𑁨. 𑀫𑀢𑁆𑀢𑀸𑀯𑀼𑀢𑁆𑀢𑀺𑀦𑀺𑀤𑁆𑀤𑁂𑀲-𑀤𑀼𑀢𑀺𑀬𑀧𑀭𑀺𑀘𑁆𑀙𑁂𑀤

𑀕𑀡𑀦𑀺𑀬𑀫

𑁧𑁭. 𑀙𑀝𑁆𑀞𑁄’𑀔𑀺𑀮𑀮𑀳𑀼,𑀚𑁄 𑀯𑀸,

𑀕𑀬𑀼𑀢𑀸’𑀜𑁆𑀜𑁂,𑀙’𑀕𑁆𑀕𑀡𑀸,𑀦 𑀚𑁄 𑀯𑀺𑀲𑀫𑁂,;

𑀅𑀭𑀺𑀬𑀸𑀬’𑀦𑁆𑀢𑀟𑁆𑀠𑁂 𑀮𑁄, 𑀙𑀝𑁆𑀞𑁄,’𑀦𑁆𑀢𑁂 𑀕𑁄,𑀕𑀡𑀸 𑀙’𑀜𑁆𑀜𑁂.

𑀬𑀢𑀺𑀦𑀺𑀬𑀫

𑁧𑁮. 𑀧𑀞𑀫𑀟𑁆𑀠𑁂 𑀙𑀝𑁆𑀞𑁄 𑀘𑁂,

𑀲𑀩𑁆𑀩𑀮𑀳𑁂,’𑀢𑁆𑀣𑀸’𑀤𑀺𑀮𑀳𑀼𑀦𑀺 𑀪𑀯𑀢𑀺𑀬𑀢𑀺;

𑀢𑀧𑁆𑀧𑀭𑀓𑁄,𑀦𑁆𑀢𑁂𑀧𑀺, 𑀲𑀘𑁂, 𑀘𑀭𑀺𑀫𑁂𑀧𑀺, 𑀪𑀯𑀢𑀺 𑀘𑀢𑀼𑀢𑁆𑀣𑁄’𑀦𑁆𑀢𑁂.

𑁧𑁯. 𑀅𑀭𑀺𑀬𑀸𑀲𑀸𑀫𑀜𑁆𑀜𑀁 𑀘𑁂, 𑀧𑀼𑀩𑁆𑀩𑁄’𑀤𑀺𑀢 𑀮𑀓𑁆𑀔𑀡𑀁 𑀪𑀯𑁂 𑀬𑀲𑁆𑀲𑀸.

𑁨𑁦. 𑀆𑀤𑀺𑀫’𑀫𑀣 𑀧𑀸𑀤𑀬𑀼𑀕𑀁, 𑀬𑀲𑁆𑀲𑀸 𑀢𑁆𑀬𑀁’𑀲𑁂𑀳𑀺 𑀲𑀸 𑀧𑀣𑁆𑀬𑀸.

𑁨𑁧. 𑀬𑀢𑁆𑀣 𑀕𑀡𑀢𑁆𑀢𑀬 𑀫𑀼𑀮𑁆𑀮𑀗𑁆𑀖𑀺,

𑀬𑁄’𑀪𑀬𑀢𑁆𑀣𑀸’𑀤𑀺𑀫𑁄 𑀪𑀯𑁂 𑀯𑀺𑀧𑀼𑀮𑀸.

𑁨𑁨. 𑀕𑀭𑀼𑀫𑀚𑁆𑀛𑀕𑁄 𑀚𑀓𑀸𑀭𑁄, 𑀘𑀢𑀼𑀢𑁆𑀣𑀓𑁄 𑀤𑀼𑀢𑀺𑀬𑀓𑁄 𑀘𑀧𑀮𑀸.

𑁨𑁩. 𑀘𑀧𑀮𑀸’𑀕𑀢𑀸’𑀔𑀺𑀮𑀁 𑀘𑁂, 𑀤𑀮𑀸’𑀤𑀺𑀫𑀁 𑀮𑀓𑁆𑀔𑀡𑀁 𑀪𑀚𑀢𑀺 𑀬𑀲𑁆𑀲𑀸;

𑀧𑀣𑁆𑀬𑀸𑀮𑀓𑁆𑀔𑀡’𑀫𑀜𑁆𑀜𑀁, 𑀫𑀼𑀔𑀘𑀧𑀮𑀸 𑀦𑀸𑀫 𑀲𑀸 𑀪𑀯𑀢𑀺.

𑁨𑁪. 𑀧𑀣𑁆𑀬𑀸𑀬 𑀮𑀓𑁆𑀔𑀡𑀁 𑀘𑁂, 𑀧𑀞𑀫𑀟𑁆𑀠𑁂 𑀮𑀓𑁆𑀔𑀡𑀁 𑀢𑀼 𑀘𑀧𑀮𑀸𑀬;

𑀤𑀼𑀢𑀺𑀬𑁂 𑀤𑀮𑁂’𑀣 𑀬𑀲𑁆𑀲𑀸, 𑀧𑀓𑀺𑀢𑁆𑀢𑀺𑀢𑀸 𑀲𑀸 𑀚𑀖𑀦𑀘𑀧𑀮𑀸.

𑀅𑀭𑀺𑀬𑀸𑀚𑀸𑀢𑀺𑀬𑁄.

𑁨𑁫. 𑀲𑀩𑁆𑀩𑀁𑀧𑀞𑀫𑀤𑀮𑁂 𑀬𑀤𑀺, 𑀮𑀓𑁆𑀔𑀡’𑀫𑀭𑀺𑀬𑀸𑀬 𑀯𑀼𑀢𑁆𑀢’𑀫𑀼𑀪𑀬𑁂𑀲𑀼;

𑀬𑀲𑁆𑀲𑀸 𑀤𑀮𑁂𑀲𑀼 𑀬𑀼𑀢𑁆𑀢𑀁,

𑀯𑀼𑀢𑁆𑀢𑀸 𑀲𑀸 𑀕𑀻𑀢𑀺 𑀯𑀼𑀢𑁆𑀢 𑀬𑀢𑀺 𑀮𑀮𑀺𑀢𑀸.

𑁨𑁬. 𑀅𑀭𑀺𑀬𑀸𑀬𑀁 𑀤𑀼𑀢𑀺𑀬’𑀟𑁆𑀠𑁂, 𑀕𑀤𑀺𑀢𑀸’𑀔𑀺𑀮𑀮𑀓𑁆𑀔𑀡𑀁 𑀬𑀁 𑀢𑀁;

𑀪𑀯𑀢𑀺 𑀤𑀮𑁂𑀲𑀼’𑀪𑀬𑁂𑀲𑀼𑀧𑀺,

𑀬𑀤𑀺 𑀬𑀲𑁆𑀲𑀸 𑀲𑀸’𑀬 𑀫𑀼𑀧𑀕𑀻𑀢𑀺.

𑁨𑁭. 𑀅𑀭𑀺𑀬𑀸𑀬’𑀟𑁆𑀠𑀤𑁆𑀯𑀺𑀢𑀬𑀁, 𑀧𑀼𑀩𑁆𑀩𑁄𑀤𑀺𑀢 𑀮𑀓𑁆𑀔𑀡𑁄’𑀧𑁂𑀢𑀁;

𑀯𑀺𑀧𑀭𑀺𑀬𑀬𑁂𑀦𑀸’𑀪𑀺𑀳𑀺𑀢𑀁,

𑀬𑀲𑁆𑀲𑀸 𑀲𑀫𑁆𑀪𑀯𑀢𑀺 𑀘𑁂’𑀳 𑀲𑁄’𑀕𑁆𑀕𑀻𑀢𑀺.

𑁨𑁮. 𑀅𑀭𑀺𑀬𑀸𑀧𑀼𑀩𑁆𑀩’𑀟𑁆𑀠𑀁 𑀬𑀤𑀺, 𑀕𑀭𑀼𑀦𑁂’𑀓𑁂𑀦𑀸’𑀥𑀺𑀓𑁂𑀦 𑀦𑀺𑀥𑀦𑁂 𑀬𑀼𑀢𑁆𑀢𑀁;

𑀬𑀤𑀺 𑀧𑀼𑀩𑁆𑀩’𑀟𑁆𑀠𑀲𑀫𑀸𑀦𑀁, 𑀤𑀮 𑀫𑀺𑀢𑀭𑀁 𑀘𑁄’𑀤𑀺𑀢𑀸’𑀬’𑀫𑀭𑀺𑀬𑀸𑀕𑀻𑀢𑀺.

𑀕𑀻𑀢𑀺𑀚𑀸𑀢𑀺𑀬𑁄.

𑁨𑁯. 𑀯𑀺𑀲𑀫𑁂 𑀙 𑀲𑀺𑀬𑀼𑀁 𑀓𑀮𑀸 𑀫𑀼𑀔𑁂,

𑀲𑀫𑁂 𑀢𑁆𑀯’𑀝𑁆𑀞, 𑀭,𑀮,𑀕𑀸, 𑀢𑀢𑁄’𑀧𑀭𑀺;

𑀯𑁂𑀢𑀸𑀮𑀻𑀬𑀁 𑀢 𑀫𑀼𑀘𑁆𑀘𑀢𑁂, 𑀮𑀳𑀼 𑀙𑀓𑁆𑀓𑀁 𑀦 𑀦𑀺𑀭𑀦𑁆𑀢𑀭𑀁 𑀲𑀫𑁂.

𑁩𑁦. 𑀯𑁂𑀢𑀸𑀮𑀻𑀬𑁄𑀧𑀫𑀁 𑀫𑀼𑀔𑁂 𑀢𑀁,

𑀑𑀧𑀘𑁆𑀙𑀦𑁆𑀤𑀲𑀓𑀁 𑀭,𑀬𑀸 𑀬’𑀤𑀦𑁆𑀢𑁂.

𑁩𑁧. 𑀆𑀧𑀸𑀢𑀮𑀺𑀓𑀸 𑀓𑀣𑀺𑀢𑀸’𑀬𑀁, 𑀪𑀕𑀕𑀸’𑀦𑁆𑀢𑁂 𑀬𑀤𑀺 𑀧𑀼𑀩𑁆𑀩𑀫𑀺𑀯’𑀜𑁆𑀜𑀁.

𑁩𑁨. 𑀬𑀤𑀸’𑀤𑀺𑀢𑁄 𑀤𑀓𑁆𑀔𑀺𑀡𑀦𑁆𑀢𑀺𑀓𑀸,

𑀞𑀺𑀢𑁂’𑀢𑁆𑀣 𑀧𑀸𑀤𑁂𑀲𑁆𑀯𑀸’𑀔𑀺𑀮𑁂𑀲𑀼 𑀚𑁄.

𑁩𑁩. ‘𑀉𑀤𑀺𑀘𑁆𑀘𑀯𑀼𑀢𑁆𑀢𑀻’𑀢𑀺 𑀯𑀼𑀘𑁆𑀘𑀢𑁂,

𑀚𑁄 𑀘𑀸’𑀤𑁄 𑀯𑀺𑀲𑀫𑁂𑀲𑀼 𑀲𑀡𑁆𑀞𑀺𑀢𑁄.

𑁩𑁪. 𑀧𑀼𑀩𑁆𑀩𑀢𑁆𑀣, 𑀲𑀫𑁂𑀲𑀼 𑀘𑁂 𑀕, 𑀚𑀸, ‘𑀧𑀘𑁆𑀘𑀯𑀼𑀢𑁆𑀢𑀺’ 𑀭𑀼𑀤𑀺𑀢𑀸’𑀢𑀺 𑀲𑀡𑁆𑀞𑀺𑀢𑀸.

𑁩𑁫. 𑀲𑀫𑀸𑀲𑀫𑀸’𑀢𑁆𑀭𑀸’𑀤𑀺𑀦𑀁 𑀲𑀫𑀸,

𑀲𑀁𑀬𑀼𑀢𑀸 𑀪𑀯𑀢𑀺 𑀢𑀁 𑀧𑀯𑀢𑁆𑀢𑀓𑀁.

𑁩𑁬. 𑀅𑀲𑁆𑀲 𑀲𑀸 𑀲𑀫 𑀓𑀢𑀸’ 𑀧𑀭𑀦𑁆𑀢𑀺𑀓𑀸.

𑁩𑁭. 𑀢𑀤’𑀜𑁆𑀜𑀚𑀸 𑀘𑀸𑀭𑀼𑀳𑀸𑀲𑀺𑀦𑀻.

𑀯𑁂𑀢𑀸𑀮𑀻𑀬𑀚𑀸𑀢𑀺𑀬𑁄.

𑁩𑁮. 𑀤𑁆𑀯𑀺𑀓 𑀯𑀺𑀳𑀢 𑀯𑀲𑀼 𑀮𑀳𑀼 𑀅𑀘𑀮𑀥𑀺𑀢𑀺 𑀭𑀺’𑀳.

𑁩𑁯. 𑀫𑀢𑁆𑀢𑀸𑀲𑀫𑀓𑀁 𑀦𑀯𑀫𑁄 𑀮𑁆𑀕’𑀦𑁆𑀢𑁂.

𑁪𑁦. 𑀚𑁄 𑀦𑁆𑀮𑀸’ 𑀣𑀯𑀸’𑀡𑁆𑀡𑀯𑀸 𑀯𑀺𑀲𑀺𑀮𑁄𑀓𑁄.

𑁪𑁧. 𑀢𑀤𑁆𑀯𑀬𑀢𑁄 𑀯𑀸𑀦𑀯𑀸𑀲𑀺𑀓𑀸’𑀔𑁆𑀬𑀸.

𑁪𑁨. 𑀧𑀜𑁆𑀘,𑀝𑁆𑀞,𑀦𑀯𑀲𑀼 𑀬𑀤𑀺 𑀮𑁄 𑀘𑀺𑀢𑁆𑀭𑀸.

𑁪𑁩. 𑀕,𑀮𑁆𑀬𑀸’𑀝𑁆𑀞𑀳𑀺 𑀘𑁂’𑀲𑀸 𑀯𑀼’𑀧𑀘𑀺𑀢𑁆𑀭𑀸.

𑁪𑁪. 𑀬’𑀫𑀢𑀻𑀢 𑀮𑀓𑁆𑀔𑀡 𑀯𑀺𑀲𑁂𑀲 𑀬𑀼𑀢𑀁, (𑀘𑀺𑀢𑁆𑀭𑀸)

𑀫𑀢𑁆𑀢𑀸 𑀲𑀫𑀸’𑀤𑀺 𑀧𑀸𑀤𑀸’𑀪𑀺𑀳𑀺𑀢𑀁; (𑀯𑀺𑀲𑀺𑀮𑁄𑀓)

𑀅𑀦𑀺𑀬𑀢 𑀯𑀼𑀢𑁆𑀢 𑀧𑀭𑀺𑀫𑀸𑀡 𑀲𑀳𑀺𑀢𑀁, (𑀯𑀸𑀦𑀯𑀸𑀲𑀺𑀓𑀸)

𑀧𑀣𑀺𑀢𑀁 𑀚𑀦𑁂𑀲𑀼 𑀧𑀸𑀤𑀸𑀓𑀼𑀮𑀓𑀁. (𑀯𑀺𑀲𑀺𑀮𑁄𑀓)

𑀫𑀢𑁆𑀢𑀸𑀲𑀫𑀓 𑀚𑀸𑀢𑀺𑀬𑁄.

𑁪𑁫. 𑀯𑀺𑀦𑀸 𑀯𑀡𑁆𑀡𑁂𑀳𑀺 𑀫𑀢𑁆𑀢𑀸 𑀕𑀸, 𑀯𑀺𑀦𑀸 𑀯𑀡𑁆𑀡𑀸 𑀕𑀭𑀽𑀳𑀺 𑀢𑀼;

𑀯𑀺𑀦𑀸 𑀮𑀳𑀽𑀳𑀺 𑀕𑀭𑀯𑁄, 𑀤𑀮𑁂 𑀧𑀣𑁆𑀬𑀸𑀤𑀺𑀦𑁄 𑀫𑀢𑀸.

𑀇𑀢𑀺 𑀯𑀼𑀢𑁆𑀢𑁄𑀤𑀬𑁂 𑀙𑀦𑁆𑀤𑀲𑀺 𑀫𑀢𑁆𑀢𑀸𑀯𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.