𑁯. 𑀩𑁆𑀭𑀳𑁆𑀫𑀯𑀺𑀳𑀸𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀫𑁂𑀢𑁆𑀢𑀸𑀪𑀸𑀯𑀦𑀸𑀓𑀣𑀸𑀯𑀡𑁆𑀡𑀦𑀸

𑁨𑁪𑁦. 𑀫𑁂𑀢𑁆𑀢𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀁. 𑀪𑀸𑀯𑁂𑀢𑀼𑀓𑀸𑀫𑁂𑀦𑀸𑀢𑀺 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀔𑀦𑀺𑀲𑀺𑀦𑁆𑀦𑁂𑀦𑀸𑀢𑀺 𑀯𑀺𑀲𑀫𑀁 𑀅𑀦𑀺𑀲𑀻𑀤𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂𑀦 𑀲𑀼𑀔𑀦𑀺𑀲𑀺𑀦𑁆𑀦𑁂𑀦.

𑀓𑀲𑁆𑀫𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀓𑀸𑀭𑀡𑀧𑀼𑀘𑁆𑀙𑀸, 𑀅𑀜𑁆𑀜𑀁 𑀅𑀥𑀺𑀕𑀦𑁆𑀢𑀼𑀓𑀸𑀫𑁂𑀦 𑀅𑀜𑁆𑀜𑀢𑁆𑀣 𑀆𑀤𑀻𑀦𑀯𑀸𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀺𑀫𑀢𑁆𑀣𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑁂𑀢𑁆𑀢𑀸 𑀦𑀸𑀫 𑀅𑀢𑁆𑀣𑀢𑁄 𑀅𑀤𑁄𑀲𑁄. 𑀢𑀣𑀸 𑀳𑀺 𑀅𑀤𑁄𑀲𑀦𑀺𑀤𑁆𑀤𑁂𑀲𑁂 ‘‘𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢’’𑀦𑁆𑀢𑀺 (𑀥. 𑀲. 𑁧𑁦𑁬𑁨) 𑀦𑀺𑀤𑁆𑀤𑀺𑀝𑁆𑀞𑀁. 𑀔𑀦𑁆𑀢𑀻𑀢𑀺 𑀘 𑀇𑀥 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀧𑀦 𑀅𑀢𑁆𑀣𑀢𑁄 𑀅𑀤𑁄𑀲𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸𑀢𑀺 𑀫𑁂𑀢𑁆𑀢𑀸𑀬 𑀲𑀺𑀚𑁆𑀛𑀫𑀸𑀦𑀸𑀬 𑀢𑀺𑀢𑀺𑀓𑁆𑀔𑀸𑀔𑀦𑁆𑀢𑀺 𑀲𑀺𑀤𑁆𑀥𑀸 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀔𑀦𑁆𑀢𑀺 𑀅𑀥𑀺𑀕𑀦𑁆𑀢𑀩𑁆𑀩𑀸’’𑀢𑀺. 𑀢𑁂𑀦 𑀔𑀦𑁆𑀢𑀺𑀬𑀁 𑀆𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀸 𑀲𑀢𑁆𑀣𑀺𑀓𑀸𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀪𑀺𑀪𑀽𑀢𑁄 𑀧𑀭𑀺𑀬𑀼𑀝𑁆𑀞𑀸𑀦𑁂𑀦. 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀸𑀮𑀸𑀪𑁂𑀦. 𑀆𑀤𑀻𑀦𑀯𑁄 𑀤𑀝𑁆𑀞𑀩𑁆𑀩𑁄 𑀧𑀸𑀡𑀖𑀸𑀢𑀸𑀤𑀺𑀯𑀲𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀤𑀺𑀅𑀦𑀢𑁆𑀣𑀫𑀽𑀮𑀪𑀸𑀯𑀢𑁄.

𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄𑀢𑀺 𑀧𑀭𑀸𑀧𑀓𑀸𑀭𑀲𑀳𑀦𑀸𑀤𑀺𑀓𑀸 𑀢𑀺𑀢𑀺𑀓𑁆𑀔𑀮𑀓𑁆𑀔𑀡𑀸 𑀔𑀦𑁆𑀢𑀺 𑀉𑀢𑁆𑀢𑀫𑀁 𑀢𑀧𑁄 𑀅𑀓𑀢𑁆𑀢𑀩𑁆𑀩𑀸𑀓𑀭𑀡𑀓𑀢𑁆𑀢𑀩𑁆𑀩𑀓𑀭𑀡𑀮𑀓𑁆𑀔𑀡𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀫𑀽𑀮𑀪𑀸𑀯𑀢𑁄. 𑀔𑀦𑁆𑀢𑀺𑀩𑀮𑀁 𑀩𑀮𑀸𑀦𑀻𑀓𑀦𑁆𑀢𑀺 𑀧𑀭𑀫𑀁 𑀫𑀗𑁆𑀕𑀮𑀪𑀽𑀢𑀸 𑀔𑀦𑁆𑀢𑀺 𑀏𑀯 𑀩𑀮𑀁 𑀏𑀢𑀲𑁆𑀲𑀸𑀢𑀺 𑀔𑀦𑁆𑀢𑀺𑀩𑀮𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀔𑀦𑁆𑀢𑀺𑀩𑀮𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺. 𑀤𑁄𑀲𑀸𑀤𑀺𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀲𑀫𑀢𑁆𑀣𑀢𑀸𑀬 𑀅𑀦𑀻𑀓𑀪𑀽𑀢𑁂𑀦 𑀢𑁂𑀦𑁂𑀯 𑀘 𑀔𑀦𑁆𑀢𑀺𑀩𑀮𑁂𑀦 𑀩𑀮𑀸𑀦𑀻𑀓𑀁. 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀦𑀢𑁆𑀣𑀧𑀝𑀺𑀩𑀸𑀳𑀦𑁄, 𑀅𑀢𑁆𑀣𑀸𑀯𑀳𑁄 𑀘 𑀔𑀦𑁆𑀢𑀺𑀢𑁄 𑀉𑀢𑁆𑀢𑀭𑀺 𑀅𑀧𑀲𑁆𑀲𑀬𑁄 𑀦𑀢𑁆𑀣𑀺.

𑀯𑀺𑀯𑁂𑀘𑀦𑀢𑁆𑀣𑀸𑀬𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀢𑁆𑀣𑀸𑀬. 𑀔𑀦𑁆𑀢𑀺𑀬𑀸 𑀲𑀁𑀬𑁄𑀚𑀦𑀢𑁆𑀣𑀸𑀬 𑀅𑀢𑁆𑀢𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀸𑀯𑀦𑀁 𑀤𑀽𑀲𑁂𑀦𑁆𑀢𑀻𑀢𑀺 𑀤𑁄𑀲𑀸, 𑀧𑀼𑀕𑁆𑀕𑀮𑀸𑀬𑁂𑀯 𑀤𑁄𑀲𑀸 𑀧𑀼𑀕𑁆𑀕𑀮𑀤𑁄𑀲𑀸. 𑀬𑁂𑀲𑀼 𑀪𑀸𑀯𑀦𑀸 𑀦 𑀲𑀫𑁆𑀧𑀚𑁆𑀚𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀯𑀺𑀧𑀚𑁆𑀚𑀢𑁂𑀯, 𑀢𑁂 𑀏𑀯 𑀯𑀼𑀢𑁆𑀢𑀸. 𑀧𑀞𑀫𑀦𑁆𑀢𑀺 𑀯𑀓𑁆𑀔𑀫𑀸𑀦𑁂𑀦 𑀓𑁄𑀝𑁆𑀞𑀸𑀲𑀢𑁄 𑀓𑁄𑀝𑁆𑀞𑀸𑀲𑀦𑁆𑀢𑀭𑀼𑀧𑀲𑀁𑀳𑀭𑀡𑀦𑀬𑁂𑀦 𑀯𑀺𑀦𑀸 𑀲𑀩𑁆𑀩𑀧𑀞𑀫𑀁.

𑀧𑀺𑀬𑀸𑀬𑀺𑀢𑀩𑁆𑀩𑁄 𑀧𑀺𑀬𑁄, 𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀧𑁆𑀧𑀺𑀬𑁄. 𑀲𑁄 𑀲𑀗𑁆𑀔𑁂𑀧𑀢𑁄 𑀤𑀼𑀯𑀺𑀥𑁄 𑀅𑀢𑁆𑀣𑀲𑁆𑀲 𑀅𑀓𑀸𑀭𑀓𑁄, 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄𑀢𑀺. 𑀢𑀢𑁆𑀣 𑀬𑁄 𑀅𑀢𑁆𑀢𑀦𑁄, 𑀧𑀺𑀬𑀲𑁆𑀲 𑀘 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄, 𑀲𑁄 𑀯𑁂𑀭𑀺𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄. 𑀬𑁄 𑀧𑀦 𑀅𑀢𑁆𑀢𑀦𑁄, 𑀧𑀺𑀬𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀅𑀓𑀸𑀭𑀓𑁄, 𑀅𑀧𑁆𑀧𑀺𑀬𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀓𑀸𑀭𑀓𑁄, ‘‘𑀅𑀢𑁆𑀣𑀁 𑀫𑁂 𑀦𑀸𑀘𑀭𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁩𑁭), ‘‘𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀻’’𑀢𑀺𑀆𑀤𑀺𑀦𑀸 𑀘 𑀆𑀖𑀸𑀢𑀯𑀢𑁆𑀣𑀼𑀪𑀽𑀢𑁄, 𑀲𑁄 𑀅𑀧𑁆𑀧𑀺𑀬𑁄, 𑀅𑀦𑀦𑀼𑀓𑀽𑀮𑀯𑀼𑀢𑁆𑀢𑀺𑀓𑁄 𑀅𑀦𑀺𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀮𑀺𑀗𑁆𑀕𑀯𑀺𑀲𑀪𑀸𑀕𑁂𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀦𑀸 𑀮𑀺𑀗𑁆𑀕𑁂𑀦 𑀯𑀺𑀲𑀤𑀺𑀲𑁂. 𑀑𑀥𑀺𑀲𑁄𑀢𑀺 𑀪𑀸𑀕𑀲𑁄. ‘‘𑀢𑀺𑀲𑁆𑀲 𑀤𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀑𑀥𑀺𑀲𑀓𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀙𑀲𑀼 𑀧𑀼𑀕𑁆𑀕𑀮𑁂𑀲𑀼 𑀅𑀪𑀸𑀯𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀺𑀬𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀺𑀬𑀁 𑀳𑀺 𑀧𑀺𑀬𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑁄 𑀓𑀺𑀮𑀫𑀢𑀻𑀢𑀺 𑀤𑁄𑀲𑁂𑀦 𑀪𑀸𑀯𑀦𑀸𑀬 𑀲𑀧𑀭𑀺𑀲𑁆𑀲𑀬𑀢𑀫𑀸𑀳. 𑀅𑀧𑁆𑀧𑀺𑀬𑀢𑀸 𑀳𑀺 𑀧𑀺𑀬𑀪𑀸𑀯𑀲𑁆𑀲 𑀉𑀚𑀼𑀧𑀝𑀺𑀧𑀓𑁆𑀔𑀸, 𑀦 𑀘 𑀢𑀲𑁆𑀲 𑀧𑀺𑀬𑀝𑁆𑀞𑀸𑀦𑁂 𑀞𑀧𑀦𑁂𑀦 𑀯𑀺𑀦𑀸 𑀪𑀸𑀯𑀦𑀸 𑀲𑀺𑀚𑁆𑀛𑀢𑀺. 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑀁 𑀫𑀚𑁆𑀛𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑁄 𑀓𑀺𑀮𑀫𑀢𑀻𑀢𑀺 𑀭𑀸𑀕𑁂𑀦 𑀪𑀸𑀯𑀦𑀸𑀬 𑀲𑀧𑀭𑀺𑀲𑁆𑀲𑀬𑀢𑀫𑀸𑀳 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀲𑁆𑀲 𑀕𑁂𑀳𑀲𑁆𑀲𑀺𑀢𑀧𑁂𑀫𑀝𑁆𑀞𑀸𑀦𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀅𑀧𑁆𑀧𑀫𑀢𑁆𑀢𑀓𑁂𑀧𑀻’’𑀢𑀺𑀆𑀤𑀺. 𑀫𑀚𑁆𑀛𑀢𑁆𑀢𑀁 𑀇𑀝𑁆𑀞𑀸𑀦𑀺𑀝𑁆𑀞𑀢𑀸𑀳𑀺 𑀫𑀚𑁆𑀛𑀲𑀪𑀸𑀯𑀁 𑀦𑁂𑀯 𑀧𑀺𑀬𑀁 𑀦𑀸𑀧𑁆𑀧𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀕𑀭𑀼𑀝𑁆𑀞𑀸𑀦𑁂 𑀧𑀺𑀬𑀝𑁆𑀞𑀸𑀦𑁂 𑀘 𑀞𑀧𑁂𑀦𑁆𑀢𑁄 𑀓𑀺𑀮𑀫𑀢𑀺 𑀫𑀚𑁆𑀛𑀢𑁆𑀢𑁂 𑀲𑀫𑁆𑀪𑀸𑀯𑀦𑀻𑀬𑀧𑀺𑀬𑀸𑀬𑀺𑀢𑀩𑁆𑀩𑀢𑀸𑀦𑀁 𑀅𑀪𑀸𑀯𑀸. 𑀦 𑀳𑀺 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁂 𑀪𑀸𑀯𑀦𑀻𑀬𑀢𑀸, 𑀫𑀦𑀸𑀧𑀢𑀸 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀧𑀺𑀬𑀕𑀭𑀼𑀪𑀸𑀯𑀲𑀫𑁆𑀧𑀦𑁆𑀦𑁂 𑀘 𑀧𑀞𑀫𑀁 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸. 𑀓𑁄𑀥𑁄 𑀉𑀧𑁆𑀧𑀚𑁆𑀚𑀢𑀺 𑀓𑁄𑀝𑁆𑀞𑀸𑀲𑀦𑁆𑀢𑀭𑀪𑀸𑀯𑀸𑀦𑀼𑀧𑀦𑀬𑀦𑀢𑁄.

𑀢𑀫𑁂𑀯𑀸𑀢𑀺 𑀯𑀺𑀲𑀪𑀸𑀕𑀮𑀺𑀗𑁆𑀕𑀫𑁂𑀯. 𑀮𑀺𑀗𑁆𑀕𑀲𑀪𑀸𑀕𑁂𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀧𑀺𑀬𑀧𑀼𑀕𑁆𑀕𑀮𑁂’’𑀢𑀺 𑀆𑀳. 𑀪𑀺𑀢𑁆𑀢𑀺𑀬𑀼𑀤𑁆𑀥𑀫𑀓𑀸𑀲𑀻𑀢𑀺 𑀲𑀻𑀮𑀁 𑀅𑀥𑀺𑀝𑁆𑀞𑀸𑀬 𑀧𑀺𑀳𑀺𑀢𑀤𑁆𑀯𑀸𑀭𑁂 𑀕𑀩𑁆𑀪𑁂 𑀲𑀬𑀦𑀧𑀻𑀞𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑁄 𑀫𑁂𑀢𑁆𑀢𑀸𑀫𑀼𑀔𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁂𑀦 𑀅𑀦𑁆𑀥𑀻𑀓𑀢𑁄 𑀪𑀭𑀺𑀬𑀸𑀬 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀤𑁆𑀯𑀸𑀭𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀪𑀺𑀢𑁆𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸𑀧𑀺 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑀢𑀸𑀬 𑀪𑀺𑀢𑁆𑀢𑀺𑀁 𑀧𑀳𑀭𑀺. 𑀢𑁂𑀦𑀸𑀳 ‘‘𑀫𑁂𑀢𑁆𑀢𑀸𑀬𑀦𑀸𑀫𑀼𑀔𑁂𑀦 𑀭𑀸𑀕𑁄 𑀯𑀜𑁆𑀘𑁂𑀢𑀻’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁧), ‘‘𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀭𑀸𑀕𑁄 𑀲𑀳𑀢𑁂 𑀦𑀭’’𑀦𑁆𑀢𑀺 𑀘.

𑀆𑀤𑀸𑀦𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑁂 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑁂 𑀥𑀭𑀫𑀸𑀦𑀢𑀸𑀬 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀉𑀧𑀮𑀩𑁆𑀪𑀫𑀸𑀦𑁂 𑀔𑀦𑁆𑀥𑀧𑁆𑀧𑀩𑀦𑁆𑀥𑁂 𑀇𑀥 𑀲𑀢𑁆𑀢𑀸𑀤𑀺𑀕𑁆𑀕𑀳𑀡𑀁, 𑀦 𑀢𑀺𑀬𑀤𑁆𑀥𑀕𑀢𑁂𑀢𑀺 𑀆𑀳 ‘‘𑀓𑀸𑀮𑀓𑀢𑁂 𑀧𑀦𑀸’’𑀢𑀺𑀆𑀤𑀺. 𑀓𑀲𑁆𑀫𑀸 𑀧𑀦 𑀓𑀸𑀮𑀓𑀢𑁂 𑀫𑁂𑀢𑁆𑀢𑀸𑀪𑀸𑀯𑀦𑀸 𑀦 𑀇𑀚𑁆𑀛𑀢𑀻𑀢𑀺? 𑀫𑁂𑀢𑁆𑀢𑀸𑀩𑁆𑀬𑀸𑀧𑀸𑀭𑀲𑁆𑀲 𑀅𑀬𑁄𑀕𑁆𑀬𑀝𑁆𑀞𑀸𑀦𑀪𑀸𑀯𑀢𑁄. 𑀦 𑀳𑀺 𑀫𑀢𑀧𑀼𑀕𑁆𑀕𑀮𑁄 𑀳𑀺𑀢𑀽𑀧𑀲𑀁𑀳𑀸𑀭𑀸𑀭𑀳𑁄. 𑀬𑀢𑁆𑀣 𑀲𑀢𑀺 𑀲𑀫𑁆𑀪𑀯𑁂 𑀧𑀬𑁄𑀕𑀢𑁄 𑀳𑀺𑀢𑀽𑀧𑀲𑀁𑀳𑀸𑀭𑁄 𑀮𑀩𑁆𑀪𑁂𑀬𑁆𑀬, 𑀢𑀢𑁆𑀣𑁂𑀯 𑀫𑀸𑀦𑀲𑁄 𑀳𑀺𑀢𑀽𑀧𑀲𑀁𑀳𑀸𑀭𑁄 𑀬𑀼𑀚𑁆𑀚𑁂𑀬𑁆𑀬. 𑀤𑀼𑀓𑁆𑀔𑀸𑀧𑀦𑀬𑀦𑀫𑁄𑀤𑀧𑁆𑀧𑀯𑀢𑁆𑀢𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀓𑀭𑀼𑀡𑀸𑀪𑀸𑀯𑀦𑀸𑀤𑀻𑀦𑀫𑁆𑀧𑀺 𑀓𑀸𑀮𑀓𑀢𑁂 𑀅𑀦𑀺𑀚𑁆𑀛𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀢𑁆𑀣 𑀧𑀕𑀼𑀡𑀫𑁂𑀢𑁆𑀢𑀸𑀛𑀸𑀦𑁄 𑀆𑀘𑀭𑀺𑀬𑀲𑁆𑀲 𑀓𑀸𑀮𑀓𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀢𑀁 𑀫𑁂𑀢𑁆𑀢𑀸𑀬 𑀨𑀭𑀺𑀢𑀼𑀓𑀸𑀫𑁄 ‘‘𑀆𑀘𑀭𑀺𑀬𑀁 𑀆𑀭𑀩𑁆𑀪 𑀫𑁂𑀢𑁆𑀢𑀁 𑀆𑀭𑀪𑀢𑀻’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀧𑀕𑀼𑀡𑀸𑀯 𑀫𑁂 𑀫𑁂𑀢𑁆𑀢𑀸𑀛𑀸𑀦𑀲𑀫𑀸𑀧𑀢𑁆𑀢𑀻’’𑀢𑀺. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀭𑀫𑁆𑀫𑀡𑀁. 𑀕𑀯𑁂𑀲𑀸𑀳𑀻𑀢𑀺 ‘‘𑀬𑀁 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲𑀫𑁂𑀢𑁆𑀢𑀁 𑀆𑀭𑀪𑀲𑀺, 𑀲𑁄 𑀚𑀻𑀯𑀢𑀺 𑀦 𑀚𑀻𑀯𑀢𑀻’’𑀢𑀺 𑀚𑀸𑀦𑀸𑀳𑀻𑀢𑀺 𑀅𑀢𑁆𑀣𑁄. 𑀫𑁂𑀢𑁆𑀢𑀸𑀬𑀦𑁆𑀢𑁄𑀢𑀺 𑀫𑁂𑀢𑁆𑀢𑀁 𑀓𑀭𑁄𑀦𑁆𑀢𑁄, 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑁄𑀢𑀺 𑀅𑀢𑁆𑀣𑁄.

𑁨𑁪𑁧. 𑀅𑀢𑁆𑀢𑀦𑀺 𑀪𑀸𑀯𑀦𑀸 𑀦𑀸𑀫 𑀲𑀓𑁆𑀔𑀺𑀪𑀸𑀯𑀢𑁆𑀣𑀸𑀢𑀺 𑀦𑀸𑀦𑀸𑀯𑀺𑀥𑀲𑀼𑀔𑀸𑀦𑀼𑀩𑀦𑁆𑀥𑀅𑀦𑀯𑀚𑁆𑀚𑀲𑀼𑀔𑀅𑀩𑁆𑀬𑀸𑀲𑁂𑀓𑀲𑀼𑀔𑀸𑀤𑀺 𑀬𑀁 𑀅𑀢𑁆𑀢𑀦𑀺 𑀉𑀧𑀮𑀩𑁆𑀪𑀢𑀺, 𑀢𑀁 𑀦𑀺𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀲 𑀯𑀢𑁆𑀢𑀫𑀸𑀦𑀢𑀸𑀬 𑀆𑀳 ‘‘𑀅𑀳𑀁 𑀲𑀼𑀔𑀺𑀢𑁄 𑀳𑁄𑀫𑀻’’𑀢𑀺. 𑀲𑀭𑀻𑀭𑀲𑀼𑀔𑀁 𑀦𑀸𑀫 𑀅𑀦𑁂𑀓𑀦𑁆𑀢𑀺𑀓𑀁, 𑀈𑀤𑀺𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑁄𑀓𑀸𑀲𑀁 𑀘𑀺𑀢𑁆𑀢𑀤𑀼𑀓𑁆𑀔𑀦𑁆𑀢𑀺 𑀢𑀤𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀦𑀺𑀤𑁆𑀤𑀼𑀓𑁆𑀔𑁄𑀢𑀺 𑀯𑀸’’𑀢𑀺. 𑀳𑁄𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀅𑀯𑁂𑀭𑁄𑀢𑀺𑀆𑀤𑀻𑀲𑀼, 𑀯𑀺𑀲𑁂𑀲𑀢𑁄 𑀘 𑀤𑀼𑀓𑁆𑀔𑀸𑀪𑀸𑀯𑁂 𑀲𑀼𑀔𑀲𑀜𑁆𑀜𑀸. 𑀲𑀸 𑀧𑀦𑀸𑀬𑀁 𑀦𑀺𑀤𑁆𑀤𑀼𑀓𑁆𑀔𑀢𑀸 𑀯𑁂𑀭𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑁂𑀭𑀲𑀜𑁆𑀜𑀺𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀅𑀪𑀸𑀯𑀢𑁄, 𑀯𑀺𑀲𑁂𑀲𑀢𑁄 𑀩𑁆𑀬𑀸𑀧𑀸𑀤𑀯𑀺𑀭𑀳𑀢𑁄 𑀈𑀖𑀲𑀜𑁆𑀜𑀺𑀢𑀸𑀬 𑀈𑀢𑀺𑀬𑀸 𑀅𑀪𑀸𑀯𑀢𑁄, 𑀅𑀦𑀯𑀚𑁆𑀚𑀓𑀸𑀬𑀺𑀓𑀲𑀼𑀔𑀲𑀫𑀗𑁆𑀕𑀺𑀢𑀸𑀬 𑀘 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑁂𑀭𑁄 𑀅𑀩𑁆𑀬𑀸𑀧𑀚𑁆𑀚𑁄 𑀅𑀦𑀻𑀖𑁄 𑀲𑀼𑀔𑀻’’𑀢𑀺. 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀸𑀫𑀻𑀢𑀺 𑀏𑀯𑀁𑀪𑀽𑀢𑁄 𑀳𑀼𑀢𑁆𑀯𑀸 𑀫𑀫 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀫𑀺, 𑀬𑀸𑀧𑁂𑀫𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀲𑀦𑁆𑀢𑁂 𑀬𑀁 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁, 𑀢𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀲𑀢𑀺, 𑀬𑀤𑀺 𑀅𑀢𑁆𑀢𑀦𑀺𑀧𑀺 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. ‘‘𑀬𑀁 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀯𑀺𑀪𑀗𑁆𑀕𑀤𑁂𑀲𑀦𑀸𑀬 𑀲𑀫𑀸𑀦𑀕𑀢𑀺𑀓𑀁 𑀲𑀼𑀢𑁆𑀢𑀧𑀤𑀁 𑀆𑀳𑀭𑀦𑁆𑀢𑁄 ‘‘𑀓𑀣𑀜𑁆𑀘 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺.

𑀢𑀦𑁆𑀢𑀺 𑀯𑀺𑀪𑀗𑁆𑀕𑀸𑀤𑀻𑀲𑀼 𑀯𑀘𑀦𑀁. 𑀅𑀧𑁆𑀧𑀦𑀸𑀯𑀲𑁂𑀦𑀸𑀢𑀺 𑀅𑀧𑁆𑀧𑀦𑀸𑀯𑀳𑀪𑀸𑀯𑀦𑀸𑀯𑀲𑁂𑀦. 𑀇𑀤𑀦𑁆𑀢𑀺 ‘‘𑀅𑀳𑀁 𑀲𑀼𑀔𑀺𑀢𑁄 𑀳𑁄𑀫𑀻’’𑀢𑀺𑀆𑀤𑀺𑀯𑀘𑀦𑀁. 𑀲𑀓𑁆𑀔𑀺𑀪𑀸𑀯𑀯𑀲𑁂𑀦𑀸𑀢𑀺 𑀅𑀳𑀁 𑀯𑀺𑀬 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀲𑀼𑀔𑀓𑀸𑀫𑀸, 𑀢𑀲𑁆𑀫𑀸 𑀢𑁂𑀲𑀼 𑀫𑀬𑀸 𑀅𑀢𑁆𑀢𑀦𑀺 𑀯𑀺𑀬 𑀲𑀼𑀔𑀽𑀧𑀲𑀁𑀳𑀸𑀭𑁄 𑀓𑀸𑀢𑀩𑁆𑀩𑁄𑀢𑀺 𑀏𑀯𑀁 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀲𑀓𑁆𑀔𑀺𑀪𑀸𑀯𑁂 𑀞𑀧𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀲𑀘𑁂𑀧𑀺 𑀳𑀻’’𑀢𑀺𑀆𑀤𑀺. 𑀓𑀲𑁆𑀫𑀸 𑀧𑀦 𑀅𑀢𑁆𑀢𑀦𑀺 𑀪𑀸𑀯𑀦𑀸 𑀅𑀧𑁆𑀧𑀦𑀸𑀯𑀳𑀸 𑀦 𑀳𑁄𑀢𑀻𑀢𑀺? 𑀅𑀢𑁆𑀢𑀲𑀺𑀦𑁂𑀳𑀯𑀲𑁂𑀦 𑀲𑀧𑀭𑀺𑀲𑁆𑀲𑀬𑀪𑀸𑀯𑀢𑁄. 𑀓𑁄𑀝𑁆𑀞𑀸𑀲𑀦𑁆𑀢𑀭𑁂 𑀧𑀦 𑀪𑀸𑀯𑀺𑀢𑀪𑀸𑀯𑀦𑀲𑁆𑀲 𑀢𑀢𑁆𑀣𑀸𑀧𑀺 𑀲𑀻𑀫𑀲𑀫𑁆𑀪𑁂𑀤𑁄 𑀳𑁄𑀢𑀺𑀬𑁂𑀯.

𑀲𑀩𑁆𑀩𑀸 𑀤𑀺𑀲𑀸𑀢𑀺 𑀅𑀦𑀯𑀲𑁂𑀲𑀸 𑀤𑀲𑀧𑀺 𑀤𑀺𑀲𑀸. 𑀅𑀦𑀼𑀧𑀭𑀺𑀕𑀫𑁆𑀫 𑀘𑁂𑀢𑀲𑀸𑀢𑀺 𑀘𑀺𑀢𑁆𑀢𑁂𑀦 𑀧𑀭𑀺𑀬𑁂𑀲𑀦𑀯𑀲𑁂𑀦 𑀅𑀦𑀼𑀕𑀦𑁆𑀢𑁆𑀯𑀸. 𑀦𑁂𑀯𑀚𑁆𑀛𑀕𑀸 𑀧𑀺𑀬𑀢𑀭𑀫𑀢𑁆𑀢𑀦𑀸 𑀓𑁆𑀯𑀘𑀻𑀢𑀺 𑀲𑀩𑁆𑀩𑀼𑀲𑁆𑀲𑀸𑀳𑁂𑀦 𑀧𑀭𑀺𑀬𑁂𑀲𑀦𑁆𑀢𑁄 𑀅𑀢𑀺𑀲𑀬𑁂𑀦 𑀅𑀢𑁆𑀢𑀢𑁄 𑀧𑀺𑀬𑀢𑀭𑀁 𑀅𑀜𑁆𑀜𑀁 𑀲𑀢𑁆𑀢𑀁 𑀓𑀢𑁆𑀣𑀘𑀺 𑀤𑀺𑀲𑀸𑀬 𑀦𑁂𑀯 𑀅𑀥𑀺𑀕𑀘𑁆𑀙𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀁 𑀧𑀺𑀬𑁄 𑀧𑀼𑀣𑀼 𑀅𑀢𑁆𑀢𑀸 𑀧𑀭𑁂𑀲𑀦𑁆𑀢𑀺 𑀏𑀯𑀁 𑀓𑀲𑁆𑀲𑀘𑀺 𑀅𑀢𑁆𑀢𑀢𑁄 𑀧𑀺𑀬𑀢𑀭𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀯𑀲𑁂𑀦 𑀧𑀼𑀣𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀸 𑀧𑀺𑀬𑁄. 𑀢𑀲𑁆𑀫𑀸 𑀢𑁂𑀦 𑀓𑀸𑀭𑀡𑁂𑀦, 𑀅𑀢𑁆𑀢𑀓𑀸𑀫𑁄 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑁄, 𑀧𑀭𑀁 𑀲𑀢𑁆𑀢𑀁 𑀅𑀦𑁆𑀢𑀫𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀫𑁆𑀧𑀺, 𑀦 𑀳𑀺𑀁𑀲𑁂 𑀦 𑀳𑀦𑁂𑀬𑁆𑀬, 𑀦 𑀯𑀺𑀳𑁂𑀞𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀅𑀬𑀁 𑀦𑀬𑁄𑀢𑀺 𑀲𑀩𑁆𑀩𑁂𑀳𑀺 𑀲𑀢𑁆𑀢𑁂𑀳𑀺, 𑀅𑀢𑁆𑀢𑀦𑁄 𑀘 𑀧𑀺𑀬𑀢𑀭𑀪𑀸𑀯𑀁 𑀦𑀺𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀼 𑀓𑀭𑀼𑀡𑀸𑀬𑀦𑀁 𑀯𑀤𑀢𑀸 𑀪𑀕𑀯𑀢𑀸 𑀲𑀼𑀔𑁂𑀲𑀺𑀢𑀸𑀬 ‘‘𑀅𑀢𑁆𑀢𑀸𑀦𑀁 𑀲𑀓𑁆𑀔𑀺𑀪𑀸𑀯𑁂 𑀞𑀧𑁂𑀢𑁆𑀯𑀸 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀦𑀬𑀤𑀲𑁆𑀲𑀦𑀁 𑀓𑀢𑀫𑁂𑀯𑀸𑀢𑀺 𑀅𑀢𑁆𑀣𑁄.

𑁨𑁪𑁨. 𑀲𑀼𑀔𑀧𑀯𑀢𑁆𑀢𑀦𑀢𑁆𑀣𑀦𑁆𑀢𑀺 𑀲𑀼𑀔𑁂𑀦 𑀅𑀓𑀺𑀘𑁆𑀙𑁂𑀦 𑀫𑁂𑀢𑁆𑀢𑀸𑀬 𑀧𑀯𑀢𑁆𑀢𑀦𑀢𑁆𑀣𑀁. 𑀬𑁆𑀯𑀸𑀲𑁆𑀲𑀸𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀅𑀲𑁆𑀲 𑀬𑁄𑀕𑀺𑀦𑁄. 𑀧𑀺𑀬𑁄𑀢𑀺 𑀇𑀝𑁆𑀞𑁄. 𑀫𑀦𑀸𑀧𑁄𑀢𑀺 𑀫𑀦𑀯𑀟𑁆𑀠𑀦𑀓𑁄. 𑀕𑀭𑀽𑀢𑀺 𑀕𑀼𑀡𑀯𑀺𑀲𑁂𑀲𑀯𑀲𑁂𑀦 𑀕𑀭𑀼𑀓𑀸𑀢𑀩𑁆𑀩𑁄. 𑀪𑀸𑀯𑀦𑀻𑀬𑁄𑀢𑀺 𑀲𑀫𑁆𑀪𑀸𑀯𑁂𑀢𑀩𑁆𑀩𑁄. 𑀆𑀘𑀭𑀺𑀬𑀫𑀢𑁆𑀢𑁄𑀢𑀺 𑀲𑀻𑀮𑀸𑀤𑀺𑀦𑀸 𑀆𑀘𑀭𑀺𑀬𑀧𑁆𑀧𑀫𑀸𑀡𑁄. 𑀧𑀺𑀬𑀯𑀘𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀢𑁆𑀣𑀘𑀭𑀺𑀬𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀻𑀮𑀲𑀼𑀢𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀤𑁆𑀥𑀸𑀤𑀺𑀓𑁂, 𑀥𑀼𑀢𑀥𑀫𑁆𑀫𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀸𑀤𑀺𑀓𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺.

𑀓𑀸𑀫𑀦𑁆𑀢𑀺 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀭𑀺𑀢𑀸𑀲𑀼𑀔𑀲𑀺𑀤𑁆𑀥𑀺𑀤𑀻𑀧𑀦𑁄𑀬𑀁 𑀦𑀺𑀧𑀸𑀢𑁄. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 𑁋 𑀢𑀸𑀤𑀺𑀲𑀁 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲 𑀪𑀸𑀯𑀦𑀁 𑀆𑀭𑀪𑀦𑁆𑀢𑁄 𑀬𑁄𑀕𑀻 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀭𑀻, 𑀲𑀼𑀔𑁂𑀦 𑀘𑀲𑁆𑀲 𑀢𑀢𑁆𑀣 𑀪𑀸𑀯𑀦𑀸 𑀇𑀚𑁆𑀛𑀢𑀺, 𑀢𑁂𑀦 𑀧𑀦 𑀬𑁄𑀕𑀺𑀦𑀸 𑀢𑀸𑀯𑀢𑀸 𑀲𑀦𑁆𑀢𑁄𑀲𑁄 𑀦 𑀓𑀸𑀢𑀩𑁆𑀩𑁄𑀢𑀺. 𑀢𑁂𑀦𑀸𑀳 ‘‘𑀅𑀧𑁆𑀧𑀦𑀸 𑀲𑀫𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺. 𑀲𑀻𑀫𑀸𑀲𑀫𑁆𑀪𑁂𑀤𑀦𑁆𑀢𑀺 𑀫𑀭𑀺𑀬𑀸𑀤𑀸𑀧𑀦𑀬𑀦𑀁, 𑀅𑀢𑁆𑀢𑀸 𑀧𑀺𑀬𑁄 𑀫𑀚𑁆𑀛𑀢𑁆𑀢𑁄 𑀯𑁂𑀭𑀻𑀢𑀺 𑀯𑀺𑀪𑀸𑀕𑀸𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀦𑀦𑁆𑀢𑀭𑀦𑁆𑀢𑀺 𑀢𑀢𑁄 𑀧𑀺𑀬𑀫𑀦𑀸𑀧𑀕𑀭𑀼𑀪𑀸𑀯𑀦𑀻𑀬𑀢𑁄, 𑀢𑀢𑁆𑀣 𑀯𑀸 𑀫𑁂𑀢𑁆𑀢𑀸𑀥𑀺𑀕𑀫𑀢𑁄 𑀅𑀦𑀦𑁆𑀢𑀭𑀁. 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑁂 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀕𑀭𑀼𑀝𑁆𑀞𑀸𑀦𑀻𑀬𑁂 𑀧𑀝𑀺𑀮𑀤𑁆𑀥𑀁 𑀫𑁂𑀢𑁆𑀢𑀸𑀫𑀦𑀲𑀺𑀓𑀸𑀭𑀁 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑁂 𑀉𑀧𑀲𑀁𑀳𑀭𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀔𑀽𑀧𑀲𑀁𑀳𑀸𑀭𑀓𑀢𑀲𑁆𑀲 𑀢𑀁 𑀳𑁄𑀢𑀺 𑀧𑀕𑁂𑀯 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸. 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑀢𑁄 𑀅𑀦𑀦𑁆𑀢𑀭𑀁 𑀫𑀚𑁆𑀛𑀢𑁆𑀢𑁂 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 𑀫𑀚𑁆𑀛𑀢𑁆𑀢𑀁 𑀧𑀺𑀬𑀕𑀭𑀼𑀝𑁆𑀞𑀸𑀦𑁂 𑀞𑀧𑁂𑀢𑀼𑀁 𑀲𑀼𑀓𑀭𑀪𑀸𑀯𑀢𑁄. ‘‘𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑀢𑁄’’𑀢𑀺 𑀘 𑀇𑀤𑀁 𑀧𑀼𑀭𑀺𑀫𑀸𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀕𑀼𑀡𑀫𑀦𑀲𑀺𑀓𑀸𑀭𑀸𑀥𑀺𑀕𑀫𑀢𑁄 𑀧𑀝𑁆𑀞𑀸𑀬 𑀳𑀺𑀲𑁆𑀲 𑀲𑁄𑀧𑀺 𑀧𑀺𑀬𑀝𑁆𑀞𑀸𑀦𑁂 𑀏𑀯 𑀢𑀺𑀝𑁆𑀞𑀢𑀺. 𑀫𑀚𑁆𑀛𑀢𑁆𑀢𑀢𑁄 𑀯𑁂𑀭𑀻𑀧𑀼𑀕𑁆𑀕𑀮𑁂𑀢𑀺 𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑁂 𑀫𑁂𑀢𑁆𑀢𑀸𑀬𑀦𑁆𑀢𑁂𑀦 𑀢𑀢𑁆𑀣 𑀧𑀕𑀼𑀡𑀫𑀦𑀲𑀺𑀓𑀸𑀭𑀸𑀥𑀺𑀕𑀫𑁂𑀦 𑀧𑀺𑀬𑀪𑀸𑀯𑀁 𑀉𑀧𑀲𑀁𑀳𑀭𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀯𑁂𑀭𑀻𑀧𑀼𑀕𑁆𑀕𑀮𑀁 𑀪𑀸𑀯𑀦𑀸𑀬 𑀫𑀚𑁆𑀛𑀢𑁆𑀢𑁂 𑀞𑀧𑁂𑀢𑁆𑀯𑀸 𑀢𑀢𑁄 𑀫𑀚𑁆𑀛𑀢𑁆𑀢𑀢𑁄 𑀧𑀺𑀬𑀪𑀸𑀯𑀽𑀧𑀲𑀁𑀳𑀸𑀭𑁂𑀦 𑀯𑁂𑀭𑀻𑀧𑀼𑀕𑁆𑀕𑀮𑁂 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸. ‘‘𑀯𑁂𑀭𑀻𑀧𑀼𑀕𑁆𑀕𑀮𑁂’’𑀢𑀺 𑀘 𑀇𑀤𑀁 𑀧𑀼𑀭𑀺𑀫𑀸𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀓𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀫𑀼𑀤𑀼𑀁 𑀓𑀫𑁆𑀫𑀦𑀺𑀬𑀁 𑀘𑀺𑀢𑁆𑀢𑀁 𑀓𑀢𑁆𑀯𑀸𑀢𑀺 𑀧𑀺𑀬𑀕𑀭𑀼𑀝𑁆𑀞𑀸𑀦𑀻𑀬𑁄, 𑀅𑀢𑀺𑀧𑁆𑀧𑀺𑀬𑁄, 𑀫𑀚𑁆𑀛𑀢𑁆𑀢𑁄, 𑀯𑁂𑀭𑀻𑀢𑀺 𑀘𑀢𑀽𑀲𑀼 𑀧𑀼𑀕𑁆𑀕𑀮𑀓𑁄𑀝𑁆𑀞𑀸𑀲𑁂𑀲𑀼 𑀧𑀞𑀫𑀁 𑀢𑀸𑀯 𑀧𑀺𑀬𑀕𑀭𑀼𑀝𑁆𑀞𑀸𑀦𑀻𑀬𑁂 𑀫𑁂𑀢𑁆𑀢𑀸𑀪𑀸𑀯𑀦𑀁 𑀅𑀥𑀺𑀕𑀦𑁆𑀢𑁆𑀯𑀸 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀢𑀣𑀸𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀓𑁄𑀝𑁆𑀞𑀸𑀲𑀦𑁆𑀢𑀭𑀽𑀧𑀲𑀁𑀳𑀸𑀭𑀢𑁆𑀣𑀁 𑀫𑀼𑀤𑀼𑀁 𑀓𑀫𑁆𑀫𑀦𑀺𑀬𑀁 𑀓𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑁂 𑀅𑀢𑀺𑀧𑁆𑀧𑀺𑀬𑀪𑀸𑀯𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀧𑀺𑀬𑀪𑀸𑀯𑀫𑀢𑁆𑀢𑁂 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁂𑀦 𑀪𑀸𑀯𑀦𑀸 𑀉𑀧𑀲𑀁𑀳𑀭𑀺𑀢𑀩𑁆𑀩𑀸, 𑀢𑀫𑁆𑀧𑀺 𑀯𑀲𑀻𑀪𑀸𑀯𑀸𑀧𑀸𑀤𑀦𑁂𑀦 𑀫𑀼𑀤𑀼𑀁 𑀓𑀫𑁆𑀫𑀦𑀺𑀬𑀁 𑀓𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀫𑀚𑁆𑀛𑀢𑁆𑀢𑁂 𑀉𑀤𑀸𑀲𑀺𑀦𑀪𑀸𑀯𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀧𑀺𑀬𑀪𑀸𑀯𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀪𑀸𑀯𑀦𑀸 𑀉𑀧𑀲𑀁𑀳𑀭𑀺𑀢𑀩𑁆𑀩𑀸, 𑀧𑀼𑀦 𑀢𑀫𑁆𑀧𑀺 𑀯𑀲𑀻𑀪𑀸𑀯𑀸𑀧𑀸𑀤𑀦𑁂𑀦 𑀫𑀼𑀤𑀼𑀁 𑀓𑀫𑁆𑀫𑀦𑀺𑀬𑀁 𑀓𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀯𑁂𑀭𑀺𑀫𑁆𑀳𑀺 𑀯𑁂𑀭𑀻𑀲𑀜𑁆𑀜𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀫𑀚𑁆𑀛𑀢𑁆𑀢𑀪𑀸𑀯𑀽𑀧𑀝𑁆𑀞𑀧𑀦𑀫𑀼𑀔𑁂𑀦 𑀧𑀺𑀬𑀪𑀸𑀯𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀦 𑀪𑀸𑀯𑀦𑀸 𑀉𑀧𑀲𑀁𑀳𑀭𑀺𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀤𑀦𑀦𑁆𑀢𑀭𑁂 𑀢𑀤𑀦𑀦𑁆𑀢𑀭𑁂 𑀉𑀧𑀲𑀁𑀳𑀭𑀺𑀢𑀩𑁆𑀩’’𑀦𑁆𑀢𑀺, 𑀛𑀸𑀦𑀘𑀺𑀢𑁆𑀢𑀁 𑀉𑀧𑀦𑁂𑀢𑀩𑁆𑀩𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀯𑁂𑀭𑀻𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀺 𑀓𑀫𑁆𑀫𑀩𑀮𑁂𑀦 𑀯𑀸 𑀏𑀢𑀭𑀳𑀺 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀯𑀸 𑀲𑀩𑁆𑀩𑀲𑁄 𑀅𑀦𑀢𑁆𑀣𑀓𑀭𑀲𑁆𑀲 𑀅𑀪𑀸𑀯𑀢𑁄. 𑀫𑀳𑀸𑀧𑀼𑀭𑀺𑀲𑀚𑀸𑀢𑀺𑀓𑀢𑁆𑀢𑀸𑀢𑀺 𑀫𑀳𑀸𑀧𑀼𑀭𑀺𑀲𑀲𑀪𑀸𑀯𑀢𑁆𑀢𑀸 𑀘𑀺𑀭𑀓𑀸𑀮𑀧𑀭𑀺𑀘𑀬𑀲𑀫𑀺𑀤𑁆𑀥𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀢𑀸𑀬 𑀉𑀴𑀸𑀭𑀚𑁆𑀛𑀸𑀲𑀬𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑁄 𑀳𑀺 𑀲𑀩𑁆𑀩𑀲𑀳𑁄 𑀧𑀭𑀸𑀧𑀭𑀸𑀥𑀁 𑀢𑀺𑀡𑀸𑀬𑀧𑀺 𑀦 𑀫𑀜𑁆𑀜𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀢𑁆𑀣𑀁 𑀓𑀭𑁄𑀦𑁆𑀢𑁂𑀧𑀺 𑀧𑀭𑁂 𑀯𑁂𑀭𑀻𑀲𑀜𑁆𑀜𑀸𑀯 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑁂𑀦𑀸𑀢𑀺 𑀢𑁂𑀦 𑀬𑁄𑀕𑀺𑀦𑀸. 𑀅𑀢𑁆𑀣𑀺 𑀯𑁂𑀭𑀻𑀧𑀼𑀕𑁆𑀕𑀮𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁪𑁩. 𑀧𑀼𑀭𑀺𑀫𑀧𑀼𑀕𑁆𑀕𑀮𑁂𑀲𑀽𑀢𑀺 𑀧𑀺𑀬𑀸𑀤𑀻𑀲𑀼 𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑁂𑀲𑀼 𑀧𑀼𑀭𑀺𑀫𑁂𑀲𑀼 𑀧𑀼𑀕𑁆𑀕𑀮𑁂𑀲𑀼. 𑀫𑁂𑀢𑁆𑀢𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀢𑀺 𑀧𑀝𑀺𑀖𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀁 𑀫𑁂𑀢𑁆𑀢𑀸𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸. 𑀫𑁂𑀢𑁆𑀢𑀸𑀬𑀦𑁆𑀢𑁂𑀦 𑀧𑀝𑀺𑀖𑀁 𑀧𑀝𑀺𑀯𑀺𑀦𑁄𑀤𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀓𑁂𑀘𑀺 𑀧𑀦 ‘‘𑀉𑀧𑀘𑀸𑀭𑀚𑁆𑀛𑀸𑀦𑀁 𑀲𑀫𑁆𑀧𑀸𑀤𑁂𑀢𑁆𑀯𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑁂𑀲𑀁 𑀉𑀧𑀘𑀸𑀭𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀦𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀁 𑀲𑀺𑀬𑀸 ‘‘𑀯𑀼𑀝𑁆𑀞𑀳𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀧𑀼𑀩𑁆𑀩𑁂 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀲𑀢𑀺𑀬𑀸 𑀅𑀫𑀦𑀲𑀺𑀓𑀸𑀭𑁂𑀦 𑀧𑀝𑀺𑀖𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀲𑀸𑀥𑀸𑀭𑀡𑀢𑁄 𑀢𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀦𑀁, 𑀲𑀫𑀸𑀧𑀚𑁆𑀚𑀦𑀜𑁆𑀘 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀧𑀦 𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀧𑀺 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲𑀧𑀺 𑀬𑀣𑀸 𑀧𑀝𑀺𑀖𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁 ‘‘𑀢𑀁 𑀧𑀼𑀕𑁆𑀕𑀮𑀁 𑀫𑁂𑀢𑁆𑀢𑀸𑀬𑀦𑁆𑀢𑁂𑀦 𑀧𑀝𑀺𑀖𑀁 𑀯𑀺𑀦𑁄𑀤𑁂𑀢𑀩𑁆𑀩’’𑀦𑁆𑀢𑀺. 𑀫𑁂𑀢𑁆𑀢𑀸𑀬𑀦𑀫𑁂𑀯 𑀳𑀺 𑀇𑀥 𑀧𑀝𑀺𑀖𑀯𑀺𑀦𑁄𑀤𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀦 𑀦𑀺𑀩𑁆𑀩𑀸𑀢𑀻𑀢𑀺 𑀦 𑀯𑀽𑀧𑀲𑀫𑁆𑀫𑀢𑀺.

𑀅𑀦𑀼𑀲𑀸𑀭𑀢𑁄𑀢𑀺 𑀅𑀦𑀼𑀕𑀫𑀦𑀢𑁄, 𑀧𑀘𑁆𑀘𑀯𑁂𑀓𑁆𑀔𑀡𑀢𑁄𑀢𑀺 𑀅𑀢𑁆𑀣𑁄. 𑀖𑀝𑀺𑀢𑀩𑁆𑀩𑀦𑁆𑀢𑀺 𑀯𑀸𑀬𑀫𑀺𑀢𑀩𑁆𑀩𑀁.

𑀢𑀜𑁆𑀘 𑀔𑁄 𑀖𑀝𑀦𑀁 𑀯𑀸𑀬𑀫𑀦𑀁. 𑀇𑀫𑀺𑀦𑀸 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑁂𑀦 𑀆𑀓𑀸𑀭𑁂𑀦.

𑀉𑀪𑀢𑁄 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀤𑀡𑁆𑀟𑁄 𑀏𑀢𑀲𑁆𑀲𑀸𑀢𑀺 𑀉𑀪𑀢𑁄𑀤𑀡𑁆𑀟𑀓𑀁, 𑀢𑁂𑀦. 𑀑𑀘𑀭𑀓𑀸 𑀮𑀸𑀫𑀓𑀸𑀘𑀸𑀭𑀸 𑀧𑀸𑀧𑀧𑀼𑀭𑀺𑀲𑀸. 𑀢𑀢𑁆𑀭𑀸𑀧𑀻𑀢𑀺 𑀢𑁂𑀲𑀼𑀧𑀺 𑀅𑀗𑁆𑀕𑀫𑀗𑁆𑀕𑀸𑀦𑀺 𑀑𑀓𑁆𑀓𑀦𑁆𑀢𑁂𑀲𑀼𑀧𑀺. 𑀢𑁂𑀦𑀸𑀢𑀺 𑀫𑀦𑁄𑀧𑀤𑁄𑀲𑁂𑀦. 𑀦 𑀲𑀸𑀲𑀦𑀓𑀭𑁄. 𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁 𑀳𑀺 𑀲𑀸𑀲𑀦𑀁. 𑀢𑀲𑁆𑀲𑁂𑀯𑀸𑀢𑀺 𑀢𑀢𑁄𑀧𑀺. 𑀦𑀺𑀲𑁆𑀲𑀓𑁆𑀓𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁, 𑀲𑀫𑀼𑀘𑁆𑀘𑀬𑁂 𑀘 𑀏𑀯-𑀲𑀤𑁆𑀤𑁄, 𑀧𑀞𑀫𑀁 𑀓𑀼𑀤𑁆𑀥𑀧𑀼𑀭𑀺𑀲𑀢𑁄𑀧𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀓𑀼𑀚𑁆𑀛𑀦𑁂𑀦. 𑀧𑀸𑀧𑀺𑀬𑁄𑀢𑀺 𑀧𑀸𑀧𑀢𑀭𑁄. 𑀲𑀸𑀭𑀫𑁆𑀪𑀸𑀤𑀺𑀓𑀲𑁆𑀲 𑀓𑀺𑀮𑁂𑀲𑀸𑀦𑀼𑀩𑀦𑁆𑀥𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄 𑀓𑁄𑀥𑀲𑁆𑀲 𑀲𑀸𑀯𑀚𑁆𑀚𑀢𑀁 𑀜𑀢𑁆𑀯𑀸𑀧𑀺 𑀓𑀼𑀚𑁆𑀛𑀦𑀢𑁄 𑀲𑀘𑁂 𑀓𑁄𑀥𑁂 𑀅𑀦𑀯𑀚𑁆𑀚𑀲𑀜𑁆𑀜𑀻 𑀓𑀼𑀤𑁆𑀥𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦 𑀧𑀝𑀺𑀓𑀼𑀚𑁆𑀛𑁂𑀬𑁆𑀬𑀸𑀢𑀺 𑀓𑁂𑀘𑀺. 𑀉𑀪𑀺𑀦𑁆𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘𑀸’’𑀢𑀺. 𑀅𑀣 𑀯𑀸 𑀉𑀪𑀺𑀦𑁆𑀦𑀦𑁆𑀢𑀺 𑀉𑀪𑀬𑁂𑀲𑀁 𑀮𑁄𑀓𑀸𑀦𑀁, 𑀇𑀥𑀮𑁄𑀓𑀧𑀭𑀮𑁄𑀓𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀲𑀧𑀢𑁆𑀢𑀓𑀦𑁆𑀢𑀸𑀢𑀺 𑀧𑀝𑀺𑀲𑀢𑁆𑀢𑀽𑀳𑀺 𑀇𑀘𑁆𑀙𑀺𑀢𑀸. 𑀲𑀧𑀢𑁆𑀢𑀓𑀭𑀡𑀸𑀢𑀺 𑀢𑁂𑀳𑀺 𑀓𑀸𑀢𑀩𑁆𑀩𑀸. 𑀓𑁄𑀥𑀦𑀦𑁆𑀢𑀺 𑀓𑀼𑀚𑁆𑀛𑀦𑀲𑀻𑀮𑀁. 𑀓𑁄𑀥𑀦𑀸𑀬𑀦𑁆𑀢𑀺 𑀓𑁄𑀥𑀦𑁄 𑀅𑀬𑀁, 𑀅𑀬𑀦𑁆𑀢𑀺 𑀘 𑀦𑀺𑀧𑀸𑀢𑀫𑀢𑁆𑀢𑀁. 𑀓𑁄𑀥𑀧𑀭𑁂𑀢𑁄𑀢𑀺 𑀓𑁄𑀥𑁂𑀦 𑀅𑀦𑀼𑀕𑀢𑁄, 𑀧𑀭𑀸𑀪𑀺𑀪𑀽𑀢𑁄 𑀯𑀸. 𑀤𑀼𑀩𑁆𑀩𑀡𑁆𑀡𑁄𑀯 𑀳𑁄𑀢𑀻𑀢𑀺 𑀧𑀓𑀢𑀺𑀬𑀸 𑀯𑀡𑁆𑀡𑀯𑀸𑀧𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄𑀧𑀺 𑀫𑀼𑀔𑀯𑀺𑀓𑀸𑀭𑀸𑀤𑀺𑀯𑀲𑁂𑀦 𑀯𑀺𑀭𑀽𑀧𑁄 𑀏𑀯 𑀳𑁄𑀢𑀺 𑀏𑀢𑀭𑀳𑀺, 𑀆𑀬𑀢𑀺𑀁 𑀘𑀸𑀢𑀺. 𑀓𑁄𑀥𑀸𑀪𑀺𑀪𑀯𑀲𑁆𑀲 𑀏𑀓𑀦𑁆𑀢𑀺𑀓𑀫𑀺𑀤𑀁 𑀨𑀮𑀦𑁆𑀢𑀺 𑀤𑀻𑀧𑁂𑀢𑀼𑀁 ‘‘𑀤𑀼𑀩𑁆𑀩𑀡𑁆𑀡𑁄 𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀓𑀢𑁆𑀯𑀸 𑀧𑀼𑀦 ‘‘𑀓𑁄𑀥𑀸𑀪𑀺𑀪𑀽𑀢𑁄’’𑀢𑀺 𑀯𑀼𑀢𑁆𑀢𑀁. 𑀦 𑀧𑀘𑀼𑀭𑀢𑁆𑀣𑁄𑀢𑀺 𑀦 𑀧𑀳𑀽𑀢𑀥𑀦𑁄. 𑀦 𑀪𑁄𑀕𑀯𑀸𑀢𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀢𑁆𑀣𑀼𑀭𑀳𑀺𑀢𑁄. 𑀦 𑀬𑀲𑀯𑀸𑀢𑀺 𑀦 𑀓𑀺𑀢𑁆𑀢𑀺𑀫𑀸.

𑀙𑀯𑀸𑀮𑀸𑀢𑀦𑁆𑀢𑀺 𑀙𑀯𑀤𑀳𑀦𑀸𑀮𑀸𑀢𑀁, 𑀘𑀺𑀢𑀓𑀸𑀬𑀁 𑀲𑀦𑁆𑀢𑀚𑁆𑀚𑀦𑀼𑀫𑁆𑀫𑀼𑀓𑁆𑀓𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀉𑀪𑀢𑁄𑀧𑀤𑀺𑀢𑁆𑀢𑀦𑁆𑀢𑀺 𑀉𑀪𑁄𑀲𑀼 𑀓𑁄𑀝𑀻𑀲𑀼 𑀤𑀟𑁆𑀠𑀁. 𑀫𑀚𑁆𑀛𑁂 𑀕𑀽𑀣𑀕𑀢𑀦𑁆𑀢𑀺 𑀯𑁂𑀫𑀚𑁆𑀛𑀝𑁆𑀞𑀸𑀦𑁂 𑀲𑀼𑀦𑀔𑀲𑁆𑀲 𑀯𑀸 𑀲𑀺𑀗𑁆𑀕𑀸𑀮𑀲𑁆𑀲 𑀯𑀸 𑀉𑀳𑀤𑁂𑀦 𑀕𑀽𑀣𑁂𑀦 𑀫𑀓𑁆𑀔𑀺𑀢𑀁. 𑀓𑀝𑁆𑀞𑀢𑁆𑀣𑀦𑁆𑀢𑀺 𑀤𑀸𑀭𑀼𑀓𑀺𑀘𑁆𑀘𑀁. 𑀦𑁂𑀯 𑀨𑀭𑀢𑀺 𑀦 𑀲𑀸𑀥𑁂𑀢𑀺. 𑀢𑀣𑀽𑀧𑀫𑀸𑀳𑀦𑁆𑀢𑀺 𑀢𑀣𑀽𑀧𑀫𑀁 𑀢𑀸𑀤𑀺𑀲𑀁 𑀅𑀳𑀁. 𑀇𑀫𑀦𑁆𑀢𑀺 ‘‘𑀲𑁄 𑀘 𑀳𑁄𑀢𑀺 𑀅𑀪𑀺𑀚𑁆𑀛𑀸𑀮𑀽’’𑀢𑀺𑀆𑀤𑀺𑀦𑀸 (𑀇𑀢𑀺𑀯𑀼. 𑁯𑁨) 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀯𑀤𑀢𑀺, 𑀢𑀲𑁆𑀫𑀸 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑀢𑀸𑀤𑀺𑀦𑀸 𑀲𑀻𑀮𑀭𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥 𑀧𑀦 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀁 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑀢𑀸𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀲𑁄 𑀤𑀸𑀦𑀺 𑀢𑁆𑀯𑀦𑁆𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀅𑀢𑁆𑀢𑀦𑁄 𑀑𑀯𑀤𑀦𑀸𑀓𑀸𑀭𑀤𑀲𑁆𑀲𑀦𑀁.

𑁨𑁪𑁪. 𑀬𑁄 𑀬𑁄 𑀥𑀫𑁆𑀫𑁄𑀢𑀺 𑀓𑀸𑀬𑀲𑀫𑀸𑀘𑀸𑀭𑀸𑀤𑀻𑀲𑀼 𑀬𑁄 𑀬𑁄 𑀲𑀼𑀘𑀭𑀺𑀢𑀥𑀫𑁆𑀫𑁄. 𑀯𑀽𑀧𑀲𑀦𑁆𑀢𑁄𑀢𑀺 𑀲𑀁𑀬𑀢𑁄. 𑀧𑀭𑀺𑀲𑀼𑀤𑁆𑀥𑁄𑀢𑀺 𑀓𑀺𑀮𑁂𑀲𑀫𑀮𑀯𑀺𑀕𑀫𑁂𑀦 𑀯𑀺𑀲𑀼𑀤𑁆𑀥𑁄. 𑀓𑀺𑀮𑁂𑀲𑀤𑀸𑀳𑀸𑀪𑀸𑀯𑁂𑀦 𑀯𑀸 𑀉𑀧𑀲𑀦𑁆𑀢𑁄, 𑀅𑀦𑀯𑀚𑁆𑀚𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁄, 𑀓𑀸𑀬𑀲𑀫𑀸𑀘𑀸𑀭𑀲𑁆𑀲𑁂𑀯 𑀉𑀧𑀲𑀫𑁄 𑀘𑀺𑀭𑀓𑀸𑀮𑀁 𑀲𑀁𑀬𑀢𑀓𑀸𑀬𑀓𑀫𑁆𑀫𑀢𑀸𑀬 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀢𑁂𑀢𑀺 𑀯𑀘𑀻𑀫𑀦𑁄𑀲𑀫𑀸𑀘𑀸𑀭𑁂.

𑀲𑁄𑀢𑀺 𑀉𑀧𑀲𑀦𑁆𑀢𑀯𑀘𑀻𑀲𑀫𑀸𑀘𑀸𑀭𑁄 𑀧𑀼𑀕𑁆𑀕𑀮𑁄. 𑀧𑀝𑀺𑀲𑀦𑁆𑀣𑀸𑀭𑀓𑀼𑀲𑀮𑁄𑀢𑀺 𑀬𑀣𑀸 𑀧𑀭𑁂𑀳𑀺 𑀙𑀺𑀤𑁆𑀤𑀁 𑀦 𑀳𑁄𑀢𑀺, 𑀏𑀯𑀁 𑀧𑀝𑀺𑀲𑀦𑁆𑀣𑀭𑀡𑁂 𑀓𑀼𑀲𑀮𑁄. 𑀲𑀔𑀺𑀮𑁄𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀲𑀗𑁆𑀔𑀸𑀢𑁂𑀦 𑀲𑀔𑀺𑀮𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀼𑀔𑀲𑀫𑁆𑀪𑀸𑀲𑁄𑀢𑀺 𑀧𑀺𑀬𑀓𑀣𑁄. 𑀲𑀫𑁆𑀫𑁄𑀤𑀓𑁄𑀢𑀺 𑀲𑀫𑁆𑀫𑁄𑀤𑀦𑀻𑀬𑀓𑀣𑀸𑀬 𑀲𑀫𑁆𑀫𑁄𑀤𑀦𑀲𑀻𑀮𑁄. 𑀉𑀢𑁆𑀢𑀸𑀦𑀫𑀼𑀔𑁄𑀢𑀺 𑀯𑀺𑀓𑀼𑀡𑀺𑀢𑀫𑀼𑀔𑁄 𑀅𑀳𑀼𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀲𑁂𑀦 𑀯𑀺𑀓𑀲𑀺𑀢𑀫𑀼𑀔𑁄. 𑀧𑀼𑀩𑁆𑀩𑀪𑀸𑀲𑀻𑀢𑀺 𑀬𑁂𑀦 𑀓𑁂𑀦𑀘𑀺 𑀲𑀫𑀸𑀕𑀢𑁄 𑀧𑀝𑀺𑀲𑀦𑁆𑀣𑀸𑀭𑀯𑀲𑁂𑀦 𑀧𑀞𑀫𑀁𑀬𑁂𑀯 𑀆𑀪𑀸𑀲𑀦𑀲𑀻𑀮𑁄. 𑀫𑀥𑀼𑀭𑁂𑀦 𑀲𑀭𑁂𑀦 𑀥𑀫𑁆𑀫𑀁 𑀑𑀲𑀸𑀭𑁂𑀢𑀺 𑀲𑀭𑀪𑀜𑁆𑀜𑀯𑀲𑁂𑀦. 𑀲𑀭𑀪𑀸𑀡𑀁 𑀧𑀦 𑀓𑀭𑁄𑀦𑁆𑀢𑁄 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀭𑀺𑀧𑀼𑀡𑁆𑀡𑁂𑀳𑀺 𑀧𑀤𑁂𑀳𑀺 𑀘 𑀩𑁆𑀬𑀜𑁆𑀚𑀦𑁂𑀳𑀺 𑀘 𑀅𑀩𑁆𑀬𑀸𑀓𑀼𑀮𑁂𑀳𑀺 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺.

𑀲𑀩𑁆𑀩𑀚𑀦𑀲𑁆𑀲 𑀧𑀸𑀓𑀝𑁄 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀬𑁄 𑀳𑀻’’𑀢𑀺𑀆𑀤𑀺. 𑀑𑀓𑀧𑁆𑀧𑁂𑀢𑁆𑀯𑀸𑀢𑀺 𑀲𑀤𑁆𑀤𑀳𑀺𑀢𑁆𑀯𑀸. 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀳𑀺 𑀲𑀤𑁆𑀥𑀸. 𑀑𑀳𑀺𑀢𑀲𑁄𑀢𑁄𑀢𑀺 𑀅𑀯𑀳𑀺𑀢𑀲𑁄𑀢𑁄, 𑀲𑀼𑀲𑁆𑀲𑀼𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀺𑀁𑀓𑀢𑁆𑀯𑀸 𑀅𑀢𑁆𑀣𑀁 𑀓𑀢𑁆𑀯𑀸, 𑀅𑀢𑁆𑀣𑀺𑀓𑁄 𑀯𑀸 𑀳𑀼𑀢𑁆𑀯𑀸.

‘‘𑀏𑀓𑁄𑀧𑀺 𑀦 𑀯𑀽𑀧𑀲𑀦𑁆𑀢𑁄 𑀳𑁄𑀢𑀻’’𑀢𑀺 𑀧𑀸𑀞𑁄, 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀦𑀺𑀭𑀬𑀢𑁄 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑁄 𑀩𑀳𑀼𑀓𑀸𑀮𑀁 𑀢𑀢𑁆𑀣𑁂𑀯 𑀲𑀁𑀲𑀭𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀫𑀳𑀸𑀦𑀺𑀭𑀬𑀲𑁄𑀴𑀲𑀉𑀲𑁆𑀲𑀤𑀦𑀺𑀭𑀬𑀧𑀭𑀺𑀧𑀽𑀭𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀜𑁆𑀚𑀻𑀯𑀸𑀤𑀬𑁄 𑀅𑀝𑁆𑀞 𑀫𑀳𑀸𑀦𑀺𑀭𑀬𑀸. 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀲𑁆𑀲 𑀤𑁆𑀯𑀸𑀭𑁂 𑀤𑁆𑀯𑀸𑀭𑁂 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸𑀤𑀬𑁄 𑀲𑁄𑀴𑀲 𑀉𑀲𑁆𑀲𑀤𑀦𑀺𑀭𑀬𑀸. 𑀓𑀸𑀭𑀼𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑀩𑁆𑀩𑀁 𑀫𑀳𑀸𑀤𑀼𑀓𑁆𑀔𑀪𑀸𑀕𑀺𑀪𑀸𑀯𑀢𑁄. 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀯𑀺𑀳𑁂𑀲𑀸𑀪𑀽𑀢𑀸 𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸 𑀉𑀧𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀧𑀝𑀺𑀖𑁄 𑀅𑀦𑁄𑀓𑀸𑀲𑁄𑀯𑀸𑀢𑀺 𑀆𑀳 ‘‘𑀓𑀸𑀭𑀼𑀜𑁆𑀜𑀫𑁆𑀧𑀺 𑀧𑀝𑀺𑀘𑁆𑀘 𑀆𑀖𑀸𑀢𑁄 𑀯𑀽𑀧𑀲𑀫𑁆𑀫𑀢𑀻’’𑀢𑀺.

𑀇𑀫𑀲𑁆𑀲 𑀘 𑀅𑀢𑁆𑀣𑀲𑁆𑀲𑀸𑀢𑀺 ‘‘𑀬𑁄 𑀬𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲.

𑁨𑁪𑁫. 𑀬𑀁 𑀯𑁂𑀭𑀻 𑀤𑀼𑀓𑁆𑀔𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀢𑀲𑁆𑀲 𑀯𑀲𑁂𑀦 ‘‘𑀅𑀢𑁆𑀢𑀦𑁄 𑀯𑀺𑀲𑀬𑁂’’𑀢𑀺 𑀯𑀼𑀢𑁆𑀢𑁄 𑀪𑀺𑀓𑁆𑀔𑀼𑀦𑁄 𑀓𑀸𑀬𑁄. 𑀓𑀺𑀦𑁆𑀢𑀺 𑀓𑀺𑀁 𑀓𑀸𑀭𑀡𑀁. 𑀢𑀲𑁆𑀲𑀸𑀢𑀺 𑀯𑁂𑀭𑀺𑀦𑁄. 𑀅𑀯𑀺𑀲𑀬𑁂𑀢𑀺 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀕𑁄𑀘𑀭𑁂. 𑀲𑀘𑀺𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂. 𑀫𑀳𑀸𑀦𑀢𑁆𑀣𑀓𑀭𑀦𑁆𑀢𑀺 𑀇𑀥𑀮𑁄𑀓𑀢𑁆𑀣𑀧𑀭𑀮𑁄𑀓𑀢𑁆𑀣𑀧𑀭𑀫𑀢𑁆𑀣𑀸𑀦𑀁 𑀯𑀺𑀭𑀸𑀥𑀦𑀯𑀲𑁂𑀦 𑀫𑀳𑀢𑁄 𑀯𑀺𑀧𑀼𑀮𑀲𑁆𑀲, 𑀦𑀸𑀦𑀸𑀯𑀺𑀥𑀲𑁆𑀲 𑀘 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀲𑁆𑀲 𑀅𑀦𑀢𑁆𑀣𑀲𑁆𑀲 𑀓𑀸𑀭𑀡𑀁. 𑀫𑀽𑀮𑀦𑀺𑀓𑀦𑁆𑀢𑀦𑀦𑁆𑀢𑀺 𑀲𑀻𑀮𑀲𑁆𑀲 𑀫𑀽𑀮𑀸𑀦𑀺 𑀦𑀸𑀫 𑀳𑀺𑀭𑁄𑀢𑁆𑀢𑀧𑁆𑀧𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸, 𑀢𑁂𑀲𑀁 𑀙𑀺𑀦𑁆𑀤𑀦𑀁. 𑀓𑁄𑀥𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀻𑀦𑀺 𑀉𑀘𑁆𑀙𑀺𑀦𑁆𑀤𑀢𑀺. 𑀚𑀴𑁄𑀢𑀺 𑀅𑀦𑁆𑀥𑀩𑀸𑀮𑁄.

𑀅𑀦𑀭𑀺𑀬𑀁 𑀓𑀫𑁆𑀫𑀦𑁆𑀢𑀺 𑀯𑁂𑀭𑀺𑀦𑀸 𑀓𑀢𑀫𑀳𑀸𑀧𑀭𑀸𑀥𑀫𑀸𑀳. 𑀬𑁄 𑀲𑀬𑀦𑁆𑀢𑀺 𑀬𑁄 𑀢𑁆𑀯𑀁 𑀲𑀬𑀫𑁆𑀧𑀺. 𑀤𑁄𑀲𑁂𑀢𑀼𑀓𑀸𑀫𑁄𑀢𑀺 𑀓𑁄𑀥𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄. 𑀬𑀤𑀺 𑀓𑀭𑀺 𑀬𑀤𑀺 𑀅𑀓𑀸𑀲𑀺. 𑀤𑁄𑀲𑀼𑀧𑁆𑀧𑀸𑀤𑁂𑀦𑀸𑀢𑀺 𑀤𑁄𑀲𑀲𑁆𑀲 𑀉𑀧𑁆𑀧𑀸𑀤𑀦𑁂𑀦. 𑀤𑀼𑀓𑁆𑀔𑀁 𑀢𑀲𑁆𑀲 𑀘 𑀦𑀸𑀫𑀸𑀢𑀺 𑀤𑀼𑀓𑁆𑀔𑀜𑁆𑀘 𑀦𑀸𑀫 𑀢𑀲𑁆𑀲 𑀅𑀧𑀭𑀸𑀥𑀓𑀲𑁆𑀲. 𑀦𑀸𑀫𑀸𑀢𑀺 𑀅𑀲𑀫𑁆𑀪𑀸𑀯𑀦𑁂 𑀦𑀺𑀧𑀸𑀢𑁄, 𑀢𑁂𑀦 𑀢𑀲𑁆𑀲 𑀓𑀸𑀭𑀡𑀁 𑀅𑀦𑁂𑀓𑀦𑁆𑀢𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀓𑀸𑀳𑀲𑀺 𑀯𑀸 𑀦 𑀯𑀸’’𑀢𑀺, 𑀓𑀭𑀺𑀲𑁆𑀲𑀲𑀺 𑀦 𑀯𑀸 𑀓𑀭𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀅𑀳𑀺𑀢𑀁 𑀫𑀕𑁆𑀕𑀦𑁆𑀢𑀺 𑀅𑀢𑁆𑀢𑀦𑁄 𑀅𑀳𑀺𑀢𑀸𑀯𑀳𑀁 𑀤𑀼𑀕𑁆𑀕𑀢𑀺𑀫𑀕𑁆𑀕𑀁.

𑀅𑀝𑁆𑀞𑀸𑀦𑁂𑀢𑀺 𑀤𑁄𑀲𑁄 𑀢𑀯 𑀅𑀧𑁆𑀧𑀺𑀬𑀲𑁆𑀲 𑀓𑀸𑀭𑀸𑀧𑀓𑁄, 𑀲𑀢𑁆𑀢𑀼 𑀧𑀦 𑀢𑀲𑁆𑀲 𑀯𑀲𑀯𑀢𑁆𑀢𑀺𑀢𑀸𑀬 𑀤𑀸𑀲𑀲𑀤𑀺𑀲𑁄𑀢𑀺 𑀅𑀝𑁆𑀞𑀸𑀦𑀁 𑀧𑀘𑁆𑀘𑀸𑀧𑀓𑀺𑀭𑀺𑀬𑀸𑀬. 𑀢𑀲𑁆𑀫𑀸 𑀢𑀫𑁂𑀯 𑀤𑁄𑀲𑀁 𑀙𑀺𑀦𑁆𑀤𑀲𑁆𑀲𑀼 𑀉𑀘𑁆𑀙𑀺𑀦𑁆𑀤. 𑀔𑀡𑀺𑀓𑀢𑁆𑀢𑀸𑀢𑀺 𑀉𑀤𑀬𑀯𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑀸𑀮𑀲𑀗𑁆𑀔𑀸𑀢𑁄 𑀔𑀡𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀔𑀡𑀺𑀓𑀸, 𑀢𑀩𑁆𑀪𑀸𑀯𑀢𑁄 𑀔𑀡𑀧𑀪𑀗𑁆𑀕𑀼𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀲 𑀤𑀸𑀦𑀻𑀥 𑀓𑀼𑀚𑁆𑀛𑀲𑀻𑀢𑀺 𑀅𑀧𑀭𑀸𑀥𑀓𑀲𑁆𑀲 𑀲𑀦𑁆𑀢𑀸𑀦𑁂 𑀬𑁂𑀳𑀺 𑀔𑀦𑁆𑀥𑁂𑀳𑀺 𑀢𑁂 𑀅𑀧𑀭𑀸𑀥𑁄 𑀓𑀢𑁄, 𑀢𑁂 𑀢𑀁𑀔𑀡𑀁𑀬𑁂𑀯 𑀲𑀩𑁆𑀩𑀲𑁄 𑀦𑀺𑀭𑀼𑀤𑁆𑀥𑀸. 𑀇𑀤𑀸𑀦𑀺 𑀧𑀦 𑀅𑀜𑁆𑀜𑁂 𑀢𑀺𑀝𑁆𑀞𑀦𑁆𑀢𑀻𑀢𑀺 𑀓𑀲𑁆𑀲 𑀢𑁆𑀯𑀁 𑀇𑀥 𑀓𑀼𑀚𑁆𑀛𑀲𑀺. 𑀦 𑀳𑀺 𑀬𑀼𑀢𑁆𑀢𑀁 𑀅𑀦𑀧𑀭𑀸𑀥𑁂𑀲𑀼 𑀓𑀼𑀚𑁆𑀛𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀯𑀺𑀦𑀸 𑀓𑀲𑁆𑀲 𑀲𑁄 𑀓𑀭𑁂𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀬𑀲𑁆𑀲 𑀤𑀼𑀓𑁆𑀔𑀁 𑀓𑀭𑁄𑀢𑀺, 𑀢𑀁 𑀤𑀼𑀓𑁆𑀔𑀓𑀺𑀭𑀺𑀬𑀸𑀬 𑀯𑀺𑀲𑀬𑀪𑀽𑀢𑀁 𑀧𑀼𑀕𑁆𑀕𑀮𑀁 𑀯𑀺𑀦𑀸 𑀓𑀲𑁆𑀲 𑀦𑀸𑀫 𑀲𑁄 𑀤𑀼𑀓𑁆𑀔𑀓𑀸𑀭𑀓𑁄 𑀤𑀼𑀓𑁆𑀔𑀁 𑀓𑀭𑁂 𑀓𑀭𑁂𑀬𑁆𑀬. 𑀲𑀬𑀫𑁆𑀧𑀺 𑀤𑀼𑀓𑁆𑀔𑀳𑁂𑀢𑀼 𑀢𑁆𑀯𑀫𑀺𑀢𑀻𑀢𑀺 𑀏𑀯𑀁 𑀲𑀬𑀫𑁆𑀧𑀺 𑀢𑁆𑀯𑀁 𑀏𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀳𑁂𑀢𑀼, 𑀏𑀯𑀁 𑀲𑀫𑀸𑀦𑁂 𑀢𑀲𑁆𑀲 𑀢𑀼𑀬𑁆𑀳𑀜𑁆𑀘 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀳𑁂𑀢𑀼𑀪𑀸𑀯𑁂 𑀓𑀺𑀁 𑀓𑀸𑀭𑀡𑀸 𑀢𑀲𑁆𑀲 𑀓𑀼𑀚𑁆𑀛𑀲𑀺 𑀦 𑀢𑀼𑀬𑁆𑀳𑀦𑁆𑀢𑀺 𑀅𑀢𑁆𑀣𑁄.

𑁨𑁪𑁬. 𑀧𑀭𑀮𑁄𑀓𑁂𑀧𑀺 𑀅𑀦𑀼𑀕𑀸𑀫𑀺𑀪𑀸𑀯𑀢𑁄 𑀓𑀫𑁆𑀫𑀁𑀬𑁂𑀯 𑀲𑀓𑀁 𑀲𑀦𑁆𑀢𑀓𑀁 𑀏𑀢𑁂𑀲𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀸, 𑀢𑁂𑀲𑀁 𑀪𑀸𑀯𑁄 𑀓𑀫𑁆𑀫𑀲𑁆𑀲𑀓𑀢𑀸. 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀫 𑀦𑀺𑀲𑁂𑀥𑀦𑀢𑁆𑀣𑀸, 𑀦𑀺𑀲𑁂𑀥𑀦𑀜𑁆𑀘 𑀪𑀸𑀯𑀺𑀦𑁄 𑀓𑀫𑁆𑀫𑀲𑁆𑀲𑀸𑀢𑀺 𑀆𑀳 ‘‘𑀬𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀻’’𑀢𑀺. 𑀧𑀝𑀺𑀖𑀯𑀲𑁂𑀦 𑀧𑀦 𑀧𑀯𑀢𑁆𑀢𑀓𑀫𑁆𑀫𑀁 𑀧𑀸𑀓𑀝𑀪𑀸𑀯𑀢𑁄 𑀆𑀲𑀦𑁆𑀦𑀁, 𑀧𑀘𑁆𑀘𑀓𑁆𑀔𑀜𑁆𑀘𑀸𑀢𑀺 𑀆𑀳 ‘‘𑀇𑀤𑀜𑁆𑀘𑀸’’𑀢𑀺. 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂, 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀦𑀺𑀲𑁆𑀲𑀦𑁆𑀤𑁂𑀦 ‘‘𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺’’𑀦𑁆𑀢𑀺𑀆𑀤𑀺𑀦𑀸 𑀩𑁆𑀬𑀢𑀺𑀭𑁂𑀓𑀢𑁄 𑀯𑀼𑀘𑁆𑀘𑀫𑀸𑀦𑀫𑁂𑀯𑀢𑁆𑀣𑀁 𑀚𑁄𑀢𑁂𑀢𑀺. 𑀦𑁂𑀯 𑀲𑀫𑀢𑁆𑀣𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀭𑀬𑁂 𑀦𑀺𑀬𑀼𑀢𑁆𑀢𑀁, 𑀚𑀸𑀢𑀦𑁆𑀢𑀺 𑀯𑀸 𑀦𑁂𑀭𑀬𑀺𑀓𑀁. 𑀅𑀢𑁆𑀢𑀸𑀦𑀁𑀬𑁂𑀯 𑀑𑀓𑀺𑀭𑀢𑀺 𑀤𑁄𑀲𑀭𑀚𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁪𑁭. 𑀲𑀢𑁆𑀣𑀼 𑀧𑀼𑀩𑁆𑀩𑀘𑀭𑀺𑀬𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸, 𑀲𑀢𑁆𑀣𑀼 𑀕𑀸𑀭𑀯𑁂𑀦𑀸𑀧𑀺 𑀧𑀝𑀺𑀖𑀁 𑀯𑀽𑀧𑀲𑀫𑁂𑀬𑁆𑀬𑀸𑀢𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀲𑀫𑀸𑀦𑁄 𑀦𑀦𑀼 𑀢𑁂 𑀲𑀢𑁆𑀣𑀸 𑀘𑀺𑀢𑁆𑀢𑀁 𑀦𑀧𑁆𑀧𑀤𑀽𑀲𑁂𑀲𑀺, 𑀧𑀕𑁂𑀯 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁂𑀯𑀺𑀬𑀸 𑀧𑀤𑀼𑀝𑁆𑀞𑁂𑀦𑀸𑀢𑀺 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀧𑀤𑀼𑀩𑁆𑀪𑀺𑀦𑀸 𑀫𑀺𑀘𑁆𑀙𑀸𑀘𑀸𑀭𑀯𑀲𑁂𑀦 𑀅𑀧𑀭𑀤𑁆𑀥𑁂𑀦. 𑀬𑀢𑁆𑀣 𑀲𑀼𑀲𑀸𑀦𑁂 𑀙𑀯𑀲𑀭𑀻𑀭𑀁 𑀙𑀟𑁆𑀟𑀻𑀬𑀢𑀺, 𑀢𑀁 𑀆𑀫𑀓𑀲𑀼𑀲𑀸𑀦𑀁. 𑀦𑀺𑀔𑀜𑁆𑀜𑀫𑀸𑀦𑁄𑀢𑀺 𑀦𑀺𑀔𑀡𑀺𑀬𑀫𑀸𑀦𑁄. 𑀧𑀼𑀭𑀺𑀲𑀓𑀸𑀭𑀁 𑀓𑀢𑁆𑀯𑀸𑀢𑀺 𑀆𑀯𑀸𑀝𑀢𑁄 𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀩𑀸𑀳𑀼𑀩𑀮𑁂𑀦 𑀧𑀼𑀭𑀺𑀲𑀓𑀸𑀭𑀁 𑀓𑀢𑁆𑀯𑀸. 𑀬𑀓𑁆𑀔𑀸𑀦𑀼𑀪𑀸𑀯𑁂𑀦𑀸𑀢𑀺 𑀅𑀟𑁆𑀟𑀯𑀺𑀦𑀺𑀘𑁆𑀙𑀬𑁂𑀦 𑀆𑀭𑀸𑀥𑀺𑀢𑀘𑀺𑀢𑁆𑀢𑀲𑁆𑀲 𑀬𑀓𑁆𑀔𑀲𑁆𑀲 𑀆𑀦𑀼𑀪𑀸𑀯𑁂𑀦. 𑀲𑀺𑀭𑀺𑀕𑀩𑁆𑀪𑀦𑁆𑀢𑀺 𑀯𑀸𑀲𑀸𑀕𑀸𑀭𑁂.

𑀆𑀲𑀻𑀲𑁂𑀣𑁂𑀯𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑁂 𑀅𑀢𑁆𑀣𑁂 𑀜𑀸𑀬𑀢𑁄 𑀅𑀦𑀯𑀚𑁆𑀚𑀢𑁄 𑀆𑀲𑀁 𑀓𑀭𑁂𑀬𑁆𑀬. 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀸𑀢𑀺 ‘‘𑀏𑀯𑀁 𑀓𑀺𑀘𑁆𑀙𑀸𑀧𑀦𑁆𑀦𑀲𑁆𑀲 𑀫𑁂 𑀓𑀼𑀢𑁄 𑀲𑁄𑀢𑁆𑀣𑀺𑀪𑀸𑀯𑁄’’𑀢𑀺 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬. 𑀯𑀼𑀢𑁆𑀢𑀜𑁆𑀳𑀺 ‘‘𑀆𑀧𑀤𑀸𑀲𑀼 𑀔𑁄, 𑀫𑀳𑀸𑀭𑀸𑀚, 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 (𑀉𑀤𑀸. 𑁫𑁩). 𑀬𑀣𑀸 𑀇𑀘𑁆𑀙𑀺𑀦𑁆𑀢𑀺 𑀬𑁂𑀦 𑀧𑀓𑀸𑀭𑁂𑀦 𑀓𑀲𑁆𑀲𑀘𑀺 𑀧𑀻𑀴𑀁 𑀅𑀓𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑀁 𑀅𑀢𑁆𑀢𑀸𑀦𑀁 𑀇𑀘𑁆𑀙𑀺𑀁, 𑀢𑀣𑀸 𑀅𑀳𑀁 𑀅𑀳𑀼𑀦𑁆𑀢𑀺 𑀧𑀲𑁆𑀲𑀸𑀫𑀺. 𑀯𑁄𑀢𑀺 𑀳𑀺 𑀦𑀺𑀧𑀸𑀢𑀫𑀢𑁆𑀢𑀁.

𑀓𑀸𑀲𑀺𑀭𑀜𑁆𑀜𑀸𑀢𑀺 𑀓𑀮𑀸𑀩𑀼𑀦𑀸 𑀓𑀸𑀲𑀺𑀭𑀸𑀚𑁂𑀦. 𑀲𑀓𑀡𑁆𑀝𑀓𑀸𑀳𑀻𑀢𑀺 𑀅𑀬𑀓𑀡𑁆𑀝𑀓𑁂𑀳𑀺 𑀲𑀓𑀡𑁆𑀝𑀓𑀸𑀳𑀺.

𑀫𑀳𑀮𑁆𑀮𑀓𑁄𑀢𑀺 𑀯𑀼𑀤𑁆𑀥𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀭𑀼𑀚𑁆𑀛𑀦𑁆𑀢𑀻𑀢𑀺 𑀦𑀺𑀭𑀼𑀚𑁆𑀛𑀦𑁆𑀢𑀺.

𑀘𑀺𑀢𑁆𑀢𑀧𑀭𑀺𑀕𑁆𑀕𑀡𑁆𑀳𑀦𑀓𑀸𑀮𑁄𑀢𑀺 𑀯𑀺𑀲𑁂𑀯𑀦𑀁 𑀓𑀸𑀢𑀼𑀁 𑀅𑀤𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀤𑁂𑀯 𑀤𑀫𑀦𑀓𑀸𑀮𑁄.

𑀧𑀼𑀣𑀼𑀲𑀮𑁆𑀮𑁂𑀦𑀸𑀢𑀺 𑀯𑀺𑀧𑀼𑀮𑁂𑀦 𑀲𑀮𑁆𑀮𑁂𑀦. 𑀦𑀸𑀕𑁄𑀢𑀺 𑀳𑀢𑁆𑀣𑀺𑀦𑀸𑀕𑁄. 𑀯𑀥𑀻𑀢𑀺 𑀯𑀺𑀚𑁆𑀛𑀺, 𑀫𑀸𑀭𑁂𑀲𑀻𑀢𑀺 𑀯𑀸 𑀅𑀢𑁆𑀣𑁄. 𑀇𑀫𑀁 𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀫𑀬𑀺 𑀏𑀯𑀁 𑀓𑀭𑀡𑀁 𑀦𑀸𑀫 𑀦 𑀢𑀯 𑀯𑀲𑁂𑀦 𑀳𑁄𑀢𑀺, 𑀢𑀲𑁆𑀫𑀸 𑀓𑀲𑁆𑀲 𑀯𑀸 𑀭𑀜𑁆𑀜𑁄, 𑀭𑀸𑀚𑀫𑀢𑁆𑀢𑀲𑁆𑀲 𑀯𑀸 𑀅𑀬𑀁 𑀧𑀬𑁄𑀕𑁄 𑀉𑀬𑁆𑀬𑁄𑀚𑀦𑀸𑀢𑀺 𑀅𑀢𑁆𑀣𑁄.

𑀙𑀩𑁆𑀩𑀡𑁆𑀡𑀭𑀲𑁆𑀫𑀻𑀢𑀺 𑀦𑀻𑀮𑀧𑀻𑀢𑀮𑁄𑀳𑀺𑀢𑀸𑀤𑀺𑀯𑀲𑁂𑀦 𑀙𑀩𑁆𑀩𑀡𑁆𑀡𑀫𑀬𑀽𑀔𑀸. 𑀙𑀩𑁆𑀩𑀡𑁆𑀡𑀓𑀺𑀭𑀡𑀯𑀦𑁆𑀢𑀤𑀦𑁆𑀢𑀢𑀸𑀬 𑀳𑀺 𑀢𑁂 𑀳𑀢𑁆𑀣𑀻 ‘‘𑀙𑀤𑁆𑀤𑀦𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀦 𑀙𑀤𑁆𑀤𑀦𑁆𑀢𑀯𑀦𑁆𑀢𑀢𑀸𑀬.

𑀙𑀸𑀢𑁄𑀢𑀺 𑀚𑀺𑀖𑀘𑁆𑀙𑀺𑀢𑁄. 𑀔𑀸𑀤𑁂𑀬𑁆𑀬𑀸𑀢𑀺 𑀔𑀸𑀤𑁂𑀬𑁆𑀬𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀆𑀳𑀺𑀢𑁄𑀢𑀺 𑀲𑀼𑀳𑀺𑀢𑁄. 𑀲𑀫𑁆𑀩𑀮𑀦𑁆𑀢𑀺 𑀫𑀕𑁆𑀕𑀸𑀳𑀸𑀭𑀁. 𑀢𑀁 𑀧𑀦 𑀬𑀲𑁆𑀫𑀸 𑀉𑀧𑀘𑀸𑀭𑁂𑀦 𑀧𑀣𑀲𑁆𑀲 𑀳𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀧𑀸𑀣𑁂𑀬𑁆𑀬’’𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. ‘‘𑀫𑀺𑀢𑁆𑀢𑀤𑀼𑀩𑁆𑀪𑀻 𑀯𑀢𑀸𑀬𑀁 𑀅𑀦𑁆𑀥𑀩𑀸𑀮𑁄’’𑀢𑀺 𑀓𑀸𑀭𑀼𑀜𑁆𑀜𑁂𑀦 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀢𑀁 𑀧𑀼𑀭𑀺𑀲𑀁 𑀉𑀤𑀺𑀓𑁆𑀔𑀫𑀸𑀦𑁄.

𑀫𑀸 𑀅𑀬𑁆𑀬𑁄𑀲𑀺 𑀫𑁂 𑀪𑀤𑀦𑁆𑀢𑁂𑀢𑀺 𑀏𑀢𑁆𑀣 𑀫𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀫𑀸𑀢𑀺 𑀯𑀸 𑀧𑀝𑀺𑀓𑁆𑀔𑁂𑀧𑁄, 𑀢𑁂𑀦 𑀉𑀧𑀭𑀺 𑀢𑁂𑀦 𑀓𑀸𑀢𑀩𑁆𑀩𑀁 𑀯𑀺𑀧𑁆𑀧𑀓𑀸𑀭𑀁 𑀧𑀝𑀺𑀲𑁂𑀥𑁂𑀢𑀺. 𑀅𑀬𑁆𑀬𑁄 𑀫𑁂𑀢𑀺 𑀅𑀬𑁆𑀬𑀺𑀭𑀓𑁄 𑀢𑁆𑀯𑀁 𑀫𑀫 𑀅𑀢𑀺𑀣𑀺𑀪𑀸𑀯𑀢𑁄. 𑀪𑀤𑀦𑁆𑀢𑁂𑀢𑀺 𑀧𑀺𑀬𑀲𑀫𑀼𑀤𑀸𑀘𑀸𑀭𑁄. 𑀢𑁆𑀯𑀁 𑀦𑀸𑀫𑁂𑀢𑀸𑀤𑀺𑀲𑀁 𑀓𑀭𑀻𑀢𑀺 𑀢𑁆𑀯𑀫𑁆𑀧𑀺 𑀏𑀯𑀭𑀽𑀧𑀁 𑀅𑀓𑀸𑀲𑀺 𑀦𑀸𑀫.

𑀢𑀺𑀭𑀘𑁆𑀙𑀸𑀦𑀪𑀽𑀢𑁄𑀧𑀺 𑀧𑀦 𑀫𑀳𑀸𑀓𑀧𑀺 𑀳𑀼𑀢𑁆𑀯𑀸 𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀲𑀻𑀢𑀺 𑀬𑁄𑀚𑀦𑀸.

𑀧𑁂𑀴𑀸𑀬 𑀧𑀓𑁆𑀔𑀺𑀧𑀦𑁆𑀢𑁂𑀧𑀻𑀢𑀺 𑀔𑀼𑀤𑁆𑀤𑀓𑀸𑀬 𑀧𑁂𑀴𑀸𑀬 𑀧𑀸𑀤𑁂𑀳𑀺 𑀓𑁄𑀝𑁂𑀢𑁆𑀯𑀸 𑀧𑀓𑁆𑀔𑀺𑀧𑀦𑁆𑀢𑁂𑀧𑀺. 𑀫𑀤𑁆𑀤𑀦𑁆𑀢𑁂𑀧𑀻𑀢𑀺 𑀤𑀼𑀩𑁆𑀩𑀮𑀪𑀸𑀯𑀓𑀭𑀡𑀢𑁆𑀣𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀫𑀤𑁆𑀤𑀦𑁆𑀢𑁂𑀧𑀺. 𑀅𑀮𑀫𑁆𑀧𑀸𑀦𑁂𑀢𑀺 𑀏𑀯𑀁𑀦𑀸𑀫𑀓𑁂 𑀅𑀳𑀺𑀢𑀼𑀡𑁆𑀟𑀺𑀓𑁂.

𑀧𑀻𑀢𑀁 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀢𑁆𑀣𑀯𑀺𑀓𑀧𑁆𑀧𑁂, 𑀢𑁂𑀦 𑀑𑀤𑀸𑀢𑀫𑀜𑁆𑀚𑀺𑀝𑁆𑀞𑀸𑀤𑀺𑀁 𑀅𑀯𑀼𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀘𑀺𑀢𑁆𑀢𑀸𑀦𑀼𑀯𑀢𑁆𑀢𑀦𑁆𑀢𑁄𑀢𑀺 𑀘𑀺𑀢𑁆𑀢𑀁 𑀅𑀦𑀼𑀯𑀢𑁆𑀢𑀦𑁆𑀢𑁄. 𑀳𑁄𑀫𑀺 𑀘𑀺𑀦𑁆𑀢𑀺𑀢𑀲𑀦𑁆𑀦𑀺𑀪𑁄 𑀏𑀯𑀫𑀬𑀁 𑀩𑀳𑀼𑀮𑀸𑀪𑀁 𑀮𑀪𑀢𑀽𑀢𑀺. 𑀆𑀦𑀼𑀪𑀸𑀯𑁂𑀦 𑀧𑀦 𑀣𑀮𑀁 𑀓𑀭𑁂𑀬𑁆𑀬 𑀉𑀤𑀓𑀁…𑀧𑁂… 𑀙𑀸𑀭𑀺𑀓𑀁 𑀓𑀭𑁂. 𑀏𑀯𑀁 𑀧𑀦 𑀬𑀤𑀺 𑀘𑀺𑀢𑁆𑀢𑀯𑀲𑀻 𑀳𑁂𑀲𑁆𑀲𑀁…𑀧𑁂… 𑀉𑀢𑁆𑀢𑀫𑀢𑁆𑀣𑁄 𑀦 𑀲𑀺𑀚𑁆𑀛𑀢𑀻𑀢𑀺 𑀢𑀤𑀸 𑀅𑀢𑁆𑀢𑀦𑀸 𑀢𑀢𑁆𑀣 𑀤𑀺𑀝𑁆𑀞𑀁 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺 𑀪𑀕𑀯𑀸. 𑀢𑀢𑁆𑀣 𑀉𑀢𑁆𑀢𑀫𑀢𑁆𑀣𑁄𑀢𑀺 𑀩𑀼𑀤𑁆𑀥𑀪𑀸𑀯𑀫𑀸𑀳. 𑀪𑁄𑀚𑀧𑀼𑀢𑁆𑀢𑁂𑀳𑀻𑀢𑀺 𑀮𑀼𑀤𑁆𑀤𑀧𑀼𑀢𑁆𑀢𑁂𑀳𑀺.

𑀅𑀴𑀸𑀭𑀸𑀢𑀺 𑀬𑁂𑀦 𑀲𑀬𑀁 𑀢𑀤𑀸 𑀮𑀼𑀤𑁆𑀤𑀳𑀢𑁆𑀣𑀢𑁄 𑀫𑁄𑀘𑀺𑀢𑁄, 𑀢𑀁 𑀲𑀢𑁆𑀣𑀯𑀸𑀳𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀅𑀢𑀺𑀓𑀲𑁆𑀲𑀸𑀢𑀺 𑀦𑀸𑀲𑀸𑀬 𑀆𑀯𑀼𑀢𑀭𑀚𑁆𑀚𑀼𑀁 𑀆𑀓𑀟𑁆𑀠𑀺𑀢𑁆𑀯𑀸. 𑀲𑀫𑁆𑀧𑀭𑀺𑀕𑀬𑁆𑀳𑀸𑀢𑀺 𑀓𑀸𑀴𑀯𑁂𑀢𑁆𑀢𑀮𑀢𑀸𑀤𑀻𑀳𑀺 𑀲𑀩𑁆𑀩𑀲𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, 𑀅𑀘𑁆𑀙𑀭𑀺𑀬𑀸𑀦𑀺 𑀤𑀼𑀲𑁆𑀲𑀳𑀸𑀦𑀁 𑀲𑀳𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀢𑀺𑀯𑀺𑀬 𑀅𑀬𑀼𑀢𑁆𑀢𑀁 𑀅𑀧𑁆𑀧𑀢𑀺𑀭𑀽𑀧𑀁 𑀧𑀝𑀺𑀖𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑁂𑀦 𑀓𑁂𑀦𑀘𑀺 𑀅𑀧𑁆𑀧𑀝𑀺𑀲𑀫𑀔𑀦𑁆𑀢𑀺𑀕𑀼𑀡𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑀸𑀯𑁄𑀓𑁆𑀓𑀫𑀦𑀧𑁆𑀧𑀲𑀗𑁆𑀕𑀢𑁄.

𑁨𑁪𑁮. ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁧𑁨𑁪; 𑁩.𑁯𑁯, 𑁧𑁦𑁦; 𑁩.𑁫.𑁫𑁨𑁦; 𑀓𑀣𑀸. 𑁭𑁫) 𑀆𑀕𑀢𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀅𑀦𑀫𑀢𑀕𑁆𑀕𑀲𑀤𑁆𑀤𑁄, 𑀢𑀤𑀢𑁆𑀣𑁄 𑀯𑀸 𑀏𑀢𑁂𑀲𑀦𑁆𑀢𑀺 𑀅𑀦𑀫𑀢𑀕𑁆𑀕𑀺𑀬𑀸𑀦𑀺.

𑀅𑀚𑁂𑀳𑀺 𑀕𑀫𑀦𑀫𑀕𑁆𑀕𑁄 𑀅𑀚𑀧𑀣𑁄. 𑀲𑀗𑁆𑀓𑀽 𑀮𑀕𑁆𑀕𑀸𑀧𑁂𑀢𑁆𑀯𑀸 𑀢𑁂 𑀆𑀮𑀫𑁆𑀩𑀺𑀢𑁆𑀯𑀸 𑀕𑀫𑀦𑀫𑀕𑁆𑀕𑁄 𑀲𑀗𑁆𑀓𑀼𑀧𑀣𑁄. 𑀲𑀗𑁆𑀓𑀽𑀢𑀺 𑀅𑀗𑁆𑀓𑀼𑀲𑀸𑀓𑀸𑀭𑁂𑀦 𑀓𑀢𑀤𑀻𑀖𑀤𑀡𑁆𑀟𑁄 𑀯𑀼𑀘𑁆𑀘𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀧𑀧𑀸𑀢𑀫𑀕𑁆𑀕𑀤𑀼𑀕𑁆𑀕𑀫𑀕𑁆𑀕𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀪𑀢𑁄𑀩𑁆𑀬𑀽𑀴𑁆𑀳𑁂𑀢𑀺 𑀲𑀫𑁆𑀧𑀳𑀸𑀭𑀢𑁆𑀣𑀁 𑀤𑁆𑀯𑀻𑀳𑀺𑀧𑀺 𑀧𑀓𑁆𑀔𑁂𑀳𑀺 𑀕𑀸𑀴𑁆𑀳𑀲𑀦𑁆𑀦𑀸𑀳𑁂. 𑀅𑀜𑁆𑀜𑀸𑀦𑀺 𑀘 𑀤𑀼𑀓𑁆𑀓𑀭𑀸𑀦𑀺 𑀓𑀭𑀺𑀢𑁆𑀯𑀸 𑀥𑀦𑀸𑀲𑀸𑀬 𑀧𑀩𑁆𑀩𑀢𑀯𑀺𑀤𑀼𑀕𑁆𑀕𑀦𑀤𑀻𑀯𑀺𑀤𑀼𑀕𑁆𑀕𑀸𑀤𑀺𑀧𑀓𑁆𑀔𑀦𑁆𑀤𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀁 𑀧𑁄𑀲𑁂𑀲𑀺, 𑀉𑀧𑀓𑀸𑀭𑀁 𑀅𑀓𑀸𑀲𑀺, 𑀢𑀢𑁆𑀭 𑀦𑀧𑁆𑀧𑀢𑀺𑀭𑀽𑀧𑀁 𑀫𑀦𑀁 𑀧𑀤𑀽𑀲𑁂𑀢𑀼𑀦𑁆𑀢𑀺 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀜𑁆𑀘 𑀏𑀢𑀭𑀳𑀺 𑀤𑀺𑀲𑁆𑀲𑀫𑀸𑀦𑁂𑀦 𑀧𑀼𑀢𑁆𑀢𑀸𑀤𑀻𑀦𑀁 𑀧𑁄𑀲𑀦𑀸𑀤𑀺𑀦𑀸 𑀅𑀢𑀻𑀢𑀲𑁆𑀲 𑀅𑀦𑀼𑀫𑀸𑀦𑀢𑁄 𑀕𑀳𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁨𑁪𑁯. 𑀫𑁂𑀢𑁆𑀢𑀸𑀬𑀸𑀢𑀺 𑀫𑁂𑀢𑁆𑀢𑀸𑀲𑀗𑁆𑀔𑀸𑀢𑀸𑀬, 𑀫𑁂𑀢𑁆𑀢𑀸𑀲𑀳𑀺𑀢𑀸𑀬 𑀯𑀸. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀘𑀺𑀢𑁆𑀢𑀲𑀫𑀸𑀥𑀸𑀦𑁂. 𑀆𑀲𑁂𑀯𑀺𑀢𑀸𑀬𑀸𑀢𑀺 𑀆𑀤𑀭𑁂𑀦 𑀲𑁂𑀯𑀺𑀢𑀸𑀬. 𑀪𑀸𑀯𑀺𑀢𑀸𑀬𑀸𑀢𑀺 𑀯𑀟𑁆𑀠𑀺𑀢𑀸𑀬. 𑀩𑀳𑀼𑀮𑀻𑀓𑀢𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀬. 𑀬𑀸𑀦𑀻𑀓𑀢𑀸𑀬𑀸𑀢𑀺 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸𑀬. 𑀯𑀢𑁆𑀣𑀼𑀓𑀢𑀸𑀬𑀸𑀢𑀺 𑀅𑀥𑀺𑀝𑁆𑀞𑀸𑀦𑀯𑀢𑁆𑀣𑀼𑀁 𑀯𑀺𑀬 𑀓𑀢𑀸𑀬. 𑀅𑀦𑀼𑀝𑁆𑀞𑀺𑀢𑀸𑀬𑀸𑀢𑀺 𑀅𑀥𑀺𑀝𑁆𑀞𑀺𑀢𑀸𑀬. 𑀧𑀭𑀺𑀘𑀺𑀢𑀸𑀬𑀸𑀢𑀺 𑀧𑀭𑀺𑀘𑀺𑀡𑁆𑀡𑀸𑀬 𑀘𑀺𑀡𑁆𑀡𑀯𑀲𑀻𑀪𑀸𑀯𑀸𑀬. 𑀲𑀼𑀲𑀫𑀸𑀭𑀤𑁆𑀥𑀸𑀬𑀸𑀢𑀺 𑀲𑀼𑀝𑁆𑀞𑀼 𑀲𑀫𑁆𑀧𑀸𑀤𑀺𑀢𑀸𑀬. 𑀧𑀸𑀝𑀺𑀓𑀗𑁆𑀔𑀸𑀢𑀺 𑀇𑀘𑁆𑀙𑀺𑀢𑀩𑁆𑀩𑀸 𑀅𑀯𑀲𑁆𑀲𑀁𑀪𑀸𑀯𑀺𑀦𑁄. 𑀲𑁂𑀲𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺.

𑁨𑁫𑁦. 𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑁄𑀢𑀺 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀸𑀤𑀺𑀦𑀸 𑀥𑀸𑀢𑀽𑀦𑀁 𑀯𑀺𑀦𑀺𑀩𑁆𑀪𑀼𑀚𑀦𑀁. 𑀅𑀧𑀭𑀸𑀥𑁄 𑀦𑀸𑀫 𑀅𑀧𑀭𑀚𑁆𑀛𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀥𑀫𑁆𑀫𑀫𑀼𑀔𑁂𑀦 𑀕𑀬𑁆𑀳𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀓𑀺𑀁 𑀓𑁂𑀲𑀸𑀦𑀁 𑀓𑀼𑀚𑁆𑀛𑀲𑀻’’𑀢𑀺𑀆𑀤𑀺, 𑀓𑁂𑀲𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀧𑀭𑀚𑁆𑀛𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀪𑀸𑀯𑀢𑁄. 𑀇𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀢𑀧𑀭𑀫𑀢𑁆𑀣𑀥𑀫𑁆𑀫𑀯𑀲𑁂𑀦𑁂𑀯 𑀯𑀺𑀦𑀺𑀩𑁆𑀪𑁄𑀕𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀉𑀧𑀸𑀤𑀸𑀬, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀉𑀧𑀸𑀤𑀸𑀬𑀸𑀢𑀺 𑀧𑀘𑁆𑀘𑁂𑀓𑀁 𑀉𑀧𑀸𑀤𑀸𑀬-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀓𑁄𑀥𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁 𑀦 𑀳𑁄𑀢𑀻𑀢𑀺 𑀬𑀣𑀸 𑀆𑀭𑀕𑁆𑀕𑁂 𑀲𑀸𑀲𑀧𑀲𑁆𑀲, 𑀆𑀓𑀸𑀲𑁂 𑀘 𑀘𑀺𑀢𑁆𑀢𑀓𑀫𑁆𑀫𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀏𑀯𑀫𑀲𑁆𑀲 ‘‘𑀯𑁂𑀭𑀻’’𑀢𑀺 𑀧𑀭𑀺𑀓𑀧𑁆𑀧𑀺𑀢𑁂 𑀧𑀼𑀕𑁆𑀕𑀮𑁂 𑀓𑁄𑀥𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁 𑀦 𑀳𑁄𑀢𑀺, 𑀓𑁂𑀲𑀸𑀤𑀻𑀦𑀁 𑀅𑀓𑀼𑀚𑁆𑀛𑀺𑀢𑀩𑁆𑀩𑀢𑁄, 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲 𑀅𑀪𑀸𑀯𑀢𑁄.

𑁨𑁫𑁧. 𑀲𑀁𑀯𑀺𑀪𑀸𑀕𑁄𑀢𑀺 𑀆𑀫𑀺𑀲𑀲𑀁𑀯𑀺𑀪𑀸𑀕𑁄. 𑀧𑀭𑀲𑁆𑀲𑀸𑀢𑀺 𑀧𑀘𑁆𑀘𑀢𑁆𑀣𑀺𑀓𑀲𑁆𑀲. 𑀪𑀺𑀦𑁆𑀦𑀸𑀚𑀻𑀯𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄. 𑀢𑀲𑁆𑀲𑁂𑀯𑀁 𑀓𑀭𑁄𑀢𑁄𑀢𑀺 𑀏𑀯𑀁 𑀲𑀁𑀯𑀺𑀪𑀸𑀕𑀁 𑀓𑀭𑁄𑀦𑁆𑀢𑀲𑁆𑀲 𑀢𑀲𑁆𑀲 𑀤𑀸𑀬𑀓𑀲𑁆𑀲. 𑀇𑀢𑀭𑀲𑁆𑀲𑀸𑀢𑀺 𑀧𑀝𑀺𑀕𑁆𑀕𑀸𑀳𑀓𑀲𑁆𑀲. ‘‘𑀫𑀫 𑀫𑀸𑀢𑀭𑀸𑀉𑀧𑀸𑀲𑀺𑀓𑀸𑀬 𑀤𑀺𑀦𑁆𑀦𑁄’’𑀢𑀺 𑀇𑀤𑀁 ‘‘𑀥𑀫𑁆𑀫𑀺𑀬𑀮𑀸𑀪𑁄’’𑀢𑀺 𑀏𑀢𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀢𑁂𑀦 𑀧𑀦 𑀢𑀲𑁆𑀲 𑀆𑀕𑀫𑀦𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺.

𑀲𑀩𑁆𑀩𑀢𑁆𑀣𑀲𑀸𑀥𑀓𑀦𑁆𑀢𑀺 ‘‘𑀅𑀢𑁆𑀢𑀢𑁆𑀣𑁄 𑀧𑀭𑀢𑁆𑀣𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄 𑀅𑀢𑁆𑀣𑁄’’𑀢𑀺 (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑀫. 𑁩.𑁫) 𑀏𑀯𑀫𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀅𑀢𑁆𑀣𑀸𑀦𑀁, 𑀳𑀺𑀢𑀸𑀦𑀁, 𑀧𑀬𑁄𑀚𑀦𑀸𑀦𑀜𑁆𑀘 𑀦𑀺𑀧𑁆𑀨𑀸𑀤𑀓𑀁. 𑀉𑀦𑁆𑀦𑀫𑀦𑁆𑀢𑀺 𑀤𑀸𑀬𑀓𑀸. 𑀦𑀫𑀦𑁆𑀢𑀺 𑀧𑀝𑀺𑀕𑁆𑀕𑀸𑀳𑀓𑀸.

𑁨𑁫𑁨. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀓𑀓𑀘𑀽𑀧𑀫𑁄𑀯𑀸𑀤𑀸𑀦𑀼𑀲𑁆𑀲𑀭𑀡𑀸𑀤𑀻𑀳𑀺 𑀅𑀢𑁆𑀢𑀦𑁄 𑀑𑀯𑀤𑀦𑀸𑀓𑀸𑀭𑁂𑀳𑀺. 𑀯𑀽𑀧𑀲𑀦𑁆𑀢𑀧𑀝𑀺𑀖𑀲𑁆𑀲𑀸𑀢𑀺 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀯𑀺𑀦𑁄𑀤𑀺𑀢𑀸𑀖𑀸𑀢𑀲𑁆𑀲. 𑀢𑀲𑁆𑀫𑀺𑀫𑁆𑀧𑀻𑀢𑀺 𑀯𑁂𑀭𑀻𑀧𑀼𑀕𑁆𑀕𑀮𑁂𑀧𑀺. 𑀯𑁂𑀭𑀻-𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀅𑀧𑁆𑀧𑀺𑀬𑀧𑀼𑀕𑁆𑀕𑀮𑀲𑁆𑀲𑀸𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁 𑀯𑁂𑀭𑀺𑀫𑁆𑀳𑀺 𑀫𑁂𑀢𑁆𑀢𑀸𑀬 𑀲𑀺𑀤𑁆𑀥𑀸𑀬 𑀢𑀲𑁆𑀫𑀺𑀫𑁆𑀧𑀺 𑀫𑁂𑀢𑁆𑀢𑀸𑀲𑀺𑀤𑁆𑀥𑀺𑀢𑁄, 𑀧𑀺𑀬𑀢𑁄 𑀧𑀦 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑀲𑁆𑀲 𑀯𑀺𑀲𑀼𑀁 𑀕𑀳𑀡𑀁 𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑀲𑁆𑀲 𑀤𑀼𑀩𑁆𑀩𑀺𑀦𑀺𑀫𑁄𑀘𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀫𑁂𑀢𑁆𑀢𑀸𑀯𑀲𑁂𑀦𑀸𑀢𑀺 𑀫𑁂𑀢𑁆𑀢𑀸𑀬𑀦𑀯𑀲𑁂𑀦. 𑀲𑀫𑀘𑀺𑀢𑁆𑀢𑀢𑀦𑁆𑀢𑀺 𑀳𑀺𑀢𑀽𑀧𑀲𑀁𑀳𑀸𑀭𑁂𑀦 𑀲𑀫𑀸𑀦𑀘𑀺𑀢𑁆𑀢𑀢𑀁. 𑀲𑀻𑀫𑀸𑀲𑀫𑁆𑀪𑁂𑀤𑁄 𑀲𑀸 𑀏𑀯 𑀲𑀫𑀘𑀺𑀢𑁆𑀢𑀢𑀸. 𑀇𑀫𑀲𑁆𑀫𑀺𑀁 𑀧𑀼𑀕𑁆𑀕𑀮𑁂𑀢𑀺 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀺𑀓𑀧𑀼𑀕𑁆𑀕𑀮𑁂. 𑀦𑀺𑀲𑀺𑀦𑁆𑀦𑁂𑀢𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀁.

𑀳𑀺𑀢𑀫𑀚𑁆𑀛𑀢𑁆𑀢𑁂𑀢𑀺 𑀧𑀺𑀬𑁂, 𑀫𑀚𑁆𑀛𑀢𑁆𑀢𑁂 𑀘. 𑀘𑀢𑀼𑀩𑁆𑀩𑀺𑀥𑁂𑀢𑀺 𑀘𑀢𑀼𑀩𑁆𑀩𑀺𑀥𑁂 𑀚𑀦𑁂, 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀸𑀦𑀢𑁆𑀢𑀦𑁆𑀢𑀺 𑀧𑀺𑀬𑀫𑀚𑁆𑀛𑀢𑁆𑀢𑀸𑀤𑀺𑀦𑀸𑀦𑀸𑀓𑀭𑀡𑀁. 𑀳𑀺𑀢𑀘𑀺𑀢𑁆𑀢𑁄𑀯 𑀧𑀸𑀡𑀺𑀦𑀦𑁆𑀢𑀺 𑀓𑁂𑀯𑀮𑀁 𑀲𑀢𑁆𑀢𑁂𑀲𑀼 𑀳𑀺𑀢𑀘𑀺𑀢𑁆𑀢𑁄 𑀏𑀯𑀸𑀢𑀺 𑀧𑀯𑀼𑀘𑁆𑀘𑀢𑀺, 𑀦 𑀧𑀦 ‘‘𑀫𑁂𑀢𑁆𑀢𑀸𑀬 𑀦𑀺𑀓𑀸𑀫𑀮𑀸𑀪𑀻’’𑀢𑀺 𑀯𑀸 ‘‘𑀓𑀼𑀲𑀮𑀻’’𑀢𑀺 𑀯𑀸 𑀧𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀢𑁆𑀢𑀸𑀤𑀻𑀲𑀼 𑀧𑀲𑁆𑀲𑀢𑀺 𑀦𑀸𑀦𑀢𑁆𑀢𑀦𑁆𑀢𑀺. 𑀓𑀲𑁆𑀫𑀸 𑀧𑀦𑀸𑀬𑀁 𑀳𑀺𑀢𑀘𑀺𑀢𑁆𑀢𑁄 𑀓𑀼𑀲𑀮𑀻𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺? 𑀲𑀸𑀢𑀺𑀲𑀬𑀲𑁆𑀲 𑀓𑀼𑀲𑀮𑀲𑁆𑀲 𑀯𑀲𑁂𑀦 𑀓𑀼𑀲𑀮𑀺𑀪𑀸𑀯𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀇𑀫𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀸𑀪𑀸𑀯𑀦𑀸 𑀦 𑀯𑀺𑀲𑁂𑀲𑀯𑀢𑀻. 𑀅𑀣 𑀯𑀸 𑀦 𑀦𑀺𑀓𑀸𑀫𑀮𑀸𑀪𑀻 𑀫𑁂𑀢𑁆𑀢𑀸𑀬 𑀬𑀢𑁄 𑀅𑀢𑁆𑀢𑀸𑀤𑀻𑀲𑀼 𑀧𑀲𑁆𑀲𑀢𑀺 𑀦𑀸𑀦𑀢𑁆𑀢𑀁. 𑀓𑀼𑀲𑀮𑀻𑀢𑀺 𑀧𑀯𑀼𑀘𑁆𑀘𑀢𑀺, 𑀬𑀲𑁆𑀫𑀸 𑀳𑀺𑀢𑀘𑀺𑀢𑁆𑀢𑁄𑀯 𑀧𑀸𑀡𑀺𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀕𑀸𑀫𑀲𑀻𑀫𑀸𑀤𑀬𑁄 𑀯𑀺𑀬 𑀕𑀸𑀫𑀦𑁆𑀢𑀭𑀸𑀤𑀻𑀳𑀺 𑀲𑀢𑁆𑀢𑀲𑀗𑁆𑀔𑀸𑀢𑁂 𑀫𑁂𑀢𑁆𑀢𑀸𑀯𑀺𑀲𑀬𑁂 𑀪𑀸𑀯𑀦𑀸𑀬 𑀧𑀼𑀩𑁆𑀩𑁂 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀓𑀺𑀡𑁆𑀡𑀫𑀭𑀺𑀬𑀸𑀤𑀸𑀭𑀽𑀧𑁂𑀦 𑀞𑀺𑀢𑀢𑁆𑀢𑀸 𑀅𑀢𑁆𑀢𑀸𑀤𑀬𑁄 𑀇𑀥 𑀲𑀻𑀫𑀸 𑀦𑀸𑀫𑀸𑀢𑀺 𑀆𑀳 ‘‘𑀘𑀢𑀲𑁆𑀲𑁄 𑀲𑀻𑀫𑀸𑀬𑁄’’𑀢𑀺. 𑀲𑀫𑁆𑀪𑀺𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀲𑀫𑁆𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀁 𑀨𑀭𑀢𑀺 𑀫𑁂𑀢𑁆𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀳𑀸𑀯𑀺𑀲𑁂𑀲𑁄𑀢𑀺 𑀫𑀳𑀦𑁆𑀢𑁄 𑀪𑀸𑀯𑀦𑀸𑀬 𑀯𑀺𑀲𑁂𑀲𑁄 𑀅𑀢𑀺𑀲𑀬𑁄. 𑀧𑀼𑀭𑀺𑀫𑁂𑀦 𑀧𑀼𑀭𑀺𑀫𑀢𑁄 𑀅𑀢𑁆𑀢𑀸𑀤𑀺𑀦𑀸𑀦𑀢𑁆𑀢𑀤𑀲𑁆𑀲𑀺𑀦𑀸. 𑀦 𑀦𑀸𑀬𑀢𑀻𑀢𑀺 𑀦 𑀜𑀸𑀬𑀢𑀺.

𑁨𑁫𑁩. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀣𑀸 𑀓𑀲𑀺𑀡𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀲𑀼 𑀢𑀁𑀢𑀁𑀓𑀲𑀺𑀡𑀫𑀡𑁆𑀟𑀮𑀸𑀤𑀺𑀧𑀭𑀺𑀕𑁆𑀕𑀳𑀫𑀼𑀔𑁂𑀦 𑀪𑀸𑀯𑀦𑀸𑀯𑀲𑁂𑀦 𑀮𑀤𑁆𑀥𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀛𑀸𑀦𑀲𑁆𑀲 𑀕𑁄𑀘𑀭𑀪𑀸𑀯𑁂𑀦 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑀢𑀺𑀝𑁆𑀞𑀢𑀺, 𑀦 𑀏𑀯𑀫𑀺𑀥 𑀉𑀧𑀝𑁆𑀞𑀺𑀢𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺. 𑀬𑁄 𑀧𑀦𑀸𑀬𑀁 𑀬𑀣𑀸𑀯𑀼𑀢𑁆𑀢𑁄 𑀲𑀻𑀫𑀸𑀲𑀫𑁆𑀪𑁂𑀤𑁄 𑀮𑀤𑁆𑀥𑁄, 𑀲𑁆𑀯𑁂𑀯 𑀦𑀺𑀫𑀺𑀢𑁆𑀢𑀁 𑀯𑀺𑀬𑀸𑀢𑀺 𑀦𑀺𑀫𑀺𑀢𑁆𑀢𑀁. 𑀢𑀲𑁆𑀫𑀺𑀁 𑀳𑀺 𑀮𑀤𑁆𑀥𑁂 𑀪𑀸𑀯𑀦𑀸𑀬 𑀲𑀸𑀢𑀺𑀲𑀬𑀢𑁆𑀢𑀸 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀺𑀦𑁆𑀦𑀸𑀯, 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀫𑁂𑀯. 𑀢𑁂𑀦𑀸𑀳 ‘‘𑀦𑀺𑀫𑀺𑀢𑁆𑀢𑀜𑁆𑀘 𑀉𑀧𑀘𑀸𑀭𑀜𑁆𑀘 𑀮𑀤𑁆𑀥𑀁 𑀳𑁄𑀢𑀻’’𑀢𑀺. 𑀢𑀫𑁂𑀯 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀻𑀫𑀸𑀲𑀫𑁆𑀪𑁂𑀤𑀯𑀲𑁂𑀦 𑀧𑀯𑀢𑁆𑀢𑀲𑀫𑀣𑀦𑀺𑀫𑀺𑀢𑁆𑀢𑀁. 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀅𑀓𑀺𑀘𑁆𑀙𑁂𑀦𑁂𑀯, 𑀧𑀕𑁂𑀯 𑀧𑀭𑀺𑀧𑀦𑁆𑀣𑀲𑁆𑀲 𑀯𑀺𑀲𑁄𑀥𑀺𑀢𑀢𑁆𑀢𑀸.

𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀪𑀸𑀯𑀦𑀸𑀦𑀼𑀬𑁄𑀕𑁂𑀦. 𑀅𑀦𑁂𑀦 𑀬𑁄𑀕𑀺𑀦𑀸. 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯.

‘‘𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀲𑁂𑀦𑀸’’𑀢𑀺 𑀇𑀤𑀁 𑀯𑀓𑁆𑀔𑀫𑀸𑀦𑀸𑀬 𑀯𑀺𑀓𑀼𑀩𑁆𑀩𑀦𑀸𑀬 𑀢𑁂𑀲𑀁 𑀲𑀸𑀥𑀸𑀭𑀡𑀢𑀸𑀬 𑀯𑀼𑀢𑁆𑀢𑀁. 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀘𑀺𑀢𑁆𑀢𑀲𑁆𑀲𑁂𑀯 𑀦 𑀉𑀧𑀘𑀸𑀭𑀫𑀢𑁆𑀢𑀮𑀸𑀪𑀺𑀦𑁄. 𑀧𑀕𑀼𑀡𑀩𑀮𑀯𑀪𑀸𑀯𑀸𑀧𑀸𑀤𑀦𑁂𑀦 𑀯𑁂𑀧𑀼𑀮𑁆𑀮𑀸𑀤𑀺𑀯𑀺𑀲𑁂𑀲𑀧𑁆𑀧𑀢𑁆𑀢𑀲𑁆𑀲 𑀑𑀥𑀺𑀲𑁄, 𑀅𑀦𑁄𑀥𑀺𑀲𑁄 𑀘 𑀤𑀺𑀲𑀸𑀨𑀭𑀡𑀸𑀤𑀺𑀯𑀲𑁂𑀦 𑀛𑀸𑀦𑀲𑁆𑀲 𑀧𑀯𑀺𑀚𑀫𑁆𑀪𑀦𑀸 𑀯𑀺𑀓𑀼𑀩𑁆𑀩𑀦𑀸 𑀯𑀺𑀯𑀺𑀥𑀸 𑀓𑀺𑀭𑀺𑀬𑀸𑀢𑀺 𑀓𑀢𑁆𑀯𑀸.

𑁨𑁫𑁪. 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀪𑀗𑁆𑀕𑀸 𑀫𑁂𑀢𑁆𑀢𑀸𑀬 𑀲𑀳 𑀧𑀯𑀢𑁆𑀢𑁂𑀦 𑀲𑀁𑀲𑀝𑁆𑀞𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀢𑀁 𑀯𑀼𑀢𑁆𑀢𑀦𑀬𑁂𑀦 𑀫𑁂𑀢𑁆𑀢𑀸𑀬 𑀲𑀳𑀕𑀢𑀁, 𑀢𑀸𑀬 𑀏𑀓𑀼𑀧𑁆𑀧𑀸𑀤𑀸𑀤𑀺𑀯𑀺𑀥𑀺𑀦𑀸 𑀲𑀫𑁆𑀫𑀤𑁂𑀯 𑀆𑀕𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑁂𑀦𑀸’’𑀢𑀺. 𑀘𑁂𑀢𑁄-𑀲𑀤𑁆𑀤𑁄 ‘‘𑀅𑀥𑀺𑀘𑁂𑀢𑀲𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁧𑁫𑁩; 𑀉𑀤𑀸. 𑁩𑁭) 𑀲𑀫𑀸𑀥𑀺𑀧𑀭𑀺𑀬𑀸𑀬𑁄𑀧𑀺 𑀳𑁄𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑁂𑀢𑀼𑀁 ‘‘𑀘𑁂𑀢𑀲𑀸𑀢𑀺 𑀘𑀺𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 𑀏𑀢𑀁 𑀧𑀤𑀁. 𑀤𑀺𑀲𑁄𑀥𑀺𑀧𑀭𑀺𑀕𑁆𑀕𑀳𑁄 𑀲𑀢𑁆𑀢𑁄𑀥𑀺𑀧𑀭𑀺𑀕𑁆𑀕𑀳𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀺𑀲𑁆𑀲𑀸 𑀤𑀺𑀲𑀸𑀬 𑀧𑀞𑀫𑀧𑀭𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀁 𑀉𑀧𑀸𑀤𑀸𑀬𑀸’’𑀢𑀺. 𑀤𑀺𑀲𑀸𑀲𑀼 𑀳𑀺 𑀞𑀺𑀢𑀲𑀢𑁆𑀢𑀸 𑀤𑀺𑀲𑀸𑀕𑀳𑀡𑁂𑀦 𑀕𑀳𑀺𑀢𑀸. 𑀢𑁂𑀦𑀸𑀳 ‘‘𑀏𑀓𑀤𑀺𑀲𑀸𑀧𑀭𑀺𑀬𑀸𑀧𑀦𑁆𑀦𑀲𑀢𑁆𑀢𑀨𑀭𑀡𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺. 𑀨𑀭𑀡𑀜𑁆𑀘 𑀲𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀲𑁆𑀲 𑀨𑀲𑁆𑀲𑀦𑀸 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀁 𑀕𑀳𑀡𑀁 𑀆𑀭𑀫𑁆𑀫𑀡𑀓𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀨𑀭𑀺𑀢𑁆𑀯𑀸𑀢𑀺 𑀨𑀼𑀲𑀺𑀢𑁆𑀯𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺. 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀥𑀺𑀝𑁆𑀞𑀺𑀢𑀦𑁆𑀢𑀺 𑀫𑁂𑀢𑁆𑀢𑀸𑀛𑀸𑀦𑀼𑀧𑀢𑁆𑀣𑀫𑁆𑀪𑀺𑀢𑀁. 𑀢𑀣𑀸𑀢𑀺 𑀦𑀺𑀬𑀫𑀦𑀁. 𑀢𑀁 𑀅𑀦𑀺𑀬𑀫𑀸𑀧𑁂𑀓𑁆𑀔𑀲𑀫𑁆𑀩𑀦𑁆𑀥𑀻𑀪𑀸𑀯𑀢𑁄 𑀉𑀧𑀫𑀸𑀓𑀸𑀭𑀦𑀺𑀬𑀫𑀦𑀁. 𑀤𑀼𑀢𑀺𑀬𑀦𑁆𑀢𑀺 𑀉𑀧𑀫𑁂𑀬𑁆𑀬𑀤𑀲𑁆𑀲𑀦𑀁, 𑀉𑀧𑀫𑁂𑀬𑁆𑀬𑀜𑁆𑀘 𑀦𑀸𑀫 𑀉𑀧𑀫𑀁, 𑀢𑁂𑀦 𑀲𑀫𑁆𑀩𑀦𑁆𑀥𑀜𑁆𑀘 𑀯𑀺𑀦𑀸 𑀦𑀢𑁆𑀣𑀻𑀢𑀺 𑀢𑀤𑀼𑀪𑀬𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀣𑀸 𑀤𑀼𑀢𑀺𑀬𑀦𑁆𑀢𑀺 𑀏𑀢𑁆𑀣 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀯𑀁 𑀢𑀢𑀺𑀬𑀁 𑀘𑀢𑀼𑀢𑁆𑀣𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀢𑀤𑀦𑀦𑁆𑀢𑀭𑀦𑁆𑀢𑀺 𑀘 𑀨𑀭𑀡𑀸𑀧𑁂𑀓𑁆𑀔𑀁 𑀅𑀦𑀦𑁆𑀢𑀭𑀕𑁆𑀕𑀳𑀡𑀁, 𑀦 𑀨𑀭𑀺𑀢𑀩𑁆𑀩𑀤𑀺𑀲𑀸𑀧𑁂𑀓𑁆𑀔𑀁 𑀤𑀺𑀲𑀸𑀦𑀁 𑀅𑀦𑀺𑀤𑁆𑀤𑀺𑀝𑁆𑀞𑀭𑀽𑀧𑀢𑁆𑀢𑀸. 𑀨𑀭𑀡𑀸𑀦𑀼𑀓𑁆𑀓𑀫𑁂𑀦 𑀳𑀺 𑀢𑀸𑀲𑀁 𑀤𑀼𑀢𑀺𑀬𑀸𑀤𑀺𑀢𑀸, 𑀦 𑀲𑀭𑀽𑀧𑀢𑁄. 𑀢𑁂𑀦𑁂𑀯𑀸𑀳 ‘‘𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀤𑀺𑀲’’𑀦𑁆𑀢𑀺. 𑀇𑀢𑀻𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀁 𑀘𑀢𑀲𑁆𑀲𑁄, 𑀏𑀯𑀁 𑀉𑀤𑁆𑀥𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀢𑁂𑀦𑁂𑀯 𑀦𑀬𑁂𑀦𑀸’’𑀢𑀺. 𑀇𑀤𑀫𑁆𑀧𑀺 𑀇𑀢𑀺-𑀲𑀤𑁆𑀤𑀲𑁆𑀲𑁂𑀯 𑀅𑀢𑁆𑀣𑀤𑀲𑁆𑀲𑀦𑀁. 𑀧𑀸𑀴𑀺𑀬𑀁 (𑀫. 𑀦𑀺. 𑁩.𑁩𑁦𑁯; 𑁩.𑁨𑁩𑁦; 𑀯𑀺𑀪. 𑁬𑁪𑁨) 𑀅𑀥𑁄 𑀢𑀺𑀭𑀺𑀬𑀦𑁆𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀥𑁄𑀤𑀺𑀲𑀫𑁆𑀧𑀺 𑀢𑀺𑀭𑀺𑀬𑀁 𑀤𑀺𑀲𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦𑁂𑀯 ‘‘𑀤𑀼𑀢𑀺𑀬’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀧𑀺-𑀲𑀤𑁆𑀤𑀲𑁆𑀲 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀢𑀸 𑀤𑀻𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑁂𑀯𑀸𑀢𑀺 𑀇𑀤𑀫𑁆𑀧𑀺 𑀇𑀢𑀺-𑀲𑀤𑁆𑀤𑀲𑁆𑀲𑁂𑀯 𑀅𑀢𑁆𑀣𑀤𑀲𑁆𑀲𑀦𑀁. 𑀏𑀢𑁆𑀣 𑀘 ‘‘𑀅𑀥𑁄’’𑀢𑀺 𑀇𑀫𑀺𑀦𑀸 𑀬𑀣𑀸 𑀦𑀺𑀭𑀬𑁂𑀲𑀼, 𑀦𑀸𑀕𑀪𑀯𑀦𑀸𑀤𑀻𑀲𑀼, 𑀬𑀢𑁆𑀣 𑀢𑀢𑁆𑀣 𑀯𑀸 𑀅𑀢𑁆𑀢𑀦𑁄 𑀳𑁂𑀝𑁆𑀞𑀺𑀫𑀤𑀺𑀲𑀸𑀬 𑀲𑀢𑁆𑀢𑀸 𑀕𑀬𑁆𑀳𑀦𑁆𑀢𑀺, 𑀏𑀯𑀁 ‘‘𑀉𑀤𑁆𑀥’’𑀦𑁆𑀢𑀺 𑀇𑀫𑀺𑀦𑀸 𑀤𑁂𑀯𑀮𑁄𑀓𑁂, 𑀬𑀢𑁆𑀣 𑀢𑀢𑁆𑀣 𑀯𑀸 𑀅𑀢𑁆𑀢𑀦𑁄 𑀉𑀧𑀭𑀺𑀫𑀤𑀺𑀲𑀸𑀬𑀁 𑀲𑀢𑁆𑀢𑀸 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀚𑁆𑀛𑀢𑁆𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀇𑀢𑁆𑀣𑀺𑀧𑀼𑀭𑀺𑀲𑀅𑀭𑀺𑀬𑀸𑀦𑀭𑀺𑀬𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀓𑁂 𑀧𑀪𑁂𑀤𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀈𑀲𑀓𑀫𑁆𑀧𑀺 𑀩𑀳𑀺 𑀅𑀯𑀺𑀓𑁆𑀔𑀺𑀧𑀫𑀸𑀦𑁄𑀢𑀺 𑀅𑀧𑁆𑀧𑀓𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀢𑁄 𑀩𑀳𑀺 𑀯𑀺𑀓𑁆𑀔𑁂𑀧𑀁 𑀅𑀦𑀸𑀧𑀚𑁆𑀚𑀦𑁆𑀢𑁄 𑀳𑀺𑀢𑀽𑀧𑀲𑀁𑀳𑀸𑀭𑀢𑁄 𑀅𑀜𑁆𑀜𑀣𑀸 𑀣𑁄𑀓𑀫𑁆𑀧𑀺 𑀅𑀯𑀢𑁆𑀢𑀫𑀸𑀦𑁄. 𑀲𑀩𑁆𑀩𑀢𑁆𑀢𑀢𑀸𑀬𑀸𑀢𑀺 𑀯𑀸 𑀲𑀩𑁆𑀩𑁂𑀦 𑀅𑀢𑁆𑀢𑀪𑀸𑀯𑁂𑀦 𑀬𑀣𑀸 𑀲𑀩𑁆𑀩𑀪𑀸𑀯𑁂𑀦 𑀅𑀢𑁆𑀢𑀦𑀺 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑁂 𑀳𑀺𑀢𑁂𑀲𑀺𑀢𑀸, 𑀏𑀯𑀁 𑀲𑀩𑁆𑀩𑀥𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀫𑁂𑀢𑁆𑀢𑀸𑀬 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀲𑀢𑁆𑀢𑀯𑀺𑀲𑀬𑁄 𑀲𑀩𑁆𑀩-𑀲𑀤𑁆𑀤𑁄, 𑀲𑁄 𑀘 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀲𑀩𑁆𑀩𑀲𑀢𑁆𑀢𑀓𑀸𑀬𑀲𑀗𑁆𑀔𑀸𑀢𑀸 𑀧𑀚𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀩𑁆𑀩𑀸𑀯𑀦𑁆𑀢𑁄𑀢𑀺 𑀧𑀤𑀢𑁆𑀣𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀯𑀦𑁆𑀢’’𑀦𑁆𑀢𑀺 𑀆𑀳. 𑀏𑀢𑁆𑀣 𑀘 𑀲𑀩𑁆𑀩𑀥𑀻𑀢𑀺 𑀤𑀺𑀲𑁄𑀥𑀺𑀦𑀸, 𑀤𑁂𑀲𑁄𑀥𑀺𑀦𑀸 𑀘 𑀅𑀦𑁄𑀥𑀺𑀲𑁄𑀨𑀭𑀡𑀁 𑀯𑀼𑀢𑁆𑀢𑀁, 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀢𑁆𑀢𑁄𑀥𑀺𑀦𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀦𑁄𑀥𑀺𑀲𑁄 𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺. 𑀏𑀓𑀫𑁂𑀯𑀢𑁆𑀣𑀁 𑀧𑀓𑀸𑀭𑀢𑁄 𑀧𑀭𑀺𑀬𑀸𑀬𑁂𑀦𑁆𑀢𑀺 𑀜𑀸𑀧𑁂𑀦𑁆𑀢𑀻𑀢𑀺 𑀧𑀭𑀺𑀬𑀸𑀬𑀸, 𑀯𑁂𑀯𑀘𑀦𑀸𑀦𑀺. 𑀯𑀺𑀧𑀼𑀮𑀸𑀤𑀺𑀲𑀤𑁆𑀤𑀸 𑀘𑁂𑀢𑁆𑀣 𑀢𑀸𑀤𑀺𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀯𑀺𑀧𑀼𑀮𑁂𑀦𑀸𑀢𑀺 𑀏𑀯𑀫𑀸𑀤𑀺𑀧𑀭𑀺𑀬𑀸𑀬𑀤𑀲𑁆𑀲𑀦𑀢𑁄’’𑀢𑀺. 𑀧𑀭𑀺𑀬𑀸𑀬𑀤𑀲𑁆𑀲𑀦𑁂 𑀘 𑀧𑀼𑀩𑁆𑀩𑁂 𑀕𑀳𑀺𑀢𑀧𑀤𑀸𑀦𑀺𑀧𑀺 𑀧𑀼𑀦 𑀕𑀬𑁆𑀳𑀦𑁆𑀢𑀺, 𑀬𑀣𑀸 ‘‘𑀲𑀤𑁆𑀥𑀸 𑀲𑀤𑁆𑀤𑀳𑀦𑀸’’𑀢𑀺 (𑀥. 𑀲. 𑁧𑁨) 𑀏𑀢𑁆𑀣 𑀯𑀼𑀢𑁆𑀢𑀫𑁆𑀧𑀺 𑀲𑀤𑁆𑀥𑀸𑀧𑀤𑀁 𑀧𑀼𑀦 𑀇𑀦𑁆𑀤𑁆𑀭𑀺𑀬𑀸𑀤𑀺𑀧𑀭𑀺𑀬𑀸𑀬𑀤𑀲𑁆𑀲𑀦𑁂 ‘‘𑀲𑀤𑁆𑀥𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀥. 𑀲. 𑁧𑁨) 𑀯𑀼𑀢𑁆𑀢𑀁. 𑀢𑀣𑀸𑀲𑀤𑁆𑀤𑁄 𑀯𑀸 𑀇𑀢𑀺𑀲𑀤𑁆𑀤𑁄 𑀯𑀸 𑀦 𑀯𑀼𑀢𑁆𑀢𑁄𑀢𑀺 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 𑀏𑀢𑀲𑁆𑀲 𑀅𑀦𑀼𑀯𑀢𑁆𑀢𑀓𑁄 𑀢𑀣𑀸-𑀲𑀤𑁆𑀤𑁄 𑀘 𑀇𑀢𑀺-𑀲𑀤𑁆𑀤𑁄 𑀘 𑀢𑁂𑀲𑀁 𑀨𑀭𑀡𑀸𑀦𑀦𑁆𑀢𑀭𑀸𑀤𑀺𑀝𑁆𑀞𑀸𑀦𑀁 𑀅𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 𑀢𑁂 𑀦 𑀯𑀼𑀢𑁆𑀢𑀸𑀢𑀺 𑀧𑀼𑀦 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀼𑀦 𑀯𑀘𑀦𑀁 𑀦𑀺𑀕𑀫𑀦𑀦𑁆𑀢𑀺 𑀆𑀳 ‘‘𑀦𑀺𑀕𑀫𑀦𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢’’𑀦𑁆𑀢𑀺. 𑀦𑀦𑀼 𑀘 𑀲𑀫𑀸𑀧𑀦𑀯𑀲𑁂𑀦 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀼𑀦 𑀯𑀘𑀦𑀁 𑀦𑀺𑀕𑀫𑀦𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄 𑀑𑀥𑀺𑀲𑁄𑀅𑀦𑁄𑀥𑀺𑀲𑁄𑀨𑀭𑀡𑀸𑀦𑀁 𑀲𑀫𑀸𑀧𑀦𑁂 𑀏𑀯 𑀯𑀼𑀢𑁆𑀢𑀢𑁆𑀢𑀸. 𑀯𑀺𑀧𑀼𑀮𑁂𑀦𑀸𑀢𑀺 𑀫𑀳𑀦𑁆𑀢𑁂𑀦, 𑀫𑀳𑀢𑁆𑀢𑀜𑁆𑀘𑀲𑁆𑀲 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀲𑀼 𑀯𑀺𑀬 𑀆𑀭𑀫𑁆𑀫𑀡𑀲𑁆𑀲 𑀏𑀓𑀤𑁂𑀲𑀫𑁂𑀯 𑀅𑀕𑁆𑀕𑀳𑁂𑀢𑁆𑀯𑀸 𑀅𑀦𑀯𑀲𑁂𑀲𑀕𑁆𑀕𑀳𑀡𑀯𑀲𑁂𑀦𑀸𑀢𑀺 𑀆𑀳 ‘‘𑀨𑀭𑀡𑀯𑀲𑁂𑀦 𑀯𑀺𑀧𑀼𑀮𑀢𑀸 𑀤𑀝𑁆𑀞𑀩𑁆𑀩𑀸’’𑀢𑀺.

𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀤𑀻𑀳𑀺 𑀫𑀳𑀢𑁆𑀢𑀁 𑀕𑀢𑀁, 𑀫𑀳𑀦𑁆𑀢𑁂𑀳𑀺 𑀯𑀸 𑀉𑀴𑀸𑀭𑀘𑁆𑀙𑀦𑁆𑀤𑀘𑀺𑀢𑁆𑀢𑀯𑀻𑀭𑀺𑀬𑀧𑀜𑁆𑀜𑁂𑀳𑀺 𑀕𑀢𑀁 𑀧𑀝𑀺𑀧𑀦𑁆𑀦𑀦𑁆𑀢𑀺 𑀫𑀳𑀕𑁆𑀕𑀢𑀁. 𑀢𑀬𑀺𑀤𑀁 𑀬𑀲𑁆𑀫𑀸 𑀏𑀓𑀦𑁆𑀢𑀢𑁄 𑀭𑀽𑀧𑀸𑀯𑀘𑀭𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀽𑀫𑀺𑀯𑀲𑁂𑀦 𑀫𑀳𑀕𑁆𑀕𑀢’’𑀦𑁆𑀢𑀺. 𑀦𑀺𑀭𑀼𑀴𑁆𑀳𑁄 𑀳𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼 𑀫𑀳𑀕𑁆𑀕𑀢𑀯𑁄𑀳𑀸𑀭𑁄. 𑀧𑀕𑀼𑀡𑀯𑀲𑁂𑀦𑀸𑀢𑀺 𑀧𑀓𑀸𑀭𑀢𑁄 𑀕𑀼𑀡𑀺𑀢𑀁 𑀩𑀳𑀼𑀮𑀻𑀓𑀢𑀁 𑀧𑀕𑀼𑀡𑀁, 𑀢𑀲𑁆𑀲 𑀯𑀲𑁂𑀦, 𑀲𑀼𑀪𑀸𑀯𑀺𑀢𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀁 𑀳𑀺 𑀧𑀫𑀸𑀡𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀧𑁆𑀧𑀫𑀸𑀡𑀁 𑀦𑀸𑀫 𑀳𑁄𑀢𑀺. 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀅𑀧𑀭𑀺𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀓𑀭𑀡𑀯𑀲𑁂𑀦. 𑀲𑀬𑀫𑁆𑀧𑀺 𑀯𑁂𑀭𑀭𑀳𑀺𑀢𑀢𑁆𑀢𑀸, 𑀢𑀁𑀲𑀫𑀗𑁆𑀕𑀺𑀦𑁄 𑀯𑁂𑀭𑀸𑀪𑀸𑀯𑀳𑁂𑀢𑀼𑀢𑁆𑀢𑀸 𑀘 𑀅𑀯𑁂𑀭𑀁. 𑀢𑀬𑀺𑀤𑀁 𑀤𑁆𑀯𑀬𑀁 𑀬𑀢𑁄 𑀮𑀪𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀩𑁆𑀬𑀸𑀧𑀸𑀤𑀧𑀘𑁆𑀘𑀢𑁆𑀣𑀺𑀓𑀧𑁆𑀧𑀳𑀸𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀘𑁂𑀢𑀲𑁄 𑀩𑁆𑀬𑀸𑀧𑀢𑁆𑀢𑀺𑀯𑀲𑁂𑀦 𑀳𑀦𑀦𑀢𑁄 𑀩𑁆𑀬𑀸𑀧𑀚𑁆𑀚𑀁, 𑀘𑁂𑀢𑀲𑀺𑀓𑀁 𑀅𑀲𑀸𑀢𑀁, 𑀢𑀤𑀪𑀸𑀯𑀢𑁄 𑀅𑀩𑁆𑀬𑀸𑀧𑀚𑁆𑀚𑀁. 𑀢𑁂𑀦𑀸𑀳 ‘‘𑀦𑀺𑀤𑁆𑀤𑀼𑀓𑁆𑀔’’𑀦𑁆𑀢𑀺. 𑀢𑀁 𑀧𑀦𑀲𑁆𑀲 𑀅𑀩𑁆𑀬𑀸𑀧𑀚𑁆𑀚𑀢𑁆𑀢𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀺𑀬 𑀦 𑀲𑀪𑀸𑀯𑀢𑁄, 𑀅𑀣 𑀔𑁄 𑀧𑀘𑁆𑀘𑀢𑁆𑀣𑀺𑀓𑀯𑀺𑀯𑁂𑀓𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁄𑀫𑀦𑀲𑁆𑀲𑀧𑁆𑀧𑀳𑀸𑀦𑀢𑁄’’𑀢𑀺 𑀆𑀳. 𑀅𑀬𑀦𑁆𑀢𑀺 𑀇𑀥 𑀬𑀣𑀸𑀦𑀻𑀢𑀁 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁂 (𑀯𑀺𑀪. 𑁬𑁪𑁨), 𑀢𑁂𑀲𑀼 𑀢𑁂𑀲𑀼 𑀘 𑀲𑀼𑀢𑁆𑀢𑀧𑀤𑁂𑀲𑁂𑀲𑀼 (𑀫. 𑀦𑀺. 𑁧.𑁪𑁫𑁯; 𑁨.𑁩𑁦𑁯, 𑁩𑁧𑁫) 𑀆𑀕𑀢𑀁 𑀫𑁂𑀢𑁆𑀢𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀺𑀓𑀼𑀩𑁆𑀩𑀦𑀫𑀸𑀳.

𑁨𑁫𑁫. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 𑀇𑀫𑀺𑀲𑁆𑀲𑀸 ‘‘𑀧𑀜𑁆𑀘𑀳𑀸𑀓𑀸𑀭𑁂𑀳𑀺, 𑀲𑀢𑁆𑀢𑀳𑀸𑀓𑀸𑀭𑁂𑀳𑀺, 𑀤𑀲𑀳𑀸𑀓𑀸𑀭𑁂𑀳𑀻’’𑀢𑀺 𑀆𑀓𑀸𑀭𑀯𑀺𑀪𑀸𑀕𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁨.𑁨𑁨) 𑀯𑀼𑀢𑁆𑀢𑀸𑀬 𑀘 𑀯𑀺𑀓𑀼𑀩𑁆𑀩𑀦𑀸𑀬 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀲𑁆𑀲 𑀯𑀺𑀬 𑀪𑁂𑀤𑀸𑀪𑀸𑀯𑀫𑀼𑀧𑀲𑀁𑀳𑀭𑀢𑀺 𑀑𑀥𑀺𑀲𑁄𑀨𑀭𑀡𑀅𑀦𑁄𑀥𑀺𑀲𑁄𑀨𑀭𑀡𑀤𑀺𑀲𑀸𑀨𑀭𑀡𑀯𑀲𑁂𑀦 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸. 𑀓𑁂𑀯𑀮𑀁 𑀧𑀦𑁂𑀢𑁆𑀣 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁨.𑁨𑁨) 𑀯𑀺𑀬 𑀲𑀢𑁆𑀢𑁄𑀥𑀺 𑀦 𑀕𑀳𑀺𑀢𑁄𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀬𑀫𑁆𑀧𑀻𑀢𑀺 𑀯𑀺𑀓𑀼𑀩𑁆𑀩𑀦𑀁 𑀲𑀦𑁆𑀥𑀸𑀬𑀸𑀳.

𑀇𑀤𑀸𑀦𑀺 𑀪𑁂𑀤𑀸𑀪𑀸𑀯𑀤𑀲𑁆𑀲𑀦𑀫𑀼𑀔𑁂𑀦 𑀉𑀤𑁆𑀤𑁂𑀲𑀢𑁄 𑀆𑀦𑀻𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀁 𑀦𑀺𑀤𑁆𑀤𑁂𑀲𑀢𑁄 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲𑀸 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀁 𑀓𑀸𑀢𑀼𑀁 ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳.

𑁨𑁫𑁬. 𑀢𑀢𑁆𑀣 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀲𑀩𑁆𑀩-𑀲𑀤𑁆𑀤𑁄 𑀓𑀸𑀫𑀁 𑀧𑀤𑁂𑀲𑀲𑀩𑁆𑀩𑀯𑀺𑀲𑀬𑁄, 𑀦 𑀲𑀩𑁆𑀩𑀲𑀩𑁆𑀩𑀯𑀺𑀲𑀬𑁄 𑀬𑀣𑀸 ‘‘𑀲𑀩𑁆𑀩𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁧𑁯-𑁧𑁨𑁦), ‘‘𑀲𑀢𑁆𑀢𑀸’’𑀢𑀺 𑀧𑀦 𑀧𑀤𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀅𑀲𑁂𑀲𑁂𑀢𑁆𑀯𑀸𑀯 𑀧𑀭𑀺𑀬𑀸𑀤𑀺𑀬𑀢𑀻𑀢𑀺 𑀆𑀳 ‘‘𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀫𑁂𑀢’’𑀦𑁆𑀢𑀺.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀭𑀽𑀧𑁂. 𑀲𑀢𑁆𑀢𑁄𑀢𑀺 𑀲𑀚𑁆𑀚𑀦𑀓𑀺𑀘𑁆𑀘𑁂𑀦 𑀙𑀦𑁆𑀤𑀸𑀤𑀺𑀧𑀭𑀺𑀬𑀸𑀬𑁂𑀦 𑀮𑁄𑀪𑁂𑀦 𑀆𑀲𑀢𑁆𑀢𑁄 𑀮𑀕𑁆𑀕𑁄. 𑀢𑀢𑁆𑀭𑀸𑀢𑀺 𑀯𑀸 𑀓𑀭𑀡𑁂 𑀪𑀼𑀫𑁆𑀫𑀁, 𑀢𑁂𑀦 𑀙𑀦𑁆𑀤𑀸𑀤𑀺𑀦𑀸𑀢𑀺 𑀅𑀢𑁆𑀣𑁄.

𑀬𑀤𑀺 𑀲𑀢𑁆𑀢𑀢𑀸𑀬 𑀲𑀢𑁆𑀢𑀸, 𑀓𑀣𑀁 𑀯𑀻𑀢𑀭𑀸𑀕𑁂𑀲𑀽𑀢𑀺 𑀆𑀳 ‘‘𑀭𑀼𑀴𑁆𑀳𑀻𑀲𑀤𑁆𑀤𑁂𑀦𑀸’’𑀢𑀺𑀆𑀤𑀺. 𑀅𑀯𑀻𑀢𑀭𑀸𑀕𑁂𑀲𑀼 𑀭𑀼𑀴𑁆𑀳𑁂𑀦, 𑀅𑀯𑀻𑀢𑀭𑀸𑀕𑁂𑀲𑀼 𑀯𑀸 𑀧𑀯𑀢𑁆𑀢𑀺𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀔𑀦𑁆𑀥𑀲𑀦𑁆𑀢𑀸𑀦𑀢𑀸𑀬 𑀢𑀁𑀲𑀤𑀺𑀲𑁂𑀲𑀼 𑀯𑀻𑀢𑀭𑀸𑀕𑁂𑀲𑀼 𑀭𑀼𑀴𑁆𑀳𑁂𑀦 𑀲𑀤𑁆𑀤𑁂𑀦. 𑀅𑀣 𑀯𑀸 𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑀺𑀧𑀺 𑀅𑀜𑁆𑀜𑀲𑁆𑀫𑀺𑀁 𑀢𑀦𑁆𑀦𑀺𑀫𑀺𑀢𑁆𑀢𑀬𑀼𑀢𑁆𑀢𑁂 𑀓𑀢𑁆𑀣𑀘𑀺 𑀯𑀺𑀲𑀬𑁂 𑀲𑀫𑁆𑀫𑀼𑀢𑀺𑀬𑀸 𑀘𑀺𑀭𑀓𑀸𑀮𑀢𑀸𑀬 𑀦𑀺𑀫𑀺𑀢𑁆𑀢𑀯𑀺𑀭𑀳𑁂𑀧𑀺 𑀧𑀯𑀢𑁆𑀢𑀺 𑀭𑀼𑀴𑁆𑀳𑀻 𑀦𑀸𑀫 𑀬𑀣𑀸 ‘‘𑀕𑀘𑁆𑀙𑀦𑁆𑀢𑀻𑀢𑀺 𑀕𑀸𑀯𑁄’’𑀢𑀺, 𑀏𑀯𑀁 𑀲𑀢𑁆𑀢𑀲𑀤𑁆𑀤𑀲𑁆𑀲𑀸𑀧𑀺 𑀭𑀼𑀴𑁆𑀳𑀻𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀯𑀸 𑀯𑀻𑀢𑀭𑀸𑀕𑁂𑀲𑀼 𑀲𑀢𑁆𑀢𑀯𑁄𑀳𑀸𑀭𑁄 𑀤𑀝𑁆𑀞𑀩𑁆𑀩𑁄. 𑀲𑀢𑁆𑀯𑀬𑁄𑀕𑀢𑁄𑀢𑀺 𑀏𑀢𑁆𑀣 𑀲𑀢𑁆𑀯𑀁 𑀦𑀸𑀫 𑀩𑀼𑀤𑁆𑀥𑀺, 𑀯𑀻𑀭𑀺𑀬𑀁, 𑀢𑁂𑀚𑁄 𑀯𑀸, 𑀢𑁂𑀦 𑀬𑁄𑀕𑀢𑁄 𑀲𑀢𑁆𑀢𑀸, 𑀬𑀣𑀸 ‘‘𑀦𑀻𑀮𑀕𑀼𑀡𑀬𑁄𑀕𑀢𑁄 𑀦𑀻𑀮𑁄 𑀧𑀝𑁄’’𑀢𑀺.

𑀧𑀸𑀡𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀸𑀡𑀦𑀁, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀢𑀲𑁆𑀲 𑀓𑀫𑁆𑀫𑀁 𑀧𑀸𑀡𑀦𑀢𑀸, 𑀢𑀸𑀬, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀫𑁆𑀧𑀬𑁄𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀪𑀽𑀢𑀢𑁆𑀢𑀸𑀢𑀺 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀚𑀸𑀢𑀢𑁆𑀢𑀸. 𑀧𑀽𑀭𑀡𑀢𑁄, 𑀕𑀮𑀦𑀢𑁄 𑀘 𑀧𑀼𑀕𑁆𑀕𑀮𑀸𑀢𑀺 𑀦𑁂𑀭𑀼𑀢𑁆𑀢𑀸. 𑀲𑀢𑁆𑀢𑀸 𑀳𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀸 𑀢𑀁𑀢𑀁𑀲𑀢𑁆𑀢𑀦𑀺𑀓𑀸𑀬𑀁 𑀧𑀽𑀭𑁂𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀲𑀩𑁆𑀩𑀸𑀯𑀢𑁆𑀣𑀦𑀺𑀧𑀸𑀢𑀺𑀢𑀸𑀬 𑀘 𑀕𑀮𑀦𑁆𑀢𑀺 𑀘𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀁 ‘‘𑀅𑀢𑁆𑀢𑀸’’𑀢𑀺 𑀪𑀯𑀢𑀺 𑀏𑀢𑁆𑀣 𑀅𑀪𑀺𑀥𑀸𑀦𑀁, 𑀘𑀺𑀢𑁆𑀢𑀜𑁆𑀘𑀸𑀢𑀺 𑀅𑀢𑁆𑀢𑀪𑀸𑀯𑁄, 𑀲𑀭𑀻𑀭𑀁, 𑀔𑀦𑁆𑀥𑀧𑀜𑁆𑀘𑀓𑀫𑁂𑀯 𑀯𑀸. 𑀢𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀁. 𑀉𑀧𑀸𑀤𑀸𑀬𑀸𑀢𑀺 𑀕𑀳𑁂𑀢𑁆𑀯𑀸 𑀉𑀧𑀸𑀤𑀸𑀦𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀲𑀫𑁆𑀪𑀯𑀢𑁄𑀢𑀺 𑀧𑀭𑀫𑀢𑁆𑀣𑀢𑁄 𑀅𑀲𑀦𑁆𑀢𑁂𑀧𑀺 𑀲𑀢𑁆𑀢𑀲𑀜𑁆𑀜𑀺𑀢𑁂 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑁂𑀦 𑀲𑀫𑁆𑀪𑀯𑀢𑁄.

𑀬𑀣𑀸 𑀘 𑀲𑀢𑁆𑀢𑀸𑀢𑀺 𑀯𑀘𑀦𑀦𑁆𑀢𑀺 𑀬𑀣𑀸 𑀲𑀢𑁆𑀢-𑀲𑀤𑁆𑀤𑁄 𑀬𑀣𑀸𑀯𑀼𑀢𑁆𑀢𑁂𑀦𑀝𑁆𑀞𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀤𑁂𑀲𑀯𑀼𑀢𑁆𑀢𑀺𑀧𑀺 𑀭𑀼𑀴𑁆𑀳𑀻𑀯𑀲𑁂𑀦 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀬𑀓𑁄. 𑀲𑁂𑀲𑀸𑀦𑀺𑀧𑀻𑀢𑀺 𑀧𑀸𑀡𑀸𑀤𑀺𑀯𑀘𑀦𑀸𑀦𑀺𑀧𑀺. 𑀢𑀸𑀦𑀺𑀧𑀺 𑀳𑀺 𑀭𑀽𑀧𑀸𑀭𑀽𑀧𑀪𑀯𑀽𑀧𑀕𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀤𑀺𑀲𑀫𑀗𑁆𑀕𑀻𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀪𑀸𑀯𑀢𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸𑀦𑀁 𑀧𑀼𑀕𑀮𑀦𑀲𑁆𑀲 𑀅𑀪𑀸𑀯𑀢𑁄 𑀧𑀤𑁂𑀲𑀯𑀼𑀢𑁆𑀢𑀻𑀦𑀺. 𑀭𑀼𑀴𑁆𑀳𑀻𑀯𑀲𑁂𑀦 𑀆𑀭𑁄𑀧𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀸𑀬 𑀭𑀼𑀴𑁆𑀳𑀺𑀬𑀸 𑀯𑀲𑁂𑀦 𑀓𑀢𑁆𑀣𑀘𑀺 𑀯𑀺𑀲𑀬𑁂 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀧𑀸𑀡𑀧𑀼𑀕𑁆𑀕𑀮𑀪𑀸𑀯𑀁 𑀆𑀭𑁄𑀧𑁂𑀢𑁆𑀯𑀸. 𑀬𑀤𑀺 𑀲𑀸𑀥𑀸𑀭𑀡𑀢𑁄 𑀲𑀢𑁆𑀢𑀯𑁂𑀯𑀘𑀦𑀸𑀦𑀻𑀢𑀺 𑀕𑀳𑁂𑀢𑁆𑀯𑀸 𑀅𑀦𑁄𑀥𑀺𑀲𑁄𑀨𑀭𑀡𑀸 𑀫𑁂𑀢𑁆𑀢𑀸 𑀯𑀼𑀘𑁆𑀘𑀢𑀺, 𑀅𑀣 𑀓𑀲𑁆𑀫𑀸 𑀧𑀜𑁆𑀘𑀳𑁂𑀯 𑀆𑀓𑀸𑀭𑁂𑀳𑀺 𑀯𑀼𑀢𑁆𑀢𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀸𑀫𑀜𑁆𑀘𑀸’’𑀢𑀺𑀆𑀤𑀺. 𑀓𑁂𑀘𑀺 𑀧𑀦𑀸𑀳𑀼 ‘‘𑀦 𑀔𑁄 𑀧𑀦𑁂𑀢𑀸𑀦𑀺 ‘‘𑀲𑀢𑁆𑀢𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀯𑁂𑀯𑀘𑀦𑀢𑀸𑀫𑀢𑁆𑀢𑀁 𑀉𑀧𑀸𑀤𑀸𑀬 𑀕𑀳𑀺𑀢𑀸𑀦𑀺, 𑀬𑀢𑁄 𑀚𑀦𑁆𑀢𑀼𑀆𑀤𑀻𑀦𑀫𑁆𑀧𑀺 𑀕𑀳𑀡𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀢𑁆𑀣𑀯𑀺𑀲𑁂𑀲𑀁 𑀧𑀦 𑀦𑀺𑀫𑀺𑀢𑁆𑀢𑀪𑀽𑀢𑀁 𑀉𑀧𑀸𑀤𑀸𑀬 𑀕𑀳𑀺𑀢𑀸𑀦𑀻’’𑀢𑀺, 𑀢𑁂 𑀲𑀦𑁆𑀥𑀸𑀬𑀸𑀳 ‘‘𑀬𑁂 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀢𑁆𑀣𑀢𑁄𑀢𑀺 𑀲𑀚𑁆𑀚𑀦𑀝𑁆𑀞𑁂𑀦 𑀲𑀢𑁆𑀢𑀸, 𑀧𑀸𑀡𑀦𑀝𑁆𑀞𑁂𑀦 𑀧𑀸𑀡𑀸𑀢𑀺 𑀏𑀯𑀫𑀸𑀤𑀺𑀅𑀢𑁆𑀣𑀢𑁄. 𑀢𑁂𑀲𑀁 𑀢𑀁 𑀫𑀢𑀺𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁄𑀥𑀺𑀲𑁄𑀨𑀭𑀡𑀸 𑀯𑀺𑀭𑀼𑀚𑁆𑀛𑀢𑀻’’𑀢𑀺. 𑀓𑀲𑁆𑀫𑀸? 𑀓𑁂𑀘𑀺 𑀲𑀢𑁆𑀢𑀸, 𑀓𑁂𑀘𑀺 𑀧𑀸𑀡𑀸, 𑀓𑁂𑀘𑀺 𑀧𑀼𑀕𑁆𑀕𑀮𑀸𑀢𑀺 𑀆𑀧𑀚𑁆𑀚𑀦𑀢𑁄. 𑀢𑀣𑀸 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀲𑀢𑁆𑀢𑀸𑀤𑀺𑀲𑀤𑁆𑀤𑀸 𑀲𑀧𑁆𑀧𑀤𑁂𑀲𑀯𑀺𑀲𑀬𑀸𑀢𑀺 𑀏𑀯𑀫𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀦𑀺𑀧𑁆𑀧𑀤𑁂𑀲𑀯𑀺𑀲𑀬𑀸𑀢𑀺 𑀏𑀯𑀫𑀢𑁆𑀣𑀁 𑀕𑀳𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀇𑀫𑁂𑀲𑀽’’𑀢𑀺𑀆𑀤𑀺. 𑀧𑀜𑁆𑀘𑀲𑀼 𑀆𑀓𑀸𑀭𑁂𑀲𑀽𑀢𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 (𑀧𑀝𑀺. 𑀫. 𑁨.𑁨𑁨) 𑀆𑀕𑀢𑁂𑀲𑀼 𑀧𑀜𑁆𑀘𑀲𑀼 𑀪𑀸𑀯𑀦𑀸𑀓𑀸𑀭𑁂𑀲𑀼. 𑀅𑀜𑁆𑀜𑀢𑀭𑀯𑀲𑁂𑀦𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀲𑁂𑀦.

𑁨𑁫𑁭. 𑀇𑀤𑀸𑀦𑀺 𑀤𑁆𑀯𑀸𑀯𑀻𑀲𑀢𑀺𑀬𑀸 𑀪𑀸𑀯𑀦𑀸𑀓𑀸𑀭𑁂𑀲𑀼 𑀅𑀧𑁆𑀧𑀦𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑁆𑀬𑀸𑀧𑀸𑀤𑀭𑀳𑀺𑀢𑀸𑀢𑀺 𑀤𑁄𑀫𑀦𑀲𑁆𑀲𑀩𑁆𑀬𑀸𑀧𑀸𑀤𑀭𑀳𑀺𑀢𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀬𑀣𑀸𑀯𑀼𑀢𑁆𑀢𑀆𑀓𑀸𑀭𑀯𑀺𑀪𑀸𑀕𑀫𑀢𑁆𑀢𑀢𑁄 𑀅𑀧𑁆𑀧𑀦𑀸𑀯𑀺𑀪𑀸𑀕𑁄, 𑀢𑀲𑁆𑀫𑀸. 𑀇𑀫𑁂𑀲𑀼𑀧𑀺 𑀧𑀤𑁂𑀲𑀽𑀢𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀓𑁄𑀝𑁆𑀞𑀸𑀲𑁂𑀲𑀼𑀧𑀺. 𑀬𑀁 𑀬𑀁 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀬𑀤𑀺𑀧𑀺 𑀧𑀼𑀩𑁆𑀩𑀪𑀸𑀕𑁂 𑀢𑀢𑁆𑀣 𑀢𑀢𑁆𑀣 𑀅𑀪𑀺𑀦𑀺𑀯𑁂𑀲𑁂 𑀅𑀦𑁂𑀓𑀓𑁄𑀝𑁆𑀞𑀸𑀲𑀯𑀲𑁂𑀦𑁂𑀯 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀢𑀺, 𑀪𑀸𑀯𑀦𑀸𑀬 𑀲𑀫𑀺𑀚𑁆𑀛𑀦𑀓𑁆𑀔𑀡𑁂 𑀧𑀦 𑀢𑀢𑁆𑀣 𑀬𑀁 𑀧𑀕𑀼𑀡𑀢𑀭𑀢𑀸𑀬 𑀲𑀼𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀲 𑀯𑀲𑁂𑀦 𑀅𑀧𑁆𑀧𑀦𑀸 𑀳𑁄𑀢𑀺, 𑀬𑀣𑀸 𑀢𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂. 𑀢𑀢𑁆𑀣 𑀧𑀦 𑀆𑀭𑀫𑁆𑀫𑀡𑀁, 𑀇𑀥 𑀪𑀸𑀯𑀦𑀸𑀓𑀸𑀭𑁄𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀘𑀢𑀼𑀦𑁆𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁. 𑀩𑁆𑀬𑀸𑀧𑀦𑀺𑀘𑁆𑀙𑀸𑀮𑁄𑀧𑁂𑀦 𑀳𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁 𑀢𑁂𑀲𑀁 𑀧𑀘𑀼𑀭𑀢𑁄 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑀢𑀺𑀬𑀸 𑀧𑀦 𑀧𑀓𑀢𑀺 𑀬𑀤𑀺𑀧𑀺 𑀧𑀞𑀫𑀤𑀼𑀓𑁂𑀦 𑀦 𑀲𑀗𑁆𑀕𑀳𑀺𑀢𑀸, 𑀤𑀼𑀢𑀺𑀬𑀤𑀼𑀓𑁂𑀦 𑀧𑀦 𑀢𑀺𑀓𑁂𑀦 𑀘 𑀲𑀗𑁆𑀕𑀳𑀺𑀢𑀸 𑀏𑀯.

𑀇𑀢𑀺 𑀲𑀩𑁆𑀩𑀸𑀦𑀺𑀧𑀻𑀢𑀺 𑀅𑀦𑁄𑀥𑀺𑀲𑁄𑀨𑀭𑀡𑁂 𑀯𑀻𑀲𑀢𑀺, 𑀑𑀥𑀺𑀲𑁄𑀨𑀭𑀡𑁂 𑀅𑀝𑁆𑀞𑀯𑀻𑀲𑀢𑀺, 𑀤𑀺𑀲𑀸𑀨𑀭𑀡𑁂 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺, 𑀅𑀲𑀻𑀢𑀺 𑀘𑀸𑀢𑀺 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺. 𑀲𑀢-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄.

𑁨𑁫𑁮. 𑀏𑀯𑀁 𑀫𑁂𑀢𑁆𑀢𑀸𑀪𑀸𑀯𑀦𑀁 𑀯𑀺𑀪𑀸𑀯𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀆𑀦𑀺𑀲𑀁𑀲𑁂 𑀯𑀺𑀪𑀸𑀯𑁂𑀢𑀼𑀁 ‘‘𑀇𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑁂𑀲𑀸 𑀚𑀦𑀸𑀢𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀮𑀸𑀪𑀺𑀦𑁄. 𑀲𑀫𑁆𑀧𑀭𑀺𑀯𑀢𑁆𑀢𑀫𑀸𑀦𑀸𑀢𑀺 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀅𑀲𑀬𑀺𑀢𑁆𑀯𑀸 𑀲𑀩𑁆𑀩𑀲𑁄 𑀧𑀭𑀺𑀯𑀢𑁆𑀢𑀫𑀸𑀦𑀸. 𑀓𑀸𑀓𑀘𑁆𑀙𑀫𑀸𑀦𑀸𑀢𑀺 𑀖𑀼𑀭𑀼𑀖𑀼𑀭𑀼𑀧𑀲𑁆𑀲𑀸𑀲𑀯𑀲𑁂𑀦 𑀯𑀺𑀲𑁆𑀲𑀭𑀁 𑀓𑀭𑁄𑀦𑁆𑀢𑀸. 𑀲𑀼𑀔𑀁 𑀲𑀼𑀧𑀢𑀻𑀢𑀺 𑀏𑀢𑁆𑀣 𑀤𑀼𑀯𑀺𑀥𑀸𑀲𑀼𑀧𑀦𑀸 𑀲𑀬𑀦𑁂 𑀧𑀺𑀝𑁆𑀞𑀺𑀧𑁆𑀧𑀲𑀸𑀭𑀡𑀮𑀓𑁆𑀔𑀡𑀸, 𑀓𑀺𑀭𑀺𑀬𑀸𑀫𑀬𑀘𑀺𑀢𑁆𑀢𑁂𑀳𑀺 𑀅𑀯𑁄𑀓𑀺𑀡𑁆𑀡𑀪𑀯𑀗𑁆𑀕𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀘. 𑀢𑀢𑁆𑀣𑀸𑀬𑀁 𑀉𑀪𑀬𑀣𑀸𑀧𑀺 𑀲𑀼𑀔𑀫𑁂𑀯 𑀲𑀼𑀧𑀢𑀺. 𑀬𑀲𑁆𑀫𑀸 𑀲𑀡𑀺𑀓𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀲𑀫𑁄𑀥𑀸𑀬 𑀧𑀸𑀲𑀸𑀤𑀺𑀓𑁂𑀦 𑀆𑀓𑀸𑀭𑁂𑀦 𑀲𑀬𑀢𑀺, 𑀦𑀺𑀤𑁆𑀤𑁄𑀓𑁆𑀓𑀫𑀦𑁂𑀧𑀺 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄 𑀯𑀺𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀏𑀯𑀁 𑀅𑀲𑀼𑀧𑀺𑀢𑁆𑀯𑀸’’𑀢𑀺𑀆𑀤𑀺.

𑀦𑀺𑀤𑁆𑀤𑀸𑀓𑀸𑀮𑁂 𑀲𑀼𑀔𑀁 𑀅𑀮𑀪𑀺𑀢𑁆𑀯𑀸 𑀤𑀼𑀓𑁆𑀔𑁂𑀦 𑀲𑀼𑀢𑁆𑀢𑀢𑁆𑀢𑀸 𑀏𑀯 𑀧𑀝𑀺𑀩𑀼𑀚𑁆𑀛𑀦𑀓𑀸𑀮𑁂 𑀲𑀭𑀻𑀭𑀔𑁂𑀤𑁂𑀦 𑀦𑀺𑀢𑁆𑀣𑀼𑀦𑀦𑀁, 𑀯𑀺𑀚𑀫𑁆𑀪𑀦𑀁, 𑀇𑀢𑁄 𑀘𑀺𑀢𑁄 𑀯𑀺𑀧𑀭𑀺𑀯𑀢𑁆𑀢𑀦𑀜𑁆𑀘 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀢𑁆𑀣𑀼𑀦𑀦𑁆𑀢𑀸 𑀯𑀺𑀚𑀫𑁆𑀪𑀦𑁆𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀦𑁆𑀢𑀸 𑀤𑀼𑀓𑁆𑀔𑀁 𑀧𑀝𑀺𑀩𑀼𑀚𑁆𑀛𑀦𑁆𑀢𑀻’’𑀢𑀺. 𑀅𑀬𑀁 𑀧𑀦 𑀲𑀼𑀔𑁂𑀦 𑀲𑀼𑀢𑁆𑀢𑀢𑁆𑀢𑀸 𑀲𑀭𑀻𑀭𑀔𑁂𑀤𑀸𑀪𑀸𑀯𑀢𑁄 𑀦𑀺𑀢𑁆𑀣𑀼𑀦𑀦𑀸𑀤𑀺𑀭𑀳𑀺𑀢𑁄𑀯 𑀧𑀝𑀺𑀩𑀼𑀚𑁆𑀛𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀅𑀧𑁆𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸’’𑀢𑀺𑀆𑀤𑀺. 𑀲𑀼𑀔𑀧𑀝𑀺𑀩𑁄𑀥𑁄 𑀘 𑀲𑀭𑀻𑀭𑀯𑀺𑀓𑀸𑀭𑀸𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀲𑀼𑀔𑀁 𑀦𑀺𑀩𑁆𑀩𑀺𑀓𑀸𑀭’’𑀦𑁆𑀢𑀺.

‘‘𑀪𑀤𑁆𑀤𑀓𑀫𑁂𑀯 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺 𑀇𑀤𑀁 𑀅𑀦𑀼𑀪𑀽𑀢𑀧𑀼𑀩𑁆𑀩𑀯𑀲𑁂𑀦, 𑀤𑁂𑀯𑀢𑀽𑀧𑀲𑀁𑀳𑀸𑀭𑀯𑀲𑁂𑀦 𑀘𑀲𑁆𑀲 𑀪𑀤𑁆𑀤𑀓𑀫𑁂𑀯 𑀲𑀼𑀧𑀺𑀦𑀁 𑀳𑁄𑀢𑀺, 𑀦 𑀧𑀸𑀧𑀓𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑁄 𑀯𑀺𑀬𑀸’’𑀢𑀺𑀆𑀤𑀺. 𑀥𑀸𑀢𑀼𑀓𑁆𑀔𑁄𑀪𑀳𑁂𑀢𑀼𑀓𑀫𑁆𑀧𑀺 𑀘𑀲𑁆𑀲 𑀩𑀳𑀼𑀮𑀁 𑀪𑀤𑁆𑀤𑀓𑀫𑁂𑀯 𑀲𑀺𑀬𑀸 𑀬𑁂𑀪𑀼𑀬𑁆𑀬𑁂𑀦 𑀘𑀺𑀢𑁆𑀢𑀚𑀭𑀽𑀧𑀸𑀦𑀼𑀕𑀼𑀡𑀢𑀸𑀬 𑀉𑀢𑀼𑀆𑀳𑀸𑀭𑀚𑀭𑀽𑀧𑀸𑀦𑀁.

𑀉𑀭𑁂 𑀆𑀫𑀼𑀢𑁆𑀢𑀫𑀼𑀢𑁆𑀢𑀸𑀳𑀸𑀭𑁄 𑀯𑀺𑀬𑀸𑀢𑀺 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀉𑀭𑁂 𑀮𑀫𑁆𑀩𑀺𑀢𑀫𑀼𑀢𑁆𑀢𑀸𑀳𑀸𑀭𑁄 𑀯𑀺𑀬𑀸𑀢𑀺 𑀓𑁂𑀳𑀺𑀘𑀺 𑀯𑀼𑀢𑁆𑀢𑀁. 𑀢𑀁 𑀏𑀓𑀸𑀯𑀮𑀺𑀯𑀲𑁂𑀦 𑀯𑀼𑀢𑁆𑀢𑀁 𑀲𑀺𑀬𑀸, 𑀅𑀦𑁂𑀓𑀭𑀢𑀦𑀸𑀯𑀮𑀺𑀲𑀫𑀽𑀳𑀪𑀽𑀢𑁄 𑀧𑀦 𑀫𑀼𑀢𑁆𑀢𑀸𑀳𑀸𑀭𑁄 𑀅𑀁𑀲𑀧𑁆𑀧𑀤𑁂𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀝𑀺𑀧𑁆𑀧𑀤𑁂𑀲𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀸 𑀧𑀮𑀫𑁆𑀩𑀦𑁆𑀢𑁄 𑀉𑀭𑁂 𑀆𑀫𑀼𑀓𑁆𑀓𑁄𑀬𑁂𑀯 𑀦𑀸𑀫 𑀳𑁄𑀢𑀺.

𑀢𑀢𑁆𑀣𑁂𑀯𑀸𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑁂𑀬𑁂𑀯. 𑀲𑀓𑁆𑀓𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀸 𑀤𑁂𑀲𑀲𑁆𑀲 𑀔𑁂𑀫𑀢𑀸𑀬, 𑀢𑀲𑁆𑀲 𑀢𑀲𑁆𑀲 𑀧𑀤𑁂𑀲𑀲𑁆𑀲 𑀭𑀫𑀡𑀻𑀬𑀢𑀸𑀬 𑀘.

𑀤𑀲𑀸𑀯 𑀅𑀦𑁆𑀢𑁄 𑀤𑀲𑀦𑁆𑀢𑁄, 𑀯𑀢𑁆𑀣𑀲𑁆𑀲 𑀑𑀲𑀸𑀦𑀦𑁆𑀢𑁄.

𑀲𑀫𑀧𑁆𑀧𑀯𑀢𑁆𑀢𑀯𑀸𑀲𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀭𑁂 𑀲𑀫𑀧𑁆𑀧𑀯𑀢𑁆𑀢𑀯𑀢𑁆𑀢𑀯𑀸𑀲𑀁. 𑀣𑁂𑀭𑁄 𑀓𑀺𑀭 𑀅𑀢𑁆𑀢𑀦𑀸 𑀧𑀯𑀺𑀝𑁆𑀞𑀧𑀯𑀺𑀝𑁆𑀞𑀯𑀺𑀳𑀸𑀭𑁂 ‘‘𑀅𑀳𑀫𑁂𑀢𑁆𑀣 𑀆𑀕𑀦𑁆𑀢𑀼𑀓𑁄’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀯𑀢𑁆𑀢𑀸𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑁄 𑀏𑀯 𑀯𑀺𑀳𑀸𑀲𑀺. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀲𑀫𑀧𑁆𑀧𑀯𑀢𑁆𑀢𑀫𑁂𑀢𑁆𑀢𑀸𑀯𑀺𑀳𑀸𑀭𑀯𑀸𑀲𑀁. 𑀅𑀬𑀁 𑀳𑀺 𑀣𑁂𑀭𑁄 𑀅𑀭𑀳𑀢𑁆𑀢𑀸𑀥𑀺𑀕𑀫𑀢𑁄 𑀧𑀼𑀩𑁆𑀩𑁂𑀧𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀅𑀳𑁄𑀲𑀺.

𑀯𑀦𑀦𑁆𑀢𑀭𑁂 𑀞𑀺𑀢𑁄𑀢𑀺 𑀣𑁂𑀭𑁄 𑀓𑀺𑀭 𑀢𑀣𑀸 𑀲𑀫𑀧𑁆𑀧𑀯𑀢𑁆𑀢𑀯𑀸𑀲𑀯𑀲𑁂𑀦 𑀘𑀭𑀫𑀸𑀦𑁄 𑀏𑀓𑀤𑀺𑀯𑀲𑀁 𑀅𑀜𑁆𑀜𑀢𑀭𑀁 𑀭𑀫𑀡𑀻𑀬𑀁 𑀯𑀦𑀦𑁆𑀢𑀭𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀢𑀢𑁄 𑀉𑀝𑁆𑀞𑀺𑀢𑁄 𑀅𑀢𑁆𑀢𑀦𑁄 𑀕𑀼𑀡𑀸𑀯𑀚𑁆𑀚𑀦𑀳𑁂𑀢𑀼𑀓𑁂𑀦 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀉𑀤𑀸𑀦𑁂𑀦𑁆𑀢𑁄 ‘‘𑀬𑀸𑀯𑀢𑀸 𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀕𑀸𑀣𑀁 𑀅𑀪𑀸𑀲𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀦𑀦𑁆𑀢𑀭𑁂 𑀞𑀺𑀢𑁄’’𑀢𑀺 𑀧𑀞𑀫𑀕𑀸𑀣𑀸 𑀞𑀧𑀺𑀢𑀸. 𑀢𑀢𑁆𑀣 𑀕𑀚𑁆𑀚𑀫𑀸𑀦𑀓𑁄𑀢𑀺 𑀲𑀻𑀳𑀕𑀚𑁆𑀚𑀺𑀢𑀁 𑀕𑀚𑁆𑀚𑀦𑁆𑀢𑁄. 𑀕𑀼𑀡𑀫𑁂𑀲𑀦𑁆𑀢𑁄𑀢𑀺 𑀅𑀢𑁆𑀢𑀦𑁄 𑀕𑀼𑀡𑀲𑀫𑀼𑀤𑀬𑀁 𑀕𑀯𑁂𑀲𑀦𑁆𑀢𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄.

𑀫𑀡𑀺𑀮𑀭𑀼𑀓𑁆𑀔𑁂 𑀦𑀺𑀯𑀸𑀲𑀺𑀢𑀸𑀬 𑀢𑀁 𑀤𑁂𑀯𑀢𑀁 ‘‘𑀫𑀡𑀺𑀮𑀺𑀬𑀸’’𑀢𑀺 𑀯𑁄𑀳𑀭𑀦𑁆𑀢𑀺, 𑀢𑀲𑁆𑀫𑀸 𑀲𑀸 𑀤𑁂𑀯𑀢𑀸𑀧𑀺 ‘‘𑀅𑀳𑀁, 𑀪𑀦𑁆𑀢𑁂, 𑀫𑀡𑀺𑀮𑀺𑀬𑀸’’𑀢𑀺 𑀆𑀳. 𑀭𑀼𑀓𑁆𑀔𑀤𑁂𑀯𑀢𑀸𑀦𑀁 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀦𑀺𑀯𑀸𑀲𑀭𑀼𑀓𑁆𑀔𑀯𑀲𑁂𑀦 𑀯𑁄𑀳𑀸𑀭𑁄 𑀬𑀣𑀸 𑀨𑀦𑁆𑀤𑀦𑀤𑁂𑀯𑀢𑀸𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀘𑀺𑀢𑁆𑀢𑀮𑀧𑀩𑁆𑀩𑀢𑁂𑀬𑁂𑀯.

‘‘𑀩𑀮𑀯𑀧𑀺𑀬𑀘𑀺𑀢𑁆𑀢𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀩𑀮𑀯𑀧𑀺𑀬𑀘𑀺𑀢𑁆𑀢𑀢𑀸𑀫𑀢𑁆𑀢𑁂𑀦𑀧𑀺 𑀲𑀢𑁆𑀣𑀁 𑀦 𑀓𑀫𑀢𑀺, 𑀧𑀕𑁂𑀯 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀤𑀲𑁆𑀲𑁂𑀢𑀺.

𑀔𑀺𑀧𑁆𑀧𑀫𑁂𑀯 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺 𑀓𑁂𑀦𑀘𑀺 𑀧𑀭𑀺𑀧𑀦𑁆𑀣𑁂𑀦 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀪𑀸𑀯𑀢𑁄 𑀔𑀺𑀧𑁆𑀧𑀫𑁂𑀯 𑀲𑀫𑀸𑀥𑀺𑀬𑀢𑀺. 𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀓𑁂𑀘𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀇𑀢𑁄 𑀅𑀜𑁆𑀜𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀅𑀥𑀺𑀕𑀢𑀚𑁆𑀛𑀸𑀦𑀸𑀦𑀫𑁆𑀧𑀺 𑀲𑀼𑀔𑀲𑀼𑀧𑀦𑀸𑀤𑀬𑁄 𑀆𑀦𑀺𑀲𑀁𑀲𑀸 𑀮𑀩𑁆𑀪𑀦𑁆𑀢𑀺, 𑀬𑀣𑀸𑀳 𑁋

‘‘𑀲𑀼𑀔𑀁 𑀲𑀼𑀧𑀦𑁆𑀢𑀺 𑀫𑀼𑀦𑀬𑁄, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀸;

𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸’’𑀢𑀺. 𑁋

𑀘 𑀆𑀤𑀺, 𑀢𑀣𑀸𑀧𑀺𑀫𑁂 𑀆𑀦𑀺𑀲𑀁𑀲𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀮𑀸𑀪𑀺𑀦𑁄 𑀅𑀦𑀯𑀲𑁂𑀲𑀸 𑀮𑀩𑁆𑀪𑀦𑁆𑀢𑀺 𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀦𑀺𑀲𑁆𑀲𑀭𑀡𑀁 𑀳𑁂𑀢𑀁, 𑀆𑀯𑀼𑀲𑁄, 𑀩𑁆𑀬𑀸𑀧𑀸𑀤𑀲𑁆𑀲, 𑀬𑀤𑀺𑀤𑀁 𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁩.𑁩𑁨𑁬; 𑀅. 𑀦𑀺. 𑁬.𑁧𑁩). 𑀩𑁆𑀬𑀸𑀧𑀸𑀤𑀸𑀤𑀺𑀯𑀲𑁂𑀦 𑀘 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀲𑀼𑀧𑀦𑀸𑀤𑀬𑁄𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑁂𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀲𑀺𑀤𑁆𑀥𑁂𑀲𑀼 𑀲𑀼𑀔𑀲𑀼𑀧𑀦𑀸𑀤𑀬𑁄 𑀳𑀢𑁆𑀣𑀕𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺.

𑀓𑀭𑀼𑀡𑀸𑀪𑀸𑀯𑀦𑀸𑀯𑀡𑁆𑀡𑀦𑀸

𑁨𑁫𑁯. 𑀓𑀭𑀼𑀡𑀦𑁆𑀢𑀺 𑀓𑀭𑀼𑀡𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀁. 𑀦𑀺𑀓𑁆𑀓𑀭𑀼𑀡𑀢𑀸𑀬𑀸𑀢𑀺 𑀯𑀺𑀳𑁂𑀲𑀸𑀬, ‘‘𑀇𑀥𑁂𑀓𑀘𑁆𑀘𑁄 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀲𑀢𑁆𑀢𑀸𑀦𑀁 𑀯𑀺𑀳𑁂𑀞𑀦𑀚𑀸𑀢𑀺𑀓𑁄 𑀳𑁄𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀯𑀺𑀳𑁂𑀞𑀦𑁂𑀢𑀺 𑀅𑀢𑁆𑀣𑁄. 𑀆𑀤𑀻𑀦𑀯𑀦𑁆𑀢𑀺 𑀤𑁄𑀲𑀁. 𑀬𑀣𑀸 𑀢𑀣𑀸 𑀲𑀢𑁆𑀢𑀸𑀦𑀁 𑀯𑀺𑀳𑁂𑀞𑀦𑀸𑀬 𑀧𑀸𑀧𑀓𑁄 𑀯𑀺𑀧𑀸𑀓𑁄 𑀇𑀥 𑀘𑁂𑀯 𑀲𑀫𑁆𑀧𑀭𑀸𑀬𑁂 𑀘. 𑀢𑀣𑀸 𑀳𑀺 𑀬𑁄 𑀲𑀢𑁆𑀢𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑁂𑀦 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀘𑁆𑀙𑁂𑀤𑀦𑁂𑀦 𑀯𑀸 𑀥𑀦𑀚𑀸𑀦𑀺𑀬𑀸 𑀯𑀸 𑀅𑀮𑀸𑀪𑀸𑀬 𑀯𑀸 𑀅𑀯𑀸𑀲𑀸𑀬 𑀯𑀸 𑀅𑀦𑀢𑁆𑀣𑀸𑀬 𑀯𑀸 𑀅𑀬𑀲𑀢𑁆𑀣𑀸𑀬 𑀯𑀸 𑀧𑀭𑀺𑀲𑀁𑀲𑀓𑁆𑀓𑀦𑁂𑀦 𑀯𑀸 𑀅𑀦𑁆𑀢𑀫𑀲𑁄 𑀬𑀣𑀸𑀯𑀚𑁆𑀚𑀤𑀲𑁆𑀲𑀦𑁂𑀦𑀧𑀺 𑀯𑀺𑀳𑁂𑀞𑁂𑀢𑀺, 𑀢𑀲𑁆𑀲 𑀲𑁄 𑀧𑀫𑀸𑀤𑀯𑀺𑀳𑀸𑀭𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀮𑀸𑀪𑀸𑀬𑀧𑀺 𑀳𑁄𑀢𑀺, 𑀮𑀤𑁆𑀥𑀲𑁆𑀲 𑀧𑀭𑀺𑀳𑀸𑀦𑀸𑀬𑀧𑀺 𑀳𑁄𑀢𑀺, 𑀢𑀦𑁆𑀦𑀺𑀫𑀺𑀢𑁆𑀢𑀁 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀅𑀯𑀺𑀲𑀸𑀭𑀤𑁄 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑀫𑀗𑁆𑀓𑀼𑀪𑀽𑀢𑁄, 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸, 𑀲𑀼𑀕𑀢𑀺𑀬𑀫𑁆𑀧𑀺 𑀫𑀦𑀼𑀲𑁆𑀲𑀪𑀽𑀢𑁄 𑀤𑀼𑀚𑁆𑀚𑀘𑁆𑀘𑁄𑀧𑀺 𑀳𑁄𑀢𑀺 𑀦𑀻𑀘𑀓𑀼𑀮𑀺𑀓𑁄, 𑀤𑀼𑀩𑁆𑀩𑀡𑁆𑀡𑁄𑀧𑀺 𑀳𑁄𑀢𑀺 𑀤𑀼𑀤𑁆𑀤𑀲𑀺𑀓𑁄, 𑀩𑀳𑁆𑀯𑀸𑀩𑀸𑀥𑁄𑀧𑀺 𑀳𑁄𑀢𑀺 𑀭𑁄𑀕𑀩𑀳𑀼𑀮𑁄, 𑀤𑀼𑀕𑁆𑀕𑀢𑁄𑀧𑀺 𑀳𑁄𑀢𑀺 𑀅𑀧𑁆𑀧𑀦𑁆𑀦𑀧𑀸𑀦𑁄, 𑀅𑀧𑁆𑀧𑀸𑀬𑀼𑀓𑁄𑀧𑀺 𑀳𑁄𑀢𑀺 𑀧𑀭𑀺𑀢𑁆𑀢𑀚𑀻𑀯𑀺𑀢𑁄𑀢𑀺 𑀏𑀯𑀫𑀸𑀤𑀺𑀅𑀦𑁂𑀓𑀸𑀦𑀢𑁆𑀣𑀸𑀦𑀼𑀩𑀦𑁆𑀥𑀺𑀢𑀸 𑀯𑀺𑀳𑁂𑀲𑀸𑀬 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀓𑀭𑀼𑀡𑀸𑀬 𑀆𑀦𑀺𑀲𑀁𑀲𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀓𑁆𑀓𑀭𑀼𑀡𑀢𑀸𑀬 𑀆𑀤𑀻𑀦𑀯𑀁 𑀓𑀭𑀼𑀡𑀸𑀬 𑀘 𑀆𑀦𑀺𑀲𑀁𑀲𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸’’𑀢𑀺. ‘‘𑀧𑀺𑀬𑁄 𑀳𑀻’’𑀢𑀺𑀆𑀤𑀺𑀦𑀸 𑀧𑀞𑀫𑀁 𑀧𑀺𑀬𑀧𑀼𑀕𑁆𑀕𑀮𑀸𑀤𑀻𑀲𑀼 𑀅𑀦𑀸𑀭𑀫𑁆𑀪𑀲𑁆𑀲 𑀓𑀸𑀭𑀡𑀫𑀸𑀳. 𑀧𑀺𑀬𑀁 𑀳𑀺 𑀧𑀼𑀕𑁆𑀕𑀮𑀁 𑀓𑀭𑀼𑀡𑀸𑀬𑀺𑀢𑀼𑀫𑀸𑀭𑀪𑀦𑁆𑀢𑀲𑁆𑀲 𑀦 𑀢𑀸𑀯 𑀧𑀺𑀬𑀪𑀸𑀯𑁄 𑀯𑀺𑀕𑀘𑁆𑀙𑀢𑀺, 𑀅𑀯𑀺𑀕𑀢𑁂 𑀘 𑀢𑀲𑁆𑀫𑀺𑀁 𑀓𑀼𑀢𑁄 𑀓𑀭𑀼𑀡𑀸𑀬𑀦𑀸. 𑀢𑁂𑀦𑀸𑀳 ‘‘𑀧𑀺𑀬𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀻’’𑀢𑀺. 𑀲𑁂𑀲𑀧𑀼𑀕𑁆𑀕𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀮𑀺𑀗𑁆𑀕𑀯𑀺𑀲𑀪𑀸𑀕𑀓𑀸𑀮𑀓𑀢𑀸𑀦𑀁 𑀅𑀔𑁂𑀢𑁆𑀢𑀪𑀸𑀯𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀬𑀢𑁆𑀣 𑀧𑀦 𑀧𑀞𑀫𑀁 𑀆𑀭𑀪𑀺𑀢𑀩𑁆𑀩𑀸, 𑀢𑀁 𑀧𑀸𑀴𑀺𑀦𑀬𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀓𑀣𑀜𑁆𑀘 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑀼𑀕𑁆𑀕𑀢𑀦𑁆𑀢𑀺 𑀤𑀮𑀺𑀤𑁆𑀤𑀁. 𑀲𑁄 𑀳𑀺 𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀢𑁄 𑀲𑀼𑀔𑀲𑀸𑀥𑀦𑀸𑀦𑀁 𑀅𑀪𑀸𑀯𑁂𑀦 𑀤𑀼𑀓𑁆𑀔𑀁 𑀕𑀢𑁄 𑀉𑀧𑀕𑀢𑁄 𑀤𑀼𑀕𑁆𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀤𑀼𑀕𑁆𑀕𑀢𑀦𑁆𑀢𑀺 𑀤𑀼𑀓𑁆𑀔𑁂𑀦 𑀲𑀫𑀗𑁆𑀕𑀺𑀪𑀸𑀯𑀁 𑀕𑀢𑀁. 𑀤𑀼𑀭𑀼𑀧𑁂𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀉𑀧𑁂𑀢𑀁. 𑀕𑀢𑀺𑀓𑀼𑀮𑀭𑀽𑀧𑀸𑀤𑀺𑀯𑀲𑁂𑀦 𑀯𑀸 𑀢𑀫𑀪𑀸𑀯𑁂 𑀞𑀺𑀢𑁄 𑀤𑀼𑀕𑁆𑀕𑀢𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀉𑀧𑁂𑀢𑀢𑁆𑀢𑀸 𑀢𑀫𑀧𑀭𑀸𑀬𑀡𑀪𑀸𑀯𑁂 𑀞𑀺𑀢𑁄 𑀤𑀼𑀭𑀼𑀧𑁂𑀢𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀫𑀓𑀺𑀘𑁆𑀙𑀧𑁆𑀧𑀢𑁆𑀢𑀦𑁆𑀢𑀺 𑀅𑀢𑀺𑀯𑀺𑀬 𑀓𑀺𑀘𑁆𑀙𑀫𑀸𑀧𑀦𑁆𑀦𑀁 𑀫𑀳𑀸𑀩𑁆𑀬𑀲𑀦𑀁 𑀦𑀺𑀫𑀼𑀕𑁆𑀕𑀁. 𑀅𑀧𑁆𑀧𑁂𑀯 𑀦𑀸𑀫𑀸𑀢𑀺 𑀲𑀸𑀥𑀼 𑀯𑀢.

𑀯𑀥𑁂𑀣 𑀦𑀦𑁆𑀢𑀺 ‘‘𑀖𑀸𑀢𑁂𑀣 𑀦𑀁 𑀘𑁄𑀭’’𑀦𑁆𑀢𑀺 𑀏𑀯𑀁 𑀧𑀳𑀺𑀢𑀸𑀬 𑀭𑀜𑁆𑀜𑁄 𑀆𑀡𑀸𑀬 𑀔𑀸𑀤𑀦𑀻𑀬𑀫𑁆𑀧𑀺…𑀧𑁂… 𑀤𑁂𑀦𑁆𑀢𑀺 ‘‘𑀇𑀤𑀸𑀦𑁂𑀯 𑀫𑀸𑀭𑀺𑀬𑀫𑀸𑀦𑁄 𑀏𑀢𑁆𑀢𑀓𑀫𑁆𑀧𑀺 𑀲𑀼𑀔𑀁 𑀮𑀪𑀢𑀽’’𑀢𑀺. 𑀲𑀼𑀲𑀚𑁆𑀚𑀺𑀢𑁄𑀢𑀺 𑀲𑀼𑀔𑀸𑀦𑀼𑀪𑀯𑀦𑁂 𑀲𑀦𑁆𑀦𑀤𑁆𑀥𑁄.

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦𑀸𑀢𑀺 𑀬𑁂𑀦 𑀬𑁂𑀦 𑀯𑀺𑀥𑀺𑀦𑀸 𑀏𑀢𑀭𑀳𑀺 𑀬𑀣𑀸𑀯𑀼𑀢𑁆𑀢𑁂 𑀧𑀭𑀫𑀓𑀺𑀘𑁆𑀙𑀸𑀧𑀦𑁆𑀦𑁂 𑀆𑀬𑀢𑀺𑀁 𑀯𑀸 𑀤𑀼𑀓𑁆𑀔𑀪𑀸𑀕𑀺𑀫𑁆𑀳𑀺 𑀧𑀼𑀕𑁆𑀕𑀮𑁂 𑀓𑀭𑀼𑀡𑀸𑀬𑀺𑀢𑀼𑀁 𑀓𑀭𑀼𑀡𑀸 𑀉𑀧𑁆𑀧𑀸𑀤𑀺𑀢𑀸, 𑀏𑀢𑁂𑀦𑁂𑀯 𑀦𑀬𑁂𑀦. 𑀧𑀺𑀬𑀧𑀼𑀕𑁆𑀕𑀮𑁂𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀧𑀼𑀕𑁆𑀕𑀮𑁂. 𑀏𑀢𑀭𑀳𑀺 𑀯𑀸 𑀤𑀺𑀲𑁆𑀲𑀫𑀸𑀦𑀁 𑀆𑀬𑀢𑀺𑀁 𑀯𑀸 𑀪𑀸𑀯𑀺𑀦𑀺𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀓𑀭𑀼𑀡𑀸 𑀧𑀯𑀢𑁆𑀢𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀚𑁆𑀛𑀢𑁆𑀢𑀯𑁂𑀭𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀳𑀺 𑀲𑁄 𑀓𑀭𑀼𑀡𑀸𑀬 𑀯𑀢𑁆𑀣𑀼𑀪𑀽𑀢𑁄 𑀤𑀼𑀯𑀺𑀥𑁄 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄, 𑀓𑀸𑀫𑀁 𑀢𑀢𑁆𑀣 𑀓𑀭𑀼𑀡𑀸𑀪𑀸𑀯𑀦𑀸 𑀲𑀼𑀔𑁂𑀦𑁂𑀯 𑀇𑀚𑁆𑀛𑀢𑀺, 𑀇𑀫𑀺𑀦𑀸 𑀧𑀦 𑀪𑀺𑀓𑁆𑀔𑀼𑀦𑀸 𑀢𑀢𑁆𑀣 𑀪𑀸𑀯𑀦𑀁 𑀧𑀕𑀼𑀡𑀢𑀭𑀁 𑀓𑀢𑁆𑀯𑀸 𑀲𑀻𑀫𑀸𑀲𑀫𑁆𑀪𑁂𑀤𑀁 𑀓𑀸𑀢𑀼𑀁 𑀢𑀤𑀦𑀦𑁆𑀢𑀭𑀁 𑀧𑀺𑀬𑀧𑀼𑀕𑁆𑀕𑀮𑁂, 𑀢𑀢𑁄 𑀫𑀚𑁆𑀛𑀢𑁆𑀢𑁂, 𑀢𑀢𑁄 𑀯𑁂𑀭𑀺𑀧𑀼𑀕𑁆𑀕𑀮𑁂 𑀓𑀭𑀼𑀡𑀸 𑀪𑀸𑀯𑁂𑀢𑀩𑁆𑀩𑀸. 𑀪𑀸𑀯𑁂𑀦𑁆𑀢𑁂𑀦 𑀘 𑀏𑀓𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀫𑀼𑀤𑀼𑀁 𑀓𑀫𑁆𑀫𑀦𑀺𑀬𑀁 𑀘𑀺𑀢𑁆𑀢𑀁 𑀓𑀢𑁆𑀯𑀸 𑀢𑀤𑀦𑀦𑁆𑀢𑀭𑁂 𑀢𑀤𑀦𑀦𑁆𑀢𑀭𑁂 𑀉𑀧𑀲𑀁𑀳𑀭𑀺𑀢𑀩𑁆𑀩𑀁. 𑀬𑀲𑁆𑀲 𑀧𑀦 𑀯𑁂𑀭𑀺𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀺, 𑀫𑀳𑀸𑀧𑀼𑀭𑀺𑀲𑀚𑀸𑀢𑀺𑀓𑀢𑁆𑀢𑀸 𑀯𑀸 𑀅𑀦𑀢𑁆𑀣𑀁 𑀓𑀭𑁄𑀦𑁆𑀢𑁂𑀧𑀺 𑀯𑁂𑀭𑀺𑀲𑀜𑁆𑀜𑀸𑀯 𑀦𑀼𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀫𑀚𑁆𑀛𑀢𑁆𑀢𑁂 𑀫𑁂 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀚𑀸𑀢𑀁, 𑀇𑀤𑀸𑀦𑀺 𑀯𑁂𑀭𑀺𑀫𑁆𑀳𑀺 𑀉𑀧𑀲𑀁𑀳𑀭𑀸𑀫𑀻𑀢𑀺 𑀩𑁆𑀬𑀸𑀧𑀸𑀭𑁄𑀯 𑀦 𑀓𑀸𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀅𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺.

𑀢𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 (𑀯𑀺𑀲𑀼𑀤𑁆𑀥𑀺. 𑁧.𑁨𑁪𑁦 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦. 𑀢𑀁 𑀫𑁂𑀢𑁆𑀢𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀯𑀽𑀧𑀲𑀫𑁂𑀢𑀩𑁆𑀩𑀦𑁆𑀢𑀺 ‘‘𑀅𑀣𑀸𑀦𑁂𑀦 𑀧𑀼𑀭𑀺𑀫𑀧𑀼𑀕𑁆𑀕𑀮𑁂𑀲𑀽’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁨𑁪𑁩), ‘‘𑀓𑀓𑀘𑀽𑀧𑀫𑀑𑀯𑀸𑀤𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀢𑁄’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁨𑁪𑁩) 𑀘 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀯𑀼𑀢𑁆𑀢𑁂𑀦 𑀦𑀬𑁂𑀦 𑀢𑀁 𑀧𑀝𑀺𑀖𑀁 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀏𑀯𑀁 𑀏𑀢𑀭𑀳𑀺 𑀫𑀳𑀸𑀤𑀼𑀓𑁆𑀔𑀧𑁆𑀧𑀢𑁆𑀢𑁂 𑀲𑀼𑀔𑀺𑀢𑁂𑀧𑀺 𑀅𑀓𑀢𑀓𑀼𑀲𑀮𑀢𑀸𑀬 𑀆𑀬𑀢𑀺𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀺𑀬𑀸 𑀯𑀲𑁂𑀦 𑀓𑀭𑀼𑀡𑀸𑀬𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀢𑀓𑀮𑁆𑀬𑀸𑀡𑁂𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄𑀧𑀺 𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀩𑁆𑀬𑀲𑀦𑀸𑀦𑀁. 𑀯𑀝𑁆𑀝𑀤𑀼𑀓𑁆𑀔𑀁 𑀅𑀦𑀢𑀺𑀓𑁆𑀓𑀦𑁆𑀢𑀢𑁆𑀢𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀧𑀺 𑀅𑀓𑁆𑀔𑀸𑀦𑁂𑀦 𑀧𑀭𑀺𑀬𑁄𑀲𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀅𑀦𑀸𑀕𑀢𑀲𑁆𑀲 𑀆𑀧𑀸𑀬𑀺𑀓𑀲𑁆𑀲 𑀲𑀼𑀕𑀢𑀻𑀲𑀼𑀧𑀺 𑀚𑀸𑀢𑀺𑀚𑀭𑀸𑀤𑀺𑀪𑁂𑀤𑀲𑁆𑀲𑀸𑀢𑀺 𑀅𑀧𑀭𑀺𑀫𑀺𑀢𑀲𑁆𑀲 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀅𑀦𑀢𑀺𑀓𑁆𑀓𑀦𑁆𑀢𑀪𑀸𑀯𑀢𑁄. 𑀲𑀩𑁆𑀩𑀣𑀸𑀧𑀺 𑀓𑀭𑀼𑀡𑀸𑀬𑀺𑀢𑁆𑀯𑀸𑀢𑀺 𑀤𑀼𑀓𑁆𑀔𑀧𑁆𑀧𑀢𑁆𑀢𑀺𑀬𑀸, 𑀲𑀼𑀔𑀧𑁆𑀧𑀢𑁆𑀢𑀺𑀬𑀸 𑀅𑀓𑀢𑀓𑀼𑀲𑀮𑀢𑀸𑀬 𑀯𑀸 𑀓𑀢𑀸𑀓𑀼𑀲𑀮𑀢𑀸𑀬 𑀯𑀸𑀢𑀺 𑀲𑀩𑁆𑀩𑀧𑀓𑀸𑀭𑁂𑀦𑀧𑀺 𑀓𑀭𑀼𑀡𑀸𑀬 𑀯𑀢𑁆𑀣𑀼𑀪𑀸𑀯𑀲𑁆𑀲 𑀲𑀮𑁆𑀮𑀓𑁆𑀔𑀡𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀓𑀭𑀼𑀡𑀁 𑀓𑀢𑁆𑀯𑀸 𑀓𑀭𑀼𑀡𑀸𑀪𑀸𑀯𑀦𑀁 𑀯𑀟𑁆𑀠𑁂𑀢𑁆𑀯𑀸. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀅𑀣𑀸𑀦𑁂𑀦 𑀧𑀼𑀦𑀧𑁆𑀧𑀼𑀦𑀁 𑀫𑁂𑀢𑁆𑀢𑀸𑀬𑀦𑁆𑀢𑁂𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁨𑁪𑁩) 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑀁 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀻𑀫𑀸𑀲𑀫𑁆𑀪𑁂𑀤𑀯𑀲𑁂𑀦 𑀧𑀯𑀢𑁆𑀢𑀁 𑀲𑀫𑀣𑀦𑀺𑀫𑀺𑀢𑁆𑀢𑀁. 𑀫𑁂𑀢𑁆𑀢𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀬𑀣𑀸 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑀁 ‘‘𑀅𑀧𑁆𑀧𑀓𑀲𑀺𑀭𑁂𑀦𑁂𑀯𑀸’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁨𑁫𑁩) 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦 𑀅𑀧𑁆𑀧𑀦𑀸 ‘‘𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁨𑁫𑁩-𑁨𑁫𑁪) 𑀢𑀲𑁆𑀲𑀸 𑀯𑀟𑁆𑀠𑀦𑀸 𑀘 𑀯𑀼𑀢𑁆𑀢𑀸, 𑀏𑀯𑀫𑀺𑀥 𑀓𑀭𑀼𑀡𑀸𑀪𑀸𑀯𑀦𑀸𑀬𑀁 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦 𑀅𑀧𑁆𑀧𑀦𑀸 𑀯𑁂𑀤𑀺𑀢𑀩𑁆𑀩𑀸 𑀘 𑀯𑀟𑁆𑀠𑁂𑀢𑀩𑁆𑀩𑀸 𑀘, 𑀢𑀣𑁂𑀯𑀲𑁆𑀲𑀸 𑀯𑀟𑁆𑀠𑀦𑀸𑀯𑀺𑀥𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 ‘‘𑀧𑀞𑀫𑀁 𑀯𑁂𑀭𑀺𑀧𑀼𑀕𑁆𑀕𑀮𑁄 𑀓𑀭𑀼𑀡𑀸𑀬𑀺𑀢𑀩𑁆𑀩𑁄’’𑀢𑀺 𑀇𑀤𑀁 𑀬𑀣𑀸 𑀧𑀸𑀴𑀺𑀯𑀺𑀭𑀼𑀤𑁆𑀥𑀁, 𑀏𑀯𑀁 𑀬𑀼𑀢𑁆𑀢𑀺𑀯𑀺𑀭𑀼𑀤𑁆𑀥𑀫𑁆𑀧𑀻𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀧𑀞𑀫𑀁 𑀳𑀺 𑀯𑁂𑀭𑀺𑀁 𑀲𑀫𑀦𑀼𑀲𑁆𑀲𑀭𑀢𑁄 𑀓𑁄𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦 𑀓𑀭𑀼𑀡𑀸. 𑀅𑀢𑁆𑀢𑀸𑀧𑀺 𑀲𑀓𑁆𑀔𑀺𑀪𑀸𑀯𑁂𑀦 𑀓𑀭𑀼𑀡𑀸𑀬𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑁄, 𑀲𑁄 𑀓𑀺𑀫𑀺𑀢𑀺 𑀧𑀘𑁆𑀙𑀸 𑀕𑀬𑁆𑀳𑀢𑀻𑀢𑀺. ‘‘𑀅𑀧𑁆𑀧𑀦𑀸 𑀯𑀟𑁆𑀠𑁂𑀢𑀩𑁆𑀩𑀸’’𑀢𑀺 𑀇𑀫𑀺𑀦𑀸 𑀘 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀘𑀺𑀢𑁆𑀢𑀲𑁆𑀲𑁂𑀯 ‘‘𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁦𑁮; 𑀫. 𑀦𑀺. 𑁧.𑁭𑁭, 𑁫𑁦𑁯; 𑁨.𑁩𑁦𑁯, 𑁩𑁧𑁫, 𑁪𑁫𑁨, 𑁪𑁭𑁧; 𑁩.𑁨𑁩𑁦) 𑀯𑀼𑀢𑁆𑀢𑀯𑀺𑀓𑀼𑀩𑁆𑀩𑀦𑀸 𑀇𑀚𑁆𑀛𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄.

𑀓𑀭𑀼𑀡𑀸𑀧𑀤𑀫𑀢𑁆𑀢𑀫𑁂𑀯 𑀘𑀲𑁆𑀲𑀸 𑀧𑀸𑀴𑀺𑀬𑀸 𑀯𑀺𑀲𑁂𑀲𑁄𑀢𑀺 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀯𑀺𑀓𑀼𑀩𑁆𑀩𑀦𑀸, 𑀫𑁂𑀢𑁆𑀢𑀸𑀬 𑀯𑀼𑀢𑁆𑀢𑀆𑀦𑀺𑀲𑀁𑀲𑀸 𑀘 𑀇𑀥 𑀮𑀩𑁆𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄 𑀧𑀭𑀁…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁄 𑀧𑀭𑀦𑁆𑀢𑀺 ‘‘𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺 (𑀤𑀻. 𑀦𑀺. 𑁩.𑁩𑁦𑁮; 𑀫. 𑀦𑀺. 𑁧.𑁭𑁭, 𑁫𑁦𑁯; 𑁨.𑁩𑁦𑁯, 𑁩𑁧𑁫, 𑁪𑁫𑁨, 𑁪𑁭𑁧; 𑁩.𑁨𑁩𑁦) 𑀯𑀼𑀢𑁆𑀢𑀯𑀺𑀓𑀼𑀩𑁆𑀩𑀦𑀢𑁄 𑀉𑀧𑀭𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀼𑀤𑀺𑀢𑀸𑀪𑀸𑀯𑀦𑀸𑀯𑀡𑁆𑀡𑀦𑀸

𑁨𑁬𑁦. 𑀧𑀺𑀬𑀧𑀼𑀕𑁆𑀕𑀮𑀸𑀤𑀻𑀲𑀽𑀢𑀺 𑀧𑀺𑀬𑀫𑀚𑁆𑀛𑀢𑁆𑀢𑀯𑁂𑀭𑀻𑀲𑀼 𑀦 𑀆𑀭𑀪𑀺𑀢𑀩𑁆𑀩𑀸. 𑀫𑀼𑀤𑀺𑀢𑀸𑀪𑀸𑀯𑀦𑀸𑀢𑀺 𑀯𑀺𑀪𑀢𑁆𑀢𑀺𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑀦𑀸. 𑀦 𑀳𑀻𑀢𑀺𑀆𑀤𑀺 𑀢𑀢𑁆𑀣 𑀓𑀸𑀭𑀡𑀯𑀘𑀦𑀁. 𑀧𑀺𑀬𑀪𑀸𑀯𑀫𑀢𑁆𑀢𑁂𑀦𑀸𑀢𑀺 𑀏𑀢𑁆𑀣 𑀫𑀢𑁆𑀢-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺 𑀅𑀢𑁆𑀣𑁄, 𑀢𑁂𑀦 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀢𑀸𑀤𑀺𑀲𑀺𑀤𑁆𑀥𑀸 𑀦𑀺𑀘𑁆𑀘𑀧𑁆𑀧𑀳𑀁𑀲𑀺𑀢𑀫𑀼𑀔𑀢𑀸, 𑀧𑀼𑀩𑁆𑀩𑀪𑀸𑀲𑀺𑀢𑀸, 𑀲𑀼𑀔𑀲𑀫𑁆𑀪𑀸𑀲𑀢𑀸, 𑀲𑀔𑀺𑀮𑀢𑀸, 𑀲𑀫𑁆𑀫𑁄𑀤𑀓𑀢𑀸𑀢𑀺 𑀏𑀯𑀫𑀸𑀤𑀺𑀓𑁂 𑀫𑀼𑀤𑀺𑀢𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑁂 𑀯𑀺𑀲𑁂𑀲𑁂 𑀉𑀮𑁆𑀮𑀺𑀗𑁆𑀕𑁂𑀢𑀺, 𑀈𑀤𑀺𑀲𑁂𑀳𑀺 𑀯𑀺𑀲𑁂𑀲𑁂𑀳𑀺 𑀯𑀺𑀭𑀳𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯-𑀓𑀸𑀭𑁂𑀦 𑀧𑀦 𑀧𑀺𑀬𑀧𑀼𑀕𑁆𑀕𑀮𑀲𑁆𑀲 𑀲𑀼𑀔𑀲𑀫𑀧𑁆𑀧𑀺𑀢𑀢𑀸𑀤𑀺𑀁, 𑀫𑀼𑀤𑀺𑀢𑀸𑀬 𑀘 𑀳𑁂𑀢𑀼𑀪𑀽𑀢𑀁 𑀧𑀫𑁄𑀤𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀧𑀺𑀬𑀧𑀼𑀕𑁆𑀕𑀮𑁂𑀧𑀺 𑀳𑀺 𑀧𑀭𑀫𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑀼𑀤𑀺𑀢𑁂 𑀳𑀝𑁆𑀞𑀢𑀼𑀝𑁆𑀞𑁂 𑀪𑀺𑀓𑁆𑀔𑀼𑀦𑁄 𑀫𑀼𑀤𑀺𑀢𑁄𑀓𑀸𑀲𑀁 𑀮𑀪𑁂𑀬𑁆𑀬. 𑀯𑀓𑁆𑀔𑀢𑀺 𑀳𑀺 ‘‘𑀧𑀺𑀬𑀧𑀼𑀕𑁆𑀕𑀮𑀁 𑀯𑀸’’𑀢𑀺𑀆𑀤𑀺. 𑀆𑀤𑀺𑀢𑁄 𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀉𑀤𑀸𑀲𑀺𑀦𑀢𑀸 𑀲𑀡𑁆𑀞𑀸𑀢𑀺, 𑀯𑁂𑀭𑀺𑀁 𑀲𑀫𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀓𑁄𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀧𑀕𑁂𑀯 𑀫𑀚𑁆𑀛𑀢𑁆𑀢𑀯𑁂𑀭𑀺𑀦𑁄’’𑀢𑀺.

𑀧𑀫𑁄𑀤𑀧𑁆𑀧𑀯𑀢𑁆𑀢𑀺𑀬𑀸 𑀲𑁄𑀡𑁆𑀟𑀲𑀤𑀺𑀲𑁄 𑀲𑀳𑀸𑀬𑁄 𑀲𑁄𑀡𑁆𑀟𑀲𑀳𑀸𑀬𑁄. 𑀫𑀼𑀤𑀺𑀢𑀫𑀼𑀤𑀺𑀢𑁄𑀯𑀸𑀢𑀺 𑀧𑀲𑀸𑀤𑀲𑁄𑀫𑁆𑀫𑀢𑀸𑀬 𑀅𑀢𑀺𑀯𑀺𑀬 𑀫𑀼𑀤𑀺𑀢𑁄 𑀏𑀯. 𑀧𑀲𑀸𑀤𑁂 𑀳𑀺 𑀇𑀤𑀁 𑀆𑀫𑁂𑀟𑀺𑀢𑀁. 𑀏𑀯𑀁 𑀅𑀝𑁆𑀞𑀓𑀣𑀸𑀦𑀬𑁂𑀦 𑀆𑀤𑀺𑀢𑁄 𑀫𑀼𑀤𑀺𑀢𑀸𑀪𑀸𑀯𑀦𑀸𑀬 𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀸𑀴𑀺𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀧𑀺𑀬𑀧𑀼𑀕𑁆𑀕𑀮𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀔𑀺𑀢𑀦𑁆𑀢𑀺 𑀲𑀜𑁆𑀚𑀸𑀢𑀲𑀼𑀔𑀁, 𑀲𑀼𑀔𑀧𑁆𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀚𑁆𑀚𑀺𑀢𑀦𑁆𑀢𑀺 𑀲𑀼𑀔𑀸𑀦𑀼𑀪𑀯𑀦𑁂 𑀲𑀦𑁆𑀦𑀤𑁆𑀥𑀁 𑀧𑀝𑀺𑀬𑀢𑁆𑀢𑀲𑀼𑀔𑀲𑀸𑀥𑀦𑀁. 𑀅𑀳𑁄 𑀲𑀸𑀥𑀽𑀢𑀺 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀬𑀁 𑀲𑀫𑁆𑀧𑀚𑀜𑁆𑀜𑀧𑀼𑀩𑁆𑀩𑀧𑀫𑁄𑀤𑀦𑀸𑀓𑀸𑀭𑀤𑀲𑁆𑀲𑀦𑀁. 𑀧𑀼𑀦 𑀅𑀳𑁄 𑀲𑀼𑀝𑁆𑀞𑀽𑀢𑀺 𑀢𑀲𑁆𑀲 𑀧𑀫𑁄𑀤𑀦𑀲𑁆𑀲 𑀩𑀳𑀼𑀮𑀻𑀓𑀸𑀭𑀤𑀲𑁆𑀲𑀦𑀁. 𑀧𑀺𑀬𑀁 𑀫𑀦𑀸𑀧𑀦𑁆𑀢𑀺 𑀏𑀢𑁆𑀣 𑀫𑀦𑀸𑀧-𑀕𑁆𑀕𑀳𑀡𑁂𑀦 𑀧𑀸𑀴𑀺𑀬𑀫𑁆𑀧𑀺 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀏𑀓𑁂.

𑀅𑀢𑀻𑀢𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀢𑀻𑀢𑁂. 𑀅𑀦𑀸𑀕𑀢𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦 𑀳𑀺 𑀪𑀯𑀦𑁆𑀢𑀭𑀕𑀢𑁂 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸 𑀭𑀼𑀳𑀢𑀺. 𑀬𑀤𑀺 𑀏𑀯𑀁, 𑀅𑀢𑀻𑀢𑀸𑀦𑀸𑀕𑀢𑁂 𑀓𑀣𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄. ‘‘𑀲𑁄 𑀏𑀯𑀸𑀬𑀁 𑀤𑀢𑁆𑀢𑁄 𑀢𑀺𑀲𑁆𑀲𑁄’’𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸𑀬 𑀯𑀺𑀚𑁆𑀚𑀫𑀸𑀦𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀢𑁄. 𑀓𑀣𑀁 𑀧𑀦𑀲𑁆𑀲 𑀅𑀦𑀸𑀕𑀢𑁂 𑀲𑀫𑁆𑀧𑀢𑁆𑀢𑀺 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺? 𑀆𑀤𑁂𑀲𑀸𑀤𑀺𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀬 𑀯𑀸 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀼𑀫𑀸𑀦𑀢𑁄 𑀮𑀤𑁆𑀥𑀸𑀬 𑀕𑀳𑁂𑀢𑀩𑁆𑀩𑀢𑁄.

𑀧𑀺𑀬𑀧𑀼𑀕𑁆𑀕𑀮𑁂𑀢𑀺 𑀲𑁄𑀡𑁆𑀟𑀲𑀳𑀸𑀬𑀲𑀜𑁆𑀜𑀺𑀢𑁂 𑀅𑀢𑀺𑀧𑁆𑀧𑀺𑀬𑀧𑀼𑀕𑁆𑀕𑀮𑁂, 𑀧𑀺𑀬𑀧𑀼𑀕𑁆𑀕𑀮𑁂 𑀘. 𑀤𑀼𑀯𑀺𑀥𑁄𑀧𑀺 𑀘𑁂𑀲 𑀇𑀥 𑀧𑀺𑀬𑀪𑀸𑀯𑀲𑀸𑀫𑀜𑁆𑀜𑀢𑁄 ‘‘𑀧𑀺𑀬𑀧𑀼𑀕𑁆𑀕𑀮𑁄’’𑀢𑀺 𑀯𑀼𑀢𑁆𑀢𑁄. 𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀅𑀢𑀺𑀧𑁆𑀧𑀺𑀬𑀧𑀼𑀕𑁆𑀕𑀮𑁄 𑀧𑀺𑀬𑀧𑀼𑀕𑁆𑀕𑀮𑁄 𑀫𑀚𑁆𑀛𑀢𑁆𑀢𑁄 𑀯𑁂𑀭𑀻𑀢𑀺 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀕𑀼𑀡𑀁, 𑀫𑀼𑀤𑀼𑀁, 𑀓𑀫𑁆𑀫𑀦𑀺𑀬𑀜𑁆𑀘 𑀓𑀢𑁆𑀯𑀸 𑀲𑁂𑀲𑁂𑀲𑀼 𑀉𑀧𑀲𑀁𑀳𑀭𑀡𑀸𑀦𑀼𑀓𑁆𑀓𑀫𑁂𑀦. 𑀓𑀺𑀜𑁆𑀘𑀸𑀧𑀺 𑀘𑀢𑀽𑀲𑀼 𑀚𑀦𑁂𑀲𑀼 𑀲𑀫𑀘𑀺𑀢𑁆𑀢𑀢𑀸𑀯 𑀲𑀻𑀫𑀸𑀲𑀫𑁆𑀪𑁂𑀤𑁄 𑀲𑀻𑀫𑀸 𑀲𑀫𑁆𑀪𑀺𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸. 𑀪𑀸𑀯𑀦𑀸𑀬 𑀧𑀦 𑀢𑀣𑀸 𑀩𑀳𑀼𑀲𑁄 𑀧𑀯𑀢𑁆𑀢𑀫𑀸𑀦𑀸𑀬 𑀧𑀼𑀭𑀺𑀫𑀲𑀺𑀤𑁆𑀥𑀁 𑀳𑁂𑀢𑀼𑀁, 𑀇𑀢𑀭𑀁 𑀨𑀮𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀫𑀘𑀺𑀢𑁆𑀢𑀢𑀸𑀬 𑀲𑀻𑀫𑀸𑀲𑀫𑁆𑀪𑁂𑀤𑀁 𑀓𑀢𑁆𑀯𑀸’’𑀢𑀺. 𑀬𑀣𑀸𑀯𑀼𑀢𑁆𑀢𑀲𑀻𑀫𑀸𑀪𑀸𑀯𑁄 𑀯𑀸 𑀲𑀻𑀫𑀸𑀲𑀫𑁆𑀪𑁂𑀤𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀘𑀺𑀢𑁆𑀢𑀢𑀸𑀬 𑀲𑀻𑀫𑀸𑀲𑀫𑁆𑀪𑁂𑀤𑀁 𑀓𑀢𑁆𑀯𑀸’’𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀉𑀧𑁂𑀓𑁆𑀔𑀸𑀪𑀸𑀯𑀦𑀸𑀯𑀡𑁆𑀡𑀦𑀸

𑁨𑁬𑁧. 𑀉𑀧𑁂𑀓𑁆𑀔𑀸𑀪𑀸𑀯𑀦𑀦𑁆𑀢𑀺 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀁. 𑀬𑀲𑁆𑀫𑀸 𑀧𑀼𑀭𑀺𑀫𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑁆𑀢𑀬𑀦𑀺𑀲𑁆𑀲𑀦𑁆𑀤𑁄 𑀘𑀢𑀼𑀢𑁆𑀣𑀩𑁆𑀭𑀳𑁆𑀫𑀯𑀺𑀳𑀸𑀭𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀸𑀤𑀻𑀲𑀼 𑀧𑀝𑀺𑀮𑀤𑁆𑀥𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑁂𑀦𑀸’’𑀢𑀺. 𑀧𑀕𑀼𑀡𑀢𑀢𑀺𑀬𑀚𑁆𑀛𑀸𑀦𑀸𑀢𑀺 𑀲𑀼𑀪𑀸𑀯𑀺𑀢𑀁 𑀯𑀲𑀻𑀪𑀸𑀯𑀁 𑀧𑀸𑀧𑀺𑀢𑀁 𑀧𑀕𑀼𑀡𑀁, 𑀢𑀣𑀸𑀭𑀽𑀧𑀸 𑀢𑀢𑀺𑀬𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑀢𑁄. 𑀅𑀧𑁆𑀧𑀕𑀼𑀡𑀁 𑀳𑀺 𑀉𑀧𑀭𑀺𑀛𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁 𑀦 𑀳𑁄𑀢𑀺. 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀘𑁂𑀢𑁆𑀣 𑀢𑀢𑀺𑀬𑀕𑁆𑀕𑀳𑀡𑀁. 𑀲𑀼𑀔𑀺𑀢𑀸 𑀳𑁄𑀦𑁆𑀢𑀽𑀢𑀺𑀆𑀤𑀺𑀯𑀲𑁂𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀦𑀺𑀤𑁆𑀤𑀼𑀓𑁆𑀔𑀸 𑀳𑁄𑀦𑁆𑀢𑀽’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀢𑁆𑀢𑀓𑁂𑀮𑀸𑀬𑀦𑀁 𑀲𑀢𑁆𑀢𑁂𑀲𑀼 𑀫𑀫𑀸𑀬𑀦𑀁 𑀫𑀫𑀢𑁆𑀢𑀓𑀭𑀡𑀁, 𑀢𑀣𑀸 𑀫𑀦𑀲𑀺𑀓𑀸𑀭𑁂𑀦 𑀬𑁄𑀕𑁄 𑀲𑀢𑁆𑀢𑀓𑁂𑀮𑀸𑀬𑀦𑀫𑀦𑀲𑀺𑀓𑀸𑀭𑀬𑀼𑀢𑁆𑀢𑀢𑁆𑀢𑀁, 𑀢𑀲𑁆𑀫𑀸. 𑀫𑁂𑀢𑁆𑀢𑀸𑀤𑀻𑀦𑀁 𑀭𑀸𑀕𑀕𑁂𑀳𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀲𑁄𑀫𑀦𑀲𑁆𑀲𑀸𑀦𑀁 𑀆𑀲𑀦𑁆𑀦𑀯𑀼𑀢𑁆𑀢𑀺𑀢𑀸𑀬 𑀬𑀣𑀸𑀭𑀳𑀁 𑀧𑀝𑀺𑀖𑀸𑀦𑀼𑀦𑀬𑀲𑀫𑀻𑀧𑀘𑀸𑀭𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 ‘‘𑀲𑀼𑀔𑀺𑀢𑀸 𑀳𑁄𑀦𑁆𑀢𑀼, 𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀦𑁆𑀢𑀼 𑀫𑁄𑀤𑀦𑁆𑀢𑀽’’𑀢𑀺 𑀳𑀺𑀢𑁂𑀲𑀺𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀅𑀦𑀼𑀦𑀬𑀲𑁆𑀲 𑀆𑀲𑀦𑁆𑀦𑀘𑀸𑀭𑀺𑀢𑀸. 𑀲𑀢𑀺 𑀘 𑀢𑀩𑁆𑀩𑀺𑀧𑀭𑀺𑀬𑀸𑀬𑁂 𑀮𑁄𑀳𑀺𑀢𑀧𑁆𑀧𑀓𑁄𑀧𑁂 𑀧𑀼𑀩𑁆𑀩𑁄 𑀯𑀺𑀬 𑀮𑀤𑁆𑀥𑁄𑀓𑀸𑀲𑀫𑁂𑀯𑁂𑀢𑁆𑀣 𑀧𑀝𑀺𑀖𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀢𑀸𑀲𑀁 𑀧𑀝𑀺𑀖𑀸𑀦𑀼𑀦𑀬𑀲𑀫𑀻𑀧𑀘𑀸𑀭𑀺𑀢𑀸 𑀤𑀝𑁆𑀞𑀩𑁆𑀩𑀸.

‘‘𑀲𑁄𑀫𑀦𑀲𑁆𑀲𑀬𑁄𑀕𑁂𑀦 𑀑𑀴𑀸𑀭𑀺𑀓𑀢𑁆𑀢𑀸’’𑀢𑀺 𑀇𑀤𑀁 𑀢𑀢𑀺𑀬𑀚𑁆𑀛𑀸𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀇𑀤𑀫𑀸𑀤𑀻𑀦𑀯𑀤𑀲𑁆𑀲𑀦𑀦𑁆𑀢𑀺. 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀧𑀦 𑀑𑀴𑀸𑀭𑀺𑀓𑀪𑀸𑀯𑁂 𑀯𑀼𑀘𑁆𑀘𑀫𑀸𑀦𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀬𑁄𑀕𑁂𑀦𑁂𑀯 𑀑𑀴𑀸𑀭𑀺𑀓𑀢𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸, 𑀢𑀸𑀳𑀺𑀧𑀺 𑀢𑀸𑀲𑀁 𑀲𑀫𑀸𑀬𑁄𑀕𑀲𑀫𑁆𑀪𑀯𑀢𑁄, 𑀉𑀧𑁂𑀓𑁆𑀔𑀸𑀬 𑀘 𑀢𑀤𑀪𑀸𑀯𑀢𑁄. 𑀦 𑀯𑀸 𑀯𑀢𑁆𑀢𑀩𑁆𑀩𑀸 𑀢𑀢𑀺𑀬𑀚𑁆𑀛𑀸𑀦𑀺𑀓𑀸𑀦𑀁𑀬𑁂𑀯 𑀫𑁂𑀢𑁆𑀢𑀸𑀤𑀻𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸, 𑀢𑀁𑀢𑀁𑀛𑀸𑀦𑀲𑀫𑀢𑀺𑀓𑁆𑀓𑀫𑁂𑀦𑁂𑀯 𑀘 𑀢𑀁𑀢𑀁𑀛𑀸𑀦𑀺𑀓𑀸 𑀫𑁂𑀢𑁆𑀢𑀸𑀤𑀬𑁄𑀧𑀺 𑀲𑀫𑀢𑀺𑀓𑁆𑀓𑀦𑁆𑀢𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀺, 𑀛𑀸𑀦𑀲𑀸𑀫𑀜𑁆𑀜𑁂𑀦 𑀯𑀺𑀬 𑀫𑁂𑀢𑁆𑀢𑀸𑀤𑀺𑀲𑀸𑀫𑀜𑁆𑀜𑁂𑀦 𑀯𑁄𑀳𑀸𑀭𑀫𑀢𑁆𑀢𑀁. 𑀧𑀼𑀭𑀺𑀫𑀸𑀲𑀽𑀢𑀺 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸𑀲𑀼. 𑀲𑀦𑁆𑀢𑀪𑀸𑀯𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀲𑀢𑁆𑀢𑀓𑁂𑀮𑀸𑀬𑀦𑀸𑀤𑀺𑀅𑀦𑀼𑀧𑀲𑀦𑁆𑀢𑀪𑀸𑀯𑀸𑀪𑀸𑀯𑀢𑁄 𑀉𑀧𑁂𑀓𑁆𑀔𑀸𑀬 𑀲𑀦𑁆𑀢𑀪𑀸𑀯𑀢𑁄. ‘‘𑀲𑀦𑁆𑀢𑀪𑀸𑀯𑀢𑁄’’𑀢𑀺 𑀘 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀲𑀼𑀔𑀼𑀫𑀢𑀸 𑀧𑀡𑀻𑀢𑀢𑀸 𑀯𑀺𑀤𑀽𑀭𑀓𑀺𑀮𑁂𑀲𑀢𑀸 𑀯𑀺𑀧𑀼𑀮𑀨𑀮𑀢𑀸𑀢𑀺 𑀏𑀯𑀫𑀸𑀤𑀬𑁄𑀧𑀺 𑀉𑀧𑁂𑀓𑁆𑀔𑀸𑀬 𑀆𑀦𑀺𑀲𑀁𑀲𑀸 𑀤𑀝𑁆𑀞𑀩𑁆𑀩𑀸. 𑀧𑀓𑀢𑀺𑀫𑀚𑁆𑀛𑀢𑁆𑀢𑁄𑀢𑀺 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀓𑀢𑀺𑀬𑀸 𑀲𑀪𑀸𑀯𑁂𑀦𑁂𑀯 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀤𑀸𑀲𑀺𑀦𑀧𑀓𑁆𑀔𑁂 𑀞𑀺𑀢𑁄. 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀯𑀲𑁂𑀦𑁂𑀯 𑀅𑀬𑀫𑀸𑀬𑀲𑁆𑀫𑀸 𑀆𑀕𑀢𑁄 𑀕𑀘𑁆𑀙𑀢𑀺 𑀘, 𑀢𑁆𑀯𑀫𑁆𑀧𑀺 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀯𑀲𑁂𑀦𑁂𑀯 𑀆𑀕𑀢𑁄 𑀕𑀘𑁆𑀙𑀲𑀺 𑀘, 𑀦 𑀢𑀲𑁆𑀲 𑀢𑀯 𑀧𑀬𑁄𑀕𑁂𑀦 𑀓𑀺𑀜𑁆𑀘𑀺 𑀲𑀼𑀔𑀁 𑀯𑀸 𑀉𑀧𑀦𑁂𑀢𑀼𑀁, 𑀤𑀼𑀓𑁆𑀔𑀁 𑀯𑀸 𑀅𑀧𑀦𑁂𑀢𑀼𑀁 𑀮𑀩𑁆𑀪𑀸, 𑀓𑁂𑀯𑀮𑀁 𑀧𑀦𑁂𑀢𑀁 𑀘𑀺𑀢𑁆𑀢𑀲𑁆𑀲 𑀅𑀦𑀼𑀚𑀼𑀓𑀫𑁆𑀫𑀁, 𑀬𑀤𑀺𑀤𑀁 𑀫𑁂𑀢𑁆𑀢𑀸𑀬𑀦𑀸𑀤𑀺𑀦𑀸 𑀲𑀢𑁆𑀢𑁂𑀲𑀼 𑀓𑁂𑀮𑀸𑀬𑀦𑀁. 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀕𑀢𑀫𑀕𑁆𑀕𑁄 𑀘𑁂𑀲 𑀅𑀧𑀡𑁆𑀡𑀓𑀧𑀝𑀺𑀧𑀤𑀸𑀪𑀽𑀢𑁄, 𑀬𑀤𑀺𑀤𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀢𑀸𑀢𑀺 𑀏𑀯𑀁 𑀧𑀝𑀺𑀧𑀓𑁆𑀔𑀚𑀺𑀕𑀼𑀘𑁆𑀙𑀸𑀫𑀼𑀔𑁂𑀦 𑀫𑀚𑁆𑀛𑀢𑁆𑀢𑀢𑀸𑀬 𑀲𑀫𑀼𑀧𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑀸𑀤𑀭𑁄 𑀢𑀁 𑀧𑀼𑀕𑁆𑀕𑀮𑀁 𑀧𑀼𑀦𑀧𑁆𑀧𑀼𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀢𑀢𑁆𑀣 𑀘 𑀲𑀯𑀺𑀲𑁂𑀲𑀁 𑀉𑀧𑁂𑀓𑁆𑀔𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀺, 𑀢𑀲𑁆𑀲 𑀢𑀣𑀸 𑀧𑀝𑀺𑀧𑀚𑁆𑀚𑀢𑁄 𑀧𑀓𑀢𑀺𑀬𑀸𑀧𑀺 𑀉𑀤𑀸𑀲𑀺𑀦𑀢𑁆𑀢𑀸 𑀲𑀸𑀢𑀺𑀲𑀬𑀁 𑀢𑀢𑁆𑀣 𑀫𑀚𑁆𑀛𑀢𑁆𑀢𑀢𑀸 𑀲𑀡𑁆𑀞𑀸𑀢𑀺. 𑀪𑀸𑀯𑀦𑀸𑀩𑀮𑁂𑀦 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀺𑀦𑁆𑀦𑀸 𑀏𑀯 𑀳𑁄𑀦𑁆𑀢𑀺, 𑀲𑁄 𑀢𑀁 𑀉𑀧𑁂𑀓𑁆𑀔𑀁 𑀧𑀺𑀬𑀧𑀼𑀕𑁆𑀕𑀮𑀸𑀤𑀻𑀲𑀼 𑀉𑀧𑀲𑀁𑀳𑀭𑀢𑀺. 𑀢𑁂𑀦𑀸𑀳 ‘‘𑀉𑀧𑁂𑀓𑁆𑀔𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸. 𑀢𑀢𑁄 𑀧𑀺𑀬𑀧𑀼𑀕𑁆𑀕𑀮𑀸𑀤𑀻𑀲𑀽’’𑀢𑀺. 𑀏𑀓𑀁 𑀧𑀼𑀕𑁆𑀕𑀮𑀦𑁆𑀢𑀺 𑀏𑀢𑁆𑀣 𑀅𑀜𑁆𑀜𑀢𑁆𑀣𑁄 𑀏𑀓-𑀲𑀤𑁆𑀤𑁄 ‘‘𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁭) 𑀯𑀺𑀬. 𑀏𑀓𑀯𑀘𑀦𑁂𑀦𑁂𑀯 𑀘𑁂𑀢𑁆𑀣 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑁄 𑀲𑀺𑀤𑁆𑀥𑁄, 𑀢𑀲𑁆𑀫𑀸 𑀅𑀜𑁆𑀜𑀁 𑀏𑀓𑀁 𑀧𑀼𑀕𑁆𑀕𑀮𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑁂𑀦 𑀅𑀢𑁆𑀢𑀸𑀦𑀁 𑀦𑀺𑀯𑀢𑁆𑀢𑁂𑀢𑀺. ‘‘𑀦𑁂𑀯 𑀫𑀦𑀸𑀧’’𑀦𑁆𑀢𑀺 𑀇𑀫𑀺𑀦𑀸 𑀧𑀺𑀬𑀧𑀼𑀕𑁆𑀕𑀮𑀁, 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑀜𑁆𑀘 𑀦𑀺𑀯𑀢𑁆𑀢𑁂𑀢𑀺, 𑀅𑀢𑁆𑀢𑀸𑀦𑀫𑁆𑀧𑀺 𑀯𑀸 𑀅𑀢𑁆𑀢𑀦𑀺 𑀅𑀫𑀦𑀸𑀧𑀢𑀸𑀬 𑀅𑀪𑀸𑀯𑀢𑁄. ‘‘𑀦 𑀅𑀫𑀦𑀸𑀧’’𑀦𑁆𑀢𑀺 𑀇𑀫𑀺𑀦𑀸 𑀅𑀧𑁆𑀧𑀺𑀬𑀁, 𑀯𑁂𑀭𑀺𑀧𑀼𑀕𑁆𑀕𑀮𑀜𑁆𑀘, 𑀧𑀸𑀭𑀺𑀲𑁂𑀲𑀢𑁄 𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀲𑁆𑀲 𑀕𑀳𑀡𑀁 𑀆𑀧𑀦𑁆𑀦𑀁. 𑀇𑀢𑀺 ‘‘𑀏𑀓𑀁 𑀧𑀼𑀕𑁆𑀕𑀮𑀁 𑀦𑁂𑀯 𑀫𑀦𑀸𑀧𑀁 𑀦𑀸𑀫𑀦𑀸𑀧’’𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄, 𑀧𑀺𑀬𑀸𑀤𑀻𑀦𑀜𑁆𑀘 𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀉𑀤𑀸𑀲𑀺𑀦𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀺.

𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀬𑁆𑀯𑀸𑀲𑁆𑀲 𑀧𑀓𑀢𑀺𑀫𑀚𑁆𑀛𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀅𑀢𑁆𑀢𑀲𑀺𑀦𑁂𑀳𑀲𑁆𑀲 𑀩𑀮𑀯𑀪𑀸𑀯𑀢𑁄 𑀯𑁂𑀭𑀺𑀢𑁄𑀧𑀺 𑀅𑀢𑁆𑀢𑀦𑀺 𑀫𑀚𑁆𑀛𑀢𑁆𑀢𑀢𑀸𑀬 𑀤𑀼𑀭𑀽𑀧𑀲𑀁𑀳𑀸𑀭𑀢𑁆𑀢𑀸 ‘‘𑀇𑀫𑁂𑀲𑀼 𑀘 𑀅𑀢𑁆𑀢𑀦𑀺 𑀘𑀸’’𑀢𑀺 𑀅𑀢𑁆𑀢𑀸 𑀧𑀘𑁆𑀙𑀸 𑀯𑀼𑀢𑁆𑀢𑁄. 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀅𑀬𑀁 𑀲𑀫𑀸𑀧𑀢𑁆𑀢𑀺 𑀆𑀲𑀦𑁆𑀦𑀧𑀻𑀢𑀺𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁮𑁭) 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦. 𑀬𑀁 𑀳𑀺 𑀳𑁂𑀝𑁆𑀞𑀸 ‘‘𑀧𑀕𑀼𑀡𑀢𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬𑀸’’𑀢𑀺𑀆𑀤𑀺 (𑀯𑀺𑀲𑀼𑀤𑁆𑀥𑀺. 𑁧.𑁮𑁭) 𑀯𑀼𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀢𑀻𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼, 𑀘𑀢𑀼𑀢𑁆𑀣𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀘 𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀤𑀁 𑀧𑀦 𑀢𑀢𑀺𑀬𑀚𑁆𑀛𑀸𑀦𑁂 𑀆𑀤𑀻𑀦𑀯𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀘𑀢𑀼𑀢𑁆𑀣𑀸𑀥𑀺𑀕𑀫𑀸𑀬 𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀧𑀣𑀯𑀻𑀲𑀤𑁆𑀤𑀁 𑀅𑀧𑀦𑁂𑀢𑁆𑀯𑀸 𑀢𑀤𑁂𑀯 𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑁂𑀲𑀓𑀲𑀺𑀡𑀸𑀦𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀸𑀫𑀁 𑀓𑀲𑀺𑀡𑀸𑀦𑀸𑀧𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀲𑁆𑀲𑀸𑀧𑀺 𑀢𑀢𑀺𑀬𑀚𑁆𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀤𑀺𑀢𑀸𑀬 𑀅𑀢𑁆𑀣𑁂𑀯 𑀲𑀪𑀸𑀕𑀢𑀸, 𑀢𑀁 𑀧𑀦 𑀅𑀓𑀸𑀭𑀡𑀁 𑀆𑀭𑀫𑁆𑀫𑀡𑀲𑁆𑀲 𑀯𑀺𑀲𑀤𑀺𑀲𑀢𑀸𑀬𑀸𑀢𑀺 𑀆𑀳 ‘‘𑀆𑀭𑀫𑁆𑀫𑀡𑀯𑀺𑀲𑀪𑀸𑀕𑀢𑀸𑀬𑀸’’𑀢𑀺. 𑀦𑀦𑀼 𑀘 𑀅𑀜𑁆𑀜𑀣𑀸𑀯 𑀓𑀲𑀺𑀡𑀸𑀤𑀺𑀪𑀸𑀯𑀦𑀸, 𑀅𑀜𑁆𑀜𑀣𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀢𑀺 𑀪𑀸𑀯𑀦𑀸𑀯𑀲𑁂𑀦𑀸𑀧𑀺 𑀬𑀣𑀸𑀯𑀼𑀢𑁆𑀢𑀚𑁆𑀛𑀸𑀦𑀸𑀦𑀁 𑀅𑀢𑁆𑀣𑁂𑀯 𑀯𑀺𑀲𑀤𑀺𑀲𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀪𑀸𑀯𑀦𑀸𑀯𑀲𑁂𑀦 𑀧𑀦 𑀯𑀺𑀲𑀤𑀺𑀲𑀢𑀸 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀦 𑀏𑀓𑀦𑁆𑀢𑀺𑀓𑀁 𑀓𑀸𑀭𑀡𑀁. 𑀢𑀣𑀸 𑀳𑀺 𑀅𑀜𑁆𑀜𑀣𑀸𑀯 𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀸, 𑀅𑀜𑁆𑀜𑀣𑀸 𑀉𑀧𑁂𑀓𑁆𑀔𑀸𑀪𑀸𑀯𑀦𑀸. 𑀢𑀣𑀸𑀧𑀺 𑀲𑀢𑁆𑀢𑁂𑀲𑀼 𑀬𑀣𑀸𑀧𑀯𑀢𑁆𑀢𑀺𑀢𑀁 𑀳𑀺𑀢𑁂𑀲𑀺𑀢𑀸𑀤𑀺𑀆𑀓𑀸𑀭𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀆𑀫𑀲𑀦𑁆𑀢𑀻, 𑀢𑀢𑁄 𑀯𑀺𑀦𑀺𑀯𑀢𑁆𑀢𑀫𑀸𑀦𑀭𑀽𑀧𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀓𑀸𑀭𑁂𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀧𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀫𑁆𑀫𑀲𑁆𑀲𑀓𑀸 𑀲𑀢𑁆𑀢𑀸, 𑀢𑁂 𑀓𑀲𑁆𑀲 𑀭𑀼𑀘𑀺𑀬𑀸 𑀲𑀼𑀔𑀺𑀢𑀸 𑀯𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 (𑀯𑀺𑀲𑀼𑀤𑁆𑀥𑀺. 𑁧.𑁨𑁬𑁩). 𑀆𑀭𑀫𑁆𑀫𑀡𑀲𑀪𑀸𑀕𑀢𑀸𑀧𑀺 𑀘𑁂𑀢𑁆𑀣 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑀢𑀺𑀬𑀚𑁆𑀛𑀸𑀦𑀲𑁆𑀲 𑀇𑀚𑁆𑀛𑀢𑀺 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀸𑀤𑀻𑀲𑀽’’𑀢𑀺𑀆𑀤𑀺. 𑀢𑀢𑁆𑀣 𑀫𑁂𑀢𑁆𑀢𑀸𑀤𑀻𑀲𑀽𑀢𑀺 𑀫𑁂𑀢𑁆𑀢𑀸𑀤𑀻𑀲𑀼 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂𑀲𑀼, 𑀫𑁂𑀢𑁆𑀢𑀸𑀤𑀺𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑁨𑁬𑁨. 𑀩𑁆𑀭𑀳𑁆𑀫𑀼𑀢𑁆𑀢𑀫𑁂𑀦𑀸𑀢𑀺 𑀏𑀢𑁆𑀣 𑀲𑀫𑁆𑀫𑀼𑀢𑀺𑀩𑁆𑀭𑀳𑁆𑀫𑀸𑀦𑁄 𑀉𑀧𑀧𑀢𑁆𑀢𑀺𑀩𑁆𑀭𑀳𑁆𑀫𑀸𑀦𑁄 𑀯𑀺𑀲𑀼𑀤𑁆𑀥𑀺𑀩𑁆𑀭𑀳𑁆𑀫𑀸𑀦𑁄𑀢𑀺 𑀢𑀺𑀯𑀺𑀥𑀸 𑀩𑁆𑀭𑀳𑁆𑀫𑀸𑀦𑁄.

‘‘𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭𑀁, 𑀲𑀼𑀯𑀸 𑀪𑀼𑀜𑁆𑀚𑀦𑁆𑀢𑀺 𑀓𑁄𑀲𑀺𑀬;

𑀧𑀝𑀺𑀯𑁂𑀤𑁂𑀫𑀺 𑀢𑁂 𑀩𑁆𑀭𑀳𑁆𑀫𑁂, 𑀦 𑀦𑁂 𑀯𑀸𑀭𑁂𑀢𑀼𑀫𑀼𑀲𑁆𑀲𑀳𑁂. (𑀚𑀸. 𑁧.𑁧𑁪.𑁧);

𑀧𑀭𑀺𑀩𑁆𑀩𑀚 𑀫𑀳𑀸𑀩𑁆𑀭𑀳𑁆𑀫𑁂, 𑀧𑀘𑀦𑁆𑀢𑀜𑁆𑀜𑁂𑀧𑀺 𑀧𑀸𑀡𑀺𑀦𑁄’’𑀢𑀺. (𑀧𑀸𑀘𑀺. 𑁬𑁪𑁭) 𑁋

𑀘 𑀏𑀯𑀫𑀸𑀤𑀻𑀲𑀼 𑀳𑀺 𑀩𑁆𑀭𑀳𑁆𑀫𑀲𑀤𑁆𑀤𑁂𑀦 𑀲𑀫𑁆𑀫𑀼𑀢𑀺𑀩𑁆𑀭𑀳𑁆𑀫𑀸𑀦𑁄 𑀯𑀼𑀢𑁆𑀢𑀸.

‘‘𑀅𑀧𑀸𑀭𑀼𑀢𑀸 𑀢𑁂𑀲𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸,

𑀬𑁂 𑀲𑁄𑀢𑀯𑀦𑁆𑀢𑁄 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀁;

𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁,

𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’’.

‘‘𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀻’’𑀢𑀺 (𑀤𑀻. 𑀦𑀺. 𑁨.𑁭𑁧; 𑀫. 𑀦𑀺. 𑁧.𑁨𑁮𑁩; 𑁨.𑁩𑁪𑁦; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁯) 𑀘 𑀏𑀯𑀫𑀸𑀤𑀻𑀲𑀼 𑀩𑁆𑀭𑀳𑁆𑀫𑀲𑀤𑁆𑀤𑁂𑀦 𑀉𑀧𑀧𑀢𑁆𑀢𑀺𑀩𑁆𑀭𑀳𑁆𑀫𑀸𑀦𑁄 𑀯𑀼𑀢𑁆𑀢𑀸. ‘‘𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁧𑁪𑁮; 𑀲𑀁. 𑀦𑀺. 𑁨.𑁨𑁧; 𑀅. 𑀦𑀺. 𑁪.𑁮; 𑁫.𑁧𑁧; 𑀧𑀝𑀺. 𑀫. 𑁨.𑁪𑁪) 𑀯𑀘𑀦𑀢𑁄 ‘‘𑀩𑁆𑀭𑀳𑁆𑀫’’𑀦𑁆𑀢𑀺 𑀅𑀭𑀺𑀬𑀥𑀫𑁆𑀫𑁄 𑀯𑀼𑀘𑁆𑀘𑀢𑀺, 𑀢𑀢𑁄 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀯𑀺𑀲𑀼𑀤𑁆𑀥𑀺𑀩𑁆𑀭𑀳𑁆𑀫𑀸𑀦𑁄 𑀦𑀸𑀫 𑀧𑀭𑀫𑀢𑁆𑀣𑀩𑁆𑀭𑀳𑁆𑀫𑀢𑀸𑀬. 𑀯𑀺𑀲𑁂𑀲𑀢𑁄 𑀧𑀦 ‘‘𑀩𑁆𑀭𑀳𑁆𑀫𑀸𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀘𑀦𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀢𑁆𑀢𑀫𑀩𑁆𑀭𑀳𑁆𑀫𑀸 𑀦𑀸𑀫 𑀲𑀤𑁂𑀯𑀓𑁂 𑀮𑁄𑀓𑁂 𑀩𑁆𑀭𑀳𑁆𑀫𑀪𑀽𑀢𑁂𑀳𑀺 𑀕𑀼𑀡𑁂𑀳𑀺 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀺𑀢𑁄. 𑀇𑀢𑀺 𑀩𑁆𑀭𑀳𑁆𑀫𑀸𑀦𑀁 𑀉𑀢𑁆𑀢𑀫𑁄, 𑀩𑁆𑀭𑀳𑁆𑀫𑀸 𑀘 𑀲𑁄 𑀉𑀢𑁆𑀢𑀫𑁄 𑀘𑀸𑀢𑀺 𑀯𑀸 𑀩𑁆𑀭𑀳𑁆𑀫𑀼𑀢𑁆𑀢𑀫𑁄, 𑀪𑀕𑀯𑀸. 𑀢𑁂𑀦 𑀓𑀣𑀺𑀢𑁂 ‘‘𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁫𑁫𑁬; 𑁩.𑁩𑁦𑁮; 𑀫. 𑀦𑀺. 𑁧.𑁭𑁭, 𑁪𑁫𑁯, 𑁫𑁦𑁯; 𑁨.𑁩𑁦𑁯, 𑁩𑁧𑁫, 𑁪𑁫𑁧, 𑁪𑁭𑁧) 𑀢𑀢𑁆𑀣 𑀢𑀢𑁆𑀣 𑀯𑁂𑀦𑁂𑀬𑁆𑀬𑀸𑀦𑀁 𑀤𑁂𑀲𑀺𑀢𑁂. 𑀇𑀢𑀻𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑁂𑀦 𑀪𑀸𑀯𑀦𑀸𑀓𑁆𑀓𑀫𑁂𑀦 𑀘𑁂𑀯 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀘 𑀯𑀺𑀤𑀺𑀢𑁆𑀯𑀸 𑀚𑀸𑀦𑀺𑀢𑁆𑀯𑀸. 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀅𑀲𑀸𑀥𑀸𑀭𑀡𑀁 𑀢𑀁𑀢𑀁𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀝𑀺𑀦𑀺𑀬𑀢𑀫𑁂𑀯 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀸𑀥𑀸𑀭𑀡𑀪𑀸𑀯𑀢𑁄 𑀢𑀢𑁆𑀣 𑀢𑀢𑁆𑀣 𑀧𑀓𑀺𑀡𑁆𑀡𑀓𑀁 𑀯𑀺𑀲𑀝𑀁 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀸 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀚𑀸𑀦𑀺𑀢𑀩𑁆𑀩𑀸.

𑀫𑁂𑀚𑁆𑀚𑀢𑀻𑀢𑀺 𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀲 𑀓𑀢𑁆𑀢𑀼𑀦𑀺𑀯𑀢𑁆𑀢𑀦𑀢𑁆𑀣𑀁 𑀥𑀫𑁆𑀫𑀫𑁂𑀯 𑀓𑀢𑁆𑀢𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀲𑀢𑀺. 𑀲𑀺𑀦𑀺𑀬𑁆𑀳𑀢𑀻𑀢𑀺 𑀏𑀢𑁆𑀣 𑀲𑀢𑁆𑀢𑁂𑀲𑀼 𑀩𑁆𑀬𑀸𑀧𑀚𑁆𑀚𑀦𑀯𑀲𑁂𑀦 𑀮𑀽𑀔𑀪𑀸𑀯𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀳𑀺𑀢𑀸𑀓𑀸𑀭𑀧𑀯𑀢𑁆𑀢𑀺𑀯𑀲𑁂𑀦 𑀲𑀺𑀦𑁂𑀳𑀦𑀁 𑀤𑀝𑁆𑀞𑀩𑁆𑀩𑀁, 𑀦 𑀢𑀡𑁆𑀳𑀸𑀬𑀦𑀯𑀲𑁂𑀦. 𑀢𑀁 𑀳𑀺 𑀫𑁄𑀳𑀧𑀼𑀩𑁆𑀩𑀗𑁆𑀕𑀫𑀁 𑀮𑀼𑀩𑁆𑀪𑀦𑀲𑀪𑀸𑀯𑀁, 𑀇𑀤𑀁 𑀧𑀦 𑀅𑀤𑀼𑀲𑁆𑀲𑀦𑀲𑀪𑀸𑀯𑀁 𑀅𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀁. 𑀦𑀦𑀼 𑀘 𑀢𑀡𑁆𑀳𑀸𑀲𑀺𑀦𑁂𑀳𑁄𑀧𑀺 𑀩𑁆𑀬𑀸𑀧𑀸𑀤𑀯𑀺𑀭𑁄𑀥𑀻 𑀢𑁂𑀦 𑀲𑀳𑀸𑀦𑀯𑀝𑁆𑀞𑀸𑀦𑀢𑁄. 𑀬𑀤𑀺𑀧𑀺 𑀢𑁂𑀦 𑀲𑀳 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀦𑀧𑁆𑀧𑀯𑀢𑁆𑀢𑀢𑀺, 𑀯𑀺𑀭𑁄𑀥𑀻 𑀧𑀦 𑀦 𑀳𑁄𑀢𑀺 𑀅𑀧𑁆𑀧𑀳𑀸𑀬𑀓𑀢𑁄. 𑀫𑁂𑀚𑁆𑀚𑀢𑀻𑀢𑀺 𑀫𑀺𑀢𑁆𑀢𑁄, 𑀳𑀺𑀢𑀚𑁆𑀛𑀸𑀲𑀬𑁄 𑀔𑀦𑁆𑀥𑀧𑁆𑀧𑀩𑀦𑁆𑀥𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀫𑀺𑀢𑁆𑀢𑁂 𑀪𑀯𑀸, 𑀫𑀺𑀢𑁆𑀢𑁂 𑀯𑀸 𑀆𑀭𑀫𑁆𑀫𑀡𑀪𑀽𑀢𑁂 𑀧𑀺𑀬𑁂 𑀧𑀼𑀕𑁆𑀕𑀮𑁂 𑀪𑀯𑀸, 𑀫𑀺𑀢𑁆𑀢𑀲𑁆𑀲 𑀏𑀲𑀸 𑀧𑀯𑀢𑁆𑀢𑀺 𑀫𑁂𑀚𑁆𑀚𑀦𑀯𑀲𑁂𑀦 𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀭𑁄𑀢𑀻𑀢𑀺 𑀓𑀭𑀼𑀡𑀸, 𑀓𑀺𑀁 𑀓𑀭𑁄𑀢𑀺, 𑀓𑁂𑀲𑀁, 𑀓𑀺𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀳𑀤𑀬𑀓𑀫𑁆𑀧𑀦’’𑀦𑁆𑀢𑀺. 𑀓𑀫𑁆𑀧𑀦𑀦𑁆𑀢𑀺 𑀘 𑀧𑀭𑁂𑀲𑀁 𑀤𑀼𑀓𑁆𑀔𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀧𑀦𑁂𑀢𑀼𑀓𑀸𑀫𑀲𑁆𑀲 𑀅𑀲𑀳𑀦𑀸𑀓𑀸𑀭𑁂𑀦 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁. 𑀢𑀬𑀺𑀤𑀁 𑀲𑀧𑁆𑀧𑀼𑀭𑀺𑀲𑀸𑀦𑀁𑀬𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀸𑀥𑀽𑀦’’𑀦𑁆𑀢𑀺. 𑀲𑀧𑁆𑀧𑀼𑀭𑀺𑀲𑀸 𑀳𑀺 𑀲𑀧𑀭𑀳𑀺𑀢𑀲𑀸𑀥𑀦𑁂𑀦 ‘‘𑀲𑀸𑀥𑀽’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀦𑀸𑀲𑁂𑀢𑀻𑀢𑀺 𑀅𑀤𑀲𑁆𑀲𑀦𑀁 𑀕𑀫𑁂𑀢𑀺, 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀢𑁆𑀣 𑀳𑀺𑀁𑀲𑀦𑀁 𑀅𑀧𑀦𑀬𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀳𑀺 𑀓𑀭𑀼𑀡𑀸. 𑀨𑀭𑀡𑀯𑀲𑁂𑀦𑀸𑀢𑀺 𑀨𑀼𑀲𑀦𑀯𑀲𑁂𑀦, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀓𑀭𑀡𑀜𑁆𑀘𑁂𑀢𑁆𑀣 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑁂𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀫𑁄𑀤𑀦𑁆𑀢𑀺 𑀢𑀸𑀬𑀸𑀢𑀺 𑀫𑁄𑀤𑀦𑀓𑀺𑀭𑀺𑀬𑀸𑀬 𑀫𑀼𑀤𑀺𑀢𑀸𑀬 𑀓𑀭𑀡𑀪𑀸𑀯𑀦𑀺𑀤𑁆𑀤𑁂𑀲𑁄, 𑀲𑁆𑀯𑀸𑀬𑀁 𑀉𑀧𑀘𑀸𑀭𑀲𑀺𑀤𑁆𑀥𑁄, 𑀫𑀼𑀤𑀺𑀢𑀸𑀯𑀺𑀦𑀺𑀫𑀼𑀢𑁆𑀢𑁄 𑀦𑀢𑁆𑀣𑀺 𑀢𑀢𑁆𑀣 𑀓𑁄𑀘𑀺 𑀓𑀢𑁆𑀢𑀸𑀢𑀺 𑀢𑀫𑁂𑀯 𑀓𑀢𑁆𑀢𑀼𑀪𑀸𑀯𑁂𑀦 𑀦𑀺𑀤𑁆𑀤𑀺𑀲𑀢𑀺 ‘‘𑀲𑀬𑀁 𑀯𑀸 𑀫𑁄𑀤𑀢𑀻’’𑀢𑀺, 𑀅𑀬𑀫𑁆𑀧𑀺 𑀉𑀧𑀘𑀸𑀭𑀦𑀺𑀤𑁆𑀤𑁂𑀲𑁄𑀯. 𑀥𑀫𑁆𑀫𑀸𑀦𑀁 𑀅𑀯𑀲𑀯𑀢𑁆𑀢𑀦𑀢𑁄𑀢𑀺 𑀯𑀲𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 ‘‘𑀫𑁄𑀤𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑀼𑀤𑀺𑀢𑀸’’𑀢𑀺 𑀆𑀳.

𑀧𑀺𑀬𑀸𑀤𑀻𑀲𑀼 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀫𑀼𑀔𑁂𑀦 𑀉𑀤𑀸𑀲𑀺𑀦𑀪𑀸𑀯𑀲𑀗𑁆𑀔𑀸𑀢𑀸 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀸 𑀉𑀧𑁂𑀓𑁆𑀔𑀸. 𑀢𑁂𑀦𑀸𑀳 ‘‘𑀅𑀯𑁂𑀭𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺. 𑀢𑀢𑁆𑀣 𑀉𑀧𑁂𑀓𑁆𑀔𑀢𑀻𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁨𑁬𑁩. 𑀳𑀺𑀢𑁄 𑀦𑀸𑀫 𑀅𑀢𑁆𑀣𑀘𑀭𑁄, 𑀢𑀲𑁆𑀫𑀸 𑀳𑀺𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸𑀢𑀺 𑀲𑀢𑁆𑀢𑀸𑀦𑀁 𑀳𑀺𑀢𑀘𑀭𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀮𑀓𑁆𑀔𑀡𑀸, 𑀳𑀺𑀢𑀸𑀓𑀸𑀭𑀲𑁆𑀲 𑀯𑀸 𑀧𑀯𑀢𑁆𑀢𑀦𑀮𑀓𑁆𑀔𑀡𑀸. 𑀳𑀺𑀢𑀽𑀧𑀲𑀁𑀳𑀸𑀭𑀭𑀲𑀸𑀢𑀺 𑀲𑀢𑁆𑀢𑁂𑀲𑀼 𑀳𑀺𑀢𑀲𑁆𑀲 𑀉𑀧𑀦𑀬𑀦𑀓𑀺𑀘𑁆𑀘𑀸, 𑀉𑀧𑀦𑀬𑀦𑀲𑀫𑁆𑀧𑀢𑁆𑀢𑀺𑀓𑀸 𑀯𑀸. ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁩𑁭; 𑀯𑀺𑀪. 𑁯𑁦𑁯) 𑀧𑀯𑀢𑁆𑀢𑀦𑀓𑀲𑁆𑀲 𑀆𑀖𑀸𑀢𑀲𑁆𑀲 𑀯𑀺𑀦𑀬𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀺, 𑀬𑀢𑁆𑀣 𑀯𑀸 𑀲𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀆𑀖𑀸𑀢𑀯𑀺𑀦𑀬𑀦𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀆𑀖𑀸𑀢𑀯𑀺𑀦𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀫𑀦𑀸𑀧𑀸𑀦𑀫𑁆𑀧𑀺 𑀲𑀢𑁆𑀢𑀸𑀦𑀁 𑀧𑀝𑀺𑀓𑁆𑀓𑀽𑀮𑁂 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀺𑀢𑀸𑀭𑀽𑀧𑁂𑀦, 𑀧𑀕𑁂𑀯 𑀫𑀦𑀸𑀧𑀸𑀦𑀁 𑀬𑀁 𑀫𑀦𑀸𑀧𑀪𑀸𑀯𑀤𑀲𑁆𑀲𑀦𑀁, 𑀢𑀣𑀸𑀧𑀯𑀢𑁆𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀢𑀁 𑀧𑀤𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀫𑀦𑀸𑀧𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀩𑁆𑀬𑀸𑀧𑀸𑀤𑀽𑀧𑀲𑀫𑁄𑀢𑀺 𑀩𑁆𑀬𑀸𑀧𑀸𑀤𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀽𑀧𑀲𑀫𑁄. 𑀲𑀫𑁆𑀧𑀢𑁆𑀢𑀻𑀢𑀺 𑀲𑀫𑁆𑀧𑀚𑁆𑀚𑀦𑀁 𑀲𑀫𑁆𑀫𑀤𑁂𑀯 𑀦𑀺𑀩𑁆𑀩𑀢𑁆𑀢𑀺. 𑀲𑀺𑀦𑁂𑀳𑀲𑀫𑁆𑀪𑀯𑁄𑀢𑀺 𑀢𑀡𑁆𑀳𑀸𑀲𑀺𑀦𑁂𑀳𑀲𑁆𑀲 𑀉𑀧𑁆𑀧𑀢𑁆𑀢𑀺. 𑀯𑀺𑀧𑀢𑁆𑀢𑀻𑀢𑀺 𑀯𑀺𑀦𑀸𑀲𑁄. 𑀫𑁂𑀢𑁆𑀢𑀸𑀫𑀼𑀔𑁂𑀦 𑀳𑀺 𑀭𑀸𑀕𑁄 𑀯𑀜𑁆𑀘𑁂𑀢𑀺.

𑀓𑀭𑀼𑀡𑀸𑀤𑀻𑀦𑀁 𑀮𑀓𑁆𑀔𑀡𑀸𑀤𑀻𑀲𑀼 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀲𑀢𑁆𑀢𑀸𑀦𑀁 𑀧𑀯𑀢𑁆𑀢𑀤𑀼𑀓𑁆𑀔𑀲𑁆𑀲 𑀅𑀧𑀦𑀬𑀦𑀸𑀓𑀸𑀭𑁄. 𑀅𑀧𑀦𑀬𑀦𑀁 𑀧𑀦 𑀳𑁄𑀢𑀼 𑀯𑀸 𑀫𑀸 𑀯𑀸, 𑀬𑁄 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑁄, 𑀢𑀣𑀸𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸. 𑀅𑀧𑀦𑁂𑀢𑀼𑀓𑀸𑀫𑀢𑀸𑀬 𑀧𑀭𑁂𑀲𑀁 𑀤𑀼𑀓𑁆𑀔𑀲𑁆𑀲 𑀅𑀲𑀳𑀦𑀁 𑀅𑀦𑀥𑀺𑀯𑀸𑀲𑀦𑀁 𑀧𑀭𑀤𑀼𑀓𑁆𑀔𑀸𑀲𑀳𑀦𑀁. 𑀦 𑀯𑀺𑀳𑀺𑀁𑀲𑀸 𑀅𑀯𑀺𑀳𑀺𑀁𑀲𑀸, 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀦𑀁. 𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀺, 𑀯𑀺𑀳𑀺𑀁𑀲𑀸𑀬 𑀯𑀸 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀅𑀯𑀺𑀳𑀺𑀁𑀲𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀯𑀺𑀳𑀺𑀁𑀲𑀽𑀧𑀲𑀫𑁄𑀢𑀺 𑀏𑀢𑁆𑀣 𑀯𑀺𑀳𑀺𑀁𑀲𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑁂, 𑀯𑀺𑀳𑀺𑀁𑀲𑀦𑀁 𑀯𑀸 𑀦𑁂𑀲𑀁 𑀢𑀦𑁆𑀢𑀺 𑀯𑀺𑀳𑀺𑀁𑀲𑀸, 𑀲𑀢𑁆𑀢𑀸𑀦𑀁 𑀯𑀺𑀳𑁂𑀞𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑁄 𑀓𑀭𑀼𑀡𑀸𑀬 𑀧𑀝𑀺𑀧𑀓𑁆𑀔𑀪𑀽𑀢𑁄 𑀧𑀝𑀺𑀖𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀓𑀭𑀼𑀡𑀸𑀫𑀼𑀔𑁂𑀦 𑀲𑁄𑀓𑁄 𑀯𑀜𑁆𑀘𑁂𑀢𑀻𑀢𑀺 𑀆𑀳 ‘‘𑀲𑁄𑀓𑀲𑀫𑁆𑀪𑀯𑁄 𑀯𑀺𑀧𑀢𑁆𑀢𑀻’’𑀢𑀺.

𑀧𑀫𑁄𑀤𑀦𑀮𑀓𑁆𑀔𑀡𑀸𑀢𑀺 𑀧𑀭𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑁄𑀤𑀦𑀮𑀓𑁆𑀔𑀡𑀸. 𑀅𑀦𑀺𑀲𑁆𑀲𑀸𑀬𑀦𑀭𑀲𑀸𑀢𑀺 𑀇𑀲𑁆𑀲𑀸𑀬𑀦𑀲𑁆𑀲 𑀉𑀲𑀽𑀬𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀓𑀺𑀘𑁆𑀘𑀸. 𑀲𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀸, 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼, 𑀅𑀥𑀺𑀓𑀼𑀲𑀮𑀥𑀫𑁆𑀫𑁂𑀲𑀼 𑀘 𑀅𑀲𑀳𑀦𑀁 𑀅𑀭𑀫𑀡𑀁 𑀅𑀭𑀢𑀺𑀇𑀘𑁆𑀘𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀢𑀲𑁆𑀲𑀸 𑀯𑀺𑀳𑀦𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀯𑀸 𑀯𑀺𑀖𑀸𑀢𑀁 𑀯𑀽𑀧𑀲𑀫𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀅𑀭𑀢𑀺𑀯𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀧𑀳𑀸𑀲𑁄 𑀕𑁂𑀳𑀲𑀺𑀢𑀧𑀻𑀢𑀺𑀯𑀲𑁂𑀦 𑀧𑀳𑀝𑁆𑀞𑀪𑀸𑀯𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁. 𑀲𑀢𑁆𑀢𑁂𑀲𑀼 𑀲𑀫𑀪𑀸𑀯𑀤𑀲𑁆𑀲𑀦𑀭𑀲𑀸𑀢𑀺 𑀧𑀺𑀬𑀸𑀤𑀺𑀪𑁂𑀤𑁂𑀲𑀼 𑀲𑀩𑁆𑀩𑀲𑀢𑁆𑀢𑁂𑀲𑀼 𑀉𑀤𑀸𑀲𑀺𑀦𑀯𑀼𑀢𑁆𑀢𑀺𑀬𑀸 𑀲𑀫𑀪𑀸𑀯𑀲𑁆𑀲𑁂𑀯 𑀤𑀲𑁆𑀲𑀦𑀓𑀺𑀘𑁆𑀘𑀸, 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀡𑀢𑁄 𑀲𑀫𑀪𑀸𑀯𑁂𑀦𑁂𑀯 𑀢𑁂𑀲𑀁 𑀕𑀳𑀡𑀓𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢𑁂𑀲𑀼 𑀧𑀝𑀺𑀓𑁆𑀓𑀽𑀮𑀸𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀸𑀦𑀁 𑀅𑀕𑁆𑀕𑀳𑀡𑀢𑁄 𑀢𑀢𑁆𑀣 𑀧𑀝𑀺𑀖𑀸𑀦𑀼𑀦𑀬𑀸𑀦𑀁 𑀯𑀽𑀧𑀲𑀫𑀦𑀸𑀓𑀸𑀭𑁂𑀦 𑀯𑀼𑀢𑁆𑀢𑀺𑀬𑀸 𑀢𑁂𑀲𑀁 𑀯𑀽𑀧𑀲𑀫𑀁 𑀯𑀺𑀓𑁆𑀔𑀫𑁆𑀪𑀦𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀧𑀝𑀺𑀖𑀸𑀦𑀼𑀦𑀬𑀯𑀽𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀏𑀯𑀁 𑀧𑀯𑀢𑁆𑀢𑀓𑀫𑁆𑀫𑀲𑁆𑀲𑀓𑀢𑀸𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸𑀢𑀺 𑀏𑀢𑁆𑀣 ‘‘𑀏𑀯’’𑀦𑁆𑀢𑀺 𑀇𑀫𑀺𑀦𑀸 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀳𑀺𑀢𑀽𑀧𑀲𑀁𑀳𑀸𑀭𑀤𑀼𑀓𑁆𑀔𑀸𑀧𑀦𑀬𑀦𑀲𑀫𑁆𑀧𑀢𑁆𑀢𑀺𑀧𑀫𑁄𑀤𑀦𑀸𑀓𑀸𑀭𑁂𑀦 𑀧𑀘𑁆𑀘𑀸𑀫𑀲𑀦𑁆𑀢𑁄 𑀫𑁂𑀢𑁆𑀢𑀸𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀧𑀝𑀺𑀲𑁂𑀥𑀦𑀫𑀼𑀔𑁂𑀦 𑀧𑀯𑀢𑁆𑀢𑀁 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀁, 𑀦 𑀬𑀁 𑀓𑀺𑀜𑁆𑀘𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁬𑁪. 𑀯𑀺𑀧𑀲𑁆𑀲𑀦𑀸𑀲𑀼𑀔𑀜𑁆𑀘𑁂𑀯 𑀪𑀯𑀲𑀫𑁆𑀧𑀢𑁆𑀢𑀺 𑀘𑀸𑀢𑀺 𑀏𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀘𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀫𑁆𑀧𑀺 𑀳𑀺 𑀦𑁂𑀲𑀁 𑀲𑀸𑀥𑀸𑀭𑀡𑀧𑀬𑁄𑀚𑀦𑀁. 𑀢𑀣𑀸 ‘‘𑀲𑀼𑀔𑀁 𑀲𑀼𑀧𑀢𑀻’’𑀢𑀺𑀆𑀤𑀬𑁄 (𑀅. 𑀦𑀺. 𑁮.𑁧; 𑁧𑁧.𑁧𑁫) 𑀏𑀓𑀸𑀤𑀲𑀸𑀦𑀺𑀲𑀁𑀲𑀸. 𑀢𑁂 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀇𑀥 𑀦 𑀕𑀳𑀺𑀢𑀸.

𑀦𑀺𑀲𑁆𑀲𑀭𑀢𑀺 𑀅𑀧𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁, 𑀧𑀳𑀸𑀬𑀓𑀁. 𑀓𑀸𑀫𑀜𑁆𑀘𑁂𑀢𑁂𑀳𑀺 𑀧𑀜𑁆𑀘𑀧𑀺 𑀦𑀻𑀯𑀭𑀡𑀸𑀦𑀺, 𑀢𑀤𑁂𑀓𑀝𑁆𑀞𑀸 𑀘 𑀧𑀸𑀧𑀥𑀫𑁆𑀫𑀸 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀬𑀦𑁆𑀢𑀺, 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀤𑀲𑁆𑀲𑀦𑀯𑀲𑁂𑀦 𑀧𑀦 𑀩𑁆𑀬𑀸𑀧𑀸𑀤𑀸𑀤𑀬𑁄 𑀧𑀸𑀴𑀺𑀬𑀁 (𑀤𑀻. 𑀦𑀺. 𑁩.𑁩𑁨𑁬; 𑀅. 𑀦𑀺. 𑁬.𑁧𑁩) 𑀯𑀼𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀭𑀸𑀕𑀦𑀺𑀲𑁆𑀲𑀭𑀡𑀢𑀸𑀯𑀘𑀦𑀁 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 𑀲𑀼𑀝𑁆𑀞𑀼 𑀲𑀫𑀢𑁆𑀣𑀺𑀢𑀁 𑀤𑀝𑁆𑀞𑀩𑁆𑀩𑀁.

𑁨𑁬𑁫. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼. 𑀫𑁂𑀢𑁆𑀢𑀸 𑀲𑀢𑁆𑀢𑁂𑀲𑀼 𑀬𑀣𑀸𑀭𑀳𑀁 𑀤𑀸𑀦𑀧𑀺𑀬𑀯𑀘𑀦𑀸𑀤𑀺𑀲𑀻𑀮𑀲𑀼𑀢𑀸𑀤𑀺𑀕𑀼𑀡𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀸𑀦𑀁 𑀫𑀦𑀸𑀧𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸’’𑀢𑀺. 𑀭𑀸𑀕𑁄𑀧𑀺 𑀢𑀢𑁆𑀣 𑀬𑀣𑀸 𑀢𑀣𑀸 𑀕𑀼𑀡𑀕𑁆𑀕𑀳𑀡𑀫𑀼𑀔𑁂𑀦𑁂𑀯 𑀧𑀯𑀢𑁆𑀢𑀢𑀺 𑀫𑀦𑀸𑀧𑀲𑀜𑁆𑀜𑀸𑀧𑀮𑁄𑀪𑀢𑁄𑀢𑀺 𑀆𑀳 ‘‘𑀕𑀼𑀡𑀤𑀲𑁆𑀲𑀦𑀲𑀪𑀸𑀕𑀢𑀸𑀬𑀸’’𑀢𑀺. 𑀢𑀲𑁆𑀫𑀸 𑀫𑀺𑀢𑁆𑀢𑀫𑀼𑀔𑀲𑀧𑀢𑁆𑀢𑁄 𑀯𑀺𑀬 𑀢𑀼𑀮𑁆𑀬𑀸𑀓𑀸𑀭𑁂𑀦 𑀤𑀽𑀲𑀦𑀢𑁄 𑀭𑀸𑀕𑁄 𑀫𑁂𑀢𑁆𑀢𑀸𑀬 𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑁄, 𑀲𑁄 𑀮𑀳𑀼𑀁 𑀑𑀢𑀸𑀭𑀁 𑀮𑀪𑀢𑀺 𑀲𑀢𑀺𑀲𑀫𑁆𑀫𑁄𑀲𑀫𑀢𑁆𑀢𑁂𑀦𑀸𑀧𑀺 𑀫𑁂𑀢𑁆𑀢𑀁 𑀅𑀧𑀦𑀻𑀬 𑀢𑀲𑁆𑀲𑀸 𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑁆𑀢𑀸. 𑀢𑀢𑁄𑀢𑀺 𑀭𑀸𑀕𑀢𑁄, 𑀭𑀸𑀕𑀲𑁆𑀲 𑀯𑀸 𑀑𑀢𑀸𑀭𑀮𑀸𑀪𑀢𑁄. 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀬𑀸𑀢𑀺 𑀲𑀪𑀸𑀕𑀲𑁆𑀲, 𑀲𑀪𑀸𑀕𑁂𑀦 𑀯𑀸 𑀯𑀺𑀲𑀪𑀸𑀕𑀢𑀸𑀬. 𑀲𑀢𑁆𑀢𑁂𑀲𑀼 𑀳𑀺 𑀫𑀦𑀸𑀧𑀸𑀓𑀸𑀭𑀕𑀸𑀳𑀺𑀦𑁄 𑀫𑁂𑀢𑁆𑀢𑀸𑀲𑀪𑀸𑀕𑀲𑁆𑀲 𑀢𑀩𑁆𑀩𑀺𑀧𑀭𑀻𑀢𑀲𑀪𑀸𑀯𑁄 𑀩𑁆𑀬𑀸𑀧𑀸𑀤𑁄 𑀢𑁂𑀦 𑀯𑀺𑀲𑀪𑀸𑀕𑁄. 𑀢𑀲𑁆𑀫𑀸 𑀲𑁄 𑀑𑀢𑀸𑀭𑀁 𑀮𑀪𑀫𑀸𑀦𑁄 𑀘𑀺𑀭𑁂𑀦𑁂𑀯 𑀮𑀪𑁂𑀬𑁆𑀬𑀸𑀢𑀺 𑀧𑀼𑀭𑀺𑀲𑀲𑁆𑀲 𑀤𑀽𑀭𑁂 𑀞𑀺𑀢𑀲𑀧𑀢𑁆𑀢𑁄 𑀯𑀺𑀬 𑀫𑁂𑀢𑁆𑀢𑀸𑀬 𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑁄. 𑀢𑀢𑁄𑀢𑀺 𑀩𑁆𑀬𑀸𑀧𑀸𑀤𑀢𑁄. 𑀦𑀺𑀩𑁆𑀪𑀬𑁂𑀦𑀸𑀢𑀺 𑀅𑀦𑀼𑀲𑁆𑀲𑀗𑁆𑀓𑀦𑀧𑀭𑀺𑀲𑀗𑁆𑀓𑀦𑁂𑀦, 𑀮𑀤𑁆𑀥𑀧𑀢𑀺𑀝𑁆𑀞𑀸𑀬 𑀫𑁂𑀢𑁆𑀢𑀸𑀬 𑀩𑁆𑀬𑀸𑀧𑀸𑀤𑁂𑀦 𑀤𑀼𑀧𑁆𑀧𑀥𑀁𑀲𑀺𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀫𑁂𑀢𑁆𑀢𑀸𑀬𑀺𑀲𑁆𑀲𑀢𑀻’’𑀢𑀺𑀆𑀤𑀺.

𑀇𑀝𑁆𑀞𑀸𑀦𑀦𑁆𑀢𑀺 𑀧𑀺𑀬𑀸𑀦𑀁. 𑀓𑀦𑁆𑀢𑀸𑀦𑀦𑁆𑀢𑀺 𑀓𑀫𑀦𑀻𑀬𑀸𑀦𑀁. 𑀫𑀦𑀸𑀧𑀸𑀦𑀦𑁆𑀢𑀺 𑀫𑀦𑀯𑀟𑁆𑀠𑀦𑀓𑀸𑀦𑀁. 𑀢𑀢𑁄 𑀏𑀯 𑀫𑀦𑁄 𑀭𑀫𑁂𑀦𑁆𑀢𑀻𑀢𑀺 𑀫𑀦𑁄𑀭𑀫𑀸𑀦𑀁. 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀦𑁆𑀢𑀺 𑀢𑀡𑁆𑀳𑀸𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀁. 𑀅𑀧𑁆𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄𑀢𑀺 𑀅𑀧𑁆𑀧𑀝𑀺𑀮𑀸𑀪𑁂𑀦 𑀅𑀳𑀫𑀺𑀫𑁂 𑀦 𑀮𑀪𑀸𑀫𑀻𑀢𑀺 𑀧𑀭𑀺𑀢𑀲𑁆𑀲𑀢𑁄. 𑀅𑀢𑀻𑀢𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀁. 𑀦𑀺𑀭𑀼𑀤𑁆𑀥𑀦𑁆𑀢𑀺 𑀦𑀺𑀭𑁄𑀥𑀧𑁆𑀧𑀢𑁆𑀢𑀁. 𑀯𑀺𑀧𑀭𑀺𑀡𑀢𑀦𑁆𑀢𑀺 𑀲𑀪𑀸𑀯𑀯𑀺𑀕𑀫𑁂𑀦 𑀯𑀺𑀕𑀢𑀁. 𑀲𑀫𑀦𑀼𑀲𑁆𑀲𑀭𑀢𑁄𑀢𑀺 𑀅𑀦𑀼𑀢𑁆𑀣𑀼𑀦𑀦𑀯𑀲𑁂𑀦 𑀘𑀺𑀦𑁆𑀢𑀬𑀢𑁄. 𑀕𑁂𑀳𑀲𑀺𑀢𑀦𑁆𑀢𑀺 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀁. ‘‘𑀆𑀤𑀺𑀦𑀸’’𑀢𑀺 𑀇𑀫𑀺𑀦𑀸 ‘‘𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀲𑀤𑁆𑀤𑀸𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀧𑀢𑁆𑀢𑀺𑀤𑀲𑁆𑀲𑀦𑀲𑀪𑀸𑀕𑀢𑀸𑀬𑀸𑀢𑀺 𑀬𑁂𑀲𑀼 𑀲𑀢𑁆𑀢𑁂𑀲𑀼 𑀪𑁄𑀕𑀸𑀤𑀺𑀯𑀺𑀧𑀢𑁆𑀢𑀺𑀤𑀲𑁆𑀲𑀦𑀫𑀼𑀔𑁂𑀦 𑀓𑀭𑀼𑀡𑀸 𑀧𑀯𑀢𑁆𑀢𑀢𑀺, 𑀢𑁂𑀲𑀼 𑀢𑀦𑁆𑀦𑀺𑀫𑀺𑀢𑁆𑀢𑀫𑁂𑀯 𑀅𑀬𑁄𑀦𑀺𑀲𑁄 𑀆𑀪𑁄𑀕𑁂 𑀲𑀢𑀺 𑀬𑀣𑀸𑀯𑀼𑀢𑁆𑀢𑀤𑁄𑀫𑀦𑀲𑁆𑀲𑀫𑀼𑀔𑁂𑀦 𑀲𑁄𑀓𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑁄 𑀓𑀭𑀼𑀡𑀸𑀬 𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑁄. 𑀲𑁄𑀓𑁄 𑀳𑀺 𑀇𑀥 𑀤𑁄𑀫𑀦𑀲𑁆𑀲𑀲𑀻𑀲𑁂𑀦 𑀯𑀼𑀢𑁆𑀢𑁄. 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀬𑀸𑀢𑀺 𑀏𑀢𑁆𑀣 𑀲𑀢𑁆𑀢𑁂𑀲𑀼 𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀓𑀸𑀭𑀲𑁆𑀲 𑀓𑀭𑀼𑀡𑀸𑀲𑀪𑀸𑀕𑀲𑁆𑀲 𑀢𑁂𑀲𑀼 𑀤𑀼𑀓𑁆𑀔𑀽𑀧𑀦𑀬𑀦𑀸𑀓𑀸𑀭𑁄 𑀯𑀺𑀳𑁂𑀲𑀸𑀲𑀪𑀸𑀯𑁄 𑀯𑀺𑀲𑀪𑀸𑀕𑁄𑀢𑀺 𑀢𑀸𑀬 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀬 𑀲𑀸 𑀑𑀢𑀸𑀭𑀁 𑀮𑀪𑀫𑀸𑀦𑀸 𑀘𑀺𑀭𑁂𑀦𑁂𑀯 𑀮𑀪𑁂𑀬𑁆𑀬𑀸𑀢𑀺 𑀧𑀼𑀭𑀺𑀲𑀲𑁆𑀲 𑀤𑀽𑀭𑁂 𑀞𑀺𑀢𑀲𑀧𑀢𑁆𑀢𑁄 𑀯𑀺𑀬 𑀓𑀭𑀼𑀡𑀸𑀬 𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑀸 𑀯𑀼𑀢𑁆𑀢𑀸.

𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀲𑀪𑀸𑀕𑀢𑀸𑀬𑀸𑀢𑀺 𑀬𑁂𑀲𑀼 𑀲𑀢𑁆𑀢𑁂𑀲𑀼 𑀪𑁄𑀕𑀸𑀤𑀺𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀫𑀼𑀔𑁂𑀦 𑀫𑀼𑀤𑀺𑀢𑀸 𑀧𑀯𑀢𑁆𑀢𑀢𑀺, 𑀢𑁂𑀲𑀼 𑀢𑀦𑁆𑀦𑀺𑀫𑀺𑀢𑁆𑀢𑀫𑁂𑀯 𑀅𑀬𑁄𑀦𑀺𑀲𑁄 𑀆𑀪𑁄𑀕𑁂 𑀲𑀢𑀺 ‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀽𑀧𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁦𑁬) 𑀯𑀼𑀢𑁆𑀢𑀲𑁄𑀫𑀦𑀲𑁆𑀲𑀫𑀼𑀔𑁂𑀦 𑀧𑀳𑀸𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑁄 𑀘 𑀫𑀼𑀤𑀺𑀢𑀸𑀬 𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑁄. 𑀧𑀳𑀸𑀲𑁄 𑀳𑀺 𑀇𑀥 𑀲𑁄𑀫𑀦𑀲𑁆𑀲𑀲𑀻𑀲𑁂𑀦 𑀯𑀼𑀢𑁆𑀢𑁄. 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀬𑀸𑀢𑀺 𑀪𑁄𑀕𑀸𑀤𑀺𑀲𑀫𑁆𑀧𑀢𑁆𑀢𑀻𑀳𑀺 𑀫𑀼𑀤𑀺𑀢𑁂𑀲𑀼 𑀲𑀢𑁆𑀢𑁂𑀲𑀼 𑀧𑀫𑁄𑀤𑀦𑀸𑀓𑀸𑀭𑀲𑁆𑀲 𑀫𑀼𑀤𑀺𑀢𑀸𑀲𑀪𑀸𑀕𑀲𑁆𑀲 𑀢𑀢𑁆𑀣 𑀅𑀦𑀪𑀺𑀭𑀫𑀦𑀸𑀓𑀸𑀭𑀸 𑀅𑀭𑀢𑀺 𑀯𑀺𑀲𑀪𑀸𑀕𑀸𑀢𑀺 𑀢𑀸𑀬 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀬 𑀲𑀸 𑀑𑀢𑀸𑀭𑀁 𑀮𑀪𑀫𑀸𑀦𑀸 𑀘𑀺𑀭𑁂𑀦𑁂𑀯 𑀮𑀪𑁂𑀬𑁆𑀬𑀸𑀢𑀺 𑀧𑀼𑀭𑀺𑀲𑀲𑁆𑀲 𑀤𑀽𑀭𑁂 𑀞𑀺𑀢𑀲𑀧𑀢𑁆𑀢𑁄 𑀯𑀺𑀬 𑀫𑀼𑀤𑀺𑀢𑀸𑀬 𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑀸 𑀯𑀼𑀢𑁆𑀢𑀸. 𑀧𑀫𑀼𑀤𑀺𑀢𑁄 𑀘𑀸𑀢𑀺𑀆𑀤𑀺 𑀫𑀼𑀤𑀺𑀢𑀸𑀬 𑀲𑀺𑀤𑁆𑀥𑀸𑀬 𑀅𑀬𑀫𑁆𑀧𑀺 𑀅𑀭𑀢𑀺 𑀦 𑀳𑁄𑀢𑀻𑀢𑀺 𑀮𑀤𑁆𑀥𑀩𑁆𑀩𑀕𑀼𑀡𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀇𑀥𑀸𑀥𑀺𑀧𑁆𑀧𑁂𑀢𑀅𑀭𑀢𑀺𑀦𑀺𑀕𑁆𑀕𑀳𑀤𑀲𑁆𑀲𑀦𑀯𑀲𑁂𑀦. 𑀓𑀸𑀬𑀘𑀺𑀢𑁆𑀢𑀯𑀺𑀯𑁂𑀓𑀧𑀝𑀺𑀧𑀓𑁆𑀔𑀸𑀬 𑀯𑀸 𑀅𑀭𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀺𑀢𑀸𑀬 𑀫𑀼𑀤𑀺𑀢𑀸𑀬 𑀧𑀝𑀺𑀧𑀓𑁆𑀔𑀸 𑀅𑀭𑀢𑀺 𑀲𑀼𑀯𑀺𑀓𑁆𑀔𑀫𑁆𑀪𑀦𑁂𑀬𑁆𑀬𑀸 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀏𑀓𑀤𑁂𑀲𑁂𑀦 𑀅𑀭𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀥𑀺𑀓𑀼𑀲𑀮𑀥𑀫𑁆𑀫𑁂𑀲𑀽𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀲𑀼.

𑀩𑀸𑀮𑀓𑀭𑀥𑀫𑁆𑀫𑀬𑁄𑀕𑀢𑁄 𑀩𑀸𑀮𑀲𑁆𑀲. 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀩𑁆𑀬𑀸𑀫𑀽𑀴𑁆𑀳𑀢𑀸𑀬 𑀫𑀽𑀴𑁆𑀳𑀲𑁆𑀲. 𑀧𑀼𑀣𑀽𑀦𑀁 𑀓𑀺𑀮𑁂𑀲𑀸𑀤𑀻𑀦𑀁 𑀚𑀦𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀓𑀺𑀮𑁂𑀲𑁄𑀥𑀻𑀦𑀁 𑀫𑀕𑁆𑀕𑁄𑀥𑀻𑀳𑀺 𑀅𑀚𑀺𑀢𑀢𑁆𑀢𑀸 𑀅𑀦𑁄𑀥𑀺𑀚𑀺𑀦𑀲𑁆𑀲, 𑀑𑀥𑀺𑀚𑀺𑀦𑀸 𑀯𑀸 𑀲𑁂𑀓𑁆𑀔𑀸 𑀑𑀥𑀺𑀲𑁄𑀯 𑀓𑀺𑀮𑁂𑀲𑀸𑀦𑀁 𑀚𑀺𑀢𑀢𑁆𑀢𑀸. 𑀢𑁂𑀦 𑀇𑀫𑀲𑁆𑀲 𑀑𑀥𑀺𑀚𑀺𑀢𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀢𑁆𑀢𑀫𑀪𑀯𑀸𑀤𑀺𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀦𑀯𑀺𑀧𑀸𑀓𑀲𑁆𑀲 𑀅𑀚𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀚𑀺𑀦𑀲𑁆𑀲, 𑀯𑀺𑀧𑀸𑀓𑀚𑀺𑀦𑀸 𑀯𑀸 𑀅𑀭𑀳𑀦𑁆𑀢𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸. 𑀢𑁂𑀦𑀲𑁆𑀲 𑀅𑀲𑁂𑀓𑁆𑀔𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀦𑁂𑀓𑀸𑀤𑀻𑀦𑀯𑁂 𑀲𑀩𑁆𑀩𑁂𑀲𑀫𑁆𑀧𑀺 𑀧𑀸𑀧𑀥𑀫𑁆𑀫𑀸𑀦𑀁 𑀫𑀽𑀮𑀪𑀽𑀢𑁂 𑀲𑀫𑁆𑀫𑁄𑀳𑁂 𑀆𑀤𑀻𑀦𑀯𑀸𑀦𑀁 𑀅𑀤𑀲𑁆𑀲𑀦𑀲𑀻𑀮𑀢𑀸𑀬 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄. 𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀅𑀲𑁆𑀲𑀼𑀢𑀯𑀢𑁄. 𑀏𑀤𑀺𑀲𑁄 𑀏𑀓𑀁𑀲𑁂𑀦 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀢𑀲𑁆𑀲 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀧𑀼𑀦𑀧𑀺 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀭𑀽𑀧𑀸𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀲𑀫𑁆𑀫𑁄𑀳𑀧𑀼𑀩𑁆𑀩𑀺𑀓𑀸. 𑀭𑀽𑀧𑀁 𑀲𑀸 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀭𑀽𑀧𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀸𑀬 𑀓𑀸𑀭𑀡𑀁 𑀦 𑀳𑁄𑀢𑀺, 𑀭𑀽𑀧𑀸𑀭𑀫𑁆𑀫𑀡𑁂 𑀓𑀺𑀮𑁂𑀲𑁂 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀭𑀳𑀺𑀢𑀁 𑀅𑀜𑁆𑀜𑀸𑀡𑀫𑁂𑀯 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸. 𑀤𑁄𑀲𑀕𑀼𑀡𑀸𑀯𑀺𑀘𑀸𑀭𑀡𑀯𑀲𑁂𑀦 𑀲𑀪𑀸𑀕𑀢𑁆𑀢𑀸𑀢𑀺 𑀬𑀣𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀫𑁂𑀢𑁆𑀢𑀸𑀤𑀬𑁄 𑀯𑀺𑀬 𑀲𑀢𑁆𑀢𑁂𑀲𑀼 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀯𑀲𑁂𑀦 𑀕𑀼𑀡𑀤𑁄𑀲𑁂 𑀅𑀯𑀺𑀘𑀸𑀭𑁂𑀦𑁆𑀢𑀻 𑀓𑁂𑀯𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀏𑀯𑀁 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸 𑀲𑀢𑁆𑀢𑁂𑀲𑀼 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀼𑀡𑀤𑁄𑀲𑀁 𑀅𑀘𑀺𑀦𑁆𑀢𑁂𑀦𑁆𑀢𑀻 𑀓𑁂𑀯𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀤𑁄𑀲𑀕𑀼𑀡𑀸𑀯𑀺𑀘𑀸𑀭𑀡𑀯𑀲𑁂𑀦 𑀲𑀪𑀸𑀕𑀸. 𑀢𑀲𑁆𑀫𑀸 𑀲𑀸 𑀮𑀳𑀼𑀁 𑀑𑀢𑀸𑀭𑀁 𑀮𑀪𑀢𑀻𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸𑀬 𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑀸 𑀯𑀼𑀢𑁆𑀢𑀸. 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀬𑀸𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀲𑁆𑀲 𑀉𑀧𑁂𑀓𑁆𑀔𑀸𑀲𑀪𑀸𑀕𑀲𑁆𑀲 𑀢𑀢𑁆𑀣 𑀅𑀦𑀼𑀭𑁄𑀥𑀯𑀺𑀭𑁄𑀥𑀧𑀯𑀢𑁆𑀢𑀺𑀆𑀓𑀸𑀭𑀸 𑀭𑀸𑀕𑀧𑀝𑀺𑀖𑀸 𑀯𑀺𑀲𑀪𑀸𑀕𑀸𑀢𑀺 𑀢𑀸𑀬 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀬 𑀢𑁂 𑀑𑀢𑀸𑀭𑀁 𑀮𑀪𑀫𑀸𑀦𑀸 𑀘𑀺𑀭𑁂𑀦𑁂𑀯 𑀮𑀪𑁂𑀬𑁆𑀬𑀼𑀦𑁆𑀢𑀺 𑀧𑀼𑀭𑀺𑀲𑀲𑁆𑀲 𑀤𑀽𑀭𑁂 𑀞𑀺𑀢𑀲𑀧𑀢𑁆𑀢𑁄 𑀯𑀺𑀬 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑀸 𑀯𑀼𑀢𑁆𑀢𑀸.

𑁨𑁬𑁬. 𑀓𑀢𑁆𑀢𑀼𑀓𑀸𑀫𑀢𑀸 𑀙𑀦𑁆𑀤𑁄 𑀆𑀤𑀺 ‘‘𑀙𑀦𑁆𑀤𑀫𑀽𑀮𑀓𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 (𑀅. 𑀦𑀺. 𑁮.𑁮𑁩) 𑀯𑀘𑀦𑀢𑁄, 𑀅𑀣 𑀯𑀸 𑀲𑀢𑁆𑀢𑁂𑀲𑀼 𑀳𑀺𑀢𑁂𑀲𑀺𑀢𑀸𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀤𑀺𑀦𑀸 𑀅𑀦𑀯𑀚𑁆𑀚𑀸𑀪𑀺𑀧𑀢𑁆𑀣𑀦𑀸𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 ‘‘𑀓𑀢𑁆𑀢𑀼𑀓𑀸𑀫𑀢𑀸 𑀙𑀦𑁆𑀤𑁄 𑀆𑀤𑀻’’𑀢𑀺 𑀯𑀼𑀢𑁆𑀢𑀁. 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁄𑀧𑀺 𑀳𑀺 𑀲𑀢𑁆𑀢𑁂𑀲𑀼 𑀅𑀦𑀺𑀭𑀸𑀓𑀢𑀳𑀺𑀢𑀘𑁆𑀙𑀦𑁆𑀤𑁄𑀬𑁂𑀯 ‘‘𑀢𑀢𑁆𑀣 𑀅𑀩𑁆𑀬𑀸𑀯𑀝𑀢𑀸 𑀅𑀧𑀡𑁆𑀡𑀓𑀧𑀝𑀺𑀧𑀤𑀸’’𑀢𑀺 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀺 𑀫𑀸𑀢𑀸 𑀯𑀺𑀬 𑀲𑀓𑀺𑀘𑁆𑀘𑀧𑀲𑀼𑀢𑁂 𑀧𑀼𑀢𑁆𑀢𑁂. 𑀦𑀻𑀯𑀭𑀡𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀓𑀢𑁆𑀣𑀘𑀺 𑀲𑀢𑁆𑀢𑀕𑁆𑀕𑀳𑀡𑀫𑁆𑀧𑀺 𑀲𑀗𑁆𑀔𑀸𑀭𑀕𑁆𑀕𑀳𑀡𑀫𑁂𑀯 𑀳𑁄𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀬𑀣𑀸 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 (𑀅. 𑀦𑀺. 𑁧𑁦.𑁨𑁭; 𑀔𑀼. 𑀧𑀸. 𑁪.𑁧), 𑀦 𑀏𑀯𑀫𑀺𑀥𑀸𑀢𑀺 𑀆𑀳 ‘‘𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀏𑀓𑁄 𑀯𑀸 𑀲𑀢𑁆𑀢𑁄 𑀅𑀦𑁂𑀓𑁂 𑀯𑀸 𑀲𑀢𑁆𑀢𑀸 𑀆𑀭𑀫𑁆𑀫𑀡’’𑀦𑁆𑀢𑀺. 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀯𑀲𑁂𑀦𑀸𑀢𑀺 𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀥𑀫𑁆𑀫𑀯𑀲𑁂𑀦. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀲𑀼𑀔𑀺𑀢𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁨.𑁨𑁩) 𑀪𑀸𑀯𑀦𑀸𑀬𑀁 𑀲𑀼𑀔𑀸𑀤𑀺𑀕𑁆𑀕𑀳𑀡𑀫𑁆𑀧𑀺 𑀮𑀩𑁆𑀪𑀢𑀺. 𑀢𑀁 𑀧𑀦 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 (𑀥. 𑀧. 𑁨𑁫𑁫; 𑀣𑁂𑀭𑀕𑀸. 𑁬𑁭𑁬; 𑀦𑁂𑀢𑁆𑀢𑀺. 𑁫) 𑀯𑀺𑀧𑀲𑁆𑀲𑀦𑀸𑀬 𑀅𑀦𑀺𑀘𑁆𑀘𑀮𑀓𑁆𑀔𑀡𑀕𑀳𑀡𑀁 𑀯𑀺𑀬 𑀅𑀧𑁆𑀧𑀥𑀸𑀦𑀪𑀽𑀢𑀁, 𑀲𑀢𑁆𑀢𑀧𑀜𑁆𑀜𑀢𑁆𑀢𑀺 𑀏𑀯 𑀧𑀥𑀸𑀦𑀪𑀸𑀯𑁂𑀦 𑀕𑀬𑁆𑀳𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑀘𑀸𑀭𑁂 𑀯𑀸 𑀧𑀢𑁆𑀢𑁂 𑀆𑀭𑀫𑁆𑀫𑀡𑀯𑀟𑁆𑀠𑀦𑀁 𑀢𑀢𑁆𑀣𑀸𑀧𑀺 𑀲𑀻𑀫𑀸𑀲𑀫𑁆𑀪𑁂𑀤𑀲𑀺𑀤𑁆𑀥𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑀫𑀸𑀯𑀸𑀲𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀲𑀢𑁆𑀢𑁂 𑀫𑁂𑀢𑁆𑀢𑀸𑀬 𑀨𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀜𑀸𑀡𑁂𑀦 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀏𑀓𑀸 𑀭𑀘𑁆𑀙𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀭𑀘𑁆𑀙𑀸𑀕𑀳𑀡𑁂𑀦 𑀭𑀘𑁆𑀙𑀸𑀯𑀸𑀲𑀺𑀦𑁄 𑀲𑀢𑁆𑀢𑀸 𑀕𑀳𑀺𑀢𑀸 𑀬𑀣𑀸 𑀏𑀓𑀁 𑀤𑀺𑀲𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣.

𑁨𑁬𑁭. 𑀓𑀲𑀺𑀡𑀸𑀦𑀁 𑀦𑀺𑀲𑁆𑀲𑀦𑁆𑀤𑁄𑀢𑀺 𑀓𑀲𑀺𑀡𑀚𑁆𑀛𑀸𑀦𑀸𑀦𑀁 𑀦𑀺𑀲𑁆𑀲𑀦𑁆𑀤𑀨𑀮𑀲𑀤𑀺𑀲𑀸 𑀆𑀭𑀼𑀧𑁆𑀧𑀸 𑀅𑀭𑀽𑀧𑀚𑁆𑀛𑀸𑀦𑀸𑀦𑀺, 𑀓𑀲𑀺𑀡𑀚𑁆𑀛𑀸𑀦𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀸𑀯 𑀲𑀺𑀚𑁆𑀛𑀦𑀢𑁄. 𑀢𑁂𑀳𑀺 𑀯𑀺𑀦𑀸 𑀅𑀲𑀺𑀚𑁆𑀛𑀦𑀢𑁄𑀢𑀺 𑀓𑁂𑀘𑀺. 𑀲𑀫𑀸𑀥𑀺𑀦𑀺𑀲𑁆𑀲𑀦𑁆𑀤𑁄𑀢𑀺 𑀭𑀽𑀧𑀚𑁆𑀛𑀸𑀦𑀲𑀫𑀸𑀥𑀻𑀦𑀁, 𑀳𑁂𑀝𑁆𑀞𑀺𑀫𑀸𑀦𑀁 𑀢𑀺𑀡𑁆𑀡𑀁 𑀅𑀭𑀽𑀧𑀚𑁆𑀛𑀸𑀦𑀲𑀫𑀸𑀥𑀻𑀦𑀜𑁆𑀘 𑀦𑀺𑀲𑁆𑀲𑀦𑁆𑀤𑁄 𑀧𑀝𑀺𑀧𑀸𑀝𑀺𑀬𑀸 𑀢𑁂 𑀅𑀥𑀺𑀕𑀦𑁆𑀢𑁆𑀯𑀸𑀯 𑀧𑀝𑀺𑀮𑀪𑀺𑀢𑀩𑁆𑀩𑀢𑁄. 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀦𑁆𑀤𑁄 𑀯𑀺𑀧𑀲𑁆𑀲𑀦𑀸𑀦𑀼𑀪𑀸𑀯𑁂𑀦 𑀮𑀤𑁆𑀥𑀩𑁆𑀩𑀢𑁄, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀘 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀦𑁆𑀤𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺. 𑀬𑀣𑀸𑀳 ‘‘𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸’’𑀢𑀺𑀆𑀤𑀺 (𑀯𑀺𑀲𑀼𑀤𑁆𑀥𑀺. 𑁨.𑁮𑁬𑁮). ‘‘𑀧𑀼𑀭𑀺𑀫𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑁆𑀢𑀬𑀦𑀺𑀲𑁆𑀲𑀦𑁆𑀤𑁄’’𑀢𑀺 𑀇𑀫𑀺𑀦𑀸 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀢𑀻𑀡𑀺 𑀛𑀸𑀦𑀸𑀦𑀺 𑀅𑀥𑀺𑀕𑀦𑁆𑀢𑁆𑀯𑀸 𑀞𑀺𑀢𑀲𑁆𑀲𑁂𑀯 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁄, 𑀦 𑀇𑀢𑀭𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀬 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁨𑁬𑁮. 𑀲𑀺𑀬𑀸𑀢𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀲𑀺𑀬𑀸 𑀓𑀲𑁆𑀲𑀘𑀺 𑀧𑀭𑀺𑀯𑀺𑀢𑀓𑁆𑀓𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀫𑁂𑀢𑁆𑀢𑀸𑀤𑀻𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀇𑀢𑀭𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀫𑀢𑁆𑀢𑀸𑀦𑀺. 𑀇𑀫𑀸𑀦𑀺 𑀧𑀦 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁨.𑁨𑁨) 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀪𑀽𑀢𑀸𑀦𑀺. 𑀢𑀲𑁆𑀫𑀸 𑀲𑀢𑁆𑀢𑁂𑀲𑀼 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀪𑀸𑀯𑁂𑀦 𑀲𑁂𑀝𑁆𑀞𑀸 𑀏𑀢𑁂 𑀯𑀺𑀳𑀸𑀭𑀸. 𑀩𑁆𑀭𑀳𑁆𑀫𑀸𑀦𑁄𑀢𑀺 𑀉𑀧𑀧𑀢𑁆𑀢𑀺𑀩𑁆𑀭𑀳𑁆𑀫𑀸𑀦𑁄. 𑀢𑁂 𑀳𑀺 𑀇𑀥 𑀛𑀸𑀦𑀪𑀸𑀯𑀦𑀸𑀬 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀦𑁆𑀦𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 ‘‘𑀦𑀺𑀤𑁆𑀤𑁄𑀲𑀘𑀺𑀢𑁆𑀢𑀸 𑀯𑀺𑀳𑀭𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀩𑁆𑀭𑀳𑁆𑀫𑀸𑀦𑁄𑀢𑀺 𑀯𑀸 𑀲𑀓𑀮𑀩𑀼𑀤𑁆𑀥𑀕𑀼𑀡𑀳𑁂𑀢𑀼𑀪𑀽𑀢𑀸𑀦𑀁 𑀤𑀸𑀦𑀧𑀸𑀭𑀫𑀺𑀢𑀸𑀤𑀻𑀦𑀁 𑀩𑀼𑀤𑁆𑀥𑀓𑀭𑀥𑀫𑁆𑀫𑀸𑀦𑀁 𑀧𑀭𑀺𑀧𑀽𑀭𑀡𑀯𑀲𑁂𑀦 𑀩𑁆𑀭𑀽𑀳𑀺𑀢𑀕𑀼𑀡𑀸 𑀫𑀳𑀸𑀲𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑀸. 𑀢𑁂 𑀳𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑁂𑀲𑀦𑁂𑀦, 𑀅𑀳𑀺𑀢𑀸𑀧𑀦𑀬𑀦𑁂𑀦, 𑀲𑀫𑁆𑀧𑀢𑁆𑀢𑀺𑀧𑀫𑁄𑀤𑀦𑁂𑀦, 𑀲𑀩𑁆𑀩𑀢𑁆𑀣 𑀯𑀺𑀯𑀚𑁆𑀚𑀺𑀢𑀸𑀕𑀢𑀺𑀕𑀫𑀦𑀫𑀚𑁆𑀛𑀢𑁆𑀢𑀪𑀸𑀯𑀸𑀥𑀺𑀝𑁆𑀞𑀸𑀦𑁂𑀦 𑀘 𑀦𑀺𑀤𑁆𑀤𑁄𑀲𑀘𑀺𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀏𑀯𑀦𑁆𑀢𑀺 𑀬𑀣𑀸 𑀢𑁂 𑀉𑀧𑀧𑀢𑁆𑀢𑀺𑀩𑁆𑀭𑀳𑁆𑀫𑀸𑀦𑁄, 𑀫𑀳𑀸𑀩𑁄𑀥𑀺𑀲𑀢𑁆𑀢𑀩𑁆𑀭𑀳𑁆𑀫𑀸𑀦𑁄 𑀯𑀸, 𑀏𑀯𑀁 𑀏𑀢𑁂𑀳𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑀗𑁆𑀕𑀻𑀪𑀽𑀢𑀸.

𑁨𑁬𑁯. 𑀘𑀢𑀲𑁆𑀲𑁄𑀯𑀸𑀢𑀺𑀆𑀤𑀺𑀧𑀜𑁆𑀳𑀲𑁆𑀲𑀸𑀢𑀺 𑀘𑀢𑀲𑁆𑀲𑁄𑀢𑀺𑀆𑀤𑀺𑀓𑀲𑁆𑀲 𑀢𑀺𑀯𑀺𑀥𑀲𑁆𑀲 𑀧𑀜𑁆𑀳𑀲𑁆𑀲. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀺𑀯𑀲𑀸𑀢𑀺 𑀏𑀢𑁆𑀣 𑀩𑁆𑀬𑀸𑀧𑀸𑀤𑀲𑀁𑀓𑀺𑀮𑁂𑀲𑀸𑀤𑀺𑀢𑁄 𑀯𑀺𑀲𑀼𑀚𑁆𑀛𑀦𑀼𑀧𑀸𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄. 𑀆𑀤𑀺-𑀲𑀤𑁆𑀤𑁂𑀦 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀫𑀦𑀲𑀺𑀓𑀸𑀭𑀯𑀺𑀲𑁂𑀲𑀸 𑀲𑀗𑁆𑀕𑀳𑀺𑀢𑀸. 𑀆𑀲𑀁 𑀫𑁂𑀢𑁆𑀢𑀸𑀤𑀻𑀦𑀁. 𑀅𑀧𑁆𑀧𑀫𑀸𑀡𑁂𑀢𑀺 𑀧𑀫𑀸𑀡𑀭𑀳𑀺𑀢𑁂. 𑀬𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀢𑀦𑁆𑀢𑀺 𑀢𑀲𑁆𑀫𑀸. 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄.

𑀩𑁆𑀬𑀸𑀧𑀸𑀤𑀩𑀳𑀼𑀮𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀓𑁆𑀔𑀧𑀸𑀢𑀯𑀲𑁂𑀦 𑀅𑀦𑀸𑀪𑀼𑀚𑀦𑀫𑀦𑀸𑀪𑁄𑀕𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁆𑀯𑀸𑀬𑀁 𑀘𑀢𑀼𑀩𑁆𑀩𑀺𑀥𑁄 𑀲𑀢𑁆𑀢𑁂𑀲𑀼 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄, 𑀢𑀫𑁂𑀯 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀘 𑀬𑀣𑀸 𑀫𑀸𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀼𑀢𑁆𑀢𑀲𑁆𑀲𑀸𑀧𑀺 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀅𑀢𑁆𑀣𑀲𑁆𑀲 𑀉𑀧𑀫𑁂𑀬𑁆𑀬𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀅𑀢𑁆𑀣𑀼𑀧𑀦𑀬𑀦𑀢𑁆𑀣𑁄 ‘‘𑀬𑀲𑁆𑀫𑀸 𑀘𑀸’’𑀢𑀺 𑀘-𑀲𑀤𑁆𑀤𑁄. 𑀧𑀭𑀺𑀬𑀸𑀬𑁂𑀢𑀺 𑀯𑀸𑀭𑁂, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀺𑀘𑁆𑀘𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀓𑁆𑀓𑀫𑁂𑀢𑀺 𑀅𑀢𑁆𑀣𑁄. 𑀅𑀩𑁆𑀬𑀸𑀯𑀝𑀸𑀢𑀺 𑀅𑀦𑀼𑀲𑁆𑀲𑀼𑀓𑁆𑀓𑀸. 𑀢𑀣𑀸𑀢𑀺 𑀬𑀣𑀸 𑀫𑀸𑀢𑀸 𑀤𑀳𑀭𑀸𑀤𑀻𑀲𑀼 𑀧𑀼𑀢𑁆𑀢𑁂𑀲𑀼, 𑀢𑀣𑀸 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀫𑁂𑀢𑁆𑀢𑀸𑀬𑀦𑀸𑀤𑀺𑀯𑀲𑀺𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀬𑀣𑀸𑀭𑀳𑀁 𑀤𑁄𑀲𑀫𑁄𑀳𑀭𑀸𑀕𑀧𑀓𑁆𑀔𑀺𑀬𑀸, 𑀢𑁂𑀳𑀺 𑀘 𑀯𑀺𑀲𑀼𑀚𑁆𑀛𑀦𑀼𑀧𑀸𑀬𑁄 𑀅𑀧𑁆𑀧𑀫𑀜𑁆𑀜𑀸, 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀘 𑀲𑀢𑁆𑀢𑁂𑀲𑀼 𑀫𑀦𑀲𑀺𑀓𑀸𑀭𑁄, 𑀢𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀺𑀯𑀲𑀸 𑀘𑀢𑀲𑁆𑀲𑁄𑀯 𑀅𑀧𑁆𑀧𑀫𑀜𑁆𑀜𑀸. 𑀘𑀢𑀲𑁆𑀲𑁄𑀧𑀺 𑀏𑀢𑀸 𑀪𑀸𑀯𑁂𑀢𑀼𑀓𑀸𑀫𑁂𑀦 𑀦 𑀏𑀓𑁂𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑀺 𑀳𑀺 𑀲𑀩𑁆𑀩𑀲𑀗𑁆𑀕𑀳𑁂 𑀓𑀫𑁂𑀦 𑀪𑀯𑀺𑀢𑀩𑁆𑀩𑀁. 𑀳𑀺𑀢𑁂𑀲𑀺𑀢𑀸 𑀫𑁂𑀢𑁆𑀢𑀸𑀬𑀦𑀦𑁆𑀢𑀺 𑀆𑀳 ‘‘𑀏𑀯𑀁 𑀧𑀢𑁆𑀣𑀺𑀢𑀳𑀺𑀢𑀸𑀦’’𑀦𑁆𑀢𑀺. 𑀲𑀫𑁆𑀪𑀸𑀯𑁂𑀢𑁆𑀯𑀸 𑀯𑀸𑀢𑀺 ‘‘𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀬𑀁 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸’’𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀯𑀸. 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀆𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄 𑀧𑀭𑀦𑁆𑀢𑀺 𑀢𑀢𑁄 𑀳𑀺𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀆𑀤𑀺𑀢𑁄 𑀧𑀭𑀁. 𑀓𑀢𑁆𑀢𑀩𑁆𑀩𑀸𑀪𑀸𑀯𑀢𑁄𑀢𑀺 𑀘𑀢𑀼𑀢𑁆𑀣𑀲𑁆𑀲 𑀧𑀓𑀸𑀭𑀲𑁆𑀲 𑀓𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀅𑀬𑀁 𑀓𑀫𑁄𑀢𑀺 𑀅𑀬𑀁 𑀇𑀫𑀸𑀲𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀧𑀯𑀢𑁆𑀢𑀦𑀓𑁆𑀓𑀫𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 ‘‘𑀇𑀫𑀺𑀦𑀸𑀯 𑀓𑀫𑁂𑀦 𑀏𑀢𑀸𑀲𑀁 𑀧𑀯𑀢𑁆𑀢𑀺, 𑀦 𑀅𑀜𑁆𑀜𑀣𑀸’’𑀢𑀺. 𑀫𑁂𑀢𑁆𑀢𑀸𑀤𑀻𑀦𑀁 𑀳𑀺 𑀢𑀺𑀲𑁆𑀲𑀦𑁆𑀦𑀁 𑀪𑀸𑀯𑀦𑀸𑀦𑀁 𑀓𑀫𑀦𑀺𑀬𑀫𑁄 𑀦𑀢𑁆𑀣𑀺, 𑀬𑀁 𑀯𑀸 𑀢𑀁 𑀯𑀸 𑀧𑀞𑀫𑀁 𑀪𑀸𑀯𑁂𑀢𑀼𑀁 𑀮𑀩𑁆𑀪𑀸, 𑀤𑁂𑀲𑀦𑀸𑀓𑁆𑀓𑀫𑀯𑀲𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢𑀁.

𑀏𑀓𑀲𑀢𑁆𑀢𑀲𑁆𑀲𑀸𑀧𑀻𑀢𑀺 𑀏𑀓𑀲𑁆𑀲𑀸𑀧𑀺 𑀲𑀢𑁆𑀢𑀲𑁆𑀲. 𑀅𑀧𑁆𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀢𑁆𑀢𑀸 𑀧𑀭𑀺𑀘𑁆𑀙𑁂𑀤𑀕𑁆𑀕𑀳𑀡𑀁 𑀦𑀢𑁆𑀣𑀺, 𑀦 𑀘 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀧𑀯𑀢𑁆𑀢𑀁 𑀲𑀢𑁆𑀢𑀕𑁆𑀕𑀳𑀡𑀁 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀸𑀤𑀺𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀺𑀬𑀸 𑀅𑀧𑀭𑀸𑀫𑀸𑀲𑀲𑀢𑁆𑀢𑀕𑁆𑀕𑀳𑀡𑀫𑀼𑀤𑁆𑀥𑀪𑀽𑀢𑀸𑀦𑀁 𑀫𑁂𑀢𑁆𑀢𑀸𑀤𑀻𑀦𑀁 𑀏𑀓𑀲𑀢𑁆𑀢𑀸𑀭𑀫𑁆𑀫𑀡𑀸𑀦𑀫𑁆𑀧𑀺 𑀅𑀧𑁆𑀧𑀫𑀸𑀡𑀕𑁄𑀘𑀭𑀢𑀸 𑀯𑀼𑀢𑁆𑀢𑀸. 𑀏𑀯𑀁 𑀧𑀫𑀸𑀡𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀬𑀣𑀸 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀅𑀢𑀺𑀭𑁂𑀓𑀼𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑁂 𑀧𑀤𑁂𑀲𑁂 𑀦𑀺𑀫𑀺𑀢𑁆𑀢𑀁 𑀕𑀬𑁆𑀳𑀢𑀺, 𑀏𑀯𑀁 𑀧𑀫𑀸𑀡𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀲𑀓𑀮𑀨𑀭𑀡𑀯𑀲𑁂𑀦𑀸𑀢𑀺 𑀦𑀺𑀭𑀯𑀲𑁂𑀲𑀨𑀭𑀡𑀯𑀲𑁂𑀦.

𑁨𑁭𑁦. 𑀦𑀺𑀲𑁆𑀲𑀭𑀡𑀢𑁆𑀢𑀸𑀢𑀺 𑀏𑀢𑁆𑀣 𑀬𑀁 𑀬𑀲𑁆𑀲 𑀦𑀺𑀲𑁆𑀲𑀭𑀡𑀁, 𑀢𑀁 𑀢𑀲𑁆𑀲 𑀉𑀚𑀼𑀧𑀝𑀺𑀧𑀓𑁆𑀔𑀪𑀽𑀢𑀫𑁂𑀯 𑀳𑁄𑀢𑀺. 𑀬𑀣𑀸 𑀓𑀸𑀫𑀸𑀦𑀁 𑀦𑁂𑀓𑁆𑀔𑀫𑁆𑀫𑀁, 𑀭𑀽𑀧𑀸𑀦𑀁 𑀆𑀭𑀼𑀧𑁆𑀧𑀸, 𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀸𑀦𑀁, 𑀏𑀯𑀁 𑀤𑁄𑀫𑀦𑀲𑁆𑀲𑀲𑀳𑀺𑀢𑀸𑀦𑀁 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀭𑀢𑀻𑀦𑀁 𑀦𑀺𑀲𑁆𑀲𑀭𑀡𑀪𑀽𑀢𑀸 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸 𑀦 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺. 𑀦𑀺𑀲𑁆𑀲𑀭𑀡𑀕𑁆𑀕𑀳𑀡𑁂𑀦𑁂𑀯 𑀘 𑀧𑀼𑀩𑁆𑀩𑀪𑀸𑀕𑀺𑀬𑀸𑀦𑀁 𑀢𑀸𑀲𑀁 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑁄𑀕𑁄𑀧𑀺 𑀅𑀦𑀼𑀜𑁆𑀜𑀸𑀢𑁄𑀢𑀺 𑀤𑀝𑁆𑀞𑀩𑁆𑀩𑀁 𑀅𑀦𑀺𑀲𑁆𑀲𑀭𑀡𑀪𑀸𑀯𑀢𑁄. 𑀢𑀣𑀸 𑀳𑀺 𑀅𑀝𑁆𑀞𑀯𑀻𑀲𑀢𑀺𑀬𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀁 𑀧𑀯𑀢𑁆𑀢𑀺𑀁 𑀆𑀘𑀭𑀺𑀬𑀸 𑀇𑀘𑁆𑀙𑀦𑁆𑀢𑀺. 𑀦 𑀳𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀁 𑀯𑀺𑀦𑀸 𑀯𑀢𑁆𑀢𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁂𑀓𑁆𑀔𑀸 𑀯𑀺𑀬. 𑀦 𑀳𑀺 𑀓𑀤𑀸𑀘𑀺 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁂𑀓𑁆𑀔𑀸 𑀯𑁂𑀤𑀦𑀼𑀧𑁂𑀓𑁆𑀔𑀁 𑀯𑀺𑀦𑀸 𑀯𑀢𑁆𑀢𑀢𑀻𑀢𑀺.

𑁨𑁭𑁧. 𑀲𑀸𑀢𑀲𑀳𑀕𑀢𑀦𑁆𑀢𑀺 𑀲𑀼𑀔𑀲𑀳𑀕𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀢𑀢𑁄 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀓𑀸𑀬 (𑀅. 𑀦𑀺. 𑁮.𑁬𑁩) 𑀤𑁂𑀲𑀦𑀸𑀬 𑀘𑀢𑀼𑀦𑁆𑀦𑀫𑁆𑀧𑀺 𑀅𑀧𑁆𑀧𑀫𑀜𑁆𑀜𑀸𑀦𑀁 𑀲𑀯𑀺𑀢𑀓𑁆𑀓𑀸𑀤𑀺𑀪𑀸𑀯𑁄 𑀯𑀺𑀬 𑀉𑀧𑁂𑀓𑁆𑀔𑀸𑀲𑀳𑀕𑀢𑀪𑀸𑀯𑁄𑀧𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸. 𑀘𑀢𑀲𑁆𑀲𑁄𑀧𑀺 𑀅𑀧𑁆𑀧𑀫𑀜𑁆𑀜𑀸 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀺𑀓𑀸𑀢𑀺 𑀘𑁄𑀤𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 𑀲𑀢𑀻𑀢𑀺 𑀬𑀤𑀺 𑀫𑀽𑀮𑀲𑀫𑀸𑀥𑀺𑀫𑁆𑀳𑀺 𑀯𑀼𑀢𑁆𑀢𑀫𑀢𑁆𑀣𑀁 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀢𑀸𑀬 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀧𑀓𑁆𑀔𑀺𑀧𑀢𑀺, 𑀏𑀯𑀁 𑀲𑀦𑁆𑀢𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀬𑁄𑀧𑀺 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀺𑀓𑀸 𑀲𑀺𑀬𑀼𑀁, 𑀦 𑀧𑀦 𑀳𑁄𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀳𑁄𑀦𑁆𑀢𑀼 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀆𑀦𑀸𑀧𑀸𑀦𑀪𑀸𑀯𑀦𑀸𑀯𑀲𑁂𑀦 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀺𑀓𑀸𑀢𑀺 𑀯𑀤𑁂𑀬𑁆𑀬𑀸𑀢𑀺 𑀆𑀲𑀗𑁆𑀓𑀦𑁆𑀢𑁄 𑀆𑀳 ‘‘𑀯𑁂𑀤𑀦𑀸𑀤𑀻𑀲𑀽’’𑀢𑀺𑀆𑀤𑀺. 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀫𑀢𑁆𑀢𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀫𑁂𑀢𑁆𑀢𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀺𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀻𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀧𑀓𑀸𑀲𑀺𑀢𑁄 𑀏𑀯 𑀘𑀺𑀢𑁆𑀢𑀲𑀫𑀸𑀥𑀺 ‘‘𑀅𑀚𑁆𑀛𑀢𑁆𑀢𑀁 𑀫𑁂 𑀘𑀺𑀢𑁆𑀢𑀁 𑀞𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀻𑀳𑀺𑀧𑀺 𑀩𑁆𑀬𑀜𑁆𑀚𑀦𑁂𑀳𑀺 𑀧𑀓𑀸𑀲𑀺𑀢𑁄𑀢𑀺 𑀩𑁆𑀬𑀜𑁆𑀚𑀦𑀢𑁄 𑀮𑀩𑁆𑀪𑀫𑀸𑀦𑀲𑀫𑀸𑀥𑀺𑀘𑁆𑀙𑀸𑀬𑀸𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀪𑀬𑀢𑁆𑀣 𑀮𑀩𑁆𑀪𑀫𑀸𑀦𑀁 𑀅𑀥𑀺𑀧𑁆𑀧𑀸𑀬𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑀢𑁆𑀣𑀁 𑀳𑀺 𑀅𑀜𑁆𑀜𑀣𑀸 𑀯𑀤𑀦𑁆𑀢𑁄 𑀅𑀬𑀣𑀸𑀯𑀸𑀤𑀺𑀢𑀸𑀬 𑀲𑀢𑁆𑀣𑀸𑀭𑀁 𑀅𑀧𑀯𑀤𑀦𑁆𑀢𑁄 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀻’’𑀢𑀺.

𑁨𑁭𑁨. ‘‘𑀢𑀬𑀺𑀫𑀁 𑀤𑁄𑀲𑀁 𑀧𑀭𑀺𑀳𑀭𑀺𑀢𑀼𑀓𑀸𑀫𑁂𑀦 𑀦 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀦𑀻𑀢𑀢𑁆𑀣𑀫𑁂𑀯, 𑀢𑀲𑁆𑀫𑀸 𑀕𑀭𑀼𑀓𑀼𑀮𑀢𑁄 𑀅𑀥𑀺𑀧𑁆𑀧𑀸𑀬𑁄 𑀫𑀕𑁆𑀕𑀺𑀢𑀩𑁆𑀩𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀕𑀫𑁆𑀪𑀻𑀭𑀁 𑀳𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀢𑀢𑁆𑀣 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀆𑀬𑀸𑀘𑀺𑀢𑀸 𑀥𑀫𑁆𑀫𑀤𑁂𑀲𑀦𑀸 𑀏𑀢𑁂𑀦𑀸𑀢𑀺 𑀆𑀬𑀸𑀘𑀺𑀢𑀥𑀫𑁆𑀫𑀤𑁂𑀲𑀦𑁄, 𑀢𑀁 𑀆𑀬𑀸𑀘𑀺𑀢𑀥𑀫𑁆𑀫𑀤𑁂𑀲𑀦𑀁. 𑀏𑀯𑀫𑁂𑀯𑀸𑀢𑀺 𑀕𑀭𑀳𑀦𑁂 𑀦𑀺𑀧𑀸𑀢𑁄, 𑀫𑀼𑀤𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑁂, 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑁂𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦𑀸𑀫 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 ‘‘𑀦𑀺𑀬𑀓𑀚𑁆𑀛𑀢𑁆𑀢𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀁 𑀞𑀺𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸 𑀅𑀯𑀺𑀓𑁆𑀔𑀺𑀧𑁆𑀧𑀫𑀸𑀦𑀁 𑀏𑀓𑀕𑁆𑀕𑀪𑀸𑀯𑁂 𑀞𑀺𑀢𑀁 𑀪𑀯𑀺𑀲𑁆𑀲𑀢𑀺. 𑀢𑀢𑁄 𑀏𑀯 𑀲𑀼𑀲𑀡𑁆𑀞𑀺𑀢𑀁, 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀦𑁆𑀦𑀸𑀢𑀺 𑀅𑀯𑀺𑀓𑁆𑀔𑀫𑁆𑀪𑀺𑀢𑀸. 𑀧𑀸𑀧𑀓𑀸𑀢𑀺 𑀮𑀸𑀫𑀓𑀸. 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀧𑀯𑀢𑁆𑀢𑀺𑀢𑀼𑀁 𑀑𑀓𑀸𑀲𑀸𑀤𑀸𑀦𑁂𑀦 𑀓𑀼𑀲𑀮𑀘𑀺𑀢𑁆𑀢𑀁 𑀔𑁂𑀧𑁂𑀢𑁆𑀯𑀸 𑀦 𑀘 𑀞𑀲𑁆𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀲𑁆𑀲 𑀓𑀸𑀭𑀡𑀫𑀸𑀳.

𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀫𑀢𑁆𑀢𑁄𑀢𑀺 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑁂𑀦 𑀧𑀝𑀺𑀮𑀤𑁆𑀥𑀫𑀢𑁆𑀢𑀁 𑀦𑀸𑀢𑀺𑀲𑀼𑀪𑀸𑀯𑀺𑀢𑀁 𑀲𑀫𑀸𑀥𑀸𑀦𑀁. 𑀢𑀁 𑀧𑀦 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸𑀦𑀁 𑀲𑀫𑀸𑀥𑀺𑀯𑀺𑀲𑁂𑀲𑀸𑀦𑀁 𑀫𑀽𑀮𑀓𑀸𑀭𑀡𑀪𑀸𑀯𑀢𑁄 ‘‘𑀫𑀽𑀮𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑁄. 𑀲𑁆𑀯𑀸𑀬𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀫𑀢𑁆𑀢𑁄 ‘‘𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺 𑀲𑀦𑁆𑀦𑀺𑀲𑀸𑀤𑁂𑀫𑀺 𑀏𑀓𑁄𑀤𑀺𑀁 𑀓𑀭𑁄𑀫𑀺 𑀲𑀫𑀸𑀤𑀳𑀸𑀫𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀔𑀡𑀺𑀓𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀣𑁂𑀯 𑀳𑀺 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀁 𑀅𑀳𑁄𑀲𑀺 𑀅𑀲𑀮𑁆𑀮𑀻𑀦𑀁…𑀧𑁂… 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕’’𑀦𑁆𑀢𑀺 (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁧𑁧) 𑀯𑀢𑁆𑀯𑀸 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁮.𑁧𑁧) 𑀧𑀞𑀫𑀁 𑀯𑀼𑀢𑁆𑀢𑀘𑀺𑀢𑁆𑀢𑁂𑀓𑀕𑁆𑀕𑀢𑀸 ‘‘𑀔𑀡𑀺𑀓𑀲𑀫𑀸𑀥𑀻’’𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀫𑀺𑀥𑀸𑀧𑀻𑀢𑀺. 𑀲𑁄 𑀏𑀯 𑀲𑀫𑀸𑀥𑀻𑀢𑀺 𑀫𑀽𑀮𑀲𑀫𑀸𑀥𑀺𑀫𑀸𑀳.

𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄, 𑀅𑀲𑁆𑀲 𑀯𑀸 𑀫𑀽𑀮𑀲𑀫𑀸𑀥𑀺𑀲𑁆𑀲. 𑀪𑀸𑀯𑀦𑀦𑁆𑀢𑀺 𑀯𑀟𑁆𑀠𑀦𑀁. 𑀅𑀬𑀁 𑀲𑀫𑀸𑀥𑀻𑀢𑀺 𑀘 𑀫𑀽𑀮𑀲𑀫𑀸𑀥𑀺𑀬𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀏𑀯𑀁 𑀪𑀸𑀯𑀺𑀢𑁄𑀢𑀺 𑀬𑀣𑀸 𑀅𑀭𑀡𑀺𑀲𑀳𑀺𑀢𑁂𑀦 𑀉𑀧𑁆𑀧𑀸𑀤𑀺𑀢𑁄 𑀅𑀕𑁆𑀕𑀺 𑀕𑁄𑀫𑀬𑀘𑀼𑀡𑁆𑀡𑀸𑀤𑀻𑀳𑀺 𑀯𑀟𑁆𑀠𑀺𑀢𑁄 𑀕𑁄𑀫𑀬𑀕𑁆𑀕𑀺𑀆𑀤𑀺𑀪𑀸𑀯𑀁 𑀧𑀢𑁆𑀢𑁄𑀧𑀺 𑀅𑀭𑀡𑀺𑀲𑀳𑀺𑀢𑁂𑀦 𑀉𑀧𑁆𑀧𑀸𑀤𑀺𑀢𑀫𑀽𑀮𑀕𑁆𑀕𑀻𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀫𑀽𑀮𑀲𑀫𑀸𑀥𑀺 𑀏𑀯 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀯𑀟𑁆𑀠𑀺𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀅𑀜𑁆𑀜𑁂𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼. 𑀢𑀢𑁆𑀣 𑀬𑀣𑀸 𑀫𑁂𑀢𑁆𑀢𑀸𑀪𑀸𑀯𑀦𑀸𑀧𑀼𑀩𑁆𑀩𑀗𑁆𑀕𑀫𑁂𑀦 𑀪𑀸𑀯𑀦𑀸𑀦𑀬𑁂𑀦 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀲𑀯𑀺𑀢𑀓𑁆𑀓𑀸𑀤𑀺𑀪𑀸𑀯𑀯𑀲𑁂𑀦 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀲𑀫𑁆𑀧𑀸𑀧𑀦𑀯𑀺𑀥𑀺𑀦𑀸 𑀫𑀽𑀮𑀲𑀫𑀸𑀥𑀺𑀲𑁆𑀲 𑀪𑀸𑀯𑀦𑀸 𑀯𑀼𑀢𑁆𑀢𑀸, 𑀏𑀯𑀁 𑀓𑀭𑀼𑀡𑀸𑀤𑀺𑀪𑀸𑀯𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼𑀧𑀺 𑀪𑀸𑀯𑀦𑀸𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀼𑀩𑁆𑀩𑀗𑁆𑀕𑀫𑀁 𑀪𑀸𑀯𑀦𑀸𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀲𑀯𑀓𑁆𑀔𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀭𑀼𑀡𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀧𑀭𑀺𑀬𑁄𑀲𑀸𑀦𑀸𑀬 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑀸𑀥𑀺𑀕𑀫𑀸𑀬 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀓𑀣𑀺𑀢𑀢𑁆𑀢𑀸 𑀧𑀼𑀦 ‘‘𑀢𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀇𑀫𑀁 𑀲𑀫𑀸𑀥𑀺𑀁 𑀲𑀯𑀺𑀢𑀓𑁆𑀓𑀫𑁆𑀧𑀻’’𑀢𑀺𑀆𑀤𑀺 (𑀅. 𑀦𑀺. 𑁮.𑁬𑁩) 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀬 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀲𑀸 𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀪𑀸𑀯𑁂𑀦 𑀯𑀢𑁆𑀢𑀫𑀸𑀦𑀸 𑀬𑀣𑀸𑀯𑀼𑀢𑁆𑀢𑀚𑁆𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀦𑁆𑀢𑀻 𑀯𑀺𑀲𑁂𑀲𑀢𑁄 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺.

𑀧𑀼𑀦 𑀬𑀢𑁄 𑀔𑁄 𑀢𑁂𑀢𑀺𑀆𑀤𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀢𑁄 𑀉𑀤𑁆𑀥𑀁 𑀮𑀤𑁆𑀥𑀩𑁆𑀩𑀨𑀸𑀲𑀼𑀯𑀺𑀳𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀕𑀕𑁆𑀖𑀲𑀻𑀢𑀺 𑀕𑀫𑀺𑀲𑁆𑀲𑀲𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀲𑀯𑀺𑀢𑀓𑁆𑀓𑀫𑁆𑀧𑀻’’𑀢𑀺𑀆𑀤𑀺𑀓𑀸 𑀤𑁂𑀲𑀦𑀸 𑀫𑁂𑀢𑁆𑀢𑀸𑀤𑀻𑀦𑀁 𑀆𑀭𑀫𑁆𑀫𑀡𑀢𑁄 𑀅𑀜𑁆𑀜𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀲𑀫𑀸𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸, 𑀦 𑀅𑀧𑁆𑀧𑀫𑀜𑁆𑀜𑀸, 𑀢𑀲𑁆𑀫𑀸. ‘‘𑀢𑀣𑁂𑀯𑀸’’𑀢𑀺𑀆𑀤𑀺𑀦𑀸 𑀕𑀦𑁆𑀣𑀦𑁆𑀢𑀭𑁂𑀦𑀧𑀺 𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀢𑀢𑁆𑀣 𑀢𑀣𑁂𑀯𑀸𑀢𑀺 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦𑁂𑀯. 𑀅𑀪𑀺𑀥𑀫𑁆𑀫𑁂𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 (𑀥. 𑀲. 𑁨𑁫𑁧 𑀆𑀤𑀬𑁄), 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁬𑁮𑁪 𑀆𑀤𑀬𑁄) 𑀘 𑀢𑀢𑁆𑀣 𑀢𑀢𑁆𑀣 𑀅𑀪𑀺𑀥𑀫𑁆𑀫𑀧𑁆𑀧𑀤𑁂𑀲𑁂𑀲𑀼.

𑁨𑁭𑁩. 𑀲𑀼𑀪𑀧𑀭𑀫𑀸𑀤𑀺𑀯𑀲𑁂𑀦𑀸𑀢𑀺 𑀲𑀼𑀪-𑀲𑀤𑁆𑀤𑁄 ‘‘𑀲𑀼𑀪𑀦𑁆𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁧𑁨; 𑀅. 𑀦𑀺. 𑁮.𑁬𑁬) 𑀏𑀯𑀁 𑀯𑀼𑀢𑁆𑀢𑀲𑀼𑀪𑀯𑀺𑀫𑁄𑀓𑁆𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀧𑀭𑀫-𑀲𑀤𑁆𑀤𑁄 𑀉𑀓𑁆𑀓𑀁𑀲𑀢𑁆𑀣𑁄. 𑀲𑀼𑀪𑁄 𑀲𑀼𑀪𑀯𑀺𑀫𑁄𑀓𑁆𑀔𑁄 𑀧𑀭𑀫𑁄 𑀉𑀓𑁆𑀓𑀁𑀲𑁄 𑀧𑀭𑀫𑀸 𑀓𑁄𑀝𑀺 𑀏𑀢𑀺𑀲𑁆𑀲𑀸𑀢𑀺 𑀲𑀼𑀪𑀧𑀭𑀫𑀸, 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀢𑀢𑁄 𑀧𑀭𑀁 𑀢𑀸𑀬 𑀲𑀸𑀥𑁂𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀲𑀸𑀥𑀸𑀭𑀡𑀲𑁆𑀲 𑀅𑀢𑁆𑀣𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀲𑀼𑀔𑀸𑀤𑀬𑁄 𑀇𑀥 𑀅𑀦𑀯𑀲𑀭𑀸. 𑀇𑀢𑀭𑁂𑀢𑀭𑀯𑀺𑀲𑀺𑀝𑁆𑀞𑀸𑀧𑁂𑀢𑁂 𑀯𑀺𑀲𑁂𑀲𑀸, 𑀧𑀕𑁂𑀯 𑀧𑀭𑁂𑀳𑀺. 𑀢𑁂𑀦𑀸𑀳 ‘‘𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑁄 𑀆𑀦𑀼𑀪𑀸𑀯𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀯𑀺𑀲𑁂𑀲𑁂𑀢𑁆𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀺𑀝𑁆𑀞𑀁 𑀓𑀢𑁆𑀯𑀸.

𑀢𑀲𑁆𑀲 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀸𑀢𑀺 𑀲𑀼𑀪𑀯𑀺𑀫𑁄𑀓𑁆𑀔𑀸𑀤𑀺𑀓𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀯𑀺𑀫𑁄𑀓𑁆𑀔𑀲𑁆𑀲 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑁆𑀲 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑁆𑀧𑀝𑀺𑀓𑁆𑀓𑀽𑀮𑀧𑀭𑀺𑀘𑀬𑀸𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀯𑀲𑁂𑀦 𑀲𑀢𑁆𑀢𑀲𑀜𑁆𑀜𑀺𑀢𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀭𑀫𑁆𑀫𑀡𑁂 𑀅𑀧𑁆𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑁂𑀦𑁂𑀯 𑀕𑀳𑀡𑀲𑁆𑀲 𑀧𑀭𑀺𑀘𑀺𑀢𑀢𑁆𑀢𑀸. 𑀢𑀲𑁆𑀲 𑀲𑀗𑁆𑀔𑀸𑀭𑀪𑀽𑀢𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀅𑀧𑁆𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑁂𑀦𑁂𑀯 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀲𑀪𑀸𑀯𑀢𑁄. ‘‘𑀅𑀧𑁆𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀢𑀢𑁆𑀣𑀲𑁆𑀲 𑀘𑀺𑀢𑁆𑀢𑀁 𑀅𑀪𑀺𑀭𑀢𑀺𑀯𑀲𑁂𑀦 𑀦𑀺𑀭𑀸𑀲𑀗𑁆𑀓𑀁 𑀧𑀯𑀢𑁆𑀢𑀢𑀺, 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀘 𑀲𑀼𑀔𑁂𑀦, 𑀲𑀼𑀝𑁆𑀞𑀼 𑀘 𑀯𑀺𑀫𑀼𑀘𑁆𑀘𑀢𑀺, 𑀬𑀢𑀲𑁆𑀲 𑀛𑀸𑀦𑀲𑁆𑀲 𑀯𑀺𑀫𑁄𑀓𑁆𑀔𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀧𑁆𑀧𑀝𑀺𑀓𑁆𑀓𑀽𑀮𑁂𑀲𑀽’’𑀢𑀺𑀆𑀤𑀺. 𑀬𑀣𑀸𑀯𑀼𑀢𑁆𑀢𑁄 𑀘 𑀅𑀢𑁆𑀣𑁄 𑀅𑀦𑀢𑁆𑀣𑀘𑀭𑀡𑀸𑀤𑀺𑀅𑀥𑀺𑀧𑁆𑀧𑀸𑀬𑁂𑀦 𑀲𑀘𑁂𑀢𑀦𑁂 𑀆𑀭𑀫𑁆𑀫𑀡𑁂 𑀆𑀖𑀸𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀝𑀺𑀓𑁆𑀓𑀽𑀮𑀧𑀭𑀺𑀘𑀬𑀸 𑀅𑀘𑁂𑀢𑀦𑁂𑀧𑀺 𑀯𑀸𑀢𑀸𑀢𑀧𑀸𑀤𑀺𑀓𑁂 𑀆𑀖𑀸𑀢𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀦 𑀢𑀢𑁄 𑀧𑀭𑀦𑁆𑀢𑀺 𑀢𑀢𑁄 𑀲𑀼𑀪𑀯𑀺𑀫𑁄𑀓𑁆𑀔𑀢𑁄 𑀧𑀭𑀁 𑀓𑀲𑁆𑀲𑀘𑀺 𑀯𑀺𑀫𑁄𑀓𑁆𑀔𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀪𑀺𑀳𑀦𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀪𑀺𑀖𑀸𑀢𑁄, 𑀤𑀡𑁆𑀟𑁄 𑀅𑀪𑀺𑀖𑀸𑀢𑁄 𑀬𑀲𑁆𑀲 𑀢𑀁 𑀤𑀡𑁆𑀟𑀸𑀪𑀺𑀖𑀸𑀢𑀁, 𑀢𑀁 𑀆𑀤𑀺 𑀬𑀲𑁆𑀲 𑀢𑀁 𑀤𑀡𑁆𑀟𑀸𑀪𑀺𑀖𑀸𑀢𑀸𑀤𑀺, 𑀤𑀡𑁆𑀟𑀸𑀪𑀺𑀖𑀸𑀢𑀸𑀤𑀺 𑀭𑀽𑀧𑀁 𑀦𑀺𑀫𑀺𑀢𑁆𑀢𑀁 𑀬𑀲𑁆𑀲 𑀢𑀁 𑀤𑀡𑁆𑀟𑀸𑀪𑀺𑀖𑀸𑀢𑀸𑀤𑀺𑀭𑀽𑀧𑀦𑀺𑀫𑀺𑀢𑁆𑀢𑀁. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀲𑀢𑁆𑀢𑀤𑀼𑀓𑁆𑀔’’𑀦𑁆𑀢𑀺, 𑀤𑀡𑁆𑀟𑀧𑁆𑀧𑀳𑀸𑀭𑀸𑀤𑀺𑀚𑀦𑀺𑀢𑀁 𑀓𑀭𑀚𑀭𑀽𑀧𑀳𑁂𑀢𑀼𑀓𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑀓𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑁂 𑀆𑀤𑀻𑀦𑀯𑁄 𑀲𑀼𑀧𑀭𑀺𑀯𑀺𑀤𑀺𑀢𑁄 𑀳𑁄𑀢𑀺 𑀓𑀭𑀼𑀡𑀸𑀯𑀺𑀳𑀸𑀭𑀺𑀲𑁆𑀲 𑀭𑀽𑀧𑀦𑀺𑀫𑀺𑀢𑁆𑀢𑀢𑁆𑀢𑀸, 𑀤𑀼𑀓𑁆𑀔𑀲𑁆𑀲 𑀓𑀭𑀼𑀡𑀸𑀬 𑀘 𑀧𑀭𑀤𑀼𑀓𑁆𑀔𑀸𑀲𑀳𑀦𑀭𑀲𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀆𑀓𑀸𑀲𑁂. 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀲𑀩𑁆𑀩𑀲𑁄 𑀭𑀽𑀧𑀸𑀦𑀁 𑀅𑀪𑀸𑀯𑁄 𑀯𑀺𑀯𑀭𑀫𑀧𑀕𑀫𑁄𑀢𑀺.

𑀢𑁂𑀦 𑀢𑁂𑀦𑀸𑀢𑀺𑀆𑀤𑀻𑀲𑀼 𑀅𑀬𑀁 𑀬𑁄𑀚𑀦𑀸 𑁋 𑀢𑁂𑀦 𑀢𑁂𑀦 𑀪𑁄𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀦𑀸 𑀧𑀸𑀫𑁄𑀚𑁆𑀚𑀓𑀸𑀭𑀡𑁂𑀦 𑀧𑀫𑀼𑀤𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀧𑀸𑀫𑁄𑀚𑁆𑀚𑀯𑀺𑀜𑁆𑀜𑀸𑀡𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀬𑁄𑀕𑀺𑀦𑁄 ‘‘𑀲𑀸𑀥𑀼 𑀯𑀢𑀸𑀬𑀁 𑀲𑀢𑁆𑀢𑁄 𑀧𑀫𑁄𑀤𑀢𑀻’’𑀢𑀺 𑀫𑀼𑀤𑀺𑀢𑀸𑀬 𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄 𑀧𑀫𑀼𑀤𑀺𑀢𑀯𑀺𑀜𑁆𑀜𑀸𑀡𑀲𑁆𑀲 𑀤𑀲𑁆𑀲𑀦𑁂𑀦 𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑀧𑀭𑀺𑀘𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀻𑀢𑀺.

𑀅𑀦𑀼𑀓𑁆𑀓𑀫𑀸𑀥𑀺𑀕𑀢𑀦𑁆𑀢𑀺 𑀆𑀓𑀸𑀲𑀓𑀲𑀺𑀡𑀯𑀚𑁆𑀚𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀲𑀺𑀡𑁂 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀥𑀺𑀕𑀫𑀸𑀦𑀼𑀓𑁆𑀓𑀫𑁂𑀦 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀬 𑀅𑀥𑀺𑀕𑀢𑀁. 𑀆𑀓𑀸𑀲𑀦𑀺𑀫𑀺𑀢𑁆𑀢𑀁 𑀕𑁄𑀘𑀭𑁄 𑀏𑀢𑀲𑁆𑀲𑀸𑀢𑀺 𑀆𑀓𑀸𑀲𑀦𑀺𑀫𑀺𑀢𑁆𑀢𑀕𑁄𑀘𑀭𑀁, 𑀢𑀲𑁆𑀫𑀺𑀁 𑀆𑀓𑀸𑀲𑀦𑀺𑀫𑀺𑀢𑁆𑀢𑀕𑁄𑀘𑀭𑁂 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂. 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑁄𑀢𑀺 𑀤𑀼𑀢𑀺𑀬𑀸𑀭𑀼𑀧𑁆𑀧𑀸𑀥𑀺𑀕𑀫𑀸𑀬 𑀪𑀸𑀯𑀦𑀸𑀘𑀺𑀢𑁆𑀢𑀁 𑀦𑁂𑀦𑁆𑀢𑀲𑁆𑀲, 𑀢𑀣𑀸 𑀪𑀸𑀯𑀬𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂. 𑀘𑀺𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀘𑀺𑀢𑁆𑀢𑀁. 𑀧𑀓𑁆𑀔𑀦𑁆𑀤𑀢𑀻𑀢𑀺 𑀅𑀦𑀼𑀧𑀯𑀺𑀲𑀢𑀺 𑀯𑀺𑀫𑁄𑀓𑁆𑀔𑀪𑀸𑀯𑁂𑀦 𑀅𑀧𑁆𑀧𑁂𑀢𑀺.

𑀆𑀪𑁄𑀕𑀸𑀪𑀸𑀯𑀢𑁄𑀢𑀺 ‘‘𑀲𑀼𑀔𑀺𑀢𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁨.𑁨𑁩) 𑀲𑀼𑀔𑀸𑀲𑀻𑀲𑀦𑀸𑀤𑀺𑀯𑀲𑁂𑀦 𑀆𑀪𑀼𑀚𑀦𑀸𑀪𑀸𑀯𑀢𑁄. 𑀲𑀢𑁆𑀢𑀸𑀦𑀁 𑀲𑀼𑀔𑀸𑀲𑀻𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀸𑀯 𑀧𑀭𑀫𑀢𑁆𑀣𑀕𑁆𑀕𑀳𑀡𑀫𑀼𑀔𑁂𑀦 𑀲𑀢𑁆𑀢𑁂 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀉𑀧𑁂𑀓𑁆𑀔𑀸𑀪𑀸𑀯𑀦𑀸 𑀧𑀦 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺𑀢𑁆𑀯𑀸 𑀓𑁂𑀯𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦𑁂𑀯 𑀲𑀢𑁆𑀢𑁂 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀺𑀲𑁆𑀲 𑀲𑀼𑀔𑀤𑀼𑀓𑁆𑀔𑀸𑀤𑀺𑀧𑀭𑀫𑀢𑁆𑀣𑀕𑁆𑀕𑀸𑀳𑀯𑀺𑀫𑀼𑀔𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀕𑁆𑀕𑀳𑀡𑀤𑀼𑀓𑁆𑀔𑀁 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺. 𑀦𑀦𑀼 𑀘 ‘‘𑀓𑀫𑁆𑀫𑀲𑁆𑀲𑀓𑀸 𑀲𑀢𑁆𑀢𑀸, 𑀢𑁂 𑀓𑀲𑁆𑀲 𑀭𑀼𑀘𑀺𑀬𑀸 𑀲𑀼𑀔𑀺𑀢𑀸 𑀯𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀧𑀺 𑀧𑀭𑀫𑀢𑁆𑀣𑀕𑁆𑀕𑀳𑀡𑀫𑀼𑀔𑁂𑀦𑁂𑀯 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁄𑀧𑀺 𑀲𑀢𑁆𑀢𑁂 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀁 𑀧𑀦 𑀪𑀸𑀯𑀦𑀸𑀬 𑀧𑀼𑀩𑁆𑀩𑀪𑀸𑀕𑁂, 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀁 𑀧𑀦 𑀓𑁂𑀯𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦𑁂𑀯 𑀲𑀢𑁆𑀢𑁂 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀲𑀯𑀺𑀲𑁂𑀲𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂 𑀏𑀯 𑀯𑀺𑀲𑀬𑁂 𑀢𑀲𑁆𑀲 𑀧𑀯𑀢𑁆𑀢𑀺. 𑀅𑀯𑀺𑀚𑁆𑀚𑀫𑀸𑀦𑀕𑁆𑀕𑀳𑀡𑀤𑀼𑀓𑁆𑀔𑀢𑀸 𑀘 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀺𑀬𑀸 𑀅𑀧𑀭𑀸𑀫𑀸𑀲𑀲𑀢𑁆𑀢𑀕𑁆𑀕𑀳𑀡𑀫𑀼𑀤𑁆𑀥𑀪𑀽𑀢𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.