𑁧𑁦. 𑀆𑀭𑀼𑀧𑁆𑀧𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀧𑀞𑀫𑀸𑀭𑀼𑀧𑁆𑀧𑀯𑀡𑁆𑀡𑀦𑀸

𑁨𑁭𑁫. 𑀉𑀤𑁆𑀤𑀺𑀝𑁆𑀞𑁂𑀲𑀽𑀢𑀺 ‘‘𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸’’𑀢𑀺 𑀏𑀯𑀁 𑀉𑀤𑁆𑀤𑀺𑀝𑁆𑀞𑁂𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀢𑁂𑀦𑁂𑀯𑀸𑀳 ‘‘𑀘𑀢𑀽𑀲𑀼 𑀆𑀭𑀼𑀧𑁆𑀧𑁂𑀲𑀽’’𑀢𑀺. 𑀢𑀢𑁆𑀣 𑀭𑀽𑀧𑀯𑀺𑀯𑁂𑀓𑁂𑀦 𑀅𑀭𑀽𑀧𑀁, 𑀅𑀭𑀽𑀧𑀫𑁂𑀯 𑀆𑀭𑀼𑀧𑁆𑀧𑀁 𑀛𑀸𑀦𑀁, 𑀇𑀥 𑀧𑀦 𑀢𑀤𑀢𑁆𑀣𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀪𑀸𑀯𑁂𑀢𑀼𑀓𑀸𑀫𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀽𑀧𑀸𑀥𑀺𑀓𑀭𑀡𑀦𑁆𑀢𑀺 𑀭𑀽𑀧𑀳𑁂𑀢𑀼. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀏𑀢𑁆𑀣 𑀅𑀥𑀺𑀓𑀭𑀡-𑀲𑀤𑁆𑀤𑁄 ‘‘𑀓𑀸𑀫𑀸𑀥𑀺𑀓𑀭𑀡’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁬𑁮-𑁧𑁬𑁯) 𑀯𑀺𑀬. 𑀤𑀡𑁆𑀟𑀦𑀝𑁆𑀞𑁂𑀦 𑀤𑀡𑁆𑀟𑁄, 𑀫𑀼𑀕𑁆𑀕𑀭𑀸𑀤𑀺. 𑀧𑀭𑀧𑀻𑀴𑀸𑀥𑀺𑀧𑁆𑀧𑀸𑀬𑁂𑀦 𑀢𑀲𑁆𑀲 𑀆𑀤𑀸𑀦𑀁 𑀤𑀡𑁆𑀟𑀸𑀤𑀸𑀦𑀁. 𑀲𑀢𑁆𑀢𑀸𑀦𑀁 𑀲𑀲𑀦𑀝𑁆𑀞𑁂𑀦 𑀲𑀢𑁆𑀣𑀁, 𑀆𑀯𑀼𑀥𑀁. 𑀪𑀡𑁆𑀟𑀦𑀁 𑀓𑀮𑀳𑁄. 𑀯𑀺𑀭𑁄𑀥𑁄 𑀯𑀺𑀕𑁆𑀕𑀳𑁄. 𑀦𑀸𑀦𑀸𑀯𑀸𑀤𑁄 𑀯𑀺𑀯𑀸𑀤𑁄. 𑀏𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀤𑀡𑁆𑀟𑀸𑀤𑀸𑀦𑀸𑀤𑀺𑀓𑀁. 𑀲𑀩𑁆𑀩𑀲𑁄𑀢𑀺 𑀅𑀦𑀯𑀲𑁂𑀲𑀢𑁄. 𑀆𑀭𑀼𑀧𑁆𑀧𑁂 𑀅𑀭𑀽𑀧𑀪𑀸𑀯𑁂, 𑀆𑀭𑀼𑀧𑁆𑀧𑁂 𑀯𑀸 𑀪𑀯𑁂. 𑀭𑀽𑀧𑀸𑀦𑀁𑀬𑁂𑀯𑀸𑀢𑀺 𑀤𑀺𑀝𑁆𑀞𑀸𑀤𑀻𑀦𑀯𑀸𑀦𑀁 𑀭𑀽𑀧𑀸𑀦𑀁𑀬𑁂𑀯, 𑀦 𑀅𑀭𑀽𑀧𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬. 𑀯𑀺𑀭𑀸𑀕𑀸𑀬𑀸𑀢𑀺 𑀯𑀺𑀭𑀚𑁆𑀚𑀦𑀢𑁆𑀣𑀸𑀬. 𑀦𑀺𑀭𑁄𑀥𑀸𑀬𑀸𑀢𑀺 𑀦𑀺𑀭𑀼𑀚𑁆𑀛𑀦𑀢𑁆𑀣𑀸𑀬. 𑀲𑀩𑁆𑀩𑀫𑁂𑀢𑀁 𑀲𑀫𑀢𑀺𑀓𑁆𑀓𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀡𑁆𑀟𑀸𑀤𑀸𑀦𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀺𑀓𑀁 𑀲𑀩𑁆𑀩𑀁 𑀭𑀽𑀧𑀳𑁂𑀢𑀼𑀓𑀁 𑀅𑀦𑀢𑁆𑀣𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀦 𑀇𑀥 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀭𑀚𑀭𑀽𑀧𑁂𑀢𑀺 𑀬𑀣𑀸𑀯𑀼𑀢𑁆𑀢𑀸𑀤𑀻𑀦𑀯𑀸𑀥𑀺𑀓𑀭𑀡𑀪𑀸𑀯𑀬𑁄𑀕𑁆𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀑𑀴𑀸𑀭𑀺𑀓𑀭𑀽𑀧𑁂𑀢𑀺 𑀅𑀢𑁆𑀣𑁄. 𑀆𑀤𑀻𑀦𑀯𑀦𑁆𑀢𑀺 𑀤𑁄𑀲𑀁. 𑀢𑀲𑁆𑀲𑀸𑀢𑀺 𑀭𑀽𑀧𑀲𑁆𑀲. 𑀆𑀮𑁄𑀓𑁄𑀢𑀺 𑀯𑀡𑁆𑀡𑀯𑀺𑀲𑁂𑀲𑁄 𑀏𑀯𑀸𑀢𑀺 𑀢𑀢𑁆𑀣 𑀧𑀯𑀢𑁆𑀢𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀲𑀺𑀬𑀸 𑀆𑀓𑀸𑀲𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀳𑁂𑀢𑀼𑀁, 𑀦 𑀧𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸. 𑀢𑀲𑁆𑀲 𑀳𑀺 𑀉𑀕𑁆𑀖𑀸𑀝𑀦𑀸 𑀦𑀸𑀫 𑀭𑀽𑀧𑀦𑀺𑀫𑀺𑀢𑁆𑀢𑁂𑀦𑁂𑀯 𑀲𑀺𑀬𑀸𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀁 𑀦𑀯𑀲𑀽’’𑀢𑀺. 𑀓𑁂𑀘𑀺 𑀧𑀦 ‘‘𑀆𑀮𑁄𑀓𑀓𑀲𑀺𑀡𑀫𑁆𑀧𑀺 𑀞𑀧𑁂𑀢𑁆𑀯𑀸 𑀅𑀝𑁆𑀞𑀲𑀽’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀲 𑀧𑀦 𑀞𑀧𑀦𑁂 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺, 𑀓𑀭𑀚𑀭𑀽𑀧𑀁 𑀅𑀢𑀺𑀓𑁆𑀓𑀦𑁆𑀢𑀁 𑀳𑁄𑀢𑀺 𑀢𑀲𑁆𑀲 𑀅𑀦𑀸𑀮𑀫𑁆𑀩𑀦𑀢𑁄.

𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺𑀧𑀺 𑀢𑀲𑁆𑀲 𑀅𑀦𑀸𑀮𑀫𑁆𑀩𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸? 𑀲𑀘𑁆𑀘𑀫𑁂𑀢𑀁, 𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑀢𑁄 𑀧𑀦 𑀲𑀦𑁆𑀢𑀲𑀪𑀸𑀯𑁂𑀦 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀁 𑀲𑀼𑀝𑁆𑀞𑀼 𑀅𑀢𑀺𑀓𑁆𑀓𑀦𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀦𑀺𑀭𑀼𑀚𑁆𑀛𑀦𑀢𑁄, 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀢𑁄 𑀘𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀓𑀸𑀭𑀡𑀁, 𑀇𑀢𑀭𑁂𑀲𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀲𑀫𑁆𑀪𑀯𑀢𑁄, 𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑀸𑀦𑀜𑁆𑀘 𑀅𑀓𑀸𑀫𑀥𑀸𑀢𑀼𑀲𑀁𑀯𑀢𑁆𑀢𑀦𑀻𑀬𑀢𑁄. 𑀢𑀧𑁆𑀧𑀝𑀺𑀪𑀸𑀕𑀫𑁂𑀯𑀸𑀢𑀺 𑀓𑀭𑀚𑀭𑀽𑀧𑀧𑀝𑀺𑀪𑀸𑀕𑀫𑁂𑀯 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀲𑀫𑁆𑀪𑀯𑀢𑁄. 𑀲𑀤𑀺𑀲𑀜𑁆𑀘 𑀦𑀸𑀫 𑀢𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀓𑀺𑀁 𑀢𑀲𑁆𑀲 𑀲𑀫𑀢𑀺𑀓𑁆𑀓𑀫𑀦𑁂𑀦𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀓𑀣𑀁? 𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀣𑀦𑁆𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀮𑁂𑀔𑀸𑀘𑀺𑀢𑁆𑀢𑀦𑁆𑀢𑀺 𑀓𑀸𑀴𑀯𑀡𑁆𑀡𑀸𑀤𑀺𑀦𑀸 𑀓𑀢𑀧𑀭𑀺𑀓𑀫𑁆𑀫𑀸𑀬 𑀮𑁂𑀔𑀸𑀬 𑀘𑀺𑀢𑁆𑀢𑀁. 𑀨𑀮𑀺𑀢𑀦𑁆𑀢𑀭𑀦𑁆𑀢𑀺 𑀯𑀺𑀯𑀭𑀁. 𑀤𑀺𑀲𑁆𑀯𑀸𑀢𑀺 𑀤𑀽𑀭𑀢𑁄 𑀤𑀺𑀲𑁆𑀯𑀸. 𑀲𑀫𑀸𑀦𑀭𑀽𑀧𑀲𑀤𑁆𑀤𑀲𑀫𑀼𑀤𑀸𑀘𑀸𑀭𑀦𑁆𑀢𑀺 𑀲𑀤𑀺𑀲𑀭𑀽𑀧𑀲𑀡𑁆𑀞𑀸𑀦𑀲𑀭𑀧𑁆𑀧𑀬𑁄𑀕𑀁.

𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 ‘‘𑀫𑀫 𑀘𑀓𑁆𑀔𑀼 𑀲𑁄𑀪𑀦𑀁, 𑀫𑀫 𑀓𑀸𑀬𑁄 𑀣𑀺𑀭𑁄, 𑀫𑀫 𑀧𑀭𑀺𑀓𑁆𑀔𑀸𑀭𑀸 𑀲𑀼𑀦𑁆𑀤𑀭𑀸’’𑀢𑀺 𑀏𑀯𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦. 𑀓𑀭𑀚𑀭𑀽𑀧𑀲𑀫𑀗𑁆𑀕𑀺𑀓𑀸𑀮𑁄𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀭𑀽𑀧𑁂𑀦 𑀘𑁂𑀯 𑀆𑀭𑀫𑁆𑀫𑀡𑀭𑀽𑀧𑁂𑀦 𑀘 𑀲𑀫𑀦𑁆𑀦𑀸𑀕𑀢𑀓𑀸𑀮𑁄. 𑀢𑀫𑁆𑀧𑀻𑀢𑀺 𑀓𑀲𑀺𑀡𑀭𑀽𑀧𑀲𑁆𑀲𑀧𑀺. 𑀲𑀸𑀫𑀺𑀅𑀢𑁆𑀣𑁂 𑀳𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁. 𑀪𑀬𑀲𑀦𑁆𑀢𑀸𑀲𑀅𑀤𑀲𑁆𑀲𑀦𑀓𑀸𑀫𑀢𑀸 𑀯𑀺𑀬 𑀲𑀫𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑀢𑀸𑀢𑀺 𑀬𑁄𑀚𑀦𑀸. 𑀇𑀤𑀜𑁆𑀘 𑀬𑀣𑀸𑀯𑀼𑀢𑁆𑀢𑀸𑀦𑀁 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀦𑀺𑀭𑁄𑀥𑀸𑀦𑀁 𑀲𑀸𑀥𑀸𑀭𑀡𑀯𑀘𑀦𑀁. 𑀢𑁂 𑀳𑀺 𑀢𑀬𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀪𑀬𑀲𑀦𑁆𑀢𑀸𑀲𑀅𑀤𑀲𑁆𑀲𑀦𑀓𑀸𑀫𑀢𑀸 𑀯𑀼𑀢𑁆𑀢𑀸. 𑀏𑀓𑁄 𑀓𑀺𑀭 𑀲𑀼𑀦𑀔𑁄 𑀯𑀦𑁂 𑀲𑀽𑀓𑀭𑁂𑀦 𑀧𑀳𑀝𑀫𑀢𑁆𑀢𑁄 𑀧𑀮𑀸𑀢𑁄, 𑀲𑁄 𑀅𑀭𑀽𑀧𑀤𑀲𑁆𑀲𑀦𑀯𑁂𑀮𑀸𑀬 𑀪𑀢𑁆𑀢𑀧𑀘𑀦𑀉𑀓𑁆𑀔𑀮𑀺𑀁 𑀤𑀽𑀭𑀢𑁄 𑀤𑀺𑀲𑁆𑀯𑀸 𑀲𑀽𑀓𑀭𑀲𑀜𑁆𑀜𑀸𑀬 𑀪𑀻𑀢𑁄 𑀉𑀢𑁆𑀢𑀲𑀦𑁆𑀢𑁄 𑀧𑀮𑀸𑀬𑀺, 𑀧𑀺𑀲𑀸𑀘𑀪𑀻𑀭𑀼𑀓𑁄 𑀧𑀼𑀭𑀺𑀲𑁄 𑀭𑀢𑁆𑀢𑀺𑀪𑀸𑀕𑁂 𑀅𑀧𑀭𑀺𑀘𑀺𑀢𑁂 𑀤𑁂𑀲𑁂 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀁 𑀢𑀸𑀮𑀓𑁆𑀔𑀦𑁆𑀥𑀁 𑀤𑀺𑀲𑁆𑀯𑀸 𑀧𑀺𑀲𑀸𑀘𑀲𑀜𑁆𑀜𑀸𑀬 𑀪𑀻𑀢𑁄 𑀉𑀢𑁆𑀢𑀲𑀦𑁆𑀢𑁄 𑀫𑀼𑀘𑁆𑀙𑀺𑀢𑁄 𑀧𑀧𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀽𑀓𑀭𑀸…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑁨𑁭𑁬. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀑𑀧𑀫𑁆𑀫𑀢𑁆𑀣𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳. 𑀲𑁄𑀢𑀺 𑀬𑁄𑀕𑀸𑀯𑀘𑀭𑁄. 𑀢𑀲𑁆𑀫𑀺𑀁 𑀛𑀸𑀦𑁂 𑀆𑀤𑀻𑀦𑀯𑀁 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀽𑀧𑀦𑁆𑀢𑀺 𑀓𑀲𑀺𑀡𑀭𑀽𑀧𑀁. 𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑁄𑀢𑀺 𑀅𑀭𑀽𑀧𑀚𑁆𑀛𑀸𑀦𑀢𑁄. 𑀢𑀸𑀦𑀺 𑀳𑀺 ‘‘𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁭𑁨; 𑁧𑁦.𑁯) 𑀲𑀦𑁆𑀢𑀯𑀺𑀫𑁄𑀓𑁆𑀔𑀸𑀢𑀺 𑀆𑀕𑀢𑀸. 𑀲𑀦𑁆𑀢𑀢𑀸𑀲𑀺𑀤𑁆𑀥𑀺 𑀘𑀲𑁆𑀲 𑀅𑀦𑀼𑀲𑁆𑀲𑀼𑀢𑀺𑀢𑁄 𑀤𑀝𑁆𑀞𑀩𑁆𑀩𑀸. 𑀬𑀣𑁂𑀯𑀸𑀢𑀺 𑀏𑀯-𑀓𑀸𑀭𑁂𑀦 𑀬𑁂𑀦 𑀧𑀓𑀸𑀭𑁂𑀦 𑀏𑀢𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀤𑀼𑀯𑀗𑁆𑀕𑀺𑀓𑀁, 𑀏𑀯𑀁 𑀆𑀭𑀼𑀧𑁆𑀧𑀸𑀦𑀺𑀧𑀻𑀢𑀺 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀯𑀲𑁂𑀦 𑀤𑀼𑀯𑀗𑁆𑀕𑀺𑀓𑀢𑁆𑀢𑀁 𑀤𑀲𑁆𑀲𑁂𑀢𑀺, 𑀦 𑀢𑀢𑀺𑀬𑀚𑁆𑀛𑀸𑀦𑁂 𑀯𑀺𑀬 𑀤𑀼𑀯𑀗𑁆𑀕𑀺𑀓𑀢𑀸𑀫𑀢𑁆𑀢𑀁. 𑀦𑀦𑀼 𑀘𑁂𑀢𑁆𑀣𑀸𑀧𑀺 𑀤𑀼𑀯𑀗𑁆𑀕𑀺𑀓𑀢𑀸𑀫𑀢𑁆𑀢𑀫𑁂𑀯 𑀪𑀽𑀫𑀺𑀪𑁂𑀤𑀢𑁄𑀢𑀺? 𑀦𑀸𑀬𑀁 𑀤𑁄𑀲𑁄 𑀉𑀧𑀫𑁄𑀧𑀫𑁂𑀬𑁆𑀬𑀪𑀸𑀯𑀲𑁆𑀲 𑀪𑀺𑀦𑁆𑀦𑀸𑀥𑀺𑀓𑀭𑀡𑀢𑁄.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑁂. 𑀦𑀺𑀓𑀦𑁆𑀢𑀺𑀦𑁆𑀢𑀺 𑀅𑀧𑁂𑀓𑁆𑀔𑀁. 𑀧𑀭𑀺𑀬𑀸𑀤𑀸𑀬𑀸𑀢𑀺 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀢𑀲𑁆𑀫𑀺𑀁 𑀛𑀸𑀦𑁂 𑀔𑁂𑀧𑁂𑀢𑁆𑀯𑀸, 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑀡𑁂𑀦𑁂𑀯 𑀧𑀡𑀻𑀢𑀢𑁄, 𑀲𑀼𑀔𑀼𑀫𑀢𑁄 𑀘 𑀫𑀦𑀲𑀺𑀓𑀸𑀭𑁄 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀦𑁆𑀢𑀢𑁄 𑀅𑀦𑀦𑁆𑀢𑀢𑁄 𑀫𑀦𑀲𑀺 𑀓𑀭𑀺𑀢𑁆𑀯𑀸’’𑀢𑀺. 𑀧𑀢𑁆𑀣𑀭𑀺𑀢𑁆𑀯𑀸𑀢𑀺 𑀧𑀕𑁂𑀯 𑀯𑀟𑁆𑀠𑀺𑀢𑀁, 𑀢𑀤𑀸 𑀯𑀟𑁆𑀠𑀦𑀯𑀲𑁂𑀦 𑀯𑀸 𑀧𑀢𑁆𑀣𑀭𑀺𑀢𑁆𑀯𑀸. 𑀢𑁂𑀦𑀸𑀢𑀺 𑀓𑀲𑀺𑀡𑀭𑀽𑀧𑁂𑀦. 𑀉𑀕𑁆𑀖𑀸𑀝𑁂𑀢𑀺 𑀓𑀲𑀺𑀡𑀦𑁆𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀲𑀺𑀡𑀭𑀽𑀧𑀁 𑀅𑀧𑀦𑁂𑀢𑀺. 𑀉𑀕𑁆𑀖𑀸𑀝𑀦𑀯𑀺𑀥𑀺𑀁 𑀧𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀕𑁆𑀖𑀸𑀝𑁂𑀦𑁆𑀢𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀁𑀯𑁂𑀮𑁆𑀮𑁂𑀢𑀻𑀢𑀺 𑀧𑀝𑀺𑀲𑀁𑀳𑀭𑀢𑀺. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑁂𑀦. 𑀦𑁂𑀯 𑀉𑀩𑁆𑀩𑀝𑁆𑀝𑀢𑀻𑀢𑀺 𑀦𑁂𑀯 𑀉𑀝𑁆𑀞𑀳𑀢𑀺. 𑀦 𑀯𑀺𑀯𑀝𑁆𑀝𑀢𑀻𑀢𑀺 𑀦 𑀯𑀺𑀦𑀺𑀯𑀝𑁆𑀝𑀢𑀺. 𑀇𑀫𑀲𑁆𑀲𑀸𑀢𑀺 𑀇𑀫𑀲𑁆𑀲 𑀓𑀲𑀺𑀡𑀭𑀽𑀧𑀲𑁆𑀲. 𑀅𑀫𑀦𑀲𑀺𑀓𑀸𑀭𑀦𑁆𑀢𑀺 𑀫𑀦𑀲𑀺 𑀅𑀓𑀭𑀡𑀁 𑀅𑀘𑀺𑀦𑁆𑀢𑀦𑀁. 𑀫𑀦𑀲𑀺𑀓𑀸𑀭𑀜𑁆𑀘 𑀧𑀝𑀺𑀘𑁆𑀘𑀸𑀢𑀺 ‘‘𑀆𑀓𑀸𑀲𑁄 𑀆𑀓𑀸𑀲𑁄’’𑀢𑀺 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀜𑁆𑀘 𑀦𑀺𑀲𑁆𑀲𑀸𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀓𑀲𑀺𑀡𑀭𑀽𑀧𑀁 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀦𑀲𑀺 𑀓𑀭𑁄𑀢𑁄, 𑀢𑁂𑀦 𑀘 𑀨𑀼𑀝𑁆𑀞𑁄𑀓𑀸𑀲𑀁 ‘‘𑀆𑀓𑀸𑀲𑁄 𑀆𑀓𑀸𑀲𑁄’’𑀢𑀺 𑀫𑀦𑀲𑀺 𑀓𑀭𑁄𑀢𑁄 𑀬𑀤𑀸 𑀢𑀁 𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀢𑀤𑀸 𑀲𑁄 𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑀺 𑀦𑀸𑀫, 𑀢𑀜𑁆𑀘 𑀢𑁂𑀦 𑀉𑀕𑁆𑀖𑀸𑀝𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺. 𑀢𑁂𑀦𑀸𑀳 ‘‘𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀫𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺. 𑀲𑀩𑁆𑀩𑀫𑁂𑀢𑀦𑁆𑀢𑀺 𑀢𑀺𑀯𑀺𑀥𑀫𑁆𑀧𑁂𑀢𑀁 𑀏𑀓𑀫𑁂𑀯 𑀧𑀭𑀺𑀬𑀸𑀬𑀪𑀸𑀯𑀢𑁄.

‘‘𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀭𑀽𑀧𑀸𑀯𑀘𑀭𑀧𑀞𑀫𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺, 𑀢𑀢𑁄 𑀧𑀝𑁆𑀞𑀸𑀬 𑀘𑀲𑁆𑀲 𑀦 𑀦𑁂𑀲𑀁 𑀧𑀭𑀺𑀬𑀼𑀝𑁆𑀞𑀸𑀦𑀁. 𑀬𑀤𑀺 𑀲𑀺𑀬𑀸, 𑀛𑀸𑀦𑀢𑁄 𑀧𑀭𑀺𑀳𑀸𑀬𑁂𑀬𑁆𑀬? 𑀬𑀁 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀅𑀢𑁆𑀣𑁂𑀯 𑀲𑀼𑀔𑀼𑀫𑀸𑀦𑀺 𑀅𑀭𑀽𑀧𑀚𑁆𑀛𑀸𑀦𑀯𑀺𑀓𑁆𑀔𑀫𑁆𑀪𑀦𑁂𑀬𑁆𑀬𑀸𑀦𑀺 𑀦𑀻𑀯𑀭𑀡𑀸𑀦𑀺, 𑀢𑀸𑀦𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀦 𑀳𑀺 𑀫𑀳𑀕𑁆𑀕𑀢𑀓𑀼𑀲𑀮𑁂𑀲𑀼 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑁂𑀲𑀼 𑀯𑀺𑀬 𑀑𑀥𑀺𑀲𑁄 𑀧𑀳𑀸𑀦𑀁 𑀦𑀸𑀫 𑀅𑀢𑁆𑀣𑀺. 𑀬𑁄 𑀧𑀦 𑀭𑀽𑀧𑀸𑀯𑀘𑀭𑁂𑀳𑀺 𑀆𑀭𑀼𑀧𑁆𑀧𑀸𑀦𑀁 𑀉𑀴𑀸𑀭𑀨𑀮𑀢𑀸𑀤𑀺𑀯𑀺𑀲𑁂𑀲𑁄, 𑀲𑁄 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀲𑀦𑁆𑀢𑀢𑀭𑀧𑀡𑀻𑀢𑀢𑀭𑀪𑀸𑀯𑁂𑀦 𑀢𑁂𑀲𑀼𑀬𑁂𑀯 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀸𑀦𑀁 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀯𑀺𑀓𑁆𑀔𑀫𑁆𑀪𑀦𑁆𑀢𑀻’’𑀢𑀺 𑀧𑀦 𑀯𑀘𑀦𑀁 𑀯𑀡𑁆𑀡𑀪𑀡𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀅𑀜𑁆𑀜𑀢𑁆𑀣𑀸𑀧𑀺 𑀳𑁂𑀝𑁆𑀞𑀸 𑀧𑀳𑀻𑀦𑀸𑀦𑀁 𑀉𑀧𑀭𑀺 𑀧𑀳𑀸𑀦𑀁 𑀯𑀼𑀘𑁆𑀘𑀢𑀺. 𑀬𑁂 𑀧𑀦 ‘‘𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀩𑁆𑀩𑁂𑀲𑀁 𑀅𑀓𑀼𑀲𑀮𑀸𑀦𑀁 𑀧𑀝𑀺𑀧𑀓𑁆𑀔𑀸𑀢𑀺 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀳𑀺 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑀸𑀤𑀻𑀲𑀼 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀸𑀯𑀘𑀦𑀲𑁆𑀲 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁. 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀆𑀓𑀸𑀲𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸 𑀲𑀢𑀺 𑀲𑀫𑁆𑀫𑀸 𑀲𑀽𑀧𑀝𑁆𑀞𑀺𑀢𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀲𑀢𑀺𑀲𑀻𑀲𑁂𑀦 𑀘𑁂𑀢𑁆𑀣 𑀉𑀧𑀘𑀸𑀭𑀚𑁆𑀛𑀸𑀦𑀸𑀦𑀼𑀕𑀼𑀡𑀸𑀦𑀁 𑀲𑀤𑁆𑀥𑀸𑀧𑀜𑁆𑀘𑀫𑀸𑀦𑀁 𑀲𑀓𑀺𑀘𑁆𑀘𑀬𑁄𑀕𑀁 𑀤𑀲𑁆𑀲𑁂𑀢𑀺. 𑀉𑀧𑀘𑀸𑀭𑁂𑀦𑀸𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑁂𑀦. 𑀇𑀥𑀸𑀧𑀻𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀦𑁆𑀥𑀸𑀬 𑀲𑀫𑁆𑀧𑀺𑀡𑁆𑀟𑀦𑀁. 𑀢𑀁 𑀳𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀁. 𑀲𑁂𑀲𑀦𑁆𑀢𑀺 ‘‘𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀻’’𑀢𑀺𑀆𑀤𑀺. 𑀬𑀁 𑀇𑀥 𑀯𑀢𑁆𑀢𑀩𑁆𑀩𑀫𑀯𑀼𑀢𑁆𑀢𑀁, 𑀢𑀁 𑀧𑀦 𑀧𑀣𑀯𑀻𑀓𑀲𑀺𑀡𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁫𑁧 𑀆𑀤𑀬𑁄) 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺.

𑀏𑀯𑀁 𑀬𑀁 𑀢𑀢𑁆𑀣 𑀅𑀯𑀺𑀲𑀺𑀝𑁆𑀞𑀁, 𑀢𑀁 𑀅𑀢𑀺𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑀺𑀝𑁆𑀞𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺𑀆𑀤𑀺𑀫𑀸𑀳. 𑀬𑀸𑀦𑀧𑁆𑀧𑀼𑀢𑁄𑀴𑀺 𑀓𑀼𑀫𑁆𑀪𑀺𑀫𑀼𑀔𑀸𑀤𑀻𑀦𑀦𑁆𑀢𑀺 𑀑𑀕𑀼𑀡𑁆𑀞𑀦𑀲𑀺𑀯𑀺𑀓𑀸𑀤𑀺𑀬𑀸𑀦𑀸𑀦𑀁 𑀫𑀼𑀔𑀁 𑀬𑀸𑀦𑀫𑀼𑀔𑀁, 𑀧𑀼𑀢𑁄𑀴𑀺𑀬𑀸 𑀔𑀼𑀤𑁆𑀤𑀓𑀤𑁆𑀯𑀸𑀭𑀲𑁆𑀲 𑀫𑀼𑀔𑀁 𑀧𑀼𑀢𑁄𑀴𑀺𑀫𑀼𑀔𑀁, 𑀓𑀼𑀫𑁆𑀪𑀺𑀫𑀼𑀔𑀦𑁆𑀢𑀺 𑀧𑀘𑁆𑀘𑁂𑀓𑀁 𑀫𑀼𑀔-𑀲𑀤𑁆𑀤𑁄 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀆𑀓𑀸𑀲𑀁𑀬𑁂𑀯 𑀬𑀸𑀦𑀫𑀼𑀔𑀸𑀤𑀺𑀧𑀭𑀺𑀘𑁆𑀙𑀺𑀦𑁆𑀦𑀁. 𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀧𑀭𑀺𑀓𑀫𑁆𑀫𑀪𑀽𑀢𑁂𑀦 𑀫𑀦𑀲𑀺𑀓𑀸𑀭𑁂𑀦 𑀉𑀧𑀘𑀸𑀭𑀚𑁆𑀛𑀸𑀦𑁂𑀦. 𑀧𑀭𑀺𑀓𑀫𑁆𑀫𑀁 𑀅𑀦𑀼𑀮𑁄𑀫𑀁 𑀉𑀧𑀘𑀸𑀭𑁄𑀢𑀺 𑀘 𑀅𑀦𑀢𑁆𑀣𑀦𑁆𑀢𑀭𑀜𑁆𑀳𑁂𑀢𑀁. 𑀧𑁂𑀓𑁆𑀔𑀫𑀸𑀦𑁄 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀘𑀓𑁆𑀔𑀼𑀦𑀸.

𑁨𑁭𑁭. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀁 𑀤𑀡𑁆𑀟𑀸𑀤𑀸𑀦𑀲𑀫𑁆𑀪𑀯𑀤𑀲𑁆𑀲𑀦𑀸𑀤𑀺𑀦𑀸 𑀲𑀩𑁆𑀩𑁂𑀦 𑀭𑀽𑀧𑀥𑀫𑁆𑀫𑁂𑀲𑀼, 𑀧𑀣𑀯𑀻𑀓𑀲𑀺𑀡𑀸𑀤𑀺𑀭𑀽𑀧𑀦𑀺𑀫𑀺𑀢𑁆𑀢𑁂𑀲𑀼, 𑀢𑀤𑀸𑀭𑀫𑁆𑀫𑀡𑀚𑁆𑀛𑀸𑀦𑁂𑀲𑀼 𑀘 𑀤𑁄𑀲𑀤𑀲𑁆𑀲𑀦𑀸𑀓𑀸𑀭𑁂𑀦, 𑀢𑁂𑀲𑀼 𑀏𑀯 𑀯𑀸 𑀭𑀽𑀧𑀸𑀤𑀻𑀲𑀼 𑀦𑀺𑀓𑀦𑁆𑀢𑀺𑀧𑁆𑀧𑀳𑀸𑀦𑀅𑀦𑀸𑀯𑀚𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀦𑀸. 𑀭𑀽𑀧𑀚𑁆𑀛𑀸𑀦𑀫𑁆𑀧𑀺 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬𑁦; 𑀯𑀺𑀪. 𑁬𑁨𑁫) 𑀬𑀣𑀸 𑀭𑀽𑀧𑀪𑀯𑁄 𑀭𑀽𑀧𑀁. 𑀭𑀽𑀧𑀻𑀢𑀺 𑀳𑀺 𑀭𑀽𑀧𑀚𑁆𑀛𑀸𑀦𑀮𑀸𑀪𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀫𑁆𑀧𑀺 𑀓𑀲𑀺𑀡𑀭𑀽𑀧𑀁 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺 𑀧𑀼𑀭𑀺𑀫𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀤𑀢𑁆𑀢𑁄’’𑀢𑀺. 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀓𑀲𑀺𑀡𑀭𑀽𑀧𑀸𑀦𑀺 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀧𑀼𑀭𑀺𑀫𑀧𑀤𑀮𑁄𑀧𑁂𑀦 𑀘 𑀬𑀣𑀸𑀓𑁆𑀓𑀫𑀁 𑀭𑀽𑀧𑀚𑁆𑀛𑀸𑀦𑀓𑀲𑀺𑀡𑀭𑀽𑀧𑁂𑀲𑀼 𑀭𑀽𑀧𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸. 𑀭𑀽𑀧𑁂 𑀭𑀽𑀧𑀚𑁆𑀛𑀸𑀦𑁂 𑀢𑀁𑀲𑀳𑀕𑀢𑀸 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸. 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀬𑀣𑀸𑀯𑀼𑀢𑁆𑀢𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑁂𑀦 𑀧𑀸𑀴𑀺𑀬𑀁 ‘‘𑀭𑀽𑀧𑀲𑀜𑁆𑀜𑀸𑀦’’𑀦𑁆𑀢𑀺 𑀲𑀭𑀽𑀧𑁂𑀓𑀲𑁂𑀲𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀭𑀸𑀕𑀸𑀢𑀺 𑀚𑀺𑀕𑀼𑀘𑁆𑀙𑀦𑀢𑁄. 𑀦𑀺𑀭𑁄𑀥𑀸𑀢𑀺 𑀢𑀧𑁆𑀧𑀝𑀺𑀩𑀦𑁆𑀥𑀙𑀦𑁆𑀤𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑁂𑀦 𑀦𑀺𑀭𑁄𑀥𑀦𑀢𑁄. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀭𑀸𑀕𑀸 𑀅𑀦𑀯𑀲𑁂𑀲𑀸𑀦𑀁 𑀦𑀺𑀭𑁄𑀥𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

‘‘𑀆𑀭𑀫𑁆𑀫𑀡𑁂 𑀅𑀯𑀺𑀭𑀢𑁆𑀢𑀲𑁆𑀲 𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑁄 𑀦 𑀳𑁄𑀢𑀻’’𑀢𑀺 𑀇𑀤𑀁 𑀬𑀲𑁆𑀫𑀸 𑀇𑀫𑀸𑀦𑀺 𑀛𑀸𑀦𑀸𑀦𑀺 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀸𑀦𑀺, 𑀦 𑀅𑀗𑁆𑀕𑀸𑀢𑀺𑀓𑁆𑀓𑀫𑁂𑀦𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑁄 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑁂𑀦 𑀯𑀺𑀦𑀸 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀫𑀢𑀺𑀓𑁆𑀓𑀦𑁆𑀢𑀸𑀲𑀼 𑀘 𑀲𑀜𑁆𑀜𑀸𑀲𑀼 𑀆𑀭𑀫𑁆𑀫𑀡𑀁 𑀲𑀫𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀻’’𑀢𑀺 𑀆𑀳. 𑀅𑀯𑀢𑁆𑀯𑀸 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀸𑀧𑀦𑁆𑀦𑀲𑁆𑀲𑀸𑀢𑀺𑀆𑀤𑀻𑀲𑀼 𑀓𑀼𑀲𑀮𑀲𑀜𑁆𑀜𑀸𑀯𑀲𑁂𑀦 𑀲𑀫𑀸𑀧𑀦𑁆𑀦𑀕𑁆𑀕𑀳𑀡𑀁, 𑀯𑀺𑀧𑀸𑀓𑀲𑀜𑁆𑀜𑀸𑀯𑀲𑁂𑀦 𑀉𑀧𑀧𑀦𑁆𑀦𑀕𑁆𑀕𑀳𑀡𑀁, 𑀓𑀺𑀭𑀺𑀬𑀸𑀲𑀜𑁆𑀜𑀸𑀯𑀲𑁂𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀕𑁆𑀕𑀳𑀡𑀁. 𑀅𑀭𑀳𑀢𑁄 𑀳𑀺 𑀛𑀸𑀦𑀸𑀦𑀺 𑀯𑀺𑀲𑁂𑀲𑀢𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄. 𑀬𑀤𑀺 𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑀲𑁆𑀲 𑀅𑀦𑀼𑀦𑀺𑀧𑁆𑀨𑀸𑀤𑀺𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑁄 𑀯𑀺𑀪𑀗𑁆𑀕𑁂 𑀘 𑀅𑀯𑀼𑀢𑁆𑀢𑁄, 𑀅𑀣 𑀓𑀲𑁆𑀫𑀸 𑀇𑀥 𑀕𑀳𑀺𑀢𑁄𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀯𑀲𑁂𑀦𑀸𑀧𑀺 𑀅𑀬𑀫𑀢𑁆𑀣𑀯𑀡𑁆𑀡𑀦𑀸 𑀓𑀢𑀸, ‘‘𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 𑀯𑀺𑀬 𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑀫𑁂𑀯 𑀅𑀯𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁭𑁮. 𑀧𑀝𑀺𑀖𑀸𑀢𑁂𑀦𑀸𑀢𑀺 𑀧𑀝𑀺𑀳𑀦𑀦𑁂𑀦 𑀯𑀺𑀲𑀬𑀻𑀯𑀺𑀲𑀬𑀲𑀫𑁄𑀥𑀸𑀦𑁂𑀦. 𑀅𑀢𑁆𑀣𑀗𑁆𑀕𑀫𑀸𑀢𑀺𑀆𑀤𑀻𑀲𑀼 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀅𑀢𑁆𑀣𑀯𑀘𑀦𑀁, 𑀢𑀲𑁆𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑁄 𑀛𑀸𑀦𑀲𑀫𑀗𑁆𑀕𑀺𑀓𑀸𑀮𑁂 𑀅𑀦𑀼𑀧𑁆𑀧𑀢𑁆𑀢𑀻𑀢𑀺 𑀢𑀲𑁆𑀲 𑀇𑀥𑁂𑀯 𑀕𑀳𑀡𑁂 𑀓𑀸𑀭𑀡𑀁 𑀅𑀦𑀼𑀬𑁄𑀕𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀜𑁆𑀘𑁂𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀧𑀝𑀺𑀧𑀚𑁆𑀚𑀦𑀓𑀸𑀦𑀁. 𑀏𑀢𑀸𑀲𑀁 𑀧𑀝𑀺𑀖𑀲𑀜𑁆𑀜𑀸𑀦𑀁. 𑀏𑀢𑁆𑀣 𑀧𑀞𑀫𑀸𑀭𑀼𑀧𑁆𑀧𑀓𑀣𑀸𑀬𑀁. 𑀯𑀘𑀦𑀁 𑀅𑀢𑁆𑀣𑀗𑁆𑀕𑀫𑀯𑀲𑁂𑀦.

𑀓𑀺𑀁 𑀯𑀸 𑀧𑀲𑀁𑀲𑀸𑀓𑀺𑀢𑁆𑀢𑀦𑁂𑀦, 𑀧𑀝𑀺𑀖𑀲𑀜𑁆𑀜𑀸𑀦𑀁 𑀧𑀦 𑀅𑀢𑁆𑀣𑀗𑁆𑀕𑀫𑁄 𑀇𑀥𑁂𑀯 𑀯𑀢𑁆𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀪𑀸𑀯𑁄 𑀦𑀸𑀫 𑀧𑀝𑀺𑀧𑀓𑁆𑀔𑁂𑀦 𑀧𑀳𑀻𑀦𑀢𑀸𑀬 𑀯𑀸 𑀧𑀘𑁆𑀘𑀬𑀸𑀪𑀸𑀯𑁂𑀦 𑀯𑀸. 𑀢𑁂𑀲𑀼 𑀭𑀽𑀧𑀚𑁆𑀛𑀸𑀦𑀲𑀫𑀗𑁆𑀕𑀺𑀦𑁄 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀪𑀸𑀯𑁄 𑀧𑀘𑁆𑀘𑀬𑀸𑀪𑀸𑀯𑀫𑀢𑁆𑀢𑁂𑀦, 𑀦 𑀧𑀝𑀺𑀧𑀓𑁆𑀔𑀸𑀥𑀺𑀕𑀫𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀢𑀸𑀢𑀺 𑀧𑀝𑀺𑀖𑀲𑀜𑁆𑀜𑀸. 𑀭𑀽𑀧𑀸𑀯𑀘𑀭𑀦𑁆𑀢𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁. 𑀲𑀫𑀸𑀧𑀦𑁆𑀦𑀲𑁆𑀲𑀸𑀢𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀓𑀺𑀜𑁆𑀘𑀸𑀧𑀺 𑀦 𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀦 𑀧𑀳𑀻𑀦𑀢𑁆𑀢𑀸 𑀦 𑀲𑀦𑁆𑀢𑀻𑀢𑀺 𑀦 𑀢𑀤𑀸 𑀧𑀝𑀺𑀖𑀲𑀜𑁆𑀜𑀸 𑀧𑀳𑀻𑀦𑀪𑀸𑀯𑁂𑀦 𑀦 𑀲𑀦𑁆𑀢𑀺 𑀦𑀸𑀫. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀦 𑀳𑀺 𑀭𑀽𑀧𑀯𑀺𑀭𑀸𑀕𑀸𑀬 𑀭𑀽𑀧𑀸𑀯𑀘𑀭𑀪𑀸𑀯𑀦𑀸 𑀲𑀁𑀯𑀢𑁆𑀢𑀢𑀻’’𑀢𑀺. 𑀦𑀦𑀼 𑀘 𑀧𑀝𑀺𑀖𑀲𑀜𑁆𑀜𑀸𑀧𑀺 𑀅𑀭𑀽𑀧𑀥𑀫𑁆𑀫𑀸 𑀏𑀯𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀭𑀽𑀧𑀸𑀬𑀢𑁆𑀢𑀸 𑀘 𑀏𑀢𑀸𑀲𑀁 𑀧𑀯𑀢𑁆𑀢𑀻’’𑀢𑀺. 𑀅𑀬𑀁 𑀧𑀦 𑀪𑀸𑀯𑀦𑀸𑀢𑀺 𑀅𑀭𑀽𑀧𑀪𑀸𑀯𑀦𑀫𑀸𑀳. 𑀥𑀸𑀭𑁂𑀢𑀼𑀦𑁆𑀢𑀺 𑀅𑀯𑀥𑀸𑀭𑁂𑀢𑀼𑀁. 𑀇𑀥𑀸𑀢𑀺 𑀅𑀭𑀽𑀧𑀚𑁆𑀛𑀸𑀦𑁂. 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀯𑀘𑀦𑀸𑀤𑀻𑀳𑀺 𑀆𑀦𑁂𑀜𑁆𑀚𑀢𑀸. ‘‘𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁮.𑁭𑁨; 𑁧𑁦.𑁯) 𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑀸 𑀘 𑀯𑀼𑀢𑁆𑀢𑀸.

𑁨𑁭𑁯. 𑀤𑁄𑀲𑀤𑀲𑁆𑀲𑀦𑀧𑀼𑀩𑁆𑀩𑀓𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀯𑀲𑁂𑀦 𑀧𑀝𑀺𑀖𑀲𑀜𑁆𑀜𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀫𑀳𑀢𑀸𑀧𑀺 𑀲𑀤𑁆𑀤𑁂𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀦 𑀯𑀼𑀝𑁆𑀞𑀸𑀢𑀺. 𑀢𑀣𑀸 𑀧𑀦 𑀦 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀲𑀺𑀬𑀸, 𑀧𑀞𑀫𑀚𑁆𑀛𑀸𑀦𑀁 𑀧𑀦 𑀅𑀧𑁆𑀧𑀓𑀫𑁆𑀧𑀺 𑀲𑀤𑁆𑀤𑀁 𑀦 𑀲𑀳𑀢𑀻𑀢𑀺 𑀢𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄𑀢𑀺 𑀯𑀼𑀢𑁆𑀢𑀁. 𑀆𑀭𑀼𑀧𑁆𑀧𑀪𑀸𑀯𑀦𑀸𑀬 𑀅𑀪𑀸𑀯𑁂 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀉𑀧𑁆𑀧𑀢𑁆𑀢𑀺𑀭𑀳𑀸𑀦𑀁 𑀭𑀽𑀧𑀲𑀜𑁆𑀜𑀸𑀧𑀝𑀺𑀖𑀲𑀜𑁆𑀜𑀸𑀦𑀁 𑀬𑀸𑀯 𑀅𑀢𑁆𑀢𑀦𑁄 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺, 𑀢𑀸𑀯 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀲𑀫𑀢𑀺𑀓𑁆𑀓𑀫𑁄, 𑀅𑀢𑁆𑀣𑀗𑁆𑀕𑀫𑁄 𑀘 𑀯𑀼𑀢𑁆𑀢𑁄. 𑀦𑀸𑀦𑀢𑁆𑀢𑀲𑀜𑁆𑀜𑀸𑀲𑀼 𑀧𑀦 𑀬𑀸 𑀢𑀲𑁆𑀫𑀺𑀁 𑀪𑀯𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀏𑀓𑀦𑁆𑀢𑀭𑀽𑀧𑀦𑀺𑀲𑁆𑀲𑀺𑀢𑀸, 𑀢𑀸 𑀅𑀦𑁄𑀓𑀸𑀲𑀢𑀸𑀬 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀆𑀭𑀼𑀧𑁆𑀧𑀪𑀸𑀯𑀦𑀸𑀬 𑀦𑀺𑀯𑀸𑀭𑀺𑀢𑀢𑁆𑀢𑀸, 𑀅𑀦𑀺𑀯𑀸𑀭𑀺𑀢𑀢𑁆𑀢𑀸 𑀘 𑀓𑀸𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀲𑀁 𑀅𑀫𑀦𑀲𑀺𑀓𑀸𑀭𑁄 𑀅𑀦𑀸𑀯𑀚𑁆𑀚𑀦𑀁 𑀅𑀧𑀘𑁆𑀘𑀯𑁂𑀓𑁆𑀔𑀡𑀁, 𑀚𑀯𑀦𑀧𑀝𑀺𑀧𑀸𑀤𑀓𑁂𑀦 𑀯𑀸 𑀪𑀯𑀗𑁆𑀕𑀫𑀦𑀲𑁆𑀲 𑀅𑀦𑁆𑀢𑁄 𑀅𑀓𑀭𑀡𑀁 𑀅𑀧𑁆𑀧𑀯𑁂𑀲𑀦𑀁 𑀯𑀼𑀢𑁆𑀢𑀁.

𑀢𑁂𑀦 𑀘 𑀦𑀸𑀦𑀢𑁆𑀢𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀳𑁂𑀢𑀽𑀦𑀁 𑀭𑀽𑀧𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀲𑀫𑀸𑀥𑀺𑀲𑁆𑀲 𑀣𑀺𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑁂𑀧𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀺𑀘 𑀇𑀫𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑁄 𑀓𑀣𑀺𑀢𑁄 𑀲𑁄𑀢𑀽𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁, 𑀧𑀮𑁄𑀪𑀦𑀢𑁆𑀣𑀜𑁆𑀘. 𑀬𑁂 𑀳𑀺 𑀅𑀓𑀼𑀲𑀮𑀸 𑀏𑀯𑀁𑀕𑀸𑀳𑀺𑀦𑁄 ‘‘𑀲𑀩𑁆𑀩𑀲𑁆𑀲𑀸𑀤𑀭𑀳𑀺𑀢𑁂 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀲𑀜𑁆𑀜𑀸𑀬 𑀓𑁄 𑀆𑀦𑀺𑀲𑀁𑀲𑁄’’𑀢𑀺, 𑀢𑁂 𑀢𑀢𑁄 𑀫𑀺𑀘𑁆𑀙𑀸𑀕𑀸𑀳𑀢𑁄 𑀦𑀺𑀯𑀢𑁆𑀢𑁂𑀢𑀼𑀁 𑀢𑀻𑀳𑀺 𑀧𑀤𑁂𑀳𑀺 𑀛𑀸𑀦𑀲𑁆𑀲 𑀆𑀦𑀺𑀲𑀁𑀲𑁄 𑀓𑀣𑀺𑀢𑁄. 𑀢𑀁 𑀳𑀺 𑀲𑀼𑀢𑁆𑀯𑀸 𑀢𑁂𑀲𑀁 𑀏𑀯𑀁 𑀪𑀯𑀺𑀲𑁆𑀲𑀢𑀺 ‘‘𑀏𑀯𑀁 𑀲𑀦𑁆𑀢𑀸 𑀓𑀺𑀭𑀸𑀬𑀁 𑀲𑀫𑀸𑀧𑀢𑁆𑀢𑀺 𑀏𑀯𑀁 𑀧𑀡𑀻𑀢𑀸, 𑀳𑀦𑁆𑀤𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀁 𑀉𑀲𑁆𑀲𑀸𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑁨𑁮𑁦. 𑀅𑀲𑁆𑀲𑀸𑀢𑀺 𑀆𑀓𑀸𑀲𑀲𑁆𑀲. 𑀉𑀧𑁆𑀧𑀸𑀤𑁄 𑀏𑀯 𑀅𑀦𑁆𑀢𑁄 𑀉𑀧𑁆𑀧𑀸𑀤𑀦𑁆𑀢𑁄, 𑀢𑀣𑀸 𑀯𑀬𑀦𑁆𑀢𑁄. 𑀲𑀪𑀸𑀯𑀥𑀫𑁆𑀫𑁄 𑀳𑀺 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀢𑁄, 𑀳𑀼𑀢𑁆𑀯𑀸 𑀘 𑀯𑀺𑀦𑀲𑁆𑀲𑀦𑀢𑁄 𑀉𑀤𑀬𑀯𑀬𑀧𑀭𑀺𑀘𑁆𑀙𑀺𑀦𑁆𑀦𑁄. 𑀆𑀓𑀸𑀲𑁄 𑀧𑀦 𑀅𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀢𑀤𑀼𑀪𑀬𑀸𑀪𑀸𑀯𑀢𑁄 𑀅𑀦𑀦𑁆𑀢𑁄 𑀯𑀼𑀢𑁆𑀢𑁄. 𑀅𑀚𑀝𑀸𑀓𑀸𑀲𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀸𑀦𑀁 𑀇𑀥 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀆𑀓𑀸𑀲𑁄𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀆𑀳. 𑀓𑀲𑀺𑀡𑀁 𑀉𑀕𑁆𑀖𑀸𑀝𑀻𑀬𑀢𑀺 𑀏𑀢𑁂𑀦𑀸𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑁄, 𑀢𑀤𑁂𑀯 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀁. 𑀫𑀦𑀲𑀺𑀓𑀸𑀭𑀯𑀲𑁂𑀦𑀸𑀧𑀻𑀢𑀺 𑀭𑀽𑀧𑀯𑀺𑀯𑁂𑀓𑀫𑀢𑁆𑀢𑀕𑁆𑀕𑀳𑀡𑁂𑀦 𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀕𑁆𑀕𑀳𑀡𑀢𑁄 𑀅𑀦𑀦𑁆𑀢𑀨𑀭𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑀯𑀲𑁂𑀦𑀸𑀧𑀺. 𑀅𑀦𑀦𑁆𑀢𑀁 𑀨𑀭𑀢𑀻𑀢𑀺 𑀅𑀕𑁆𑀕𑀳𑀺𑀢𑀧𑀭𑀺𑀘𑁆𑀙𑁂𑀤𑀢𑀸𑀬 𑀅𑀦𑀦𑁆𑀢𑀁 𑀓𑀢𑁆𑀯𑀸 𑀧𑀭𑀺𑀓𑀫𑁆𑀫𑀲𑀫𑁆𑀨𑀲𑁆𑀲𑀧𑀼𑀩𑁆𑀩𑀓𑁂𑀦 𑀛𑀸𑀦𑀲𑀫𑁆𑀨𑀲𑁆𑀲𑁂𑀦 𑀨𑀼𑀲𑀢𑀺. 𑀬𑀣𑀸 𑀪𑀺𑀲𑀕𑁆𑀕𑀫𑁂𑀯 𑀪𑁂𑀲𑀚𑁆𑀚𑀁, 𑀏𑀯𑀁 𑀆𑀓𑀸𑀲𑀸𑀦𑀦𑁆𑀢𑀫𑁂𑀯 𑀆𑀓𑀸𑀲𑀸𑀦𑀜𑁆𑀘𑀁 𑀲𑀁𑀬𑁄𑀕𑀧𑀭𑀲𑁆𑀲 𑀢-𑀓𑀸𑀭𑀲𑁆𑀲 𑀘-𑀓𑀸𑀭𑀁 𑀓𑀢𑁆𑀯𑀸. 𑀛𑀸𑀦𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀆𑀭𑀫𑁆𑀫𑀡𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 ‘‘𑀆𑀬𑀢𑀦𑀫𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀅𑀥𑀺𑀝𑁆𑀞𑀸𑀦𑀝𑁆𑀞𑁂 𑀆𑀬𑀢𑀦-𑀲𑀤𑁆𑀤𑀲𑁆𑀲 𑀤𑀲𑁆𑀲𑀦𑀢𑁄. 𑀓𑀸𑀭𑀡𑀸𑀓𑀭𑀲𑀜𑁆𑀚𑀸𑀢𑀺𑀤𑁂𑀲𑀦𑀺𑀯𑀸𑀲𑀢𑁆𑀣𑁂𑀧𑀺 𑀆𑀬𑀢𑀦-𑀲𑀤𑁆𑀤𑁄 𑀇𑀥 𑀬𑀼𑀚𑁆𑀚𑀢𑁂𑀯.

𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁨𑁮𑁧. 𑀘𑀺𑀡𑁆𑀡𑁄 𑀘𑀭𑀺𑀢𑁄 𑀧𑀕𑀼𑀡𑀺𑀓𑀢𑁄 𑀆𑀯𑀚𑁆𑀚𑀦𑀸𑀤𑀺𑀮𑀓𑁆𑀔𑀡𑁄 𑀯𑀲𑀻𑀪𑀸𑀯𑁄 𑀏𑀢𑁂𑀦𑀸𑀢𑀺 𑀘𑀺𑀡𑁆𑀡𑀯𑀲𑀻𑀪𑀸𑀯𑁄, 𑀢𑁂𑀦 𑀘𑀺𑀡𑁆𑀡𑀯𑀲𑀻𑀪𑀸𑀯𑁂𑀦. 𑀭𑀽𑀧𑀸𑀯𑀘𑀭𑀲𑀜𑁆𑀜𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑀥𑀺𑀕𑀦𑁆𑀢𑀩𑁆𑀩𑀢𑁄, 𑀢𑀁𑀲𑀳𑀕𑀢𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀲𑀫𑀼𑀤𑀸𑀘𑀸𑀭𑀲𑁆𑀲 𑀳𑀸𑀦𑀪𑀸𑀕𑀺𑀬𑀪𑀸𑀯𑀸𑀯𑀳𑀢𑁄, 𑀢𑀁𑀲𑀫𑀢𑀺𑀓𑁆𑀓𑀫𑁂𑀦𑁂𑀯 𑀢𑀤𑀜𑁆𑀜𑁂𑀲𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀸𑀦𑀁 𑀲𑀫𑀢𑀺𑀓𑁆𑀓𑀫𑀲𑀺𑀤𑁆𑀥𑀺𑀢𑁄 𑀘 𑀯𑀼𑀢𑁆𑀢𑀁 ‘‘𑀆𑀲𑀦𑁆𑀦𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺. 𑀯𑀻𑀣𑀺𑀧𑀝𑀺𑀧𑀦𑁆𑀦𑀸𑀬 𑀪𑀸𑀯𑀦𑀸𑀬 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀸𑀯𑀳𑀪𑀸𑀯𑀢𑁄, 𑀧𑀡𑀻𑀢𑀪𑀸𑀯𑀲𑀺𑀤𑁆𑀥𑀺𑀢𑁄 𑀘 𑀧𑀞𑀫𑀸𑀭𑀼𑀧𑁆𑀧𑀢𑁄 𑀤𑀼𑀢𑀺𑀬𑀸𑀭𑀼𑀧𑁆𑀧𑀁 𑀲𑀦𑁆𑀢𑀢𑀭𑀲𑀪𑀸𑀯𑀦𑁆𑀢𑀺 𑀆𑀳 ‘‘𑀦𑁄 𑀘 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀫𑀺𑀯 𑀲𑀦𑁆𑀢𑀸’’𑀢𑀺 𑀯𑀓𑁆𑀔𑀢𑀺 𑀳𑀺 ‘‘𑀲𑀼𑀧𑁆𑀧𑀡𑀻𑀢𑀢𑀭𑀸 𑀳𑁄𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀇𑀥𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁨𑁯𑁦). 𑀅𑀦𑀦𑁆𑀢𑀁 𑀅𑀦𑀦𑁆𑀢𑀦𑁆𑀢𑀺 𑀓𑁂𑀯𑀮𑀁 ‘‘𑀅𑀦𑀦𑁆𑀢𑀁 𑀅𑀦𑀦𑁆𑀢’’𑀦𑁆𑀢𑀺 𑀦 𑀫𑀦𑀲𑀺 𑀓𑀸𑀢𑀩𑁆𑀩𑀁 𑀦 𑀪𑀸𑀯𑁂𑀢𑀩𑁆𑀩𑀁, ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀁, 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀧𑀦 𑀫𑀦𑀲𑀺 𑀓𑀸𑀢𑀩𑁆𑀩𑀁, ‘‘𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀸.

𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂𑀢𑀺 𑀢𑀲𑁆𑀫𑀺𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑁂 𑀯𑀺𑀜𑁆𑀜𑀸𑀡𑀦𑀺𑀫𑀺𑀢𑁆𑀢𑁂. 𑀘𑀺𑀢𑁆𑀢𑀁 𑀘𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲. 𑀆𑀓𑀸𑀲𑀨𑀼𑀝𑁂 𑀯𑀺𑀜𑁆𑀜𑀸𑀡𑁂𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑁂 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂 𑀆𑀭𑀫𑁆𑀫𑀡𑀪𑀽𑀢𑁂. 𑀅𑀧𑁆𑀧𑁂𑀢𑀻𑀢𑀺 𑀅𑀧𑁆𑀧𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀲𑀪𑀸𑀯𑀥𑀫𑁆𑀫𑁂𑀧𑀺 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀪𑀸𑀯𑀦𑀸𑀪𑀸𑀯𑀢𑁄 𑀇𑀤𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀳𑁄𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀁 𑀯𑀺𑀬. 𑀅𑀧𑁆𑀧𑀦𑀸𑀦𑀬𑁄 𑀧𑀦𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀏𑀢𑁆𑀣 𑀤𑀼𑀢𑀺𑀬𑀸𑀭𑀼𑀧𑁆𑀧𑀚𑁆𑀛𑀸𑀦𑁂 𑀧𑀼𑀭𑀺𑀫𑀪𑀸𑀕𑁂 𑀢𑀻𑀡𑀺, 𑀘𑀢𑁆𑀢𑀸𑀭𑀺 𑀯𑀸 𑀚𑀯𑀦𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. ‘‘𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸 𑀅𑀭𑀽𑀧𑀸𑀯𑀘𑀭’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁨𑁭𑁬) 𑀧𑀞𑀫𑀸𑀭𑀼𑀧𑁆𑀧𑀚𑁆𑀛𑀸𑀦𑁂 𑀯𑀼𑀢𑁆𑀢𑁂𑀦 𑀦𑀬𑁂𑀦, 𑀅𑀣 𑀯𑀸 𑀅𑀧𑁆𑀧𑀦𑀸𑀦𑀬𑁄𑀢𑀺 𑀲𑀪𑀸𑀯𑀥𑀫𑁆𑀫𑁂𑀧𑀺 𑀆𑀭𑀫𑁆𑀫𑀡𑁂 𑀛𑀸𑀦𑀲𑁆𑀲 𑀅𑀧𑁆𑀧𑀦𑀸𑀦𑀬𑁄 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀪𑀸𑀯𑀦𑀸𑀯𑀲𑁂𑀦 𑀆𑀭𑀼𑀧𑁆𑀧𑀁 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺, ‘‘𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀲𑁆𑀲𑁂𑀯 𑀳𑀺 𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀦𑀫𑀢𑁆𑀢𑀁 𑀢𑀢𑁆𑀣 𑀳𑁄𑀢𑀻’’𑀢𑀺 𑀫𑀭𑀡𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁭𑁭) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁨𑁮𑁨. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀞𑀫𑀸𑀭𑀼𑀧𑁆𑀧𑁂 ‘‘𑀆𑀲𑀦𑁆𑀦𑀭𑀽𑀧𑀚𑁆𑀛𑀸𑀦𑀧𑀘𑁆𑀘𑀢𑁆𑀣𑀺𑀓𑀢𑀸, 𑀅𑀲𑀦𑁆𑀢𑀲𑀪𑀸𑀯𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀲𑀩𑁆𑀩𑁂𑀦 𑀤𑁄𑀲𑀤𑀲𑁆𑀲𑀦𑀸𑀓𑀸𑀭𑁂𑀦, 𑀢𑀢𑁆𑀣 𑀯𑀸 𑀦𑀺𑀓𑀦𑁆𑀢𑀺𑀧𑀳𑀸𑀦𑀅𑀦𑀸𑀯𑀚𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀆𑀓𑀸𑀭𑁂𑀦, 𑀲𑀩𑁆𑀩𑀁 𑀯𑀸 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀪𑁂𑀤𑀢𑁄 𑀅𑀦𑀯𑀲𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀆𑀳 ‘‘𑀲𑀩𑁆𑀩𑀲𑁄𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺. 𑀛𑀸𑀦𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀢𑀸 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀯𑀲𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀛𑀸𑀦𑀫𑁆𑀧𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦’’𑀦𑁆𑀢𑀺. 𑀆𑀭𑀫𑁆𑀫𑀡𑀲𑁆𑀲 𑀧𑀦 𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀲𑀯𑀲𑁂𑀦𑀸𑀢𑀺 𑀲𑀦𑁆𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀫𑀡𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀧𑀼𑀭𑀺𑀫𑀦𑀬𑁂𑀦𑁂𑀯𑀸’’𑀢𑀺 𑀇𑀤𑀁 ‘‘𑀦𑀸𑀲𑁆𑀲 𑀅𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀤𑀲𑀺𑀤𑁆𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦, 𑀏𑀯𑀁 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦𑀧𑀺 𑀆𑀬𑀢𑀦-𑀲𑀤𑁆𑀤𑁂𑀦 𑀇𑀥 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀜𑁆𑀚𑀸𑀬𑀢𑀺 𑀏𑀢𑁆𑀣𑀸𑀢𑀺 𑀲𑀜𑁆𑀚𑀸𑀢𑀺, 𑀲𑀜𑁆𑀚𑀸𑀢𑀺 𑀏𑀯 𑀤𑁂𑀲𑁄 𑀲𑀜𑁆𑀚𑀸𑀢𑀺𑀤𑁂𑀲𑁄. 𑀛𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦. 𑀆𑀭𑀫𑁆𑀫𑀡𑀁 𑀅𑀫𑀦𑀲𑀺𑀓𑀭𑀡𑁂𑀦. 𑀉𑀪𑀬𑀫𑁆𑀧𑀺 𑀯𑀸 𑀉𑀪𑀬𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀛𑀸𑀦𑀲𑁆𑀲𑀧𑀺 𑀳𑀺 𑀅𑀦𑀸𑀯𑀚𑁆𑀚𑀦𑀁, 𑀚𑀯𑀦𑀧𑀝𑀺𑀧𑀸𑀤𑀓𑁂𑀦 𑀯𑀸 𑀪𑀯𑀗𑁆𑀕𑀫𑀦𑀲𑁆𑀲 𑀅𑀦𑁆𑀢𑁄 𑀅𑀓𑀭𑀡𑀁 𑀅𑀫𑀦𑀲𑀺𑀓𑀭𑀡𑀁, 𑀆𑀭𑀫𑁆𑀫𑀡𑀲𑁆𑀲 𑀘 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀦𑁆𑀢𑀺 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸.

𑀧𑀼𑀩𑁆𑀩𑁂 𑀅𑀦𑀦𑁆𑀢𑀲𑁆𑀲 𑀆𑀓𑀸𑀲𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀦𑁄 𑀨𑀭𑀡𑀸𑀓𑀸𑀭𑁂𑀦𑁂𑀯 ‘‘𑀅𑀦𑀦𑁆𑀢’’𑀦𑁆𑀢𑀺 𑀫𑀦𑀲𑀺 𑀓𑀸𑀢𑀩𑁆𑀩𑀢𑁆𑀢𑀸 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀧𑀼𑀦 ‘‘𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀅𑀦𑀦𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀲𑁄 𑀫𑀦𑀲𑀺𑀓𑀭𑀡𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀦𑀯𑀲𑁂𑀲𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄 ‘𑀅𑀦𑀦𑁆𑀢’𑀦𑁆𑀢𑀺 𑀫𑀦𑀲𑀺 𑀓𑀭𑁄𑀢𑀻’’𑀢𑀺. 𑀛𑀸𑀦𑀯𑀺𑀪𑀗𑁆𑀕𑁂𑀧𑀺 𑀅𑀬𑀫𑁂𑀯𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀧𑀦 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀸 𑀧𑀸𑀴𑀺𑀬𑀸 𑀏𑀯𑀁 𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀢𑀁𑀬𑁂𑀯 𑀆𑀓𑀸𑀲𑀁 𑀨𑀼𑀝𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑁂𑀦 𑀫𑀦𑀲𑀺 𑀓𑀭𑁄𑀢𑀻𑀢𑀺. 𑀅𑀬𑀁 𑀧𑀦𑀢𑁆𑀣𑁄 𑀬𑀼𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺, 𑀢𑀁𑀬𑁂𑀯 𑀆𑀓𑀸𑀲𑀁 𑀯𑀺𑀜𑁆𑀜𑀸𑀡𑁂𑀦 𑀨𑀼𑀝𑀁 𑀢𑁂𑀦 𑀕𑀳𑀺𑀢𑀸𑀓𑀸𑀭𑀁 𑀫𑀦𑀲𑀺 𑀓𑀭𑁄𑀢𑀺. 𑀏𑀯𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀅𑀦𑀦𑁆𑀢𑀁 𑀨𑀭𑀢𑀻𑀢𑀺. 𑀬𑀁 𑀳𑀺 𑀆𑀓𑀸𑀲𑀁 𑀧𑀞𑀫𑀸𑀭𑀼𑀧𑁆𑀧𑀲𑀫𑀗𑁆𑀕𑀻 𑀯𑀺𑀜𑁆𑀜𑀸𑀡𑁂𑀦 𑀅𑀦𑀦𑁆𑀢𑀁 𑀨𑀭𑀢𑀺, 𑀢𑀁 𑀨𑀭𑀡𑀸𑀓𑀸𑀭𑀲𑀳𑀺𑀢𑀫𑁂𑀯 𑀯𑀺𑀜𑁆𑀜𑀸𑀡𑀁 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀤𑀼𑀢𑀺𑀬𑀸𑀭𑀼𑀧𑁆𑀧𑀲𑀫𑀗𑁆𑀕𑀻 𑀅𑀦𑀦𑁆𑀢𑀁 𑀨𑀭𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀫𑀦𑀲𑀺𑀓𑀸𑀭𑀯𑀲𑁂𑀦 𑀅𑀦𑀦𑁆𑀢𑀨𑀭𑀡𑀸𑀓𑀸𑀭𑁂𑀦 𑀇𑀥 𑀅𑀦𑀦𑁆𑀢𑀢𑀸, 𑀦 𑀆𑀓𑀸𑀲𑀲𑁆𑀲 𑀯𑀺𑀬 𑀉𑀧𑁆𑀧𑀸𑀤𑀦𑁆𑀢𑀸𑀤𑀺𑀅𑀪𑀸𑀯𑁂𑀦𑀸𑀢𑀺 ‘‘𑀦𑀸𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯𑀸𑀳. ‘‘𑀭𑀼𑀴𑁆𑀳𑀻𑀲𑀤𑁆𑀤𑁄’’𑀢𑀺 𑀇𑀫𑀺𑀦𑀸 ‘‘𑀯𑀺𑀜𑁆𑀜𑀸𑀡𑀸𑀦𑀜𑁆𑀘’’𑀦𑁆𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑁂 𑀯𑀺𑀜𑁆𑀜𑀸𑀡𑀜𑁆𑀘-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄𑀢𑀺 𑀤𑀲𑁆𑀲𑁂𑀢𑀺, 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀯𑀺𑀜𑁆𑀜𑀸𑀡𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀚𑁆𑀛𑀸𑀦𑁂𑀦 𑀅𑀜𑁆𑀘𑀻𑀬𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀆𑀮𑀫𑁆𑀩𑀻𑀬𑀢𑀻𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀦𑁆𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺 𑀆𑀳 ‘‘𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸’’𑀢𑀺.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁨𑁮𑁩. 𑀢𑀢𑀺𑀬𑀸𑀭𑀼𑀧𑁆𑀧𑀓𑀫𑁆𑀫𑀝𑁆𑀞𑀸𑀦𑁂 𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀁, 𑀢𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀅𑀧𑀼𑀩𑁆𑀩𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀢𑀢𑁆𑀣 𑀢𑀲𑁆𑀲𑁂𑀯𑀸𑀢𑀺 𑀬𑀁 𑀆𑀭𑀩𑁆𑀪 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀧𑀯𑀢𑁆𑀢𑀁, 𑀢𑀲𑁆𑀲𑁂𑀯. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀲𑁆𑀲𑀸’’𑀢𑀺. 𑀏𑀢𑁂𑀦 𑀢𑀢𑁄 𑀅𑀜𑁆𑀜𑀁 𑀢𑀢𑀺𑀬𑀸𑀭𑀼𑀧𑁆𑀧𑀚𑁆𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀆𑀭𑀫𑁆𑀫𑀡𑀪𑀽𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀅𑀦𑀸𑀭𑀫𑁆𑀫𑀡𑀪𑀽𑀢𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀪𑀸𑀯𑁄𑀢𑀺 𑀦𑀢𑁆𑀣𑀺𑀢𑀸. 𑀲𑀼𑀜𑁆𑀜𑀢𑀸𑀢𑀺 𑀭𑀺𑀢𑁆𑀢𑀢𑀸. 𑀯𑀺𑀯𑀺𑀢𑁆𑀢𑀸𑀓𑀸𑀭𑁄𑀢𑀺 𑀯𑀺𑀯𑁂𑀓𑁄. 𑀢𑀻𑀳𑀺 𑀧𑀤𑁂𑀳𑀺 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲 𑀅𑀧𑀕𑀫𑀫𑁂𑀯 𑀯𑀤𑀢𑀺. ‘‘𑀫𑀦𑀲𑀺 𑀓𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀫𑀦𑀲𑀺𑀓𑀸𑀭𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀫𑀦𑀲𑀺𑀓𑀭𑀺𑀢𑁆𑀯𑀸𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀦𑀲𑀺 𑀅𑀓𑀢𑁆𑀯𑀸 𑀅𑀘𑀺𑀦𑁆𑀢𑁂𑀢𑁆𑀯𑀸. 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀢𑀻𑀲𑀼 𑀧𑀓𑀸𑀭𑁂𑀲𑀼 𑀏𑀓𑁂𑀦𑀧𑀺 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂𑀢𑀺 𑀢𑀲𑁆𑀫𑀺𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑀲𑀗𑁆𑀔𑀸𑀢𑁂 𑀛𑀸𑀦𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑁂. 𑀆𑀓𑀸𑀲𑁂 𑀨𑀼𑀝𑁂𑀢𑀺 𑀆𑀓𑀸𑀲𑀁 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑁂. ‘‘𑀆𑀓𑀸𑀲𑀨𑀼𑀝𑁂’’𑀢𑀺 𑀯𑀸 𑀧𑀸𑀞𑁄. 𑀲𑀼𑀜𑁆𑀜𑀯𑀺𑀯𑀺𑀢𑁆𑀢𑀦𑀢𑁆𑀣𑀺𑀪𑀸𑀯𑁂𑀢𑀺 𑀲𑀼𑀜𑁆𑀜𑀪𑀸𑀯𑁂, 𑀯𑀺𑀯𑀺𑀢𑁆𑀢𑀪𑀸𑀯𑁂, 𑀦𑀢𑁆𑀣𑀺𑀪𑀸𑀯𑁂 𑀘𑀸𑀢𑀺 𑀬𑁂𑀦 𑀆𑀓𑀸𑀭𑁂𑀦 𑀪𑀸𑀯𑀺𑀢𑀁, 𑀢𑀲𑁆𑀲 𑀕𑀳𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀣 𑀯𑀸 𑀲𑀼𑀜𑁆𑀜𑀯𑀺𑀯𑀺𑀢𑁆𑀢𑀦𑀢𑁆𑀣𑀺𑀪𑀸𑀯𑁂𑀢𑀺 𑀲𑀼𑀜𑁆𑀜𑀯𑀺𑀯𑀺𑀢𑁆𑀢𑀢𑀸𑀲𑀗𑁆𑀔𑀸𑀢𑁂 𑀦𑀢𑁆𑀣𑀺𑀪𑀸𑀯𑁂, 𑀢𑁂𑀦 𑀯𑀺𑀦𑀸𑀲𑀸𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀧𑀼𑀭𑁂 𑀅𑀪𑀸𑀯𑀸𑀤𑀺𑀓𑁂.

𑀢𑀲𑁆𑀫𑀺𑀁 𑀳𑀺 𑀅𑀧𑁆𑀧𑀦𑀸𑀘𑀺𑀢𑁆𑀢𑁂𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑁂 𑀅𑀧𑁆𑀧𑀦𑀸𑀯𑀲𑁂𑀦 𑀧𑀯𑀢𑁆𑀢𑁂 𑀘𑀺𑀢𑁆𑀢𑁂, 𑀢𑀲𑁆𑀫𑀺𑀁 𑀯𑀸 𑀧𑀞𑀫𑀸𑀭𑀼𑀧𑁆𑀧𑀲𑁆𑀲 𑀅𑀧𑀕𑀫𑀲𑀗𑁆𑀔𑀸𑀢𑁂 𑀦𑀢𑁆𑀣𑀺𑀪𑀸𑀯𑁂 𑀬𑀣𑀸𑀯𑀼𑀢𑁆𑀢𑁂 𑀅𑀧𑁆𑀧𑀦𑀸𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂. 𑀲𑁄 𑀪𑀺𑀓𑁆𑀔𑀼 𑀅𑀪𑀸𑀯𑀫𑁂𑀯 𑀧𑀲𑁆𑀲𑀦𑁆𑀢𑁄 𑀯𑀺𑀳𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀲𑁄 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀼𑀜𑁆𑀜𑀫𑁂𑀯 𑀧𑀲𑁆𑀲𑀢𑀺, 𑀦𑀢𑁆𑀣𑀺𑀪𑀸𑀯𑀫𑁂𑀯 𑀧𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀢𑀁 𑀞𑀸𑀦𑀦𑁆𑀢𑀺 𑀢𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁. ‘‘𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑁂𑀦 𑀅𑀦𑁆𑀢𑀭𑀳𑀺𑀢𑁂’’𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀓𑀭𑀡𑀸𑀪𑀸𑀯𑁂𑀦 𑀢𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀦 𑀦𑀝𑁆𑀞𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀺𑀲𑁆𑀯𑀸 𑀕𑀢𑁄, 𑀢𑀢𑁄 𑀲𑀩𑁆𑀩𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀧𑀕𑀢𑁂𑀲𑀼 𑀆𑀕𑀦𑁆𑀢𑁆𑀯𑀸 𑀢𑀁 𑀞𑀸𑀦𑀁 𑀪𑀺𑀓𑁆𑀔𑀽𑀳𑀺 𑀲𑀼𑀜𑁆𑀜𑀫𑁂𑀯 𑀧𑀲𑁆𑀲𑀢𑀺, 𑀦 𑀪𑀺𑀓𑁆𑀔𑀽𑀦𑀁 𑀢𑀢𑁄𑀧𑀺 𑀅𑀧𑀕𑀢𑀓𑀸𑀭𑀡𑀁, 𑀏𑀯𑀫𑀬𑀁 𑀬𑁄𑀕𑀸𑀯𑀘𑀭𑁄 𑀧𑀼𑀩𑁆𑀩𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀚𑁆𑀛𑀸𑀦𑀘𑀓𑁆𑀔𑀼𑀦𑀸 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀤𑀺𑀲𑁆𑀯𑀸 𑀧𑀘𑁆𑀙𑀸 𑀦𑀢𑁆𑀣𑀻𑀢𑀺 𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑁂𑀦 𑀢𑀲𑁆𑀫𑀺𑀁 𑀅𑀧𑀕𑀢𑁂 𑀢𑀢𑀺𑀬𑀸𑀭𑀼𑀧𑁆𑀧𑀚𑁆𑀛𑀸𑀦𑀘𑀓𑁆𑀔𑀼𑀦𑀸 𑀢𑀲𑁆𑀲 𑀦𑀢𑁆𑀣𑀺𑀪𑀸𑀯𑀫𑁂𑀯 𑀧𑀲𑁆𑀲𑀦𑁆𑀢𑁄 𑀯𑀺𑀳𑀭𑀢𑀺, 𑀦 𑀢𑀲𑁆𑀲 𑀅𑀧𑀕𑀫𑀦𑀓𑀸𑀭𑀡𑀁 𑀯𑀻𑀫𑀁𑀲𑀢𑀺 𑀛𑀸𑀦𑀲𑁆𑀲 𑀢𑀸𑀤𑀺𑀲𑀸𑀪𑁄𑀕𑀸𑀪𑀸𑀯𑀢𑁄𑀢𑀺. 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁨𑁮𑁪. 𑀦𑀢𑁆𑀣𑀺𑀢𑀸 𑀧𑀭𑀺𑀬𑀸𑀬𑀸𑀲𑀼𑀜𑁆𑀜𑀯𑀺𑀯𑀺𑀢𑁆𑀢𑀪𑀸𑀯𑀸𑀢𑀺 ‘‘𑀦𑀢𑁆𑀣𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦 𑀲𑀼𑀜𑁆𑀜𑀯𑀺𑀯𑀺𑀢𑁆𑀢𑀧𑀤𑀸𑀦𑀺𑀧𑀺 𑀕𑀳𑀺𑀢𑀸𑀦𑀺. 𑀆𑀫𑁂𑀟𑀺𑀢𑀯𑀘𑀦𑀁 𑀧𑀦 𑀪𑀸𑀯𑀦𑀸𑀓𑀸𑀭𑀤𑀲𑁆𑀲𑀦𑀁. 𑀯𑀺𑀪𑀗𑁆𑀕𑁂𑀧𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀅𑀬𑀫𑁂𑀯𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀫𑁆𑀧𑀺 𑀯𑀺𑀪𑀗𑁆𑀕𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀁 𑀅𑀪𑀸𑀯𑁂𑀢𑀻𑀢𑀺 𑀬𑀁 𑀧𑀼𑀩𑁆𑀩𑁂 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀫𑀦𑀲𑀺 𑀓𑀢𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁, 𑀢𑀁𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀁𑀬𑁂𑀯 𑀳𑀺 𑀆𑀭𑀫𑁆𑀫𑀡𑀪𑀽𑀢𑀁 𑀧𑀞𑀫𑁂𑀦 𑀯𑀺𑀬 𑀭𑀽𑀧𑀦𑀺𑀫𑀺𑀢𑁆𑀢𑀁 𑀢𑀢𑀺𑀬𑁂𑀦𑀸𑀭𑀼𑀧𑁆𑀧𑁂𑀦𑀸𑀪𑀸𑀯𑁂𑀢𑀻𑀢𑀺. 𑀔𑀬𑀢𑁄 𑀲𑀫𑁆𑀫𑀲𑀦𑀦𑁆𑀢𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀫𑀸𑀳. 𑀲𑀸 𑀳𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀪𑀗𑁆𑀕𑀸𑀪𑀸𑀯𑀫𑁂𑀯 𑀧𑀲𑁆𑀲𑀦𑁆𑀢𑀻 ‘‘𑀯𑀺𑀜𑁆𑀜𑀸𑀡𑀫𑁆𑀧𑀺 𑀅𑀪𑀸𑀯𑁂𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀔𑀬𑀢𑁄 𑀲𑀫𑁆𑀫𑀲𑀦𑀁 𑀯𑀺𑀬 𑀯𑀼𑀢𑁆𑀢’’𑀦𑁆𑀢𑀺. 𑀅𑀲𑁆𑀲𑀸𑀢𑀺 𑀧𑀸𑀞𑀲𑁆𑀲. 𑀧𑀼𑀦 𑀅𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀡𑀲𑁆𑀲. 𑀅𑀪𑀸𑀯𑁂𑀢𑀻𑀢𑀺 𑀅𑀪𑀸𑀯𑀁 𑀓𑀭𑁄𑀢𑀺. 𑀬𑀣𑀸 𑀜𑀸𑀡𑀲𑁆𑀲 𑀦 𑀉𑀧𑀢𑀺𑀝𑁆𑀞𑀢𑀺, 𑀏𑀯𑀁 𑀓𑀭𑁄𑀢𑀺 𑀅𑀫𑀦𑀲𑀺𑀓𑀭𑀡𑀢𑁄. 𑀢𑀢𑁄 𑀏𑀯 𑀯𑀺𑀪𑀸𑀯𑁂𑀢𑀺 𑀯𑀺𑀕𑀢𑀪𑀸𑀯𑀁 𑀓𑀭𑁄𑀢𑀺, 𑀯𑀺𑀦𑀸𑀲𑁂𑀢𑀺 𑀯𑀸 𑀬𑀣𑀸 𑀦 𑀤𑀺𑀲𑁆𑀲𑀢𑀺, 𑀢𑀣𑀸 𑀓𑀭𑀡𑀢𑁄. 𑀢𑁂𑀦𑁂𑀯 𑀅𑀦𑁆𑀢𑀭𑀥𑀸𑀧𑁂𑀢𑀺 𑀢𑀺𑀭𑁄𑀪𑀸𑀯𑀁 𑀕𑀫𑁂𑀢𑀺. 𑀦 𑀅𑀜𑁆𑀜𑀣𑀸𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀏𑀯𑀫𑀢𑁆𑀣𑁄, 𑀦 𑀇𑀢𑁄 𑀅𑀜𑁆𑀜𑀣𑀸 𑀅𑀬𑀼𑀚𑁆𑀚𑀫𑀸𑀦𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀲𑁆𑀲𑀸𑀢𑀺 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑀲𑁆𑀲. 𑀓𑀺𑀜𑁆𑀘𑀦𑀦𑁆𑀢𑀺 𑀓𑀺𑀜𑁆𑀘𑀺𑀧𑀺. 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀧𑁆𑀧𑀸𑀯𑀲𑁂𑀲𑀢𑀸 𑀦𑀸𑀫 𑀪𑀗𑁆𑀕𑁄 𑀏𑀯 𑀲𑀺𑀬𑀸𑀢𑀺 𑀆𑀳 ‘‘𑀪𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀲𑁆𑀲 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀻’’𑀢𑀺. 𑀲𑀢𑀺 𑀳𑀺 𑀪𑀗𑁆𑀕𑀫𑀢𑁆𑀢𑁂𑀧𑀺 𑀢𑀲𑁆𑀲 𑀲𑀓𑀺𑀜𑁆𑀘𑀦𑀢𑀸 𑀲𑀺𑀬𑀸. 𑀅𑀓𑀺𑀜𑁆𑀘𑀦𑀦𑁆𑀢𑀺 𑀘 𑀯𑀺𑀜𑁆𑀜𑀸𑀡𑀲𑁆𑀲 𑀓𑀺𑀜𑁆𑀘𑀺 𑀧𑀓𑀸𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀺𑀪𑀸𑀯𑀦𑀫𑀸𑀳. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁨𑁮𑁫. 𑀦𑁄 𑀘 𑀲𑀦𑁆𑀢𑀸𑀢𑀺 𑀬𑀣𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀯𑀺𑀲𑁂𑀲𑀸 𑀲𑀦𑁆𑀢𑀸, 𑀏𑀯𑀫𑀬𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀦𑁄 𑀘 𑀲𑀦𑁆𑀢𑀸 𑀢𑀤𑀪𑀸𑀯𑀢𑁄. 𑀬𑀸 𑀅𑀬𑀁 𑀔𑀦𑁆𑀥𑁂𑀲𑀼 𑀧𑀘𑁆𑀘𑀬𑀬𑀸𑀧𑀦𑀻𑀬𑀢𑀸𑀬, 𑀭𑁄𑀕𑀫𑀽𑀮𑀢𑀸𑀬 𑀘 𑀭𑁄𑀕𑀲𑀭𑀺𑀓𑁆𑀔𑀢𑀸, 𑀤𑀼𑀓𑁆𑀔𑀢𑀸𑀲𑀽𑀮𑀬𑁄𑀕𑀸𑀤𑀺𑀦𑀸 𑀕𑀡𑁆𑀟𑀲𑀭𑀺𑀓𑁆𑀔𑀢𑀸, 𑀧𑀻𑀴𑀸𑀚𑀦𑀦𑀸𑀤𑀺𑀦𑀸 𑀲𑀮𑁆𑀮𑀲𑀭𑀺𑀓𑁆𑀔𑀢𑀸 𑀘, 𑀲𑀸 𑀲𑀜𑁆𑀜𑀸𑀬 𑀲𑀢𑀺 𑀳𑁄𑀢𑀺, 𑀦𑀸𑀲𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀜𑁆𑀜𑀸 𑀭𑁄𑀕𑁄, 𑀲𑀜𑁆𑀜𑀸 𑀕𑀡𑁆𑀟𑁄, 𑀲𑀜𑁆𑀜𑀸 𑀲𑀮𑁆𑀮’’𑀦𑁆𑀢𑀺. 𑀲𑀸 𑀘𑁂𑀢𑁆𑀣 𑀧𑀝𑀼𑀓𑀺𑀘𑁆𑀘𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑀢𑁄 𑀑𑀴𑀸𑀭𑀺𑀓𑀲𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀓𑁂𑀯𑀮𑀁 𑀲𑀜𑁆𑀜𑀸 𑀏𑀯, 𑀅𑀣 𑀔𑁄 𑀯𑁂𑀤𑀦𑀸𑀘𑁂𑀢𑀦𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀜𑁆𑀜𑀸𑀲𑀻𑀲𑁂𑀦 𑀧𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀏𑀢𑀁 𑀲𑀦𑁆𑀢𑀦𑁆𑀢𑀺 𑀏𑀢𑀁 𑀅𑀲𑀦𑁆𑀢𑀪𑀸𑀯𑀓𑀭𑀭𑁄𑀕𑀸𑀤𑀺𑀲𑀭𑀺𑀓𑁆𑀔𑀲𑀜𑁆𑀜𑀸𑀯𑀺𑀭𑀳𑀢𑁄 𑀲𑀦𑁆𑀢𑀁. 𑀢𑀢𑁄 𑀏𑀯 𑀧𑀡𑀻𑀢𑀁. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸’’𑀢𑀺? 𑀢𑀤𑀧𑀤𑁂𑀲𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀚𑁆𑀛𑀸𑀦𑀫𑀸𑀳 ‘‘𑀆𑀤𑀻𑀦𑀯’’𑀦𑁆𑀢𑀺. 𑀏𑀢𑁆𑀣 𑀭𑁄𑀕𑀸𑀤𑀺𑀲𑀭𑀺𑀓𑁆𑀔𑀲𑀜𑁆𑀜𑀸𑀤𑀺𑀲𑀩𑁆𑀪𑀸𑀯𑁄𑀧𑀺 𑀆𑀤𑀻𑀦𑀯𑁄 𑀤𑀝𑁆𑀞𑀩𑁆𑀩𑁄, 𑀦 𑀆𑀲𑀦𑁆𑀦𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀧𑀘𑁆𑀘𑀢𑁆𑀣𑀺𑀓𑀢𑀸𑀯. 𑀉𑀧𑀭𑀻𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑁂. 𑀲𑀸 𑀯𑀸𑀢𑀺 𑀲𑀸 𑀏𑀯. 𑀯𑀢𑁆𑀢𑀺𑀢𑀸𑀢𑀺 𑀧𑀯𑀢𑁆𑀢𑀺𑀢𑀸 𑀦𑀺𑀩𑁆𑀩𑀢𑁆𑀢𑀺𑀢𑀸 𑀯𑀴𑀜𑁆𑀚𑀺𑀢𑀸.

𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂𑀢𑀺 𑀢𑀲𑁆𑀫𑀺𑀁 𑀢𑀢𑀺𑀬𑀸𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁂 𑀛𑀸𑀦𑀦𑀺𑀫𑀺𑀢𑁆𑀢𑁂. 𑀫𑀸𑀦𑀲𑀦𑁆𑀢𑀺 𑀘𑀺𑀢𑁆𑀢𑀁 ‘‘𑀫𑀦𑁄 𑀏𑀯 𑀫𑀸𑀦𑀲’’𑀦𑁆𑀢𑀺 𑀓𑀢𑁆𑀯𑀸, 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀁 𑀯𑀸. 𑀢𑀁 𑀳𑀺 𑀫𑀦𑀲𑀺 𑀪𑀯𑀦𑁆𑀢𑀺 𑀫𑀸𑀦𑀲𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀛𑀸𑀦𑀸𑀦𑀼𑀕𑀼𑀡𑀢𑀸𑀬 𑀲𑀫𑀸𑀧𑀢𑁆𑀢𑀺𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀔𑀦𑁆𑀥𑁂𑀲𑀽’’𑀢𑀺, 𑀆𑀭𑀫𑁆𑀫𑀡𑀪𑀽𑀢𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁮𑁬. 𑀬𑀣𑀸𑀯𑀼𑀢𑁆𑀢𑀁 𑀆𑀓𑀺𑀜𑁆𑀘𑀜𑁆𑀜𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀢𑁄 𑀆𑀬𑀢𑀦𑀁 𑀓𑀸𑀭𑀡𑀫𑀲𑁆𑀲𑀸𑀢𑀺 𑀛𑀸𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀆𑀓𑀺𑀜𑁆𑀘𑀜𑁆𑀜𑀫𑁂𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀁 𑀛𑀸𑀦𑀲𑁆𑀲 𑀓𑀸𑀭𑀡𑀦𑁆𑀢𑀺 𑀆𑀭𑀫𑁆𑀫𑀡𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀏𑀯𑀁 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀬𑀸𑀬 𑀲𑀜𑁆𑀜𑀸𑀬 𑀪𑀸𑀯𑀢𑁄𑀢𑀺 𑀬𑀸𑀤𑀺𑀲𑀸𑀬 𑀲𑀜𑁆𑀜𑀸𑀬 𑀅𑀢𑁆𑀣𑀺𑀪𑀸𑀯𑁂𑀦. 𑀬𑀸 𑀳𑀺 𑀲𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄 𑀲𑀜𑁆𑀜𑀸𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀸, 𑀲𑀜𑁆𑀜𑀸𑀲𑀪𑀸𑀯𑀸𑀦𑀸𑀢𑀺𑀯𑀢𑁆𑀢𑀦𑀢𑁄 𑀅𑀲𑀜𑁆𑀜𑀸𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀸, 𑀢𑀲𑁆𑀲𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀢𑀁 𑀛𑀸𑀦𑀁. 𑀢𑀁 𑀢𑀸𑀯 𑀤𑀲𑁆𑀲𑁂𑀢𑀼𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀢𑀁 𑀲𑀲𑀸𑀧𑀝𑀺𑀧𑀤𑀁, 𑀬𑀣𑀸𑀯𑀼𑀢𑁆𑀢𑀲𑀜𑁆𑀜𑀁, 𑀢𑀲𑁆𑀲𑀸 𑀘 𑀅𑀥𑀺𑀕𑀫𑀼𑀧𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀳𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀥𑀫𑁆𑀫𑀁 𑀉𑀤𑁆𑀥𑀭𑀦𑁆𑀢𑁂𑀦 𑀲𑀜𑁆𑀜𑀸𑀯𑀦𑁆𑀢𑀫𑀼𑀔𑁂𑀦 𑀲𑀜𑁆𑀜𑀸 𑀉𑀤𑁆𑀥𑀝𑀸, 𑀅𑀜𑁆𑀜𑀣𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀉𑀤𑁆𑀥𑀭𑀺𑀢𑀩𑁆𑀩𑀁 𑀲𑀺𑀬𑀸. 𑀲𑀸 𑀧𑀦 𑀧𑀝𑀺𑀧𑀤𑀸 𑀬𑀢𑁆𑀣 𑀧𑀯𑀢𑁆𑀢𑀢𑀺, 𑀬𑀣𑀸 𑀘 𑀧𑀯𑀢𑁆𑀢𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀳𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀸𑀯𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀁, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑀸 𑀦𑀸𑀫. 𑀦𑀢𑁆𑀣𑀺𑀪𑀸𑀯𑀫𑁆𑀧𑀻𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀼𑀜𑁆𑀜𑀢𑀫𑁆𑀧𑀺, 𑀏𑀯𑀁 𑀲𑀼𑀔𑀼𑀫𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀦𑁆𑀢𑀸𑀭𑀫𑁆𑀫𑀡𑀢𑀸𑀬𑀸𑀢𑀺 𑀲𑀦𑁆𑀢𑀁 𑀆𑀭𑀫𑁆𑀫𑀡𑀁 𑀏𑀢𑀺𑀲𑁆𑀲𑀸𑀢𑀺 𑀲𑀦𑁆𑀢𑀸𑀭𑀫𑁆𑀫𑀡𑀸, 𑀢𑀩𑁆𑀪𑀸𑀯𑁄 𑀲𑀦𑁆𑀢𑀸𑀭𑀫𑁆𑀫𑀡𑀢𑀸, 𑀢𑀸𑀬, 𑀦 𑀛𑀸𑀦𑀲𑀦𑁆𑀢𑀢𑀸𑀬. 𑀦 𑀳𑀺 𑀢𑀢𑀺𑀬𑀸𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑁆𑀛𑀸𑀦𑀢𑁄 𑀲𑀦𑁆𑀢𑀸.

𑀘𑁄𑀤𑀓𑁄 ‘‘𑀬𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀦 𑀢𑀢𑁆𑀣 𑀆𑀤𑀻𑀦𑀯𑀤𑀲𑁆𑀲𑀦𑀁 𑀪𑀯𑁂𑀬𑁆𑀬. 𑀅𑀲𑀢𑀺 𑀘 𑀆𑀤𑀻𑀦𑀯𑀤𑀲𑁆𑀲𑀦𑁂 𑀲𑀫𑀢𑀺𑀓𑁆𑀓𑀫𑁄 𑀏𑀯 𑀦 𑀲𑀺𑀬𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀦𑁆𑀢𑀢𑁄 𑀘𑁂 𑀫𑀦𑀲𑀺 𑀓𑀭𑁄𑀢𑀺, 𑀓𑀣𑀁 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀻’’𑀢𑀺 𑀆𑀳. 𑀇𑀢𑀭𑁄 ‘‘𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀬𑀸’’𑀢𑀺 𑀧𑀭𑀺𑀳𑀸𑀭𑀫𑀸𑀳, 𑀢𑁂𑀦 𑀆𑀤𑀻𑀦𑀯𑀤𑀲𑁆𑀲𑀦𑀫𑁆𑀧𑀺 𑀅𑀢𑁆𑀣𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀳𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀺𑀁 𑀛𑀸𑀦𑁂 𑀅𑀪𑀺𑀭𑀢𑀺, 𑀢𑀢𑁆𑀣 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁. 𑀲𑀸 𑀧𑀦𑀲𑁆𑀲 𑀢𑀢𑀺𑀬𑀸𑀭𑀼𑀧𑁆𑀧𑁂 𑀲𑀩𑁆𑀩𑀲𑁄 𑀦𑀢𑁆𑀣𑀺, 𑀓𑁂𑀯𑀮𑀁 𑀅𑀜𑁆𑀜𑀸𑀪𑀸𑀯𑀢𑁄 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺𑀫𑀸𑀳.

𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀕𑀘𑁆𑀙𑀢𑀻𑀢𑀺 𑀢𑁂𑀲𑀁 𑀲𑀺𑀧𑁆𑀧𑀻𑀦𑀁 𑀚𑀻𑀯𑀺𑀓𑀁 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄 𑀢𑁂 𑀯𑀻𑀢𑀺𑀯𑀢𑁆𑀢𑀢𑀺𑀬𑁂𑀯. 𑀲𑁄𑀢𑀺 𑀬𑁄𑀕𑀸𑀯𑀘𑀭𑁄. 𑀢𑀦𑁆𑀢𑀺 𑀢𑀢𑀺𑀬𑀸𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀲𑀦𑁆𑀢𑀸 𑀯𑀢𑀸𑀬𑀁 𑀲𑀫𑀸𑀧𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀦𑀬𑁂𑀦 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄. 𑀢𑀦𑁆𑀢𑀺 𑀬𑀸𑀬 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀦𑀸𑀫 𑀳𑁄𑀢𑀺, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀲𑀜𑁆𑀜𑀁 𑀧𑀸𑀧𑀼𑀡𑀸𑀢𑀻𑀢𑀺 𑀬𑁄𑀚𑀦𑀸. 𑀲𑀜𑁆𑀜𑀸𑀲𑀻𑀲𑁂𑀦 𑀳𑀺 𑀤𑁂𑀲𑀦𑀸. 𑀧𑀭𑀫𑀲𑀼𑀔𑀼𑀫𑀦𑁆𑀢𑀺 𑀉𑀓𑁆𑀓𑀁𑀲𑀕𑀢𑀲𑀼𑀔𑀼𑀫𑀪𑀸𑀯𑀁. 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀉𑀓𑁆𑀓𑀁𑀲𑀕𑀢𑀲𑀼𑀔𑀼𑀫𑀢𑀸𑀬 𑀲𑀗𑁆𑀔𑀸𑀭𑀸𑀦𑀁 𑀲𑁂𑀲𑀢𑀸𑀫𑀢𑁆𑀢𑀁 𑀲𑀫𑀸𑀧𑀢𑁆𑀢𑀺𑀁. 𑀢𑁂𑀦𑀸𑀳 ‘‘𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀲𑀗𑁆𑀔𑀸𑀭’’𑀦𑁆𑀢𑀺. 𑀅𑀦𑁆𑀢𑀫𑀢𑀺𑀘𑁆𑀘 𑀅𑀘𑁆𑀘𑀦𑁆𑀢𑀁. 𑀬𑀢𑁄 𑀲𑀼𑀔𑀼𑀫𑀢𑀫𑀁 𑀦𑀸𑀫 𑀦𑀢𑁆𑀣𑀺, 𑀢𑀣𑀸𑀧𑀭𑀫𑀼𑀓𑁆𑀓𑀁𑀲𑀕𑀢𑀲𑀼𑀔𑀼𑀫𑀲𑀗𑁆𑀔𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑀢𑁄 𑀧𑀝𑁆𑀞𑀸𑀬 𑀳𑀺 𑀢𑀘𑁆𑀙𑀦𑁆𑀢𑀺𑀬𑀸 𑀯𑀺𑀬 𑀧𑀯𑀢𑁆𑀢𑀫𑀸𑀦𑀸𑀬 𑀪𑀸𑀯𑀦𑀸𑀬 𑀅𑀦𑀼𑀓𑁆𑀓𑀫𑁂𑀦 𑀲𑀗𑁆𑀔𑀸𑀭𑀸 𑀢𑀢𑁆𑀣 𑀅𑀦𑁆𑀢𑀺𑀫𑀓𑁄𑀝𑁆𑀞𑀸𑀲𑀢𑀁 𑀧𑀸𑀧𑀺𑀢𑀸, 𑀢𑀢𑁄 𑀧𑀭𑀁 𑀦𑀺𑀭𑁄𑀥𑁄 𑀏𑀯, 𑀦 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀻’’𑀢𑀺.

𑁨𑁮𑁭. 𑀬𑀁 𑀢𑀁 𑀘𑀢𑀼𑀓𑁆𑀔𑀦𑁆𑀥𑀁. 𑀅𑀢𑁆𑀣𑀢𑁄𑀢𑀺 𑀓𑀼𑀲𑀮𑀸𑀤𑀺𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀧𑀭𑀫𑀢𑁆𑀣𑀢𑁄. 𑀯𑀺𑀲𑁂𑀲𑀢𑁄 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀇𑀥 𑀲𑀫𑀸𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸’’𑀢𑀺. 𑀑𑀴𑀸𑀭𑀺𑀓𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄𑀢𑀺 𑀬𑀤𑀺𑀧𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀯𑀺𑀧𑀸𑀓𑀲𑀜𑁆𑀜𑀸𑀬 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀓𑀼𑀲𑀮𑀲𑀜𑁆𑀜𑀸 𑀑𑀴𑀸𑀭𑀺𑀓𑀸, 𑀢𑀣𑀸 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀜𑁆𑀜𑀸𑀳𑀺, 𑀢𑀣𑀸𑀧𑀺 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀦𑀸𑀫 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀕𑀳𑁂𑀢𑀩𑁆𑀩𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀬 𑀯𑀺𑀬 𑀘𑀢𑀼𑀯𑁄𑀓𑀸𑀭𑁂𑀧𑀺 𑀳𑁂𑀝𑁆𑀞𑀸 𑀢𑀻𑀲𑀼 𑀪𑀽𑀫𑀻𑀲𑀼 𑀲𑀜𑁆𑀜𑀸𑀬 𑀯𑀺𑀬 𑀑𑀴𑀸𑀭𑀺𑀓𑀸𑀬 𑀅𑀪𑀸𑀯𑀢𑁄. 𑀲𑀼𑀔𑀼𑀫𑀸𑀬𑀸𑀢𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀼𑀔𑀼𑀫𑀸𑀬 𑀲𑀜𑁆𑀜𑀸𑀬 𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀦𑁂𑀯𑀲𑀜𑁆𑀜𑀸𑀢𑀺 𑀏𑀢𑁆𑀣 𑀦-𑀓𑀸𑀭𑁄 𑀅𑀪𑀸𑀯𑀢𑁆𑀣𑁄, 𑀦𑀸𑀲𑀜𑁆𑀜𑀦𑁆𑀢𑀺 𑀏𑀢𑁆𑀣 𑀦-𑀓𑀸𑀭𑁄 𑀅𑀜𑁆𑀜𑀢𑁆𑀣𑁄, 𑀅-𑀓𑀸𑀭𑁄 𑀅𑀪𑀸𑀯𑀢𑁆𑀣𑁄𑀯, 𑀅𑀲𑀜𑁆𑀜𑀁 𑀅𑀦𑀲𑀜𑁆𑀜𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸𑀢𑀺 𑀏𑀓𑀤𑁂𑀲𑀪𑀸𑀯𑁂𑀦 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀏𑀢𑁆𑀣𑀸𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑁂. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀦𑁂𑀯𑀲𑀜𑁆𑀜𑀸𑀢𑀺 𑀏𑀢𑁆𑀣 𑀦-𑀓𑀸𑀭𑁄 𑀅𑀜𑁆𑀜𑀢𑁆𑀣𑁄. 𑀢𑀣𑀸 𑀦𑀸𑀲𑀜𑁆𑀜𑀸𑀢𑀺 𑀏𑀢𑁆𑀣 𑀦-𑀓𑀸𑀭𑁄, 𑀅-𑀓𑀸𑀭𑁄 𑀘 𑀅𑀜𑁆𑀜𑀢𑁆𑀣𑁄 𑀏𑀯𑀸𑀢𑀺 𑀢𑁂𑀦 𑀤𑁆𑀯𑀬𑁂𑀦 𑀲𑀜𑁆𑀜𑀸𑀪𑀸𑀯𑁄 𑀏𑀯 𑀤𑀲𑁆𑀲𑀺𑀢𑁄𑀢𑀺 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀆𑀬𑀢𑀦𑀪𑀸𑀯𑁄 𑀯𑀼𑀢𑁆𑀢𑁄𑀯𑀸𑀢𑀺 ‘‘𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄.

𑀓𑀺𑀁 𑀧𑀦 𑀓𑀸𑀭𑀡𑀁, 𑀬𑁂𑀦𑁂𑀢𑁆𑀣 𑀲𑀜𑁆𑀜𑀸𑀯 𑀏𑀤𑀺𑀲𑀻 𑀚𑀸𑀢𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺. 𑀲𑀜𑁆𑀜𑀸𑀲𑀻𑀲𑁂𑀦𑀸𑀬𑀁 𑀤𑁂𑀲𑀦𑀸 𑀓𑀢𑀸 ‘‘𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁪𑁧, 𑁩𑁫𑁯; 𑀅. 𑀦𑀺. 𑁯.𑁨𑁪) 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀏𑀲 𑀅𑀢𑁆𑀣𑁄𑀢𑀺 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀲𑀪𑀸𑀯𑀢𑁄 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀦𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀢𑀸𑀲𑀗𑁆𑀔𑀸𑀢𑁄 𑀅𑀢𑁆𑀣𑁄.

𑀅𑀢𑀺𑀣𑁄𑀓𑀫𑁆𑀧𑀺 𑀬𑀁 𑀢𑁂𑀮𑀫𑀢𑁆𑀣𑀺 𑀪𑀦𑁆𑀢𑁂𑀢𑀺 𑀆𑀳 𑀅𑀓𑀧𑁆𑀧𑀺𑀬𑀪𑀸𑀯𑀁 𑀉𑀧𑀸𑀤𑀸𑀬, 𑀢𑀤𑁂𑀯 𑀦𑀢𑁆𑀣𑀺, 𑀪𑀦𑁆𑀢𑁂, 𑀢𑁂𑀮𑀦𑁆𑀢𑀺 𑀆𑀳 𑀦𑀸𑀴𑀺𑀧𑀽𑀭𑀡𑀁 𑀉𑀧𑀸𑀤𑀸𑀬. 𑀢𑁂𑀦𑀸𑀳 ‘‘𑀢𑀢𑁆𑀣 𑀬𑀣𑀸’’𑀢𑀺𑀆𑀤𑀺.

𑀬𑀤𑀺 𑀆𑀭𑀫𑁆𑀫𑀡𑀲𑀜𑁆𑀚𑀸𑀦𑀦𑀁 𑀲𑀜𑁆𑀜𑀸𑀓𑀺𑀘𑁆𑀘𑀁, 𑀢𑀁 𑀲𑀜𑁆𑀜𑀸 𑀲𑀫𑀸𑀦𑀸 𑀓𑀣𑀫𑀬𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀆𑀳 ‘‘𑀤𑀳𑀦𑀓𑀺𑀘𑁆𑀘𑀫𑀺𑀯𑀸’’𑀢𑀺𑀆𑀤𑀺. 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀏𑀯 𑀳𑁂𑀲𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀢𑁄 𑀏𑀯 𑀘 𑀜𑀸𑀡𑀲𑁆𑀲 𑀲𑀼𑀕𑀬𑁆𑀳𑀸𑀧𑀺 𑀦 𑀳𑁄𑀢𑀺. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀺𑀤𑀸𑀚𑀦𑀦𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀅𑀓𑀢𑀸𑀪𑀺𑀦𑀺𑀯𑁂𑀲𑁄𑀢𑀺 𑀅𑀓𑀢𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀅𑀧𑁆𑀧𑀯𑀢𑁆𑀢𑀺𑀢𑀲𑀫𑁆𑀫𑀲𑀦𑀘𑀸𑀭𑁄. 𑀧𑀓𑀢𑀺𑀯𑀺𑀧𑀲𑁆𑀲𑀓𑁄𑀢𑀺 𑀧𑀓𑀢𑀺𑀬𑀸 𑀯𑀺𑀧𑀲𑁆𑀲𑀓𑁄. 𑀔𑀦𑁆𑀥𑀸𑀤𑀺𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀸𑀮𑀫𑁆𑀩𑀦𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑀸𑀦𑀁 𑀯𑀺𑀧𑀲𑁆𑀲𑀓𑁄 𑀲𑀓𑁆𑀓𑀼𑀡𑁂𑀬𑁆𑀬 𑀢𑀩𑁆𑀩𑀺𑀲𑀬𑀉𑀤𑀬𑀩𑁆𑀩𑀬𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀼𑀁, 𑀬𑀣𑀸 𑀧𑀦 𑀲𑀓𑁆𑀓𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦𑁂𑀯𑀸𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑁂 𑀨𑀲𑁆𑀲𑀸𑀤𑀺𑀥𑀫𑁆𑀫𑁂 𑀅𑀯𑀺𑀦𑀺𑀩𑁆𑀪𑀼𑀚𑁆𑀚 𑀏𑀓𑀢𑁄 𑀕𑀳𑁂𑀢𑁆𑀯𑀸 𑀓𑀮𑀸𑀧𑀢𑁄 𑀲𑀫𑀽𑀳𑀢𑁄 𑀲𑀫𑁆𑀫𑀲𑀦𑀯𑀲𑁂𑀦 𑀦𑀬𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦. 𑀨𑀲𑁆𑀲𑀸𑀤𑀺𑀥𑀫𑁆𑀫𑁂 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀭𑀽𑀧𑀢𑁄 𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀫𑁆𑀫𑀲𑀦𑀁 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸. 𑀏𑀯𑀁 𑀲𑀼𑀔𑀼𑀫𑀢𑁆𑀢𑀁 𑀕𑀢𑀸 𑀬𑀣𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸𑀧𑀺 𑀦𑀸𑀫 𑀅𑀦𑀼𑀧𑀤𑀁 𑀦 𑀯𑀺𑀧𑀲𑁆𑀲𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀣𑁂𑀭𑀲𑁆𑀲𑀸𑀢𑀺 𑀅𑀜𑁆𑀜𑀢𑀭𑀲𑁆𑀲 𑀣𑁂𑀭𑀲𑁆𑀲. 𑀅𑀜𑁆𑀜𑀸𑀳𑀺𑀧𑀻𑀢𑀺 𑀏𑀢𑁆𑀣 𑀅𑀬𑀫𑀧𑀭𑀸 𑀉𑀧𑀫𑀸 𑁋 𑀏𑀓𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀫𑀦𑀼𑀜𑁆𑀜𑀁 𑀫𑀢𑁆𑀢𑀺𑀓𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀤𑀺𑀲𑁆𑀯𑀸 𑀬𑀸𑀘𑀺 ‘‘𑀤𑁂𑀳𑀺 𑀫𑁂 𑀇𑀫𑀁 𑀪𑀸𑀚𑀦’’𑀦𑁆𑀢𑀺. 𑀲𑁄 𑀲𑀼𑀭𑀸𑀲𑀺𑀢𑁆𑀢𑀢𑀁 𑀲𑀦𑁆𑀥𑀸𑀬 ‘‘𑀦𑀸𑀬𑁆𑀬𑁄 𑀲𑀓𑁆𑀓𑀸 𑀤𑀸𑀢𑀼𑀁, 𑀲𑀼𑀭𑀸 𑀏𑀢𑁆𑀣 𑀅𑀢𑁆𑀣𑀻’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀲𑀫𑀻𑀧𑁂 𑀞𑀺𑀢𑀁 𑀧𑀼𑀭𑀺𑀲𑀁 𑀉𑀤𑁆𑀤𑀺𑀲𑁆𑀲 𑀆𑀳 ‘‘𑀢𑁂𑀦 𑀳𑀺 𑀇𑀫𑀲𑁆𑀲 𑀧𑀸𑀢𑀼𑀁 𑀤𑁂𑀳𑀻’’𑀢𑀺. 𑀇𑀢𑀭𑁄 ‘‘𑀦𑀢𑁆𑀣𑀬𑁆𑀬𑁄’’𑀢𑀺 𑀆𑀳. 𑀢𑀢𑁆𑀣 𑀬𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀬𑁄𑀕𑁆𑀬𑀪𑀸𑀯𑀁 𑀉𑀧𑀸𑀤𑀸𑀬 ‘‘𑀅𑀢𑁆𑀣𑀻’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁, 𑀧𑀸𑀢𑀩𑁆𑀩𑀢𑀸𑀬 𑀢𑀢𑁆𑀣 𑀅𑀪𑀸𑀯𑀢𑁄 ‘‘𑀦𑀢𑁆𑀣𑀻’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀚𑀸𑀢𑀁, 𑀏𑀯𑀁 𑀇𑀥𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀬𑀣𑀸 𑀳𑁂𑀝𑁆𑀞𑀸 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄, 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀁, 𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀪𑀸𑀯𑀦𑀸𑀓𑀸𑀭𑁄 𑀕𑀳𑀺𑀢𑁄, 𑀏𑀯𑀁 𑀓𑁄𑀘𑀺 𑀪𑀸𑀯𑀦𑀸𑀓𑀸𑀭𑁄 𑀦 𑀕𑀳𑀺𑀢𑁄𑀢𑀺? 𑀓𑁂𑀘𑀺 𑀢𑀸𑀯 𑀆𑀳𑀼 𑁋 ‘‘𑀪𑀸𑀯𑀦𑀸𑀓𑀸𑀭𑁄 𑀦𑀸𑀫 𑀲𑁄𑀧𑀘𑀸𑀭𑀲𑁆𑀲 𑀛𑀸𑀦𑀲𑁆𑀲 𑀬𑀣𑀸𑀲𑀓𑀁 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀆𑀓𑀸𑀭𑁄, 𑀆𑀭𑀫𑁆𑀫𑀡𑀜𑁆𑀘𑁂𑀢𑁆𑀣 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀥𑀫𑁆𑀫𑀸. 𑀢𑁂 𑀧𑀦 𑀕𑀬𑁆𑀳𑀫𑀸𑀦𑀸 𑀏𑀓𑀲𑁆𑀲 𑀯𑀸 𑀧𑀼𑀩𑁆𑀩𑀗𑁆𑀕𑀫𑀥𑀫𑁆𑀫𑀲𑁆𑀲 𑀯𑀲𑁂𑀦 𑀕𑀳𑁂𑀢𑀩𑁆𑀩𑀸 𑀲𑀺𑀬𑀼𑀁, 𑀲𑀩𑁆𑀩𑁂 𑀏𑀯 𑀯𑀸. 𑀢𑀢𑁆𑀣 𑀧𑀞𑀫𑀧𑀓𑁆𑀔𑁂 𑀯𑀺𑀜𑁆𑀜𑀸𑀡𑀲𑁆𑀲 𑀕𑀳𑀡𑀁 𑀆𑀧𑀦𑁆𑀦𑀦𑁆𑀢𑀺 ‘𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀫𑀦𑀲𑀺𑀓𑀸𑀭𑁂 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀤𑀼𑀢𑀺𑀬𑀧𑀓𑁆𑀔𑁂 𑀧𑀦 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀬 𑀛𑀸𑀦𑀲𑁆𑀲 ‘𑀆𑀓𑀺𑀜𑁆𑀘𑀜𑁆𑀜𑀁 𑀆𑀓𑀺𑀜𑁆𑀘𑀜𑁆𑀜’𑀦𑁆𑀢𑀺 𑀫𑀦𑀲𑀺𑀓𑀸𑀭𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑀸 𑀯𑀸 𑀲𑀺𑀬𑀸, 𑀅𑀪𑀸𑀯𑀸𑀭𑀫𑁆𑀫𑀡𑀢𑀸 𑀯𑀸. 𑀲𑀩𑁆𑀩𑀣𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀸𑀯𑁄 𑀦 𑀮𑀩𑁆𑀪𑀢𑀻’’𑀢𑀺. 𑀢𑀤𑀺𑀤𑀫𑀓𑀸𑀭𑀡𑀁 𑀢𑀣𑀸 𑀛𑀸𑀦𑀲𑁆𑀲 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀦 𑀳𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀸𑀯𑀦𑀸 𑀯𑀺𑀜𑁆𑀜𑀸𑀡𑀫𑀸𑀓𑀺𑀜𑁆𑀘𑀜𑁆𑀜𑀁 𑀯𑀸 𑀆𑀫𑀲𑀦𑁆𑀢𑀻 𑀧𑀯𑀢𑁆𑀢𑀢𑀺, 𑀓𑀺𑀜𑁆𑀘𑀭𑀳𑀺? 𑀢𑀢𑀺𑀬𑀸𑀭𑀼𑀧𑁆𑀧𑀲𑁆𑀲 𑀲𑀦𑁆𑀢𑀢𑀁.

𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀲𑀦𑁆𑀢’’𑀦𑁆𑀢𑀺 𑀦 𑀕𑀳𑀺𑀢𑀦𑁆𑀢𑀺? 𑀓𑀺𑀜𑁆𑀘𑀸𑀧𑀺 𑀦 𑀕𑀳𑀺𑀢𑀢𑀁 𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁧𑁨𑁯; 𑀲𑀁. 𑀦𑀺. 𑁨.𑁧𑁫𑁨), 𑀯𑀺𑀪𑀗𑁆𑀕𑁂 (𑀯𑀺𑀪. 𑁬𑁦𑁬 𑀆𑀤𑀬𑁄) 𑀧𑀦 𑀕𑀳𑀺𑀢𑀫𑁂𑀯. 𑀬𑀣𑀸𑀳 𑁋 ‘‘𑀢𑀜𑁆𑀜𑁂𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑀻’’𑀢𑀺 (𑀯𑀺𑀪. 𑁬𑁧𑁯). 𑀅𑀣 𑀓𑀲𑁆𑀫𑀸 𑀯𑀺𑀪𑀗𑁆𑀕𑁂 𑀯𑀺𑀬 𑀲𑀼𑀢𑁆𑀢𑁂 𑀪𑀸𑀯𑀦𑀸𑀓𑀸𑀭𑁄 𑀦 𑀕𑀳𑀺𑀢𑁄𑀢𑀺? 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄, 𑀤𑁂𑀲𑀦𑀸𑀯𑀺𑀮𑀸𑀲𑀢𑁄 𑀘. 𑀬𑁂 𑀳𑀺 𑀯𑁂𑀦𑁂𑀬𑁆𑀬𑀸 𑀬𑀣𑀸 𑀳𑁂𑀝𑁆𑀞𑀸 𑀢𑀻𑀲𑀼 𑀆𑀭𑀼𑀧𑁆𑀧𑁂𑀲𑀼 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄, 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀁, 𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀪𑀸𑀯𑀦𑀸𑀓𑀸𑀭𑁄 𑀕𑀳𑀺𑀢𑁄, 𑀏𑀯𑀁 𑀅𑀕𑁆𑀕𑀳𑀺𑀢𑁂 𑀏𑀯 𑀢𑀲𑁆𑀫𑀺𑀁 𑀢𑀫𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀲𑀼𑀢𑁆𑀢𑁂 𑀢𑀣𑀸 𑀤𑁂𑀲𑀦𑀸 𑀓𑀢𑀸, 𑀲𑀼𑀢𑁆𑀢𑀦𑁆𑀢𑀕𑀢𑀺𑀓𑀸𑀯 𑀅𑀪𑀺𑀥𑀫𑁆𑀫𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 (𑀯𑀺𑀪. 𑁬𑁦𑁫 𑀆𑀤𑀬𑁄) 𑀉𑀤𑁆𑀤𑁂𑀲𑀤𑁂𑀲𑀦𑀸. 𑀬𑁂 𑀧𑀦 𑀯𑁂𑀦𑁂𑀬𑁆𑀬𑀸 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑁂𑀬𑁂𑀯 𑀢𑀲𑁆𑀫𑀺𑀁 𑀢𑀫𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀯𑀺𑀪𑀗𑁆𑀕𑁂 𑀪𑀸𑀯𑀦𑀸𑀓𑀸𑀭𑁄 𑀯𑀼𑀢𑁆𑀢𑁄. 𑀥𑀫𑁆𑀫𑀺𑀲𑁆𑀲𑀭𑁄 𑀧𑀦 𑀪𑀕𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀸𑀦𑀁 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀁 𑀚𑀸𑀦𑀦𑁆𑀢𑁄 𑀓𑀢𑁆𑀣𑀘𑀺 𑀪𑀸𑀯𑀦𑀸𑀓𑀸𑀭𑀁 𑀕𑀡𑁆𑀳𑀸𑀢𑀺, 𑀓𑀢𑁆𑀣𑀘𑀺 𑀪𑀸𑀯𑀦𑀸𑀓𑀸𑀭𑀁 𑀦 𑀕𑀡𑁆𑀳𑀸𑀢𑀺. 𑀲𑀸 𑀘 𑀤𑁂𑀲𑀦𑀸 𑀬𑀸𑀯𑀤𑁂𑀯 𑀯𑁂𑀦𑁂𑀬𑁆𑀬𑀯𑀺𑀦𑀬𑀢𑁆𑀣𑀸𑀢𑀺 𑀅𑀬𑀫𑁂𑀢𑁆𑀣 𑀤𑁂𑀲𑀦𑀸𑀯𑀺𑀮𑀸𑀲𑁄. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀯𑀸 𑀧𑀭𑀺𑀬𑀸𑀬𑀓𑀣𑀸𑀢𑀺 𑀢𑀢𑁆𑀣 𑀪𑀸𑀯𑀦𑀸𑀓𑀸𑀭𑁄 𑀦 𑀕𑀳𑀺𑀢𑁄, 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸𑀢𑀺 𑀢𑀢𑁆𑀣 𑀪𑀸𑀯𑀦𑀸𑀓𑀸𑀭𑁄 𑀕𑀳𑀺𑀢𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀪𑀸𑀯𑀦𑀸𑀓𑀸𑀭𑀲𑁆𑀲 𑀕𑀳𑀡𑁂, 𑀅𑀕𑁆𑀕𑀳𑀡𑁂 𑀘 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 𑁋 ‘‘𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑁂 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀲𑀼𑀢𑁆𑀢𑁂 𑀪𑀸𑀯𑀦𑀸𑀓𑀸𑀭𑀲𑁆𑀲 𑀅𑀕𑁆𑀕𑀳𑀡𑀁, 𑀲𑁆𑀯𑀸𑀬𑀁 𑀯𑀺𑀲𑁂𑀲𑁄 𑀅𑀦𑀼𑀧𑀼𑀩𑁆𑀩𑀪𑀸𑀯𑀦𑀸𑀚𑀦𑀺𑀢𑁄. 𑀲𑀸 𑀘 𑀅𑀦𑀼𑀧𑀼𑀩𑁆𑀩𑀪𑀸𑀯𑀦𑀸 𑀧𑀳𑀸𑀦𑀓𑁆𑀓𑀫𑁄𑀧𑀚𑀦𑀺𑀢𑀸 𑀧𑀳𑀸𑀢𑀩𑁆𑀩𑀲𑀫𑀢𑀺𑀓𑁆𑀓𑀫𑁂𑀦 𑀛𑀸𑀦𑀸𑀦𑀁 𑀅𑀥𑀺𑀕𑀦𑁆𑀢𑀩𑁆𑀩𑀢𑁄. 𑀢𑀣𑀸 𑀳𑀺 𑀓𑀸𑀫𑀸𑀤𑀺𑀯𑀺𑀯𑁂𑀓𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀧𑀻𑀢𑀺𑀯𑀺𑀭𑀸𑀕𑀲𑁄𑀫𑀦𑀲𑁆𑀲𑀢𑁆𑀣𑀗𑁆𑀕𑀫𑀫𑀼𑀔𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑁂𑀲𑀺𑀢𑀸𑀦𑀺, 𑀭𑀽𑀧𑀲𑀜𑁆𑀜𑀸𑀤𑀺𑀲𑀫𑀢𑀺𑀓𑁆𑀓𑀫𑀫𑀼𑀔𑁂𑀦 𑀅𑀭𑀽𑀧𑀚𑁆𑀛𑀸𑀦𑀸𑀦𑀺. 𑀦 𑀓𑁂𑀯𑀮𑀜𑁆𑀘 𑀛𑀸𑀦𑀸𑀦𑀺𑀬𑁂𑀯, 𑀅𑀣 𑀔𑁄 𑀲𑀩𑁆𑀩𑀫𑁆𑀧𑀺 𑀲𑀻𑀮𑀁, 𑀲𑀩𑁆𑀩𑀸𑀧𑀺 𑀧𑀜𑁆𑀜𑀸 𑀧𑀝𑀺𑀧𑀓𑁆𑀔𑀥𑀫𑁆𑀫𑀧𑁆𑀧𑀳𑀸𑀦𑀯𑀲𑁂𑀦𑁂𑀯 𑀲𑀫𑁆𑀧𑀸𑀤𑁂𑀢𑀩𑁆𑀩𑀢𑁄 𑀧𑀳𑀸𑀢𑀩𑁆𑀩𑀥𑀫𑁆𑀫𑀲𑀫𑀢𑀺𑀓𑁆𑀓𑀫𑀤𑀲𑁆𑀲𑀦𑀫𑀼𑀔𑁂𑀦𑁂𑀯 𑀤𑁂𑀲𑀦𑀸 𑀆𑀭𑀼𑀴𑁆𑀳𑀸. 𑀢𑀣𑀸 𑀳𑀺 ‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁮, 𑁧𑁯𑁪) 𑀲𑀻𑀮𑀲𑀁𑀯𑀭𑁄, ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁧𑁩; 𑀫. 𑀦𑀺. 𑁧.𑁪𑁧𑁧, 𑁪𑁨𑁧; 𑁩.𑁧𑁫, 𑁭𑁫) 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, ‘‘𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩, 𑁪𑁨𑁨; 𑁨.𑁨𑁪; 𑁩.𑁭𑁫; 𑀲𑀁. 𑀦𑀺. 𑁨.𑁬𑁩; 𑀅. 𑀦𑀺. 𑁬.𑁫𑁮; 𑀫𑀳𑀸𑀦𑀺. 𑁨𑁦𑁬; 𑀯𑀺𑀪. 𑁫𑁧𑁮) 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, ‘‘𑀇𑀥 𑀪𑀺𑀓𑁆𑀔𑀼 𑀫𑀺𑀘𑁆𑀙𑀸𑀚𑀻𑀯𑀁 𑀧𑀳𑀸𑀬 𑀲𑀫𑁆𑀫𑀸𑀆𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁮) 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺, ‘‘𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁧𑁭; 𑀫. 𑀦𑀺. 𑁧.𑁪𑁧𑁨, 𑁪𑁨𑁫; 𑁩.𑁧𑁬, 𑁭𑁫) 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, ‘‘𑀅𑀦𑀺𑀘𑁆𑀘𑀲𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬, 𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄, 𑀫𑁂𑀖𑀺𑀬, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀺, 𑀅𑀦𑀢𑁆𑀢𑀲𑀜𑁆𑀜𑀻 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀺, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀜𑀸 𑀧𑀝𑀺𑀧𑀓𑁆𑀔𑀥𑀫𑁆𑀫𑀧𑁆𑀧𑀳𑀸𑀦𑀯𑀲𑁂𑀦𑁂𑀯 𑀤𑁂𑀲𑀺𑀢𑀸. 𑀢𑀲𑁆𑀫𑀸 𑀛𑀸𑀦𑀸𑀦𑀺 𑀤𑁂𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁨𑁬; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩) 𑀧𑀳𑀸𑀢𑀩𑁆𑀩𑀥𑀫𑁆𑀫𑀲𑀫𑀢𑀺𑀓𑁆𑀓𑀫𑀤𑀲𑁆𑀲𑀦𑀫𑀼𑀔𑁂𑀦𑁂𑀯 𑀤𑁂𑀲𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀸𑀫𑀸𑀤𑀺𑀯𑀺𑀯𑁂𑀓𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀧𑀻𑀢𑀺𑀯𑀺𑀭𑀸𑀕𑀲𑁄𑀫𑀦𑀲𑁆𑀲𑀢𑁆𑀣𑀗𑁆𑀕𑀫𑀫𑀼𑀔𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑁂𑀲𑀺𑀢𑀸𑀦𑀺, 𑀭𑀽𑀧𑀲𑀜𑁆𑀜𑀸𑀤𑀺𑀲𑀫𑀢𑀺𑀓𑁆𑀓𑀫𑀫𑀼𑀔𑁂𑀦 𑀅𑀭𑀽𑀧𑀚𑁆𑀛𑀸𑀦𑀸𑀦𑀻’’𑀢𑀺. 𑀢𑀢𑁆𑀣 𑀬𑀣𑀸 𑀭𑀽𑀧𑀸𑀯𑀘𑀭𑀁 𑀧𑀞𑀫𑀁 𑀛𑀸𑀦𑀁 𑀪𑀸𑀯𑀦𑀸𑀯𑀺𑀲𑁂𑀲𑀸𑀥𑀺𑀕𑀢𑁂𑀳𑀺 𑀯𑀺𑀢𑀓𑁆𑀓𑀸𑀤𑀻𑀳𑀺 𑀯𑀺𑀬 𑀲𑀤𑁆𑀥𑀸𑀤𑀻𑀳𑀺𑀧𑀺 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀲𑀪𑀸𑀯𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀦𑀻𑀯𑀭𑀡𑀸𑀦𑀁, 𑀢𑀤𑁂𑀓𑀝𑁆𑀞𑀸𑀦𑀜𑁆𑀘 𑀧𑀸𑀧𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀪𑀸𑀯𑀧𑁆𑀧𑀢𑁆𑀢𑀁 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀳𑀺 𑀲𑀡𑁆𑀳𑀲𑀼𑀔𑀼𑀫𑀁, 𑀲𑀦𑁆𑀢𑀁, 𑀧𑀡𑀻𑀢𑀜𑁆𑀘 𑀳𑁄𑀢𑀺; 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀧𑀦 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑀢𑁄 𑀢𑀢𑁄 𑀲𑀸𑀢𑀺𑀲𑀬𑀁 𑀲𑀡𑁆𑀳𑀲𑀼𑀔𑀼𑀫𑀲𑀡𑁆𑀳𑀲𑀼𑀔𑀼𑀫𑀢𑀭𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀅𑀭𑀽𑀧𑀸𑀯𑀘𑀭𑀁 𑀧𑀞𑀫𑀚𑁆𑀛𑀸𑀦𑀁 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀧𑀺 𑀅𑀗𑁆𑀕𑀲𑀦𑁆𑀢𑀢𑀸𑀬𑀧𑀺 𑀧𑀸𑀓𑀢𑀺𑀓𑀧𑀭𑀺𑀢𑁆𑀢𑀥𑀫𑁆𑀫𑁂𑀳𑀺 𑀯𑀺𑀬 𑀲𑀩𑁆𑀩𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀳𑀺 𑀲𑀦𑁆𑀢𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀆𑀭𑀫𑁆𑀫𑀡𑀲𑀦𑁆𑀢𑀪𑀸𑀯𑁂𑀦𑀸𑀧𑀺 𑀳𑀺 𑀢𑀤𑀸𑀭𑀫𑁆𑀫𑀡𑀥𑀫𑁆𑀫𑀸 𑀲𑀦𑁆𑀢𑀲𑀪𑀸𑀯𑀸 𑀳𑁄𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀭𑀫𑁆𑀫𑀡𑀸 𑀥𑀫𑁆𑀫𑀸.

𑀲𑀢𑀺𑀧𑀺 𑀥𑀫𑁆𑀫𑀢𑁄, 𑀫𑀳𑀕𑁆𑀕𑀢𑀪𑀸𑀯𑁂𑀦𑀸𑀧𑀺 𑀘 𑀅𑀪𑁂𑀤𑁂 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀢𑁄 𑀆𑀭𑀼𑀧𑁆𑀧𑀁 𑀅𑀗𑁆𑀕𑀢𑁄𑀧𑀺 𑀲𑀦𑁆𑀢𑀫𑁂𑀯, 𑀬𑀢𑀲𑁆𑀲 𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑀸 𑀯𑀼𑀢𑁆𑀢𑀸. 𑀤𑀼𑀢𑀺𑀬𑀸𑀭𑀼𑀧𑁆𑀧𑀸𑀤𑀻𑀦𑀺 𑀧𑀦 𑀧𑀞𑀫𑀸𑀭𑀼𑀧𑁆𑀧𑀸𑀤𑀺𑀢𑁄 𑀅𑀗𑁆𑀕𑀢𑁄, 𑀆𑀭𑀫𑁆𑀫𑀡𑀢𑁄 𑀘 𑀲𑀦𑁆𑀢𑀲𑀦𑁆𑀢𑀢𑀭𑀲𑀦𑁆𑀢𑀢𑀫𑀪𑀸𑀯𑀧𑁆𑀧𑀢𑁆𑀢𑀸𑀦𑀺 𑀢𑀣𑀸 𑀪𑀸𑀯𑀦𑀸𑀯𑀺𑀲𑁂𑀲𑀲𑀫𑀸𑀬𑁄𑀕𑀢𑁄, 𑀲𑁆𑀯𑀸𑀬𑀁 𑀪𑀸𑀯𑀦𑀸𑀯𑀺𑀲𑁂𑀲𑁄 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑀢𑁄 𑀧𑀝𑁆𑀞𑀸𑀬 𑀢𑀁𑀢𑀁𑀧𑀳𑀸𑀢𑀩𑁆𑀩𑀲𑀫𑀢𑀺𑀓𑁆𑀓𑀫𑀦𑀯𑀲𑁂𑀦 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲 𑀲𑀦𑁆𑀢𑀲𑀼𑀔𑀼𑀫𑀪𑀸𑀯𑀁 𑀆𑀧𑀸𑀤𑁂𑀦𑁆𑀢𑁄 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑁂 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀁 𑀧𑀸𑀧𑁂𑀢𑀺. 𑀬𑀢𑁄 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀁 𑀬𑀣𑀸 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀧𑀓𑀢𑀺𑀯𑀺𑀧𑀲𑁆𑀲𑀓𑀲𑁆𑀲𑀸𑀧𑀺 𑀦𑀺𑀩𑁆𑀩𑀺𑀤𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀦 𑀳𑁄𑀢𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀺𑀢𑁄, 𑀢𑀣𑀸 𑀲𑀬𑀁 𑀢𑀢𑀺𑀬𑀸𑀭𑀼𑀧𑁆𑀧𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀫𑀸𑀦𑀁 𑀢𑁂 𑀬𑀸𑀣𑀸𑀯𑀢𑁄 𑀯𑀺𑀪𑀸𑀯𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀬𑀣𑀸 𑀢𑀤𑀜𑁆𑀜𑀚𑁆𑀛𑀸𑀦𑀸𑀦𑀺 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀁. 𑀓𑁂𑀯𑀮𑀁 𑀧𑀦 𑀆𑀭𑀩𑁆𑀪 𑀧𑀯𑀢𑁆𑀢𑀺𑀫𑀢𑁆𑀢𑀫𑁂𑀯𑀲𑁆𑀲 𑀢𑀢𑁆𑀣 𑀳𑁄𑀢𑀺, 𑀢𑀬𑀺𑀤𑀁 𑀆𑀭𑀫𑁆𑀫𑀡𑀪𑀸𑀯𑁂𑀦𑀸𑀧𑀺 𑀦𑀸𑀫 𑀯𑀺𑀪𑀽𑀢𑀸𑀓𑀸𑀭𑀢𑀸𑀬 𑀞𑀸𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀁 𑀆𑀭𑀫𑁆𑀫𑀡𑀓𑀭𑀡𑁂 𑀓𑀺𑀁 𑀧𑀳𑁄𑀢𑀺. 𑀢𑀲𑁆𑀫𑀸 𑀢𑀤𑀲𑁆𑀲 𑀅𑀯𑀺𑀪𑀽𑀢𑀓𑀺𑀘𑁆𑀘𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸 𑀳𑁂𑀝𑁆𑀞𑀸 𑀢𑀻𑀲𑀼 𑀞𑀸𑀦𑁂𑀲𑀼 𑀪𑀸𑀯𑀦𑀸𑀓𑀸𑀭𑀁 𑀯𑀢𑁆𑀯𑀸 𑀢𑀸𑀤𑀺𑀲𑁄 𑀇𑀥 𑀦 𑀮𑀩𑁆𑀪𑀢𑀻𑀢𑀺 𑀤𑀻𑀧𑁂𑀢𑀼𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀤𑁂𑀲𑀦𑀸𑀬𑀁 𑀲𑀼𑀢𑁆𑀢𑁂 𑀪𑀸𑀯𑀦𑀸𑀓𑀸𑀭𑀁 𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀦 𑀓𑀣𑁂𑀲𑀺.

𑀬𑀲𑁆𑀫𑀸 𑀧𑀦 𑀲𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀆𑀓𑀸𑀭𑁄 𑀅𑀢𑁆𑀣𑁂𑀯𑀸𑀢𑀺 𑀅𑀢𑀺𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁𑀬𑁂𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀻’’𑀢𑀺 (𑀯𑀺𑀪. 𑁬𑁧𑁯) 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁 𑀬𑀣𑀸𑀥𑀫𑁆𑀫𑀲𑀸𑀲𑀦𑀪𑀸𑀯𑀢𑁄, 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀯𑀸 𑀯𑀺𑀪𑀗𑁆𑀕𑁂 ‘‘𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁 𑀢𑀤𑀸 𑀬𑁄𑀕𑀺𑀦𑁄 𑀢𑀲𑁆𑀲 𑀯𑀺𑀪𑀽𑀢𑀪𑀸𑀯𑀢𑁄. 𑀅𑀧𑁆𑀧𑀦𑀸𑀯𑀲𑁂𑀦 𑀧𑀦 𑀲𑀼𑀢𑁆𑀢𑁂 𑀪𑀸𑀯𑀦𑀸𑀓𑀸𑀭𑁄 𑀦 𑀕𑀳𑀺𑀢𑁄 𑀅𑀯𑀺𑀪𑀽𑀢𑀪𑀸𑀯𑀢𑁄. 𑀓𑀫𑁆𑀫𑀝𑁆𑀞𑀸𑀦𑀁 𑀳𑀺 𑀓𑀺𑀜𑁆𑀘𑀺 𑀆𑀤𑀺𑀢𑁄 𑀅𑀯𑀺𑀪𑀽𑀢𑀁 𑀳𑁄𑀢𑀺, 𑀬𑀣𑀸 𑀢𑀁? 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀺. 𑀓𑀺𑀜𑁆𑀘𑀺 𑀫𑀚𑁆𑀛𑁂, 𑀬𑀣𑀸 𑀢𑀁? 𑀆𑀦𑀸𑀧𑀸𑀦𑀲𑁆𑀲𑀢𑀺. 𑀓𑀺𑀜𑁆𑀘𑀺 𑀉𑀪𑀬𑀢𑁆𑀣, 𑀬𑀣𑀸 𑀢𑀁? 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀆𑀤𑀺. 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀓𑀫𑁆𑀫𑀝𑁆𑀞𑀸𑀦𑀁 𑀧𑀦 𑀧𑀭𑀺𑀬𑁄𑀲𑀸𑀦𑁂 𑀅𑀯𑀺𑀪𑀽𑀢𑀁 𑀪𑀸𑀯𑀦𑀸𑀬 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀁 𑀆𑀭𑀫𑁆𑀫𑀡𑀲𑁆𑀲 𑀅𑀯𑀺𑀪𑀽𑀢𑀪𑀸𑀯𑀢𑁄. 𑀢𑀲𑁆𑀫𑀸 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑁂 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀲𑀢𑁆𑀣𑀸𑀭𑀸 𑀲𑀼𑀢𑁆𑀢𑁂 𑀪𑀸𑀯𑀦𑀸𑀓𑀸𑀭𑁄 𑀦 𑀕𑀳𑀺𑀢𑁄, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀢𑁄𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑁨𑁮𑁮. 𑀅𑀲𑀤𑀺𑀲𑀭𑀽𑀧𑁄𑀢𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀓𑁂𑀢𑀼𑀫𑀸𑀮𑀸𑀤𑀻𑀳𑀺 𑀭𑀽𑀧𑀕𑀼𑀡𑁂𑀳𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀭𑀽𑀧𑀓𑀸𑀬𑁄, 𑀲𑀪𑀸𑀯𑀢𑁆𑀣𑁄 𑀯𑀸 𑀭𑀽𑀧-𑀲𑀤𑁆𑀤𑁄 ‘‘𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩; 𑀯𑀺𑀪. 𑁨𑁦𑁩) 𑀯𑀺𑀬. 𑀢𑀲𑁆𑀫𑀸 𑀅𑀲𑀤𑀺𑀲𑀭𑀽𑀧𑁄𑀢𑀺 𑀅𑀲𑀤𑀺𑀲𑀲𑀪𑀸𑀯𑁄, 𑀢𑁂𑀦 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑀸𑀬𑁄𑀕𑀤𑀻𑀧𑀦𑀢𑁄 𑀲𑀢𑁆𑀣𑀼 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀅𑀲𑀤𑀺𑀲𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀢𑀲𑁆𑀫𑀺𑀦𑁆𑀢𑀺 𑀆𑀭𑀼𑀧𑁆𑀧𑁂. 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀅𑀲𑀸𑀥𑀸𑀭𑀡𑀁 𑀢𑀢𑁆𑀣 𑀢𑀢𑁆𑀣 𑀛𑀸𑀦𑁂 𑀧𑀢𑀺𑀦𑀺𑀬𑀢𑀫𑁂𑀯 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀸𑀥𑀸𑀭𑀡𑀪𑀸𑀯𑀢𑁄 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀓𑀺𑀡𑁆𑀡𑀓𑀁 𑀯𑀺𑀲𑀝𑀁 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀚𑀸𑀦𑀺𑀢𑀩𑁆𑀩𑀸.

𑁨𑁮𑁯. 𑀭𑀽𑀧𑀦𑀺𑀫𑀺𑀢𑁆𑀢𑀸𑀢𑀺𑀓𑁆𑀓𑀫𑀢𑁄𑀢𑀺 𑀓𑀲𑀺𑀡𑀭𑀽𑀧𑀲𑀗𑁆𑀔𑀸𑀢𑀲𑁆𑀲 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲 𑀅𑀢𑀺𑀓𑁆𑀓𑀫𑀦𑀢𑁄. 𑀆𑀓𑀸𑀲𑀸𑀢𑀺𑀓𑁆𑀓𑀫𑀢𑁄𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀲𑁆𑀲 𑀅𑀢𑀺𑀓𑁆𑀓𑀫𑀦𑀢𑁄. 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀸𑀢𑀺𑀓𑁆𑀓𑀫𑀢𑁄𑀢𑀺 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑀺𑀓𑁆𑀓𑀫𑀦𑀢𑁄, 𑀦 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀢𑀺𑀓𑁆𑀓𑀫𑀦𑀢𑁄. 𑀢𑀤𑀢𑀺𑀓𑁆𑀓𑀫𑀢𑁄 𑀳𑀺 𑀢𑀲𑁆𑀲𑁂𑀯 𑀯𑀺𑀪𑀸𑀯𑀦𑀁 𑀳𑁄𑀢𑀺. 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀯𑀺𑀪𑀸𑀯𑀦𑁂 𑀳𑀺 𑀢𑀤𑁂𑀯 𑀅𑀢𑀺𑀓𑁆𑀓𑀦𑁆𑀢𑀁 𑀲𑀺𑀬𑀸, 𑀦 𑀢𑀲𑁆𑀲 𑀆𑀭𑀫𑁆𑀫𑀡𑀁, 𑀦 𑀘 𑀆𑀭𑀫𑁆𑀫𑀡𑁂 𑀤𑁄𑀲𑀁 𑀤𑀺𑀲𑁆𑀯𑀸 𑀅𑀦𑀸𑀭𑀫𑁆𑀫𑀡𑀲𑁆𑀲 𑀯𑀺𑀪𑀸𑀯𑀦𑀸𑀢𑀺𑀓𑁆𑀓𑀫𑁄 𑀬𑀼𑀚𑁆𑀚𑀢𑀺. 𑀧𑀸𑀴𑀺𑀬𑀜𑁆𑀘 ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀢𑁄 𑀲𑀫𑀸𑀧𑀚𑁆𑀚𑀢𑀺…𑀧𑁂… 𑀲𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀁𑀬𑁂𑀯 𑀯𑀺𑀜𑁆𑀜𑀸𑀡𑀁 𑀅𑀪𑀸𑀯𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀢𑀁𑀬𑁂𑀯 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀅𑀪𑀸𑀯𑁂𑀢𑀻’’𑀢𑀺, ‘‘𑀢𑀁𑀬𑁂𑀯 𑀅𑀪𑀸𑀯𑁂𑀢𑀻’’𑀢𑀺 𑀯𑀸. ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚𑀸’’𑀢𑀺 𑀏𑀢𑁆𑀣 𑀧𑀦 𑀤𑁆𑀯𑀬𑀁 𑀯𑀼𑀢𑁆𑀢𑀁 𑀆𑀭𑀫𑁆𑀫𑀡𑀜𑁆𑀘 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀜𑁆𑀘. 𑀢𑀲𑁆𑀫𑀺𑀁 𑀤𑁆𑀯𑀬𑁂 𑀬𑁂𑀦 𑀓𑁂𑀦𑀘𑀺, 𑀬𑀢𑁄 𑀯𑀸 𑀯𑀼𑀝𑁆𑀞𑀺𑀢𑁄, 𑀢𑁂𑀦𑁂𑀯 𑀧𑀥𑀸𑀦𑀦𑀺𑀤𑁆𑀤𑀺𑀝𑁆𑀞𑁂𑀦 𑀢𑀁-𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑁂 𑀆𑀧𑀦𑁆𑀦𑁂 ‘‘𑀅𑀬𑀜𑁆𑀘 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀪𑀸𑀯𑀦𑀸’’𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀺𑀜𑁆𑀜𑀸𑀡𑀯𑀘𑀦𑀁. 𑀢𑀲𑁆𑀫𑀸 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀅𑀪𑀸𑀯𑀦𑀸𑀢𑀺𑀓𑁆𑀓𑀫𑁄 𑀯𑀼𑀢𑁆𑀢𑁄.

𑁨𑁯𑁦. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀅𑀗𑁆𑀕𑀸𑀢𑀺𑀓𑁆𑀓𑀫𑁂 𑀅𑀲𑀢𑀺𑀧𑀺. 𑀲𑀼𑀧𑁆𑀧𑀡𑀻𑀢𑀢𑀭𑀸𑀢𑀺 𑀲𑀼𑀝𑁆𑀞𑀼 𑀧𑀡𑀻𑀢𑀢𑀭𑀸, 𑀲𑀼𑀦𑁆𑀤𑀭𑀸 𑀧𑀡𑀻𑀢𑀢𑀭𑀸 𑀘𑀸𑀢𑀺 𑀯𑀸 𑀅𑀢𑁆𑀣𑁄. 𑀲𑀢𑀺𑀧𑀺 𑀘𑀢𑀼𑀦𑁆𑀦𑀁 𑀧𑀸𑀲𑀸𑀤𑀢𑀮𑀸𑀦𑀁, 𑀲𑀸𑀝𑀺𑀓𑀸𑀦𑀜𑁆𑀘 𑀢𑀩𑁆𑀪𑀸𑀯𑀢𑁄, 𑀧𑀫𑀸𑀡𑀢𑁄 𑀘 𑀲𑀫𑀪𑀸𑀯𑁂 𑀉𑀧𑀭𑀽𑀧𑀭𑀺 𑀧𑀦 𑀓𑀸𑀫𑀕𑀼𑀡𑀸𑀦𑀁, 𑀲𑀼𑀔𑀲𑀫𑁆𑀨𑀲𑁆𑀲𑀸𑀤𑀻𑀦𑀜𑁆𑀘 𑀯𑀺𑀲𑁂𑀲𑁂𑀦 𑀧𑀡𑀻𑀢𑀢𑀭𑀸𑀤𑀺𑀪𑀸𑀯𑁄 𑀯𑀺𑀬 𑀏𑀢𑀸𑀲𑀁 𑀘𑀢𑀼𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀆𑀭𑀼𑀧𑁆𑀧𑀪𑀸𑀯𑀢𑁄, 𑀅𑀗𑁆𑀕𑀢𑁄 𑀘 𑀲𑀢𑀺𑀧𑀺 𑀲𑀫𑀪𑀸𑀯𑁂 𑀪𑀸𑀯𑀦𑀸𑀯𑀺𑀲𑁂𑀲𑀲𑀺𑀤𑁆𑀥𑁄 𑀧𑀦 𑀲𑀸𑀢𑀺𑀲𑀬𑁄 𑀉𑀧𑀭𑀽𑀧𑀭𑀺 𑀧𑀡𑀻𑀢𑀢𑀭𑀸𑀤𑀺𑀪𑀸𑀯𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀦𑀸.

𑁨𑁯𑁧. 𑀦𑀺𑀲𑁆𑀲𑀺𑀢𑁄𑀢𑀺 𑀦𑀺𑀲𑁆𑀲𑀸𑀬 𑀞𑀺𑀢𑁄. 𑀤𑀼𑀝𑁆𑀞𑀺𑀢𑀸𑀢𑀺 𑀦 𑀲𑀫𑁆𑀫𑀸 𑀞𑀺𑀢𑀸, 𑀤𑀼𑀓𑁆𑀔𑀁 𑀯𑀸 𑀞𑀺𑀢𑀸. 𑀢𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀢𑁂𑀦 𑀦𑀺𑀲𑁆𑀲𑀺𑀢𑀁, 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀸 𑀢𑀁 𑀫𑀡𑁆𑀟𑀧𑀮𑀕𑁆𑀕𑀁 𑀧𑀼𑀭𑀺𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁 𑀧𑀼𑀭𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀫𑀡𑁆𑀟𑀧𑀮𑀕𑁆𑀕𑀜𑁆𑀳𑀺 𑀅𑀦𑀺𑀲𑁆𑀲𑀸𑀬 𑀢𑁂𑀦 𑀯𑀺𑀦𑀸𑀪𑀽𑀢𑁂 𑀯𑀺𑀯𑀺𑀢𑁆𑀢𑁂 𑀩𑀳𑀺 𑀑𑀓𑀸𑀲𑁂 𑀞𑀸𑀦𑀁 𑀯𑀺𑀬 𑀆𑀓𑀸𑀲𑀮𑀕𑁆𑀕𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀯𑁂𑀓𑁂 𑀢𑀤𑀧𑀕𑀫𑁂 𑀢𑀢𑀺𑀬𑀸𑀭𑀼𑀧𑁆𑀧𑀲𑁆𑀲 𑀞𑀸𑀦𑀦𑁆𑀢𑀺.

𑁨𑁯𑁨. 𑀆𑀭𑀫𑁆𑀫𑀡𑀁 𑀓𑀭𑁄𑀢𑁂𑀯, 𑀅𑀜𑁆𑀜𑀸𑀪𑀸𑀯𑁂𑀦 𑀢𑀁 𑀇𑀤𑀦𑁆𑀢𑀺 ‘‘𑀆𑀲𑀦𑁆𑀦𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀧𑀘𑁆𑀘𑀢𑁆𑀣𑀺𑀓𑀭𑀽𑀧𑀸𑀲𑀦𑁆𑀦𑀸𑀓𑀸𑀲𑀸𑀭𑀫𑁆𑀫𑀡𑀯𑀺𑀜𑁆𑀜𑀸𑀡𑀸𑀧𑀕𑀫𑀸𑀭𑀫𑁆𑀫𑀡𑀁, 𑀦𑁄 𑀘 𑀲𑀦𑁆𑀢’’𑀦𑁆𑀢𑀺 𑀘 𑀤𑀺𑀝𑁆𑀞𑀸𑀤𑀻𑀦𑀯𑀫𑁆𑀧𑀺 𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀇𑀤𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀁 𑀅𑀜𑁆𑀜𑀲𑁆𑀲 𑀢𑀸𑀤𑀺𑀲𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑀬𑁄𑀕𑁆𑀬𑀲𑁆𑀲 𑀅𑀪𑀸𑀯𑁂𑀦 𑀅𑀮𑀸𑀪𑁂𑀦 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺 𑀏𑀯. ‘‘𑀲𑀩𑁆𑀩𑀤𑀺𑀲𑀫𑁆𑀧𑀢𑀺’’𑀦𑁆𑀢𑀺 𑀇𑀤𑀁 𑀚𑀦𑀲𑁆𑀲 𑀅𑀕𑀢𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀺𑀦𑁆𑀢𑀺 𑀚𑀻𑀯𑀺𑀓𑀁. 𑀯𑀢𑁆𑀢𑀢𑀻𑀢𑀺 𑀚𑀻𑀯𑀢𑀺.

𑁨𑁯𑁩. 𑀆𑀭𑀼𑀴𑁆𑀳𑁄𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀓𑁄𑀘𑀺 𑀧𑀼𑀭𑀺𑀲𑁄 𑀅𑀦𑁂𑀓𑀧𑁄𑀭𑀺𑀲𑀁 𑀤𑀻𑀖𑀦𑀺𑀲𑁆𑀲𑁂𑀡𑀺𑀁 𑀆𑀭𑀼𑀴𑁆𑀳𑁄 𑀢𑀲𑁆𑀲 𑀉𑀧𑀭𑀺𑀫𑀧𑀤𑁂 𑀞𑀺𑀢𑁄 𑀢𑀲𑁆𑀲𑀸 𑀦𑀺𑀲𑁆𑀲𑁂𑀡𑀺𑀬𑀸 𑀩𑀸𑀳𑀼𑀫𑁂𑀯 𑀑𑀮𑀼𑀩𑁆𑀪𑀢𑀺 𑀅𑀜𑁆𑀜𑀲𑁆𑀲 𑀅𑀮𑀸𑀪𑀢𑁄, 𑀬𑀣𑀸 𑀘 𑀧𑀁𑀲𑀼𑀧𑀩𑁆𑀩𑀢𑀲𑁆𑀲, 𑀫𑀺𑀲𑁆𑀲𑀓𑀧𑀩𑁆𑀩𑀢𑀲𑁆𑀲 𑀯𑀸 𑀅𑀕𑁆𑀕𑀓𑁄𑀝𑀺𑀁 𑀆𑀭𑀼𑀴𑁆𑀳𑁄 𑀢𑀲𑁆𑀲 𑀫𑀢𑁆𑀣𑀓𑀫𑁂𑀯 𑀑𑀮𑀼𑀩𑁆𑀪𑀢𑀺, 𑀬𑀣𑀸 𑀘 𑀕𑀺𑀭𑀺𑀁 𑀲𑀺𑀮𑀸𑀧𑀩𑁆𑀩𑀢𑀁 𑀆𑀭𑀼𑀴𑁆𑀳𑁄 𑀧𑀭𑀺𑀧𑁆𑀨𑀦𑁆𑀤𑀫𑀸𑀦𑁄 𑀅𑀜𑁆𑀜𑀸𑀪𑀸𑀯𑀢𑁄 𑀅𑀢𑁆𑀢𑀦𑁄 𑀚𑀡𑁆𑀡𑀼𑀓𑀫𑁂𑀯 𑀑𑀮𑀼𑀩𑁆𑀪𑀢𑀺, 𑀢𑀣𑀸 𑀏𑀢𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑁆𑀛𑀸𑀦𑀁 𑀢𑀁 𑀢𑀢𑀺𑀬𑀸𑀭𑀼𑀧𑁆𑀧𑀁 𑀑𑀮𑀼𑀩𑁆𑀪𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀉𑀢𑁆𑀢𑀸𑀦𑀫𑁂𑀯.

𑀆𑀭𑀼𑀧𑁆𑀧𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀤𑀲𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.