𑁧𑁧. 𑀲𑀫𑀸𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀆𑀳𑀸𑀭𑁂𑀧𑀝𑀺𑀓𑁆𑀓𑀽𑀮𑀪𑀸𑀯𑀦𑀸𑀯𑀡𑁆𑀡𑀦𑀸

𑁨𑁯𑁪. 𑀉𑀤𑁆𑀤𑁂𑀲𑁄 𑀦𑀸𑀫 𑀦𑀺𑀤𑁆𑀤𑁂𑀲𑀢𑁆𑀣𑁄 𑀫𑀼𑀤𑀼𑀫𑀚𑁆𑀛𑀺𑀫𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀢𑁄, 𑀆𑀕𑀢𑁄 𑀘 𑀪𑀸𑀭𑁄 𑀅𑀯𑀲𑁆𑀲𑀁 𑀯𑀳𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀓𑀸 𑀲𑀜𑁆𑀜𑀸𑀢𑀺 𑀏𑀯𑀁 𑀉𑀤𑁆𑀤𑀺𑀝𑁆𑀞𑀸𑀬 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀬 𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀢𑀢𑁆𑀣𑀸𑀬𑀁 𑀲𑀜𑁆𑀜𑀸-𑀲𑀤𑁆𑀤𑁄 ‘‘𑀭𑀽𑀧𑀲𑀜𑁆𑀜𑀸 𑀲𑀤𑁆𑀤𑀲𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁧𑁪) 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑁂 𑀥𑀫𑁆𑀫𑁂 𑀆𑀕𑀢𑁄, ‘‘𑀅𑀦𑀺𑀘𑁆𑀘𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸’’𑀢𑀺𑀆𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀬𑀁 𑀆𑀕𑀢𑁄, ‘‘𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀢𑀺 𑀯𑀸 𑀲𑁄𑀧𑀸𑀓𑀭𑀽𑀧𑀲𑀜𑁆𑀜𑀸𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀉𑀤𑀸𑀳𑀼 𑀦𑀸𑀦𑀢𑁆𑀣𑀸’’𑀢𑀺𑀆𑀤𑀻𑀲𑀼 𑀲𑀫𑀣𑁂 𑀆𑀕𑀢𑁄. 𑀇𑀥 𑀧𑀦 𑀲𑀫𑀣𑀲𑁆𑀲 𑀧𑀭𑀺𑀓𑀫𑁆𑀫𑁂 𑀤𑀝𑁆𑀞𑀩𑁆𑀩𑁄. 𑀆𑀳𑀸𑀭𑁂 𑀳𑀺 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀕𑁆𑀕𑀳𑀡𑀁, 𑀢𑀧𑁆𑀧𑀪𑀸𑀯𑀺𑀢𑀁 𑀯𑀸 𑀉𑀧𑀘𑀸𑀭𑀚𑁆𑀛𑀸𑀦𑀁 𑀇𑀥 ‘‘𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣 𑀬𑀲𑁆𑀫𑀺𑀁 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸, 𑀢𑀢𑁆𑀣 𑀦𑀺𑀩𑁆𑀩𑁂𑀤𑀯𑀺𑀭𑀸𑀕𑀼𑀧𑁆𑀧𑀸𑀤𑀦𑀸𑀬 𑀢𑀧𑁆𑀧𑀲𑀗𑁆𑀕𑁂𑀦 𑀲𑀩𑁆𑀩𑀫𑁆𑀧𑀺 𑀆𑀳𑀸𑀭𑀁 𑀓𑀺𑀘𑁆𑀘𑀧𑁆𑀧𑀪𑁂𑀤𑀸𑀤𑀻𑀦𑀯𑁄𑀧𑀫𑁆𑀫𑁂𑀳𑀺 𑀯𑀺𑀪𑀸𑀯𑁂𑀢𑀼𑀁 ‘‘𑀆𑀳𑀭𑀢𑀻𑀢𑀺 𑀆𑀳𑀸𑀭𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀆𑀳𑀭𑀢𑀻𑀢𑀺 𑀆𑀳𑀸𑀭𑀧𑀘𑁆𑀘𑀬𑀲𑀗𑁆𑀔𑀸𑀢𑁂𑀦 𑀉𑀧𑁆𑀧𑀢𑁆𑀢𑀺𑀬𑀸, 𑀞𑀺𑀢𑀺𑀬𑀸 𑀯𑀸 𑀧𑀘𑁆𑀘𑀬𑀪𑀸𑀯𑁂𑀦 𑀅𑀢𑁆𑀢𑀦𑁄 𑀨𑀮𑀁 𑀆𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 𑀧𑀯𑀢𑁆𑀢𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀓𑀩𑀴𑀁 𑀓𑀭𑀻𑀬𑀢𑀻𑀢𑀺 𑀓𑀩𑀴𑀻𑀓𑀸𑀭𑁄, 𑀯𑀢𑁆𑀣𑀼𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀮𑀓𑁆𑀔𑀡𑀢𑁄 𑀧𑀦 𑀑𑀚𑀸𑀮𑀓𑁆𑀔𑀡𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀩𑀴𑀻𑀓𑀸𑀭𑁄 𑀘 𑀲𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀆𑀳𑀸𑀭𑁄 𑀘𑀸𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀅𑀬𑀁 𑀳𑀺 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀲𑁄 𑀨𑀼𑀲𑀦𑀮𑀓𑁆𑀔𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀘𑁂𑀢𑀬𑀢𑀻𑀢𑀺 𑀘𑁂𑀢𑀦𑀸, 𑀅𑀢𑁆𑀢𑀦𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀆𑀭𑀫𑁆𑀫𑀡𑁂 𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀅𑀢𑁆𑀣𑁄, 𑀫𑀦𑁄𑀲𑀦𑁆𑀦𑀺𑀲𑁆𑀲𑀺𑀢𑀸 𑀘𑁂𑀢𑀦𑀸 𑀫𑀦𑁄𑀲𑀜𑁆𑀘𑁂𑀢𑀦𑀸. 𑀉𑀧𑀧𑀢𑁆𑀢𑀺𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁. 𑀏𑀯𑀫𑁂𑀢𑁆𑀣 𑀲𑀸𑀫𑀜𑁆𑀜𑀢𑁆𑀣𑀢𑁄, 𑀯𑀺𑀲𑁂𑀲𑀢𑁆𑀣𑀢𑁄 𑀘 𑀆𑀳𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀲𑁆𑀫𑀸 𑀧𑀦𑁂𑀢𑁂 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸, 𑀅𑀜𑁆𑀜𑁂 𑀥𑀫𑁆𑀫𑀸 𑀓𑀺𑀁 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺? 𑀦𑁄 𑀦 𑀳𑁄𑀦𑁆𑀢𑀺, 𑀇𑀫𑁂 𑀧𑀦 𑀢𑀣𑀸 𑀘 𑀳𑁄𑀦𑁆𑀢𑀺 𑀅𑀜𑁆𑀜𑀣𑀸 𑀘𑀸𑀢𑀺 𑀲𑀫𑀸𑀦𑁂𑀧𑀺 𑀧𑀘𑁆𑀘𑀬𑀪𑀸𑀯𑁂 𑀅𑀢𑀺𑀭𑁂𑀓𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀓𑀣𑀁? 𑀏𑀢𑁂𑀲𑀼 𑀳𑀺 𑀧𑀞𑀫𑁄 𑀲𑀬𑀁 𑀬𑀲𑁆𑀫𑀺𑀁 𑀓𑀮𑀸𑀧𑁂 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀬𑀣𑀸𑀭𑀳𑀁 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄𑀯 𑀑𑀚𑀝𑁆𑀞𑀫𑀓𑀁 𑀭𑀽𑀧𑀁 𑀆𑀳𑀭𑀢𑀺, 𑀤𑀼𑀢𑀺𑀬𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀳𑀭𑀢𑀺, 𑀢𑀢𑀺𑀬𑁄 𑀢𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀆𑀳𑀭𑀢𑀺, 𑀘𑀢𑀼𑀢𑁆𑀣𑁄 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀆𑀳𑀭𑀢𑀺. 𑀢𑁂𑀦𑀸𑀳 ‘‘𑀓𑀩𑀴𑀻𑀓𑀸𑀭𑀸𑀳𑀸𑀭𑁄’’𑀢𑀺𑀆𑀤𑀺. 𑀏𑀢𑁆𑀣 𑀘 𑀓𑀫𑁆𑀫𑀚𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀑𑀚𑀸 𑀲𑀢𑀺 𑀧𑀘𑁆𑀘𑀬𑀮𑀸𑀪𑁂 𑀤𑁆𑀯𑁂 𑀢𑀺𑀲𑁆𑀲𑁄 𑀧𑀯𑁂𑀡𑀺𑀬𑁄 𑀖𑀝𑁂𑀦𑁆𑀢𑀻 𑀑𑀚𑀝𑁆𑀞𑀫𑀓𑀭𑀽𑀧𑀁 𑀆𑀳𑀭𑀢𑀺, 𑀲𑀼𑀔𑀯𑁂𑀤𑀦𑀻𑀬𑀸𑀤𑀺𑀪𑁂𑀤𑀪𑀺𑀦𑁆𑀦𑁄 𑀨𑀲𑁆𑀲𑀸𑀳𑀸𑀭𑁄 𑀬𑀣𑀸𑀭𑀳𑀁 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀳𑀭𑀢𑀺, 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀪𑁂𑀤𑀪𑀺𑀦𑁆𑀦𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀓𑀸𑀫𑀪𑀯𑀸𑀤𑀻𑀲𑀼 𑀢𑀻𑀲𑀼 𑀪𑀯𑁂𑀲𑀼 𑀬𑀣𑀸𑀭𑀳𑀁 𑀲𑀯𑀺𑀜𑁆𑀜𑀸𑀡𑀁, 𑀅𑀯𑀺𑀜𑁆𑀜𑀸𑀡𑀜𑁆𑀘 𑀧𑀝𑀺𑀲𑀦𑁆𑀥𑀺𑀁 𑀆𑀳𑀭𑀢𑀺, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀬𑀣𑀸𑀧𑀘𑁆𑀘𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀦𑀸𑀫𑀁 𑀭𑀽𑀧𑀁, 𑀦𑀸𑀫𑀭𑀽𑀧𑀜𑁆𑀘 𑀆𑀳𑀭𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀇𑀫𑁂 𑀏𑀯 𑀥𑀫𑁆𑀫𑀸 𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀭𑀽𑀧𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀧𑀘𑁆𑀘𑀬𑁄, 𑀏𑀯𑀁 𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁫). 𑀅𑀧𑀭𑁄 𑀦𑀬𑁄 𑁋 𑀅𑀚𑁆𑀛𑀢𑁆𑀢𑀺𑀓𑀲𑀦𑁆𑀢𑀢𑀺𑀬𑀸 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑁄, 𑀨𑀲𑁆𑀲𑀸𑀤𑀬𑁄 𑀘 𑀢𑀬𑁄 𑀥𑀫𑁆𑀫𑀸 𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸. 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀁 𑀲𑀢𑁆𑀢𑀸𑀦𑀁 𑀭𑀽𑀧𑀓𑀸𑀬𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑁄, 𑀦𑀸𑀫𑀓𑀸𑀬𑁂 𑀯𑁂𑀤𑀦𑀸𑀬 𑀨𑀲𑁆𑀲𑁄, 𑀯𑀺𑀜𑁆𑀜𑀸𑀡𑀲𑁆𑀲 𑀫𑀦𑁄𑀲𑀜𑁆𑀘𑁂𑀢𑀦𑀸, 𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁. 𑀬𑀣𑀸𑀳 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀓𑀸𑀬𑁄 𑀆𑀳𑀸𑀭𑀝𑁆𑀞𑀺𑀢𑀺𑀓𑁄, 𑀆𑀳𑀸𑀭𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺, 𑀅𑀦𑀸𑀳𑀸𑀭𑁄 𑀦𑁄 𑀢𑀺𑀝𑁆𑀞𑀢𑀺 (𑀲𑀁. 𑀦𑀺. 𑁫.𑁧𑁮𑁩). 𑀢𑀣𑀸 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 (𑀉𑀤𑀸. 𑁧; 𑀫𑀳𑀸𑀯. 𑁧; 𑀦𑁂𑀢𑁆𑀢𑀺. 𑁨𑁪).

𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀢𑀺 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀢𑀁 𑀪𑀬𑀁 𑀅𑀦𑀢𑁆𑀣𑀸𑀯𑀳𑀢𑁄. 𑀕𑀥𑀺𑀢𑀲𑁆𑀲 𑀳𑀺 𑀆𑀳𑀸𑀭𑀧𑀭𑀺𑀪𑁄𑀕𑁄 𑀅𑀦𑀢𑁆𑀣𑀸𑀬 𑀳𑁄𑀢𑀺. 𑀳𑁂𑀢𑀼𑀅𑀢𑁆𑀣𑁂 𑀪𑀼𑀫𑁆𑀫𑀁. 𑀏𑀯𑀁 𑀲𑁂𑀲𑁂𑀲𑀼. 𑀦𑀺𑀓𑀦𑁆𑀢𑀻𑀢𑀺 𑀦𑀺𑀓𑀸𑀫𑀦𑀸 𑀙𑀦𑁆𑀤𑀭𑀸𑀕𑁄. 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀦𑀺𑀓𑀦𑁆𑀢𑀺 𑀏𑀯 𑀪𑀬𑀁 𑀦𑀺𑀓𑀦𑁆𑀢𑀺𑀪𑀬𑀁. 𑀓𑀩𑀴𑀻𑀓𑀸𑀭𑀸𑀳𑀸𑀭𑀳𑁂𑀢𑀼 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀙𑀦𑁆𑀤𑀭𑀸𑀕𑁄 𑀪𑀬𑀁 𑀪𑀬𑀸𑀦𑀓𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀲𑁆𑀲 𑀅𑀦𑀢𑁆𑀣𑀲𑁆𑀲 𑀲𑀓𑀮𑀲𑁆𑀲𑀸𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀳𑁂𑀢𑀼𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀓𑀩𑀴𑀻𑀓𑀸𑀭𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄, 𑀅𑀢𑁆𑀣𑀺 𑀦𑀦𑁆𑀤𑀻, 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀴𑁆𑀳’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁬𑁪; 𑀓𑀣𑀸. 𑁨𑁯𑁬; 𑀫𑀳𑀸𑀦𑀺. 𑁭). 𑀉𑀧𑀕𑀫𑀦𑀁 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀲𑁆𑀲 𑀆𑀭𑀫𑁆𑀫𑀡𑁂𑀦 𑀲𑀫𑁄𑀥𑀸𑀦𑀁 𑀲𑀗𑁆𑀕𑀢𑀺 𑀲𑀼𑀔𑀯𑁂𑀤𑀦𑀻𑀬𑀸𑀤𑀺𑀨𑀲𑁆𑀲𑀼𑀧𑁆𑀧𑀢𑁆𑀢𑀺 𑀪𑀬𑀁 𑀪𑀬𑀸𑀦𑀓𑀁 𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀺 𑀅𑀧𑀭𑀺𑀫𑀼𑀘𑁆𑀘𑀦𑀢𑁄. 𑀢𑁂𑀦𑀸𑀳 ‘‘𑀲𑀼𑀔𑀯𑁂𑀤𑀦𑀻𑀬𑀁, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀸 𑀯𑁂𑀤𑀦𑀸 (𑀲𑀁. 𑀦𑀺. 𑁪.𑁧𑁨𑁯), 𑀢𑀲𑁆𑀲 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸…𑀧𑁂… 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 (𑀉𑀤𑀸. 𑁧). 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀉𑀧𑀧𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀉𑀧𑀧𑀢𑁆𑀢𑀺, 𑀉𑀧𑀧𑀚𑁆𑀚𑀦𑀁 𑀯𑀸 𑀉𑀧𑀧𑀢𑁆𑀢𑀺, 𑀔𑀺𑀧𑀦𑀁 𑀪𑀬𑀁 𑀪𑀬𑀸𑀦𑀓𑀁 𑀉𑀧𑀧𑀢𑁆𑀢𑀺𑀫𑀽𑀮𑀓𑁂𑀳𑀺 𑀩𑁆𑀬𑀲𑀦𑁂𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑁄. 𑀢𑁂𑀦𑀸𑀳 ‘‘𑀅𑀯𑀺𑀤𑁆𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀼𑀜𑁆𑀜𑀜𑁆𑀘𑁂 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀧𑀼𑀜𑁆𑀜𑀼𑀧𑀕𑀁 𑀪𑀯𑀢𑀺 𑀯𑀺𑀜𑁆𑀜𑀸𑀡𑀁. 𑀅𑀧𑀼𑀜𑁆𑀜𑀜𑁆𑀘𑁂 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀧𑀼𑀜𑁆𑀜𑀼𑀧𑀕𑀁 𑀪𑀯𑀢𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁫𑁧). 𑀧𑀝𑀺𑀲𑀦𑁆𑀥𑀻𑀢𑀺 𑀪𑀯𑀦𑁆𑀢𑀭𑀸𑀤𑀻𑀳𑀺 𑀧𑀝𑀺𑀲𑀦𑁆𑀥𑀸𑀦𑀁, 𑀢𑀁 𑀪𑀬𑀁 𑀪𑀬𑀸𑀦𑀓𑀁 𑀧𑀝𑀺𑀲𑀦𑁆𑀥𑀺𑀦𑀺𑀫𑀺𑀢𑁆𑀢𑁂𑀳𑀺 𑀤𑀼𑀓𑁆𑀔𑁂𑀳𑀺 𑀅𑀯𑀺𑀫𑀼𑀘𑁆𑀘𑀦𑀢𑁄. 𑀢𑁂𑀦𑀸𑀳 ‘‘𑀯𑀺𑀜𑁆𑀜𑀸𑀡𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄, 𑀅𑀢𑁆𑀣𑀺 𑀦𑀦𑁆𑀤𑀻, 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀴𑁆𑀳’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁬𑁪).

𑀧𑀼𑀢𑁆𑀢𑀫𑀁𑀲𑀽𑀧𑀫𑁂𑀦 𑀑𑀯𑀸𑀤𑁂𑀦 𑀤𑀻𑀧𑁂𑀢𑀩𑁆𑀩𑁄 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀸𑀬. 𑀏𑀯𑀁 𑀳𑀺 𑀢𑀢𑁆𑀣 𑀦𑀺𑀓𑀦𑁆𑀢𑀺𑀪𑀬𑀁 𑀦 𑀳𑁄𑀢𑀺. 𑀦𑀺𑀘𑁆𑀘𑀫𑁆𑀫𑀸 𑀕𑀸𑀯𑀻 𑀬𑀁 𑀬𑀁 𑀞𑀸𑀦𑀁 𑀉𑀧𑀕𑀘𑁆𑀙𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀁 𑀧𑀸𑀡𑀺𑀦𑁄 𑀔𑀸𑀤𑀦𑁆𑀢𑀺𑀬𑁂𑀯. 𑀏𑀯𑀁 𑀨𑀲𑁆𑀲𑁂 𑀲𑀢𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀯𑁂𑀤𑀦𑀸 𑀘 𑀤𑀼𑀓𑁆𑀔𑀲𑀮𑁆𑀮𑀸𑀤𑀺𑀢𑁄 𑀤𑀝𑁆𑀞𑀩𑁆𑀩𑀸𑀢𑀺 𑀨𑀲𑁆𑀲𑁂 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑀕𑀫𑀦𑀪𑀬𑀁 𑀦 𑀳𑁄𑀢𑀻𑀢𑀺 𑀆𑀳 ‘‘𑀨𑀲𑁆𑀲𑀸𑀳𑀸𑀭𑁄 𑀦𑀺𑀘𑁆𑀘𑀫𑁆𑀫𑀕𑀸𑀯𑀽𑀧𑀫𑁂𑀦 𑀤𑀻𑀧𑁂𑀢𑀩𑁆𑀩𑁄’’𑀢𑀺. 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀲𑀩𑁆𑀩𑀲𑁄 𑀆𑀤𑀺𑀢𑁆𑀢𑀸 𑀪𑀯𑀸 𑀅𑀗𑁆𑀕𑀸𑀭𑀓𑀸𑀲𑀼𑀲𑀤𑀺𑀲𑀸𑀢𑀺 𑀧𑀲𑁆𑀲𑀢𑁄 𑀉𑀧𑀧𑀢𑁆𑀢𑀺𑀪𑀬𑀁 𑀦 𑀳𑁄𑀢𑀻𑀢𑀺 𑀆𑀳 ‘‘𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑁂𑀦 𑀤𑀻𑀧𑁂𑀢𑀩𑁆𑀩𑁄’’𑀢𑀺. 𑀘𑁄𑀭𑀲𑀤𑀺𑀲𑀁 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀣𑀧𑀸𑀢𑀢𑁄, 𑀧𑀳𑀸𑀭𑀲𑀤𑀺𑀲𑀻 𑀯𑁂𑀤𑀦𑀸 𑀤𑀼𑀭𑀥𑀺𑀯𑀸𑀲𑀢𑁄𑀢𑀺 𑀲𑀫𑁆𑀫𑀤𑁂𑀯 𑀧𑀲𑁆𑀲𑀢𑁄 𑀧𑀝𑀺𑀲𑀦𑁆𑀥𑀺𑀪𑀬𑀁 𑀦 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀲𑀢𑁆𑀢𑀺𑀲𑀢𑀽𑀧𑀫𑁂𑀦 𑀤𑀻𑀧𑁂𑀢𑀩𑁆𑀩𑁄’’𑀢𑀺.

𑀏𑀯𑀁 𑀓𑀺𑀘𑁆𑀘𑀸𑀤𑀺𑀫𑀼𑀔𑁂𑀦 𑀆𑀳𑀸𑀭𑁂𑀲𑀼 𑀆𑀤𑀻𑀦𑀯𑀁 𑀯𑀺𑀪𑀸𑀯𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀬𑀣𑀸𑀥𑀺𑀧𑁆𑀧𑁂𑀢𑀁 𑀆𑀳𑀸𑀭𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀢𑁄 𑀫𑀦𑀲𑀺𑀓𑀸𑀭𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂𑀲𑀼 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀸𑀤𑀸𑀬𑀭𑀽𑀧𑀦𑀺𑀤𑁆𑀤𑁂𑀲𑁂𑀧𑀺 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄’’𑀢𑀺 (𑀥. 𑀲. 𑁫𑁯𑁫) 𑀆𑀕𑀢𑀢𑁆𑀢𑀸 𑀢𑀢𑁄 𑀯𑀺𑀲𑁂𑀲𑁂𑀦𑁆𑀢𑁄 ‘‘𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀧𑁆𑀧𑀪𑁂𑀤𑁄’’𑀢𑀺 𑀆𑀳, 𑀪𑀽𑀢𑀓𑀣𑀦𑀁 𑀯𑀸 𑀏𑀢𑀁. 𑀢𑀢𑁆𑀣 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀧𑁆𑀧𑀪𑁂𑀤𑁄𑀢𑀺 𑀅𑀲𑀺𑀢𑀩𑁆𑀩𑀧𑀸𑀢𑀩𑁆𑀩𑀔𑀸𑀬𑀺𑀢𑀩𑁆𑀩𑀲𑀸𑀬𑀺𑀢𑀩𑁆𑀩𑀯𑀺𑀪𑀸𑀕𑁄 𑀓𑀸𑀮𑀪𑁂𑀤𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄 𑀬𑀣𑀸 ‘‘𑀤𑀼𑀤𑁆𑀥’’𑀦𑁆𑀢𑀺. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀯𑀸𑀢𑀺 𑀅𑀯𑀥𑀸𑀭𑀡𑀁 𑀬𑀣𑀸 𑀨𑀲𑁆𑀲𑀸𑀳𑀸𑀭𑀸𑀤𑀺𑀦𑀺𑀯𑀢𑁆𑀢𑀦𑀁, 𑀏𑀯𑀁 𑀑𑀚𑀸𑀳𑀸𑀭𑀦𑀺𑀯𑀢𑁆𑀢𑀦𑀫𑁆𑀧𑀺 𑀤𑀝𑁆𑀞𑀩𑁆𑀩𑀁. 𑀲𑀯𑀢𑁆𑀣𑀼𑀓𑁄 𑀏𑀯 𑀳𑀺 𑀆𑀳𑀸𑀭𑁄 𑀇𑀥 𑀓𑀫𑁆𑀫𑀝𑁆𑀞𑀸𑀦𑀪𑀽𑀢𑁄, 𑀢𑁂𑀦 𑀆𑀳𑀭𑀻𑀬𑀢𑀻𑀢𑀺 𑀆𑀳𑀸𑀭𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄𑀢𑀺 𑀅𑀬𑀁 𑀧𑀦𑀢𑁆𑀣𑁄 𑀦𑀺𑀩𑁆𑀩𑀢𑁆𑀢𑀺𑀢𑀑𑀚𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀇𑀫𑀲𑁆𑀫𑀺𑀁 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀅𑀢𑁆𑀣𑁂. 𑀉𑀧𑁆𑀧𑀦𑁆𑀦𑀸 𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀪𑀸𑀯𑀦𑀁 𑀯𑀤𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁫).

𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀢𑁄, 𑀅𑀢𑁆𑀣𑀢𑁄 𑀘 𑀲𑀼𑀕𑁆𑀕𑀳𑀺𑀢𑀁 𑀲𑀼𑀫𑀦𑀲𑀺𑀓𑀢𑀁 𑀲𑀽𑀧𑀥𑀸𑀭𑀺𑀢𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀉𑀕𑁆𑀕𑀳𑀢𑁄 𑀏𑀓𑀧𑀤𑀫𑁆𑀧𑀺 𑀅𑀯𑀺𑀭𑀚𑁆𑀛𑀦𑁆𑀢𑁂𑀦𑀸’’𑀢𑀺. 𑀢𑀢𑁆𑀣 𑀉𑀕𑁆𑀕𑀳𑀢𑁄𑀢𑀺 𑀆𑀘𑀭𑀺𑀬𑀼𑀕𑁆𑀕𑀳𑀢𑁄. 𑀏𑀓𑀧𑀤𑀫𑁆𑀧𑀻𑀢𑀺 𑀏𑀓𑀫𑁆𑀧𑀺 𑀧𑀤𑀁, 𑀏𑀓𑀓𑁄𑀝𑁆𑀞𑀸𑀲𑀫𑁆𑀧𑀺 𑀯𑀸, 𑀧𑀤𑁂𑀲𑀫𑀢𑁆𑀢𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀤𑀲𑀳𑀸𑀓𑀸𑀭𑁂𑀳𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀅𑀦𑁆𑀢𑀺𑀫𑀚𑀻𑀯𑀺𑀓𑀸𑀪𑀸𑀯𑀢𑁄, 𑀧𑀺𑀡𑁆𑀟𑀧𑀸𑀢𑀲𑁆𑀲 𑀅𑀮𑀸𑀪𑀮𑀸𑀪𑁂𑀲𑀼 𑀧𑀭𑀺𑀢𑀲𑁆𑀲𑀦𑀕𑁂𑀥𑀸𑀤𑀺𑀲𑀫𑀼𑀧𑁆𑀧𑀢𑁆𑀢𑀺𑀢𑁄, 𑀪𑀼𑀢𑁆𑀢𑀲𑁆𑀲 𑀲𑀫𑁆𑀫𑀤𑀚𑀦𑀦𑀢𑁄, 𑀓𑀺𑀫𑀺𑀓𑀼𑀮𑀲𑀁𑀯𑀤𑁆𑀥𑀦𑀢𑁄𑀢𑀺 𑀏𑀯𑀫𑀸𑀤𑀻𑀳𑀺𑀧𑀺 𑀆𑀓𑀸𑀭𑁂𑀳𑀺 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸? 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦𑀁 𑀬𑀤𑀺𑀤𑀁 𑀧𑀺𑀡𑁆𑀟𑁄𑀮𑁆𑀬𑀁, 𑀅𑀪𑀺𑀲𑀸𑀧𑁄𑀬𑀁, 𑀪𑀺𑀓𑁆𑀔𑀯𑁂, 𑀮𑁄𑀓𑀲𑁆𑀫𑀺𑀁 ‘𑀧𑀺𑀡𑁆𑀟𑁄𑀮𑁄 𑀯𑀺𑀘𑀭𑀲𑀺 𑀧𑀢𑁆𑀢𑀧𑀸𑀡𑀻’’’𑀢𑀺 (𑀲𑀁. 𑀦𑀺. 𑁩.𑁮𑁦), ‘‘𑀅𑀮𑀤𑁆𑀥𑀸 𑀘 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀢𑀲𑁆𑀲𑀢𑀺, 𑀮𑀤𑁆𑀥𑀸 𑀘 𑀧𑀺𑀡𑁆𑀟𑀧𑀸𑀢𑀁 𑀕𑀥𑀺𑀢𑁄 𑀫𑀼𑀘𑁆𑀙𑀺𑀢𑁄 𑀅𑀚𑁆𑀛𑁄𑀲𑀦𑁆𑀦𑁄 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 (𑀅. 𑀦𑀺. 𑁩.𑁧𑁨𑁪), ‘‘𑀪𑀼𑀢𑁆𑀢𑁄 𑀘 𑀆𑀳𑀸𑀭𑁄 𑀓𑀲𑁆𑀲𑀘𑀺 𑀓𑀤𑀸𑀘𑀺 𑀫𑀭𑀡𑀁 𑀯𑀸 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁 𑀆𑀯𑀳𑀢𑀺, 𑀉𑀓𑁆𑀓𑁄𑀘𑀓𑀸𑀤𑀬𑁄, 𑀢𑀓𑁆𑀓𑁄𑀝𑀓𑀸𑀤𑀬𑁄 𑀘 𑀤𑁆𑀯𑀢𑁆𑀢𑀺𑀁𑀲 𑀤𑁆𑀯𑀢𑁆𑀢𑀺𑀁𑀲 𑀓𑀼𑀮𑀧𑁆𑀧𑀪𑁂𑀤𑀸 𑀓𑀺𑀫𑀬𑁄 𑀘 𑀦𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻’’𑀢𑀺.

𑀯𑀼𑀘𑁆𑀘𑀢𑁂 𑁋 𑀅𑀦𑁆𑀢𑀺𑀫𑀚𑀻𑀯𑀺𑀓𑀸𑀪𑀸𑀯𑁄 𑀢𑀸𑀯 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀯𑀺𑀲𑁄𑀥𑀦𑀢𑁆𑀣𑀁 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀢𑁄 𑀧𑀕𑁂𑀯 𑀫𑀦𑀲𑀺 𑀓𑀸𑀢𑀩𑁆𑀩𑁄 ‘‘𑀫𑀸𑀳𑀁 𑀙𑀯𑀸𑀮𑀸𑀢𑀲𑀤𑀺𑀲𑁄 𑀪𑀯𑁂𑀬𑁆𑀬’’𑀦𑁆𑀢𑀺. 𑀢𑀣𑀸 𑀧𑀺𑀡𑁆𑀟𑀧𑀸𑀢𑀲𑁆𑀲 𑀅𑀮𑀸𑀪𑀮𑀸𑀪𑁂𑀲𑀼𑀧𑀺 𑀧𑀭𑀺𑀢𑀲𑁆𑀲𑀦𑀕𑁂𑀥𑀸𑀤𑀺𑀲𑀫𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀁 𑀧𑀕𑁂𑀯 𑀅𑀦𑀼𑀝𑁆𑀞𑀸𑀢𑀩𑁆𑀩𑀁 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀝𑀺𑀲𑀗𑁆𑀔𑀸𑀦𑀯𑀢𑁄 𑀢𑀤𑀪𑀸𑀯𑀢𑁄. 𑀪𑀢𑁆𑀢𑀲𑀫𑁆𑀫𑀤𑁄 𑀅𑀦𑁂𑀓𑀦𑁆𑀢𑀺𑀓𑁄, 𑀧𑀭𑀺𑀪𑁄𑀕𑀦𑁆𑀢𑁄𑀕𑀥𑁄 𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀫𑀺𑀓𑀼𑀮𑀲𑀁𑀯𑀤𑁆𑀥𑀦𑀁 𑀧𑀦 𑀦 𑀲𑀗𑁆𑀕𑀳𑁂𑀢𑀩𑁆𑀩𑀁, 𑀲𑀗𑁆𑀕𑀳𑀺𑀢𑀫𑁂𑀯 𑀯𑀸 ‘‘𑀤𑀲𑀳𑀸𑀓𑀸𑀭𑁂𑀳𑀻’’𑀢𑀺 𑀏𑀢𑁆𑀣 𑀦𑀺𑀬𑀫𑀲𑁆𑀲 𑀅𑀓𑀢𑀢𑁆𑀢𑀸. 𑀇𑀫𑀺𑀦𑀸 𑀯𑀸 𑀦𑀬𑁂𑀦 𑀇𑀢𑀭𑁂𑀲𑀫𑁆𑀧𑁂𑀢𑁆𑀣 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀬𑀣𑀸𑀲𑀫𑁆𑀪𑀯𑀫𑁂𑀢𑁆𑀣 𑀧𑀝𑀺𑀓𑁆𑀓𑀽𑀮𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀣𑀸 𑀳𑀺 𑀖𑀭𑀕𑁄𑀴𑀺𑀓𑀯𑀘𑁆𑀘𑀫𑀽𑀲𑀺𑀓𑀚𑀢𑀼𑀓𑀯𑀘𑁆𑀘𑀸𑀤𑀺𑀓𑀁 𑀲𑀫𑁆𑀪𑀯𑀦𑁆𑀢𑀁 𑀕𑀳𑀺𑀢𑀁, 𑀦 𑀏𑀓𑀦𑁆𑀢𑀺𑀓𑀦𑁆𑀢𑀺. 𑀢𑀣𑀸 𑀧𑀭𑀺𑀬𑁂𑀲𑀦𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀢𑁆𑀢𑀩𑁆𑀩𑀁.

𑀕𑀫𑀦𑀢𑁄𑀢𑀺𑀆𑀤𑀻𑀲𑀼 𑀧𑀘𑁆𑀘𑀸𑀕𑀫𑀦𑀫𑁆𑀧𑀺 𑀕𑀫𑀦𑀲𑀪𑀸𑀕𑀢𑁆𑀢𑀸 𑀕𑀫𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁. 𑀧𑀝𑀺𑀓𑁆𑀓𑀫𑀦𑀲𑀸𑀮𑀸𑀤𑀺𑀉𑀧𑀲𑀗𑁆𑀓𑀫𑀦𑀁 𑀯𑀺𑀬 𑀧𑀭𑀺𑀬𑁂𑀲𑀦𑁂 𑀲𑀫𑀸𑀦𑀧𑀝𑀺𑀓𑁆𑀓𑀽𑀮𑀁 𑀳𑀺 𑀅𑀲𑀼𑀘𑀺𑀝𑁆𑀞𑀸𑀦𑀓𑁆𑀓𑀫𑀦𑀯𑀺𑀭𑀽𑀧𑀤𑀼𑀕𑁆𑀕𑀦𑁆𑀥𑀤𑀲𑁆𑀲𑀦𑀖𑀸𑀬𑀦𑀸𑀥𑀺𑀯𑀸𑀲𑀦𑁂𑀳𑀺. 𑀕𑀫𑀦𑀢𑁄𑀢𑀺 𑀪𑀺𑀓𑁆𑀔𑀸𑀘𑀸𑀭𑀯𑀲𑁂𑀦 𑀕𑁄𑀘𑀭𑀕𑀸𑀫𑀁 𑀉𑀤𑁆𑀤𑀺𑀲𑁆𑀲 𑀕𑀫𑀦𑀢𑁄. 𑀧𑀭𑀺𑀬𑁂𑀲𑀦𑀢𑁄𑀢𑀺 𑀕𑁄𑀘𑀭𑀕𑀸𑀫𑁂 𑀪𑀺𑀓𑁆𑀔𑀢𑁆𑀣𑀁 𑀆𑀳𑀺𑀡𑁆𑀟𑀦𑀢𑁄. 𑀧𑀭𑀺𑀪𑁄𑀕𑀢𑁄𑀢𑀺 𑀆𑀳𑀸𑀭𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑀢𑁄. 𑀉𑀪𑀬𑀁 𑀉𑀪𑀬𑁂𑀦 𑀆𑀲𑀬𑀢𑀺, 𑀏𑀓𑀚𑁆𑀛𑀁 𑀧𑀯𑀢𑁆𑀢𑀫𑀸𑀦𑁄𑀧𑀺 𑀓𑀫𑁆𑀫𑀩𑀮𑀯𑀯𑀢𑁆𑀣𑀺𑀢𑁄 𑀳𑀼𑀢𑁆𑀯𑀸 𑀫𑀭𑀺𑀬𑀸𑀤𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀲𑀬𑀢𑀺 𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀲𑀬𑁄, 𑀆𑀫𑀸𑀲𑀬𑀲𑁆𑀲 𑀉𑀧𑀭𑀺 𑀢𑀺𑀝𑁆𑀞𑀦𑀓𑁄 𑀧𑀺𑀢𑁆𑀢𑀸𑀤𑀺𑀓𑁄. 𑀫𑀭𑀺𑀬𑀸𑀤𑀢𑁆𑀣𑁄 𑀳𑀺 𑀅𑀬𑀫𑀸𑀓𑀸𑀭𑁄, 𑀢𑀢𑁄 𑀆𑀲𑀬𑀢𑁄. 𑀦𑀺𑀤𑀥𑀸𑀢𑀺 𑀬𑀣𑀸𑀪𑀼𑀢𑁆𑀢𑁄 𑀆𑀳𑀸𑀭𑁄 𑀦𑀺𑀘𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀦𑀺𑀥𑀸𑀦𑀁, 𑀆𑀫𑀸𑀲𑀬𑁄, 𑀢𑀢𑁄 𑀦𑀺𑀥𑀸𑀦𑀢𑁄. 𑀅𑀧𑀭𑀺𑀧𑀓𑁆𑀓𑀢𑁄𑀢𑀺 𑀕𑀳𑀡𑀻𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀚𑀢𑁂𑀚𑁂𑀦 𑀅𑀧𑀭𑀺𑀧𑀓𑁆𑀓𑀢𑁄. 𑀧𑀭𑀺𑀧𑀓𑁆𑀓𑀢𑁄𑀢𑀺 𑀬𑀣𑀸𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀺𑀧𑀓𑁆𑀓𑀪𑀸𑀯𑀢𑁄. 𑀨𑀮𑀢𑁄𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑁄. 𑀦𑀺𑀲𑁆𑀲𑀦𑁆𑀤𑀢𑁄𑀢𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀲𑁆𑀲𑀦𑁆𑀤𑀦𑀢𑁄. 𑀲𑀫𑁆𑀫𑀓𑁆𑀔𑀦𑀢𑁄𑀢𑀺 𑀲𑀩𑁆𑀩𑀲𑁄 𑀫𑀓𑁆𑀔𑀦𑀢𑁄. 𑀲𑀩𑁆𑀩𑀢𑁆𑀣 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀢𑀁𑀢𑀁𑀓𑀺𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀺𑀧𑀝𑀺𑀧𑀸𑀝𑀺𑀯𑀲𑁂𑀦 𑀘𑀸𑀬𑀁 𑀕𑀫𑀦𑀢𑁄𑀢𑀺𑀆𑀤𑀺𑀓𑀸 𑀅𑀦𑀼𑀧𑀼𑀩𑁆𑀩𑀻 𑀞𑀧𑀺𑀢𑀸, 𑀲𑀫𑁆𑀫𑀓𑁆𑀔𑀦𑀁 𑀧𑀦 𑀧𑀭𑀺𑀪𑁄𑀕𑀸𑀤𑀻𑀲𑀼 𑀮𑀩𑁆𑀪𑀫𑀸𑀦𑀫𑁆𑀧𑀺 𑀦𑀺𑀲𑁆𑀲𑀦𑁆𑀤𑀯𑀲𑁂𑀦 𑀯𑀺𑀲𑁂𑀲𑀢𑁄 𑀧𑀝𑀺𑀓𑁆𑀓𑀽𑀮𑀦𑁆𑀢𑀺 𑀲𑀩𑁆𑀩𑀧𑀘𑁆𑀙𑀸 𑀞𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁯𑁫. 𑀏𑀯𑀁 𑀫𑀳𑀸𑀦𑀼𑀪𑀸𑀯𑁂𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀧𑀝𑀺𑀧𑀢𑁆𑀢𑀺𑀬𑀸 𑀫𑀳𑀸𑀦𑀼𑀪𑀸𑀯𑁂𑀢𑀺 𑀯𑀤𑀦𑁆𑀢𑀺, 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀳𑀭𑀡𑀸𑀤𑀺𑀲𑀺𑀤𑁆𑀥𑀁 𑀯𑀸 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 𑀬𑁄𑀕𑀸𑀯𑀘𑀭𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀫𑀳𑀸𑀦𑀼𑀪𑀸𑀯𑁂 𑀦𑀸𑀫 𑀲𑀸𑀲𑀦𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀸𑀫-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂 𑀤𑀝𑁆𑀞𑀩𑁆𑀩𑁄. 𑀧𑀩𑁆𑀩𑀚𑀺𑀢𑁂𑀦 𑀕𑀸𑀫𑀸𑀪𑀺𑀫𑀼𑀔𑁂𑀦 𑀕𑀦𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀅𑀬𑀜𑁆𑀘 𑀕𑀫𑀦𑀸𑀤𑀺𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀸 𑀬𑁄𑀕𑀺𑀦𑁄 𑀦 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀸𑀯, 𑀅𑀣 𑀔𑁄 𑀅𑀦𑀼𑀤𑁆𑀤𑁂𑀲𑀺𑀓𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀓𑀮𑀭𑀢𑁆𑀢𑀺’’𑀦𑁆𑀢𑀺𑀆𑀤𑀺𑀦𑀸 𑀥𑀼𑀭𑀤𑁆𑀯𑀬𑀁 𑀧𑀭𑀺𑀕𑁆𑀕𑀳𑁂𑀲𑀺. 𑀧𑀭𑀺𑀯𑁂𑀡𑀦𑁆𑀢𑀺 𑀧𑀭𑀺𑀯𑁂𑀡𑀗𑁆𑀕𑀡𑀁. 𑀯𑀻𑀲𑀢𑀺𑀁𑀲𑀯𑀸𑀭𑁂𑀢𑀺 𑀏𑀢𑁆𑀣 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀸𑀭𑀧𑀭𑀺𑀘𑁆𑀙𑁂𑀤𑁄𑀢𑀺 𑀓𑁂𑀘𑀺, 𑀅𑀧𑀭𑁂 𑀧𑀦 ‘‘𑀉𑀡𑁆𑀳𑀸𑀲𑀦𑁂𑀦𑀸’’𑀢𑀺 𑀯𑀤𑀦𑁆𑀢𑀺. 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀜𑁆𑀳𑀺 𑀅𑀧𑁆𑀧𑀢𑁆𑀢𑀸 𑀪𑀸𑀯𑀦𑀸 𑀨𑀭𑀡𑀧𑀻𑀢𑀺𑀬𑀸 𑀅𑀪𑀸𑀯𑀢𑁄 𑀦𑀺𑀲𑀚𑁆𑀚𑀸𑀯𑀲𑁂𑀦 𑀓𑀸𑀬𑀓𑀺𑀮𑀫𑀣𑀁 𑀦 𑀯𑀺𑀦𑁄𑀤𑀢𑀺𑀬𑁂𑀯𑀸𑀢𑀺 𑀇𑀭𑀺𑀬𑀸𑀧𑀣𑀘𑀮𑀦𑀁 𑀳𑁄𑀢𑀺𑀬𑁂𑀯. 𑀯𑀻𑀲𑀢𑀺𑀁𑀲𑀕𑁆𑀕𑀳𑀡𑀁 𑀧𑀦 𑀬𑀣𑀸𑀲𑀮𑁆𑀮𑀓𑁆𑀔𑀺𑀢𑀪𑀺𑀓𑁆𑀔𑀸𑀘𑀭𑀡𑀯𑁂𑀮𑀸𑀯𑀲𑁂𑀦. 𑀅𑀣 𑀯𑀸 𑀕𑀫𑀦𑀢𑁄 𑀬𑀸𑀯 𑀲𑀫𑁆𑀫𑀓𑁆𑀔𑀦𑀫𑀦𑀲𑀺𑀓𑀸𑀭𑁄 𑀏𑀓𑁄 𑀯𑀸𑀭𑁄, 𑀏𑀯𑀁 𑀯𑀻𑀲𑀢𑀺𑀁𑀲𑀯𑀸𑀭𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀦𑀺𑀚𑀦𑀲𑀫𑁆𑀩𑀸𑀥𑀸𑀦𑀻𑀢𑀺 𑀚𑀦𑀲𑀫𑁆𑀩𑀸𑀥𑀭𑀳𑀺𑀢𑀸𑀦𑀺, 𑀢𑁂𑀦 𑀅𑀧𑁆𑀧𑀸𑀓𑀺𑀡𑁆𑀡𑀢𑀁, 𑀅𑀧𑁆𑀧𑀲𑀤𑁆𑀤𑀢𑀁, 𑀅𑀧𑁆𑀧𑀦𑀺𑀕𑁆𑀖𑁄𑀲𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀢𑁄 𑀏𑀯 𑀧𑀯𑀺𑀯𑁂𑀓𑀲𑀼𑀔𑀸𑀦𑀺 𑀚𑀦𑀯𑀺𑀯𑁂𑀓𑁂𑀦 𑀇𑀝𑁆𑀞𑀸𑀦𑀺, 𑀧𑀯𑀺𑀯𑁂𑀓𑀲𑁆𑀲 𑀯𑀸 𑀛𑀸𑀦𑀸𑀦𑀼𑀬𑁄𑀕𑀲𑁆𑀲 𑀉𑀧𑀓𑀸𑀭𑀸𑀦𑀺. 𑀬𑀲𑁆𑀫𑀸 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀸𑀦𑀺, 𑀢𑀲𑁆𑀫𑀸 𑀲𑀻𑀢𑀮𑀸𑀦𑀺. 𑀬𑀲𑁆𑀫𑀸 𑀲𑀼𑀘𑀻𑀦𑀺, 𑀢𑀲𑁆𑀫𑀸 𑀭𑀫𑀡𑀻𑀬𑀪𑀽𑀫𑀺𑀪𑀸𑀕𑀸𑀦𑀻𑀢𑀺 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀓𑀸𑀭𑀡𑀯𑀘𑀦𑀸𑀦𑀺. 𑀅𑀭𑀺𑀬𑀦𑁆𑀢𑀺 𑀦𑀺𑀤𑁆𑀤𑁄𑀲𑀁. 𑀯𑀺𑀯𑁂𑀓𑀭𑀢𑀺𑀦𑁆𑀢𑀺 𑀛𑀸𑀦𑀸𑀦𑀼𑀬𑁄𑀕𑀭𑀢𑀺𑀁.

𑀓𑀺𑀜𑁆𑀘𑀸𑀧𑀺 𑀬𑁄𑀕𑀸𑀯𑀘𑀭𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀦𑀸𑀫 𑀲𑀼𑀚𑀕𑁆𑀕𑀺𑀢𑀁 𑀲𑀼𑀲𑀫𑁆𑀫𑀝𑁆𑀞𑀫𑁂𑀯 𑀳𑁄𑀢𑀺, 𑀓𑀤𑀸𑀘𑀺 𑀧𑀦 𑀚𑀕𑁆𑀕𑀦𑀢𑁄 𑀧𑀘𑁆𑀙𑀸 𑀏𑀯𑀫𑁆𑀧𑀺 𑀲𑀺𑀬𑀸𑀢𑀺 𑀧𑀝𑀺𑀓𑁆𑀓𑀽𑀮𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁 ‘‘𑀧𑀸𑀤𑀭𑀚𑀖𑀭𑀕𑁄𑀮𑀺𑀓𑀯𑀘𑁆𑀘𑀸𑀤𑀺𑀲𑀫𑁆𑀧𑀭𑀺𑀓𑀺𑀡𑁆𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀪𑀽𑀫𑀺𑀬𑀸 𑀙𑀯𑀺𑀭𑀓𑁆𑀔𑀡𑀢𑁆𑀣𑀁 𑀅𑀢𑁆𑀣𑀭𑀺𑀢𑀩𑁆𑀩𑀁 𑀘𑀺𑀫𑀺𑀮𑀺𑀓𑀸𑀤𑀺𑀅𑀢𑁆𑀣𑀭𑀡𑀫𑀸𑀳. 𑀚𑀢𑀼𑀓𑀸 𑀔𑀼𑀤𑁆𑀤𑀓𑀯𑀕𑁆𑀕𑀼𑀮𑀺𑀬𑁄. 𑀉𑀧𑀳𑀢𑀢𑁆𑀢𑀸𑀢𑀺 𑀤𑀽𑀲𑀺𑀢𑀢𑁆𑀢𑀸. 𑀢𑀢𑁄𑀢𑀺 𑀢𑀢𑁄 𑀢𑀢𑁄. 𑀅𑀧𑁆𑀧𑁂𑀓𑀤𑀸 𑀉𑀮𑀽𑀓𑀧𑀸𑀭𑀸𑀯𑀢𑀸𑀤𑀻𑀳𑀻𑀢𑀺 𑀇𑀥𑀸𑀧𑀺 ‘‘𑀅𑀧𑁆𑀧𑁂𑀓𑀤𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀉𑀤𑀓𑀘𑀺𑀓𑁆𑀔𑀮𑁆𑀮𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀘𑀯𑀭𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑀺𑀯𑁂𑀡𑀢𑁄 𑀯𑀺𑀳𑀸𑀭𑀗𑁆𑀕𑀡𑀧𑁆𑀧𑀯𑁂𑀲𑀫𑀕𑁆𑀕𑁄 𑀯𑀺𑀳𑀸𑀭𑀭𑀘𑁆𑀙𑀸.

𑀯𑀺𑀢𑀓𑁆𑀓𑀫𑀸𑀴𑀓𑁂𑀢𑀺 ‘‘𑀓𑀢𑁆𑀣 𑀦𑀼 𑀔𑁄 𑀅𑀚𑁆𑀚 𑀪𑀺𑀓𑁆𑀔𑀸𑀬 𑀘𑀭𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀢𑀓𑁆𑀓𑀦𑀫𑀸𑀴𑀓𑁂. 𑀕𑀸𑀫𑀫𑀕𑁆𑀕𑀦𑁆𑀢𑀺 𑀕𑀸𑀫𑀕𑀸𑀫𑀺𑀫𑀕𑁆𑀕𑀁. 𑀔𑀸𑀡𑀼𑀓𑀡𑁆𑀝𑀓𑀫𑀕𑁆𑀕𑁄𑀢𑀺 𑀔𑀸𑀡𑀼𑀓𑀡𑁆𑀝𑀓𑀯𑀦𑁆𑀢𑁄 𑀫𑀕𑁆𑀕𑁄. 𑀤𑀝𑁆𑀞𑀩𑁆𑀩𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑁂𑀦 𑀕𑀫𑀦𑀁 𑀉𑀧𑀮𑀓𑁆𑀔𑁂𑀢𑀺.

𑀕𑀡𑁆𑀟𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦𑀸𑀢𑀺𑀆𑀤𑀺 𑀏𑀯𑀫𑀚𑁆𑀛𑀸𑀲𑀬𑁂𑀦 𑀦𑀺𑀯𑀸𑀲𑀦𑀸𑀤𑀺 𑀓𑀸𑀢𑀩𑁆𑀩𑀦𑁆𑀢𑀺 𑀯𑀢𑁆𑀢𑀤𑀲𑁆𑀲𑀦𑀁, 𑀕𑀡𑁆𑀟𑀭𑁄𑀕𑀺𑀦𑀸 𑀯𑀸𑀢𑀸𑀢𑀧𑀸𑀤𑀺𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀕𑀡𑁆𑀟𑀁 𑀧𑀝𑀺𑀘𑁆𑀙𑀸𑀤𑀬𑀫𑀸𑀦𑁂𑀦 𑀯𑀺𑀬. 𑀅𑀣 𑀯𑀸 𑀕𑀡𑁆𑀟𑀁 𑀯𑀺𑀬 𑀕𑀡𑁆𑀟𑀁 𑀧𑀝𑀺𑀘𑁆𑀙𑀸𑀤𑀬𑀫𑀸𑀦𑁂𑀦𑀸𑀢𑀺 𑀏𑀓𑀁 𑀕𑀡𑁆𑀟-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 𑀪𑀯𑀢𑀺. ‘‘𑀕𑀡𑁆𑀟𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀅. 𑀦𑀺. 𑁯.𑁧𑁫; 𑀲𑀁. 𑀦𑀺. 𑁪.𑁧𑁦𑁩) 𑀯𑀘𑀦𑀢𑁄 𑀕𑀡𑁆𑀟𑁄𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀧𑀭𑀺𑀬𑀸𑀬𑁄, 𑀯𑀺𑀲𑁂𑀲𑀢𑁄 𑀭𑀽𑀧𑀓𑀸𑀬𑀲𑁆𑀲 𑀤𑀼𑀓𑁆𑀔𑀢𑀸𑀲𑀽𑀮𑀬𑁄𑀕𑀢𑁄, 𑀅𑀲𑀼𑀘𑀺𑀧𑀕𑁆𑀖𑀭𑀡𑀢𑁄, 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀉𑀤𑁆𑀥𑀼𑀫𑀸𑀢𑀓𑀧𑀓𑁆𑀓𑀧𑀪𑀺𑀚𑁆𑀚𑀦𑀢𑁄. 𑀯𑀡𑀘𑁄𑀴𑀓𑀦𑁆𑀢𑀺 𑀯𑀡𑀧𑀝𑀺𑀘𑁆𑀙𑀸𑀤𑀓𑀯𑀢𑁆𑀣𑀔𑀡𑁆𑀟𑀁. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀣𑀯𑀺𑀓𑀢𑁄 𑀉𑀤𑁆𑀥𑀭𑀺𑀢𑁆𑀯𑀸. 𑀓𑀼𑀡𑀧𑀸𑀦𑀺𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀕𑀭𑀳𑀸𑀬𑀁 𑀏𑀯𑀭𑀽𑀧𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺 𑀪𑀯𑀦𑁆𑀢𑀻𑀢𑀺, 𑀲𑀫𑁆𑀪𑀯𑀤𑀲𑁆𑀲𑀦𑁂 𑀯𑀸 𑀇𑀤𑀫𑁆𑀧𑀺 𑀢𑀢𑁆𑀣 𑀲𑀫𑁆𑀪𑀯𑀢𑀻𑀢𑀺. 𑀅𑀥𑀺𑀯𑀸𑀲𑁂𑀢𑀩𑁆𑀩𑁄𑀢𑀺 𑀔𑀫𑀺𑀢𑀩𑁆𑀩𑁄 𑀅𑀜𑁆𑀜𑀣𑀸 𑀆𑀳𑀸𑀭𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄. 𑀕𑀸𑀫𑀤𑁆𑀯𑀸𑀭𑁂𑀢𑀺 𑀕𑀸𑀫𑀤𑁆𑀯𑀸𑀭𑀲𑀫𑀻𑀧𑁂, 𑀉𑀫𑁆𑀫𑀸𑀭𑀩𑁆𑀪𑀦𑁆𑀢𑀭𑁂 𑀯𑀸. 𑀕𑀸𑀫𑀭𑀘𑁆𑀙𑀸 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀸 𑀑𑀮𑁄𑀓𑁂𑀢𑀩𑁆𑀩𑀸 𑀳𑁄𑀦𑁆𑀢𑀺 𑀬𑀼𑀕𑀫𑀢𑁆𑀢𑀤𑀲𑁆𑀲𑀺𑀦𑀸𑀧𑀺 𑀲𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀘𑁆𑀘𑀢𑁆𑀣𑀭𑀡𑀸𑀤𑀻𑀢𑀺 𑀖𑀭𑀕𑁄𑀮𑀺𑀓𑀯𑀘𑁆𑀘𑀸𑀤𑀺𑀲𑀁𑀓𑀺𑀮𑀺𑀝𑁆𑀞𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀓𑀁. 𑀅𑀦𑁂𑀓𑀓𑀼𑀡𑀧𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀏𑀢𑁆𑀣 𑀤𑀼𑀦𑁆𑀦𑀺𑀯𑀢𑁆𑀣𑀤𑀼𑀧𑁆𑀧𑀸𑀭𑀼𑀢𑀫𑀦𑀼𑀲𑁆𑀲𑀲𑀫𑀸𑀓𑀼𑀮𑀸𑀦𑀁 𑀕𑀸𑀫𑀭𑀘𑁆𑀙𑀸𑀦𑀁 𑀑𑀮𑁄𑀓𑀦𑀫𑁆𑀧𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀢𑀫𑁆𑀧𑀺 𑀳𑀺 𑀧𑀝𑀺𑀓𑁆𑀓𑀽𑀮𑀫𑁂𑀯𑀸𑀢𑀺. 𑀅𑀳𑁄 𑀯𑀢𑀸𑀢𑀺 𑀕𑀭𑀳𑀦𑁂 𑀦𑀺𑀧𑀸𑀢𑁄. 𑀪𑁄𑀢𑀺 𑀥𑀫𑁆𑀫𑀸𑀮𑀧𑀦𑀁. 𑀬𑀸𑀯𑀜𑁆𑀘𑀺𑀤𑀁 𑀧𑀝𑀺𑀓𑁆𑀓𑀽𑀮𑁄 𑀆𑀳𑀸𑀭𑁄 𑀬𑀤𑀢𑁆𑀣𑀁 𑀕𑀫𑀦𑀫𑁆𑀧𑀺 𑀦𑀸𑀫 𑀏𑀯𑀁 𑀚𑁂𑀕𑀼𑀘𑁆𑀙𑀁, 𑀤𑀼𑀭𑀥𑀺𑀯𑀸𑀲𑀦𑀜𑁆𑀘𑀸𑀢𑀺 𑀅𑀢𑁆𑀣𑁄.

𑁨𑁯𑁬. 𑀕𑀫𑀦𑀧𑀝𑀺𑀓𑁆𑀓𑀽𑀮𑀦𑁆𑀢𑀺 𑀕𑀫𑀦𑀫𑁂𑀯 𑀧𑀝𑀺𑀓𑁆𑀓𑀽𑀮𑀁 𑀕𑀫𑀦𑀧𑀝𑀺𑀓𑁆𑀓𑀽𑀮𑀁. 𑀅𑀥𑀺𑀯𑀸𑀲𑁂𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 ‘‘𑀏𑀢𑁆𑀢𑀓𑁂𑀦𑀸𑀧𑀺 𑀫𑀼𑀢𑁆𑀢𑀺 𑀦𑀢𑁆𑀣𑀺, 𑀇𑀢𑁄 𑀧𑀭𑀫𑁆𑀧𑀺 𑀫𑀳𑀦𑁆𑀢𑀁 𑀧𑀝𑀺𑀓𑁆𑀓𑀽𑀮𑀁 𑀲𑀓𑀮𑀁 𑀅𑀥𑀺𑀯𑀸𑀲𑁂𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀓𑁆𑀔𑀫𑀸𑀦𑀁 𑀧𑀝𑀺𑀓𑁆𑀓𑀽𑀮𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑁂𑀦𑀸𑀢𑀺 𑀲𑀗𑁆𑀖𑀸𑀝𑀺𑀬𑀸 𑀓𑀧𑁆𑀧𑀦𑀧𑀸𑀭𑀼𑀧𑀦𑁂𑀦 𑀧𑀸𑀭𑀼𑀢𑀲𑀭𑀻𑀭𑁂𑀦. 𑀬𑀢𑁆𑀣𑀸𑀢𑀺 𑀬𑀸𑀲𑀼 𑀯𑀻𑀣𑀻𑀲𑀼. 𑀬𑀸𑀯 𑀧𑀺𑀡𑁆𑀟𑀺𑀓𑀫𑀁𑀲𑀸𑀧𑀻𑀢𑀺 𑀬𑀸𑀯 𑀚𑀗𑁆𑀖𑀧𑀺𑀡𑁆𑀟𑀺𑀓𑀫𑀁𑀲𑀧𑁆𑀧𑀤𑁂𑀲𑀸𑀧𑀺. 𑀉𑀤𑀓𑀘𑀺𑀓𑁆𑀔𑀮𑁆𑀮𑁂𑀢𑀺 𑀉𑀤𑀓𑀫𑀺𑀲𑁆𑀲𑁂 𑀓𑀤𑁆𑀤𑀫𑁂. 𑀏𑀓𑁂𑀦 𑀘𑀻𑀯𑀭𑀦𑁆𑀢𑀺 𑀏𑀓𑁂𑀦 𑀳𑀢𑁆𑀣𑁂𑀦 𑀦𑀺𑀯𑀢𑁆𑀣𑀘𑀻𑀯𑀭𑀁. 𑀫𑀘𑁆𑀙𑀸 𑀥𑁄𑀯𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀫𑀘𑁆𑀙𑀥𑁄𑀯𑀦𑀁, 𑀉𑀤𑀓𑀁. 𑀲𑀫𑁆𑀫𑀺𑀲𑁆𑀲-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀑𑀴𑀺𑀕𑀮𑁆𑀮𑀸𑀦𑀺 𑀉𑀘𑁆𑀙𑀺𑀝𑁆𑀞𑁄𑀤𑀓𑀕𑀩𑁆𑀪𑀫𑀮𑀸𑀤𑀻𑀦𑀁 𑀲𑀓𑀤𑁆𑀤𑀫𑀸𑀦𑀁 𑀲𑀦𑁆𑀤𑀦𑀝𑁆𑀞𑀸𑀦𑀸𑀦𑀺, 𑀬𑀸𑀦𑀺 𑀚𑀡𑁆𑀡𑀼𑀫𑀢𑁆𑀢𑀅𑀲𑀼𑀘𑀺𑀪𑀭𑀺𑀢𑀸𑀦𑀺𑀧𑀺 𑀳𑁄𑀦𑁆𑀢𑀺. 𑀘𑀦𑁆𑀤𑀦𑀺𑀓𑀸𑀦𑀺 𑀓𑁂𑀯𑀮𑀸𑀦𑀁 𑀉𑀘𑁆𑀙𑀺𑀝𑁆𑀞𑁄𑀤𑀓𑀕𑀩𑁆𑀪𑀫𑀮𑀸𑀤𑀻𑀦𑀁 𑀲𑀦𑁆𑀤𑀦𑀝𑁆𑀞𑀸𑀦𑀸𑀦𑀺. 𑀬𑀢𑁄𑀢𑀺 𑀑𑀴𑀺𑀕𑀮𑁆𑀮𑀸𑀤𑀺𑀢𑁄. 𑀢𑀸 𑀫𑀓𑁆𑀔𑀺𑀓𑀸𑀢𑀺 𑀢𑀢𑁆𑀣 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑁄 𑀦𑀻𑀮𑀫𑀓𑁆𑀔𑀺𑀓𑀸. 𑀦𑀺𑀮𑀻𑀬𑀦𑁆𑀢𑀻𑀢𑀺 𑀅𑀘𑁆𑀙𑀦𑁆𑀢𑀺.

𑀤𑀤𑀫𑀸𑀦𑀸𑀧𑀻𑀢𑀺𑀆𑀤𑀺 𑀲𑀢𑀺𑀧𑀺 𑀓𑁂𑀲𑀜𑁆𑀘𑀺 𑀲𑀤𑁆𑀥𑀸𑀦𑀁 𑀯𑀲𑁂𑀦 𑀲𑀓𑁆𑀓𑀘𑁆𑀘𑀓𑀸𑀭𑁂 𑀧𑀝𑀺𑀓𑁆𑀓𑀽𑀮𑀧𑀘𑁆𑀘𑀯𑁂𑀓𑁆𑀔𑀡𑀸𑀬𑁄𑀕𑁆𑀬𑀁 𑀧𑀦 𑀅𑀲𑀤𑁆𑀥𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀦𑀓𑀅𑀲𑀓𑁆𑀓𑀘𑁆𑀘𑀓𑀸𑀭𑀫𑁂𑀯 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. 𑀢𑀼𑀡𑁆𑀳𑀻 𑀳𑁄𑀦𑁆𑀢𑀺 𑀲𑀬𑀫𑁂𑀯 𑀭𑀺𑀜𑁆𑀘𑀺𑀢𑁆𑀯𑀸 𑀕𑀘𑁆𑀙𑀺𑀲𑁆𑀲𑀢𑀻𑀢𑀺. 𑀕𑀘𑁆𑀙𑀸𑀢𑀺 𑀅𑀧𑁂𑀳𑀺. 𑀭𑁂𑀢𑀺 𑀅𑀫𑁆𑀪𑁄. 𑀫𑀼𑀡𑁆𑀟𑀓𑀸𑀢𑀺 𑀅𑀦𑀸𑀤𑀭𑀸𑀮𑀧𑀦𑀁. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀓𑀣𑁂𑀦𑁆𑀢𑀺. 𑀧𑀺𑀡𑁆𑀟𑁄𑀮𑁆𑀬𑀲𑁆𑀲 𑀅𑀦𑁆𑀢𑀺𑀫𑀚𑀻𑀯𑀺𑀓𑀸𑀪𑀸𑀯𑁂𑀦𑀸𑀳 ‘‘𑀓𑀧𑀡𑀫𑀦𑀼𑀲𑁆𑀲𑁂𑀦 𑀯𑀺𑀬 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀩𑁆𑀩’’𑀦𑁆𑀢𑀺.

𑁨𑁯𑁭. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀢𑁆𑀢𑀕𑀢𑁂 𑀆𑀳𑀸𑀭𑁂. 𑀮𑀚𑁆𑀚𑀺𑀢𑀩𑁆𑀩𑀁 𑀳𑁄𑀢𑀺 ‘‘𑀉𑀘𑁆𑀙𑀺𑀝𑁆𑀞𑀁 𑀦𑀼 𑀔𑁄 𑀅𑀬𑀁 𑀫𑀬𑁆𑀳𑀁 𑀤𑀸𑀢𑀼𑀓𑀸𑀫𑁄’’𑀢𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺, 𑀲𑁂𑀤𑁄 𑀧𑀕𑁆𑀖𑀭𑀫𑀸𑀦𑁄 𑀆𑀳𑀸𑀭𑀲𑁆𑀲 𑀯𑀸 𑀉𑀡𑁆𑀳𑀢𑀸𑀬, 𑀪𑀺𑀓𑁆𑀔𑀼𑀦𑁄 𑀯𑀸 𑀲𑀧𑀭𑀺𑀴𑀸𑀳𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀓𑁆𑀔𑀣𑀤𑁆𑀥𑀪𑀢𑁆𑀢𑀫𑁆𑀧𑀻𑀢𑀺 𑀲𑀼𑀓𑁆𑀔𑀢𑀸𑀬 𑀣𑀤𑁆𑀥𑀫𑁆𑀧𑀺 𑀪𑀢𑁆𑀢𑀁, 𑀧𑀕𑁂𑀯 𑀢𑀓𑁆𑀓𑀓𑀜𑁆𑀚𑀺𑀓𑀸𑀤𑀺𑀦𑀸 𑀉𑀧𑀲𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀲𑁂𑀤𑁂𑀦 𑀓𑀺𑀮𑀺𑀦𑁆𑀦𑀢𑀸𑀬 𑀧𑀝𑀺𑀓𑁆𑀓𑀽𑀮𑀢𑀁 𑀯𑀤𑀢𑀺.

𑀢𑀲𑁆𑀫𑀺𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑁂. 𑀲𑀫𑁆𑀪𑀺𑀦𑁆𑀦𑀲𑁄𑀪𑁂𑀢𑀺 𑀲𑀩𑁆𑀩𑀲𑁄 𑀯𑀺𑀦𑀝𑁆𑀞𑀲𑁄𑀪𑁂. 𑀯𑁂𑀫𑀚𑁆𑀛𑀢𑁄 𑀧𑀝𑁆𑀞𑀸𑀬𑀸𑀢𑀺 𑀚𑀺𑀯𑁆𑀳𑀸𑀬 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬. 𑀤𑀦𑁆𑀢𑀕𑀽𑀣𑀓𑁄 𑀤𑀦𑁆𑀢𑀫𑀮𑀁. 𑀯𑀺𑀘𑀼𑀡𑁆𑀡𑀺𑀢𑀫𑀓𑁆𑀔𑀺𑀢𑁄𑀢𑀺 𑀉𑀪𑀬𑁂𑀳𑀺 𑀤𑀦𑁆𑀢𑁂𑀳𑀺 𑀯𑀺𑀘𑀼𑀡𑁆𑀡𑀺𑀢𑁄 𑀔𑁂𑀴𑀸𑀤𑀻𑀳𑀺 𑀲𑀫𑀼𑀧𑀮𑀺𑀢𑁆𑀢𑁄. 𑀏𑀯𑀁𑀪𑀽𑀢𑀲𑁆𑀲 𑀘𑀲𑁆𑀲 𑀬𑀸𑀬𑀁 𑀧𑀼𑀩𑁆𑀩𑁂 𑀯𑀡𑁆𑀡𑀲𑀫𑁆𑀧𑀤𑀸, 𑀕𑀦𑁆𑀥𑀲𑀫𑁆𑀧𑀤𑀸, 𑀅𑀪𑀺𑀲𑀗𑁆𑀔𑀸𑀭𑀲𑀫𑁆𑀧𑀤𑀸 𑀘, 𑀲𑀸 𑀏𑀓𑀁𑀲𑁂𑀦 𑀯𑀺𑀦𑀲𑁆𑀲𑀢𑀺, 𑀭𑀲𑁄 𑀧𑀦 𑀦𑀲𑁆𑀲𑁂𑀬𑁆𑀬 𑀯𑀸 𑀦 𑀯𑀸𑀢𑀺 𑀆𑀳 ‘‘𑀅𑀦𑁆𑀢𑀭𑀳𑀺𑀢𑀯𑀡𑁆𑀡𑀕𑀦𑁆𑀥𑀲𑀗𑁆𑀔𑀸𑀭𑀯𑀺𑀲𑁂𑀲𑁄’’𑀢𑀺. 𑀲𑀼𑀯𑀸𑀦𑀤𑁄𑀡𑀺𑀬𑀦𑁆𑀢𑀺 𑀲𑀸𑀭𑀫𑁂𑀬𑁆𑀬𑀸𑀦𑀁 𑀪𑀼𑀜𑁆𑀚𑀦𑀓𑀅𑀫𑁆𑀩𑀡𑁂. 𑀲𑀼𑀯𑀸𑀦𑀯𑀫𑀣𑀼 𑀯𑀺𑀬𑀸𑀢𑀺 𑀯𑀦𑁆𑀢𑀲𑀼𑀦𑀔𑀙𑀟𑁆𑀟𑀦𑀁 𑀯𑀺𑀬. 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀅𑀢𑀻𑀢𑀢𑁆𑀢𑀸 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑁄 𑀳𑁄𑀢𑀻𑀢𑀺 𑀉𑀓𑁆𑀓𑀁𑀲𑀕𑀢𑀁 𑀢𑀲𑁆𑀲 𑀧𑀝𑀺𑀓𑁆𑀓𑀽𑀮𑀪𑀸𑀯𑀁 𑀯𑀺𑀪𑀸𑀯𑁂𑀢𑀺.

𑁨𑁯𑁮. 𑀧𑀭𑀺𑀪𑁄𑀕𑀦𑁆𑀢𑀺 𑀅𑀚𑁆𑀛𑁄𑀳𑀭𑀡𑀁. 𑀏𑀲 𑀆𑀳𑀸𑀭𑁄 𑀅𑀦𑁆𑀢𑁄 𑀧𑀯𑀺𑀲𑀫𑀸𑀦𑁄 𑀩𑀳𑀮𑀫𑀥𑀼𑀓𑀢𑁂𑀮𑀫𑀓𑁆𑀔𑀺𑀢𑁄 𑀯𑀺𑀬 𑀧𑀭𑀫𑀚𑁂𑀕𑀼𑀘𑁆𑀙𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑁄𑀢𑀺 𑀓𑁄𑀝𑁆𑀞𑀲𑁆𑀲 𑀅𑀩𑁆𑀪𑀦𑁆𑀢𑀭𑁂. 𑀦𑀺𑀥𑀸𑀦𑀫𑀦𑀼𑀧𑀕𑀢𑁄 𑀆𑀫𑀸𑀲𑀬𑀁 𑀅𑀧𑁆𑀧𑀢𑁆𑀢𑁄𑀬𑁂𑀯 𑀆𑀳𑀸𑀭𑁄 𑀧𑀺𑀢𑁆𑀢𑀸𑀤𑀻𑀳𑀺 𑀯𑀺𑀫𑀺𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀯𑀺𑀲𑀫𑀸𑀦𑁄’’𑀢𑀺. 𑀆𑀫𑀸𑀲𑀬𑀧𑀓𑁆𑀓𑀸𑀲𑀬𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀬𑀫𑀸𑀲𑀬𑁄 𑀦𑀸𑀫𑀸𑀢𑀺 𑀆𑀲𑀗𑁆𑀓𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀧𑀺𑀢𑁆𑀢𑀫𑁂𑀯𑀸𑀲𑀬𑁄 𑀧𑀺𑀢𑁆𑀢𑀸𑀲𑀬𑁄. 𑀅𑀥𑀺𑀓𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀫𑀦𑁆𑀤𑀧𑀼𑀜𑁆𑀜𑀩𑀸𑀳𑀼𑀮𑁆𑀮𑀢𑁄 𑀮𑁄𑀓𑀲𑁆𑀲. 𑀏𑀯𑀁 𑀆𑀲𑀬𑀢𑁄𑀢𑀺 𑀚𑁂𑀕𑀼𑀘𑁆𑀙𑁄 𑀳𑀼𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀝𑁆𑀞𑁄 𑀚𑁂𑀕𑀼𑀘𑁆𑀙𑀢𑀭𑁂𑀳𑀺 𑀧𑀺𑀢𑁆𑀢𑀸𑀤𑀻𑀳𑀺 𑀯𑀺𑀫𑀺𑀲𑁆𑀲𑀺𑀢𑁄 𑀅𑀢𑀺𑀯𑀺𑀬 𑀚𑁂𑀕𑀼𑀘𑁆𑀙𑁄 𑀳𑁄𑀢𑀻𑀢𑀺 𑀏𑀯𑀁 𑀆𑀲𑀬𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁨𑁯𑁯. 𑀦𑀺𑀥𑀸𑀦𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑁄𑀢𑀺 𑀆𑀳𑀸𑀭𑁄. 𑀤𑀲𑀯𑀲𑁆𑀲𑀺𑀓𑁂𑀦𑀸𑀢𑀺 𑀚𑀸𑀢𑀺𑀬𑀸 𑀤𑀲𑀯𑀲𑁆𑀲𑁂𑀦 𑀲𑀢𑁆𑀢𑁂𑀦. 𑀑𑀓𑀸𑀲𑁂𑀢𑀺 𑀆𑀫𑀸𑀲𑀬𑀲𑀗𑁆𑀔𑀸𑀢𑁂 𑀧𑀤𑁂𑀲𑁂.

𑁩𑁦𑁦. 𑀏𑀯𑀭𑀽𑀧𑁂𑀢𑀺 𑀏𑀤𑀺𑀲𑁂, 𑀤𑀲𑀯𑀲𑁆𑀲𑀸𑀦𑀺 𑀬𑀸𑀯 𑀯𑀲𑁆𑀲𑀲𑀢𑀁 𑀅𑀥𑁄𑀢𑀯𑀘𑁆𑀘𑀓𑀽𑀧𑀲𑀤𑀺𑀲𑁂𑀢𑀺 𑀅𑀢𑁆𑀣𑁄. 𑀦𑀺𑀥𑀸𑀦𑀦𑁆𑀢𑀺 𑀦𑀺𑀥𑀸𑀢𑀩𑁆𑀩𑀢𑀁. 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀢𑀺 𑀲𑀘𑁂 𑀧𑀦 ‘‘𑀤𑀲𑀯𑀲𑁆𑀲𑀺𑀓𑁂𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁨𑁯𑁯) 𑀬𑀣𑀸𑀯𑀼𑀢𑁆𑀢𑁄 𑀧𑀓𑀸𑀭𑁄 𑀏𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁄, 𑀢𑀲𑁆𑀫𑀺𑀁. 𑀧𑀭𑀫𑀦𑁆𑀥𑀓𑀸𑀭𑀢𑀺𑀫𑀺𑀲𑁂𑀢𑀺 𑀅𑀢𑀺𑀯𑀺𑀬 𑀅𑀦𑁆𑀥𑀓𑀭𑀡𑀫𑀳𑀸𑀢𑀫𑀲𑀺. 𑀅𑀢𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑁂 𑀧𑀤𑁂𑀲𑁂 𑀧𑀭𑀫𑀚𑁂𑀕𑀼𑀘𑁆𑀙𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀢𑁆𑀣 𑀓𑀺𑀁 𑀯𑀺𑀬𑀸𑀢𑀺 𑀆𑀳 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺. 𑀓𑀸𑀮𑀫𑁂𑀖𑁂𑀦 𑀅𑀪𑀺𑀯𑀼𑀝𑁆𑀞𑁂 𑀆𑀯𑀸𑀝𑁂 𑀩𑀳𑀼𑀲𑁄 𑀯𑀲𑁆𑀲𑀦𑁂𑀦 𑀏𑀓𑀘𑁆𑀘𑀁 𑀅𑀲𑀼𑀘𑀺𑀚𑀸𑀢𑀁 𑀉𑀧𑁆𑀧𑀺𑀮𑀯𑀺𑀢𑁆𑀯𑀸 𑀯𑀺𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀓𑀸𑀮𑀫𑁂𑀖-𑀕𑁆𑀕𑀳𑀡𑀁. 𑀢𑀺𑀡𑀧𑀡𑁆𑀡𑀓𑀺𑀮𑀜𑁆𑀚𑀔𑀡𑁆𑀟-𑀕𑁆𑀕𑀳𑀡𑀁 𑀦 𑀅𑀲𑀼𑀪𑀲𑁆𑀲𑀸𑀧𑀺 𑀅𑀲𑀼𑀪𑁂𑀦 𑀲𑀫𑁆𑀫𑀺𑀲𑁆𑀲𑀢𑀸𑀬 𑀅𑀲𑀼𑀪𑀪𑀸𑀯𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀓𑀸𑀬𑀕𑁆𑀕𑀺𑀲𑀦𑁆𑀢𑀸𑀧𑀓𑀼𑀣𑀺𑀢𑀓𑀼𑀣𑀦𑀲𑀜𑁆𑀚𑀸𑀢𑀨𑁂𑀡𑀧𑀼𑀩𑁆𑀩𑀼𑀴𑀓𑀸𑀘𑀺𑀢𑁄𑀢𑀺 𑀕𑀳𑀡𑀺𑀢𑁂𑀚𑁂𑀦 𑀧𑀓𑁆𑀓𑀼𑀣𑀺𑀢𑀦𑀺𑀧𑁆𑀧𑀓𑁆𑀓𑀢𑀸𑀬 𑀲𑀫𑀼𑀧𑁆𑀧𑀦𑁆𑀦𑀨𑁂𑀡𑀧𑀼𑀩𑁆𑀩𑀼𑀴𑀦𑀺𑀘𑀺𑀢𑁄. 𑀅𑀧𑀭𑀺𑀧𑀓𑁆𑀓𑀢𑁄𑀢𑀺 𑀅𑀧𑀭𑀺𑀧𑀓𑁆𑀓𑀪𑀸𑀯𑀢𑁄.

𑁩𑁦𑁧. 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀥𑀸𑀢𑀼𑀬𑁄 𑀯𑀺𑀬𑀸𑀢𑀺 𑀬𑀣𑀸 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀥𑀸𑀢𑀼𑀬𑁄 𑀯𑀺𑀥𑀺𑀦𑀸 𑀢𑀸𑀧𑀺𑀬𑀫𑀸𑀦𑀸 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀓𑁂 𑀫𑀼𑀜𑁆𑀘𑀦𑁆𑀢𑀺𑀬𑁄 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀦 𑀏𑀯𑀫𑀬𑀁. 𑀅𑀬𑀁 𑀧𑀦 𑀆𑀳𑀸𑀭𑁄 𑀓𑀸𑀬𑀕𑁆𑀕𑀺𑀦𑀸 𑀧𑀭𑀺𑀧𑀓𑁆𑀓𑁄 𑀨𑁂𑀡𑀧𑀼𑀩𑁆𑀩𑀼𑀴𑀓𑁂 𑀫𑀼𑀜𑁆𑀘𑀦𑁆𑀢𑁄 𑀲𑀡𑁆𑀳𑀁 𑀓𑀭𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 ‘‘𑀲𑀡𑁆𑀳𑀓𑀭𑀡𑀻’’𑀢𑀺 𑀮𑀤𑁆𑀥𑀦𑀸𑀫𑀓𑁂 𑀦𑀺𑀲𑀤𑁂 𑀧𑀺𑀲𑀺𑀢𑁆𑀯𑀸 𑀦𑀸𑀴𑀺𑀓𑁂 𑀔𑀼𑀤𑁆𑀤𑀓𑀯𑁂𑀴𑀼𑀦𑀸𑀴𑀺𑀓𑀸𑀬𑀁 𑀯𑀡𑁆𑀡𑀲𑀡𑁆𑀞𑀸𑀦𑀫𑀢𑁆𑀢𑁂𑀦 𑀧𑀓𑁆𑀔𑀺𑀧𑁆𑀧𑀫𑀸𑀦𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀯𑀺𑀬 𑀓𑀭𑀻𑀲𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀧𑀓𑁆𑀓𑀸𑀲𑀬𑀁 𑀧𑀽𑀭𑁂𑀢𑀺, 𑀫𑀼𑀢𑁆𑀢𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀫𑀼𑀢𑁆𑀢𑀯𑀢𑁆𑀣𑀺𑀁 𑀧𑀽𑀭𑁂𑀢𑀻𑀢𑀺 𑀬𑁄𑀚𑀦𑀸. 𑀕𑀳𑀡𑀺𑀬𑀸 𑀇𑀦𑁆𑀥𑀦𑀪𑀸𑀕𑁄 𑀯𑀺𑀬 𑀓𑀺𑀫𑀺𑀪𑀓𑁆𑀔𑀪𑀸𑀕𑁄 𑀘 𑀅𑀧𑀸𑀓𑀝𑁄𑀯. 𑀭𑀲𑀪𑀸𑀕𑁄 𑀨𑀮𑀢𑁄 𑀧𑀓𑀸𑀲𑀻𑀬𑀢𑀺, 𑀅𑀧𑀭𑀺𑀧𑀓𑁆𑀓𑀲𑀪𑀸𑀕𑀸 𑀘 𑀢𑁂𑀢𑀺 𑀢𑁂 𑀅𑀦𑀸𑀫𑀲𑀺𑀢𑁆𑀯𑀸 𑀓𑀭𑀻𑀲𑀫𑀼𑀢𑁆𑀢𑀪𑀸𑀕𑀸 𑀏𑀯𑁂𑀢𑁆𑀣 𑀤𑀲𑁆𑀲𑀺𑀢𑀸.

𑁩𑁦𑁨. 𑀧𑀝𑀺𑀓𑁆𑀓𑀽𑀮𑀲𑁆𑀲 𑀦𑀸𑀫 𑀨𑀮𑁂𑀦 𑀧𑀝𑀺𑀓𑁆𑀓𑀽𑀮𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀫𑀸 𑀧𑀭𑀺𑀧𑀘𑁆𑀘𑀫𑀸𑀦𑁄’’𑀢𑀺𑀆𑀤𑀺𑀫𑀸𑀳. 𑀦𑀔𑀤𑀦𑁆𑀢𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀢𑀘𑀸𑀤𑀻𑀦𑀺 𑀏𑀯 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀧𑀸𑀴𑀺𑀬𑀁 (𑀫. 𑀦𑀺. 𑁩.𑁧𑁫𑁪; 𑀔𑀼. 𑀧𑀸. 𑁩.𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭) 𑀆𑀕𑀢𑀸𑀦𑀺, 𑀅𑀣 𑀔𑁄 𑀅𑀓𑁆𑀔𑀺𑀕𑀽𑀣𑀓𑀡𑁆𑀡𑀕𑀽𑀣𑀤𑀦𑁆𑀢𑀫𑀮𑀚𑀮𑁆𑀮𑀺𑀓𑀸𑀲𑀫𑁆𑀪𑀯𑀸𑀤𑀻𑀦𑀺 𑀤𑁆𑀯𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑀯𑀺𑀦𑀺𑀫𑀼𑀢𑁆𑀢𑀸𑀦𑀺 𑀅𑀲𑀼𑀪𑀸𑀦𑀺 𑀲𑀗𑁆𑀕𑀡𑁆𑀳𑀦𑁆𑀢𑁄 ‘‘𑀦𑀸𑀦𑀸𑀓𑀼𑀡𑀧𑀸𑀦𑀻’’𑀢𑀺 𑀆𑀳𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁦𑁩. 𑀦𑀺𑀲𑁆𑀲𑀦𑁆𑀤𑀫𑀸𑀦𑁄𑀢𑀺 𑀯𑀺𑀲𑁆𑀲𑀯𑀦𑁆𑀢𑁄, 𑀧𑀕𑁆𑀖𑀭𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀆𑀤𑀺𑀦𑀸 𑀧𑀓𑀸𑀭𑁂𑀦𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀸𑀲𑀺𑀓𑀸𑀬 𑀲𑀺𑀗𑁆𑀖𑀸𑀡𑀺𑀓𑀸, 𑀫𑀼𑀔𑁂𑀦 𑀔𑁂𑀴𑁄, 𑀓𑀤𑀸𑀘𑀺 𑀧𑀺𑀢𑁆𑀢𑀁, 𑀲𑁂𑀫𑁆𑀳𑀁, 𑀮𑁄𑀳𑀺𑀢𑀁 𑀯𑀫𑀢𑀺, 𑀯𑀘𑁆𑀘𑀫𑀕𑁆𑀕𑁂𑀦 𑀉𑀘𑁆𑀘𑀸𑀭𑁄, 𑀧𑀲𑁆𑀲𑀸𑀯𑀫𑀕𑁆𑀕𑁂𑀦 𑀧𑀲𑁆𑀲𑀸𑀯𑁄, 𑀲𑀓𑀮𑀓𑀸𑀬𑁂 𑀮𑁄𑀫𑀓𑀽𑀧𑁂𑀳𑀺 𑀲𑁂𑀤𑀚𑀮𑁆𑀮𑀺𑀓𑀸𑀢𑀺 𑀏𑀯𑀁𑀧𑀓𑀸𑀭𑀁 𑀅𑀲𑀼𑀘𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀧𑀞𑀫𑀤𑀺𑀯𑀲𑁂’’𑀢𑀺 𑀇𑀤𑀁 𑀦𑀺𑀲𑁆𑀲𑀦𑁆𑀤𑀤𑀺𑀯𑀲𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀤𑀼𑀢𑀺𑀬𑀤𑀺𑀯𑀲𑁂 𑀦𑀺𑀲𑁆𑀲𑀦𑁆𑀤𑁂𑀦𑁆𑀢𑁄’’𑀢𑀺. 𑀯𑀺𑀓𑀼𑀡𑀺𑀢𑀫𑀼𑀔𑁄𑀢𑀺 𑀚𑀺𑀕𑀼𑀘𑁆𑀙𑀸𑀯𑀲𑁂𑀦 𑀲𑀗𑁆𑀓𑀼𑀘𑀺𑀢𑀫𑀼𑀔𑁄. 𑀢𑁂𑀦𑀸𑀳 ‘‘𑀚𑁂𑀕𑀼𑀘𑁆𑀙𑀻’’𑀢𑀺. 𑀫𑀗𑁆𑀓𑀼𑀪𑀽𑀢𑁄𑀢𑀺 𑀯𑀺𑀫𑀦𑀓𑀚𑀸𑀢𑁄 ‘‘𑀇𑀫𑀫𑁆𑀧𑀺 𑀦𑀸𑀫 𑀧𑁄𑀲𑁂𑀫𑀻’’𑀢𑀺. 𑀭𑀢𑁆𑀢𑁄𑀢𑀺 𑀯𑀢𑁆𑀣𑀁 𑀯𑀺𑀬 𑀭𑀗𑁆𑀕𑀚𑀸𑀢𑁂𑀦 𑀘𑀺𑀢𑁆𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀸𑀓𑀸𑀭𑁂𑀦 𑀙𑀦𑁆𑀤𑀭𑀸𑀕𑁂𑀦 𑀭𑀢𑁆𑀢𑁄. 𑀕𑀺𑀤𑁆𑀥𑁄𑀢𑀺 𑀅𑀪𑀺𑀓𑀗𑁆𑀔𑀦𑀲𑀪𑀸𑀯𑁂𑀦 𑀅𑀪𑀺𑀕𑀺𑀚𑁆𑀛𑀦𑁂𑀦 𑀕𑀺𑀤𑁆𑀥𑁄 𑀕𑁂𑀥𑀁 𑀆𑀧𑀦𑁆𑀦𑁄. 𑀕𑀥𑀺𑀢𑁄𑀢𑀺 𑀤𑀼𑀫𑁆𑀫𑁄𑀘𑀦𑀻𑀬𑀪𑀸𑀯𑁂𑀦 𑀕𑀦𑁆𑀣𑀺𑀢𑁄 𑀯𑀺𑀬 𑀢𑀢𑁆𑀣 𑀧𑀝𑀺𑀩𑀤𑁆𑀥𑁄. 𑀫𑀼𑀘𑁆𑀙𑀺𑀢𑁄𑀢𑀺 𑀭𑀲𑀢𑀡𑁆𑀳𑀸𑀬 𑀫𑀼𑀘𑁆𑀙𑀁 𑀫𑁄𑀳𑀁 𑀆𑀧𑀦𑁆𑀦𑁄. 𑀯𑀺𑀭𑀢𑁆𑀢𑁄𑀢𑀺 𑀯𑀺𑀕𑀢𑀭𑀸𑀕𑁄. 𑀅𑀝𑁆𑀝𑀻𑀬𑀫𑀸𑀦𑁄𑀢𑀺 𑀤𑀼𑀓𑁆𑀔𑀺𑀬𑀫𑀸𑀦𑁄. 𑀳𑀭𑀸𑀬𑀫𑀸𑀦𑁄𑀢𑀺 𑀮𑀚𑁆𑀚𑀫𑀸𑀦𑁄. 𑀚𑀺𑀕𑀼𑀘𑁆𑀙𑀫𑀸𑀦𑁄𑀢𑀺 𑀳𑀻𑀴𑁂𑀦𑁆𑀢𑁄.

𑀦𑀯𑀤𑁆𑀯𑀸𑀭𑁂𑀳𑀻𑀢𑀺 𑀧𑀸𑀓𑀝𑀸𑀦𑀁 𑀫𑀳𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀮𑁄𑀫𑀓𑀽𑀧𑀯𑀺𑀯𑀭𑁂𑀳𑀺𑀧𑀺 𑀲𑀦𑁆𑀤𑀢𑁂𑀯𑀸𑀢𑀺. 𑀦𑀺𑀮𑀻𑀬𑀢𑀻𑀢𑀺 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀦𑁆𑀢𑁄 𑀦𑀺𑀕𑀽𑀳𑀢𑀺, 𑀲𑀗𑁆𑀓𑀼𑀘𑀢𑀺 𑀯𑀸. 𑀏𑀯𑀦𑁆𑀢𑀺 𑀏𑀓𑁂𑀦 𑀤𑁆𑀯𑀸𑀭𑁂𑀦 𑀧𑀯𑁂𑀲𑀦𑀁 𑀅𑀦𑁂𑀓𑁂𑀳𑀺 𑀤𑁆𑀯𑀸𑀭𑁂𑀳𑀺 𑀅𑀦𑁂𑀓𑀥𑀸 𑀦𑀺𑀓𑁆𑀔𑀸𑀫𑀦𑀁, 𑀧𑀓𑀸𑀲𑀦𑀁 𑀧𑀯𑁂𑀲𑀦𑀁, 𑀦𑀺𑀕𑀽𑀴𑁆𑀳𑀁 𑀦𑀺𑀓𑁆𑀔𑀸𑀫𑀦𑀫𑁆𑀧𑀻𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑁂𑀦 𑀧𑀯𑁂𑀲𑀦𑀁, 𑀫𑀗𑁆𑀓𑀼𑀪𑀽𑀢𑁂𑀦 𑀦𑀺𑀓𑁆𑀔𑀸𑀫𑀦𑀁, 𑀲𑀸𑀭𑀢𑁆𑀢𑁂𑀦 𑀧𑀯𑁂𑀲𑀦𑀁, 𑀯𑀺𑀭𑀢𑁆𑀢𑁂𑀦 𑀦𑀺𑀓𑁆𑀔𑀸𑀫𑀦𑀦𑁆𑀢𑀺 𑀇𑀫𑁂𑀳𑀺 𑀧𑀓𑀸𑀭𑁂𑀳𑀺.

𑁩𑁦𑁪. 𑀧𑀭𑀺𑀪𑁄𑀕𑀓𑀸𑀮𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀧𑀯𑀺𑀝𑁆𑀞𑀫𑀢𑁆𑀢𑁄𑀧𑀺 𑀦𑀸𑀫 𑀧𑀯𑁂𑀲𑀤𑁆𑀯𑀸𑀭𑀁 𑀚𑁂𑀕𑀼𑀘𑁆𑀙𑀁 𑀓𑀭𑁄𑀢𑀺, 𑀧𑀕𑁂𑀯 𑀮𑀤𑁆𑀥𑀧𑀭𑀺𑀯𑀸𑀲𑁄 𑀧𑀭𑀺𑀧𑀸𑀓𑀧𑁆𑀧𑀢𑁆𑀢𑁄 𑀇𑀢𑀭𑀤𑁆𑀯𑀸𑀭𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀆𑀳𑀸𑀭𑁄. 𑀕𑀦𑁆𑀥𑀳𑀭𑀡𑀢𑁆𑀣𑀦𑁆𑀢𑀺 𑀯𑀺𑀲𑁆𑀲𑀕𑀦𑁆𑀥𑀸𑀧𑀦𑀬𑀦𑀢𑁆𑀣𑀁. 𑀓𑀸𑀬𑀕𑁆𑀕𑀺𑀦𑀸𑀢𑀺 𑀕𑀳𑀡𑀺𑀢𑁂𑀚𑀸𑀦𑀼𑀕𑀢𑁂𑀦 𑀓𑀸𑀬𑀼𑀲𑁆𑀫𑀸𑀦𑀸. 𑀨𑁂𑀡𑀼𑀤𑁆𑀤𑁂𑀳𑀓𑀦𑁆𑀢𑀺 𑀨𑁂𑀡𑀸𑀦𑀺 𑀉𑀝𑁆𑀞𑀧𑁂𑀢𑁆𑀯𑀸 𑀉𑀝𑁆𑀞𑀧𑁂𑀢𑁆𑀯𑀸. 𑀧𑀘𑁆𑀘𑀺𑀢𑁆𑀯𑀸𑀢𑀺 𑀧𑀭𑀺𑀧𑀸𑀓𑀁 𑀕𑀦𑁆𑀢𑁆𑀯𑀸. 𑀉𑀢𑁆𑀢𑀭𑀫𑀸𑀦𑁄𑀢𑀺 𑀉𑀧𑁆𑀧𑀺𑀮𑀯𑀦𑁆𑀢𑁄. 𑀲𑁂𑀫𑁆𑀳𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀺𑀢𑁆𑀢𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀭𑀻𑀲𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑁂𑀤𑀚𑀮𑁆𑀮𑀺𑀓𑀸𑀤𑀺𑀓𑁂. 𑀇𑀫𑀸𑀦𑀺 𑀤𑁆𑀯𑀸𑀭𑀸𑀦𑀺 𑀫𑀼𑀔𑀸𑀤𑀻𑀦𑀺. 𑀏𑀓𑀘𑁆𑀘𑀦𑁆𑀢𑀺 𑀧𑀲𑁆𑀲𑀸𑀯𑀫𑀕𑁆𑀕𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀘𑁄𑀓𑁆𑀔𑀚𑀸𑀢𑀺𑀓𑀸 𑀧𑀦 𑀫𑀼𑀔𑀸𑀤𑀻𑀦𑀺𑀧𑀺 𑀥𑁄𑀯𑀺𑀢𑁆𑀯𑀸 𑀳𑀢𑁆𑀣𑀁 𑀧𑀼𑀦 𑀥𑁄𑀯𑀦𑁆𑀢𑀺𑀬𑁂𑀯. 𑀧𑀼𑀦 𑀏𑀓𑀘𑁆𑀘𑀦𑁆𑀢𑀺 𑀯𑀘𑁆𑀘𑀫𑀕𑁆𑀕𑀁. 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸. 𑀏𑀢𑁆𑀣 𑀘 𑀆𑀳𑀸𑀭𑀢𑁆𑀣𑀸𑀬 𑀕𑀫𑀦𑀧𑀭𑀺𑀬𑁂𑀲𑀦𑀸𑀦𑀁 𑀧𑀝𑀺𑀓𑁆𑀓𑀽𑀮𑀢𑀸 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀢𑀸 𑀯𑀼𑀢𑁆𑀢𑀸. 𑀧𑀭𑀺𑀪𑁄𑀕𑀲𑁆𑀲 𑀢𑀦𑁆𑀦𑀺𑀲𑁆𑀲𑀬𑀢𑁄, 𑀆𑀲𑀬𑀦𑀺𑀥𑀸𑀦𑀸𑀦𑀁 𑀢𑀁𑀲𑀫𑁆𑀩𑀦𑁆𑀥𑀢𑁄, 𑀇𑀢𑀭𑁂𑀲𑀁 𑀢𑀩𑁆𑀩𑀺𑀓𑀸𑀭𑀢𑁄𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀫𑀺𑀪𑀓𑁆𑀔𑀪𑀸𑀯𑁄𑀧𑀺 𑀳𑀺𑀲𑁆𑀲 𑀯𑀺𑀓𑀸𑀭𑀧𑀓𑁆𑀔𑁂𑀬𑁂𑀯 𑀞𑀧𑁂𑀢𑀩𑁆𑀩𑁄𑀢𑀺.

𑁩𑁦𑁫. 𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀆𑀓𑀸𑀭𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀯𑀲𑁂𑀦 𑀉𑀧𑀝𑁆𑀞𑀺𑀢𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑀜𑁆𑀜𑀺𑀢𑀁 𑀪𑀸𑀯𑀦𑀸𑀬 𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁, 𑀦 𑀉𑀕𑁆𑀕𑀳𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀬𑀤𑀺 𑀳𑀺 𑀢𑀢𑁆𑀣 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂𑀦𑀧𑀺 𑀪𑀯𑀺𑀢𑀩𑁆𑀩𑀁. 𑀢𑀣𑀸 𑀘 𑀲𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑁂𑀦 𑀛𑀸𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀘 𑀪𑀯𑀢𑀺, 𑀓𑀲𑁆𑀫𑀸? 𑀪𑀸𑀯𑀦𑀸𑀬 𑀦𑀸𑀦𑀸𑀓𑀸𑀭𑀢𑁄, 𑀲𑀪𑀸𑀯𑀥𑀫𑁆𑀫𑀪𑀸𑀯𑁂𑀦 𑀘 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀲𑀪𑀸𑀯𑀥𑀫𑁆𑀫𑀢𑀸𑀬 𑀕𑀫𑁆𑀪𑀻𑀭𑀢𑁆𑀢𑀸’’𑀢𑀺. 𑀏𑀢𑁆𑀣 𑀳𑀺 𑀬𑀤𑀺𑀧𑀺 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀯𑀲𑁂𑀦 𑀪𑀸𑀯𑀦𑀸 𑀧𑀯𑀢𑁆𑀢𑀢𑀺. 𑀬𑁂 𑀧𑀦 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀜𑁆𑀜𑀢𑁆𑀢𑀺, 𑀢𑁂 𑀏𑀯 𑀥𑀫𑁆𑀫𑀸 𑀧𑀝𑀺𑀓𑁆𑀓𑀽𑀮𑀸, 𑀦 𑀧𑀜𑁆𑀜𑀢𑁆𑀢𑀻𑀢𑀺 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀕𑁆𑀕𑀳𑀡𑀫𑀼𑀔𑁂𑀦𑀧𑀺 𑀲𑀪𑀸𑀯𑀥𑀫𑁆𑀫𑁂𑀬𑁂𑀯 𑀆𑀭𑀩𑁆𑀪 𑀪𑀸𑀯𑀦𑀸𑀬 𑀧𑀯𑀢𑁆𑀢𑀦𑀢𑁄, 𑀲𑀪𑀸𑀯𑀥𑀫𑁆𑀫𑀸𑀦𑀜𑁆𑀘 𑀲𑀪𑀸𑀯𑁂𑀦𑁂𑀯 𑀕𑀫𑁆𑀪𑀻𑀭𑀪𑀸𑀯𑀢𑁄 𑀦 𑀢𑀢𑁆𑀣 𑀛𑀸𑀦𑀁 𑀅𑀧𑁆𑀧𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀕𑀫𑁆𑀪𑀻𑀭𑀪𑀸𑀯𑀢𑁄 𑀳𑀺 𑀧𑀼𑀭𑀺𑀫𑀲𑀘𑁆𑀘𑀤𑁆𑀯𑀬𑀁 𑀤𑀼𑀤𑁆𑀤𑀲𑀁 𑀚𑀸𑀢𑀦𑁆𑀢𑀺. 𑀬𑀤𑀺 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀓𑀣𑀁 𑀓𑀫𑁆𑀫𑀝𑁆𑀞𑀸𑀦𑀁 ‘‘𑀲𑀜𑁆𑀜𑀸’’ 𑀇𑀘𑁆𑀘𑁂𑀯 𑀯𑁄𑀳𑀭𑀻𑀬𑀢𑀻𑀢𑀺 𑀆𑀳 ‘‘𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺.

𑀇𑀤𑀸𑀦𑀺 𑀇𑀫𑀺𑀲𑁆𑀲𑀸 𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀜𑁆𑀘 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀲𑀢𑀡𑁆𑀳𑀸𑀬𑀸𑀢𑀺 𑀫𑀥𑀼𑀭𑀸𑀤𑀺𑀭𑀲𑀯𑀺𑀲𑀬𑀸𑀬 𑀢𑀡𑁆𑀳𑀸𑀬. 𑀧𑀢𑀺𑀮𑀻𑀬𑀢𑀻𑀢𑀺 𑀲𑀗𑁆𑀓𑀼𑀘𑀢𑀺 𑀅𑀦𑁂𑀓𑀸𑀓𑀸𑀭𑀁 𑀢𑀢𑁆𑀣 𑀧𑀝𑀺𑀓𑁆𑀓𑀽𑀮𑀢𑀸𑀬 𑀲𑀡𑁆𑀞𑀺𑀢𑀢𑁆𑀢𑀸. 𑀧𑀢𑀺𑀓𑀼𑀝𑀢𑀻𑀢𑀺 𑀅𑀧𑀲𑀓𑁆𑀓𑀢𑀺 𑀦 𑀯𑀺𑀲𑀭𑀢𑀺. 𑀧𑀢𑀺𑀯𑀢𑁆𑀢𑀢𑀻𑀢𑀺 𑀦𑀺𑀯𑀢𑁆𑀢𑀢𑀺. 𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁄𑀢𑀺 𑀫𑀳𑀢𑁄 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀧𑁆𑀧𑀬𑁄𑀚𑀦𑁄. 𑀯𑀺𑀕𑀢𑀫𑀤𑁄𑀢𑀺 𑀫𑀸𑀦𑀫𑀤𑀸𑀤𑀻𑀦𑀁 𑀅𑀪𑀸𑀯𑁂𑀦 𑀦𑀺𑀫𑁆𑀫𑀤𑁄, 𑀫𑀤𑀸𑀪𑀸𑀯𑀕𑁆𑀕𑀳𑀡𑁂𑀦𑁂𑀯 𑀘𑀲𑁆𑀲 𑀤𑀯𑀫𑀡𑁆𑀟𑀦𑀯𑀺𑀪𑀽𑀲𑀦𑀸𑀤𑀻𑀦𑀫𑁆𑀧𑀺 𑀅𑀪𑀸𑀯𑁄 𑀕𑀳𑀺𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀭𑀺𑀜𑁆𑀜𑀸𑀫𑀼𑀔𑁂𑀦𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀢𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑀤𑁆𑀯𑀸𑀭𑁂𑀦. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄𑀢𑀺 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀦𑀺𑀬𑀼𑀢𑁆𑀢𑁄, 𑀢𑀧𑁆𑀧𑀬𑁄𑀚𑀦𑁄 𑀯𑀸 𑀭𑀸𑀕𑁄. 𑀧𑀭𑀺𑀜𑁆𑀜𑀁 𑀲𑀫𑀢𑀺𑀓𑁆𑀓𑀫𑀁 𑀕𑀘𑁆𑀙𑀢𑀺. 𑀭𑀲𑀢𑀡𑁆𑀳𑀸𑀬 𑀳𑀺 𑀲𑀫𑁆𑀫𑀤𑁂𑀯 𑀯𑀺𑀕𑀢𑀸𑀬 𑀭𑀽𑀧𑀢𑀡𑁆𑀳𑀸𑀤𑀬𑁄𑀧𑀺 𑀯𑀺𑀕𑀢𑀸 𑀏𑀯 𑀳𑁄𑀦𑁆𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀉𑀓𑁆𑀓𑀁𑀲𑀕𑀫𑀦𑀢𑁄. 𑀲𑀢𑀺 𑀘 𑀯𑀺𑀲𑀬𑀺𑀲𑀫𑀢𑀺𑀓𑁆𑀓𑀫𑁂 𑀯𑀺𑀲𑀬𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑁄 𑀧𑀜𑁆𑀘𑀓𑀸𑀫𑀕𑀼𑀡𑀧𑀭𑀺𑀜𑁆𑀜𑀸𑀫𑀼𑀔𑁂𑀦 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺. 𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀳𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑁂𑀲𑀼 𑀢𑀦𑁆𑀦𑀺𑀲𑁆𑀲𑀬𑀪𑀽𑀢𑀸𑀦𑀺, 𑀢𑀕𑁆𑀕𑀸𑀳𑀓𑀸 𑀧𑀲𑀸𑀤𑀸 𑀘 𑀲𑀼𑀔𑁂𑀦𑁂𑀯 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀻𑀢𑀺. 𑀅𑀧𑀭𑀺𑀧𑀓𑁆𑀓𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀲𑀬𑀦𑀺𑀥𑀸𑀦𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀅𑀧𑀭𑀺𑀧𑀓𑁆𑀓𑀁 𑀢𑀸𑀯 𑀉𑀤𑀭𑀺𑀬𑀫𑁂𑀯. 𑀆𑀲𑀬𑀕𑁆𑀕𑀳𑀡𑁂𑀦 𑀧𑀺𑀢𑁆𑀢𑀲𑁂𑀫𑁆𑀳𑀧𑀼𑀩𑁆𑀩𑀮𑁄𑀳𑀺𑀢𑀸𑀦𑀁, 𑀧𑀭𑀺𑀧𑀓𑁆𑀓𑀕𑁆𑀕𑀳𑀡𑁂𑀦 𑀓𑀭𑀻𑀲𑀫𑀼𑀢𑁆𑀢𑀸𑀦𑀁, 𑀨𑀮𑀕𑁆𑀕𑀳𑀡𑁂𑀦 𑀓𑁂𑀲𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀧𑀭𑀺𑀕𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺 𑀆𑀳 ‘‘𑀓𑀸𑀬𑀕𑀢𑀸𑀲𑀢𑀺𑀪𑀸𑀯𑀦𑀸𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺. 𑀅𑀲𑀼𑀪𑀲𑀜𑁆𑀜𑀸𑀬𑀸𑀢𑀺 𑀅𑀲𑀼𑀪𑀪𑀸𑀯𑀦𑀸𑀬, 𑀅𑀯𑀺𑀜𑁆𑀜𑀸𑀡𑀓𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀕𑁆𑀕𑀳𑀡𑁂𑀦 𑀓𑀸𑀬𑀲𑁆𑀲 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀪𑀸𑀯𑀲𑀮𑁆𑀮𑀓𑁆𑀔𑀡𑀢𑁄. 𑀇𑀫𑀁 𑀧𑀦 𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀇𑀫𑀁 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀪𑀸𑀯𑀦𑀁. 𑀅𑀫𑀢𑀧𑀭𑀺𑀬𑁄𑀲𑀸𑀦𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀦𑀺𑀝𑁆𑀞𑀺𑀢𑀁 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀪𑀸𑀯𑀦𑀸𑀲𑀗𑁆𑀔𑀸𑀢𑀁 𑀉𑀧𑀘𑀸𑀭𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀦𑁆𑀢𑀺 𑀅𑀢𑁆𑀣𑁄.

𑀆𑀳𑀸𑀭𑁂𑀧𑀝𑀺𑀓𑁆𑀓𑀽𑀮𑀪𑀸𑀯𑀦𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀪𑀸𑀯𑀦𑀸𑀯𑀡𑁆𑀡𑀦𑀸

𑁩𑁦𑁬. ‘‘𑀏𑀓𑀁 𑀯𑀯𑀢𑁆𑀣𑀸𑀦𑀦𑁆𑀢𑀺 𑀏𑀯𑀁 𑀉𑀤𑁆𑀤𑀺𑀝𑁆𑀞𑀲𑁆𑀲 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀲𑁆𑀲 𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀉𑀤𑁆𑀤𑁂𑀲𑁄 𑀦𑀸𑀫 𑀦𑀺𑀤𑁆𑀤𑁂𑀲𑀢𑁆𑀣𑁄 𑀫𑀼𑀤𑀼𑀫𑀚𑁆𑀛𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀢𑁄, 𑀆𑀕𑀢𑁄 𑀘 𑀪𑀸𑀭𑁄 𑀅𑀯𑀲𑁆𑀲𑀁 𑀯𑀳𑀺𑀢𑀩𑁆𑀩𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀢𑀺𑀧𑀺 𑀯𑀺𑀲𑀬𑀪𑁂𑀤𑁂𑀦 𑀯𑀯𑀢𑁆𑀣𑀸𑀦𑀲𑁆𑀲 𑀪𑁂𑀤𑁂 𑀯𑀯𑀢𑁆𑀣𑀸𑀦𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀦 𑀢𑀁 𑀅𑀪𑀺𑀦𑁆𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀏𑀓𑀁 𑀯𑀯𑀢𑁆𑀣𑀸𑀦’’𑀦𑁆𑀢𑀺, 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀲𑀢𑀺𑀧𑀺 𑀯𑀺𑀲𑀬𑀪𑁂𑀤𑁂 𑀅𑀢𑁆𑀣𑀲𑀺𑀤𑁆𑀥𑀺𑀬𑀁 𑀢𑀲𑁆𑀲 𑀏𑀓𑀯𑀺𑀲𑀬𑀢𑀸𑀯𑀸𑀢𑀺 ‘‘𑀏𑀓𑀁 𑀯𑀯𑀢𑁆𑀣𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀬𑁄𑀕𑀺𑀦𑁄 𑀬𑀤𑀺𑀧𑀺 𑀧𑀼𑀩𑁆𑀩𑀪𑀸𑀕𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀓𑁄𑀝𑁆𑀞𑀸𑀲𑁂𑀲𑀼 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑀢𑀺, 𑀅𑀧𑀭𑀪𑀸𑀕𑁂 𑀧𑀦 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀲𑁆𑀫𑀺𑀁𑀬𑁂𑀯 𑀓𑁄𑀝𑁆𑀞𑀸𑀲𑁂 𑀅𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀺, 𑀦 𑀲𑀩𑁆𑀩𑁂𑀲𑀼, 𑀏𑀯𑀫𑀺𑀥𑀸𑀧𑀻𑀢𑀺. 𑀢𑀢𑁆𑀣 𑀲𑀺𑀬𑀸 𑁋 𑀬𑀣𑀸 𑀧𑀝𑀺𑀓𑁆𑀓𑀽𑀮𑀪𑀸𑀯𑀲𑀸𑀫𑀜𑁆𑀜𑁂𑀦 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑁂 𑀅𑀪𑁂𑀤𑀢𑁄 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑀢𑀺, 𑀏𑀯𑀁 𑀇𑀥 𑀥𑀸𑀢𑀼𑀪𑀸𑀯𑀲𑀸𑀫𑀜𑁆𑀜𑁂𑀦 𑀅𑀪𑁂𑀤𑀢𑁄 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑀢𑀻𑀢𑀺 ‘‘𑀏𑀓𑀁 𑀯𑀯𑀢𑁆𑀣𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁. 𑀢𑀢𑁆𑀣 𑀳𑀺 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀢𑁄 𑀧𑀝𑁆𑀞𑀸𑀬 𑀧𑀝𑀺𑀓𑁆𑀓𑀽𑀮𑀯𑀲𑁂𑀦𑁂𑀯 𑀲𑀩𑁆𑀩𑀢𑁆𑀣 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄, 𑀇𑀥 𑀧𑀦 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀥𑀸𑀢𑀼𑀬𑁄 𑀫𑀦𑀲𑀺 𑀓𑀸𑀢𑀩𑁆𑀩𑀸, 𑀦 𑀥𑀸𑀢𑀼𑀪𑀸𑀯𑀲𑀸𑀫𑀜𑁆𑀜𑀢𑁄. 𑀢𑁂𑀦𑁂𑀯𑀸𑀳 ‘‘𑀲𑀪𑀸𑀯𑀽𑀧𑀮𑀓𑁆𑀔𑀡𑀯𑀲𑁂𑀦 𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺. 𑀓𑀺𑀁 𑀯𑀸 𑀏𑀢𑁂𑀦 𑀧𑀧𑀜𑁆𑀘𑁂𑀦, 𑀅𑀜𑁆𑀜𑁂𑀳𑀺 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀳𑀺 𑀅𑀲𑀁𑀲𑀝𑁆𑀞𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀦𑀸𑀫 𑀏𑀓𑀁 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀁 𑀯𑀯𑀢𑁆𑀣𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀲𑁆𑀲 𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀪𑀸𑀯𑀦𑀸𑀯? 𑀲𑀘𑁆𑀘𑀁 𑀪𑀸𑀯𑀦𑀸𑀯, 𑀲𑀓𑀺𑀁 𑀧𑀯𑀢𑁆𑀢𑀁 𑀧𑀦 𑀯𑀯𑀢𑁆𑀣𑀸𑀦𑀁, 𑀢𑀲𑁆𑀲 𑀩𑀳𑀼𑀮𑀻𑀓𑀸𑀭𑁄 𑀪𑀸𑀯𑀦𑀸𑀢𑀺 𑀯𑀘𑀦𑀪𑁂𑀤𑁂𑀦 𑀯𑀼𑀢𑁆𑀢𑀁. 𑀓𑀣𑀁 𑀧𑀦 𑀪𑀸𑀯𑀦𑀸 𑀦𑀺𑀤𑁆𑀤𑀺𑀲𑀻𑀬𑀢𑀺 𑀢𑀲𑁆𑀲𑀸 𑀯𑀘𑀻𑀕𑁄𑀘𑀭𑀸𑀢𑀺𑀓𑁆𑀓𑀦𑁆𑀢𑀪𑀸𑀯𑀢𑁄𑀢𑀺? 𑀦𑀸𑀬𑀁 𑀤𑁄𑀲𑁄 𑀪𑀸𑀯𑀦𑀢𑁆𑀣𑁂 𑀪𑀸𑀯𑀦𑀸𑀯𑁄𑀳𑀸𑀭𑀢𑁄. 𑀪𑀸𑀯𑀦𑀢𑁆𑀣𑁄 𑀳𑀺 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁄 𑀇𑀥 ‘‘𑀪𑀸𑀯𑀦𑀸’’𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀲𑀪𑀸𑀯𑀽𑀧𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀓𑀓𑁆𑀔𑀴𑀢𑁆𑀢𑀸𑀤𑀺𑀓𑀲𑁆𑀲 𑀲𑀮𑀓𑁆𑀔𑀡𑀲𑁆𑀲 𑀉𑀧𑀥𑀸𑀭𑀡𑀯𑀲𑁂𑀦. 𑀇𑀤𑀁 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀬 𑀦 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀲𑀮𑁆𑀮𑀓𑁆𑀔𑀡𑀯𑀲𑁂𑀦, 𑀦𑀻𑀮𑀓𑀲𑀺𑀡𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀬 𑀦 𑀦𑀻𑀮𑀸𑀤𑀺𑀯𑀡𑁆𑀡𑀲𑀮𑁆𑀮𑀓𑁆𑀔𑀡𑀯𑀲𑁂𑀦, 𑀦𑀸𑀧𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀬 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀲𑀸𑀫𑀜𑁆𑀜𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀅𑀣 𑀔𑁄 𑀧𑀣𑀯𑀻𑀆𑀤𑀻𑀦𑀁 𑀲𑀪𑀸𑀯𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀪𑀸𑀯𑀽𑀧𑀮𑀓𑁆𑀔𑀡𑀯𑀲𑁂𑀦𑀸’’𑀢𑀺, 𑀓𑀓𑁆𑀔𑀴𑀢𑁆𑀢𑀸𑀤𑀺𑀓𑀲𑁆𑀲 𑀲𑀮𑀓𑁆𑀔𑀡𑀲𑁆𑀲 𑀉𑀧𑀥𑀸𑀭𑀡𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 𑀜𑀸𑀡𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀬𑁂𑀯𑀸𑀧𑀦𑀓𑀯𑀺𑀦𑀺𑀘𑁆𑀙𑀬𑁄, 𑀦𑀸𑀧𑀺 𑀯𑀺𑀢𑀓𑁆𑀓𑀸𑀤𑀺𑀯𑀺𑀦𑀺𑀘𑁆𑀙𑀬𑁄. 𑀥𑀸𑀢𑀼𑀫𑀦𑀲𑀺𑀓𑀸𑀭𑁄𑀢𑀺 𑀥𑀸𑀢𑀽𑀲𑀼 𑀫𑀦𑀲𑀺𑀓𑀸𑀭𑁄, 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀆𑀭𑀩𑁆𑀪 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀓𑀸𑀢𑀩𑁆𑀩𑀢𑁄 𑀓𑀫𑁆𑀫𑀁, 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 𑀞𑀸𑀦𑀜𑁆𑀘𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀪𑀸𑀯𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀁 𑀬𑁄𑀕𑀓𑀫𑁆𑀫𑀁. 𑀢𑁂𑀦𑀸𑀳 ‘‘𑀥𑀸𑀢𑀼𑀫𑀦𑀲𑀺𑀓𑀸𑀭𑁄, 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺. 𑀢𑀬𑀺𑀤𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁. ‘‘𑀤𑁆𑀯𑀺𑀥𑀸 𑀆𑀕𑀢’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀥𑀸𑀢𑀼𑀯𑀺𑀪𑀗𑁆𑀕𑁂 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀲𑁂𑀦 𑀆𑀕𑀢𑀁, 𑀢𑀲𑁆𑀫𑀸 ‘‘𑀢𑀺𑀥𑀸 𑀆𑀕𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦, 𑀢𑀢𑁆𑀣𑀸𑀧𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀥𑀸𑀢𑀽𑀦𑀁 𑀧𑀪𑁂𑀤𑀢𑁄 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀲𑁆𑀲 𑀓𑀢𑀢𑁆𑀢𑀸, 𑀩𑀸𑀳𑀺𑀭𑀸𑀦𑀜𑁆𑀘 𑀥𑀸𑀢𑀽𑀦𑀁 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸. 𑀅𑀣 𑀯𑀸 𑀤𑁆𑀯𑀺𑀥𑀸 𑀆𑀕𑀢𑀦𑁆𑀢𑀺 𑀏𑀢𑁆𑀣 𑀤𑁆𑀯𑀺𑀥𑀸𑀯 𑀆𑀕𑀢𑀦𑁆𑀢𑀺 𑀦 𑀏𑀯𑀁 𑀦𑀺𑀬𑀫𑁄 𑀕𑀳𑁂𑀢𑀩𑁆𑀩𑁄, 𑀅𑀣 𑀔𑁄 𑀤𑁆𑀯𑀺𑀥𑀸 𑀆𑀕𑀢𑀫𑁂𑀯𑀸𑀢𑀺, 𑀢𑁂𑀦 𑀢𑀢𑀺𑀬𑀲𑁆𑀲𑀸𑀧𑀺 𑀧𑀓𑀸𑀭𑀲𑁆𑀲 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀲𑁄 𑀘 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁄 ‘‘𑀲𑀗𑁆𑀔𑁂𑀧𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘𑀸’’𑀢𑀺 𑀏𑀢𑁆𑀣 𑀆𑀯𑀼𑀢𑁆𑀢𑀺𑀯𑀲𑁂𑀦, 𑀘-𑀲𑀤𑁆𑀤𑁂𑀦𑁂𑀯 𑀯𑀸 𑀲𑀗𑁆𑀕𑀳𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀬𑁄 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 𑀅𑀢𑀺𑀲𑀗𑁆𑀔𑁂𑀧𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀮𑀩𑁆𑀪𑀫𑀸𑀦𑁄 𑀯𑀺𑀢𑁆𑀣𑀸𑀭𑀪𑀸𑀕𑁄, 𑀢𑀁 𑀯𑀺𑀢𑁆𑀣𑀸𑀭𑀦𑀬𑀦𑁆𑀢𑁄𑀕𑀥𑀫𑁂𑀯 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀤𑁆𑀯𑀺𑀥𑀸 𑀆𑀕𑀢’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢’’𑀦𑁆𑀢𑀺 𑀇𑀤𑀜𑁆𑀘 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. ‘‘𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂’’𑀢𑀺 𑀘 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁, 𑀲𑀢𑀺𑀧𑀝𑁆𑀞𑀸𑀦(𑀤𑀻. 𑀦𑀺. 𑁨.𑁩𑁭𑁮 𑀆𑀤𑀬𑁄; 𑀫. 𑀦𑀺. 𑁩.𑁧𑁧𑁧 𑀆𑀤𑀬𑁄) 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑀸𑀤𑀻𑀲𑀼𑀧𑀺 (𑀫. 𑀦𑀺. 𑁩.𑁧𑁫𑁩 𑀆𑀤𑀬𑁄) 𑀢𑀣𑁂𑀯 𑀆𑀕𑀢𑀢𑁆𑀢𑀸. 𑀭𑀸𑀳𑀼𑀮𑁄𑀯𑀸𑀤𑁂𑀢𑀺 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑁂 (𑀫. 𑀦𑀺. 𑁨.𑁧𑁧𑁩 𑀆𑀤𑀬𑁄). 𑀥𑀸𑀢𑀼𑀯𑀺𑀪𑀗𑁆𑀕𑁂𑀢𑀺 𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁩𑁪𑁨 𑀆𑀤𑀬𑁄), 𑀅𑀪𑀺𑀥𑀫𑁆𑀫𑁂 𑀥𑀸𑀢𑀼𑀯𑀺𑀪𑀗𑁆𑀕𑁂 (𑀯𑀺𑀪. 𑁧𑁭𑁨 𑀆𑀤𑀬𑁄) 𑀘.

𑀓𑀸𑀫𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑁂𑀲𑀦𑀸 𑀆𑀕𑀢𑀸, 𑀉𑀧𑀫𑀸 𑀘 𑀦𑀸𑀫 𑀬𑀸𑀯𑀤𑁂𑀯 𑀉𑀧𑀫𑁂𑀬𑁆𑀬𑀢𑁆𑀣𑀯𑀺𑀪𑀸𑀯𑀦𑀢𑁆𑀣𑀸𑀢𑀺 𑀉𑀧𑀫𑀁 𑀢𑀸𑀯 𑀤𑀲𑁆𑀲𑁂𑀢𑁆𑀯𑀸 𑀉𑀧𑀫𑁂𑀬𑁆𑀬𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑁂𑀬𑁆𑀬𑀣𑀸𑀧𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀆𑀦𑀻𑀢𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀥𑀸𑀢𑀼𑀯𑀲𑁂𑀦, 𑀢𑀢𑁆𑀣𑀧𑀺 𑀘𑀢𑀼𑀫𑀳𑀸𑀪𑀽𑀢𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺? 𑀲𑀢𑁆𑀢𑀲𑀼𑀜𑁆𑀜𑀢𑀸𑀲𑀦𑁆𑀤𑀲𑁆𑀲𑀦𑀢𑁆𑀣𑀁, 𑀏𑀢𑁆𑀣 𑀥𑀸𑀢𑀼𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀑𑀴𑀸𑀭𑀺𑀓𑀪𑀸𑀯𑁂𑀦 𑀲𑀼𑀧𑀸𑀓𑀝𑀢𑀸𑀬, 𑀏𑀓𑀘𑁆𑀘𑀯𑁂𑀦𑁂𑀬𑁆𑀬𑀚𑀦𑀘𑀭𑀺𑀢𑀸𑀦𑀼𑀓𑀼𑀮𑀢𑀸𑀬 𑀘 𑀫𑀳𑀸𑀪𑀽𑀢𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀣𑀯𑀻𑀥𑀸𑀢𑀽𑀢𑀺𑀆𑀤𑀻𑀲𑀼 𑀥𑀸𑀢𑀼𑀢𑁆𑀣𑁄 𑀦𑀸𑀫 𑀲𑀪𑀸𑀯𑀢𑁆𑀣𑁄, 𑀲𑀪𑀸𑀯𑀢𑁆𑀣𑁄 𑀦𑀸𑀫 𑀲𑀼𑀜𑁆𑀜𑀢𑀢𑁆𑀣𑁄, 𑀲𑀼𑀜𑁆𑀜𑀢𑀢𑁆𑀣𑁄 𑀦𑀸𑀫 𑀦𑀺𑀲𑁆𑀲𑀢𑁆𑀢𑀢𑁆𑀣𑁄. 𑀏𑀯𑀁 𑀲𑀪𑀸𑀯𑀲𑀼𑀜𑁆𑀜𑀢𑀦𑀺𑀲𑁆𑀲𑀢𑁆𑀢𑀢𑁆𑀣𑁂𑀦 𑀧𑀣𑀯𑀻𑀬𑁂𑀯 𑀥𑀸𑀢𑀼 𑀧𑀣𑀯𑀻𑀥𑀸𑀢𑀼. 𑀆𑀧𑁄𑀥𑀸𑀢𑀼𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀣𑀯𑀻𑀥𑀸𑀢𑀽𑀢𑀺 𑀲𑀳𑀚𑀭𑀽𑀧𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸 𑀥𑀸𑀢𑀼, 𑀢𑀣𑀸 𑀆𑀧𑁄𑀥𑀸𑀢𑀽𑀢𑀺 𑀆𑀩𑀦𑁆𑀥𑀦𑀥𑀸𑀢𑀼, 𑀢𑁂𑀚𑁄𑀥𑀸𑀢𑀽𑀢𑀺 𑀧𑀭𑀺𑀧𑀸𑀘𑀦𑀥𑀸𑀢𑀼, 𑀯𑀸𑀬𑁄𑀥𑀸𑀢𑀽𑀢𑀺 𑀯𑀺𑀢𑁆𑀣𑀫𑁆𑀪𑀦𑀥𑀸𑀢𑀽𑀢𑀺 𑀏𑀯𑀫𑁂𑀢𑁆𑀣 𑀲𑀫𑀸𑀲𑁄, 𑀪𑀸𑀯𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺.

𑀏𑀯𑀁 𑀢𑀺𑀓𑁆𑀔𑀧𑀜𑁆𑀜𑀲𑁆𑀲𑀸𑀢𑀺𑀆𑀤𑀻𑀲𑀼 𑀏𑀯𑀦𑁆𑀢𑀺 𑀬𑀣𑀸𑀤𑀲𑁆𑀲𑀺𑀢𑀁 𑀧𑀸𑀴𑀺𑀁 𑀧𑀘𑁆𑀘𑀸𑀫𑀲𑀢𑀺. 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀢𑀺 𑀓𑀢𑁆𑀯𑀸 𑀆𑀳 ‘‘𑀢𑀺𑀓𑁆𑀔𑀧𑀜𑁆𑀜𑀲𑁆𑀲𑀸’’𑀢𑀺. 𑀬𑀣𑀸 𑀯𑀢𑁆𑀣𑀬𑀼𑀕𑀁 𑀅𑀭𑀳𑀢𑀻𑀢𑀺 𑀯𑀢𑁆𑀣𑀬𑀼𑀕𑀺𑀓𑁄, 𑀏𑀯𑀁 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀅𑀭𑀳𑀢𑀺, 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀧𑀬𑁄𑀚𑀦𑁄𑀢𑀺 𑀯𑀸 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑁄, 𑀢𑀲𑁆𑀲 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲.

𑀙𑁂𑀓𑁄𑀢𑀺 𑀢𑀁𑀢𑀁𑀲𑀫𑀜𑁆𑀜𑀸𑀬 𑀓𑀼𑀲𑀮𑁄, 𑀬𑀣𑀸𑀚𑀸𑀢𑁂 𑀲𑀽𑀦𑀲𑁆𑀫𑀺𑀁 𑀦𑀗𑁆𑀕𑀼𑀝𑁆𑀞𑀔𑀼𑀭𑀯𑀺𑀲𑀸𑀡𑀸𑀤𑀺𑀯𑀦𑁆𑀢𑁂 𑀅𑀝𑁆𑀞𑀺𑀫𑀁𑀲𑀸𑀤𑀺𑀅𑀯𑀬𑀯𑀲𑀫𑀼𑀤𑀸𑀬𑁂 𑀅𑀯𑀺𑀪𑀢𑁆𑀢𑁂 𑀕𑀸𑀯𑀻𑀲𑀫𑀜𑁆𑀜𑀸, 𑀦 𑀯𑀺𑀪𑀢𑁆𑀢𑁂, 𑀯𑀺𑀪𑀢𑁆𑀢𑁂 𑀧𑀦 𑀅𑀝𑁆𑀞𑀺𑀫𑀁𑀲𑀸𑀤𑀺𑀅𑀯𑀬𑀯𑀲𑀫𑀜𑁆𑀜𑀸𑀢𑀺 𑀚𑀸𑀦𑀦𑀓𑁄. 𑀕𑁄𑀖𑀸𑀢𑀓𑁄𑀢𑀺 𑀚𑀻𑀯𑀺𑀓𑀢𑁆𑀣𑀸𑀬 𑀕𑀼𑀦𑁆𑀦𑀁 𑀖𑀸𑀢𑀓𑁄. 𑀅𑀦𑁆𑀢𑁂𑀯𑀸𑀲𑀻𑀢𑀺 𑀓𑀫𑁆𑀫𑀓𑀭𑀡𑀯𑀲𑁂𑀦 𑀢𑀲𑁆𑀲 𑀲𑀫𑀻𑀧𑀯𑀸𑀲𑀻 𑀢𑀲𑁆𑀲 𑀢𑀦𑁆𑀦𑀺𑀲𑁆𑀲𑀸𑀬 𑀚𑀻𑀯𑀦𑀢𑁄. 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀅𑀜𑁆𑀜𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸. 𑀫𑀳𑀸𑀧𑀣𑀸𑀦𑀁 𑀯𑁂𑀫𑀚𑁆𑀛𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀧𑀣𑀸𑀦𑀁 𑀢𑀸𑀬 𑀏𑀯 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑀸𑀦𑀲𑀗𑁆𑀔𑀸𑀢𑁂. 𑀬𑀲𑁆𑀫𑀸 𑀢𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀣𑀸 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀦𑁆𑀢𑁆𑀯𑀸 𑀲𑀫𑁄𑀳𑀺𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀘𑀢𑀼𑀫𑀳𑀸𑀧𑀣𑀸𑀦𑀁, 𑀢𑀲𑁆𑀫𑀺𑀁 𑀘𑀢𑀼𑀫𑀳𑀸𑀧𑀣𑁂. 𑀯𑀺𑀮𑀻𑀬𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀺 𑀯𑀺𑀪𑀚𑁆𑀚𑀦𑁆𑀢𑀻𑀢𑀺 𑀩𑀻𑀮𑀸, 𑀪𑀸𑀕𑀸, 𑀯-𑀓𑀸𑀭𑀲𑁆𑀲 𑀩-𑀓𑀸𑀭𑀁, 𑀇-𑀓𑀸𑀭𑀲𑁆𑀲 𑀘 𑀈-𑀓𑀸𑀭𑀁 𑀓𑀢𑁆𑀯𑀸. 𑀢𑀫𑁂𑀯 𑀳𑀺 𑀪𑀸𑀕𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀞𑀺𑀢-𑀲𑀤𑁆𑀤𑁄 ‘‘𑀞𑀺𑀢𑁄 𑀯𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁨𑁮) 𑀯𑀺𑀬 𑀞𑀸𑀦𑀲𑀗𑁆𑀔𑀸𑀢𑀇𑀭𑀺𑀬𑀸𑀧𑀣𑀲𑀫𑀗𑁆𑀕𑀺𑀢𑀸𑀬, 𑀕𑀢𑀺𑀦𑀺𑀯𑀢𑁆𑀢𑀺𑀅𑀢𑁆𑀣𑀢𑀸𑀬 𑀯𑀸 𑀞𑀸-𑀲𑀤𑁆𑀤𑀲𑁆𑀲 𑀅𑀜𑁆𑀜𑀢𑁆𑀣 𑀞𑀧𑁂𑀢𑁆𑀯𑀸 𑀕𑀫𑀦𑀁 𑀲𑁂𑀲𑀇𑀭𑀺𑀬𑀸𑀧𑀣𑀲𑀫𑀗𑁆𑀕𑀺𑀢𑀸𑀬 𑀩𑁄𑀥𑀓𑁄, 𑀇𑀥 𑀧𑀦 𑀬𑀣𑀸 𑀢𑀣𑀸 𑀭𑀽𑀧𑀓𑀸𑀬𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀩𑁄𑀥𑀓𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀞𑀺𑀢𑀢𑁆𑀢𑀸𑀬𑀣𑀸𑀞𑀺𑀢’’𑀦𑁆𑀢𑀺. 𑀢𑀢𑁆𑀣 𑀆𑀓𑀸𑀭𑁂𑀦𑀸𑀢𑀺 𑀞𑀸𑀦𑀸𑀤𑀺𑀦𑀸 𑀭𑀽𑀧𑀓𑀸𑀬𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑁂𑀦. 𑀞𑀸𑀦𑀸𑀤𑀬𑁄 𑀳𑀺 𑀇𑀭𑀺𑀬𑀸𑀲𑀗𑁆𑀔𑀸𑀢𑀸𑀬 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 ‘‘𑀇𑀭𑀺𑀬𑀸𑀧𑀣𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀞𑀺𑀢𑀦𑁆𑀢𑀺 𑀬𑀣𑀸𑀧𑀯𑀢𑁆𑀢𑀁. 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀫𑁂𑀯𑁂𑀢𑁆𑀣 𑀧𑀡𑀺𑀥𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀬𑀣𑀸𑀞𑀺𑀢𑀢𑁆𑀢𑀸𑀯 𑀬𑀣𑀸𑀧𑀡𑀺𑀳𑀺𑀢’’𑀦𑁆𑀢𑀺. 𑀞𑀺𑀢𑀦𑁆𑀢𑀺 𑀯𑀸 𑀓𑀸𑀬𑀲𑁆𑀲 𑀞𑀸𑀦𑀲𑀗𑁆𑀔𑀸𑀢𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁. 𑀧𑀡𑀺𑀳𑀺𑀢𑀦𑁆𑀢𑀺 𑀢𑀤𑀜𑁆𑀜𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁. 𑀞𑀺𑀢𑀦𑁆𑀢𑀺 𑀯𑀸 𑀓𑀸𑀬𑀲𑀗𑁆𑀔𑀸𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑀡𑁂 𑀲𑀓𑀺𑀘𑁆𑀘𑀯𑀲𑁂𑀦 𑀅𑀯𑀝𑁆𑀞𑀸𑀦𑀧𑀭𑀺𑀤𑀻𑀧𑀦𑀁. 𑀧𑀡𑀺𑀳𑀺𑀢𑀦𑁆𑀢𑀺 𑀧𑀘𑁆𑀘𑀬𑀓𑀺𑀘𑁆𑀘𑀯𑀲𑁂𑀦 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀧𑀓𑀸𑀭𑀢𑁄 𑀦𑀺𑀳𑀺𑀢𑀁 𑀧𑀡𑀺𑀳𑀺𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀸𑀢𑀼𑀲𑁄𑀢𑀺 𑀥𑀸𑀢𑀼𑀁 𑀥𑀸𑀢𑀼𑀁 𑀧𑀣𑀯𑀻𑀆𑀤𑀺𑀥𑀸𑀢𑀼𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸. 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀧𑀢𑀺 𑀧𑀢𑀺 𑀅𑀯𑁂𑀓𑁆𑀔𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀧𑀲𑁆𑀲𑀢𑀺.

𑀬𑀣𑀸 𑀙𑁂𑀓𑁄𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀸 𑀲𑀤𑁆𑀤𑀢𑁆𑀣𑀯𑀺𑀯𑀭𑀡𑀯𑀲𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀇𑀤𑀸𑀦𑀺 𑀪𑀸𑀯𑀢𑁆𑀣𑀯𑀺𑀪𑀸𑀯𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀕𑁄𑀖𑀸𑀢𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑁄𑀲𑁂𑀦𑁆𑀢𑀲𑁆𑀲𑀸𑀢𑀺 𑀫𑀁𑀲𑀽𑀧𑀘𑀬𑀧𑀭𑀺𑀩𑁆𑀭𑀽𑀳𑀦𑀸𑀬 𑀓𑀼𑀡𑁆𑀟𑀓𑀪𑀢𑁆𑀢𑀓𑀧𑁆𑀧𑀸𑀲𑀝𑁆𑀞𑀺𑀆𑀤𑀻𑀳𑀺 𑀲𑀁𑀯𑀟𑁆𑀠𑁂𑀦𑁆𑀢𑀲𑁆𑀲. 𑀯𑀥𑀺𑀢𑀁 𑀫𑀢𑀦𑁆𑀢𑀺 𑀳𑀺𑀁𑀲𑀺𑀢𑀁 𑀳𑀼𑀢𑁆𑀯𑀸 𑀫𑀢𑀁. 𑀫𑀢𑀦𑁆𑀢𑀺 𑀘 𑀫𑀢𑀫𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀢𑀸𑀯𑀤𑁂𑀯𑀸’’𑀢𑀺. 𑀕𑀸𑀯𑀻𑀢𑀺 𑀲𑀜𑁆𑀜𑀸 𑀦 𑀅𑀦𑁆𑀢𑀭𑀥𑀸𑀬𑀢𑀺 𑀬𑀸𑀦𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀉𑀧𑀸𑀤𑀸𑀬 𑀕𑀸𑀯𑀻𑀲𑀫𑀜𑁆𑀜𑀸, 𑀫𑀢𑀫𑀢𑁆𑀢𑀸𑀬𑀧𑀺 𑀕𑀸𑀯𑀺𑀬𑀸 𑀢𑁂𑀲𑀁 𑀲𑀦𑁆𑀦𑀺𑀯𑁂𑀲𑀲𑁆𑀲 𑀅𑀯𑀺𑀦𑀝𑁆𑀞𑀢𑁆𑀢𑀸. 𑀩𑀺𑀮𑀸𑀲𑁄𑀢𑀺 𑀩𑀺𑀮𑀁 𑀩𑀺𑀮𑀁 𑀓𑀢𑁆𑀯𑀸. 𑀯𑀺𑀪𑀚𑀺𑀢𑁆𑀯𑀸𑀢𑀺 𑀅𑀝𑁆𑀞𑀺𑀲𑀗𑁆𑀖𑀸𑀢𑀢𑁄 𑀫𑀁𑀲𑀁 𑀯𑀺𑀯𑁂𑀘𑁂𑀢𑁆𑀯𑀸, 𑀢𑀢𑁄 𑀯𑀸 𑀯𑀺𑀯𑁂𑀘𑀺𑀢𑀁 𑀫𑀁𑀲𑀁 𑀪𑀸𑀕𑀲𑁄 𑀓𑀢𑁆𑀯𑀸. 𑀢𑁂𑀦𑁂𑀯𑀸𑀳 ‘‘𑀫𑀁𑀲𑀲𑀜𑁆𑀜𑀸 𑀧𑀯𑀢𑁆𑀢𑀢𑀻’’𑀢𑀺. 𑀧𑀩𑁆𑀩𑀚𑀺𑀢𑀲𑁆𑀲𑀧𑀺 𑀅𑀧𑀭𑀺𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲. 𑀖𑀦𑀯𑀺𑀦𑀺𑀩𑁆𑀪𑁄𑀕𑀦𑁆𑀢𑀺 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀖𑀦𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀦𑀁 𑀯𑀺𑀯𑁂𑀘𑀦𑀁. 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲. 𑀲𑀢𑁆𑀢𑀲𑀜𑁆𑀜𑀸𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀯𑀲𑁂𑀦 𑀧𑀯𑀢𑁆𑀢𑀸 𑀲𑀢𑁆𑀢𑀲𑀜𑁆𑀜𑀸𑀢𑀺 𑀯𑀤𑀦𑁆𑀢𑀺, 𑀯𑁄𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑀲𑀢𑁆𑀢𑀲𑀜𑁆𑀜𑀸𑀬𑀧𑀺 𑀢𑀤𑀸 𑀅𑀦𑁆𑀢𑀭𑀥𑀸𑀦𑀁 𑀬𑀼𑀢𑁆𑀢𑀫𑁂𑀯 𑀬𑀸𑀣𑀸𑀯𑀢𑁄 𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀲𑀫𑁆𑀧𑀸𑀤𑀦𑀢𑁄. 𑀏𑀯𑀁 𑀳𑀺 𑀲𑀢𑀺 𑀬𑀣𑀸𑀯𑀼𑀢𑁆𑀢𑀑𑀧𑀫𑁆𑀫𑀢𑁆𑀣𑁂𑀦 𑀑𑀧𑀫𑁂𑀬𑁆𑀬𑀢𑁆𑀣𑁄 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀥𑀸𑀢𑀼𑀯𑀲𑁂𑀦𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀻’’𑀢𑀺.

𑁩𑁦𑁭. 𑀏𑀯𑀁 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀲𑀗𑁆𑀔𑁂𑀧𑀢𑁄 𑀆𑀕𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀸𑀳𑀢𑁆𑀣𑀺𑀧𑀤𑀽𑀧𑀫𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀭𑀸𑀳𑀼𑀮𑁄𑀯𑀸𑀤- (𑀫. 𑀦𑀺. 𑁨.𑁧𑁧𑁩 𑀆𑀤𑀬𑁄) 𑀥𑀸𑀢𑀼𑀯𑀺𑀪𑀗𑁆𑀕𑁂𑀲𑀼 (𑀫. 𑀦𑀺. 𑁩.𑁩𑁪𑁨 𑀆𑀤𑀬𑁄; 𑀯𑀺𑀪. 𑁧𑁭𑁨 𑀆𑀤𑀬𑁄) 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀆𑀕𑀫𑀦𑀫𑁂𑀯 𑀉𑀧𑀲𑀁𑀳𑀭𑀢𑀺, 𑀦 𑀲𑀩𑁆𑀩𑀁 𑀤𑁂𑀲𑀦𑀸𑀦𑀬𑀁 𑀅𑀜𑁆𑀜𑀣𑀸𑀧𑀺 𑀢𑀢𑁆𑀣 𑀤𑁂𑀲𑀦𑀸𑀦𑀬𑀲𑁆𑀲 𑀆𑀕𑀢𑀢𑁆𑀢𑀸.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀬𑀣𑀸𑀤𑀲𑁆𑀲𑀺𑀢𑁂 𑀫𑀳𑀸𑀳𑀢𑁆𑀣𑀺𑀧𑀤𑀽𑀧𑀫𑀧𑀸𑀞𑁂. 𑀅𑀚𑁆𑀛𑀢𑁆𑀢𑀺𑀓𑀸𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸. 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀦𑁆𑀢𑀺 𑀧𑀤𑀤𑁆𑀯𑀬𑁂𑀦𑀸𑀧𑀺 𑀢𑀁𑀢𑀁𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀥𑀫𑁆𑀫𑁄 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀉𑀪𑀬𑀫𑁆𑀧𑀺 𑀦𑀺𑀬𑀓𑀲𑁆𑀲 𑀅𑀥𑀺𑀯𑀘𑀦’’𑀦𑁆𑀢𑀺. 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀧𑀦 𑀅𑀢𑁆𑀢𑀦𑀺 𑀕𑀳𑁂𑀢𑀩𑁆𑀩𑀪𑀸𑀯𑀽𑀧𑀕𑀫𑀦𑀯𑀲𑁂𑀦 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀁 𑀅𑀚𑁆𑀛𑀢𑁆𑀢𑀁. 𑀢𑀁𑀢𑀁𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀧𑀘𑁆𑀘𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀢𑀦𑀺 𑀧𑀯𑀢𑁆𑀢𑀢𑁆𑀢𑀸 𑀅𑀚𑁆𑀛𑀢𑁆𑀢𑀁, 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀧𑀝𑀺𑀘𑁆𑀘 𑀧𑀯𑀢𑁆𑀢𑀢𑁆𑀢𑀸 𑀧𑀘𑁆𑀘𑀢𑁆𑀢’’𑀦𑁆𑀢𑀺. 𑀓𑀓𑁆𑀔𑀴𑀦𑁆𑀢𑀺 𑀓𑀣𑀺𑀦𑀁. 𑀬𑀲𑁆𑀫𑀸 𑀢𑀁 𑀣𑀤𑁆𑀥𑀪𑀸𑀯𑁂𑀦 𑀲𑀳𑀚𑀸𑀢𑀸𑀦𑀁 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀣𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀔𑀭𑀺𑀕𑀢𑀦𑁆𑀢𑀺 𑀔𑀭𑀻𑀲𑀼 𑀔𑀭𑀲𑀪𑀸𑀯𑁂𑀲𑀼 𑀕𑀢𑀁 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁, 𑀔𑀭𑀲𑀪𑀸𑀯𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀔𑀭𑀲𑀪𑀸𑀯𑀁 𑀨𑀭𑀼𑀲𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀢𑁄 𑀨𑀭𑀼𑀲𑀸𑀓𑀸𑀭𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀨𑀭𑀼𑀲’’𑀦𑁆𑀢𑀺. 𑀢𑁂𑀦𑀸𑀳 ‘‘𑀤𑀼𑀢𑀺𑀬𑀁 𑀆𑀓𑀸𑀭𑀯𑀘𑀦’’𑀦𑁆𑀢𑀺. 𑀉𑀧𑀸𑀤𑀺𑀦𑁆𑀦𑀁 𑀦𑀸𑀫 𑀲𑀭𑀻𑀭𑀝𑁆𑀞𑀓𑀁. 𑀢𑀁 𑀧𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑀁 𑀲𑀦𑁆𑀥𑀸𑀬 𑀉𑀧𑀸𑀤𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀦𑁆𑀦𑀫𑁆𑀧𑀺, 𑀢𑀡𑁆𑀳𑀸𑀤𑀻𑀳𑀺 𑀆𑀤𑀺𑀦𑁆𑀦𑀕𑀳𑀺𑀢𑀧𑀭𑀸𑀫𑀝𑁆𑀞𑀯𑀲𑁂𑀦 𑀲𑀩𑁆𑀩𑀫𑁆𑀧𑁂𑀢𑀁 𑀉𑀧𑀸𑀤𑀺𑀦𑁆𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀸𑀤𑀺𑀦𑁆𑀦𑀦𑁆𑀢𑀺 𑀤𑀴𑁆𑀳𑀁 𑀆𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀫𑀫’’𑀦𑁆𑀢𑀺 𑀕𑀳𑀺𑀢𑀁 ‘‘𑀅𑀳’’𑀦𑁆𑀢𑀺 𑀧𑀭𑀸𑀫𑀝𑁆𑀞𑀦𑁆𑀢𑀺 𑀬𑁄𑀚𑀦𑀸. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀯𑀸𑀘𑀻𑀢𑀺 𑀆𑀳 ‘‘𑀢𑀁 𑀓𑀢𑀫𑀦𑁆𑀢𑀺 𑀘𑁂𑀢𑀺 𑀅𑀢𑁆𑀣𑁄’’𑀢𑀺. 𑀢𑀢𑁄𑀢𑀺 𑀧𑀘𑁆𑀙𑀸. 𑀢𑀦𑁆𑀢𑀺 𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀪𑁂𑀤𑀢𑁄 𑀤𑀲𑁆𑀲𑀺𑀢𑀁 𑀧𑀣𑀯𑀻𑀥𑀸𑀢𑀼𑀁. 𑀤𑀲𑁆𑀲𑁂𑀦𑁆𑀢𑁄𑀢𑀺 𑀯𑀢𑁆𑀣𑀼𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄. 𑀓𑀺𑀜𑁆𑀘𑀸𑀧𑀺 𑀫𑀢𑁆𑀣𑀮𑀼𑀗𑁆𑀕𑀁 𑀅𑀝𑁆𑀞𑀺𑀫𑀺𑀜𑁆𑀚𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀇𑀥 𑀧𑀸𑀴𑀺𑀬𑀁 𑀯𑀺𑀲𑀼𑀁 𑀦 𑀉𑀤𑁆𑀥𑀝𑀁, 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁪) 𑀧𑀦 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀯𑀺𑀲𑀼𑀁 𑀕𑀳𑀺𑀢𑀦𑁆𑀢𑀺 𑀢𑀫𑁆𑀧𑀺 𑀲𑀗𑁆𑀕𑀡𑁆𑀳𑀦𑁆𑀢𑁄 𑀣𑀤𑁆𑀥𑀪𑀸𑀯𑀸𑀥𑀺𑀓𑀢𑀸𑀬 𑀧𑀣𑀯𑀻𑀥𑀸𑀢𑀼𑀓𑁄𑀝𑁆𑀞𑀸𑀲𑁂𑀲𑀼𑀬𑁂𑀯 ‘‘𑀫𑀢𑁆𑀣𑀮𑀼𑀗𑁆𑀕𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀧𑀣𑀯𑀻𑀥𑀸𑀢𑀼 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀆𑀳. ‘‘𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀻’’𑀢𑀺 𑀯𑀸 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀇𑀥 ‘‘𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀻’’𑀢𑀺 𑀇𑀤𑀁 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑀁 ‘‘𑀫𑀢𑁆𑀣𑀮𑀼𑀗𑁆𑀕𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀧𑀣𑀯𑀻𑀥𑀸𑀢𑀼 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀻’’𑀢𑀺 𑀯𑀘𑀦𑀢𑁄. 𑀧𑀼𑀦 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀻𑀢𑀺 𑀅𑀯𑀲𑁂𑀲𑁂𑀲𑀼 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀢𑀺𑀧𑁆𑀧𑀓𑀸𑀭𑁂𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀦 𑀳𑀺 𑀢𑁂 𑀢𑀬𑁄 𑀓𑁄𑀝𑁆𑀞𑀸𑀲𑀸.

𑀯𑀺𑀲𑁆𑀲𑀦𑁆𑀤𑀦𑀪𑀸𑀯𑁂𑀦𑀸𑀢𑀺 𑀧𑀕𑁆𑀖𑀭𑀡𑀲𑀪𑀸𑀯𑁂𑀦. 𑀅𑀧𑁆𑀧𑁄𑀢𑀻𑀢𑀺 𑀯𑀺𑀲𑀭𑀢𑀺. 𑀧𑀧𑁆𑀧𑁄𑀢𑀻𑀢𑀺 𑀧𑀸𑀧𑀼𑀡𑀸𑀢𑀺, 𑀲𑀲𑀫𑁆𑀪𑀸𑀭𑀆𑀧𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀲𑁄 𑀳𑀺 𑀯𑀺𑀲𑁆𑀲𑀦𑁆𑀤𑀦𑀪𑀸𑀯𑁂𑀦 𑀲𑀲𑀫𑁆𑀪𑀸𑀭𑀧𑀣𑀯𑀻𑀲𑀗𑁆𑀔𑀸𑀢𑀁 𑀢𑀁 𑀢𑀁 𑀞𑀸𑀦𑀁 𑀯𑀺𑀲𑀭𑀢𑀺, 𑀧𑀸𑀧𑀼𑀡𑀸𑀢𑀺 𑀘, 𑀮𑀓𑁆𑀔𑀡𑀸𑀧𑀯𑀲𑁂𑀦𑁂𑀯 𑀯𑀸. 𑀲𑁄𑀧𑀺 𑀳𑀺 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀢𑀸𑀬 𑀲𑁂𑀲𑀪𑀽𑀢𑀢𑁆𑀢𑀬𑀲𑀗𑁆𑀔𑀸𑀢𑀁 𑀢𑀁 𑀢𑀁 𑀞𑀸𑀦𑀁 𑀤𑁆𑀭𑀯𑀪𑀸𑀯𑀲𑀺𑀤𑁆𑀥𑁂𑀦 𑀯𑀺𑀲𑁆𑀲𑀦𑁆𑀤𑀦𑀪𑀸𑀯𑁂𑀦 𑀆𑀩𑀦𑁆𑀥𑀢𑁆𑀢𑀁, 𑀆𑀲𑀢𑁆𑀢𑀢𑁆𑀢𑀁, 𑀅𑀯𑀺𑀧𑁆𑀧𑀓𑀺𑀡𑁆𑀡𑀜𑁆𑀘 𑀓𑀭𑁄𑀦𑁆𑀢𑀁 ‘‘𑀅𑀧𑁆𑀧𑁄𑀢𑀺 𑀧𑀧𑁆𑀧𑁄𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺.

𑀢𑁂𑀚𑀦𑀯𑀲𑁂𑀦𑀸𑀢𑀺 𑀦𑀺𑀲𑀺𑀢𑀪𑀸𑀯𑁂𑀦 𑀢𑀺𑀓𑁆𑀔𑀪𑀸𑀯𑁂𑀦. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 ‘‘𑀦𑀸𑀦𑀸𑀯𑀺𑀥𑁂𑀲𑀽’’𑀢𑀺 𑀆𑀧𑁄𑀥𑀸𑀢𑀼𑀬𑀁 𑀯𑀼𑀢𑁆𑀢𑀦𑀬𑁂𑀦. 𑀓𑀼𑀧𑀺𑀢𑁂𑀦𑀸𑀢𑀺 𑀔𑀼𑀪𑀺𑀢𑁂𑀦. 𑀉𑀲𑀼𑀫𑀚𑀸𑀢𑁄𑀢𑀺 𑀉𑀲𑁆𑀫𑀸𑀪𑀺𑀪𑀽𑀢𑁄. 𑀚𑀻𑀭𑀢𑀻𑀢𑀺 𑀚𑀺𑀡𑁆𑀡𑁄 𑀳𑁄𑀢𑀺. 𑀢𑁂𑀚𑁄𑀥𑀸𑀢𑀼𑀯𑀲𑁂𑀦 𑀮𑀩𑁆𑀪𑀫𑀸𑀦𑀸 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀚𑀭𑀸𑀧𑀯𑀢𑁆𑀢𑀺 𑀧𑀸𑀓𑀝𑀚𑀭𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀭𑀻𑀭𑁂 𑀧𑀓𑀢𑀺𑀉𑀲𑀼𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀡𑁆𑀳𑀪𑀸𑀯𑁄 𑀲𑀦𑁆𑀢𑀸𑀧𑁄, 𑀲𑀭𑀻𑀭𑀲𑁆𑀲 𑀤𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑀳𑀸𑀤𑀸𑀳𑁄 𑀧𑀭𑀺𑀤𑀸𑀳𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀬𑁂𑀦 𑀚𑀻𑀭𑀻𑀬𑀢𑀻𑀢𑀺 𑀘 𑀏𑀓𑀸𑀳𑀺𑀓𑀸𑀤𑀺𑀚𑀭𑀭𑁄𑀕𑁂𑀦 𑀚𑀭𑀻𑀬𑀢𑀻𑀢𑀺𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀲𑀢𑀓𑁆𑀔𑀢𑁆𑀢𑀼𑀁 𑀢𑀸𑀧𑁂𑀢𑁆𑀯𑀸 𑀢𑀸𑀧𑁂𑀢𑁆𑀯𑀸 𑀲𑀻𑀢𑀼𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀝𑀸 𑀲𑀧𑁆𑀧𑀺 ‘‘𑀲𑀢𑀥𑁄𑀢𑀲𑀧𑁆𑀧𑀻’’𑀢𑀺 𑀯𑀤𑀦𑁆𑀢𑀺. 𑀅𑀲𑀺𑀢𑀦𑁆𑀢𑀺 𑀪𑀼𑀢𑁆𑀢𑀁. 𑀔𑀸𑀬𑀺𑀢𑀦𑁆𑀢𑀺 𑀔𑀸𑀤𑀺𑀢𑀁. 𑀲𑀸𑀬𑀺𑀢𑀦𑁆𑀢𑀺 𑀅𑀲𑁆𑀲𑀸𑀤𑀺𑀢𑀁. 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀻𑀢𑀺 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀲𑀫𑁆𑀫𑀸𑀧𑀭𑀺𑀧𑀸𑀓𑁄𑀧𑀺 𑀧𑀦 𑀯𑀺𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀢𑀲𑁆𑀲𑀸 𑀏𑀯 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀭𑀲𑀸𑀤𑀺𑀪𑀸𑀯𑁂𑀦𑀸𑀢𑀺 𑀭𑀲𑀭𑀼𑀥𑀺𑀭𑀫𑀁𑀲𑀫𑁂𑀤𑀦𑁆𑀳𑀸𑀭𑀼𑀅𑀝𑁆𑀞𑀺𑀅𑀝𑁆𑀞𑀺𑀫𑀺𑀜𑁆𑀚𑀲𑀼𑀓𑁆𑀓𑀯𑀲𑁂𑀦. 𑀯𑀺𑀯𑁂𑀓𑀦𑁆𑀢𑀺 𑀧𑀼𑀣𑀼𑀪𑀸𑀯𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀪𑀸𑀯𑀁. 𑀅𑀲𑀺𑀢𑀸𑀤𑀺𑀪𑁂𑀤𑀲𑁆𑀲 𑀳𑀺 𑀆𑀳𑀸𑀭𑀲𑁆𑀲 𑀧𑀭𑀺𑀡𑀸𑀫𑁂 𑀭𑀲𑁄 𑀳𑁄𑀢𑀺, 𑀢𑀁 𑀧𑀝𑀺𑀘𑁆𑀘 𑀭𑀲𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 ‘‘𑀭𑀲𑀲𑁆𑀲 𑀧𑀭𑀺𑀡𑀸𑀫𑁂 𑀭𑀼𑀥𑀺𑀭’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀦𑁂𑀢𑀩𑁆𑀩𑀁.

𑀯𑀸𑀬𑀦𑀯𑀲𑁂𑀦𑀸𑀢𑀺 𑀲𑀫𑀼𑀤𑀻𑀭𑀡𑀯𑀲𑁂𑀦, 𑀲𑀯𑁂𑀕𑀕𑀫𑀦𑀯𑀲𑁂𑀦 𑀯𑀸. 𑀉𑀕𑁆𑀕𑀸𑀭𑀳𑀺𑀓𑁆𑀓𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀉𑀤𑁆𑀤𑁂𑀓𑀔𑀺𑀧𑀦𑀸𑀤𑀺𑀧𑀯𑀢𑁆𑀢𑀦𑀓𑀯𑀸𑀢𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀺𑀢𑁆𑀢𑀲𑁂𑀫𑁆𑀳𑀮𑀲𑀺𑀓𑀸𑀓𑁂𑀯𑀮𑀤𑀼𑀕𑁆𑀕𑀦𑁆𑀥𑀸𑀤𑀺𑀦𑀻𑀳𑀭𑀡𑀓𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀺𑀧𑀺 𑀓𑀼𑀘𑁆𑀙𑀺-𑀲𑀤𑁆𑀤𑁄 𑀉𑀤𑀭𑀧𑀭𑀺𑀬𑀸𑀬𑁄, 𑀓𑁄𑀝𑁆𑀞-𑀲𑀤𑁆𑀤𑁂𑀦 𑀧𑀦 𑀅𑀦𑁆𑀢𑀦𑁆𑀢𑀭𑀲𑁆𑀲 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀢𑀤𑀯𑀲𑀺𑀝𑁆𑀞𑁄 𑀉𑀤𑀭𑀧𑁆𑀧𑀤𑁂𑀲𑁄 𑀇𑀥 𑀓𑀼𑀘𑁆𑀙𑀺-𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀩𑀳𑀺𑀯𑀸𑀢𑀸’’𑀢𑀺. 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀮𑁄𑀓𑀦𑀯𑀺𑀮𑁄𑀓𑀦𑀉𑀤𑁆𑀥𑀭𑀡𑀸𑀢𑀺𑀳𑀭𑀡𑀸𑀤𑀺𑀓𑀸 𑀲𑀩𑁆𑀩𑀸 𑀓𑀸𑀬𑀺𑀓𑀓𑀺𑀭𑀺𑀬𑀸 𑀲𑀗𑁆𑀕𑀳𑀺𑀢𑀸. ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀯𑀸’’𑀢𑀺 𑀏𑀢𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀭𑀻𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀦 𑀳𑀺 𑀩𑀳𑀺𑀤𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀲𑀫𑁆𑀪𑀯𑁄 𑀅𑀢𑁆𑀣𑀻𑀢𑀺. 𑀬𑀤𑀺 𑀏𑀯𑀁 𑀓𑀣𑀁 ‘‘𑀧𑀲𑁆𑀲𑀸𑀲𑁄𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀦𑀸𑀲𑀺𑀓𑀯𑀸𑀢𑁄, 𑀤𑀻𑀖𑀦𑀸𑀲𑀺𑀓𑀲𑁆𑀲 𑀦𑀸𑀲𑀺𑀓𑀕𑁆𑀕𑀁, 𑀇𑀢𑀭𑀲𑁆𑀲 𑀉𑀢𑁆𑀢𑀭𑁄𑀝𑁆𑀞𑀁 𑀨𑀼𑀲𑀦𑁆𑀢𑁄 𑀧𑀯𑀢𑁆𑀢𑀢𑀻’’𑀢𑀺 𑀯𑀘𑀦𑀁? 𑀢𑀁 𑀦𑀺𑀓𑁆𑀔𑀫𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲, 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀉𑀢𑀼𑀲𑀫𑀼𑀝𑁆𑀞𑀸𑀦𑀲𑁆𑀲 𑀘 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀆𑀧𑁄𑀥𑀸𑀢𑀼𑀆𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀥𑀸𑀢𑀽𑀦𑀁 𑀦𑀺𑀤𑁆𑀤𑁂𑀲𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀆𑀧𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 ‘‘𑀬𑀁 𑀯𑀸 𑀧𑀦𑀜𑁆𑀜’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀪𑀯𑀲𑁆𑀲, 𑀢𑁂𑀚𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀲𑀭𑀻𑀭𑁂 𑀧𑀸𑀓𑀢𑀺𑀓𑀉𑀲𑁆𑀫𑀸𑀬, 𑀯𑀸𑀬𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀥𑀫𑀦𑀺𑀚𑀸𑀮𑀸𑀦𑀼𑀲𑀝𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀘𑀫𑁆𑀫𑀔𑀻𑀮𑀧𑀻𑀴𑀓𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀯𑀸𑀬𑀼𑀦𑁄 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀫𑀺𑀜𑁆𑀚𑀦𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀯𑀸𑀢𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀯. 𑀬𑀤𑀺 𑀏𑀯𑀁, 𑀓𑀣𑀁 ‘‘𑀧𑀼𑀭𑀺𑀫𑀸 𑀧𑀜𑁆𑀘 𑀘𑀢𑀼𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀯𑀘𑀦𑀁? 𑀦 𑀳𑀺 𑀲𑀫𑀺𑀜𑁆𑀚𑀦𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀸 𑀏𑀯 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀯𑀸𑀢𑀸, 𑀅𑀣 𑀔𑁄 𑀢𑀤𑀜𑁆𑀜𑁂𑀧𑀻𑀢𑀺 𑀦𑀢𑁆𑀣𑀺 𑀯𑀺𑀭𑁄𑀥𑁄.

𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀢𑁂𑀦𑀸𑀳 ‘‘𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀻’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑁂 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀢𑁂𑀦 𑀅𑀬𑀁 𑀯𑀡𑁆𑀡𑀦𑀸 𑀦 𑀓𑁂𑀯𑀮𑀁 𑀫𑀳𑀸𑀳𑀢𑁆𑀣𑀺𑀧𑀤𑀽𑀧𑀫𑀲𑁆𑀲𑁂𑀯 (𑀫. 𑀦𑀺. 𑁧.𑁩𑁦𑁦 𑀆𑀤𑀬𑁄), 𑀅𑀣 𑀔𑁄 𑀫𑀳𑀸𑀭𑀸𑀳𑀼𑀮𑁄𑀯𑀸𑀤- (𑀫. 𑀦𑀺. 𑁨.𑁧𑁧𑁩 𑀆𑀤𑀬𑁄) 𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑀸𑀦𑀫𑁆𑀧𑀺 (𑀫. 𑀦𑀺. 𑁩.𑁩𑁪𑁨 𑀆𑀤𑀬𑁄) 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀳𑁄𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀪𑀸𑀯𑀦𑀸𑀦𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀭𑀸𑀳𑀼𑀮𑁄𑀯𑀸𑀤𑀥𑀸𑀢𑀼𑀯𑀺𑀪𑀗𑁆𑀕𑁂𑀲𑀼𑀧𑀻’’𑀢𑀺.

𑁩𑁦𑁮. 𑀪𑀸𑀯𑀦𑀸𑀦𑀬𑁂𑀢𑀺 𑀪𑀸𑀯𑀦𑀸𑀬 𑀦𑀬𑁂. 𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸 𑀇𑀚𑁆𑀛𑀢𑀺, 𑀢𑀲𑁆𑀫𑀺𑀁 𑀪𑀸𑀯𑀦𑀸𑀯𑀺𑀥𑀺𑀫𑁆𑀳𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑁂. 𑀬𑀲𑁆𑀫𑀸 𑀬𑁂𑀲𑀁 ‘‘𑀢𑀺𑀓𑁆𑀔𑀧𑀜𑁆𑀜𑁄 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑁄’’𑀢𑀺 𑀇𑀫𑁂𑀲𑀁 𑀤𑀼𑀯𑀺𑀥𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀤𑁆𑀯𑀺𑀥𑀸 𑀆𑀕𑀢𑀁 𑀤𑁆𑀯𑀺𑀥𑀸 𑀤𑁂𑀲𑀺𑀢𑀁, 𑀢𑀲𑁆𑀫𑀸 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁄𑀧𑀺 𑀢𑁂𑀲𑀁 𑀤𑁆𑀯𑀺𑀥𑀸𑀯 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀢𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀮𑁄𑀫𑀸 𑀧𑀣𑀯𑀻𑀥𑀸𑀢𑀽𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄 𑀥𑀸𑀢𑀼𑀧𑀭𑀺𑀕𑁆𑀕𑀳𑁄𑀢𑀺 ‘‘𑀓𑁂𑀲𑀸 𑀧𑀣𑀯𑀻𑀥𑀸𑀢𑀼, 𑀮𑁄𑀫𑀸 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀏𑀯𑀁 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀯𑀺𑀢𑁆𑀣𑀸𑀭𑀢𑁄 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁄. 𑀧𑀧𑀜𑁆𑀘𑀢𑁄𑀢𑀺 𑀤𑀦𑁆𑀥𑀢𑁄 𑀲𑀡𑀺𑀓𑀢𑁄. 𑀬𑀁 𑀣𑀤𑁆𑀥𑀮𑀓𑁆𑀔𑀡𑀦𑁆𑀢𑀺 𑀓𑁂𑀲𑀸𑀤𑀻𑀲𑀼 𑀬𑀁 𑀣𑀤𑁆𑀥𑀮𑀓𑁆𑀔𑀡𑀁 𑀓𑀓𑁆𑀔𑀴𑀪𑀸𑀯𑁄. 𑀬𑀁 𑀆𑀩𑀦𑁆𑀥𑀦𑀮𑀓𑁆𑀔𑀡𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀫𑀦𑀲𑀺 𑀓𑀭𑁄𑀢𑁄𑀢𑀺 𑀯𑀢𑁆𑀣𑀼𑀁 𑀅𑀦𑀸𑀫𑀲𑀺𑀢𑁆𑀯𑀸 𑀏𑀯𑀁 𑀮𑀓𑁆𑀔𑀡𑀫𑀢𑁆𑀢𑀢𑁄 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲. 𑀅𑀲𑁆𑀲𑀸𑀢𑀺 𑀢𑀺𑀓𑁆𑀔𑀧𑀜𑁆𑀜𑀲𑁆𑀲. 𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀢𑀤𑁂𑀯 𑀮𑀓𑁆𑀔𑀡𑀁 𑀯𑀺𑀪𑀽𑀢𑀁 𑀳𑁄𑀢𑀺, 𑀢𑀲𑁆𑀲 𑀯𑀸 𑀮𑀓𑁆𑀔𑀡𑀲𑁆𑀲 𑀲𑀼𑀝𑁆𑀞𑀼 𑀉𑀧𑀝𑁆𑀞𑀸𑀦𑀢𑁄 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑀁 𑀫𑀦𑀲𑀺𑀓𑀸𑀭𑀲𑀗𑁆𑀔𑀸𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀪𑀽𑀢𑀁 𑀯𑀺𑀲𑀤𑀁 𑀳𑁄𑀢𑀺, 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀸𑀝𑀯𑁂𑀦 𑀲𑀁𑀔𑀺𑀢𑁆𑀢𑀭𑀼𑀘𑀺𑀪𑀸𑀯𑀢𑁄. 𑀲𑀩𑁆𑀩𑀲𑁄 𑀫𑀦𑁆𑀤𑀧𑀜𑁆𑀜𑀲𑁆𑀲 𑀪𑀸𑀯𑀦𑀸𑀯 𑀦 𑀇𑀚𑁆𑀛𑀢𑀻𑀢𑀺 𑀆𑀳 ‘‘𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲𑀸’’𑀢𑀺. 𑀏𑀯𑀁 𑀫𑀦𑀲𑀺 𑀓𑀭𑁄𑀢𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀔𑁂𑀧𑀢𑁄 𑀫𑀦𑀲𑀺 𑀓𑀭𑁄𑀢𑁄. 𑀅𑀦𑁆𑀥𑀓𑀸𑀭𑀁 𑀅𑀯𑀺𑀪𑀽𑀢𑀁 𑀳𑁄𑀢𑀻𑀢𑀺 𑀅𑀦𑀼𑀧𑀝𑁆𑀞𑀸𑀦𑀢𑁄 𑀅𑀦𑁆𑀥𑀁 𑀯𑀺𑀬 𑀓𑀭𑁄𑀦𑁆𑀢𑀁 𑀅𑀧𑀸𑀓𑀝𑀁 𑀳𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀧𑀼𑀭𑀺𑀫𑀦𑀬𑁂𑀦𑀸𑀢𑀺 ‘‘𑀓𑁂𑀲𑀸 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦. 𑀯𑀢𑁆𑀣𑀼𑀆𑀫𑀲𑀦𑁂𑀦 𑀯𑀺𑀢𑁆𑀣𑀸𑀭𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀧𑀸𑀓𑀝𑀁 𑀳𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀁, 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀅𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀢𑀸𑀬 𑀯𑀺𑀢𑁆𑀣𑀸𑀭𑀭𑀼𑀘𑀺𑀪𑀸𑀯𑀢𑁄.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀤𑁆𑀯𑀻𑀲𑀼 𑀪𑀺𑀓𑁆𑀔𑀽𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑁂𑀬𑁆𑀬𑀸𑀮𑀫𑀼𑀔𑀦𑁆𑀢𑀺 𑀧𑁂𑀬𑁆𑀬𑀸𑀮𑀧𑀸𑀴𑀺𑀬𑀸 𑀫𑀼𑀔𑀪𑀽𑀢𑀁 𑀤𑁆𑀯𑀸𑀭𑀪𑀽𑀢𑀁 𑀆𑀤𑀺𑀢𑁄 𑀯𑀸𑀭𑀁, 𑀯𑀸𑀭𑀤𑁆𑀯𑀬𑀁 𑀯𑀸. 𑀯𑀺𑀢𑁆𑀣𑀸𑀭𑁂𑀢𑁆𑀯𑀸𑀢𑀺 𑀅𑀦𑀯𑀲𑁂𑀲𑀢𑁄 𑀲𑀚𑁆𑀛𑀸𑀬𑀺𑀢𑁆𑀯𑀸. 𑀉𑀪𑀢𑁄𑀓𑁄𑀝𑀺𑀯𑀲𑁂𑀦𑁂𑀯𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀯𑀸𑀭𑀲𑁆𑀲 𑀆𑀤𑀺𑀅𑀦𑁆𑀢𑀕𑁆𑀕𑀳𑀡𑀯𑀲𑁂𑀦𑁂𑀯. 𑀑𑀝𑁆𑀞𑀧𑀭𑀺𑀬𑀸𑀳𑀢𑀫𑀢𑁆𑀢𑀦𑁆𑀢𑀺 𑀑𑀝𑁆𑀞𑀸𑀦𑀁 𑀲𑀫𑁆𑀨𑀼𑀲𑀦𑀫𑀢𑁆𑀢𑀁. 𑀬𑀣𑀸 𑀕𑀦𑁆𑀣𑀧𑀭𑀺𑀯𑀢𑁆𑀢𑀦𑁂 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀔𑁂𑀧𑁄 𑀭𑀼𑀘𑁆𑀘𑀢𑀺, 𑀦 𑀯𑀺𑀢𑁆𑀣𑀸𑀭𑁄. 𑀇𑀢𑀭𑀲𑁆𑀲 𑀘 𑀯𑀺𑀢𑁆𑀣𑀸𑀭𑁄 𑀭𑀼𑀘𑁆𑀘𑀢𑀺, 𑀦 𑀲𑀗𑁆𑀔𑁂𑀧𑁄, 𑀏𑀯𑀁 𑀪𑀸𑀯𑀦𑀸𑀦𑀬𑁂𑀧𑀻𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀲𑀗𑁆𑀔𑁂𑀧𑁄, 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀘 𑀯𑀺𑀢𑁆𑀣𑀸𑀭𑁄 𑀲𑀧𑁆𑀧𑀸𑀬𑁄, 𑀢𑀲𑁆𑀫𑀸. 𑀬𑀲𑁆𑀫𑀸 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀼𑀓𑀸𑀫𑀲𑁆𑀲 𑀲𑀻𑀮𑀯𑀺𑀲𑁄𑀥𑀦𑀸𑀤𑀺𑀧𑀼𑀩𑁆𑀩𑀓𑀺𑀘𑁆𑀘𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯𑀸𑀢𑀺 𑀇𑀥 𑀦 𑀆𑀫𑀝𑁆𑀞𑀁. 𑀬𑀲𑁆𑀫𑀸 𑀧𑀦 𑀯𑀺𑀯𑁂𑀓𑀝𑁆𑀞𑀓𑀸𑀬𑀲𑁆𑀲, 𑀯𑀺𑀯𑁂𑀓𑀝𑁆𑀞𑀘𑀺𑀢𑁆𑀢𑀲𑁆𑀲𑁂𑀯 𑀘 𑀪𑀸𑀯𑀦𑀸 𑀇𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲, 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦𑀸’’𑀢𑀺 𑀆𑀳. 𑀢𑀢𑁆𑀣 𑀭𑀳𑁄𑀕𑀢𑁂𑀦𑀸𑀢𑀺 𑀭𑀳𑀲𑀺 𑀕𑀢𑁂𑀦, 𑀏𑀓𑀸𑀓𑀺𑀦𑀸 𑀪𑀸𑀯𑀦𑀸𑀦𑀼𑀓𑀽𑀮𑀝𑁆𑀞𑀸𑀦𑀁 𑀉𑀧𑀕𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀮𑁆𑀮𑀻𑀦𑁂𑀦𑀸𑀢𑀺 𑀧𑀢𑀺 𑀧𑀢𑀺 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀁 𑀦𑀺𑀲𑁂𑀥𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀲𑀮𑁆𑀮𑀻𑀦𑁂𑀦, 𑀢𑀢𑁆𑀣 𑀲𑀁𑀲𑀺𑀮𑀺𑀝𑁆𑀞𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀓𑀮𑀫𑁆𑀧𑀺 𑀅𑀢𑁆𑀢𑀦𑁄 𑀭𑀽𑀧𑀓𑀸𑀬𑀁 𑀆𑀯𑀚𑁆𑀚𑁂𑀢𑁆𑀯𑀸𑀢𑀺 𑀉𑀤𑁆𑀥𑀁 𑀧𑀸𑀤𑀢𑀮𑀸, 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸, 𑀢𑀺𑀭𑀺𑀬𑀁 𑀢𑀘𑀧𑀭𑀺𑀬𑀦𑁆𑀢𑀁 𑀲𑀩𑁆𑀩𑀫𑁆𑀧𑀺 𑀅𑀢𑁆𑀢𑀦𑁄 𑀓𑀭𑀚𑀓𑀸𑀬𑀁 𑀥𑀸𑀢𑀼𑀯𑀲𑁂𑀦 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀬𑀲𑁆𑀫𑀸 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀅𑀬𑀁 𑀓𑀸𑀬𑁄, 𑀢𑀲𑁆𑀫𑀸 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’’𑀢𑀺 𑀘𑀢𑀼𑀫𑀳𑀸𑀪𑀽𑀢𑀯𑀲𑁂𑀦 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀸𑀲𑀁 𑀥𑀸𑀢𑀽𑀦𑀁 𑀮𑀓𑁆𑀔𑀡𑀢𑁄, 𑀉𑀧𑀝𑁆𑀞𑀸𑀦𑀸𑀓𑀸𑀭𑀢𑁄 𑀘 𑀫𑀦𑀲𑀺𑀓𑀸𑀭𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀇𑀫𑀲𑁆𑀫𑀺𑀁 𑀓𑀸𑀬𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀣𑀤𑁆𑀥𑀪𑀸𑀯𑁄𑀢𑀺 𑀮𑀓𑁆𑀔𑀡𑀫𑀸𑀳. 𑀣𑀤𑁆𑀥𑀢𑁆𑀢𑀮𑀓𑁆𑀔𑀡𑀸 𑀳𑀺 𑀧𑀣𑀯𑀻𑀥𑀸𑀢𑀼. 𑀔𑀭𑀪𑀸𑀯𑁄𑀢𑀺 𑀉𑀧𑀝𑁆𑀞𑀸𑀦𑀸𑀓𑀸𑀭𑀁, 𑀜𑀸𑀡𑁂𑀦 𑀕𑀳𑁂𑀢𑀩𑁆𑀩𑀸𑀓𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀤𑁆𑀭𑀯𑀪𑀸𑀯𑁄 𑀮𑀓𑁆𑀔𑀡𑀁 𑀆𑀧𑁄𑀥𑀸𑀢𑀼𑀬𑀸 𑀧𑀕𑁆𑀖𑀭𑀡𑀲𑀪𑀸𑀯𑀢𑁆𑀢𑀸. 𑀆𑀩𑀦𑁆𑀥𑀦𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑁄. 𑀉𑀡𑁆𑀳𑀪𑀸𑀯𑁄 𑀮𑀓𑁆𑀔𑀡𑀁 𑀢𑁂𑀚𑁄𑀥𑀸𑀢𑀼𑀬𑀸 𑀉𑀲𑁆𑀫𑀸𑀲𑀪𑀸𑀯𑀢𑁆𑀢𑀸. 𑀧𑀭𑀺𑀧𑀸𑀘𑀦𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑁄. 𑀯𑀺𑀢𑁆𑀣𑀫𑁆𑀪𑀦𑀁 𑀮𑀓𑁆𑀔𑀡𑀁 𑀯𑀸𑀬𑁄𑀥𑀸𑀢𑀼𑀬𑀸 𑀉𑀧𑀢𑁆𑀣𑀫𑁆𑀪𑀦𑀲𑀪𑀸𑀯𑀢𑁆𑀢𑀸. 𑀲𑀫𑀼𑀤𑀻𑀭𑀡𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑁄, 𑀉𑀧𑀝𑁆𑀞𑀸𑀦𑀸𑀓𑀸𑀭𑁄 𑀘 𑀦𑀸𑀫 𑀥𑀸𑀢𑀽𑀦𑀁 𑀲𑀓𑀺𑀘𑁆𑀘𑀓𑀭𑀡𑀯𑀲𑁂𑀦 𑀜𑀸𑀡𑀲𑁆𑀲 𑀯𑀺𑀪𑀽𑀢𑀸𑀓𑀸𑀭𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀉𑀪𑀬𑀕𑁆𑀕𑀳𑀡𑀁? 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀢𑁄. 𑀏𑀓𑀘𑁆𑀘𑀲𑁆𑀲 𑀳𑀺 𑀥𑀸𑀢𑀼𑀬𑁄 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀢𑀸 𑀲𑀪𑀸𑀯𑀢𑁄 𑀕𑀳𑁂𑀢𑀩𑁆𑀩𑀢𑀁 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀲𑀓𑀺𑀘𑁆𑀘𑀓𑀭𑀡𑀢𑁄, 𑀬𑁄 𑀭𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀭𑀸𑀬𑀁 𑀬𑁄𑀕𑀻 𑀥𑀸𑀢𑀼𑀬𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀆𑀤𑀺𑀢𑁄 𑀧𑀘𑁆𑀘𑁂𑀓𑀁 𑀲𑀮𑀓𑁆𑀔𑀡𑀢𑁄, 𑀲𑀭𑀲𑀢𑁄𑀧𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀬𑁄 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀣𑀤𑁆𑀥𑀪𑀸𑀯𑁄 𑀯𑀸 𑀔𑀭𑀪𑀸𑀯𑁄 𑀯𑀸…𑀧𑁂… 𑀏𑀯𑀁 𑀲𑀁𑀔𑀺𑀢𑁆𑀢𑁂𑀦 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺. 𑀢𑀢𑁆𑀣 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀧𑀭𑀺𑀕𑁆𑀕𑀸𑀳𑀓𑀪𑀽𑀢𑁂𑀦 𑀜𑀸𑀡𑁂𑀦 𑀥𑀸𑀢𑀼𑀬𑁄 𑀮𑀓𑁆𑀔𑀡𑀢𑁄, 𑀭𑀲𑀢𑁄 𑀯𑀸 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑁂𑀢𑁆𑀯𑀸. 𑀅𑀬𑀁 𑀢𑀸𑀯 𑀲𑀁𑀔𑀺𑀢𑁆𑀢𑀢𑁄 𑀪𑀸𑀯𑀦𑀸𑀦𑀬𑁂 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁄.

𑀏𑀯𑀁 𑀧𑀦 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀣𑀯𑀻𑀥𑀸𑀢𑀼 𑀣𑀤𑁆𑀥𑀪𑀸𑀯𑁄 𑀯𑀸 𑀔𑀭𑀪𑀸𑀯𑁄 𑀯𑀸, 𑀆𑀧𑁄𑀥𑀸𑀢𑀼 𑀤𑁆𑀭𑀯𑀪𑀸𑀯𑁄 𑀯𑀸 𑀆𑀩𑀦𑁆𑀥𑀦𑀪𑀸𑀯𑁄 𑀯𑀸, 𑀢𑁂𑀚𑁄𑀥𑀸𑀢𑀼 𑀉𑀡𑁆𑀳𑀪𑀸𑀯𑁄 𑀯𑀸 𑀧𑀭𑀺𑀧𑀸𑀘𑀦𑀪𑀸𑀯𑁄 𑀯𑀸, 𑀯𑀸𑀬𑁄𑀥𑀸𑀢𑀼 𑀯𑀺𑀢𑁆𑀣𑀫𑁆𑀪𑀦𑀪𑀸𑀯𑁄 𑀯𑀸 𑀲𑀫𑀼𑀤𑀻𑀭𑀡𑀪𑀸𑀯𑁄 𑀯𑀸’’𑀢𑀺 𑀏𑀯𑀁 𑀮𑀓𑁆𑀔𑀡𑀸𑀤𑀻𑀳𑀺 𑀲𑀤𑁆𑀥𑀺𑀁𑀬𑁂𑀯 𑀥𑀸𑀢𑀼𑀬𑁄 𑀫𑀦𑀲𑀺 𑀓𑀭𑁄𑀦𑁆𑀢𑁂𑀦 𑀓𑀸𑀮𑀲𑀢𑀫𑁆𑀧𑀺 𑀓𑀸𑀮𑀲𑀳𑀲𑁆𑀲𑀫𑁆𑀧𑀺 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀺𑀢𑀩𑁆𑀩𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀓𑀸𑀢𑀩𑁆𑀩𑀁. 𑀢𑀲𑁆𑀲𑁂𑀯𑀁 𑀫𑀦𑀲𑀺 𑀓𑀭𑁄𑀢𑁄 𑀬𑀁 𑀮𑀓𑁆𑀔𑀡𑀸𑀤𑀻𑀲𑀼 𑀲𑀼𑀧𑀸𑀓𑀝𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀢𑀤𑁂𑀯 𑀕𑀳𑁂𑀢𑁆𑀯𑀸 𑀇𑀢𑀭𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 ‘‘𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀏𑀯𑀁 𑀫𑀦𑀲𑀺 𑀓𑀭𑁄𑀦𑁆𑀢𑁂𑀦 𑀳𑀺 𑀅𑀦𑀼𑀧𑀼𑀩𑁆𑀩𑀢𑁄, 𑀦𑀸𑀢𑀺𑀲𑀻𑀖𑀢𑁄, 𑀦𑀸𑀢𑀺𑀲𑀡𑀺𑀓𑀢𑁄, 𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀦𑀢𑁄, 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀢𑁄, 𑀅𑀦𑀼𑀧𑀝𑁆𑀞𑀸𑀦𑀫𑀼𑀜𑁆𑀘𑀦𑀢𑁄, 𑀮𑀓𑁆𑀔𑀡𑀢𑁄, 𑀢𑀬𑁄 𑀘 𑀲𑀼𑀢𑁆𑀢𑀦𑁆𑀢𑀸𑀢𑀺 𑀇𑀫𑁂𑀳𑀺 𑀤𑀲𑀳𑀸𑀓𑀸𑀭𑁂𑀳𑀺 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀅𑀦𑀼𑀝𑁆𑀞𑀸𑀢𑀩𑁆𑀩𑀁.

𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑀢𑁄𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀢𑁄 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀧𑀝𑀺𑀧𑀸𑀝𑀺𑀢𑁄, 𑀲𑀸 𑀘 𑀤𑁂𑀲𑀦𑀸𑀧𑀝𑀺𑀧𑀸𑀝𑀺𑀬𑁂𑀯. 𑀏𑀯𑀁 𑀅𑀦𑀼𑀧𑀼𑀩𑁆𑀩𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑁂𑀦𑀸𑀧𑀺 𑀦𑀸𑀢𑀺𑀲𑀻𑀖𑀢𑁄 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀅𑀢𑀺𑀲𑀻𑀖𑀢𑁄 𑀫𑀦𑀲𑀺 𑀓𑀭𑁄𑀢𑁄 𑀳𑀺 𑀅𑀧𑀭𑀸𑀧𑀭𑀁 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁄 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀧𑀦 𑀅𑀯𑀺𑀪𑀽𑀢𑀁 𑀳𑁄𑀢𑀺, 𑀦 𑀯𑀺𑀲𑁂𑀲𑀁 𑀆𑀯𑀳𑀢𑀺. 𑀢𑀲𑁆𑀫𑀸 𑀦𑀸𑀢𑀺𑀲𑀻𑀖𑀢𑁄 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀬𑀣𑀸 𑀘 𑀦𑀸𑀢𑀺𑀲𑀻𑀖𑀢𑁄, 𑀏𑀯𑀁 𑀦𑀸𑀢𑀺𑀲𑀡𑀺𑀓𑀢𑁄𑀧𑀺. 𑀅𑀢𑀺𑀲𑀡𑀺𑀓𑀢𑁄 𑀫𑀦𑀲𑀺 𑀓𑀭𑁄𑀢𑁄 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀦 𑀕𑀘𑁆𑀙𑀢𑀺, 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀅𑀢𑀺𑀲𑀻𑀖𑀁 𑀅𑀢𑀺𑀲𑀡𑀺𑀓𑀜𑁆𑀘 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀧𑀼𑀭𑀺𑀲𑀸 𑀏𑀢𑁆𑀣 𑀦𑀺𑀤𑀲𑁆𑀲𑁂𑀢𑀩𑁆𑀩𑀸. 𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀦𑀢𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 𑀧𑀝𑀺𑀩𑀸𑀳𑀺𑀢𑀩𑁆𑀩𑁄. 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑁂 𑀳𑀺 𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀸 𑀧𑀭𑀺𑀳𑀸𑀬𑀢𑀺 𑀧𑀭𑀺𑀥𑀁𑀲𑀢𑀺. 𑀏𑀓𑀧𑀤𑀺𑀓𑀫𑀕𑁆𑀕𑀕𑀸𑀫𑀻 𑀧𑀼𑀭𑀺𑀲𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑁂𑀢𑀩𑁆𑀩𑁄. 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀢𑁄𑀢𑀺 ‘‘𑀬𑀸 𑀅𑀬𑀁 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺𑀓𑀸 𑀧𑀡𑁆𑀡𑀢𑁆𑀢𑀺, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀮𑀓𑁆𑀔𑀡𑁂𑀲𑀼 𑀏𑀯 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁.

𑀏𑀯𑀁 𑀧𑀡𑁆𑀡𑀢𑁆𑀢𑀺𑀁 𑀯𑀺𑀚𑀳𑀺𑀢𑁆𑀯𑀸 𑀓𑀓𑁆𑀔𑀴𑀮𑀓𑁆𑀔𑀡𑀸𑀤𑀻𑀲𑀼 𑀏𑀯 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀮𑀓𑁆𑀔𑀡𑀸𑀦𑀺 𑀲𑀼𑀧𑀸𑀓𑀝𑀸𑀦𑀺 𑀲𑀼𑀯𑀺𑀪𑀽𑀢𑀸𑀦𑀺 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀲𑁆𑀲𑁂𑀯𑀁 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀸𑀭𑀯𑀲𑁂𑀦 𑀘𑀺𑀢𑁆𑀢𑀁 𑀆𑀲𑁂𑀯𑀦𑀁 𑀮𑀪𑀢𑀺. 𑀲𑀩𑁆𑀩𑁄 𑀭𑀽𑀧𑀓𑀸𑀬𑁄 𑀥𑀸𑀢𑀼𑀫𑀢𑁆𑀢𑀢𑁄 𑀉𑀧𑀝𑁆𑀞𑀸𑀢𑀺 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀦𑀺𑀚𑁆𑀚𑀻𑀯𑁄 𑀬𑀦𑁆𑀢𑀁 𑀯𑀺𑀬 𑀬𑀦𑁆𑀢𑀲𑀼𑀢𑁆𑀢𑁂𑀦 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀫𑀸𑀦𑁄. 𑀲𑀘𑁂 𑀧𑀦 𑀩𑀳𑀺𑀤𑁆𑀥𑀸𑀧𑀺 𑀫𑀦𑀲𑀺𑀓𑀸𑀭𑀁 𑀉𑀧𑀲𑀁𑀳𑀭𑀢𑀺, 𑀅𑀣𑀲𑁆𑀲 𑀆𑀳𑀺𑀡𑁆𑀟𑀦𑁆𑀢𑀸 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀤𑀬𑁄 𑀲𑀢𑁆𑀢𑀸𑀓𑀸𑀭𑀁 𑀯𑀺𑀚𑀳𑀺𑀢𑁆𑀯𑀸 𑀥𑀸𑀢𑀼𑀲𑀫𑀽𑀳𑀯𑀲𑁂𑀦𑁂𑀯 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂𑀳𑀺 𑀓𑀭𑀺𑀬𑀫𑀸𑀦𑀸 𑀓𑀺𑀭𑀺𑀬𑀸 𑀥𑀸𑀢𑀼𑀫𑀬𑁂𑀦 𑀬𑀦𑁆𑀢𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀢𑁂𑀳𑀺 𑀅𑀚𑁆𑀛𑁄𑀳𑀭𑀺𑀬𑀫𑀸𑀦𑀁 𑀧𑀸𑀦𑀪𑁄𑀚𑀦𑀸𑀤𑀺 𑀥𑀸𑀢𑀼𑀲𑀗𑁆𑀖𑀸𑀢𑁂 𑀧𑀓𑁆𑀔𑀺𑀧𑁆𑀧𑀫𑀸𑀦𑁄 𑀥𑀸𑀢𑀼𑀲𑀗𑁆𑀖𑀸𑀢𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀅𑀣𑀲𑁆𑀲 𑀢𑀣𑀸 𑀮𑀤𑁆𑀥𑀸𑀲𑁂𑀯𑀦𑀫𑁆𑀧𑀺 𑀘𑀺𑀢𑁆𑀢𑀁 𑀬𑀤𑀺 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀉𑀤𑁆𑀥𑀘𑁆𑀘𑀯𑀲𑁂𑀦 𑀯𑀸 𑀅𑀢𑀺𑀮𑀻𑀦𑀯𑀻𑀭𑀺𑀬𑀢𑀸𑀬 𑀓𑁄𑀲𑀚𑁆𑀚𑀯𑀲𑁂𑀦 𑀯𑀸 𑀪𑀸𑀯𑀦𑀸𑀯𑀺𑀥𑀺𑀁 𑀦 𑀑𑀢𑀭𑁂𑀬𑁆𑀬, 𑀢𑀤𑀸 𑀅𑀥𑀺𑀘𑀺𑀢𑁆𑀢𑀲𑀼𑀢𑁆𑀢𑀁 (𑀅. 𑀦𑀺. 𑁩.𑁧𑁦𑁩), 𑀅𑀦𑀼𑀢𑁆𑀢𑀭𑀲𑀻𑀢𑀺𑀪𑀸𑀯𑀲𑀼𑀢𑁆𑀢𑀁 (𑀅. 𑀦𑀺. 𑁬.𑁮𑁫), 𑀩𑁄𑀚𑁆𑀛𑀗𑁆𑀕𑀲𑀼𑀢𑁆𑀢𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁯𑁪-𑁧𑁯𑁫) 𑀇𑀫𑁂𑀲𑀼 𑀢𑀻𑀲𑀼 𑀲𑀼𑀢𑁆𑀢𑁂𑀲𑀼 𑀆𑀕𑀢𑀦𑀬𑁂𑀦 𑀯𑀻𑀭𑀺𑀬𑀲𑀫𑀸𑀥𑀺𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀬𑁄 𑀘 𑀲𑀼𑀢𑁆𑀢𑀦𑁆𑀢𑀸’’𑀢𑀺. 𑀏𑀯𑀁 𑀧𑀦 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀮𑀓𑁆𑀔𑀡𑁂 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀬𑀤𑀸 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀮𑀤𑁆𑀥𑀲𑀫𑀢𑀸𑀦𑀺 𑀲𑀼𑀯𑀺𑀲𑀤𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀸 𑀅𑀲𑀤𑁆𑀥𑀺𑀬𑀸𑀤𑀻𑀦𑀁 𑀤𑀽𑀭𑀻𑀪𑀸𑀯𑁂𑀦 𑀲𑀸𑀢𑀺𑀲𑀬𑀁 𑀣𑀸𑀫𑀧𑁆𑀧𑀢𑁆𑀢𑁂𑀳𑀺 𑀲𑀢𑁆𑀢𑀳𑀺 𑀩𑀮𑁂𑀳𑀺 𑀮𑀤𑁆𑀥𑀽𑀧𑀢𑁆𑀣𑀫𑁆𑀪𑀸𑀦𑀺 𑀯𑀺𑀢𑀓𑁆𑀓𑀸𑀤𑀻𑀦𑀺 𑀛𑀸𑀦𑀗𑁆𑀕𑀸𑀦𑀺 𑀧𑀝𑀼𑀢𑀭𑀸𑀦𑀺 𑀳𑀼𑀢𑁆𑀯𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑁂𑀲𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺𑀬𑁂𑀯 𑀳𑁄𑀦𑁆𑀢𑀺 𑀲𑀤𑁆𑀥𑀺𑀁 𑀢𑀤𑁂𑀓𑀝𑁆𑀞𑁂𑀳𑀺 𑀧𑀸𑀧𑀥𑀫𑁆𑀫𑁂𑀳𑀺. 𑀏𑀢𑁆𑀢𑀸𑀯𑀢𑀸 𑀘𑀸𑀦𑁂𑀦 𑀉𑀧𑀘𑀸𑀭𑀚𑁆𑀛𑀸𑀦𑀁 𑀲𑀫𑀥𑀺𑀕𑀢𑀁 𑀳𑁄𑀢𑀺 𑀥𑀸𑀢𑀼𑀮𑀓𑁆𑀔𑀡𑀸𑀭𑀫𑁆𑀫𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀽𑀢𑀺…𑀧𑁂… 𑀉𑀧𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀥𑀸𑀢𑀼𑀫𑀢𑁆𑀢𑀢𑁄𑀢𑀺 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄 𑀫𑀢𑁆𑀢-𑀲𑀤𑁆𑀤𑁄. 𑀢𑁂𑀦 𑀬𑀁 𑀇𑀢𑁄 𑀩𑀸𑀳𑀺𑀭𑀓𑀸, 𑀮𑁄𑀓𑀺𑀬𑀫𑀳𑀸𑀚𑀦𑁄 𑀘 ‘‘𑀲𑀢𑁆𑀢𑁄 𑀚𑀻𑀯𑁄’’𑀢𑀺𑀆𑀤𑀺𑀓𑀁 𑀯𑀺𑀲𑁂𑀲𑀁 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀯𑀺𑀚𑁆𑀚𑀫𑀸𑀦𑀁 𑀯𑀺𑀓𑀧𑁆𑀧𑀦𑀸𑀫𑀢𑁆𑀢𑁂𑀦𑁂𑀯 𑀲𑀫𑀸𑀭𑁄𑀧𑁂𑀦𑁆𑀢𑀺, 𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀦𑀺𑀲𑁆𑀲𑀢𑁆𑀢𑀢𑁄 𑀦𑀺𑀚𑁆𑀚𑀻𑀯𑀢𑁄’’𑀢𑀺. 𑀆𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀫𑀦𑁆𑀦𑀸𑀳𑀭𑀺𑀢𑀩𑁆𑀩𑀁. 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀸𑀯𑀦𑀸𑀯𑀲𑁂𑀦 𑀥𑀸𑀢𑀼𑀫𑀢𑁆𑀢𑀢𑁄 𑀥𑀸𑀢𑀼𑀮𑀓𑁆𑀔𑀡𑀁 𑀫𑀦𑀲𑀺 𑀞𑀧𑁂𑀢𑀩𑁆𑀩𑀁. 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀢𑀤𑁂𑀯 𑀥𑀸𑀢𑀼𑀮𑀓𑁆𑀔𑀡𑀁 𑀧𑀢𑀺 𑀧𑀢𑀺 𑀅𑀯𑁂𑀓𑁆𑀔𑀺𑀢𑀩𑁆𑀩𑀁, 𑀪𑀸𑀯𑀦𑀸𑀲𑀺𑀤𑁆𑀥𑁂𑀦 𑀜𑀸𑀡𑀘𑀓𑁆𑀔𑀼𑀦𑀸 𑀅𑀧𑀭𑀸𑀧𑀭𑀁 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀺𑀢𑀩𑁆𑀩𑀁.

𑀢𑀲𑁆𑀲𑁂𑀯𑀁 𑀯𑀸𑀬𑀫𑀫𑀸𑀦𑀲𑁆𑀲𑀸𑀢𑀺 𑀢𑀲𑁆𑀲 𑀬𑁄𑀕𑀺𑀦𑁄 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲, 𑀢𑀢𑁆𑀣 𑀘 𑀪𑀸𑀯𑀦𑀸𑀅𑀦𑀼𑀬𑁄𑀕𑁂 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬, 𑀲𑀸𑀢𑀘𑁆𑀘𑀓𑀸𑀭𑀺𑀢𑀸𑀬, 𑀲𑀧𑁆𑀧𑀸𑀬𑀲𑁂𑀯𑀺𑀢𑀸𑀬, 𑀲𑀫𑀣𑀦𑀺𑀫𑀺𑀢𑁆𑀢𑀲𑀮𑁆𑀮𑀓𑁆𑀔𑀡𑁂𑀦, 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀦𑀼𑀧𑀯𑀢𑁆𑀢𑀦𑁂𑀦, 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑀯𑀼𑀢𑁆𑀢𑀺𑀢𑀸𑀬, 𑀅𑀦𑁆𑀢𑀭𑀸 𑀲𑀗𑁆𑀓𑁄𑀘𑀁 𑀅𑀦𑀸𑀧𑀚𑁆𑀚𑀦𑁆𑀢𑁂𑀦 𑀪𑀸𑀯𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀉𑀲𑁆𑀲𑁄𑀴𑁆𑀳𑀺𑀬𑀁 𑀅𑀯𑀝𑁆𑀞𑀸𑀦𑁂𑀦 𑀲𑀫𑁆𑀫𑀤𑁂𑀯 𑀯𑀸𑀬𑀸𑀫𑀁 𑀧𑀬𑁄𑀕𑀁 𑀧𑀭𑀓𑁆𑀓𑀫𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲. 𑀥𑀸𑀢𑀼𑀧𑁆𑀧𑀪𑁂𑀤𑀸𑀯𑀪𑀸𑀲𑀦𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑁄𑀢𑀺 𑀧𑀣𑀯𑀻𑀆𑀤𑀻𑀦𑀁 𑀥𑀸𑀢𑀽𑀦𑀁 𑀲𑀪𑀸𑀯𑀮𑀓𑁆𑀔𑀡𑀸𑀯𑀪𑀸𑀲𑀦𑁂𑀦 𑀅𑀯𑀪𑀸𑀲𑀦𑀓𑀺𑀘𑁆𑀘𑀸𑀬 𑀪𑀸𑀯𑀦𑀸𑀧𑀜𑁆𑀜𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀅𑀯𑀺𑀚𑀳𑀦𑁂𑀦 𑀲𑀩𑁆𑀩𑀢𑁄 𑀕𑀳𑀺𑀢𑁄 𑀫𑀳𑀕𑁆𑀕𑀢𑀪𑀸𑀯𑀁 𑀅𑀧𑁆𑀧𑀢𑁆𑀢𑀢𑀸𑀬 𑀉𑀧𑀘𑀸𑀭𑀫𑀢𑁆𑀢𑁄 𑀲𑀺𑀔𑀸𑀧𑁆𑀧𑀢𑁆𑀢𑁄 𑀓𑀸𑀫𑀸𑀯𑀘𑀭𑀲𑀫𑀸𑀥𑀺 𑀉𑀧𑁆𑀧𑀚𑁆𑀚𑀢𑀺. 𑀉𑀧𑀘𑀸𑀭𑀲𑀫𑀸𑀥𑀻𑀢𑀺 𑀘 𑀭𑀼𑀴𑁆𑀳𑀻𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀧𑁆𑀧𑀦𑀁 𑀳𑀺 𑀉𑀧𑁂𑀘𑁆𑀘 𑀘𑀸𑀭𑀻 𑀲𑀫𑀸𑀥𑀺 𑀉𑀧𑀘𑀸𑀭𑀲𑀫𑀸𑀥𑀺, 𑀅𑀧𑁆𑀧𑀦𑀸 𑀘𑁂𑀢𑁆𑀣 𑀦𑀢𑁆𑀣𑀺. 𑀢𑀸𑀤𑀺𑀲𑀲𑁆𑀲 𑀧𑀦 𑀲𑀫𑀸𑀥𑀺𑀲𑁆𑀲 𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀧𑁆𑀧𑀦𑀸 𑀦 𑀳𑁄𑀢𑀻𑀢𑀺? 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀲𑀪𑀸𑀯𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑀸’’𑀢𑀺. 𑀲𑀪𑀸𑀯𑀥𑀫𑁆𑀫𑁂 𑀳𑀺 𑀢𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀢𑁄 𑀅𑀲𑀢𑀺 𑀪𑀸𑀯𑀦𑀸𑀯𑀺𑀲𑁂𑀲𑁂 𑀅𑀧𑁆𑀧𑀦𑀸𑀛𑀸𑀦𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀮𑁄𑀓𑀼𑀢𑁆𑀢𑀭𑀁 𑀧𑀦 𑀛𑀸𑀦𑀁 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸𑀦𑀼𑀓𑁆𑀓𑀫𑀯𑀲𑁂𑀦, 𑀆𑀭𑀼𑀧𑁆𑀧𑀁 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀪𑀸𑀯𑀦𑀸𑀯𑀲𑁂𑀦 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀳𑁄𑀢𑀻𑀢𑀺 𑀫𑀭𑀡𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁭𑁭) 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄.

𑀏𑀯𑀁 𑀭𑀽𑀧𑀓𑀸𑀬𑁂 𑀅𑀯𑀺𑀲𑁂𑀲𑁂𑀦 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀅𑀝𑁆𑀞𑀺𑀆𑀤𑀻𑀦𑀁 𑀯𑀺𑀦𑀺𑀩𑁆𑀪𑀼𑀚𑀦𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀲𑀼𑀢𑁆𑀢𑁂 𑀆𑀕𑀢𑀁 𑀥𑀸𑀢𑀼𑀫𑀦𑀲𑀺𑀓𑀸𑀭𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑁂 𑀇𑀫𑁂 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸𑀧𑀘𑁆𑀘𑀬𑀁 𑀞𑀺𑀢𑀸 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑀸 𑀓𑀝𑁆𑀞𑀯𑀮𑁆𑀮𑀺𑀢𑀺𑀡𑀫𑀢𑁆𑀢𑀺𑀓𑀸𑀬𑁄 𑀉𑀧𑀸𑀤𑀸𑀬 𑀬𑀣𑀸 𑀅𑀕𑀸𑀭𑀲𑀫𑀜𑁆𑀜𑀸, 𑀦 𑀢𑀢𑁆𑀣 𑀓𑁄𑀘𑀺 𑀅𑀕𑀸𑀭𑁄 𑀦𑀸𑀫 𑀅𑀢𑁆𑀣𑀺, 𑀏𑀯𑀁 𑀬𑀣𑀸𑀧𑀘𑁆𑀘𑀬𑀁 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑀸𑀦𑀺 𑀧𑀯𑀢𑁆𑀢𑀫𑀸𑀦𑀸𑀦𑀺 𑀅𑀝𑁆𑀞𑀺𑀦𑁆𑀳𑀸𑀭𑀼𑀫𑀁𑀲𑀘𑀫𑁆𑀫𑀸𑀦𑀺 𑀧𑀝𑀺𑀘𑁆𑀘 𑀲𑀭𑀻𑀭𑀲𑀫𑀜𑁆𑀜𑀸, 𑀦 𑀏𑀢𑁆𑀣 𑀓𑁄𑀘𑀺 𑀅𑀢𑁆𑀢𑀸 𑀚𑀻𑀯𑁄. 𑀓𑁂𑀯𑀮𑀁 𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑀫𑀸𑀓𑀸𑀲𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀤𑁂𑀲𑀦𑀸 𑀲𑀢𑁆𑀢𑀲𑀼𑀜𑁆𑀜𑀢𑀸𑀲𑀦𑁆𑀤𑀲𑁆𑀲𑀦𑀧𑀭𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀦𑀺𑀲𑁆𑀲𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀝𑁆𑀞𑀺𑀜𑁆𑀘 𑀧𑀝𑀺𑀘𑁆𑀘𑀸𑀢𑀺 𑀧𑀡𑁆𑀳𑀺𑀓𑀝𑁆𑀞𑀺𑀓𑀸𑀤𑀺𑀪𑁂𑀤𑀁 𑀧𑀝𑀺𑀧𑀸𑀝𑀺𑀬𑀸 𑀉𑀲𑁆𑀲𑀺𑀢𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀅𑀢𑀺𑀭𑁂𑀓𑀢𑀺𑀲𑀢𑀪𑁂𑀤𑀁 𑀅𑀝𑁆𑀞𑀺𑀁 𑀉𑀧𑀸𑀤𑀸𑀬. 𑀦𑁆𑀳𑀸𑀭𑀼𑀜𑁆𑀘𑀸𑀢𑀺 𑀢𑀫𑁂𑀯 𑀅𑀝𑁆𑀞𑀺𑀲𑀗𑁆𑀖𑀸𑀝𑀁 𑀆𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑀁 𑀦𑀯𑀲𑀢𑀧𑁆𑀧𑀪𑁂𑀤𑀁 𑀦𑁆𑀳𑀸𑀭𑀼𑀁. 𑀫𑀁𑀲𑀦𑁆𑀢𑀺 𑀢𑀫𑁂𑀯 𑀅𑀝𑁆𑀞𑀺𑀲𑀗𑁆𑀖𑀸𑀝𑀁 𑀅𑀦𑀼𑀮𑀺𑀫𑁆𑀧𑀺𑀢𑁆𑀯𑀸 𑀞𑀺𑀢𑀁 𑀦𑀯𑀧𑁂𑀲𑀺𑀲𑀢𑀧𑁆𑀧𑀪𑁂𑀤𑀁 𑀫𑀁𑀲𑀁. 𑀘𑀫𑁆𑀫𑀦𑁆𑀢𑀺 𑀫𑀘𑁆𑀙𑀺𑀓𑀧𑀢𑁆𑀢𑀓𑀘𑁆𑀙𑀸𑀬𑀸𑀬 𑀙𑀯𑀺𑀬𑀸 𑀲𑀜𑁆𑀙𑀸𑀤𑀺𑀢𑀁 𑀲𑀓𑀮𑀲𑀭𑀻𑀭𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁 𑀩𑀳𑀮𑀘𑀫𑁆𑀫𑀁 𑀧𑀝𑀺𑀘𑁆𑀘 𑀉𑀧𑀸𑀤𑀸𑀬. 𑀲𑀩𑁆𑀩𑀢𑁆𑀣 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄𑀢𑀺 𑀬𑀣𑀸 𑀪𑀺𑀢𑁆𑀢𑀺𑀧𑀸𑀤𑀸𑀤𑀺𑀯𑀲𑁂𑀦 𑀞𑀧𑀺𑀢𑀁 𑀓𑀝𑁆𑀞𑀁, 𑀢𑀲𑁆𑀲𑁂𑀯 𑀆𑀩𑀦𑁆𑀥𑀦𑀯𑀮𑁆𑀮𑀺, 𑀅𑀦𑀼𑀮𑁂𑀧𑀦𑀫𑀢𑁆𑀢𑀺𑀓𑀸, 𑀙𑀸𑀤𑀦𑀢𑀺𑀡𑀦𑁆𑀢𑀺 𑀏𑀢𑀸𑀦𑀺 𑀓𑀝𑁆𑀞𑀸𑀤𑀻𑀦𑀺 𑀅𑀦𑁆𑀢𑁄, 𑀩𑀳𑀺 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁄 𑀆𑀓𑀸𑀲𑁄 𑀅𑀕𑀸𑀭𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀕𑁂𑀳𑀦𑁆𑀢𑀺 𑀧𑀡𑁆𑀡𑀢𑁆𑀢𑀺𑀁 𑀮𑀪𑀢𑀺, 𑀏𑀯𑀫𑁂𑀯 𑀬𑀣𑀸𑀯𑀼𑀢𑁆𑀢𑀸𑀦𑀺 𑀅𑀝𑁆𑀞𑀺𑀆𑀤𑀻𑀦𑀺 𑀅𑀦𑁆𑀢𑁄, 𑀩𑀳𑀺 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁄 𑀆𑀓𑀸𑀲𑁄 𑀢𑀸𑀦𑁂𑀯 𑀅𑀝𑁆𑀞𑀺𑀆𑀤𑀻𑀦𑀺 𑀉𑀧𑀸𑀤𑀸𑀬 𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀲𑀭𑀻𑀭𑀦𑁆𑀢𑀺 𑀯𑁄𑀳𑀸𑀭𑀁 𑀮𑀪𑀢𑀺. 𑀬𑀣𑀸 𑀘 𑀓𑀝𑁆𑀞𑀸𑀤𑀻𑀦𑀺 𑀧𑀝𑀺𑀘𑁆𑀘 𑀲𑀗𑁆𑀔𑀁 𑀕𑀢𑀁 𑀅𑀕𑀸𑀭𑀁 𑀮𑁄𑀓𑁂 ‘‘𑀔𑀢𑁆𑀢𑀺𑀬𑀕𑁂𑀳𑀁, 𑀩𑁆𑀭𑀸𑀳𑁆𑀫𑀡𑀕𑁂𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀤𑀫𑁆𑀧𑀺 ‘‘𑀔𑀢𑁆𑀢𑀺𑀬𑀲𑀭𑀻𑀭𑀁 𑀩𑁆𑀭𑀸𑀳𑁆𑀫𑀡𑀲𑀭𑀻𑀭’’𑀦𑁆𑀢𑀺 𑀯𑁄𑀳𑀭𑀻𑀬𑀢𑀺, 𑀦𑀢𑁆𑀣𑁂𑀢𑁆𑀣 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀚𑀻𑀯𑁄 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑁂𑀢𑀺 𑀢𑁂 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀢𑀁𑀢𑀁𑀅𑀦𑁆𑀢𑀭𑀸𑀦𑀼𑀲𑀸𑀭𑀺𑀦𑀸𑀢𑀺 𑀅𑀝𑁆𑀞𑀺𑀦𑁆𑀳𑀸𑀭𑀽𑀦𑀁 𑀦𑁆𑀳𑀸𑀭𑀼𑀫𑀁𑀲𑀸𑀦𑀁 𑀫𑀁𑀲𑀘𑀫𑁆𑀫𑀸𑀦𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀓𑁄𑀝𑁆𑀞𑀸𑀲𑀸𑀦𑀁 𑀯𑀺𑀯𑀭𑀸𑀦𑀼𑀧𑀸𑀢𑀺𑀦𑀸 𑀜𑀸𑀡𑀲𑀗𑁆𑀔𑀸𑀢𑁂𑀦 𑀳𑀢𑁆𑀣𑁂𑀦. 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸𑀢𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀯𑀺𑀦𑀺𑀯𑁂𑀞𑁂𑀢𑁆𑀯𑀸. 𑀅𑀣 𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸𑀢𑀺 𑀧𑀘𑁆𑀘𑁂𑀓𑀁 𑀅𑀝𑁆𑀞𑀺𑀆𑀤𑀻𑀦𑀁 𑀅𑀦𑁆𑀢𑀭𑀸𑀦𑀼𑀲𑀸𑀭𑀺𑀦𑀸 𑀜𑀸𑀡𑀳𑀢𑁆𑀣𑁂𑀦 𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸. 𑀏𑀢𑁂𑀲𑀽𑀢𑀺 𑀲𑀓𑀮𑀫𑁆𑀧𑀺 𑀅𑀢𑁆𑀢𑀦𑁄 𑀭𑀽𑀧𑀓𑀸𑀬𑀁 𑀘𑀢𑀼𑀥𑀸 𑀓𑀢𑁆𑀯𑀸 𑀯𑀺𑀪𑀢𑁆𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀺𑀆𑀤𑀻𑀲𑀼 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀬𑁄 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀣𑀤𑁆𑀥𑀪𑀸𑀯𑁄 𑀯𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀪𑀸𑀯𑀦𑀸𑀯𑀺𑀥𑀸𑀦𑀁, 𑀢𑀁 𑀅𑀦𑀦𑁆𑀢𑀭𑀦𑀬𑁂 𑀯𑀼𑀢𑁆𑀢𑀸𑀓𑀸𑀭𑁂𑀦𑁂𑀯 𑀯𑀢𑁆𑀢𑀩𑁆𑀩𑀁.

𑁩𑁦𑁯. 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑁂 𑀧𑀦 ‘‘𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀏𑀯𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄 𑀪𑀸𑀯𑀦𑀸𑀦𑀬𑁄. ‘‘𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀥𑀸𑀢𑀼𑀬𑁄 𑀉𑀕𑁆𑀕𑀡𑁆𑀳𑀺𑀢𑁆𑀯𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀆𑀤𑀺𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸 𑀥𑀸𑀢𑀼𑀬𑁄 𑀦 𑀳𑁄𑀦𑁆𑀢𑀻𑀢𑀺? 𑀯𑀢𑁆𑀣𑀼𑀲𑀻𑀲𑁂𑀦 𑀥𑀸𑀢𑀽𑀦𑀁𑀬𑁂𑀯 𑀉𑀕𑁆𑀕𑀳𑁂𑀢𑀩𑁆𑀩𑀢𑁆𑀢𑀸 𑀦𑀸𑀬𑀁 𑀤𑁄𑀲𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀢𑀺 ‘‘𑀕𑁄𑀘𑀭𑀕𑀸𑀫𑀢𑁄 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀢𑀸𑀤𑀻𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁫𑁩) 𑀯𑀼𑀢𑁆𑀢𑀧𑁆𑀧𑀓𑀸𑀭𑁂. 𑀓𑀢𑀲𑀩𑁆𑀩𑀓𑀺𑀘𑁆𑀘𑁂𑀦𑀸𑀢𑀺 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀺𑀓𑀁 𑀓𑀢𑀁 𑀲𑀩𑁆𑀩𑀓𑀺𑀘𑁆𑀘𑀁 𑀏𑀢𑁂𑀦𑀸𑀢𑀺 𑀓𑀢𑀲𑀩𑁆𑀩𑀓𑀺𑀘𑁆𑀘𑁄, 𑀢𑁂𑀦𑀲𑁆𑀲 𑀲𑀻𑀮𑀯𑀺𑀲𑁄𑀥𑀦𑀸𑀤𑀺 𑀧𑀦 𑀓𑀫𑁆𑀫𑀝𑁆𑀞𑀸𑀦𑀼𑀕𑁆𑀕𑀳𑀡𑀢𑁄 𑀧𑀕𑁂𑀯 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀢𑁄𑀢𑀺 𑀲𑀫𑁆𑀪𑀭𑀻𑀬𑀦𑁆𑀢𑀺 𑀏𑀢𑁂𑀦 𑀩𑀼𑀤𑁆𑀥𑀺𑀯𑁄𑀳𑀸𑀭𑀸𑀢𑀺 𑀲𑀫𑁆𑀪𑀸𑀭𑁄, 𑀢𑀦𑁆𑀦𑀺𑀫𑀺𑀢𑁆𑀢𑀁. 𑀓𑀺𑀁 𑀧𑀦𑁂𑀢𑀁? 𑀧𑀣𑀯𑀻𑀆𑀤𑀺. 𑀓𑁂𑀲𑀸𑀤𑀻𑀲𑀼 𑀳𑀺 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀲𑀼 ‘‘𑀧𑀣𑀯𑀻’’𑀢𑀺 𑀩𑀼𑀤𑁆𑀥𑀺𑀯𑁄𑀳𑀸𑀭𑀸 𑀧𑀣𑀯𑀻𑀦𑀺𑀫𑀺𑀢𑁆𑀢𑀓𑀸 𑀣𑀤𑁆𑀥𑀢𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀦𑀢𑁄. 𑀢𑀲𑁆𑀫𑀸 𑀢𑀢𑁆𑀣 𑀧𑀣𑀯𑀻𑀲𑀫𑁆𑀪𑀸𑀭𑁄 𑀦𑀸𑀫 𑀲𑀯𑀺𑀲𑁂𑀲𑀸𑀬 𑀢𑀲𑁆𑀲𑀸 𑀅𑀢𑁆𑀣𑀺𑀢𑀸𑀬 𑀓𑁂𑀲𑀸𑀤𑀬𑁄 𑀲𑀳 𑀲𑀫𑁆𑀪𑀸𑀭𑁂𑀳𑀻𑀢𑀺 𑀲𑀲𑀫𑁆𑀪𑀸𑀭𑀸. 𑀆𑀧𑁄𑀓𑁄𑀝𑁆𑀞𑀸𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀲𑀫𑁆𑀪𑀸𑀭𑀸𑀦𑀁 𑀲𑀗𑁆𑀔𑁂𑀧𑁄 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑁄, 𑀢𑀢𑁄 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀢𑁄 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑀗𑁆𑀔𑁂𑀧𑀢𑁄 𑀯𑀻𑀲𑀢𑀺𑀬𑀸, 𑀤𑁆𑀯𑀸𑀤𑀲𑀲𑀼, 𑀘𑀢𑀽𑀲𑀼, 𑀙𑀲𑀼 𑀘 𑀓𑁄𑀝𑁆𑀞𑀸𑀲𑁂𑀲𑀼 𑀬𑀣𑀸𑀓𑁆𑀓𑀫𑀁 𑀧𑀣𑀯𑀻𑀆𑀤𑀺𑀓𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀢𑁄 𑀪𑀸𑀯𑀦𑀸. 𑀢𑁂𑀦𑀸𑀳 ‘‘𑀇𑀥 𑀪𑀺𑀓𑁆𑀔𑀼 𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀽’’𑀢𑀺𑀆𑀤𑀺.

𑀲𑀲𑀫𑁆𑀪𑀸𑀭𑀯𑀺𑀪𑀢𑁆𑀢𑀺𑀢𑁄𑀢𑀺 𑀲𑀲𑀫𑁆𑀪𑀸𑀭𑀸𑀦𑀁 𑀓𑁂𑀲𑀸𑀤𑀻𑀦𑀁 𑀯𑀺𑀪𑀸𑀕𑀢𑁄 𑀓𑁂𑀲𑀸𑀤𑀺𑀓𑁂 𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑁂 𑀧𑀼𑀩𑁆𑀩𑁂 𑀯𑀺𑀬 𑀏𑀓𑀚𑁆𑀛𑀁 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀪𑀸𑀕𑀢𑁄 𑀧𑀣𑀯𑀻𑀥𑀸𑀢𑀼𑀪𑀸𑀯𑁂𑀦 𑀯𑀯𑀢𑁆𑀣𑀸𑀧𑀦𑀁. 𑀆𑀧𑁄𑀓𑁄𑀝𑁆𑀞𑀸𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀢𑁄𑀢𑀺 𑀮𑀓𑁆𑀔𑀻𑀬𑀢𑀺 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁, 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄, 𑀇𑀥 𑀧𑀦 𑀣𑀤𑁆𑀥𑀢𑀸𑀤𑀺. 𑀢𑀲𑁆𑀫𑀸 𑀣𑀤𑁆𑀥𑀮𑀓𑁆𑀔𑀡𑀸𑀤𑀺𑀯𑀦𑁆𑀢𑀢𑀸𑀬 𑀲𑀳 𑀮𑀓𑁆𑀔𑀡𑁂𑀳𑀻𑀢𑀺 𑀲𑀮𑀓𑁆𑀔𑀡𑀸, 𑀓𑁂𑀲𑀸𑀤𑀬𑁄 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀆𑀓𑀸𑀭𑀸. 𑀢𑁂𑀲𑀁 𑀲𑀗𑁆𑀔𑁂𑀧𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑁂𑀲𑀸𑀤𑀺𑀓𑁂 𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑁂 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀣𑀤𑁆𑀥𑀢𑀸𑀤𑀺𑀓𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀮𑀓𑁆𑀔𑀡𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀪𑀸𑀯𑀦𑀸 𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀢𑁄 𑀪𑀸𑀯𑀦𑀸. 𑀏𑀲 𑀦𑀬𑁄 𑀆𑀧𑁄𑀓𑁄𑀝𑁆𑀞𑀸𑀲𑀸𑀤𑀻𑀲𑀼𑀧𑀺. 𑀲𑀮𑀓𑁆𑀔𑀡𑀯𑀺𑀪𑀢𑁆𑀢𑀺𑀢𑁄𑀢𑀺 𑀣𑀤𑁆𑀥𑀮𑀓𑁆𑀔𑀡𑀸𑀤𑀺𑀦𑀸 𑀲𑀮𑀓𑁆𑀔𑀡𑀸𑀦𑀁 𑀓𑁂𑀲𑀸𑀤𑀻𑀦𑀁 𑀯𑀺𑀪𑀸𑀕𑀢𑁄 𑀓𑁂𑀲𑀸𑀤𑀻𑀲𑀼 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀲𑀼 𑀧𑀘𑁆𑀘𑁂𑀓𑀁 𑀣𑀤𑁆𑀥𑀢𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀮𑀓𑁆𑀔𑀡𑀸𑀦𑀁 𑀯𑀯𑀢𑁆𑀣𑀸𑀧𑀦𑀯𑀲𑁂𑀦 𑀪𑀸𑀯𑀦𑀸.

𑀏𑀯𑀁 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀉𑀤𑁆𑀤𑀺𑀝𑁆𑀞𑀁 𑀪𑀸𑀯𑀦𑀸𑀦𑀬𑀁 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀓𑀣𑀁 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀢𑁄 𑀪𑀸𑀯𑁂𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀏𑀢𑁆𑀣 𑀘 𑀬𑀣𑀸 𑀢𑀺𑀓𑁆𑀔𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀢𑀺𑀓𑁆𑀔𑀢𑀸𑀬 𑀧𑀭𑁄𑀧𑀭𑀺𑀬𑀢𑁆𑀢𑀲𑀩𑁆𑀪𑀸𑀯𑀢𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑀼𑀤𑀺𑀦𑁆𑀤𑁆𑀭𑀺𑀬𑀢𑀸𑀯𑀲𑁂𑀦 𑀤𑀼𑀯𑀺𑀥𑁄𑀢𑀺. 𑀢𑀢𑁆𑀣 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀧𑀞𑀫𑀦𑀬𑁄 𑀯𑀼𑀢𑁆𑀢𑁄, 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀤𑀼𑀢𑀺𑀬𑁄. 𑀏𑀯𑀁 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑁄𑀧𑀺 𑀧𑀼𑀕𑁆𑀕𑀮𑁄𑀢𑀺. 𑀢𑀢𑁆𑀣 𑀬𑁄 𑀯𑀺𑀲𑀤𑀺𑀦𑁆𑀤𑁆𑀭𑀺𑀬𑁄 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀯𑀲𑁂𑀦 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀢𑁄, 𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀢𑁄 𑀘 𑀪𑀸𑀯𑀦𑀸𑀦𑀬𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀬𑁄 𑀧𑀦 𑀦𑀸𑀢𑀺𑀯𑀺𑀲𑀤𑀺𑀦𑁆𑀤𑁆𑀭𑀺𑀬𑁄, 𑀢𑀲𑁆𑀲 𑀯𑀲𑁂𑀦 𑀲𑀲𑀫𑁆𑀪𑀸𑀭𑀯𑀺𑀪𑀢𑁆𑀢𑀺𑀢𑁄, 𑀲𑀮𑀓𑁆𑀔𑀡𑀯𑀺𑀪𑀢𑁆𑀢𑀺𑀢𑁄 𑀘 𑀪𑀸𑀯𑀦𑀸𑀦𑀬𑁄 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲 𑀏𑀯𑀁 𑀯𑀯𑀢𑁆𑀣𑀸𑀧𑀬𑀢𑁄 𑀏𑀯 𑀥𑀸𑀢𑀼𑀬𑁄 𑀧𑀸𑀓𑀝𑀸 𑀳𑁄𑀦𑁆𑀢𑀺 𑀲𑀯𑀺𑀲𑁂𑀲𑀁 𑀥𑀸𑀢𑀽𑀦𑀁 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸. 𑀪𑀸𑀯𑀦𑀸𑀯𑀺𑀥𑀸𑀦𑀁 𑀧𑀦𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁩𑁧𑁦. 𑀬𑀲𑁆𑀲𑀸𑀢𑀺 𑀦𑀸𑀢𑀺𑀯𑀺𑀲𑀤𑀺𑀦𑁆𑀤𑁆𑀭𑀺𑀬𑀁 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀏𑀯𑀁 𑀪𑀸𑀯𑀬𑀢𑁄𑀢𑀺 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀢𑁄 𑀪𑀸𑀯𑁂𑀦𑁆𑀢𑀲𑁆𑀲. 𑀬𑁂𑀦 𑀯𑀺𑀥𑀺𑀦𑀸 𑀉𑀕𑁆𑀕𑀳𑁂𑀢𑁆𑀯𑀸 𑀓𑀼𑀲𑀮𑁄 𑀳𑁄𑀢𑀺, 𑀲𑁄 𑀲𑀢𑁆𑀢𑀯𑀺𑀥𑁄 𑀯𑀺𑀥𑀺 ‘‘𑀉𑀕𑁆𑀕𑀳𑀓𑁄𑀲𑀮𑁆𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀦𑁆𑀦𑀺𑀩𑁆𑀩𑀢𑁆𑀢𑀁 𑀯𑀸 𑀜𑀸𑀡𑀁. 𑀏𑀯𑀁 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂𑀢𑀺 𑀥𑀸𑀢𑀼𑀫𑀦𑀲𑀺𑀓𑀸𑀭𑀯𑀲𑁂𑀦 𑀧𑀭𑀺𑀕𑁆𑀕𑀳𑀺𑀢𑁂 𑀓𑁂𑀲𑀸𑀤𑀺𑀓𑁂 𑀤𑁆𑀯𑀢𑁆𑀢𑀺𑀁𑀲𑀯𑀺𑀥𑁂 𑀓𑁄𑀝𑁆𑀞𑀸𑀲𑁂. ‘‘𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂’’𑀢𑀺 𑀘 𑀇𑀤𑀁 𑀢𑁂𑀚𑀯𑀸𑀬𑀼𑀓𑁄𑀝𑁆𑀞𑀸𑀲𑁂𑀲𑀼 𑀯𑀡𑁆𑀡𑀸𑀤𑀺𑀯𑀲𑁂𑀦 𑀯𑀯𑀢𑁆𑀣𑀸𑀦𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀲𑀩𑁆𑀩𑀁 𑀢𑀢𑁆𑀣 𑀯𑀼𑀢𑁆𑀢𑀯𑀺𑀥𑀸𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 ‘‘𑀯𑀘𑀲𑀸 𑀫𑀦𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀉𑀕𑁆𑀕𑀳𑀓𑁄𑀲𑀮𑁆𑀮𑀼𑀤𑁆𑀤𑁂𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀸𑀤𑀺𑀯𑀲𑁂𑀦𑀸’’𑀢𑀺 𑀧𑀤𑀁, 𑀢𑀸𑀯 𑀆𑀕𑀢𑀁 𑀲𑀩𑁆𑀩𑀁 𑀪𑀸𑀯𑀦𑀸𑀯𑀺𑀥𑀸𑀦𑀁 𑀓𑀸𑀢𑀩𑁆𑀩𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀯𑀡𑁆𑀡𑀸𑀤𑀺𑀯𑀲𑁂𑀦𑀸𑀢𑀺 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦. 𑀅𑀬𑀜𑁆𑀘 𑀯𑀡𑁆𑀡𑀸𑀤𑀺𑀯𑀲𑁂𑀦 𑀫𑀦𑀲𑀺𑀓𑀸𑀭𑁄 𑀥𑀸𑀢𑀼𑀧𑀝𑀺𑀓𑁆𑀓𑀽𑀮𑀯𑀡𑁆𑀡𑀫𑀦𑀲𑀺𑀓𑀸𑀭𑀸𑀦𑀁 𑀲𑀸𑀥𑀸𑀭𑀡𑁄 𑀧𑀼𑀩𑁆𑀩𑀪𑀸𑀕𑁄𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀥𑀸𑀢𑀼𑀫𑀦𑀲𑀺𑀓𑀸𑀭𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀲𑀸𑀦𑁂 𑀏𑀯𑀁 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁.

𑁩𑁧𑁧. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸𑀢𑀺 𑀏𑀢𑁂 ‘‘𑀲𑀻𑀲𑀓𑀝𑀸𑀳𑀧𑀮𑀺𑀯𑁂𑀞𑀦𑀘𑀫𑁆𑀫𑀁 𑀓𑁂𑀲𑀸’’𑀢𑀺 𑀏𑀯𑀁 𑀯𑁄𑀳𑀭𑀺𑀬𑀫𑀸𑀦𑀸 𑀪𑀽𑀢𑀼𑀧𑀸𑀤𑀸𑀬𑀥𑀫𑁆𑀫𑀸 ‘‘𑀫𑀬𑀺 𑀓𑁂𑀲𑀸 𑀚𑀸𑀢𑀸, 𑀫𑀬𑀫𑁂𑀢𑁆𑀣 𑀚𑀸𑀢𑀸’’𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀜𑁆𑀜𑀸. 𑀇𑀫𑀺𑀦𑀸 𑀓𑀸𑀭𑀡𑀲𑁆𑀲 𑀘 𑀨𑀮𑀲𑁆𑀲 𑀘 𑀅𑀩𑁆𑀬𑀸𑀧𑀸𑀭𑀢𑀸𑀬 𑀥𑀸𑀢𑀼𑀫𑀢𑁆𑀢𑀢𑀁 𑀲𑀦𑁆𑀤𑀲𑁆𑀲𑁂𑀢𑀺, 𑀢𑁂𑀦 𑀘 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀫𑁆𑀧𑀺 𑀏𑀯𑀫𑁂𑀯 𑀅𑀩𑁆𑀬𑀸𑀧𑀸𑀭𑀢𑀸 𑀤𑀻𑀧𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀢𑀸𑀦𑀺, 𑀢𑁂𑀲𑀁 𑀓𑀸𑀭𑀡𑀸𑀦𑀺 𑀘 𑀢𑀣𑀸 𑀢𑀣𑀸 𑀆𑀪𑀼𑀚𑀺𑀢𑁆𑀯𑀸, 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀘𑁆𑀘𑀬𑀪𑀸𑀯𑀁 𑀯𑀸 𑀕𑀘𑁆𑀙𑀦𑁆𑀢𑀻𑀢𑀺. 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀅𑀘𑁂𑀢𑀦𑁄𑀢𑀺 𑀦 𑀘𑁂𑀢𑀦𑁄, 𑀘𑁂𑀢𑀦𑀸𑀭𑀳𑀺𑀢𑁄 𑀯𑀸. 𑀅𑀩𑁆𑀬𑀸𑀓𑀢𑁄𑀢𑀺 𑀅𑀩𑁆𑀬𑀸𑀓𑀢𑀭𑀸𑀲𑀺𑀧𑀭𑀺𑀬𑀸𑀧𑀦𑁆𑀦𑁄. 𑀲𑀼𑀜𑁆𑀜𑁄𑀢𑀺 𑀅𑀢𑁆𑀢𑀲𑀼𑀜𑁆𑀜𑁄. 𑀢𑀢𑁄 𑀏𑀯 𑀦𑀺𑀲𑁆𑀲𑀢𑁆𑀢𑁄. 𑀣𑀤𑁆𑀥𑀮𑀓𑁆𑀔𑀡𑀸𑀥𑀺𑀓𑀢𑀸𑀬 𑀣𑀤𑁆𑀥𑁄. 𑀢𑀢𑁄 𑀏𑀯 𑀧𑀣𑀯𑀻𑀥𑀸𑀢𑀽𑀢𑀺 𑀏𑀯𑀁 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀢𑁆𑀣.

𑁩𑁧𑁨. 𑀲𑀼𑀜𑁆𑀜𑀕𑀸𑀫𑀝𑁆𑀞𑀸𑀦𑁂𑀢𑀺 𑀏𑀢𑁆𑀣 𑀲𑀼𑀜𑁆𑀜𑀕𑀸𑀫𑀕𑁆𑀕𑀳𑀡𑀁 𑀧𑀭𑀫𑀢𑁆𑀣𑀢𑁄 𑀯𑁂𑀤𑀓𑀯𑀺𑀭𑀳𑀤𑀲𑁆𑀲𑀦𑀢𑁆𑀣𑀁 𑀓𑀸𑀬𑀲𑁆𑀲.

𑁩𑁧𑁩. 𑀫𑀥𑀼𑀓𑀝𑁆𑀞𑀺𑀓𑁂𑀢𑀺 𑀫𑀥𑀼𑀓𑀩𑀻𑀚𑀸𑀦𑀺.

𑁩𑁧𑁪. 𑀕𑁂𑀳𑀣𑀫𑁆𑀪𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀞𑀧𑀺𑀢𑀲𑀺𑀮𑀸𑀬𑁄 𑀧𑀸𑀲𑀸𑀡𑀉𑀤𑀼𑀓𑁆𑀔𑀮𑀓𑀸𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺.

𑁩𑁧𑁫. 𑀤𑀼𑀕𑁆𑀕𑀦𑁆𑀥𑀸𑀤𑀺𑀪𑀸𑀯𑁂 𑀘𑀲𑁆𑀲 𑀲𑀤𑀺𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀮𑁆𑀮𑀕𑁄𑀘𑀫𑁆𑀫𑀕𑁆𑀕𑀳𑀡𑀁.

𑁩𑁧𑁬. 𑀬𑁂𑀪𑀼𑀬𑁆𑀬𑁂𑀦 𑀫𑀁𑀲𑀧𑁂𑀲𑀻𑀦𑀁 𑀩𑀳𑀮𑀢𑀸𑀬 𑀫𑀳𑀸𑀫𑀢𑁆𑀢𑀺𑀓𑀕𑁆𑀕𑀳𑀡𑀁.

𑁩𑁧𑁭. 𑀓𑀼𑀝𑁆𑀝𑀤𑀸𑀭𑀽𑀲𑀽𑀢𑀺 𑀤𑀸𑀭𑀼𑀓𑀼𑀝𑁆𑀝𑀺𑀓𑀸𑀬 𑀓𑀼𑀝𑀺𑀬𑀸 𑀪𑀺𑀢𑁆𑀢𑀺𑀧𑀸𑀤𑀪𑀽𑀢𑁂𑀲𑀼 𑀓𑀝𑁆𑀞𑁂𑀲𑀼.

𑁩𑁧𑁮. 𑀧𑀡𑁆𑀳𑀺𑀓𑀝𑁆𑀞𑀺𑀆𑀤𑀻𑀦𑀁 𑀆𑀥𑀸𑀭𑀪𑀸𑀯𑁄 𑀯𑀺𑀬 𑀕𑁄𑀧𑁆𑀨𑀓𑀝𑁆𑀞𑀺𑀆𑀤𑀻𑀦𑀁 𑀆𑀥𑁂𑀬𑁆𑀬𑀪𑀸𑀯𑁄𑀧𑀺 𑀅𑀲𑀫𑀦𑁆𑀦𑀸𑀳𑀸𑀭𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀡𑁆𑀳𑀺𑀓𑀝𑁆𑀞𑀺𑀕𑁄𑀧𑁆𑀨𑀓𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢’’𑀦𑁆𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀼𑀦 ‘‘𑀲𑀻𑀲𑀝𑁆𑀞𑀺𑀕𑀻𑀯𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁧𑁯. 𑀲𑀺𑀦𑁆𑀦𑀯𑁂𑀢𑁆𑀢𑀕𑁆𑀕𑀸𑀤𑀻𑀲𑀽𑀢𑀺 𑀲𑁂𑀤𑀺𑀢𑀯𑁂𑀢𑁆𑀢𑀓𑀴𑀻𑀭𑀸𑀤𑀻𑀲𑀼.

𑁩𑁨𑁧. 𑀉𑀭𑀝𑁆𑀞𑀺𑀲𑀗𑁆𑀖𑀸𑀝𑁄 𑀧𑀜𑁆𑀚𑀭𑀲𑀤𑀺𑀲𑀢𑀸𑀬 ‘‘𑀉𑀭𑀝𑁆𑀞𑀺𑀧𑀜𑁆𑀚𑀭’’𑀦𑁆𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀲 𑀅𑀣𑀺𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀚𑀺𑀡𑁆𑀡𑀲𑀦𑁆𑀤𑀫𑀸𑀦𑀺𑀓𑀧𑀜𑁆𑀚𑀭𑀁 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀕𑀳𑀺𑀢𑀁.

𑁩𑁨𑁨. 𑀬𑀫𑀓𑀫𑀁𑀲𑀧𑀺𑀡𑁆𑀟𑁂𑀢𑀺 𑀫𑀁𑀲𑀧𑀺𑀡𑁆𑀟𑀬𑀼𑀕𑀴𑁂.

𑁩𑁨𑁩. 𑀓𑀺𑀮𑁄𑀫𑀓𑀲𑁆𑀲 𑀲𑁂𑀢𑀯𑀡𑁆𑀡𑀢𑀸𑀬 ‘‘𑀧𑀺𑀮𑁄𑀢𑀺𑀓𑀧𑀮𑀺𑀯𑁂𑀞𑀺𑀢𑁂’’𑀢𑀺 𑀧𑀺𑀮𑁄𑀢𑀺𑀓𑀁 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀏𑀯𑀫𑁂𑀯 𑀦 𑀯𑀓𑁆𑀓𑀳𑀤𑀬𑀸𑀦𑀺 𑀲𑀓𑀮𑀲𑀭𑀻𑀭𑁂 𑀘 𑀫𑀁𑀲𑀁 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀦 𑀯𑀓𑁆𑀓𑀳𑀤𑀬𑀸𑀦𑀺 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀸𑀦𑀻’’𑀢𑀺, 𑀦 𑀲𑀓𑀮𑀲𑀭𑀻𑀭𑁂 𑀘 𑀫𑀁𑀲𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑁂𑀦 𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁩𑁨𑁪. 𑀓𑁄𑀝𑁆𑀞𑀫𑀢𑁆𑀣𑀓𑀧𑀲𑁆𑀲𑀦𑁆𑀢𑀺 𑀓𑀼𑀲𑀽𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀫𑀢𑁆𑀣𑀓𑀧𑀲𑁆𑀲𑀁.

𑁩𑁨𑁫. 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀫𑀦𑁆𑀢𑀭𑁂𑀢𑀺 𑀤𑁆𑀯𑀺𑀦𑁆𑀦𑀁 𑀣𑀦𑀧𑁆𑀧𑀤𑁂𑀲𑀸𑀦𑀁 𑀯𑁂𑀫𑀚𑁆𑀛𑁂, 𑀣𑀦𑀧𑁆𑀧𑀤𑁂𑀲𑁄 𑀘 𑀅𑀩𑁆𑀪𑀦𑁆𑀢𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁩𑁨𑁭. 𑀏𑀓𑀯𑀻𑀲𑀢𑀺𑀅𑀦𑁆𑀢𑀪𑁄𑀕𑁂𑀢𑀺 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀑𑀪𑀕𑁆𑀕𑁄𑀪𑀕𑁆𑀕𑁂 𑀅𑀦𑁆𑀢𑀫𑀡𑁆𑀟𑀮𑁂.

𑁩𑁨𑁮. 𑀆𑀫𑀸𑀲𑀬𑁂 𑀞𑀺𑀢𑁄 𑀧𑀭𑀺𑀪𑀼𑀢𑁆𑀢𑀸𑀳𑀸𑀭𑁄 𑀉𑀤𑀭𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀉𑀤𑀭𑀺𑀬𑀁 𑀉𑀤𑀭𑁂 𑀞𑀺𑀢𑀁 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢’’𑀦𑁆𑀢𑀺.

𑁩𑁩𑁧. 𑀅𑀩𑀤𑁆𑀥𑀧𑀺𑀢𑁆𑀢𑀁 𑀲𑀁𑀲𑀭𑀡𑀮𑁄𑀳𑀺𑀢𑀁 𑀯𑀺𑀬, 𑀓𑀸𑀬𑀼𑀲𑁆𑀫𑀸 𑀯𑀺𑀬 𑀘 𑀓𑀫𑁆𑀫𑀚𑀭𑀽𑀧𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀦𑁆𑀢𑀺 𑀆𑀳 ‘‘𑀆𑀩𑀤𑁆𑀥𑀧𑀺𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀁 𑀲𑀓𑀮𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢’’𑀦𑁆𑀢𑀺. 𑀧𑀝𑀺𑀩𑀤𑁆𑀥𑀢𑀸𑀯𑀘𑀦𑁂𑀦 𑀘𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀲𑀢𑀺 𑀲𑀩𑁆𑀪𑀸𑀯𑀫𑁂𑀯 𑀤𑀻𑀧𑁂𑀢𑀺, 𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀺𑀬 𑀏𑀓𑀦𑁆𑀢𑀓𑀫𑁆𑀫𑀚𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀺𑀢𑁆𑀢𑀓𑁄𑀲𑀓𑁂𑀢𑀺 𑀫𑀳𑀸𑀓𑁄𑀲𑀸𑀝𑀓𑀻𑀓𑁄𑀲𑀲𑀤𑀺𑀲𑁂 𑀧𑀺𑀢𑁆𑀢𑀸𑀥𑀸𑀭𑁂. 𑀬𑀽𑀲𑀪𑀽𑀢𑁄𑀢𑀺 𑀭𑀲𑀪𑀽𑀢𑁄.

𑁩𑁩𑁨. 𑀉𑀘𑁆𑀙𑀺𑀝𑁆𑀞𑁄𑀤𑀓𑀕𑀩𑁆𑀪𑀫𑀮𑀸𑀤𑀻𑀦𑀁 𑀙𑀟𑁆𑀟𑀦𑀝𑁆𑀞𑀸𑀦𑀁 𑀘𑀦𑁆𑀤𑀦𑀺𑀓𑀸, 𑀢𑀲𑁆𑀲𑀁 𑀘𑀦𑁆𑀤𑀦𑀺𑀓𑀸𑀬𑀁.

𑁩𑁩𑁩. 𑀧𑀼𑀩𑁆𑀩𑀸𑀲𑀬𑁄 𑀫𑀦𑁆𑀤𑀧𑀜𑁆𑀜𑀸𑀦𑀁 𑀓𑁂𑀲𑀜𑁆𑀘𑀺𑀤𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀅𑀲𑀩𑁆𑀩𑀲𑀸𑀥𑀸𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀧𑀼𑀩𑁆𑀩𑁄 𑀅𑀦𑀺𑀩𑀤𑁆𑀥𑁄𑀓𑀸𑀲𑁄’’𑀢𑀺.

𑁩𑁩𑁪. 𑀧𑀺𑀢𑁆𑀢𑀁 𑀯𑀺𑀬𑀸𑀢𑀺 𑀅𑀩𑀤𑁆𑀥𑀧𑀺𑀢𑁆𑀢𑀁 𑀯𑀺𑀬. 𑀲𑀓𑀮𑀲𑀭𑀻𑀭𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀁 𑀲𑀩𑁆𑀩𑀁 𑀲𑀭𑀻𑀭𑀧𑁆𑀧𑀤𑁂𑀲𑀁. 𑀯𑀓𑁆𑀓𑀳𑀤𑀬𑀬𑀓𑀦𑀧𑀧𑁆𑀨𑀸𑀲𑀸𑀦𑀺 𑀢𑁂𑀫𑁂𑀦𑁆𑀢𑀦𑁆𑀢𑀺 𑀏𑀢𑁆𑀣 𑀬𑀓𑀦𑀁 𑀳𑁂𑀝𑁆𑀞𑀸𑀪𑀸𑀕𑀧𑀽𑀭𑀡𑁂𑀦, 𑀇𑀢𑀭𑀸𑀦𑀺 𑀢𑁂𑀲𑀁 𑀉𑀧𑀭𑀺 𑀣𑁄𑀓𑀁 𑀣𑁄𑀓𑀁 𑀧𑀕𑁆𑀖𑀭𑀡𑁂𑀦 𑀘 𑀢𑁂𑀫𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀳𑁂𑀝𑁆𑀞𑀸 𑀮𑁂𑀟𑁆𑀟𑀼𑀔𑀡𑁆𑀟𑀸𑀤𑀻𑀦𑀺 𑀢𑁂𑀫𑀬𑀫𑀸𑀦𑁂𑀢𑀺 𑀢𑁂𑀫𑀓𑀢𑁂𑀫𑀺𑀢𑀩𑁆𑀩𑀸𑀦𑀁 𑀅𑀩𑁆𑀬𑀸𑀧𑀸𑀭𑀢𑀸𑀲𑀸𑀫𑀜𑁆𑀜𑀦𑀺𑀤𑀲𑁆𑀲𑀦𑀢𑁆𑀣𑀁 𑀏𑀯 𑀉𑀧𑀫𑀸 𑀤𑀝𑁆𑀞𑀩𑁆𑀩𑀸, 𑀦 𑀞𑀸𑀦𑀲𑀸𑀫𑀜𑁆𑀜𑀦𑀺𑀤𑀲𑁆𑀲𑀦𑀢𑁆𑀣𑀁. 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑁂𑀦 𑀳𑀺 𑀢𑁂𑀫𑁂𑀢𑀩𑁆𑀩𑀸𑀦𑀁 𑀓𑁂𑀲𑀜𑁆𑀘𑀺 𑀳𑁂𑀝𑁆𑀞𑀸, 𑀓𑀲𑁆𑀲𑀘𑀺 𑀉𑀧𑀭𑀺 𑀞𑀺𑀢𑀢𑀸 𑀓𑀸𑀬𑀕𑀢𑀸𑀲𑀢𑀺𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁦𑁬) 𑀤𑀲𑁆𑀲𑀺𑀢𑀸𑀢𑀺. 𑀬𑀓𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀝𑁆𑀞𑀸𑀦𑀁 ‘‘𑀫𑀬𑀺 𑀮𑁄𑀳𑀺𑀢𑀁 𑀞𑀺𑀢’’𑀦𑁆𑀢𑀺 𑀦 𑀚𑀸𑀦𑀸𑀢𑀺, 𑀯𑀓𑁆𑀓𑀸𑀤𑀻𑀦𑀺 ‘‘𑀅𑀫𑁆𑀳𑁂 𑀢𑁂𑀫𑀬𑀫𑀸𑀦𑀁 𑀮𑁄𑀳𑀺𑀢𑀁 𑀞𑀺𑀢’’𑀦𑁆𑀢𑀺 𑀦 𑀚𑀸𑀦𑀦𑁆𑀢𑀻𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁩𑁩𑁬. 𑀧𑀢𑁆𑀣𑀺𑀦𑁆𑀦𑀲𑀺𑀦𑁂𑀳𑁄𑀢𑀺 𑀣𑀺𑀦𑀪𑀸𑀯𑀁 𑀖𑀦𑀪𑀸𑀯𑀁 𑀕𑀢𑀲𑀺𑀦𑁂𑀳𑁄. 𑀲𑀓𑀮𑀲𑀭𑀻𑀭𑁂 𑀫𑀁𑀲𑀦𑁆𑀢𑀺 𑀬𑁄𑀚𑀦𑀸, 𑀢𑀜𑁆𑀘 𑀣𑀽𑀮𑀲𑀭𑀻𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑁂𑀤𑀲𑁆𑀲 𑀲𑀢𑀺𑀧𑀺 𑀧𑀢𑁆𑀣𑀺𑀦𑁆𑀦𑀢𑀸𑀬 𑀖𑀦𑀪𑀸𑀯𑁂 𑀫𑀁𑀲𑀲𑁆𑀲 𑀯𑀺𑀬 𑀦 𑀩𑀤𑁆𑀥𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀢𑁆𑀣𑀺𑀦𑁆𑀦𑀬𑀽𑀲𑁄’’𑀢𑀺. 𑀢𑁂𑀦𑁂𑀯𑀲𑁆𑀲 𑀆𑀧𑁄𑀓𑁄𑀝𑁆𑀞𑀸𑀲𑀢𑀸.

𑁩𑁩𑁭. 𑀉𑀤𑀓𑀧𑀼𑀡𑁆𑀡𑁂𑀲𑀼 𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑁂𑀲𑀽𑀢𑀺 𑀦𑀸𑀢𑀺𑀧𑀭𑀺𑀡𑀢𑀸𑀦𑀁 𑀲𑀚𑀮𑀓𑀸𑀦𑀁 𑀅𑀕𑁆𑀕𑀢𑁄 𑀙𑀺𑀦𑁆𑀦𑀸𑀦𑀁 𑀢𑀸𑀮𑀲𑀮𑀸𑀝𑀼𑀓𑀸𑀦𑀁 𑀯𑀺𑀯𑀭𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁩𑁩𑁮. 𑀯𑀲𑀸𑀬 𑀅𑀢𑁆𑀢𑀦𑁄 𑀆𑀥𑀸𑀭𑁂 𑀅𑀪𑀺𑀩𑁆𑀬𑀸𑀧𑀦𑀫𑀼𑀔𑁂𑀦 𑀅𑀩𑁆𑀬𑀸𑀧𑀸𑀭𑀢𑀸𑀲𑀸𑀫𑀜𑁆𑀜𑀁 𑀯𑀺𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀆𑀘𑀸𑀫𑀕𑀢𑀢𑁂𑀮𑀁 𑀦𑀺𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁩𑁯. 𑀔𑁂𑀴𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑁂 𑀅𑀫𑁆𑀩𑀺𑀮𑀕𑁆𑀕𑀫𑀥𑀼𑀭𑀕𑁆𑀕𑀸𑀤𑀺𑀓𑁂.

𑁩𑁪𑁩. 𑀓𑁂𑀲𑀸𑀤𑀻𑀲𑀼 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀢𑁆𑀯𑀸 𑀢𑁂𑀚𑁄𑀓𑁄𑀝𑁆𑀞𑀸𑀲𑁂𑀲𑀼 𑀧𑀯𑀢𑁆𑀢𑁂𑀢𑀩𑁆𑀩𑁄 𑀫𑀦𑀲𑀺𑀓𑀸𑀭𑁄𑀢𑀺 𑀯𑀺𑀪𑀢𑁆𑀢𑀺𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀬𑁂𑀦 𑀲𑀦𑁆𑀢𑀧𑁆𑀧𑀢𑀻𑀢𑀺 𑀬𑁂𑀦 𑀓𑀸𑀬𑁄 𑀲𑀦𑁆𑀢𑀧𑁆𑀧𑀢𑀺, 𑀅𑀬𑀁 𑀲𑀦𑁆𑀢𑀧𑁆𑀧𑀦𑀓𑀺𑀘𑁆𑀘𑁄. 𑀢𑁂𑀚𑁄𑀢𑀺 𑀢𑀲𑁆𑀲 𑀧𑀭𑀺𑀕𑁆𑀕𑀡𑁆𑀳𑀦𑀸𑀓𑀸𑀭𑁄 𑀏𑀯 𑀧𑀘𑁆𑀘𑀸𑀫𑀝𑁆𑀞𑁄. 𑀬𑁂𑀦 𑀚𑀻𑀭𑀻𑀬𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁪𑁪. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀅𑀦𑁆𑀢𑁄𑀧𑀯𑀺𑀲𑀦𑀩𑀳𑀺𑀦𑀺𑀓𑁆𑀔𑀫𑀦𑀦𑀸𑀲𑀺𑀓𑀸𑀯𑀸𑀢𑀪𑀸𑀯𑁂𑀦. ‘‘𑀏𑀯𑀁 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀸𑀓𑀸𑀭𑁂𑀦 𑀲𑀲𑀫𑁆𑀪𑀸𑀭𑀯𑀺𑀪𑀢𑁆𑀢𑀺𑀢𑁄 𑀧𑀯𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀲𑁆𑀲. 𑀥𑀸𑀢𑀼𑀬𑁄 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀯𑀺𑀢𑁆𑀣𑀸𑀭𑀢𑁄 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀥𑀸𑀢𑀼𑀬𑁄 𑀯𑀺𑀪𑀽𑀢𑀸 𑀳𑁄𑀦𑁆𑀢𑀺. 𑀇𑀥𑀸𑀧𑀺 𑀪𑀸𑀯𑀦𑀸𑀯𑀺𑀥𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁩𑁪𑁫. 𑀢𑀢𑁆𑀣𑁂𑀯𑀸𑀢𑀺 𑀢𑁂𑀲𑀼𑀬𑁂𑀯 𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀼. 𑀧𑀭𑀺𑀧𑀸𑀘𑀦𑀮𑀓𑁆𑀔𑀡𑀁 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀢𑀢𑁆𑀣𑁂𑀯𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀧𑀼𑀦 𑀢𑀢𑁆𑀣𑁂𑀯𑀸𑀢𑀺 𑀢𑁂𑀲𑀼𑀬𑁂𑀯 𑀤𑁆𑀯𑀸𑀤𑀲𑀲𑀼 𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑀸𑀦𑀁 𑀲𑀁𑀯𑀺𑀕𑁆𑀕𑀳𑀢𑀸𑀬 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀸 𑀆𑀧𑁄𑀥𑀸𑀢𑀼𑀆𑀤𑀬𑁄 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀸𑀤𑀻𑀲𑀼 𑀉𑀤𑀓𑀸𑀤𑀬𑁄 𑀯𑀺𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 ‘‘𑀢𑀢𑁆𑀣𑁂𑀯 𑀆𑀩𑀦𑁆𑀥𑀦𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀦𑁆𑀢𑀧𑁆𑀧𑀦𑀸𑀤𑀺𑀢𑁂𑀚𑁄𑀓𑁄𑀝𑁆𑀞𑀸𑀲𑁂𑀲𑀼 𑀧𑀦 𑀯𑀸𑀬𑁄𑀥𑀸𑀢𑀼𑀆𑀤𑀬𑁄 𑀦 𑀢𑀣𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀓𑀢𑁆𑀯𑀸 ‘‘𑀢𑁂𑀦 𑀅𑀯𑀺𑀦𑀺𑀪𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀢𑀢𑁆𑀣𑁂𑀯𑀸𑀢𑀺. 𑀬𑀤𑀺 𑀏𑀯𑀁, 𑀯𑀸𑀬𑀼𑀓𑁄𑀝𑁆𑀞𑀸𑀲𑁂𑀲𑀼 𑀓𑀣𑀁 𑀢𑀢𑁆𑀣𑁂𑀯𑀸𑀢𑀺? 𑀯𑀸𑀬𑀼𑀓𑁄𑀝𑁆𑀞𑀸𑀲𑀸𑀧𑀺 𑀳𑀺 𑀉𑀤𑁆𑀥𑀗𑁆𑀕𑀫𑀯𑀸𑀢𑀸𑀤𑀬𑁄 𑀧𑀺𑀡𑁆𑀟𑀸𑀓𑀸𑀭𑁂𑀦𑁂𑀯 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀢𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀦 𑀧𑀦 𑀲𑀦𑁆𑀢𑀧𑁆𑀧𑀦𑀸𑀤𑀺𑀢𑁂𑀚𑁄𑀓𑁄𑀝𑁆𑀞𑀸𑀲𑀸𑀢𑀺 𑀦𑀸𑀬𑀁 𑀤𑁄𑀲𑁄. 𑀢𑀢𑁆𑀣 𑀢𑁂𑀦𑀸𑀢𑀺 𑀢𑁂𑀦 𑀢𑁂𑀚𑁂𑀦. 𑀅𑀯𑀺𑀦𑀺𑀪𑀼𑀢𑁆𑀢𑀦𑁆𑀢𑀺 𑀅𑀯𑀺𑀦𑀸𑀪𑀽𑀢𑀁, 𑀢𑀁𑀢𑀁𑀓𑀮𑀸𑀧𑀕𑀢𑀯𑀲𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀏𑀯𑀁 𑀯𑀯𑀢𑁆𑀣𑀸𑀧𑀬𑀢𑁄𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀢𑁄 𑀥𑀸𑀢𑀼𑀬𑁄 𑀯𑀯𑀢𑁆𑀣𑀸𑀧𑁂𑀦𑁆𑀢𑀲𑁆𑀲. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀢𑀲𑁆𑀲𑁂𑀯𑀁 𑀯𑀸𑀬𑀫𑀫𑀸𑀦𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁮) 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦.

𑁩𑁪𑁬. 𑀏𑀯𑀫𑁆𑀧𑀺 𑀪𑀸𑀯𑀬𑀢𑁄𑀢𑀺 𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀢𑁄 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀪𑀸𑀯𑁂𑀦𑁆𑀢𑀲𑁆𑀲𑀸𑀧𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀲𑀲𑀫𑁆𑀪𑀸𑀭𑀯𑀺𑀪𑀢𑁆𑀢𑀺𑀢𑁄 𑀪𑀸𑀯𑀦𑀸𑀬𑀁 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀏𑀯𑀦𑁆𑀢𑀺 𑀬𑀣𑀸 𑀓𑁂𑀲𑁂, 𑀏𑀯𑀁. 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀏𑀓𑀘𑀢𑁆𑀢𑀸𑀮𑀻𑀲𑀪𑁂𑀤𑁂𑀲𑀼 𑀲𑁂𑀲𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀏𑀯𑀫𑁂𑀢𑁆𑀣 𑀅𑀝𑁆𑀞𑀲𑀝𑁆𑀞𑀺𑀥𑀸𑀢𑀼𑀲𑀢𑀲𑁆𑀲 𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀪𑀸𑀯𑀦𑀸𑀯𑀺𑀥𑀸𑀦𑀁 𑀧𑀦𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀤𑀸𑀦𑀺 𑀯𑀘𑀦𑀢𑁆𑀣𑀸𑀤𑀺𑀫𑀼𑀔𑁂𑀦𑀧𑀺 𑀥𑀸𑀢𑀽𑀲𑀼 𑀫𑀦𑀲𑀺𑀓𑀸𑀭𑀯𑀺𑀥𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀘𑀦𑀢𑁆𑀣𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀘𑀦𑀢𑁆𑀣𑀢𑁄𑀢𑀺 𑀬𑀲𑁆𑀫𑀸 𑀲𑀩𑁆𑀩𑀧𑀞𑀫𑀁 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀕𑁆𑀕𑀳𑀡𑀁 𑀯𑀘𑀦𑀯𑀲𑁂𑀦 𑀳𑁄𑀢𑀺 𑀯𑀘𑀦𑀤𑁆𑀯𑀸𑀭𑁂𑀦 𑀢𑀤𑀢𑁆𑀣𑀲𑁆𑀲 𑀆𑀤𑀺𑀢𑁄 𑀕𑀳𑁂𑀢𑀩𑁆𑀩𑀢𑁄, 𑀢𑀲𑁆𑀫𑀸 𑀯𑀘𑀦𑀢𑁆𑀣𑀢𑁄𑀧𑀺 𑀥𑀸𑀢𑀽𑀦𑀁 𑀫𑀦𑀲𑀺𑀓𑀸𑀢𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀓𑀮𑀸𑀧𑀢𑁄𑀢𑀺 𑀯𑀘𑀦𑀢𑁆𑀣𑀯𑀲𑁂𑀦 𑀯𑀺𑀲𑁂𑀲𑀢𑁄, 𑀲𑀸𑀫𑀜𑁆𑀜𑀢𑁄 𑀘 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀲𑁆𑀲 𑀬𑀲𑁆𑀫𑀸 𑀢𑀸 𑀧𑀺𑀡𑁆𑀟𑀲𑁄 𑀧𑀯𑀢𑁆𑀢𑀦𑁆𑀢𑀺, 𑀦 𑀧𑀘𑁆𑀘𑁂𑀓𑀁, 𑀢𑀲𑁆𑀫𑀸 𑀓𑀮𑀸𑀧𑀢𑁄𑀧𑀺 𑀫𑀦𑀲𑀺𑀓𑀸𑀢𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀢𑁂 𑀧𑀦 𑀓𑀮𑀸𑀧𑀸 𑀧𑀭𑀫𑀸𑀡𑀼𑀧𑀭𑀺𑀫𑀸𑀡𑀸 𑀳𑁄𑀦𑁆𑀢𑀻𑀢𑀺 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀏𑀓𑀲𑁆𑀫𑀺𑀁 𑀲𑀭𑀻𑀭𑁂 𑀧𑀭𑀺𑀫𑁂𑀬𑁆𑀬𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀼𑀁 𑀘𑀼𑀡𑁆𑀡𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀲𑁄 𑀧𑀦𑀸𑀬𑀁 𑀢𑀸𑀲𑀁 𑀘𑀼𑀡𑁆𑀡𑀢𑁄 𑀫𑀦𑀲𑀺𑀓𑀸𑀭𑁄 𑀲𑀗𑁆𑀖𑀸𑀝𑀯𑀲𑁂𑀦 𑀳𑁄𑀢𑀻𑀢𑀺 𑀦𑀺𑀩𑁆𑀩𑀝𑁆𑀝𑀺𑀢𑀲𑀭𑀽𑀧𑀫𑁂𑀯 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 𑀮𑀓𑁆𑀔𑀡𑀸𑀤𑀺𑀢𑁄 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄. 𑀮𑀓𑁆𑀔𑀡𑀸𑀤𑀺𑀢𑁄 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁂𑀦 𑀲𑀮𑀓𑁆𑀔𑀡𑀯𑀺𑀪𑀢𑁆𑀢𑀺𑀢𑁄 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁂 𑀬𑀲𑁆𑀫𑀸 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀓𑁄𑀝𑁆𑀞𑀸𑀲𑀸𑀦𑀁 𑀯𑀲𑁂𑀦 𑀥𑀸𑀢𑀽𑀲𑀼 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑀸𑀲𑀼 ‘‘𑀏𑀢𑁆𑀢𑀓𑀸 𑀉𑀢𑀼𑀲𑀫𑀼𑀝𑁆𑀞𑀸𑀦𑀸, 𑀏𑀢𑁆𑀢𑀓𑀸 𑀘𑀺𑀢𑁆𑀢𑀸𑀤𑀺𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀜𑀸𑀢𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀫𑀼𑀝𑁆𑀞𑀸𑀦𑀢𑁄 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄.

𑀏𑀯𑀁 𑀧𑀭𑀺𑀜𑁆𑀜𑀸𑀢𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀢𑀸𑀲𑀁 𑀲𑀤𑁆𑀤𑀸𑀦𑀼𑀲𑀸𑀭𑁂𑀦 𑀯𑀺𑀦𑀸 𑀯𑀺𑀲𑁂𑀲𑀲𑀸𑀫𑀜𑁆𑀜𑀧𑀭𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 𑀦𑀸𑀦𑀢𑁆𑀢𑁂𑀓𑀢𑁆𑀢𑀢𑁄 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄. 𑀮𑀓𑁆𑀔𑀡𑀯𑀺𑀲𑁂𑀲𑀢𑁄 𑀯𑀺𑀦𑀺𑀪𑀼𑀢𑁆𑀢𑀭𑀽𑀧𑀸𑀧𑀺 𑀏𑀢𑀸 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑀢𑀸𑀬 𑀧𑀤𑁂𑀲𑁂𑀦 𑀅𑀯𑀺𑀦𑀺𑀪𑀼𑀢𑁆𑀢𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀦𑀺𑀩𑁆𑀪𑁄𑀕𑀸𑀯𑀺𑀦𑀺𑀩𑁆𑀪𑁄𑀕𑀢𑁄 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄. 𑀲𑀢𑀺𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀬𑀁 𑀓𑀸𑀘𑀺𑀤𑁂𑀯 𑀓𑀸𑀲𑀜𑁆𑀘𑀺 𑀲𑀪𑀸𑀕𑀸, 𑀓𑀸𑀘𑀺 𑀯𑀺𑀲𑀪𑀸𑀕𑀸𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 𑀲𑀪𑀸𑀕𑀯𑀺𑀲𑀪𑀸𑀕𑀢𑁄 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄. 𑀲𑀪𑀸𑀕𑀯𑀺𑀲𑀪𑀸𑀕𑀸𑀧𑀺 𑀥𑀸𑀢𑀼𑀬𑁄 𑀅𑀚𑁆𑀛𑀢𑁆𑀢𑀺𑀓𑀸 𑀈𑀤𑀺𑀲𑀓𑀺𑀘𑁆𑀘𑀯𑀺𑀲𑁂𑀲𑀬𑀼𑀢𑁆𑀢𑀸, 𑀩𑀸𑀳𑀺𑀭𑀸 𑀢𑀩𑁆𑀩𑀺𑀧𑀭𑀻𑀢𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀺𑀲𑁂𑀲𑀢𑁄 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄. 𑀲𑀚𑀸𑀢𑀺𑀲𑀗𑁆𑀕𑀳𑀸𑀤𑀺𑀓𑁄 𑀥𑀸𑀢𑀼𑀲𑀗𑁆𑀕𑀳𑀯𑀺𑀲𑁂𑀲𑁄𑀧𑀺 𑀧𑀭𑀺𑀕𑁆𑀕𑀳𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 𑀲𑀗𑁆𑀕𑀳𑀢𑁄 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄. 𑀲𑀦𑁆𑀥𑀸𑀭𑀡𑀸𑀤𑀻𑀳𑀺 𑀬𑀣𑀸𑀲𑀓𑀓𑀺𑀘𑁆𑀘𑁂𑀳𑀺 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀫𑁆𑀪𑀪𑀸𑀯𑀢𑁄𑀧𑀺 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 𑀧𑀘𑁆𑀘𑀬𑀢𑁄 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄. 𑀅𑀩𑁆𑀬𑀸𑀧𑀸𑀭𑀦𑀬𑀢𑁄 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 𑀅𑀲𑀫𑀦𑁆𑀦𑀸𑀳𑀸𑀭𑀢𑁄 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄. 𑀅𑀢𑁆𑀢𑀦𑁄 𑀧𑀘𑁆𑀘𑀬𑀥𑀫𑁆𑀫𑀯𑀺𑀲𑁂𑀲𑀢𑁄, 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑀢𑁄 𑀘 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 𑀧𑀘𑁆𑀘𑀬𑀯𑀺𑀪𑀸𑀕𑀢𑁄 𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄𑀢𑀺 𑀏𑀯𑀫𑁂𑀢𑁂𑀲𑀁 𑀢𑁂𑀭𑀲𑀦𑁆𑀦𑀁 𑀆𑀓𑀸𑀭𑀸𑀦𑀁 𑀧𑀭𑀺𑀕𑁆𑀕𑀳𑁂 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀓𑀸𑀭𑁂𑀳𑀻𑀢𑀺 𑀧𑀓𑀸𑀭𑁂𑀳𑀺, 𑀓𑀸𑀭𑀡𑁂𑀳𑀺 𑀯𑀸.

𑁩𑁪𑁭. 𑀢𑀢𑁆𑀣 𑀧𑀢𑁆𑀣𑀝𑀢𑁆𑀢𑀸𑀢𑀺 𑀧𑀼𑀣𑀼𑀢𑁆𑀢𑀸, 𑀢𑁂𑀦 𑀧𑀼𑀣𑀼𑀪𑀸𑀯𑀢𑁄 𑀧𑀼𑀣𑀼𑀯𑀻, 𑀧𑀼𑀣𑀼𑀯𑀻 𑀏𑀯 𑀧𑀣𑀯𑀻𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀤𑁆𑀤𑀢𑁆𑀣𑀫𑀸𑀳. 𑀧𑀢𑁆𑀣𑀦𑀝𑁆𑀞𑁂𑀦 𑀯𑀸 𑀧𑀣𑀯𑀻, 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀧𑀢𑁆𑀣𑀸𑀬𑀢𑀺 𑀉𑀧𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀧𑁆𑀧𑁄𑀢𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯. 𑀆𑀧𑀻𑀬𑀢𑀻𑀢𑀺 𑀲𑁄𑀲𑀻𑀬𑀢𑀺, 𑀧𑀺𑀯𑀻𑀬𑀢𑀻𑀢𑀺 𑀓𑁂𑀘𑀺. ‘‘𑀅𑀬𑀁 𑀧𑀦𑀢𑁆𑀣𑁄 𑀲𑀲𑀫𑁆𑀪𑀸𑀭𑀸𑀧𑁂 𑀬𑀼𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺, 𑀮𑀓𑁆𑀔𑀡𑀸𑀧𑁂𑀧𑀺 𑀬𑀼𑀚𑁆𑀚𑀢𑁂𑀯. 𑀲𑁄𑀧𑀺 𑀳𑀺 𑀨𑀭𑀼𑀲𑀧𑀸𑀘𑀦𑀯𑀺𑀲𑁄𑀲𑀦𑀸𑀓𑀸𑀭𑁂𑀦 𑀲𑁂𑀲𑀪𑀽𑀢𑀢𑁆𑀢𑀬𑁂𑀦 𑀧𑀻𑀬𑀫𑀸𑀦𑁄 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺. 𑀅𑀧𑁆𑀧𑀸𑀬𑀢𑀻𑀢𑀺 𑀩𑁆𑀭𑀽𑀳𑁂𑀢𑀺. 𑀧𑀭𑀺𑀩𑁆𑀭𑀽𑀳𑀦𑀭𑀲𑀸 𑀳𑀺 𑀆𑀧𑁄𑀥𑀸𑀢𑀼. 𑀢𑁂𑀚𑀢𑀻𑀢𑀺 𑀦𑀺𑀲𑁂𑀢𑀺, 𑀢𑀺𑀓𑁆𑀔𑀪𑀸𑀯𑁂𑀦 𑀲𑁂𑀲𑀪𑀽𑀢𑀢𑁆𑀢𑀬𑀁 𑀉𑀲𑁆𑀫𑀸𑀧𑀬𑀢𑀻𑀢𑀺 𑀅𑀢𑁆𑀣𑁄. 𑀯𑀸𑀬𑀢𑀻𑀢𑀺 𑀲𑀫𑀻𑀭𑁂𑀢𑀺, 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀪𑀽𑀢𑀲𑀗𑁆𑀖𑀸𑀢𑀁 𑀕𑀫𑁂𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀢𑀸𑀯 𑀯𑀺𑀲𑁂𑀲𑀢𑁄 𑀯𑀘𑀦𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀲𑀸𑀫𑀜𑁆𑀜𑀢𑁄 𑀯𑀢𑁆𑀢𑀼𑀁 ‘‘𑀅𑀯𑀺𑀲𑁂𑀲𑁂𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀮𑀓𑁆𑀔𑀡𑀥𑀸𑀭𑀡𑀢𑁄𑀢𑀺 𑀬𑀣𑀸 𑀢𑀺𑀢𑁆𑀣𑀺𑀬𑀧𑀭𑀺𑀓𑀧𑁆𑀧𑀺𑀢𑁄 ‘‘𑀧𑀓𑀢𑀺 𑀅𑀢𑁆𑀢𑀸’’𑀢𑀺 𑀏𑀯𑀫𑀸𑀤𑀺𑀓𑁄 𑀲𑀪𑀸𑀯𑀢𑁄 𑀦𑀢𑁆𑀣𑀺, 𑀦 𑀏𑀯𑀫𑁂𑀢𑀸. 𑀏𑀢𑀸 𑀧𑀦 𑀲𑀮𑀓𑁆𑀔𑀡𑀁 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀼𑀬𑁄. 𑀤𑀼𑀓𑁆𑀔𑀸𑀤𑀸𑀦𑀢𑁄𑀢𑀺 𑀤𑀼𑀓𑁆𑀔𑀲𑁆𑀲 𑀯𑀺𑀤𑀳𑀦𑀢𑁄. 𑀏𑀢𑀸 𑀳𑀺 𑀥𑀸𑀢𑀼𑀬𑁄 𑀓𑀸𑀭𑀡𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸 𑀳𑀼𑀢𑁆𑀯𑀸 𑀅𑀬𑀮𑁄𑀳𑀸𑀤𑀺𑀥𑀸𑀢𑀼𑀬𑁄 𑀯𑀺𑀬 𑀅𑀬𑀮𑁄𑀳𑀸𑀤𑀺𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀯𑀺𑀤𑀳𑀦𑁆𑀢𑀺. 𑀤𑀼𑀓𑁆𑀔𑀸𑀥𑀸𑀦𑀢𑁄𑀢𑀺 𑀅𑀦𑀧𑁆𑀧𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀯𑀺𑀥𑀸𑀦𑀫𑀢𑁆𑀢𑀢𑁄 𑀅𑀯𑀲𑀯𑀢𑁆𑀢𑀦𑀢𑁄, 𑀢𑀁 𑀯𑀸 𑀤𑀼𑀓𑁆𑀔𑀁 𑀏𑀢𑀸𑀳𑀺 𑀓𑀸𑀭𑀡𑀪𑀽𑀢𑀸𑀳𑀺 𑀲𑀢𑁆𑀢𑁂𑀳𑀺 𑀅𑀦𑀼𑀯𑀺𑀥𑀻𑀬𑀢𑀺, 𑀢𑀣𑀸𑀯𑀺𑀳𑀺𑀢𑀜𑁆𑀘 𑀢𑀁 𑀏𑀢𑀸𑀲𑁆𑀯𑁂𑀯 𑀥𑀻𑀬𑀢𑀺 𑀞𑀧𑀻𑀬𑀢𑀻𑀢𑀺 𑀏𑀯𑀁 𑀤𑀼𑀓𑁆𑀔𑀸𑀥𑀸𑀦𑀢𑁄, 𑀥𑀸𑀢𑀼𑀬𑁄. 𑀅𑀧𑀺𑀘 ‘‘𑀦𑀺𑀚𑁆𑀚𑀻𑀯𑀝𑁆𑀞𑁄 𑀥𑀸𑀢𑀼𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀣𑀸 𑀳𑀺 𑀪𑀕𑀯𑀸 ‘‘𑀙𑀥𑀸𑀢𑀼𑀭𑁄𑀬𑀁 𑀪𑀺𑀓𑁆𑀔𑀼 𑀧𑀼𑀭𑀺𑀲𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁪𑁩-𑁩𑁪𑁫) 𑀚𑀻𑀯𑀲𑀜𑁆𑀜𑀸𑀲𑀫𑀽𑀳𑀦𑀦𑀢𑁆𑀣𑀁 𑀥𑀸𑀢𑀼𑀤𑁂𑀲𑀦𑀁 𑀅𑀓𑀸𑀲𑀻𑀢𑀺. 𑀇𑀢𑀺 𑀯𑀘𑀦𑀢𑁆𑀣𑀫𑀼𑀔𑁂𑀦𑀧𑀺 𑀅𑀲𑀸𑀥𑀸𑀭𑀡𑀢𑁄, 𑀲𑀸𑀥𑀸𑀭𑀡𑀢𑁄 𑀘 𑀥𑀸𑀢𑀽𑀦𑀁 𑀲𑀭𑀲𑀮𑀓𑁆𑀔𑀡𑀫𑁂𑀯 𑀯𑀺𑀪𑀸𑀯𑀻𑀬𑀢𑀻𑀢𑀺 𑀆𑀳 ‘‘𑀏𑀯𑀁 𑀯𑀺𑀲𑁂𑀲𑀲𑀸𑀫𑀜𑁆𑀜𑀯𑀲𑁂𑀦 𑀯𑀘𑀦𑀢𑁆𑀣𑀢𑁄 𑀫𑀦𑀲𑀺 𑀓𑀸𑀢𑀩𑁆𑀩𑀸’’𑀢𑀺. 𑀫𑀦𑀲𑀺𑀓𑀸𑀭𑁄 𑀧𑀦 𑀯𑀘𑀦𑀢𑁆𑀣𑀫𑀼𑀔𑁂𑀦 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁩𑁪𑁮. 𑀆𑀓𑀸𑀭𑁂𑀳𑀻𑀢𑀺 𑀧𑀓𑀸𑀭𑁂𑀳𑀺. 𑀅𑀣 𑀯𑀸 𑀆𑀓𑀭𑀻𑀬𑀦𑁆𑀢𑀺 𑀤𑀺𑀲𑁆𑀲𑀦𑁆𑀢𑀺 𑀏𑀢𑁆𑀣 𑀥𑀸𑀢𑀼𑀬𑁄𑀢𑀺 𑀆𑀓𑀸𑀭𑀸, 𑀓𑁄𑀝𑁆𑀞𑀸𑀲𑀸. 𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀯𑀺𑀲𑀺𑀝𑁆𑀞𑀭𑀽𑀧𑀸𑀦𑀁 𑀯𑀡𑁆𑀡𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀥𑀫𑁆𑀫𑀸𑀦𑀁 𑀲𑀫𑀯𑀥𑀸𑀦𑀢𑁄 𑀲𑀦𑁆𑀦𑀺𑀯𑁂𑀲𑀯𑀺𑀲𑁂𑀲𑀯𑀲𑁂𑀦 𑀲𑀳𑀸𑀯𑀝𑁆𑀞𑀸𑀦𑀢𑁄 𑀢𑀁 𑀉𑀧𑀸𑀤𑀸𑀬. 𑀓𑁂𑀲𑀸𑀢𑀺 𑀲𑀫𑁆𑀫𑀼𑀢𑀺 𑀲𑀫𑀜𑁆𑀜𑀸𑀫𑀢𑁆𑀢𑀁 𑀳𑁄𑀢𑀺. 𑀢𑁂𑀲𑀁𑀬𑁂𑀯 𑀯𑀺𑀦𑀺𑀩𑁆𑀪𑁄𑀕𑀸𑀢𑀺 𑀢𑁂𑀲𑀁𑀬𑁂𑀯 𑀯𑀡𑁆𑀡𑀸𑀤𑀻𑀦𑀁 𑀯𑀺𑀦𑀺𑀩𑁆𑀪𑀼𑀚𑀦𑀢𑁄. 𑀬𑀣𑀸 𑀳𑀺 𑀯𑀡𑁆𑀡𑀸𑀤𑀬𑁄 𑀅𑀝𑁆𑀞 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀯𑀺𑀦𑀺𑀩𑁆𑀪𑀼𑀚𑁆𑀚𑀫𑀸𑀦𑀸 𑀅𑀜𑁆𑀜𑀫𑀜𑁆𑀜𑀩𑁆𑀬𑀢𑀺𑀭𑁂𑀓𑁂𑀦 𑀧𑀭𑀫𑀢𑁆𑀣𑀢𑁄 𑀉𑀧𑀮𑀩𑁆𑀪𑀦𑁆𑀢𑀺, 𑀦 𑀏𑀯𑀁 𑀯𑀡𑁆𑀡𑀸𑀤𑀺𑀩𑁆𑀬𑀢𑀺𑀭𑁂𑀓𑁂𑀦 𑀧𑀭𑀫𑀢𑁆𑀣𑀢𑁄 𑀓𑁂𑀲𑀸 𑀉𑀧𑀮𑀩𑁆𑀪𑀦𑁆𑀢𑀺. 𑀢𑀲𑁆𑀫𑀸 𑀬𑁂 𑀘 𑀥𑀫𑁆𑀫𑁂 𑀲𑀫𑀼𑀤𑀺𑀢𑁂 𑀉𑀧𑀸𑀤𑀸𑀬 ‘‘𑀓𑁂𑀲𑀸’’𑀢𑀺 𑀲𑀫𑁆𑀫𑀼𑀢𑀺, 𑀢𑁂𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁂𑀲𑀼 𑀦𑀢𑁆𑀣𑀺 ‘‘𑀓𑁂𑀲𑀸’’𑀢𑀺 𑀲𑀫𑁆𑀫𑀼𑀢𑀺, 𑀯𑁄𑀳𑀸𑀭𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

‘‘𑀅𑀝𑁆𑀞𑀥𑀫𑁆𑀫𑀓𑀮𑀸𑀧𑀫𑀢𑁆𑀢𑀫𑁂𑀯𑀸’’𑀢𑀺 𑀇𑀤𑀁 𑀓𑁂𑀲𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀬𑀪𑀽𑀢𑁂 𑀯𑀡𑁆𑀡𑀸𑀤𑀺𑀓𑁂 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀢𑁂𑀲𑀁 𑀅𑀝𑁆𑀞𑀥𑀫𑁆𑀫𑀫𑀢𑁆𑀢𑀪𑀸𑀯𑀢𑁄. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀓𑁄𑀝𑁆𑀞𑀸𑀲𑁄𑀢𑀺 𑀓𑁂𑀲𑁂𑀲𑀼 𑀢𑀸𑀯 𑀓𑁂𑀲𑀫𑀽𑀮𑀁, 𑀏𑀯𑀁 𑀮𑁄𑀫𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑀁. 𑀤𑀲𑀥𑀫𑁆𑀫𑀓𑀮𑀸𑀧𑁄𑀧𑀻𑀢𑀺 𑀏𑀢𑁆𑀣 𑀅𑀲𑀺𑀢𑀸𑀤𑀺𑀧𑀭𑀺𑀧𑀸𑀘𑀓𑁄 𑀢𑁂𑀚𑁄𑀓𑁄𑀝𑁆𑀞𑀸𑀲𑁄 𑀦𑀯𑀥𑀫𑁆𑀫𑀓𑀮𑀸𑀧𑁄𑀧𑀻𑀢𑀺 𑀯𑀢𑁆𑀢𑀩𑁆𑀩𑁄. 𑀬𑀤𑀺𑀫𑁂 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑀸 𑀬𑀣𑀸𑀭𑀳𑀁 𑀅𑀝𑁆𑀞𑀦𑀯𑀤𑀲𑀥𑀫𑁆𑀫𑀲𑀫𑀽𑀳𑀪𑀽𑀢𑀸, 𑀅𑀣 𑀓𑀲𑁆𑀫𑀸 𑀧𑀣𑀯𑀻𑀆𑀤𑀺𑀥𑀸𑀢𑀼𑀫𑀢𑁆𑀢𑀢𑁄 𑀫𑀦𑀲𑀺 𑀓𑀭𑀻𑀬𑀦𑁆𑀢𑀻𑀢𑀺 𑀆𑀳 ‘‘𑀉𑀲𑁆𑀲𑀤𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀅𑀬𑀁 𑀥𑀸𑀢𑀼𑀫𑀦𑀲𑀺𑀓𑀸𑀭𑁄 𑀬𑀸𑀯𑀤𑁂𑀯 𑀲𑀢𑁆𑀢𑀲𑀜𑁆𑀜𑀸𑀲𑀫𑀼𑀕𑁆𑀖𑀸𑀝𑀦𑀢𑁆𑀣𑁄, 𑀥𑀫𑁆𑀫𑀯𑀺𑀦𑀺𑀩𑁆𑀪𑁄𑀕𑁄 𑀘 𑀲𑀸𑀢𑀺𑀲𑀬𑀁 𑀲𑀢𑁆𑀢𑀲𑀜𑁆𑀜𑀸𑀲𑀫𑀼𑀕𑁆𑀖𑀸𑀝𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀓𑁄𑀝𑁆𑀞𑀸𑀲𑁂𑀲𑀼 𑀏𑀯𑀁 𑀥𑀫𑁆𑀫𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀳𑀺 𑀉𑀤𑀭𑀺𑀬𑀁 𑀓𑀭𑀻𑀲𑀁 𑀧𑀼𑀩𑁆𑀩𑁄 𑀫𑀼𑀢𑁆𑀢𑀜𑁆𑀘 𑀉𑀢𑀼𑀲𑀫𑀼𑀝𑁆𑀞𑀸𑀦𑀸, 𑀅𑀲𑀺𑀢𑀸𑀤𑀺𑀧𑀭𑀺𑀧𑀸𑀘𑀓𑀢𑁂𑀚𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀸𑀢𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄𑀢𑀺 𑀙 𑀏𑀓𑀲𑀫𑀼𑀝𑁆𑀞𑀸𑀦𑀸, 𑀲𑁂𑀤𑁄𑀅𑀲𑁆𑀲𑀼 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸𑀢𑀺 𑀘𑀢𑁆𑀢𑀸𑀭𑁄 𑀉𑀢𑀼𑀘𑀺𑀢𑁆𑀢𑀯𑀲𑁂𑀦 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀸, 𑀲𑁂𑀲𑀸 𑀤𑁆𑀯𑀢𑁆𑀢𑀺𑀁𑀲 𑀘𑀢𑀼𑀲𑀫𑀼𑀝𑁆𑀞𑀸𑀦𑀸.

𑀢𑁂𑀲𑀼 𑀅𑀲𑀺𑀢𑀸𑀤𑀺𑀧𑀭𑀺𑀧𑀸𑀘𑀓𑁂 𑀢𑁂𑀚𑁄𑀓𑁄𑀝𑁆𑀞𑀸𑀲𑁂 𑀏𑀓𑁄 𑀓𑀮𑀸𑀧𑁄 𑀚𑀻𑀯𑀺𑀢𑀦𑀯𑀓𑁄, 𑀅𑀜𑁆𑀜𑁂𑀲𑀼 𑀏𑀓𑀲𑀫𑀼𑀝𑁆𑀞𑀸𑀦𑁂𑀲𑀼 𑀉𑀢𑀼𑀲𑀫𑀼𑀝𑁆𑀞𑀸𑀦𑁄, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀯𑀸 𑀏𑀓𑁂𑀓𑁄 𑀅𑀝𑁆𑀞𑀓𑁄, 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑁂𑀲𑀼 𑀉𑀢𑀼𑀘𑀺𑀢𑁆𑀢𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀅𑀝𑁆𑀞𑀓𑀸, 𑀘𑀢𑀼𑀲𑀫𑀼𑀝𑁆𑀞𑀸𑀦𑁂𑀲𑀼 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀸 𑀢𑀬𑁄 𑀢𑀬𑁄 𑀅𑀝𑁆𑀞𑀓𑀸, 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀲𑀼 𑀲𑀤𑁆𑀤𑀦𑀯𑀓𑀸, 𑀅𑀝𑁆𑀞𑀲𑀼 𑀢𑁂𑀚𑁄𑀯𑀸𑀬𑁄𑀓𑁄𑀝𑁆𑀞𑀸𑀲𑁂𑀲𑀼 𑀅𑀝𑁆𑀞 𑀚𑀻𑀯𑀺𑀢𑀦𑀯𑀓𑀸, 𑀲𑁂𑀲𑁂𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀼 𑀓𑀸𑀬𑀪𑀸𑀯𑀤𑀲𑀓𑀤𑁆𑀯𑀬𑀲𑀳𑀺𑀢𑀸, 𑀘𑀓𑁆𑀔𑀸𑀤𑀺𑀲𑀜𑁆𑀜𑀺𑀢𑁂𑀲𑀼 𑀫𑀁𑀲𑀓𑁄𑀝𑁆𑀞𑀸𑀲𑁂𑀲𑀼 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀯𑀢𑁆𑀣𑀼𑀤𑀲𑀓𑀲𑀳𑀺𑀢𑀸 𑀘𑀸𑀢𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀓𑁂 𑀭𑀽𑀧𑀓𑀸𑀬𑁂 𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀏𑀓𑀢𑁆𑀢𑀯𑀲𑁂𑀦 𑀕𑀬𑁆𑀳𑀫𑀸𑀦𑀸 𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀲𑀢𑀭𑀽𑀧𑀓𑀮𑀸𑀧𑀸 𑀭𑀽𑀧𑀯𑀺𑀪𑀸𑀕𑀢𑁄 𑀲𑀸𑀥𑀺𑀓𑀁 𑀤𑀺𑀬𑀟𑁆𑀠𑀭𑀽𑀧𑀲𑀳𑀲𑁆𑀲𑀁 𑀳𑁄𑀢𑀺, 𑀓𑁄𑀝𑁆𑀞𑀸𑀲𑀸𑀦𑀁 𑀧𑀦 𑀅𑀯𑀬𑀯𑀯𑀺𑀪𑀸𑀕𑁂𑀦 𑀢𑀤𑀯𑀬𑀯𑀓𑀮𑀸𑀧𑀸𑀦𑀁 𑀪𑁂𑀤𑁂 𑀕𑀬𑁆𑀳𑀫𑀸𑀦𑁂 𑀭𑀽𑀧𑀥𑀫𑁆𑀫𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀪𑁂𑀤𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀥𑀫𑁆𑀫𑀯𑀺𑀪𑀸𑀕𑀢𑁄 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸𑀧𑀺 𑀇𑀫𑁂 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀓𑁄𑀝𑁆𑀞𑀸𑀲𑀸 𑀉𑀲𑁆𑀲𑀤𑀕𑁆𑀕𑀳𑀡𑁂𑀦 𑀘𑀢𑀼𑀥𑀸𑀢𑀼𑀯𑀲𑁂𑀦𑁂𑀯 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀉𑀲𑁆𑀲𑀤𑀯𑀲𑁂𑀦 𑀧𑀦…𑀧𑁂… 𑀫𑀦𑀲𑀺 𑀓𑀸𑀢𑀩𑁆𑀩𑀸’’𑀢𑀺. 𑀢𑀢𑁆𑀣 𑀫𑀦𑀲𑀺𑀓𑀸𑀭𑀯𑀺𑀥𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁩𑁪𑁯. 𑀫𑀚𑁆𑀛𑀺𑀫𑁂𑀦 𑀧𑀫𑀸𑀡𑁂𑀦𑀸𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀳𑀺 𑀫𑀚𑁆𑀛𑀺𑀫𑀲𑀭𑀻𑀭𑁂 𑀮𑀩𑁆𑀪𑀫𑀸𑀦𑁂𑀦 𑀫𑀚𑁆𑀛𑀺𑀫𑁂𑀦 𑀧𑀭𑀺𑀫𑀸𑀡𑁂𑀦. 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑀸𑀢𑀺 𑀧𑀜𑁆𑀜𑀸𑀬 𑀧𑀭𑀺𑀢𑀓𑁆𑀓𑁂𑀢𑁆𑀯𑀸 𑀕𑀬𑁆𑀳𑀫𑀸𑀦𑀸. 𑀧𑀭𑀫𑀸𑀡𑀼𑀪𑁂𑀤𑀲𑀜𑁆𑀘𑀼𑀡𑁆𑀡𑀸𑀢𑀺 𑀏𑀢𑁆𑀣 𑀬𑀣𑀸 ‘‘𑀅𑀗𑁆𑀕𑀼𑀮𑀲𑁆𑀲 𑀅𑀝𑁆𑀞𑀫𑁄 𑀪𑀸𑀕𑁄 𑀬𑀯𑁄, 𑀬𑀯𑀲𑁆𑀲 𑀅𑀝𑁆𑀞𑀫𑁄 𑀪𑀸𑀕𑁄 𑀊𑀓𑀸, 𑀊𑀓𑀸𑀬 𑀅𑀝𑁆𑀞𑀫𑁄 𑀪𑀸𑀕𑁄 𑀮𑀺𑀓𑁆𑀔𑀸, 𑀮𑀺𑀓𑁆𑀔𑀸𑀬 𑀅𑀝𑁆𑀞𑀫𑁄 𑀪𑀸𑀕𑁄 𑀭𑀣𑀭𑁂𑀡𑀼, 𑀭𑀣𑀭𑁂𑀡𑀼𑀲𑁆𑀲 𑀅𑀝𑁆𑀞𑀫𑁄 𑀪𑀸𑀕𑁄 𑀢𑀚𑁆𑀚𑀸𑀭𑀻, 𑀢𑀚𑁆𑀚𑀸𑀭𑀺𑀬𑀸 𑀅𑀝𑁆𑀞𑀫𑁄 𑀪𑀸𑀕𑁄 𑀅𑀡𑀼, 𑀏𑀯𑀁 𑀅𑀡𑀼𑀦𑁄 𑀅𑀝𑁆𑀞𑀫𑁄 𑀪𑀸𑀕𑁄 𑀧𑀭𑀫𑀸𑀡𑀼 𑀦𑀸𑀫𑀸’’𑀢𑀺 𑀓𑁂𑀘𑀺. 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁫𑁧𑁫) 𑀧𑀦 ‘‘𑀲𑀢𑁆𑀢𑀥𑀜𑁆𑀜𑀫𑀸𑀲𑀧𑁆𑀧𑀫𑀸𑀡𑀁 𑀏𑀓𑀁 𑀅𑀗𑁆𑀕𑀼𑀮𑀁, 𑀲𑀢𑁆𑀢𑀊𑀓𑀸𑀧𑀫𑀸𑀡𑁄 𑀏𑀓𑁄 𑀥𑀜𑁆𑀜𑀫𑀸𑀲𑁄, 𑀲𑀢𑁆𑀢𑀮𑀺𑀓𑁆𑀔𑀸𑀧𑀫𑀸𑀡𑀸 𑀏𑀓𑀸 𑀊𑀓𑀸, 𑀙𑀢𑁆𑀢𑀺𑀁𑀲𑀭𑀣𑀭𑁂𑀡𑀼𑀧𑁆𑀧𑀫𑀸𑀡𑀸 𑀏𑀓𑀸 𑀮𑀺𑀓𑁆𑀔𑀸, 𑀙𑀢𑁆𑀢𑀺𑀁𑀲𑀢𑀚𑁆𑀚𑀸𑀭𑀺𑀧𑁆𑀧𑀫𑀸𑀡𑁄 𑀏𑀓𑁄 𑀭𑀣𑀭𑁂𑀡𑀼, 𑀙𑀢𑁆𑀢𑀺𑀁𑀲𑀅𑀡𑀼𑀧𑁆𑀧𑀫𑀸𑀡𑀸 𑀏𑀓𑀸 𑀢𑀚𑁆𑀚𑀸𑀭𑀻, 𑀙𑀢𑁆𑀢𑀺𑀁𑀲𑀧𑀭𑀫𑀸𑀡𑀼𑀧𑁆𑀧𑀫𑀸𑀡𑁄 𑀏𑀓𑁄 𑀅𑀡𑀽’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀡𑀼𑀦𑁄 𑀙𑀢𑁆𑀢𑀺𑀁𑀲𑀢𑀺𑀫𑀪𑀸𑀕𑀫𑀢𑁆𑀢𑁄 𑀧𑀭𑀫𑀸𑀡𑀼 𑀦𑀸𑀫 𑀆𑀓𑀸𑀲𑀓𑁄𑀝𑁆𑀞𑀸𑀲𑀺𑀓𑁄 𑀫𑀁𑀲𑀘𑀓𑁆𑀔𑀼𑀲𑁆𑀲 𑀅𑀕𑁄𑀘𑀭𑁄 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲𑁂𑀯 𑀕𑁄𑀘𑀭𑀪𑀽𑀢𑁄. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀭𑀫𑀸𑀡𑀼𑀪𑁂𑀤𑀲𑀜𑁆𑀘𑀼𑀡𑁆𑀡𑀸’’𑀢𑀺, 𑀬𑀣𑀸𑀯𑀼𑀢𑁆𑀢𑀧𑀭𑀫𑀸𑀡𑀼𑀧𑁆𑀧𑀪𑁂𑀤𑁂𑀦 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀪𑀽𑀢𑀸. 𑀲𑀼𑀔𑀼𑀫𑀭𑀚𑀪𑀽𑀢𑀸𑀢𑀺 𑀢𑀢𑁄𑀬𑁂𑀯 𑀅𑀢𑀺𑀯𑀺𑀬 𑀲𑀼𑀔𑀼𑀫𑀭𑀚𑀪𑀸𑀯𑀁 𑀕𑀢𑀸.

𑀤𑁄𑀡𑀫𑀢𑁆𑀢𑀸 𑀲𑀺𑀬𑀸𑀢𑀺 𑀲𑁄𑀴𑀲 𑀦𑀸𑀴𑀺𑀫𑀢𑁆𑀢𑀸. 𑀇𑀥𑀸𑀧𑀺 ‘‘𑀫𑀚𑁆𑀛𑀺𑀫𑁂𑀦 𑀧𑀫𑀸𑀡𑁂𑀦𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑁂𑀦 ‘‘𑀧𑀓𑀢𑀺𑀬𑀸 𑀘𑀢𑀼𑀫𑀼𑀝𑁆𑀞𑀺𑀓𑀁 𑀓𑀼𑀟𑀼𑀯𑀁, 𑀘𑀢𑀼𑀓𑀼𑀟𑀼𑀯𑀁 𑀦𑀸𑀴𑀺, 𑀢𑀸𑀬 𑀦𑀸𑀴𑀺𑀬𑀸 𑀲𑁄𑀴𑀲 𑀦𑀸𑀴𑀺𑀬𑁄 𑀤𑁄𑀡𑀁, 𑀢𑀁 𑀧𑀦 𑀫𑀕𑀥𑀦𑀸𑀴𑀺𑀬𑀸 𑀤𑁆𑀯𑀸𑀤𑀲 𑀦𑀸𑀴𑀺𑀬𑁄 𑀳𑁄𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀕𑀳𑀺𑀢𑀸𑀢𑀺 𑀬𑀣𑀸 𑀦 𑀯𑀺𑀧𑁆𑀧𑀓𑀺𑀭𑀢𑀺, 𑀏𑀯𑀁 𑀆𑀩𑀦𑁆𑀥𑀦𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸 𑀕𑀳𑀺𑀢𑀸. 𑀅𑀦𑀼𑀧𑀸𑀮𑀺𑀢𑀸𑀢𑀺 𑀬𑀣𑀸 𑀧𑀕𑁆𑀖𑀭𑀡𑀲𑀪𑀸𑀯𑀸𑀬 𑀆𑀧𑁄𑀥𑀸𑀢𑀼𑀬𑀸 𑀯𑀲𑁂𑀦 𑀓𑀺𑀮𑀺𑀦𑁆𑀦𑀪𑀸𑀯𑀁, 𑀧𑀺𑀘𑁆𑀙𑀺𑀮𑀪𑀸𑀯𑀁 𑀯𑀸 𑀦𑀸𑀧𑀚𑁆𑀚𑀢𑀺, 𑀏𑀯𑀁 𑀅𑀦𑀼𑀭𑀓𑁆𑀔𑀺𑀢𑀸. 𑀯𑀺𑀢𑁆𑀣𑀫𑁆𑀪𑀺𑀢𑀸𑀢𑀺 𑀲𑀗𑁆𑀖𑀸𑀢𑀯𑀸𑀬𑀼𑀦𑀸 𑀅𑀢𑀺𑀯𑀺𑀬 𑀯𑀺𑀢𑁆𑀣𑀫𑁆𑀪𑀦𑀁 𑀧𑀸𑀧𑀺𑀢𑀸. 𑀦 𑀯𑀺𑀓𑀺𑀭𑀢𑀺 𑀦 𑀯𑀺𑀤𑁆𑀥𑀁𑀲𑀢𑀻𑀢𑀺 𑀲𑀼𑀔𑀼𑀫𑀭𑀚𑀪𑀽𑀢𑀸𑀧𑀺 𑀧𑀣𑀯𑀻𑀥𑀸𑀢𑀼 𑀆𑀩𑀦𑁆𑀥𑀦𑀧𑀭𑀺𑀧𑀸𑀘𑀦𑀲𑀫𑀼𑀤𑀻𑀭𑀡𑀓𑀺𑀘𑁆𑀘𑀸𑀳𑀺 𑀆𑀧𑁄𑀢𑁂𑀚𑁄𑀯𑀸𑀬𑁄𑀥𑀸𑀢𑀽𑀳𑀺 𑀮𑀤𑁆𑀥𑀧𑀘𑁆𑀘𑀬𑀸 𑀲𑀺𑀦𑁂𑀳𑁂𑀦 𑀢𑁂𑀫𑀺𑀢𑀸 𑀢𑁂𑀚𑀲𑀸 𑀧𑀭𑀺𑀧𑀓𑁆𑀓𑀸 𑀯𑀸𑀬𑀼𑀦𑀸 𑀯𑀺𑀢𑁆𑀣𑀫𑁆𑀪𑀦𑀁 𑀧𑀸𑀧𑀺𑀢𑀸 𑀧𑀺𑀝𑁆𑀞𑀘𑀼𑀡𑁆𑀡𑀸 𑀯𑀺𑀬 𑀦 𑀇𑀢𑁄 𑀘𑀺𑀢𑁄 𑀘 𑀯𑀺𑀓𑀺𑀭𑀢𑀺 𑀦 𑀯𑀺𑀤𑁆𑀥𑀁𑀲𑀢𑀺, 𑀅𑀣 𑀔𑁄 𑀧𑀺𑀡𑁆𑀟𑀺𑀢𑀸 𑀖𑀦𑀪𑀽𑀢𑀸 𑀳𑀼𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀕𑀳𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀅𑀯𑀺𑀓𑀺𑀭𑀺𑀬𑀫𑀸𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀓𑀧𑁆𑀧𑀦𑁆𑀢𑀺 𑀯𑀺𑀪𑀸𑀕𑀁. 𑀬𑀤𑀺𑀧𑀺 𑀢𑁂𑀚𑁄𑀯𑀸𑀬𑁄𑀥𑀸𑀢𑀼𑀬𑁄𑀧𑀺 𑀲𑀯𑀺𑀕𑁆𑀕𑀳𑀸 𑀭𑀽𑀧𑀥𑀫𑁆𑀫𑀪𑀸𑀯𑀢𑁄, 𑀬𑀸𑀤𑀺𑀲𑁄 𑀧𑀦 𑀖𑀦𑀪𑀸𑀯𑁄 𑀧𑀣𑀯𑀻𑀆𑀧𑁄𑀥𑀸𑀢𑀽𑀲𑀼 𑀮𑀩𑁆𑀪𑀢𑀺, 𑀦 𑀢𑀸𑀤𑀺𑀲𑁄 𑀢𑁂𑀚𑁄𑀯𑀸𑀬𑁄𑀥𑀸𑀢𑀽𑀲𑀼 𑀮𑀩𑁆𑀪𑀢𑀻𑀢𑀺 𑀫𑁂𑀬𑁆𑀬𑀪𑀸𑀯𑀸𑀪𑀸𑀯𑀢𑁄 𑀢𑀢𑁆𑀣 𑀘𑀼𑀡𑁆𑀡𑀪𑁂𑀤𑁄 𑀦 𑀉𑀤𑁆𑀥𑀝𑁄. 𑀢𑀣𑀸 𑀳𑀺 𑀲𑀲𑀫𑁆𑀪𑀸𑀭𑀢𑁂𑀚𑁄𑀯𑀸𑀬𑀽𑀲𑀼𑀧𑀺 𑀫𑁂𑀬𑁆𑀬𑀪𑀸𑀯𑁄 𑀦 𑀮𑀩𑁆𑀪𑀢𑁂𑀯.

𑀬𑀽𑀲𑀕𑀢𑀸𑀢𑀺 𑀬𑀽𑀲𑀪𑀸𑀯𑀁 𑀤𑁆𑀭𑀯𑀪𑀸𑀯𑀁 𑀕𑀢𑀸. 𑀢𑀢𑁄 𑀏𑀯 𑀆𑀩𑀦𑁆𑀥𑀦𑀸𑀓𑀸𑀭𑀪𑀽𑀢𑀸. 𑀦 𑀧𑀕𑁆𑀖𑀭𑀢𑀻𑀢𑀺 𑀦 𑀑𑀕𑀴𑀢𑀺. 𑀦 𑀧𑀭𑀺𑀲𑁆𑀲𑀯𑀢𑀻𑀢𑀺 𑀦 𑀯𑀺𑀲𑁆𑀲𑀦𑁆𑀤𑀢𑀺. 𑀧𑀻𑀡𑀺𑀢𑀧𑀻𑀡𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀆𑀧𑁄𑀥𑀸𑀢𑀼𑀬𑀸 𑀩𑁆𑀭𑀽𑀳𑀦𑀭𑀲𑀢𑀸𑀬 𑀯𑀼𑀢𑁆𑀢𑀁.

𑀉𑀲𑀼𑀫𑀸𑀓𑀸𑀭𑀪𑀽𑀢𑀸𑀢𑀺 𑀏𑀢𑁂𑀦 𑀓𑀸𑀬𑁂 𑀧𑀸𑀓𑀢𑀺𑀓𑀉𑀲𑁆𑀫𑀸𑀧𑀺 𑀕𑀳𑀡𑀻𑀲𑀗𑁆𑀔𑀸𑀢𑀸𑀬 𑀢𑀲𑁆𑀲𑀸𑀬𑁂𑀯 𑀢𑁂𑀚𑁄𑀥𑀸𑀢𑀼𑀬𑀸 𑀯𑀲𑁂𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀧𑀸𑀘𑁂𑀢𑀻𑀢𑀺 𑀲𑀦𑁆𑀢𑁂𑀚𑁂𑀢𑀺. 𑀲𑀸 𑀳𑀺 𑀬𑀣𑀸𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀲𑀫𑁆𑀫𑀸 𑀧𑀭𑀺𑀡𑀸𑀫𑀦𑁂𑀦 𑀭𑀲𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑀁 𑀕𑀘𑁆𑀙𑀦𑁆𑀢𑀻 𑀇𑀫𑀁 𑀓𑀸𑀬𑀁 𑀧𑀭𑀺𑀧𑀸𑀘𑁂𑀢𑀺 𑀲𑀦𑁆𑀢𑁂𑀚𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 ‘‘𑀦 𑀧𑀽𑀢𑀺𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺. 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀸𑀬, 𑀘𑀺𑀢𑁆𑀢𑀧𑁆𑀧𑀲𑀸𑀤𑀳𑁂𑀢𑀼𑀓𑀸𑀬 𑀘 𑀲𑀭𑀻𑀭𑁂 𑀯𑀡𑁆𑀡𑀲𑀫𑁆𑀧𑀤𑀸𑀬 𑀢𑁂𑀚𑁄𑀥𑀸𑀢𑀼 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀧𑀕𑁂𑀯 𑀉𑀢𑀼𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀬 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀬𑀣𑀸𑀯𑀼𑀢𑁆𑀢𑀢𑁂𑀚𑁄𑀥𑀸𑀢𑀽𑀢𑀺 𑀆𑀳 ‘‘𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀜𑁆𑀘𑀲𑁆𑀲 𑀆𑀯𑀳𑀢𑀻’’𑀢𑀺.

𑀲𑀫𑀼𑀤𑀻𑀭𑀡𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸𑀢𑀺 𑀏𑀢𑁆𑀣 𑀲𑀫𑀼𑀤𑀻𑀭𑀡𑀁 𑀅𑀦𑀼𑀧𑁂𑀮𑁆𑀮𑀦𑀁, 𑀯𑀺𑀲𑁄𑀲𑀦𑀦𑁆𑀢𑀺 𑀓𑁂𑀘𑀺. 𑀯𑀺𑀢𑁆𑀣𑀫𑁆𑀪𑀦𑀁 𑀲𑁂𑀲𑀪𑀽𑀢𑀢𑁆𑀢𑀬𑀲𑁆𑀲 𑀣𑀫𑁆𑀪𑀺𑀢𑀢𑁆𑀢𑀸𑀧𑀸𑀤𑀦𑀁, 𑀉𑀧𑁆𑀧𑀻𑀮𑀦𑀦𑁆𑀢𑀺 𑀏𑀓𑁂. 𑀢𑀸𑀬𑀸𑀢𑀺 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸𑀬 𑀯𑀸𑀬𑁄𑀥𑀸𑀢𑀼𑀬𑀸. 𑀅𑀧𑀭𑀸𑀬𑀸𑀢𑀺 𑀲𑀫𑀼𑀤𑀻𑀭𑀡𑀮𑀓𑁆𑀔𑀡𑀸𑀬. 𑀲𑀸 𑀳𑀺 𑀧𑁂𑀮𑁆𑀮𑀦𑀲𑀪𑀸𑀯𑀸. 𑀢𑁂𑀦𑀸𑀳 ‘‘𑀲𑀫𑀩𑁆𑀪𑀸𑀳𑀢𑁄’’𑀢𑀺. 𑀲𑀫𑀩𑁆𑀪𑀸𑀳𑀦𑀜𑁆𑀘 𑀭𑀽𑀧𑀓𑀮𑀸𑀧𑀲𑁆𑀲 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁄. 𑀅𑀯𑀖𑀝𑁆𑀝𑀦𑀁 𑀆𑀲𑀦𑁆𑀦𑀢𑀭𑀼𑀧𑁆𑀧𑀢𑁆𑀢𑀺𑀬𑀸. 𑀮𑀸𑀴𑁂𑀢𑀻𑀢𑀺 𑀧𑀭𑀺𑀯𑀢𑁆𑀢𑁂𑀢𑀺. 𑀇𑀤𑀸𑀦𑀺 𑀬𑀤𑀢𑁆𑀣𑀁 𑀘𑀼𑀡𑁆𑀡𑀢𑁄 𑀫𑀦𑀲𑀺𑀓𑀸𑀭𑁄 𑀆𑀕𑀢𑁄, 𑀢𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀫𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀥𑀸𑀢𑀼𑀬𑀦𑁆𑀢𑀦𑁆𑀢𑀺 𑀲𑀼𑀢𑁆𑀢𑁂𑀦 𑀯𑀺𑀬 𑀬𑀦𑁆𑀢𑀭𑀽𑀧𑀓𑀁 𑀅𑀲𑀢𑀺𑀧𑀺 𑀓𑀢𑁆𑀢𑀼𑀪𑀽𑀢𑁂 𑀅𑀢𑁆𑀢𑀦𑀺 𑀘𑀺𑀢𑁆𑀢𑀯𑀲𑁂𑀦 𑀥𑀸𑀢𑀼𑀫𑀬𑀁 𑀬𑀦𑁆𑀢𑀁 𑀧𑀯𑀢𑁆𑀢𑀢𑀺, 𑀇𑀥𑀸𑀧𑀺 𑀫𑀦𑀲𑀺𑀓𑀸𑀭𑀯𑀺𑀥𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁩𑁫𑁦. 𑀬𑀤𑀺𑀧𑀺 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀮𑀓𑁆𑀔𑀡𑀸𑀤𑀬𑁄 𑀳𑁂𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀸 𑀏𑀯, 𑀢𑀣𑀸𑀧𑀺 𑀢𑁂 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑁆𑀯𑀸 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀮𑀓𑁆𑀔𑀡𑀸𑀤𑀺𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀮𑀓𑁆𑀔𑀻𑀬𑀢𑀺 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁, 𑀓𑀓𑁆𑀔𑀴𑀢𑁆𑀢𑀁 𑀮𑀓𑁆𑀔𑀡𑀫𑁂𑀢𑀺𑀲𑁆𑀲𑀸𑀢𑀺 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸. 𑀦𑀦𑀼 𑀘 𑀓𑀓𑁆𑀔𑀴𑀢𑁆𑀢𑀫𑁂𑀯 𑀧𑀣𑀯𑀻𑀥𑀸𑀢𑀽𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀣𑀸𑀧𑀺 𑀯𑀺𑀜𑁆𑀜𑀸𑀢𑀸𑀯𑀺𑀜𑁆𑀜𑀸𑀢𑀲𑀤𑁆𑀤𑀢𑁆𑀣𑀢𑀸𑀯𑀲𑁂𑀦 𑀅𑀪𑀺𑀦𑁆𑀦𑁂𑀧𑀺 𑀥𑀫𑁆𑀫𑁂 𑀓𑀧𑁆𑀧𑀦𑀸𑀲𑀺𑀤𑁆𑀥𑁂𑀦 𑀪𑁂𑀤𑁂𑀦 𑀏𑀯𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀏𑀯𑀁 𑀳𑀺 𑀅𑀢𑁆𑀣𑀯𑀺𑀲𑁂𑀲𑀸𑀯𑀩𑁄𑀥𑁄 𑀳𑁄𑀢𑀻𑀢𑀺. 𑀅𑀣 𑀯𑀸 𑀮𑀓𑁆𑀔𑀻𑀬𑀢𑀻𑀢𑀺 𑀮𑀓𑁆𑀔𑀡𑀁, 𑀓𑀓𑁆𑀔𑀴𑀢𑁆𑀢𑀁 𑀳𑀼𑀢𑁆𑀯𑀸 𑀮𑀓𑁆𑀔𑀺𑀬𑀫𑀸𑀦𑀸 𑀥𑀸𑀢𑀼 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀢𑀺𑀝𑁆𑀞𑀸𑀦𑀭𑀲𑀸𑀢𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀪𑀸𑀯𑀓𑀺𑀘𑁆𑀘𑀸. 𑀢𑀢𑁄 𑀏𑀯 𑀦𑁂𑀲𑀁 𑀲𑀫𑁆𑀧𑀝𑀺𑀘𑁆𑀙𑀦𑀸𑀓𑀸𑀭𑁂𑀦 𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀧𑀤𑀝𑁆𑀞𑀸𑀦𑀁 𑀧𑀦𑁂𑀢𑁆𑀣 𑀅𑀜𑁆𑀜𑀥𑀫𑁆𑀫𑀢𑀸𑀬 𑀦 𑀉𑀤𑁆𑀥𑀝𑀁, 𑀲𑀸𑀥𑀸𑀭𑀡𑀪𑀸𑀯𑀲𑀩𑁆𑀪𑀸𑀯𑀢𑁄 𑀯𑀸 𑀤𑀽𑀭𑀓𑀸𑀭𑀡𑀁 𑀯𑀺𑀬. 𑀬𑀣𑀸 𑀯𑀸 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸𑀤𑀻𑀲𑀼 𑀭𑀲𑀸𑀤𑀺𑀦𑀸 𑀅𑀜𑁆𑀜𑁂𑀲𑀁 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀘𑀬𑀯𑀦𑁆𑀢𑀢𑀸𑀤𑀲𑁆𑀲𑀦𑀢𑁆𑀣𑀁 𑀧𑀤𑀝𑁆𑀞𑀸𑀦𑀁 𑀉𑀤𑁆𑀥𑀝𑀁, 𑀦 𑀏𑀯𑀫𑀺𑀥. 𑀇𑀥 𑀧𑀦 𑀥𑀸𑀢𑀽𑀦𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀯𑀺𑀲𑁂𑀲𑀯𑀺𑀪𑀸𑀯𑀦𑀧𑀭𑀸𑀬 𑀘𑁄𑀤𑀦𑀸𑀬 𑀅𑀜𑁆𑀜𑀥𑀫𑁆𑀫𑀪𑀽𑀢𑀁 𑀧𑀤𑀝𑁆𑀞𑀸𑀦𑀁 𑀦 𑀉𑀤𑁆𑀥𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀩𑁆𑀭𑀽𑀳𑀦𑀭𑀲𑀸𑀢𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀯𑀟𑁆𑀠𑀦𑀓𑀺𑀘𑁆𑀘𑀸. 𑀢𑀣𑀸 𑀳𑀺 𑀲𑀸 𑀦𑁂𑀲𑀁 𑀧𑀻𑀡𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀗𑁆𑀕𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀩𑀸𑀳𑀺𑀭𑀉𑀤𑀓𑀁 𑀯𑀺𑀬 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀲𑁆𑀲 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀫𑀤𑁆𑀤𑀯𑀸𑀦𑀼𑀧𑁆𑀧𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀩𑀸𑀳𑀺𑀭𑀕𑁆𑀕𑀺 𑀯𑀺𑀬 𑀚𑀢𑀼𑀮𑁄𑀳𑀸𑀤𑀻𑀦𑀁 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀫𑀼𑀤𑀼𑀪𑀸𑀯𑀸𑀦𑀼𑀧𑁆𑀧𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀪𑀺𑀦𑀻𑀳𑀸𑀭𑁄 𑀪𑀽𑀢𑀲𑀗𑁆𑀖𑀸𑀝𑀲𑁆𑀲 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄, 𑀦𑀻𑀳𑀭𑀡𑀁 𑀯𑀸 𑀩𑀻𑀚𑀢𑁄 𑀅𑀗𑁆𑀓𑀼𑀭𑀲𑁆𑀲 𑀯𑀺𑀬.

𑁩𑁫𑁧. 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀯 𑀓𑀫𑁆𑀫𑀸𑀤𑀺𑀯𑀲𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀓𑀤𑀸𑀘𑀺 𑀉𑀢𑀼𑀢𑁄, 𑀓𑀤𑀸𑀘𑀺 𑀘𑀺𑀢𑁆𑀢𑀢𑁄 𑀉𑀧𑁆𑀧𑀚𑁆𑀚𑀦𑀢𑁄. 𑀅𑀯𑀲𑁂𑀲𑀸𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀸 𑀓𑁂𑀲𑀸𑀤𑀬𑁄 𑀘𑀢𑀼𑀯𑀻𑀲𑀢𑀺, 𑀆𑀤𑀺𑀢𑁄 𑀢𑀬𑁄 𑀢𑁂𑀚𑁄𑀓𑁄𑀝𑁆𑀞𑀸𑀲𑀸, 𑀧𑀜𑁆𑀘 𑀯𑀸𑀬𑁄𑀓𑁄𑀝𑁆𑀞𑀸𑀲𑀸 𑀘𑀸𑀢𑀺 𑀤𑁆𑀯𑀢𑁆𑀢𑀺𑀁𑀲. 𑀲𑀩𑁆𑀩𑁂𑀧𑀻𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀓𑀫𑁆𑀫𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀘𑀢𑀼𑀲𑀫𑀼𑀝𑁆𑀞𑀸𑀦𑀸. 𑀓𑁂𑀲𑀸𑀤𑀻𑀦𑀫𑁆𑀧𑀺 𑀳𑀺 𑀫𑀁𑀲𑀢𑁄 𑀅𑀯𑀺𑀫𑀼𑀢𑁆𑀢𑀪𑀸𑀕𑁄 𑀓𑀫𑁆𑀫𑀸𑀳𑀸𑀭𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄𑀯 𑀳𑁄𑀢𑀻𑀢𑀺.

𑁩𑁫𑁨. 𑀦𑀸𑀦𑀢𑁆𑀢𑁂𑀓𑀢𑁆𑀢𑀢𑁄𑀢𑀺 𑀯𑀺𑀲𑁂𑀲𑀲𑀸𑀫𑀜𑁆𑀜𑀢𑁄. 𑀥𑀫𑁆𑀫𑀸𑀦𑀁 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀢𑀸 𑀦𑀸𑀦𑀢𑁆𑀢𑀁, 𑀲𑀫𑀸𑀦𑀢𑀸 𑀏𑀓𑀢𑁆𑀢𑀁. 𑀲𑀩𑁆𑀩𑀸𑀲𑀫𑁆𑀧𑀻𑀢𑀺 𑀘𑀢𑀼𑀦𑁆𑀦𑀫𑁆𑀧𑀺. 𑀲𑀮𑀓𑁆𑀔𑀡𑀸𑀤𑀺𑀢𑁄𑀢𑀺 𑀲𑀓𑀁 𑀮𑀓𑁆𑀔𑀡𑀁 𑀲𑀮𑀓𑁆𑀔𑀡𑀁, 𑀢𑀢𑁄 𑀲𑀮𑀓𑁆𑀔𑀡𑀸𑀤𑀺𑀢𑁄. 𑀆𑀤𑀺-𑀲𑀤𑁆𑀤𑁂𑀦 𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀁 𑀯𑀺𑀬 𑀫𑀼𑀤𑀼𑀲𑀡𑁆𑀳𑀨𑀭𑀼𑀲𑀪𑀸𑀯𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀦𑀸𑀦𑀢𑁆𑀢𑀪𑀽𑀢𑀸𑀦’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀏𑀓𑀢𑁆𑀢𑀁 𑀳𑁄𑀢𑀺 𑀲𑀸𑀥𑀸𑀭𑀡𑀢𑁆𑀢𑀸𑀢𑀺? 𑀦, ‘‘𑀅𑀜𑁆𑀜𑀸 𑀏𑀯 𑀥𑀸𑀢𑀼𑀬𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸, 𑀅𑀜𑁆𑀜𑀸 𑀉𑀢𑀼𑀆𑀤𑀺𑀲𑀫𑀼𑀝𑁆𑀞𑀸𑀦𑀸’’𑀢𑀺𑀆𑀤𑀺𑀓𑀁 𑀪𑁂𑀤𑀁 𑀲𑀦𑁆𑀥𑀸𑀬 𑀢𑀣𑀸 𑀯𑀘𑀦𑀢𑁄. 𑀏𑀢𑀸𑀲𑀁 𑀥𑀸𑀢𑀽𑀦𑀁. 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀼𑀧𑁆𑀧𑀦𑀲𑀪𑀸𑀯𑀁. 𑀓𑀺𑀫𑁆𑀧𑀦𑁂𑀢𑀁 𑀭𑀼𑀧𑁆𑀧𑀦𑀁 𑀦𑀸𑀫? 𑀬𑀸 𑀲𑀻𑀢𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺, 𑀢𑀲𑁆𑀫𑀺𑀁 𑀯𑀸 𑀲𑀢𑀺 𑀬𑁄 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁄, 𑀢𑀁 𑀭𑀼𑀧𑁆𑀧𑀦𑀁. 𑀅𑀦𑀢𑀻𑀢𑀢𑁆𑀢𑀸𑀢𑀺 𑀅𑀧𑀭𑀺𑀘𑁆𑀘𑀚𑀦𑀢𑁄.

𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑁄 𑀘𑁂𑀢𑁆𑀣 𑀲𑀲𑀫𑁆𑀪𑀸𑀭𑀥𑀸𑀢𑀼𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀢𑀣𑀸 𑀫𑀳𑀸𑀯𑀺𑀓𑀸𑀭𑀢𑀸 𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀮𑀓𑁆𑀔𑀡𑀥𑀸𑀢𑀼𑀯𑀲𑁂𑀦, 𑀫𑀳𑀸𑀧𑀭𑀺𑀳𑀸𑀭𑀢𑀸, 𑀫𑀳𑀢𑁆𑀢𑀯𑀺𑀚𑁆𑀚𑀫𑀸𑀦𑀢𑀸 𑀘 𑀉𑀪𑀬𑀯𑀲𑁂𑀦𑀸𑀢𑀺. 𑀪𑀽𑀢𑀲𑀤𑁆𑀤𑀸𑀧𑁂𑀓𑁆𑀔𑀸𑀬 ‘‘𑀏𑀢𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀫𑀳𑀦𑁆𑀢𑀸𑀦𑀺 𑀧𑀸𑀢𑀼𑀪𑀽𑀢𑀸𑀦𑀺 𑀅𑀦𑁂𑀓𑀲𑀢𑀲𑀳𑀲𑁆𑀲 𑀭𑀽𑀧𑀓𑀮𑀸𑀧𑀲𑀗𑁆𑀖𑀸𑀝𑀢𑀸𑀬 𑀲𑀫𑀽𑀳𑀯𑀲𑁂𑀦, 𑀲𑀦𑁆𑀢𑀢𑀺𑀯𑀲𑁂𑀦 𑀘 𑀅𑀧𑀭𑀺𑀫𑀺𑀢𑀧𑀭𑀺𑀫𑀸𑀡𑀸𑀦𑀁, 𑀅𑀦𑁂𑀓𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀸𑀦𑀜𑁆𑀘 𑀉𑀧𑁆𑀧𑀚𑁆𑀚𑀦𑀢𑁄. 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀤𑀲𑀲𑀳𑀲𑁆𑀲𑀸𑀦𑀺. 𑀤𑁂𑀯𑀤𑀸𑀦𑀯𑀸𑀤𑀻𑀦𑀁 𑀢𑀺𑀕𑀸𑀯𑀼𑀢𑀸𑀤𑀺𑀲𑀭𑀻𑀭𑀯𑀲𑁂𑀦 𑀫𑀳𑀦𑁆𑀢𑀸𑀦𑀺 𑀧𑀸𑀢𑀼𑀪𑀽𑀢𑀸𑀦𑀺.

𑀢𑀢𑁆𑀣𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀫𑀳𑀦𑁆𑀢𑀸𑀦𑀺 𑀪𑀽𑀢𑀸𑀦𑀺 𑀚𑀸𑀢𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀻𑀢𑀺 𑀫𑀳𑀸𑀪𑀽𑀢𑀸𑀦𑀻𑀢𑀺. 𑀅𑀦𑁂𑀓𑀸𑀪𑀽𑀢𑀯𑀺𑀲𑁂𑀲𑀤𑀲𑁆𑀲𑀦𑁂𑀦, 𑀅𑀦𑁂𑀓𑀩𑁆𑀪𑀼𑀢𑀤𑀲𑁆𑀲𑀦𑁂𑀦 𑀘 𑀅𑀦𑁂𑀓𑀘𑁆𑀙𑀭𑀺𑀬𑀤𑀲𑁆𑀲𑀦𑀯𑀲𑁂𑀦 𑀫𑀳𑀦𑁆𑀢𑁄 𑀅𑀩𑁆𑀪𑀼𑀢𑁄, 𑀫𑀳𑀦𑁆𑀢𑀸𑀦𑀺 𑀯𑀸 𑀅𑀪𑀽𑀢𑀸𑀦𑀺 𑀏𑀢𑁆𑀣𑀸𑀢𑀺 𑀫𑀳𑀸𑀪𑀽𑀢𑁄, 𑀫𑀸𑀬𑀸𑀓𑀸𑀭𑁄. 𑀬𑀓𑁆𑀔𑀸𑀤𑀬𑁄 𑀚𑀸𑀢𑀺𑀯𑀲𑁂𑀦𑁂𑀯 𑀫𑀳𑀦𑁆𑀢𑀸 𑀪𑀽𑀢𑀸𑀢𑀺 𑀫𑀳𑀸𑀪𑀽𑀢𑀸, 𑀦𑀺𑀭𑀼𑀴𑁆𑀳𑁄 𑀯𑀸 𑀅𑀬𑀁 𑀢𑁂𑀲𑀼 𑀫𑀳𑀸𑀪𑀽𑀢𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀧𑀣𑀯𑀻𑀆𑀤𑀬𑁄 𑀧𑀦 𑀯𑀜𑁆𑀘𑀓𑀢𑀸𑀬, 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑀢𑀸𑀬 𑀘 𑀫𑀳𑀸𑀪𑀽𑀢𑀸 𑀯𑀺𑀬 𑀫𑀳𑀸𑀪𑀽𑀢𑀸. 𑀪𑀽𑀢𑀲𑀤𑁆𑀤𑀲𑁆𑀲 𑀉𑀪𑀬𑀮𑀺𑀗𑁆𑀕𑀢𑀸𑀬 𑀦𑀧𑀼𑀁𑀲𑀓𑀢𑀸 𑀓𑀢𑀸. 𑀢𑀢𑁆𑀣 𑀯𑀜𑁆𑀘𑀓𑀢𑀸 𑀲𑀬𑀁 𑀅𑀦𑀻𑀮𑀸𑀤𑀺𑀲𑀪𑀸𑀯𑀸𑀦𑀺 𑀳𑀼𑀢𑁆𑀯𑀸 𑀦𑀻𑀮𑀸𑀤𑀺𑀲𑀪𑀸𑀯𑀲𑁆𑀲 𑀉𑀧𑀝𑁆𑀞𑀸𑀧𑀦𑀁, 𑀅𑀦𑀺𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀲𑀪𑀸𑀯𑀸𑀦𑁂𑀯 𑀘 𑀳𑀼𑀢𑁆𑀯𑀸 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀆𑀓𑀸𑀭𑀲𑁆𑀲 𑀉𑀧𑀝𑁆𑀞𑀸𑀧𑀦𑀁. 𑀢𑀣𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑁆𑀢𑁄, 𑀩𑀳𑀺 𑀘 𑀅𑀝𑁆𑀞𑀺𑀢𑀸𑀦𑀁𑀬𑁂𑀯 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀅𑀯𑀝𑁆𑀞𑀸𑀦𑀢𑁄 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑀢𑀸. 𑀬𑀤𑀺 𑀳𑀺 𑀇𑀫𑀸 𑀥𑀸𑀢𑀼𑀬𑁄 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑁆𑀢𑁄 𑀞𑀺𑀢𑀸, 𑀦 𑀲𑀓𑀺𑀘𑁆𑀘𑀓𑀭𑀸 𑀲𑀺𑀬𑀼𑀁 𑀅𑀜𑁆𑀜𑀫𑀜𑁆𑀜𑀸𑀦𑀼𑀧𑁆𑀧𑀯𑁂𑀲𑀦𑀢𑁄, 𑀅𑀣 𑀩𑀳𑀺 𑀞𑀺𑀢𑀸 𑀯𑀺𑀦𑀺𑀩𑁆𑀪𑀼𑀢𑁆𑀢𑀸 𑀲𑀺𑀬𑀼𑀁. 𑀢𑀣𑀸 𑀲𑀢𑀺 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀯𑀸𑀤𑁄 𑀳𑀸𑀬𑁂𑀬𑁆𑀬, 𑀢𑀲𑁆𑀫𑀸 𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀢𑀺𑀝𑁆𑀞𑀸𑀦𑀸𑀤𑀺𑀦𑀸 𑀬𑀣𑀸𑀲𑀓𑀁 𑀓𑀺𑀘𑁆𑀘𑀯𑀺𑀲𑁂𑀲𑁂𑀦 𑀲𑁂𑀲𑀸𑀦𑀁 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀉𑀧𑀓𑀸𑀭𑀺𑀓𑀸 𑀳𑁄𑀦𑁆𑀢𑀺, 𑀬𑁂𑀦 𑀲𑀳𑀚𑀸𑀢𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀦 𑀢𑀺𑀝𑁆𑀞𑀦𑁆𑀢𑀻’’𑀢𑀺. 𑀫𑀦𑀸𑀧𑁂𑀳𑀻𑀢𑀺 𑀫𑀦𑁄𑀳𑀭𑁂𑀳𑀺 𑀘𑀸𑀢𑀼𑀭𑀺𑀬𑀯𑀦𑁆𑀢𑁂𑀳𑀺. 𑀯𑀡𑁆𑀡𑀲𑀡𑁆𑀞𑀸𑀦𑀯𑀺𑀓𑁆𑀔𑁂𑀧𑁂𑀳𑀻𑀢𑀺 𑀓𑀸𑀴𑀲𑀸𑀫𑀢𑀸𑀤𑀺𑀯𑀡𑁆𑀡𑁂𑀳𑀺, 𑀧𑀼𑀣𑀼𑀮𑀯𑀺𑀯𑀭𑀓𑀺𑀲𑀢𑀸𑀤𑀺𑀲𑀡𑁆𑀞𑀸𑀦𑁂𑀳𑀺, 𑀳𑀢𑁆𑀣𑀪𑀫𑀼𑀓𑀸𑀤𑀺𑀯𑀺𑀓𑁆𑀔𑁂𑀧𑁂𑀳𑀺 𑀘. 𑀲𑀭𑀲𑀮𑀓𑁆𑀔𑀡𑀦𑁆𑀢𑀺 𑀲𑀪𑀸𑀯𑀪𑀽𑀢𑀁 𑀮𑀓𑁆𑀔𑀡𑀁, 𑀲𑀓𑀺𑀘𑁆𑀘𑀓𑀁 𑀯𑀸 𑀲𑀪𑀸𑀯𑀁.

𑀫𑀳𑀸𑀧𑀭𑀺𑀳𑀸𑀭𑀢𑁄𑀢𑀺 𑀏𑀢𑁆𑀣 𑀯𑀘𑀦𑀢𑁆𑀣𑀁 𑀯𑀤𑀦𑁆𑀢𑁄 𑀆𑀳 ‘‘𑀫𑀳𑀦𑁆𑀢𑁂𑀳𑀺…𑀧𑁂… 𑀪𑀽𑀢𑀸𑀦𑀺, 𑀫𑀳𑀸𑀧𑀭𑀺𑀳𑀸𑀭𑀸𑀦𑀺 𑀯𑀸 𑀪𑀽𑀢𑀸𑀦𑀻’’𑀢𑀺. 𑀢𑀢𑁆𑀣 𑀧𑀘𑁆𑀙𑀺𑀫𑀢𑁆𑀣𑁂 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀲𑁆𑀲 𑀧𑀭𑀺𑀳𑀸𑀭-𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀫𑀳𑀸𑀪𑀽𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀢𑀣𑀸 𑀳𑀻𑀢𑀺 𑀢𑀢𑁄 𑀏𑀯 𑀯𑀺𑀓𑀸𑀭𑀲𑁆𑀲 𑀫𑀳𑀦𑁆𑀢𑀢𑁆𑀢𑀸 𑀏𑀯𑀸𑀢𑀺 𑀢𑀁 𑀯𑀺𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀽𑀫𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀘𑁆𑀘𑀺𑀫𑀢𑁄𑀢𑀺 𑀅𑀕𑁆𑀕𑀺𑀲𑁆𑀲. 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀏𑀓𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀓𑀁 𑀘𑀓𑁆𑀓𑀯𑀸𑀴𑀦𑁆𑀢𑀺 𑀢𑀁 𑀲𑀩𑁆𑀩𑀁 𑀆𑀡𑀸𑀔𑁂𑀢𑁆𑀢𑀪𑀸𑀯𑁂𑀦 𑀏𑀓𑀁 𑀓𑀢𑁆𑀯𑀸 𑀯𑀤𑀢𑀺. 𑀯𑀺𑀮𑀻𑀬𑀢𑀻𑀢𑀺 𑀯𑀺𑀧𑀢𑁆𑀢𑀺𑀓𑀭𑀫𑁂𑀖𑀸𑀪𑀺𑀯𑀼𑀝𑁆𑀞𑁂𑀦 𑀔𑀸𑀭𑀼𑀤𑀓𑁂𑀦 𑀮𑀯𑀡𑀁 𑀯𑀺𑀬 𑀯𑀺𑀮𑀬𑀁 𑀕𑀘𑁆𑀙𑀢𑀺 𑀯𑀺𑀤𑁆𑀥𑀁𑀲𑀢𑀺. 𑀓𑀼𑀧𑀺𑀢𑁂𑀦𑀸𑀢𑀺 𑀔𑀼𑀪𑀺𑀢𑁂𑀦. 𑀯𑀺𑀓𑀻𑀭𑀢𑀻𑀢𑀺 𑀯𑀺𑀥𑀫𑀢𑀺 𑀯𑀺𑀤𑁆𑀥𑀁𑀲𑀢𑀺.

𑀅𑀦𑀼𑀧𑀸𑀤𑀺𑀦𑁆𑀦𑁂𑀲𑀼 𑀯𑀺𑀓𑀸𑀭𑀫𑀳𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀸𑀤𑀺𑀦𑁆𑀦𑁂𑀲𑀼 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀢𑁆𑀣𑀤𑁆𑀥𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀝𑁆𑀞𑀫𑀼𑀔𑁂𑀦 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀉𑀧𑀫𑀢𑁆𑀣𑁄. 𑀬𑀣𑀸 𑀓𑀝𑁆𑀞𑀫𑀼𑀔𑁂𑀦 𑀲𑀧𑁆𑀧𑁂𑀦 𑀟𑀝𑁆𑀞𑁄 𑀧𑀢𑁆𑀣𑀤𑁆𑀥𑁄 𑀳𑁄𑀢𑀺, 𑀏𑀯𑀁 𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦 𑀲𑁄 𑀓𑀸𑀬𑁄 𑀓𑀝𑁆𑀞𑀫𑀼𑀔𑁂𑀯 𑀳𑁄𑀢𑀺, 𑀓𑀝𑁆𑀞𑀫𑀼𑀔𑀫𑀼𑀔𑀕𑀢𑁄 𑀯𑀺𑀬 𑀧𑀢𑁆𑀣𑀤𑁆𑀥𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀸-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄. 𑀲𑁄 ‘‘𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦 𑀯𑀸’’𑀢𑀺 𑀏𑀯𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀓𑀝𑁆𑀞𑀫𑀼𑀔𑁂𑀦 𑀟𑀝𑁆𑀞𑁄𑀧𑀺 𑀓𑀸𑀬𑁄 𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦𑁂𑀯 𑀧𑀢𑁆𑀣𑀤𑁆𑀥𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀣𑀯𑀻𑀥𑀸𑀢𑀼𑀬𑀸 𑀅𑀯𑀺𑀬𑀼𑀢𑁆𑀢𑁄 𑀲𑁄 𑀓𑀸𑀬𑁄 𑀲𑀩𑁆𑀩𑀤𑀸 𑀓𑀝𑁆𑀞𑀫𑀼𑀔𑀫𑀼𑀔𑀕𑀢𑁄 𑀯𑀺𑀬 𑀳𑁄𑀢𑀻𑀢𑀺. 𑀯𑀸-𑀲𑀤𑁆𑀤𑁄 𑀯𑀸 𑀅𑀦𑀺𑀬𑀫𑀢𑁆𑀣𑁄, 𑀢𑀢𑁆𑀭𑀸𑀬𑀫𑀢𑁆𑀣𑁄 𑁋 𑀓𑀝𑁆𑀞𑀫𑀼𑀔𑁂𑀦 𑀟𑀝𑁆𑀞𑁄 𑀓𑀸𑀬𑁄 𑀧𑀢𑁆𑀣𑀤𑁆𑀥𑁄 𑀳𑁄𑀢𑀺 𑀯𑀸, 𑀦 𑀯𑀸 𑀳𑁄𑀢𑀺 𑀫𑀦𑁆𑀢𑀸𑀕𑀤𑀯𑀲𑁂𑀦, 𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦 𑀧𑀦 𑀫𑀦𑁆𑀢𑀸𑀕𑀤𑀭𑀳𑀺𑀢𑁄 𑀲𑁄 𑀓𑀸𑀬𑁄 𑀓𑀝𑁆𑀞𑀫𑀼𑀔𑀫𑀼𑀔𑀕𑀢𑁄 𑀯𑀺𑀬 𑀳𑁄𑀢𑀺 𑀏𑀓𑀦𑁆𑀢𑀧𑀢𑁆𑀣𑀤𑁆𑀥𑁄𑀢𑀺.

𑀧𑀽𑀢𑀺𑀬𑁄𑀢𑀺 𑀓𑀼𑀣𑀺𑀢𑁄. 𑀲𑀦𑁆𑀢𑀢𑁆𑀢𑁄𑀢𑀺 𑀲𑀩𑁆𑀩𑀲𑁄 𑀢𑀢𑁆𑀢𑁄 𑀲𑀫𑀼𑀧𑁆𑀧𑀦𑁆𑀦𑀤𑀸𑀳𑁄. 𑀲𑀜𑁆𑀙𑀺𑀦𑁆𑀦𑁄𑀢𑀺 𑀲𑀫𑀦𑁆𑀢𑀢𑁄 𑀙𑀺𑀦𑁆𑀦𑁄 𑀧𑀭𑀫𑀸𑀡𑀼𑀪𑁂𑀤𑀲𑀜𑁆𑀘𑀼𑀡𑁆𑀡𑁄 𑀆𑀬𑀲𑁆𑀫𑀢𑁄 𑀉𑀧𑀲𑁂𑀦𑀢𑁆𑀣𑁂𑀭𑀲𑁆𑀲 𑀲𑀭𑀻𑀭𑀁 𑀯𑀺𑀬. 𑀫𑀳𑀸𑀯𑀺𑀓𑀸𑀭𑀸𑀦𑀺 𑀪𑀽𑀢𑀸𑀦𑀻𑀢𑀺 𑀫𑀳𑀸𑀯𑀺𑀓𑀸𑀭𑀯𑀦𑁆𑀢𑀸𑀦𑀺 𑀪𑀽𑀢𑀸𑀦𑀺 𑀫𑀳𑀸𑀪𑀽𑀢𑀸𑀦𑀻𑀢𑀺 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄. ‘‘𑀧𑀣𑀯𑀻’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀮𑁄𑀓𑀲𑁆𑀲 𑀧𑀸𑀓𑀝𑀸𑀦𑀺𑀧𑀺 𑀯𑀺𑀧𑀮𑁆𑀮𑀸𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀬𑀣𑀸𑀲𑀪𑀸𑀯𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁂 𑀫𑀳𑀦𑁆𑀢𑁂𑀦 𑀯𑀸𑀬𑀸𑀫𑁂𑀦 𑀯𑀺𑀦𑀸 𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀢𑁆𑀢𑀸 ‘‘𑀫𑀳𑀦𑁆𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀦𑀺 𑀳𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺. ‘‘𑀅𑀫𑀳𑀦𑁆𑀢𑀸𑀦𑀻’’𑀢𑀺 𑀫𑀦𑁆𑀢𑁆𑀯𑀸 𑀞𑀺𑀢𑀸 𑀢𑁂𑀲𑀁 𑀤𑀼𑀧𑁆𑀧𑀭𑀺𑀕𑁆𑀕𑀳𑀢𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀫𑀳𑀦𑁆𑀢𑀸𑀦𑀺 𑀏𑀢𑀸𑀦𑀻’’𑀢𑀺 𑀚𑀸𑀦𑀸𑀢𑀻𑀢𑀺 𑀫𑀳𑀸𑀪𑀽𑀢𑁂𑀓𑀤𑁂𑀲𑀢𑀸𑀤𑀻𑀳𑀺 𑀯𑀸 𑀓𑀸𑀭𑀡𑁂𑀳𑀺 𑀫𑀳𑀸𑀪𑀽𑀢𑀸𑀦𑀺. 𑀏𑀢𑀸 𑀳𑀺 𑀥𑀸𑀢𑀼𑀬𑁄 𑀫𑀳𑀸𑀪𑀽𑀢𑁂𑀓𑀤𑁂𑀲𑀢𑁄, 𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄, 𑀫𑀳𑀸𑀪𑀽𑀢𑀲𑀦𑁆𑀦𑀺𑀲𑁆𑀲𑀬𑀢𑁄, 𑀫𑀳𑀸𑀪𑀽𑀢𑀪𑀸𑀯𑀢𑁄, 𑀫𑀳𑀸𑀪𑀽𑀢𑀧𑀭𑀺𑀬𑁄𑀲𑀸𑀦𑀢𑁄 𑀘𑀸𑀢𑀺 𑀇𑀫𑁂𑀳𑀺𑀧𑀺 𑀓𑀸𑀭𑀡𑁂𑀳𑀺 ‘‘𑀫𑀳𑀸𑀪𑀽𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀢𑀢𑁆𑀣 𑀫𑀳𑀸𑀪𑀽𑀢𑁂𑀓𑀤𑁂𑀲𑀢𑁄𑀢𑀺 ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀣𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁦𑁧) 𑀳𑀺 𑀅𑀯𑀺𑀲𑁂𑀲𑁂𑀦 𑀔𑀦𑁆𑀥𑀧𑀜𑁆𑀘𑀓𑀁 ‘‘𑀪𑀽𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀬𑀤𑀺𑀤𑀁 𑀓𑀸𑀫𑀪𑀯𑁂, 𑀭𑀽𑀧𑀪𑀯𑁂, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂, 𑀏𑀓𑀘𑁆𑀘𑁂 𑀘 𑀲𑀜𑁆𑀜𑀻𑀪𑀯𑁂 𑀧𑀯𑀢𑁆𑀢𑀁 𑀔𑀦𑁆𑀥𑀧𑀜𑁆𑀘𑀓𑀁, 𑀢𑀁 𑀫𑀳𑀸𑀯𑀺𑀲𑀬𑀢𑀸𑀬 ‘‘𑀫𑀳𑀸𑀪𑀽𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀧𑀣𑀯𑀻𑀆𑀤𑀬𑁄 𑀧𑀦 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀢𑀲𑁆𑀲 𑀫𑀳𑀸𑀪𑀽𑀢𑀲𑁆𑀲 𑀏𑀓𑀤𑁂𑀲𑀪𑀽𑀢𑀸 ‘‘𑀫𑀳𑀸𑀪𑀽𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀫𑀼𑀤𑀸𑀬𑁂𑀲𑀼 𑀳𑀺 𑀧𑀯𑀢𑁆𑀢𑀯𑁄𑀳𑀸𑀭𑀸 𑀅𑀯𑀬𑀯𑁂𑀲𑀼𑀧𑀺 𑀤𑀺𑀲𑁆𑀲𑀦𑁆𑀢𑀺 𑀬𑀣𑀸 ‘‘𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄, 𑀧𑀝𑁄 𑀤𑀟𑁆𑀠𑁄’’𑀢𑀺 𑀘. 𑀫𑀳𑀸𑀪𑀽𑀢𑀲𑀫𑀜𑁆𑀜𑀢𑁄𑀢𑀺 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀪𑀯𑀦𑁆𑀢𑀺 𑀏𑀢𑁆𑀣 𑀉𑀧𑀸𑀤𑀸𑀭𑀽𑀧𑀸𑀦𑀻𑀢𑀺 𑀪𑀽𑀢𑀸𑀦𑀺, 𑀧𑀣𑀯𑀻𑀆𑀤𑀬𑁄 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄. 𑀲𑀸 𑀧𑀦𑀸𑀬𑀫𑁂𑀢𑀸𑀲𑀼 𑀪𑀽𑀢𑀲𑀫𑀜𑁆𑀜𑀸 𑀅𑀦𑀜𑁆𑀜𑀢𑁆𑀣𑀯𑀼𑀢𑁆𑀢𑀺𑀢𑀸𑀬 𑀉𑀧𑀸𑀤𑀸𑀭𑀽𑀧𑀸𑀦𑀁 𑀅𑀯𑀺𑀧𑀭𑀻𑀢𑀝𑁆𑀞𑀸, 𑀮𑁄𑀓𑀲𑁆𑀲 𑀘𑁂𑀢𑀸 𑀩𑀳𑀽𑀧𑀓𑀸𑀭𑀸, 𑀘𑀓𑁆𑀔𑀼𑀲𑀫𑀼𑀤𑁆𑀤𑀸𑀤𑀻𑀦𑀁 𑀦𑀺𑀲𑁆𑀲𑀬𑀪𑀽𑀢𑀸 𑀘𑀸𑀢𑀺 𑀫𑀳𑀦𑁆𑀢𑀸𑀦𑀺 𑀪𑀽𑀢𑀸𑀦𑀻𑀢𑀺 𑀲𑀫𑀜𑁆𑀜𑀸𑀬𑀺𑀁𑀲𑀼. 𑀫𑀳𑀸𑀪𑀽𑀢𑀲𑀦𑁆𑀦𑀺𑀲𑁆𑀲𑀬𑀢𑁄𑀢𑀺 𑀫𑀳𑀦𑁆𑀢𑀸𑀦𑀁 𑀫𑀳𑀸𑀦𑀼𑀪𑀸𑀯𑀸𑀦𑀁 𑀫𑀳𑀸𑀲𑀫𑁆𑀫𑀢𑀫𑀦𑁆𑀥𑀸𑀢𑀼𑀧𑁆𑀧𑀪𑀼𑀢𑀻𑀦𑀁 𑀭𑀜𑁆𑀜𑀁, 𑀲𑀓𑁆𑀓𑀸𑀤𑀻𑀦𑀁 𑀤𑁂𑀯𑀸𑀦𑀁, 𑀯𑁂𑀧𑀘𑀺𑀢𑁆𑀢𑀺𑀆𑀤𑀻𑀦𑀁 𑀅𑀲𑀼𑀭𑀸𑀦𑀁, 𑀫𑀳𑀸𑀩𑁆𑀭𑀳𑁆𑀫𑀸𑀤𑀻𑀦𑀁 𑀩𑁆𑀭𑀳𑁆𑀫𑀸𑀦𑀁, 𑀕𑀼𑀡𑀢𑁄 𑀯𑀸 𑀫𑀳𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀲𑀸𑀯𑀓𑀸𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑀸 𑀲𑀩𑁆𑀩𑁂𑀲𑀫𑁆𑀧𑀺 𑀪𑀽𑀢𑀸𑀦𑀁 𑀲𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀪𑀽𑀢𑀢𑀸𑀬 𑀫𑀳𑀦𑁆𑀢𑀸 𑀪𑀽𑀢𑀸 𑀏𑀢𑁂𑀲𑀽𑀢𑀺 𑀫𑀳𑀸𑀪𑀽𑀢𑀸. 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀳𑀺 𑀦𑁂𑀲𑀁 𑀓𑀸𑀬𑁄𑀢𑀺. 𑀫𑀳𑀸𑀪𑀽𑀢𑀪𑀸𑀯𑀢𑁄𑀢𑀺 𑀩𑀳𑀼𑀪𑀽𑀢𑀪𑀸𑀯𑀢𑁄. 𑀅𑀬𑀁 𑀳𑀺 𑀫𑀳𑀸-𑀲𑀤𑁆𑀤𑁄 ‘‘𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀢𑁄’’𑀢𑀺𑀆𑀤𑀻𑀲𑀼 𑀩𑀳𑀼𑀪𑀸𑀯𑁂 𑀤𑀺𑀲𑁆𑀲𑀢𑀺. 𑀧𑀣𑀯𑀻𑀆𑀤𑀬𑁄 𑀘 𑀥𑀸𑀢𑀼𑀬𑁄 𑀏𑀓𑀲𑁆𑀫𑀺𑀫𑁆𑀧𑀺 𑀅𑀢𑁆𑀢𑀪𑀸𑀯𑁂 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑁂𑀤𑀸 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀫𑀳𑀦𑁆𑀢𑀸 𑀩𑀳𑀽 𑀅𑀦𑁂𑀓𑀲𑀢𑀲𑀳𑀲𑁆𑀲𑀧𑁆𑀧𑀪𑁂𑀤𑀸 𑀪𑀽𑀢𑀸𑀢𑀺 𑀫𑀳𑀸𑀪𑀽𑀢𑀸. 𑀫𑀳𑀸𑀪𑀽𑀢𑀧𑀭𑀺𑀬𑁄𑀲𑀸𑀦𑀢𑁄𑀢𑀺 𑀫𑀳𑀸𑀪𑀽𑀢𑀲𑁆𑀲 𑀯𑀲𑁂𑀦 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀺𑀢𑁄.

‘‘𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸;

𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄, 𑀲 𑀪𑀽𑀢𑀧𑀘𑀦𑀺𑀁 𑀧𑀘𑀻’’𑀢𑀺. (𑀚𑀸. 𑁧.𑁨.𑁧𑁯𑁦) 𑁋

𑀳𑀺 𑀏𑀯𑀫𑀸𑀤𑀻𑀲𑀼 𑀔𑀻𑀡𑀸𑀲𑀯𑁄 ‘‘𑀪𑀽𑀢𑁄’’𑀢𑀺 𑀯𑀼𑀢𑁆𑀢𑁄. 𑀲𑁄 𑀳𑀺 𑀉𑀘𑁆𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀓𑀢𑀸𑀬 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀏𑀓𑀦𑁆𑀢𑀢𑁄 ‘‘𑀪𑀽𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀦 𑀇𑀢𑀭𑁂, 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀯𑁄𑀳𑀸𑀭𑀁 𑀅𑀦𑀢𑀻𑀢𑀢𑁆𑀢𑀸. 𑀪𑀽𑀢𑁄 𑀏𑀯 𑀇𑀥 𑀧𑀽𑀚𑀸𑀯𑀲𑁂𑀦 ‘‘𑀫𑀳𑀸𑀪𑀽𑀢𑁄’’𑀢𑀺 𑀯𑀼𑀢𑁆𑀢𑁄 𑀬𑀣𑀸 ‘‘𑀫𑀳𑀸𑀔𑀻𑀡𑀸𑀲𑀯𑁄, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 𑀘. 𑀇𑀫𑀸𑀲𑀜𑁆𑀘 𑀥𑀸𑀢𑀽𑀦𑀁 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀫𑀳𑀸𑀪𑀽𑀢𑀲𑁆𑀲𑁂𑀯 𑀲𑀦𑁆𑀢𑀸𑀦𑁂 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀺, 𑀦𑀸𑀜𑁆𑀜𑀢𑁆𑀭. 𑀢𑀲𑁆𑀫𑀸 𑀫𑀳𑀸𑀪𑀽𑀢𑁂 𑀪𑀽𑀢𑀸 𑀧𑀭𑀺𑀬𑁄𑀲𑀸𑀦𑀁 𑀧𑀢𑁆𑀢𑀸𑀢𑀺 𑀫𑀳𑀸𑀪𑀽𑀢𑀸 𑀧𑀼𑀭𑀺𑀫𑀧𑀤𑁂 𑀪𑀽𑀢-𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸. 𑀏𑀯𑀫𑁂𑀢𑀸 𑀥𑀸𑀢𑀼𑀬𑁄 𑀫𑀳𑀸𑀪𑀽𑀢𑁂𑀓𑀤𑁂𑀲𑀢𑀸𑀤𑀻𑀳𑀺 𑀫𑀳𑀸𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀣𑀯𑀻𑀆𑀤𑀻𑀦𑀁 𑀓𑀓𑁆𑀔𑀴𑀧𑀕𑁆𑀖𑀭𑀡𑀸𑀤𑀺𑀯𑀺𑀲𑁂𑀲𑀮𑀓𑁆𑀔𑀡𑀲𑀫𑀗𑁆𑀕𑀺𑀢𑀸 𑀅𑀧𑀭𑀺𑀘𑁆𑀘𑀢𑁆𑀢𑀥𑀸𑀢𑀼𑀮𑀓𑁆𑀔𑀡𑀸𑀦𑀁𑀬𑁂𑀯𑀸𑀢𑀺 𑀆𑀳 ‘‘𑀥𑀸𑀢𑀼𑀮𑀓𑁆𑀔𑀡𑀁 𑀅𑀦𑀢𑀻𑀢𑀢𑁆𑀢𑀸’’𑀢𑀺. 𑀦 𑀳𑀺 𑀲𑀸𑀫𑀜𑁆𑀜𑀧𑀭𑀺𑀘𑁆𑀘𑀸𑀕𑁂𑀦 𑀯𑀺𑀲𑁂𑀲𑁄, 𑀯𑀺𑀲𑁂𑀲𑀦𑀺𑀭𑀧𑁂𑀓𑁆𑀔𑀁 𑀯𑀸 𑀲𑀸𑀫𑀜𑁆𑀜𑀁 𑀧𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀢𑀫𑀢𑁆𑀣𑀸𑀧𑁂𑀓𑁆𑀔𑀢𑁄 𑀪𑁂𑀤𑀁, 𑀲𑀲𑀸𑀫𑀜𑁆𑀜𑀁 𑀚𑀳𑀸𑀢𑀺 𑀦𑁄;

𑀕𑀡𑁆𑀳𑀸𑀢𑀺 𑀲𑀁𑀲𑀬𑀼𑀧𑁆𑀧𑀸𑀤𑀸, 𑀲𑀫𑁂𑀯𑁂𑀓𑀢𑁆𑀣𑀓𑀁 𑀤𑁆𑀯𑀬’’𑀦𑁆𑀢𑀺.

𑀲𑀮𑀓𑁆𑀔𑀡𑀥𑀸𑀭𑀡𑁂𑀦 𑀘𑀸𑀢𑀺 𑀬𑁂𑀦 𑀲𑀮𑀓𑁆𑀔𑀡𑀥𑀸𑀭𑀡𑁂𑀦 ‘‘𑀥𑀸𑀢𑀼𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀦𑁂𑀯 ‘‘𑀥𑀫𑁆𑀫𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺 𑀉𑀪𑀬𑀣𑀸𑀧𑀺 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀬 𑀏𑀯 𑀯𑀺𑀪𑀸𑀯𑀦𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀙𑀥𑀸𑀢𑀼𑀭𑁄𑀬𑀁 𑀪𑀺𑀓𑁆𑀔𑀼 𑀧𑀼𑀭𑀺𑀲𑁄, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺 𑀘. 𑀅𑀭𑀽𑀧𑀸𑀦𑀁 𑀔𑀡𑀢𑁄 𑀭𑀽𑀧𑀸𑀦𑀁 𑀔𑀡𑀲𑁆𑀲 𑀦𑀸𑀢𑀺𑀇𑀢𑁆𑀢𑀭𑀢𑀸𑀬𑀸𑀳 ‘‘𑀅𑀢𑁆𑀢𑀦𑁄 𑀔𑀡𑀸𑀦𑀼𑀭𑀽𑀧’’𑀦𑁆𑀢𑀺. 𑀥𑀭𑀡𑁂𑀦𑀸𑀢𑀺 𑀞𑀸𑀦𑁂𑀦, 𑀧𑀯𑀢𑁆𑀢𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀔𑀬𑀝𑁆𑀞𑁂𑀦𑀸𑀢𑀺 𑀔𑀡𑀪𑀗𑁆𑀕𑀼𑀢𑀸𑀬. 𑀪𑀬𑀝𑁆𑀞𑁂𑀦𑀸𑀢𑀺 𑀉𑀤𑀬𑀯𑀬𑀧𑀝𑀺𑀧𑀻𑀴𑀦𑀸𑀤𑀺𑀦𑀸 𑀲𑀧𑁆𑀧𑀝𑀺𑀪𑀬𑀢𑀸𑀬. 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀅𑀢𑁆𑀢𑀲𑀸𑀭𑀯𑀺𑀭𑀳𑁂𑀦.

𑁩𑁫𑁩. 𑀲𑀳𑀼𑀧𑁆𑀧𑀦𑁆𑀦𑀸𑀯 𑀏𑀢𑀸𑀢𑀺 𑀏𑀢𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀲𑀳 𑀉𑀧𑁆𑀧𑀦𑁆𑀦𑀸𑀯 𑀲𑀳 𑀧𑀯𑀢𑁆𑀢𑀫𑀸𑀦𑀸𑀯 𑀲𑀫𑀸𑀦𑀓𑀸𑀮𑁂 𑀮𑀩𑁆𑀪𑀫𑀸𑀦𑀸𑀧𑀺 𑀅𑀯𑀓𑀁𑀲𑀢𑁄 𑀲𑀩𑁆𑀩𑀧𑀭𑀺𑀬𑀦𑁆𑀢𑀺𑀫𑁂 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑁂𑀲𑀼 𑀲𑀼𑀤𑁆𑀥𑀝𑁆𑀞𑀓𑁂, 𑀓𑀫𑁆𑀫𑀚𑁂𑀲𑀼 𑀚𑀻𑀯𑀺𑀢𑀦𑀯𑀓𑁂𑀢𑀺 𑀏𑀓𑁂𑀓𑀲𑁆𑀫𑀺𑀁 𑀲𑀼𑀤𑁆𑀥𑀝𑁆𑀞𑀓𑀸𑀤𑀺𑀓𑀮𑀸𑀧𑁂𑀧𑀺 𑀧𑀤𑁂𑀲𑁂𑀦 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑀢𑀸𑀬. 𑀬𑀢𑁆𑀣 𑀳𑀺 𑀢𑀺𑀲𑁆𑀲𑀦𑁆𑀦𑀁 𑀥𑀸𑀢𑀽𑀦𑀁 𑀧𑀢𑀺𑀝𑁆𑀞𑀸𑀯𑀲𑁂𑀦 𑀧𑀣𑀯𑀻, 𑀢𑀢𑁆𑀣𑁂𑀯 𑀢𑀲𑁆𑀲𑀸 𑀆𑀩𑀦𑁆𑀥𑀦𑀧𑀭𑀺𑀧𑀸𑀘𑀦𑀲𑀫𑀼𑀤𑀻𑀭𑀡𑀯𑀲𑁂𑀦 𑀇𑀢𑀭𑀸. 𑀏𑀲 𑀦𑀬𑁄 𑀲𑁂𑀲𑀸𑀲𑀼𑀧𑀺.

𑁩𑁫𑁪. 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀭𑀼𑀓𑀢𑁆𑀢𑀸 𑀲𑀪𑀸𑀕𑀸 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀦𑀦𑀼 𑀧𑀣𑀯𑀺𑀬𑀸𑀧𑀺 𑀮𑀳𑀼𑀪𑀸𑀯𑁄 𑀅𑀢𑁆𑀣𑀺. 𑀢𑀣𑀸 𑀳𑀺 𑀲𑀸 ‘‘𑀓𑀓𑁆𑀔𑀴𑀁 𑀫𑀼𑀤𑀼𑀓𑀁 𑀲𑀡𑁆𑀳𑀁 𑀨𑀭𑀼𑀲𑀁 𑀕𑀭𑀼𑀓𑀁 𑀮𑀳𑀼𑀓’’𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀆𑀧𑁂𑀧𑀺 𑀮𑀳𑀼𑀪𑀸𑀯𑁄 𑀮𑀩𑁆𑀪𑀢𑁂𑀯𑀸𑀢𑀺? 𑀦, 𑀦𑀺𑀧𑁆𑀧𑀭𑀺𑀬𑀸𑀬𑀕𑀭𑀼𑀪𑀸𑀯𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀕𑀭𑀼𑀪𑀸𑀯𑁄 𑀏𑀯 𑀳𑀺 𑀧𑀣𑀯𑀻𑀥𑀸𑀢𑀼𑀬𑀸 𑀕𑀭𑀼𑀢𑀭𑀁 𑀉𑀧𑀸𑀤𑀸𑀬 𑀮𑀳𑀼𑀪𑀸𑀯𑁄𑀢𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄 𑀲𑀻𑀢𑀪𑀸𑀯𑁄 𑀯𑀺𑀬 𑀢𑁂𑀚𑁄𑀥𑀸𑀢𑀼𑀬𑀸. 𑀬𑀤𑀺 𑀏𑀯𑀁 𑀭𑀽𑀧𑀲𑁆𑀲 𑀮𑀳𑀼𑀢𑀸𑀢𑀺 𑀓𑀣𑀁? 𑀅𑀬𑀫𑁆𑀧𑀺 𑀯𑀼𑀢𑁆𑀢𑀦𑀬𑀸 𑀏𑀯 𑀮𑀳𑀼𑀢𑀸𑀓𑀸𑀭𑀁 𑀉𑀧𑀸𑀤𑀸𑀬 𑀮𑀩𑁆𑀪𑀦𑀢𑁄. 𑀦 𑀳𑀺 𑀧𑀭𑀺𑀘𑁆𑀙𑁂𑀤𑀯𑀺𑀓𑀸𑀭𑀮𑀓𑁆𑀔𑀡𑀸𑀦𑀺 𑀧𑀭𑀫𑀢𑁆𑀣𑀢𑁄 𑀮𑀩𑁆𑀪𑀦𑁆𑀢𑀺 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀲𑀪𑀸𑀯𑀢𑁄. 𑀢𑀲𑁆𑀫𑀸 𑀧𑀭𑀫𑀢𑁆𑀣𑀲𑀺𑀤𑁆𑀥𑀁 𑀕𑀭𑀼𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀫𑀸 𑀤𑁆𑀯𑁂 𑀕𑀭𑀼𑀓𑀢𑁆𑀢𑀸 𑀲𑀪𑀸𑀕𑀸’’𑀢𑀺. ‘‘𑀢𑀣𑀸’’𑀢𑀺 𑀧𑀤𑁂𑀦 ‘‘𑀲𑀪𑀸𑀕𑀸’’𑀢𑀺 𑀇𑀫𑀫𑀢𑁆𑀣𑀁 𑀉𑀧𑀲𑀁𑀳𑀭𑀢𑀺. ‘‘𑀤𑁆𑀯𑁂’’𑀢𑀺 𑀧𑀦 𑀇𑀤𑀁 𑀬𑀣𑀸 ‘‘𑀧𑀼𑀭𑀺𑀫𑀸’’𑀢𑀺 𑀏𑀢𑁆𑀣, 𑀏𑀯𑀁 ‘‘𑀧𑀘𑁆𑀙𑀺𑀫𑀸’’𑀢𑀺 𑀏𑀢𑁆𑀣𑀸𑀧𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀯𑀺𑀲𑀪𑀸𑀕𑀸 𑀕𑀭𑀼𑀓𑀮𑀳𑀼𑀓𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘 𑀕𑀭𑀼𑀓𑀮𑀳𑀼𑀓𑀪𑀸𑀯𑁂𑀳𑀺, 𑀏𑀯𑀁 𑀧𑁂𑀬𑁆𑀬𑀪𑀸𑀯𑀸𑀧𑁂𑀬𑁆𑀬𑀪𑀸𑀯𑁂𑀳𑀺 𑀘 𑀲𑀪𑀸𑀕𑀯𑀺𑀲𑀪𑀸𑀕𑀢𑀸 𑀬𑁄𑀚𑁂𑀢𑀩𑁆𑀩𑀸.

𑁩𑁫𑁫. 𑀅𑀚𑁆𑀛𑀢𑁆𑀢𑀺𑀓𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀅𑀚𑁆𑀛𑀢𑁆𑀢𑀺𑀓𑀸, 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀸𑀡𑀯𑀢𑁆𑀣𑀼 𑀯𑀺𑀜𑁆𑀜𑀢𑁆𑀢𑀺𑀇𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀘𑀓𑁆𑀔𑀸𑀤𑀻𑀦𑀁 𑀙𑀦𑁆𑀦𑀁 𑀯𑀺𑀜𑁆𑀜𑀸𑀡𑀯𑀢𑁆𑀣𑀽𑀦𑀁, 𑀤𑁆𑀯𑀺𑀦𑁆𑀦𑀁 𑀯𑀺𑀜𑁆𑀜𑀢𑁆𑀢𑀻𑀦𑀁, 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀘. 𑀬𑁂 𑀧𑀦 ‘‘𑀯𑀺𑀜𑁆𑀜𑀸𑀡𑀯𑀢𑁆𑀣𑀽𑀢𑀺 𑀳𑀤𑀬𑀯𑀢𑁆𑀣𑀼 𑀕𑀳𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬-𑀕𑁆𑀕𑀳𑀡𑁂𑀦 𑀅𑀝𑁆𑀞𑀦𑁆𑀦𑀫𑁆𑀧𑀺 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀯𑀼𑀢𑁆𑀢𑀯𑀺𑀧𑀭𑀻𑀢𑀧𑁆𑀧𑀓𑀸𑀭𑀸’’𑀢𑀺 𑀇𑀤𑀁 𑀩𑀸𑀳𑀺𑀭𑀸𑀦𑀁 𑀥𑀸𑀢𑀽𑀦𑀁 𑀬𑀣𑀸 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀯𑀢𑁆𑀣𑀼𑀯𑀺𑀜𑁆𑀜𑀢𑁆𑀢𑀺𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑀺𑀲𑁆𑀲𑀬𑀢𑀸 𑀘 𑀇𑀭𑀺𑀬𑀸𑀧𑀣𑀯𑀺𑀭𑀳𑁄 𑀘 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁄, 𑀏𑀯𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀢𑀸𑀧𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀮𑀓𑁆𑀔𑀡𑀭𑀽𑀧𑀲𑁆𑀲 𑀯𑀺𑀬 𑀓𑀼𑀢𑁄𑀘𑀺𑀧𑀺 𑀲𑀫𑀼𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀢𑁄 𑀉𑀢𑀼𑀲𑀫𑀼𑀝𑁆𑀞𑀸𑀦𑀢𑀸𑀬 𑀢𑀸𑀲𑀁. 𑀮𑀳𑀼𑀢𑀸𑀤𑀺𑀦𑀺𑀲𑁆𑀲𑀬𑀢𑀸𑀧𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀥𑀸𑀢𑀽𑀦𑀁 𑀯𑀢𑁆𑀢𑀩𑁆𑀩𑀸, 𑀦 𑀯𑀸 𑀯𑀢𑁆𑀢𑀩𑁆𑀩𑀸. 𑀯𑀺𑀜𑁆𑀜𑀢𑁆𑀢𑀺-𑀕𑁆𑀕𑀳𑀡𑀁 𑀳𑀺 𑀮𑀓𑁆𑀔𑀡𑀦𑁆𑀢𑀺.

𑁩𑁫𑁬. 𑀇𑀢𑀭𑀸𑀳𑀻𑀢𑀺 𑀆𑀧𑁄𑀢𑁂𑀚𑁄𑀯𑀸𑀬𑀼𑀥𑀸𑀢𑀽𑀳𑀺. 𑀏𑀓𑀲𑀗𑁆𑀕𑀳𑀸𑀢𑀺 𑀲𑀚𑀸𑀢𑀺𑀲𑀗𑁆𑀕𑀳𑁂𑀦 𑀏𑀓𑀲𑀗𑁆𑀕𑀳𑀸. 𑀲𑀫𑀸𑀦𑀚𑀸𑀢𑀺𑀬𑀸𑀦𑀁 𑀳𑀺 𑀲𑀗𑁆𑀕𑀳𑁄 𑀲𑀳𑀚𑀸𑀢𑀺𑀲𑀗𑁆𑀕𑀳𑁄. 𑀢𑁂𑀦𑀸𑀳 ‘‘𑀲𑀫𑀼𑀝𑁆𑀞𑀸𑀦𑀦𑀸𑀦𑀢𑁆𑀢𑀸𑀪𑀸𑀯𑀢𑁄’’𑀢𑀺.

𑁩𑁫𑁭. 𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀁 𑀧𑀢𑀺𑀝𑁆𑀞𑀸 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀬𑁂𑀳𑀺 𑀫𑀳𑀸𑀪𑀽𑀢𑁂𑀳𑀺 𑀲𑀫𑁆𑀧𑀺𑀡𑁆𑀟𑀦𑀯𑀲𑁂𑀦 𑀲𑀗𑁆𑀕𑀳𑀺𑀢𑀸, 𑀧𑀭𑀺𑀧𑀸𑀘𑀦𑀯𑀲𑁂𑀦 𑀅𑀦𑀼𑀧𑀸𑀮𑀺𑀢𑀸, 𑀲𑀫𑀼𑀤𑀻𑀭𑀡𑀯𑀲𑁂𑀦 𑀯𑀺𑀢𑁆𑀣𑀫𑁆𑀪𑀺𑀢𑀸 𑀘, 𑀢𑁂𑀲𑀁 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀁 𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀁 𑀧𑀢𑀺𑀝𑁆𑀞𑀸 𑀳𑀼𑀢𑁆𑀯𑀸 𑀢𑀢𑁄 𑀏𑀯 𑀲𑀦𑁆𑀥𑀸𑀭𑀡𑀯𑀲𑁂𑀦 𑀅𑀯𑀲𑁆𑀲𑀬𑁄 𑀳𑁄𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀯𑀸 𑀧𑀢𑀺𑀝𑁆𑀞𑀸 𑀳𑀼𑀢𑁆𑀯𑀸 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀏𑀲 𑀦𑀬𑁄 𑀲𑁂𑀲𑀸𑀲𑀼𑀧𑀺.

𑁩𑁫𑁮. 𑀬𑀤𑀺𑀧𑀺 𑀅𑀜𑁆𑀜𑀫𑀜𑁆𑀜𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸𑀢𑀺 𑀳𑁂𑀝𑁆𑀞𑀸 𑀥𑀸𑀢𑀽𑀦𑀁 𑀅𑀲𑀫𑀦𑁆𑀦𑀸𑀳𑀸𑀭𑀢𑀸 𑀤𑀲𑁆𑀲𑀺𑀢𑀸 𑀏𑀯, 𑀅𑀣𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀣𑀯𑀻𑀥𑀸𑀢𑀼 𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀣𑀯𑀻𑀥𑀸𑀢𑀼 𑀘𑁂𑀢𑁆𑀣𑀸𑀢𑀺 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀅𑀬𑀫𑁆𑀧𑀺 𑀏𑀓𑁄 𑀫𑀦𑀲𑀺𑀓𑀸𑀭𑀧𑁆𑀧𑀓𑀸𑀭𑁄𑀢𑀺 𑀤𑀻𑀧𑁂𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀸𑀲𑀼 𑀥𑀸𑀢𑀽𑀲𑀼. 𑀅𑀳𑀁 ‘‘𑀧𑀣𑀯𑀻𑀥𑀸𑀢𑀽’’𑀢𑀺 𑀯𑀸 ‘‘𑀧𑀘𑁆𑀘𑀬𑁄 𑀳𑁄𑀫𑀻’’𑀢𑀺 𑀯𑀸 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀢𑀦𑀺 𑀯𑀺𑀬 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂 𑀘 𑀆𑀪𑁄𑀕𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀓𑀸𑀭𑀓𑀲𑁆𑀲 𑀯𑀺𑀬 𑀉𑀧𑀓𑀢𑁆𑀢𑀩𑁆𑀩𑀸𑀦𑀫𑁆𑀧𑀺 𑀆𑀪𑁄𑀕𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀭𑀸𑀦𑀺𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀸𑀲𑀼 𑀥𑀸𑀢𑀽𑀲𑀼, 𑀢𑀢𑁆𑀣𑀸𑀧𑀺 𑀅𑀢𑁆𑀢𑀓𑀺𑀘𑁆𑀘𑀼𑀧𑀓𑀢𑁆𑀢𑀩𑁆𑀩𑀪𑁂𑀤𑁂𑀲𑀼 𑀲𑀩𑁆𑀩𑁂𑀲𑀼.

𑁩𑁫𑁯. 𑀧𑀘𑁆𑀘𑀬𑀯𑀺𑀪𑀸𑀕𑀢𑁄𑀢𑀺 𑀧𑀘𑁆𑀘𑀬𑀥𑀫𑁆𑀫𑀯𑀺𑀪𑀸𑀕𑀢𑁄 𑀘𑁂𑀯 𑀧𑀘𑁆𑀘𑀬𑀪𑀸𑀯𑀯𑀺𑀪𑀸𑀕𑀢𑁄 𑀘. ‘‘𑀧𑀘𑁆𑀘𑀬𑀢𑁄’’𑀢𑀺 𑀳𑀺 𑀇𑀫𑀺𑀦𑀸 𑀧𑀣𑀯𑀻𑀆𑀤𑀻𑀦𑀁 𑀅𑀜𑁆𑀜𑀸𑀲𑀸𑀥𑀸𑀭𑀡𑁄 𑀧𑀢𑀺𑀝𑁆𑀞𑀸𑀪𑀸𑀯𑀸𑀤𑀺𑀦𑀸 𑀲𑁂𑀲𑀪𑀽𑀢𑀢𑁆𑀢𑀬𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀇𑀥 𑀧𑀦 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀧𑀣𑀯𑀻𑀆𑀤𑀻𑀦𑀁 𑀉𑀧𑁆𑀧𑀢𑁆𑀢𑀺, 𑀢𑁂𑀲𑀁 𑀧𑀣𑀯𑀻𑀆𑀤𑀻𑀦𑀜𑁆𑀘 𑀅𑀦𑀯𑀲𑁂𑀲𑀢𑁄 𑀧𑀘𑁆𑀘𑀬𑀪𑀸𑀯𑀯𑀺𑀪𑀸𑀕𑁄 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀆𑀓𑀸𑀭𑀸𑀦𑀁 𑀯𑀺𑀲𑁂𑀲𑁄. 𑀓𑀫𑁆𑀫𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀁 𑀭𑀽𑀧𑀼𑀧𑁆𑀧𑀸𑀤𑀓𑀁 𑀓𑀫𑁆𑀫𑀁. 𑀘𑀺𑀢𑁆𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀼𑀧𑁆𑀧𑀸𑀤𑀓𑀁 𑀘𑀺𑀢𑁆𑀢𑀁. 𑀆𑀳𑀸𑀭𑁄𑀢𑀺 𑀅𑀚𑁆𑀛𑀢𑁆𑀢𑀺𑀓𑁄 𑀭𑀽𑀧𑀼𑀧𑁆𑀧𑀸𑀤𑀓𑁄 𑀆𑀳𑀸𑀭𑁄. 𑀉𑀢𑀽𑀢𑀺 𑀬𑁄 𑀓𑁄𑀘𑀺 𑀉𑀢𑀼, 𑀅𑀢𑁆𑀣𑀢𑁄 𑀢𑁂𑀚𑁄𑀥𑀸𑀢𑀼. 𑀓𑀫𑁆𑀫𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀲𑀫𑀼𑀝𑁆𑀞𑀸𑀦𑀲𑀗𑁆𑀓𑀭𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀢𑁂𑀦 𑀅𑀓𑀫𑁆𑀫𑀚𑀸𑀦𑀫𑁆𑀧𑀺 𑀓𑁂𑀲𑀜𑁆𑀘𑀺 𑀓𑀫𑁆𑀫𑀲𑁆𑀲 𑀧𑀭𑀺𑀬𑀸𑀬𑀧𑀘𑁆𑀘𑀬𑀪𑀸𑀯𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀫𑁆𑀫𑀧𑀘𑁆𑀘𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺. 𑀦𑀦𑀼 𑀘 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀫𑁆𑀫𑀢𑁄 𑀅𑀜𑁆𑀜𑁂𑀦𑀧𑀺 𑀧𑀘𑁆𑀘𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀪𑀯𑀺𑀢𑀩𑁆𑀩𑀁, 𑀲𑁄 𑀧𑀦 𑀓𑀫𑁆𑀫𑀕𑀢𑀺𑀓𑁄𑀯𑀸𑀢𑀺 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀢𑁆𑀣𑀁 𑀅𑀯𑀥𑀸𑀭𑀡𑀁 𑀓𑀢𑀁, 𑀢𑁂𑀦𑀸𑀳 ‘‘𑀦 𑀘𑀺𑀢𑁆𑀢𑀸𑀤𑀬𑁄’’𑀢𑀺. 𑀘𑀺𑀢𑁆𑀢𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀅𑀬𑀫𑀢𑁆𑀣𑁄 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑁄. 𑀇𑀢𑀭𑁂𑀢𑀺 𑀘𑀺𑀢𑁆𑀢𑀸𑀤𑀺𑀢𑁄 𑀅𑀜𑁆𑀜𑁂. 𑀚𑀦𑀓𑀧𑀘𑁆𑀘𑀬𑁄𑀢𑀺 𑀲𑀫𑀼𑀝𑁆𑀞𑀸𑀧𑀓𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀘𑁆𑀘𑀬𑁄 𑀧𑀦 𑀓𑀫𑁆𑀫𑀧𑀘𑁆𑀘𑀬𑁄𑀯. 𑀯𑀼𑀢𑁆𑀢𑀁 𑀳𑀺 ‘‘𑀓𑀼𑀲𑀮𑀸𑀓𑀼𑀲𑀮𑀸 𑀘𑁂𑀢𑀦𑀸 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁭).

𑀲𑁂𑀲𑀸𑀦𑀦𑁆𑀢𑀺 𑀘𑀺𑀢𑁆𑀢𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀦𑀁. 𑀧𑀭𑀺𑀬𑀸𑀬𑀢𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁧.𑁧.𑁯) 𑀅𑀭𑀽𑀧𑀸𑀦𑀁𑀬𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑁆𑀲 𑀆𑀕𑀢𑀢𑁆𑀢𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦𑀢𑁆𑀣𑀺. 𑀲𑀼𑀢𑁆𑀢𑁂 𑀧𑀦 ‘‘𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀦𑀲𑀡𑁆𑀟𑀁 𑀉𑀧𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀘𑀦𑀢𑁄 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀯𑀺𑀦𑀸 𑀅𑀪𑀸𑀯𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀺𑀢𑁆𑀢𑀁 𑀚𑀦𑀓𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀳𑀚𑀸𑀢𑀦𑀺𑀲𑁆𑀲𑀬𑀸𑀳𑀸𑀭𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀦𑁆𑀢𑀁 𑀘𑀺𑀢𑁆𑀢𑀁 𑀲𑀫𑀼𑀝𑁆𑀞𑀸𑀧𑀓𑀢𑀁 𑀉𑀧𑀸𑀤𑀸𑀬 ‘‘𑀚𑀦𑀓𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀆𑀳𑀸𑀭𑀉𑀢𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀯𑀁 𑀓𑀫𑁆𑀫𑀸𑀤𑀻𑀦𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀯𑀲𑁂𑀦 𑀥𑀸𑀢𑀽𑀲𑀼 𑀧𑀘𑁆𑀘𑀬𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁 𑀥𑀸𑀢𑀽𑀦𑀫𑁆𑀧𑀺 𑀯𑀲𑁂𑀦 𑀧𑀘𑁆𑀘𑀬𑀯𑀺𑀪𑀸𑀕𑀁 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀁 𑀢𑀸𑀯 ‘‘𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀫𑀳𑀸𑀪𑀽𑀢’’𑀦𑁆𑀢𑀺𑀆𑀤𑀺𑀦𑀸 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀼𑀦 ‘‘𑀢𑀢𑁆𑀣 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀲𑀢𑀺. 𑀢𑀢𑁆𑀣 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀧𑀣𑀯𑀻𑀥𑀸𑀢𑀽𑀢𑀺 ‘‘𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀫𑀳𑀸𑀪𑀽𑀢’’𑀦𑁆𑀢𑀺 𑀏𑀢𑁆𑀣 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀸 𑀓𑀫𑁆𑀫𑀚𑀧𑀣𑀯𑀻𑀥𑀸𑀢𑀼. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁 𑀇𑀢𑀭𑀸𑀲𑀦𑁆𑀢𑀺 𑀓𑀫𑁆𑀫𑀚𑀸𑀦𑀁 𑀆𑀧𑁄𑀥𑀸𑀢𑀼𑀆𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀥𑀸𑀢𑀽𑀦𑀁 𑀲𑀳𑀼𑀧𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀸𑀦𑀁 𑀢𑀸𑀲𑀁 𑀉𑀧𑀓𑀸𑀭𑀓𑀢𑁄, 𑀆𑀥𑀸𑀭𑀪𑀸𑀯𑀢𑁄, 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀪𑀗𑁆𑀕𑀸𑀥𑀭𑀡𑀢𑁄, 𑀯𑀺𑀕𑀫𑀸𑀪𑀸𑀯𑀢𑁄 𑀘 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑁂𑀯 𑀧𑀢𑀺𑀝𑁆𑀞𑀸𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀳𑁄𑀦𑁆𑀢𑀻 𑀘 𑀓𑀫𑁆𑀫𑀁 𑀯𑀺𑀬 𑀅𑀢𑁆𑀢𑀦𑁄, 𑀢𑀸𑀲𑀜𑁆𑀘 𑀦 𑀚𑀦𑀓𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺 𑀅𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀸 𑀢𑀸𑀲𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀦𑀺𑀲𑁆𑀲𑀬𑀧𑀘𑁆𑀘𑀬-𑀕𑁆𑀕𑀳𑀡𑁂𑀦𑁂𑀯 𑀧𑀢𑀺𑀝𑁆𑀞𑀸𑀪𑀸𑀯𑁄 𑀲𑀗𑁆𑀕𑀳𑀺𑀢𑁄, 𑀧𑀣𑀯𑀻𑀥𑀸𑀢𑀼𑀬𑀸 𑀧𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀓𑀺𑀘𑁆𑀘𑀁 𑀲𑀳𑀚𑀸𑀢𑀸𑀦𑀁 𑀧𑀢𑀺𑀝𑁆𑀞𑀸𑀪𑀸𑀯𑁄𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀢𑀺𑀝𑁆𑀞𑀸𑀯𑀲𑁂𑀦 𑀘𑀸’’𑀢𑀺 𑀯𑀺𑀲𑀼𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀆𑀩𑀦𑁆𑀥𑀦𑀯𑀲𑁂𑀦 𑀘𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀺𑀲𑀦𑁆𑀢𑀢𑀺𑀫𑀳𑀸𑀪𑀽𑀢𑀸𑀦𑀦𑁆𑀢𑀺 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀁 𑀘𑀢𑀼𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀯𑁄𑀓𑀺𑀡𑁆𑀡𑀸𑀦𑀁, 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀺𑀁 𑀉𑀧𑀸𑀤𑀸𑀬 𑀲𑀦𑁆𑀢𑀢𑀻𑀢𑀺 𑀲𑀦𑁆𑀢𑀢𑀺𑀕𑁆𑀕𑀳𑀡𑀁. 𑀧𑀣𑀯𑀻𑀥𑀸𑀢𑀼𑀬𑀸 𑀧𑀢𑀺𑀝𑁆𑀞𑀸𑀪𑀸𑀯𑁄 𑀦𑀸𑀫 𑀲𑀳𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁𑀬𑁂𑀯𑀸𑀢𑀺 𑀆𑀳 ‘‘𑀦 𑀧𑀢𑀺𑀝𑁆𑀞𑀸𑀯𑀲𑁂𑀦𑀸’’𑀢𑀺. 𑀦 𑀆𑀩𑀦𑁆𑀥𑀦𑀯𑀲𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑀳𑀸𑀪𑀽𑀢𑁂𑀲𑀼. ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀧𑀣𑀯𑀻𑀥𑀸𑀢𑀼 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀇𑀢𑀭𑀸𑀲’’𑀦𑁆𑀢𑀺𑀆𑀤𑀻𑀲𑀼 𑀲𑀼𑀓𑀭𑁄 𑀢𑀦𑁆𑀢𑀺𑀦𑀬𑁄 𑀦𑁂𑀢𑀼𑀦𑁆𑀢𑀺 ‘‘𑀘𑀺𑀢𑁆𑀢𑀆𑀳𑀸𑀭…𑀧𑁂… 𑀏𑀲𑁂𑀯 𑀦𑀬𑁄’’𑀢𑀺 𑀅𑀢𑀺𑀤𑀺𑀲𑀢𑀺.

𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑀧𑁆𑀧𑀯𑀢𑁆𑀢𑀸𑀲𑀼 𑀘 𑀧𑀦𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑁄, 𑀢𑀤𑀼𑀪𑀬𑁂𑀦 𑀘 𑀬𑀣𑀸𑀯𑀼𑀢𑁆𑀢𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑀸 𑀥𑀸𑀢𑀼𑀬𑁄 𑀇𑀫𑀺𑀦𑀸 𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺.

𑀇𑀤𑀸𑀦𑀺 𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀁 𑀧𑀝𑀺𑀘𑁆𑀘𑀸’’𑀢𑀺𑀕𑀸𑀣𑀫𑀸𑀳. 𑀢𑀢𑁆𑀣 𑀏𑀓𑀁 𑀥𑀸𑀢𑀼𑀁 𑀧𑀝𑀺𑀘𑁆𑀘 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀘𑀢𑀼𑀥𑀸 𑀲𑀫𑁆𑀧𑀯𑀢𑁆𑀢𑀦𑁆𑀢𑀺, 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀧𑀝𑀺𑀘𑁆𑀘 𑀏𑀓𑀸𑀯 𑀥𑀸𑀢𑀼 𑀘𑀢𑀼𑀥𑀸 𑀲𑀫𑁆𑀧𑀯𑀢𑁆𑀢𑀢𑀺, 𑀤𑁆𑀯𑁂 𑀥𑀸𑀢𑀼𑀬𑁄 𑀧𑀝𑀺𑀘𑁆𑀘 𑀤𑁆𑀯𑁂 𑀥𑀸𑀢𑀼𑀬𑁄 𑀙𑀥𑀸 𑀲𑀫𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀢𑁆𑀣𑁄 𑀧𑀦 𑀧𑀣𑀯𑀻𑀆𑀤𑀻𑀲𑀼 𑀏𑀓𑁂𑀓𑀺𑀲𑁆𑀲𑀸 𑀧𑀘𑁆𑀘𑀬𑀪𑀸𑀯𑁂 𑀇𑀢𑀭𑀸𑀲𑀁 𑀢𑀺𑀲𑁆𑀲𑀦𑁆𑀦𑀁 𑀢𑀺𑀲𑁆𑀲𑀦𑁆𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀢𑀺 𑀅𑀬𑀫𑁂𑀓𑁄 𑀘𑀢𑀼𑀓𑁆𑀓𑁄, 𑀢𑀺𑀲𑁆𑀲𑀦𑁆𑀦𑀁 𑀢𑀺𑀲𑁆𑀲𑀦𑁆𑀦𑀁 𑀧𑀘𑁆𑀘𑀬𑀪𑀸𑀯𑁂 𑀇𑀢𑀭𑀸𑀬 𑀏𑀓𑁂𑀓𑀺𑀲𑁆𑀲𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀢𑀺 𑀅𑀬𑀫𑀧𑀭𑁄 𑀘𑀢𑀼𑀓𑁆𑀓𑁄, 𑀧𑀞𑀫𑀤𑀼𑀢𑀺𑀬𑀸, 𑀢𑀢𑀺𑀬𑀘𑀢𑀼𑀢𑁆𑀣𑀸, 𑀧𑀞𑀫𑀢𑀢𑀺𑀬𑀸, 𑀤𑀼𑀢𑀺𑀬𑀘𑀢𑀼𑀢𑁆𑀣𑀸, 𑀧𑀞𑀫𑀘𑀢𑀼𑀢𑁆𑀣𑀸, 𑀤𑀼𑀢𑀺𑀬𑀢𑀢𑀺𑀬𑀸𑀢𑀺 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀪𑀸𑀯𑁂 𑀢𑀢𑁆𑀣 𑀢𑀢𑁆𑀣 𑀇𑀢𑀭𑀸𑀲𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀢𑀺 𑀅𑀬𑀫𑁂𑀓𑁄 𑀙𑀓𑁆𑀓𑁄. 𑀏𑀯𑀁 𑀧𑀘𑁆𑀘𑀬𑀪𑀸𑀯𑁂𑀦 𑀘𑀢𑀼𑀥𑀸, 𑀙𑀥𑀸 𑀘 𑀧𑀯𑀢𑁆𑀢𑀫𑀸𑀦𑀸𑀦𑀁 𑀏𑀓𑀓𑀤𑁆𑀯𑀺𑀓𑀢𑀺𑀓𑀯𑀲𑁂𑀦 𑀢𑀺𑀓𑀤𑀼𑀓𑀏𑀓𑀓𑀯𑀲𑁂𑀦 𑀘 𑀬𑀣𑀸𑀓𑁆𑀓𑀫𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀘 𑀧𑀘𑁆𑀘𑀬𑀪𑀸𑀯𑁄 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀘 𑀅𑀜𑁆𑀜𑀫𑀜𑁆𑀜𑀫𑀼𑀔𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀧𑀝𑀺𑀘𑁆𑀘𑀯𑀸𑀭𑁂 ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀢𑀬𑁄 𑀫𑀳𑀸𑀪𑀽𑀢𑀸, 𑀢𑀬𑁄 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀏𑀓𑀁 𑀫𑀳𑀸𑀪𑀽𑀢𑀁, 𑀤𑁆𑀯𑁂 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀫𑀳𑀸𑀪𑀽𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁫𑁩).

𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀤𑀸𑀦𑀯𑀺𑀲𑁆𑀲𑀚𑁆𑀚𑀦𑀸𑀤𑀺𑀓𑀸𑀬𑀺𑀓𑀓𑀺𑀭𑀺𑀬𑀸𑀓𑀭𑀡𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀉𑀧𑁆𑀧𑀻𑀴𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺 𑀖𑀝𑁆𑀝𑀦𑀓𑀺𑀭𑀺𑀬𑀸𑀬 𑀧𑀣𑀯𑀻𑀥𑀸𑀢𑀼𑀯𑀲𑁂𑀦 𑀲𑀺𑀚𑁆𑀛𑀦𑀢𑁄. 𑀲𑀸𑀯𑀸𑀢𑀺 𑀧𑀣𑀯𑀻𑀥𑀸𑀢𑀼𑀬𑁂𑀯. 𑀆𑀧𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀆𑀧𑁄𑀥𑀸𑀢𑀼𑀬𑀸 𑀢𑀢𑁆𑀣 𑀅𑀧𑁆𑀧𑀥𑀸𑀦𑀪𑀸𑀯𑀁, 𑀧𑀣𑀯𑀻𑀥𑀸𑀢𑀼𑀬𑀸 𑀘 𑀧𑀥𑀸𑀦𑀪𑀸𑀯𑀦𑁆𑀢𑀺 𑀧𑀢𑀺𑀝𑁆𑀞𑀸𑀪𑀸𑀯𑁂 𑀯𑀺𑀬 𑀧𑀢𑀺𑀝𑁆𑀞𑀸𑀧𑀦𑁂𑀧𑀺 𑀲𑀸𑀢𑀺𑀲𑀬𑀓𑀺𑀘𑁆𑀘𑀢𑁆𑀢𑀸 𑀢𑀲𑁆𑀲𑀸 𑀧𑀢𑀺𑀝𑁆𑀞𑀸𑀧𑀦𑀲𑁆𑀲 𑀧𑀸𑀤𑀝𑁆𑀞𑀧𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀯𑀓𑁆𑀔𑁂𑀧𑀦𑀲𑁆𑀲𑀸𑀢𑀺 𑀅𑀥𑁄𑀦𑀺𑀓𑁆𑀔𑀺𑀧𑀦𑀲𑁆𑀲. 𑀢𑀢𑁆𑀣 𑀘 𑀕𑀭𑀼𑀢𑀭𑀲𑀪𑀸𑀯𑀸𑀬 𑀆𑀧𑁄𑀥𑀸𑀢𑀼𑀬𑀸 𑀲𑀸𑀢𑀺𑀲𑀬𑁄 𑀩𑁆𑀬𑀸𑀧𑀸𑀭𑁄𑀢𑀺 𑀆𑀳 ‘‘𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀆𑀧𑁄𑀥𑀸𑀢𑀽’’𑀢𑀺. 𑀢𑀣𑀸 𑀉𑀤𑁆𑀥𑀗𑁆𑀕𑀢𑀺𑀓𑀸 𑀢𑁂𑀚𑁄𑀥𑀸𑀢𑀽𑀢𑀺 𑀉𑀤𑁆𑀥𑀭𑀡𑁂 𑀯𑀸𑀬𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄 𑀯𑀼𑀢𑁆𑀢𑁄. 𑀢𑀺𑀭𑀺𑀬𑀁 𑀕𑀢𑀺𑀓𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀼 𑀲𑀸𑀢𑀺𑀲𑀬𑁄 𑀩𑁆𑀬𑀸𑀧𑀸𑀭𑁄𑀢𑀺 𑀢𑁂𑀚𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄 𑀕𑀳𑀺𑀢𑁄. 𑀢𑀢𑁆𑀣 𑀞𑀺𑀢𑀝𑁆𑀞𑀸𑀦𑀢𑁄 𑀅𑀪𑀺𑀫𑀼𑀔𑀁 𑀧𑀸𑀤𑀲𑁆𑀲 𑀳𑀭𑀡𑀁 𑀅𑀢𑀺𑀳𑀭𑀡𑀁, 𑀧𑀼𑀭𑀢𑁄 𑀳𑀭𑀡𑀁. 𑀢𑀢𑁄 𑀣𑁄𑀓𑀁 𑀯𑀻𑀢𑀺𑀓𑁆𑀓𑀫𑁆𑀫 𑀳𑀭𑀡𑀁 𑀯𑀻𑀢𑀺𑀳𑀭𑀡𑀁, 𑀧𑀲𑁆𑀲𑀢𑁄 𑀳𑀭𑀡𑀁.

𑀏𑀓𑁂𑀓𑁂𑀦 𑀫𑀼𑀔𑁂𑀦𑀸𑀢𑀺 ‘‘𑀧𑀢𑁆𑀣𑀝𑀢𑁆𑀢𑀸 𑀧𑀣𑀯𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁩𑁪𑁭) 𑀯𑀺𑀪𑀢𑁆𑀢𑁂𑀲𑀼 𑀢𑁂𑀭𑀲𑀲𑀼 𑀆𑀓𑀸𑀭𑁂𑀲𑀼 𑀏𑀓𑁂𑀓𑁂𑀦 𑀥𑀸𑀢𑀽𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑀫𑀼𑀔𑁂𑀦. 𑀲𑁆𑀯𑀸𑀬𑀦𑁆𑀢𑀺 𑀲𑁄 𑀅𑀬𑀁 𑀉𑀧𑀘𑀸𑀭𑀲𑀫𑀸𑀥𑀺. 𑀓𑀣𑀁 𑀧𑀦𑀲𑁆𑀲 𑀯𑀯𑀢𑁆𑀣𑀸𑀦𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀘𑀢𑀼𑀦𑁆𑀦𑀁 𑀥𑀸𑀢𑀽𑀦’’𑀦𑁆𑀢𑀺𑀆𑀤𑀺.

𑁩𑁬𑁦. 𑀇𑀤𑀸𑀦𑀺 𑀇𑀫𑀺𑀲𑁆𑀲𑀸 𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀜𑁆𑀘 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀜𑁆𑀜𑀢𑀁 𑀅𑀯𑀕𑀸𑀳𑀢𑀻𑀢𑀺 𑀥𑀸𑀢𑀼𑀫𑀢𑁆𑀢𑀢𑀸𑀤𑀲𑁆𑀲𑀦𑁂𑀦 𑀭𑀽𑀧𑀓𑀸𑀬𑀲𑁆𑀲 𑀅𑀦𑀢𑁆𑀢𑀓𑀢𑀁 𑀯𑀯𑀢𑁆𑀣𑀸𑀧𑀬𑀢𑁄 𑀢𑀤𑀦𑀼𑀲𑀸𑀭𑁂𑀦 𑀦𑀸𑀫𑀓𑀸𑀬𑀲𑁆𑀲𑀸𑀧𑀺 𑀅𑀦𑀢𑁆𑀢𑀓𑀢𑀸 𑀲𑀼𑀧𑀸𑀓𑀝𑀸 𑀳𑁄𑀢𑀻𑀢𑀺 𑀲𑀩𑁆𑀩𑀲𑁄 𑀅𑀢𑁆𑀢𑀲𑀼𑀜𑁆𑀜𑀢𑀁 𑀧𑀭𑀺𑀬𑁄𑀕𑀸𑀳𑀢𑀺 𑀢𑀢𑁆𑀣 𑀧𑀢𑀺𑀝𑁆𑀞𑀳𑀢𑀺. 𑀲𑀢𑁆𑀢𑀲𑀜𑁆𑀜𑀁 𑀲𑀫𑀼𑀕𑁆𑀖𑀸𑀢𑁂𑀢𑀻𑀢𑀺 𑀢𑀢𑁄 𑀏𑀯 ‘‘𑀲𑀢𑁆𑀢𑁄 𑀧𑁄𑀲𑁄 𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀅𑀬𑀸𑀣𑀸𑀯𑀲𑀜𑁆𑀜𑀁 𑀉𑀕𑁆𑀖𑀸𑀢𑁂𑀢𑀺 𑀲𑀫𑀽𑀳𑀦𑀢𑀺. 𑀯𑀸𑀴𑀫𑀺𑀕𑀬𑀓𑁆𑀔𑀭𑀓𑁆𑀔𑀲𑀸𑀤𑀺𑀯𑀺𑀓𑀧𑁆𑀧𑀁 𑀅𑀦𑀸𑀯𑀚𑁆𑀚𑀫𑀸𑀦𑁄𑀢𑀺 𑀲𑀲𑀦𑁆𑀢𑀸𑀦𑁂 𑀯𑀺𑀬 𑀧𑀭𑀲𑀦𑁆𑀢𑀸𑀦𑁂𑀧𑀺 𑀥𑀸𑀢𑀼𑀫𑀢𑁆𑀢𑀢𑀸𑀬 𑀲𑀼𑀤𑀺𑀝𑁆𑀞𑀢𑁆𑀢𑀸 𑀔𑀻𑀡𑀸𑀲𑀯𑁄 𑀯𑀺𑀬 ‘‘𑀇𑀫𑁂 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄 𑀯𑀸𑀴𑀫𑀺𑀕𑀸, 𑀇𑀫𑁂 𑀬𑀓𑁆𑀔𑀭𑀓𑁆𑀔𑀲𑀸’’𑀢𑀺 𑀏𑀯𑀫𑀸𑀤𑀺𑀯𑀺𑀓𑀧𑁆𑀧𑀁 𑀅𑀓𑀭𑁄𑀦𑁆𑀢𑁄 𑀪𑀬𑀪𑁂𑀭𑀯𑀁 𑀲𑀳𑀢𑀺 𑀅𑀪𑀺𑀪𑀯𑀢𑀺. 𑀬𑀣𑀸𑀯𑀼𑀢𑁆𑀢𑀯𑀺𑀓𑀧𑁆𑀧𑀦𑀸𑀧𑀚𑁆𑀚𑀦𑀁 𑀳𑀺 𑀪𑀬𑀪𑁂𑀭𑀯𑀲𑀳𑀦𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀉𑀕𑁆𑀖𑀸𑀢𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁. 𑀦𑀺𑀕𑁆𑀖𑀸𑀢𑁄 𑀤𑀻𑀦𑀪𑀸𑀯𑀧𑁆𑀧𑀢𑁆𑀢𑀺. 𑀫𑀳𑀸𑀧𑀜𑁆𑀜𑁄 𑀘 𑀧𑀦 𑀳𑁄𑀢𑀺 𑀥𑀸𑀢𑀼𑀯𑀲𑁂𑀦 𑀓𑀸𑀬𑁂 𑀲𑀫𑁆𑀫𑀤𑁂𑀯 𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀓𑀭𑀡𑀢𑁄. 𑀢𑀣𑀸 𑀳𑀺𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲 𑀅𑀦𑀼𑀓𑀽𑀮𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀼𑀕𑀢𑀺𑀧𑀭𑀸𑀬𑀡𑁄 𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀧𑀭𑀺𑀧𑀓𑁆𑀓𑀢𑀸𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑀽𑀦𑀯𑀻𑀲𑀢𑀺𑀪𑀸𑀯𑀦𑀸𑀦𑀬𑀧𑀝𑀺𑀫𑀡𑁆𑀟𑀺𑀢𑀲𑁆𑀲

𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑀺𑀤𑁆𑀤𑁂𑀲𑀲𑁆𑀲 𑀮𑀻𑀦𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩𑁬𑁧. ‘‘𑀓𑁄 𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸 𑀲𑀭𑀽𑀧𑀸𑀤𑀺𑀧𑀼𑀘𑁆𑀙𑀸 𑀬𑀸𑀯𑀤𑁂𑀯 𑀯𑀺𑀪𑀸𑀕𑀸𑀯𑀩𑁄𑀥𑀦𑀢𑁆𑀣𑀸. 𑀲𑀭𑀽𑀧𑀸𑀤𑀺𑀢𑁄 𑀳𑀺 𑀜𑀸𑀢𑀲𑁆𑀲 𑀧𑀪𑁂𑀤𑁄 𑀯𑀼𑀘𑁆𑀘𑀫𑀸𑀦𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺 𑀲𑀗𑁆𑀔𑁂𑀧𑀧𑀼𑀩𑁆𑀩𑀓𑀢𑁆𑀢𑀸 𑀯𑀺𑀢𑁆𑀣𑀸𑀭𑀲𑁆𑀲, 𑀯𑀺𑀢𑁆𑀣𑀸𑀭𑀯𑀺𑀥𑀺𑀦𑀸 𑀘 𑀲𑀗𑁆𑀔𑁂𑀧𑀯𑀺𑀥𑀺 𑀲𑀗𑁆𑀕𑀬𑁆𑀳𑀢𑀻𑀢𑀺 ‘‘𑀲𑀫𑀸𑀥𑀺𑀲𑁆𑀲 𑀯𑀺𑀢𑁆𑀣𑀸𑀭𑀁 𑀪𑀸𑀯𑀦𑀸𑀦𑀬𑀜𑁆𑀘 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀓𑁄 𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸𑀧𑀺 𑀲𑀫𑀸𑀥𑀺𑀲𑁆𑀲𑁂𑀯 𑀧𑀓𑀸𑀭𑀪𑁂𑀤𑁄 𑀤𑀲𑁆𑀲𑀻𑀬𑀢𑀺, 𑀪𑀸𑀯𑀦𑀸𑀦𑀺𑀲𑀁𑀲𑁄𑀧𑀺 𑀪𑀸𑀯𑀦𑀸𑀦𑀬𑀦𑀺𑀲𑁆𑀲𑀺𑀢𑁄 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀯𑀺𑀢𑁆𑀣𑀸𑀭𑀁 𑀪𑀸𑀯𑀦𑀸𑀦𑀬𑀜𑁆𑀘 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀧𑁆𑀧𑀓𑀸𑀭𑀢𑁄𑀢𑀺 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀺𑀓𑀲𑁆𑀲 𑀲𑀩𑁆𑀩𑀲𑁆𑀲 𑀪𑀸𑀯𑀦𑀸𑀬 𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀭𑀡𑀧𑁆𑀧𑀓𑀸𑀭𑀢𑁄 𑀘𑁂𑀯 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀯𑀺𑀪𑀸𑀯𑀦𑀢𑁄 𑀘.

‘‘𑀲𑀫𑀢𑁆𑀢𑀸 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀲𑀫𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀤𑀼𑀯𑀺𑀥𑁄𑀬𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥 𑀅𑀥𑀺𑀧𑁆𑀧𑁂𑀢𑁄 𑀲𑀫𑀸𑀥𑀻𑀢𑀺 𑀮𑁄𑀓𑀺𑀬𑀲𑀫𑀸𑀥𑀺𑀁 𑀆𑀳. 𑀤𑀲𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀽𑀢𑀺 𑀬𑀸𑀦𑀺 𑀳𑁂𑀝𑁆𑀞𑀸 ‘‘𑀉𑀧𑀘𑀸𑀭𑀸𑀯𑀳𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺 𑀤𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺, 𑀢𑁂𑀲𑀼. 𑀅𑀧𑁆𑀧𑀦𑀸𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑁂𑀲𑀽𑀢𑀺 𑀅𑀧𑁆𑀧𑀦𑀸𑀬 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑁂𑀲𑀼 𑀅𑀝𑁆𑀞𑀦𑁆𑀦𑀁 𑀛𑀸𑀦𑀸𑀦𑀁 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼. 𑀏𑀓𑀕𑁆𑀕𑀢𑀸𑀢𑀺 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀁, 𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀺𑀬𑀜𑁆𑀘 𑀏𑀓𑀕𑁆𑀕𑀢𑀸. 𑀅𑀯𑀲𑁂𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀽𑀢𑀺 ‘‘𑀅𑀧𑁆𑀧𑀦𑀸𑀯𑀳𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀲𑀼 𑀢𑀺𑀁𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼.

𑀲𑀫𑀸𑀥𑀺𑀆𑀦𑀺𑀲𑀁𑀲𑀓𑀣𑀸𑀯𑀡𑁆𑀡𑀦𑀸

𑁩𑁬𑁨. 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀲𑀼𑀔𑀯𑀺𑀳𑀸𑀭𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄. 𑀓𑀸𑀫𑀁 ‘‘𑀲𑀫𑀸𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀏𑀢𑁂𑀦 𑀅𑀧𑁆𑀧𑀦𑀸𑀲𑀫𑀸𑀥𑀺𑀬𑁂𑀯 𑀯𑀺𑀪𑀸𑀯𑀺𑀢𑁄, ‘‘𑀏𑀓𑀕𑁆𑀕𑀘𑀺𑀢𑁆𑀢𑀸’’𑀢𑀺 𑀧𑀦 𑀧𑀤𑁂𑀦 𑀉𑀧𑀘𑀸𑀭𑀲𑀫𑀸𑀥𑀺𑀦𑁄𑀧𑀺 𑀕𑀳𑀡𑀁 𑀳𑁄𑀢𑀻𑀢𑀺 𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀅𑀧𑁆𑀧𑀦𑀸𑀲𑀫𑀸𑀥𑀺𑀪𑀸𑀯𑀦𑀸’’𑀢𑀺 𑀯𑀼𑀢𑁆𑀢𑀁. 𑀦 𑀔𑁄 𑀧𑀦𑁂𑀢𑁂𑀢𑀺 𑀏𑀢𑁂 𑀩𑀸𑀳𑀺𑀭𑀓𑀪𑀸𑀯𑀺𑀢𑀸 𑀛𑀸𑀦𑀥𑀫𑁆𑀫𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀫𑀢𑁆𑀢𑀓𑀭𑀸. 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 ‘‘𑀲𑀮𑁆𑀮𑁂𑀔𑀸’’𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸𑀦𑀁 𑀲𑀮𑁆𑀮𑁂𑀔𑀦𑀧𑀝𑀺𑀧𑀤𑀸 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸, 𑀲𑀸𑀲𑀦𑁂 𑀧𑀦 𑀅𑀯𑀺𑀳𑀺𑀁𑀲𑀸𑀤𑀬𑁄𑀧𑀺 𑀲𑀮𑁆𑀮𑁂𑀔𑀸𑀯 𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀢𑁆𑀢𑀸.

𑀲𑀫𑁆𑀩𑀸𑀥𑁂𑀢𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀦𑀸 𑀲𑀁𑀓𑀺𑀮𑀺𑀝𑁆𑀞𑀢𑀸𑀬 𑀧𑀭𑀫𑀲𑀫𑁆𑀩𑀸𑀥𑁂 𑀅𑀢𑀺𑀯𑀺𑀬 𑀲𑀗𑁆𑀓𑀝𑀝𑁆𑀞𑀸𑀦𑀪𑀽𑀢𑁂 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑁂. 𑀑𑀓𑀸𑀲𑀸𑀥𑀺𑀕𑀫𑀦𑀬𑁂𑀦𑀸𑀢𑀺 𑀅𑀢𑁆𑀣𑀧𑀝𑀺𑀮𑀸𑀪𑀬𑁄𑀕𑁆𑀕𑀲𑁆𑀲 𑀦𑀯𑀫𑀔𑀡𑀲𑀗𑁆𑀔𑀸𑀢𑀲𑁆𑀲 𑀑𑀓𑀸𑀲𑀲𑁆𑀲 𑀅𑀥𑀺𑀕𑀫𑀦𑀬𑁂𑀦. 𑀢𑀲𑁆𑀲 𑀳𑀺 𑀤𑀼𑀮𑁆𑀮𑀪𑀢𑀸𑀬 𑀅𑀧𑁆𑀧𑀦𑀸𑀥𑀺𑀕𑀫𑀫𑁆𑀧𑀺 𑀅𑀦𑀥𑀺𑀕𑀫𑀬𑀫𑀸𑀦𑁄 𑀲𑀁𑀯𑁂𑀕𑀩𑀳𑀼𑀮𑁄 𑀧𑀼𑀕𑁆𑀕𑀮𑁄 𑀉𑀧𑀘𑀸𑀭𑀲𑀫𑀸𑀥𑀺𑀫𑁆𑀳𑀺𑀬𑁂𑀯 𑀞𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺 ‘‘𑀲𑀻𑀖𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀫𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺.

𑀅𑀪𑀺𑀜𑁆𑀜𑀸𑀧𑀸𑀤𑀓𑀦𑁆𑀢𑀺 𑀇𑀤𑁆𑀥𑀺𑀯𑀺𑀥𑀸𑀤𑀺𑀅𑀪𑀺𑀜𑁆𑀜𑀸𑀜𑀸𑀡𑀧𑀸𑀤𑀓𑀪𑀽𑀢𑀁 𑀅𑀥𑀺𑀝𑁆𑀞𑀸𑀦𑀪𑀽𑀢𑀁. 𑀳𑁄𑀢𑀻𑀢𑀺 𑀯𑀼𑀢𑁆𑀢𑀦𑀬𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀢𑁂𑀦 ‘‘𑀇𑀫𑀺𑀦𑀸 𑀧𑀓𑀸𑀭𑁂𑀦 𑀯𑀼𑀢𑁆𑀢𑀦𑀬𑀸’’𑀢𑀺 𑀲𑁂𑀲𑀸𑀪𑀺𑀜𑁆𑀜𑀸𑀦𑀫𑁆𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀢𑀺 𑀲𑀢𑀺 𑀆𑀬𑀢𑀦𑁂𑀢𑀺 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑁂 𑀅𑀪𑀺𑀜𑁆𑀜𑀸𑀥𑀺𑀕𑀫𑀲𑁆𑀲 𑀓𑀸𑀭𑀡𑁂 𑀯𑀺𑀚𑁆𑀚𑀫𑀸𑀦𑁂. 𑀅𑀪𑀺𑀜𑁆𑀜𑀸𑀥𑀺𑀕𑀫𑀲𑁆𑀲 𑀳𑀺 𑀅𑀥𑀺𑀓𑀸𑀭𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀬𑁄 ‘‘𑀧𑀼𑀩𑁆𑀩𑀳𑁂𑀢𑀽’’𑀢𑀺 𑀯𑀼𑀘𑁆𑀘𑀢𑀺. 𑀦 𑀲𑀫𑀸𑀧𑀢𑁆𑀢𑀻𑀲𑀼 𑀯𑀲𑀻𑀪𑀸𑀯𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀢𑀺 𑀲𑀢𑀺 𑀆𑀬𑀢𑀦𑁂’’𑀢𑀺 (𑀫. 𑀦𑀺. 𑁩.𑁧𑁫𑁮; 𑀅. 𑀦𑀺. 𑁩.𑁧𑁦𑁨). 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲𑀸𑀢𑀺 𑀯𑀓𑁆𑀔𑀫𑀸𑀦𑀯𑀺𑀪𑀸𑀕𑀸𑀬 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀸𑀢𑀩𑁆𑀩𑀲𑁆𑀲. 𑀥𑀫𑁆𑀫𑀲𑁆𑀲𑀸𑀢𑀺 𑀪𑀸𑀯𑁂𑀢𑀩𑁆𑀩𑀲𑁆𑀲 𑀘𑁂𑀯 𑀯𑀺𑀪𑀸𑀯𑁂𑀢𑀩𑁆𑀩𑀲𑁆𑀲 𑀘 𑀥𑀫𑁆𑀫𑀲𑁆𑀲. 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀭 𑀢𑀢𑁆𑀭𑁂𑀯𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁𑀬𑁂𑀯 𑀲𑀘𑁆𑀙𑀺𑀓𑀸𑀢𑀩𑁆𑀩𑀥𑀫𑁆𑀫𑁂. 𑀲𑀓𑁆𑀔𑀺𑀪𑀸𑀯𑀸𑀬 𑀧𑀘𑁆𑀘𑀓𑁆𑀔𑀓𑀸𑀭𑀺𑀢𑀸𑀬 𑀪𑀩𑁆𑀩𑁄 𑀲𑀓𑁆𑀔𑀺𑀪𑀩𑁆𑀩𑁄, 𑀢𑀲𑁆𑀲 𑀪𑀸𑀯𑁄 𑀲𑀓𑁆𑀔𑀺𑀪𑀩𑁆𑀩𑀢𑀸, 𑀢𑀁 𑀲𑀓𑁆𑀔𑀺𑀪𑀩𑁆𑀩𑀢𑀁.

𑀢𑀁 𑀢𑀁 𑀪𑀯𑀕𑀫𑀺𑀓𑀫𑁆𑀫𑀁 𑀆𑀭𑀩𑁆𑀪 𑀪𑀯𑀧𑀢𑁆𑀣𑀦𑀸𑀬 𑀅𑀦𑀼𑀧𑁆𑀧𑀦𑁆𑀦𑀸𑀬𑀧𑀺 𑀓𑀫𑁆𑀫𑀲𑁆𑀲 𑀓𑀢𑀽𑀧𑀘𑀺𑀢𑀪𑀸𑀯𑁂𑀦𑁂𑀯 𑀪𑀯𑀧𑀢𑁆𑀣𑀦𑀸𑀓𑀺𑀘𑁆𑀘𑀁 𑀲𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀢𑁆𑀣𑀬𑀫𑀸𑀦𑀸 𑀯𑀸’’𑀢𑀺. 𑀲𑀳 𑀩𑁆𑀬𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀸𑀬𑁄, 𑀇𑀥 𑀧𑀦 𑀏𑀓𑀪𑀯𑀽𑀧𑀕𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀢𑀸, 𑀢𑀁 𑀲𑀳𑀩𑁆𑀬𑀢𑀁.

𑀓𑀺𑀁 𑀧𑀦 𑀅𑀧𑁆𑀧𑀦𑀸𑀲𑀫𑀸𑀥𑀺𑀪𑀸𑀯𑀦𑀸𑀬𑁂𑀯 𑀪𑀯𑀯𑀺𑀲𑁂𑀲𑀸𑀦𑀺𑀲𑀁𑀲𑀸, 𑀉𑀤𑀸𑀳𑀼 𑀇𑀢𑀭𑀸𑀧𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀉𑀧𑀘𑀸𑀭𑀲𑀫𑀸𑀥𑀺𑀪𑀸𑀯𑀦𑀸𑀧𑀻’’𑀢𑀺𑀆𑀤𑀺.

𑀦𑀺𑀩𑁆𑀩𑀸𑀦𑀦𑁆𑀢𑀺 𑀢𑀺𑀲𑁆𑀲𑀦𑁆𑀦𑀁 𑀤𑀼𑀓𑁆𑀔𑀢𑀸𑀦𑀁 𑀦𑀺𑀩𑁆𑀩𑀼𑀢𑀺𑀁. 𑀭𑀽𑀧𑀥𑀫𑁆𑀫𑁂 𑀧𑀭𑀺𑀬𑀸𑀧𑀦𑁆𑀦𑀸 𑀯𑀺𑀚𑁆𑀚𑀫𑀸𑀦𑀸𑀧𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑁂𑀦 𑀅𑀲𑀦𑁆𑀢𑀲𑀫𑀸𑀯. 𑀢𑁂𑀦𑀸𑀳 ‘‘𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀻𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀼𑀓𑁆𑀔𑀅𑀦𑀢𑁆𑀢𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀦𑀺𑀭𑁄𑀥𑀧𑀝𑀺𑀦𑀺𑀲𑁆𑀲𑀕𑁆𑀕𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸𑀢𑀺 𑀇𑀫𑀸𑀳𑀺 𑀅𑀝𑁆𑀞𑀳𑀺, 𑀅𑀝𑁆𑀞𑀳𑀺 𑀘 𑀅𑀭𑀺𑀬𑀫𑀕𑁆𑀕𑀨𑀮𑀜𑀸𑀡𑁂𑀳𑀻𑀢𑀺 𑀏𑀯𑀁 𑀲𑁄𑀴𑀲𑀳𑀺. 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀻𑀢𑀺 𑀧𑀜𑁆𑀘𑀦𑁆𑀦𑀁 𑀭𑀽𑀧𑀚𑁆𑀛𑀸𑀦𑀸𑀦𑀁, 𑀘𑀢𑀼𑀦𑁆𑀦𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀜𑁆𑀘 𑀯𑀲𑁂𑀦 𑀏𑀯𑀁 𑀦𑀯𑀳𑀺. 𑀓𑁂𑀘𑀺 𑀧𑀦 ‘‘𑀘𑀢𑁆𑀢𑀸𑀭𑁄 𑀭𑀽𑀧𑀚𑁆𑀛𑀸𑀦𑀲𑀫𑀸𑀥𑀻, 𑀘𑀢𑁆𑀢𑀸𑀭𑁄 𑀅𑀭𑀽𑀧𑀚𑁆𑀛𑀸𑀦𑀲𑀫𑀸𑀥𑀻, 𑀉𑀪𑀬𑁂𑀲𑀁 𑀉𑀧𑀘𑀸𑀭𑀲𑀫𑀸𑀥𑀺𑀁 𑀏𑀓𑀁 𑀓𑀢𑁆𑀯𑀸 𑀏𑀯𑀁 𑀦𑀯𑀸’’𑀢𑀺 𑀯𑀤𑀦𑁆𑀢𑀺.

𑀲𑀫𑀸𑀥𑀺𑀪𑀸𑀯𑀦𑀸𑀬𑁄𑀕𑁂𑀢𑀺 𑀲𑀫𑀸𑀥𑀺𑀪𑀸𑀯𑀦𑀸𑀬 𑀅𑀦𑀼𑀬𑁄𑀕𑁂 𑀅𑀦𑀼𑀬𑀼𑀜𑁆𑀚𑀦𑁂, 𑀲𑀫𑀸𑀥𑀺𑀪𑀸𑀯𑀦𑀸𑀲𑀗𑁆𑀔𑀸𑀢𑁂 𑀯𑀸 𑀬𑁄𑀕𑁂. 𑀬𑁄𑀕𑁄𑀢𑀺 𑀪𑀸𑀯𑀦𑀸 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀬𑁄𑀕𑀸 𑀯𑁂 𑀚𑀸𑀬𑀢𑀻 𑀪𑀽𑀭𑀻’’𑀢𑀺 (𑀥. 𑀧. 𑁨𑁮𑁨).

𑁩𑁬𑁩. 𑀲𑀫𑀸𑀥𑀺𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀻𑀮𑀁 𑀲𑀫𑁆𑀧𑀺𑀡𑁆𑀟𑁂𑀢𑀺.

𑀲𑀫𑀸𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀏𑀓𑀸𑀤𑀲𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.