𑁨𑁨. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀧𑀞𑀫𑀫𑀕𑁆𑀕𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁦𑁬. 𑀇𑀤𑀸𑀦𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀦𑀺𑀤𑁆𑀤𑁂𑀲𑁂 𑀅𑀦𑀼𑀧𑁆𑀧𑀢𑁆𑀢𑁂 𑀲𑀸 𑀬𑀲𑁆𑀲 𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁄 𑀧𑀭𑀁 𑀕𑁄𑀢𑁆𑀭𑀪𑀼𑀜𑀸𑀡𑀁 𑀳𑁄𑀢𑀻’’𑀢𑀺 𑀆𑀳. 𑀇𑀢𑁄 𑀧𑀭𑀦𑁆𑀢𑀺 𑀇𑀢𑁄 𑀅𑀦𑀼𑀮𑁄𑀫𑀜𑀸𑀡𑀢𑁄 𑀉𑀧𑀭𑀺. 𑀢𑀦𑁆𑀢𑀺 𑀕𑁄𑀢𑁆𑀭𑀪𑀼𑀜𑀸𑀡𑀁. 𑀦𑁂𑀯 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀪𑀚𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀸𑀦𑀁 𑀅𑀕𑁆𑀕𑀳𑀡𑀢𑁄. 𑀦 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀪𑀚𑀢𑀺 𑀲𑀢𑀺𑀧𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀅𑀔𑁂𑀧𑀦𑀢𑁄. 𑀢𑀢𑁄 𑀏𑀯𑁂𑀢𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀯𑀺𑀲𑀬𑀁 𑀉𑀤𑁆𑀤𑁂𑀲𑀦𑁆𑀢𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀁 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀯𑀺𑀬 𑀫𑀕𑁆𑀕𑀲𑁆𑀲 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀁 𑀯𑀼𑀘𑁆𑀘𑀢𑀺. 𑀅𑀦𑁆𑀢𑀭𑀸𑀢𑀺 𑀙𑀝𑁆𑀞𑀲𑀢𑁆𑀢𑀫𑀯𑀺𑀲𑀼𑀤𑁆𑀥𑀻𑀦𑀁 𑀯𑁂𑀫𑀚𑁆𑀛𑁂. 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯 𑀳𑁄𑀢𑀺 𑀉𑀪𑀬𑀯𑀺𑀲𑀼𑀤𑁆𑀥𑀺𑀮𑀓𑁆𑀔𑀡𑀢𑀸𑀪𑀸𑀯𑀢𑁄. 𑀢𑀣𑀸𑀧𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀧𑀭𑀺𑀬𑁄𑀲𑀸𑀦𑀢𑀸𑀬 𑀯𑀺𑀧𑀲𑁆𑀲𑀦𑀸𑀧𑀓𑁆𑀔𑀺𑀓𑀁. 𑀢𑁂𑀦𑁂𑀯𑀲𑁆𑀲 𑀢𑀁𑀲𑁄𑀢𑀧𑀢𑀺𑀢𑀢𑀸. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀲𑁄𑀢𑁂…𑀧𑁂… 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺. 𑀏𑀢𑁂𑀦𑀲𑁆𑀲 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀪𑀚𑀦𑀁 𑀤𑀲𑁆𑀲𑁂𑀢𑀺. 𑀲𑁄𑀢𑀲𑁆𑀲 𑀅𑀭𑀺𑀬𑀲𑁆𑀲𑀆𑀤𑀺𑀢𑁄 𑀧𑀚𑁆𑀚𑀦𑀁 𑀲𑁄𑀢𑀸𑀧𑀢𑁆𑀢𑀺, 𑀲𑁄 𑀏𑀯 𑀫𑀕𑁆𑀕𑁄, 𑀲𑁄𑀢𑀁 𑀯𑀸 𑀅𑀭𑀺𑀬𑀁 𑀆𑀤𑀺𑀢𑁄 𑀧𑀚𑁆𑀚𑀢𑀺 𑀅𑀥𑀺𑀕𑀘𑁆𑀙𑀢𑀻𑀢𑀺 𑀲𑁄𑀢𑀸𑀧𑀢𑁆𑀢𑀺, 𑀧𑀞𑀫𑀓𑁄. 𑀢𑀲𑁆𑀲 𑀫𑀕𑁆𑀕𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀓𑀺𑀤𑁂𑀯 𑀇𑀫𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀢𑀻𑀢𑀺 𑀲𑀓𑀤𑀸𑀕𑀸𑀫𑀻, 𑀢𑀲𑁆𑀲 𑀫𑀕𑁆𑀕𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀓𑀸𑀫𑀪𑀯𑀁 𑀦 𑀆𑀕𑀘𑁆𑀙𑀢𑀻𑀢𑀺 𑀅𑀦𑀸𑀕𑀸𑀫𑀻, 𑀢𑀲𑁆𑀲 𑀫𑀕𑁆𑀕𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁄. 𑀓𑀺𑀮𑁂𑀲𑀸𑀤𑀻𑀦𑀁 𑀳𑀦𑀦𑀸𑀤𑀺𑀦𑀸 𑀅𑀭𑀳𑀁, 𑀅𑀕𑁆𑀕𑀫𑀕𑁆𑀕𑀝𑁆𑀞𑁄. 𑀢𑀲𑁆𑀲 𑀪𑀸𑀯𑁄 𑀅𑀭𑀳𑀢𑁆𑀢𑀁, 𑀲𑁄 𑀏𑀯 𑀫𑀕𑁆𑀕𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁄. 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫.

𑀢𑁂𑀳𑀺 𑀢𑀻𑀳𑀺𑀧𑀻𑀢𑀺 𑀳𑁂𑀝𑁆𑀞𑀸 𑀢𑀺𑀡𑁆𑀡𑀁 𑀅𑀦𑀼𑀮𑁄𑀫𑀜𑀸𑀡𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀢𑀻𑀲𑀼 𑀯𑀸 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀢𑀻𑀳𑀺𑀧𑀻𑀢𑀺 𑀯𑀸 𑀯𑀺𑀓𑀧𑁆𑀧𑀦𑁆𑀢𑀭𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀧𑀺-𑀲𑀤𑁆𑀤𑁄, 𑀢𑁂𑀦 𑀢𑀻𑀳𑀺𑀧𑀺 𑀤𑁆𑀯𑀻𑀳𑀺𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑁂𑀦𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀸𑀦𑀼𑀓𑀽𑀮𑀁. 𑀧𑀞𑀫𑀜𑁆𑀳𑀺 𑀅𑀦𑀼𑀮𑁄𑀫𑀜𑀸𑀡𑀁 𑀲𑀩𑁆𑀩𑁄𑀴𑀸𑀭𑀺𑀓𑀁, 𑀤𑀼𑀢𑀺𑀬𑀁 𑀢𑀢𑁄 𑀦𑀸𑀢𑀺𑀑𑀴𑀸𑀭𑀺𑀓𑀁, 𑀢𑀢𑀺𑀬𑀁 𑀢𑀢𑁄 𑀦𑀸𑀢𑀺𑀑𑀴𑀸𑀭𑀺𑀓𑀁 𑀢𑀫𑀁 𑀅𑀦𑁆𑀢𑀭𑀥𑀸𑀧𑁂𑀢𑀺. 𑀅𑀣 𑀯𑀸 𑀩𑀮𑀸𑀦𑀼𑀭𑀽𑀧𑁂𑀦𑀸𑀢𑀺 𑀳𑁂𑀝𑁆𑀞𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀆𑀳𑀺𑀢𑀩𑀮𑀸𑀦𑀼𑀭𑀽𑀧𑁂𑀦. 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀳𑀺 𑀅𑀦𑀼𑀮𑁄𑀫𑀜𑀸𑀡𑀲𑁆𑀲𑀸𑀧𑀺 𑀫𑀕𑁆𑀕𑀜𑀸𑀡𑀲𑁆𑀲 𑀯𑀺𑀬 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀲𑀺𑀤𑁆𑀥𑁄 𑀅𑀢𑁆𑀣𑁂𑀯 𑀫𑀼𑀤𑀼𑀢𑀺𑀓𑁆𑀔𑀢𑀸𑀯𑀺𑀲𑁂𑀲𑁄. 𑀧𑀮𑀺𑀩𑁄𑀥𑀢𑁄 𑀉𑀧𑀝𑁆𑀞𑀸𑀢𑀺 𑀧𑀮𑀺𑀩𑁄𑀥𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀢𑀫𑀲𑁆𑀲 𑀅𑀦𑁆𑀢𑀭𑀥𑀸𑀧𑀺𑀢𑀢𑁆𑀢𑀸. ‘‘𑀆𑀲𑁂𑀯𑀦𑀦𑁆𑀢𑁂’’𑀢𑀺 𑀇𑀫𑀺𑀦𑀸 𑀤𑀼𑀢𑀺𑀬𑀲𑁆𑀲 𑀯𑀸 𑀢𑀢𑀺𑀬𑀲𑁆𑀲 𑀯𑀸 𑀅𑀦𑀼𑀮𑁄𑀫𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀕𑁄𑀢𑁆𑀭𑀪𑀼𑀜𑀸𑀡𑀼𑀧𑁆𑀧𑀢𑁆𑀢𑀺, 𑀦 𑀧𑀞𑀫𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺 𑀢𑀲𑁆𑀲 𑀅𑀦𑀸𑀲𑁂𑀯𑀦𑀢𑁆𑀢𑀸. 𑀦 𑀳𑀺 𑀅𑀮𑀤𑁆𑀥𑀸𑀲𑁂𑀯𑀦𑀁 𑀕𑁄𑀢𑁆𑀭𑀪𑀼𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀦𑀺𑀫𑀺𑀢𑁆𑀢𑀸𑀤𑀺𑀯𑀺𑀭𑀳𑀢𑁄, 𑀢𑀩𑁆𑀩𑀺𑀥𑀼𑀭𑀢𑁄 𑀘 ‘‘𑀅𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀩𑁆𑀩𑀸𑀦𑀁 𑀯𑀺𑀲𑁂𑀲𑀺𑀢𑀁. 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀦𑁆𑀢𑀺 𑀅𑀭𑀺𑀬𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀁 𑀧𑀼𑀣𑀼𑀚𑁆𑀚𑀦𑀲𑀫𑀜𑁆𑀜𑀁. 𑀕𑁄𑀢𑁆𑀢𑀦𑁆𑀢𑀺 𑀳𑀺 𑀏𑀓𑀯𑀁𑀲𑀚𑀸𑀦𑀁 𑀲𑀫𑀸𑀦𑀸 𑀲𑀫𑀜𑁆𑀜𑀸, 𑀏𑀯𑀁 𑀇𑀥𑀸𑀧𑀻𑀢𑀺. 𑀧𑀼𑀣𑀼𑀚𑁆𑀚𑀦𑀲𑀗𑁆𑀔𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀯𑀢𑁆𑀣𑀼𑀁. 𑀏𑀓𑀦𑁆𑀢𑀺𑀓𑀢𑀸𑀬 𑀏𑀓𑀯𑀸𑀭𑀫𑁂𑀯 𑀘 𑀉𑀧𑁆𑀧𑀚𑁆𑀚𑀦𑀢𑁄 𑀅𑀧𑀼𑀦𑀭𑀸𑀯𑀝𑁆𑀝𑀓𑀁.

𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂𑀢𑀺 𑀅𑀲𑀗𑁆𑀔𑀢𑀥𑀸𑀢𑀼𑀬𑀸 𑀩𑀳𑀺𑀪𑀸𑀯𑀢𑁄 𑀩𑀳𑀺𑀤𑁆𑀥𑀸𑀲𑀜𑁆𑀜𑀺𑀢𑀸 𑀲𑀗𑁆𑀔𑀸𑀭𑀕𑀢𑀸 𑀯𑀼𑀝𑁆𑀞𑀸𑀦𑀪𑀽𑀢𑁂 𑀯𑀺𑀯𑀝𑁆𑀝𑀦𑁂 𑀦𑀺𑀧𑁆𑀨𑀚𑁆𑀚𑀫𑀸𑀦𑁂 𑀧𑀜𑁆𑀜𑀸. 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀅𑀪𑀺𑀪𑀯𑀢𑀺. 𑀧𑀓𑁆𑀔𑀦𑁆𑀤𑀢𑀻𑀢𑀺 𑀅𑀦𑀼𑀧𑀯𑀺𑀲𑀢𑀺. 𑀏𑀢𑁆𑀣 𑀘 ‘‘𑀉𑀧𑁆𑀧𑀸𑀤𑀁 𑀅𑀪𑀺𑀪𑀼𑀬𑁆𑀬𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀸𑀪𑀺𑀪𑀯𑀦𑀁 𑀢𑀤𑀢𑀺𑀓𑁆𑀓𑀫𑀦𑀫𑀸𑀳. ‘‘𑀅𑀦𑀼𑀧𑁆𑀧𑀸𑀤𑀁 𑀧𑀓𑁆𑀔𑀦𑁆𑀤𑀢𑀻’’𑀢𑀺𑀆𑀤𑀺𑀦𑀸 𑀅𑀭𑀺𑀬𑀕𑁄𑀢𑁆𑀢𑀪𑀸𑀯𑀦𑀁 𑀢𑀤𑀼𑀪𑀬𑀪𑀸𑀯𑀢𑁄.

𑁮𑁦𑁭. 𑀏𑀓𑀸𑀯𑀚𑁆𑀚𑀦𑀸𑀦𑀁 𑀦𑀸𑀦𑀸𑀯𑀻𑀣𑀺𑀢𑀸 𑀦𑀢𑁆𑀣𑀻𑀢𑀺 𑀦 𑀢𑀁𑀦𑀺𑀲𑁂𑀥𑀦𑀸𑀬 𑀏𑀓𑀯𑀻𑀣𑀺𑀕𑁆𑀕𑀳𑀡𑀁, 𑀅𑀣 𑀔𑁄 𑀦𑀸𑀦𑀸𑀭𑀫𑁆𑀫𑀡𑀸𑀦𑀫𑁆𑀧𑀺 𑀏𑀓𑀸𑀯𑀚𑁆𑀚𑀦𑀸𑀦𑀁 𑀦𑀸𑀦𑀸𑀯𑀻𑀣𑀺𑀢𑀸 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀳𑀸𑀫𑀸𑀢𑀺𑀓𑀦𑁆𑀢𑀺 𑀫𑀳𑀦𑁆𑀢𑀁 𑀉𑀤𑀓𑀯𑀸𑀳𑀓𑀁. 𑀮𑀗𑁆𑀖𑀺𑀢𑁆𑀯𑀸𑀢𑀺 𑀅𑀦𑁄𑀢𑀭𑀦𑁆𑀢𑁄 𑀏𑀯 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀉𑀮𑁆𑀮𑀗𑁆𑀖𑀺𑀢𑁆𑀯𑀸𑀢𑀺 𑀉𑀧𑀭𑀺𑀪𑀸𑀕𑁂𑀦𑁂𑀯 𑀮𑀗𑁆𑀖𑀺𑀢𑁆𑀯𑀸. 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀢𑀸 𑀉𑀢𑁆𑀢𑀭𑀼𑀢𑁆𑀢𑀭𑀯𑀺𑀲𑀺𑀝𑁆𑀞𑀸 𑀦𑀺𑀦𑁆𑀦𑀢𑀸𑀯.

𑀅𑀝𑁆𑀞𑀳𑀺 𑀜𑀸𑀡𑁂𑀳𑀺 𑀅𑀦𑀼𑀓𑁆𑀓𑀫𑁂𑀦 𑀆𑀳𑀺𑀢𑀯𑀺𑀲𑁂𑀲𑀁 𑀅𑀦𑀼𑀮𑁄𑀫𑀜𑀸𑀡𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀲𑁆𑀲 𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀁 𑀚𑀸𑀢𑀦𑁆𑀢𑀺 𑀆𑀳 ‘‘𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀦𑀸 𑀯𑁂𑀕𑁂𑀦 𑀥𑀸𑀯𑀺𑀢𑁆𑀯𑀸’’𑀢𑀺. 𑀭𑀽𑀧𑀁 𑀅𑀦𑁂𑀓𑀲𑀦𑁆𑀢𑀢𑀺𑀲𑀫𑁆𑀩𑀦𑁆𑀥𑀢𑀸𑀬 𑀅𑀦𑁂𑀓𑀯𑀝𑁆𑀝𑀭𑀘𑀺𑀢𑀸 𑀭𑀚𑁆𑀚𑀼 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀭𑀚𑁆𑀚𑀼𑀁 𑀯𑀸’’𑀢𑀺. 𑀅𑀢𑁆𑀢𑀪𑀸𑀯𑀲𑁆𑀲 𑀭𑀼𑀓𑁆𑀔𑀝𑁆𑀞𑀸𑀦𑀺𑀬𑀢𑀸𑀬 𑀯𑀼𑀢𑁆𑀢𑀢𑁆𑀢𑀸 𑀢𑀁𑀲𑀫𑁆𑀩𑀦𑁆𑀥𑀤𑀡𑁆𑀟𑀝𑁆𑀞𑀸𑀦𑀺𑀬𑀢𑀸 𑀯𑁂𑀤𑀦𑀸𑀤𑀻𑀲𑀼 𑀏𑀓𑀲𑁆𑀲𑁂𑀯 𑀬𑀼𑀢𑁆𑀢𑀸, 𑀦 𑀯𑁂𑀤𑀦𑀸𑀤𑀺𑀲𑀫𑀼𑀤𑀸𑀬𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀯𑁂𑀤𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀤𑀡𑁆𑀟𑀁 𑀯𑀸’’𑀢𑀺. 𑀅𑀦𑀼𑀮𑁄𑀫𑀸𑀯𑀚𑁆𑀚𑀦𑁂𑀦𑀸𑀢𑀺 𑀅𑀦𑀼𑀮𑁄𑀫𑀲𑁆𑀲 𑀆𑀯𑀚𑁆𑀚𑀦𑁂𑀦. 𑀬𑁂𑀦 𑀆𑀯𑀚𑁆𑀚𑀦𑁂𑀦 𑀅𑀦𑀼𑀮𑁄𑀫𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀢𑀁 𑀆𑀭𑀫𑁆𑀫𑀡𑀁. ‘‘𑀧𑀞𑀫𑁂𑀦 𑀅𑀦𑀼𑀮𑁄𑀫𑀘𑀺𑀢𑁆𑀢𑁂𑀦 𑀉𑀮𑁆𑀮𑀗𑁆𑀖𑀺𑀢𑁆𑀯𑀸’’𑀢𑀺 𑀇𑀤𑀁 𑀲𑀓𑁆𑀓𑀸𑀬𑀢𑀻𑀭𑀲𑁆𑀲 𑀢𑀲𑁆𑀲 𑀅𑀢𑀺𑀓𑁆𑀓𑀫𑀦𑀸𑀭𑀫𑁆𑀪𑀢𑀸𑀬 𑀯𑀼𑀢𑁆𑀢𑀁. ‘‘𑀤𑀼𑀢𑀺𑀬𑁂𑀦 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀫𑀸𑀦𑀲𑁄’’𑀢𑀺 𑀇𑀤𑀁 𑀢𑀲𑁆𑀲 𑀲𑀩𑁆𑀩𑀲𑀗𑁆𑀔𑀸𑀭𑀢𑁄 𑀲𑀸𑀢𑀺𑀲𑀬𑀁 𑀅𑀮𑀕𑁆𑀕𑀁 𑀳𑀼𑀢𑁆𑀯𑀸 𑀯𑀺𑀲𑀗𑁆𑀔𑀸𑀭𑁂 𑀅𑀮𑁆𑀮𑀻𑀦𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀢𑀢𑀺 𑀬𑁄𑀕𑀸𑀯𑀘𑀭𑁄. 𑀏𑀓𑀸𑀭𑀫𑁆𑀫𑀡𑁂𑀢𑀺 𑀏𑀓𑀯𑀸𑀭𑀁𑀬𑁂𑀯 𑀆𑀮𑀫𑁆𑀩𑀺𑀢𑁂 𑀆𑀭𑀫𑁆𑀫𑀡𑁂. 𑀢𑁂𑀦𑀸𑀳 ‘‘𑀅𑀮𑀤𑁆𑀥𑀸𑀲𑁂𑀯𑀦𑀢𑀸𑀬𑀸’’𑀢𑀺. 𑀢𑁂𑀦 𑀏𑀓𑀸𑀭𑀫𑁆𑀫𑀡𑁂 𑀆𑀲𑁂𑀯𑀦𑀸 𑀉𑀧𑀓𑀸𑀭𑀯𑀢𑀻, 𑀦 𑀢𑀣𑀸 𑀦𑀸𑀦𑀸𑀭𑀫𑁆𑀫𑀡𑁂𑀢𑀺 𑀤𑀲𑁆𑀲𑁂𑀢𑀺.

𑁮𑁦𑁮. 𑀢𑀢𑁆𑀭𑀸𑀢𑀺 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀽𑀦𑀁 𑀇𑀢𑀭𑀻𑀢𑀭𑀓𑀺𑀘𑁆𑀘𑀸𑀓𑀭𑀡𑁂. 𑀦𑀓𑁆𑀔𑀢𑁆𑀢𑀬𑁄𑀕𑀦𑁆𑀢𑀺 𑀦𑀓𑁆𑀔𑀢𑁆𑀢𑁂𑀦 𑀘𑀦𑁆𑀤𑀲𑁆𑀲 𑀬𑁄𑀕𑀁, 𑀦𑀓𑁆𑀔𑀢𑁆𑀢𑀬𑁄𑀕𑀯𑀺𑀪𑀸𑀯𑀦𑀺𑀬𑀁 𑀯𑀸 𑀓𑀸𑀮𑀁, 𑀤𑀺𑀯𑀲𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁.

𑀏𑀯𑀁 𑀦𑀺𑀩𑁆𑀩𑀢𑁆𑀢𑀸𑀳𑀻𑀢𑀺 𑀅𑀦𑀼𑀮𑁄𑀫𑀜𑀸𑀡𑀸𑀦𑀺 𑀯𑀺𑀬 𑀲𑀗𑁆𑀔𑀸𑀭𑁂 𑀅𑀦𑀸𑀮𑀫𑁆𑀩𑀺𑀢𑁆𑀯𑀸 𑀅𑀳𑀁 𑀯𑀺𑀬 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀯𑀢𑁆𑀢𑀸𑀳𑀻𑀢𑀺 𑀫𑀕𑁆𑀕𑀲𑁆𑀲 𑀕𑁄𑀢𑁆𑀭𑀪𑀼𑀦𑀸 𑀤𑀺𑀦𑁆𑀦𑀲𑀜𑁆𑀜𑀸𑀫𑀼𑀜𑁆𑀘𑀦𑀁, 𑀅𑀦𑀼𑀩𑀦𑁆𑀥𑀦𑀜𑁆𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀓𑀭𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁮𑁦𑁯. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀕𑁄𑀢𑁆𑀭𑀪𑀼𑀦𑀸 𑀤𑀺𑀦𑁆𑀦𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀬 𑀢𑁂𑀦 𑀕𑀳𑀺𑀢𑀸𑀭𑀫𑁆𑀫𑀡𑁂𑀬𑁂𑀯 𑀯𑀢𑁆𑀢𑀺𑀢𑁆𑀯𑀸 𑀫𑀕𑁆𑀕𑀲𑁆𑀲 𑀮𑁄𑀪𑀓𑁆𑀔𑀦𑁆𑀥𑀸𑀤𑀺𑀦𑀺𑀩𑁆𑀩𑀺𑀚𑁆𑀛𑀦𑁂. 𑀉𑀲𑀼𑀁 𑀅𑀲𑀢𑀺 𑀔𑀺𑀧𑁆𑀧𑀢𑀻𑀢𑀺 𑀇𑀲𑁆𑀲𑀸𑀲𑁄, 𑀥𑀦𑀼𑀕𑁆𑀕𑀳𑁄. 𑀲𑀭𑀕𑁄𑀘𑀭𑀝𑁆𑀞𑀸𑀦𑀁 𑀦𑀸𑀫 𑀅𑀝𑁆𑀞𑀉𑀲𑀪𑀫𑀢𑁆𑀢𑀁. 𑀢𑀜𑁆𑀘 𑀔𑁄 𑀤𑀽𑀭𑁂 𑀧𑀸𑀢𑀺𑀦𑁄 𑀫𑀚𑁆𑀛𑀺𑀫𑀧𑀼𑀭𑀺𑀲𑀲𑁆𑀲 𑀯𑀲𑁂𑀦 𑀘𑀢𑀼𑀳𑀢𑁆𑀣𑀸𑀬 𑀬𑀝𑁆𑀞𑀺𑀬𑀸 𑀯𑀻𑀲𑀢𑀺𑀬𑀝𑁆𑀞𑀺 𑀉𑀲𑀪𑀁, 𑀢𑁂𑀦 𑀅𑀝𑁆𑀞𑀉𑀲𑀪𑀫𑀢𑁆𑀢𑁂 𑀧𑀤𑁂𑀲𑁂 𑀳𑀢𑁆𑀣𑀯𑀲𑁂𑀦 𑀘𑀢𑁆𑀢𑀸𑀭𑀻𑀲𑀸𑀥𑀺𑀓𑀙𑀲𑀢𑀳𑀢𑁆𑀣𑁂 𑀧𑀤𑁂𑀲𑁂. 𑀨𑀮𑀓𑀲𑀢𑀦𑁆𑀢𑀺 𑀅𑀲𑀦𑀲𑀸𑀭𑀫𑀬𑀁 𑀨𑀮𑀓𑀲𑀢𑀁. 𑀓𑀼𑀫𑁆𑀪𑀓𑀸𑀭𑀘𑀓𑁆𑀓𑀲𑀤𑀺𑀲𑁂 𑀘𑀓𑁆𑀓𑀬𑀦𑁆𑀢𑁂. 𑀆𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀪𑀫𑁂𑀢𑁆𑀯𑀸. 𑀤𑀡𑁆𑀟𑀓𑀖𑀝𑁆𑀝𑀦𑀸𑀬 𑀉𑀧𑁆𑀧𑀸𑀤𑁂𑀢𑀩𑁆𑀩𑀲𑀤𑁆𑀤𑁄 𑀤𑀡𑁆𑀟𑀓𑀲𑀜𑁆𑀜𑀸. 𑀨𑀮𑀓𑀲𑀢𑀯𑀺𑀦𑀺𑀯𑀺𑀚𑁆𑀛𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀤𑀡𑁆𑀟𑀓𑀲𑀜𑁆𑀜𑀸 𑀯𑀺𑀬 𑀕𑁄𑀢𑁆𑀭𑀪𑀼𑀜𑀸𑀡𑀁 𑀮𑁄𑀪𑀓𑁆𑀔𑀦𑁆𑀥𑀸𑀤𑀺𑀦𑀺𑀩𑁆𑀩𑀺𑀚𑁆𑀛𑀦𑀲𑁆𑀲 𑀫𑀕𑁆𑀕𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄. 𑀇𑀲𑁆𑀲𑀸𑀲𑁄 𑀯𑀺𑀬 𑀫𑀕𑁆𑀕𑀜𑀸𑀡𑀁 𑀦𑀺𑀩𑁆𑀩𑀺𑀚𑁆𑀛𑀺𑀢𑀩𑁆𑀩𑀦𑀺𑀯𑀺𑀚𑁆𑀛𑀦𑀢𑁄.

𑁮𑁧𑁦. 𑀅𑀝𑁆𑀞𑀫𑀪𑀯𑀢𑁄 𑀧𑀝𑁆𑀞𑀸𑀬 𑀦𑀺𑀩𑁆𑀩𑀢𑁆𑀢𑀦𑀓𑀁 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀲𑀫𑀼𑀤𑁆𑀤𑀁 𑀲𑁄𑀲𑁂𑀢𑀺. 𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁 𑀳𑀺𑀭𑀺𑀥𑀦𑀁 𑀑𑀢𑁆𑀢𑀧𑁆𑀧𑀥𑀦𑀁 𑀲𑀼𑀢𑀥𑀦𑀁 𑀘𑀸𑀕𑀥𑀦𑀁 𑀧𑀜𑁆𑀜𑀸𑀥𑀦𑀦𑁆𑀢𑀺 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀅𑀭𑀺𑀬𑀥𑀦𑀸𑀦𑀁. 𑀲𑀫𑁆𑀫𑀼𑀔𑀻𑀪𑀸𑀯𑀦𑁆𑀢𑀺 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀺𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀯𑁂𑀭𑀸𑀦𑀺 𑀘𑁂𑀯 𑀧𑀜𑁆𑀘𑀯𑀻𑀲𑀢𑀺𑀫𑀳𑀸𑀪𑀬𑀸𑀦𑀺 𑀘𑀸𑀢𑀺 𑀲𑀩𑁆𑀩𑀯𑁂𑀭𑀪𑀬𑀸𑀦𑀺. 𑀅𑀜𑁆𑀜𑁂𑀲𑀜𑁆𑀘 𑀭𑀢𑀦𑀢𑁆𑀢𑀬𑁂 𑀦𑀺𑀯𑀺𑀝𑁆𑀞𑀲𑀤𑁆𑀥𑀸𑀤𑀻𑀦𑀁. 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀤𑁆𑀤𑁄 𑀢𑀤𑁂𑀓𑀤𑁂𑀲𑁂𑀧𑀺 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡’’𑀦𑁆𑀢𑀺.

𑀧𑀞𑀫𑀫𑀕𑁆𑀕𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀲𑁄𑀢𑀸𑀧𑀦𑁆𑀦𑀧𑀼𑀕𑁆𑀕𑀮𑀓𑀣𑀸𑀯𑀡𑁆𑀡𑀦𑀸

𑁮𑁧𑁧. 𑀢𑀲𑁆𑀲𑁂𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀲𑁆𑀲. 𑀓𑀸𑀫𑀜𑁆𑀘𑁂𑀢𑁆𑀣 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀤𑁆𑀯𑁂, 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀢𑀻𑀡𑀺 𑀨𑀮𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀅𑀯𑀺𑀲𑁂𑀲𑀢𑁄 𑀧𑀦 𑀕𑀳𑀺𑀢𑀲𑁆𑀲 𑀫𑀕𑁆𑀕𑀲𑁆𑀲 𑀯𑀲𑁂𑀦 ‘‘𑀤𑁆𑀯𑁂, 𑀢𑀻𑀡𑀺 𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑀸𑀥𑀺𑀫𑀸𑀦𑀦𑁆𑀢𑀭𑀺𑀓𑀜𑁆𑀜𑀫𑀸𑀳𑀽𑀢𑀺 𑀬𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀲𑀫𑀦𑀦𑁆𑀢𑀭𑀁 𑀦𑀺𑀬𑀫𑁂𑀦𑁂𑀯 𑀨𑀮𑀧𑁆𑀧𑀤𑀸𑀦𑀢𑁄 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀻𑀢𑀺 𑀆𑀳𑀽𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀭𑀫𑁂𑀯 𑀧𑀯𑀢𑁆𑀢𑀦𑀓𑀁 𑀨𑀮𑀁 𑀅𑀦𑀦𑁆𑀢𑀭𑀁, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄, 𑀢𑀁 𑀯𑀸 𑀧𑀬𑁄𑀚𑀦𑀁 𑀏𑀢𑀲𑁆𑀲𑀸𑀢𑀺 𑀆𑀦𑀦𑁆𑀢𑀭𑀺𑀓𑁄, 𑀫𑀕𑁆𑀕𑁄.

𑀆𑀲𑁂𑀯𑀦𑀦𑁆𑀢𑁂𑀢𑀺 𑀆𑀲𑁂𑀯𑀦𑀢𑁄 𑀅𑀦𑁆𑀢𑁂, 𑀆𑀲𑁂𑀯𑀦𑀮𑀸𑀪𑀺𑀦𑁄 𑀅𑀦𑀼𑀮𑁄𑀫𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀮𑀤𑁆𑀥𑀸𑀲𑁂𑀯𑀦𑀫𑁂𑀯 𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀁 𑀉𑀧𑁆𑀧𑀸𑀤𑁂𑀢𑀺. 𑀉𑀧𑀭𑀺 𑀧𑀦 𑀙, 𑀲𑀢𑁆𑀢 𑀯𑀸 𑀚𑀯𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀘𑀢𑁆𑀢𑀸𑀭𑀺 𑀨𑀮𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑀤𑁂𑀬𑁆𑀬𑀸𑀢𑀺 𑀆𑀳 ‘‘𑀲𑀢𑁆𑀢𑀘𑀺𑀢𑁆𑀢𑀧𑀭𑀫𑀸 𑀘 𑀏𑀓𑀸𑀯𑀚𑁆𑀚𑀦𑀯𑀻𑀣𑀻’’𑀢𑀺.

𑀢𑀁 𑀧𑀦 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁮𑁧𑁨. 𑀏𑀢𑁆𑀢𑀸𑀯𑀢𑀸𑀢𑀺 𑀧𑀞𑀫𑀫𑀕𑁆𑀕𑀸𑀦𑀦𑁆𑀢𑀭𑀁 𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀫𑀓𑁆𑀓𑁂𑀦. 𑀪𑀼𑀲𑀁 𑀧𑀫𑀢𑁆𑀢𑁄𑀧𑀻𑀢𑀺 𑀤𑁂𑀯𑀭𑀚𑁆𑀚𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀸𑀤𑀺𑀧𑀫𑀸𑀤𑀝𑁆𑀞𑀸𑀦𑀁 𑀆𑀕𑀫𑁆𑀫 𑀪𑀼𑀲𑀁 𑀧𑀫𑀢𑁆𑀢𑁄𑀧𑀺. 𑀬𑁂𑀲𑀁 𑀬𑀣𑀸𑀯𑀼𑀢𑁆𑀢𑀆𑀯𑀚𑁆𑀚𑀦𑀚𑀯𑀦𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀏𑀲 𑀲𑁄𑀢𑀸𑀧𑀦𑁆𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁂𑀦𑁂𑀯 𑀧𑀲𑀗𑁆𑀕𑁂𑀦 𑀲𑁂𑀲𑀸𑀦𑀁 𑀅𑀭𑀺𑀬𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄𑀬𑁂𑀯 𑀘𑁂𑀲𑁄, 𑀬𑀤𑀺𑀤𑀁 𑀧𑀜𑁆𑀘𑀦𑁆𑀦𑀁, 𑀘𑀢𑀼𑀦𑁆𑀦𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀁 𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀪𑀸𑀯𑁂𑀦𑁂𑀯𑀸’’𑀢𑀺 𑀏𑀢𑁂𑀦 𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑀢𑁆𑀣𑀢𑀸 𑀓𑀲𑁆𑀲𑀘𑀺 𑀳𑁄𑀢𑀺, 𑀓𑀲𑁆𑀲𑀘𑀺 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀮𑁄𑀪𑁄 𑀏𑀯 𑀮𑁄𑀪𑀥𑀫𑁆𑀫𑁄.

𑀤𑀼𑀢𑀺𑀬𑀫𑀕𑁆𑀕𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁧𑁩. 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀪𑀸𑀯𑀸𑀬𑀸𑀢𑀺 𑀏𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀢𑀦𑀼𑀪𑀸𑀯𑀢𑁆𑀣𑀁. 𑀢𑀢𑁆𑀣 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀢𑀦𑀼𑀪𑀸𑀯𑁄 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀬𑀸, 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀸𑀬 𑀘. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀳𑀺 𑀯𑀝𑁆𑀝𑀸𑀦𑀼𑀲𑀸𑀭𑀺𑀫𑀳𑀸𑀚𑀦𑀲𑁆𑀲 𑀯𑀺𑀬 𑀓𑀺𑀮𑁂𑀲𑀸 𑀅𑀪𑀺𑀡𑁆𑀳𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀤𑀸𑀘𑀺 𑀓𑀤𑀸𑀘𑀺 𑀯𑀺𑀭𑀴𑀸𑀓𑀸𑀭𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀣𑀸 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀫𑀤𑁆𑀤𑀦𑁆𑀢𑀸 𑀙𑀸𑀤𑁂𑀦𑁆𑀢𑀸 𑀅𑀦𑁆𑀥𑀓𑀸𑀭𑀁 𑀓𑀭𑁄𑀦𑁆𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀤𑁆𑀯𑀻𑀳𑀺 𑀧𑀦 𑀫𑀕𑁆𑀕𑁂𑀳𑀺 𑀧𑀳𑀻𑀦𑀢𑁆𑀢𑀸 𑀫𑀦𑁆𑀤𑀫𑀦𑁆𑀤𑀸 𑀢𑀦𑀼𑀓𑀸𑀓𑀸𑀭𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀲𑀓𑀤𑀸𑀕𑀸𑀫𑀺𑀲𑁆𑀲𑀸𑀧𑀺 𑀓𑀺𑀮𑁂𑀲𑀸 𑀘𑀺𑀭𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀩𑀳𑀮𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀣𑀸 𑀳𑀺𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄 𑀤𑀺𑀲𑁆𑀲𑀦𑁆𑀢𑀻’’𑀢𑀺, 𑀢𑀁 𑀅𑀓𑀸𑀭𑀡𑀁 𑀯𑀢𑁆𑀣𑀼𑀧𑀝𑀺𑀲𑁂𑀯𑀦𑁂𑀦 𑀯𑀺𑀦𑀸𑀧𑀺 𑀕𑀩𑁆𑀪𑀕𑁆𑀕𑀳𑀡𑀲𑀩𑁆𑀪𑀸𑀯𑀢𑁄. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀢𑁂𑀲𑀁 𑀢𑀦𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀸𑀬𑀸𑀢𑀺 𑀕𑀡𑀦𑀯𑀲𑁂𑀦𑀧𑀺 𑀤𑀼𑀢𑀺𑀬𑀸𑀬, 𑀉𑀧𑁆𑀧𑀢𑁆𑀢𑀺𑀯𑀲𑁂𑀦𑀧𑀺 𑀤𑀼𑀢𑀺𑀬𑀸𑀬 𑀪𑀽𑀫𑀺𑀬𑀸. 𑀧𑀢𑁆𑀢𑀺𑀬𑀸𑀢𑀺 𑀲𑀸𑀫𑀜𑁆𑀜𑀨𑀮𑀲𑁆𑀲 𑀧𑀝𑀺𑀮𑀸𑀪𑀸𑀬. 𑀢𑀜𑁆𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀪𑀸𑀯𑀢𑁄 𑀢𑁂 𑀥𑀫𑁆𑀫𑀸 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀽𑀫𑀺. 𑀬𑀲𑁆𑀫𑀸 𑀯𑀸 𑀲𑀫𑀸𑀦𑁂𑀧𑀺 𑀮𑁄𑀓𑀼𑀢𑁆𑀢𑀭𑀪𑀸𑀯𑁂 𑀲𑀬𑀫𑁆𑀧𑀺 𑀪𑀯𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀅𑀧𑀸𑀢𑀼𑀪𑀽𑀢𑀁, 𑀢𑀲𑁆𑀫𑀸𑀧𑀺 ‘‘𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑁄𑀕𑀁 𑀓𑀭𑁄𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀪𑀺𑀬𑁄𑀕𑀁 𑀓𑀭𑁄𑀢𑀺. ‘‘𑀦𑀯𑀳𑀸𑀓𑀸𑀭𑁂𑀳𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺 𑀪𑀯𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁬𑁯𑁯) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀤𑀕𑁆𑀕𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀢𑀁 𑀲𑀫𑁆𑀧𑀸𑀤𑁂𑀢𑀺, 𑀢𑀤𑀕𑁆𑀕𑁂𑀦 𑀩𑀮𑀸𑀦𑀺, 𑀩𑁄𑀚𑁆𑀛𑀗𑁆𑀕𑀸𑀦𑀺 𑀘 𑀧𑀝𑀼𑀢𑀭𑀪𑀸𑀯𑀁 𑀆𑀧𑀸𑀤𑁂𑀦𑁆𑀢𑁄 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀮𑀓𑁆𑀔𑀡𑀢𑁆𑀢𑀬𑀢𑀻𑀭𑀡𑀯𑀲𑁂𑀦 𑀜𑀸𑀡𑁂𑀦 𑀧𑀭𑀺𑀫𑀤𑁆𑀤𑀢𑀺. 𑀢𑀢𑁆𑀣 𑀅𑀧𑀭𑀸𑀧𑀭𑀁 𑀜𑀸𑀡𑀁 𑀘𑀸𑀭𑁂𑀦𑁆𑀢𑁄 𑀧𑀭𑀺𑀯𑀢𑁆𑀢𑁂𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀑𑀕𑀸𑀳𑀢𑀻’’𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀻𑀦𑀁 𑀉𑀧𑁆𑀧𑀸𑀤𑀦𑁂 𑀯𑀼𑀢𑁆𑀢𑀦𑀬𑁂𑀦. 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀦𑁆𑀢𑀺 𑀏𑀢𑁆𑀣 𑀕𑁄𑀢𑁆𑀭𑀪𑀼 𑀯𑀺𑀬 𑀕𑁄𑀢𑁆𑀭𑀪𑀼. 𑀧𑀞𑀫𑀫𑀕𑁆𑀕𑀧𑀼𑀭𑁂𑀘𑀸𑀭𑀺𑀓𑀜𑀸𑀡𑀜𑁆𑀳𑀺 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀸𑀪𑀺𑀪𑀯𑀦𑀢𑁄, 𑀅𑀭𑀺𑀬𑀕𑁄𑀢𑁆𑀢𑀪𑀯𑀦𑀢𑁄 𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀕𑁄𑀢𑁆𑀭𑀪𑀽𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀁 𑀧𑀦 𑀢𑀁𑀲𑀤𑀺𑀲𑀢𑀸𑀬 𑀧𑀭𑀺𑀬𑀸𑀬𑀢𑁄 𑀕𑁄𑀢𑁆𑀭𑀪𑀼. 𑀏𑀓𑀘𑁆𑀘𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀺𑀬𑀸, 𑀧𑀦 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀆𑀭𑀫𑁆𑀫𑀡𑀓𑀭𑀡𑀢𑁄 𑀘 𑀯𑁄𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑀧𑀝𑁆𑀞𑀸𑀦𑁂 ‘‘𑀅𑀦𑀼𑀮𑁄𑀫𑀁 𑀯𑁄𑀤𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸 𑁧.𑁧.𑁪𑁧𑁭). 𑀬𑀲𑁆𑀫𑀸 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀉𑀧𑁆𑀧𑀸𑀤𑀸𑀤𑀺𑀅𑀪𑀺𑀪𑀯𑀦𑀢𑁆𑀣𑀁 𑀉𑀧𑀸𑀤𑀸𑀬 ‘‘𑀅𑀝𑁆𑀞 𑀕𑁄𑀢𑁆𑀭𑀪𑀼𑀥𑀫𑁆𑀫𑀸 𑀲𑀫𑀸𑀥𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀤𑀲 𑀕𑁄𑀢𑁆𑀭𑀪𑀼𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁬𑁦) 𑀕𑁄𑀢𑁆𑀭𑀪𑀼𑀦𑀸𑀫𑁂𑀦𑁂𑀯𑁂𑀢𑀁 𑀆𑀕𑀢𑀁, 𑀢𑀲𑁆𑀫𑀸 𑀇𑀥𑀸𑀧𑀺 ‘‘𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀤𑀼𑀢𑀺𑀬𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀢𑀢𑀺𑀬𑀫𑀕𑁆𑀕𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁧𑁪. 𑀲𑀓𑀺𑀤𑁂𑀯𑀸𑀢𑀺 𑀏𑀓𑀯𑀸𑀭𑀁𑀬𑁂𑀯. ‘‘𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀘𑀢𑁆𑀢𑀸𑀭𑁄 𑀯𑀚𑁆𑀚𑁂𑀢𑁆𑀯𑀸 𑀏𑀓𑁄𑀯 𑀕𑀳𑀺𑀢𑁄. 𑀏𑀓𑀘𑁆𑀘𑁄 𑀇𑀥 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀇𑀥𑁂𑀯 𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀇𑀥 𑀦 𑀕𑀳𑀺𑀢𑀸. 𑀬𑁄 𑀧𑀦 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀬𑀸𑀯𑀢𑀸𑀬𑀼𑀓𑀁 𑀯𑀲𑀺𑀢𑁆𑀯𑀸 𑀧𑀼𑀦 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀏𑀓𑁄𑀯 𑀇𑀥 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀸𑀬𑀸𑀢𑀺 𑀢𑁂𑀲𑀁𑀬𑁂𑀯 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑀦𑀼𑀓𑀢𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀸𑀬. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀓𑀸𑀫𑀪𑀯𑀲𑁆𑀲 𑀅𑀦𑀸𑀕𑀫𑀦𑀢𑁄 𑀅𑀦𑀸𑀕𑀸𑀫𑀻.

𑀢𑀢𑀺𑀬𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁧𑁫. 𑀑𑀧𑀧𑀸𑀢𑀺𑀓𑁄𑀢𑀺 𑀉𑀧𑀧𑀸𑀢𑀬𑁄𑀦𑀺𑀓𑁄. 𑀇𑀫𑀺𑀦𑀸𑀲𑁆𑀲 𑀕𑀩𑁆𑀪𑀲𑁂𑀬𑁆𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀢𑀢𑁆𑀣 𑀲𑀼𑀤𑁆𑀥𑀸𑀯𑀸𑀲𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀸. 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀢𑀲𑁆𑀫𑀸 𑀮𑁄𑀓𑀸 𑀇𑀥 𑀅𑀦𑀸𑀯𑀢𑁆𑀢𑀦𑀲𑀪𑀸𑀯𑁄, 𑀩𑀼𑀤𑁆𑀥𑀤𑀲𑁆𑀲𑀦𑀥𑀫𑁆𑀫𑀲𑁆𑀲𑀯𑀦𑀸𑀦𑀁 𑀧𑀦𑀢𑁆𑀣𑀸𑀬 𑀆𑀕𑀫𑀦𑀁 𑀳𑁄𑀢𑀺𑀬𑁂𑀯.

𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀸𑀬𑀸𑀢𑀺 𑀏𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀁 𑀦𑀺𑀲𑁆𑀲𑁂𑀲𑀧𑁆𑀧𑀚𑀳𑀦𑀢𑁆𑀣𑀸𑀬. 𑀢𑀢𑁆𑀣 𑀭𑀽𑀧𑀪𑀯𑁂 𑀙𑀦𑁆𑀤𑀭𑀸𑀕𑁄 𑀭𑀽𑀧𑀭𑀸𑀕𑁄. 𑀅𑀭𑀽𑀧𑀪𑀯𑁂 𑀙𑀦𑁆𑀤𑀭𑀸𑀕𑁄 𑀅𑀭𑀽𑀧𑀭𑀸𑀕𑁄. 𑀫𑀸𑀦𑁄 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀫𑀸𑀦𑁄. 𑀢𑀣𑀸 𑀉𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸.

𑀘𑀢𑀼𑀢𑁆𑀣𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀅𑀭𑀳𑀦𑁆𑀢𑀧𑀼𑀕𑁆𑀕𑀮𑀓𑀣𑀸𑀯𑀡𑁆𑀡𑀦𑀸

𑁮𑁧𑁬. 𑀫𑀳𑀸𑀔𑀻𑀡𑀸𑀲𑀯𑁄𑀢𑀺 𑀫𑀳𑀸𑀦𑀼𑀪𑀸𑀯𑀢𑀸𑀦𑀺𑀩𑀦𑁆𑀥𑀦𑀁 𑀧𑀽𑀚𑀸𑀯𑀘𑀦𑀫𑁂𑀢𑀁, 𑀦 𑀉𑀧𑀸𑀤𑀸𑀬𑀯𑀘𑀦𑀁 𑀬𑀣𑀸 ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺. 𑀦 𑀳𑀺 𑀘𑀽𑀴𑀔𑀻𑀡𑀸𑀲𑀯𑁄 𑀦𑀸𑀫 𑀅𑀢𑁆𑀣𑀺. 𑀅𑀦𑁆𑀢𑀺𑀫𑀤𑁂𑀳𑀁 𑀥𑀸𑀭𑁂𑀢𑀻𑀢𑀺 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻. 𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀪𑀸𑀭𑀸𑀦𑀁 𑀑𑀳𑀺𑀢𑀢𑁆𑀢𑀸 𑀑𑀭𑁄𑀧𑀺𑀢𑀢𑁆𑀢𑀸 𑀑𑀳𑀺𑀢𑀪𑀸𑀭𑁄. 𑀅𑀦𑀼𑀧𑁆𑀧𑀢𑁆𑀢𑁄 𑀲𑀤𑀢𑁆𑀣𑀁 𑀲𑀓𑀢𑁆𑀣𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄. 𑀲𑀤𑀢𑁆𑀣𑁄𑀢𑀺 𑀘 𑀅𑀭𑀳𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀅𑀢𑁆𑀢𑀼𑀧𑀦𑀺𑀩𑀦𑁆𑀥𑀦𑀝𑁆𑀞𑁂𑀦, 𑀅𑀢𑁆𑀢𑀸𑀦𑀁 𑀅𑀯𑀺𑀚𑀳𑀦𑀝𑁆𑀞𑁂𑀦, 𑀅𑀢𑁆𑀢𑀦𑁄 𑀧𑀭𑀫𑀢𑁆𑀣𑀝𑁆𑀞𑁂𑀦 𑀘 𑀅𑀢𑁆𑀢𑀦𑁄 𑀅𑀢𑁆𑀣𑀢𑁆𑀢𑀸 𑀲𑀓𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀓𑁆𑀔𑀻𑀡𑀸𑀦𑀺 𑀤𑀲𑀧𑀺 𑀪𑀯𑀲𑀁𑀬𑁄𑀚𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄. 𑀔𑀦𑁆𑀥𑀸𑀤𑀺𑀅𑀢𑁆𑀣𑀁 𑀲𑀫𑁆𑀫𑀸 𑀅𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑁄𑀢𑀺 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀅𑀕𑁆𑀕𑁄 𑀘 𑀲𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀘, 𑀅𑀕𑁆𑀕𑀤𑀓𑁆𑀔𑀺𑀡𑀁 𑀯𑀸 𑀅𑀭𑀳𑀢𑀻𑀢𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄.

𑀩𑁄𑀥𑀺𑀧𑀓𑁆𑀔𑀺𑀬𑀓𑀣𑀸𑀯𑀡𑁆𑀡𑀦𑀸

𑁮𑁧𑁭. 𑀘𑀢𑀼𑀦𑁆𑀦𑀁 𑀫𑀕𑁆𑀕𑀜𑀸𑀡𑀸𑀦𑀁 𑀯𑀲𑁂𑀦 𑀘𑀢𑀼𑀜𑀸𑀡𑀸𑀬. 𑀆𑀦𑀼𑀪𑀸𑀯𑀯𑀺𑀚𑀸𑀦𑀦𑀢𑁆𑀣𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀆𑀤𑀺𑀓𑀲𑁆𑀲 𑀆𑀦𑀼𑀪𑀸𑀯𑀲𑁆𑀲 𑀩𑁄𑀥𑀦𑀢𑁆𑀣𑀁.

𑀧𑀭𑀺𑀧𑀼𑀡𑁆𑀡𑀸 𑀩𑁄𑀥𑀺𑀧𑀓𑁆𑀔𑀺𑀬𑀸 𑀏𑀢𑀲𑁆𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑀩𑁄𑀥𑀺𑀧𑀓𑁆𑀔𑀺𑀬𑁄, 𑀫𑀕𑁆𑀕𑁄. 𑀢𑀲𑁆𑀲 𑀪𑀸𑀯𑁄 𑀧𑀭𑀺𑀧𑀼𑀡𑁆𑀡𑀩𑁄𑀥𑀺𑀧𑀓𑁆𑀔𑀺𑀬𑀪𑀸𑀯𑁄. 𑀯𑀼𑀝𑁆𑀞𑀸𑀦𑀩𑀮𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑀸𑀯 𑀯𑀼𑀝𑁆𑀞𑀸𑀦𑀩𑀮𑀲𑀫𑀸𑀬𑁄𑀕𑁄, 𑀬𑁂 𑀲𑀁𑀬𑁄𑀚𑀦𑀸𑀤𑀬𑁄 𑀬𑁂𑀦 𑀧𑀞𑀫𑀫𑀕𑁆𑀕𑀸𑀤𑀺𑀦𑀸 𑀧𑀳𑀸𑀢𑀩𑁆𑀩𑀸.

𑁮𑁧𑁮. 𑀩𑀼𑀚𑁆𑀛𑀦𑀝𑁆𑀞𑁂𑀦 𑀯𑀸 𑀩𑁄𑀥𑁄, 𑀫𑀕𑁆𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀢𑀲𑁆𑀲 𑀩𑀼𑀚𑁆𑀛𑀦𑀓𑀺𑀭𑀺𑀬𑀸𑀬 𑀅𑀦𑀼𑀕𑀼𑀡𑀪𑀸𑀯𑀢𑁄 𑀧𑀓𑁆𑀔𑁂 𑀪𑀯𑀸𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀸.

𑁮𑁧𑁯. 𑀢𑁂𑀲𑀼 𑀩𑁄𑀥𑀺𑀧𑀓𑁆𑀔𑀺𑀬𑁂𑀲𑀼. 𑀆𑀭𑀫𑁆𑀫𑀡𑁂𑀲𑀽𑀢𑀺 𑀓𑀸𑀬𑀸𑀤𑀺𑀆𑀭𑀫𑁆𑀫𑀡𑁂𑀲𑀼. 𑀑𑀓𑁆𑀔𑀦𑁆𑀤𑀺𑀢𑁆𑀯𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀧𑀓𑁆𑀔𑀦𑁆𑀤𑀺𑀢𑁆𑀯𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀧𑀝𑁆𑀞𑀸𑀦𑀢𑁄𑀢𑀺 𑀅𑀲𑀼𑀪𑀸𑀓𑀸𑀭𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀉𑀧𑀕𑀦𑁆𑀢𑁆𑀯𑀸 𑀅𑀯𑀝𑁆𑀞𑀸𑀦𑀢𑁄. 𑀓𑀸𑀬𑀸𑀤𑀻𑀲𑀼 𑀅𑀲𑀼𑀪𑀸𑀓𑀸𑀭𑀸𑀤𑀺𑀕𑁆𑀕𑀳𑀡𑀁 𑀧𑀼𑀩𑁆𑀩𑀪𑀸𑀕𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀲𑀼𑀪𑀲𑀜𑁆𑀜𑀸𑀤𑀺𑀧𑀳𑀸𑀦𑀓𑀺𑀘𑁆𑀘𑀲𑀸𑀥𑀦𑀁 𑀫𑀕𑁆𑀕𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀳𑀺 𑀏𑀓𑀸𑀯 𑀲𑀢𑀺 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀢𑀺.

𑁮𑁨𑁦. 𑀧𑀤𑀳𑀦𑁆𑀢𑀻𑀢𑀺 𑀯𑀸𑀬𑀫𑀦𑁆𑀢𑀺, 𑀓𑀸𑀬𑀘𑀺𑀢𑁆𑀢𑀸𑀦𑀺 𑀧𑀕𑁆𑀕𑀡𑁆𑀳𑀦𑁆𑀢𑀺 𑀯𑀸. 𑀅𑀲𑁄𑀪𑀸𑀳𑁂𑀢𑀽𑀦𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀧𑀚𑀳𑀦𑁂𑀦, 𑀲𑁄𑀪𑀸𑀳𑁂𑀢𑀽𑀦𑀜𑁆𑀘 𑀯𑁄𑀤𑀸𑀦𑀥𑀫𑁆𑀫𑀸𑀦𑀁 𑀪𑀸𑀯𑀦𑁂𑀦 𑀲𑁄𑀪𑀦𑀁, 𑀲𑀼𑀦𑁆𑀤𑀭𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑀪𑀸𑀯𑀸𑀯𑀳𑀦𑀢𑁄𑀢𑀺 𑀧𑀸𑀲𑀁𑀲𑀢𑀫𑀪𑀸𑀯𑀲𑀸𑀥𑀦𑀢𑁄. 𑀧𑀥𑀸𑀦𑀪𑀸𑀯𑀓𑀸𑀭𑀡𑀢𑁄𑀢𑀺 𑀉𑀢𑁆𑀢𑀫𑀪𑀸𑀯𑀳𑁂𑀢𑀼𑀢𑁄.

𑁮𑁨𑁧. 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦𑀸𑀢𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁨.𑁩𑁬𑁯) 𑀯𑀼𑀢𑁆𑀢𑁂𑀦. 𑀇𑀚𑁆𑀛𑀦𑀝𑁆𑀞𑁄 𑀦𑀺𑀧𑁆𑀨𑀚𑁆𑀚𑀦𑀝𑁆𑀞𑁄, 𑀧𑀝𑀺𑀮𑀸𑀪𑀲𑀫𑁆𑀧𑀤𑀸 𑀯𑀸, 𑀬𑁂𑀦 𑀯𑀸 𑀇𑀚𑁆𑀛𑀦𑁆𑀢𑀺 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀺, 𑀢𑀁 𑀇𑀚𑁆𑀛𑀦𑀁. 𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀧𑀫𑀼𑀔𑀸 𑀫𑀕𑁆𑀕𑀥𑀫𑁆𑀫𑀸 𑀇𑀥 ‘‘𑀇𑀤𑁆𑀥𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁄. 𑀢𑀲𑁆𑀫𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀢𑀲𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸 𑀙𑀦𑁆𑀤𑀸𑀤𑀬𑁄 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀧𑀸𑀤𑁄. 𑀢𑀲𑁆𑀲𑀸 𑀏𑀯 𑀨𑀮𑀪𑀽𑀢𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀙𑀦𑁆𑀤𑀸𑀤𑀬𑁄 𑀧𑀼𑀩𑁆𑀩𑀪𑀸𑀕𑀓𑀸𑀭𑀡𑀝𑁆𑀞𑁂𑀦 𑀧𑀸𑀤𑁄. 𑀲𑁄𑀢𑀺 𑀇𑀤𑁆𑀥𑀺𑀧𑀸𑀤𑁄. 𑀇𑀫𑁂 𑀮𑁄𑀓𑀼𑀢𑁆𑀢𑀭𑀸𑀯𑀸𑀢𑀺 𑀇𑀫𑁂 𑀬𑀣𑀸𑀯𑀼𑀢𑁆𑀢𑀸 𑀙𑀦𑁆𑀤𑀸𑀤𑀬𑁄 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 𑀆𑀕𑀢𑀦𑀬𑁂𑀦 𑀮𑁄𑀓𑀼𑀢𑁆𑀢𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀙𑀦𑁆𑀤𑀸𑀤𑀺𑀅𑀥𑀺𑀧𑀢𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀥𑀫𑁆𑀫𑀸𑀧𑀺 𑀨𑀲𑁆𑀲𑀸𑀤𑀬𑁄 𑀇𑀤𑁆𑀥𑀺𑀧𑀸𑀤𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀇𑀤𑁆𑀥𑀺𑀧𑀸𑀤𑁄 𑀦𑁄 𑀅𑀥𑀺𑀧𑀢𑀺, 𑀅𑀥𑀺𑀧𑀢𑀺 𑀯𑀸 𑀦𑁄 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫 𑀦𑀢𑁆𑀣𑀺, 𑀬𑀣𑀸 𑀧𑀦 𑀏𑀓𑀲𑁆𑀫𑀺𑀁 𑀭𑀚𑁆𑀚𑁂 𑀭𑀚𑁆𑀚𑀸𑀭𑀳𑁂𑀲𑀼 𑀘𑀢𑀽𑀲𑀼 𑀭𑀸𑀚𑀓𑀼𑀫𑀸𑀭𑁂𑀲𑀼 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀏𑀓𑁄𑀯 𑀭𑀚𑁆𑀚𑀫𑀦𑀼𑀲𑀸𑀲𑀢𑀺, 𑀦 𑀲𑀩𑁆𑀩𑁂, 𑀏𑀯𑀁 𑀏𑀓𑀫𑁂𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀏𑀓𑁄𑀯 𑀅𑀥𑀺𑀧𑀢𑀺, 𑀇𑀤𑁆𑀥𑀺𑀧𑀸𑀤𑁄 𑀘 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁮𑁨𑁨. 𑀅𑀲𑁆𑀲𑀤𑁆𑀥𑀺𑀬𑀁 𑀲𑀤𑁆𑀥𑀸𑀧𑀝𑀺𑀧𑀓𑁆𑀔𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀯𑀢𑁆𑀣𑀼𑀕𑀢𑁄 𑀧𑀲𑀸𑀤𑀧𑀢𑀺𑀭𑀽𑀧𑀓𑁄 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄 𑀯𑀸. 𑀓𑁄𑀲𑀚𑁆𑀚𑀁 𑀣𑀺𑀦𑀫𑀺𑀤𑁆𑀥𑀧𑀥𑀸𑀦𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀧𑀫𑀸𑀤𑁄 𑀲𑀢𑀺𑀲𑀫𑁆𑀫𑁄𑀲𑁄 𑀢𑀣𑀸𑀧𑀯𑀢𑁆𑀢𑀸 𑀅𑀓𑀼𑀲𑀮𑀸 𑀔𑀦𑁆𑀥𑀸. 𑀅𑀪𑀺𑀪𑀯𑀦𑀲𑀗𑁆𑀔𑀸𑀢𑁂𑀦 𑀅𑀥𑀺𑀧𑀢𑀺𑀬𑀝𑁆𑀞𑁂𑀦𑀸𑀢𑀺 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀅𑀪𑀺𑀪𑀯𑀦𑀢𑁄 𑀅𑀪𑀺𑀪𑀯𑀦𑀦𑁆𑀢𑀺 𑀯𑀢𑁆𑀢𑀩𑁆𑀩𑁂𑀦 𑀅𑀥𑀺𑀫𑁄𑀓𑁆𑀔𑀧𑀕𑁆𑀕𑀳𑀉𑀧𑀝𑁆𑀞𑀸𑀦𑀅𑀯𑀺𑀓𑁆𑀔𑁂𑀧𑀧𑀚𑀸𑀦𑀦𑀲𑁆𑀲 𑀏𑀓𑀮𑀓𑁆𑀔𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀅𑀥𑀺𑀧𑀢𑀺𑀬𑀝𑁆𑀞𑁂𑀦. 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀳𑀺 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀢𑀲𑁆𑀫𑀸 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀘 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁂𑀦 𑀘 𑀩𑀮𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁨𑁩. 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑀓𑀲𑀢𑁆𑀢𑀲𑁆𑀲. 𑀬𑁄 𑀳𑁂𑀲𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀲𑀢𑀺𑀆𑀤𑀺𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀓𑀭𑀡𑀪𑀽𑀢𑀸𑀬 𑀩𑀼𑀚𑁆𑀛𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀦𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺 𑀅𑀭𑀺𑀬𑀲𑀸𑀯𑀓𑁄, 𑀢𑀲𑁆𑀲 𑀩𑁄𑀥𑀺𑀲𑁆𑀲 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀬𑁆𑀬𑀸𑀦𑀺𑀓𑀝𑁆𑀞𑁂𑀦𑀸𑀢𑀺 𑀯𑀝𑁆𑀝𑀢𑁄 𑀦𑀺𑀲𑁆𑀲𑀭𑀡𑀝𑁆𑀞𑁂𑀦.

𑁮𑁨𑁪. 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀼𑀤𑁆𑀤𑀲𑀯𑀺𑀥𑁂𑀦𑀸𑀢𑀺 𑀆𑀦𑀸𑀧𑀸𑀦𑀇𑀭𑀺𑀬𑀸𑀧𑀣𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀸𑀦𑀺, 𑀦𑀯 𑀲𑀺𑀯𑀣𑀺𑀓𑀧𑀩𑁆𑀩𑀸𑀦𑀺 𑀘𑀸𑀢𑀺 𑀏𑀯𑀁 𑀘𑀼𑀤𑁆𑀤𑀲𑀯𑀺𑀥𑁂𑀦. 𑀓𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀢𑁄 𑀘 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀮𑀩𑁆𑀪𑀢𑀺, 𑀦 𑀯𑁂𑀤𑀦𑀸𑀤𑀬𑁄 𑀧𑀭𑀺𑀕𑁆𑀕𑀡𑁆𑀳𑀢𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀲𑀼𑀔𑀁 𑀯𑁂𑀤𑀦’’𑀦𑁆𑀢𑀺𑀆𑀤𑀺𑀦𑀸𑀢𑀺 𑀯𑀸 ‘‘𑀲𑀸𑀫𑀺𑀲’’𑀦𑁆𑀢𑀺𑀆𑀤𑀺𑀦𑀸𑀢𑀺 𑀯𑀸 ‘‘𑀦𑀺𑀭𑀸𑀫𑀺𑀲’’𑀦𑁆𑀢𑀺𑀆𑀤𑀺𑀦𑀸𑀢𑀺 𑀯𑀸 𑀏𑀯𑀁 𑀦𑀯𑀯𑀺𑀥𑁂𑀦. 𑀲𑀭𑀸𑀕𑀤𑁄𑀲𑀫𑁄𑀳𑀲𑀁𑀔𑀺𑀢𑁆𑀢𑀫𑀳𑀕𑁆𑀕𑀢𑀲𑀫𑀸𑀳𑀺𑀢𑀲𑀉𑀢𑁆𑀢𑀭𑀯𑀺𑀫𑀼𑀢𑁆𑀢𑀧𑀤𑀸𑀦𑀁 𑀲𑀧𑀝𑀺𑀧𑀓𑁆𑀔𑀸𑀦𑀁 𑀯𑀲𑁂𑀦 𑀲𑁄𑀴𑀲𑀯𑀺𑀥𑁂𑀦. 𑀦𑀻𑀯𑀭𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀬𑀢𑀦𑀩𑁄𑀚𑁆𑀛𑀗𑁆𑀕𑀲𑀘𑁆𑀘𑀧𑀩𑁆𑀩𑀸𑀦𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑁂𑀦. 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀢𑀪𑀸𑀯𑁂. 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀦𑁆𑀢𑀺 𑀅𑀢𑁆𑀢𑀦𑁄 𑀅𑀪𑀽𑀢𑀧𑀼𑀩𑁆𑀩𑀁. 𑀧𑀭𑀲𑁆𑀲 𑀉𑀧𑁆𑀧𑀦𑁆𑀦𑀁 𑀅𑀓𑀼𑀲𑀮𑀁 𑀤𑀺𑀲𑁆𑀯𑀸 𑀢𑀦𑁆𑀦𑀺𑀫𑀺𑀢𑁆𑀢𑀜𑁆𑀘 𑀯𑀥𑀩𑀦𑁆𑀥𑀸𑀭𑀳𑀸𑀤𑀻𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲𑀸𑀢𑀺 𑀢𑀸𑀤𑀺𑀲𑀲𑁆𑀲. 𑀪𑀯𑀢𑀺 𑀳𑀺 𑀢𑀁𑀲𑀤𑀺𑀲𑁂𑀧𑀺 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 ‘‘𑀢𑀸𑀦𑀺𑀬𑁂𑀯 𑀑𑀲𑀥𑀸𑀦𑀻’’𑀢𑀺. 𑀢𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀛𑀸𑀦𑀯𑀺𑀧𑀲𑁆𑀲𑀦𑀸 𑀇𑀢𑁄 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸𑀧𑀺 𑀲𑀺𑀬𑀼𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩’’𑀦𑁆𑀢𑀺, 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀲𑀫𑁆𑀫𑀸𑀯𑀸𑀘𑀸𑀦𑀁𑀬𑁂𑀯 𑀕𑀳𑀡𑀁. 𑀢𑁂𑀲𑀼 𑀯𑀼𑀢𑁆𑀢𑁂𑀲𑀼 𑀲𑁂𑀲𑀺𑀤𑁆𑀥𑀺𑀧𑀸𑀤𑀲𑁂𑀲𑀯𑀺𑀭𑀢𑀺𑀬𑁄 𑀅𑀢𑁆𑀣𑀢𑁄 𑀯𑀼𑀢𑁆𑀢𑀸𑀯 𑀳𑁄𑀦𑁆𑀢𑀻𑀢𑀺 𑀮𑀓𑁆𑀔𑀡𑀳𑀸𑀭𑀯𑀲𑁂𑀦 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑁂 𑀏𑀢𑁂 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀸. 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀜𑀸𑀡𑀸𑀦𑀁. 𑀓𑀸𑀫𑀁 𑀲𑀩𑁆𑀩𑁂𑀧𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀫𑀕𑁆𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸𑀯, 𑀢𑀣𑀸𑀧𑀺 𑀲𑀸𑀢𑀺𑀲𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑀩𑁆𑀬𑀸𑀧𑀸𑀭𑁄 𑀫𑀕𑁆𑀕𑀓𑁆𑀔𑀡𑁂𑀢𑀺 𑀯𑀼𑀢𑁆𑀢𑀁 ‘‘𑀨𑀮𑀓𑁆𑀔𑀡𑁂 𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂’’𑀢𑀺. 𑀅𑀯𑀲𑁂𑀲𑀸 𑀢𑁂𑀢𑁆𑀢𑀺𑀁𑀲 𑀮𑀩𑁆𑀪𑀦𑁆𑀢𑀺, 𑀢𑁂 𑀘 𑀔𑁄 𑀧𑀭𑀺𑀬𑀸𑀬𑀢𑁄, 𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁨𑁫. 𑀲𑁂𑀲𑁂𑀲𑀼 𑀧𑀦𑀸𑀢𑀺 𑀇𑀤𑁆𑀥𑀺𑀧𑀸𑀤𑀸𑀤𑀻𑀲𑀼 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀬𑀣𑀸 𑀲𑀢𑀺𑀯𑀻𑀭𑀺𑀬𑁂𑀲𑀼 ‘‘𑀲𑀢𑀺𑀧𑀝𑁆𑀞𑀸𑀦𑀁 𑀲𑀫𑁆𑀫𑀧𑁆𑀧𑀥𑀸𑀦’’𑀦𑁆𑀢𑀺 𑀲𑀗𑁆𑀔𑀺𑀧𑀦𑀯𑀲𑁂𑀦 𑀳𑀸𑀧𑀦𑀁, ‘‘𑀓𑀸𑀬𑀸𑀦𑀼𑀧𑀲𑁆𑀲𑀦𑀸’’𑀢𑀺𑀆𑀤𑀺𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦 𑀯𑀟𑁆𑀠𑀦𑀁 𑀅𑀢𑁆𑀣𑀺, 𑀈𑀤𑀺𑀲𑀁 𑀳𑀸𑀧𑀦𑀯𑀟𑁆𑀠𑀦𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁮𑁨𑁬. 𑀇𑀤𑀸𑀦𑀺 𑀲𑀩𑁆𑀩𑁂𑀲𑀼 𑀏𑀯 𑀬𑀣𑀸𑀭𑀳𑀁 𑀮𑀩𑁆𑀪𑀫𑀸𑀦𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑁂𑀲𑀽𑀢𑀺 𑀲𑀢𑁆𑀢𑀢𑀺𑀁𑀲𑀸𑀬 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼. 𑀙𑀤𑁆𑀥𑀸𑀢𑀺 𑀏𑀓𑀥𑀸 𑀤𑁆𑀯𑁂𑀥𑀸 𑀘𑀢𑀼𑀥𑀸 𑀧𑀜𑁆𑀘𑀥𑀸 𑀅𑀝𑁆𑀞𑀥𑀸 𑀦𑀯𑀥𑀸𑀢𑀺 𑀏𑀯𑀁 𑀙𑀧𑁆𑀧𑀓𑀸𑀭𑁂𑀦 𑀢𑁂 𑀪𑀯𑀦𑁆𑀢𑀺.

𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀸𑀤𑀺𑀯𑀲𑁂𑀦𑀸𑀢𑀺 𑀙𑀦𑁆𑀤𑁄 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀯𑀲𑁂𑀦𑁂𑀯, 𑀘𑀺𑀢𑁆𑀢𑀁 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀯𑀲𑁂𑀦𑁂𑀯, 𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀉𑀧𑁂𑀓𑁆𑀔𑀸 𑀩𑁄𑀚𑁆𑀛𑀗𑁆𑀕𑀯𑀲𑁂𑀦𑁂𑀯, 𑀲𑀗𑁆𑀓𑀧𑁆𑀧𑀸𑀤𑀬𑁄 𑀫𑀕𑁆𑀕𑀯𑀲𑁂𑀦𑁂𑀯𑀸𑀢𑀺 𑀏𑀯𑀁 𑀦𑀯 𑀏𑀓𑀯𑀺𑀥𑀸𑀯 𑀳𑁄𑀦𑁆𑀢𑀺.

𑀘𑀼𑀤𑁆𑀤𑀲𑁂𑀯 𑀅𑀲𑀫𑁆𑀪𑀺𑀦𑁆𑀦𑀸𑀢𑀺 𑀲𑀢𑀺 𑀯𑀻𑀭𑀺𑀬𑀁 𑀙𑀦𑁆𑀤𑁄 𑀘𑀺𑀢𑁆𑀢𑀁 𑀧𑀜𑁆𑀜𑀸 𑀲𑀤𑁆𑀥𑀸 𑀲𑀫𑀸𑀥𑀺 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺 𑀉𑀧𑁂𑀓𑁆𑀔𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄𑀢𑀺 𑀇𑀫𑁂 𑀅𑀲𑀫𑁆𑀪𑀺𑀦𑁆𑀦𑀸 𑀧𑀤𑀦𑁆𑀢𑀭𑀲𑀫𑁆𑀪𑁂𑀤𑁂𑀦 𑀯𑀺𑀦𑀸 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀕𑀬𑁆𑀳𑀫𑀸𑀦𑀸 𑀘𑀼𑀤𑁆𑀤𑀲𑁂𑀯 𑀘 𑀲𑀪𑀸𑀯𑀥𑀫𑁆𑀫𑀸. 𑀘𑀼𑀤𑁆𑀤𑀲𑀸𑀢𑀺 𑀘 𑀉𑀓𑁆𑀓𑀁𑀲𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀢𑁆𑀢𑀁. 𑀢𑀜𑁆𑀘 𑀔𑁄 𑀧𑀞𑀫𑀚𑁆𑀛𑀸𑀦𑀺𑀓𑀫𑀕𑁆𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦, 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁂 𑀧𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀪𑀸𑀯𑀢𑁄 𑀢𑁂𑀭𑀲, 𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑁂𑀲𑀼 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀪𑀸𑀯𑀢𑁄 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. ‘‘𑀲𑀢𑁆𑀢𑀢𑀺𑀁𑀲𑀧𑁆𑀧𑀪𑁂𑀤𑀢𑁄’’𑀢𑀺 𑀇𑀤𑀫𑁆𑀧𑀺 𑀉𑀓𑁆𑀓𑀁𑀲𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀅𑀯𑀓𑀁𑀲𑀢𑁄 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀏𑀓𑀲𑁆𑀫𑀺𑀁 𑀔𑀡𑁂 𑀙𑀢𑁆𑀢𑀺𑀁𑀲, 𑀧𑀜𑁆𑀘𑀢𑀺𑀁𑀲 𑀳𑁄𑀦𑁆𑀢𑀺, 𑀘𑀢𑀼𑀦𑁆𑀦𑀁 𑀅𑀥𑀺𑀧𑀢𑀻𑀦𑀁 𑀏𑀓𑀚𑁆𑀛𑀁 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀲𑁆𑀲𑁂𑀯 𑀇𑀤𑁆𑀥𑀺𑀧𑀸𑀤𑀲𑁆𑀲 𑀲𑀫𑁆𑀪𑀯𑁄𑀢𑀺 𑀤𑁆𑀯𑀢𑁆𑀢𑀺𑀁𑀲 𑀘 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀢𑁆𑀢𑀢𑀺𑀁𑀲𑀧𑀪𑁂𑀤𑀢𑁄 𑀓𑀣𑀦𑁆𑀢𑀺 𑀆𑀳 ‘‘𑀲𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀢𑁄’’𑀢𑀺𑀆𑀤𑀺, 𑀏𑀓𑀘𑁆𑀘𑀲𑁆𑀲 𑀲𑀪𑀸𑀯𑀢𑁄 𑀏𑀓𑀲𑁆𑀲𑀸𑀧𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀸𑀦𑀼𑀭𑀽𑀧𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀢𑀁𑀢𑀁𑀓𑀺𑀘𑁆𑀘𑀲𑀸𑀥𑀦𑀢𑁄𑀢𑀺 𑀅𑀢𑁆𑀣𑁄. 𑀲𑀭𑀽𑀧𑁂𑀦 𑀘 𑀯𑀼𑀢𑁆𑀢𑀺𑀢𑁄𑀢𑀺 𑀅𑀪𑁂𑀤𑀲𑁆𑀲 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀸𑀤𑀺𑀓𑀲𑁆𑀲 𑀲𑀭𑀽𑀧𑁂𑀦𑁂𑀯 𑀧𑀯𑀢𑁆𑀢𑀦𑀢𑁄 𑀘.

𑀏𑀢𑁆𑀣𑀸𑀢𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀁. 𑀓𑀲𑁆𑀫𑀸 𑀧𑀦 𑀩𑁄𑀥𑀺𑀧𑀓𑁆𑀔𑀺𑀬𑁂𑀲𑀼 𑀛𑀸𑀦𑀓𑁄𑀝𑁆𑀞𑀸𑀲𑁄 𑀦 𑀕𑀳𑀺𑀢𑁄, 𑀦𑀦𑀼 𑀛𑀸𑀦𑀭𑀳𑀺𑀢𑁄 𑀅𑀭𑀺𑀬𑀫𑀕𑁆𑀕𑁄 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀢𑀢𑁄 𑀏𑀯 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀩𑁄𑀥𑀺𑀧𑀓𑁆𑀔𑀺𑀬𑁂𑀲𑀼 𑀛𑀸𑀦𑀁 𑀦 𑀕𑀳𑀺𑀢’’𑀦𑁆𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀲𑁆𑀲 𑀛𑀸𑀦𑀲𑁆𑀲 𑀫𑀕𑁆𑀕𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸. 𑀢𑀜𑁆𑀳𑀺 𑀲𑀦𑁆𑀥𑀸𑀬 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺 (𑀥. 𑀲. 𑁨𑁭𑁭, 𑁩𑁪𑁩 𑀆𑀤𑀬𑁄) 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀲𑁆𑀲 𑀧𑀦𑁂𑀢𑁆𑀣 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀺. 𑀅𑀧𑀭𑁄 𑀦𑀬𑁄 𑁋 𑀓𑀲𑁆𑀫𑀸 𑀧𑀦 𑀩𑁄𑀥𑀺𑀧𑀓𑁆𑀔𑀺𑀬𑁂𑀲𑀼 𑀛𑀸𑀦𑀓𑁄𑀝𑁆𑀞𑀸𑀲𑁄 𑀦 𑀕𑀳𑀺𑀢𑁄, 𑀦𑀦𑀼 𑀛𑀸𑀦𑀭𑀳𑀺𑀢𑁄 𑀅𑀭𑀺𑀬𑀫𑀕𑁆𑀕𑁄 𑀦𑀢𑁆𑀣𑀺, 𑀦 𑀘 𑀢𑀁 𑀧𑀝𑀺𑀧𑀤𑀸 𑀯𑀺𑀬 𑀏𑀓𑀦𑁆𑀢𑀧𑀼𑀩𑁆𑀩𑀪𑀸𑀕𑀺𑀬𑀁, 𑀦𑀸𑀧𑀺 𑀏𑀓𑀘𑁆𑀘𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀬 𑀫𑀕𑁆𑀕𑀦𑀺𑀲𑁆𑀲𑀦𑁆𑀤𑁄, 𑀅𑀣 𑀔𑁄 𑀫𑀕𑁆𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑁄, 𑀬𑀢𑁄 ‘‘𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀻’’𑀢𑀺 (𑀥. 𑀲. 𑁨𑁭𑁭, 𑁩𑁪𑁩 𑀆𑀤𑀬𑁄) 𑀯𑀼𑀢𑁆𑀢𑀁, 𑀫𑀕𑁆𑀕𑀫𑀕𑁆𑀕𑀧𑀭𑀺𑀯𑀸𑀭𑀥𑀫𑁆𑀫𑀸 𑀘 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀁 𑀢𑀸𑀯 𑀯𑀼𑀢𑁆𑀢𑀁 𑀛𑀸𑀦𑀭𑀳𑀺𑀢𑁄 𑀅𑀭𑀺𑀬𑀫𑀕𑁆𑀕𑁄 𑀦𑀢𑁆𑀣𑀻’’𑀢𑀺, 𑀢𑀢𑁆𑀣 𑀦 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑁄𑀕𑀫𑀢𑁆𑀢𑁂𑀦 𑀛𑀸𑀦𑀲𑁆𑀲 𑀩𑁄𑀥𑀺𑀧𑀓𑁆𑀔𑀺𑀬𑀢𑀸 𑀮𑀩𑁆𑀪𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑀢𑁄. 𑀆𑀳𑀸𑀭𑀸𑀤𑀻𑀦𑀫𑁆𑀧𑀺 𑀳𑀺 𑀩𑁄𑀥𑀺𑀧𑀓𑁆𑀔𑀺𑀬𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀏𑀢𑁂𑀦 𑀫𑀕𑁆𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀢𑀸 𑀩𑁄𑀥𑀺𑀧𑀓𑁆𑀔𑀺𑀬𑀪𑀸𑀯𑀲𑁆𑀲 𑀅𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀫𑀕𑁆𑀕𑀧𑀭𑀺𑀯𑀸𑀭𑀥𑀫𑁆𑀫𑀸 𑀘 𑀩𑁄𑀥𑀺𑀧𑀓𑁆𑀔𑀺𑀬𑀸’’𑀢𑀺, 𑀢𑀢𑁆𑀣 𑀧𑀭𑀺𑀯𑀸𑀭𑀝𑁆𑀞𑁄 𑀓𑀺𑀁 𑀲𑀳𑀧𑀯𑀢𑁆𑀢𑀺𑀅𑀢𑁆𑀣𑁄, 𑀉𑀤𑀸𑀳𑀼 𑀧𑀭𑀺𑀓𑁆𑀔𑀸𑀭𑀝𑁆𑀞𑁄𑀢𑀺? 𑀬𑀤𑀺 𑀧𑀼𑀭𑀺𑀫𑁄 𑀧𑀓𑁆𑀔𑁄, 𑀲𑁄 𑀧𑀕𑁂𑀯 𑀦𑀺𑀮𑁆𑀮𑁄𑀘𑀺𑀢𑁄. 𑀅𑀣 𑀤𑀼𑀢𑀺𑀬𑁄, 𑀇𑀤𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀓𑀣𑀁 𑀧𑀯𑀢𑁆𑀢𑀫𑀸𑀦𑀁 𑀛𑀸𑀦𑀁 𑀫𑀕𑁆𑀕𑀲𑁆𑀲 𑀧𑀭𑀺𑀓𑁆𑀔𑀸𑀭𑁄? 𑀬𑀤𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦, 𑀏𑀯𑀁 𑀲𑀢𑀺 𑀨𑀲𑁆𑀲𑀸𑀤𑀻𑀦𑀫𑁆𑀧𑀺 𑀫𑀕𑁆𑀕𑀧𑀭𑀺𑀓𑁆𑀔𑀸𑀭𑀢𑀸 𑀆𑀧𑀚𑁆𑀚𑀢𑀺. 𑀅𑀣 𑀧𑀝𑀺𑀧𑀓𑁆𑀔𑀯𑀺𑀥𑀁𑀲𑀦𑁂𑀦, 𑀦 𑀲𑀩𑁆𑀩𑁂 𑀛𑀸𑀦𑀥𑀫𑁆𑀫𑀸 𑀧𑀝𑀺𑀧𑀓𑁆𑀔𑀯𑀺𑀥𑀁𑀲𑀦𑀲𑀫𑀢𑁆𑀣𑀸. 𑀦 𑀳𑀺 𑀯𑀺𑀘𑀸𑀭𑁄, 𑀯𑁂𑀤𑀦𑀸 𑀘 𑀓𑀲𑁆𑀲𑀘𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀲𑁆𑀲 𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀬𑀁 𑀧𑀦 𑀧𑁂𑀝𑀓𑁂 ‘‘𑀲𑀼𑀔𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲, 𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀝𑀺𑀧𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀲𑀼𑀔𑀁 𑀲𑀬𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀧𑀝𑀺𑀧𑀓𑁆𑀔𑀲𑁆𑀲 𑀧𑀦 𑀲𑀫𑀸𑀥𑀺𑀲𑁆𑀲 𑀧𑀘𑁆𑀘𑀬𑀢𑀸𑀬 𑀧𑀝𑀺𑀧𑀓𑁆𑀔𑁄. 𑀦 𑀘 𑀯𑀺𑀘𑀸𑀭𑁄 𑀧𑀜𑁆𑀜𑀸 𑀯𑀺𑀬, 𑀅𑀥𑀺𑀫𑁄𑀓𑁆𑀔𑁄 𑀯𑀺𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀝𑀺𑀧𑀓𑁆𑀔𑁄, 𑀧𑀝𑀺𑀧𑀓𑁆𑀔𑀲𑁆𑀲 𑀧𑀝𑀺𑀭𑀽𑀧𑀢𑀸𑀬 𑀧𑀦 𑀧𑀝𑀺𑀧𑀓𑁆𑀔𑁄 𑀯𑀼𑀢𑁆𑀢𑁄. 𑀢𑀣𑀸 𑀧𑀻𑀢𑀺𑀧𑀺 𑀦 𑀩𑁆𑀬𑀸𑀧𑀸𑀤𑀲𑁆𑀲 𑀅𑀤𑁄𑀲𑁄 𑀯𑀺𑀬 𑀉𑀚𑀼𑀧𑀝𑀺𑀧𑀓𑁆𑀔𑁄, 𑀅𑀤𑁄𑀲𑀲𑀫𑁆𑀧𑀬𑁄𑀕𑀢𑁄 𑀧𑀦 𑀧𑀝𑀺𑀧𑀓𑁆𑀔𑁄 𑀯𑀼𑀢𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢’’𑀦𑁆𑀢𑀺. 𑀯𑀺𑀢𑀓𑁆𑀓𑀲𑀫𑀸𑀥𑀬𑁄 𑀏𑀯 𑀧𑀦 𑀛𑀸𑀦𑀥𑀫𑁆𑀫𑁂𑀲𑀼 𑀉𑀚𑀼𑀓𑀁 𑀧𑀝𑀺𑀧𑀓𑁆𑀔𑀯𑀺𑀥𑀁𑀲𑀦𑀲𑀫𑀢𑁆𑀣𑀸𑀢𑀺 𑀧𑀝𑀺𑀧𑀓𑁆𑀔𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀲𑁆𑀲 𑀧𑀭𑀺𑀧𑀼𑀡𑁆𑀡𑀲𑁆𑀲 𑀛𑀸𑀦𑀓𑁄𑀝𑁆𑀞𑀸𑀲𑀲𑁆𑀲 𑀅𑀪𑀸𑀯𑀢𑁄 𑀦 𑀘𑀲𑁆𑀲 𑀩𑁄𑀥𑀺𑀧𑀓𑁆𑀔𑀺𑀬𑁂𑀲𑀼 𑀲𑀗𑁆𑀕𑀳𑁄 𑀓𑀢𑁄. 𑀬𑀲𑁆𑀫𑀸 𑀧𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀲𑀫𑀸𑀥𑀺 𑀘 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀛𑀸𑀦𑀥𑀫𑁆𑀫𑀸, 𑀢𑀲𑁆𑀫𑀸 𑀢𑁂 𑀲𑀦𑁆𑀥𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀯𑀸 𑀇𑀢𑀭𑁂𑀧𑀺 𑀕𑀳𑁂𑀢𑁆𑀯𑀸 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓’’𑀦𑁆𑀢𑀺𑀆𑀤𑀺 (𑀥. 𑀲. 𑁨𑁭𑁭).

𑀯𑀼𑀝𑁆𑀞𑀸𑀦𑀩𑀮𑀲𑀫𑀸𑀬𑁄𑀕𑀓𑀣𑀸𑀯𑀡𑁆𑀡𑀦𑀸

𑁮𑁨𑁭. 𑀯𑀼𑀝𑁆𑀞𑀸𑀦𑀁 𑀦𑀺𑀫𑀺𑀢𑁆𑀢𑀢𑁄, 𑀧𑀯𑀢𑁆𑀢𑀢𑁄 𑀘 𑀯𑀼𑀝𑁆𑀞𑀸𑀦𑀁. 𑀩𑀮𑀲𑀫𑀸𑀬𑁄𑀕𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑀸. 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀤𑀼𑀓𑁆𑀔𑀸𑀤𑀻𑀲𑀼 𑀯𑀺𑀲𑁂𑀲𑀤𑀲𑁆𑀲𑀦𑀝𑁆𑀞𑁂𑀦 𑀫𑀕𑁆𑀕𑀧𑀜𑁆𑀜𑀸𑀧𑀺 𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 ‘‘𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀯𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺 (𑀧𑀝𑀺. 𑀫. 𑁨.𑁫). 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀦𑁂𑀯𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀸𑀢𑀺, 𑀧𑀯𑀢𑁆𑀢𑀺…𑀧𑁂… 𑀙𑀺𑀦𑁆𑀤𑀦𑀢𑁄 𑀦 𑀧𑀯𑀢𑁆𑀢𑀸 𑀯𑀼𑀝𑁆𑀞𑀸𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀢𑁄 𑀯𑀼𑀝𑁆𑀞𑀸𑀦𑀁 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀓𑀭𑀡𑀁. 𑀧𑀯𑀢𑁆𑀢𑀢𑁄 𑀯𑀼𑀝𑁆𑀞𑀸𑀦𑀁 𑀳𑁂𑀢𑀼𑀦𑀺𑀭𑁄𑀥𑁂𑀦 𑀆𑀬𑀢𑀺𑀁 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀯𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀁. 𑀢𑁂𑀦𑀸𑀳 ‘‘𑀲𑀫𑀼𑀤𑀬𑀲𑁆𑀲 𑀅𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀧𑀯𑀢𑁆𑀢𑀸 𑀦 𑀯𑀼𑀝𑁆𑀞𑀸𑀢𑀻’’𑀢𑀺.

𑀤𑀼𑀪𑀢𑁄𑀢𑀺 𑀉𑀪𑀢𑁄, 𑀤-𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀤𑀼𑀪𑀸𑀢𑀺 𑀯𑀸 𑀧𑀤𑀦𑁆𑀢𑀭𑀫𑁂𑀯𑁂𑀢𑀁 𑀉𑀪𑀬𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁. 𑀤𑀲𑁆𑀲𑀦𑀝𑁆𑀞𑁂𑀦𑀸𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀮𑀓𑁆𑀔𑀡𑁂𑀦 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀝𑁆𑀞𑁂𑀦. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸𑀢𑀺 𑀤𑁆𑀯𑀸𑀲𑀝𑁆𑀞𑀺𑀧𑁆𑀧𑀪𑁂𑀤𑀸𑀬𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀻𑀢𑀺 𑀅𑀧𑀸𑀬𑀕𑀫𑀦𑀻𑀬𑀢𑀸𑀬 𑀢𑀲𑁆𑀲𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀅𑀦𑀼𑀯𑀢𑁆𑀢𑀓𑁂𑀳𑀺 𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀓𑀺𑀮𑁂𑀲𑁂𑀳𑀺. 𑀔𑀦𑁆𑀥𑁂𑀳𑀻𑀢𑀺 𑀏𑀢𑁆𑀣𑀸𑀧𑀺 𑀢𑀤𑀦𑀼𑀯𑀢𑁆𑀢𑀓𑀲𑀤𑁆𑀤𑁄 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀢𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀺𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀢𑀺𑀆𑀤𑀻𑀲𑀼𑀧𑀺 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀸𑀢𑀺. 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀼𑀝𑁆𑀞𑀸𑀢𑀻𑀢𑀺 𑀧𑀸𑀴𑀺 𑀲𑀁𑀔𑀺𑀢𑁆𑀢𑀸. 𑀬𑀣𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸, 𑀏𑀯𑀁 𑀫𑀺𑀘𑁆𑀙𑀸𑀯𑀸𑀘𑀸𑀤𑀬𑁄𑀧𑀺 𑀅𑀧𑀸𑀬𑀕𑀫𑀦𑀻𑀬𑀸 𑀏𑀯 𑀯𑁂𑀤𑀺𑀢𑀩𑁆𑀩𑀸. 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀘𑁂𑀢𑀦𑀸𑀲𑀪𑀸𑀯𑀸. 𑀫𑀺𑀘𑁆𑀙𑀸𑀲𑀢𑀺 𑀢𑀣𑀸𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑁂 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀸 𑀫𑀸𑀦𑀢𑁄 𑀯𑀼𑀝𑁆𑀞𑀸𑀢𑀺. 𑀲𑁄 𑀳𑀺 ‘‘𑀅𑀳𑀫𑀲𑁆𑀫𑀻’’𑀢𑀺 𑀧𑀯𑀢𑁆𑀢𑀺𑀬𑀸 𑀤𑀺𑀝𑁆𑀞𑀺𑀝𑁆𑀞𑀸𑀦𑀺𑀬𑁄, 𑀫𑀺𑀘𑁆𑀙𑀸𑀫𑀕𑁆𑀕𑀢𑁄 𑀧𑀦𑁂𑀢𑁆𑀣 𑀯𑀼𑀝𑁆𑀞𑀸𑀦𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀲𑀁𑀬𑁄𑀚𑀦𑀸𑀦𑀼𑀲𑀬𑁂𑀳𑁂𑀯 𑀯𑀼𑀝𑁆𑀞𑀸𑀦𑀁 𑀉𑀤𑁆𑀥𑀝𑀁.

𑀅𑀡𑀼𑀲𑀳𑀕𑀢𑀸𑀢𑀺 𑀅𑀡𑀼𑀪𑀸𑀯𑀁 𑀕𑀢𑀸 𑀧𑀢𑁆𑀢𑀸, 𑀢𑀦𑀼𑀪𑀽𑀢𑀸𑀢𑀺 𑀅𑀢𑁆𑀣𑁄.

𑁮𑁨𑁮. 𑀏𑀯𑀁 𑀯𑀼𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀩𑀮𑀲𑀫𑀸𑀬𑁄𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀺𑀬𑀸𑀦𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀣𑀩𑀮𑀁 𑀅𑀥𑀺𑀓𑀁 𑀳𑁄𑀢𑀺 𑀲𑀫𑀸𑀥𑀺𑀪𑀸𑀯𑀦𑀸𑀪𑀸𑀯𑀢𑁄. 𑀯𑀺𑀧𑀲𑁆𑀲𑀦𑀸𑀩𑀮𑀁 𑀅𑀥𑀺𑀓𑀁 𑀳𑁄𑀢𑀺 𑀜𑀸𑀡𑀼𑀢𑁆𑀢𑀭𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬. 𑀲𑀫𑀸𑀦𑀪𑀸𑀯𑁂𑀦 𑀬𑀼𑀕𑁂 𑀦𑀤𑁆𑀥𑀸 𑀩𑀤𑁆𑀥𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀬𑀼𑀕𑀦𑀤𑁆𑀥𑀸. 𑀢𑁂𑀦𑀸𑀳 ‘‘𑀅𑀜𑁆𑀜𑀫𑀜𑁆𑀜𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦𑀸’’𑀢𑀺, 𑀓𑀺𑀘𑁆𑀘𑀢𑁄 𑀅𑀦𑀽𑀦𑀸𑀥𑀺𑀓𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀏𑀯 𑀲𑀫𑀸𑀬𑁄𑀕𑁄𑀢𑀺 𑀲𑀫𑀧𑀭𑀺𑀘𑁆𑀙𑁂𑀤𑀬𑁄𑀕𑁄𑀢𑀺 𑀅𑀢𑁆𑀣𑁄.

𑀲𑀫𑀸𑀥𑀺𑀧𑀝𑀺𑀧𑀓𑁆𑀔𑀤𑀲𑁆𑀲𑀦𑀢𑁆𑀣𑀁 ‘‘𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂𑀳𑀻’’𑀢𑀺 𑀯𑀼𑀢𑁆𑀢𑀁, 𑀉𑀤𑁆𑀥𑀘𑁆𑀘𑀧𑀥𑀸𑀦𑁂𑀳𑀺 𑀓𑀺𑀮𑁂𑀲𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀻𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀯𑀺𑀓𑁆𑀔𑁂𑀧𑀲𑁆𑀲 𑀉𑀚𑀼𑀧𑀝𑀺𑀧𑀓𑁆𑀔𑀪𑀽𑀢𑁄 𑀲𑀫𑀸𑀥𑀺. 𑀦𑀺𑀭𑁄𑀥𑀕𑁄𑀘𑀭𑁄𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄. 𑀯𑀼𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀯𑀼𑀝𑁆𑀞𑀸𑀦𑀓𑀪𑀸𑀯𑁂𑀦 𑀦𑀺𑀫𑀺𑀢𑁆𑀢𑀢𑁄, 𑀧𑀯𑀢𑁆𑀢𑀢𑁄 𑀘 𑀯𑀼𑀝𑁆𑀞𑀳𑀫𑀸𑀦𑀯𑀲𑁂𑀦. 𑀏𑀓𑀭𑀲𑀸𑀢𑀺 𑀲𑀫𑀸𑀦𑀓𑀺𑀘𑁆𑀘𑀸.

𑀧𑀳𑀸𑀢𑀩𑁆𑀩𑀥𑀫𑁆𑀫𑀧𑀳𑀸𑀦𑀓𑀣𑀸𑀯𑀡𑁆𑀡𑀦𑀸

𑁮𑁨𑁯. 𑀬𑁂 𑀥𑀫𑁆𑀫𑀸𑀢𑀺 𑀬𑁂 𑀲𑀁𑀓𑀺𑀮𑁂𑀲𑀥𑀫𑁆𑀫𑀸. 𑀲𑀁𑀬𑁄𑀚𑀦𑀸𑀤𑀻𑀲𑀼 𑀲𑀁𑀬𑁄𑀚𑀦𑀝𑁆𑀞𑁂𑀦 𑀩𑀦𑁆𑀥𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀸𑀦𑀺, 𑀯𑀺𑀩𑀸𑀥𑀦𑀝𑁆𑀞𑁂𑀦, 𑀉𑀧𑀢𑀸𑀧𑀦𑀝𑁆𑀞𑁂𑀦 𑀯𑀸 𑀓𑀺𑀮𑁂𑀲𑀸, 𑀫𑀺𑀘𑁆𑀙𑀸𑀲𑀪𑀸𑀯𑀸𑀢𑀺 𑀫𑀺𑀘𑁆𑀙𑀢𑁆𑀢𑀸, 𑀮𑁄𑀓𑁂 𑀥𑀫𑁆𑀫𑀸 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸𑀢𑀺 𑀮𑁄𑀓𑀥𑀫𑁆𑀫𑀸, 𑀫𑀘𑁆𑀙𑁂𑀭𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸𑀢𑀺 𑀫𑀘𑁆𑀙𑀭𑀺𑀬𑀁, 𑀯𑀺𑀧𑀭𑀻𑀢𑀝𑁆𑀞𑁂𑀦 𑀯𑀺𑀧𑀮𑁆𑀮𑀸𑀲𑀸, 𑀕𑀦𑁆𑀣𑀦𑀝𑁆𑀞𑁂𑀦 𑀕𑀦𑁆𑀣𑀸, 𑀅𑀬𑀼𑀢𑁆𑀢𑀸 𑀕𑀢𑀻𑀢𑀺 𑀅𑀕𑀢𑀺, 𑀆𑀲𑀯𑀦𑁆𑀢𑀻𑀢𑀺 𑀆𑀲𑀯𑀸, 𑀑𑀳𑀦𑀦𑁆𑀢𑀻𑀢𑀺 𑀑𑀖𑀸, 𑀬𑁄𑀚𑀦𑀝𑁆𑀞𑁂𑀦 𑀬𑁄𑀕𑀸, 𑀦𑀻𑀯𑀭𑀦𑁆𑀢𑀻𑀢𑀺 𑀦𑀻𑀯𑀭𑀡𑀸𑀦𑀺, 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀧𑀭𑀢𑁄 𑀆𑀫𑀲𑀦𑁆𑀢𑀻𑀢𑀺 𑀧𑀭𑀸𑀫𑀸𑀲𑀸, 𑀪𑀼𑀲𑀁 𑀆𑀤𑀺𑀬𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀸𑀦𑀺, 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼 𑀅𑀦𑀼 𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸, 𑀫𑀮𑀻𑀦𑀪𑀸𑀯𑀓𑀭𑀡𑀝𑁆𑀞𑁂𑀦 𑀫𑀮𑀸, 𑀅𑀓𑀼𑀲𑀮𑀓𑀫𑁆𑀫𑀸𑀦𑀺 𑀘 𑀢𑀸𑀦𑀺 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀦𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀓𑀲𑀼𑀔𑀤𑀼𑀓𑁆𑀔𑀸𑀦𑀜𑁆𑀘 𑀧𑀣𑀸 𑀘𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑀸, 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺, 𑀅𑀓𑀼𑀲𑀮𑁄 𑀘 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀘𑀸𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀅𑀓𑀼𑀲𑀮𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀔𑀦𑁆𑀥𑁂𑀳𑀺 𑀔𑀦𑁆𑀥𑀸𑀦𑀦𑁆𑀢𑀺 𑀇𑀥𑀮𑁄𑀓𑀓𑁆𑀔𑀦𑁆𑀥𑁂𑀳𑀺 𑀧𑀭𑀮𑁄𑀓𑀓𑁆𑀔𑀦𑁆𑀥𑀸𑀦𑀁. 𑀬𑀸𑀯𑀜𑁆𑀳𑀺 𑀢𑁂𑀢𑀺 𑀢𑁂 𑀭𑀽𑀧𑀭𑀸𑀕𑀸𑀤𑀬𑁄 𑀬𑀸𑀯 𑀧𑀯𑀢𑁆𑀢𑀦𑁆𑀢𑀺 𑀦 𑀲𑀫𑀼𑀘𑁆𑀙𑀺𑀚𑁆𑀚𑀦𑁆𑀢𑀺, 𑀢𑀸𑀯 𑀏𑀢𑁂𑀲𑀁 𑀔𑀦𑁆𑀥𑀨𑀮𑀤𑀼𑀓𑁆𑀔𑀸𑀦𑀁 𑀅𑀦𑀼𑀧𑀭𑀫𑁄 𑀅𑀯𑀺𑀘𑁆𑀙𑁂𑀤𑁄𑀢𑀺. 𑀏𑀢𑁂𑀦 𑀢𑁂𑀲𑀁 𑀲𑀁𑀬𑁄𑀚𑀦𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀉𑀤𑁆𑀥𑀦𑁆𑀢𑀺 𑀭𑀽𑀧𑀸𑀭𑀽𑀧𑀪𑀯𑁂𑀲𑀼, 𑀢𑀢𑀺𑀬𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀉𑀤𑁆𑀥𑀁. 𑀉𑀤𑁆𑀥𑀁 𑀪𑀚𑀦𑁆𑀢𑀻𑀢𑀺 𑀉𑀤𑁆𑀥𑀁𑀪𑀸𑀕𑀸, 𑀭𑀽𑀧𑀸𑀭𑀽𑀧𑀪𑀯𑀸, 𑀢𑁂𑀲𑀁 𑀅𑀯𑀺𑀘𑁆𑀙𑁂𑀤𑀳𑁂𑀢𑀼𑀢𑀸𑀬 𑀳𑀺𑀢𑀸𑀦𑀺 𑀉𑀤𑁆𑀥𑀁𑀪𑀸𑀕𑀺𑀬𑀸𑀦𑀺.

𑀓𑀺𑀮𑀺𑀲𑁆𑀲𑀦𑁆𑀢𑀺, 𑀓𑀺𑀮𑁂𑀲𑁂𑀦𑁆𑀢𑀺 𑀘𑀸𑀢𑀺 𑀤𑀼𑀯𑀺𑀥𑀫𑁆𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀬𑀁 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳.

𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 ‘‘𑀮𑁄𑀓𑀣𑀽𑀧𑀺𑀓𑀸𑀤𑀻𑀲𑀼 𑀫𑁄𑀓𑁆𑀔𑁄’’𑀢𑀺 𑀧𑀯𑀢𑁆𑀢𑀫𑀺𑀘𑁆𑀙𑀸𑀯𑀺𑀫𑁄𑀓𑁆𑀔𑁄. 𑀅𑀪𑀺𑀦𑀺𑀯𑀺𑀲𑀦𑀸𑀤𑀺𑀯𑀲𑁂𑀦 𑀫𑀺𑀘𑁆𑀙𑀸 𑀯𑀺𑀧𑀭𑀻𑀢𑀁 𑀦 𑀲𑀫𑁆𑀫𑀸 𑀧𑀯𑀢𑁆𑀢𑀦𑀢𑁄 𑀫𑀺𑀘𑁆𑀙𑀸𑀜𑀸𑀡𑀁 𑀫𑁄𑀳𑁄𑀯.

𑀮𑁄𑀓𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀔𑀦𑁆𑀥𑀧𑁆𑀧𑀯𑀢𑁆𑀢𑀺𑀬𑀁 𑀲𑀢𑀺. 𑀅𑀦𑀼𑀧𑀭𑀫𑀥𑀫𑁆𑀫𑀓𑀢𑁆𑀢𑀸𑀢𑀺 𑀧𑀼𑀜𑁆𑀜𑀧𑀸𑀧𑀯𑀲𑁂𑀦 𑀅𑀧𑀭𑀸𑀧𑀭𑀁 𑀅𑀯𑀺𑀘𑁆𑀙𑀺𑀚𑁆𑀚𑀦𑀢𑁄. ‘‘𑀮𑀸𑀪𑀳𑁂𑀢𑀼𑀓𑁄 𑀮𑀸𑀪𑁄’’𑀢𑀺𑀆𑀤𑀺𑀦𑀸 𑀓𑀸𑀭𑀡𑁄𑀧𑀘𑀸𑀭𑁂𑀦.

𑀆𑀯𑀸𑀲𑁂 𑀫𑀘𑁆𑀙𑀭𑀺𑀬𑀁, 𑀆𑀯𑀸𑀲𑀳𑁂𑀢𑀼𑀓𑀁 𑀯𑀸 𑀫𑀘𑁆𑀙𑀭𑀺𑀬𑀁 𑀆𑀯𑀸𑀲𑀫𑀘𑁆𑀙𑀭𑀺𑀬𑀁.

𑀢𑀬𑁄𑀢𑀺 𑀯𑀢𑁆𑀣𑀼𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀪𑀺𑀦𑁆𑀤𑀺𑀢𑁆𑀯𑀸 𑀧𑀦 𑀯𑀼𑀘𑁆𑀘𑀫𑀸𑀦𑁂 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺.

𑀕𑀦𑁆𑀣𑀓𑀭𑀡𑀁 𑀓𑀸𑀭𑀡𑀪𑀸𑀯𑁂𑀦 𑀧𑀝𑀺𑀩𑀤𑁆𑀥𑀢𑀸𑀓𑀭𑀡𑀁 𑀕𑀦𑁆𑀣𑀦𑀦𑁆𑀢𑀺 𑀢𑀁 𑀭𑀽𑀧𑀓𑀸𑀬𑁂𑀧𑀺 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀦𑀸𑀫𑀓𑀸𑀬𑀲𑁆𑀲 𑀘𑁂𑀯 𑀭𑀽𑀧𑀓𑀸𑀬𑀲𑁆𑀲 𑀘𑀸’’𑀢𑀺. 𑀢𑀢𑁆𑀣 𑀩𑁆𑀬𑀸𑀧𑀸𑀤𑀲𑁆𑀲𑀸𑀧𑀺 𑀅𑀪𑀺𑀲𑀚𑁆𑀚𑀦𑀼𑀧𑀦𑀬𑁆𑀳𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀕𑀦𑁆𑀣𑀦𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄, 𑀬𑀢𑁄 𑀢𑀲𑁆𑀲 𑀧𑀝𑀺𑀖𑀲𑀁𑀬𑁄𑀚𑀦𑀪𑀸𑀯𑁄 𑀯𑀼𑀢𑁆𑀢𑁄.

𑀙𑀦𑁆𑀤𑀤𑁄𑀲𑀫𑁄𑀳𑀪𑀬𑁂𑀳𑀻𑀢𑀺 𑀙𑀦𑁆𑀤𑀤𑁄𑀲𑀫𑁄𑀳𑀪𑀬𑀳𑁂𑀢𑀼. 𑀢𑀜𑁆𑀳𑀻𑀢𑀺 𑀅𑀓𑀢𑁆𑀢𑀩𑁆𑀩𑀓𑀭𑀡𑀁, 𑀓𑀢𑁆𑀢𑀩𑁆𑀩𑀸𑀓𑀭𑀡𑀜𑁆𑀘.

𑀲𑀯𑀦𑀸𑀢𑀺 𑀧𑀯𑀢𑁆𑀢𑀦𑀢𑁄. 𑀲𑀯𑀦𑀢𑁄𑀢𑀺 𑀓𑀺𑀮𑁂𑀲𑀸𑀲𑀼𑀘𑀺𑀪𑀸𑀯𑁂𑀦 𑀯𑀺𑀲𑁆𑀲𑀦𑁆𑀤𑀦𑀢𑁄. 𑀧𑀼𑀦 𑀲𑀯𑀦𑀢𑁄𑀢𑀺 𑀧𑀲𑀯𑀦𑀢𑁄.

𑀆𑀓𑀟𑁆𑀠𑀦𑀝𑁆𑀞𑁂𑀦, 𑀤𑀼𑀭𑀼𑀢𑁆𑀢𑀭𑀡𑀝𑁆𑀞𑁂𑀦 𑀘𑀸𑀢𑀺 𑀏𑀢𑁂𑀦 𑀑𑀖𑀸 𑀯𑀺𑀬 𑀑𑀖𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀭𑀫𑁆𑀫𑀡𑁂𑀦, 𑀤𑀼𑀓𑁆𑀔𑁂𑀦 𑀘 𑀯𑀺𑀬𑁄𑀕𑀲𑁆𑀲 𑀅𑀧𑁆𑀧𑀤𑀸𑀦𑀲𑀗𑁆𑀔𑀸𑀢𑁂𑀦 𑀬𑁄𑀚𑀦𑀝𑁆𑀞𑁂𑀦 𑀬𑁄𑀕𑀸𑀢𑀺 𑀤𑀲𑁆𑀲𑁂𑀢𑀺, 𑀲𑀁𑀓𑀺𑀮𑁂𑀲𑀓𑀭𑀡𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀜𑁆𑀜𑁂𑀯𑀸𑀢𑀺 𑀓𑀸𑀫𑀭𑀸𑀕𑀸𑀤𑀻𑀦𑀁𑀬𑁂𑀯. 𑀢𑁂 𑀳𑀺 𑀲𑁄𑀢𑀯𑀲𑁂𑀦 𑀯𑀢𑁆𑀢𑀫𑀸𑀦𑀸 𑀲𑁄𑀢𑁄 𑀯𑀺𑀬 𑀲𑁄𑀢𑀧𑀢𑀺𑀢𑁂 𑀲𑀢𑁆𑀢𑁂 𑀅𑀧𑀸𑀬𑀲𑀫𑀼𑀤𑁆𑀤𑀁 𑀧𑀸𑀧𑁂𑀦𑁆𑀢𑀺, 𑀲𑀁𑀲𑀸𑀭𑀲𑀫𑀼𑀤𑁆𑀤𑀢𑁄 𑀘 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀬𑀣𑀸𑀕𑀳𑀺𑀢𑀜𑁆𑀘 𑀆𑀭𑀫𑁆𑀫𑀡𑀁 𑀯𑀺𑀲𑁆𑀲𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀬𑀸𑀤𑀺𑀲𑀜𑁆𑀘 𑀧𑀸𑀧𑀁 𑀓𑀢𑁆𑀯𑀸 𑀤𑀼𑀓𑁆𑀔𑀧𑁆𑀧𑀢𑁆𑀢𑁂 𑀧𑀼𑀦𑀧𑀺 𑀢𑀸𑀤𑀺𑀲𑁂𑀦 𑀬𑁄𑀚𑁂𑀦𑁆𑀢𑀺.

𑀘𑀺𑀢𑁆𑀢𑀲𑁆𑀲𑀸𑀢𑀺 𑀓𑀼𑀲𑀮𑀘𑀺𑀢𑁆𑀢𑀲𑁆𑀲, 𑀯𑀺𑀲𑁂𑀲𑀢𑁄 𑀛𑀸𑀦𑀘𑀺𑀢𑁆𑀢𑀲𑁆𑀲. 𑀆𑀤𑀺𑀢𑁄 𑀯𑀭𑀡𑀁 𑀆𑀯𑀭𑀡𑀁. 𑀓𑀺𑀮𑁂𑀲𑀯𑀸𑀲𑀦𑀁 𑀦𑁂𑀢𑁆𑀯𑀸 𑀯𑀭𑀡𑀁 𑀦𑀻𑀯𑀭𑀡𑀁. 𑀓𑀼𑀝𑁆𑀝𑀓𑀯𑀸𑀝𑀸𑀤𑀻𑀳𑀺 𑀯𑀺𑀬 𑀧𑀺𑀤𑀳𑀦𑀁 𑀧𑀝𑀺𑀘𑁆𑀙𑀸𑀤𑀦𑀁, 𑀢𑀁 𑀧𑀦 𑀓𑀼𑀲𑀮𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀺𑀢𑀼𑀁, 𑀧𑀭𑀺𑀜𑁆𑀜𑀸𑀢𑀼𑀁, 𑀜𑀸𑀢𑀼𑀜𑁆𑀘 𑀅𑀧𑁆𑀧𑀤𑀸𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑀁.

𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀪𑀸𑀯𑀦𑁆𑀢𑀺 𑀓𑀸𑀬𑀸𑀤𑀺𑀓𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀲𑀼𑀪𑀸𑀤𑀺𑀲𑀪𑀸𑀯𑀁. 𑀅𑀪𑀽𑀢𑀁 𑀲𑀪𑀸𑀯𑀦𑁆𑀢𑀺 𑀲𑀼𑀪𑀸𑀤𑀺𑀲𑀪𑀸𑀯𑀁.

𑀣𑀸𑀫𑀕𑀢𑀝𑁆𑀞𑁂𑀦𑀸𑀢𑀺 𑀣𑀸𑀫𑀕𑀢𑀪𑀸𑀯𑁂𑀦. 𑀣𑀸𑀫𑀕𑀢𑀦𑁆𑀢𑀺 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀓𑀸𑀫𑀭𑀸𑀕𑀸𑀤𑀻𑀦𑀁 𑀲𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀬𑁂𑀦 𑀢𑁂 𑀏𑀯 𑀪𑀕𑀯𑀢𑀸 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀢𑁆𑀢𑀸. 𑀅𑀦𑀼𑀲𑀬𑀦𑀜𑁆𑀘 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀸. 𑀢𑁂𑀦𑀸𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀓𑀸𑀫𑀭𑀸𑀕𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀅𑀦𑀼𑀲𑁂𑀦𑁆𑀢𑀺𑀬𑁂𑀯𑀸’’𑀢𑀺.

𑀤𑀼𑀫𑁆𑀫𑁄𑀘𑀦𑀻𑀬𑀪𑀸𑀯𑁂𑀦 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳 ‘‘𑀢𑁂𑀮𑀜𑁆𑀚𑀦𑀓𑀮𑀮𑀁 𑀯𑀺𑀬𑀸’’𑀢𑀺.

𑁮𑁩𑁦. 𑀲𑁂𑀲𑀸𑀢𑀺 𑀅𑀦𑀧𑀸𑀬𑀕𑀫𑀦𑀻𑀬𑀸. 𑀲𑀼𑀔𑀼𑀫𑀸 𑀓𑀸𑀫𑀭𑀸𑀕𑀧𑀝𑀺𑀖𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸 𑀏𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀧𑀞𑀫𑀜𑀸𑀡𑀸𑀤𑀺𑀯𑀚𑁆𑀛𑀢𑀸 𑀦𑀺𑀯𑀢𑁆𑀢𑀻𑀬𑀢𑀺. 𑀢𑀬𑀺𑀤𑀁 𑀦𑀺𑀬𑀫𑀤𑀲𑁆𑀲𑀦𑀁 𑀅𑀜𑁆𑀜𑀢𑁆𑀣𑀸𑀧𑀺 𑀦𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀦𑀺𑀬𑀫𑀁 𑀦 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀢𑁂𑀦 𑀦𑀺𑀬𑀫𑁂 𑀅𑀓𑀢𑁂 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑀢𑀸𑀧𑀺 𑀅𑀦𑀼𑀜𑁆𑀜𑀸𑀢𑀸 𑀏𑀯 𑀳𑁄𑀢𑀻𑀢𑀺.

𑀮𑁄𑀪…𑀧𑁂… 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀦𑀻𑀢𑀺𑀆𑀤𑀻𑀲𑀼 𑀧𑀞𑀫𑀜𑀸𑀡𑀸𑀤𑀻𑀳𑀺 𑀳𑀢𑀸𑀧𑀸𑀬𑀕𑀫𑀦𑀻𑀬𑀸𑀤𑀺𑀪𑀸𑀯𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀺𑀲𑀤𑁆𑀤𑁂𑀦 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀕𑀳𑀺𑀢𑀸.

𑀬𑀲𑁂𑀢𑀺 𑀧𑀭𑀺𑀯𑀸𑀭𑁂.

𑀅𑀕𑀢𑀻𑀲𑀼 𑀙𑀦𑁆𑀤𑀸𑀤𑀬𑁄 𑀓𑀺𑀜𑁆𑀘𑀸𑀧𑀺 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑀸, 𑀢𑀣𑀸𑀧𑀺 𑀢𑀁𑀫𑀽𑀮𑀓𑀲𑁆𑀲 𑀅𑀓𑀢𑁆𑀢𑀩𑁆𑀩𑀓𑀭𑀡𑀲𑁆𑀲, 𑀓𑀢𑁆𑀢𑀩𑁆𑀩𑀸𑀓𑀭𑀡𑀲𑁆𑀲 𑀘 𑀅𑀧𑀸𑀬𑀕𑀫𑀦𑀻𑀬𑀢𑀸𑀬 𑀧𑀞𑀫𑀫𑀕𑁆𑀕𑀯𑀚𑁆𑀛𑀸.

𑀓𑀢𑀸𑀓𑀢𑀸𑀓𑀼𑀲𑀮𑀸𑀓𑀼𑀲𑀮𑀯𑀺𑀲𑀬𑀁 𑀬𑀁 𑀯𑀺𑀧𑁆𑀧𑀝𑀺𑀲𑀸𑀭𑀪𑀽𑀢𑀁 𑀓𑀼𑀓𑁆𑀓𑀼𑀘𑁆𑀘𑀁, 𑀢𑀁 𑀇𑀥 𑀢𑀢𑀺𑀬𑀜𑀸𑀡𑀯𑀚𑁆𑀛𑀁 𑀯𑀼𑀢𑁆𑀢𑀁. 𑀬𑀁 𑀧𑀦 ‘‘𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸𑀬 𑀆𑀧𑀢𑁆𑀢𑀺𑀫𑀸𑀧𑀚𑁆𑀚𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁪𑁩𑁮; 𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁 𑀓𑀼𑀓𑁆𑀓𑀼𑀘𑁆𑀘𑀁, 𑀢𑀁 𑀲𑀦𑁆𑀥𑀸𑀬 ‘‘𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧𑁧𑁭𑁬) 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀯𑀘𑀦𑀸𑀦𑀁 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑁂𑀲𑀼𑀧𑀺 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀅𑀥𑀺𑀧𑁆𑀧𑀸𑀬𑁄 𑀫𑀕𑁆𑀕𑀺𑀢𑀩𑁆𑀩𑁄, 𑀦 𑀯𑀺𑀭𑁄𑀥𑀢𑁄 𑀧𑀘𑁆𑀘𑁂𑀢𑀩𑁆𑀩𑁄. 𑀑𑀴𑀸𑀭𑀺𑀓𑀸𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀯𑀸 𑀲𑀦𑁆𑀥𑀸𑀬 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀞𑀫𑀢𑀢𑀺𑀬𑀜𑀸𑀡𑀯𑀚𑁆𑀛𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀅𑀦𑀼𑀯𑀲𑀺𑀢𑁆𑀯𑀸 𑀅𑀦𑀼𑀯𑀲𑀺𑀢𑁆𑀯𑀸 𑀆𑀯𑀲𑀣𑀧𑀺𑀡𑁆𑀟𑀁 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺, ‘‘𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀦 𑀧𑀝𑀺𑀕𑁆𑀕𑀳𑁂𑀲𑀻’’𑀢𑀺 (𑀧𑀸𑀘𑀺. 𑁨𑁦𑁪) 𑀧𑀦 𑀆𑀕𑀢𑀁 𑀓𑀼𑀓𑁆𑀓𑀼𑀘𑁆𑀘𑀁, 𑀦 𑀦𑀻𑀯𑀭𑀡𑀁 𑀅𑀭𑀳𑀢𑁄 𑀉𑀧𑁆𑀧𑀚𑁆𑀚𑀦𑀢𑁄, 𑀦𑀻𑀯𑀭𑀡𑀧𑀝𑀺𑀭𑀽𑀧𑀓𑀁 𑀧𑀦 ‘‘𑀓𑀧𑁆𑀧𑀢𑀺 𑀦 𑀓𑀧𑁆𑀧𑀢𑀻’’𑀢𑀺 𑀯𑀻𑀫𑀁𑀲𑀦𑀪𑀽𑀢𑀁 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫, 𑀢𑀁 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀯.

𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀼𑀲𑀬𑀸 𑀅𑀡𑀼𑀲𑀳𑀕𑀢𑀸 𑀢𑀢𑀺𑀬𑀜𑀸𑀡𑀯𑀚𑁆𑀛𑀸. 𑀑𑀴𑀸𑀭𑀺𑀓𑀸𑀦𑀁 𑀧𑀦 𑀤𑀼𑀢𑀺𑀬𑀜𑀸𑀡𑀯𑀚𑁆𑀛𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀯.

𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀫𑀓𑁆𑀔𑀧𑀴𑀸𑀲𑀫𑀸𑀬𑀸𑀲𑀸𑀞𑁂𑀬𑁆𑀬𑀧𑀫𑀸𑀤𑀣𑀫𑁆𑀪𑀲𑀸𑀭𑀫𑁆𑀪𑀸𑀤𑀻𑀦𑀁 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁮𑁩𑁧. 𑀅𑀨𑀮𑁄 𑀯𑀸𑀬𑀸𑀫𑁄𑀢𑀺 𑀏𑀢𑁆𑀣 𑀅𑀢𑀻𑀢𑀸𑀦𑀁 𑀢𑀸𑀯 𑀧𑀚𑀳𑀦𑁂 𑀅𑀨𑀮𑁄 𑀳𑁄𑀢𑀼 𑀯𑀸𑀬𑀸𑀫𑁄 𑀦𑀺𑀭𑀼𑀤𑁆𑀥𑀢𑁆𑀢𑀸, 𑀅𑀦𑀸𑀕𑀢𑀸𑀦𑀁 𑀧𑀦 𑀓𑀣𑀦𑁆𑀢𑀺 𑀢𑁂𑀲𑀫𑁆𑀧𑀺 𑀯𑀓𑁆𑀔𑀫𑀸𑀦𑀁 𑀅𑀯𑀺𑀧𑀭𑀻𑀢𑀫𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 𑀦𑀢𑁆𑀣𑀺𑀢𑀸𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀘𑁄𑀤𑁂𑀢𑀺, 𑀢𑀣𑀸𑀧𑀺 ‘‘𑀅𑀨𑀮𑁄’’𑀢𑀺 𑀧𑀼𑀩𑁆𑀩𑁂 𑀧𑀳𑀸𑀢𑀩𑁆𑀩𑀸𑀦𑀁 𑀦𑀢𑁆𑀣𑀺𑀢𑀸𑀬 𑀘𑁄𑀤𑀦𑀸 𑀓𑀢𑀸, 𑀇𑀤𑀸𑀦𑀺 𑀧𑀳𑀸𑀦𑀲𑁆𑀲. 𑀬𑀤𑀺 𑀳𑀺 𑀧𑀳𑀸𑀦𑀁 𑀅𑀢𑁆𑀣𑀺, 𑀓𑀣𑀁 𑀧𑀳𑀸𑀢𑀩𑁆𑀩𑀸 𑀲𑀦𑁆𑀢𑀺? 𑀅𑀣 𑀧𑀳𑀸𑀢𑀩𑁆𑀩𑀸 𑀲𑀦𑁆𑀢𑀺, 𑀓𑀣𑀁 𑀧𑀳𑀸𑀦𑀁 𑀳𑁄𑀢𑀺? 𑀧𑀳𑀸𑀢𑀩𑁆𑀩𑀸 𑀘 𑀲𑀦𑁆𑀢𑀺, 𑀧𑀳𑀸𑀦𑀜𑁆𑀘 𑀳𑁄𑀢𑀻𑀢𑀺 𑀯𑀺𑀧𑁆𑀧𑀝𑀺𑀲𑀺𑀤𑁆𑀥𑀫𑁂𑀢𑀁. 𑀓𑀲𑁆𑀫𑀸? 𑀧𑀳𑀸𑀢𑀩𑁆𑀩𑁂𑀲𑀼 𑀲𑀦𑁆𑀢𑁂𑀲𑀼 𑀧𑀳𑀸𑀦𑀲𑁆𑀲 𑀅𑀲𑀫𑁆𑀪𑀯𑀢𑁄 𑀢𑀤𑀼𑀧𑀕𑁄 𑀯𑀸𑀬𑀸𑀫𑁄 𑀅𑀨𑀮𑁄 𑀆𑀮𑁄𑀓𑀢𑀫𑀸𑀦𑀁 𑀲𑀳𑀸𑀯𑀝𑁆𑀞𑀸𑀦𑁂 𑀲𑀢𑀺 𑀆𑀮𑁄𑀓𑀲𑁆𑀲 𑀅𑀨𑀮𑀢𑀸 𑀯𑀺𑀬. 𑀅𑀣𑀸𑀧𑀺 𑀓𑀣𑀜𑁆𑀘𑀺 𑀧𑀳𑀸𑀦𑀁 𑀲𑀺𑀬𑀸? 𑀲𑀁𑀓𑀺𑀮𑁂𑀲𑀺𑀓𑀸 𑀘 𑀫𑀕𑁆𑀕𑀪𑀸𑀯𑀦𑀸 𑀆𑀧𑀚𑁆𑀚𑀢𑀺 𑀧𑀳𑀸𑀢𑀩𑁆𑀩𑀧𑀳𑀸𑀬𑀓𑀸𑀦𑀁 𑀲𑀳𑀸𑀯𑀝𑁆𑀞𑀸𑀦𑀢𑁄. 𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀸 𑀓𑀺𑀮𑁂𑀲𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀯𑀸𑀤𑀻𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀧𑀦 𑀦𑁂𑀲𑀁 𑀯𑀸𑀤𑀻𑀦𑀁 𑀬𑀣𑀸 𑀫𑀢𑀺𑀫𑀢𑁆𑀢𑀁, 𑀏𑀯𑀫𑀺𑀥𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀺𑀮𑁂𑀲𑁄 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀦𑀸𑀫 𑀅𑀢𑁆𑀣𑀻’’𑀢𑀺. 𑀅𑀭𑀽𑀧𑀥𑀫𑁆𑀫𑀸 𑀳𑀺 𑀏𑀓𑀯𑀢𑁆𑀣𑀼𑀓𑀸𑀤𑀺𑀪𑀸𑀯𑁂𑀦 𑀯𑀢𑁆𑀢𑀫𑀸𑀦𑀸 𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀢𑁂 𑀓𑀣𑀁 𑀘𑀺𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫 𑀲𑀺𑀬𑀼𑀁, 𑀢𑀲𑁆𑀫𑀸 𑀦𑀢𑁆𑀣𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀓𑀺𑀮𑁂𑀲𑀸𑀦𑀁. 𑀆𑀯𑁂𑀡𑀺𑀓𑀸𑀢𑀺 𑀅𑀲𑀸𑀥𑀸𑀭𑀡𑀸, 𑀲𑀬𑀫𑁂𑀯 𑀉𑀧𑁆𑀧𑀸𑀤𑀺𑀢𑀸 𑀧𑀸𑀴𑀺 𑀅𑀦𑀸𑀭𑀼𑀴𑁆𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀴𑀺𑀬𑀁𑀬𑁂𑀯 𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁆𑀯𑀸𑀬𑀁 𑀧𑀼𑀕𑁆𑀕𑀮𑁄. 𑀳𑀜𑁆𑀘𑀻𑀢𑀺 𑀬𑀤𑀺.

𑀯𑀺𑀦𑀺𑀩𑀤𑁆𑀥𑁄𑀢𑀺 𑀫𑀸𑀦𑁂𑀦 𑀧𑀢𑁆𑀣𑀤𑁆𑀥𑀘𑀺𑀢𑁆𑀢𑁄. 𑀧𑀭𑀸𑀫𑀝𑁆𑀞𑁄𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑁄. 𑀣𑀸𑀫𑀕𑀢𑁄𑀢𑀺 𑀣𑀸𑀫𑀕𑀢𑀓𑀺𑀮𑁂𑀲𑁄 𑀣𑀺𑀭𑀪𑀸𑀯𑀕𑀢𑀸𑀦𑀼𑀲𑀬𑁄. 𑀢𑁂𑀦 𑀳𑀺 𑀦𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸𑀢𑀺 𑀬𑀲𑁆𑀫𑀸 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀦 𑀬𑀼𑀚𑁆𑀚𑀢𑀺, 𑀢𑀺𑀓𑀸𑀮𑀺𑀓𑀸 𑀘 𑀓𑀺𑀮𑁂𑀲𑀸, 𑀢𑀲𑁆𑀫𑀸 𑀦𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸, 𑀢𑀸𑀬 𑀲𑀸𑀥𑁂𑀢𑀩𑁆𑀩𑀁 𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀦 𑀳𑀺 𑀦𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸’’𑀢𑀺𑀆𑀤𑀺𑀦𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑀲𑁆𑀲 𑀧𑀝𑀺𑀓𑁆𑀔𑁂𑀧𑁄. 𑀇𑀤𑀁 𑀯𑀼𑀢𑁆𑀢𑀁 ‘‘𑀧𑀸𑀴𑀺𑀬𑀁𑀬𑁂𑀯 𑀳𑀻’’𑀢𑀺𑀆𑀤𑀺𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀏𑀯𑀫𑁂𑀯𑀸𑀢𑀺 𑀬𑀣𑀸 𑀅𑀚𑀸𑀢𑀨𑀮𑁂 𑀢𑀭𑀼𑀡𑀭𑀼𑀓𑁆𑀔𑁂 𑀫𑀽𑀮𑁂 𑀙𑀺𑀦𑁆𑀦𑁂 𑀅𑀲𑀢𑀺 𑀙𑁂𑀤𑀦𑁂 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀺 𑀙𑁂𑀤𑀦𑀧𑀘𑁆𑀘𑀬𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀯𑀺𑀦𑀝𑁆𑀞𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀫𑀕𑁆𑀕𑀪𑀸𑀯𑀦𑀸𑀬 𑀅𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀓𑀺𑀮𑁂𑀲𑀸 𑀫𑀕𑁆𑀕𑀪𑀸𑀯𑀦𑀸𑀬 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸 ‘‘𑀧𑀳𑀻𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀉𑀧𑁆𑀧𑀸𑀤𑁄𑀢𑀺 𑀉𑀧𑁆𑀧𑀸𑀤𑀲𑀻𑀲𑁂𑀦 𑀉𑀧𑁆𑀧𑀸𑀤𑀯𑀦𑁆𑀢𑁄 𑀔𑀦𑁆𑀥𑀸 𑀯𑀼𑀢𑁆𑀢𑀸. 𑀅𑀦𑀼𑀧𑁆𑀧𑀸𑀤𑁂𑀢𑀺 𑀦𑀺𑀩𑁆𑀩𑀸𑀦𑁂. 𑀅𑀚𑀸𑀢𑀸𑀬𑁂𑀯 𑀦 𑀚𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀧𑀳𑀻𑀦𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 ‘‘𑀦𑀢𑁆𑀣𑀺 𑀓𑀺𑀮𑁂𑀲𑀧𑁆𑀧𑀳𑀸𑀦’’𑀦𑁆𑀢𑀺 𑀧𑀭𑀯𑀸𑀤𑀺𑀦𑀸 𑀓𑀢𑁄 𑀧𑀝𑀺𑀓𑁆𑀔𑁂𑀧𑁄 ‘‘𑀦 𑀳𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀢𑁂 𑀧𑀦 𑀦𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀕𑀢𑀸, 𑀦𑀸𑀧𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀦 𑀘 𑀉𑀧𑁆𑀧𑀦𑁆𑀦𑀸𑀢𑀺 ‘‘𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀳𑁂𑀢𑀼𑀦𑀺𑀭𑁄𑀥𑀸𑀢𑀺 𑀤𑀼𑀓𑁆𑀔𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀦𑀺𑀭𑁄𑀥𑀸. 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀓𑀤𑀼𑀓𑁆𑀔𑀲𑁆𑀲 𑀦𑀺𑀭𑁄𑀥𑁄. 𑀉𑀧𑁆𑀧𑀸𑀤𑀧𑀯𑀢𑁆𑀢𑀦𑀺𑀫𑀺𑀢𑁆𑀢𑀸𑀬𑀽𑀳𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀯𑀲𑁂𑀦 𑀕𑀳𑀺𑀢𑀸.

𑁮𑁩𑁨. 𑀏𑀢𑁂𑀦𑀸𑀢𑀺 ‘‘𑀅𑀚𑀸𑀢𑀸𑀬𑁂𑀯 𑀦 𑀚𑀸𑀬𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑁂𑀦. 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀁 𑀪𑀽𑀫𑀺𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀮𑀤𑁆𑀥𑀯𑀦𑁆𑀢𑁄 𑀪𑀽𑀫𑀺𑀮𑀤𑁆𑀥𑀸 𑀬𑀣𑀸 ‘‘𑀅𑀕𑁆𑀕𑀺𑀆𑀳𑀺𑀢𑁄’’𑀢𑀺, 𑀮𑀤𑁆𑀥𑀪𑀽𑀫𑀺𑀓𑀸𑀢𑀺 𑀅𑀢𑁆𑀣𑁄. 𑀯𑀢𑁆𑀢𑀫𑀸𑀦𑀸𑀤𑀺𑀉𑀧𑁆𑀧𑀦𑁆𑀦𑀯𑀺𑀥𑀼𑀭𑀢𑀸𑀬 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀸 𑀏𑀯 𑀦𑀸𑀫 𑀢𑁂𑀢𑀺 𑀯𑀼𑀢𑁆𑀢𑀁.

𑁮𑁩𑁩. 𑀅𑀦𑀼𑀪𑀯𑀺𑀢𑁆𑀯𑀸, 𑀪𑀯𑀺𑀢𑁆𑀯𑀸 𑀘 𑀅𑀧𑀕𑀢𑀁 𑀪𑀽𑀢𑀸𑀧𑀕𑀢𑀁. 𑀅𑀦𑀼𑀪𑀽𑀢𑀪𑀽𑀢𑀸 𑀳𑀺 𑀪𑀽𑀢𑀢𑀸𑀲𑀸𑀫𑀜𑁆𑀜𑁂𑀦 𑀪𑀽𑀢𑀲𑀤𑁆𑀤𑁂𑀦 𑀯𑀼𑀢𑁆𑀢𑀸. 𑀲𑀸𑀫𑀜𑁆𑀜𑀫𑁂𑀯 𑀳𑀺 𑀉𑀧𑀲𑀕𑁆𑀕𑁂𑀦 𑀯𑀺𑀲𑁂𑀲𑀻𑀬𑀢𑀻𑀢𑀺. 𑀅𑀦𑀼𑀪𑀽𑀢𑀲𑀤𑁆𑀤𑁄 𑀘 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄 𑀅𑀦𑀼𑀪𑀸𑀯𑀓𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀓𑀧𑁆𑀧𑀕𑀸𑀳𑀯𑀲𑁂𑀦 𑀭𑀸𑀕𑀸𑀤𑀻𑀳𑀺, 𑀢𑀩𑁆𑀩𑀺𑀧𑀓𑁆𑀔𑁂𑀳𑀺 𑀘 𑀅𑀓𑀼𑀲𑀮𑀁, 𑀓𑀼𑀲𑀮𑀜𑁆𑀘 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺, 𑀦 𑀯𑀺𑀧𑀸𑀓𑁄 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀢𑁆𑀢𑀸, 𑀦𑀸𑀧𑀺 𑀓𑀺𑀭𑀺𑀬𑀸 𑀅𑀳𑁂𑀢𑀼𑀓𑀸𑀦𑀁 𑀅𑀢𑀺𑀤𑀼𑀩𑁆𑀩𑀮𑀢𑀸𑀬, 𑀲𑀳𑁂𑀢𑀼𑀓𑀸𑀦𑀜𑁆𑀘 𑀔𑀻𑀡𑀓𑀺𑀮𑁂𑀲𑀲𑁆𑀲 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀢𑀺𑀲𑀦𑁆𑀢𑀯𑀼𑀢𑁆𑀢𑀺𑀢𑁆𑀢𑀸. 𑀏𑀢𑁆𑀣 𑀘 𑀧𑀼𑀭𑀺𑀫𑀦𑀬𑁂 𑀓𑀼𑀲𑀮𑀸𑀓𑀼𑀲𑀮𑀫𑁂𑀯 𑀯𑀢𑁆𑀢𑀼𑀁 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 ‘‘𑀪𑀽𑀢𑀸𑀧𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 ‘‘𑀉𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸’’𑀢𑀺 (𑀲𑀁. 𑀦𑀺. 𑁫.𑁬𑁫𑁧-𑁬𑁬𑁨; 𑀯𑀺𑀪. 𑁩𑁯𑁦-𑁩𑁯𑁧) 𑀏𑀢𑁆𑀣 ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀢𑀁𑀲𑀤𑀺𑀲𑀸𑀦𑀁 𑀧𑀳𑀸𑀦𑀁, 𑀯𑀼𑀤𑁆𑀥𑀺 𑀘 𑀯𑀼𑀢𑁆𑀢𑀸. 𑀧𑀘𑁆𑀙𑀺𑀫𑀦𑀬𑁂 𑀘-𑀲𑀤𑁆𑀤𑁂𑀦 𑀓𑀼𑀲𑀮𑀸𑀓𑀼𑀲𑀮𑀜𑁆𑀘 𑀆𑀓𑀟𑁆𑀠𑀺𑀢𑁆𑀯𑀸 𑀲𑀩𑁆𑀩𑀁 𑀲𑀗𑁆𑀔𑀢𑀁 𑀯𑀼𑀢𑁆𑀢𑀁 𑀪𑀼𑀢𑁆𑀯𑀸𑀧𑀕𑀢𑀪𑀸𑀯𑀸𑀪𑀺𑀥𑀸𑀦𑀸𑀥𑀺𑀧𑁆𑀧𑀸𑀬𑁂𑀦. 𑀯𑀺𑀧𑀘𑁆𑀘𑀺𑀢𑀼𑀁 𑀑𑀓𑀸𑀲𑀓𑀭𑀡𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀢𑀁 𑀅𑀢𑀻𑀢𑀁 𑀓𑀫𑁆𑀫𑀜𑁆𑀘 𑀢𑀢𑁄 𑀉𑀧𑁆𑀧𑀚𑁆𑀚𑀺𑀢𑀼𑀁 𑀆𑀭𑀤𑁆𑀥𑁄 𑀯𑀺𑀧𑀸𑀓𑁄 𑀘 𑀅𑀦𑀸𑀕𑀢𑁄 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑁄 𑀑𑀓𑀸𑀲𑁄 𑀓𑀢𑁄 𑀏𑀢𑁂𑀦, 𑀑𑀓𑀸𑀲𑁄 𑀓𑀢𑁄 𑀏𑀢𑀲𑁆𑀲𑀸𑀢𑀺 𑀘 𑀅𑀢𑁆𑀣𑀤𑁆𑀯𑀬𑀯𑀲𑁂𑀦, 𑀬𑀁 𑀉𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀯𑀺𑀦𑀸𑀧𑀺 𑀯𑀺𑀜𑁆𑀜𑀸𑀬𑀫𑀸𑀦𑀁 𑀉𑀧𑁆𑀧𑀦𑁆𑀦𑀁 𑀲𑀦𑁆𑀥𑀸𑀬 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁧𑁦.𑁨𑁧𑁭, 𑁨𑁧𑁯) 𑀯𑀼𑀢𑁆𑀢𑀁.

𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀽𑀢𑀺 𑀫𑀦𑀼𑀲𑁆𑀲𑀤𑁂𑀯𑀸𑀤𑀺𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑁂𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀅𑀦𑀸𑀧𑀸𑀤𑀺𑀢𑀢𑀸𑀬 𑀅𑀲𑀫𑀽𑀳𑀢𑀁. 𑀅𑀲𑀫𑀽𑀳𑀢𑀢𑁆𑀢𑀸𑀬𑁂𑀯 𑀳𑀺𑀲𑁆𑀲 𑀦𑀢𑁆𑀣𑀻𑀢𑀺 𑀦𑀯𑀢𑁆𑀢𑀩𑁆𑀩𑀢𑀸𑀬 𑀉𑀧𑁆𑀧𑀦𑁆𑀦𑀯𑁄𑀳𑀸𑀭𑁄.

𑁮𑁩𑁪. ‘‘𑀓𑀸 𑀪𑀽𑀫𑀺, 𑀓𑁄 𑀯𑀸 𑀪𑀽𑀫𑀺𑀮𑀤𑁆𑀥𑁄’’𑀢𑀺 𑀆𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. ‘‘𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸’’𑀢𑀺 𑀏𑀢𑁂𑀦 𑀔𑀦𑁆𑀥𑀸𑀦𑀁 𑀅𑀧𑀭𑀺𑀜𑁆𑀜𑀸𑀢𑀢𑀁 𑀤𑀲𑁆𑀲𑁂𑀢𑀺, 𑀦 𑀆𑀭𑀫𑁆𑀫𑀡𑀪𑀸𑀯𑀫𑀢𑁆𑀢𑀁 𑀢𑁂𑀪𑀽𑀫𑀓𑀕𑁆𑀕𑀳𑀡𑁂𑀦𑁂𑀯 𑀢𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀅𑀧𑀭𑀺𑀜𑁆𑀜𑀸𑀢𑀸 𑀳𑀺 𑀔𑀦𑁆𑀥𑀸 𑀓𑀺𑀮𑁂𑀲𑀸𑀦𑀁 𑀪𑀽𑀫𑀻𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀔𑀦𑁆𑀥𑁂𑀲𑀼 𑀯𑀢𑁆𑀣𑀼𑀪𑀽𑀢𑁂𑀲𑀼. 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦. 𑀅𑀢𑀻𑀢𑀸𑀦𑀸𑀕𑀢𑁂, 𑀧𑀕𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀦𑁆𑀢𑀺 𑀢𑀁 𑀅𑀜𑁆𑀜𑀲𑀦𑁆𑀢𑀸𑀦𑀕𑀢𑀁 𑀓𑀺𑀮𑁂𑀲𑀚𑀸𑀢𑀁. 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑁂𑀦 𑀪𑀽𑀫𑀺𑀮𑀤𑁆𑀥𑀁 𑀦𑀸𑀫 𑀬𑀤𑀺 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀓𑀺𑀮𑁂𑀲𑀚𑀸𑀢𑀲𑁆𑀲. 𑀅𑀧𑁆𑀧𑀳𑁂𑀬𑁆𑀬𑀢𑁄 𑀧𑀭𑀲𑀦𑁆𑀢𑀢𑀺𑀧𑀢𑀺𑀢𑀢𑁆𑀢𑀸 𑀦 𑀓𑁄𑀘𑀺 𑀪𑀯𑀫𑀽𑀮𑀁 𑀧𑀚𑀳𑁂𑀬𑁆𑀬. 𑀪𑀽𑀫𑀺𑀮𑀤𑁆𑀥𑀜𑁆𑀳𑀺 𑀅𑀦𑀼𑀲𑀬𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦. 𑀬𑀢𑁆𑀣 𑀬𑀢𑁆𑀣 𑀪𑀯𑁂, 𑀲𑀦𑁆𑀢𑀸𑀦𑁂 𑀯𑀸. 𑀧𑀭𑀺𑀜𑁆𑀜𑀸𑀢𑀸𑀦𑀁 𑀅𑀪𑀽𑀫𑀺𑀪𑀸𑀯𑀢𑁄 ‘‘𑀅𑀧𑀭𑀺𑀜𑁆𑀜𑀸𑀢𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀸𑀤𑀢𑁄 𑀧𑀪𑀼𑀢𑀻𑀢𑀺 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀧𑀝𑁆𑀞𑀸𑀬. 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀪𑀸𑀯𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀓𑀸𑀭𑀡𑀲𑁆𑀲 𑀅𑀪𑀸𑀯𑀢𑁄 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀓𑀺𑀮𑁂𑀲𑀚𑀸𑀢𑀁 𑀅𑀦𑀼𑀲𑁂𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀼𑀲𑀬𑀺𑀢𑀁 𑀓𑀺𑀮𑁂𑀲𑀚𑀸𑀢𑀁, 𑀢𑁂𑀦𑁂𑀯 𑀅𑀦𑀼𑀲𑀬𑀦𑀲𑀗𑁆𑀔𑀸𑀢𑁂𑀦 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀪𑀽𑀫𑀺𑀮𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁩𑁫. 𑀢𑀢𑁆𑀣 𑀘 𑀪𑀽𑀫𑀺𑀪𑀽𑀢𑁂𑀲𑀼 𑀔𑀦𑁆𑀥𑁂𑀲𑀼 𑀦 𑀲𑀩𑁆𑀩𑁂 𑀲𑀩𑁆𑀩𑁂𑀲𑀁 𑀯𑀢𑁆𑀣𑀽 𑀳𑁄𑀦𑁆𑀢𑀺, 𑀅𑀣 𑀔𑁄 𑀯𑀺𑀲𑁂𑀲𑁄 𑀅𑀢𑁆𑀣𑀻𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲 𑀬𑁂𑀲𑀽’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀬𑁂𑀲𑀽𑀢𑀺 𑀲𑀢𑀺𑀧𑀺 𑀅𑀚𑁆𑀛𑀢𑁆𑀢𑀪𑀸𑀯𑀲𑀸𑀫𑀜𑁆𑀜𑁂 𑀬𑁂𑀲𑀼 𑀅𑀢𑀻𑀢𑀸𑀤𑀺𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀔𑀦𑁆𑀥𑁂𑀲𑀼. 𑀢𑁂 𑀏𑀯 𑀬𑀣𑀸𑀦𑀼𑀲𑀬𑀺𑀢𑀸 𑀔𑀦𑁆𑀥𑀸. 𑀓𑀺𑀁 𑀧𑀦𑁂𑀢𑁂 𑀓𑀺𑀮𑁂𑀲𑀸 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀸 𑀯𑀺𑀬 𑀧𑀭𑀺𑀘𑁆𑀙𑀺𑀚𑁆𑀚 𑀧𑀭𑀺𑀘𑁆𑀙𑀺𑀚𑁆𑀚 𑀅𑀦𑀼𑀲𑁂𑀦𑁆𑀢𑀻𑀢𑀺? 𑀬𑀢𑁄 𑀢𑁂 𑀏𑀯 𑀔𑀦𑁆𑀥𑀸 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀽𑀢𑀺 𑀯𑀼𑀢𑁆𑀢𑀸, 𑀦 𑀳𑁂𑀯 𑀔𑁄 𑀅𑀦𑀼𑀲𑀬𑀸𑀦𑀁 𑀯𑀢𑁆𑀣𑀼𑀁 𑀧𑀭𑀺𑀘𑁆𑀙𑀺𑀚𑁆𑀚 𑀧𑀯𑀢𑁆𑀢𑀺 𑀅𑀢𑁆𑀣𑀺. 𑀅𑀢𑀻𑀢𑀸𑀤𑀺𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀧𑀦 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀬𑁄 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀝𑁆𑀞𑁄, 𑀲𑁄 𑀧𑀭𑀺𑀘𑁆𑀙𑀺𑀚𑁆𑀚 𑀧𑀯𑀢𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 ‘‘𑀅𑀢𑀻𑀢𑀓𑁆𑀔𑀦𑁆𑀥𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀯𑀢𑁆𑀣𑀼𑀯𑀲𑁂𑀦 𑀪𑀽𑀫𑀺𑀮𑀤𑁆𑀥𑀁 𑀳𑁄𑀢𑀻𑀢𑀺 𑀯𑀢𑁆𑀣𑀼𑀪𑁂𑀤𑁂𑀦 𑀲𑀺𑀬𑀸 𑀢𑀲𑁆𑀲 𑀪𑁂𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸𑀯𑀯𑀢𑁆𑀣𑀺𑀢𑀪𑀸𑀯𑀢𑁄 𑀏𑀯 𑀳𑀺 ‘‘𑀅𑀜𑁆𑀜𑀢𑀭𑁄 𑀮𑁄𑀮𑀚𑀸𑀢𑀺𑀓𑁄 𑀢𑀁 𑀭𑀲𑀧𑀣𑀯𑀺𑀁 𑀅𑀗𑁆𑀕𑀼𑀮𑀺𑀬𑀸 𑀲𑀸𑀬𑀻’’𑀢𑀺𑀆𑀤𑀺𑀯𑀘𑀦𑀁 (𑀤𑀻. 𑀦𑀺. 𑁩.𑁧𑁨𑁦) 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀸𑀦𑀁 𑀭𑀲𑀢𑀡𑁆𑀳𑀸𑀤𑀻𑀦𑀁 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑁆𑀔𑀦𑁆𑀥𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑀯𑀢𑁆𑀣𑀼𑀓𑀢𑀁 𑀯𑀺𑀪𑀸𑀯𑁂𑀢𑀺. 𑀢𑁂𑀦𑀸𑀳 ‘‘𑀢𑀣𑀸 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑁂𑀲𑀽’’𑀢𑀺𑀆𑀤𑀺. 𑀬𑀣𑀸 𑀘𑁂𑀢𑁆𑀣 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑁆𑀔𑀦𑁆𑀥𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀺, 𑀏𑀯𑀁 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀽’’𑀢𑀺.

𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀪𑀯𑀦𑀯𑀲𑁂𑀦 𑀘 𑀓𑀺𑀮𑁂𑀲𑀸𑀦𑀁 𑀅𑀦𑀼𑀲𑀬𑀦𑀝𑁆𑀞𑁄 𑀅𑀦𑀼𑀫𑀻𑀬𑀢𑀺 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄. 𑀬𑀲𑁆𑀲 𑀬𑁂 𑀅𑀦𑀼𑀲𑀬𑀸 𑀧𑀳𑀻𑀦𑀸, 𑀢𑁂𑀲𑀁 𑀯𑀢𑁆𑀣𑀼 𑀢𑁂𑀦 𑀲𑀫𑀢𑀺𑀓𑁆𑀓𑀦𑁆𑀢𑀁 𑀧𑀭𑀺𑀜𑁆𑀜𑀸𑀢𑀢𑁆𑀢𑀸𑀢𑀺 𑀓𑀼𑀢𑁄 𑀦𑁂𑀲𑀁 𑀪𑀽𑀫𑀺𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑁄𑀢𑀸𑀧𑀦𑁆𑀦𑀸𑀤𑀻𑀲𑀼 𑀧𑀦𑀸’’𑀢𑀺𑀆𑀤𑀺. 𑀇𑀥 𑀯𑀝𑁆𑀝𑀫𑀽𑀮𑀓𑀺𑀮𑁂𑀲𑀸𑀢𑀺 𑀅𑀦𑀼𑀲𑀬𑀸 𑀅𑀥𑀺𑀧𑁆𑀧𑁂𑀢𑀸, 𑀦 𑀅𑀯𑀺𑀚𑁆𑀚𑀸, 𑀪𑀯𑀢𑀡𑁆𑀳𑀸 𑀘. 𑀬𑀁 𑀓𑀺𑀜𑁆𑀘𑀺 𑀘𑁂𑀢𑀦𑀸𑀘𑁂𑀢𑀲𑀺𑀓𑀪𑁂𑀤𑀁, 𑀓𑀸𑀬𑀺𑀓𑀸𑀤𑀺𑀪𑁂𑀤𑀁 𑀯𑀸. 𑀇𑀢𑀻𑀢𑀺 𑀏𑀯𑀁, 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀢𑁂 𑀧𑀦𑁂𑀢𑁂 𑀅𑀦𑀼𑀲𑀬𑀸 𑀅𑀢𑀻𑀢𑀸𑀤𑀺𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀢𑀢𑁆𑀣 𑀢𑀢𑁆𑀣 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀲𑀬𑀦𑁆𑀢𑀸𑀧𑀺 𑀢𑁂 𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀅𑀯𑀺𑀪𑀸𑀕𑁂𑀦𑁂𑀯 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀅𑀦𑀼𑀲𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀲𑁂𑀢𑀁 𑀯𑀝𑁆𑀝𑀫𑀽𑀮’’𑀦𑁆𑀢𑀺𑀆𑀤𑀺𑀫𑀸𑀳.

𑁮𑁩𑁬. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀧𑀣𑀯𑀻𑀭𑀲𑀸𑀤𑀺 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀼𑀓𑁆𑀔𑀕𑀘𑁆𑀙𑀮𑀢𑀸𑀤𑀻𑀦𑀁 𑀧𑀘𑁆𑀘𑀬𑀪𑀽𑀢𑁄 𑀲𑀲𑀫𑁆𑀪𑀸𑀭𑀧𑀣𑀯𑀺𑀬𑀸 𑀭𑀲𑁄 𑀧𑀣𑀯𑀻𑀭𑀲𑁄. 𑀆𑀧𑁄𑀭𑀲𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀔𑀸 𑀦𑀸𑀫 𑀔𑀼𑀤𑁆𑀤𑀓𑀲𑀸𑀔𑀸. 𑀧𑀲𑀸𑀔𑁄 𑀯𑀺𑀝𑀧𑁄. 𑀭𑀼𑀓𑁆𑀔𑀧𑀯𑁂𑀡𑀺𑀦𑁆𑀢𑀺 𑀭𑀼𑀓𑁆𑀔𑀧𑀭𑀸𑀧𑀭𑀁. 𑀲𑀦𑁆𑀢𑀸𑀦𑀬𑀫𑀸𑀦𑁂𑀢𑀺 𑀅𑀧𑀭𑀸𑀧𑀭𑀁 𑀅𑀦𑀼𑀧𑁆𑀧𑀩𑀦𑁆𑀥𑀦𑁆𑀢𑁂.

𑀫𑀡𑁆𑀟𑀽𑀓𑀓𑀡𑁆𑀝𑀓𑁄𑀢𑀺 𑀏𑀓𑁄 𑀫𑀘𑁆𑀙𑀓𑀡𑁆𑀝𑀓𑁄𑀢𑀺 𑀯𑀤𑀦𑁆𑀢𑀺. 𑀅𑀦𑀼𑀧𑀸𑀤𑀸𑀦𑁄𑀢𑀺 𑀧𑀳𑀻𑀦𑀘𑀢𑀼𑀭𑀼𑀧𑀸𑀤𑀸𑀦𑁄, 𑀭𑀽𑀧𑀸𑀤𑀻𑀲𑀼 𑀯𑀸 𑀓𑀺𑀜𑁆𑀘𑀺𑀧𑀺 𑀅𑀕𑀡𑁆𑀳𑀦𑁆𑀢𑁄.

𑁮𑁩𑁭. 𑀇𑀥 𑀲𑀫𑀼𑀤𑀸𑀘𑀸𑀭𑁄 𑀦𑀸𑀫 𑀮𑀤𑁆𑀥𑀢𑁆𑀢𑀮𑀸𑀪𑀢𑀸𑀢𑀺 𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀦𑁆𑀢𑀺 𑀆𑀳 ‘‘𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀫𑁂𑀯 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦’’𑀦𑁆𑀢𑀺. 𑀧𑀼𑀩𑁆𑀩𑀪𑀸𑀕𑁂 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀻𑀢𑀺 𑀢𑀲𑁆𑀫𑀺𑀁 𑀆𑀧𑀸𑀣𑀕𑀢𑁂 𑀆𑀭𑀫𑁆𑀫𑀡𑁂 𑀆𑀤𑀺𑀢𑁄 𑀧𑀯𑀢𑁆𑀢𑀚𑀯𑀦𑀯𑀸𑀭𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺. 𑀅𑀥𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀅𑀪𑀺𑀭𑀼𑀬𑁆𑀳 𑀕𑀳𑀺𑀢𑀢𑁆𑀢𑀸, 𑀤𑀴𑁆𑀳𑀁 𑀕𑀳𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀪𑀸𑀕𑁂𑀢𑀺 𑀅𑀧𑀭𑀲𑁆𑀫𑀺𑀁 𑀓𑀸𑀮𑀪𑀸𑀕𑁂, 𑀓𑀸𑀮𑀦𑁆𑀢𑀭𑁂𑀢𑀺 𑀅𑀢𑁆𑀣𑁄. 𑀏𑀓𑀦𑁆𑀢𑁂𑀦 𑀉𑀧𑁆𑀧𑀢𑁆𑀢𑀺𑀢𑁄𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀲𑀢𑀺 𑀢𑀣𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀦𑀺𑀬𑀫𑁂𑀦 𑀉𑀧𑁆𑀧𑀚𑁆𑀚𑀦𑀢𑁄. 𑀓𑀮𑁆𑀬𑀸𑀡𑀺𑀕𑀸𑀫𑁂𑀢𑀺 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂. 𑀭𑁄𑀳𑀡𑁂 𑀓𑀺𑀭 𑀅𑀪𑀺𑀭𑀽𑀧𑀸𑀦𑀁 𑀇𑀢𑁆𑀣𑀻𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀲𑁄 𑀕𑀸𑀫𑁄 𑀢𑀣𑀸 𑀯𑀼𑀘𑁆𑀘𑀢𑀺. 𑀘𑀺𑀢𑁆𑀢𑀲𑀦𑁆𑀢𑀢𑀺𑀫𑀦𑀸𑀭𑀼𑀴𑁆𑀳𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀁 𑀧𑀝𑀺𑀲𑁂𑀥𑁂𑀢𑀺. ‘‘𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀓𑀲𑁆𑀲 𑀳𑁂𑀢𑀼𑀦𑁄 𑀅𑀪𑀸𑀯𑀸’’𑀢𑀺 𑀏𑀢𑁂𑀦 𑀧𑀘𑁆𑀘𑀬𑁂 𑀲𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀸𑀬 𑀅𑀯𑀺𑀓𑁆𑀔𑀫𑁆𑀪𑀺𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑀸𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀅𑀲𑀫𑀽𑀳𑀢𑀼𑀧𑁆𑀧𑀦𑁆𑀦𑀫𑁆𑀧𑀺 𑀧𑀘𑁆𑀘𑀬𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀫𑁂𑀯? 𑀲𑀘𑁆𑀘𑀫𑁂𑀢𑀁, 𑀧𑀳𑀸𑀦𑀯𑀺𑀲𑁂𑀲𑀪𑀸𑀯𑀓𑀢𑁄 𑀧𑀦 𑀦𑁂𑀲𑀁 𑀪𑁂𑀤𑁄. 𑀬𑀣𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀸𑀲𑀫𑀽𑀳𑀢𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀲𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀁, 𑀏𑀯𑀁 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀼𑀧𑁆𑀧𑀦𑁆𑀦𑀫𑁆𑀧𑀻𑀢𑀺 𑀢𑀺𑀯𑀺𑀥𑀲𑁆𑀲𑀸𑀧𑀺 𑀪𑀽𑀫𑀺𑀮𑀤𑁆𑀥𑁂𑀦 𑀏𑀓𑀲𑀗𑁆𑀕𑀳𑀢𑀸 𑀯𑀼𑀢𑁆𑀢𑀸.

𑁮𑁩𑁮. 𑀅𑀓𑀼𑀲𑀮𑀫𑁆𑀧𑀺 𑀪𑀽𑀢𑀸𑀧𑀕𑀢𑀼𑀧𑁆𑀧𑀦𑁆𑀦𑀁 𑀅𑀢𑀻𑀢𑀢𑁆𑀢𑀸 𑀦 𑀧𑀳𑀸𑀢𑀩𑁆𑀩𑀁, 𑀢𑀣𑀸 𑀏𑀓𑀘𑁆𑀘𑀁 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀇𑀢𑀭𑀁 𑀅𑀧𑁆𑀧𑀳𑀸𑀢𑀩𑁆𑀩𑀢𑁄, 𑀲𑁂𑀲𑀤𑁆𑀯𑀬𑀁 𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀪𑀸𑀯𑀢𑁄𑀢𑀺 𑀆𑀳 ‘‘𑀅𑀫𑀕𑁆𑀕𑀯𑀚𑁆𑀛𑀢𑁆𑀢𑀸’’𑀢𑀺. 𑀓𑁂𑀦𑀘𑀻𑀢𑀺 𑀘𑀢𑀽𑀲𑀼 𑀫𑀕𑁆𑀕𑀜𑀸𑀡𑁂𑀲𑀼 𑀓𑁂𑀦𑀘𑀺. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀉𑀧𑁆𑀧𑀦𑁆𑀦𑀲𑁆𑀲. 𑀢𑀁 𑀉𑀧𑁆𑀧𑀦𑁆𑀦𑀪𑀸𑀯𑀁 𑀯𑀺𑀦𑀸𑀲𑀬𑀫𑀸𑀦𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀁 𑀯𑀺𑀦𑀸𑀲𑁂𑀦𑁆𑀢𑀁. 𑀧𑀞𑀫𑀁 𑀮𑁄𑀓𑀺𑀬𑀜𑀸𑀡𑁂𑀦 𑀬𑀣𑀸𑀩𑀮𑀁 𑀧𑀳𑀻𑀦𑀫𑁂𑀯 𑀮𑁄𑀓𑀼𑀢𑁆𑀢𑀭𑀜𑀸𑀡𑀁 𑀧𑀚𑀳𑀢𑀻𑀢𑀺 𑀮𑁄𑀓𑀺𑀬𑀕𑁆𑀕𑀳𑀡𑀁 𑀓𑀢𑀁.

𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁮𑁩𑁯. 𑀲𑀘𑁆𑀘𑀸𑀪𑀺𑀲𑀫𑀬𑀓𑀸𑀮𑀲𑁆𑀫𑀺𑀦𑁆𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑀓𑁆𑀔𑀡𑁂. 𑀯𑀼𑀢𑁆𑀢𑀸𑀦𑀻𑀢𑀺 ‘‘𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁦𑁯𑁯), ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁧𑁦𑁦) 𑀘 𑀯𑀼𑀢𑁆𑀢𑀸𑀦𑀺. 𑀬𑀣𑀸𑀲𑀪𑀸𑀯𑁂𑀦𑀸𑀢𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑁂𑀦. ‘‘𑀚𑀸𑀦𑀺𑀢𑀩𑁆𑀩𑀸𑀦𑀻’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀚𑀸𑀦𑀦𑀯𑀺𑀥𑀺𑀁 𑀉𑀧𑀫𑀸𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀢𑀸𑀯 𑀯𑀼𑀢𑁆𑀢𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑀣𑀸 𑀧𑀤𑀻𑀧𑁄𑀢𑀺𑀆𑀤𑀺 𑀏𑀓𑀲𑁆𑀲 𑀜𑀸𑀡𑀲𑁆𑀲 𑀏𑀓𑀓𑁆𑀔𑀡𑁂 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀣𑀁 𑀲𑀫𑁆𑀪𑀯𑀦𑁆𑀢𑀺. 𑀦 𑀳𑀺 𑀢𑀸𑀤𑀺𑀲𑀁 𑀓𑀺𑀜𑁆𑀘𑀺 𑀮𑁄𑀓𑁂 𑀤𑀺𑀝𑁆𑀞𑀁 𑀅𑀢𑁆𑀣𑀺, 𑀦 𑀘 𑀯𑀘𑀦𑀁 𑀮𑀩𑁆𑀪𑀢𑀻𑀢𑀺 𑀅𑀦𑁆𑀢𑁄𑀮𑀻𑀦𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦𑀸’’𑀢𑀺. 𑀅𑀦𑀯𑀲𑁂𑀲𑀢𑁄 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑀲𑀗𑁆𑀔𑀸𑀢𑁂𑀦 𑀧𑀝𑀺𑀯𑀺𑀚𑁆𑀛𑀦𑁂𑀦 𑀅𑀪𑀺𑀲𑀫𑁂𑀢𑀺 𑀅𑀲𑀫𑁆𑀫𑁄𑀳𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀢𑀺. 𑀧𑀳𑀸𑀦𑀸𑀪𑀺𑀲𑀫𑀬𑁂𑀦𑀸𑀢𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀲𑀗𑁆𑀔𑀸𑀢𑁂𑀦 𑀧𑀝𑀺𑀯𑀺𑀚𑁆𑀛𑀦𑁂𑀦 𑀅𑀲𑀫𑁆𑀫𑁄𑀳𑀢𑁄 𑀅𑀪𑀺𑀲𑀫𑁂𑀢𑀺. 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦𑀸𑀢𑀺 𑀫𑀕𑁆𑀕𑀜𑀸𑀡𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀺𑀲𑁂𑀲𑀫𑀕𑁆𑀕𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀸𑀯𑀲𑁂𑀦 𑀪𑀸𑀯𑀦𑀸𑀪𑀺𑀲𑀫𑀬𑁂𑀦. 𑀅𑀪𑀺𑀲𑀫𑁂𑀢𑀺 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀲𑀫𑁆𑀪𑀽𑀢𑁂𑀦 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀲𑀗𑁆𑀔𑀸𑀢𑁂𑀦 𑀧𑀝𑀺𑀯𑀺𑀚𑁆𑀛𑀦𑁂𑀦 𑀅𑀪𑀺𑀲𑀫𑁂𑀢𑀺 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀢𑀺. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀲𑀫𑁆𑀫𑁄𑀳𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑀁 𑀅𑀢𑁆𑀢𑀦𑀺𑀧𑀺 𑀲𑀫𑁆𑀫𑁄𑀳𑀁 𑀯𑀺𑀤𑁆𑀥𑀁𑀲𑁂𑀢𑀺𑀬𑁂𑀯. 𑀦𑀺𑀭𑁄𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦𑀸𑀢𑀺 𑀧𑀘𑁆𑀘𑀓𑁆𑀔𑀓𑀭𑀡𑀲𑀗𑁆𑀔𑀸𑀢𑁂𑀦 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀧𑀸𑀧𑀼𑀡𑀸𑀢𑀻𑀢𑀺 𑀅𑀥𑀺𑀕𑀘𑁆𑀙𑀢𑀺. 𑀲𑁆𑀯𑀸𑀬𑀁 𑀅𑀥𑀺𑀕𑀫𑁄 𑀤𑀲𑁆𑀲𑀦𑀧𑀝𑀺𑀯𑁂𑀥𑁄𑀢𑀺 𑀆𑀳 ‘‘𑀧𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺.

‘‘𑀦𑀺𑀭𑁄𑀥𑀁…𑀧𑁂… 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺 𑀏𑀢𑁂𑀦 𑀦𑀺𑀭𑁄𑀥𑀲𑀘𑁆𑀘𑀫𑁂𑀓𑀁 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑁂𑀦 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁂𑀦 𑀫𑀕𑁆𑀕𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀏𑀯𑀁 𑀬𑀼𑀢𑁆𑀢𑀺𑀯𑀲𑁂𑀦 𑀯𑀺𑀪𑀸𑀯𑀺𑀢𑀁 𑀏𑀓𑀧𑀝𑀺𑀯𑁂𑀥𑀁 𑀆𑀕𑀫𑁂𑀦𑀧𑀺 𑀲𑀸𑀥𑁂𑀢𑀼𑀁 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 ‘‘𑀬𑁄 𑀤𑀼𑀓𑁆𑀔𑀲𑀫𑀼𑀤𑀬𑀁 𑀧𑀲𑁆𑀲𑀢𑀺, 𑀲𑁄 𑀤𑀼𑀓𑁆𑀔𑀫𑁆𑀧𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁧𑁦𑁦) 𑀆𑀕𑀢𑀁 𑀲𑀫𑀼𑀤𑀬𑀁 𑀲𑀘𑁆𑀘𑀸𑀤𑀺𑀫𑀽𑀮𑀓𑀁 𑀬𑁄𑀚𑀦𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀦 𑀘𑁂𑀢𑀁 𑀓𑀸𑀮𑀦𑁆𑀢𑀭𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀏𑀓𑀧𑀝𑀺𑀯𑁂𑀥𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁, 𑀤𑀼𑀓𑁆𑀔𑁂𑀧𑁂𑀢𑀁 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁭𑁯𑁪; 𑀧𑀝𑀺. 𑀫. 𑁧.𑁧𑁦𑁯) 𑀅𑀧𑀭𑀁 𑀲𑀼𑀢𑁆𑀢𑀧𑀤𑀁 𑀆𑀦𑀻𑀢𑀁. 𑀢𑀣𑀸 𑀳𑀺 ‘‘𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀺…𑀧𑁂… 𑀧𑀝𑀺𑀧𑀤𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁧𑁦𑁦) 𑀏𑀓𑀲𑀘𑁆𑀘𑀤𑀲𑁆𑀲𑀦𑀲𑀫𑀗𑁆𑀕𑀺𑀦𑁄 𑀅𑀜𑁆𑀜𑀲𑀘𑁆𑀘𑀤𑀲𑁆𑀲𑀦𑀲𑀫𑀗𑁆𑀕𑀺𑀪𑀸𑀯𑀯𑀺𑀘𑀸𑀭𑀡𑀸𑀬 𑀢𑀫𑀢𑁆𑀣𑀁 𑀲𑀸𑀥𑁂𑀢𑀼𑀁 𑀆𑀬𑀲𑁆𑀫𑀢𑀸 𑀕𑀯𑀫𑁆𑀧𑀢𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀧𑀘𑁆𑀘𑁂𑀓𑀜𑁆𑀘 𑀲𑀘𑁆𑀘𑀢𑁆𑀢𑀬𑀤𑀲𑁆𑀲𑀦𑀬𑁄𑀚𑀦𑀸 𑀓𑀢𑀸. 𑀅𑀜𑁆𑀜𑀣𑀸 𑀓𑀫𑀸𑀪𑀺𑀲𑀫𑀬𑁂 𑀧𑀼𑀭𑀺𑀫𑀤𑀺𑀝𑁆𑀞𑀲𑁆𑀲 𑀧𑀼𑀦 𑀅𑀤𑀲𑁆𑀲𑀦𑀢𑁄 𑀲𑀫𑀼𑀤𑀬𑀸𑀤𑀺𑀁 𑀧𑀲𑁆𑀲𑀢𑁄 𑀤𑀼𑀓𑁆𑀔𑀸𑀤𑀺𑀤𑀲𑁆𑀲𑀦𑀁 𑀧𑀼𑀦 𑀅𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀯𑀼𑀘𑁆𑀘𑀫𑀸𑀦𑁂 𑀘 𑀲𑀩𑁆𑀩𑀤𑀲𑁆𑀲𑀦𑀁 𑀤𑀲𑁆𑀲𑀦𑀦𑁆𑀢𑀭𑀧𑀭𑀫𑀦𑁆𑀢𑀺 𑀤𑀲𑁆𑀲𑀦𑀸𑀦𑀼𑀧𑀭𑀫𑁄 𑀏𑀯 𑀲𑀺𑀬𑀸𑀢𑀺.

𑀦𑀺𑀲𑁆𑀲𑀬𑀪𑀸𑀯𑀳𑁂𑀢𑀼𑀢𑀸𑀬 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀬 𑀯𑀝𑁆𑀝𑀺𑀛𑀸𑀧𑀦𑀲𑀤𑀺𑀲𑀢𑀸, 𑀧𑀝𑀺𑀧𑀓𑁆𑀔𑀯𑀺𑀤𑁆𑀥𑀁𑀲𑀦𑀢𑀸𑀬 𑀲𑀫𑀼𑀤𑀬𑀧𑁆𑀧𑀳𑀸𑀦𑀲𑁆𑀲 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀲𑀤𑀺𑀲𑀢𑀸, 𑀜𑀸𑀡𑀸𑀮𑁄𑀓𑀧𑀭𑀺𑀩𑁆𑀭𑀽𑀳𑀦𑀢𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀆𑀮𑁄𑀓𑀯𑀺𑀤𑁆𑀥𑀁𑀲𑀦𑀲𑀤𑀺𑀲𑀢𑀸, 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀬𑀣𑀸 𑀬𑀣𑀸 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸, 𑀢𑀣𑀸 𑀢𑀣𑀸 𑀓𑀺𑀮𑁂𑀲𑀲𑁆𑀦𑁂𑀳𑀧𑀭𑀺𑀬𑀸𑀤𑀸𑀦𑀁 𑀳𑁄𑀢𑀻𑀢𑀺 𑀦𑀺𑀭𑁄𑀥𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑁆𑀦𑁂𑀳𑀧𑀭𑀺𑀬𑀸𑀤𑀸𑀦𑀲𑀤𑀺𑀲𑀢𑀸 𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸.

𑁮𑁪𑁦. 𑀑𑀪𑀸𑀲𑁂𑀢𑀻𑀢𑀺 𑀧𑀓𑀸𑀲𑁂𑀢𑀺. 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀯𑀽𑀧𑀲𑀫𑀪𑀸𑀯𑀢𑁄 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀽𑀢𑀁.

𑁮𑁪𑁧. 𑀅𑀧𑁆𑀧𑁂𑀢𑀻𑀢𑀺 𑀧𑀧𑁆𑀧𑁄𑀢𑀺. 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀬 𑀲𑀓𑁆𑀓𑀸𑀬𑀢𑀻𑀭𑀲𑀫𑀢𑀺𑀓𑁆𑀓𑀫𑀪𑀸𑀯𑀢𑁄 𑀑𑀭𑀺𑀫𑀢𑀻𑀭𑀧𑁆𑀧𑀳𑀸𑀦𑀲𑀤𑀺𑀲𑀢𑀸, 𑀫𑀕𑁆𑀕𑀪𑀸𑀯𑀦𑀸𑀬 𑀲𑀢𑁆𑀢𑀢𑁆𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀯𑀳𑀦𑀢𑀸𑀬 𑀪𑀡𑁆𑀟𑀯𑀳𑀦𑀲𑀤𑀺𑀲𑀢𑀸.

𑁮𑁪𑁨. 𑀧𑀯𑀢𑁆𑀢𑀁 𑀜𑀸𑀡𑀁 𑀅𑀲𑁆𑀲𑀸𑀢𑀺 𑀧𑀯𑀢𑁆𑀢𑀜𑀸𑀡𑁄, 𑀫𑀕𑁆𑀕𑁄. 𑀅𑀲𑁆𑀲 𑀫𑀕𑁆𑀕𑀲𑁆𑀲.

𑀢𑀣𑀝𑁆𑀞𑁂𑀦𑀸𑀢𑀺 𑀢𑀣𑀲𑀪𑀸𑀯𑁂𑀦, 𑀧𑀻𑀴𑀦𑀸𑀤𑀺𑀅𑀯𑀺𑀧𑀭𑀻𑀢𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀓𑀧𑀝𑀺𑀯𑁂𑀥𑀸𑀦𑀻𑀢𑀺 𑀏𑀓𑀚𑁆𑀛𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀓𑀸𑀭𑀸𑀦𑀺.

𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁪𑁪) 𑀯𑀼𑀢𑁆𑀢𑀫𑁂𑀯. 𑀏𑀓𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀏𑀓𑁂𑀦𑁂𑀯 𑀲𑀗𑁆𑀕𑀳𑀺𑀢𑀸𑀦𑀺. 𑀓𑁂𑀦? 𑀢𑀣𑀝𑁆𑀞𑁂𑀦, 𑀲𑀘𑁆𑀘𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀦𑁆𑀢𑀺𑀆𑀤𑀺 𑀜𑀸𑀡𑀲𑁆𑀲 𑀏𑀓𑀧𑀝𑀺𑀯𑁂𑀥𑀤𑀲𑁆𑀲𑀦𑀁. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀦𑀺𑀭𑁄𑀥𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀫𑁆𑀧𑀺 𑀬𑁄 𑀲𑁄 𑀤𑀼𑀓𑁆𑀔𑀸𑀤𑀻𑀲𑀼 𑀢𑀘𑁆𑀙𑀸𑀯𑀺𑀧𑀮𑁆𑀮𑀸𑀲𑀪𑀽𑀢𑀪𑀸𑀯𑀲𑀗𑁆𑀔𑀸𑀢𑁄 𑀲𑀘𑁆𑀘𑀝𑁆𑀞𑁄, 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑁂𑀦 𑀢𑀁 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀺. 𑀬𑀢𑁄 𑀅𑀧𑀭𑀪𑀸𑀕𑁂 𑀧𑀻𑀴𑀦𑀸𑀤𑀬𑁄 𑀲𑁄𑀴𑀲𑀧𑀺 𑀲𑀘𑁆𑀘𑀝𑁆𑀞𑀸 𑀅𑀭𑀺𑀬𑀲𑁆𑀲 𑀳𑀢𑁆𑀣𑀸𑀫𑀮𑀓𑀁 𑀯𑀺𑀬 𑀬𑀸𑀣𑀸𑀯𑀢𑁄 𑀉𑀧𑀝𑁆𑀞𑀳𑀦𑁆𑀢𑀺.

𑁮𑁪𑁩. 𑀅𑀢𑁆𑀣𑀸𑀢𑀺 𑀜𑀸𑀡𑁂𑀦 𑀅𑀭𑀡𑀻𑀬𑀢𑁄 𑀅𑀢𑁆𑀣𑀸𑀢𑀺 𑀮𑀤𑁆𑀥𑀲𑀫𑀜𑁆𑀜𑀸 𑀆𑀓𑀸𑀭𑀸. 𑀅𑀜𑁆𑀜𑀲𑀘𑁆𑀘𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀲𑀫𑀼𑀤𑀬𑀸𑀤𑀺𑀲𑀘𑁆𑀘𑀦𑁆𑀢𑀭𑀤𑀲𑁆𑀲𑀦𑀯𑀲𑁂𑀦. 𑀆𑀯𑀺𑀪𑀸𑀯𑀢𑁄𑀢𑀺 𑀧𑀓𑀸𑀲𑀪𑀸𑀯𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂 𑀆𑀓𑀸𑀭𑀸 𑀤𑀼𑀓𑁆𑀔𑀸𑀤𑀻𑀲𑀼 𑀲𑀪𑀸𑀯𑀯𑀲𑁂𑀦, 𑀲𑀘𑁆𑀘𑀦𑁆𑀢𑀭𑀤𑀲𑁆𑀲𑀦𑀯𑀲𑁂𑀦 𑀘 𑀆𑀯𑀺𑀪𑀯𑀦𑁆𑀢𑀺, 𑀢𑁂 𑀧𑀻𑀴𑀦𑀸𑀤𑀬𑁄 𑀘𑀢𑁆𑀢𑀸𑀭𑁄𑀬𑁂𑀯𑀸𑀢𑀺 𑀲𑁄𑀴𑀲𑁂𑀯 𑀯𑀼𑀢𑁆𑀢𑀸, 𑀦 𑀅𑀜𑁆𑀜𑁂𑀢𑀺. 𑀅𑀬𑀫𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀓𑀣𑀫𑀺𑀤𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀺. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 𑁋 𑀬𑀲𑁆𑀫𑀸 𑀧𑀸𑀴𑀺𑀬𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀧𑀺 𑀲𑀘𑁆𑀘𑀜𑀸𑀡𑀁 𑀯𑀼𑀢𑁆𑀢𑀁 𑀓𑀺𑀘𑁆𑀘𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦𑀧𑀺, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 ‘‘𑀲𑀪𑀸𑀯𑀢𑁄, 𑀲𑀘𑁆𑀘𑀦𑁆𑀢𑀭𑀤𑀲𑁆𑀲𑀦𑀢𑁄 𑀘 𑀲𑀘𑁆𑀘𑀸𑀦𑀁 𑀆𑀓𑀸𑀭𑀸 𑀆𑀯𑀺𑀪𑀯𑀦𑁆𑀢𑀻’’𑀢𑀺.

𑀓𑀺𑀘𑁆𑀘𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀤𑀲𑁆𑀲𑀦𑀁 𑀆𑀯𑀺𑀪𑀸𑀯𑀢𑁄 𑀤𑀲𑁆𑀲𑀦𑀲𑀤𑀺𑀲𑀦𑁆𑀢𑀺 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀇𑀢𑀭𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀤𑀲𑁆𑀲𑀦𑁂𑀲𑀼. 𑀆𑀬𑀽𑀳𑀺𑀢𑀦𑁆𑀢𑀺 𑀧𑀺𑀡𑁆𑀟𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀦𑀸𑀫, 𑀲𑀩𑁆𑀩𑀁 𑀢𑀁 𑀲𑀫𑀼𑀤𑀺𑀢𑀫𑁂𑀯 𑀦𑀺𑀩𑁆𑀩𑀢𑁆𑀢𑀢𑀻𑀢𑀺. 𑀲𑀗𑁆𑀔𑀢𑀦𑁆𑀢𑀺 𑀧𑀘𑁆𑀘𑀬𑀦𑁆𑀢𑀭𑁂𑀳𑀺 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀓𑀢𑀁. 𑀭𑀸𑀲𑀺𑀓𑀢𑀦𑁆𑀢𑀺 𑀧𑀼𑀜𑁆𑀚𑀓𑀢𑀁. 𑀅𑀦𑁂𑀓𑀫𑁂𑀯 𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀏𑀓𑀚𑁆𑀛𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀭𑀸𑀲𑀺𑀓𑀢𑀁 𑀯𑀺𑀬 𑀳𑁄𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀲𑀫𑀼𑀤𑀬𑁂𑀦 𑀆𑀬𑀽𑀳𑀺𑀢𑀢𑁆𑀢𑀸. 𑀅𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀲𑁆𑀲. 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀓𑀺𑀮𑁂𑀲𑀲𑀦𑁆𑀢𑀸𑀧𑀳𑀭𑁄. 𑀲𑀬𑀫𑁆𑀧𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑀢𑁄 𑀲𑀼𑀲𑀻𑀢𑀮𑁄. 𑀲𑀦𑁆𑀢𑀸𑀧𑀝𑁆𑀞𑁄 𑀆𑀯𑀺𑀪𑀯𑀢𑀺 𑀉𑀴𑀸𑀭𑀤𑀲𑁆𑀲𑀦𑁂𑀦 𑀢𑀤𑀜𑁆𑀜𑀲𑁆𑀲 𑀅𑀦𑀼𑀴𑀸𑀭𑀪𑀸𑀯𑁄 𑀯𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀬𑀲𑁆𑀫𑀢𑁄’’𑀢𑀺𑀆𑀤𑀺. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀲𑁆𑀲 𑀦𑀺𑀘𑁆𑀘𑀲𑀪𑀸𑀯𑀲𑁆𑀲 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 𑀧𑀝𑀺𑀧𑀓𑁆𑀔𑀢𑁄 𑀆𑀯𑀺𑀪𑀯𑀦𑀸𑀓𑀸𑀭𑀲𑁆𑀲 𑀲𑀼𑀔𑀲𑀺𑀤𑁆𑀥𑀺𑀢𑁄.

𑀦𑀺𑀤𑀸𑀦𑀝𑁆𑀞𑁄 𑀆𑀯𑀺𑀪𑀯𑀢𑀺 𑀇𑀤𑀫𑀲𑁆𑀲 𑀦𑀺𑀤𑀤𑀸𑀢𑀻𑀢𑀺. 𑀲𑀁𑀬𑁄𑀕𑀧𑀮𑀺𑀩𑁄𑀥𑀝𑁆𑀞𑀸 𑀧𑀝𑀺𑀧𑀓𑁆𑀔𑀯𑀲𑁂𑀦 𑀆𑀯𑀺𑀪𑀯𑀦𑀸𑀓𑀸𑀭𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀲𑀁𑀬𑁄𑀕𑀪𑀽𑀢𑀲𑁆𑀲𑀸’’𑀢𑀺𑀆𑀤𑀺. 𑀓𑀺𑀮𑁂𑀲𑀤𑀼𑀓𑁆𑀔𑁂𑀳𑀺 𑀲𑀁𑀬𑁄𑀚𑀦𑀝𑁆𑀞𑁄 𑀲𑀁𑀬𑁄𑀕𑀝𑁆𑀞𑁄. 𑀲𑀁𑀲𑀸𑀭𑀘𑀸𑀭𑀓𑁂 𑀧𑀮𑀺𑀩𑀼𑀤𑁆𑀥𑀦𑀝𑁆𑀞𑁄 𑀧𑀮𑀺𑀩𑁄𑀥𑀝𑁆𑀞𑁄.

𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀤𑀺𑀯𑀲𑁂𑀦 𑀅𑀯𑀺𑀯𑁂𑀓𑀪𑀽𑀢𑀲𑁆𑀲. 𑀯𑀺𑀯𑁂𑀓𑀝𑁆𑀞𑁄 𑀉𑀧𑀥𑀺𑀯𑀺𑀯𑁂𑀓𑀢𑀸. 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀯𑀺𑀢𑁆𑀢𑀢𑀸 𑀅𑀲𑀗𑁆𑀔𑀢𑀪𑀸𑀯𑁄𑀢𑀺 𑀏𑀯𑀁 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀲𑀪𑀸𑀯𑁄𑀧𑀺 𑀅𑀭𑀺𑀬𑀫𑀕𑁆𑀕𑁄 𑀲𑀗𑁆𑀔𑀢𑁄 𑀏𑀯, 𑀅𑀬𑀫𑁂𑀯 𑀘 𑀏𑀓𑁄 𑀅𑀲𑀗𑁆𑀔𑀢𑁄𑀢𑀺 𑀦𑀺𑀭𑁄𑀥𑀲𑁆𑀲 𑀅𑀲𑀗𑁆𑀔𑀢𑀪𑀸𑀯𑁄 𑀲𑀼𑀧𑀸𑀓𑀝𑁄 𑀳𑁄𑀢𑀺. 𑀤𑀼𑀓𑁆𑀔𑀁 𑀯𑀺𑀲𑀁 𑀫𑀭𑀡𑀥𑀫𑁆𑀫𑀢𑁄 𑀢𑀲𑁆𑀲 𑀅𑀕𑀤𑀪𑀽𑀢𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁.

‘‘𑀫𑀕𑁆𑀕𑁄’’𑀢𑀺 𑀲𑀫𑁆𑀪𑀸𑀯𑁂𑀢𑀩𑁆𑀩𑀢𑀁 𑀧𑀢𑁆𑀢𑁄 𑀲𑀼𑀔𑀼𑀫𑀲𑀦𑁆𑀢𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑁄 𑀦𑀺𑀓𑀦𑁆𑀢𑀺𑀪𑀽𑀢𑁄𑀧𑀺 𑀦𑀸𑀬𑀁 𑀲𑀫𑀼𑀤𑀬𑁄 𑀳𑁂𑀢𑀼 𑀦𑀺𑀩𑁆𑀩𑀸𑀦𑀲𑁆𑀲 𑀧𑀢𑁆𑀢𑀺𑀬𑀸. 𑀅𑀬𑀁 𑀅𑀭𑀺𑀬𑀫𑀕𑁆𑀕𑁄 𑀳𑁂𑀢𑀽𑀢𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑁂 𑀯𑀼𑀢𑁆𑀢𑀦𑀬𑁂𑀦 𑀫𑀕𑁆𑀕𑀲𑁆𑀲 𑀳𑁂𑀢𑀼𑀝𑁆𑀞𑁄 𑀆𑀯𑀺𑀪𑀯𑀢𑀺. 𑀦𑀺𑀭𑁄𑀥𑀤𑀲𑁆𑀲𑀦𑁂𑀦𑀸𑀢𑀺 𑀅𑀢𑀺𑀯𑀺𑀬 𑀦𑀺𑀧𑀼𑀡𑀲𑁆𑀲 𑀧𑀭𑀫𑀕𑀫𑁆𑀪𑀻𑀭𑀲𑁆𑀲 𑀦𑀺𑀭𑁄𑀥𑀲𑀘𑁆𑀘𑀲𑁆𑀲 𑀤𑀲𑁆𑀲𑀦𑁂𑀦. 𑀢𑁂𑀦𑀸𑀳 ‘‘𑀧𑀭𑀫𑀲𑀼𑀔𑀼𑀫𑀸𑀦𑀻’’𑀢𑀺𑀆𑀤𑀺. 𑀤𑀼𑀓𑁆𑀔𑀤𑀲𑁆𑀲𑀦𑁂𑀦𑀸𑀢𑀺 𑀅𑀢𑀺𑀯𑀺𑀬 𑀆𑀤𑀻𑀦𑀯𑀧𑁆𑀧𑀢𑁆𑀢𑀺𑀬𑀸 𑀯𑀺𑀧𑀼𑀮𑀢𑀭𑀸𑀤𑀻𑀦𑀯𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀤𑀲𑁆𑀲𑀦𑁂𑀦. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄. 𑀢𑁂𑀦𑀸𑀳 ‘‘𑀅𑀦𑁂𑀓𑀭𑁄𑀕𑀸𑀢𑀼𑀭…𑀧𑁂… 𑀉𑀴𑀸𑀭𑀪𑀸𑀯𑁄 𑀯𑀺𑀬𑀸’’𑀢𑀺. 𑀏𑀯𑀫𑁂𑀢𑁂 𑀬𑀣𑀸𑀭𑀳𑀁 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀘𑁆𑀘𑁂𑀲𑀼 𑀆𑀯𑀺𑀪𑀯𑀦𑀸𑀓𑀸𑀭𑀸 𑀯𑀺𑀪𑀸𑀯𑀺𑀢𑀸.

𑀏𑀓𑁂𑀓𑀲𑁆𑀲𑀸𑀢𑀺 𑀏𑀓𑁂𑀓𑀲𑁆𑀲 𑀅𑀢𑁆𑀣𑀲𑁆𑀲, 𑀧𑀻𑀴𑀦𑀸𑀬𑀽𑀳𑀦𑀦𑀺𑀲𑁆𑀲𑀭𑀡𑀦𑀺𑀬𑁆𑀬𑀸𑀦𑀝𑁆𑀞𑁂 𑀲𑀦𑁆𑀥𑀸𑀬𑀸𑀳. 𑀢𑀺𑀡𑁆𑀡𑀁 𑀢𑀺𑀡𑁆𑀡𑀦𑁆𑀢𑀺 𑀲𑀗𑁆𑀔𑀢𑀸𑀤𑀺𑀅𑀢𑁆𑀣𑁂. 𑀬𑁂 𑀧𑀦 𑀯𑀸𑀤𑀺𑀦𑁄. 𑀦𑀸𑀦𑀸𑀪𑀺𑀲𑀫𑀬𑀦𑁆𑀢𑀺 𑀦𑀸𑀦𑀸𑀜𑀸𑀡𑁂𑀦 𑀅𑀪𑀺𑀲𑀫𑀬𑀁, 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀦𑀸𑀦𑀸𑀓𑁆𑀔𑀡𑁂 𑀦𑀸𑀦𑀸𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺 𑀳𑀺 𑀫𑀕𑁆𑀕𑀜𑀸𑀡𑀲𑁆𑀲 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀸𑀦𑀸𑀪𑀺𑀲𑀫𑀬𑁄 𑀲𑀺𑀬𑀸, 𑀤𑀼𑀓𑁆𑀔𑀤𑀲𑁆𑀲𑀦𑀸𑀤𑀻𑀳𑀺 𑀧𑀞𑀫𑀫𑀕𑁆𑀕𑀸𑀤𑀻𑀳𑀺 𑀧𑀳𑀸𑀢𑀩𑁆𑀩𑀸𑀦𑀁 𑀲𑀁𑀬𑁄𑀚𑀦𑀢𑁆𑀢𑀬𑀸𑀤𑀻𑀦𑀁 𑀏𑀓𑀤𑁂𑀲𑀧𑁆𑀧𑀳𑀸𑀦𑀁 𑀆𑀧𑀚𑁆𑀚𑀢𑀺. 𑀢𑀣𑀸 𑀘 𑀲𑀢𑀺 𑀏𑀓𑀤𑁂𑀲𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀢𑀸𑀤𑀺𑀧𑁆𑀧𑀲𑀗𑁆𑀕𑁄. 𑀢𑀁𑀢𑀁𑀤𑀲𑁆𑀲𑀦𑀸𑀦𑀦𑁆𑀢𑀭𑀜𑁆𑀘 𑀢𑀁𑀢𑀁𑀨𑀮𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑀁𑀢𑀁𑀧𑀳𑁂𑀬𑁆𑀬𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀽𑀢𑀸𑀦𑀁 𑀨𑀮𑀸𑀦𑀁 𑀫𑀕𑁆𑀕𑀸𑀦𑀁 𑀯𑀺𑀬 𑀘𑀢𑀼𑀓𑁆𑀓𑀢𑀸 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀏𑀓𑀤𑁂𑀲𑀲𑁄𑀢𑀸𑀧𑀦𑁆𑀦𑀢𑀸𑀤𑀺𑀧𑁆𑀧𑀲𑀗𑁆𑀕𑁄. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑀤𑀺 𑀫𑀕𑁆𑀕𑀜𑀸𑀡𑀲𑁆𑀲 𑀦𑀸𑀦𑀸𑀪𑀺𑀲𑀫𑀬𑁄 𑀲𑀺𑀬𑀸, 𑀅𑀜𑁆𑀜𑁂𑀦 𑀜𑀸𑀡𑁂𑀦 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺. 𑀅𑀜𑁆𑀜𑁂𑀦 𑀲𑀫𑀼𑀤𑀬𑀁, 𑀅𑀜𑁆𑀜𑁂𑀦 𑀦𑀺𑀭𑁄𑀥𑀁, 𑀅𑀜𑁆𑀜𑁂𑀦 𑀫𑀕𑁆𑀕𑀁, 𑀏𑀯𑀁 𑀲𑀢𑀺 𑀫𑀕𑁆𑀕𑀓𑀺𑀘𑁆𑀘𑀁 𑀅𑀧𑀭𑀺𑀧𑀼𑀡𑁆𑀡𑀫𑁂𑀯 𑀲𑀺𑀬𑀸. 𑀫𑀕𑁆𑀕𑀤𑀲𑁆𑀲𑀦𑁂𑀦 𑀳𑀺 𑀤𑁆𑀯𑀬𑀕𑀢𑀺, 𑀢𑁂𑀦𑁂𑀯 𑀯𑀸 𑀢𑀲𑁆𑀲 𑀤𑀲𑁆𑀲𑀦𑀁, 𑀅𑀜𑁆𑀜𑁂𑀦 𑀯𑀸𑀢𑀺. 𑀢𑀢𑁆𑀣 𑀧𑀞𑀫𑁄 𑀢𑀸𑀯 𑀧𑀓𑁆𑀔𑁄 𑀦 𑀬𑀼𑀚𑁆𑀚𑀢𑀺 𑀅𑀢𑁆𑀢𑀦𑀺 𑀧𑀯𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀢𑁂𑀦𑁂𑀯 𑀅𑀗𑁆𑀕𑀼𑀮𑀕𑁆𑀕𑁂𑀦 𑀢𑀫𑁂𑀯 𑀧𑀭𑀸𑀫𑀲𑀺𑀢𑀼𑀁 𑀲𑀓𑁆𑀓𑀸. 𑀅𑀣 𑀅𑀜𑁆𑀜𑁂𑀦 𑀅𑀦𑀯𑀝𑁆𑀞𑀸𑀦𑀧𑁆𑀧𑀲𑀗𑁆𑀕𑁄 ‘‘𑀬𑁂𑀦 𑀫𑀕𑁆𑀕𑀁 𑀧𑀲𑁆𑀲𑀢𑀺, 𑀲𑁄𑀧𑀺 𑀫𑀕𑁆𑀕𑁄. 𑀢𑀫𑁆𑀧𑀺 𑀬𑁂𑀦 𑀧𑀲𑁆𑀲𑀢𑀺, 𑀲𑁄𑀧𑀺 𑀫𑀕𑁆𑀕𑁄’’𑀢𑀺. 𑀢𑀲𑁆𑀫𑀸 𑀏𑀓𑀸𑀪𑀺𑀲𑀫𑀬𑀢𑁄 𑀬𑀣𑀸𑀯𑀼𑀢𑁆𑀢𑁄 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁄𑀯 𑀬𑀼𑀢𑁆𑀢𑁄. 𑀅𑀧𑀺𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁, 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀜𑁆𑀘 𑀲𑀘𑁆𑀘𑀤𑁆𑀯𑀬𑀁 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑀲𑁆𑀲 𑀫𑀕𑁆𑀕𑀜𑀸𑀡𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀲𑀫𑀼𑀘𑁆𑀙𑀺𑀦𑁆𑀤𑀦𑀸𑀦𑀺 𑀦 𑀲𑀫𑁆𑀪𑀯𑀦𑁆𑀢𑀺 𑀢𑀢𑁄 𑀅𑀦𑀺𑀲𑁆𑀲𑀭𑀡𑀢𑁄. 𑀦 𑀳𑀺 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀲𑀫𑀼𑀤𑀬𑀧𑁆𑀧𑀳𑀸𑀦𑀸𑀦𑀺 𑀤𑀼𑀓𑁆𑀔𑀲𑀫𑀼𑀤𑀬𑀲𑀘𑁆𑀘𑀸𑀭𑀫𑁆𑀫𑀡𑁂𑀦 𑀜𑀸𑀡𑁂𑀦 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂𑀦 𑀧𑀦 𑀢𑀢𑁆𑀣, 𑀇𑀢𑀭𑀤𑁆𑀯𑀬𑁂 𑀘 𑀲𑀫𑁆𑀫𑁄𑀳𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑁂𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀏𑀓𑀸𑀪𑀺𑀲𑀫𑀬𑁄 𑀏𑀯 𑀬𑀼𑀢𑁆𑀢𑁄. 𑀅𑀬𑀁 𑀧𑀦 𑀅𑀢𑁆𑀣𑁄 𑀧𑀸𑀴𑀺𑀬𑀁 𑀆𑀕𑀢𑁄 𑀏𑀯𑀸𑀢𑀺 ‘‘𑀢𑁂𑀲𑀁 𑀉𑀢𑁆𑀢𑀭𑀁 𑀅𑀪𑀺𑀥𑀫𑁆𑀫𑁂 𑀓𑀣𑀸𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀫𑁂𑀯𑀸’’𑀢𑀺.

𑀧𑀭𑀺𑀜𑁆𑀜𑀸𑀤𑀺𑀧𑁆𑀧𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁮𑁪𑁫. 𑀅𑀪𑀺𑀜𑁆𑀜𑀸𑀧𑀜𑁆𑀜𑀸𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀅𑀧𑀺𑀘 𑀲𑀼𑀢𑀫𑀬𑀸𑀬, 𑀘𑀺𑀦𑁆𑀢𑀸𑀫𑀬𑀸𑀬, 𑀏𑀓𑀘𑁆𑀘𑀪𑀸𑀯𑀦𑀸𑀫𑀬𑀸𑀬 𑀘 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸. 𑀆𑀯𑁂𑀡𑀺𑀓𑀸 𑀪𑀽𑀫𑀺 𑀧𑀭𑀺𑀜𑁆𑀜𑀦𑁆𑀢𑀭𑀸𑀦𑀁 𑀅𑀯𑀺𑀲𑀬𑀪𑀸𑀯𑀢𑁄. 𑀦 𑀳𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀡𑀯𑀲𑁂𑀦 𑀢𑀻𑀭𑀡𑀧𑀭𑀺𑀜𑁆𑀜𑀸𑀤𑀻𑀦𑀁 𑀧𑀯𑀢𑁆𑀢𑀺 𑀅𑀢𑁆𑀣𑀺.

𑁮𑁪𑁬. 𑀅𑀦𑀼𑀮𑁄𑀫𑀜𑀸𑀡𑀫𑁆𑀧𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦𑁂𑀯 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺, 𑀧𑀕𑁂𑀯 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀤𑀬𑁄𑀢𑀺 𑀆𑀳 ‘‘𑀬𑀸𑀯 𑀅𑀦𑀼𑀮𑁄𑀫𑀸 𑀆𑀯𑁂𑀡𑀺𑀓𑀸 𑀪𑀽𑀫𑀻’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀢𑀻𑀭𑀡𑀧𑀭𑀺𑀜𑁆𑀜𑀸𑀪𑀽𑀫𑀺𑀬𑀁 𑀜𑀸𑀢𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀬𑁄𑀧𑀺 𑀮𑀤𑁆𑀥𑀸𑀯𑀲𑀭𑀸, 𑀢𑀢𑁆𑀣 𑀧𑀦 𑀬𑀣𑀸 𑀢𑀻𑀭𑀡𑀧𑀭𑀺𑀜𑁆𑀜𑀸 𑀲𑀸𑀢𑀺𑀲𑀬𑀁 𑀓𑀺𑀘𑁆𑀘𑀓𑀸𑀭𑀻, 𑀦 𑀢𑀣𑀸 𑀇𑀢𑀭𑀸𑀢𑀺 𑀆𑀯𑁂𑀡𑀺𑀓𑀕𑁆𑀕𑀳𑀡𑀁.

𑁮𑁪𑁭. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀳𑀸𑀦𑀧𑀭𑀺𑀜𑁆𑀜𑀸 𑀦𑀸𑀫 𑀫𑀕𑁆𑀕𑀜𑀸𑀡𑀦𑁆𑀢𑀺 ‘‘𑀬𑀸𑀯 𑀫𑀕𑁆𑀕𑀜𑀸𑀡𑀸 𑀪𑀽𑀫𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺 𑀇𑀥 𑀅𑀪𑀺𑀲𑀫𑀬𑀓𑀸𑀮𑁂 𑀓𑀺𑀘𑁆𑀘𑀯𑀺𑀘𑀸𑀭𑁂 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸 𑀢𑀤𑀢𑁆𑀣𑀢𑁆𑀢𑀸 𑀲𑁂𑀲𑀧𑀭𑀺𑀜𑁆𑀜𑀸𑀦𑀁. 𑀢𑁂𑀦𑀸𑀳 ‘‘𑀬𑀲𑁆𑀫𑀸 𑀯𑀸’’𑀢𑀺𑀆𑀤𑀺.

𑀢𑀤𑀢𑁆𑀣𑀸𑀬𑁂𑀯𑀸𑀢𑀺 𑀧𑀳𑀸𑀦𑀧𑀭𑀺𑀜𑁆𑀜𑀢𑁆𑀣𑀸 𑀏𑀯. 𑀅𑀣 𑀯𑀸 𑀢𑀤𑀢𑁆𑀣𑀸𑀬𑁂𑀯𑀸𑀢𑀺 𑀧𑀳𑀸𑀦𑀢𑁆𑀣𑀸 𑀏𑀯. 𑀅𑀣 𑀯𑀸 𑀢𑀤𑀢𑁆𑀣𑀸𑀬𑁂𑀯𑀸𑀢𑀺 𑀫𑀕𑁆𑀕𑀢𑁆𑀣𑀸 𑀏𑀯. 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸 𑀳𑀺 𑀬𑀸𑀯𑀤𑁂𑀯 𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀸𑀬 𑀧𑀯𑀢𑁆𑀢𑀸. 𑀦𑀺𑀬𑀫𑀢𑁄 𑀜𑀸𑀢𑀸 𑀘𑁂𑀯 𑀢𑀻𑀭𑀺𑀢𑀸 𑀘 𑀳𑁄𑀦𑁆𑀢𑀺 𑀜𑀸𑀢𑀢𑀻𑀭𑀺𑀢𑀪𑀸𑀯𑁂𑀳𑀺 𑀯𑀺𑀦𑀸 𑀧𑀳𑀸𑀦𑀸𑀪𑀸𑀯𑀢𑁄, 𑀧𑀳𑀸𑀦𑀲𑀺𑀤𑁆𑀥𑀺𑀬𑀜𑁆𑀘 𑀜𑀸𑀢𑀢𑀻𑀭𑀺𑀢𑀪𑀸𑀯𑀲𑀺𑀤𑁆𑀥𑀺𑀢𑁄. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀤𑀼𑀓𑁆𑀔𑁂 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀢𑀲𑁆𑀲 𑀲𑀪𑀸𑀯𑀮𑀓𑁆𑀔𑀡𑀁 𑀯𑀺𑀬 𑀲𑀸𑀫𑀜𑁆𑀜𑀮𑀓𑁆𑀔𑀡𑀫𑁆𑀧𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀯𑀼𑀘𑁆𑀘𑀢𑀺 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑀢𑁄. 𑀢𑁂𑀦𑀸𑀳 ‘‘𑀧𑀭𑀺𑀜𑁆𑀜𑀢𑁆𑀢𑀬𑀫𑁆𑀧𑀺…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑁮𑁪𑁮. 𑀧𑀭𑀺𑀜𑁆𑀜𑀸 𑀯𑀺𑀬𑀸𑀢𑀺 𑀢𑀺𑀯𑀺𑀥𑀢𑀸𑀲𑀸𑀫𑀜𑁆𑀜𑀁 𑀦𑀺𑀤𑀲𑁆𑀲𑁂𑀢𑀺, 𑀦 𑀧𑀭𑀺𑀜𑁆𑀜𑀸𑀧𑀳𑀸𑀢𑀩𑁆𑀩𑀢𑀸𑀲𑀸𑀫𑀜𑁆𑀜𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀲𑁆𑀲 𑀅𑀭𑀺𑀧𑀜𑁆𑀜𑀸𑀓𑀺𑀘𑁆𑀘𑀪𑀸𑀯𑀢𑁄. 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀬𑀣𑀸 𑀦 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀏𑀯𑀁 𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀦𑀺𑀲𑁂𑀥𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀁 𑀯𑀺𑀓𑁆𑀔𑀫𑁆𑀪𑀦𑀁, 𑀯𑀺𑀓𑁆𑀔𑀫𑁆𑀪𑀦𑀫𑁂𑀯 𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁. 𑀧𑀸𑀓𑀝𑀢𑁆𑀢𑀸𑀢𑀺 ‘‘𑀅𑀬𑀁 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁧𑁯𑁮) 𑀧𑀭𑁂𑀲𑀫𑁆𑀧𑀺 𑀧𑀸𑀓𑀝𑀢𑁆𑀢𑀸. ‘‘𑀦 𑀲𑀳𑀲𑀸 𑀘𑀺𑀢𑁆𑀢𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀻’’𑀢𑀺 𑀇𑀤𑀁 𑀧𑀝𑀺𑀮𑀤𑁆𑀥𑀫𑀢𑁆𑀢𑀲𑁆𑀲 𑀛𑀸𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀲𑀼𑀪𑀸𑀯𑀺𑀢𑁂 𑀧𑀦 𑀧𑀕𑀼𑀡𑀚𑁆𑀛𑀸𑀦𑁂 𑀬𑀸𑀯 𑀘𑀭𑀺𑀫𑀓𑀘𑀺𑀢𑁆𑀢𑀫𑁆𑀧𑀺 𑀦 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀯. 𑀅𑀣 𑀯𑀸 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂𑀧𑀻𑀢𑀺 𑀛𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀬𑀸. 𑀧𑀘𑁆𑀙𑀸𑀪𑀸𑀕𑁂𑀧𑀻𑀢𑀺 𑀛𑀸𑀦𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀓𑀺𑀘𑁆𑀘𑀧𑁆𑀧𑀲𑀼𑀢𑀲𑁆𑀲𑀧𑀺. 𑀯𑀺𑀢𑀓𑁆𑀓𑀸𑀤𑀬𑁄𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀭𑀽𑀧𑀲𑀜𑁆𑀜𑀸𑀤𑀬𑁄. 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀸 𑀤𑀼𑀢𑀺𑀬𑀸𑀤𑀻𑀲𑀼 𑀅𑀧𑁆𑀧𑀺𑀢𑁂𑀲𑀼𑀬𑁂𑀯 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀢𑀢𑁄 𑀢𑀢𑁄 𑀯𑀼𑀝𑁆𑀞𑀺𑀢𑀫𑀢𑁆𑀢𑀲𑁆𑀲 𑀧𑀦 𑀧𑀯𑀢𑁆𑀢𑀦𑁆𑀢𑀺 𑀧𑀭𑀺𑀢𑁆𑀢𑀘𑀺𑀢𑁆𑀢𑀯𑀲𑁂𑀦𑁂𑀯 𑀯𑀼𑀝𑁆𑀞𑀳𑀦𑀢𑁄.

𑁮𑁪𑁯. ‘‘𑀧𑀤𑀻𑀧𑁂𑀦 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀬𑀸’’𑀢𑀺 𑀇𑀤𑀁 𑀧𑀝𑀺𑀧𑀓𑁆𑀔𑁂𑀦 𑀧𑀳𑀻𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀝𑀺𑀧𑀓𑁆𑀔𑁄 𑀳𑀺 𑀧𑀤𑀻𑀧𑁄 𑀅𑀦𑁆𑀥𑀓𑀸𑀭𑀲𑁆𑀲, 𑀖𑀝𑀧𑁆𑀧𑀳𑀸𑀭𑁄 𑀧𑀦 𑀲𑁂𑀯𑀸𑀮𑀲𑁆𑀲 𑀦 𑀧𑀝𑀺𑀧𑀓𑁆𑀔𑁄, 𑀓𑁂𑀯𑀮𑀁 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑀫𑀢𑁆𑀢𑀫𑁂𑀯 𑀓𑀭𑁄𑀢𑀻𑀢𑀺. 𑀢𑁂𑀦 𑀅𑀲𑀢𑀺𑀧𑀺 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀢𑀁 𑀦𑀺𑀤𑀲𑁆𑀲𑀦𑀁 𑀲𑀼𑀝𑁆𑀞𑀼𑀢𑀭𑀁 𑀬𑀼𑀚𑁆𑀚𑀢𑀺. ‘‘𑀯𑀺𑀧𑀲𑁆𑀲𑀦𑀸𑀬 𑀅𑀯𑀬𑀯𑀪𑀽𑀢𑁂𑀦𑀸’’𑀢𑀺 𑀇𑀤𑀁 𑀇𑀥𑀸𑀥𑀺𑀓𑀢𑀢𑀤𑀗𑁆𑀕𑀧𑁆𑀧𑀳𑀸𑀦𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀻𑀮𑀯𑀺𑀲𑁄𑀥𑀦𑀸𑀤𑀺𑀦𑀸𑀧𑀺 𑀳𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀳𑁄𑀢𑀺𑀬𑁂𑀯𑀸𑀢𑀺. 𑀜𑀸𑀡𑀗𑁆𑀕𑁂𑀦𑀸𑀢𑀺 𑀜𑀸𑀡𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦. 𑀢𑀤𑀗𑁆𑀕𑁂𑀦 𑀢𑀤𑀗𑁆𑀕𑀲𑁆𑀲 𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁. 𑀲𑀢𑀺 𑀯𑀺𑀚𑁆𑀚𑀫𑀸𑀦𑁂 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑁂 𑀓𑀸𑀬𑁂, 𑀲𑀬𑀁 𑀯𑀸 𑀢𑀢𑁆𑀣 𑀲𑀢𑀺 𑀤𑀺𑀝𑁆𑀞𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁮𑁧; 𑁪.𑁩𑁪𑁫) 𑀦𑀬𑁂𑀦 𑀯𑀼𑀢𑁆𑀢𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀲𑁄𑀴𑀲𑀯𑀢𑁆𑀣𑀼𑀓𑀸, 𑀅𑀝𑁆𑀞𑀯𑀢𑁆𑀣𑀼𑀓𑀸 𑀘 𑀓𑀗𑁆𑀔𑀸𑀯 𑀫𑀮𑀁 𑀓𑀗𑁆𑀔𑀸𑀫𑀮𑀁. 𑀲𑀫𑀽𑀳𑀕𑀸𑀳𑀲𑁆𑀲𑀸𑀢𑀺 ‘‘𑀅𑀢𑁆𑀢𑀸 𑀅𑀢𑁆𑀢𑀦𑀺𑀬’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀲𑀫𑀽𑀳𑀕𑀳𑀡𑀲𑁆𑀲 𑀧𑀳𑀸𑀦𑀁 𑀓𑀮𑀸𑀧𑀲𑀫𑁆𑀫𑀲𑀦𑁂𑀦 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀓𑀺𑀭𑀡𑀯𑀲𑁂𑀦 𑀔𑀦𑁆𑀥𑀸𑀦𑀁 𑀤𑀲𑁆𑀲𑀦𑀢𑁄. 𑀅𑀲𑁆𑀲𑀸𑀤𑀲𑀜𑁆𑀜𑀸𑀬𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀲𑁆𑀲𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀫𑀺𑀘𑁆𑀙𑀸𑀲𑀜𑁆𑀜𑀸𑀬. 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀲𑁆𑀲𑀸𑀢𑀺 𑀧𑀝𑀺𑀲𑀗𑁆𑀔𑀸𑀦𑀧𑀝𑀺𑀧𑀓𑁆𑀔𑀲𑁆𑀲 𑀫𑁄𑀳𑀲𑁆𑀲. 𑀅𑀦𑀼𑀧𑁂𑀓𑁆𑀔𑀦𑀲𑁆𑀲𑀸𑀢𑀺 𑀅𑀧𑁂𑀓𑁆𑀔𑀸𑀬. 𑀲𑀗𑁆𑀔𑀸𑀭𑁂𑀲𑀼 𑀦𑀺𑀘𑁆𑀘𑀸𑀤𑀺𑀕𑀸𑀳𑁄 𑀲𑀘𑁆𑀘𑀧𑀝𑀺𑀮𑁄𑀫𑀕𑀸𑀳𑁄 𑀫𑀕𑁆𑀕𑀲𑀘𑁆𑀘𑀸𑀥𑀺𑀕𑀫𑀲𑁆𑀲 𑀯𑀺𑀮𑁄𑀫𑀦𑀢𑁄. 𑀲𑀸𑀤𑀻𑀦𑀯𑁂𑀲𑀼 𑀅𑀦𑀸𑀤𑀻𑀦𑀯𑀲𑀜𑁆𑀜𑀺𑀢𑀸, 𑀅𑀦𑀸𑀤𑀻𑀦𑀯𑁂 𑀘 𑀲𑀸𑀤𑀻𑀦𑀯𑀲𑀜𑁆𑀜𑀺𑀢𑀸 𑀲𑀘𑁆𑀘𑀧𑀝𑀺𑀮𑁄𑀫𑀕𑀸𑀳𑁄𑀢𑀺 𑀘 𑀯𑀤𑀦𑁆𑀢𑀺.

𑀏𑀯𑀁 𑀯𑀺𑀲𑀼𑀤𑁆𑀥𑀺𑀓𑁆𑀓𑀫𑁂𑀦 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀝𑁆𑀞𑀸𑀭𑀲𑀫𑀳𑀸𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀯𑀸 𑀧𑀦 𑀧𑀳𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁫𑁦. 𑀯𑀼𑀢𑁆𑀢𑀫𑁂𑀯 ‘‘𑀲𑀩𑁆𑀩𑀁 𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁭𑁪𑁨).

𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 𑀖𑀦𑀕𑁆𑀕𑀳𑀡𑀁 𑀖𑀦𑀲𑀜𑁆𑀜𑀸, 𑀢𑀲𑁆𑀲𑀸 𑀖𑀦𑀲𑀜𑁆𑀜𑀸𑀬.

𑀦𑀺𑀭𑁄𑀥𑁂 𑀅𑀥𑀺𑀫𑀼𑀢𑁆𑀢𑀢𑀸, 𑀢𑀸𑀬𑀸𑀢𑀺 𑀢𑀺𑀬𑀤𑁆𑀥𑀕𑀢𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀫𑁂𑀯 𑀤𑀺𑀲𑁆𑀯𑀸 𑀢𑀢𑁆𑀣 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀧𑀯𑀢𑁆𑀢𑀧𑀜𑁆𑀜𑀸, 𑀢𑀸𑀬. 𑀆𑀬𑀽𑀳𑀦𑀲𑁆𑀲𑀸𑀢𑀺 𑀅𑀪𑀺𑀲𑀗𑁆𑀔𑀭𑀡𑀲𑁆𑀲.

𑀢𑀁 𑀢𑀁 𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀸𑀤𑀺𑀓𑀁 𑀢𑀁 𑀢𑀁 𑀧𑀭𑀺𑀘𑁆𑀙𑁂𑀤𑀁. 𑀅𑀜𑁆𑀜𑀣𑀸𑀧𑀯𑀢𑁆𑀢𑀺𑀤𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀘 𑀅𑀜𑁆𑀜𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀤𑀲𑁆𑀲𑀦𑀁, 𑀅𑀯𑀢𑁆𑀣𑀸𑀯𑀺𑀲𑁂𑀲𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀁 𑀯𑀸. 𑀥𑀼𑀯𑀲𑀜𑁆𑀜𑀸𑀬𑀸𑀢𑀺 𑀣𑀺𑀭𑀪𑀸𑀯𑀕𑁆𑀕𑀳𑀡𑀲𑁆𑀲.

𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀲𑁆𑀲𑀸𑀢𑀺 𑀅𑀲𑀸𑀭𑁂𑀲𑀼 𑀲𑀸𑀭𑀕𑀳𑀡𑀸𑀪𑀺𑀦𑀺𑀯𑁂𑀲𑀲𑁆𑀲.

𑀲𑀁𑀲𑀬𑀫𑀺𑀘𑁆𑀙𑀸𑀜𑀸𑀡𑀸𑀦𑀁 𑀯𑀲𑁂𑀦 𑀲𑀫𑁆𑀫𑀼𑀬𑁆𑀳𑀦𑀁 𑀲𑀫𑁆𑀫𑁄𑀳𑁄, 𑀲𑁄 𑀏𑀯 𑀅𑀪𑀺𑀦𑀺𑀯𑁂𑀲𑁄𑀢𑀺 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄. 𑀲𑀗𑁆𑀔𑀸𑀭𑁂𑀲𑀼 𑀮𑁂𑀡𑀢𑀸𑀡𑀪𑀸𑀯𑀕𑁆𑀕𑀳𑀡𑀁 𑀆𑀮𑀬𑀸𑀪𑀺𑀦𑀺𑀯𑁂𑀲𑁄, 𑀅𑀢𑁆𑀣𑀢𑁄 𑀪𑀯𑀦𑀺𑀓𑀦𑁆𑀢𑀺.

𑀬𑀣𑀸 𑀘𑀺𑀢𑁆𑀢𑀁 𑀲𑀗𑁆𑀔𑀸𑀭𑁂 𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀯𑀝𑁆𑀝𑀁 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀢𑀺, 𑀢𑀣𑀸 𑀧𑀯𑀢𑁆𑀢𑀦𑀢𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀘 𑀅𑀦𑀼𑀮𑁄𑀫𑀜𑁆𑀘 ‘‘𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀦𑀺𑀯𑀺𑀝𑁆𑀞𑀪𑀸𑀯𑁂𑀦 𑀑𑀕𑀸𑀴𑁆𑀳𑀪𑀸𑀯𑁂𑀦 𑀧𑀯𑀢𑁆𑀢𑀲𑀁𑀬𑁄𑀚𑀦𑀸𑀤𑀺𑀓𑀺𑀮𑁂𑀲𑀸 𑀏𑀯 𑀓𑀺𑀮𑁂𑀲𑀸𑀪𑀺𑀦𑀺𑀯𑁂𑀲𑁄. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀫𑀸𑀳.

𑁮𑁫𑁧. 𑀅𑀲𑀦𑀺𑀯𑀺𑀘𑀓𑁆𑀓𑀁 𑀅𑀲𑀦𑀺𑀫𑀡𑁆𑀟𑀮𑀁. 𑀏𑀯𑀁 𑀧𑀳𑀸𑀦𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀫𑀸𑀳. 𑀓𑀫𑁆𑀫𑀓𑀺𑀮𑁂𑀲𑀸𑀦𑀁, 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸 𑀲𑀗𑁆𑀔𑀸𑀭𑀸𑀦𑀁 𑀔𑀬𑀁 𑀦𑀺𑀭𑁄𑀥𑀁 𑀕𑀘𑁆𑀙𑀢𑀻𑀢𑀺 𑀔𑀬𑀕𑀸𑀫𑀻, 𑀅𑀭𑀺𑀬𑀫𑀕𑁆𑀕𑁄. 𑀮𑁄𑀓𑀼𑀢𑁆𑀢𑀭𑀕𑁆𑀕𑀳𑀡𑁂𑀦𑁂𑀯 𑀲𑀺𑀤𑁆𑀥𑁂𑀧𑀺 𑀔𑀬𑀕𑀸𑀫𑀺𑀕𑁆𑀕𑀳𑀡𑀁 𑀯𑀡𑁆𑀡𑀪𑀡𑀦𑀢𑁆𑀣𑀁. 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑀁 𑀉𑀧𑀸𑀤𑀸𑀬. 𑀢𑀤𑀢𑁆𑀣𑀸𑀦𑁂𑀯𑀸𑀢𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀢𑁆𑀣𑀸𑀦𑁂𑀯. 𑀢𑁂𑀦 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀧𑁆𑀧𑀳𑀸𑀦𑀸𑀦𑀁 𑀫𑀕𑁆𑀕𑀲𑀫𑁆𑀪𑀸𑀭𑀢𑀫𑀸𑀳 𑀢𑁂𑀳𑀺 𑀯𑀺𑀦𑀸 𑀅𑀲𑀺𑀚𑁆𑀛𑀦𑀢𑁄. 𑀅𑀣 𑀯𑀸 𑀢𑀤𑀢𑁆𑀣𑀸𑀦𑁂𑀯𑀸𑀢𑀺 𑀫𑀕𑁆𑀕𑀢𑁆𑀣𑀸𑀦𑁂𑀯. 𑀢𑁂𑀦 𑀢𑀤𑀢𑁆𑀣𑀢𑀸𑀬 𑀢𑁂𑀲𑀁 𑀢𑀁𑀓𑀺𑀘𑁆𑀘𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀭𑀸𑀚𑀸𑀦𑀁 𑀯𑀥𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀫𑁆𑀧𑀺 𑀢𑀢𑁄 𑀧𑀼𑀩𑁆𑀩𑁂 𑀓𑀢𑀦𑁆𑀢𑀺 𑀬𑀁 𑀢𑀢𑁄𑀭𑀚𑁆𑀚𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀓𑀢𑀁 𑀧𑀘𑁆𑀘𑀦𑁆𑀢𑀲𑀸𑀥𑀦𑀤𑀼𑀕𑁆𑀕𑀯𑀺𑀤𑁆𑀥𑀁𑀲𑀦𑀸𑀤𑀺. 𑀬𑀣𑀸 𑀇𑀤𑀜𑁆𑀘𑀺𑀤𑀜𑁆𑀘 𑀭𑀜𑁆𑀜𑀸 𑀓𑀢𑀦𑁆𑀢𑀺𑀬𑁂𑀯 𑀯𑀼𑀘𑁆𑀘𑀢𑀺, 𑀏𑀯𑀁 𑀮𑁄𑀓𑀺𑀬𑀜𑀸𑀡𑁂𑀦 𑀲𑀸𑀥𑀺𑀢𑀸𑀦𑀺𑀧𑀺 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀧𑁆𑀧𑀳𑀸𑀦𑀸𑀦𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀫𑀕𑁆𑀕𑀲𑁆𑀲 𑀓𑀺𑀘𑁆𑀘𑀪𑀸𑀯𑁂𑀦 𑀯𑀼𑀘𑁆𑀘𑀦𑁆𑀢𑀺, 𑀢𑀤𑀢𑁆𑀣𑀢𑀸𑀬, 𑀢𑁂𑀲𑀁 𑀢𑀁𑀲𑀦𑁆𑀢𑀢𑀺𑀧𑀢𑀺𑀢𑀢𑀸𑀬 𑀘 𑀫𑀕𑁆𑀕𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁮𑁫𑁨. 𑀮𑁄𑀓𑀺𑀬𑀲𑁆𑀲, 𑀮𑁄𑀓𑀺𑀬𑀸 𑀯𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀮𑁄𑀓𑀺𑀬𑀲𑀘𑁆𑀙𑀺𑀓𑀺𑀭𑀺𑀬𑀸. 𑀏𑀯𑀁 𑀮𑁄𑀓𑀼𑀢𑁆𑀢𑀭𑀲𑀘𑁆𑀙𑀺𑀓𑀺𑀭𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀮𑀸𑀪𑀻𑀫𑁆𑀳𑀻𑀢𑀺 𑀮𑀸𑀪𑀻 𑀅𑀫𑁆𑀳𑀺. 𑀢𑀣𑀸 𑀯𑀲𑀻𑀫𑁆𑀳𑀻𑀢𑀺 𑀏𑀢𑁆𑀣𑀸𑀧𑀺. 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀨𑀲𑁆𑀲𑁂𑀦𑀸𑀢𑀺 𑀧𑀘𑁆𑀘𑀓𑁆𑀔𑀢𑁄 𑀆𑀭𑀫𑁆𑀫𑀡𑀓𑀭𑀡𑀲𑀗𑁆𑀔𑀸𑀢𑁂𑀦 𑀜𑀸𑀡𑀨𑀲𑁆𑀲𑀦𑁂𑀦. ‘‘𑀧𑀘𑁆𑀘𑀓𑁆𑀔𑀢𑁄’’𑀢𑀺 𑀘 𑀇𑀫𑀺𑀦𑀸 𑀅𑀦𑀼𑀫𑀸𑀦𑀢𑁄 𑀆𑀭𑀫𑁆𑀫𑀡𑀓𑀭𑀡𑀁 𑀦𑀺𑀯𑀢𑁆𑀢𑁂𑀢𑀺, ‘‘𑀈𑀤𑀺𑀲𑀫𑀺𑀤’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀦𑀁 𑀳𑁂𑀢𑁆𑀣 ‘‘𑀜𑀸𑀡𑀨𑀲𑁆𑀲𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀨𑀲𑁆𑀲𑀺𑀢𑀸𑀢𑀺 𑀜𑀸𑀡𑁂𑀦 𑀨𑀼𑀝𑁆𑀞𑀸.

𑀛𑀸𑀦𑀫𑀕𑁆𑀕𑀨𑀮𑀸𑀦𑀺 𑀯𑀺𑀬 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸𑀧𑀺 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑀯𑀲𑁂𑀦 𑀢𑀣𑀸𑀯𑀺𑀤𑁆𑀥𑀁𑀲𑀦𑀧𑀯𑀢𑁆𑀢𑀜𑀸𑀡𑀁 𑀅𑀧𑀭𑀧𑁆𑀧𑀘𑁆𑀘𑀬𑀜𑀸𑀡𑀁.

𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀦𑁆𑀢𑁄. 𑀅𑀫𑀢𑁄𑀕𑀥𑀦𑁆𑀢𑀺 𑀅𑀫𑀢𑀧𑀭𑀺𑀬𑀸𑀧𑀦𑁆𑀦𑀁, 𑀅𑀫𑀢𑀲𑀗𑁆𑀔𑀸𑀢𑀦𑁆𑀢𑀺 𑀅𑀢𑁆𑀣𑁄.

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 𑀤𑀲𑁆𑀲𑀦𑀁, 𑀢𑁂𑀦 𑀤𑀲𑁆𑀲𑀦𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸 𑀤𑀲𑁆𑀲𑀦𑀲𑀘𑁆𑀙𑀺𑀓𑀺𑀭𑀺𑀬𑀸. 𑀓𑀺𑀜𑁆𑀘𑀸𑀧𑀺 𑀕𑁄𑀢𑁆𑀭𑀪𑀼𑀜𑀸𑀡𑀁 𑀢𑀢𑁄 𑀧𑀞𑀫𑀢𑀭𑀁 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑀢𑀺, 𑀆𑀮𑀫𑁆𑀩𑀦𑀓𑀭𑀡𑀢𑁄 𑀤𑀺𑀲𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀓𑀭𑀡𑀢𑁄 𑀧𑀦 𑀦 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀤𑀼𑀯𑀺𑀥𑀸𑀧𑀻𑀢𑀺 𑀲𑀸 𑀤𑀲𑁆𑀲𑀦𑀪𑀸𑀯𑀦𑀸𑀯𑀲𑁂𑀦 𑀤𑀼𑀯𑀺𑀥𑀸𑀧𑀺 𑀲𑀘𑁆𑀙𑀺𑀓𑀺𑀭𑀺𑀬𑀸. 𑀤𑀲𑁆𑀲𑀦𑀪𑀸𑀯𑀦𑀸𑀯𑀲𑁂𑀦𑀸𑀢𑀺 𑀤𑀲𑁆𑀲𑀦𑀫𑀕𑁆𑀕𑀪𑀸𑀯𑀦𑀸𑀫𑀕𑁆𑀕𑀯𑀲𑁂𑀦. 𑀢𑁂𑀦 𑀅𑀫𑀕𑁆𑀕𑀯𑀲𑁂𑀦 𑀧𑀯𑀢𑁆𑀢𑀦𑀺𑀩𑁆𑀩𑀸𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀲𑀘𑁆𑀙𑀺𑀓𑀺𑀭𑀺𑀬𑀁 𑀦𑀺𑀯𑀢𑁆𑀢𑁂𑀢𑀺. 𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀧𑀦 𑀇𑀫𑀺𑀦𑀸 𑀫𑀕𑁆𑀕𑀨𑀮𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀲𑀘𑁆𑀙𑀺𑀓𑀺𑀭𑀺𑀬𑀁. 𑀇𑀫𑀲𑁆𑀲 𑀜𑀸𑀡𑀲𑁆𑀲𑀸𑀢𑀺 𑀇𑀫𑀲𑁆𑀲 𑀬𑀣𑀸𑀥𑀺𑀕𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑀜𑀸𑀡𑀲𑁆𑀲.

𑁮𑁫𑁩. 𑀅𑀪𑀺𑀫𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀪𑀸𑀯𑀦𑀸 𑀦𑀸𑀫 𑀉𑀧𑁆𑀧𑀸𑀤𑀦𑀸, 𑀲𑀦𑁆𑀢𑀸𑀦𑀧𑀭𑀺𑀪𑀸𑀯𑀦𑀸 𑀘𑀸𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑁄𑀓𑀺𑀬𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀤𑀕𑁆𑀕𑁂𑀦 𑀳𑀺 𑀮𑁄𑀓𑀺𑀬𑀸 𑀓𑀼𑀲𑀮𑀸𑀤𑀬𑁄 𑀉𑀧𑁆𑀧𑀸𑀤𑀺𑀢𑀸, 𑀯𑀟𑁆𑀠𑀺𑀢𑀸 𑀘, 𑀢𑀤𑀕𑁆𑀕𑁂𑀦𑀲𑁆𑀲 𑀲𑀻𑀮𑀪𑀸𑀯𑀦𑀸, 𑀓𑀸𑀬𑀪𑀸𑀯𑀦𑀸, 𑀘𑀺𑀢𑁆𑀢𑀪𑀸𑀯𑀦𑀸, 𑀧𑀜𑁆𑀜𑀸𑀪𑀸𑀯𑀦𑀸 𑀘 𑀮𑁄𑀓𑀺𑀬𑀸 𑀦𑀺𑀧𑁆𑀨𑀸𑀤𑀺𑀢𑀸 𑀳𑁄𑀢𑀺, 𑀢𑀸𑀬 𑀘 𑀲𑀦𑁆𑀢𑀸𑀦𑁄𑀧𑀺 𑀧𑀭𑀺𑀪𑀸𑀯𑀺𑀢𑁄𑀢𑀺. 𑀢𑀸𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸𑀲𑀼 𑀇𑀥 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀣𑀸𑀬𑀁 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸 𑀅𑀥𑀺𑀧𑁆𑀧𑁂𑀢𑀸, 𑀦 𑀇𑀢𑀭𑀸 𑀢𑀲𑁆𑀲𑀸 𑀲𑀫𑁆𑀪𑀸𑀭𑀪𑀸𑀯𑀢𑁄. 𑀘𑀢𑀼𑀩𑁆𑀩𑀺𑀥𑀫𑁆𑀧𑁂𑀢𑀁 𑀜𑀸𑀡𑀦𑁆𑀢𑀺 𑀏𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀸𑀦𑀺 𑀲𑀫𑁆𑀫𑀸𑀯𑀸𑀘𑀸𑀤𑀺𑀪𑁂𑀤𑀸𑀦𑀺 𑀲𑀻𑀮𑀸𑀤𑀻𑀦𑀺 𑀉𑀧𑁆𑀧𑀸𑀤𑁂𑀢𑀺. 𑀓𑀣𑀁? 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀸𑀬. 𑀲𑀻𑀮𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀸𑀥𑀺𑀲𑁆𑀲 𑀕𑀳𑀡𑀁, 𑀦 𑀧𑀜𑁆𑀜𑀸𑀬. 𑀦 𑀳𑀺 𑀢𑀤𑁂𑀯 𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀕𑁆𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀧𑀦 𑀉𑀧𑁆𑀧𑀸𑀤𑁂𑀢𑀺. 𑀢𑀤𑀦𑁆𑀢𑁄𑀕𑀥𑀪𑀸𑀯𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑁄 𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑁄𑀢𑀺 𑀯𑀤𑀦𑁆𑀢𑀺. 𑀲𑀻𑀮𑀸𑀤𑀻𑀦𑀻𑀢𑀺 𑀯𑀸 𑀨𑀮𑀲𑀻𑀮𑀸𑀤𑀻𑀦𑀫𑁆𑀧𑀺 𑀕𑀳𑀡𑀦𑁆𑀢𑀺 𑀧𑀜𑁆𑀜𑀸𑀬𑀧𑀺 𑀕𑀳𑀡𑀁 𑀬𑀼𑀚𑁆𑀚𑀢𑀺𑀬𑁂𑀯. 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀺𑀢𑀸𑀬𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀺𑀢𑀸𑀬𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀳𑀺 𑀘 𑀲𑀦𑁆𑀢𑀸𑀦𑀁 𑀯𑀸𑀲𑁂𑀢𑀻𑀢𑀺 𑀢𑁂𑀳𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑀧𑀝𑀺𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑁂𑀳𑀺 𑀮𑁄𑀓𑀼𑀢𑁆𑀢𑀭𑁂𑀳𑀺 𑀲𑀻𑀮𑀸𑀤𑀻𑀳𑀺 𑀅𑀭𑀺𑀬𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀧𑀭𑀺𑀪𑀸𑀯𑁂𑀢𑀺. 𑀬𑀁 𑀦𑀺𑀲𑁆𑀲𑀸𑀬 𑀧𑀭𑀸𑀯𑀼𑀢𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀬𑀣𑀸 𑀧𑀭𑀺𑀜𑁆𑀜𑀢𑁆𑀢𑀬𑀫𑁆𑀧𑀺 𑀧𑀳𑀸𑀦𑀢𑁆𑀢𑀬𑀫𑁆𑀧𑀺 𑀫𑀕𑁆𑀕𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀁 𑀧𑀭𑀺𑀬𑀸𑀬𑁂𑀦, 𑀦 𑀏𑀯𑀫𑀺𑀥. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸𑀯 𑀅𑀲𑁆𑀲 𑀫𑀕𑁆𑀕𑀜𑀸𑀡𑀲𑁆𑀲 𑀓𑀺𑀘𑁆𑀘𑀁. 𑀦 𑀳𑁂𑀢𑁆𑀣 𑀪𑀸𑀯𑀦𑀸𑀬 𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀅𑀯𑀥𑀸𑀭𑀡𑀁. 𑀢𑁂𑀦 𑀮𑁄𑀓𑀺𑀬𑀪𑀸𑀯𑀦𑀁 𑀦𑀺𑀯𑀢𑁆𑀢𑁂𑀢𑀺.

𑀏𑀯𑀁 𑀲𑀭𑀽𑀧𑁂𑀦𑁂𑀯 𑀆𑀕𑀢𑀸𑀬𑀸𑀢𑀺 ‘‘𑀘𑀺𑀢𑁆𑀢𑀁 𑀪𑀸𑀯𑀬’’𑀦𑁆𑀢𑀺 𑀲𑀫𑀸𑀥𑀺 𑀯𑀺𑀬 𑀘𑀺𑀢𑁆𑀢𑀲𑀻𑀲𑁂𑀦 𑀅𑀦𑀸𑀕𑀦𑁆𑀢𑁆𑀯𑀸 ‘‘𑀧𑀜𑁆𑀜𑀁 𑀪𑀸𑀯𑀬’’𑀦𑁆𑀢𑀺 𑀏𑀯𑀁 𑀲𑀭𑀽𑀧𑁂𑀦𑁂𑀯 𑀆𑀕𑀢𑀸𑀬 𑀧𑀜𑁆𑀜𑀸𑀬. 𑀬𑀁 𑀯𑀼𑀢𑁆𑀢𑀁 𑀉𑀤𑁆𑀤𑁂𑀲𑀯𑀲𑁂𑀦. 𑀏𑀢𑁆𑀢𑀸𑀯𑀢𑀸 𑀢𑀁 𑀯𑀺𑀢𑁆𑀣𑀸𑀭𑀺𑀢𑀁 𑀳𑁄𑀢𑀺. 𑀅𑀬𑀜𑁆𑀘 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀩𑀸𑀯𑀻𑀲𑀢𑀺𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.