𑁨𑁩. 𑀧𑀜𑁆𑀜𑀸𑀪𑀸𑀯𑀦𑀸𑀦𑀺𑀲𑀁𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀆𑀦𑀺𑀲𑀁𑀲𑀧𑀓𑀸𑀲𑀦𑀸𑀯𑀡𑁆𑀡𑀦𑀸

𑁮𑁫𑁪. 𑀅𑀦𑁂𑀓𑀲𑀢𑀸𑀦𑀺𑀲𑀁𑀲𑀸 𑀲𑀸𑀯𑀓𑀩𑁄𑀥𑀺𑀆𑀤𑀺𑀯𑀺𑀧𑀼𑀮𑁄𑀤𑀸𑀢𑀕𑀼𑀡𑀯𑀺𑀲𑁂𑀲𑀸𑀯𑀳𑀢𑁆𑀢𑀸. 𑀯𑀺𑀢𑁆𑀣𑀸𑀭𑀢𑁄𑀢𑀺 𑀦𑀬𑀤𑀲𑁆𑀲𑀦𑀁 𑀅𑀓𑀢𑁆𑀯𑀸 ‘‘𑀅𑀬𑀫𑁆𑀧𑀺 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄, 𑀅𑀬𑀫𑁆𑀧𑀻’’𑀢𑀺 𑀅𑀦𑀼𑀧𑀤𑀤𑀲𑁆𑀲𑀦𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀧𑀓𑀸𑀲𑁂𑀢𑀼𑀁 𑀦 𑀲𑀼𑀓𑀭𑀁 𑀅𑀢𑀺𑀩𑀳𑀼𑀪𑀸𑀯𑀢𑁄. 𑀅𑀲𑁆𑀲𑀸𑀢𑀺 𑀧𑀜𑁆𑀜𑀸𑀪𑀸𑀯𑀦𑀸𑀬. 𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀯𑀲𑁂𑀦 𑀦𑀸𑀦𑀸𑀯𑀺𑀥𑀸𑀦𑀁 𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀧𑀚𑀳𑀦𑀁. 𑀅𑀭𑀺𑀬𑀨𑀮𑀭𑀲𑀸𑀦𑀼𑀪𑀯𑀦𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀺𑀨𑀮𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀁.

𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀓𑀣𑀸𑀯𑀡𑁆𑀡𑀦𑀸

𑁮𑁫𑁫. ‘‘𑀅𑀭𑀺𑀬𑀨𑀮𑀭𑀲𑀸𑀦𑀼𑀪𑀯𑀦’’𑀦𑁆𑀢𑀺 𑀏𑀢𑁂𑀦𑁂𑀯 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀤𑀻𑀧𑀻𑀬𑀢𑀻𑀢𑀺 ‘‘𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂’’𑀢𑀺 𑀯𑀺𑀲𑁂𑀲𑀯𑀘𑀦𑀁, 𑀢𑀩𑁆𑀪𑀸𑀯𑀪𑀸𑀯𑀢𑁄 𑀯𑀸. 𑀲𑀺𑀤𑁆𑀥𑁂 𑀳𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀲𑀺𑀤𑁆𑀥𑀫𑁂𑀯 𑀳𑁄𑀢𑀻𑀢𑀺.

𑀪𑀻𑀫𑀯𑁂𑀕𑀸𑀦𑀼𑀧𑀢𑀺𑀢𑀸𑀢𑀺 𑀲𑀓𑀮𑀁 𑀮𑁄𑀓𑀁 𑀪𑀺𑀦𑁆𑀤𑀦𑁆𑀢𑁂𑀦 𑀯𑀺𑀬 𑀪𑀻𑀫𑁂𑀦 𑀪𑀬𑀸𑀦𑀓𑁂𑀦 𑀯𑁂𑀕𑁂𑀦 𑀲𑀳𑀲𑀸 𑀧𑀢𑀺𑀢𑀸. 𑀲𑀺𑀮𑀼𑀘𑁆𑀘𑀬𑁂𑀢𑀺 𑀧𑀩𑁆𑀩𑀢𑁂 𑀲𑁂𑀮𑀧𑀼𑀣𑀼𑀮𑁂. 𑀲𑀢𑁂𑀚𑀼𑀚𑁆𑀚𑀮𑀫𑀡𑁆𑀟𑀮𑁄𑀢𑀺 𑀲𑀭𑀤𑀓𑀸𑀮𑀲𑀫𑀺𑀤𑁆𑀥𑁂𑀦 𑀅𑀢𑁆𑀢𑀦𑁄 𑀢𑁂𑀚𑀲𑀸 𑀲𑀫𑀼𑀚𑁆𑀚𑀮𑀤𑀼𑀤𑁆𑀤𑀺𑀓𑁆𑀔𑀫𑀡𑁆𑀟𑀮𑁄. 𑀯𑀥𑀩𑀦𑁆𑀥𑀦𑀸𑀤𑀺𑀤𑀼𑀕𑁆𑀕𑀢𑀺𑀧𑀭𑀺𑀧𑀓𑁆𑀓𑀺𑀮𑁂𑀲𑀸𑀤𑀺𑀚𑀸𑀢𑀺𑀆𑀤𑀺𑀲𑀩𑁆𑀩𑀸𑀦𑀢𑁆𑀣𑀯𑀺𑀥𑀸𑀬𑀓𑀁. 𑀲𑀦𑁆𑀤𑀺𑀝𑁆𑀞𑀺𑀓𑀦𑁆𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑀁. 𑀚𑀜𑁆𑀜𑀸𑀢𑀺 𑀚𑀸𑀦𑁂𑀬𑁆𑀬. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀁 𑀧𑀜𑁆𑀜𑀸𑀪𑀸𑀯𑀦𑀸𑀬𑀁.

𑀨𑀮𑀲𑀫𑀸𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁮𑁫𑁬. 𑀅𑀭𑀺𑀬𑀲𑁆𑀲 𑀫𑀕𑁆𑀕𑀲𑁆𑀲 𑀨𑀮𑀁 𑀅𑀭𑀺𑀬𑀨𑀮𑀁, 𑀅𑀭𑀺𑀬𑀜𑁆𑀘 𑀢𑀁 𑀯𑀺𑀲𑀼𑀤𑁆𑀥𑀢𑁆𑀢𑀸 𑀨𑀮𑀜𑁆𑀘𑀸𑀢𑀺𑀧𑀺 𑀅𑀭𑀺𑀬𑀨𑀮𑀁, 𑀢𑀲𑁆𑀲 𑀭𑀲𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺𑀲𑀼𑀔𑀁, 𑀅𑀦𑀼𑀪𑀯𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀲𑁆𑀲 𑀢𑀲𑁆𑀲 𑀧𑀝𑀺𑀲𑁂𑀯𑀦𑀁. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀆𑀓𑀸𑀭𑁂𑀲𑀼. 𑀅𑀲𑁆𑀲𑀸𑀢𑀺 𑀅𑀭𑀺𑀬𑀨𑀮𑀲𑁆𑀲.

𑁮𑁫𑁭. 𑀲𑀁𑀬𑁄𑀚𑀦𑁂𑀲𑀼 𑀧𑀳𑀻𑀦𑁂𑀲𑀼 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀧𑀳𑀻𑀦𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀁𑀬𑁂𑀯 𑀕𑀳𑀡𑀁. 𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀫𑀢𑁆𑀢𑀫𑁂𑀯 𑀅𑀭𑀺𑀬𑀫𑀕𑁆𑀕𑀲𑁆𑀲 𑀨𑀮𑀁 𑀦𑀸𑀫, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀢𑁆𑀣𑀦𑁆𑀢𑀭𑀁 𑀯𑀺𑀧𑀸𑀓𑀪𑀽𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀨𑀮𑀁 𑀦𑀸𑀫 𑀦 𑀓𑁄𑀘𑀺 𑀅𑀜𑁆𑀜𑁄 𑀥𑀫𑁆𑀫𑁄 𑀅𑀢𑁆𑀣𑀻’’𑀢𑀺. 𑀓𑁂 𑀧𑀦𑁂𑀢𑀁 𑀯𑀤𑀦𑁆𑀢𑀻𑀢𑀺? 𑀅𑀦𑁆𑀥𑀓𑀸𑀤𑀬𑁄. 𑀢𑁂 𑀳𑀺 ‘‘𑀅𑀭𑀳𑀢𑁆𑀢𑀁 𑀅𑀭𑀳𑀢𑁆𑀢𑀦𑁆𑀢𑀺, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺…𑀧𑁂… 𑀫𑁄𑀳𑀓𑁆𑀔𑀬𑁄’’𑀢𑀺 (𑀲𑀁. 𑀦𑀺. 𑁪.𑁩𑁧𑁫) 𑀲𑀼𑀢𑁆𑀢𑀧𑀤𑀲𑁆𑀲 𑀅𑀢𑁆𑀣𑀁 𑀅𑀜𑁆𑀜𑀣𑀸 𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 ‘‘𑀅𑀭𑀳𑀢𑁆𑀢𑀁 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀯 𑀢𑀣𑀸 𑀯𑁄𑀳𑀭𑀻𑀬𑀢𑀻’’𑀢𑀺 𑀯𑀤𑀦𑁆𑀢𑀸 𑀲𑁂𑀲𑀨𑀮𑁂𑀧𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀇𑀤𑀁 𑀲𑀼𑀢𑁆𑀢𑀫𑁆𑀧𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀫𑀸𑀳. 𑀧𑀓𑀝𑁆𑀞𑁄 𑀉𑀓𑁆𑀓𑀝𑁆𑀞𑁄 𑀬𑁄𑀕𑁄𑀢𑀺 𑀧𑀬𑁄𑀕𑁄, 𑀅𑀭𑀺𑀬𑀫𑀕𑁆𑀕𑁄, 𑀧𑀬𑁄𑀕𑀦𑀺𑀫𑀺𑀢𑁆𑀢𑀁 𑀚𑀸𑀢𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀧𑀬𑁄𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺. 𑀬𑀸 𑀧𑀦 𑀅𑀭𑀺𑀬𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀮𑀩𑁆𑀪𑀫𑀸𑀦𑀸𑀧𑀺 𑀬𑀲𑁆𑀲𑀸 𑀯𑀺𑀧𑀸𑀓𑀧𑀜𑁆𑀜𑀸𑀬 𑀦𑀺𑀧𑁆𑀧𑀚𑁆𑀚𑀫𑀸𑀦𑀸𑀬 𑀦𑀺𑀧𑁆𑀧𑀚𑁆𑀚𑀢𑀺, 𑀲𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀁 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸𑀬𑀁 𑀧𑀜𑁆𑀜𑀸𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀜𑁆𑀜𑀸𑀢𑀺 𑀯𑀼𑀢𑁆𑀢𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀯𑀼𑀝𑁆𑀞𑀸𑀢𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀤𑀲𑁆𑀲𑀦𑀯𑀲𑁂𑀦 𑀯𑀢𑁆𑀯𑀸 𑀢𑀤𑀜𑁆𑀜𑀢𑁄𑀧𑀺 𑀯𑀼𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀬𑁄𑀕𑀢𑁄, 𑀉𑀧𑀦𑀺𑀲𑁆𑀲𑀬𑀢𑁄 𑀘 𑀅𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺. 𑀢𑁂𑀦 𑀢𑀤𑁂𑀓𑀝𑁆𑀞𑀧𑁆𑀧𑀳𑀸𑀦𑀫𑀸𑀳. 𑀔𑀦𑁆𑀥𑁂𑀳𑀻𑀢𑀺 𑀢𑀤𑀦𑀼𑀯𑀢𑁆𑀢𑀓𑀓𑁆𑀔𑀦𑁆𑀥𑁂𑀳𑀺, 𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑁂𑀳𑀺 𑀘𑁂𑀯 𑀢𑀧𑁆𑀧𑀘𑁆𑀘𑀬𑀸 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀓𑁆𑀔𑀦𑁆𑀥𑁂𑀳𑀺 𑀘𑀸𑀢𑀺 𑀅𑀢𑁆𑀣𑁄. 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀓𑀺𑀮𑁂𑀲𑀓𑁆𑀔𑀦𑁆𑀥𑁂𑀳𑀺 𑀩𑀳𑀺𑀤𑁆𑀥𑀸𑀪𑀽𑀢𑁂𑀳𑀺 𑀯𑀺𑀧𑀲𑁆𑀲𑀦𑀸𑀬 𑀕𑁄𑀘𑀭𑀪𑀽𑀢𑁂𑀳𑀺 𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑁂𑀳𑀺.

𑀏𑀯𑀁 𑀫𑀕𑁆𑀕𑀓𑀺𑀘𑁆𑀘𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀯𑀲𑁂𑀦 𑀨𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀫𑁆𑀧𑀬𑁄𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀫𑁆𑀧𑀬𑁄𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸𑀢𑀺 𑀢𑀲𑁆𑀲 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀦𑀸𑀤𑀺𑀧𑀬𑁄𑀕𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸. 𑀫𑀕𑁆𑀕𑁄 𑀳𑀺 𑀦𑀺𑀫𑀺𑀢𑁆𑀢𑀢𑁄, 𑀧𑀯𑀢𑁆𑀢𑀢𑁄 𑀘 𑀯𑀼𑀝𑁆𑀞𑀳𑀦𑁆𑀢𑁄 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺 𑀅𑀢𑁆𑀢𑀦𑁄 𑀔𑀡𑁂 𑀢𑀁 𑀧𑀬𑁄𑀕𑀁 𑀓𑀭𑁄𑀢𑀺 𑀦𑀸𑀫, 𑀨𑀮𑀓𑁆𑀔𑀡𑁂 𑀧𑀦𑀲𑁆𑀲 𑀲𑁄 𑀧𑀬𑁄𑀕𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀯𑀽𑀧𑀲𑀦𑁆𑀢𑁄 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀫𑁆𑀧𑀬𑁄𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸’’𑀢𑀺. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀧𑀦 𑀩𑀳𑀼𑀓𑁆𑀔𑀢𑁆𑀢𑀼𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀢𑀺. 𑀲𑀩𑁆𑀩𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀧𑀬𑁄𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀦𑀢𑁄 ‘‘𑀢𑀫𑁆𑀧𑀬𑁄𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀕𑁆𑀕𑀲𑁆𑀲𑁂𑀢𑀁 𑀨𑀮𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸 𑀯𑀺𑀧𑀸𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫, 𑀏𑀢𑀁 𑀅𑀭𑀺𑀬𑀫𑀕𑁆𑀕𑀲𑁆𑀲 𑀨𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁬𑁩) 𑀲𑀗𑁆𑀓𑀧𑁆𑀧𑀸𑀤𑀺𑀯𑀲𑁂𑀦, 𑀲𑁂𑀲𑀫𑀕𑁆𑀕𑀯𑀲𑁂𑀦 𑀘 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸𑀢𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸𑀬 𑀫𑀕𑁆𑀕𑁂𑀳𑀺 𑀦𑀺𑀩𑁆𑀩𑀺𑀲𑁂𑀲𑀢𑀸𑀬. 𑀢𑀣𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀗𑁆𑀔𑀸𑀢𑁄 𑀫𑀳𑀕𑁆𑀕𑀢𑁄 𑀥𑀫𑁆𑀫𑁄 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀯𑁂𑀮𑀸𑀬𑀁 𑀅𑀧𑁆𑀧𑀫𑀸𑀡𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀭𑀺𑀬𑀨𑀮𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀬 𑀘 𑀤𑀻𑀧𑀦𑀸𑀢𑀺 𑀏𑀯𑀫𑀸𑀤𑀻𑀦𑀺𑀧𑀺 𑀏𑀢𑁆𑀣 𑀅𑀭𑀺𑀬𑀨𑀮𑀲𑁆𑀲 𑀲𑀪𑀸𑀯𑀥𑀫𑁆𑀫𑀪𑀸𑀯𑁂𑀦 𑀅𑀢𑁆𑀣𑀺𑀢𑀸𑀬 𑀲𑀸𑀥𑀓𑀸𑀦𑀺, 𑀦 𑀬𑀣𑀸𑀤𑀲𑁆𑀲𑀺𑀢𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁫𑁮. 𑀨𑀮𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺 𑀨𑀮𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀁. 𑀅𑀲𑁆𑀲𑀸𑀢𑀺 𑀅𑀭𑀺𑀬𑀨𑀮𑀲𑁆𑀲. 𑀲𑀭𑀽𑀧𑀓𑀢𑁆𑀢𑀼𑀓𑀸𑀭𑀡𑀸𑀓𑀸𑀭𑀝𑁆𑀞𑀺𑀢𑀺𑀯𑀼𑀝𑁆𑀞𑀸𑀦𑀸𑀦𑀦𑁆𑀢𑀭𑀯𑀲𑁂𑀦 𑀇𑀤𑀁 𑀧𑀜𑁆𑀳𑀸𑀓𑀫𑁆𑀫𑀁.

𑁮𑁫𑁯. 𑀅𑀭𑀺𑀬𑀨𑀮𑀲𑁆𑀲 𑀦𑀺𑀭𑁄𑀥𑁂 𑀅𑀧𑁆𑀧𑀦𑀸𑀢𑀺 𑀅𑀭𑀺𑀬𑀲𑁆𑀲 𑀨𑀮𑀛𑀸𑀦𑀲𑁆𑀲 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀪𑀽𑀢𑁂 𑀅𑀧𑁆𑀧𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺.

𑁮𑁬𑁦. 𑀲𑀩𑁆𑀩𑁂𑀧𑀺 𑀧𑀼𑀣𑀼𑀚𑁆𑀚𑀦𑀸𑀢𑀺 𑀛𑀸𑀦𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄𑀧𑀺 𑀧𑀼𑀣𑀼𑀚𑁆𑀚𑀦𑀸 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀧𑀕𑁂𑀯 𑀇𑀢𑀭𑁂. 𑀅𑀭𑀺𑀬𑀸 𑀲𑀩𑁆𑀩𑁂𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀓𑀸𑀫𑀁 𑀲𑀸𑀫𑀜𑁆𑀜𑀚𑁄𑀢𑀦𑀸, 𑀲𑀸 𑀧𑀦 𑀯𑀺𑀲𑁂𑀲𑀦𑀺𑀯𑀺𑀝𑁆𑀞𑀸𑀬𑁂𑀯 𑀳𑁄𑀢𑀺. 𑀅𑀥𑀺𑀕𑀢𑀢𑁆𑀢𑀸𑀢𑀺 𑀧𑀦 𑀳𑁂𑀢𑀼𑀓𑀺𑀢𑁆𑀢𑀦𑀁. 𑀉𑀧𑀭𑀺𑀫𑀸𑀦𑀫𑁆𑀧𑀺 𑀳𑁂𑀝𑁆𑀞𑀺𑀫𑀸𑀬 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀬 𑀲𑀫𑀸𑀧𑀚𑁆𑀚𑀦𑀁 𑀲𑀸𑀥𑁂𑀦𑁆𑀢𑀁 𑀯𑀺𑀬 𑀞𑀺𑀢𑀦𑁆𑀢𑀺 𑀢𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀉𑀧𑀭𑀺𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑀭𑀺𑀫𑀸𑀢𑀺 𑀲𑀓𑀤𑀸𑀕𑀸𑀫𑀺𑀆𑀤𑀬𑁄. 𑀳𑁂𑀝𑁆𑀞𑀺𑀫𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀺𑀁. 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺 𑀲𑀢𑀺𑀧𑀺 𑀅𑀥𑀺𑀕𑀢𑀢𑁆𑀢𑁂. 𑀓𑀲𑁆𑀫𑀸𑀢𑀺 𑀘𑁂? 𑀓𑀸𑀭𑀡𑀫𑀸𑀳 ‘‘𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸’’𑀢𑀺. 𑀏𑀢𑁂𑀦 𑀉𑀧𑀭𑀺𑀫𑁄 𑀅𑀭𑀺𑀬𑁄 𑀳𑁂𑀝𑁆𑀞𑀺𑀫𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀢𑁆𑀢𑀸, 𑀬𑀣𑀸 𑀢𑀁 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀦𑁆𑀢𑀺, 𑀏𑀯𑀁 𑀧𑀯𑀢𑁆𑀢𑀁 𑀳𑁂𑀢𑀼𑀁 𑀩𑁆𑀬𑀪𑀺𑀘𑀸𑀭𑁂𑀢𑀺. 𑀦 𑀳𑀺 𑀮𑁄𑀓𑀺𑀬𑀚𑁆𑀛𑀸𑀦𑁂𑀲𑀼 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑀁 𑀦𑀸𑀫 𑀅𑀢𑁆𑀣𑀺 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀇𑀥 𑀧𑀦 𑀅𑀲𑀫𑀼𑀕𑁆𑀖𑀸𑀝𑀺𑀢𑀓𑀫𑁆𑀫𑀓𑀺𑀮𑁂𑀲𑀦𑀺𑀭𑁄𑀥𑀦𑁂𑀦 𑀧𑀼𑀣𑀼𑀚𑁆𑀚𑀦𑁂𑀳𑀺 𑀯𑀺𑀬 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀲𑁄𑀢𑀸𑀧𑀦𑁆𑀦𑀸𑀤𑀻𑀳𑀺 𑀲𑀓𑀤𑀸𑀕𑀸𑀫𑀺𑀆𑀤𑀻𑀦𑀁 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑀁 𑀅𑀢𑁆𑀣𑀺. 𑀬𑀢𑁄 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀨𑀮𑀥𑀫𑁆𑀫𑀸 𑀉𑀧𑀭𑀽𑀧𑀭𑀺 𑀫𑀕𑁆𑀕𑀥𑀫𑁆𑀫𑁂𑀳𑀺 𑀦𑀺𑀯𑀢𑁆𑀢𑀺𑀢𑀸 𑀧𑀝𑀺𑀧𑀓𑁆𑀔𑁂𑀳𑀺 𑀯𑀺𑀬 𑀅𑀪𑀺𑀪𑀽𑀢𑀸 𑀅𑀧𑁆𑀧𑀯𑀢𑁆𑀢𑀺𑀥𑀫𑁆𑀫𑀢𑀁𑀬𑁂𑀯 𑀆𑀧𑀦𑁆𑀦𑀸. 𑀢𑁂𑀦𑀸𑀳 ‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸’’𑀢𑀺.

𑀅𑀧𑀺𑀘 𑀓𑀼𑀲𑀮𑀓𑀺𑀭𑀺𑀬𑀧𑀯𑀢𑁆𑀢𑀺 𑀦𑀸𑀫 𑀅𑀜𑁆𑀜𑀸𑀤𑀺𑀲𑀻, 𑀯𑀺𑀧𑀸𑀓𑀧𑀯𑀢𑁆𑀢𑀺 𑀘 𑀅𑀜𑁆𑀜𑀸𑀤𑀺𑀲𑀻, 𑀅𑀦𑀦𑁆𑀢𑀭𑀨𑀮𑀢𑁆𑀢𑀸 𑀘 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁 𑀳𑁂𑀝𑁆𑀞𑀺𑀫𑀢𑁄 𑀉𑀧𑀭𑀺𑀫𑁄 𑀪𑀯𑀦𑁆𑀢𑀭𑀕𑀢𑁄 𑀯𑀺𑀬 𑀳𑁄𑀢𑀺. 𑀢𑀁𑀢𑀁𑀨𑀮𑀯𑀲𑁂𑀦𑁂𑀯 𑀳𑀺 𑀅𑀭𑀺𑀬𑀸𑀦𑀁 𑀲𑁄𑀢𑀸𑀧𑀦𑁆𑀦𑀸𑀤𑀺𑀦𑀸𑀫𑀮𑀸𑀪𑁄. 𑀢𑁂 𑀲𑀘𑁂 𑀅𑀜𑁆𑀜𑀨𑀮𑀲𑀫𑀗𑁆𑀕𑀺𑀦𑁄𑀧𑀺 𑀳𑁄𑀦𑁆𑀢𑀺, 𑀲𑁄𑀢𑀸𑀧𑀦𑁆𑀦𑀸𑀤𑀺𑀦𑀸𑀫𑀫𑁆𑀧𑀺 𑀢𑁂𑀲𑀁 𑀅𑀯𑀝𑁆𑀞𑀺𑀢𑀁 𑀲𑀺𑀬𑀸, 𑀢𑁂𑀦 𑀢𑁂𑀦 𑀛𑀸𑀦𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑁄 𑀯𑀺𑀬𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀭𑀺𑀬𑀲𑁆𑀲 𑀢𑀁 𑀢𑀁 𑀨𑀮𑀁 𑀪𑀯𑀗𑁆𑀕𑀲𑀤𑀺𑀲𑀦𑁆𑀢𑀺 𑀦 𑀉𑀧𑀭𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀨𑀮𑀲𑀫𑀗𑁆𑀕𑀺𑀢𑀸𑀬 𑀮𑁂𑀲𑁄𑀧𑀺 𑀲𑀫𑁆𑀪𑀯𑀢𑀺, 𑀓𑀼𑀢𑁄 𑀢𑀲𑁆𑀲 𑀲𑀫𑀸𑀧𑀚𑁆𑀚𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀳𑁂𑀝𑁆𑀞𑀺𑀫𑀸 𑀘 𑀉𑀧𑀭𑀺𑀫𑀦𑁆𑀢𑀺 𑀳𑁂𑀝𑁆𑀞𑀺𑀫𑀸 𑀘 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀭𑀺𑀬𑀸 𑀉𑀧𑀭𑀺𑀫𑀁 𑀲𑀓𑀤𑀸𑀕𑀸𑀫𑀺𑀨𑀮𑀸𑀤𑀺𑀁 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀅𑀦𑀥𑀺𑀕𑀢𑀢𑁆𑀢𑀸’’𑀢𑀺. 𑀦 𑀳𑀺 𑀅𑀦𑀥𑀺𑀕𑀢𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑀸.

‘‘𑀅𑀢𑁆𑀢𑀦𑁄 𑀅𑀢𑁆𑀢𑀦𑁄𑀬𑁂𑀯 𑀧𑀦 𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁂 𑀆𑀧𑀦𑁆𑀦𑁂 𑀢𑀢𑁆𑀣 𑀓𑁂𑀲𑀜𑁆𑀘𑀺 𑀫𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀘𑀺 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁂 𑀳𑀺 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀦𑁄𑀢𑀺 𑀬𑀲𑁆𑀫𑀸 𑀳𑀺 𑀢𑁂 ‘‘𑀉𑀧𑀭𑀺𑀫𑀸 𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀸 𑀅𑀦𑀸𑀕𑀸𑀫𑀺𑀦𑁄, 𑀅𑀭𑀳𑀦𑁆𑀢𑁄 𑀘 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀦𑁄, 𑀇𑀢𑀭𑁂 𑀧𑀦 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄, 𑀢𑀲𑁆𑀫𑀸 𑀤𑁆𑀯𑁂 𑀏𑀯 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺. 𑀦 𑀳𑀺 𑀲𑀫𑀸𑀥𑀺𑀧𑀸𑀭𑀺𑀧𑀽𑀭𑀺𑀬𑀸 𑀯𑀺𑀦𑀸 𑀲𑀫𑀸𑀧𑀢𑁆𑀢𑀺𑀯𑀴𑀜𑁆𑀚𑀦𑀁 𑀲𑀫𑁆𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀦𑁆𑀢𑀺 ‘‘𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀦𑁄’’𑀢𑀺 𑀢𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑀁. 𑀅𑀓𑀸𑀭𑀡𑀫𑁂𑀯𑀸𑀢𑀺 𑀅𑀬𑀼𑀢𑁆𑀢𑀺𑀬𑁂𑀯. 𑀓𑀲𑁆𑀫𑀸𑀢𑀺 𑀘𑁂? 𑀆𑀳 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀻’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀲𑀩𑁆𑀩𑀲𑁄 𑀅𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀮𑀩𑁆𑀪𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀲𑀫𑀼𑀘𑁆𑀙𑀺𑀦𑁆𑀦𑁂𑀓𑀘𑁆𑀘𑀓𑀺𑀮𑁂𑀲𑀸𑀦𑀁 𑀳𑁂𑀝𑁆𑀞𑀺𑀫𑀸𑀦𑀁 𑀅𑀭𑀺𑀬𑀸𑀦𑀁, 𑀢𑀲𑁆𑀫𑀸 𑀢𑁂𑀲𑀁 𑀲𑀫𑀸𑀥𑀺𑀲𑁆𑀫𑀺𑀁 𑀅𑀧𑀭𑀺𑀧𑀽𑀭𑀓𑀸𑀭𑀺𑀢𑀸 𑀅𑀢𑁆𑀢𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀲𑀫𑀸𑀧𑀚𑁆𑀚𑀦𑀲𑁆𑀲 𑀅𑀓𑀸𑀭𑀡𑀦𑁆𑀢𑀺. 𑀬𑀼𑀢𑁆𑀢𑀺𑀘𑀺𑀦𑁆𑀢𑀸 𑀦𑀸𑀫 𑀧𑀸𑀴𑀺𑀅𑀦𑀸𑀭𑀼𑀴𑁆𑀳𑁂 𑀅𑀢𑁆𑀣𑁂 𑀬𑀼𑀢𑁆𑀢𑀸, 𑀅𑀬𑀁 𑀧𑀦𑀢𑁆𑀣𑁄 𑀧𑀸𑀴𑀺𑀆𑀭𑀼𑀴𑁆𑀳𑁄𑀢𑀺 𑀓𑀸𑀭𑀡𑀸𑀧𑀤𑁂𑀲𑁂 𑀅𑀦𑀸𑀤𑀭𑀓𑀭𑀡𑀫𑀼𑀔𑁂𑀦 𑀧𑀸𑀴𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀜𑁆𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀝𑀺𑀮𑀸𑀪𑀢𑁆𑀣𑀸𑀬𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀲𑀫𑀥𑀺𑀕𑀫𑀸𑀬. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀢𑁆𑀣𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀏𑀢𑁆𑀣 𑀘 ‘‘𑀲𑀼𑀜𑁆𑀜𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬𑀸’’𑀢𑀺𑀆𑀤𑀺𑀦𑀸 𑀲𑀭𑀽𑀧𑀢𑁄 𑀉𑀤𑁆𑀥𑀝𑀢𑁆𑀢𑀸 𑀢𑀢𑁄 𑀧𑀼𑀩𑁆𑀩𑁂 𑀆𑀕𑀢𑀸 𑀫𑀕𑁆𑀕𑀨𑀮𑀯𑀸𑀭𑀸 𑀅𑀧𑁆𑀧𑀡𑀺𑀳𑀺𑀢𑀯𑀲𑁂𑀦 𑀯𑀼𑀢𑁆𑀢𑀸. 𑀢𑀢𑁆𑀣 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀘 𑀧𑀯𑀢𑁆𑀢𑀸𑀦𑀁 𑀨𑀮𑀲𑀫𑀸𑀧𑀢𑁆𑀢𑀻𑀦𑀁 𑀧𑀼𑀭𑁂𑀘𑀭𑀸 𑀕𑁄𑀢𑁆𑀭𑀪𑀼𑀥𑀫𑁆𑀫𑀸 𑀦𑀯𑀤𑀲𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬𑀸’’𑀢𑀺𑀆𑀤𑀺𑀦𑀸 𑀧𑀦 𑀘𑀢𑀽𑀲𑀼𑀧𑀺 𑀨𑀮𑁂𑀲𑀼 𑀏𑀓𑀲𑀤𑀺𑀲𑀁 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀅𑀢𑁆𑀢𑀦𑁄 𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀯𑀲𑁂𑀦 𑀢𑀁 𑀯𑀼𑀢𑁆𑀢𑀦𑁆𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑀲𑀦𑁆𑀦𑀁 𑀕𑁄𑀢𑁆𑀭𑀪𑀼𑀥𑀫𑁆𑀫𑀸𑀦𑀁 𑀤𑀲𑁆𑀲𑀦𑀯𑀲𑁂𑀦 𑀤𑁂𑀲𑀦𑀸𑀬 𑀆𑀭𑀤𑁆𑀥𑀢𑁆𑀢𑀸, 𑀫𑀕𑁆𑀕𑀯𑀸𑀭𑁂𑀦𑁂𑀯 𑀘 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄. 𑀦 𑀘 𑀫𑀕𑁆𑀕𑀸𑀦𑀦𑁆𑀢𑀭𑀁 𑀨𑀮𑀁 ‘‘𑀨𑀮𑀲𑀫𑀸𑀧𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀸𑀪𑀸𑀯𑀢𑁄. 𑀢𑀲𑁆𑀫𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀘𑀦𑁂𑀦𑁂𑀯 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀫𑁆𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀲𑀺𑀤𑁆𑀥𑀁. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑁮𑁬𑁧. 𑀧𑀬𑁄𑀚𑀦𑀫𑁆𑀧𑀺 𑀢𑀤𑀢𑁆𑀣𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀳𑁄𑀢𑀺 𑀢𑀦𑁆𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀦𑀢𑁄𑀢𑀺 ‘‘𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀻’’𑀢𑀺 𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣’’𑀦𑁆𑀢𑀺 𑀧𑀬𑁄𑀚𑀦𑀁 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀓𑀲𑁆𑀫𑀸𑀢𑀺 𑀯𑀸 𑀲𑀫𑁆𑀧𑀤𑀸𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀓𑀺𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀦𑁆𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀯𑀽𑀧𑀲𑀫𑁂𑀦 𑀲𑀦𑁆𑀢𑁂𑀦 𑀲𑀼𑀔𑀯𑀺𑀳𑀸𑀭𑁂𑀦 𑀯𑀺𑀳𑀭𑀡𑀢𑁆𑀣𑀁. 𑀲𑀢𑀺𑀧𑀺 𑀯𑀺𑀧𑀸𑀓𑀪𑀸𑀯𑁂 𑀧𑀭𑀺𑀓𑀫𑁆𑀫𑁂𑀦 𑀯𑀺𑀦𑀸 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀸𑀦𑀁 𑀢𑀲𑁆𑀲 𑀢𑀲𑁆𑀲 𑀅𑀭𑀺𑀬𑀲𑁆𑀲 𑀭𑀼𑀘𑀺𑀯𑀲𑁂𑀦𑁂𑀯 𑀧𑀯𑀢𑁆𑀢𑀺, 𑀬𑀢𑁄 𑀦𑁂𑀲𑀁 𑀲𑀸𑀥𑀺𑀧𑀢𑀺𑀢𑀸𑀢𑀺 𑀆𑀳 ‘‘𑀅𑀤𑁆𑀥𑀸𑀦…𑀧𑁂… 𑀲𑀫𑀸𑀧𑀚𑁆𑀚𑀦𑁆𑀢𑀻’’𑀢𑀺.

𑁮𑁬𑁨. 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀻𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺. 𑀬𑀣𑀸 𑀳𑀺 𑀮𑁄𑀓𑀺𑀬𑀚𑁆𑀛𑀸𑀦𑀸𑀦𑀁 𑀲𑀫𑀥𑀺𑀕𑀫𑁄 𑀲𑀫𑁆𑀧𑀬𑁄𑀕𑀲𑀫𑀗𑁆𑀕𑀺𑀪𑀸𑀯𑁂𑀦 𑀲𑀺𑀚𑁆𑀛𑀫𑀸𑀦𑁄 𑀧𑀳𑀸𑀦𑀗𑁆𑀕𑀲𑀫𑀢𑀺𑀓𑁆𑀓𑀫𑀫𑀼𑀔𑁂𑀦 𑀯𑀼𑀘𑁆𑀘𑀢𑀺 𑀢𑀣𑀸 𑀲𑀫𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸, 𑀏𑀯𑀁 𑀨𑀮𑀲𑀫𑀸𑀧𑀢𑁆𑀢𑀺𑀧𑀺 𑀦𑀺𑀩𑁆𑀩𑀸𑀦𑀫𑀦𑀲𑀺𑀓𑀸𑀭𑁂𑀦 𑀲𑀺𑀚𑁆𑀛𑀫𑀸𑀦𑀸 𑀢𑀤𑀜𑁆𑀜𑀸𑀭𑀫𑁆𑀫𑀡𑀸𑀫𑀦𑀲𑀺𑀓𑀸𑀭𑀫𑀼𑀔𑁂𑀦 𑀯𑀼𑀘𑁆𑀘𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀢𑁄 𑀯𑀺𑀦𑀺𑀯𑀝𑁆𑀝𑀺𑀢𑀫𑀸𑀦𑀲𑀢𑀸𑀯𑀲𑁂𑀦 𑀲𑀫𑀺𑀚𑁆𑀛𑀦𑀢𑁄. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀢𑁄’’𑀢𑀺𑀆𑀤𑀺. 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀺𑀜𑀸𑀡𑀧𑀭𑀫𑁆𑀧𑀭𑀯𑀲𑁂𑀦 𑀳𑀺 𑀲𑀩𑁆𑀩𑀨𑀮𑀘𑀺𑀢𑁆𑀢𑀁 𑀲𑀗𑁆𑀔𑀸𑀭𑀢𑁄 𑀲𑀩𑁆𑀩𑀲𑁄 𑀦𑀺𑀩𑁆𑀩𑀺𑀦𑁆𑀦𑀯𑀺𑀭𑀢𑁆𑀢𑀘𑀺𑀢𑁆𑀢𑀲𑁆𑀲 𑀢𑀢𑁄 𑀯𑀺𑀦𑀺𑀲𑁆𑀲𑀝𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀧𑀯𑀢𑁆𑀢𑀢𑀺. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀜𑁆𑀘 𑀢𑀁 𑀦𑀺𑀩𑁆𑀩𑀸𑀦𑀢𑁄 𑀅𑀜𑁆𑀜𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀫𑀦𑀲𑀺𑀓𑀸𑀭𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀫𑀦𑀲𑀺𑀓𑀸𑀭𑀸 𑀧𑀯𑀢𑁆𑀢𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀤𑁆𑀯𑀬𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀯𑀸 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸. 𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀲𑀫𑀸𑀧𑀚𑁆𑀚𑀦𑀢𑁆𑀣𑀸𑀬. 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀸𑀤𑀺𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀦𑀁. 𑀅𑀫𑀦𑀲𑀺𑀓𑀸𑀭𑁄𑀢𑀺 𑀆𑀤𑀻𑀦𑀯𑀢𑁄 𑀤𑀺𑀲𑁆𑀯𑀸 𑀯𑀺𑀲𑁆𑀲𑀝𑁆𑀞𑀢𑀸𑀬 𑀅𑀦𑀸𑀯𑀚𑁆𑀚𑀦𑀁 𑀅𑀲𑀫𑀦𑁆𑀦𑀸𑀳𑀸𑀭𑁄. 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀸𑀬. 𑀓𑁂𑀳𑀺𑀘𑀺 𑀧𑀘𑁆𑀘𑀬𑁂𑀳𑀺 𑀦 𑀲𑀗𑁆𑀔𑀢𑀢𑁆𑀢𑀸 𑀘 𑀅𑀲𑀗𑁆𑀔𑀢𑀸𑀢𑀺 𑀮𑀤𑁆𑀥𑀦𑀸𑀫𑀸𑀬 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀳𑀚𑀸𑀢𑁂𑀦 𑀫𑀦𑀲𑀺𑀓𑀸𑀭𑁂𑀦 𑀫𑀦𑀲𑀺𑀓𑀭𑀡𑀁, 𑀢𑀲𑁆𑀲𑀸 𑀯𑀸 𑀥𑀸𑀢𑀼𑀬𑀸 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀲𑀗𑁆𑀔𑀸𑀢𑁂 𑀫𑀦𑀲𑀺𑀓𑀭𑀡𑀁.

𑁮𑁬𑁩. 𑀉𑀤𑀬𑀩𑁆𑀩𑀬𑀸𑀤𑀺𑀯𑀲𑁂𑀦𑀸𑀢𑀺 𑀉𑀤𑀬𑀩𑁆𑀩𑀬𑀪𑀗𑁆𑀕𑀪𑀬𑀢𑀼𑀧𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀓𑀸𑀦𑀁 𑀦𑀯𑀦𑁆𑀦𑀫𑁆𑀧𑀺 𑀜𑀸𑀡𑀸𑀦𑀁 𑀩𑁆𑀬𑀸𑀧𑀸𑀭𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀧𑀯𑀢𑁆𑀢𑀸𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀲𑁆𑀲𑀸’’𑀢𑀺. 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀕𑁄𑀢𑁆𑀭𑀪𑀼𑀜𑀸𑀡𑀸𑀦𑀦𑁆𑀢𑀭𑀦𑁆𑀢𑀺 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀲𑁆𑀲 ‘‘𑀯𑁄𑀤𑀸𑀦’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀕𑁄𑀢𑁆𑀭𑀪𑀼𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀕𑁄𑀢𑁆𑀭𑀪𑀼𑀜𑀸𑀡𑀁 𑀫𑀕𑁆𑀕𑀜𑀸𑀡𑀧𑀼𑀭𑁂𑀘𑀸𑀭𑀺𑀓𑀁 𑀯𑀺𑀬 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺? 𑀨𑀮𑀥𑀫𑁆𑀫𑀸𑀦𑀁 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀢𑁄. 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸 𑀏𑀯 𑀳𑀺 𑀦𑀺𑀬𑁆𑀬𑀸𑀦𑀺𑀓𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀢𑀫𑁂 𑀥𑀫𑁆𑀫𑀸 𑀦𑀺𑀬𑁆𑀬𑀸𑀦𑀺𑀓𑀸? 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺 (𑀥. 𑀲. 𑁧𑁨𑁯𑁫, 𑁧𑁬𑁦𑁯). 𑀢𑀲𑁆𑀫𑀸 𑀏𑀓𑀦𑁆𑀢𑁂𑀦 𑀦𑀺𑀬𑁆𑀬𑀸𑀦𑀺𑀓𑀲𑀪𑀸𑀯𑀲𑁆𑀲 𑀉𑀪𑀢𑁄𑀯𑀼𑀝𑁆𑀞𑀸𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑁂𑀦 𑀜𑀸𑀡𑁂𑀦 𑀦𑀺𑀫𑀺𑀢𑁆𑀢𑀢𑁄 𑀯𑀼𑀝𑁆𑀞𑀺𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀬𑀼𑀢𑁆𑀢𑀸, 𑀦 𑀧𑀦 𑀅𑀭𑀺𑀬𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀢𑀲𑁆𑀲 𑀯𑀺𑀧𑀸𑀓𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀅𑀯𑀼𑀝𑁆𑀞𑀸𑀦𑀲𑀪𑀸𑀯𑀸𑀦𑀁 𑀨𑀮𑀜𑀸𑀡𑀸𑀦𑀁 𑀧𑀼𑀭𑁂𑀘𑀸𑀭𑀺𑀓𑀜𑀸𑀡𑀲𑁆𑀲 𑀓𑀤𑀸𑀘𑀺𑀧𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀉𑀪𑀬𑀢𑁆𑀣 𑀅𑀦𑀼𑀮𑁄𑀫𑀜𑀸𑀡𑀸𑀦𑀁 𑀅𑀢𑀼𑀮𑁆𑀬𑀸𑀓𑀸𑀭𑀢𑁄. 𑀅𑀭𑀺𑀬𑀫𑀕𑁆𑀕𑀯𑀻𑀣𑀺𑀬𑀜𑁆𑀳𑀺 𑀅𑀦𑀼𑀮𑁄𑀫𑀜𑀸𑀡𑀸𑀦𑀺 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀸𑀦𑀁 𑀣𑀽𑀮𑀣𑀽𑀮𑀮𑁄𑀪𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀸𑀢𑀺𑀲𑀬𑀁 𑀧𑀤𑀸𑀮𑀦𑁂𑀦 𑀮𑁄𑀓𑀺𑀬𑀜𑀸𑀡𑁂𑀲𑀼 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀦𑀺 𑀫𑀕𑁆𑀕𑀜𑀸𑀡𑀸𑀦𑀼𑀕𑀼𑀡𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀧𑀦 𑀢𑀸𑀦𑀺 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀢𑁂𑀲𑀁 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑀢𑁆𑀣 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑁂 𑀦𑀺𑀭𑀼𑀲𑁆𑀲𑀼𑀓𑁆𑀓𑀸𑀦𑀺 𑀓𑁂𑀯𑀮𑀁 𑀅𑀭𑀺𑀬𑀸𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀲𑀫𑀗𑁆𑀕𑀺𑀪𑀸𑀯𑀲𑁆𑀲 𑀧𑀭𑀺𑀓𑀫𑁆𑀫𑀫𑀢𑁆𑀢𑀸𑀦𑀺 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦 𑀢𑁂𑀲𑀁 𑀓𑀼𑀢𑁄𑀘𑀺 𑀯𑀼𑀝𑁆𑀞𑀸𑀦𑀲𑀫𑁆𑀪𑀯𑁄, 𑀬𑀢𑁄 𑀦𑁂𑀲𑀁 𑀧𑀭𑀺𑀬𑁄𑀲𑀸𑀦𑀜𑀸𑀡𑀁 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀯𑀼𑀝𑁆𑀞𑀸𑀦𑀢𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀲𑀺𑀬𑀸.

𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑁂𑀓𑁆𑀔𑀲𑁆𑀲 𑀅𑀢𑁆𑀢𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀯𑀴𑀜𑁆𑀚𑀦𑀢𑁆𑀣𑀸𑀬 𑀉𑀤𑀬𑀩𑁆𑀩𑀬𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀼𑀧𑀼𑀩𑁆𑀩𑀺𑀬𑀸 𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀕𑁆𑀕𑁄’’𑀢𑀺 𑀇𑀤𑀜𑁆𑀘 𑀅𑀝𑁆𑀞𑀓𑀣𑀸𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑁂𑀓𑁆𑀔𑀲𑁆𑀲𑀸𑀧𑀺 𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀕𑁆𑀕𑁄’’𑀢𑀺. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀅𑀧𑁆𑀧𑀦𑀚𑁆𑀛𑀸𑀦𑀯𑀲𑁂𑀦 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀦𑀺𑀭𑀦𑁆𑀢𑀭𑀁 𑀨𑀮𑀘𑀺𑀢𑁆𑀢𑀲𑁆𑀲𑁂𑀯 𑀧𑀯𑀢𑁆𑀢𑀦𑀁 𑀲𑀫𑀸𑀧𑀚𑁆𑀚𑀦𑀁 𑀨𑀮𑀲𑀫𑀸𑀧𑀢𑁆𑀢𑀻𑀢𑀺 𑀆𑀳 ‘‘𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀦𑀺𑀭𑁄𑀥𑁂 𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀻’’𑀢𑀺. 𑀬𑀤𑀺 𑀅𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁, 𑀢𑁂𑀦 𑀦𑀻𑀳𑀸𑀭𑁂𑀦 𑀲𑁂𑀓𑁆𑀔𑀲𑁆𑀲 𑀉𑀧𑀭𑀺𑀫𑀕𑁆𑀕𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀦𑁆𑀦𑀢𑀸𑀬𑀸’’𑀢𑀺𑀆𑀤𑀺. 𑀢𑁂𑀦 𑀅𑀜𑁆𑀜𑁄𑀬𑁂𑀯 𑀯𑀺𑀧𑀲𑁆𑀲𑀦𑀸𑀘𑀸𑀭𑁄 𑀅𑀭𑀺𑀬𑀫𑀕𑁆𑀕𑀸𑀯𑀳𑁄, 𑀅𑀜𑁆𑀜𑁄 𑀨𑀮𑀲𑀫𑀸𑀧𑀢𑁆𑀢𑀺𑀆𑀯𑀳𑁄𑀢𑀺 𑀤𑀲𑁆𑀲𑁂𑀢𑀺, 𑀲𑁆𑀯𑀸𑀬𑀁 𑀯𑀺𑀧𑀲𑁆𑀲𑀦𑀸𑀬 𑀯𑀺𑀪𑀸𑀕𑁄 𑀯𑀼𑀢𑁆𑀢𑁄 𑀏𑀯. 𑀬𑁂 𑀧𑀦𑀸𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀲𑀦𑁆𑀥𑀸𑀬𑀸𑀳. 𑀢𑁂 𑀳𑀺 𑀫𑀕𑁆𑀕𑀨𑀮𑀯𑀺𑀧𑀲𑁆𑀲𑀦𑀸𑀬 𑀆𑀮𑁄𑀴𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀳𑀺 ‘‘𑀏𑀯𑀁 𑀲𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀳𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀬𑀤𑀺 𑀇𑀢𑀭𑀢𑁆𑀣𑀸𑀧𑀺 𑀯𑀺𑀧𑀲𑁆𑀲𑀦𑀸 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀴𑀺𑀯𑀲𑁂𑀦𑁂𑀯 𑀘 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 ‘‘𑀤𑀲 𑀕𑁄𑀢𑁆𑀭𑀪𑀼𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀫𑀕𑁆𑀕𑀢𑁆𑀣𑀸 𑀨𑀮𑀢𑁆𑀣𑀸 𑀯𑀺𑀧𑀲𑁆𑀲𑀦𑀸 𑀯𑀺𑀲𑀼𑀁 𑀓𑀢𑁆𑀯𑀸 𑀧𑀯𑀢𑁆𑀢𑀧𑀸𑀴𑀺𑀯𑀲𑁂𑀦𑁂𑀯 𑀢𑁂𑀲𑀁 𑀯𑀘𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺𑀧𑀺 𑀦 𑀕𑀳𑁂𑀢𑀩𑁆𑀩𑀁, 𑀅𑀜𑁆𑀜𑀣𑀸 ‘‘𑀤𑀲 𑀕𑁄𑀢𑁆𑀭𑀪𑀼𑀥𑀫𑁆𑀫𑀸’’𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬𑀸𑀢𑀺. 𑀇𑀤𑀫𑁂𑀯 𑀧𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀁. 𑀨𑀮𑀜𑁆𑀘𑀲𑁆𑀲𑀸𑀢𑀺𑀆𑀤𑀺 𑀫𑀳𑀕𑁆𑀕𑀢𑀯𑀺𑀧𑀸𑀓𑀸𑀦𑀁 𑀯𑀺𑀬 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀦𑀜𑁆𑀘 𑀓𑀼𑀲𑀮𑀲𑀭𑀺𑀓𑁆𑀔𑀢𑀸𑀤𑀲𑁆𑀲𑀦𑀁. 𑀛𑀸𑀦𑀢𑁄 𑀲𑀭𑀺𑀓𑁆𑀔𑀢𑀸𑀤𑀲𑁆𑀲𑀦𑁂𑀦𑁂𑀯 𑀘𑁂𑀢𑁆𑀣 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀯𑀲𑁂𑀦𑀸𑀧𑀺 𑀲𑀭𑀺𑀓𑁆𑀔𑀢𑀸 𑀤𑀲𑁆𑀲𑀺𑀢𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁬𑁪. 𑀞𑀺𑀢𑀺𑀬𑀸𑀢𑀺 𑀧𑀩𑀦𑁆𑀥𑀝𑁆𑀞𑀺𑀢𑀺𑀬𑀸. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀜𑁆𑀳𑀺 𑀲𑀫𑀸𑀧𑀢𑁆𑀢𑀺𑀬𑀸 𑀧𑀩𑀦𑁆𑀥𑀯𑀲𑁂𑀦𑀸𑀯𑀝𑁆𑀞𑀸𑀦𑀁 𑀇𑀥 𑀞𑀺𑀢𑀻𑀢𑀺. ‘‘𑀘𑀦𑁆𑀤𑁂 𑀯𑀸 𑀲𑀽𑀭𑀺𑀬𑁂 𑀯𑀸 𑀏𑀢𑁆𑀢𑀓𑀁 𑀞𑀸𑀦𑀁 𑀕𑀢𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀮𑀸𑀯𑀥𑀺𑀕𑁆𑀕𑀳𑀡𑀯𑀲𑁂𑀦 𑀲𑀫𑀸𑀧𑀚𑁆𑀚𑀦𑀁 𑀘𑀺𑀢𑁆𑀢𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑀁 𑀅𑀪𑀺𑀲𑀗𑁆𑀔𑀸𑀭𑁄.

𑁮𑁬𑁫. 𑀲𑀩𑁆𑀩𑀸𑀦𑁂𑀯𑁂𑀢𑀸𑀦𑀻𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀲𑀩𑁆𑀩𑀸𑀦𑁂𑀯 𑀏𑀢𑀸𑀦𑀺 𑀏𑀓𑀢𑁄 𑀓𑀸𑀫𑀁 𑀦 𑀫𑀦𑀲𑀺 𑀓𑀭𑁄𑀢𑀺 𑀅𑀲𑀫𑁆𑀪𑀯𑀢𑁄. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦𑀸𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦. 𑀲𑀫𑀼𑀤𑀸𑀬𑀲𑀤𑁆𑀤𑀸 𑀳𑀺 𑀅𑀯𑀬𑀯𑁂𑀲𑀼𑀧𑀺 𑀧𑀯𑀢𑁆𑀢𑀦𑁆𑀢𑀺, 𑀅𑀯𑀬𑀯𑀩𑁆𑀬𑀢𑀺𑀭𑁂𑀓𑁂𑀦 𑀘 𑀲𑀫𑀼𑀤𑀸𑀬𑁄 𑀦 𑀮𑀩𑁆𑀪𑀢𑀻𑀢𑀺 𑀅𑀯𑀬𑀯𑀕𑀢𑀫𑁆𑀧𑀺 𑀓𑀺𑀘𑁆𑀘𑀁 𑀲𑀫𑀼𑀤𑀸𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀲𑀩𑁆𑀩𑁂𑀲𑀁 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀦𑀁 𑀏𑀓𑀢𑁄 𑀫𑀦𑀲𑀺𑀓𑀸𑀭𑀸𑀪𑀸𑀯𑀢𑁄. 𑀬𑀲𑁆𑀫𑀸 𑀪𑀯𑀗𑁆𑀕𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀬𑀁 𑀪𑀯𑀗𑁆𑀕𑀲𑁆𑀲𑀸’’𑀢𑀺𑀆𑀤𑀺. 𑀪𑀯𑀗𑁆𑀕𑀲𑁆𑀲 𑀆𑀭𑀫𑁆𑀫𑀡𑀁 𑀦𑀸𑀫 𑀓𑀫𑁆𑀫𑀸𑀤𑀺. 𑀫𑀦𑀲𑀺 𑀓𑀭𑁄𑀢𑁄𑀢𑀺 𑀪𑀯𑀗𑁆𑀕𑀲𑀳𑀕𑀢𑁂𑀦 𑀫𑀦𑀲𑀺𑀓𑀸𑀭𑁂𑀦 𑀫𑀦𑀲𑀺 𑀓𑀭𑁄𑀢𑁄, 𑀢𑀁 𑀯𑀸 𑀆𑀭𑀫𑁆𑀫𑀡𑀁 𑀪𑀯𑀗𑁆𑀕𑀫𑀦𑀲𑀺 𑀓𑀭𑁄𑀢𑁄.

𑁮𑁬𑁬. 𑀨𑀮𑀲𑁆𑀲 𑀨𑀮𑀫𑁂𑀯 𑀯𑀸 𑀅𑀦𑀦𑁆𑀢𑀭𑀁 𑀳𑁄𑀢𑀺 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁. 𑀪𑀯𑀗𑁆𑀕𑀁 𑀯𑀸 𑀲𑀩𑁆𑀩𑀧𑀘𑁆𑀙𑀺𑀫𑀲𑁆𑀲. 𑀨𑀮𑀸𑀦𑀦𑁆𑀢𑀭𑀁 𑀫𑀕𑁆𑀕𑀯𑀻𑀣𑀺𑀬𑀁, 𑀨𑀮𑀲𑀫𑀸𑀧𑀢𑁆𑀢𑀺𑀬𑀜𑁆𑀘. ‘‘𑀬𑁂𑀦 𑀨𑀮𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀁 𑀳𑁄𑀢𑀻’’𑀢𑀺 𑀇𑀤𑀁 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀦𑀺𑀭𑁄𑀥𑀸𑀯𑀼𑀝𑁆𑀞𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀁 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀕𑁆𑀕𑀨𑀮𑀁 𑀯𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸𑀦𑀦𑁆𑀢𑀭𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀓𑀼𑀲𑀮𑀲𑁆𑀲, 𑀓𑀺𑀭𑀺𑀬𑀲𑁆𑀲 𑀯𑀸 𑀅𑀦𑀦𑁆𑀢𑀭𑀁 𑀲𑀢𑀺𑀧𑀺 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀯𑀺𑀚𑀸𑀢𑀺𑀬𑁂𑀦 𑀅𑀦𑁆𑀢𑀭𑀺𑀓𑀢𑁆𑀢𑀸.

𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑀦𑁆𑀢𑀺 𑀲𑀩𑁆𑀩𑀲𑁄 𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑀤𑀭𑀣𑀁. 𑀅𑀫𑀢𑀸𑀭𑀫𑁆𑀫𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁. 𑀲𑀼𑀪𑀦𑁆𑀢𑀺 𑀅𑀲𑁄𑀪𑀦𑀢𑀸𑀬 𑀓𑀺𑀮𑁂𑀲𑀲𑁆𑀲𑀸𑀧𑀺 𑀅𑀪𑀸𑀯𑀢𑁄 𑀲𑁄𑀪𑀦𑀁. 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀮𑁄𑀓𑀸𑀫𑀺𑀲𑀁 𑀯𑀦𑁆𑀢𑀁 𑀙𑀟𑁆𑀟𑀺𑀢𑀁 𑀏𑀢𑁂𑀦𑀸𑀢𑀺 𑀯𑀦𑁆𑀢𑀮𑁄𑀓𑀸𑀫𑀺𑀲𑀁. 𑀯𑀽𑀧𑀲𑀦𑁆𑀢𑀓𑀺𑀮𑁂𑀲𑀢𑀸𑀬, 𑀲𑀼𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑀁. 𑀬𑁂𑀦 𑀥𑀫𑁆𑀫𑁂𑀦 𑀬𑁄𑀕𑀢𑁄 𑀲𑀫𑀡𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀲𑀸𑀫𑀜𑁆𑀜𑀲𑁆𑀲 𑀨𑀮𑀦𑁆𑀢𑀺 𑀲𑀸𑀫𑀜𑁆𑀜𑀨𑀮𑀁.

𑀑𑀚𑀯𑀦𑁆𑀢𑁂𑀦𑀸𑀢𑀺 𑀲𑀪𑀸𑀯𑀲𑀫𑁆𑀧𑀦𑁆𑀦𑁂𑀦. 𑀲𑀼𑀘𑀺𑀦𑀸𑀢𑀺 𑀓𑀺𑀮𑁂𑀲𑀸𑀲𑀼𑀘𑀺𑀯𑀺𑀭𑀳𑀢𑁄 𑀧𑀭𑀺𑀲𑀼𑀤𑁆𑀥𑁂𑀦. 𑀲𑀼𑀔𑁂𑀦𑀸𑀢𑀺 𑀅𑀦𑀼𑀢𑁆𑀢𑀭𑀲𑀼𑀔𑁂𑀦. 𑀅𑀪𑀺𑀲𑀦𑁆𑀤𑀺𑀢𑀦𑁆𑀢𑀺 𑀲𑀩𑁆𑀩𑀲𑁄 𑀮𑀽𑀔𑀪𑀸𑀯𑀸𑀧𑀕𑀫𑀦𑁂𑀦 𑀲𑀺𑀦𑁂𑀳𑀺𑀢𑀁. 𑀲𑀸𑀢𑀸𑀢𑀺𑀲𑀸𑀢𑁂𑀦𑀸𑀢𑀺 𑀫𑀳𑀕𑁆𑀕𑀢𑀲𑀸𑀢𑀢𑁄, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑀸𑀢𑀢𑁄 𑀘 𑀅𑀢𑀺𑀯𑀺𑀬 𑀲𑀸𑀢𑁂𑀦 𑀫𑀥𑀼𑀭𑁂𑀦. 𑀫𑀕𑁆𑀕𑀲𑀼𑀔𑀢𑁄𑀧𑀺 𑀳𑀺 𑀨𑀮𑀲𑀼𑀔𑀁 𑀲𑀦𑁆𑀢𑀢𑀭𑀢𑀸𑀬 𑀧𑀡𑀻𑀢𑀢𑀭𑀁. 𑀅𑀫𑀢𑁂𑀦 𑀲𑀫𑁆𑀫𑁄𑀤𑀺𑀢𑀁. ‘‘𑀫𑀥𑀼𑀁 𑀯𑀺𑀬𑀸’’𑀢𑀺 𑀇𑀫𑀺𑀦𑀸 𑀲𑀸𑀢𑀸𑀢𑀺𑀲𑀸𑀢𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺.

𑀢𑀲𑁆𑀲 𑀅𑀭𑀺𑀬𑀲𑁆𑀲 𑀨𑀮𑀲𑁆𑀲 𑀭𑀲𑀪𑀽𑀢𑀁 𑀲𑀸𑀭𑀪𑀽𑀢𑀁 𑀢𑀁 𑀲𑀼𑀔𑀁 𑀧𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀬𑀲𑁆𑀫𑀸 𑀧𑀡𑁆𑀟𑀺𑀢𑁄 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀻𑀢𑀺 𑀬𑁄𑀚𑀦𑀸.

𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁮𑁬𑁭. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 ‘‘𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸’’𑀢𑀺 𑀲𑀁𑀔𑀺𑀢𑁆𑀢𑀯𑀘𑀦𑁂. 𑀇𑀤𑀁 𑀲𑀭𑀽𑀧𑀸𑀤𑀺𑀯𑀲𑁂𑀦 𑀧𑀜𑁆𑀳𑀸𑀓𑀫𑁆𑀫𑀁. 𑀓𑀢𑁆𑀣𑀸𑀢𑀺 𑀓𑀲𑁆𑀫𑀺𑀁 𑀪𑀯𑁂.

𑁮𑁬𑁮. 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀯𑀲𑁂𑀦𑀸𑀢𑀺 𑀯𑀺𑀧𑀲𑁆𑀲𑀦𑀸𑀦𑀼𑀕𑀢𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀆𑀭𑁄𑀳𑀦𑁆𑀢𑁂𑀦 𑀢𑀁𑀢𑀁𑀧𑀝𑀺𑀧𑀓𑁆𑀔𑀦𑀺𑀭𑁄𑀥𑀫𑀼𑀔𑁂𑀦 𑀢𑀺𑀡𑁆𑀡𑀁 𑀲𑀗𑁆𑀔𑀸𑀭𑀸𑀦𑀁 𑀅𑀦𑀼𑀧𑀼𑀩𑁆𑀩𑀢𑁄 𑀦𑀺𑀭𑁄𑀥𑀯𑀲𑁂𑀦. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀬𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀧𑁆𑀧𑀯𑀢𑁆𑀢𑀺, 𑀅𑀬𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀓𑁂 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀓𑀸𑀫𑀁 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀸 𑀧𑀥𑀸𑀦𑀢𑀸𑀬 𑀧𑀞𑀫𑀁 𑀧𑀼𑀘𑁆𑀙𑀺𑀢𑀸, 𑀢𑀩𑁆𑀩𑀺𑀲𑁆𑀲𑀚𑁆𑀚𑀦𑀁 𑀧𑀦 𑀕𑀭𑀼𑀪𑀸𑀯𑀢𑁄 𑀧𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀅𑀲𑀫𑀸𑀧𑀚𑁆𑀚𑀦𑀓𑁂 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑁂𑀧𑀺…𑀧𑁂… 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻’’𑀢𑀺 𑀆𑀳 𑀬𑀣𑀸 ‘‘𑀯𑀸𑀫𑀁 𑀫𑀼𑀜𑁆𑀘, 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸’’𑀢𑀺. 𑀢𑀢𑁆𑀣 ‘‘𑀲𑀩𑁆𑀩𑁂𑀧𑀻’’𑀢𑀺 𑀇𑀤𑀁 𑀧𑀼𑀣𑀼𑀚𑁆𑀚𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀯𑀺𑀲𑁂𑀲𑀦𑀁. 𑀢𑁂 𑀳𑀺 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀺𑀦𑁄𑀧𑀺 𑀅𑀮𑀸𑀪𑀺𑀦𑁄 𑀯𑀺𑀬 𑀲𑀫𑀸𑀥𑀺𑀲𑁆𑀫𑀺𑀁 𑀅𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀳𑀺 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀢𑀸, 𑀦 𑀛𑀸𑀦𑀸𑀥𑀺𑀕𑀫𑀫𑀢𑁆𑀢𑁂𑀦. 𑀅𑀦𑀸𑀕𑀸𑀫𑀺𑀦𑁄, 𑀅𑀭𑀳𑀦𑁆𑀢𑁄𑀢𑀺 𑀏𑀢𑁆𑀣 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀘 𑀅𑀦𑀸𑀕𑀸𑀫𑀺𑀦𑁄, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀘 𑀅𑀭𑀳𑀦𑁆𑀢𑁄𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀉𑀪𑀬𑁂𑀧𑀺 𑀘𑁂𑀢𑁂 𑀲𑀢𑀺𑀧𑀺 𑀯𑀺𑀧𑀲𑁆𑀲𑀦𑀸𑀩𑀮𑁂 𑀲𑀫𑀸𑀥𑀺𑀩𑀮𑀲𑁆𑀲 𑀅𑀪𑀸𑀯𑀢𑁄 𑀦𑀺𑀭𑁄𑀥𑀁 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑁆𑀪𑀯𑀢𑀜𑁆𑀜𑁂𑀯𑁂𑀢𑁆𑀣 𑀲𑀫𑀸𑀥𑀺𑀩𑀮𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀧𑀼𑀭𑀺𑀫𑀓𑀸 𑀧𑀦 𑀢𑀬𑁄 𑀲𑀢𑀺𑀧𑀺 𑀲𑀫𑀸𑀥𑀺𑀩𑀮𑁂 𑀯𑀺𑀧𑀲𑁆𑀲𑀦𑀸𑀩𑀮𑀲𑁆𑀲 𑀅𑀪𑀸𑀯𑀢𑁄, 𑀅𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀘 𑀲𑀫𑀸𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀧𑀭𑀺𑀧𑀼𑀡𑁆𑀡𑀢𑀸 𑀘𑀲𑁆𑀲 𑀲𑀗𑁆𑀔𑀸𑀭𑀸𑀦𑀁 𑀦 𑀲𑀫𑁆𑀫𑀸 𑀧𑀭𑀺𑀫𑀤𑁆𑀤𑀺𑀢𑀢𑁆𑀢𑀸. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺…𑀧𑁂… 𑀲𑀫𑀸𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀁 𑀧𑀸𑀴𑀺𑀯𑀲𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑀻𑀳𑀺 𑀩𑀮𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀏𑀢𑁆𑀣 𑀢𑀬𑁄𑀢𑀺 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀺𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀜𑀸𑀡𑀘𑀭𑀺𑀬𑀸𑀳𑀻𑀢𑀺 𑀜𑀸𑀡𑀧𑁆𑀧𑀯𑀢𑁆𑀢𑀻𑀳𑀺. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀸𑀬 𑀜𑀸𑀡𑀁. 𑀅𑀬𑀜𑁆𑀘 𑀲𑀫𑁆𑀧𑀤𑀸𑀢𑀺 𑀅𑀬𑀁 𑀩𑀮𑀤𑁆𑀯𑀬𑀲𑀫𑀦𑁆𑀦𑀸𑀕𑀫𑀸𑀤𑀺𑀓𑀸 𑀬𑀣𑀸𑀯𑀼𑀢𑁆𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀆𑀯𑀳𑀸 𑀲𑀫𑁆𑀧𑀢𑁆𑀢𑀺. 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑁂𑀢𑀺 𑀅𑀦𑀸𑀕𑀸𑀫𑀺𑀦𑁄 𑀘𑁂𑀯 𑀔𑀻𑀡𑀸𑀲𑀯𑁂 𑀘.

𑁮𑁬𑁯. 𑀲𑀫𑀣𑀩𑀮𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀓𑁂 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀲𑀫𑁂𑀢𑀻𑀢𑀺 𑀲𑀫𑀣𑁄, 𑀲𑁄 𑀏𑀯 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀁. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸, 𑀲𑀸 𑀏𑀯 𑀯𑀼𑀢𑁆𑀢𑀦𑀬𑁂𑀦 𑀩𑀮𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀦𑁂𑀓𑁆𑀔𑀫𑁆𑀫𑀯𑀲𑁂𑀦𑀸𑀢𑀺𑀆𑀤𑀻𑀲𑀼 𑀓𑀸𑀫𑀘𑁆𑀙𑀦𑁆𑀤𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀲𑁆𑀲, 𑀅𑀮𑁄𑀪𑀧𑀥𑀸𑀦𑀲𑁆𑀲 𑀯𑀸 𑀢𑀣𑀸𑀧𑀯𑀢𑁆𑀢𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑁄 𑀬𑁄 𑀅𑀯𑀺𑀓𑁆𑀔𑁂𑀧𑁄, 𑀢𑀁 𑀲𑀫𑀣𑀩𑀮𑀁. 𑀩𑁆𑀬𑀸𑀧𑀸𑀤𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀲𑁆𑀲, 𑀅𑀤𑁄𑀲𑀧𑀥𑀸𑀦𑀲𑁆𑀲 𑀯𑀸 𑀢𑀣𑀸𑀧𑀯𑀢𑁆𑀢𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀯𑀲𑁂𑀦𑁂𑀯. 𑀣𑀺𑀦𑀫𑀺𑀤𑁆𑀥𑀯𑀺𑀓𑁆𑀔𑀫𑁆𑀪𑀺𑀓𑀸𑀬 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀦𑀲𑀺𑀓𑀭𑀡𑁂𑀦 𑀉𑀧𑀝𑁆𑀞𑀺𑀢𑀆𑀮𑁄𑀓𑀲𑀜𑁆𑀜𑀸𑀬 𑀯𑀲𑁂𑀦. 𑀉𑀤𑁆𑀥𑀘𑁆𑀘𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀅𑀯𑀺𑀓𑁆𑀔𑁂𑀧𑀲𑁆𑀲 𑀲𑀫𑀸𑀥𑀸𑀦𑀲𑁆𑀲 𑀯𑀲𑁂𑀦. 𑀲𑀓𑀮𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀲𑀺𑀔𑀸𑀧𑀢𑁆𑀢𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀺𑀤𑁆𑀥𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑁄 𑀬𑁄 𑀅𑀯𑀺𑀓𑁆𑀔𑁂𑀧𑁄, 𑀢𑀁 𑀲𑀫𑀣𑀩𑀮𑀦𑁆𑀢𑀺 𑀅𑀢𑁆𑀣𑀬𑁄𑀚𑀦𑀸.

𑀏𑀯𑀁 𑀉𑀧𑀘𑀸𑀭𑀲𑁆𑀲 𑀛𑀸𑀦𑀲𑁆𑀲 𑀯𑀲𑁂𑀦 𑀲𑀫𑀣𑀩𑀮𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀯𑀲𑁂𑀦 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑀸𑀬 𑀘 𑀩𑀮𑀧𑁆𑀧𑀢𑁆𑀢𑀺𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀧𑀞𑀫𑀚𑁆𑀛𑀸𑀦𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀻𑀯𑀭𑀡𑁂𑀢𑀺 𑀦𑀻𑀯𑀭𑀡𑀦𑀺𑀫𑀺𑀢𑁆𑀢𑀁 𑀦𑀻𑀯𑀭𑀡𑀧𑀘𑁆𑀘𑀬𑀸. 𑀦 𑀓𑀫𑁆𑀧𑀢𑀺 𑀛𑀸𑀦𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄, 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺 𑀯𑀸. 𑀲𑁄 𑀳𑀺 𑀯𑀺𑀲𑁂𑀲𑀢𑁄 𑀇𑀥 ‘‘𑀲𑀫𑀣𑀩𑀮’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀣𑀸 𑀳𑀺 𑀓𑁂𑀦𑀝𑁆𑀞𑁂𑀦 𑀲𑀫𑀣𑀩𑀮𑀦𑁆𑀢𑀺 𑀩𑀮𑀝𑁆𑀞𑁄 𑀧𑀼𑀘𑁆𑀙𑀺𑀢𑁄. 𑀉𑀤𑁆𑀥𑀘𑁆𑀘𑁂𑀢𑀺 𑀉𑀤𑁆𑀥𑀘𑁆𑀘𑀦𑀺𑀫𑀺𑀢𑁆𑀢𑀁. 𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂𑀢𑀺 𑀉𑀤𑁆𑀥𑀘𑁆𑀘𑁂𑀦 𑀲𑀫𑁆𑀧𑀬𑀼𑀢𑁆𑀢𑀫𑁄𑀳𑀅𑀳𑀺𑀭𑀺𑀓𑀸𑀤𑀺𑀓𑀺𑀮𑁂𑀲𑀳𑁂𑀢𑀼. 𑀔𑀦𑁆𑀥𑁂𑀢𑀺 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀘𑀢𑀼𑀓𑁆𑀔𑀦𑁆𑀥𑀦𑀺𑀫𑀺𑀢𑁆𑀢𑀁. 𑀦 𑀓𑀫𑁆𑀧𑀢𑀻𑀢𑀺𑀆𑀤𑀻𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀓𑀫𑁆𑀧𑀦𑀁 𑀯𑀸 𑀞𑀸𑀦𑀸𑀧𑀕𑀫𑁄. 𑀘𑀮𑀦𑀁 𑀧𑀭𑀺𑀩𑁆𑀪𑀫𑀦𑀁. 𑀯𑁂𑀥𑀦𑀁 𑀲𑀦𑁆𑀥𑀸𑀯𑀦𑀁. 𑀉𑀤𑁆𑀥𑀘𑁆𑀘𑁂 𑀦 𑀓𑀫𑁆𑀧𑀢𑀺, 𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂 𑀦 𑀘𑀮𑀢𑀺, 𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑁆𑀔𑀦𑁆𑀥𑁂 𑀦 𑀯𑁂𑀥𑀢𑀻𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀉𑀤𑁆𑀥𑀘𑁆𑀘𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑀫𑀣𑀲𑁆𑀲 𑀉𑀚𑀼𑀧𑀝𑀺𑀧𑀓𑁆𑀔𑀢𑀸𑀬 𑀢𑀤𑀪𑀺𑀪𑀯𑁂𑀦 𑀩𑀮𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑁂𑀢𑀁 𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀸𑀧𑀢𑁆𑀢𑀻𑀦𑀁 𑀲𑀸𑀥𑀸𑀭𑀡𑀢𑁄 𑀓𑀺𑀘𑁆𑀘𑀸𑀢𑀺𑀲𑀬𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀇𑀤𑀁 𑀲𑀫𑀣𑀩𑀮𑀦𑁆𑀢𑀺 𑀬𑀸𑀬𑀁 𑀦𑁂𑀓𑁆𑀔𑀫𑁆𑀫𑀸𑀤𑀺𑀯𑀲𑁂𑀦 𑀮𑀤𑁆𑀥𑀸𑀬 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀦𑀻𑀯𑀭𑀡𑀸𑀤𑀻𑀳𑀺 𑀅𑀓𑀫𑁆𑀧𑀦𑀻𑀬𑀢𑀸, 𑀢𑀸𑀦𑀺 𑀘 𑀅𑀪𑀺𑀪𑀯𑀺𑀢𑁆𑀯𑀸 𑀅𑀯𑀝𑁆𑀞𑀸𑀦𑀁, 𑀇𑀤𑀁 𑀲𑀫𑀣𑀩𑀮𑀁.

𑀇𑀤𑀸𑀦𑀺 𑀯𑀺𑀧𑀲𑁆𑀲𑀦𑀸𑀩𑀮𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸 𑀲𑀗𑁆𑀔𑁂𑀧𑀢𑁄 𑀲𑀢𑁆𑀢𑀳𑀺 𑀅𑀦𑀼𑀧𑀲𑁆𑀲𑀦𑀸𑀳𑀺 𑀲𑀗𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀢𑀢𑁄 𑀢𑀢𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀢𑀸𑀲𑀁 𑀯𑀲𑁂𑀦 𑀅𑀦𑀼𑀧𑀲𑁆𑀲𑀦𑀸 𑀓𑀸𑀢𑀩𑁆𑀩𑀸, 𑀢𑀢𑁆𑀢𑀓𑁂𑀦𑁂𑀯 𑀘𑁂𑀢𑁆𑀣 𑀅𑀦𑀼𑀧𑀲𑁆𑀲𑀦𑀸𑀓𑀺𑀘𑁆𑀘𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀻𑀢𑀺 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀩𑀮𑀁…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀩𑀮’’𑀦𑁆𑀢𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀲𑀬𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑀸𑀯 𑀩𑀮𑀝𑁆𑀞𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸𑀩𑀮’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀬𑀸𑀢𑀺 𑀤𑁆𑀯𑀸𑀤𑀲𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀅𑀯𑀺𑀚𑁆𑀚𑀸𑀦𑀺𑀫𑀺𑀢𑁆𑀢𑀁. 𑀅𑀯𑀺𑀚𑁆𑀚𑀸𑀲𑀳𑀕𑀢𑀓𑀺𑀮𑁂𑀲𑁂𑀢𑀺 𑀅𑀯𑀺𑀚𑁆𑀚𑀸𑀬 𑀲𑀫𑁆𑀧𑀬𑀼𑀢𑁆𑀢𑀮𑁄𑀪𑀤𑁄𑀲𑀸𑀤𑀺𑀓𑀺𑀮𑁂𑀲𑀯𑀢𑁆𑀣𑀼𑀦𑀺𑀫𑀺𑀢𑁆𑀢𑀁. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀯𑀺𑀚𑁆𑀚𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀬 𑀉𑀚𑀼𑀧𑀝𑀺𑀧𑀓𑁆𑀔𑀢𑀸𑀬 𑀢𑀤𑀪𑀺𑀪𑀯𑁂𑀦 𑀩𑀮𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑁂𑀢𑀁 𑀲𑀢𑁆𑀢𑀦𑁆𑀦𑀫𑁆𑀧𑀺 𑀅𑀦𑀼𑀧𑀲𑁆𑀲𑀦𑀸𑀦𑀁 𑀲𑀸𑀥𑀸𑀭𑀡𑀢𑁄 𑀓𑀺𑀘𑁆𑀘𑀸𑀢𑀺𑀲𑀬𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀇𑀤𑀁 𑀯𑀺𑀧𑀲𑁆𑀲𑀦𑀸𑀩𑀮𑀦𑁆𑀢𑀺 𑀬𑀸𑀬𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀮𑀤𑁆𑀥𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀦𑀺𑀫𑀺𑀢𑁆𑀢𑀁 𑀅𑀓𑀫𑁆𑀧𑀦𑀻𑀬𑀢𑀸, 𑀢𑀸 𑀘 𑀅𑀪𑀺𑀪𑀯𑀺𑀢𑁆𑀯𑀸 𑀅𑀯𑀝𑁆𑀞𑀸𑀦𑀁, 𑀇𑀤𑀁 𑀯𑀺𑀧𑀲𑁆𑀲𑀦𑀸𑀩𑀮𑀁.

𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑀸 𑀯𑀸𑀘𑀁 𑀲𑀗𑁆𑀔𑀭𑁄𑀦𑁆𑀢𑀺 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑀸𑀘𑀁 𑀪𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁬𑁩; 𑀲𑀁. 𑀦𑀺. 𑁪.𑁩𑁪𑁮). 𑀢𑁂 𑀧𑀦 𑀤𑀼𑀢𑀺𑀬𑀚𑁆𑀛𑀸𑀦𑁂 𑀯𑀽𑀧𑀲𑀦𑁆𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀤𑀼𑀢𑀺𑀬𑀚𑁆𑀛𑀸𑀦𑀁…𑀧𑁂… 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀻’’𑀢𑀺. 𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑀸, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀓𑀸𑀬𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸, 𑀢𑀲𑁆𑀫𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁬𑁩; 𑀲𑀁. 𑀦𑀺. 𑁪.𑁩𑁪𑁮). 𑀢𑁂 𑀧𑀦 𑀬𑀲𑁆𑀫𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀯𑀽𑀧𑀲𑀦𑁆𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁…𑀧𑁂… 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀻’’𑀢𑀺. 𑀘𑀺𑀢𑁆𑀢𑁂𑀦 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑀸, 𑀲𑀜𑁆𑀜𑀸 𑀯𑁂𑀤𑀦𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑁂𑀢𑀲𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀘𑀺𑀢𑁆𑀢𑀧𑁆𑀧𑀝𑀺𑀩𑀤𑁆𑀥𑀸, 𑀢𑀲𑁆𑀫𑀸 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺 (𑀲𑀁. 𑀦𑀺. 𑁧.𑁪𑁬𑁩; 𑀲𑀁. 𑀦𑀺. 𑁪.𑁩𑁪𑁮). 𑀢𑁂 𑀧𑀦 𑀬𑀲𑁆𑀫𑀸 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀽𑀧𑀲𑀫𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢…𑀧𑁂… 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀻’’𑀢𑀺.

𑀜𑀸𑀡𑀘𑀭𑀺𑀬𑀸𑀲𑀼 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸𑀕𑁆𑀕𑀳𑀡𑁂𑀦𑁂𑀯 𑀢𑀲𑁆𑀲 𑀆𑀤𑀺𑀪𑀽𑀢𑀸 𑀲𑁂𑀲𑀸𑀦𑀼𑀧𑀲𑁆𑀲𑀦𑀸𑀧𑀺 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀫𑀕𑁆𑀕𑁄 𑀜𑀸𑀡𑀘𑀭𑀺𑀬𑀸, 𑀨𑀮𑀲𑀫𑀸𑀧𑀢𑁆𑀢𑀺 𑀜𑀸𑀡𑀘𑀭𑀺𑀬𑀸𑀢𑀺 𑀫𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀻𑀦𑀁 𑀜𑀸𑀡𑀘𑀭𑀺𑀬𑀸𑀪𑀸𑀯𑀯𑀘𑀦𑀁 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁 𑀜𑀸𑀡𑀧𑀥𑀸𑀦𑀢𑁆𑀢𑀸, 𑀜𑀸𑀡𑁂𑀦 𑀯𑀸 𑀇𑀦𑁆𑀤𑁆𑀭𑀺𑀬𑀸𑀥𑀺𑀧𑀢𑀺𑀳𑁂𑀢𑀼𑀫𑀕𑁆𑀕𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀲𑀸𑀢𑀺𑀲𑀬𑀧𑀘𑁆𑀘𑀬𑀪𑀽𑀢𑁂𑀦 𑀲𑁂𑀲𑀸 𑀫𑀕𑁆𑀕𑀨𑀮𑀥𑀫𑁆𑀫𑀸 𑀘𑀭𑀺𑀢𑀸 𑀧𑀯𑀢𑁆𑀢𑀺𑀢𑀸𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁. 𑀲𑀫𑀸𑀥𑀺𑀘𑀭𑀺𑀬𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀸𑀳𑀺 𑀲𑁄𑀴𑀲𑀳𑀻𑀢𑀺 𑀅𑀝𑁆𑀞𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁, 𑀅𑀝𑁆𑀞𑀦𑁆𑀦𑀜𑁆𑀘 𑀫𑀕𑁆𑀕𑀨𑀮𑀜𑀸𑀡𑀸𑀦𑀁 𑀯𑀲𑁂𑀦 𑀇𑀫𑀸𑀳𑀺 𑀲𑁄𑀴𑀲𑀳𑀺 𑀜𑀸𑀡𑀧𑀯𑀢𑁆𑀢𑀻𑀳𑀺.

𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀻𑀢𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀅𑀝𑁆𑀞 𑀲𑀫𑀸𑀥𑀺𑀘𑀭𑀺𑀬𑀸, 𑀢𑀸𑀲𑀁 𑀉𑀧𑀘𑀸𑀭𑀲𑀫𑀸𑀥𑀺 𑀉𑀧𑀘𑀸𑀭𑀲𑀫𑀸𑀥𑀺𑀪𑀸𑀯𑀦𑀸𑀲𑀸𑀫𑀜𑁆𑀜𑁂𑀦 𑀏𑀓𑀸 𑀲𑀫𑀸𑀥𑀺𑀘𑀭𑀺𑀬𑀸𑀢𑀺 𑀏𑀯𑀁 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺. 𑀢𑁂𑀦𑀸𑀳 ‘‘𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀥𑀺𑀘𑀭𑀺𑀬𑀸’’𑀢𑀺𑀆𑀤𑀺. 𑀧𑀞𑀫𑀚𑁆𑀛𑀸𑀦𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀘𑀸𑀢𑀺𑀆𑀤𑀺 𑀦𑀸𑀦𑀸𑀯𑀚𑁆𑀚𑀦𑀼𑀧𑀘𑀸𑀭𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀉𑀧𑀭𑀺𑀲𑀫𑀸𑀧𑀢𑁆𑀢𑀻𑀦𑀫𑁆𑀧𑀺 𑀉𑀧𑀘𑀸𑀭𑀲𑁆𑀲 𑀢𑀣𑁂𑀯 𑀯𑀼𑀢𑁆𑀢𑀢𑁆𑀢𑀸. 𑀦 𑀳𑀺 𑀏𑀓𑀸𑀯𑀚𑁆𑀚𑀦𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀤𑀺𑀉𑀧𑀘𑀸𑀭𑁂 𑀧𑀻𑀢𑀺𑀆𑀤𑀬𑁄 𑀲𑀫𑁆𑀪𑀯𑀦𑁆𑀢𑀺. 𑀏𑀢𑁆𑀣 𑀘 ‘‘𑀧𑀞𑀫𑀚𑁆𑀛𑀸𑀦𑀧𑀝𑀺𑀮𑀸𑀪𑀢𑁆𑀣𑀸𑀬𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀉𑀧𑀘𑀸𑀭𑀲𑀫𑀸𑀥𑀺𑀲𑁆𑀲𑀸𑀧𑀺 𑀧𑀸𑀭𑀺𑀧𑀽𑀭𑀻 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀁 𑀧𑀦𑁂𑀢𑁆𑀣 𑀲𑀫𑀣𑀩𑀮𑀲𑀫𑀸𑀥𑀺𑀘𑀭𑀺𑀬𑀸𑀦𑀁 𑀦𑀸𑀦𑀢𑁆𑀢𑀁, 𑀓𑀺𑀁 𑀯𑀸 𑀯𑀺𑀧𑀲𑁆𑀲𑀦𑀸𑀩𑀮𑀮𑁄𑀓𑀺𑀬𑀜𑀸𑀡𑀘𑀭𑀺𑀬𑀸𑀦𑀁? 𑀬𑀣𑀸 𑀲𑀫𑀣𑀩𑀮𑁂𑀧𑀺 ‘‘𑀦𑁂𑀓𑁆𑀔𑀫𑁆𑀫𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀲𑀤𑁆𑀥𑀺𑀁 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀅𑀧𑁆𑀧𑀦𑀸𑀲𑀫𑀸𑀥𑀺𑀬𑁂𑀯 𑀯𑀼𑀢𑁆𑀢𑁄, 𑀢𑀣𑀸 𑀲𑀫𑀸𑀥𑀺𑀘𑀭𑀺𑀬𑀸𑀲𑀼, 𑀯𑀺𑀧𑀲𑁆𑀲𑀦𑀸𑀩𑀮𑀮𑁄𑀓𑀺𑀬𑀜𑀸𑀡𑀘𑀭𑀺𑀬𑀸𑀲𑀼 𑀘 𑀯𑀺𑀧𑀲𑁆𑀲𑀦𑀸𑀯 𑀯𑀼𑀢𑁆𑀢𑀸𑀢𑀺? 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀸, 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸 𑀧𑀦 𑀧𑀼𑀭𑁂𑀘𑀭𑀜𑀸𑀡𑀸𑀤𑀺𑀯𑀺𑀧𑀲𑁆𑀲𑀦𑀸𑀩𑀮𑁂 𑀅𑀯𑀼𑀢𑁆𑀢𑀸 𑀏𑀯 𑀜𑀸𑀡𑀘𑀭𑀺𑀬𑀸𑀲𑀼 𑀯𑀼𑀢𑁆𑀢𑀸. 𑀅𑀧𑀺𑀘 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁄 𑀩𑀮𑀝𑁆𑀞𑁄, 𑀧𑀜𑁆𑀘𑀦𑁆𑀦𑀁 𑀯𑀲𑀻𑀪𑀸𑀯𑀸𑀦𑀁 𑀯𑀲𑁂𑀦 𑀲𑀼𑀘𑀺𑀡𑁆𑀡𑀢𑀸 𑀘𑀭𑀺𑀬𑀝𑁆𑀞𑁄, 𑀏𑀢𑁂𑀦𑁂𑀯 𑀲𑀫𑀣𑀩𑀮𑀲𑀫𑀸𑀥𑀺𑀘𑀭𑀺𑀬𑀸𑀦𑀫𑁆𑀧𑀺 𑀦𑀸𑀦𑀢𑁆𑀢𑀁 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀲𑀻𑀪𑀸𑀯𑀢𑀸 𑀧𑀜𑁆𑀜𑀸𑀢𑀺 𑀏𑀢𑁆𑀣 𑀯𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀯𑀲𑀻, 𑀢𑀲𑁆𑀲 𑀪𑀸𑀯𑁄 𑀯𑀲𑀻𑀪𑀸𑀯𑁄, 𑀲𑀸 𑀏𑀯 𑀯𑀲𑀻𑀪𑀸𑀯𑀢𑀸. ‘‘𑀯𑀲𑀺𑀬𑁄’’𑀢𑀺 𑀧𑀦 𑀧𑀸𑀴𑀺𑀬𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀸𑀬𑁄 𑀤𑀲𑁆𑀲𑁂𑀢𑀼𑀁 ‘‘𑀯𑀲𑀻𑀢𑀺 𑀧𑀜𑁆𑀘 𑀯𑀲𑀺𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀛𑀸𑀦𑀁 𑀆𑀯𑀚𑁆𑀚𑀦𑁆𑀢𑀲𑁆𑀲 𑀦𑀺𑀭𑀦𑁆𑀢𑀭𑀁 𑀛𑀸𑀦𑀗𑁆𑀕𑁂𑀲𑀼 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀦𑀲𑀫𑀢𑁆𑀣𑀢𑀸 𑀆𑀯𑀚𑁆𑀚𑀦𑀯𑀲𑀻. 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀲𑀻𑀖𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸 𑀲𑀫𑀸𑀧𑀚𑁆𑀚𑀦𑀯𑀲𑀻. 𑀅𑀘𑁆𑀙𑀭𑀸𑀫𑀢𑁆𑀢𑀁 𑀯𑀸 𑀓𑀢𑀺𑀧𑀬𑀘𑁆𑀙𑀭𑀸𑀫𑀢𑁆𑀢𑀁 𑀯𑀸 𑀔𑀡𑀁 𑀛𑀸𑀦𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀻. 𑀢𑀣𑁂𑀯 𑀮𑀳𑀼𑀁 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀻. 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻 𑀧𑀦 𑀆𑀯𑀚𑁆𑀚𑀦𑀯𑀲𑀺𑀬𑀸 𑀏𑀯 𑀲𑀺𑀚𑁆𑀛𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀸𑀦𑁂𑀯 𑀳𑀺 𑀢𑀢𑁆𑀣 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀸𑀦𑀻𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀳𑁂𑀝𑁆𑀞𑀸 𑀆𑀕𑀢𑁄 𑀏𑀯. 𑀅𑀬𑀜𑁆𑀘 𑀯𑀲𑀻𑀪𑀸𑀯𑁄 𑀲𑀫𑀸𑀥𑀺𑀘𑀭𑀺𑀬𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑁄. 𑀜𑀸𑀡𑀘𑀭𑀺𑀬𑀸𑀲𑀼 𑀧𑀦 𑀮𑁄𑀓𑀼𑀢𑁆𑀢𑀭𑀸𑀦𑀁 𑀜𑀸𑀡𑀘𑀭𑀺𑀬𑀸𑀦𑀁 𑀯𑀲𑀻𑀪𑀸𑀯𑀸𑀧𑀸𑀤𑀦𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀧𑀝𑀺𑀧𑀓𑁆𑀔𑀲𑁆𑀲 𑀲𑀼𑀯𑀺𑀳𑀢𑀢𑁆𑀢𑀸 𑀲𑀪𑀸𑀯𑀲𑀺𑀤𑁆𑀥𑁄 𑀢𑀢𑁆𑀣 𑀯𑀲𑀻𑀪𑀸𑀯𑁄, 𑀮𑁄𑀓𑀺𑀬𑀸𑀦𑀁 𑀧𑀦 𑀧𑀕𑀼𑀡𑀩𑀮𑀯𑀪𑀸𑀯𑀸𑀧𑀸𑀤𑀦𑁂𑀦 𑀯𑀲𑀻𑀪𑀸𑀯𑁄 𑀮𑀩𑁆𑀪𑀢𑁂𑀯.

𑁮𑁭𑁦. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄𑀢𑀺 𑀅𑀦𑀯𑀲𑁂𑀲𑀦𑀺𑀤𑁆𑀤𑁂𑀲𑁄. 𑀘𑀼𑀤𑁆𑀤𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺 𑀳𑁄𑀢𑀺 𑀅𑀕𑁆𑀕𑀫𑀕𑁆𑀕𑀨𑀮𑀸𑀦𑀁 𑀅𑀦𑀥𑀺𑀕𑀢𑀢𑁆𑀢𑀸𑀢𑀺. 𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 ‘‘𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀻’’𑀢𑀺 𑀯𑀼𑀢𑁆𑀢𑀁, 𑀢𑀢𑁄 𑀅𑀯𑀓𑀁𑀲𑀯𑀲𑁂𑀦𑀧𑀺 𑀇𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀦 𑀳𑁄𑀢𑀺 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀯𑀢𑁆𑀣𑀼𑀪𑀽𑀢𑀸 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄, 𑀓𑀸𑀫𑀭𑀸𑀕𑁄. 𑀅𑀧𑁆𑀧𑀳𑀻𑀦𑀢𑁆𑀢𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀦 𑀳𑀺 𑀓𑀸𑀫𑀭𑀸𑀕𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀫𑀢𑁆𑀢𑀁 𑀦𑀺𑀭𑁄𑀥𑀲𑁆𑀲 𑀅𑀥𑀺𑀝𑁆𑀞𑀸𑀦𑀁 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸𑀢𑀺 𑀲𑀫𑀸𑀥𑀺𑀧𑀸𑀭𑀺𑀧𑀦𑁆𑀣𑀺𑀓𑀲𑁆𑀲 𑀓𑀸𑀫𑀭𑀸𑀕𑀲𑁆𑀲 𑀲𑀼𑀧𑀳𑀻𑀦𑀢𑁆𑀢𑀸. 𑀏𑀢𑁂𑀦 𑀓𑀸𑀫𑀁 𑀫𑀕𑁆𑀕𑀨𑀮𑀜𑀸𑀡𑀘𑀭𑀺𑀬𑀸 𑀮𑁄𑀓𑀺𑀬𑀜𑀸𑀡𑀲𑀫𑀸𑀥𑀺𑀘𑀭𑀺𑀬𑀸 𑀯𑀺𑀬 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑁂 𑀲𑀭𑀽𑀧𑁂𑀦 𑀦 𑀯𑀺𑀦𑀺𑀬𑀼𑀚𑁆𑀚𑀦𑁆𑀢𑀺 𑀢𑀤𑀸 𑀅𑀧𑁆𑀧𑀯𑀢𑁆𑀢𑀦𑀢𑁄, 𑀢𑀲𑁆𑀲 𑀢𑀲𑁆𑀲 𑀧𑀦 𑀧𑀝𑀺𑀧𑀓𑁆𑀔𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀩𑀮𑀘𑀭𑀺𑀬𑀸𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑀢𑀸𑀬 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀅𑀥𑀺𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀲𑀸𑀢𑀺 𑀅𑀦𑀸𑀕𑀸𑀫𑀻. 𑀇𑀤𑀜𑁆𑀳𑀺 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀦𑀸𑀕𑀸𑀫𑀺𑀦𑁄𑀯 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀯𑀘𑀦𑀢𑁄, 𑀅𑀜𑁆𑀜𑀣𑀸 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀺𑀭𑀺𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀯𑀼𑀘𑁆𑀘𑁂𑀬𑁆𑀬.

𑁮𑁭𑁧. ‘‘𑀧𑀜𑁆𑀘𑀯𑁄𑀓𑀸𑀭𑀪𑀯𑁂’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀘𑀢𑀼𑀯𑁄𑀓𑀸𑀭𑀪𑀯𑁂𑀧𑀺 𑀅𑀭𑀽𑀧𑀚𑁆𑀛𑀸𑀦𑀯𑀲𑁂𑀦 𑀬𑀣𑀸𑀭𑀳𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺 𑀮𑀩𑁆𑀪𑀢𑀻𑀢𑀺? 𑀓𑀸𑀫𑀁 𑀮𑀩𑁆𑀪𑀢𑀺, 𑀲𑀸 𑀧𑀦 ‘‘𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻’’𑀢𑀺 𑀦 𑀯𑀼𑀘𑁆𑀘𑀢𑀺 𑀏𑀓𑀤𑁂𑀲𑀪𑀸𑀯𑀢𑁄. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑁂𑀯 𑀘 ‘‘𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀻’’𑀢𑀺. 𑀯𑀢𑁆𑀣𑀼𑀲𑁆𑀲 𑀅𑀪𑀸𑀯𑀸𑀢𑀺 𑀳𑀤𑀬𑀯𑀢𑁆𑀣𑀼𑀦𑁄 𑀅𑀪𑀸𑀯𑀸𑀢𑀺 𑀯𑀤𑀦𑁆𑀢𑀺, 𑀓𑀭𑀚𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀧𑀦 𑀯𑀢𑁆𑀣𑀼𑀦𑁄 𑀅𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀳𑀺 𑀆𑀭𑀼𑀧𑁆𑀧𑁂 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑁂𑀬𑁆𑀬, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁, 𑀅𑀜𑁆𑀜𑀲𑁆𑀲 𑀘 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀅𑀧𑀜𑁆𑀜𑀢𑁆𑀢𑀺𑀓𑁄𑀯 𑀪𑀯𑁂𑀬𑁆𑀬 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑀤𑀺𑀲𑁄. 𑀓𑀺𑀜𑁆𑀘𑀸𑀬𑀁 𑀉𑀧𑀸𑀤𑀸𑀬 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀓𑀺𑀁 𑀯𑀸 𑀏𑀢𑀸𑀬 𑀯𑀢𑁆𑀣𑀼𑀘𑀺𑀦𑁆𑀢𑀸𑀬. 𑀅𑀗𑁆𑀕𑀯𑁂𑀓𑀮𑁆𑀮𑀢𑁄𑀯 𑀦𑀢𑁆𑀣𑀺 𑀆𑀭𑀼𑀧𑁆𑀧𑁂 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁.

𑁮𑁭𑁨. 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀺𑀪𑁂𑀤𑁂𑀢𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁂, 𑀪𑀺𑀚𑁆𑀚𑀦𑁂 𑀘, 𑀢𑁂𑀲𑀁 𑀯𑀸 𑀓𑀼𑀲𑀮𑀸𑀤𑀺𑀪𑁂𑀤𑀪𑀺𑀦𑁆𑀦𑁂 𑀬𑀣𑀸𑀭𑀳𑀁 𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀺 𑀉𑀧𑀤𑁆𑀤𑀼𑀢𑁂 𑀧𑀯𑀢𑁆𑀢𑀺𑀯𑀺𑀪𑀸𑀕𑁂. 𑀘𑀺𑀢𑁆𑀢𑀘𑁂𑀢𑀲𑀺𑀓𑀯𑀺𑀕𑀫𑁂𑀳𑀺 𑀭𑀽𑀧𑀥𑀫𑁆𑀫𑁂𑀲𑀼 𑀮𑀩𑁆𑀪𑀫𑀸𑀦𑀸𑀧𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀢𑀁 𑀆𑀧𑀚𑁆𑀚𑀢𑀺. 𑀉𑀓𑁆𑀓𑀡𑁆𑀞𑀺𑀢𑁆𑀯𑀸𑀢𑀺 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸. 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀯𑀺𑀬. 𑀲𑀼𑀔𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁.

𑁮𑁭𑁩. 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸𑀢𑀺 𑀬𑀼𑀕𑀦𑀤𑁆𑀥𑀸𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀽𑀧𑀓𑀸𑀭𑀺𑀢𑀸𑀬 𑀲𑀳𑀺𑀢𑀸𑀦𑀁 𑀯𑀲𑁂𑀦. 𑀉𑀲𑁆𑀲𑀓𑁆𑀓𑀺𑀢𑁆𑀯𑀸𑀢𑀺 𑀉𑀓𑁆𑀓𑀁𑀲𑀁 𑀧𑀢𑁆𑀯𑀸 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸, 𑀬𑀸𑀯 𑀘 𑀅𑀦𑀼𑀮𑁄𑀫𑀜𑀸𑀡𑀸 𑀆𑀭𑀼𑀳𑀺𑀢𑁆𑀯𑀸. 𑀦𑀺𑀭𑁄𑀥𑀬𑀢𑁄𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀁 𑀦𑀺𑀭𑁄𑀥𑁂𑀦𑁆𑀢𑀲𑁆𑀲. 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺𑀧𑀺 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑁂𑀦 𑀏𑀯𑀫𑀲𑁆𑀲𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺. ‘‘𑀬𑁄 𑀳𑀻’’𑀢𑀺𑀆𑀤𑀺𑀦𑀸 ‘‘𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀯𑀭𑀢𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑀺 𑀢𑀤𑀼𑀤𑁆𑀥𑀁 𑀲𑀼𑀤𑁆𑀥𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀅𑀪𑀸𑀯𑀢𑁄. 𑀬𑁄 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀉𑀲𑁆𑀲𑀓𑁆𑀓𑀢𑀺 𑀲𑀘𑁂 𑀅𑀭𑀺𑀬𑁄 𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀺𑀓𑁄, 𑀲𑁄 𑀅𑀢𑁆𑀢𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀣 𑀧𑀼𑀣𑀼𑀚𑁆𑀚𑀦𑁄, 𑀲𑁂𑀔𑁄 𑀯𑀸 𑀫𑀕𑁆𑀕𑀢𑁆𑀣𑀺𑀓𑁄 𑀢𑀸𑀬 𑀘𑁂 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀁 𑀧𑀢𑁆𑀯𑀸 𑀨𑀮𑁂 𑀞𑀺𑀢𑁄, 𑀲𑁄𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀲𑁄𑀢𑀺 𑀉𑀪𑀬𑀯𑀲𑁂𑀦 𑀧𑀝𑀺𑀧𑀦𑁆𑀦𑁄. 𑀢𑀦𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁.

𑁮𑁭𑁪. 𑀬𑁂𑀦 𑀨𑀮𑀤𑁆𑀯𑀬𑀲𑀫𑀦𑁆𑀦𑀸𑀕𑀫𑀸𑀤𑀺𑀦𑀸 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀲𑁄 𑀯𑀺𑀥𑀺 𑀧𑀕𑁂𑀯 𑀯𑀺𑀪𑀸𑀯𑀺𑀢𑁄𑀢𑀺 𑀲𑀫𑀸𑀧𑀚𑁆𑀚𑀦𑀸𑀓𑀸𑀭𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀢𑀪𑀢𑁆𑀢𑀓𑀺𑀘𑁆𑀘𑁄’’𑀢𑀺𑀆𑀤𑀺𑀫𑀸𑀳. 𑀢𑀜𑁆𑀳𑀺 𑀲𑀩𑁆𑀩𑀸𑀲𑀫𑁆𑀧𑀺 𑀪𑀸𑀯𑀦𑀸𑀦𑀁 𑀲𑀸𑀥𑀸𑀭𑀡𑀁 𑀧𑀼𑀩𑁆𑀩𑀓𑀺𑀘𑁆𑀘𑀁. 𑀢𑀢𑁆𑀣 𑀲𑀗𑁆𑀔𑀸𑀭𑁂𑀢𑀺 𑀢𑀲𑁆𑀫𑀺𑀁 𑀧𑀞𑀫𑀚𑁆𑀛𑀸𑀦𑁂, 𑀧𑀞𑀫𑀚𑁆𑀛𑀸𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀯𑀸 𑀲𑀗𑁆𑀔𑀸𑀭𑁂.

‘‘𑀯𑀺𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀻𑀤𑀺𑀲𑀻 𑀧𑀦𑁂𑀢𑁆𑀣 𑀯𑀺𑀧𑀲𑁆𑀲𑀦𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀢𑀁 𑀦𑀺𑀤𑁆𑀥𑀸𑀭𑀡𑀢𑁆𑀣𑀁 ‘‘𑀯𑀺𑀧𑀲𑁆𑀲𑀦𑀸 𑀧𑀦𑁂𑀲𑀸’’𑀢𑀺𑀆𑀤𑀺𑀦𑀸 𑀢𑀫𑁂𑀯 𑀯𑀺𑀧𑀲𑁆𑀲𑀦𑀁 𑀢𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀫𑀦𑁆𑀤𑀸 𑀘𑁂 𑀯𑀺𑀧𑀲𑁆𑀲𑀦𑀸, 𑀤𑀦𑁆𑀥𑀸𑀪𑀺𑀜𑁆𑀜𑀁 𑀫𑀕𑁆𑀕𑀁 𑀲𑀸𑀥𑁂𑀢𑀺. 𑀢𑀺𑀓𑁆𑀔𑀸 𑀘𑁂, 𑀔𑀺𑀧𑁆𑀧𑀸𑀪𑀺𑀜𑁆𑀜𑀦𑁆𑀢𑀺 𑀅𑀬𑀁 𑀫𑀦𑁆𑀤𑀢𑀺𑀓𑁆𑀔𑀢𑀸𑀬 𑀯𑀺𑀲𑁂𑀲𑁄. 𑀮𑀓𑁆𑀔𑀡𑀧𑁆𑀧𑀢𑁆𑀢𑀸 𑀧𑀦 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀔𑀸𑀭…𑀧𑁂… 𑀳𑁄𑀢𑀺𑀬𑁂𑀯𑀸’’𑀢𑀺. 𑀢𑀺𑀓𑁆𑀔𑀸𑀯 𑀯𑀝𑁆𑀝𑀢𑀺 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁂𑀧𑀺 𑀲𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀯𑀺𑀯𑀝𑁆𑀝𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀦𑀢𑁄, 𑀫𑀕𑁆𑀕𑁄 𑀯𑀺𑀬 𑀯𑀺𑀲𑀗𑁆𑀔𑀸𑀭𑀕𑀢𑀲𑁆𑀲 𑀨𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀘. 𑀢𑁂𑀦𑀸𑀳 ‘‘𑀫𑀕𑁆𑀕𑀪𑀸𑀯𑀦𑀸𑀲𑀤𑀺𑀲𑀸’’𑀢𑀺. 𑀬𑀲𑁆𑀫𑀸 𑀅𑀢𑀺𑀫𑀦𑁆𑀤𑀸 𑀲𑀫𑀣𑀸𑀤𑀺𑀓𑀸 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀦𑁂 𑀅𑀲𑀫𑀢𑁆𑀣𑀸 𑀲𑀫𑀣𑀦𑀺𑀝𑁆𑀞𑀸 𑀳𑁄𑀢𑀺, 𑀅𑀢𑀺𑀢𑀺𑀓𑁆𑀔𑀸 𑀜𑀸𑀡𑀸𑀤𑀺𑀓𑀸 𑀲𑀸𑀢𑀺𑀲𑀬𑀁 𑀲𑀗𑁆𑀔𑀸𑀭𑁂𑀲𑀼 𑀤𑁄𑀲𑀤𑀲𑁆𑀲𑀦𑁂 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀝𑁆𑀞𑀸 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀸𑀢𑀺𑀫𑀦𑁆𑀤𑀦𑀸𑀢𑀺𑀢𑀺𑀓𑁆𑀔𑀸 𑀯𑀝𑁆𑀝𑀢𑀻’’𑀢𑀺. 𑀏𑀲 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀓𑁄. 𑀢𑁂 𑀲𑀗𑁆𑀔𑀸𑀭𑁂𑀢𑀺 𑀢𑁂 𑀧𑀞𑀫𑀚𑁆𑀛𑀸𑀦𑀲𑀗𑁆𑀔𑀸𑀭𑁂.

‘‘𑀢𑀣𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀦𑀸𑀢𑀺𑀫𑀦𑁆𑀤𑀸𑀬 𑀦𑀸𑀢𑀺𑀢𑀺𑀓𑁆𑀔𑀸𑀬𑀸’’𑀢𑀺 𑀇𑀫𑀫𑀢𑁆𑀣𑀁 𑀆𑀓𑀟𑁆𑀠𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀗𑁆𑀔𑀸𑀭𑁂 𑀢𑀣𑁂𑀯 𑀯𑀺𑀧𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀦 𑀢𑀁 𑀅𑀯𑀢𑁆𑀯𑀸 ‘‘𑀘𑀢𑀼𑀩𑁆𑀩𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀘𑀸𑀭𑀢𑁄 𑀳𑀺 𑀲𑀫𑀸𑀥𑀺𑀘𑀸𑀭𑁄, 𑀢𑀲𑁆𑀫𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁. 𑀢𑀣𑀸 𑀳𑀺 𑀧𑀭𑀢𑁄𑀧𑀺 ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀇𑀫𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀁 (𑀯𑀺𑀲𑀼𑀤𑁆𑀥𑀺. 𑁨.𑁮𑁭𑁯) 𑀯𑀓𑁆𑀔𑀢𑀺, 𑀦 𑀧𑀦 ‘‘𑀢𑀢𑁆𑀣 𑀲𑀗𑁆𑀔𑀸𑀭𑁂 𑀢𑀣𑁂𑀯 𑀯𑀺𑀧𑀲𑁆𑀲𑀺𑀢𑁆𑀯𑀸’’𑀢𑀺. 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀦𑁆𑀢𑀺 𑀅𑀢𑁆𑀢𑀦𑀸 𑀅𑀲𑀫𑁆𑀩𑀤𑁆𑀥𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲 𑀅𑀯𑀺𑀦𑀸𑀲𑀦𑀁. 𑀬𑀣𑀸 𑀢𑀁 𑀦 𑀯𑀺𑀦𑀲𑁆𑀲𑀢𑀺, 𑀢𑀣𑀸 𑀅𑀥𑀺𑀝𑁆𑀞𑀸𑀦𑀁. 𑀲𑀗𑁆𑀖𑀧𑀝𑀺𑀫𑀸𑀦𑀦𑀦𑁆𑀢𑀺 𑀲𑀗𑁆𑀖𑀲𑁆𑀲 𑀧𑀝𑀺𑀫𑀸𑀦𑀦𑀸𑀯𑀚𑁆𑀚𑀦𑀁. 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀦𑁆𑀢𑀺 𑀲𑀢𑁆𑀣𑀼 𑀧𑀓𑁆𑀓𑁄𑀲𑀦𑀸𑀯𑀚𑁆𑀚𑀦𑀁. 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀚𑀻𑀯𑀺𑀢𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁭𑁫. 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀢𑀣𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀫𑁂𑀯 𑀳𑁂𑀢𑁆𑀣 𑀅𑀥𑀺𑀝𑁆𑀞𑀸𑀦𑀁.

𑀘𑀺𑀢𑁆𑀢𑀚𑀭𑀽𑀧𑀸𑀤𑀻𑀦𑀁 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸𑀤𑀺𑀉𑀧𑀢𑁆𑀣𑀫𑁆𑀪𑀸𑀪𑀸𑀯𑀢𑁄 𑀘 𑀲𑀢𑁆𑀢𑀸𑀳𑀫𑁂𑀯 𑀢𑀣𑀸 𑀲𑀭𑀻𑀭𑀁 𑀧𑀯𑀢𑁆𑀢𑀢𑀺, 𑀢𑀢𑁄 𑀧𑀭𑀁 𑀓𑀺𑀮𑀫𑀢𑀻𑀢𑀺 𑀲𑀢𑁆𑀢𑀸𑀳𑀫𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀯𑀤𑀦𑁆𑀢𑀺.

𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑁂𑀯𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑁂𑀯. 𑀦𑀁 𑀅𑀕𑁆𑀕𑀺𑀆𑀤𑀺𑀅𑀦𑁆𑀢𑀭𑀸𑀬𑀁 𑀭𑀓𑁆𑀔𑀢𑀺 𑀲𑀫𑀸𑀧𑀦𑁆𑀦𑀓𑁄 𑀅𑀥𑀺𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀲𑁆𑀲𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀇𑀤𑁆𑀥𑀺𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁩𑁭𑁪) 𑀯𑀼𑀢𑁆𑀢𑀫𑁂𑀯.

𑁮𑁭𑁬. 𑀏𑀢𑀲𑁆𑀲𑀸𑀢𑀺 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲, 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀲𑁆𑀲 𑀯𑀸. 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀲𑀗𑁆𑀓𑀫𑀦𑀲𑀫𑀬𑁂 𑀯𑀼𑀝𑁆𑀞𑀸𑀢𑀺𑀬𑁂𑀯. 𑀓𑀸𑀮𑀧𑀭𑀺𑀘𑁆𑀙𑁂𑀤𑀲𑀤𑀺𑀲𑀜𑁆𑀳𑁂𑀢𑀁.

𑀏𑀯𑀁 𑀕𑀭𑀼𑀓𑀸𑀢𑀺 𑀅𑀕𑁆𑀕𑀺𑀆𑀤𑀻𑀳𑀺𑀧𑀺 𑀅𑀦𑀪𑀺𑀪𑀯𑀦𑀻𑀬𑀁 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀁 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀧𑀦𑀢𑁄 𑀏𑀯𑀁 𑀕𑀭𑀼𑀓𑀸 𑀳𑀺 𑀲𑀗𑁆𑀖𑀲𑁆𑀲 𑀆𑀡𑀸 𑀦𑀸𑀫, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀆𑀓𑀗𑁆𑀔𑀦𑁆𑀢𑁂𑀦 𑀚𑀻𑀯𑀺𑀢𑀳𑁂𑀢𑀼𑀧𑀺 𑀲𑀗𑁆𑀖𑀲𑁆𑀲 𑀆𑀡𑀸 𑀦 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁭𑁭. 𑀦 𑀧𑀓𑁆𑀓𑁄𑀲𑀢𑀺 ‘‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄, 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁭𑁮. 𑀚𑀻𑀯𑀺𑀢𑀤𑁆𑀥𑀸𑀦𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀓𑀸𑀮𑀲𑁆𑀲 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀬𑀸. 𑀆𑀬𑀼 𑀏𑀯 𑀆𑀬𑀼𑀲𑀗𑁆𑀔𑀸𑀭𑀸. ‘‘𑀆𑀬𑀼𑀉𑀲𑁆𑀫𑀸𑀯𑀺𑀜𑁆𑀜𑀸𑀡𑀸𑀦𑀻’’𑀢𑀺 𑀘 𑀯𑀤𑀦𑁆𑀢𑀺, 𑀢𑁂 𑀘𑀲𑁆𑀲 𑀧𑀓𑀢𑀺𑀘𑀺𑀢𑁆𑀢𑀲𑁆𑀲𑁂𑀯 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀺. 𑀅𑀦𑁆𑀢𑁄𑀦𑀺𑀭𑁄𑀥𑁂 𑀫𑀭𑀡𑀁 𑀦𑀢𑁆𑀣𑀺 𑀘𑀭𑀺𑀫𑀪𑀯𑀗𑁆𑀕𑁂𑀦 𑀫𑀻𑀬𑀦𑀢𑁄. 𑀆𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 ‘‘𑀲𑀳𑀲𑀸 𑀫𑀭𑀡𑀁 𑀫𑀸 𑀅𑀳𑁄𑀲𑀻’’𑀢𑀺. 𑀲𑀳𑀲𑀸 𑀳𑀺 𑀫𑀭𑀡𑁂 𑀅𑀜𑁆𑀜𑀩𑁆𑀬𑀸𑀓𑀭𑀡𑀪𑀺𑀓𑁆𑀔𑀼𑀑𑀯𑀸𑀤𑀤𑀸𑀦𑀲𑀸𑀲𑀦𑀸𑀦𑀼𑀪𑀸𑀯𑀤𑀻𑀧𑀦𑀸𑀦𑀁 𑀅𑀦𑀺𑀲𑁆𑀲𑀭𑁄 𑀲𑀺𑀬𑀸, 𑀅𑀦𑀸𑀕𑀸𑀫𑀺𑀦𑁄 𑀯𑀸 𑀅𑀕𑁆𑀕𑀫𑀕𑁆𑀕𑀸𑀦𑀥𑀺𑀕𑀫𑁄 𑀲𑀺𑀬𑀸. 𑀅𑀯𑀲𑁂𑀲𑀦𑁆𑀢𑀺 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀸𑀤𑀺𑀢𑀺𑀯𑀺𑀥𑀫𑁆𑀧𑀺 𑀧𑀼𑀩𑁆𑀩𑀓𑀺𑀘𑁆𑀘𑀁. 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁.

𑁮𑁭𑁯. 𑀓𑀺𑀜𑁆𑀘𑀸𑀧𑀺 ‘‘𑀏𑀓𑀁 𑀯𑀸 𑀤𑁆𑀯𑁂 𑀯𑀸’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀯𑀺𑀬 𑀯𑀼𑀢𑁆𑀢𑀁, 𑀤𑁆𑀯𑁂 𑀯𑀸𑀭𑁂 𑀏𑀯 𑀧𑀦 𑀦𑀺𑀬𑀫𑀢𑁄 𑀯𑀤𑀦𑁆𑀢𑀺. 𑀘𑀺𑀢𑁆𑀢𑀯𑀸𑀭𑁂𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀺𑀢𑁆𑀢𑀯𑀸𑀭𑁂. 𑀦𑀺𑀭𑁄𑀥𑀁 𑀨𑀼𑀲𑀢𑀻𑀢𑀺 𑀅𑀘𑀺𑀢𑁆𑀢𑀓𑀪𑀸𑀯𑀫𑁂𑀯𑀸𑀳. 𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑀢𑁆𑀢𑀸𑀢𑀺 𑀘𑀺𑀢𑁆𑀢𑀦𑀺𑀭𑁄𑀥𑀸𑀬 𑀧𑀬𑁄𑀕𑀪𑀸𑀯𑀢𑁄, 𑀩𑀮𑀤𑁆𑀯𑀬𑀲𑀫𑁆𑀪𑀭𑀡𑀸𑀤𑀺𑀧𑀬𑁄𑀕𑀲𑁆𑀲 𑀘𑀺𑀢𑁆𑀢𑀦𑀺𑀭𑁄𑀥𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑀲𑀫𑀦𑁆𑀦𑀸𑀕𑀫𑁄, 𑀜𑀸𑀡𑀲𑀫𑀸𑀥𑀺𑀘𑀭𑀺𑀬𑀸𑀯𑀲𑀻𑀪𑀸𑀯𑁄 𑀘𑁂𑀢𑁆𑀣 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀤𑁆𑀯𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀬𑀼𑀕𑀦𑀤𑁆𑀥𑁂 𑀓𑀢𑁆𑀯𑀸’’𑀢𑀺. 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑁄𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁, 𑀢𑀤𑀦𑀼𑀧𑀲𑁆𑀲𑀦𑀸𑀦𑀜𑁆𑀘 𑀅𑀦𑀼𑀧𑀼𑀩𑁆𑀩𑀢𑁄 𑀦𑀺𑀭𑁄𑀥𑀦𑀲𑁆𑀲𑀸𑀬𑀁 𑀧𑀬𑁄𑀕𑁄. 𑀇𑀤𑀁 𑀯𑀼𑀢𑁆𑀢𑀦𑀬𑁂𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀆𑀭𑁄𑀳𑀦𑀁 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀲𑁆𑀲. 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺 𑀘𑀺𑀢𑁆𑀢𑀸𑀦𑀺 𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀧𑀭𑀢𑁄 𑀅𑀘𑀺𑀢𑁆𑀢𑀓𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀓𑀮𑀁 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀅𑀘𑀺𑀢𑁆𑀢𑀓𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀜𑁆𑀘 𑀔𑁄 𑀲𑀗𑁆𑀖𑀧𑀝𑀺𑀫𑀸𑀦𑀦𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀸𑀯𑀚𑁆𑀚𑀦𑀸𑀦𑀁 𑀅𑀓𑀭𑀡𑁂𑀦, 𑀦 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀲𑁆𑀲. 𑀢𑀲𑁆𑀲 𑀳𑀺 𑀅𑀓𑀭𑀡𑁂𑀦 𑀓𑀤𑀸𑀘𑀺 𑀓𑁂𑀯𑀮𑀁 𑀢𑀸𑀤𑀺𑀲𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲 𑀅𑀯𑀺𑀦𑀸𑀲𑁄 𑀦 𑀲𑀺𑀬𑀸, 𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀩𑀦𑁆𑀥𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀫𑀳𑀸𑀦𑀸𑀕𑀢𑁆𑀣𑁂𑀭𑀯𑀢𑁆𑀣𑀼𑀦𑀸 𑀯𑀺𑀪𑀸𑀯𑀺𑀢𑁄 𑀏𑀯. 𑀏𑀯𑀁 𑀲𑀦𑁆𑀢𑁂 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀢𑀻𑀢𑀺 𑀇𑀫𑀺𑀦𑀸 𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑁂 𑀚𑀸𑀢𑁂 𑀏𑀯𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀅𑀯𑀺𑀩𑀦𑁆𑀥𑁂𑀦𑁂𑀯 𑀧𑀦 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀻𑀢𑀺𑀓𑁆𑀓𑀫𑀦𑁂 𑀨𑀮𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀕𑀫𑁆𑀪𑀻𑀭𑀓𑀦𑁆𑀤𑀭𑁄𑀭𑀼𑀴𑁆𑀳𑀢𑀢𑁆𑀢𑀧𑀸𑀲𑀸𑀡𑀓𑁆𑀓𑀦𑁆𑀢𑀧𑀼𑀭𑀺𑀲𑀦𑀺𑀤𑀲𑁆𑀲𑀦𑀫𑁆𑀧𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 𑀅𑀓𑀢𑀢𑁆𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀫𑀢𑁆𑀢𑁄𑀯 ‘𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀧𑀢𑀺𑀝𑁆𑀞𑀸𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀧𑀝𑀺𑀫𑀸𑀦𑀦𑀸𑀤𑀺𑀏𑀓𑀘𑁆𑀘𑀧𑀼𑀩𑁆𑀩𑀓𑀺𑀘𑁆𑀘𑀸𑀓𑀭𑀡𑁂 𑀅𑀗𑁆𑀕𑀯𑁂𑀓𑀮𑁆𑀮𑀢𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀦 𑀇𑀚𑁆𑀛𑀢𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀯𑀢𑁆𑀢𑀲𑀤𑀺𑀲𑀜𑁆𑀳𑁂𑀢𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸, 𑀬𑀤𑀺𑀤𑀁 𑀧𑀼𑀩𑁆𑀩𑀓𑀺𑀘𑁆𑀘𑀓𑀭𑀡𑀁. 𑀢𑀲𑁆𑀫𑀸 𑀢𑀢𑁆𑀣 𑀬𑀁 𑀕𑀭𑀼𑀢𑀭𑀁, 𑀢𑀲𑁆𑀲 𑀅𑀓𑀭𑀡𑀁 𑀲𑀫𑀸𑀧𑀚𑁆𑀚𑀦𑀁 𑀯𑀺𑀩𑀦𑁆𑀥𑀢𑀻𑀢𑀺 𑀅𑀧𑀭𑁂. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀧𑀢𑀺𑀝𑁆𑀞𑀸𑀢𑀻’’𑀢𑀺 𑀘 𑀇𑀤𑀁 𑀧𑀼𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀳𑀺 𑀯𑀼𑀝𑁆𑀞𑀸𑀬 𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀸𑀢𑀩𑁆𑀩𑀢𑁆𑀢𑀸.

𑀬𑀣𑀸 𑀧𑀦𑀸𑀢𑀺𑀆𑀤𑀺 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀢𑀸𑀲𑀸𑀫𑀜𑁆𑀜𑁂𑀦 𑀉𑀧𑀫𑀸𑀲𑀁𑀲𑀦𑁆𑀤𑀦𑀁.

𑁮𑁮𑁦. 𑀅𑀲𑁆𑀲𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸. ‘‘𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀞𑀸𑀦𑀁 𑀤𑀲𑁆𑀲𑁂𑀢𑀺.

𑁮𑁮𑁨. 𑀯𑀺𑀯𑁂𑀓𑀦𑀺𑀦𑁆𑀦𑀦𑁆𑀢𑀺 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀦𑁆𑀦𑀁, 𑀧𑀕𑁂𑀯 𑀲𑀗𑁆𑀔𑀸𑀭𑀯𑀺𑀫𑀼𑀔𑀢𑀸𑀬, 𑀨𑀮𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁮𑁩. 𑀊𑀲𑀗𑁆𑀔𑀸𑀭𑀢𑁆𑀢𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸, 𑀅𑀯𑀲𑁂𑀲𑀘𑁂𑀢𑀲𑀺𑀓𑀯𑀺𑀜𑁆𑀜𑀸𑀡𑀸𑀪𑀸𑀯𑁂𑀦 𑀭𑀽𑀧𑀥𑀫𑁆𑀫𑀫𑀢𑁆𑀢𑀸𑀯𑀲𑁂𑀲𑀢𑀸𑀬 𑀘 𑀫𑀢𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀅𑀯𑀺𑀲𑁂𑀲𑀁 𑀕𑀳𑁂𑀢𑁆𑀯𑀸 𑀧𑀼𑀘𑁆𑀙𑀸 ‘‘𑀫𑀢𑀲𑁆𑀲 𑀘 𑀲𑀫𑀸𑀧𑀦𑁆𑀦𑀲𑁆𑀲 𑀘 𑀓𑁄 𑀯𑀺𑀲𑁂𑀲𑁄’’𑀢𑀺. 𑀓𑀸𑀫𑀁 𑀦𑁂𑀲𑀁 𑀲𑀗𑁆𑀔𑀸𑀭𑀢𑁆𑀢𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀆𑀤𑀻𑀳𑀺 𑀅𑀯𑀺𑀲𑁂𑀲𑁄, 𑀭𑀽𑀧𑀥𑀫𑁆𑀫𑀫𑀢𑁆𑀢𑀸𑀯𑀲𑁂𑀲𑀢𑀸𑀬 𑀧𑀦 𑀆𑀬𑀼𑀉𑀲𑁆𑀫𑀸𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀧𑀕𑀫𑀸𑀦𑀧𑀕𑀫𑀦𑀁 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁆𑀯𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁮𑁮𑁪. 𑀲𑀪𑀸𑀯𑀢𑁄𑀢𑀺 𑀲𑀪𑀸𑀯𑀥𑀫𑁆𑀫𑀢𑁄, 𑀧𑀭𑀫𑀢𑁆𑀣𑀢𑁄𑀢𑀺 𑀅𑀢𑁆𑀣𑁄. 𑀧𑀭𑀫𑀢𑁆𑀣𑀢𑁄 𑀳𑀺 𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀗𑁆𑀔𑀢𑀸𑀤𑀺𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺, 𑀦 𑀅𑀯𑀺𑀚𑁆𑀚𑀫𑀸𑀦𑀁. 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀯𑀲𑁂𑀦𑀸𑀢𑀺 𑀬𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀬𑀼𑀕𑀦𑀤𑁆𑀥𑁂 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀆𑀭𑁄𑀳𑀦𑁆𑀢𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀧𑀬𑁄𑀕𑀦𑀺𑀩𑁆𑀩𑀢𑁆𑀢𑀺𑀬𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀦𑀺𑀧𑁆𑀨𑀦𑁆𑀦𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀧𑀬𑁄𑀕𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀸𑀤𑀸𑀬 ‘‘𑀦𑀺𑀧𑁆𑀨𑀦𑁆𑀦𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀲𑀗𑁆𑀔𑀸𑀭𑀯𑀽𑀧𑀲𑀫𑀢𑁄, 𑀲𑀦𑁆𑀢𑀥𑀫𑁆𑀫𑀲𑀫𑀦𑁆𑀯𑀬𑀢𑁄 𑀘 𑀲𑀦𑁆𑀢𑀁. 𑀅𑀭𑀺𑀬𑁂𑀳𑀺 𑀏𑀯 𑀦𑀺𑀲𑁂𑀯𑀺𑀢𑀩𑁆𑀩𑀢𑁆𑀢𑀸 𑀅𑀭𑀺𑀬𑀦𑀺𑀲𑁂𑀯𑀺𑀢𑀁. 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀢𑀸𑀦𑀁 𑀦𑀺𑀩𑁆𑀩𑀼𑀢𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀫𑀺𑀢𑀺 𑀲𑀗𑁆𑀔𑀁 𑀉𑀧𑀸𑀕𑀢𑀁. 𑀅𑀭𑀺𑀬𑀁 𑀧𑀜𑁆𑀜𑀦𑁆𑀢𑀺 𑀲𑀼𑀯𑀺𑀲𑀼𑀤𑁆𑀥𑀁 𑀫𑀕𑁆𑀕𑀨𑀮𑀧𑀜𑁆𑀜𑀁. 𑀇𑀫𑀺𑀲𑁆𑀲𑀸𑀧𑀻𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸. 𑀲𑀫𑀸𑀧𑀢𑁆𑀢𑀺𑀲𑀫𑀢𑁆𑀣𑀢𑀸𑀢𑀺 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸.

𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸

𑁮𑁮𑁫. 𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀻𑀢𑀺 𑀆𑀳𑀼𑀦𑁂𑀬𑁆𑀬𑀧𑀸𑀳𑀼𑀦𑁂𑀬𑁆𑀬𑀤𑀓𑁆𑀔𑀺𑀡𑁂𑀬𑁆𑀬𑀅𑀜𑁆𑀚𑀮𑀺𑀓𑀭𑀡𑀻𑀬𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑀲𑀺𑀤𑁆𑀥𑀺. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀤𑀲𑁆𑀲𑀦𑀫𑀕𑁆𑀕𑀧𑀜𑁆𑀜𑀸𑀤𑀺𑀯𑀺𑀲𑁂𑀲𑁂𑀦 𑀯𑀺𑀦𑀸, 𑀏𑀢𑀺𑀲𑁆𑀲𑀸 𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀬. 𑀆𑀦𑁂𑀢𑁆𑀯𑀸 𑀳𑀼𑀦𑀺𑀢𑀩𑁆𑀩𑀦𑁆𑀢𑀺 𑀆𑀳𑀼𑀦𑀁, 𑀤𑀽𑀭𑀢𑁄𑀧𑀺 𑀆𑀦𑁂𑀢𑁆𑀯𑀸 𑀤𑀸𑀢𑀩𑁆𑀩𑀤𑀸𑀦𑀁, 𑀢𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄𑀢𑀺 𑀆𑀳𑀼𑀦𑁂𑀬𑁆𑀬𑁄. 𑀧𑀸𑀳𑀼𑀦𑀁 𑀯𑀼𑀘𑁆𑀘𑀢𑀺 𑀆𑀕𑀦𑁆𑀢𑀼𑀓𑀤𑀸𑀦𑀁, 𑀢𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄. 𑀤𑀓𑁆𑀔𑀺𑀡𑀁 𑀅𑀭𑀳𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀅𑀜𑁆𑀚𑀮𑀺𑀓𑀭𑀡𑀁 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀢𑀁 𑀅𑀭𑀳𑀢𑀻𑀢𑀺 𑀅𑀜𑁆𑀚𑀮𑀺𑀓𑀭𑀡𑀻𑀬𑁄. 𑀅𑀦𑀼𑀢𑁆𑀢𑀭𑀁 𑀉𑀢𑁆𑀢𑀫𑀁 𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀯𑀺𑀭𑀼𑀳𑀦𑀝𑁆𑀞𑀸𑀦𑀦𑁆𑀢𑀺 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑁮𑁮𑁬. 𑀫𑀦𑁆𑀤𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑁄𑀢𑀺 𑀅𑀢𑀺𑀓𑁆𑀔𑀸𑀬 𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦 𑀧𑀞𑀫𑀫𑀕𑁆𑀕𑀧𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀪𑀸𑀯𑀁 𑀆𑀕𑀢𑁄. 𑀲𑀤𑁆𑀥𑀸𑀤𑀻𑀦𑀁 𑀫𑀼𑀤𑀽𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀫𑀼𑀤𑀺𑀦𑁆𑀤𑁆𑀭𑀺𑀬𑁄𑀧𑀺 𑀲𑀫𑀸𑀦𑁄. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀫𑀸 𑀪𑀯𑀽𑀧𑀧𑀢𑁆𑀢𑀺 𑀅𑀢𑁆𑀢𑀪𑀸𑀯𑀕𑁆𑀕𑀳𑀡𑀁, 𑀢𑀢𑁄 𑀧𑀭𑀁 𑀅𑀝𑁆𑀞𑀫𑀁 𑀪𑀯𑀁 𑀦𑀸𑀤𑀺𑀬𑀢𑀻𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄. 𑀲𑀁𑀲𑀭𑀺𑀢𑁆𑀯𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀅𑀧𑀭𑀸𑀧𑀭𑀁 𑀕𑀦𑁆𑀢𑁆𑀯𑀸. 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀬𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀁 𑀓𑀭𑁄𑀢𑀺. 𑀅𑀬𑀁 𑀓𑀸𑀮𑁂𑀦 𑀤𑁂𑀯𑀮𑁄𑀓𑀲𑁆𑀲, 𑀓𑀸𑀮𑁂𑀦 𑀫𑀦𑀼𑀲𑁆𑀲𑀮𑁄𑀓𑀲𑁆𑀲𑀸𑀢𑀺 𑀫𑀺𑀲𑁆𑀲𑀓𑀲𑁆𑀲 𑀪𑀯𑀲𑁆𑀲 𑀯𑀲𑁂𑀦 ‘‘𑀲𑀢𑁆𑀢𑀲𑀼𑀕𑀢𑀺𑀪𑀯𑁂 𑀲𑀁𑀲𑀭𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁄. 𑀓𑀼𑀮𑀢𑁄 𑀓𑀼𑀮𑀁 𑀕𑀘𑁆𑀙𑀢𑀻𑀢𑀺 𑀓𑁄𑀮𑀁𑀓𑁄𑀮𑁄. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀢𑁄 𑀧𑀝𑁆𑀞𑀸𑀬 𑀳𑀺 𑀦𑀻𑀘𑀓𑀼𑀮𑁂 𑀉𑀧𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀫𑀳𑀸𑀪𑁄𑀕𑀓𑀼𑀮𑁂𑀲𑀼𑀬𑁂𑀯 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀻𑀢𑀺 𑀤𑁂𑀯𑀫𑀦𑀼𑀲𑁆𑀲𑀯𑀲𑁂𑀦 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀪𑀯𑁂. 𑀇𑀢𑀺 𑀅𑀬𑀫𑁆𑀧𑀺 𑀫𑀺𑀲𑁆𑀲𑀓𑀪𑀯𑁂𑀦𑁂𑀯 𑀓𑀣𑀺𑀢𑁄. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯 𑀘𑁂𑀢𑀁 ‘‘𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸’’𑀢𑀺. 𑀬𑀸𑀯 𑀙𑀝𑁆𑀞𑀪𑀯𑀸 𑀲𑀁𑀲𑀭𑀦𑁆𑀢𑁄𑀧𑀺 𑀓𑁄𑀮𑀁𑀓𑁄𑀮𑁄𑀯 𑀳𑁄𑀢𑀺. 𑀅𑀢𑁆𑀢𑀪𑀸𑀯𑀕𑁆𑀕𑀳𑀡𑀲𑀗𑁆𑀔𑀸𑀢𑀁 𑀏𑀓𑀁𑀬𑁂𑀯 𑀔𑀦𑁆𑀥𑀩𑀻𑀚𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀩𑀻𑀚𑀻. ‘‘𑀫𑀸𑀦𑀼𑀲𑀓𑀁 𑀪𑀯’’𑀦𑁆𑀢𑀺 𑀇𑀤𑀫𑁆𑀧𑀺 𑀤𑁂𑀲𑀦𑀸𑀫𑀢𑁆𑀢𑀁. ‘‘𑀤𑁂𑀯𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀓𑁄 𑀧𑀦𑁂𑀢𑁂𑀲𑀁 𑀇𑀫𑀁 𑀧𑀪𑁂𑀤𑀁 𑀦𑀺𑀬𑀫𑁂𑀢𑀻𑀢𑀺? 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸. 𑀲𑀘𑁂 𑀳𑀺 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸 𑀩𑀮𑀯𑀢𑀻 𑀳𑁄𑀢𑀺, 𑀏𑀓𑀩𑀻𑀚𑀻 𑀦𑀸𑀫 𑀳𑁄𑀢𑀺. 𑀢𑀢𑁄 𑀫𑀦𑁆𑀤𑀸𑀬 𑀓𑁄𑀮𑀁𑀓𑁄𑀮𑁄, 𑀢𑀢𑁄 𑀫𑀦𑁆𑀤𑀢𑀭𑀸𑀬 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄.

𑁮𑁮𑁭. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀓𑀺𑀁 𑀆𑀕𑀘𑁆𑀙𑀢𑀻𑀢𑀺 𑀲𑀓𑀤𑀸𑀕𑀸𑀫𑀻. 𑀲𑀓𑀺𑀤𑁂𑀯𑀸𑀢𑀺 𑀏𑀓𑀯𑀸𑀭𑀁𑀬𑁂𑀯. ‘‘𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀘𑀢𑁆𑀢𑀸𑀭𑁄 𑀯𑀚𑁆𑀚𑁂𑀢𑁆𑀯𑀸 𑀏𑀓𑁄𑀯 𑀕𑀳𑀺𑀢𑁄. 𑀏𑀓𑀘𑁆𑀘𑁄 𑀳𑀺 𑀇𑀥 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀇𑀥𑁂𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀇𑀥 𑀦 𑀕𑀳𑀺𑀢𑀸. 𑀬𑁄 𑀧𑀦 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀬𑀸𑀯𑀢𑀸𑀬𑀼𑀓𑀁 𑀯𑀲𑀺𑀢𑁆𑀯𑀸 𑀧𑀼𑀦 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀇𑀥 𑀕𑀳𑀺𑀢𑁄.

𑁮𑁮𑁮. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀇𑀥 𑀅𑀦𑀸𑀕𑀫𑀦𑀢𑁄 𑀅𑀦𑀸𑀕𑀸𑀫𑀻. 𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀸𑀯𑀲𑁂𑀦𑀸𑀢𑀺 𑀲𑀤𑁆𑀥𑀸𑀤𑀻𑀦𑀁 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑁄𑀧𑀭𑀺𑀬𑀢𑁆𑀢𑁂𑀦. 𑀧𑀜𑁆𑀘𑀥𑀸 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑁄 𑀳𑁄𑀢𑀻𑀢𑀺 𑀲𑁄 𑀅𑀦𑀸𑀕𑀸𑀫𑀻 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀆𑀤𑀺𑀪𑀸𑀯𑁂𑀦 𑀧𑀜𑁆𑀘𑀧𑀓𑀸𑀭𑁂𑀦 𑀇𑀫𑀁 𑀮𑁄𑀓𑀁 𑀧𑀚𑀳𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀓𑁄 𑀳𑁄𑀢𑀺. 𑀆𑀬𑀼𑀯𑁂𑀫𑀚𑁆𑀛𑀲𑁆𑀲 𑀅𑀦𑁆𑀢𑀭𑀸𑀬𑁂𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻. 𑀉𑀧𑀳𑀘𑁆𑀘𑀸𑀢𑀺 𑀯𑀸 𑀉𑀧𑀕𑀦𑁆𑀢𑁆𑀯𑀸 𑀓𑀸𑀮𑀓𑀺𑀭𑀺𑀬𑀁. 𑀅𑀧𑁆𑀧𑀬𑁄𑀕𑁂𑀦𑀸𑀢𑀺 𑀅𑀥𑀺𑀫𑀢𑁆𑀢𑀧𑀬𑁄𑀕𑁂𑀦 𑀯𑀺𑀦𑀸 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀢𑀸𑀬 𑀲𑀼𑀔𑁂𑀦𑁂𑀯. 𑀲𑀧𑁆𑀧𑀬𑁄𑀕𑁂𑀦𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀤𑁆𑀥𑀁 𑀯𑀸 𑀳𑀺 𑀪𑀸𑀯𑁂𑀦 𑀉𑀤𑁆𑀥𑀫𑀲𑁆𑀲 𑀢𑀡𑁆𑀳𑀸𑀲𑁄𑀢𑀁, 𑀯𑀝𑁆𑀝𑀲𑁄𑀢𑀁 𑀯𑀸𑀢𑀺 𑀉𑀤𑁆𑀥𑀁𑀲𑁄𑀢𑁄. 𑀉𑀤𑁆𑀥𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀝𑀺𑀮𑀪𑀺𑀢𑀩𑁆𑀩𑀢𑁄 𑀉𑀤𑁆𑀥𑀫𑀲𑁆𑀲 𑀫𑀕𑁆𑀕𑀲𑁄𑀢𑀦𑁆𑀢𑀺 𑀉𑀤𑁆𑀥𑀁𑀲𑁄𑀢𑁄. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀓𑀦𑀺𑀝𑁆𑀞𑀪𑀯𑀁 𑀕𑀘𑁆𑀙𑀢𑀻𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻.

𑀬𑀢𑁆𑀣𑀼𑀧𑀧𑀦𑁆𑀦𑁄𑀢𑀺 𑀅𑀯𑀺𑀳𑀸𑀤𑀻𑀲𑀼 𑀬𑀢𑁆𑀣 𑀬𑀢𑁆𑀣 𑀉𑀧𑀧𑀦𑁆𑀦𑁄. 𑀇𑀫𑁂𑀲𑀁 𑀧𑀦 𑀅𑀦𑀸𑀕𑀸𑀫𑀻𑀦𑀁 𑀧𑀪𑁂𑀤𑀚𑀸𑀦𑀦𑀢𑁆𑀣𑀁 𑀉𑀤𑁆𑀥𑀁𑀲𑁄𑀢𑀅𑀓𑀦𑀺𑀝𑁆𑀞𑀕𑀸𑀫𑀺𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀬𑁄 𑀳𑀺 𑀅𑀯𑀺𑀳𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀤𑁂𑀯𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀅𑀓𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀳𑁂𑀝𑁆𑀞𑀸 𑀢𑀬𑁄 𑀤𑁂𑀯𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀲𑀼𑀤𑀲𑁆𑀲𑀻𑀤𑁂𑀯𑀮𑁄𑀓𑁂 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀦𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀇𑀢𑁄 𑀅𑀓𑀦𑀺𑀝𑁆𑀞𑀫𑁂𑀯 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀦𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀳𑁂𑀝𑁆𑀞𑀸 𑀘𑀢𑀽𑀲𑀼 𑀤𑁂𑀯𑀮𑁄𑀓𑁂𑀲𑀼 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀦𑀉𑀤𑁆𑀥𑀁𑀲𑁄𑀢𑁄 𑀦𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀏𑀢𑁂 𑀧𑀦 𑀅𑀯𑀺𑀳𑁂𑀲𑀼 𑀉𑀧𑀧𑀦𑁆𑀦𑀲𑀫𑀦𑀦𑁆𑀢𑀭𑀸 𑀆𑀬𑀼𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀯𑀸, 𑀧𑀢𑁆𑀯𑀸 𑀘 𑀧𑀭𑀺𑀦𑀺𑀩𑁆𑀩𑀸𑀬𑀦𑀯𑀲𑁂𑀦 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀏𑀓𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀏𑀓𑁄 𑀉𑀤𑁆𑀥𑀁𑀲𑁄𑀢𑁄𑀢𑀺 𑀧𑀜𑁆𑀘. 𑀢𑁂 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀯𑀺𑀪𑀸𑀕𑁂𑀦 𑀤𑀲 𑀳𑁄𑀦𑁆𑀢𑀺. 𑀢𑀣𑀸 𑀅𑀢𑀧𑁆𑀧𑀲𑀼𑀤𑀲𑁆𑀲𑀲𑀼𑀤𑀲𑁆𑀲𑀻𑀲𑀽𑀢𑀺 𑀘𑀢𑁆𑀢𑀸𑀭𑁄 𑀤𑀲𑀓𑀸 𑀘𑀢𑁆𑀢𑀸𑀮𑀻𑀲𑀁. 𑀅𑀓𑀦𑀺𑀝𑁆𑀞𑁂 𑀧𑀦 𑀉𑀤𑁆𑀥𑀁𑀲𑁄𑀢𑁄 𑀦𑀢𑁆𑀣𑀺. 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀏𑀓𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀘𑀢𑁆𑀢𑀸𑀭𑁄. 𑀢𑁂 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀯𑀺𑀪𑀸𑀕𑁂𑀦 𑀅𑀝𑁆𑀞𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀁 𑀅𑀦𑀸𑀕𑀸𑀫𑀺𑀦𑁄.

𑀲𑁄𑀢𑀸𑀧𑀦𑁆𑀦𑀸 𑀧𑀦 𑀧𑀝𑀺𑀧𑀤𑀸𑀪𑁂𑀤𑁂𑀦 𑀘𑀢𑁆𑀢𑀸𑀭𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸, 𑀘𑀢𑁆𑀢𑀸𑀭𑁄 𑀓𑁄𑀮𑀁𑀓𑁄𑀮𑀸, 𑀘𑀢𑁆𑀢𑀸𑀭𑁄 𑀏𑀓𑀩𑀻𑀚𑀺𑀦𑁄𑀢𑀺 𑀲𑀤𑁆𑀥𑀸𑀥𑀼𑀭𑁂𑀦 𑀧𑀝𑀺𑀧𑀦𑁆𑀦𑀸 𑀤𑁆𑀯𑀸𑀤𑀲, 𑀢𑀣𑀸 𑀧𑀜𑁆𑀜𑀸𑀥𑀼𑀭𑁂𑀦𑀸𑀢𑀺 𑀘𑀢𑀼𑀯𑀻𑀲𑀢𑀺.

𑀲𑀓𑀤𑀸𑀕𑀸𑀫𑀺𑀦𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀸 𑀧𑀝𑀺𑀧𑀤𑀸𑀯𑀲𑁂𑀦 𑀘𑀢𑁆𑀢𑀸𑀭𑁄, 𑀢𑀣𑀸 𑀅𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀳𑀻𑀢𑀺 𑀤𑁆𑀯𑀸𑀤𑀲.

𑁮𑁮𑁯. 𑀢𑀣𑀸 𑀅𑀭𑀳𑀦𑁆𑀢𑁄. 𑀢𑁂 𑀧𑀦 𑀤𑁆𑀯𑀸𑀤𑀲 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸, 𑀤𑁆𑀯𑀸𑀤𑀲 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸, 𑀤𑁆𑀯𑀸𑀤𑀲 𑀢𑁂𑀯𑀺𑀚𑁆𑀚𑀸, 𑀤𑁆𑀯𑀸𑀤𑀲 𑀙𑀴𑀪𑀺𑀜𑁆𑀜𑀸, 𑀤𑁆𑀯𑀸𑀤𑀲 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀢𑀺 𑀲𑀫𑀲𑀝𑁆𑀞𑀺 𑀳𑁄𑀦𑁆𑀢𑀺. 𑀏𑀯𑀫𑁂𑀢𑁂 𑀲𑀤𑁆𑀥𑀺𑀁 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀙𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀲𑀢𑀁 𑀅𑀭𑀺𑀬𑀸. 𑀬𑀲𑁆𑀫𑀸 𑀢𑁂𑀲𑀁 𑀅𑀭𑀺𑀬𑀪𑀸𑀯𑀲𑀺𑀤𑁆𑀥𑀺 𑀅𑀭𑀺𑀬𑀸𑀬 𑀧𑀜𑁆𑀜𑀸𑀪𑀸𑀯𑀦𑀸𑀬, 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀺𑀧𑀺 𑀇𑀫𑀺𑀲𑁆𑀲𑀸 𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄’’𑀢𑀺. 𑀮𑁄𑀓𑀺𑀬𑀯𑀺𑀚𑁆𑀚𑀸𑀪𑀺𑀜𑁆𑀜𑀸𑀳𑀺 𑀯𑀺𑀦𑀸𑀧𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀢𑀸 𑀳𑁄𑀢𑀻𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀯𑀺𑀲𑀼𑀁 𑀕𑀳𑀺𑀢𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀬𑀁 𑀘𑀢𑀼𑀢𑁆𑀣𑀫𑀕𑁆𑀕𑀧𑀜𑁆𑀜𑀸𑀪𑀸𑀯𑀦𑀁 𑀲𑀦𑁆𑀥𑀸𑀬 𑀳𑁂𑀝𑁆𑀞𑀸 𑀲𑀗𑁆𑀔𑁂𑀧𑀢𑁄 𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀧𑀦 𑀯𑀼𑀢𑁆𑀢𑀸𑀓𑀸𑀭𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀓𑁆𑀔𑀡𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀫𑀁 𑀘𑀢𑀽𑀲𑀼𑀧𑀺 𑀫𑀕𑁆𑀕𑀓𑁆𑀔𑀡𑁂𑀲𑀼 𑀢𑀁 𑀚𑀝𑀁 𑀯𑀺𑀚𑀝𑁂𑀢𑀺 𑀦𑀸𑀫, 𑀨𑀮𑀓𑁆𑀔𑀡𑁂𑀲𑀼𑀧𑀺 𑀬𑀣𑀸𑀭𑀳𑀁 𑀯𑀺𑀚𑀝𑀺𑀢𑀚𑀝𑁄, 𑀅𑀕𑁆𑀕𑀨𑀮𑀓𑁆𑀔𑀡𑁂𑀬𑁂𑀯 𑀧𑀦 𑀲𑀩𑁆𑀩𑀲𑁄 𑀯𑀺𑀚𑀝𑀺𑀢𑀚𑀝𑁄, 𑀢𑀢𑁄 𑀧𑀭𑀁 𑀯𑀺𑀚𑀝𑁂𑀢𑀩𑁆𑀩𑀸𑀬 𑀚𑀝𑀸𑀬 𑀅𑀪𑀸𑀯𑀢𑁄. 𑀢𑁂𑀦𑁂𑀢𑁆𑀣 𑀳𑁂𑀝𑁆𑀞𑀸 𑀳𑁂𑀝𑁆𑀞𑀺𑀫𑀫𑀕𑁆𑀕𑀧𑀜𑁆𑀜𑀸𑀪𑀸𑀯𑀦𑀸𑀦𑀺𑀲𑀁𑀲𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀯 𑀘𑀢𑀼𑀢𑁆𑀣𑀫𑀕𑁆𑀕𑀧𑀜𑁆𑀜𑀸𑀪𑀸𑀯𑀦𑀸𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑀭𑀢𑀺𑀦𑁆𑀢𑀺 𑀅𑀪𑀺𑀭𑀢𑀺𑀁, 𑀅𑀪𑀺𑀭𑀼𑀘𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀅𑀭𑀺𑀬𑀸𑀬 𑀧𑀜𑁆𑀜𑀸𑀪𑀸𑀯𑀦𑀸𑀬.

𑁮𑁯𑁦. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬𑀸𑀢𑀺 𑀇𑀫𑀺𑀲𑁆𑀲𑀁 𑀕𑀸𑀣𑀸𑀬𑀁. 𑀕𑀸𑀣𑀸 𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀪𑀽𑀢𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀆𑀥𑀸𑀭𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀲𑀸𑀫𑀺𑀯𑀘𑀦𑀁 𑀯𑀸 𑀏𑀢𑀁 𑀅𑀢𑁆𑀣𑀲𑁆𑀲 𑀢𑀁𑀲𑀫𑁆𑀩𑀦𑁆𑀥𑀺𑀪𑀸𑀯𑀢𑁄.

𑀧𑀜𑁆𑀜𑀸𑀪𑀸𑀯𑀦𑀸𑀦𑀺𑀲𑀁𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀢𑁂𑀯𑀻𑀲𑀢𑀺𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁮𑁯𑁧. 𑀇𑀫𑀺𑀲𑁆𑀲𑀸 𑀤𑀸𑀦𑀺 𑀕𑀸𑀣𑀸𑀬𑀸𑀢𑀺𑀆𑀤𑀻𑀦𑀁 𑀕𑀸𑀣𑀸𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯. 𑀲𑁆𑀯𑀸𑀬𑀁 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀪𑀸𑀲𑀺𑀲𑁆𑀲’’𑀦𑁆𑀢𑀺 𑀏𑀯𑀁 𑀧𑀝𑀺𑀜𑁆𑀜𑀸𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀏𑀢𑁆𑀢𑀸𑀯𑀢𑀸 𑀪𑀸𑀲𑀺𑀢𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁯𑁨. 𑀢𑀢𑁆𑀣𑀸𑀢𑀺𑀆𑀤𑀻𑀲𑀼 𑀅𑀬𑀁 𑀧𑀤𑀲𑀫𑁆𑀩𑀦𑁆𑀥𑁂𑀦 𑀲𑀤𑁆𑀥𑀺𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑁂𑀲𑀁 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺𑀕𑀸𑀣𑀸𑀬𑀁 𑀯𑀼𑀢𑁆𑀢𑀸𑀦𑀁 𑀲𑀻𑀮𑀸𑀤𑀺𑀧𑁆𑀧𑀪𑁂𑀤𑀸𑀦𑀁 𑀅𑀢𑁆𑀣𑀸𑀦𑀁 𑀧𑀜𑁆𑀘𑀦𑁆𑀦𑀫𑁆𑀧𑀺 𑀫𑀳𑀸𑀦𑀺𑀓𑀸𑀬𑀸𑀦𑀁 𑀅𑀝𑁆𑀞𑀓𑀣𑀸𑀦𑀬𑁂 𑀅𑀝𑁆𑀞𑀓𑀣𑀸𑀢𑀦𑁆𑀢𑀺𑀬𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑁄 𑀬𑁄 𑀯𑀺𑀦𑀺𑀘𑁆𑀙𑀬𑁄, 𑀬𑁂𑀪𑀼𑀬𑁆𑀬𑁂𑀦 𑀢𑀁 𑀲𑀩𑁆𑀩𑀁 𑀲𑀫𑀸𑀳𑀭𑀺𑀢𑁆𑀯𑀸 𑀲𑀫𑀸𑀦𑁂𑀢𑁆𑀯𑀸 𑀦𑀺𑀓𑀸𑀬𑀦𑁆𑀢𑀭𑀲𑁆𑀲 𑀦𑀺𑀓𑀸𑀬𑀕𑀢𑀯𑀸𑀤𑀤𑁄𑀲𑀲𑀗𑁆𑀓𑀭𑁂𑀳𑀺 𑀫𑀼𑀢𑁆𑀢𑁄 𑀲𑁄 𑀦𑀺𑀘𑁆𑀙𑀬𑁄 𑀬𑀲𑁆𑀫𑀸 𑀧𑀓𑀸𑀲𑀺𑀢𑁄, 𑀢𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀓𑀸𑀫𑁂𑀳𑀺 𑀬𑁄𑀕𑀻𑀳𑀺 𑀏𑀢𑀲𑁆𑀫𑀺𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀆𑀤𑀭𑁄 𑀓𑀭𑀡𑀻𑀬𑁄𑀬𑁂𑀯𑀸𑀢𑀺.

𑀦𑀺𑀕𑀫𑀦𑀕𑀸𑀣𑀸𑀬𑁄

𑀏𑀢𑁆𑀢𑀸𑀯𑀢𑀸 𑀘 𑁋

𑀲𑀼𑀯𑀺𑀲𑀼𑀤𑁆𑀥𑀲𑀫𑀸𑀘𑀸𑀭𑁄, 𑀯𑀺𑀲𑀼𑀤𑁆𑀥𑀦𑀬𑀫𑀡𑁆𑀟𑀺𑀢𑀁;

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀮𑁄𑀓𑀲𑁆𑀲, 𑀬𑀤𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀺𑀬𑀸.

𑀅𑀪𑀸𑀲𑀺 𑀓𑀭𑀼𑀡𑀸𑀯𑁂𑀕-𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄;

𑀫𑀳𑁂𑀲𑀺 𑀯𑀺𑀧𑀼𑀮𑁄𑀤𑀸𑀢-𑀯𑀺𑀲𑀼𑀤𑁆𑀥𑀺𑀫𑀢𑀺𑀧𑀸𑀝𑀯𑁄.

𑀢𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁, 𑀓𑀣𑀸𑀫𑀕𑁆𑀕𑀁 𑀧𑀼𑀭𑀸𑀢𑀦𑀁;

𑀦𑀺𑀲𑁆𑀲𑀸𑀬 𑀬𑀸 𑀲𑀫𑀸𑀭𑀤𑁆𑀥𑀸, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀫𑀬𑀸.

𑀆𑀬𑀸𑀘𑀺𑀢𑁄 𑀲𑀺𑀤𑁆𑀥𑀕𑀸𑀫-𑀧𑀭𑀺𑀯𑁂𑀡𑀦𑀺𑀯𑀸𑀲𑀺𑀦𑀸;

𑀣𑁂𑀭𑁂𑀦 𑀤𑀸𑀞𑀦𑀸𑀕𑁂𑀦, 𑀲𑀼𑀤𑁆𑀥𑀸𑀘𑀸𑀭𑁂𑀦 𑀥𑀻𑀫𑀢𑀸.

𑀲𑀸 𑀏𑀲𑀸 𑀧𑀭𑀫𑀢𑁆𑀣𑀸𑀦𑀁, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀦𑀺𑀥𑀸𑀦𑀢𑁄 𑀧𑀭𑀫𑀢𑁆𑀣-𑀫𑀜𑁆𑀚𑀽𑀲𑀸 𑀦𑀸𑀫 𑀦𑀸𑀫𑀢𑁄.

𑀲𑀫𑁆𑀧𑀢𑁆𑀢𑀸 𑀧𑀭𑀺𑀦𑀺𑀝𑁆𑀞𑀸𑀦𑀁, 𑀅𑀦𑀸𑀓𑀼𑀮𑀯𑀺𑀦𑀺𑀘𑁆𑀙𑀬𑀸;

𑀅𑀝𑁆𑀞𑀸𑀲𑀻𑀢𑀺𑀧𑁆𑀧𑀫𑀸𑀡𑀸𑀬, 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑀢𑁄.

𑀇𑀢𑀺 𑀢𑀁 𑀲𑀗𑁆𑀔𑀭𑁄𑀦𑁆𑀢𑁂𑀦, 𑀬𑀁 𑀢𑀁 𑀅𑀥𑀺𑀕𑀢𑀁 𑀫𑀬𑀸;

𑀧𑀼𑀜𑁆𑀜𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑁂.

𑀑𑀕𑀸𑀳𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀸𑀬, 𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸;

𑀲𑀩𑁆𑀩𑁂𑀧𑀺 𑀤𑁂𑀳𑀺𑀦𑁄 𑀳𑁄𑀦𑁆𑀢𑀼, 𑀯𑀺𑀫𑀼𑀢𑁆𑀢𑀺𑀭𑀲𑀪𑀸𑀕𑀺𑀦𑁄.

𑀘𑀺𑀭𑀁 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀁;

𑀢𑀲𑁆𑀫𑀺𑀁 𑀲𑀕𑀸𑀭𑀯𑀸 𑀦𑀺𑀘𑁆𑀘𑀁, 𑀳𑁄𑀦𑁆𑀢𑀼 𑀲𑀩𑁆𑀩𑁂𑀧𑀺 𑀧𑀸𑀡𑀺𑀦𑁄.

𑀲𑀫𑁆𑀫𑀸 𑀯𑀲𑁆𑀲𑀢𑀼 𑀓𑀸𑀮𑁂𑀦, 𑀤𑁂𑀯𑁄 𑀭𑀸𑀚𑀸 𑀫𑀳𑀻𑀧𑀢𑀺;

𑀲𑀤𑁆𑀥𑀫𑁆𑀫𑀦𑀺𑀭𑀢𑁄 𑀮𑁄𑀓𑀁, 𑀥𑀫𑁆𑀫𑁂𑀦𑁂𑀯 𑀧𑀲𑀸𑀲𑀢𑀽𑀢𑀺.

𑀩𑀤𑀭𑀢𑀺𑀢𑁆𑀣𑀯𑀺𑀳𑀸𑀭𑀯𑀸𑀲𑀺𑀦𑀸 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑁂𑀦 𑀓𑀢𑀸

𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸 𑀦𑀸𑀫 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑀳𑀸𑀝𑀻𑀓𑀸 𑀲𑀫𑀢𑁆𑀢𑀸.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕-𑀫𑀳𑀸𑀝𑀻𑀓𑀸 𑀲𑀫𑀢𑁆𑀢𑀸.