𑁨𑁧. 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀉𑀤𑀬𑀩𑁆𑀩𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁭𑁩𑁭. 𑀯𑀺𑀧𑀲𑁆𑀲𑀦𑀸𑀘𑀸𑀭𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑀺𑀧𑀲𑁆𑀲𑀦𑀸. 𑀲𑀺𑀔𑀸𑀧𑁆𑀧𑀢𑁆𑀢𑀺 𑀧𑀦𑀲𑁆𑀲 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀻𑀦𑀁 𑀅𑀢𑁆𑀢𑀝𑁆𑀞𑀫𑀸𑀦𑀁𑀯𑀲𑁂𑀦 𑀚𑀸𑀢𑀸𑀢𑀺 𑀆𑀳 ‘‘𑀅𑀝𑁆𑀞𑀦𑁆𑀦𑀁 𑀧𑀦 𑀜𑀸𑀡𑀸𑀦𑀁 𑀯𑀲𑁂𑀦 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑀺𑀧𑀲𑁆𑀲𑀦𑀸’’𑀢𑀺. 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀲𑁆𑀲 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀢𑀫𑀲𑁆𑀲 𑀯𑀺𑀕𑀫𑀦𑁂𑀦 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀸𑀦𑀼𑀓𑀽𑀮𑀢𑁆𑀢𑀸 ‘‘𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡’’𑀦𑁆𑀢𑀺 𑀅𑀦𑀼𑀮𑁄𑀫𑀜𑀸𑀡𑀫𑀸𑀳. 𑀢𑀸𑀦𑀺 𑀧𑀦 𑀜𑀸𑀡𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀦𑁆𑀦𑀦𑁆𑀢𑀺 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀢𑀤𑀦𑀼𑀲𑀸𑀭𑁂𑀦 𑀇𑀢𑀭𑀮𑀓𑁆𑀔𑀡𑀸𑀦𑀺 𑀘 𑀯𑀺𑀪𑀸𑀯𑁂𑀦𑁆𑀢𑀻𑀬𑁂𑀯 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 ‘‘𑀯𑀻𑀣𑀺𑀧𑀝𑀺𑀧𑀦𑁆𑀦𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀁 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺. 𑀢𑀬𑀺𑀤𑀁 𑀢𑀲𑁆𑀲 𑀲𑀩𑁆𑀩𑀲𑁄 𑀢𑀻𑀭𑀡𑀧𑀭𑀺𑀜𑁆𑀜𑀸𑀪𑀸𑀯𑀫𑁂𑀯 𑀫𑀜𑁆𑀜𑀫𑀸𑀦𑁂𑀳𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀳𑀺 𑀉𑀤𑀬𑀩𑁆𑀩𑀬𑀜𑀸𑀡𑀁 𑀢𑀻𑀭𑀡𑀧𑀭𑀺𑀜𑁆𑀜𑀦𑁆𑀢𑁄𑀕𑀥𑀫𑁂𑀯, 𑀉𑀤𑀬𑀩𑁆𑀩𑀬𑀸𑀤𑀻𑀦𑀁 𑀧𑀦 𑀚𑀸𑀦𑀦𑀝𑁆𑀞𑁂𑀦, 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀘 𑀜𑀸𑀡𑀤𑀲𑁆𑀲𑀦𑀸𑀦𑀺, 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀻𑀦𑀺. 𑀢𑀸𑀦𑀺𑀬𑁂𑀯 𑀧𑀝𑀺𑀧𑀓𑁆𑀔𑀢𑁄 𑀯𑀺𑀲𑀼𑀤𑁆𑀥𑀢𑁆𑀢𑀸 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀲𑀸 𑀏𑀯 𑀅𑀭𑀺𑀬𑀫𑀕𑁆𑀕𑁄 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸 𑀘𑀸𑀢𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀉𑀧𑁆𑀧𑀦𑁆𑀦𑀫𑀢𑁆𑀢𑀁 𑀅𑀧𑁆𑀧𑀕𑀼𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀕𑀼𑀡𑀜𑁆𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀳𑀸𑀦𑀲𑀺𑀤𑁆𑀥𑀺𑀬𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑀁. 𑀬𑀢𑁄 𑀢𑀤𑀯𑀺𑀕𑀫𑁂𑀦 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀧𑀲𑁆𑀲𑀦𑀸𑀲𑀼 𑀏𑀓𑀘𑁆𑀘𑀸 𑀅𑀥𑀺𑀕𑀢𑀸 𑀏𑀯 𑀳𑁄𑀦𑁆𑀢𑀺. 𑀦 𑀳𑀺 𑀉𑀤𑀬𑀩𑁆𑀩𑀬𑀸𑀦𑀁 𑀧𑀘𑁆𑀘𑀓𑁆𑀔𑀢𑁄 𑀧𑀝𑀺𑀯𑁂𑀥𑁂𑀦 𑀯𑀺𑀦𑀸 𑀲𑀸𑀫𑀜𑁆𑀜𑀸𑀓𑀸𑀭𑀸𑀦𑀁 𑀢𑀻𑀭𑀡𑀫𑀢𑁆𑀢𑁂𑀦 𑀲𑀸𑀢𑀺𑀲𑀬𑀁 𑀧𑀝𑀺𑀧𑀓𑁆𑀔𑀧𑀳𑀸𑀦𑀁 𑀲𑀫𑁆𑀪𑀯𑀢𑀺. 𑀅𑀲𑀢𑀺 𑀘 𑀧𑀝𑀺𑀧𑀓𑁆𑀔𑀧𑀳𑀸𑀦𑁂 𑀓𑀼𑀢𑁄 𑀜𑀸𑀡𑀸𑀤𑀻𑀦𑀁 𑀯𑀚𑀺𑀭𑀫𑀺𑀯 𑀅𑀯𑀺𑀳𑀢𑀯𑁂𑀕𑀢𑀸, 𑀢𑀺𑀔𑀺𑀡𑀯𑀺𑀲𑀤𑀸𑀤𑀺𑀢𑀸 𑀯𑀸. 𑀢𑀲𑁆𑀫𑀸 𑀧𑀕𑀼𑀡𑀪𑀸𑀯𑀧𑁆𑀧𑀢𑁆𑀢𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀧𑀳𑀸𑀦𑀧𑀭𑀺𑀜𑁆𑀜𑀸𑀧𑀓𑁆𑀔𑀺𑀬𑀫𑁂𑀯 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀪𑀗𑁆𑀕𑀲𑁆𑀲𑁂𑀯 𑀅𑀦𑀼𑀧𑀲𑁆𑀲𑀦𑀸 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸, 𑀢𑀤𑁂𑀯 𑀜𑀸𑀡𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁. 𑀬𑀣𑀸𑀪𑀽𑀢𑀤𑀲𑁆𑀲𑀸𑀯𑀻 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀢𑁂𑀪𑀽𑀫𑀓𑀥𑀫𑁆𑀫𑀸, 𑀢𑁂𑀲𑀼 𑀪𑀬𑀢𑁄 𑀉𑀧𑀝𑁆𑀞𑀺𑀢𑁂𑀲𑀼 𑀪𑀸𑀬𑀺𑀢𑀩𑁆𑀩𑀸𑀓𑀸𑀭𑀕𑀸𑀳𑀺𑀜𑀸𑀡𑀁 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁. 𑀫𑀼𑀜𑁆𑀘𑀺𑀢𑀼𑀁 𑀇𑀘𑁆𑀙𑀢𑀻𑀢𑀺 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀁, 𑀘𑀺𑀢𑁆𑀢𑀁, 𑀧𑀼𑀕𑁆𑀕𑀮𑁄 𑀯𑀸, 𑀢𑀲𑁆𑀲 𑀪𑀸𑀯𑁄 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸, 𑀢𑀤𑁂𑀯 𑀜𑀸𑀡𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁. 𑀧𑀼𑀦 𑀧𑀝𑀺𑀲𑀗𑁆𑀔𑀸𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁. 𑀦𑀺𑀭𑀧𑁂𑀓𑁆𑀔𑀢𑀸𑀬 𑀲𑀗𑁆𑀔𑀸𑀭𑀸𑀦𑀁 𑀉𑀧𑁂𑀓𑁆𑀔𑀦𑀯𑀲𑁂𑀦 𑀧𑀯𑀢𑁆𑀢𑀜𑀸𑀡𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀺𑀦𑀯𑀯𑀺𑀥𑀜𑀸𑀡𑀁 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀢𑀲𑁆𑀫𑀸.

𑁭𑁩𑁮. ‘‘𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀯𑀺𑀲𑁂𑀲𑀦𑁂𑀦 𑀯𑀺𑀪𑀸𑀯𑀺𑀢𑀫𑀢𑁆𑀣𑀁 𑀅𑀦𑀯𑀩𑀼𑀚𑁆𑀛𑀦𑁆𑀢𑁄 𑀘𑁄𑀤𑀓𑁄 ‘‘𑀧𑀼𑀦 𑀉𑀤𑀬𑀩𑁆𑀩𑀬𑀜𑀸𑀡𑁂 𑀬𑁄𑀕𑁄 𑀓𑀺𑀫𑀢𑁆𑀣𑀺𑀬𑁄’’𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀓𑀺𑀫𑀢𑁆𑀣𑀺𑀬𑁄𑀢𑀺 𑀓𑀺𑀁 𑀧𑀬𑁄𑀚𑀦𑁄 𑀦𑀺𑀭𑀢𑁆𑀣𑀓𑁄, 𑀧𑀕𑁂𑀯 𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸 𑀧𑀓𑁆𑀓𑀲𑁆𑀲 𑀧𑀘𑀦𑀁 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀸𑀤𑀺𑀳𑁂𑀢𑀼𑀧𑀝𑀺𑀧𑀸𑀝𑀺𑀕𑁆𑀕𑀳𑀡𑀯𑀲𑁂𑀦 𑀢𑀫𑀢𑁆𑀣𑀁 𑀜𑀸𑀧𑁂𑀢𑀼𑀓𑀸𑀫𑁄 𑀆𑀘𑀭𑀺𑀬𑁄𑀯 𑀓𑀣𑁂𑀢𑀼𑀓𑀫𑁆𑀬𑀢𑀸𑀯𑀲𑁂𑀦 ‘‘𑀓𑀺𑀫𑀢𑁆𑀣𑀺𑀬𑁄’’𑀢𑀺 𑀧𑀼𑀘𑁆𑀙𑀢𑀺. 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀢𑁆𑀣𑁄𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀁 𑀲𑀫𑁆𑀫𑀤𑁂𑀯 𑀉𑀧𑀥𑀸𑀭𑀡𑀢𑁆𑀣𑁄. 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀤𑀬𑀩𑁆𑀩𑀬𑀜𑀸𑀡𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀦𑀦𑀼 𑀘 𑀉𑀤𑀬𑀩𑁆𑀩𑀬𑀜𑀸𑀡𑀁 𑀦𑀸𑀫 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀩𑁆𑀩𑀬𑀫𑁂𑀯 𑀧𑀲𑁆𑀲𑀢𑀺, 𑀦 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀁, 𑀢𑁂𑀦 𑀓𑀣𑀁 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀲𑀮𑁆𑀮𑀓𑁆𑀔𑀡𑀁 𑀳𑁄𑀢𑀻𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀉𑀤𑀬𑀩𑁆𑀩𑀬𑀜𑀸𑀡𑀁 𑀮𑀓𑁆𑀔𑀡𑀢𑁆𑀢𑀬𑀯𑀺𑀲𑀬𑀁 𑀳𑁄𑀢𑀻’’𑀢𑀺. 𑀉𑀤𑀬𑀩𑁆𑀩𑀬𑁂 𑀧𑀦 𑀧𑀝𑀺𑀯𑀺𑀤𑁆𑀥𑁂 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀧𑀸𑀓𑀝𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀢𑀢𑁄 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁. 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫; 𑁪𑁫, 𑁭𑁭; 𑁪.𑁧, 𑁪; 𑀧𑀝𑀺. 𑀫. 𑁨.𑁧𑁦) 𑀇𑀢𑀭𑀮𑀓𑁆𑀔𑀡𑀫𑁆𑀧𑀺. 𑀅𑀣 𑀯𑀸 𑀉𑀤𑀬𑀩𑁆𑀩𑀬𑀕𑁆𑀕𑀳𑀡𑁂𑀦 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁄, 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀸𑀓𑀸𑀭𑁄, 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁄 𑀘 𑀯𑀺𑀪𑀽𑀢𑀢𑀭𑁄 𑀳𑁄𑀢𑀻𑀢𑀺 𑀓𑀸𑀭𑀡𑀪𑀸𑀯𑁂𑀦 𑀉𑀤𑀬𑀩𑁆𑀩𑀬𑀜𑀸𑀡𑁂 𑀬𑁄𑀕𑀲𑁆𑀲 𑀮𑀓𑁆𑀔𑀡𑀢𑁆𑀢𑀬𑀲𑀮𑁆𑀮𑀓𑁆𑀔𑀡𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀲𑀫𑁆𑀫𑀼𑀔𑁂𑀦𑁂𑀯. 𑀳𑁂𑀝𑁆𑀞𑀸𑀢𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀢𑁄 𑀳𑁂𑀝𑁆𑀞𑀸. 𑀢𑀜𑁆𑀳𑀺 𑀑𑀪𑀸𑀲𑀸𑀤𑀺𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀢𑀺𑀓𑁆𑀔𑀁 𑀯𑀺𑀲𑀤𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑁆𑀧𑀺 𑀤𑀺𑀝𑁆𑀞𑀺𑀆𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀢𑁆𑀢𑀸 𑀓𑀼𑀡𑁆𑀞𑀁 𑀅𑀯𑀺𑀲𑀤𑀫𑁂𑀯 𑀚𑀸𑀢𑀁. 𑀢𑁂𑀦𑀸𑀳 ‘‘𑀤𑀲𑀳𑀺…𑀧𑁂… 𑀦𑀸𑀲𑀓𑁆𑀔𑀻’’𑀢𑀺.

𑁭𑁩𑁯. 𑀅𑀫𑀦𑀲𑀺𑀓𑀸𑀭𑀸𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. ‘‘𑀓𑀺𑀲𑁆𑀲 𑀅𑀫𑀦𑀲𑀺𑀓𑀸𑀭𑀸’’𑀢𑀺 𑀳𑀺 𑀇𑀤𑀁 ‘‘𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀳𑁂𑀢𑀼𑀧𑀼𑀘𑁆𑀙𑀸. 𑀲𑀦𑁆𑀢𑀢𑀺𑀬𑀸 𑀳𑀺𑀲𑁆𑀲 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀦 𑀉𑀧𑀝𑁆𑀞𑀸𑀢𑀺, 𑀲𑀸 𑀘 𑀲𑀦𑁆𑀢𑀢𑀺 𑀉𑀤𑀬𑀩𑁆𑀩𑀬𑀸𑀫𑀦𑀲𑀺𑀓𑀸𑀭𑁂𑀦 𑀧𑀝𑀺𑀘𑁆𑀙𑀸𑀤𑀺𑀓𑀸 𑀚𑀸𑀢𑀸. 𑀇𑀭𑀺𑀬𑀸𑀧𑀣𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀤𑀼𑀓𑁆𑀔𑀮𑀓𑁆𑀔𑀡𑀁 𑀦 𑀉𑀧𑀝𑁆𑀞𑀸𑀢𑀺, 𑀢𑁂 𑀘 𑀇𑀭𑀺𑀬𑀸𑀧𑀣𑀸 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀸𑀫𑀦𑀲𑀺𑀓𑀸𑀭𑁂𑀦 𑀧𑀝𑀺𑀘𑁆𑀙𑀸𑀤𑀓𑀸 𑀚𑀸𑀢𑀸. 𑀖𑀦𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀅𑀦𑀢𑁆𑀢𑀮𑀓𑁆𑀔𑀡𑀁 𑀦 𑀉𑀧𑀝𑁆𑀞𑀸𑀢𑀺, 𑀢𑁂 𑀘 𑀖𑀦𑀸 𑀦𑀸𑀦𑀸𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑀸𑀫𑀦𑀲𑀺𑀓𑀸𑀭𑁂𑀦 𑀧𑀝𑀺𑀘𑁆𑀙𑀸𑀤𑀓𑀸 𑀚𑀸𑀢𑀸𑀢𑀺. 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀢𑁄 𑀦 𑀉𑀤𑀬𑀸𑀯𑀢𑁆𑀣𑀸 𑀯𑀬𑀸𑀯𑀢𑁆𑀣𑀁 𑀧𑀸𑀧𑀼𑀡𑀸𑀢𑀺, 𑀯𑀬𑀸𑀯𑀢𑁆𑀣𑀸 𑀯𑀸 𑀉𑀤𑀬𑀸𑀯𑀢𑁆𑀣𑀁. 𑀅𑀜𑁆𑀜𑁄𑀯 𑀉𑀤𑀬𑀓𑁆𑀔𑀡𑁄, 𑀅𑀜𑁆𑀜𑁄𑀯 𑀯𑀬𑀓𑁆𑀔𑀡𑁄𑀢𑀺 𑀏𑀓𑁄𑀧𑀺 𑀥𑀫𑁆𑀫𑁄 𑀔𑀡𑀯𑀲𑁂𑀦 𑀪𑁂𑀤𑀢𑁄 𑀉𑀧𑀝𑁆𑀞𑀸𑀢𑀺, 𑀧𑀕𑁂𑀯 𑀅𑀢𑀻𑀢𑀸𑀤𑀺𑀓𑁄𑀢𑀺 𑀆𑀳 ‘‘𑀉𑀤𑀬𑀩𑁆𑀩𑀬𑀁 𑀧𑀦…𑀧𑁂… 𑀉𑀧𑀝𑁆𑀞𑀸𑀢𑀻’’𑀢𑀺. 𑀢𑀢𑁆𑀣 𑀲𑀦𑁆𑀢𑀢𑀺𑀬𑀸 𑀯𑀺𑀓𑁄𑀧𑀺𑀢𑀸𑀬𑀸𑀢𑀺 𑀧𑀼𑀩𑁆𑀩𑀸𑀧𑀭𑀺𑀬𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑁄𑀜𑁆𑀜𑀪𑀸𑀯𑀲𑀮𑁆𑀮𑀓𑁆𑀔𑀡𑁂𑀦 𑀲𑀦𑁆𑀢𑀢𑀺𑀬𑀸 𑀉𑀕𑁆𑀖𑀸𑀝𑀺𑀢𑀸𑀬. 𑀦 𑀳𑀺 𑀲𑀫𑁆𑀫𑀤𑁂𑀯 𑀉𑀤𑀬𑀩𑁆𑀩𑀬𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀲𑁆𑀲 𑀥𑀫𑁆𑀫𑀸 𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀉𑀧𑀝𑁆𑀞𑀳𑀦𑁆𑀢𑀺, 𑀅𑀣 𑀔𑁄 𑀅𑀬𑁄𑀲𑀮𑀸𑀓𑀸 𑀯𑀺𑀬 𑀅𑀲𑀫𑁆𑀩𑀦𑁆𑀥𑀪𑀸𑀯𑁂𑀦𑀸𑀢𑀺 𑀲𑀼𑀝𑁆𑀞𑀼𑀢𑀭𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀧𑀸𑀓𑀝𑀁 𑀳𑁄𑀢𑀺.

𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀁 𑀫𑀦𑀲𑀺 𑀓𑀢𑁆𑀯𑀸𑀢𑀺 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀉𑀤𑀬𑀩𑁆𑀩𑀬𑀯𑀲𑁂𑀦 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑀦𑁆𑀢𑀭𑀁 𑀧𑀝𑀺𑀧𑀻𑀴𑀺𑀬𑀫𑀸𑀦𑀢𑀁 𑀯𑀺𑀩𑀸𑀥𑀺𑀬𑀫𑀸𑀦𑀢𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀇𑀭𑀺𑀬𑀸𑀧𑀣𑁂 𑀉𑀕𑁆𑀖𑀸𑀝𑀺𑀢𑁂𑀢𑀺 𑀇𑀭𑀺𑀬𑀸𑀧𑀣𑁂 𑀮𑀩𑁆𑀪𑀫𑀸𑀦𑀤𑀼𑀓𑁆𑀔𑀧𑀝𑀺𑀘𑁆𑀙𑀸𑀤𑀓𑀪𑀸𑀯𑁂 𑀉𑀕𑁆𑀖𑀸𑀝𑀺𑀢𑁂. 𑀏𑀓𑀲𑁆𑀫𑀺𑀜𑁆𑀳𑀺 𑀇𑀭𑀺𑀬𑀸𑀧𑀣𑁂 𑀉𑀧𑁆𑀧𑀦𑁆𑀦𑀲𑁆𑀲 𑀤𑀼𑀓𑁆𑀔𑀲𑁆𑀲 𑀯𑀺𑀦𑁄𑀤𑀓𑀁 𑀇𑀭𑀺𑀬𑀸𑀧𑀣𑀦𑁆𑀢𑀭𑀁 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀓𑀁 𑀯𑀺𑀬 𑀳𑁄𑀢𑀺, 𑀏𑀯𑀁 𑀲𑁂𑀲𑀸𑀧𑀻𑀢𑀺 𑀇𑀭𑀺𑀬𑀸𑀧𑀣𑀸𑀦𑀁 𑀢𑀁𑀢𑀁𑀤𑀼𑀓𑁆𑀔𑀧𑀝𑀺𑀘𑁆𑀙𑀸𑀤𑀓𑀪𑀸𑀯𑁂 𑀬𑀸𑀣𑀸𑀯𑀢𑁄 𑀜𑀸𑀢𑁂 𑀢𑁂𑀲𑀁 𑀤𑀼𑀓𑁆𑀔𑀧𑀝𑀺𑀘𑁆𑀙𑀸𑀤𑀓𑀪𑀸𑀯𑁄 𑀉𑀕𑁆𑀖𑀸𑀝𑀺𑀢𑁄 𑀦𑀸𑀫 𑀳𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑀦𑁆𑀢𑀭𑀁 𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑀢𑀸𑀬 𑀧𑀸𑀓𑀝𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀻’’𑀢𑀺. 𑀦𑀸𑀦𑀸𑀥𑀸𑀢𑀼𑀬𑁄𑀢𑀺 𑀦𑀸𑀦𑀸𑀯𑀺𑀥𑀸 𑀧𑀣𑀯𑀻𑀆𑀤𑀺𑀥𑀸𑀢𑀼𑀬𑁄 𑀦𑀸𑀦𑀸𑀯𑀺𑀥𑁂 𑀲𑀪𑀸𑀯𑀥𑀫𑁆𑀫𑁂. 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸𑀢𑀺 ‘‘𑀅𑀜𑁆𑀜𑀸 𑀧𑀣𑀯𑀻𑀥𑀸𑀢𑀼, 𑀅𑀜𑁆𑀜𑀸 𑀆𑀧𑁄𑀥𑀸𑀢𑀽’’𑀢𑀺𑀆𑀤𑀺𑀦𑀸, ‘‘𑀅𑀜𑁆𑀜𑁄 𑀨𑀲𑁆𑀲𑁄, 𑀅𑀜𑁆𑀜𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸. 𑀖𑀦𑀯𑀺𑀦𑀺𑀩𑁆𑀪𑁄𑀕𑁂 𑀓𑀢𑁂𑀢𑀺 𑀲𑀫𑀽𑀳𑀖𑀦𑁂, 𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑁂 𑀘 𑀧𑀪𑁂𑀤𑀺𑀢𑁂. 𑀬𑀸 𑀳𑁂𑀲𑀸 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀤𑁆𑀥𑁂𑀲𑀼 𑀲𑀫𑀼𑀤𑀺𑀢𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀏𑀓𑀢𑁆𑀢𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑁂𑀳𑀺 𑀕𑀬𑁆𑀳𑀫𑀸𑀦𑀸 𑀲𑀫𑀽𑀳𑀖𑀦𑀢𑀸, 𑀢𑀣𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀓𑀺𑀘𑁆𑀘𑀪𑁂𑀤𑀲𑁆𑀲 𑀲𑀢𑀺𑀧𑀺 𑀧𑀝𑀺𑀦𑀺𑀬𑀢𑀪𑀸𑀯𑁂 𑀏𑀓𑀢𑁄 𑀕𑀬𑁆𑀳𑀫𑀸𑀦𑀸 𑀓𑀺𑀘𑁆𑀘𑀖𑀦𑀢𑀸, 𑀢𑀣𑀸 𑀲𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀲𑀢𑀺𑀧𑀺 𑀆𑀭𑀫𑁆𑀫𑀡𑀓𑀭𑀡𑀪𑁂𑀤𑁂 𑀏𑀓𑀢𑁄 𑀕𑀬𑁆𑀳𑀫𑀸𑀦𑀸 𑀆𑀭𑀫𑁆𑀫𑀡𑀖𑀦𑀢𑀸 𑀘, 𑀢𑀸 𑀥𑀸𑀢𑀽𑀲𑀼 𑀜𑀸𑀡𑁂𑀦 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑀸 𑀳𑀢𑁆𑀣𑁂𑀦 𑀧𑀭𑀺𑀫𑀚𑁆𑀚𑀺𑀬𑀫𑀸𑀦𑁄 𑀨𑁂𑀡𑀧𑀺𑀡𑁆𑀟𑁄 𑀯𑀺𑀬 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀺, ‘‘𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀫𑀸𑀦𑀸 𑀲𑀼𑀜𑁆𑀜𑀸 𑀏𑀢𑁂 𑀥𑀫𑁆𑀫𑀸 𑀥𑀫𑁆𑀫𑀫𑀢𑁆𑀢𑀸’’𑀢𑀺 𑀅𑀦𑀢𑁆𑀢𑀮𑀓𑁆𑀔𑀡𑀁 𑀧𑀸𑀓𑀝𑀢𑀭𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀦𑀸𑀥𑀸𑀢𑀼𑀬𑁄…𑀧𑁂… 𑀉𑀧𑀝𑁆𑀞𑀸𑀢𑀻’’𑀢𑀺.

𑁭𑁪𑁦. 𑀥𑀼𑀯𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄 𑀦 𑀦𑀺𑀘𑁆𑀘𑀦𑁆𑀢𑀺 𑀅𑀦𑀺𑀘𑁆𑀘𑀁, 𑀔𑀦𑁆𑀥𑀧𑀜𑁆𑀘𑀓𑀁. 𑀬𑀣𑀸𑀳 ‘‘𑀭𑀽𑀧𑀁 𑀔𑁄, 𑀭𑀸𑀥, 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁭𑁨). 𑀢𑀢𑁆𑀣 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀪𑀸𑀯𑀸’’𑀢𑀺 𑀆𑀳. 𑀉𑀧𑁆𑀧𑀸𑀤𑁄 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁, 𑀯𑀬𑁄 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁, 𑀅𑀜𑁆𑀜𑀣𑀢𑁆𑀢𑀁 𑀚𑀭𑀸, 𑀢𑁂𑀲𑀁 𑀲𑀩𑁆𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀦𑀲𑁆𑀲𑀦𑀢𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑁂𑀦 𑀚𑀸𑀢𑀺𑀚𑀭𑀸𑀫𑀭𑀡𑀲𑀩𑁆𑀪𑀸𑀯𑀢𑁄 𑀅𑀦𑀺𑀘𑁆𑀘𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀧𑀸𑀓𑀪𑀸𑀯𑀯𑀺𑀤𑁆𑀥𑀁𑀲𑀸𑀪𑀸𑀯𑀢𑁄. 𑀬𑀲𑁆𑀲 𑀪𑀸𑀯𑁂𑀦 𑀔𑀦𑁆𑀥𑀧𑀜𑁆𑀘𑀓𑀁 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀳𑀺 𑀢𑀁 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀮𑀓𑁆𑀔𑀻𑀬𑀢𑀺. 𑀆𑀓𑀸𑀭𑀯𑀺𑀓𑀸𑀭𑁄𑀢𑀺 𑀆𑀓𑀸𑀭𑀯𑀺𑀓𑀢𑀺. 𑀅𑀪𑀸𑀯𑀸𑀓𑀸𑀭𑁄 𑀳𑀺 𑀯𑀺𑀓𑀢𑀺𑀭𑀽𑀧𑁂𑀦 𑀮𑀩𑁆𑀪𑀢𑀺, 𑀯𑀺𑀭𑀽𑀧𑀢𑁆𑀢𑀸 𑀦 𑀉𑀧𑁆𑀧𑀸𑀤𑀸𑀓𑀸𑀭𑁄. 𑀆𑀓𑀸𑀭𑀯𑀺𑀓𑀸𑀭𑁄𑀢𑀺 𑀯𑀸 𑀆𑀓𑀸𑀭𑀯𑀺𑀲𑁂𑀲𑁄. 𑀳𑀼𑀢𑁆𑀯𑀸 𑀅𑀪𑀸𑀯𑁄 𑀳𑀺 𑀧𑀸𑀓𑀪𑀸𑀯𑀢𑁄 𑀪𑀺𑀦𑁆𑀦𑁄 𑀯𑀺𑀤𑁆𑀥𑀁𑀲𑀸𑀪𑀸𑀯𑀢𑁆𑀢𑀸 𑀢𑀢𑁆𑀣 𑀘 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀦𑀺𑀭𑀼𑀴𑁆𑀳𑀁. 𑀅𑀦𑀺𑀘𑁆𑀘𑀸𑀓𑀸𑀭𑁄 𑀳𑀺 𑀤𑀼𑀓𑁆𑀔𑀸𑀦𑀢𑁆𑀢𑀸𑀓𑀸𑀭𑁂𑀳𑀺 𑀯𑀺𑀬 𑀉𑀧𑁆𑀧𑀸𑀤𑀸𑀓𑀸𑀭𑀢𑁄 𑀘 𑀯𑀺𑀲𑀺𑀝𑁆𑀞𑁄. 𑀢𑀣𑀸 𑀳𑀺 𑀲𑀤𑁆𑀤𑀲𑁆𑀲 𑀯𑀺𑀤𑁆𑀥𑀁𑀲𑀸𑀪𑀸𑀯𑁄 𑀲𑀗𑁆𑀔𑀢𑀪𑀸𑀯𑁂𑀦𑀧𑀺 𑀲𑀸𑀥𑀻𑀬𑀢𑀺.

𑀲𑀗𑁆𑀔𑀢𑀪𑀸𑀯𑁄 𑀘 𑀅𑀢𑁆𑀣𑀢𑁄 𑀉𑀧𑁆𑀧𑀸𑀤𑀯𑀦𑁆𑀢𑀢𑀸. 𑀉𑀧𑁆𑀧𑀸𑀤𑁄 𑀘 𑀧𑀸𑀓𑀪𑀸𑀯𑀲𑀸𑀥𑀺𑀢𑀸 𑀥𑀭𑀫𑀸𑀦𑀸𑀯𑀢𑁆𑀣𑀸. 𑀇𑀫𑀺𑀦𑀸 𑀦𑀬𑁂𑀦 𑀤𑀼𑀓𑁆𑀔𑀸𑀦𑀢𑁆𑀢𑀸𑀮𑀓𑁆𑀔𑀡𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀧𑀺𑀘 𑀬𑀣𑀸 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄 𑀅𑀦𑀺𑀘𑁆𑀘𑀦𑁆𑀢𑀺 𑀦𑀺𑀘𑁆𑀘𑀸𑀓𑀸𑀭𑀧𑀝𑀺𑀓𑁆𑀔𑁂𑀧𑀢𑁄 𑀬𑀣𑀸𑀯𑀼𑀢𑁆𑀢𑁄 𑀅𑀪𑀸𑀯𑀸𑀓𑀸𑀭𑀲𑀗𑁆𑀔𑀸𑀢𑁄 𑀅𑀦𑀺𑀘𑁆𑀘𑀸𑀓𑀸𑀭𑁄 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀏𑀯𑀁 𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄 𑀤𑀼𑀓𑁆𑀔𑀦𑁆𑀢𑀺 𑀲𑀼𑀔𑀸𑀓𑀸𑀭𑀧𑀝𑀺𑀓𑁆𑀔𑁂𑀧𑀢𑁄 𑀅𑀪𑀺𑀡𑁆𑀳𑀧𑀝𑀺𑀧𑀻𑀴𑀦𑀸𑀓𑀸𑀭𑀲𑀗𑁆𑀔𑀸𑀢𑁄 𑀤𑀼𑀓𑁆𑀔𑀸𑀓𑀸𑀭𑁄 𑀤𑀼𑀓𑁆𑀔𑀮𑀓𑁆𑀔𑀡𑀁, 𑀢𑀣𑀸 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀢𑁄 𑀅𑀦𑀢𑁆𑀢𑀸𑀢𑀺 𑀅𑀢𑁆𑀢𑀸𑀓𑀸𑀭𑀧𑀝𑀺𑀓𑁆𑀔𑁂𑀧𑀢𑁄 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑀲𑀗𑁆𑀔𑀸𑀢𑁄 𑀅𑀦𑀢𑁆𑀢𑀸𑀓𑀸𑀭𑁄 𑀅𑀦𑀢𑁆𑀢𑀮𑀓𑁆𑀔𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂 𑀬𑀺𑀫𑁂 𑀢𑀬𑁄𑀧𑀺 𑀆𑀓𑀸𑀭𑀸 𑀅𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀦 𑀳𑁄𑀦𑁆𑀢𑀺. 𑀔𑀦𑁆𑀥𑁂𑀳𑀺 𑀯𑀺𑀦𑀸 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀸𑀧𑀺 𑀦 𑀳𑁄𑀦𑁆𑀢𑀺. 𑀔𑀦𑁆𑀥𑁂 𑀧𑀦 𑀉𑀧𑀸𑀤𑀸𑀬 𑀯𑁄𑀳𑀸𑀭𑀯𑀲𑁂𑀦 𑀮𑀩𑁆𑀪𑀫𑀸𑀦𑀸 𑀢𑀤𑀸𑀤𑀻𑀦𑀯𑀯𑀺𑀪𑀸𑀯𑀦𑀸𑀬 𑀯𑀺𑀲𑁂𑀲𑀓𑀸𑀭𑀡𑀪𑀽𑀢𑀸 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺𑀯𑀺𑀲𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀬𑀺𑀤𑀁 𑀲𑀩𑁆𑀩𑀫𑁆𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀢𑁆𑀢𑀬𑀜𑁆𑀘𑁂𑀯 𑀮𑀓𑁆𑀔𑀺𑀢𑀩𑁆𑀩𑀜𑁆𑀘 𑀔𑀦𑁆𑀥𑀧𑀜𑁆𑀘𑀓𑀁. ‘‘𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀦 𑀬𑀸𑀣𑀸𑀯𑀲𑀭𑀲𑀢𑁄 𑀲𑀮𑁆𑀮𑀓𑁆𑀔𑁂𑀢𑀻’’𑀢𑀺 𑀇𑀤𑀁 𑀢𑀤𑀢𑁆𑀣𑁂 𑀢𑀩𑁆𑀩𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀉𑀤𑀬𑀩𑁆𑀩𑀬𑀜𑀸𑀡𑀢𑁆𑀣𑀜𑁆𑀳𑀺 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸 ‘‘𑀉𑀤𑀬𑀩𑁆𑀩𑀬𑀜𑀸𑀡’’𑀦𑁆𑀢𑀺 𑀓𑀣𑀺𑀢𑀸. 𑀦 𑀳𑀺 𑀉𑀤𑀬𑀩𑁆𑀩𑀬𑀜𑀸𑀡𑀁 𑀤𑀼𑀓𑁆𑀔𑀮𑀓𑁆𑀔𑀡𑀸𑀤𑀺𑀯𑀺𑀲𑀬𑀁. 𑀢𑀩𑁆𑀩𑀺𑀲𑀬𑀢𑁆𑀢𑁂 𑀯𑀸 𑀉𑀤𑀬𑀩𑁆𑀩𑀬𑀜𑀸𑀡𑀫𑁂𑀯 𑀦 𑀲𑀺𑀬𑀸, 𑀉𑀤𑀬𑀩𑁆𑀩𑀬𑀜𑀸𑀡𑀁 𑀧𑀦 𑀢𑀺𑀓𑁆𑀔𑀁, 𑀯𑀺𑀲𑀤𑀜𑁆𑀘 𑀓𑀸𑀢𑀼𑀓𑀸𑀫𑁂𑀦 𑀮𑀓𑁆𑀔𑀡𑀢𑁆𑀢𑀬𑀢𑀻𑀭𑀡𑀫𑁂𑀯 𑀓𑀸𑀢𑀩𑁆𑀩𑀁. 𑀧𑀭𑀺𑀓𑀫𑁆𑀫𑀲𑀤𑀺𑀲𑀜𑁆𑀳𑁂𑀢𑀁 𑀢𑀲𑁆𑀲. 𑀏𑀲 𑀦𑀬𑁄 𑀲𑁂𑀲𑀜𑀸𑀡𑁂𑀲𑀼𑀧𑀻𑀢𑀺.

𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀉𑀤𑀬𑀩𑁆𑀩𑀬𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁭𑁪𑁧. 𑀯𑀳𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀜𑀸𑀡𑀲𑁆𑀲 𑀢𑀺𑀓𑁆𑀔𑀪𑀸𑀯𑁄 𑀪𑀸𑀯𑀦𑀸𑀬 𑀧𑀕𑀼𑀡𑀪𑀸𑀯𑁂𑀦. 𑀧𑀕𑀼𑀡𑀸 𑀘 𑀪𑀸𑀯𑀦𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀆𑀭𑀫𑁆𑀫𑀡𑁂 𑀅𑀧𑁆𑀧𑀺𑀢𑀸 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀜𑀸𑀡𑀲𑁆𑀲 𑀢𑀺𑀓𑁆𑀔𑀪𑀸𑀯𑁂𑀦 𑀲𑀗𑁆𑀔𑀸𑀭𑀸𑀦𑀁 𑀮𑀳𑀼𑀉𑀧𑀝𑁆𑀞𑀸𑀦𑀢𑀸 𑀤𑀲𑁆𑀲𑀺𑀢𑀸. 𑀲𑀗𑁆𑀔𑀸𑀭𑁂𑀲𑀼 𑀧𑀦 𑀉𑀤𑀬𑀩𑁆𑀩𑀬𑀯𑀲𑁂𑀦 𑀮𑀳𑀼𑀁 𑀮𑀳𑀼𑀁 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀉𑀤𑀬𑀤𑀲𑁆𑀲𑀦𑀜𑁆𑀘 ‘‘𑀉𑀧𑁆𑀧𑀸𑀤𑀯𑀢𑁄 𑀯𑀺𑀦𑀸𑀲𑁄’’𑀢𑀺 𑀬𑀸𑀯𑀤𑁂𑀯 𑀯𑀬𑀤𑀲𑁆𑀲𑀦𑀢𑁆𑀣𑀁 𑀢𑀲𑁆𑀲 𑀦𑀺𑀩𑁆𑀩𑀺𑀤𑀸𑀯𑀳𑀢𑁆𑀢𑀸𑀢𑀺 𑀯𑀬𑁂 𑀏𑀯𑀲𑁆𑀲 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑀢𑀺, 𑀢𑁂𑀦 𑀉𑀧𑁆𑀧𑀸𑀤𑀸𑀤𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀬𑀫𑁂𑀯𑀸𑀭𑀩𑁆𑀪 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀸𑀤𑀁 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀧𑁆𑀧𑀸𑀤𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺𑀯𑀺𑀓𑀸𑀭𑀁. 𑀞𑀺𑀢𑀺𑀦𑁆𑀢𑀺 𑀞𑀺𑀢𑀺𑀧𑁆𑀧𑀢𑁆𑀢𑀁, 𑀚𑀭𑀦𑁆𑀢𑀺 𑀅𑀢𑁆𑀣𑁄. 𑀧𑀯𑀢𑁆𑀢𑀦𑁆𑀢𑀺 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁. 𑀬𑀁 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑀸𑀤𑀺𑀖𑀦𑀯𑀲𑁂𑀦, 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀘 𑀲𑀯𑀺𑀕𑁆𑀕𑀳𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀦𑀁, 𑀢𑀁 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀧𑀯𑀢𑁆𑀢𑀁 𑀦𑀸𑀫 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀦𑀁 𑀉𑀧𑁆𑀧𑀸𑀤𑁄𑀯, 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀉𑀧𑁆𑀧𑀦𑁆𑀦𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑀸 𑀞𑀸𑀦𑀧𑀭𑀫𑁆𑀧𑀭𑀸, 𑀢𑀲𑁆𑀫𑀸 𑀉𑀧𑁆𑀧𑀸𑀤𑀫𑁂𑀯 𑀕𑀡𑁆𑀳𑀸𑀢𑀺 𑀘𑁂, 𑀧𑀯𑀢𑁆𑀢𑀁 𑀕𑀡𑁆𑀳𑀸𑀢𑀺 𑀦𑀸𑀫. 𑀞𑀺𑀢𑀺𑀁𑀬𑁂𑀯 𑀕𑀡𑁆𑀳𑀸𑀢𑀺 𑀘𑁂, 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 ‘‘𑀉𑀧𑁆𑀧𑀸𑀤𑀁 𑀯𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀦 𑀳𑀺 𑀅𑀲𑀢𑀺 𑀪𑁂𑀤𑁂 𑀯𑀺𑀓𑀧𑁆𑀧𑁄 𑀬𑀼𑀢𑁆𑀢𑁄. 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺 𑀅𑀕𑁆𑀕𑀳𑀡𑀢𑁄. 𑀓𑀺𑀁 𑀧𑀦 𑀲𑀫𑁆𑀧𑀸𑀧𑀼𑀡𑀸𑀢𑀻𑀢𑀺 𑀆𑀳 ‘‘𑀔𑀬…𑀧𑁂… 𑀲𑀦𑁆𑀢𑀺𑀝𑁆𑀞𑀢𑀻’’𑀢𑀺. 𑀢𑀢𑁆𑀣 𑀦𑀺𑀭𑁄𑀥𑀲𑀤𑁆𑀤𑁄 𑀅𑀦𑀼𑀧𑁆𑀧𑀸𑀤𑁂𑀧𑀺 𑀤𑀺𑀲𑁆𑀲𑀢𑀻𑀢𑀺 𑀪𑁂𑀤𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀁, 𑀪𑁂𑀤𑀲𑀤𑁆𑀤𑁄 𑀯𑀺𑀲𑁂𑀲𑀯𑀸𑀘𑀓𑁄𑀧𑀺 𑀳𑁄𑀢𑀻𑀢𑀺 𑀯𑀬𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀁, 𑀲𑁄𑀧𑀺 𑀅𑀦𑀺𑀭𑁄𑀥𑀯𑀸𑀘𑀓𑁄𑀧𑀺 𑀅𑀢𑁆𑀣𑀻𑀢𑀺 𑀔𑀬𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀁, 𑀔𑀬𑀯𑀬𑀪𑁂𑀤𑀲𑀗𑁆𑀔𑀸𑀢𑁂 𑀔𑀡𑀺𑀓𑀦𑀺𑀭𑁄𑀥𑁂𑀢𑀺 𑀅𑀢𑁆𑀣𑁄. 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀲𑀢𑀺𑀲𑀻𑀲𑁂𑀦 𑀜𑀸𑀡𑀫𑀸𑀳. 𑀏𑀢𑀲𑁆𑀫𑀺𑀁 𑀞𑀸𑀦𑁂𑀢𑀺 𑀉𑀧𑀓𑁆𑀓𑀺𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀉𑀤𑀬𑀩𑁆𑀩𑀬𑀜𑀸𑀡𑀲𑁆𑀲 𑀢𑀺𑀓𑁆𑀔𑀪𑀸𑀯𑀸𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀉𑀤𑀬𑀫𑁆𑀧𑀺 𑀫𑀼𑀜𑁆𑀘𑀺𑀢𑁆𑀯𑀸 𑀯𑀬𑀲𑁆𑀲𑁂𑀯 𑀫𑀦𑀲𑀺𑀓𑀸𑀭𑀓𑀸𑀮𑁂.

𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸𑀢𑀺 𑀭𑀽𑀧𑀯𑁂𑀤𑀦𑀸𑀤𑀺𑀆𑀭𑀫𑁆𑀫𑀡𑀁 𑀔𑀬𑀯𑀬𑀯𑀲𑁂𑀦𑁂𑀯 𑀧𑀝𑀺𑀲𑀗𑁆𑀔𑀸𑀬. 𑀬𑀓𑀸𑀭𑀮𑁄𑀧𑁂𑀦 𑀳𑀺 𑀦𑀺𑀤𑁆𑀤𑁂𑀲𑁄 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮, 𑁪𑁦𑁫) 𑀯𑀺𑀬. 𑀬𑀣𑀸𑀯𑀼𑀢𑁆𑀢𑀲𑁆𑀲 𑀯𑀸 𑀆𑀭𑀫𑁆𑀫𑀡𑀲𑁆𑀲 𑀔𑀬𑀯𑀬𑀪𑁂𑀤𑀯𑀲𑁂𑀦 𑀧𑀝𑀺𑀲𑀗𑁆𑀔𑀸 𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸. 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑁂𑀢𑀺 𑀬𑁄 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑁄, 𑀢𑀲𑁆𑀲 𑀅𑀦𑀼𑀧𑀲𑁆𑀲𑀦𑁂. 𑀧𑀜𑁆𑀜𑀸𑀢𑀺 𑀧𑀓𑀸𑀭𑀢𑁄 𑀚𑀸𑀦𑀦𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀇𑀤𑀸𑀦𑁂𑀯 𑀲𑀁𑀯𑀡𑁆𑀡𑀻𑀬𑀢𑀺.

𑁭𑁪𑁨. 𑀬𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀦𑁆𑀢𑀺 𑀭𑀽𑀧𑀁 𑀬𑀸𑀯 𑀚𑀭𑀸𑀫𑀭𑀡𑀦𑁆𑀢𑀺 𑀯𑀺𑀧𑀲𑁆𑀲𑀺𑀢𑀩𑁆𑀩𑀪𑀸𑀯𑁂𑀦 𑀕𑀳𑀺𑀢𑀁 𑀲𑀩𑁆𑀩𑀁 𑀲𑀗𑁆𑀔𑀸𑀭𑀕𑀢𑀫𑀸𑀳. 𑀧𑀝𑀺𑀲𑀗𑁆𑀔𑀸𑀦𑀁 𑀦𑀸𑀫 𑀚𑀸𑀦𑀦𑀁, 𑀢𑀜𑁆𑀘 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀪𑀗𑁆𑀕𑀢𑁄 𑀤𑀲𑁆𑀲𑀦𑀫𑁂𑀯𑀸𑀢𑀺 𑀆𑀳 ‘‘𑀚𑀸𑀦𑀺𑀢𑁆𑀯𑀸 𑀔𑀬𑀢𑁄 𑀯𑀬𑀢𑁄 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀢𑀲𑁆𑀲 𑀜𑀸𑀡𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀭𑀽𑀧𑀸𑀭𑀫𑁆𑀫𑀡𑀫𑁂𑀯 𑀭𑀽𑀧𑀸𑀭𑀫𑁆𑀫𑀡𑀢𑀸 𑀬𑀣𑀸 ‘‘𑀤𑁂𑀯𑁄 𑀏𑀯 𑀤𑁂𑀯𑀢𑀸’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀸𑀭𑀫𑁆𑀫𑀡𑀁 𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀭𑀽𑀧𑀸𑀭𑀫𑁆𑀫𑀡𑀢𑀸𑀢𑀺 𑀯𑀸 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸 𑀭𑀽𑀧𑀸𑀭𑀫𑁆𑀫𑀡𑀪𑀸𑀯𑁂’’𑀢𑀺 𑀆𑀳. 𑀅𑀧𑀭𑁂𑀦 𑀘𑀺𑀢𑁆𑀢𑁂𑀦 𑀪𑀗𑁆𑀕𑀁 𑀅𑀦𑀼𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀯𑀺𑀲𑀬𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀫𑀸𑀳. 𑀏𑀯𑀜𑁆𑀳𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸 𑀧𑀕𑀼𑀡𑀸 𑀳𑁄𑀢𑀺, 𑀆𑀭𑀫𑁆𑀫𑀡𑀜𑁆𑀘𑀲𑁆𑀲 𑀯𑀺𑀪𑀽𑀢𑀢𑀭𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀜𑀸𑀢𑀦𑁆𑀢𑀺 𑀆𑀭𑀫𑁆𑀫𑀡𑀫𑀸𑀳 𑀅𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀜𑀸𑀢𑀢𑁆𑀢𑀸. 𑀜𑀸𑀡𑀦𑁆𑀢𑀺 𑀅𑀦𑀼𑀧𑀲𑁆𑀲𑀦𑀸𑀜𑀸𑀡𑀁. 𑀉𑀪𑁄𑀧𑀺 𑀯𑀺𑀧𑀲𑁆𑀲𑀢𑀻𑀢𑀺 𑀢𑀤𑀼𑀪𑀬𑀫𑁆𑀧𑀺 𑀔𑀬𑀢𑁄 𑀯𑀬𑀢𑁄 𑀯𑀺𑀧𑀲𑁆𑀲𑀢𑀻𑀢𑀺. 𑀅𑀬𑀁 𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀭𑀽𑀧𑀲𑁆𑀲 𑀬𑀸𑀯 𑀚𑀭𑀸𑀫𑀭𑀡𑀲𑁆𑀲 𑀔𑀬𑀢𑁄 𑀯𑀬𑀢𑁄 𑀤𑀲𑁆𑀲𑀦𑀁 𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸𑀢𑀁, 𑀤𑀲𑁆𑀲𑀦𑀓𑀜𑀸𑀡𑀲𑁆𑀲 𑀔𑀬𑀢𑁄 𑀯𑀬𑀢𑁄 𑀤𑀲𑁆𑀲𑀦𑀁 𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸𑀬 𑀪𑀗𑁆𑀕𑀲𑁆𑀲 𑀅𑀦𑀼𑀧𑀲𑁆𑀲𑀦𑀦𑁆𑀢𑀺 𑀉𑀪𑀬𑀢𑁆𑀣 𑀧𑀜𑁆𑀜𑀸. 𑀧𑀼𑀭𑀺𑀫𑀁 𑀯𑀸 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄 𑀧𑀘𑁆𑀙𑀺𑀫𑀸𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀺𑀫𑀸 𑀏𑀯 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑁂 𑀜𑀸𑀡𑀦𑁆𑀢𑀺.

𑀏𑀢𑁆𑀣𑀸𑀢𑀺 ‘‘𑀢𑀲𑁆𑀲 𑀘𑀺𑀢𑁆𑀢𑀲𑁆𑀲…𑀧𑁂… 𑀪𑀗𑁆𑀕𑀁 𑀅𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀢𑁆𑀣. 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺. 𑀅𑀦𑀼-𑀲𑀤𑁆𑀤𑁄 ‘‘𑀪𑀺𑀬𑁆𑀬𑁄’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀢𑀻’’𑀢𑀺.

𑀇𑀥 𑀲𑀗𑁆𑀔𑀢𑀥𑀫𑁆𑀫𑁄 𑀦𑀸𑀫 𑀚𑀸𑀢𑀺𑀚𑀭𑀸𑀫𑀭𑀡𑀧𑀓𑀢𑀺𑀓𑁄, 𑀢𑀲𑁆𑀲 𑀚𑀸𑀢𑀺 𑀆𑀤𑀺𑀓𑁄𑀝𑀺, 𑀚𑀭𑀸 𑀫𑀚𑁆𑀛𑀺𑀫𑀓𑁄𑀝𑀺, 𑀫𑀭𑀡𑀁 𑀑𑀲𑀸𑀦𑀓𑁄𑀝𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀉𑀧𑁆𑀧𑀸𑀤𑀸𑀤𑀺𑀢𑀺𑀯𑀺𑀥𑀫𑁆𑀧𑀺 𑀲𑀗𑁆𑀔𑀢𑀮𑀓𑁆𑀔𑀡𑀢𑀸𑀬 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀢𑀣𑀸𑀧𑀺 𑀚𑀸𑀢𑀺𑀚𑀭𑀸𑀲𑀼 𑀤𑀺𑀝𑁆𑀞𑀸𑀲𑀼 𑀦 𑀢𑀣𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀧𑀸𑀓𑀝𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺 𑀬𑀣𑀸 𑀯𑀬𑀓𑁆𑀔𑀡𑁂𑀢𑀺 𑀆𑀳 ‘‘𑀪𑀗𑁆𑀕𑁄 𑀦𑀸𑀫 𑀅𑀦𑀺𑀘𑁆𑀘𑀢𑀸𑀬 𑀧𑀭𑀫𑀸 𑀓𑁄𑀝𑀻’’𑀢𑀺, 𑀉𑀢𑁆𑀢𑀫𑀸 𑀓𑁄𑀝𑀺 𑀧𑀭𑀺𑀬𑁄𑀲𑀸𑀦𑀓𑁄𑀝𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀚𑀭𑀸𑀥𑀫𑁆𑀫𑀁, 𑀫𑀭𑀡𑀥𑀫𑁆𑀫𑀫𑁂𑀯 𑀘 𑀚𑀸𑀬𑀢𑀻𑀢𑀺 𑀚𑀸𑀢𑀺 𑀅𑀦𑀺𑀘𑁆𑀘𑀢𑀸𑀬 𑀆𑀤𑀺 𑀓𑁄𑀝𑀺, 𑀢𑀣𑀸 𑀚𑀸𑀢𑀺𑀥𑀫𑁆𑀫𑀁, 𑀫𑀭𑀡𑀥𑀫𑁆𑀫𑀫𑁂𑀯 𑀘 𑀚𑀻𑀭𑀢𑀻𑀢𑀺 𑀚𑀭𑀸 𑀫𑀚𑁆𑀛𑀺𑀫𑀸 𑀓𑁄𑀝𑀺, 𑀚𑀸𑀢𑀺𑀥𑀫𑁆𑀫𑀁, 𑀚𑀭𑀸𑀥𑀫𑁆𑀫𑀫𑁂𑀯 𑀘 𑀪𑀺𑀚𑁆𑀚𑀢𑀻𑀢𑀺 𑀪𑀗𑁆𑀕𑁄 𑀧𑀭𑀫𑀸 𑀓𑁄𑀝𑀻𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺 𑀦 𑀓𑀮𑀸𑀧𑀢𑁄 𑀲𑀫𑁆𑀫𑀲𑀦𑁆𑀢𑁄 𑀯𑀺𑀬 ‘‘𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸’’𑀢𑀺 (𑀧𑀝𑀺. 𑀫. 𑁧.𑁪𑁮) 𑀅𑀦𑀼𑀫𑀸𑀦𑀯𑀲𑁂𑀦, 𑀦𑀸𑀧𑀺 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀯𑀺𑀬 𑀉𑀤𑀬𑀕𑁆𑀕𑀳𑀡𑀧𑀼𑀩𑁆𑀩𑀓𑀯𑀬𑀤𑀲𑁆𑀲𑀦𑀯𑀲𑁂𑀦, 𑀅𑀣 𑀔𑁄 𑀉𑀤𑀬𑀩𑁆𑀩𑀬𑀜𑀸𑀡𑀸𑀦𑀼𑀪𑀸𑀯𑁂𑀦 𑀧𑀘𑁆𑀘𑀓𑁆𑀔𑀢𑁄 𑀉𑀧𑀝𑁆𑀞𑀺𑀢𑁂𑀲𑀼 𑀉𑀤𑀬𑀯𑀬𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀉𑀤𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀪𑀗𑁆𑀕𑀤𑀲𑁆𑀲𑀦𑀯𑀲𑁂𑀦𑁂𑀯 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀏𑀯𑀁 𑀅𑀦𑀼𑀧𑀲𑁆𑀲𑀢𑁄 𑀧𑀦𑀲𑁆𑀲 𑀦𑀺𑀘𑁆𑀘𑀕𑀸𑀳𑀲𑁆𑀲 𑀮𑁂𑀲𑁄𑀧𑀺 𑀦𑀢𑁆𑀣𑀻𑀢𑀺 𑀆𑀳 ‘‘𑀦𑁄 𑀦𑀺𑀘𑁆𑀘𑀢𑁄’’𑀢𑀺. 𑀢𑀣𑀸 𑀳𑁂𑀲 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 ‘‘𑀅𑀦𑀺𑀘𑁆𑀘𑀢𑁄 𑀏𑀯 𑀅𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀯-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀢𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦𑁄 𑀦𑀺𑀘𑁆𑀘𑀢𑁄’’𑀢𑀺 𑀯𑀼𑀢𑁆𑀢𑀁. 𑀦 𑀘𑁂𑀢𑁆𑀣 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑀸𑀤𑀺𑀦𑀺𑀯𑀢𑁆𑀢𑀦𑀫𑀸𑀲𑀗𑁆𑀓𑀺𑀢𑀩𑁆𑀩𑀁 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀧𑀭𑀢𑁆𑀢𑀸, 𑀏𑀯-𑀓𑀸𑀭𑀲𑁆𑀲 𑀉𑀧𑀭𑀺 𑀤𑁂𑀲𑀦𑀸𑀭𑀼𑀴𑁆𑀳𑀢𑁆𑀢𑀸 𑀘 𑀢𑀸𑀲𑀁. 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀦𑀺𑀘𑁆𑀘𑀢𑁄 𑀢𑀸𑀯 𑀅𑀦𑀼𑀧𑀲𑁆𑀲𑀦𑀸 𑀪𑀗𑁆𑀕𑀸𑀦𑀼𑀧𑀲𑁆𑀲𑀓𑀲𑁆𑀲 𑀬𑀼𑀢𑁆𑀢𑀸 ‘‘𑀪𑀗𑁆𑀕𑁄 𑀦𑀸𑀫 𑀅𑀦𑀺𑀘𑁆𑀘𑀢𑀸𑀬 𑀧𑀭𑀫𑀸 𑀓𑁄𑀝𑀻’’𑀢𑀺, 𑀤𑀼𑀓𑁆𑀔𑀸𑀤𑀺𑀢𑁄 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀲𑁆𑀲 𑀤𑀼𑀓𑁆𑀔𑀢𑁆𑀢𑀸’’𑀢𑀺𑀆𑀤𑀺. 𑀏𑀢𑁂𑀦 𑀬𑀁 𑀅𑀦𑀺𑀘𑁆𑀘𑀁, 𑀢𑀁 𑀏𑀓𑀦𑁆𑀢𑀢𑁄 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸, 𑀢𑀢𑁄 𑀘 𑀦 𑀅𑀪𑀺𑀦𑀦𑁆𑀤𑀦𑀺𑀬𑀸𑀤𑀺𑀭𑀽𑀧𑀁. 𑀢𑀲𑁆𑀫𑀸 𑀉𑀧𑀭𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑁄 𑀜𑀸𑀡𑀧𑀭𑀺𑀓𑀫𑁆𑀫𑀢𑁆𑀣𑀜𑁆𑀘 𑀇𑀢𑀭𑀸𑀲𑀫𑁆𑀧𑀺 𑀙𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀅𑀦𑀼𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄𑀢𑀺𑀆𑀤𑀺𑀦𑀸 𑀯𑀺𑀲𑀼𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀪𑀗𑁆𑀕𑀤𑀲𑁆𑀲𑀦𑁂𑀦𑁂𑀯 𑀲𑀩𑁆𑀩𑀁 𑀤𑀺𑀝𑁆𑀞𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀁 𑀬𑀼𑀢𑁆𑀢𑀁, 𑀢𑀢𑁄 𑀧𑀦 𑀧𑀼𑀩𑁆𑀩𑀪𑀸𑀕𑁂 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀸 𑀅𑀦𑀼𑀧𑀲𑁆𑀲𑀦𑀸 𑀇𑀘𑁆𑀙𑀺𑀢𑀩𑁆𑀩𑀸𑀯. 𑀅𑀜𑁆𑀜𑀣𑀸 ‘‘𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑀸 (𑀧𑀝𑀺. 𑀫. 𑁧.𑁫𑁧) 𑀧𑀸𑀴𑀺, ‘‘𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀢𑀻’’𑀢𑀺 𑀆𑀕𑀢𑀸 𑀢𑀲𑁆𑀲𑀸 𑀅𑀝𑁆𑀞𑀓𑀣𑀸 𑀘 𑀯𑀺𑀭𑁄𑀥𑀺𑀢𑀸 𑀲𑀺𑀬𑀸. 𑀢𑀤𑁂𑀯 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁.

𑀦 𑀢𑀁 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀢𑀁 𑀲𑀗𑁆𑀔𑀸𑀭𑀕𑀢𑀁 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀯𑀲𑁂𑀦 ‘‘𑀏𑀢𑀁 𑀫𑀫, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀦 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁. 𑀦 𑀢𑀢𑁆𑀣 𑀭𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀢𑀢𑁆𑀣 𑀲𑀗𑁆𑀔𑀸𑀭𑀕𑀢𑁂 𑀭𑀜𑁆𑀚𑀦𑀯𑀲𑁂𑀦 𑀦 𑀧𑀯𑀢𑁆𑀢𑀺𑀢𑀩𑁆𑀩𑀁, 𑀓𑀸𑀫𑀭𑀸𑀕𑁄, 𑀪𑀯𑀭𑀸𑀕𑁄 𑀯𑀸 𑀦 𑀧𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀭𑀸𑀕𑀁 𑀦𑀺𑀭𑁄𑀥𑁂𑀢𑀻𑀢𑀺 𑀭𑀸𑀕𑀁 𑀯𑀺𑀓𑁆𑀔𑀫𑁆𑀪𑀦𑀦𑀺𑀭𑁄𑀥𑀁 𑀧𑀸𑀧𑁂𑀢𑀺, 𑀯𑀺𑀓𑁆𑀔𑀫𑁆𑀪𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀮𑁄𑀓𑀺𑀓𑁂𑀦𑁂𑀯 𑀢𑀸𑀯 𑀜𑀸𑀡𑁂𑀦𑀸’’𑀢𑀺. 𑀲𑀢𑀺 𑀘 𑀯𑀺𑀓𑁆𑀔𑀫𑁆𑀪𑀦𑁂 𑀓𑀣𑀁 𑀲𑀫𑀼𑀤𑀬𑁄𑀢𑀺 𑀆𑀳 ‘‘𑀦𑁄 𑀲𑀫𑀼𑀤𑁂𑀢𑀺, 𑀲𑀫𑀼𑀤𑀬𑀁 𑀦 𑀓𑀭𑁄𑀢𑀻’’𑀢𑀺.

𑀏𑀯𑀁 𑀯𑀺𑀭𑀢𑁆𑀢𑁄𑀢𑀺 𑀏𑀯𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀦𑀼𑀲𑀸𑀭𑁂𑀦 𑀯𑀺𑀭𑀢𑁆𑀢𑁄. 𑀬𑀣𑀸 𑀤𑀺𑀝𑁆𑀞𑀁 𑀲𑀫𑁆𑀧𑀢𑀺 𑀉𑀧𑀝𑁆𑀞𑀺𑀢𑀁 𑀲𑀗𑁆𑀔𑀸𑀭𑀕𑀢𑀁 𑀦𑀺𑀭𑁄𑀥𑁂𑀢𑀺 𑀦𑀺𑀭𑁄𑀥𑀁 𑀫𑀦𑀲𑀺 𑀓𑀭𑁄𑀢𑀺, 𑀅𑀤𑀺𑀝𑁆𑀞𑀫𑁆𑀧𑀺 𑀅𑀢𑀻𑀢𑀸𑀦𑀸𑀕𑀢𑀁 𑀅𑀦𑁆𑀯𑀬𑀜𑀸𑀡𑀯𑀲𑁂𑀦 𑀬𑀣𑀸 𑀇𑀤𑀁 𑀏𑀢𑀭𑀳𑀺, 𑀏𑀯𑀁 𑀇𑀢𑀭𑁂𑀧𑀻𑀢𑀺 𑀅𑀦𑀼𑀫𑀺𑀦𑀦𑁆𑀢𑁄 𑀦𑀺𑀭𑁄𑀥𑁂𑀢𑀺 𑀫𑀦𑀲𑀺𑀓𑀢𑀲𑁆𑀲𑀸𑀧𑀺 𑀦𑀺𑀭𑁄𑀥𑀁 𑀓𑀭𑁄𑀢𑀺. 𑀦𑁄 𑀲𑀫𑀼𑀤𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄, 𑀦𑁄 𑀲𑀫𑀼𑀤𑀬𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀧𑀝𑀺𑀧𑀦𑁆𑀦𑁄𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀝𑀺𑀧𑀦𑁆𑀦𑁄. 𑀲𑀤𑁆𑀥𑀺𑀁 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀓𑀺𑀮𑁂𑀲𑀸𑀦𑀁 𑀧𑀭𑀺𑀘𑁆𑀘𑀚𑀦𑀢𑁄𑀢𑀺 𑀔𑀦𑁆𑀥𑁂𑀳𑀺, 𑀅𑀪𑀺𑀲𑀗𑁆𑀔𑀸𑀭𑁂𑀳𑀺 𑀘 𑀲𑀳 𑀓𑀺𑀮𑁂𑀲𑀸𑀦𑀁 𑀧𑀚𑀳𑀦𑀢𑁄. 𑀓𑀺𑀮𑁂𑀲𑁂 𑀳𑀺 𑀧𑀚𑀳𑀦𑁆𑀢𑁄 𑀢𑀦𑁆𑀦𑀺𑀫𑀺𑀢𑁆𑀢𑀓𑀓𑀫𑁆𑀫𑀁, 𑀢𑀢𑁄 𑀦𑀺𑀩𑁆𑀩𑀢𑁆𑀢𑀦𑀓𑁂 𑀔𑀦𑁆𑀥𑁂 𑀘 𑀧𑀚𑀳𑀢𑀺 𑀦𑀸𑀫. 𑀲𑀗𑁆𑀔𑀢𑀤𑁄𑀲𑀤𑀲𑁆𑀲𑀦𑁂𑀦𑀸𑀢𑀺 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀅𑀦𑀺𑀘𑁆𑀘𑀤𑀼𑀓𑁆𑀔𑀢𑀸𑀤𑀺𑀆𑀤𑀻𑀦𑀯𑀤𑀲𑁆𑀲𑀦𑁂𑀦. 𑀢𑀩𑁆𑀩𑀺𑀧𑀭𑀻𑀢𑁂𑀢𑀺 𑀦𑀺𑀘𑁆𑀘𑀲𑀼𑀔𑀸𑀤𑀺𑀲𑀪𑀸𑀯𑁂. 𑀢𑀦𑁆𑀦𑀺𑀦𑁆𑀦𑀢𑀸𑀬𑀸𑀢𑀺 𑀢𑀤𑀥𑀺𑀫𑀼𑀢𑁆𑀢𑀢𑀸𑀬. 𑀧𑀝𑀺𑀦𑀺𑀲𑁆𑀲𑀕𑁆𑀕𑀲𑀤𑁆𑀤𑁄 𑀧𑀭𑀺𑀘𑁆𑀘𑀸𑀕𑀢𑁆𑀣𑁄, 𑀧𑀓𑁆𑀔𑀦𑁆𑀤𑀦𑀢𑁆𑀣𑁄 𑀘𑀸𑀢𑀺 𑀧𑀝𑀺𑀦𑀺𑀲𑁆𑀲𑀕𑁆𑀕𑀲𑁆𑀲 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀓𑁆𑀔𑀦𑁆𑀤𑀦𑀁 𑀅𑀥𑀺𑀫𑀼𑀘𑁆𑀘𑀦𑀁. 𑀬𑀣𑀸𑀯𑀼𑀢𑁆𑀢𑁂𑀦𑀸𑀢𑀺 𑀢𑀤𑀗𑁆𑀕𑀸𑀤𑀺𑀧𑁆𑀧𑀳𑀸𑀦𑀧𑁆𑀧𑀓𑀸𑀭𑁂𑀦, 𑀢𑀦𑁆𑀦𑀺𑀦𑁆𑀦𑀧𑁆𑀧𑀓𑀸𑀭𑁂𑀦 𑀘. 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦𑀸𑀢𑀺 𑀉𑀧𑁆𑀧𑀸𑀤𑀦𑀯𑀲𑁂𑀦. 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀳𑀺 𑀓𑀺𑀮𑁂𑀲𑁂 𑀆𑀤𑀺𑀬𑀢𑀻𑀢𑀺 𑀢𑁂 𑀅𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀓𑀺𑀮𑁂𑀲𑁂 𑀦 𑀆𑀤𑀺𑀬𑀢𑀺 𑀦𑀸𑀫. 𑀅𑀤𑁄𑀲𑀤𑀲𑁆𑀲𑀺𑀢𑀸𑀯𑀲𑁂𑀦𑀸𑀢𑀺 𑀤𑁄𑀲𑀸𑀦𑀁 𑀅𑀤𑀲𑁆𑀲𑀸𑀯𑀺𑀪𑀸𑀯𑁂𑀦. 𑀲𑀗𑁆𑀔𑀢𑀸𑀭𑀫𑁆𑀫𑀡𑀁 𑀆𑀤𑀺𑀬𑀢𑀻𑀢𑀺 𑀬𑁄𑀚𑀦𑀸. 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀸𑀬 𑀳𑀺 𑀲𑀗𑁆𑀔𑀸𑀭𑁂 𑀆𑀤𑀺𑀬𑀢𑀻𑀢𑀺 𑀆𑀤𑀻𑀦𑀯𑀤𑀲𑁆𑀲𑀺𑀢𑀸𑀬 𑀢𑁂 𑀦 𑀆𑀤𑀺𑀬𑀢𑀺 𑀦 𑀕𑀡𑁆𑀳𑀸𑀢𑀺.

𑁭𑁪𑁩. 𑀅𑀲𑁆𑀲𑀸𑀢𑀺 𑀬𑁄𑀕𑀺𑀦𑁄. 𑀢𑁂𑀳𑀺 𑀜𑀸𑀡𑁂𑀳𑀻𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀜𑀸𑀡𑁂𑀳𑀺. 𑀢𑀦𑁆𑀢𑀺 𑀧𑀳𑀸𑀦𑀁. 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀦𑀺𑀘𑁆𑀘𑀕𑀸𑀳𑀁, 𑀲𑀜𑁆𑀜𑀸𑀲𑀻𑀲𑁂𑀦 𑀦𑀺𑀤𑁆𑀤𑁂𑀲𑁄. 𑀲𑀼𑀔𑀲𑀜𑁆𑀜𑀁 𑀅𑀢𑁆𑀢𑀲𑀜𑁆𑀜𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀧𑁆𑀧𑀻𑀢𑀺𑀓𑀁 𑀢𑀡𑁆𑀳𑀦𑁆𑀢𑀺 𑀲𑀉𑀧𑁆𑀧𑀺𑀮𑀸𑀯𑀺𑀢𑀁 𑀅𑀪𑀺𑀧𑀢𑁆𑀣𑀦𑀁.

𑁭𑁪𑁪. ‘‘𑀯𑀢𑁆𑀣𑀼𑀲𑀗𑁆𑀓𑀫𑀦𑀸’’𑀢𑀺 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 ‘‘𑀯𑀢𑁆𑀣𑀽’’𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀽𑀧𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀗𑁆𑀓𑀫𑀦𑀸𑀢𑀺 𑀯𑀺𑀧𑀲𑁆𑀲𑀦𑀸𑀪𑀸𑀯𑀲𑀸𑀫𑀜𑁆𑀜𑀢𑁄 𑀏𑀓𑀢𑁆𑀢𑀦𑀬𑁂𑀦 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀅𑀜𑁆𑀜𑀤𑁂𑀯 𑀭𑀽𑀧𑀪𑀗𑁆𑀕𑀯𑀺𑀲𑀬𑀁 𑀜𑀸𑀡𑀁, 𑀅𑀜𑁆𑀜𑀤𑁂𑀯 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀪𑀗𑁆𑀕𑀯𑀺𑀲𑀬𑀦𑁆𑀢𑀺 𑀓𑀼𑀢𑁄 𑀲𑀗𑁆𑀓𑀫𑀦𑀸. 𑀧𑀜𑁆𑀜𑀸𑀯𑀺𑀯𑀝𑁆𑀝𑀦𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀜𑀸𑀬𑀸𑀢𑀺 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬. 𑀯𑀬𑀲𑁆𑀲𑁂𑀯 𑀕𑀳𑀡𑀯𑀲𑁂𑀦 𑀉𑀤𑀬𑀢𑁄 𑀯𑀺𑀦𑀺𑀯𑀝𑁆𑀝𑀦𑀸. 𑀢𑁂𑀦𑀸𑀳 ‘‘𑀉𑀤𑀬𑀁 𑀧𑀳𑀸𑀬 𑀯𑀬𑁂 𑀲𑀦𑁆𑀢𑀺𑀝𑁆𑀞𑀦𑀸’’𑀢𑀺. ‘‘𑀅𑀦𑀦𑁆𑀢𑀭𑀫𑁂𑀯 𑀆𑀯𑀚𑁆𑀚𑀦𑀲𑀫𑀢𑁆𑀣𑀢𑀸’’𑀢𑀺 𑀇𑀫𑀺𑀦𑀸 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀧𑀕𑀼𑀡𑀩𑀮𑀯𑀪𑀸𑀯𑀫𑀸𑀳.

𑁭𑁪𑁫. 𑀉𑀪𑁄𑀢𑀺 𑀤𑀺𑀝𑁆𑀞𑀸𑀤𑀺𑀝𑁆𑀞𑀪𑀸𑀯𑁂𑀦 𑀤𑁆𑀯𑁂𑀧𑀺 𑀆𑀭𑀫𑁆𑀫𑀡𑀸𑀦𑀺. 𑀏𑀓𑀯𑀯𑀢𑁆𑀣𑀦𑀸𑀢𑀺 𑀔𑀡𑀪𑀗𑁆𑀕𑀼𑀭𑀢𑀸𑀬 𑀲𑀫𑀸𑀦𑀸𑀢𑀺 𑀯𑀯𑀢𑁆𑀣𑀸𑀧𑀦𑀸.

𑀲𑀁𑀯𑀺𑀚𑁆𑀚𑀫𑀸𑀦𑀫𑁆𑀳𑀻𑀢𑀺 𑀧𑀘𑁆𑀘𑀓𑁆𑀔𑀢𑁄 𑀉𑀧𑀮𑀩𑁆𑀪𑀫𑀸𑀦𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂. 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑁄𑀢𑀺 𑀪𑀗𑁆𑀕𑀤𑀲𑁆𑀲𑀦𑀲𑁆𑀲 𑀧𑀭𑀺𑀩𑀦𑁆𑀥𑀯𑀺𑀥𑀫𑀦𑁂𑀦 𑀯𑀺𑀲𑀼𑀤𑁆𑀥𑀜𑀸𑀡𑁄, 𑀲𑀼𑀯𑀺𑀲𑀼𑀤𑁆𑀥𑀪𑀗𑁆𑀕𑀤𑀲𑁆𑀲𑀦𑁄𑀢𑀺 𑀅𑀢𑁆𑀣𑁄. 𑀢𑀤𑀦𑁆𑀯𑀬𑀁 𑀦𑁂𑀢𑀻𑀢𑀺 𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀗𑁆𑀔𑀸𑀭𑀪𑀗𑁆𑀕𑀤𑀲𑁆𑀲𑀺𑀦𑁄 𑀜𑀸𑀡𑀲𑁆𑀲 𑀅𑀦𑁆𑀯𑀬𑀁 𑀅𑀦𑀼𑀕𑀢𑀪𑀽𑀢𑀁 𑀜𑀸𑀡𑀁 𑀧𑀯𑀢𑁆𑀢𑁂𑀢𑀺. 𑀓𑀢𑁆𑀣 𑀧𑀦 𑀧𑀯𑀢𑁆𑀢𑁂𑀢𑀻𑀢𑀺 𑀆𑀳 ‘‘𑀅𑀢𑀻𑀢𑀦𑀸𑀕𑀢𑁂’’𑀢𑀺, 𑀅𑀢𑀻𑀢𑁂, 𑀅𑀦𑀸𑀕𑀢𑁂 𑀘 𑀲𑀗𑁆𑀔𑀸𑀭𑀕𑀢𑁂. 𑀲𑀩𑁆𑀩𑁂𑀧𑀻𑀢𑀺𑀆𑀤𑀺 𑀢𑀲𑁆𑀲 𑀧𑀯𑀢𑁆𑀢𑀦𑀸𑀓𑀸𑀭𑀤𑀲𑁆𑀲𑀦𑀁.

𑀪𑀗𑁆𑀕𑀲𑀗𑁆𑀔𑀸𑀢𑁂 𑀦𑀺𑀭𑁄𑀥𑁂, 𑀦 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲𑀸𑀢𑀺 𑀬𑀸 𑀆𑀭𑀫𑁆𑀫𑀡𑀦𑁆𑀯𑀬𑁂𑀦 𑀉𑀪𑁄 𑀤𑀺𑀝𑁆𑀞𑀸𑀤𑀺𑀝𑁆𑀞𑁂 𑀔𑀡𑀪𑀗𑁆𑀕𑀼𑀭𑀢𑀸𑀬 𑀏𑀓𑀪𑀸𑀯𑁂𑀦 𑀯𑀯𑀢𑁆𑀣𑀸𑀧𑀦𑀸, 𑀏𑀲𑀸 𑀯𑀬𑀮𑀓𑁆𑀔𑀡𑁂 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑁂 𑀯𑀺𑀧𑀲𑁆𑀲𑀦𑀸 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀢𑀺 𑀅𑀢𑁆𑀣𑁄.

𑁭𑁪𑁬. 𑀆𑀭𑀫𑁆𑀫𑀡𑀜𑁆𑀘 𑀧𑀝𑀺𑀲𑀗𑁆𑀔𑀸𑀢𑀺𑀆𑀤𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑁆𑀢𑀸 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀤𑀴𑁆𑀳𑀻𑀓𑀭𑀡𑀁. 𑀢𑀬𑀺𑀤𑀁 𑀪𑀗𑁆𑀕𑀤𑀲𑁆𑀲𑀦𑀁 𑀲𑀗𑁆𑀔𑀸𑀭𑀸𑀦𑀁 𑀅𑀯𑀲𑀯𑀢𑁆𑀢𑀦𑀸𑀯𑀩𑁄𑀥𑀦𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀧𑀝𑀺𑀯𑁂𑀥𑀸𑀬𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀜𑁆𑀜𑀢𑁄 𑀘 𑀉𑀧𑀝𑁆𑀞𑀸𑀦’’𑀦𑁆𑀢𑀺 𑀆𑀳. 𑀆𑀭𑀫𑁆𑀫𑀡𑀲𑁆𑀲 𑀳𑀺 𑀪𑀗𑁆𑀕𑀸𑀭𑀫𑁆𑀫𑀡𑀘𑀺𑀢𑁆𑀢𑀲𑁆𑀲 𑀘 𑀪𑀗𑁆𑀕𑀫𑀦𑀼𑀧𑀲𑁆𑀲𑀢𑁄 𑀯𑀺𑀲𑁂𑀲𑀢𑁄 𑀲𑀗𑁆𑀔𑀸𑀭𑀸 𑀲𑀼𑀜𑁆𑀜𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯’’𑀦𑁆𑀢𑀺𑀆𑀤𑀺.

𑀦 𑀘𑀢𑁆𑀣𑀺 𑀅𑀜𑁆𑀜𑁄𑀢𑀺 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀜𑁆𑀜𑁄 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑁄 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺. 𑀢𑁂𑀲𑀁 𑀔𑀬𑀁 𑀧𑀲𑁆𑀲𑀢𑀻𑀢𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀔𑀡𑁂 𑀔𑀡𑁂 𑀉𑀧𑀝𑁆𑀞𑀳𑀦𑁆𑀢𑀁 𑀪𑀗𑁆𑀕𑀁 𑀧𑀲𑁆𑀲𑀢𑀺. 𑀬𑀣𑀸𑀯𑀼𑀢𑁆𑀢𑀸𑀬 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑁆𑀧𑀫𑀢𑁆𑀢𑁄. 𑀬𑀣𑀸 𑀓𑀺𑀁? 𑀫𑀡𑀺𑀁𑀯 𑀯𑀺𑀚𑁆𑀛𑀁 𑀯𑀚𑀺𑀭𑁂𑀦 𑀬𑁄𑀦𑀺𑀲𑁄 𑀬𑀣𑀸 𑀦𑀸𑀫 𑀓𑀼𑀲𑀮𑁄 𑀧𑀼𑀭𑀺𑀲𑁄 𑀉𑀧𑀸𑀬𑁂𑀦 𑀫𑀡𑀺𑀁 𑀯𑀺𑀚𑁆𑀛𑀦𑁆𑀢𑁄 𑀫𑀡𑀺𑀲𑁆𑀲 𑀙𑀺𑀤𑁆𑀤𑀫𑁂𑀯 𑀧𑀲𑁆𑀲𑀢𑀺 𑀫𑀦𑀲𑀺 𑀓𑀭𑁄𑀢𑀺, 𑀦 𑀫𑀡𑀺𑀲𑁆𑀲 𑀯𑀡𑁆𑀡𑀸𑀤𑀺𑀁, 𑀏𑀯𑀫𑁂𑀯 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑀦𑁆𑀢𑀭𑀁 𑀪𑀗𑁆𑀕𑀫𑁂𑀯 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺, 𑀦 𑀲𑀗𑁆𑀔𑀸𑀭𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀯𑀸 𑀯𑀚𑀺𑀭𑁂𑀦 𑀫𑀡𑀺𑀁 𑀯𑀺𑀚𑁆𑀛𑀦𑁆𑀢𑀲𑁆𑀲 𑀯𑀺𑀤𑁆𑀥𑀝𑁆𑀞𑀸𑀦𑀁 𑀦 𑀧𑀼𑀦 𑀭𑀼𑀳𑀢𑀺, 𑀏𑀯𑀁 𑀯𑀚𑀺𑀭𑀲𑀤𑀺𑀲𑁂𑀦 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀦 𑀪𑀗𑁆𑀕𑁂 𑀤𑀺𑀝𑁆𑀞𑁂 𑀦 𑀧𑀼𑀦 𑀦𑀺𑀘𑁆𑀘𑀕𑀸𑀳𑁄 𑀭𑀼𑀳𑀢𑀺, 𑀏𑀯𑀁 𑀪𑀗𑁆𑀕𑀫𑁂𑀯 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀬𑀸 𑀘 𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸𑀢𑀺 ‘‘𑀭𑀽𑀧𑀸𑀭𑀫𑁆𑀫𑀡𑀢𑀸 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀢𑀺, 𑀢𑀁 𑀆𑀭𑀫𑁆𑀫𑀡𑀁 𑀧𑀝𑀺𑀲𑀗𑁆𑀔𑀸’’𑀢𑀺 (𑀧𑀝𑀺. 𑀫. 𑁧.𑁫𑁧) 𑀏𑀯𑀫𑀸𑀕𑀢𑀸 𑀬𑀸 𑀘 𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸, ‘‘𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀁 𑀅𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀬𑀸 𑀘 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸, ‘‘𑀲𑀗𑁆𑀔𑀸𑀭𑀸𑀯 𑀪𑀺𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀪𑁂𑀤𑁄 𑀫𑀭𑀡𑀁, 𑀦 𑀅𑀜𑁆𑀜𑁄 𑀓𑁄𑀘𑀺 𑀅𑀢𑁆𑀣𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀬𑀜𑁆𑀘 𑀲𑀼𑀜𑁆𑀜𑀢𑁄 𑀉𑀧𑀝𑁆𑀞𑀸𑀦𑀁, 𑀅𑀬𑀁 𑀏𑀯𑀁 𑀢𑀺𑀥𑀸 𑀯𑀼𑀢𑁆𑀢𑀸𑀧𑀺 𑀅𑀥𑀺𑀧𑀜𑁆𑀜𑀸𑀯𑀺𑀧𑀲𑁆𑀲𑀦𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑁭𑁪𑁭. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀲𑀽𑀢𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀼. 𑀦𑀺𑀩𑁆𑀩𑀺𑀤𑀸𑀤𑀻𑀲𑀽𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀦𑀺𑀭𑁄𑀥𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀲𑀼. 𑀢𑀬𑁄 𑀉𑀧𑀝𑁆𑀞𑀸𑀦𑁂𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁂 𑀉𑀧𑀝𑁆𑀞𑀸𑀦𑁂. 𑀔𑀬𑀢𑁄 𑀯𑀬𑀢𑁄 𑀉𑀧𑀝𑁆𑀞𑀸𑀦𑀜𑁆𑀳𑀺 𑀅𑀦𑀺𑀘𑁆𑀘𑀢𑁄 𑀉𑀧𑀝𑁆𑀞𑀸𑀦𑀁, 𑀪𑀬𑀢𑁄 𑀉𑀧𑀝𑁆𑀞𑀸𑀦𑀁 𑀤𑀼𑀓𑁆𑀔𑀢𑁄, 𑀲𑀼𑀜𑁆𑀜𑀢𑁄 𑀉𑀧𑀝𑁆𑀞𑀸𑀦𑀁 𑀅𑀦𑀢𑁆𑀢𑀢𑁄𑀢𑀺. 𑀤𑀺𑀝𑁆𑀞𑀻𑀲𑀽𑀢𑀺 𑀤𑀺𑀝𑁆𑀞𑀺𑀦𑀺𑀫𑀺𑀢𑁆𑀢𑀁 𑀦 𑀯𑁂𑀥𑀢𑀺. 𑀢𑀸 𑀳𑀺 𑀅𑀲𑀁𑀳𑀻𑀭𑀢𑀸𑀬 𑀦 𑀘𑀮𑀢𑀺.

𑁭𑁪𑁮. 𑀤𑀼𑀩𑁆𑀩𑀮𑀪𑀸𑀚𑀦𑀲𑁆𑀲 𑀯𑀺𑀬𑀸𑀢𑀺 𑀢𑀺𑀦𑁆𑀢𑀆𑀫𑀫𑀢𑁆𑀢𑀺𑀓𑀸𑀪𑀸𑀚𑀦𑀲𑁆𑀲 𑀯𑀺𑀬 𑀪𑁂𑀤𑀫𑁂𑀯 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀤𑀼𑀩𑁆𑀩𑀮𑀪𑀸𑀚𑀦𑀽𑀧𑀫𑀸 𑀲𑀭𑀲𑀪𑀺𑀤𑀼𑀭𑀢𑀸𑀤𑀲𑁆𑀲𑀦𑀢𑁆𑀣𑀁, 𑀯𑀺𑀧𑁆𑀧𑀓𑀺𑀭𑀺𑀬𑀫𑀸𑀦𑀲𑀼𑀔𑀼𑀫𑀭𑀚𑀽𑀧𑀫𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀩𑀦𑁆𑀥𑀢𑀸𑀤𑀲𑁆𑀲𑀦𑀢𑁆𑀣𑀁, 𑀪𑀺𑀚𑁆𑀚𑀺𑀬𑀫𑀸𑀦𑀢𑀺𑀮𑀽𑀧𑀫𑀸 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀪𑁂𑀤𑀫𑁂𑀯𑀸𑀢𑀺 𑀯𑀺𑀦𑀸𑀲𑀫𑁂𑀯 𑀧𑀲𑁆𑀲𑀢𑀺 𑀉𑀧𑁆𑀧𑀸𑀤𑀸𑀤𑀻𑀦𑀁 𑀅𑀕𑁆𑀕𑀳𑀡𑀢𑁄. 𑀏𑀯𑀫𑁂𑀯𑀸𑀢𑀺 𑀬𑀣𑀸 𑀉𑀤𑀓𑀩𑀼𑀩𑁆𑀩𑀼𑀴𑀓𑀸𑀦𑀺 𑀉𑀤𑀓𑀢𑀮𑀸𑀤𑀺𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸𑀦𑀺 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸𑀦𑀺 𑀲𑀻𑀖𑀁 𑀲𑀻𑀖𑀁 𑀪𑀺𑀚𑁆𑀚𑀦𑁆𑀢𑀺, 𑀏𑀯𑀫𑁂𑀯 𑀲𑀩𑁆𑀩𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀔𑀡𑀝𑁆𑀞𑀺𑀢𑀺𑀓𑀸 𑀲𑀻𑀖𑀁 𑀲𑀻𑀖𑀁 𑀪𑀺𑀚𑁆𑀚𑀦𑁆𑀢𑀻𑀢𑀺 𑀪𑁂𑀤𑀫𑁂𑀯 𑀧𑀲𑁆𑀲𑀢𑀺. 𑀢𑀼𑀭𑀺𑀢𑀢𑀼𑀭𑀺𑀢𑀜𑁆𑀳𑀺 𑀦𑁂𑀲𑀁 𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀪𑀺𑀚𑁆𑀚𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀻’’𑀢𑀺 𑀆𑀫𑁂𑀟𑀺𑀢𑀯𑀘𑀦𑀁.

𑀫𑀭𑀻𑀘𑀺𑀧𑀺 𑀇𑀢𑁆𑀢𑀭𑀓𑀸𑀮𑀺𑀓𑀸𑀯, 𑀦𑀺𑀲𑁆𑀲𑀬𑀧𑀩𑀦𑁆𑀥𑀯𑀲𑁂𑀦 𑀧𑀦 𑀘𑀺𑀭𑀢𑀭𑀼𑀧𑀝𑁆𑀞𑀸𑀦𑀦𑁆𑀢𑀺 ‘‘𑀬𑀣𑀸 𑀧𑀲𑁆𑀲𑁂 𑀫𑀭𑀻𑀘𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀅𑀬𑀸𑀣𑀸𑀯𑀼𑀧𑀝𑁆𑀞𑀸𑀦𑀢𑁄𑀯. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀮𑁄𑀓𑀁. 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀺 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦 𑀧𑀼𑀦𑀩𑁆𑀪𑀯𑀸𑀪𑀸𑀯𑀢𑁄.

𑁭𑁪𑁯. 𑀪𑀯𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀦𑁆𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀁. 𑀦 𑀳𑀺 𑀦𑀺𑀭𑀦𑁆𑀢𑀭𑀁 𑀪𑀗𑁆𑀕𑀫𑁂𑀯 𑀧𑀲𑁆𑀲𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀅𑀯𑀲𑀭𑁄 𑀅𑀢𑁆𑀣𑀺. 𑀢𑀢𑁄 𑀏𑀯 𑀚𑀻𑀯𑀺𑀢𑁂 𑀦𑀺𑀭𑀸𑀮𑀬𑀢𑁆𑀢𑀸 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀧𑀭𑀺𑀘𑁆𑀘𑀸𑀕𑁄. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁 𑀭𑀢𑁆𑀢𑀺𑀦𑁆𑀤𑀺𑀯𑀁. 𑀪𑀸𑀯𑀦𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀸. 𑀇𑀘𑁆𑀙𑀸𑀘𑀸𑀭𑀸𑀦𑀁 𑀤𑀽𑀭𑀻𑀪𑀸𑀯𑀢𑁄 𑀯𑀺𑀲𑀼𑀤𑁆𑀥𑀸𑀚𑀻𑀯𑀺𑀢𑀸. 𑀉𑀲𑁆𑀲𑀼𑀓𑁆𑀓𑀧𑁆𑀧𑀳𑀸𑀦𑀁 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼 𑀅𑀩𑁆𑀬𑀸𑀯𑀝𑀢𑀸 𑀢𑀺𑀩𑁆𑀩𑀲𑀁𑀯𑁂𑀕𑀢𑁆𑀢𑀸. 𑀯𑀺𑀕𑀢𑀪𑀬𑀢𑀸 𑀓𑀼𑀢𑁄𑀘𑀺𑀧𑀺 𑀦𑀺𑀩𑁆𑀪𑀬𑀢𑀸 𑀅𑀢𑁆𑀢𑀲𑀺𑀦𑁂𑀳𑀸𑀪𑀸𑀯𑀢𑁄. 𑀔𑀦𑁆𑀢𑀺𑀲𑁄𑀭𑀘𑁆𑀘𑀧𑀝𑀺𑀮𑀸𑀪𑁄 𑀅𑀦𑀺𑀘𑁆𑀘𑀢𑀸𑀬 𑀲𑀼𑀤𑀺𑀝𑁆𑀞𑀢𑁆𑀢𑀸. 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀅𑀥𑀺𑀓𑀼𑀲𑀮𑁂𑀲𑀼 𑀘 𑀅𑀭𑀢𑀺𑀬𑀸, 𑀓𑀸𑀫𑀕𑀼𑀡𑁂𑀲𑀼 𑀭𑀢𑀺𑀬𑀸 𑀘 𑀲𑀳𑀦𑀢𑁄 𑀅𑀪𑀺𑀪𑀯𑀦𑀢𑁄 𑀅𑀭𑀢𑀺𑀭𑀢𑀺𑀲𑀳𑀦𑀢𑀸.

𑀇𑀫𑀸𑀦𑀺 𑀅𑀝𑁆𑀞𑀕𑁆𑀕𑀼𑀡𑀫𑀼𑀢𑁆𑀢𑀫𑀸𑀦𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀫-𑀓𑀸𑀭𑁄 𑀘 𑀧𑀤𑀲𑀦𑁆𑀥𑀺𑀓𑀭𑁄, 𑀪𑀯𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀸𑀤𑀺𑀓𑁂 𑀇𑀫𑁂 𑀅𑀝𑁆𑀞 𑀉𑀢𑁆𑀢𑀫𑀸𑀦𑀺𑀲𑀁𑀲𑁂𑀢𑀺 𑀅𑀢𑁆𑀣𑁄. 𑀢𑀳𑀺𑀦𑁆𑀢𑀺 𑀢𑀢𑁆𑀣 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀬𑀦𑁆𑀢𑀺 𑀅𑀢𑁆𑀣𑁄.

𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁭𑁫𑁦. 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀢𑁂𑀪𑀽𑀫𑀓𑀸𑀦𑀁 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁. 𑀅𑀥𑀺𑀓𑀸𑀭𑀯𑀲𑁂𑀦 𑀳𑀺 𑀧𑀤𑁂𑀲𑀲𑀩𑁆𑀩𑀯𑀺𑀲𑀬𑁄 𑀇𑀥 𑀲𑀩𑁆𑀩𑀲𑀤𑁆𑀤𑁄. 𑀆𑀲𑁂𑀯𑀦𑁆𑀢𑀲𑁆𑀲𑀸𑀢𑀺 𑀆𑀤𑀭𑀯𑀲𑁂𑀦 𑀲𑁂𑀯𑀦𑁆𑀢𑀲𑁆𑀲 𑀧𑀯𑀢𑁆𑀢𑁂𑀦𑁆𑀢𑀲𑁆𑀲. 𑀪𑀸𑀯𑁂𑀦𑁆𑀢𑀲𑁆𑀲𑀸𑀢𑀺 𑀯𑀟𑁆𑀠𑁂𑀦𑁆𑀢𑀲𑁆𑀲 𑀩𑁆𑀭𑀽𑀳𑁂𑀦𑁆𑀢𑀲𑁆𑀲. 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀲𑁆𑀲 𑀬𑀼𑀜𑁆𑀚𑀦𑁆𑀢𑀲𑁆𑀲. 𑀧𑀪𑁂𑀤𑀓𑀸𑀢𑀺 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀯𑀲𑁂𑀦 𑀧𑀪𑁂𑀤𑀓𑀸. 𑀆𑀚𑀻𑀯𑀺𑀓𑀸 𑀩𑁆𑀬𑀸𑀥𑀺𑀆𑀤𑀺𑀦𑀺𑀫𑀺𑀢𑁆𑀢𑀁 𑀫𑀭𑀺𑀢𑀼𑀓𑀸𑀫𑀲𑁆𑀲, 𑀅𑀫𑀭𑀺𑀢𑀼𑀓𑀸𑀫𑀲𑁆𑀲𑀸𑀧𑀺 𑀲𑀽𑀭𑀲𑁆𑀲 𑀪𑀸𑀬𑀺𑀢𑀩𑁆𑀩𑀫𑁆𑀧𑀺 𑀦 𑀪𑀬𑀢𑁄 𑀉𑀧𑀝𑁆𑀞𑀸𑀢𑀻𑀢𑀺 ‘‘𑀲𑀼𑀔𑁂𑀦 𑀚𑀻𑀯𑀺𑀢𑀼𑀓𑀸𑀫𑀲𑁆𑀲 𑀪𑀻𑀭𑀼𑀓𑀧𑀼𑀭𑀺𑀲𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀪𑀻𑀭𑀼𑀓𑀚𑀸𑀢𑀺𑀓𑀲𑁆𑀲 𑀲𑀻𑀳𑀸𑀤𑀬𑁄 𑀲𑀦𑁆𑀢𑀸𑀲𑀦𑀺𑀫𑀺𑀢𑁆𑀢𑀁 𑀪𑀬𑀸𑀦𑀓𑀪𑀸𑀯𑀢𑁄, 𑀢𑀣𑀸 𑀬𑁄𑀕𑀺𑀦𑁄 𑀪𑀗𑁆𑀕𑀢𑁄 𑀤𑀺𑀲𑁆𑀲𑀫𑀸𑀦𑀸 𑀲𑀗𑁆𑀔𑀸𑀭𑀸𑀢𑀺 𑀆𑀳 ‘‘𑀲𑀻𑀳…𑀧𑁂… 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀑𑀴𑀸𑀭𑀺𑀓𑀸 𑀤𑀻𑀖𑀢𑀭𑀧𑀩𑀦𑁆𑀥𑀸, 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀲𑀼𑀔𑀼𑀫𑀢𑀭𑀸 𑀇𑀢𑁆𑀢𑀭𑀓𑀸𑀮𑀸, 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀫𑀚𑁆𑀛𑀺𑀫𑀸 𑀇𑀥 𑀆𑀤𑀺𑀢𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸. 𑀪𑀬𑀢𑁄 𑀪𑀸𑀬𑀺𑀢𑀩𑁆𑀩𑀢𑁄 𑀉𑀧𑀢𑀺𑀝𑁆𑀞𑀦𑀓𑁂𑀲𑀼 𑀜𑀸𑀡𑀁 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁.

𑀬𑀣𑀸 𑀇𑀢𑁆𑀣𑀺𑀬𑀸 𑀧𑀼𑀢𑁆𑀢𑀸𑀦𑀁 𑀲𑀻𑀲𑀲𑁆𑀲 𑀙𑀺𑀦𑁆𑀦𑀢𑀸 𑀙𑀺𑀚𑁆𑀚𑀫𑀸𑀦𑀢𑀸 𑀕𑀬𑁆𑀳𑀫𑀸𑀦𑀸 𑀪𑀬𑀸𑀯𑀳𑀸, 𑀏𑀯𑀁 𑀬𑁄𑀕𑀺𑀦𑁄 𑀢𑀺𑀬𑀤𑁆𑀥𑀕𑀢𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀸 𑀕𑀬𑁆𑀳𑀫𑀸𑀦𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀺𑀲𑁆𑀲𑀸 𑀓𑀺𑀭 𑀇𑀢𑁆𑀣𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑀣𑀸 𑀧𑀽𑀢𑀺𑀪𑀽𑀢𑀁 𑀑𑀤𑀦𑀸𑀤𑀺 𑀦 𑀲𑀪𑀸𑀯𑁂𑀦 𑀢𑀺𑀝𑁆𑀞𑀢𑀺 𑀯𑀺𑀦𑀲𑁆𑀲𑀢𑀺, 𑀏𑀯𑀁 𑀬𑀲𑁆𑀲𑀸 𑀇𑀢𑁆𑀣𑀺𑀬𑀸 𑀯𑀺𑀚𑀸𑀢𑀯𑀺𑀚𑀸𑀢𑀸 𑀧𑀼𑀢𑁆𑀢𑀸 𑀦 𑀚𑀻𑀯𑀦𑁆𑀢𑀺 𑀫𑀭𑀦𑁆𑀢𑀺 𑀏𑀯, 𑀲𑀸 ‘‘𑀧𑀽𑀢𑀺𑀧𑀚𑀸’’𑀢𑀺 𑀯𑀼𑀢𑁆𑀢𑀸. 𑀧𑀽𑀢𑀺𑀧𑀚𑀸𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀯𑀺𑀲𑁂𑀲𑀢𑁄 𑀕𑀩𑁆𑀪𑀕𑀢𑀫𑀭𑀡𑀘𑀺𑀦𑁆𑀢𑀸𑀤𑀲𑁆𑀲𑀦𑁂𑀦 𑀬𑁄𑀕𑀺𑀦𑁄 𑀅𑀦𑀸𑀕𑀢𑀲𑀗𑁆𑀔𑀸𑀭𑀦𑀺𑀭𑁄𑀥𑀲𑀦𑁆𑀦𑀺𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀳𑀺𑀲𑁆𑀲 𑀲𑀼𑀧𑀸𑀓𑀝𑁄 𑀏𑀯𑀸𑀢𑀺 𑀦 𑀲𑁄 𑀉𑀧𑀫𑀸𑀬 𑀲𑀸𑀥𑁂𑀢𑀩𑁆𑀩𑁄. 𑀅𑀦𑁆𑀢𑀺𑀫𑀪𑀯𑀺𑀓𑀲𑁆𑀲 𑀘 𑀬𑁄𑀕𑀺𑀦𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀫𑀸𑀤𑀺𑀪𑀸𑀯𑀺𑀦𑁄 𑀅𑀢𑀻𑀢𑁂 𑀤𑀼𑀓𑁆𑀔𑀩𑀳𑀼𑀢𑀸𑀬, 𑀅𑀦𑀸𑀕𑀢𑀤𑀼𑀓𑁆𑀔𑀧𑀭𑀺𑀢𑁆𑀢𑀢𑀸𑀬 𑀘 𑀤𑀲𑁆𑀲𑀦𑀢𑁆𑀣𑀁 𑀩𑀳𑀼𑀧𑀚𑀸𑀯 𑀇𑀢𑁆𑀣𑀻 𑀦𑀺𑀤𑀲𑁆𑀲𑀺𑀢𑀸.

𑀢𑀢𑁆𑀣 𑀬𑀣𑀸 𑀢𑀲𑁆𑀲𑀸 𑀦𑀯 𑀧𑀼𑀢𑁆𑀢𑀸 𑀫𑀢𑀸, 𑀏𑀯𑀁 𑀅𑀚𑁆𑀛𑀢𑁆𑀢𑀸𑀤𑀺𑀧𑁆𑀧𑀪𑁂𑀤𑀸 𑀅𑀢𑀻𑀢𑀸 𑀲𑀗𑁆𑀔𑀸𑀭𑀸, 𑀯𑀼𑀲𑀺𑀢𑀧𑀼𑀩𑁆𑀩𑀸 𑀯𑀸 𑀦𑀯 𑀲𑀢𑁆𑀢𑀸𑀯𑀸𑀲𑀸 𑀤𑀝𑁆𑀞𑀩𑁆𑀩𑀸, 𑀫𑀻𑀬𑀫𑀸𑀦𑀧𑀼𑀢𑁆𑀢𑁄 𑀯𑀺𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀲𑀗𑁆𑀔𑀸𑀭𑀸, 𑀧𑀯𑀢𑁆𑀢𑀫𑀸𑀦𑁄 𑀯𑀸 𑀲𑀢𑁆𑀢𑀸𑀯𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀅𑀚𑀸𑀢𑀧𑀼𑀢𑁆𑀢𑁄 𑀯𑀺𑀬 𑀅𑀦𑀸𑀕𑀢𑀸 𑀲𑀗𑁆𑀔𑀸𑀭𑀸, 𑀪𑀸𑀯𑀻 𑀯𑀸 𑀲𑀢𑁆𑀢𑀸𑀯𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀫𑀯𑀝𑁆𑀞𑀺𑀢𑁂 𑀬𑀤𑁂𑀓𑁂 𑀤𑀲𑀧𑀼𑀢𑁆𑀢𑀫𑀸𑀢𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀯𑀧𑀼𑀢𑁆𑀢𑀫𑀸𑀢𑀼𑀕𑁆𑀕𑀳𑀡𑀁 𑀲𑀸𑀢𑁆𑀣𑀓𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀤𑀧𑀸𑀳𑀢𑀁 𑀳𑁄𑀢𑀺. 𑀤𑀸𑀭𑀓𑀸𑀦𑀁 𑀫𑀭𑀡𑀲𑁆𑀲 𑀘𑀺𑀭𑀓𑀸𑀮𑀺𑀓𑀢𑁆𑀢𑀸 𑀫𑀭𑀡𑀸𑀦𑀼𑀲𑁆𑀲𑀭𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀕𑀩𑁆𑀪𑀕𑀢𑁄 𑀅𑀧𑁆𑀧𑀘𑁆𑀘𑀓𑁆𑀔𑀢𑀸𑀬 𑀪𑀸𑀯𑀻𑀧𑀓𑁆𑀔𑁂𑀬𑁂𑀯 𑀢𑀺𑀝𑁆𑀞𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀓𑀼𑀘𑁆𑀙𑀺𑀕𑀢𑁄 𑀅𑀦𑀸𑀕𑀢𑀲𑀗𑁆𑀔𑀸𑀭𑀝𑁆𑀞𑀸𑀦𑀺𑀬𑁄 𑀯𑀼𑀢𑁆𑀢𑁄. 𑀏𑀢𑀲𑁆𑀫𑀺𑀁 𑀔𑀡𑁂𑀢𑀺 𑀪𑀗𑁆𑀕𑀤𑀲𑁆𑀲𑀦𑀫𑀼𑀔𑁂𑀦 𑀲𑀗𑁆𑀔𑀸𑀭𑀸𑀦𑀁 𑀪𑀬𑀸𑀦𑀓𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀓𑁆𑀔𑀡𑁂.

𑁭𑁫𑁧. 𑀦 𑀪𑀸𑀬𑀢𑀺 𑀜𑀸𑀡𑀲𑁆𑀲 𑀪𑀸𑀬𑀦𑀸𑀓𑀸𑀭𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀧𑀝𑀺𑀖𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀳𑀺 𑀪𑀸𑀬𑀦𑀁, 𑀜𑀸𑀡𑀁 𑀧𑀦 𑀪𑀸𑀬𑀺𑀢𑀩𑁆𑀩𑀯𑀢𑁆𑀣𑀼𑀁 𑀪𑀸𑀬𑀺𑀢𑀩𑁆𑀩𑀦𑁆𑀢𑀺 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺. 𑀢𑁂𑀦𑀸𑀳 ‘‘𑀅𑀢𑀻𑀢𑀸…𑀧𑁂… 𑀢𑀻𑀭𑀡𑀫𑀢𑁆𑀢𑀫𑁂𑀯𑀸’’𑀢𑀺, 𑀢𑀺𑀲𑁆𑀲𑁄 𑀅𑀗𑁆𑀕𑀸𑀭𑀓𑀸𑀲𑀼𑀬𑁄 𑀅𑀢𑀺𑀢𑀸𑀧𑁂𑀦 𑀢𑀺𑀓𑁆𑀔𑀫𑀚𑁆𑀛𑀫𑀼𑀤𑀼𑀪𑁂𑀤𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀪𑀯𑀸𑀤𑀻𑀦𑀜𑁆𑀳𑀺 𑀢𑀺𑀡𑁆𑀡𑀁 𑀪𑀯𑀸𑀦𑀁 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀢𑀸𑀲𑀁 𑀕𑀳𑀡𑀁, 𑀢𑀣𑀸 𑀔𑀤𑀺𑀭𑀸𑀤𑀺𑀲𑀽𑀮𑀢𑁆𑀢𑀬𑀲𑁆𑀲 𑀅𑀧𑁆𑀧𑀡𑀻𑀢𑀸𑀤𑀺𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀓𑁂𑀯𑀮𑀁 𑀳𑀻’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀜𑀸𑀡𑀲𑁆𑀲. 𑀩𑁆𑀬𑀲𑀦𑀸𑀧𑀦𑁆𑀦𑀸𑀢𑀺 𑀦𑀸𑀦𑀸𑀯𑀺𑀥𑀯𑀺𑀧𑀼𑀮𑀸𑀦𑀢𑁆𑀣𑀧𑀢𑀺𑀢𑀸. 𑀪𑀬𑀢𑁄𑀢𑀺 𑀪𑀸𑀬𑀺𑀢𑀩𑁆𑀩𑀢𑁄.

𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀦𑁆𑀢𑀺 ‘‘𑀲𑀗𑁆𑀔𑀸𑀭𑀸𑀦𑀁 𑀲𑀫𑀽𑀳𑀸𑀤𑀺𑀖𑀦𑀯𑀲𑁂𑀦, 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀘 𑀲𑀯𑀺𑀕𑁆𑀕𑀳𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀲𑀗𑁆𑀔𑀸𑀭𑀸𑀦𑀁 𑀧𑀦 𑀢𑀣𑀸 𑀉𑀧𑀝𑁆𑀞𑀸𑀦𑀁 𑀲𑀗𑁆𑀔𑀸𑀭𑀯𑀺𑀦𑀺𑀫𑀼𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑀻𑀢𑀸…𑀧𑁂… 𑀅𑀥𑀺𑀯𑀘𑀦’’𑀦𑁆𑀢𑀺. 𑀫𑀭𑀡𑀫𑁂𑀯𑀸𑀢𑀺 𑀪𑀗𑁆𑀕𑀫𑁂𑀯. 𑀢𑁂𑀦𑀸𑀢𑀺 𑀪𑀗𑁆𑀕𑀤𑀲𑁆𑀲𑀦𑁂𑀦. 𑀔𑀡𑁂 𑀔𑀡𑁂 𑀪𑀗𑁆𑀕𑀫𑁂𑀯 𑀧𑀲𑁆𑀲𑀢𑁄 𑀳𑀺 𑀦𑀺𑀫𑀺𑀢𑁆𑀢𑀲𑀜𑁆𑀜𑀺𑀢𑀁 𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀢𑀸𑀬 𑀯𑀼𑀢𑁆𑀢𑀦𑀬𑁂𑀦 𑀲𑀧𑁆𑀧𑀝𑀺𑀪𑀬𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀧𑀯𑀢𑁆𑀢𑀁 𑀦𑀸𑀫 𑀓𑀸𑀫𑀁 𑀲𑀩𑁆𑀩𑀸 𑀪𑀯𑀧𑀯𑀢𑁆𑀢𑀺, 𑀫𑀢𑁆𑀣𑀓𑀧𑁆𑀧𑀢𑁆𑀢𑀸𑀬 𑀧𑀦 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀲𑀩𑁆𑀩𑀪𑀯𑁂𑀲𑀼 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀲𑁆𑀲 𑀲𑀼𑀝𑁆𑀞𑀼𑀢𑀭𑀁 𑀉𑀧𑀝𑁆𑀞𑀸𑀦𑀢𑁄 𑀲𑀦𑁆𑀢𑀲𑀼𑀔𑀸𑀪𑀺𑀫𑀢𑀸𑀧𑀺 𑀪𑀯𑀸 𑀤𑀼𑀓𑁆𑀔𑀲𑀪𑀸𑀯𑀢𑀸𑀬 𑀪𑀬𑀢𑁄 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀯𑀢𑁆𑀢𑀦𑁆𑀢𑀺 𑀭𑀽𑀧𑀸𑀭𑀽𑀧𑀪𑀯𑀧𑀯𑀢𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀪𑀬𑀦𑁆𑀢𑀺 𑀦𑀺𑀫𑀺𑀢𑁆𑀢𑀁, 𑀧𑀯𑀢𑁆𑀢𑀜𑁆𑀘. 𑀤𑁆𑀯𑀬𑀫𑁆𑀧𑀺 𑀳𑀺 𑀢𑀁 𑀅𑀢𑁆𑀢𑀲𑀼𑀜𑁆𑀜𑀫𑁂𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀢𑀻𑀢𑀺.

𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁭𑁫𑁨. 𑀢𑀸𑀡𑀦𑁆𑀢𑀺 𑀲𑀗𑁆𑀔𑀸𑀭𑀳𑁂𑀢𑀼𑀓𑀸 𑀅𑀦𑀢𑁆𑀢𑀢𑁄 𑀭𑀓𑁆𑀔𑀡𑀁. 𑀦𑁂𑀯 𑀧𑀜𑁆𑀜𑀸𑀬𑀢𑀺 𑀲𑀩𑁆𑀩𑀪𑀯𑀸𑀤𑀻𑀦𑀁 𑀲𑀸𑀤𑀻𑀦𑀯𑀢𑀸𑀬 𑀏𑀓𑀲𑀤𑀺𑀲𑀢𑁆𑀢𑀸. 𑀮𑁂𑀡𑀦𑁆𑀢𑀺 𑀢𑀲𑁆𑀲 𑀧𑀭𑀺𑀳𑀭𑀡𑀢𑀸𑀡𑀸𑀬 𑀉𑀧𑀮𑀻𑀬𑀦𑀁. 𑀕𑀢𑀻𑀢𑀺 𑀢𑀤𑀢𑁆𑀣𑀁 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁. 𑀧𑀝𑀺𑀲𑀭𑀡𑀦𑁆𑀢𑀺 𑀢𑀲𑁆𑀲𑁂𑀯 𑀧𑀝𑀺𑀲𑀭𑀡𑀝𑁆𑀞𑀸𑀦𑀁. 𑀧𑀢𑁆𑀣𑀦𑀸𑀢𑀺 𑀆𑀲𑀻𑀲𑀦𑀸 𑀦 𑀳𑁄𑀢𑀺. 𑀏𑀢𑁂𑀦 ‘‘𑀦𑁂𑀢𑀁 𑀫𑀫𑀸’’𑀢𑀺 𑀢𑀡𑁆𑀳𑀸𑀕𑀸𑀳𑀸𑀪𑀸𑀯𑀫𑀸𑀳. 𑀧𑀭𑀸𑀫𑀸𑀲𑁄𑀢𑀺 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄. 𑀢𑁂𑀦 ‘‘𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀤𑀺𑀝𑁆𑀞𑀺𑀕𑀸𑀳𑀸𑀪𑀸𑀯𑀫𑀸𑀳. 𑀢𑀡𑁆𑀳𑀸𑀕𑀸𑀳𑀸𑀪𑀸𑀯𑁂𑀦𑁂𑀯 𑀘𑁂𑀢𑁆𑀣 ‘‘𑀏𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀕𑀸𑀳𑀸𑀪𑀸𑀯𑁄𑀧𑀺 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀺, 𑀯𑀸-𑀲𑀤𑁆𑀤𑀕𑁆𑀕𑀳𑀡𑁂𑀦 𑀯𑀸.

𑀇𑀤𑀸𑀦𑀺 𑀧𑀢𑁆𑀣𑀦𑀸𑀤𑀻𑀦𑀫𑀪𑀸𑀯𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀬𑁄 𑀪𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀬𑁄 𑀪𑀯𑀸 𑀅𑀗𑁆𑀕𑀸𑀭𑀓𑀸𑀲𑀼𑀬𑁄 𑀯𑀺𑀬 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀸𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀫𑀳𑀸𑀪𑀺𑀢𑀸𑀧𑀢𑀸𑀬. 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀓𑀝𑁆𑀞𑀫𑀼𑀔𑀧𑀽𑀢𑀺𑀫𑀼𑀔𑀅𑀕𑁆𑀕𑀺𑀫𑀼𑀔𑀲𑀢𑁆𑀣𑀫𑀼𑀔𑀲𑀗𑁆𑀔𑀸𑀢𑀸 𑀖𑁄𑀭𑀯𑀺𑀲𑀆𑀲𑀻𑀯𑀺𑀲𑀸 𑀯𑀺𑀬 𑀓𑀸𑀬𑀲𑁆𑀲 𑀣𑀤𑁆𑀥𑀢𑀸𑀯𑀺𑀲𑁆𑀲𑀦𑁆𑀤𑀦𑀤𑀸𑀳𑀘𑁆𑀙𑁂𑀤𑀤𑀼𑀓𑁆𑀔𑀯𑀺𑀥𑀸𑀦𑀢𑁄 𑀯𑀺𑀲𑁂𑀲𑀢𑁄, 𑀅𑀯𑀺𑀲𑁂𑀲𑀢𑁄 𑀧𑀦 𑀆𑀲𑀬𑀢𑁄, 𑀯𑀺𑀲𑀯𑀺𑀓𑀸𑀭𑀢𑁄, 𑀅𑀦𑀢𑁆𑀣𑀤𑀸𑀦𑀢𑁄, 𑀤𑀼𑀭𑀼𑀧𑀘𑀸𑀭𑀢𑁄, 𑀤𑀼𑀭𑀸𑀲𑀤𑀢𑁄, 𑀅𑀓𑀢𑀜𑁆𑀜𑀼𑀢𑁄, 𑀅𑀯𑀺𑀲𑁂𑀲𑀓𑀸𑀭𑀺𑀢𑁄, 𑀅𑀦𑁂𑀓𑀸𑀤𑀻𑀦𑀯𑀽𑀧𑀤𑁆𑀤𑀯𑀢𑁄 𑀘. ‘‘𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸 𑀉𑀕𑁆𑀕𑀢𑁂𑀚𑀸 𑀖𑁄𑀭𑀯𑀺𑀲𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑁂𑀢𑀁 𑀫𑀳𑀸𑀪𑀽𑀢𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁩𑁮) 𑀳𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀓𑁆𑀔𑀦𑁆𑀥𑀸 𑀏𑀓𑀓𑁆𑀔𑀦𑁆𑀥𑀪𑁂𑀤𑁂 𑀅𑀜𑁆𑀜𑀓𑁆𑀔𑀦𑁆𑀥𑀸𑀦𑀯𑀝𑁆𑀞𑀸𑀦𑀢𑁄. 𑀅𑀜𑁆𑀜𑀫𑀜𑁆𑀜𑀸𑀖𑀸𑀢𑀦𑀢𑁄, 𑀫𑀭𑀡𑀤𑀼𑀓𑁆𑀔𑀸𑀯𑀳𑀦𑀢𑁄 𑀘 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀯𑀥𑀓𑀸 𑀯𑀺𑀬. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁄 𑀯𑀥𑀓𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀙 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺 𑀅𑀢𑁆𑀢𑀢𑁆𑀢𑀦𑀺𑀬𑀪𑀸𑀯𑁂𑀦 𑀕𑀳𑀺𑀢𑀸𑀦𑀺𑀧𑀺 𑀢𑀢𑁄 𑀭𑀺𑀢𑁆𑀢𑀪𑀸𑀯𑀢𑁄 𑀲𑀼𑀜𑁆𑀜𑀕𑀸𑀫𑁄 𑀯𑀺𑀬 𑀪𑁄𑀚𑀦𑀸𑀤𑀺𑀕𑀬𑁆𑀳𑀼𑀧𑀕𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀧𑀯𑀺𑀝𑁆𑀞𑀲𑀼𑀜𑁆𑀜𑀕𑀸𑀫𑁄 𑀯𑀺𑀬. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀲𑀼𑀜𑁆𑀜𑀕𑀸𑀫𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀉𑀧𑀧𑀭𑀺𑀓𑁆𑀔𑁂𑀬𑁆𑀬, 𑀭𑀺𑀢𑁆𑀢𑀓𑀜𑁆𑀜𑁂𑀯 𑀔𑀸𑀬𑀢𑀺, 𑀢𑀼𑀘𑁆𑀙𑀓𑀜𑁆𑀜𑁂𑀯 𑀔𑀸𑀬𑀢𑀺, 𑀲𑀼𑀜𑁆𑀜𑀓𑀜𑁆𑀜𑁂𑀯 𑀔𑀸𑀬𑀢𑀻’’𑀢𑀺 (𑀲𑀁. 𑀦𑀺. 𑁪.𑁨𑁩𑁮) 𑁋

𑀆𑀤𑀺. 𑀙 𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀕𑀸𑀫𑀖𑀸𑀢𑀓𑀘𑁄𑀭𑀸 𑀯𑀺𑀬 𑀲𑀩𑁆𑀩𑀣𑀸𑀧𑀺 𑀖𑀸𑀢𑀓𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀘𑁄𑀭𑀸 𑀕𑀸𑀫𑀖𑀸𑀢𑀓𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀩𑀸𑀳𑀺𑀭𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀲𑀼 𑀭𑀽𑀧𑁂𑀲𑀽’’𑀢𑀺𑀆𑀤𑀺. 𑀭𑀸𑀕𑀕𑁆𑀕𑀺𑀆𑀤𑀻𑀳𑀺 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁? 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀻’’𑀢𑀺 (𑀲𑀁. 𑀦𑀺. 𑁪.𑁨𑁮) 𑁋

𑀆𑀤𑀺. 𑀲𑀗𑁆𑀔𑀸𑀭𑀸𑀦𑀁 𑀕𑀡𑁆𑀟𑀸𑀤𑀺𑀲𑀤𑀺𑀲𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬𑁂𑀯. 𑀦𑀺𑀭𑀲𑁆𑀲𑀸𑀤𑀸𑀢𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑀭𑀳𑀺𑀢𑀸 𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸. 𑀦𑀺𑀭𑀲𑀸𑀢𑀺 𑀲𑀫𑁆𑀧𑀢𑁆𑀢𑀺𑀭𑀳𑀺𑀢𑀸 𑀯𑀺𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀬𑀣𑀸 𑀳𑁂𑀝𑁆𑀞𑀸 𑀦𑀺𑀭𑀲𑁆𑀲𑀸𑀤𑀸 𑀦𑀺𑀭𑀲𑀸 𑀫𑀳𑀸𑀆𑀤𑀻𑀦𑀯𑀭𑀸𑀲𑀺𑀪𑀽𑀢𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀯𑀁 𑀉𑀧𑀭𑀺𑀧𑀺 ‘‘𑀲𑀯𑀸𑀴𑀓𑀫𑀺𑀯 𑀯𑀦𑀕𑀳𑀦’’𑀦𑁆𑀢𑀺𑀆𑀤𑀻𑀲𑀼 𑀢𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀲𑀲𑀤𑁆𑀤𑀽𑀮𑀸𑀢𑀺 𑀲𑀩𑁆𑀬𑀕𑁆𑀖𑀸. 𑀕𑀸𑀳𑀸 𑀓𑀼𑀫𑁆𑀪𑀺𑀮𑀸𑀤𑀬𑁄. 𑀭𑀓𑁆𑀔𑀲𑁄 𑀤𑀓𑀭𑀓𑁆𑀔𑀲𑁄. ‘‘𑀦𑀺𑀭𑀲𑀁 𑀦𑀺𑀭𑀲𑁆𑀲𑀸𑀤’’𑀦𑁆𑀢𑀺 𑀇𑀫𑀺𑀦𑀸 𑀆𑀤𑀻𑀦𑀯𑀲𑁆𑀲 𑀅𑀩𑁆𑀩𑁄𑀓𑀺𑀡𑁆𑀡𑀢𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺𑀲𑁆𑀲 𑀬𑁄𑀕𑀺𑀦𑁄 𑀲𑀩𑁆𑀩𑁂𑀲𑀼 𑀪𑀯𑀸𑀤𑀻𑀲𑀼 𑀲𑀩𑁆𑀩𑁂𑀧𑀺 𑀲𑀗𑁆𑀔𑀸𑀭𑀸 𑀦𑀺𑀲𑁆𑀲𑀕𑁆𑀕𑀢𑁄 𑀦𑀺𑀭𑀦𑁆𑀢𑀭𑀁 𑀲𑀧𑁆𑀧𑀝𑀺𑀪𑀬𑀸𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀬𑀜𑁆𑀘 𑀲𑀧𑁆𑀧𑀝𑀺𑀪𑀬𑀁, 𑀢𑀁 𑀲𑀸𑀤𑀻𑀦𑀯𑀁. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯’’𑀦𑁆𑀢𑀺𑀆𑀤𑀺.

𑀬𑀦𑁆𑀢𑀺 𑀆𑀤𑀻𑀦𑀯𑀜𑀸𑀡𑀁. 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀇𑀤𑀁 𑀤𑀲𑀯𑀢𑁆𑀣𑀼𑀓𑀁 𑀤𑁆𑀯𑀸𑀤𑀲𑀯𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀢𑀲𑁆𑀲𑁂𑀯 𑀧𑀤𑀪𑀸𑀚𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀁.

𑀉𑀧𑁆𑀧𑀸𑀤𑁄 𑀪𑀬𑀦𑁆𑀢𑀺 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑁄 𑀅𑀔𑁂𑀫𑀝𑁆𑀞𑁂𑀦 𑀪𑀬𑀯𑀢𑁆𑀣𑀼𑀢𑀸𑀬 𑀪𑀬𑀁. 𑀉𑀧𑁆𑀧𑀸𑀤𑀫𑀽𑀮𑀓𑀜𑁆𑀳𑀺 𑀲𑀩𑁆𑀩𑀁 𑀢𑀁 𑀲𑀩𑁆𑀩𑀯𑀢𑁆𑀣𑀼𑀓𑀦𑁆𑀢𑀺 𑀲𑀩𑁆𑀬𑀲𑀦𑀁. 𑀧𑀯𑀢𑁆𑀢𑀁 𑀪𑀬𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀧𑁆𑀧𑀸𑀤𑁄, 𑀦 𑀯𑀸 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀲𑀗𑁆𑀔𑀸𑀭𑀸𑀦𑀁 𑀆𑀬𑀢𑀺𑀁 𑀉𑀧𑁆𑀧𑀸𑀤𑁄𑀢𑀺 𑀅𑀦𑀼𑀧𑁆𑀧𑀸𑀤𑁄, 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀘 𑀲𑀩𑁆𑀩𑀲𑁄 𑀪𑀬𑀸𑀪𑀸𑀯𑀢𑁄 𑀧𑀭𑀫𑀲𑁆𑀲𑀸𑀲𑀪𑀽𑀢𑀢𑁆𑀢𑀸 𑀦𑀺𑀩𑁆𑀪𑀬𑀝𑁆𑀞𑁂𑀦 𑀔𑁂𑀫𑀦𑁆𑀢𑀺. 𑀲𑀦𑁆𑀢𑀺𑀧𑀤𑁂𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀽𑀧𑀲𑀫𑀪𑀽𑀢𑁂 𑀅𑀫𑀢𑀧𑀤𑁂. 𑀅𑀧𑁆𑀧𑀯𑀢𑁆𑀢𑀦𑁆𑀢𑀺𑀆𑀤𑀻𑀳𑀺𑀧𑀺 𑀧𑀯𑀢𑁆𑀢𑀸𑀤𑀺𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀦𑀺𑀩𑁆𑀩𑀸𑀦𑀫𑁂𑀯 𑀯𑀤𑀢𑀺. 𑀧𑀯𑀢𑁆𑀢𑀺𑀬𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀤𑀦𑀦𑁆𑀢𑀭𑀫𑁂𑀯 𑀦𑀺𑀯𑀢𑁆𑀢𑀺𑀬𑀁 𑀆𑀦𑀺𑀲𑀁𑀲𑀤𑀲𑁆𑀲𑀦𑀯𑀲𑁂𑀦 𑀲𑀻𑀖𑀁 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑀸𑀦𑀁 𑀯𑀲𑁂𑀦 ‘‘𑀉𑀧𑁆𑀧𑀸𑀤𑁄 𑀪𑀬𑀁, 𑀅𑀦𑀼𑀧𑁆𑀧𑀸𑀤𑁄 𑀔𑁂𑀫’’𑀦𑁆𑀢𑀺 𑀢𑀢𑀺𑀬𑀯𑀸𑀭𑁄 𑀯𑀼𑀢𑁆𑀢𑁄. 𑀏𑀲𑁂𑀯 𑀦𑀬𑁄 𑀙𑀝𑁆𑀞𑀯𑀸𑀭𑀸𑀤𑀻𑀲𑀼𑀧𑀺. 𑀏𑀢𑁆𑀣 𑀘 𑀉𑀧𑁆𑀧𑀸𑀤𑁄 𑀯𑀺𑀲𑁂𑀲𑁄, 𑀪𑀬𑀁 𑀯𑀺𑀲𑁂𑀲𑀺𑀢𑀩𑁆𑀩𑀁 𑀲𑀸𑀫𑀜𑁆𑀜𑀪𑀸𑀯𑀢𑁄𑀢𑀺 𑀲𑀢𑀺𑀧𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂 𑀮𑀺𑀗𑁆𑀕𑀪𑁂𑀤𑁄 𑀕𑀳𑀺𑀢𑁄. 𑀬𑀣𑀸 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁫𑁪; 𑀫. 𑀦𑀺. 𑁩.𑁩𑁭𑁪). 𑀏𑀲 𑀦𑀬𑁄 ‘‘𑀕𑀢𑀺 𑀪𑀬’’𑀦𑁆𑀢𑀺𑀆𑀤𑀻𑀲𑀼𑀧𑀺.

𑀉𑀧𑁆𑀧𑀸𑀤𑁄 𑀲𑀗𑁆𑀔𑀸𑀭𑀸𑀢𑀺 𑀏𑀢𑁆𑀣 𑀧𑀦 𑀲𑀩𑁆𑀩𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑀁 𑀲𑀸𑀫𑀜𑁆𑀜𑁂𑀦 𑀕𑀳𑁂𑀢𑁆𑀯𑀸 𑀲𑀗𑁆𑀔𑀸𑀭𑀸 𑀪𑁂𑀤𑀢𑁄 𑀯𑀺𑀳𑀺𑀢𑀸 𑀲𑀩𑁆𑀩𑀢𑁆𑀣𑀓𑀫𑁂𑀯 𑀢𑁂𑀲𑀁 𑀯𑀺𑀪𑀸𑀕𑀢𑁄 𑀯𑀺𑀧𑀲𑁆𑀲𑀺𑀬𑀫𑀸𑀦𑀢𑁆𑀢𑀸𑀢𑀺 𑀯𑀘𑀦𑀪𑁂𑀤𑁄 𑀓𑀢𑁄.

𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 ‘‘𑀤𑀼𑀓𑁆𑀔’’𑀦𑁆𑀢𑀺 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀜𑀸𑀡𑀁 𑀆𑀤𑀻𑀦𑀯𑁂 𑀇𑀤𑀦𑁆𑀢𑀺 𑀆𑀤𑀻𑀦𑀯𑁂 𑀯𑀺𑀲𑀬𑀪𑀽𑀢𑁂 𑀇𑀤𑀁 𑀧𑀜𑁆𑀘𑀯𑀢𑁆𑀣𑀼𑀓𑀁 𑀜𑀸𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀜𑀸𑀡𑀁 𑀲𑀦𑁆𑀢𑀺𑀧𑀤𑁂𑀢𑀺 𑀲𑀦𑁆𑀢𑀺𑀧𑀤𑁂 𑀦𑀺𑀦𑁆𑀦𑀸𑀤𑀺𑀪𑀸𑀯𑁂𑀦 𑀞𑀺𑀢𑀁 𑀇𑀤𑀁 𑀜𑀸𑀡𑀦𑁆𑀢𑀺 𑀅𑀢𑁆𑀣𑁄.

𑁭𑁫𑁩. 𑀓𑀫𑁆𑀫𑀧𑀘𑁆𑀘𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑁄 𑀧𑀸𑀓𑀝𑀢𑀭𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀆𑀳 ‘‘𑀧𑀼𑀭𑀺𑀫𑀓𑀫𑁆𑀫𑀧𑀘𑁆𑀘𑀬𑀸 𑀇𑀥 𑀉𑀧𑁆𑀧𑀢𑁆𑀢𑀻’’𑀢𑀺. 𑀧𑀯𑀢𑁆𑀢𑀁 𑀦𑀸𑀫 𑀇𑀥 𑀧𑀯𑀢𑁆𑀢𑀺𑀬𑀁 𑀥𑀫𑁆𑀫𑀧𑁆𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀉𑀧𑁆𑀧𑀦𑁆𑀦𑀲𑁆𑀲 𑀧𑀯𑀢𑁆𑀢𑀻’’𑀢𑀺. 𑀲𑀩𑁆𑀩𑀫𑁆𑀧𑀻𑀢𑀺 𑀢𑀺𑀬𑀤𑁆𑀥𑀕𑀢𑀁 𑀭𑀽𑀧𑀸𑀭𑀽𑀧𑀁 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀺𑀯𑀺𑀪𑀸𑀕𑀁 𑀲𑀩𑁆𑀩𑀫𑁆𑀧𑀺. 𑀓𑀫𑁆𑀫𑀦𑁆𑀢𑀺 𑀏𑀢𑀭𑀳𑀺 𑀧𑀯𑀢𑁆𑀢𑀁 𑀓𑀫𑁆𑀫𑀁. 𑀏𑀢𑁆𑀣 𑀘 𑀉𑀧𑁆𑀧𑀸𑀤𑀧𑀯𑀢𑁆𑀢𑀆𑀬𑀽𑀳𑀦𑀕𑁆𑀕𑀳𑀡𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸, 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂𑀦 𑀅𑀦𑀸𑀕𑀢𑀤𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀉𑀧𑀸𑀤𑀺𑀢𑁆𑀢𑀸. 𑀉𑀧𑁆𑀧𑀸𑀤𑀕𑁆𑀕𑀳𑀡𑁂𑀦 𑀘 𑀅𑀢𑀻𑀢𑀤𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀓𑀫𑁆𑀫𑀲𑀗𑁆𑀔𑀸𑀭𑀸 𑀉𑀮𑁆𑀮𑀺𑀗𑁆𑀕𑀢𑁆𑀢𑀸. 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑁂𑀦 𑀧𑀦 𑀲𑀩𑁆𑀩𑁂𑀧𑀺 𑀕𑀳𑀺𑀢𑀸. 𑀬𑀸𑀬 𑀕𑀢𑀺𑀬𑀸 𑀲𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺 𑀲𑀸 𑀦𑀺𑀭𑀬𑀸𑀤𑀺𑀪𑁂𑀤𑀸 𑀕𑀢𑀺 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀕𑀦𑁆𑀢𑀩𑁆𑀩𑀢𑁆𑀢𑀸, 𑀲𑀸 𑀧𑀦𑀢𑁆𑀣𑀢𑁄 𑀢𑀁𑀢𑀁𑀓𑀫𑁆𑀫𑀦𑀺𑀬𑀫𑀺𑀢𑀸 𑀪𑀯𑀲𑀫𑀜𑁆𑀜𑀸𑀭𑀳𑀸 𑀯𑀺𑀧𑀸𑀓𑀓𑁆𑀔𑀦𑁆𑀥𑀸, 𑀓𑀝𑀢𑁆𑀢𑀸 𑀘 𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀦𑁆𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀁. 𑀧𑀸𑀓𑀝𑀸 𑀏𑀯 𑀲𑀘𑁆𑀘𑀯𑀺𑀪𑀗𑁆𑀕𑁂 𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦. 𑀬𑀤𑀺 𑀢𑁂 𑀧𑀜𑁆𑀘𑁂𑀯 𑀯𑀢𑁆𑀣𑀼𑀪𑀸𑀯𑁂𑀦 𑀇𑀘𑁆𑀙𑀺𑀢𑀸, 𑀅𑀣 𑀓𑀲𑁆𑀫𑀸 𑀲𑁂𑀲𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀲𑁂𑀲𑀸 𑀢𑁂𑀲𑀁 𑀯𑁂𑀯𑀘𑀦𑀯𑀲𑁂𑀦𑀸’’𑀢𑀺. 𑀢𑁂𑀦 𑀯𑀺𑀧𑀲𑁆𑀲𑀓𑀸𑀦𑀁 𑀜𑀸𑀡𑀯𑀺𑀧𑁆𑀨𑀸𑀭𑀲𑁆𑀲 𑀯𑀺𑀲𑀬𑀲𑀁𑀯𑀟𑁆𑀠𑀦𑀢𑁆𑀣𑀁 𑀤𑁂𑀲𑀦𑀸 𑀯𑀟𑁆𑀠𑀺𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀦𑁆𑀯𑀬𑀢𑁄 𑀤𑀲𑁆𑀲𑀺𑀢𑀲𑁆𑀲 𑀆𑀤𑀻𑀦𑀯𑀜𑀸𑀡𑀲𑁆𑀲 𑀩𑁆𑀬𑀢𑀺𑀭𑁂𑀓𑀢𑁄 𑀤𑀲𑁆𑀲𑀦𑀢𑁆𑀣𑀁 𑀧𑀝𑀺𑀧𑀓𑁆𑀔𑀜𑀸𑀡𑀤𑀲𑁆𑀲𑀦𑀁 ‘‘𑀬𑀢𑁆𑀣 𑀉𑀧𑁆𑀧𑀸𑀤𑁄 𑀦𑀢𑁆𑀣𑀺, 𑀢𑀢𑁆𑀣 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀪𑀬𑀫𑁆𑀧𑀺 𑀦𑀢𑁆𑀣𑀻’’𑀢𑀺. ‘‘𑀪𑀬𑀢𑀼𑀧𑀝𑁆𑀞𑀸𑀦𑁂𑀦 𑀯𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀢𑁆𑀢𑀺𑀤𑀲𑁆𑀲𑀦𑀁 𑀩𑀼𑀤𑁆𑀥𑀸𑀦𑀁, 𑀅𑀦𑀼𑀩𑀼𑀤𑁆𑀥𑀸𑀦𑀜𑁆𑀘 𑀆𑀘𑀺𑀡𑁆𑀡𑀫𑁂𑀢𑀁 𑀬𑀣𑀸 𑀧𑀼𑀭𑀺𑀫𑀁 𑀲𑀘𑁆𑀘𑀤𑁆𑀯𑀬𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀭𑁄𑀥𑀲𑀘𑁆𑀘𑀤𑁂𑀲𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀮𑁄𑀓𑁂 𑀓𑀲𑁆𑀲𑀘𑀺 𑀆𑀤𑀻𑀦𑀯𑀤𑀲𑁆𑀲𑀦𑀁 𑀦𑀺𑀭𑀢𑁆𑀣𑀓𑀫𑁆𑀧𑀺 𑀳𑁄𑀢𑀺, 𑀦 𑀢𑀣𑀸 𑀇𑀤𑀁, 𑀇𑀤𑀁 𑀧𑀦 𑀲𑀸𑀢𑁆𑀣𑀓𑀫𑁂𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀧𑁆𑀧𑀝𑀺𑀧𑀓𑁆𑀔𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺 𑀤𑀸𑀳𑀸𑀪𑀺𑀪𑀽𑀢𑀲𑁆𑀲 𑀲𑀻𑀢𑀦𑀺𑀦𑁆𑀦𑀢𑀸 𑀯𑀺𑀬 𑀲𑀼𑀝𑁆𑀞𑀼 𑀤𑀺𑀝𑁆𑀞𑀸𑀤𑀻𑀦𑀯𑀢𑁄 𑀏𑀓𑀁𑀲𑁂𑀦 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀪𑀸𑀯𑀢𑁄.

𑀪𑀬𑀦𑁆𑀢𑀺 𑀪𑀸𑀬𑀺𑀢𑀩𑁆𑀩𑀁. ‘‘𑀦𑀺𑀬𑀫𑀢𑁄 𑀤𑀼𑀓𑁆𑀔’’𑀦𑁆𑀢𑀺 𑀏𑀢𑁂𑀦𑀲𑁆𑀲 𑀤𑀼𑀓𑁆𑀔𑀪𑀸𑀯𑁂𑀦 𑀪𑀸𑀬𑀺𑀢𑀩𑁆𑀩𑀢𑀸𑀢𑀺 𑀪𑀸𑀬𑀺𑀢𑀩𑁆𑀩𑀢𑀸 𑀤𑀼𑀓𑁆𑀔𑀪𑀸𑀯𑀁 𑀦 𑀩𑁆𑀬𑀪𑀺𑀘𑀭𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀝𑁆𑀝𑀸𑀫𑀺𑀲𑀁 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸𑀢𑀺 𑀯𑀤𑀦𑁆𑀢𑀺. 𑀢𑀺𑀯𑀺𑀥𑀫𑁆𑀧𑀺 𑀯𑀝𑁆𑀝𑀁, 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀜𑁆𑀘 𑀯𑀝𑁆𑀝𑀸𑀫𑀺𑀲𑀁. 𑀓𑀺𑀮𑁂𑀲𑁂𑀳𑀺 𑀆𑀫𑀲𑀺𑀢𑀩𑁆𑀩𑀢𑁄 𑀮𑁄𑀓𑀸𑀫𑀺𑀲𑀁, 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀓𑀺𑀮𑁂𑀲𑀸 𑀏𑀯 𑀓𑀺𑀮𑁂𑀲𑀸𑀫𑀺𑀲𑀁. 𑀲𑀗𑁆𑀔𑀸𑀭𑀫𑀢𑁆𑀢𑀫𑁂𑀯𑀸𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁂𑀦 𑀯𑀺𑀲𑀗𑁆𑀔𑀸𑀭𑀁 𑀦𑀺𑀯𑀢𑁆𑀢𑁂𑀢𑀺. 𑀦 𑀳𑀺 𑀢𑀢𑁆𑀣 𑀲𑀸𑀫𑀺𑀲𑀢𑀸𑀮𑁂𑀲𑁄𑀧𑀺 𑀅𑀢𑁆𑀣𑀻𑀢𑀺. 𑀫𑀢𑁆𑀢-𑀲𑀤𑁆𑀤𑁂𑀦 𑀧𑀦 𑀅𑀧𑀭𑀺𑀧𑀼𑀡𑁆𑀡𑀢𑀁 𑀯𑀺𑀪𑀸𑀯𑁂𑀢𑀺. 𑀦 𑀳𑀺 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀲𑀸𑀫𑀺𑀲𑀦𑁆𑀢𑀺. 𑀢𑀲𑁆𑀫𑀸𑀢𑀺 ‘‘𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀸𑀤𑀺𑀪𑀸𑀯𑁂𑀦 𑀦𑀺𑀬𑀢𑀢𑁆𑀢𑀸. 𑀬𑀤𑀺 𑀬𑀁 𑀪𑀬𑀁, 𑀢𑀁 𑀤𑀼𑀓𑁆𑀔𑀸𑀤𑀺𑀲𑀪𑀸𑀯𑀫𑁂𑀯, 𑀢𑀣𑀸 𑀲𑀢𑀺 𑀪𑀬𑀸𑀤𑀻𑀲𑀼 𑀏𑀓𑁂𑀦𑁂𑀯 𑀅𑀢𑁆𑀣𑀲𑀺𑀤𑁆𑀥𑀺. 𑀓𑀲𑁆𑀫𑀸 𑀲𑀩𑁆𑀩𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺. 𑀬𑀣𑀸 𑀢𑁂𑀲𑀼 𑀏𑀯 𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀧𑀯𑀢𑁆𑀢𑀺𑀯𑀲𑁂𑀦 𑀆𑀓𑀸𑀭𑀦𑀸𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑀸𑀦𑀸𑀦𑀢𑁆𑀢𑀁, 𑀏𑀯𑀁 𑀪𑀬𑀸𑀓𑀸𑀭𑀸𑀤𑀺𑀆𑀓𑀸𑀭𑀦𑀸𑀦𑀢𑁆𑀢𑀢𑁄 𑀧𑀯𑀢𑁆𑀢𑀺𑀯𑀲𑁂𑀦𑁂𑀯𑁂𑀢𑁆𑀣 𑀜𑀸𑀡𑀲𑁆𑀲 𑀦𑀸𑀦𑀢𑁆𑀢𑀁. 𑀢𑀢𑁆𑀣 𑀪𑀬𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀜𑀸𑀡𑀁 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁, 𑀇𑀢𑀭𑀸𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀁 𑀆𑀤𑀻𑀦𑀯𑀜𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀲𑁆𑀫𑀸 𑀆𑀤𑀻𑀦𑀯𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀯𑀼𑀢𑁆𑀢𑀸 𑀧𑀦𑁆𑀦𑀭𑀲𑀸𑀧𑀺 𑀅𑀢𑁆𑀣𑀸 𑀉𑀧𑁆𑀧𑀸𑀤𑀸𑀤𑀻𑀲𑀼 𑀧𑀜𑁆𑀘𑀲𑁆𑀯𑁂𑀯 𑀅𑀦𑁆𑀢𑁄𑀕𑀥𑀸, 𑀢𑀢𑁆𑀣 𑀘 𑀜𑀸𑀡𑀁 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀤𑀲𑀯𑀺𑀥𑀁 𑀳𑁄𑀢𑀺. 𑀢𑀲𑁆𑀫𑀸 𑀆𑀳 ‘‘𑀤𑀲 𑀜𑀸𑀡𑁂 𑀧𑀚𑀸𑀦𑀸𑀢𑀻’’𑀢𑀺. 𑀧𑀚𑀸𑀦𑀦𑀜𑁆𑀘 𑀲𑀸𑀢𑀺𑀲𑀬𑀁 𑀯𑀺𑀲𑀬𑀕𑀢𑀲𑀫𑁆𑀫𑁄𑀳𑀯𑀺𑀕𑀫𑁂𑀦 𑀅𑀲𑀫𑁆𑀫𑀽𑀴𑁆𑀳𑀁, 𑀅𑀢𑁆𑀢𑀦𑀺𑀧𑀺 𑀅𑀲𑀫𑁆𑀫𑀽𑀴𑁆𑀳𑀫𑁂𑀯𑀸𑀢𑀺 𑀅𑀢𑁆𑀢𑀸𑀦𑀫𑁆𑀧𑀺 𑀧𑀚𑀸𑀦𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀧𑀝𑀺𑀯𑀺𑀚𑁆𑀛𑀢𑀺 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺. 𑀤𑁆𑀯𑀺𑀦𑁆𑀦𑀦𑁆𑀢𑀺 𑀤𑁆𑀯𑀻𑀲𑀼 𑀓𑀼𑀲𑀮𑀲𑀤𑁆𑀤𑀬𑁄𑀕𑁂𑀦 𑀳𑀺 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀬𑀣𑀸 ‘‘𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀲𑁆𑀲𑀸’’𑀢𑀺 (𑀚𑀸. 𑁨.𑁨𑁨.𑁯𑁪). 𑀓𑀼𑀲𑀮𑀢𑀸𑀢𑀺 𑀓𑀭𑀡𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀤𑁆𑀯𑀺𑀦𑁆𑀦𑀁 𑀓𑀼𑀲𑀮𑀢𑀸𑀬𑀸’’𑀢𑀺. 𑀤𑁆𑀯𑀺𑀦𑁆𑀦𑀦𑁆𑀢𑀺 𑀯𑀸 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀯𑀢𑁆𑀢𑀺𑀬𑀸 𑀬𑀸𑀣𑀸𑀯𑀢𑁄 𑀤𑀺𑀝𑁆𑀞𑀢𑀸𑀬 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀲𑀦𑁆𑀢𑀺𑀧𑀤𑀁 𑀲𑀼𑀯𑀺𑀦𑀺𑀘𑁆𑀙𑀺𑀢𑀫𑁂𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀢𑁂𑀦𑀲𑁆𑀲 𑀘𑀺𑀢𑁆𑀢𑀁 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀸𑀤𑀺𑀫𑀺𑀘𑁆𑀙𑀸𑀕𑀸𑀳𑀯𑀲𑁂𑀦 𑀦 𑀯𑀺𑀘𑀮𑀢𑀺. 𑀢𑀢𑁆𑀣 𑀲𑀼𑀧𑀭𑀺𑀤𑀺𑀝𑁆𑀞𑀸𑀤𑀻𑀦𑀯𑀢𑁆𑀢𑀸𑀢𑀺 𑀆𑀳 ‘‘𑀦𑀸𑀦𑀸𑀤𑀺𑀝𑁆𑀞𑀻𑀲𑀼 𑀦 𑀓𑀫𑁆𑀧𑀢𑀻’’𑀢𑀺𑀆𑀤𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁭𑁫𑁪. 𑀲𑀗𑁆𑀔𑀸𑀭𑀕𑀢𑁂𑀢𑀺 𑀲𑀩𑁆𑀩𑀲𑁆𑀫𑀺𑀁 𑀢𑁂𑀪𑀽𑀫𑀓𑁂 𑀲𑀗𑁆𑀔𑀸𑀭𑁂. 𑀦𑀺𑀩𑁆𑀩𑀺𑀦𑁆𑀤𑀢𑀻𑀢𑀺 𑀜𑀸𑀡𑀦𑀺𑀩𑁆𑀩𑀺𑀤𑁂𑀦 𑀦𑀺𑀩𑁆𑀩𑁂𑀤𑀁 𑀆𑀧𑀚𑁆𑀚𑀢𑀺. 𑀢𑀣𑀸𑀪𑀽𑀢𑁄 𑀘 𑀢𑀢𑁆𑀣 𑀉𑀓𑁆𑀓𑀡𑁆𑀞𑀦𑁆𑀢𑁄, 𑀅𑀦𑀪𑀺𑀭𑀫𑀦𑁆𑀢𑁄 𑀘 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀓𑁆𑀓𑀡𑁆𑀞𑀢𑀺 𑀦𑀸𑀪𑀺𑀭𑀫𑀢𑀻’’𑀢𑀺.

𑀢𑀢𑁆𑀣 𑀅𑀦𑀪𑀺𑀭𑀫𑀡𑀲𑁆𑀲 𑀉𑀧𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀬𑁆𑀬𑀣𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁄𑀢𑀢𑁆𑀢𑀤𑀳𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁂𑀲𑀼 𑀤𑁆𑀯𑀺𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁂𑀲𑀼 𑀬𑀣𑀸𑀓𑁆𑀓𑀫𑀁 𑀲𑀸𑀦𑀼𑀅𑀜𑁆𑀚𑀦𑀭𑀚𑀢𑀲𑀼𑀯𑀡𑁆𑀡𑀲𑀢𑁆𑀢𑀭𑀢𑀦𑀫𑀬𑁂𑀲𑀼𑀕𑀦𑁆𑀥𑀫𑀸𑀤𑀦𑀓𑀸𑀴𑀓𑁂𑀮𑀸𑀲𑀲𑀼𑀤𑀲𑁆𑀲𑀦𑀘𑀺𑀢𑁆𑀢𑀓𑀽𑀝𑀪𑁂𑀤𑁂𑀲𑀼 𑀧𑀜𑁆𑀘𑀲𑀼 𑀳𑀺𑀫𑀯𑀢𑁄 𑀫𑀳𑀸𑀲𑀺𑀔𑀭𑁂𑀲𑀼 𑀧𑀘𑁆𑀙𑀺𑀫𑁄 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑁄 𑀦𑀸𑀫. 𑀲𑀻𑀳𑀧𑀧𑀸𑀢𑀸𑀤𑀻𑀲𑀼 𑀲𑀢𑁆𑀢𑀲𑀼 𑀫𑀳𑀸𑀲𑀭𑁂𑀲𑀼.

𑀲𑀼𑀯𑀡𑁆𑀡𑀧𑀜𑁆𑀚𑀭𑁂𑀢𑀺 𑀲𑀼𑀯𑀡𑁆𑀡𑀫𑀬𑁂 𑀲𑀻𑀳𑀧𑀜𑁆𑀚𑀭𑁂. 𑀧𑀓𑁆𑀔𑀺𑀢𑁆𑀢𑁄𑀢𑀺 𑀦𑀺𑀭𑀼𑀤𑁆𑀥𑁄. 𑀢𑀺𑀯𑀺𑀥𑁂 𑀲𑀼𑀕𑀢𑀺𑀪𑀯𑁂𑀢𑀺 𑀓𑀸𑀫𑀲𑀼𑀕𑀢𑀺𑀆𑀤𑀺𑀓𑁂 𑀢𑀺𑀯𑀺𑀥𑁂 𑀲𑀫𑁆𑀧𑀢𑁆𑀢𑀺𑀪𑀯𑁂.

𑀳𑀢𑁆𑀣𑀧𑀸𑀤𑀯𑀸𑀮𑀯𑀢𑁆𑀣𑀺𑀓𑁄𑀲𑁂𑀳𑀺 𑀪𑀽𑀫𑀺𑀨𑀼𑀲𑀦𑁂𑀳𑀺 𑀲𑀢𑁆𑀢𑀳𑀺 𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀢𑁆𑀢𑀧𑀢𑀺𑀝𑁆𑀞𑁄. 𑀦𑀕𑀭𑀫𑀚𑁆𑀛𑁂 𑀦𑀸𑀪𑀺𑀭𑀫𑀢𑀺 𑀤𑁆𑀯𑀸𑀭𑀧𑀜𑁆𑀚𑀭𑀦𑀸𑀴𑀦𑀸𑀤𑀺𑀅𑀯𑀩𑀸𑀥𑀦𑀪𑀬𑁂𑀦. 𑀤𑀺𑀝𑁆𑀞𑁂𑀢𑀺 𑀅𑀥𑀺𑀫𑀼𑀢𑁆𑀢𑀺𑀧𑀼𑀩𑁆𑀩𑀓𑁂𑀦 𑀅𑀦𑁆𑀯𑀬𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑁂. 𑀢𑁂𑀦𑀸𑀳 ‘‘𑀢𑀦𑁆𑀦𑀺𑀦𑁆𑀦𑀢𑀧𑁆𑀧𑁄𑀡𑀢𑀧𑁆𑀧𑀩𑁆𑀪𑀸𑀭𑀫𑀸𑀦𑀲𑁄’’𑀢𑀺.

𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑁭𑁫𑁫. 𑀢𑀁 𑀧𑀦𑁂𑀢𑀦𑁆𑀢𑀺 𑀦𑀺𑀩𑁆𑀩𑀺𑀤𑀸𑀜𑀸𑀡𑀫𑀸𑀳. 𑀜𑀸𑀡𑀤𑁆𑀯𑀬𑁂𑀦𑀸𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑀸𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀤𑁆𑀯𑀬𑁂𑀦. 𑀬𑀲𑁆𑀫𑀸 𑀪𑀬𑀢𑁄 𑀤𑀺𑀲𑁆𑀲𑀫𑀸𑀦𑀸 𑀏𑀯 𑀲𑀗𑁆𑀔𑀸𑀭𑀸 𑀫𑀳𑀸𑀤𑀻𑀦𑀯𑀸, 𑀦𑀺𑀩𑁆𑀩𑀺𑀦𑁆𑀤𑀺𑀢𑀩𑁆𑀩𑀸 𑀘 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀫𑁆𑀧𑀺 𑀢𑀁 𑀜𑀸𑀡𑀁 𑀢𑀣𑀸𑀪𑀸𑀯𑀦𑀸𑀩𑀮𑀧𑁆𑀧𑀢𑁆𑀢𑀺𑀬𑀸 𑀅𑀯𑀢𑁆𑀣𑀸𑀯𑀺𑀲𑁂𑀲𑀬𑀼𑀢𑁆𑀢𑀁 𑀢𑀺𑀯𑀺𑀥𑀓𑀺𑀘𑁆𑀘𑀲𑀸𑀫𑀢𑁆𑀣𑀺𑀬𑀯𑀦𑁆𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑀲𑀗𑁆𑀔𑀸𑀭𑁂’’𑀢𑀺𑀆𑀤𑀺.

𑀢𑀬𑀺𑀤𑀁 𑀢𑀸𑀲𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁, 𑀆𑀤𑀺𑀫𑁆𑀳𑀺 𑀧𑀦 𑀪𑀺𑀦𑁆𑀦𑀲𑀪𑀸𑀯𑀸 𑀏𑀯 𑀧𑀯𑀢𑁆𑀢𑀦𑁆𑀢𑀺. 𑀉𑀧𑁆𑀧𑀸𑀤𑁂𑀲𑀻𑀢𑀺 𑀧𑀸𑀢𑁆𑀯𑀸𑀓𑀸𑀲𑀺, 𑀯𑀺𑀪𑀸𑀯𑁂𑀲𑀻𑀢𑀺 𑀅𑀢𑁆𑀣𑁄.

𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁭𑁫𑁬. 𑀦 𑀲𑀚𑁆𑀚𑀢𑀺 𑀩𑀳𑁆𑀯𑀸𑀤𑀻𑀦𑀯𑀢𑀸𑀬 𑀤𑀺𑀝𑁆𑀞𑀢𑁆𑀢𑀸. 𑀫𑀼𑀜𑁆𑀘𑀺𑀢𑀼𑀓𑀸𑀫𑀁 𑀦𑀺𑀲𑁆𑀲𑀭𑀺𑀢𑀼𑀓𑀸𑀫𑀁 𑀳𑁄𑀢𑀺 𑀅𑀦𑀸𑀤𑀺𑀓𑀸𑀮𑀺𑀓𑀲𑁆𑀲 𑀔𑀦𑁆𑀥𑀲𑁆𑀲 𑀧𑀭𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀫𑀼𑀜𑁆𑀘𑀺𑀢𑀼𑀓𑀸𑀫𑀢𑀸 𑀢𑀢𑁄 𑀅𑀢𑁆𑀢𑀸𑀦𑀁 𑀦𑀺𑀩𑁆𑀩𑁂𑀥𑁂𑀢𑀼𑀓𑀸𑀫𑀢𑀸 𑀦𑀺𑀲𑁆𑀲𑀭𑀺𑀢𑀼𑀓𑀸𑀫𑀢𑀸 𑀅𑀧𑀕𑀦𑁆𑀢𑀼𑀓𑀸𑀫𑀢𑀸. 𑀧𑀜𑁆𑀚𑀭𑀧𑀓𑁆𑀔𑀺𑀢𑁆𑀢𑁄𑀢𑀺 𑀧𑀜𑁆𑀚𑀭𑁂𑀦 𑀲𑀫𑁄𑀭𑀼𑀤𑁆𑀥𑁄. 𑀏𑀯𑀫𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀤𑀺𑀢𑁆𑀢𑀅𑀗𑁆𑀕𑀸𑀭𑀉𑀧𑀲𑀝𑁆𑀞𑀤𑁂𑀲𑀩𑁆𑀬𑀸𑀴𑀲𑀸𑀧𑀤𑀸𑀓𑀼𑀮𑀯𑀦𑀕𑀳𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁭𑁫𑁭. ‘‘𑀲𑀩𑁆𑀩𑀪𑀯 …𑀧𑁂… 𑀫𑀼𑀜𑁆𑀘𑀺𑀢𑀼𑀓𑀸𑀫𑁄’’𑀢𑀺 𑀯𑀢𑁆𑀯𑀸 𑀧𑀼𑀦 𑀲𑀩𑁆𑀩𑀲𑁆𑀫𑀸 𑀲𑀗𑁆𑀔𑀸𑀭𑀕𑀢𑀸𑀢𑀺 𑀲𑀩𑁆𑀩𑀕𑁆𑀕𑀳𑀡𑀁 𑀲𑀸𑀢𑀺𑀲𑀬𑀫𑀼𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀅𑀥𑀺𑀓𑀯𑀘𑀦𑀁 𑀅𑀜𑁆𑀜𑀫𑀢𑁆𑀣𑀁 𑀩𑁄𑀥𑁂𑀢𑀻𑀢𑀺. 𑀬𑀜𑁆𑀳𑀺 𑀲𑀗𑁆𑀔𑀸𑀭𑁂𑀳𑀺 𑀅𑀦𑀦𑀼𑀩𑀦𑁆𑀥𑀲𑁆𑀲 𑀫𑀼𑀜𑁆𑀘𑀦𑀁, 𑀢𑀁 𑀲𑀸𑀢𑀺𑀲𑀬𑀁 𑀫𑀼𑀜𑁆𑀘𑀦𑀁. 𑀢𑀁 𑀧𑀦 𑀯𑀼𑀘𑁆𑀘𑀫𑀸𑀦𑀸𑀬 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀳𑁄𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀦 𑀢𑁂 𑀏𑀯𑀁 𑀲𑀗𑁆𑀔𑀸𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀡𑁆𑀳𑀦𑀁 𑀧𑀼𑀩𑁆𑀩𑁂𑀧𑀺 𑀓𑀢𑀦𑁆𑀢𑀺 𑀧𑀼𑀦𑀕𑁆𑀕𑀳𑀡𑀁. 𑀪𑀯𑀸𑀤𑀺𑀕𑀢𑀲𑁆𑀲 𑀲𑀗𑁆𑀔𑀸𑀭𑀲𑁆𑀲 𑀅𑀧𑀭𑀺𑀢𑀼𑀮𑀺𑀢𑀲𑁆𑀲 𑀅𑀪𑀸𑀯𑀢𑁄 ‘‘𑀢𑁂’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀧𑀲𑁆𑀲𑀦𑀸𑀓𑀸𑀭𑀲𑁆𑀲 𑀅𑀧𑀼𑀩𑁆𑀩𑀲𑁆𑀲𑀧𑀺 𑀅𑀢𑁆𑀣𑀺𑀢𑀸𑀬 ‘‘𑀏𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦𑀸𑀢𑀺 𑀳𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀭𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑀁 𑀦𑀸𑀫 𑀧𑀭𑀺𑀧𑀼𑀡𑁆𑀡𑀮𑀓𑁆𑀔𑀡𑀯𑀲𑁂𑀦𑁂𑀯 𑀳𑁄𑀢𑀻𑀢𑀺 ‘‘𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑀅𑀦𑀘𑁆𑀘𑀦𑁆𑀢𑀺𑀓𑀢𑁄𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀧𑀞𑀫𑁂𑀦 𑀆𑀤𑀺-𑀲𑀤𑁆𑀤𑁂𑀦 ‘‘𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑁄 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀤𑀼𑀢𑀺𑀬𑁂𑀦 ‘‘𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀢𑁄 𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀅𑀚𑀜𑁆𑀜𑀢𑁄𑀢𑀺 𑀅𑀫𑀦𑀼𑀜𑁆𑀜𑀢𑁄, 𑀅𑀲𑁄𑀪𑀦𑀢𑁄 𑀯𑀸. 𑀚𑁂𑀕𑀼𑀘𑁆𑀙𑀢𑁄𑀢𑀺 ‘‘𑀥𑀻’’𑀢𑀺 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀢𑁄. 𑀧𑀝𑀺𑀓𑁆𑀓𑀽𑀮𑀢𑁄𑀢𑀺 𑀅𑀪𑀺𑀭𑀼𑀘𑀺𑀬𑀸 𑀧𑀝𑀺𑀮𑁄𑀫𑀦𑁂𑀦 𑀧𑀝𑀺𑀓𑁆𑀓𑀽𑀮𑀪𑀸𑀯𑀢𑁄. 𑀦 𑀫𑀡𑁆𑀟𑀦𑁂𑀦 𑀳𑀢𑀸 𑀅𑀫𑀡𑁆𑀟𑀦𑀳𑀢𑀸, 𑀅𑀫𑀡𑁆𑀟𑀦𑁂𑀦 𑀲𑀓𑁆𑀓𑀸 𑀏𑀢𑁂𑀲𑀁 𑀲𑀼𑀪𑀪𑀸𑀯𑀁 𑀳𑀦𑁆𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀫𑀡𑁆𑀟𑀦𑁂𑀦 𑀯𑀸 𑀢𑁂𑀲𑀁 𑀅𑀲𑀼𑀪𑀢𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀅𑀫𑀡𑁆𑀟𑀦𑀳𑀢𑀸. 𑀫𑀡𑁆𑀟𑀦𑁂𑀦 𑀯𑀸 𑀦 𑀳𑀦𑁆𑀢𑀩𑁆𑀩𑀲𑀪𑀸𑀯𑀸 ‘‘𑀅𑀲𑀽𑀭𑀺𑀬𑀧𑀲𑁆𑀲𑀸’’𑀢𑀺 𑀯𑀺𑀬 𑀅𑀫𑀡𑁆𑀟𑀦𑀳𑀢𑀸. 𑀢𑀢𑁄 𑀅𑀫𑀡𑁆𑀟𑀦𑀳𑀢𑀪𑀸𑀯𑀢𑁄𑀢𑀺 𑀭𑀽𑀧𑀲𑀗𑁆𑀔𑀸𑀭𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀯𑀺𑀭𑀽𑀧𑀢𑁄𑀢𑀺 𑀅𑀲𑀼𑀦𑁆𑀤𑀭𑀢𑁄. 𑀧𑀝𑀺𑀖𑀲𑀁𑀬𑁄𑀚𑀦𑀯𑀢𑁆𑀣𑀼𑀢𑀸𑀬 𑀧𑀲𑁆𑀲𑀦𑁆𑀢𑁂 𑀅𑀢𑁆𑀢𑀦𑀺 𑀩𑀦𑁆𑀥𑀢𑀻𑀢𑀺 𑀩𑀻𑀪𑀘𑁆𑀙𑀁 𑀅𑀢𑀺𑀯𑀺𑀬 𑀯𑀺𑀭𑀽𑀧𑀁. 𑀬𑀁 𑀤𑀺𑀝𑁆𑀞𑀫𑀢𑁆𑀢𑀫𑁂𑀯 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀳𑁄𑀢𑀺. 𑀅𑀚𑀜𑁆𑀜𑀚𑀺𑀕𑀼𑀘𑁆𑀙𑀦𑀻𑀬𑀢𑀸 𑀳𑀺 𑀕𑀽𑀣𑀁 𑀯𑀺𑀬 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁 𑀯𑀸 𑀩𑀻𑀪𑀘𑁆𑀙𑀁. 𑀇𑀥 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀲𑀼𑀘𑀺𑀢𑁄 𑀅𑀫𑀦𑀸𑀧𑀢𑁄’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀘𑀢𑀼𑀢𑁆𑀣𑁂𑀦 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀧𑀭𑀺𑀡𑀸𑀬𑀓𑀢𑁄 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄.

𑁭𑁫𑁮. 𑀅𑀬𑀦𑁆𑀢𑀺 𑀬𑁄𑀕𑀸𑀯𑀘𑀭𑁄. 𑀫𑀼𑀜𑁆𑀘𑀦𑀲𑁆𑀲𑀸𑀢𑀺 𑀧𑀼𑀦 𑀅𑀦𑀦𑀼𑀩𑀦𑁆𑀥𑀦𑀢𑁆𑀣𑀁 𑀲𑀼𑀫𑀼𑀢𑁆𑀢𑀫𑀼𑀜𑁆𑀘𑀦𑀲𑁆𑀲. 𑀉𑀧𑀸𑀬𑀲𑀫𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀼𑀝𑁆𑀞𑀼 𑀧𑀭𑀺𑀕𑁆𑀕𑀡𑁆𑀳𑀦𑀁 𑀧𑀭𑀺𑀫𑀤𑁆𑀤𑀦𑀸 𑀉𑀧𑀸𑀬𑁄, 𑀢𑀲𑁆𑀲 𑀲𑀸𑀥𑀦𑀢𑁆𑀣𑀁.

𑀫𑀘𑁆𑀙𑀕𑀳𑀡𑀢𑁆𑀣𑀁 𑀉𑀤𑀓𑁂 𑀢𑀢𑁆𑀣 𑀢𑀢𑁆𑀣 𑀔𑀺𑀧𑀦𑁆𑀢𑀺 𑀏𑀢𑀦𑁆𑀢𑀺 𑀔𑀺𑀧𑁆𑀧𑀁, 𑀫𑀘𑁆𑀙𑀸𑀦𑀁 𑀕𑀳𑀡𑀓𑀽𑀝𑀧𑀁. 𑀑𑀟𑁆𑀟𑀸𑀧𑁂𑀲𑀻𑀢𑀺 𑀑𑀲𑀸𑀭𑁂𑀲𑀺, 𑀔𑀺𑀧𑀻𑀢𑀺 𑀅𑀢𑁆𑀣𑁄. 𑀲𑀧𑁆𑀧𑀦𑁆𑀢𑀺 𑀓𑀡𑁆𑀳𑀲𑀧𑁆𑀧𑀁. 𑀕𑀳𑀡𑁂𑀢𑀺 𑀬𑀣𑀸𑀕𑀳𑀺𑀢𑀁 𑀲𑀧𑁆𑀧𑀁 𑀅𑀙𑀟𑁆𑀟𑁂𑀢𑁆𑀯𑀸 𑀕𑀳𑀡𑁂. 𑀳𑀢𑁆𑀣𑀁 𑀦𑀺𑀩𑁆𑀩𑁂𑀞𑁂𑀢𑁆𑀯𑀸𑀢𑀺 𑀲𑀧𑁆𑀧𑁂𑀦 𑀅𑀢𑁆𑀢𑀦𑁄 𑀪𑁄𑀕𑁂𑀦 𑀯𑁂𑀞𑀺𑀢𑀁 𑀳𑀢𑁆𑀣𑀧𑀤𑁂𑀲𑀁 𑀦𑀺𑀩𑁆𑀩𑁂𑀞𑁂𑀢𑁆𑀯𑀸 𑀫𑁄𑀘𑁂𑀢𑁆𑀯𑀸. 𑀆𑀯𑀺𑀚𑁆𑀛𑀺𑀢𑁆𑀯𑀸 𑀆𑀯𑁂𑀞𑀺𑀓𑀧𑁆𑀧𑀳𑀸𑀧𑀦𑁂𑀦 𑀪𑀫𑁂𑀢𑁆𑀯𑀸. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀙𑀟𑁆𑀟𑁂𑀢𑁆𑀯𑀸.

𑀢𑀢𑁆𑀣𑀸𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀢𑀢𑁆𑀣 𑀆𑀤𑀺𑀢𑁄𑀯𑀸𑀢𑀺 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀓𑀸𑀮𑁂. 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀫𑀽𑀳𑀸𑀤𑀺𑀖𑀦𑀕𑁆𑀕𑀳𑀡𑀁 𑀪𑀺𑀦𑁆𑀤𑀺𑀢𑁆𑀯𑀸. 𑀲𑀼𑀫𑀼𑀢𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬. 𑀲𑀗𑁆𑀔𑀸𑀭𑀸𑀦𑀁 𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑁂𑀦 𑀉𑀧𑀝𑁆𑀞𑀸𑀢𑀼𑀁 𑀅𑀲𑀫𑀢𑁆𑀣𑀢𑀸 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀪𑁂𑀤𑀸𑀬 𑀯𑀺𑀧𑀲𑁆𑀲𑀦𑀸𑀬 𑀲𑀸𑀢𑀺𑀲𑀬𑀁 𑀩𑀮𑀯𑀪𑀸𑀯𑀧𑁆𑀧𑀢𑁆𑀢𑀺𑀬𑀸, 𑀲𑀸 𑀘 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑀲𑁆𑀲 𑀲𑀼𑀝𑁆𑀞𑀼𑀢𑀭𑀁 𑀲𑀮𑁆𑀮𑀓𑁆𑀔𑀡𑁂𑀦𑀸𑀢𑀺 𑀆𑀳 ‘‘𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑁂𑀦…𑀧𑁂… 𑀧𑀸𑀧𑁂𑀢𑁆𑀯𑀸’’𑀢𑀺. 𑀬𑀣𑀸 𑀳𑀺 𑀦𑀺𑀩𑁆𑀩𑀼𑀤𑁆𑀥𑀓𑀭𑀡𑁂 𑀩𑀮𑀯𑀢𑀭𑁂𑀦 𑀧𑀝𑀺𑀫𑀮𑁆𑀮𑁂𑀦 𑀢𑀢𑁆𑀣 𑀢𑀢𑁆𑀣 𑀫𑀼𑀝𑁆𑀞𑀺𑀧𑁆𑀧𑀳𑀸𑀭𑀸𑀤𑀺𑀦𑀸 𑀯𑀺𑀫𑀣𑀺𑀢𑁄 𑀇𑀢𑀭𑁄 𑀢𑁂𑀦 𑀬𑀼𑀚𑁆𑀛𑀺𑀢𑀼𑀁 𑀅𑀲𑀫𑀢𑁆𑀣𑀢𑀁 𑀧𑀸𑀧𑀺𑀢𑁄 𑀳𑁄𑀢𑀺. 𑀦 𑀓𑁂𑀯𑀮𑀁 𑀅𑀲𑀫𑀢𑁆𑀣𑀢𑀁 𑀧𑀸𑀧𑀺𑀢𑁄𑀯 𑀳𑁄𑀢𑀺, 𑀅𑀣 𑀔𑁄 𑀫𑀭𑀡𑀫𑀢𑁆𑀢𑀁 𑀤𑀼𑀓𑁆𑀔𑀁 𑀯𑀸 𑀫𑀭𑀡𑀁 𑀯𑀸 𑀧𑀸𑀧𑀼𑀡𑀸𑀢𑀺, 𑀏𑀯𑀫𑁂𑀢𑁂𑀧𑀺 𑀲𑀗𑁆𑀔𑀸𑀭𑀸 𑀏𑀯𑀁 𑀤𑀼𑀩𑁆𑀩𑀮𑀪𑀸𑀯𑀁 𑀧𑀸𑀧𑀺𑀢𑀸 𑀉𑀧𑀭𑀺𑀜𑀸𑀡𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀺𑀲𑁂𑀯𑀦𑀢𑀁, 𑀲𑀩𑁆𑀩𑀲𑁄 𑀪𑀗𑁆𑀕𑀜𑁆𑀘 𑀧𑀸𑀧𑀼𑀡𑀦𑁆𑀢𑀻𑀢𑀺.

𑁭𑁫𑁯. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀯𑀁 ‘‘𑀅𑀦𑀘𑁆𑀘𑀦𑁆𑀢𑀺𑀓𑀢𑁄’’𑀢𑀺𑀆𑀤𑀺𑀦𑀸 𑀧𑀭𑁄𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑀲𑀮𑁆𑀮𑀓𑁆𑀔𑀡𑀯𑀲𑀧𑁆𑀧𑀯𑀢𑁆𑀢𑁂𑀦 𑀧𑀝𑀺𑀲𑀗𑁆𑀔𑀸𑀦𑁂𑀦.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀪𑀬𑀢𑀼𑀧𑀝𑁆𑀞𑀸𑀦𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁭𑁫𑁦) 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 ‘‘𑀧𑀝𑀺𑀲𑀗𑁆𑀔𑀸’’𑀢𑀺 𑀧𑀤𑀲𑁆𑀲 ‘‘𑀚𑀸𑀦𑀺𑀢𑁆𑀯𑀸’’𑀢𑀺 𑀅𑀢𑁆𑀣𑀁 𑀯𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑀼𑀧𑁆𑀧𑀚𑁆𑀚𑀦𑀓𑀺𑀭𑀺𑀬𑀸𑀦𑀁 𑀲𑀫𑀸𑀦𑀔𑀡𑀢𑁆𑀢𑀸 𑀅𑀲𑀢𑀺𑀧𑀺 𑀧𑀼𑀩𑁆𑀩𑀸𑀧𑀭𑀓𑀸𑀮𑀢𑁆𑀢𑁂 𑀲𑀤𑁆𑀤𑀯𑁄𑀳𑀸𑀭𑀫𑀢𑁆𑀢𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀦 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸 (𑀧𑀝𑁆𑀞𑀸. 𑁧.𑁧.𑁫𑁩), 𑀦𑀺𑀳𑀦𑁆𑀢𑁆𑀯𑀸 𑀢𑀺𑀫𑀺𑀭𑀁 𑀲𑀩𑁆𑀩𑀁, 𑀉𑀕𑁆𑀕𑀢𑁄𑀬𑀁 𑀤𑀺𑀯𑀸𑀓𑀭𑁄’’𑀢𑀺 𑀘 𑀏𑀯𑀫𑀸𑀤𑀻𑀲𑀼 𑀯𑀺𑀬 𑀲𑀫𑀸𑀦𑀓𑀸𑀮𑀯𑀲𑁂𑀦𑀸𑀬𑀁 𑀲𑀤𑁆𑀤𑀧𑀬𑁄𑀕𑁄𑀢𑀺. 𑀢𑀣𑀸 𑀫𑀦𑀜𑁆𑀘 𑀥𑀫𑁆𑀫𑁂 𑀘 𑀧𑀞𑀫𑀁 𑀧𑀝𑀺𑀘𑁆𑀘 𑀧𑀘𑁆𑀙𑀸 𑀦 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺, 𑀏𑀯𑀫𑀺𑀥𑀸𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀤𑀺𑀲𑁄 𑀲𑀤𑁆𑀤𑀧𑀬𑁄𑀕𑁄 𑀬𑁂𑀪𑀼𑀬𑁆𑀬𑁂𑀦 𑀮𑁄𑀓𑁂 𑀧𑀼𑀩𑁆𑀩𑀓𑀸𑀮𑀯𑀲𑁂𑀦𑁂𑀯 𑀤𑀺𑀲𑁆𑀲𑀢𑀻𑀢𑀺 𑀧𑀼𑀩𑁆𑀩𑀓𑀸𑀮𑀯𑀲𑁂𑀦𑁂𑀯 𑀇𑀥𑀸𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀢𑁆𑀢𑀦𑀬𑁂𑀦 𑀯𑀸…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀅𑀧𑀭𑀸𑀧𑀭𑀁 𑀉𑀧𑁆𑀧𑀦𑁆𑀦𑁂𑀲𑀼 𑀜𑀸𑀡𑁂𑀲𑀼 𑀧𑀼𑀭𑀺𑀫𑀲𑁆𑀲 𑀯𑀲𑁂𑀦 𑀧𑀝𑀺𑀲𑀗𑁆𑀔𑀸𑀦𑀓𑀺𑀭𑀺𑀬𑀸, 𑀢𑀤𑀜𑁆𑀜𑀲𑁆𑀲 𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀺𑀭𑀺𑀬𑀸 𑀘 𑀬𑁄𑀚𑁂𑀢𑀩𑁆𑀩𑀸, 𑀦 𑀘 𑀢𑀸𑀦𑀺 𑀪𑁂𑀤𑀢𑁄 𑀅𑀧𑁂𑀓𑁆𑀔𑀺𑀢𑀩𑁆𑀩𑀸𑀦𑀺 𑀏𑀓𑀲𑀦𑁆𑀢𑀸𑀦𑀧𑀢𑀺𑀢𑀢𑀸𑀬 𑀏𑀓𑀢𑁆𑀢𑀦𑀬𑀯𑀲𑁂𑀦 𑀕𑀳𑀺𑀢𑀢𑁆𑀢𑀸𑀢𑀺. 𑀇𑀢𑀭𑀲𑁆𑀫𑀺𑀁 𑀧𑀤𑀤𑁆𑀯𑀬𑁂𑀢𑀺 ‘‘𑀧𑀯𑀢𑁆𑀢𑀁 𑀧𑀝𑀺𑀲𑀗𑁆𑀔𑀸, 𑀦𑀺𑀫𑀺𑀢𑁆𑀢𑀜𑁆𑀘 𑀧𑀯𑀢𑁆𑀢𑀜𑁆𑀘 𑀧𑀝𑀺𑀲𑀗𑁆𑀔𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑀤𑁆𑀯𑀬𑁂.

𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁭𑁬𑁦. 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀓𑀸𑀭𑀸𑀤𑀺𑀧𑀭𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀧𑀯𑀢𑁆𑀢𑀫𑁆𑀧𑀺 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀯𑀺𑀲𑁂𑀲𑀢𑁄 𑀅𑀦𑀢𑁆𑀢𑀸𑀓𑀸𑀭𑀧𑀭𑀺𑀕𑁆𑀕𑀡𑁆𑀳𑀦𑀧𑀥𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀲𑀼𑀜𑁆𑀜𑀸𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺. 𑀢𑀲𑁆𑀫𑀺𑀜𑁆𑀳𑀺 𑀲𑀢𑀺 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁄 𑀇𑀚𑁆𑀛𑀢𑀺, 𑀦 𑀅𑀲𑀢𑀺. 𑀢𑀤𑀪𑀸𑀯𑀢𑁄 𑀳𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀮𑀓𑁆𑀔𑀡𑀧𑀜𑁆𑀜𑀸𑀧𑀓𑀫𑁆𑀧𑀺 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀸𑀤𑀻𑀦𑀁 𑀲𑀸𑀲𑀦𑀁 𑀅𑀦𑀺𑀬𑁆𑀬𑀸𑀦𑀺𑀓𑀫𑁂𑀯 𑀚𑀸𑀢𑀁. 𑀅𑀣 𑀯𑀸 𑀢𑁂𑀲𑀁 𑀦𑀺𑀘𑁆𑀘𑀲𑀸𑀭𑀸𑀤𑀻𑀳𑀺 𑀭𑀺𑀢𑁆𑀢𑀓𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀲𑀼𑀜𑁆𑀜𑀸𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀜𑁆𑀳𑀺 𑀬𑀢𑁄 𑀭𑀺𑀢𑁆𑀢𑀓𑀁, 𑀢𑀁 𑀢𑁂𑀦 𑀲𑀼𑀜𑁆𑀜𑀦𑁆𑀢𑀺. 𑀲𑀗𑁆𑀔𑀸𑀭𑀸𑀦𑀁 𑀅𑀢𑁆𑀢𑀲𑀼𑀜𑁆𑀜𑀢𑀸𑀬 𑀤𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄 𑀅𑀦𑁂𑀓𑀯𑀸𑀭𑀁 𑀧𑀝𑀺𑀯𑀺𑀤𑁆𑀥𑀸𑀬𑀧𑀺 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀬 𑀤𑀴𑁆𑀳𑀻𑀪𑀸𑀯𑀸𑀧𑀸𑀤𑀦𑀢𑁆𑀣𑀁 ‘‘𑀧𑀼𑀦 𑀲𑀼𑀜𑁆𑀜𑀫𑀺𑀤’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀤𑀕𑁆𑀕𑁂𑀦 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀢𑀸, 𑀢𑀤𑀕𑁆𑀕𑁂𑀦 𑀅𑀦𑀢𑁆𑀢𑀦𑀺𑀬𑀸. 𑀲𑀢𑀺 𑀳𑀺 𑀅𑀢𑁆𑀢𑀦𑀺 𑀅𑀢𑁆𑀢𑀦𑀺𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀜𑁆𑀜𑀫𑀺𑀤𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺. 𑀤𑁆𑀯𑀺𑀓𑁄𑀝𑀺𑀓𑀦𑁆𑀢𑀺 𑀤𑁆𑀯𑀺𑀅𑀁𑀲𑀺𑀓𑀁, 𑀅𑀢𑁆𑀢𑀸𑀦𑀁 𑀦𑁂𑀯 𑀤𑀺𑀲𑁆𑀯𑀸 𑀜𑀸𑀡𑀘𑀓𑁆𑀔𑀼𑀦𑀸 𑀧𑀘𑁆𑀘𑀓𑁆𑀔𑀢𑁄, 𑀅𑀦𑀼𑀫𑀸𑀦𑀢𑁄 𑀘 𑀢𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀁 𑀅𑀜𑁆𑀜𑀁 𑀲𑀢𑁆𑀢𑀁, 𑀲𑀗𑁆𑀔𑀸𑀭𑀁 𑀯𑀸 𑀧𑀭𑀺𑀓𑁆𑀔𑀸𑀭𑀪𑀸𑀯𑁂 𑀅𑀢𑁆𑀢𑀦𑁄 𑀲𑀼𑀔𑀤𑀼𑀓𑁆𑀔𑀲𑀸𑀥𑀦𑀪𑀸𑀯𑁂 𑀞𑀺𑀢𑀁 𑀦 𑀤𑀺𑀲𑁆𑀯𑀸𑀢𑀺 𑀬𑁄𑀚𑀦𑀸. 𑀧𑀼𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀥𑀺𑀓𑀸𑀭𑁂.

𑀓𑁆𑀯𑀘𑀻𑀢𑀺 𑀓𑀢𑁆𑀣𑀘𑀺 𑀞𑀸𑀦𑁂, 𑀓𑀸𑀮𑁂, 𑀥𑀫𑁆𑀫𑁂 𑀯𑀸. 𑀅𑀣 𑀯𑀸 𑀓𑁆𑀯𑀘𑀻𑀢𑀺 𑀅𑀚𑁆𑀛𑀢𑁆𑀢𑀁, 𑀩𑀳𑀺𑀤𑁆𑀥𑀸 𑀯𑀸. 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀦𑁆𑀢𑀺 𑀲𑀓𑀢𑁆𑀢𑀸𑀦𑀁. ‘‘𑀅𑀬𑀁 𑀔𑁄 𑀪𑀯𑀁 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸…𑀧𑁂… 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁪𑁨) 𑀧𑀭𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀁 𑀅𑀢𑁆𑀢𑀸𑀦𑀜𑁆𑀘 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀪𑀽𑀢𑀁 𑀦 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀲𑁆𑀲𑀘𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀲𑁆𑀲𑀸𑀢𑀺 ‘‘𑀧𑀭𑀚𑀸𑀢𑀺, 𑀧𑀭𑁄 𑀧𑀼𑀭𑀺𑀲𑁄’’𑀢𑀺 𑀘 𑀏𑀯𑀁 𑀕𑀳𑀺𑀢𑀲𑁆𑀲. 𑀦 𑀘 𑀫𑀫 𑀓𑁆𑀯𑀘𑀦𑀻𑀢𑀺 𑀏𑀢𑁆𑀣 𑀫𑀫-𑀲𑀤𑁆𑀤𑁄 𑀅𑀝𑁆𑀞𑀸𑀦𑁂 𑀧𑀬𑀼𑀢𑁆𑀢𑁄𑀢𑀺 𑀆𑀳 ‘‘𑀫𑀫-𑀲𑀤𑁆𑀤𑀁 𑀢𑀸𑀯 𑀞𑀧𑁂𑀢𑁆𑀯𑀸’’𑀢𑀺. 𑀧𑀭𑀲𑁆𑀲 𑀘𑀸𑀢𑀺 𑀅𑀢𑁆𑀢𑀢𑁄 𑀅𑀜𑁆𑀜𑀲𑁆𑀲. ‘‘𑀧𑀭𑁄 𑀧𑀼𑀭𑀺𑀲𑁄’’𑀢𑀺 𑀏𑀯𑀁𑀪𑀽𑀢𑁄 𑀅𑀢𑁆𑀣𑁄 𑀫𑀫𑀢𑁆𑀣𑀸𑀬 𑀞𑀺𑀢𑁄, 𑀢𑀲𑁆𑀲 𑀯𑀲𑁂𑀦 𑀫𑀬𑁆𑀳𑀁 𑀲𑀩𑁆𑀩𑀁 𑀲𑀺𑀚𑁆𑀛𑀢𑀻𑀢𑀺 𑀏𑀯𑀁 𑀏𑀓𑀘𑁆𑀘𑀤𑀺𑀝𑁆𑀞𑀺𑀕𑀢𑀺𑀓𑀧𑀭𑀺𑀓𑀧𑁆𑀧𑀺𑀢𑀯𑀲𑁂𑀦 𑀧𑀭𑀁 𑀅𑀢𑁆𑀢𑀸𑀦𑀁 𑀢𑀜𑁆𑀘 𑀅𑀢𑁆𑀢𑀦𑁄 𑀓𑀺𑀜𑁆𑀘𑀦𑀪𑀽𑀢𑀁 𑀦 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀘 𑀓𑁆𑀯𑀘𑀦𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀦𑀸𑀳𑀁 𑀓𑁆𑀯𑀘𑀦𑀻𑀢𑀺 𑀲𑀓𑀅𑀢𑁆𑀢𑀦𑁄 𑀅𑀪𑀸𑀯𑀁 𑀧𑀲𑁆𑀲𑀢𑀺. 𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀦𑁆𑀢𑀺 𑀲𑀓𑀅𑀢𑁆𑀢𑀦𑁄 𑀏𑀯 𑀓𑀲𑁆𑀲𑀘𑀺 𑀅𑀦𑀢𑁆𑀢𑀦𑀺𑀬𑀢𑀁 𑀧𑀲𑁆𑀲𑀢𑀺. 𑀦 𑀘 𑀫𑀫𑀸𑀢𑀺 𑀏𑀢𑀁 𑀤𑁆𑀯𑀬𑀁 𑀬𑀣𑀸𑀲𑀗𑁆𑀔𑁆𑀬𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀢𑁆𑀣𑀻𑀢𑀺 𑀧𑀘𑁆𑀘𑁂𑀓𑀁. 𑀦 𑀘 𑀓𑁆𑀯𑀘𑀦𑀺 𑀧𑀭𑀲𑁆𑀲 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀅𑀪𑀸𑀯𑀁 𑀧𑀲𑁆𑀲𑀢𑀺. 𑀢𑀲𑁆𑀲 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀫𑀫 𑀓𑀺𑀜𑁆𑀘𑀦𑀢𑀸 𑀦 𑀘𑀢𑁆𑀣𑀻𑀢𑀺 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀅𑀦𑀢𑁆𑀢𑀦𑀺𑀬𑀢𑀁 𑀧𑀲𑁆𑀲𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀁, 𑀩𑀳𑀺𑀤𑁆𑀥𑀸 𑀘 𑀔𑀦𑁆𑀥𑀸𑀦𑀁 𑀅𑀢𑁆𑀢𑀢𑁆𑀢𑀦𑀺𑀬𑀲𑀼𑀜𑁆𑀜𑀢𑀸 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑀢𑀸 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀤𑀺𑀝𑁆𑀞𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀫𑀬’’𑀦𑁆𑀢𑀺𑀆𑀤𑀺.

𑁭𑁬𑁧. ‘‘𑀙𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀆𑀕𑀢𑁂 𑀧𑀓𑀸𑀭𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀬 𑀧𑀭𑀺𑀩𑁆𑀭𑀽𑀳𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀙𑀳𑀸𑀓𑀸𑀭𑁂𑀳𑀻𑀢𑀺 𑀙𑀳𑀺 𑀕𑀳𑀡𑀸𑀓𑀸𑀭𑁂𑀳𑀺, 𑀕𑀳𑁂𑀢𑀩𑁆𑀩𑀸𑀓𑀸𑀭𑁂𑀳𑀺 𑀯𑀸. 𑀦𑀺𑀘𑁆𑀘𑁂𑀦𑀸𑀢𑀺 ‘‘𑀦𑀺𑀘𑁆𑀘𑁄’’𑀢𑀺 𑀧𑀭𑀺𑀓𑀧𑁆𑀧𑀺𑀢𑁂𑀦 𑀅𑀢𑁆𑀢𑀦𑀸 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺. 𑀦𑀺𑀘𑁆𑀘𑁂𑀦𑀸𑀢𑀺 𑀯𑀸 𑀦𑀺𑀘𑁆𑀘𑀪𑀸𑀯𑁂𑀦. 𑀥𑀼𑀯𑀸𑀤𑀬𑁄 ‘‘𑀦𑀺𑀘𑁆𑀘𑁄’’𑀢𑀺 𑀕𑀳𑀺𑀢𑀲𑁆𑀲𑁂𑀯 𑀕𑀳𑁂𑀢𑀩𑁆𑀩𑀸𑀓𑀸𑀭𑀸. 𑀢𑀩𑁆𑀩𑀺𑀪𑀸𑀕𑁂𑀦 𑀳𑀺 𑀇𑀫𑀲𑁆𑀲 𑀙𑀓𑁆𑀓𑀢𑀸. 𑀢𑀢𑁆𑀣 𑀦𑀺𑀘𑁆𑀘𑀢𑀸 𑀦𑀸𑀫 𑀓𑀽𑀝𑀝𑁆𑀞𑀢𑀸. 𑀥𑀼𑀯𑀪𑀸𑀯𑁄 𑀣𑀺𑀭𑀢𑀸. 𑀲𑀤𑀸 𑀪𑀸𑀯𑀺𑀢𑀸 𑀲𑀲𑁆𑀲𑀢𑀢𑀸. 𑀦𑀺𑀩𑁆𑀩𑀺𑀓𑀸𑀭𑀢𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑀸. 𑀬𑀸𑀯 𑀚𑀭𑀸𑀫𑀭𑀡𑀸𑀢𑀺 𑀧𑁂𑀬𑁆𑀬𑀸𑀮𑀁 𑀅𑀓𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀧𑀤𑀫𑁂𑀯 𑀤𑀲𑁆𑀲𑁂𑀢𑀺.

𑁭𑁬𑁨. 𑀦 𑀲𑀸𑀭𑀦𑁆𑀢𑀺 𑀅𑀲𑀸𑀭𑀁, 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀸𑀭𑀦𑁆𑀢𑀺 𑀦𑀺𑀲𑁆𑀲𑀸𑀭𑀁. 𑀲𑀸𑀭𑀢𑁄 𑀅𑀧𑀕𑀢𑀁, 𑀲𑀸𑀭𑀁 𑀯𑀸 𑀢𑀢𑁄 𑀅𑀧𑀕𑀢𑀦𑁆𑀢𑀺 𑀲𑀸𑀭𑀸𑀧𑀕𑀢𑀁. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸’’𑀢𑀺 𑀧𑀸𑀴𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢’’𑀦𑁆𑀢𑀺 𑀧𑀤𑀢𑁆𑀢𑀬𑀁 𑀏𑀓𑁄 𑀲𑀼𑀜𑁆𑀜𑀢𑀸𑀧𑀭𑀺𑀕𑁆𑀕𑀳𑀸𑀓𑀸𑀭𑁄, 𑀅𑀜𑁆𑀜𑀣𑀸 𑀲𑀢𑁆𑀢𑁂𑀯 𑀆𑀓𑀸𑀭𑀸 𑀲𑀺𑀬𑀼𑀁, 𑀦 𑀅𑀝𑁆𑀞𑀸𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀲𑀼𑀪𑀲𑀸𑀭𑀲𑀸𑀭𑁂𑀦𑀸𑀢𑀺𑀧𑀺 𑀧𑀸𑀴𑀺𑀬𑀁 𑀅𑀢𑁆𑀣𑀻𑀢𑀺 ‘𑀅𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢’𑀦𑁆𑀢𑀺 𑀇𑀤𑀁 𑀧𑀤𑀢𑁆𑀢𑀬𑀁 ‘𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦𑀸’𑀢𑀺𑀆𑀤𑀻𑀲𑀼 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀲𑁂𑀢𑀯𑀘𑁆𑀙𑁄𑀢𑀺 𑀲𑁂𑀢𑀯𑀭𑀼𑀡𑀓𑁄. ‘‘𑀫𑀺𑀦𑀭𑀼𑀓𑁆𑀔𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀸𑀴𑀺𑀪𑀤𑁆𑀤𑀓𑁄𑀢𑀺 𑀓𑀺𑀁𑀲𑀼𑀓𑁄.

𑁭𑁬𑁩. 𑀦𑀺𑀘𑁆𑀘𑀲𑀸𑀭𑀸𑀤𑀻𑀦𑀁 𑀅𑀪𑀸𑀯𑀢𑁄 𑀭𑀺𑀢𑁆𑀢𑀢𑁄 𑀧𑀲𑁆𑀲𑀢𑀺. 𑀧𑀭𑀺𑀢𑁆𑀢𑀢𑁄, 𑀮𑀸𑀫𑀓𑀢𑁆𑀢𑀸 𑀯𑀸 𑀢𑀼𑀘𑁆𑀙𑀢𑁄. 𑀅𑀢𑁆𑀢𑀲𑀸𑀭𑀸𑀪𑀸𑀯𑁂𑀦 𑀲𑀼𑀜𑁆𑀜𑀢𑁄. 𑀲𑀬𑀁 𑀅𑀦𑀢𑁆𑀢𑀢𑀸𑀬 𑀅𑀦𑀢𑁆𑀢𑀢𑁄. 𑀇𑀲𑁆𑀲𑀭𑀺𑀬𑀲𑁆𑀲 𑀅𑀪𑀸𑀯𑀢𑁄, 𑀓𑁂𑀦𑀘𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀘 𑀅𑀦𑀺𑀲𑁆𑀲𑀭𑀺𑀬𑀢𑁄. 𑀨𑁂𑀡𑀧𑀺𑀡𑁆𑀟𑁂𑀦 𑀪𑀸𑀚𑀦𑀸𑀤𑀺𑀁 𑀓𑀸𑀢𑀼𑀓𑀸𑀫𑀲𑁆𑀲 𑀯𑀺𑀬 𑀭𑀽𑀧𑀲𑁆𑀲 𑀦𑀺𑀘𑁆𑀘𑀢𑀸𑀤𑀺𑀁 𑀓𑀸𑀢𑀼𑀓𑀸𑀫𑀲𑁆𑀲 𑀢𑀁 𑀦 𑀲𑀺𑀚𑁆𑀛𑀢𑀺, 𑀲𑀓𑀇𑀘𑁆𑀙𑀸𑀯𑀲𑁂𑀦 𑀯𑀸 𑀓𑀸𑀘𑀺 𑀓𑀺𑀭𑀺𑀬𑀸 𑀦𑀢𑁆𑀣𑀻𑀢𑀺 𑀅𑀓𑀸𑀫𑀓𑀸𑀭𑀺𑀬𑀢𑁄. ‘‘𑀏𑀯𑀁 𑀭𑀽𑀧𑀁 𑀳𑁄𑀢𑀼, 𑀫𑀸 𑀏𑀯’’𑀦𑁆𑀢𑀺 𑀅𑀮𑀩𑁆𑀪𑀦𑀻𑀬𑀢𑁄. 𑀲𑀬𑀁 𑀅𑀜𑁆𑀜𑀲𑁆𑀲 𑀯𑀲𑁂 𑀦 𑀯𑀢𑁆𑀢𑀢𑀺, 𑀦𑀸𑀧𑀺 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺 𑀅𑀯𑀲𑀯𑀢𑁆𑀢𑀓𑀢𑁄. 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀬𑀁 𑀢𑀲𑁆𑀲 𑀧𑀭𑁄 𑀯𑀺𑀬 𑀅𑀯𑀺𑀥𑁂𑀬𑁆𑀬𑀢𑀸𑀬 𑀧𑀭𑀢𑁄. 𑀓𑀸𑀭𑀓𑀸𑀤𑀺 𑀯𑀺𑀬 𑀓𑀸𑀭𑀡𑁂𑀳𑀺, 𑀨𑀮𑁂𑀦 𑀘 𑀯𑀺𑀯𑀺𑀢𑁆𑀢𑀢𑁄. 𑀦 𑀳𑀺 𑀓𑀸𑀭𑀡𑁂𑀦 𑀨𑀮𑀁, 𑀨𑀮𑁂𑀦 𑀯𑀸 𑀓𑀸𑀭𑀡𑀁 𑀲𑀕𑀩𑁆𑀪𑀁 𑀢𑀺𑀝𑁆𑀞𑀢𑀺. 𑀏𑀲 𑀦𑀬𑁄 𑀯𑁂𑀤𑀦𑀸𑀤𑀻𑀲𑀼𑀧𑀺.

𑁭𑁬𑁪. 𑀭𑀽𑀧𑀁 𑀦 𑀲𑀢𑁆𑀢𑁄𑀢𑀺𑀆𑀤𑀻𑀲𑀼 𑀬𑁄 𑀮𑁄𑀓𑀯𑁄𑀳𑀸𑀭𑁂𑀦 𑀲𑀢𑁆𑀢𑁄, 𑀭𑀽𑀧𑀁 𑀲𑁄 𑀦 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄 𑀢𑀲𑁆𑀲𑀸𑀯𑀼𑀢𑁆𑀢𑀲𑀺𑀤𑁆𑀥𑀢𑁆𑀢𑀸. 𑀦 𑀳𑀺 𑀮𑁄𑀓𑁄 𑀭𑀽𑀧𑀫𑀢𑁆𑀢𑀁 ‘‘𑀲𑀢𑁆𑀢𑁄’’𑀢𑀺 𑀯𑁄𑀳𑀭𑀢𑀺, 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑁄 𑀧𑀦 𑀅𑀢𑁆𑀢𑀸 ‘‘𑀲𑀢𑁆𑀢𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀢𑁂𑀳𑀺 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀧𑀭𑁂𑀲𑀁 𑀲𑀜𑁆𑀚𑀸𑀧𑀦𑀝𑁆𑀞𑁂𑀦 ‘‘𑀲𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀭𑀽𑀧𑀁 𑀲𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀜𑁆𑀜𑀢𑀸𑀧𑀭𑀺𑀕𑁆𑀕𑀡𑁆𑀳𑀦𑀜𑁆𑀳𑁂𑀢𑀦𑁆𑀢𑀺. 𑀏𑀲 𑀦𑀬𑁄 𑀦 𑀚𑀻𑀯𑁄𑀢𑀺𑀆𑀤𑀻𑀲𑀼𑀧𑀺. 𑀢𑀢𑁆𑀣 𑀚𑀻𑀯𑀦𑀝𑁆𑀞𑁂𑀦 𑀚𑀻𑀯𑁄. 𑀦𑀭𑀦𑀝𑁆𑀞𑁂𑀦 𑀦𑁂𑀢𑀼𑀪𑀸𑀯𑁂𑀦 𑀦𑀭𑁄. ‘‘𑀅𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀫𑀸𑀦𑁄 𑀏𑀢𑁆𑀣 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀫𑀸𑀦𑀯𑁄. 𑀣𑀺𑀬𑀢𑀺 𑀏𑀢𑁆𑀣 𑀕𑀩𑁆𑀪𑁄𑀢𑀺 𑀇𑀢𑁆𑀣𑀻. 𑀧𑀥𑀸𑀦𑀪𑀸𑀯𑁂𑀦 𑀧𑀼𑀭𑀺 𑀲𑁂𑀢𑀻𑀢𑀺 𑀧𑀼𑀭𑀺𑀲𑁄. 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸. 𑀧𑀘𑁆𑀘𑀢𑁆𑀢𑀁 𑀢𑀲𑁆𑀲 𑀢𑀲𑁆𑀲 𑀅𑀳𑀁𑀓𑀸𑀭𑀯𑀢𑁆𑀣𑀼𑀢𑀸𑀬 ‘‘𑀅𑀳’’𑀦𑁆𑀢𑀺 𑀘 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀅𑀢𑁆𑀢𑀸 𑀯𑀼𑀘𑁆𑀘𑀢𑀺, 𑀭𑀽𑀧𑀁 𑀧𑀦 𑀢𑀸𑀤𑀺𑀲𑀁 𑀦 𑀳𑁄𑀢𑀻𑀢𑀺 𑀲𑀼𑀜𑁆𑀜𑀢𑀸𑀧𑀭𑀺𑀕𑁆𑀕𑀡𑁆𑀳𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀦 𑀲𑀢𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀝𑁆𑀞𑀳𑀺𑀧𑀺 𑀧𑀤𑁂𑀳𑀺 𑀭𑀽𑀧𑀲𑁆𑀲 𑀅𑀢𑁆𑀢𑀲𑀼𑀜𑁆𑀜𑀢𑀸𑀯 𑀤𑀲𑁆𑀲𑀺𑀢𑀸. 𑀇𑀢𑀭𑁂𑀳𑀺 𑀘𑀢𑀽𑀳𑀺 𑀢𑀲𑁆𑀲 𑀓𑀺𑀜𑁆𑀘𑀦𑀢𑀸𑀪𑀸𑀯𑁄. 𑀢𑀢𑁆𑀣 𑀦 𑀫𑀫𑀸𑀢𑀺 𑀫𑀬𑁆𑀳𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀦 𑀳𑁄𑀢𑀺, 𑀢𑀣𑀸 𑀅𑀜𑁆𑀜𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀦 𑀳𑁄𑀢𑀺, 𑀓𑀲𑁆𑀲𑀘𑀺𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀦 𑀳𑁄𑀢𑀺 𑀅𑀢𑁆𑀢𑀦𑁄𑀬𑁂𑀯 𑀅𑀪𑀸𑀯𑀢𑁄. ‘‘𑀦 𑀅𑀢𑁆𑀢𑀦𑀺𑀬’’𑀦𑁆𑀢𑀺 𑀧𑀤𑁂𑀦 𑀧𑀓𑀸𑀲𑀺𑀢𑁄 𑀏𑀯𑀢𑁆𑀣𑁄 𑀧𑀭𑀺𑀬𑀸𑀬𑀦𑁆𑀢𑀭𑁂𑀳𑀺 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀧𑀓𑀸𑀲𑀺𑀢𑁄. 𑀏𑀲 𑀦𑀬𑁄 𑀯𑁂𑀤𑀦𑀸𑀤𑀻𑀲𑀼𑀧𑀺.

𑁭𑁬𑁫. 𑀳𑁂𑀝𑁆𑀞𑀸 𑀓𑀮𑀸𑀧𑀲𑀫𑁆𑀫𑀲𑀦𑀲𑁆𑀲 𑀤𑀴𑁆𑀳𑀪𑀸𑀯𑀸𑀬 𑀯𑀼𑀢𑁆𑀢𑀲𑀫𑁆𑀫𑀲𑀦𑀦𑀬𑀸𑀧𑀺 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀬 𑀤𑀴𑁆𑀳𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀻𑀭𑀡𑀧𑀭𑀺𑀜𑁆𑀜𑀸𑀯𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀬𑀲𑁆𑀲 𑀅𑀳𑀺𑀁𑀲𑀦𑁂𑀦 𑀅𑀲𑀭𑀡𑀢𑁄. ‘‘𑀲𑀭𑀡’’𑀦𑁆𑀢𑀺 𑀕𑀳𑁂𑀢𑀼𑀁 𑀅𑀬𑀼𑀢𑁆𑀢𑀢𑀸𑀬 𑀅𑀲𑀭𑀡𑀻𑀪𑀽𑀢𑀢𑁄. ‘‘𑀅𑀦𑀲𑁆𑀲𑀸𑀤𑀢𑁄’’𑀢𑀺 𑀇𑀤𑀁 𑀧𑀸𑀴𑀺𑀬𑀁 𑀦𑀢𑁆𑀣𑀺. 𑀲𑀢𑀺 𑀘 𑀢𑁂𑀘𑀢𑁆𑀢𑀸𑀮𑀻𑀲 𑀆𑀓𑀸𑀭𑀸 𑀲𑀺𑀬𑀼𑀁. 𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀁 𑀲𑀩𑁆𑀩𑀸𑀤𑀻𑀦𑀯𑀽𑀧𑀮𑀤𑁆𑀥𑀺𑀬𑀸 𑀆𑀤𑀻𑀦𑀯𑀢𑁄. ‘‘𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄’’𑀢𑀺 𑀇𑀤𑀁 𑀤𑁆𑀯𑀬𑀁 𑀬𑀣𑀸 𑀅𑀦𑀺𑀘𑁆𑀘𑀢𑁄 𑀤𑀲𑁆𑀲𑀦𑀁 𑀧𑀦𑀸𑀴𑀺𑀓𑀸𑀬, 𑀦𑀺𑀘𑁆𑀘𑀲𑀸𑀭𑀯𑀺𑀭𑀳𑀤𑀻𑀧𑀦𑁂𑀦 𑀯𑀸 𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑀁 𑀳𑁄𑀢𑀺, 𑀏𑀯𑀁 𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀣𑀸 ‘‘𑀬𑀁 𑀔𑁄 𑀭𑀽𑀧𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄’’𑀢𑀺 (𑀲𑀁. 𑀦𑀺. 𑁩.𑁨𑁬) 𑀤𑀲𑁆𑀲𑀦𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀯𑀺𑀪𑀸𑀯𑀦𑁂𑀦 𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑀁. ‘‘𑀬𑀁 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀅𑀬𑀁 𑀭𑀽𑀧𑀲𑁆𑀲 𑀆𑀤𑀻𑀦𑀯𑁄’’𑀢𑀺 (𑀲𑀁. 𑀦𑀺. 𑁩.𑁨𑁬) 𑀘 𑀤𑀲𑁆𑀲𑀦𑀁 𑀦𑀺𑀘𑁆𑀘𑀢𑀸𑀤𑀺𑀲𑀼𑀜𑁆𑀜𑀢𑀸𑀪𑀸𑀯𑀦𑀢𑁄. 𑀢𑀣𑀸 ‘‘𑀬𑁄 𑀭𑀽𑀧𑁂 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀏𑀯𑀁 𑀲𑀫𑀼𑀤𑀬𑀸𑀤𑀺𑀤𑀲𑁆𑀲𑀦𑀸𑀦𑀁, 𑀇𑀢𑀭𑁂𑀲𑀜𑁆𑀘 𑀬𑀣𑀸𑀭𑀳𑀁 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀦𑀼𑀩𑁆𑀭𑀽𑀳𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀬𑀁 𑀧𑀦 𑀆𑀤𑀻𑀦𑀯𑀢𑁄 𑀤𑀲𑁆𑀲𑀦𑀁, 𑀧𑀼𑀩𑁆𑀩𑁂 𑀯𑀢𑁆𑀯𑀸𑀧𑀺 𑀧𑀼𑀦 𑀯𑀘𑀦𑀁 𑀅𑀲𑁆𑀲𑀸𑀤𑀧𑀝𑀺𑀓𑁆𑀔𑁂𑀧𑀢𑁄 𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀆𑀓𑀸𑀭𑀸 𑀦𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀯𑁂𑀤𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀧𑀲𑁆𑀲𑀢𑀻’’𑀢𑀺.

𑀯𑀼𑀢𑁆𑀢𑀫𑁆𑀧𑀺 𑀘 𑀦𑀺𑀤𑁆𑀤𑁂𑀲𑁂 𑀏𑀢𑀁 𑀲𑀼𑀜𑁆𑀜𑀢𑀸𑀧𑀭𑀺𑀕𑁆𑀕𑀡𑁆𑀳𑀦𑀓𑀣𑀸𑀲𑀦𑁆𑀤𑀲𑁆𑀲𑀦𑀁 ‘‘𑀅𑀲𑀼𑀓𑀸𑀬 𑀧𑀸𑀴𑀺𑀬𑀸 𑀅𑀬𑀁 𑀦𑀺𑀤𑁆𑀤𑁂𑀲𑁄’’𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀢𑀲𑁆𑀲 𑀨𑀮𑀲𑀦𑁆𑀤𑀲𑁆𑀲𑀦𑀢𑁆𑀣𑀜𑁆𑀘.

𑁭𑁬𑁬. 𑀏𑀯𑀁 𑀢𑀻𑀭𑀡𑀧𑀭𑀺𑀜𑁆𑀜𑀸𑀯𑀲𑁂𑀦 𑀧𑀘𑁆𑀘𑁂𑀓𑀁 𑀔𑀦𑁆𑀥𑁂𑀲𑀼 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀼𑀧𑁆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀲𑀼𑀜𑁆𑀜𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀲𑀫𑁆𑀫𑀲𑀦𑁆𑀢𑁄. 𑀪𑀬𑀜𑁆𑀘 𑀦𑀦𑁆𑀤𑀺𑀜𑁆𑀘 𑀯𑀺𑀧𑁆𑀧𑀳𑀸𑀬𑀸𑀢𑀺 𑀅𑀚𑁆𑀛𑀼𑀧𑁂𑀓𑁆𑀔𑀓𑀢𑀸𑀬 𑀲𑀗𑁆𑀔𑀸𑀭𑀸𑀦𑀁 𑀯𑀺𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀪𑀬𑀜𑁆𑀘𑁂𑀯 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀧𑀻𑀢𑀺𑀜𑁆𑀘 𑀧𑀚𑀳𑀺𑀢𑁆𑀯𑀸. 𑀅𑀣 𑀯𑀸 𑀪𑀬𑀢𑀼𑀧𑀝𑁆𑀞𑀸𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀜𑀸𑀡𑀪𑀬𑀜𑁆𑀘 𑀲𑀫𑁆𑀫𑀲𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀧𑀻𑀢𑀺𑀲𑀗𑁆𑀔𑀸𑀢𑀁 𑀦𑀦𑁆𑀤𑀺𑀜𑁆𑀘 𑀧𑀳𑀸𑀬. 𑀦 𑀳𑀺 𑀲𑀩𑁆𑀩𑀲𑁄 𑀲𑀼𑀜𑁆𑀜𑀢𑀸𑀬 𑀤𑀺𑀝𑁆𑀞𑀸𑀬 𑀪𑀬𑀦𑀦𑁆𑀤𑀻𑀦𑀁 𑀅𑀯𑀲𑀭𑁄 𑀅𑀢𑁆𑀣𑀺, 𑀅𑀣 𑀔𑁄 𑀉𑀧𑁂𑀓𑁆𑀔𑀸𑀯 𑀲𑀡𑁆𑀞𑀸𑀢𑀺. 𑀢𑁂𑀦𑀸𑀳 ‘‘𑀲𑀗𑁆𑀔𑀸𑀭𑁂𑀲𑀼 𑀉𑀤𑀸𑀲𑀻𑀦𑁄 𑀳𑁄𑀢𑀻’’𑀢𑀺. 𑀢𑀢𑁆𑀣 𑀬𑁂𑀦 𑀫𑀺𑀘𑁆𑀙𑀸𑀕𑀸𑀳𑁂𑀦 𑀅𑀦𑀼𑀤𑀸𑀲𑀻𑀦𑀢𑀸 𑀲𑀺𑀬𑀸, 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀦 𑀕𑀡𑁆𑀳𑀸𑀢𑀻’’𑀢𑀺 𑀆𑀳. 𑀇𑀤𑀸𑀦𑀺𑀲𑁆𑀲 𑀉𑀤𑀸𑀲𑀻𑀦𑀢𑀸𑀬 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀲𑁆𑀲𑀝𑁆𑀞𑀪𑀭𑀺𑀬𑁄 𑀯𑀺𑀬 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀦𑀼𑀤𑀸𑀲𑀻𑀦𑀢𑀸𑀧𑀼𑀩𑁆𑀩𑀺𑀓𑀸 𑀉𑀤𑀸𑀲𑀻𑀦𑀢𑀸 𑀯𑀼𑀘𑁆𑀘𑀫𑀸𑀦𑀸 𑀇𑀥 𑀑𑀧𑀫𑁆𑀫𑀢𑁆𑀣𑀁 𑀨𑀭𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀝𑁆𑀞𑀸 𑀓𑀦𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑀺𑀯𑀺𑀬 𑀦𑀁 𑀫𑀫𑀸𑀬𑁂𑀬𑁆𑀬 𑀇𑀢𑁆𑀣𑀻𑀦𑀁 𑀲𑀸𑀞𑁂𑀬𑁆𑀬𑀓𑀽𑀝𑁂𑀬𑁆𑀬𑀯𑀗𑁆𑀓𑁂𑀬𑁆𑀬𑀸𑀤𑀻𑀦𑀁 𑀅𑀚𑀸𑀦𑀦𑀢𑁄. 𑀫𑀼𑀜𑁆𑀘𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸𑀢𑀺 𑀫𑀼𑀜𑁆𑀘𑀺𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸, 𑀢𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬 𑀦𑀺𑀭𑀧𑁂𑀓𑁆𑀔𑀢𑀸𑀬 𑀯𑀲𑁂𑀦𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀬𑁄𑀕𑀸𑀯𑀘𑀭𑁄. 𑀫𑀼𑀜𑁆𑀘𑀺𑀢𑀼𑀓𑀸𑀫𑀢𑀸𑀬 𑀉𑀤𑁆𑀥𑀁 𑀬𑀸𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸 𑀏𑀯𑀸𑀢𑀺 𑀆𑀳 ‘‘𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄’’𑀢𑀺.

𑀧𑀢𑀺𑀮𑀻𑀬𑀢𑀻𑀢𑀺 𑀏𑀓𑀧𑀲𑁆𑀲𑁂𑀦 𑀦𑀺𑀮𑀻𑀬𑀢𑀺 𑀦𑀺𑀮𑀻𑀦𑀁 𑀯𑀺𑀬 𑀳𑁄𑀢𑀺. 𑀧𑀢𑀺𑀓𑀼𑀝𑀢𑀻𑀢𑀺 𑀲𑀗𑁆𑀓𑀼𑀘𑀢𑀺. 𑀧𑀝𑀺𑀯𑀝𑁆𑀝𑀢𑀻𑀢𑀺 𑀯𑀺𑀯𑀝𑁆𑀝𑀢𑀺. 𑀦 𑀲𑀫𑁆𑀧𑀲𑀸𑀭𑀺𑀬𑀢𑀻𑀢𑀺 𑀦 𑀯𑀺𑀲𑀭𑀢𑀺, 𑀅𑀪𑀺𑀭𑀢𑀺𑀯𑀲𑁂𑀦 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀅𑀢𑁆𑀣𑁄.

𑀇𑀘𑁆𑀘𑀲𑁆𑀲𑀸𑀢𑀺 𑀇𑀢𑀺 𑀏𑀯𑀁 𑀅𑀲𑁆𑀲 𑀬𑁄𑀕𑀺𑀦𑁄.

𑁭𑁬𑁭. 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑁂𑀦 𑀲𑀗𑁆𑀔𑀸𑀭𑁂𑀲𑀼 𑀅𑀚𑁆𑀛𑀼𑀧𑁂𑀓𑁆𑀔𑀦𑁂 𑀲𑀺𑀚𑁆𑀛𑀫𑀸𑀦𑁂 𑀢𑀁 𑀧𑀦𑁂𑀢𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀫𑀸𑀦𑀁 𑀧𑀭𑀺𑀧𑀸𑀓𑀕𑀫𑀦𑁂𑀦 𑀅𑀦𑀼𑀮𑁄𑀫𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀢𑁄 𑀧𑀲𑁆𑀲𑀢𑀺 𑀦𑀸𑀫. 𑀢𑀣𑀸𑀪𑀽𑀢𑀜𑁆𑀘 𑀲𑀩𑁆𑀩𑀁 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀫𑁂𑀯 𑀧𑀓𑁆𑀔𑀦𑁆𑀤𑀢𑀺 𑀦𑀸𑀫. 𑀢𑀬𑀺𑀤𑀁 𑀇𑀥 𑀜𑀸𑀡𑀁 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀜𑀸𑀡𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁆𑀢𑀁 𑀦𑁂𑀢𑁆𑀯𑀸 𑀯𑀼𑀢𑁆𑀢𑀁 𑀏𑀓𑀢𑁆𑀢𑀦𑀬𑀯𑀲𑁂𑀦. 𑀦𑁄 𑀘𑁂 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀢𑁄 𑀧𑀲𑁆𑀲𑀢𑀻𑀢𑀺 𑀢𑀸𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀲𑁆𑀲 𑀅𑀧𑀭𑀺𑀧𑀓𑁆𑀓𑀢𑀫𑁂𑀯𑀸𑀳. 𑀲𑀫𑀼𑀤𑁆𑀤𑀁 𑀢𑀭𑀦𑁆𑀢𑀻𑀢𑀺 𑀲𑀸𑀫𑀼𑀤𑁆𑀤𑀺𑀓𑀸, 𑀲𑀁𑀬𑀢𑁆𑀢𑀺𑀓𑀸. 𑀤𑀺𑀲𑀸𑀚𑀸𑀦𑀦𑀓𑁄 𑀓𑀸𑀓𑁄 𑀤𑀺𑀲𑀸𑀓𑀸𑀓𑁄, 𑀮𑀓𑁆𑀔𑀡𑀫𑀢𑁆𑀢𑀜𑁆𑀘𑁂𑀢𑀁 𑀬𑁄 𑀓𑁄𑀘𑀺 𑀢𑀸𑀤𑀺𑀲𑁄 𑀲𑀓𑀼𑀦𑁆𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀤𑁂𑀲𑀦𑁆𑀢𑀺 𑀅𑀤𑁂𑀲𑀁 𑀲𑀫𑀼𑀤𑁆𑀤𑁂 𑀅𑀧𑀭𑀺𑀘𑀺𑀢𑀝𑁆𑀞𑀸𑀦𑀁. 𑀅𑀦𑀼𑀕𑀦𑁆𑀢𑁆𑀯𑀸𑀢𑀺 𑀅𑀦𑀼 𑀅𑀦𑀼 𑀕𑀦𑁆𑀢𑁆𑀯𑀸.

𑀢𑀬𑀺𑀤𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀧𑀺𑀝𑁆𑀞𑀁 𑀯𑀝𑁆𑀝𑀬𑀫𑀸𑀦𑀁 𑀯𑀺𑀬𑀸𑀢𑀺 𑀣𑀽𑀮𑀣𑀽𑀮𑀢𑁄 𑀯𑀺𑀯𑁂𑀘𑀦𑀯𑀲𑁂𑀦 𑀦𑀺𑀧𑁆𑀨𑁄𑀝𑀺𑀬𑀫𑀸𑀦𑀁 𑀲𑀡𑁆𑀳𑀁 𑀲𑀡𑁆𑀳𑀁 𑀧𑀺𑀝𑁆𑀞𑀘𑀼𑀡𑁆𑀡𑀁 𑀯𑀺𑀬. 𑀦𑀺𑀩𑁆𑀩𑀝𑁆𑀝𑀺𑀢𑀓𑀧𑁆𑀧𑀸𑀲𑀦𑁆𑀢𑀺 𑀦𑀺𑀩𑁆𑀩𑀝𑁆𑀝𑀺𑀢𑀩𑀻𑀚𑀁 𑀓𑀧𑁆𑀧𑀸𑀲𑀁. 𑀯𑀺𑀳𑀦𑀫𑀸𑀦𑀁 𑀯𑀺𑀬𑀸𑀢𑀺 𑀥𑀦𑀼𑀓𑁂𑀦 𑀯𑀺𑀳𑀜𑁆𑀜𑀫𑀸𑀦𑀁 𑀯𑀺𑀬. 𑀉𑀧𑀫𑀸𑀤𑁆𑀯𑀬𑁂𑀦𑀧𑀺 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀲𑀼𑀔𑀼𑀫𑀢𑀭𑀪𑀸𑀯𑀸𑀧𑀢𑁆𑀢𑀺𑀫𑀸𑀳. 𑀬𑀣𑀸 𑀬𑀣𑀸 𑀳𑀺 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀩𑀮𑁂𑀦 𑀢𑀺𑀓𑁆𑀔𑀸, 𑀯𑀺𑀲𑀤𑀸, 𑀲𑀽𑀭𑀸 𑀘 𑀳𑁄𑀢𑀺, 𑀢𑀣𑀸 𑀢𑀣𑀸 𑀲𑀼𑀔𑀼𑀫𑀢𑀭𑀸𑀧𑀺 𑀳𑁄𑀢𑀻𑀢𑀺. 𑀲𑀗𑁆𑀔𑀸𑀭𑀯𑀺𑀘𑀺𑀦𑀦𑁂𑀢𑀺 𑀧𑀯𑀺𑀘𑀬𑀲𑁆𑀲 𑀲𑀺𑀔𑀸𑀧𑁆𑀧𑀢𑁆𑀢𑀢𑀸𑀬 𑀲𑀗𑁆𑀔𑀸𑀭𑁂𑀲𑀼 𑀯𑀺𑀬 𑀢𑁂𑀲𑀁 𑀯𑀺𑀘𑀺𑀦𑀦𑁂𑀧𑀺 𑀉𑀤𑀸𑀲𑀻𑀦𑀁 𑀳𑀼𑀢𑁆𑀯𑀸 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀢𑀺𑀝𑁆𑀞𑀢𑀺 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. ‘‘𑀲𑀢𑁆𑀢𑀥𑀸 𑀅𑀝𑁆𑀞𑀸𑀭𑀲𑀥𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀢𑁆𑀢𑀸𑀧𑀺 𑀳𑀺 𑀅𑀦𑀼𑀧𑀲𑁆𑀲𑀦𑀸𑀧𑀓𑀸𑀭𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀲𑁆𑀯𑁂𑀯 𑀢𑀻𑀲𑀼 𑀅𑀦𑁆𑀢𑁄𑀕𑀥𑀸𑀢𑀺 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀢𑀸𑀲𑀁 𑀏𑀯 𑀯𑀲𑁂𑀦 𑀢𑀺𑀝𑁆𑀞𑀢𑀺.

𑁭𑁬𑁮. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀯𑀺𑀫𑁄𑀓𑁆𑀔𑀫𑀼𑀔𑀪𑀸𑀯𑀸𑀧𑀚𑁆𑀚𑀦𑁂, 𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀧𑀘𑁆𑀘𑀬𑀢𑁆𑀣𑁂 𑀘. 𑀇𑀤𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀢𑀺𑀡𑁆𑀡𑀁 𑀇𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀁. 𑀆𑀥𑀺𑀧𑀢𑁂𑀬𑁆𑀬𑀯𑀲𑁂𑀦𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑀯𑀲𑁂𑀦. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀩𑀳𑀼𑀮𑀲𑁆𑀲 𑀳𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀩𑀳𑀼𑀮𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀩𑀳𑀼𑀮𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀢𑀺𑀲𑁆𑀲𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀩𑀮𑀯𑀢𑀭𑀪𑀸𑀯𑀁 𑀧𑀢𑁆𑀢𑀸𑀦𑀺 𑀇𑀫𑀸𑀦𑀺 𑀢𑀻𑀡𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀫𑁄𑀓𑁆𑀔𑀫𑀼𑀔𑀪𑀸𑀯𑀁 𑀆𑀧𑀸𑀤𑁂𑀦𑁆𑀢𑀻𑀢𑀺 𑀆𑀳 ‘‘𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸…𑀧𑁂… 𑀆𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺. 𑀢𑀺𑀯𑀺𑀥𑀯𑀺𑀫𑁄𑀓𑁆𑀔𑀫𑀼𑀔𑀪𑀸𑀯𑀦𑁆𑀢𑀺 𑀏𑀢𑁆𑀣 𑀓𑁂 𑀧𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸, 𑀓𑀸𑀦𑀺 𑀯𑀸 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀻𑀢𑀺 𑀅𑀦𑁆𑀢𑁄𑀮𑀻𑀦𑁂 𑀅𑀦𑀼𑀬𑁄𑀕𑁂 𑀯𑀺𑀫𑁄𑀓𑁆𑀔𑀫𑀼𑀔𑀸𑀥𑀻𑀦𑀢𑁆𑀢𑀸 𑀯𑀺𑀫𑁄𑀓𑁆𑀔𑀸𑀥𑀺𑀕𑀫𑀲𑁆𑀲 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀲𑁆𑀲𑁄 𑀳𑀺…𑀧𑁂… 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀬𑀜𑁆𑀘 𑀅𑀢𑁆𑀣𑁄 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀫𑀸𑀳.

𑀮𑁄𑀓𑀦𑀺𑀬𑁆𑀬𑀸𑀦𑀸𑀬𑀸𑀢𑀺 𑀮𑁄𑀓𑀢𑁄 𑀦𑀺𑀓𑁆𑀔𑀫𑀦𑀸𑀬, 𑀲𑀢𑁆𑀢𑀮𑁄𑀓𑀲𑁆𑀲 𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀓𑁆𑀔𑀫𑀦𑀸𑀬. 𑀧𑀭𑀺𑀘𑁆𑀙𑁂𑀤𑀧𑀭𑀺𑀯𑀝𑀼𑀫𑀢𑁄𑀢𑀺 𑀉𑀤𑀬𑀩𑁆𑀩𑀬𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀢𑁄 𑀘𑁂𑀯 𑀧𑀭𑀺𑀯𑀝𑀼𑀫𑀢𑁄 𑀘. 𑀲𑀫𑀦𑀼𑀧𑀲𑁆𑀲𑀦𑀢𑀸𑀬𑀸𑀢𑀺 𑀲𑀫𑁆𑀫𑀤𑁂𑀯 𑀅𑀦𑀼 𑀅𑀦𑀼 𑀧𑀲𑁆𑀲𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀳𑀺 𑀲𑀗𑁆𑀔𑀸𑀭𑁂 𑀆𑀤𑀺𑀢𑁄 𑀉𑀤𑀬𑁂𑀦, 𑀅𑀦𑁆𑀢𑀢𑁄 𑀯𑀬𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁂 𑀧𑀲𑁆𑀲𑀢𑀺. 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑀸𑀬 𑀳𑀺 𑀢𑁂 𑀅𑀦𑀺𑀘𑁆𑀘𑀸𑀢𑀺. 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀯𑀺𑀭𑀳𑀢𑁄 ‘‘𑀅𑀦𑀺𑀫𑀺𑀢𑁆𑀢𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸. 𑀘𑀺𑀢𑁆𑀢𑀲𑀫𑁆𑀧𑀓𑁆𑀔𑀦𑁆𑀤𑀦𑀢𑀸𑀬𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀼𑀮𑁄𑀫𑀜𑀸𑀡𑀸𑀤𑀺𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀯𑀺𑀲𑀦𑀢𑁆𑀣𑀸𑀬. 𑀅𑀧𑁆𑀧𑀡𑀺𑀳𑀺𑀢𑀸𑀬𑀸𑀢𑀺 𑀭𑀸𑀕𑀧𑀡𑀺𑀥𑀺𑀆𑀤𑀻𑀦𑀁 𑀅𑀪𑀸𑀯𑁂𑀦 ‘‘𑀅𑀧𑁆𑀧𑀡𑀺𑀳𑀺𑀢𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬. 𑀲𑀼𑀜𑁆𑀜𑀢𑀸𑀬𑀸𑀢𑀺 𑀅𑀢𑁆𑀢𑀲𑀼𑀜𑁆𑀜𑀢𑀸𑀬 ‘‘𑀲𑀼𑀜𑁆𑀜𑀢𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬.

𑀕𑀢𑀺𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺𑀁. 𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑀯𑀺𑀪𑀸𑀯𑀦𑁂𑀦 𑀲𑀁𑀯𑁂𑀚𑀺𑀬𑀫𑀸𑀦𑀁 𑀘𑀺𑀢𑁆𑀢𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀲𑀫𑀼𑀢𑁆𑀢𑁂𑀚𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀫𑀦𑁄𑀲𑀫𑀼𑀢𑁆𑀢𑁂𑀚𑀦𑀢𑀸𑀬𑀸𑀢𑀺 𑀘𑀺𑀢𑁆𑀢𑀲𑀁𑀯𑁂𑀚𑀦𑀢𑀸𑀬𑀸’’𑀢𑀺. 𑀫𑀫𑀁𑀓𑀸𑀭𑁂𑀦 𑀅𑀢𑁆𑀢𑀦𑀺𑀬𑀲𑀜𑁆𑀜𑀺𑀢𑀲𑁆𑀲 𑀯𑀢𑁆𑀣𑀼𑀦𑁄 𑀲𑀸𑀫𑀺𑀪𑀽𑀢𑁄 𑀅𑀢𑁆𑀢𑀸 𑀧𑀞𑀫𑀁 𑀧𑀭𑀸𑀫𑀲𑀻𑀬𑀢𑀺, 𑀢𑀢𑁄 𑀅𑀢𑁆𑀢𑀦𑀺𑀬𑀦𑁆𑀢𑀺 𑀆𑀳 ‘‘𑀦𑀸𑀳𑀁, 𑀦 𑀫𑀫𑀸𑀢𑀺 𑀏𑀯𑀁 𑀅𑀦𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑀢𑀸𑀬𑀸’’𑀢𑀺. 𑀢𑀻𑀡𑀺 𑀧𑀤𑀸𑀦𑀻𑀢𑀺 𑀧𑀭𑀺𑀘𑁆𑀙𑁂𑀤𑀧𑀭𑀺𑀯𑀝𑀼𑀫, 𑀫𑀦𑁄𑀲𑀫𑀼𑀢𑁆𑀢𑁂𑀚𑀦, 𑀲𑀫𑀦𑀼𑀧𑀲𑁆𑀲𑀦𑀧𑀤𑀸𑀦𑀻𑀢𑀺 𑀯𑀤𑀦𑁆𑀢𑀺, ‘‘𑀲𑀩𑁆𑀩𑀲𑀗𑁆𑀔𑀸𑀭𑁂’’𑀢𑀺𑀆𑀤𑀻𑀦𑀺 𑀧𑀦 𑀢𑀻𑀡𑀺 𑀯𑀸𑀓𑁆𑀬𑀸𑀦𑀺 𑀢𑀻𑀡𑀺 𑀧𑀤𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀦𑁂𑀯𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀁 𑀯𑀲𑁂𑀦 𑀢𑁂𑀲𑀁 𑀢𑀺𑀡𑁆𑀡𑀁 𑀧𑀤𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀏𑀯. 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀢𑀺 ‘‘𑀅𑀦𑀺𑀘𑁆𑀘𑀢𑁄 𑀫𑀦𑀲𑀺 𑀓𑀭𑁄𑀢𑁄 𑀓𑀣𑀁 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂.

𑁭𑁬𑁯. 𑀏𑀯𑀁 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀫𑁄𑀓𑁆𑀔𑁂 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄. 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀩𑀳𑀼𑀮𑁄. 𑀬𑀲𑁆𑀲 𑀯𑀺𑀲𑁂𑀲𑀢𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀢𑀺𑀓𑁆𑀔𑀸 𑀲𑀽𑀭𑀸 𑀳𑁄𑀢𑀺, 𑀢𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. ‘‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸’’𑀢𑀺 𑀳𑀺 𑀆𑀤𑀺𑀢𑁄 𑀲𑀤𑁆𑀥𑀸𑀫𑀢𑁆𑀢𑀓𑁂𑀦 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀉𑀓𑁆𑀓𑀁𑀲𑀕𑀢𑀸𑀬 𑀢𑀭𑀼𑀧𑀮𑁆𑀮𑀯𑀸𑀤𑀻𑀲𑀼 𑀯𑀺𑀬 𑀫𑀡𑀺𑀓𑀦𑀓𑀸𑀤𑀻𑀲𑀼𑀧𑀺 𑀢𑁂𑀲𑀁 𑀅𑀦𑀺𑀘𑁆𑀘𑀢𑀁 𑀲𑀸𑀢𑀺𑀲𑀬𑀁 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀢𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸’’𑀢𑀺 𑀲𑀢𑁆𑀣𑀭𑀺 𑀲𑀤𑁆𑀥𑀸 𑀩𑀮𑀯𑀢𑀻 𑀧𑀯𑀢𑁆𑀢𑀢𑀻𑀢𑀺 𑀲𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄, 𑀅𑀥𑀺𑀫𑀢𑁆𑀢𑀲𑀤𑁆𑀥𑁄 𑀘 𑀳𑁄𑀢𑀺. 𑀢𑀲𑁆𑀲 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀩𑀳𑀼𑀮𑀢𑀸𑀬 𑀅𑀦𑀺𑀘𑁆𑀘𑀸𑀓𑀸𑀭𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀲𑁄 ‘‘𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄𑀢𑀺 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 ‘‘𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀲𑀼𑀔𑁄 𑀦𑀺𑀭𑁄𑀥𑁄’’𑀢𑀺 𑀘 𑀫𑀦𑀲𑀺𑀓𑀸𑀭𑀯𑀲𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀲𑀦𑁆𑀢𑀧𑀡𑀻𑀢𑀲𑀼𑀔𑀪𑀸𑀯𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀅𑀪𑀺𑀡𑁆𑀳𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑀫𑀸𑀬𑁄𑀕𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄 𑀳𑁄𑀢𑀺. 𑀢𑀢𑁄 𑀘 𑀅𑀥𑀺𑀫𑀢𑁆𑀢𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀧𑀝𑀺𑀮𑀸𑀪𑁂𑀦 𑀭𑀸𑀕𑀧𑀡𑀺𑀥𑀺𑀬𑀸 𑀤𑀽𑀭𑀻𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀲𑀫𑀥𑀺𑀕𑀫𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑀢𑁄…𑀧𑁂… 𑀧𑀝𑀺𑀮𑀪𑀢𑀻’’𑀢𑀺. 𑀯𑁂𑀤𑀩𑀳𑀼𑀮𑁄𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀅𑀢𑁆𑀢𑀲𑀼𑀜𑁆𑀜𑀢𑀸𑀬 𑀦𑀺𑀧𑀼𑀡𑀜𑀸𑀡𑀯𑀺𑀲𑀬𑀢𑁆𑀢𑀸 𑀜𑀸𑀡𑀩𑀳𑀼𑀮𑁄 𑀳𑁄𑀢𑀺. 𑀢𑀢𑁄 𑀘 𑀅𑀥𑀺𑀫𑀢𑁆𑀢𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀧𑀝𑀺𑀮𑀸𑀪𑁂𑀦 𑀫𑁄𑀳𑀲𑁆𑀲 𑀤𑀽𑀭𑀻𑀪𑀸𑀯𑀢𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑀫𑀥𑀺𑀕𑀫𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀢𑁆𑀢𑀢𑁄…𑀧𑁂… 𑀧𑀝𑀺𑀮𑀪𑀢𑀻’’𑀢𑀺.

𑀬𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀫𑀺𑀢𑁆𑀢𑀯𑀲𑁂𑀦 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀬𑀢𑁆𑀣 𑀇𑀤𑀁 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀲𑀩𑁆𑀩𑀲𑁄 𑀦𑀢𑁆𑀣𑀺, 𑀢𑀁 ‘‘𑀅𑀦𑀺𑀫𑀺𑀢𑁆𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀅𑀦𑀺𑀫𑀺𑀢𑁆𑀢𑀸𑀓𑀸𑀭𑁂𑀦 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀫𑀕𑁆𑀕𑁂𑀦 𑀖𑀝𑁂𑀢𑀺. 𑀢𑀲𑁆𑀲 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑀢𑁄 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀅𑀦𑀺𑀫𑀺𑀢𑁆𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀅𑀭𑀺𑀬𑀫𑀕𑁆𑀕𑁄’’𑀢𑀺. 𑀲𑁆𑀯𑀸𑀬𑀁 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀺𑀫𑀺𑀢𑁆𑀢𑀸𑀓𑀸𑀭𑁄 𑀦𑁂𑀯 𑀫𑀕𑁆𑀕𑁂𑀦 𑀓𑀢𑁄, 𑀦 𑀯𑀺𑀧𑀲𑁆𑀲𑀦𑀸𑀬, 𑀅𑀣 𑀔𑁄 𑀲𑀪𑀸𑀯𑀲𑀺𑀤𑁆𑀥𑁄. 𑀢𑀤𑀸𑀭𑀫𑁆𑀫𑀡𑀢𑀸𑀬 𑀘 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀺𑀫𑀺𑀢𑁆𑀢𑀸𑀬 𑀥𑀸𑀢𑀼𑀬𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑁄’’𑀢𑀺. 𑀬𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀡𑀺𑀥𑀺𑀬𑀸 𑀤𑀽𑀭𑀻𑀪𑀸𑀯𑀓𑀭𑀡𑁂𑀦 𑀅𑀧𑁆𑀧𑀡𑀺𑀳𑀺𑀢𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄, 𑀬𑁄 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀅𑀢𑁆𑀢𑀽𑀧𑀮𑀤𑁆𑀥𑀺𑀬𑀸 𑀤𑀽𑀭𑀻𑀪𑀸𑀯𑀓𑀭𑀡𑁂𑀦 𑀲𑀼𑀜𑁆𑀜𑀢𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄𑀢𑀺 𑀘 𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀏𑀢𑁂𑀦𑁂𑀯 𑀦𑀬𑁂𑀦𑀸’’𑀢𑀺𑀆𑀤𑀺.

𑁭𑁭𑁦. 𑀬𑀤𑀺 𑀅𑀭𑀺𑀬𑀫𑀕𑁆𑀕𑁄 𑀢𑀺𑀯𑀺𑀥𑀫𑁆𑀧𑀺 𑀯𑀺𑀫𑁄𑀓𑁆𑀔𑀦𑀸𑀫𑀁 𑀮𑀪𑀢𑀺, 𑀅𑀣 𑀓𑀲𑁆𑀫𑀸 𑀅𑀪𑀺𑀥𑀫𑁆𑀫𑁂 𑀯𑀺𑀫𑁄𑀓𑁆𑀔𑀤𑁆𑀯𑀬𑀫𑁂𑀯 𑀆𑀕𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀦𑁆𑀢𑀺 𑀅𑀪𑀺𑀥𑀫𑁆𑀫𑁂 𑀯𑀺𑀫𑁄𑀓𑁆𑀔𑀤𑁆𑀯𑀬𑀯𑀘𑀦𑀁. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀲𑀦𑁆𑀥𑀸𑀬𑀸𑀢𑀺 𑀉𑀚𑀼𑀓𑀫𑁂𑀯 𑀯𑀺𑀧𑀲𑁆𑀲𑀦𑀢𑁄 𑀫𑀕𑁆𑀕𑀲𑁆𑀲 𑀦𑀸𑀫𑀸𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀸 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀓𑀸𑀫𑀁 𑀲𑀼𑀢𑁆𑀢𑁂 ‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳𑀸’’𑀢𑀺 (𑀲𑀼. 𑀦𑀺. 𑁩𑁪𑁪) 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸, 𑀲𑀸 𑀧𑀦 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀥𑀼𑀯𑀦𑀺𑀫𑀺𑀢𑁆𑀢𑀅𑀢𑁆𑀢𑀦𑀺𑀫𑀺𑀢𑁆𑀢𑀸𑀦𑀺 𑀉𑀕𑁆𑀖𑀸𑀝𑁂𑀦𑁆𑀢𑀻𑀧𑀺 𑀲𑀬𑀁 𑀦𑀺𑀫𑀺𑀢𑁆𑀢𑀥𑀫𑁆𑀫𑁂𑀲𑀼 𑀏𑀯 𑀘𑀭𑀢𑀻𑀢𑀺 𑀲𑀦𑀺𑀫𑀺𑀢𑁆𑀢𑀸𑀯 𑀳𑁄𑀢𑀻𑀢𑀺. 𑀅𑀧𑀺𑀘 𑀅𑀪𑀺𑀥𑀫𑁆𑀫𑁄 𑀦𑀸𑀫 𑀧𑀭𑀫𑀢𑁆𑀣𑀤𑁂𑀲𑀦𑀸, 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑀲𑁆𑀲 𑀘 𑀧𑀭𑀫𑀢𑁆𑀣𑀢𑁄 𑀳𑁂𑀢𑀼𑀯𑁂𑀓𑀮𑁆𑀮𑀫𑁂𑀯. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀳𑀺 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁄 𑀓𑀣𑀺𑀢𑁄. 𑀢𑀢𑁆𑀣 𑀘 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀢𑀁 𑀅𑀭𑀺𑀬𑀫𑀕𑁆𑀕𑁂 𑀏𑀓𑀗𑁆𑀕𑀫𑁆𑀧𑀺 𑀦 𑀳𑁄𑀢𑀺, 𑀅𑀫𑀕𑁆𑀕𑀗𑁆𑀕𑀢𑁆𑀢𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀢𑀭𑁂𑀲𑀼 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀯𑀲𑁂𑀦 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁄, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀯𑀲𑁂𑀦 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁄.

𑀢𑁂𑀲𑀼 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀦 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀻𑀢𑀺 𑀢𑀸𑀦𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀗𑁆𑀕𑀢𑁆𑀢𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄 𑀢𑀤𑀪𑀸𑀯𑀢𑁄𑀢𑀺 𑀓𑁂𑀘𑀺. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄 𑀆𑀕𑀫𑀦𑀢𑁄 𑀦𑀸𑀫𑀁 𑀅𑀮𑀪𑀦𑁆𑀢𑁄𑀧𑀺 𑀲𑀕𑀼𑀡𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘 𑀦𑀸𑀫𑀁 𑀮𑀪𑀢𑀻’’𑀢𑀺, 𑀢𑁂𑀲𑀁 𑀫𑀢𑁂𑀦 𑀅𑀧𑁆𑀧𑀡𑀺𑀳𑀺𑀢𑀲𑀼𑀜𑁆𑀜𑀢𑀫𑀕𑁆𑀕𑀸𑀧𑀺 𑀲𑀕𑀼𑀡𑀢𑁄 𑀏𑀯, 𑀆𑀭𑀫𑁆𑀫𑀡𑀢𑁄 𑀏𑀯 𑀘 𑀦𑀸𑀫𑀁 𑀮𑀪𑁂𑀬𑁆𑀬𑀼𑀦𑁆𑀢𑀺? 𑀢𑀁 𑀅𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀫𑀕𑁆𑀕𑁄 𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀦𑀸𑀫𑀁 𑀮𑀪𑀢𑀺 𑀲𑀭𑀲𑀢𑁄 𑀘 𑀧𑀘𑁆𑀘𑀦𑀻𑀓𑀢𑁄 𑀘𑀸𑀢𑀺, 𑀲𑀪𑀸𑀯𑀢𑁄 𑀘 𑀧𑀝𑀺𑀧𑀓𑁆𑀔𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑁄 𑀳𑀺 𑀭𑀸𑀕𑀧𑀡𑀺𑀥𑀺𑀆𑀤𑀻𑀳𑀺 𑀯𑀺𑀫𑀼𑀢𑁆𑀢𑁄, 𑀲𑀼𑀜𑁆𑀜𑀢𑀫𑀕𑁆𑀕𑁄 𑀭𑀸𑀕𑀸𑀤𑀻𑀳𑀺 𑀲𑀼𑀜𑁆𑀜𑁄 𑀏𑀯𑀸𑀢𑀺 𑀢𑁂 𑀲𑀭𑀲𑀢𑁄 𑀦𑀸𑀫𑀁 𑀮𑀪𑀦𑁆𑀢𑀺. 𑀢𑀣𑀸 𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑁄 𑀧𑀡𑀺𑀥𑀺𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀲𑀼𑀜𑁆𑀜𑀢𑀫𑀕𑁆𑀕𑁄 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀏𑀯𑀸𑀢𑀺 𑀢𑁂 𑀧𑀘𑁆𑀘𑀦𑀻𑀓𑀢𑁄 𑀦𑀸𑀫𑀁 𑀮𑀪𑀦𑁆𑀢𑀺, 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄 𑀧𑀦 𑀭𑀸𑀕𑀸𑀤𑀺𑀦𑀺𑀫𑀺𑀢𑁆𑀢𑀸𑀦𑀁, 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀯𑀸 𑀅𑀪𑀸𑀯𑁂𑀦 𑀲𑀭𑀲𑀢𑁄 𑀏𑀯 𑀦𑀸𑀫𑀁 𑀮𑀪𑀢𑀺, 𑀦𑁄 𑀧𑀘𑁆𑀘𑀦𑀻𑀓𑀢𑁄. 𑀦 𑀳𑀺 𑀲𑁄 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀧𑀝𑀺𑀧𑀓𑁆𑀔𑁄, 𑀲𑀸 𑀧𑀦𑀲𑁆𑀲 𑀅𑀦𑀼𑀮𑁄𑀫𑀪𑀸𑀯𑁂 𑀞𑀺𑀢𑀸𑀢𑀺 𑀲𑀩𑁆𑀩𑀣𑀸𑀧𑀺 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄 𑀦 𑀮𑀩𑁆𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀲𑀦𑁆𑀥𑀸𑀬𑀸’’𑀢𑀺.

𑀬𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄 𑀮𑀩𑁆𑀪𑀢𑀺. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀳𑀺 𑀯𑀺𑀧𑀲𑁆𑀲𑀦𑀸 𑀬𑀁 𑀬𑀁 𑀲𑀫𑁆𑀫𑀲𑀦𑁆𑀢𑀻 𑀯𑀼𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑁂𑀢𑀺, 𑀢𑀢𑁆𑀣 𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄 𑀳𑁄𑀢𑀺, 𑀤𑀼𑀓𑁆𑀔𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀅𑀧𑁆𑀧𑀡𑀺𑀳𑀺𑀢𑁄, 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀲𑀼𑀜𑁆𑀜𑀢𑁄, 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀲𑀁𑀯𑀡𑁆𑀡𑀦𑀸 𑀏𑀲𑀸𑀢𑀺 𑀓𑀢𑁆𑀯𑀸 𑀇𑀥 𑀢𑀬𑁄𑀧𑀺 𑀯𑀺𑀫𑁄𑀓𑁆𑀔𑀸 𑀉𑀤𑁆𑀥𑀝𑀸. 𑀬𑀁 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀅𑀪𑀺𑀦𑀺𑀯𑁂𑀲𑀦𑀺𑀫𑀺𑀢𑁆𑀢𑀧𑀡𑀺𑀥𑀺𑀫𑀼𑀜𑁆𑀘𑀦𑀁 𑀉𑀧𑀸𑀤𑀸𑀬 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀅𑀦𑀼𑀧𑀲𑁆𑀲𑀦𑀸𑀦𑀁 𑀢𑀤𑀸𑀕𑀫𑀦𑀯𑀲𑁂𑀦 𑀢𑀤𑀦𑁆𑀯𑀬𑀲𑁆𑀲 𑀫𑀕𑁆𑀕𑀲𑁆𑀲 𑀘 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀸𑀤𑀺𑀪𑀸𑀯𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀢𑀲𑁆𑀲 𑀧𑀭𑀺𑀬𑀸𑀬𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀅𑀧𑁆𑀧𑀡𑀺𑀳𑀺𑀢𑁄, 𑀯𑀺𑀫𑁄𑀓𑁆𑀔𑁄’’𑀢𑀺 𑀘 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀦𑁆𑀢𑀺 ‘‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸’’𑀢𑀺 𑀅𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀜𑀸𑀡𑀁. 𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑁂𑀲𑀁 𑀫𑀼𑀜𑁆𑀘𑀢𑀻𑀢𑀺 ‘‘𑀢𑁂 𑀦𑀺𑀘𑁆𑀘𑀸’’𑀢𑀺 𑀦𑀺𑀘𑁆𑀘𑀸𑀓𑀸𑀭𑀢𑁄 𑀧𑀯𑀢𑁆𑀢𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀺𑀤𑁆𑀥𑀁𑀲𑀦𑀯𑀲𑁂𑀦, 𑀢𑀤𑀦𑁆𑀯𑀬𑀁 𑀧𑀦 𑀫𑀕𑁆𑀕𑀜𑀸𑀡𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀫𑀼𑀜𑁆𑀘𑀢𑀺. 𑀇𑀢𑀻𑀢𑀺 𑀢𑀲𑁆𑀫𑀸. 𑀅𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑀢𑁄 𑀭𑀺𑀢𑁆𑀢𑀢𑀸𑀬, 𑀯𑀺𑀫𑀼𑀢𑁆𑀢𑀢𑀸𑀬 𑀘 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀦𑁆𑀢𑀺 𑀢𑀺𑀯𑀺𑀥𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀢𑀢𑁆𑀣 𑀬𑀲𑁆𑀲 𑀧𑀭𑀺𑀬𑀸𑀬𑀢𑁄, 𑀬𑀲𑁆𑀲 𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀦𑀸𑀫𑀮𑀸𑀪𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦, 𑀅𑀣 𑀔𑁄 𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸𑀪𑀸𑀯𑀢𑁄. 𑀯𑀺𑀫𑁄𑀓𑁆𑀔𑀤𑁆𑀯𑀬𑀫𑁂𑀯 𑀯𑀼𑀢𑁆𑀢𑀁 𑀅𑀪𑀺𑀥𑀫𑁆𑀫𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸𑀥𑀺𑀓𑀸𑀭𑁂. ‘‘𑀢𑀺𑀯𑀺𑀥𑀯𑀺𑀫𑁄𑀓𑁆𑀔𑀫𑀼𑀔𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀏𑀢𑀲𑁆𑀫𑀺𑀁 𑀯𑀸 𑀉𑀤𑁆𑀤𑁂𑀲𑀯𑀘𑀦𑁂.

𑁭𑁭𑁧. 𑀢𑁂𑀲𑀁 𑀯𑀺𑀪𑀸𑀕𑀸𑀬𑀸𑀢𑀺 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀲𑀤𑁆𑀥𑀸𑀦𑀼𑀲𑀸𑀭𑀺𑀆𑀤𑀺𑀪𑀸𑀯𑁂𑀦 𑀯𑀺𑀪𑀢𑁆𑀢𑀲𑀪𑀸𑀯𑀢𑀸𑀬.

𑁭𑁭𑁨. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀻𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀺𑀪𑀸𑀯𑀺𑀢𑀸𑀓𑀸𑀭𑀡𑀪𑀽𑀢𑀁 𑀅𑀥𑀺𑀫𑀢𑁆𑀢𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀺. 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀢𑀸𑀬, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀫𑀢𑁆𑀢𑀢𑀸𑀬 𑀘 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀧𑀺𑀘 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀦𑀺𑀘𑁆𑀘𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑀲𑁆𑀲 𑀲𑀤𑁆𑀥𑀸𑀪𑀺𑀩𑀼𑀤𑁆𑀥𑀺𑀬𑀸 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀢𑀤𑀦𑁆𑀯𑀬𑁂 𑀫𑀕𑁆𑀕𑁂 𑀲𑀤𑁆𑀥𑀸 𑀢𑀺𑀓𑁆𑀔𑀢𑀭𑀸 𑀳𑁄𑀢𑀺, 𑀢𑁂𑀦 𑀅𑀝𑁆𑀞𑀫𑀓𑁄 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫 𑀳𑁄𑀢𑀺. 𑀲𑁂𑀲𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀽𑀢𑀺 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀨𑀮𑀸 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼. ‘‘𑀲𑀢𑁆𑀢𑀲𑀼 𑀞𑀸𑀦𑁂𑀲𑀽’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀲𑁂𑀲𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀅𑀕𑁆𑀕𑀨𑀮𑁂 𑀧𑀦 𑀲𑀘𑀸𑀬𑀁 𑀅𑀭𑀽𑀧𑀚𑁆𑀛𑀸𑀦𑀮𑀸𑀪𑀻, 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀦𑁄 𑀘𑁂 𑀅𑀭𑀽𑀧𑀚𑁆𑀛𑀸𑀦𑀮𑀸𑀪𑀻, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀅𑀪𑀺𑀥𑀫𑁆𑀫𑁂 𑀳𑀺 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸 𑀘𑀲𑁆𑀲 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺, 𑀦𑁄 𑀘 𑀔𑁄 𑀬𑀣𑀸𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄’’𑀢𑀺 (𑀧𑀼. 𑀧. 𑁨𑁦𑁮) 𑁋

𑀏𑀓𑀘𑁆𑀘𑀸𑀲𑀯𑀧𑀭𑀺𑀓𑁆𑀔𑀬𑀯𑀘𑀦𑀢𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀲𑁂𑀓𑁆𑀔𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺, 𑀦 𑀅𑀲𑁂𑀓𑁆𑀔𑀪𑀸𑀯𑁄. 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀤𑁆𑀯𑁂 𑀥𑀼𑀭𑀸𑀦𑀺, 𑀤𑁆𑀯𑁂 𑀅𑀪𑀺𑀦𑀺𑀯𑁂𑀲𑀸, 𑀤𑁆𑀯𑁂 𑀲𑀻𑀲𑀸𑀦𑀻’’𑀢𑀺 𑀯𑀘𑀦𑀢𑁄 𑀦𑀢𑁆𑀣𑀺 𑀅𑀭𑀳𑀢𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄. 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸 𑀳𑀺 𑀅𑀪𑀺𑀥𑀫𑁆𑀫𑁄, 𑀇𑀥 𑀧𑀦 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀬𑀤𑀺 𑀧𑀭𑀺𑀬𑀸𑀬𑀢𑁄 𑀅𑀭𑀳𑀢𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀢𑀸, 𑀓𑁄 𑀧𑀦 𑀲𑁄 𑀧𑀭𑀺𑀬𑀸𑀬𑁄? 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀦𑁆𑀯𑀬𑀢𑀸. 𑀬𑁄 𑀳𑀺 𑀅𑀕𑁆𑀕𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀲𑁄 𑀅𑀕𑁆𑀕𑀨𑀮𑀓𑁆𑀔𑀡𑁂𑀧𑀺 𑀢𑀤𑀦𑁆𑀯𑀬𑀢𑀸𑀬 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄𑀢𑀺 𑀇𑀥𑀸𑀧𑀺 𑀢𑀣𑁂𑀯 𑀯𑀼𑀢𑁆𑀢𑀁. 𑀅𑀣 𑀯𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑀤𑀺𑀲𑀢𑀸𑀬 𑀅𑀭𑀳𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀓𑀸 𑀧𑀦𑁂𑀢𑁆𑀣 𑀲𑀤𑀺𑀲𑀢𑀸? 𑀬𑀣𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀲𑁂𑀓𑁆𑀔𑀲𑁆𑀲 𑀓𑀺𑀮𑁂𑀲𑀓𑁆𑀔𑀬𑁄 𑀓𑀼𑀡𑁆𑀞𑁂𑀦 𑀅𑀲𑀺𑀦𑀸 𑀓𑀤𑀮𑀺𑀘𑁆𑀙𑁂𑀤𑀲𑀤𑀺𑀲𑁄 ‘‘𑀦𑁄 𑀘 𑀔𑁄 𑀬𑀣𑀸𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲𑀸’’𑀢𑀺 𑀯𑀘𑀦𑀢𑁄, 𑀏𑀯𑀁 𑀢𑀤𑀦𑁆𑀯𑀬𑀲𑁆𑀲𑀸𑀧𑀺 𑀅𑀭𑀳𑀢𑁄𑀢𑀺 𑀅𑀬𑀫𑁂𑀢𑁆𑀣 𑀲𑀤𑀺𑀲𑀢𑀸. 𑀓𑀺𑀁 𑀧𑀦 𑀦𑁂𑀲𑀁 𑀓𑀺𑀮𑁂𑀲𑀧𑀳𑀸𑀦𑁂 𑀦𑀸𑀦𑀢𑁆𑀢𑀁 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀅𑀣 𑀓𑀲𑁆𑀫𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺? 𑀆𑀕𑀫𑀦𑀻𑀬𑀦𑀸𑀦𑀢𑁆𑀢𑁂𑀦. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑀺 𑀆𑀕𑀫𑀦𑀫𑁆𑀳𑀺 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀅𑀧𑁆𑀧𑀓𑀲𑀺𑀭𑁂𑀦 𑀅𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀧𑀺𑀘 𑀧𑀜𑁆𑀜𑀸𑀬𑀧𑀺 𑀦𑁂𑀲𑀁 𑀯𑁂𑀫𑀢𑁆𑀢𑀢𑀸. 𑀲𑀸 𑀘 𑀬𑀸𑀯𑀢𑀺𑀓𑀸 𑀮𑀩𑁆𑀪𑀢𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀞𑀫𑀫𑀕𑁆𑀕𑀸𑀤𑀻𑀲𑀼 𑀲𑀢𑀺𑀧𑀺 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑁂 𑀲𑀤𑁆𑀥𑀸𑀤𑀻𑀦𑀁 𑀢𑀺𑀓𑁆𑀔𑀢𑀸𑀯𑀘𑀦𑀫𑁆𑀧𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑁭𑁭𑁩. 𑀲𑁄𑀢𑀺 𑀤𑀼𑀓𑁆𑀔𑀢𑁄 𑀯𑀼𑀝𑁆𑀞𑀺𑀢𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀅𑀝𑁆𑀞𑀲𑀼𑀧𑀺 𑀞𑀸𑀦𑁂𑀲𑀼. 𑀦𑀦𑀼 𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀤𑁆𑀯𑁂 𑀥𑀼𑀭𑀸𑀦𑀻’’𑀢𑀺 𑀦𑀺𑀬𑀫𑀺𑀢𑀢𑁆𑀢𑀸 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀯𑀸 𑀲𑀺𑀬𑀸, 𑀥𑀫𑁆𑀫𑀸𑀦𑀼𑀲𑀸𑀭𑀻 𑀯𑀸? 𑀇𑀥 𑀦 𑀲𑀤𑁆𑀥𑀸𑀦𑀼𑀲𑀸𑀭𑀻 𑀬𑀼𑀢𑁆𑀢𑁄, 𑀓𑀸𑀬𑀲𑀓𑁆𑀔𑀺𑀢𑀸𑀧𑀺 𑀅𑀭𑀳𑀢𑁄 𑀦𑀢𑁆𑀣𑀺. 𑀅𑀪𑀺𑀥𑀫𑁆𑀫𑁂 𑀳𑀺 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀓𑀸𑀬𑀲𑀓𑁆𑀔𑀻? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀓𑀸𑀬𑀲𑀓𑁆𑀔𑀻’’𑀢𑀺 (𑀧𑀼. 𑀧. 𑁨𑁦𑁮) 𑁋

𑀏𑀓𑀘𑁆𑀘𑀸𑀲𑀯𑀧𑀭𑀺𑀓𑁆𑀔𑀬𑀯𑀘𑀦𑀢𑁄 𑀓𑀸𑀬𑀲𑀓𑁆𑀔𑀺𑀦𑁄 𑀲𑁂𑀓𑁆𑀔𑀪𑀸𑀯𑁄𑀯 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄, 𑀇𑀥 𑀧𑀦 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀓𑁄 𑀧𑀦 𑀲𑁄 𑀧𑀭𑀺𑀬𑀸𑀬𑁄𑀢𑀺? 𑀓𑀸𑀬𑀲𑀓𑁆𑀔𑀺𑀲𑀤𑀺𑀲𑀢𑀸. 𑀉𑀧𑀘𑀸𑀭𑀭𑀽𑀧𑀚𑁆𑀛𑀸𑀦𑀲𑀫𑀸𑀥𑀺𑀢𑁄 𑀳𑀺 𑀲𑀸𑀢𑀺𑀲𑀬𑀁 𑀅𑀭𑀽𑀧𑀲𑀫𑀸𑀥𑀺𑀲𑀫𑁆𑀨𑀲𑁆𑀲𑀁 𑀮𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀻𑀢𑀺 𑀏𑀓𑀘𑁆𑀘𑀸𑀲𑀯𑀧𑀭𑀺𑀓𑁆𑀔𑀬𑀁 𑀉𑀧𑀸𑀤𑀸𑀬 ‘‘𑀓𑀸𑀬𑀲𑀓𑁆𑀔𑀻’’𑀢𑀺 𑀯𑀢𑁆𑀢𑀩𑁆𑀩𑀧𑀼𑀕𑁆𑀕𑀮𑁂𑀦 𑀲𑀸𑀢𑀺𑀲𑀬𑀲𑀫𑀸𑀥𑀺𑀲𑀫𑁆𑀨𑀲𑁆𑀲𑀢𑀤𑀥𑀺𑀝𑁆𑀞𑀸𑀦𑀸𑀲𑀯𑀧𑀭𑀺𑀓𑁆𑀔𑀬𑀲𑀸𑀫𑀜𑁆𑀜𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀸𑀬𑀲𑀓𑁆𑀔𑀻 𑀯𑀺𑀬 𑀓𑀸𑀬𑀲𑀓𑁆𑀔𑀻𑀢𑀺 𑀅𑀭𑀳𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀯𑀼𑀢𑁆𑀢𑁄𑀢𑀺 𑀇𑀥𑀸𑀧𑀺 𑀢𑀫𑁂𑀯 𑀦𑀬𑀁 𑀕𑀳𑁂𑀢𑁆𑀯𑀸 𑀅𑀭𑀳𑀢𑁄𑀧𑀺 𑀓𑀸𑀬𑀲𑀓𑁆𑀔𑀺𑀢𑀸 𑀯𑀼𑀢𑁆𑀢𑀸. 𑀲𑀼𑀢𑁆𑀢𑀦𑁆𑀢𑀲𑀁𑀯𑀡𑁆𑀡𑀦𑀸 𑀳𑁂𑀲𑀸𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 𑀙𑀲𑀼 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀻 𑀦𑀸𑀫 𑀳𑁄𑀢𑀺, 𑀲𑁄 𑀘 𑀔𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻, 𑀦 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀉𑀧𑀘𑀸𑀭𑀫𑀢𑁆𑀢𑀮𑀸𑀪𑀻, 𑀭𑀽𑀧𑀚𑁆𑀛𑀸𑀦𑀫𑀢𑁆𑀢𑀮𑀸𑀪𑀻 𑀯𑀸. 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄𑀢𑀺 𑀘 𑀧𑀲𑁆𑀲𑀤𑁆𑀥𑀺𑀲𑀻𑀲𑁂𑀦 𑀲𑀫𑀸𑀥𑀺 𑀯𑀼𑀢𑁆𑀢𑁄𑀢𑀺 𑀲𑀸𑀢𑀺𑀲𑀬𑀲𑀫𑀸𑀥𑀺𑀮𑀸𑀪𑀻 𑀲𑀫𑀣𑀬𑀸𑀦𑀺𑀓𑁄𑀯 𑀅𑀥𑀺𑀧𑁆𑀧𑁂𑀢𑁄, 𑀲𑀫𑀣𑀬𑀸𑀦𑀺𑀓𑀲𑁆𑀲𑁂𑀯 𑀘 𑀓𑀸𑀬𑀲𑀓𑁆𑀔𑀺𑀪𑀸𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄. 𑀅𑀭𑀽𑀧𑀚𑁆𑀛𑀸𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀅𑀭𑀽𑀧𑀚𑁆𑀛𑀸𑀦𑀁. 𑀢𑀢𑁆𑀣 𑀧𑀦 𑀏𑀓𑀫𑁆𑀧𑀺 𑀮𑀤𑁆𑀥𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀽𑀧𑀚𑁆𑀛𑀸𑀦’’𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 ‘‘𑀘𑀢𑁆𑀢𑀸𑀭𑀺 𑀅𑀭𑀽𑀧𑀚𑁆𑀛𑀸𑀦𑀸𑀦𑀻’’𑀢𑀺. 𑀢𑁂𑀦𑀸𑀬𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀘 𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺. 𑀏𑀲 𑀦𑀬𑁄 𑀓𑀸𑀬𑀲𑀓𑁆𑀔𑀺𑀫𑁆𑀳𑀺𑀧𑀺. 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄.

𑁭𑁭𑁪. 𑀧𑀜𑁆𑀜𑀯𑀢𑁄 𑀦𑀺𑀧𑀼𑀡𑀢𑀭𑀸, 𑀕𑀫𑁆𑀪𑀻𑀭𑀸 𑀘 𑀅𑀢𑁆𑀣𑀸 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀅𑀦𑀢𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀢𑀸, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀧𑀝𑀺𑀮𑀸𑀪𑁄 𑀘 𑀯𑀼𑀢𑁆𑀢𑁄. 𑀥𑀫𑁆𑀫𑀸𑀦𑀼𑀲𑀸𑀭𑀻 𑀳𑁄𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸. 𑀧𑀜𑁆𑀜𑀸 𑀳𑀺 𑀇𑀥 ‘‘𑀥𑀫𑁆𑀫𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀸 ‘‘𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄’’𑀢𑀺𑀆𑀤𑀻𑀲𑀼 𑀯𑀺𑀬 (𑀚𑀸. 𑁧.𑁧.𑁫𑁭).

𑁭𑁭𑁫. 𑀬𑀲𑁆𑀲𑀸 𑀧𑀸𑀴𑀺𑀬𑀸 𑀯𑀲𑁂𑀦 𑀇𑀥 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀢𑀁 𑀧𑀸𑀴𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁭𑁭𑁬. ‘‘𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀯𑀫𑀸𑀤𑀺𑀅𑀢𑁆𑀣𑀲𑁆𑀲 𑀲𑀸𑀥𑀓𑀁 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁. ‘‘𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀢𑁂𑀦 𑀲𑀩𑁆𑀩𑀣𑀸 𑀅𑀯𑀺𑀫𑀼𑀢𑁆𑀢𑀲𑁆𑀲 𑀲𑀤𑁆𑀥𑀸𑀫𑀢𑁆𑀢𑁂𑀦 𑀯𑀺𑀫𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀲𑁂𑀓𑁆𑀔𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀸 𑀲𑀤𑁆𑀥𑀸𑀬 𑀅𑀥𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀢𑁄𑀢𑀺 𑀨𑀼𑀝𑁆𑀞𑀸𑀦𑀁 𑀅𑀦𑀦𑁆𑀢𑀭𑀁 𑀨𑀼𑀝𑁆𑀞𑀦𑁆𑀢𑁄, 𑀨𑀼𑀝𑁆𑀞𑀸𑀦𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀦𑀦𑁆𑀢𑀭𑁄 𑀓𑀸𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀨𑀼𑀝𑁆𑀞𑀸𑀦𑀦𑁆𑀢𑀭𑀓𑀸𑀮𑀫𑁂𑀯 𑀲𑀘𑁆𑀙𑀺𑀓𑀭𑀡𑀽𑀧𑀸𑀬𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀸𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀯𑀦𑀧𑀼𑀁𑀲𑀓𑀁 𑀯𑀸 𑀏𑀢𑀁 𑀬𑀣𑀸 ‘‘𑀏𑀓𑀫𑀦𑁆𑀢’’𑀦𑁆𑀢𑀺 (𑀧𑀸𑀭𑀸. 𑁨). 𑀬𑁄 𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀦 𑀭𑀽𑀧𑀓𑀸𑀬𑀢𑁄, 𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄 𑀘 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄, 𑀢𑁂𑀦 𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀯𑀺𑀫𑁄𑀓𑁆𑀔𑁄 𑀆𑀮𑁄𑀘𑀺𑀢𑁄 𑀧𑀓𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺, 𑀦 𑀧𑀦 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑁄, 𑀦𑀺𑀭𑁄𑀥𑀁 𑀧𑀦 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀘𑁆𑀘𑁂𑀲𑀼 𑀆𑀲𑀯𑁂𑀲𑀼 𑀔𑁂𑀧𑀺𑀢𑁂𑀲𑀼 𑀢𑁂𑀦 𑀲𑁄 𑀲𑀘𑁆𑀙𑀺𑀓𑀢𑁄𑀯 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀬𑀣𑀸𑀆𑀮𑁄𑀘𑀺𑀢𑀁 𑀦𑀸𑀫𑀓𑀸𑀬𑁂𑀦 𑀲𑀘𑁆𑀙𑀸𑀓𑀸𑀲𑀻𑀢𑀺 𑀓𑀸𑀬𑀲𑀓𑁆𑀔𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀼 𑀯𑀺𑀫𑀼𑀢𑁆𑀢𑁄 𑀏𑀓𑀘𑁆𑀘𑀸𑀦𑀁 𑀆𑀲𑀯𑀸𑀦𑀁 𑀅𑀧𑀭𑀺𑀓𑁆𑀔𑀻𑀡𑀢𑁆𑀢𑀸. 𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄𑀢𑀺 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀬𑀸𑀯 𑀅𑀕𑁆𑀕𑀫𑀕𑁆𑀕𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺. ‘‘𑀤𑀺𑀝𑁆𑀞𑀺𑀬𑀸 𑀧𑀢𑁆𑀢𑁄’’𑀢𑀺 𑀯𑀸 𑀧𑀸𑀞𑁄, 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀤𑀺𑀝𑁆𑀞𑀺𑀬𑀸 𑀦𑀺𑀭𑁄𑀥𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀇𑀫𑁂 𑀘 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸𑀤𑀬𑁄 𑀢𑀬𑁄 𑀧𑀭𑀫𑀢𑁆𑀣𑀢𑁄 𑀅𑀧𑀭𑀺𑀬𑁄𑀲𑀺𑀢𑀜𑀸𑀡𑀓𑀺𑀘𑁆𑀘𑀸𑀢𑀺 𑀢𑀁 𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀛𑀸𑀦𑀨𑀲𑁆𑀲𑀦𑁆𑀢𑀺 𑀲𑀸𑀢𑀺𑀲𑀬𑀁 𑀛𑀸𑀦𑀨𑀲𑁆𑀲𑀁. 𑀢𑁂𑀦 𑀅𑀭𑀽𑀧𑀚𑁆𑀛𑀸𑀦𑀨𑀲𑁆𑀲𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺.

‘‘𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸𑀢𑀺 𑀜𑀸𑀢𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀤𑀼𑀓𑁆𑀔𑀲𑀘𑁆𑀘𑀧𑀝𑀺𑀯𑁂𑀥𑀫𑀸𑀳, ‘‘𑀲𑀼𑀔𑁄 𑀦𑀺𑀭𑁄𑀥𑁄𑀢𑀺 𑀜𑀸𑀢𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀦𑀺𑀭𑁄𑀥𑀲𑀘𑁆𑀘𑀧𑀝𑀺𑀯𑁂𑀥𑀁. 𑀢𑀤𑀼𑀪𑀬𑁂𑀦 𑀘 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀧𑀝𑀺𑀯𑁂𑀥𑀁 𑀦𑀸𑀦𑀦𑁆𑀢𑀭𑀺𑀬𑀓𑀪𑀸𑀯𑀢𑁄. ‘‘𑀜𑀸𑀢𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀤𑀼𑀢𑀺𑀬𑀫𑀕𑁆𑀕𑀓𑀺𑀘𑁆𑀘𑀁, ‘‘𑀤𑀺𑀝𑁆𑀞𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀢𑀢𑀺𑀬𑀫𑀕𑁆𑀕𑀓𑀺𑀘𑁆𑀘𑀁, ‘‘𑀯𑀺𑀤𑀺𑀢𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀘𑀢𑀼𑀢𑁆𑀣𑀫𑀕𑁆𑀕𑀓𑀺𑀘𑁆𑀘𑀁, ‘‘𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀞𑀫𑀨𑀮𑀓𑀺𑀘𑁆𑀘𑀁, ‘‘𑀨𑀼𑀲𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑁂𑀲𑀨𑀮𑀤𑁆𑀯𑀬𑀓𑀺𑀘𑁆𑀘𑀁. 𑀇𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀫𑀕𑁆𑀕𑀨𑀮𑀜𑀸𑀡𑀩𑁆𑀬𑀸𑀧𑀸𑀭𑀤𑀲𑁆𑀲𑀦𑀸𑀦𑀺 𑀇𑀫𑀸𑀦𑀺 𑀧𑀤𑀸𑀦𑀻𑀢𑀺 𑀯𑀤𑀦𑁆𑀢𑀺.

𑁭𑁭𑁭. 𑀇𑀢𑀭𑁂𑀲𑀽𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀺𑀆𑀤𑀺𑀧𑀤𑁂𑀲𑀼. 𑀲𑀤𑁆𑀥𑀁 𑀅𑀦𑀼𑀲𑀭𑀢𑀻𑀢𑀺 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀺𑀢𑀁 𑀲𑀤𑁆𑀥𑀁 𑀅𑀦𑀼𑀕𑀘𑁆𑀙𑀢𑀺. 𑀬𑀣𑀸 𑀲𑀸 𑀢𑀺𑀓𑁆𑀔𑀸 𑀲𑀽𑀭𑀸 𑀅𑀳𑁄𑀲𑀺, 𑀫𑀕𑁆𑀕𑀓𑁆𑀔𑀡𑁂𑀧𑀺 𑀢𑀤𑀦𑀼𑀭𑀽𑀧𑀫𑁂𑀯 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀬 𑀯𑀸 𑀅𑀦𑀼𑀲𑀭𑀢𑀻𑀢𑀺 𑀲𑀤𑁆𑀥𑀸𑀬 𑀓𑀸𑀭𑀡𑀪𑀽𑀢𑀸𑀬 𑀲𑀘𑁆𑀘𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀭𑀽𑀧𑀁 𑀲𑀭𑀢𑀺 𑀕𑀘𑁆𑀙𑀢𑀺, 𑀧𑀝𑀺𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀻𑀳𑀺𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁂𑀳𑀺 𑀲𑀤𑁆𑀥𑀸𑀬 𑀅𑀥𑀺𑀫𑀢𑁆𑀢𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀥𑀫𑁆𑀫𑀸𑀦𑀼𑀲𑀸𑀭𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄, 𑀭𑀽𑀧𑀓𑀸𑀬𑀢𑁄 𑀘 𑀦𑀸𑀫𑀓𑀸𑀬𑀢𑁄 𑀘 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦, 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀯𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀭𑀽𑀧𑀚𑁆𑀛𑀸𑀦𑁂𑀦 𑀭𑀽𑀧𑀓𑀸𑀬𑀢𑁄 𑀘 𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄 𑀘 𑀯𑀺𑀫𑀼𑀢𑁆𑀢𑁄, 𑀅𑀭𑀺𑀬𑀫𑀕𑁆𑀕𑁂𑀦 𑀦𑀸𑀫𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑁄𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀧𑀚𑀸𑀦𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀧𑀞𑀫𑀚𑁆𑀛𑀸𑀦𑀨𑀲𑁆𑀲𑁂𑀦 𑀯𑀺𑀦𑀸 𑀧𑀭𑀺𑀚𑀸𑀦𑀦𑀸𑀤𑀺𑀧𑁆𑀧𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀢𑁂𑀲𑀁 𑀓𑀺𑀘𑁆𑀘𑀸𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑀸𑀬 𑀯𑀺𑀲𑁂𑀲𑁂𑀦 𑀫𑀼𑀢𑁆𑀢𑁄𑀢𑀺 𑀯𑀺𑀫𑀼𑀢𑁆𑀢𑁄.

𑀅𑀬𑀁 𑀧𑀦𑁂𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀗𑁆𑀔𑁂𑀧𑀓𑀣𑀸 𑁋 𑀬𑀲𑁆𑀲 𑀅𑀦𑀺𑀘𑁆𑀘𑀸𑀓𑀸𑀭𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀲𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀺𑀓𑁆𑀔𑀪𑀸𑀯𑁂𑀦 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫 𑀳𑁄𑀢𑀺, 𑀫𑀚𑁆𑀛𑁂 𑀙𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀅𑀕𑁆𑀕𑀨𑀮𑀓𑁆𑀔𑀡𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀢𑀣𑀸 𑀬𑀲𑁆𑀲 𑀤𑀼𑀓𑁆𑀔𑀸𑀓𑀸𑀭𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀲 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀢𑀸𑀬 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺 𑀤𑀼𑀓𑁆𑀔𑀼𑀧𑀦𑀺𑀲𑀸𑀬 𑀲𑀤𑁆𑀥𑀸𑀬𑀧𑀺 𑀢𑀺𑀩𑁆𑀩𑀢𑀭𑀢𑁆𑀢𑀸, 𑀥𑀼𑀭𑀦𑀺𑀬𑀫𑀢𑁄 𑀘. 𑀲𑁄𑀧𑀺 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀏𑀯 𑀳𑁄𑀢𑀺, 𑀫𑀚𑁆𑀛𑁂 𑀙𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀅𑀦𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀘 𑀳𑁄𑀢𑀺. 𑀬𑀲𑁆𑀲 𑀧𑀦 𑀅𑀦𑀢𑁆𑀢𑀸𑀓𑀸𑀭𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀲𑁄 𑀯𑁂𑀤𑀩𑀳𑀼𑀮𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀺𑀓𑁆𑀔𑀪𑀸𑀯𑁂𑀦 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀏𑀯 𑀳𑁄𑀢𑀺, 𑀫𑀚𑁆𑀛𑁂 𑀙𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀅𑀦𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀏𑀯 𑀳𑁄𑀢𑀺. 𑀇𑀫𑁂 𑀧𑀦 𑀦 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀺𑀦𑁄, 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻 𑀧𑀦 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀯𑀸 𑀥𑀫𑁆𑀫𑀸𑀦𑀼𑀲𑀸𑀭𑀻 𑀯𑀸 𑀲𑀺𑀬𑀸. 𑀫𑀚𑁆𑀛𑁂 𑀙𑀲𑀼 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀻, 𑀧𑀭𑀺𑀬𑁄𑀲𑀸𑀦𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺.

𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁.

𑁭𑁭𑁮. 𑀬𑀁 𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀸𑀬 𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦𑁂𑀢𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁. 𑀧𑀼𑀭𑀺𑀫𑁂𑀦 𑀜𑀸𑀡𑀤𑁆𑀯𑀬𑁂𑀦𑀸𑀢𑀺 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀤𑁆𑀯𑀬𑁂𑀦 𑀅𑀢𑁆𑀣𑀢𑁄 𑀏𑀓𑀁, 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑀢𑁄 𑀦𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀝𑁆𑀞𑀓𑀣𑀸𑀬, 𑀧𑀸𑀴𑀺𑀬𑀸 𑀘 𑀲𑀸𑀥𑁂𑀢𑀼𑀁 ‘‘𑀢𑁂𑀦𑀸𑀳𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀫𑀼𑀜𑁆𑀘𑀦𑀼𑀧𑀸𑀬𑀓𑀭𑀡𑀜𑀸𑀡𑀸𑀦𑀺𑀧𑀺 𑀲𑀗𑁆𑀔𑀸𑀭𑁂𑀲𑀼 𑀉𑀤𑀸𑀲𑀻𑀦𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑀢𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀫𑀜𑁆𑀜𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀇𑀤𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀏𑀓𑀫𑁂𑀯 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀻’’𑀢𑀺. 𑀢𑁂𑀦 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀯𑁄𑀳𑀸𑀭𑁄 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀤𑀺𑀜𑀸𑀡𑀲𑀫𑀼𑀤𑀸𑀬𑀯𑀺𑀲𑀬𑁄𑀢𑀺 𑀤𑀲𑁆𑀲𑁂𑀢𑀺.

𑁭𑁮𑁦. 𑀉𑀧𑁆𑀧𑀸𑀤𑀸𑀤𑀻𑀦𑀻𑀢𑀺 𑀉𑀧𑁆𑀧𑀸𑀤𑀧𑀯𑀢𑁆𑀢𑀸𑀤𑀺𑀅𑀧𑀤𑁂𑀲𑁂𑀦 𑀯𑀼𑀢𑁆𑀢𑁂 𑀲𑀗𑁆𑀔𑀸𑀭𑁂. 𑀧𑀭𑀺𑀘𑁆𑀘𑀚𑀺𑀢𑀼𑀓𑀸𑀫𑀢𑀸𑀢𑀺 𑀢𑀧𑁆𑀧𑀝𑀺𑀩𑀦𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀼𑀓𑀸𑀫𑀢𑀸. 𑀧𑀝𑀺𑀲𑀗𑁆𑀔𑀸𑀦𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀢𑀻𑀭𑀡𑀁. 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀦𑀺𑀭𑀸𑀮𑀬𑀪𑀸𑀯𑀸𑀧𑀢𑁆𑀢𑀺𑀬𑀸 𑀅𑀧𑁂𑀓𑁆𑀔𑀸𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸. 𑀅𑀯𑀲𑀸𑀦𑁂𑀢𑀺 𑀢𑀣𑀸𑀓𑀭𑀡𑀲𑁆𑀲 𑀉𑀢𑁆𑀢𑀭𑀓𑀸𑀮𑀁. 𑀬𑀸𑀯 𑀦𑀺𑀩𑁆𑀩𑀸𑀦𑀲𑀫𑁆𑀧𑀓𑁆𑀔𑀦𑁆𑀤𑀦𑀸 𑀦 𑀇𑀚𑁆𑀛𑀢𑀺, 𑀢𑀸𑀯 𑀯𑀺𑀘𑀺𑀦𑀦𑁂𑀧𑀺 𑀉𑀤𑀸𑀲𑀻𑀦𑀢𑀸𑀬 𑀜𑀸𑀡𑀲𑁆𑀲 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀲𑀦𑁆𑀢𑀺𑀝𑁆𑀞𑀦𑀸’’𑀢𑀺. 𑀏𑀯𑀦𑁆𑀢𑀺 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀓𑀸𑀭𑀲𑀸𑀫𑀜𑁆𑀜𑀢𑁄 ‘‘𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸 𑀘 𑀲𑀸 𑀲𑀦𑁆𑀢𑀺𑀝𑁆𑀞𑀦𑀸 𑀘𑀸’’𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦.

𑁭𑁮𑁧. 𑀇𑀫𑁂 𑀥𑀫𑁆𑀫𑀸𑀢𑀺 𑀇𑀫𑁂 𑀜𑀸𑀡𑀲𑀗𑁆𑀔𑀸𑀢𑀸 𑀥𑀫𑁆𑀫𑀸, 𑀜𑀸𑀡𑀧𑀭𑀺𑀬𑀸𑀬𑁄 𑀯𑀸 𑀇𑀥 𑀥𑀫𑁆𑀫-𑀲𑀤𑁆𑀤𑁄, 𑀢𑀲𑁆𑀫𑀸 𑀇𑀫𑀸𑀦𑀺 𑀜𑀸𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀓𑀢𑁆𑀢𑀸𑀢𑀺 𑀏𑀓𑀲𑀪𑀸𑀯𑀸.

𑁭𑁮𑁨. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀳𑁄𑀢𑀺 𑀯𑀼𑀝𑁆𑀞𑀸𑀦𑀕𑀫𑀦𑀢𑁄. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀤𑀺𑀜𑀸𑀡𑀢𑁆𑀢𑀬𑀲𑁆𑀲𑀸𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀲𑀜𑁆𑀜𑀺𑀢𑀲𑁆𑀲 𑀜𑀸𑀡𑀢𑁆𑀢𑀬𑀲𑁆𑀲. 𑀓𑀺𑀘𑁆𑀘𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦𑀧𑀺 𑀮𑁄𑀓𑀺𑀬𑀜𑀸𑀡𑀸𑀦𑀁 𑀉𑀧𑀭𑀺 𑀞𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀫𑀪𑀸𑀯𑀁 𑀧𑀢𑁆𑀢𑀢𑁆𑀢𑀸’’𑀢𑀺. 𑀦𑀺𑀫𑀺𑀢𑁆𑀢𑀪𑀽𑀢𑀢𑁄𑀢𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀢𑁄 𑀔𑀦𑁆𑀥𑀧𑀜𑁆𑀘𑀓𑀢𑁄. 𑀢𑁂𑀦𑀸𑀳 ‘‘𑀅𑀪𑀺𑀦𑀺𑀯𑀺𑀝𑁆𑀞𑀯𑀢𑁆𑀣𑀼𑀢𑁄’’𑀢𑀺. 𑀢𑀜𑁆𑀳𑀺 𑀯𑀺𑀧𑀲𑁆𑀲𑀦𑀸𑀬 𑀕𑁄𑀘𑀭𑀓𑀭𑀡𑀲𑀗𑁆𑀔𑀸𑀢𑁂𑀦 𑀅𑀪𑀺𑀦𑀺𑀯𑁂𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀯𑀢𑁆𑀣𑀼𑀦𑁆𑀢𑀺 𑀧𑀯𑀼𑀘𑁆𑀘𑀢𑀺. 𑀢𑀁 𑀧𑀦𑁂𑀢𑀁 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀧𑀭𑀢𑁄 𑀤𑀺𑀝𑁆𑀞𑀺𑀢𑀸𑀬 ‘‘𑀩𑀳𑀺𑀤𑁆𑀥𑀸’’𑀢𑀺 𑀯𑀼𑀢𑁆𑀢𑀁. 𑀢𑀤𑁂𑀯 𑀳𑀺 ‘‘𑀩𑀳𑀺𑀤𑁆𑀥𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀘𑁆𑀘𑀢𑀺. 𑀅𑀚𑁆𑀛𑀢𑁆𑀢𑀧𑀯𑀢𑁆𑀢𑀢𑁄𑀢𑀺 𑀲𑀲𑀦𑁆𑀢𑀸𑀦𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀯𑀢𑁆𑀢𑀦𑀆𑀤𑀺𑀢𑁄, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑀓𑁆𑀔𑀦𑁆𑀥𑁂𑀳𑀺 𑀘. 𑀢𑀜𑁆𑀳𑀺 𑀲𑀲𑀦𑁆𑀢𑀢𑀺𑀬𑀁 𑀓𑀺𑀮𑁂𑀲𑀧𑁆𑀧𑀯𑀢𑁆𑀢𑀪𑀸𑀯𑀢𑁄, 𑀢𑀦𑁆𑀦𑀺𑀫𑀺𑀢𑁆𑀢𑀁 𑀅𑀲𑀢𑀺 𑀫𑀕𑁆𑀕𑀪𑀸𑀯𑀦𑀸𑀬 𑀉𑀧𑁆𑀧𑀚𑁆𑀚𑀦𑀓𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀯𑀢𑁆𑀢𑀪𑀸𑀯𑀢𑁄 𑀘 𑀢𑀣𑀸 𑀯𑀼𑀢𑁆𑀢𑀁. 𑀯𑀼𑀝𑁆𑀞𑀳𑀦𑀜𑁆𑀘 𑀦𑁂𑀲𑀁 𑀆𑀭𑀫𑁆𑀫𑀡𑀸𑀓𑀭𑀡𑀁, 𑀆𑀬𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀜𑁆𑀘. 𑀖𑀝𑀺𑀬𑀢𑀺 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀫𑁂𑀯 𑀫𑀕𑁆𑀕𑀲𑀫𑀼𑀧𑁆𑀧𑀢𑁆𑀢𑀺𑀢𑁄.

𑁭𑁮𑁩. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 ‘‘𑀅𑀪𑀺𑀦𑀺𑀯𑀺𑀝𑁆𑀞𑀯𑀢𑁆𑀣𑀼𑀢𑁄 𑀯𑀼𑀝𑁆𑀞𑀳𑀦𑀢𑁄’’𑀢𑀺 𑀲𑀗𑁆𑀔𑁂𑀧𑀯𑀘𑀦𑁂. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀭𑀽𑀧𑀸𑀭𑀽𑀧𑀧𑀧𑀜𑁆𑀘𑀓𑁆𑀔𑀦𑁆𑀥𑀮𑀓𑁆𑀔𑀡𑀢𑁆𑀢𑀬𑀯𑀲𑁂𑀦 𑀅𑀬𑀁 𑀫𑀸𑀢𑀺𑀓𑀸 𑀉𑀤𑁆𑀤𑁂𑀲𑁄. 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀔𑀦𑁆𑀥𑁂𑀲𑀼 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸. ‘‘𑀅𑀚𑁆𑀛𑀢𑁆𑀢𑀸 𑀯𑀼𑀝𑁆𑀞𑀸𑀢𑀻’’𑀢𑀺 𑀇𑀤𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀅𑀚𑁆𑀛𑀢𑁆𑀢𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑀸 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀫𑀕𑁆𑀕𑁄 𑀲𑀩𑁆𑀩𑀢𑁄𑀧𑀺 𑀯𑀼𑀝𑁆𑀞𑀸𑀢𑀺. 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀧𑁆𑀧𑀳𑀸𑀭𑁂𑀦𑀸𑀢𑀺 𑀏𑀓𑀚𑁆𑀛𑀁, 𑀢𑀁 𑀧𑀦 𑀅𑀚𑁆𑀛𑀢𑁆𑀢𑀸𑀤𑀺𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁯𑁮; 𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁬; 𑀧𑀝𑀺. 𑀫. 𑁨.𑁩𑁦) 𑀅𑀯𑀺𑀪𑀸𑀕𑁂𑀦 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀧𑀯𑀢𑁆𑀢𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀢𑀬𑀺𑀤𑀁 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀦𑁆𑀢𑀲𑁆𑀲 𑀜𑀸𑀡𑀼𑀢𑁆𑀢𑀭𑀲𑁆𑀲 𑀲𑀫𑁆𑀪𑀯𑀢𑀻𑀢𑀺 𑀯𑀤𑀦𑁆𑀢𑀺.

𑁭𑁮𑁪. 𑀲𑀼𑀤𑁆𑀥𑀅𑀚𑁆𑀛𑀢𑁆𑀢𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀦 𑀳𑁄𑀢𑀺 𑀫𑀫𑀁𑀓𑀸𑀭𑀯𑀢𑁆𑀣𑀼𑀦𑁄𑀧𑀺 𑀧𑀭𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀫𑀕𑁆𑀕𑀲𑀗𑁆𑀔𑀸𑀢𑀁 𑀯𑀼𑀝𑁆𑀞𑀸𑀦𑀁, 𑀫𑀕𑁆𑀕𑁂𑀦 𑀯𑀸 𑀯𑀼𑀝𑁆𑀞𑀸𑀦𑀁 𑀫𑀕𑁆𑀕𑀯𑀼𑀝𑁆𑀞𑀸𑀦𑀁.

𑁭𑁮𑁫. 𑀭𑀸𑀲𑀺𑀁 𑀓𑀢𑁆𑀯𑀸𑀢𑀺 𑀪𑀽𑀢𑀼𑀧𑀸𑀤𑀸𑀬𑀯𑀲𑁂𑀦 𑀤𑀼𑀯𑀺𑀥𑀁 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀅𑀦𑁂𑀓𑀪𑁂𑀤𑀫𑁆𑀧𑀺 ‘‘𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧’’𑀦𑁆𑀢𑀺 𑀧𑀺𑀡𑁆𑀟𑀢𑁄 𑀕𑀳𑁂𑀢𑁆𑀯𑀸. 𑀬𑀣𑀸 𑀭𑀽𑀧𑁂 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀬𑁂𑀪𑀼𑀬𑁆𑀬𑁂𑀦 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲, 𑀏𑀯𑀁 𑀅𑀭𑀽𑀧𑁂 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀬𑁂𑀪𑀼𑀬𑁆𑀬𑁂𑀦 𑀲𑀫𑀣𑀬𑀸𑀦𑀺𑀓𑀲𑁆𑀲 𑀳𑁄𑀢𑀺. 𑀅𑀪𑀺𑀦𑀺𑀯𑁂𑀲𑁄𑀢𑀺 𑀘 𑀯𑀺𑀧𑀲𑁆𑀲𑀦𑀸𑀬 𑀧𑀼𑀩𑁆𑀩𑀪𑀸𑀕𑁂 𑀓𑀢𑁆𑀢𑀩𑁆𑀩𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀧𑀞𑀫𑀁 𑀭𑀽𑀧𑀧𑀭𑀺𑀕𑁆𑀕𑀡𑁆𑀳𑀦𑀁 𑀭𑀽𑀧𑁂 𑀅𑀪𑀺𑀦𑀺𑀯𑁂𑀲𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑁭𑁮𑁬. 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀓𑀸𑀫𑀁 𑀉𑀤𑀬𑀩𑁆𑀩𑀬𑀧𑀭𑀺𑀕𑁆𑀕𑀡𑁆𑀳𑀦𑀁 𑀅𑀪𑀺𑀦𑀺𑀯𑁂𑀲𑁄𑀢𑀺 𑀤𑀲𑁆𑀲𑀺𑀢𑀁, 𑀬𑀣𑀸𑀉𑀧𑀝𑁆𑀞𑀺𑀢𑁂 𑀧𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑁂, 𑀢𑁂𑀲𑀜𑁆𑀘 𑀧𑀘𑁆𑀘𑀬𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀗𑁆𑀔𑁂𑀧𑁂𑀦𑁂𑀯 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀘𑀸𑀭𑁂𑀦𑁆𑀢𑁄 𑀜𑀸𑀡𑀼𑀢𑁆𑀢𑀭𑁄 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀜𑀸𑀡𑀧𑀝𑀺𑀧𑀸𑀝𑀺𑀬𑀸 𑀔𑀺𑀧𑁆𑀧𑀫𑁂𑀯 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀏𑀓𑀧𑁆𑀧𑀳𑀸𑀭𑁂𑀦 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀅𑀜𑁆𑀜𑀣𑀸 𑀏𑀓𑁂𑀦𑁂𑀯 𑀮𑁄𑀓𑀺𑀬𑀘𑀺𑀢𑁆𑀢𑁂𑀦 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀭𑀺𑀕𑁆𑀕𑀳𑀧𑀭𑀺𑀚𑀸𑀦𑀦𑀸𑀤𑀻𑀦𑀁 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸𑀤𑀺𑀁 𑀏𑀓𑀚𑁆𑀛𑀁 𑀆𑀭𑀫𑁆𑀫𑀡𑀁 𑀓𑀸𑀢𑀼𑀁 𑀲𑀓𑁆𑀓𑀸. 𑀬𑀲𑁆𑀲 𑀧𑀦 𑀏𑀓𑀯𑀸𑀭𑀁 𑀜𑀸𑀡𑁂𑀦 𑀨𑀲𑁆𑀲𑀺𑀢𑀁, 𑀧𑀼𑀦 𑀢𑀁 𑀨𑀲𑁆𑀲𑀺𑀢𑀩𑁆𑀩𑀫𑁂𑀯, 𑀢𑀸𑀤𑀺𑀲𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺.

𑁭𑁮𑁮. 𑀏𑀢𑁆𑀣 𑀘 𑀅𑀪𑀺𑀦𑀺𑀯𑁂𑀲𑁄 𑀅𑀓𑀸𑀭𑀡𑀁 𑀯𑀼𑀝𑁆𑀞𑀸𑀦𑀫𑁂𑀯 𑀧𑀫𑀸𑀡𑀁, 𑀢𑀲𑁆𑀫𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀺𑀫𑁄𑀓𑁆𑀔𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀸𑀧𑀺 𑀯𑀼𑀝𑁆𑀞𑀸𑀦𑀯𑀲𑁂𑀦 𑀲𑀫𑁆𑀪𑀯𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘 𑀬𑁄𑀧𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀬𑁄𑀧𑀺 𑀚𑀦𑀸𑀢𑀺 𑀯𑀼𑀝𑁆𑀞𑀸𑀦𑀯𑀲𑁂𑀦 𑀪𑁂𑀤𑁂 𑀅𑀲𑀢𑀺𑀧𑀺 𑀅𑀪𑀺𑀦𑀺𑀯𑁂𑀲𑀯𑀲𑁂𑀦𑁂𑀯 𑀮𑀤𑁆𑀥𑀁 𑀪𑁂𑀤𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁.

𑁭𑁮𑁯. 𑀲𑀤𑁆𑀥𑀺𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀜𑀸𑀡𑁂𑀳𑀻𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑀸𑀤𑀺𑀧𑀼𑀭𑀺𑀫𑀜𑀸𑀡𑁂𑀳𑀺 𑀘𑁂𑀯 𑀕𑁄𑀢𑁆𑀭𑀪𑀼𑀆𑀤𑀺𑀧𑀘𑁆𑀙𑀺𑀫𑀜𑀸𑀡𑁂𑀳𑀺 𑀘 𑀲𑀳. 𑀉𑀤𑁆𑀤𑀸𑀦𑀦𑁆𑀢𑀺 𑀉𑀤𑁆𑀤𑁂𑀲𑁄.

𑀬𑀢𑁆𑀣 𑀓𑀢𑁆𑀣𑀘𑀺…𑀧𑁂… 𑀯𑀝𑁆𑀝𑁂𑀬𑁆𑀬𑀼𑀁 𑀢𑀁𑀢𑀁𑀜𑀸𑀡𑀝𑁆𑀞𑀸𑀦𑀺𑀬𑀲𑁆𑀲 𑀉𑀧𑀫𑀸𑀯𑀢𑁆𑀣𑀼𑀦𑁄 𑀮𑀩𑁆𑀪𑀦𑀢𑁄. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂𑀢𑀺 𑀇𑀫𑀲𑁆𑀫𑀺𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀧𑀤𑁂𑀲𑁂. 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀜𑀸𑀡𑀁, 𑀲𑀩𑁆𑀩𑀁 𑀯𑀸 𑀜𑀸𑀡𑀓𑀺𑀘𑁆𑀘𑀁 𑀧𑀸𑀓𑀝𑀁 𑀳𑁄𑀢𑀺 𑀯𑁂𑀫𑀚𑁆𑀛𑁂 𑀞𑀢𑁆𑀯𑀸 𑀯𑀺𑀪𑀸𑀯𑀺𑀬𑀫𑀸𑀦𑀢𑁆𑀢𑀸. 𑀯𑀼𑀢𑁆𑀢𑀸 𑀯𑀺𑀲𑀼𑀤𑁆𑀥𑀺𑀓𑀣𑀸𑀬𑀁.

𑁭𑁯𑁦. 𑀦𑀺𑀮𑀻𑀬𑀺𑀢𑁆𑀯𑀸𑀢𑀺 𑀉𑀧𑀯𑀺𑀲𑀺𑀢𑁆𑀯𑀸. 𑀧𑀭𑀸𑀫𑀲𑀺𑀢𑁆𑀯𑀸𑀢𑀺 𑀯𑀻𑀫𑀁𑀲𑀺𑀢𑁆𑀯𑀸.

𑀕𑀬𑁆𑀳𑀼𑀧𑀕𑀁 𑀅𑀤𑀺𑀲𑁆𑀯𑀸𑀢𑀺 𑀕𑀳𑀡𑀬𑁄𑀕𑁆𑀕𑀁 𑀦𑀺𑀘𑁆𑀘𑀲𑀸𑀭𑀸𑀤𑀺𑀁 𑀅𑀤𑀺𑀲𑁆𑀯𑀸. 𑀘𑀺𑀢𑁆𑀢𑀲𑁆𑀲 𑀯𑀗𑁆𑀓𑀪𑀸𑀯𑀓𑀭𑀸𑀦𑀁 𑀫𑀸𑀬𑀸𑀤𑀻𑀦𑀁 𑀲𑀼𑀝𑁆𑀞𑀼 𑀯𑀺𑀓𑁆𑀔𑀫𑁆𑀪𑀦𑁂𑀦 𑀅𑀦𑀼𑀮𑁄𑀫𑀲𑁆𑀲 𑀉𑀚𑀼𑀓𑀲𑀸𑀔𑀸𑀲𑀤𑀺𑀲𑀢𑀸. 𑀦𑀺𑀩𑁆𑀩𑀸𑀦𑀸𑀮𑁄𑀘𑀦𑀢𑁄 𑀕𑁄𑀢𑁆𑀭𑀪𑀼𑀜𑀸𑀡𑀲𑁆𑀲 𑀉𑀤𑁆𑀥𑀁 𑀉𑀮𑁆𑀮𑁄𑀓𑀦𑀲𑀤𑀺𑀲𑀢𑀸. 𑀅𑀧𑁆𑀧𑀢𑀺𑀝𑁆𑀞𑁂 𑀦𑀺𑀩𑁆𑀩𑀸𑀦𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀫𑀕𑁆𑀕𑀜𑀸𑀡𑀲𑁆𑀲 𑀆𑀓𑀸𑀲𑁂 𑀉𑀧𑁆𑀧𑀢𑀦𑀲𑀤𑀺𑀲𑀢𑀸.

𑁭𑁯𑁧. 𑀲𑀧𑁆𑀧𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 𑀕𑁄𑀢𑁆𑀭𑀪𑀼𑀜𑀸𑀡𑀁 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑁆𑀲 𑀆𑀮𑀫𑁆𑀩𑀦𑀢𑁄. 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀞𑀸𑀦𑀁 𑀯𑀺𑀬 𑀫𑀕𑁆𑀕𑀜𑀸𑀡𑀁 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀅𑀢𑁆𑀢𑀦𑁄𑀧𑀺 𑀤𑀲𑁆𑀲𑀦𑀢𑁄. 𑀅𑀪𑀬𑀝𑁆𑀞𑀸𑀦𑁂 𑀞𑀸𑀦𑀦𑁆𑀢𑀺 𑀅𑀪𑀬𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑀫𑀸𑀳, 𑀦 𑀢𑀲𑁆𑀲 𑀧𑀸𑀧𑀼𑀡𑀧𑀝𑀺𑀧𑀢𑁆𑀢𑀺𑀁.

𑁭𑁯𑁨. 𑀅𑀢𑁆𑀢𑀢𑁆𑀣𑀸𑀤𑀻𑀦𑀁 𑀅𑀦𑀯𑀩𑀼𑀚𑁆𑀛𑀦𑀢𑁄 ‘‘𑀅𑀳𑀁, 𑀫𑀫𑀸’’𑀢𑀺 𑀕𑀳𑀡𑀲𑁆𑀲 𑀦𑀺𑀤𑁆𑀤𑁄𑀓𑁆𑀓𑀫𑀦𑀲𑀤𑀺𑀲𑀢𑀸. 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀕𑁆𑀕𑀳𑀡𑁂𑀦𑁂𑀯 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸𑀧𑀺 𑀕𑀳𑀺𑀢𑀸. 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀢𑀸𑀲𑀁 𑀲𑀁𑀲𑀸𑀭𑀢𑁄 𑀦𑀺𑀓𑁆𑀔𑀫𑀦𑀸𑀥𑀺𑀫𑀼𑀢𑁆𑀢𑀢𑀸𑀬 𑀦𑀺𑀓𑁆𑀔𑀫𑀦𑀫𑀕𑁆𑀕𑁄𑀮𑁄𑀓𑀦𑀲𑀤𑀺𑀲𑀢𑀸. 𑀫𑀕𑁆𑀕𑁂 𑀤𑀺𑀝𑁆𑀞𑁂 𑀫𑀕𑁆𑀕𑀧𑀝𑀺𑀧𑀢𑁆𑀢𑀺 𑀯𑀺𑀬 𑀅𑀦𑀼𑀮𑁄𑀫𑁂 𑀲𑀺𑀤𑁆𑀥𑁂 𑀫𑀕𑁆𑀕𑁄 𑀲𑀺𑀤𑁆𑀥𑁄 𑀏𑀯𑀸𑀢𑀺 𑀅𑀦𑀼𑀮𑁄𑀫𑀲𑁆𑀲 𑀫𑀕𑁆𑀕𑀤𑀲𑁆𑀲𑀦𑀲𑀤𑀺𑀲𑀢𑀸. 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀆𑀤𑀺𑀢𑁆𑀢𑀖𑀭𑀢𑁄 𑀦𑀺𑀓𑁆𑀔𑀫𑀦𑀁 𑀯𑀺𑀬 𑀕𑁄𑀢𑁆𑀭𑀪𑀼𑀜𑀸𑀡𑀁. 𑀯𑁂𑀕𑁂𑀦𑀕𑀫𑀦𑀁 𑀯𑀺𑀬 𑀫𑀕𑁆𑀕𑀜𑀸𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀧𑀤𑁂𑀲𑁂𑀲𑀼 𑀲𑀸𑀥𑀦𑀓𑀺𑀘𑁆𑀘𑀯𑀺𑀲𑁂𑀲𑀬𑁄𑀕𑀢𑁄.

𑁭𑁯𑁩. 𑀧𑀭𑀢𑁄 𑀦 𑀫𑀫𑀸𑀬𑀺𑀢𑀩𑁆𑀩𑀢𑁄 𑀘 𑀧𑀲𑁆𑀲𑀺𑀢𑀩𑁆𑀩𑀸𑀦𑀁 𑀔𑀦𑁆𑀥𑀸𑀦𑀁 ‘‘𑀅𑀳𑀁, 𑀫𑀫𑀸’’𑀢𑀺 𑀕𑀳𑀡𑀲𑁆𑀲 𑀭𑀸𑀚𑀕𑁄𑀡𑀸𑀦𑀁 𑀲𑀓𑀕𑀳𑀡𑀲𑀤𑀺𑀲𑀢𑀸 𑀯𑀼𑀢𑁆𑀢𑀸.

𑁭𑁯𑁪. 𑀲𑀪𑀬𑁂 𑀅𑀪𑀬𑀤𑀲𑁆𑀲𑀦𑀳𑁂𑀢𑀼𑀢𑀸𑀬 𑀔𑀦𑁆𑀥𑀸𑀦𑀁 ‘‘𑀅𑀳𑀁, 𑀫𑀫𑀸’’𑀢𑀺 𑀕𑀳𑀡𑀲𑁆𑀲 𑀬𑀓𑁆𑀔𑀺𑀦𑀺𑀬𑀸 𑀲𑀁𑀯𑀸𑀲𑀲𑀤𑀺𑀲𑀢𑀸. 𑀲𑀼𑀲𑀸𑀦𑀯𑀺𑀚𑀳𑀦𑀁 𑀯𑀺𑀬 𑀲𑀗𑁆𑀔𑀸𑀭𑀲𑀼𑀲𑀸𑀦𑀁 𑀯𑀺𑀚𑀳𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀁 𑀕𑁄𑀢𑁆𑀭𑀪𑀼.

𑁭𑁯𑁫. 𑀧𑀼𑀢𑁆𑀢𑀕𑀺𑀤𑁆𑀥𑀺𑀦𑀻𑀢𑀺 𑀧𑀼𑀢𑁆𑀢𑀯𑀘𑁆𑀙𑀮𑀸. 𑀑𑀢𑁆𑀢𑀧𑁆𑀧𑀫𑀸𑀦𑀸𑀢𑀺 𑀲𑀸𑀭𑀚𑁆𑀚𑀬𑀫𑀸𑀦𑀸. 𑀑𑀴𑀸𑀭𑀺𑀓𑀑𑀴𑀸𑀭𑀺𑀓𑀮𑁄𑀪𑀓𑁆𑀔𑀦𑁆𑀥𑀸𑀤𑀺𑀯𑀺𑀓𑁆𑀔𑀫𑁆𑀪𑀦𑁂𑀦 𑀲𑀗𑁆𑀔𑀸𑀭𑀧𑀭𑀺𑀘𑁆𑀘𑀚𑀦𑀢𑁄 𑀅𑀦𑀼𑀮𑁄𑀫𑀲𑁆𑀲 𑀢𑀢𑁆𑀣𑁂𑀯 𑀤𑀸𑀭𑀓𑁄𑀭𑁄𑀧𑀦𑀲𑀤𑀺𑀲𑀢𑀸.

𑁭𑁯𑁬. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸…𑀧𑁂… 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸, 𑀦 𑀧𑀼𑀭𑀺𑀫𑀸𑀲𑀼 𑀯𑀺𑀬 𑀪𑀬𑀢𑀼𑀧𑀝𑁆𑀞𑀸𑀦𑀸𑀤𑀻𑀲𑀼 𑀞𑀺𑀢𑀲𑁆𑀲 𑀪𑀸𑀬𑀦𑀸𑀤𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀢𑁄, 𑀘𑀺𑀭𑀸𑀦𑀼𑀩𑀦𑁆𑀥𑀢𑁄, 𑀤𑀼𑀲𑁆𑀲𑀳𑀢𑁄 𑀘 𑀯𑀝𑁆𑀝𑀤𑀼𑀓𑁆𑀔𑀲𑀤𑀺𑀲𑀁 𑀚𑀺𑀖𑀘𑁆𑀙𑀸𑀤𑀼𑀓𑁆𑀔𑀦𑁆𑀢𑀺 𑀆𑀳 ‘‘𑀲𑀁𑀲𑀸𑀭𑀯𑀝𑁆𑀝𑀚𑀺𑀖𑀘𑁆𑀙𑀸𑀬𑀸’’𑀢𑀺. 𑀓𑀸𑀬𑀕𑀢𑀸𑀲𑀢𑀺 𑀏𑀯 𑀪𑁄𑀚𑀦𑀁 𑀓𑀸𑀬𑀕𑀢𑀸𑀲𑀢𑀺𑀪𑁄𑀚𑀦𑀁. 𑀲𑀸 𑀧𑀦𑁂𑀢𑁆𑀣 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑁆𑀫𑀸𑀲𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀅𑀫𑀢𑀭𑀲𑀧𑀭𑀺𑀪𑁄𑀕𑀢𑀸𑀬 𑀘 ‘‘𑀅𑀫𑀢𑀭𑀲𑀁 𑀓𑀸𑀬𑀕𑀢𑀸𑀲𑀢𑀺𑀪𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀫𑀢𑀁 𑀢𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀬𑁂 𑀓𑀸𑀬𑀕𑀢𑀸𑀲𑀢𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁧.𑁬𑁦𑁦).

𑀨𑀮𑀭𑀲𑀸𑀫𑀮𑀓𑀲𑀺𑀗𑁆𑀕𑀻𑀯𑁂𑀭𑀫𑀼𑀕𑁆𑀕𑀫𑀸𑀲𑀸𑀤𑀺 𑀅𑀦𑁂𑀓𑀗𑁆𑀕𑀲𑀫𑁆𑀪𑀸𑀭𑀁.

𑀓𑀧𑀡𑀸𑀲𑁂𑀭𑀺𑀪𑀸𑀯𑀸𑀤𑀺𑀓𑀭𑀡𑁂𑀦 𑀢𑀡𑁆𑀳𑀸𑀲𑀺𑀦𑁂𑀳𑀲𑁆𑀲 𑀲𑀻𑀢𑀲𑀤𑀺𑀲𑀢𑀸. 𑀫𑀕𑁆𑀕𑀢𑁂𑀚𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀇𑀦𑁆𑀤𑀕𑁆𑀕𑀺𑀁.

𑀭𑀸𑀕𑀕𑁆𑀕𑀺𑀆𑀤𑀬𑁄 𑀏𑀓𑀸𑀤𑀲𑀕𑁆𑀕𑀻 𑀯𑀽𑀧𑀲𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀏𑀓𑀸𑀤𑀲𑀕𑁆𑀕𑀺𑀯𑀽𑀧𑀲𑀫𑀁, 𑀦𑀺𑀩𑁆𑀩𑀸𑀦𑀁.

𑀅𑀦𑁆𑀥𑀓𑀸𑀭𑀧𑀭𑁂𑀢𑁄𑀢𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀅𑀦𑁆𑀥𑀓𑀸𑀭𑁂𑀦 𑀓𑀺𑀜𑁆𑀘𑀺 𑀅𑀢𑁆𑀢𑀢𑁆𑀣𑀁 𑀯𑀸 𑀧𑀭𑀢𑁆𑀣𑀁 𑀯𑀸 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀅𑀪𑀺𑀪𑀽𑀢𑁄. 𑀜𑀸𑀡𑀫𑀬𑁄 𑀆𑀮𑁄𑀓𑁄 𑀏𑀢𑀺𑀲𑁆𑀲𑀸𑀢𑀺 𑀜𑀸𑀡𑀸𑀮𑁄𑀓𑀸, 𑀫𑀕𑁆𑀕𑀪𑀸𑀯𑀦𑀸.

𑀅𑀫𑀢𑀪𑀽𑀢𑀁, 𑀅𑀫𑀢𑀪𑀸𑀯𑀲𑀸𑀥𑀓𑀁 𑀯𑀸 𑀑𑀲𑀥𑀁 𑀅𑀫𑀢𑁄𑀲𑀥𑀁, 𑀦𑀺𑀩𑁆𑀩𑀸𑀦𑀁. 𑀳𑁂𑀝𑁆𑀞𑀸 𑀅𑀢𑁆𑀢𑀦𑀸 𑀯𑀼𑀢𑁆𑀢𑀫𑁂𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀩𑁆𑀬𑀸𑀧𑀸𑀭𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀦 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑁭𑁯𑁭. 𑀦𑀺𑀭𑀸𑀮𑀬𑀢𑀸𑀬 𑀢𑀡𑁆𑀳𑀸𑀯𑀲𑁂𑀦 𑀪𑀯𑀸𑀤𑀻𑀲𑀼 𑀅𑀯𑀺𑀲𑀝𑀚𑁆𑀛𑀸𑀲𑀬𑁄 𑀳𑀼𑀢𑁆𑀯𑀸 𑀢𑀢𑁄 𑀲𑀗𑁆𑀓𑀼𑀘𑀺𑀢𑀘𑀺𑀢𑁆𑀢𑁄 𑀧𑀢𑀺𑀮𑀻𑀦𑀪𑀸𑀯𑁂𑀦 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀢𑀺𑀮𑀻𑀦𑀘𑀭𑁄, 𑀢𑀲𑁆𑀲 𑀧𑀢𑀺𑀮𑀻𑀦𑀘𑀭𑀲𑁆𑀲. 𑀲𑀁𑀲𑀸𑀭𑁂 𑀪𑀬𑀲𑁆𑀲 𑀇𑀓𑁆𑀔𑀦𑀢𑀸𑀬 𑀪𑀺𑀓𑁆𑀔𑀼𑀦𑁄 𑀓𑀸𑀬𑀘𑀺𑀢𑁆𑀢𑀯𑀺𑀯𑁂𑀓𑀲𑀺𑀤𑁆𑀥𑀺𑀬𑀸 𑀯𑀺𑀯𑀺𑀢𑁆𑀢𑀫𑀸𑀲𑀦𑀁 𑀪𑀚𑀫𑀸𑀦𑀲𑁆𑀲. 𑀲𑀸𑀫𑀕𑁆𑀕𑀺𑀬𑀦𑁆𑀢𑀺 𑀬𑀼𑀢𑁆𑀢𑀁, 𑀧𑀢𑀺𑀭𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀦𑁂𑀢𑀺 𑀓𑀸𑀫𑀪𑀯𑀸𑀤𑀺𑀓𑁂 𑀢𑀺𑀯𑀺𑀥𑁂𑀧𑀺 𑀪𑀯𑁂. 𑀲𑁄 𑀳𑀺 𑀇𑀥 𑀪𑀯𑀦𑀝𑁆𑀞𑁂𑀦 𑀪𑀯𑀦𑁆𑀢𑀺 𑀯𑀼𑀢𑁆𑀢𑁄. 𑀦 𑀤𑀲𑁆𑀲𑀬𑁂𑀢𑀺 𑀅𑀦𑀼𑀧𑁆𑀧𑀚𑁆𑀚𑀦𑀯𑀲𑁂𑀦 𑀦 𑀤𑀲𑁆𑀲𑁂𑀬𑁆𑀬. 𑀢𑀲𑁆𑀲 𑀢𑀁 𑀅𑀤𑀲𑁆𑀲𑀦𑀁 𑀲𑀸𑀫𑀕𑁆𑀕𑀺𑀬𑀦𑁆𑀢𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀆𑀳𑀽𑀢𑀺 𑀬𑁄𑀚𑀦𑀸.

𑀦𑀺𑀬𑀫𑁂𑀢𑁆𑀯𑀸𑀢𑀺 𑀦𑀺𑀬𑀢𑀁 𑀏𑀓𑀁𑀲𑀺𑀓𑀁 𑀓𑀢𑁆𑀯𑀸. 𑀩𑁄𑀚𑁆𑀛𑀗𑁆𑀕𑀯𑀺𑀲𑁂𑀲𑀁, 𑀫𑀕𑁆𑀕𑀗𑁆𑀕𑀯𑀺𑀲𑁂𑀲𑀁, 𑀛𑀸𑀦𑀗𑁆𑀕𑀯𑀺𑀲𑁂𑀲𑀁, 𑀧𑀝𑀺𑀧𑀤𑀸𑀯𑀺𑀲𑁂𑀲𑀁, 𑀯𑀺𑀫𑁄𑀓𑁆𑀔𑀯𑀺𑀲𑁂𑀲𑀦𑁆𑀢𑀺 𑀯𑀺𑀲𑁂𑀲𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀯𑀺𑀲𑁂𑀲𑀦𑁆𑀢𑀺 𑀙𑀲𑀢𑁆𑀢𑀪𑀸𑀯𑁄 𑀲𑀢𑁆𑀢𑀝𑁆𑀞𑀪𑀸𑀯𑁄 𑀧𑀜𑁆𑀘𑀸𑀤𑀺𑀪𑀸𑀯𑁄𑀢𑀺 𑀇𑀫𑀁 𑀬𑀣𑀸𑀓𑁆𑀓𑀫𑀁 𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀅𑀭𑀺𑀬𑀫𑀕𑁆𑀕𑁂 𑀮𑀩𑁆𑀪𑀫𑀸𑀦𑀪𑁂𑀤𑀁. 𑀧𑀸𑀤𑀓𑀚𑁆𑀛𑀸𑀦𑀦𑁆𑀢𑀺 𑀫𑀕𑁆𑀕𑀲𑁆𑀲 𑀆𑀲𑀦𑁆𑀦𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀁 𑀛𑀸𑀦𑀁. 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸𑀢𑀺 𑀫𑀕𑁆𑀕𑀸𑀲𑀦𑁆𑀦𑀸𑀬 𑀏𑀯 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀕𑁄𑀘𑀭𑀪𑀽𑀢𑀸 𑀯𑀺𑀧𑀲𑁆𑀲𑀺𑀢𑀸. 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄𑀢𑀺 𑀉𑀪𑀺𑀦𑁆𑀦𑀁 𑀪𑁂𑀤𑁂 𑀲𑀢𑀺 𑀯𑀺𑀧𑀲𑁆𑀲𑀓𑀲𑁆𑀲 𑀅𑀚𑁆𑀛𑀸𑀲𑀬𑁄. 𑀏𑀢𑁆𑀣 𑀘 𑀧𑀞𑀫𑀁 𑀓𑁂𑀘𑀻𑀢𑀺 𑀯𑀼𑀢𑁆𑀢𑁄 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄. 𑀤𑀼𑀢𑀺𑀬𑀁 𑀓𑁂𑀘𑀻𑀢𑀺 𑀯𑀼𑀢𑁆𑀢𑁄 𑀫𑁄𑀭𑀯𑀸𑀧𑀻𑀯𑀸𑀲𑀺𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑁄. 𑀢𑀢𑀺𑀬𑀁 𑀓𑁂𑀘𑀻𑀢𑀺 𑀯𑀼𑀢𑁆𑀢𑁄 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄.