𑁨𑁦. 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀲𑀫𑁆𑀫𑀲𑀦𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁬𑁯𑁨. 𑀏𑀯𑀁 𑀫𑀕𑁆𑀕𑀜𑁆𑀘 𑀅𑀫𑀕𑁆𑀕𑀜𑁆𑀘 𑀜𑀢𑁆𑀯𑀸 𑀞𑀺𑀢𑀁 𑀜𑀸𑀡𑀦𑁆𑀢𑀺 𑀅𑀬𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀸 𑀯𑀻𑀣𑀺𑀧𑀝𑀺𑀧𑀦𑁆𑀦𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄, 𑀅𑀬𑀁 𑀑𑀪𑀸𑀲𑀸𑀤𑀺𑀪𑁂𑀤𑁄 𑀤𑀲𑀯𑀺𑀥𑁄 𑀉𑀧𑀓𑁆𑀓𑀺𑀮𑁂𑀲𑁄 𑀦 𑀫𑀕𑁆𑀕𑁄𑀢𑀺 𑀏𑀯𑀁 𑀫𑀕𑁆𑀕𑀜𑁆𑀘 𑀅𑀫𑀕𑁆𑀕𑀜𑁆𑀘 𑀬𑀸𑀣𑀸𑀯𑀢𑁄 𑀯𑀯𑀢𑁆𑀣𑀧𑁂𑀢𑁆𑀯𑀸 𑀞𑀺𑀢𑀁 𑀜𑀸𑀡𑀁.

𑀅𑀢𑀻𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀥𑀫𑁆𑀫𑁂 𑀓𑀮𑀸𑀧𑀢𑁄 𑀲𑀗𑁆𑀔𑀺𑀧𑀺𑀢𑁆𑀯𑀸 𑀲𑀫𑁆𑀫𑀲𑀦𑀁 𑀓𑀮𑀸𑀧𑀲𑀫𑁆𑀫𑀲𑀦𑀁, 𑀅𑀬𑀁 𑀓𑀺𑀭 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀅𑀪𑀺𑀮𑀸𑀧𑁄. ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁬𑁧; 𑁨.𑁧𑁧𑁩; 𑁩.𑁮𑁬; 𑀅. 𑀦𑀺. 𑁪.𑁧𑁮𑁧) 𑀦𑀬𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀯𑀺𑀧𑀲𑁆𑀲𑀦𑀸 𑀦𑀬𑀯𑀺𑀧𑀲𑁆𑀲𑀦𑀸, 𑀅𑀬𑀁 𑀓𑀺𑀭 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀻𑀦𑀁 𑀅𑀪𑀺𑀮𑀸𑀧𑁄. 𑀢𑁂𑀦𑁂𑀯𑀸𑀳 ‘‘𑀓𑀮𑀸𑀧𑀲𑀫𑁆𑀫𑀲𑀦𑀲𑀗𑁆𑀔𑀸𑀢𑀸𑀬 𑀦𑀬𑀯𑀺𑀧𑀲𑁆𑀲𑀦𑀸𑀬𑀸’’𑀢𑀺. 𑀢𑀸𑀯-𑀲𑀤𑁆𑀤𑁄 𑀓𑀫𑀢𑁆𑀣𑁄, 𑀢𑁂𑀦 𑀲𑀫𑁆𑀫𑀲𑀦𑀧𑁆𑀧𑀓𑀸𑀭𑀸𑀦𑀁 𑀩𑀳𑀼𑀪𑁂𑀤𑀢𑀁 𑀤𑀻𑀧𑁂𑀢𑀺. 𑀩𑀳𑀼𑀪𑀸𑀯𑀢𑁄 𑀳𑀺 𑀢𑁂𑀲𑀁 𑀧𑀞𑀫𑀁 𑀦𑀬𑀯𑀺𑀧𑀲𑁆𑀲𑀦𑀸𑀬 𑀬𑁄𑀕𑀸𑀭𑀫𑁆𑀪𑀁 𑀅𑀦𑀼𑀲𑀸𑀲𑀢𑀺 ‘‘𑀦𑀬𑀯𑀺𑀧𑀲𑁆𑀲𑀦𑀸𑀬 𑀢𑀸𑀯 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺. 𑀓𑀲𑁆𑀫𑀸𑀢𑀺 𑀘𑁄𑀤𑀓𑀯𑀘𑀦𑀁. 𑀢𑀲𑁆𑀲𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀅𑀣 𑀓𑀲𑁆𑀫𑀸 ‘‘𑀦𑀬𑀯𑀺𑀧𑀲𑁆𑀲𑀦𑀸𑀬 𑀆𑀤𑀺𑀢𑁄 𑀬𑁄𑀕𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀇𑀢𑀭𑁄 𑀢𑀲𑁆𑀲𑀸𑀬𑀁 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀯𑀺𑀧𑀲𑁆𑀲𑀦𑀸𑀬 𑀲𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀼𑀧𑁆𑀧𑀸𑀤𑁄, 𑀉𑀤𑀬𑀩𑁆𑀩𑀬𑀜𑀸𑀡𑁂 𑀲𑀢𑀺 𑀑𑀪𑀸𑀲𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀲𑀫𑁆𑀪𑀯𑁄, 𑀢𑀢𑁄 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑀁, 𑀢𑀲𑁆𑀫𑀸 𑀢𑀲𑁆𑀲 𑀆𑀤𑀺𑀢𑁄𑀯 𑀆𑀭𑀫𑁆𑀪𑀲𑁆𑀲 𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 𑀯𑀺𑀧𑀲𑁆𑀲𑀦𑀸 𑀧𑀞𑀫𑀁 𑀆𑀭𑀤𑁆𑀥𑀩𑁆𑀩𑀸’’𑀢𑀺. 𑀏𑀯𑀫𑁆𑀧𑀺 𑀧𑀞𑀫𑀁 𑀦𑀬𑀯𑀺𑀧𑀲𑁆𑀲𑀦𑀸𑀯 𑀓𑀲𑁆𑀫𑀸 𑀆𑀭𑀤𑁆𑀥𑀩𑁆𑀩𑀸𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀬 𑀘 𑀓𑀮𑀸𑀧𑀲𑀫𑁆𑀫𑀲𑀦𑀁 𑀆𑀤𑀻’’𑀢𑀺. 𑀢𑀜𑁆𑀳𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀲𑀼𑀓𑀭𑀁 𑀲𑀫𑁆𑀫𑀲𑀦𑀦𑁆𑀢𑀺 𑀆𑀤𑀺𑀪𑀽𑀢𑀁.

𑀢𑀲𑁆𑀫𑀸𑀢𑀺 𑀆𑀤𑀺𑀪𑀽𑀢𑀢𑁆𑀢𑀸. 𑀅𑀣 𑀯𑀸 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲…𑀧𑁂… 𑀓𑀮𑀸𑀧𑀲𑀫𑁆𑀫𑀲𑀦𑀁 𑀆𑀤𑀺, 𑀢𑀲𑁆𑀫𑀸. 𑀏𑀢𑀦𑁆𑀢𑀺 𑀓𑀮𑀸𑀧𑀲𑀫𑁆𑀫𑀲𑀦𑀁. 𑀅𑀧𑀺𑀘𑀸𑀢𑀺𑀆𑀤𑀺 𑀓𑀮𑀸𑀧𑀲𑀫𑁆𑀫𑀲𑀦𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀸𑀬 𑀆𑀤𑀺𑀪𑀸𑀯𑁂 𑀉𑀧𑀘𑀬𑀳𑁂𑀢𑀼𑀤𑀲𑁆𑀲𑀦𑀁. 𑀉𑀤𑀬𑀩𑁆𑀩𑀬𑀜𑀸𑀡𑀧𑀭𑀺𑀬𑁄𑀲𑀸𑀦𑀸 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀅𑀲𑀫𑁆𑀧𑀢𑁆𑀢𑁂 𑀏𑀯 𑀘 𑀉𑀤𑀬𑀩𑁆𑀩𑀬𑀜𑀸𑀡𑁂 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀯𑀢𑁆𑀢𑀫𑀸𑀦𑀸𑀬𑀸’’𑀢𑀺. 𑀓𑀮𑀸𑀧𑀲𑀫𑁆𑀫𑀲𑀦𑁂 𑀢𑀸𑀯 𑀬𑁄𑀕𑁄 𑀓𑀸𑀢𑀩𑁆𑀩𑁄𑀢𑀺 𑀏𑀢𑁆𑀣𑀸𑀧𑀺 𑀢𑀲𑁆𑀲𑁂𑀯 𑀧𑀞𑀫𑀸𑀭𑀫𑁆𑀪𑁂 𑀓𑀸𑀭𑀡𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀓𑀮𑀸𑀧𑀲𑀫𑁆𑀫𑀲𑀦𑀁 𑀦𑀸𑀫 𑀏𑀓𑀯𑀺𑀲𑀼𑀤𑁆𑀥𑀺𑀬𑀫𑁆𑀧𑀺 𑀦 𑀅𑀦𑁆𑀢𑁄𑀕𑀥𑀁, 𑀏𑀓𑀘𑁆𑀘𑁂 𑀘 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸𑀯 𑀯𑀺𑀧𑀲𑁆𑀲𑀦𑀸𑀘𑀸𑀭𑀁 𑀯𑀡𑁆𑀡𑁂𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀲𑀼𑀢𑁆𑀢𑀦𑁆𑀢𑁂𑀲𑀼 𑀏𑀓𑀤𑁂𑀲𑁂𑀦, 𑀅𑀦𑀯𑀲𑁂𑀲𑀢𑁄 𑀘 𑀤𑀲𑁆𑀲𑀺𑀢𑀁. 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀫𑀦𑀲𑀺𑀓𑀸𑀭𑀲𑀼𑀓𑀭𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀤𑀺𑀪𑀸𑀯𑁂𑀦 𑀞𑀧𑀺𑀢𑀁. 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀘 𑀑𑀪𑀸𑀲𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀲𑀫𑁆𑀪𑀯𑁄, 𑀢𑀲𑁆𑀫𑀸 ‘‘𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀬𑀁 𑀯𑀺𑀘𑀸𑀭𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁬𑁯𑁩. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀜𑀸𑀢𑀧𑀭𑀺𑀜𑁆𑀜𑀸𑀦𑀦𑁆𑀢𑀭𑀪𑀸𑀯𑁂, 𑀢𑀸𑀲𑀼 𑀯𑀸 𑀧𑀭𑀺𑀜𑁆𑀜𑀸𑀲𑀼. 𑀯𑀺𑀦𑀺𑀘𑁆𑀙𑀬𑁄𑀢𑀺 𑀲𑀭𑀽𑀧𑀢𑁄, 𑀓𑀺𑀘𑁆𑀘𑀢𑁄, 𑀪𑀽𑀫𑀺𑀢𑁄 𑀘 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀮𑁄𑀓𑀼𑀢𑁆𑀢𑀭𑀸𑀧𑀺 𑀧𑀼𑀭𑀺𑀫𑀲𑁆𑀫𑀺𑀁 𑀲𑀘𑁆𑀘𑀤𑁆𑀯𑀬𑁂 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀢𑀺𑀯𑀺𑀥𑀸𑀧𑀺 𑀧𑀭𑀺𑀜𑁆𑀜𑀸 𑀓𑀺𑀘𑁆𑀘𑀯𑀲𑁂𑀦 𑀮𑀩𑁆𑀪𑀢𑀻𑀢𑀺 ‘‘𑀮𑁄𑀓𑀺𑀬𑀧𑀭𑀺𑀜𑁆𑀜𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀪𑀸𑀯𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀢𑁄 𑀜𑁂𑀬𑁆𑀬𑀅𑀪𑀺𑀫𑀼𑀔𑀸 𑀧𑀜𑁆𑀜𑀸 𑀅𑀪𑀺𑀜𑁆𑀜𑀸𑀧𑀜𑁆𑀜𑀸. 𑀜𑀸𑀢𑀝𑁆𑀞𑁂𑀢𑀺 𑀜𑀸𑀢𑀪𑀸𑀯𑀦𑀺𑀫𑀺𑀢𑁆𑀢𑀁. 𑀅𑀪𑀺𑀜𑁆𑀜𑁂𑀬𑁆𑀬𑀲𑁆𑀲 𑀚𑀸𑀦𑀦𑀳𑁂𑀢𑀼 ‘‘𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀜𑁆𑀜𑀸𑀧𑀜𑁆𑀜𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀺 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑀧𑀜𑁆𑀜𑀸. 𑀢𑀻𑀭𑀡𑀝𑁆𑀞𑁂𑀢𑀺 𑀲𑀫𑁆𑀫𑀲𑀦𑀪𑀸𑀯𑀳𑁂𑀢𑀼. 𑀧𑀳𑀸𑀦𑀧𑀜𑁆𑀜𑀸𑀢𑀺 𑀧𑀳𑀸𑀢𑀩𑁆𑀩𑀲𑁆𑀲 𑀧𑀚𑀳𑀦𑀧𑀜𑁆𑀜𑀸. 𑀯𑁂𑀤𑀬𑀺𑀢𑀸𑀤𑀺𑀮𑀓𑁆𑀔𑀡𑀯𑀺𑀥𑀼𑀭𑀢𑀸𑀬 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀢𑁂𑀲𑀁𑀬𑁂𑀯 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀕𑀳𑀺𑀢𑀥𑀫𑁆𑀫𑀸𑀦𑀁𑀬𑁂𑀯. 𑀬𑀣𑀸 𑀧𑀣𑀯𑀻𑀨𑀲𑁆𑀲𑀸𑀤𑀻𑀦𑀁 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀮𑀓𑁆𑀔𑀡𑀸𑀦𑀺 𑀢𑀻𑀲𑀼𑀧𑀺 𑀔𑀡𑁂𑀲𑀼 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑀸𑀦𑀺 𑀧𑀝𑀺𑀦𑀺𑀬𑀢𑀭𑀽𑀧𑀢𑀸𑀬 𑀲𑀪𑀸𑀯𑀲𑀺𑀤𑁆𑀥𑀸𑀦𑁂𑀯 𑀳𑀼𑀢𑁆𑀯𑀸 𑀕𑀬𑁆𑀳𑀦𑁆𑀢𑀺, 𑀦 𑀏𑀯𑀫𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀸𑀦𑀺. 𑀢𑀸𑀦𑀺 𑀧𑀦 𑀪𑀗𑁆𑀕𑀼𑀤𑀬𑀩𑁆𑀩𑀬𑀧𑀻𑀴𑀸𑀯𑀲𑀯𑀢𑁆𑀢𑀦𑀸𑀓𑀸𑀭𑀫𑀼𑀔𑁂𑀦 𑀕𑀳𑁂𑀢𑀩𑁆𑀩𑀢𑁄 𑀲𑀫𑀸𑀭𑁄𑀧𑀺𑀢𑀭𑀽𑀧𑀸𑀦𑀺 𑀯𑀺𑀬 𑀕𑀬𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺. 𑀮𑁄𑀓𑀺𑀬𑀧𑀭𑀺𑀜𑁆𑀜𑀸𑀦𑀁𑀬𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀯 ‘‘𑀧𑀳𑀸𑀦𑀧𑀭𑀺𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸.

𑀲𑀗𑁆𑀔𑀸𑀭𑀧𑀝𑀺𑀘𑁆𑀙𑁂𑀤𑀢𑁄𑀢𑀺 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀢𑁄, 𑀬𑀸 ‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀢𑁆𑀢𑀸. 𑀓𑁂𑀘𑀺 𑀧𑀦 ‘‘𑀔𑀦𑁆𑀥𑀸𑀤𑀻𑀦𑀁 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺𑀪𑀸𑀯𑀢𑁄 𑀲𑀩𑁆𑀩𑁄𑀧𑀺 𑀔𑀦𑁆𑀥𑀸𑀤𑀺𑀯𑀺𑀘𑀸𑀭𑁄 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀯𑀤𑀦𑁆𑀢𑀺. ‘‘𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲𑁂𑀯 𑀆𑀥𑀺𑀧𑀘𑁆𑀘’’𑀦𑁆𑀢𑀺 𑀇𑀫𑀺𑀦𑀸 𑀦𑀸𑀫𑀭𑀽𑀧𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀧𑀜𑁆𑀜𑀸𑀦𑀁 𑀢𑀻𑀭𑀡𑀧𑀳𑀸𑀦𑀸𑀲𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀢𑀸𑀲𑀫𑁆𑀧𑀺 𑀧𑀦 ‘‘𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁, 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧’’𑀦𑁆𑀢𑀺 𑀅𑀭𑀽𑀧𑀭𑀽𑀧𑀸𑀦𑀁 𑀲𑀸𑀥𑀸𑀭𑀡𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀏𑀓𑁂𑀦𑀸𑀓𑀸𑀭𑁂𑀦 𑀢𑀻𑀭𑀡𑀧𑀭𑀺𑀬𑀸𑀬𑁄, 𑀤𑀺𑀝𑁆𑀞𑀺𑀓𑀗𑁆𑀔𑀸𑀯𑀺𑀓𑁆𑀔𑀫𑁆𑀪𑀦𑁂𑀦 𑀧𑀳𑀸𑀦𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀲𑀺𑀬𑀸 𑀢𑀻𑀭𑀡𑀧𑀳𑀸𑀦𑁂𑀲𑀼𑀧𑀺 𑀆𑀥𑀺𑀧𑀘𑁆𑀘𑀦𑁆𑀢𑀺 𑀯𑀤𑀦𑁆𑀢𑀺. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀧𑀦 𑀬𑀣𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀸𑀯 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑀢𑀸, 𑀏𑀯𑀁 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀏𑀯 𑀢𑀻𑀭𑀡𑀧𑀳𑀸𑀦𑀓𑀺𑀘𑁆𑀘𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀳𑀺 𑀢𑀺𑀲𑁆𑀲𑁄𑀧𑀺 𑀧𑀭𑀺𑀜𑁆𑀜𑀸 𑀯𑀯𑀢𑁆𑀣𑀺𑀢𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀣𑀸 𑀲𑀗𑁆𑀓𑀸𑀭𑁄 𑀲𑀺𑀬𑀸. 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀪𑀽𑀫𑀺 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀲𑀦𑁆𑀢𑀻𑀭𑀡𑀢𑁄. 𑀢𑁂𑀦𑀸𑀳 ‘‘𑀏𑀢𑀲𑁆𑀫𑀺𑀁…𑀧𑁂… 𑀆𑀥𑀺𑀧𑀘𑁆𑀘’’𑀦𑁆𑀢𑀺. 𑀓𑀸𑀫𑀁 𑀉𑀤𑀬𑀩𑁆𑀩𑀬𑀜𑀸𑀡𑀫𑁆𑀧𑀺 𑀓𑀜𑁆𑀘𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺, 𑀢𑀲𑁆𑀲 𑀧𑀦 𑀅𑀣𑀸𑀫𑀕𑀢𑀢𑁆𑀢𑀸 𑀦 𑀲𑀸𑀢𑀺𑀲𑀬𑀁 𑀧𑀳𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀉𑀧𑀭𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀪𑀽𑀫𑀻’’𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄𑀢𑀺 𑀅𑀦𑀺𑀘𑁆𑀘𑀸𑀓𑀸𑀭𑀢𑁄 𑀲𑀗𑁆𑀔𑀸𑀭𑁂 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀲𑀦𑁆𑀢𑁄. 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 ‘‘𑀢𑁂 𑀦𑀺𑀘𑁆𑀘𑀸 𑀲𑀲𑁆𑀲𑀢𑀸’’𑀢𑀺 𑀧𑀯𑀢𑁆𑀢𑀁 𑀫𑀺𑀘𑁆𑀙𑀸𑀲𑀜𑁆𑀜𑀁. 𑀲𑀜𑁆𑀜𑀸𑀲𑀻𑀲𑁂𑀦 𑀤𑀺𑀝𑁆𑀞𑀺𑀘𑀺𑀢𑁆𑀢𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀲𑁂𑀯 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀲𑀫𑁆𑀪𑀽𑀢𑀸𑀬 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀲𑀗𑁆𑀔𑀸𑀭𑁂 𑀦𑀺𑀩𑁆𑀩𑀺𑀚𑁆𑀚𑀦𑀯𑀲𑁂𑀦 𑀧𑀲𑁆𑀲𑀦𑁆𑀢𑁄. 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀁. 𑀯𑀺𑀭𑀚𑁆𑀚𑀦𑁆𑀢𑁄𑀢𑀺 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀭𑀚𑁆𑀚𑀦𑀯𑀲𑁂𑀦 𑀬𑀣𑀸 𑀲𑀗𑁆𑀔𑀸𑀭𑁂𑀲𑀼 𑀭𑀸𑀕𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀢𑀣𑀸𑀪𑀽𑀢𑁄 𑀳𑀺 𑀭𑀸𑀕𑀁 𑀧𑀚𑀳𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑁄𑀥𑁂𑀦𑁆𑀢𑁄𑀢𑀺 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀬𑀣𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯, 𑀦 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀢𑀣𑀸𑀪𑀽𑀢𑁄 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑀁 𑀧𑀚𑀳𑀢𑀺 𑀦𑀸𑀫 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀢𑁄. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄𑀢𑀺 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀬𑀣𑀸 𑀲𑀗𑁆𑀔𑀸𑀭𑀸 𑀦 𑀧𑀼𑀦 𑀆𑀤𑀺𑀬𑀦𑁆𑀢𑀺, 𑀏𑀯𑀁 𑀯𑁄𑀲𑁆𑀲𑀚𑁆𑀚𑀦𑁆𑀢𑁄. 𑀢𑁂𑀦𑀸𑀳 ‘‘𑀆𑀤𑀸𑀦𑀁 𑀧𑀚𑀳𑀢𑀻’’𑀢𑀺, 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀸 𑀕𑀳𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀥𑀺𑀢𑀢𑁆𑀢𑀸𑀢𑀺 𑀲𑀫𑁆𑀧𑀸𑀤𑀺𑀢𑀢𑁆𑀢𑀸. 𑀇𑀢𑀭𑀸𑀢𑀺 𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸. 𑀏𑀯𑀁 𑀧𑀭𑀺𑀜𑁆𑀜𑀸 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀧𑀭𑀺𑀜𑁆𑀜𑀸𑀓𑁆𑀓𑀫𑀯𑀲𑁂𑀦𑀧𑀺 𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀦𑁆𑀢𑀭𑀁 ‘‘𑀓𑀮𑀸𑀧𑀲𑀫𑁆𑀫𑀲𑀦𑁂 𑀬𑁄𑀕𑁄 𑀓𑀸𑀢𑀩𑁆𑀩𑁄’’𑀢𑀺 𑀬𑁆𑀯𑀸𑀬𑀫𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀁 𑀦𑀺𑀕𑀫𑀯𑀲𑁂𑀦 𑀧𑀘𑁆𑀘𑀸𑀳𑀭𑀦𑁆𑀢𑁄 ‘‘𑀢𑁂𑀦 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁬𑁯𑁪. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀓𑀮𑀸𑀧𑀲𑀫𑁆𑀫𑀲𑀦𑁂 𑀯𑀺𑀪𑀸𑀯𑁂𑀢𑀩𑁆𑀩𑁂, 𑀢𑀲𑁆𑀲 𑀯𑀸 𑀓𑀮𑀸𑀧𑀲𑀫𑁆𑀫𑀲𑀦𑀲𑁆𑀲 𑀆𑀤𑀺𑀪𑀸𑀯𑁂. 𑀅𑀬𑀁 𑀧𑀸𑀴𑀻𑀢𑀺 𑀤𑀲𑁆𑀲𑀺𑀬𑀫𑀸𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀫𑀸𑀳. 𑀢𑀢𑁆𑀣 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸𑀢𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂 𑀥𑀫𑁆𑀫𑁂 𑀏𑀓𑀢𑁄 𑀲𑀗𑁆𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁂 𑀲𑀸𑀥𑁂𑀢𑀩𑁆𑀩𑁂 𑀢𑀁𑀲𑀸𑀥𑀦𑀻𑀬𑀸 𑀧𑀜𑁆𑀜𑀸. 𑀲𑀫𑁆𑀫𑀲𑀦𑁂 𑀅𑀦𑀺𑀘𑁆𑀘𑀢𑀸𑀤𑀺𑀯𑀲𑁂𑀦 𑀢𑀻𑀭𑀡𑁂 𑀜𑀸𑀡𑀦𑁆𑀢𑀺 𑀧𑀯𑀼𑀘𑁆𑀘𑀢𑀺, 𑀲𑀸 𑀓𑀣𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀯𑀢𑁆𑀣𑀸𑀦𑁂 𑀲𑀫𑁆𑀫𑀲𑀦𑁂𑀢𑀺 𑀘 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀪𑀼𑀫𑁆𑀫𑀯𑀘𑀦𑀁. 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑀧𑁂𑀢𑀻𑀢𑀺𑀆𑀤𑀻𑀦𑀺 𑀧𑀦 𑀬𑀲𑁆𑀫𑀸 𑀧𑀭𑀢𑁄 𑀯𑀡𑁆𑀡𑀺𑀬𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣𑁂𑀯 𑀦𑁂𑀲𑀁 𑀅𑀢𑁆𑀣𑀁 𑀯𑀺𑀪𑀸𑀯𑀬𑀺𑀲𑁆𑀲𑀸𑀫.

𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀏𑀢𑁆𑀣 𑀳𑀺 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀯𑀺𑀧𑀲𑁆𑀲𑀦𑀸𑀫𑀦𑀲𑀺𑀓𑀸𑀭𑀲𑀼𑀔𑀢𑁆𑀣𑀁 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀫𑀁 𑀢𑀸𑀯 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀫𑀼𑀔𑁂𑀦 𑀕𑀳𑀺𑀢𑀸, 𑀢𑁂 𑀧𑀦 𑀔𑀦𑁆𑀥𑀸 𑀬𑀲𑁆𑀫𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑀯𑀲𑁂𑀦 𑀯𑀺𑀪𑀸𑀕𑀁 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀤𑁆𑀯𑀸𑀭𑀙𑀓𑁆𑀓𑀸𑀤𑀺𑀯𑀲𑁂𑀦 𑀤𑀲 𑀙𑀓𑁆𑀓𑀸 𑀕𑀳𑀺𑀢𑀸. 𑀬𑀲𑁆𑀫𑀸 𑀧𑀦 𑀮𑀓𑁆𑀔𑀡𑁂𑀲𑀼 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀼𑀓𑁆𑀔𑀯𑀺𑀪𑀸𑀕𑀁, 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀪𑀸𑀯𑀦𑀸𑀬 𑀙 𑀥𑀸𑀢𑀼𑀬𑁄 𑀕𑀳𑀺𑀢𑀸. 𑀢𑀢𑁄 𑀬𑁂𑀲𑀼 𑀓𑀲𑀺𑀡𑁂𑀲𑀼 𑀇𑀢𑁄 𑀩𑀸𑀳𑀺𑀭𑀓𑀸𑀦𑀁 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄, 𑀢𑀸𑀦𑀺 𑀇𑀫𑁂𑀲𑀁 𑀛𑀸𑀦𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢𑀸𑀦𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀤𑀲 𑀓𑀲𑀺𑀡𑀸𑀦𑀺 𑀕𑀳𑀺𑀢𑀸𑀦𑀺. 𑀢𑀢𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀧𑀭𑀺𑀯𑀸𑀭𑀪𑀸𑀯𑁂𑀦 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸 𑀕𑀳𑀺𑀢𑀸. 𑀧𑀼𑀩𑁆𑀩𑁂 𑀔𑀦𑁆𑀥𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀕𑀳𑀺𑀢𑀸 𑀥𑀫𑁆𑀫𑀸 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦, 𑀯𑀺𑀢𑁆𑀣𑀸𑀭𑀦𑀬𑁂𑀦 𑀘 𑀫𑀦𑀲𑀺 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀘 𑀕𑀳𑀺𑀢𑀸. 𑀢𑁂𑀲𑀼 𑀇𑀫𑁂 𑀥𑀫𑁆𑀫𑀸 𑀲𑀢𑀺𑀧𑀺 𑀲𑀼𑀜𑁆𑀜𑀦𑀺𑀭𑀻𑀳𑀅𑀩𑁆𑀬𑀸𑀧𑀸𑀭𑀪𑀸𑀯𑁂 𑀥𑀫𑁆𑀫𑀲𑀪𑀸𑀯𑀢𑁄 𑀆𑀥𑀺𑀧𑀘𑁆𑀘𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀢𑁆𑀢𑀮𑀓𑁆𑀔𑀡𑀯𑀺𑀪𑀸𑀯𑀦𑀢𑁆𑀣𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀕𑀳𑀺𑀢𑀸𑀦𑀺. 𑀏𑀯𑀁 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸𑀧𑀺𑀫𑁂 𑀥𑀫𑁆𑀫𑀸 𑀪𑀽𑀫𑀺𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀢𑀺𑀯𑀺𑀥𑀸𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀕𑀳𑀺𑀢𑀸.

𑀏𑀢𑁆𑀢𑀸𑀯𑀢𑀸 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀓𑀸𑀫𑀪𑀯𑀸𑀤𑀬𑁄 𑀦𑀯 𑀪𑀯𑀸 𑀕𑀳𑀺𑀢𑀸. 𑀏𑀢𑁆𑀢𑀓𑁂 𑀅𑀪𑀺𑀜𑁆𑀜𑁂𑀬𑁆𑀬𑀯𑀺𑀲𑁂𑀲𑁂 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑁂𑀦 𑀲𑀡𑁆𑀳𑀲𑀼𑀔𑀼𑀫𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑀫𑀳𑀕𑁆𑀕𑀢𑀥𑀫𑁆𑀫𑁂𑀲𑀼 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀛𑀸𑀦𑀧𑁆𑀧𑀫𑀜𑁆𑀜𑀸𑀭𑀼𑀧𑁆𑀧𑀸𑀦𑀺 𑀕𑀳𑀺𑀢𑀸𑀦𑀺. 𑀢𑀢𑁆𑀣 𑀛𑀸𑀦𑀸𑀦𑀺 𑀦𑀸𑀫 𑀯𑀼𑀢𑁆𑀢𑀸𑀯𑀲𑁂𑀲𑀸𑀭𑀫𑁆𑀫𑀡𑀸𑀦𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺. 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀪𑀸𑀕𑀢𑁄 𑀇𑀫𑁂 𑀥𑀫𑁆𑀫𑀸 𑀪𑀺𑀦𑁆𑀤𑀺𑀢𑁆𑀯𑀸 𑀫𑀦𑀲𑀺 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺 𑀕𑀳𑀺𑀢𑀸𑀦𑀺. 𑀧𑀘𑁆𑀘𑀬𑀸𑀓𑀸𑀭𑀫𑀦𑀲𑀺𑀓𑀸𑀭𑁄 𑀳𑀺 𑀮𑀓𑁆𑀔𑀡𑀢𑁆𑀢𑀬𑀁 𑀲𑀼𑀔𑁂𑀦, 𑀲𑀼𑀝𑁆𑀞𑀼𑀢𑀭𑀜𑁆𑀘 𑀯𑀺𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀧𑀘𑁆𑀙𑀢𑁄 𑀕𑀳𑀺𑀢𑁄. 𑀏𑀯𑀫𑁂𑀢𑁂 𑀲𑀫𑁆𑀫𑀲𑀦𑀻𑀬𑀪𑀸𑀯𑁂𑀦 𑀕𑀳𑀺𑀢𑀸 𑀔𑀦𑁆𑀥𑀸𑀤𑀺𑀯𑀲𑁂𑀦 𑀓𑁄𑀝𑁆𑀞𑀸𑀲𑀢𑁄 𑀧𑀜𑁆𑀘𑀯𑀻𑀲𑀢𑀺𑀯𑀺𑀥𑀸. 𑀧𑀪𑁂𑀤𑀢𑁄 𑀧𑀦 𑀅𑀢𑀻𑀢𑀸𑀤𑀺𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸𑀯 𑀕𑀬𑁆𑀳𑀫𑀸𑀦𑀸 𑀤𑁆𑀯𑀻𑀳𑀺 𑀊𑀦𑀸𑀦𑀺 𑀤𑁆𑀯𑁂𑀲𑀢𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀣 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑀧𑁂𑀢𑀻𑀢𑀺𑀆𑀤𑀺𑀓𑁄 𑀧𑀞𑀫𑁄 𑀮𑀓𑁆𑀔𑀡𑀯𑀯𑀢𑁆𑀣𑀸𑀧𑀦𑀯𑀸𑀭𑁄. 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺𑀆𑀤𑀺𑀓𑁄 𑀤𑀼𑀢𑀺𑀬𑁄 𑀳𑁂𑀢𑀼𑀯𑀸𑀭𑁄 𑀮𑀓𑁆𑀔𑀡𑀸𑀦𑀁 𑀳𑁂𑀢𑀼𑀓𑀺𑀢𑁆𑀢𑀦𑀢𑁄. 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀦𑁆𑀢𑀺𑀆𑀤𑀺𑀓𑁄 𑀧𑀦 𑀳𑁂𑀢𑀼𑀧𑀢𑀺𑀝𑁆𑀞𑀸𑀧𑀦𑀯𑀸𑀭𑁄 𑀧𑀸𑀓𑀝𑀪𑀸𑀯𑀲𑀮𑁆𑀮𑀓𑁆𑀔𑀡𑀢𑁄. 𑀔𑀬𑀝𑁆𑀞𑁂𑀦𑀸𑀢𑀺 𑀳𑀺 𑀔𑀬𑀲𑀪𑀸𑀯𑀢𑁄 𑀬𑀲𑁆𑀫𑀸 𑀭𑀽𑀧𑀁 𑀔𑀬𑀲𑀪𑀸𑀯𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀔𑀬𑀁 𑀯𑀬𑀁 𑀪𑁂𑀤𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀪𑀬𑀝𑁆𑀞𑁂𑀦𑀸𑀢𑀺 𑀪𑀸𑀬𑀺𑀢𑀩𑁆𑀩𑀪𑀸𑀯𑀢𑁄 𑀬𑀲𑁆𑀫𑀸 𑀭𑀽𑀧𑀁 𑀧𑀪𑀗𑁆𑀕𑀼𑀭𑀢𑀸𑀬 𑀪𑀬𑀸𑀦𑀓𑀁, 𑀢𑀲𑁆𑀫𑀸 𑀤𑀼𑀓𑁆𑀔𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩𑁦.𑁧𑁫, 𑁪𑁫, 𑁪𑁬, 𑁭𑁬, 𑁮𑁫; 𑁨.𑁪.𑁧𑁪; 𑀧𑀝𑀺. 𑀫. 𑁨.𑁧𑁦). 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀅𑀲𑀸𑀭𑀓𑀪𑀸𑀯𑀢𑁄, 𑀅𑀢𑁆𑀢𑀲𑀸𑀭𑀯𑀺𑀭𑀳𑀢𑁄𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀯𑀸𑀭𑁂 𑀧𑀦 ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀳𑁂𑀢𑀼𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀲𑀗𑁆𑀔𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀁, 𑀅𑀦𑀼𑀭𑀽𑀧𑁂 𑀘 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘, 𑀦 𑀯𑀺𑀦𑀸 𑀢𑁂𑀳𑀺 𑀲𑀫𑀁, 𑀲𑀫𑁆𑀫𑀸 𑀘 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀸 𑀔𑀬𑀯𑀬𑀯𑀺𑀭𑀸𑀕𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺. 𑀦 𑀳𑀺 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀁 𑀅𑀦𑀺𑀭𑀼𑀚𑁆𑀛𑀦𑀓𑀁 𑀦𑀸𑀫 𑀅𑀢𑁆𑀣𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀁 𑀢𑀁 𑀭𑀽𑀧𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀯𑀢 𑀫𑀸 𑀧𑀮𑀼𑀚𑁆𑀚𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁫.𑁩𑁭𑁯). 𑀏𑀢𑁂𑀦 𑀅𑀦𑀺𑀘𑁆𑀘𑀸 𑀧𑀣𑀯𑀻𑀥𑀸𑀢𑀼 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀢𑀤𑀜𑁆𑀜𑀁 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀁 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑁂𑀲𑀥𑀫𑁆𑀫𑁂𑀲𑀼𑀧𑀺.

𑀇𑀤𑀸𑀦𑀺 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀚𑀸𑀢𑀺𑀧𑀘𑁆𑀘𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀮𑀓𑁆𑀔𑀡𑀲𑁆𑀲𑁂𑀯 𑀘𑁂𑀢𑁆𑀣 𑀧𑀢𑀺𑀝𑁆𑀞𑀸𑀧𑀦𑀁 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑀺𑀢𑁂 𑀲𑁂𑀲𑀮𑀓𑁆𑀔𑀡𑀤𑁆𑀯𑀬𑀲𑁆𑀲𑀧𑀺 𑀧𑀢𑀺𑀝𑁆𑀞𑀸𑀧𑀦𑀲𑀺𑀤𑁆𑀥𑀺𑀢𑁄.

𑀇𑀫𑀺𑀦𑀸 𑀧𑁂𑀬𑁆𑀬𑀸𑀮𑁂𑀦 𑀇𑀫𑁂 𑀥𑀫𑁆𑀫𑀭𑀸𑀲𑀬𑁄 𑀲𑀁𑀔𑀺𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀥𑀫𑁆𑀫𑀸, 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀇𑀤𑀁 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀤𑁆𑀤𑁂𑀲𑁂 ‘‘𑀘𑀓𑁆𑀔𑀼𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁩; 𑀲𑀁. 𑀦𑀺. 𑁪.𑁪𑁬) 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑁂 𑀥𑀫𑁆𑀫𑁂 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀅𑀪𑀺𑀜𑁆𑀜𑁂𑀬𑁆𑀬𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁪𑁮) 𑀧𑀦 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀫𑀁 𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀲𑁆𑀲𑁂𑀢𑁆𑀯𑀸 ‘‘𑀘𑀓𑁆𑀔𑀼’’𑀦𑁆𑀢𑀺𑀆𑀤𑀺𑀦𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀥𑀫𑁆𑀫𑀸 𑀤𑀲𑁆𑀲𑀺𑀢𑀸. 𑀢𑀣𑀸𑀤𑀲𑁆𑀲𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀇𑀫𑁂 𑀥𑀫𑁆𑀫𑀭𑀸𑀲𑀬𑁄 𑀲𑀁𑀔𑀺𑀢𑁆𑀢𑀸𑀢𑀺 𑀧𑀸𑀴𑀺𑀬𑀁 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀦𑁂𑀯𑀸𑀳 ‘‘𑀢𑀁 𑀢𑀢𑁆𑀣…𑀧𑁂… 𑀲𑀁𑀔𑀺𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀢𑀦𑁆𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀁. 𑀏𑀢𑁆𑀣𑀸𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀤𑁆𑀤𑁂𑀲𑁂. ‘‘𑀯𑀺𑀜𑁆𑀜𑀸𑀡𑀁 𑀫𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀓𑁄𑀝𑁆𑀞𑀸𑀲𑁂 𑀬𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀆𑀕𑀢𑀸. 𑀓𑁂𑀘𑀺 𑀧𑀦 ‘‘𑀏𑀢𑁆𑀣𑀸𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀬’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀲𑀫𑁆𑀫𑀲𑀦𑀼𑀧𑀕𑀸 𑀏𑀯 𑀳𑀺 𑀥𑀫𑁆𑀫𑀸 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀕𑀳𑀺𑀢𑀸 𑀲𑀫𑁆𑀫𑀲𑀦𑀯𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀦 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀤𑁆𑀤𑁂𑀲𑁂 (𑀧𑀝𑀺. 𑀫. 𑁧.𑁩; 𑀲𑀁. 𑀦𑀺. 𑁪.𑁪𑁬) 𑀯𑀺𑀬 𑀲𑀩𑁆𑀩𑁂𑀯 𑀅𑀪𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸. 𑀬𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸. 𑀬𑀲𑁆𑀲𑀸𑀢𑀺 𑀬𑁄𑀕𑀺𑀦𑁄. 𑀢𑁂𑀲𑀼 𑀢𑁂𑀦 𑀲𑀫𑁆𑀫𑀲𑀦𑀁 𑀆𑀭𑀪𑀺𑀢𑀩𑁆𑀩𑀁 𑀬𑀣𑀸𑀧𑀸𑀓𑀝𑀁 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄𑀢𑀺 𑀓𑀢𑁆𑀯𑀸. 𑀧𑀘𑁆𑀙𑀸 𑀧𑀦 𑀅𑀦𑀼𑀧𑀝𑁆𑀞𑀳𑀦𑁆𑀢𑁂𑀧𑀺 𑀉𑀧𑀸𑀬𑁂𑀦 𑀉𑀧𑀝𑁆𑀞𑀳𑀸𑀧𑁂𑀢𑁆𑀯𑀸 𑀅𑀦𑀯𑀲𑁂𑀲𑀢𑁄𑀯 𑀲𑀫𑁆𑀫𑀲𑀺𑀢𑀩𑁆𑀩𑀸.

𑁬𑁯𑁫. ‘‘𑀅𑀢𑀻𑀢𑀁 𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀺𑀘𑁆𑀘𑀢𑁄 𑀲𑀫𑁆𑀫𑀲𑀦𑀲𑁆𑀲 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀸𑀢𑀺 𑀆𑀳 ‘‘𑀏𑀓𑀸𑀤𑀲𑀳𑀺 𑀑𑀓𑀸𑀲𑁂𑀳𑀻’’𑀢𑀺. 𑀯𑀯𑀢𑁆𑀣𑀸𑀧𑀦𑀁 𑀦𑀸𑀫 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀅𑀦𑀺𑀘𑁆𑀘𑀢𑁄 𑀲𑀦𑁆𑀦𑀺𑀝𑁆𑀞𑀸𑀦𑀜𑁆𑀘𑁂𑀢𑁆𑀣 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀯𑀸𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀦𑁆𑀢𑀺 𑀲𑀫𑁆𑀫𑀲𑀢𑀻’’𑀢𑀺.

𑀓𑀣𑀦𑁆𑀢𑀺 𑀲𑀫𑁆𑀫𑀲𑀦𑀸𑀓𑀸𑀭𑁄 𑀧𑀼𑀘𑁆𑀙𑀺𑀢𑁄𑀢𑀺 𑀢𑀁 𑀧𑀭𑀢𑁄 𑀇𑀥𑁂𑀯 𑀧𑀸𑀴𑀺𑀬𑀁 𑀤𑀼𑀢𑀺𑀬𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀲𑀗𑁆𑀔𑁂𑀧𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀻-𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀲𑁆𑀫𑀸 ‘‘𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀅𑀦𑀺𑀘𑁆𑀘𑀦𑁆𑀢𑀺 𑀲𑀫𑁆𑀫𑀲𑀢𑀻𑀢𑀺 𑀬𑁄𑀚𑀦𑀸.

𑀏𑀯𑀫𑁆𑀧𑀺 𑀲𑀗𑁆𑀔𑁂𑀧𑁄𑀬𑁂𑀯𑀸𑀢𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀏𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑀻𑀢𑁂𑀢𑀺 𑀅𑀢𑀻𑀢𑁂 𑀪𑀯𑁂. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀳𑀺 𑀇𑀤𑀁 𑀲𑀫𑁆𑀫𑀲𑀦𑀯𑀺𑀥𑀸𑀦𑀁, 𑀢𑀲𑁆𑀫𑀸 𑀪𑀯𑀯𑀲𑁂𑀦 𑀅𑀤𑁆𑀥𑀸𑀪𑁂𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀦𑀬𑀺𑀫𑀁 𑀪𑀯𑀁 𑀲𑀫𑁆𑀧𑀢𑁆𑀢𑀦𑁆𑀢𑀻’’𑀢𑀺. 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀅𑀢𑀻𑀢𑀪𑀯𑁂 𑀧𑀭𑀺𑀬𑀸𑀧𑀦𑁆𑀦𑀁 𑀭𑀽𑀧𑀁, 𑀢𑀁 𑀅𑀢𑀻𑀢𑁂𑀬𑁂𑀯 𑀪𑀯𑁂 𑀔𑀻𑀡𑀁, 𑀢𑀢𑁄 𑀦 𑀇𑀫𑀁 𑀪𑀯𑀁 𑀲𑀫𑁆𑀧𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦 𑀔𑀬𑀲𑀪𑀸𑀯𑀢𑁆𑀢𑀸𑀢𑀺 𑀲𑀫𑁆𑀫𑀲𑀢𑀻𑀢𑀺. 𑀏𑀲 𑀦𑀬𑁄 𑀬𑀁 𑀅𑀦𑀸𑀕𑀢𑀦𑁆𑀢𑀺𑀆𑀤𑀻𑀲𑀼𑀧𑀺.

𑀬𑀁 𑀩𑀳𑀺𑀤𑁆𑀥𑀸, 𑀢𑀫𑁆𑀧𑀺 𑀩𑀳𑀺𑀤𑁆𑀥𑀸 𑀏𑀯 𑀔𑀻𑀬𑀢𑀺, 𑀦 𑀅𑀚𑁆𑀛𑀢𑁆𑀢𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺, 𑀬𑀁 𑀑𑀴𑀸𑀭𑀺𑀓𑀁, 𑀢𑀫𑁆𑀧𑀺 𑀢𑀢𑁆𑀣𑁂𑀯 𑀔𑀻𑀬𑀢𑀻𑀢𑀺 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑀇𑀤𑀁 𑀲𑀩𑁆𑀩𑀫𑁆𑀧𑀻𑀢𑀺 𑀇𑀤𑀁 𑀅𑀢𑀻𑀢𑀸𑀤𑀺𑀪𑁂𑀤𑀲𑁆𑀲 𑀭𑀽𑀧𑀲𑁆𑀲 𑀲𑀫𑁆𑀫𑀲𑀦𑀢𑁄 𑀲𑀩𑁆𑀩𑀁 𑀏𑀓𑀸𑀤𑀲𑀯𑀺𑀥𑀫𑁆𑀧𑀺 𑀲𑀫𑁆𑀫𑀲𑀦𑀁 𑀏𑀓𑀁 𑀲𑀫𑁆𑀫𑀲𑀦𑀁 𑀅𑀦𑀺𑀘𑁆𑀘𑀢𑁄 𑀲𑀫𑁆𑀫𑀲𑀦𑀦𑁆𑀢𑀺 𑀓𑀢𑁆𑀯𑀸.

𑀢𑀦𑁆𑀢𑀺 𑀢𑀁 𑀏𑀓𑀸𑀤𑀲𑀯𑀺𑀥𑀫𑁆𑀧𑀺 𑀭𑀽𑀧𑀁. 𑀲𑀧𑁆𑀧𑀝𑀺𑀪𑀬𑀢𑀸𑀬𑀸𑀢𑀺 𑀪𑀬𑀸𑀦𑀓𑀢𑀸𑀬. 𑀪𑀬𑀸𑀯𑀳𑀁 𑀳𑁄𑀢𑀻𑀢𑀺 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀲𑁆𑀲 ‘‘𑀅𑀳𑀁 𑀯𑀺𑀦𑀲𑁆𑀲𑀸𑀫𑀺, 𑀫𑀫 𑀲𑀦𑁆𑀢𑀓𑀁 𑀯𑀺𑀦𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀪𑀬𑀚𑀦𑀓𑀁 𑀳𑁄𑀢𑀺. 𑀲𑀻𑀳𑁄𑀧𑀫𑀲𑀼𑀢𑁆𑀢𑁂 𑀤𑁂𑀯𑀸𑀦𑀁 𑀯𑀺𑀬𑀸𑀢𑀺 𑀲𑀻𑀳𑁄𑀧𑀫𑀲𑀼𑀢𑁆𑀢𑁂 𑀤𑁂𑀲𑀺𑀬𑀫𑀸𑀦𑁂 𑀤𑁂𑀯𑀸𑀦𑀁 𑀯𑀺𑀬. 𑀢𑀢𑁆𑀣 𑀳𑀺 𑁋

‘‘𑀬𑀤𑀸 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀇𑀢𑀺 𑀯𑁂𑀤𑀦𑀸… 𑀇𑀢𑀺 𑀲𑀜𑁆𑀜𑀸… 𑀇𑀢𑀺 𑀲𑀗𑁆𑀔𑀸𑀭𑀸… 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺. 𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸 𑀉𑀘𑁆𑀘𑁂𑀲𑀼 𑀯𑀺𑀫𑀸𑀦𑁂𑀲𑀼 𑀘𑀺𑀭𑀝𑁆𑀞𑀺𑀢𑀺𑀓𑀸, 𑀢𑁂𑀧𑀺 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀪𑀬𑀁 𑀲𑀁𑀯𑁂𑀕𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺 ‘𑀅𑀦𑀺𑀘𑁆𑀘𑀸𑀯 𑀓𑀺𑀭 𑀪𑁄 𑀫𑀬𑀁 𑀲𑀫𑀸𑀦𑀸 𑀦𑀺𑀘𑁆𑀘𑀫𑁆𑀳𑀸𑀢𑀺 𑀅𑀫𑀜𑁆𑀜𑀺𑀫𑁆𑀳, 𑀅𑀤𑁆𑀥𑀼𑀯𑀸𑀯…𑀧𑁂… 𑀅𑀲𑀲𑁆𑀲𑀢𑀸𑀯 𑀓𑀺𑀭 𑀪𑁄 𑀫𑀬𑀁 𑀲𑀫𑀸𑀦𑀸 𑀲𑀲𑁆𑀲𑀢𑀫𑁆𑀳𑀸𑀢𑀺 𑀅𑀫𑀜𑁆𑀜𑀺𑀫𑁆𑀳, 𑀫𑀬𑀫𑁆𑀧𑀺 𑀓𑀺𑀭 𑀪𑁄 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀅𑀲𑀲𑁆𑀲𑀢𑀸 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸’’’𑀢𑀺 (𑀲𑀁. 𑀦𑀺. 𑁩.𑁭𑁮; 𑀅. 𑀦𑀺. 𑁪.𑁩𑁩) 𑁋

𑀏𑀯𑀁 𑀤𑁂𑀯𑀸𑀦𑀁 𑀪𑀬𑀼𑀧𑁆𑀧𑀢𑁆𑀢𑀺 𑀆𑀕𑀢𑀸.

𑀔𑀦𑁆𑀥𑀧𑀜𑁆𑀘𑀓𑀁, 𑀢𑀤𑁂𑀓𑀤𑁂𑀲𑁄 𑀯𑀸 𑀅𑀢𑁆𑀢𑀯𑀸𑀤𑀻𑀳𑀺 ‘‘𑀅𑀢𑁆𑀢𑀸’’𑀢𑀺 𑀧𑀭𑀺𑀓𑀧𑁆𑀧𑀻𑀬𑀢𑀺, 𑀢𑀜𑁆𑀘 𑀏𑀓𑀦𑁆𑀢𑀢𑁄 𑀅𑀦𑀺𑀘𑁆𑀘𑀁, 𑀤𑀼𑀓𑁆𑀔𑀜𑁆𑀘𑀸𑀢𑀺 𑀆𑀳 ‘‘𑀬𑀜𑁆𑀳𑀺 𑀅𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺. 𑀢𑀻𑀲𑀼 𑀤𑀼𑀓𑁆𑀔𑀢𑀸𑀲𑀼 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀯 𑀩𑁆𑀬𑀸𑀧𑀺𑀦𑀻, ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀘 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀺𑀘𑁆𑀘𑀢𑀁 𑀯𑀸 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀁 𑀯𑀸’’𑀢𑀺. 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲𑀸𑀢𑀺 ‘‘𑀓𑀸𑀭𑀓𑁄 𑀯𑁂𑀤𑀓𑁄 𑀲𑀬𑀁𑀯𑀲𑀻’’𑀢𑀺 𑀏𑀯𑀁𑀪𑀽𑀢𑁄 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 𑀲𑀢𑀺 𑀭𑀽𑀧𑀲𑁆𑀲 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀦𑀁 𑀅𑀬𑀼𑀚𑁆𑀚𑀫𑀸𑀦𑀓𑀁 𑀲𑀺𑀬𑀸. 𑀬𑀣𑀸 𑀭𑀽𑀧𑀓𑁆𑀔𑀦𑁆𑀥𑁂 𑀅𑀪𑁂𑀤𑀢𑁄 𑀢𑀺𑀯𑀺𑀥𑀁 𑀲𑀫𑁆𑀫𑀲𑀦𑀁, 𑀪𑁂𑀤𑀢𑁄 𑀢𑁂𑀢𑁆𑀢𑀺𑀁𑀲𑀯𑀺𑀥𑀁, 𑀏𑀯𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀻𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲 𑀦𑀬𑁄’’𑀢𑀺 𑀅𑀢𑀺𑀤𑀺𑀲𑀢𑀺. 𑀢𑁂𑀦 𑀔𑀦𑁆𑀥𑀯𑀲𑁂𑀦 𑀢𑀸𑀯 𑀪𑁂𑀤𑀢𑁄 𑀧𑀜𑁆𑀘𑀲𑀝𑁆𑀞𑀺𑀅𑀥𑀺𑀓𑀸 𑀲𑀢𑀁 𑀲𑀫𑁆𑀫𑀲𑀦𑀯𑀸𑀭𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀤𑁆𑀯𑀸𑀭𑀙𑀓𑁆𑀓𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀲𑀫𑁆𑀫𑀲𑀦𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁯𑁬. 𑀦𑀺𑀬𑀫𑀢𑁄 𑀲𑀗𑁆𑀔𑀢𑀸𑀤𑀺𑀪𑁂𑀤𑀁 𑀳𑁄𑀢𑀻𑀢𑀺 𑀏𑀓𑀁𑀲𑁂𑀦 𑀲𑀗𑁆𑀔𑀢𑀢𑀸𑀤𑀺𑀯𑀺𑀲𑁂𑀲𑀯𑀦𑁆𑀢𑀁 𑀳𑁄𑀢𑀺 𑀅𑀲𑀗𑁆𑀔𑀢𑀸𑀤𑀺𑀲𑀪𑀸𑀯𑁂 𑀅𑀦𑀺𑀘𑁆𑀘𑀢𑀸𑀬 𑀅𑀲𑀫𑁆𑀪𑀯𑀢𑁄. 𑀅𑀲𑁆𑀲𑀸𑀢𑀺 𑀅𑀦𑀺𑀘𑁆𑀘𑀲𑁆𑀲. 𑀧𑀭𑀺𑀬𑀸𑀬𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑁂𑀯𑀘𑀦𑀤𑀲𑁆𑀲𑀦𑀢𑁆𑀣𑀁, 𑀢𑀁 𑀧𑀦 ‘‘𑀔𑀬𑀥𑀫𑁆𑀫’’𑀦𑁆𑀢𑀺𑀆𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀦 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁. 𑀦 𑀳𑀺 𑀢𑀤𑁂𑀯 𑀢𑀲𑁆𑀲 𑀧𑀭𑀺𑀬𑀸𑀬𑁄 𑀳𑁄𑀢𑀺, 𑀦𑀸𑀧𑀺 𑀲𑀗𑁆𑀔𑀢𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀧𑀤𑀸𑀦𑀺 𑀳𑀼𑀢𑁆𑀯𑀸 𑀅𑀪𑀸𑀯𑀤𑀻𑀧𑀦𑀢𑁄 𑀧𑀸𑀓𑀪𑀸𑀯𑀤𑀻𑀧𑀦𑀢𑁄. 𑀧𑀸𑀓𑀪𑀸𑀯𑀤𑀻𑀧𑀦𑁂𑀦 𑀧𑀦 𑀅𑀦𑀺𑀘𑁆𑀘𑀢𑀸𑀬 𑀲𑀸𑀥𑀦𑀧𑀓𑁆𑀔𑁂 𑀢𑀺𑀝𑁆𑀞𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀲𑀩𑁆𑀩𑁂𑀲𑀁 𑀧𑀤𑀸𑀦𑀁 𑀧𑀭𑀺𑀬𑀸𑀬𑀢𑀸𑀪𑀸𑀯𑀢𑁄 ‘‘𑀦𑀸𑀦𑀸𑀓𑀸𑀭𑁂𑀳𑀺 𑀯𑀸’’𑀢𑀺 𑀯𑀺𑀓𑀧𑁆𑀧𑀦𑁆𑀢𑀭𑀁 𑀕𑀳𑀺𑀢𑀁. 𑀫𑀦𑀲𑀺𑀓𑀸𑀭𑀧𑁆𑀧𑀯𑀢𑁆𑀢𑀻𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀦𑀺𑀘𑁆𑀘𑀢𑀸𑀬 𑀉𑀧𑀩𑁆𑀭𑀽𑀳𑀦𑀫𑀦𑀲𑀺𑀓𑀸𑀭𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁.

𑀘𑀢𑁆𑀢𑀸𑀭𑀻𑀲𑀸𑀓𑀸𑀭𑀅𑀦𑀼𑀧𑀲𑁆𑀲𑀦𑀸𑀓𑀣𑀸𑀯𑀡𑁆𑀡𑀦𑀸

𑁬𑁯𑁭. 𑀲𑁄𑀢𑀺 𑀬𑁄𑀕𑀸𑀯𑀘𑀭𑁄. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀪𑁂𑀤𑀲𑁆𑀲 𑀅𑀦𑀺𑀘𑁆𑀘𑀢𑀸𑀤𑀺𑀲𑀫𑁆𑀫𑀲𑀦𑀲𑁆𑀲. 𑀣𑀺𑀭𑀪𑀸𑀯𑀢𑁆𑀣𑀸𑀬𑀸𑀢𑀺 𑀤𑀴𑁆𑀳𑀪𑀸𑀯𑀢𑁆𑀣𑀸𑀬 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀸𑀭𑁄 𑀯𑀺𑀬 𑀩𑀳𑀼𑀮𑀻𑀓𑀸𑀭𑀪𑀸𑀯𑀢𑁄. 𑀬𑀁 𑀢𑀁 𑀪𑀕𑀯𑀢𑀸 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀼𑀮𑁄𑀫𑀺𑀓𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀅𑀦𑀼𑀓𑀽𑀮𑀁. 𑀔𑀦𑁆𑀢𑀺𑀦𑁆𑀢𑀺 𑀜𑀸𑀡𑀔𑀦𑁆𑀢𑀺𑀁. 𑀜𑀸𑀡𑀜𑁆𑀳𑀺 𑀯𑀺𑀲𑀬𑀲𑀪𑀸𑀯𑀁 𑀑𑀕𑀸𑀳𑁂𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀔𑀫𑀢𑀺 𑀲𑀳𑀢𑀻𑀢𑀺 𑀔𑀦𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀁. 𑀲𑁄 𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀲𑀫𑁆𑀫𑀢𑁆𑀢𑀜𑁆𑀘𑁂𑀯 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑀢𑀸𑀬 𑀦𑀺𑀬𑀸𑀫𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺. ‘‘𑀆𑀤𑀺𑀦𑀸 𑀦𑀬𑁂𑀦𑀸’’𑀢𑀺 𑀇𑀫𑀺𑀦𑀸 ‘‘𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺, 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀲𑀼𑀔𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀻’’𑀢𑀺 (𑀧𑀝𑀺. 𑀫. 𑁩.𑁩𑁮) 𑀏𑀯𑀫𑀸𑀤𑀺𑀓𑁄 𑀧𑀸𑀞𑀲𑁂𑀲𑁄 𑀭𑁄𑀕𑀸𑀤𑀺𑀧𑀝𑀺𑀧𑀓𑁆𑀔𑀬𑁄𑀚𑀦𑀸𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄. ‘‘𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀦𑀺𑀘𑁆𑀘𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀯𑀘𑀦𑁂𑀦 𑀲𑀗𑁆𑀔𑀸𑀭𑀸𑀦𑀁 𑀤𑀼𑀓𑁆𑀔𑀭𑁄𑀕𑀢𑀸𑀤𑀺𑀧𑀝𑀺𑀧𑀓𑁆𑀔𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀼𑀔𑀸𑀭𑁄𑀕𑁆𑀬𑀸𑀤𑀺𑀪𑀸𑀯𑁄 ‘‘𑀆𑀤𑀺𑀦𑀸 𑀦𑀬𑁂𑀦𑀸’’𑀢𑀺 𑀏𑀢𑁆𑀣 𑀦𑀬𑀕𑁆𑀕𑀳𑀡𑁂𑀦 𑀤𑀻𑀧𑀺𑀢𑁄𑀢𑀺. 𑀅𑀯𑀲𑁂𑀲𑁄 𑀲𑀩𑁆𑀩𑁄 𑀧𑀸𑀞𑁄 𑀧𑀓𑀸𑀲𑀺𑀢𑁄 𑀏𑀯 𑀳𑁄𑀢𑀻𑀢𑀺.

𑀓𑀸𑀫𑀜𑁆𑀘𑁂𑀢𑀁 𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀫𑁆𑀫𑀲𑀦𑀁 𑀅𑀦𑀼𑀮𑁄𑀫𑀜𑀸𑀡𑁂 𑀪𑀸𑀯𑁂𑀢𑀩𑁆𑀩𑀯𑀺𑀥𑀸𑀦𑀁. 𑀢𑁂𑀦𑀸𑀳 ‘‘𑀅𑀦𑀼𑀮𑁄𑀫𑀜𑀸𑀡𑀁 𑀯𑀺𑀪𑀚𑀦𑁆𑀢𑁂𑀦…𑀧𑁂… 𑀯𑀼𑀢𑁆𑀢’’𑀦𑁆𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀧𑀦 𑀓𑀢𑀧𑀭𑀺𑀘𑀬𑀲𑁆𑀲𑁂𑀯 𑀓𑀺𑀘𑁆𑀘𑀸𑀯𑀳𑀁 𑀳𑁄𑀢𑀻𑀢𑀺 𑀇𑀥𑀸𑀧𑀺 𑀯𑀼𑀢𑁆𑀢𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲𑀸𑀧𑀻𑀢𑀺 𑀦 𑀓𑁂𑀯𑀮𑀁 𑀓𑀮𑀸𑀧𑀲𑀫𑁆𑀫𑀲𑀦𑀲𑁆𑀲𑁂𑀯, 𑀅𑀣 𑀔𑁄 𑀬𑀣𑀸𑀤𑀲𑁆𑀲𑀺𑀢𑀲𑁆𑀲 𑀘𑀢𑁆𑀢𑀸𑀮𑀻𑀲𑀧𑁆𑀧𑀪𑁂𑀤𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀲𑁆𑀲𑀧𑀺. 𑀢𑀜𑁆𑀳𑀺 𑀅𑀦𑀼𑀮𑁄𑀫𑀺𑀓𑀔𑀦𑁆𑀢𑀺𑀧𑀝𑀺𑀮𑀸𑀪𑀸𑀬, 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀸𑀬 𑀘 𑀲𑀁𑀯𑀢𑁆𑀢𑀦𑀢𑁄 𑀏𑀓𑀁𑀲𑀢𑁄 𑀇𑀘𑁆𑀙𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀅𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀅𑀦𑁄𑀓𑁆𑀓𑀫𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸…𑀧𑁂… 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄’’𑀢𑀺 (𑀅. 𑀦𑀺. 𑁬.𑁯𑁮; 𑀧𑀝𑀺. 𑀫. 𑁩.𑁩𑁬) 𑁋

𑀆𑀤𑀺 𑀲𑀼𑀓𑁆𑀓𑀧𑀓𑁆𑀔𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄. 𑀢𑀣𑀸 ‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄, 𑀤𑀼𑀓𑁆𑀔𑀢𑁄, 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀢𑁆𑀢𑀢𑁄, 𑀅𑀦𑀢𑁆𑀢𑀢𑁄’’𑀢𑀺 (𑀧𑀝𑀺. 𑀫. 𑁩.𑁩𑁬) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄.

𑁬𑁯𑁮. 𑀏𑀓𑁂𑀓𑀁 𑀔𑀦𑁆𑀥𑀁 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀲𑁆𑀲 𑀯𑀲𑁂𑀦 𑀲𑀫𑁆𑀫𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀧𑀦 𑀲𑀫𑁆𑀫𑀲𑀦𑀲𑁆𑀲 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀲𑀸𑀥𑀸𑀭𑀡𑀢𑀸𑀬 ‘‘𑀏𑀓𑁂𑀓𑀁 𑀔𑀦𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑀘𑁆𑀘𑀦𑁆𑀢𑀺𑀓𑀢𑀸𑀬𑀸𑀢𑀺 𑀅𑀘𑁆𑀘𑀦𑁆𑀢𑀺𑀓𑀢𑀸𑀪𑀸𑀯𑀢𑁄, 𑀅𑀲𑀲𑁆𑀲𑀢𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀲𑁆𑀲𑀢𑀜𑁆𑀳𑀺 𑀅𑀘𑁆𑀘𑀦𑁆𑀢𑀺𑀓𑀁 𑀧𑀭𑀸𑀬 𑀓𑁄𑀝𑀺𑀬𑀸 𑀅𑀪𑀸𑀯𑀢𑁄. 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑀸𑀬𑀸𑀢𑀺 𑀧𑀼𑀩𑁆𑀩𑀸𑀧𑀭𑀓𑁄𑀝𑀺𑀯𑀦𑁆𑀢𑀢𑀸𑀬, 𑀉𑀤𑀬𑀩𑁆𑀩𑀬𑀥𑀫𑁆𑀫𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑀢𑁄 𑀲𑀫𑁆𑀫𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀅𑀦𑀺𑀘𑁆𑀘𑀢𑁄𑀢𑀺 𑀘 𑀅𑀤𑁆𑀥𑀼𑀯𑀢𑁄. 𑀏𑀢𑀜𑁆𑀳𑀺 𑀦 𑀦𑀺𑀘𑁆𑀘𑀁, 𑀔𑀡𑀺𑀓𑀢𑀸𑀬 𑀅𑀲𑀤𑀸𑀪𑀸𑀯𑀺𑀢𑀸𑀬 𑀯𑀸 𑀦 𑀇𑀘𑁆𑀘𑀁 𑀦 𑀉𑀧𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀦𑀺𑀘𑁆𑀘𑀁. 𑀉𑀧𑁆𑀧𑀸𑀤𑀯𑀬𑀧𑀝𑀺𑀧𑀻𑀴𑀦𑀢𑀸𑀬𑀸𑀢𑀺 𑀉𑀧𑁆𑀧𑀸𑀤𑁂𑀦, 𑀯𑀬𑁂𑀦 𑀘 𑀧𑀢𑀺 𑀧𑀢𑀺 𑀔𑀡𑁂 𑀔𑀡𑁂 𑀢𑀁𑀲𑀫𑀗𑁆𑀕𑀺𑀦𑁄 𑀯𑀺𑀩𑀸𑀥𑀦𑀲𑀪𑀸𑀯𑀢𑁆𑀢𑀸, 𑀢𑁂𑀳𑀺 𑀯𑀸 𑀲𑀬𑀫𑁂𑀯 𑀯𑀺𑀩𑀸𑀥𑁂𑀢𑀩𑁆𑀩𑀢𑁆𑀢𑀸. 𑀉𑀤𑀬𑀩𑁆𑀩𑀬𑀯𑀦𑁆𑀢𑁄 𑀳𑀺 𑀥𑀫𑁆𑀫𑀸 𑀅𑀪𑀺𑀡𑁆𑀳𑀁 𑀢𑁂𑀳𑀺 𑀧𑀝𑀺𑀧𑀻𑀴𑀺𑀢𑀸 𑀏𑀯 𑀳𑁄𑀦𑁆𑀢𑀺, 𑀬𑀸 𑀧𑀻𑀴𑀦𑀸 ‘‘𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀓𑁆𑀔𑀯𑀢𑁆𑀣𑀼𑀢𑀸𑀬𑀸𑀢𑀺 𑀢𑀺𑀯𑀺𑀥𑀲𑁆𑀲𑀸𑀧𑀺 𑀤𑀼𑀓𑁆𑀔𑀲𑁆𑀲, 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀘 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀧𑀘𑁆𑀘𑀬𑀬𑀸𑀧𑀦𑀻𑀬𑀢𑀸𑀬𑀸𑀢𑀺 𑀬𑀣𑀸𑀭𑀳𑀁 𑀧𑀘𑁆𑀘𑀬𑁂𑀳𑀺 𑀬𑀸𑀧𑁂𑀢𑀩𑁆𑀩𑀢𑀸𑀬. 𑀭𑁄𑀕𑀫𑀽𑀮𑀢𑀸𑀬𑀸𑀢𑀺 𑀫𑀽𑀮𑀩𑁆𑀬𑀸𑀥𑀺 𑀯𑀺𑀬 𑀅𑀦𑀼𑀩𑀦𑁆𑀥𑀩𑁆𑀬𑀸𑀥𑀻𑀦𑀁 𑀫𑀽𑀮𑀪𑀸𑀯𑀢𑁄, 𑀧𑀤𑀤𑁆𑀯𑀬𑁂𑀦𑀸𑀧𑀺 𑀬𑀸𑀧𑁆𑀬𑀭𑁄𑀕𑀲𑀤𑀺𑀲𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀸𑀧𑁆𑀬𑀩𑁆𑀬𑀸𑀥𑀺 𑀳𑀺 𑀭𑁄𑀕𑁄 𑀇𑀢𑀭𑁄 𑀆𑀩𑀸𑀥𑁄𑀢𑀺. 𑀤𑀼𑀓𑁆𑀔𑀢𑀸𑀲𑀽𑀮𑀬𑁄𑀕𑀺𑀢𑀸𑀬𑀸𑀢𑀺 𑀢𑀺𑀯𑀺𑀥𑀤𑀼𑀓𑁆𑀔𑀢𑀸𑀲𑀗𑁆𑀔𑀸𑀢𑁂𑀦 𑀭𑀼𑀚𑁆𑀚𑀦𑁂𑀦 𑀬𑀼𑀚𑁆𑀚𑀢𑀸𑀬. 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑀸𑀬𑀸𑀢𑀺 𑀬𑀣𑀸𑀭𑀳𑀫𑀸𑀭𑀫𑁆𑀫𑀡𑀯𑀲𑁂𑀦, 𑀲𑀫𑀦𑁆𑀦𑀸𑀕𑀫𑀯𑀲𑁂𑀦 𑀘 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀲𑀼𑀘𑀺𑀯𑀺𑀲𑁆𑀲𑀦𑁆𑀤𑀦𑀢𑁄. 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀢𑁄 𑀉𑀧𑁆𑀧𑀢𑁆𑀢𑀺𑀬𑀸 𑀉𑀤𑁆𑀥𑀼𑀫𑀸𑀢𑀢𑀸.

𑀅𑀦𑁆𑀢𑁄𑀢𑀼𑀤𑀦𑀢𑀸𑀬𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀢𑀼𑀤𑀦𑀢𑁄. 𑀤𑀼𑀓𑁆𑀔𑀯𑁂𑀤𑀦𑀸𑀤𑀬𑁄 𑀯𑀺𑀬 𑀳𑀺 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀢𑁆𑀢𑀪𑀸𑀯𑀲𑁆𑀲 𑀅𑀩𑁆𑀪𑀦𑁆𑀢𑀭𑀕𑀢𑀸 𑀏𑀯 𑀉𑀤𑀬𑀩𑁆𑀩𑀬𑀯𑀲𑁂𑀦 𑀢𑀼𑀤𑀦𑁆𑀢𑀺. 𑀅𑀭𑀺𑀬𑀫𑀕𑁆𑀕𑀲𑀡𑁆𑀟𑀸𑀲𑁂𑀦 𑀯𑀺𑀦𑀸 𑀦𑀻𑀳𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀼𑀦𑁆𑀦𑀻𑀳𑀭𑀡𑀻𑀬𑀢𑀸 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀤𑀴𑁆𑀳𑀪𑀸𑀯𑀢𑁄. 𑀅𑀖𑀦𑁆𑀢𑀺 𑀧𑀸𑀧𑀁 𑀯𑀺𑀬 𑀅𑀭𑀺𑀬𑀚𑀦𑁂𑀳𑀺 𑀯𑀺𑀕𑀭𑀳𑀺𑀢𑀩𑁆𑀩𑀁. 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀚𑀦𑀦𑀢𑁄 𑀅𑀯𑀟𑁆𑀠𑀺𑀆𑀯𑀳𑀁, 𑀧𑀸𑀧𑀲𑁆𑀲 𑀘 𑀯𑀢𑁆𑀣𑀼𑀪𑀽𑀢𑀁 𑀔𑀦𑁆𑀥𑀧𑀜𑁆𑀘𑀓𑀦𑁆𑀢𑀺 𑀆𑀳 ‘‘𑀯𑀺𑀕𑀭𑀳…𑀧𑁂… 𑀅𑀖𑀢𑁄’’𑀢𑀺. 𑀅𑀲𑁂𑀭𑀺𑀪𑀸𑀯𑀚𑀦𑀓𑀢𑀸𑀬𑀸𑀢𑀺 𑀧𑀭𑀯𑀲𑀢𑀸𑀚𑀦𑀦𑀢𑁄. 𑀬𑀣𑀸 𑀕𑀺𑀮𑀸𑀦𑁄 𑀅𑀜𑁆𑀜𑁂𑀳𑀺 𑀲𑀁𑀯𑁂𑀲𑀦𑀯𑀼𑀝𑁆𑀞𑀸𑀧𑀦𑀸𑀤𑀺𑀦𑀸 𑀧𑀭𑀧𑀝𑀺𑀩𑀤𑁆𑀥𑀲𑀭𑀻𑀭𑀯𑀼𑀢𑁆𑀢𑀺𑀓𑁄 𑀅𑀲𑁂𑀭𑀻, 𑀏𑀯𑀫𑁂𑀢𑁂𑀧𑀺 𑀅𑀲𑁂𑀭𑀺𑀪𑀸𑀯𑀚𑀦𑀓𑀸. 𑀅𑀯𑀲𑀢𑀸𑀬𑀸𑀢𑀺 𑀅𑀯𑀲𑀯𑀢𑁆𑀢𑀦𑀢𑁄. 𑀬𑀣𑀸 𑀧𑀭𑁄𑀲𑀢𑀦𑁆𑀢𑁄 𑀧𑀼𑀭𑀺𑀲𑁄 𑀧𑀭𑀲𑁆𑀲 𑀯𑀲𑀁 𑀦 𑀕𑀘𑁆𑀙𑀢𑀺, 𑀏𑀯𑀁 𑀲𑀼𑀪𑀲𑀼𑀔𑀸𑀤𑀺𑀪𑀸𑀯𑁂𑀦 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄. 𑀅𑀯𑀺𑀥𑁂𑀬𑁆𑀬𑀢𑀸𑀬𑀸𑀢𑀺 ‘‘𑀫𑀸 𑀚𑀻𑀭𑀣, 𑀫𑀸 𑀫𑀻𑀬𑀣𑀸’’𑀢𑀺𑀆𑀤𑀺𑀦𑀸 𑀯𑀺𑀥𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄. 𑀧𑀮𑀼𑀚𑁆𑀚𑀦𑀢𑀸𑀬𑀸𑀢𑀺 𑀩𑁆𑀬𑀸𑀥𑀺𑀆𑀤𑀻𑀳𑀺 𑀧𑀓𑀸𑀭𑁂𑀳𑀺 𑀙𑀺𑀚𑁆𑀚𑀦𑀢𑁄 𑀯𑀺𑀦𑀲𑁆𑀲𑀦𑀢𑁄. 𑀢𑁂𑀳𑀺 𑀏𑀯 𑀯𑀸 𑀆𑀩𑁆𑀬𑀲𑀦𑀢𑁄. 𑀩𑁆𑀬𑀲𑀦𑀢𑁆𑀣𑁄 𑀳𑀺 𑀮𑁄𑀓𑀲𑀤𑁆𑀤𑁄, 𑀧𑀲𑀤𑁆𑀤𑁄 𑀪𑀼𑀲𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀩𑁆𑀬𑀸𑀥𑀺𑀆𑀤𑀻𑀳𑀺 𑀘 𑀔𑀦𑁆𑀥𑀸𑀦𑀁 𑀩𑁆𑀬𑀲𑀦𑀦𑁆𑀢𑀺. 𑀩𑁆𑀬𑀲𑀦𑀸𑀯𑀳𑀪𑀸𑀯𑁂𑀦 𑀏𑀢𑀻𑀢𑀺 𑀈𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀅𑀓𑀼𑀲𑀮𑀧𑀓𑁆𑀔𑀺𑀬𑀸𑀦𑀁 𑀩𑁆𑀬𑀲𑀦𑀳𑁂𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀔𑀦𑁆𑀥𑀸 𑀘 𑀏𑀤𑀺𑀲𑀸𑀢𑀺 𑀆𑀳 ‘‘𑀅𑀦𑁂𑀓𑀩𑁆𑀬𑀲𑀦𑀸𑀯𑀳𑀢𑀸𑀬 𑀈𑀢𑀺𑀢𑁄’’𑀢𑀺.

𑀉𑀧𑀤𑁆𑀤𑀯𑀢𑀻𑀢𑀺 𑀉𑀧𑀤𑁆𑀤𑀯𑁄, 𑀅𑀦𑀢𑁆𑀣𑀁 𑀚𑀦𑁂𑀦𑁆𑀢𑁄 𑀅𑀪𑀺𑀪𑀯𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄, 𑀭𑀸𑀚𑀤𑀡𑁆𑀟𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀔𑀦𑁆𑀥𑀸 𑀘 𑀏𑀤𑀺𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀤𑀺𑀢𑀸𑀦𑀁…𑀧𑁂… 𑀉𑀧𑀤𑁆𑀤𑀯𑀢𑁄’’𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀪𑀬𑀸𑀯𑀳𑀢𑁄, 𑀅𑀪𑀬𑀧𑀝𑀺𑀧𑀓𑁆𑀔𑀢𑁄 𑀘 𑀔𑀦𑁆𑀥𑀸 𑀪𑀬𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀪𑀬𑀸𑀦𑀁…𑀧𑁂… 𑀪𑀬𑀢𑁄’’𑀢𑀺. 𑀩𑀳𑀺𑀤𑁆𑀥𑀸 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺, 𑀅𑀚𑁆𑀛𑀢𑁆𑀢𑀁 𑀭𑀸𑀕𑀸𑀤𑀻𑀳𑀺 𑀅𑀦𑀢𑁆𑀣𑁂𑀳𑀺 𑀉𑀧𑀲𑀚𑁆𑀚𑀦𑀝𑁆𑀞𑁂𑀦, 𑀉𑀧𑀲𑀕𑁆𑀕𑀲𑀤𑀺𑀲𑀢𑀸𑀬 𑀘 𑀉𑀧𑀲𑀕𑁆𑀕𑁄. 𑀉𑀧𑀲𑀕𑁆𑀕𑁄𑀢𑀺 𑀘 𑀤𑁂𑀯𑀢𑀽𑀧𑀲𑀁𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑁄 𑀩𑁆𑀬𑀸𑀥𑀺𑀆𑀤𑀺𑀅𑀦𑀢𑁆𑀣𑁄. 𑀲𑁄 𑀅𑀢𑁆𑀣𑀓𑀸𑀫𑁂𑀦 𑀫𑀼𑀳𑀼𑀢𑁆𑀢𑀫𑁆𑀧𑀺 𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑁂𑀓𑁂𑀳𑀺…𑀧𑁂… 𑀉𑀧𑀲𑀕𑁆𑀕𑀢𑁄’’𑀢𑀺. 𑀤𑁄𑀲𑀽𑀧𑀲𑀝𑁆𑀞𑀢𑀸𑀬𑀸𑀢𑀺 𑀆𑀭𑀫𑁆𑀫𑀡𑀢𑁄, 𑀲𑀫𑁆𑀧𑀬𑁄𑀕𑀢𑁄 𑀘 𑀭𑀸𑀕𑀸𑀤𑀺𑀤𑁄𑀲𑁂𑀳𑀺 𑀉𑀧𑁂𑀢𑀢𑀸𑀬. 𑀮𑁄𑀓𑀥𑀫𑁆𑀫𑀸 𑀮𑀸𑀪𑀸𑀤𑀺𑀳𑁂𑀢𑀼𑀓𑀸 𑀅𑀦𑀼𑀦𑀬𑀧𑀝𑀺𑀖𑀸, 𑀢𑁂𑀳𑀺, 𑀩𑁆𑀬𑀸𑀥𑀺𑀆𑀤𑀻𑀳𑀺 𑀘 𑀅𑀦𑀯𑀝𑁆𑀞𑀺𑀢𑀢𑀸 𑀧𑀘𑀮𑀺𑀢𑀢𑀸.

𑀉𑀧𑀓𑁆𑀓𑀫𑁂𑀦𑀸𑀢𑀺 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀯𑀸 𑀧𑀬𑁄𑀕𑁂𑀦. 𑀲𑀭𑀲𑁂𑀦𑀸𑀢𑀺 𑀲𑀪𑀸𑀯𑁂𑀦. 𑀧𑀪𑀗𑁆𑀕𑀼𑀧𑀕𑀫𑀦𑀲𑀻𑀮𑀢𑀸 𑀪𑀺𑀤𑀼𑀭𑀢𑀸. 𑀲𑀩𑁆𑀩𑀸𑀯𑀢𑁆𑀣𑀦𑀺𑀧𑀸𑀢𑀺𑀢𑀸𑀬𑀸𑀢𑀺 𑀭𑀼𑀓𑁆𑀔𑀨𑀮𑀁 𑀯𑀺𑀬 𑀅𑀢𑀺𑀢𑀭𑀼𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀸𑀲𑀼 𑀅𑀯𑀢𑁆𑀣𑀸𑀲𑀼 𑀦𑀺𑀧𑀢𑀦𑀲𑀻𑀮𑀢𑀸𑀬. 𑀅𑀦𑀺𑀧𑀢𑀲𑁆𑀲𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀲𑀸𑀭𑀢𑀸𑀬 𑀣𑀺𑀭𑀪𑀸𑀯𑀲𑁆𑀲 𑀅𑀪𑀸𑀯𑀢𑀸𑀬. 𑀣𑀺𑀭𑀜𑁆𑀳𑀺 𑀥𑀼𑀯𑀁 𑀦𑀸𑀫 𑀳𑁄𑀢𑀺. 𑀢𑀸𑀬𑀺𑀢𑀼𑀁 𑀭𑀓𑁆𑀔𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦 𑀢𑀸𑀬𑀦𑁄𑀢𑀺 𑀅𑀢𑀸𑀬𑀦𑁄, 𑀢𑀩𑁆𑀪𑀸𑀯𑁄 𑀅𑀢𑀸𑀬𑀦𑀢𑀸. 𑀢𑀸𑀡𑀸𑀲𑀻𑀲𑀸𑀬 𑀉𑀧𑀕𑀢𑀲𑁆𑀲 𑀅𑀮𑀩𑁆𑀪𑀦𑁂𑀬𑁆𑀬𑀔𑁂𑀫𑀢𑀸. 𑀤𑀼𑀓𑁆𑀔𑀪𑀻𑀢𑀺𑀬𑀸 𑀉𑀧𑀮𑀻𑀬𑀦𑀸𑀥𑀺𑀧𑁆𑀧𑀸𑀬𑁂𑀦 𑀅𑀮𑁆𑀮𑀻𑀬𑀺𑀢𑀼𑀁. 𑀤𑀼𑀓𑁆𑀔𑀦𑀺𑀯𑀢𑁆𑀢𑀦𑀁 𑀮𑁂𑀡𑀓𑀺𑀘𑁆𑀘𑀁. 𑀚𑀸𑀢𑀺𑀆𑀤𑀺𑀪𑀬𑀸𑀦𑀁 𑀳𑀺𑀁𑀲𑀦𑀁 𑀯𑀺𑀥𑀫𑀦𑀁 𑀪𑀬𑀲𑀸𑀭𑀓𑀢𑁆𑀢𑀁. 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑁂𑀳𑀻𑀢𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂𑀳𑀺 𑀩𑀸𑀮𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀧𑁆𑀧𑀓𑀸𑀭𑁂𑀳𑀺. 𑀭𑀺𑀢𑁆𑀢𑀢𑀸𑀬𑀸𑀢𑀺 𑀯𑀺𑀯𑀺𑀢𑁆𑀢𑀢𑀸𑀬, 𑀯𑀺𑀭𑀳𑀺𑀢𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀲𑀸𑀭𑀸𑀪𑀸𑀯𑁄 𑀭𑀺𑀢𑁆𑀢𑀢𑀸. 𑀲𑀸 𑀏𑀯 𑀘 𑀢𑀼𑀘𑁆𑀙𑀢𑀸𑀢𑀺 𑀆𑀳 ‘‘𑀭𑀺𑀢𑁆𑀢𑀢𑀸𑀬𑁂𑀯 𑀢𑀼𑀘𑁆𑀙𑀢𑁄’’𑀢𑀺. 𑀅𑀧𑁆𑀧𑀓𑀢𑁆𑀢𑀸𑀢𑀺 𑀧𑀭𑀺𑀢𑁆𑀢𑀢𑁆𑀢𑀸, 𑀮𑀸𑀫𑀓𑀢𑁆𑀢𑀸 𑀯𑀸. 𑀥𑀼𑀯𑀲𑀸𑀭𑀸𑀪𑀸𑀯𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀲𑀸𑀭𑀸𑀪𑀸𑀯𑀁 𑀭𑀺𑀢𑁆𑀢𑀧𑀤𑁂𑀦 𑀯𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀫𑀢𑁆𑀢𑀲𑀸𑀭𑀸𑀪𑀸𑀯𑀫𑁂𑀯 𑀲𑀼𑀜𑁆𑀜𑀧𑀤𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀫𑀺…𑀧𑁂… 𑀲𑀼𑀜𑁆𑀜𑀢𑁄’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀓𑁂𑀦𑀘𑀺 𑀲𑀸𑀫𑀺𑀆𑀤𑀺𑀮𑀓𑁆𑀔𑀡𑁂𑀦 𑀅𑀢𑁆𑀢𑀦𑀸 𑀲𑀼𑀜𑁆𑀜𑀸 𑀏𑀢𑁂, 𑀏𑀯𑀁 𑀲𑀬𑀫𑁆𑀧𑀺 𑀅𑀢𑀁𑀲𑀪𑀸𑀯𑁄𑀢𑀺 𑀆𑀳 ‘‘𑀲𑀬𑀜𑁆𑀘…𑀧𑁂… 𑀅𑀦𑀢𑁆𑀢𑀢𑁄’’𑀢𑀺. 𑀦 𑀅𑀢𑁆𑀢𑀸𑀢𑀺 𑀳𑀺 𑀅𑀦𑀢𑁆𑀢𑀸𑀢𑀺.

𑀧𑀯𑀢𑁆𑀢𑀺𑀤𑀼𑀓𑁆𑀔𑀢𑀸𑀬𑀸𑀢𑀺 𑀪𑀯𑀧𑀯𑀢𑁆𑀢𑀺𑀤𑀼𑀓𑁆𑀔𑀪𑀸𑀯𑀢𑁄. 𑀪𑀯𑀧𑀯𑀢𑁆𑀢𑀺 𑀘 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑁂𑀦 𑀧𑀯𑀢𑁆𑀢𑀦𑀫𑁂𑀯, 𑀲𑁄 𑀘 𑀆𑀤𑀻𑀦𑀯𑁄. 𑀬𑀣𑀸𑀳 ‘‘𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀆𑀤𑀻𑀦𑀯𑁄’’𑀢𑀺. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀲𑁆𑀲 𑀘 𑀆𑀤𑀻𑀦𑀯𑀢𑀸𑀬𑀸’’𑀢𑀺. 𑀆𑀤𑀻𑀦𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀏𑀓𑀫𑀦𑁆𑀢’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁬𑁫), 𑀅𑀢𑀺𑀯𑀺𑀬 𑀓𑀧𑀡𑀦𑁆𑀢𑀺 𑀅𑀢𑁆𑀣𑁄. 𑀪𑀼𑀲𑀢𑁆𑀣𑁄 𑀳𑀺 𑀅𑀬𑀁 𑀆-𑀓𑀸𑀭𑁄. 𑀬𑀣𑀸 ‘‘𑀤𑁆𑀯𑀺𑀥𑀸 𑀙𑀺𑀤𑁆𑀤𑀓𑀁 𑀯𑀺𑀘𑁆𑀙𑀺𑀤𑁆𑀤𑀓’’𑀦𑁆𑀢𑀺 𑀏𑀢𑁆𑀣 𑀤𑁆𑀯𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑁂 𑀯𑀺-𑀲𑀤𑁆𑀤𑁄, 𑀏𑀯𑀫𑀺𑀥𑀸𑀧𑀻𑀢𑀺 𑀆𑀳 ‘‘𑀤𑁆𑀯𑁂𑀥𑀸 𑀧𑀭𑀺𑀡𑀸𑀫𑀧𑀓𑀢𑀺𑀢𑀸𑀬 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄’’𑀢𑀺. 𑀯𑀺𑀧𑀭𑀺𑀡𑀸𑀫𑁄 𑀘 𑀯𑀺𑀧𑀭𑀻𑀢𑀲𑀪𑀸𑀯𑀸𑀧𑀢𑁆𑀢𑀺. 𑀤𑀼𑀩𑁆𑀩𑀮𑀢𑀸𑀬𑀸𑀢𑀺 𑀲𑀭𑀲𑀪𑀺𑀤𑀼𑀭𑀢𑀸𑀬 𑀩𑀮𑀸𑀪𑀸𑀯𑀢𑁄. 𑀤𑀼𑀩𑁆𑀩𑀮𑀫𑁆𑀧𑀺 𑀓𑀺𑀜𑁆𑀘𑀺 𑀫𑀼𑀤𑀼𑀓𑀫𑁆𑀫𑀜𑁆𑀜𑀸𑀪𑀸𑀯𑁂𑀦 𑀤𑀼𑀧𑁆𑀧𑀥𑀁𑀲𑀺𑀬𑀸. 𑀇𑀫𑁂 𑀧𑀦 𑀲𑀼𑀧𑀥𑀁𑀲𑀺𑀬𑀸 𑀏𑀯𑀸𑀢𑀺 𑀆𑀳 ‘‘𑀨𑁂𑀕𑁆𑀕𑀼 𑀯𑀺𑀬 𑀲𑀼𑀔𑀪𑀜𑁆𑀚𑀦𑀻𑀬𑀢𑀸𑀬 𑀘𑀸’’𑀢𑀺. 𑀅𑀖𑀲𑁆𑀲 𑀧𑀸𑀧𑀲𑁆𑀲 𑀳𑁂𑀢𑀼𑀢𑀸 𑀅𑀖𑀳𑁂𑀢𑀼𑀢𑀸. 𑀔𑀦𑁆𑀥𑀧𑀝𑀺𑀩𑀤𑁆𑀥𑀫𑁂𑀯 𑀳𑀺 𑀲𑀩𑁆𑀩𑀁 𑀓𑀺𑀩𑁆𑀩𑀺𑀲𑀦𑁆𑀢𑀺. 𑀇𑀫𑁂 𑀭𑀽𑀧𑀸𑀤𑀬𑁄 𑀲𑀼𑀔𑀳𑁂𑀢𑀼, 𑀦 𑀤𑀼𑀓𑁆𑀔𑀳𑁂𑀢𑀽𑀢𑀺 𑀚𑀦𑀺𑀢𑀯𑀺𑀲𑁆𑀲𑀸𑀲𑀸𑀦𑀁 𑀳𑀦𑀦𑀲𑀻𑀮𑀢𑀸𑀬, 𑀔𑀦𑁆𑀥𑁂𑀲𑀼 𑀳𑀺 ‘‘𑀏𑀢𑀁 𑀫𑀫𑀸’’𑀢𑀺 𑀕𑀸𑀳𑀯𑀲𑁂𑀦 𑀲𑀢𑁆𑀢𑀸 𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑀺, 𑀯𑀺𑀲𑁆𑀲𑀸𑀲𑀁 𑀯𑀸 𑀳𑀦𑀦𑁆𑀢𑀻𑀢𑀺 𑀯𑀺𑀲𑁆𑀲𑀸𑀲𑀖𑀸𑀢𑀺𑀦𑁄, 𑀢𑀩𑁆𑀪𑀸𑀯𑀢𑁄.

𑀯𑀺𑀕𑀢𑀪𑀯𑀢𑀸𑀬𑀸𑀢𑀺 𑀅𑀧𑀕𑀢𑀯𑀟𑁆𑀠𑀺𑀢𑀸𑀬. 𑀯𑀺𑀪𑀯𑀢𑀡𑁆𑀳𑀸, 𑀯𑀺𑀪𑀯𑀤𑀺𑀝𑁆𑀞𑀺 𑀘 𑀯𑀺𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀢𑁄 𑀯𑀺𑀪𑀯𑀢𑁄, 𑀧𑀺𑀢𑀼𑀲𑀤𑀺𑀲𑀲𑁆𑀲 𑀯𑀸 𑀲𑀪𑀸𑀯𑀳𑁂𑀢𑀼𑀦𑁄 𑀯𑀺𑀪𑀯𑀢𑁄 𑀯𑀺𑀦𑀸𑀲𑀢𑁄 𑀲𑀫𑁆𑀪𑀽𑀢𑀢𑀸𑀬. 𑀆𑀲𑀯𑀸𑀦𑀁 𑀆𑀭𑀫𑁆𑀫𑀡𑀸𑀤𑀺𑀦𑀸 𑀧𑀘𑁆𑀘𑀬𑀪𑀸𑀯𑁄 𑀆𑀲𑀯𑀧𑀤𑀝𑁆𑀞𑀸𑀦𑀢𑀸. 𑀩𑀻𑀚𑀸𑀤𑀺𑀓𑁄 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼, 𑀪𑀽𑀢𑀲𑀮𑀺𑀮𑀸𑀤𑀺𑀓𑁄 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄. 𑀏𑀲 𑀦𑀬𑁄 𑀅𑀚𑁆𑀛𑀢𑁆𑀢𑁂𑀧𑀺. 𑀢𑁂𑀳𑀺 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀓𑀢𑁄 𑀲𑀗𑁆𑀔𑀢𑁄. 𑀫𑀘𑁆𑀘𑀼𑀫𑀸𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦, 𑀓𑀺𑀮𑁂𑀲𑀫𑀸𑀭𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀲𑀁𑀯𑀟𑁆𑀠𑀦𑀢𑁄 𑀆𑀫𑀺𑀲𑀪𑀽𑀢𑀢𑀸, 𑀔𑀦𑁆𑀥𑀸𑀧𑀺 𑀔𑀦𑁆𑀥𑀸𑀦𑀁 𑀆𑀫𑀺𑀲𑀪𑀽𑀢𑀸 𑀧𑀘𑁆𑀘𑀬𑀪𑀸𑀯𑁂𑀦 𑀲𑀁𑀯𑀟𑁆𑀠𑀦𑀢𑁄, 𑀢𑀤𑀦𑁆𑀢𑁄𑀕𑀥𑀸 𑀅𑀪𑀺𑀲𑀗𑁆𑀔𑀸𑀭𑀸. 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲 𑀧𑀦 ‘‘𑀫𑀫𑁂𑀢’’𑀦𑁆𑀢𑀺 𑀅𑀥𑀺𑀫𑀸𑀦𑀯𑀲𑁂𑀦 𑀆𑀫𑀺𑀲𑀪𑀸𑀯𑁄𑀢𑀺 𑀔𑀦𑁆𑀥𑀸𑀤𑀺𑀫𑀸𑀭𑀸𑀦𑀫𑁆𑀧𑀺 𑀇𑀫𑁂𑀲𑀁 𑀬𑀣𑀸𑀭𑀳𑀁 𑀆𑀫𑀺𑀲𑀪𑀽𑀢𑀢𑀸 𑀯𑀢𑁆𑀢𑀩𑁆𑀩𑀸. 𑀥𑀫𑁆𑀫𑀲𑀤𑁆𑀤𑁄 ‘‘𑀚𑀸𑀢𑀺𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁭𑁩; 𑀧𑀝𑀺. 𑀫. 𑁧.𑁩𑁩) 𑀯𑀺𑀬 𑀧𑀓𑀢𑀺𑀅𑀢𑁆𑀣𑁄, ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁧𑁮 𑀆𑀤𑀬𑁄) 𑀯𑀺𑀬 𑀳𑁂𑀢𑀼𑀅𑀢𑁆𑀣𑁄 𑀘𑀸𑀢𑀺 𑀆𑀳 ‘‘𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀧𑀓𑀢𑀺𑀢𑀸𑀬, 𑀲𑁄𑀓𑀧𑀭𑀺𑀤𑁂𑀯𑀉𑀧𑀸𑀬𑀸𑀲𑀳𑁂𑀢𑀼𑀢𑀸𑀬𑀸’’𑀢𑀺. 𑀲𑀁𑀓𑀺𑀮𑁂𑀲𑀢𑁆𑀢𑀬𑀕𑁆𑀕𑀳𑀡𑁂𑀦 𑀢𑀤𑁂𑀓𑀝𑁆𑀞𑀸𑀦𑀁 𑀤𑀲𑀦𑁆𑀦𑀁 𑀓𑀺𑀮𑁂𑀲𑀯𑀢𑁆𑀣𑀽𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀤𑀸𑀭𑀫𑁆𑀫𑀡𑀸𑀧𑀺 𑀳𑀺 𑀥𑀫𑁆𑀫𑀸 𑀢𑀤𑀦𑀢𑀺𑀯𑀢𑁆𑀢𑀦𑀢𑁄 𑀲𑀁𑀓𑀺𑀮𑁂𑀲𑀺𑀓𑀸 𑀏𑀯. 𑀢𑀣𑀸 𑀔𑀼𑀤𑁆𑀤𑀸, 𑀢𑀡𑁆𑀳𑀸, 𑀚𑀝𑀸𑀤𑀻𑀲𑀼 𑀲𑀭𑀻𑀭𑀲𑁆𑀲, 𑀲𑀁𑀓𑀺𑀮𑁂𑀲𑀲𑁆𑀲 𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀘𑀢𑁆𑀢𑀸𑀭𑀻𑀲𑀸𑀧𑀺 𑀲𑀫𑁆𑀫𑀲𑀦𑀸𑀦𑀺 𑀢𑀻𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼 𑀅𑀦𑁆𑀢𑁄𑀕𑀥𑀸𑀦𑁂𑀯𑀸𑀢𑀺 𑀢𑀤𑀦𑁆𑀢𑁄𑀕𑀥𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀦𑀺 𑀲𑀭𑀽𑀧𑀢𑁄, 𑀧𑀭𑀺𑀬𑀸𑀬𑀢𑁄 𑀘 𑀅𑀦𑀺𑀘𑁆𑀘𑀪𑀸𑀯𑀯𑀺𑀪𑀸𑀯𑀦𑀢𑁄. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺. ‘‘𑀅𑀲𑀸𑀭𑀓𑀢𑁄’’𑀢𑀺 𑀇𑀤𑀁 𑀦𑀺𑀘𑁆𑀘𑀲𑀸𑀭𑀸𑀪𑀸𑀯𑀯𑀺𑀪𑀸𑀯𑀦𑀁.

𑀏𑀢𑁆𑀢𑀸𑀯𑀢𑀸 𑀓𑀮𑀸𑀧𑀢𑁄 𑀥𑀫𑁆𑀫𑁂 𑀲𑀗𑁆𑀕𑀳𑁂𑀢𑁆𑀯𑀸 𑀦𑀬𑀢𑁄 𑀲𑀫𑁆𑀫𑀲𑀦𑀫𑀢𑁆𑀢𑀁 𑀤𑀲𑁆𑀲𑀺𑀢𑀁, 𑀦 𑀢𑀸𑀯 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸 𑀯𑀺𑀳𑀺𑀢𑀸𑀢𑀺 ‘‘𑀲𑀫𑁆𑀫𑀲𑀦𑀸𑀭𑀫𑁆𑀪𑀯𑀺𑀥𑀸𑀦’’𑀦𑁆𑀢𑀺. 𑀯𑀼𑀢𑁆𑀢𑀁.

𑀇𑀦𑁆𑀤𑁆𑀭𑀺𑀬𑀢𑀺𑀓𑁆𑀔𑀓𑀸𑀭𑀡𑀦𑀯𑀓𑀓𑀣𑀸𑀯𑀡𑁆𑀡𑀦𑀸

𑁬𑁯𑁯. 𑀏𑀓𑀘𑁆𑀘𑀲𑁆𑀲 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀫𑀳𑀸𑀧𑀜𑁆𑀜𑀲𑁆𑀲 𑀦𑀬𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀉𑀤𑀬𑀩𑁆𑀩𑀬𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀭𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀬𑀲𑁆𑀲 𑀧𑀦…𑀧𑁂… 𑀦 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀤𑀬𑀩𑁆𑀩𑀬𑀜𑀸𑀡𑀼𑀧𑁆𑀧𑀢𑁆𑀢𑀺 𑀳𑀺 𑀇𑀥 𑀦𑀬𑀯𑀺𑀧𑀲𑁆𑀲𑀦𑀸𑀬 𑀲𑀫𑁆𑀧𑀚𑁆𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦 ‘‘𑀦𑀯𑀳𑀸𑀓𑀸𑀭𑁂𑀳𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺 𑀪𑀯𑀦𑁆𑀢𑀺…𑀧𑁂… 𑀅𑀦𑁆𑀢𑀭𑀸 𑀘 𑀅𑀩𑁆𑀩𑁄𑀲𑀸𑀦𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀦𑀯𑀦𑁆𑀦𑀁 𑀆𑀓𑀸𑀭𑀸𑀦𑀁 𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺 𑀓𑀢𑁆𑀯𑀸 𑀲𑀧𑁆𑀧𑀸𑀬𑀸𑀦𑀺 𑀲𑁂𑀯𑀫𑀸𑀦𑁂𑀦 𑀲𑀫𑁆𑀫𑀲𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀢𑁂𑀦𑀸𑀢𑀺 𑀬𑁄𑀕𑀺𑀦𑀸. 𑀦𑀯𑀳𑀸𑀓𑀸𑀭𑁂𑀳𑀻𑀢𑀺 𑀯𑀓𑁆𑀔𑀫𑀸𑀦𑁂𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀺. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑀺𑀓𑁆𑀔𑀸𑀦𑀻𑀢𑀺 𑀢𑀺𑀔𑀺𑀡𑀸𑀦𑀺 𑀯𑀺𑀲𑀤𑀸𑀦𑀺 𑀲𑀽𑀭𑀸𑀦𑀺. 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀔𑀡𑁂 𑀔𑀡𑁂 𑀉𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀁. 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀺𑀬𑀫𑀸𑀦𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁. 𑀔𑀬𑀫𑁂𑀯𑀸𑀢𑀺 𑀧𑀞𑀫𑀁 𑀉𑀧𑁆𑀧𑀸𑀤𑀁 𑀤𑀺𑀲𑁆𑀯𑀸 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀔𑀬𑀫𑁂𑀯 𑀪𑀗𑁆𑀕𑀫𑁂𑀯 𑀧𑀲𑁆𑀲𑀢𑀺. 𑀢𑀲𑁆𑀲 𑀢𑀣𑀸𑀔𑀬𑀤𑀲𑁆𑀲𑀦𑀧𑀲𑀼𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀢𑀺𑀓𑁆𑀔𑀸 𑀲𑀽𑀭𑀸 𑀯𑀳𑀢𑀺, 𑀇𑀢𑀭𑀸𑀦𑀺 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑀢𑁆𑀣𑀸𑀢𑀺 𑀔𑀬𑀤𑀲𑁆𑀲𑀦𑁂. 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬𑀸𑀢𑀺 𑀆𑀤𑀭𑀓𑀸𑀭𑀺𑀢𑀸𑀬, 𑀬𑀣𑀸 𑀔𑀬𑀤𑀲𑁆𑀲𑀦𑀧𑀭𑀫𑁂𑀦𑁂𑀯 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀏𑀯𑀁 𑀢𑀁 𑀆𑀤𑀭𑀚𑀸𑀢𑁄 𑀲𑀫𑁆𑀧𑀸𑀤𑁂𑀢𑀺. 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬𑀸𑀢𑀺 𑀅𑀯𑀺𑀘𑁆𑀙𑁂𑀤𑀓𑀺𑀭𑀺𑀬𑀸𑀬, 𑀬𑀣𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀔𑀬𑀤𑀲𑁆𑀲𑀦𑀯𑀲𑁂𑀦 𑀦𑀺𑀭𑀦𑁆𑀢𑀭𑀫𑁂𑀯 𑀧𑀯𑀢𑁆𑀢𑀢𑀺, 𑀏𑀯𑀁 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀦𑀁 𑀲𑀫𑁆𑀧𑀸𑀤𑁂𑀢𑀺. 𑀲𑀧𑁆𑀧𑀸𑀬𑀓𑀺𑀭𑀺𑀬𑀸𑀬𑀸𑀢𑀺 𑀅𑀦𑀼𑀭𑀽𑀧𑀓𑀺𑀭𑀺𑀬𑀸𑀬 𑀆𑀯𑀸𑀲𑀸𑀤𑀺𑀲𑀢𑁆𑀢𑀯𑀺𑀥𑀲𑀧𑁆𑀧𑀸𑀬𑀸𑀲𑁂𑀯𑀦𑀓𑀺𑀭𑀺𑀬𑀸𑀬. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁂𑀦𑀸𑀢𑀺 𑀬𑀣𑀸 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀆𑀓𑀸𑀭𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀫𑀣𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑁂𑀦 𑀲𑀫𑁆𑀧𑀸𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀼𑀧𑀯𑀢𑁆𑀢𑀦𑀢𑀸𑀬𑀸𑀢𑀺 𑀅𑀦𑀼𑀭𑀽𑀧𑀢𑁄 𑀧𑀯𑀢𑁆𑀢𑀦𑁂𑀦 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀮𑀻𑀦𑀪𑀸𑀯𑁂 𑀧𑀻𑀢𑀺𑀯𑀻𑀭𑀺𑀬𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀉𑀤𑁆𑀥𑀢𑀪𑀸𑀯𑁂 𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀩𑁆𑀭𑀽𑀳𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀢𑀦𑁆𑀢𑀺 𑀅𑀢𑁆𑀢𑀦𑁄 𑀓𑀸𑀬𑁂 𑀅𑀲𑀼𑀘𑀺𑀪𑀸𑀯𑁂𑀦 𑀩𑀸𑀳𑀺𑀭𑀓𑀅𑀯𑀺𑀜𑁆𑀜𑀸𑀡𑀓𑀓𑀼𑀡𑀧𑁂 𑀯𑀺𑀬 𑀚𑀻𑀯𑀺𑀢𑁂 𑀅𑀳𑀺𑀢𑀸𑀯𑀳𑀧𑀘𑁆𑀘𑀢𑁆𑀣𑀺𑀓𑁂 𑀯𑀺𑀬 𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀺. 𑀢𑀢𑁆𑀣 𑀘 𑀅𑀪𑀺𑀪𑀼𑀬𑁆𑀬 𑀦𑁂𑀓𑁆𑀔𑀫𑁆𑀫𑁂𑀦𑀸𑀢𑀺 𑀢𑀲𑁆𑀫𑀺𑀁 𑀓𑀸𑀬𑀘𑀺𑀢𑁆𑀢𑁂 𑀅𑀦𑀧𑁂𑀓𑁆𑀔𑀪𑀸𑀯𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀪𑀸𑀯𑀸𑀧𑀸𑀤𑀦𑁂𑀦 𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀯𑀻𑀭𑀺𑀬𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀢𑀺. 𑀅𑀦𑁆𑀢𑀭𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀸𑀬 𑀪𑀸𑀯𑀦𑀸𑀲𑀺𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀯. 𑀅𑀩𑁆𑀩𑁄𑀲𑀸𑀦𑁂𑀦𑀸𑀢𑀺 𑀅𑀲𑀗𑁆𑀓𑁄𑀘𑀦𑁂𑀦.

𑀏𑀯𑀁 𑀯𑀼𑀢𑁆𑀢𑀸𑀦𑀦𑁆𑀢𑀺 𑀏𑀯𑀁 ‘‘𑀦𑀯𑀳𑀸𑀓𑀸𑀭𑁂𑀳𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺 𑀪𑀯𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀦𑀁. 𑀏𑀢𑁆𑀣 𑀘 𑀬𑀣𑀸 𑀦𑀸𑀫 𑀲𑀼𑀔𑀼𑀫𑀸𑀦𑀁 𑀫𑀼𑀢𑁆𑀢𑀸𑀧𑀯𑀸𑀴𑀸𑀤𑀻𑀦𑀁 𑀯𑀺𑀚𑁆𑀛𑀦𑁂 𑀲𑀼𑀔𑀼𑀫𑀢𑀭𑁂𑀦 𑀯𑁂𑀥𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀯𑀫𑁂𑀯 𑀲𑀡𑁆𑀳𑀲𑀼𑀔𑀼𑀫𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁, 𑀧𑀘𑁆𑀘𑀬𑀲𑁆𑀲 𑀘 𑀧𑀭𑀺𑀕𑁆𑀕𑀡𑁆𑀳𑀦𑁂 𑀢𑀺𑀓𑁆𑀔𑁂𑀦 𑀜𑀸𑀡𑁂𑀦 𑀪𑀯𑀺𑀢𑀩𑁆𑀩𑀁. 𑀢𑁂𑀲𑀁 𑀧𑀦 𑀔𑀬𑀯𑀬𑀤𑀲𑁆𑀲𑀦𑁂 𑀢𑀺𑀓𑁆𑀔𑀢𑀭𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀺𑀓𑁆𑀔𑀢𑀭𑀢𑀸 𑀘𑀲𑁆𑀲 𑀦𑀺𑀲𑀸𑀦𑀲𑀺𑀮𑀸𑀬𑀁 𑀲𑀡𑁆𑀳𑀫𑀝𑁆𑀞𑀢𑀸𑀬 𑀓𑀭𑀡𑁂𑀦 𑀯𑀺𑀬 𑀨𑀭𑀲𑀼𑀥𑀸𑀭𑀸𑀬 𑀦𑀺𑀲𑀺𑀢𑀪𑀸𑀯𑀸𑀧𑀸𑀤𑀦𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀪𑀸𑀯𑀸𑀧𑀸𑀤𑀦𑁂𑀦 𑀲𑀸𑀥𑁂𑀢𑀩𑁆𑀩𑀸. 𑀢𑀜𑁆𑀘 𑀬𑁂𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀺 𑀳𑁄𑀢𑀺, 𑀢𑁂𑀲𑀼 𑀔𑀡𑀺𑀓𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀸𑀓𑀸𑀭𑀤𑀲𑁆𑀲𑀦𑀁 𑀧𑀞𑀫𑀁 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀔𑀬𑀫𑁂𑀯 𑀧𑀲𑁆𑀲𑀢𑀻’’𑀢𑀺. 𑀅𑀲𑀢𑀺 𑀜𑀸𑀡𑀲𑁆𑀲 𑀢𑀺𑀓𑁆𑀔𑀢𑀭𑀪𑀸𑀯𑁂 𑀢𑀤𑀪𑀸𑀯𑀢𑁄 𑀲𑁂𑀲𑀺𑀦𑁆𑀤𑁆𑀭𑀺𑀬𑀢𑀺𑀓𑁆𑀔𑀢𑀸 𑀢𑀲𑁆𑀲 𑀲𑀫𑁆𑀪𑀸𑀭𑀪𑀸𑀯𑀢𑁄 𑀯𑀼𑀢𑁆𑀢𑀸, 𑀅𑀯𑀺𑀦𑀸𑀪𑀸𑀯𑀢𑁄 𑀯𑀸. 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀤𑀺𑀕𑁆𑀕𑀳𑀡𑀁 𑀧𑀦 𑀢𑀲𑁆𑀲 𑀉𑀧𑀸𑀬𑀤𑀲𑁆𑀲𑀦𑀁. 𑀅𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀤𑀻𑀦𑀺 𑀅𑀦𑀼𑀧𑀬𑀼𑀚𑁆𑀚𑀦𑀸𑀤𑀺𑀯𑀲𑁂𑀦 𑀯𑀚𑁆𑀚𑁂𑀢𑁆𑀯𑀸 𑀲𑀧𑁆𑀧𑀸𑀬𑀸𑀦𑀺 𑀫𑀢𑁆𑀢𑀲𑁄 𑀲𑁂𑀯𑀫𑀸𑀦𑁂𑀦. 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀘𑁆𑀘𑀦𑁆𑀢𑀯𑀺𑀥𑀼𑀭𑀢𑀸𑀬 𑀏𑀓𑀚𑁆𑀛𑀁 𑀅𑀲𑀫𑁆𑀫𑀲𑀺𑀢𑀩𑁆𑀩𑀢𑁆𑀢𑀸, 𑀢𑀣𑀸 𑀲𑀫𑁆𑀫𑀲𑀦𑀲𑁆𑀲 𑀘 𑀇𑀥 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀓𑀸𑀮𑁂𑀦 𑀭𑀽𑀧𑀁 𑀲𑀫𑁆𑀫𑀲𑀺𑀢𑀩𑁆𑀩𑀁, 𑀓𑀸𑀮𑁂𑀦 𑀅𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀘 𑀭𑀽𑀧𑀲𑁆𑀲 𑀑𑀴𑀸𑀭𑀺𑀓𑀢𑀸𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀧𑀞𑀫𑀁 𑀲𑀫𑁆𑀫𑀲𑀺𑀢𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀦𑀺𑀩𑁆𑀩𑀢𑁆𑀢𑀺 𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀧𑀞𑀫𑀁 𑀢𑀸𑀯 𑀆𑀕𑀫𑀸𑀦𑀼𑀲𑀸𑀭𑀢𑁄 𑀅𑀦𑀼𑀫𑀸𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑀸. 𑀢𑀢𑁄 𑀧𑀭𑀁 𑀅𑀦𑀼𑀓𑁆𑀓𑀫𑁂𑀦 𑀩𑀮𑀧𑁆𑀧𑀢𑁆𑀢𑁂 𑀪𑀸𑀯𑀦𑀸𑀜𑀸𑀡𑁂 𑀧𑀘𑁆𑀘𑀓𑁆𑀔𑀢𑁄𑀧𑀺 𑀤𑀺𑀲𑁆𑀲𑀢𑀻𑀢𑀺.

𑀭𑀽𑀧𑀦𑀺𑀩𑁆𑀩𑀢𑁆𑀢𑀺𑀧𑀲𑁆𑀲𑀦𑀸𑀓𑀸𑀭𑀓𑀣𑀸𑀯𑀡𑁆𑀡𑀦𑀸

𑁭𑁦𑁦. 𑀲𑀩𑁆𑀩𑁂𑀲𑀦𑁆𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀅𑀡𑁆𑀟𑀚𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁. 𑀧𑀞𑀫𑀁 𑀓𑀫𑁆𑀫𑀢𑁄 𑀦𑀺𑀩𑁆𑀩𑀢𑁆𑀢𑀢𑀺 𑀢𑀁𑀫𑀽𑀮𑀓𑀢𑁆𑀢𑀸 𑀉𑀢𑀼𑀚𑀸𑀤𑀺𑀭𑀽𑀧𑀸𑀦𑀁. 𑀧𑀭𑀢𑁄 𑀧𑀯𑀢𑁆𑀢𑀦𑀓𑀓𑀸𑀬𑀤𑀲𑀓𑀸𑀤𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑀁 𑀧𑀩𑀦𑁆𑀥𑀢𑁆𑀢𑀬𑀁, 𑀲𑀦𑁆𑀢𑀢𑀺𑀲𑀻𑀲𑀁 𑀯𑀸 𑀲𑀦𑁆𑀥𑀸𑀬 ‘‘𑀢𑀺𑀲𑀦𑁆𑀢𑀢𑀺𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀤𑀦𑁆𑀥𑀁 𑀫𑀦𑁆𑀤𑀁 𑀘𑀺𑀭𑁂𑀦 𑀦𑀺𑀭𑁄𑀥𑁄 𑀏𑀢𑀲𑁆𑀲𑀸𑀢𑀺 𑀤𑀦𑁆𑀥𑀦𑀺𑀭𑁄𑀥𑀁 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑁆𑀢𑀸. 𑀢𑁂𑀦𑀸𑀳 ‘‘𑀕𑀭𑀼𑀧𑀭𑀺𑀯𑀢𑁆𑀢𑀻’’𑀢𑀺. 𑀢𑁂𑀦𑀸𑀢𑀺 𑀢𑀲𑁆𑀫𑀸, 𑀬𑀲𑁆𑀫𑀸 ‘‘𑀢𑀢𑁄 𑀲𑀻𑀖𑀢𑀭𑀁 𑀔𑁄, 𑀪𑀺𑀓𑁆𑀔𑀯𑁂, 𑀆𑀬𑀼𑀲𑀗𑁆𑀔𑀸𑀭𑀸 𑀔𑀻𑀬𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁨.𑁨𑁨𑁮) 𑀯𑀘𑀦𑀢𑁄 𑀭𑀽𑀧𑀥𑀫𑁆𑀫𑀸𑀧𑀺 𑀇𑀢𑁆𑀢𑀭𑀓𑀸𑀮𑀸 𑀏𑀯, 𑀅𑀭𑀽𑀧𑀥𑀫𑁆𑀫𑀸 𑀧𑀦 𑀢𑁂𑀳𑀺 𑀲𑀸𑀢𑀺𑀲𑀬𑀁 𑀇𑀢𑁆𑀢𑀭𑀓𑀸𑀮𑀸, 𑀢𑀲𑁆𑀫𑀸 𑀆𑀳 𑀪𑀕𑀯𑀸𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀺𑀘𑀸𑀭𑀺𑀢𑀫𑁂𑀯. 𑀢𑁂𑀳𑀺 𑀲𑀤𑀺𑀲𑀸𑀢𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀪𑀗𑁆𑀕𑀓𑁆𑀔𑀡𑁂𑀳𑀺 𑀲𑀤𑀺𑀲𑀸. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑀪𑀗𑁆𑀕𑀓𑁆𑀔𑀡𑁂𑀲𑀼 𑀯𑀺𑀲𑀤𑀺𑀲𑀢𑀸 𑀦𑀢𑁆𑀣𑀺, 𑀲𑀫𑀸𑀦𑀓𑀸𑀮𑀸𑀯 𑀢𑁂. 𑀞𑀸𑀦𑀧𑁆𑀧𑀢𑁆𑀢𑀦𑁆𑀢𑀺 𑀞𑀺𑀢𑀺𑀓𑁆𑀔𑀡𑀧𑁆𑀧𑀢𑁆𑀢𑀁. 𑀢𑁂𑀦𑀸𑀢𑀺 𑀤𑀼𑀢𑀺𑀬𑀪𑀯𑀗𑁆𑀕𑀘𑀺𑀢𑁆𑀢𑁂𑀦. 𑀯𑀢𑁆𑀣𑀼𑀭𑀽𑀧𑀁 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑁄 𑀳𑀼𑀢𑁆𑀯𑀸 𑀅𑀜𑁆𑀜𑀲𑁆𑀲 𑀦 𑀳𑁄𑀢𑀺 𑀞𑀧𑁂𑀢𑁆𑀯𑀸 𑀫𑀭𑀡𑀸𑀲𑀦𑁆𑀦𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑁂𑀦 𑀲𑀤𑁆𑀥𑀺’’𑀦𑁆𑀢𑀺𑀆𑀤𑀺.

𑀏𑀯𑀁 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺, 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀞𑀸𑀦𑀓𑁆𑀔𑀡𑁂𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂. 𑀬𑀸𑀯 𑀧𑀯𑀢𑁆𑀢𑀺 𑀦𑀸𑀫 𑀅𑀢𑁆𑀣𑀻𑀢𑀺 𑀬𑀸𑀯 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺, 𑀬𑀸𑀯 𑀯𑀸 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺. 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀬𑀜𑁆𑀳𑀺 𑀦𑀢𑁆𑀣𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀻𑀢𑀺. 𑀭𑀽𑀧𑀽𑀧𑀧𑀢𑁆𑀢𑀺𑀬𑀁 𑀲𑀁𑀲𑁂𑀤𑀚𑀸 𑀑𑀧𑀧𑀸𑀢𑀺𑀓𑀲𑀤𑀺𑀲𑀸𑀢𑀺 𑀑𑀧𑀧𑀸𑀢𑀺𑀓𑀸𑀦𑀁𑀬𑁂𑀯 𑀕𑀳𑀡𑀁. 𑀑𑀧𑀧𑀸𑀢𑀺𑀓𑀸𑀦𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀯𑀸 𑀲𑀁𑀲𑁂𑀤𑀚𑁂 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀲𑀢𑁆𑀢𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀘𑀓𑁆𑀔𑀼𑀤𑀲𑀓𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀲𑀦𑁆𑀢𑀢𑀺𑀲𑀻𑀲𑀸𑀦𑀁 𑀯𑀲𑁂𑀦.

𑁭𑁦𑁧. 𑀢𑀢𑁆𑀣𑀸𑀢𑀺 𑀓𑀫𑁆𑀫𑀢𑁄 𑀭𑀽𑀧𑀧𑀯𑀢𑁆𑀢𑀺𑀬𑀁. 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀽𑀢𑀁𑀬𑁂𑀯 𑀇𑀥 𑀓𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀓𑀫𑁆𑀫𑀁 𑀦𑀸𑀫 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸’’𑀢𑀺. 𑀚𑀻𑀯𑀺𑀢𑀦𑀯𑀓𑀁 𑀘𑀓𑁆𑀔𑀼𑀤𑀲𑀓𑀸𑀤𑀺𑀅𑀦𑁆𑀢𑁄𑀕𑀥𑀫𑁂𑀯 𑀓𑀢𑁆𑀯𑀸 ‘‘𑀲𑀫𑀲𑀢𑁆𑀢𑀢𑀺𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀯𑀸 𑀘𑀓𑁆𑀔𑀼𑀤𑀲𑀓𑀸𑀤𑀺 𑀯𑀺𑀬 𑀲𑀼𑀔𑀧𑀭𑀺𑀕𑁆𑀕𑀳𑀁 𑀦 𑀳𑁄𑀢𑀻𑀢𑀺. 𑀢𑀤𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀓𑀝𑀢𑁆𑀢𑀸𑀭𑀽𑀧𑀫𑀸𑀳. 𑀓𑀫𑁆𑀫𑀜𑁆𑀳𑀺 𑀓𑀫𑁆𑀫𑀚𑀲𑁆𑀲 𑀚𑀦𑀓𑀁, 𑀧𑀭𑀺𑀧𑀸𑀘𑀓𑀫𑁆𑀧𑀺 𑀳𑁄𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲, 𑀓𑀫𑁆𑀫𑀚𑀕𑁆𑀕𑀺𑀦𑁄 𑀘 𑀯𑀲𑁂𑀦 𑀅𑀦𑀼𑀭𑀓𑁆𑀔𑀡𑀲𑀩𑁆𑀪𑀸𑀯𑀢𑁄, 𑀆𑀳𑀸𑀭𑀸𑀤𑀺𑀧𑀝𑀺𑀮𑀸𑀪𑀳𑁂𑀢𑀼𑀢𑀸𑀬 𑀉𑀧𑀢𑁆𑀣𑀫𑁆𑀪𑀓𑀦𑀺𑀫𑀺𑀢𑁆𑀢𑀢𑁄 𑀘. 𑀢𑁂𑀦𑀸𑀳 ‘‘𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑁄𑀧𑀺 𑀳𑁄𑀢𑀻’’𑀢𑀺. 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑀢𑀸 𑀘𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑀫𑁆𑀫𑀁 𑀧𑀘𑁆𑀘𑀬𑁄 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀧𑀘𑁆𑀘𑀬𑀁, 𑀢𑀤𑁂𑀯 𑀘𑀺𑀢𑁆𑀢𑀁, 𑀢𑀁 𑀲𑀫𑀼𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀧𑀘𑁆𑀘𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁. 𑀯𑀺𑀧𑀸𑀓𑀘𑁂𑀢𑀲𑀺𑀓𑀸𑀦𑀫𑁆𑀧𑀺 𑀓𑀫𑁆𑀫𑀧𑀘𑁆𑀘𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑀸 𑀯𑀢𑁆𑀢𑀩𑁆𑀩𑀸, 𑀦 𑀯𑀸 𑀯𑀢𑁆𑀢𑀩𑁆𑀩𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀓𑀫𑁆𑀫𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸. 𑀞𑀸𑀦𑀧𑁆𑀧𑀢𑁆𑀢𑀸 𑀑𑀚𑀸 𑀅𑀜𑁆𑀜𑀁 𑀑𑀚𑀝𑁆𑀞𑀫𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑀆𑀳𑀸𑀭𑀸𑀦𑀼𑀕𑀢𑁂 𑀲𑀭𑀻𑀭𑁂𑀢𑀺 𑀕𑀳𑁂𑀢𑀩𑁆𑀩𑀁.

𑀢𑀢𑁆𑀭𑀸𑀧𑀻𑀢𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑁂𑀧𑀺 𑀑𑀚𑀝𑁆𑀞𑀫𑀓𑁂. 𑀘𑀢𑀲𑁆𑀲𑁄 𑀯𑀸 𑀧𑀜𑁆𑀘 𑀯𑀸 𑀧𑀯𑀢𑁆𑀢𑀺𑀬𑁄 𑀖𑀝𑁂𑀢𑀻𑀢𑀺 𑀲𑀤𑀺𑀲𑀲𑀦𑁆𑀢𑀢𑀺𑀯𑀲𑁂𑀦 𑀘𑀢𑀲𑁆𑀲𑁄 𑀯𑀸 𑀧𑀜𑁆𑀘 𑀯𑀸 𑀭𑀽𑀧𑀓𑀮𑀸𑀧𑀧𑁆𑀧𑀯𑀢𑁆𑀢𑀺𑀬𑁄 𑀲𑀦𑁆𑀢𑀸𑀦𑁂𑀢𑀺. 𑀩𑀸𑀳𑀺𑀭𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀦 𑀯𑀺𑀲𑀤𑀺𑀲𑀸 𑀩𑀳𑀽𑀧𑀺 𑀧𑀯𑀢𑁆𑀢𑀺𑀬𑁄 𑀖𑀝𑁂𑀢𑀻𑀢𑀺 𑀯𑀤𑀦𑁆𑀢𑀺. 𑀬𑀣𑀸 𑀓𑀫𑁆𑀫𑀧𑀘𑁆𑀘𑀬𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑁂 𑀧𑀯𑁂𑀡𑀺𑀖𑀝𑀦𑀸, 𑀏𑀯𑀁 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑁂𑀧𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀬𑀣𑀸 𑀢𑀢𑁆𑀣 𑀢𑀢𑁆𑀣 𑀓𑁄𑀝𑁆𑀞𑀸𑀲𑁂 𑀧𑀭𑀫𑁆𑀧𑀭𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁂𑀦 𑀅𑀓𑀫𑁆𑀫𑀚𑀸 𑀤𑀼𑀢𑀺𑀬𑀸𑀤𑀺𑀧𑀯𑀢𑁆𑀢𑀺𑀬𑁄 𑀅𑀲𑀫𑁆𑀪𑁂𑀤𑁂𑀦 𑀤𑀲𑁆𑀲𑀺𑀢𑀸, 𑀏𑀯𑀁 𑀓𑀫𑁆𑀫𑀚𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀉𑀢𑀼𑀯𑀲𑁂𑀦, 𑀓𑀫𑁆𑀫𑀚𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀳𑀸𑀭𑀯𑀲𑁂𑀦, 𑀓𑀫𑁆𑀫𑀧𑀘𑁆𑀘𑀬𑀘𑀺𑀢𑁆𑀢𑀚𑀸𑀳𑀸𑀭𑀉𑀢𑀼𑀲𑀫𑀼𑀝𑁆𑀞𑀸𑀦𑀉𑀢𑀼𑀆𑀳𑀸𑀭𑀯𑀲𑁂𑀦 𑀘 𑀲𑀫𑁆𑀪𑁂𑀤𑀯𑀲𑁂𑀦𑀸𑀧𑀺 𑀭𑀽𑀧𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀓𑀫𑁆𑀫𑀚𑀢𑁄 𑀧𑀯𑀢𑁆𑀢𑀆𑀳𑀸𑀭𑀸 𑀯𑀺𑀲𑁂𑀲𑀧𑀘𑁆𑀘𑀬𑀮𑀸𑀪𑁂 𑀲𑀢𑀺 𑀬𑀣𑀸𑀯𑀼𑀢𑁆𑀢𑀧𑀭𑀺𑀫𑀸𑀡𑀸𑀳𑀺 𑀧𑀯𑀢𑁆𑀢𑀻𑀳𑀺 𑀉𑀤𑁆𑀥𑀫𑁆𑀧𑀺 𑀧𑀯𑀢𑁆𑀢𑀺𑀬𑁄 𑀦 𑀖𑀝𑁂𑀦𑁆𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀳𑀺 ‘‘𑀤𑀲 𑀤𑁆𑀯𑀸𑀤𑀲 𑀯𑀸𑀭𑁂 𑀧𑀯𑀢𑁆𑀢𑀺𑀁 𑀖𑀝𑁂𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁭𑁦𑁩), ‘‘𑀏𑀯𑀁 𑀤𑀻𑀖𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀦𑀼𑀧𑀸𑀤𑀺𑀦𑁆𑀦𑀧𑀓𑁆𑀔𑁂 𑀞𑀢𑁆𑀯𑀸𑀧𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀧𑀯𑀢𑁆𑀢𑀢𑀺 𑀏𑀯𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁭𑁦𑁪) 𑀘 𑀯𑀓𑁆𑀔𑀢𑀺.

𑁭𑁦𑁨. 𑀚𑀦𑀓𑀸𑀚𑀦𑀓𑀸 𑀫𑀢𑀸𑀢𑀺 𑀧𑀼𑀭𑀺𑀫𑀓𑀸 𑀢𑀺𑀓𑁄𑀝𑁆𑀞𑀸𑀲𑀲𑀗𑁆𑀕𑀳𑀺𑀢𑀸 𑀚𑀦𑀓𑀸, 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑀺𑀓𑀸 ‘‘𑀲𑁄𑀴𑀲𑀸’’𑀢𑀺 𑀯𑀼𑀢𑁆𑀢𑀸 𑀅𑀚𑀦𑀓𑀸𑀢𑀺 𑀫𑀢𑀸 𑀜𑀸𑀢𑀸. 𑀓𑀼𑀲𑀮𑀓𑀺𑀭𑀺𑀬𑀢𑁄𑀢𑀺 𑀓𑀼𑀲𑀮𑀢𑁄 𑀘 𑀓𑀺𑀭𑀺𑀬𑀢𑁄 𑀘. 𑀇𑀭𑀺𑀬𑀸𑀬 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀧𑀣𑀪𑀸𑀯𑀢𑁄 𑀇𑀭𑀺𑀬𑀸𑀧𑀣𑁄, 𑀕𑀫𑀦𑀸𑀤𑀺, 𑀅𑀢𑁆𑀣𑀢𑁄 𑀢𑀤𑀯𑀢𑁆𑀣𑀸 𑀭𑀽𑀧𑀧𑁆𑀧𑀯𑀢𑁆𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑁄 𑀇𑀭𑀺𑀬𑀸𑀧𑀣𑁄, 𑀯𑀺𑀜𑁆𑀜𑀢𑁆𑀢𑀺 𑀘 𑀦𑀢𑁆𑀣𑀺, 𑀢𑀣𑀸𑀧𑀺 𑀦 𑀲𑀩𑁆𑀩𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀁 𑀇𑀭𑀺𑀬𑀸𑀧𑀣𑀽𑀧𑀢𑁆𑀣𑀫𑁆𑀪𑀓𑀁, 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀼𑀧𑁆𑀧𑀸𑀤𑀓𑀜𑁆𑀘 𑀳𑁄𑀢𑀺. 𑀬𑀁 𑀧𑀦 𑀘𑀺𑀢𑁆𑀢𑀁 𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀁, 𑀢𑀁 𑀏𑀓𑀁𑀲𑀢𑁄 𑀇𑀢𑀭𑀲𑁆𑀲 𑀚𑀦𑀓𑀁 𑀅𑀯𑀺𑀦𑀸𑀪𑀸𑀯𑀢𑁄, 𑀢𑀣𑀸 𑀇𑀭𑀺𑀬𑀸𑀧𑀣𑀽𑀧𑀢𑁆𑀣𑀫𑁆𑀪𑀓𑀁 𑀭𑀽𑀧𑀲𑁆𑀲. 𑀏𑀢𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀭𑀽𑀧𑀁, 𑀇𑀭𑀺𑀬𑀸𑀧𑀣𑀁, 𑀯𑀺𑀜𑁆𑀜𑀢𑁆𑀢𑀺𑀜𑁆𑀘𑀸’’𑀢𑀺 𑀲𑀫𑀼𑀘𑁆𑀘𑀬𑁄 𑀓𑀢𑁄. 𑀯𑀺𑀧𑀸𑀓𑀯𑀚𑁆𑀚𑀸𑀦𑀻𑀢𑀺 𑀏𑀢𑁆𑀣 𑀯𑀺𑀧𑀸𑀓𑀸𑀪𑀺𑀜𑁆𑀜𑀸𑀤𑁆𑀯𑀬𑀯𑀚𑁆𑀚𑀸𑀦𑀻𑀢𑀺 𑀯𑀢𑁆𑀢𑀩𑁆𑀩𑀁 𑀢𑀤𑀜𑁆𑀜𑁂𑀲𑀁𑀬𑁂𑀯 𑀲𑁂𑀲𑀕𑁆𑀕𑀳𑀡𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀦 𑀯𑀸 𑀯𑀢𑁆𑀢𑀩𑁆𑀩𑀁 𑀲𑁂𑀲𑀕𑁆𑀕𑀳𑀡𑁂𑀦𑁂𑀯 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀦𑀫𑁆𑀧𑀺 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑁄. 𑀦 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀦𑁆𑀢𑀺 𑀫𑀳𑀕𑁆𑀕𑀢𑀓𑀼𑀲𑀮𑀸𑀤𑀻𑀦𑀁 𑀲𑀦𑁆𑀢𑀪𑀸𑀯𑁂𑀦 𑀅𑀯𑀺𑀧𑁆𑀨𑀸𑀭𑀺𑀓𑀪𑀸𑀯𑀢𑁄. 𑀯𑀺𑀧𑁆𑀨𑀸𑀭𑀺𑀓𑀫𑁂𑀯 𑀳𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀤𑀺𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀇𑀭𑀺𑀬𑀸𑀧𑀣𑀽𑀧𑀢𑁆𑀣𑀫𑁆𑀪𑀓𑀸𑀦𑀺 𑀧𑀦 𑀳𑁄𑀦𑁆𑀢𑀺 𑀲𑀢𑀺𑀧𑀺 𑀲𑀦𑁆𑀢𑀪𑀸𑀯𑁂 𑀛𑀸𑀦𑀯𑁂𑀕𑁂𑀦 𑀲𑀉𑀲𑁆𑀲𑀸𑀳𑀢𑁆𑀢𑀸, 𑀬𑀢𑁄 𑀢𑁂𑀲𑀁 𑀚𑀯𑀦𑀓𑀺𑀘𑁆𑀘𑀢𑀸. 𑀧𑀜𑁆𑀘 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀽𑀧𑀫𑁂𑀯 𑀚𑀦𑀬𑀦𑁆𑀢𑀺, 𑀦 𑀇𑀭𑀺𑀬𑀸𑀧𑀣𑀁 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁂𑀦 𑀧𑀭𑀺𑀤𑀼𑀩𑁆𑀩𑀮𑀪𑀸𑀯𑀢𑁄. 𑀓𑀺𑀭𑀺𑀬𑀸𑀫𑀬𑀘𑀺𑀢𑁆𑀢𑁂𑀳𑀺 𑀅𑀯𑀺𑀫𑀺𑀲𑁆𑀲𑀪𑀯𑀗𑁆𑀕𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀔𑀦𑁆𑀥𑀸𑀤𑀺𑀲𑀭𑀻𑀭𑀸𑀯𑀬𑀯𑀸𑀦𑀁 𑀦𑀺𑀘𑁆𑀘𑀮𑀪𑀸𑀯𑁂𑀦𑀸𑀯𑀝𑁆𑀞𑀸𑀦𑀁. 𑀢𑀣𑀸 𑀳𑀺 𑀅𑀩𑁆𑀩𑁄𑀓𑀺𑀡𑁆𑀡𑁂 𑀪𑀯𑀗𑁆𑀕𑁂 𑀧𑀯𑀢𑁆𑀢𑀫𑀸𑀦𑁂 𑀅𑀗𑁆𑀕𑀸𑀦𑀺 𑀑𑀲𑀻𑀤𑀦𑁆𑀢𑀺 𑀧𑀯𑀺𑀝𑁆𑀞𑀸𑀦𑀺 𑀯𑀺𑀬 𑀳𑁄𑀦𑁆𑀢𑀺. ‘‘𑀤𑁆𑀯𑀢𑁆𑀢𑀺𑀁𑀲𑀸’’𑀢𑀺 𑀧𑀦 𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀚𑀸𑀕𑀭𑀡𑀘𑀺𑀢𑁆𑀢𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀅𑀗𑁆𑀕𑀸𑀦𑀺 𑀉𑀧𑀢𑁆𑀣𑀤𑁆𑀥𑀸𑀦𑀺 𑀬𑀣𑀸𑀧𑀯𑀢𑁆𑀢𑀇𑀭𑀺𑀬𑀸𑀧𑀣𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀲𑀩𑁆𑀩𑀤𑀼𑀩𑁆𑀩𑀮𑀢𑀸𑀬 𑀭𑀽𑀧𑀁 𑀦 𑀚𑀦𑁂𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀯𑀢𑁆𑀣𑀼𑀤𑀼𑀩𑁆𑀩𑀮𑀢𑀸𑀬. 𑀔𑀻𑀡𑀸𑀲𑀯𑀸𑀦𑀁 𑀘𑀼𑀢𑀺𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑁋

‘‘𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀭𑀽𑀧𑀸𑀯𑀘𑀭𑁂 𑀅𑀭𑀽𑀧𑀸𑀯𑀘𑀭𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁, 𑀬𑁂 𑀘 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄 𑀘 𑀢𑁂𑀲𑀁 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁮𑁮) 𑁋

𑀧𑀦 𑀯𑀘𑀦𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑁆𑀲 𑀕𑀩𑁆𑀪𑀕𑀢𑀢𑀸𑀤𑀺𑀯𑀺𑀩𑀦𑁆𑀥𑀸𑀪𑀸𑀯𑁂 𑀓𑀸𑀬𑀲𑀗𑁆𑀔𑀸𑀭𑀸𑀲𑀫𑀼𑀝𑁆𑀞𑀸𑀧𑀦𑁂 𑀓𑀸𑀭𑀡𑀁 𑀅𑀢𑁆𑀣𑀺, 𑀦 𑀘 𑀬𑀼𑀢𑁆𑀢𑀁 𑀘𑀼𑀢𑁄 𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀜𑁆𑀘𑀲𑁆𑀲 𑀧𑀯𑀢𑁆𑀢𑀢𑀺, 𑀦𑀸𑀧𑀺 ‘‘𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 𑀧𑀸𑀴𑀺 𑀅𑀢𑁆𑀣𑀺, ‘‘𑀔𑀻𑀡𑀸𑀲𑀯𑀸𑀦’’𑀦𑁆𑀢𑀺, 𑀧𑀦 𑀯𑀺𑀲𑁂𑀲𑀦𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀦𑁆𑀢𑀲𑁆𑀲 𑀢𑁂𑀲𑀁 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀁 𑀧𑀸𑀓𑀝𑀦𑁆𑀢𑀺 𑀓𑀢𑁆𑀯𑀸 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁄𑀴𑀲 𑀘𑀺𑀢𑁆𑀢𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀡𑀁 𑀢𑁂𑀲𑀁 𑀭𑀽𑀧𑀚𑀦𑀦𑁂 𑀏𑀓𑀁𑀲𑀢𑁄 𑀦𑀺𑀬𑀫𑁂𑀢𑀩𑁆𑀩𑀢𑁆𑀢𑀸, 𑀅𑀜𑁆𑀜𑀸𑀦𑀺 𑀧𑀦 𑀩𑀳𑀽𑀦𑀺 𑀅𑀭𑀽𑀧𑁂 𑀉𑀧𑁆𑀧𑀦𑁆𑀦𑀸𑀦𑀺 𑀅𑀦𑁄𑀓𑀸𑀲𑀕𑀢𑀢𑁆𑀢𑀸 𑀭𑀽𑀧𑀁 𑀦 𑀚𑀦𑁂𑀦𑁆𑀢𑀺𑀬𑁂𑀯. 𑀦 𑀞𑀺𑀢𑀺𑀓𑁆𑀔𑀡𑁂, 𑀪𑀗𑁆𑀕𑀓𑁆𑀔𑀡𑁂 𑀯𑀸 𑀭𑀽𑀧𑀁 𑀚𑀦𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀧𑀦 𑀩𑀮𑀯𑀁 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀮𑀸𑀪𑀢𑁄.

𑀬𑀣𑀸 𑀧𑀣𑀯𑀻𑀆𑀤𑀬𑁄 𑀭𑀽𑀧𑀥𑀫𑁆𑀫𑀸 𑀘𑀺𑀢𑁆𑀢𑀳𑁂𑀢𑀼𑀓𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀏𑀯𑀁 𑀯𑁂𑀤𑀦𑀸𑀤𑀬𑁄𑀧𑀻𑀢𑀺 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸, 𑀲𑀤𑁆𑀤𑀦𑀯𑀓’’𑀦𑁆𑀢𑀺𑀆𑀤𑀺. 𑀢𑁂𑀦𑁂𑀯𑀸𑀳 𑁋 ‘‘𑀓𑀢𑀫𑁂 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸? 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀻’’𑀢𑀺 (𑀥. 𑀲. 𑁧𑁨𑁦𑁧, 𑁧𑁫𑁩𑁫). 𑀢𑀢𑁆𑀣 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀆𑀤𑀻𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑀸 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸 𑀢𑁂𑀲𑀁 𑀅𑀦𑀺𑀧𑁆𑀨𑀦𑁆𑀦𑀢𑁆𑀢𑀸. ‘‘𑀏𑀯𑀁 𑀯𑀼𑀢𑁆𑀢𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧’’𑀦𑁆𑀢𑀺 𑀇𑀫𑀺𑀦𑀸 𑀅𑀢𑀁𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯 𑀘𑀺𑀢𑁆𑀢𑀚𑀭𑀽𑀧𑀲𑁆𑀲 𑀘𑀺𑀢𑁆𑀢𑀧𑀘𑁆𑀘𑀬𑀢𑀸 𑀤𑀲𑁆𑀲𑀺𑀢𑀸. 𑀬𑀣𑀸 𑀧𑀦 𑀓𑀫𑁆𑀫𑀧𑀘𑁆𑀘𑀬𑀁 𑀤𑀲𑁆𑀲𑀺𑀢𑀁, 𑀏𑀯𑀁 𑀘𑀺𑀢𑁆𑀢𑀧𑀘𑁆𑀘𑀬𑁂 𑀕𑀬𑁆𑀳𑀫𑀸𑀦𑁂 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲, 𑀲𑀳𑀚𑀸𑀢𑀯𑁂𑀤𑀦𑀸𑀤𑀻𑀦𑀜𑁆𑀘 𑀘𑀺𑀢𑁆𑀢𑀧𑀘𑁆𑀘𑀬𑀢𑀸 𑀲𑀺𑀬𑀸. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀘𑀺𑀢𑁆𑀢𑀧𑀘𑁆𑀘𑀬𑁂 𑀧𑀦 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀯𑀲𑁂𑀦𑁂𑀯 𑀘𑀺𑀢𑁆𑀢𑀧𑀘𑁆𑀘𑀬𑀁 𑀉𑀤𑁆𑀥𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀉𑀢𑀼𑀆𑀳𑀸𑀭𑁂𑀳𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀉𑀢𑀼𑀆𑀳𑀸𑀭𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀯𑀲𑁂𑀦 𑀘𑀢𑀼𑀧𑀜𑁆𑀘𑀧𑀯𑀢𑁆𑀢𑀺𑀖𑀝𑀦𑀁 𑀯𑀼𑀢𑁆𑀢𑀁, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀧𑀦 𑀯𑀲𑁂𑀦 𑀤𑁆𑀯𑀢𑁆𑀢𑀺𑀧𑁆𑀧𑀯𑀢𑁆𑀢𑀺𑀖𑀝𑀦𑀁 𑀢𑀁𑀧𑀸𑀓𑀢𑀺𑀓𑀘𑀺𑀢𑁆𑀢𑀯𑀲𑁂𑀦, 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀘𑀺𑀢𑁆𑀢𑀯𑀲𑁂𑀦 𑀧𑀦 𑀩𑀳𑀼𑀢𑀭𑀸𑀧𑀺 𑀧𑀯𑀢𑁆𑀢𑀺𑀬𑁄 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀁𑀦𑀺𑀩𑁆𑀩𑀢𑁆𑀢𑀸𑀦𑀁 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀉𑀴𑀸𑀭𑀧𑀡𑀻𑀢𑀪𑀸𑀯𑀢𑁄.

𑁭𑁦𑁩. ‘‘𑀉𑀧𑀸𑀤𑀺𑀦𑁆𑀦𑀁 𑀓𑀫𑁆𑀫𑀚𑀭𑀽𑀧𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸’’𑀢𑀺 𑀏𑀢𑁂𑀦 𑀩𑀳𑀺𑀤𑁆𑀥𑀸 𑀅𑀦𑀼𑀧𑀸𑀤𑀺𑀦𑁆𑀦𑀑𑀚𑀸 𑀭𑀽𑀧𑀸𑀳𑀭𑀡𑀓𑀺𑀘𑁆𑀘𑀁 𑀦 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀬𑀮𑀸𑀪𑁄 𑀘𑀲𑁆𑀲 𑀓𑀫𑁆𑀫𑀚𑀪𑀽𑀢𑀲𑀦𑁆𑀦𑀺𑀲𑁆𑀲𑀬𑀢𑀸𑀯𑀲𑁂𑀦𑀸𑀢𑀺 𑀆𑀳 ‘‘𑀢𑀢𑁆𑀣 𑀧𑀢𑀺𑀝𑁆𑀞𑀸𑀬𑀸’’𑀢𑀺. 𑀢𑀢𑁆𑀣 𑀓𑀫𑁆𑀫𑀧𑀘𑁆𑀘𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀭𑀽𑀧𑀲𑁆𑀲𑀧𑀺 𑀓𑀫𑁆𑀫𑀫𑀽𑀮𑀓𑀢𑁆𑀢𑀸 𑀲𑀺𑀬𑀸 𑀓𑀫𑁆𑀫𑀚𑀧𑀭𑀺𑀬𑀸𑀬𑁄𑀢𑀺 𑀢𑀁𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀉𑀧𑀸𑀤𑀺𑀦𑁆𑀦’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀆𑀳𑀸𑀭𑀧𑀘𑁆𑀘𑀬𑀲𑁆𑀲 𑀆𑀳𑀸𑀭𑁄 𑀦 𑀓𑁂𑀯𑀮𑀁 𑀉𑀧𑀢𑁆𑀣𑀫𑁆𑀪𑀓𑁄𑀯, 𑀅𑀣 𑀔𑁄 𑀚𑀦𑀓𑁄𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀤𑀲 𑀤𑁆𑀯𑀸𑀤𑀲 𑀯𑀸𑀭𑁂’’𑀢𑀺 𑀯𑀢𑁆𑀯𑀸 𑀓𑀣𑀁 𑀇𑀫𑀲𑁆𑀲𑁂𑀯 𑀤𑀲 𑀤𑁆𑀯𑀸𑀤𑀲 𑀯𑀸𑀭𑁂 𑀧𑀯𑀢𑁆𑀢𑀺𑀖𑀝𑀦𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀓𑀤𑀺𑀯𑀲𑀁 𑀧𑀭𑀺𑀪𑀼𑀢𑁆𑀢𑀸𑀳𑀸𑀭𑁄’’𑀢𑀺𑀆𑀤𑀺. 𑀤𑀸𑀭𑀓𑀲𑁆𑀲 𑀲𑀭𑀻𑀭𑀁 𑀨𑀭𑀺𑀢𑁆𑀯𑀸𑀢𑀺 𑀦𑀸𑀪𑀺𑀫𑀽𑀮𑀸𑀦𑀼𑀕𑀢𑀸𑀳𑀺 𑀭𑀲𑀳𑀭𑀡𑀻𑀳𑀺 𑀨𑀭𑀺𑀢𑁆𑀯𑀸, 𑀅𑀜𑁆𑀜𑀣𑀸 𑀚𑀮𑀸𑀩𑀼𑀅𑀦𑁆𑀢𑀭𑀺𑀓𑁂 𑀓𑀸𑀬𑁂 𑀫𑀓𑁆𑀔𑀦𑀸𑀯𑀲𑁂𑀦 𑀦 𑀲𑀫𑁆𑀫𑀸𑀯𑀺𑀦𑀺𑀬𑁄𑀕𑁄 𑀆𑀳𑀸𑀭𑀲𑁆𑀲 𑀲𑀫𑁆𑀪𑀯𑀢𑀻𑀢𑀺.

𑀉𑀧𑀸𑀤𑀺𑀦𑁆𑀦𑀓𑁄 𑀅𑀦𑀼𑀧𑀸𑀤𑀺𑀦𑁆𑀦𑀓𑁄𑀢𑀺 𑀤𑀼𑀯𑀺𑀥𑁂 𑀆𑀳𑀸𑀭𑁂 𑀧𑀼𑀩𑁆𑀩𑁂 𑀅𑀦𑀼𑀧𑀸𑀤𑀺𑀦𑁆𑀦𑀓𑁄 𑀆𑀳𑀸𑀭𑀧𑀘𑁆𑀘𑀬𑀆𑀳𑀸𑀭𑁄 𑀤𑀲𑁆𑀲𑀺𑀢𑁄𑀢𑀺 𑀇𑀢𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀚𑀸𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀓𑀫𑁆𑀫𑀧𑀘𑁆𑀘𑀬𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀢𑁂𑀦𑀸𑀳 ‘‘𑀘𑀢𑀲𑁆𑀲𑁄 𑀯𑀸 𑀧𑀜𑁆𑀘 𑀯𑀸 𑀧𑀯𑀢𑁆𑀢𑀺𑀬𑁄 𑀖𑀝𑁂𑀢𑀻’’𑀢𑀺. 𑀆𑀳𑀸𑀭𑀧𑀘𑁆𑀘𑀬𑀉𑀢𑀼𑀦𑁄𑀧𑀺 𑀉𑀢𑀼𑀧𑀘𑁆𑀘𑀬𑀸𑀳𑀸𑀭𑀲𑁆𑀲 𑀯𑀺𑀬 𑀤𑀲 𑀤𑁆𑀯𑀸𑀤𑀲 𑀯𑀸𑀭𑁂 𑀧𑀯𑀢𑁆𑀢𑀺𑀖𑀝𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀦𑀬𑀢𑁆𑀢𑀸 𑀦 𑀉𑀤𑁆𑀥𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀲𑁂𑀲𑀸𑀦𑀦𑁆𑀢𑀺 𑀓𑀫𑁆𑀫𑀘𑀺𑀢𑁆𑀢𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀁 𑀢𑀺𑀲𑀦𑁆𑀢𑀢𑀺𑀭𑀽𑀧𑀸𑀦𑀁. 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀳𑀺 𑀅𑀜𑁆𑀜𑀸𑀳𑀸𑀭𑀲𑀫𑀼𑀝𑁆𑀞𑀺𑀢𑀲𑁆𑀲, 𑀢𑀺𑀲𑀦𑁆𑀢𑀢𑀺𑀭𑀽𑀧𑀸𑀦𑀜𑁆𑀘 𑀉𑀧𑀢𑁆𑀣𑀫𑁆𑀪𑀓𑀯𑀲𑁂𑀦 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀲𑁆𑀲 𑀚𑀦𑀓𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀆𑀳𑀸𑀭𑀧𑀘𑁆𑀘𑀬𑁄 𑀳𑁄𑀦𑁆𑀢𑁄𑀬𑁂𑀯 𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀦𑀺𑀲𑁆𑀲𑀬𑀪𑀸𑀯𑁄 𑀧𑀦 𑀧𑀝𑁆𑀞𑀸𑀦𑀦𑀬𑁂𑀦 𑀦𑀢𑁆𑀣𑀺. 𑀆𑀳𑀸𑀭𑀧𑀘𑁆𑀘𑀬𑀸 𑀧𑀯𑀢𑁆𑀢𑀫𑀸𑀦𑀸𑀦𑀺 𑀭𑀽𑀧𑀸𑀦𑀺 𑀆𑀳𑀸𑀭𑀦𑀺𑀲𑁆𑀲𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀭𑀢𑁄 𑀉𑀢𑀼𑀦𑁄 𑀦𑀺𑀲𑁆𑀲𑀬𑀚𑁄𑀢𑀦𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑁭𑁦𑁪. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀬𑀧𑀺 𑀢𑁂𑀚𑁄𑀥𑀸𑀢𑀼𑀬𑀸 𑀭𑀽𑀧𑀼𑀧𑁆𑀧𑀸𑀤𑀦𑁂 𑀲𑀫𑀢𑁆𑀣𑀪𑀸𑀯𑀢𑁄 ‘‘𑀉𑀢𑀼 𑀦𑀸𑀫 𑀘𑀢𑀼𑀲𑀫𑀼𑀝𑁆𑀞𑀸𑀦𑀸 𑀢𑁂𑀚𑁄𑀥𑀸𑀢𑀽’’𑀢𑀺 𑀯𑀼𑀢𑁆𑀢𑀁. 𑀏𑀲 𑀤𑀼𑀯𑀺𑀥𑁄 𑀳𑁄𑀢𑀻𑀢𑀺 𑀏𑀲 𑀉𑀢𑀼 𑀢𑁂𑀚𑁄𑀥𑀸𑀢𑀼𑀪𑀸𑀯𑀸𑀯𑀺𑀲𑁂𑀲𑁂𑀧𑀺 𑀢𑀺𑀓𑁆𑀔𑀫𑀦𑁆𑀤𑀢𑀸𑀯𑀺𑀲𑁂𑀲𑁂𑀦 𑀉𑀡𑁆𑀳𑁄, 𑀲𑀻𑀢𑁄𑀢𑀺 𑀤𑀼𑀯𑀺𑀥𑁄 𑀳𑁄𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀺𑀘𑀸𑀭𑀺𑀢𑀫𑁂𑀯. 𑀬𑀤𑀺𑀧𑀺 𑀉𑀢𑀼 𑀉𑀧𑀸𑀤𑀺𑀦𑁆𑀦𑀓𑁂𑀦 𑀯𑀺𑀦𑀸𑀧𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑁂 𑀧𑀦 𑀢𑁂𑀦 𑀯𑀺𑀦𑀸 𑀢𑀲𑁆𑀲 𑀭𑀽𑀧𑀼𑀧𑁆𑀧𑀸𑀤𑀦𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀉𑀧𑀸𑀤𑀺𑀦𑁆𑀦𑀓𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸’’𑀢𑀺. 𑀢𑁂𑀦𑀸𑀳 ‘‘𑀘𑀢𑀼𑀲𑀫𑀼𑀝𑁆𑀞𑀸𑀦𑁄 𑀉𑀢𑀽’’𑀢𑀺. 𑀉𑀢𑀼𑀲𑀫𑀼𑀝𑁆𑀞𑀸𑀦𑁄𑀬𑁂𑀯 𑀳𑀺 𑀉𑀢𑀼 𑀉𑀧𑀸𑀤𑀺𑀦𑁆𑀦𑀓𑁂𑀦 𑀯𑀺𑀦𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀉𑀢𑀼𑀧𑀘𑁆𑀘𑀬𑀁 𑀦𑀸𑀫 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀭𑀽𑀧𑀁. 𑀬𑀜𑁆𑀳𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀧𑀦𑁆𑀦𑀭𑀲𑀯𑀺𑀥𑀁 𑀭𑀽𑀧𑀁, 𑀬𑀜𑁆𑀘 𑀢𑀤𑀜𑁆𑀜𑀢𑀺𑀲𑀦𑁆𑀢𑀢𑀺𑀭𑀽𑀧𑀁, 𑀢𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀲𑀪𑀸𑀕𑁄 𑀉𑀢𑀼𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀯𑀺𑀲𑀪𑀸𑀕𑁄 𑀉𑀢𑀼 𑀳𑀺𑀫𑀸𑀤𑀺 𑀯𑀺𑀬 𑀧𑀤𑀼𑀫𑀸𑀤𑀻𑀦𑀁 𑀯𑀺𑀲𑀤𑀺𑀲𑀭𑀽𑀧𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀧𑀼𑀭𑀺𑀫𑀭𑀽𑀧𑀁 𑀯𑀺𑀦𑀸𑀲𑁂𑀦𑁆𑀢𑀁 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀲𑀪𑀸𑀕𑀁, 𑀯𑀺𑀲𑀪𑀸𑀕𑀜𑁆𑀘 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀉𑀢𑀼 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸𑀦𑀁 𑀧𑀯𑀢𑁆𑀢𑀺𑀬𑀸 𑀘 𑀯𑀺𑀦𑀸𑀲𑀲𑁆𑀲 𑀘 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺.

𑀤𑀻𑀖𑀫𑁆𑀧𑀺 𑀅𑀤𑁆𑀥𑀸𑀦𑀦𑁆𑀢𑀺 ‘‘𑀤𑀲 𑀤𑁆𑀯𑀸𑀤𑀲 𑀯𑀸𑀭𑁂’’𑀢𑀺 𑀅𑀜𑁆𑀜𑀲𑁆𑀲 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀢𑁄 𑀤𑀻𑀖𑀫𑁆𑀧𑀺 𑀓𑀸𑀮𑀁. 𑀉𑀢𑀼 𑀳𑀺 𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦 𑀮𑀤𑁆𑀥𑀧𑀘𑁆𑀘𑀬𑀁 𑀘𑀺𑀭𑀢𑀭𑀫𑁆𑀧𑀺 𑀓𑀸𑀮𑀁 𑀲𑀤𑀺𑀲𑀸𑀓𑀸𑀭𑀁 𑀭𑀽𑀧𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀢𑀸𑀦𑁂𑀢𑀺 𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸, 𑀧𑀕𑁂𑀯 𑀇𑀢𑀭𑀣𑀸. 𑀢𑁂𑀦𑀸𑀳 ‘‘𑀅𑀦𑀼𑀧𑀸𑀤𑀺𑀦𑁆𑀦𑀧𑀓𑁆𑀔𑁂 𑀞𑀢𑁆𑀯𑀸𑀧𑀻’’𑀢𑀺, 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀓𑁂𑀲𑀮𑁄𑀫𑀦𑀔𑀘𑀫𑁆𑀫𑀔𑀺𑀮𑀢𑀺𑀮𑀓𑀸𑀤𑀺𑀯𑀲𑁂𑀦 𑀚𑀻𑀯𑀫𑀸𑀦𑀲𑀭𑀻𑀭𑁂 𑀅𑀜𑁆𑀜𑀢𑁆𑀣 𑀫𑀢𑀓𑀴𑁂𑀯𑀭𑀸𑀤𑀺𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸 𑀤𑀺𑀝𑁆𑀞𑀸𑀬 𑀢𑀲𑁆𑀲 𑀪𑀗𑁆𑀕𑁄𑀧𑀺 𑀤𑀺𑀝𑁆𑀞𑁄𑀬𑁂𑀯 𑀳𑁄𑀢𑀺 𑀇𑀢𑁆𑀢𑀭𑀓𑀸𑀮𑀢𑁆𑀢𑀸 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀆𑀳 ‘‘𑀦𑀺𑀩𑁆𑀩𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑁄 𑀓𑀸𑀮𑁂𑀦 𑀭𑀽𑀧𑀁 𑀲𑀫𑁆𑀫𑀲𑀢𑀺 𑀦𑀸𑀫𑀸’’𑀢𑀺. 𑀦 𑀳𑀺 𑀦𑀺𑀩𑁆𑀩𑀢𑁆𑀢𑀺𑀫𑀢𑁆𑀢𑀤𑀲𑁆𑀲𑀦𑀁 𑀲𑀫𑁆𑀫𑀲𑀦𑀁 𑀦𑀸𑀫 𑀳𑁄𑀢𑀺, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀜𑁆𑀘 𑀅𑀥𑀺𑀓𑀢𑀦𑁆𑀢𑀺. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺 𑀦𑀺𑀩𑁆𑀩𑀢𑁆𑀢𑀺𑀕𑁆𑀕𑀳𑀡𑁂𑀲𑀼.

𑀅𑀭𑀽𑀧𑀦𑀺𑀩𑁆𑀩𑀢𑁆𑀢𑀺𑀧𑀲𑁆𑀲𑀦𑀸𑀓𑀸𑀭𑀓𑀣𑀸𑀯𑀡𑁆𑀡𑀦𑀸

𑁭𑁦𑁫. 𑀮𑁄𑀓𑀺𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀇𑀢𑀭𑀲𑁆𑀲 𑀅𑀯𑀺𑀲𑀬𑀢𑁆𑀢𑀸.

𑀦𑀺𑀩𑁆𑀩𑀢𑁆𑀢𑀢𑀺 𑀢𑀁𑀢𑀁𑀪𑀯𑀯𑀲𑁂𑀦. 𑀢𑀤𑁂𑀯 𑀏𑀓𑀽𑀦𑀯𑀻𑀲𑀢𑀺𑀧𑁆𑀧𑀪𑁂𑀤𑀁 𑀘𑀺𑀢𑁆𑀢𑀁 𑀪𑀯𑀗𑁆𑀕𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀘𑀼𑀢𑀺𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼. 𑀅𑀦𑀦𑁆𑀢𑀭𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬𑀸𑀢𑀺𑀆𑀤𑀺𑀦𑀸𑀧𑀺 𑀧𑀯𑀢𑁆𑀢𑀺𑀬𑁂𑀯 𑀯𑀼𑀢𑁆𑀢𑀸.

𑀲𑁄 𑀧𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀁𑀬𑁂𑀯 𑀧𑀯𑀢𑁆𑀢𑀺𑀬𑀁 𑀧𑀯𑀢𑁆𑀢𑀦𑀸𑀓𑀸𑀭𑁄𑀢𑀺 𑀲𑀼𑀤𑁆𑀥𑀧𑁆𑀧𑀯𑀢𑁆𑀢𑀺𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀯𑀢𑁆𑀢𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑀫𑁆𑀪𑀺𑀦𑁆𑀦𑀢𑁆𑀢𑀸𑀢𑀺 𑀅𑀯𑀺𑀦𑀝𑁆𑀞𑀢𑁆𑀢𑀸. ‘‘𑀅𑀲𑀫𑁆𑀪𑀺𑀦𑁆𑀦𑀢𑁆𑀢𑀸 𑀘𑀓𑁆𑀔𑀼𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀞𑀺𑀢𑀺𑀧𑁆𑀧𑀢𑁆𑀢𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀬𑀣𑀸 𑀦𑀺𑀭𑀼𑀚𑁆𑀛𑀫𑀸𑀦𑀁 𑀭𑀽𑀧𑀁 𑀓𑀲𑁆𑀲𑀘𑀺 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀏𑀓𑀁 𑀯𑀸 𑀧𑀜𑁆𑀘, 𑀲𑀢𑁆𑀢 𑀯𑀸 𑀚𑀯𑀦𑀸𑀦𑀺 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀁 𑀘𑀺𑀢𑁆𑀢𑀁 𑀯𑀸𑀢𑀺 𑀯𑀸-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀯𑁄𑀝𑁆𑀞𑀩𑁆𑀩𑀦𑀜𑁆𑀳𑀺 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁, 𑀢𑀁 𑀧𑀦 𑀤𑀼𑀢𑀺𑀬𑀫𑁄𑀖𑀯𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘 𑀚𑀯𑀦𑀸𑀦𑀺 𑀲𑀼𑀢𑁆𑀢𑀫𑀼𑀘𑁆𑀙𑀺𑀢𑀸𑀤𑀺𑀓𑀸𑀮𑁂, 𑀲𑀢𑁆𑀢 𑀧𑀸𑀓𑀢𑀺𑀓𑀓𑀸𑀮𑁂 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀚𑀯𑀦𑀸𑀭𑀫𑁆𑀫𑀡𑀸𑀦𑀼𑀭𑀽𑀧𑀦𑁆𑀢𑀺 ‘‘𑀢𑀺𑀳𑁂𑀢𑀼𑀓𑀁 𑀘𑁂 𑀚𑀯𑀦𑀁, 𑀢𑀺𑀳𑁂𑀢𑀼𑀓𑀁, 𑀤𑁆𑀯𑀺𑀳𑁂𑀢𑀼𑀓𑀁 𑀯𑀸’’𑀢𑀺𑀆𑀤𑀺𑀦𑀸, ‘‘𑀇𑀝𑁆𑀞𑀁 𑀘𑁂 𑀆𑀭𑀫𑁆𑀫𑀡𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀘 𑀚𑀯𑀦𑀲𑁆𑀲, 𑀆𑀭𑀫𑁆𑀫𑀡𑀲𑁆𑀲 𑀘 𑀅𑀦𑀼𑀭𑀽𑀧𑀁. 𑀲𑁂𑀲𑀤𑁆𑀯𑀸𑀭𑁂𑀲𑀽𑀢𑀺 𑀲𑁄𑀢𑀤𑁆𑀯𑀸𑀭𑀸𑀤𑀺𑀲𑁂𑀲𑀤𑁆𑀯𑀸𑀭𑁂𑀲𑀼.

𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀸𑀥𑀺𑀕𑀫𑀸𑀦𑀼𑀓𑁆𑀓𑀫𑁂𑀦 𑀧𑀜𑁆𑀜𑀸𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀢𑀺 𑀅𑀭𑀳𑀢𑁆𑀢𑀁 𑀅𑀥𑀺𑀕𑀘𑁆𑀙𑀢𑀺.

𑀭𑀽𑀧𑀲𑀢𑁆𑀢𑀓𑀲𑀫𑁆𑀫𑀲𑀦𑀓𑀣𑀸𑀯𑀡𑁆𑀡𑀦𑀸

𑁭𑁦𑁬. 𑀭𑀽𑀧𑁂𑀲𑀼 𑀫𑀦𑀲𑀺𑀓𑀸𑀭𑀲𑀢𑁆𑀢𑀓𑀁 𑀭𑀽𑀧𑀲𑀢𑁆𑀢𑀓𑀁, 𑀭𑀽𑀧𑀥𑀫𑁆𑀫𑁂𑀲𑀼 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀫𑀦𑀲𑀺 𑀓𑀸𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀭𑀽𑀧𑀲𑀢𑁆𑀢𑀓𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀇𑀫𑁂𑀳𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀫𑀦𑀲𑀺𑀓𑀸𑀭𑀸𑀤𑀺𑀧𑁆𑀧𑀓𑀸𑀭𑁂𑀳𑀺, 𑀇𑀫𑁂𑀳𑀺 𑀯𑀸 𑀬𑀣𑀸𑀯𑀼𑀢𑁆𑀢𑀓𑁄𑀝𑁆𑀞𑀸𑀲𑁂𑀳𑀺. 𑀆𑀭𑁄𑀧𑁂𑀢𑁆𑀯𑀸𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸.

𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀢𑁄𑀢𑀺 𑀪𑀯𑀲𑁆𑀲 𑀕𑀳𑀡𑀯𑀺𑀲𑁆𑀲𑀚𑁆𑀚𑀦𑀢𑁄, 𑀚𑀸𑀢𑀺𑀢𑁄, 𑀫𑀭𑀡𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀯𑀬𑁄𑀯𑀼𑀟𑁆𑀠𑀢𑁆𑀣𑀕𑀸𑀫𑀺𑀢𑁄𑀢𑀺 𑀯𑀬𑀲𑀸 𑀯𑀼𑀟𑁆𑀠𑀲𑁆𑀲 𑀅𑀢𑁆𑀣𑀕𑀸𑀫𑀺𑀪𑀸𑀯𑀢𑁄, 𑀅𑀢𑁆𑀣𑀗𑁆𑀕𑀫𑀢𑁄 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀆𑀳𑀸𑀭𑀢𑁄𑀢𑀺 𑀆𑀳𑀸𑀭𑀳𑁂𑀢𑀼, 𑀭𑀽𑀧𑀲𑁆𑀲 𑀧𑀘𑁆𑀘𑀬𑀪𑀽𑀢𑀆𑀳𑀸𑀭𑀢𑁄𑀢𑀺 𑀅𑀢𑁆𑀣𑁄. 𑀅𑀬𑀮𑁄𑀳𑀸𑀤𑀺𑀪𑀽𑀫𑀺𑀧𑀸𑀲𑀸𑀡𑀸𑀤𑀺𑀪𑁂𑀤𑀁 𑀯𑀺𑀯𑀺𑀥𑀯𑀡𑁆𑀡𑀲𑀡𑁆𑀞𑀸𑀦𑀁 𑀓𑀫𑁆𑀫𑀸𑀦𑀧𑁂𑀓𑁆𑀔𑀁 𑀲𑀪𑀸𑀯𑀲𑀺𑀤𑁆𑀥𑀁 𑀭𑀽𑀧𑀁 𑀥𑀫𑁆𑀫𑀢𑀸𑀭𑀽𑀧𑀁. 𑀲𑀢𑁆𑀢𑀸𑀢𑀺 𑀲𑀢𑁆𑀢𑀥𑀸 𑀲𑀢𑁆𑀢𑀳𑀸𑀓𑀸𑀭𑁂𑀳𑀺. 𑀯𑀺𑀧𑀲𑁆𑀲𑀢𑀻𑀢𑀺 𑀢𑀁 𑀢𑀁 𑀓𑁄𑀝𑁆𑀞𑀸𑀲𑀁 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀢𑀺 𑀲𑀫𑁆𑀫𑀲𑀢𑀺.

‘‘𑀪𑀸𑀭𑀸𑀤𑀸𑀦𑀁 𑀤𑀼𑀔𑀁 𑀮𑁄𑀓𑁂’’𑀢𑀺 𑀯𑀘𑀦𑀢𑁄 𑀔𑀦𑁆𑀥𑀪𑀸𑀭𑀲𑁆𑀲 𑀆𑀤𑀺𑀢𑁄 𑀕𑀳𑀡𑀦𑁆𑀢𑀺 𑀓𑀢𑁆𑀯𑀸 ‘‘𑀆𑀤𑀸𑀦𑀦𑁆𑀢𑀺 𑀧𑀝𑀺𑀲𑀦𑁆𑀥𑀻’’𑀢𑀺 𑀆𑀳. ‘‘𑀲𑀩𑁆𑀩𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬’’𑀦𑁆𑀢𑀺 (𑀤𑀻. 𑀦𑀺. 𑁨.𑁨𑁨𑁦; 𑀲𑀁. 𑀦𑀺. 𑁧.𑁧𑁮𑁬) 𑀧𑀦 𑀯𑀘𑀦𑀢𑁄 𑀔𑀦𑁆𑀥𑀪𑀸𑀭𑀦𑀺𑀓𑁆𑀔𑁂𑀧𑁄𑀢𑀺 𑀓𑀢𑁆𑀯𑀸 ‘‘𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀘𑀼𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢’’𑀦𑁆𑀢𑀺 (𑀤𑀻. 𑀦𑀺. 𑁨.𑁭; 𑀲𑀁. 𑀦𑀺. 𑁧.𑁧𑁪𑁫-𑁧𑁪𑁬; 𑀅. 𑀦𑀺. 𑁭.𑁭𑁪) 𑀯𑀘𑀦𑀢𑁄 𑀢𑀢𑁄 𑀊𑀦𑀸𑀥𑀺𑀓𑀪𑀸𑀯𑁄 𑀅𑀧𑁆𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀁 𑀯𑀲𑁆𑀲𑀲𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺. 𑀏𑀢𑁆𑀣𑀦𑁆𑀢𑀭𑁂 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸𑀢𑀺 𑀏𑀢𑀲𑁆𑀫𑀺𑀁 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑁆𑀢𑀭𑁂 𑀧𑀯𑀢𑁆𑀢𑀸 𑀲𑀩𑁆𑀩𑁂 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀧𑁆𑀧𑀪𑁂𑀤𑀸 𑀲𑀗𑁆𑀔𑀸𑀭𑀸. 𑀭𑀽𑀧𑀥𑀫𑁆𑀫𑁂𑀲𑀼 𑀳𑀺 𑀇𑀤𑀁 𑀲𑀫𑁆𑀫𑀲𑀦𑀯𑀺𑀥𑀸𑀦𑀦𑁆𑀢𑀺. ‘‘𑀅𑀦𑀺𑀘𑁆𑀘𑀸’’𑀢𑀺 𑀕𑀳𑀺𑀢𑀫𑀢𑁆𑀢𑀁 𑀬𑀼𑀢𑁆𑀢𑀺𑀢𑁄 𑀳𑀤𑀬𑁂 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑁆𑀧𑀸𑀤𑀯𑀬𑀯𑀢𑁆𑀢𑀺𑀢𑁄𑀢𑀺 𑀉𑀧𑁆𑀧𑀚𑁆𑀚𑀦𑀯𑀲𑁂𑀦, 𑀦𑀺𑀭𑀼𑀚𑁆𑀛𑀦𑀯𑀲𑁂𑀦 𑀘 𑀧𑀯𑀢𑁆𑀢𑀦𑀢𑁄, 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀢𑁄 𑀳𑀼𑀢𑁆𑀯𑀸 𑀯𑀬𑀽𑀧𑀕𑀫𑀦𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀧𑀭𑀺𑀡𑀸𑀫𑀢𑁄𑀢𑀺 𑀲𑀦𑁆𑀢𑀸𑀦𑀲𑁆𑀲 𑀧𑀼𑀭𑀺𑀫𑀼𑀢𑁆𑀢𑀭𑀯𑀺𑀲𑀤𑀺𑀲𑀪𑀸𑀯𑀢𑁄𑀢𑀺 𑀯𑀤𑀦𑁆𑀢𑀺. 𑀢𑀁 𑀯𑀲𑁆𑀲𑀲𑀢𑀧𑀭𑀺𑀘𑁆𑀙𑀺𑀦𑁆𑀦𑁂 𑀭𑀽𑀧𑁂 𑀇𑀤𑀁 𑀲𑀫𑁆𑀫𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯 𑀯𑀼𑀢𑁆𑀢𑀁 𑀲𑀺𑀬𑀸, 𑀚𑀭𑀸𑀫𑀭𑀡𑁂𑀦 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀅𑀲𑀢𑀺𑀧𑀺 𑀥𑀫𑁆𑀫𑀪𑁂𑀤𑁂 𑀅𑀯𑀢𑁆𑀣𑀸𑀪𑁂𑀤𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀦 𑀳𑀺 𑀉𑀧𑁆𑀧𑀸𑀤𑀸𑀯𑀢𑁆𑀣𑀸 𑀏𑀯 𑀪𑀗𑁆𑀕𑀸𑀯𑀢𑁆𑀣𑀸𑀢𑀺 𑀬𑀼𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀚𑀭𑀸𑀬 𑀘𑁂𑀯 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑁂𑀥𑀸 𑀧𑀭𑀺𑀡𑀸𑀫𑀧𑀓𑀢𑀺𑀢𑀸𑀬𑀸’’𑀢𑀺. 𑀲𑀪𑀸𑀯𑀯𑀺𑀕𑀫𑁄 𑀏𑀯 𑀯𑀸 𑀏𑀢𑁆𑀣 𑀯𑀺𑀧𑀭𑀺𑀡𑀸𑀫𑁄. 𑀔𑀡𑀺𑀓𑀢𑀸 𑀢𑀸𑀯𑀓𑀸𑀮𑀺𑀓𑀢𑀸. 𑀦𑀺𑀘𑁆𑀘𑀲𑀪𑀸𑀯𑀸𑀪𑀸𑀯𑁄 𑀏𑀯 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑁄. 𑀅𑀦𑀺𑀘𑁆𑀘𑀥𑀫𑁆𑀫𑀸 𑀳𑀺 𑀢𑁂𑀦𑁂𑀯 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀚𑀸𑀦𑀦𑁆𑀢𑀸𑀦𑀁 𑀦𑀺𑀘𑁆𑀘𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺 𑀦𑀸𑀫. 𑀬𑀢𑁄 𑀦 𑀦𑀺𑀘𑁆𑀘𑀦𑁆𑀢𑀺 𑀅𑀦𑀺𑀘𑁆𑀘𑀁, 𑀉𑀧𑁆𑀧𑀸𑀤𑀓𑁆𑀔𑀡𑁂 𑀬𑀤𑀯𑀢𑁆𑀣𑀸 𑀲𑀗𑁆𑀔𑀸𑀭𑀸, 𑀦 𑀢𑀤𑀯𑀢𑁆𑀣𑀸 𑀞𑀺𑀢𑀺𑀓𑁆𑀔𑀡𑁂𑀢𑀺 𑀅𑀯𑀢𑁆𑀣𑀦𑁆𑀢𑀭𑀧𑁆𑀧𑀢𑁆𑀢𑀺𑀬𑀸 𑀜𑀸𑀬𑀢𑀺 𑀢𑁂𑀲𑀁 𑀓𑀺𑀮𑀫𑀦𑀸𑀓𑀸𑀭𑁄𑀢𑀺 𑀆𑀳 ‘‘𑀞𑀺𑀢𑀺𑀬𑀁 𑀚𑀭𑀸𑀬 𑀓𑀺𑀮𑀫𑀦𑁆𑀢𑀻’’𑀢𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀓𑀝𑀚𑀭𑀸𑀬 𑀯𑁂𑀤𑀺𑀢𑀩𑁆𑀩𑁄. 𑀬𑁂 𑀧𑀦 𑀲𑀗𑁆𑀔𑀸𑀭𑀸𑀦𑀁 𑀞𑀺𑀢𑀺𑀁 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄 𑀦𑀸𑀫 𑀤𑀼𑀭𑀢𑀺𑀓𑁆𑀓𑀫𑁄 𑀚𑀭𑀸𑀦𑀦𑁆𑀢𑀭𑀁 𑀪𑀗𑁆𑀕𑁄𑀢𑀺 𑀆𑀳 ‘‘𑀚𑀭𑀁 𑀧𑀢𑁆𑀯𑀸 𑀅𑀯𑀲𑁆𑀲𑀁 𑀪𑀺𑀚𑁆𑀚𑀦𑁆𑀢𑀻’’𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑀯𑀲𑁂𑀦 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑀦𑁆𑀢𑀭𑀩𑀸𑀥𑀢𑀸, 𑀢𑀢𑁄 𑀘 𑀦𑁂𑀲𑀁 𑀤𑀼𑀲𑁆𑀲𑀳𑀢𑀸𑀬 𑀤𑀼𑀓𑁆𑀔𑀫𑀢𑀸, 𑀢𑀺𑀲𑁆𑀲𑀦𑁆𑀦𑀁 𑀤𑀼𑀓𑁆𑀔𑀢𑀸𑀦𑀁, 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀘 𑀅𑀥𑀺𑀝𑁆𑀞𑀸𑀦𑀢𑀸𑀬 𑀤𑀼𑀓𑁆𑀔𑀯𑀢𑁆𑀣𑀼𑀢𑀸, 𑀢𑀲𑁆𑀫𑀸. 𑀅𑀪𑀺𑀡𑁆𑀳…𑀧𑁂… 𑀤𑀼𑀓𑁆𑀔𑀸𑀢𑀺 𑀬𑁄𑀚𑀦𑀸.

‘‘𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀞𑀺𑀢𑀺𑀁 𑀫𑀸 𑀧𑀸𑀧𑀼𑀡𑀦𑁆𑀢𑀼, 𑀉𑀧𑁆𑀧𑀚𑁆𑀚𑀫𑀸𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀉𑀧𑁆𑀧𑀦𑁆𑀦𑀸’’𑀢𑀺 𑀇𑀫𑀺𑀦𑀸 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀢𑀸 𑀯𑀼𑀢𑁆𑀢𑀸. 𑀞𑀸𑀦𑀧𑁆𑀧𑀢𑁆𑀢𑀸 𑀫𑀸 𑀚𑀻𑀭𑀦𑁆𑀢𑀽𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀅𑀢𑁆𑀣𑀢𑁄 𑀞𑀺𑀢𑀺 𑀏𑀯 𑀚𑀭𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀚𑀭𑀸𑀯𑀲𑁂𑀦 𑀧𑀦 𑀬𑁄 𑀓𑀺𑀮𑀫𑀣𑁄, 𑀲𑁄 𑀇𑀥 𑀚𑀭𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀸 𑀪𑀺𑀚𑁆𑀚𑀦𑁆𑀢𑀽𑀢𑀺 𑀦𑀺𑀘𑁆𑀘𑀢𑀁 𑀆𑀲𑀻𑀲𑀢𑀺. 𑀓𑀲𑁆𑀲𑀘𑀺 𑀥𑀫𑁆𑀫𑀺𑀲𑁆𑀲𑀭𑀲𑁆𑀲𑀸𑀧𑀺 𑀪𑀕𑀯𑀢𑁄 𑀯𑀲𑀯𑀢𑁆𑀢𑀺𑀪𑀸𑀯𑁄 𑀦𑀢𑁆𑀣𑀺. 𑀦 𑀳𑀺 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀁 𑀓𑁂𑀦𑀘𑀺 𑀓𑀸𑀢𑀼𑀁 𑀲𑀓𑁆𑀓𑀸. 𑀪𑀸𑀯𑀜𑁆𑀜𑀣𑀢𑁆𑀢𑀫𑁂𑀯 𑀳𑀺 𑀇𑀤𑁆𑀥𑀺𑀯𑀺𑀲𑀬𑁄. 𑀲𑀼𑀜𑁆𑀜𑀸 𑀲𑀗𑁆𑀔𑀸𑀭𑀸 𑀢𑁂𑀦 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀓𑀸𑀭𑀡𑀧𑀭𑀸𑀫𑀲𑀦𑀁. 𑀲𑀼𑀜𑁆𑀜𑀢𑁄𑀢𑀺 𑀦𑀺𑀯𑀸𑀲𑀻𑀓𑀸𑀭𑀓𑀯𑁂𑀤𑀓𑀅𑀥𑀺𑀝𑁆𑀞𑀸𑀬𑀓𑀯𑀺𑀭𑀳𑁂𑀦 𑀢𑀢𑁄 𑀲𑀼𑀜𑁆𑀜𑀢𑁄, 𑀦 𑀦𑀺𑀲𑁆𑀲𑀪𑀸𑀯𑀢𑁄𑀢𑀺 𑀏𑀓𑀘𑁆𑀘𑀧𑀭𑀺𑀓𑀧𑁆𑀧𑀺𑀢𑀲𑀪𑀸𑀯𑀲𑀼𑀜𑁆𑀜𑀢𑁄. 𑀅𑀲𑁆𑀲𑀸𑀫𑀺𑀓𑀢𑁄𑀢𑀺 𑀲𑀸𑀫𑀺𑀪𑀽𑀢𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄. 𑀏𑀢𑁂𑀦 𑀅𑀦𑀢𑁆𑀢𑀦𑀺𑀬𑀢𑀁 𑀤𑀲𑁆𑀲𑁂𑀢𑀺. 𑀅𑀯𑀲𑀯𑀢𑁆𑀢𑀺𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀯𑀲𑀯𑀢𑁆𑀢𑀺𑀪𑀸𑀯𑀸𑀪𑀸𑀯𑀢𑁄. 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀢𑁄𑀢𑀺 𑀧𑀭𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄 𑀧𑀝𑀺𑀓𑁆𑀔𑀺𑀧𑀦𑀢𑁄. ‘‘𑀲𑀼𑀜𑁆𑀜𑀢𑁄’’𑀢𑀺𑀆𑀤𑀺𑀦𑀸 𑀳𑀺 𑀥𑀫𑁆𑀫𑀸𑀦𑀁 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑀅𑀢𑁆𑀢𑀯𑀺𑀭𑀳𑁄 𑀯𑀼𑀢𑁆𑀢𑁄, 𑀇𑀫𑀺𑀦𑀸 𑀧𑀦 𑀅𑀢𑀁𑀲𑀪𑀸𑀯𑀢𑁄 𑀅𑀢𑁆𑀢𑀸 𑀦 𑀳𑁄𑀢𑀻𑀢𑀺.

𑁭𑁦𑁭. 𑀏𑀢𑁆𑀣 𑀘 ‘‘𑀉𑀧𑁆𑀧𑀸𑀤𑀯𑀬𑀯𑀢𑁆𑀢𑀺𑀢𑁄’’𑀢𑀺𑀆𑀤𑀺𑀦𑀸 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀦𑀺𑀘𑁆𑀘𑀸, ‘‘𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀢𑁄’’𑀢𑀺𑀆𑀤𑀺𑀦𑀸 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀤𑀼𑀓𑁆𑀔𑀸, ‘‘𑀲𑀼𑀜𑁆𑀜𑀢𑁄’’𑀢𑀺𑀆𑀤𑀺𑀦𑀸 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀦𑀢𑁆𑀢𑀸𑀢𑀺 𑀭𑀽𑀧𑀥𑀫𑁆𑀫𑁂 𑀦𑀺𑀭𑀼𑀴𑁆𑀳𑀁 𑀮𑀓𑁆𑀔𑀡𑀢𑁆𑀢𑀬𑀁 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀅𑀲𑀮𑁆𑀮𑀓𑁆𑀔𑀺𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑁄 𑀢𑀁 𑀢𑀢𑁆𑀣 𑀆𑀭𑁄𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀧𑀦𑀸𑀦𑁂𑀦 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀯𑀲𑁂𑀦 𑀲𑀫𑁆𑀫𑀲𑀺𑀢𑀢𑁆𑀢𑀸 𑀆𑀳 ‘‘𑀭𑀽𑀧𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺.

𑀢𑀢𑁆𑀣 𑀘 𑀬𑀲𑁆𑀫𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀕𑁆𑀕𑀳𑀡𑀧𑀼𑀩𑁆𑀩𑀓𑀁 𑀤𑀼𑀓𑁆𑀔𑀮𑀓𑁆𑀔𑀡𑀕𑁆𑀕𑀳𑀡𑀁, 𑀤𑀼𑀓𑁆𑀔𑀮𑀓𑁆𑀔𑀡𑀕𑁆𑀕𑀳𑀡𑀧𑀼𑀩𑁆𑀩𑀓𑀁 𑀯𑀸 𑀅𑀦𑀢𑁆𑀢𑀮𑀓𑁆𑀔𑀡𑀕𑁆𑀕𑀳𑀡𑀁. 𑀅𑀦𑀺𑀘𑁆𑀘𑀮𑀓𑁆𑀔𑀡𑀜𑁆𑀘𑁂𑀢𑁆𑀣 𑀭𑀽𑀧𑀪𑁂𑀤𑁂𑀦 𑀤𑀲𑁆𑀲𑀺𑀬𑀫𑀸𑀦𑀁 𑀬𑀣𑁄𑀴𑀸𑀭𑀺𑀓𑀢𑁄 𑀤𑀻𑀧𑁂𑀢𑀩𑁆𑀩𑀦𑁆𑀢𑀺 𑀢𑀁 𑀯𑀲𑁆𑀲𑀲𑀢𑀧𑀭𑀺𑀘𑁆𑀙𑁂𑀤𑁂𑀦 𑀧𑀞𑀫𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀲𑁆𑀲𑀲𑀢𑀁 𑀞𑀺𑀢𑀲𑁆𑀲 ‘‘𑀤𑀲 𑀯𑀸 𑀯𑀻𑀲𑀢𑀺 𑀯𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀚𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀬𑀸𑀯𑀉𑀤𑁆𑀥𑀭𑀡𑀸𑀤𑀺𑀓𑁄𑀝𑁆𑀞𑀸𑀲𑀯𑀲𑁂𑀦 𑀭𑀽𑀧𑀲𑁆𑀲 𑀪𑀗𑁆𑀕𑀁 𑀤𑀺𑀲𑁆𑀯𑀸 𑀢𑀢𑁄 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑀁 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀢𑁄 𑀲𑀫𑁆𑀫𑀲𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀫𑁂𑀯 𑀯𑀲𑁆𑀲𑀲𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀬𑀯𑀲𑁂𑀦 𑀭𑀽𑀧𑀲𑁆𑀲 𑀲𑀫𑁆𑀫𑀲𑀦𑀯𑀺𑀥𑀺 𑀆𑀭𑀤𑁆𑀥𑁄. 𑀢𑀢𑁆𑀣 𑀬𑀲𑁆𑀫𑀸 𑀑𑀴𑀸𑀭𑀺𑀓𑀯𑀲𑁂𑀦𑁂𑀯𑀸𑀬𑀁 𑀆𑀤𑀺𑀢𑁄 𑀭𑀽𑀧𑀪𑁂𑀤𑁄 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀦 𑀯𑀲𑁆𑀲𑀲𑀢𑀁 𑀲𑀫𑀓𑁄𑀝𑁆𑀞𑀸𑀲𑀯𑀲𑁂𑀦 𑀯𑀺𑀪𑀢𑁆𑀢𑀁, 𑀫𑀚𑁆𑀛𑀺𑀫𑀸𑀯𑀢𑁆𑀣𑀸𑀬 𑀯𑀸 𑀢𑀣𑀸𑀭𑀽𑀧𑀢𑁆𑀢𑀸 𑀫𑀚𑁆𑀛𑀺𑀫𑀯𑀬𑁂 𑀏𑀓𑀁 𑀯𑀲𑁆𑀲𑀁 𑀯𑀟𑁆𑀠𑀺𑀢𑀁.

𑁭𑁦𑁮. 𑀫𑀦𑁆𑀤𑀢𑀸𑀩𑀸𑀳𑀼𑀮𑁆𑀮𑁂𑀦 𑀧𑀯𑀢𑁆𑀢𑀁 𑀯𑀲𑁆𑀲𑀸𑀦𑀁 𑀤𑀲𑀓𑀁 𑀫𑀦𑁆𑀤𑀤𑀲𑀓𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀢𑀤𑀸𑀢𑀺 𑀧𑀞𑀫𑁂 𑀯𑀲𑁆𑀲𑀤𑀲𑀓𑁂. 𑀲𑁄𑀢𑀺 𑀧𑀼𑀕𑁆𑀕𑀮𑁄. 𑀘𑀧𑀮𑁄𑀢𑀺 𑀅𑀦𑀯𑀝𑁆𑀞𑀺𑀢𑀓𑀺𑀭𑀺𑀬𑀢𑀸𑀬 𑀢𑀭𑀮𑁄. 𑀢𑁂𑀦 𑀫𑁄𑀫𑀽𑀳𑀪𑀸𑀯𑀢𑁄 𑀯𑀺𑀲𑁂𑀲𑁂𑀢𑀺. 𑀦 𑀳𑁂𑀲 𑀦𑀯𑀫𑀤𑀲𑀓𑁂 𑀯𑀺𑀬 𑀫𑁄𑀫𑀽𑀳𑀪𑀸𑀯𑁂𑀦 𑀫𑀦𑁆𑀤𑁄, 𑀅𑀣 𑀔𑁄 𑀘𑀧𑀮𑀢𑀸𑀬𑀸𑀢𑀺. 𑀢𑁂𑀦𑀸𑀳 ‘‘𑀓𑀼𑀫𑀸𑀭𑀓𑁄’’𑀢𑀺. 𑀢𑀢𑀺𑀬𑁂 𑀤𑀲𑀓𑁂 𑀫𑀁𑀲𑀧𑀸𑀭𑀺𑀧𑀽𑀭𑀺𑀬𑀸 𑀬𑀣𑀸𑀭𑀳𑀁 𑀙𑀯𑀺𑀯𑀡𑁆𑀡𑁄 𑀯𑀺𑀧𑁆𑀧𑀲𑀻𑀤𑀢𑀻𑀢𑀺 𑀆𑀳 ‘‘𑀯𑀡𑁆𑀡𑀸𑀬𑀢𑀦𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀻’’𑀢𑀺. 𑀘𑀢𑀼𑀢𑁆𑀣𑁂 𑀤𑀲𑀓𑁂 𑀅𑀝𑁆𑀞𑀻𑀦𑀁, 𑀦𑁆𑀳𑀸𑀭𑀽𑀦𑀜𑁆𑀘 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀩𑀮𑀜𑁆𑀘 𑀣𑀸𑀫𑁄 𑀘 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺. 𑀧𑀜𑁆𑀘𑀫𑁂 𑀤𑀲𑀓𑁂 𑀬𑁄𑀩𑁆𑀩𑀦𑀫𑀤𑀲𑁆𑀲 𑀤𑀽𑀭𑀻𑀪𑀸𑀯𑁂𑀦 𑀬𑁂𑀪𑀼𑀬𑁆𑀬𑁂𑀦 𑀓𑀺𑀮𑁂𑀲𑀢𑀦𑀼𑀢𑀸𑀬 𑀧𑀜𑁆𑀜𑀸 𑀬𑀣𑀸𑀭𑀳𑀁 𑀲𑀼𑀯𑀺𑀲𑀤𑀸 𑀳𑁄𑀢𑀺. 𑀔𑀺𑀟𑁆𑀟𑀸𑀬 𑀭𑀢𑀺 𑀔𑀺𑀟𑁆𑀟𑀸𑀭𑀢𑀺. 𑀓𑀧𑀮𑁆𑀮𑀺𑀓𑀸𑀤𑀺𑀦𑀺𑀲𑁆𑀲𑀬𑀯𑀺𑀲𑁂𑀲𑁂𑀦 𑀧𑀤𑀻𑀧𑀲𑁆𑀲 𑀲𑀼𑀤𑁆𑀥𑀢𑀸𑀤𑀺 𑀯𑀺𑀬 𑀦𑀺𑀲𑁆𑀲𑀬𑀯𑀺𑀲𑁂𑀲𑁂𑀦 𑀧𑀜𑁆𑀘𑀫𑀙𑀝𑁆𑀞𑀤𑀲𑀓𑁂𑀲𑀼 𑀧𑀜𑁆𑀜𑀸𑀬 𑀩𑀼𑀤𑁆𑀥𑀺𑀳𑀸𑀦𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀭𑀢𑁄 𑀧𑀩𑁆𑀪𑀸𑀭𑁄 𑀳𑁄𑀢𑀺 𑀓𑀝𑀺𑀲𑀦𑁆𑀥𑀺𑀕𑀻𑀯𑀸𑀲𑀦𑁆𑀥𑀻𑀦𑀁 𑀯𑀲𑁂𑀦 𑀭𑀲𑁆𑀲𑀲𑁆𑀲𑀸𑀧𑀺, 𑀧𑀕𑁂𑀯 𑀤𑀻𑀖𑀲𑁆𑀲. 𑀧𑀩𑁆𑀪𑀸𑀭𑁄𑀢𑀺 𑀘 𑀕𑀭𑀼𑀪𑀸𑀯𑁂𑀦 𑀧𑀮𑀫𑁆𑀩𑀓𑁄. 𑀫𑁄𑀫𑀽𑀳𑁄 𑀳𑁄𑀢𑀺 𑀲𑀢𑀺𑀧𑀜𑁆𑀜𑀸𑀯𑀺𑀧𑁆𑀧𑀯𑀸𑀲𑀢𑁄. 𑀲𑀬𑀦𑀩𑀳𑀼𑀮𑁄𑀯 𑀳𑁄𑀢𑀺 𑀞𑀸𑀦𑀸𑀤𑀺𑀯𑀲𑁂𑀦 𑀲𑀭𑀻𑀭𑀪𑀸𑀭𑀁 𑀯𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄.

𑁭𑁦𑁯. 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀦𑁆𑀢𑀺 𑀬𑁂𑀪𑀼𑀬𑁆𑀬𑀢𑀸𑀬 𑀯𑀼𑀢𑁆𑀢𑀁. 𑀘𑀢𑀼𑀯𑀲𑁆𑀲𑀺𑀓𑁄𑀧𑀺 𑀳𑀺 𑀏𑀓𑁄 𑀓𑁄𑀝𑁆𑀞𑀸𑀲𑁄 𑀳𑁄𑀢𑀻𑀢𑀺. 𑀤𑁆𑀯𑀺𑀲𑀢𑀁 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀏𑀓𑁂𑀓𑀅𑀬𑀦𑀯𑀲𑁂𑀦𑀸𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀲𑁆𑀲𑀸𑀦𑁂 𑀧𑀯𑀢𑁆𑀢𑀭𑀽𑀧𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀁 𑀧𑀦 𑀯𑀲𑁆𑀲𑀸𑀦𑀁 𑀤𑁆𑀯𑀺𑀥𑀸 𑀲𑀫𑀢𑁆𑀢𑀁, 𑀦 𑀧𑀼𑀩𑁆𑀩𑁂 𑀯𑀺𑀬 𑀘𑀢𑀼𑀫𑀸𑀲𑀦𑁆𑀢𑀺 𑀆𑀳 ‘‘𑀤𑁆𑀯𑁂𑀫𑀸𑀲’’𑀦𑁆𑀢𑀺. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀲𑁄 𑀧𑀦 𑀯𑀲𑁆𑀲𑀸𑀦𑁄 𑀉𑀢𑀼 𑀲𑀸𑀯𑀡𑀧𑁄𑀝𑁆𑀞𑀧𑀸𑀤𑀫𑀸𑀲𑀸, 𑀅𑀲𑁆𑀲𑀬𑀼𑀚𑀓𑀢𑁆𑀢𑀺𑀓𑀫𑀸𑀲𑀸 𑀲𑀭𑀤𑁄, 𑀫𑀺𑀕𑀲𑀺𑀭𑀨𑀼𑀲𑁆𑀲𑀫𑀸𑀲𑀸 𑀳𑁂𑀫𑀦𑁆𑀢𑁄, 𑀫𑀸𑀖𑀨𑀕𑁆𑀕𑀼𑀦𑀫𑀸𑀲𑀸 𑀲𑀺𑀲𑀺𑀭𑁄, 𑀘𑀺𑀢𑁆𑀢𑀯𑁂𑀲𑀸𑀔𑀫𑀸𑀲𑀸 𑀯𑀲𑀦𑁆𑀢𑁄, 𑀚𑁂𑀝𑁆𑀞𑀸𑀲𑀴𑁆𑀳𑀫𑀸𑀲𑀸 𑀕𑀺𑀫𑁆𑀳𑁄 𑀉𑀢𑀽𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸𑀢𑀺 𑀤𑀲𑀤𑀲𑀦𑀸𑀝𑀺𑀓𑀸𑀯𑀲𑁂𑀦 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸.

𑁭𑁧𑁦. 𑀅𑀪𑀺𑀫𑀼𑀔𑀁 𑀧𑀼𑀭𑀢𑁄 𑀓𑀫𑀦𑀁 𑀅𑀪𑀺𑀓𑁆𑀓𑀫𑁄. 𑀧𑀝𑀺𑀦𑀺𑀯𑀢𑁆𑀢𑀦𑀯𑀲𑁂𑀦 𑀓𑀫𑀦𑀁 𑀧𑀝𑀺𑀓𑁆𑀓𑀫𑁄. 𑀆𑀫𑀼𑀔𑀁 𑀮𑁄𑀓𑀦𑀁 𑀆𑀮𑁄𑀓𑀦𑀁. 𑀯𑀺𑀯𑀺𑀥𑀁 𑀇𑀢𑁄 𑀘𑀺𑀢𑁄 𑀘 𑀮𑁄𑀓𑀦𑀁 𑀯𑀺𑀮𑁄𑀓𑀦𑀁. 𑀳𑀢𑁆𑀣𑀧𑀸𑀤𑀸𑀦𑀁 𑀲𑀗𑁆𑀓𑀼𑀘𑀦𑀁 𑀲𑀫𑀺𑀜𑁆𑀚𑀦𑀁. 𑀆𑀬𑀫𑀦𑀁 𑀧𑀲𑀸𑀭𑀡𑀁.

𑀧𑀸𑀤𑀼𑀤𑁆𑀥𑀭𑀡𑀓𑀸𑀮𑁂𑀢𑀺 𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀭𑀡𑀓𑀸𑀮𑁂. 𑀧𑀸𑀤𑀲𑁆𑀲𑀸𑀢𑀺 𑀉𑀤𑁆𑀥𑀝𑀧𑀸𑀤𑀲𑁆𑀲. 𑀑𑀫𑀢𑁆𑀢𑀸𑀢𑀺 𑀲𑀢𑁆𑀢𑀺𑀢𑁄 𑀳𑀻𑀦𑀧𑁆𑀧𑀫𑀸𑀡𑀸. 𑀢𑁂𑀦𑀸𑀳 ‘‘𑀫𑀦𑁆𑀤𑀸’’𑀢𑀺. 𑀇𑀢𑀭𑀸𑀢𑀺 𑀢𑁂𑀚𑁄𑀯𑀸𑀬𑁄𑀥𑀸𑀢𑀼𑀬𑁄. 𑀬𑀣𑀸 𑀧𑀸𑀤𑀲𑁆𑀲 𑀉𑀤𑁆𑀥𑀭𑀡𑀁 𑀲𑀺𑀚𑁆𑀛𑀢𑀺, 𑀢𑀣𑀸 𑀧𑀯𑀢𑁆𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑀼 𑀏𑀓𑀁𑀲𑀢𑁄 𑀢𑁂𑀚𑁄𑀯𑀸𑀬𑁄𑀥𑀸𑀢𑀽𑀦𑀁 𑀅𑀥𑀺𑀫𑀢𑁆𑀢𑀢𑀸 𑀇𑀘𑁆𑀙𑀺𑀢𑀩𑁆𑀩𑀸 𑀲𑀮𑁆𑀮𑀳𑀼𑀓𑀲𑀪𑀸𑀯𑀢𑀸𑀬 𑀢𑀸𑀲𑀁. 𑀢𑀢𑁄 𑀏𑀯 𑀘 𑀇𑀢𑀭𑀸𑀲𑀁 𑀑𑀫𑀢𑁆𑀢𑀢𑀸 𑀕𑀭𑀼𑀲𑀪𑀸𑀯𑀢𑁆𑀢𑀸. 𑀢𑀁𑀲𑀫𑁆𑀩𑀦𑁆𑀥𑀢𑁆𑀢𑀸 𑀧𑀦 𑀲𑁂𑀲𑀁 𑀢𑀺𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀢𑀕𑁆𑀕𑀢𑀺𑀓𑀫𑁂𑀯 𑀳𑁄𑀢𑀺. 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀧𑀯𑀢𑁆𑀢𑀺𑀬𑀁 𑀯𑀸𑀬𑁄𑀧𑀣𑀯𑀻𑀅𑀥𑀺𑀫𑀢𑁆𑀢𑀢𑀸 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀢𑁄 𑀳𑀭𑀡𑁂, 𑀧𑀘𑁆𑀙𑀢𑁄 𑀳𑀭𑀡𑁂 𑀘 𑀉𑀤𑁆𑀥𑀭𑀡𑁂 𑀯𑀺𑀬 𑀲𑀮𑁆𑀮𑀳𑀼𑀓𑀲𑀪𑀸𑀯𑀭𑀽𑀧𑀧𑁆𑀧𑀯𑀢𑁆𑀢𑀻𑀢𑀺 𑀢𑀸𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀥𑀸𑀢𑀽𑀦𑀁 𑀅𑀥𑀺𑀫𑀢𑁆𑀢𑀢𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀢𑀣𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀽’’𑀢𑀺. 𑀬𑀣𑀸 𑀉𑀤𑁆𑀥𑀭𑀡𑀸𑀤𑀻𑀲𑀼 𑀲𑀮𑁆𑀮𑀳𑀼𑀓𑀲𑀪𑀸𑀯𑀢𑁆𑀢𑀸 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀥𑀸𑀢𑀽𑀦𑀁 𑀓𑀺𑀘𑁆𑀘𑀁 𑀅𑀥𑀺𑀓𑀁 𑀳𑁄𑀢𑀺, 𑀇𑀢𑀭𑀸𑀲𑀁 𑀳𑀻𑀦𑀁, 𑀏𑀯𑀁 𑀯𑁄𑀲𑁆𑀲𑀚𑁆𑀚𑀦𑀸𑀤𑀻𑀲𑀼 𑀢𑀻𑀲𑀼 𑀕𑀭𑀼𑀲𑀪𑀸𑀯𑀢𑁆𑀢𑀸 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀓𑀺𑀘𑁆𑀘𑀁 𑀅𑀥𑀺𑀓𑀁 𑀳𑁄𑀢𑀺, 𑀇𑀢𑀭𑀸𑀲𑀁 𑀳𑀻𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑁄𑀲𑁆𑀲𑀚𑁆𑀚𑀦𑁂’’𑀢𑀺𑀆𑀤𑀺.

𑀢𑀤𑀼𑀧𑀸𑀤𑀸𑀬𑀭𑀽𑀧𑀸𑀦𑀻𑀢𑀺 𑀢𑀸 𑀥𑀸𑀢𑀼𑀬𑁄 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀉𑀧𑀸𑀤𑀸𑀭𑀽𑀧𑀸𑀦𑀺. 𑀏𑀢𑁆𑀣𑁂𑀯𑀸𑀢𑀺 𑀉𑀤𑁆𑀥𑀭𑀡𑁂𑀬𑁂𑀯. 𑀢𑁂𑀦𑀸𑀳 ‘‘𑀅𑀢𑀺𑀳𑀭𑀡𑀁 𑀅𑀧𑁆𑀧𑀢𑁆𑀯𑀸’’𑀢𑀺. 𑀇𑀢𑀻𑀢𑀺 𑀏𑀯𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀉𑀤𑁆𑀥𑀭𑀡𑀸𑀤𑀺𑀓𑁄𑀝𑁆𑀞𑀸𑀲𑁂. 𑀧𑀩𑁆𑀩𑀁𑀧𑀩𑁆𑀩𑀦𑁆𑀢𑀺𑀆𑀤𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀓𑁄𑀝𑁆𑀞𑀸𑀲𑀦𑁆𑀢𑀭𑀲𑀗𑁆𑀓𑀭𑀸𑀪𑀸𑀯𑀤𑀲𑁆𑀲𑀦𑀁. 𑀢𑀝𑀢𑀝𑀸𑀬𑀦𑁆𑀢𑀸𑀢𑀺 𑀢𑀝𑀢𑀝𑀸𑀬𑀦𑁆𑀢𑀺 𑀯𑀺𑀬, 𑀢𑁂𑀦 𑀦𑁂𑀲𑀁 𑀧𑀯𑀢𑁆𑀢𑀺𑀓𑁆𑀔𑀡𑀲𑁆𑀲 𑀇𑀢𑁆𑀢𑀭𑀢𑀁 𑀤𑀲𑁆𑀲𑁂𑀢𑀺.

𑁭𑁧𑁧. 𑀅𑀲𑁆𑀲𑀸𑀢𑀺 𑀲𑀫𑁆𑀫𑀲𑀦𑀲𑁆𑀲. 𑀤𑀸𑀭𑀼𑀢𑀺𑀡𑀼𑀓𑁆𑀓𑀸𑀤𑀻𑀲𑀽𑀢𑀺 𑀤𑀸𑀭𑀼𑀉𑀓𑁆𑀓𑀸𑀢𑀺𑀡𑀼𑀓𑁆𑀓𑀸𑀤𑀻𑀲𑀼. ‘‘𑀓𑀺𑀁 𑀅𑀦𑁆𑀥𑀩𑀸𑀮 𑀏𑀓𑀖𑀦𑀁 𑀲𑀢𑀢𑀁 𑀲𑀩𑁆𑀩𑀤𑀸𑀪𑀸𑀯𑀺𑀁 𑀏𑀓𑀦𑁆𑀢𑀺 𑀫𑀜𑁆𑀜𑀲𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀓𑀺𑀫𑁂𑀢𑁆𑀣 𑀫𑀦𑀸𑀧’’𑀦𑁆𑀢𑀺. 𑀇𑀤𑀫𑁆𑀧𑀻𑀢𑀺 𑀬𑀤𑀺𑀤𑀁 𑀢𑁂𑀮𑀯𑀝𑁆𑀝𑀺𑀓𑁆𑀔𑀬𑁂𑀦 𑀧𑀤𑀻𑀧𑀲𑁆𑀲 𑀅𑀧𑀜𑁆𑀜𑀸𑀬𑀦𑀁 𑀯𑀼𑀢𑁆𑀢𑀁, 𑀇𑀤𑀫𑁆𑀧𑀺. 𑀅𑀗𑁆𑀕𑀼𑀮𑀗𑁆𑀕𑀼𑀮𑀦𑁆𑀢𑀭𑁂𑀢𑀺 𑀅𑀗𑁆𑀕𑀼𑀮𑀺𑀬𑀸 𑀫𑀺𑀢𑀁 𑀅𑀗𑁆𑀕𑀼𑀮𑀦𑁆𑀢𑀺 𑀅𑀗𑁆𑀕𑀼𑀮𑀧𑁆𑀧𑀫𑀸𑀡𑁂 𑀧𑀤𑁂𑀲𑁂𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀼𑀦𑁄 𑀅𑀯𑀬𑀯𑀮𑁂𑀲𑀪𑀽𑀢𑀁 𑀧𑀭𑀫𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀁 𑀅𑀁𑀲𑀼𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀁𑀲𑀼𑀁 𑀧𑀦 𑀫𑀼𑀜𑁆𑀘𑀺𑀢𑁆𑀯𑀸’’𑀢𑀺.

𑀢𑀢𑁆𑀣𑀸𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀢𑀢𑁆𑀣 𑀓𑀸𑀫𑀁 𑀉𑀧𑀫𑁂𑀬𑁆𑀬𑁂 𑀯𑀺𑀬 𑀉𑀧𑀫𑀸𑀬𑀁 𑀧𑀸𑀓𑀝𑁄 𑀓𑀸𑀮𑀪𑁂𑀤𑁄 𑀦𑀢𑁆𑀣𑀺, 𑀏𑀓𑀓𑁄𑀝𑁆𑀞𑀸𑀲𑀕𑀢𑀁 𑀧𑀦 𑀓𑁄𑀝𑁆𑀞𑀸𑀲𑀦𑁆𑀢𑀭𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀏𑀢𑁆𑀢𑀸𑀯𑀢𑀸 𑀉𑀧𑀫𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀧𑀫𑀸𑀬𑀫𑁆𑀧𑀺 𑀯𑀸 𑀢𑀸𑀯 𑀬𑀸𑀯𑀸𑀢𑀺 𑀓𑀸𑀮𑀲𑁆𑀲 𑀪𑁂𑀤𑀫𑀢𑁆𑀢𑀸 𑀮𑀩𑁆𑀪𑀢𑁂𑀯𑀸𑀢𑀺 𑀢𑀲𑁆𑀲𑀸 𑀕𑀳𑀡𑁂 𑀓𑀸𑀮𑀪𑁂𑀤𑀯𑀲𑁂𑀦𑀸𑀧𑀺 𑀉𑀧𑀫𑀸 𑀬𑁄𑀚𑁂𑀢𑀩𑁆𑀩𑀸.

𑁭𑁧𑁨. 𑀧𑀼𑀩𑁆𑀩𑁂 𑀆𑀤𑀸𑀦𑀦𑀺𑀓𑁆𑀔𑁂𑀧𑀸𑀤𑀺𑀯𑀲𑁂𑀦 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀁 𑀲𑀗𑁆𑀖𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑀁, 𑀇𑀤𑀸𑀦𑀺 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀤𑁂𑀯 𑀭𑀽𑀧𑀁 𑀯𑀺𑀲𑀗𑁆𑀔𑀭𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸. ‘‘𑀯𑀺𑀲𑀗𑁆𑀖𑀭𑀺𑀢𑁆𑀯𑀸’’𑀢𑀺 𑀯𑀸 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀆𑀳𑀸𑀭𑀫𑀬𑀦𑁆𑀢𑀺 𑀆𑀳𑀸𑀭𑁂𑀦 𑀦𑀺𑀩𑁆𑀩𑀢𑁆𑀢𑀁. 𑀛𑀢𑁆𑀢𑀦𑁆𑀢𑀺 𑀫𑀺𑀮𑀸𑀢𑀁. 𑀓𑀺𑀮𑀦𑁆𑀢𑀦𑁆𑀢𑀺 𑀔𑀺𑀦𑁆𑀦𑀁. 𑀥𑀸𑀢𑀦𑁆𑀢𑀺 𑀢𑀺𑀢𑁆𑀢𑀁. 𑀧𑀻𑀡𑀺𑀢𑀦𑁆𑀢𑀺 𑀫𑀁𑀲𑀽𑀧𑀘𑀬𑀲𑀫𑁆𑀧𑀢𑁆𑀢𑀺𑀬𑀸 𑀧𑀻𑀡𑀺𑀢𑀁. 𑀢𑀢𑁄 𑀏𑀯 𑀫𑀼𑀤𑀼. 𑀲𑀺𑀦𑀺𑀤𑁆𑀥𑀦𑁆𑀢𑀺 𑀲𑀺𑀦𑀺𑀤𑁆𑀥𑀘𑁆𑀙𑀯𑀺𑀢𑀸𑀬 𑀲𑀡𑁆𑀳𑀁. 𑀢𑀢𑁄 𑀏𑀯 𑀨𑀲𑁆𑀲𑀯𑀦𑁆𑀢𑀁.

𑁭𑁧𑁩. 𑀉𑀡𑁆𑀳𑀓𑀸𑀮𑁂 𑀲𑀫𑀼𑀝𑁆𑀞𑀺𑀢𑀁 𑀭𑀽𑀧𑀦𑁆𑀢𑀺 𑀉𑀡𑁆𑀳𑀲𑀦𑁆𑀢𑀸𑀧𑁂𑀦 𑀲𑀦𑁆𑀢𑀢𑁆𑀢𑀁 𑀭𑀽𑀧𑀁 𑀲𑀦𑁆𑀥𑀸𑀬𑀸𑀳. 𑀲𑀻𑀢𑀉𑀢𑀼𑀦𑀸𑀢𑀺 𑀲𑀧𑁆𑀧𑀸𑀬𑁂𑀦 𑀲𑀻𑀢𑀉𑀢𑀼𑀦𑀸.

𑁭𑁧𑁪. 𑀆𑀬𑀢𑀦𑀤𑁆𑀯𑀸𑀭𑀯𑀲𑁂𑀦𑀸𑀢𑀺 𑀆𑀬𑀢𑀦𑀲𑀗𑁆𑀔𑀸𑀢𑀤𑁆𑀯𑀸𑀭𑀯𑀲𑁂𑀦. 𑀓𑀫𑁆𑀫𑀤𑁆𑀯𑀸𑀭𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀬𑀢𑀦𑀕𑁆𑀕𑀳𑀡𑀁. 𑀓𑀸𑀬𑀤𑁆𑀯𑀸𑀭𑁂𑀢𑀺 𑀧𑀲𑀸𑀤𑀓𑀸𑀬𑀤𑁆𑀯𑀸𑀭𑁂. 𑀫𑀦𑁄𑀤𑁆𑀯𑀸𑀭𑀁 𑀦𑀸𑀫 𑀲𑀸𑀯𑀚𑁆𑀚𑀦𑀁 𑀪𑀯𑀗𑁆𑀕𑀁. 𑀢𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀢𑁄 𑀳𑀤𑀬𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 𑀦𑀺𑀲𑁆𑀲𑀺𑀢𑀯𑁄𑀳𑀸𑀭𑁂𑀦 ‘‘𑀫𑀦𑁄𑀤𑁆𑀯𑀸𑀭𑁂’’𑀢𑀺 𑀯𑀼𑀢𑁆𑀢𑀁, 𑀬𑀢𑁆𑀣 𑀫𑀦𑁄𑀤𑁆𑀯𑀸𑀭𑀼𑀧𑁆𑀧𑀢𑁆𑀢𑀺.

𑁭𑁧𑁫. 𑀲𑁄𑀫𑀦𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀺𑀢𑀯𑀲𑁂𑀦𑀸𑀢𑀺 𑀲𑁄𑀫𑀦𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀺𑀢𑀧𑀼𑀕𑁆𑀕𑀮𑀯𑀲𑁂𑀦, 𑀲𑁄𑀫𑀦𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀺𑀢𑀓𑀸𑀮𑀯𑀲𑁂𑀦 𑀯𑀸.

𑀅𑀬𑀫𑀢𑁆𑀣𑁄𑀢𑀺 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀲𑀗𑁆𑀔𑀸𑀭𑀸𑀦𑀁 𑀅𑀢𑀺𑀇𑀢𑁆𑀢𑀭𑀔𑀡𑀢𑀸𑀲𑀗𑁆𑀔𑀸𑀢𑁄 𑀅𑀢𑁆𑀣𑁄.

𑀚𑀻𑀯𑀺𑀢𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀲𑀼𑀔𑀤𑀼𑀓𑁆𑀔𑀸𑀢𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸. 𑀉𑀧𑁂𑀓𑁆𑀔𑀸𑀧𑀺 𑀳𑀺 𑀲𑀼𑀔𑀤𑀼𑀓𑁆𑀔𑀸𑀲𑀼 𑀏𑀯 𑀅𑀦𑁆𑀢𑁄𑀕𑀥𑀸 𑀇𑀝𑁆𑀞𑀸𑀦𑀺𑀝𑁆𑀞𑀪𑀸𑀯𑀢𑁄. 𑀅𑀢𑁆𑀢𑀪𑀸𑀯𑁄𑀢𑀺 𑀚𑀻𑀯𑀺𑀢𑀯𑁂𑀤𑀦𑀸𑀯𑀺𑀜𑁆𑀜𑀸𑀡𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑀺𑀝𑁆𑀞𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀲𑀜𑁆𑀜𑀸𑀢𑀺 𑀓𑁂𑀘𑀺. 𑀓𑁂𑀯𑀮𑀸𑀢𑀺 𑀅𑀢𑁆𑀢𑀦𑀸 𑀦𑀺𑀘𑁆𑀘𑀪𑀸𑀯𑁂𑀦 𑀯𑀸 𑀅𑀯𑁄𑀫𑀺𑀲𑁆𑀲𑀸. 𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸𑀢𑀺 𑀏𑀓𑁂𑀓𑁂𑀦 𑀘𑀺𑀢𑁆𑀢𑁂𑀦 𑀲𑀳𑀺𑀢𑀸. 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑀸𑀬 𑀮𑀳𑀼𑀓𑁄 𑀅𑀢𑀺𑀇𑀢𑁆𑀢𑀭𑁄 𑀚𑀻𑀯𑀺𑀢𑀸𑀤𑀻𑀦𑀁 𑀔𑀡𑁄 𑀯𑀢𑁆𑀢𑀢𑀺.

𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀓𑀧𑁆𑀧𑀦𑁆𑀢𑀺 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀓𑀧𑁆𑀧𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀓𑀧𑁆𑀧𑀦𑁆𑀢𑀺 𑀘 𑀲𑀸𑀫𑀜𑁆𑀜𑀯𑀲𑁂𑀦 𑀏𑀓𑀯𑀘𑀦𑀁. 𑀫𑀭𑀽𑀢𑀺 𑀤𑁂𑀯𑀸. 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑁄𑀳𑀺𑀢𑀸𑀢𑀺 𑀏𑀯𑀁 𑀘𑀺𑀭𑀚𑀻𑀯𑀺𑀦𑁄𑀧𑀺 𑀢𑁂 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀳𑀺𑀢𑀸 𑀳𑀼𑀢𑁆𑀯𑀸 𑀦 𑀢𑀺𑀝𑁆𑀞𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁂𑀲𑀫𑁆𑀧𑀺 𑀲𑀦𑁆𑀢𑀸𑀦𑁂 𑀚𑀻𑀯𑀺𑀢𑀸𑀤𑀻𑀦𑀺 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀳 𑀦 𑀢𑀺𑀝𑁆𑀞𑀦𑁆𑀢𑀺, 𑀏𑀓𑁂𑀦 𑀘𑀺𑀢𑁆𑀢𑁂𑀦 𑀲𑀳 𑀉𑀧𑁆𑀧𑀦𑁆𑀦𑀸𑀦𑀺 𑀢𑁂𑀦𑁂𑀯 𑀲𑀳 𑀦𑀺𑀭𑀼𑀚𑁆𑀛𑀦𑀢𑁄 𑀬𑀸𑀯 𑀤𑀼𑀢𑀺𑀬𑀸 𑀦 𑀢𑀺𑀝𑁆𑀞𑀦𑁆𑀢𑀻𑀢𑀺.

𑀬𑁂 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲𑀸𑀢𑀺 𑀘𑀯𑀦𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀤𑁆𑀥𑀸𑀢𑀺 𑀯𑀢𑁆𑀢𑀩𑁆𑀩𑀸 𑀬𑁂 𑀔𑀦𑁆𑀥𑀸. 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥𑀸𑀢𑀺 𑀬𑁂 𑀯𑀸 𑀇𑀥 𑀧𑀯𑀢𑁆𑀢𑀺𑀬𑀁 𑀢𑀺𑀝𑁆𑀞𑀦𑁆𑀢𑀲𑁆𑀲 𑀥𑀭𑀦𑁆𑀢𑀲𑁆𑀲 𑀪𑀗𑁆𑀕𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑀼𑀤𑁆𑀥𑀓𑁆𑀔𑀦𑁆𑀥𑀸. 𑀲𑀩𑁆𑀩𑁂𑀧𑀺 𑀲𑀤𑀺𑀲𑀸 𑀢𑁂 𑀲𑀩𑁆𑀩𑁂𑀧𑀺 𑀏𑀓𑀲𑀤𑀺𑀲𑀸 𑀅𑀢𑁆𑀣𑀗𑁆𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀥𑀸𑀦𑀸𑀪𑀸𑀯𑁂𑀦 𑀯𑀺𑀕𑀢𑀸. 𑀬𑀣𑀸 𑀳𑀺 𑀘𑀼𑀢𑀺𑀓𑁆𑀔𑀦𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀏𑀯𑀁 𑀢𑀢𑁄 𑀧𑀼𑀩𑁆𑀩𑁂𑀧𑀺 𑀔𑀦𑁆𑀥𑀸. 𑀢𑀲𑁆𑀫𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀦𑀦𑁆𑀢𑀭𑀸 𑀘 𑀬𑁂 𑀪𑀕𑁆𑀕𑀸𑀢𑀺 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀦𑁆𑀢𑀭𑀫𑁂𑀯 𑀪𑀕𑁆𑀕𑀸 𑀦𑀺𑀭𑀼𑀤𑁆𑀥𑀸. 𑀬𑁂 𑀘 𑀪𑀕𑁆𑀕𑀸 𑀅𑀦𑀸𑀕𑀢𑁂𑀢𑀺 𑀬𑁂 𑀘 𑀲𑀗𑁆𑀔𑀸𑀭𑀸 𑀅𑀦𑀸𑀕𑀢𑁂 𑀪𑀕𑁆𑀕𑀸 𑀪𑀜𑁆𑀚𑀦𑀲𑀻𑀮𑀸 𑀪𑀺𑀚𑁆𑀚𑀺𑀲𑁆𑀲𑀦𑁆𑀢𑀺. 𑀢𑀤𑀦𑁆𑀢𑀭𑀸 𑀦𑀺𑀭𑀼𑀤𑁆𑀥𑀸𑀦𑀦𑁆𑀢𑀺 𑀢𑁂𑀲𑀁 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀅𑀦𑁆𑀢𑀭𑀸 𑀯𑁂𑀫𑀚𑁆𑀛𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀁 𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀦𑀁 𑀪𑀕𑁆𑀕𑀸𑀦𑀁. 𑀯𑁂𑀲𑀫𑀁 𑀦𑀢𑁆𑀣𑀺 𑀮𑀓𑁆𑀔𑀡𑁂𑀢𑀺 𑀢𑁂𑀲𑀁 𑀢𑀺𑀯𑀺𑀥𑀸𑀦𑀫𑁆𑀧𑀺 𑀪𑀗𑁆𑀕𑀮𑀓𑁆𑀔𑀡𑀦𑀺𑀫𑀺𑀢𑁆𑀢𑀁 𑀯𑀺𑀲𑀫𑀢𑀸 𑀯𑀺𑀲𑀤𑀺𑀲𑀢𑀸 𑀦𑀢𑁆𑀣𑀺.

𑀅𑀦𑀺𑀩𑁆𑀩𑀢𑁆𑀢𑁂𑀦 𑀦 𑀚𑀸𑀢𑁄𑀢𑀺 𑀅𑀦𑀼𑀧𑁆𑀧𑀦𑁆𑀦𑁂𑀦 𑀘𑀺𑀢𑁆𑀢𑁂𑀦 𑀚𑀸𑀢𑁄 𑀦 𑀳𑁄𑀢𑀺, 𑀅𑀚𑀸𑀢𑁄 𑀦𑀸𑀫 𑀳𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀯𑀢𑁆𑀢𑀫𑀸𑀦𑁂𑀦 𑀘𑀺𑀢𑁆𑀢𑁂𑀦 𑀚𑀻𑀯𑀢𑀺 𑀚𑀻𑀯𑀫𑀸𑀦𑁄 𑀦𑀸𑀫 𑀳𑁄𑀢𑀺. 𑀘𑀺𑀢𑁆𑀢𑀪𑀗𑁆𑀕𑀸 𑀫𑀢𑁄 𑀮𑁄𑀓𑁄𑀢𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀯𑀺𑀬 𑀲𑀩𑁆𑀩𑀲𑁆𑀲𑀧𑀺 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀧𑁆𑀧𑀢𑁆𑀢𑀺𑀬𑀸 𑀅𑀬𑀁 𑀮𑁄𑀓𑁄 𑀧𑀭𑀫𑀢𑁆𑀣𑀢𑁄 𑀫𑀢𑁄 𑀦𑀸𑀫 𑀳𑁄𑀢𑀺 𑀦𑀺𑀭𑀼𑀤𑁆𑀥𑀲𑁆𑀲 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀺𑀬𑀸 𑀬𑀸𑀬𑀁 𑀢𑀁 𑀢𑀁 𑀲𑀦𑁆𑀢𑀁 𑀲𑀦𑀺𑀲𑁆𑀲𑀬𑀁 𑀘𑀺𑀢𑁆𑀢𑀁 𑀉𑀧𑀸𑀤𑀸𑀬 ‘‘𑀢𑀺𑀲𑁆𑀲𑁄 𑀚𑀻𑀯𑀢𑀺, 𑀨𑀼𑀲𑁆𑀲𑁄 𑀚𑀻𑀯𑀢𑀻’’𑀢𑀺 𑀏𑀯𑀁 𑀯𑀘𑀦𑀧𑁆𑀧𑀯𑀢𑁆𑀢𑀺𑀬𑀸 𑀯𑀺𑀲𑀬𑀪𑀽𑀢𑀸 𑀲𑀦𑁆𑀢𑀸𑀦𑀧𑀜𑁆𑀜𑀢𑁆𑀢𑀺, 𑀲𑀸 𑀏𑀢𑁆𑀣 𑀧𑀭𑀫𑀢𑁆𑀣𑀺𑀬𑀸 𑀧𑀭𑀫𑀢𑁆𑀣𑀪𑀽𑀢𑀸. 𑀢𑀣𑀸 𑀳𑀺 𑀯𑀤𑀦𑁆𑀢𑀺 ‘‘𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀻’’𑀢𑀺 (𑀲𑀁. 𑀦𑀺. 𑁧.𑁭𑁬).

𑀅𑀦𑀺𑀥𑀸𑀦𑀕𑀢𑀸 𑀪𑀕𑁆𑀕𑀸𑀢𑀺 𑀬𑁂 𑀪𑀕𑁆𑀕𑀸, 𑀦 𑀢𑁂 𑀓𑀢𑁆𑀣𑀘𑀺 𑀦𑀺𑀥𑀸𑀦𑀁 𑀕𑀢𑀸, 𑀅𑀣 𑀔𑁄 𑀅𑀪𑀸𑀯𑀫𑁂𑀯 𑀕𑀢𑀸. 𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂 𑀬𑀢𑁄 𑀆𑀕𑀘𑁆𑀙𑁂𑀬𑁆𑀬𑀼𑀁 𑀯𑀢𑁆𑀢𑀫𑀸𑀦𑀪𑀸𑀯𑀁. 𑀦𑀺𑀩𑁆𑀩𑀢𑁆𑀢𑀸 𑀬𑁂𑀧𑀻𑀢𑀺 𑀬𑁂 𑀧𑀝𑀺𑀮𑀤𑁆𑀥𑀢𑁆𑀢𑀪𑀸𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀢𑁂𑀧𑀺 𑀆𑀭𑀕𑁆𑀕𑁂 𑀲𑀸𑀲𑀧𑀽𑀧𑀫𑀸 𑀢𑀺𑀝𑁆𑀞𑀦𑁆𑀢𑀺. 𑀬𑀣𑀸 𑀦𑀸𑀫 𑀲𑀽𑀘𑀺𑀬𑀁 𑀞𑀺𑀢𑀸𑀬𑀁 𑀲𑀸𑀲𑀧𑁄 𑀔𑀺𑀢𑁆𑀢𑁄 𑀢𑀲𑁆𑀲𑀸 𑀲𑀺𑀔𑀁 𑀨𑀼𑀝𑁆𑀞𑀫𑀢𑁆𑀢𑁄 𑀯𑀺𑀕𑀘𑁆𑀙𑀢𑀺 𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀺, 𑀦 𑀢𑁂𑀲𑀁 𑀅𑀯𑀝𑁆𑀞𑀸𑀦𑀁 𑀅𑀢𑁆𑀣𑀻𑀢𑀺.

𑀪𑀗𑁆𑀕𑁄 𑀦𑁂𑀲𑀁 𑀧𑀼𑀭𑀓𑁆𑀔𑀢𑁄𑀢𑀺 𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀥𑀫𑁆𑀫𑀸𑀦𑀁 𑀪𑀗𑁆𑀕𑁄 𑀦𑀸𑀫 𑀧𑀼𑀭𑀢𑁄 𑀏𑀯 𑀓𑀢𑁄, 𑀏𑀓𑀁𑀲𑀪𑀸𑀯𑀻 𑀦 𑀅𑀧𑀲𑀓𑁆𑀓𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀭𑀸𑀡𑁂𑀳𑀻𑀢𑀺 𑀧𑀼𑀭𑀺𑀫𑀓𑁂𑀳𑀺 𑀅𑀢𑀻𑀢𑁂𑀳𑀺.

𑀅𑀤𑀲𑁆𑀲𑀦𑀢𑁄𑀢𑀺 𑀅𑀧𑀲𑁆𑀲𑀺𑀢𑀩𑁆𑀩𑀢𑁄. 𑀆𑀬𑀦𑁆𑀢𑀻𑀢𑀺 𑀆𑀕𑀘𑁆𑀙𑀦𑁆𑀢𑀺. ‘‘𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀇𑀫𑀺𑀦𑀸𑀧𑀺 𑀓𑀼𑀢𑁄𑀘𑀺 𑀭𑀸𑀲𑀺𑀢𑁄 𑀆𑀕𑀫𑀦𑀸𑀪𑀸𑀯𑀫𑁂𑀯𑀸𑀳. 𑀪𑀕𑁆𑀕𑀸 𑀕𑀘𑁆𑀙𑀦𑁆𑀢𑀼𑀤𑀲𑁆𑀲𑀦𑀦𑁆𑀢𑀺 𑀪𑀕𑁆𑀕𑀸𑀧𑀺 𑀓𑀢𑁆𑀣𑀘𑀺 𑀉𑀧𑀕𑀫𑀦𑀸𑀪𑀸𑀯𑀢𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀤𑀲𑁆𑀲𑀦𑀁 𑀅𑀪𑀸𑀯𑀫𑁂𑀯 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀦𑀺𑀤𑀲𑁆𑀲𑀦𑀫𑀸𑀳 ‘‘𑀯𑀺𑀚𑁆𑀚𑀼𑀧𑁆𑀧𑀸𑀤𑁄…𑀧𑁂… 𑀯𑀬𑀦𑁆𑀢𑀺 𑀘𑀸’’𑀢𑀺.

𑁭𑁧𑁬. ‘‘𑀯𑀺𑀯𑀝𑁆𑀝𑀓𑀧𑁆𑀧𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀚𑁆𑀚𑀦𑀓𑀭𑀽𑀧’’𑀦𑁆𑀢𑀺 𑀇𑀫𑀺𑀦𑀸 𑀲𑀬𑀫𑁂𑀯 𑀉𑀧𑁆𑀧𑀚𑁆𑀚𑀦𑀓𑀥𑀫𑁆𑀫𑀢𑀸𑀬 ‘‘𑀥𑀫𑁆𑀫𑀢𑀸𑀭𑀽𑀧’’𑀦𑁆𑀢𑀺 𑀅𑀦𑁆𑀯𑀢𑁆𑀣𑀦𑀸𑀫𑀢𑀁 𑀤𑀲𑁆𑀲𑁂𑀢𑀺. 𑀅𑀬𑀮𑁄𑀳𑀸𑀤𑀻𑀲𑀼 𑀅𑀬𑁄 𑀦𑀸𑀫 𑀓𑀸𑀴𑀮𑁄𑀳𑀁. 𑀮𑁄𑀳𑀁 𑀦𑀸𑀫 𑀚𑀸𑀢𑀺𑀮𑁄𑀳𑀁 𑀯𑀺𑀚𑀸𑀢𑀺𑀮𑁄𑀳𑀁 𑀓𑀺𑀢𑁆𑀢𑀺𑀫𑀮𑁄𑀳𑀁 𑀧𑀺𑀲𑀸𑀘𑀮𑁄𑀳𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁. 𑀢𑀢𑁆𑀣 𑀅𑀬𑁄 𑀭𑀚𑀢𑀁 𑀲𑀼𑀯𑀡𑁆𑀡𑀁 𑀢𑀺𑀧𑀼 𑀲𑀻𑀲𑀁 𑀢𑀫𑁆𑀩𑀮𑁄𑀳𑀁 𑀯𑁂𑀓𑀦𑁆𑀢𑀓𑀮𑁄𑀳𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀚𑀸𑀢𑀺𑀮𑁄𑀳𑀸𑀦𑀺. 𑀦𑀸𑀕𑀦𑀸𑀲𑀺𑀓𑀮𑁄𑀳𑀁 𑀯𑀺𑀚𑀸𑀢𑀺𑀮𑁄𑀳𑀁. 𑀓𑀁𑀲𑀮𑁄𑀳𑀁 𑀯𑀝𑁆𑀝𑀮𑁄𑀳𑀁 𑀳𑀸𑀭𑀓𑀽𑀝𑀦𑁆𑀢𑀺 𑀢𑀻𑀡𑀺 𑀓𑀺𑀢𑁆𑀢𑀺𑀫𑀮𑁄𑀳𑀸𑀦𑀺. 𑀫𑁄𑀭𑀓𑁆𑀔𑀓𑀸𑀤𑀺 𑀧𑀺𑀲𑀸𑀘𑀮𑁄𑀳𑀁. 𑀢𑀢𑁆𑀣 𑀢𑀫𑁆𑀩𑀮𑁄𑀳𑀁 𑀯𑁂𑀓𑀦𑁆𑀢𑀓𑀦𑁆𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀚𑀸𑀢𑀺𑀮𑁄𑀳𑁂𑀳𑀺 𑀲𑀤𑁆𑀥𑀺𑀁 𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀇𑀥 ‘‘𑀮𑁄𑀳’’𑀦𑁆𑀢𑀺 𑀕𑀳𑀺𑀢𑀦𑁆𑀢𑀺. 𑀢𑀺𑀧𑀽𑀢𑀺 𑀲𑁂𑀢𑀢𑀺𑀧𑀼. 𑀲𑀻𑀲𑀦𑁆𑀢𑀺 𑀓𑀸𑀴𑀢𑀺𑀧𑀼. 𑀲𑀼𑀯𑀡𑁆𑀡𑀁 𑀆𑀓𑀭𑀼𑀧𑁆𑀧𑀦𑁆𑀦𑀭𑀲𑀯𑀺𑀤𑁆𑀥𑀸𑀤𑀺𑀪𑁂𑀤𑀁. 𑀫𑀼𑀢𑁆𑀢𑀸 𑀲𑀸𑀫𑀼𑀤𑁆𑀤𑀺𑀓𑀫𑀼𑀢𑁆𑀢𑀸𑀤𑀺. 𑀫𑀡𑀻𑀢𑀺 𑀯𑁂𑀴𑀼𑀭𑀺𑀬𑀮𑁄𑀳𑀺𑀢𑀗𑁆𑀕𑀫𑀲𑀸𑀭𑀕𑀮𑁆𑀮𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄 𑀲𑀩𑁆𑀩𑁄 𑀫𑀡𑀺𑀯𑀺𑀲𑁂𑀲𑁄. 𑀯𑁂𑀴𑀼𑀭𑀺𑀬𑁄 𑀯𑀁𑀲𑀯𑀡𑁆𑀡𑀫𑀡𑀺. 𑀲𑀗𑁆𑀔𑁄 𑀲𑀸𑀫𑀼𑀤𑁆𑀤𑀺𑀓𑀲𑀗𑁆𑀔𑁄. 𑀲𑀺𑀮𑀸𑀢𑀺 𑀓𑀸𑀴𑀲𑀺𑀮𑀸𑀧𑀡𑁆𑀟𑀼𑀲𑀺𑀮𑀸𑀤𑀺𑀪𑁂𑀤𑀸 𑀲𑀩𑁆𑀩𑀸𑀧𑀺 𑀭𑀢𑀦𑀲𑀫𑁆𑀫𑀢𑀲𑀺𑀮𑀸. 𑀧𑀯𑀸𑀴𑀁 𑀦𑀸𑀫 𑀯𑀝𑁆𑀝𑀼𑀫𑀁 𑀯𑀺𑀤𑁆𑀥𑀫𑀁. 𑀮𑁄𑀳𑀺𑀢𑀗𑁆𑀕𑀁 𑀭𑀢𑁆𑀢𑀫𑀡𑀺. 𑀫𑀲𑀸𑀭𑀕𑀮𑁆𑀮𑀁 𑀓𑀩𑀭𑀫𑀡𑀺. 𑀪𑀽𑀫𑀺𑀆𑀤𑀬𑁄 𑀧𑀸𑀓𑀝𑀸𑀯. 𑀢𑀤𑀲𑁆𑀲𑀸𑀢𑀺 𑀢𑀁 𑀥𑀫𑁆𑀫𑀢𑀸𑀭𑀽𑀧𑀁 𑀅𑀲𑁆𑀲 𑀬𑁄𑀕𑀺𑀦𑁄.

𑀢𑀭𑀼𑀡𑀧𑀮𑁆𑀮𑀯𑀯𑀡𑁆𑀡𑀦𑁆𑀢𑀺 𑀅𑀫𑁆𑀩𑀸𑀤𑀻𑀦𑀁 𑀢𑀭𑀼𑀡𑀧𑀮𑁆𑀮𑀯𑁂𑀦 𑀲𑀫𑀸𑀦𑀯𑀡𑁆𑀡𑀁. 𑀲𑀪𑀸𑀕𑀭𑀽𑀧𑀲𑀦𑁆𑀢𑀢𑀺𑀦𑁆𑀢𑀺 𑀯𑀡𑁆𑀡𑀸𑀤𑀺𑀦𑀸 𑀲𑀫𑀸𑀦𑀪𑀸𑀕𑀁 𑀭𑀽𑀧𑀲𑀦𑁆𑀢𑀸𑀦𑀁. 𑀅𑀦𑀼𑀧𑁆𑀧𑀩𑀦𑁆𑀥𑀸𑀧𑀬𑀫𑀸𑀦𑀦𑁆𑀢𑀺 𑀳𑁂𑀢𑀼𑀨𑀮𑀧𑀭𑀫𑁆𑀧𑀭𑀸𑀬 𑀲𑀫𑁆𑀩𑀦𑁆𑀥𑀦𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺.

𑀲𑁄𑀢𑀺 𑀬𑁄𑀕𑀻. 𑀢𑀦𑁆𑀢𑀺 𑀅𑀲𑁄𑀓𑀭𑀼𑀓𑁆𑀔𑀧𑀡𑁆𑀡𑀁. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑁂𑀢𑁆𑀯𑀸. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀇𑀫𑀺𑀦𑀸 𑀅𑀲𑁄𑀓𑀧𑀡𑁆𑀡𑁂 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀲𑀩𑁆𑀩𑀫𑁆𑀧𑀺 𑀅𑀬𑀮𑁄𑀳𑀸𑀤𑀺𑀪𑁂𑀤𑀁 𑀥𑀫𑁆𑀫𑀢𑀸𑀭𑀽𑀧𑀁. 𑀢𑀫𑁆𑀧𑀺 𑀳𑀺 𑀲𑀻𑀢𑀓𑀸𑀮𑁂 𑀲𑀻𑀢𑀮𑀁, 𑀉𑀡𑁆𑀳𑀓𑀸𑀮𑁂 𑀲𑀽𑀭𑀺𑀬𑀲𑀦𑁆𑀢𑀸𑀧𑁂𑀦 𑀉𑀡𑁆𑀳𑀢𑀭𑀁 𑀳𑁄𑀢𑀺. 𑀢𑀢𑁆𑀣 𑀲𑀻𑀢𑀪𑀸𑀯𑁂𑀦 𑀧𑀯𑀢𑁆𑀢𑀁 𑀭𑀽𑀧𑀁 𑀉𑀡𑁆𑀳𑀁 𑀉𑀡𑁆𑀳𑀪𑀸𑀯𑁂𑀦 𑀧𑀯𑀢𑁆𑀢𑀁 𑀭𑀽𑀧𑀁 𑀲𑀻𑀢𑀁 𑀦 𑀧𑀸𑀧𑀼𑀡𑀸𑀢𑀺. 𑀢𑀢𑁆𑀣 𑀢𑀢𑁆𑀣𑁂𑀯 𑀢𑀝𑀢𑀝𑀸𑀬𑀦𑁆𑀢𑀁 𑀪𑀺𑀚𑁆𑀚𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑀅𑀭𑀽𑀧𑀲𑀢𑁆𑀢𑀓𑀲𑀫𑁆𑀫𑀲𑀦𑀓𑀣𑀸𑀯𑀡𑁆𑀡𑀦𑀸

𑁭𑁧𑁭. 𑀓𑀮𑀸𑀧𑀢𑁄𑀢𑀺 𑀅𑀭𑀽𑀧𑀥𑀫𑁆𑀫𑀓𑀮𑀸𑀧𑀢𑁄.

𑀬𑀲𑁆𑀫𑀸 𑀢𑀢𑁆𑀣 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀸𑀥𑀸𑀭𑀡𑀸 𑀲𑀼𑀧𑀸𑀓𑀝𑀸, 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀘, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀮𑀸𑀧𑀢𑁄𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸’’𑀢𑀺 𑀆𑀳. 𑀬𑁂 𑀇𑀫𑁂 𑀲𑀫𑁆𑀫𑀲𑀦𑁂 𑀉𑀧𑁆𑀧𑀦𑁆𑀦𑀸 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀯𑀺𑀦𑀝𑁆𑀞𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀯𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀫𑁆𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁. 𑀲𑀫𑁆𑀫𑀲𑀦𑁆𑀢𑁄𑀢𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑁄. 𑀢𑀁 𑀬𑀼𑀢𑁆𑀢𑀢𑀭𑀦𑁆𑀢𑀺 𑀢𑀁 𑀅𑀭𑀺𑀬𑀯𑀁𑀲𑀓𑀣𑀸𑀬𑀁 𑀯𑀼𑀢𑁆𑀢𑀁 𑀬𑀼𑀢𑁆𑀢𑀢𑀭𑀁 𑀆𑀲𑀦𑁆𑀦𑀪𑀸𑀯𑁂𑀦 𑀯𑀺𑀪𑀽𑀢𑀢𑀭𑀁 𑀭𑀽𑀧𑀲𑀢𑁆𑀢𑀓𑁂 𑀲𑀫𑁆𑀫𑀲𑀦𑀁 𑀲𑀳 𑀕𑀳𑁂𑀢𑁆𑀯𑀸 𑀲𑀫𑁆𑀫𑀲𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀅𑀧𑀺𑀘 𑀭𑀽𑀧𑀲𑀢𑁆𑀢𑀓𑁂 𑀲𑀫𑁆𑀫𑀲𑀦𑀲𑁆𑀲 𑀭𑀽𑀧𑀥𑀫𑁆𑀫𑁂𑀲𑀼 𑀲𑀸𑀢𑀺𑀲𑀬𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀢𑀩𑁆𑀩𑀺𑀲𑀬𑀁 𑀅𑀭𑀽𑀧𑀲𑀫𑁆𑀫𑀲𑀦𑀁 𑀲𑀸𑀢𑀺𑀲𑀬𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀸𑀬 𑀲𑀫𑁆𑀧𑀯𑀢𑁆𑀢𑀢𑀻𑀢𑀺 𑀢𑀁 𑀬𑀼𑀢𑁆𑀢𑀢𑀭𑀁, 𑀦 𑀧𑀦 𑀅𑀧𑀼𑀩𑁆𑀩𑀓𑁂𑀲𑀸𑀤𑀺𑀲𑀫𑁆𑀫𑀲𑀦𑀁 𑀓𑀢𑁆𑀯𑀸 𑀢𑀩𑁆𑀩𑀺𑀲𑀬𑀁 𑀧𑀯𑀢𑁆𑀢𑀺𑀢𑀁. 𑀢𑀣𑀸 𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀦𑀯𑀁 𑀦𑀯𑀁 𑀏𑀯 𑀲𑀺𑀬𑀸, 𑀧𑀼𑀩𑁆𑀩𑁂 𑀕𑀳𑀺𑀢𑀁 𑀲𑀫𑁆𑀫𑀲𑀦𑀯𑀺𑀲𑀬𑀁 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀲𑀫𑁆𑀫𑀲𑀦𑀯𑀺𑀲𑀬𑀲𑁆𑀲 𑀕𑀡𑁆𑀳𑀦𑀢𑁄. 𑀲𑁂𑀲𑀸𑀦𑀺𑀧𑀻𑀢𑀺 𑀬𑀫𑀓𑀢𑁄 𑀲𑀫𑁆𑀫𑀲𑀦𑀸𑀤𑀻𑀦𑀺𑀧𑀺. 𑀢𑁂𑀦𑁂𑀯𑀸𑀢𑀺 𑀅𑀭𑀺𑀬𑀯𑀁𑀲𑀓𑀣𑀸𑀦𑀬𑁂𑀦𑁂𑀯.

𑁭𑁧𑁮. 𑀢𑀫𑁆𑀧𑀺 𑀘𑀺𑀢𑁆𑀢𑀦𑁆𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀢𑁄 𑀲𑀫𑁆𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑁆𑀧𑀺. 𑀘𑀺𑀢𑁆𑀢𑀲𑀻𑀲𑁂𑀦 𑀳𑀺 𑀦𑀺𑀤𑁆𑀤𑁂𑀲𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀬𑀫𑀓𑀢𑁄 𑀲𑀫𑁆𑀫𑀲𑀢𑀺 𑀦𑀸𑀫 𑀦𑀸𑀫𑀭𑀽𑀧𑀥𑀫𑁆𑀫𑁂 𑀆𑀭𑀩𑁆𑀪 𑀬𑀼𑀕𑀴𑀯𑀲𑁂𑀦 𑀲𑀫𑁆𑀫𑀲𑀦𑀲𑁆𑀲 𑀧𑀯𑀢𑁆𑀢𑀦𑀢𑁄. 𑀅𑀬𑀜𑁆𑀳𑀺 𑀧𑀼𑀩𑁆𑀩𑁂 𑀭𑀽𑀧𑀲𑀢𑁆𑀢𑀓𑀯𑀲𑁂𑀦 𑀲𑀫𑁆𑀫𑀲𑀺𑀢𑁆𑀯𑀸 𑀞𑀺𑀢𑁄𑀧𑀺 𑀇𑀤𑀸𑀦𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀸𑀤𑀺𑀯𑀲𑁂𑀦 𑀲𑀫𑁆𑀫𑀲𑀺𑀢𑁆𑀯𑀸𑀯 𑀢𑀁 𑀲𑀫𑁆𑀫𑀲𑀢𑀺. 𑀔𑀡𑀺𑀓𑀢𑁄 𑀲𑀫𑁆𑀫𑀲𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁭𑁧𑁯. 𑀏𑀢𑀫𑁆𑀧𑀻𑀢𑀺 𑀏𑀢𑀁 𑀘𑀢𑀼𑀢𑁆𑀣𑀲𑀫𑁆𑀫𑀲𑀦𑀘𑀺𑀢𑁆𑀢𑀫𑁆𑀧𑀺. 𑀧𑀞𑀫𑀘𑀺𑀢𑁆𑀢𑀦𑁆𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀸𑀤𑀺𑀯𑀲𑁂𑀦 𑀭𑀽𑀧𑀁 𑀲𑀫𑁆𑀫𑀲𑀺𑀢𑀘𑀺𑀢𑁆𑀢𑀁, 𑀬𑀁 𑀭𑀽𑀧𑀧𑀭𑀺𑀕𑁆𑀕𑀸𑀳𑀓𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀲𑀫𑁆𑀫𑀲𑀺𑀢𑀲𑀫𑁆𑀫𑀲𑀺𑀢𑀘𑀺𑀢𑁆𑀢𑀲𑀫𑁆𑀫𑀲𑀦𑁂𑀦 𑀢𑁂𑀲𑀁 𑀔𑀡𑀺𑀓𑀪𑀸𑀯𑀲𑁆𑀲 𑀯𑀺𑀪𑀸𑀯𑀦𑀢𑁄 𑀇𑀤𑀁 𑀲𑀫𑁆𑀫𑀲𑀦𑀁 ‘‘𑀔𑀡𑀺𑀓𑀢𑁄 𑀲𑀫𑁆𑀫𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁭𑁨𑁦. 𑀇𑀤𑀫𑁂𑀯 𑀘 𑀲𑀫𑁆𑀫𑀲𑀦𑀁 𑀤𑀺𑀕𑀼𑀡𑀺𑀢𑀁 𑀅𑀦𑁂𑀓𑀲𑀫𑁆𑀫𑀲𑀦𑀧𑀝𑀺𑀧𑀸𑀝𑀺𑀲𑀫𑁆𑀪𑀯𑀢𑁄 ‘‘𑀧𑀝𑀺𑀧𑀸𑀝𑀺𑀢𑁄 𑀲𑀫𑁆𑀫𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀝𑁆𑀝𑁂𑀬𑁆𑀬𑀸𑀢𑀺 𑀲𑀫𑁆𑀪𑀯𑁂𑀬𑁆𑀬. 𑀢𑀣𑀸 𑀲𑀢𑀺 𑀧𑀝𑀺𑀧𑀸𑀝𑀺𑀲𑀫𑁆𑀫𑀲𑀦𑀧𑀲𑀼𑀢𑀸 𑀏𑀯 𑀪𑀸𑀯𑀦𑀸 𑀲𑀺𑀬𑀸, 𑀦 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀼𑀧𑀓𑀸𑀭𑀻, 𑀦 𑀘𑀸𑀬𑀁 𑀲𑀫𑀸𑀧𑀢𑁆𑀢𑀺𑀘𑀸𑀭𑁄. 𑀬𑀲𑁆𑀫𑀸 𑀘 𑀢𑀢𑁆𑀢𑀓𑁂𑀦 𑀭𑀽𑀧𑀥𑀫𑁆𑀫𑁂𑀲𑀼, 𑀅𑀭𑀽𑀧𑀥𑀫𑁆𑀫𑁂𑀲𑀼 𑀘 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀺 𑀲𑀼𑀝𑁆𑀞𑀼 𑀯𑀺𑀪𑀽𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀬𑀸𑀯 𑀤𑀲𑀫𑀘𑀺𑀢𑁆𑀢𑀲𑀫𑁆𑀫𑀲𑀦𑀸…𑀧𑁂… 𑀞𑀧𑁂𑀢𑀩𑁆𑀩’’𑀦𑁆𑀢𑀺. 𑀞𑀧𑁂𑀢𑀩𑁆𑀩𑀦𑁆𑀢𑀺 𑀘 𑀦 𑀏𑀓𑀸𑀤𑀲𑀫𑀁 𑀤𑁆𑀯𑀸𑀤𑀲𑀫𑁂𑀦 𑀲𑀫𑁆𑀫𑀲𑀺𑀢𑀩𑁆𑀩𑀦𑁆𑀢𑀺 𑀧𑀝𑀺𑀧𑀸𑀝𑀺𑀢𑁄 𑀲𑀫𑁆𑀫𑀲𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀧𑀭𑀁, 𑀦 𑀢𑀢𑁄 𑀲𑀫𑁆𑀫𑀲𑀦𑀢𑁄 𑀑𑀭𑀫𑀦𑀤𑀲𑁆𑀲𑀦𑀧𑀭𑀁, 𑀢𑀲𑁆𑀫𑀸 𑀧𑀼𑀦𑀧𑀺 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀬𑀸𑀯 𑀤𑀲𑀫𑀘𑀺𑀢𑁆𑀢𑀲𑀫𑁆𑀫𑀲𑀦𑀸 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀢𑁂𑀯. 𑀯𑀼𑀢𑁆𑀢𑀦𑁆𑀢𑀺 𑀅𑀭𑀺𑀬𑀯𑀁𑀲𑀓𑀣𑀸𑀬𑀁 𑀯𑀼𑀢𑁆𑀢𑀁.

𑁭𑁨𑁧. 𑀯𑀺𑀲𑀼𑀁 𑀲𑀫𑁆𑀫𑀲𑀦𑀦𑀬𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀦𑀺𑀘𑁆𑀘𑀸𑀤𑀺𑀫𑀦𑀲𑀺𑀓𑀸𑀭𑀯𑀺𑀦𑀺𑀫𑀼𑀢𑁆𑀢𑁄 𑀅𑀜𑁆𑀜𑁄 𑀯𑀺𑀧𑀲𑁆𑀲𑀦𑀸𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀺. 𑀯𑀺𑀧𑀲𑁆𑀲𑀦𑀸𑀬 𑀘 𑀤𑀺𑀝𑁆𑀞𑀺𑀆𑀤𑀺𑀯𑀺𑀓𑁆𑀔𑀫𑁆𑀪𑀦𑀸 𑀇𑀥 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀸𑀤𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀯𑀺𑀧𑀲𑁆𑀲𑀦𑀸𑀬 𑀏𑀯 𑀳𑀺 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀸𑀤𑀬𑁄 𑀇𑀚𑁆𑀛𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑁆𑀢𑀲𑀜𑁆𑀜𑀸𑀢𑀺 𑀲𑀢𑁆𑀢𑀸 𑀅𑀢𑁆𑀣𑀻𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀸. 𑀤𑀼𑀩𑁆𑀩𑀮𑀸𑀬 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀲𑀳𑀕𑀢𑀲𑀜𑁆𑀜𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀢𑁆𑀢𑀲𑀜𑁆𑀜𑀁 𑀉𑀕𑁆𑀖𑀸𑀝𑀺𑀢𑀘𑀺𑀢𑁆𑀢𑁂𑀦𑀸𑀢𑀺 𑀲𑀢𑁆𑀢𑀲𑀜𑁆𑀜𑀸𑀬 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑁂𑀦 𑀤𑀺𑀝𑁆𑀞𑀺 𑀦𑀼𑀧𑁆𑀧𑀚𑁆𑀚𑀢𑀺, 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀉𑀧𑁆𑀧𑀚𑁆𑀚𑀦𑀓𑀸 𑀘𑀺𑀢𑁆𑀢𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀸 𑀢𑀤𑀪𑀸𑀯𑁂𑀦 𑀳𑁄𑀦𑁆𑀢𑀻𑀢𑀺. 𑀫𑀸𑀦𑁄 𑀦𑀸𑀫 𑀬𑁄 𑀤𑀺𑀝𑁆𑀞𑀽𑀧𑀦𑀺𑀲𑁆𑀲𑀬𑁄 𑀅𑀧𑀸𑀬𑀕𑀫𑀦𑀻𑀬𑁄, 𑀲𑁄 𑀤𑀺𑀝𑁆𑀞𑀺𑀬𑀸 𑀯𑀺𑀓𑁆𑀔𑀫𑁆𑀪𑀺𑀢𑀸𑀬 𑀯𑀺𑀓𑁆𑀔𑀫𑁆𑀪𑀺𑀢𑁄 𑀏𑀯 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸 𑀲𑀫𑀼𑀘𑁆𑀙𑀺𑀦𑁆𑀦𑀸𑀬 𑀲𑀫𑀼𑀘𑁆𑀙𑀺𑀚𑁆𑀚𑀦𑀢𑁄𑀢𑀺 𑀆𑀳 ‘‘𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀺𑀢…𑀧𑁂… 𑀫𑀸𑀦𑁄 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. 𑀫𑀸𑀦𑁄 𑀯𑀺𑀓𑁆𑀔𑀫𑁆𑀪𑀺𑀬𑀫𑀸𑀦𑁄 𑀢𑀡𑁆𑀳𑀸𑀬 𑀧𑀯𑀢𑁆𑀢𑀺𑀁 𑀦𑀺𑀯𑀸𑀭𑁂𑀢𑀺, 𑀅𑀪𑀺𑀫𑀢𑀯𑀺𑀲𑀬𑁂𑀲𑀼 𑀏𑀯 𑀢𑀡𑁆𑀳𑀸𑀬 𑀧𑀯𑀢𑁆𑀢𑀦𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀫𑀸𑀦𑀲𑀫𑀼𑀕𑁆𑀖𑀸𑀝𑀺𑀢…𑀧𑁂… 𑀢𑀡𑁆𑀳𑀸 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑀡𑁆𑀳𑀸𑀢𑀺 𑀇𑀥 𑀲𑀼𑀔𑀼𑀫𑀸 𑀦𑀺𑀓𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀢𑀡𑁆𑀳𑀸𑀬…𑀧𑁂… 𑀧𑀭𑀺𑀬𑀸𑀤𑀺𑀦𑁆𑀦𑀸 𑀦𑀸𑀫 𑀳𑁄𑀢𑀻’’𑀢𑀺.

𑀅𑀬𑀁 𑀦𑀬𑁄𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀲𑀦𑀯𑀺𑀥𑀺.

𑀫𑀫 𑀯𑀺𑀧𑀲𑁆𑀲𑀦𑀸𑀢𑀺 𑀇𑀫𑀲𑁆𑀲𑀸𑀧𑀺 𑀅𑀢𑁆𑀢𑀦𑀺𑀬𑀲𑀜𑁆𑀜𑀺𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀲𑀸𑀫𑀺𑀪𑀽𑀢𑁄 𑀅𑀢𑁆𑀢𑀸 𑀧𑀭𑀸𑀫𑀲𑀻𑀬𑀢𑀻𑀢𑀺 𑀤𑀺𑀝𑁆𑀞𑀺𑀕𑀸𑀳𑀢𑀸𑀢𑀺 𑀢𑀣𑀸 ‘‘𑀕𑀡𑁆𑀳𑀢𑁄 𑀳𑀺 𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀝𑀦𑀁 𑀦𑀸𑀫 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘𑀸𑀬𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀲𑀫𑀥𑀺𑀕𑀫𑁂𑀦 𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀓𑁄, 𑀫𑀕𑁆𑀕𑁂𑀦 𑀧𑀦 𑀅𑀲𑀫𑀼𑀕𑁆𑀖𑀸𑀝𑀺𑀢𑀢𑁆𑀢𑀸 𑀅𑀦𑁄𑀴𑀸𑀭𑀺𑀓𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀯𑀲𑁂𑀦𑁂𑀯𑀁 𑀯𑀼𑀢𑁆𑀢𑀁.

𑀲𑀼𑀝𑁆𑀞𑀽𑀢𑀺 𑀲𑀫𑁆𑀫𑀸. 𑀫𑀦𑀸𑀧𑀦𑁆𑀢𑀺 𑀘 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁, 𑀫𑀦𑀯𑀟𑁆𑀠𑀦𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀪𑀬𑁂𑀦𑀸𑀧𑀺 𑀯𑀺𑀧𑀲𑁆𑀲𑀦𑀸𑀯𑀺𑀲𑀬𑀁 𑀅𑀥𑀺𑀫𑀸𑀦𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸𑀦𑀲𑀫𑀼𑀕𑁆𑀖𑀸𑀝𑁄 𑀦𑀸𑀫 𑀦 𑀳𑁄𑀢𑀻’’𑀢𑀺.

𑀯𑀺𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀫𑀻𑀢𑀺 𑀢𑀢𑁆𑀣 𑀲𑀫𑀢𑁆𑀣𑀢𑀸𑀧𑀤𑁂𑀲𑁂𑀦 𑀕𑀼𑀡𑀯𑀺𑀲𑁂𑀲𑀬𑁄𑀕𑀢𑁄 𑀯𑀺𑀧𑀲𑁆𑀲𑀦𑀸𑀬 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑀸 𑀤𑀲𑁆𑀲𑀻𑀬𑀢𑀺, 𑀘𑀺𑀢𑁆𑀢𑀁 𑀯𑀺𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀫𑀺. 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑁆𑀢𑁄 𑀏𑀯 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀻𑀢𑀺 𑀯𑀺𑀧𑀲𑁆𑀲𑀦𑀁 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸.

𑀬𑀲𑁆𑀫𑀸 𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀝𑀦𑀁 𑀦𑀸𑀫𑁂𑀢𑁆𑀣 𑀯𑀺𑀲𑁂𑀲𑀢𑁄 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀲𑀘𑁂 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀺𑀥𑀺𑀁 𑀯𑀢𑁆𑀯𑀸 𑀬𑀲𑁆𑀫𑀸 𑀧𑀦 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁂𑀦 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀢𑁄𑀧𑀺 𑀤𑀼𑀓𑁆𑀔𑀢𑁄𑀧𑀺 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀏𑀯 𑀢𑀤𑀼𑀧𑀩𑁆𑀭𑀽𑀳𑀦𑀢𑁄, 𑀢𑀲𑁆𑀫𑀸 ‘‘𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑀲𑁆𑀫𑀸 𑀫𑀸𑀦𑀲𑀫𑀼𑀕𑁆𑀖𑀸𑀝𑀦𑀁 𑀦𑀸𑀫 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀳𑁄𑀢𑀺. 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀓𑁂 𑀲𑀗𑁆𑀔𑀸𑀭𑁂 𑀧𑀲𑁆𑀲𑀦𑁆𑀢𑀲𑁆𑀲 𑀓𑀼𑀢𑁄 𑀫𑀸𑀦𑀲𑁆𑀲 𑀅𑀯𑀲𑀭𑁄. 𑀅𑀦𑀺𑀘𑁆𑀘𑀲𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀝𑀸𑀬𑀸𑀢𑀺 𑀳𑀺 𑀯𑀼𑀢𑁆𑀢𑀁.

𑀬𑀲𑁆𑀫𑀸 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁 𑀦𑀸𑀫 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀳𑁄𑀢𑀺. 𑀦 𑀳𑀺 𑀲𑀪𑀸𑀯𑀢𑁄, 𑀤𑀼𑀓𑁆𑀔𑀯𑀢𑁆𑀣𑀼𑀢𑁄 𑀘 𑀤𑀼𑀓𑁆𑀔𑀪𑀽𑀢𑁂 𑀲𑀗𑁆𑀔𑀸𑀭𑁂 𑀧𑀲𑁆𑀲𑀦𑁆𑀢𑀲𑁆𑀲 𑀢𑀢𑁆𑀣 𑀈𑀲𑀓𑀫𑁆𑀧𑀺 𑀅𑀪𑀺𑀭𑀢𑁄 𑀳𑁄𑀢𑀺. 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀳𑀺 𑀢𑀢𑁆𑀣 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀲𑁂𑀲𑀁 𑀅𑀦𑀢𑁆𑀢𑀮𑀓𑁆𑀔𑀡𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀸𑀝𑀺𑀢𑁄 𑀲𑀫𑁆𑀫𑀲𑀦𑀁 𑀧𑀲𑀼𑀢𑀲𑁆𑀲 𑀬𑁄𑀕𑀺𑀦𑁄 𑀬𑀤𑀸 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀢𑀺𑀓𑁆𑀔𑀸 𑀲𑀽𑀭𑀸 𑀯𑀺𑀲𑀤𑀸 𑀧𑀯𑀢𑁆𑀢𑀢𑀺, 𑀇𑀢𑀭𑀸 𑀤𑁆𑀯𑁂𑀧𑀺 𑀢𑀤𑀦𑀼𑀕𑀢𑀺𑀓𑀸, 𑀢𑀤𑀸𑀦𑁂𑀦 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀁 𑀓𑀢𑀁 𑀳𑁄𑀢𑀺. 𑀅𑀢𑁆𑀢𑀤𑀺𑀝𑁆𑀞𑀺𑀫𑀽𑀮𑀺𑀓𑀸 𑀳𑀺 𑀲𑀩𑁆𑀩𑀸 𑀤𑀺𑀝𑁆𑀞𑀺𑀬𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀘 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀉𑀚𑀼𑀧𑀝𑀺𑀧𑀓𑁆𑀔𑀸.

𑀬𑀤𑀸 𑀧𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀢𑀺𑀓𑁆𑀔𑀸 𑀲𑀽𑀭𑀸 𑀯𑀺𑀲𑀤𑀸 𑀧𑀯𑀢𑁆𑀢𑀢𑀺, 𑀇𑀢𑀭𑀸 𑀤𑁆𑀯𑁂𑀧𑀺 𑀢𑀤𑀦𑀼𑀕𑀢𑀺𑀓𑀸, 𑀢𑀤𑀸𑀦𑁂𑀦 𑀫𑀸𑀦𑀲𑀫𑀼𑀕𑁆𑀖𑀸𑀝𑀦𑀁 𑀓𑀢𑀁 𑀳𑁄𑀢𑀺. 𑀲𑀢𑀺 𑀳𑀺 𑀦𑀺𑀘𑁆𑀘𑀕𑀸𑀳𑁂 𑀫𑀸𑀦𑀚𑀧𑁆𑀧𑀦𑀸 ‘‘𑀇𑀤𑀁 𑀦𑀺𑀘𑁆𑀘𑀁, 𑀇𑀤𑀁 𑀥𑀼𑀯’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁫𑁦𑁧) 𑀩𑀓𑀩𑁆𑀭𑀳𑁆𑀫𑀼𑀦𑁄 𑀯𑀺𑀬. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀘 𑀦𑀺𑀘𑁆𑀘𑀕𑀸𑀳𑀲𑁆𑀲 𑀉𑀚𑀼𑀧𑀝𑀺𑀧𑀓𑁆𑀔𑀸.

𑀬𑀤𑀸 𑀧𑀦 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀢𑀺𑀓𑁆𑀔𑀸 𑀲𑀽𑀭𑀸 𑀯𑀺𑀲𑀤𑀸 𑀧𑀯𑀢𑁆𑀢𑀢𑀺, 𑀇𑀢𑀭𑀸 𑀤𑁆𑀯𑁂𑀧𑀺 𑀢𑀤𑀦𑀼𑀕𑀢𑀺𑀓𑀸, 𑀢𑀤𑀸𑀦𑁂𑀦 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁 𑀓𑀢𑀁 𑀳𑁄𑀢𑀺. 𑀲𑀢𑀺 𑀳𑀺 𑀲𑀼𑀔𑀲𑀜𑁆𑀜𑀸𑀬 𑀢𑀡𑁆𑀳𑀸𑀕𑀸𑀳𑁄𑀯, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀘 𑀦𑀺𑀓𑀦𑁆𑀢𑀺𑀬𑀸 𑀉𑀚𑀼𑀧𑀝𑀺𑀧𑀓𑁆𑀔𑀸. 𑀏𑀯𑀁 𑀢𑀺𑀲𑁆𑀲𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀓𑀺𑀘𑁆𑀘𑀯𑀺𑀲𑁂𑀲𑀯𑀲𑁂𑀦 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀸𑀤𑀻𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀢𑀺 𑀅𑀬𑀁 𑀯𑀺𑀧𑀲𑁆𑀲𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀻’’𑀢𑀺. 𑀅𑀦𑀼𑀧𑀲𑁆𑀲𑀦𑀸𑀦𑀁 𑀬𑀣𑀸𑀭𑀳𑀁 𑀲𑀓𑀓𑀺𑀘𑁆𑀘𑀓𑀭𑀡𑀜𑁆𑀳𑀺 𑀲𑀓𑀝𑁆𑀞𑀸𑀦𑁂𑀬𑁂𑀯 𑀞𑀸𑀦𑀁, 𑀢𑀲𑁆𑀫𑀸 𑀯𑀺𑀲𑀼𑀁 𑀲𑀫𑁆𑀫𑀲𑀦𑀦𑀬𑁄 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁭𑁨𑁨. 𑀲𑀩𑁆𑀩𑀸𑀓𑀸𑀭𑀢𑁄𑀢𑀺 𑀇𑀥 𑀯𑀺𑀬 𑀏𑀓𑀤𑁂𑀲𑁂𑀦 𑀅𑀯𑀢𑁆𑀯𑀸 𑀲𑀩𑁆𑀩𑀸𑀓𑀸𑀭𑀢𑁄 𑀲𑀭𑀽𑀧𑀢𑁄, 𑀓𑀺𑀘𑁆𑀘𑀢𑁄 𑀘 𑀅𑀦𑀯𑀲𑁂𑀲𑀢𑁄 𑀯𑀢𑁆𑀢𑀩𑁆𑀩𑀸. 𑀇𑀥𑁂𑀯𑀸𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸𑀬𑀫𑁂𑀯. 𑀏𑀓𑀘𑁆𑀘𑀸𑀦𑀁𑀬𑁂𑀯𑁂𑀢𑁆𑀣 𑀅𑀦𑀼𑀧𑀲𑁆𑀲𑀦𑀸𑀦𑀁 𑀧𑀝𑀺𑀮𑀸𑀪𑁄𑀢𑀺 𑀆𑀳 ‘‘𑀏𑀓𑀤𑁂𑀲𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄’’𑀢𑀺, 𑀢𑀸 𑀧𑀦 𑀲𑀬𑀫𑁂𑀯 𑀲𑀭𑀽𑀧𑀢𑁄 𑀤𑀲𑁆𑀲𑁂𑀲𑁆𑀲𑀢𑀺. 𑀢𑀧𑁆𑀧𑀝𑀺𑀧𑀓𑁆𑀔𑁂 𑀥𑀫𑁆𑀫𑁂𑀢𑀺 𑀬𑀸 𑀅𑀦𑀼𑀧𑀲𑁆𑀲𑀦𑀸 𑀇𑀥 𑀲𑀫𑁆𑀪𑀯𑀦𑁆𑀢𑀺, 𑀢𑀸𑀲𑀁 𑀧𑀝𑀺𑀧𑀓𑁆𑀔𑁂 𑀥𑀫𑁆𑀫𑁂 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀓𑁂 𑀧𑀚𑀳𑀢𑀺 𑀯𑀺𑀓𑁆𑀔𑀫𑁆𑀪𑁂𑀢𑀺.

𑀔𑀬𑀸𑀦𑀼𑀧𑀲𑁆𑀲𑀦𑀦𑁆𑀢𑀺 𑀲𑀗𑁆𑀔𑀸𑀭𑀸𑀦𑀁 𑀔𑀡𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁. 𑀪𑀸𑀯𑁂𑀦𑁆𑀢𑁄𑀢𑀺 𑀯𑀟𑁆𑀠𑁂𑀦𑁆𑀢𑁄. 𑀖𑀦𑀲𑀜𑁆𑀜𑀦𑁆𑀢𑀺 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 𑀏𑀓𑀢𑁆𑀢𑀕𑁆𑀕𑀳𑀡𑀁. 𑀔𑀬𑀸𑀦𑀼𑀧𑀲𑁆𑀲𑀦𑀦𑁆𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀸𑀦𑀼𑀧𑀲𑁆𑀲𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀸𑀬 𑀧𑀜𑁆𑀜𑀸𑀬 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 ‘‘𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸’’𑀢𑀺 (𑀧𑀝𑀺. 𑀫. 𑁧.𑁪𑁮) 𑀧𑀲𑁆𑀲𑀢𑀺, 𑀲𑀸 𑀔𑀬𑀸𑀦𑀼𑀧𑀲𑁆𑀲𑀦𑀸. 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲𑀸 𑀧𑀸𑀭𑀺𑀧𑀽𑀭𑀻𑀢𑀺 𑀖𑀦𑀲𑀜𑁆𑀜𑀸𑀬 𑀧𑀳𑀸𑀦𑀁 𑀳𑁄𑀢𑀺, 𑀢𑀢𑁄 𑀧𑀼𑀩𑁆𑀩𑁂 𑀅𑀧𑀭𑀺𑀧𑀼𑀡𑁆𑀡𑀢𑀸𑀬 𑀢𑀁 𑀦 𑀳𑁄𑀢𑀺. 𑀏𑀯𑀫𑀜𑁆𑀜𑀢𑁆𑀣𑀸𑀧𑀻𑀢𑀺 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀢𑀸 𑀧𑀳𑀸𑀦𑀢𑀻𑀭𑀡𑀧𑀭𑀺𑀜𑁆𑀜𑀸𑀲𑀼 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀸. 𑀧𑀘𑁆𑀘𑀓𑁆𑀔𑀢𑁄, 𑀅𑀦𑁆𑀯𑀬𑀢𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀪𑀗𑁆𑀕𑀁 𑀤𑀺𑀲𑁆𑀯𑀸 𑀢𑀢𑁆𑀣𑁂𑀯 𑀪𑀗𑁆𑀕𑀲𑀗𑁆𑀔𑀸𑀢𑁂 𑀦𑀺𑀭𑁄𑀥𑁂 𑀅𑀥𑀺𑀫𑀼𑀢𑁆𑀢𑀢𑀸 𑀯𑀬𑀸𑀦𑀼𑀧𑀲𑁆𑀲𑀦𑀸, 𑀢𑀸𑀬 𑀆𑀬𑀽𑀳𑀦𑀁 𑀧𑀚𑀳𑀢𑀺. 𑀬𑀤𑀢𑁆𑀣𑀁, 𑀬𑀸𑀬 𑀘 𑀆𑀬𑀽𑀳𑀢𑀺, 𑀢𑀲𑁆𑀫𑀺𑀁 𑀧𑀯𑀢𑁆𑀢𑁂 𑀢𑀡𑁆𑀳𑀸𑀬 𑀘𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀬𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀆𑀬𑀽𑀳𑀦𑀁 𑀧𑀚𑀳𑀢𑀻’’𑀢𑀺. 𑀚𑀸𑀢𑀲𑁆𑀲 𑀚𑀭𑀸𑀫𑀭𑀡𑁂𑀳𑀺 𑀤𑁆𑀯𑀺𑀥𑀸 𑀧𑀭𑀺𑀡𑀸𑀫𑀤𑀲𑁆𑀲𑀦𑀁, 𑀭𑀽𑀧𑀲𑀢𑁆𑀢𑀓𑀸𑀤𑀺𑀯𑀲𑁂𑀦 𑀯𑀸 𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀢𑀁𑀢𑀁𑀧𑀭𑀺𑀘𑁆𑀙𑁂𑀤𑀢𑁄 𑀧𑀭𑀁 𑀅𑀜𑁆𑀜𑀪𑀸𑀯𑀤𑀲𑁆𑀲𑀦𑀁 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀸, 𑀢𑀸𑀬 𑀥𑀼𑀯𑀲𑀜𑁆𑀜𑀁 𑀣𑀺𑀭𑀪𑀸𑀯𑀕𑀳𑀡𑀁 𑀧𑀚𑀳𑀢𑀺.

𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀏𑀯. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀦𑁆𑀢𑀢𑀺𑀬𑀁, 𑀲𑀫𑀽𑀳𑁂 𑀘 𑀏𑀓𑀢𑁆𑀢𑀲𑀜𑁆𑀜𑀸𑀬 𑀕𑀬𑁆𑀳𑀫𑀸𑀦𑀁 𑀓𑀸𑀮𑀦𑁆𑀢𑀭𑀸𑀯𑀝𑁆𑀞𑀸𑀬𑀺𑀪𑀸𑀯𑁂𑀦, 𑀦𑀺𑀘𑁆𑀘𑀪𑀸𑀯𑁂𑀦 𑀘 𑀲𑀗𑁆𑀔𑀸𑀭𑀸𑀦𑀁 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀲𑀯𑀺𑀕𑁆𑀕𑀳𑀁 𑀯𑀺𑀬 𑀉𑀧𑀝𑁆𑀞𑀸𑀦𑀫𑀢𑁆𑀢𑀁. 𑀧𑀡𑀺𑀥𑀺𑀦𑁆𑀢𑀺 𑀲𑀼𑀔𑀧𑀢𑁆𑀣𑀦𑀁, 𑀭𑀸𑀕𑀸𑀤𑀺𑀧𑀡𑀺𑀥𑀺𑀁 𑀯𑀸, 𑀅𑀢𑁆𑀣𑀢𑁄 𑀢𑀡𑁆𑀳𑀸𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀦𑀺𑀦𑁆𑀦𑀢𑀁. 𑀅𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀁. 𑀏𑀢𑁂𑀲𑀜𑁆𑀳𑀺 𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀅𑀦𑀺𑀫𑀺𑀢𑁆𑀢𑀸𑀤𑀺𑀦𑀸𑀫𑁂𑀳𑀺 𑀯𑀼𑀢𑁆𑀢𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀧𑀳𑀸𑀢𑀩𑁆𑀩𑀸 𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀯𑀺𑀬 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀸𑀤𑀬𑁄𑀯 𑀧𑀝𑀺𑀧𑀓𑁆𑀔𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀜𑀢𑁆𑀯𑀸 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀁 𑀤𑀺𑀲𑁆𑀯𑀸 𑀲𑀗𑁆𑀔𑀸𑀭𑀸 𑀏𑀯 𑀪𑀺𑀚𑁆𑀚𑀦𑁆𑀢𑀺, 𑀲𑀗𑁆𑀔𑀸𑀭𑀸𑀦𑀁 𑀫𑀭𑀡𑀁, 𑀦 𑀅𑀜𑁆𑀜𑁄 𑀓𑁄𑀘𑀺 𑀅𑀢𑁆𑀣𑀻𑀢𑀺 𑀪𑀗𑁆𑀕𑀯𑀲𑁂𑀦 𑀲𑀼𑀜𑁆𑀜𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀅𑀥𑀺𑀧𑀜𑁆𑀜𑀸 𑀘 𑀲𑀸 𑀥𑀫𑁆𑀫𑁂𑀲𑀼 𑀘 𑀯𑀺𑀧𑀲𑁆𑀲𑀦𑀸𑀢𑀺 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸, 𑀢𑀸𑀬 𑀦𑀺𑀘𑁆𑀘𑀲𑀸𑀭𑀸𑀤𑀺𑀆𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀁 𑀅𑀪𑀺𑀦𑀺𑀯𑁂𑀲𑀁 𑀲𑀢𑀡𑁆𑀳𑀁 𑀤𑀺𑀝𑁆𑀞𑀺𑀁 𑀧𑀚𑀳𑀢𑀺. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀸𑀫 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀁. 𑀢𑁂𑀦 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀏𑀯𑀫𑀸𑀤𑀺𑀓𑀁, ‘‘𑀇𑀲𑁆𑀲𑀭𑀢𑁄 𑀮𑁄𑀓𑁄 𑀲𑀫𑁆𑀪𑀯𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀜𑁆𑀘 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺. 𑀪𑀬𑀢𑀼𑀧𑀝𑁆𑀞𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀲𑀩𑁆𑀩𑀪𑀯𑀸𑀤𑀻𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀜𑀸𑀡𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸, 𑀢𑀸𑀬 𑀓𑀲𑁆𑀲𑀘𑀺𑀧𑀺 𑀆𑀮𑀬𑀦𑀺𑀲𑁆𑀲𑀬𑀅𑀤𑀲𑁆𑀲𑀦𑀢𑁄 𑀆𑀮𑀬𑀸𑀪𑀺𑀦𑀺𑀯𑁂𑀲𑀁 𑀢𑀣𑀸𑀧𑀯𑀢𑁆𑀢𑀁 𑀢𑀡𑁆𑀳𑀁 𑀧𑀚𑀳𑀢𑀺. 𑀲𑀗𑁆𑀔𑀸𑀭𑀸𑀦𑀁 𑀫𑀼𑀜𑁆𑀘𑀦𑀲𑁆𑀲 𑀉𑀧𑀸𑀬𑀪𑀽𑀢𑀁 𑀧𑀝𑀺𑀲𑀗𑁆𑀔𑀸𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸, 𑀢𑀸𑀬 𑀅𑀦𑀺𑀘𑁆𑀘𑀸𑀤𑀻𑀲𑀼 𑀅𑀧𑁆𑀧𑀝𑀺𑀲𑀗𑁆𑀔𑀸𑀢𑀢𑁆𑀢𑀸 𑀧𑀝𑀺𑀲𑀗𑁆𑀔𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀅𑀯𑀺𑀚𑁆𑀚𑀁 𑀧𑀚𑀳𑀢𑀺. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸, 𑀅𑀦𑀼𑀮𑁄𑀫𑀜𑀸𑀡𑀜𑁆𑀘 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸. 𑀢𑀲𑁆𑀲𑀸 𑀳𑀺 𑀯𑀲𑁂𑀦 𑀢𑀲𑁆𑀲 𑀧𑀤𑀼𑀫𑀧𑀮𑀸𑀲𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺, 𑀢𑀲𑁆𑀫𑀸 𑀢𑀸𑀬 𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑀁 𑀓𑀸𑀫𑀲𑀁𑀬𑁄𑀕𑀸𑀤𑀺𑀓𑀺𑀮𑁂𑀲𑀧𑁆𑀧𑀯𑀢𑁆𑀢𑀺𑀁 𑀧𑀚𑀳𑀢𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀲𑀢𑁆𑀢 𑀅𑀦𑀼𑀧𑀲𑁆𑀲𑀦𑀸 𑀳𑁂𑀝𑁆𑀞𑀸 𑀅𑀢𑁆𑀣𑀢𑁄 𑀯𑀺𑀪𑀢𑁆𑀢𑀸𑀢𑀺, 𑀧𑀭𑀢𑁄 𑀘 𑀲𑀁𑀯𑀡𑁆𑀡𑀻𑀬𑀦𑁆𑀢𑀻𑀢𑀺 𑀇𑀥 𑀦 𑀯𑀼𑀢𑁆𑀢𑀸.

𑀢𑀸𑀲𑀽𑀢𑀺 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀧𑀲𑁆𑀲𑀦𑀸𑀲𑀼. 𑀇𑀫𑀺𑀦𑀸𑀢𑀺 𑀬𑁄𑀕𑀺𑀦𑀸. 𑀢𑀲𑁆𑀫𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀯𑀲𑁂𑀦 𑀲𑀗𑁆𑀔𑀸𑀭𑀸𑀦𑀁 𑀤𑀺𑀝𑁆𑀞𑀢𑁆𑀢𑀸. 𑀢𑀁𑀤𑀲𑁆𑀲𑀦𑀜𑁆𑀳𑀺 𑀅𑀦𑀺𑀘𑁆𑀘𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀢𑀺. 𑀧𑀝𑀺𑀯𑀺𑀤𑁆𑀥𑀸𑀢𑀺 𑀧𑀝𑀺𑀮𑀤𑁆𑀥𑀸. 𑀬𑀤𑀕𑁆𑀕𑁂𑀦 𑀳𑀺 𑀜𑀸𑀡𑁂𑀦 𑀲𑀯𑀺𑀲𑀬𑁄 𑀧𑀝𑀺𑀯𑀺𑀤𑁆𑀥𑁄, 𑀢𑀤𑀕𑁆𑀕𑁂𑀦 𑀢𑀁 𑀧𑀝𑀺𑀮𑀤𑁆𑀥𑀁 𑀦𑀸𑀫 𑀳𑁄𑀢𑀺. 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁 𑀬𑀣𑀸 ‘‘𑀭𑀼𑀓𑁆𑀔𑁄 𑀧𑀸𑀤𑀧𑁄 𑀢𑀭𑀽’’𑀢𑀺. 𑀢𑀸𑀧𑀺 𑀅𑀦𑀺𑀫𑀺𑀢𑁆𑀢𑀸𑀧𑀡𑀺𑀳𑀺𑀢𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸.

𑀲𑀩𑁆𑀩𑀸𑀧𑀺 𑀯𑀺𑀧𑀲𑁆𑀲𑀦𑀸, 𑀢𑀲𑁆𑀫𑀸 𑀏𑀓𑀤𑁂𑀲𑁂𑀦 𑀧𑀝𑀺𑀯𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀬𑀸 𑀏𑀯 𑀲𑀗𑁆𑀕𑀳𑀺𑀢𑀁, 𑀢𑀲𑁆𑀫𑀸 𑀢𑀁 𑀧𑀕𑁂𑀯 𑀲𑀺𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀤𑀫𑁆𑀧𑀺 𑀤𑁆𑀯𑀬𑀁 𑀧𑀝𑀺𑀯𑀺𑀤𑁆𑀥𑀫𑁂𑀯 𑀳𑁄𑀢𑀻’’𑀢𑀺. 𑀲𑁂𑀲𑁂𑀲𑀼 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀤𑀻𑀲𑀼 𑀤𑀲𑀲𑀼. ‘‘𑀓𑀺𑀜𑁆𑀘𑀺 𑀧𑀝𑀺𑀯𑀺𑀤𑁆𑀥𑀁 𑀓𑀺𑀜𑁆𑀘𑀺 𑀅𑀧𑁆𑀧𑀝𑀺𑀯𑀺𑀤𑁆𑀥’’𑀦𑁆𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀏𑀓𑀤𑁂𑀲𑀧𑀝𑀺𑀯𑁂𑀥𑀫𑀸𑀳. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀳𑀺 𑀲𑀺𑀤𑁆𑀥𑀸𑀬 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸, 𑀔𑀬𑀸𑀦𑀼𑀧𑀲𑁆𑀲𑀦𑀸, 𑀯𑀬𑀸𑀦𑀼𑀧𑀲𑁆𑀲𑀦𑀸, 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀸 𑀘 𑀏𑀓𑀤𑁂𑀲𑁂𑀦 𑀲𑀺𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀺𑀤𑁆𑀥𑀸𑀬 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸, 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸 𑀘, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀲𑀺𑀤𑁆𑀥𑀸𑀬 𑀇𑀢𑀭𑀸𑀢𑀺.

𑀉𑀤𑀬𑀩𑁆𑀩𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁭𑁨𑁩. 𑀧𑀭𑀢𑁄 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀓𑀣𑀸𑀬𑀁 𑀅𑀩𑁆𑀪𑀸𑀤𑀺𑀯𑀺𑀕𑀫𑁂𑀦 𑀆𑀓𑀸𑀲𑀲𑁆𑀲 𑀯𑀺𑀬, 𑀧𑀗𑁆𑀓𑀫𑀮𑀯𑀺𑀕𑀫𑁂𑀦 𑀉𑀤𑀓𑀲𑁆𑀲 𑀯𑀺𑀬, 𑀓𑀸𑀴𑀓𑀸𑀧𑀕𑀫𑁂𑀦 𑀲𑀼𑀯𑀡𑁆𑀡𑀲𑁆𑀲 𑀯𑀺𑀬 𑀲𑀁𑀓𑀺𑀮𑁂𑀲𑀯𑀺𑀕𑀫𑁂𑀦 𑀜𑀸𑀡𑀲𑁆𑀲 𑀧𑀭𑀺𑀲𑀼𑀤𑁆𑀥𑀻𑀢𑀺 𑀆𑀳 ‘‘𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀧𑀳𑀸𑀦𑁂𑀦 𑀯𑀺𑀲𑀼𑀤𑁆𑀥𑀜𑀸𑀡𑁄’’𑀢𑀺. 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀲𑀗𑁆𑀔𑀸𑀭𑁂𑀲𑀼 𑀮𑀓𑁆𑀔𑀡𑀢𑁆𑀢𑀬𑀲𑀮𑁆𑀮𑀓𑁆𑀔𑀡𑀲𑀫𑁆𑀫𑀲𑀦𑀲𑁆𑀲 𑀓𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀲𑀦𑀜𑀸𑀡𑀲𑁆𑀲 𑀧𑀸𑀭𑀁 𑀕𑀦𑁆𑀢𑁆𑀯𑀸’’𑀢𑀺. 𑀢𑀢𑁆𑀣 𑀲𑀫𑁆𑀫𑀲𑀦𑀜𑀸𑀡𑀲𑁆𑀲𑀸𑀢𑀺 𑀦𑀬𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀲𑁆𑀲 𑀓𑀮𑀸𑀧𑀲𑀫𑁆𑀫𑀲𑀦𑀜𑀸𑀡𑀲𑁆𑀲. 𑀢𑀲𑁆𑀲𑁂𑀯 𑀳𑀺 𑀣𑀺𑀭𑀪𑀸𑀯𑀸𑀬 𑀇𑀢𑀭𑁂 𑀲𑀫𑁆𑀫𑀲𑀦𑀯𑀺𑀲𑁂𑀲𑀸𑀢𑀺 𑀯𑀤𑀦𑁆𑀢𑀺. 𑀲𑀫𑁆𑀫𑀲𑀦𑀜𑀸𑀡𑀲𑁆𑀲𑀸𑀢𑀺 𑀯𑀸 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀲𑀫𑁆𑀫𑀲𑀦𑀜𑀸𑀡𑀲𑁆𑀲. 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬 𑀲𑀤𑀺𑀲𑀸 𑀳𑀺 𑀲𑀸. 𑀢𑀸𑀬 𑀳𑀺 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀸𑀤𑀺 𑀲𑀫𑁆𑀪𑀯𑀢𑀻𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀪𑀸𑀯𑀦𑀸𑀯𑀺𑀥𑀸𑀦𑀁 𑀧𑀭𑀢𑁄 𑀯𑀢𑁆𑀢𑀼𑀓𑀸𑀫𑁄 ‘‘𑀲𑀗𑁆𑀔𑁂𑀧𑀢𑁄 𑀢𑀸𑀯 𑀆𑀭𑀪𑀢𑀻’’𑀢𑀺 𑀆𑀳. 𑀲𑀗𑁆𑀔𑁂𑀧𑀢𑁄 𑀳𑀺 𑀆𑀭𑀫𑁆𑀪𑁄 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀲𑀼𑀓𑀭𑁄. 𑀢𑀢𑁆𑀭𑀸𑀢𑀺 𑀲𑀗𑁆𑀔𑁂𑀧𑁂𑀦 𑀆𑀭𑀫𑁆𑀪𑁂.

𑀓𑀣𑀦𑁆𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀬𑀁 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁…𑀧𑁂… 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑁂 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀣𑀁 𑀜𑀸𑀢𑀩𑁆𑀩𑀦𑁆𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀸 𑀥𑀫𑁆𑀫𑁂 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀓𑀸𑀢𑀩𑁆𑀩𑁄, 𑀦 𑀅𑀢𑀻𑀢𑀸𑀦𑀸𑀕𑀢𑁂𑀢𑀺 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺. 𑀉𑀤𑀬𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀬𑀸𑀯𑀤𑁂𑀯 𑀯𑀬𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑀬𑀤𑀲𑁆𑀲𑀦𑀲𑁆𑀲 𑀧𑀥𑀸𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸’’𑀢𑀺 𑀯𑀢𑁆𑀯𑀸 𑀢𑀁 𑀧𑀦 𑀯𑀬𑀤𑀲𑁆𑀲𑀦𑀁 𑀉𑀤𑀬𑀤𑀲𑁆𑀲𑀦𑀧𑀼𑀩𑁆𑀩𑀓𑀦𑁆𑀢𑀺 𑀆𑀳 ‘‘𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑁂 𑀜𑀸𑀡’’𑀦𑁆𑀢𑀺.

𑀚𑀸𑀢𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀁 𑀧𑀝𑀺𑀮𑀤𑁆𑀥𑀢𑁆𑀢𑀪𑀸𑀯𑀁. 𑀅𑀬𑀁 𑀳𑀺 𑀚𑀸𑀢𑀲𑀤𑁆𑀤𑁄 𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄 ‘‘𑀬𑁂 𑀥𑀫𑁆𑀫𑀸 𑀚𑀸𑀢𑀸 𑀪𑀽𑀢𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁦𑁪𑁬) 𑀯𑀺𑀬, 𑀦 𑀅𑀢𑀻𑀢𑀁

‘‘𑀬𑁂 𑀢𑁂 𑀚𑀸𑀢𑀸 𑀦 𑀢𑁂 𑀲𑀦𑁆𑀢𑀺, 𑀬𑁂 𑀦 𑀚𑀸𑀢𑀸 𑀢𑀢𑁆𑀣𑁂𑀯 𑀢𑁂;

𑀮𑀤𑁆𑀥𑀢𑁆𑀢𑀪𑀸𑀯𑀸 𑀦𑁄 𑀪𑀕𑁆𑀕𑀸, 𑀢𑁂𑀯 𑀲𑀦𑁆𑀢𑀺 𑀲𑀪𑀸𑀯𑀢𑁄’’𑀢𑀺. 𑁋

𑀆𑀤𑀻𑀲𑀼 𑀯𑀺𑀬, 𑀦𑀸𑀧𑀺 𑀚𑀸𑀢𑀢𑀸𑀫𑀢𑁆𑀢𑀁 ‘‘𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦𑀸𑀳 ‘‘𑀚𑀸𑀢𑀁 𑀭𑀽𑀧𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀤𑀻. 𑀦𑀺. 𑁨.𑁨𑁦𑁭; 𑀲𑀁. 𑀦𑀺. 𑁫.𑁩𑁭𑁯), 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀁 𑀦𑀸𑀫 𑀚𑀸𑀢𑀁 𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀆𑀤𑀺𑀢𑁄 𑀤𑀼𑀧𑁆𑀧𑀭𑀺𑀕𑁆𑀕𑀳𑀦𑁆𑀢𑀺 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀓𑀸𑀢𑀩𑁆𑀩𑁄. 𑀢𑀲𑁆𑀲𑀸𑀢𑀺 𑀭𑀽𑀧𑀲𑁆𑀲. 𑀧𑀘𑁆𑀘𑀬𑀮𑀓𑁆𑀔𑀡𑀧𑀧𑀜𑁆𑀘𑀁 𑀅𑀦𑀸𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀉𑀤𑀬𑁄𑀢𑀺 𑀦𑀺𑀩𑁆𑀩𑀢𑁆𑀢𑀦𑀲𑀜𑁆𑀜𑀺𑀢𑀁 𑀲𑀗𑁆𑀔𑀢𑀮𑀓𑁆𑀔𑀡𑀁 𑀉𑀤𑀬𑁄 𑀉𑀧𑁆𑀧𑀸𑀤𑁄. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀯𑀬𑁄𑀢𑀺 𑀯𑀺𑀧𑀭𑀺𑀡𑀸𑀫𑀲𑀜𑁆𑀜𑀺𑀢𑀁 𑀲𑀗𑁆𑀔𑀢𑀮𑀓𑁆𑀔𑀡𑀁 𑀯𑀬𑁄 𑀯𑀺𑀦𑀸𑀲𑁄. 𑀅𑀦𑀼𑀧𑀲𑁆𑀲𑀦𑀸𑀜𑀸𑀡𑀦𑁆𑀢𑀺 𑀬𑀸 𑀉𑀤𑀬𑀲𑁆𑀲, 𑀯𑀬𑀲𑁆𑀲 𑀘 𑀅𑀦𑀼𑀧𑁂𑀓𑁆𑀔𑀦𑀸, 𑀢𑀁 𑀜𑀸𑀡𑀁. 𑀓𑀺𑀜𑁆𑀘𑀸𑀧𑀺 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀻𑀲𑀼 𑀚𑀸𑀢𑀺𑀚𑀭𑀸𑀫𑀭𑀡𑀲𑀻𑀲𑁂𑀦 𑀚𑀸𑀢𑀺𑀚𑀭𑀸𑀫𑀭𑀡𑀯𑀦𑁆𑀢𑁄 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀇𑀥 𑀧𑀦 𑀉𑀤𑀬𑀩𑁆𑀩𑀬𑀜𑀸𑀡𑀦𑀺𑀤𑁆𑀤𑁂𑀲𑁂 ‘‘𑀚𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀢𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀉𑀤𑀬𑁄, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀯𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁪𑁯) 𑀯𑀼𑀘𑁆𑀘𑀫𑀸𑀦𑁂 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀁 𑀚𑀸𑀢𑀺𑀚𑀭𑀸𑀫𑀭𑀡𑀯𑀦𑁆𑀢𑀢𑀸, 𑀦𑀺𑀧𑁆𑀨𑀦𑁆𑀦𑀢𑀸 𑀘 𑀅𑀦𑀼𑀜𑁆𑀜𑀸𑀢𑀸 𑀯𑀺𑀬 𑀳𑁄𑀢𑀻𑀢𑀺 𑀢𑀁 𑀧𑀭𑀺𑀳𑀭𑀺𑀢𑀼𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀪𑀯𑀧𑀭𑀺𑀬𑁄𑀲𑀸𑀦𑀸𑀯 𑀤𑁂𑀲𑀦𑀸 𑀓𑀢𑀸.

𑀲𑁄𑀢𑀺 𑀬𑁄𑀕𑀻. 𑀇𑀫𑀺𑀦𑀸 𑀧𑀸𑀴𑀺𑀦𑀬𑁂𑀦𑀸𑀢𑀺 𑀇𑀫𑀸𑀬 ‘‘𑀚𑀸𑀢𑀁 𑀭𑀽𑀧𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑀸𑀬 𑀧𑀸𑀴𑀺𑀕𑀢𑀺𑀬𑀸. 𑀚𑀸𑀢𑀺𑀦𑁆𑀢𑀺 𑀦 𑀧𑀲𑀽𑀢𑀺𑀁, 𑀦 𑀘 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀫𑀢𑁆𑀢𑀁, 𑀅𑀣 𑀔𑁄 𑀉𑀧𑁆𑀧𑀸𑀤𑀁 𑀦𑀺𑀩𑁆𑀩𑀢𑁆𑀢𑀺𑀯𑀺𑀓𑀸𑀭𑀁. 𑀲𑁆𑀯𑀸𑀬𑀁 𑀯𑀺𑀓𑀸𑀭𑁄 𑀬𑀲𑁆𑀫𑀸 𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀦𑀯𑀸𑀯𑀝𑁆𑀞𑀸𑀦𑀚𑀭𑀸 𑀯𑀺𑀬 𑀦𑀯𑀪𑀸𑀯𑀸𑀧𑀕𑀫𑁄𑀢𑀺 𑀆𑀳 ‘‘𑀅𑀪𑀺𑀦𑀯𑀸𑀓𑀸𑀭’’𑀦𑁆𑀢𑀺. 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀭𑀸𑀲𑀺 𑀯𑀸 𑀦𑀺𑀘𑀬𑁄 𑀯𑀸 𑀦𑀢𑁆𑀣𑀺 𑀬𑀢𑁄 𑀆𑀕𑀘𑁆𑀙𑁂𑀬𑁆𑀬 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀮𑀤𑁆𑀥𑀢𑁆𑀢𑀪𑀸𑀯𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀉𑀧𑁆𑀧𑀚𑁆𑀚𑀫𑀸𑀦…𑀧𑁂… 𑀦𑀢𑁆𑀣𑀻’’𑀢𑀺. 𑀬𑀣𑀸 𑀅𑀦𑀸𑀕𑀢𑁂 𑀅𑀤𑁆𑀥𑀦𑀺 𑀇𑀫𑁂 𑀥𑀫𑁆𑀫𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀺, 𑀏𑀯𑀁 𑀅𑀢𑀻𑀢𑁂𑀧𑀺 𑀅𑀤𑁆𑀥𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀭𑀼𑀚𑁆𑀛𑀫𑀸𑀦𑀲𑁆𑀲𑀸𑀧𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀅𑀯𑀺𑀚𑁆𑀚𑀫𑀸𑀦𑀸𑀦𑀁𑀬𑁂𑀯 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀸𑀤𑁄, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘 𑀲𑀩𑁆𑀩𑀲𑁄 𑀅𑀪𑀸𑀯𑀽𑀧𑀕𑀫𑁄𑀢𑀺 𑀇𑀫𑀫𑀢𑁆𑀣𑀁 𑀲𑀫𑀼𑀤𑀸𑀬𑀕𑀢𑀁 𑀢𑀤𑁂𑀓𑀤𑁂𑀲𑀪𑀽𑀢𑀸𑀬 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀸𑀲𑀺𑀢𑁄𑀢𑀺 𑀭𑀸𑀲𑀺𑀪𑀸𑀯𑁂𑀦 𑀲𑀫𑀼𑀲𑁆𑀲𑀺𑀢𑁄 𑀧𑀼𑀜𑁆𑀚𑁄 𑀭𑀸𑀲𑀺. 𑀬𑀣𑀸 𑀢𑀣𑀸 𑀧𑀺𑀡𑁆𑀟𑀺𑀪𑀽𑀢𑁄 𑀦𑀺𑀘𑀬𑁄. 𑀪𑀽𑀫𑀺𑀬𑀁 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀁 𑀦𑀺𑀥𑀸𑀦𑀁. 𑀉𑀧𑀯𑀻𑀡𑁂𑀢𑀺 𑀏𑀢𑁂𑀦𑀸𑀢𑀺 𑀉𑀧𑀯𑀻𑀡𑀁, 𑀯𑀻𑀡𑀸𑀯𑀸𑀤𑀦𑀁.

𑁭𑁨𑁪. 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀉𑀤𑀬𑀩𑁆𑀩𑀬𑀫𑀦𑀲𑀺𑀓𑀸𑀭𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀦 𑀬𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸𑀢𑀺 𑀅𑀯𑀺𑀚𑁆𑀚𑀸𑀬 𑀉𑀧𑁆𑀧𑀸𑀤𑀸, 𑀅𑀢𑁆𑀣𑀺𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀭𑁄𑀥𑀯𑀺𑀭𑁄𑀥𑀻𑀳𑀺 𑀉𑀧𑁆𑀧𑀸𑀤𑁄 𑀅𑀢𑁆𑀣𑀺𑀪𑀸𑀯𑀯𑀸𑀘𑀓𑁄𑀧𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀲𑁆𑀫𑀸 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀸𑀬 𑀅𑀯𑀺𑀚𑁆𑀚𑀸𑀬 𑀲𑀢𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦𑀸𑀢𑀺 𑀧𑀘𑁆𑀘𑀬𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑁂𑀦, 𑀅𑀢𑁆𑀣𑀺𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀤𑀻𑀳𑀺 𑀘 𑀢𑀻𑀳𑀺 𑀅𑀢𑀻𑀢𑀓𑀸𑀮𑀺𑀓𑀸𑀦𑀺 𑀢𑁂𑀲𑀁 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑀸𑀦𑀺 𑀉𑀧𑀸𑀤𑀸𑀦𑀸𑀤𑀻𑀦𑀺𑀧𑀺 𑀕𑀳𑀺𑀢𑀸𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀯𑀢𑁆𑀢𑀺𑀧𑀘𑁆𑀘𑀬𑁂𑀲𑀼 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀩𑀮𑀯𑀢𑀸𑀬 𑀲𑁄 𑀏𑀯 𑀕𑀳𑀺𑀢𑁄 ‘‘𑀆𑀳𑀸𑀭𑀲𑀫𑀼𑀤𑀬𑀸’’𑀢𑀺. 𑀢𑀲𑁆𑀫𑀺𑀁 𑀧𑀦 𑀕𑀳𑀺𑀢𑁂 𑀧𑀯𑀢𑁆𑀢𑀺𑀧𑀘𑁆𑀘𑀬𑀢𑀸𑀲𑀸𑀫𑀜𑁆𑀜𑁂𑀦 𑀉𑀢𑀼𑀘𑀺𑀢𑁆𑀢𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑁆𑀲 𑀧𑀘𑁆𑀘𑀬𑀢𑁄 𑀉𑀤𑀬𑀤𑀲𑁆𑀲𑀦𑀁 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀦𑀺𑀲𑁆𑀲𑀬𑀲𑀳𑀺𑀢𑁂𑀦𑁂𑀯 𑀓𑀫𑁆𑀫𑀼𑀦𑀸 𑀭𑀽𑀧𑀓𑀸𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀺. 𑀅𑀲𑀢𑀺 𑀘 𑀅𑀯𑀺𑀚𑁆𑀚𑀼𑀧𑀦𑀺𑀲𑁆𑀲𑀬𑀸𑀬 𑀪𑀯𑀦𑀺𑀓𑀦𑁆𑀢𑀺𑀬𑀸 𑀚𑀸𑀢𑀺𑀬𑀸 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺. 𑀬𑀣𑀸 𑀘 𑀭𑀽𑀧𑀲𑁆𑀲 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀦𑀺𑀲𑁆𑀲𑀬𑀢𑀸, 𑀏𑀯𑀁 𑀯𑁂𑀤𑀦𑀸𑀤𑀻𑀦𑀫𑁆𑀧𑀺 𑀤𑀝𑁆𑀞𑀩𑁆𑀩𑀸. 𑀆𑀳𑀸𑀭𑁄 𑀧𑀦 𑀉𑀧𑁆𑀧𑀦𑁆𑀦𑀲𑁆𑀲 𑀭𑀽𑀧𑀲𑁆𑀲 𑀧𑁄𑀲𑀓𑁄, 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀓𑀸𑀫𑀥𑀸𑀢𑀸𑀥𑀺𑀝𑁆𑀞𑀸𑀦𑀢𑁆𑀢𑀸 𑀘 𑀤𑁂𑀲𑀦𑀸𑀬. 𑀉𑀓𑁆𑀓𑀁𑀲𑀦𑀺𑀤𑁆𑀤𑁂𑀲𑁂𑀦 𑀯𑀸 𑀆𑀳𑀸𑀭𑀕𑁆𑀕𑀳𑀡𑀁. ‘‘𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀮𑀯𑀲𑁂𑀦 𑀉𑀤𑀬𑀤𑀲𑁆𑀲𑀦𑀫𑀸𑀳. 𑀢𑀢𑁆𑀣 𑀅𑀤𑁆𑀥𑀸𑀦𑀯𑀲𑁂𑀦 𑀧𑀕𑁂𑀯 𑀉𑀤𑀬𑀁 𑀧𑀲𑁆𑀲𑀺𑀢𑁆𑀯𑀸 𑀞𑀺𑀢𑁄 𑀇𑀥 𑀲𑀦𑁆𑀢𑀢𑀺𑀯𑀲𑁂𑀦 𑀤𑀺𑀲𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀔𑀡𑀯𑀲𑁂𑀦 𑀧𑀲𑁆𑀲𑀢𑀺. 𑀧𑀜𑁆𑀘 𑀮𑀓𑁆𑀔𑀡𑀸𑀦𑀻𑀢𑀺 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀓𑀫𑁆𑀫𑀁 𑀆𑀳𑀸𑀭𑁄𑀢𑀺 𑀇𑀫𑁂𑀲𑀁 𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀺𑀢𑀸𑀲𑀗𑁆𑀔𑀸𑀢𑀮𑀓𑁆𑀔𑀡𑀸𑀦𑀺 𑀘𑁂𑀯 𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀜𑁆𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺. 𑀢𑁂𑀲𑀁 𑀅𑀢𑁆𑀣𑀺𑀢𑀸 𑀳𑀺 𑀭𑀽𑀧𑀲𑁆𑀲 𑀉𑀤𑀬𑁄 𑀮𑀓𑁆𑀔𑀻𑀬𑀢𑀺 𑀏𑀢𑁂𑀳𑀻𑀢𑀺 𑀮𑀓𑁆𑀔𑀡𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦𑀺𑀩𑁆𑀩𑀢𑁆𑀢𑀺 𑀧𑀦 𑀲𑀗𑁆𑀔𑀢𑀮𑀓𑁆𑀔𑀡𑀫𑁂𑀯𑀸𑀢𑀺.

𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄𑀢𑀺 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦 𑀅𑀯𑀺𑀚𑁆𑀚𑀸𑀬 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀢𑁄 𑀅𑀦𑀸𑀕𑀢𑀲𑁆𑀲 𑀭𑀽𑀧𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑁄𑀢𑀺 𑀧𑀘𑁆𑀘𑀬𑀸𑀪𑀸𑀯𑁂 𑀅𑀪𑀸𑀯𑀢𑁄. 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀲𑁆𑀲 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀭𑀽𑀧𑀧𑀘𑁆𑀘𑀬𑀲𑁆𑀲 𑀦𑀺𑀭𑀼𑀤𑁆𑀥𑀪𑀸𑀯𑁂𑀦. 𑀢𑀡𑁆𑀳𑀸𑀦𑀺𑀭𑁄𑀥𑀸 𑀓𑀫𑁆𑀫𑀦𑀺𑀭𑁄𑀥𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀆𑀳𑀸𑀭𑀦𑀺𑀭𑁄𑀥𑀸𑀢𑀺 𑀧𑀯𑀢𑁆𑀢𑀺𑀧𑀘𑁆𑀘𑀬𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀅𑀪𑀸𑀯𑁂. 𑀭𑀽𑀧𑀦𑀺𑀭𑁄𑀥𑁄𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀅𑀪𑀸𑀯𑁄 𑀳𑁄𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀦𑁆𑀢𑀺 𑀪𑀗𑁆𑀕𑀓𑀸𑀮𑀯𑀲𑁂𑀦 𑀢𑁂𑀲𑀁 𑀯𑀬𑀤𑀲𑁆𑀲𑀦𑀁. 𑀢𑀲𑁆𑀫𑀸 𑀢𑀁 𑀅𑀤𑁆𑀥𑀸𑀯𑀲𑁂𑀦 𑀧𑀕𑁂𑀯 𑀧𑀲𑁆𑀲𑀺𑀢𑁆𑀯𑀸 𑀞𑀺𑀢𑁄 𑀇𑀥 𑀲𑀦𑁆𑀢𑀢𑀺𑀯𑀲𑁂𑀦 𑀤𑀺𑀲𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀔𑀡𑀯𑀲𑁂𑀦 𑀧𑀲𑁆𑀲𑀢𑀺. 𑀧𑀜𑁆𑀘 𑀮𑀓𑁆𑀔𑀡𑀸𑀦𑀻𑀢𑀺 𑀇𑀥 𑀅𑀯𑀺𑀚𑁆𑀚𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄, 𑀭𑀽𑀧𑀲𑁆𑀲 𑀔𑀡𑀦𑀺𑀭𑁄𑀥𑁄 𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺. 𑀢𑁂𑀲𑀜𑁆𑀳𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄, 𑀭𑀽𑀧𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑁄 𑀮𑀓𑁆𑀔𑀻𑀬𑀢𑀺 𑀏𑀢𑁂𑀳𑀻𑀢𑀺 𑀮𑀓𑁆𑀔𑀡𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀯𑀺𑀧𑀭𑀺𑀡𑀸𑀫𑁄 𑀲𑀗𑁆𑀔𑀢𑀮𑀓𑁆𑀔𑀡𑀫𑁂𑀯. 𑀏𑀲 𑀦𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 ‘‘𑀨𑀼𑀝𑁆𑀞𑁄 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁩), ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀲𑀜𑁆𑀜𑀸, 𑀘𑁂𑀢𑀦𑀸’’𑀢𑀺, 𑀘 𑀯𑀘𑀦𑀢𑁄 𑀨𑀲𑁆𑀲𑁄 𑀯𑁂𑀤𑀦𑀸 (𑀯𑀺𑀪. 𑁨𑁩𑁧) 𑀲𑀜𑁆𑀜𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑀺𑀧𑀘𑁆𑀘𑀬𑁄, 𑀢𑀁𑀦𑀺𑀭𑁄𑀥𑀸 𑀘 𑀢𑁂𑀲𑀁 𑀦𑀺𑀭𑁄𑀥𑁄, 𑀫𑀳𑀸𑀧𑀤𑀸𑀦 (𑀤𑀻. 𑀦𑀺. 𑁨.𑁬𑁦) 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑁂𑀲𑀼, 𑀅𑀪𑀺𑀥𑀫𑁆𑀫𑁂 𑀘 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀯𑀸𑀭𑁂 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀓𑀣𑀸. 𑁭𑁧𑁯) 𑀯𑀘𑀦𑀢𑁄 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀧𑀘𑁆𑀘𑀬𑁄, 𑀢𑀁𑀦𑀺𑀭𑁄𑀥𑀸 𑀢𑀲𑁆𑀲 𑀦𑀺𑀭𑁄𑀥𑁄𑀢𑀺 𑀯𑀼𑀢𑁆𑀢𑀁 ‘‘𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄’’𑀢𑀺𑀆𑀤𑀺.

𑀏𑀢𑁆𑀣 𑀘 𑀓𑁂𑀘𑀺 𑀢𑀸𑀯 𑀆𑀳𑀼 ‘‘𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁 𑀅𑀤𑁆𑀥𑀸𑀲𑀦𑁆𑀢𑀢𑀺𑀯𑀲𑁂𑀦𑁂𑀯, 𑀦 𑀔𑀡𑀯𑀲𑁂𑀦𑀸’’𑀢𑀺. 𑀢𑁂𑀲𑀁 𑀫𑀢𑁂𑀦 𑀔𑀡𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀫𑁂𑀯 𑀦 𑀲𑀺𑀬𑀸. 𑀅𑀧𑀭𑁂 𑀧𑀦𑀸𑀳𑀼 ‘‘𑀧𑀘𑁆𑀘𑀬𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑀩𑁆𑀩𑀲𑀸𑀥𑀸𑀭𑀡𑀢𑁄 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀸 𑀯𑁂𑀤𑀦𑀸𑀲𑀫𑁆𑀪𑀯𑀁 𑀮𑀩𑁆𑀪𑀫𑀸𑀦𑀢𑀁 𑀧𑀲𑁆𑀲𑀢𑀺, 𑀦 𑀉𑀧𑁆𑀧𑀸𑀤𑀁. 𑀅𑀯𑀺𑀚𑁆𑀚𑀸𑀤𑀺𑀅𑀪𑀸𑀯𑁂 𑀘 𑀢𑀲𑁆𑀲𑀸 𑀅𑀲𑀫𑁆𑀪𑀯𑀁 𑀅𑀮𑀩𑁆𑀪𑀫𑀸𑀦𑀢𑀁 𑀧𑀲𑁆𑀲𑀢𑀺, 𑀦 𑀪𑀗𑁆𑀕𑀁. 𑀔𑀡𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀁, 𑀪𑀗𑁆𑀕𑀜𑁆𑀘 𑀧𑀲𑁆𑀲𑀢𑀻’’𑀢𑀺, 𑀢𑀁 𑀬𑀼𑀢𑁆𑀢𑀁. 𑀲𑀦𑁆𑀢𑀢𑀺𑀯𑀲𑁂𑀦 𑀳𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀉𑀤𑀬𑀢𑁄, 𑀯𑀬𑀢𑁄 𑀘 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀪𑀸𑀯𑀦𑀸𑀬 𑀩𑀮𑀧𑁆𑀧𑀢𑁆𑀢𑀓𑀸𑀮𑁂 𑀜𑀸𑀡𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀔𑀡𑀢𑁄 𑀉𑀤𑀬𑀩𑁆𑀩𑀬𑀸 𑀉𑀧𑀝𑁆𑀞𑀳𑀦𑁆𑀢𑀻𑀢𑀺. 𑀅𑀬𑀜𑁆𑀳𑀺 𑀧𑀞𑀫𑀁 𑀧𑀘𑁆𑀘𑀬𑀢𑁄 𑀉𑀤𑀬𑀩𑁆𑀩𑀬𑀁 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀅𑀯𑀺𑀚𑁆𑀚𑀸𑀤𑀺𑀓𑁂 𑀧𑀘𑁆𑀘𑀬𑀥𑀫𑁆𑀫𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀯𑀦𑁆𑀢𑁂 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀧𑀘𑁆𑀘𑀬𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀫𑀼𑀔𑁂𑀦 𑀔𑀡𑀢𑁄𑀧𑀺 𑀉𑀤𑀬𑀩𑁆𑀩𑀬𑀁 𑀫𑀦𑀲𑀺 𑀓𑀭𑁄𑀢𑀺.

𑀢𑀲𑁆𑀲 𑀬𑀤𑀸 𑀜𑀸𑀡𑀁 𑀢𑀺𑀓𑁆𑀔𑀁 𑀯𑀺𑀲𑀤𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑀤𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀸, 𑀪𑀺𑀚𑁆𑀚𑀦𑁆𑀢𑀸 𑀘 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀫𑁆𑀧𑀺 𑀭𑀽𑀧𑀲𑁆𑀲 𑀉𑀤𑀬𑁄’’𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀫𑁆𑀧𑀺 𑀭𑀽𑀧𑀲𑁆𑀲 𑀉𑀤𑀬𑁄𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸𑀧𑀺. 𑀢𑀡𑁆𑀳𑀸…𑀧𑁂… 𑀓𑀫𑁆𑀫…𑀧𑁂… 𑀆𑀳𑀸𑀭𑀲𑀫𑀼𑀤𑀬𑀸𑀧𑀺 𑀭𑀽𑀧𑀲𑁆𑀲 𑀲𑀫𑁆𑀪𑀯𑁄. 𑀏𑀯𑀫𑁆𑀧𑀺 𑀭𑀽𑀧𑀲𑁆𑀲 𑀯𑀬𑁄𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸𑀧𑀺 𑀢𑀡𑁆𑀳𑀸…𑀧𑁂… 𑀆𑀳𑀸𑀭𑀦𑀺𑀭𑁄𑀥𑀸𑀧𑀺 𑀭𑀽𑀧𑀲𑁆𑀲 𑀯𑀬𑁄 𑀅𑀦𑀼𑀧𑁆𑀧𑀸𑀤𑁄𑀢𑀺 𑀧𑀘𑁆𑀘𑀬𑀢𑁄 𑀯𑀺𑀢𑁆𑀣𑀸𑀭𑁂𑀦 𑀫𑀦𑀲𑀺𑀓𑀸𑀭𑀁 𑀓𑀭𑁄𑀢𑀺. 𑀏𑀯𑀫𑁆𑀧𑀺 𑀭𑀽𑀧𑀁 𑀉𑀤𑁂𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁆𑀧𑀺 𑀆𑀳𑀸𑀭𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁆𑀧𑀺 𑀉𑀤𑁂𑀢𑀺 𑀉𑀧𑁆𑀧𑀚𑁆𑀚𑀢𑀺 𑀦𑀺𑀧𑁆𑀧𑀚𑁆𑀚𑀢𑀻𑀢𑀺. 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁆𑀧𑀺 𑀆𑀳𑀸𑀭𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁆𑀧𑀺 𑀯𑁂𑀢𑀺 𑀦𑀺𑀭𑀼𑀚𑁆𑀛𑀢𑀻𑀢𑀺 𑀔𑀡𑀢𑁄 𑀯𑀺𑀢𑁆𑀣𑀸𑀭𑁂𑀦 𑀫𑀦𑀲𑀺𑀓𑀸𑀭𑀁 𑀓𑀭𑁄𑀢𑀻𑀢𑀺 𑀬𑁄𑀚𑀦𑀸.

𑁭𑁨𑁫. 𑀏𑀯𑀁 𑀫𑀦𑀲𑀺 𑀓𑀭𑁄𑀢𑁄 𑀦 𑀬𑀸𑀯 𑀉𑀤𑀬𑀩𑁆𑀩𑀬𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀉𑀤𑀬𑀩𑁆𑀩𑀬𑀸 𑀲𑀼𑀝𑁆𑀞𑀼 𑀧𑀸𑀓𑀝𑀸 𑀦 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀇𑀢𑀺 𑀓𑀺𑀭𑀺𑀫𑁂 𑀥𑀫𑁆𑀫𑀸…𑀧𑁂… 𑀧𑀝𑀺𑀯𑁂𑀦𑁆𑀢𑀻’’𑀢𑀺, 𑀦𑀬𑀤𑀲𑁆𑀲𑀦𑀯𑀲𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀧𑀞𑀫𑀜𑁆𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀉𑀤𑀬𑀩𑁆𑀩𑀬𑀁 𑀤𑀺𑀲𑁆𑀯𑀸 𑀅𑀣 𑀅𑀢𑀻𑀢𑀸𑀦𑀸𑀕𑀢𑁂 𑀦𑀬𑀁 𑀦𑁂𑀢𑀺. 𑀤𑀼𑀓𑁆𑀔𑀸𑀤𑀺𑀲𑀘𑁆𑀘𑀧𑁆𑀧𑀪𑁂𑀤𑀸, 𑀅𑀦𑀼𑀮𑁄𑀫𑀸𑀤𑀺𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑁆𑀧𑀪𑁂𑀤𑀸, 𑀏𑀓𑀢𑁆𑀢𑀸𑀤𑀺𑀦𑀬𑀧𑁆𑀧𑀪𑁂𑀤𑀸, 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀪𑁂𑀤𑀸 𑀘 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀮𑀓𑁆𑀔𑀡𑀧𑁆𑀧𑀪𑁂𑀤𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀫𑁆𑀧𑀺 𑀕𑀳𑀡𑀁, 𑀢𑁂𑀲𑀫𑁆𑀧𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀢𑀺 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑀪𑀸𑀯𑀢𑁄.

𑁭𑁨𑁬. 𑀬𑀦𑁆𑀢𑀺 𑀓𑀭𑀡𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀬𑁂𑀦 𑀜𑀸𑀡𑁂𑀦𑀸𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀬𑀦𑁆𑀢𑀺 𑀯𑀸 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁. 𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀁 𑀧𑀲𑁆𑀲𑀢𑀺, 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑀁 𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀬𑀣𑀸 𑀅𑀯𑀺𑀚𑁆𑀚𑀸𑀤𑀺𑀲𑀫𑀼𑀤𑀬𑀦𑀺𑀭𑁄𑀥𑀢𑁄 𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀦𑀺𑀭𑁄𑀥𑀲𑁆𑀲 𑀅𑀜𑁆𑀜𑀢𑁆𑀢𑀸 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺𑀆𑀤𑀺𑀯𑀘𑀦𑀪𑁂𑀤𑁄 (𑀧𑀝𑀺. 𑀫. 𑁧.𑁫𑁦) 𑀓𑀢𑁄, 𑀦 𑀏𑀯𑀁 𑀦𑀺𑀩𑁆𑀩𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑁂𑀳𑀺 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀲𑁆𑀲 𑀪𑁂𑀤𑁄 𑀅𑀢𑁆𑀣𑀺 𑀅𑀪𑀺𑀦𑁆𑀦𑀸𑀥𑀺𑀓𑀭𑀡𑀢𑁆𑀢𑀸𑀢𑀺 ‘‘𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀦𑁆𑀢𑁄 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀢𑀻’’𑀢𑀺 𑀯𑀘𑀦𑀪𑁂𑀤𑀁 𑀅𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁, 𑀪𑀗𑁆𑀕𑀓𑁆𑀔𑀡𑁂𑀬𑁂𑀯 𑀘 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁, 𑀢𑀲𑁆𑀫𑀸 𑀢𑀸𑀦𑀺 𑀧𑀲𑁆𑀲𑀦𑁆𑀢𑁄 𑀔𑀡𑀢𑁄 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑁂 𑀧𑀲𑁆𑀲𑀢𑀺 𑀦𑀸𑀫𑀸𑀢𑀺 ‘‘𑀬𑀁 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺.

𑁭𑁨𑁭. 𑀇𑀘𑁆𑀘𑀲𑁆𑀲𑁂𑀯𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 ‘‘𑀅𑀯𑀺𑀚𑁆𑀚𑀸 𑀲𑀫𑀼𑀤𑀬𑀸’’𑀢𑀺𑀆𑀤𑀺 𑀧𑀘𑁆𑀘𑀬𑀢𑁄 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁, ‘‘𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺 𑀔𑀡𑀢𑁄, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀬𑁄𑀕𑀺𑀦𑁄. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀬𑁂 𑀧𑀦 ‘‘𑀇𑀘𑁆𑀘𑀲𑁆𑀲 𑀧𑀘𑁆𑀘𑀬𑀢𑁄’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀚𑀦𑀓𑀸𑀯𑀩𑁄𑀥𑀢𑁄𑀢𑀺 𑀔𑀦𑁆𑀥𑀸𑀦𑀁 𑀚𑀦𑀓𑀲𑁆𑀲 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀲𑁆𑀲 𑀅𑀯𑀩𑀼𑀚𑁆𑀛𑀦𑀢𑁄. 𑀚𑀸𑀢𑀺𑀤𑀼𑀓𑁆𑀔𑀸𑀯𑀩𑁄𑀥𑀢𑁄𑀢𑀺 𑀚𑀸𑀢𑀺𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀯𑀩𑀼𑀚𑁆𑀛𑀦𑀢𑁄. 𑀤𑀼𑀓𑁆𑀔𑀲𑀘𑁆𑀘𑀁 𑀧𑀸𑀓𑀝𑀁 𑀳𑁄𑀢𑀺 𑀏𑀓𑀤𑁂𑀲𑀤𑀲𑁆𑀲𑀦𑁂𑀦 𑀧𑀩𑁆𑀩𑀢𑀲𑀫𑀼𑀤𑁆𑀤𑀸𑀤𑀺𑀤𑀲𑁆𑀲𑀦𑀓𑀸𑀦𑀁 𑀯𑀺𑀬. 𑀫𑀭𑀡𑀤𑀼𑀓𑁆𑀔𑀸𑀯𑀩𑁄𑀥𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀧𑀘𑁆𑀘𑀬𑀸𑀦𑀼𑀧𑁆𑀧𑀸𑀤𑁂𑀦𑀸’’𑀢𑀺 𑀏𑀢𑁂𑀦 𑀧𑀘𑁆𑀘𑀬𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀇𑀥 𑀧𑀘𑁆𑀘𑀬𑀦𑀺𑀭𑁄𑀥𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀬𑀯𑀢𑀦𑁆𑀢𑀺 𑀧𑀘𑁆𑀘𑀬𑀢𑁄 𑀉𑀧𑁆𑀧𑀚𑁆𑀚𑀦𑀓𑀸𑀦𑀁. 𑀬𑀜𑁆𑀘𑀲𑁆𑀲 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀦𑁆𑀢𑀺 𑀬𑀁 𑀅𑀲𑁆𑀲 𑀬𑁄𑀕𑀺𑀦𑁄 𑀧𑀘𑁆𑀘𑀬𑀢𑁄, 𑀔𑀡𑀢𑁄 𑀘 𑀉𑀤𑀬𑀩𑁆𑀩𑀬𑀸𑀦𑀁 𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀲𑀫𑁆𑀫𑁄𑀳𑁄, 𑀢𑀧𑁆𑀧𑀥𑀸𑀦𑁄 𑀯𑀸 𑀯𑀺𑀢𑀓𑁆𑀓𑀸𑀤𑀺𑀥𑀫𑁆𑀫𑀧𑀼𑀜𑁆𑀚𑁄 𑀫𑀕𑁆𑀕𑁄 𑀯𑀸𑀬𑀁 𑀮𑁄𑀓𑀺𑀓𑁄𑀢𑀺 𑀦𑀺𑀬𑁆𑀬𑀸𑀦𑀸𑀦𑀼𑀮𑁄𑀫𑀢𑁄 𑀮𑁄𑀓𑀺𑀓𑁄 𑀫𑀕𑁆𑀕𑁄 𑀏𑀯𑀸𑀬𑀁. 𑀇𑀢𑀺 𑀢𑀲𑁆𑀫𑀸 𑀫𑀕𑁆𑀕𑀲𑀘𑁆𑀘𑀁 𑀧𑀸𑀓𑀝𑀁 𑀳𑁄𑀢𑀺 𑀲𑀪𑀸𑀯𑀸𑀯𑀩𑁄𑀥𑀢𑁄. 𑀢𑁂𑀦𑀸𑀳 ‘‘𑀢𑀢𑁆𑀭 𑀲𑀫𑁆𑀫𑁄𑀳𑀯𑀺𑀖𑀸𑀢𑀢𑁄’’𑀢𑀺, 𑀢𑀤𑀗𑁆𑀕𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁄 𑀫𑀕𑁆𑀕𑁄 𑀅𑀭𑀺𑀬𑀫𑀕𑁆𑀕𑀲𑁆𑀲 𑀉𑀧𑀸𑀬𑀪𑀽𑀢𑁄 𑀅𑀲𑀫𑁆𑀫𑁄𑀳𑀲𑀪𑀸𑀯𑁄 𑀅𑀢𑁆𑀢𑀸𑀦𑀫𑁆𑀧𑀺 𑀧𑀓𑀸𑀲𑁂𑀢𑀺 𑀧𑀤𑀻𑀧𑁄 𑀯𑀺𑀬𑀸𑀢𑀺 𑀫𑀕𑁆𑀕𑀲𑀘𑁆𑀘𑀁 𑀧𑀸𑀓𑀝𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀧𑀸𑀓𑀝𑀪𑀸𑀯𑁄 𑀫𑁄𑀳𑀦𑁆𑀥𑀓𑀸𑀭𑀯𑀺𑀥𑀫𑀦𑁂𑀦𑀸𑀢𑀺 𑀆𑀳 ‘‘𑀢𑀢𑁆𑀭 𑀲𑀫𑁆𑀫𑁄𑀳𑀯𑀺𑀖𑀸𑀢𑀢𑁄’’𑀢𑀺.

𑁭𑁨𑁮. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸’’𑀢𑀺𑀆𑀤𑀺𑀓𑁄 𑀅𑀦𑀼𑀮𑁄𑀫𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀧𑀯𑀢𑁆𑀢𑀺𑀬𑀸 𑀅𑀦𑀼𑀮𑁄𑀫𑀦𑀢𑁄. ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸’’𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀤𑀻𑀲𑀼 𑀲𑀦𑁆𑀢𑁂𑀲𑀽𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻𑀢𑀺 𑀅𑀯𑀩𑁄𑀥𑀢𑁄’’𑀢𑀺. 𑀧𑀯𑀢𑁆𑀢𑀺𑀬𑀸 𑀯𑀺𑀮𑁄𑀫𑀦𑀢𑁄 ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸’’𑀢𑀺𑀆𑀤𑀺𑀓𑁄 𑀧𑀝𑀺𑀮𑁄𑀫𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀢𑁂 𑀘 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 ‘‘𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀲𑀁. 𑀦𑀺. 𑁨.𑁨𑁦). 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀲𑁆𑀲 𑀘 𑀧𑀸𑀓𑀝𑀢𑀸 𑀧𑀘𑁆𑀘𑀬𑀸𑀓𑀸𑀭𑀧𑀸𑀓𑀝𑀢𑀸𑀬 𑀏𑀯 ‘‘𑀇𑀫𑀲𑁆𑀲𑁂𑀢𑀁 𑀨𑀮’’𑀦𑁆𑀢𑀺 𑀅𑀯𑀩𑁄𑀥𑀢𑁄.

𑁭𑁨𑁯. 𑀧𑀼𑀭𑀺𑀫𑀧𑀼𑀭𑀺𑀫𑀸𑀦𑀁 𑀦𑀺𑀭𑁄𑀥𑁄 𑀉𑀢𑁆𑀢𑀭𑀼𑀢𑁆𑀢𑀭𑀸𑀦𑀁 𑀉𑀧𑁆𑀧𑀸𑀤𑀸𑀦𑀼𑀩𑀦𑁆𑀥𑁄𑀢𑀺 𑀅𑀬𑀫𑀢𑁆𑀣𑁄 𑀧𑀘𑁆𑀘𑀬𑀢𑁄 𑀉𑀤𑀬𑀤𑀲𑁆𑀲𑀦𑁂𑀦 𑀲𑀺𑀚𑁆𑀛𑀫𑀸𑀦𑁄 𑀏𑀓𑀢𑁆𑀢𑀦𑀬𑀸𑀥𑀺𑀕𑀫𑀸𑀬 𑀳𑁄𑀢𑀺. 𑀬𑀢𑁄 ‘‘𑀅𑀜𑁆𑀜𑁄 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑀬𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁧𑁭) 𑀯𑁄𑀳𑀸𑀭𑀲𑀺𑀤𑁆𑀥𑀺𑀬𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀅𑀦𑁄𑀓𑀸𑀲𑀢𑀸. 𑀢𑁂𑀦𑀸𑀳 ‘‘𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂𑀦𑀸’’𑀢𑀺𑀆𑀤𑀺. 𑀲𑀗𑁆𑀔𑀸𑀭𑀸 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀔𑀡𑀢𑁄 𑀉𑀤𑀬𑀤𑀲𑁆𑀲𑀦𑁂𑀦 𑀲𑀺𑀚𑁆𑀛𑀫𑀸𑀦𑁄 𑀦𑀸𑀦𑀢𑁆𑀢𑀦𑀬𑀸𑀥𑀺𑀕𑀫𑀸𑀬 𑀳𑁄𑀢𑀺. 𑀬𑀢𑁄 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀲𑀪𑀸𑀯𑀪𑁂𑀤𑀸𑀯𑀩𑁄𑀥𑀢𑁄 ‘‘𑀲𑁄 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑀬𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀅𑀦𑁄𑀓𑀸𑀲𑀢𑀸. 𑀢𑁂𑀦𑀸𑀳 ‘‘𑀔𑀡𑀢𑁄 𑀉𑀤𑀬𑀤𑀲𑁆𑀲𑀦𑁂𑀦𑀸’’𑀢𑀺𑀆𑀤𑀺. 𑀧𑀘𑁆𑀘𑀬𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦 𑀧𑀘𑁆𑀘𑀬𑁂 𑀲𑀢𑀺 𑀨𑀮𑀲𑁆𑀲 𑀪𑀸𑀯𑁄, 𑀅𑀲𑀢𑀺 𑀅𑀪𑀸𑀯𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺𑀬𑀸 𑀅𑀢𑁆𑀣𑀺𑀢𑀸𑀫𑀢𑁆𑀢𑁂𑀦𑁂𑀯 𑀢𑁂 𑀥𑀫𑁆𑀫𑀸 𑀓𑀸𑀭𑀡𑀦𑁆𑀢𑀺 𑀅𑀩𑁆𑀬𑀸𑀧𑀸𑀭𑀦𑀬𑁄 𑀧𑀸𑀓𑀝𑁄 𑀳𑁄𑀢𑀺. 𑀬𑀢𑁄 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀅𑀦𑁄𑀓𑀸𑀲𑀢𑀸 𑀯𑀲𑀯𑀢𑁆𑀢𑀺𑀢𑀸𑀬 𑀅𑀮𑀩𑁆𑀪𑀦𑁂𑀬𑁆𑀬𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺. 𑀅𑀯𑀲𑀯𑀢𑁆𑀢𑀺𑀪𑀸𑀯𑁄 𑀧𑀭𑀸𑀬𑀢𑁆𑀢𑀢𑀸, 𑀲𑀸 𑀘 𑀲𑀧𑁆𑀧𑀘𑁆𑀘𑀬𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀘𑀬𑀢𑁄 𑀉𑀤𑀬𑀤𑀲𑁆𑀲𑀦𑁂𑀦 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀇𑀫𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘 𑀧𑀘𑁆𑀘𑀬𑀸𑀦𑀼𑀭𑀽𑀧𑀫𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀳𑁂𑀢𑀼𑀨𑀮𑀲𑁆𑀲 𑀳𑁂𑀢𑀼𑀅𑀦𑀼𑀭𑀽𑀧𑀢𑁄 𑀲𑀺𑀤𑁆𑀥𑀺𑀬𑀸 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀬𑀸 𑀅𑀦𑁄𑀓𑀸𑀲𑀢𑀸𑀯𑀸𑀢𑀺 𑀆𑀳 ‘‘𑀧𑀘𑁆𑀘𑀬𑀢𑁄 𑀧𑀦𑀸’’𑀢𑀺𑀆𑀤𑀺. 𑀲𑀢𑀺 𑀓𑀸𑀭𑀡𑁂 𑀓𑀼𑀢𑁄 𑀅𑀓𑀺𑀭𑀺𑀬𑀯𑀸𑀤𑁄. 𑀓𑀭𑁄𑀢𑀻𑀢𑀺 𑀳𑀺 𑀓𑀸𑀭𑀡𑀁.

𑁭𑁩𑁦. 𑀧𑀘𑁆𑀘𑀬𑀢𑁄 𑀉𑀤𑀬𑀁 𑀧𑀲𑁆𑀲𑀢𑁄 𑀧𑀘𑁆𑀘𑀬𑁂 𑀲𑀢𑀺 𑀲𑀪𑀸𑀯𑁂 𑀲𑀢𑀺 𑀨𑀮𑀲𑁆𑀲 𑀲𑀫𑁆𑀪𑀯𑁄𑀢𑀺 𑀅𑀢𑁆𑀣𑀺𑀢𑀸𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑀢𑀸𑀢𑀺 𑀲𑀗𑁆𑀔𑀢𑀸𑀦𑀁 𑀦𑀺𑀭𑀻𑀳𑀢𑀸, 𑀅𑀲𑀢𑀺 𑀘 𑀅𑀪𑀸𑀯𑁄𑀢𑀺 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀢𑀸 𑀘 𑀯𑀺𑀜𑁆𑀜𑀸𑀬𑀫𑀸𑀦𑀸 𑀅𑀢𑁆𑀢𑀲𑀼𑀜𑁆𑀜𑀢𑀁 𑀯𑀺𑀪𑀸𑀯𑁂𑀢𑀻𑀢𑀺 𑀆𑀳 ‘‘𑀧𑀘𑁆𑀘𑀬𑀢𑁄 𑀘𑀲𑁆𑀲…𑀧𑁂… 𑀢𑀸𑀯𑀩𑁄𑀥𑀢𑁄’’𑀢𑀺. 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀧𑀸𑀓𑀝𑀁 𑀳𑁄𑀢𑀺 𑀔𑀡𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀩𑁆𑀩𑀬𑀢𑁄 𑀧𑀭𑀺𑀘𑁆𑀙𑀺𑀦𑁆𑀦𑀢𑀸𑀬 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀳𑀼𑀢𑁆𑀯𑀸 𑀅𑀪𑀸𑀯𑀸𑀯𑀩𑁄𑀥𑀢𑁄’’𑀢𑀺. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑀜𑁆𑀳𑀺 𑀳𑀼𑀢𑁆𑀯𑀸 𑀅𑀪𑀸𑀯𑁄. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀺𑀯𑁂𑀓𑁄 𑀅𑀢𑀻𑀢𑀸𑀦𑀸𑀕𑀢𑀪𑀸𑀯𑀲𑀼𑀜𑁆𑀜𑀢𑀸. 𑀦 𑀳𑀺 𑀲𑀗𑁆𑀔𑀸𑀭𑀸 𑀔𑀡𑀢𑁆𑀢𑀬𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀘 𑀯𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀺𑀯𑁂𑀓𑀸𑀯𑀩𑁄𑀥𑀢𑁄𑀢𑀺 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑀸𑀧𑀝𑀺𑀯𑁂𑀥𑀢𑁄𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀮𑀓𑁆𑀔𑀡𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀸 𑀲𑀗𑁆𑀔𑀸𑀭𑀸 𑀉𑀧𑁆𑀧𑀸𑀤𑀢𑁄 𑀉𑀤𑁆𑀥𑀁 𑀚𑀭𑀸𑀪𑀗𑁆𑀕𑀸𑀯𑀢𑁆𑀣𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀯𑀺𑀩𑀸𑀥𑀻𑀬𑀦𑁆𑀢𑁂𑀯. 𑀲𑀸 𑀘 𑀦𑁂𑀲𑀁 𑀯𑀺𑀩𑀸𑀥𑀺𑀬𑀫𑀸𑀦𑀢𑀸 𑀲𑀫𑁆𑀫𑀸 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦 𑀯𑀺𑀪𑀽𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀤𑀼𑀓𑁆𑀔…𑀧𑁂… 𑀩𑁄𑀥𑀢𑁄’’𑀢𑀺.

𑀲𑀪𑀸𑀯𑀮𑀓𑁆𑀔𑀡𑀫𑁆𑀧𑀻𑀢𑀺 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦 𑀦 𑀓𑁂𑀯𑀮𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀮𑀓𑁆𑀔𑀡𑀫𑁂𑀯, 𑀅𑀣 𑀔𑁄 𑀧𑀣𑀯𑀻𑀨𑀲𑁆𑀲𑀸𑀤𑀻𑀦𑀁 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀜𑁆𑀜𑀺𑀢𑀁 𑀲𑀪𑀸𑀯𑀲𑀗𑁆𑀔𑀸𑀢𑀁 𑀮𑀓𑁆𑀔𑀡𑀫𑁆𑀧𑀺 𑀧𑀸𑀓𑀪𑀸𑀯𑀯𑀺𑀤𑁆𑀥𑀁 𑀲𑀪𑀸𑀯𑀸𑀯𑀘𑁆𑀙𑀺𑀦𑁆𑀦𑀁 𑀧𑀸𑀓𑀝𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑀸𑀯𑀩𑁄𑀥𑀢𑁄’’𑀢𑀺. 𑀲𑀪𑀸𑀯𑀮𑀓𑁆𑀔𑀡𑁂𑀢𑀺 𑀲𑀪𑀸𑀯𑀲𑀜𑁆𑀜𑀺𑀢𑁂 𑀮𑀓𑁆𑀔𑀡𑁂, 𑀢𑀁𑀢𑀁𑀥𑀫𑁆𑀫𑀸𑀦𑀁 𑀲𑀮𑀓𑁆𑀔𑀡𑁂. 𑀲𑀗𑁆𑀔𑀢𑀮𑀓𑁆𑀔𑀡𑀲𑁆𑀲 𑀢𑀸𑀯𑀓𑀸𑀮𑀺𑀓𑀢𑁆𑀢𑀫𑁆𑀧𑀻𑀢𑀺 𑀉𑀧𑁆𑀧𑀸𑀤𑀸𑀤𑀺𑀲𑀗𑁆𑀔𑀢𑀮𑀓𑁆𑀔𑀡𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑀸𑀤𑀺𑀧𑀭𑀺𑀢𑁆𑀢𑀓𑀸𑀮𑀺𑀓𑀢𑀸𑀧𑀺 𑀔𑀡𑀦𑁆𑀢𑀭𑀸𑀦𑀯𑀝𑁆𑀞𑀸𑀦𑀢𑁄 𑀢𑀲𑁆𑀲. 𑀢𑁂𑀦𑀸𑀳 ‘‘𑀉𑀤𑀬𑀓𑁆𑀔𑀡𑁂’’𑀢𑀺𑀆𑀤𑀺. 𑀉𑀤𑀬𑀯𑀬𑀫𑀢𑁆𑀢𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀯𑀲𑁂𑀦𑁂𑀯 𑀇𑀫𑀲𑁆𑀲 𑀜𑀸𑀡𑀲𑁆𑀲 𑀧𑀯𑀢𑁆𑀢𑀦𑀢𑁄, 𑀦 𑀞𑀺𑀢𑀺𑀓𑁆𑀔𑀡𑀲𑁆𑀲 𑀅𑀪𑀸𑀯𑀸.

𑁭𑁩𑁧. 𑀦 𑀓𑁂𑀯𑀮𑀜𑁆𑀘 𑀦𑀺𑀘𑁆𑀘𑀦𑀯𑀸, 𑀅𑀣 𑀔𑁄 𑀧𑀭𑀺𑀢𑁆𑀢𑀓𑀸𑀮𑀝𑁆𑀞𑀸𑀬𑀺𑀦𑁄. 𑀓𑀣𑀦𑁆𑀢𑀺 𑀆𑀳 ‘‘𑀲𑀽𑀭𑀺𑀬𑀼𑀕𑁆𑀕𑀫𑀦𑁂’’𑀢𑀺𑀆𑀤𑀺. 𑀢𑀢𑁆𑀣 𑀉𑀤𑀓𑁂 𑀤𑀡𑁆𑀟𑁂𑀦 𑀓𑀢𑀮𑁂𑀔𑀸 𑀉𑀤𑀓𑁂 𑀤𑀡𑁆𑀟𑀭𑀸𑀚𑀺. 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀆𑀤𑀬𑁄 𑀧𑀜𑁆𑀘 𑀓𑀺𑀘𑁆𑀘𑀸𑀧𑀺 𑀉𑀢𑁆𑀢𑀭𑀼𑀢𑁆𑀢𑀭𑀺 𑀅𑀢𑀺𑀧𑀭𑀺𑀢𑁆𑀢𑀝𑁆𑀞𑀸𑀬𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀦𑀺𑀤𑀲𑁆𑀲𑀺𑀢𑀸, 𑀢𑀣𑀸𑀧𑀺 𑀢𑁂 𑀤𑀦𑁆𑀥𑀦𑀺𑀭𑁄𑀥𑀸 𑀏𑀯 𑀦𑀺𑀤𑀲𑁆𑀲𑀺𑀢𑀸, 𑀢𑀢𑁄𑀧𑀺 𑀮𑀳𑀼𑀢𑀭𑀦𑀺𑀭𑁄𑀥𑀢𑁆𑀢𑀸 𑀲𑀗𑁆𑀔𑀸𑀭𑀸𑀦𑀁. 𑀢𑀣𑀸 𑀳𑀺 𑀕𑀫𑀦𑀲𑁆𑀲𑀸𑀤𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀸𑀬𑁂𑀦 𑀧𑀝𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺 𑀧𑀸𑀤𑁂 𑀘 𑀩𑀦𑁆𑀥𑀔𑀼𑀭𑀥𑀸𑀭𑀸 𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀲𑀻𑀖𑀢𑀭𑁄 𑀭𑀽𑀧𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄, 𑀧𑀕𑁂𑀯 𑀅𑀭𑀽𑀧𑀥𑀫𑁆𑀫𑀸𑀦𑀁. 𑀦 𑀓𑁂𑀯𑀮𑀁 𑀦𑀺𑀘𑁆𑀘𑀦𑀯𑀸, 𑀦𑀸𑀧𑀺 𑀧𑀭𑀺𑀢𑁆𑀢𑀓𑀸𑀮𑀝𑁆𑀞𑀸𑀬𑀺𑀦𑁄𑀯, 𑀅𑀣 𑀔𑁄 𑀅𑀲𑀸𑀭𑀸. 𑀓𑀣𑀦𑁆𑀢𑀺 𑀆𑀳 ‘‘𑀫𑀸𑀬𑀸’’𑀢𑀺𑀆𑀤𑀺. 𑀫𑀸𑀬𑀸𑀤𑀬𑁄 𑀳𑀺 𑀫𑀡𑀺𑀆𑀤𑀺𑀯𑀲𑁂𑀦 𑀤𑀺𑀲𑁆𑀲𑀫𑀸𑀦𑀸 𑀅𑀢𑀁𑀲𑀪𑀸𑀯𑀢𑀸𑀬 𑀅𑀲𑀸𑀭𑀸. 𑀢𑀢𑁆𑀣 𑀫𑀦𑁆𑀢𑁄𑀲𑀥𑀪𑀸𑀯𑀺𑀢𑀸 𑀇𑀦𑁆𑀤𑀚𑀸𑀮𑀸𑀤𑀺𑀓𑀸 𑀫𑀸𑀬𑀸. 𑀫𑀺𑀕𑀢𑀡𑁆𑀳𑀺𑀓𑀸 𑀫𑀭𑀻𑀘𑀺. 𑀲𑀼𑀧𑀺𑀦𑀫𑁂𑀯 𑀲𑀼𑀧𑀺𑀦𑀦𑁆𑀢𑀁. 𑀫𑀡𑁆𑀟𑀮𑀸𑀓𑀸𑀭𑁂𑀦 𑀆𑀯𑀺𑀚𑁆𑀛𑀺𑀬𑀫𑀸𑀦𑀁 𑀅𑀮𑀸𑀢𑀫𑁂𑀯 𑀅𑀮𑀸𑀢𑀘𑀓𑁆𑀓𑀁. 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀸𑀦𑀁 𑀓𑀻𑀴𑀦𑀺𑀘𑁆𑀙𑀸𑀯𑀲𑁂𑀦 𑀦𑀕𑀭𑀁 𑀯𑀺𑀬 𑀆𑀓𑀸𑀲𑁂 𑀉𑀧𑀝𑁆𑀞𑀸𑀦𑀫𑀢𑁆𑀢𑀁 𑀕𑀦𑁆𑀥𑀩𑁆𑀩𑀦𑀕𑀭𑀁.

𑀏𑀢𑁆𑀢𑀸𑀯𑀢𑀸𑀢𑀺 𑀬𑁆𑀯𑀸𑀬𑀁 ‘‘𑀚𑀸𑀢𑀁 𑀭𑀽𑀧𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 (𑀧𑀝𑀺. 𑀫. 𑁧.𑁪𑁯), ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 (𑀫. 𑀦𑀺. 𑁧.𑁩𑁪𑁭, 𑁩𑁬𑁧; 𑁨.𑁧𑁧𑁩; 𑁩.𑁮𑁬, 𑁮𑁯; 𑀧𑀝𑀺. 𑀫. 𑁧.𑁪𑁮) 𑀯𑀸 𑀬𑀸𑀯 𑀉𑀤𑀬𑀩𑁆𑀩𑀬𑀧𑀝𑀺𑀯𑁂𑀥𑀸 𑀪𑀸𑀯𑀦𑀸𑀯𑀺𑀥𑀺 𑀆𑀭𑀤𑁆𑀥𑁄, 𑀏𑀢𑁆𑀢𑀸𑀯𑀢𑀸. 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀓𑁄𑀧𑀺 𑀳𑀺 𑀲𑀩𑁆𑀩𑁄 𑀪𑀸𑀯𑀦𑀸𑀯𑀺𑀥𑀺 𑀉𑀤𑀬𑀩𑁆𑀩𑀬𑀜𑀸𑀡𑀼𑀧𑁆𑀧𑀸𑀤𑀦𑀲𑁆𑀲𑁂𑀯, 𑀦 𑀧𑀭𑀺𑀲𑀧𑀭𑀺𑀲𑀭𑀻𑀭𑀓𑀭𑀩𑀦𑁆𑀥𑁄𑀢𑀺. 𑀯𑀬𑀥𑀫𑁆𑀫𑀫𑁂𑀯𑀸𑀢𑀺 𑀪𑀺𑀚𑁆𑀚𑀦𑀲𑀪𑀸𑀯𑀫𑁂𑀯. 𑀯𑀬𑀁 𑀉𑀧𑁂𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬. 𑀬𑀜𑁆𑀳𑀺 𑀉𑀧𑀓𑁆𑀓𑀫𑁂𑀦 𑀯𑀺𑀦𑀲𑁆𑀲𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀫𑁆𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯 𑀯𑀺𑀦𑀲𑁆𑀲𑀢𑀺 𑀅𑀳𑁂𑀢𑀼𑀓𑀢𑁆𑀢𑀸 𑀯𑀺𑀦𑀸𑀲𑀲𑁆𑀲. 𑀉𑀧𑀓𑁆𑀓𑀫𑀳𑁂𑀢𑀼 𑀧𑀦 𑀯𑀺𑀲𑀤𑀺𑀲𑀼𑀧𑁆𑀧𑀸𑀤𑁄 𑀳𑁄𑀢𑀺. 𑀇𑀫𑀺𑀦𑀸 𑀆𑀓𑀸𑀭𑁂𑀦𑀸𑀢𑀺 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁬; 𑀧𑀝𑀺. 𑀫. 𑁨.𑁩𑁦) 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀬𑀁 𑀅𑀦𑀸𑀮𑀫𑁆𑀩𑀺𑀢𑁆𑀯𑀸𑀧𑀺 ‘‘𑀯𑀬𑀥𑀫𑁆𑀫𑀫𑁂𑀯 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀉𑀤𑀬𑀲𑁆𑀲, ‘‘𑀉𑀧𑁆𑀧𑀦𑁆𑀦𑀜𑁆𑀘 𑀇𑀤𑀁 𑀯𑀬𑀁 𑀉𑀧𑁂𑀢𑀻’’𑀢𑀺 𑀯𑀬𑀲𑁆𑀲 𑀘 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀘𑁆𑀘𑀓𑁆𑀔𑀓𑀭𑀡𑀸𑀓𑀸𑀭𑁂𑀦. 𑀅𑀥𑀼𑀦𑀸 𑀉𑀧𑁆𑀧𑀦𑁆𑀦𑀁, 𑀦 𑀢𑀸𑀯 𑀩𑀮𑀧𑁆𑀧𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀜𑀸𑀡’’𑀦𑁆𑀢𑀺. 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁 𑀲𑀫𑁆𑀫𑀲𑀦𑀁 𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀧𑀲𑁆𑀲𑀦𑀸𑀲𑀫𑀜𑁆𑀜𑀁 𑀮𑀪𑀢𑀺, 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑁂𑀯 𑀮𑀪𑀢𑀻𑀢𑀺 𑀆𑀳 ‘‘𑀬𑀲𑁆𑀲𑀸𑀥𑀺𑀕𑀫𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺.

𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀓𑀣𑀸𑀯𑀡𑁆𑀡𑀦𑀸

𑁭𑁩𑁨. 𑀇𑀫𑀸𑀬 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦, 𑀦 𑀆𑀭𑀤𑁆𑀥𑀯𑀺𑀧𑀲𑁆𑀲𑀦𑀸𑀦𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀤𑀺𑀲𑀗𑁆𑀔𑀸𑀢𑀸𑀬 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬, 𑀦𑀸𑀧𑀺 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀤𑀺𑀲𑀗𑁆𑀔𑀸𑀢𑀸𑀬 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀢𑀤𑀸 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲𑀸𑀢𑀺 𑀘 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲𑁂𑀯𑀸𑀢𑀺 𑀏𑀯-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸 𑀳𑀻’’𑀢𑀺𑀆𑀤𑀺. 𑀤𑀺𑀝𑁆𑀞𑀺𑀕𑀸𑀳𑀸𑀤𑀺𑀯𑀢𑁆𑀣𑀼𑀪𑀸𑀯𑁂𑀦 𑀯𑀺𑀧𑀲𑁆𑀲𑀦𑀁 𑀉𑀧𑀓𑁆𑀓𑀺𑀮𑁂𑀲𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸. ‘‘𑀅𑀭𑀺𑀬𑀲𑀸𑀯𑀓𑀲𑁆𑀲𑀸’’𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀯𑀼𑀢𑁆𑀢𑀁 𑀩𑀮𑀯𑀯𑀺𑀧𑀲𑁆𑀲𑀦𑀸𑀧𑀢𑁆𑀢𑀲𑁆𑀲𑀸𑀧𑀺 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀯𑀺𑀧𑁆𑀧𑀝𑀺𑀧𑀦𑁆𑀦𑀓𑀲𑁆𑀲𑀸𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀆𑀤𑀺𑀯𑀲𑁂𑀦 𑀬𑀣𑀸 𑀢𑀣𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀓𑀲𑁆𑀲. 𑀢𑀲𑁆𑀲 𑀧𑀦 𑀧𑀝𑀺𑀧𑀢𑁆𑀢𑀺𑀬𑀸 𑀕𑀭𑀳𑀺𑀢𑀩𑁆𑀩𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀧𑁆𑀧𑀝𑀺𑀧𑀦𑁆𑀦𑀓𑀲𑁆𑀲𑀸’’𑀢𑀺 𑀆𑀳. 𑀘-𑀲𑀤𑁆𑀤𑁄 𑀉𑀧𑀭𑀺𑀧𑀤𑀤𑁆𑀯𑀬𑁂𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀦𑁆𑀢𑀭𑀸 𑀯𑁄𑀲𑀸𑀦𑀁 𑀆𑀧𑀦𑁆𑀦𑀲𑁆𑀲. 𑀓𑀼𑀲𑀻𑀢𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀓𑁄𑀲𑀚𑁆𑀚𑁂𑀦 𑀪𑀸𑀯𑀦𑀁 𑀅𑀦𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲. 𑀅𑀣 𑀯𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀓𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀲𑀗𑁆𑀔𑀸𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀦 𑀯𑀺𑀕𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀓𑀲𑁆𑀲. 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀢𑁆𑀢𑀺𑀬𑁂𑀯 𑀳𑀺 𑀲𑀲𑀫𑁆𑀪𑀸𑀭𑀸 𑀧𑀼𑀩𑁆𑀩𑀪𑀸𑀕𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺, 𑀢𑀤𑀜𑁆𑀜𑀸 𑀯𑀺𑀧𑁆𑀧𑀝𑀺𑀧𑀢𑁆𑀢𑀺, 𑀲𑀸 𑀘 𑀢𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀲𑁆𑀲 𑀳𑁄𑀢𑀺. 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀘 𑀓𑁄𑀲𑀚𑁆𑀚𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀓𑀼𑀲𑀻𑀢𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺. 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲𑀸𑀢𑀺 𑀬𑁄𑀕𑁂𑀦 𑀜𑀸𑀡𑁂𑀦 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲. 𑀲𑀸 𑀧𑀦 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀸 𑀲𑀫𑀣𑀯𑀲𑁂𑀦𑀸𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲𑀸’’𑀢𑀺. 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯 𑀦 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀅𑀜𑁆𑀜𑀣𑀸 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄.

𑀑𑀪𑀸𑀲𑀸𑀤𑀻𑀲𑀼 ‘‘𑀅𑀭𑀺𑀬𑀥𑀫𑁆𑀫𑁄’’𑀢𑀺 𑀧𑀯𑀢𑁆𑀢𑀁 𑀉𑀤𑁆𑀥𑀘𑁆𑀘𑀁 𑀯𑀺𑀓𑁆𑀔𑁂𑀧𑁄 𑀥𑀫𑁆𑀫𑀼𑀤𑁆𑀥𑀘𑁆𑀘𑀁, 𑀢𑁂𑀦 𑀥𑀫𑁆𑀫𑀼𑀤𑁆𑀥𑀘𑁆𑀘𑁂𑀦 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀢𑁄 𑀉𑀓𑁆𑀓𑀫𑀦𑁂𑀦 𑀯𑀺𑀭𑀽𑀧𑀁 𑀕𑀳𑀺𑀢𑀁 𑀧𑀯𑀢𑁆𑀢𑀺𑀢𑀁 𑀫𑀸𑀦𑀲𑀁 𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑀁. 𑀑𑀪𑀸𑀲𑁄 𑀥𑀫𑁆𑀫𑁄𑀢𑀺 𑀓𑀸𑀭𑀡𑀽𑀧𑀘𑀸𑀭𑁂𑀦𑀸𑀳, 𑀈𑀤𑀺𑀲𑀁 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀫𑀫 𑀅𑀭𑀺𑀬𑀫𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀑𑀪𑀸𑀲𑀁 𑀆𑀯𑀚𑁆𑀚𑀢𑀺 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀯𑀸 ‘‘𑀫𑀕𑁆𑀕𑁄’’𑀢𑀺 𑀯𑀸 ‘‘𑀨𑀮’’𑀦𑁆𑀢𑀺 𑀯𑀸. 𑀦𑀺𑀩𑁆𑀩𑀸𑀦𑀦𑁆𑀢𑀺 𑀕𑀡𑁆𑀳𑀦𑁆𑀢𑁄 𑀢𑀢𑁆𑀣 𑀧𑀯𑀢𑁆𑀢𑀥𑀫𑁆𑀫𑁂 𑀫𑀕𑁆𑀕𑀨𑀮𑀪𑀸𑀯𑁂𑀦 𑀕𑀡𑁆𑀳𑀸𑀢𑀺, 𑀜𑀸𑀡𑀸𑀤𑀺𑀓𑁂 𑀧𑀦 𑀫𑀕𑁆𑀕𑀨𑀮𑀪𑀸𑀯𑁂𑀦𑁂𑀯 𑀕𑀡𑁆𑀳𑀸𑀢𑀺. 𑀢𑀢𑁄 𑀯𑀺𑀓𑁆𑀔𑁂𑀧𑁄 𑀉𑀤𑁆𑀥𑀘𑁆𑀘𑀦𑁆𑀢𑀺 𑀢𑀢𑁄 𑀑𑀪𑀸𑀲𑀳𑁂𑀢𑀼 𑀬𑁄 𑀯𑀺𑀓𑁆𑀔𑁂𑀧𑁄, 𑀢𑀁 𑀉𑀤𑁆𑀥𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. ‘‘𑀉𑀤𑁆𑀥𑀘𑁆𑀘𑁂𑀦 𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀅𑀦𑀺𑀘𑁆𑀘𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀅𑀦𑀺𑀘𑁆𑀘…𑀧𑁂… 𑀦𑀧𑁆𑀧𑀚𑀸𑀦𑀸𑀢𑀺 ‘‘𑀫𑀕𑁆𑀕𑀁 𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀲𑀜𑁆𑀜𑀸𑀬 𑀅𑀦𑀺𑀘𑁆𑀘𑀢𑀸𑀤𑀺𑀯𑀲𑁂𑀦 𑀫𑀦𑀲𑀺𑀓𑀸𑀭𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑁋

‘‘𑀬𑁄 𑀳𑀺 𑀓𑁄𑀘𑀺, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀩𑁆𑀬𑀸𑀓𑀭𑁄𑀢𑀺, 𑀲𑀩𑁆𑀩𑁄 𑀲𑁄 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀺, 𑀢𑀲𑁆𑀲 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄…𑀧𑁂… 𑀓𑀭𑁄𑀢𑁄 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀁 𑀫𑀸𑀦𑀲𑀁 𑀳𑁄𑀢𑀺, 𑀳𑁄𑀢𑀺 𑀲𑁄, 𑀆𑀯𑀼𑀲𑁄, 𑀲𑀫𑀬𑁄 𑀬𑀁 𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀫𑁂𑀯 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺, 𑀢𑀲𑁆𑀲 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺…𑀧𑁂… 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁧𑁭𑁦) 𑁋

𑀇𑀫𑀺𑀦𑀸 𑀲𑀼𑀢𑁆𑀢𑀧𑀤𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀳𑀺 𑀘𑀢𑀼𑀢𑁆𑀣𑀫𑀕𑁆𑀕𑀯𑀺𑀲𑁆𑀲𑀚𑁆𑀚𑀦𑁂 𑀬𑀣𑀸𑀯𑀼𑀢𑁆𑀢𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀥𑀫𑁆𑀫𑀸 𑀥𑀫𑁆𑀫𑁄. 𑀢𑀢𑁆𑀣 𑀉𑀤𑁆𑀥𑀘𑁆𑀘𑀁 ‘‘𑀅𑀥𑀺𑀕𑀢𑀫𑀕𑁆𑀕𑀸𑀤𑀺𑀓𑁄𑀳𑀫𑀲𑁆𑀫𑀻’’𑀢𑀺 𑀅𑀫𑀕𑁆𑀕𑀸𑀤𑀻𑀲𑀼 𑀯𑀺𑀓𑁆𑀔𑁂𑀧𑁄 𑀥𑀫𑁆𑀫𑀼𑀤𑁆𑀥𑀘𑁆𑀘𑀁, 𑀢𑁂𑀦 𑀉𑀧𑀤𑁆𑀤𑀼𑀢𑀁 𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑀁 𑀳𑁄𑀢𑀺. 𑀦𑀺𑀓𑀦𑁆𑀢𑀺 𑀑𑀪𑀸𑀲𑀸𑀤𑀻𑀲𑀼 𑀅𑀧𑁂𑀓𑁆𑀔𑀸 𑀲𑀼𑀔𑀼𑀫𑀭𑀽𑀧𑀸 𑀢𑀡𑁆𑀳𑀸, 𑀲𑀸 𑀯𑀺𑀧𑀲𑁆𑀲𑀦𑀸𑀪𑀺𑀭𑀢𑀺𑀆𑀓𑀸𑀭𑁂𑀦 𑀉𑀧𑀝𑁆𑀞𑀳𑀦𑁆𑀢𑀻 𑀅𑀥𑀺𑀫𑀸𑀦𑀺𑀓𑁂𑀦 ‘‘𑀥𑀫𑁆𑀫𑁄’’𑀢𑀺 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀦𑀺𑀓𑀦𑁆𑀢𑀺 ‘𑀥𑀫𑁆𑀫𑁄’𑀢𑀺 𑀦𑀺𑀓𑀦𑁆𑀢𑀺𑀁 𑀆𑀯𑀚𑁆𑀚𑀢𑀻’’𑀢𑀺.

𑁭𑁩𑁩. 𑀯𑀺𑀧𑀲𑁆𑀲𑀦𑁄𑀪𑀸𑀲𑁄𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀁, 𑀲𑀲𑀦𑁆𑀢𑀢𑀺𑀧𑀢𑀺𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀜𑁆𑀘 𑀪𑀸𑀲𑀼𑀭𑀁 𑀭𑀽𑀧𑀁. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀁 𑀬𑁄𑀕𑀺𑀦𑁄 𑀲𑀭𑀻𑀭𑀝𑁆𑀞𑀫𑁂𑀯 𑀧𑀪𑀲𑁆𑀲𑀭𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀇𑀢𑀭𑀁 𑀲𑀭𑀻𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀜𑀸𑀡𑀸𑀦𑀼𑀪𑀸𑀯𑀸𑀦𑀼𑀭𑀽𑀧𑀁 𑀲𑀫𑀦𑁆𑀢𑀢𑁄 𑀧𑀢𑁆𑀣𑀭𑀢𑀺, 𑀢𑀁 𑀢𑀲𑁆𑀲𑁂𑀯 𑀧𑀜𑁆𑀜𑀸𑀬𑀢𑀺, 𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑁂 𑀭𑀽𑀧𑀕𑀢𑀫𑁆𑀧𑀺 𑀧𑀲𑁆𑀲𑀢𑀺, 𑀧𑀲𑁆𑀲𑀦𑁆𑀢𑁄 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀢𑀺, 𑀉𑀤𑀸𑀳𑀼 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀺𑀦𑁄 𑀯𑀺𑀬 𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺. 𑀯𑀺𑀧𑀲𑁆𑀲𑀦𑀸𑀯𑀻𑀣𑀺 𑀦𑀸𑀫 𑀧𑀝𑀺𑀧𑀸𑀝𑀺𑀬𑀸 𑀧𑀯𑀢𑁆𑀢𑀫𑀸𑀦𑀸 𑀯𑀺𑀧𑀲𑁆𑀲𑀦𑀸𑀯. 𑀉𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺 𑀬𑁄𑀕𑀺𑀦𑀸 ‘‘𑀫𑀕𑁆𑀕𑀧𑁆𑀧𑀢𑁆𑀢𑁄𑀫𑁆𑀳𑀻’’𑀢𑀺 𑀅𑀥𑀺𑀫𑀸𑀦𑁂𑀦 𑀯𑀺𑀲𑁆𑀲𑀝𑁆𑀞𑀢𑁆𑀢𑀸, 𑀢𑀲𑁆𑀲 𑀯𑀸 𑀬𑁄𑀕𑀺𑀦𑁄 𑀯𑀺𑀧𑀲𑁆𑀲𑀦𑀸 𑀢𑀢𑁄 𑀏𑀯 𑀯𑀻𑀣𑀺 𑀉𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺. 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀫𑁂𑀯𑀸𑀳.

𑀯𑁂𑀫𑀢𑁆𑀢𑀢𑀸𑀬𑀸𑀢𑀺 𑀅𑀧𑁆𑀧𑀯𑀺𑀧𑀼𑀮𑀢𑀸𑀯𑀲𑁂𑀦 𑀯𑀺𑀲𑀤𑀺𑀲𑀢𑀸𑀬. 𑀅𑀲𑁆𑀲𑀸𑀢𑀺 𑀑𑀪𑀸𑀲𑀲𑁆𑀲. 𑀤𑁆𑀯𑀻𑀳𑀺 𑀓𑀼𑀝𑁆𑀝𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀁 𑀕𑁂𑀳𑀁 𑀤𑁆𑀯𑀺𑀓𑀼𑀝𑁆𑀝𑀕𑁂𑀳𑀁. 𑀢𑀲𑁆𑀲 𑀓𑀺𑀭 𑀅𑀩𑁆𑀪𑀦𑁆𑀢𑀭𑁂𑀧𑀺 𑀏𑀓𑀸 𑀪𑀺𑀢𑁆𑀢𑀺 𑀳𑁄𑀢𑀺 𑀩𑀳𑀺𑀧𑀺, 𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑁂 𑀅𑀦𑀼𑀧𑀭𑀺𑀬𑀸𑀬𑀧𑀣𑀁 𑀳𑁄𑀢𑀺, 𑀲𑀸𑀬𑀦𑁆𑀳𑁂 𑀢𑀢𑁆𑀣 𑀲𑀦𑁆𑀣𑀭𑀺𑀢𑀸𑀦𑀺 𑀧𑀜𑁆𑀘𑀯𑀡𑁆𑀡𑀸𑀦𑀺 𑀓𑀼𑀲𑀼𑀫𑀸𑀦𑀺, 𑀯𑀺𑀲𑀤𑀜𑀸𑀡𑀲𑁆𑀲 𑀑𑀪𑀸𑀲𑁂𑀦 𑀨𑀭𑀺𑀢𑀝𑁆𑀞𑀸𑀦𑁂 𑀭𑀽𑀧𑀕𑀢𑀜𑁆𑀘 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀯𑀺𑀬 𑀧𑀜𑁆𑀜𑀸𑀬𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀦𑁆𑀢𑁂 𑀫𑀬𑁆𑀳’’𑀦𑁆𑀢𑀺𑀆𑀤𑀺.

𑀏𑀯𑀁 𑀑𑀪𑀸𑀲𑀲𑁆𑀲 𑀯𑁂𑀫𑀢𑁆𑀢𑀢𑀸𑀬 𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀘𑀺𑀭𑀓𑀸𑀮𑀯𑀺𑀧𑁆𑀧𑀮𑀫𑁆𑀩𑀦𑁂 𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑀁 𑀧𑀦 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁄𑀢𑀺 𑀯𑀓𑁆𑀔𑀫𑀸𑀦𑀧𑁆𑀧𑀓𑀸𑀭𑀁 𑀲𑀦𑁆𑀥𑀸𑀬𑀸𑀳, 𑀦 𑀲𑀩𑁆𑀩𑀁. 𑀲𑁄𑀢𑀺 𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀅𑀥𑀺𑀫𑀸𑀦𑀺𑀓𑁄.