𑁯. 𑀩𑁆𑀭𑀳𑁆𑀫𑀯𑀺𑀳𑀸𑀭𑀦𑀺𑀤𑁆𑀤𑁂𑀲𑁄

𑀫𑁂𑀢𑁆𑀢𑀸𑀪𑀸𑀯𑀦𑀸𑀓𑀣𑀸

𑁨𑁪𑁦. 𑀅𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀸𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑁂𑀲𑀼 𑀧𑀦 𑀫𑁂𑀢𑁆𑀢𑀸, 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀉𑀧𑁂𑀓𑁆𑀔𑀸𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀫𑁂𑀢𑁆𑀢𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀢𑀸𑀯 𑀆𑀤𑀺𑀓𑀫𑁆𑀫𑀺𑀓𑁂𑀦 𑀬𑁄𑀕𑀸𑀯𑀘𑀭𑁂𑀦 𑀉𑀧𑀘𑁆𑀙𑀺𑀦𑁆𑀦𑀧𑀮𑀺𑀩𑁄𑀥𑁂𑀦 𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑁂𑀦 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀪𑀢𑁆𑀢𑀲𑀫𑁆𑀫𑀤𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀯𑀺𑀢𑁆𑀢𑁂 𑀧𑀤𑁂𑀲𑁂 𑀲𑀼𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀲𑀼𑀔𑀦𑀺𑀲𑀺𑀦𑁆𑀦𑁂𑀦 𑀆𑀤𑀺𑀢𑁄 𑀢𑀸𑀯 𑀤𑁄𑀲𑁂 𑀆𑀤𑀻𑀦𑀯𑁄, 𑀔𑀦𑁆𑀢𑀺𑀬𑀜𑁆𑀘 𑀆𑀦𑀺𑀲𑀁𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄.

𑀓𑀲𑁆𑀫𑀸? 𑀇𑀫𑀸𑀬 𑀳𑀺 𑀪𑀸𑀯𑀦𑀸𑀬 𑀤𑁄𑀲𑁄 𑀧𑀳𑀸𑀢𑀩𑁆𑀩𑁄, 𑀔𑀦𑁆𑀢𑀺 𑀅𑀥𑀺𑀕𑀦𑁆𑀢𑀩𑁆𑀩𑀸. 𑀦 𑀘 𑀲𑀓𑁆𑀓𑀸 𑀓𑀺𑀜𑁆𑀘𑀺 𑀅𑀤𑀺𑀝𑁆𑀞𑀸𑀤𑀻𑀦𑀯𑀁 𑀧𑀳𑀸𑀢𑀼𑀁, 𑀅𑀯𑀺𑀤𑀺𑀢𑀸𑀦𑀺𑀲𑀁𑀲𑀁 𑀯𑀸 𑀅𑀥𑀺𑀕𑀦𑁆𑀢𑀼𑀁. 𑀢𑀲𑁆𑀫𑀸 ‘‘𑀤𑀼𑀝𑁆𑀞𑁄 𑀔𑁄, 𑀆𑀯𑀼𑀲𑁄, 𑀤𑁄𑀲𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀻’’𑀢𑀺𑀆𑀤𑀻𑀦𑀁 (𑀅. 𑀦𑀺. 𑁩.𑁭𑁨) 𑀯𑀲𑁂𑀦 𑀤𑁄𑀲𑁂 𑀆𑀤𑀻𑀦𑀯𑁄 𑀤𑀝𑁆𑀞𑀩𑁆𑀩𑁄.

‘‘𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸, 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸’’; (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁪);

‘‘𑀔𑀦𑁆𑀢𑀺𑀩𑀮𑀁 𑀩𑀮𑀸𑀦𑀻𑀓𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁’’. (𑀥. 𑀧. 𑁩𑁯𑁯; 𑀲𑀼. 𑀦𑀺. 𑁬𑁨𑁮);

‘‘𑀔𑀦𑁆𑀢𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀻𑀦𑀁 (𑀲𑀁. 𑀦𑀺. 𑁧.𑁨𑁫𑁦) 𑀯𑀲𑁂𑀦 𑀔𑀦𑁆𑀢𑀺𑀬𑀁 𑀆𑀦𑀺𑀲𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀣𑁂𑀯𑀁 𑀤𑀺𑀝𑁆𑀞𑀸𑀤𑀻𑀦𑀯𑀢𑁄 𑀤𑁄𑀲𑀢𑁄 𑀘𑀺𑀢𑁆𑀢𑀁 𑀯𑀺𑀯𑁂𑀘𑀦𑀢𑁆𑀣𑀸𑀬, 𑀯𑀺𑀤𑀺𑀢𑀸𑀦𑀺𑀲𑀁𑀲𑀸𑀬 𑀘 𑀔𑀦𑁆𑀢𑀺𑀬𑀸 𑀲𑀁𑀬𑁄𑀚𑀦𑀢𑁆𑀣𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸 𑀆𑀭𑀪𑀺𑀢𑀩𑁆𑀩𑀸. 𑀆𑀭𑀪𑀦𑁆𑀢𑁂𑀦 𑀘 𑀆𑀤𑀺𑀢𑁄𑀯 𑀧𑀼𑀕𑁆𑀕𑀮𑀪𑁂𑀤𑁄 𑀚𑀸𑀦𑀺𑀢𑀩𑁆𑀩𑁄 ‘‘𑀇𑀫𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀫𑁂𑀢𑁆𑀢𑀸 𑀧𑀞𑀫𑀁 𑀦 𑀪𑀸𑀯𑁂𑀢𑀩𑁆𑀩𑀸, 𑀇𑀫𑁂𑀲𑀼 𑀦𑁂𑀯 𑀪𑀸𑀯𑁂𑀢𑀩𑁆𑀩𑀸’’𑀢𑀺.

𑀅𑀬𑀜𑁆𑀳𑀺 𑀫𑁂𑀢𑁆𑀢𑀸 𑀅𑀧𑁆𑀧𑀺𑀬𑀧𑀼𑀕𑁆𑀕𑀮𑁂, 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑁂, 𑀫𑀚𑁆𑀛𑀢𑁆𑀢𑁂, 𑀯𑁂𑀭𑀻𑀧𑀼𑀕𑁆𑀕𑀮𑁂𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀞𑀫𑀁 𑀦 𑀪𑀸𑀯𑁂𑀢𑀩𑁆𑀩𑀸. 𑀮𑀺𑀗𑁆𑀕𑀯𑀺𑀲𑀪𑀸𑀕𑁂 𑀑𑀥𑀺𑀲𑁄 𑀦 𑀪𑀸𑀯𑁂𑀢𑀩𑁆𑀩𑀸. 𑀓𑀸𑀮𑀓𑀢𑁂 𑀦 𑀪𑀸𑀯𑁂𑀢𑀩𑁆𑀩𑀸𑀯. 𑀓𑀺𑀁𑀓𑀸𑀭𑀡𑀸 𑀅𑀧𑁆𑀧𑀺𑀬𑀸𑀤𑀻𑀲𑀼 𑀧𑀞𑀫𑀁 𑀦 𑀪𑀸𑀯𑁂𑀢𑀩𑁆𑀩𑀸? 𑀅𑀧𑁆𑀧𑀺𑀬𑀁 𑀳𑀺 𑀧𑀺𑀬𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑁄 𑀓𑀺𑀮𑀫𑀢𑀺. 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑀁 𑀫𑀚𑁆𑀛𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑁄 𑀓𑀺𑀮𑀫𑀢𑀺, 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀘𑀲𑁆𑀲 𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂 𑀆𑀭𑁄𑀤𑀦𑀸𑀓𑀸𑀭𑀧𑁆𑀧𑀢𑁆𑀢𑁄 𑀯𑀺𑀬 𑀳𑁄𑀢𑀺. 𑀫𑀚𑁆𑀛𑀢𑁆𑀢𑀁 𑀕𑀭𑀼𑀝𑁆𑀞𑀸𑀦𑁂 𑀘 𑀧𑀺𑀬𑀝𑁆𑀞𑀸𑀦𑁂 𑀘 𑀞𑀧𑁂𑀦𑁆𑀢𑁄 𑀓𑀺𑀮𑀫𑀢𑀺. 𑀯𑁂𑀭𑀺𑀫𑀦𑀼𑀲𑁆𑀲𑀭𑀢𑁄 𑀓𑁄𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀺𑀬𑀸𑀤𑀻𑀲𑀼 𑀧𑀞𑀫𑀁 𑀦 𑀪𑀸𑀯𑁂𑀢𑀩𑁆𑀩𑀸.

𑀮𑀺𑀗𑁆𑀕𑀯𑀺𑀲𑀪𑀸𑀕𑁂 𑀧𑀦 𑀢𑀫𑁂𑀯 𑀆𑀭𑀩𑁆𑀪 𑀑𑀥𑀺𑀲𑁄 𑀪𑀸𑀯𑁂𑀦𑁆𑀢𑀲𑁆𑀲 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀜𑁆𑀜𑀢𑀭𑁄 𑀓𑀺𑀭 𑀅𑀫𑀘𑁆𑀘𑀧𑀼𑀢𑁆𑀢𑁄 𑀓𑀼𑀮𑀽𑀧𑀓𑀢𑁆𑀣𑁂𑀭𑀁 𑀧𑀼𑀘𑁆𑀙𑀺 ‘‘𑀪𑀦𑁆𑀢𑁂, 𑀓𑀲𑁆𑀲 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺? 𑀣𑁂𑀭𑁄 ‘‘𑀧𑀺𑀬𑀧𑀼𑀕𑁆𑀕𑀮𑁂’’𑀢𑀺 𑀆𑀳. 𑀢𑀲𑁆𑀲 𑀅𑀢𑁆𑀢𑀦𑁄 𑀪𑀭𑀺𑀬𑀸 𑀧𑀺𑀬𑀸 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑁄 𑀲𑀩𑁆𑀩𑀭𑀢𑁆𑀢𑀺𑀁 𑀪𑀺𑀢𑁆𑀢𑀺𑀬𑀼𑀤𑁆𑀥𑀫𑀓𑀸𑀲𑀺. 𑀢𑀲𑁆𑀫𑀸 𑀮𑀺𑀗𑁆𑀕𑀯𑀺𑀲𑀪𑀸𑀕𑁂 𑀑𑀥𑀺𑀲𑁄 𑀦 𑀪𑀸𑀯𑁂𑀢𑀩𑁆𑀩𑀸.

𑀓𑀸𑀮𑀓𑀢𑁂 𑀧𑀦 𑀪𑀸𑀯𑁂𑀦𑁆𑀢𑁄 𑀦𑁂𑀯 𑀅𑀧𑁆𑀧𑀦𑀁, 𑀦 𑀉𑀧𑀘𑀸𑀭𑀁 𑀧𑀸𑀧𑀼𑀡𑀸𑀢𑀺. 𑀅𑀜𑁆𑀜𑀢𑀭𑁄 𑀓𑀺𑀭 𑀤𑀳𑀭𑀪𑀺𑀓𑁆𑀔𑀼 𑀆𑀘𑀭𑀺𑀬𑀁 𑀆𑀭𑀩𑁆𑀪 𑀫𑁂𑀢𑁆𑀢𑀁 𑀆𑀭𑀪𑀺. 𑀢𑀲𑁆𑀲 𑀫𑁂𑀢𑁆𑀢𑀸 𑀦𑀧𑁆𑀧𑀯𑀢𑁆𑀢𑀢𑀺. 𑀲𑁄 𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀧𑀕𑀼𑀡𑀸𑀯 𑀫𑁂 𑀫𑁂𑀢𑁆𑀢𑀸𑀛𑀸𑀦𑀲𑀫𑀸𑀧𑀢𑁆𑀢𑀺, 𑀦 𑀘 𑀦𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀫𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀆𑀳. 𑀣𑁂𑀭𑁄 ‘‘𑀦𑀺𑀫𑀺𑀢𑁆𑀢𑀁, 𑀆𑀯𑀼𑀲𑁄, 𑀕𑀯𑁂𑀲𑀸𑀳𑀻’’𑀢𑀺 𑀆𑀳. 𑀲𑁄 𑀕𑀯𑁂𑀲𑀦𑁆𑀢𑁄 𑀆𑀘𑀭𑀺𑀬𑀲𑁆𑀲 𑀫𑀢𑀪𑀸𑀯𑀁 𑀜𑀢𑁆𑀯𑀸 𑀅𑀜𑁆𑀜𑀁 𑀆𑀭𑀩𑁆𑀪 𑀫𑁂𑀢𑁆𑀢𑀸𑀬𑀦𑁆𑀢𑁄 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀲𑀺. 𑀢𑀲𑁆𑀫𑀸 𑀓𑀸𑀮𑀓𑀢𑁂 𑀦 𑀪𑀸𑀯𑁂𑀢𑀩𑁆𑀩𑀸𑀯.

𑁨𑁪𑁧. 𑀲𑀩𑁆𑀩𑀧𑀞𑀫𑀁 𑀧𑀦 ‘‘𑀅𑀳𑀁 𑀲𑀼𑀔𑀺𑀢𑁄 𑀳𑁄𑀫𑀺 𑀦𑀺𑀤𑁆𑀤𑀼𑀓𑁆𑀔𑁄’’𑀢𑀺 𑀯𑀸, ‘‘𑀅𑀯𑁂𑀭𑁄 𑀅𑀩𑁆𑀬𑀸𑀧𑀚𑁆𑀚𑁄 𑀅𑀦𑀻𑀖𑁄 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀸𑀫𑀻’’𑀢𑀺 𑀯𑀸 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀅𑀢𑁆𑀢𑀦𑀺𑀬𑁂𑀯 𑀪𑀸𑀯𑁂𑀢𑀩𑁆𑀩𑀸.

𑀏𑀯𑀁 𑀲𑀦𑁆𑀢𑁂 𑀬𑀁 𑀯𑀺𑀪𑀗𑁆𑀕𑁂 (𑀯𑀺𑀪. 𑁬𑁪𑁩) 𑀯𑀼𑀢𑁆𑀢𑀁 𑁋

‘‘𑀓𑀣𑀜𑁆𑀘 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺? 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀏𑀓𑀁 𑀧𑀼𑀕𑁆𑀕𑀮𑀁 𑀧𑀺𑀬𑀁 𑀫𑀦𑀸𑀧𑀁 𑀤𑀺𑀲𑁆𑀯𑀸 𑀫𑁂𑀢𑁆𑀢𑀸𑀬𑁂𑀬𑁆𑀬, 𑀏𑀯𑀫𑁂𑀯 𑀲𑀩𑁆𑀩𑁂 𑀲𑀢𑁆𑀢𑁂 𑀫𑁂𑀢𑁆𑀢𑀸𑀬 𑀨𑀭𑀢𑀻’’𑀢𑀺.

‘‘𑀬𑀜𑁆𑀘 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁨.𑁨𑁨) 𑁋

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑁄𑀥𑀺𑀲𑁄𑀨𑀭𑀡𑀸 𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑁂𑀢𑀩𑁆𑀩𑀸, 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀼’’ 𑀅𑀩𑁆𑀬𑀸𑀧𑀚𑁆𑀚𑀸 𑀅𑀦𑀻𑀖𑀸 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀼. 𑀲𑀩𑁆𑀩𑁂 𑀧𑀸𑀡𑀸… 𑀲𑀩𑁆𑀩𑁂 𑀪𑀽𑀢𑀸… 𑀲𑀩𑁆𑀩𑁂 𑀧𑀼𑀕𑁆𑀕𑀮𑀸… 𑀲𑀩𑁆𑀩𑁂 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸 𑀅𑀦𑀻𑀖𑀸 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’’𑀢𑀺𑀆𑀤𑀺 𑁋

𑀯𑀼𑀢𑁆𑀢𑀁. 𑀬𑀜𑁆𑀘 𑀫𑁂𑀢𑁆𑀢𑀲𑀼𑀢𑁆𑀢𑁂 (𑀔𑀼. 𑀧𑀸. 𑁯.𑁩; 𑀲𑀼. 𑀦𑀺. 𑁧𑁪𑁫) 𑁋

‘‘𑀲𑀼𑀔𑀺𑀦𑁄𑀯 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼,

𑀲𑀩𑁆𑀩𑀲𑀢𑁆𑀢𑀸 𑀪𑀯𑀦𑁆𑀢𑀼 𑀲𑀼𑀔𑀺𑀢𑀢𑁆𑀢𑀸’’𑀢𑀺𑀆𑀤𑀺. 𑁋

𑀯𑀼𑀢𑁆𑀢𑀁, 𑀢𑀁 𑀯𑀺𑀭𑀼𑀚𑁆𑀛𑀢𑀺. 𑀦 𑀳𑀺 𑀢𑀢𑁆𑀣 𑀅𑀢𑁆𑀢𑀦𑀺 𑀪𑀸𑀯𑀦𑀸 𑀯𑀼𑀢𑁆𑀢𑀸𑀢𑀺 𑀘𑁂. 𑀢𑀜𑁆𑀘 𑀦 𑀯𑀺𑀭𑀼𑀚𑁆𑀛𑀢𑀺. 𑀓𑀲𑁆𑀫𑀸? 𑀢𑀜𑁆𑀳𑀺 𑀅𑀧𑁆𑀧𑀦𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀤𑀁 𑀲𑀓𑁆𑀔𑀺𑀪𑀸𑀯𑀯𑀲𑁂𑀦.

𑀲𑀘𑁂𑀧𑀺 𑀳𑀺 𑀯𑀲𑁆𑀲𑀲𑀢𑀁 𑀯𑀲𑁆𑀲𑀲𑀳𑀲𑁆𑀲𑀁 𑀯𑀸 ‘‘𑀅𑀳𑀁 𑀲𑀼𑀔𑀺𑀢𑁄 𑀳𑁄𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀦𑀺 𑀫𑁂𑀢𑁆𑀢𑀁 𑀪𑀸𑀯𑁂𑀢𑀺, 𑀦𑁂𑀯𑀲𑁆𑀲 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀢𑀺. ‘‘𑀅𑀳𑀁 𑀲𑀼𑀔𑀺𑀢𑁄 𑀳𑁄𑀫𑀻’’𑀢𑀺 𑀪𑀸𑀯𑀬𑀢𑁄 𑀧𑀦 𑀬𑀣𑀸 𑀅𑀳𑀁 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑁄 𑀚𑀻𑀯𑀺𑀢𑀼𑀓𑀸𑀫𑁄 𑀅𑀫𑀭𑀺𑀢𑀼𑀓𑀸𑀫𑁄 𑀘, 𑀏𑀯𑀁 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸𑀢𑀺 𑀅𑀢𑁆𑀢𑀸𑀦𑀁 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀅𑀜𑁆𑀜𑀲𑀢𑁆𑀢𑁂𑀲𑀼 𑀳𑀺𑀢𑀲𑀼𑀔𑀓𑀸𑀫𑀢𑀸 𑀉𑀧𑁆𑀧𑀚𑁆𑀚𑀢𑀺. 𑀪𑀕𑀯𑀢𑀸𑀧𑀺 𑁋

‘‘𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀧𑀭𑀺𑀕𑀫𑁆𑀫 𑀘𑁂𑀢𑀲𑀸,

𑀦𑁂𑀯𑀚𑁆𑀛𑀕𑀸 𑀧𑀺𑀬𑀢𑀭𑀫𑀢𑁆𑀢𑀦𑀸 𑀓𑁆𑀯𑀘𑀺;

𑀏𑀯𑀁 𑀧𑀺𑀬𑁄 𑀧𑀼𑀣𑀼 𑀅𑀢𑁆𑀢𑀸 𑀧𑀭𑁂𑀲𑀁,

𑀢𑀲𑁆𑀫𑀸 𑀦 𑀳𑀺𑀁𑀲𑁂 𑀧𑀭𑀫𑀢𑁆𑀢𑀓𑀸𑀫𑁄’’𑀢𑀺. (𑀲𑀁. 𑀦𑀺. 𑁧.𑁧𑁧𑁯; 𑀉𑀤𑀸. 𑁪𑁧); 𑁋

𑀯𑀤𑀢𑀸 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄.

𑁨𑁪𑁨. 𑀢𑀲𑁆𑀫𑀸 𑀲𑀓𑁆𑀔𑀺𑀪𑀸𑀯𑀢𑁆𑀣𑀁 𑀧𑀞𑀫𑀁 𑀅𑀢𑁆𑀢𑀸𑀦𑀁 𑀫𑁂𑀢𑁆𑀢𑀸𑀬 𑀨𑀭𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀲𑀼𑀔𑀧𑁆𑀧𑀯𑀢𑁆𑀢𑀦𑀢𑁆𑀣𑀁 𑀬𑁆𑀯𑀸𑀬𑀁 𑀧𑀺𑀬𑁄 𑀫𑀦𑀸𑀧𑁄 𑀕𑀭𑀼 𑀪𑀸𑀯𑀦𑀻𑀬𑁄 𑀆𑀘𑀭𑀺𑀬𑁄 𑀯𑀸 𑀆𑀘𑀭𑀺𑀬𑀫𑀢𑁆𑀢𑁄 𑀯𑀸 𑀉𑀧𑀚𑁆𑀛𑀸𑀬𑁄 𑀯𑀸 𑀉𑀧𑀚𑁆𑀛𑀸𑀬𑀫𑀢𑁆𑀢𑁄 𑀯𑀸 𑀢𑀲𑁆𑀲 𑀤𑀸𑀦𑀧𑀺𑀬𑀯𑀘𑀦𑀸𑀤𑀻𑀦𑀺 𑀧𑀺𑀬𑀫𑀦𑀸𑀧𑀢𑁆𑀢𑀓𑀸𑀭𑀡𑀸𑀦𑀺 𑀲𑀻𑀮𑀲𑀼𑀢𑀸𑀤𑀻𑀦𑀺 𑀕𑀭𑀼𑀪𑀸𑀯𑀦𑀻𑀬𑀢𑁆𑀢𑀓𑀸𑀭𑀡𑀸𑀦𑀺 𑀘 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀏𑀲 𑀲𑀧𑁆𑀧𑀼𑀭𑀺𑀲𑁄 𑀲𑀼𑀔𑀻 𑀳𑁄𑀢𑀼 𑀦𑀺𑀤𑁆𑀤𑀼𑀓𑁆𑀔𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸.

𑀏𑀯𑀭𑀽𑀧𑁂 𑀘 𑀧𑀼𑀕𑁆𑀕𑀮𑁂 𑀓𑀸𑀫𑀁 𑀅𑀧𑁆𑀧𑀦𑀸 𑀲𑀫𑁆𑀧𑀚𑁆𑀚𑀢𑀺, 𑀇𑀫𑀺𑀦𑀸 𑀧𑀦 𑀪𑀺𑀓𑁆𑀔𑀼𑀦𑀸 𑀢𑀸𑀯𑀢𑀓𑁂𑀦𑁂𑀯 𑀢𑀼𑀝𑁆𑀞𑀺𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀲𑀻𑀫𑀸𑀲𑀫𑁆𑀪𑁂𑀤𑀁 𑀓𑀢𑁆𑀢𑀼𑀓𑀸𑀫𑁂𑀦 𑀢𑀤𑀦𑀦𑁆𑀢𑀭𑀁 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑁂, 𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑀢𑁄 𑀫𑀚𑁆𑀛𑀢𑁆𑀢𑁂, 𑀫𑀚𑁆𑀛𑀢𑁆𑀢𑀢𑁄 𑀯𑁂𑀭𑀻𑀧𑀼𑀕𑁆𑀕𑀮𑁂 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸. 𑀪𑀸𑀯𑁂𑀦𑁆𑀢𑁂𑀦 𑀘 𑀏𑀓𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀫𑀼𑀤𑀼𑀁 𑀓𑀫𑁆𑀫𑀦𑀺𑀬𑀁 𑀘𑀺𑀢𑁆𑀢𑀁 𑀓𑀢𑁆𑀯𑀸 𑀢𑀤𑀦𑀦𑁆𑀢𑀭𑁂 𑀢𑀤𑀦𑀦𑁆𑀢𑀭𑁂 𑀉𑀧𑀲𑀁𑀳𑀭𑀺𑀢𑀩𑁆𑀩𑀁.

𑀬𑀲𑁆𑀲 𑀧𑀦 𑀯𑁂𑀭𑀻𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀺, 𑀫𑀳𑀸𑀧𑀼𑀭𑀺𑀲𑀚𑀸𑀢𑀺𑀓𑀢𑁆𑀢𑀸 𑀯𑀸 𑀅𑀦𑀢𑁆𑀣𑀁 𑀓𑀭𑁄𑀦𑁆𑀢𑁂𑀧𑀺 𑀧𑀭𑁂 𑀯𑁂𑀭𑀻𑀲𑀜𑁆𑀜𑀸𑀯 𑀦𑀼𑀧𑁆𑀧𑀚𑁆𑀚𑀢𑀺, 𑀢𑁂𑀦 ‘‘𑀫𑀚𑁆𑀛𑀢𑁆𑀢𑁂 𑀫𑁂 𑀫𑁂𑀢𑁆𑀢𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀚𑀸𑀢𑀁, 𑀇𑀤𑀸𑀦𑀺 𑀦𑀁 𑀯𑁂𑀭𑀺𑀫𑁆𑀳𑀺 𑀉𑀧𑀲𑀁𑀳𑀭𑀸𑀫𑀻’’𑀢𑀺 𑀩𑁆𑀬𑀸𑀧𑀸𑀭𑁄𑀯 𑀦 𑀓𑀸𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀅𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑀚𑁆𑀛𑀢𑁆𑀢𑀢𑁄 𑀯𑁂𑀭𑀻𑀧𑀼𑀕𑁆𑀕𑀮𑁂 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺.

𑁨𑁪𑁩. 𑀲𑀘𑁂 𑀧𑀦𑀲𑁆𑀲 𑀯𑁂𑀭𑀺𑀫𑁆𑀳𑀺 𑀘𑀺𑀢𑁆𑀢𑀫𑀼𑀧𑀲𑀁𑀳𑀭𑀢𑁄 𑀢𑁂𑀦 𑀓𑀢𑀸𑀧𑀭𑀸𑀥𑀸𑀦𑀼𑀲𑁆𑀲𑀭𑀡𑁂𑀦 𑀧𑀝𑀺𑀖𑀫𑀼𑀧𑁆𑀧𑀚𑁆𑀚𑀢𑀺, 𑀅𑀣𑀸𑀦𑁂𑀦 𑀧𑀼𑀭𑀺𑀫𑀧𑀼𑀕𑁆𑀕𑀮𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀼𑀦𑀧𑁆𑀧𑀼𑀦𑀁 𑀫𑁂𑀢𑁆𑀢𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀧𑀼𑀕𑁆𑀕𑀮𑀁 𑀫𑁂𑀢𑁆𑀢𑀸𑀬𑀦𑁆𑀢𑁂𑀦 𑀧𑀝𑀺𑀖𑀁 𑀯𑀺𑀦𑁄𑀤𑁂𑀢𑀩𑁆𑀩𑀁. 𑀲𑀘𑁂 𑀏𑀯𑀫𑁆𑀧𑀺 𑀯𑀸𑀬𑀫𑀢𑁄 𑀦 𑀦𑀺𑀩𑁆𑀩𑀸𑀢𑀺, 𑀅𑀣 𑁋

𑀓𑀓𑀘𑀽𑀧𑀫𑀑𑀯𑀸𑀤-𑀆𑀤𑀻𑀦𑀁 𑀅𑀦𑀼𑀲𑀸𑀭𑀢𑁄;

𑀧𑀝𑀺𑀖𑀲𑁆𑀲 𑀧𑀳𑀸𑀦𑀸𑀬, 𑀖𑀝𑀺𑀢𑀩𑁆𑀩𑀁 𑀧𑀼𑀦𑀧𑁆𑀧𑀼𑀦𑀁.

𑀢𑀜𑁆𑀘 𑀔𑁄 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀢𑁆𑀢𑀸𑀦𑀁 𑀑𑀯𑀤𑀦𑁆𑀢𑁂𑀦𑁂𑀯 ‘‘𑀅𑀭𑁂 𑀓𑀼𑀚𑁆𑀛𑀦𑀧𑀼𑀭𑀺𑀲, 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘𑀉𑀪𑀢𑁄𑀤𑀡𑁆𑀟𑀓𑁂𑀦 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀓𑀓𑀘𑁂𑀦 𑀘𑁄𑀭𑀸 𑀑𑀘𑀭𑀓𑀸 𑀅𑀗𑁆𑀕𑀫𑀗𑁆𑀕𑀸𑀦𑀺 𑀑𑀓𑀦𑁆𑀢𑁂𑀬𑁆𑀬𑀼𑀁, 𑀢𑀢𑁆𑀭𑀸𑀧𑀺 𑀬𑁄 𑀫𑀦𑁄 𑀧𑀤𑁄𑀲𑁂𑀬𑁆𑀬. 𑀦 𑀫𑁂 𑀲𑁄 𑀢𑁂𑀦 𑀲𑀸𑀲𑀦𑀓𑀭𑁄’𑀢𑀺 (𑀫. 𑀦𑀺. 𑁧.𑁨𑁩𑁨) 𑀘,

‘𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄, 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺;

𑀓𑀼𑀤𑁆𑀥𑀫𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀲𑀗𑁆𑀕𑀸𑀫𑀁 𑀚𑁂𑀢𑀺 𑀤𑀼𑀚𑁆𑀚𑀬𑀁.

‘‘‘𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀧𑀭𑀁 𑀲𑀗𑁆𑀓𑀼𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀻’𑀢𑀺 𑀘. (𑀲𑀁. 𑀦𑀺. 𑁧.𑁧𑁮𑁮); 𑁋

‘‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀧𑀢𑁆𑀢𑀓𑀦𑁆𑀢𑀸 𑀲𑀧𑀢𑁆𑀢𑀓𑀭𑀡𑀸 𑀓𑁄𑀥𑀦𑀁 𑀆𑀕𑀘𑁆𑀙𑀦𑁆𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸. 𑀓𑀢𑀫𑁂 𑀲𑀢𑁆𑀢? 𑀇𑀥, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑀅𑀳𑁄 𑀯𑀢𑀸𑀬𑀁 𑀤𑀼𑀩𑁆𑀩𑀡𑁆𑀡𑁄 𑀅𑀲𑁆𑀲𑀸𑀢𑀺. 𑀢𑀁 𑀓𑀺𑀲𑁆𑀲𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀯𑀡𑁆𑀡𑀯𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄 𑀓𑀺𑀜𑁆𑀘𑀸𑀧𑀺 𑀲𑁄 𑀳𑁄𑀢𑀺 𑀲𑀼𑀦𑁆𑀳𑀸𑀢𑁄 𑀲𑀼𑀯𑀺𑀮𑀺𑀢𑁆𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼 𑀑𑀤𑀸𑀢𑀯𑀢𑁆𑀣𑀯𑀲𑀦𑁄, 𑀅𑀣 𑀔𑁄 𑀲𑁄 𑀤𑀼𑀩𑁆𑀩𑀡𑁆𑀡𑁄𑀯 𑀳𑁄𑀢𑀺 𑀓𑁄𑀥𑀸𑀪𑀺𑀪𑀽𑀢𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑀅𑀳𑁄𑀯𑀢𑀸𑀬𑀁 𑀤𑀼𑀓𑁆𑀔𑀁 𑀲𑀬𑁂𑀬𑁆𑀬𑀸𑀢𑀺…𑀧𑁂… 𑀦 𑀧𑀘𑀼𑀭𑀢𑁆𑀣𑁄 𑀅𑀲𑁆𑀲𑀸𑀢𑀺…𑀧𑁂… 𑀦 𑀪𑁄𑀕𑀯𑀸 𑀅𑀲𑁆𑀲𑀸𑀢𑀺…𑀧𑁂… 𑀦 𑀬𑀲𑀯𑀸 𑀅𑀲𑁆𑀲𑀸𑀢𑀺…𑀧𑁂… 𑀦 𑀫𑀺𑀢𑁆𑀢𑀯𑀸 𑀅𑀲𑁆𑀲𑀸𑀢𑀺…𑀧𑁂… 𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬𑀸𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀲𑀼𑀕𑀢𑀺𑀕𑀫𑀦𑁂𑀦 𑀦𑀦𑁆𑀤𑀢𑀺. 𑀓𑁄𑀥𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺 𑀓𑁄𑀥𑀸𑀪𑀺𑀪𑀽𑀢𑁄’𑀢𑀺 (𑀅. 𑀦𑀺. 𑁭.𑁬𑁪) 𑀘,

‘‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀙𑀯𑀸𑀮𑀸𑀢𑀁 𑀉𑀪𑀢𑁄𑀧𑀤𑀺𑀢𑁆𑀢𑀁 𑀫𑀚𑁆𑀛𑁂 𑀕𑀽𑀣𑀕𑀢𑀁 𑀦𑁂𑀯 𑀕𑀸𑀫𑁂 𑀓𑀝𑁆𑀞𑀢𑁆𑀣𑀁 𑀨𑀭𑀢𑀺, 𑀦 𑀅𑀭𑀜𑁆𑀜𑁂 𑀓𑀝𑁆𑀞𑀢𑁆𑀣𑀁 𑀨𑀭𑀢𑀺. 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀻’𑀢𑀺 𑀘,

‘‘𑀲𑁄 𑀤𑀸𑀦𑀺 𑀢𑁆𑀯𑀁 𑀏𑀯𑀁 𑀓𑀼𑀚𑁆𑀛𑀦𑁆𑀢𑁄 𑀦 𑀘𑁂𑀯 𑀪𑀕𑀯𑀢𑁄 𑀲𑀸𑀲𑀦𑀓𑀭𑁄 𑀪𑀯𑀺𑀲𑁆𑀲𑀲𑀺, 𑀧𑀝𑀺𑀓𑀼𑀚𑁆𑀛𑀦𑁆𑀢𑁄 𑀘 𑀓𑀼𑀤𑁆𑀥𑀧𑀼𑀭𑀺𑀲𑀢𑁄𑀧𑀺 𑀧𑀸𑀧𑀺𑀬𑁄 𑀳𑀼𑀢𑁆𑀯𑀸 𑀦 𑀤𑀼𑀚𑁆𑀚𑀬𑀁 𑀲𑀗𑁆𑀕𑀸𑀫𑀁 𑀚𑁂𑀲𑁆𑀲𑀲𑀺, 𑀲𑀧𑀢𑁆𑀢𑀓𑀭𑀡𑁂 𑀘 𑀥𑀫𑁆𑀫𑁂 𑀅𑀢𑁆𑀢𑀸𑀯 𑀅𑀢𑁆𑀢𑀦𑁄 𑀓𑀭𑀺𑀲𑁆𑀲𑀲𑀺, 𑀙𑀯𑀸𑀮𑀸𑀢𑀽𑀧𑀫𑁄 𑀘 𑀪𑀯𑀺𑀲𑁆𑀲𑀲𑀻’’𑀢𑀺.

𑁨𑁪𑁪. 𑀢𑀲𑁆𑀲𑁂𑀯𑀁 𑀖𑀝𑀬𑀢𑁄 𑀯𑀸𑀬𑀫𑀢𑁄 𑀲𑀘𑁂 𑀢𑀁 𑀧𑀝𑀺𑀖𑀁 𑀯𑀽𑀧𑀲𑀫𑁆𑀫𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀯𑀽𑀧𑀲𑀫𑁆𑀫𑀢𑀺, 𑀅𑀣 𑀬𑁄 𑀬𑁄 𑀥𑀫𑁆𑀫𑁄 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀽𑀧𑀲𑀦𑁆𑀢𑁄 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑁄, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑁄 𑀧𑀲𑀸𑀤𑀁 𑀆𑀯𑀳𑀢𑀺, 𑀢𑀁 𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀆𑀖𑀸𑀢𑁄 𑀧𑀝𑀺𑀯𑀺𑀦𑁂𑀢𑀩𑁆𑀩𑁄.

𑀏𑀓𑀘𑁆𑀘𑀲𑁆𑀲 𑀳𑀺 𑀓𑀸𑀬𑀲𑀫𑀸𑀘𑀸𑀭𑁄𑀯 𑀉𑀧𑀲𑀦𑁆𑀢𑁄 𑀳𑁄𑀢𑀺. 𑀉𑀧𑀲𑀦𑁆𑀢𑀪𑀸𑀯𑁄 𑀘𑀲𑁆𑀲 𑀩𑀳𑀼𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀭𑁄𑀦𑁆𑀢𑀲𑁆𑀲 𑀲𑀩𑁆𑀩𑀚𑀦𑁂𑀦 𑀜𑀸𑀬𑀢𑀺. 𑀯𑀘𑀻𑀲𑀫𑀸𑀘𑀸𑀭𑀫𑀦𑁄𑀲𑀫𑀸𑀘𑀸𑀭𑀸 𑀧𑀦 𑀅𑀯𑀽𑀧𑀲𑀦𑁆𑀢𑀸 𑀳𑁄𑀦𑁆𑀢𑀺. 𑀢𑀲𑁆𑀲 𑀢𑁂 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀬𑀲𑀫𑀸𑀘𑀸𑀭𑀯𑀽𑀧𑀲𑀫𑁄𑀬𑁂𑀯 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑁄.

𑀏𑀓𑀘𑁆𑀘𑀲𑁆𑀲 𑀯𑀘𑀻𑀲𑀫𑀸𑀘𑀸𑀭𑁄𑀯 𑀉𑀧𑀲𑀦𑁆𑀢𑁄 𑀳𑁄𑀢𑀺. 𑀉𑀧𑀲𑀦𑁆𑀢𑀪𑀸𑀯𑁄 𑀘𑀲𑁆𑀲 𑀲𑀩𑁆𑀩𑀚𑀦𑁂𑀦 𑀜𑀸𑀬𑀢𑀺. 𑀲𑁄 𑀳𑀺 𑀧𑀓𑀢𑀺𑀬𑀸 𑀘 𑀧𑀝𑀺𑀲𑀦𑁆𑀣𑀸𑀭𑀓𑀼𑀲𑀮𑁄 𑀳𑁄𑀢𑀺 𑀲𑀔𑀺𑀮𑁄 𑀲𑀼𑀔𑀲𑀫𑁆𑀪𑀸𑀲𑁄 𑀲𑀫𑁆𑀫𑁄𑀤𑀓𑁄 𑀉𑀢𑁆𑀢𑀸𑀦𑀫𑀼𑀔𑁄 𑀧𑀼𑀩𑁆𑀩𑀪𑀸𑀲𑀻 𑀫𑀥𑀼𑀭𑁂𑀦 𑀲𑀭𑁂𑀦 𑀥𑀫𑁆𑀫𑀁 𑀑𑀲𑀸𑀭𑁂𑀢𑀺, 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺. 𑀓𑀸𑀬𑀲𑀫𑀸𑀘𑀸𑀭𑀫𑀦𑁄𑀲𑀫𑀸𑀘𑀸𑀭𑀸 𑀧𑀦 𑀅𑀯𑀽𑀧𑀲𑀦𑁆𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀢𑁂 𑀅𑀘𑀺𑀦𑁆𑀢𑁂𑀢𑁆𑀯𑀸 𑀯𑀘𑀻𑀲𑀫𑀸𑀘𑀸𑀭𑀯𑀽𑀧𑀲𑀫𑁄𑀬𑁂𑀯 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑁄.

𑀏𑀓𑀘𑁆𑀘𑀲𑁆𑀲 𑀫𑀦𑁄𑀲𑀫𑀸𑀘𑀸𑀭𑁄𑀯 𑀉𑀧𑀲𑀦𑁆𑀢𑁄 𑀳𑁄𑀢𑀺, 𑀉𑀧𑀲𑀦𑁆𑀢𑀪𑀸𑀯𑁄 𑀘𑀲𑁆𑀲 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀻𑀲𑀼 𑀲𑀩𑁆𑀩𑀚𑀦𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀬𑁄 𑀳𑀺 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄 𑀳𑁄𑀢𑀺, 𑀲𑁄 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀣𑁂𑀭𑁂 𑀯𑀸 𑀯𑀦𑁆𑀤𑀫𑀸𑀦𑁄 𑀦 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑀢𑀺, 𑀥𑀫𑁆𑀫𑀲𑁆𑀲𑀯𑀦𑀫𑀡𑁆𑀟𑀧𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀯𑀸 𑀧𑀘𑀮𑀸𑀬𑀦𑁆𑀢𑁄 𑀯𑀸 𑀦𑀺𑀲𑀻𑀤𑀢𑀺. 𑀉𑀧𑀲𑀦𑁆𑀢𑀘𑀺𑀢𑁆𑀢𑁄 𑀧𑀦 𑀑𑀓𑀧𑁆𑀧𑁂𑀢𑁆𑀯𑀸 𑀯𑀦𑁆𑀤𑀢𑀺, 𑀑𑀳𑀺𑀢𑀲𑁄𑀢𑁄 𑀅𑀝𑁆𑀞𑀺𑀁𑀓𑀢𑁆𑀯𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀇𑀢𑀺 𑀏𑀓𑀘𑁆𑀘𑀲𑁆𑀲 𑀫𑀦𑁄𑀲𑀫𑀸𑀘𑀸𑀭𑁄𑀯 𑀉𑀧𑀲𑀦𑁆𑀢𑁄 𑀳𑁄𑀢𑀺, 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀸 𑀅𑀯𑀽𑀧𑀲𑀦𑁆𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀢𑁂 𑀅𑀘𑀺𑀦𑁆𑀢𑁂𑀢𑁆𑀯𑀸 𑀫𑀦𑁄𑀲𑀫𑀸𑀘𑀸𑀭𑀯𑀽𑀧𑀲𑀫𑁄𑀬𑁂𑀯 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑁄.

𑀏𑀓𑀘𑁆𑀘𑀲𑁆𑀲 𑀧𑀦 𑀇𑀫𑁂𑀲𑀼 𑀢𑀻𑀲𑀼 𑀥𑀫𑁆𑀫𑁂𑀲𑀼 𑀏𑀓𑁄𑀧𑀺 𑀅𑀯𑀽𑀧𑀲𑀦𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 ‘‘𑀓𑀺𑀜𑁆𑀘𑀸𑀧𑀺 𑀏𑀲 𑀇𑀤𑀸𑀦𑀺 𑀫𑀦𑀼𑀲𑁆𑀲𑀮𑁄𑀓𑁂 𑀘𑀭𑀢𑀺, 𑀅𑀣 𑀔𑁄 𑀓𑀢𑀺𑀧𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀅𑀝𑁆𑀞𑀫𑀳𑀸𑀦𑀺𑀭𑀬𑀲𑁄𑀴𑀲𑀉𑀲𑁆𑀲𑀤𑀦𑀺𑀭𑀬𑀧𑀭𑀺𑀧𑀽𑀭𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀸𑀭𑀼𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑀩𑁆𑀩𑀁. 𑀓𑀸𑀭𑀼𑀜𑁆𑀜𑀫𑁆𑀧𑀺 𑀳𑀺 𑀧𑀝𑀺𑀘𑁆𑀘 𑀆𑀖𑀸𑀢𑁄 𑀯𑀽𑀧𑀲𑀫𑁆𑀫𑀢𑀺.

𑀏𑀓𑀘𑁆𑀘𑀲𑁆𑀲 𑀢𑀬𑁄𑀧𑀺𑀫𑁂 𑀥𑀫𑁆𑀫𑀸 𑀯𑀽𑀧𑀲𑀦𑁆𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁. 𑀢𑀸𑀤𑀺𑀲𑁂 𑀳𑀺 𑀧𑀼𑀕𑁆𑀕𑀮𑁂 𑀦 𑀤𑀼𑀓𑁆𑀓𑀭𑀸 𑀳𑁄𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀢𑀺.

𑀇𑀫𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑁋 ‘‘𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀆𑀖𑀸𑀢𑀧𑀝𑀺𑀯𑀺𑀦𑀬𑀸. 𑀬𑀢𑁆𑀣 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀦𑁆𑀦𑁄 𑀆𑀖𑀸𑀢𑁄 𑀲𑀩𑁆𑀩𑀲𑁄 𑀧𑀝𑀺𑀯𑀺𑀦𑁄𑀤𑁂𑀢𑀩𑁆𑀩𑁄’’𑀢𑀺 (𑀅. 𑀦𑀺. 𑁫.𑁧𑁬𑁨) 𑀇𑀤𑀁 𑀧𑀜𑁆𑀘𑀓𑀦𑀺𑀧𑀸𑀢𑁂 𑀆𑀖𑀸𑀢𑀧𑀝𑀺𑀯𑀺𑀦𑀬𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁨𑁪𑁫. 𑀲𑀘𑁂 𑀧𑀦𑀲𑁆𑀲 𑀏𑀯𑀫𑁆𑀧𑀺 𑀯𑀸𑀬𑀫𑀢𑁄 𑀆𑀖𑀸𑀢𑁄 𑀉𑀧𑁆𑀧𑀚𑁆𑀚𑀢𑀺𑀬𑁂𑀯, 𑀅𑀣𑀸𑀦𑁂𑀦 𑀏𑀯𑀁 𑀅𑀢𑁆𑀢𑀸 𑀑𑀯𑀤𑀺𑀢𑀩𑁆𑀩𑁄 𑁋

‘‘𑀅𑀢𑁆𑀢𑀦𑁄 𑀯𑀺𑀲𑀬𑁂 𑀤𑀼𑀓𑁆𑀔𑀁, 𑀓𑀢𑀁 𑀢𑁂 𑀬𑀤𑀺 𑀯𑁂𑀭𑀺𑀦𑀸;

𑀓𑀺𑀁 𑀢𑀲𑁆𑀲𑀸𑀯𑀺𑀲𑀬𑁂 𑀤𑀼𑀓𑁆𑀔𑀁, 𑀲𑀘𑀺𑀢𑁆𑀢𑁂 𑀓𑀢𑁆𑀢𑀼𑀫𑀺𑀘𑁆𑀙𑀲𑀺.

‘‘𑀩𑀳𑀽𑀧𑀓𑀸𑀭𑀁 𑀳𑀺𑀢𑁆𑀯𑀸𑀦, 𑀜𑀸𑀢𑀺𑀯𑀕𑁆𑀕𑀁 𑀭𑀼𑀤𑀫𑁆𑀫𑀼𑀔𑀁;

𑀫𑀳𑀸𑀦𑀢𑁆𑀣𑀓𑀭𑀁 𑀓𑁄𑀥𑀁, 𑀲𑀧𑀢𑁆𑀢𑀁 𑀦 𑀚𑀳𑀸𑀲𑀺 𑀓𑀺𑀁.

‘‘𑀬𑀸𑀦𑀺 𑀭𑀓𑁆𑀔𑀲𑀺 𑀲𑀻𑀮𑀸𑀦𑀺, 𑀢𑁂𑀲𑀁 𑀫𑀽𑀮𑀦𑀺𑀓𑀦𑁆𑀢𑀦𑀁;

𑀓𑁄𑀥𑀁 𑀦𑀸𑀫𑀼𑀧𑀴𑀸𑀮𑁂𑀲𑀺, 𑀓𑁄 𑀢𑀬𑀸 𑀲𑀤𑀺𑀲𑁄 𑀚𑀴𑁄.

‘‘𑀓𑀢𑀁 𑀅𑀦𑀭𑀺𑀬𑀁 𑀓𑀫𑁆𑀫𑀁, 𑀧𑀭𑁂𑀦 𑀇𑀢𑀺 𑀓𑀼𑀚𑁆𑀛𑀲𑀺;

𑀓𑀺𑀁 𑀦𑀼 𑀢𑁆𑀯𑀁 𑀢𑀸𑀤𑀺𑀲𑀁𑀬𑁂𑀯, 𑀬𑁄 𑀲𑀬𑀁 𑀓𑀢𑁆𑀢𑀼𑀫𑀺𑀘𑁆𑀙𑀲𑀺.

‘‘𑀤𑁄𑀲𑁂𑀢𑀼𑀓𑀸𑀫𑁄 𑀬𑀤𑀺 𑀢𑀁, 𑀅𑀫𑀦𑀸𑀧𑀁 𑀧𑀭𑁄 𑀓𑀭𑀺;

𑀤𑁄𑀲𑀼𑀧𑁆𑀧𑀸𑀤𑁂𑀦 𑀢𑀲𑁆𑀲𑁂𑀯, 𑀓𑀺𑀁 𑀧𑀽𑀭𑁂𑀲𑀺 𑀫𑀦𑁄𑀭𑀣𑀁.

‘‘𑀤𑀼𑀓𑁆𑀔𑀁 𑀢𑀲𑁆𑀲 𑀘 𑀦𑀸𑀫 𑀢𑁆𑀯𑀁, 𑀓𑀼𑀤𑁆𑀥𑁄 𑀓𑀸𑀳𑀲𑀺 𑀯𑀸 𑀦𑀯𑀸;

𑀅𑀢𑁆𑀢𑀸𑀦𑀁 𑀧𑀦𑀺𑀤𑀸𑀦𑁂𑀯, 𑀓𑁄𑀥𑀤𑀼𑀓𑁆𑀔𑁂𑀦 𑀩𑀸𑀥𑀲𑀺.

‘‘𑀓𑁄𑀥𑀁 𑀯𑀸 𑀅𑀳𑀺𑀢𑀁 𑀫𑀕𑁆𑀕𑀁, 𑀆𑀭𑀽𑀴𑁆𑀳𑀸 𑀬𑀤𑀺 𑀯𑁂𑀭𑀺𑀦𑁄;

𑀓𑀲𑁆𑀫𑀸 𑀢𑀼𑀯𑀫𑁆𑀧𑀺 𑀓𑀼𑀚𑁆𑀛𑀦𑁆𑀢𑁄, 𑀢𑁂𑀲𑀁𑀬𑁂𑀯𑀸𑀦𑀼𑀲𑀺𑀓𑁆𑀔𑀲𑀺.

‘‘𑀬𑀁 𑀤𑁄𑀲𑀁 𑀢𑀯 𑀦𑀺𑀲𑁆𑀲𑀸𑀬, 𑀲𑀢𑁆𑀢𑀼𑀦𑀸 𑀅𑀧𑁆𑀧𑀺𑀬𑀁 𑀓𑀢𑀁;

𑀢𑀫𑁂𑀯 𑀤𑁄𑀲𑀁 𑀙𑀺𑀦𑁆𑀤𑀲𑁆𑀲𑀼, 𑀓𑀺𑀫𑀝𑁆𑀞𑀸𑀦𑁂 𑀯𑀺𑀳𑀜𑁆𑀜𑀲𑀺.

‘‘𑀔𑀡𑀺𑀓𑀢𑁆𑀢𑀸 𑀘 𑀥𑀫𑁆𑀫𑀸𑀦𑀁, 𑀬𑁂𑀳𑀺 𑀔𑀦𑁆𑀥𑁂𑀳𑀺 𑀢𑁂 𑀓𑀢𑀁;

𑀅𑀫𑀦𑀸𑀧𑀁 𑀦𑀺𑀭𑀼𑀤𑁆𑀥𑀸 𑀢𑁂, 𑀓𑀲𑁆𑀲 𑀤𑀸𑀦𑀻𑀥 𑀓𑀼𑀚𑁆𑀛𑀲𑀺.

‘‘𑀤𑀼𑀓𑁆𑀔𑀁 𑀓𑀭𑁄𑀢𑀺 𑀬𑁄 𑀬𑀲𑁆𑀲, 𑀢𑀁 𑀯𑀺𑀦𑀸 𑀓𑀲𑁆𑀲 𑀲𑁄 𑀓𑀭𑁂;

𑀲𑀬𑀫𑁆𑀧𑀺 𑀤𑀼𑀓𑁆𑀔𑀳𑁂𑀢𑀼𑀢𑁆𑀢, 𑀫𑀺𑀢𑀺 𑀓𑀺𑀁 𑀢𑀲𑁆𑀲 𑀓𑀼𑀚𑁆𑀛𑀲𑀻’’𑀢𑀺.

𑁨𑁪𑁬. 𑀲𑀘𑁂 𑀧𑀦𑀲𑁆𑀲 𑀏𑀯𑀁 𑀅𑀢𑁆𑀢𑀸𑀦𑀁 𑀑𑀯𑀤𑀢𑁄𑀧𑀺 𑀧𑀝𑀺𑀖𑀁 𑀦𑁂𑀯 𑀯𑀽𑀧𑀲𑀫𑁆𑀫𑀢𑀺, 𑀅𑀣𑀸𑀦𑁂𑀦 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀫𑁆𑀫𑀲𑁆𑀲𑀓𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀢𑀢𑁆𑀣 𑀅𑀢𑁆𑀢𑀦𑁄 𑀢𑀸𑀯 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸 ‘‘𑀅𑀫𑁆𑀪𑁄 𑀢𑁆𑀯𑀁 𑀢𑀲𑁆𑀲 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀲𑀺? 𑀦𑀦𑀼 𑀢𑀯𑁂𑀯 𑀘𑁂𑀢𑀁 𑀤𑁄𑀲𑀦𑀺𑀤𑀸𑀦𑀁 𑀓𑀫𑁆𑀫𑀁 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺? 𑀓𑀫𑁆𑀫𑀲𑁆𑀲𑀓𑁄 𑀳𑀺 𑀢𑁆𑀯𑀁 𑀓𑀫𑁆𑀫𑀤𑀸𑀬𑀸𑀤𑁄 𑀓𑀫𑁆𑀫𑀬𑁄𑀦𑀺 𑀓𑀫𑁆𑀫𑀩𑀦𑁆𑀥𑀼 𑀓𑀫𑁆𑀫𑀧𑀝𑀺𑀲𑀭𑀡𑁄, 𑀬𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀺, 𑀢𑀲𑁆𑀲 𑀤𑀸𑀬𑀸𑀤𑁄 𑀪𑀯𑀺𑀲𑁆𑀲𑀲𑀺, 𑀇𑀤𑀜𑁆𑀘 𑀢𑁂 𑀓𑀫𑁆𑀫𑀁 𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁, 𑀦 𑀧𑀘𑁆𑀘𑁂𑀓𑀩𑁄𑀥𑀺𑀁, 𑀦 𑀲𑀸𑀯𑀓𑀪𑀽𑀫𑀺𑀁, 𑀦 𑀩𑁆𑀭𑀳𑁆𑀫𑀢𑁆𑀢𑀲𑀓𑁆𑀓𑀢𑁆𑀢𑀘𑀓𑁆𑀓𑀯𑀢𑁆𑀢𑀺𑀧𑀤𑁂𑀲𑀭𑀸𑀚𑀸𑀤𑀺𑀲𑀫𑁆𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀲𑀫𑁆𑀧𑀢𑁆𑀢𑀺𑀁 𑀲𑀸𑀥𑁂𑀢𑀼𑀁 𑀲𑀫𑀢𑁆𑀣𑀁, 𑀅𑀣 𑀔𑁄 𑀲𑀸𑀲𑀦𑀢𑁄 𑀘𑀸𑀯𑁂𑀢𑁆𑀯𑀸 𑀯𑀺𑀖𑀸𑀲𑀸𑀤𑀸𑀤𑀺𑀪𑀸𑀯𑀲𑁆𑀲 𑀘𑁂𑀯 𑀦𑁂𑀭𑀬𑀺𑀓𑀸𑀤𑀺𑀤𑀼𑀓𑁆𑀔𑀯𑀺𑀲𑁂𑀲𑀸𑀦𑀜𑁆𑀘 𑀢𑁂 𑀲𑀁𑀯𑀢𑁆𑀢𑀦𑀺𑀓𑀫𑀺𑀤𑀁 𑀓𑀫𑁆𑀫𑀁. 𑀲𑁄 𑀢𑁆𑀯𑀁 𑀇𑀤𑀁 𑀓𑀭𑁄𑀦𑁆𑀢𑁄 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀯𑀻𑀢𑀘𑁆𑀘𑀺𑀢𑁂 𑀯𑀸 𑀅𑀗𑁆𑀕𑀸𑀭𑁂, 𑀕𑀽𑀣𑀁 𑀯𑀸 𑀕𑀳𑁂𑀢𑁆𑀯𑀸 𑀧𑀭𑀁 𑀧𑀳𑀭𑀺𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀯𑀺𑀬 𑀅𑀢𑁆𑀢𑀸𑀦𑀫𑁂𑀯 𑀧𑀞𑀫𑀁 𑀤𑀳𑀲𑀺 𑀘𑁂𑀯 𑀤𑀼𑀕𑁆𑀕𑀦𑁆𑀥𑀜𑁆𑀘 𑀓𑀭𑁄𑀲𑀻’’𑀢𑀺.

𑀏𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑀲𑁆𑀲𑀓𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀲𑁆𑀲𑀧𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸 ‘‘𑀏𑀲𑁄𑀧𑀺 𑀢𑀯 𑀓𑀼𑀚𑁆𑀛𑀺𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀢𑀺? 𑀦𑀦𑀼 𑀏𑀢𑀲𑁆𑀲𑁂𑀯𑁂𑀢𑀁 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺? 𑀓𑀫𑁆𑀫𑀲𑁆𑀲𑀓𑁄 𑀳𑀺 𑀅𑀬𑀫𑀸𑀬𑀲𑁆𑀫𑀸 𑀓𑀫𑁆𑀫𑀤𑀸𑀬𑀸𑀤𑁄…𑀧𑁂… 𑀬𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀲 𑀤𑀸𑀬𑀸𑀤𑁄 𑀪𑀯𑀺𑀲𑁆𑀲𑀢𑀺. 𑀇𑀤𑀜𑁆𑀘𑀲𑁆𑀲 𑀓𑀫𑁆𑀫𑀁 𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁, 𑀦 𑀧𑀘𑁆𑀘𑁂𑀓𑀩𑁄𑀥𑀺𑀁, 𑀦 𑀲𑀸𑀯𑀓𑀪𑀽𑀫𑀺𑀁, 𑀦 𑀩𑁆𑀭𑀳𑁆𑀫𑀢𑁆𑀢𑀲𑀓𑁆𑀓𑀢𑁆𑀢𑀘𑀓𑁆𑀓𑀯𑀢𑁆𑀢𑀺𑀧𑀤𑁂𑀲𑀭𑀸𑀚𑀸𑀤𑀺𑀲𑀫𑁆𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀲𑀫𑁆𑀧𑀢𑁆𑀢𑀺𑀁 𑀲𑀸𑀥𑁂𑀢𑀼𑀁 𑀲𑀫𑀢𑁆𑀣𑀁, 𑀅𑀣 𑀔𑁄 𑀲𑀸𑀲𑀦𑀢𑁄 𑀘𑀸𑀯𑁂𑀢𑁆𑀯𑀸 𑀯𑀺𑀖𑀸𑀲𑀸𑀤𑀸𑀤𑀺𑀪𑀸𑀯𑀲𑁆𑀲 𑀘𑁂𑀯 𑀦𑁂𑀭𑀬𑀺𑀓𑀸𑀤𑀺𑀤𑀼𑀓𑁆𑀔𑀯𑀺𑀲𑁂𑀲𑀸𑀦𑀜𑁆𑀘𑀲𑁆𑀲 𑀲𑀁𑀯𑀢𑁆𑀢𑀦𑀺𑀓𑀫𑀺𑀤𑀁 𑀓𑀫𑁆𑀫𑀁. 𑀲𑁆𑀯𑀸𑀬𑀁 𑀇𑀤𑀁 𑀓𑀭𑁄𑀦𑁆𑀢𑁄 𑀧𑀝𑀺𑀯𑀸𑀢𑁂 𑀞𑀢𑁆𑀯𑀸 𑀧𑀭𑀁 𑀭𑀚𑁂𑀦 𑀑𑀓𑀺𑀭𑀺𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀯𑀺𑀬 𑀅𑀢𑁆𑀢𑀸𑀦𑀁𑀬𑁂𑀯 𑀑𑀓𑀺𑀭𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘‘𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺,

𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲;

𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁,

𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄’’’𑀢𑀺. (𑀥. 𑀧. 𑁧𑁨𑁫; 𑀲𑀼. 𑀦𑀺. 𑁬𑁬𑁭);

𑁨𑁪𑁭. 𑀲𑀘𑁂 𑀧𑀦𑀲𑁆𑀲 𑀏𑀯𑀁 𑀓𑀫𑁆𑀫𑀲𑁆𑀲𑀓𑀢𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀢𑁄 𑀦𑁂𑀯 𑀯𑀽𑀧𑀲𑀫𑁆𑀫𑀢𑀺, 𑀅𑀣𑀸𑀦𑁂𑀦 𑀲𑀢𑁆𑀣𑀼 𑀧𑀼𑀩𑁆𑀩𑀘𑀭𑀺𑀬𑀕𑀼𑀡𑀸 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀬𑁄 𑁋 𑀅𑀫𑁆𑀪𑁄 𑀧𑀩𑁆𑀩𑀚𑀺𑀢, 𑀦𑀦𑀼 𑀢𑁂 𑀲𑀢𑁆𑀣𑀸 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀺𑀲𑀢𑁆𑀢𑁄𑀧𑀺 𑀲𑀫𑀸𑀦𑁄 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑀬𑀫𑀸𑀦𑁄 𑀢𑀢𑁆𑀣 𑀢𑀢𑁆𑀣 𑀯𑀥𑀓𑁂𑀲𑀼𑀧𑀺 𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀘𑀺𑀢𑁆𑀢𑀁 𑀦𑀧𑁆𑀧𑀤𑀽𑀲𑁂𑀲𑀺. 𑀲𑁂𑀬𑁆𑀬𑀣𑀺𑀤𑀁, 𑀲𑀻𑀮𑀯𑀚𑀸𑀢𑀓𑁂 𑀢𑀸𑀯 𑀅𑀢𑁆𑀢𑀦𑁄 𑀤𑁂𑀯𑀺𑀬𑀸 𑀧𑀤𑀼𑀝𑁆𑀞𑁂𑀦 𑀧𑀸𑀧𑀅𑀫𑀘𑁆𑀘𑁂𑀦 𑀆𑀦𑀻𑀢𑀲𑁆𑀲 𑀧𑀝𑀺𑀭𑀜𑁆𑀜𑁄 𑀢𑀺𑀬𑁄𑀚𑀦𑀲𑀢𑀁 𑀭𑀚𑁆𑀚𑀁 𑀕𑀡𑁆𑀳𑀦𑁆𑀢𑀲𑁆𑀲 𑀦𑀺𑀲𑁂𑀥𑀦𑀢𑁆𑀣𑀸𑀬 𑀉𑀝𑁆𑀞𑀺𑀢𑀸𑀦𑀁 𑀅𑀫𑀘𑁆𑀘𑀸𑀦𑀁 𑀆𑀯𑀼𑀥𑀫𑁆𑀧𑀺 𑀙𑀼𑀧𑀺𑀢𑀼𑀁 𑀦 𑀅𑀤𑀸𑀲𑀺. 𑀧𑀼𑀦 𑀲𑀤𑁆𑀥𑀺𑀁 𑀅𑀫𑀘𑁆𑀘𑀲𑀳𑀲𑁆𑀲𑁂𑀦 𑀆𑀫𑀓𑀲𑀼𑀲𑀸𑀦𑁂 𑀕𑀮𑀧𑁆𑀧𑀫𑀸𑀡𑀁 𑀪𑀽𑀫𑀺𑀁 𑀔𑀡𑀺𑀢𑁆𑀯𑀸 𑀦𑀺𑀔𑀜𑁆𑀜𑀫𑀸𑀦𑁄 𑀘𑀺𑀢𑁆𑀢𑀧𑁆𑀧𑀤𑁄𑀲𑀫𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸 𑀓𑀼𑀡𑀧𑀔𑀸𑀤𑀦𑀢𑁆𑀣𑀁 𑀆𑀕𑀢𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁 𑀧𑀁𑀲𑀼𑀯𑀺𑀬𑀽𑀳𑀦𑀁 𑀦𑀺𑀲𑁆𑀲𑀸𑀬 𑀧𑀼𑀭𑀺𑀲𑀓𑀸𑀭𑀁 𑀓𑀢𑁆𑀯𑀸 𑀧𑀝𑀺𑀮𑀤𑁆𑀥𑀚𑀻𑀯𑀺𑀢𑁄 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀅𑀢𑁆𑀢𑀦𑁄 𑀲𑀺𑀭𑀺𑀕𑀩𑁆𑀪𑀁 𑀑𑀭𑀼𑀬𑁆𑀳 𑀲𑀺𑀭𑀺𑀲𑀬𑀦𑁂 𑀲𑀬𑀺𑀢𑀁 𑀧𑀘𑁆𑀘𑀢𑁆𑀣𑀺𑀓𑀁 𑀤𑀺𑀲𑁆𑀯𑀸 𑀓𑁄𑀧𑀁 𑀅𑀓𑀢𑁆𑀯𑀸𑀯 𑀅𑀜𑁆𑀜𑀫𑀜𑁆𑀜𑀁 𑀲𑀧𑀣𑀁 𑀓𑀢𑁆𑀯𑀸 𑀢𑀁 𑀫𑀺𑀢𑁆𑀢𑀝𑁆𑀞𑀸𑀦𑁂 𑀞𑀧𑀬𑀺𑀢𑁆𑀯𑀸 𑀆𑀳 𑁋

‘‘𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀫𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀽’’𑀢𑀺. (𑀚𑀸. 𑁧.𑁧.𑁫𑁧);

𑀔𑀦𑁆𑀢𑀺𑀯𑀸𑀤𑀻𑀚𑀸𑀢𑀓𑁂 𑀤𑀼𑀫𑁆𑀫𑁂𑀥𑁂𑀦 𑀓𑀸𑀲𑀺𑀭𑀜𑁆𑀜𑀸 ‘‘𑀓𑀺𑀁𑀯𑀸𑀤𑀻 𑀢𑁆𑀯𑀁 𑀲𑀫𑀡𑀸’’𑀢𑀺 𑀧𑀼𑀝𑁆𑀞𑁄 ‘‘𑀔𑀦𑁆𑀢𑀺𑀯𑀸𑀤𑀻 𑀦𑀸𑀫𑀸𑀳’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀓𑀡𑁆𑀝𑀓𑀸𑀳𑀺 𑀓𑀲𑀸𑀳𑀺 𑀢𑀸𑀴𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑁂𑀲𑀼 𑀙𑀺𑀚𑁆𑀚𑀫𑀸𑀦𑁂𑀲𑀼 𑀓𑁄𑀧𑀫𑀢𑁆𑀢𑀫𑁆𑀧𑀺 𑀦𑀸𑀓𑀸𑀲𑀺.

𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀫𑀳𑀮𑁆𑀮𑀓𑁄 𑀧𑀩𑁆𑀩𑀚𑁆𑀚𑀽𑀧𑀕𑀢𑁄 𑀏𑀯𑀁 𑀓𑀭𑁂𑀬𑁆𑀬. 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑁂 𑀧𑀦 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄𑀧𑀺 𑀲𑀫𑀸𑀦𑁄 𑁋

‘‘𑀘𑀦𑁆𑀤𑀦𑀭𑀲𑀸𑀦𑀼𑀮𑀺𑀢𑁆𑀢𑀸, 𑀩𑀸𑀳𑀸 𑀙𑀺𑀚𑁆𑀚𑀦𑁆𑀢𑀺 𑀥𑀫𑁆𑀫𑀧𑀸𑀮𑀲𑁆𑀲;

𑀤𑀸𑀬𑀸𑀤𑀲𑁆𑀲 𑀧𑀣𑀩𑁆𑀬𑀸, 𑀧𑀸𑀡𑀸 𑀫𑁂 𑀤𑁂𑀯 𑀭𑀼𑀚𑁆𑀛𑀦𑁆𑀢𑀻’’𑀢𑀺. (𑀚𑀸. 𑁧.𑁫.𑁪𑁯);

𑀏𑀯𑀁 𑀯𑀺𑀧𑁆𑀧𑀮𑀧𑀫𑀸𑀦𑀸𑀬 𑀫𑀸𑀢𑀼𑀬𑀸 𑀧𑀺𑀢𑀭𑀸 𑀫𑀳𑀸𑀧𑀢𑀸𑀧𑁂𑀦 𑀦𑀸𑀫 𑀭𑀜𑁆𑀜𑀸 𑀯𑀁𑀲𑀓𑀴𑀻𑀭𑁂𑀲𑀼 𑀯𑀺𑀬 𑀘𑀢𑀽𑀲𑀼 𑀳𑀢𑁆𑀣𑀧𑀸𑀤𑁂𑀲𑀼 𑀙𑁂𑀤𑀸𑀧𑀺𑀢𑁂𑀲𑀼 𑀢𑀸𑀯𑀢𑀸𑀧𑀺 𑀲𑀦𑁆𑀢𑀼𑀝𑁆𑀞𑀺𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀣𑀸𑀢𑀺 𑀆𑀡𑀢𑁆𑀢𑁂 ‘‘𑀅𑀬𑀁 𑀤𑀸𑀦𑀺 𑀢𑁂 𑀘𑀺𑀢𑁆𑀢𑀧𑀭𑀺𑀕𑁆𑀕𑀡𑁆𑀳𑀦𑀓𑀸𑀮𑁄, 𑀇𑀤𑀸𑀦𑀺 𑀅𑀫𑁆𑀪𑁄 𑀥𑀫𑁆𑀫𑀧𑀸𑀮, 𑀲𑀻𑀲𑀘𑁆𑀙𑁂𑀤𑀸𑀡𑀸𑀧𑀓𑁂 𑀧𑀺𑀢𑀭𑀺, 𑀲𑀻𑀲𑀘𑁆𑀙𑁂𑀤𑀓𑁂 𑀧𑀼𑀭𑀺𑀲𑁂, 𑀧𑀭𑀺𑀤𑁂𑀯𑀫𑀸𑀦𑀸𑀬 𑀫𑀸𑀢𑀭𑀺, 𑀅𑀢𑁆𑀢𑀦𑀺 𑀘𑀸𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀲𑀫𑀘𑀺𑀢𑁆𑀢𑁄 𑀳𑁄𑀳𑀻’’𑀢𑀺 𑀤𑀴𑁆𑀳𑀁 𑀲𑀫𑀸𑀤𑀸𑀦𑀫𑀥𑀺𑀝𑁆𑀞𑀸𑀬 𑀧𑀤𑀼𑀝𑁆𑀞𑀸𑀓𑀸𑀭𑀫𑀢𑁆𑀢𑀫𑁆𑀧𑀺 𑀦𑀸𑀓𑀸𑀲𑀺.

𑀇𑀤𑀜𑁆𑀘𑀸𑀧𑀺 𑀅𑀦𑀘𑁆𑀙𑀭𑀺𑀬𑀫𑁂𑀯, 𑀬𑀁 𑀫𑀦𑀼𑀲𑁆𑀲𑀪𑀽𑀢𑁄 𑀏𑀯𑀫𑀓𑀸𑀲𑀺. 𑀢𑀺𑀭𑀘𑁆𑀙𑀸𑀦𑀪𑀽𑀢𑁄𑀧𑀺 𑀧𑀦 𑀙𑀤𑁆𑀤𑀦𑁆𑀢𑁄 𑀦𑀸𑀫 𑀯𑀸𑀭𑀡𑁄 𑀳𑀼𑀢𑁆𑀯𑀸 𑀯𑀺𑀲𑀧𑁆𑀧𑀺𑀢𑁂𑀦 𑀲𑀮𑁆𑀮𑁂𑀦 𑀦𑀸𑀪𑀺𑀬𑀁 𑀯𑀺𑀤𑁆𑀥𑁄𑀧𑀺 𑀢𑀸𑀯 𑀅𑀦𑀢𑁆𑀣𑀓𑀸𑀭𑀺𑀫𑁆𑀳𑀺 𑀮𑀼𑀤𑁆𑀤𑀓𑁂 𑀘𑀺𑀢𑁆𑀢𑀁 𑀦𑀧𑁆𑀧𑀤𑀽𑀲𑁂𑀲𑀺. 𑀬𑀣𑀸𑀳 𑁋

‘‘𑀲𑀫𑀧𑁆𑀧𑀺𑀢𑁄 𑀧𑀼𑀣𑀼𑀲𑀮𑁆𑀮𑁂𑀦 𑀦𑀸𑀕𑁄,

𑀅𑀤𑀼𑀝𑁆𑀞𑀘𑀺𑀢𑁆𑀢𑁄 𑀮𑀼𑀤𑁆𑀤𑀓𑀁 𑀅𑀚𑁆𑀛𑀪𑀸𑀲𑀺;

𑀓𑀺𑀫𑀢𑁆𑀣𑀬𑀁 𑀓𑀺𑀲𑁆𑀲 𑀯𑀸 𑀲𑀫𑁆𑀫 𑀳𑁂𑀢𑀼,

𑀫𑀫𑀁 𑀯𑀥𑀻 𑀓𑀲𑁆𑀲 𑀯𑀸𑀬𑀁 𑀧𑀬𑁄𑀕𑁄’’𑀢𑀺. (𑀚𑀸. 𑁧.𑁧𑁬.𑁧𑁨𑁪);

𑀏𑀯𑀁 𑀯𑀢𑁆𑀯𑀸 𑀘 𑀓𑀸𑀲𑀺𑀭𑀜𑁆𑀜𑁄 𑀫𑀳𑁂𑀲𑀺𑀬𑀸 𑀢𑀯 𑀤𑀦𑁆𑀢𑀸𑀦𑀫𑀢𑁆𑀣𑀸𑀬 𑀧𑁂𑀲𑀺𑀢𑁄𑀫𑁆𑀳𑀺 𑀪𑀤𑀦𑁆𑀢𑁂𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲𑀸 𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑁄 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀦𑀺𑀘𑁆𑀙𑀭𑀡𑀲𑀫𑀼𑀚𑁆𑀚𑀮𑀺𑀢𑀘𑀸𑀭𑀼𑀲𑁄𑀪𑁂 𑀅𑀢𑁆𑀢𑀦𑁄 𑀤𑀦𑁆𑀢𑁂 𑀙𑁂𑀢𑁆𑀯𑀸 𑀅𑀤𑀸𑀲𑀺.

𑀫𑀳𑀸𑀓𑀧𑀺 𑀳𑀼𑀢𑁆𑀯𑀸 𑀅𑀢𑁆𑀢𑀦𑀸𑀬𑁂𑀯 𑀧𑀩𑁆𑀩𑀢𑀧𑀧𑀸𑀢𑀢𑁄 𑀉𑀤𑁆𑀥𑀭𑀺𑀢𑁂𑀦 𑀧𑀼𑀭𑀺𑀲𑁂𑀦 𑁋

‘‘𑀪𑀓𑁆𑀔𑁄 𑀅𑀬𑀁 𑀫𑀦𑀼𑀲𑁆𑀲𑀸𑀦𑀁, 𑀬𑀣𑁂𑀯𑀜𑁆𑀜𑁂 𑀯𑀦𑁂 𑀫𑀺𑀕𑀸;

𑀬𑀁𑀦𑀽𑀦𑀺𑀫𑀁 𑀯𑀥𑀺𑀢𑁆𑀯𑀸𑀦, 𑀙𑀸𑀢𑁄 𑀔𑀸𑀤𑁂𑀬𑁆𑀬 𑀯𑀸𑀦𑀭𑀁.

‘‘𑀆𑀳𑀺𑀢𑁄𑀯 𑀕𑀫𑀺𑀲𑁆𑀲𑀸𑀫𑀺, 𑀫𑀁𑀲𑀫𑀸𑀤𑀸𑀬 𑀲𑀫𑁆𑀩𑀮𑀁;

𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀲𑁆𑀲𑀸𑀫𑀺, 𑀧𑀸𑀣𑁂𑀬𑁆𑀬𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺. (𑀚𑀸. 𑁧.𑁧𑁬.𑁨𑁦𑁫-𑁨𑁦𑁬); 𑁋

𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀲𑀺𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀢𑁆𑀣𑀓𑁂 𑀲𑀫𑁆𑀧𑀤𑀸𑀮𑀺𑀢𑁂 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀢𑀁 𑀧𑀼𑀭𑀺𑀲𑀁 𑀉𑀤𑀺𑀓𑁆𑀔𑀫𑀸𑀦𑁄 𑁋

‘‘𑀫𑀸 𑀅𑀬𑁆𑀬𑁄𑀲𑀺 𑀫𑁂 𑀪𑀤𑀦𑁆𑀢𑁂, 𑀢𑁆𑀯𑀁 𑀦𑀸𑀫𑁂𑀢𑀸𑀤𑀺𑀲𑀁 𑀓𑀭𑀺;

𑀢𑁆𑀯𑀁 𑀔𑁄𑀲𑀺 𑀦𑀸𑀫 𑀤𑀻𑀖𑀸𑀯𑀼, 𑀅𑀜𑁆𑀜𑀁 𑀯𑀸𑀭𑁂𑀢𑀼𑀫𑀭𑀳𑀲𑀻’’𑀢𑀺. (𑀚𑀸. 𑁧.𑁧𑁬.𑁨𑁦𑁯); 𑁋

𑀯𑀢𑁆𑀯𑀸 𑀢𑀲𑁆𑀫𑀺𑀁 𑀧𑀼𑀭𑀺𑀲𑁂 𑀘𑀺𑀢𑁆𑀢𑀁 𑀅𑀧𑁆𑀧𑀤𑀽𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀘 𑀤𑀼𑀓𑁆𑀔𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀢𑀫𑁂𑀯 𑀧𑀼𑀭𑀺𑀲𑀁 𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀲𑀺.

𑀪𑀽𑀭𑀺𑀤𑀢𑁆𑀢𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀯𑀫𑁆𑀫𑀺𑀓𑀫𑀼𑀤𑁆𑀥𑀦𑀺 𑀲𑀬𑀫𑀸𑀦𑁄 𑀓𑀧𑁆𑀧𑀼𑀝𑁆𑀞𑀸𑀦𑀕𑁆𑀕𑀺𑀲𑀤𑀺𑀲𑁂𑀦 𑀑𑀲𑀥𑁂𑀦 𑀲𑀓𑀮𑀲𑀭𑀻𑀭𑁂 𑀲𑀺𑀜𑁆𑀘𑀺𑀬𑀫𑀸𑀦𑁄𑀧𑀺 𑀧𑁂𑀴𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀓𑀻𑀴𑀸𑀧𑀺𑀬𑀫𑀸𑀦𑁄𑀧𑀺 𑀢𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑁂 𑀫𑀦𑁄𑀧𑀤𑁄𑀲𑀫𑀢𑁆𑀢𑀫𑁆𑀧𑀺 𑀦 𑀅𑀓𑀸𑀲𑀺. 𑀬𑀣𑀸𑀳 𑁋

‘‘𑀧𑁂𑀴𑀸𑀬 𑀧𑀓𑁆𑀔𑀺𑀧𑀦𑁆𑀢𑁂𑀧𑀺, 𑀫𑀤𑁆𑀤𑀦𑁆𑀢𑁂𑀧𑀺 𑀘 𑀧𑀸𑀡𑀺𑀦𑀸;

𑀅𑀮𑀫𑁆𑀧𑀸𑀦𑁂 𑀦 𑀓𑀼𑀧𑁆𑀧𑀸𑀫𑀺, 𑀲𑀻𑀮𑀔𑀡𑁆𑀟𑀪𑀬𑀸 𑀫𑀫𑀸’’𑀢𑀺. (𑀘𑀭𑀺𑀬𑀸. 𑁨.𑁧𑁬);

𑀘𑀫𑁆𑀧𑁂𑀬𑁆𑀬𑁄𑀧𑀺 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀅𑀳𑀺𑀢𑀼𑀡𑁆𑀟𑀺𑀓𑁂𑀦 𑀯𑀺𑀳𑁂𑀞𑀺𑀬𑀫𑀸𑀦𑁄 𑀫𑀦𑁄𑀧𑀤𑁄𑀲𑀫𑀢𑁆𑀢𑀫𑁆𑀧𑀺 𑀦𑀼𑀧𑁆𑀧𑀸𑀤𑁂𑀲𑀺. 𑀬𑀣𑀸𑀳 𑁋

‘‘𑀢𑀤𑀸𑀧𑀺 𑀫𑀁 𑀥𑀫𑁆𑀫𑀘𑀸𑀭𑀺𑀁, 𑀉𑀧𑀯𑀼𑀢𑁆𑀣𑀉𑀧𑁄𑀲𑀣𑀁;

𑀅𑀳𑀺𑀢𑀼𑀡𑁆𑀟𑀺𑀓𑁄 𑀕𑀳𑁂𑀢𑁆𑀯𑀸𑀦, 𑀭𑀸𑀚𑀤𑁆𑀯𑀸𑀭𑀫𑁆𑀳𑀺 𑀓𑀻𑀴𑀢𑀺.

‘‘𑀬𑀁 𑀲𑁄 𑀯𑀡𑁆𑀡𑀁 𑀘𑀺𑀦𑁆𑀢𑀬𑀢𑀺, 𑀦𑀻𑀮𑀁 𑀧𑀻𑀢𑀁 𑀯 𑀮𑁄𑀳𑀺𑀢𑀁;

𑀢𑀲𑁆𑀲 𑀘𑀺𑀢𑁆𑀢𑀸𑀦𑀼𑀯𑀢𑁆𑀢𑀦𑁆𑀢𑁄, 𑀳𑁄𑀫𑀺 𑀘𑀺𑀦𑁆𑀢𑀺𑀢𑀲𑀦𑁆𑀦𑀺𑀪𑁄.

‘‘𑀣𑀮𑀁 𑀓𑀭𑁂𑀬𑁆𑀬𑀁 𑀉𑀤𑀓𑀁, 𑀉𑀤𑀓𑀫𑁆𑀧𑀺 𑀣𑀮𑀁 𑀓𑀭𑁂;

𑀬𑀤𑀺𑀳𑀁 𑀢𑀲𑁆𑀲 𑀓𑀼𑀧𑁆𑀧𑁂𑀬𑁆𑀬𑀁, 𑀔𑀡𑁂𑀦 𑀙𑀸𑀭𑀺𑀓𑀁 𑀓𑀭𑁂.

‘‘𑀬𑀤𑀺 𑀘𑀺𑀢𑁆𑀢𑀯𑀲𑀻 𑀳𑁂𑀲𑁆𑀲𑀁, 𑀧𑀭𑀺𑀳𑀸𑀬𑀺𑀲𑁆𑀲𑀸𑀫𑀺 𑀲𑀻𑀮𑀢𑁄;

𑀲𑀻𑀮𑁂𑀦 𑀧𑀭𑀺𑀳𑀻𑀦𑀲𑁆𑀲, 𑀉𑀢𑁆𑀢𑀫𑀢𑁆𑀣𑁄 𑀦 𑀲𑀺𑀚𑁆𑀛𑀢𑀻’’𑀢𑀺. (𑀘𑀭𑀺𑀬𑀸. 𑁨.𑁨𑁧-𑁨𑁪);

𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀢𑀺𑀔𑀺𑀡𑀸𑀳𑀺 𑀲𑀢𑁆𑀢𑀻𑀳𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀑𑀯𑀺𑀚𑁆𑀛𑀺𑀢𑁆𑀯𑀸 𑀧𑀳𑀸𑀭𑀫𑀼𑀔𑁂𑀳𑀺 𑀲𑀓𑀡𑁆𑀝𑀓𑀸 𑀮𑀢𑀸𑀬𑁄 𑀧𑀯𑁂𑀲𑁂𑀢𑁆𑀯𑀸 𑀦𑀸𑀲𑀸𑀬 𑀤𑀴𑁆𑀳𑀁 𑀭𑀚𑁆𑀚𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑁄𑀴𑀲𑀳𑀺 𑀪𑁄𑀚𑀧𑀼𑀢𑁆𑀢𑁂𑀳𑀺 𑀓𑀸𑀚𑁂𑀦𑀸𑀤𑀸𑀬 𑀯𑀬𑁆𑀳𑀫𑀸𑀦𑁄 𑀥𑀭𑀡𑀻𑀢𑀮𑁂 𑀖𑀁𑀲𑀺𑀬𑀫𑀸𑀦𑀲𑀭𑀻𑀭𑁄 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑁄 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀺𑀢𑀫𑀢𑁆𑀢𑁂𑀦𑁂𑀯 𑀲𑀩𑁆𑀩𑁂 𑀪𑁄𑀚𑀧𑀼𑀢𑁆𑀢𑁂 𑀪𑀲𑁆𑀫𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄𑀧𑀺 𑀲𑀫𑀸𑀦𑁄 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀧𑀤𑀼𑀝𑁆𑀞𑀸𑀓𑀸𑀭𑀫𑀢𑁆𑀢𑀫𑁆𑀧𑀺 𑀦 𑀅𑀓𑀸𑀲𑀺.

𑀬𑀣𑀸𑀳 𑁋

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀜𑁆𑀘𑀴𑀸𑀭,

𑀉𑀧𑁄𑀲𑀣𑀁 𑀦𑀺𑀘𑁆𑀘𑀫𑀼𑀧𑀸𑀯𑀲𑀸𑀫𑀺;

𑀅𑀣𑀸𑀕𑀫𑀼𑀁 𑀲𑁄𑀴𑀲 𑀪𑁄𑀚𑀧𑀼𑀢𑁆𑀢𑀸,

𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸𑀦 𑀤𑀴𑁆𑀳𑀜𑁆𑀘 𑀧𑀸𑀲𑀁.

‘‘𑀪𑁂𑀢𑁆𑀯𑀸𑀦 𑀦𑀸𑀲𑀁 𑀅𑀢𑀺𑀓𑀲𑁆𑀲 𑀭𑀚𑁆𑀚𑀼𑀁,

𑀦𑀬𑀺𑀁𑀲𑀼 𑀫𑀁 𑀲𑀫𑁆𑀧𑀭𑀺𑀕𑀬𑁆𑀳 𑀮𑀼𑀤𑁆𑀤𑀸;

𑀏𑀢𑀸𑀤𑀺𑀲𑀁 𑀤𑀼𑀓𑁆𑀔𑀫𑀳𑀁 𑀢𑀺𑀢𑀺𑀓𑁆𑀔𑀁,

𑀉𑀧𑁄𑀲𑀣𑀁 𑀅𑀧𑁆𑀧𑀝𑀺𑀓𑁄𑀧𑀬𑀦𑁆𑀢𑁄’’𑀢𑀺. (𑀚𑀸. 𑁨.𑁧𑁭.𑁧𑁮𑁦-𑁧𑁮𑁧);

𑀦 𑀓𑁂𑀯𑀮𑀜𑁆𑀘 𑀏𑀢𑀸𑀦𑁂𑀯, 𑀅𑀜𑁆𑀜𑀸𑀦𑀺𑀧𑀺 𑀫𑀸𑀢𑀼𑀧𑁄𑀲𑀓𑀚𑀸𑀢𑀓𑀸𑀤𑀻𑀲𑀼 𑀅𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀅𑀓𑀸𑀲𑀺. 𑀢𑀲𑁆𑀲 𑀢𑁂 𑀇𑀤𑀸𑀦𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀁 𑀲𑀤𑁂𑀯𑀮𑁄𑀓𑁂 𑀓𑁂𑀦𑀘𑀺 𑀅𑀧𑁆𑀧𑀝𑀺𑀲𑀫𑀔𑀦𑁆𑀢𑀺𑀕𑀼𑀡𑀁 𑀢𑀁 𑀪𑀕𑀯𑀦𑁆𑀢𑀁 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑀢𑁄 𑀧𑀝𑀺𑀖𑀘𑀺𑀢𑁆𑀢𑀁 𑀦𑀸𑀫 𑀉𑀧𑁆𑀧𑀸𑀤𑁂𑀢𑀼𑀁 𑀅𑀢𑀺𑀯𑀺𑀬 𑀅𑀬𑀼𑀢𑁆𑀢𑀁 𑀅𑀧𑁆𑀧𑀢𑀺𑀭𑀽𑀧𑀦𑁆𑀢𑀺.

𑁨𑁪𑁮. 𑀲𑀘𑁂 𑀧𑀦𑀲𑁆𑀲 𑀏𑀯𑀁 𑀲𑀢𑁆𑀣𑀼 𑀧𑀼𑀩𑁆𑀩𑀘𑀭𑀺𑀢𑀕𑀼𑀡𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀤𑀻𑀖𑀭𑀢𑁆𑀢𑀁 𑀓𑀺𑀮𑁂𑀲𑀸𑀦𑀁 𑀤𑀸𑀲𑀩𑁆𑀬𑀁 𑀉𑀧𑀕𑀢𑀲𑁆𑀲 𑀦𑁂𑀯 𑀢𑀁 𑀧𑀝𑀺𑀖𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀣𑀸𑀦𑁂𑀦 𑀅𑀦𑀫𑀢𑀕𑁆𑀕𑀺𑀬𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸𑀦𑀺. 𑀢𑀢𑁆𑀭 𑀳𑀺 𑀯𑀼𑀢𑁆𑀢𑀁 𑁋

‘‘𑀦 𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑁄 𑀲𑀼𑀮𑀪𑀭𑀽𑀧𑁄, 𑀬𑁄 𑀦 𑀫𑀸𑀢𑀸𑀪𑀽𑀢𑀧𑀼𑀩𑁆𑀩𑁄, 𑀬𑁄 𑀦 𑀧𑀺𑀢𑀸𑀪𑀽𑀢𑀧𑀼𑀩𑁆𑀩𑁄, 𑀬𑁄 𑀦 𑀪𑀸𑀢𑀸, 𑀬𑁄 𑀦 𑀪𑀕𑀺𑀦𑀻, 𑀬𑁄 𑀦 𑀧𑀼𑀢𑁆𑀢𑁄, 𑀬𑁄 𑀦 𑀥𑀻𑀢𑀸𑀪𑀽𑀢𑀧𑀼𑀩𑁆𑀩𑀸’’𑀢𑀺 (𑀲𑀁. 𑀦𑀺. 𑁨.𑁧𑁩𑁭-𑁧𑁪𑁨).

𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁, ‘‘𑀅𑀬𑀁 𑀓𑀺𑀭 𑀫𑁂 𑀅𑀢𑀻𑀢𑁂 𑀫𑀸𑀢𑀸 𑀳𑀼𑀢𑁆𑀯𑀸 𑀤𑀲𑀫𑀸𑀲𑁂 𑀓𑀼𑀘𑁆𑀙𑀺𑀬𑀸 𑀧𑀭𑀺𑀳𑀭𑀺𑀢𑁆𑀯𑀸 𑀫𑀼𑀢𑁆𑀢𑀓𑀭𑀻𑀲𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀻𑀦𑀺 𑀳𑀭𑀺𑀘𑀦𑁆𑀤𑀦𑀁 𑀯𑀺𑀬 𑀅𑀚𑀺𑀕𑀼𑀘𑁆𑀙𑀫𑀸𑀦𑀸 𑀅𑀧𑀦𑁂𑀢𑁆𑀯𑀸 𑀉𑀭𑁂 𑀦𑀘𑁆𑀘𑀸𑀧𑁂𑀦𑁆𑀢𑀻 𑀅𑀗𑁆𑀕𑁂𑀦 𑀧𑀭𑀺𑀳𑀭𑀫𑀸𑀦𑀸 𑀧𑁄𑀲𑁂𑀲𑀺, 𑀧𑀺𑀢𑀸 𑀳𑀼𑀢𑁆𑀯𑀸 𑀅𑀚𑀧𑀣𑀲𑀗𑁆𑀓𑀼𑀧𑀣𑀸𑀤𑀻𑀦𑀺 𑀕𑀦𑁆𑀢𑁆𑀯𑀸 𑀯𑀸𑀡𑀺𑀚𑁆𑀚𑀁 𑀧𑀬𑁄𑀚𑀬𑀫𑀸𑀦𑁄 𑀫𑀬𑁆𑀳𑀫𑀢𑁆𑀣𑀸𑀬 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀉𑀪𑀢𑁄𑀩𑁆𑀬𑀽𑀴𑁆𑀳𑁂 𑀲𑀗𑁆𑀕𑀸𑀫𑁂 𑀧𑀯𑀺𑀲𑀺𑀢𑁆𑀯𑀸 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀸𑀦𑀺 𑀘 𑀤𑀼𑀓𑁆𑀓𑀭𑀸𑀦𑀺 𑀓𑀭𑀺𑀢𑁆𑀯𑀸 ‘𑀧𑀼𑀢𑁆𑀢𑀓𑁂 𑀧𑁄𑀲𑁂𑀲𑁆𑀲𑀸𑀫𑀻’𑀢𑀺 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀫𑀁 𑀧𑁄𑀲𑁂𑀲𑀺. 𑀪𑀸𑀢𑀸, 𑀪𑀕𑀺𑀦𑀻, 𑀧𑀼𑀢𑁆𑀢𑁄, 𑀥𑀻𑀢𑀸 𑀘 𑀳𑀼𑀢𑁆𑀯𑀸𑀧𑀺 𑀇𑀤𑀜𑁆𑀘𑀺𑀤𑀜𑁆𑀘𑀼𑀧𑀓𑀸𑀭𑀁 𑀅𑀓𑀸𑀲𑀻𑀢𑀺 𑀢𑀢𑁆𑀭 𑀫𑁂 𑀦𑀧𑁆𑀧𑀢𑀺𑀭𑀽𑀧𑀁 𑀫𑀦𑀁 𑀧𑀤𑀽𑀲𑁂𑀢𑀼’’𑀦𑁆𑀢𑀺.

𑁨𑁪𑁯. 𑀲𑀘𑁂 𑀧𑀦 𑀏𑀯𑀫𑁆𑀧𑀺 𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺𑀬𑁂𑀯, 𑀅𑀣𑀸𑀦𑁂𑀦 𑀏𑀯𑀁 𑀫𑁂𑀢𑁆𑀢𑀸𑀦𑀺𑀲𑀁𑀲𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸 𑁋 ‘‘𑀅𑀫𑁆𑀪𑁄 𑀧𑀩𑁆𑀩𑀚𑀺𑀢, 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘𑀫𑁂𑀢𑁆𑀢𑀸𑀬 𑀔𑁄, 𑀪𑀺𑀓𑁆𑀔𑀯𑁂, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀺𑀢𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀬𑀸𑀦𑀻𑀓𑀢𑀸𑀬 𑀯𑀢𑁆𑀣𑀼𑀓𑀢𑀸𑀬 𑀅𑀦𑀼𑀝𑁆𑀞𑀺𑀢𑀸𑀬 𑀧𑀭𑀺𑀘𑀺𑀢𑀸𑀬 𑀲𑀼𑀲𑀫𑀸𑀭𑀤𑁆𑀥𑀸𑀬 𑀏𑀓𑀸𑀤𑀲𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂 𑀏𑀓𑀸𑀤𑀲? 𑀲𑀼𑀔𑀁 𑀲𑀼𑀧𑀢𑀺, 𑀲𑀼𑀔𑀁 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀺, 𑀦𑀸𑀲𑁆𑀲 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀺, 𑀢𑀼𑀯𑀝𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀫𑀼𑀔𑀯𑀡𑁆𑀡𑁄 𑀧𑀲𑀻𑀤𑀢𑀺, 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀗𑁆𑀓𑀭𑁄𑀢𑀺, 𑀉𑀢𑁆𑀢𑀭𑀺𑀫𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑁄𑀢𑀻’𑀢𑀺 (𑀅. 𑀦𑀺. 𑁧𑁧.𑁧𑁫).

‘‘𑀲𑀘𑁂 𑀢𑁆𑀯𑀁 𑀇𑀤𑀁 𑀘𑀺𑀢𑁆𑀢𑀁 𑀦 𑀦𑀺𑀩𑁆𑀩𑀸𑀧𑁂𑀲𑁆𑀲𑀲𑀺, 𑀇𑀫𑁂𑀳𑀺 𑀆𑀦𑀺𑀲𑀁𑀲𑁂𑀳𑀺 𑀧𑀭𑀺𑀩𑀸𑀳𑀺𑀭𑁄 𑀪𑀯𑀺𑀲𑁆𑀲𑀲𑀻’’𑀢𑀺.

𑁨𑁫𑁦. 𑀏𑀯𑀫𑁆𑀧𑀺 𑀦𑀺𑀩𑁆𑀩𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀦 𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑁄 𑀓𑀸𑀢𑀩𑁆𑀩𑁄. 𑀓𑀣𑀁? ‘‘𑀅𑀫𑁆𑀪𑁄 𑀧𑀩𑁆𑀩𑀚𑀺𑀢, 𑀢𑁆𑀯𑀁 𑀏𑀢𑀲𑁆𑀲 𑀓𑀼𑀚𑁆𑀛𑀫𑀸𑀦𑁄 𑀓𑀲𑁆𑀲 𑀓𑀼𑀚𑁆𑀛𑀲𑀺? 𑀓𑀺𑀁 𑀓𑁂𑀲𑀸𑀦𑀁 𑀓𑀼𑀚𑁆𑀛𑀲𑀺, 𑀉𑀤𑀸𑀳𑀼 𑀮𑁄𑀫𑀸𑀦𑀁, 𑀦𑀔𑀸𑀦𑀁…𑀧𑁂… 𑀫𑀼𑀢𑁆𑀢𑀲𑁆𑀲 𑀓𑀼𑀚𑁆𑀛𑀲𑀺? 𑀅𑀣 𑀯𑀸 𑀧𑀦 𑀓𑁂𑀲𑀸𑀤𑀻𑀲𑀼 𑀧𑀣𑀯𑀻𑀥𑀸𑀢𑀼𑀬𑀸 𑀓𑀼𑀚𑁆𑀛𑀲𑀺, 𑀆𑀧𑁄𑀥𑀸𑀢𑀼𑀬𑀸, 𑀢𑁂𑀚𑁄𑀥𑀸𑀢𑀼𑀬𑀸, 𑀯𑀸𑀬𑁄𑀥𑀸𑀢𑀼𑀬𑀸 𑀓𑀼𑀚𑁆𑀛𑀲𑀺? 𑀬𑁂 𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀉𑀧𑀸𑀤𑀸𑀬 𑀅𑀬𑀫𑀸𑀬𑀲𑁆𑀫𑀸 𑀇𑀢𑁆𑀣𑀦𑁆𑀦𑀸𑀫𑁄𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀲𑀼 𑀓𑀺𑀁 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀓𑀼𑀚𑁆𑀛𑀲𑀺, 𑀉𑀤𑀸𑀳𑀼 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀓𑀼𑀚𑁆𑀛𑀲𑀺? 𑀓𑀺𑀁 𑀯𑀸 𑀘𑀓𑁆𑀔𑀸𑀬𑀢𑀦𑀲𑁆𑀲 𑀓𑀼𑀚𑁆𑀛𑀲𑀺, 𑀓𑀺𑀁 𑀭𑀽𑀧𑀸𑀬𑀢𑀦𑀲𑁆𑀲 𑀓𑀼𑀚𑁆𑀛𑀲𑀺…𑀧𑁂… 𑀓𑀺𑀁 𑀫𑀦𑀸𑀬𑀢𑀦𑀲𑁆𑀲 𑀓𑀼𑀚𑁆𑀛𑀲𑀺, 𑀓𑀺𑀁 𑀥𑀫𑁆𑀫𑀸𑀬𑀢𑀦𑀲𑁆𑀲 𑀓𑀼𑀚𑁆𑀛𑀲𑀺? 𑀓𑀺𑀁 𑀯𑀸 𑀘𑀓𑁆𑀔𑀼𑀥𑀸𑀢𑀼𑀬𑀸 𑀓𑀼𑀚𑁆𑀛𑀲𑀺, 𑀓𑀺𑀁 𑀭𑀽𑀧𑀥𑀸𑀢𑀼𑀬𑀸, 𑀓𑀺𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀓𑀺𑀁 𑀫𑀦𑁄𑀥𑀸𑀢𑀼𑀬𑀸, 𑀓𑀺𑀁 𑀥𑀫𑁆𑀫𑀥𑀸𑀢𑀼𑀬𑀸, 𑀓𑀺𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺? 𑀏𑀯𑀜𑁆𑀳𑀺 𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑀁 𑀓𑀭𑁄𑀢𑁄 𑀆𑀭𑀕𑁆𑀕𑁂 𑀲𑀸𑀲𑀧𑀲𑁆𑀲 𑀯𑀺𑀬 𑀆𑀓𑀸𑀲𑁂 𑀘𑀺𑀢𑁆𑀢𑀓𑀫𑁆𑀫𑀲𑁆𑀲 𑀯𑀺𑀬 𑀘 𑀓𑁄𑀥𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁 𑀦 𑀳𑁄𑀢𑀺.

𑁨𑁫𑁧. 𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑀁 𑀧𑀦 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀤𑀸𑀦𑀲𑀁𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑀲𑁆𑀲 𑀤𑀸𑀢𑀩𑁆𑀩𑀁, 𑀧𑀭𑀲𑁆𑀲 𑀲𑀦𑁆𑀢𑀓𑀁 𑀅𑀢𑁆𑀢𑀦𑀸 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀧𑀭𑁄 𑀪𑀺𑀦𑁆𑀦𑀸𑀚𑀻𑀯𑁄 𑀳𑁄𑀢𑀺 𑀅𑀧𑀭𑀺𑀪𑁄𑀕𑀸𑀭𑀳𑀧𑀭𑀺𑀓𑁆𑀔𑀸𑀭𑁄, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁂𑀯 𑀤𑀸𑀢𑀩𑁆𑀩𑀁. 𑀢𑀲𑁆𑀲𑁂𑀯𑀁 𑀓𑀭𑁄𑀢𑁄 𑀏𑀓𑀦𑁆𑀢𑁂𑀦𑁂𑀯 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀆𑀖𑀸𑀢𑁄 𑀯𑀽𑀧𑀲𑀫𑁆𑀫𑀢𑀺. 𑀇𑀢𑀭𑀲𑁆𑀲 𑀘 𑀅𑀢𑀻𑀢𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀩𑀦𑁆𑀥𑁄𑀧𑀺 𑀓𑁄𑀥𑁄 𑀢𑀗𑁆𑀔𑀡𑀜𑁆𑀜𑁂𑀯 𑀯𑀽𑀧𑀲𑀫𑁆𑀫𑀢𑀺, 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀺𑀳𑀸𑀭𑁂 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀝𑁆𑀞𑀸𑀧𑀺𑀢𑀲𑁂𑀦𑀸𑀲𑀦𑁂𑀦 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑁂𑀦 ‘‘𑀅𑀬𑀁, 𑀪𑀦𑁆𑀢𑁂, 𑀅𑀝𑁆𑀞𑀓𑀳𑀸𑀧𑀡𑀕𑁆𑀖𑀦𑀓𑁄 𑀧𑀢𑁆𑀢𑁄 𑀫𑀫 𑀫𑀸𑀢𑀭𑀸 𑀉𑀧𑀸𑀲𑀺𑀓𑀸𑀬 𑀤𑀺𑀦𑁆𑀦𑁄 𑀥𑀫𑁆𑀫𑀺𑀬𑀮𑀸𑀪𑁄, 𑀫𑀳𑀸𑀉𑀧𑀸𑀲𑀺𑀓𑀸𑀬 𑀧𑀼𑀜𑁆𑀜𑀮𑀸𑀪𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀧𑀢𑁆𑀢𑀁 𑀮𑀤𑁆𑀥𑀫𑀳𑀸𑀣𑁂𑀭𑀲𑁆𑀲 𑀯𑀺𑀬. 𑀏𑀯𑀁 𑀫𑀳𑀸𑀦𑀼𑀪𑀸𑀯𑀫𑁂𑀢𑀁 𑀤𑀸𑀦𑀁 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀤𑀦𑁆𑀢𑀤𑀫𑀦𑀁 𑀤𑀸𑀦𑀁, 𑀤𑀸𑀦𑀁 𑀲𑀩𑁆𑀩𑀢𑁆𑀣𑀲𑀸𑀥𑀓𑀁;

𑀤𑀸𑀦𑁂𑀦 𑀧𑀺𑀬𑀯𑀸𑀘𑀸𑀬, 𑀉𑀦𑁆𑀦𑀫𑀦𑁆𑀢𑀺 𑀦𑀫𑀦𑁆𑀢𑀺 𑀘𑀸’’𑀢𑀺.

𑁨𑁫𑁨. 𑀢𑀲𑁆𑀲𑁂𑀯𑀁 𑀯𑁂𑀭𑀻𑀧𑀼𑀕𑁆𑀕𑀮𑁂 𑀯𑀽𑀧𑀲𑀦𑁆𑀢𑀧𑀝𑀺𑀖𑀲𑁆𑀲 𑀬𑀣𑀸 𑀧𑀺𑀬𑀸𑀢𑀺𑀧𑁆𑀧𑀺𑀬𑀲𑀳𑀸𑀬𑀓𑀫𑀚𑁆𑀛𑀢𑁆𑀢𑁂𑀲𑀼, 𑀏𑀯𑀁 𑀢𑀲𑁆𑀫𑀺𑀫𑁆𑀧𑀺 𑀫𑁂𑀢𑁆𑀢𑀸𑀯𑀲𑁂𑀦 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺. 𑀅𑀣𑀸𑀦𑁂𑀦 𑀧𑀼𑀦𑀧𑁆𑀧𑀼𑀦𑀁 𑀫𑁂𑀢𑁆𑀢𑀸𑀬𑀦𑁆𑀢𑁂𑀦 𑀅𑀢𑁆𑀢𑀦𑀺 𑀧𑀺𑀬𑀧𑀼𑀕𑁆𑀕𑀮𑁂 𑀫𑀚𑁆𑀛𑀢𑁆𑀢𑁂 𑀯𑁂𑀭𑀻𑀧𑀼𑀕𑁆𑀕𑀮𑁂𑀢𑀺 𑀘𑀢𑀽𑀲𑀼 𑀚𑀦𑁂𑀲𑀼 𑀲𑀫𑀘𑀺𑀢𑁆𑀢𑀢𑀁 𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀲𑀻𑀫𑀸𑀲𑀫𑁆𑀪𑁂𑀤𑁄 𑀓𑀸𑀢𑀩𑁆𑀩𑁄. 𑀢𑀲𑁆𑀲𑀺𑀤𑀁 𑀮𑀓𑁆𑀔𑀡𑀁, 𑀲𑀘𑁂 𑀇𑀫𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀧𑀺𑀬𑀫𑀚𑁆𑀛𑀢𑁆𑀢𑀯𑁂𑀭𑀻𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀘𑀢𑀼𑀢𑁆𑀣𑁂 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑁂 𑀘𑁄𑀭𑀸 𑀆𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀏𑀓𑀁 𑀪𑀺𑀓𑁆𑀔𑀼𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀓𑀸𑀭𑀡𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑀁 𑀫𑀸𑀭𑁂𑀢𑁆𑀯𑀸 𑀕𑀮𑀮𑁄𑀳𑀺𑀢𑀁 𑀕𑀳𑁂𑀢𑁆𑀯𑀸 𑀩𑀮𑀺𑀓𑀭𑀡𑀢𑁆𑀣𑀸𑀬𑀸’’𑀢𑀺 𑀯𑀤𑁂𑀬𑁆𑀬𑀼𑀁, 𑀢𑀢𑁆𑀭 𑀘𑁂𑀲𑁄 𑀪𑀺𑀓𑁆𑀔𑀼 ‘‘𑀅𑀲𑀼𑀓𑀁 𑀯𑀸 𑀅𑀲𑀼𑀓𑀁 𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀬𑁆𑀬, 𑀅𑀓𑀢𑁄𑀯 𑀳𑁄𑀢𑀺 𑀲𑀻𑀫𑀸𑀲𑀫𑁆𑀪𑁂𑀤𑁄. 𑀲𑀘𑁂𑀧𑀺 ‘‘𑀫𑀁 𑀕𑀡𑁆𑀳𑀦𑁆𑀢𑀼, 𑀫𑀸 𑀇𑀫𑁂 𑀢𑀬𑁄’’𑀢𑀺𑀧𑀺 𑀘𑀺𑀦𑁆𑀢𑁂𑀬𑁆𑀬, 𑀅𑀓𑀢𑁄𑀯 𑀳𑁄𑀢𑀺 𑀲𑀻𑀫𑀸𑀲𑀫𑁆𑀪𑁂𑀤𑁄. 𑀓𑀲𑁆𑀫𑀸? 𑀬𑀲𑁆𑀲 𑀬𑀲𑁆𑀲 𑀳𑀺 𑀕𑀳𑀡𑀫𑀺𑀘𑁆𑀙𑀢𑀺, 𑀢𑀲𑁆𑀲 𑀢𑀲𑁆𑀲 𑀅𑀳𑀺𑀢𑁂𑀲𑀻 𑀳𑁄𑀢𑀺, 𑀇𑀢𑀭𑁂𑀲𑀁𑀬𑁂𑀯 𑀳𑀺𑀢𑁂𑀲𑀻 𑀳𑁄𑀢𑀺.

𑀬𑀤𑀸 𑀧𑀦 𑀘𑀢𑀼𑀦𑁆𑀦𑀁 𑀚𑀦𑀸𑀦𑀫𑀦𑁆𑀢𑀭𑁂 𑀏𑀓𑀫𑁆𑀧𑀺 𑀘𑁄𑀭𑀸𑀦𑀁 𑀤𑀸𑀢𑀩𑁆𑀩𑀁 𑀦 𑀧𑀲𑁆𑀲𑀢𑀺, 𑀅𑀢𑁆𑀢𑀦𑀺 𑀘 𑀢𑁂𑀲𑀼 𑀘 𑀢𑀻𑀲𑀼 𑀚𑀦𑁂𑀲𑀼 𑀲𑀫𑀫𑁂𑀯 𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀢𑀺, 𑀓𑀢𑁄 𑀳𑁄𑀢𑀺 𑀲𑀻𑀫𑀸𑀲𑀫𑁆𑀪𑁂𑀤𑁄. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀅𑀢𑁆𑀢𑀦𑀺 𑀳𑀺𑀢𑀫𑀚𑁆𑀛𑀢𑁆𑀢𑁂, 𑀅𑀳𑀺𑀢𑁂 𑀘 𑀘𑀢𑀼𑀩𑁆𑀩𑀺𑀥𑁂;

𑀬𑀤𑀸 𑀧𑀲𑁆𑀲𑀢𑀺 𑀦𑀸𑀦𑀢𑁆𑀢𑀁, 𑀳𑀺𑀢𑀘𑀺𑀢𑁆𑀢𑁄𑀯 𑀧𑀸𑀡𑀺𑀦𑀁.

‘‘𑀦 𑀦𑀺𑀓𑀸𑀫𑀮𑀸𑀪𑀻 𑀫𑁂𑀢𑁆𑀢𑀸𑀬, 𑀓𑀼𑀲𑀮𑀻𑀢𑀺 𑀧𑀯𑀼𑀘𑁆𑀘𑀢𑀺;

𑀬𑀤𑀸 𑀘𑀢𑀲𑁆𑀲𑁄 𑀲𑀻𑀫𑀸𑀬𑁄, 𑀲𑀫𑁆𑀪𑀺𑀦𑁆𑀦𑀸 𑀳𑁄𑀦𑁆𑀢𑀺 𑀪𑀺𑀓𑁆𑀔𑀼𑀦𑁄.

‘‘𑀲𑀫𑀁 𑀨𑀭𑀢𑀺 𑀫𑁂𑀢𑁆𑀢𑀸𑀬, 𑀲𑀩𑁆𑀩𑀮𑁄𑀓𑀁 𑀲𑀤𑁂𑀯𑀓𑀁;

𑀫𑀳𑀸𑀯𑀺𑀲𑁂𑀲𑁄 𑀧𑀼𑀭𑀺𑀫𑁂𑀦, 𑀬𑀲𑁆𑀲 𑀲𑀻𑀫𑀸 𑀦 𑀜𑀸𑀬𑀢𑀻’’𑀢𑀺.

𑁨𑁫𑁩. 𑀏𑀯𑀁 𑀲𑀻𑀫𑀸𑀲𑀫𑁆𑀪𑁂𑀤𑀲𑀫𑀓𑀸𑀮𑀫𑁂𑀯 𑀘 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀦𑀺𑀫𑀺𑀢𑁆𑀢𑀜𑁆𑀘 𑀉𑀧𑀘𑀸𑀭𑀜𑁆𑀘 𑀮𑀤𑁆𑀥𑀁 𑀳𑁄𑀢𑀺. 𑀲𑀻𑀫𑀸𑀲𑀫𑁆𑀪𑁂𑀤𑁂 𑀧𑀦 𑀓𑀢𑁂 𑀢𑀫𑁂𑀯 𑀦𑀺𑀫𑀺𑀢𑁆𑀢𑀁 𑀆𑀲𑁂𑀯𑀦𑁆𑀢𑁄 𑀪𑀸𑀯𑁂𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺.

𑀏𑀢𑁆𑀢𑀸𑀯𑀢𑀸𑀦𑁂𑀦 𑀅𑀥𑀺𑀕𑀢𑀁 𑀳𑁄𑀢𑀺 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀞𑀫𑀚𑁆𑀛𑀸𑀦𑀁 𑀫𑁂𑀢𑁆𑀢𑀸𑀲𑀳𑀕𑀢𑀁. 𑀅𑀥𑀺𑀕𑀢𑁂 𑀘 𑀢𑀲𑁆𑀫𑀺𑀁 𑀢𑀤𑁂𑀯 𑀦𑀺𑀫𑀺𑀢𑁆𑀢𑀁 𑀆𑀲𑁂𑀯𑀦𑁆𑀢𑁄 𑀪𑀸𑀯𑁂𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀢𑀼𑀓𑁆𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀸𑀦𑀺, 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀘 𑀧𑀸𑀧𑀼𑀡𑀸𑀢𑀺.

𑀲𑁄 𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺 (𑀯𑀺𑀪. 𑁬𑁪𑁨; 𑀤𑀻. 𑀦𑀺. 𑁧.𑁫𑁫𑁬). 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀘𑀺𑀢𑁆𑀢𑀲𑁆𑀲𑁂𑀯 𑀳𑀺 𑀅𑀬𑀁 𑀯𑀺𑀓𑀼𑀩𑁆𑀩𑀦𑀸 𑀲𑀫𑁆𑀧𑀚𑁆𑀚𑀢𑀺.

𑁨𑁫𑁪. 𑀏𑀢𑁆𑀣 𑀘 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺 𑀫𑁂𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑁂𑀦. 𑀘𑁂𑀢𑀲𑀸𑀢𑀺 𑀘𑀺𑀢𑁆𑀢𑁂𑀦. 𑀏𑀓𑀁 𑀤𑀺𑀲𑀦𑁆𑀢𑀺 𑀏𑀓𑀫𑁂𑀓𑀺𑀲𑁆𑀲𑀸 𑀤𑀺𑀲𑀸𑀬 𑀧𑀞𑀫𑀧𑀭𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀁 𑀉𑀧𑀸𑀤𑀸𑀬 𑀏𑀓𑀤𑀺𑀲𑀸𑀧𑀭𑀺𑀬𑀸𑀧𑀦𑁆𑀦𑀲𑀢𑁆𑀢𑀨𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀨𑀭𑀺𑀢𑁆𑀯𑀸𑀢𑀺 𑀨𑀼𑀲𑀺𑀢𑁆𑀯𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀯𑀺𑀳𑀭𑀢𑀻𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀥𑀺𑀝𑁆𑀞𑀺𑀢𑀁 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀁 𑀧𑀯𑀢𑁆𑀢𑁂𑀢𑀺. 𑀢𑀣𑀸 𑀤𑀼𑀢𑀺𑀬𑀦𑁆𑀢𑀺 𑀬𑀣𑀸 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀤𑀺𑀲𑀸𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑁂𑀯 𑀢𑀤𑀦𑀦𑁆𑀢𑀭𑀁 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀘𑀢𑀼𑀢𑁆𑀣𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀉𑀤𑁆𑀥𑀦𑁆𑀢𑀺 𑀏𑀢𑁂𑀦𑁂𑀯 𑀦𑀬𑁂𑀦 𑀉𑀧𑀭𑀺𑀫𑀁 𑀤𑀺𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀥𑁄 𑀢𑀺𑀭𑀺𑀬𑀦𑁆𑀢𑀺 𑀅𑀥𑁄𑀤𑀺𑀲𑀫𑁆𑀧𑀺 𑀢𑀺𑀭𑀺𑀬𑀁𑀤𑀺𑀲𑀫𑁆𑀧𑀺 𑀏𑀯𑀫𑁂𑀯. 𑀢𑀢𑁆𑀣 𑀘 𑀅𑀥𑁄𑀢𑀺 𑀳𑁂𑀝𑁆𑀞𑀸. 𑀢𑀺𑀭𑀺𑀬𑀦𑁆𑀢𑀺 𑀅𑀦𑀼𑀤𑀺𑀲𑀸𑀲𑀼. 𑀏𑀯𑀁 𑀲𑀩𑁆𑀩𑀤𑀺𑀲𑀸𑀲𑀼 𑀅𑀲𑁆𑀲𑀫𑀡𑁆𑀟𑀮𑁂 𑀅𑀲𑁆𑀲𑀫𑀺𑀯 𑀫𑁂𑀢𑁆𑀢𑀸𑀲𑀳𑀕𑀢𑀁 𑀘𑀺𑀢𑁆𑀢𑀁 𑀲𑀸𑀭𑁂𑀢𑀺𑀧𑀺 𑀧𑀘𑁆𑀘𑀸𑀲𑀸𑀭𑁂𑀢𑀺𑀧𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀏𑀓𑀁 𑀤𑀺𑀲𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀑𑀥𑀺𑀲𑁄 𑀫𑁂𑀢𑁆𑀢𑀸𑀨𑀭𑀡𑀁 𑀤𑀲𑁆𑀲𑀺𑀢𑀁.

𑀲𑀩𑁆𑀩𑀥𑀻𑀢𑀺𑀆𑀤𑀺 𑀧𑀦 𑀅𑀦𑁄𑀥𑀺𑀲𑁄 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑀢𑁆𑀣. 𑀲𑀩𑁆𑀩𑀢𑁆𑀢𑀢𑀸𑀬𑀸𑀢𑀺 𑀲𑀩𑁆𑀩𑁂𑀲𑀼 𑀳𑀻𑀦𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑀫𑀺𑀢𑁆𑀢𑀲𑀧𑀢𑁆𑀢𑀫𑀚𑁆𑀛𑀢𑁆𑀢𑀸𑀤𑀺𑀧𑁆𑀧𑀪𑁂𑀤𑁂𑀲𑀼 𑀅𑀢𑁆𑀢𑀢𑀸𑀬. ‘‘𑀅𑀬𑀁 𑀧𑀭𑀲𑀢𑁆𑀢𑁄’’𑀢𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀅𑀢𑁆𑀢𑀲𑀫𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀲𑀩𑁆𑀩𑀢𑁆𑀢𑀢𑀸𑀬𑀸𑀢𑀺 𑀲𑀩𑁆𑀩𑁂𑀦 𑀘𑀺𑀢𑁆𑀢𑀪𑀸𑀕𑁂𑀦 𑀈𑀲𑀓𑀫𑁆𑀧𑀺 𑀩𑀳𑀺 𑀅𑀯𑀺𑀓𑁆𑀔𑀺𑀧𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀯𑀦𑁆𑀢𑀁, 𑀲𑀩𑁆𑀩𑀲𑀢𑁆𑀢𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀓𑀦𑁆𑀢𑀺 𑀲𑀢𑁆𑀢𑀮𑁄𑀓𑀁. 𑀯𑀺𑀧𑀼𑀮𑁂𑀦𑀸𑀢𑀺𑀏𑀯𑀫𑀸𑀤𑀺𑀧𑀭𑀺𑀬𑀸𑀬𑀤𑀲𑁆𑀲𑀦𑀢𑁄 𑀧𑀦𑁂𑀢𑁆𑀣 𑀧𑀼𑀦 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀏𑀢𑁆𑀣 𑀑𑀥𑀺𑀲𑁄 𑀨𑀭𑀡𑁂 𑀯𑀺𑀬 𑀧𑀼𑀦 𑀢𑀣𑀸𑀲𑀤𑁆𑀤𑁄 𑀇𑀢𑀺𑀲𑀤𑁆𑀤𑁄 𑀯𑀸 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀧𑀼𑀦 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸𑀢𑀺 𑀯𑀼𑀢𑁆𑀢𑀁. 𑀦𑀺𑀕𑀫𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁. 𑀯𑀺𑀧𑀼𑀮𑁂𑀦𑀸𑀢𑀺 𑀏𑀢𑁆𑀣 𑀘 𑀨𑀭𑀡𑀯𑀲𑁂𑀦 𑀯𑀺𑀧𑀼𑀮𑀢𑀸 𑀤𑀝𑁆𑀞𑀩𑁆𑀩𑀸. 𑀪𑀽𑀫𑀺𑀯𑀲𑁂𑀦 𑀧𑀦 𑀏𑀢𑀁 𑀫𑀳𑀕𑁆𑀕𑀢𑀁 𑀧𑀕𑀼𑀡𑀯𑀲𑁂𑀦 𑀘 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀘 𑀅𑀧𑁆𑀧𑀫𑀸𑀡𑀁, 𑀩𑁆𑀬𑀸𑀧𑀸𑀤𑀧𑀘𑁆𑀘𑀢𑁆𑀣𑀺𑀓𑀧𑁆𑀧𑀳𑀸𑀦𑁂𑀦 𑀅𑀯𑁂𑀭𑀁, 𑀤𑁄𑀫𑀦𑀲𑁆𑀲𑀧𑁆𑀧𑀳𑀸𑀦𑀢𑁄 𑀅𑀩𑁆𑀬𑀸𑀧𑀚𑁆𑀚𑀁, 𑀦𑀺𑀤𑁆𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀬 𑀯𑀺𑀓𑀼𑀩𑁆𑀩𑀦𑀸𑀬 𑀅𑀢𑁆𑀣𑁄.

𑁨𑁫𑁫. 𑀬𑀣𑀸 𑀘𑀸𑀬𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀘𑀺𑀢𑁆𑀢𑀲𑁆𑀲𑁂𑀯 𑀯𑀺𑀓𑀼𑀩𑁆𑀩𑀦𑀸 𑀲𑀫𑁆𑀧𑀚𑁆𑀚𑀢𑀺, 𑀢𑀣𑀸 𑀬𑀫𑁆𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁨.𑁨𑁨) ‘‘𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑁄𑀥𑀺𑀲𑁄𑀨𑀭𑀡𑀸 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀑𑀥𑀺𑀲𑁄𑀨𑀭𑀡𑀸 𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀤𑀲𑀳𑀸𑀓𑀸𑀭𑁂𑀳𑀺 𑀤𑀺𑀲𑀸𑀨𑀭𑀡𑀸 𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀘𑀺𑀢𑁆𑀢𑀲𑁆𑀲𑁂𑀯 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀘 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸 𑀅𑀦𑀻𑀖𑀸 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀼, 𑀲𑀩𑁆𑀩𑁂 𑀧𑀸𑀡𑀸, 𑀲𑀩𑁆𑀩𑁂 𑀪𑀽𑀢𑀸, 𑀲𑀩𑁆𑀩𑁂 𑀧𑀼𑀕𑁆𑀕𑀮𑀸, 𑀲𑀩𑁆𑀩𑁂 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸 𑀅𑀯𑁂𑀭𑀸…𑀧𑁂… 𑀧𑀭𑀺𑀳𑀭𑀦𑁆𑀢𑀽𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑁄𑀥𑀺𑀲𑁄𑀨𑀭𑀡𑀸 𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀩𑁆𑀩𑀸 𑀇𑀢𑁆𑀣𑀺𑀬𑁄 𑀅𑀯𑁂𑀭𑀸…𑀧𑁂… 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀼, 𑀲𑀩𑁆𑀩𑁂 𑀧𑀼𑀭𑀺𑀲𑀸, 𑀲𑀩𑁆𑀩𑁂 𑀅𑀭𑀺𑀬𑀸, 𑀲𑀩𑁆𑀩𑁂 𑀅𑀦𑀭𑀺𑀬𑀸, 𑀲𑀩𑁆𑀩𑁂 𑀤𑁂𑀯𑀸, 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸, 𑀲𑀩𑁆𑀩𑁂 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀸…𑀧𑁂… 𑀧𑀭𑀺𑀳𑀭𑀦𑁆𑀢𑀽𑀢𑀺 𑀇𑀫𑁂𑀳𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀑𑀥𑀺𑀲𑁄𑀨𑀭𑀡𑀸 𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀩𑁆𑀩𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀅𑀯𑁂𑀭𑀸…𑀧𑁂… 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀼. 𑀲𑀩𑁆𑀩𑁂 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬, 𑀲𑀩𑁆𑀩𑁂 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬, 𑀲𑀩𑁆𑀩𑁂 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬, 𑀲𑀩𑁆𑀩𑁂 𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀲𑀩𑁆𑀩𑁂 𑀧𑀘𑁆𑀙𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀲𑀩𑁆𑀩𑁂 𑀉𑀢𑁆𑀢𑀭𑀸𑀬 𑀅𑀦𑀼𑀤𑀺𑀲𑀸𑀬, 𑀲𑀩𑁆𑀩𑁂 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬, 𑀲𑀩𑁆𑀩𑁂 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬, 𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀅𑀯𑁂𑀭𑀸…𑀧𑁂… 𑀧𑀭𑀺𑀳𑀭𑀦𑁆𑀢𑀼. 𑀲𑀩𑁆𑀩𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀸𑀡𑀸, 𑀪𑀽𑀢𑀸, 𑀧𑀼𑀕𑁆𑀕𑀮𑀸, 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸, 𑀅𑀯𑁂𑀭𑀸…𑀧𑁂… 𑀧𑀭𑀺𑀳𑀭𑀦𑁆𑀢𑀼. 𑀲𑀩𑁆𑀩𑀸 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀇𑀢𑁆𑀣𑀺𑀬𑁄, 𑀲𑀩𑁆𑀩𑁂 𑀧𑀼𑀭𑀺𑀲𑀸, 𑀅𑀭𑀺𑀬𑀸, 𑀅𑀦𑀭𑀺𑀬𑀸, 𑀤𑁂𑀯𑀸, 𑀫𑀦𑀼𑀲𑁆𑀲𑀸, 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀸…𑀧𑁂… 𑀧𑀭𑀺𑀳𑀭𑀦𑁆𑀢𑀼. 𑀲𑀩𑁆𑀩𑀸 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬, 𑀉𑀢𑁆𑀢𑀭𑀸𑀬, 𑀤𑀓𑁆𑀔𑀺𑀡𑀸𑀬, 𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀧𑀘𑁆𑀙𑀺𑀫𑀸𑀬, 𑀉𑀢𑁆𑀢𑀭𑀸𑀬, 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬, 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬, 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀇𑀢𑁆𑀣𑀺𑀬𑁄…𑀧𑁂… 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸 𑀅𑀦𑀻𑀖𑀸 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽𑀢𑀺 𑀇𑀫𑁂𑀳𑀺 𑀤𑀲𑀳𑀸𑀓𑀸𑀭𑁂𑀳𑀺 𑀤𑀺𑀲𑀸𑀨𑀭𑀡𑀸 𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁫𑁬. 𑀢𑀢𑁆𑀣 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀫𑁂𑀢𑀁. 𑀲𑀢𑁆𑀢𑀸𑀢𑀺 𑀭𑀽𑀧𑀸𑀤𑀻𑀲𑀼 𑀔𑀦𑁆𑀥𑁂𑀲𑀼 𑀙𑀦𑁆𑀤𑀭𑀸𑀕𑁂𑀦 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸𑀢𑀺 𑀲𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋