𑁧𑁦. 𑀆𑀭𑀼𑀧𑁆𑀧𑀦𑀺𑀤𑁆𑀤𑁂𑀲𑁄

𑀧𑀞𑀫𑀸𑀭𑀼𑀧𑁆𑀧𑀯𑀡𑁆𑀡𑀦𑀸

𑁨𑁭𑁫. 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑁂𑀲𑀼 𑀧𑀦 𑀘𑀢𑀽𑀲𑀼 𑀆𑀭𑀼𑀧𑁆𑀧𑁂𑀲𑀼 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀢𑀸𑀯 𑀪𑀸𑀯𑁂𑀢𑀼𑀓𑀸𑀫𑁄 ‘‘𑀤𑀺𑀲𑁆𑀲𑀦𑁆𑀢𑁂 𑀔𑁄 𑀧𑀦 𑀭𑀽𑀧𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀸, 𑀦𑀢𑁆𑀣𑀺 𑀔𑁄 𑀧𑀦𑁂𑀢𑀁 𑀲𑀩𑁆𑀩𑀲𑁄 𑀆𑀭𑀼𑀧𑁆𑀧𑁂𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀭𑀽𑀧𑀸𑀦𑀁𑀬𑁂𑀯 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁨.𑁧𑁦𑁩) 𑀯𑀘𑀦𑀢𑁄 𑀏𑀢𑁂𑀲𑀁 𑀤𑀡𑁆𑀟𑀸𑀤𑀸𑀦𑀸𑀤𑀻𑀦𑀜𑁆𑀘𑁂𑀯 𑀘𑀓𑁆𑀔𑀼𑀲𑁄𑀢𑀭𑁄𑀕𑀸𑀤𑀻𑀦𑀜𑁆𑀘 𑀆𑀩𑀸𑀥𑀲𑀳𑀲𑁆𑀲𑀸𑀦𑀁 𑀯𑀲𑁂𑀦 𑀓𑀭𑀚𑀭𑀽𑀧𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀞𑀧𑁂𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀁 𑀦𑀯𑀲𑀼 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺.

𑀢𑀲𑁆𑀲 𑀓𑀺𑀜𑁆𑀘𑀸𑀧𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀓𑀭𑀚𑀭𑀽𑀧𑀁 𑀅𑀢𑀺𑀓𑁆𑀓𑀦𑁆𑀢𑀁 𑀳𑁄𑀢𑀺, 𑀅𑀣 𑀔𑁄 𑀓𑀲𑀺𑀡𑀭𑀽𑀧𑀫𑁆𑀧𑀺 𑀬𑀲𑁆𑀫𑀸 𑀢𑀧𑁆𑀧𑀝𑀺𑀪𑀸𑀕𑀫𑁂𑀯, 𑀢𑀲𑁆𑀫𑀸 𑀢𑀫𑁆𑀧𑀺 𑀲𑀫𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀓𑀣𑀁? 𑀬𑀣𑀸 𑀅𑀳𑀺𑀪𑀻𑀭𑀼𑀓𑁄 𑀧𑀼𑀭𑀺𑀲𑁄 𑀅𑀭𑀜𑁆𑀜𑁂 𑀲𑀧𑁆𑀧𑁂𑀦 𑀅𑀦𑀼𑀩𑀤𑁆𑀥𑁄 𑀯𑁂𑀕𑁂𑀦 𑀧𑀮𑀸𑀬𑀺𑀢𑁆𑀯𑀸 𑀧𑀮𑀸𑀢𑀝𑁆𑀞𑀸𑀦𑁂 𑀮𑁂𑀔𑀸𑀘𑀺𑀢𑁆𑀢𑀁 𑀢𑀸𑀮𑀧𑀡𑁆𑀡𑀁 𑀯𑀸 𑀯𑀮𑁆𑀮𑀺𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀨𑀮𑀺𑀢𑀸𑀬 𑀯𑀸 𑀧𑀦 𑀧𑀣𑀯𑀺𑀬𑀸 𑀨𑀮𑀺𑀢𑀦𑁆𑀢𑀭𑀁 𑀤𑀺𑀲𑁆𑀯𑀸 𑀪𑀸𑀬𑀢𑁂𑀯 𑀉𑀢𑁆𑀢𑀲𑀢𑁂𑀯, 𑀦𑁂𑀯 𑀦𑀁 𑀤𑀓𑁆𑀔𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀬𑀣𑀸 𑀘 𑀅𑀦𑀢𑁆𑀣𑀓𑀸𑀭𑀺𑀦𑀸 𑀯𑁂𑀭𑀺𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀏𑀓𑀕𑀸𑀫𑁂 𑀯𑀲𑀫𑀸𑀦𑁄 𑀧𑀼𑀭𑀺𑀲𑁄 𑀢𑁂𑀦 𑀯𑀥𑀩𑀦𑁆𑀥𑀕𑁂𑀳𑀛𑀸𑀧𑀦𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑁄 𑀅𑀜𑁆𑀜𑀁 𑀕𑀸𑀫𑀁 𑀯𑀲𑀦𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀢𑀢𑁆𑀭𑀸𑀧𑀺 𑀯𑁂𑀭𑀺𑀦𑀸 𑀲𑀫𑀸𑀦𑀭𑀽𑀧𑀲𑀤𑁆𑀤𑀲𑀫𑀼𑀤𑀸𑀘𑀸𑀭𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀪𑀸𑀬𑀢𑁂𑀯 𑀉𑀢𑁆𑀢𑀲𑀢𑁂𑀯, 𑀦𑁂𑀯 𑀦𑀁 𑀤𑀓𑁆𑀔𑀺𑀢𑀼𑀓𑀸𑀫𑁄 𑀳𑁄𑀢𑀺.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀢𑁂𑀲𑀁 𑀳𑀺 𑀧𑀼𑀭𑀺𑀲𑀸𑀦𑀁 𑀅𑀳𑀺𑀦𑀸 𑀯𑁂𑀭𑀺𑀦𑀸 𑀯𑀸 𑀉𑀧𑀤𑁆𑀤𑀼𑀢𑀓𑀸𑀮𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀆𑀭𑀫𑁆𑀫𑀡𑀯𑀲𑁂𑀦 𑀓𑀭𑀚𑀭𑀽𑀧𑀲𑀫𑀗𑁆𑀕𑀺𑀓𑀸𑀮𑁄. 𑀢𑁂𑀲𑀁 𑀯𑁂𑀕𑁂𑀦 𑀧𑀮𑀸𑀬𑀦𑀅𑀜𑁆𑀜𑀕𑀸𑀫𑀕𑀫𑀦𑀸𑀦𑀺 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀓𑀭𑀚𑀭𑀽𑀧𑀲𑀫𑀢𑀺𑀓𑁆𑀓𑀫𑀦𑀓𑀸𑀮𑁄. 𑀢𑁂𑀲𑀁 𑀧𑀮𑀸𑀢𑀝𑁆𑀞𑀸𑀦𑁂 𑀘 𑀅𑀜𑁆𑀜𑀕𑀸𑀫𑁂 𑀘 𑀮𑁂𑀔𑀸𑀘𑀺𑀢𑁆𑀢𑀢𑀸𑀮𑀧𑀡𑁆𑀡𑀸𑀤𑀻𑀦𑀺 𑀘𑁂𑀯 𑀯𑁂𑀭𑀺𑀲𑀤𑀺𑀲𑀁 𑀧𑀼𑀭𑀺𑀲𑀜𑁆𑀘 𑀤𑀺𑀲𑁆𑀯𑀸 𑀪𑀬𑀲𑀦𑁆𑀢𑀸𑀲𑀅𑀤𑀲𑁆𑀲𑀦𑀓𑀸𑀫𑀢𑀸 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀓𑀲𑀺𑀡𑀭𑀽𑀧𑀫𑁆𑀧𑀺 𑀢𑀧𑁆𑀧𑀝𑀺𑀪𑀸𑀕𑀫𑁂𑀯 𑀇𑀤𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀫𑁆𑀧𑀺 𑀲𑀫𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑀢𑀸. 𑀲𑀽𑀓𑀭𑀸𑀪𑀺𑀳𑀢𑀲𑀼𑀦𑀔𑀧𑀺𑀲𑀸𑀘𑀪𑀻𑀭𑀼𑀓𑀸𑀤𑀺𑀓𑀸𑀧𑀺 𑀘𑁂𑀢𑁆𑀣 𑀉𑀧𑀫𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁭𑁬. 𑀏𑀯𑀁 𑀲𑁄 𑀢𑀲𑁆𑀫𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀸 𑀓𑀲𑀺𑀡𑀭𑀽𑀧𑀸 𑀦𑀺𑀩𑁆𑀩𑀺𑀚𑁆𑀚 𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 𑀧𑀕𑀼𑀡𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀢𑀲𑁆𑀫𑀺𑀁 𑀛𑀸𑀦𑁂 ‘‘𑀇𑀫𑀁 𑀫𑀬𑀸 𑀦𑀺𑀩𑁆𑀩𑀺𑀡𑁆𑀡𑀁 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻’’𑀢𑀺 𑀘, ‘‘𑀆𑀲𑀦𑁆𑀦𑀲𑁄𑀫𑀦𑀲𑁆𑀲𑀧𑀘𑁆𑀘𑀢𑁆𑀣𑀺𑀓’’𑀦𑁆𑀢𑀺 𑀘, ‘‘𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑁄 𑀑𑀴𑀸𑀭𑀺𑀓’’𑀦𑁆𑀢𑀺 𑀘 𑀆𑀤𑀻𑀦𑀯𑀁 𑀧𑀲𑁆𑀲𑀢𑀺. 𑀅𑀗𑁆𑀕𑁄𑀴𑀸𑀭𑀺𑀓𑀢𑀸 𑀧𑀦𑁂𑀢𑁆𑀣 𑀦𑀢𑁆𑀣𑀺. 𑀬𑀣𑁂𑀯 𑀳𑁂𑀢𑀁 𑀭𑀽𑀧𑀁 𑀤𑀼𑀯𑀗𑁆𑀕𑀺𑀓𑀁, 𑀏𑀯𑀁 𑀆𑀭𑀼𑀧𑁆𑀧𑀸𑀦𑀺𑀧𑀻𑀢𑀺.

𑀲𑁄 𑀢𑀢𑁆𑀣 𑀏𑀯𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀦𑁆𑀢𑀢𑁄 𑀅𑀦𑀦𑁆𑀢𑀢𑁄 𑀫𑀦𑀲𑀺𑀓𑀭𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀯𑀸 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺 𑀢𑀢𑁆𑀢𑀓𑀁 𑀯𑀸 𑀓𑀲𑀺𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 ‘‘𑀆𑀓𑀸𑀲𑁄 𑀆𑀓𑀸𑀲𑁄’’𑀢𑀺 𑀯𑀸, ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 𑀯𑀸 𑀫𑀦𑀲𑀺𑀓𑀭𑁄𑀦𑁆𑀢𑁄 𑀉𑀕𑁆𑀖𑀸𑀝𑁂𑀢𑀺 𑀓𑀲𑀺𑀡𑀁. 𑀉𑀕𑁆𑀖𑀸𑀝𑁂𑀦𑁆𑀢𑁄 𑀳𑀺 𑀦𑁂𑀯 𑀓𑀺𑀮𑀜𑁆𑀚𑀁 𑀯𑀺𑀬 𑀲𑀁𑀯𑁂𑀮𑁆𑀮𑁂𑀢𑀺, 𑀦 𑀓𑀧𑀸𑀮𑀢𑁄 𑀧𑀽𑀯𑀁 𑀯𑀺𑀬 𑀉𑀤𑁆𑀥𑀭𑀢𑀺, 𑀓𑁂𑀯𑀮𑀁 𑀧𑀦 𑀢𑀁 𑀦𑁂𑀯 𑀆𑀯𑀚𑁆𑀚𑁂𑀢𑀺, 𑀦 𑀫𑀦𑀲𑀺 𑀓𑀭𑁄𑀢𑀺, 𑀦 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀦𑀸𑀯𑀚𑁆𑀚𑁂𑀦𑁆𑀢𑁄 𑀅𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀘 𑀅𑀜𑁆𑀜𑀤𑀢𑁆𑀣𑀼 𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 ‘‘𑀆𑀓𑀸𑀲𑁄 𑀆𑀓𑀸𑀲𑁄’’𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑀺 𑀦𑀸𑀫. 𑀓𑀲𑀺𑀡𑀫𑁆𑀧𑀺 𑀉𑀕𑁆𑀖𑀸𑀝𑀺𑀬𑀫𑀸𑀦𑀁 𑀦𑁂𑀯 𑀉𑀩𑁆𑀩𑀝𑁆𑀝𑀢𑀺 𑀦 𑀯𑀺𑀯𑀝𑁆𑀝𑀢𑀺, 𑀓𑁂𑀯𑀮𑀁 𑀇𑀫𑀲𑁆𑀲 𑀅𑀫𑀦𑀲𑀺𑀓𑀸𑀭𑀜𑁆𑀘 ‘‘𑀆𑀓𑀸𑀲𑁄 𑀆𑀓𑀸𑀲𑁄’’𑀢𑀺 𑀫𑀦𑀲𑀺𑀓𑀸𑀭𑀜𑁆𑀘 𑀧𑀝𑀺𑀘𑁆𑀘 𑀉𑀕𑁆𑀖𑀸𑀝𑀺𑀢𑀁 𑀦𑀸𑀫 𑀳𑁄𑀢𑀺, 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀫𑀢𑁆𑀢𑀁 𑀧𑀜𑁆𑀜𑀸𑀬𑀢𑀺. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀦𑁆𑀢𑀺 𑀯𑀸 𑀓𑀲𑀺𑀡𑀨𑀼𑀝𑁆𑀞𑁄𑀓𑀸𑀲𑁄𑀢𑀺 𑀯𑀸 𑀓𑀲𑀺𑀡𑀯𑀺𑀯𑀺𑀢𑁆𑀢𑀸𑀓𑀸𑀲𑀦𑁆𑀢𑀺 𑀯𑀸 𑀲𑀩𑁆𑀩𑀫𑁂𑀢𑀁 𑀏𑀓𑀫𑁂𑀯.

𑀲𑁄 𑀢𑀁 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀦𑀺𑀫𑀺𑀢𑁆𑀢𑀁 ‘‘𑀆𑀓𑀸𑀲𑁄 𑀆𑀓𑀸𑀲𑁄’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑁂𑀢𑀺, 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀭𑁄𑀢𑀺. 𑀢𑀲𑁆𑀲𑁂𑀯𑀁 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀬𑀢𑁄 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀭𑁄𑀢𑁄 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀉𑀧𑀘𑀸𑀭𑁂𑀦 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀢𑀺, 𑀪𑀸𑀯𑁂𑀢𑀺, 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲𑁂𑀯𑀁 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀬𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀁 𑀯𑀺𑀬 𑀆𑀓𑀸𑀲𑁂 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀺. 𑀇𑀥𑀸𑀧𑀺 𑀳𑀺 𑀧𑀼𑀭𑀺𑀫𑀪𑀸𑀕𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀚𑀯𑀦𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸 𑀅𑀭𑀽𑀧𑀸𑀯𑀘𑀭𑀁. 𑀲𑁂𑀲𑀁 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀏𑀯𑀁 𑀉𑀧𑁆𑀧𑀦𑁆𑀦𑁂 𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂 𑀲𑁄 𑀪𑀺𑀓𑁆𑀔𑀼 𑀬𑀣𑀸 𑀦𑀸𑀫 𑀬𑀸𑀦𑀧𑁆𑀧𑀼𑀢𑁄𑀴𑀺 𑀓𑀼𑀫𑁆𑀪𑀺𑀫𑀼𑀔𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀦𑀻𑀮𑀧𑀺𑀮𑁄𑀢𑀺𑀓𑀸𑀬 𑀯𑀸 𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀸𑀬 𑀧𑀺𑀮𑁄𑀢𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀧𑁂𑀓𑁆𑀔𑀫𑀸𑀦𑁄 𑀧𑀼𑀭𑀺𑀲𑁄 𑀯𑀸𑀢𑀯𑁂𑀕𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀅𑀧𑀦𑀻𑀢𑀸𑀬 𑀧𑀺𑀮𑁄𑀢𑀺𑀓𑀸𑀬 𑀆𑀓𑀸𑀲𑀁𑀬𑁂𑀯 𑀧𑁂𑀓𑁆𑀔𑀫𑀸𑀦𑁄 𑀢𑀺𑀝𑁆𑀞𑁂𑀬𑁆𑀬, 𑀏𑀯𑀫𑁂𑀯 𑀧𑀼𑀩𑁆𑀩𑁂 𑀓𑀲𑀺𑀡𑀫𑀡𑁆𑀟𑀮𑀁 𑀛𑀸𑀦𑀘𑀓𑁆𑀔𑀼𑀦𑀸 𑀧𑁂𑀓𑁆𑀔𑀫𑀸𑀦𑁄 𑀯𑀺𑀳𑀭𑀺𑀢𑁆𑀯𑀸 ‘‘𑀆𑀓𑀸𑀲𑁄 𑀆𑀓𑀸𑀲𑁄’’𑀢𑀺 𑀇𑀫𑀺𑀦𑀸 𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑁂𑀦 𑀲𑀳𑀲𑀸 𑀅𑀧𑀦𑀻𑀢𑁂 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀆𑀓𑀸𑀲𑀜𑁆𑀜𑁂𑀯 𑀧𑁂𑀓𑁆𑀔𑀫𑀸𑀦𑁄 𑀯𑀺𑀳𑀭𑀢𑀺. 𑀏𑀢𑁆𑀢𑀸𑀯𑀢𑀸 𑀘𑁂𑀲 ‘‘𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺 (𑀯𑀺𑀪. 𑁫𑁦𑁮; 𑀤𑀻. 𑀦𑀺. 𑁨.𑁧𑁨𑁯).

𑁨𑁭𑁭. 𑀢𑀢𑁆𑀣 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦, 𑀲𑀩𑁆𑀩𑀸𑀲𑀁 𑀯𑀸 𑀅𑀦𑀯𑀲𑁂𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀜𑁆𑀘𑁂𑀯 𑀢𑀤𑀸𑀭𑀫𑁆𑀫𑀡𑀸𑀦𑀜𑁆𑀘. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑁆𑀧𑀺 𑀳𑀺 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁨𑁯), 𑀢𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁭𑁩), 𑀢𑀲𑁆𑀫𑀸 𑀇𑀥 𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸𑀢𑀺 𑀏𑀯𑀁 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀭𑀽𑀧𑀁 𑀲𑀜𑁆𑀜𑀸 𑀅𑀲𑁆𑀲𑀸𑀢𑀺 𑀭𑀽𑀧𑀲𑀜𑁆𑀜𑀁. 𑀭𑀽𑀧𑀁 𑀅𑀲𑁆𑀲 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀣𑀯𑀻𑀓𑀲𑀺𑀡𑀸𑀤𑀺𑀪𑁂𑀤𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀢𑀺𑀓𑁆𑀓𑀫𑀸𑀢𑀺 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀘. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀏𑀢𑀸𑀲𑀁 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀧𑀜𑁆𑀘𑀤𑀲𑀦𑁆𑀦𑀁 𑀛𑀸𑀦𑀲𑀗𑁆𑀔𑀸𑀢𑀸𑀦𑀁 𑀭𑀽𑀧𑀲𑀜𑁆𑀜𑀸𑀦𑀁, 𑀏𑀢𑁂𑀲𑀜𑁆𑀘 𑀧𑀣𑀯𑀻𑀓𑀲𑀺𑀡𑀸𑀤𑀺𑀯𑀲𑁂𑀦 𑀦𑀯𑀦𑁆𑀦𑀁 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑀸𑀦𑀁 𑀭𑀽𑀧𑀲𑀜𑁆𑀜𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀅𑀦𑀯𑀲𑁂𑀲𑀸𑀦𑀁 𑀯𑀸 𑀯𑀺𑀭𑀸𑀕𑀸 𑀘 𑀦𑀺𑀭𑁄𑀥𑀸 𑀘 𑀯𑀺𑀭𑀸𑀕𑀳𑁂𑀢𑀼𑀜𑁆𑀘𑁂𑀯 𑀦𑀺𑀭𑁄𑀥𑀳𑁂𑀢𑀼𑀜𑁆𑀘 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀦 𑀳𑀺 𑀲𑀓𑁆𑀓𑀸 𑀲𑀩𑁆𑀩𑀲𑁄 𑀅𑀦𑀢𑀺𑀓𑁆𑀓𑀦𑁆𑀢𑀭𑀽𑀧𑀲𑀜𑁆𑀜𑁂𑀦 𑀏𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀦𑁆𑀢𑀺.

𑀢𑀢𑁆𑀣 𑀬𑀲𑁆𑀫𑀸 𑀆𑀭𑀫𑁆𑀫𑀡𑁂 𑀅𑀯𑀺𑀭𑀢𑁆𑀢𑀲𑁆𑀲 𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑁄 𑀦 𑀳𑁄𑀢𑀺, 𑀲𑀫𑀢𑀺𑀓𑁆𑀓𑀦𑁆𑀢𑀸𑀲𑀼 𑀘 𑀲𑀜𑁆𑀜𑀸𑀲𑀼 𑀆𑀭𑀫𑁆𑀫𑀡𑀁 𑀲𑀫𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀁 𑀅𑀯𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑀸 𑀭𑀽𑀧𑀲𑀜𑁆𑀜𑀸? 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲 𑀯𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁, 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀭𑀽𑀧𑀲𑀜𑁆𑀜𑀸𑀬𑁄. 𑀇𑀫𑀸 𑀭𑀽𑀧𑀲𑀜𑁆𑀜𑀸𑀬𑁄 𑀅𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺 𑀯𑀻𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄. 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸’’𑀢𑀺 (𑀯𑀺𑀪. 𑁬𑁦𑁨) 𑀏𑀯𑀁 𑀯𑀺𑀪𑀗𑁆𑀕𑁂 𑀲𑀜𑁆𑀜𑀸𑀦𑀁𑀬𑁂𑀯 𑀲𑀫𑀢𑀺𑀓𑁆𑀓𑀫𑁄 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀸 𑀏𑀢𑀸 𑀲𑀫𑀸𑀧𑀢𑁆𑀢𑀺𑀬𑁄, 𑀦 𑀏𑀓𑀲𑁆𑀫𑀺𑀜𑁆𑀜𑁂𑀯 𑀆𑀭𑀫𑁆𑀫𑀡𑁂 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀯𑀺𑀬. 𑀢𑀲𑁆𑀫𑀸 𑀅𑀬𑀁 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀯𑀲𑁂𑀦𑀸𑀧𑀺 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁭𑁮. 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀢𑀺 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀧𑀝𑀺𑀖𑀸𑀢𑁂𑀦 𑀲𑀫𑀼𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸. 𑀭𑀽𑀧𑀲𑀜𑁆𑀜𑀸𑀤𑀻𑀦𑀁 𑀏𑀢𑀫𑀥𑀺𑀯𑀘𑀦𑀁. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀸 𑀧𑀝𑀺𑀖𑀲𑀜𑁆𑀜𑀸? 𑀭𑀽𑀧𑀲𑀜𑁆𑀜𑀸 𑀲𑀤𑁆𑀤𑀲𑀜𑁆𑀜𑀸 𑀕𑀦𑁆𑀥𑀲𑀜𑁆𑀜𑀸 𑀭𑀲𑀲𑀜𑁆𑀜𑀸 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸, 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀖𑀲𑀜𑁆𑀜𑀸𑀬𑁄’’𑀢𑀺 (𑀯𑀺𑀪. 𑁬𑁦𑁩). 𑀢𑀸𑀲𑀁 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀜𑁆𑀘𑀦𑁆𑀦𑀦𑁆𑀢𑀺 𑀲𑀩𑁆𑀩𑀲𑁄 𑀤𑀲𑀦𑁆𑀦𑀫𑁆𑀧𑀺 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀧𑀳𑀸𑀦𑀸 𑀅𑀲𑀫𑀼𑀧𑁆𑀧𑀸𑀤𑀸 𑀅𑀧𑁆𑀧𑀯𑀢𑁆𑀢𑀺𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀸𑀫𑀜𑁆𑀘𑁂𑀢𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀲𑀫𑀸𑀧𑀦𑁆𑀦𑀲𑁆𑀲𑀸𑀧𑀺 𑀦 𑀲𑀦𑁆𑀢𑀺. 𑀦 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀘𑀤𑁆𑀯𑀸𑀭𑀯𑀲𑁂𑀦 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀜𑁆𑀜𑀢𑁆𑀣 𑀧𑀳𑀻𑀦𑀸𑀦𑀁 𑀲𑀼𑀔𑀤𑀼𑀓𑁆𑀔𑀸𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀯𑀺𑀬, 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 𑀢𑀢𑀺𑀬𑀫𑀕𑁆𑀕𑁂 𑀯𑀺𑀬 𑀘 𑀇𑀫𑀲𑁆𑀫𑀺𑀁 𑀛𑀸𑀦𑁂 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀇𑀫𑀲𑁆𑀲 𑀛𑀸𑀦𑀲𑁆𑀲 𑀧𑀲𑀁𑀲𑀸𑀯𑀲𑁂𑀦 𑀏𑀢𑀸𑀲𑀫𑁂𑀢𑁆𑀣 𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀣 𑀯𑀸 𑀓𑀺𑀜𑁆𑀘𑀸𑀧𑀺 𑀢𑀸 𑀭𑀽𑀧𑀸𑀯𑀘𑀭𑀁 𑀲𑀫𑀸𑀧𑀦𑁆𑀦𑀲𑁆𑀲𑀸𑀧𑀺 𑀦 𑀲𑀦𑁆𑀢𑀺, 𑀅𑀣 𑀔𑁄 𑀦 𑀧𑀳𑀻𑀦𑀢𑁆𑀢𑀸 𑀦 𑀲𑀦𑁆𑀢𑀺. 𑀦 𑀳𑀺 𑀭𑀽𑀧𑀯𑀺𑀭𑀸𑀕𑀸𑀬 𑀭𑀽𑀧𑀸𑀯𑀘𑀭𑀪𑀸𑀯𑀦𑀸 𑀲𑀁𑀯𑀢𑁆𑀢𑀢𑀺, 𑀭𑀽𑀧𑀸𑀬𑀢𑁆𑀢𑀸 𑀘 𑀏𑀢𑀸𑀲𑀁 𑀧𑀯𑀢𑁆𑀢𑀺. 𑀅𑀬𑀁 𑀧𑀦 𑀪𑀸𑀯𑀦𑀸 𑀭𑀽𑀧𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀢𑀸 𑀏𑀢𑁆𑀣 𑀧𑀳𑀻𑀦𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀦 𑀓𑁂𑀯𑀮𑀜𑁆𑀘 𑀯𑀢𑁆𑀢𑀼𑀁, 𑀏𑀓𑀁𑀲𑁂𑀦𑁂𑀯 𑀏𑀯𑀁 𑀥𑀸𑀭𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀸𑀲𑀜𑁆𑀳𑀺 𑀇𑀢𑁄 𑀧𑀼𑀩𑁆𑀩𑁂 𑀅𑀧𑁆𑀧𑀳𑀻𑀦𑀢𑁆𑀢𑀸𑀬𑁂𑀯 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀤𑁆𑀤𑁄 ‘‘𑀓𑀡𑁆𑀝𑀓𑁄’’𑀢𑀺 (𑀅. 𑀦𑀺. 𑁧𑁦.𑁭𑁨) 𑀯𑀼𑀢𑁆𑀢𑁄 𑀪𑀕𑀯𑀢𑀸. 𑀇𑀥 𑀘 𑀧𑀳𑀻𑀦𑀢𑁆𑀢𑀸𑀬𑁂𑀯 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑁂𑀜𑁆𑀚𑀢𑀸 (𑀯𑀺𑀪. 𑁨𑁨𑁬) 𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑀸 (𑀫. 𑀦𑀺. 𑁧.𑁬𑁬) 𑀘 𑀯𑀼𑀢𑁆𑀢𑀸. 𑀆𑀴𑀸𑀭𑁄 𑀘 𑀓𑀸𑀮𑀸𑀫𑁄 𑀅𑀭𑀽𑀧𑀲𑀫𑀸𑀧𑀦𑁆𑀦𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀸𑀬 𑀅𑀢𑀺𑀓𑁆𑀓𑀫𑀦𑁆𑀢𑀸𑀦𑀺 𑀦𑁂𑀯 𑀅𑀤𑁆𑀤𑀲, 𑀦 𑀧𑀦 𑀲𑀤𑁆𑀤𑀁 𑀅𑀲𑁆𑀲𑁄𑀲𑀻𑀢𑀺 (𑀤𑀻. 𑀦𑀺. 𑁨.𑁧𑁯𑁨).

𑁨𑁭𑁯. 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸𑀢𑀺 𑀦𑀸𑀦𑀢𑁆𑀢𑁂 𑀯𑀸 𑀕𑁄𑀘𑀭𑁂 𑀧𑀯𑀢𑁆𑀢𑀸𑀦𑀁 𑀲𑀜𑁆𑀜𑀸𑀦𑀁, 𑀦𑀸𑀦𑀢𑁆𑀢𑀸𑀦𑀁 𑀯𑀸 𑀲𑀜𑁆𑀜𑀸𑀦𑀁. 𑀬𑀲𑁆𑀫𑀸 𑀳𑀺 𑀏𑀢𑀸 ‘‘𑀢𑀢𑁆𑀣 𑀓𑀢𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸? 𑀅𑀲𑀫𑀸𑀧𑀦𑁆𑀦𑀲𑁆𑀲 𑀫𑀦𑁄𑀥𑀸𑀢𑀼𑀲𑀫𑀗𑁆𑀕𑀺𑀲𑁆𑀲 𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑀗𑁆𑀕𑀺𑀲𑁆𑀲 𑀯𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁, 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀸𑀬𑁄’’𑀢𑀺 𑀏𑀯𑀁 𑀯𑀺𑀪𑀗𑁆𑀕𑁂 (𑀯𑀺𑀪. 𑁬𑁦𑁪) 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸 𑀅𑀲𑀫𑀸𑀧𑀦𑁆𑀦𑀲𑁆𑀲 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀕𑀳𑀺𑀢𑀸 𑀲𑀜𑁆𑀜𑀸 𑀭𑀽𑀧𑀲𑀤𑁆𑀤𑀸𑀤𑀺𑀪𑁂𑀤𑁂 𑀦𑀸𑀦𑀢𑁆𑀢𑁂 𑀦𑀸𑀦𑀸𑀲𑀪𑀸𑀯𑁂 𑀕𑁄𑀘𑀭𑁂 𑀧𑀯𑀢𑁆𑀢𑀦𑁆𑀢𑀺, 𑀬𑀲𑁆𑀫𑀸 𑀘𑁂𑀢𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀜𑁆𑀜𑀸, 𑀤𑁆𑀯𑀸𑀤𑀲𑀸𑀓𑀼𑀲𑀮𑀲𑀜𑁆𑀜𑀸, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸, 𑀤𑁆𑀯𑁂 𑀅𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑀜𑁆𑀜𑀸𑀢𑀺 𑀏𑀯𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀲𑀜𑁆𑀜𑀸 𑀦𑀸𑀦𑀢𑁆𑀢𑀸 𑀦𑀸𑀦𑀸𑀲𑀪𑀸𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀸, 𑀢𑀲𑁆𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀢𑀺 𑀯𑀼𑀢𑁆𑀢𑀸. 𑀢𑀸𑀲𑀁 𑀲𑀩𑁆𑀩𑀲𑁄 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀸𑀯𑀚𑁆𑀚𑀦𑀸 𑀅𑀲𑀫𑀦𑁆𑀦𑀸𑀳𑀸𑀭𑀸 𑀅𑀧𑀘𑁆𑀘𑀯𑁂𑀓𑁆𑀔𑀡𑀸. 𑀬𑀲𑁆𑀫𑀸 𑀢𑀸 𑀦𑀸𑀯𑀚𑁆𑀚𑁂𑀢𑀺, 𑀦 𑀫𑀦𑀲𑀺 𑀓𑀭𑁄𑀢𑀺, 𑀦 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀲𑁆𑀫𑀸 𑀘𑁂𑀢𑁆𑀣 𑀧𑀼𑀭𑀺𑀫𑀸 𑀭𑀽𑀧𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸 𑀘 𑀇𑀫𑀺𑀦𑀸 𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑁂 𑀪𑀯𑁂𑀧𑀺 𑀦 𑀯𑀺𑀚𑁆𑀚𑀦𑁆𑀢𑀺. 𑀧𑀕𑁂𑀯 𑀢𑀲𑁆𑀫𑀺𑀁 𑀪𑀯𑁂 𑀇𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀡𑀓𑀸𑀮𑁂, 𑀢𑀲𑁆𑀫𑀸 𑀢𑀸𑀲𑀁 𑀲𑀫𑀢𑀺𑀓𑁆𑀓𑀫𑀸 𑀅𑀢𑁆𑀣𑀗𑁆𑀕𑀫𑀸𑀢𑀺 𑀤𑁆𑀯𑁂𑀥𑀸𑀧𑀺 𑀅𑀪𑀸𑀯𑁄𑀬𑁂𑀯 𑀯𑀼𑀢𑁆𑀢𑁄. 𑀦𑀸𑀦𑀢𑁆𑀢𑀲𑀜𑁆𑀜𑀸𑀲𑀼 𑀧𑀦 𑀬𑀲𑁆𑀫𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀜𑁆𑀜𑀸, 𑀦𑀯 𑀓𑀺𑀭𑀺𑀬𑀲𑀜𑁆𑀜𑀸, 𑀤𑀲𑀸𑀓𑀼𑀲𑀮𑀲𑀜𑁆𑀜𑀸𑀢𑀺 𑀇𑀫𑀸 𑀲𑀢𑁆𑀢𑀯𑀻𑀲𑀢𑀺𑀲𑀜𑁆𑀜𑀸 𑀇𑀫𑀺𑀦𑀸 𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑁂 𑀪𑀯𑁂 𑀯𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀲𑀁 𑀅𑀫𑀦𑀲𑀺𑀓𑀸𑀭𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀧𑀺 𑀳𑀺 𑀇𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑁄 𑀢𑀸𑀲𑀁 𑀅𑀫𑀦𑀲𑀺𑀓𑀸𑀭𑀸𑀬𑁂𑀯 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀸 𑀧𑀦 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀲𑀫𑀸𑀧𑀦𑁆𑀦𑁄 𑀳𑁄𑀢𑀻𑀢𑀺.

𑀲𑀗𑁆𑀔𑁂𑀧𑀢𑁄 𑀘𑁂𑀢𑁆𑀣 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀢𑀺 𑀇𑀫𑀺𑀦𑀸 𑀲𑀩𑁆𑀩𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸𑀢𑀺 𑀇𑀫𑀺𑀦𑀸 𑀲𑀩𑁆𑀩𑁂𑀲𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀳𑀸𑀦𑀜𑁆𑀘 𑀅𑀫𑀦𑀲𑀺𑀓𑀸𑀭𑁄 𑀘 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁮𑁦. 𑀅𑀦𑀦𑁆𑀢𑁄 𑀆𑀓𑀸𑀲𑁄𑀢𑀺 𑀏𑀢𑁆𑀣 𑀦𑀸𑀲𑁆𑀲 𑀉𑀧𑁆𑀧𑀸𑀤𑀦𑁆𑀢𑁄 𑀯𑀸 𑀯𑀬𑀦𑁆𑀢𑁄 𑀯𑀸 𑀧𑀜𑁆𑀜𑀸𑀬𑀢𑀻𑀢𑀺 𑀅𑀦𑀦𑁆𑀢𑁄. 𑀆𑀓𑀸𑀲𑁄𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁄 𑀯𑀼𑀘𑁆𑀘𑀢𑀺. 𑀫𑀦𑀲𑀺𑀓𑀸𑀭𑀯𑀲𑁂𑀦𑀸𑀧𑀺 𑀘𑁂𑀢𑁆𑀣 𑀅𑀦𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁 𑀆𑀓𑀸𑀲𑁂 𑀘𑀺𑀢𑁆𑀢𑀁 𑀞𑀧𑁂𑀢𑀺, 𑀲𑀡𑁆𑀞𑀧𑁂𑀢𑀺, 𑀅𑀦𑀦𑁆𑀢𑀁 𑀨𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 (𑀯𑀺𑀪. 𑁬𑁦𑁫).

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀧𑀦 𑀦𑀸𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀁, 𑀆𑀓𑀸𑀲𑀁 𑀅𑀦𑀦𑁆𑀢𑀁 𑀆𑀓𑀸𑀲𑀸𑀦𑀦𑁆𑀢𑀁, 𑀆𑀓𑀸𑀲𑀸𑀦𑀦𑁆𑀢𑀫𑁂𑀯 𑀆𑀓𑀸𑀲𑀸𑀦𑀜𑁆𑀘𑀁, 𑀢𑀁 𑀆𑀓𑀸𑀲𑀸𑀦𑀜𑁆𑀘𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀫𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀫𑀺𑀯𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁.

𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀢𑀫𑀸𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀧𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀻𑀢𑀺.

𑀅𑀬𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑁂 𑀯𑀺𑀢𑁆𑀣𑀸𑀭𑀓𑀣𑀸.

𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀣𑀸

𑁨𑁮𑁧. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀧𑀦 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀁 𑀘𑀺𑀡𑁆𑀡𑀯𑀲𑀻𑀪𑀸𑀯𑁂𑀦 ‘‘𑀆𑀲𑀦𑁆𑀦𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀧𑀘𑁆𑀘𑀢𑁆𑀣𑀺𑀓𑀸 𑀅𑀬𑀁 𑀲𑀫𑀸𑀧𑀢𑁆𑀢𑀺, 𑀦𑁄 𑀘 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀫𑀺𑀯 𑀲𑀦𑁆𑀢𑀸’’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑀺𑀢𑁆𑀯𑀸 𑀢𑀁 𑀆𑀓𑀸𑀲𑀁 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁 ‘‘𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀺𑀢𑀩𑁆𑀩𑀁, 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁, 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀸𑀢𑀩𑁆𑀩𑀁. ‘‘𑀅𑀦𑀦𑁆𑀢𑀁 𑀅𑀦𑀦𑁆𑀢’’𑀦𑁆𑀢𑀺 𑀧𑀦 𑀦 𑀫𑀦𑀲𑀺𑀓𑀸𑀢𑀩𑁆𑀩𑀁.

𑀢𑀲𑁆𑀲𑁂𑀯𑀁 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑀁 𑀘𑀸𑀭𑁂𑀦𑁆𑀢𑀲𑁆𑀲 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀉𑀧𑀘𑀸𑀭𑁂𑀦 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀢𑀺, 𑀪𑀸𑀯𑁂𑀢𑀺, 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲𑁂𑀯𑀁 𑀓𑀭𑁄𑀢𑁄 𑀆𑀓𑀸𑀲𑁂 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀯𑀺𑀬 𑀆𑀓𑀸𑀲𑀨𑀼𑀝𑁂 𑀯𑀺𑀜𑁆𑀜𑀸𑀡𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀺. 𑀅𑀧𑁆𑀧𑀦𑀸𑀦𑀬𑁄 𑀧𑀦𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀘𑁂𑀲 ‘‘𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁦𑁮; 𑀤𑀻. 𑀦𑀺. 𑁨.𑁧𑁨𑁯) 𑀯𑀼𑀘𑁆𑀘𑀢𑀺.

𑁨𑁮𑁨. 𑀢𑀢𑁆𑀣 𑀲𑀩𑁆𑀩𑀲𑁄𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀏𑀢𑁆𑀣 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀛𑀸𑀦𑀫𑁆𑀧𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀆𑀭𑀫𑁆𑀫𑀡𑀫𑁆𑀧𑀺. 𑀆𑀭𑀫𑁆𑀫𑀡𑀫𑁆𑀧𑀺 𑀳𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀓𑀸𑀲𑀸𑀦𑀜𑁆𑀘𑀜𑁆𑀘 𑀢𑀁 𑀧𑀞𑀫𑀲𑁆𑀲 𑀆𑀭𑀼𑀧𑁆𑀧𑀚𑁆𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀢𑁆𑀢𑀸 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀁 𑀯𑀺𑀬 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀜𑁆𑀘𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀢𑀣𑀸 𑀆𑀓𑀸𑀲𑀸𑀦𑀜𑁆𑀘𑀜𑁆𑀘 𑀢𑀁 𑀢𑀲𑁆𑀲 𑀛𑀸𑀦𑀲𑁆𑀲 𑀲𑀜𑁆𑀚𑀸𑀢𑀺𑀳𑁂𑀢𑀼𑀢𑁆𑀢𑀸 ‘‘𑀓𑀫𑁆𑀩𑁄𑀚𑀸 𑀅𑀲𑁆𑀲𑀸𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀦𑀺 𑀯𑀺𑀬 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀆𑀬𑀢𑀦𑀜𑁆𑀘𑀸𑀢𑀺𑀧𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀏𑀯𑀫𑁂𑀢𑀁 𑀛𑀸𑀦𑀜𑁆𑀘 𑀆𑀭𑀫𑁆𑀫𑀡𑀜𑁆𑀘𑀸𑀢𑀺 𑀉𑀪𑀬𑀫𑁆𑀧𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀘 𑀅𑀫𑀦𑀲𑀺𑀓𑀭𑀡𑁂𑀦 𑀘 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀬𑀲𑁆𑀫𑀸 𑀇𑀤𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀢𑀁𑀬𑁂𑀯 𑀅𑀦𑀦𑁆𑀢𑁄 𑀆𑀓𑀸𑀲𑁄𑀢𑀺 𑀏𑀯𑀁 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀯𑀁 𑀫𑀦𑀲𑀺𑀓𑀭𑁄𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀅𑀦𑀦𑁆𑀢𑀁. 𑀲𑁄 𑀳𑀺 𑀢𑀫𑀸𑀓𑀸𑀲𑀸𑀭𑀫𑁆𑀫𑀡𑀁 𑀯𑀺𑀜𑁆𑀜𑀸𑀡𑀁 𑀅𑀦𑀯𑀲𑁂𑀲𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 ‘‘𑀅𑀦𑀦𑁆𑀢’’𑀦𑁆𑀢𑀺 𑀫𑀦𑀲𑀺 𑀓𑀭𑁄𑀢𑀺. 𑀬𑀁 𑀧𑀦 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺, 𑀢𑀁𑀬𑁂𑀯 𑀆𑀓𑀸𑀲𑀁 𑀯𑀺𑀜𑁆𑀜𑀸𑀡𑁂𑀦 𑀨𑀼𑀝𑀁 𑀫𑀦𑀲𑀺 𑀓𑀭𑁄𑀢𑀺, 𑀅𑀦𑀦𑁆𑀢𑀁 𑀨𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀯𑀺𑀪. 𑁬𑁧𑁦).

𑀢𑀢𑁆𑀣 𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀢𑀲𑁆𑀲 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺, 𑀅𑀦𑀦𑁆𑀢𑀁 𑀨𑀭𑀢𑀺 𑀢𑀜𑁆𑀜𑁂𑀯 𑀆𑀓𑀸𑀲𑀁 𑀨𑀼𑀝𑀁 𑀯𑀺𑀜𑁆𑀜𑀸𑀡𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀧𑀦 𑀦𑀸𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀁. 𑀅𑀦𑀦𑁆𑀢𑀫𑁂𑀯 𑀆𑀦𑀜𑁆𑀘𑀁. 𑀯𑀺𑀜𑁆𑀜𑀸𑀡𑀁 𑀆𑀦𑀜𑁆𑀘𑀁 𑀯𑀺𑀜𑁆𑀜𑀸𑀡𑀸𑀦𑀜𑁆𑀘𑀦𑁆𑀢𑀺 𑀅𑀯𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀭𑀽𑀴𑁆𑀳𑀻𑀲𑀤𑁆𑀤𑁄. 𑀢𑀁 𑀯𑀺𑀜𑁆𑀜𑀸𑀡𑀜𑁆𑀘𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀫𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀫𑀺𑀯𑀸𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀅𑀬𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑁂 𑀯𑀺𑀢𑁆𑀣𑀸𑀭𑀓𑀣𑀸.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀣𑀸

𑁨𑁮𑁩. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀧𑀦 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀁 𑀘𑀺𑀡𑁆𑀡𑀯𑀲𑀻𑀪𑀸𑀯𑁂𑀦 ‘‘𑀆𑀲𑀦𑁆𑀦𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀧𑀘𑁆𑀘𑀢𑁆𑀣𑀺𑀓𑀸 𑀅𑀬𑀁 𑀲𑀫𑀸𑀧𑀢𑁆𑀢𑀺, 𑀦𑁄 𑀘 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑀺𑀯 𑀲𑀦𑁆𑀢𑀸’’𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑀺𑀢𑁆𑀯𑀸 𑀢𑀲𑁆𑀲𑁂𑀯 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀭𑀫𑁆𑀫𑀡𑀪𑀽𑀢𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑁄 𑀲𑀼𑀜𑁆𑀜𑀢𑀸 𑀯𑀺𑀯𑀺𑀢𑁆𑀢𑀸𑀓𑀸𑀭𑁄 𑀫𑀦𑀲𑀺𑀓𑀸𑀢𑀩𑁆𑀩𑁄. 𑀓𑀣𑀁? 𑀢𑀁 𑀯𑀺𑀜𑁆𑀜𑀸𑀡𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀯𑀸, ‘‘𑀲𑀼𑀜𑁆𑀜𑀁 𑀲𑀼𑀜𑁆𑀜’’𑀦𑁆𑀢𑀺 𑀯𑀸, ‘‘𑀯𑀺𑀯𑀺𑀢𑁆𑀢𑀁 𑀯𑀺𑀯𑀺𑀢𑁆𑀢’’𑀦𑁆𑀢𑀺 𑀯𑀸 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀺𑀢𑀩𑁆𑀩𑀁, 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁, 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀸𑀢𑀩𑁆𑀩𑀁.

𑀢𑀲𑁆𑀲𑁂𑀯𑀁 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀘𑀸𑀭𑁂𑀦𑁆𑀢𑀲𑁆𑀲 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀉𑀧𑀘𑀸𑀭𑁂𑀦 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀢𑀺, 𑀪𑀸𑀯𑁂𑀢𑀺, 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲𑁂𑀯𑀁 𑀓𑀭𑁄𑀢𑁄 𑀆𑀓𑀸𑀲𑁂 𑀨𑀼𑀝𑁂 𑀫𑀳𑀕𑁆𑀕𑀢𑀯𑀺𑀜𑁆𑀜𑀸𑀡𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀯𑀺𑀬 𑀢𑀲𑁆𑀲𑁂𑀯 𑀆𑀓𑀸𑀲𑀁 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀲𑁆𑀲 𑀫𑀳𑀕𑁆𑀕𑀢𑀯𑀺𑀜𑁆𑀜𑀸𑀡𑀲𑁆𑀲 𑀲𑀼𑀜𑁆𑀜𑀯𑀺𑀯𑀺𑀢𑁆𑀢𑀦𑀢𑁆𑀣𑀺𑀪𑀸𑀯𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀺. 𑀏𑀢𑁆𑀣𑀸𑀧𑀺 𑀘 𑀅𑀧𑁆𑀧𑀦𑀸𑀦𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀢𑀲𑁆𑀫𑀺𑀁 𑀳𑀺 𑀅𑀧𑁆𑀧𑀦𑀸𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀲𑁄 𑀪𑀺𑀓𑁆𑀔𑀼 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀫𑀡𑁆𑀟𑀮𑀫𑀸𑀴𑀸𑀤𑀻𑀲𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀺𑀲𑁆𑀯𑀸 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀲𑀦𑁆𑀦𑀺𑀧𑀸𑀢𑀓𑀺𑀘𑁆𑀘𑀸𑀯𑀲𑀸𑀦𑁂𑀯 𑀉𑀝𑁆𑀞𑀸𑀬 𑀧𑀓𑁆𑀓𑀦𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀧𑀼𑀦 𑀢𑀁 𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀲𑀼𑀜𑁆𑀜𑀫𑁂𑀯 𑀧𑀲𑁆𑀲𑀢𑀺, 𑀯𑀺𑀯𑀺𑀢𑁆𑀢𑀫𑁂𑀯 𑀧𑀲𑁆𑀲𑀢𑀺. 𑀦𑀸𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀏𑀢𑁆𑀢𑀓𑀸 𑀦𑀸𑀫 𑀪𑀺𑀓𑁆𑀔𑀽 𑀓𑀸𑀮𑀗𑁆𑀓𑀢𑀸 𑀯𑀸 𑀤𑀺𑀲𑀸𑀧𑀓𑁆𑀓𑀦𑁆𑀢𑀸 𑀯𑀸’’𑀢𑀺, 𑀅𑀣 𑀔𑁄 𑀲𑀼𑀜𑁆𑀜𑀫𑀺𑀤𑀁 𑀯𑀺𑀯𑀺𑀢𑁆𑀢𑀦𑁆𑀢𑀺 𑀦𑀢𑁆𑀣𑀺𑀪𑀸𑀯𑀫𑁂𑀯 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀧𑀼𑀩𑁆𑀩𑁂 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀚𑁆𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑁄 𑀯𑀺𑀳𑀭𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑁂𑀦 𑀅𑀦𑁆𑀢𑀭𑀳𑀺𑀢𑁂 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑁂 𑀢𑀲𑁆𑀲 𑀅𑀧𑀕𑀫𑀲𑀗𑁆𑀔𑀸𑀢𑀁 𑀅𑀪𑀸𑀯𑀫𑁂𑀯 𑀧𑀲𑁆𑀲𑀦𑁆𑀢𑁄 𑀯𑀺𑀳𑀭𑀢𑀺. 𑀏𑀢𑁆𑀢𑀸𑀯𑀢𑀸 𑀘𑁂𑀲 ‘‘𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁦𑁮; 𑀤𑀻. 𑀦𑀺. 𑁨.𑁧𑁨𑁯) 𑀯𑀼𑀘𑁆𑀘𑀢𑀺.

𑁨𑁮𑁪. 𑀇𑀥𑀸𑀧𑀺 𑀲𑀩𑁆𑀩𑀲𑁄𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀛𑀸𑀦𑀫𑁆𑀧𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀆𑀭𑀫𑁆𑀫𑀡𑀫𑁆𑀧𑀺. 𑀆𑀭𑀫𑁆𑀫𑀡𑀫𑁆𑀧𑀺 𑀳𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀜𑁆𑀜𑀸𑀡𑀜𑁆𑀘𑀜𑁆𑀘 𑀢𑀁 𑀤𑀼𑀢𑀺𑀬𑀲𑁆𑀲 𑀆𑀭𑀼𑀧𑁆𑀧𑀚𑁆𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀢𑁆𑀢𑀸 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀁 𑀯𑀺𑀬 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀜𑁆𑀘𑀸𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁. 𑀢𑀣𑀸 𑀯𑀺𑀜𑁆𑀜𑀸𑀡𑀜𑁆𑀘𑀜𑁆𑀘 𑀢𑀁 𑀢𑀲𑁆𑀲𑁂𑀯 𑀛𑀸𑀦𑀲𑁆𑀲 𑀲𑀜𑁆𑀚𑀸𑀢𑀺𑀳𑁂𑀢𑀼𑀢𑁆𑀢𑀸 ‘‘𑀓𑀫𑁆𑀩𑁄𑀚𑀸 𑀅𑀲𑁆𑀲𑀸𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀦𑀺 𑀯𑀺𑀬 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀆𑀬𑀢𑀦𑀜𑁆𑀘𑀸𑀢𑀺𑀧𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁. 𑀏𑀯𑀫𑁂𑀢𑀁 𑀛𑀸𑀦𑀜𑁆𑀘 𑀆𑀭𑀫𑁆𑀫𑀡𑀜𑁆𑀘𑀸𑀢𑀺 𑀉𑀪𑀬𑀫𑁆𑀧𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀘 𑀅𑀫𑀦𑀲𑀺𑀓𑀭𑀡𑁂𑀦 𑀘 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀬𑀲𑁆𑀫𑀸 𑀇𑀤𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀦𑀢𑁆𑀣𑀺 𑀦𑀢𑁆𑀣𑀺, 𑀲𑀼𑀜𑁆𑀜𑀁 𑀲𑀼𑀜𑁆𑀜𑀁, 𑀯𑀺𑀯𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀦𑁆𑀢𑀺 𑀏𑀯𑀁 𑀫𑀦𑀲𑀺𑀓𑀭𑁄𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀫𑁆𑀧𑀺 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀁 𑀅𑀪𑀸𑀯𑁂𑀢𑀺 𑀯𑀺𑀪𑀸𑀯𑁂𑀢𑀺 𑀅𑀦𑁆𑀢𑀭𑀥𑀸𑀧𑁂𑀢𑀺 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀧𑀲𑁆𑀲𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺, 𑀢𑀁 𑀓𑀺𑀜𑁆𑀘𑀸𑀧𑀺 𑀔𑀬𑀢𑁄 𑀲𑀫𑁆𑀫𑀲𑀦𑀁 𑀯𑀺𑀬 𑀯𑀼𑀢𑁆𑀢𑀁, 𑀅𑀣 𑀔𑁆𑀯𑀲𑁆𑀲 𑀏𑀯𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀜𑁆𑀳𑀺 𑀯𑀺𑀜𑁆𑀜𑀸𑀡𑀁 𑀅𑀦𑀸𑀯𑀚𑁆𑀚𑁂𑀦𑁆𑀢𑁄 𑀅𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀓𑁂𑀯𑀮𑀫𑀲𑁆𑀲 𑀦𑀢𑁆𑀣𑀺𑀪𑀸𑀯𑀁 𑀲𑀼𑀜𑁆𑀜𑀪𑀸𑀯𑀁 𑀯𑀺𑀯𑀺𑀢𑁆𑀢𑀪𑀸𑀯𑀫𑁂𑀯 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀪𑀸𑀯𑁂𑀢𑀺 𑀯𑀺𑀪𑀸𑀯𑁂𑀢𑀺 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀅𑀜𑁆𑀜𑀣𑀸𑀢𑀺.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀧𑀦 𑀦𑀸𑀲𑁆𑀲 𑀓𑀺𑀜𑁆𑀘𑀦𑀦𑁆𑀢𑀺 𑀅𑀓𑀺𑀜𑁆𑀘𑀦𑀁, 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀲𑁆𑀲 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀺𑀜𑁆𑀘𑀦𑀲𑁆𑀲 𑀪𑀸𑀯𑁄 𑀆𑀓𑀺𑀜𑁆𑀘𑀜𑁆𑀜𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀸𑀧𑀕𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀆𑀓𑀺𑀜𑁆𑀘𑀜𑁆𑀜𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀫𑀲𑁆𑀲 𑀛𑀸𑀦𑀲𑁆𑀲 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀫𑀺𑀯𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀅𑀬𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑁂 𑀯𑀺𑀢𑁆𑀣𑀸𑀭𑀓𑀣𑀸.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀣𑀸

𑁨𑁮𑁫. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀧𑀦 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀁 𑀘𑀺𑀡𑁆𑀡𑀯𑀲𑀻𑀪𑀸𑀯𑁂𑀦 ‘‘𑀆𑀲𑀦𑁆𑀦𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀧𑀘𑁆𑀘𑀢𑁆𑀣𑀺𑀓𑀸 𑀅𑀬𑀁 𑀲𑀫𑀸𑀧𑀢𑁆𑀢𑀺, 𑀦𑁄 𑀘 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀯𑀺𑀬 𑀲𑀦𑁆𑀢𑀸’’𑀢𑀺 𑀯𑀸 ‘‘𑀲𑀜𑁆𑀜𑀸 𑀭𑁄𑀕𑁄, 𑀲𑀜𑁆𑀜𑀸 𑀕𑀡𑁆𑀟𑁄, 𑀲𑀜𑁆𑀜𑀸 𑀲𑀮𑁆𑀮𑀁, 𑀏𑀢𑀁 𑀲𑀦𑁆𑀢𑀁, 𑀏𑀢𑀁 𑀧𑀡𑀻𑀢𑀁 𑀬𑀤𑀺𑀤𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸’’𑀢𑀺 𑀯𑀸 𑀏𑀯𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀆𑀤𑀻𑀦𑀯𑀁, 𑀉𑀧𑀭𑀺 𑀆𑀦𑀺𑀲𑀁𑀲𑀜𑁆𑀘 𑀤𑀺𑀲𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑀺𑀢𑁆𑀯𑀸 ‘‘𑀲𑀸𑀯 𑀅𑀪𑀸𑀯𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀲𑀦𑁆𑀢𑀸 𑀲𑀦𑁆𑀢𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀺𑀢𑀩𑁆𑀩𑀸, 𑀫𑀦𑀲𑀺𑀓𑀸𑀢𑀩𑁆𑀩𑀸, 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸, 𑀢𑀓𑁆𑀓𑀸𑀳𑀢𑀸 𑀯𑀺𑀢𑀓𑁆𑀓𑀸𑀳𑀢𑀸 𑀓𑀸𑀢𑀩𑁆𑀩𑀸.

𑀢𑀲𑁆𑀲𑁂𑀯𑀁 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀫𑀸𑀦𑀲𑀁 𑀘𑀸𑀭𑁂𑀦𑁆𑀢𑀲𑁆𑀲 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀉𑀧𑀘𑀸𑀭𑁂𑀦 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀢𑀺, 𑀪𑀸𑀯𑁂𑀢𑀺, 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲𑁂𑀯𑀁 𑀓𑀭𑁄𑀢𑁄 𑀯𑀺𑀜𑁆𑀜𑀸𑀡𑀸𑀧𑀕𑀫𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀯𑀺𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀺. 𑀅𑀧𑁆𑀧𑀦𑀸𑀦𑀬𑁄 𑀧𑀦𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀘𑁂𑀲 ‘‘𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁦𑁮; 𑀤𑀻. 𑀦𑀺. 𑁨.𑁧𑁨𑁯) 𑀯𑀼𑀘𑁆𑀘𑀢𑀺.

𑁨𑁮𑁬. 𑀇𑀥𑀸𑀧𑀺 𑀲𑀩𑁆𑀩𑀲𑁄𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀏𑀢𑁆𑀣𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀛𑀸𑀦𑀫𑁆𑀧𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀆𑀭𑀫𑁆𑀫𑀡𑀫𑁆𑀧𑀺. 𑀆𑀭𑀫𑁆𑀫𑀡𑀫𑁆𑀧𑀺 𑀳𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀓𑀺𑀜𑁆𑀘𑀜𑁆𑀜𑀜𑁆𑀘 𑀢𑀁 𑀢𑀢𑀺𑀬𑀲𑁆𑀲 𑀆𑀭𑀼𑀧𑁆𑀧𑀚𑁆𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀢𑁆𑀢𑀸 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀁 𑀯𑀺𑀬 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀜𑁆𑀘𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀢𑀣𑀸 𑀆𑀓𑀺𑀜𑁆𑀘𑀜𑁆𑀜𑀜𑁆𑀘 𑀢𑀁 𑀢𑀲𑁆𑀲𑁂𑀯 𑀛𑀸𑀦𑀲𑁆𑀲 𑀲𑀜𑁆𑀚𑀸𑀢𑀺𑀳𑁂𑀢𑀼𑀢𑁆𑀢𑀸 𑀓𑀫𑁆𑀩𑁄𑀚𑀸 𑀅𑀲𑁆𑀲𑀸𑀦𑀁 𑀆𑀬𑀢𑀦𑀦𑁆𑀢𑀺𑀆𑀤𑀻𑀦𑀺 𑀯𑀺𑀬 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀆𑀬𑀢𑀦𑀜𑁆𑀘𑀸𑀢𑀺𑀧𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀏𑀯𑀫𑁂𑀢𑀁 𑀛𑀸𑀦𑀜𑁆𑀘 𑀆𑀭𑀫𑁆𑀫𑀡𑀜𑁆𑀘𑀸𑀢𑀺 𑀉𑀪𑀬𑀫𑁆𑀧𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀘 𑀅𑀫𑀦𑀲𑀺𑀓𑀭𑀡𑁂𑀦 𑀘 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀬𑀲𑁆𑀫𑀸 𑀇𑀤𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀬𑀸𑀬 𑀲𑀜𑁆𑀜𑀸𑀬 𑀪𑀸𑀯𑀢𑁄 𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀧𑀝𑀺𑀧𑀦𑁆𑀦𑀲𑁆𑀲 𑀲𑀸 𑀲𑀜𑁆𑀜𑀸 𑀳𑁄𑀢𑀺, 𑀢𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀯𑀺𑀪𑀗𑁆𑀕𑁂 ‘‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’’𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀢𑀜𑁆𑀜𑁂𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’’𑀢𑀺 (𑀯𑀺𑀪. 𑁬𑁧𑁯) 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀻𑀢𑀺 ‘‘𑀲𑀦𑁆𑀢𑀸 𑀯𑀢𑀸𑀬𑀁 𑀲𑀫𑀸𑀧𑀢𑁆𑀢𑀺, 𑀬𑀢𑁆𑀭 𑀳𑀺 𑀦𑀸𑀫 𑀦𑀢𑁆𑀣𑀺𑀪𑀸𑀯𑀫𑁆𑀧𑀺 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸 𑀞𑀲𑁆𑀲𑀢𑀻’’𑀢𑀺 𑀏𑀯𑀁 𑀲𑀦𑁆𑀢𑀸𑀭𑀫𑁆𑀫𑀡𑀢𑀸𑀬 𑀢𑀁 𑀲𑀦𑁆𑀢𑀸𑀢𑀺 𑀫𑀦𑀲𑀺 𑀓𑀭𑁄𑀢𑀺.

𑀲𑀦𑁆𑀢𑀢𑁄 𑀘𑁂 𑀫𑀦𑀲𑀺 𑀓𑀭𑁄𑀢𑀺, 𑀓𑀣𑀁 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀻𑀢𑀺? 𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀬. 𑀲𑁄 𑀳𑀺 𑀓𑀺𑀜𑁆𑀘𑀸𑀧𑀺 𑀢𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀅𑀣 𑀔𑁆𑀯𑀲𑁆𑀲 ‘‘𑀅𑀳𑀫𑁂𑀢𑀁 𑀆𑀯𑀚𑁆𑀚𑀺𑀲𑁆𑀲𑀸𑀫𑀺, 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀺, 𑀅𑀥𑀺𑀝𑁆𑀞𑀳𑀺𑀲𑁆𑀲𑀸𑀫𑀺, 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺, 𑀧𑀘𑁆𑀘𑀯𑁂𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀏𑀲 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀲𑀦𑁆𑀢𑀢𑀭𑀧𑀡𑀻𑀢𑀢𑀭𑀢𑀸𑀬.

𑀬𑀣𑀸 𑀳𑀺 𑀭𑀸𑀚𑀸 𑀫𑀳𑀘𑁆𑀘 𑀭𑀸𑀚𑀸𑀦𑀼𑀪𑀸𑀯𑁂𑀦 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀕𑀭𑀯𑀻𑀣𑀺𑀬𑀁 𑀯𑀺𑀘𑀭𑀦𑁆𑀢𑁄 𑀤𑀦𑁆𑀢𑀓𑀸𑀭𑀸𑀤𑀬𑁄 𑀲𑀺𑀧𑁆𑀧𑀺𑀓𑁂 𑀏𑀓𑀁 𑀯𑀢𑁆𑀣𑀁 𑀤𑀴𑁆𑀳𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑁂𑀦 𑀲𑀻𑀲𑀁 𑀯𑁂𑀞𑁂𑀢𑁆𑀯𑀸 𑀤𑀦𑁆𑀢𑀘𑀼𑀡𑁆𑀡𑀸𑀤𑀻𑀳𑀺 𑀲𑀫𑁄𑀓𑀺𑀡𑁆𑀡𑀕𑀢𑁆𑀢𑁂 𑀅𑀦𑁂𑀓𑀸𑀦𑀺 𑀤𑀦𑁆𑀢𑀯𑀺𑀓𑀢𑀺𑀆𑀤𑀻𑀦𑀺 𑀲𑀺𑀧𑁆𑀧𑀸𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀳𑁄 𑀯𑀢 𑀭𑁂 𑀙𑁂𑀓𑀸 𑀆𑀘𑀭𑀺𑀬𑀸 𑀈𑀤𑀺𑀲𑀸𑀦𑀺𑀧𑀺 𑀦𑀸𑀫 𑀲𑀺𑀧𑁆𑀧𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀢𑁂𑀲𑀁 𑀙𑁂𑀓𑀢𑀸𑀬 𑀢𑀼𑀲𑁆𑀲𑀢𑀺, 𑀦 𑀘𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀅𑀳𑁄 𑀯𑀢𑀸𑀳𑀁 𑀭𑀚𑁆𑀚𑀁 𑀧𑀳𑀸𑀬 𑀏𑀯𑀭𑀽𑀧𑁄 𑀲𑀺𑀧𑁆𑀧𑀺𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀭𑀚𑁆𑀚𑀲𑀺𑀭𑀺𑀬𑀸 𑀫𑀳𑀸𑀦𑀺𑀲𑀁𑀲𑀢𑀸𑀬. 𑀲𑁄 𑀲𑀺𑀧𑁆𑀧𑀺𑀦𑁄 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀏𑀲 𑀓𑀺𑀜𑁆𑀘𑀸𑀧𑀺 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀅𑀣 𑀔𑁆𑀯𑀲𑁆𑀲 ‘‘𑀅𑀳𑀫𑁂𑀢𑀁 𑀲𑀫𑀸𑀧𑀢𑁆𑀢𑀺𑀁 𑀆𑀯𑀚𑁆𑀚𑀺𑀲𑁆𑀲𑀸𑀫𑀺, 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀺, 𑀅𑀥𑀺𑀝𑁆𑀞𑀳𑀺𑀲𑁆𑀲𑀸𑀫𑀺, 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺, 𑀧𑀘𑁆𑀘𑀯𑁂𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀦𑁂𑀯 𑀏𑀲 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄 𑀳𑁄𑀢𑀺.

𑀲𑁄 𑀢𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀢𑀁 𑀧𑀭𑀫𑀲𑀼𑀔𑀼𑀫𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀲𑀜𑁆𑀜𑀁 𑀧𑀸𑀧𑀼𑀡𑀸𑀢𑀺, 𑀬𑀸𑀬 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀦𑀸𑀫 𑀳𑁄𑀢𑀺, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀲𑀗𑁆𑀔𑀸𑀭𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀁.

𑁨𑁮𑁭. 𑀇𑀤𑀸𑀦𑀺 𑀬𑀁 𑀢𑀁 𑀏𑀯𑀫𑀥𑀺𑀕𑀢𑀸𑀬 𑀲𑀜𑁆𑀜𑀸𑀬 𑀯𑀲𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀅𑀢𑁆𑀣𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲 𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸’’𑀢𑀺 (𑀯𑀺𑀪. 𑁬𑁨𑁦) 𑀯𑀼𑀢𑁆𑀢𑀁. 𑀢𑁂𑀲𑀼 𑀇𑀥 𑀲𑀫𑀸𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀑𑀴𑀸𑀭𑀺𑀓𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀲𑀼𑀔𑀼𑀫𑀸𑀬 𑀘 𑀪𑀸𑀯𑀢𑁄 𑀦𑁂𑀯𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲 𑀲𑀜𑁆𑀜𑀸 𑀦𑀸𑀲𑀜𑁆𑀜𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀁. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀜𑁆𑀘 𑀢𑀁 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀆𑀬𑀢𑀦𑀜𑁆𑀘𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁. 𑀅𑀣 𑀯𑀸 𑀬𑀸𑀬𑀫𑁂𑀢𑁆𑀣 𑀲𑀜𑁆𑀜𑀸, 𑀲𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑁂𑀯𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀦𑀸𑀲𑀜𑁆𑀜𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸 𑀘 𑀲𑀸 𑀲𑁂𑀲𑀥𑀫𑁆𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀜𑁆𑀘𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁.

𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀲𑀜𑁆𑀜𑀸𑀯 𑀏𑀤𑀺𑀲𑀻, 𑀅𑀣 𑀔𑁄 𑀯𑁂𑀤𑀦𑀸𑀧𑀺 𑀦𑁂𑀯𑀯𑁂𑀤𑀦𑀸𑀦𑀸𑀯𑁂𑀤𑀦𑀸, 𑀘𑀺𑀢𑁆𑀢𑀫𑁆𑀧𑀺 𑀦𑁂𑀯𑀘𑀺𑀢𑁆𑀢𑀁𑀦𑀸𑀘𑀺𑀢𑁆𑀢𑀁, 𑀨𑀲𑁆𑀲𑁄𑀧𑀺 𑀦𑁂𑀯𑀨𑀲𑁆𑀲𑁄𑀦𑀸𑀨𑀲𑁆𑀲𑁄. 𑀏𑀲 𑀦𑀬𑁄 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼. 𑀲𑀜𑁆𑀜𑀸𑀲𑀻𑀲𑁂𑀦 𑀧𑀦𑀸𑀬𑀁 𑀤𑁂𑀲𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀢𑁆𑀢𑀫𑀓𑁆𑀔𑀦𑀢𑁂𑀮𑀧𑁆𑀧𑀪𑀼𑀢𑀻𑀳𑀺 𑀘 𑀉𑀧𑀫𑀸𑀳𑀺 𑀏𑀲 𑀅𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄.

𑀲𑀸𑀫𑀡𑁂𑀭𑁄 𑀓𑀺𑀭 𑀢𑁂𑀮𑁂𑀦 𑀧𑀢𑁆𑀢𑀁 𑀫𑀓𑁆𑀔𑁂𑀢𑁆𑀯𑀸 𑀞𑀧𑁂𑀲𑀺, 𑀢𑀁 𑀬𑀸𑀕𑀼𑀧𑀸𑀦𑀓𑀸𑀮𑁂 𑀣𑁂𑀭𑁄 𑀧𑀢𑁆𑀢𑀫𑀸𑀳𑀭𑀸𑀢𑀺 𑀆𑀳. 𑀲𑁄 ‘‘𑀧𑀢𑁆𑀢𑁂 𑀢𑁂𑀮𑀫𑀢𑁆𑀣𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀢𑀢𑁄 ‘‘𑀆𑀳𑀭, 𑀲𑀸𑀫𑀡𑁂𑀭, 𑀢𑁂𑀮𑀁, 𑀦𑀸𑀴𑀺𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀢𑁂𑀮’’𑀦𑁆𑀢𑀺 𑀆𑀳. 𑀢𑀢𑁆𑀣 𑀬𑀣𑀸 𑀅𑀦𑁆𑀢𑁄𑀯𑀼𑀢𑁆𑀣𑀢𑁆𑀢𑀸 𑀬𑀸𑀕𑀼𑀬𑀸 𑀲𑀤𑁆𑀥𑀺𑀁 𑀅𑀓𑀧𑁆𑀧𑀺𑀬𑀝𑁆𑀞𑁂𑀦 ‘‘𑀢𑁂𑀮𑀫𑀢𑁆𑀣𑀻’’𑀢𑀺 𑀳𑁄𑀢𑀺. 𑀦𑀸𑀴𑀺𑀧𑀽𑀭𑀡𑀸𑀤𑀻𑀦𑀁 𑀯𑀲𑁂𑀦 ‘‘𑀦𑀢𑁆𑀣𑀻’’𑀢𑀺 𑀳𑁄𑀢𑀺. 𑀏𑀯𑀁 𑀲𑀸𑀧𑀺 𑀲𑀜𑁆𑀜𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑁂𑀯𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀦𑀸𑀲𑀜𑁆𑀜𑀸 𑀳𑁄𑀢𑀺.

𑀓𑀺𑀁 𑀧𑀦𑁂𑀢𑁆𑀣 𑀲𑀜𑁆𑀜𑀸𑀓𑀺𑀘𑁆𑀘𑀦𑁆𑀢𑀺? 𑀆𑀭𑀫𑁆𑀫𑀡𑀲𑀜𑁆𑀚𑀸𑀦𑀦𑀜𑁆𑀘𑁂𑀯 𑀯𑀺𑀧𑀲𑁆𑀲𑀦𑀸𑀬 𑀘 𑀯𑀺𑀲𑀬𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀺𑀤𑀸𑀚𑀦𑀦𑀁. 𑀤𑀳𑀦𑀓𑀺𑀘𑁆𑀘𑀫𑀺𑀯 𑀳𑀺 𑀲𑀼𑀔𑁄𑀤𑀓𑁂 𑀢𑁂𑀚𑁄𑀥𑀸𑀢𑀼 𑀲𑀜𑁆𑀚𑀸𑀦𑀦𑀓𑀺𑀘𑁆𑀘𑀁 𑀧𑁂𑀲𑀸 𑀧𑀝𑀼𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁂𑀲𑀲𑀫𑀸𑀧𑀢𑁆𑀢𑀻𑀲𑀼 𑀲𑀜𑁆𑀜𑀸 𑀯𑀺𑀬 𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑀬𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀺𑀤𑀸𑀚𑀦𑀦𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀜𑁆𑀜𑁂𑀲𑀼 𑀳𑀺 𑀔𑀦𑁆𑀥𑁂𑀲𑀼 𑀅𑀓𑀢𑀸𑀪𑀺𑀦𑀺𑀯𑁂𑀲𑁄 𑀪𑀺𑀓𑁆𑀔𑀼 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑁆𑀔𑀦𑁆𑀥𑁂 𑀲𑀫𑁆𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀺𑀤𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺 𑀅𑀧𑀺𑀘 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀧𑀓𑀢𑀺𑀯𑀺𑀧𑀲𑁆𑀲𑀓𑁄 𑀧𑀦 𑀫𑀳𑀸𑀧𑀜𑁆𑀜𑁄 𑀲𑀸𑀭𑀺𑀧𑀼𑀢𑁆𑀢𑀲𑀤𑀺𑀲𑁄𑀯 𑀲𑀓𑁆𑀓𑀼𑀡𑁂𑀬𑁆𑀬. 𑀲𑁄𑀧𑀺 ‘‘𑀏𑀯𑀁 𑀓𑀺𑀭𑀺𑀫𑁂 𑀥𑀫𑁆𑀫𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁯𑁫) 𑀏𑀯𑀁 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦𑁂𑀯, 𑀦𑁄 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀯𑀲𑁂𑀦. 𑀏𑀯𑀁 𑀲𑀼𑀔𑀼𑀫𑀢𑁆𑀢𑀁 𑀕𑀢𑀸 𑀏𑀲𑀸 𑀲𑀫𑀸𑀧𑀢𑁆𑀢𑀺.

𑀬𑀣𑀸 𑀘 𑀧𑀢𑁆𑀢𑀫𑀓𑁆𑀔𑀦𑀢𑁂𑀮𑀽𑀧𑀫𑀸𑀬, 𑀏𑀯𑀁 𑀫𑀕𑁆𑀕𑀼𑀤𑀓𑀽𑀧𑀫𑀸𑀬𑀧𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀓𑀺𑀭 𑀣𑁂𑀭𑀲𑁆𑀲 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀲𑀸𑀫𑀡𑁂𑀭𑁄 𑀣𑁄𑀓𑀁 𑀉𑀤𑀓𑀁 𑀤𑀺𑀲𑁆𑀯𑀸 ‘‘𑀉𑀤𑀓𑀁, 𑀪𑀦𑁆𑀢𑁂, 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀣𑀸’’𑀢𑀺 𑀆𑀳. 𑀢𑀢𑁄 𑀣𑁂𑀭𑁂𑀦 ‘‘𑀲𑀘𑁂 𑀉𑀤𑀓𑀫𑀢𑁆𑀣𑀺, 𑀆𑀳𑀭 𑀦𑁆𑀳𑀸𑀦𑀲𑀸𑀝𑀺𑀓𑀁, 𑀦𑁆𑀳𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦𑀢𑁆𑀣𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀢𑀢𑁆𑀣 𑀬𑀣𑀸 𑀉𑀧𑀸𑀳𑀦𑀢𑁂𑀫𑀦𑀫𑀢𑁆𑀢𑀝𑁆𑀞𑁂𑀦 ‘‘𑀉𑀤𑀓𑀫𑀢𑁆𑀣𑀻’’𑀢𑀺 𑀳𑁄𑀢𑀺, 𑀦𑁆𑀳𑀸𑀬𑀦𑀝𑁆𑀞𑁂𑀦 ‘‘𑀦𑀢𑁆𑀣𑀻’’𑀢𑀺 𑀳𑁄𑀢𑀺. 𑀏𑀯𑀫𑁆𑀧𑀺 𑀲𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑁂𑀯𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀦𑀸𑀲𑀜𑁆𑀜𑀸 𑀳𑁄𑀢𑀺.

𑀦 𑀓𑁂𑀯𑀮𑀜𑁆𑀘 𑀏𑀢𑀸𑀳𑁂𑀯, 𑀅𑀜𑁆𑀜𑀸𑀳𑀺𑀧𑀺 𑀅𑀦𑀼𑀭𑀽𑀧𑀸𑀳𑀺 𑀉𑀧𑀫𑀸𑀳𑀺 𑀏𑀲 𑀅𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀅𑀬𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑁂 𑀯𑀺𑀢𑁆𑀣𑀸𑀭𑀓𑀣𑀸.

𑀧𑀓𑀺𑀡𑁆𑀡𑀓𑀓𑀣𑀸

𑁨𑁮𑁮. 𑀅𑀲𑀤𑀺𑀲𑀭𑀽𑀧𑁄 𑀦𑀸𑀣𑁄, 𑀆𑀭𑀼𑀧𑁆𑀧𑀁 𑀬𑀁 𑀘𑀢𑀼𑀩𑁆𑀩𑀺𑀥𑀁 𑀆𑀳.

𑀢𑀁 𑀇𑀢𑀺 𑀜𑀢𑁆𑀯𑀸 𑀢𑀲𑁆𑀫𑀺𑀁, 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸.

𑁨𑁮𑁯. 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄 𑀳𑀺 𑁋

𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀢𑁄, 𑀘𑀢𑀲𑁆𑀲𑁄𑀧𑀺 𑀪𑀯𑀦𑁆𑀢𑀺𑀫𑀸;

𑀅𑀗𑁆𑀕𑀸𑀢𑀺𑀓𑁆𑀓𑀫𑀫𑁂𑀢𑀸𑀲𑀁, 𑀦 𑀇𑀘𑁆𑀙𑀦𑁆𑀢𑀺 𑀯𑀺𑀪𑀸𑀯𑀺𑀦𑁄.

𑀏𑀢𑀸𑀲𑀼 𑀳𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀢𑀺𑀓𑁆𑀓𑀫𑀢𑁄 𑀧𑀞𑀫𑀸, 𑀆𑀓𑀸𑀲𑀸𑀢𑀺𑀓𑁆𑀓𑀫𑀢𑁄 𑀤𑀼𑀢𑀺𑀬𑀸, 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀸𑀢𑀺𑀓𑁆𑀓𑀫𑀢𑁄 𑀢𑀢𑀺𑀬𑀸. 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀲𑁆𑀲 𑀅𑀧𑀕𑀫𑀸𑀢𑀺𑀓𑁆𑀓𑀫𑀢𑁄 𑀘𑀢𑀼𑀢𑁆𑀣𑀻𑀢𑀺 𑀲𑀩𑁆𑀩𑀣𑀸 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀢𑁄 𑀘𑀢𑀲𑁆𑀲𑁄𑀧𑀺 𑀪𑀯𑀦𑁆𑀢𑀺𑀫𑀸 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀗𑁆𑀕𑀸𑀢𑀺𑀓𑁆𑀓𑀫𑀁 𑀧𑀦 𑀏𑀢𑀸𑀲𑀁 𑀦 𑀇𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀦 𑀳𑀺 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀻𑀲𑀼 𑀯𑀺𑀬 𑀏𑀢𑀸𑀲𑀼 𑀅𑀗𑁆𑀕𑀸𑀢𑀺𑀓𑁆𑀓𑀫𑁄 𑀅𑀢𑁆𑀣𑀺. 𑀲𑀩𑁆𑀩𑀸𑀲𑀼𑀧𑀺 𑀳𑀺 𑀏𑀢𑀸𑀲𑀼 𑀉𑀧𑁂𑀓𑁆𑀔𑀸, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀤𑁆𑀯𑁂 𑀏𑀯 𑀛𑀸𑀦𑀗𑁆𑀕𑀸𑀦𑀺 𑀳𑁄𑀦𑁆𑀢𑀺.

𑁨𑁯𑁦. 𑀏𑀯𑀁 𑀲𑀦𑁆𑀢𑁂𑀧𑀺 𑁋

𑀲𑀼𑀧𑁆𑀧𑀡𑀻𑀢𑀢𑀭𑀸 𑀳𑁄𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀇𑀥;

𑀉𑀧𑀫𑀸 𑀢𑀢𑁆𑀣 𑀯𑀺𑀜𑁆𑀜𑁂𑀬𑁆𑀬𑀸, 𑀧𑀸𑀲𑀸𑀤𑀢𑀮𑀲𑀸𑀝𑀺𑀓𑀸.

𑀬𑀣𑀸 𑀳𑀺 𑀘𑀢𑀼𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀤𑀺𑀩𑁆𑀩𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀲𑀼𑀭𑀪𑀺𑀕𑀦𑁆𑀥𑀫𑀸𑀮𑀸𑀪𑁄𑀚𑀦𑀲𑀬𑀦𑀘𑁆𑀙𑀸𑀤𑀦𑀸𑀤𑀺𑀯𑀲𑁂𑀦 𑀧𑀡𑀻𑀢𑀸 𑀧𑀜𑁆𑀘𑀓𑀸𑀫𑀕𑀼𑀡𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀅𑀲𑁆𑀲𑀼. 𑀤𑀼𑀢𑀺𑀬𑁂 𑀢𑀢𑁄 𑀧𑀡𑀻𑀢𑀢𑀭𑀸. 𑀢𑀢𑀺𑀬𑁂 𑀢𑀢𑁄 𑀧𑀡𑀻𑀢𑀢𑀭𑀸. 𑀘𑀢𑀼𑀢𑁆𑀣𑁂 𑀲𑀩𑁆𑀩𑀧𑀡𑀻𑀢𑀢𑀭𑀸. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀧𑀸𑀲𑀸𑀤𑀢𑀮𑀸𑀦𑁂𑀯, 𑀦𑀢𑁆𑀣𑀺 𑀦𑁂𑀲𑀁 𑀧𑀸𑀲𑀸𑀤𑀢𑀮𑀪𑀸𑀯𑁂𑀦 𑀯𑀺𑀲𑁂𑀲𑁄. 𑀧𑀜𑁆𑀘𑀓𑀸𑀫𑀕𑀼𑀡𑀲𑀫𑀺𑀤𑁆𑀥𑀯𑀺𑀲𑁂𑀲𑁂𑀦 𑀧𑀦 𑀳𑁂𑀝𑁆𑀞𑀺𑀫𑀢𑁄 𑀳𑁂𑀝𑁆𑀞𑀺𑀫𑀢𑁄 𑀉𑀧𑀭𑀺𑀫𑀁 𑀉𑀧𑀭𑀺𑀫𑀁 𑀧𑀡𑀻𑀢𑀢𑀭𑀁 𑀳𑁄𑀢𑀺.

𑀬𑀣𑀸 𑀘 𑀏𑀓𑀸𑀬 𑀇𑀢𑁆𑀣𑀺𑀬𑀸 𑀓𑀦𑁆𑀢𑀺𑀢𑀣𑀽𑀮𑀲𑀡𑁆𑀳𑀲𑀡𑁆𑀳𑀢𑀭𑀲𑀡𑁆𑀳𑀢𑀫𑀲𑀼𑀢𑁆𑀢𑀸𑀦𑀁 𑀘𑀢𑀼𑀧𑀮𑀢𑀺𑀧𑀮𑀤𑁆𑀯𑀺𑀧𑀮𑀏𑀓𑀧𑀮𑀲𑀸𑀝𑀺𑀓𑀸 𑀅𑀲𑁆𑀲𑀼 𑀆𑀬𑀸𑀫𑁂𑀦 𑀘 𑀯𑀺𑀢𑁆𑀣𑀸𑀭𑁂𑀦 𑀘 𑀲𑀫𑀧𑁆𑀧𑀫𑀸𑀡𑀸. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀸 𑀲𑀸𑀝𑀺𑀓𑀸 𑀘𑀢𑀲𑁆𑀲𑁄𑀧𑀺 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀲𑀫𑀧𑁆𑀧𑀫𑀸𑀡𑀸, 𑀦𑀢𑁆𑀣𑀺 𑀢𑀸𑀲𑀁 𑀧𑀫𑀸𑀡𑀢𑁄 𑀯𑀺𑀲𑁂𑀲𑁄. 𑀲𑀼𑀔𑀲𑀫𑁆𑀨𑀲𑁆𑀲𑀲𑀼𑀔𑀼𑀫𑀪𑀸𑀯𑀫𑀳𑀕𑁆𑀖𑀪𑀸𑀯𑁂𑀳𑀺 𑀧𑀦 𑀧𑀼𑀭𑀺𑀫𑀸𑀬 𑀧𑀼𑀭𑀺𑀫𑀸𑀬 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀧𑀡𑀻𑀢𑀢𑀭𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀓𑀺𑀜𑁆𑀘𑀸𑀧𑀺 𑀘𑀢𑀽𑀲𑀼 𑀏𑀢𑀸𑀲𑀼 𑀉𑀧𑁂𑀓𑁆𑀔𑀸, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀏𑀢𑀸𑀦𑀺 𑀤𑁆𑀯𑁂𑀬𑁂𑀯 𑀅𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀅𑀣 𑀔𑁄 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀢𑁂𑀲𑀁 𑀅𑀗𑁆𑀕𑀸𑀦𑀺 𑀧𑀡𑀻𑀢𑀧𑀡𑀻𑀢𑀢𑀭𑀪𑀸𑀯𑁂𑀦 𑀲𑀼𑀧𑁆𑀧𑀡𑀻𑀢𑀢𑀭𑀸 𑀳𑁄𑀦𑁆𑀢𑀺 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀇𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁯𑁧. 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀡𑀻𑀢𑀧𑀡𑀻𑀢𑀸 𑀘𑁂𑀢𑀸 𑁋

𑀅𑀲𑀼𑀘𑀺𑀫𑁆𑀳𑀺 𑀫𑀡𑁆𑀟𑀧𑁂 𑀮𑀕𑁆𑀕𑁄, 𑀏𑀓𑁄 𑀢𑀦𑁆𑀦𑀺𑀲𑁆𑀲𑀺𑀢𑁄 𑀧𑀭𑁄;

𑀅𑀜𑁆𑀜𑁄 𑀩𑀳𑀺 𑀅𑀦𑀺𑀲𑁆𑀲𑀸𑀬, 𑀢𑀁 𑀢𑀁 𑀦𑀺𑀲𑁆𑀲𑀸𑀬 𑀘𑀸𑀧𑀭𑁄.

𑀞𑀺𑀢𑁄 𑀘𑀢𑀽𑀳𑀺 𑀏𑀢𑁂𑀳𑀺, 𑀧𑀼𑀭𑀺𑀲𑁂𑀳𑀺 𑀬𑀣𑀸𑀓𑁆𑀓𑀫𑀁;

𑀲𑀫𑀸𑀦𑀢𑀸𑀬 𑀜𑀸𑀢𑀩𑁆𑀩𑀸, 𑀘𑀢𑀲𑁆𑀲𑁄𑀧𑀺 𑀯𑀺𑀪𑀸𑀯𑀺𑀦𑀸.

𑀢𑀢𑁆𑀭𑀸𑀬𑀫𑀢𑁆𑀣𑀬𑁄𑀚𑀦𑀸 𑁋 𑀅𑀲𑀼𑀘𑀺𑀫𑁆𑀳𑀺 𑀓𑀺𑀭 𑀤𑁂𑀲𑁂 𑀏𑀓𑁄 𑀫𑀡𑁆𑀟𑀧𑁄, 𑀅𑀣𑁂𑀓𑁄 𑀧𑀼𑀭𑀺𑀲𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀅𑀲𑀼𑀘𑀺𑀁 𑀚𑀺𑀕𑀼𑀘𑁆𑀙𑀫𑀸𑀦𑁄 𑀢𑀁 𑀫𑀡𑁆𑀟𑀧𑀁 𑀳𑀢𑁆𑀣𑁂𑀳𑀺 𑀆𑀮𑀫𑁆𑀩𑀺𑀢𑁆𑀯𑀸 𑀢𑀢𑁆𑀣 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀯𑀺𑀬 𑀅𑀝𑁆𑀞𑀸𑀲𑀺. 𑀅𑀣𑀸𑀧𑀭𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀫𑀡𑁆𑀟𑀧𑁂 𑀮𑀕𑁆𑀕𑀁 𑀧𑀼𑀭𑀺𑀲𑀁 𑀦𑀺𑀲𑁆𑀲𑀺𑀢𑁄. 𑀅𑀣𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀬𑁄 𑀏𑀲 𑀫𑀡𑁆𑀟𑀧𑀮𑀕𑁆𑀕𑁄, 𑀬𑁄 𑀘 𑀢𑀦𑁆𑀦𑀺𑀲𑁆𑀲𑀺𑀢𑁄, 𑀉𑀪𑁄𑀧𑁂𑀢𑁂 𑀤𑀼𑀝𑁆𑀞𑀺𑀢𑀸. 𑀥𑀼𑀯𑁄 𑀘 𑀦𑁂𑀲𑀁 𑀫𑀡𑁆𑀟𑀧𑀧𑀧𑀸𑀢𑁂 𑀧𑀸𑀢𑁄, 𑀳𑀦𑁆𑀤𑀸𑀳𑀁 𑀩𑀳𑀺𑀬𑁂𑀯 𑀢𑀺𑀝𑁆𑀞𑀸𑀫𑀻’’𑀢𑀺. 𑀲𑁄 𑀢𑀦𑁆𑀦𑀺𑀲𑁆𑀲𑀺𑀢𑀁 𑀅𑀦𑀺𑀲𑁆𑀲𑀸𑀬 𑀩𑀳𑀺𑀬𑁂𑀯 𑀅𑀝𑁆𑀞𑀸𑀲𑀺. 𑀅𑀣𑀸𑀧𑀭𑁄 𑀆𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑀮𑀕𑁆𑀕𑀲𑁆𑀲 𑀘 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀘 𑀅𑀔𑁂𑀫𑀪𑀸𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀩𑀳𑀺𑀝𑁆𑀞𑀺𑀢𑀜𑁆𑀘 𑀲𑀼𑀝𑁆𑀞𑀺𑀢𑁄𑀢𑀺 𑀫𑀦𑁆𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀸𑀲𑀺. 𑀢𑀢𑁆𑀣 𑀅𑀲𑀼𑀘𑀺𑀫𑁆𑀳𑀺 𑀤𑁂𑀲𑁂 𑀫𑀡𑁆𑀟𑀧𑁄 𑀯𑀺𑀬 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁 𑀤𑀝𑁆𑀞𑀩𑁆𑀩𑀁, 𑀅𑀲𑀼𑀘𑀺𑀚𑀺𑀕𑀼𑀘𑁆𑀙𑀸𑀬 𑀫𑀡𑁆𑀟𑀧𑀮𑀕𑁆𑀕𑁄 𑀧𑀼𑀭𑀺𑀲𑁄 𑀯𑀺𑀬 𑀭𑀽𑀧𑀦𑀺𑀫𑀺𑀢𑁆𑀢𑀚𑀺𑀕𑀼𑀘𑁆𑀙𑀸𑀬 𑀆𑀓𑀸𑀲𑀸𑀭𑀫𑁆𑀫𑀡𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀫𑀡𑁆𑀟𑀧𑀮𑀕𑁆𑀕𑀁 𑀧𑀼𑀭𑀺𑀲𑀁 𑀦𑀺𑀲𑁆𑀲𑀺𑀢𑁄 𑀯𑀺𑀬 𑀆𑀓𑀸𑀲𑀸𑀭𑀫𑁆𑀫𑀡𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁, 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀔𑁂𑀫𑀪𑀸𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀺𑀲𑁆𑀲𑀸𑀬 𑀢𑀁 𑀫𑀡𑁆𑀟𑀧𑀮𑀕𑁆𑀕𑀁 𑀩𑀳𑀺𑀝𑁆𑀞𑀺𑀢𑁄 𑀯𑀺𑀬 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀭𑀫𑁆𑀫𑀡𑀁 𑀅𑀓𑀢𑁆𑀯𑀸 𑀢𑀤𑀪𑀸𑀯𑀸𑀭𑀫𑁆𑀫𑀡𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀫𑀡𑁆𑀟𑀧𑀮𑀕𑁆𑀕𑀲𑁆𑀲 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀘 𑀅𑀔𑁂𑀫𑀢𑀁 𑀘𑀺𑀦𑁆𑀢𑁂𑀢𑁆𑀯𑀸 𑀩𑀳𑀺𑀝𑁆𑀞𑀺𑀢𑀜𑁆𑀘 𑀲𑀼𑀝𑁆𑀞𑀺𑀢𑁄𑀢𑀺 𑀫𑀦𑁆𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀯𑀺𑀬 𑀯𑀺𑀜𑁆𑀜𑀸𑀡𑀸𑀪𑀸𑀯𑀲𑀗𑁆𑀔𑀸𑀢𑁂 𑀩𑀳𑀺𑀧𑀤𑁂𑀲𑁂 𑀞𑀺𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀤𑀝𑁆𑀞𑀩𑁆𑀩𑀁.

𑁨𑁯𑁨. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀜𑁆𑀘 𑁋

𑀆𑀭𑀫𑁆𑀫𑀡𑀁 𑀓𑀭𑁄𑀢𑁂𑀯, 𑀅𑀜𑁆𑀜𑀸𑀪𑀸𑀯𑁂𑀦 𑀢𑀁 𑀇𑀤𑀁;

𑀤𑀺𑀝𑁆𑀞𑀤𑁄𑀲𑀫𑁆𑀧𑀺 𑀭𑀸𑀚𑀸𑀦𑀁, 𑀯𑀼𑀢𑁆𑀢𑀺𑀳𑁂𑀢𑀼 𑀚𑀦𑁄 𑀬𑀣𑀸.

𑀇𑀤𑀜𑁆𑀳𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 ‘‘𑀆𑀲𑀦𑁆𑀦𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀧𑀘𑁆𑀘𑀢𑁆𑀣𑀺𑀓𑀸 𑀅𑀬𑀁 𑀲𑀫𑀸𑀧𑀢𑁆𑀢𑀻’’𑀢𑀺 𑀏𑀯𑀁 𑀤𑀺𑀝𑁆𑀞𑀤𑁄𑀲𑀫𑁆𑀧𑀺 𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀅𑀜𑁆𑀜𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀪𑀸𑀯𑀸 𑀆𑀭𑀫𑁆𑀫𑀡𑀁 𑀓𑀭𑁄𑀢𑁂𑀯. 𑀬𑀣𑀸 𑀓𑀺𑀁? 𑀤𑀺𑀝𑁆𑀞𑀤𑁄𑀲𑀫𑁆𑀧𑀺 𑀭𑀸𑀚𑀸𑀦𑀁 𑀯𑀼𑀢𑁆𑀢𑀺𑀳𑁂𑀢𑀼 𑀬𑀣𑀸 𑀚𑀦𑁄. 𑀬𑀣𑀸 𑀳𑀺 𑀅𑀲𑀁𑀬𑀢𑀁 𑀨𑀭𑀼𑀲𑀓𑀸𑀬𑀯𑀘𑀻𑀫𑀦𑁄𑀲𑀫𑀸𑀘𑀸𑀭𑀁 𑀓𑀜𑁆𑀘𑀺 𑀲𑀩𑁆𑀩𑀤𑀺𑀲𑀫𑁆𑀧𑀢𑀺𑀁 𑀭𑀸𑀚𑀸𑀦𑀁 ‘‘𑀨𑀭𑀼𑀲𑀲𑀫𑀸𑀘𑀸𑀭𑁄 𑀅𑀬’’𑀦𑁆𑀢𑀺 𑀏𑀯𑀁 𑀤𑀺𑀝𑁆𑀞𑀤𑁄𑀲𑀫𑁆𑀧𑀺 𑀅𑀜𑁆𑀜𑀢𑁆𑀣 𑀯𑀼𑀢𑁆𑀢𑀺𑀁 𑀅𑀮𑀪𑀫𑀸𑀦𑁄 𑀚𑀦𑁄 𑀯𑀼𑀢𑁆𑀢𑀺𑀳𑁂𑀢𑀼 𑀦𑀺𑀲𑁆𑀲𑀸𑀬 𑀯𑀢𑁆𑀢𑀢𑀺, 𑀏𑀯𑀁 𑀤𑀺𑀝𑁆𑀞𑀤𑁄𑀲𑀫𑁆𑀧𑀺 𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀅𑀜𑁆𑀜𑀁 𑀆𑀭𑀫𑁆𑀫𑀡𑀁 𑀅𑀮𑀪𑀫𑀸𑀦𑀫𑀺𑀤𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑁂𑀯.

𑁨𑁯𑁩. 𑀏𑀯𑀁 𑀓𑀼𑀭𑀼𑀫𑀸𑀦𑀜𑁆𑀘 𑁋

𑀆𑀭𑀼𑀴𑁆𑀳𑁄 𑀤𑀻𑀖𑀦𑀺𑀲𑁆𑀲𑁂𑀡𑀺𑀁, 𑀬𑀣𑀸 𑀦𑀺𑀲𑁆𑀲𑁂𑀡𑀺𑀩𑀸𑀳𑀼𑀓𑀁;

𑀧𑀩𑁆𑀩𑀢𑀕𑁆𑀕𑀜𑁆𑀘 𑀆𑀭𑀼𑀴𑁆𑀳𑁄, 𑀬𑀣𑀸 𑀧𑀩𑁆𑀩𑀢𑀫𑀢𑁆𑀣𑀓𑀁.

𑀬𑀣𑀸 𑀯𑀸 𑀕𑀺𑀭𑀺𑀫𑀸𑀭𑀽𑀴𑁆𑀳𑁄, 𑀅𑀢𑁆𑀢𑀦𑁄𑀬𑁂𑀯 𑀚𑀡𑁆𑀡𑀼𑀓𑀁;

𑀑𑀮𑀼𑀩𑁆𑀪𑀢𑀺 𑀢𑀣𑁂𑀯𑁂𑀢𑀁, 𑀛𑀸𑀦𑀫𑁄𑀮𑀼𑀩𑁆𑀪 𑀯𑀢𑁆𑀢𑀢𑀻𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀲𑀫𑀸𑀥𑀺𑀪𑀸𑀯𑀦𑀸𑀥𑀺𑀓𑀸𑀭𑁂

𑀆𑀭𑀼𑀧𑁆𑀧𑀦𑀺𑀤𑁆𑀤𑁂𑀲𑁄 𑀦𑀸𑀫

𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.