𑁧𑁧. 𑀲𑀫𑀸𑀥𑀺𑀦𑀺𑀤𑁆𑀤𑁂𑀲𑁄

𑀆𑀳𑀸𑀭𑁂𑀧𑀝𑀺𑀓𑁆𑀓𑀽𑀮𑀪𑀸𑀯𑀦𑀸

𑁨𑁯𑁪. 𑀇𑀤𑀸𑀦𑀺 𑀆𑀭𑀼𑀧𑁆𑀧𑀸𑀦𑀦𑁆𑀢𑀭𑀁 𑀏𑀓𑀸 𑀲𑀜𑁆𑀜𑀸𑀢𑀺 𑀏𑀯𑀁 𑀉𑀤𑁆𑀤𑀺𑀝𑁆𑀞𑀸𑀬 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀬 𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀢𑁆𑀣 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀲𑁄 𑀘𑀢𑀼𑀩𑁆𑀩𑀺𑀥𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁄, 𑀨𑀲𑁆𑀲𑀸𑀳𑀸𑀭𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄𑀢𑀺.

𑀓𑁄 𑀧𑀦𑁂𑀢𑁆𑀣 𑀓𑀺𑀫𑀸𑀳𑀭𑀢𑀻𑀢𑀺? 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀑𑀚𑀝𑁆𑀞𑀫𑀓𑀁 𑀭𑀽𑀧𑀁 𑀆𑀳𑀭𑀢𑀺. 𑀨𑀲𑁆𑀲𑀸𑀳𑀸𑀭𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀳𑀭𑀢𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀆𑀳𑀭𑀢𑀺. 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀆𑀳𑀭𑀢𑀺.

𑀢𑁂𑀲𑀼 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀦𑀺𑀓𑀦𑁆𑀢𑀺𑀪𑀬𑀁. 𑀨𑀲𑁆𑀲𑀸𑀳𑀸𑀭𑁂 𑀉𑀧𑀕𑀫𑀦𑀪𑀬𑀁. 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂 𑀉𑀧𑀧𑀢𑁆𑀢𑀺𑀪𑀬𑀁. 𑀯𑀺𑀜𑁆𑀜𑀸𑀡𑀸𑀳𑀸𑀭𑁂 𑀧𑀝𑀺𑀲𑀦𑁆𑀥𑀺𑀪𑀬𑀁. 𑀏𑀯𑀁 𑀲𑀧𑁆𑀧𑀝𑀺𑀪𑀬𑁂𑀲𑀼 𑀘 𑀢𑁂𑀲𑀼 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀧𑀼𑀢𑁆𑀢𑀫𑀁𑀲𑀽𑀧𑀫𑁂𑀦 (𑀲𑀁. 𑀦𑀺. 𑁨.𑁬𑁩) 𑀤𑀻𑀧𑁂𑀢𑀩𑁆𑀩𑁄. 𑀨𑀲𑁆𑀲𑀸𑀳𑀸𑀭𑁄 𑀦𑀺𑀘𑁆𑀘𑀫𑁆𑀫𑀕𑀸𑀯𑀽𑀧𑀫𑁂𑀦 (𑀲𑀁. 𑀦𑀺. 𑁨.𑁬𑁩). 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑁂𑀦 (𑀲𑀁. 𑀦𑀺. 𑁨.𑁬𑁩). 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀲𑀢𑁆𑀢𑀺𑀲𑀢𑀽𑀧𑀫𑁂𑀦𑀸𑀢𑀺 (𑀲𑀁. 𑀦𑀺. 𑁨.𑁬𑁩). 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀧𑁆𑀧𑀪𑁂𑀤𑁄 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀯 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀆𑀳𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀺𑀁 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸.

𑀢𑀁 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑀢𑁄 𑀏𑀓𑀧𑀤𑀫𑁆𑀧𑀺 𑀅𑀯𑀺𑀭𑀚𑁆𑀛𑀦𑁆𑀢𑁂𑀦 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀧𑁆𑀧𑀪𑁂𑀤𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀤𑀲𑀳𑀸𑀓𑀸𑀭𑁂𑀳𑀺 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀲𑁂𑀬𑁆𑀬𑀣𑀺𑀤𑀁, 𑀕𑀫𑀦𑀢𑁄, 𑀧𑀭𑀺𑀬𑁂𑀲𑀦𑀢𑁄, 𑀧𑀭𑀺𑀪𑁄𑀕𑀢𑁄, 𑀆𑀲𑀬𑀢𑁄, 𑀦𑀺𑀥𑀸𑀦𑀢𑁄, 𑀅𑀧𑀭𑀺𑀧𑀓𑁆𑀓𑀢𑁄, 𑀧𑀭𑀺𑀧𑀓𑁆𑀓𑀢𑁄, 𑀨𑀮𑀢𑁄, 𑀦𑀺𑀲𑁆𑀲𑀦𑁆𑀤𑀢𑁄, 𑀲𑀫𑁆𑀫𑀓𑁆𑀔𑀦𑀢𑁄𑀢𑀺.

𑁨𑁯𑁫. 𑀢𑀢𑁆𑀣 𑀕𑀫𑀦𑀢𑁄𑀢𑀺 𑀏𑀯𑀁 𑀫𑀳𑀸𑀦𑀼𑀪𑀸𑀯𑁂 𑀦𑀸𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁂𑀦 𑀲𑀓𑀮𑀭𑀢𑁆𑀢𑀺𑀁 𑀩𑀼𑀤𑁆𑀥𑀯𑀘𑀦𑀲𑀚𑁆𑀛𑀸𑀬𑀁 𑀯𑀸 𑀲𑀫𑀡𑀥𑀫𑁆𑀫𑀁 𑀯𑀸 𑀓𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀁 𑀓𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀲𑀭𑀻𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀆𑀲𑀦𑀫𑀸𑀭𑀽𑀬𑁆𑀳 𑀯𑀻𑀲𑀢𑀺𑀁𑀲 𑀯𑀸𑀭𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀉𑀝𑁆𑀞𑀸𑀬 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀦𑀺𑀚𑀦𑀲𑀫𑁆𑀩𑀸𑀥𑀸𑀦𑀺 𑀧𑀯𑀺𑀯𑁂𑀓𑀲𑀼𑀔𑀸𑀦𑀺 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀸𑀦𑀺 𑀲𑀼𑀘𑀻𑀦𑀺 𑀲𑀻𑀢𑀮𑀸𑀦𑀺 𑀭𑀫𑀡𑀻𑀬𑀪𑀽𑀫𑀺𑀪𑀸𑀕𑀸𑀦𑀺 𑀢𑀧𑁄𑀯𑀦𑀸𑀦𑀺 𑀧𑀳𑀸𑀬 𑀅𑀭𑀺𑀬𑀁 𑀯𑀺𑀯𑁂𑀓𑀭𑀢𑀺𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀼𑀲𑀸𑀦𑀸𑀪𑀺𑀫𑀼𑀔𑁂𑀦 𑀲𑀺𑀗𑁆𑀕𑀸𑀮𑁂𑀦 𑀯𑀺𑀬 𑀆𑀳𑀸𑀭𑀢𑁆𑀣𑀸𑀬 𑀕𑀸𑀫𑀸𑀪𑀺𑀫𑀼𑀔𑁂𑀦 𑀕𑀦𑁆𑀢𑀩𑁆𑀩𑀁.

𑀏𑀯𑀁 𑀕𑀘𑁆𑀙𑀢𑀸 𑀘 𑀫𑀜𑁆𑀘𑀫𑁆𑀳𑀸 𑀯𑀸 𑀧𑀻𑀞𑀫𑁆𑀳𑀸 𑀯𑀸 𑀑𑀢𑀭𑀡𑀢𑁄 𑀧𑀝𑁆𑀞𑀸𑀬 𑀧𑀸𑀤𑀭𑀚𑀖𑀭𑀕𑁄𑀮𑀺𑀓𑀯𑀘𑁆𑀘𑀸𑀤𑀺𑀲𑀫𑁆𑀧𑀭𑀺𑀓𑀺𑀡𑁆𑀡𑀁 𑀧𑀘𑁆𑀘𑀢𑁆𑀣𑀭𑀡𑀁 𑀅𑀓𑁆𑀓𑀫𑀺𑀢𑀩𑁆𑀩𑀁 𑀳𑁄𑀢𑀺. 𑀢𑀢𑁄 𑀅𑀧𑁆𑀧𑁂𑀓𑀤𑀸 𑀫𑀽𑀲𑀺𑀓𑀚𑀢𑀼𑀓𑀯𑀘𑁆𑀘𑀸𑀤𑀻𑀳𑀺 𑀉𑀧𑀳𑀢𑀢𑁆𑀢𑀸 𑀅𑀦𑁆𑀢𑁄𑀕𑀩𑁆𑀪𑀢𑁄 𑀧𑀝𑀺𑀓𑁆𑀓𑀽𑀮𑀢𑀭𑀁 𑀧𑀫𑀼𑀔𑀁 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀢𑀢𑁄 𑀉𑀮𑀽𑀓𑀧𑀸𑀭𑀸𑀯𑀢𑀸𑀤𑀺𑀯𑀘𑁆𑀘𑀲𑀫𑁆𑀫𑀓𑁆𑀔𑀺𑀢𑀢𑁆𑀢𑀸 𑀉𑀧𑀭𑀺𑀫𑀢𑀮𑀢𑁄 𑀧𑀝𑀺𑀓𑁆𑀓𑀽𑀮𑀢𑀭𑀁 𑀳𑁂𑀝𑁆𑀞𑀺𑀫𑀢𑀮𑀁. 𑀢𑀢𑁄 𑀓𑀤𑀸𑀘𑀺 𑀓𑀤𑀸𑀘𑀺 𑀯𑀸𑀢𑁂𑀭𑀺𑀢𑁂𑀳𑀺 𑀧𑀼𑀭𑀸𑀡𑀢𑀺𑀡𑀧𑀡𑁆𑀡𑁂𑀳𑀺 𑀕𑀺𑀮𑀸𑀦𑀲𑀸𑀫𑀡𑁂𑀭𑀸𑀦𑀁 𑀫𑀼𑀢𑁆𑀢𑀓𑀭𑀻𑀲𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀳𑀺 𑀯𑀲𑁆𑀲𑀓𑀸𑀮𑁂 𑀉𑀤𑀓𑀘𑀺𑀓𑁆𑀔𑀮𑁆𑀮𑀸𑀤𑀻𑀳𑀺 𑀘 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸 𑀳𑁂𑀝𑁆𑀞𑀺𑀫𑀢𑀮𑀢𑁄 𑀧𑀝𑀺𑀓𑁆𑀓𑀽𑀮𑀢𑀭𑀁 𑀧𑀭𑀺𑀯𑁂𑀡𑀁. 𑀧𑀭𑀺𑀯𑁂𑀡𑀢𑁄 𑀧𑀝𑀺𑀓𑁆𑀓𑀽𑀮𑀢𑀭𑀸 𑀯𑀺𑀳𑀸𑀭𑀭𑀘𑁆𑀙𑀸 𑀤𑀝𑁆𑀞𑀩𑁆𑀩𑀸 𑀳𑁄𑀢𑀺.

𑀅𑀦𑀼𑀧𑀼𑀩𑁆𑀩𑁂𑀦 𑀧𑀦 𑀩𑁄𑀥𑀺𑀜𑁆𑀘 𑀘𑁂𑀢𑀺𑀬𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀯𑀺𑀢𑀓𑁆𑀓𑀫𑀸𑀴𑀓𑁂 𑀞𑀺𑀢𑁂𑀦 𑀫𑀼𑀢𑁆𑀢𑀭𑀸𑀲𑀺𑀲𑀤𑀺𑀲𑀁 𑀘𑁂𑀢𑀺𑀬𑀁 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑀫𑀦𑁄𑀳𑀭𑀁 𑀩𑁄𑀥𑀺𑀁 𑀤𑁂𑀯𑀯𑀺𑀫𑀸𑀦𑀲𑀫𑁆𑀧𑀢𑁆𑀢𑀺𑀲𑀲𑁆𑀲𑀺𑀭𑀻𑀓𑀁 𑀲𑁂𑀦𑀸𑀲𑀦𑀜𑁆𑀘 𑀅𑀦𑀧𑀮𑁄𑀓𑁂𑀢𑁆𑀯𑀸 𑀏𑀯𑀭𑀽𑀧𑀁 𑀦𑀸𑀫 𑀭𑀫𑀡𑀻𑀬𑀁 𑀧𑀤𑁂𑀲𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀆𑀳𑀸𑀭𑀳𑁂𑀢𑀼 𑀕𑀦𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻𑀢𑀺 𑀧𑀓𑁆𑀓𑀫𑀺𑀢𑁆𑀯𑀸 𑀕𑀸𑀫𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁂𑀦 𑀔𑀸𑀡𑀼𑀓𑀡𑁆𑀝𑀓𑀫𑀕𑁆𑀕𑁄𑀧𑀺 𑀉𑀤𑀓𑀯𑁂𑀕𑀪𑀺𑀦𑁆𑀦𑀯𑀺𑀲𑀫𑀫𑀕𑁆𑀕𑁄𑀧𑀺 𑀤𑀝𑁆𑀞𑀩𑁆𑀩𑁄 𑀳𑁄𑀢𑀺.

𑀢𑀢𑁄 𑀕𑀡𑁆𑀟𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀯𑀺𑀬 𑀦𑀺𑀯𑀸𑀲𑀦𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀡𑀘𑁄𑀴𑀓𑀁 𑀩𑀦𑁆𑀥𑀦𑁆𑀢𑁂𑀦 𑀯𑀺𑀬 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀅𑀝𑁆𑀞𑀺𑀲𑀗𑁆𑀖𑀸𑀢𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀯𑀺𑀬 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀪𑁂𑀲𑀚𑁆𑀚𑀓𑀧𑀸𑀮𑀁 𑀦𑀻𑀳𑀭𑀦𑁆𑀢𑁂𑀦 𑀯𑀺𑀬 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑀲𑀫𑀻𑀧𑀁 𑀧𑀸𑀧𑀼𑀡𑀦𑁆𑀢𑁂𑀦 𑀳𑀢𑁆𑀣𑀺𑀓𑀼𑀡𑀧𑀅𑀲𑁆𑀲𑀓𑀼𑀡𑀧𑀕𑁄𑀓𑀼𑀡𑀧𑀫𑀳𑀺𑀁𑀲𑀓𑀼𑀡𑀧𑀫𑀦𑀼𑀲𑁆𑀲𑀓𑀼𑀡𑀧𑀅𑀳𑀺𑀓𑀼𑀡𑀧𑀓𑀼𑀓𑁆𑀓𑀼𑀭𑀓𑀼𑀡𑀧𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺 𑀪𑀯𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀤𑀝𑁆𑀞𑀩𑁆𑀩𑀸𑀦𑀺, 𑀕𑀦𑁆𑀥𑁄𑀧𑀺 𑀦𑁂𑀲𑀁 𑀖𑀸𑀦𑀁 𑀧𑀝𑀺𑀳𑀦𑀫𑀸𑀦𑁄 𑀅𑀥𑀺𑀯𑀸𑀲𑁂𑀢𑀩𑁆𑀩𑁄 𑀳𑁄𑀢𑀺. 𑀢𑀢𑁄 𑀕𑀸𑀫𑀤𑁆𑀯𑀸𑀭𑁂 𑀞𑀢𑁆𑀯𑀸 𑀘𑀡𑁆𑀟𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀧𑀭𑀺𑀲𑁆𑀲𑀬𑀧𑀭𑀺𑀯𑀚𑁆𑀚𑀦𑀢𑁆𑀣𑀁 𑀕𑀸𑀫𑀭𑀘𑁆𑀙𑀸 𑀑𑀮𑁄𑀓𑁂𑀢𑀩𑁆𑀩𑀸 𑀳𑁄𑀦𑁆𑀢𑀺.

𑀇𑀘𑁆𑀘𑁂𑀢𑀁 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀅𑀦𑁂𑀓𑀓𑀼𑀡𑀧𑀧𑀭𑀺𑀬𑁄𑀲𑀸𑀦𑀁 𑀧𑀝𑀺𑀓𑁆𑀓𑀽𑀮𑀁 𑀆𑀳𑀸𑀭𑀳𑁂𑀢𑀼 𑀅𑀓𑁆𑀓𑀫𑀺𑀢𑀩𑁆𑀩𑀜𑁆𑀘 𑀤𑀝𑁆𑀞𑀩𑁆𑀩𑀜𑁆𑀘 𑀖𑀸𑀬𑀺𑀢𑀩𑁆𑀩𑀜𑁆𑀘 𑀳𑁄𑀢𑀺. 𑀅𑀳𑁄 𑀯𑀢 𑀪𑁄 𑀧𑀝𑀺𑀓𑁆𑀓𑀽𑀮𑁄 𑀆𑀳𑀸𑀭𑁄𑀢𑀺 𑀏𑀯𑀁 𑀕𑀫𑀦𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁨𑁯𑁬. 𑀓𑀣𑀁 𑀧𑀭𑀺𑀬𑁂𑀲𑀦𑀢𑁄? 𑀏𑀯𑀁 𑀕𑀫𑀦𑀧𑀝𑀺𑀓𑁆𑀓𑀽𑀮𑀁 𑀅𑀥𑀺𑀯𑀸𑀲𑁂𑀢𑁆𑀯𑀸𑀧𑀺 𑀕𑀸𑀫𑀁 𑀧𑀯𑀺𑀝𑁆𑀞𑁂𑀦 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑁂𑀦 𑀓𑀧𑀡𑀫𑀦𑀼𑀲𑁆𑀲𑁂𑀦 𑀯𑀺𑀬 𑀓𑀧𑀸𑀮𑀳𑀢𑁆𑀣𑁂𑀦 𑀖𑀭𑀧𑀝𑀺𑀧𑀸𑀝𑀺𑀬𑀸 𑀕𑀸𑀫𑀯𑀻𑀣𑀻𑀲𑀼 𑀘𑀭𑀺𑀢𑀩𑁆𑀩𑀁 𑀳𑁄𑀢𑀺. 𑀬𑀢𑁆𑀣 𑀯𑀲𑁆𑀲𑀓𑀸𑀮𑁂 𑀅𑀓𑁆𑀓𑀦𑁆𑀢𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀬𑀸𑀯 𑀧𑀺𑀡𑁆𑀟𑀺𑀓𑀫𑀁𑀲𑀸𑀧𑀺 𑀉𑀤𑀓𑀘𑀺𑀓𑁆𑀔𑀮𑁆𑀮𑁂 𑀧𑀸𑀤𑀸 𑀧𑀯𑀺𑀲𑀦𑁆𑀢𑀺, 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑀩𑁆𑀩𑀁 𑀳𑁄𑀢𑀺, 𑀏𑀓𑁂𑀦 𑀘𑀻𑀯𑀭𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀁. 𑀕𑀺𑀫𑁆𑀳𑀓𑀸𑀮𑁂 𑀯𑀸𑀢𑀯𑁂𑀕𑁂𑀦 𑀲𑀫𑀼𑀝𑁆𑀞𑀺𑀢𑁂𑀳𑀺 𑀧𑀁𑀲𑀼𑀢𑀺𑀡𑀭𑀚𑁂𑀳𑀺 𑀑𑀓𑀺𑀡𑁆𑀡𑀲𑀭𑀻𑀭𑁂𑀦 𑀘𑀭𑀺𑀢𑀩𑁆𑀩𑀁. 𑀢𑀁 𑀢𑀁 𑀕𑁂𑀳𑀤𑁆𑀯𑀸𑀭𑀁 𑀧𑀢𑁆𑀯𑀸 𑀫𑀘𑁆𑀙𑀥𑁄𑀯𑀦𑀫𑀁𑀲𑀥𑁄𑀯𑀦𑀢𑀡𑁆𑀟𑀼𑀮𑀥𑁄𑀯𑀦𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀲𑀼𑀦𑀔𑀲𑀽𑀓𑀭𑀯𑀘𑁆𑀘𑀸𑀤𑀻𑀳𑀺 𑀲𑀫𑁆𑀫𑀺𑀲𑁆𑀲𑀸𑀦𑀺 𑀓𑀺𑀫𑀺𑀓𑀼𑀮𑀸𑀓𑀼𑀮𑀸𑀦𑀺 𑀦𑀻𑀮𑀫𑀓𑁆𑀔𑀺𑀓𑀧𑀭𑀺𑀓𑀺𑀡𑁆𑀡𑀸𑀦𑀺 𑀑𑀴𑀺𑀕𑀮𑁆𑀮𑀸𑀦𑀺 𑀘𑁂𑀯 𑀘𑀦𑁆𑀤𑀦𑀺𑀓𑀝𑁆𑀞𑀸𑀦𑀸𑀦𑀺 𑀘 𑀤𑀝𑁆𑀞𑀩𑁆𑀩𑀸𑀦𑀺 𑀳𑁄𑀦𑁆𑀢𑀺 𑀅𑀓𑁆𑀓𑀫𑀺𑀢𑀩𑁆𑀩𑀸𑀦𑀺𑀧𑀺. 𑀬𑀢𑁄 𑀢𑀸 𑀫𑀓𑁆𑀔𑀺𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑀫𑁆𑀧𑀺 𑀧𑀢𑁆𑀢𑁂𑀧𑀺 𑀲𑀻𑀲𑁂𑀧𑀺 𑀦𑀺𑀮𑀻𑀬𑀦𑁆𑀢𑀺.

𑀖𑀭𑀁 𑀧𑀯𑀺𑀝𑁆𑀞𑀲𑁆𑀲𑀸𑀧𑀺 𑀓𑁂𑀘𑀺 𑀤𑁂𑀦𑁆𑀢𑀺, 𑀓𑁂𑀘𑀺 𑀦 𑀤𑁂𑀦𑁆𑀢𑀺. 𑀤𑀤𑀫𑀸𑀦𑀸𑀧𑀺 𑀏𑀓𑀘𑁆𑀘𑁂 𑀳𑀺𑀬𑁆𑀬𑁄 𑀧𑀓𑁆𑀓𑀪𑀢𑁆𑀢𑀫𑁆𑀧𑀺 𑀧𑀼𑀭𑀸𑀡𑀔𑀚𑁆𑀚𑀓𑀫𑁆𑀧𑀺 𑀧𑀽𑀢𑀺𑀓𑀼𑀫𑁆𑀫𑀸𑀲𑀧𑀽𑀧𑀸𑀤𑀻𑀦𑀺𑀧𑀺 𑀤𑀤𑀦𑁆𑀢𑀺. 𑀅𑀤𑀤𑀫𑀸𑀦𑀸𑀧𑀺 𑀓𑁂𑀘𑀺𑀤𑁂𑀯 ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂’’𑀢𑀺 𑀯𑀤𑀦𑁆𑀢𑀺, 𑀓𑁂𑀘𑀺 𑀧𑀦 𑀅𑀧𑀲𑁆𑀲𑀫𑀸𑀦𑀸 𑀯𑀺𑀬 𑀢𑀼𑀡𑁆𑀳𑀻 𑀳𑁄𑀦𑁆𑀢𑀺, 𑀓𑁂𑀘𑀺 𑀅𑀜𑁆𑀜𑁂𑀦 𑀫𑀼𑀔𑀁 𑀓𑀭𑁄𑀦𑁆𑀢𑀺, 𑀓𑁂𑀘𑀺 ‘‘𑀕𑀘𑁆𑀙, 𑀭𑁂 𑀫𑀼𑀡𑁆𑀟𑀓𑀸’’𑀢𑀺𑀆𑀤𑀻𑀳𑀺 𑀨𑀭𑀼𑀲𑀯𑀸𑀘𑀸𑀳𑀺 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀏𑀯𑀁 𑀓𑀧𑀡𑀫𑀦𑀼𑀲𑁆𑀲𑁂𑀦 𑀯𑀺𑀬 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀦𑁆𑀢𑀺.

𑀇𑀘𑁆𑀘𑁂𑀢𑀁 𑀕𑀸𑀫𑀧𑁆𑀧𑀯𑁂𑀲𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀺𑀓𑁆𑀔𑀫𑀦𑀸 𑀉𑀤𑀓𑀘𑀺𑀓𑁆𑀔𑀮𑁆𑀮𑀸𑀤𑀺𑀧𑀝𑀺𑀓𑁆𑀓𑀽𑀮𑀁 𑀆𑀳𑀸𑀭𑀳𑁂𑀢𑀼 𑀅𑀓𑁆𑀓𑀫𑀺𑀢𑀩𑁆𑀩𑀜𑁆𑀘𑁂𑀯 𑀤𑀝𑁆𑀞𑀩𑁆𑀩𑀜𑁆𑀘 𑀅𑀥𑀺𑀯𑀸𑀲𑁂𑀢𑀩𑁆𑀩𑀜𑁆𑀘 𑀳𑁄𑀢𑀺. 𑀅𑀳𑁄 𑀯𑀢 𑀪𑁄 𑀧𑀝𑀺𑀓𑁆𑀓𑀽𑀮𑁄 𑀆𑀳𑀸𑀭𑁄𑀢𑀺 𑀏𑀯𑀁 𑀧𑀭𑀺𑀬𑁂𑀲𑀦𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁨𑁯𑁭. 𑀓𑀣𑀁 𑀧𑀭𑀺𑀪𑁄𑀕𑀢𑁄? 𑀏𑀯𑀁 𑀧𑀭𑀺𑀬𑀺𑀝𑁆𑀞𑀸𑀳𑀸𑀭𑁂𑀦 𑀧𑀦 𑀩𑀳𑀺𑀕𑀸𑀫𑁂 𑀨𑀸𑀲𑀼𑀓𑀝𑁆𑀞𑀸𑀦𑁂 𑀲𑀼𑀔𑀦𑀺𑀲𑀺𑀦𑁆𑀦𑁂𑀦 𑀬𑀸𑀯 𑀢𑀢𑁆𑀣 𑀳𑀢𑁆𑀣𑀁 𑀦 𑀑𑀢𑀸𑀭𑁂𑀢𑀺, 𑀢𑀸𑀯 𑀢𑀣𑀸𑀭𑀽𑀧𑀁 𑀕𑀭𑀼𑀝𑁆𑀞𑀸𑀦𑀺𑀬𑀁 𑀪𑀺𑀓𑁆𑀔𑀼𑀁 𑀯𑀸 𑀮𑀚𑁆𑀚𑀺𑀫𑀦𑀼𑀲𑁆𑀲𑀁 𑀯𑀸 𑀤𑀺𑀲𑁆𑀯𑀸 𑀦𑀺𑀫𑀦𑁆𑀢𑁂𑀢𑀼𑀫𑁆𑀧𑀺 𑀲𑀓𑁆𑀓𑀸 𑀳𑁄𑀢𑀺. 𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸𑀬 𑀧𑀦𑁂𑀢𑁆𑀣 𑀳𑀢𑁆𑀣𑁂 𑀑𑀢𑀸𑀭𑀺𑀢𑀫𑀢𑁆𑀢𑁂 ‘‘𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑁂𑀦 𑀮𑀚𑁆𑀚𑀺𑀢𑀩𑁆𑀩𑀁 𑀳𑁄𑀢𑀺. 𑀳𑀢𑁆𑀣𑀁 𑀧𑀦 𑀑𑀢𑀸𑀭𑁂𑀢𑁆𑀯𑀸 𑀫𑀤𑁆𑀤𑀦𑁆𑀢𑀲𑁆𑀲 𑀧𑀜𑁆𑀘𑀗𑁆𑀕𑀼𑀮𑀺𑀅𑀦𑀼𑀲𑀸𑀭𑁂𑀦 𑀲𑁂𑀤𑁄 𑀧𑀕𑁆𑀖𑀭𑀫𑀸𑀦𑁄 𑀲𑀼𑀓𑁆𑀔𑀣𑀤𑁆𑀥𑀪𑀢𑁆𑀢𑀫𑁆𑀧𑀺 𑀢𑁂𑀫𑁂𑀦𑁆𑀢𑁄 𑀫𑀼𑀤𑀼𑀁 𑀓𑀭𑁄𑀢𑀺.

𑀅𑀣 𑀢𑀲𑁆𑀫𑀺𑀁 𑀧𑀭𑀺𑀫𑀤𑁆𑀤𑀦𑀫𑀢𑁆𑀢𑁂𑀦𑀸𑀧𑀺 𑀲𑀫𑁆𑀪𑀺𑀦𑁆𑀦𑀲𑁄𑀪𑁂 𑀆𑀮𑁄𑀧𑀁 𑀓𑀢𑁆𑀯𑀸 𑀫𑀼𑀔𑁂 𑀞𑀧𑀺𑀢𑁂 𑀳𑁂𑀝𑁆𑀞𑀺𑀫𑀤𑀦𑁆𑀢𑀸 𑀉𑀤𑀼𑀓𑁆𑀔𑀮𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺, 𑀉𑀧𑀭𑀺𑀫𑀸 𑀫𑀼𑀲𑀮𑀓𑀺𑀘𑁆𑀘𑀁, 𑀚𑀺𑀯𑁆𑀳𑀸 𑀳𑀢𑁆𑀣𑀓𑀺𑀘𑁆𑀘𑀁. 𑀢𑀁 𑀢𑀢𑁆𑀣 𑀲𑀼𑀯𑀸𑀦𑀤𑁄𑀡𑀺𑀬𑀁 𑀲𑀼𑀯𑀸𑀦𑀧𑀺𑀡𑁆𑀟𑀫𑀺𑀯 𑀤𑀦𑁆𑀢𑀫𑀼𑀲𑀮𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀚𑀺𑀯𑁆𑀳𑀸𑀬 𑀲𑀫𑁆𑀧𑀭𑀺𑀯𑀢𑁆𑀢𑀺𑀬𑀫𑀸𑀦𑀁 𑀚𑀺𑀯𑁆𑀳𑀸𑀕𑁆𑀕𑁂 𑀢𑀦𑀼𑀧𑀲𑀦𑁆𑀦𑀔𑁂𑀴𑁄 𑀫𑀓𑁆𑀔𑁂𑀢𑀺, 𑀯𑁂𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀩𑀳𑀮𑀔𑁂𑀴𑁄 𑀫𑀓𑁆𑀔𑁂𑀢𑀺, 𑀤𑀦𑁆𑀢𑀓𑀝𑁆𑀞𑁂𑀦 𑀅𑀲𑀫𑁆𑀧𑀢𑁆𑀢𑀝𑁆𑀞𑀸𑀦𑁂 𑀤𑀦𑁆𑀢𑀕𑀽𑀣𑀓𑁄 𑀫𑀓𑁆𑀔𑁂𑀢𑀺. 𑀲𑁄 𑀏𑀯𑀁 𑀯𑀺𑀘𑀼𑀡𑁆𑀡𑀺𑀢𑀫𑀓𑁆𑀔𑀺𑀢𑁄 𑀢𑀗𑁆𑀔𑀡𑀜𑁆𑀜𑁂𑀯 𑀅𑀦𑁆𑀢𑀭𑀳𑀺𑀢𑀯𑀡𑁆𑀡𑀕𑀦𑁆𑀥𑀲𑀗𑁆𑀔𑀸𑀭𑀯𑀺𑀲𑁂𑀲𑁄 𑀲𑀼𑀯𑀸𑀦𑀤𑁄𑀡𑀺𑀬𑀁 𑀞𑀺𑀢𑀲𑀼𑀯𑀸𑀦𑀯𑀫𑀣𑀼 𑀯𑀺𑀬 𑀧𑀭𑀫𑀚𑁂𑀕𑀼𑀘𑁆𑀙𑀪𑀸𑀯𑀁 𑀉𑀧𑀕𑀘𑁆𑀙𑀢𑀺. 𑀏𑀯𑀭𑀽𑀧𑁄𑀧𑀺 𑀲𑀫𑀸𑀦𑁄 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀅𑀢𑀻𑀢𑀢𑁆𑀢𑀸 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑁄 𑀳𑁄𑀢𑀻𑀢𑀺 𑀏𑀯𑀁 𑀧𑀭𑀺𑀪𑁄𑀕𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁨𑁯𑁮. 𑀓𑀣𑀁 𑀆𑀲𑀬𑀢𑁄? 𑀏𑀯𑀁 𑀧𑀭𑀺𑀪𑁄𑀕𑀁 𑀉𑀧𑀕𑀢𑁄 𑀘 𑀧𑀦𑁂𑀲 𑀅𑀦𑁆𑀢𑁄 𑀧𑀯𑀺𑀲𑀫𑀸𑀦𑁄 𑀬𑀲𑁆𑀫𑀸 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀭𑀜𑁆𑀜𑁄𑀧𑀺 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀺𑀢𑁆𑀢𑀲𑁂𑀫𑁆𑀳𑀧𑀼𑀩𑁆𑀩𑀮𑁄𑀳𑀺𑀢𑀸𑀲𑀬𑁂𑀲𑀼 𑀘𑀢𑀽𑀲𑀼 𑀅𑀜𑁆𑀜𑀢𑀭𑁄 𑀆𑀲𑀬𑁄 𑀳𑁄𑀢𑀺𑀬𑁂𑀯. 𑀫𑀦𑁆𑀤𑀧𑀼𑀜𑁆𑀜𑀸𑀦𑀁 𑀧𑀦 𑀘𑀢𑁆𑀢𑀸𑀭𑁄 𑀆𑀲𑀬𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀬𑀲𑁆𑀲 𑀧𑀺𑀢𑁆𑀢𑀸𑀲𑀬𑁄 𑀅𑀥𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀩𑀳𑀮𑀫𑀥𑀼𑀓𑀢𑁂𑀮𑀫𑀓𑁆𑀔𑀺𑀢𑁄 𑀯𑀺𑀬 𑀧𑀭𑀫𑀚𑁂𑀕𑀼𑀘𑁆𑀙𑁄 𑀳𑁄𑀢𑀺. 𑀬𑀲𑁆𑀲 𑀲𑁂𑀫𑁆𑀳𑀸𑀲𑀬𑁄 𑀅𑀥𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀦𑀸𑀕𑀩𑀮𑀧𑀡𑁆𑀡𑀭𑀲𑀫𑀓𑁆𑀔𑀺𑀢𑁄 𑀯𑀺𑀬. 𑀬𑀲𑁆𑀲 𑀧𑀼𑀩𑁆𑀩𑀸𑀲𑀬𑁄 𑀅𑀥𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀧𑀽𑀢𑀺𑀢𑀓𑁆𑀓𑀫𑀓𑁆𑀔𑀺𑀢𑁄 𑀯𑀺𑀬. 𑀬𑀲𑁆𑀲 𑀮𑁄𑀳𑀺𑀢𑀸𑀲𑀬𑁄 𑀅𑀥𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀭𑀚𑀦𑀫𑀓𑁆𑀔𑀺𑀢𑁄 𑀯𑀺𑀬 𑀧𑀭𑀫𑀚𑁂𑀕𑀼𑀘𑁆𑀙𑁄 𑀳𑁄𑀢𑀻𑀢𑀺 𑀏𑀯𑀁 𑀆𑀲𑀬𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁨𑁯𑁯. 𑀓𑀣𑀁 𑀦𑀺𑀥𑀸𑀦𑀢𑁄? 𑀲𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀆𑀲𑀬𑁂𑀲𑀼 𑀅𑀜𑁆𑀜𑀢𑀭𑁂𑀦 𑀆𑀲𑀬𑁂𑀦 𑀫𑀓𑁆𑀔𑀺𑀢𑁄 𑀅𑀦𑁆𑀢𑁄𑀉𑀤𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑁂𑀯 𑀲𑀼𑀯𑀡𑁆𑀡𑀪𑀸𑀚𑀦𑁂 𑀦 𑀫𑀡𑀺𑀭𑀚𑀢𑀸𑀤𑀺𑀪𑀸𑀚𑀦𑁂𑀲𑀼 𑀦𑀺𑀥𑀸𑀦𑀁 𑀕𑀘𑁆𑀙𑀢𑀺. 𑀲𑀘𑁂 𑀧𑀦 𑀤𑀲𑀯𑀲𑁆𑀲𑀺𑀓𑁂𑀦 𑀅𑀚𑁆𑀛𑁄𑀳𑀭𑀺𑀬𑀢𑀺 𑀤𑀲 𑀯𑀲𑁆𑀲𑀸𑀦𑀺 𑀅𑀥𑁄𑀢𑀯𑀘𑁆𑀘𑀓𑀽𑀧𑀲𑀤𑀺𑀲𑁂 𑀑𑀓𑀸𑀲𑁂 𑀧𑀢𑀺𑀝𑁆𑀞𑀳𑀢𑀺. 𑀲𑀘𑁂 𑀯𑀻𑀲, 𑀢𑀺𑀁𑀲, 𑀘𑀢𑁆𑀢𑀸𑀮𑀻𑀲, 𑀧𑀜𑁆𑀜𑀸𑀲, 𑀲𑀝𑁆𑀞𑀺, 𑀲𑀢𑁆𑀢𑀢𑀺, 𑀅𑀲𑀻𑀢𑀺, 𑀦𑀯𑀼𑀢𑀺𑀯𑀲𑁆𑀲𑀺𑀓𑁂𑀦, 𑀲𑀘𑁂 𑀯𑀲𑁆𑀲𑀲𑀢𑀺𑀓𑁂𑀦 𑀅𑀚𑁆𑀛𑁄𑀳𑀭𑀺𑀬𑀢𑀺. 𑀯𑀲𑁆𑀲𑀲𑀢𑀁 𑀅𑀥𑁄𑀢𑀯𑀘𑁆𑀘𑀓𑀽𑀧𑀲𑀤𑀺𑀲𑁂 𑀑𑀓𑀸𑀲𑁂 𑀧𑀢𑀺𑀝𑁆𑀞𑀳𑀢𑀻𑀢𑀺 𑀏𑀯𑀁 𑀦𑀺𑀥𑀸𑀦𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁩𑁦𑁦. 𑀓𑀣𑀁 𑀅𑀧𑀭𑀺𑀧𑀓𑁆𑀓𑀢𑁄? 𑀲𑁄 𑀧𑀦𑀸𑀬𑀫𑀸𑀳𑀸𑀭𑁄 𑀏𑀯𑀭𑀽𑀧𑁂 𑀑𑀓𑀸𑀲𑁂 𑀦𑀺𑀥𑀸𑀦𑀫𑀼𑀧𑀕𑀢𑁄 𑀬𑀸𑀯 𑀅𑀧𑀭𑀺𑀧𑀓𑁆𑀓𑁄 𑀳𑁄𑀢𑀺, 𑀢𑀸𑀯 𑀢𑀲𑁆𑀫𑀺𑀜𑁆𑀜𑁂𑀯 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀧𑀭𑀫𑀦𑁆𑀥𑀓𑀸𑀭𑀢𑀺𑀫𑀺𑀲𑁂 𑀦𑀸𑀦𑀸𑀓𑀼𑀡𑀧𑀕𑀦𑁆𑀥𑀯𑀸𑀲𑀺𑀢𑀧𑀯𑀦𑀯𑀺𑀘𑀭𑀺𑀢𑁂 𑀅𑀢𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑁂 𑀧𑀤𑁂𑀲𑁂 𑀬𑀣𑀸 𑀦𑀸𑀫 𑀦𑀺𑀤𑀸𑀖𑁂 𑀅𑀓𑀸𑀮𑀫𑁂𑀖𑁂𑀦 𑀅𑀪𑀺𑀯𑀼𑀝𑁆𑀞𑀫𑁆𑀳𑀺 𑀘𑀡𑁆𑀟𑀸𑀮𑀕𑀸𑀫𑀤𑁆𑀯𑀸𑀭𑀆𑀯𑀸𑀝𑁂 𑀧𑀢𑀺𑀢𑀸𑀦𑀺 𑀢𑀺𑀡𑀧𑀡𑁆𑀡𑀓𑀺𑀮𑀜𑁆𑀚𑀔𑀡𑁆𑀟𑀅𑀳𑀺𑀓𑀼𑀓𑁆𑀓𑀼𑀭𑀫𑀦𑀼𑀲𑁆𑀲𑀓𑀼𑀡𑀧𑀸𑀤𑀻𑀦𑀺 𑀲𑀽𑀭𑀺𑀬𑀸𑀢𑀧𑁂𑀦 𑀲𑀦𑁆𑀢𑀢𑁆𑀢𑀸𑀦𑀺 𑀨𑁂𑀡𑀧𑀼𑀧𑁆𑀨𑀼𑀴𑀓𑀸𑀘𑀺𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀺, 𑀏𑀯𑀫𑁂𑀯 𑀢𑀁𑀤𑀺𑀯𑀲𑀫𑁆𑀧𑀺 𑀳𑀺𑀬𑁆𑀬𑁄𑀧𑀺 𑀢𑀢𑁄 𑀧𑀼𑀭𑀺𑀫𑁂 𑀤𑀺𑀯𑀲𑁂𑀧𑀺 𑀅𑀚𑁆𑀛𑁄𑀳𑀢𑁄 𑀲𑀩𑁆𑀩𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀲𑁂𑀫𑁆𑀳𑀧𑀝𑀮𑀧𑀭𑀺𑀬𑁄𑀦𑀤𑁆𑀥𑁄 𑀓𑀸𑀬𑀕𑁆𑀕𑀺𑀲𑀦𑁆𑀢𑀸𑀧𑀓𑀼𑀣𑀺𑀢𑀓𑀼𑀣𑀦𑀲𑀜𑁆𑀚𑀸𑀢𑀨𑁂𑀡𑀧𑀼𑀧𑁆𑀨𑀼𑀴𑀓𑀸𑀘𑀺𑀢𑁄 𑀧𑀭𑀫𑀚𑁂𑀕𑀼𑀘𑁆𑀙𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀏𑀯𑀁 𑀅𑀧𑀭𑀺𑀧𑀓𑁆𑀓𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁩𑁦𑁧. 𑀓𑀣𑀁 𑀧𑀭𑀺𑀧𑀓𑁆𑀓𑀢𑁄? 𑀲𑁄 𑀢𑀢𑁆𑀢𑀓𑀸𑀬𑀕𑁆𑀕𑀺𑀦𑀸 𑀧𑀭𑀺𑀧𑀓𑁆𑀓𑁄 𑀲𑀫𑀸𑀦𑁄 𑀦 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀥𑀸𑀢𑀼𑀬𑁄 𑀯𑀺𑀬 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀪𑀸𑀯𑀁 𑀉𑀧𑀕𑀘𑁆𑀙𑀢𑀺. 𑀨𑁂𑀡𑀧𑀼𑀧𑁆𑀨𑀼𑀴𑀓𑁂 𑀧𑀦 𑀫𑀼𑀜𑁆𑀘𑀦𑁆𑀢𑁄 𑀲𑀡𑁆𑀳𑀓𑀭𑀡𑀺𑀬𑀁 𑀧𑀺𑀲𑀺𑀢𑁆𑀯𑀸 𑀦𑀸𑀴𑀺𑀓𑁂 𑀧𑀓𑁆𑀔𑀺𑀢𑁆𑀢𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀯𑀺𑀬 𑀓𑀭𑀻𑀲𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀧𑀓𑁆𑀓𑀸𑀲𑀬𑀁, 𑀫𑀼𑀢𑁆𑀢𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀫𑀼𑀢𑁆𑀢𑀯𑀢𑁆𑀣𑀺𑀜𑁆𑀘 𑀧𑀽𑀭𑁂𑀢𑀻𑀢𑀺 𑀏𑀯𑀁 𑀧𑀭𑀺𑀧𑀓𑁆𑀓𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁩𑁦𑁨. 𑀓𑀣𑀁 𑀨𑀮𑀢𑁄? 𑀲𑀫𑁆𑀫𑀸 𑀧𑀭𑀺𑀧𑀘𑁆𑀘𑀫𑀸𑀦𑁄 𑀘 𑀧𑀦𑀸𑀬𑀁 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀤𑀻𑀦𑀺 𑀦𑀸𑀦𑀸𑀓𑀼𑀡𑀧𑀸𑀦𑀺 𑀦𑀺𑀧𑁆𑀨𑀸𑀤𑁂𑀢𑀺 𑀅𑀲𑀫𑁆𑀫𑀸𑀧𑀭𑀺𑀧𑀘𑁆𑀘𑀫𑀸𑀦𑁄 𑀤𑀤𑁆𑀤𑀼𑀓𑀡𑁆𑀟𑀼𑀓𑀘𑁆𑀙𑀼𑀓𑀼𑀝𑁆𑀞𑀓𑀺𑀮𑀸𑀲𑀲𑁄𑀲𑀓𑀸𑀲𑀸𑀢𑀺𑀲𑀸𑀭𑀧𑁆𑀧𑀪𑀼𑀢𑀻𑀦𑀺 𑀭𑁄𑀕𑀲𑀢𑀸𑀦𑀺, 𑀇𑀤𑀫𑀲𑁆𑀲 𑀨𑀮𑀦𑁆𑀢𑀺 𑀏𑀯𑀁 𑀨𑀮𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁩𑁦𑁩. 𑀓𑀣𑀁 𑀦𑀺𑀲𑁆𑀲𑀦𑁆𑀤𑀢𑁄? 𑀅𑀚𑁆𑀛𑁄𑀳𑀭𑀺𑀬𑀫𑀸𑀦𑁄 𑀘𑁂𑀲 𑀏𑀓𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑁆𑀲𑀦𑁆𑀤𑀫𑀸𑀦𑁄 𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄 𑀓𑀡𑁆𑀡𑀫𑁆𑀳𑀸 𑀓𑀡𑁆𑀡𑀕𑀽𑀣𑀓𑁄𑀢𑀺𑀆𑀤𑀺𑀦𑀸 𑀧𑀓𑀸𑀭𑁂𑀦 𑀅𑀦𑁂𑀓𑁂𑀳𑀺 𑀤𑁆𑀯𑀸𑀭𑁂𑀳𑀺 𑀦𑀺𑀲𑁆𑀲𑀦𑁆𑀤𑀢𑀺. 𑀅𑀚𑁆𑀛𑁄𑀳𑀭𑀡𑀲𑀫𑀬𑁂 𑀘𑁂𑀲 𑀫𑀳𑀸𑀧𑀭𑀺𑀯𑀸𑀭𑁂𑀦𑀸𑀧𑀺 𑀅𑀚𑁆𑀛𑁄𑀳𑀭𑀺𑀬𑀢𑀺. 𑀦𑀺𑀲𑁆𑀲𑀦𑁆𑀤𑀦𑀲𑀫𑀬𑁂 𑀧𑀦 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀪𑀸𑀯𑀁 𑀉𑀧𑀕𑀢𑁄 𑀏𑀓𑀓𑁂𑀦𑁂𑀯 𑀦𑀻𑀳𑀭𑀺𑀬𑀢𑀺. 𑀧𑀞𑀫𑀤𑀺𑀯𑀲𑁂 𑀘 𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀳𑀝𑁆𑀞𑀧𑀳𑀝𑁆𑀞𑁄𑀧𑀺 𑀳𑁄𑀢𑀺 𑀉𑀤𑀕𑁆𑀕𑀼𑀤𑀕𑁆𑀕𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄. 𑀤𑀼𑀢𑀺𑀬𑀤𑀺𑀯𑀲𑁂 𑀦𑀺𑀲𑁆𑀲𑀦𑁆𑀤𑁂𑀦𑁆𑀢𑁄 𑀧𑀺𑀳𑀺𑀢𑀦𑀸𑀲𑀺𑀓𑁄 𑀳𑁄𑀢𑀺 𑀯𑀺𑀓𑀼𑀡𑀺𑀢𑀫𑀼𑀔𑁄 𑀚𑁂𑀕𑀼𑀘𑁆𑀙𑀻 𑀫𑀗𑁆𑀓𑀼𑀪𑀽𑀢𑁄. 𑀧𑀞𑀫𑀤𑀺𑀯𑀲𑁂 𑀘 𑀦𑀁 𑀭𑀢𑁆𑀢𑁄 𑀕𑀺𑀤𑁆𑀥𑁄 𑀕𑀥𑀺𑀢𑁄 𑀫𑀼𑀘𑁆𑀙𑀺𑀢𑁄𑀧𑀺 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀯𑀺𑀭𑀢𑁆𑀢𑁄 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀦𑀻𑀳𑀭𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀪𑁄𑀚𑀦𑀜𑁆𑀘 𑀫𑀳𑀸𑀭𑀳𑀁;

𑀏𑀓𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸, 𑀦𑀯𑀤𑁆𑀯𑀸𑀭𑁂𑀳𑀺 𑀲𑀦𑁆𑀤𑀢𑀺.

‘‘𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀪𑁄𑀚𑀦𑀜𑁆𑀘 𑀫𑀳𑀸𑀭𑀳𑀁;

𑀪𑀼𑀜𑁆𑀚𑀢𑀺 𑀲𑀧𑀭𑀺𑀯𑀸𑀭𑁄, 𑀦𑀺𑀓𑁆𑀔𑀸𑀫𑁂𑀦𑁆𑀢𑁄 𑀦𑀺𑀮𑀻𑀬𑀢𑀺.

‘‘𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀪𑁄𑀚𑀦𑀜𑁆𑀘 𑀫𑀳𑀸𑀭𑀳𑀁;

𑀪𑀼𑀜𑁆𑀚𑀢𑀺 𑀅𑀪𑀺𑀦𑀦𑁆𑀤𑀦𑁆𑀢𑁄, 𑀦𑀺𑀓𑁆𑀔𑀸𑀫𑁂𑀦𑁆𑀢𑁄 𑀚𑀺𑀕𑀼𑀘𑁆𑀙𑀢𑀺.

‘‘𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀪𑁄𑀚𑀦𑀜𑁆𑀘 𑀫𑀳𑀸𑀭𑀳𑀁;

𑀏𑀓𑀭𑀢𑁆𑀢𑀺𑀧𑀭𑀺𑀯𑀸𑀲𑀸, 𑀲𑀩𑁆𑀩𑀁 𑀪𑀯𑀢𑀺 𑀧𑀽𑀢𑀺𑀓’’𑀦𑁆𑀢𑀺.

𑀏𑀯𑀁 𑀦𑀺𑀲𑁆𑀲𑀦𑁆𑀤𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁩𑁦𑁪. 𑀓𑀣𑀁 𑀲𑀫𑁆𑀫𑀓𑁆𑀔𑀦𑀢𑁄? 𑀧𑀭𑀺𑀪𑁄𑀕𑀓𑀸𑀮𑁂𑀧𑀺 𑀘𑁂𑀲 𑀳𑀢𑁆𑀣𑀑𑀝𑁆𑀞𑀚𑀺𑀯𑁆𑀳𑀸𑀢𑀸𑀮𑀽𑀦𑀺 𑀲𑀫𑁆𑀫𑀓𑁆𑀔𑁂𑀢𑀺. 𑀢𑀸𑀦𑀺 𑀢𑁂𑀦 𑀲𑀫𑁆𑀫𑀓𑁆𑀔𑀺𑀢𑀢𑁆𑀢𑀸 𑀧𑀝𑀺𑀓𑁆𑀓𑀽𑀮𑀸𑀦𑀺 𑀳𑁄𑀦𑁆𑀢𑀺, 𑀬𑀸𑀦𑀺 𑀥𑁄𑀢𑀸𑀦𑀺𑀧𑀺 𑀕𑀦𑁆𑀥𑀳𑀭𑀡𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀥𑁄𑀯𑀺𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀧𑀭𑀺𑀪𑀼𑀢𑁆𑀢𑁄 𑀲𑀫𑀸𑀦𑁄 𑀬𑀣𑀸 𑀦𑀸𑀫 𑀑𑀤𑀦𑁂 𑀧𑀘𑁆𑀘𑀫𑀸𑀦𑁂 𑀣𑀼𑀲𑀓𑀡𑀓𑀼𑀡𑁆𑀟𑀓𑀸𑀤𑀻𑀦𑀺 𑀉𑀢𑁆𑀢𑀭𑀺𑀢𑁆𑀯𑀸 𑀉𑀓𑁆𑀔𑀮𑀺𑀫𑀼𑀔𑀯𑀝𑁆𑀝𑀺𑀧𑀺𑀥𑀸𑀦𑀺𑀬𑁄 𑀫𑀓𑁆𑀔𑀦𑁆𑀢𑀺, 𑀏𑀯𑀫𑁂𑀯 𑀲𑀓𑀮𑀲𑀭𑀻𑀭𑀸𑀦𑀼𑀕𑀢𑁂𑀦 𑀓𑀸𑀬𑀕𑁆𑀕𑀺𑀦𑀸 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀺𑀢𑁆𑀯𑀸 𑀉𑀢𑁆𑀢𑀭𑀫𑀸𑀦𑁄 𑀤𑀦𑁆𑀢𑁂 𑀤𑀦𑁆𑀢𑀫𑀮𑀪𑀸𑀯𑁂𑀦 𑀲𑀫𑁆𑀫𑀓𑁆𑀔𑁂𑀢𑀺. 𑀚𑀺𑀯𑁆𑀳𑀸𑀢𑀸𑀮𑀼𑀧𑁆𑀧𑀪𑀼𑀢𑀻𑀦𑀺 𑀔𑁂𑀴𑀲𑁂𑀫𑁆𑀳𑀸𑀤𑀺𑀪𑀸𑀯𑁂𑀦, 𑀅𑀓𑁆𑀔𑀺𑀓𑀡𑁆𑀡𑀦𑀸𑀲𑀅𑀥𑁄𑀫𑀕𑁆𑀕𑀸𑀤𑀺𑀓𑁂 𑀅𑀓𑁆𑀔𑀺𑀕𑀽𑀣𑀓𑀓𑀡𑁆𑀡𑀕𑀽𑀣𑀓𑀲𑀺𑀗𑁆𑀖𑀸𑀡𑀺𑀓𑀸𑀫𑀼𑀢𑁆𑀢𑀓𑀭𑀻𑀲𑀸𑀤𑀺𑀪𑀸𑀯𑁂𑀦 𑀲𑀫𑁆𑀫𑀓𑁆𑀔𑁂𑀢𑀺. 𑀬𑁂𑀦 𑀲𑀫𑁆𑀫𑀓𑁆𑀔𑀺𑀢𑀸𑀦𑀺 𑀇𑀫𑀸𑀦𑀺 𑀤𑁆𑀯𑀸𑀭𑀸𑀦𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀥𑁄𑀯𑀺𑀬𑀫𑀸𑀦𑀸𑀦𑀺𑀧𑀺 𑀦𑁂𑀯 𑀲𑀼𑀘𑀻𑀦𑀺, 𑀦 𑀫𑀦𑁄𑀭𑀫𑀸𑀦𑀺 𑀳𑁄𑀦𑁆𑀢𑀺. 𑀬𑁂𑀲𑀼 𑀏𑀓𑀘𑁆𑀘𑀁 𑀥𑁄𑀯𑀺𑀢𑁆𑀯𑀸 𑀳𑀢𑁆𑀣𑁄 𑀧𑀼𑀦 𑀉𑀤𑀓𑁂𑀦 𑀥𑁄𑀯𑀺𑀢𑀩𑁆𑀩𑁄 𑀳𑁄𑀢𑀺. 𑀏𑀓𑀘𑁆𑀘𑀁 𑀥𑁄𑀯𑀺𑀢𑁆𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀕𑁄𑀫𑀬𑁂𑀦𑀧𑀺 𑀫𑀢𑁆𑀢𑀺𑀓𑀸𑀬𑀧𑀺 𑀕𑀦𑁆𑀥𑀘𑀼𑀡𑁆𑀡𑁂𑀦𑀧𑀺 𑀥𑁄𑀯𑀢𑁄 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀺𑀕𑀘𑁆𑀙𑀢𑀻𑀢𑀺 𑀏𑀯𑀁 𑀲𑀫𑁆𑀫𑀓𑁆𑀔𑀦𑀢𑁄 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑁩𑁦𑁫. 𑀢𑀲𑁆𑀲𑁂𑀯𑀁 𑀤𑀲𑀳𑀸𑀓𑀸𑀭𑁂𑀳𑀺 𑀧𑀝𑀺𑀓𑁆𑀓𑀽𑀮𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀭𑁄𑀦𑁆𑀢𑀲𑁆𑀲 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀯𑀲𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲𑁂𑀯𑀁 𑀓𑀭𑁄𑀢𑁄 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺. 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀲𑀪𑀸𑀯𑀥𑀫𑁆𑀫𑀢𑀸𑀬 𑀕𑀫𑁆𑀪𑀻𑀭𑀢𑁆𑀢𑀸 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑁂𑀦 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀧𑀦𑁂𑀢𑁆𑀣 𑀲𑀜𑁆𑀜𑀸 𑀧𑀸𑀓𑀝𑀸 𑀳𑁄𑀢𑀺. 𑀢𑀲𑁆𑀫𑀸 𑀇𑀫𑀁 𑀓𑀫𑁆𑀫𑀝𑁆𑀞𑀸𑀦𑀁 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸 𑀇𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀇𑀫𑀜𑁆𑀘 𑀧𑀦 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀲𑀢𑀡𑁆𑀳𑀸𑀬 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀝𑁆𑀝𑀢𑀺. 𑀲𑁄 𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁄 𑀯𑀺𑀬 𑀧𑀼𑀢𑁆𑀢𑀫𑀁𑀲𑀁 𑀯𑀺𑀕𑀢𑀫𑀤𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑀬𑀸𑀯𑀤𑁂𑀯 𑀤𑀼𑀓𑁆𑀔𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀸𑀬. 𑀅𑀣𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀭𑀺𑀜𑁆𑀜𑀸𑀫𑀼𑀔𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺. 𑀲𑁄 𑀧𑀜𑁆𑀘𑀓𑀸𑀫𑀕𑀼𑀡𑀧𑀭𑀺𑀜𑁆𑀜𑀸𑀫𑀼𑀔𑁂𑀦 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀺. 𑀅𑀧𑀭𑀺𑀧𑀓𑁆𑀓𑀸𑀤𑀺𑀧𑀝𑀺𑀓𑁆𑀓𑀽𑀮𑀪𑀸𑀯𑀯𑀲𑁂𑀦 𑀘𑀲𑁆𑀲 𑀓𑀸𑀬𑀕𑀢𑀸𑀲𑀢𑀺𑀪𑀸𑀯𑀦𑀸𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀅𑀲𑀼𑀪𑀲𑀜𑁆𑀜𑀸𑀬 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀇𑀫𑀁 𑀧𑀦 𑀧𑀝𑀺𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀫𑀢𑀧𑀭𑀺𑀬𑁄𑀲𑀸𑀦𑀢𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀲𑀼𑀕𑀢𑀺𑀧𑀭𑀸𑀬𑀦𑁄 𑀳𑁄𑀢𑀻𑀢𑀺.

𑀅𑀬𑀁 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀪𑀸𑀯𑀦𑀸𑀬 𑀯𑀺𑀢𑁆𑀣𑀸𑀭𑀓𑀣𑀸.

𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀪𑀸𑀯𑀦𑀸

𑁩𑁦𑁬. 𑀇𑀤𑀸𑀦𑀺 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀦𑀦𑁆𑀢𑀭𑀁 𑀏𑀓𑀁 𑀯𑀯𑀢𑁆𑀣𑀸𑀦𑀦𑁆𑀢𑀺 𑀏𑀯𑀁 𑀉𑀤𑁆𑀤𑀺𑀝𑁆𑀞𑀲𑁆𑀲 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀲𑁆𑀲 𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀢𑁆𑀣 𑀯𑀯𑀢𑁆𑀣𑀸𑀦𑀦𑁆𑀢𑀺 𑀲𑀪𑀸𑀯𑀽𑀧𑀮𑀓𑁆𑀔𑀡𑀯𑀲𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀁, 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀯𑀯𑀢𑁆𑀣𑀸𑀦𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁. 𑀥𑀸𑀢𑀼𑀫𑀦𑀲𑀺𑀓𑀸𑀭𑁄, 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀢𑀬𑀺𑀤𑀁 𑀤𑁆𑀯𑀺𑀥𑀸 𑀆𑀕𑀢𑀁 𑀲𑀗𑁆𑀔𑁂𑀧𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘. 𑀲𑀗𑁆𑀔𑁂𑀧𑀢𑁄 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 𑀆𑀕𑀢𑀁. 𑀯𑀺𑀢𑁆𑀣𑀸𑀭𑀢𑁄 𑀫𑀳𑀸𑀳𑀢𑁆𑀣𑀺𑀧𑀤𑀽𑀧𑀫𑁂 𑀭𑀸𑀳𑀼𑀮𑁄𑀯𑀸𑀤𑁂 𑀥𑀸𑀢𑀼𑀯𑀺𑀪𑀗𑁆𑀕𑁂 𑀘. 𑀢𑀜𑁆𑀳𑀺 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑁄 𑀕𑁄𑀖𑀸𑀢𑀓𑁄 𑀯𑀸 𑀕𑁄𑀖𑀸𑀢𑀓𑀦𑁆𑀢𑁂𑀯𑀸𑀲𑀻 𑀯𑀸 𑀕𑀸𑀯𑀺𑀁 𑀯𑀥𑀺𑀢𑁆𑀯𑀸 𑀘𑀢𑀼𑀫𑀳𑀸𑀧𑀣𑁂 𑀩𑀺𑀮𑀲𑁄 𑀯𑀺𑀪𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀲𑁆𑀲, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀬𑀣𑀸𑀞𑀺𑀢𑀁 𑀬𑀣𑀸𑀧𑀡𑀺𑀳𑀺𑀢𑀁 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’’𑀢𑀺 𑁋

𑀏𑀯𑀁 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀯𑀲𑁂𑀦 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 (𑀤𑀻. 𑀦𑀺. 𑁨.𑁩𑁭𑁮) 𑀲𑀗𑁆𑀔𑁂𑀧𑀢𑁄 𑀆𑀕𑀢𑀁.

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀙𑁂𑀓𑁄 𑀕𑁄𑀖𑀸𑀢𑀓𑁄 𑀯𑀸 𑀢𑀲𑁆𑀲𑁂𑀯 𑀯𑀸 𑀪𑀢𑁆𑀢𑀯𑁂𑀢𑀦𑀪𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀸𑀯𑀺𑀁 𑀯𑀥𑀺𑀢𑁆𑀯𑀸 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀕𑀢𑀸𑀦𑀁 𑀫𑀳𑀸𑀧𑀣𑀸𑀦𑀁 𑀯𑁂𑀫𑀚𑁆𑀛𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀘𑀢𑀼𑀫𑀳𑀸𑀧𑀣𑁂 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀲𑁆𑀲, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀞𑀺𑀢𑀢𑁆𑀢𑀸 𑀬𑀣𑀸𑀞𑀺𑀢𑀁. 𑀬𑀣𑀸𑀞𑀺𑀢𑀢𑁆𑀢𑀸𑀯 𑀬𑀣𑀸𑀧𑀡𑀺𑀳𑀺𑀢𑀁 𑀓𑀸𑀬𑀁 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀣𑀯𑀻𑀥𑀸𑀢𑀼…𑀧𑁂… 𑀯𑀸𑀬𑁄𑀥𑀸𑀢𑀽𑀢𑀺 𑀏𑀯𑀁 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑀺.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀕𑁄𑀖𑀸𑀢𑀓𑀲𑁆𑀲 𑀕𑀸𑀯𑀺𑀁 𑀧𑁄𑀲𑁂𑀦𑁆𑀢𑀲𑁆𑀲𑀧𑀺 𑀆𑀖𑀸𑀢𑀦𑀁 𑀆𑀳𑀭𑀦𑁆𑀢𑀲𑁆𑀲𑀧𑀺 𑀆𑀳𑀭𑀺𑀢𑁆𑀯𑀸 𑀢𑀢𑁆𑀣 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀦𑁆𑀢𑀲𑁆𑀲𑀧𑀺 𑀯𑀥𑀦𑁆𑀢𑀲𑁆𑀲𑀧𑀺 𑀯𑀥𑀺𑀢𑀁 𑀫𑀢𑀁 𑀧𑀲𑁆𑀲𑀦𑁆𑀢𑀲𑁆𑀲𑀧𑀺 𑀢𑀸𑀯𑀤𑁂𑀯 𑀕𑀸𑀯𑀻𑀢𑀺𑀲𑀜𑁆𑀜𑀸 𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀬𑀸𑀯 𑀦𑀁 𑀧𑀤𑀸𑀮𑁂𑀢𑁆𑀯𑀸 𑀩𑀺𑀮𑀲𑁄 𑀦 𑀯𑀺𑀪𑀚𑀢𑀺. 𑀯𑀺𑀪𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀧𑀦 𑀕𑀸𑀯𑀻𑀲𑀜𑁆𑀜𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀫𑀁𑀲𑀲𑀜𑁆𑀜𑀸 𑀧𑀯𑀢𑁆𑀢𑀢𑀺. 𑀦𑀸𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀅𑀳𑀁 𑀕𑀸𑀯𑀺𑀁 𑀯𑀺𑀓𑁆𑀓𑀺𑀡𑀸𑀫𑀺, 𑀇𑀫𑁂 𑀕𑀸𑀯𑀺𑀁 𑀳𑀭𑀦𑁆𑀢𑀻’’𑀢𑀺. 𑀅𑀣 𑀔𑁆𑀯𑀲𑁆𑀲 ‘‘𑀅𑀳𑀁 𑀫𑀁𑀲𑀁 𑀯𑀺𑀓𑁆𑀓𑀺𑀡𑀸𑀫𑀺, 𑀇𑀫𑁂𑀧𑀺 𑀫𑀁𑀲𑀁 𑀳𑀭𑀦𑁆𑀢𑀺’’𑀘𑁆𑀘𑁂𑀯 𑀳𑁄𑀢𑀺, 𑀏𑀯𑀫𑁂𑀯 𑀇𑀫𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀕𑀺𑀳𑀺𑀪𑀽𑀢𑀲𑁆𑀲𑀧𑀺 𑀧𑀩𑁆𑀩𑀚𑀺𑀢𑀲𑁆𑀲𑀧𑀺 𑀢𑀸𑀯𑀤𑁂𑀯 𑀲𑀢𑁆𑀢𑁄𑀢𑀺 𑀯𑀸 𑀧𑁄𑀲𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀲𑀜𑁆𑀜𑀸 𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀬𑀸𑀯 𑀇𑀫𑀫𑁂𑀯 𑀓𑀸𑀬𑀁 𑀬𑀣𑀸𑀞𑀺𑀢𑀁 𑀬𑀣𑀸𑀧𑀡𑀺𑀳𑀺𑀢𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀥𑀸𑀢𑀼𑀲𑁄 𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑁄 𑀧𑀦 𑀲𑀢𑁆𑀢𑀲𑀜𑁆𑀜𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀥𑀸𑀢𑀼𑀯𑀲𑁂𑀦𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑁄 𑀕𑁄𑀖𑀸𑀢𑀓𑁄 𑀯𑀸…𑀧𑁂… 𑀦𑀺𑀲𑀺𑀦𑁆𑀦𑁄 𑀅𑀲𑁆𑀲, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼…𑀧𑁂… 𑀯𑀸𑀬𑁄𑀥𑀸𑀢𑀽’’𑀢𑀺.

𑁩𑁦𑁭. 𑀫𑀳𑀸𑀳𑀢𑁆𑀣𑀺𑀧𑀤𑀽𑀧𑀫𑁂 (𑀫. 𑀦𑀺. 𑁧.𑁩𑁦𑁦 𑀆𑀤𑀬𑁄) 𑀧𑀦 𑁋 ‘‘𑀓𑀢𑀫𑀸 𑀘𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼? 𑀬𑀁 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀓𑀓𑁆𑀔𑀴𑀁 𑀔𑀭𑀺𑀕𑀢𑀁 𑀉𑀧𑀸𑀤𑀺𑀦𑁆𑀦𑀁. 𑀲𑁂𑀬𑁆𑀬𑀣𑀺𑀤𑀁, 𑀓𑁂𑀲𑀸 𑀮𑁄𑀫𑀸…𑀧𑁂… 𑀉𑀤𑀭𑀺𑀬𑀁 𑀓𑀭𑀻𑀲𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀓𑀓𑁆𑀔𑀴𑀁 𑀔𑀭𑀺𑀕𑀢𑀁 𑀉𑀧𑀸𑀤𑀺𑀦𑁆𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀆𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀽’’𑀢𑀺 𑀘,

‘‘𑀓𑀢𑀫𑀸 𑀘𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀆𑀧𑁄𑀥𑀸𑀢𑀼? 𑀬𑀁 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀆𑀧𑁄 𑀆𑀧𑁄𑀕𑀢𑀁 𑀉𑀧𑀸𑀤𑀺𑀦𑁆𑀦𑀁. 𑀲𑁂𑀬𑁆𑀬𑀣𑀺𑀤𑀁, 𑀧𑀺𑀢𑁆𑀢𑀁…𑀧𑁂… 𑀫𑀼𑀢𑁆𑀢𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀆𑀧𑁄 𑀆𑀧𑁄𑀕𑀢𑀁 𑀉𑀧𑀸𑀤𑀺𑀦𑁆𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀆𑀧𑁄𑀥𑀸𑀢𑀽’’𑀢𑀺 𑀘,

‘‘𑀓𑀢𑀫𑀸 𑀘𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀢𑁂𑀚𑁄𑀥𑀸𑀢𑀼? 𑀬𑀁 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀢𑁂𑀚𑁄 𑀢𑁂𑀚𑁄𑀕𑀢𑀁 𑀉𑀧𑀸𑀤𑀺𑀦𑁆𑀦𑀁. 𑀲𑁂𑀬𑁆𑀬𑀣𑀺𑀤𑀁, 𑀬𑁂𑀦 𑀘 𑀲𑀦𑁆𑀢𑀧𑁆𑀧𑀢𑀺, 𑀬𑁂𑀦 𑀘 𑀚𑀻𑀭𑀻𑀬𑀢𑀺, 𑀬𑁂𑀦 𑀘 𑀧𑀭𑀺𑀟𑀬𑁆𑀳𑀢𑀺, 𑀬𑁂𑀦 𑀘 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀢𑁂𑀚𑁄 𑀢𑁂𑀚𑁄𑀕𑀢𑀁 𑀉𑀧𑀸𑀤𑀺𑀦𑁆𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀢𑁂𑀚𑁄𑀥𑀸𑀢𑀽’’𑀢𑀺 𑀘,

‘‘𑀓𑀢𑀫𑀸 𑀘𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀯𑀸𑀬𑁄𑀥𑀸𑀢𑀼? 𑀬𑀁 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀯𑀸𑀬𑁄 𑀯𑀸𑀬𑁄𑀕𑀢𑀁 𑀉𑀧𑀸𑀤𑀺𑀦𑁆𑀦𑀁. 𑀲𑁂𑀬𑁆𑀬𑀣𑀺𑀤𑀁, 𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸, 𑀅𑀥𑁄𑀕𑀫𑀸 𑀯𑀸𑀢𑀸, 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸, 𑀓𑁄𑀝𑁆𑀞𑀸𑀲𑀬𑀸 𑀯𑀸𑀢𑀸, 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀯𑀸𑀢𑀸, 𑀅𑀲𑁆𑀲𑀸𑀲𑁄 𑀧𑀲𑁆𑀲𑀸𑀲𑁄 𑀇𑀢𑀺 𑀯𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀯𑀸𑀬𑁄 𑀯𑀸𑀬𑁄𑀕𑀢𑀁 𑀉𑀧𑀸𑀤𑀺𑀦𑁆𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀯𑀸𑀬𑁄𑀥𑀸𑀢𑀽’’𑀢𑀺 𑀘 𑁋

𑀏𑀯𑀁 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀭𑀸𑀳𑀼𑀮𑁄𑀯𑀸𑀤𑀥𑀸𑀢𑀼𑀯𑀺𑀪𑀗𑁆𑀕𑁂𑀲𑀼𑀧𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸, 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀦𑁆𑀢𑀺 𑀇𑀤𑀁 𑀢𑀸𑀯 𑀉𑀪𑀬𑀫𑁆𑀧𑀺 𑀦𑀺𑀬𑀓𑀲𑁆𑀲 𑀅𑀥𑀺𑀯𑀘𑀦𑀁. 𑀦𑀺𑀬𑀓𑀁 𑀦𑀸𑀫 𑀅𑀢𑁆𑀢𑀦𑀺 𑀚𑀸𑀢𑀁 𑀲𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀬𑀺𑀤𑀁 𑀬𑀣𑀸 𑀮𑁄𑀓𑁂 𑀇𑀢𑁆𑀣𑀻𑀲𑀼 𑀓𑀣𑀸 𑀅𑀥𑀺𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀢𑁆𑀢𑀦𑀺 𑀧𑀯𑀢𑁆𑀢𑀢𑁆𑀢𑀸 𑀅𑀚𑁆𑀛𑀢𑁆𑀢𑀁, 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀧𑀝𑀺𑀘𑁆𑀘 𑀧𑀯𑀢𑁆𑀢𑀢𑁆𑀢𑀸 𑀧𑀘𑁆𑀘𑀢𑁆𑀢𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀓𑀓𑁆𑀔𑀴𑀦𑁆𑀢𑀺 𑀣𑀤𑁆𑀥𑀁. 𑀔𑀭𑀺𑀕𑀢𑀦𑁆𑀢𑀺 𑀨𑀭𑀼𑀲𑀁. 𑀢𑀢𑁆𑀣 𑀧𑀞𑀫𑀁 𑀮𑀓𑁆𑀔𑀡𑀯𑀘𑀦𑀁, 𑀤𑀼𑀢𑀺𑀬𑀁 𑀆𑀓𑀸𑀭𑀯𑀘𑀦𑀁, 𑀓𑀓𑁆𑀔𑀴𑀮𑀓𑁆𑀔𑀡𑀸 𑀳𑀺 𑀧𑀣𑀯𑀻𑀥𑀸𑀢𑀼, 𑀲𑀸 𑀨𑀭𑀼𑀲𑀸𑀓𑀸𑀭𑀸 𑀳𑁄𑀢𑀺, 𑀢𑀲𑁆𑀫𑀸 𑀔𑀭𑀺𑀕𑀢𑀦𑁆𑀢𑀺 𑀯𑀼𑀢𑁆𑀢𑀸. 𑀉𑀧𑀸𑀤𑀺𑀦𑁆𑀦𑀦𑁆𑀢𑀺 𑀤𑀴𑁆𑀳𑀁 𑀆𑀤𑀺𑀦𑁆𑀦𑀁, 𑀅𑀳𑀁 𑀫𑀫𑀦𑁆𑀢𑀺 𑀏𑀯𑀁 𑀤𑀴𑁆𑀳𑀁 𑀆𑀤𑀺𑀦𑁆𑀦𑀁, 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄. 𑀢𑀲𑁆𑀲 𑀢𑀁 𑀓𑀢𑀫𑀦𑁆𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀢𑀢𑁄 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁂𑀲𑀸 𑀮𑁄𑀫𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀫𑀢𑁆𑀣𑀮𑀼𑀗𑁆𑀕𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀧𑀣𑀯𑀻𑀥𑀸𑀢𑀼 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀻𑀢𑀺 𑀅𑀯𑀲𑁂𑀲𑁂𑀲𑀼 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀣𑀯𑀻𑀥𑀸𑀢𑀼 𑀲𑀗𑁆𑀕𑀳𑀺𑀢𑀸.

𑀯𑀺𑀲𑁆𑀲𑀦𑁆𑀤𑀦𑀪𑀸𑀯𑁂𑀦 𑀢𑀁 𑀢𑀁 𑀞𑀸𑀦𑀁 𑀅𑀧𑁆𑀧𑁄𑀢𑀻𑀢𑀺 𑀆𑀧𑁄. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀦𑀸𑀦𑀸𑀯𑀺𑀥𑁂𑀲𑀼 𑀆𑀧𑁂𑀲𑀼 𑀕𑀢𑀦𑁆𑀢𑀺 𑀆𑀧𑁄𑀕𑀢𑀁. 𑀓𑀺𑀁 𑀢𑀁? 𑀆𑀧𑁄𑀥𑀸𑀢𑀼𑀬𑀸 𑀆𑀩𑀦𑁆𑀥𑀦𑀮𑀓𑁆𑀔𑀡𑀁.

𑀢𑁂𑀚𑀦𑀯𑀲𑁂𑀦 𑀢𑁂𑀚𑁄, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁂𑀚𑁂𑀲𑀼 𑀕𑀢𑀦𑁆𑀢𑀺 𑀢𑁂𑀚𑁄𑀕𑀢𑀁. 𑀓𑀺𑀁 𑀢𑀁? 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀁. 𑀬𑁂𑀦 𑀘𑀸𑀢𑀺 𑀬𑁂𑀦 𑀢𑁂𑀚𑁄𑀥𑀸𑀢𑀼𑀕𑀢𑁂𑀦 𑀓𑀼𑀧𑀺𑀢𑁂𑀦 𑀅𑀬𑀁 𑀓𑀸𑀬𑁄 𑀲𑀦𑁆𑀢𑀧𑁆𑀧𑀢𑀺, 𑀏𑀓𑀸𑀳𑀺𑀓𑀚𑀭𑀸𑀤𑀺𑀪𑀸𑀯𑁂𑀦 𑀉𑀲𑀼𑀫𑀚𑀸𑀢𑁄 𑀳𑁄𑀢𑀺. 𑀬𑁂𑀦 𑀘 𑀚𑀻𑀭𑀻𑀬𑀢𑀻𑀢𑀺 𑀬𑁂𑀦 𑀅𑀬𑀁 𑀓𑀸𑀬𑁄 𑀚𑀻𑀭𑀢𑀺, 𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀢𑀁 𑀩𑀮𑀧𑀭𑀺𑀓𑁆𑀔𑀬𑀁 𑀯𑀮𑀺𑀧𑀮𑀺𑀢𑀸𑀤𑀺𑀪𑀸𑀯𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀬𑁂𑀦 𑀘 𑀧𑀭𑀺𑀟𑀬𑁆𑀳𑀢𑀻𑀢𑀺 𑀬𑁂𑀦 𑀓𑀼𑀧𑀺𑀢𑁂𑀦 𑀅𑀬𑀁 𑀓𑀸𑀬𑁄 𑀟𑀬𑁆𑀳𑀢𑀺. 𑀲𑁄 𑀘 𑀧𑀼𑀕𑁆𑀕𑀮𑁄 ‘‘𑀟𑀬𑁆𑀳𑀸𑀫𑀺 𑀟𑀬𑁆𑀳𑀸𑀫𑀻’’𑀢𑀺 𑀓𑀦𑁆𑀤𑀦𑁆𑀢𑁄 𑀲𑀢𑀥𑁄𑀢𑀲𑀧𑁆𑀧𑀺𑀕𑁄𑀲𑀻𑀲𑀘𑀦𑁆𑀤𑀦𑀸𑀤𑀺𑀮𑁂𑀧𑀜𑁆𑀘𑁂𑀯 𑀢𑀸𑀮𑀯𑀡𑁆𑀝𑀯𑀸𑀢𑀜𑁆𑀘 𑀧𑀘𑁆𑀘𑀸𑀲𑀻𑀲𑀢𑀺. 𑀬𑁂𑀦 𑀘 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀻𑀢𑀺 𑀬𑁂𑀦𑁂𑀢𑀁 𑀅𑀲𑀺𑀢𑀁 𑀯𑀸 𑀑𑀤𑀦𑀸𑀤𑀺 𑀧𑀻𑀢𑀁 𑀯𑀸 𑀧𑀸𑀦𑀓𑀸𑀤𑀺 𑀔𑀸𑀬𑀺𑀢𑀁 𑀯𑀸 𑀧𑀺𑀝𑁆𑀞𑀔𑀚𑁆𑀚𑀓𑀸𑀤𑀺 𑀲𑀸𑀬𑀺𑀢𑀁 𑀯𑀸 𑀅𑀫𑁆𑀩𑀧𑀓𑁆𑀓𑀫𑀥𑀼𑀨𑀸𑀡𑀺𑀢𑀸𑀤𑀺 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀭𑀲𑀸𑀤𑀺𑀪𑀸𑀯𑁂𑀦 𑀯𑀺𑀯𑁂𑀓𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀢𑀬𑁄 𑀢𑁂𑀚𑁄𑀥𑀸𑀢𑀼𑀲𑀫𑀼𑀝𑁆𑀞𑀸𑀦𑀸. 𑀧𑀘𑁆𑀙𑀺𑀫𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄𑀯.

𑀯𑀸𑀬𑀦𑀯𑀲𑁂𑀦 𑀯𑀸𑀬𑁄, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀸𑀬𑁂𑀲𑀼 𑀕𑀢𑀦𑁆𑀢𑀺 𑀯𑀸𑀬𑁄𑀕𑀢𑀁. 𑀓𑀺𑀁 𑀢𑀁? 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁. 𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸𑀢𑀺 𑀉𑀕𑁆𑀕𑀸𑀭𑀳𑀺𑀓𑁆𑀓𑀸𑀤𑀺𑀧𑀯𑀢𑁆𑀢𑀓𑀸 𑀉𑀤𑁆𑀥𑀁 𑀆𑀭𑁄𑀳𑀡𑀯𑀸𑀢𑀸. 𑀅𑀥𑁄𑀕𑀫𑀸 𑀯𑀸𑀢𑀸𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀦𑀻𑀳𑀭𑀡𑀓𑀸 𑀅𑀥𑁄 𑀑𑀭𑁄𑀳𑀡𑀯𑀸𑀢𑀸. 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀩𑀳𑀺𑀯𑀸𑀢𑀸. 𑀓𑁄𑀝𑁆𑀞𑀸𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀅𑀦𑁆𑀢𑁄𑀯𑀸𑀢𑀸. 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀯𑀸𑀢𑀸𑀢𑀺 𑀥𑀫𑀦𑀺𑀚𑀸𑀮𑀸𑀦𑀼𑀲𑀸𑀭𑁂𑀦 𑀲𑀓𑀮𑀲𑀭𑀻𑀭𑁂 𑀅𑀗𑁆𑀕𑀫𑀗𑁆𑀕𑀸𑀦𑀺 𑀅𑀦𑀼𑀲𑀝𑀸 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀸 𑀯𑀸𑀢𑀸. 𑀅𑀲𑁆𑀲𑀸𑀲𑁄𑀢𑀺 𑀅𑀦𑁆𑀢𑁄𑀧𑀯𑀺𑀲𑀦𑀦𑀸𑀲𑀺𑀓𑀯𑀸𑀢𑁄. 𑀧𑀲𑁆𑀲𑀸𑀲𑁄𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀦𑀸𑀲𑀺𑀓𑀯𑀸𑀢𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀧𑀜𑁆𑀘 𑀘𑀢𑀼𑀲𑀫𑀼𑀝𑁆𑀞𑀸𑀦𑀸. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀯. 𑀲𑀩𑁆𑀩𑀢𑁆𑀣 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀻𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀅𑀯𑀲𑁂𑀲𑀓𑁄𑀝𑁆𑀞𑀸𑀲𑁂𑀲𑀼 𑀆𑀧𑁄𑀥𑀸𑀢𑀼𑀆𑀤𑀬𑁄 𑀲𑀗𑁆𑀕𑀳𑀺𑀢𑀸.

𑀇𑀢𑀺 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀧𑀣𑀯𑀻𑀥𑀸𑀢𑀼, 𑀤𑁆𑀯𑀸𑀤𑀲𑀳𑀺 𑀆𑀧𑁄𑀥𑀸𑀢𑀼, 𑀘𑀢𑀽𑀳𑀺 𑀢𑁂𑀚𑁄𑀥𑀸𑀢𑀼, 𑀙𑀳𑀺 𑀯𑀸𑀬𑁄𑀥𑀸𑀢𑀽𑀢𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀯𑀺𑀢𑁆𑀣𑀸𑀭𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.

𑁩𑁦𑁮. 𑀪𑀸𑀯𑀦𑀸𑀦𑀬𑁂 𑀧𑀦𑁂𑀢𑁆𑀣 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁂𑀲𑀸 𑀧𑀣𑀯𑀻𑀥𑀸𑀢𑀼, 𑀮𑁄𑀫𑀸 𑀧𑀣𑀯𑀻𑀥𑀸𑀢𑀽𑀢𑀺 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄 𑀥𑀸𑀢𑀼𑀧𑀭𑀺𑀕𑁆𑀕𑀳𑁄 𑀧𑀧𑀜𑁆𑀘𑀢𑁄 𑀉𑀧𑀝𑁆𑀞𑀸𑀢𑀺. 𑀬𑀁 𑀣𑀤𑁆𑀥𑀮𑀓𑁆𑀔𑀡𑀁, 𑀅𑀬𑀁 𑀧𑀣𑀯𑀻𑀥𑀸𑀢𑀼. 𑀬𑀁 𑀆𑀩𑀦𑁆𑀥𑀦𑀮𑀓𑁆𑀔𑀡𑀁, 𑀅𑀬𑀁 𑀆𑀧𑁄𑀥𑀸𑀢𑀼. 𑀬𑀁 𑀧𑀭𑀺𑀧𑀸𑀘𑀦𑀮𑀓𑁆𑀔𑀡𑀁, 𑀅𑀬𑀁 𑀢𑁂𑀚𑁄𑀥𑀸𑀢𑀼. 𑀬𑀁 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁, 𑀅𑀬𑀁 𑀯𑀸𑀬𑁄𑀥𑀸𑀢𑀽𑀢𑀺 𑀏𑀯𑀁 𑀫𑀦𑀲𑀺𑀓𑀭𑁄𑀢𑁄 𑀧𑀦𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀓𑀝𑀁 𑀳𑁄𑀢𑀺. 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀧𑀦 𑀏𑀯𑀁 𑀫𑀦𑀲𑀺𑀓𑀭𑁄𑀢𑁄 𑀅𑀦𑁆𑀥𑀓𑀸𑀭𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺. 𑀧𑀼𑀭𑀺𑀫𑀦𑀬𑁂𑀦 𑀯𑀺𑀢𑁆𑀣𑀸𑀭𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀧𑀸𑀓𑀝𑀁 𑀳𑁄𑀢𑀺.

𑀓𑀣𑀁? 𑀬𑀣𑀸 𑀤𑁆𑀯𑀻𑀲𑀼 𑀪𑀺𑀓𑁆𑀔𑀽𑀲𑀼 𑀩𑀳𑀼𑀧𑁂𑀬𑁆𑀬𑀸𑀮𑀁 𑀢𑀦𑁆𑀢𑀺𑀁 𑀲𑀚𑁆𑀛𑀸𑀬𑀦𑁆𑀢𑁂𑀲𑀼 𑀢𑀺𑀓𑁆𑀔𑀧𑀜𑁆𑀜𑁄 𑀪𑀺𑀓𑁆𑀔𑀼 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀧𑁂𑀬𑁆𑀬𑀸𑀮𑀫𑀼𑀔𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀉𑀪𑀢𑁄𑀓𑁄𑀝𑀺𑀯𑀲𑁂𑀦𑁂𑀯 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀕𑀘𑁆𑀙𑀢𑀺. 𑀢𑀢𑁆𑀭 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑁄 𑀏𑀯𑀁 𑀯𑀢𑁆𑀢𑀸 𑀳𑁄𑀢𑀺 ‘‘𑀓𑀺𑀁 𑀲𑀚𑁆𑀛𑀸𑀬𑁄 𑀦𑀸𑀫𑁂𑀲 𑀑𑀝𑁆𑀞𑀧𑀭𑀺𑀬𑀸𑀳𑀢𑀫𑀢𑁆𑀢𑀁 𑀓𑀸𑀢𑀼𑀁 𑀦 𑀤𑁂𑀢𑀺, 𑀏𑀯𑀁 𑀲𑀚𑁆𑀛𑀸𑀬𑁂 𑀓𑀭𑀺𑀬𑀫𑀸𑀦𑁂 𑀓𑀤𑀸 𑀢𑀦𑁆𑀢𑀺 𑀧𑀕𑀼𑀡𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀆𑀕𑀢𑀸𑀕𑀢𑀁 𑀧𑁂𑀬𑁆𑀬𑀸𑀮𑀫𑀼𑀔𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸𑀯 𑀲𑀚𑁆𑀛𑀸𑀬𑀁 𑀓𑀭𑁄𑀢𑀺. 𑀢𑀫𑁂𑀦𑀁 𑀇𑀢𑀭𑁄 𑀏𑀯𑀫𑀸𑀳 𑁋 ‘‘𑀓𑀺𑀁 𑀲𑀚𑁆𑀛𑀸𑀬𑁄 𑀦𑀸𑀫𑁂𑀲 𑀧𑀭𑀺𑀬𑁄𑀲𑀸𑀦𑀁 𑀕𑀦𑁆𑀢𑀼𑀁 𑀦 𑀤𑁂𑀢𑀺, 𑀏𑀯𑀁 𑀲𑀚𑁆𑀛𑀸𑀬𑁂 𑀓𑀭𑀺𑀬𑀫𑀸𑀦𑁂 𑀓𑀤𑀸 𑀢𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀁 𑀕𑀫𑀺𑀲𑁆𑀲𑀢𑀻’’𑀢𑀺. 𑀏𑀯𑀫𑁂𑀯 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀓𑁂𑀲𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀥𑀸𑀢𑀼𑀧𑀭𑀺𑀕𑁆𑀕𑀳𑁄 𑀧𑀧𑀜𑁆𑀘𑀢𑁄 𑀉𑀧𑀝𑁆𑀞𑀸𑀢𑀺. 𑀬𑀁 𑀣𑀤𑁆𑀥𑀮𑀓𑁆𑀔𑀡𑀁, 𑀅𑀬𑀁 𑀧𑀣𑀯𑀻𑀥𑀸𑀢𑀽𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀗𑁆𑀔𑁂𑀧𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀓𑀝𑀁 𑀳𑁄𑀢𑀺. 𑀇𑀢𑀭𑀲𑁆𑀲 𑀢𑀣𑀸 𑀫𑀦𑀲𑀺𑀓𑀭𑁄𑀢𑁄 𑀅𑀦𑁆𑀥𑀓𑀸𑀭𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺. 𑀓𑁂𑀲𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀧𑀸𑀓𑀝𑀁 𑀳𑁄𑀢𑀺.

𑀢𑀲𑁆𑀫𑀸 𑀇𑀫𑀁 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀢𑀺𑀓𑁆𑀔𑀧𑀜𑁆𑀜𑁂𑀦 𑀢𑀸𑀯 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 𑀲𑀓𑀮𑀫𑁆𑀧𑀺 𑀅𑀢𑁆𑀢𑀦𑁄 𑀭𑀽𑀧𑀓𑀸𑀬𑀁 𑀆𑀯𑀚𑁆𑀚𑁂𑀢𑁆𑀯𑀸 𑀬𑁄 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀣𑀤𑁆𑀥𑀪𑀸𑀯𑁄 𑀯𑀸 𑀔𑀭𑀪𑀸𑀯𑁄 𑀯𑀸, 𑀅𑀬𑀁 𑀧𑀣𑀯𑀻𑀥𑀸𑀢𑀼. 𑀬𑁄 𑀆𑀩𑀦𑁆𑀥𑀦𑀪𑀸𑀯𑁄 𑀯𑀸 𑀤𑁆𑀭𑀯𑀪𑀸𑀯𑁄 𑀯𑀸, 𑀅𑀬𑀁 𑀆𑀧𑁄𑀥𑀸𑀢𑀼. 𑀬𑁄 𑀧𑀭𑀺𑀧𑀸𑀘𑀦𑀪𑀸𑀯𑁄 𑀯𑀸 𑀉𑀡𑁆𑀳𑀪𑀸𑀯𑁄 𑀯𑀸, 𑀅𑀬𑀁 𑀢𑁂𑀚𑁄𑀥𑀸𑀢𑀼. 𑀬𑁄 𑀯𑀺𑀢𑁆𑀣𑀫𑁆𑀪𑀦𑀪𑀸𑀯𑁄 𑀯𑀸 𑀲𑀫𑀼𑀤𑀻𑀭𑀡𑀪𑀸𑀯𑁄 𑀯𑀸, 𑀅𑀬𑀁 𑀯𑀸𑀬𑁄𑀥𑀸𑀢𑀽𑀢𑀺 𑀏𑀯𑀁 𑀲𑀁𑀔𑀺𑀢𑁆𑀢𑁂𑀦 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀽𑀢𑀺 𑀥𑀸𑀢𑀼𑀫𑀢𑁆𑀢𑀢𑁄 𑀦𑀺𑀲𑁆𑀲𑀢𑁆𑀢𑀢𑁄 𑀦𑀺𑀚𑁆𑀚𑀻𑀯𑀢𑁄 𑀆𑀯𑀚𑁆𑀚𑀺𑀢𑀩𑁆𑀩𑀁 𑀫𑀦𑀲𑀺𑀓𑀸𑀢𑀩𑁆𑀩𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀢𑀲𑁆𑀲𑁂𑀯𑀁 𑀯𑀸𑀬𑀫𑀫𑀸𑀦𑀲𑁆𑀲 𑀦𑀘𑀺𑀭𑁂𑀦𑁂𑀯 𑀥𑀸𑀢𑀼𑀧𑁆𑀧𑀪𑁂𑀤𑀸𑀯𑀪𑀸𑀲𑀦𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑁄 𑀲𑀪𑀸𑀯𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑀸 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑁄 𑀉𑀧𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀉𑀧𑁆𑀧𑀚𑁆𑀚𑀢𑀺.

𑀅𑀣 𑀯𑀸 𑀧𑀦 𑀬𑁂 𑀇𑀫𑁂 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀦𑀺𑀲𑁆𑀲𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 ‘‘𑀅𑀝𑁆𑀞𑀺𑀜𑁆𑀘 𑀧𑀝𑀺𑀘𑁆𑀘 𑀦𑁆𑀳𑀸𑀭𑀼𑀜𑁆𑀘 𑀧𑀝𑀺𑀘𑁆𑀘 𑀫𑀁𑀲𑀜𑁆𑀘 𑀧𑀝𑀺𑀘𑁆𑀘 𑀘𑀫𑁆𑀫𑀜𑁆𑀘 𑀧𑀝𑀺𑀘𑁆𑀘 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁩𑁦𑁬) 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑀸 𑀯𑀼𑀢𑁆𑀢𑀸. 𑀢𑁂𑀲𑀼 𑀢𑀁 𑀢𑀁 𑀅𑀦𑁆𑀢𑀭𑀸𑀦𑀼𑀲𑀸𑀭𑀺𑀦𑀸 𑀜𑀸𑀡𑀳𑀢𑁆𑀣𑁂𑀦 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀬𑁄 𑀏𑀢𑁂𑀲𑀼 𑀣𑀤𑁆𑀥𑀪𑀸𑀯𑁄 𑀯𑀸 𑀔𑀭𑀪𑀸𑀯𑁄 𑀯𑀸, 𑀅𑀬𑀁 𑀧𑀣𑀯𑀻𑀥𑀸𑀢𑀽𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀽𑀢𑀺 𑀥𑀸𑀢𑀼𑀫𑀢𑁆𑀢𑀢𑁄 𑀦𑀺𑀲𑁆𑀲𑀢𑁆𑀢𑀢𑁄 𑀦𑀺𑀚𑁆𑀚𑀻𑀯𑀢𑁄 𑀆𑀯𑀚𑁆𑀚𑀺𑀢𑀩𑁆𑀩𑀁 𑀫𑀦𑀲𑀺𑀓𑀸𑀢𑀩𑁆𑀩𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀢𑀲𑁆𑀲𑁂𑀯𑀁 𑀯𑀸𑀬𑀫𑀫𑀸𑀦𑀲𑁆𑀲 𑀦𑀘𑀺𑀭𑁂𑀦𑁂𑀯 𑀥𑀸𑀢𑀼𑀧𑁆𑀧𑀪𑁂𑀤𑀸𑀯𑀪𑀸𑀲𑀦𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑁄 𑀲𑀪𑀸𑀯𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑀸 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑁄 𑀉𑀧𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀗𑁆𑀔𑁂𑀧𑀢𑁄 𑀆𑀕𑀢𑁂 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀪𑀸𑀯𑀦𑀸𑀦𑀬𑁄.

𑁩𑁦𑁯. 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑁂 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀳𑀺 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑁂𑀦 𑀬𑁄𑀕𑀺𑀦𑀸 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀯𑀺𑀢𑁆𑀣𑀸𑀭𑀢𑁄 𑀥𑀸𑀢𑀼𑀬𑁄 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑁂𑀦 𑀓𑀢𑀲𑀩𑁆𑀩𑀓𑀺𑀘𑁆𑀘𑁂𑀦 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀢𑁄, 𑀲𑀲𑀫𑁆𑀪𑀸𑀭𑀯𑀺𑀪𑀢𑁆𑀢𑀺𑀢𑁄, 𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀢𑁄, 𑀲𑀮𑀓𑁆𑀔𑀡𑀯𑀺𑀪𑀢𑁆𑀢𑀺𑀢𑁄𑀢𑀺 𑀏𑀯𑀁 𑀘𑀢𑀽𑀳𑀸𑀓𑀸𑀭𑁂𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑀩𑁆𑀩𑀁.

𑀢𑀢𑁆𑀣 𑀓𑀣𑀁 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀢𑁄 𑀪𑀸𑀯𑁂𑀢𑀺? 𑀇𑀥 𑀪𑀺𑀓𑁆𑀔𑀼 𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀼 𑀣𑀤𑁆𑀥𑀸𑀓𑀸𑀭𑀁 𑀧𑀣𑀯𑀻𑀥𑀸𑀢𑀽𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀤𑁆𑀯𑀸𑀤𑀲𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀬𑀽𑀲𑀕𑀢𑀁 𑀉𑀤𑀓𑀲𑀗𑁆𑀔𑀸𑀢𑀁 𑀆𑀩𑀦𑁆𑀥𑀦𑀸𑀓𑀸𑀭𑀁 𑀆𑀧𑁄𑀥𑀸𑀢𑀽𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀭𑀺𑀧𑀸𑀘𑀦𑀓𑀁 𑀢𑁂𑀚𑀁 𑀢𑁂𑀚𑁄𑀥𑀸𑀢𑀽𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀯𑀺𑀢𑁆𑀣𑀫𑁆𑀪𑀦𑀸𑀓𑀸𑀭𑀁 𑀯𑀸𑀬𑁄𑀥𑀸𑀢𑀽𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀢𑀲𑁆𑀲𑁂𑀯𑀁 𑀯𑀯𑀢𑁆𑀣𑀸𑀧𑀬𑀢𑁄𑀬𑁂𑀯 𑀥𑀸𑀢𑀼𑀬𑁄 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀢𑀸 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑀘𑀸𑀭𑀲𑀫𑀸𑀥𑀺 𑀉𑀧𑁆𑀧𑀚𑁆𑀚𑀢𑀺.

𑁩𑁧𑁦. 𑀬𑀲𑁆𑀲 𑀧𑀦 𑀏𑀯𑀁 𑀪𑀸𑀯𑀬𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀇𑀚𑁆𑀛𑀢𑀺, 𑀢𑁂𑀦 𑀲𑀲𑀫𑁆𑀪𑀸𑀭𑀯𑀺𑀪𑀢𑁆𑀢𑀺𑀢𑁄 𑀪𑀸𑀯𑁂𑀢𑀩𑁆𑀩𑀁. 𑀓𑀣𑀁? 𑀢𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀬𑀁 𑀢𑀁 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁂 𑀲𑀢𑁆𑀢𑀥𑀸 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀤𑀲𑀥𑀸 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀜𑁆𑀘 𑀯𑀼𑀢𑁆𑀢𑀁. 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀢𑀸𑀯 𑀢𑀁 𑀲𑀩𑁆𑀩𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀢𑀘𑀧𑀜𑁆𑀘𑀓𑀸𑀤𑀻𑀦𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀯𑀘𑀲𑀸 𑀲𑀚𑁆𑀛𑀸𑀬𑀁 𑀆𑀤𑀺𑀁𑀓𑀢𑁆𑀯𑀸 𑀲𑀩𑁆𑀩𑀁 𑀢𑀢𑁆𑀣 𑀯𑀼𑀢𑁆𑀢𑀯𑀺𑀥𑀸𑀦𑀁 𑀓𑀸𑀢𑀩𑁆𑀩𑀁. 𑀅𑀬𑀫𑁂𑀯 𑀳𑀺 𑀯𑀺𑀲𑁂𑀲𑁄, 𑀢𑀢𑁆𑀣 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀓𑁂𑀲𑀸𑀤𑀬𑁄 𑀫𑀦𑀲𑀺𑀓𑀭𑀺𑀢𑁆𑀯𑀸𑀧𑀺 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁, 𑀇𑀥 𑀥𑀸𑀢𑀼𑀯𑀲𑁂𑀦. 𑀢𑀲𑁆𑀫𑀸 𑀯𑀡𑁆𑀡𑀸𑀤𑀺𑀯𑀲𑁂𑀦 𑀧𑀜𑁆𑀘𑀥𑀸 𑀧𑀜𑁆𑀘𑀥𑀸 𑀓𑁂𑀲𑀸𑀤𑀬𑁄 𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀯𑀲𑀸𑀦𑁂 𑀏𑀯𑀁 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄.

𑁩𑁧𑁧. 𑀇𑀫𑁂 𑀓𑁂𑀲𑀸 𑀦𑀸𑀫 𑀲𑀻𑀲𑀓𑀝𑀸𑀳𑀧𑀮𑀺𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸. 𑀢𑀢𑁆𑀣 𑀬𑀣𑀸𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀚𑀸𑀢𑁂𑀲𑀼 𑀓𑀼𑀡𑁆𑀞𑀢𑀺𑀡𑁂𑀲𑀼 𑀦 𑀯𑀫𑁆𑀫𑀺𑀓𑀫𑀢𑁆𑀣𑀓𑁄 𑀚𑀸𑀦𑀸𑀢𑀺 𑀫𑀬𑀺 𑀓𑀼𑀡𑁆𑀞𑀢𑀺𑀡𑀸𑀦𑀺 𑀚𑀸𑀢𑀸𑀦𑀻𑀢𑀺, 𑀦𑀧𑀺 𑀓𑀼𑀡𑁆𑀞𑀢𑀺𑀡𑀸𑀦𑀺 𑀚𑀸𑀦𑀦𑁆𑀢𑀺 𑀫𑀬𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀚𑀸𑀢𑀸𑀦𑀻𑀢𑀺, 𑀏𑀯𑀫𑁂𑀯 𑀦 𑀲𑀻𑀲𑀓𑀝𑀸𑀳𑀧𑀮𑀺𑀯𑁂𑀞𑀦𑀘𑀫𑁆𑀫𑀁 𑀚𑀸𑀦𑀸𑀢𑀺 𑀫𑀬𑀺 𑀓𑁂𑀲𑀸 𑀚𑀸𑀢𑀸𑀢𑀺, 𑀦𑀧𑀺 𑀓𑁂𑀲𑀸 𑀚𑀸𑀦𑀦𑁆𑀢𑀺 𑀫𑀬𑀁 𑀲𑀻𑀲𑀓𑀝𑀸𑀳𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀓𑁂𑀲𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁧𑁨. 𑀮𑁄𑀫𑀸 𑀲𑀭𑀻𑀭𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸. 𑀢𑀢𑁆𑀣 𑀬𑀣𑀸 𑀲𑀼𑀜𑁆𑀜𑀕𑀸𑀫𑀝𑁆𑀞𑀸𑀦𑁂 𑀚𑀸𑀢𑁂𑀲𑀼 𑀤𑀩𑁆𑀩𑀢𑀺𑀡𑀓𑁂𑀲𑀼 𑀦 𑀲𑀼𑀜𑁆𑀜𑀕𑀸𑀫𑀝𑁆𑀞𑀸𑀦𑀁 𑀚𑀸𑀦𑀸𑀢𑀺 𑀫𑀬𑀺 𑀤𑀩𑁆𑀩𑀢𑀺𑀡𑀓𑀸𑀦𑀺 𑀚𑀸𑀢𑀸𑀦𑀻𑀢𑀺, 𑀦𑀧𑀺 𑀤𑀩𑁆𑀩𑀢𑀺𑀡𑀓𑀸𑀦𑀺 𑀚𑀸𑀦𑀦𑁆𑀢𑀺 𑀫𑀬𑀁 𑀲𑀼𑀜𑁆𑀜𑀕𑀸𑀫𑀝𑁆𑀞𑀸𑀦𑁂 𑀚𑀸𑀢𑀸𑀦𑀻𑀢𑀺, 𑀏𑀯𑀫𑁂𑀯 𑀦 𑀲𑀭𑀻𑀭𑀯𑁂𑀞𑀦𑀘𑀫𑁆𑀫𑀁 𑀚𑀸𑀦𑀸𑀢𑀺 𑀫𑀬𑀺 𑀮𑁄𑀫𑀸 𑀚𑀸𑀢𑀸𑀢𑀺. 𑀦𑀧𑀺 𑀮𑁄𑀫𑀸 𑀚𑀸𑀦𑀦𑁆𑀢𑀺 𑀫𑀬𑀁 𑀲𑀭𑀻𑀭𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀮𑁄𑀫𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁧𑁩. 𑀦𑀔𑀸 𑀅𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑁂𑀲𑀼 𑀚𑀸𑀢𑀸. 𑀢𑀢𑁆𑀣 𑀬𑀣𑀸 𑀓𑀼𑀫𑀸𑀭𑀓𑁂𑀲𑀼 𑀤𑀡𑁆𑀟𑀓𑁂𑀳𑀺 𑀫𑀥𑀼𑀓𑀝𑁆𑀞𑀺𑀓𑁂 𑀯𑀺𑀚𑁆𑀛𑀺𑀢𑁆𑀯𑀸 𑀓𑀻𑀴𑀦𑁆𑀢𑁂𑀲𑀼 𑀦 𑀤𑀡𑁆𑀟𑀓𑀸 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀲𑀼 𑀫𑀥𑀼𑀓𑀝𑁆𑀞𑀺𑀓𑀸 𑀞𑀧𑀺𑀢𑀸𑀢𑀺, 𑀦𑀧𑀺 𑀫𑀥𑀼𑀓𑀝𑁆𑀞𑀺𑀓𑀸 𑀚𑀸𑀦𑀦𑁆𑀢𑀺 𑀫𑀬𑀁 𑀤𑀡𑁆𑀟𑀓𑁂𑀲𑀼 𑀞𑀧𑀺𑀢𑀸𑀢𑀺, 𑀏𑀯𑀫𑁂𑀯 𑀦 𑀅𑀗𑁆𑀕𑀼𑀮𑀺𑀬𑁄 𑀚𑀸𑀦𑀦𑁆𑀢𑀺 𑀅𑀫𑁆𑀳𑀸𑀓𑀁 𑀅𑀕𑁆𑀕𑁂𑀲𑀼 𑀦𑀔𑀸 𑀚𑀸𑀢𑀸𑀢𑀺. 𑀦𑀧𑀺 𑀦𑀔𑀸 𑀚𑀸𑀦𑀦𑁆𑀢𑀺 𑀫𑀬𑀁 𑀅𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑁂𑀲𑀼 𑀚𑀸𑀢𑀸𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀦𑀔𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁧𑁪. 𑀤𑀦𑁆𑀢𑀸 𑀳𑀦𑀼𑀓𑀝𑁆𑀞𑀺𑀓𑁂𑀲𑀼 𑀚𑀸𑀢𑀸. 𑀢𑀢𑁆𑀣 𑀬𑀣𑀸 𑀯𑀟𑁆𑀠𑀓𑀻𑀳𑀺 𑀧𑀸𑀲𑀸𑀡𑀉𑀤𑀼𑀓𑁆𑀔𑀮𑀓𑁂𑀲𑀼 𑀓𑁂𑀦𑀘𑀺𑀤𑁂𑀯 𑀲𑀺𑀮𑁂𑀲𑀚𑀸𑀢𑁂𑀦 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀣𑀫𑁆𑀪𑁂𑀲𑀼 𑀦 𑀉𑀤𑀼𑀓𑁆𑀔𑀮𑀸 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀲𑀼 𑀣𑀫𑁆𑀪𑀸 𑀞𑀺𑀢𑀸𑀢𑀺. 𑀦𑀧𑀺 𑀣𑀫𑁆𑀪𑀸 𑀚𑀸𑀦𑀦𑁆𑀢𑀺 𑀫𑀬𑀁 𑀉𑀤𑀼𑀓𑁆𑀔𑀮𑁂𑀲𑀼 𑀞𑀺𑀢𑀸𑀢𑀺, 𑀏𑀯𑀫𑁂𑀯 𑀦 𑀳𑀦𑀼𑀓𑀝𑁆𑀞𑀻𑀦𑀺 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀲𑀼 𑀤𑀦𑁆𑀢𑀸 𑀚𑀸𑀢𑀸𑀢𑀺. 𑀦𑀧𑀺 𑀤𑀦𑁆𑀢𑀸 𑀚𑀸𑀦𑀦𑁆𑀢𑀺 𑀫𑀬𑀁 𑀳𑀦𑀼𑀓𑀝𑁆𑀞𑀻𑀲𑀼 𑀚𑀸𑀢𑀸𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀤𑀦𑁆𑀢𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁧𑁫. 𑀢𑀘𑁄 𑀲𑀓𑀮𑀲𑀭𑀻𑀭𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑁄. 𑀢𑀢𑁆𑀣 𑀬𑀣𑀸 𑀅𑀮𑁆𑀮𑀕𑁄𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑀸𑀬 𑀫𑀳𑀸𑀯𑀻𑀡𑀸𑀬 𑀦 𑀫𑀳𑀸𑀯𑀻𑀡𑀸 𑀚𑀸𑀦𑀸𑀢𑀺 𑀅𑀳𑀁 𑀅𑀮𑁆𑀮𑀕𑁄𑀘𑀫𑁆𑀫𑁂𑀦 𑀧𑀭𑀺𑀬𑁄𑀦𑀤𑁆𑀥𑀸𑀢𑀺. 𑀦𑀧𑀺 𑀅𑀮𑁆𑀮𑀕𑁄𑀘𑀫𑁆𑀫𑀁 𑀚𑀸𑀦𑀸𑀢𑀺 𑀫𑀬𑀸 𑀫𑀳𑀸𑀯𑀻𑀡𑀸 𑀧𑀭𑀺𑀬𑁄𑀦𑀤𑁆𑀥𑀸𑀢𑀺, 𑀏𑀯𑀫𑁂𑀯 𑀦 𑀲𑀭𑀻𑀭𑀁 𑀚𑀸𑀦𑀸𑀢𑀺 𑀅𑀳𑀁 𑀢𑀘𑁂𑀦 𑀧𑀭𑀺𑀬𑁄𑀦𑀤𑁆𑀥𑀦𑁆𑀢𑀺. 𑀦𑀧𑀺 𑀢𑀘𑁄 𑀚𑀸𑀦𑀸𑀢𑀺 𑀫𑀬𑀸 𑀲𑀭𑀻𑀭𑀁 𑀧𑀭𑀺𑀬𑁄𑀦𑀤𑁆𑀥𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀢𑀘𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁧𑁬. 𑀫𑀁𑀲𑀁 𑀅𑀝𑁆𑀞𑀺𑀲𑀗𑁆𑀖𑀸𑀝𑀁 𑀅𑀦𑀼𑀮𑀺𑀫𑁆𑀧𑀺𑀢𑁆𑀯𑀸 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀫𑀳𑀸𑀫𑀢𑁆𑀢𑀺𑀓𑀮𑀺𑀢𑁆𑀢𑀸𑀬 𑀪𑀺𑀢𑁆𑀢𑀺𑀬𑀸 𑀦 𑀪𑀺𑀢𑁆𑀢𑀺 𑀚𑀸𑀦𑀸𑀢𑀺 𑀅𑀳𑀁 𑀫𑀳𑀸𑀫𑀢𑁆𑀢𑀺𑀓𑀸𑀬 𑀮𑀺𑀢𑁆𑀢𑀸𑀢𑀺. 𑀦𑀧𑀺 𑀫𑀳𑀸𑀫𑀢𑁆𑀢𑀺𑀓𑀸 𑀚𑀸𑀦𑀸𑀢𑀺 𑀫𑀬𑀸 𑀪𑀺𑀢𑁆𑀢𑀺 𑀮𑀺𑀢𑁆𑀢𑀸𑀢𑀺, 𑀏𑀯𑀫𑁂𑀯 𑀦 𑀅𑀝𑁆𑀞𑀺𑀲𑀗𑁆𑀖𑀸𑀝𑁄 𑀚𑀸𑀦𑀸𑀢𑀺 𑀅𑀳𑀁 𑀦𑀯𑀧𑁂𑀲𑀺𑀲𑀢𑀧𑁆𑀧𑀪𑁂𑀤𑁂𑀦 𑀫𑀁𑀲𑁂𑀦 𑀮𑀺𑀢𑁆𑀢𑁄𑀢𑀺. 𑀦𑀧𑀺 𑀫𑀁𑀲𑀁 𑀚𑀸𑀦𑀸𑀢𑀺 𑀫𑀬𑀸 𑀅𑀝𑁆𑀞𑀺𑀲𑀗𑁆𑀖𑀸𑀝𑁄 𑀮𑀺𑀢𑁆𑀢𑁄𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀫𑀁𑀲𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁧𑁭. 𑀦𑁆𑀳𑀸𑀭𑀼 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀅𑀝𑁆𑀞𑀻𑀦𑀺 𑀆𑀩𑀦𑁆𑀥𑀫𑀸𑀦𑀸 𑀞𑀺𑀢𑀸. 𑀢𑀢𑁆𑀣 𑀬𑀣𑀸 𑀯𑀮𑁆𑀮𑀻𑀳𑀺 𑀯𑀺𑀦𑀤𑁆𑀥𑁂𑀲𑀼 𑀓𑀼𑀝𑁆𑀝𑀤𑀸𑀭𑀽𑀲𑀼 𑀦 𑀓𑀼𑀝𑁆𑀝𑀤𑀸𑀭𑀽𑀦𑀺 𑀚𑀸𑀦𑀦𑁆𑀢𑀺 𑀫𑀬𑀁 𑀯𑀮𑁆𑀮𑀻𑀳𑀺 𑀯𑀺𑀦𑀤𑁆𑀥𑀸𑀦𑀻𑀢𑀺. 𑀦𑀧𑀺 𑀯𑀮𑁆𑀮𑀺𑀬𑁄 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀳𑀺 𑀓𑀼𑀝𑁆𑀝𑀤𑀸𑀭𑀽𑀦𑀺 𑀯𑀺𑀦𑀤𑁆𑀥𑀸𑀦𑀻𑀢𑀺, 𑀏𑀯𑀫𑁂𑀯 𑀦 𑀅𑀝𑁆𑀞𑀻𑀦𑀺 𑀚𑀸𑀦𑀦𑁆𑀢𑀺 𑀫𑀬𑀁 𑀦𑁆𑀳𑀸𑀭𑀽𑀳𑀺 𑀆𑀩𑀤𑁆𑀥𑀸𑀦𑀻𑀢𑀺. 𑀦𑀧𑀺 𑀦𑁆𑀳𑀸𑀭𑀽 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀳𑀺 𑀅𑀝𑁆𑀞𑀻𑀦𑀺 𑀆𑀩𑀤𑁆𑀥𑀸𑀦𑀻𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀦𑁆𑀳𑀸𑀭𑀼 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁧𑁮. 𑀅𑀝𑁆𑀞𑀻𑀲𑀼 𑀧𑀡𑁆𑀳𑀺𑀓𑀝𑁆𑀞𑀺 𑀕𑁄𑀧𑁆𑀨𑀓𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀕𑁄𑀧𑁆𑀨𑀓𑀝𑁆𑀞𑀺 𑀚𑀗𑁆𑀖𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀚𑀗𑁆𑀖𑀝𑁆𑀞𑀺 𑀊𑀭𑀼𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀊𑀭𑀼𑀝𑁆𑀞𑀺 𑀓𑀝𑀺𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀓𑀝𑀺𑀝𑁆𑀞𑀺 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁, 𑀧𑀺𑀝𑁆𑀞𑀺𑀓𑀡𑁆𑀝𑀓𑁄 𑀕𑀻𑀯𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄. 𑀕𑀻𑀯𑀝𑁆𑀞𑀺 𑀲𑀻𑀲𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀲𑀻𑀲𑀝𑁆𑀞𑀺 𑀕𑀻𑀯𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀕𑀻𑀯𑀝𑁆𑀞𑀺 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀧𑀺𑀝𑁆𑀞𑀺𑀓𑀡𑁆𑀝𑀓𑁄 𑀓𑀝𑀺𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑁄. 𑀓𑀝𑀺𑀝𑁆𑀞𑀺 𑀊𑀭𑀼𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀊𑀭𑀼𑀝𑁆𑀞𑀺 𑀚𑀗𑁆𑀖𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀚𑀗𑁆𑀖𑀝𑁆𑀞𑀺 𑀕𑁄𑀧𑁆𑀨𑀓𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀕𑁄𑀧𑁆𑀨𑀓𑀝𑁆𑀞𑀺 𑀧𑀡𑁆𑀳𑀺𑀓𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀁.

𑀢𑀢𑁆𑀣 𑀬𑀣𑀸 𑀇𑀝𑁆𑀞𑀓𑀤𑀸𑀭𑀼𑀕𑁄𑀫𑀬𑀸𑀤𑀺𑀲𑀜𑁆𑀘𑀬𑁂𑀲𑀼 𑀦 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀚𑀸𑀦𑀦𑁆𑀢𑀺 𑀫𑀬𑀁 𑀉𑀧𑀭𑀺𑀫𑁂 𑀉𑀧𑀭𑀺𑀫𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸𑀢𑀺. 𑀦𑀧𑀺 𑀉𑀧𑀭𑀺𑀫𑀸 𑀉𑀧𑀭𑀺𑀫𑀸 𑀚𑀸𑀦𑀦𑁆𑀢𑀺 𑀫𑀬𑀁 𑀳𑁂𑀝𑁆𑀞𑀺𑀫𑁂𑀲𑀼 𑀳𑁂𑀝𑁆𑀞𑀺𑀫𑁂𑀲𑀼 𑀧𑀢𑀺𑀝𑁆𑀞𑀺𑀢𑀸𑀢𑀺, 𑀏𑀯𑀫𑁂𑀯 𑀦 𑀧𑀡𑁆𑀳𑀺𑀓𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀕𑁄𑀧𑁆𑀨𑀓𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦 𑀕𑁄𑀧𑁆𑀨𑀓𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀚𑀗𑁆𑀖𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦 𑀚𑀗𑁆𑀖𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀊𑀭𑀼𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦 𑀊𑀭𑀼𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀓𑀝𑀺𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦 𑀓𑀝𑀺𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦 𑀧𑀺𑀝𑁆𑀞𑀺𑀓𑀡𑁆𑀝𑀓𑁄 𑀚𑀸𑀦𑀸𑀢𑀺 𑀅𑀳𑀁 𑀕𑀻𑀯𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦 𑀕𑀻𑀯𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀲𑀻𑀲𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦 𑀲𑀻𑀲𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀕𑀻𑀯𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀦𑁆𑀢𑀺. 𑀦 𑀕𑀻𑀯𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀧𑀢𑀺𑀝𑁆𑀞𑀺𑀢𑀦𑁆𑀢𑀺. 𑀦 𑀧𑀺𑀝𑁆𑀞𑀺𑀓𑀡𑁆𑀝𑀓𑁄 𑀚𑀸𑀦𑀸𑀢𑀺 𑀅𑀳𑀁 𑀓𑀝𑀺𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑁄𑀢𑀺. 𑀦 𑀓𑀝𑀺𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀊𑀭𑀼𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀦𑁆𑀢𑀺. 𑀦 𑀊𑀭𑀼𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀚𑀗𑁆𑀖𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀦𑁆𑀢𑀺. 𑀦 𑀚𑀗𑁆𑀖𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀕𑁄𑀧𑁆𑀨𑀓𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀦𑁆𑀢𑀺. 𑀦 𑀕𑁄𑀧𑁆𑀨𑀓𑀝𑁆𑀞𑀺 𑀚𑀸𑀦𑀸𑀢𑀺 𑀅𑀳𑀁 𑀧𑀡𑁆𑀳𑀺𑀓𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀅𑀝𑁆𑀞𑀺 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁧𑁯. 𑀅𑀝𑁆𑀞𑀺𑀫𑀺𑀜𑁆𑀚𑀁 𑀢𑁂𑀲𑀁 𑀢𑁂𑀲𑀁 𑀅𑀝𑁆𑀞𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀯𑁂𑀴𑀼𑀧𑀩𑁆𑀩𑀸𑀤𑀻𑀦𑀁 𑀅𑀦𑁆𑀢𑁄 𑀧𑀓𑁆𑀔𑀺𑀢𑁆𑀢𑀙𑀺𑀦𑁆𑀦𑀯𑁂𑀢𑁆𑀢𑀕𑁆𑀕𑀸𑀤𑀻𑀲𑀼 𑀦 𑀯𑁂𑀴𑀼𑀧𑀩𑁆𑀩𑀸𑀤𑀻𑀦𑀺 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀲𑀼 𑀯𑁂𑀢𑁆𑀢𑀕𑁆𑀕𑀸𑀤𑀻𑀦𑀺 𑀧𑀓𑁆𑀔𑀺𑀢𑁆𑀢𑀸𑀦𑀻𑀢𑀺. 𑀦𑀧𑀺 𑀯𑁂𑀢𑁆𑀢𑀕𑁆𑀕𑀸𑀤𑀻𑀦𑀺 𑀚𑀸𑀦𑀦𑁆𑀢𑀺 𑀫𑀬𑀁 𑀯𑁂𑀴𑀼𑀧𑀩𑁆𑀩𑀸𑀤𑀻𑀲𑀼 𑀞𑀺𑀢𑀸𑀦𑀻𑀢𑀺, 𑀏𑀯𑀫𑁂𑀯 𑀦 𑀅𑀝𑁆𑀞𑀻𑀦𑀺 𑀚𑀸𑀦𑀦𑁆𑀢𑀺 𑀅𑀫𑁆𑀳𑀸𑀓𑀁 𑀅𑀦𑁆𑀢𑁄 𑀫𑀺𑀜𑁆𑀚𑀁 𑀞𑀺𑀢𑀦𑁆𑀢𑀺. 𑀦𑀸𑀧𑀺 𑀫𑀺𑀜𑁆𑀚𑀁 𑀚𑀸𑀦𑀸𑀢𑀺 𑀅𑀳𑀁 𑀅𑀝𑁆𑀞𑀻𑀦𑀁 𑀅𑀦𑁆𑀢𑁄 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀅𑀝𑁆𑀞𑀺𑀫𑀺𑀜𑁆𑀚𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁨𑁦. 𑀯𑀓𑁆𑀓𑀁 𑀕𑀮𑀯𑀸𑀝𑀓𑀢𑁄 𑀦𑀺𑀓𑁆𑀔𑀦𑁆𑀢𑁂𑀦 𑀏𑀓𑀫𑀽𑀮𑁂𑀦 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀤𑁆𑀯𑀺𑀥𑀸 𑀪𑀺𑀦𑁆𑀦𑁂𑀦 𑀣𑀽𑀮𑀦𑁆𑀳𑀸𑀭𑀼𑀦𑀸 𑀯𑀺𑀦𑀺𑀩𑀤𑁆𑀥𑀁 𑀳𑀼𑀢𑁆𑀯𑀸 𑀳𑀤𑀬𑀫𑀁𑀲𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀯𑀡𑁆𑀝𑀼𑀧𑀦𑀺𑀩𑀤𑁆𑀥𑁂 𑀅𑀫𑁆𑀩𑀨𑀮𑀤𑁆𑀯𑀬𑁂 𑀦 𑀯𑀡𑁆𑀝𑀁 𑀚𑀸𑀦𑀸𑀢𑀺 𑀫𑀬𑀸 𑀅𑀫𑁆𑀩𑀨𑀮𑀤𑁆𑀯𑀬𑀁 𑀉𑀧𑀦𑀺𑀩𑀤𑁆𑀥𑀦𑁆𑀢𑀺. 𑀦𑀧𑀺 𑀅𑀫𑁆𑀩𑀨𑀮𑀤𑁆𑀯𑀬𑀁 𑀚𑀸𑀦𑀸𑀢𑀺 𑀅𑀳𑀁 𑀯𑀡𑁆𑀝𑁂𑀦 𑀉𑀧𑀦𑀺𑀩𑀤𑁆𑀥𑀦𑁆𑀢𑀺, 𑀏𑀯𑀫𑁂𑀯 𑀦 𑀣𑀽𑀮𑀦𑁆𑀳𑀸𑀭𑀼 𑀚𑀸𑀦𑀸𑀢𑀺 𑀫𑀬𑀸 𑀯𑀓𑁆𑀓𑀁 𑀉𑀧𑀦𑀺𑀩𑀤𑁆𑀥𑀦𑁆𑀢𑀺. 𑀦𑀧𑀺 𑀯𑀓𑁆𑀓𑀁 𑀚𑀸𑀦𑀸𑀢𑀺 𑀅𑀳𑀁 𑀣𑀽𑀮𑀦𑁆𑀳𑀸𑀭𑀼𑀦𑀸 𑀉𑀧𑀦𑀺𑀩𑀤𑁆𑀥𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀯𑀓𑁆𑀓𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁨𑁧. 𑀳𑀤𑀬𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀉𑀭𑀝𑁆𑀞𑀺𑀧𑀜𑁆𑀚𑀭𑀫𑀚𑁆𑀛𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀚𑀺𑀡𑁆𑀡𑀲𑀦𑁆𑀤𑀫𑀸𑀦𑀺𑀓𑀧𑀜𑁆𑀚𑀭𑀁 𑀦𑀺𑀲𑁆𑀲𑀸𑀬 𑀞𑀧𑀺𑀢𑀸𑀬 𑀫𑀁𑀲𑀧𑁂𑀲𑀺𑀬𑀸 𑀦 𑀲𑀦𑁆𑀤𑀫𑀸𑀦𑀺𑀓𑀧𑀜𑁆𑀚𑀭𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 𑀫𑀁 𑀦𑀺𑀲𑁆𑀲𑀸𑀬 𑀫𑀁𑀲𑀧𑁂𑀲𑀺 𑀞𑀺𑀢𑀸𑀢𑀺. 𑀦𑀧𑀺 𑀫𑀁𑀲𑀧𑁂𑀲𑀺 𑀚𑀸𑀦𑀸𑀢𑀺 𑀅𑀳𑀁 𑀚𑀺𑀡𑁆𑀡𑀲𑀦𑁆𑀤𑀫𑀸𑀦𑀺𑀓𑀧𑀜𑁆𑀚𑀭𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸𑀢𑀺, 𑀏𑀯𑀫𑁂𑀯 𑀦 𑀉𑀭𑀝𑁆𑀞𑀺𑀧𑀜𑁆𑀚𑀭𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 𑀫𑀁 𑀦𑀺𑀲𑁆𑀲𑀸𑀬 𑀳𑀤𑀬𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀳𑀤𑀬𑀁 𑀚𑀸𑀦𑀸𑀢𑀺 𑀅𑀳𑀁 𑀉𑀭𑀝𑁆𑀞𑀺𑀧𑀜𑁆𑀚𑀭𑀁 𑀦𑀺𑀲𑁆𑀲𑀸𑀬 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀳𑀤𑀬𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁨𑁨. 𑀬𑀓𑀦𑀁 𑀅𑀦𑁆𑀢𑁄𑀲𑀭𑀻𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀫𑀩𑁆𑀪𑀦𑁆𑀢𑀭𑁂 𑀤𑀓𑁆𑀔𑀺𑀡𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀉𑀓𑁆𑀔𑀮𑀺𑀓𑀧𑀸𑀮𑀧𑀲𑁆𑀲𑀫𑁆𑀳𑀺 𑀮𑀕𑁆𑀕𑁂 𑀬𑀫𑀓𑀫𑀁𑀲𑀧𑀺𑀡𑁆𑀟𑁂 𑀦 𑀉𑀓𑁆𑀔𑀮𑀺𑀓𑀧𑀸𑀮𑀧𑀲𑁆𑀲𑀁 𑀚𑀸𑀦𑀸𑀢𑀺 𑀫𑀬𑀺 𑀬𑀫𑀓𑀫𑀁𑀲𑀧𑀺𑀡𑁆𑀟𑁄 𑀮𑀕𑁆𑀕𑁄𑀢𑀺. 𑀦𑀧𑀺 𑀬𑀫𑀓𑀫𑀁𑀲𑀧𑀺𑀡𑁆𑀟𑁄 𑀚𑀸𑀦𑀸𑀢𑀺 𑀅𑀳𑀁 𑀉𑀓𑁆𑀔𑀮𑀺𑀓𑀧𑀸𑀮𑀧𑀲𑁆𑀲𑁂 𑀮𑀕𑁆𑀕𑁄𑀢𑀺, 𑀏𑀯𑀫𑁂𑀯 𑀦 𑀣𑀦𑀸𑀦𑀫𑀩𑁆𑀪𑀦𑁆𑀢𑀭𑁂 𑀤𑀓𑁆𑀔𑀺𑀡𑀧𑀲𑁆𑀲𑀁 𑀚𑀸𑀦𑀸𑀢𑀺 𑀫𑀁 𑀦𑀺𑀲𑁆𑀲𑀸𑀬 𑀬𑀓𑀦𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀬𑀓𑀦𑀁 𑀚𑀸𑀦𑀸𑀢𑀺 𑀅𑀳𑀁 𑀣𑀦𑀸𑀦𑀫𑀩𑁆𑀪𑀦𑁆𑀢𑀭𑁂 𑀤𑀓𑁆𑀔𑀺𑀡𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀬𑀓𑀦𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁨𑁩. 𑀓𑀺𑀮𑁄𑀫𑀓𑁂𑀲𑀼 𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑀁 𑀳𑀤𑀬𑀜𑁆𑀘 𑀯𑀓𑁆𑀓𑀜𑁆𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀁. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑀁 𑀲𑀓𑀮𑀲𑀭𑀻𑀭𑁂 𑀘𑀫𑁆𑀫𑀲𑁆𑀲 𑀳𑁂𑀝𑁆𑀞𑀢𑁄 𑀫𑀁𑀲𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀧𑀺𑀮𑁄𑀢𑀺𑀓𑀧𑀮𑀺𑀯𑁂𑀞𑀺𑀢𑁂 𑀫𑀁𑀲𑁂 𑀦 𑀫𑀁𑀲𑀁 𑀚𑀸𑀦𑀸𑀢𑀺 𑀅𑀳𑀁 𑀧𑀺𑀮𑁄𑀢𑀺𑀓𑀸𑀬 𑀧𑀮𑀺𑀯𑁂𑀞𑀺𑀢𑀦𑁆𑀢𑀺. 𑀦𑀧𑀺 𑀧𑀺𑀮𑁄𑀢𑀺𑀓𑀸 𑀚𑀸𑀦𑀸𑀢𑀺 𑀫𑀬𑀸 𑀫𑀁𑀲𑀁 𑀧𑀮𑀺𑀯𑁂𑀞𑀺𑀢𑀦𑁆𑀢𑀺, 𑀏𑀯𑀫𑁂𑀯 𑀦 𑀯𑀓𑁆𑀓𑀳𑀤𑀬𑀸𑀦𑀺 𑀲𑀓𑀮𑀲𑀭𑀻𑀭𑁂 𑀘 𑀫𑀁𑀲𑀁 𑀚𑀸𑀦𑀸𑀢𑀺 𑀅𑀳𑀁 𑀓𑀺𑀮𑁄𑀫𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺. 𑀦𑀧𑀺 𑀓𑀺𑀮𑁄𑀫𑀓𑀁 𑀚𑀸𑀦𑀸𑀢𑀺 𑀫𑀬𑀸 𑀯𑀓𑁆𑀓𑀳𑀤𑀬𑀸𑀦𑀺 𑀲𑀓𑀮𑀲𑀭𑀻𑀭𑁂 𑀘 𑀫𑀁𑀲𑀁 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀓𑀺𑀮𑁄𑀫𑀓𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁨𑁪. 𑀧𑀺𑀳𑀓𑀁 𑀳𑀤𑀬𑀲𑁆𑀲 𑀯𑀸𑀫𑀧𑀲𑁆𑀲𑁂 𑀉𑀤𑀭𑀧𑀝𑀮𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀓𑁄𑀝𑁆𑀞𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸𑀬 𑀕𑁄𑀫𑀬𑀧𑀺𑀡𑁆𑀟𑀺𑀬𑀸 𑀦 𑀓𑁄𑀝𑁆𑀞𑀫𑀢𑁆𑀣𑀓𑀧𑀲𑁆𑀲𑀁 𑀚𑀸𑀦𑀸𑀢𑀺 𑀕𑁄𑀫𑀬𑀧𑀺𑀡𑁆𑀟𑀺 𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸𑀢𑀺. 𑀦𑀧𑀺 𑀕𑁄𑀫𑀬𑀧𑀺𑀡𑁆𑀟𑀺 𑀚𑀸𑀦𑀸𑀢𑀺 𑀅𑀳𑀁 𑀓𑁄𑀝𑁆𑀞𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸𑀢𑀺, 𑀏𑀯𑀫𑁂𑀯 𑀦 𑀉𑀤𑀭𑀧𑀝𑀮𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑀁 𑀚𑀸𑀦𑀸𑀢𑀺 𑀧𑀺𑀳𑀓𑀁 𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢𑀦𑁆𑀢𑀺. 𑀦𑀧𑀺 𑀧𑀺𑀳𑀓𑀁 𑀚𑀸𑀦𑀸𑀢𑀺 𑀅𑀳𑀁 𑀉𑀤𑀭𑀧𑀝𑀮𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀧𑀺𑀳𑀓𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁨𑁫. 𑀧𑀧𑁆𑀨𑀸𑀲𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀫𑀦𑁆𑀢𑀭𑁂 𑀳𑀤𑀬𑀜𑁆𑀘 𑀬𑀓𑀦𑀜𑁆𑀘 𑀉𑀧𑀭𑀺 𑀙𑀸𑀤𑁂𑀢𑁆𑀯𑀸 𑀑𑀮𑀫𑁆𑀩𑀦𑁆𑀢𑀁 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀚𑀺𑀡𑁆𑀡𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑁂 𑀮𑀫𑁆𑀩𑀫𑀸𑀦𑁂 𑀲𑀓𑀼𑀡𑀓𑀼𑀮𑀸𑀯𑀓𑁂 𑀦 𑀚𑀺𑀡𑁆𑀡𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 𑀫𑀬𑀺 𑀲𑀓𑀼𑀡𑀓𑀼𑀮𑀸𑀯𑀓𑁄 𑀮𑀫𑁆𑀩𑀫𑀸𑀦𑁄 𑀞𑀺𑀢𑁄𑀢𑀺. 𑀦𑀧𑀺 𑀲𑀓𑀼𑀡𑀓𑀼𑀮𑀸𑀯𑀓𑁄 𑀚𑀸𑀦𑀸𑀢𑀺 𑀅𑀳𑀁 𑀚𑀺𑀡𑁆𑀡𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑁂 𑀮𑀫𑁆𑀩𑀫𑀸𑀦𑁄 𑀞𑀺𑀢𑁄𑀢𑀺, 𑀏𑀯𑀫𑁂𑀯 𑀦 𑀢𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 𑀫𑀬𑀺 𑀧𑀧𑁆𑀨𑀸𑀲𑀁 𑀮𑀫𑁆𑀩𑀫𑀸𑀦𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀧𑀧𑁆𑀨𑀸𑀲𑀁 𑀚𑀸𑀦𑀸𑀢𑀺 𑀅𑀳𑀁 𑀏𑀯𑀭𑀽𑀧𑁂 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀮𑀫𑁆𑀩𑀫𑀸𑀦𑀁 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀧𑀧𑁆𑀨𑀸𑀲𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁨𑁬. 𑀅𑀦𑁆𑀢𑀁 𑀕𑀮𑀯𑀸𑀝𑀓𑀓𑀭𑀻𑀲𑀫𑀕𑁆𑀕𑀧𑀭𑀺𑀬𑀦𑁆𑀢𑁂 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀮𑁄𑀳𑀺𑀢𑀤𑁄𑀡𑀺𑀓𑀸𑀬 𑀑𑀪𑀼𑀚𑀺𑀢𑁆𑀯𑀸 𑀞𑀧𑀺𑀢𑁂 𑀙𑀺𑀦𑁆𑀦𑀲𑀻𑀲𑀥𑀫𑁆𑀫𑀦𑀺𑀓𑀴𑁂𑀯𑀭𑁂 𑀦 𑀮𑁄𑀳𑀺𑀢𑀤𑁄𑀡𑀺 𑀚𑀸𑀦𑀸𑀢𑀺 𑀫𑀬𑀺 𑀥𑀫𑁆𑀫𑀦𑀺𑀓𑀴𑁂𑀯𑀭𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀥𑀫𑁆𑀫𑀦𑀺𑀓𑀴𑁂𑀯𑀭𑀁 𑀚𑀸𑀦𑀸𑀢𑀺 𑀅𑀳𑀁 𑀮𑁄𑀳𑀺𑀢𑀤𑁄𑀡𑀺𑀬𑀸 𑀞𑀺𑀢𑀦𑁆𑀢𑀺, 𑀏𑀯𑀫𑁂𑀯 𑀦 𑀲𑀭𑀻𑀭𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 𑀫𑀬𑀺 𑀅𑀦𑁆𑀢𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀅𑀦𑁆𑀢𑀁 𑀚𑀸𑀦𑀸𑀢𑀺 𑀅𑀳𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀅𑀦𑁆𑀢𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁨𑁭. 𑀅𑀦𑁆𑀢𑀕𑀼𑀡𑀁 𑀅𑀦𑁆𑀢𑀦𑁆𑀢𑀭𑁂 𑀏𑀓𑀯𑀻𑀲𑀢𑀺𑀅𑀦𑁆𑀢𑀪𑁄𑀕𑁂 𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀁 𑀲𑀺𑀩𑁆𑀩𑁂𑀢𑁆𑀯𑀸 𑀞𑀺𑀢𑁂𑀲𑀼 𑀭𑀚𑁆𑀚𑀼𑀓𑁂𑀲𑀼 𑀦 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀁 𑀚𑀸𑀦𑀸𑀢𑀺 𑀭𑀚𑁆𑀚𑀼𑀓𑀸 𑀫𑀁 𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀸𑀢𑀺. 𑀦𑀧𑀺 𑀭𑀚𑁆𑀚𑀼𑀓𑀸 𑀚𑀸𑀦𑀦𑁆𑀢𑀺 𑀫𑀬𑀁 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀁 𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀸𑀢𑀺, 𑀏𑀯𑀫𑁂𑀯 𑀦 𑀅𑀦𑁆𑀢𑀁 𑀚𑀸𑀦𑀸𑀢𑀺 𑀅𑀦𑁆𑀢𑀕𑀼𑀡𑀁 𑀫𑀁 𑀆𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦𑀧𑀺 𑀅𑀦𑁆𑀢𑀕𑀼𑀡𑀁 𑀚𑀸𑀦𑀸𑀢𑀺 𑀅𑀳𑀁 𑀅𑀦𑁆𑀢𑀁 𑀆𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀅𑀦𑁆𑀢𑀕𑀼𑀡𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁨𑁮. 𑀉𑀤𑀭𑀺𑀬𑀁 𑀉𑀤𑀭𑁂 𑀞𑀺𑀢𑀁 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁. 𑀢𑀢𑁆𑀣 𑀬𑀣𑀸 𑀲𑀼𑀯𑀸𑀦𑀤𑁄𑀡𑀺𑀬𑀁 𑀞𑀺𑀢𑁂 𑀲𑀼𑀯𑀸𑀦𑀯𑀫𑀣𑀼𑀫𑁆𑀳𑀺 𑀦 𑀲𑀼𑀯𑀸𑀦𑀤𑁄𑀡𑀺 𑀚𑀸𑀦𑀸𑀢𑀺 𑀫𑀬𑀺 𑀲𑀼𑀯𑀸𑀦𑀯𑀫𑀣𑀼 𑀞𑀺𑀢𑁄𑀢𑀺. 𑀦𑀧𑀺 𑀲𑀼𑀯𑀸𑀦𑀯𑀫𑀣𑀼 𑀚𑀸𑀦𑀸𑀢𑀺 𑀅𑀳𑀁 𑀲𑀼𑀯𑀸𑀦𑀤𑁄𑀡𑀺𑀬𑀁 𑀞𑀺𑀢𑁄𑀢𑀺, 𑀏𑀯𑀫𑁂𑀯 𑀦 𑀉𑀤𑀭𑀁 𑀚𑀸𑀦𑀸𑀢𑀺 𑀫𑀬𑀺 𑀉𑀤𑀭𑀺𑀬𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀉𑀤𑀭𑀺𑀬𑀁 𑀚𑀸𑀦𑀸𑀢𑀺 𑀅𑀳𑀁 𑀉𑀤𑀭𑁂 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀉𑀤𑀭𑀺𑀬𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁨𑁯. 𑀓𑀭𑀻𑀲𑀁 𑀧𑀓𑁆𑀓𑀸𑀲𑀬𑀲𑀗𑁆𑀔𑀸𑀢𑁂 𑀅𑀝𑁆𑀞𑀗𑁆𑀕𑀼𑀮𑀯𑁂𑀴𑀼𑀧𑀩𑁆𑀩𑀲𑀤𑀺𑀲𑁂 𑀅𑀦𑁆𑀢𑀧𑀭𑀺𑀬𑁄𑀲𑀸𑀦𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀯𑁂𑀴𑀼𑀧𑀩𑁆𑀩𑁂 𑀑𑀫𑀤𑁆𑀤𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀸𑀬 𑀲𑀡𑁆𑀳𑀧𑀡𑁆𑀟𑀼𑀫𑀢𑁆𑀢𑀺𑀓𑀸𑀬 𑀦 𑀯𑁂𑀴𑀼𑀧𑀩𑁆𑀩𑀁 𑀚𑀸𑀦𑀸𑀢𑀺 𑀫𑀬𑀺 𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀞𑀺𑀢𑀸𑀢𑀺. 𑀦𑀧𑀺 𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀚𑀸𑀦𑀸𑀢𑀺 𑀅𑀳𑀁 𑀯𑁂𑀴𑀼𑀧𑀩𑁆𑀩𑁂 𑀞𑀺𑀢𑀸𑀢𑀺, 𑀏𑀯𑀫𑁂𑀯 𑀦 𑀧𑀓𑁆𑀓𑀸𑀲𑀬𑁄 𑀚𑀸𑀦𑀸𑀢𑀺 𑀫𑀬𑀺 𑀓𑀭𑀻𑀲𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀓𑀭𑀻𑀲𑀁 𑀚𑀸𑀦𑀸𑀢𑀺 𑀅𑀳𑀁 𑀧𑀓𑁆𑀓𑀸𑀲𑀬𑁂 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀓𑀭𑀻𑀲𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁩𑁦. 𑀫𑀢𑁆𑀣𑀮𑀼𑀗𑁆𑀕𑀁 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀧𑀼𑀭𑀸𑀡𑀮𑀸𑀩𑀼𑀓𑀝𑀸𑀳𑁂 𑀧𑀓𑁆𑀔𑀺𑀢𑁆𑀢𑀸𑀬 𑀧𑀺𑀝𑁆𑀞𑀧𑀺𑀡𑁆𑀟𑀺𑀬𑀸 𑀦 𑀮𑀸𑀩𑀼𑀓𑀝𑀸𑀳𑀁 𑀚𑀸𑀦𑀸𑀢𑀺 𑀫𑀬𑀺 𑀧𑀺𑀝𑁆𑀞𑀧𑀺𑀡𑁆𑀟𑀺 𑀞𑀺𑀢𑀸𑀢𑀺. 𑀦𑀧𑀺 𑀧𑀺𑀝𑁆𑀞𑀧𑀺𑀡𑁆𑀟𑀺 𑀚𑀸𑀦𑀸𑀢𑀺 𑀅𑀳𑀁 𑀮𑀸𑀩𑀼𑀓𑀝𑀸𑀳𑁂 𑀞𑀺𑀢𑀸𑀢𑀺, 𑀏𑀯𑀫𑁂𑀯 𑀦 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 𑀫𑀬𑀺 𑀫𑀢𑁆𑀣𑀮𑀼𑀗𑁆𑀕𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀫𑀢𑁆𑀣𑀮𑀼𑀗𑁆𑀕𑀁 𑀚𑀸𑀦𑀸𑀢𑀺 𑀅𑀳𑀁 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑁂 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀫𑀢𑁆𑀣𑀮𑀼𑀗𑁆𑀕𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑁩𑁩𑁧. 𑀧𑀺𑀢𑁆𑀢𑁂𑀲𑀼 𑀅𑀩𑀤𑁆𑀥𑀧𑀺𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀁 𑀲𑀓𑀮𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁. 𑀩𑀤𑁆𑀥𑀧𑀺𑀢𑁆𑀢𑀁 𑀧𑀺𑀢𑁆𑀢𑀓𑁄𑀲𑀓𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀧𑀽𑀯𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑁂 𑀢𑁂𑀮𑁂 𑀦 𑀧𑀽𑀯𑀁 𑀚𑀸𑀦𑀸𑀢𑀺 𑀢𑁂𑀮𑀁 𑀫𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦𑀧𑀺 𑀢𑁂𑀮𑀁 𑀚𑀸𑀦𑀸𑀢𑀺 𑀅𑀳𑀁 𑀧𑀽𑀯𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀦𑁆𑀢𑀺, 𑀏𑀯𑀫𑁂𑀯 𑀦 𑀲𑀭𑀻𑀭𑀁 𑀚𑀸𑀦𑀸𑀢𑀺 𑀅𑀩𑀤𑁆𑀥𑀧𑀺𑀢𑁆𑀢𑀁 𑀫𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦𑀧𑀺 𑀅𑀩𑀤𑁆𑀥𑀧𑀺𑀢𑁆𑀢𑀁 𑀚𑀸𑀦𑀸𑀢𑀺 𑀅𑀳𑀁 𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀬𑀣𑀸 𑀯𑀲𑁆𑀲𑁄𑀤𑀓𑁂𑀦 𑀧𑀼𑀡𑁆𑀡𑁂 𑀓𑁄𑀲𑀸𑀢𑀓𑀺𑀓𑁄𑀲𑀓𑁂 𑀦 𑀓𑁄𑀲𑀸𑀢𑀓𑀺𑀓𑁄𑀲𑀓𑁄 𑀚𑀸𑀦𑀸𑀢𑀺 𑀫𑀬𑀺 𑀯𑀲𑁆𑀲𑁄𑀤𑀓𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀯𑀲𑁆𑀲𑁄𑀤𑀓𑀁 𑀚𑀸𑀦𑀸𑀢𑀺 𑀅𑀳𑀁 𑀓𑁄𑀲𑀸𑀢𑀓𑀺𑀓𑁄𑀲𑀓𑁂 𑀞𑀺𑀢𑀦𑁆𑀢𑀺, 𑀏𑀯𑀫𑁂𑀯 𑀦 𑀧𑀺𑀢𑁆𑀢𑀓𑁄𑀲𑀓𑁄 𑀚𑀸𑀦𑀸𑀢𑀺 𑀫𑀬𑀺 𑀩𑀤𑁆𑀥𑀧𑀺𑀢𑁆𑀢𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀩𑀤𑁆𑀥𑀧𑀺𑀢𑁆𑀢𑀁 𑀚𑀸𑀦𑀸𑀢𑀺 𑀅𑀳𑀁 𑀧𑀺𑀢𑁆𑀢𑀓𑁄𑀲𑀓𑁂 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀧𑀺𑀢𑁆𑀢𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁩𑁨. 𑀲𑁂𑀫𑁆𑀳𑀁 𑀏𑀓𑀧𑀢𑁆𑀣𑀧𑀽𑀭𑀧𑁆𑀧𑀫𑀸𑀡𑀁 𑀉𑀤𑀭𑀧𑀝𑀮𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀉𑀧𑀭𑀺 𑀲𑀜𑁆𑀚𑀸𑀢𑀨𑁂𑀡𑀧𑀝𑀮𑀸𑀬 𑀘𑀦𑁆𑀤𑀦𑀺𑀓𑀸𑀬 𑀦 𑀘𑀦𑁆𑀤𑀦𑀺𑀓𑀸 𑀚𑀸𑀦𑀸𑀢𑀺 𑀫𑀬𑀺 𑀨𑁂𑀡𑀧𑀝𑀮𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀨𑁂𑀡𑀧𑀝𑀮𑀁 𑀚𑀸𑀦𑀸𑀢𑀺 𑀅𑀳𑀁 𑀘𑀦𑁆𑀤𑀦𑀺𑀓𑀸𑀬 𑀞𑀺𑀢𑀦𑁆𑀢𑀺, 𑀏𑀯𑀫𑁂𑀯 𑀦 𑀉𑀤𑀭𑀧𑀝𑀮𑀁 𑀚𑀸𑀦𑀸𑀢𑀺 𑀫𑀬𑀺 𑀲𑁂𑀫𑁆𑀳𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀲𑁂𑀫𑁆𑀳𑀁 𑀚𑀸𑀦𑀸𑀢𑀺 𑀅𑀳𑀁 𑀉𑀤𑀭𑀧𑀝𑀮𑁂 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀲𑁂𑀫𑁆𑀳𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁩𑁩. 𑀧𑀼𑀩𑁆𑀩𑁄 𑀅𑀦𑀺𑀩𑀤𑁆𑀥𑁄𑀓𑀸𑀲𑁄 𑀬𑀢𑁆𑀣 𑀬𑀢𑁆𑀣𑁂𑀯 𑀔𑀸𑀡𑀼𑀓𑀡𑁆𑀝𑀓𑀧𑁆𑀧𑀳𑀭𑀡𑀅𑀕𑁆𑀕𑀺𑀚𑀸𑀮𑀸𑀤𑀻𑀳𑀺 𑀅𑀪𑀺𑀳𑀢𑁂 𑀲𑀭𑀻𑀭𑀧𑁆𑀧𑀤𑁂𑀲𑁂 𑀮𑁄𑀳𑀺𑀢𑀁 𑀲𑀡𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀢𑀺, 𑀕𑀡𑁆𑀟𑀧𑀻𑀴𑀓𑀸𑀤𑀬𑁄 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀬𑀣𑀸 𑀨𑀭𑀲𑀼𑀧𑁆𑀧𑀳𑀸𑀭𑀸𑀤𑀺𑀯𑀲𑁂𑀦 𑀧𑀕𑁆𑀖𑀭𑀺𑀢𑀦𑀺𑀬𑁆𑀬𑀸𑀲𑁂 𑀭𑀼𑀓𑁆𑀔𑁂 𑀦 𑀭𑀼𑀓𑁆𑀔𑀲𑁆𑀲 𑀧𑀳𑀸𑀭𑀸𑀤𑀺𑀧𑁆𑀧𑀤𑁂𑀲𑀸 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀲𑀼 𑀦𑀺𑀬𑁆𑀬𑀸𑀲𑁄 𑀞𑀺𑀢𑁄𑀢𑀺, 𑀦𑀧𑀺 𑀦𑀺𑀬𑁆𑀬𑀸𑀲𑁄 𑀚𑀸𑀦𑀸𑀢𑀺 𑀅𑀳𑀁 𑀭𑀼𑀓𑁆𑀔𑀲𑁆𑀲 𑀧𑀳𑀸𑀭𑀸𑀤𑀺𑀧𑁆𑀧𑀤𑁂𑀲𑁂𑀲𑀼 𑀞𑀺𑀢𑁄𑀢𑀺, 𑀏𑀯𑀫𑁂𑀯 𑀦 𑀲𑀭𑀻𑀭𑀲𑁆𑀲 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀳𑀺 𑀅𑀪𑀺𑀳𑀢𑀧𑁆𑀧𑀤𑁂𑀲𑀸 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀲𑀼 𑀧𑀼𑀩𑁆𑀩𑁄 𑀞𑀺𑀢𑁄𑀢𑀺. 𑀦𑀧𑀺 𑀧𑀼𑀩𑁆𑀩𑁄 𑀚𑀸𑀦𑀸𑀢𑀺 𑀅𑀳𑀁 𑀢𑁂𑀲𑀼 𑀧𑀤𑁂𑀲𑁂𑀲𑀼 𑀞𑀺𑀢𑁄𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀧𑀼𑀩𑁆𑀩𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁩𑁪. 𑀮𑁄𑀳𑀺𑀢𑁂𑀲𑀼 𑀲𑀁𑀲𑀭𑀡𑀮𑁄𑀳𑀺𑀢𑀁 𑀧𑀺𑀢𑁆𑀢𑀁 𑀯𑀺𑀬 𑀲𑀓𑀮𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁. 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀁 𑀬𑀓𑀦𑀝𑁆𑀞𑀸𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀁 𑀧𑀽𑀭𑁂𑀢𑁆𑀯𑀸 𑀏𑀓𑀧𑀢𑁆𑀣𑀧𑀽𑀭𑀫𑀢𑁆𑀢𑀁 𑀯𑀓𑁆𑀓𑀳𑀤𑀬𑀬𑀓𑀦𑀧𑀧𑁆𑀨𑀸𑀲𑀸𑀦𑀺 𑀢𑁂𑀫𑁂𑀦𑁆𑀢𑀁 𑀞𑀺𑀢𑀁. 𑀢𑀢𑁆𑀣 𑀲𑀁𑀲𑀭𑀡𑀮𑁄𑀳𑀺𑀢𑁂 𑀅𑀩𑀤𑁆𑀥𑀧𑀺𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀇𑀢𑀭𑀁 𑀧𑀦 𑀬𑀣𑀸 𑀚𑀚𑁆𑀚𑀭𑀓𑀧𑀸𑀮𑁂 𑀑𑀯𑀝𑁆𑀞𑁂 𑀉𑀤𑀓𑁂 𑀳𑁂𑀝𑁆𑀞𑀸 𑀮𑁂𑀟𑁆𑀟𑀼𑀔𑀡𑁆𑀟𑀸𑀤𑀻𑀦𑀺 𑀢𑁂𑀫𑀬𑀫𑀸𑀦𑁂 𑀦 𑀮𑁂𑀟𑁆𑀟𑀼𑀔𑀡𑁆𑀟𑀸𑀤𑀻𑀦𑀺 𑀚𑀸𑀦𑀦𑁆𑀢𑀺 𑀫𑀬𑀁 𑀉𑀤𑀓𑁂𑀦 𑀢𑁂𑀫𑀺𑀬𑀫𑀸𑀦𑀸𑀢𑀺. 𑀦𑀧𑀺 𑀉𑀤𑀓𑀁 𑀚𑀸𑀦𑀸𑀢𑀺 𑀅𑀳𑀁 𑀮𑁂𑀟𑁆𑀟𑀼𑀔𑀡𑁆𑀟𑀸𑀤𑀻𑀦𑀺 𑀢𑁂𑀫𑁂𑀫𑀻𑀢𑀺, 𑀏𑀯𑀫𑁂𑀯 𑀦 𑀬𑀓𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀝𑁆𑀞𑀸𑀦𑀁 𑀯𑀓𑁆𑀓𑀸𑀤𑀻𑀦𑀺 𑀯𑀸 𑀚𑀸𑀦𑀦𑁆𑀢𑀺 𑀫𑀬𑀺 𑀮𑁄𑀳𑀺𑀢𑀁 𑀞𑀺𑀢𑀁 𑀅𑀫𑁆𑀳𑁂 𑀯𑀸 𑀢𑁂𑀫𑀬𑀫𑀸𑀦𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀮𑁄𑀳𑀺𑀢𑀁 𑀚𑀸𑀦𑀸𑀢𑀺 𑀅𑀳𑀁 𑀬𑀓𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀁 𑀧𑀽𑀭𑁂𑀢𑁆𑀯𑀸 𑀯𑀓𑁆𑀓𑀸𑀤𑀻𑀦𑀺 𑀢𑁂𑀫𑀬𑀫𑀸𑀦𑀁 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀮𑁄𑀳𑀺𑀢𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁩𑁫. 𑀲𑁂𑀤𑁄 𑀅𑀕𑁆𑀕𑀺𑀲𑀦𑁆𑀢𑀸𑀧𑀸𑀤𑀺𑀓𑀸𑀮𑁂𑀲𑀼 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑀸𑀦𑀺 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺 𑀘𑁂𑀯 𑀧𑀕𑁆𑀖𑀭𑀢𑀺 𑀘. 𑀢𑀢𑁆𑀣 𑀬𑀣𑀸 𑀉𑀤𑀓𑀸 𑀅𑀩𑁆𑀩𑀽𑀴𑁆𑀳𑀫𑀢𑁆𑀢𑁂𑀲𑀼 𑀪𑀺𑀲𑀫𑀼𑀴𑀸𑀮𑀓𑀼𑀫𑀼𑀤𑀦𑀸𑀴𑀓𑀮𑀸𑀧𑁂𑀲𑀼 𑀦 𑀪𑀺𑀲𑀸𑀤𑀺𑀓𑀮𑀸𑀧𑀯𑀺𑀯𑀭𑀸𑀦𑀺 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀳𑀺 𑀉𑀤𑀓𑀁 𑀧𑀕𑁆𑀖𑀭𑀢𑀻𑀢𑀺. 𑀦𑀧𑀺 𑀪𑀺𑀲𑀸𑀤𑀺𑀓𑀮𑀸𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀦𑁆𑀢𑀁 𑀉𑀤𑀓𑀁 𑀚𑀸𑀦𑀸𑀢𑀺 𑀅𑀳𑀁 𑀪𑀺𑀲𑀸𑀤𑀺𑀓𑀮𑀸𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀸𑀫𑀻𑀢𑀺, 𑀏𑀯𑀫𑁂𑀯 𑀦 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑀸𑀦𑀺 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀳𑀺 𑀲𑁂𑀤𑁄 𑀧𑀕𑁆𑀖𑀭𑀢𑀻𑀢𑀺. 𑀦𑀧𑀺 𑀲𑁂𑀤𑁄 𑀚𑀸𑀦𑀸𑀢𑀺 𑀅𑀳𑀁 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀸𑀫𑀻𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀲𑁂𑀤𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁩𑁬. 𑀫𑁂𑀤𑁄 𑀣𑀽𑀮𑀲𑁆𑀲 𑀲𑀓𑀮𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀓𑀺𑀲𑀲𑁆𑀲 𑀚𑀗𑁆𑀖𑀫𑀁𑀲𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀧𑀢𑁆𑀣𑀺𑀦𑁆𑀦𑀲𑀺𑀦𑁂𑀳𑁄. 𑀢𑀢𑁆𑀣 𑀬𑀣𑀸 𑀳𑀮𑀺𑀤𑁆𑀤𑀺𑀧𑀺𑀮𑁄𑀢𑀺𑀓𑀧𑀝𑀺𑀘𑁆𑀙𑀦𑁆𑀦𑁂 𑀫𑀁𑀲𑀧𑀼𑀜𑁆𑀚𑁂 𑀦 𑀫𑀁𑀲𑀧𑀼𑀜𑁆𑀚𑁄 𑀚𑀸𑀦𑀸𑀢𑀺 𑀫𑀁 𑀦𑀺𑀲𑁆𑀲𑀸𑀬 𑀳𑀮𑀺𑀤𑁆𑀤𑀺𑀧𑀺𑀮𑁄𑀢𑀺𑀓𑀸 𑀞𑀺𑀢𑀸𑀢𑀺. 𑀦𑀧𑀺 𑀳𑀮𑀺𑀤𑁆𑀤𑀺𑀧𑀺𑀮𑁄𑀢𑀺𑀓𑀸 𑀚𑀸𑀦𑀸𑀢𑀺 𑀅𑀳𑀁 𑀫𑀁𑀲𑀧𑀼𑀜𑁆𑀚𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸𑀢𑀺, 𑀏𑀯𑀫𑁂𑀯 𑀦 𑀲𑀓𑀮𑀲𑀭𑀻𑀭𑁂 𑀚𑀗𑁆𑀖𑀸𑀤𑀻𑀲𑀼 𑀯𑀸 𑀫𑀁𑀲𑀁 𑀚𑀸𑀦𑀸𑀢𑀺 𑀫𑀁 𑀦𑀺𑀲𑁆𑀲𑀸𑀬 𑀫𑁂𑀤𑁄 𑀞𑀺𑀢𑁄𑀢𑀺. 𑀦𑀧𑀺 𑀫𑁂𑀤𑁄 𑀚𑀸𑀦𑀸𑀢𑀺 𑀅𑀳𑀁 𑀲𑀓𑀮𑀲𑀭𑀻𑀭𑁂 𑀚𑀗𑁆𑀖𑀸𑀤𑀻𑀲𑀼 𑀯𑀸 𑀫𑀁𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀫𑁂𑀤𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀧𑀢𑁆𑀣𑀺𑀦𑁆𑀦𑀬𑀽𑀲𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁩𑁭. 𑀅𑀲𑁆𑀲𑀼 𑀬𑀤𑀸 𑀲𑀜𑁆𑀚𑀸𑀬𑀢𑀺 𑀢𑀤𑀸 𑀅𑀓𑁆𑀔𑀺𑀓𑀽𑀧𑀓𑁂 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀧𑀕𑁆𑀖𑀭𑀢𑀺 𑀯𑀸. 𑀢𑀢𑁆𑀣 𑀬𑀣𑀸 𑀉𑀤𑀓𑀧𑀼𑀡𑁆𑀡𑁂𑀲𑀼 𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑁂𑀲𑀼 𑀦 𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑀸 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀲𑀼 𑀉𑀤𑀓𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑁂𑀲𑀼 𑀉𑀤𑀓𑀁 𑀚𑀸𑀦𑀸𑀢𑀺 𑀅𑀳𑀁 𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑁂𑀲𑀼 𑀞𑀺𑀢𑀦𑁆𑀢𑀺, 𑀏𑀯𑀫𑁂𑀯 𑀦 𑀅𑀓𑁆𑀔𑀺𑀓𑀽𑀧𑀓𑀸 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀲𑀼 𑀅𑀲𑁆𑀲𑀼 𑀞𑀺𑀢𑀦𑁆𑀢𑀺. 𑀦𑀧𑀺 𑀅𑀲𑁆𑀲𑀼 𑀚𑀸𑀦𑀸𑀢𑀺 𑀅𑀳𑀁 𑀅𑀓𑁆𑀔𑀺𑀓𑀽𑀧𑀓𑁂𑀲𑀼 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀅𑀲𑁆𑀲𑀼 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁩𑁮. 𑀯𑀲𑀸 𑀅𑀕𑁆𑀕𑀺𑀲𑀦𑁆𑀢𑀸𑀧𑀸𑀤𑀺𑀓𑀸𑀮𑁂 𑀳𑀢𑁆𑀣𑀢𑀮𑀳𑀢𑁆𑀣𑀧𑀺𑀝𑁆𑀞𑀺𑀧𑀸𑀤𑀢𑀮𑀧𑀸𑀤𑀧𑀺𑀝𑁆𑀞𑀺 𑀦𑀸𑀲𑀸𑀧𑀼𑀝𑀦𑀮𑀸𑀝𑀅𑀁𑀲𑀓𑀽𑀝𑁂𑀲𑀼 𑀞𑀺𑀢𑀯𑀺𑀮𑀻𑀦𑀲𑁆𑀦𑁂𑀳𑁄. 𑀢𑀢𑁆𑀣 𑀬𑀣𑀸 𑀧𑀓𑁆𑀔𑀺𑀢𑁆𑀢𑀢𑁂𑀮𑁂 𑀆𑀘𑀸𑀫𑁂 𑀦 𑀆𑀘𑀸𑀫𑁄 𑀚𑀸𑀦𑀸𑀢𑀺 𑀫𑀁 𑀢𑁂𑀮𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦𑀧𑀺 𑀢𑁂𑀮𑀁 𑀚𑀸𑀦𑀸𑀢𑀺 𑀅𑀳𑀁 𑀆𑀘𑀸𑀫𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀦𑁆𑀢𑀺, 𑀏𑀯𑀫𑁂𑀯 𑀦 𑀳𑀢𑁆𑀣𑀢𑀮𑀸𑀤𑀺𑀧𑁆𑀧𑀤𑁂𑀲𑁄 𑀚𑀸𑀦𑀸𑀢𑀺 𑀫𑀁 𑀯𑀲𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀸𑀢𑀺. 𑀦𑀧𑀺 𑀯𑀲𑀸 𑀚𑀸𑀦𑀸𑀢𑀺 𑀅𑀳𑀁 𑀳𑀢𑁆𑀣𑀢𑀮𑀸𑀤𑀺𑀧𑁆𑀧𑀤𑁂𑀲𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀸𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀯𑀲𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁩𑁯. 𑀔𑁂𑀴𑁄 𑀢𑀣𑀸𑀭𑀽𑀧𑁂 𑀔𑁂𑀴𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑁂 𑀲𑀢𑀺 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑁄𑀳𑀺𑀢𑁆𑀯𑀸 𑀚𑀺𑀯𑁆𑀳𑀸𑀢𑀮𑁂 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀬𑀣𑀸 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀉𑀤𑀓𑀦𑀺𑀲𑁆𑀲𑀦𑁆𑀤𑁂 𑀦𑀤𑀻𑀢𑀻𑀭𑀓𑀽𑀧𑀓𑁂 𑀦 𑀓𑀽𑀧𑀢𑀮𑀁 𑀚𑀸𑀦𑀸𑀢𑀺 𑀫𑀬𑀺 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀻𑀢𑀺. 𑀦𑀧𑀺 𑀉𑀤𑀓𑀁 𑀚𑀸𑀦𑀸𑀢𑀺 𑀅𑀳𑀁 𑀓𑀽𑀧𑀢𑀮𑁂 𑀲𑀦𑁆𑀢𑀺𑀝𑁆𑀞𑀸𑀫𑀻𑀢𑀺, 𑀏𑀯𑀫𑁂𑀯 𑀦 𑀚𑀺𑀯𑁆𑀳𑀸𑀢𑀮𑀁 𑀚𑀸𑀦𑀸𑀢𑀺 𑀫𑀬𑀺 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑁄𑀳𑀺𑀢𑁆𑀯𑀸 𑀔𑁂𑀴𑁄 𑀞𑀺𑀢𑁄𑀢𑀺. 𑀦𑀧𑀺 𑀔𑁂𑀴𑁄 𑀚𑀸𑀦𑀸𑀢𑀺 𑀅𑀳𑀁 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑁄𑀳𑀺𑀢𑁆𑀯𑀸 𑀚𑀺𑀯𑁆𑀳𑀸𑀢𑀮𑁂 𑀞𑀺𑀢𑁄𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀔𑁂𑀴𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁪𑁦. 𑀲𑀺𑀗𑁆𑀖𑀸𑀡𑀺𑀓𑀸 𑀬𑀤𑀸 𑀲𑀜𑁆𑀚𑀸𑀬𑀢𑀺, 𑀢𑀤𑀸 𑀦𑀸𑀲𑀸𑀧𑀼𑀝𑁂 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀧𑀕𑁆𑀖𑀭𑀢𑀺 𑀯𑀸. 𑀢𑀢𑁆𑀣 𑀬𑀣𑀸 𑀧𑀽𑀢𑀺𑀤𑀥𑀺𑀪𑀭𑀺𑀢𑀸𑀬 𑀲𑀺𑀧𑁆𑀧𑀺𑀓𑀸𑀬 𑀦 𑀲𑀺𑀧𑁆𑀧𑀺𑀓𑀸 𑀚𑀸𑀦𑀸𑀢𑀺 𑀫𑀬𑀺 𑀧𑀽𑀢𑀺𑀤𑀥𑀺 𑀞𑀺𑀢𑀦𑁆𑀢𑀺. 𑀦𑀧𑀺 𑀧𑀽𑀢𑀺𑀤𑀥𑀺 𑀚𑀸𑀦𑀸𑀢𑀺 𑀅𑀳𑀁 𑀲𑀺𑀧𑁆𑀧𑀺𑀓𑀸𑀬 𑀞𑀺𑀢𑀦𑁆𑀢𑀺, 𑀏𑀯𑀫𑁂𑀯 𑀦 𑀦𑀸𑀲𑀸𑀧𑀼𑀝𑀸 𑀚𑀸𑀦𑀦𑁆𑀢𑀺 𑀅𑀫𑁆𑀳𑁂𑀲𑀼 𑀲𑀺𑀗𑁆𑀖𑀸𑀡𑀺𑀓𑀸 𑀞𑀺𑀢𑀸𑀢𑀺. 𑀦𑀧𑀺 𑀲𑀺𑀗𑁆𑀖𑀸𑀡𑀺𑀓𑀸 𑀚𑀸𑀦𑀸𑀢𑀺 𑀅𑀳𑀁 𑀦𑀸𑀲𑀸𑀧𑀼𑀝𑁂𑀲𑀼 𑀞𑀺𑀢𑀸𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀲𑀺𑀗𑁆𑀖𑀸𑀡𑀺𑀓𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁪𑁧. 𑀮𑀲𑀺𑀓𑀸 𑀅𑀝𑁆𑀞𑀺𑀓𑀲𑀦𑁆𑀥𑀻𑀦𑀁 𑀅𑀩𑁆𑀪𑀜𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀅𑀲𑀻𑀢𑀺𑀲𑀢𑀲𑀦𑁆𑀥𑀻𑀲𑀼 𑀞𑀺𑀢𑀸. 𑀢𑀢𑁆𑀣 𑀬𑀣𑀸 𑀢𑁂𑀮𑀩𑁆𑀪𑀜𑁆𑀚𑀺𑀢𑁂 𑀅𑀓𑁆𑀔𑁂 𑀦 𑀅𑀓𑁆𑀔𑁄 𑀚𑀸𑀦𑀸𑀢𑀺 𑀫𑀁 𑀢𑁂𑀮𑀁 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢𑀦𑁆𑀢𑀺. 𑀦𑀧𑀺 𑀢𑁂𑀮𑀁 𑀚𑀸𑀦𑀸𑀢𑀺 𑀅𑀳𑀁 𑀅𑀓𑁆𑀔𑀁 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢𑀦𑁆𑀢𑀺, 𑀏𑀯𑀫𑁂𑀯 𑀦 𑀅𑀲𑀻𑀢𑀺𑀲𑀢𑀲𑀦𑁆𑀥𑀬𑁄 𑀚𑀸𑀦𑀦𑁆𑀢𑀺 𑀮𑀲𑀺𑀓𑀸 𑀅𑀫𑁆𑀳𑁂 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢𑀸𑀢𑀺. 𑀦𑀧𑀺 𑀮𑀲𑀺𑀓𑀸 𑀚𑀸𑀦𑀸𑀢𑀺 𑀅𑀳𑀁 𑀅𑀲𑀻𑀢𑀺𑀲𑀢𑀲𑀦𑁆𑀥𑀬𑁄 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢𑀸𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀮𑀲𑀺𑀓𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁪𑁨. 𑀫𑀼𑀢𑁆𑀢𑀁 𑀯𑀢𑁆𑀣𑀺𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀘𑀦𑁆𑀤𑀦𑀺𑀓𑀸𑀬 𑀧𑀓𑁆𑀔𑀺𑀢𑁆𑀢𑁂 𑀅𑀫𑀼𑀔𑁂 𑀭𑀯𑀡𑀖𑀝𑁂 𑀦 𑀭𑀯𑀡𑀖𑀝𑁄 𑀚𑀸𑀦𑀸𑀢𑀺 𑀫𑀬𑀺 𑀘𑀦𑁆𑀤𑀦𑀺𑀓𑀸𑀭𑀲𑁄 𑀞𑀺𑀢𑁄𑀢𑀺. 𑀦𑀧𑀺 𑀘𑀦𑁆𑀤𑀦𑀺𑀓𑀸𑀭𑀲𑁄 𑀚𑀸𑀦𑀸𑀢𑀺 𑀅𑀳𑀁 𑀭𑀯𑀡𑀖𑀝𑁂 𑀞𑀺𑀢𑁄𑀢𑀺, 𑀏𑀯𑀫𑁂𑀯 𑀦 𑀯𑀢𑁆𑀣𑀺 𑀚𑀸𑀦𑀸𑀢𑀺 𑀫𑀬𑀺 𑀫𑀼𑀢𑁆𑀢𑀁 𑀞𑀺𑀢𑀦𑁆𑀢𑀺. 𑀦𑀧𑀺 𑀫𑀼𑀢𑁆𑀢𑀁 𑀚𑀸𑀦𑀸𑀢𑀺 𑀅𑀳𑀁 𑀯𑀢𑁆𑀣𑀺𑀫𑁆𑀳𑀺 𑀞𑀺𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀫𑀼𑀢𑁆𑀢𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑁩𑁪𑁩. 𑀏𑀯𑀁 𑀓𑁂𑀲𑀸𑀤𑀻𑀲𑀼 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀢𑁆𑀯𑀸 𑀬𑁂𑀦 𑀲𑀦𑁆𑀢𑀧𑁆𑀧𑀢𑀺, 𑀅𑀬𑀁 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀧𑀭𑀺𑀧𑀸𑀘𑀦𑀸𑀓𑀸𑀭𑁄 𑀢𑁂𑀚𑁄𑀥𑀸𑀢𑀽𑀢𑀺, 𑀬𑁂𑀦 𑀚𑀻𑀭𑀻𑀬𑀢𑀺, 𑀬𑁂𑀦 𑀧𑀭𑀺𑀟𑀬𑁆𑀳𑀢𑀺, 𑀬𑁂𑀦 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀅𑀬𑀁 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀧𑀭𑀺𑀧𑀸𑀘𑀦𑀸𑀓𑀸𑀭𑁄 𑀢𑁂𑀚𑁄𑀥𑀸𑀢𑀽𑀢𑀺 𑀏𑀯𑀁 𑀢𑁂𑀚𑁄𑀓𑁄𑀝𑁆𑀞𑀸𑀲𑁂𑀲𑀼 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄.

𑁩𑁪𑁪. 𑀢𑀢𑁄 𑀉𑀤𑁆𑀥𑀗𑁆𑀕𑀫𑁂 𑀯𑀸𑀢𑁂 𑀉𑀤𑁆𑀥𑀗𑁆𑀕𑀫𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀥𑁄𑀕𑀫𑁂 𑀅𑀥𑁄𑀕𑀫𑀯𑀲𑁂𑀦, 𑀓𑀼𑀘𑁆𑀙𑀺𑀲𑀬𑁂 𑀓𑀼𑀘𑁆𑀙𑀺𑀲𑀬𑀯𑀲𑁂𑀦, 𑀓𑁄𑀝𑁆𑀞𑀸𑀲𑀬𑁂 𑀓𑁄𑀝𑁆𑀞𑀸𑀲𑀬𑀯𑀲𑁂𑀦, 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀫𑁆𑀳𑀺 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀯𑀲𑁂𑀦, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀯𑀺𑀢𑁆𑀣𑀫𑁆𑀪𑀦𑀸𑀓𑀸𑀭𑁄 𑀯𑀸𑀬𑁄𑀥𑀸𑀢𑀽𑀢𑀺, 𑀅𑀥𑁄𑀕𑀫𑀸 𑀯𑀸𑀢𑀸 𑀦𑀸𑀫, 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸 𑀦𑀸𑀫, 𑀓𑁄𑀝𑁆𑀞𑀸𑀲𑀬𑀸 𑀯𑀸𑀢𑀸 𑀦𑀸𑀫, 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀯𑀸𑀢𑀸 𑀦𑀸𑀫, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀸𑀢𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀯𑀺𑀢𑁆𑀣𑀫𑁆𑀪𑀦𑀸𑀓𑀸𑀭𑁄 𑀯𑀸𑀬𑁄𑀥𑀸𑀢𑀽𑀢𑀺 𑀏𑀯𑀁 𑀯𑀸𑀬𑁄𑀓𑁄𑀝𑁆𑀞𑀸𑀲𑁂𑀲𑀼 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀢𑀲𑁆𑀲𑁂𑀯𑀁 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀲𑁆𑀲 𑀥𑀸𑀢𑀼𑀬𑁄 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀢𑀸 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑀘𑀸𑀭𑀲𑀫𑀸𑀥𑀺 𑀉𑀧𑁆𑀧𑀚𑁆𑀚𑀢𑀺.

𑁩𑁪𑁫. 𑀬𑀲𑁆𑀲 𑀧𑀦 𑀏𑀯𑀁 𑀪𑀸𑀯𑀬𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀇𑀚𑁆𑀛𑀢𑀺, 𑀢𑁂𑀦 𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀢𑁄 𑀪𑀸𑀯𑁂𑀢𑀩𑁆𑀩𑀁. 𑀓𑀣𑀁? 𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀼 𑀣𑀤𑁆𑀥𑀮𑀓𑁆𑀔𑀡𑀁 𑀧𑀣𑀯𑀻𑀥𑀸𑀢𑀽𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀢𑀢𑁆𑀣𑁂𑀯 𑀆𑀩𑀦𑁆𑀥𑀦𑀮𑀓𑁆𑀔𑀡𑀁 𑀆𑀧𑁄𑀥𑀸𑀢𑀽𑀢𑀺. 𑀧𑀭𑀺𑀧𑀸𑀘𑀦𑀮𑀓𑁆𑀔𑀡𑀁 𑀢𑁂𑀚𑁄𑀥𑀸𑀢𑀽𑀢𑀺. 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁 𑀯𑀸𑀬𑁄𑀥𑀸𑀢𑀽𑀢𑀺.

𑀤𑁆𑀯𑀸𑀤𑀲𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀆𑀩𑀦𑁆𑀥𑀦𑀮𑀓𑁆𑀔𑀡𑀁 𑀆𑀧𑁄𑀥𑀸𑀢𑀽𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀢𑀢𑁆𑀣𑁂𑀯 𑀧𑀭𑀺𑀧𑀸𑀘𑀦𑀮𑀓𑁆𑀔𑀡𑀁 𑀢𑁂𑀚𑁄𑀥𑀸𑀢𑀽𑀢𑀺. 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁 𑀯𑀸𑀬𑁄𑀥𑀸𑀢𑀽𑀢𑀺. 𑀣𑀤𑁆𑀥𑀮𑀓𑁆𑀔𑀡𑀁 𑀧𑀣𑀯𑀻𑀥𑀸𑀢𑀽𑀢𑀺.

𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀭𑀺𑀧𑀸𑀘𑀦𑀮𑀓𑁆𑀔𑀡𑀁 𑀢𑁂𑀚𑁄𑀥𑀸𑀢𑀽𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀢𑁂𑀦 𑀅𑀯𑀺𑀦𑀺𑀪𑀼𑀢𑁆𑀢𑀁 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁 𑀯𑀸𑀬𑁄𑀥𑀸𑀢𑀽𑀢𑀺. 𑀣𑀤𑁆𑀥𑀮𑀓𑁆𑀔𑀡𑀁 𑀧𑀣𑀯𑀻𑀥𑀸𑀢𑀽𑀢𑀺. 𑀆𑀩𑀦𑁆𑀥𑀦𑀮𑀓𑁆𑀔𑀡𑀁 𑀆𑀧𑁄𑀥𑀸𑀢𑀽𑀢𑀺.

𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁 𑀯𑀸𑀬𑁄𑀥𑀸𑀢𑀽𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀢𑀢𑁆𑀣𑁂𑀯 𑀣𑀤𑁆𑀥𑀮𑀓𑁆𑀔𑀡𑀁 𑀧𑀣𑀯𑀻𑀥𑀸𑀢𑀽𑀢𑀺. 𑀆𑀩𑀦𑁆𑀥𑀦𑀮𑀓𑁆𑀔𑀡𑀁 𑀆𑀧𑁄𑀥𑀸𑀢𑀽𑀢𑀺. 𑀧𑀭𑀺𑀧𑀸𑀘𑀦𑀮𑀓𑁆𑀔𑀡𑀁 𑀢𑁂𑀚𑁄𑀥𑀸𑀢𑀽𑀢𑀺. 𑀢𑀲𑁆𑀲𑁂𑀯𑀁 𑀯𑀯𑀢𑁆𑀣𑀸𑀧𑀬𑀢𑁄 𑀥𑀸𑀢𑀼𑀬𑁄 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀢𑀸 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑀘𑀸𑀭𑀲𑀫𑀸𑀥𑀺 𑀉𑀧𑁆𑀧𑀚𑁆𑀚𑀢𑀺.

𑁩𑁪𑁬. 𑀬𑀲𑁆𑀲 𑀧𑀦 𑀏𑀯𑀫𑁆𑀧𑀺 𑀪𑀸𑀯𑀬𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀇𑀚𑁆𑀛𑀢𑀺, 𑀢𑁂𑀦 𑀲𑀮𑀓𑁆𑀔𑀡𑀯𑀺𑀪𑀢𑁆𑀢𑀺𑀢𑁄 𑀪𑀸𑀯𑁂𑀢𑀩𑁆𑀩𑀁. 𑀓𑀣𑀁? 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑁂𑀲𑀸𑀤𑀬𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀓𑁂𑀲𑀫𑁆𑀳𑀺 𑀣𑀤𑁆𑀥𑀮𑀓𑁆𑀔𑀡𑀁 𑀧𑀣𑀯𑀻𑀥𑀸𑀢𑀽𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀢𑀢𑁆𑀣𑁂𑀯 𑀆𑀩𑀦𑁆𑀥𑀦𑀮𑀓𑁆𑀔𑀡𑀁 𑀆𑀧𑁄𑀥𑀸𑀢𑀽𑀢𑀺. 𑀧𑀭𑀺𑀧𑀸𑀘𑀦𑀮𑀓𑁆𑀔𑀡𑀁 𑀢𑁂𑀚𑁄𑀥𑀸𑀢𑀽𑀢𑀺. 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁 𑀯𑀸𑀬𑁄𑀥𑀸𑀢𑀽𑀢𑀺. 𑀏𑀯𑀁 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀘𑀢𑀲𑁆𑀲𑁄 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀢𑀲𑁆𑀲𑁂𑀯𑀁 𑀯𑀯𑀢𑁆𑀣𑀸𑀧𑀬𑀢𑁄 𑀥𑀸𑀢𑀼𑀬𑁄 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀢𑀸 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑀘𑀸𑀭𑀲𑀫𑀸𑀥𑀺 𑀉𑀧𑁆𑀧𑀚𑁆𑀚𑀢𑀺.

𑀅𑀧𑀺𑀘 𑀔𑁄 𑀧𑀦 𑀯𑀘𑀦𑀢𑁆𑀣𑀢𑁄, 𑀓𑀮𑀸𑀧𑀢𑁄, 𑀘𑀼𑀡𑁆𑀡𑀢𑁄, 𑀮𑀓𑁆𑀔𑀡𑀸𑀤𑀺𑀢𑁄, 𑀲𑀫𑀼𑀝𑁆𑀞𑀸𑀦𑀢𑁄, 𑀦𑀸𑀦𑀢𑁆𑀢𑁂𑀓𑀢𑁆𑀢𑀢𑁄, 𑀯𑀺𑀦𑀺𑀩𑁆𑀪𑁄𑀕𑀸𑀯𑀺𑀦𑀺𑀩𑁆𑀪𑁄𑀕𑀢𑁄, 𑀲𑀪𑀸𑀕𑀯𑀺𑀲𑀪𑀸𑀕𑀢𑁄, 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀺𑀲𑁂𑀲𑀢𑁄, 𑀲𑀗𑁆𑀕𑀳𑀢𑁄, 𑀧𑀘𑁆𑀘𑀬𑀢𑁄, 𑀅𑀲𑀫𑀦𑁆𑀦𑀸𑀳𑀸𑀭𑀢𑁄, 𑀧𑀘𑁆𑀘𑀬𑀯𑀺𑀪𑀸𑀕𑀢𑁄𑀢𑀺 𑀇𑀫𑁂𑀳𑀺𑀧𑀺 𑀆𑀓𑀸𑀭𑁂𑀳𑀺 𑀥𑀸𑀢𑀼𑀬𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁪𑁭. 𑀢𑀢𑁆𑀣 𑀯𑀘𑀦𑀢𑁆𑀣𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀧𑀢𑁆𑀣𑀝𑀢𑁆𑀢𑀸 𑀧𑀣𑀯𑀻. 𑀅𑀧𑁆𑀧𑁄𑀢𑀺 𑀆𑀧𑀺𑀬𑀢𑀺 𑀅𑀧𑁆𑀧𑀸𑀬𑀢𑀻𑀢𑀺 𑀯𑀸 𑀆𑀧𑁄. 𑀢𑁂𑀚𑀢𑀻𑀢𑀺 𑀢𑁂𑀚𑁄. 𑀯𑀸𑀬𑀢𑀻𑀢𑀺 𑀯𑀸𑀬𑁄. 𑀅𑀯𑀺𑀲𑁂𑀲𑁂𑀦 𑀧𑀦 𑀲𑀮𑀓𑁆𑀔𑀡𑀥𑀸𑀭𑀡𑀢𑁄 𑀤𑀼𑀓𑁆𑀔𑀸𑀤𑀸𑀦𑀢𑁄 𑀤𑀼𑀓𑁆𑀔𑀸𑀥𑀸𑀦𑀢𑁄 𑀘 𑀥𑀸𑀢𑀽𑀢𑀺. 𑀏𑀯𑀁 𑀯𑀺𑀲𑁂𑀲𑀲𑀸𑀫𑀜𑁆𑀜𑀯𑀲𑁂𑀦 𑀯𑀘𑀦𑀢𑁆𑀣𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁪𑁮. 𑀓𑀮𑀸𑀧𑀢𑁄𑀢𑀺 𑀬𑀸 𑀅𑀬𑀁 𑀓𑁂𑀲𑀸 𑀮𑁄𑀫𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀧𑀣𑀯𑀻𑀥𑀸𑀢𑀼, 𑀧𑀺𑀢𑁆𑀢𑀁 𑀲𑁂𑀫𑁆𑀳𑀦𑁆𑀢𑀺 𑀘 𑀆𑀤𑀺𑀦𑀸 𑀦𑀬𑁂𑀦 𑀤𑁆𑀯𑀸𑀤𑀲𑀳𑀸𑀓𑀸𑀭𑁂𑀳𑀺 𑀆𑀧𑁄𑀥𑀸𑀢𑀼 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀢𑁆𑀣 𑀬𑀲𑁆𑀫𑀸 𑁋

𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸, 𑀘𑀢𑀲𑁆𑀲𑁄 𑀘𑀸𑀧𑀺 𑀥𑀸𑀢𑀼𑀬𑁄;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀳𑁄𑀢𑀺 𑀓𑁂𑀲𑀸𑀢𑀺 𑀲𑀫𑁆𑀫𑀼𑀢𑀺;

𑀢𑁂𑀲𑀁𑀬𑁂𑀯 𑀯𑀺𑀦𑀺𑀩𑁆𑀪𑁄𑀕𑀸, 𑀦𑀢𑁆𑀣𑀺 𑀓𑁂𑀲𑀸𑀢𑀺 𑀲𑀫𑁆𑀫𑀼𑀢𑀺.

𑀢𑀲𑁆𑀫𑀸 𑀓𑁂𑀲𑀸𑀧𑀺 𑀅𑀝𑁆𑀞𑀥𑀫𑁆𑀫𑀓𑀮𑀸𑀧𑀫𑀢𑁆𑀢𑀫𑁂𑀯. 𑀢𑀣𑀸 𑀮𑁄𑀫𑀸𑀤𑀬𑁄𑀢𑀺. 𑀬𑁄 𑀧𑀦𑁂𑀢𑁆𑀣 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀓𑁄𑀝𑁆𑀞𑀸𑀲𑁄, 𑀲𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀘 𑀪𑀸𑀯𑁂𑀦 𑀘 𑀲𑀤𑁆𑀥𑀺𑀁 𑀤𑀲𑀥𑀫𑁆𑀫𑀓𑀮𑀸𑀧𑁄𑀧𑀺 𑀳𑁄𑀢𑀺. 𑀉𑀲𑁆𑀲𑀤𑀯𑀲𑁂𑀦 𑀧𑀦 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀽𑀢𑀺 𑀲𑀗𑁆𑀔𑀁 𑀕𑀢𑁄. 𑀏𑀯𑀁 𑀓𑀮𑀸𑀧𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁪𑁯. 𑀘𑀼𑀡𑁆𑀡𑀢𑁄𑀢𑀺 𑀇𑀫𑀲𑁆𑀫𑀺𑀁 𑀳𑀺 𑀲𑀭𑀻𑀭𑁂 𑀫𑀚𑁆𑀛𑀺𑀫𑁂𑀦 𑀧𑀫𑀸𑀡𑁂𑀦 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑀸 𑀧𑀭𑀫𑀸𑀡𑀼𑀪𑁂𑀤𑀲𑀜𑁆𑀘𑀼𑀡𑁆𑀡𑀸 𑀲𑀼𑀔𑀼𑀫𑀭𑀚𑀪𑀽𑀢𑀸 𑀧𑀣𑀯𑀻𑀥𑀸𑀢𑀼 𑀤𑁄𑀡𑀫𑀢𑁆𑀢𑀸 𑀲𑀺𑀬𑀸. 𑀲𑀸 𑀢𑀢𑁄 𑀉𑀧𑀟𑁆𑀠𑀧𑁆𑀧𑀫𑀸𑀡𑀸𑀬 𑀆𑀧𑁄𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸, 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀧𑀸𑀮𑀺𑀢𑀸 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀢𑁆𑀣𑀫𑁆𑀪𑀺𑀢𑀸 𑀦 𑀯𑀺𑀓𑀺𑀭𑀺𑀬𑀢𑀺 𑀦 𑀯𑀺𑀤𑁆𑀥𑀁𑀲𑀺𑀬𑀢𑀺, 𑀅𑀯𑀺𑀓𑀺𑀭𑀺𑀬𑀫𑀸𑀦𑀸 𑀅𑀯𑀺𑀤𑁆𑀥𑀁𑀲𑀺𑀬𑀫𑀸𑀦𑀸 𑀅𑀦𑁂𑀓𑀯𑀺𑀥𑀁 𑀇𑀢𑁆𑀣𑀺𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀺𑀪𑀸𑀯𑀯𑀺𑀓𑀧𑁆𑀧𑀁 𑀉𑀧𑀕𑀘𑁆𑀙𑀢𑀺, 𑀅𑀡𑀼𑀣𑀽𑀮𑀤𑀻𑀖𑀭𑀲𑁆𑀲𑀣𑀺𑀭𑀓𑀣𑀺𑀦𑀸𑀤𑀺𑀪𑀸𑀯𑀜𑁆𑀘 𑀧𑀓𑀸𑀲𑁂𑀢𑀺.

𑀬𑀽𑀲𑀕𑀢𑀸 𑀆𑀩𑀦𑁆𑀥𑀦𑀸𑀓𑀸𑀭𑀪𑀽𑀢𑀸 𑀧𑀦𑁂𑀢𑁆𑀣 𑀆𑀧𑁄𑀥𑀸𑀢𑀼 𑀧𑀣𑀯𑀻𑀧𑀢𑀺𑀝𑁆𑀞𑀺𑀢𑀸 𑀢𑁂𑀚𑀸𑀦𑀼𑀧𑀸𑀮𑀺𑀢𑀸 𑀯𑀸𑀬𑁄𑀯𑀺𑀢𑁆𑀣𑀫𑁆𑀪𑀺𑀢𑀸 𑀦 𑀧𑀕𑁆𑀖𑀭𑀢𑀺 𑀦 𑀧𑀭𑀺𑀲𑁆𑀲𑀯𑀢𑀺, 𑀅𑀧𑀕𑁆𑀖𑀭𑀫𑀸𑀦𑀸 𑀅𑀧𑀭𑀺𑀲𑁆𑀲𑀯𑀫𑀸𑀦𑀸 𑀧𑀻𑀡𑀺𑀢𑀧𑀻𑀡𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀅𑀲𑀺𑀢𑀧𑀻𑀢𑀸𑀤𑀺𑀧𑀸𑀘𑀓𑀸 𑀘𑁂𑀢𑁆𑀣 𑀉𑀲𑀼𑀫𑀸𑀓𑀸𑀭𑀪𑀽𑀢𑀸 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀸 𑀢𑁂𑀚𑁄𑀥𑀸𑀢𑀼 𑀧𑀣𑀯𑀻𑀧𑀢𑀺𑀝𑁆𑀞𑀺𑀢𑀸 𑀆𑀧𑁄𑀲𑀗𑁆𑀕𑀳𑀺𑀢𑀸 𑀯𑀸𑀬𑁄𑀯𑀺𑀢𑁆𑀣𑀫𑁆𑀪𑀺𑀢𑀸 𑀇𑀫𑀁 𑀓𑀸𑀬𑀁 𑀧𑀭𑀺𑀧𑀸𑀘𑁂𑀢𑀺, 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀜𑁆𑀘𑀲𑁆𑀲 𑀆𑀯𑀳𑀢𑀺. 𑀢𑀸𑀬 𑀘 𑀧𑀦 𑀧𑀭𑀺𑀧𑀸𑀘𑀺𑀢𑁄 𑀅𑀬𑀁 𑀓𑀸𑀬𑁄 𑀦 𑀧𑀽𑀢𑀺𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀝𑀸 𑀘𑁂𑀢𑁆𑀣 𑀲𑀫𑀼𑀤𑀻𑀭𑀡𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸 𑀯𑀸𑀬𑁄𑀥𑀸𑀢𑀼 𑀧𑀣𑀯𑀻𑀧𑀢𑀺𑀝𑁆𑀞𑀺𑀢𑀸 𑀆𑀧𑁄𑀲𑀗𑁆𑀕𑀳𑀺𑀢𑀸 𑀢𑁂𑀚𑀸𑀦𑀼𑀧𑀸𑀮𑀺𑀢𑀸 𑀇𑀫𑀁 𑀓𑀸𑀬𑀁 𑀯𑀺𑀢𑁆𑀣𑀫𑁆𑀪𑁂𑀢𑀺. 𑀢𑀸𑀬 𑀘 𑀧𑀦 𑀯𑀺𑀢𑁆𑀣𑀫𑁆𑀪𑀺𑀢𑁄 𑀅𑀬𑀁 𑀓𑀸𑀬𑁄 𑀦 𑀧𑀭𑀺𑀧𑀢𑀢𑀺, 𑀉𑀚𑀼𑀓𑀁 𑀲𑀡𑁆𑀞𑀸𑀢𑀺. 𑀅𑀧𑀭𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀲𑀫𑀩𑁆𑀪𑀸𑀳𑀢𑁄 𑀕𑀫𑀦𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀲𑀬𑀦𑀇𑀭𑀺𑀬𑀸𑀧𑀣𑁂𑀲𑀼 𑀯𑀺𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀲𑀫𑀺𑀜𑁆𑀚𑁂𑀢𑀺, 𑀲𑀫𑁆𑀧𑀲𑀸𑀭𑁂𑀢𑀺, 𑀳𑀢𑁆𑀣𑀧𑀸𑀤𑀁 𑀮𑀸𑀴𑁂𑀢𑀺. 𑀏𑀯𑀫𑁂𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀪𑀸𑀯𑁂𑀦 𑀩𑀸𑀮𑀚𑀦𑀯𑀜𑁆𑀘𑀦𑀁 𑀫𑀸𑀬𑀸𑀭𑀽𑀧𑀲𑀤𑀺𑀲𑀁 𑀥𑀸𑀢𑀼𑀬𑀦𑁆𑀢𑀁 𑀧𑀯𑀢𑁆𑀢𑀢𑀻𑀢𑀺 𑀏𑀯𑀁 𑀘𑀼𑀡𑁆𑀡𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁫𑁦. 𑀮𑀓𑁆𑀔𑀡𑀸𑀤𑀺𑀢𑁄𑀢𑀺 𑀧𑀣𑀯𑀻𑀥𑀸𑀢𑀼 𑀓𑀺𑀁 𑀮𑀓𑁆𑀔𑀡𑀸, 𑀓𑀺𑀁 𑀭𑀲𑀸, 𑀓𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀏𑀯𑀁 𑀘𑀢𑀲𑁆𑀲𑁄𑀧𑀺 𑀥𑀸𑀢𑀼𑀬𑁄 𑀆𑀯𑀚𑁆𑀚𑁂𑀢𑁆𑀯𑀸 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸, 𑀧𑀢𑀺𑀝𑁆𑀞𑀸𑀦𑀭𑀲𑀸, 𑀲𑀫𑁆𑀧𑀝𑀺𑀘𑁆𑀙𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀆𑀧𑁄𑀥𑀸𑀢𑀼 𑀧𑀕𑁆𑀖𑀭𑀡𑀮𑀓𑁆𑀔𑀡𑀸, 𑀩𑁆𑀭𑀽𑀳𑀦𑀭𑀲𑀸, 𑀲𑀗𑁆𑀕𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀢𑁂𑀚𑁄𑀥𑀸𑀢𑀼 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀸, 𑀧𑀭𑀺𑀧𑀸𑀘𑀦𑀭𑀲𑀸, 𑀫𑀤𑁆𑀤𑀯𑀸𑀦𑀼𑀧𑁆𑀧𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀯𑀸𑀬𑁄𑀥𑀸𑀢𑀼 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸, 𑀲𑀫𑀼𑀤𑀻𑀭𑀡𑀭𑀲𑀸. 𑀅𑀪𑀺𑀦𑀻𑀳𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀏𑀯𑀁 𑀮𑀓𑁆𑀔𑀡𑀸𑀤𑀺𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁫𑁧. 𑀲𑀫𑀼𑀝𑁆𑀞𑀸𑀦𑀢𑁄𑀢𑀺 𑀬𑁂 𑀇𑀫𑁂 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑀦𑀯𑀲𑁂𑀦 𑀓𑁂𑀲𑀸𑀤𑀬𑁄 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀓𑁄𑀝𑁆𑀞𑀸𑀲𑀸 𑀤𑀲𑁆𑀲𑀺𑀢𑀸. 𑀢𑁂𑀲𑀼 𑀉𑀤𑀭𑀺𑀬𑀁 𑀓𑀭𑀻𑀲𑀁 𑀧𑀼𑀩𑁆𑀩𑁄 𑀫𑀼𑀢𑁆𑀢𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑀸 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀯. 𑀅𑀲𑁆𑀲𑀼 𑀲𑁂𑀤𑁄 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸. 𑀅𑀲𑀺𑀢𑀸𑀤𑀺𑀧𑀭𑀺𑀧𑀸𑀘𑀓𑁄 𑀢𑁂𑀚𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄𑀯. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀯. 𑀅𑀯𑀲𑁂𑀲𑀸 𑀲𑀩𑁆𑀩𑁂𑀧𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀸𑀢𑀺 𑀏𑀯𑀁 𑀲𑀫𑀼𑀝𑁆𑀞𑀸𑀦𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁫𑁨. 𑀦𑀸𑀦𑀢𑁆𑀢𑁂𑀓𑀢𑁆𑀢𑀢𑁄𑀢𑀺 𑀲𑀩𑁆𑀩𑀸𑀲𑀫𑁆𑀧𑀺 𑀥𑀸𑀢𑀽𑀦𑀁 𑀲𑀮𑀓𑁆𑀔𑀡𑀸𑀤𑀺𑀢𑁄 𑀦𑀸𑀦𑀢𑁆𑀢𑀁. 𑀅𑀜𑁆𑀜𑀸𑀦𑁂𑀯 𑀳𑀺 𑀧𑀣𑀯𑀻𑀥𑀸𑀢𑀼𑀬𑀸 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺. 𑀅𑀜𑁆𑀜𑀸𑀦𑀺 𑀆𑀧𑁄𑀥𑀸𑀢𑀼𑀆𑀤𑀻𑀦𑀁. 𑀏𑀯𑀁 𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀧𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘 𑀦𑀸𑀦𑀢𑁆𑀢𑀪𑀽𑀢𑀸𑀦𑀫𑁆𑀧𑀺 𑀏𑀢𑀸𑀲𑀁 𑀭𑀽𑀧𑀫𑀳𑀸𑀪𑀽𑀢𑀥𑀸𑀢𑀼𑀥𑀫𑁆𑀫𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀏𑀓𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀸𑀧𑀺 𑀳𑀺 𑀥𑀸𑀢𑀼𑀬𑁄 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀅𑀦𑀢𑀻𑀢𑀢𑁆𑀢𑀸 𑀭𑀽𑀧𑀸𑀦𑀺. 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀫𑀳𑀸𑀪𑀽𑀢𑀸𑀦𑀺.

𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀸𑀤𑀻𑀳𑀻𑀢𑀺 𑀏𑀢𑀸 𑀳𑀺 𑀥𑀸𑀢𑀼𑀬𑁄 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀢𑁄, 𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄, 𑀫𑀳𑀸𑀧𑀭𑀺𑀳𑀸𑀭𑀢𑁄, 𑀫𑀳𑀸𑀯𑀺𑀓𑀸𑀭𑀢𑁄, 𑀫𑀳𑀢𑁆𑀢𑀸 𑀪𑀽𑀢𑀢𑁆𑀢𑀸 𑀘𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀫𑀳𑀸𑀪𑀽𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀢𑀢𑁆𑀣 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀢𑁄𑀢𑀺 𑀏𑀢𑀸𑀦𑀺 𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀲𑀦𑁆𑀢𑀸𑀦𑁂𑀧𑀺 𑀉𑀧𑀸𑀤𑀺𑀦𑁆𑀦𑀲𑀦𑁆𑀢𑀸𑀦𑁂𑀧𑀺 𑀫𑀳𑀦𑁆𑀢𑀸𑀦𑀺 𑀧𑀸𑀢𑀼𑀪𑀽𑀢𑀸𑀦𑀺. 𑀢𑁂𑀲𑀁 𑀅𑀦𑀼𑀧𑀸𑀤𑀺𑀦𑁆𑀦𑀲𑀦𑁆𑀢𑀸𑀦𑁂 𑁋

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸𑀢𑀺. 𑁋

𑀆𑀤𑀺𑀦𑀸 𑀦𑀬𑁂𑀦 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀢𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸𑀯.

𑀉𑀧𑀸𑀤𑀺𑀦𑁆𑀦𑀲𑀦𑁆𑀢𑀸𑀦𑁂𑀧𑀺 𑀫𑀘𑁆𑀙𑀓𑀘𑁆𑀙𑀧𑀤𑁂𑀯𑀤𑀸𑀦𑀯𑀸𑀤𑀺𑀲𑀭𑀻𑀭𑀯𑀲𑁂𑀦 𑀫𑀳𑀦𑁆𑀢𑀸𑀦𑁂𑀯 𑀧𑀸𑀢𑀼𑀪𑀽𑀢𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸’’𑀢𑀺𑀆𑀤𑀺.

𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄𑀢𑀺 𑀏𑀢𑀸𑀦𑀺 𑀳𑀺 𑀬𑀣𑀸 𑀫𑀸𑀬𑀸𑀓𑀸𑀭𑁄 𑀅𑀫𑀡𑀺𑀁𑀬𑁂𑀯 𑀉𑀤𑀓𑀁 𑀫𑀡𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀅𑀲𑀼𑀯𑀡𑁆𑀡𑀁𑀬𑁂𑀯 𑀮𑁂𑀟𑁆𑀟𑀼𑀁 𑀲𑀼𑀯𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀬𑀣𑀸 𑀘 𑀲𑀬𑀁 𑀦𑁂𑀯 𑀬𑀓𑁆𑀔𑁄 𑀦 𑀬𑀓𑁆𑀔𑀻 𑀲𑀫𑀸𑀦𑁄 𑀬𑀓𑁆𑀔𑀪𑀸𑀯𑀫𑁆𑀧𑀺 𑀬𑀓𑁆𑀔𑀺𑀪𑀸𑀯𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀏𑀯𑀫𑁂𑀯 𑀲𑀬𑀁 𑀅𑀦𑀻𑀮𑀸𑀦𑁂𑀯 𑀳𑀼𑀢𑁆𑀯𑀸 𑀦𑀻𑀮𑀁 𑀉𑀧𑀸𑀤𑀸𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀺, 𑀅𑀧𑀻𑀢𑀸𑀦𑀺 𑀅𑀮𑁄𑀳𑀺𑀢𑀸𑀦𑀺 𑀅𑀦𑁄𑀤𑀸𑀢𑀸𑀦𑁂𑀯 𑀳𑀼𑀢𑁆𑀯𑀸 𑀑𑀤𑀸𑀢𑀁 𑀉𑀧𑀸𑀤𑀸𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀫𑀸𑀬𑀸𑀓𑀸𑀭𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄 𑀫𑀳𑀸𑀪𑀽𑀢𑀸𑀦𑀺.

𑀬𑀣𑀸 𑀘 𑀬𑀓𑁆𑀔𑀸𑀤𑀻𑀦𑀺 𑀫𑀳𑀸𑀪𑀽𑀢𑀸𑀦𑀺 𑀬𑀁 𑀕𑀡𑁆𑀳𑀦𑁆𑀢𑀺, 𑀦𑁂𑀯 𑀦𑁂𑀲𑀁 𑀢𑀲𑁆𑀲 𑀅𑀦𑁆𑀢𑁄 𑀦 𑀩𑀳𑀺 𑀞𑀸𑀦𑀁 𑀉𑀧𑀮𑀩𑁆𑀪𑀢𑀺, 𑀦 𑀘 𑀢𑀁 𑀦𑀺𑀲𑁆𑀲𑀸𑀬 𑀦 𑀢𑀺𑀝𑁆𑀞𑀦𑁆𑀢𑀺, 𑀏𑀯𑀫𑁂𑀯 𑀢𑀸𑀦𑀺𑀧𑀺 𑀦𑁂𑀯 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑁆𑀢𑁄 𑀦 𑀩𑀳𑀺 𑀞𑀺𑀢𑀸𑀦𑀺 𑀳𑀼𑀢𑁆𑀯𑀸 𑀉𑀧𑀮𑀩𑁆𑀪𑀦𑁆𑀢𑀺, 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀦 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀘𑀺𑀦𑁆𑀢𑁂𑀬𑁆𑀬𑀝𑁆𑀞𑀸𑀦𑀢𑀸𑀬 𑀬𑀓𑁆𑀔𑀸𑀤𑀺𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄𑀧𑀺 𑀫𑀳𑀸𑀪𑀽𑀢𑀸𑀦𑀺. 𑀬𑀣𑀸 𑀘 𑀬𑀓𑁆𑀔𑀺𑀦𑀻𑀲𑀗𑁆𑀔𑀸𑀢𑀸𑀦𑀺 𑀫𑀳𑀸𑀪𑀽𑀢𑀸𑀦𑀺 𑀫𑀦𑀸𑀧𑁂𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀯𑀺𑀓𑁆𑀔𑁂𑀧𑁂𑀳𑀺 𑀅𑀢𑁆𑀢𑀦𑁄 𑀪𑀬𑀸𑀦𑀓𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀢𑁆𑀢𑁂 𑀯𑀜𑁆𑀘𑁂𑀦𑁆𑀢𑀺, 𑀏𑀯𑀫𑁂𑀯 𑀏𑀢𑀸𑀦𑀺𑀧𑀺 𑀇𑀢𑁆𑀣𑀺𑀧𑀼𑀭𑀺𑀲𑀲𑀭𑀻𑀭𑀸𑀤𑀻𑀲𑀼 𑀫𑀦𑀸𑀧𑁂𑀦 𑀙𑀯𑀺𑀯𑀡𑁆𑀡𑁂𑀦 𑀫𑀦𑀸𑀧𑁂𑀦 𑀅𑀢𑁆𑀢𑀦𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀡𑁆𑀞𑀸𑀦𑁂𑀦 𑀫𑀦𑀸𑀧𑁂𑀦 𑀘 𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀺𑀪𑀫𑀼𑀓𑀯𑀺𑀓𑁆𑀔𑁂𑀧𑁂𑀦 𑀅𑀢𑁆𑀢𑀦𑁄 𑀓𑀓𑁆𑀔𑀴𑀢𑁆𑀢𑀸𑀤𑀺𑀪𑁂𑀤𑀁 𑀲𑀭𑀲𑀮𑀓𑁆𑀔𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀩𑀸𑀮𑀚𑀦𑀁 𑀯𑀜𑁆𑀘𑁂𑀦𑁆𑀢𑀺, 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀤𑀝𑁆𑀞𑀼𑀁 𑀦 𑀤𑁂𑀦𑁆𑀢𑀻𑀢𑀺 𑀯𑀜𑁆𑀘𑀓𑀢𑁆𑀢𑁂𑀦 𑀬𑀓𑁆𑀔𑀺𑀦𑀻𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄𑀧𑀺 𑀫𑀳𑀸𑀪𑀽𑀢𑀸𑀦𑀺.

𑀫𑀳𑀸𑀧𑀭𑀺𑀳𑀸𑀭𑀢𑁄𑀢𑀺 𑀫𑀳𑀦𑁆𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀧𑀭𑀺𑀳𑀭𑀺𑀢𑀩𑁆𑀩𑀢𑁄. 𑀏𑀢𑀸𑀦𑀺 𑀳𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀉𑀧𑀦𑁂𑀢𑀩𑁆𑀩𑀢𑁆𑀢𑀸 𑀫𑀳𑀦𑁆𑀢𑁂𑀳𑀺 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀳𑀺 𑀪𑀽𑀢𑀸𑀦𑀺 𑀧𑀯𑀢𑁆𑀢𑀸𑀦𑀻𑀢𑀺 𑀫𑀳𑀸𑀪𑀽𑀢𑀸𑀦𑀺. 𑀫𑀳𑀸𑀧𑀭𑀺𑀳𑀸𑀭𑀸𑀦𑀺 𑀯𑀸 𑀪𑀽𑀢𑀸𑀦𑀻𑀢𑀺𑀧𑀺 𑀫𑀳𑀸𑀪𑀽𑀢𑀸𑀦𑀺.

𑀫𑀳𑀸𑀯𑀺𑀓𑀸𑀭𑀢𑁄𑀢𑀺 𑀏𑀢𑀸𑀦𑀺 𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀸𑀦𑀺𑀧𑀺 𑀉𑀧𑀸𑀤𑀺𑀦𑁆𑀦𑀸𑀦𑀺𑀧𑀺 𑀫𑀳𑀸𑀯𑀺𑀓𑀸𑀭𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀦𑀼𑀧𑀸𑀤𑀺𑀦𑁆𑀦𑀸𑀦𑀁 𑀓𑀧𑁆𑀧𑀯𑀼𑀝𑁆𑀞𑀸𑀦𑁂 𑀯𑀺𑀓𑀸𑀭𑀫𑀳𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺. 𑀉𑀧𑀸𑀤𑀺𑀦𑁆𑀦𑀸𑀦𑀁 𑀥𑀸𑀢𑀼𑀓𑁆𑀔𑁄𑀪𑀓𑀸𑀮𑁂. 𑀢𑀣𑀸 𑀳𑀺 𑁋

𑀪𑀽𑀫𑀺𑀢𑁄 𑀯𑀼𑀝𑁆𑀞𑀺𑀢𑀸 𑀬𑀸𑀯, 𑀩𑁆𑀭𑀳𑁆𑀫𑀮𑁄𑀓𑀸 𑀯𑀺𑀥𑀸𑀯𑀢𑀺;

𑀅𑀘𑁆𑀘𑀺 𑀅𑀘𑁆𑀘𑀺𑀫𑀢𑁄 𑀮𑁄𑀓𑁂, 𑀟𑀬𑁆𑀳𑀫𑀸𑀦𑀫𑁆𑀳𑀺 𑀢𑁂𑀚𑀲𑀸.

𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀓𑀁, 𑀘𑀓𑁆𑀓𑀯𑀸𑀴𑀁 𑀯𑀺𑀮𑀻𑀬𑀢𑀺;

𑀓𑀼𑀧𑀺𑀢𑁂𑀦 𑀬𑀤𑀸 𑀮𑁄𑀓𑁄, 𑀲𑀮𑀺𑀮𑁂𑀦 𑀯𑀺𑀦𑀲𑁆𑀲𑀢𑀺.

𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀓𑀁, 𑀘𑀓𑁆𑀓𑀯𑀸𑀴𑀁 𑀯𑀺𑀓𑀻𑀭𑀢𑀺;

𑀯𑀸𑀬𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀬𑀤𑀸 𑀮𑁄𑀓𑁄 𑀯𑀺𑀦𑀲𑁆𑀲𑀢𑀺.

𑀧𑀢𑁆𑀣𑀤𑁆𑀥𑁄 𑀪𑀯𑀢𑀺 𑀓𑀸𑀬𑁄, 𑀤𑀝𑁆𑀞𑁄 𑀓𑀝𑁆𑀞𑀫𑀼𑀔𑁂𑀦 𑀯𑀸;

𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀓𑀝𑁆𑀞𑀫𑀼𑀔𑁂𑀯 𑀲𑁄.

𑀧𑀽𑀢𑀺𑀬𑁄 𑀪𑀯𑀢𑀺 𑀓𑀸𑀬𑁄, 𑀤𑀝𑁆𑀞𑁄 𑀧𑀽𑀢𑀺𑀫𑀼𑀔𑁂𑀦 𑀯𑀸;

𑀆𑀧𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀧𑀽𑀢𑀺𑀫𑀼𑀔𑁂𑀯 𑀲𑁄.

𑀲𑀦𑁆𑀢𑀢𑁆𑀢𑁄 𑀪𑀯𑀢𑀺 𑀓𑀸𑀬𑁄, 𑀤𑀝𑁆𑀞𑁄 𑀅𑀕𑁆𑀕𑀺𑀫𑀼𑀔𑁂𑀦 𑀯𑀸;

𑀢𑁂𑀚𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀅𑀕𑁆𑀕𑀺𑀫𑀼𑀔𑁂𑀯 𑀲𑁄.

𑀲𑀜𑁆𑀙𑀺𑀦𑁆𑀦𑁄 𑀪𑀯𑀢𑀺 𑀓𑀸𑀬𑁄, 𑀤𑀝𑁆𑀞𑁄 𑀲𑀢𑁆𑀣𑀫𑀼𑀔𑁂𑀦 𑀯𑀸;

𑀯𑀸𑀬𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀲𑀢𑁆𑀣𑀫𑀼𑀔𑁂𑀯 𑀲𑁄.

𑀇𑀢𑀺 𑀫𑀳𑀸𑀯𑀺𑀓𑀸𑀭𑀸𑀦𑀺 𑀪𑀽𑀢𑀸𑀦𑀻𑀢𑀺 𑀫𑀳𑀸𑀪𑀽𑀢𑀸𑀦𑀺.

𑀫𑀳𑀢𑁆𑀢𑀸 𑀪𑀽𑀢𑀢𑁆𑀢𑀸 𑀘𑀸𑀢𑀺 𑀏𑀢𑀸𑀦𑀺 𑀳𑀺 𑀫𑀳𑀦𑁆𑀢𑀸𑀦𑀺 𑀫𑀳𑀢𑀸 𑀯𑀸𑀬𑀸𑀫𑁂𑀦 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀢𑁆𑀢𑀸 𑀪𑀽𑀢𑀸𑀦𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀫𑀳𑀢𑁆𑀢𑀸 𑀪𑀽𑀢𑀢𑁆𑀢𑀸 𑀘 𑀫𑀳𑀸𑀪𑀽𑀢𑀸𑀦𑀺.

𑀏𑀯𑀁 𑀲𑀩𑁆𑀩𑀸𑀧𑁂𑀢𑀸 𑀥𑀸𑀢𑀼𑀬𑁄 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀫𑀳𑀸𑀪𑀽𑀢𑀸𑀦𑀺.

𑀲𑀮𑀓𑁆𑀔𑀡𑀥𑀸𑀭𑀡𑀢𑁄 𑀧𑀦 𑀤𑀼𑀓𑁆𑀔𑀸𑀤𑀸𑀦𑀢𑁄 𑀘 𑀤𑀼𑀓𑁆𑀔𑀸𑀥𑀸𑀦𑀢𑁄 𑀘 𑀲𑀩𑁆𑀩𑀸𑀧𑀺 𑀥𑀸𑀢𑀼𑀮𑀓𑁆𑀔𑀡𑀁 𑀅𑀦𑀢𑀻𑀢𑀢𑁆𑀢𑀸 𑀥𑀸𑀢𑀼𑀬𑁄. 𑀲𑀮𑀓𑁆𑀔𑀡𑀥𑀸𑀭𑀡𑁂𑀦 𑀘 𑀅𑀢𑁆𑀢𑀦𑁄 𑀔𑀡𑀸𑀦𑀼𑀭𑀽𑀧𑀥𑀸𑀭𑀡𑁂𑀦 𑀘 𑀥𑀫𑁆𑀫𑀸. 𑀔𑀬𑀝𑁆𑀞𑁂𑀦 𑀅𑀦𑀺𑀘𑁆𑀘𑀸. 𑀪𑀬𑀝𑁆𑀞𑁂𑀦 𑀤𑀼𑀓𑁆𑀔𑀸. 𑀅𑀲𑀸𑀭𑀓𑀝𑁆𑀞𑁂𑀦 𑀅𑀦𑀢𑁆𑀢𑀸.

𑀇𑀢𑀺 𑀲𑀩𑁆𑀩𑀸𑀲𑀫𑁆𑀧𑀺 𑀭𑀽𑀧𑀫𑀳𑀸𑀪𑀽𑀢𑀥𑀸𑀢𑀼𑀥𑀫𑁆𑀫𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀏𑀓𑀢𑁆𑀢𑀦𑁆𑀢𑀺 𑀏𑀯𑀁 𑀦𑀸𑀦𑀢𑁆𑀢𑁂𑀓𑀢𑁆𑀢𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁫𑁩. 𑀯𑀺𑀦𑀺𑀩𑁆𑀪𑁄𑀕𑀸𑀯𑀺𑀦𑀺𑀩𑁆𑀪𑁄𑀕𑀢𑁄𑀢𑀺 𑀲𑀳𑀼𑀧𑁆𑀧𑀦𑁆𑀦𑀸𑀯 𑀏𑀢𑀸 𑀏𑀓𑁂𑀓𑀲𑁆𑀫𑀺𑀁 𑀲𑀩𑁆𑀩𑀧𑀭𑀺𑀬𑀦𑁆𑀢𑀺𑀫𑁂 𑀲𑀼𑀤𑁆𑀥𑀝𑁆𑀞𑀓𑀸𑀤𑀺𑀓𑀮𑀸𑀧𑁂𑀧𑀺 𑀧𑀤𑁂𑀲𑁂𑀦 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸. 𑀮𑀓𑁆𑀔𑀡𑁂𑀦 𑀧𑀦 𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀢𑀺 𑀏𑀯𑀁 𑀯𑀺𑀦𑀺𑀩𑁆𑀪𑁄𑀕𑀸𑀯𑀺𑀦𑀺𑀩𑁆𑀪𑁄𑀕𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁫𑁪. 𑀲𑀪𑀸𑀕𑀯𑀺𑀲𑀪𑀸𑀕𑀢𑁄𑀢𑀺 𑀏𑀯𑀁 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀲𑀼 𑀘𑀸𑀧𑀺 𑀏𑀢𑀸𑀲𑀼 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀭𑀼𑀓𑀢𑁆𑀢𑀸 𑀲𑀪𑀸𑀕𑀸. 𑀢𑀣𑀸 𑀧𑀘𑁆𑀙𑀺𑀫𑀸 𑀮𑀳𑀼𑀓𑀢𑁆𑀢𑀸. 𑀧𑀼𑀭𑀺𑀫𑀸 𑀧𑀦 𑀧𑀘𑁆𑀙𑀺𑀫𑀸𑀳𑀺 𑀧𑀘𑁆𑀙𑀺𑀫𑀸 𑀘 𑀧𑀼𑀭𑀺𑀫𑀸𑀳𑀺 𑀯𑀺𑀲𑀪𑀸𑀕𑀸𑀢𑀺 𑀏𑀯𑀁 𑀲𑀪𑀸𑀕𑀯𑀺𑀲𑀪𑀸𑀕𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁫𑁫. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀺𑀲𑁂𑀲𑀢𑁄𑀢𑀺 𑀅𑀚𑁆𑀛𑀢𑁆𑀢𑀺𑀓𑀸 𑀥𑀸𑀢𑀼𑀬𑁄 𑀯𑀺𑀜𑁆𑀜𑀸𑀡𑀯𑀢𑁆𑀣𑀼𑀯𑀺𑀜𑁆𑀜𑀢𑁆𑀢𑀺𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀲𑀇𑀭𑀺𑀬𑀸𑀧𑀣𑀸, 𑀘𑀢𑀼𑀲𑀫𑀼𑀝𑁆𑀞𑀸𑀦𑀸. 𑀩𑀸𑀳𑀺𑀭𑀸 𑀯𑀼𑀢𑁆𑀢𑀯𑀺𑀧𑀭𑀻𑀢𑀧𑁆𑀧𑀓𑀸𑀭𑀸𑀢𑀺 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀺𑀲𑁂𑀲𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁫𑁬. 𑀲𑀗𑁆𑀕𑀳𑀢𑁄𑀢𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀧𑀣𑀯𑀻𑀥𑀸𑀢𑀼 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀳𑀺 𑀇𑀢𑀭𑀸𑀳𑀺 𑀏𑀓𑀲𑀗𑁆𑀕𑀳𑀸 𑀳𑁄𑀢𑀺 𑀲𑀫𑀼𑀝𑁆𑀞𑀸𑀦𑀦𑀸𑀦𑀢𑁆𑀢𑀸𑀪𑀸𑀯𑀢𑁄. 𑀢𑀣𑀸 𑀘𑀺𑀢𑁆𑀢𑀸𑀤𑀺𑀲𑀫𑀼𑀝𑁆𑀞𑀸𑀦𑀸 𑀘𑀺𑀢𑁆𑀢𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀳𑀻𑀢𑀺 𑀏𑀯𑀁 𑀲𑀗𑁆𑀕𑀳𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁫𑁭. 𑀧𑀘𑁆𑀘𑀬𑀢𑁄𑀢𑀺 𑀧𑀣𑀯𑀻𑀥𑀸𑀢𑀼 𑀆𑀧𑁄𑀲𑀗𑁆𑀕𑀳𑀺𑀢𑀸 𑀢𑁂𑀚𑁄𑀅𑀦𑀼𑀧𑀸𑀮𑀺𑀢𑀸 𑀯𑀸𑀬𑁄𑀯𑀺𑀢𑁆𑀣𑀫𑁆𑀪𑀺𑀢𑀸 𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀁 𑀧𑀢𑀺𑀝𑁆𑀞𑀸 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀆𑀧𑁄𑀥𑀸𑀢𑀼 𑀧𑀣𑀯𑀻𑀧𑀢𑀺𑀝𑁆𑀞𑀺𑀢𑀸 𑀢𑁂𑀚𑁄𑀅𑀦𑀼𑀧𑀸𑀮𑀺𑀢𑀸 𑀯𑀸𑀬𑁄𑀯𑀺𑀢𑁆𑀣𑀫𑁆𑀪𑀺𑀢𑀸 𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀁 𑀆𑀩𑀦𑁆𑀥𑀦𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑁂𑀚𑁄𑀥𑀸𑀢𑀼 𑀧𑀣𑀯𑀻𑀧𑀢𑀺𑀝𑁆𑀞𑀺𑀢𑀸 𑀆𑀧𑁄𑀲𑀗𑁆𑀕𑀳𑀺𑀢𑀸 𑀯𑀸𑀬𑁄𑀯𑀺𑀢𑁆𑀣𑀫𑁆𑀪𑀺𑀢𑀸 𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀁 𑀧𑀭𑀺𑀧𑀸𑀘𑀦𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀸𑀬𑁄𑀥𑀸𑀢𑀼 𑀧𑀣𑀯𑀻𑀧𑀢𑀺𑀝𑁆𑀞𑀺𑀢𑀸 𑀆𑀧𑁄𑀲𑀗𑁆𑀕𑀳𑀺𑀢𑀸 𑀢𑁂𑀚𑁄𑀧𑀭𑀺𑀧𑀸𑀘𑀺𑀢𑀸 𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀁 𑀯𑀺𑀢𑁆𑀣𑀫𑁆𑀪𑀦𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀁 𑀧𑀘𑁆𑀘𑀬𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁫𑁮. 𑀅𑀲𑀫𑀦𑁆𑀦𑀸𑀳𑀸𑀭𑀢𑁄𑀢𑀺 𑀧𑀣𑀯𑀻𑀥𑀸𑀢𑀼 𑀘𑁂𑀢𑁆𑀣 ‘‘𑀅𑀳𑀁 𑀧𑀣𑀯𑀻𑀥𑀸𑀢𑀽’’𑀢𑀺 𑀯𑀸, ‘‘𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀁 𑀧𑀢𑀺𑀝𑁆𑀞𑀸 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀫𑀻’’𑀢𑀺 𑀯𑀸 𑀦 𑀚𑀸𑀦𑀸𑀢𑀺. 𑀇𑀢𑀭𑀸𑀦𑀺𑀧𑀺 𑀢𑀻𑀡𑀺 ‘‘𑀅𑀫𑁆𑀳𑀸𑀓𑀁 𑀧𑀣𑀯𑀻𑀥𑀸𑀢𑀼 𑀧𑀢𑀺𑀝𑁆𑀞𑀸 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀦 𑀚𑀸𑀦𑀦𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺 𑀏𑀯𑀁 𑀅𑀲𑀫𑀦𑁆𑀦𑀸𑀳𑀸𑀭𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸.

𑁩𑁫𑁯. 𑀧𑀘𑁆𑀘𑀬𑀯𑀺𑀪𑀸𑀕𑀢𑁄𑀢𑀺 𑀥𑀸𑀢𑀽𑀦𑀁 𑀳𑀺 𑀓𑀫𑁆𑀫𑀁, 𑀘𑀺𑀢𑁆𑀢𑀁, 𑀆𑀳𑀸𑀭𑁄, 𑀉𑀢𑀽𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸. 𑀢𑀢𑁆𑀣 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀫𑁆𑀫𑀫𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀘𑀺𑀢𑁆𑀢𑀸𑀤𑀬𑁄. 𑀘𑀺𑀢𑁆𑀢𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀘𑀺𑀢𑁆𑀢𑀸𑀤𑀬𑁄𑀯 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀇𑀢𑀭𑁂. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀓𑀫𑁆𑀫𑀁 𑀚𑀦𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁂𑀲𑀸𑀦𑀁 𑀧𑀭𑀺𑀬𑀸𑀬𑀢𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀘𑀺𑀢𑁆𑀢𑀁 𑀚𑀦𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁂𑀲𑀸𑀦𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀅𑀯𑀺𑀕𑀢𑀧𑀘𑁆𑀘𑀬𑁄 𑀘. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀁 𑀆𑀳𑀸𑀭𑁄 𑀚𑀦𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁂𑀲𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀅𑀯𑀺𑀕𑀢𑀧𑀘𑁆𑀘𑀬𑁄 𑀘. 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀁 𑀉𑀢𑀼 𑀚𑀦𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁂𑀲𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁄 𑀅𑀯𑀺𑀕𑀢𑀧𑀘𑁆𑀘𑀬𑁄 𑀘. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀫𑀳𑀸𑀪𑀽𑀢𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀫𑀳𑀸𑀪𑀽𑀢𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺 𑀘𑀺𑀢𑁆𑀢𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺. 𑀢𑀣𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁. 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀫𑀳𑀸𑀪𑀽𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀫𑀳𑀸𑀪𑀽𑀢𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺 𑀓𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺.

𑀢𑀢𑁆𑀣 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀧𑀣𑀯𑀻𑀥𑀸𑀢𑀼 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁 𑀇𑀢𑀭𑀸𑀲𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑁂𑀯 𑀧𑀢𑀺𑀝𑁆𑀞𑀸𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀚𑀦𑀓𑀯𑀲𑁂𑀦. 𑀇𑀢𑀭𑁂𑀲𑀁 𑀢𑀺𑀲𑀦𑁆𑀢𑀢𑀺𑀫𑀳𑀸𑀪𑀽𑀢𑀸𑀦𑀁 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀧𑀢𑀺𑀝𑁆𑀞𑀸𑀯𑀲𑁂𑀦 𑀦 𑀚𑀦𑀓𑀯𑀲𑁂𑀦. 𑀆𑀧𑁄𑀥𑀸𑀢𑀼 𑀘𑁂𑀢𑁆𑀣 𑀇𑀢𑀭𑀸𑀲𑀁 𑀢𑀺𑀡𑁆𑀡𑀁 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀘𑁂𑀯 𑀆𑀩𑀦𑁆𑀥𑀦𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀚𑀦𑀓𑀯𑀲𑁂𑀦. 𑀇𑀢𑀭𑁂𑀲𑀁 𑀢𑀺𑀲𑀦𑁆𑀢𑀢𑀺𑀓𑀸𑀦𑀁 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀯𑀲𑁂𑀦𑁂𑀯, 𑀦 𑀆𑀩𑀦𑁆𑀥𑀦𑀯𑀲𑁂𑀦 𑀦 𑀚𑀦𑀓𑀯𑀲𑁂𑀦. 𑀢𑁂𑀚𑁄𑀥𑀸𑀢𑀼𑀧𑁂𑀢𑁆𑀣 𑀇𑀢𑀭𑀸𑀲𑀁 𑀢𑀺𑀡𑁆𑀡𑀁 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀘𑁂𑀯 𑀧𑀭𑀺𑀧𑀸𑀘𑀦𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀚𑀦𑀓𑀯𑀲𑁂𑀦. 𑀇𑀢𑀭𑁂𑀲𑀁 𑀢𑀺𑀲𑀦𑁆𑀢𑀢𑀺𑀓𑀸𑀦𑀁 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀯𑀲𑁂𑀦𑁂𑀯, 𑀦 𑀧𑀭𑀺𑀧𑀸𑀘𑀦𑀯𑀲𑁂𑀦, 𑀦 𑀚𑀦𑀓𑀯𑀲𑁂𑀦. 𑀯𑀸𑀬𑁄𑀥𑀸𑀢𑀼𑀧𑁂𑀢𑁆𑀣 𑀇𑀢𑀭𑀸𑀲𑀁 𑀢𑀺𑀡𑁆𑀡𑀁 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀘𑁂𑀯 𑀯𑀺𑀢𑁆𑀣𑀫𑁆𑀪𑀦𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀚𑀦𑀓𑀯𑀲𑁂𑀦. 𑀇𑀢𑀭𑁂𑀲𑀁 𑀢𑀺𑀲𑀦𑁆𑀢𑀢𑀺𑀓𑀸𑀦𑀁 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀯𑀲𑁂𑀦𑁂𑀯, 𑀦 𑀯𑀺𑀢𑁆𑀣𑀫𑁆𑀪𑀦𑀯𑀲𑁂𑀦, 𑀦 𑀚𑀦𑀓𑀯𑀲𑁂𑀦. 𑀘𑀺𑀢𑁆𑀢𑀆𑀳𑀸𑀭𑀉𑀢𑀼𑀲𑀫𑀼𑀝𑁆𑀞𑀸𑀦𑀧𑀣𑀯𑀻𑀥𑀸𑀢𑀼𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.