𑁮. 𑀅𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁄

𑀫𑀭𑀡𑀲𑁆𑀲𑀢𑀺𑀓𑀣𑀸

𑁧𑁬𑁭. 𑀇𑀤𑀸𑀦𑀺 𑀇𑀢𑁄 𑀅𑀦𑀦𑁆𑀢𑀭𑀸𑀬 𑀫𑀭𑀡𑀲𑁆𑀲𑀢𑀺𑀬𑀸 𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀢𑁆𑀣 𑀫𑀭𑀡𑀦𑁆𑀢𑀺 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄. 𑀬𑀁 𑀧𑀦𑁂𑀢𑀁 𑀅𑀭𑀳𑀦𑁆𑀢𑀸𑀦𑀁 𑀯𑀝𑁆𑀝𑀤𑀼𑀓𑁆𑀔𑀲𑀫𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀁 𑀲𑀫𑀼𑀘𑁆𑀙𑁂𑀤𑀫𑀭𑀡𑀁, 𑀲𑀗𑁆𑀔𑀸𑀭𑀸𑀦𑀁 𑀔𑀡𑀪𑀗𑁆𑀕𑀲𑀗𑁆𑀔𑀸𑀢𑀁 𑀔𑀡𑀺𑀓𑀫𑀭𑀡𑀁, 𑀭𑀼𑀓𑁆𑀔𑁄 𑀫𑀢𑁄 𑀮𑁄𑀳𑀁 𑀫𑀢𑀦𑁆𑀢𑀺𑀆𑀤𑀻𑀲𑀼 𑀲𑀫𑁆𑀫𑀼𑀢𑀺𑀫𑀭𑀡𑀜𑁆𑀘, 𑀦 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁.

𑀬𑀫𑁆𑀧𑀺 𑀘𑁂𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀓𑀸𑀮𑀫𑀭𑀡𑀁 𑀅𑀓𑀸𑀮𑀫𑀭𑀡𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀓𑀸𑀮𑀫𑀭𑀡𑀁 𑀧𑀼𑀜𑁆𑀜𑀓𑁆𑀔𑀬𑁂𑀦 𑀯𑀸 𑀆𑀬𑀼𑀓𑁆𑀔𑀬𑁂𑀦 𑀯𑀸 𑀉𑀪𑀬𑀓𑁆𑀔𑀬𑁂𑀦 𑀯𑀸 𑀳𑁄𑀢𑀺. 𑀅𑀓𑀸𑀮𑀫𑀭𑀡𑀁 𑀓𑀫𑁆𑀫𑀼𑀧𑀘𑁆𑀙𑁂𑀤𑀓𑀓𑀫𑁆𑀫𑀯𑀲𑁂𑀦.

𑀢𑀢𑁆𑀣 𑀬𑀁 𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀆𑀬𑀼𑀲𑀦𑁆𑀢𑀸𑀦𑀚𑀦𑀓𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀬𑀸 𑀓𑁂𑀯𑀮𑀁 𑀧𑀝𑀺𑀲𑀦𑁆𑀥𑀺𑀚𑀦𑀓𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀓𑁆𑀓𑀯𑀺𑀧𑀸𑀓𑀢𑁆𑀢𑀸 𑀫𑀭𑀡𑀁 𑀳𑁄𑀢𑀺, 𑀇𑀤𑀁 𑀧𑀼𑀜𑁆𑀜𑀓𑁆𑀔𑀬𑁂𑀦 𑀫𑀭𑀡𑀁 𑀦𑀸𑀫. 𑀬𑀁 𑀕𑀢𑀺𑀓𑀸𑀮𑀸𑀳𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀦 𑀅𑀚𑁆𑀚𑀢𑀦𑀓𑀸𑀮𑀧𑀼𑀭𑀺𑀲𑀸𑀦𑀁 𑀯𑀺𑀬 𑀯𑀲𑁆𑀲𑀲𑀢𑀫𑀢𑁆𑀢𑀧𑀭𑀺𑀫𑀸𑀡𑀲𑁆𑀲 𑀆𑀬𑀼𑀦𑁄 𑀔𑀬𑀯𑀲𑁂𑀦 𑀫𑀭𑀡𑀁 𑀳𑁄𑀢𑀺, 𑀇𑀤𑀁 𑀆𑀬𑀼𑀓𑁆𑀔𑀬𑁂𑀦 𑀫𑀭𑀡𑀁 𑀦𑀸𑀫. 𑀬𑀁 𑀧𑀦 𑀤𑀽𑀲𑀻𑀫𑀸𑀭𑀓𑀮𑀸𑀩𑀼𑀭𑀸𑀚𑀸𑀤𑀻𑀦𑀁 𑀯𑀺𑀬 𑀢𑀗𑁆𑀔𑀡𑀜𑁆𑀜𑁂𑀯 𑀞𑀸𑀦𑀸𑀘𑀸𑀯𑀦𑀲𑀫𑀢𑁆𑀣𑁂𑀦 𑀓𑀫𑁆𑀫𑀼𑀦𑀸 𑀉𑀧𑀘𑁆𑀙𑀺𑀦𑁆𑀦𑀲𑀦𑁆𑀢𑀸𑀦𑀸𑀦𑀁, 𑀧𑀼𑀭𑀺𑀫𑀓𑀫𑁆𑀫𑀯𑀲𑁂𑀦 𑀯𑀸 𑀲𑀢𑁆𑀣𑀳𑀭𑀡𑀸𑀤𑀻𑀳𑀺 𑀉𑀧𑀓𑁆𑀓𑀫𑁂𑀳𑀺 𑀉𑀧𑀘𑁆𑀙𑀺𑀚𑁆𑀚𑀫𑀸𑀦𑀲𑀦𑁆𑀢𑀸𑀦𑀸𑀦𑀁 𑀫𑀭𑀡𑀁 𑀳𑁄𑀢𑀺, 𑀇𑀤𑀁 𑀅𑀓𑀸𑀮𑀫𑀭𑀡𑀁 𑀦𑀸𑀫. 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑁂𑀦 𑀲𑀗𑁆𑀕𑀳𑀺𑀢𑀁. 𑀇𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀲𑀗𑁆𑀔𑀸𑀢𑀲𑁆𑀲 𑀫𑀭𑀡𑀲𑁆𑀲 𑀲𑀭𑀡𑀁 𑀫𑀭𑀡𑀲𑁆𑀲𑀢𑀺.

𑁧𑁬𑁮. 𑀢𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 ‘‘𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀯𑀸, ‘‘𑀫𑀭𑀡𑀁 𑀫𑀭𑀡’’𑀦𑁆𑀢𑀺 𑀯𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀅𑀬𑁄𑀦𑀺𑀲𑁄 𑀧𑀯𑀢𑁆𑀢𑀬𑀢𑁄 𑀳𑀺 𑀇𑀝𑁆𑀞𑀚𑀦𑀫𑀭𑀡𑀸𑀦𑀼𑀲𑁆𑀲𑀭𑀡𑁂 𑀲𑁄𑀓𑁄 𑀉𑀧𑁆𑀧𑀚𑁆𑀚𑀢𑀺 𑀯𑀺𑀚𑀸𑀢𑀫𑀸𑀢𑀼𑀬𑀸 𑀧𑀺𑀬𑀧𑀼𑀢𑁆𑀢𑀫𑀭𑀡𑀸𑀦𑀼𑀲𑁆𑀲𑀭𑀡𑁂 𑀯𑀺𑀬. 𑀅𑀦𑀺𑀝𑁆𑀞𑀚𑀦𑀫𑀭𑀡𑀸𑀦𑀼𑀲𑁆𑀲𑀭𑀡𑁂 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺 𑀯𑁂𑀭𑀻𑀦𑀁 𑀯𑁂𑀭𑀺𑀫𑀭𑀡𑀸𑀦𑀼𑀲𑁆𑀲𑀭𑀡𑁂 𑀯𑀺𑀬. 𑀫𑀚𑁆𑀛𑀢𑁆𑀢𑀚𑀦𑀫𑀭𑀡𑀸𑀦𑀼𑀲𑁆𑀲𑀭𑀡𑁂 𑀲𑀁𑀯𑁂𑀕𑁄 𑀦 𑀉𑀧𑁆𑀧𑀚𑁆𑀚𑀢𑀺 𑀫𑀢𑀓𑀴𑁂𑀯𑀭𑀤𑀲𑁆𑀲𑀦𑁂 𑀙𑀯𑀟𑀸𑀳𑀓𑀲𑁆𑀲 𑀯𑀺𑀬. 𑀅𑀢𑁆𑀢𑀦𑁄 𑀫𑀭𑀡𑀸𑀦𑀼𑀲𑁆𑀲𑀭𑀡𑁂 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀁 𑀯𑀥𑀓𑀁 𑀤𑀺𑀲𑁆𑀯𑀸 𑀪𑀻𑀭𑀼𑀓𑀚𑀸𑀢𑀺𑀓𑀲𑁆𑀲 𑀯𑀺𑀬. 𑀢𑀤𑁂𑀢𑀁 𑀲𑀩𑁆𑀩𑀫𑁆𑀧𑀺 𑀲𑀢𑀺𑀲𑀁𑀯𑁂𑀕𑀜𑀸𑀡𑀯𑀺𑀭𑀳𑀢𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣 𑀳𑀢𑀫𑀢𑀲𑀢𑁆𑀢𑁂 𑀑𑀮𑁄𑀓𑁂𑀢𑁆𑀯𑀸 𑀤𑀺𑀝𑁆𑀞𑀧𑀼𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀲𑀢𑁆𑀢𑀸𑀦𑀁 𑀫𑀢𑀸𑀦𑀁 𑀫𑀭𑀡𑀁 𑀆𑀯𑀚𑁆𑀚𑁂𑀢𑁆𑀯𑀸 𑀲𑀢𑀺𑀜𑁆𑀘 𑀲𑀁𑀯𑁂𑀕𑀜𑁆𑀘 𑀜𑀸𑀡𑀜𑁆𑀘 𑀬𑁄𑀚𑁂𑀢𑁆𑀯𑀸 ‘‘𑀫𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀏𑀯𑀁 𑀧𑀯𑀢𑁆𑀢𑁂𑀦𑁆𑀢𑁄 𑀳𑀺 𑀬𑁄𑀦𑀺𑀲𑁄 𑀧𑀯𑀢𑁆𑀢𑁂𑀢𑀺, 𑀉𑀧𑀸𑀬𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀯𑀢𑁆𑀢𑀬𑀢𑁄𑀬𑁂𑀯 𑀳𑀺 𑀏𑀓𑀘𑁆𑀘𑀲𑁆𑀲 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀫𑀭𑀡𑀸𑀭𑀫𑁆𑀫𑀡𑀸 𑀲𑀢𑀺 𑀲𑀡𑁆𑀞𑀸𑀢𑀺, 𑀉𑀧𑀘𑀸𑀭𑀧𑁆𑀧𑀢𑁆𑀢𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀳𑁄𑀢𑀺.

𑁧𑁬𑁯. 𑀬𑀲𑁆𑀲 𑀧𑀦 𑀏𑀢𑁆𑀢𑀸𑀯𑀢𑀸 𑀦 𑀳𑁄𑀢𑀺, 𑀢𑁂𑀦 𑀯𑀥𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄, 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀢𑁄, 𑀉𑀧𑀲𑀁𑀳𑀭𑀡𑀢𑁄, 𑀓𑀸𑀬𑀩𑀳𑀼𑀲𑀸𑀥𑀸𑀭𑀡𑀢𑁄, 𑀆𑀬𑀼𑀤𑀼𑀩𑁆𑀩𑀮𑀢𑁄, 𑀅𑀦𑀺𑀫𑀺𑀢𑁆𑀢𑀢𑁄, 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀢𑁄, 𑀔𑀡𑀧𑀭𑀺𑀢𑁆𑀢𑀢𑁄𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑀢𑀢𑁆𑀣 𑀯𑀥𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄𑀢𑀺 𑀯𑀥𑀓𑀲𑁆𑀲 𑀯𑀺𑀬 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄. 𑀬𑀣𑀸 𑀳𑀺 𑀇𑀫𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀕𑀻𑀯𑀸𑀬 𑀘𑀸𑀭𑀬𑀫𑀸𑀦𑁄 𑀯𑀥𑀓𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄𑀯 𑀳𑁄𑀢𑀺, 𑀏𑀯𑀁 𑀫𑀭𑀡𑀫𑁆𑀧𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀫𑁂𑀯𑀸𑀢𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀲𑀳 𑀚𑀸𑀢𑀺𑀬𑀸 𑀆𑀕𑀢𑀢𑁄, 𑀚𑀻𑀯𑀺𑀢𑀳𑀭𑀡𑀢𑁄 𑀘. 𑀬𑀣𑀸 𑀳𑀺 𑀅𑀳𑀺𑀘𑁆𑀙𑀢𑁆𑀢𑀓𑀫𑀓𑀼𑀴𑀁 𑀫𑀢𑁆𑀣𑀓𑁂𑀦 𑀧𑀁𑀲𑀼𑀁 𑀕𑀳𑁂𑀢𑁆𑀯𑀸𑀯 𑀉𑀕𑁆𑀕𑀘𑁆𑀙𑀢𑀺, 𑀏𑀯𑀁 𑀲𑀢𑁆𑀢𑀸 𑀚𑀭𑀸𑀫𑀭𑀡𑀁 𑀕𑀳𑁂𑀢𑁆𑀯𑀸𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀣𑀸 𑀳𑀺 𑀦𑁂𑀲𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀸𑀦𑀦𑁆𑀢𑀭𑀫𑁂𑀯 𑀚𑀭𑀁 𑀧𑀢𑁆𑀯𑀸 𑀧𑀩𑁆𑀩𑀢𑀲𑀺𑀔𑀭𑀢𑁄 𑀧𑀢𑀺𑀢𑀲𑀺𑀮𑀸 𑀯𑀺𑀬 𑀪𑀺𑀚𑁆𑀚𑀢𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀔𑀦𑁆𑀥𑁂𑀳𑀺. 𑀏𑀯𑀁 𑀔𑀡𑀺𑀓𑀫𑀭𑀡𑀁 𑀢𑀸𑀯 𑀲𑀳 𑀚𑀸𑀢𑀺𑀬𑀸 𑀆𑀕𑀢𑀁. 𑀚𑀸𑀢𑀲𑁆𑀲 𑀧𑀦 𑀅𑀯𑀲𑁆𑀲𑀁 𑀫𑀭𑀡𑀢𑁄 𑀇𑀥𑀸𑀥𑀺𑀧𑁆𑀧𑁂𑀢𑀫𑀭𑀡𑀫𑁆𑀧𑀺 𑀲𑀳 𑀚𑀸𑀢𑀺𑀬𑀸 𑀆𑀕𑀢𑀁. 𑀢𑀲𑁆𑀫𑀸 𑀏𑀲 𑀲𑀢𑁆𑀢𑁄 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀣𑀸 𑀦𑀸𑀫 𑀉𑀝𑁆𑀞𑀺𑀢𑁄 𑀲𑀽𑀭𑀺𑀬𑁄 𑀅𑀢𑁆𑀣𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑁂𑀯, 𑀕𑀢𑀕𑀢𑀝𑁆𑀞𑀸𑀦𑀢𑁄 𑀈𑀲𑀓𑀫𑁆𑀧𑀺 𑀦 𑀦𑀺𑀯𑀢𑁆𑀢𑀢𑀺. 𑀬𑀣𑀸 𑀯𑀸 𑀦𑀤𑀻 𑀧𑀩𑁆𑀩𑀢𑁂𑀬𑁆𑀬𑀸 𑀲𑀻𑀖𑀲𑁄𑀢𑀸 𑀳𑀸𑀭𑀳𑀸𑀭𑀺𑀦𑀻 𑀲𑀦𑁆𑀤𑀢𑁂𑀯 𑀯𑀢𑁆𑀢𑀢𑁂𑀯 𑀈𑀲𑀓𑀫𑁆𑀧𑀺 𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀈𑀲𑀓𑀫𑁆𑀧𑀺 𑀅𑀦𑀺𑀯𑀢𑁆𑀢𑀫𑀸𑀦𑁄 𑀫𑀭𑀡𑀸𑀪𑀺𑀫𑀼𑀔𑁄𑀯 𑀬𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀬𑀫𑁂𑀓𑀭𑀢𑁆𑀢𑀺𑀁 𑀧𑀞𑀫𑀁, 𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄;

𑀅𑀩𑁆𑀪𑀼𑀝𑁆𑀞𑀺𑀢𑁄𑀯 𑀲𑁄 𑀬𑀸𑀢𑀺, 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀻’’𑀢𑀺. (𑀚𑀸. 𑁧.𑁧𑁫.𑁩𑁬𑁩);

𑀏𑀯𑀁 𑀕𑀘𑁆𑀙𑀢𑁄 𑀘𑀲𑁆𑀲 𑀕𑀺𑀫𑁆𑀳𑀸𑀪𑀺𑀢𑀢𑁆𑀢𑀸𑀦𑀁 𑀓𑀼𑀦𑁆𑀦𑀤𑀻𑀦𑀁 𑀔𑀬𑁄 𑀯𑀺𑀬, 𑀧𑀸𑀢𑁄 𑀆𑀧𑁄𑀭𑀲𑀸𑀦𑀼𑀕𑀢𑀩𑀦𑁆𑀥𑀦𑀸𑀦𑀁 𑀤𑀼𑀫𑀧𑁆𑀨𑀮𑀸𑀦𑀁 𑀧𑀢𑀦𑀁 𑀯𑀺𑀬, 𑀫𑀼𑀕𑁆𑀕𑀭𑀸𑀪𑀺𑀢𑀸𑀴𑀺𑀢𑀸𑀦𑀁 𑀫𑀢𑁆𑀢𑀺𑀓𑀪𑀸𑀚𑀦𑀸𑀦𑀁 𑀪𑁂𑀤𑁄 𑀯𑀺𑀬, 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀼𑀝𑁆𑀞𑀸𑀦𑀁 𑀉𑀲𑁆𑀲𑀸𑀯𑀩𑀺𑀦𑁆𑀤𑀽𑀦𑀁 𑀯𑀺𑀤𑁆𑀥𑀁𑀲𑀦𑀁 𑀯𑀺𑀬 𑀘 𑀫𑀭𑀡𑀫𑁂𑀯 𑀆𑀲𑀦𑁆𑀦𑀁 𑀳𑁄𑀢𑀺. 𑀢𑁂𑀦𑀸𑀳 𑁋

‘‘𑀅𑀘𑁆𑀘𑀬𑀦𑁆𑀢𑀺 𑀅𑀳𑁄𑀭𑀢𑁆𑀢𑀸, 𑀚𑀻𑀯𑀺𑀢𑀫𑀼𑀧𑀭𑀼𑀚𑁆𑀛𑀢𑀺;

𑀆𑀬𑀼 𑀔𑀻𑀬𑀢𑀺 𑀫𑀘𑁆𑀘𑀸𑀦𑀁, 𑀓𑀼𑀦𑁆𑀦𑀤𑀻𑀦𑀁𑀯 𑀑𑀤𑀓𑀁. (𑀲𑀁. 𑀦𑀺. 𑁧.𑁧𑁪𑁬);

‘‘𑀨𑀮𑀸𑀦𑀫𑀺𑀯 𑀧𑀓𑁆𑀓𑀸𑀦𑀁, 𑀧𑀸𑀢𑁄 𑀧𑀧𑀢𑀢𑁄 𑀪𑀬𑀁;

𑀏𑀯𑀁 𑀚𑀸𑀢𑀸𑀦 𑀫𑀘𑁆𑀘𑀸𑀦𑀁, 𑀦𑀺𑀘𑁆𑀘𑀁 𑀫𑀭𑀡𑀢𑁄 𑀪𑀬𑀁.

‘‘𑀬𑀣𑀸𑀧𑀺 𑀓𑀼𑀫𑁆𑀪𑀓𑀸𑀭𑀲𑁆𑀲, 𑀓𑀢𑀁 𑀫𑀢𑁆𑀢𑀺𑀓𑀪𑀸𑀚𑀦𑀁;

𑀔𑀼𑀤𑁆𑀤𑀓𑀜𑁆𑀘 𑀫𑀳𑀦𑁆𑀢𑀜𑁆𑀘, 𑀬𑀁 𑀧𑀓𑁆𑀓𑀁 𑀬𑀜𑁆𑀘 𑀆𑀫𑀓𑀁;

𑀲𑀩𑁆𑀩𑀁 𑀪𑁂𑀤𑀦𑀧𑀭𑀺𑀬𑀦𑁆𑀢𑀁, 𑀏𑀯𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀁’. (𑀲𑀼. 𑀦𑀺. 𑁫𑁮𑁧-𑁫𑁮𑁨);

‘‘𑀉𑀲𑁆𑀲𑀸𑀯𑁄𑀯 𑀢𑀺𑀡𑀕𑁆𑀕𑀫𑁆𑀳𑀺, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀏𑀯𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀫𑀸 𑀫𑀁 𑀅𑀫𑁆𑀫 𑀦𑀺𑀯𑀸𑀭𑀬𑀸’’𑀢𑀺. (𑀚𑀸. 𑁧.𑁧𑁧.𑁭𑁯);

𑀏𑀯𑀁 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁄 𑀯𑀥𑀓𑁄 𑀯𑀺𑀬 𑀲𑀳 𑀚𑀸𑀢𑀺𑀬𑀸 𑀆𑀕𑀢𑀁 𑀧𑀦𑁂𑀢𑀁 𑀫𑀭𑀡𑀁 𑀕𑀻𑀯𑀸𑀬 𑀅𑀲𑀺𑀁 𑀘𑀸𑀭𑀬𑀫𑀸𑀦𑁄 𑀲𑁄 𑀯𑀥𑀓𑁄 𑀯𑀺𑀬 𑀚𑀻𑀯𑀺𑀢𑀁 𑀳𑀭𑀢𑀺𑀬𑁂𑀯, 𑀦 𑀅𑀳𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀲𑀳 𑀚𑀸𑀢𑀺𑀬𑀸 𑀆𑀕𑀢𑀢𑁄, 𑀚𑀻𑀯𑀺𑀢𑀳𑀭𑀡𑀢𑁄 𑀘 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁄 𑀯𑀥𑀓𑁄 𑀯𑀺𑀬 𑀫𑀭𑀡𑀫𑁆𑀧𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀫𑁂𑀯𑀸𑀢𑀺 𑀏𑀯𑀁 𑀯𑀥𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑁧𑁭𑁦. 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀢𑁄𑀢𑀺 𑀇𑀥 𑀲𑀫𑁆𑀧𑀢𑁆𑀢𑀺 𑀦𑀸𑀫 𑀢𑀸𑀯𑀤𑁂𑀯 𑀲𑁄𑀪𑀢𑀺, 𑀬𑀸𑀯 𑀦𑀁 𑀯𑀺𑀧𑀢𑁆𑀢𑀺 𑀦𑀸𑀪𑀺𑀪𑀯𑀢𑀺, 𑀦 𑀘 𑀲𑀸 𑀲𑀫𑁆𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺, 𑀬𑀸 𑀯𑀺𑀧𑀢𑁆𑀢𑀺𑀁 𑀅𑀢𑀺𑀓𑁆𑀓𑀫𑁆𑀫 𑀢𑀺𑀝𑁆𑀞𑁂𑀬𑁆𑀬. 𑀢𑀣𑀸 𑀳𑀺 𑁋

‘‘𑀲𑀓𑀮𑀁 𑀫𑁂𑀤𑀺𑀦𑀺𑀁 𑀪𑀼𑀢𑁆𑀯𑀸, 𑀤𑀢𑁆𑀯𑀸 𑀓𑁄𑀝𑀺𑀲𑀢𑀁 𑀲𑀼𑀔𑀻;

𑀅𑀟𑁆𑀠𑀸𑀫𑀮𑀓𑀫𑀢𑁆𑀢𑀲𑁆𑀲, 𑀅𑀦𑁆𑀢𑁂 𑀇𑀲𑁆𑀲𑀭𑀢𑀁 𑀕𑀢𑁄.

‘‘𑀢𑁂𑀦𑁂𑀯 𑀤𑁂𑀳𑀩𑀦𑁆𑀥𑁂𑀦, 𑀧𑀼𑀜𑁆𑀜𑀫𑁆𑀳𑀺 𑀔𑀬𑀫𑀸𑀕𑀢𑁂;

𑀫𑀭𑀡𑀸𑀪𑀺𑀫𑀼𑀔𑁄 𑀲𑁄𑀧𑀺, 𑀅𑀲𑁄𑀓𑁄 𑀲𑁄𑀓𑀫𑀸𑀕𑀢𑁄’’𑀢𑀺.

𑀅𑀧𑀺𑀘 𑀲𑀩𑁆𑀩𑀁 𑀆𑀭𑁄𑀕𑁆𑀬𑀁 𑀩𑁆𑀬𑀸𑀥𑀺𑀧𑀭𑀺𑀬𑁄𑀲𑀸𑀦𑀁, 𑀲𑀩𑁆𑀩𑀁 𑀬𑁄𑀩𑁆𑀩𑀦𑀁 𑀚𑀭𑀸𑀧𑀭𑀺𑀬𑁄𑀲𑀸𑀦𑀁, 𑀲𑀩𑁆𑀩𑀁 𑀚𑀻𑀯𑀺𑀢𑀁 𑀫𑀭𑀡𑀧𑀭𑀺𑀬𑁄𑀲𑀸𑀦𑀁, 𑀲𑀩𑁆𑀩𑁄𑀬𑁂𑀯 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀚𑀸𑀢𑀺𑀬𑀸 𑀅𑀦𑀼𑀕𑀢𑁄, 𑀚𑀭𑀸𑀬 𑀅𑀦𑀼𑀲𑀝𑁄, 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑁄, 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑁄. 𑀢𑁂𑀦𑀸𑀳 𑁋

‘‘𑀬𑀣𑀸𑀧𑀺 𑀲𑁂𑀮𑀸 𑀯𑀺𑀧𑀼𑀮𑀸, 𑀦𑀪𑀁 𑀆𑀳𑀘𑁆𑀘 𑀧𑀩𑁆𑀩𑀢𑀸;

𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑁂𑀬𑁆𑀬𑀼𑀁, 𑀦𑀺𑀧𑁆𑀧𑁄𑀣𑁂𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸.

‘‘𑀏𑀯𑀁 𑀚𑀭𑀸 𑀘 𑀫𑀘𑁆𑀘𑀼 𑀘, 𑀅𑀥𑀺𑀯𑀢𑁆𑀢𑀦𑁆𑀢𑀺 𑀧𑀸𑀡𑀺𑀦𑁂;

𑀔𑀢𑁆𑀢𑀺𑀬𑁂 𑀩𑁆𑀭𑀸𑀳𑁆𑀫𑀡𑁂 𑀯𑁂𑀲𑁆𑀲𑁂, 𑀲𑀼𑀤𑁆𑀤𑁂 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑁂;

𑀦 𑀓𑀺𑀜𑁆𑀘𑀺 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀩𑁆𑀩𑀫𑁂𑀯𑀸𑀪𑀺𑀫𑀤𑁆𑀤𑀢𑀺.

‘‘𑀦 𑀢𑀢𑁆𑀣 𑀳𑀢𑁆𑀣𑀻𑀦𑀁 𑀪𑀽𑀫𑀺, 𑀦 𑀭𑀣𑀸𑀦𑀁 𑀦 𑀧𑀢𑁆𑀢𑀺𑀬𑀸;

𑀦 𑀘𑀸𑀧𑀺 𑀫𑀦𑁆𑀢𑀬𑀼𑀤𑁆𑀥𑁂𑀦, 𑀲𑀓𑁆𑀓𑀸 𑀚𑁂𑀢𑀼𑀁 𑀥𑀦𑁂𑀦 𑀯𑀸’’𑀢𑀺. (𑀲𑀁. 𑀦𑀺. 𑁧.𑁧𑁩𑁬);

𑀏𑀯𑀁 𑀚𑀻𑀯𑀺𑀢𑀲𑀫𑁆𑀧𑀢𑁆𑀢𑀺𑀬𑀸 𑀫𑀭𑀡𑀯𑀺𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀢𑀁 𑀯𑀯𑀢𑁆𑀣𑀧𑁂𑀦𑁆𑀢𑁂𑀦 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀢𑁄 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑁧𑁭𑁧. 𑀉𑀧𑀲𑀁𑀳𑀭𑀡𑀢𑁄𑀢𑀺 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀉𑀧𑀲𑀁𑀳𑀭𑀡𑀢𑁄. 𑀢𑀢𑁆𑀣 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀉𑀧𑀲𑀁𑀳𑀭𑀡𑀢𑁄 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁, 𑀬𑀲𑀫𑀳𑀢𑁆𑀢𑀢𑁄, 𑀧𑀼𑀜𑁆𑀜𑀫𑀳𑀢𑁆𑀢𑀢𑁄, 𑀣𑀸𑀫𑀫𑀳𑀢𑁆𑀢𑀢𑁄, 𑀇𑀤𑁆𑀥𑀺𑀫𑀳𑀢𑁆𑀢𑀢𑁄, 𑀧𑀜𑁆𑀜𑀸𑀫𑀳𑀢𑁆𑀢𑀢𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄𑀢𑀺. 𑀓𑀣𑀁? 𑀇𑀤𑀁 𑀫𑀭𑀡𑀁 𑀦𑀸𑀫 𑀫𑀳𑀸𑀬𑀲𑀸𑀦𑀁 𑀫𑀳𑀸𑀧𑀭𑀺𑀯𑀸𑀭𑀸𑀦𑀁 𑀲𑀫𑁆𑀧𑀦𑁆𑀦𑀥𑀦𑀯𑀸𑀳𑀦𑀸𑀦𑀁 𑀫𑀳𑀸𑀲𑀫𑁆𑀫𑀢𑀫𑀦𑁆𑀥𑀸𑀢𑀼𑀫𑀳𑀸𑀲𑀼𑀤𑀲𑁆𑀲𑀦 𑀤𑀴𑁆𑀳𑀦𑁂𑀫𑀺 𑀦𑀺𑀫𑀺𑀧𑁆𑀧𑀪𑀼𑀢𑀻𑀦𑀫𑁆𑀧𑀺 𑀉𑀧𑀭𑀺 𑀦𑀺𑀭𑀸𑀲𑀗𑁆𑀓𑀫𑁂𑀯 𑀧𑀢𑀺𑀢𑀁, 𑀓𑀺𑀫𑀗𑁆𑀕𑀁 𑀧𑀦 𑀫𑀬𑁆𑀳𑀁 𑀉𑀧𑀭𑀺 𑀦 𑀧𑀢𑀺𑀲𑁆𑀲𑀢𑀺?

𑀫𑀳𑀸𑀬𑀲𑀸 𑀭𑀸𑀚𑀯𑀭𑀸, 𑀫𑀳𑀸𑀲𑀫𑁆𑀫𑀢𑀆𑀤𑀬𑁄;

𑀢𑁂𑀧𑀺 𑀫𑀘𑁆𑀘𑀼𑀯𑀲𑀁 𑀧𑀢𑁆𑀢𑀸, 𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸𑀢𑀺.

𑀏𑀯𑀁 𑀢𑀸𑀯 𑀬𑀲𑀫𑀳𑀢𑁆𑀢𑀢𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑀓𑀣𑀁 𑀧𑀼𑀜𑁆𑀜𑀫𑀳𑀢𑁆𑀢𑀢𑁄?

𑀚𑁄𑀢𑀺𑀓𑁄 𑀚𑀝𑀺𑀮𑁄 𑀉𑀕𑁆𑀕𑁄, 𑀫𑁂𑀡𑁆𑀟𑀓𑁄 𑀅𑀣 𑀧𑀼𑀡𑁆𑀡𑀓𑁄;

𑀏𑀢𑁂 𑀘𑀜𑁆𑀜𑁂 𑀘 𑀬𑁂 𑀮𑁄𑀓𑁂, 𑀫𑀳𑀸𑀧𑀼𑀜𑁆𑀜𑀸𑀢𑀺 𑀯𑀺𑀲𑁆𑀲𑀼𑀢𑀸;

𑀲𑀩𑁆𑀩𑁂 𑀫𑀭𑀡𑀫𑀸𑀧𑀦𑁆𑀦𑀸, 𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸𑀢𑀺.

𑀏𑀯𑀁 𑀧𑀼𑀜𑁆𑀜𑀫𑀳𑀢𑁆𑀢𑀢𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑀓𑀣𑀁 𑀣𑀸𑀫𑀫𑀳𑀢𑁆𑀢𑀢𑁄?

𑀯𑀸𑀲𑀼𑀤𑁂𑀯𑁄 𑀩𑀮𑀤𑁂𑀯𑁄, 𑀪𑀻𑀫𑀲𑁂𑀦𑁄 𑀬𑀼𑀥𑀺𑀝𑁆𑀞𑀺𑀮𑁄;

𑀘𑀸𑀦𑀼𑀭𑁄 𑀬𑁄 𑀫𑀳𑀸𑀫𑀮𑁆𑀮𑁄, 𑀅𑀦𑁆𑀢𑀓𑀲𑁆𑀲 𑀯𑀲𑀁 𑀕𑀢𑀸.

𑀏𑀯𑀁 𑀣𑀸𑀫𑀩𑀮𑀽𑀧𑁂𑀢𑀸, 𑀇𑀢𑀺 𑀮𑁄𑀓𑀫𑁆𑀳𑀺 𑀯𑀺𑀲𑁆𑀲𑀼𑀢𑀸;

𑀏𑀢𑁂𑀧𑀺 𑀫𑀭𑀡𑀁 𑀬𑀸𑀢𑀸, 𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸𑀢𑀺.

𑀏𑀯𑀁 𑀣𑀸𑀫𑀫𑀳𑀢𑁆𑀢𑀢𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑀓𑀣𑀁 𑀇𑀤𑁆𑀥𑀺𑀫𑀳𑀢𑁆𑀢𑀢𑁄?

𑀧𑀸𑀤𑀗𑁆𑀕𑀼𑀝𑁆𑀞𑀓𑀫𑀢𑁆𑀢𑁂𑀦, 𑀯𑁂𑀚𑀬𑀦𑁆𑀢𑀫𑀓𑀫𑁆𑀧𑀬𑀺;

𑀬𑁄 𑀦𑀸𑀫𑀺𑀤𑁆𑀥𑀺𑀫𑀢𑀁 𑀲𑁂𑀝𑁆𑀞𑁄, 𑀤𑀼𑀢𑀺𑀬𑁄 𑀅𑀕𑁆𑀕𑀲𑀸𑀯𑀓𑁄.

𑀲𑁄𑀧𑀺 𑀫𑀘𑁆𑀘𑀼𑀫𑀼𑀔𑀁 𑀖𑁄𑀭𑀁, 𑀫𑀺𑀕𑁄 𑀲𑀻𑀳𑀫𑀼𑀔𑀁 𑀯𑀺𑀬;

𑀧𑀯𑀺𑀝𑁆𑀞𑁄 𑀲𑀳 𑀇𑀤𑁆𑀥𑀻𑀳𑀺, 𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸𑀢𑀺.

𑀏𑀯𑀁 𑀇𑀤𑁆𑀥𑀺𑀫𑀳𑀢𑁆𑀢𑀢𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑀓𑀣𑀁 𑀧𑀜𑁆𑀜𑀸𑀫𑀳𑀢𑁆𑀢𑀢𑁄?

𑀮𑁄𑀓𑀦𑀸𑀣𑀁 𑀞𑀧𑁂𑀢𑁆𑀯𑀸𑀦, 𑀬𑁂 𑀘𑀜𑁆𑀜𑁂 𑀅𑀢𑁆𑀣𑀺 𑀧𑀸𑀡𑀺𑀦𑁄;

𑀧𑀜𑁆𑀜𑀸𑀬 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

𑀏𑀯𑀁 𑀦𑀸𑀫 𑀫𑀳𑀸𑀧𑀜𑁆𑀜𑁄, 𑀧𑀞𑀫𑁄 𑀅𑀕𑁆𑀕𑀲𑀸𑀯𑀓𑁄;

𑀫𑀭𑀡𑀲𑁆𑀲 𑀯𑀲𑀁 𑀧𑀢𑁆𑀢𑁄, 𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸𑀢𑀺.

𑀏𑀯𑀁 𑀧𑀜𑁆𑀜𑀸𑀫𑀳𑀢𑁆𑀢𑀢𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑀓𑀣𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁄? 𑀬𑁂𑀧𑀺 𑀢𑁂 𑀅𑀢𑁆𑀢𑀦𑁄 𑀜𑀸𑀡𑀯𑀻𑀭𑀺𑀬𑀩𑀮𑁂𑀦 𑀲𑀩𑁆𑀩𑀓𑀺𑀮𑁂𑀲𑀲𑀢𑁆𑀢𑀼𑀦𑀺𑀫𑁆𑀫𑀣𑀦𑀁 𑀓𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀢𑁆𑀢𑀸 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑀸 𑀲𑀬𑀫𑁆𑀪𑀼𑀦𑁄, 𑀢𑁂𑀧𑀺 𑀫𑀭𑀡𑀢𑁄 𑀦 𑀫𑀼𑀢𑁆𑀢𑀸, 𑀓𑀼𑀢𑁄 𑀧𑀦𑀸𑀳𑀁 𑀫𑀼𑀘𑁆𑀘𑀺𑀲𑁆𑀲𑀸𑀫𑀻𑀢𑀺.

𑀢𑀁 𑀢𑀁 𑀦𑀺𑀫𑀺𑀢𑁆𑀢𑀫𑀸𑀕𑀫𑁆𑀫, 𑀯𑀻𑀫𑀁𑀲𑀦𑁆𑀢𑀸 𑀫𑀳𑁂𑀲𑀬𑁄;

𑀲𑀬𑀫𑁆𑀪𑀼𑀜𑁆𑀜𑀸𑀡𑀢𑁂𑀚𑁂𑀦, 𑀬𑁂 𑀧𑀢𑁆𑀢𑀸 𑀆𑀲𑀯𑀓𑁆𑀔𑀬𑀁.

𑀏𑀓𑀘𑀭𑀺𑀬𑀦𑀺𑀯𑀸𑀲𑁂𑀦, 𑀔𑀕𑁆𑀕𑀲𑀺𑀗𑁆𑀕𑀲𑀫𑀽𑀧𑀫𑀸;

𑀢𑁂𑀧𑀺 𑀦𑀸𑀢𑀺𑀕𑀢𑀸 𑀫𑀘𑁆𑀘𑀼𑀁, 𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸𑀢𑀺.

𑀏𑀯𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑀓𑀣𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄? 𑀬𑁄𑀧𑀺 𑀲𑁄 𑀪𑀕𑀯𑀸 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀺𑀘𑀺𑀢𑁆𑀭𑀭𑀽𑀧𑀓𑀸𑀬𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀲𑀼𑀤𑁆𑀥𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡𑀭𑀢𑀦𑀲𑀫𑀺𑀤𑁆𑀥𑀥𑀫𑁆𑀫𑀓𑀸𑀬𑁄 𑀬𑀲𑀫𑀳𑀢𑁆𑀢𑀧𑀼𑀜𑁆𑀜𑀫𑀳𑀢𑁆𑀢𑀣𑀸𑀫𑀫𑀳𑀢𑁆𑀢𑀇𑀤𑁆𑀥𑀺𑀫𑀳𑀢𑁆𑀢𑀧𑀜𑁆𑀜𑀸𑀫𑀳𑀢𑁆𑀢𑀸𑀦𑀁 𑀧𑀸𑀭𑀁 𑀕𑀢𑁄 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑁄𑀧𑀺 𑀲𑀮𑀺𑀮𑀯𑀼𑀝𑁆𑀞𑀺𑀦𑀺𑀧𑀸𑀢𑁂𑀦 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀫𑀭𑀡𑀯𑀼𑀝𑁆𑀞𑀺𑀦𑀺𑀧𑀸𑀢𑁂𑀦 𑀞𑀸𑀦𑀲𑁄 𑀯𑀽𑀧𑀲𑀦𑁆𑀢𑁄.

𑀏𑀯𑀁 𑀫𑀳𑀸𑀦𑀼𑀪𑀸𑀯𑀲𑁆𑀲, 𑀬𑀁 𑀦𑀸𑀫𑁂𑀢𑀁 𑀫𑀳𑁂𑀲𑀺𑀦𑁄;

𑀦 𑀪𑀬𑁂𑀦 𑀦 𑀮𑀚𑁆𑀚𑀸𑀬, 𑀫𑀭𑀡𑀁 𑀯𑀲𑀫𑀸𑀕𑀢𑀁.

𑀦𑀺𑀮𑁆𑀮𑀚𑁆𑀚𑀁 𑀯𑀻𑀢𑀲𑀸𑀭𑀚𑁆𑀚𑀁, 𑀲𑀩𑁆𑀩𑀲𑀢𑁆𑀢𑀸𑀪𑀺𑀫𑀤𑁆𑀤𑀦𑀁;

𑀢𑀬𑀺𑀤𑀁 𑀫𑀸𑀤𑀺𑀲𑀁 𑀲𑀢𑁆𑀢𑀁, 𑀓𑀣𑀁 𑀦𑀸𑀪𑀺𑀪𑀯𑀺𑀲𑁆𑀲𑀢𑀻𑀢𑀺.

𑀏𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑀢𑀲𑁆𑀲𑁂𑀯𑀁 𑀬𑀲𑀫𑀳𑀢𑁆𑀢𑀢𑀸𑀤𑀺𑀲𑀫𑁆𑀧𑀦𑁆𑀦𑁂𑀳𑀺 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀫𑀭𑀡𑀲𑀸𑀫𑀜𑁆𑀜𑀢𑀸𑀬 𑀅𑀢𑁆𑀢𑀸𑀦𑀁 𑀉𑀧𑀲𑀁𑀳𑀭𑀺𑀢𑁆𑀯𑀸 𑀢𑁂𑀲𑀁 𑀯𑀺𑀬 𑀲𑀢𑁆𑀢𑀯𑀺𑀲𑁂𑀲𑀸𑀦𑀁 𑀫𑀬𑁆𑀳𑀫𑁆𑀧𑀺 𑀫𑀭𑀡𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀦𑀼𑀲𑁆𑀲𑀭𑀢𑁄 𑀉𑀧𑀘𑀸𑀭𑀧𑁆𑀧𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀳𑁄𑀢𑀻𑀢𑀺. 𑀏𑀯𑀁 𑀉𑀧𑀲𑀁𑀳𑀭𑀡𑀢𑁄 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑁧𑁭𑁨. 𑀓𑀸𑀬𑀩𑀳𑀼𑀲𑀸𑀥𑀸𑀭𑀡𑀢𑁄𑀢𑀺 𑀅𑀬𑀁 𑀓𑀸𑀬𑁄 𑀩𑀳𑀼𑀲𑀸𑀥𑀸𑀭𑀡𑁄. 𑀅𑀲𑀻𑀢𑀺𑀬𑀸 𑀢𑀸𑀯 𑀓𑀺𑀫𑀺𑀓𑀼𑀮𑀸𑀦𑀁 𑀲𑀸𑀥𑀸𑀭𑀡𑁄, 𑀢𑀢𑁆𑀣 𑀙𑀯𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀙𑀯𑀺𑀁 𑀔𑀸𑀤𑀦𑁆𑀢𑀺, 𑀘𑀫𑁆𑀫𑀦𑀺𑀲𑁆𑀲𑀺𑀢𑀸 𑀘𑀫𑁆𑀫𑀁 𑀔𑀸𑀤𑀦𑁆𑀢𑀺, 𑀫𑀁𑀲𑀦𑀺𑀲𑁆𑀲𑀺𑀢𑀸 𑀫𑀁𑀲𑀁 𑀔𑀸𑀤𑀦𑁆𑀢𑀺, 𑀦𑁆𑀳𑀸𑀭𑀼𑀦𑀺𑀲𑁆𑀲𑀺𑀢𑀸 𑀦𑁆𑀳𑀸𑀭𑀼𑀁 𑀔𑀸𑀤𑀦𑁆𑀢𑀺, 𑀅𑀝𑁆𑀞𑀺𑀦𑀺𑀲𑁆𑀲𑀺𑀢𑀸 𑀅𑀝𑁆𑀞𑀺𑀁 𑀔𑀸𑀤𑀦𑁆𑀢𑀺, 𑀫𑀺𑀜𑁆𑀚𑀦𑀺𑀲𑁆𑀲𑀺𑀢𑀸 𑀫𑀺𑀜𑁆𑀚𑀁 𑀔𑀸𑀤𑀦𑁆𑀢𑀺. 𑀢𑀢𑁆𑀣𑁂𑀯 𑀚𑀸𑀬𑀦𑁆𑀢𑀺 𑀚𑀻𑀬𑀦𑁆𑀢𑀺 𑀫𑀻𑀬𑀦𑁆𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀺. 𑀓𑀸𑀬𑁄𑀯 𑀦𑁂𑀲𑀁 𑀲𑀽𑀢𑀺𑀖𑀭𑀜𑁆𑀘𑁂𑀯 𑀕𑀺𑀮𑀸𑀦𑀲𑀸𑀮𑀸 𑀘 𑀲𑀼𑀲𑀸𑀦𑀜𑁆𑀘 𑀯𑀘𑁆𑀘𑀓𑀼𑀝𑀺 𑀘 𑀧𑀲𑁆𑀲𑀸𑀯𑀤𑁄𑀡𑀺𑀓𑀸 𑀘. 𑀲𑁆𑀯𑀸𑀬𑀁 𑀢𑁂𑀲𑀫𑁆𑀧𑀺 𑀓𑀺𑀫𑀺𑀓𑀼𑀮𑀸𑀦𑀁 𑀧𑀓𑁄𑀧𑁂𑀦 𑀫𑀭𑀡𑀁 𑀦𑀺𑀕𑀘𑁆𑀙𑀢𑀺𑀬𑁂𑀯. 𑀬𑀣𑀸 𑀘 𑀅𑀲𑀻𑀢𑀺𑀬𑀸 𑀓𑀺𑀫𑀺𑀓𑀼𑀮𑀸𑀦𑀁, 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁𑀬𑁂𑀯 𑀅𑀦𑁂𑀓𑀲𑀢𑀸𑀦𑀁 𑀭𑁄𑀕𑀸𑀦𑀁 𑀩𑀸𑀳𑀺𑀭𑀸𑀦𑀜𑁆𑀘 𑀅𑀳𑀺𑀯𑀺𑀘𑁆𑀙𑀺𑀓𑀸𑀤𑀻𑀦𑀁 𑀫𑀭𑀡𑀲𑁆𑀲 𑀧𑀘𑁆𑀘𑀬𑀸𑀦𑀁 𑀲𑀸𑀥𑀸𑀭𑀡𑁄.

𑀬𑀣𑀸 𑀳𑀺 𑀘𑀢𑀼𑀫𑀳𑀸𑀧𑀣𑁂 𑀞𑀧𑀺𑀢𑁂 𑀮𑀓𑁆𑀔𑀫𑁆𑀳𑀺 𑀲𑀩𑁆𑀩𑀤𑀺𑀲𑀸𑀳𑀺 𑀆𑀕𑀢𑀸 𑀲𑀭𑀲𑀢𑁆𑀢𑀺𑀢𑁄𑀫𑀭𑀧𑀸𑀲𑀸𑀡𑀸𑀤𑀬𑁄 𑀦𑀺𑀧𑀢𑀦𑁆𑀢𑀺, 𑀏𑀯𑀁 𑀓𑀸𑀬𑁂𑀧𑀺 𑀲𑀩𑁆𑀩𑀼𑀧𑀤𑁆𑀤𑀯𑀸 𑀦𑀺𑀧𑀢𑀦𑁆𑀢𑀺. 𑀲𑁆𑀯𑀸𑀬𑀁 𑀢𑁂𑀲𑀫𑁆𑀧𑀺 𑀉𑀧𑀤𑁆𑀤𑀯𑀸𑀦𑀁 𑀦𑀺𑀧𑀸𑀢𑁂𑀦 𑀫𑀭𑀡𑀁 𑀦𑀺𑀕𑀘𑁆𑀙𑀢𑀺𑀬𑁂𑀯. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀺𑀯𑀲𑁂 𑀦𑀺𑀓𑁆𑀔𑀦𑁆𑀢𑁂 𑀭𑀢𑁆𑀢𑀺𑀬𑀸 𑀧𑀝𑀺𑀳𑀺𑀢𑀸𑀬 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺, 𑀩𑀳𑀼𑀓𑀸 𑀔𑁄 𑀫𑁂 𑀧𑀘𑁆𑀘𑀬𑀸 𑀫𑀭𑀡𑀲𑁆𑀲, 𑀅𑀳𑀺 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀯𑀺𑀘𑁆𑀙𑀺𑀓𑁄 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀲𑀢𑀧𑀤𑀻 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄, 𑀉𑀧𑀓𑁆𑀔𑀮𑀺𑀢𑁆𑀯𑀸 𑀯𑀸 𑀧𑀧𑀢𑁂𑀬𑁆𑀬𑀁, 𑀪𑀢𑁆𑀢𑀁 𑀯𑀸 𑀫𑁂 𑀪𑀼𑀢𑁆𑀢𑀁 𑀩𑁆𑀬𑀸𑀧𑀚𑁆𑀚𑁂𑀬𑁆𑀬, 𑀧𑀺𑀢𑁆𑀢𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑁂𑀫𑁆𑀳𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑀢𑁆𑀣𑀓𑀸 𑀯𑀸 𑀫𑁂 𑀯𑀸𑀢𑀸 𑀓𑀼𑀧𑁆𑀧𑁂𑀬𑁆𑀬𑀼𑀁, 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄’’𑀢𑀺. 𑀏𑀯𑀁 (𑀅. 𑀦𑀺. 𑁬.𑁨𑁦) 𑀓𑀸𑀬𑀩𑀳𑀼𑀲𑀸𑀥𑀸𑀭𑀡𑀢𑁄 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑁧𑁭𑁩. 𑀆𑀬𑀼𑀤𑀼𑀩𑁆𑀩𑀮𑀢𑁄𑀢𑀺 𑀆𑀬𑀼 𑀦𑀸𑀫𑁂𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁. 𑀢𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀜𑁆𑀘𑁂𑀯 𑀇𑀭𑀺𑀬𑀸𑀧𑀣𑀽𑀧𑀦𑀺𑀩𑀤𑁆𑀥𑀜𑁆𑀘 𑀲𑀻𑀢𑀼𑀡𑁆𑀳𑀽𑀧𑀦𑀺𑀩𑀤𑁆𑀥𑀜𑁆𑀘 𑀫𑀳𑀸𑀪𑀽𑀢𑀽𑀧𑀦𑀺𑀩𑀤𑁆𑀥𑀜𑁆𑀘 𑀆𑀳𑀸𑀭𑀽𑀧𑀦𑀺𑀩𑀤𑁆𑀥𑀜𑁆𑀘. 𑀢𑀤𑁂𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀫𑀯𑀼𑀢𑁆𑀢𑀺𑀢𑀁 𑀮𑀪𑀫𑀸𑀦𑀫𑁂𑀯 𑀧𑀯𑀢𑁆𑀢𑀢𑀺. 𑀩𑀳𑀺 𑀦𑀺𑀓𑁆𑀔𑀦𑁆𑀢𑀦𑀸𑀲𑀺𑀓𑀯𑀸𑀢𑁂 𑀧𑀦 𑀅𑀦𑁆𑀢𑁄 𑀅𑀧𑀯𑀺𑀲𑀦𑁆𑀢𑁂, 𑀧𑀯𑀺𑀝𑁆𑀞𑁂 𑀯𑀸 𑀅𑀦𑀺𑀓𑁆𑀔𑀫𑀦𑁆𑀢𑁂 𑀫𑀢𑁄 𑀦𑀸𑀫 𑀳𑁄𑀢𑀺. 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀫𑁆𑀧𑀺 𑀲𑀫𑀯𑀼𑀢𑁆𑀢𑀺𑀢𑀁 𑀮𑀪𑀫𑀸𑀦𑀫𑁂𑀯 𑀧𑀯𑀢𑁆𑀢𑀢𑀺. 𑀅𑀜𑁆𑀜𑀢𑀭𑀜𑁆𑀜𑀢𑀭𑀲𑁆𑀲 𑀧𑀦 𑀅𑀥𑀺𑀫𑀢𑁆𑀢𑀢𑀸𑀬 𑀆𑀬𑀼𑀲𑀗𑁆𑀔𑀸𑀭𑀸 𑀉𑀧𑀘𑁆𑀙𑀺𑀚𑁆𑀚𑀦𑁆𑀢𑀺. 𑀲𑀻𑀢𑀼𑀡𑁆𑀳𑀸𑀦𑀫𑁆𑀧𑀺 𑀲𑀫𑀯𑀼𑀢𑁆𑀢𑀺𑀢𑀁 𑀮𑀪𑀫𑀸𑀦𑀫𑁂𑀯 𑀧𑀯𑀢𑁆𑀢𑀢𑀺. 𑀅𑀢𑀺𑀲𑀻𑀢𑁂𑀦 𑀧𑀦 𑀅𑀢𑀺𑀉𑀡𑁆𑀳𑁂𑀦 𑀯𑀸 𑀅𑀪𑀺𑀪𑀽𑀢𑀲𑁆𑀲 𑀯𑀺𑀧𑀚𑁆𑀚𑀢𑀺. 𑀫𑀳𑀸𑀪𑀽𑀢𑀸𑀦𑀫𑁆𑀧𑀺 𑀲𑀫𑀯𑀼𑀢𑁆𑀢𑀺𑀢𑀁 𑀮𑀪𑀫𑀸𑀦𑀫𑁂𑀯 𑀧𑀯𑀢𑁆𑀢𑀢𑀺. 𑀧𑀣𑀯𑀻𑀥𑀸𑀢𑀼𑀬𑀸 𑀧𑀦 𑀆𑀧𑁄𑀥𑀸𑀢𑀼𑀆𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑀲𑁆𑀲 𑀧𑀓𑁄𑀧𑁂𑀦 𑀩𑀮𑀲𑀫𑁆𑀧𑀦𑁆𑀦𑁄𑀧𑀺 𑀧𑀼𑀕𑁆𑀕𑀮𑁄 𑀧𑀢𑁆𑀣𑀤𑁆𑀥𑀓𑀸𑀬𑁄 𑀯𑀸 𑀅𑀢𑀺𑀲𑀸𑀭𑀸𑀤𑀺𑀯𑀲𑁂𑀦 𑀓𑀺𑀮𑀺𑀦𑁆𑀦𑀧𑀽𑀢𑀺𑀓𑀸𑀬𑁄 𑀯𑀸 𑀫𑀳𑀸𑀟𑀸𑀳𑀧𑀭𑁂𑀢𑁄 𑀯𑀸 𑀲𑀫𑁆𑀪𑀺𑀚𑁆𑀚𑀫𑀸𑀦𑀲𑀦𑁆𑀥𑀺𑀩𑀦𑁆𑀥𑀦𑁄 𑀯𑀸 𑀳𑀼𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀸𑀢𑀺. 𑀓𑀩𑀴𑀻𑀓𑀸𑀭𑀸𑀳𑀸𑀭𑀫𑁆𑀧𑀺 𑀬𑀼𑀢𑁆𑀢𑀓𑀸𑀮𑁂 𑀮𑀪𑀦𑁆𑀢𑀲𑁆𑀲𑁂𑀯 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀆𑀳𑀸𑀭𑀁 𑀅𑀮𑀪𑀫𑀸𑀦𑀲𑁆𑀲 𑀧𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀻𑀢𑀺. 𑀏𑀯𑀁 𑀆𑀬𑀼𑀤𑀼𑀩𑁆𑀩𑀮𑀢𑁄 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑁧𑁭𑁪. 𑀅𑀦𑀺𑀫𑀺𑀢𑁆𑀢𑀢𑁄𑀢𑀺 𑀅𑀯𑀯𑀢𑁆𑀣𑀸𑀦𑀢𑁄, 𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀸𑀦𑀁 𑀳𑀺 𑁋

𑀚𑀻𑀯𑀺𑀢𑀁 𑀩𑁆𑀬𑀸𑀥𑀺 𑀓𑀸𑀮𑁄 𑀘, 𑀤𑁂𑀳𑀦𑀺𑀓𑁆𑀔𑁂𑀧𑀦𑀁 𑀕𑀢𑀺;

𑀧𑀜𑁆𑀘𑁂𑀢𑁂 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀅𑀦𑀺𑀫𑀺𑀢𑁆𑀢𑀸 𑀦 𑀦𑀸𑀬𑀭𑁂.

𑀢𑀢𑁆𑀣 𑀚𑀻𑀯𑀺𑀢𑀁 𑀢𑀸𑀯 ‘‘𑀏𑀢𑁆𑀢𑀓𑀫𑁂𑀯 𑀚𑀻𑀯𑀺𑀢𑀩𑁆𑀩𑀁, 𑀦 𑀇𑀢𑁄 𑀧𑀭’’𑀦𑁆𑀢𑀺 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀁. 𑀓𑀮𑀮𑀓𑀸𑀮𑁂𑀧𑀺 𑀳𑀺 𑀲𑀢𑁆𑀢𑀸 𑀫𑀭𑀦𑁆𑀢𑀺, 𑀅𑀩𑁆𑀩𑀼𑀤𑀧𑁂𑀲𑀺𑀖𑀦𑀫𑀸𑀲𑀺𑀓𑀤𑁆𑀯𑁂𑀫𑀸𑀲𑀢𑁂𑀫𑀸𑀲𑀘𑀢𑀼𑀫𑀸𑀲𑀧𑀜𑁆𑀘𑀫𑀸𑀲𑀤𑀲𑀫𑀸𑀲𑀓𑀸𑀮𑁂𑀧𑀺. 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀲𑀫𑀬𑁂𑀧𑀺. 𑀢𑀢𑁄 𑀧𑀭𑀁 𑀯𑀲𑁆𑀲𑀲𑀢𑀲𑁆𑀲 𑀅𑀦𑁆𑀢𑁄𑀧𑀺 𑀩𑀳𑀺𑀧𑀺 𑀫𑀭𑀦𑁆𑀢𑀺𑀬𑁂𑀯. 𑀩𑁆𑀬𑀸𑀥𑀺𑀧𑀺 ‘‘𑀇𑀫𑀺𑀦𑀸𑀯 𑀩𑁆𑀬𑀸𑀥𑀺𑀦𑀸 𑀲𑀢𑁆𑀢𑀸 𑀫𑀭𑀦𑁆𑀢𑀺, 𑀦𑀸𑀜𑁆𑀜𑁂𑀦𑀸’’𑀢𑀺 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑁄. 𑀘𑀓𑁆𑀔𑀼𑀭𑁄𑀕𑁂𑀦𑀸𑀧𑀺 𑀳𑀺 𑀲𑀢𑁆𑀢𑀸 𑀫𑀭𑀦𑁆𑀢𑀺, 𑀲𑁄𑀢𑀭𑁄𑀕𑀸𑀤𑀻𑀦𑀁 𑀅𑀜𑁆𑀜𑀢𑀭𑁂𑀦𑀸𑀧𑀺. 𑀓𑀸𑀮𑁄𑀧𑀺 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀫𑀭𑀺𑀢𑀩𑁆𑀩𑀁, 𑀦𑀸𑀜𑁆𑀜𑀲𑁆𑀫𑀺’’𑀦𑁆𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑁄. 𑀧𑀼𑀩𑁆𑀩𑀡𑁆𑀳𑁂𑀧𑀺 𑀳𑀺 𑀲𑀢𑁆𑀢𑀸 𑀫𑀭𑀦𑁆𑀢𑀺, 𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀫𑁆𑀧𑀺. 𑀤𑁂𑀳𑀦𑀺𑀓𑁆𑀔𑁂𑀧𑀦𑀫𑁆𑀧𑀺 ‘‘𑀇𑀥𑁂𑀯 𑀫𑀻𑀬𑀫𑀸𑀦𑀸𑀦𑀁 𑀤𑁂𑀳𑁂𑀦 𑀧𑀢𑀺𑀢𑀩𑁆𑀩𑀁, 𑀦𑀸𑀜𑁆𑀜𑀢𑁆𑀭𑀸’’𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀁. 𑀅𑀦𑁆𑀢𑁄𑀕𑀸𑀫𑁂 𑀚𑀸𑀢𑀸𑀦𑀁 𑀳𑀺 𑀩𑀳𑀺𑀕𑀸𑀫𑁂𑀧𑀺 𑀅𑀢𑁆𑀢𑀪𑀸𑀯𑁄 𑀧𑀢𑀢𑀺. 𑀩𑀳𑀺𑀕𑀸𑀫𑁂 𑀚𑀸𑀢𑀸𑀦𑀫𑁆𑀧𑀺 𑀅𑀦𑁆𑀢𑁄𑀕𑀸𑀫𑁂. 𑀢𑀣𑀸 𑀣𑀮𑀚𑀸𑀦𑀁 𑀯𑀸 𑀚𑀮𑁂, 𑀚𑀮𑀚𑀸𑀦𑀁 𑀯𑀸 𑀣𑀮𑁂𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀕𑀢𑀺𑀧𑀺 ‘‘𑀇𑀢𑁄 𑀘𑀼𑀢𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀸. 𑀤𑁂𑀯𑀮𑁄𑀓𑀢𑁄 𑀳𑀺 𑀘𑀼𑀢𑀸 𑀫𑀦𑀼𑀲𑁆𑀲𑁂𑀲𑀼𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑀸𑀤𑀻𑀦𑀫𑁆𑀧𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀬𑀦𑁆𑀢𑀬𑀼𑀢𑁆𑀢𑀕𑁄𑀡𑁄 𑀯𑀺𑀬 𑀕𑀢𑀺𑀧𑀜𑁆𑀘𑀓𑁂 𑀮𑁄𑀓𑁄 𑀲𑀫𑁆𑀧𑀭𑀺𑀯𑀢𑁆𑀢𑀢𑀻𑀢𑀺 𑀏𑀯𑀁 𑀅𑀦𑀺𑀫𑀺𑀢𑁆𑀢𑀢𑁄 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑁧𑁭𑁫. 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀺𑀢𑀲𑁆𑀲 𑀦𑀸𑀫 𑀏𑀢𑀭𑀳𑀺 𑀧𑀭𑀺𑀢𑁆𑀢𑁄 𑀅𑀤𑁆𑀥𑀸. 𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁, 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀧𑁆𑀧𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼, 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑁄, 𑀪𑀺𑀓𑁆𑀔𑀯𑁂, 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁, 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄𑀢𑀺.

𑀅𑀧𑁆𑀧𑀫𑀸𑀬𑀼𑀫𑀦𑀼𑀲𑁆𑀲𑀸𑀦𑀁, 𑀳𑀻𑀴𑁂𑀬𑁆𑀬 𑀦𑀁 𑀲𑀼𑀧𑁄𑀭𑀺𑀲𑁄;

𑀘𑀭𑁂𑀬𑁆𑀬𑀸𑀤𑀺𑀢𑁆𑀢𑀲𑀻𑀲𑁄𑀯, 𑀦𑀢𑁆𑀣𑀺 𑀫𑀘𑁆𑀘𑀼𑀲𑁆𑀲 𑀦𑀸𑀕𑀫𑁄𑀢𑀺. (𑀲𑀁. 𑀦𑀺. 𑁧.𑁧𑁪𑁫);

𑀅𑀧𑀭𑀫𑁆𑀧𑀺 𑀆𑀳 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀭𑀓𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀻’’𑀢𑀺 𑀲𑀩𑁆𑀩𑀫𑁆𑀧𑀺 𑀲𑀢𑁆𑀢𑀳𑀺 𑀉𑀧𑀫𑀸𑀳𑀺 𑀅𑀮𑀗𑁆𑀓𑀢𑀁 𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀅𑀧𑀭𑀫𑁆𑀧𑀺 𑀆𑀳 𑁋 ‘‘𑀬𑁄𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺, 𑀅𑀳𑁄 𑀯𑀢𑀸𑀳𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺𑀓𑀭𑁂𑀬𑁆𑀬𑀁, 𑀩𑀳𑀼𑀁 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸𑀢𑀺. 𑀬𑁄𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺, 𑀅𑀳𑁄 𑀯𑀢𑀸𑀳𑀁 𑀤𑀺𑀯𑀲𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺𑀓𑀭𑁂𑀬𑁆𑀬𑀁, 𑀩𑀳𑀼𑀁 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸𑀢𑀺. 𑀬𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺, 𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁, 𑀬𑀤𑀦𑁆𑀢𑀭𑀁 𑀏𑀓𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺𑀓𑀭𑁂𑀬𑁆𑀬𑀁, 𑀩𑀳𑀼𑀁 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸𑀢𑀺. 𑀬𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺, 𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁, 𑀬𑀤𑀦𑁆𑀢𑀭𑀁 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂 𑀲𑀗𑁆𑀔𑀸𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺𑀓𑀭𑁂𑀬𑁆𑀬𑀁, 𑀩𑀳𑀼𑀁 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀤𑀦𑁆𑀥𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀬𑁄 𑀘 𑀔𑁆𑀯𑀸𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺, 𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁, 𑀬𑀤𑀦𑁆𑀢𑀭𑀁 𑀏𑀓𑀁 𑀆𑀮𑁄𑀧𑀁 𑀲𑀗𑁆𑀔𑀸𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺𑀓𑀭𑁂𑀬𑁆𑀬𑀁, 𑀩𑀳𑀼𑀁 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸𑀢𑀺. 𑀬𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺, 𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁, 𑀬𑀤𑀦𑁆𑀢𑀭𑀁 𑀅𑀲𑁆𑀲𑀲𑀺𑀢𑁆𑀯𑀸 𑀯𑀸 𑀧𑀲𑁆𑀲𑀲𑀸𑀫𑀺, 𑀧𑀲𑁆𑀲𑀲𑀺𑀢𑁆𑀯𑀸 𑀯𑀸 𑀅𑀲𑁆𑀲𑀲𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺𑀓𑀭𑁂𑀬𑁆𑀬𑀁, 𑀩𑀳𑀼𑀁 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑀺𑀓𑁆𑀔𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺 (𑀅. 𑀦𑀺. 𑁬.𑁧𑁯). 𑀏𑀯𑀁 𑀘𑀢𑀼𑀧𑀜𑁆𑀘𑀸𑀮𑁄𑀧𑀲𑀗𑁆𑀔𑀸𑀤𑀦𑀫𑀢𑁆𑀢𑀁 𑀅𑀯𑀺𑀲𑁆𑀲𑀸𑀲𑀺𑀬𑁄 𑀧𑀭𑀺𑀢𑁆𑀢𑁄 𑀚𑀻𑀯𑀺𑀢𑀲𑁆𑀲 𑀅𑀤𑁆𑀥𑀸𑀢𑀺 𑀏𑀯𑀁 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀢𑁄 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑁧𑁭𑁬. 𑀔𑀡𑀧𑀭𑀺𑀢𑁆𑀢𑀢𑁄𑀢𑀺 𑀧𑀭𑀫𑀢𑁆𑀣𑀢𑁄 𑀳𑀺 𑀅𑀢𑀺𑀧𑀭𑀺𑀢𑁆𑀢𑁄 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀓𑁆𑀔𑀡𑁄 𑀏𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁄𑀬𑁂𑀯. 𑀬𑀣𑀸 𑀦𑀸𑀫 𑀭𑀣𑀘𑀓𑁆𑀓𑀁 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀏𑀓𑁂𑀦𑁂𑀯 𑀦𑁂𑀫𑀺𑀧𑁆𑀧𑀤𑁂𑀲𑁂𑀦 𑀧𑀯𑀢𑁆𑀢𑀢𑀺, 𑀢𑀺𑀝𑁆𑀞𑀫𑀸𑀦𑀫𑁆𑀧𑀺 𑀏𑀓𑁂𑀦𑁂𑀯 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁. 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀦𑀺𑀭𑀼𑀤𑁆𑀥𑀫𑀢𑁆𑀢𑁂 𑀲𑀢𑁆𑀢𑁄 𑀦𑀺𑀭𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀅𑀢𑀻𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀢𑁆𑀣, 𑀦 𑀚𑀻𑀯𑀢𑀺, 𑀦 𑀚𑀻𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀦 𑀚𑀻𑀯𑀺𑀢𑁆𑀣, 𑀦 𑀚𑀻𑀯𑀢𑀺, 𑀚𑀻𑀯𑀺𑀲𑁆𑀲𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀓𑁆𑀔𑀡𑁂 𑀦 𑀚𑀻𑀯𑀺𑀢𑁆𑀣, 𑀚𑀻𑀯𑀢𑀺, 𑀦 𑀚𑀻𑀯𑀺𑀲𑁆𑀲𑀢𑀺.

‘‘𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘, 𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸, 𑀮𑀳𑀼 𑀲𑁄 𑀯𑀢𑁆𑀢𑀢𑁂 𑀔𑀡𑁄.

‘‘𑀬𑁂 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲, 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥;

𑀲𑀩𑁆𑀩𑁂𑀧𑀺 𑀲𑀤𑀺𑀲𑀸 𑀔𑀦𑁆𑀥𑀸, 𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸.

‘‘𑀅𑀦𑀺𑀩𑁆𑀩𑀢𑁆𑀢𑁂𑀦 𑀦 𑀚𑀸𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀚𑀻𑀯𑀢𑀺;

𑀘𑀺𑀢𑁆𑀢𑀪𑀗𑁆𑀕𑀸 𑀫𑀢𑁄 𑀮𑁄𑀓𑁄, 𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀺𑀬𑀸’’𑀢𑀺. (𑀫𑀳𑀸𑀦𑀺. 𑁩𑁯);

𑀏𑀯𑀁 𑀔𑀡𑀧𑀭𑀺𑀢𑁆𑀢𑀢𑁄 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑁧𑁭𑁭. 𑀇𑀢𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀆𑀓𑀸𑀭𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀅𑀦𑀼𑀲𑁆𑀲𑀭𑀢𑁄𑀧𑀺 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀸𑀭𑀯𑀲𑁂𑀦 𑀘𑀺𑀢𑁆𑀢𑀁 𑀆𑀲𑁂𑀯𑀦𑀁 𑀮𑀪𑀢𑀺, 𑀫𑀭𑀡𑀸𑀭𑀫𑁆𑀫𑀡𑀸 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀛𑀸𑀦𑀗𑁆𑀕𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺. 𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀧𑀦 𑀲𑀁𑀯𑁂𑀚𑀦𑀻𑀬𑀢𑁆𑀢𑀸 𑀘 𑀆𑀭𑀫𑁆𑀫𑀡𑀲𑁆𑀲 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀯𑀸 𑀉𑀧𑀘𑀸𑀭𑀧𑁆𑀧𑀢𑁆𑀢𑀫𑁂𑀯 𑀛𑀸𑀦𑀁 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀁 𑀧𑀦 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀘 𑀆𑀭𑀼𑀧𑁆𑀧𑀚𑁆𑀛𑀸𑀦𑀸𑀦𑀺 𑀲𑀪𑀸𑀯𑀥𑀫𑁆𑀫𑁂𑀧𑀺 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀅𑀧𑁆𑀧𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸𑀦𑀼𑀓𑁆𑀓𑀫𑀯𑀲𑁂𑀦 𑀳𑀺 𑀮𑁄𑀓𑀼𑀢𑁆𑀢𑀭𑀁 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀪𑀸𑀯𑀦𑀸𑀯𑀲𑁂𑀦 𑀆𑀭𑀼𑀧𑁆𑀧𑀁. 𑀅𑀧𑁆𑀧𑀦𑀸𑀧𑀢𑁆𑀢𑀲𑁆𑀲𑁂𑀯 𑀳𑀺 𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀦𑀫𑀢𑁆𑀢𑀁 𑀢𑀢𑁆𑀣 𑀳𑁄𑀢𑀺. 𑀇𑀥 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀦𑀢𑁆𑀣𑀺. 𑀢𑀲𑁆𑀫𑀸 𑀉𑀧𑀘𑀸𑀭𑀧𑁆𑀧𑀢𑁆𑀢𑀫𑁂𑀯 𑀛𑀸𑀦𑀁 𑀳𑁄𑀢𑀺. 𑀢𑀤𑁂𑀢𑀁 𑀫𑀭𑀡𑀲𑁆𑀲𑀢𑀺𑀩𑀮𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀫𑀭𑀡𑀲𑁆𑀲𑀢𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀇𑀫𑀜𑁆𑀘 𑀧𑀦 𑀫𑀭𑀡𑀲𑁆𑀲𑀢𑀺𑀁 𑀅𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀲𑀢𑀢𑀁 𑀅𑀧𑁆𑀧𑀫𑀢𑁆𑀢𑁄 𑀳𑁄𑀢𑀺, 𑀲𑀩𑁆𑀩𑀪𑀯𑁂𑀲𑀼 𑀅𑀦𑀪𑀺𑀭𑀢𑀺𑀲𑀜𑁆𑀜𑀁 𑀧𑀝𑀺𑀮𑀪𑀢𑀺, 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀁 𑀚𑀳𑀸𑀢𑀺, 𑀧𑀸𑀧𑀕𑀭𑀳𑀻 𑀳𑁄𑀢𑀺, 𑀅𑀲𑀦𑁆𑀦𑀺𑀥𑀺𑀩𑀳𑀼𑀮𑁄 𑀧𑀭𑀺𑀓𑁆𑀔𑀸𑀭𑁂𑀲𑀼 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁄, 𑀅𑀦𑀺𑀘𑁆𑀘𑀲𑀜𑁆𑀜𑀸 𑀘𑀲𑁆𑀲 𑀧𑀭𑀺𑀘𑀬𑀁 𑀕𑀘𑁆𑀙𑀢𑀺, 𑀢𑀤𑀦𑀼𑀲𑀸𑀭𑁂𑀦𑁂𑀯 𑀤𑀼𑀓𑁆𑀔𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸 𑀘 𑀉𑀧𑀝𑁆𑀞𑀸𑀢𑀺. 𑀬𑀣𑀸 𑀅𑀪𑀸𑀯𑀺𑀢𑀫𑀭𑀡𑀸 𑀲𑀢𑁆𑀢𑀸 𑀲𑀳𑀲𑀸 𑀯𑀸𑀴𑀫𑀺𑀕𑀬𑀓𑁆𑀔𑀲𑀧𑁆𑀧𑀘𑁄𑀭𑀯𑀥𑀓𑀸𑀪𑀺𑀪𑀽𑀢𑀸 𑀯𑀺𑀬 𑀫𑀭𑀡𑀲𑀫𑀬𑁂 𑀪𑀬𑀁 𑀲𑀦𑁆𑀢𑀸𑀲𑀁 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀅𑀪𑀬𑁄 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺. 𑀲𑀘𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀫𑀢𑀁 𑀦𑀸𑀭𑀸𑀥𑁂𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀧𑀭𑀸𑀬𑀦𑁄 𑀳𑁄𑀢𑀺.

𑀢𑀲𑁆𑀫𑀸 𑀳𑀯𑁂 𑀅𑀧𑁆𑀧𑀫𑀸𑀤𑀁, 𑀓𑀬𑀺𑀭𑀸𑀣 𑀲𑀼𑀫𑁂𑀥𑀲𑁄;

𑀏𑀯𑀁 𑀫𑀳𑀸𑀦𑀼𑀪𑀸𑀯𑀸𑀬, 𑀫𑀭𑀡𑀲𑁆𑀲𑀢𑀺𑀬𑀸 𑀲𑀤𑀸𑀢𑀺.

𑀇𑀤𑀁 𑀫𑀭𑀡𑀲𑁆𑀲𑀢𑀺𑀬𑀁 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.

𑀓𑀸𑀬𑀕𑀢𑀸𑀲𑀢𑀺𑀓𑀣𑀸

𑁧𑁭𑁮. 𑀇𑀤𑀸𑀦𑀺 𑀬𑀁 𑀢𑀁 𑀅𑀜𑁆𑀜𑀢𑁆𑀭 𑀩𑀼𑀤𑁆𑀥𑀼𑀧𑁆𑀧𑀸𑀤𑀸 𑀅𑀧𑁆𑀧𑀯𑀢𑁆𑀢𑀧𑀼𑀩𑁆𑀩𑀁 𑀲𑀩𑁆𑀩𑀢𑀺𑀢𑁆𑀣𑀺𑀬𑀸𑀦𑀁 𑀅𑀯𑀺𑀲𑀬𑀪𑀽𑀢𑀁 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 ‘‘𑀏𑀓𑀥𑀫𑁆𑀫𑁄, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀫𑀳𑀢𑁄 𑀲𑀁𑀯𑁂𑀕𑀸𑀬 𑀲𑀁𑀯𑀢𑁆𑀢𑀢𑀺. 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀫𑀳𑀢𑁄 𑀬𑁄𑀕𑀓𑁆𑀔𑁂𑀫𑀸𑀬 𑀲𑀁𑀯𑀢𑁆𑀢𑀢𑀺. 𑀫𑀳𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀬 𑀲𑀁𑀯𑀢𑁆𑀢𑀢𑀺. 𑀜𑀸𑀡𑀤𑀲𑁆𑀲𑀦𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀺. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬 𑀲𑀁𑀯𑀢𑁆𑀢𑀢𑀺. 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑁄 𑀏𑀓𑀥𑀫𑁆𑀫𑁄? 𑀓𑀸𑀬𑀕𑀢𑀸 𑀲𑀢𑀺… (𑀅. 𑀦𑀺. 𑁧.𑁫𑁬𑁩 𑀆𑀤𑀬𑁄). 𑀅𑀫𑀢𑀁 𑀢𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀬𑁂 𑀓𑀸𑀬𑀕𑀢𑀸𑀲𑀢𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀫𑀢𑀁 𑀢𑁂, 𑀪𑀺𑀓𑁆𑀔𑀯𑁂, 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀬𑁂 𑀓𑀸𑀬𑀕𑀢𑀸𑀲𑀢𑀺𑀁 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀫𑀢𑀁 𑀢𑁂𑀲𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀢𑁆𑀢𑀁… 𑀅𑀧𑀭𑀺𑀪𑀼𑀢𑁆𑀢𑀁… 𑀧𑀭𑀺𑀳𑀻𑀦𑀁… 𑀅𑀧𑀭𑀺𑀳𑀻𑀦𑀁… 𑀯𑀺𑀭𑀤𑁆𑀥𑀁… 𑀅𑀯𑀺𑀭𑀤𑁆𑀥𑀁, 𑀬𑁂𑀲𑀁 𑀓𑀸𑀬𑀕𑀢𑀸𑀲𑀢𑀺 𑀆𑀭𑀤𑁆𑀥𑀸𑀢𑀺 (𑀅. 𑀦𑀺. 𑁧.𑁬𑁦𑁩) 𑀏𑀯𑀁 𑀪𑀕𑀯𑀢𑀸 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀧𑀲𑀁𑀲𑀺𑀢𑁆𑀯𑀸 ‘‘𑀓𑀣𑀁 𑀪𑀸𑀯𑀺𑀢𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀕𑀢𑀸𑀲𑀢𑀺 𑀓𑀣𑀁 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁧𑁫𑁪) 𑀦𑀬𑁂𑀦 𑀆𑀦𑀸𑀧𑀸𑀦𑀧𑀩𑁆𑀩𑀁, 𑀇𑀭𑀺𑀬𑀸𑀧𑀣𑀧𑀩𑁆𑀩𑀁, 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀁, 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀁, 𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀁, 𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀸𑀦𑀻𑀢𑀺 𑀇𑀫𑁂𑀲𑀁 𑀘𑀼𑀤𑁆𑀤𑀲𑀦𑁆𑀦𑀁 𑀧𑀩𑁆𑀩𑀸𑀦𑀁 𑀯𑀲𑁂𑀦 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀲𑁆𑀲 𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄 𑀅𑀦𑀼𑀧𑁆𑀧𑀢𑁆𑀢𑁄.

𑀢𑀢𑁆𑀣 𑀬𑀲𑁆𑀫𑀸 𑀇𑀭𑀺𑀬𑀸𑀧𑀣𑀧𑀩𑁆𑀩𑀁 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀁 𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀦𑀯 𑀲𑀺𑀯𑀣𑀺𑀓𑀧𑀩𑁆𑀩𑀸𑀦𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼𑀬𑁂𑀯 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀬𑀸𑀧𑀺 𑀘𑁂𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀲𑀫𑀸𑀥𑀺𑀪𑀸𑀯𑀦𑀸 𑀇𑀚𑁆𑀛𑁂𑀬𑁆𑀬, 𑀲𑀸 𑀅𑀲𑀼𑀪𑀦𑀺𑀤𑁆𑀤𑁂𑀲𑁂 𑀧𑀓𑀸𑀲𑀺𑀢𑀸𑀬𑁂𑀯. 𑀆𑀦𑀸𑀧𑀸𑀦𑀧𑀩𑁆𑀩𑀁 𑀧𑀦 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀜𑁆𑀘 𑀇𑀫𑀸𑀦𑁂𑀯𑁂𑀢𑁆𑀣 𑀤𑁆𑀯𑁂 𑀲𑀫𑀸𑀥𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀆𑀦𑀸𑀧𑀸𑀦𑀧𑀩𑁆𑀩𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀯𑀲𑁂𑀦 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯. 𑀬𑀁 𑀧𑀦𑁂𑀢𑀁 ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀘𑀧𑀭𑀺𑀬𑀦𑁆𑀢𑀁 𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸…𑀧𑁂… 𑀫𑀼𑀢𑁆𑀢’’𑀦𑁆𑀢𑀺 (𑀫. 𑀦𑀺. 𑁩.𑁧𑁫𑁪) 𑀏𑀯𑀁 𑀫𑀢𑁆𑀣𑀮𑀼𑀗𑁆𑀕𑀁 𑀅𑀝𑁆𑀞𑀺𑀫𑀺𑀜𑁆𑀚𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦 𑀤𑁂𑀲𑀺𑀢𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁, 𑀇𑀤𑀫𑀺𑀥 𑀓𑀸𑀬𑀕𑀢𑀸𑀲𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑀁.

𑁧𑁭𑁯. 𑀢𑀢𑁆𑀣𑀸𑀬𑀁 𑀧𑀸𑀴𑀺𑀯𑀡𑁆𑀡𑀦𑀸𑀧𑀼𑀩𑁆𑀩𑀗𑁆𑀕𑀫𑁄 𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄. 𑀇𑀫𑀫𑁂𑀯 𑀓𑀸𑀬𑀦𑁆𑀢𑀺 𑀇𑀫𑀁 𑀘𑀢𑀼𑀫𑀳𑀸𑀪𑀽𑀢𑀺𑀓𑀁 𑀧𑀽𑀢𑀺𑀓𑀸𑀬𑀁. 𑀉𑀤𑁆𑀥𑀁 𑀧𑀸𑀤𑀢𑀮𑀸𑀢𑀺 𑀧𑀸𑀤𑀢𑀮𑀢𑁄 𑀉𑀧𑀭𑀺. 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸𑀢𑀺 𑀓𑁂𑀲𑀕𑁆𑀕𑀢𑁄 𑀳𑁂𑀝𑁆𑀞𑀸. 𑀢𑀘𑀧𑀭𑀺𑀬𑀦𑁆𑀢𑀦𑁆𑀢𑀺 𑀢𑀺𑀭𑀺𑀬𑀁 𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀁. 𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀓𑁂𑀲𑀸𑀤𑀺𑀅𑀲𑀼𑀘𑀺𑀪𑀭𑀺𑀢𑁄 𑀅𑀬𑀁 𑀓𑀸𑀬𑁄𑀢𑀺 𑀧𑀲𑁆𑀲𑀢𑀺. 𑀓𑀣𑀁? 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸…𑀧𑁂… 𑀫𑀼𑀢𑁆𑀢𑀦𑁆𑀢𑀺.

𑀢𑀢𑁆𑀣 𑀅𑀢𑁆𑀣𑀻𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀇𑀫𑀲𑁆𑀫𑀺𑀦𑁆𑀢𑀺 𑀬𑁆𑀯𑀸𑀬𑀁 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀘𑀧𑀭𑀺𑀬𑀦𑁆𑀢𑁄 𑀧𑀽𑀭𑁄 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁. 𑀓𑀸𑀬𑁂𑀢𑀺 𑀲𑀭𑀻𑀭𑁂. 𑀲𑀭𑀻𑀭𑀁 𑀳𑀺 𑀅𑀲𑀼𑀘𑀺𑀲𑀜𑁆𑀘𑀬𑀢𑁄 𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀜𑁆𑀘𑁂𑀯 𑀘𑀓𑁆𑀔𑀼𑀭𑁄𑀕𑀸𑀤𑀻𑀦𑀜𑁆𑀘 𑀭𑁄𑀕𑀲𑀢𑀸𑀦𑀁 𑀆𑀬𑀪𑀽𑀢𑀢𑁄 𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀲𑀸 𑀮𑁄𑀫𑀸𑀢𑀺 𑀏𑀢𑁂 𑀓𑁂𑀲𑀸𑀤𑀬𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸. 𑀢𑀢𑁆𑀣 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸, 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀮𑁄𑀫𑀸𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀫𑀲𑁆𑀫𑀺𑀁 𑀳𑀺 𑀧𑀸𑀤𑀢𑀮𑀸 𑀧𑀝𑁆𑀞𑀸𑀬 𑀉𑀧𑀭𑀺, 𑀓𑁂𑀲𑀫𑀢𑁆𑀣𑀓𑀸 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀢𑀘𑀢𑁄 𑀧𑀝𑁆𑀞𑀸𑀬 𑀧𑀭𑀺𑀢𑁄𑀢𑀺 𑀏𑀢𑁆𑀢𑀓𑁂 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀯𑀺𑀘𑀺𑀦𑀦𑁆𑀢𑁄 𑀦 𑀓𑁄𑀘𑀺 𑀓𑀺𑀜𑁆𑀘𑀺 𑀫𑀼𑀢𑁆𑀢𑀁 𑀯𑀸 𑀫𑀡𑀺𑀁 𑀯𑀸 𑀯𑁂𑀴𑀼𑀭𑀺𑀬𑀁 𑀯𑀸 𑀅𑀕𑀭𑀼𑀁 𑀯𑀸 𑀓𑀼𑀗𑁆𑀓𑀼𑀫𑀁 𑀯𑀸 𑀓𑀧𑁆𑀧𑀽𑀭𑀁 𑀯𑀸 𑀯𑀸𑀲𑀘𑀼𑀡𑁆𑀡𑀸𑀤𑀺𑀁 𑀯𑀸 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀼𑀘𑀺𑀪𑀸𑀯𑀁 𑀧𑀲𑁆𑀲𑀢𑀺, 𑀅𑀣 𑀔𑁄 𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀁 𑀅𑀲𑀺𑀭𑀺𑀓𑀤𑀲𑁆𑀲𑀦𑀁 𑀦𑀸𑀦𑀧𑁆𑀧𑀓𑀸𑀭𑀁 𑀓𑁂𑀲𑀮𑁄𑀫𑀸𑀤𑀺𑀪𑁂𑀤𑀁 𑀅𑀲𑀼𑀘𑀺𑀁𑀬𑁂𑀯 𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸…𑀧𑁂… 𑀫𑀼𑀢𑁆𑀢’’𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑀢𑁄 𑀯𑀡𑁆𑀡𑀦𑀸.

𑁧𑁮𑁦. 𑀇𑀫𑀁 𑀧𑀦 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑀩𑁆𑀩𑀁. 𑀢𑁂𑀦𑀸𑀧𑀺𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁂𑀦 𑀲𑀢𑁆𑀢𑀥𑀸 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀤𑀲𑀥𑀸 𑀘 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀢𑀢𑁆𑀣 𑀯𑀘𑀲𑀸 𑀫𑀦𑀲𑀸 𑀯𑀡𑁆𑀡𑀢𑁄 𑀲𑀡𑁆𑀞𑀸𑀦𑀢𑁄 𑀤𑀺𑀲𑀢𑁄 𑀑𑀓𑀸𑀲𑀢𑁄 𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀏𑀯𑀁 𑀲𑀢𑁆𑀢𑀥𑀸 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁.

𑀇𑀫𑀲𑁆𑀫𑀺𑀁 𑀳𑀺 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑁂 𑀬𑁄𑀧𑀺 𑀢𑀺𑀧𑀺𑀝𑀓𑁄 𑀳𑁄𑀢𑀺, 𑀢𑁂𑀦𑀸𑀧𑀺 𑀫𑀦𑀲𑀺𑀓𑀸𑀭𑀓𑀸𑀮𑁂 𑀧𑀞𑀫𑀁 𑀯𑀸𑀘𑀸𑀬 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀏𑀓𑀘𑁆𑀘𑀲𑁆𑀲 𑀳𑀺 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀓𑀝𑀁 𑀳𑁄𑀢𑀺 𑀫𑀮𑀬𑀯𑀸𑀲𑀻 𑀫𑀳𑀸𑀤𑁂𑀯𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀤𑁆𑀯𑀺𑀦𑁆𑀦𑀁 𑀣𑁂𑀭𑀸𑀦𑀁 𑀯𑀺𑀬. 𑀣𑁂𑀭𑁄 𑀓𑀺𑀭 𑀢𑁂𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀺𑀢𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀇𑀫𑀁𑀬𑁂𑀯 𑀲𑀚𑁆𑀛𑀸𑀬𑀁 𑀓𑀭𑁄𑀣𑀸𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀧𑀸𑀴𑀺𑀁 𑀅𑀤𑀸𑀲𑀺. 𑀢𑁂 𑀓𑀺𑀜𑁆𑀘𑀸𑀧𑀺 𑀦𑁂𑀲𑀁 𑀤𑁆𑀯𑁂 𑀢𑀬𑁄 𑀦𑀺𑀓𑀸𑀬𑀸 𑀧𑀕𑀼𑀡𑀸, 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀢𑀸𑀬 𑀧𑀦 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀦𑁆𑀢𑀸𑀯 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁. 𑀢𑀲𑁆𑀫𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁂𑀦 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀢𑁆𑀢𑀩𑁆𑀩𑁄 ‘‘𑀧𑀞𑀫𑀁 𑀢𑀸𑀯 𑀯𑀸𑀘𑀸𑀬 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’’𑀢𑀺.

𑀓𑀭𑁄𑀦𑁆𑀢𑁂𑀦 𑀘 𑀢𑀘𑀧𑀜𑁆𑀘𑀓𑀸𑀤𑀻𑀦𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸 𑀢𑀘𑁄𑀢𑀺 𑀳𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀤𑀦𑀦𑁆𑀢𑀭𑀁 𑀯𑀓𑁆𑀓𑀧𑀜𑁆𑀘𑀓𑁂 𑀫𑀁𑀲𑀁 𑀦𑁆𑀳𑀸𑀭𑀼 𑀅𑀝𑁆𑀞𑀺 𑀅𑀝𑁆𑀞𑀺𑀫𑀺𑀜𑁆𑀚𑀁 𑀯𑀓𑁆𑀓𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 𑀯𑀓𑁆𑀓𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲𑀁, 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀢𑁄 𑀧𑀧𑁆𑀨𑀸𑀲𑀧𑀜𑁆𑀘𑀓𑁂 𑀳𑀤𑀬𑀁 𑀬𑀓𑀦𑀁 𑀓𑀺𑀮𑁄𑀫𑀓𑀁 𑀧𑀺𑀳𑀓𑀁 𑀧𑀧𑁆𑀨𑀸𑀲𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 𑀧𑀧𑁆𑀨𑀸𑀲𑀁 𑀧𑀺𑀳𑀓𑀁 𑀓𑀺𑀮𑁄𑀫𑀓𑀁 𑀬𑀓𑀦𑀁 𑀳𑀤𑀬𑀁, 𑀯𑀓𑁆𑀓𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲𑀁, 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀢𑁄 𑀫𑀢𑁆𑀣𑀮𑀼𑀗𑁆𑀕𑀧𑀜𑁆𑀘𑀓𑁂 𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 𑀉𑀤𑀭𑀺𑀬𑀁 𑀓𑀭𑀻𑀲𑀁 𑀫𑀢𑁆𑀣𑀮𑀼𑀗𑁆𑀕𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 𑀫𑀢𑁆𑀣𑀮𑀼𑀗𑁆𑀕𑀁 𑀓𑀭𑀻𑀲𑀁 𑀉𑀤𑀭𑀺𑀬𑀁 𑀅𑀦𑁆𑀢𑀕𑀼𑀡𑀁 𑀅𑀦𑁆𑀢𑀁, 𑀧𑀧𑁆𑀨𑀸𑀲𑀁 𑀧𑀺𑀳𑀓𑀁 𑀓𑀺𑀮𑁄𑀫𑀓𑀁 𑀬𑀓𑀦𑀁 𑀳𑀤𑀬𑀁, 𑀯𑀓𑁆𑀓𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲𑀁, 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀢𑁄 𑀫𑁂𑀤𑀙𑀓𑁆𑀓𑁂 𑀧𑀺𑀢𑁆𑀢𑀁 𑀲𑁂𑀫𑁆𑀳𑀁 𑀧𑀼𑀩𑁆𑀩𑁄 𑀮𑁄𑀳𑀺𑀢𑀁 𑀲𑁂𑀤𑁄 𑀫𑁂𑀤𑁄𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 𑀫𑁂𑀤𑁄 𑀲𑁂𑀤𑁄 𑀮𑁄𑀳𑀺𑀢𑀁 𑀧𑀼𑀩𑁆𑀩𑁄 𑀲𑁂𑀫𑁆𑀳𑀁 𑀧𑀺𑀢𑁆𑀢𑀁, 𑀫𑀢𑁆𑀣𑀮𑀼𑀗𑁆𑀕𑀁 𑀓𑀭𑀻𑀲𑀁 𑀉𑀤𑀭𑀺𑀬𑀁 𑀅𑀦𑁆𑀢𑀕𑀼𑀡𑀁 𑀅𑀦𑁆𑀢𑀁, 𑀧𑀧𑁆𑀨𑀸𑀲𑀁 𑀧𑀺𑀳𑀓𑀁 𑀓𑀺𑀮𑁄𑀫𑀓𑀁 𑀬𑀓𑀦𑀁 𑀳𑀤𑀬𑀁, 𑀯𑀓𑁆𑀓𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲𑀁, 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀢𑁄 𑀫𑀼𑀢𑁆𑀢𑀙𑀓𑁆𑀓𑁂 𑀅𑀲𑁆𑀲𑀼 𑀯𑀲𑀸 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸 𑀮𑀲𑀺𑀓𑀸 𑀫𑀼𑀢𑁆𑀢𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 𑀫𑀼𑀢𑁆𑀢𑀁 𑀮𑀲𑀺𑀓𑀸 𑀲𑀺𑀗𑁆𑀖𑀸𑀡𑀺𑀓𑀸 𑀔𑁂𑀴𑁄 𑀯𑀲𑀸 𑀅𑀲𑁆𑀲𑀼, 𑀫𑁂𑀤𑁄 𑀲𑁂𑀤𑁄 𑀮𑁄𑀳𑀺𑀢𑀁 𑀧𑀼𑀩𑁆𑀩𑁄 𑀲𑁂𑀫𑁆𑀳𑀁 𑀧𑀺𑀢𑁆𑀢𑀁, 𑀫𑀢𑁆𑀣𑀮𑀼𑀗𑁆𑀕𑀁 𑀓𑀭𑀻𑀲𑀁 𑀉𑀤𑀭𑀺𑀬𑀁 𑀅𑀦𑁆𑀢𑀕𑀼𑀡𑀁 𑀅𑀦𑁆𑀢𑀁, 𑀧𑀧𑁆𑀨𑀸𑀲𑀁 𑀧𑀺𑀳𑀓𑀁 𑀓𑀺𑀮𑁄𑀫𑀓𑀁 𑀬𑀓𑀦𑀁 𑀳𑀤𑀬𑀁, 𑀯𑀓𑁆𑀓𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲𑀁, 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸𑀢𑀺 𑀯𑀢𑁆𑀢𑀩𑁆𑀩𑀁.

𑀏𑀯𑀁 𑀓𑀸𑀮𑀲𑀢𑀁 𑀓𑀸𑀮𑀲𑀳𑀲𑁆𑀲𑀁 𑀓𑀸𑀮𑀲𑀢𑀲𑀳𑀲𑁆𑀲𑀫𑁆𑀧𑀺 𑀯𑀸𑀘𑀸𑀬 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀯𑀘𑀲𑀸 𑀲𑀚𑁆𑀛𑀸𑀬𑁂𑀦 𑀳𑀺 𑀓𑀫𑁆𑀫𑀝𑁆𑀞𑀸𑀦𑀢𑀦𑁆𑀢𑀺 𑀧𑀕𑀼𑀡𑀸 𑀳𑁄𑀢𑀺, 𑀦 𑀇𑀢𑁄 𑀘𑀺𑀢𑁄 𑀘 𑀘𑀺𑀢𑁆𑀢𑀁 𑀯𑀺𑀥𑀸𑀯𑀢𑀺. 𑀓𑁄𑀝𑁆𑀞𑀸𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀳𑀢𑁆𑀣𑀲𑀗𑁆𑀔𑀮𑀺𑀓𑀸 𑀯𑀺𑀬 𑀯𑀢𑀺𑀧𑀸𑀤𑀧𑀦𑁆𑀢𑀺 𑀯𑀺𑀬 𑀘 𑀔𑀸𑀬𑀦𑁆𑀢𑀺.

𑀬𑀣𑀸 𑀧𑀦 𑀯𑀘𑀲𑀸, 𑀢𑀣𑁂𑀯 𑀫𑀦𑀲𑀸𑀧𑀺 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀯𑀘𑀲𑀸 𑀲𑀚𑁆𑀛𑀸𑀬𑁄 𑀳𑀺 𑀫𑀦𑀲𑀸 𑀲𑀚𑁆𑀛𑀸𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀫𑀦𑀲𑀸 𑀲𑀚𑁆𑀛𑀸𑀬𑁄 𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

𑀯𑀡𑁆𑀡𑀢𑁄𑀢𑀺 𑀓𑁂𑀲𑀸𑀤𑀻𑀦𑀁 𑀯𑀡𑁆𑀡𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑁄.

𑀲𑀡𑁆𑀞𑀸𑀦𑀢𑁄𑀢𑀺 𑀢𑁂𑀲𑀜𑁆𑀜𑁂𑀯 𑀲𑀡𑁆𑀞𑀸𑀦𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁.

𑀤𑀺𑀲𑀢𑁄𑀢𑀺 𑀇𑀫𑀲𑁆𑀫𑀺𑀁 𑀳𑀺 𑀲𑀭𑀻𑀭𑁂 𑀦𑀸𑀪𑀺𑀢𑁄 𑀉𑀤𑁆𑀥𑀁 𑀉𑀧𑀭𑀺𑀫𑀤𑀺𑀲𑀸, 𑀅𑀥𑁄 𑀳𑁂𑀝𑁆𑀞𑀺𑀫𑀤𑀺𑀲𑀸, 𑀢𑀲𑁆𑀫𑀸 𑀅𑀬𑀁 𑀓𑁄𑀝𑁆𑀞𑀸𑀲𑁄 𑀇𑀫𑀺𑀲𑁆𑀲𑀸 𑀦𑀸𑀫 𑀤𑀺𑀲𑀸𑀬𑀸𑀢𑀺 𑀤𑀺𑀲𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀑𑀓𑀸𑀲𑀢𑁄𑀢𑀺 𑀅𑀬𑀁 𑀓𑁄𑀝𑁆𑀞𑀸𑀲𑁄 𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀑𑀓𑀸𑀲𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑁄.

𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄𑀢𑀺 𑀤𑁆𑀯𑁂 𑀧𑀭𑀺𑀘𑁆𑀙𑁂𑀤𑀸. 𑀢𑀢𑁆𑀣 𑀅𑀬𑀁 𑀓𑁄𑀝𑁆𑀞𑀸𑀲𑁄 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀢𑀺𑀭𑀺𑀬𑀜𑁆𑀘 𑀇𑀫𑀺𑀦𑀸 𑀦𑀸𑀫 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀏𑀯𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀲𑀸 𑀦 𑀮𑁄𑀫𑀸, 𑀮𑁄𑀫𑀸𑀧𑀺 𑀦 𑀓𑁂𑀲𑀸𑀢𑀺 𑀏𑀯𑀁 𑀅𑀫𑀺𑀲𑁆𑀲𑀓𑀢𑀸𑀯𑀲𑁂𑀦 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀲𑀢𑁆𑀢𑀥𑀸 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀦𑁆𑀢𑁂𑀦 𑀧𑀦 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀲𑀼𑀓𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀓𑀣𑀺𑀢𑀁, 𑀅𑀲𑀼𑀓𑀲𑁆𑀫𑀺𑀁 𑀥𑀸𑀢𑀼𑀯𑀲𑁂𑀦𑀸𑀢𑀺 𑀜𑀢𑁆𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 (𑀤𑀻. 𑀦𑀺. 𑁨.𑁩𑁭𑁭) 𑀧𑀝𑀺𑀓𑁆𑀓𑀽𑀮𑀯𑀲𑁂𑀦𑁂𑀯 𑀓𑀣𑀺𑀢𑀁. 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫(𑀫. 𑀦𑀺. 𑁧.𑁩𑁦𑁦 𑀆𑀤𑀬𑁄) 𑀫𑀳𑀸𑀭𑀸𑀳𑀼𑀮𑁄𑀯𑀸𑀤(𑀫. 𑀦𑀺. 𑁨.𑁧𑁧𑁩 𑀆𑀤𑀬𑁄) 𑀥𑀸𑀢𑀼𑀯𑀺𑀪𑀗𑁆𑀕𑁂𑀲𑀼(𑀫. 𑀦𑀺. 𑁩.𑁩𑁪𑁨 𑀆𑀤𑀬𑁄) 𑀥𑀸𑀢𑀼𑀯𑀲𑁂𑀦 𑀓𑀣𑀺𑀢𑀁. 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁫𑁩) 𑀧𑀦 𑀬𑀲𑁆𑀲 𑀯𑀡𑁆𑀡𑀢𑁄 𑀉𑀧𑀝𑁆𑀞𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀢𑀢𑁆𑀣 𑀥𑀸𑀢𑀼𑀯𑀲𑁂𑀦 𑀓𑀣𑀺𑀢𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀳𑁄𑀢𑀺. 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀓𑀣𑀺𑀢𑀁 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀁. 𑀢𑀤𑁂𑀢𑀁 𑀇𑀥 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀫𑁂𑀯𑀸𑀢𑀺.

𑁧𑁮𑁧. 𑀏𑀯𑀁 𑀲𑀢𑁆𑀢𑀥𑀸 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀢𑁄, 𑀦𑀸𑀢𑀺𑀲𑀻𑀖𑀢𑁄, 𑀦𑀸𑀢𑀺𑀲𑀡𑀺𑀓𑀢𑁄, 𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀦𑀢𑁄, 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀢𑁄, 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄, 𑀅𑀧𑁆𑀧𑀦𑀸𑀢𑁄, 𑀢𑀬𑁄 𑀘 𑀲𑀼𑀢𑁆𑀢𑀦𑁆𑀢𑀸𑀢𑀺 𑀏𑀯𑀁 𑀤𑀲𑀥𑀸 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑀢𑁄𑀢𑀺 𑀇𑀤𑀜𑁆𑀳𑀺 𑀲𑀚𑁆𑀛𑀸𑀬𑀓𑀭𑀡𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀦 𑀏𑀓𑀦𑁆𑀢𑀭𑀺𑀓𑀸𑀬. 𑀏𑀓𑀦𑁆𑀢𑀭𑀺𑀓𑀸𑀬 𑀳𑀺 𑀫𑀦𑀲𑀺𑀓𑀭𑁄𑀦𑁆𑀢𑁄 𑀬𑀣𑀸 𑀦𑀸𑀫 𑀅𑀓𑀼𑀲𑀮𑁄 𑀧𑀼𑀭𑀺𑀲𑁄 𑀤𑁆𑀯𑀢𑁆𑀢𑀺𑀁𑀲𑀧𑀤𑀁 𑀦𑀺𑀲𑁆𑀲𑁂𑀡𑀺𑀁 𑀏𑀓𑀦𑁆𑀢𑀭𑀺𑀓𑀸𑀬 𑀆𑀭𑁄𑀳𑀦𑁆𑀢𑁄 𑀓𑀺𑀮𑀦𑁆𑀢𑀓𑀸𑀬𑁄 𑀧𑀢𑀢𑀺, 𑀦 𑀆𑀭𑁄𑀳𑀦𑀁 𑀲𑀫𑁆𑀧𑀸𑀤𑁂𑀢𑀺, 𑀏𑀯𑀫𑁂𑀯 𑀪𑀸𑀯𑀦𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀅𑀲𑁆𑀲𑀸𑀤𑀲𑁆𑀲 𑀅𑀦𑀥𑀺𑀕𑀫𑀸 𑀓𑀺𑀮𑀦𑁆𑀢𑀘𑀺𑀢𑁆𑀢𑁄 𑀧𑀢𑀢𑀺, 𑀦 𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀢𑀺.

𑀅𑀦𑀼𑀧𑀼𑀩𑁆𑀩𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁂𑀦𑀸𑀧𑀺 𑀘 𑀦𑀸𑀢𑀺𑀲𑀻𑀖𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀅𑀢𑀺𑀲𑀻𑀖𑀢𑁄 𑀫𑀦𑀲𑀺𑀓𑀭𑁄𑀢𑁄 𑀳𑀺 𑀬𑀣𑀸 𑀦𑀸𑀫 𑀢𑀺𑀬𑁄𑀚𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀑𑀓𑁆𑀓𑀫𑀦𑀯𑀺𑀲𑁆𑀲𑀚𑁆𑀚𑀦𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀻𑀖𑁂𑀦 𑀚𑀯𑁂𑀦 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀕𑀫𑀦𑀸𑀕𑀫𑀦𑀁 𑀓𑀭𑁄𑀢𑁄 𑀧𑀼𑀭𑀺𑀲𑀲𑁆𑀲 𑀓𑀺𑀜𑁆𑀘𑀸𑀧𑀺 𑀅𑀤𑁆𑀥𑀸𑀦𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀅𑀣 𑀔𑁄 𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀫𑁂𑀯 𑀓𑁂𑀯𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀅𑀯𑀺𑀪𑀽𑀢𑀁 𑀧𑀦 𑀳𑁄𑀢𑀺, 𑀦 𑀯𑀺𑀲𑁂𑀲𑀁 𑀆𑀯𑀳𑀢𑀺, 𑀢𑀲𑁆𑀫𑀸 𑀦𑀸𑀢𑀺𑀲𑀻𑀖𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁.

𑀬𑀣𑀸 𑀘 𑀦𑀸𑀢𑀺𑀲𑀻𑀖𑀢𑁄, 𑀏𑀯𑀁 𑀦𑀸𑀢𑀺𑀲𑀡𑀺𑀓𑀢𑁄𑀧𑀺. 𑀅𑀢𑀺𑀲𑀡𑀺𑀓𑀢𑁄 𑀫𑀦𑀲𑀺𑀓𑀭𑁄𑀢𑁄 𑀳𑀺 𑀬𑀣𑀸 𑀦𑀸𑀫 𑀢𑀤𑀳𑁂𑀯 𑀢𑀺𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑀼𑀓𑀸𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀭𑀼𑀓𑁆𑀔𑀧𑀩𑁆𑀩𑀢𑀢𑀴𑀸𑀓𑀸𑀤𑀻𑀲𑀼 𑀯𑀺𑀮𑀫𑁆𑀩𑀫𑀸𑀦𑀲𑁆𑀲 𑀫𑀕𑁆𑀕𑁄 𑀧𑀭𑀺𑀓𑁆𑀔𑀬𑀁 𑀦 𑀕𑀘𑁆𑀙𑀢𑀺, 𑀤𑁆𑀯𑀻𑀳𑀢𑀻𑀳𑁂𑀦 𑀧𑀭𑀺𑀬𑁄𑀲𑀸𑀧𑁂𑀢𑀩𑁆𑀩𑁄 𑀳𑁄𑀢𑀺, 𑀏𑀯𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀦 𑀕𑀘𑁆𑀙𑀢𑀺, 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺.

𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀦𑀢𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 𑀧𑀝𑀺𑀩𑀸𑀳𑀺𑀢𑀩𑁆𑀩𑁄. 𑀅𑀧𑁆𑀧𑀝𑀺𑀩𑀸𑀳𑀢𑁄 𑀳𑀺 𑀬𑀣𑀸 𑀦𑀸𑀫 𑀏𑀓𑀧𑀤𑀺𑀓𑀁 𑀧𑀧𑀸𑀢𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀓𑁆𑀓𑀫𑀦𑀧𑀤𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑀬𑀢𑁄 𑀧𑀤𑀯𑀸𑀭𑁄 𑀯𑀺𑀭𑀚𑁆𑀛𑀢𑀺, 𑀢𑀢𑁄 𑀲𑀢𑀧𑁄𑀭𑀺𑀲𑁂 𑀧𑀧𑀸𑀢𑁂 𑀧𑀢𑀺𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀫𑁂𑀯 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑁂 𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀳𑀸𑀬𑀢𑀺 𑀧𑀭𑀺𑀥𑀁𑀲𑀢𑀺. 𑀢𑀲𑁆𑀫𑀸 𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀦𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁.

𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀢𑁄𑀢𑀺 𑀬𑀸𑀬𑀁 𑀓𑁂𑀲𑀸 𑀮𑁄𑀫𑀸𑀢𑀺𑀆𑀤𑀺𑀓𑀸 𑀧𑀡𑁆𑀡𑀢𑁆𑀢𑀺, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀦𑁆𑀢𑀺 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁. 𑀬𑀣𑀸 𑀳𑀺 𑀉𑀤𑀓𑀤𑀼𑀮𑁆𑀮𑀪𑀓𑀸𑀮𑁂 𑀫𑀦𑀼𑀲𑁆𑀲𑀸 𑀅𑀭𑀜𑁆𑀜𑁂 𑀉𑀤𑀧𑀸𑀦𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀢𑀸𑀮𑀧𑀡𑁆𑀡𑀸𑀤𑀺𑀓𑀁 𑀓𑀺𑀜𑁆𑀘𑀺𑀤𑁂𑀯 𑀲𑀜𑁆𑀜𑀸𑀡𑀁 𑀩𑀦𑁆𑀥𑀺𑀢𑁆𑀯𑀸 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀆𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀦𑁆𑀢𑀺 𑀘𑁂𑀯 𑀧𑀺𑀯𑀦𑁆𑀢𑀺 𑀘. 𑀬𑀤𑀸 𑀧𑀦 𑀦𑁂𑀲𑀁 𑀅𑀪𑀺𑀡𑁆𑀳𑀲𑀜𑁆𑀘𑀸𑀭𑁂𑀦 𑀆𑀕𑀢𑀸𑀕𑀢𑀧𑀤𑀁 𑀧𑀸𑀓𑀝𑀁 𑀳𑁄𑀢𑀺, 𑀢𑀤𑀸 𑀲𑀜𑁆𑀜𑀸𑀡𑁂𑀦 𑀓𑀺𑀘𑁆𑀘𑀁 𑀦 𑀳𑁄𑀢𑀺, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀦𑁆𑀢𑀺 𑀘𑁂𑀯 𑀧𑀺𑀯𑀦𑁆𑀢𑀺 𑀘, 𑀏𑀯𑀫𑁂𑀯 𑀧𑀼𑀩𑁆𑀩𑀪𑀸𑀕𑁂 𑀓𑁂𑀲𑀸 𑀮𑁄𑀫𑀸𑀢𑀺𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀫𑀦𑀲𑀺𑀓𑀭𑁄𑀢𑁄 𑀧𑀝𑀺𑀓𑁆𑀓𑀽𑀮𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀺. 𑀅𑀣 𑀓𑁂𑀲𑀸 𑀮𑁄𑀫𑀸𑀢𑀺𑀧𑀡𑁆𑀡𑀢𑁆𑀢𑀺𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀪𑀸𑀯𑁂𑀬𑁂𑀯 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁.

𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄𑀢𑀺 𑀬𑁄 𑀬𑁄 𑀓𑁄𑀝𑁆𑀞𑀸𑀲𑁄 𑀦 𑀉𑀧𑀝𑁆𑀞𑀸𑀢𑀺, 𑀢𑀁 𑀢𑀁 𑀫𑀼𑀜𑁆𑀘𑀦𑁆𑀢𑁂𑀦 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀳𑀺 𑀓𑁂𑀲𑀸𑀢𑀺 𑀫𑀦𑀲𑀺𑀓𑀭𑁄𑀢𑁄 𑀫𑀦𑀲𑀺𑀓𑀸𑀭𑁄 𑀕𑀦𑁆𑀢𑁆𑀯𑀸 𑀫𑀼𑀢𑁆𑀢𑀦𑁆𑀢𑀺 𑀇𑀫𑀁 𑀧𑀭𑀺𑀬𑁄𑀲𑀸𑀦𑀓𑁄𑀝𑁆𑀞𑀸𑀲𑀫𑁂𑀯 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀫𑀼𑀢𑁆𑀢𑀦𑁆𑀢𑀺 𑀘 𑀫𑀦𑀲𑀺𑀓𑀭𑁄𑀢𑁄 𑀫𑀦𑀲𑀺𑀓𑀸𑀭𑁄 𑀕𑀦𑁆𑀢𑁆𑀯𑀸 𑀓𑁂𑀲𑀸𑀢𑀺 𑀇𑀫𑀁 𑀆𑀤𑀺𑀓𑁄𑀝𑁆𑀞𑀸𑀲𑀫𑁂𑀯 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀅𑀣𑀲𑁆𑀲 𑀫𑀦𑀲𑀺𑀓𑀭𑁄𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑁂𑀘𑀺 𑀓𑁄𑀝𑁆𑀞𑀸𑀲𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀓𑁂𑀘𑀺 𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀬𑁂 𑀬𑁂 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂𑀲𑀼 𑀢𑁂𑀲𑀼 𑀢𑀸𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀬𑀸𑀯 𑀤𑁆𑀯𑀻𑀲𑀼 𑀉𑀧𑀝𑁆𑀞𑀺𑀢𑁂𑀲𑀼 𑀢𑁂𑀲𑀫𑁆𑀧𑀺 𑀏𑀓𑁄 𑀲𑀼𑀝𑁆𑀞𑀼𑀢𑀭𑀁 𑀉𑀧𑀝𑁆𑀞𑀳𑀢𑀺, 𑀏𑀯𑀁 𑀉𑀧𑀝𑁆𑀞𑀺𑀢𑀁 𑀧𑀦 𑀢𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀅𑀧𑁆𑀧𑀦𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀬𑀣𑀸 𑀳𑀺 𑀤𑁆𑀯𑀢𑁆𑀢𑀺𑀁𑀲𑀢𑀸𑀮𑀓𑁂 𑀢𑀸𑀮𑀯𑀦𑁂 𑀯𑀲𑀦𑁆𑀢𑀁 𑀫𑀓𑁆𑀓𑀝𑀁 𑀕𑀳𑁂𑀢𑀼𑀓𑀸𑀫𑁄 𑀮𑀼𑀤𑁆𑀤𑁄 𑀆𑀤𑀺𑀫𑁆𑀳𑀺 𑀞𑀺𑀢𑀢𑀸𑀮𑀲𑁆𑀲 𑀧𑀡𑁆𑀡𑀁 𑀲𑀭𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁂𑀬𑁆𑀬, 𑀅𑀣 𑀔𑁄 𑀲𑁄 𑀫𑀓𑁆𑀓𑀝𑁄 𑀧𑀝𑀺𑀧𑀸𑀝𑀺𑀬𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀢𑀸𑀮𑁂 𑀧𑀢𑀺𑀢𑁆𑀯𑀸 𑀧𑀭𑀺𑀬𑀦𑁆𑀢𑀢𑀸𑀮𑀫𑁂𑀯 𑀕𑀘𑁆𑀙𑁂𑀬𑁆𑀬, 𑀢𑀢𑁆𑀣𑀧𑀺 𑀕𑀦𑁆𑀢𑁆𑀯𑀸 𑀮𑀼𑀤𑁆𑀤𑁂𑀦 𑀢𑀣𑁂𑀯 𑀓𑀢𑁂 𑀧𑀼𑀦 𑀢𑁂𑀦𑁂𑀯 𑀦𑀬𑁂𑀦 𑀆𑀤𑀺𑀢𑀸𑀮𑀁 𑀆𑀕𑀘𑁆𑀙𑁂𑀬𑁆𑀬, 𑀲𑁄 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀧𑀸𑀢𑀺𑀬𑀫𑀸𑀦𑁄 𑀉𑀓𑁆𑀓𑀼𑀝𑁆𑀞𑀼𑀓𑁆𑀓𑀼𑀝𑁆𑀞𑀺𑀝𑁆𑀞𑀸𑀦𑁂𑀬𑁂𑀯 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀏𑀓𑀲𑁆𑀫𑀺𑀁 𑀢𑀸𑀮𑁂 𑀦𑀺𑀧𑀢𑀺𑀢𑁆𑀯𑀸 𑀢𑀲𑁆𑀲 𑀯𑁂𑀫𑀚𑁆𑀛𑁂 𑀫𑀓𑀼𑀴𑀢𑀸𑀮𑀧𑀡𑁆𑀡𑀲𑀽𑀘𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀯𑀺𑀚𑁆𑀛𑀺𑀬𑀫𑀸𑀦𑁄𑀧𑀺 𑀦 𑀉𑀝𑁆𑀞𑀳𑁂𑀬𑁆𑀬, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀬𑀣𑀸 𑀳𑀺 𑀢𑀸𑀮𑀯𑀦𑁂 𑀤𑁆𑀯𑀢𑁆𑀢𑀺𑀁𑀲𑀢𑀸𑀮𑀸, 𑀏𑀯𑀁 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀤𑁆𑀯𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑀸. 𑀫𑀓𑁆𑀓𑀝𑁄 𑀯𑀺𑀬 𑀘𑀺𑀢𑁆𑀢𑀁. 𑀮𑀼𑀤𑁆𑀤𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄. 𑀫𑀓𑁆𑀓𑀝𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀢𑀸𑀮𑀓𑁂 𑀢𑀸𑀮𑀯𑀦𑁂 𑀦𑀺𑀯𑀸𑀲𑁄 𑀯𑀺𑀬 𑀬𑁄𑀕𑀺𑀦𑁄 𑀘𑀺𑀢𑁆𑀢𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑀓𑁂 𑀓𑀸𑀬𑁂 𑀆𑀭𑀫𑁆𑀫𑀡𑀯𑀲𑁂𑀦 𑀅𑀦𑀼𑀲𑀜𑁆𑀘𑀭𑀡𑀁. 𑀮𑀼𑀤𑁆𑀤𑁂𑀦 𑀆𑀤𑀺𑀫𑁆𑀳𑀺 𑀞𑀺𑀢𑀢𑀸𑀮𑀲𑁆𑀲 𑀧𑀡𑁆𑀡𑀁 𑀲𑀭𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀬𑀸 𑀓𑀢𑀸𑀬 𑀫𑀓𑁆𑀓𑀝𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀢𑀸𑀮𑁂 𑀧𑀢𑀺𑀢𑁆𑀯𑀸 𑀧𑀭𑀺𑀬𑀦𑁆𑀢𑀢𑀸𑀮𑀕𑀫𑀦𑀁 𑀯𑀺𑀬 𑀬𑁄𑀕𑀺𑀦𑁄 𑀓𑁂𑀲𑀸𑀢𑀺 𑀫𑀦𑀲𑀺𑀓𑀸𑀭𑁂 𑀆𑀭𑀤𑁆𑀥𑁂 𑀧𑀝𑀺𑀧𑀸𑀝𑀺𑀬𑀸 𑀕𑀦𑁆𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀓𑁄𑀝𑁆𑀞𑀸𑀲𑁂𑀬𑁂𑀯 𑀘𑀺𑀢𑁆𑀢𑀲𑁆𑀲 𑀲𑀡𑁆𑀞𑀸𑀦𑀁. 𑀧𑀼𑀦 𑀧𑀘𑁆𑀘𑀸𑀕𑀫𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀧𑀸𑀢𑀺𑀬𑀫𑀸𑀦𑀲𑁆𑀲 𑀫𑀓𑁆𑀓𑀝𑀲𑁆𑀲 𑀉𑀓𑁆𑀓𑀼𑀝𑁆𑀞𑀼𑀓𑁆𑀓𑀼𑀝𑁆𑀞𑀺𑀝𑁆𑀞𑀸𑀦𑁂 𑀉𑀝𑁆𑀞𑀸𑀦𑀁 𑀯𑀺𑀬 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀢𑁄 𑀓𑁂𑀲𑀼𑀘𑀺 𑀓𑁂𑀲𑀼𑀘𑀺 𑀉𑀧𑀝𑁆𑀞𑀺𑀢𑁂𑀲𑀼 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀧𑀝𑁆𑀞𑀺𑀢𑁂𑀲𑀼 𑀧𑀭𑀺𑀓𑀫𑁆𑀫𑀓𑀭𑀡𑀁. 𑀅𑀦𑀼𑀓𑁆𑀓𑀫𑁂𑀦 𑀏𑀓𑀲𑁆𑀫𑀺𑀁 𑀢𑀸𑀮𑁂 𑀦𑀺𑀧𑀢𑀺𑀢𑁆𑀯𑀸 𑀢𑀲𑁆𑀲 𑀫𑀚𑁆𑀛𑁂 𑀫𑀓𑀼𑀴𑀢𑀸𑀮𑀧𑀡𑁆𑀡𑀲𑀽𑀘𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀯𑀺𑀚𑁆𑀛𑀺𑀬𑀫𑀸𑀦𑀲𑁆𑀲𑀧𑀺 𑀅𑀦𑀼𑀝𑁆𑀞𑀸𑀦𑀁 𑀯𑀺𑀬 𑀅𑀯𑀲𑀸𑀦𑁂 𑀤𑁆𑀯𑀻𑀲𑀼 𑀉𑀧𑀝𑁆𑀞𑀺𑀢𑁂𑀲𑀼 𑀬𑁄 𑀲𑀼𑀝𑁆𑀞𑀼𑀢𑀭𑀁 𑀉𑀧𑀝𑁆𑀞𑀸𑀢𑀺, 𑀢𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀧𑁆𑀧𑀦𑀸𑀬 𑀉𑀧𑁆𑀧𑀸𑀤𑀦𑀁.

𑀅𑀧𑀭𑀸𑀧𑀺 𑀉𑀧𑀫𑀸 𑁋 𑀬𑀣𑀸 𑀦𑀸𑀫 𑀧𑀺𑀡𑁆𑀟𑀧𑀸𑀢𑀺𑀓𑁄 𑀪𑀺𑀓𑁆𑀔𑀼 𑀤𑁆𑀯𑀢𑁆𑀢𑀺𑀁𑀲𑀓𑀼𑀮𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀧𑀞𑀫𑀕𑁂𑀳𑁂𑀬𑁂𑀯 𑀤𑁆𑀯𑁂 𑀪𑀺𑀓𑁆𑀔𑀸 𑀮𑀪𑀺𑀢𑁆𑀯𑀸 𑀧𑀭𑀢𑁄 𑀏𑀓𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬. 𑀧𑀼𑀦𑀤𑀺𑀯𑀲𑁂 𑀢𑀺𑀲𑁆𑀲𑁄 𑀮𑀪𑀺𑀢𑁆𑀯𑀸 𑀧𑀭𑀢𑁄 𑀤𑁆𑀯𑁂 𑀯𑀺𑀲𑁆𑀲𑀚𑁆𑀚𑁂𑀬𑁆𑀬. 𑀢𑀢𑀺𑀬𑀤𑀺𑀯𑀲𑁂 𑀆𑀤𑀺𑀫𑁆𑀳𑀺𑀬𑁂𑀯 𑀧𑀢𑁆𑀢𑀧𑀽𑀭𑀁 𑀮𑀪𑀺𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀢𑁆𑀢𑀺𑀁𑀲𑀓𑀼𑀮𑀕𑀸𑀫𑁄 𑀯𑀺𑀬 𑀳𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁄. 𑀧𑀺𑀡𑁆𑀟𑀧𑀸𑀢𑀺𑀓𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄. 𑀢𑀲𑁆𑀲 𑀢𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀸𑀲𑁄 𑀯𑀺𑀬 𑀬𑁄𑀕𑀺𑀦𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀧𑀭𑀺𑀓𑀫𑁆𑀫𑀓𑀭𑀡𑀁. 𑀧𑀞𑀫𑀕𑁂𑀳𑁂 𑀤𑁆𑀯𑁂 𑀪𑀺𑀓𑁆𑀔𑀸 𑀮𑀪𑀺𑀢𑁆𑀯𑀸 𑀧𑀭𑀢𑁄 𑀏𑀓𑀺𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 𑀤𑀼𑀢𑀺𑀬𑀤𑀺𑀯𑀲𑁂 𑀢𑀺𑀲𑁆𑀲𑁄 𑀮𑀪𑀺𑀢𑁆𑀯𑀸 𑀧𑀭𑀢𑁄 𑀤𑁆𑀯𑀺𑀦𑁆𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 𑀘 𑀫𑀦𑀲𑀺𑀓𑀭𑁄𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀧𑀝𑁆𑀞𑀺𑀢𑁂𑀲𑀼 𑀬𑀸𑀯 𑀓𑁄𑀝𑁆𑀞𑀸𑀲𑀤𑁆𑀯𑀬𑁂 𑀧𑀭𑀺𑀓𑀫𑁆𑀫𑀓𑀭𑀡𑀁. 𑀢𑀢𑀺𑀬𑀤𑀺𑀯𑀲𑁂 𑀆𑀤𑀺𑀫𑁆𑀳𑀺𑀬𑁂𑀯 𑀧𑀢𑁆𑀢𑀧𑀽𑀭𑀁 𑀮𑀪𑀺𑀢𑁆𑀯𑀸 𑀆𑀲𑀦𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀪𑁄𑀕𑁄 𑀯𑀺𑀬 𑀤𑁆𑀯𑀻𑀲𑀼 𑀬𑁄 𑀲𑀼𑀝𑁆𑀞𑀼𑀢𑀭𑀁 𑀉𑀧𑀝𑁆𑀞𑀸𑀢𑀺, 𑀢𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀧𑁆𑀧𑀦𑀸𑀬 𑀉𑀧𑁆𑀧𑀸𑀤𑀦𑀁.

𑀅𑀧𑁆𑀧𑀦𑀸𑀢𑁄𑀢𑀺 𑀅𑀧𑁆𑀧𑀦𑀸𑀓𑁄𑀝𑁆𑀞𑀸𑀲𑀢𑁄 𑀓𑁂𑀲𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀅𑀧𑁆𑀧𑀦𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀢𑀬𑁄 𑀘 𑀲𑀼𑀢𑁆𑀢𑀦𑁆𑀢𑀸𑀢𑀺 𑀅𑀥𑀺𑀘𑀺𑀢𑁆𑀢𑀁, 𑀲𑀻𑀢𑀺𑀪𑀸𑀯𑁄, 𑀩𑁄𑀚𑁆𑀛𑀗𑁆𑀕𑀓𑁄𑀲𑀮𑁆𑀮𑀦𑁆𑀢𑀺 𑀇𑀫𑁂 𑀢𑀬𑁄 𑀲𑀼𑀢𑁆𑀢𑀦𑁆𑀢𑀸 𑀯𑀻𑀭𑀺𑀬𑀲𑀫𑀸𑀥𑀺𑀬𑁄𑀚𑀦𑀢𑁆𑀣𑀁 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑁋

‘‘𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀸𑀮𑁂𑀦𑀓𑀸𑀮𑀁 𑀫𑀦𑀲𑀺𑀓𑀸𑀢𑀩𑁆𑀩𑀸𑀦𑀺. 𑀓𑀸𑀮𑁂𑀦𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀓𑀸𑀮𑁂𑀦𑀓𑀸𑀮𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀓𑀸𑀮𑁂𑀦𑀓𑀸𑀮𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀜𑁆𑀜𑁂𑀯 𑀫𑀦𑀲𑀺𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀜𑁆𑀜𑁂𑀯 𑀫𑀦𑀲𑀺𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀜𑁆𑀜𑁂𑀯 𑀫𑀦𑀲𑀺𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸 𑀲𑀫𑀸𑀥𑀺𑀬𑁂𑀬𑁆𑀬 𑀆𑀲𑀯𑀸𑀦𑀁 𑀔𑀬𑀸𑀬. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀓𑀸𑀮𑁂𑀦𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑀺, 𑀢𑀁 𑀳𑁄𑀢𑀺 𑀘𑀺𑀢𑁆𑀢𑀁 𑀫𑀼𑀤𑀼𑀜𑁆𑀘 𑀓𑀫𑁆𑀫𑀜𑁆𑀜𑀜𑁆𑀘 𑀧𑀪𑀲𑁆𑀲𑀭𑀜𑁆𑀘, 𑀦 𑀘 𑀧𑀪𑀗𑁆𑀕𑀼, 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀉𑀓𑁆𑀓𑀁 𑀩𑀦𑁆𑀥𑀢𑀺, 𑀉𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀢𑀺, 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀢𑁆𑀯𑀸 𑀲𑀡𑁆𑀟𑀸𑀲𑁂𑀦 𑀚𑀸𑀢𑀭𑀽𑀧𑀁 𑀕𑀳𑁂𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀮𑁂𑀦𑀓𑀸𑀮𑀁 𑀅𑀪𑀺𑀥𑀫𑀢𑀺, 𑀓𑀸𑀮𑁂𑀦𑀓𑀸𑀮𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀢𑀺, 𑀓𑀸𑀮𑁂𑀦𑀓𑀸𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀅𑀪𑀺𑀥𑀫𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀟𑀳𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀦 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑁂𑀬𑁆𑀬. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀓𑀸𑀮𑁂𑀦𑀓𑀸𑀮𑀁 𑀅𑀪𑀺𑀥𑀫𑀢𑀺, 𑀓𑀸𑀮𑁂𑀦𑀓𑀸𑀮𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀢𑀺, 𑀓𑀸𑀮𑁂𑀦𑀓𑀸𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀢𑀁 𑀳𑁄𑀢𑀺 𑀚𑀸𑀢𑀭𑀽𑀧𑀁 𑀫𑀼𑀤𑀼𑀜𑁆𑀘 𑀓𑀫𑁆𑀫𑀜𑁆𑀜𑀜𑁆𑀘 𑀧𑀪𑀲𑁆𑀲𑀭𑀜𑁆𑀘, 𑀦 𑀘 𑀧𑀪𑀗𑁆𑀕𑀼, 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬. 𑀬𑀲𑁆𑀲𑀸 𑀬𑀲𑁆𑀲𑀸 𑀘 𑀧𑀺𑀴𑀦𑁆𑀥𑀦𑀯𑀺𑀓𑀢𑀺𑀬𑀸 𑀆𑀓𑀗𑁆𑀔𑀢𑀺 𑀬𑀤𑀺 𑀧𑀝𑀺𑀓𑀸𑀬 𑀬𑀤𑀺 𑀓𑀼𑀡𑁆𑀟𑀮𑀸𑀬 𑀬𑀤𑀺 𑀕𑀻𑀯𑁂𑀬𑁆𑀬𑀸𑀬 𑀬𑀤𑀺 𑀲𑀼𑀯𑀡𑁆𑀡𑀫𑀸𑀮𑀸𑀬, 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀅𑀦𑀼𑀪𑁄𑀢𑀺.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦…𑀧𑁂… 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀬𑀲𑁆𑀲 𑀬𑀲𑁆𑀲 𑀘 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺 𑀓𑀭𑀡𑀻𑀬𑀲𑁆𑀲 𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺 𑀓𑀺𑀭𑀺𑀬𑀸𑀬, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺 𑀆𑀬𑀢𑀦𑁂’’𑀢𑀺 (𑀅. 𑀦𑀺. 𑁩.𑁧𑁦𑁩).

𑀇𑀤𑀁 𑀲𑀼𑀢𑁆𑀢𑀁 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁄 𑀘 𑀳𑁄𑀢𑀺 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑁄. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺 (𑀅. 𑀦𑀺. 𑁬.𑁮𑁫).

𑀇𑀤𑀁 𑀲𑀼𑀢𑁆𑀢𑀁 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀩𑁄𑀚𑁆𑀛𑀗𑁆𑀕𑀓𑁄𑀲𑀮𑁆𑀮𑀁 ‘‘𑀧𑀦 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀅𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁪) 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀓𑀣𑀸𑀬𑀁 𑀤𑀲𑁆𑀲𑀺𑀢𑀫𑁂𑀯.

𑀇𑀢𑀺 𑀇𑀤𑀁 𑀲𑀢𑁆𑀢𑀯𑀺𑀥𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀇𑀤𑀜𑁆𑀘 𑀤𑀲𑀯𑀺𑀥𑀁 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑁂𑀦 𑀬𑁄𑀕𑀺𑀦𑀸 𑀉𑀪𑀬𑀓𑁄𑀲𑀮𑁆𑀮𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦𑀲𑁆𑀲 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂𑀬𑁂𑀯 𑀨𑀸𑀲𑀼 𑀳𑁄𑀢𑀺, 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀓𑀣𑀸𑀧𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀚𑁆𑀚𑀦𑁆𑀢𑁂𑀦 𑀯𑀺𑀲𑁂𑀲𑀁 𑀮𑀪𑀺𑀢𑁆𑀯𑀸 𑀉𑀧𑀭𑀽𑀧𑀭𑀺 𑀓𑀣𑀸𑀧𑁂𑀢𑀩𑁆𑀩𑀁. 𑀅𑀜𑁆𑀜𑀢𑁆𑀣 𑀯𑀲𑀺𑀢𑀼𑀓𑀸𑀫𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀓𑀣𑀸𑀧𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀩𑁆𑀩𑀁 𑀕𑀡𑁆𑀞𑀺𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀣𑀯𑀻𑀓𑀲𑀺𑀡𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀧𑀳𑀸𑀬 𑀅𑀦𑀼𑀭𑀽𑀧𑁂 𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑁂 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀓𑀭𑁄𑀦𑁆𑀢𑁂𑀦 𑀧𑀦 𑀓𑁂𑀲𑁂𑀲𑀼 𑀢𑀸𑀯 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀓𑀣𑀁? 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀓𑁂𑀲𑁂 𑀮𑀼𑀜𑁆𑀘𑀺𑀢𑁆𑀯𑀸 𑀳𑀢𑁆𑀣𑀢𑀮𑁂 𑀞𑀧𑁂𑀢𑁆𑀯𑀸 𑀯𑀡𑁆𑀡𑁄 𑀢𑀸𑀯 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. 𑀙𑀺𑀦𑁆𑀦𑀝𑁆𑀞𑀸𑀦𑁂𑀧𑀺 𑀓𑁂𑀲𑁂 𑀑𑀮𑁄𑀓𑁂𑀢𑀼𑀁 𑀯𑀝𑁆𑀝𑀢𑀺. 𑀉𑀤𑀓𑀧𑀢𑁆𑀢𑁂 𑀯𑀸 𑀬𑀸𑀕𑀼𑀧𑀢𑁆𑀢𑁂 𑀯𑀸 𑀑𑀮𑁄𑀓𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀓𑀸𑀴𑀓𑀓𑀸𑀮𑁂 𑀤𑀺𑀲𑁆𑀯𑀸 𑀓𑀸𑀴𑀓𑀸𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀸. 𑀲𑁂𑀢𑀓𑀸𑀮𑁂 𑀲𑁂𑀢𑀸𑀢𑀺. 𑀫𑀺𑀲𑁆𑀲𑀓𑀓𑀸𑀮𑁂 𑀧𑀦 𑀉𑀲𑁆𑀲𑀤𑀯𑀲𑁂𑀦 𑀫𑀦𑀲𑀺𑀓𑀸𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀬𑀣𑀸 𑀘 𑀓𑁂𑀲𑁂𑀲𑀼, 𑀏𑀯𑀁 𑀲𑀓𑀮𑁂𑀧𑀺 𑀢𑀘𑀧𑀜𑁆𑀘𑀓𑁂 𑀤𑀺𑀲𑁆𑀯𑀸𑀯 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁.

𑀓𑁄𑀝𑁆𑀞𑀸𑀲𑀯𑀯𑀢𑁆𑀣𑀸𑀧𑀦𑀓𑀣𑀸

𑁧𑁮𑁨. 𑀏𑀯𑀁 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀓𑁄𑀝𑁆𑀞𑀸𑀲𑁂 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀆𑀲𑀬𑁄𑀓𑀸𑀲𑀯𑀲𑁂𑀦 𑀧𑀜𑁆𑀘𑀥𑀸 𑀧𑀝𑀺𑀓𑁆𑀓𑀽𑀮𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀅𑀦𑀼𑀧𑀼𑀩𑁆𑀩𑀓𑀣𑀸. 𑀓𑁂𑀲𑀸 𑀢𑀸𑀯 𑀧𑀓𑀢𑀺𑀯𑀡𑁆𑀡𑁂𑀦 𑀓𑀸𑀴𑀓𑀸 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀸. 𑀲𑀡𑁆𑀞𑀸𑀦𑀢𑁄 𑀤𑀻𑀖𑀯𑀝𑁆𑀝𑀮𑀺𑀓𑀸 𑀢𑀼𑀮𑀸𑀤𑀡𑁆𑀟𑀲𑀡𑁆𑀞𑀸𑀦𑀸. 𑀤𑀺𑀲𑀢𑁄 𑀉𑀧𑀭𑀺𑀫𑀤𑀺𑀲𑀸𑀬 𑀚𑀸𑀢𑀸. 𑀑𑀓𑀸𑀲𑀢𑁄 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑀡𑁆𑀡𑀘𑀽𑀴𑀺𑀓𑀸𑀳𑀺, 𑀧𑀼𑀭𑀢𑁄 𑀦𑀮𑀸𑀝𑀦𑁆𑀢𑁂𑀦, 𑀧𑀘𑁆𑀙𑀢𑁄 𑀕𑀮𑀯𑀸𑀝𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀲𑀻𑀲𑀓𑀝𑀸𑀳𑀯𑁂𑀞𑀦𑀁 𑀅𑀮𑁆𑀮𑀘𑀫𑁆𑀫𑀁 𑀓𑁂𑀲𑀸𑀦𑀁 𑀑𑀓𑀸𑀲𑁄. 𑀧𑀭𑀺𑀘𑁆𑀙𑁂𑀤𑀢𑁄 𑀓𑁂𑀲𑀸 𑀲𑀻𑀲𑀯𑁂𑀞𑀦𑀘𑀫𑁆𑀫𑁂 𑀯𑀻𑀳𑀕𑁆𑀕𑀫𑀢𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑁂𑀦 𑀳𑁂𑀝𑁆𑀞𑀸 𑀅𑀢𑁆𑀢𑀦𑁄 𑀫𑀽𑀮𑀢𑀮𑁂𑀦, 𑀉𑀧𑀭𑀺 𑀆𑀓𑀸𑀲𑁂𑀦, 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀤𑁆𑀯𑁂 𑀓𑁂𑀲𑀸 𑀏𑀓𑀢𑁄 𑀦𑀢𑁆𑀣𑀻𑀢𑀺 𑀅𑀬𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀓𑁂𑀲𑀸 𑀦 𑀮𑁄𑀫𑀸, 𑀮𑁄𑀫𑀸 𑀦 𑀓𑁂𑀲𑀸𑀢𑀺 𑀏𑀯𑀁 𑀅𑀯𑀲𑁂𑀲𑀏𑀓𑀢𑀺𑀁𑀲𑀓𑁄𑀝𑁆𑀞𑀸𑀲𑁂𑀳𑀺 𑀅𑀫𑀺𑀲𑁆𑀲𑀻𑀓𑀢𑀸 𑀓𑁂𑀲𑀸 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑁄 𑀏𑀓𑀓𑁄𑀝𑁆𑀞𑀸𑀲𑁄𑀢𑀺 𑀅𑀬𑀁 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀇𑀤𑀁 𑀓𑁂𑀲𑀸𑀦𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀸𑀧𑀦𑀁.

𑁧𑁮𑁩. 𑀇𑀤𑀁 𑀧𑀦 𑀦𑁂𑀲𑀁 𑀯𑀡𑁆𑀡𑀸𑀤𑀺𑀯𑀲𑁂𑀦 𑀧𑀜𑁆𑀘𑀥𑀸 𑀧𑀝𑀺𑀓𑁆𑀓𑀽𑀮𑀢𑁄 𑀯𑀯𑀢𑁆𑀣𑀸𑀧𑀦𑀁. 𑀓𑁂𑀲𑀸 𑀦𑀸𑀫𑁂𑀢𑁂 𑀯𑀡𑁆𑀡𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸. 𑀲𑀡𑁆𑀞𑀸𑀦𑀢𑁄𑀧𑀺 𑀕𑀦𑁆𑀥𑀢𑁄𑀧𑀺 𑀆𑀲𑀬𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸.

𑀫𑀦𑀼𑀜𑁆𑀜𑁂𑀧𑀺 𑀳𑀺 𑀬𑀸𑀕𑀼𑀧𑀢𑁆𑀢𑁂 𑀯𑀸 𑀪𑀢𑁆𑀢𑀧𑀢𑁆𑀢𑁂 𑀯𑀸 𑀓𑁂𑀲𑀯𑀡𑁆𑀡𑀁 𑀓𑀺𑀜𑁆𑀘𑀺 𑀤𑀺𑀲𑁆𑀯𑀸 𑀓𑁂𑀲𑀫𑀺𑀲𑁆𑀲𑀓𑀫𑀺𑀤𑀁 𑀳𑀭𑀣 𑀦𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀏𑀯𑀁 𑀓𑁂𑀲𑀸 𑀯𑀡𑁆𑀡𑀢𑁄 𑀧𑀝𑀺𑀓𑁆𑀓𑀽𑀮𑀸. 𑀭𑀢𑁆𑀢𑀺𑀁 𑀪𑀼𑀜𑁆𑀚𑀦𑁆𑀢𑀸𑀧𑀺 𑀓𑁂𑀲𑀲𑀡𑁆𑀞𑀸𑀦𑀁 𑀅𑀓𑁆𑀓𑀯𑀸𑀓𑀁 𑀯𑀸 𑀫𑀓𑀘𑀺𑀯𑀸𑀓𑀁 𑀯𑀸 𑀙𑀼𑀧𑀺𑀢𑁆𑀯𑀸𑀧𑀺 𑀢𑀣𑁂𑀯 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀏𑀯𑀁 𑀲𑀡𑁆𑀞𑀸𑀦𑀢𑁄 𑀧𑀝𑀺𑀓𑁆𑀓𑀽𑀮𑀸.

𑀢𑁂𑀮𑀫𑀓𑁆𑀔𑀦𑀧𑀼𑀧𑁆𑀨𑀥𑀽𑀧𑀸𑀤𑀺 𑀲𑀗𑁆𑀔𑀸𑀭𑀯𑀺𑀭𑀳𑀺𑀢𑀸𑀦𑀜𑁆𑀘 𑀓𑁂𑀲𑀸𑀦𑀁 𑀕𑀦𑁆𑀥𑁄 𑀧𑀭𑀫𑀚𑁂𑀕𑀼𑀘𑁆𑀙𑁄 𑀳𑁄𑀢𑀺. 𑀢𑀢𑁄 𑀚𑁂𑀕𑀼𑀘𑁆𑀙𑀢𑀭𑁄 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀸𑀦𑀁. 𑀓𑁂𑀲𑀸 𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀅𑀧𑁆𑀧𑀝𑀺𑀓𑁆𑀓𑀽𑀮𑀸𑀧𑀺 𑀲𑀺𑀬𑀼𑀁, 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑁆𑀓𑀽𑀮𑀸𑀬𑁂𑀯. 𑀬𑀣𑀸 𑀳𑀺 𑀤𑀳𑀭𑀲𑁆𑀲 𑀓𑀼𑀫𑀸𑀭𑀲𑁆𑀲 𑀯𑀘𑁆𑀘𑀁 𑀯𑀡𑁆𑀡𑀢𑁄 𑀳𑀮𑀺𑀤𑁆𑀤𑀺𑀯𑀡𑁆𑀡𑀁, 𑀲𑀡𑁆𑀞𑀸𑀦𑀢𑁄𑀧𑀺 𑀳𑀮𑀺𑀤𑁆𑀤𑀺𑀧𑀺𑀡𑁆𑀟𑀲𑀡𑁆𑀞𑀸𑀦𑀁. 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑀺𑀢𑀜𑁆𑀘 𑀉𑀤𑁆𑀥𑀼𑀫𑀸𑀢𑀓𑀓𑀸𑀴𑀲𑀼𑀦𑀔𑀲𑀭𑀻𑀭𑀁 𑀯𑀡𑁆𑀡𑀢𑁄 𑀢𑀸𑀮𑀧𑀓𑁆𑀓𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀯𑀝𑁆𑀝𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀁. 𑀤𑀸𑀞𑀸𑀧𑀺𑀲𑁆𑀲 𑀲𑀼𑀫𑀦𑀫𑀓𑀼𑀴𑀲𑀤𑀺𑀲𑀸𑀢𑀺 𑀉𑀪𑀬𑀫𑁆𑀧𑀺 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀲𑀺𑀬𑀸 𑀅𑀧𑁆𑀧𑀝𑀺𑀓𑁆𑀓𑀽𑀮𑀁 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑁆𑀓𑀽𑀮𑀫𑁂𑀯. 𑀏𑀯𑀁 𑀓𑁂𑀲𑀸𑀧𑀺 𑀲𑀺𑀬𑀼𑀁 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀅𑀧𑁆𑀧𑀝𑀺𑀓𑁆𑀓𑀽𑀮𑀸 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑁆𑀓𑀽𑀮𑀸𑀬𑁂𑀯𑀸𑀢𑀺.

𑀬𑀣𑀸 𑀧𑀦 𑀅𑀲𑀼𑀘𑀺𑀝𑁆𑀞𑀸𑀦𑁂 𑀕𑀸𑀫𑀦𑀺𑀲𑁆𑀲𑀦𑁆𑀤𑁂𑀦 𑀚𑀸𑀢𑀸𑀦𑀺 𑀲𑀽𑀧𑁂𑀬𑁆𑀬𑀧𑀡𑁆𑀡𑀸𑀦𑀺 𑀦𑀸𑀕𑀭𑀺𑀓𑀫𑀦𑀼𑀲𑁆𑀲𑀸𑀦𑀁 𑀚𑁂𑀕𑀼𑀘𑁆𑀙𑀸𑀦𑀺 𑀳𑁄𑀦𑁆𑀢𑀺 𑀅𑀧𑀭𑀺𑀪𑁄𑀕𑀸𑀦𑀺, 𑀏𑀯𑀁 𑀓𑁂𑀲𑀸𑀧𑀺 𑀧𑀼𑀩𑁆𑀩𑀮𑁄𑀳𑀺𑀢𑀫𑀼𑀢𑁆𑀢𑀓𑀭𑀻𑀲𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀦𑀺𑀲𑁆𑀲𑀦𑁆𑀤𑁂𑀦 𑀚𑀸𑀢𑀢𑁆𑀢𑀸 𑀚𑁂𑀕𑀼𑀘𑁆𑀙𑀸𑀢𑀺 𑀇𑀤𑀁 𑀦𑁂𑀲𑀁 𑀆𑀲𑀬𑀢𑁄 𑀧𑀸𑀝𑀺𑀓𑁆𑀓𑀼𑀮𑁆𑀬𑀁.

𑀇𑀫𑁂 𑀘 𑀓𑁂𑀲𑀸 𑀦𑀸𑀫 𑀕𑀽𑀣𑀭𑀸𑀲𑀺𑀫𑁆𑀳𑀺 𑀉𑀝𑁆𑀞𑀺𑀢𑀓𑀡𑁆𑀡𑀺𑀓𑀁 𑀯𑀺𑀬 𑀏𑀓𑀢𑀺𑀁𑀲𑀓𑁄𑀝𑁆𑀞𑀸𑀲𑀭𑀸𑀲𑀺𑀫𑁆𑀳𑀺 𑀚𑀸𑀢𑀸. 𑀢𑁂 𑀲𑀼𑀲𑀸𑀦𑀲𑀗𑁆𑀓𑀸𑀭𑀝𑁆𑀞𑀸𑀦𑀸𑀤𑀻𑀲𑀼 𑀚𑀸𑀢𑀲𑀸𑀓𑀁 𑀯𑀺𑀬 𑀧𑀭𑀺𑀓𑁆𑀔𑀸𑀤𑀻𑀲𑀼 𑀚𑀸𑀢𑀓𑀫𑀮𑀓𑀼𑀯𑀮𑀬𑀸𑀤𑀺𑀧𑀼𑀧𑁆𑀨𑀁 𑀯𑀺𑀬 𑀘 𑀅𑀲𑀼𑀘𑀺𑀝𑁆𑀞𑀸𑀦𑁂 𑀚𑀸𑀢𑀢𑁆𑀢𑀸 𑀧𑀭𑀫𑀚𑁂𑀕𑀼𑀘𑁆𑀙𑀸𑀢𑀺 𑀇𑀤𑀁 𑀦𑁂𑀲𑀁 𑀑𑀓𑀸𑀲𑀢𑁄 𑀧𑀸𑀝𑀺𑀓𑁆𑀓𑀼𑀮𑁆𑀬𑀁.