𑁪. 𑀲𑀻𑀮𑀸𑀦𑀼𑀲𑁆𑀲𑀢𑀺𑀓𑀣𑀸

𑁧𑁫𑁮. 𑀲𑀻𑀮𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀧𑀦 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 ‘‘𑀅𑀳𑁄 𑀯𑀢 𑀫𑁂 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻’’𑀢𑀺 (𑀅. 𑀦𑀺. 𑁬.𑁧𑁦) 𑀏𑀯𑀁 𑀅𑀔𑀡𑁆𑀟𑀢𑀸𑀤𑀺𑀕𑀼𑀡𑀯𑀲𑁂𑀦 𑀅𑀢𑁆𑀢𑀦𑁄 𑀲𑀻𑀮𑀸𑀦𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘 𑀕𑀳𑀝𑁆𑀞𑁂𑀦 𑀕𑀳𑀝𑁆𑀞𑀲𑀻𑀮𑀸𑀦𑀺, 𑀧𑀩𑁆𑀩𑀚𑀺𑀢𑁂𑀦 𑀧𑀩𑁆𑀩𑀚𑀺𑀢𑀲𑀻𑀮𑀸𑀦𑀺.

𑀕𑀳𑀝𑁆𑀞𑀲𑀻𑀮𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀧𑀩𑁆𑀩𑀚𑀺𑀢𑀲𑀻𑀮𑀸𑀦𑀺 𑀯𑀸, 𑀬𑁂𑀲𑀁 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸 𑀏𑀓𑀫𑁆𑀧𑀺 𑀦 𑀪𑀺𑀦𑁆𑀦𑀁, 𑀢𑀸𑀦𑀺 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬 𑀦 𑀔𑀡𑁆𑀟𑀸𑀦𑀻𑀢𑀺 𑀅𑀔𑀡𑁆𑀟𑀸𑀦𑀺. 𑀬𑁂𑀲𑀁 𑀯𑁂𑀫𑀚𑁆𑀛𑁂 𑀏𑀓𑀫𑁆𑀧𑀺 𑀦 𑀪𑀺𑀦𑁆𑀦𑀁, 𑀢𑀸𑀦𑀺 𑀫𑀚𑁆𑀛𑁂 𑀯𑀺𑀦𑀺𑀯𑀺𑀤𑁆𑀥𑀲𑀸𑀝𑀓𑁄 𑀯𑀺𑀬 𑀦 𑀙𑀺𑀤𑁆𑀤𑀸𑀦𑀻𑀢𑀺 𑀅𑀘𑁆𑀙𑀺𑀤𑁆𑀤𑀸𑀦𑀺. 𑀬𑁂𑀲𑀁 𑀧𑀝𑀺𑀧𑀸𑀝𑀺𑀬𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀦 𑀪𑀺𑀦𑁆𑀦𑀸𑀦𑀺, 𑀢𑀸𑀦𑀺 𑀧𑀺𑀝𑁆𑀞𑀺𑀬𑀸 𑀯𑀸 𑀓𑀼𑀘𑁆𑀙𑀺𑀬𑀸 𑀯𑀸 𑀉𑀝𑁆𑀞𑀺𑀢𑁂𑀦 𑀤𑀻𑀖𑀯𑀝𑁆𑀝𑀸𑀤𑀺𑀲𑀡𑁆𑀞𑀸𑀦𑁂𑀦 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀓𑀸𑀴𑀭𑀢𑁆𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑀭𑀻𑀭𑀯𑀡𑁆𑀡𑀸 𑀕𑀸𑀯𑀻 𑀯𑀺𑀬 𑀦 𑀲𑀩𑀮𑀸𑀦𑀻𑀢𑀺 𑀅𑀲𑀩𑀮𑀸𑀦𑀺. 𑀬𑀸𑀦𑀺 𑀅𑀦𑁆𑀢𑀭𑀦𑁆𑀢𑀭𑀸 𑀦 𑀪𑀺𑀦𑁆𑀦𑀸𑀦𑀺, 𑀢𑀸𑀦𑀺 𑀯𑀺𑀲𑀪𑀸𑀕𑀩𑀺𑀦𑁆𑀤𑀼𑀯𑀺𑀘𑀺𑀢𑁆𑀭𑀸 𑀕𑀸𑀯𑀻 𑀯𑀺𑀬 𑀦 𑀓𑀫𑁆𑀫𑀸𑀲𑀸𑀦𑀻𑀢𑀺 𑀅𑀓𑀫𑁆𑀫𑀸𑀲𑀸𑀦𑀺. 𑀅𑀯𑀺𑀲𑁂𑀲𑁂𑀦 𑀯𑀸 𑀲𑀩𑁆𑀩𑀸𑀦𑀺𑀧𑀺 𑀲𑀢𑁆𑀢𑀯𑀺𑀥𑁂𑀦 𑀫𑁂𑀣𑀼𑀦𑀲𑀁𑀬𑁄𑀕𑁂𑀦 𑀓𑁄𑀥𑀼𑀧𑀦𑀸𑀳𑀸𑀤𑀻𑀳𑀺 𑀘 𑀧𑀸𑀧𑀥𑀫𑁆𑀫𑁂𑀳𑀺 𑀅𑀦𑀼𑀧𑀳𑀢𑀢𑁆𑀢𑀸 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺. 𑀢𑀸𑀦𑀺𑀬𑁂𑀯 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑁂𑀢𑁆𑀯𑀸 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑁂𑀦 𑀪𑀼𑀚𑀺𑀲𑁆𑀲𑀸𑀦𑀺. 𑀩𑀼𑀤𑁆𑀥𑀸𑀤𑀻𑀳𑀺 𑀯𑀺𑀜𑁆𑀜𑀽𑀳𑀺 𑀧𑀲𑀢𑁆𑀣𑀢𑁆𑀢𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀢𑀸𑀬 𑀓𑁂𑀦𑀘𑀺 𑀯𑀸 𑀅𑀬𑀁 𑀢𑁂 𑀲𑀻𑀮𑁂𑀲𑀼 𑀤𑁄𑀲𑁄𑀢𑀺 𑀏𑀯𑀁 𑀧𑀭𑀸𑀫𑀝𑁆𑀞𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀧𑀭𑀸𑀫𑀝𑁆𑀞𑀸𑀦𑀺. 𑀉𑀧𑀘𑀸𑀭𑀲𑀫𑀸𑀥𑀺𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀯𑀸, 𑀅𑀣 𑀯𑀸 𑀧𑀦 𑀫𑀕𑁆𑀕𑀲𑀫𑀸𑀥𑀺𑀁 𑀨𑀮𑀲𑀫𑀸𑀥𑀺𑀜𑁆𑀘𑀸𑀧𑀺 𑀲𑀁𑀯𑀢𑁆𑀢𑁂𑀦𑁆𑀢𑀻𑀢𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺.

𑁧𑁫𑁯. 𑀏𑀯𑀁 𑀅𑀔𑀡𑁆𑀟𑀢𑀸𑀤𑀺𑀕𑀼𑀡𑀯𑀲𑁂𑀦 𑀅𑀢𑁆𑀢𑀦𑁄 𑀲𑀻𑀮𑀸𑀦𑀺 𑀅𑀦𑀼𑀲𑁆𑀲𑀭𑀢𑁄 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀦 𑀤𑁄𑀲…𑀧𑁂… 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺, 𑀲𑀻𑀮𑀁 𑀆𑀭𑀩𑁆𑀪𑀸𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑀲𑁆𑀲 𑀏𑀓𑀓𑁆𑀔𑀡𑁂 𑀛𑀸𑀦𑀗𑁆𑀕𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀻𑀮𑀕𑀼𑀡𑀸𑀦𑀁 𑀧𑀦 𑀕𑀫𑁆𑀪𑀻𑀭𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀸𑀦𑀼𑀲𑁆𑀲𑀭𑀡𑀸𑀥𑀺𑀫𑀼𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀯𑀸 𑀉𑀧𑀘𑀸𑀭𑀧𑁆𑀧𑀢𑁆𑀢𑀫𑁂𑀯 𑀛𑀸𑀦𑀁 𑀳𑁄𑀢𑀺. 𑀢𑀤𑁂𑀢𑀁 𑀲𑀻𑀮𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀻𑀮𑀸𑀦𑀼𑀲𑁆𑀲𑀢𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀇𑀫𑀜𑁆𑀘 𑀧𑀦 𑀲𑀻𑀮𑀸𑀦𑀼𑀲𑁆𑀲𑀢𑀺𑀁 𑀅𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀬 𑀲𑀕𑀸𑀭𑀯𑁄 𑀳𑁄𑀢𑀺 𑀲𑀪𑀸𑀕𑀯𑀼𑀢𑁆𑀢𑀺, 𑀧𑀝𑀺𑀲𑀦𑁆𑀣𑀸𑀭𑁂 𑀅𑀧𑁆𑀧𑀫𑀢𑁆𑀢𑁄, 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀪𑀬𑀯𑀺𑀭𑀳𑀺𑀢𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀤𑁆𑀥𑀸𑀤𑀺𑀯𑁂𑀧𑀼𑀮𑁆𑀮𑀁 𑀅𑀥𑀺𑀕𑀘𑁆𑀙𑀢𑀺, 𑀧𑀻𑀢𑀺𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀳𑁄𑀢𑀺. 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀧𑀦 𑀲𑀼𑀕𑀢𑀺𑀧𑀭𑀸𑀬𑀦𑁄 𑀳𑁄𑀢𑀺.

𑀢𑀲𑁆𑀫𑀸 𑀳𑀯𑁂 𑀅𑀧𑁆𑀧𑀫𑀸𑀤𑀁, 𑀓𑀬𑀺𑀭𑀸𑀣 𑀲𑀼𑀫𑁂𑀥𑀲𑁄;

𑀏𑀯𑀁 𑀫𑀳𑀸𑀦𑀼𑀪𑀸𑀯𑀸𑀬, 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀸 𑀲𑀤𑀸𑀢𑀺.

𑀇𑀤𑀁 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀁 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.