𑁫. 𑀘𑀸𑀕𑀸𑀦𑀼𑀲𑁆𑀲𑀢𑀺𑀓𑀣𑀸

𑁧𑁬𑁦. 𑀘𑀸𑀕𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀧𑀦 𑀧𑀓𑀢𑀺𑀬𑀸 𑀘𑀸𑀕𑀸𑀥𑀺𑀫𑀼𑀢𑁆𑀢𑁂𑀦 𑀦𑀺𑀘𑁆𑀘𑀧𑁆𑀧𑀯𑀢𑁆𑀢𑀤𑀸𑀦𑀲𑀁𑀯𑀺𑀪𑀸𑀕𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀣 𑀯𑀸 𑀧𑀦 𑀪𑀸𑀯𑀦𑀁 𑀆𑀭𑀪𑀦𑁆𑀢𑁂𑀦 𑀇𑀢𑁄 𑀤𑀸𑀦𑀺 𑀧𑀪𑀼𑀢𑀺 𑀲𑀢𑀺 𑀧𑀝𑀺𑀕𑁆𑀕𑀸𑀳𑀓𑁂 𑀅𑀦𑁆𑀢𑀫𑀲𑁄 𑀏𑀓𑀸𑀮𑁄𑀧𑀫𑀢𑁆𑀢𑀫𑁆𑀧𑀺 𑀤𑀸𑀦𑀁 𑀅𑀤𑀢𑁆𑀯𑀸 𑀦 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀲𑀫𑀸𑀤𑀸𑀦𑀁 𑀓𑀢𑁆𑀯𑀸 𑀢𑀁𑀤𑀺𑀯𑀲𑀁 𑀕𑀼𑀡𑀯𑀺𑀲𑀺𑀝𑁆𑀞𑁂𑀲𑀼 𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀤𑀸𑀦𑀁 𑀤𑀢𑁆𑀯𑀸 𑀢𑀢𑁆𑀣 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 ‘‘𑀮𑀸𑀪𑀸 𑀯𑀢 𑀫𑁂 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑁄𑀳𑀁 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀸𑀬 𑀧𑀚𑀸𑀬 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄’’𑀢𑀺 𑀏𑀯𑀁 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀤𑀺𑀕𑀼𑀡𑀯𑀲𑁂𑀦 𑀅𑀢𑁆𑀢𑀦𑁄 𑀘𑀸𑀕𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑁄.

𑀢𑀢𑁆𑀣 𑀮𑀸𑀪𑀸 𑀯𑀢 𑀫𑁂𑀢𑀺 𑀫𑀬𑁆𑀳𑀁 𑀯𑀢 𑀮𑀸𑀪𑀸, 𑀬𑁂 𑀇𑀫𑁂 ‘‘𑀆𑀬𑀼𑀁 𑀔𑁄 𑀧𑀦 𑀤𑀢𑁆𑀯𑀸 𑀆𑀬𑀼𑀲𑁆𑀲 𑀪𑀸𑀕𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸’’ 𑀇𑀢𑀺 (𑀅. 𑀦𑀺. 𑁫.𑁩𑁭) 𑀘, ‘‘𑀤𑀤𑀁 𑀧𑀺𑀬𑁄 𑀳𑁄𑀢𑀺 𑀪𑀚𑀦𑁆𑀢𑀺 𑀦𑀁 𑀩𑀳𑀽’’ 𑀇𑀢𑀺 (𑀅. 𑀦𑀺. 𑁫.𑁩𑁪) 𑀘, ‘‘𑀤𑀤𑀫𑀸𑀦𑁄 𑀧𑀺𑀬𑁄 𑀳𑁄𑀢𑀺, 𑀲𑀢𑀁 𑀥𑀫𑁆𑀫𑀁 𑀅𑀦𑀼𑀓𑁆𑀓𑀫𑀁’’ 𑀇𑀢𑀺 (𑀅. 𑀦𑀺. 𑁫.𑁩𑁫) 𑀘 𑀏𑀯𑀫𑀸𑀤𑀻𑀳𑀺 𑀦𑀬𑁂𑀳𑀺 𑀪𑀕𑀯𑀢𑀸 𑀤𑀸𑀬𑀓𑀲𑁆𑀲 𑀮𑀸𑀪𑀸 𑀲𑀁𑀯𑀡𑁆𑀡𑀺𑀢𑀸, 𑀢𑁂 𑀫𑀬𑁆𑀳𑀁 𑀅𑀯𑀲𑁆𑀲𑀁 𑀪𑀸𑀕𑀺𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀮𑀤𑁆𑀥𑀁 𑀯𑀢 𑀫𑁂𑀢𑀺 𑀬𑀁 𑀫𑀬𑀸 𑀇𑀤𑀁 𑀲𑀸𑀲𑀦𑀁 𑀫𑀦𑀼𑀲𑁆𑀲𑀢𑁆𑀢𑀁 𑀯𑀸 𑀮𑀤𑁆𑀥𑀁, 𑀢𑀁 𑀲𑀼𑀮𑀤𑁆𑀥𑀁 𑀯𑀢 𑀫𑁂. 𑀓𑀲𑁆𑀫𑀸? 𑀬𑁄𑀳𑀁 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀸𑀬 𑀧𑀚𑀸𑀬…𑀧𑁂… 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄𑀢𑀺.

𑀢𑀢𑁆𑀣 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀸𑀬𑀸𑀢𑀺 𑀫𑀘𑁆𑀙𑁂𑀭𑀫𑀮𑁂𑀦 𑀅𑀪𑀺𑀪𑀽𑀢𑀸𑀬. 𑀧𑀚𑀸𑀬𑀸𑀢𑀺 𑀧𑀚𑀸𑀬𑀦𑀯𑀲𑁂𑀦 𑀲𑀢𑁆𑀢𑀸 𑀯𑀼𑀘𑁆𑀘𑀦𑁆𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀻𑀦𑀁 𑀧𑀭𑀲𑀸𑀥𑀸𑀭𑀡𑀪𑀸𑀯𑀫𑀲𑀳𑀦𑀮𑀓𑁆𑀔𑀡𑁂𑀦 𑀘𑀺𑀢𑁆𑀢𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑀤𑀽𑀲𑀓𑀸𑀦𑀁 𑀓𑀡𑁆𑀳𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀫𑀘𑁆𑀙𑁂𑀭𑀫𑀮𑁂𑀦 𑀅𑀪𑀺𑀪𑀽𑀢𑁂𑀲𑀼 𑀲𑀢𑁆𑀢𑁂𑀲𑀽𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦𑀸𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀭𑀸𑀕𑀤𑁄𑀲𑀸𑀤𑀺𑀫𑀮𑀸𑀦𑀜𑁆𑀘𑁂𑀯 𑀫𑀘𑁆𑀙𑁂𑀭𑀲𑁆𑀲 𑀘 𑀯𑀺𑀕𑀢𑀢𑁆𑀢𑀸 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦. 𑀘𑁂𑀢𑀲𑀸 𑀯𑀺𑀳𑀭𑀸𑀫𑀻𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀯𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑁂𑀲𑀼 𑀧𑀦 𑀫𑀳𑀸𑀦𑀸𑀫𑀲𑀓𑁆𑀓𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀢𑁄 𑀦𑀺𑀲𑁆𑀲𑀬𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑁄 𑀦𑀺𑀲𑁆𑀲𑀬𑀯𑀺𑀳𑀸𑀭𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀸𑀫𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀪𑀯𑀺𑀢𑁆𑀯𑀸 𑀯𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀫𑀼𑀢𑁆𑀢𑀘𑀸𑀕𑁄𑀢𑀺 𑀯𑀺𑀲𑁆𑀲𑀝𑁆𑀞𑀘𑀸𑀕𑁄. 𑀧𑀬𑀢𑀧𑀸𑀡𑀻𑀢𑀺 𑀧𑀭𑀺𑀲𑀼𑀤𑁆𑀥𑀳𑀢𑁆𑀣𑁄. 𑀲𑀓𑁆𑀓𑀘𑁆𑀘𑀁 𑀲𑀳𑀢𑁆𑀣𑀸 𑀤𑁂𑀬𑁆𑀬𑀥𑀫𑁆𑀫𑀁 𑀤𑀸𑀢𑀼𑀁 𑀲𑀤𑀸 𑀥𑁄𑀢𑀳𑀢𑁆𑀣𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑁄𑀲𑁆𑀲𑀕𑁆𑀕𑀭𑀢𑁄𑀢𑀺 𑀯𑁄𑀲𑁆𑀲𑀚𑁆𑀚𑀦𑀁 𑀯𑁄𑀲𑁆𑀲𑀕𑁆𑀕𑁄, 𑀧𑀭𑀺𑀘𑁆𑀘𑀸𑀕𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀯𑁄𑀲𑁆𑀲𑀕𑁆𑀕𑁂 𑀲𑀢𑀢𑀸𑀪𑀺𑀬𑁄𑀕𑀯𑀲𑁂𑀦 𑀭𑀢𑁄𑀢𑀺 𑀯𑁄𑀲𑁆𑀲𑀕𑁆𑀕𑀭𑀢𑁄. 𑀬𑀸𑀘𑀬𑁄𑀕𑁄𑀢𑀺 𑀬𑀁 𑀬𑀁 𑀧𑀭𑁂 𑀬𑀸𑀘𑀦𑁆𑀢𑀺, 𑀢𑀲𑁆𑀲 𑀢𑀲𑁆𑀲 𑀤𑀸𑀦𑀢𑁄 𑀬𑀸𑀘𑀦𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀬𑀸𑀚𑀬𑁄𑀕𑁄𑀢𑀺𑀧𑀺 𑀧𑀸𑀞𑁄. 𑀬𑀚𑀦𑀲𑀗𑁆𑀔𑀸𑀢𑁂𑀦 𑀬𑀸𑀚𑁂𑀦 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄𑀢𑀺 𑀤𑀸𑀦𑁂 𑀘 𑀲𑀁𑀯𑀺𑀪𑀸𑀕𑁂 𑀘 𑀭𑀢𑁄. 𑀅𑀳𑀜𑁆𑀳𑀺 𑀤𑀸𑀦𑀜𑁆𑀘 𑀤𑁂𑀫𑀺, 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄𑀧𑀺 𑀘 𑀲𑀁𑀯𑀺𑀪𑀸𑀕𑀁 𑀓𑀭𑁄𑀫𑀺, 𑀏𑀢𑁆𑀣𑁂𑀯 𑀘𑀲𑁆𑀫𑀺 𑀉𑀪𑀬𑁂 𑀭𑀢𑁄𑀢𑀺 𑀏𑀯𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀅𑀢𑁆𑀣𑁄.

𑁧𑁬𑁧. 𑀢𑀲𑁆𑀲𑁂𑀯𑀁 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀤𑀺𑀕𑀼𑀡𑀯𑀲𑁂𑀦 𑀅𑀢𑁆𑀢𑀦𑁄 𑀘𑀸𑀕𑀁 𑀅𑀦𑀼𑀲𑁆𑀲𑀭𑀢𑁄 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀦 𑀤𑁄𑀲…𑀧𑁂… 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀘𑀸𑀕𑀁 𑀆𑀭𑀩𑁆𑀪𑀸𑀢𑀺 (𑀅. 𑀦𑀺. 𑁫.𑁧𑁦) 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑀲𑁆𑀲 𑀏𑀓𑀓𑁆𑀔𑀡𑁂 𑀛𑀸𑀦𑀗𑁆𑀕𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀘𑀸𑀕𑀕𑀼𑀡𑀸𑀦𑀁 𑀧𑀦 𑀕𑀫𑁆𑀪𑀻𑀭𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑀘𑀸𑀕𑀕𑀼𑀡𑀸𑀦𑀼𑀲𑁆𑀲𑀭𑀡𑀸𑀥𑀺𑀫𑀼𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀯𑀸 𑀉𑀧𑀘𑀸𑀭𑀧𑁆𑀧𑀢𑁆𑀢𑀫𑁂𑀯 𑀛𑀸𑀦𑀁 𑀳𑁄𑀢𑀺. 𑀢𑀤𑁂𑀢𑀁 𑀘𑀸𑀕𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀘𑀸𑀕𑀸𑀦𑀼𑀲𑁆𑀲𑀢𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀇𑀫𑀜𑁆𑀘 𑀧𑀦 𑀘𑀸𑀕𑀸𑀦𑀼𑀲𑁆𑀲𑀢𑀺𑀁 𑀅𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀘𑀸𑀕𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀮𑁄𑀪𑀚𑁆𑀛𑀸𑀲𑀬𑁄, 𑀫𑁂𑀢𑁆𑀢𑀸𑀬 𑀅𑀦𑀼𑀮𑁄𑀫𑀓𑀸𑀭𑀻, 𑀯𑀺𑀲𑀸𑀭𑀤𑁄, 𑀧𑀻𑀢𑀺𑀧𑀸𑀫𑁄𑀚𑁆𑀚𑀩𑀳𑀼𑀮𑁄, 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀧𑀦 𑀲𑀼𑀕𑀢𑀺𑀧𑀭𑀸𑀬𑀦𑁄 𑀳𑁄𑀢𑀺.

𑀢𑀲𑁆𑀫𑀸 𑀳𑀯𑁂 𑀅𑀧𑁆𑀧𑀫𑀸𑀤𑀁, 𑀓𑀬𑀺𑀭𑀸𑀣 𑀲𑀼𑀫𑁂𑀥𑀲𑁄;

𑀏𑀯𑀁 𑀫𑀳𑀸𑀦𑀼𑀪𑀸𑀯𑀸𑀬, 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀸 𑀲𑀤𑀸𑀢𑀺.

𑀇𑀤𑀁 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀁 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.