𑁩. 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀓𑀣𑀸

𑁧𑁫𑁪. 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀼𑀓𑀸𑀫𑁂𑀦𑀸𑀧𑀺 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄, 𑀧𑀸𑀳𑀼𑀦𑁂𑀬𑁆𑀬𑁄, 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀅𑀜𑁆𑀚𑀮𑀺𑀓𑀭𑀡𑀻𑀬𑁄, 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺 (𑀅. 𑀦𑀺. 𑁬.𑁧𑁦) 𑀏𑀯𑀁 𑀅𑀭𑀺𑀬𑀲𑀗𑁆𑀖𑀕𑀼𑀡𑀸 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸.

𑁧𑁫𑁫. 𑀢𑀢𑁆𑀣 𑀲𑀼𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀲𑀼𑀝𑁆𑀞𑀼 𑀧𑀝𑀺𑀧𑀦𑁆𑀦𑁄, 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀺𑀯𑀢𑁆𑀢𑀺𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀲𑀓𑁆𑀓𑀘𑁆𑀘𑀁 𑀲𑀼𑀡𑀦𑁆𑀢𑀻𑀢𑀺 𑀲𑀸𑀯𑀓𑀸. 𑀲𑀸𑀯𑀓𑀸𑀦𑀁 𑀲𑀗𑁆𑀖𑁄 𑀲𑀸𑀯𑀓𑀲𑀗𑁆𑀖𑁄, 𑀲𑀻𑀮𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀢𑀸𑀬 𑀲𑀗𑁆𑀖𑀸𑀢𑀪𑀸𑀯𑀫𑀸𑀧𑀦𑁆𑀦𑁄 𑀲𑀸𑀯𑀓𑀲𑀫𑀽𑀳𑁄𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀲𑀸 𑀲𑀫𑁆𑀫𑀸𑀧𑀝𑀺𑀧𑀤𑀸 𑀉𑀚𑀼 𑀅𑀯𑀗𑁆𑀓𑀸 𑀅𑀓𑀼𑀝𑀺𑀮𑀸 𑀅𑀚𑀺𑀫𑁆𑀳𑀸, 𑀅𑀭𑀺𑀬𑁄 𑀘 𑀜𑀸𑀬𑁄𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀅𑀦𑀼𑀘𑁆𑀙𑀯𑀺𑀓𑀢𑁆𑀢𑀸 𑀘 𑀲𑀸𑀫𑀻𑀘𑀻𑀢𑀺𑀧𑀺 𑀲𑀗𑁆𑀔𑀁 𑀕𑀢𑀸. 𑀢𑀲𑁆𑀫𑀸 𑀢𑀫𑁆𑀧𑀝𑀺𑀧𑀦𑁆𑀦𑁄 𑀅𑀭𑀺𑀬𑀲𑀗𑁆𑀖𑁄 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄𑀢𑀺𑀧𑀺 𑀯𑀼𑀢𑁆𑀢𑁄.

𑀏𑀢𑁆𑀣 𑀘 𑀬𑁂 𑀫𑀕𑁆𑀕𑀝𑁆𑀞𑀸, 𑀢𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀲𑀫𑀗𑁆𑀕𑀺𑀢𑀸𑀬 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀬𑁂 𑀨𑀮𑀝𑁆𑀞𑀸, 𑀢𑁂 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀅𑀢𑀻𑀢𑀁 𑀧𑀝𑀺𑀧𑀤𑀁 𑀲𑀦𑁆𑀥𑀸𑀬 𑀲𑀼𑀧𑁆𑀧𑀝𑀺𑀧𑀦𑁆𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀦𑁆𑀦𑀢𑁆𑀢𑀸𑀧𑀺 𑀅𑀧𑀡𑁆𑀡𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀢𑁆𑀢𑀸𑀧𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑁄.

𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀅𑀦𑁆𑀢𑀤𑁆𑀯𑀬𑀫𑀦𑀼𑀧𑀕𑀫𑁆𑀫 𑀧𑀝𑀺𑀧𑀦𑁆𑀦𑀢𑁆𑀢𑀸 𑀓𑀸𑀬𑀯𑀘𑀻𑀫𑀦𑁄𑀯𑀗𑁆𑀓𑀓𑀼𑀝𑀺𑀮𑀚𑀺𑀫𑁆𑀳𑀤𑁄𑀲𑀧𑁆𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸 𑀘 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑀢𑁆𑀢𑀸 𑀘 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄.

𑀜𑀸𑀬𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀤𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄.

𑀬𑀣𑀸 𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸𑀭𑀳𑀸 𑀳𑁄𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀦𑁆𑀦𑀢𑁆𑀢𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄.

𑁧𑁫𑁬. 𑀬𑀤𑀺𑀤𑀦𑁆𑀢𑀺 𑀬𑀸𑀦𑀺 𑀇𑀫𑀸𑀦𑀺. 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀻𑀢𑀺 𑀬𑀼𑀕𑀴𑀯𑀲𑁂𑀦 𑀧𑀞𑀫𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀇𑀤𑀫𑁂𑀓𑀁 𑀬𑀼𑀕𑀴𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀴𑀸𑀦𑀺 𑀳𑁄𑀦𑁆𑀢𑀺. 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀢𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀯𑀲𑁂𑀦 𑀏𑀓𑁄 𑀧𑀞𑀫𑀫𑀕𑁆𑀕𑀝𑁆𑀞𑁄 𑀏𑀓𑁄 𑀨𑀮𑀝𑁆𑀞𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀝𑁆𑀞𑁂𑀯 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀘 𑀧𑀼𑀭𑀺𑀲𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀏𑀓𑀢𑁆𑀣𑀸𑀦𑀺 𑀏𑀢𑀸𑀦𑀺 𑀧𑀤𑀸𑀦𑀺. 𑀯𑁂𑀦𑁂𑀬𑁆𑀬𑀯𑀲𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄𑀢𑀺 𑀬𑀸𑀦𑀺𑀫𑀸𑀦𑀺 𑀬𑀼𑀕𑀯𑀲𑁂𑀦 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺, 𑀧𑀸𑀝𑀺𑀏𑀓𑁆𑀓𑀢𑁄 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀆𑀳𑀼𑀦𑁂𑀬𑁆𑀬𑁄𑀢𑀺𑀆𑀤𑀻𑀲𑀼 𑀆𑀦𑁂𑀢𑁆𑀯𑀸 𑀳𑀼𑀦𑀺𑀢𑀩𑁆𑀩𑀦𑁆𑀢𑀺 𑀆𑀳𑀼𑀦𑀁, 𑀤𑀽𑀭𑀢𑁄𑀧𑀺 𑀆𑀦𑁂𑀢𑁆𑀯𑀸 𑀲𑀻𑀮𑀯𑀦𑁆𑀢𑁂𑀲𑀼 𑀤𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀫𑁂𑀢𑀫𑀥𑀺𑀯𑀘𑀦𑀁. 𑀢𑀁 𑀆𑀳𑀼𑀦𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄 𑀢𑀲𑁆𑀲 𑀫𑀳𑀧𑁆𑀨𑀮𑀓𑀭𑀡𑀢𑁄𑀢𑀺 𑀆𑀳𑀼𑀦𑁂𑀬𑁆𑀬𑁄. 𑀅𑀣 𑀯𑀸 𑀤𑀽𑀭𑀢𑁄𑀧𑀺 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀸𑀧𑀢𑁂𑀬𑁆𑀬𑀫𑁆𑀧𑀺 𑀏𑀢𑁆𑀣 𑀳𑀼𑀦𑀺𑀢𑀩𑁆𑀩𑀦𑁆𑀢𑀺 𑀆𑀳𑀯𑀦𑀻𑀬𑁄. 𑀲𑀓𑁆𑀓𑀸𑀤𑀻𑀦𑀫𑁆𑀧𑀺 𑀯𑀸 𑀆𑀳𑀯𑀦𑀁 𑀅𑀭𑀳𑀢𑀻𑀢𑀺 𑀆𑀳𑀯𑀦𑀻𑀬𑁄. 𑀬𑁄 𑀘𑀸𑀬𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀳𑀯𑀦𑀻𑀬𑁄 𑀦𑀸𑀫 𑀅𑀕𑁆𑀕𑀺, 𑀬𑀢𑁆𑀣 𑀳𑀼𑀢𑀁 𑀫𑀳𑀧𑁆𑀨𑀮𑀦𑁆𑀢𑀺 𑀢𑁂𑀲𑀁 𑀮𑀤𑁆𑀥𑀺. 𑀲𑀘𑁂 𑀳𑀼𑀢𑀲𑁆𑀲 𑀫𑀳𑀧𑁆𑀨𑀮𑀢𑀸𑀬 𑀆𑀳𑀯𑀦𑀻𑀬𑁄, 𑀲𑀗𑁆𑀖𑁄𑀯 𑀆𑀳𑀯𑀦𑀻𑀬𑁄. 𑀲𑀗𑁆𑀖𑁂 𑀳𑀼𑀢𑀜𑁆𑀳𑀺 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀬𑀣𑀸𑀳 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀦𑁆𑀢𑀼, 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂 𑀯𑀦𑁂;

𑀏𑀓𑀜𑁆𑀘 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀽𑀚𑀬𑁂;

𑀲𑀸𑀬𑁂𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀯𑀲𑁆𑀲𑀲𑀢𑀁 𑀳𑀼𑀢’’𑀦𑁆𑀢𑀺. (𑀥. 𑀧. 𑁧𑁦𑁭);

𑀢𑀤𑁂𑀢𑀁 𑀦𑀺𑀓𑀸𑀬𑀦𑁆𑀢𑀭𑁂 𑀆𑀳𑀯𑀦𑀻𑀬𑁄𑀢𑀺 𑀧𑀤𑀁 𑀇𑀥 𑀆𑀳𑀼𑀦𑁂𑀬𑁆𑀬𑁄𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀅𑀢𑁆𑀣𑀢𑁄 𑀏𑀓𑀁. 𑀩𑁆𑀬𑀜𑁆𑀚𑀦𑀢𑁄 𑀧𑀦𑁂𑀢𑁆𑀣 𑀓𑀺𑀜𑁆𑀘𑀺𑀫𑀢𑁆𑀢𑀫𑁂𑀯 𑀦𑀸𑀦𑀁. 𑀇𑀢𑀺 𑀆𑀳𑀼𑀦𑁂𑀬𑁆𑀬𑁄.

𑀧𑀸𑀳𑀼𑀦𑁂𑀬𑁆𑀬𑁄𑀢𑀺 𑀏𑀢𑁆𑀣 𑀧𑀦 𑀧𑀸𑀳𑀼𑀦𑀁 𑀯𑀼𑀘𑁆𑀘𑀢𑀺 𑀤𑀺𑀲𑀸𑀯𑀺𑀤𑀺𑀲𑀢𑁄 𑀆𑀕𑀢𑀸𑀦𑀁 𑀧𑀺𑀬𑀫𑀦𑀸𑀧𑀸𑀦𑀁 𑀜𑀸𑀢𑀺𑀫𑀺𑀢𑁆𑀢𑀸𑀦𑀫𑀢𑁆𑀣𑀸𑀬 𑀲𑀓𑁆𑀓𑀸𑀭𑁂𑀦 𑀧𑀝𑀺𑀬𑀢𑁆𑀢𑀁 𑀆𑀕𑀦𑁆𑀢𑀼𑀓𑀤𑀸𑀦𑀁. 𑀢𑀫𑁆𑀧𑀺 𑀞𑀧𑁂𑀢𑁆𑀯𑀸 𑀢𑁂 𑀢𑀣𑀸𑀭𑀽𑀧𑁂 𑀧𑀸𑀳𑀼𑀦𑀓𑁂 𑀲𑀗𑁆𑀖𑀲𑁆𑀲𑁂𑀯 𑀤𑀸𑀢𑀼𑀁 𑀬𑀼𑀢𑁆𑀢𑀁, 𑀲𑀗𑁆𑀖𑁄𑀯 𑀢𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄. 𑀲𑀗𑁆𑀖𑀲𑀤𑀺𑀲𑁄 𑀳𑀺 𑀧𑀸𑀳𑀼𑀦𑀓𑁄 𑀦𑀢𑁆𑀣𑀺. 𑀢𑀣𑀸 𑀳𑁂𑀲 𑀏𑀓𑀩𑀼𑀤𑁆𑀥𑀦𑁆𑀢𑀭𑁂 𑀘 𑀤𑀺𑀲𑁆𑀲𑀢𑀺, 𑀅𑀩𑁆𑀩𑁄𑀓𑀺𑀡𑁆𑀡𑀜𑁆𑀘 𑀧𑀺𑀬𑀫𑀦𑀸𑀧𑀢𑁆𑀢𑀓𑀭𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺. 𑀏𑀯𑀁 𑀧𑀸𑀳𑀼𑀦𑀫𑀲𑁆𑀲 𑀤𑀸𑀢𑀼𑀁 𑀬𑀼𑀢𑁆𑀢𑀁 𑀧𑀸𑀳𑀼𑀦𑀜𑁆𑀘 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄. 𑀬𑁂𑀲𑀁 𑀧𑀦 𑀧𑀸𑀳𑀯𑀦𑀻𑀬𑁄𑀢𑀺 𑀧𑀸𑀴𑀺, 𑀢𑁂𑀲𑀁 𑀬𑀲𑁆𑀫𑀸 𑀲𑀗𑁆𑀖𑁄 𑀧𑀼𑀩𑁆𑀩𑀓𑀸𑀭𑀫𑀭𑀳𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀧𑀞𑀫𑀁 𑀆𑀦𑁂𑀢𑁆𑀯𑀸 𑀏𑀢𑁆𑀣 𑀳𑀼𑀦𑀺𑀢𑀩𑁆𑀩𑀦𑁆𑀢𑀺 𑀧𑀸𑀳𑀯𑀦𑀻𑀬𑁄. 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀯𑀸 𑀆𑀳𑀯𑀦𑀫𑀭𑀳𑀢𑀻𑀢𑀺 𑀧𑀸𑀳𑀯𑀦𑀻𑀬𑁄. 𑀲𑁆𑀯𑀸𑀬𑀫𑀺𑀥 𑀢𑁂𑀦𑁂𑀯 𑀅𑀢𑁆𑀣𑁂𑀦 𑀧𑀸𑀳𑀼𑀦𑁂𑀬𑁆𑀬𑁄𑀢𑀺 𑀯𑀼𑀘𑁆𑀘𑀢𑀺.

𑀤𑀓𑁆𑀔𑀺𑀡𑀸𑀢𑀺 𑀧𑀦 𑀧𑀭𑀮𑁄𑀓𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀤𑀸𑀦𑀁 𑀯𑀼𑀘𑁆𑀘𑀢𑀺. 𑀢𑀁 𑀤𑀓𑁆𑀔𑀺𑀡𑀁 𑀅𑀭𑀳𑀢𑀺, 𑀤𑀓𑁆𑀔𑀺𑀡𑀸𑀬 𑀯𑀸 𑀳𑀺𑀢𑁄 𑀬𑀲𑁆𑀫𑀸 𑀦𑀁 𑀫𑀳𑀧𑁆𑀨𑀮𑀓𑀭𑀡𑀢𑀸𑀬 𑀯𑀺𑀲𑁄𑀥𑁂𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄.

𑀉𑀪𑁄 𑀳𑀢𑁆𑀣𑁂 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀲𑀩𑁆𑀩𑀮𑁄𑀓𑁂𑀦 𑀓𑀬𑀺𑀭𑀫𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀅𑀭𑀳𑀢𑀻𑀢𑀺 𑀅𑀜𑁆𑀚𑀮𑀺𑀓𑀭𑀡𑀻𑀬𑁄.

𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸𑀢𑀺 𑀲𑀩𑁆𑀩𑀮𑁄𑀓𑀲𑁆𑀲 𑀅𑀲𑀤𑀺𑀲𑀁 𑀧𑀼𑀜𑁆𑀜𑀯𑀺𑀭𑀽𑀳𑀦𑀝𑁆𑀞𑀸𑀦𑀁. 𑀬𑀣𑀸 𑀳𑀺 𑀭𑀜𑁆𑀜𑁄 𑀯𑀸 𑀅𑀫𑀘𑁆𑀘𑀲𑁆𑀲 𑀯𑀸 𑀲𑀸𑀮𑀻𑀦𑀁 𑀯𑀸 𑀬𑀯𑀸𑀦𑀁 𑀯𑀸 𑀯𑀺𑀭𑀽𑀳𑀦𑀝𑁆𑀞𑀸𑀦𑀁 𑀭𑀜𑁆𑀜𑁄 𑀲𑀸𑀮𑀺𑀓𑁆𑀔𑁂𑀢𑁆𑀢𑀁 𑀭𑀜𑁆𑀜𑁄 𑀬𑀯𑀓𑁆𑀔𑁂𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀗𑁆𑀖𑁄 𑀲𑀩𑁆𑀩𑀮𑁄𑀓𑀲𑁆𑀲 𑀧𑀼𑀜𑁆𑀜𑀸𑀦𑀁 𑀯𑀺𑀭𑀽𑀳𑀦𑀝𑁆𑀞𑀸𑀦𑀁. 𑀲𑀗𑁆𑀖𑀁 𑀦𑀺𑀲𑁆𑀲𑀸𑀬 𑀳𑀺 𑀮𑁄𑀓𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀳𑀺𑀢𑀲𑀼𑀔𑀲𑀁𑀯𑀢𑁆𑀢𑀦𑀺𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀯𑀺𑀭𑀽𑀳𑀦𑁆𑀢𑀺. 𑀢𑀲𑁆𑀫𑀸 𑀲𑀗𑁆𑀖𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸𑀢𑀺.

𑁧𑁫𑁭. 𑀏𑀯𑀁 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀪𑁂𑀤𑁂 𑀲𑀗𑁆𑀖𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑁄 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀦 𑀤𑁄𑀲…𑀧𑁂… 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀲𑀗𑁆𑀖𑀁 𑀆𑀭𑀩𑁆𑀪𑀸𑀢𑀺 (𑀅. 𑀦𑀺. 𑁬.𑁧𑁦) 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑀲𑁆𑀲 𑀏𑀓𑀓𑁆𑀔𑀡𑁂 𑀛𑀸𑀦𑀗𑁆𑀕𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀗𑁆𑀖𑀕𑀼𑀡𑀸𑀦𑀁 𑀧𑀦 𑀕𑀫𑁆𑀪𑀻𑀭𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀸𑀦𑀼𑀲𑁆𑀲𑀭𑀡𑀸𑀥𑀺𑀫𑀼𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀯𑀸 𑀉𑀧𑀘𑀸𑀭𑀧𑁆𑀧𑀢𑁆𑀢𑀫𑁂𑀯 𑀛𑀸𑀦𑀁 𑀳𑁄𑀢𑀺. 𑀢𑀤𑁂𑀢𑀁 𑀲𑀗𑁆𑀖𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀇𑀫𑀜𑁆𑀘 𑀧𑀦 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀁 𑀅𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀲𑀕𑀸𑀭𑀯𑁄 𑀳𑁄𑀢𑀺 𑀲𑀧𑁆𑀧𑀢𑀺𑀲𑁆𑀲𑁄. 𑀲𑀤𑁆𑀥𑀸𑀤𑀺𑀯𑁂𑀧𑀼𑀮𑁆𑀮𑀁 𑀅𑀥𑀺𑀕𑀘𑁆𑀙𑀢𑀺, 𑀧𑀻𑀢𑀺𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀳𑁄𑀢𑀺, 𑀪𑀬𑀪𑁂𑀭𑀯𑀲𑀳𑁄, 𑀤𑀼𑀓𑁆𑀔𑀸𑀥𑀺𑀯𑀸𑀲𑀦𑀲𑀫𑀢𑁆𑀣𑁄, 𑀲𑀗𑁆𑀖𑁂𑀦 𑀲𑀁𑀯𑀸𑀲𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀲𑀗𑁆𑀖𑀕𑀼𑀡𑀸𑀦𑀼𑀲𑁆𑀲𑀢𑀺𑀬𑀸 𑀅𑀚𑁆𑀛𑀸𑀯𑀼𑀢𑁆𑀣𑀜𑁆𑀘𑀲𑁆𑀲 𑀲𑀭𑀻𑀭𑀁 𑀲𑀦𑁆𑀦𑀺𑀧𑀢𑀺𑀢𑀲𑀗𑁆𑀖𑀫𑀺𑀯 𑀉𑀧𑁄𑀲𑀣𑀸𑀕𑀸𑀭𑀁 𑀧𑀽𑀚𑀸𑀭𑀳𑀁 𑀳𑁄𑀢𑀺, 𑀲𑀗𑁆𑀖𑀕𑀼𑀡𑀸𑀥𑀺𑀕𑀫𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀲𑀫𑀸𑀬𑁄𑀕𑁂 𑀘𑀲𑁆𑀲 𑀲𑀫𑁆𑀫𑀼𑀔𑀸 𑀲𑀗𑁆𑀖𑀁 𑀧𑀲𑁆𑀲𑀢𑁄 𑀯𑀺𑀬 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀧𑀦 𑀲𑀼𑀕𑀢𑀺𑀧𑀭𑀸𑀬𑀦𑁄 𑀳𑁄𑀢𑀺.

𑀢𑀲𑁆𑀫𑀸 𑀳𑀯𑁂 𑀅𑀧𑁆𑀧𑀫𑀸𑀤𑀁, 𑀓𑀬𑀺𑀭𑀸𑀣 𑀲𑀼𑀫𑁂𑀥𑀲𑁄;

𑀏𑀯𑀁 𑀫𑀳𑀸𑀦𑀼𑀪𑀸𑀯𑀸𑀬, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀸 𑀲𑀤𑀸𑀢𑀺.

𑀇𑀤𑀁 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀁 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.