𑁧. 𑀲𑀻𑀮𑀦𑀺𑀤𑁆𑀤𑁂𑀲𑁄

𑀲𑀻𑀮𑀲𑀭𑀽𑀧𑀸𑀤𑀺𑀓𑀣𑀸

𑁬. 𑀏𑀯𑀁 𑀅𑀦𑁂𑀓𑀕𑀼𑀡𑀲𑀗𑁆𑀕𑀸𑀳𑀓𑁂𑀦 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀫𑀼𑀔𑁂𑀦 𑀤𑁂𑀲𑀺𑀢𑁄𑀧𑀺 𑀧𑀦𑁂𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀅𑀢𑀺𑀲𑀗𑁆𑀔𑁂𑀧𑀤𑁂𑀲𑀺𑀢𑁄𑀬𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀦𑀸𑀮𑀁 𑀲𑀩𑁆𑀩𑁂𑀲𑀁 𑀉𑀧𑀓𑀸𑀭𑀸𑀬𑀸𑀢𑀺 𑀯𑀺𑀢𑁆𑀣𑀸𑀭𑀫𑀲𑁆𑀲 𑀤𑀲𑁆𑀲𑁂𑀢𑀼𑀁 𑀲𑀻𑀮𑀁 𑀢𑀸𑀯 𑀆𑀭𑀩𑁆𑀪 𑀇𑀤𑀁 𑀧𑀜𑁆𑀳𑀸𑀓𑀫𑁆𑀫𑀁 𑀳𑁄𑀢𑀺.

𑀓𑀺𑀁 𑀲𑀻𑀮𑀁, 𑀓𑁂𑀦𑀝𑁆𑀞𑁂𑀦 𑀲𑀻𑀮𑀁, 𑀓𑀸𑀦𑀲𑁆𑀲 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺, 𑀓𑀺𑀫𑀸𑀦𑀺𑀲𑀁𑀲𑀁 𑀲𑀻𑀮𑀁, 𑀓𑀢𑀺𑀯𑀺𑀥𑀁 𑀘𑁂𑀢𑀁 𑀲𑀻𑀮𑀁, 𑀓𑁄 𑀘𑀲𑁆𑀲 𑀲𑀁𑀓𑀺𑀮𑁂𑀲𑁄, 𑀓𑀺𑀁 𑀯𑁄𑀤𑀸𑀦𑀦𑁆𑀢𑀺.

𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀓𑀺𑀁 𑀲𑀻𑀮𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀸 𑀯𑀺𑀭𑀫𑀦𑁆𑀢𑀲𑁆𑀲 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸𑀤𑀬𑁄 𑀥𑀫𑁆𑀫𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀓𑀺𑀁 𑀲𑀻𑀮𑀦𑁆𑀢𑀺 𑀘𑁂𑀢𑀦𑀸 𑀲𑀻𑀮𑀁, 𑀘𑁂𑀢𑀲𑀺𑀓𑀁 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮’’𑀦𑁆𑀢𑀺 (𑀧𑀝𑀺. 𑀫. 𑁧.𑁩𑁯). 𑀢𑀢𑁆𑀣 𑀘𑁂𑀢𑀦𑀸 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀸 𑀯𑀺𑀭𑀫𑀦𑁆𑀢𑀲𑁆𑀲 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸. 𑀘𑁂𑀢𑀲𑀺𑀓𑀁 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀯𑀺𑀭𑀢𑀺. 𑀅𑀧𑀺𑀘 𑀘𑁂𑀢𑀦𑀸 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀚𑀳𑀦𑁆𑀢𑀲𑁆𑀲 𑀲𑀢𑁆𑀢 𑀓𑀫𑁆𑀫𑀧𑀣𑀘𑁂𑀢𑀦𑀸. 𑀘𑁂𑀢𑀲𑀺𑀓𑀁 𑀲𑀻𑀮𑀁 𑀦𑀸𑀫 ‘‘𑀅𑀪𑀺𑀚𑁆𑀛𑀁 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁧𑁭) 𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀅𑀦𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀲𑀫𑁆𑀫𑀸𑀤𑀺𑀝𑁆𑀞𑀺𑀥𑀫𑁆𑀫𑀸. 𑀲𑀁𑀯𑀭𑁄 𑀲𑀻𑀮𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀯𑀺𑀥𑁂𑀦 𑀲𑀁𑀯𑀭𑁄 𑀯𑁂𑀤𑀺𑀢𑀩𑁆𑀩𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀲𑀢𑀺𑀲𑀁𑀯𑀭𑁄, 𑀜𑀸𑀡𑀲𑀁𑀯𑀭𑁄, 𑀔𑀦𑁆𑀢𑀺𑀲𑀁𑀯𑀭𑁄, 𑀯𑀻𑀭𑀺𑀬𑀲𑀁𑀯𑀭𑁄𑀢𑀺. 𑀢𑀢𑁆𑀣 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄𑀢𑀺 (𑀯𑀺𑀪. 𑁫𑁧𑁧) 𑀅𑀬𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻𑀢𑀺 (𑀤𑀻. 𑀦𑀺. 𑁧.𑁨𑁧𑁩) 𑀅𑀬𑀁 𑀲𑀢𑀺𑀲𑀁𑀯𑀭𑁄.

𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, (𑀅𑀚𑀺𑀢𑀸𑀢𑀺 𑀪𑀕𑀯𑀸;)

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂𑀢𑀺. (𑀲𑀼. 𑀦𑀺. 𑁧𑁦𑁪𑁧);

𑀅𑀬𑀁 𑀜𑀸𑀡𑀲𑀁𑀯𑀭𑁄. 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. 𑀬𑁄 𑀧𑀦𑀸𑀬𑀁 𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲𑀸𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁪; 𑀅. 𑀦𑀺. 𑁬.𑁫𑁮) 𑀦𑀬𑁂𑀦 𑀆𑀕𑀢𑁄, 𑀅𑀬𑀁 𑀔𑀦𑁆𑀢𑀺𑀲𑀁𑀯𑀭𑁄 𑀦𑀸𑀫. 𑀬𑁄 𑀘𑀸𑀬𑀁 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁬.𑁫𑁮) 𑀦𑀬𑁂𑀦 𑀆𑀕𑀢𑁄, 𑀅𑀬𑀁 𑀯𑀻𑀭𑀺𑀬𑀲𑀁𑀯𑀭𑁄 𑀦𑀸𑀫. 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀧𑀺 𑀏𑀢𑁆𑀣𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. 𑀇𑀢𑀺 𑀅𑀬𑀁 𑀧𑀜𑁆𑀘𑀯𑀺𑀥𑁄𑀧𑀺 𑀲𑀁𑀯𑀭𑁄, 𑀬𑀸 𑀘 𑀧𑀸𑀧𑀪𑀻𑀭𑀼𑀓𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀯𑀢𑁆𑀣𑀼𑀢𑁄 𑀯𑀺𑀭𑀢𑀺, 𑀲𑀩𑁆𑀩𑀫𑁆𑀧𑁂𑀢𑀁 𑀲𑀁𑀯𑀭𑀲𑀻𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀦𑁆𑀢𑀺 𑀲𑀫𑀸𑀤𑀺𑀦𑁆𑀦𑀲𑀻𑀮𑀲𑁆𑀲 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀦𑀢𑀺𑀓𑁆𑀓𑀫𑁄. 𑀇𑀤𑀁 𑀢𑀸𑀯 𑀓𑀺𑀁 𑀲𑀻𑀮𑀦𑁆𑀢𑀺 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁.

𑁭. 𑀅𑀯𑀲𑁂𑀲𑁂𑀲𑀼 𑀓𑁂𑀦𑀝𑁆𑀞𑁂𑀦 𑀲𑀻𑀮𑀦𑁆𑀢𑀺 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁. 𑀓𑀺𑀫𑀺𑀤𑀁 𑀲𑀻𑀮𑀦𑀁 𑀦𑀸𑀫. 𑀲𑀫𑀸𑀥𑀸𑀦𑀁 𑀯𑀸, 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀻𑀮𑁆𑀬𑀯𑀲𑁂𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀢𑀺 𑀅𑀢𑁆𑀣𑁄. 𑀉𑀧𑀥𑀸𑀭𑀡𑀁 𑀯𑀸, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀦𑀯𑀲𑁂𑀦 𑀆𑀥𑀸𑀭𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀏𑀢𑀤𑁂𑀯 𑀳𑁂𑀢𑁆𑀣 𑀅𑀢𑁆𑀣𑀤𑁆𑀯𑀬𑀁 𑀲𑀤𑁆𑀤𑀮𑀓𑁆𑀔𑀡𑀯𑀺𑀤𑀽 𑀅𑀦𑀼𑀚𑀸𑀦𑀦𑁆𑀢𑀺. 𑀅𑀜𑁆𑀜𑁂 𑀧𑀦 𑀲𑀺𑀭𑀝𑁆𑀞𑁄 𑀲𑀻𑀮𑀢𑁆𑀣𑁄, 𑀲𑀻𑀢𑀮𑀝𑁆𑀞𑁄 𑀲𑀻𑀮𑀢𑁆𑀣𑁄𑀢𑀺 𑀏𑀯𑀫𑀸𑀤𑀺𑀦𑀸𑀧𑀺 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺.

𑁮. 𑀇𑀤𑀸𑀦𑀺 𑀓𑀸𑀦𑀲𑁆𑀲 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀻𑀢𑀺 𑀏𑀢𑁆𑀣 𑁋

𑀲𑀻𑀮𑀦𑀁 𑀮𑀓𑁆𑀔𑀡𑀁 𑀢𑀲𑁆𑀲, 𑀪𑀺𑀦𑁆𑀦𑀲𑁆𑀲𑀸𑀧𑀺 𑀅𑀦𑁂𑀓𑀥𑀸;

𑀲𑀦𑀺𑀤𑀲𑁆𑀲𑀦𑀢𑁆𑀢𑀁 𑀭𑀽𑀧𑀲𑁆𑀲, 𑀬𑀣𑀸 𑀪𑀺𑀦𑁆𑀦𑀲𑁆𑀲𑀦𑁂𑀓𑀥𑀸.

𑀬𑀣𑀸 𑀳𑀺 𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀥𑀸 𑀪𑀺𑀦𑁆𑀦𑀲𑁆𑀲𑀸𑀧𑀺 𑀭𑀽𑀧𑀸𑀬𑀢𑀦𑀲𑁆𑀲 𑀲𑀦𑀺𑀤𑀲𑁆𑀲𑀦𑀢𑁆𑀢𑀁 𑀮𑀓𑁆𑀔𑀡𑀁, 𑀦𑀻𑀮𑀸𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑀲𑁆𑀲𑀸𑀧𑀺 𑀲𑀦𑀺𑀤𑀲𑁆𑀲𑀦 𑀪𑀸𑀯𑀸𑀦𑀢𑀺𑀓𑁆𑀓𑀫𑀦𑀢𑁄. 𑀢𑀣𑀸 𑀲𑀻𑀮𑀲𑁆𑀲 𑀘𑁂𑀢𑀦𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀥𑀸 𑀪𑀺𑀦𑁆𑀦𑀲𑁆𑀲𑀸𑀧𑀺 𑀬𑀤𑁂𑀢𑀁 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀫𑀸𑀥𑀸𑀦𑀯𑀲𑁂𑀦 𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀁 𑀲𑀻𑀮𑀦𑀁, 𑀢𑀤𑁂𑀯 𑀮𑀓𑁆𑀔𑀡𑀁, 𑀘𑁂𑀢𑀦𑀸𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑀲𑁆𑀲𑀸𑀧𑀺 𑀲𑀫𑀸𑀥𑀸𑀦𑀧𑀢𑀺𑀝𑁆𑀞𑀸𑀦𑀪𑀸𑀯𑀸𑀦𑀢𑀺𑀓𑁆𑀓𑀫𑀦𑀢𑁄. 𑀏𑀯𑀁 𑀮𑀓𑁆𑀔𑀡𑀲𑁆𑀲 𑀧𑀦𑀲𑁆𑀲 𑁋

𑀤𑀼𑀲𑁆𑀲𑀻𑀮𑁆𑀬𑀯𑀺𑀤𑁆𑀥𑀁𑀲𑀦𑀢𑀸, 𑀅𑀦𑀯𑀚𑁆𑀚𑀕𑀼𑀡𑁄 𑀢𑀣𑀸;

𑀓𑀺𑀘𑁆𑀘𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦, 𑀭𑀲𑁄 𑀦𑀸𑀫 𑀧𑀯𑀼𑀘𑁆𑀘𑀢𑀺.

𑀢𑀲𑁆𑀫𑀸 𑀇𑀤𑀁 𑀲𑀻𑀮𑀁 𑀦𑀸𑀫 𑀓𑀺𑀘𑁆𑀘𑀝𑁆𑀞𑁂𑀦 𑀭𑀲𑁂𑀦 𑀤𑀼𑀲𑁆𑀲𑀻𑀮𑁆𑀬𑀯𑀺𑀤𑁆𑀥𑀁𑀲𑀦𑀭𑀲𑀁, 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀭𑀲𑁂𑀦 𑀅𑀦𑀯𑀚𑁆𑀚𑀭𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑀓𑁆𑀔𑀡𑀸𑀤𑀻𑀲𑀼 𑀳𑀺 𑀓𑀺𑀘𑁆𑀘𑀫𑁂𑀯 𑀲𑀫𑁆𑀧𑀢𑁆𑀢𑀺 𑀯𑀸 𑀭𑀲𑁄𑀢𑀺 𑀯𑀼𑀘𑁆𑀘𑀢𑀺.

𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀢𑀬𑀺𑀤𑀁 𑀢𑀲𑁆𑀲 𑀯𑀺𑀜𑁆𑀜𑀼𑀳𑀺;

𑀑𑀢𑁆𑀢𑀧𑁆𑀧𑀜𑁆𑀘 𑀳𑀺𑀭𑀻 𑀘𑁂𑀯, 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀡𑁆𑀡𑀺𑀢𑀁.

𑀢𑀬𑀺𑀤𑀁 𑀲𑀻𑀮𑀁 𑀓𑀸𑀬𑀲𑁄𑀘𑁂𑀬𑁆𑀬𑀁 𑀯𑀘𑀻𑀲𑁄𑀘𑁂𑀬𑁆𑀬𑀁 𑀫𑀦𑁄𑀲𑁄𑀘𑁂𑀬𑁆𑀬𑀦𑁆𑀢𑀺 (𑀅. 𑀦𑀺. 𑁩.𑁧𑁨𑁧) 𑀏𑀯𑀁 𑀯𑀼𑀢𑁆𑀢𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑁄𑀘𑁂𑀬𑁆𑀬𑀪𑀸𑀯𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀺 𑀕𑀳𑀡𑀪𑀸𑀯𑀁 𑀕𑀘𑁆𑀙𑀢𑀺. 𑀳𑀺𑀭𑁄𑀢𑁆𑀢𑀧𑁆𑀧𑀜𑁆𑀘 𑀧𑀦𑀲𑁆𑀲 𑀯𑀺𑀜𑁆𑀜𑀽𑀳𑀺 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀡𑁆𑀡𑀺𑀢𑀁, 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀳𑀺𑀭𑁄𑀢𑁆𑀢𑀧𑁆𑀧𑁂 𑀳𑀺 𑀲𑀢𑀺 𑀲𑀻𑀮𑀁 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀢𑀺𑀝𑁆𑀞𑀢𑀺 𑀘. 𑀅𑀲𑀢𑀺 𑀦𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀺𑀝𑁆𑀞𑀢𑀻𑀢𑀺. 𑀏𑀯𑀁 𑀲𑀻𑀮𑀲𑁆𑀲 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀻𑀮𑀸𑀦𑀺𑀲𑀁𑀲𑀓𑀣𑀸

𑁯. 𑀓𑀺𑀫𑀸𑀦𑀺𑀲𑀁𑀲𑀁 𑀲𑀻𑀮𑀦𑁆𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀅𑀦𑁂𑀓𑀕𑀼𑀡𑀧𑀝𑀺𑀮𑀸𑀪𑀸𑀦𑀺𑀲𑀁𑀲𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀔𑁄, 𑀆𑀦𑀦𑁆𑀤, 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀦𑀺𑀲𑀁𑀲𑀸𑀦𑀻’’𑀢𑀺 (𑀅. 𑀦𑀺. 𑁧𑁧.𑁧).

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀺𑀫𑁂 𑀕𑀳𑀧𑀢𑀬𑁄 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀓𑀢𑀫𑁂 𑀧𑀜𑁆𑀘? 𑀇𑀥 𑀕𑀳𑀧𑀢𑀬𑁄 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀧𑁆𑀧𑀫𑀸𑀤𑀸𑀥𑀺𑀓𑀭𑀡𑀁 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑀢𑀺, 𑀅𑀬𑀁 𑀧𑀞𑀫𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀧𑀼𑀦 𑀘𑀧𑀭𑀁 𑀕𑀳𑀧𑀢𑀬𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀅𑀬𑀁 𑀤𑀼𑀢𑀺𑀬𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀧𑀼𑀦 𑀘𑀧𑀭𑀁 𑀕𑀳𑀧𑀢𑀬𑁄 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁, 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀅𑀫𑀗𑁆𑀓𑀼𑀪𑀽𑀢𑁄, 𑀅𑀬𑀁 𑀢𑀢𑀺𑀬𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀧𑀼𑀦 𑀘𑀧𑀭𑀁 𑀕𑀳𑀧𑀢𑀬𑁄 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀧𑀼𑀦 𑀘𑀧𑀭𑀁 𑀕𑀳𑀧𑀢𑀬𑁄 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺, 𑀅𑀬𑀁 𑀧𑀜𑁆𑀘𑀫𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬𑀸’’𑀢𑀺 (𑀤𑀻. 𑀦𑀺. 𑁨.𑁧𑁫𑁦; 𑀅. 𑀦𑀺. 𑁫.𑁨𑁧𑁩; 𑀫𑀳𑀸𑀯. 𑁨𑁮𑁫).

𑀅𑀧𑀭𑁂𑀧𑀺 ‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀅𑀲𑁆𑀲𑀁 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁬𑁫) 𑀦𑀬𑁂𑀦 𑀧𑀺𑀬𑀫𑀦𑀸𑀧𑀢𑀸𑀤𑀬𑁄 𑀆𑀲𑀯𑀓𑁆𑀔𑀬𑀧𑀭𑀺𑀬𑁄𑀲𑀸𑀦𑀸 𑀅𑀦𑁂𑀓𑀸 𑀲𑀻𑀮𑀸𑀦𑀺𑀲𑀁𑀲𑀸 𑀯𑀼𑀢𑁆𑀢𑀸. 𑀏𑀯𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀅𑀦𑁂𑀓𑀕𑀼𑀡𑀸𑀦𑀺𑀲𑀁𑀲𑀁 𑀲𑀻𑀮𑀁. 𑀅𑀧𑀺𑀘 𑁋

𑀲𑀸𑀲𑀦𑁂 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀧𑀢𑀺𑀝𑁆𑀞𑀸 𑀦𑀢𑁆𑀣𑀺 𑀬𑀁 𑀯𑀺𑀦𑀸;

𑀆𑀦𑀺𑀲𑀁𑀲𑀧𑀭𑀺𑀘𑁆𑀙𑁂𑀤𑀁, 𑀢𑀲𑁆𑀲 𑀲𑀻𑀮𑀲𑁆𑀲 𑀓𑁄 𑀯𑀤𑁂.

𑀦 𑀕𑀗𑁆𑀕𑀸 𑀬𑀫𑀼𑀦𑀸 𑀘𑀸𑀧𑀺, 𑀲𑀭𑀪𑀽 𑀯𑀸 𑀲𑀭𑀲𑁆𑀯𑀢𑀻;

𑀦𑀺𑀦𑁆𑀦𑀕𑀸 𑀯𑀸𑀘𑀺𑀭𑀯𑀢𑀻, 𑀫𑀳𑀻 𑀯𑀸𑀧𑀺 𑀫𑀳𑀸𑀦𑀤𑀻.

𑀲𑀓𑁆𑀓𑀼𑀡𑀦𑁆𑀢𑀺 𑀯𑀺𑀲𑁄𑀥𑁂𑀢𑀼𑀁, 𑀢𑀁 𑀫𑀮𑀁 𑀇𑀥 𑀧𑀸𑀡𑀺𑀦𑀁;

𑀯𑀺𑀲𑁄𑀥𑀬𑀢𑀺 𑀲𑀢𑁆𑀢𑀸𑀦𑀁, 𑀬𑀁 𑀯𑁂 𑀲𑀻𑀮𑀚𑀮𑀁 𑀫𑀮𑀁.

𑀦 𑀢𑀁 𑀲𑀚𑀮𑀤𑀸 𑀯𑀸𑀢𑀸, 𑀦 𑀘𑀸𑀧𑀺 𑀳𑀭𑀺𑀘𑀦𑁆𑀤𑀦𑀁;

𑀦𑁂𑀯 𑀳𑀸𑀭𑀸 𑀦 𑀫𑀡𑀬𑁄, 𑀦 𑀘𑀦𑁆𑀤𑀓𑀺𑀭𑀡𑀗𑁆𑀓𑀼𑀭𑀸.

𑀲𑀫𑀬𑀦𑁆𑀢𑀻𑀥 𑀲𑀢𑁆𑀢𑀸𑀦𑀁, 𑀧𑀭𑀺𑀴𑀸𑀳𑀁 𑀲𑀼𑀭𑀓𑁆𑀔𑀺𑀢𑀁;

𑀬𑀁 𑀲𑀫𑁂𑀢𑀺 𑀇𑀤𑀁 𑀅𑀭𑀺𑀬𑀁, 𑀲𑀻𑀮𑀁 𑀅𑀘𑁆𑀘𑀦𑁆𑀢𑀲𑀻𑀢𑀮𑀁.

𑀲𑀻𑀮𑀕𑀦𑁆𑀥𑀲𑀫𑁄 𑀕𑀦𑁆𑀥𑁄, 𑀓𑀼𑀢𑁄 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀬𑁄 𑀲𑀫𑀁 𑀅𑀦𑀼𑀯𑀸𑀢𑁂 𑀘, 𑀧𑀝𑀺𑀯𑀸𑀢𑁂 𑀘 𑀯𑀸𑀬𑀢𑀺.

𑀲𑀕𑁆𑀕𑀸𑀭𑁄𑀳𑀡𑀲𑁄𑀧𑀸𑀦𑀁, 𑀅𑀜𑁆𑀜𑀁 𑀲𑀻𑀮𑀲𑀫𑀁 𑀓𑀼𑀢𑁄;

𑀤𑁆𑀯𑀸𑀭𑀁 𑀯𑀸 𑀧𑀦 𑀦𑀺𑀩𑁆𑀩𑀸𑀦, 𑀦𑀕𑀭𑀲𑁆𑀲 𑀧𑀯𑁂𑀲𑀦𑁂.

𑀲𑁄𑀪𑀦𑁆𑀢𑁂𑀯𑀁 𑀦 𑀭𑀸𑀚𑀸𑀦𑁄, 𑀫𑀼𑀢𑁆𑀢𑀸𑀫𑀡𑀺𑀯𑀺𑀪𑀽𑀲𑀺𑀢𑀸;

𑀬𑀣𑀸 𑀲𑁄𑀪𑀦𑁆𑀢𑀺 𑀬𑀢𑀺𑀦𑁄, 𑀲𑀻𑀮𑀪𑀽𑀲𑀦𑀪𑀽𑀲𑀺𑀢𑀸.

𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀪𑀬𑀁, 𑀯𑀺𑀤𑁆𑀥𑀁𑀲𑀬𑀢𑀺 𑀲𑀩𑁆𑀩𑀲𑁄;

𑀚𑀦𑁂𑀢𑀺 𑀓𑀺𑀢𑁆𑀢𑀺𑀳𑀸𑀲𑀜𑁆𑀘, 𑀲𑀻𑀮𑀁 𑀲𑀻𑀮𑀯𑀢𑀁 𑀲𑀤𑀸.

𑀕𑀼𑀡𑀸𑀦𑀁 𑀫𑀽𑀮𑀪𑀽𑀢𑀲𑁆𑀲, 𑀤𑁄𑀲𑀸𑀦𑀁 𑀩𑀮𑀖𑀸𑀢𑀺𑀦𑁄;

𑀇𑀢𑀺 𑀲𑀻𑀮𑀲𑁆𑀲 𑀯𑀺𑀜𑁆𑀜𑁂𑀬𑁆𑀬𑀁, 𑀆𑀦𑀺𑀲𑀁𑀲𑀓𑀣𑀸𑀫𑀼𑀔𑀦𑁆𑀢𑀺.

𑀲𑀻𑀮𑀧𑁆𑀧𑀪𑁂𑀤𑀓𑀣𑀸

𑁧𑁦. 𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 𑀓𑀢𑀺𑀯𑀺𑀥𑀁 𑀘𑁂𑀢𑀁 𑀲𑀻𑀮𑀦𑁆𑀢𑀺, 𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀲𑀩𑁆𑀩𑀫𑁂𑀯 𑀢𑀸𑀯 𑀇𑀤𑀁 𑀲𑀻𑀮𑀁 𑀅𑀢𑁆𑀢𑀦𑁄 𑀲𑀻𑀮𑀦𑀮𑀓𑁆𑀔𑀡𑁂𑀦 𑀏𑀓𑀯𑀺𑀥𑀁.

𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀣𑀸 𑀆𑀪𑀺𑀲𑀫𑀸𑀘𑀸𑀭𑀺𑀓𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀯𑀲𑁂𑀦, 𑀯𑀺𑀭𑀢𑀺𑀅𑀯𑀺𑀭𑀢𑀺𑀯𑀲𑁂𑀦, 𑀦𑀺𑀲𑁆𑀲𑀺𑀢𑀸𑀦𑀺𑀲𑁆𑀲𑀺𑀢𑀯𑀲𑁂𑀦, 𑀓𑀸𑀮𑀧𑀭𑀺𑀬𑀦𑁆𑀢𑀆𑀧𑀸𑀡𑀓𑁄𑀝𑀺𑀓𑀯𑀲𑁂𑀦, 𑀲𑀧𑀭𑀺𑀬𑀦𑁆𑀢𑀸𑀧𑀭𑀺𑀬𑀦𑁆𑀢𑀯𑀲𑁂𑀦, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀘.

𑀢𑀺𑀯𑀺𑀥𑀁 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀯𑀲𑁂𑀦. 𑀢𑀣𑀸 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀯𑀲𑁂𑀦, 𑀧𑀭𑀸𑀫𑀝𑁆𑀞𑀸𑀧𑀭𑀸𑀫𑀝𑁆𑀞𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦, 𑀯𑀺𑀲𑀼𑀤𑁆𑀥𑀸𑀯𑀺𑀲𑀼𑀤𑁆𑀥𑀯𑁂𑀫𑀢𑀺𑀓𑀯𑀲𑁂𑀦, 𑀲𑁂𑀓𑁆𑀔𑀸𑀲𑁂𑀓𑁆𑀔𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀯𑀲𑁂𑀦 𑀘.

𑀘𑀢𑀼𑀩𑁆𑀩𑀺𑀥𑀁 𑀳𑀸𑀦𑀪𑀸𑀕𑀺𑀬𑀞𑀺𑀢𑀺𑀪𑀸𑀕𑀺𑀬𑀯𑀺𑀲𑁂𑀲𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀯𑀲𑁂𑀦. 𑀢𑀣𑀸 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀅𑀦𑀼𑀧𑀲𑀫𑁆𑀧𑀦𑁆𑀦𑀕𑀳𑀝𑁆𑀞𑀲𑀻𑀮𑀯𑀲𑁂𑀦, 𑀧𑀓𑀢𑀺𑀆𑀘𑀸𑀭𑀥𑀫𑁆𑀫𑀢𑀸𑀧𑀼𑀩𑁆𑀩𑀳𑁂𑀢𑀼𑀓𑀲𑀻𑀮𑀯𑀲𑁂𑀦, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀯𑀲𑁂𑀦 𑀘.

𑀧𑀜𑁆𑀘𑀯𑀺𑀥𑀁 𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺𑀯𑀲𑁂𑀦. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀧𑀜𑁆𑀘 𑀲𑀻𑀮𑀸𑀦𑀺 𑁋 𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀅𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀧𑀭𑀺𑀧𑀼𑀡𑁆𑀡𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀅𑀧𑀭𑀸𑀫𑀝𑁆𑀞𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮’’𑀦𑁆𑀢𑀺 (𑀧𑀝𑀺. 𑀫. 𑁧.𑁩𑁭). 𑀢𑀣𑀸 𑀧𑀳𑀸𑀦𑀯𑁂𑀭𑀫𑀡𑀻𑀘𑁂𑀢𑀦𑀸𑀲𑀁𑀯𑀭𑀸𑀯𑀻𑀢𑀺𑀓𑁆𑀓𑀫𑀯𑀲𑁂𑀦.

𑁧𑁧. 𑀢𑀢𑁆𑀣 𑀏𑀓𑀯𑀺𑀥𑀓𑁄𑀝𑁆𑀞𑀸𑀲𑁂 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀯𑀺𑀥𑀓𑁄𑀝𑁆𑀞𑀸𑀲𑁂 𑀬𑀁 𑀪𑀕𑀯𑀢𑀸 ‘‘𑀇𑀤𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀁, 𑀢𑀁 𑀘𑀸𑀭𑀺𑀢𑁆𑀢𑀁. 𑀬𑀁 ‘‘𑀇𑀤𑀁 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀲𑁆𑀲 𑀅𑀓𑀭𑀡𑀁, 𑀢𑀁 𑀯𑀸𑀭𑀺𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄. 𑀘𑀭𑀦𑁆𑀢𑀺 𑀢𑀲𑁆𑀫𑀺𑀁 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀧𑀯𑀢𑁆𑀢𑀦𑁆𑀢𑀻𑀢𑀺 𑀘𑀸𑀭𑀺𑀢𑁆𑀢𑀁. 𑀯𑀸𑀭𑀺𑀢𑀁 𑀢𑀸𑀬𑀦𑁆𑀢𑀺 𑀭𑀓𑁆𑀔𑀦𑁆𑀢𑀺 𑀢𑁂𑀦𑀸𑀢𑀺 𑀯𑀸𑀭𑀺𑀢𑁆𑀢𑀁. 𑀢𑀢𑁆𑀣 𑀲𑀤𑁆𑀥𑀸𑀯𑀻𑀭𑀺𑀬𑀲𑀸𑀥𑀦𑀁 𑀘𑀸𑀭𑀺𑀢𑁆𑀢𑀁, 𑀲𑀤𑁆𑀥𑀸𑀲𑀸𑀥𑀦𑀁 𑀯𑀸𑀭𑀺𑀢𑁆𑀢𑀁. 𑀏𑀯𑀁 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦 𑀤𑀼𑀯𑀺𑀥𑀁.

𑀤𑀼𑀢𑀺𑀬𑀤𑀼𑀓𑁂 𑀅𑀪𑀺𑀲𑀫𑀸𑀘𑀸𑀭𑁄𑀢𑀺 𑀉𑀢𑁆𑀢𑀫𑀲𑀫𑀸𑀘𑀸𑀭𑁄. 𑀅𑀪𑀺𑀲𑀫𑀸𑀘𑀸𑀭𑁄 𑀏𑀯 𑀆𑀪𑀺𑀲𑀫𑀸𑀘𑀸𑀭𑀺𑀓𑀁. 𑀅𑀪𑀺𑀲𑀫𑀸𑀘𑀸𑀭𑀁 𑀯𑀸 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀁, 𑀆𑀚𑀻𑀯𑀝𑁆𑀞𑀫𑀓𑀢𑁄 𑀅𑀯𑀲𑁂𑀲𑀲𑀻𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀸𑀯𑀪𑀽𑀢𑀦𑁆𑀢𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁, 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀜𑁆𑀳𑀺 𑀫𑀕𑁆𑀕𑀲𑁆𑀲 𑀆𑀤𑀺𑀪𑀸𑀯𑀪𑀽𑀢𑀁, 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀧𑀭𑀺𑀲𑁄𑀥𑁂𑀢𑀩𑁆𑀩𑀢𑁄. 𑀢𑁂𑀦𑀸𑀳 𑁋 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁪𑁩𑁧). 𑀬𑀸𑀦𑀺 𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺, 𑀇𑀤𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁. 𑀲𑁂𑀲𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁. 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑀯𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁. 𑀔𑀦𑁆𑀥𑀓𑀯𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀁. 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀬𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁 𑀲𑀫𑁆𑀧𑀚𑁆𑀚𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀥𑀫𑁆𑀫𑀁 𑀅𑀧𑀭𑀺𑀧𑀽𑀭𑁂𑀢𑁆𑀯𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁 𑀥𑀫𑁆𑀫𑀁 𑀧𑀭𑀺𑀧𑀽𑀭𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀅. 𑀦𑀺. 𑁫.𑁨𑁧). 𑀏𑀯𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀯𑀲𑁂𑀦 𑀤𑀼𑀯𑀺𑀥𑀁.

𑀢𑀢𑀺𑀬𑀤𑀼𑀓𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑁂𑀭𑀫𑀡𑀺𑀫𑀢𑁆𑀢𑀁 𑀯𑀺𑀭𑀢𑀺𑀲𑀻𑀮𑀁. 𑀲𑁂𑀲𑀁 𑀘𑁂𑀢𑀦𑀸𑀤𑀺 𑀅𑀯𑀺𑀭𑀢𑀺𑀲𑀻𑀮𑀦𑁆𑀢𑀺 𑀏𑀯𑀁 𑀯𑀺𑀭𑀢𑀺𑀅𑀯𑀺𑀭𑀢𑀺𑀯𑀲𑁂𑀦 𑀤𑀼𑀯𑀺𑀥𑀁.

𑀘𑀢𑀼𑀢𑁆𑀣𑀤𑀼𑀓𑁂 𑀦𑀺𑀲𑁆𑀲𑀬𑁄𑀢𑀺 𑀤𑁆𑀯𑁂 𑀦𑀺𑀲𑁆𑀲𑀬𑀸 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘. 𑀢𑀢𑁆𑀣 𑀬𑀁 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 (𑀤𑀻. 𑀦𑀺. 𑁩.𑁩𑁨𑁦; 𑀫. 𑀦𑀺. 𑁧.𑁧𑁮𑁬; 𑀅. 𑀦𑀺. 𑁫.𑁨𑁦𑁬; 𑁭.𑁫𑁦) 𑀏𑀯𑀁 𑀪𑀯𑀲𑀫𑁆𑀧𑀢𑁆𑀢𑀺𑀁 𑀆𑀓𑀗𑁆𑀔𑀫𑀸𑀦𑁂𑀦 𑀧𑀯𑀢𑁆𑀢𑀺𑀢𑀁, 𑀇𑀤𑀁 𑀢𑀡𑁆𑀳𑀸𑀦𑀺𑀲𑁆𑀲𑀺𑀢𑀁. 𑀬𑀁 ‘‘𑀲𑀻𑀮𑁂𑀦 𑀲𑀼𑀤𑁆𑀥𑀻’’𑀢𑀺 𑀏𑀯𑀁 𑀲𑀼𑀤𑁆𑀥𑀺𑀤𑀺𑀝𑁆𑀞𑀺𑀬𑀸 𑀧𑀯𑀢𑁆𑀢𑀺𑀢𑀁, 𑀇𑀤𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑀁. 𑀬𑀁 𑀧𑀦 𑀮𑁄𑀓𑀼𑀢𑁆𑀢𑀭𑀁 𑀮𑁄𑀓𑀺𑀬𑀜𑁆𑀘 𑀢𑀲𑁆𑀲𑁂𑀯 𑀲𑀫𑁆𑀪𑀸𑀭𑀪𑀽𑀢𑀁, 𑀇𑀤𑀁 𑀅𑀦𑀺𑀲𑁆𑀲𑀺𑀢𑀦𑁆𑀢𑀺 𑀏𑀯𑀁 𑀦𑀺𑀲𑁆𑀲𑀺𑀢𑀸𑀦𑀺𑀲𑁆𑀲𑀺𑀢𑀯𑀲𑁂𑀦 𑀤𑀼𑀯𑀺𑀥𑀁.

𑀧𑀜𑁆𑀘𑀫𑀤𑀼𑀓𑁂 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀁 𑀲𑀻𑀮𑀁 𑀓𑀸𑀮𑀧𑀭𑀺𑀬𑀦𑁆𑀢𑀁. 𑀬𑀸𑀯𑀚𑀻𑀯𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑀣𑁂𑀯 𑀧𑀯𑀢𑁆𑀢𑀺𑀢𑀁 𑀆𑀧𑀸𑀡𑀓𑁄𑀝𑀺𑀓𑀦𑁆𑀢𑀺 𑀏𑀯𑀁 𑀓𑀸𑀮𑀧𑀭𑀺𑀬𑀦𑁆𑀢𑀆𑀧𑀸𑀡𑀓𑁄𑀝𑀺𑀓𑀯𑀲𑁂𑀦 𑀤𑀼𑀯𑀺𑀥𑀁.

𑀙𑀝𑁆𑀞𑀤𑀼𑀓𑁂 𑀮𑀸𑀪𑀬𑀲𑀜𑀸𑀢𑀺𑀅𑀗𑁆𑀕𑀚𑀻𑀯𑀺𑀢𑀯𑀲𑁂𑀦 𑀤𑀺𑀝𑁆𑀞𑀧𑀭𑀺𑀬𑀦𑁆𑀢𑀁 𑀲𑀧𑀭𑀺𑀬𑀦𑁆𑀢𑀁 𑀦𑀸𑀫. 𑀯𑀺𑀧𑀭𑀻𑀢𑀁 𑀅𑀧𑀭𑀺𑀬𑀦𑁆𑀢𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀓𑀢𑀫𑀁 𑀢𑀁 𑀲𑀻𑀮𑀁 𑀲𑀧𑀭𑀺𑀬𑀦𑁆𑀢𑀁? 𑀅𑀢𑁆𑀣𑀺 𑀲𑀻𑀮𑀁 𑀮𑀸𑀪𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀬𑀲𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀜𑀸𑀢𑀺𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀅𑀗𑁆𑀕𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁. 𑀓𑀢𑀫𑀁 𑀢𑀁 𑀲𑀻𑀮𑀁 𑀮𑀸𑀪𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀮𑀸𑀪𑀳𑁂𑀢𑀼 𑀮𑀸𑀪𑀧𑀘𑁆𑀘𑀬𑀸 𑀮𑀸𑀪𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀇𑀤𑀁 𑀢𑀁 𑀲𑀻𑀮𑀁 𑀮𑀸𑀪𑀧𑀭𑀺𑀬𑀦𑁆𑀢’’𑀦𑁆𑀢𑀺 (𑀧𑀝𑀺. 𑀫. 𑁧.𑁩𑁮). 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀇𑀢𑀭𑀸𑀦𑀺𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀅𑀧𑀭𑀺𑀬𑀦𑁆𑀢𑀯𑀺𑀲𑁆𑀲𑀚𑁆𑀚𑀦𑁂𑀧𑀺 𑀯𑀼𑀢𑁆𑀢𑀁 ‘‘𑀓𑀢𑀫𑀁 𑀢𑀁 𑀲𑀻𑀮𑀁 𑀦 𑀮𑀸𑀪𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀮𑀸𑀪𑀳𑁂𑀢𑀼 𑀮𑀸𑀪𑀧𑀘𑁆𑀘𑀬𑀸 𑀮𑀸𑀪𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀓𑀺𑀁 𑀲𑁄 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀢𑀺, 𑀇𑀤𑀁 𑀢𑀁 𑀲𑀻𑀮𑀁 𑀦 𑀮𑀸𑀪𑀧𑀭𑀺𑀬𑀦𑁆𑀢’’𑀦𑁆𑀢𑀺 (𑀧𑀝𑀺. 𑀫. 𑁧.𑁩𑁮). 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀇𑀢𑀭𑀸𑀦𑀺𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀏𑀯𑀁 𑀲𑀧𑀭𑀺𑀬𑀦𑁆𑀢𑀸𑀧𑀭𑀺𑀬𑀦𑁆𑀢𑀯𑀲𑁂𑀦 𑀤𑀼𑀯𑀺𑀥𑀁.

𑀲𑀢𑁆𑀢𑀫𑀤𑀼𑀓𑁂 𑀲𑀩𑁆𑀩𑀫𑁆𑀧𑀺 𑀲𑀸𑀲𑀯𑀁 𑀲𑀻𑀮𑀁 𑀮𑁄𑀓𑀺𑀬𑀁. 𑀅𑀦𑀸𑀲𑀯𑀁 𑀮𑁄𑀓𑀼𑀢𑁆𑀢𑀭𑀁. 𑀢𑀢𑁆𑀣 𑀮𑁄𑀓𑀺𑀬𑀁 𑀪𑀯𑀯𑀺𑀲𑁂𑀲𑀸𑀯𑀳𑀁 𑀳𑁄𑀢𑀺 𑀪𑀯𑀦𑀺𑀲𑁆𑀲𑀭𑀡𑀲𑁆𑀲 𑀘 𑀲𑀫𑁆𑀪𑀸𑀭𑁄. 𑀬𑀣𑀸𑀳 𑁋 ‘‘𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬, 𑀲𑀁𑀯𑀭𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀬, 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀢𑁆𑀣𑀸𑀬, 𑀧𑀸𑀫𑁄𑀚𑁆𑀚𑀁 𑀧𑀻𑀢𑀢𑁆𑀣𑀸𑀬, 𑀧𑀻𑀢𑀺 𑀧𑀲𑁆𑀲𑀤𑁆𑀥𑀢𑁆𑀣𑀸𑀬, 𑀧𑀲𑁆𑀲𑀤𑁆𑀥𑀺 𑀲𑀼𑀔𑀢𑁆𑀣𑀸𑀬, 𑀲𑀼𑀔𑀁 𑀲𑀫𑀸𑀥𑀢𑁆𑀣𑀸𑀬, 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀢𑁆𑀣𑀸𑀬, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀢𑁆𑀣𑀸𑀬, 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀢𑁆𑀣𑀸𑀬, 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬, 𑀏𑀢𑀤𑀢𑁆𑀣𑀸 𑀓𑀣𑀸, 𑀏𑀢𑀤𑀢𑁆𑀣𑀸 𑀫𑀦𑁆𑀢𑀦𑀸, 𑀏𑀢𑀤𑀢𑁆𑀣𑀸 𑀉𑀧𑀦𑀺𑀲𑀸, 𑀏𑀢𑀤𑀢𑁆𑀣𑀁 𑀲𑁄𑀢𑀸𑀯𑀥𑀸𑀦𑀁, 𑀬𑀤𑀺𑀤𑀁 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀭𑀺. 𑁩𑁬𑁬). 𑀮𑁄𑀓𑀼𑀢𑁆𑀢𑀭𑀁 𑀪𑀯𑀦𑀺𑀲𑁆𑀲𑀭𑀡𑀸𑀯𑀳𑀁 𑀳𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀘 𑀪𑀽𑀫𑀻𑀢𑀺 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑀁.

𑁧𑁨. 𑀢𑀺𑀓𑁂𑀲𑀼 𑀧𑀞𑀫𑀢𑁆𑀢𑀺𑀓𑁂 𑀳𑀻𑀦𑁂𑀦 𑀙𑀦𑁆𑀤𑁂𑀦 𑀘𑀺𑀢𑁆𑀢𑁂𑀦 𑀯𑀻𑀭𑀺𑀬𑁂𑀦 𑀯𑀻𑀫𑀁𑀲𑀸𑀬 𑀯𑀸 𑀧𑀯𑀢𑁆𑀢𑀺𑀢𑀁 𑀳𑀻𑀦𑀁. 𑀫𑀚𑁆𑀛𑀺𑀫𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁. 𑀧𑀡𑀻𑀢𑁂𑀳𑀺 𑀧𑀡𑀻𑀢𑀁. 𑀬𑀲𑀓𑀸𑀫𑀢𑀸𑀬 𑀯𑀸 𑀲𑀫𑀸𑀤𑀺𑀦𑁆𑀦𑀁 𑀳𑀻𑀦𑀁. 𑀧𑀼𑀜𑁆𑀜𑀨𑀮𑀓𑀸𑀫𑀢𑀸𑀬 𑀫𑀚𑁆𑀛𑀺𑀫𑀁. 𑀓𑀢𑁆𑀢𑀩𑁆𑀩𑀫𑁂𑀯𑀺𑀤𑀦𑁆𑀢𑀺 𑀅𑀭𑀺𑀬𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀫𑀸𑀤𑀺𑀦𑁆𑀦𑀁 𑀧𑀡𑀻𑀢𑀁. ‘‘𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀇𑀫𑁂 𑀧𑀦𑀜𑁆𑀜𑁂 𑀪𑀺𑀓𑁆𑀔𑀽 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸’’𑀢𑀺 𑀏𑀯𑀁 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀯𑀸 𑀳𑀻𑀦𑀁. 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀁 𑀮𑁄𑀓𑀺𑀬𑀁 𑀲𑀻𑀮𑀁 𑀫𑀚𑁆𑀛𑀺𑀫𑀁. 𑀮𑁄𑀓𑀼𑀢𑁆𑀢𑀭𑀁 𑀧𑀡𑀻𑀢𑀁. 𑀢𑀡𑁆𑀳𑀸𑀯𑀲𑁂𑀦 𑀯𑀸 𑀪𑀯𑀪𑁄𑀕𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀁 𑀳𑀻𑀦𑀁. 𑀅𑀢𑁆𑀢𑀦𑁄 𑀯𑀺𑀫𑁄𑀓𑁆𑀔𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁. 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀺𑀫𑁄𑀓𑁆𑀔𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀁 𑀧𑀸𑀭𑀫𑀺𑀢𑀸𑀲𑀻𑀮𑀁 𑀧𑀡𑀻𑀢𑀦𑁆𑀢𑀺 𑀏𑀯𑀁 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀯𑀲𑁂𑀦 𑀢𑀺𑀯𑀺𑀥𑀁.

𑀤𑀼𑀢𑀺𑀬𑀢𑁆𑀢𑀺𑀓𑁂 𑀅𑀢𑁆𑀢𑀦𑁄 𑀅𑀦𑀦𑀼𑀭𑀽𑀧𑀁 𑀧𑀚𑀳𑀺𑀢𑀼𑀓𑀸𑀫𑁂𑀦 𑀅𑀢𑁆𑀢𑀕𑀭𑀼𑀦𑀸 𑀅𑀢𑁆𑀢𑀦𑀺𑀕𑀸𑀭𑀯𑁂𑀦 𑀧𑀯𑀢𑁆𑀢𑀺𑀢𑀁 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁. 𑀮𑁄𑀓𑀸𑀧𑀯𑀸𑀤𑀁 𑀧𑀭𑀺𑀳𑀭𑀺𑀢𑀼𑀓𑀸𑀫𑁂𑀦 𑀮𑁄𑀓𑀕𑀭𑀼𑀦𑀸 𑀮𑁄𑀓𑁂 𑀕𑀸𑀭𑀯𑁂𑀦 𑀧𑀯𑀢𑁆𑀢𑀺𑀢𑀁 𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀁. 𑀥𑀫𑁆𑀫𑀫𑀳𑀢𑁆𑀢𑀁 𑀧𑀽𑀚𑁂𑀢𑀼𑀓𑀸𑀫𑁂𑀦 𑀥𑀫𑁆𑀫𑀕𑀭𑀼𑀦𑀸 𑀥𑀫𑁆𑀫𑀕𑀸𑀭𑀯𑁂𑀦 𑀧𑀯𑀢𑁆𑀢𑀺𑀢𑀁 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀏𑀯𑀁 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀁.

𑀢𑀢𑀺𑀬𑀢𑁆𑀢𑀺𑀓𑁂 𑀬𑀁 𑀤𑀼𑀓𑁂𑀲𑀼 𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀧𑀭𑀸𑀫𑀝𑁆𑀞𑀢𑁆𑀢𑀸 𑀧𑀭𑀸𑀫𑀝𑁆𑀞𑀁. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀫𑀕𑁆𑀕𑀲𑀫𑁆𑀪𑀸𑀭𑀪𑀽𑀢𑀁 𑀲𑁂𑀓𑁆𑀔𑀸𑀦𑀜𑁆𑀘 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀅𑀧𑀭𑀸𑀫𑀝𑁆𑀞𑀁. 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀨𑀮𑀲𑀫𑁆𑀧𑀬𑀼𑀢𑁆𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀦𑁆𑀢𑀺 𑀏𑀯𑀁 𑀧𑀭𑀸𑀫𑀝𑁆𑀞𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀁.

𑀘𑀢𑀼𑀢𑁆𑀣𑀢𑁆𑀢𑀺𑀓𑁂 𑀬𑀁 𑀆𑀧𑀢𑁆𑀢𑀺𑀁 𑀅𑀦𑀸𑀧𑀚𑁆𑀚𑀦𑁆𑀢𑁂𑀦 𑀧𑀽𑀭𑀺𑀢𑀁, 𑀆𑀧𑀚𑁆𑀚𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀢𑀧𑀝𑀺𑀓𑀫𑁆𑀫𑀁, 𑀢𑀁 𑀯𑀺𑀲𑀼𑀤𑁆𑀥𑀁. 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀲𑁆𑀲 𑀅𑀓𑀢𑀧𑀝𑀺𑀓𑀫𑁆𑀫𑀁 𑀅𑀯𑀺𑀲𑀼𑀤𑁆𑀥𑀁. 𑀯𑀢𑁆𑀣𑀼𑀫𑁆𑀳𑀺 𑀯𑀸 𑀆𑀧𑀢𑁆𑀢𑀺𑀬𑀸 𑀯𑀸 𑀅𑀚𑁆𑀛𑀸𑀘𑀸𑀭𑁂 𑀯𑀸 𑀯𑁂𑀫𑀢𑀺𑀓𑀲𑁆𑀲 𑀲𑀻𑀮𑀁 𑀯𑁂𑀫𑀢𑀺𑀓𑀲𑀻𑀮𑀁 𑀦𑀸𑀫. 𑀢𑀢𑁆𑀣 𑀬𑁄𑀕𑀺𑀦𑀸 𑀅𑀯𑀺𑀲𑀼𑀤𑁆𑀥𑀲𑀻𑀮𑀁 𑀯𑀺𑀲𑁄𑀥𑁂𑀢𑀩𑁆𑀩𑀁, 𑀯𑁂𑀫𑀢𑀺𑀓𑁂 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀁 𑀅𑀓𑀢𑁆𑀯𑀸 𑀯𑀺𑀫𑀢𑀺 𑀧𑀝𑀺𑀯𑀺𑀦𑁂𑀢𑀩𑁆𑀩𑀸 ‘‘𑀇𑀘𑁆𑀘𑀲𑁆𑀲 𑀨𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀯𑀺𑀲𑀼𑀤𑁆𑀥𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀁.

𑀧𑀜𑁆𑀘𑀫𑀢𑁆𑀢𑀺𑀓𑁂 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀢𑀻𑀳𑀺 𑀘 𑀲𑀸𑀫𑀜𑁆𑀜𑀨𑀮𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁 𑀲𑀻𑀮𑀁 𑀲𑁂𑀓𑁆𑀔𑀁. 𑀅𑀭𑀳𑀢𑁆𑀢𑀨𑀮𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑁂𑀓𑁆𑀔𑀁. 𑀲𑁂𑀲𑀁 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀦𑁆𑀢𑀺 𑀏𑀯𑀁 𑀲𑁂𑀓𑁆𑀔𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀁.

𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀧𑀦 𑀬𑀲𑁆𑀫𑀸 𑀮𑁄𑀓𑁂 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀧𑀓𑀢𑀺𑀧𑀺 𑀲𑀻𑀮𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀁 𑀲𑀦𑁆𑀥𑀸𑀬 ‘‘𑀅𑀬𑀁 𑀲𑀼𑀔𑀲𑀻𑀮𑁄, 𑀅𑀬𑀁 𑀤𑀼𑀓𑁆𑀔𑀲𑀻𑀮𑁄, 𑀅𑀬𑀁 𑀓𑀮𑀳𑀲𑀻𑀮𑁄, 𑀅𑀬𑀁 𑀫𑀡𑁆𑀟𑀦𑀲𑀻𑀮𑁄’’𑀢𑀺 𑀪𑀡𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀦 𑀧𑀭𑀺𑀬𑀸𑀬𑁂𑀦 ‘‘𑀢𑀻𑀡𑀺 𑀲𑀻𑀮𑀸𑀦𑀺, 𑀓𑀼𑀲𑀮𑀲𑀻𑀮𑀁 𑀅𑀓𑀼𑀲𑀮𑀲𑀻𑀮𑀁 𑀅𑀩𑁆𑀬𑀸𑀓𑀢𑀲𑀻𑀮𑀦𑁆𑀢𑀺 (𑀧𑀝𑀺. 𑀫. 𑁧.𑁩𑁯). 𑀏𑀯𑀁 𑀓𑀼𑀲𑀮𑀸𑀤𑀺𑀯𑀲𑁂𑀦𑀧𑀺 𑀢𑀺𑀯𑀺𑀥𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀓𑀼𑀲𑀮𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀲𑁆𑀲 𑀲𑀻𑀮𑀲𑁆𑀲 𑀮𑀓𑁆𑀔𑀡𑀸𑀤𑀻𑀲𑀼 𑀏𑀓𑁂𑀦𑀧𑀺 𑀦 𑀲𑀫𑁂𑀢𑀻𑀢𑀺 𑀇𑀥 𑀦 𑀉𑀧𑀦𑀻𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑀲𑁆𑀲 𑀢𑀺𑀯𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁩. 𑀘𑀢𑀼𑀓𑁆𑀓𑁂𑀲𑀼 𑀧𑀞𑀫𑀘𑀢𑀼𑀓𑁆𑀓𑁂 𑁋

𑀬𑁄𑀥 𑀲𑁂𑀯𑀢𑀺 𑀤𑀼𑀲𑁆𑀲𑀻𑀮𑁂, 𑀲𑀻𑀮𑀯𑀦𑁆𑀢𑁂 𑀦 𑀲𑁂𑀯𑀢𑀺;

𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑁂 𑀤𑁄𑀲𑀁, 𑀦 𑀧𑀲𑁆𑀲𑀢𑀺 𑀅𑀯𑀺𑀤𑁆𑀤𑀲𑀼.

𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀩𑀳𑀼𑀮𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦 𑀭𑀓𑁆𑀔𑀢𑀺;

𑀏𑀯𑀭𑀽𑀧𑀲𑁆𑀲 𑀯𑁂 𑀲𑀻𑀮𑀁, 𑀚𑀸𑀬𑀢𑁂 𑀳𑀸𑀦𑀪𑀸𑀕𑀺𑀬𑀁.

𑀬𑁄 𑀧𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀇𑀥;

𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀫𑁆𑀳𑀺, 𑀦 𑀉𑀧𑁆𑀧𑀸𑀤𑁂𑀢𑀺 𑀫𑀸𑀦𑀲𑀁.

𑀢𑀼𑀝𑁆𑀞𑀲𑁆𑀲 𑀲𑀻𑀮𑀫𑀢𑁆𑀢𑁂𑀦, 𑀅𑀖𑀝𑀦𑁆𑀢𑀲𑁆𑀲 𑀉𑀢𑁆𑀢𑀭𑀺;

𑀢𑀲𑁆𑀲 𑀢𑀁 𑀞𑀺𑀢𑀺𑀪𑀸𑀕𑀺𑀬𑀁, 𑀲𑀻𑀮𑀁 𑀪𑀯𑀢𑀺 𑀪𑀺𑀓𑁆𑀔𑀼𑀦𑁄.

𑀲𑀫𑁆𑀧𑀦𑁆𑀦𑀲𑀻𑀮𑁄 𑀖𑀝𑀢𑀺, 𑀲𑀫𑀸𑀥𑀢𑁆𑀣𑀸𑀬 𑀬𑁄 𑀧𑀦;

𑀯𑀺𑀲𑁂𑀲𑀪𑀸𑀕𑀺𑀬𑀁 𑀲𑀻𑀮𑀁, 𑀳𑁄𑀢𑀺 𑀏𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀅𑀢𑀼𑀝𑁆𑀞𑁄 𑀲𑀻𑀮𑀫𑀢𑁆𑀢𑁂𑀦, 𑀦𑀺𑀩𑁆𑀩𑀺𑀤𑀁 𑀬𑁄𑀦𑀼𑀬𑀼𑀜𑁆𑀚𑀢𑀺;

𑀳𑁄𑀢𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁, 𑀲𑀻𑀮𑀫𑁂𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺.

𑀏𑀯𑀁 𑀳𑀸𑀦𑀪𑀸𑀕𑀺𑀬𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁.

𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺, 𑀬𑀸𑀦𑀺 𑀘 𑀦𑁂𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀜𑁆𑀜𑀢𑁆𑀢𑀺𑀢𑁄 𑀭𑀓𑁆𑀔𑀺𑀢𑀩𑁆𑀩𑀸𑀦𑀺, 𑀇𑀤𑀁 𑀪𑀺𑀓𑁆𑀔𑀼𑀲𑀻𑀮𑀁. 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺, 𑀬𑀸𑀦𑀺 𑀘 𑀢𑀸𑀲𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀜𑀢𑁆𑀢𑀺𑀢𑁄 𑀭𑀓𑁆𑀔𑀺𑀢𑀩𑁆𑀩𑀸𑀦𑀺, 𑀇𑀤𑀁 𑀪𑀺𑀓𑁆𑀔𑀼𑀦𑀺𑀲𑀻𑀮𑀁. 𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀻𑀦𑀁 𑀤𑀲𑀲𑀻𑀮𑀸𑀦𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀻𑀮𑀁. 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀦𑀁 𑀦𑀺𑀘𑁆𑀘𑀲𑀻𑀮𑀯𑀲𑁂𑀦 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀸𑀦𑀺, 𑀲𑀢𑀺 𑀯𑀸 𑀉𑀲𑁆𑀲𑀸𑀳𑁂 𑀤𑀲, 𑀉𑀧𑁄𑀲𑀣𑀗𑁆𑀕𑀯𑀲𑁂𑀦 𑀅𑀝𑁆𑀞𑀸𑀢𑀺 𑀇𑀤𑀁 𑀕𑀳𑀝𑁆𑀞𑀲𑀻𑀮𑀦𑁆𑀢𑀺 𑀏𑀯𑀁 𑀪𑀺𑀓𑁆𑀔𑀼𑀲𑀻𑀮𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁.

𑀢𑀢𑀺𑀬𑀘𑀢𑀼𑀓𑁆𑀓𑁂 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑁄 𑀧𑀓𑀢𑀺𑀲𑀻𑀮𑀁. 𑀓𑀼𑀮𑀤𑁂𑀲𑀧𑀸𑀲𑀡𑁆𑀟𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀭𑀺𑀬𑀸𑀤𑀸𑀘𑀸𑀭𑀺𑀢𑁆𑀢𑀁 𑀆𑀘𑀸𑀭𑀲𑀻𑀮𑀁. ‘‘𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺 𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀧𑀼𑀭𑀺𑀲𑁂𑀲𑀼 𑀫𑀸𑀦𑀲𑀁 𑀉𑀧𑁆𑀧𑀚𑁆𑀚𑀺 𑀓𑀸𑀫𑀕𑀼𑀡𑀽𑀧𑀲𑀁𑀳𑀺𑀢’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀲𑀻𑀮𑀁 𑀥𑀫𑁆𑀫𑀢𑀸𑀲𑀻𑀮𑀁. 𑀫𑀳𑀸𑀓𑀲𑁆𑀲𑀧𑀸𑀤𑀻𑀦𑀁 𑀧𑀦 𑀲𑀼𑀤𑁆𑀥𑀲𑀢𑁆𑀢𑀸𑀦𑀁, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼 𑀲𑀻𑀮𑀁 𑀧𑀼𑀩𑁆𑀩𑀳𑁂𑀢𑀼𑀓𑀲𑀻𑀮𑀦𑁆𑀢𑀺 𑀏𑀯𑀁 𑀧𑀓𑀢𑀺𑀲𑀻𑀮𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁.

𑀘𑀢𑀼𑀢𑁆𑀣𑀘𑀢𑀼𑀓𑁆𑀓𑁂 𑀬𑀁 𑀪𑀕𑀯𑀢𑀸 ‘‘𑀇𑀥 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽’’𑀢𑀺 (𑀯𑀺𑀪. 𑁫𑁦𑁮; 𑀤𑀻. 𑀦𑀺. 𑁧.𑁧𑁯𑁩) 𑀯𑀁 𑀯𑀼𑀢𑁆𑀢𑀁 𑀲𑀻𑀮𑀁, 𑀇𑀤𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀦𑀸𑀫. 𑀬𑀁 𑀧𑀦 ‘‘𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻, 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻…𑀧𑁂… 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁧.𑁨𑁨, 𑁪𑁧𑁧; 𑀤𑀻. 𑀦𑀺. 𑁧.𑁨𑁧𑁩; 𑀅. 𑀦𑀺. 𑁪.𑁧𑁯𑁮) 𑀯𑀼𑀢𑁆𑀢𑀁, 𑀇𑀤𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁. 𑀬𑀸 𑀧𑀦 𑀆𑀚𑀻𑀯𑀳𑁂𑀢𑀼𑀧𑀜𑁆𑀜𑀢𑁆𑀢𑀸𑀦𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀻𑀢𑀺𑀓𑁆𑀓𑀫𑀲𑁆𑀲, ‘‘𑀓𑀼𑀳𑀦𑀸 𑀮𑀧𑀦𑀸 𑀦𑁂𑀫𑀺𑀢𑁆𑀢𑀺𑀓𑀢𑀸 𑀦𑀺𑀧𑁆𑀧𑁂𑀲𑀺𑀓𑀢𑀸 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸’’𑀢𑀺 𑀏𑀯𑀫𑀸𑀤𑀻𑀦𑀜𑁆𑀘 𑀧𑀸𑀧𑀥𑀫𑁆𑀫𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀸 𑀫𑀺𑀘𑁆𑀙𑀸𑀚𑀻𑀯𑀸 𑀯𑀺𑀭𑀢𑀺, 𑀇𑀤𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀺, 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮) 𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀧𑀝𑀺𑀲𑀗𑁆𑀔𑀸𑀦𑀧𑀭𑀺𑀲𑀼𑀤𑁆𑀥𑁄 𑀘𑀢𑀼𑀧𑀘𑁆𑀘𑀬𑀧𑀭𑀺𑀪𑁄𑀕𑁄 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀦𑀸𑀫.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁

𑁧𑁪. 𑀢𑀢𑁆𑀭𑀸𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸𑀬 𑀲𑀤𑁆𑀥𑀺𑀁 𑀯𑀺𑀦𑀺𑀘𑁆𑀙𑀬𑀓𑀣𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀪𑀺𑀓𑁆𑀔𑀽𑀢𑀺 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀡𑀢𑀸𑀬 𑀯𑀸 𑀪𑀺𑀦𑁆𑀦𑀧𑀝𑀥𑀭𑀸𑀤𑀺𑀢𑀸𑀬 𑀯𑀸 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑁄 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀓𑀼𑀮𑀧𑀼𑀢𑁆𑀢𑁄. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀏𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀲𑀻𑀮𑀁. 𑀢𑀜𑁆𑀳𑀺 𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑀬𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀺, 𑀢𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀁𑀯𑀭𑀡𑀁 𑀲𑀁𑀯𑀭𑁄, 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄, 𑀉𑀧𑀕𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀻𑀦𑀫𑀢𑁆𑀣𑁄 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺 𑀅𑀢𑁆𑀣𑀺 𑀆𑀘𑀸𑀭𑁄, 𑀅𑀢𑁆𑀣𑀺 𑀅𑀦𑀸𑀘𑀸𑀭𑁄;

𑀢𑀢𑁆𑀣 𑀓𑀢𑀫𑁄 𑀅𑀦𑀸𑀘𑀸𑀭𑁄? 𑀓𑀸𑀬𑀺𑀓𑁄 𑀯𑀻𑀢𑀺𑀓𑁆𑀓𑀫𑁄 𑀯𑀸𑀘𑀲𑀺𑀓𑁄 𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀯𑀻𑀢𑀺𑀓𑁆𑀓𑀫𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀦𑀸𑀘𑀸𑀭𑁄. 𑀲𑀩𑁆𑀩𑀫𑁆𑀧𑀺 𑀤𑀼𑀲𑁆𑀲𑀻𑀮𑁆𑀬𑀁 𑀅𑀦𑀸𑀘𑀸𑀭𑁄. 𑀇𑀥𑁂𑀓𑀘𑁆𑀘𑁄 𑀯𑁂𑀴𑀼𑀤𑀸𑀦𑁂𑀦 𑀯𑀸 𑀧𑀢𑁆𑀢𑀤𑀸𑀦𑁂𑀦 𑀯𑀸 𑀧𑀼𑀧𑁆𑀨𑀨𑀮𑀲𑀺𑀦𑀸𑀦𑀤𑀦𑁆𑀢𑀓𑀝𑁆𑀞𑀤𑀸𑀦𑁂𑀦 𑀯𑀸 𑀘𑀸𑀝𑀼𑀓𑀫𑁆𑀬𑀢𑀸𑀬 𑀯𑀸 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀬 𑀯𑀸 𑀧𑀸𑀭𑀺𑀪𑀝𑁆𑀬𑀢𑀸𑀬 𑀯𑀸 𑀚𑀗𑁆𑀖𑀧𑁂𑀲𑀦𑀺𑀓𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑁂𑀦 𑀫𑀺𑀘𑁆𑀙𑀸𑀆𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀦𑀸𑀘𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀆𑀘𑀸𑀭𑁄? 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀘𑀸𑀭𑁄. 𑀲𑀩𑁆𑀩𑁄𑀧𑀺 𑀲𑀻𑀮𑀲𑀁𑀯𑀭𑁄 𑀆𑀘𑀸𑀭𑁄. 𑀇𑀥𑁂𑀓𑀘𑁆𑀘𑁄 𑀦 𑀯𑁂𑀴𑀼𑀤𑀸𑀦𑁂𑀦 𑀯𑀸 𑀦 𑀧𑀢𑁆𑀢𑀦 𑀧𑀼𑀧𑁆𑀨𑀦 𑀨𑀮𑀦 𑀲𑀺𑀦𑀸𑀦𑀦 𑀤𑀦𑁆𑀢𑀓𑀝𑁆𑀞𑀤𑀸𑀦𑁂𑀦 𑀯𑀸 𑀦 𑀘𑀸𑀝𑀼𑀓𑀫𑁆𑀬𑀢𑀸𑀬 𑀯𑀸 𑀦 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀬 𑀯𑀸 𑀦 𑀧𑀸𑀭𑀺𑀪𑀝𑁆𑀬𑀢𑀸𑀬 𑀯𑀸 𑀦 𑀚𑀗𑁆𑀖𑀧𑁂𑀲𑀦𑀺𑀓𑁂𑀦 𑀯𑀸 𑀦 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑁂𑀦 𑀫𑀺𑀘𑁆𑀙𑀸𑀆𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀘𑀸𑀭𑁄.

𑀕𑁄𑀘𑀭𑁄𑀢𑀺 𑀅𑀢𑁆𑀣𑀺 𑀕𑁄𑀘𑀭𑁄 𑀅𑀢𑁆𑀣𑀺 𑀅𑀕𑁄𑀘𑀭𑁄.

𑀢𑀢𑁆𑀣 𑀓𑀢𑀫𑁄 𑀅𑀕𑁄𑀘𑀭𑁄? 𑀇𑀥𑁂𑀓𑀘𑁆𑀘𑁄 𑀯𑁂𑀲𑀺𑀬𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺 𑀯𑀺𑀥𑀯𑀸, 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸, 𑀧𑀡𑁆𑀟𑀓, 𑀪𑀺𑀓𑁆𑀔𑀼𑀦𑀻, 𑀧𑀸𑀦𑀸𑀕𑀸𑀭𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦, 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀓𑀼𑀮𑀸𑀦𑀺 𑀅𑀲𑁆𑀲𑀤𑁆𑀥𑀸𑀦𑀺 𑀅𑀧𑁆𑀧𑀲𑀦𑁆𑀦𑀸𑀦𑀺 𑀅𑀦𑁄𑀧𑀸𑀦𑀪𑀽𑀢𑀸𑀦𑀺 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑀸𑀦𑀺 𑀅𑀦𑀢𑁆𑀣𑀓𑀸𑀫𑀸𑀦𑀺 𑀅𑀳𑀺𑀢𑀓𑀸𑀫𑀸𑀦𑀺 𑀅𑀨𑀸𑀲𑀼𑀓𑀓𑀸𑀫𑀸𑀦𑀺 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀦𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀢𑀣𑀸𑀭𑀽𑀧𑀸𑀦𑀺 𑀓𑀼𑀮𑀸𑀦𑀺 𑀲𑁂𑀯𑀢𑀺 𑀪𑀚𑀢𑀺 𑀧𑀬𑀺𑀭𑀼𑀧𑀸𑀲𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀕𑁄𑀘𑀭𑁄.

𑀢𑀢𑁆𑀣 𑀓𑀢𑀫𑁄 𑀕𑁄𑀘𑀭𑁄? 𑀇𑀥𑁂𑀓𑀘𑁆𑀘𑁄 𑀦 𑀯𑁂𑀲𑀺𑀬𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺…𑀧𑁂… 𑀦 𑀧𑀸𑀦𑀸𑀕𑀸𑀭𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀅𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀭𑀸𑀚𑀽𑀳𑀺…𑀧𑁂… 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦, 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀓𑀼𑀮𑀸𑀦𑀺 𑀲𑀤𑁆𑀥𑀸𑀦𑀺 𑀧𑀲𑀦𑁆𑀦𑀸𑀦𑀺 𑀑𑀧𑀸𑀦𑀪𑀽𑀢𑀸𑀦𑀺 𑀓𑀸𑀲𑀸𑀯𑀧𑀚𑁆𑀚𑁄𑀢𑀸𑀦𑀺 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀸𑀦𑀺 𑀅𑀢𑁆𑀣𑀓𑀸𑀫𑀸𑀦𑀺…𑀧𑁂… 𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀦𑀺 𑀪𑀺𑀓𑁆𑀔𑀽𑀦𑀁…𑀧𑁂… 𑀉𑀧𑀸𑀲𑀺𑀓𑀸𑀦𑀁, 𑀢𑀣𑀸𑀭𑀽𑀧𑀸𑀦𑀺 𑀓𑀼𑀮𑀸𑀦𑀺 𑀲𑁂𑀯𑀢𑀺 𑀪𑀚𑀢𑀺 𑀧𑀬𑀺𑀭𑀼𑀧𑀸𑀲𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀕𑁄𑀘𑀭𑁄. 𑀇𑀢𑀺 𑀇𑀫𑀺𑀦𑀸 𑀘 𑀆𑀘𑀸𑀭𑁂𑀦 𑀇𑀫𑀺𑀦𑀸 𑀘 𑀕𑁄𑀘𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺 (𑀯𑀺𑀪. 𑁫𑁧𑁧).

𑀅𑀧𑀺 𑀘𑁂𑀢𑁆𑀣 𑀇𑀫𑀺𑀦𑀸𑀧𑀺 𑀦𑀬𑁂𑀦 𑀆𑀘𑀸𑀭𑀕𑁄𑀘𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀯𑀺𑀥𑁄 𑀳𑀺 𑀅𑀦𑀸𑀘𑀸𑀭𑁄 𑀓𑀸𑀬𑀺𑀓𑁄 𑀯𑀸𑀘𑀲𑀺𑀓𑁄 𑀘. 𑀢𑀢𑁆𑀣 𑀓𑀢𑀫𑁄 𑀓𑀸𑀬𑀺𑀓𑁄 𑀅𑀦𑀸𑀘𑀸𑀭𑁄? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀕𑀢𑁄𑀧𑀺 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀧𑀼𑀭𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀉𑀘𑁆𑀘𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺, 𑀲𑀲𑀻𑀲𑀫𑁆𑀧𑀺 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺, 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀳𑀦𑀸𑀦𑀁 𑀘𑀗𑁆𑀓𑀫𑀦𑁆𑀢𑀸𑀦𑀁 𑀲𑀉𑀧𑀸𑀳𑀦𑁄 𑀘𑀗𑁆𑀓𑀫𑀢𑀺, 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑀸𑀦𑀁 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀢𑀺, 𑀙𑀫𑀸𑀬 𑀘𑀗𑁆𑀓𑀫𑀦𑁆𑀢𑀸𑀦𑀁 𑀘𑀗𑁆𑀓𑀫𑁂 𑀘𑀗𑁆𑀓𑀫𑀢𑀺, 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚𑀸𑀧𑀺 𑀢𑀺𑀝𑁆𑀞𑀢𑀺, 𑀅𑀦𑀼𑀧𑀔𑀚𑁆𑀚𑀸𑀧𑀺 𑀦𑀺𑀲𑀻𑀤𑀢𑀺, 𑀦𑀯𑁂𑀧𑀺 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀚𑀦𑁆𑀢𑀸𑀖𑀭𑁂𑀧𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀸𑀧𑀼𑀘𑁆𑀙𑀸 𑀓𑀝𑁆𑀞𑀁 𑀧𑀓𑁆𑀔𑀺𑀧𑀢𑀺, 𑀤𑁆𑀯𑀸𑀭𑀁 𑀧𑀺𑀤𑀳𑀢𑀺, 𑀉𑀤𑀓𑀢𑀺𑀢𑁆𑀣𑁂𑀧𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀑𑀢𑀭𑀢𑀺, 𑀧𑀼𑀭𑀢𑁄𑀧𑀺 𑀑𑀢𑀭𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑁆𑀳𑀸𑀬𑀢𑀺, 𑀧𑀼𑀭𑀢𑁄𑀧𑀺 𑀦𑁆𑀳𑀸𑀬𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀉𑀢𑁆𑀢𑀭𑀢𑀺, 𑀧𑀼𑀭𑀢𑁄𑀧𑀺 𑀉𑀢𑁆𑀢𑀭𑀢𑀺, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑁄𑀧𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀕𑀘𑁆𑀙𑀢𑀺, 𑀧𑀼𑀭𑀢𑁄𑀧𑀺 𑀕𑀘𑁆𑀙𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀢𑀺, 𑀬𑀸𑀦𑀺𑀧𑀺 𑀢𑀸𑀦𑀺 𑀳𑁄𑀦𑁆𑀢𑀺 𑀓𑀼𑀮𑀸𑀦𑀁 𑀑𑀯𑀭𑀓𑀸𑀦𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘 𑀬𑀢𑁆𑀣 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄 𑀦𑀺𑀲𑀻𑀤𑀦𑁆𑀢𑀺, 𑀢𑀢𑁆𑀣𑀧𑀺 𑀲𑀳𑀲𑀸 𑀧𑀯𑀺𑀲𑀢𑀺, 𑀓𑀼𑀫𑀸𑀭𑀓𑀲𑁆𑀲𑀧𑀺 𑀲𑀻𑀲𑀁 𑀧𑀭𑀸𑀫𑀲𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀬𑀺𑀓𑁄 𑀅𑀦𑀸𑀘𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀯𑀸𑀘𑀲𑀺𑀓𑁄 𑀅𑀦𑀸𑀘𑀸𑀭𑁄? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀕𑀢𑁄𑀧𑀺 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀸𑀧𑀼𑀘𑁆𑀙𑀸 𑀥𑀫𑁆𑀫𑀁 𑀪𑀡𑀢𑀺. 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄𑀧𑀺 𑀇𑀢𑁆𑀣𑀺𑀁 𑀯𑀸 𑀓𑀼𑀫𑀸𑀭𑀺𑀁 𑀯𑀸 𑀏𑀯𑀫𑀸𑀳 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁂 𑀇𑀢𑁆𑀣𑀁𑀕𑁄𑀢𑁆𑀢𑁂 𑀓𑀺𑀁 𑀅𑀢𑁆𑀣𑀺, 𑀬𑀸𑀕𑀼 𑀅𑀢𑁆𑀣𑀺, 𑀪𑀢𑁆𑀢𑀁 𑀅𑀢𑁆𑀣𑀺, 𑀔𑀸𑀤𑀦𑀻𑀬𑀁 𑀅𑀢𑁆𑀣𑀺, 𑀓𑀺𑀁 𑀧𑀺𑀯𑀺𑀲𑁆𑀲𑀸𑀫, 𑀓𑀺𑀁 𑀔𑀸𑀤𑀺𑀲𑁆𑀲𑀸𑀫, 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫. 𑀓𑀺𑀁 𑀯𑀸 𑀫𑁂 𑀤𑀲𑁆𑀲𑀣𑀸’’𑀢𑀺 𑀯𑀺𑀧𑁆𑀧𑀮𑀧𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀸𑀘𑀲𑀺𑀓𑁄 𑀅𑀦𑀸𑀘𑀸𑀭𑁄 (𑀫𑀳𑀸𑀦𑀺. 𑁮𑁭). 𑀧𑀝𑀺𑀧𑀓𑁆𑀔𑀯𑀲𑁂𑀦 𑀧𑀦𑀲𑁆𑀲 𑀆𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘 𑀪𑀺𑀓𑁆𑀔𑀼 𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀲𑀓𑁆𑀓𑀘𑁆𑀘𑀓𑀸𑀭𑀻 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀘𑀸𑀭𑁄. 𑀏𑀯𑀁 𑀢𑀸𑀯 𑀆𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀕𑁄𑀘𑀭𑁄 𑀧𑀦 𑀢𑀺𑀯𑀺𑀥𑁄 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄 𑀆𑀭𑀓𑁆𑀔𑀕𑁄𑀘𑀭𑁄 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄𑀢𑀺. 𑀢𑀢𑁆𑀣 𑀓𑀢𑀫𑁄 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄? 𑀤𑀲𑀓𑀣𑀸𑀯𑀢𑁆𑀣𑀼𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄, 𑀬𑀁 𑀦𑀺𑀲𑁆𑀲𑀸𑀬 𑀅𑀲𑁆𑀲𑀼𑀢𑀁 𑀲𑀼𑀡𑀸𑀢𑀺, 𑀲𑀼𑀢𑀁 𑀧𑀭𑀺𑀬𑁄𑀤𑀧𑁂𑀢𑀺, 𑀓𑀗𑁆𑀔𑀁 𑀯𑀺𑀢𑀭𑀢𑀺, 𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀢𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺. 𑀬𑀲𑁆𑀲 𑀯𑀸 𑀧𑀦 𑀅𑀦𑀼𑀲𑀺𑀓𑁆𑀔𑀫𑀸𑀦𑁄 𑀲𑀤𑁆𑀥𑀸𑀬 𑀯𑀟𑁆𑀠𑀢𑀺, 𑀲𑀻𑀮𑁂𑀦, 𑀲𑀼𑀢𑁂𑀦, 𑀘𑀸𑀕𑁂𑀦, 𑀧𑀜𑁆𑀜𑀸𑀬 𑀯𑀟𑁆𑀠𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄.

𑀓𑀢𑀫𑁄 𑀆𑀭𑀓𑁆𑀔𑀕𑁄𑀘𑀭𑁄? 𑀇𑀥 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀬𑀼𑀕𑀫𑀢𑁆𑀢𑀤𑀲𑁆𑀲𑀸𑀯𑀻 𑀲𑀼𑀲𑀁𑀯𑀼𑀢𑁄 𑀕𑀘𑁆𑀙𑀢𑀺, 𑀦 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀲𑁆𑀲𑀁, 𑀦 𑀭𑀣𑀁, 𑀦 𑀧𑀢𑁆𑀢𑀺𑀁, 𑀦 𑀇𑀢𑁆𑀣𑀺𑀁, 𑀦 𑀧𑀼𑀭𑀺𑀲𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀦𑁆𑀢𑁄, 𑀦 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄, 𑀦 𑀤𑀺𑀲𑀸𑀯𑀺𑀤𑀺𑀲𑀁 𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀭𑀓𑁆𑀔𑀕𑁄𑀘𑀭𑁄.

𑀓𑀢𑀫𑁄 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀢𑁆𑀣 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄? 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 (𑀲𑀁. 𑀦𑀺. 𑁫.𑁩𑁭𑁨), 𑀅𑀬𑀁 𑀯𑀼𑀘𑁆𑀘𑀢𑀺 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄. 𑀇𑀢𑀺 𑀇𑀫𑀺𑀦𑀸 𑀘 𑀆𑀘𑀸𑀭𑁂𑀦 𑀇𑀫𑀺𑀦𑀸 𑀘 𑀕𑁄𑀘𑀭𑁂𑀦 𑀉𑀧𑁂𑀢𑁄…𑀧𑁂… 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺.

𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀢𑀺 𑀅𑀡𑀼𑀧𑁆𑀧𑀫𑀸𑀡𑁂𑀲𑀼 𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀲𑁂𑀔𑀺𑀬𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀦𑀲𑀻𑀮𑁄. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀬𑀁𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀲𑀫𑁆𑀫𑀸 𑀆𑀤𑀸𑀬 𑀲𑀺𑀓𑁆𑀔𑀢𑀺. 𑀏𑀢𑁆𑀣 𑀘 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺 𑀏𑀢𑁆𑀢𑀸𑀯𑀢𑀸 𑀘 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀤𑀲𑁆𑀲𑀺𑀢𑀁. ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺 𑀧𑀦 𑀲𑀩𑁆𑀩𑀁 𑀬𑀣𑀸𑀧𑀝𑀺𑀧𑀦𑁆𑀦𑀲𑁆𑀲 𑀢𑀁 𑀲𑀻𑀮𑀁 𑀲𑀫𑁆𑀧𑀚𑁆𑀚𑀢𑀺, 𑀢𑀁 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁

𑁧𑁫. 𑀬𑀁 𑀧𑀦𑁂𑀢𑀁 𑀢𑀤𑀦𑀦𑁆𑀢𑀭𑀁 ‘‘𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀲𑁆𑀲𑀺𑀢𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁, 𑀢𑀢𑁆𑀣 𑀲𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂 𑀞𑀺𑀢𑁄 𑀪𑀺𑀓𑁆𑀔𑀼. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀓𑀸𑀭𑀡𑀯𑀲𑁂𑀦 𑀘𑀓𑁆𑀔𑀽𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀦 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸. 𑀧𑁄𑀭𑀸𑀡𑀸 𑀧𑀦𑀸𑀳𑀼 ‘‘𑀘𑀓𑁆𑀔𑀼 𑀭𑀽𑀧𑀁 𑀦 𑀧𑀲𑁆𑀲𑀢𑀺, 𑀅𑀘𑀺𑀢𑁆𑀢𑀓𑀢𑁆𑀢𑀸, 𑀘𑀺𑀢𑁆𑀢𑀁 𑀦 𑀧𑀲𑁆𑀲𑀢𑀺, 𑀅𑀘𑀓𑁆𑀔𑀼𑀓𑀢𑁆𑀢𑀸, 𑀤𑁆𑀯𑀸𑀭𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑁂 𑀧𑀦 𑀘𑀓𑁆𑀔𑀼𑀧𑀲𑀸𑀤𑀯𑀢𑁆𑀣𑀼𑀓𑁂𑀦 𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺. 𑀈𑀤𑀺𑀲𑀻 𑀧𑀦𑁂𑀲𑀸 ‘𑀥𑀦𑀼𑀦𑀸 𑀯𑀺𑀚𑁆𑀛𑀢𑀻’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀲𑀫𑁆𑀪𑀸𑀭𑀓𑀣𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄’’𑀢𑀺. 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀯𑀸 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀯𑀸 𑀓𑀺𑀮𑁂𑀲𑀯𑀢𑁆𑀣𑀼𑀪𑀽𑀢𑀁 𑀦𑀺𑀫𑀺𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺, 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀲𑀡𑁆𑀞𑀸𑀢𑀺. 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻𑀢𑀺 𑀓𑀺𑀮𑁂𑀲𑀸𑀦𑀁 𑀅𑀦𑀼𑀅𑀦𑀼𑀩𑁆𑀬𑀜𑁆𑀚𑀦𑀢𑁄 𑀧𑀸𑀓𑀝𑀪𑀸𑀯𑀓𑀭𑀡𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀳𑀢𑁆𑀣𑀧𑀸𑀤𑀲𑀺𑀢𑀳𑀲𑀺𑀢𑀓𑀣𑀺𑀢𑀯𑀺𑀮𑁄𑀓𑀺𑀢𑀸𑀤𑀺𑀪𑁂𑀤𑀁 𑀆𑀓𑀸𑀭𑀁 𑀦 𑀕𑀡𑁆𑀳𑀸𑀢𑀺, 𑀬𑀁 𑀢𑀢𑁆𑀣 𑀪𑀽𑀢𑀁, 𑀢𑀤𑁂𑀯 𑀕𑀡𑁆𑀳𑀸𑀢𑀺, 𑀘𑁂𑀢𑀺𑀬𑀧𑀩𑁆𑀩𑀢𑀯𑀸𑀲𑀻 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬.

𑀣𑁂𑀭𑀁 𑀓𑀺𑀭 𑀘𑁂𑀢𑀺𑀬𑀧𑀩𑁆𑀩𑀢𑀸 𑀅𑀦𑀼𑀭𑀸𑀥𑀧𑀼𑀭𑀁 𑀧𑀺𑀡𑁆𑀟𑀘𑀸𑀭𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀁 𑀅𑀜𑁆𑀜𑀢𑀭𑀸 𑀓𑀼𑀮𑀲𑀼𑀡𑁆𑀳𑀸 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀪𑀡𑁆𑀟𑀺𑀢𑁆𑀯𑀸 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸 𑀤𑁂𑀯𑀓𑀜𑁆𑀜𑀸 𑀯𑀺𑀬 𑀓𑀸𑀮𑀲𑁆𑀲𑁂𑀯 𑀅𑀦𑀼𑀭𑀸𑀥𑀧𑀼𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀜𑀸𑀢𑀺𑀖𑀭𑀁 𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀺𑀲𑁆𑀯𑀸 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀸 𑀫𑀳𑀸𑀳𑀲𑀺𑀢𑀁 𑀳𑀲𑀺. 𑀣𑁂𑀭𑁄 𑀓𑀺𑀫𑁂𑀢𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲𑀸 𑀤𑀦𑁆𑀢𑀝𑁆𑀞𑀺𑀓𑁂 𑀅𑀲𑀼𑀪𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀲𑁆𑀲𑀸 𑀤𑀦𑁆𑀢𑀝𑁆𑀞𑀺𑀓𑀁 𑀤𑀺𑀲𑁆𑀯𑀸, 𑀧𑀼𑀩𑁆𑀩𑀲𑀜𑁆𑀜𑀁 𑀅𑀦𑀼𑀲𑁆𑀲𑀭𑀺;

𑀢𑀢𑁆𑀣𑁂𑀯 𑀲𑁄 𑀞𑀺𑀢𑁄 𑀣𑁂𑀭𑁄, 𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀻’’𑀢𑀺.

𑀲𑀸𑀫𑀺𑀓𑁄𑀧𑀺 𑀔𑁄 𑀧𑀦𑀲𑁆𑀲𑀸 𑀅𑀦𑀼𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀓𑀺𑀜𑁆𑀘𑀺, 𑀪𑀦𑁆𑀢𑁂, 𑀇𑀢𑁆𑀣𑀺𑀁 𑀧𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺. 𑀢𑀁 𑀣𑁂𑀭𑁄 𑀆𑀳 𑁋

‘‘𑀦𑀸𑀪𑀺𑀚𑀸𑀦𑀸𑀫𑀺 𑀇𑀢𑁆𑀣𑀻 𑀯𑀸, 𑀧𑀼𑀭𑀺𑀲𑁄 𑀯𑀸 𑀇𑀢𑁄 𑀕𑀢𑁄;

𑀅𑀧𑀺𑀘 𑀅𑀝𑁆𑀞𑀺𑀲𑀗𑁆𑀖𑀸𑀝𑁄, 𑀕𑀘𑁆𑀙𑀢𑁂𑀲 𑀫𑀳𑀸𑀧𑀣𑁂’’𑀢𑀺.

𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀦𑁆𑀢𑀺𑀆𑀤𑀺𑀫𑁆𑀳𑀺 𑀬𑀁𑀓𑀸𑀭𑀡𑀸 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀼 𑀏𑀢𑀁 𑀧𑀼𑀕𑁆𑀕𑀮𑀁 𑀲𑀢𑀺𑀓𑀯𑀸𑀝𑁂𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀅𑀧𑀺𑀳𑀺𑀢𑀘𑀓𑁆𑀔𑀼𑀤𑁆𑀯𑀸𑀭𑀁 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀁 𑀏𑀢𑁂 𑀅𑀪𑀺𑀚𑁆𑀛𑀸𑀤𑀬𑁄 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀅𑀦𑀼𑀩𑀦𑁆𑀥𑁂𑀬𑁆𑀬𑀼𑀁. 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀻𑀢𑀺 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀦𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑁄𑀬𑁂𑀯 𑀘 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀦𑀢𑁆𑀣𑀺. 𑀦 𑀳𑀺 𑀘𑀓𑁆𑀔𑀼𑀧𑀲𑀸𑀤𑀁 𑀦𑀺𑀲𑁆𑀲𑀸𑀬 𑀲𑀢𑀺 𑀯𑀸 𑀫𑀼𑀝𑁆𑀞𑀲𑀘𑁆𑀘𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀧𑀺𑀘 𑀬𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀢𑀤𑀸 𑀪𑀯𑀗𑁆𑀕𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀁. 𑀢𑀢𑁄 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁. 𑀢𑀢𑁄 𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁. 𑀢𑀢𑁄 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀤𑀦𑀦𑁆𑀢𑀭𑀁 𑀚𑀯𑀦𑀁 𑀚𑀯𑀢𑀺.

𑀢𑀢𑁆𑀭𑀸𑀧𑀺 𑀦𑁂𑀯 𑀪𑀯𑀗𑁆𑀕𑀲𑀫𑀬𑁂, 𑀦 𑀆𑀯𑀚𑁆𑀚𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑀫𑀬𑁂 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀅𑀢𑁆𑀣𑀺. 𑀚𑀯𑀦𑀓𑁆𑀔𑀡𑁂 𑀧𑀦 𑀲𑀘𑁂 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸 𑀫𑀼𑀝𑁆𑀞𑀲𑀘𑁆𑀘𑀁 𑀯𑀸 𑀅𑀜𑁆𑀜𑀸𑀡𑀁 𑀯𑀸 𑀅𑀓𑁆𑀔𑀦𑁆𑀢𑀺 𑀯𑀸 𑀓𑁄𑀲𑀚𑁆𑀚𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀲𑀁𑀯𑀭𑁄 𑀳𑁄𑀢𑀺. 𑀏𑀯𑀁 𑀳𑁄𑀦𑁆𑀢𑁄 𑀧𑀦 𑀲𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀅𑀲𑀁𑀯𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀬𑀣𑀸 𑀓𑀺𑀁? 𑀬𑀣𑀸 𑀦𑀕𑀭𑁂 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀅𑀲𑀁𑀯𑀼𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀖𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀕𑀩𑁆𑀪𑀸𑀤𑀬𑁄 𑀲𑀼𑀲𑀁𑀯𑀼𑀢𑀸 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀅𑀦𑁆𑀢𑁄𑀦𑀕𑀭𑁂 𑀲𑀩𑁆𑀩𑀁 𑀪𑀡𑁆𑀟𑀁 𑀅𑀭𑀓𑁆𑀔𑀺𑀢𑀁 𑀅𑀕𑁄𑀧𑀺𑀢𑀫𑁂𑀯 𑀳𑁄𑀢𑀺. 𑀦𑀕𑀭𑀤𑁆𑀯𑀸𑀭𑁂𑀦 𑀳𑀺 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀬𑀤𑀺𑀘𑁆𑀙𑀦𑁆𑀢𑀺, 𑀢𑀁 𑀓𑀭𑁂𑀬𑁆𑀬𑀼𑀁, 𑀏𑀯𑀫𑁂𑀯 𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺.

𑀢𑀲𑁆𑀫𑀺𑀁 𑀧𑀦 𑀲𑀻𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀤𑁆𑀯𑀸𑀭𑀫𑁆𑀧𑀺 𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀬𑀣𑀸 𑀓𑀺𑀁? 𑀬𑀣𑀸 𑀦𑀕𑀭𑀤𑁆𑀯𑀸𑀭𑁂𑀲𑀼 𑀲𑀁𑀯𑀼𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀖𑀭𑀸𑀤𑀬𑁄 𑀅𑀲𑀁𑀯𑀼𑀢𑀸 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀅𑀦𑁆𑀢𑁄𑀦𑀕𑀭𑁂 𑀲𑀩𑁆𑀩𑀁 𑀪𑀡𑁆𑀟𑀁 𑀲𑀼𑀭𑀓𑁆𑀔𑀺𑀢𑀁 𑀲𑀼𑀕𑁄𑀧𑀺𑀢𑀫𑁂𑀯 𑀳𑁄𑀢𑀺. 𑀦𑀕𑀭𑀤𑁆𑀯𑀸𑀭𑁂𑀲𑀼 𑀳𑀺 𑀧𑀺𑀳𑀺𑀢𑁂𑀲𑀼 𑀘𑁄𑀭𑀸𑀦𑀁 𑀧𑀯𑁂𑀲𑁄 𑀦𑀢𑁆𑀣𑀺, 𑀏𑀯𑀫𑁂𑀯 𑀚𑀯𑀦𑁂 𑀲𑀻𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀤𑁆𑀯𑀸𑀭𑀫𑁆𑀧𑀺 𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄𑀢𑀺 𑀯𑀼𑀢𑁆𑀢𑁄.

𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑀺𑀤𑀁 𑀲𑀗𑁆𑀔𑁂𑀧𑀢𑁄 𑀭𑀽𑀧𑀸𑀤𑀻𑀲𑀼 𑀓𑀺𑀮𑁂𑀲𑀸𑀦𑀼𑀩𑀦𑁆𑀥𑀦𑀺𑀫𑀺𑀢𑁆𑀢𑀸𑀤𑀺𑀕𑁆𑀕𑀸𑀳𑀧𑀭𑀺𑀯𑀚𑁆𑀚𑀦𑀮𑀓𑁆𑀔𑀡𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁

𑁧𑁬. 𑀇𑀤𑀸𑀦𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑁂 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀦𑁆𑀢𑀺 𑀬𑀸𑀦𑀺 𑀢𑀸𑀦𑀺 ‘‘𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 ‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸’𑀢𑀺 𑀪𑀡𑀢𑀺, 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼𑀦𑀻 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀲𑀽𑀧𑀁 𑀯𑀸 𑀑𑀤𑀦𑀁 𑀯𑀸 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀭𑀺. 𑁨𑁮𑁭) 𑀏𑀯𑀁 𑀧𑀜𑁆𑀜𑀢𑁆𑀢𑀸𑀦𑀺 𑀙 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀇𑀫𑁂𑀲𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁.

𑀓𑀼𑀳𑀦𑀸𑀢𑀺𑀆𑀤𑀻𑀲𑀼 𑀅𑀬𑀁 𑀧𑀸𑀴𑀺, ‘‘𑀢𑀢𑁆𑀣 𑀓𑀢𑀫𑀸 𑀓𑀼𑀳𑀦𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀇𑀘𑁆𑀙𑀸𑀧𑀓𑀢𑀲𑁆𑀲 𑀬𑀸 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀦 𑀯𑀸 𑀲𑀸𑀫𑀦𑁆𑀢𑀚𑀧𑁆𑀧𑀺𑀢𑁂𑀦 𑀯𑀸 𑀇𑀭𑀺𑀬𑀸𑀧𑀣𑀲𑁆𑀲 𑀯𑀸 𑀅𑀝𑁆𑀞𑀧𑀦𑀸 𑀞𑀧𑀦𑀸 𑀲𑀡𑁆𑀞𑀧𑀦𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀼𑀳𑀦𑀸.

‘‘𑀢𑀢𑁆𑀣 𑀓𑀢𑀫𑀸 𑀮𑀧𑀦𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀇𑀘𑁆𑀙𑀸𑀧𑀓𑀢𑀲𑁆𑀲 𑀬𑀸 𑀧𑀭𑁂𑀲𑀁 𑀆𑀮𑀧𑀦𑀸 𑀮𑀧𑀦𑀸 𑀲𑀮𑁆𑀮𑀧𑀦𑀸 𑀉𑀮𑁆𑀮𑀧𑀦𑀸 𑀲𑀫𑀼𑀮𑁆𑀮𑀧𑀦𑀸 𑀉𑀦𑁆𑀦𑀳𑀦𑀸 𑀲𑀫𑀼𑀦𑁆𑀦𑀳𑀦𑀸 𑀉𑀓𑁆𑀓𑀸𑀘𑀦𑀸 𑀲𑀫𑀼𑀓𑁆𑀓𑀸𑀘𑀦𑀸 𑀅𑀦𑀼𑀧𑁆𑀧𑀺𑀬𑀪𑀸𑀡𑀺𑀢𑀸 𑀘𑀸𑀝𑀼𑀓𑀫𑁆𑀬𑀢𑀸 𑀫𑀼𑀕𑁆𑀕𑀲𑀽𑀧𑁆𑀬𑀢𑀸 𑀧𑀸𑀭𑀺𑀪𑀝𑁆𑀬𑀢𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀮𑀧𑀦𑀸.

‘‘𑀢𑀢𑁆𑀣 𑀓𑀢𑀫𑀸 𑀦𑁂𑀫𑀺𑀢𑁆𑀢𑀺𑀓𑀢𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀇𑀘𑁆𑀙𑀸𑀧𑀓𑀢𑀲𑁆𑀲 𑀬𑀁 𑀧𑀭𑁂𑀲𑀁 𑀦𑀺𑀫𑀺𑀢𑁆𑀢𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀑𑀪𑀸𑀲𑁄 𑀑𑀪𑀸𑀲𑀓𑀫𑁆𑀫𑀁 𑀲𑀸𑀫𑀦𑁆𑀢𑀚𑀧𑁆𑀧𑀸 𑀧𑀭𑀺𑀓𑀣𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀦𑁂𑀫𑀺𑀢𑁆𑀢𑀺𑀓𑀢𑀸.

‘‘𑀢𑀢𑁆𑀣 𑀓𑀢𑀫𑀸 𑀦𑀺𑀧𑁆𑀧𑁂𑀲𑀺𑀓𑀢𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀇𑀘𑁆𑀙𑀸𑀧𑀓𑀢𑀲𑁆𑀲 𑀬𑀸 𑀧𑀭𑁂𑀲𑀁 𑀅𑀓𑁆𑀓𑁄𑀲𑀦𑀸 𑀯𑀫𑁆𑀪𑀦𑀸 𑀕𑀭𑀳𑀦𑀸 𑀉𑀓𑁆𑀔𑁂𑀧𑀦𑀸 𑀲𑀫𑀼𑀓𑁆𑀔𑁂𑀧𑀦𑀸 𑀔𑀺𑀧𑀦𑀸 𑀲𑀁𑀔𑀺𑀧𑀦𑀸 𑀧𑀸𑀧𑀦𑀸 𑀲𑀫𑁆𑀧𑀸𑀧𑀦𑀸 𑀅𑀯𑀡𑁆𑀡𑀳𑀸𑀭𑀺𑀓𑀸 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀦𑀺𑀧𑁆𑀧𑁂𑀲𑀺𑀓𑀢𑀸.

‘‘𑀢𑀢𑁆𑀣 𑀓𑀢𑀫𑀸 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀇𑀢𑁄 𑀮𑀤𑁆𑀥𑀁 𑀆𑀫𑀺𑀲𑀁 𑀅𑀫𑀼𑀢𑁆𑀭 𑀳𑀭𑀢𑀺, 𑀅𑀫𑀼𑀢𑁆𑀭 𑀯𑀸 𑀮𑀤𑁆𑀥𑀁 𑀆𑀫𑀺𑀲𑀁 𑀇𑀥 𑀆𑀳𑀭𑀢𑀺. 𑀬𑀸 𑀏𑀯𑀭𑀽𑀧𑀸 𑀆𑀫𑀺𑀲𑁂𑀦 𑀆𑀫𑀺𑀲𑀲𑁆𑀲 𑀏𑀝𑁆𑀞𑀺 𑀕𑀯𑁂𑀝𑁆𑀞𑀺 𑀧𑀭𑀺𑀬𑁂𑀝𑁆𑀞𑀺 𑀏𑀲𑀦𑀸 𑀕𑀯𑁂𑀲𑀦𑀸 𑀧𑀭𑀺𑀬𑁂𑀲𑀦𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸’’𑀢𑀺 (𑀯𑀺𑀪. 𑁮𑁬𑁨-𑁮𑁬𑁫).

𑁧𑁭. 𑀇𑀫𑀺𑀲𑁆𑀲𑀸 𑀧𑀦 𑀧𑀸𑀴𑀺𑀬𑀸 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀼𑀳𑀦𑀦𑀺𑀤𑁆𑀤𑁂𑀲𑁂 𑀢𑀸𑀯 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲𑀸𑀢𑀺 𑀮𑀸𑀪𑀜𑁆𑀘 𑀲𑀓𑁆𑀓𑀸𑀭𑀜𑁆𑀘 𑀓𑀺𑀢𑁆𑀢𑀺𑀲𑀤𑁆𑀤𑀜𑁆𑀘 𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲, 𑀧𑀢𑁆𑀣𑀬𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀸𑀧𑀺𑀘𑁆𑀙𑀲𑁆𑀲𑀸𑀢𑀺 𑀅𑀲𑀦𑁆𑀢𑀕𑀼𑀡𑀤𑀻𑀧𑀦𑀓𑀸𑀫𑀲𑁆𑀲. 𑀇𑀘𑁆𑀙𑀸𑀧𑀓𑀢𑀲𑁆𑀲𑀸𑀢𑀺 𑀇𑀘𑁆𑀙𑀸𑀬 𑀅𑀧𑀓𑀢𑀲𑁆𑀲, 𑀉𑀧𑀤𑁆𑀤𑀼𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀇𑀢𑁄 𑀧𑀭𑀁 𑀬𑀲𑁆𑀫𑀸 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀸𑀫𑀦𑁆𑀢𑀚𑀧𑁆𑀧𑀦𑀇𑀭𑀺𑀬𑀸𑀧𑀣𑀲𑀦𑁆𑀦𑀺𑀲𑁆𑀲𑀺𑀢𑀯𑀲𑁂𑀦 𑀫𑀳𑀸𑀦𑀺𑀤𑁆𑀤𑁂𑀲𑁂 𑀢𑀺𑀯𑀺𑀥𑀁 𑀓𑀼𑀳𑀦𑀯𑀢𑁆𑀣𑀼 𑀆𑀕𑀢𑀁. 𑀢𑀲𑁆𑀫𑀸 𑀢𑀺𑀯𑀺𑀥𑀫𑁆𑀧𑁂𑀢𑀁 𑀤𑀲𑁆𑀲𑁂𑀢𑀼𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀦 𑀯𑀸𑀢𑀺 𑀏𑀯𑀫𑀸𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀘𑀻𑀯𑀭𑀸𑀤𑀻𑀳𑀺 𑀦𑀺𑀫𑀦𑁆𑀢𑀺𑀢𑀲𑁆𑀲 𑀢𑀤𑀢𑁆𑀣𑀺𑀓𑀲𑁆𑀲𑁂𑀯 𑀲𑀢𑁄 𑀧𑀸𑀧𑀺𑀘𑁆𑀙𑀢𑀁 𑀦𑀺𑀲𑁆𑀲𑀸𑀬 𑀧𑀝𑀺𑀓𑁆𑀔𑀺𑀧𑀦𑁂𑀦, 𑀢𑁂 𑀘 𑀕𑀳𑀧𑀢𑀺𑀓𑁂 𑀅𑀢𑁆𑀢𑀦𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑁂 𑀜𑀢𑁆𑀯𑀸 𑀧𑀼𑀦 𑀢𑁂𑀲𑀁 ‘‘𑀅𑀳𑁄 𑀅𑀬𑁆𑀬𑁄 𑀅𑀧𑁆𑀧𑀺𑀘𑁆𑀙𑁄 𑀦 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀇𑀘𑁆𑀙𑀢𑀺, 𑀲𑀼𑀮𑀤𑁆𑀥𑀁 𑀯𑀢 𑀦𑁄 𑀅𑀲𑁆𑀲 𑀲𑀘𑁂 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀧𑀡𑀻𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀉𑀧𑀦𑁂𑀦𑁆𑀢𑀸𑀦𑀁 𑀢𑀤𑀦𑀼𑀕𑁆𑀕𑀳𑀓𑀸𑀫𑀢𑀁𑀬𑁂𑀯 𑀆𑀯𑀺𑀓𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑁂𑀦 𑀘 𑀢𑀢𑁄 𑀧𑀪𑀼𑀢𑀺 𑀅𑀧𑀺 𑀲𑀓𑀝𑀪𑀸𑀭𑁂𑀳𑀺 𑀉𑀧𑀦𑀸𑀫𑀦𑀳𑁂𑀢𑀼𑀪𑀽𑀢𑀁 𑀯𑀺𑀫𑁆𑀳𑀸𑀧𑀦𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 𑁋

‘‘𑀓𑀢𑀫𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥 𑀕𑀳𑀧𑀢𑀺𑀓𑀸 𑀪𑀺𑀓𑁆𑀔𑀼𑀁 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀢𑁆𑀣𑀺𑀓𑁄 𑀘𑀻𑀯𑀭…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦𑀁 𑀪𑀺𑀬𑁆𑀬𑁄𑀓𑀫𑁆𑀬𑀢𑀁 𑀉𑀧𑀸𑀤𑀸𑀬 𑀘𑀻𑀯𑀭𑀁 𑀧𑀘𑁆𑀘𑀓𑁆𑀔𑀸𑀢𑀺. 𑀧𑀺𑀡𑁆𑀟𑀧𑀸𑀢𑀁…𑀧𑁂… 𑀲𑁂𑀦𑀸𑀲𑀦𑀁. 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀘𑁆𑀘𑀓𑁆𑀔𑀸𑀢𑀺. 𑀲𑁄 𑀏𑀯𑀫𑀸𑀳 𑁋 ‘𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀘𑀻𑀯𑀭𑁂𑀦, 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀲𑀼𑀲𑀸𑀦𑀸 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸 𑀯𑀸 𑀧𑀸𑀧𑀡𑀺𑀓𑀸 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀥𑀸𑀭𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀧𑀺𑀡𑁆𑀟𑀧𑀸𑀢𑁂𑀦 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀉𑀜𑁆𑀙𑀸𑀘𑀭𑀺𑀬𑀸𑀬 𑀧𑀺𑀡𑁆𑀟𑀺𑀬𑀸𑀮𑁄𑀧𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀲𑁂𑀦𑀸𑀲𑀦𑁂𑀦, 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀭𑀼𑀓𑁆𑀔𑀫𑀽𑀮𑀺𑀓𑁄 𑀯𑀸 𑀅𑀲𑁆𑀲 𑀅𑀩𑁆𑀪𑁄𑀓𑀸𑀲𑀺𑀓𑁄 𑀯𑀸. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀧𑀽𑀢𑀺𑀫𑀼𑀢𑁆𑀢𑁂𑀦 𑀯𑀸 𑀳𑀭𑀺𑀝𑀓𑀻𑀔𑀡𑁆𑀟𑁂𑀦 𑀯𑀸 𑀑𑀲𑀥𑀁 𑀓𑀭𑁂𑀬𑁆𑀬𑀸’𑀢𑀺. 𑀢𑀤𑀼𑀧𑀸𑀤𑀸𑀬 𑀮𑀽𑀔𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺, 𑀮𑀽𑀔𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀮𑀽𑀔𑀁 𑀲𑁂𑀦𑀸𑀲𑀦𑀁 𑀧𑀝𑀺𑀲𑁂𑀯𑀢𑀺, 𑀮𑀽𑀔𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑁂𑀯𑀢𑀺, 𑀢𑀫𑁂𑀦𑀁 𑀕𑀳𑀧𑀢𑀺𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 ‘𑀅𑀬𑀁 𑀲𑀫𑀡𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀥𑀼𑀢𑀯𑀸𑀤𑁄’𑀢𑀺. 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭…𑀧𑁂… 𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑁄 𑀏𑀯𑀫𑀸𑀳 𑁋 ‘𑀢𑀺𑀡𑁆𑀡𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀲𑀤𑁆𑀥𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀤𑁂𑀬𑁆𑀬𑀥𑀫𑁆𑀫𑀲𑁆𑀲…𑀧𑁂… 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀸𑀲𑀤𑁆𑀥𑁄𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀢𑀼𑀫𑁆𑀳𑀸𑀓𑀜𑁆𑀘𑁂𑀯𑀸𑀬𑀁 𑀲𑀤𑁆𑀥𑀸 𑀅𑀢𑁆𑀣𑀺, 𑀤𑁂𑀬𑁆𑀬𑀥𑀫𑁆𑀫𑁄 𑀘 𑀲𑀁𑀯𑀺𑀚𑁆𑀚𑀢𑀺, 𑀅𑀳𑀜𑁆𑀘 𑀧𑀝𑀺𑀕𑁆𑀕𑀸𑀳𑀓𑁄, 𑀲𑀘𑁂𑀳𑀁 𑀦 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀺, 𑀏𑀯𑀁 𑀢𑀼𑀫𑁆𑀳𑁂 𑀧𑀼𑀜𑁆𑀜𑁂𑀦 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄. 𑀅𑀧𑀺𑀘 𑀢𑀼𑀫𑁆𑀳𑀸𑀓𑀁𑀬𑁂𑀯 𑀅𑀦𑀼𑀓𑀫𑁆𑀧𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀫𑀻’𑀢𑀺. 𑀢𑀤𑀼𑀧𑀸𑀤𑀸𑀬 𑀩𑀳𑀼𑀫𑁆𑀧𑀺 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀩𑀳𑀼𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁…𑀧𑁂… 𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁, 𑀇𑀤𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽’’𑀢𑀺 (𑀫𑀳𑀸𑀦𑀺. 𑁮𑁭).

𑀧𑀸𑀧𑀺𑀘𑁆𑀙𑀲𑁆𑀲𑁂𑀯 𑀧𑀦 𑀲𑀢𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑀧𑀭𑀺𑀤𑀻𑀧𑀦𑀯𑀸𑀘𑀸𑀬 𑀢𑀣𑀸 𑀢𑀣𑀸 𑀯𑀺𑀫𑁆𑀳𑀸𑀧𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋

‘‘𑀓𑀢𑀫𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 ‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’𑀢𑀺 𑀅𑀭𑀺𑀬𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀸𑀘𑀁 𑀪𑀸𑀲𑀢𑀺 ‘𑀬𑁄 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’𑀢𑀺 𑀪𑀡𑀢𑀺. ‘𑀬𑁄 𑀏𑀯𑀭𑀽𑀧𑀁 𑀧𑀢𑁆𑀢𑀁 𑀮𑁄𑀳𑀣𑀸𑀮𑀓𑀁. 𑀥𑀫𑁆𑀫𑀓𑀭𑀡𑀁 𑀧𑀭𑀺𑀲𑁆𑀲𑀸𑀯𑀦𑀁 𑀓𑀼𑀜𑁆𑀘𑀺𑀓𑀁, 𑀓𑀸𑀬𑀩𑀦𑁆𑀥𑀦𑀁 𑀉𑀧𑀸𑀳𑀦𑀁 𑀥𑀸𑀭𑁂𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’𑀢𑀺 𑀪𑀡𑀢𑀺. 𑀬𑀲𑁆𑀲 𑀏𑀯𑀭𑀽𑀧𑁄 𑀉𑀧𑀚𑁆𑀛𑀸𑀬𑁄 𑀆𑀘𑀭𑀺𑀬𑁄 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄, 𑀲𑀫𑀸𑀦𑀸𑀘𑀭𑀺𑀬𑀓𑁄 𑀫𑀺𑀢𑁆𑀢𑁄 𑀲𑀦𑁆𑀤𑀺𑀝𑁆𑀞𑁄 𑀲𑀫𑁆𑀪𑀢𑁆𑀢𑁄 𑀲𑀳𑀸𑀬𑁄. 𑀬𑁄 𑀏𑀯𑀭𑀽𑀧𑁂 𑀯𑀺𑀳𑀸𑀭𑁂 𑀯𑀲𑀢𑀺 𑀅𑀟𑁆𑀠𑀬𑁄𑀕𑁂 𑀧𑀸𑀲𑀸𑀤𑁂 𑀳𑀫𑁆𑀫𑀺𑀬𑁂 𑀕𑀼𑀳𑀸𑀬𑀁 𑀮𑁂𑀡𑁂 𑀓𑀼𑀝𑀺𑀬𑀸 𑀓𑀽𑀝𑀸𑀕𑀸𑀭𑁂 𑀅𑀝𑁆𑀝𑁂 𑀫𑀸𑀴𑁂 𑀉𑀤𑁆𑀤𑀡𑁆𑀟𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀲𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’𑀢𑀺 𑀪𑀡𑀢𑀺. 𑀅𑀣 𑀯𑀸 ‘𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑁄 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄 𑀓𑀼𑀳𑀓𑀓𑀼𑀳𑀓𑁄 𑀮𑀧𑀓𑀮𑀧𑀓𑁄 𑀫𑀼𑀔𑀲𑀫𑁆𑀪𑀸𑀯𑀺𑀓𑁄, 𑀅𑀬𑀁 𑀲𑀫𑀡𑁄 𑀇𑀫𑀸𑀲𑀁 𑀏𑀯𑀭𑀽𑀧𑀸𑀦𑀁 𑀲𑀦𑁆𑀢𑀸𑀦𑀁 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻’𑀢𑀺 𑀢𑀸𑀤𑀺𑀲𑀁 𑀕𑀫𑁆𑀪𑀻𑀭𑀁 𑀕𑀽𑀴𑁆𑀳𑀁 𑀦𑀺𑀧𑀼𑀡𑀁 𑀧𑀝𑀺𑀘𑁆𑀙𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁 𑀓𑀣𑁂𑀲𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁, 𑀇𑀤𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽’’𑀢𑀺 (𑀫𑀳𑀸𑀦𑀺. 𑁮𑁭).

𑀧𑀸𑀧𑀺𑀘𑁆𑀙𑀲𑁆𑀲𑁂𑀯 𑀧𑀦 𑀲𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑀓𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀫𑁆𑀳𑀸𑀧𑀦𑀁 𑀇𑀭𑀺𑀬𑀸𑀧𑀣𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀼𑀳𑀦𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀓𑀢𑀫𑀁 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼. 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 ‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’𑀢𑀺 𑀕𑀫𑀦𑀁 𑀲𑀡𑁆𑀞𑀧𑁂𑀢𑀺, 𑀞𑀸𑀦𑀁 𑀲𑀡𑁆𑀞𑀧𑁂𑀢𑀺, 𑀦𑀺𑀲𑀚𑁆𑀚𑀁 𑀲𑀡𑁆𑀞𑀧𑁂𑀢𑀺, 𑀲𑀬𑀦𑀁 𑀲𑀡𑁆𑀞𑀧𑁂𑀢𑀺, 𑀧𑀡𑀺𑀥𑀸𑀬 𑀕𑀘𑁆𑀙𑀢𑀺, 𑀧𑀡𑀺𑀥𑀸𑀬 𑀢𑀺𑀝𑁆𑀞𑀢𑀺, 𑀧𑀡𑀺𑀥𑀸𑀬 𑀦𑀺𑀲𑀻𑀤𑀢𑀺, 𑀧𑀡𑀺𑀥𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀕𑀘𑁆𑀙𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀢𑀺𑀝𑁆𑀞𑀢𑀺, 𑀦𑀺𑀲𑀻𑀤𑀢𑀺, 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀆𑀧𑀸𑀣𑀓𑀚𑁆𑀛𑀸𑀬𑀻 𑀘 𑀳𑁄𑀢𑀺, 𑀬𑀸 𑀏𑀯𑀭𑀽𑀧𑀸 𑀇𑀭𑀺𑀬𑀸𑀧𑀣𑀲𑁆𑀲 𑀅𑀝𑁆𑀞𑀧𑀦𑀸 𑀞𑀧𑀦𑀸 𑀲𑀡𑁆𑀞𑀧𑀦𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽’’𑀢𑀺 (𑀫𑀳𑀸𑀦𑀺. 𑁮𑁭).

𑀢𑀢𑁆𑀣 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀦𑀸𑀢𑀺 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀦𑁆𑀢𑀺 𑀏𑀯𑀁 𑀲𑀗𑁆𑀔𑀸𑀢𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑁂𑀦 𑀯𑀸 𑀲𑀗𑁆𑀔𑀸𑀢𑁂𑀦. 𑀲𑀸𑀫𑀦𑁆𑀢𑀚𑀧𑁆𑀧𑀺𑀢𑁂𑀦𑀸𑀢𑀺 𑀲𑀫𑀻𑀧𑀪𑀡𑀺𑀢𑁂𑀦. 𑀇𑀭𑀺𑀬𑀸𑀧𑀣𑀲𑁆𑀲 𑀯𑀸𑀢𑀺 𑀘𑀢𑀼𑀇𑀭𑀺𑀬𑀸𑀧𑀣𑀲𑁆𑀲. 𑀅𑀝𑁆𑀞𑀧𑀦𑀸𑀢𑀺𑀆𑀤𑀺 𑀞𑀧𑀦𑀸, 𑀆𑀤𑀭𑁂𑀦 𑀯𑀸 𑀞𑀧𑀦𑀸. 𑀞𑀧𑀦𑀸𑀢𑀺 𑀞𑀧𑀦𑀸𑀓𑀸𑀭𑁄. 𑀲𑀡𑁆𑀞𑀧𑀦𑀸𑀢𑀺 𑀅𑀪𑀺𑀲𑀗𑁆𑀔𑀭𑀡𑀸, 𑀧𑀸𑀲𑀸𑀤𑀺𑀓𑀪𑀸𑀯𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀓𑀼𑀝𑀺𑀓𑀸𑀢𑀺 𑀧𑀥𑀸𑀦𑀧𑀼𑀭𑀺𑀫𑀝𑁆𑀞𑀺𑀢𑀪𑀸𑀯𑀤𑀲𑁆𑀲𑀦𑁂𑀦 𑀪𑀸𑀓𑀼𑀝𑀺𑀓𑀭𑀡𑀁, 𑀫𑀼𑀔𑀲𑀗𑁆𑀓𑁄𑀘𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀓𑀼𑀝𑀺𑀓𑀭𑀡𑀁 𑀲𑀻𑀮𑀫𑀲𑁆𑀲𑀸𑀢𑀺 𑀪𑀸𑀓𑀼𑀝𑀺𑀓𑁄. 𑀪𑀸𑀓𑀼𑀝𑀺𑀓𑀲𑁆𑀲 𑀪𑀸𑀯𑁄 𑀪𑀸𑀓𑀼𑀝𑀺𑀬𑀁. 𑀓𑀼𑀳𑀦𑀸𑀢𑀺 𑀯𑀺𑀫𑁆𑀳𑀸𑀧𑀦𑀸. 𑀓𑀼𑀳𑀲𑁆𑀲 𑀆𑀬𑀦𑀸 𑀓𑀼𑀳𑀸𑀬𑀦𑀸. 𑀓𑀼𑀳𑀺𑀢𑀲𑁆𑀲 𑀪𑀸𑀯𑁄 𑀓𑀼𑀳𑀺𑀢𑀢𑁆𑀢𑀦𑁆𑀢𑀺.

𑀮𑀧𑀦𑀸𑀦𑀺𑀤𑁆𑀤𑁂𑀲𑁂 𑀆𑀮𑀧𑀦𑀸𑀢𑀺 𑀯𑀺𑀳𑀸𑀭𑀁 𑀆𑀕𑀢𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 ‘‘𑀓𑀺𑀫𑀢𑁆𑀣𑀸𑀬 𑀪𑁄𑀦𑁆𑀢𑁄 𑀆𑀕𑀢𑀸, 𑀓𑀺𑀁 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑀺𑀢𑀼𑀁, 𑀬𑀤𑀺 𑀏𑀯𑀁 𑀕𑀘𑁆𑀙𑀣 𑀭𑁂, 𑀅𑀳𑀁 𑀧𑀘𑁆𑀙𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀆𑀤𑀺𑀢𑁄𑀯 𑀮𑀧𑀦𑀸. 𑀅𑀣 𑀯𑀸 𑀅𑀢𑁆𑀢𑀸𑀦𑀁 𑀉𑀧𑀦𑁂𑀢𑁆𑀯𑀸 ‘‘𑀅𑀳𑀁 𑀢𑀺𑀲𑁆𑀲𑁄, 𑀫𑀬𑀺 𑀭𑀸𑀚𑀸 𑀧𑀲𑀦𑁆𑀦𑁄, 𑀫𑀬𑀺 𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀭𑀸𑀚𑀫𑀳𑀸𑀫𑀢𑁆𑀢𑁄 𑀧𑀲𑀦𑁆𑀦𑁄’’𑀢𑀺 𑀏𑀯𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀸 𑀮𑀧𑀦𑀸 𑀆𑀮𑀧𑀦𑀸. 𑀮𑀧𑀦𑀸𑀢𑀺 𑀧𑀼𑀝𑁆𑀞𑀲𑁆𑀲 𑀲𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀮𑀧𑀦𑀁. 𑀲𑀮𑁆𑀮𑀧𑀦𑀸𑀢𑀺 𑀕𑀳𑀧𑀢𑀺𑀓𑀸𑀦𑀁 𑀉𑀓𑁆𑀓𑀡𑁆𑀞𑀦𑁂 𑀪𑀻𑀢𑀲𑁆𑀲 𑀑𑀓𑀸𑀲𑀁 𑀤𑀢𑁆𑀯𑀸 𑀤𑀢𑁆𑀯𑀸 𑀲𑀼𑀝𑁆𑀞𑀼 𑀮𑀧𑀦𑀸. 𑀉𑀮𑁆𑀮𑀧𑀦𑀸𑀢𑀺 𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑁄 𑀫𑀳𑀸𑀦𑀸𑀯𑀺𑀓𑁄 𑀫𑀳𑀸𑀤𑀸𑀦𑀧𑀢𑀻𑀢𑀺 𑀏𑀯𑀁 𑀉𑀤𑁆𑀥𑀁 𑀓𑀢𑁆𑀯𑀸 𑀮𑀧𑀦𑀸. 𑀲𑀫𑀼𑀮𑁆𑀮𑀧𑀦𑀸𑀢𑀺 𑀲𑀩𑁆𑀩𑀢𑁄𑀪𑀸𑀕𑁂𑀦 𑀉𑀤𑁆𑀥𑀁 𑀓𑀢𑁆𑀯𑀸 𑀮𑀧𑀦𑀸.

𑀉𑀦𑁆𑀦𑀳𑀦𑀸𑀢𑀺 ‘‘𑀉𑀧𑀸𑀲𑀓𑀸 𑀧𑀼𑀩𑁆𑀩𑁂 𑀈𑀤𑀺𑀲𑁂 𑀓𑀸𑀮𑁂 𑀦𑀯𑀤𑀸𑀦𑀁 𑀤𑁂𑀣, 𑀇𑀤𑀸𑀦𑀺 𑀓𑀺𑀁 𑀦 𑀤𑁂𑀣𑀸’’𑀢𑀺 𑀏𑀯𑀁 𑀬𑀸𑀯 ‘‘𑀤𑀲𑁆𑀲𑀸𑀫, 𑀪𑀦𑁆𑀢𑁂, 𑀑𑀓𑀸𑀲𑀁 𑀦 𑀮𑀪𑀸𑀫𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺, 𑀢𑀸𑀯 𑀉𑀤𑁆𑀥𑀁 𑀉𑀤𑁆𑀥𑀁 𑀦𑀳𑀦𑀸, 𑀯𑁂𑀞𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀉𑀘𑁆𑀙𑀼𑀳𑀢𑁆𑀣𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀆𑀪𑀢𑀁 𑀉𑀧𑀸𑀲𑀓𑀸’’𑀢𑀺 𑀧𑀼𑀘𑁆𑀙𑀢𑀺. 𑀉𑀘𑁆𑀙𑀼𑀔𑁂𑀢𑁆𑀢𑀢𑁄, 𑀪𑀦𑁆𑀢𑁂𑀢𑀺. 𑀓𑀺𑀁 𑀢𑀢𑁆𑀣 𑀉𑀘𑁆𑀙𑀼 𑀫𑀥𑀼𑀭𑀦𑁆𑀢𑀺. 𑀔𑀸𑀤𑀺𑀢𑁆𑀯𑀸, 𑀪𑀦𑁆𑀢𑁂, 𑀚𑀸𑀦𑀺𑀢𑀩𑁆𑀩𑀦𑁆𑀢𑀺. ‘‘𑀦, 𑀉𑀧𑀸𑀲𑀓, 𑀪𑀺𑀓𑁆𑀔𑀼𑀲𑁆𑀲 𑀉𑀘𑁆𑀙𑀼𑀁 𑀤𑁂𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀬𑀸 𑀏𑀯𑀭𑀽𑀧𑀸 𑀦𑀺𑀩𑁆𑀩𑁂𑀞𑁂𑀦𑁆𑀢𑀲𑁆𑀲𑀸𑀧𑀺 𑀯𑁂𑀞𑀦𑀓𑀣𑀸, 𑀲𑀸 𑀉𑀦𑁆𑀦𑀳𑀦𑀸. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀧𑀼𑀦𑀧𑁆𑀧𑀼𑀦𑀁 𑀉𑀦𑁆𑀦𑀳𑀦𑀸 𑀲𑀫𑀼𑀦𑁆𑀦𑀳𑀦𑀸.

𑀉𑀓𑁆𑀓𑀸𑀘𑀦𑀸𑀢𑀺 ‘‘𑀏𑀢𑀁 𑀓𑀼𑀮𑀁 𑀫𑀁𑀬𑁂𑀯 𑀚𑀸𑀦𑀸𑀢𑀺. 𑀲𑀘𑁂 𑀏𑀢𑁆𑀣 𑀤𑁂𑀬𑁆𑀬𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀫𑀬𑁆𑀳𑀫𑁂𑀯 𑀤𑁂𑀢𑀻’’𑀢𑀺 𑀏𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀘𑀦𑀸 𑀉𑀓𑁆𑀓𑀸𑀘𑀦𑀸, 𑀉𑀤𑁆𑀤𑀻𑀧𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀮𑀓𑀦𑁆𑀤𑀭𑀺𑀓𑀯𑀢𑁆𑀣𑀼 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀧𑀦 𑀧𑀼𑀦𑀧𑁆𑀧𑀼𑀦𑀁 𑀉𑀓𑁆𑀓𑀸𑀘𑀦𑀸 𑀲𑀫𑀼𑀓𑁆𑀓𑀸𑀘𑀦𑀸.

𑀅𑀦𑀼𑀧𑁆𑀧𑀺𑀬𑀪𑀸𑀡𑀺𑀢𑀸𑀢𑀺 𑀲𑀘𑁆𑀘𑀸𑀦𑀼𑀭𑀽𑀧𑀁 𑀥𑀫𑁆𑀫𑀸𑀦𑀼𑀭𑀽𑀧𑀁 𑀯𑀸 𑀅𑀦𑀧𑀮𑁄𑀓𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀺𑀬𑀪𑀡𑀦𑀫𑁂𑀯. 𑀘𑀸𑀝𑀼𑀓𑀫𑁆𑀬𑀢𑀸𑀢𑀺 𑀦𑀻𑀘𑀯𑀼𑀢𑁆𑀢𑀺𑀢𑀸 𑀅𑀢𑁆𑀢𑀸𑀦𑀁 𑀳𑁂𑀝𑁆𑀞𑀢𑁄 𑀳𑁂𑀝𑁆𑀞𑀢𑁄 𑀞𑀧𑁂𑀢𑁆𑀯𑀸 𑀯𑀢𑁆𑀢𑀦𑀁. 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀢𑀺 𑀫𑀼𑀕𑁆𑀕𑀲𑀽𑀧𑀲𑀤𑀺𑀲𑀢𑀸. 𑀬𑀣𑀸 𑀳𑀺 𑀫𑀼𑀕𑁆𑀕𑁂𑀲𑀼 𑀧𑀘𑁆𑀘𑀫𑀸𑀦𑁂𑀲𑀼 𑀓𑁄𑀘𑀺𑀤𑁂𑀯 𑀦 𑀧𑀘𑁆𑀘𑀢𑀺, 𑀅𑀯𑀲𑁂𑀲𑀸 𑀧𑀘𑁆𑀘𑀦𑁆𑀢𑀺, 𑀏𑀯𑀁 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀘𑀦𑁂 𑀓𑀺𑀜𑁆𑀘𑀺𑀤𑁂𑀯 𑀲𑀘𑁆𑀘𑀁 𑀳𑁄𑀢𑀺, 𑀲𑁂𑀲𑀁 𑀅𑀮𑀻𑀓𑀁, 𑀅𑀬𑀁 𑀧𑀼𑀕𑁆𑀕𑀮𑁄 𑀫𑀼𑀕𑁆𑀕𑀲𑀽𑀧𑁆𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀪𑀸𑀯𑁄 𑀫𑀼𑀕𑁆𑀕𑀲𑀽𑀧𑁆𑀬𑀢𑀸. 𑀧𑀸𑀭𑀺𑀪𑀝𑁆𑀬𑀢𑀸𑀢𑀺 𑀧𑀸𑀭𑀺𑀪𑀝𑁆𑀬𑀪𑀸𑀯𑁄. 𑀬𑁄 𑀳𑀺 𑀓𑀼𑀮𑀤𑀸𑀭𑀓𑁂 𑀥𑀸𑀢𑀺 𑀯𑀺𑀬 𑀅𑀗𑁆𑀓𑁂𑀦 𑀯𑀸 𑀔𑀦𑁆𑀥𑁂𑀦 𑀯𑀸 𑀧𑀭𑀺𑀪𑀝𑀢𑀺, 𑀥𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀧𑀭𑀺𑀪𑀝𑀲𑁆𑀲 𑀓𑀫𑁆𑀫𑀁 𑀧𑀸𑀭𑀺𑀪𑀝𑁆𑀬𑀼𑀁. 𑀧𑀸𑀭𑀺𑀪𑀝𑁆𑀬𑀲𑁆𑀲 𑀪𑀸𑀯𑁄 𑀧𑀸𑀭𑀺𑀪𑀝𑁆𑀬𑀢𑀸𑀢𑀺.

𑀦𑁂𑀫𑀺𑀢𑁆𑀢𑀺𑀓𑀢𑀸𑀦𑀺𑀤𑁆𑀤𑁂𑀲𑁂 𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀭𑁂𑀲𑀁 𑀧𑀘𑁆𑀘𑀬𑀤𑀸𑀦𑀲𑀜𑁆𑀜𑀸𑀚𑀦𑀓𑀁 𑀓𑀸𑀬𑀯𑀘𑀻𑀓𑀫𑁆𑀫𑀁. 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 𑀔𑀸𑀤𑀦𑀻𑀬𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀔𑀸𑀤𑀦𑀻𑀬𑀁 𑀮𑀪𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀫𑀺𑀢𑁆𑀢𑀓𑀭𑀡𑀁. 𑀑𑀪𑀸𑀲𑁄𑀢𑀺 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸. 𑀑𑀪𑀸𑀲𑀓𑀫𑁆𑀫𑀦𑁆𑀢𑀺 𑀯𑀘𑁆𑀙𑀧𑀸𑀮𑀓𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀫𑁂 𑀯𑀘𑁆𑀙𑀸 𑀔𑀻𑀭𑀕𑁄𑀯𑀘𑁆𑀙𑀸 𑀉𑀤𑀸𑀳𑀼 𑀢𑀓𑁆𑀓𑀕𑁄𑀯𑀘𑁆𑀙𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀔𑀻𑀭𑀕𑁄𑀯𑀘𑁆𑀙𑀸, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑀻𑀭𑀕𑁄𑀯𑀘𑁆𑀙𑀸, 𑀬𑀤𑀺 𑀔𑀻𑀭𑀕𑁄𑀯𑀘𑁆𑀙𑀸 𑀲𑀺𑀬𑀼𑀁, 𑀪𑀺𑀓𑁆𑀔𑀽𑀧𑀺 𑀔𑀻𑀭𑀁 𑀮𑀪𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀢𑁂𑀲𑀁 𑀤𑀸𑀭𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀦𑀺𑀯𑁂𑀤𑁂𑀢𑁆𑀯𑀸 𑀔𑀻𑀭𑀤𑀸𑀧𑀦𑀸𑀤𑀺𑀓𑀁 𑀑𑀪𑀸𑀲𑀓𑀭𑀡𑀁. 𑀲𑀸𑀫𑀦𑁆𑀢𑀚𑀧𑁆𑀧𑀸𑀢𑀺 𑀲𑀫𑀻𑀧𑀁 𑀓𑀢𑁆𑀯𑀸 𑀚𑀧𑁆𑀧𑀦𑀁. 𑀓𑀼𑀮𑀽𑀧𑀓𑀪𑀺𑀓𑁆𑀔𑀼 𑀯𑀢𑁆𑀣𑀼 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁.

𑀓𑀼𑀮𑀽𑀧𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀁 𑀤𑀺𑀲𑁆𑀯𑀸 𑀅𑀤𑀸𑀢𑀼𑀓𑀸𑀫𑀸 𑀖𑀭𑀡𑀻 ‘‘𑀢𑀡𑁆𑀟𑀼𑀮𑀸 𑀦𑀢𑁆𑀣𑀻’’𑀢𑀺 𑀪𑀡𑀦𑁆𑀢𑀻 𑀢𑀡𑁆𑀟𑀼𑀮𑁂 𑀆𑀳𑀭𑀺𑀢𑀼𑀓𑀸𑀫𑀸 𑀯𑀺𑀬 𑀧𑀝𑀺𑀯𑀺𑀲𑁆𑀲𑀓𑀖𑀭𑀁 𑀕𑀢𑀸. 𑀪𑀺𑀓𑁆𑀔𑀼𑀧𑀺 𑀅𑀦𑁆𑀢𑁄𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀯𑀸𑀝𑀓𑁄𑀡𑁂 𑀉𑀘𑁆𑀙𑀼𑀁, 𑀪𑀸𑀚𑀦𑁂 𑀕𑀼𑀴𑀁, 𑀧𑀺𑀝𑀓𑁂 𑀮𑁄𑀡𑀫𑀘𑁆𑀙𑀨𑀸𑀮𑁂, 𑀓𑀼𑀫𑁆𑀪𑀺𑀬𑀁 𑀢𑀡𑁆𑀟𑀼𑀮𑁂, 𑀖𑀝𑁂 𑀖𑀢𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀖𑀭𑀡𑀻 ‘‘𑀢𑀡𑁆𑀟𑀼𑀮𑁂 𑀦𑀸𑀮𑀢𑁆𑀣’’𑀦𑁆𑀢𑀺 𑀆𑀕𑀢𑀸. 𑀪𑀺𑀓𑁆𑀔𑀼 ‘‘𑀉𑀧𑀸𑀲𑀺𑀓𑁂 ‘𑀅𑀚𑁆𑀚 𑀪𑀺𑀓𑁆𑀔𑀸 𑀦 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀧𑀝𑀺𑀓𑀘𑁆𑀘𑁂𑀯 𑀦𑀺𑀫𑀺𑀢𑁆𑀢𑀁 𑀅𑀤𑁆𑀤𑀲’’𑀦𑁆𑀢𑀺 𑀆𑀳. 𑀓𑀺𑀁, 𑀪𑀦𑁆𑀢𑁂𑀢𑀺. 𑀓𑀯𑀸𑀝𑀓𑁄𑀡𑁂 𑀦𑀺𑀓𑁆𑀔𑀺𑀢𑁆𑀢𑀁 𑀉𑀘𑁆𑀙𑀼𑀁 𑀯𑀺𑀬 𑀲𑀧𑁆𑀧𑀁 𑀅𑀤𑁆𑀤𑀲𑀁, ‘𑀢𑀁 𑀧𑀳𑀭𑀺𑀲𑁆𑀲𑀸𑀫𑀻’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀪𑀸𑀚𑀦𑁂 𑀞𑀧𑀺𑀢𑀁 𑀕𑀼𑀴𑀧𑀺𑀡𑁆𑀟𑀁 𑀯𑀺𑀬 𑀧𑀸𑀲𑀸𑀡𑀁, 𑀮𑁂𑀟𑁆𑀟𑀼𑀓𑁂𑀦 𑀧𑀳𑀝𑁂𑀦 𑀲𑀧𑁆𑀧𑁂𑀦 𑀓𑀢𑀁 𑀧𑀺𑀝𑀓𑁂 𑀦𑀺𑀓𑁆𑀔𑀺𑀢𑁆𑀢𑀮𑁄𑀡𑀫𑀘𑁆𑀙𑀨𑀸𑀮𑀲𑀤𑀺𑀲𑀁 𑀨𑀡𑀁, 𑀢𑀲𑁆𑀲 𑀢𑀁 𑀮𑁂𑀟𑁆𑀟𑀼𑀁 𑀟𑀁𑀲𑀺𑀢𑀼𑀓𑀸𑀫𑀲𑁆𑀲 𑀓𑀼𑀫𑁆𑀪𑀺𑀬𑀸 𑀢𑀡𑁆𑀟𑀼𑀮𑀲𑀤𑀺𑀲𑁂 𑀤𑀦𑁆𑀢𑁂, 𑀅𑀣𑀲𑁆𑀲 𑀓𑀼𑀧𑀺𑀢𑀲𑁆𑀲 𑀖𑀝𑁂 𑀧𑀓𑁆𑀔𑀺𑀢𑁆𑀢𑀖𑀢𑀲𑀤𑀺𑀲𑀁 𑀫𑀼𑀔𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀯𑀺𑀲𑀫𑀺𑀲𑁆𑀲𑀓𑀁 𑀔𑁂𑀴𑀦𑁆𑀢𑀺. 𑀲𑀸 ‘‘𑀦 𑀲𑀓𑁆𑀓𑀸 𑀫𑀼𑀡𑁆𑀟𑀓𑀁 𑀯𑀜𑁆𑀘𑁂𑀢𑀼’’𑀦𑁆𑀢𑀺 𑀉𑀘𑁆𑀙𑀼𑀁 𑀤𑀢𑁆𑀯𑀸 𑀑𑀤𑀦𑀁 𑀧𑀘𑀺𑀢𑁆𑀯𑀸 𑀖𑀢𑀕𑀼𑀴𑀫𑀘𑁆𑀙𑁂𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑀁 𑀅𑀤𑀸𑀲𑀻𑀢𑀺. 𑀏𑀯𑀁 𑀲𑀫𑀻𑀧𑀁 𑀓𑀢𑁆𑀯𑀸 𑀚𑀧𑁆𑀧𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀓𑀣𑀸𑀢𑀺 𑀬𑀣𑀸 𑀢𑀁 𑀮𑀪𑀢𑀺 𑀢𑀲𑁆𑀲 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀣𑀦𑀦𑁆𑀢𑀺.

𑀦𑀺𑀧𑁆𑀧𑁂𑀲𑀺𑀓𑀢𑀸𑀦𑀺𑀤𑁆𑀤𑁂𑀲𑁂 𑀅𑀓𑁆𑀓𑁄𑀲𑀦𑀸𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑀁. 𑀯𑀫𑁆𑀪𑀦𑀸𑀢𑀺 𑀧𑀭𑀺𑀪𑀯𑀺𑀢𑁆𑀯𑀸 𑀓𑀣𑀦𑀁. 𑀕𑀭𑀳𑀡𑀸𑀢𑀺 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁄𑀲𑀸𑀭𑁄𑀧𑀦𑀸. 𑀉𑀓𑁆𑀔𑁂𑀧𑀦𑀸𑀢𑀺 𑀫𑀸 𑀏𑀢𑀁 𑀏𑀢𑁆𑀣 𑀓𑀣𑁂𑀣𑀸𑀢𑀺 𑀯𑀸𑀘𑀸𑀬 𑀉𑀓𑁆𑀔𑀺𑀧𑀦𑀁. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀲𑀯𑀢𑁆𑀣𑀼𑀓𑀁 𑀲𑀳𑁂𑀢𑀼𑀓𑀁 𑀓𑀢𑁆𑀯𑀸 𑀉𑀓𑁆𑀔𑁂𑀧𑀦𑀸 𑀲𑀫𑀼𑀓𑁆𑀔𑁂𑀧𑀦𑀸. 𑀅𑀣 𑀯𑀸 𑀅𑀤𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀤𑀸𑀦𑀧𑀢𑀻’’𑀢𑀺 𑀏𑀯𑀁 𑀉𑀓𑁆𑀔𑀺𑀧𑀦𑀁 𑀉𑀓𑁆𑀔𑁂𑀧𑀦𑀸. 𑀫𑀳𑀸𑀤𑀸𑀦𑀧𑀢𑀻𑀢𑀺 𑀏𑀯𑀁 𑀲𑀼𑀝𑁆𑀞𑀼 𑀉𑀓𑁆𑀔𑁂𑀧𑀦𑀸 𑀲𑀫𑀼𑀓𑁆𑀔𑁂𑀧𑀦𑀸. 𑀔𑀺𑀧𑀦𑀸𑀢𑀺 𑀓𑀺𑀁 𑀇𑀫𑀲𑁆𑀲 𑀚𑀻𑀯𑀺𑀢𑀁 𑀩𑀻𑀚𑀪𑁄𑀚𑀺𑀦𑁄𑀢𑀺 𑀏𑀯𑀁 𑀉𑀧𑁆𑀧𑀡𑁆𑀟𑀦𑀸. 𑀲𑀁𑀔𑀺𑀧𑀦𑀸𑀢𑀺 𑀓𑀺𑀁 𑀇𑀫𑀁 𑀅𑀤𑀸𑀬𑀓𑁄𑀢𑀺 𑀪𑀡𑀣, 𑀬𑁄 𑀦𑀺𑀘𑁆𑀘𑀓𑀸𑀮𑀁 𑀲𑀩𑁆𑀩𑁂𑀲𑀫𑁆𑀧𑀺 𑀦𑀢𑁆𑀣𑀻𑀢𑀺 𑀯𑀘𑀦𑀁 𑀤𑁂𑀢𑀻𑀢𑀺 𑀲𑀼𑀝𑁆𑀞𑀼𑀢𑀭𑀁 𑀉𑀧𑁆𑀧𑀡𑁆𑀟𑀦𑀸. 𑀧𑀸𑀧𑀦𑀸𑀢𑀺 𑀅𑀤𑀸𑀬𑀓𑀢𑁆𑀢𑀲𑁆𑀲 𑀅𑀯𑀡𑁆𑀡𑀲𑁆𑀲 𑀯𑀸 𑀧𑀸𑀧𑀦𑀁. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀧𑀸𑀧𑀦𑀸 𑀲𑀫𑁆𑀧𑀸𑀧𑀦𑀸. 𑀅𑀯𑀡𑁆𑀡𑀳𑀸𑀭𑀺𑀓𑀸𑀢𑀺 𑀏𑀯𑀁 𑀫𑁂 𑀅𑀯𑀡𑁆𑀡𑀪𑀬𑀸𑀧𑀺 𑀤𑀲𑁆𑀲𑀢𑀻𑀢𑀺 𑀕𑁂𑀳𑀢𑁄 𑀕𑁂𑀳𑀁 𑀕𑀸𑀫𑀢𑁄 𑀕𑀸𑀫𑀁 𑀚𑀦𑀧𑀤𑀢𑁄 𑀚𑀦𑀧𑀤𑀁 𑀅𑀯𑀡𑁆𑀡𑀳𑀭𑀡𑀁. 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸𑀢𑀺 𑀧𑀼𑀭𑀢𑁄 𑀫𑀥𑀼𑀭𑀁 𑀪𑀡𑀺𑀢𑁆𑀯𑀸 𑀧𑀭𑀫𑁆𑀫𑀼𑀔𑁂 𑀅𑀯𑀡𑁆𑀡𑀪𑀸𑀲𑀺𑀢𑀸. 𑀏𑀲𑀸 𑀳𑀺 𑀅𑀪𑀺𑀫𑀼𑀔𑀁 𑀑𑀮𑁄𑀓𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀧𑀭𑀫𑁆𑀫𑀼𑀔𑀸𑀦𑀁 𑀧𑀺𑀝𑁆𑀞𑀺𑀫𑀁𑀲𑀁 𑀔𑀸𑀤𑀦𑀫𑀺𑀯 𑀳𑁄𑀢𑀺, 𑀢𑀲𑁆𑀫𑀸 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸𑀢𑀺 𑀯𑀼𑀢𑁆𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀦𑀺𑀧𑁆𑀧𑁂𑀲𑀺𑀓𑀢𑀸𑀢𑀺 𑀅𑀬𑀁 𑀬𑀲𑁆𑀫𑀸 𑀯𑁂𑀴𑀼𑀧𑁂𑀲𑀺𑀓𑀸𑀬 𑀯𑀺𑀬 𑀅𑀩𑁆𑀪𑀗𑁆𑀕𑀁 𑀧𑀭𑀲𑁆𑀲 𑀕𑀼𑀡𑀁 𑀦𑀺𑀧𑁆𑀧𑁂𑀲𑁂𑀢𑀺 𑀦𑀺𑀧𑀼𑀜𑁆𑀙𑀢𑀺, 𑀬𑀲𑁆𑀫𑀸 𑀯𑀸 𑀕𑀦𑁆𑀥𑀚𑀸𑀢𑀁 𑀦𑀺𑀧𑀺𑀲𑀺𑀢𑁆𑀯𑀸 𑀕𑀦𑁆𑀥𑀫𑀕𑁆𑀕𑀦𑀸 𑀯𑀺𑀬 𑀧𑀭𑀕𑀼𑀡𑁂 𑀦𑀺𑀧𑀺𑀲𑀺𑀢𑁆𑀯𑀸 𑀯𑀺𑀘𑀼𑀡𑁆𑀡𑁂𑀢𑁆𑀯𑀸 𑀏𑀲𑀸 𑀮𑀸𑀪𑀫𑀕𑁆𑀕𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀧𑁆𑀧𑁂𑀲𑀺𑀓𑀢𑀸𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸𑀦𑀺𑀤𑁆𑀤𑁂𑀲𑁂 𑀦𑀺𑀚𑀺𑀕𑀻𑀲𑀦𑀢𑀸𑀢𑀺 𑀫𑀕𑁆𑀕𑀦𑀸. 𑀇𑀢𑁄 𑀮𑀤𑁆𑀥𑀦𑁆𑀢𑀺 𑀇𑀫𑀫𑁆𑀳𑀸 𑀕𑁂𑀳𑀸 𑀮𑀤𑁆𑀥𑀁. 𑀅𑀫𑀼𑀢𑁆𑀭𑀸𑀢𑀺 𑀅𑀫𑀼𑀓𑀫𑁆𑀳𑀺 𑀕𑁂𑀳𑁂. 𑀏𑀝𑁆𑀞𑀻𑀢𑀺 𑀇𑀘𑁆𑀙𑀦𑀸. 𑀕𑀯𑁂𑀝𑁆𑀞𑀻𑀢𑀺 𑀫𑀕𑁆𑀕𑀦𑀸. 𑀧𑀭𑀺𑀬𑁂𑀝𑁆𑀞𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀫𑀕𑁆𑀕𑀦𑀸. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀮𑀤𑁆𑀥𑀁 𑀮𑀤𑁆𑀥𑀁 𑀪𑀺𑀓𑁆𑀔𑀁 𑀢𑀢𑁆𑀭 𑀢𑀢𑁆𑀭 𑀓𑀼𑀮𑀤𑀸𑀭𑀓𑀸𑀦𑀁 𑀤𑀢𑁆𑀯𑀸 𑀅𑀦𑁆𑀢𑁂 𑀔𑀻𑀭𑀬𑀸𑀕𑀼𑀁 𑀮𑀪𑀺𑀢𑁆𑀯𑀸 𑀕𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀘𑁂𑀢𑁆𑀣 𑀓𑀣𑁂𑀢𑀩𑁆𑀩𑀁. 𑀏𑀲𑀦𑀸𑀢𑀺𑀆𑀤𑀻𑀦𑀺 𑀏𑀝𑁆𑀞𑀺𑀆𑀤𑀻𑀦𑀫𑁂𑀯 𑀯𑁂𑀯𑀘𑀦𑀸𑀦𑀺, 𑀢𑀲𑁆𑀫𑀸 𑀏𑀝𑁆𑀞𑀻𑀢𑀺 𑀏𑀲𑀦𑀸. 𑀕𑀯𑁂𑀝𑁆𑀞𑀻𑀢𑀺 𑀕𑀯𑁂𑀲𑀦𑀸, 𑀧𑀭𑀺𑀬𑁂𑀝𑁆𑀞𑀻𑀢𑀺 𑀧𑀭𑀺𑀬𑁂𑀲𑀦𑀸. 𑀇𑀘𑁆𑀘𑁂𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀓𑀼𑀳𑀦𑀸𑀤𑀻𑀦𑀁 𑀅𑀢𑁆𑀣𑁄.

𑀇𑀤𑀸𑀦𑀺 𑀏𑀯𑀫𑀸𑀤𑀻𑀦𑀜𑁆𑀘 𑀧𑀸𑀧𑀥𑀫𑁆𑀫𑀸𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀅𑀗𑁆𑀕𑀁, 𑀦𑀺𑀫𑀺𑀢𑁆𑀢𑀁, 𑀉𑀧𑁆𑀧𑀸𑀢𑀁, 𑀲𑀼𑀧𑀺𑀦𑀁, 𑀮𑀓𑁆𑀔𑀡𑀁, 𑀫𑀽𑀲𑀺𑀓𑀘𑁆𑀙𑀺𑀦𑁆𑀦𑀁, 𑀅𑀕𑁆𑀕𑀺𑀳𑁄𑀫𑀁, 𑀤𑀩𑁆𑀩𑀺𑀳𑁄𑀫’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁧) 𑀆𑀤𑀺𑀦𑀸 𑀦𑀬𑁂𑀦 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀸𑀦𑀁 𑀅𑀦𑁂𑀓𑁂𑀲𑀁 𑀧𑀸𑀧𑀥𑀫𑁆𑀫𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀬𑁆𑀯𑀸𑀬𑀁 𑀇𑀫𑁂𑀲𑀁 𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀻𑀢𑀺𑀓𑁆𑀓𑀫𑀯𑀲𑁂𑀦, 𑀇𑀫𑁂𑀲𑀜𑁆𑀘 ‘‘𑀓𑀼𑀳𑀦𑀸 𑀮𑀧𑀦𑀸 𑀦𑁂𑀫𑀺𑀢𑁆𑀢𑀺𑀓𑀢𑀸 𑀦𑀺𑀧𑁆𑀧𑁂𑀲𑀺𑀓𑀢𑀸 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸’’𑀢𑀺 𑀏𑀯𑀫𑀸𑀤𑀻𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑁄 𑀫𑀺𑀘𑁆𑀙𑀸𑀚𑀻𑀯𑁄, 𑀬𑀸 𑀢𑀲𑁆𑀫𑀸 𑀲𑀩𑁆𑀩𑀧𑁆𑀧𑀓𑀸𑀭𑀸𑀧𑀺 𑀫𑀺𑀘𑁆𑀙𑀸𑀚𑀻𑀯𑀸 𑀯𑀺𑀭𑀢𑀺, 𑀇𑀤𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄. 𑀏𑀢𑀁 𑀆𑀕𑀫𑁆𑀫 𑀚𑀻𑀯𑀦𑁆𑀢𑀻𑀢𑀺 𑀆𑀚𑀻𑀯𑁄. 𑀓𑁄 𑀲𑁄, 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀯𑀸𑀬𑀸𑀫𑁄. 𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀧𑀭𑀺𑀲𑀼𑀤𑁆𑀥𑀢𑀸. 𑀆𑀚𑀻𑀯𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀺 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺.

𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁

𑁧𑁮. 𑀬𑀁 𑀧𑀦𑁂𑀢𑀁 𑀢𑀤𑀦𑀦𑁆𑀢𑀭𑀁 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄𑀢𑀺 𑀉𑀧𑀸𑀬𑁂𑀦 𑀧𑀣𑁂𑀦 𑀧𑀝𑀺𑀲𑀗𑁆𑀔𑀸𑀬 𑀜𑀢𑁆𑀯𑀸, 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀫𑁂𑀯 ‘‘𑀬𑁄𑀦𑀺𑀲𑁄 𑀧𑀝𑀺𑀲𑀗𑁆𑀔𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀘𑀻𑀯𑀭𑀦𑁆𑀢𑀺 𑀅𑀦𑁆𑀢𑀭𑀯𑀸𑀲𑀓𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺. 𑀧𑀝𑀺𑀲𑁂𑀯𑀢𑀻𑀢𑀺 𑀧𑀭𑀺𑀪𑀼𑀜𑁆𑀚𑀢𑀺, 𑀦𑀺𑀯𑀸𑀲𑁂𑀢𑀺 𑀯𑀸 𑀧𑀸𑀭𑀼𑀧𑀢𑀺 𑀯𑀸. 𑀬𑀸𑀯𑀤𑁂𑀯𑀸𑀢𑀺 𑀧𑀬𑁄𑀚𑀦𑀸𑀯𑀥𑀺𑀧𑀭𑀺𑀘𑁆𑀙𑁂𑀤𑀦𑀺𑀬𑀫𑀯𑀘𑀦𑀁, 𑀏𑀢𑁆𑀢𑀓𑀫𑁂𑀯 𑀳𑀺 𑀬𑁄𑀕𑀺𑀦𑁄 𑀘𑀻𑀯𑀭𑀧𑀝𑀺𑀲𑁂𑀯𑀦𑁂 𑀧𑀬𑁄𑀚𑀦𑀁 𑀬𑀤𑀺𑀤𑀁 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸𑀢𑀺𑀆𑀤𑀺, 𑀦 𑀇𑀢𑁄 𑀪𑀺𑀬𑁆𑀬𑁄. 𑀲𑀻𑀢𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀩𑀳𑀺𑀤𑁆𑀥𑀸𑀉𑀢𑀼𑀧𑀭𑀺𑀡𑀸𑀫𑀦𑀯𑀲𑁂𑀦 𑀯𑀸 𑀉𑀧𑁆𑀧𑀦𑁆𑀦𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀻𑀢𑀲𑁆𑀲. 𑀧𑀝𑀺𑀖𑀸𑀢𑀸𑀬𑀸𑀢𑀺 𑀧𑀝𑀺𑀳𑀦𑀦𑀢𑁆𑀣𑀁. 𑀬𑀣𑀸 𑀲𑀭𑀻𑀭𑁂 𑀆𑀩𑀸𑀥𑀁 𑀦 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀢𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁. 𑀲𑀻𑀢𑀩𑁆𑀪𑀸𑀳𑀢𑁂 𑀳𑀺 𑀲𑀭𑀻𑀭𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀬𑁄𑀦𑀺𑀲𑁄 𑀧𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬 𑀘𑀻𑀯𑀭𑀁 𑀧𑀝𑀺𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀪𑀕𑀯𑀸 𑀅𑀦𑀼𑀜𑁆𑀜𑀸𑀲𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑁂𑀯𑀮𑀜𑁆𑀳𑁂𑀢𑁆𑀣 𑀉𑀡𑁆𑀳𑀲𑁆𑀲𑀸𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑁆𑀲. 𑀢𑀲𑁆𑀲 𑀯𑀦𑀤𑀸𑀳𑀸𑀤𑀻𑀲𑀼 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀟𑀁𑀲𑀸𑀢𑀺 𑀟𑀁𑀲𑀦𑀫𑀓𑁆𑀔𑀺𑀓𑀸, 𑀅𑀦𑁆𑀥𑀫𑀓𑁆𑀔𑀺𑀓𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀓𑀲𑀸 𑀫𑀓𑀲𑀸 𑀏𑀯. 𑀯𑀸𑀢𑀸𑀢𑀺 𑀲𑀭𑀚𑀅𑀭𑀚𑀸𑀤𑀺𑀪𑁂𑀤𑀸. 𑀆𑀢𑀧𑁄𑀢𑀺 𑀲𑀽𑀭𑀺𑀬𑀸𑀢𑀧𑁄. 𑀲𑀭𑀻𑀲𑀧𑀸𑀢𑀺 𑀬𑁂 𑀓𑁂𑀘𑀺 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀻𑀖𑀚𑀸𑀢𑀺𑀓𑀸 𑀲𑀧𑁆𑀧𑀸𑀤𑀬𑁄, 𑀢𑁂𑀲𑀁 𑀤𑀝𑁆𑀞𑀲𑀫𑁆𑀨𑀲𑁆𑀲𑁄 𑀘 𑀨𑀼𑀝𑁆𑀞𑀲𑀫𑁆𑀨𑀲𑁆𑀲𑁄 𑀘𑀸𑀢𑀺 𑀤𑀼𑀯𑀺𑀥𑁄 𑀲𑀫𑁆𑀨𑀲𑁆𑀲𑁄, 𑀲𑁄𑀧𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀦 𑀩𑀸𑀥𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀢𑁂𑀲𑀁 𑀧𑀝𑀺𑀖𑀸𑀢𑀢𑁆𑀣𑀸𑀬 𑀧𑀝𑀺𑀲𑁂𑀯𑀢𑀺. 𑀬𑀸𑀯𑀤𑁂𑀯𑀸𑀢𑀺 𑀧𑀼𑀦 𑀏𑀢𑀲𑁆𑀲 𑀯𑀘𑀦𑀁 𑀦𑀺𑀬𑀢𑀧𑀬𑁄𑀚𑀦𑀸𑀯𑀥𑀺𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁, 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀜𑁆𑀳𑀺 𑀦𑀺𑀬𑀢𑀧𑀬𑁄𑀚𑀦𑀁, 𑀇𑀢𑀭𑀸𑀦𑀺 𑀓𑀤𑀸𑀘𑀺 𑀓𑀤𑀸𑀘𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀳𑀺𑀭𑀺𑀓𑁄𑀧𑀻𑀦𑀦𑁆𑀢𑀺 𑀢𑀁 𑀢𑀁 𑀲𑀫𑁆𑀩𑀸𑀥𑀝𑁆𑀞𑀸𑀦𑀁. 𑀬𑀲𑁆𑀫𑀺𑀁 𑀬𑀲𑁆𑀫𑀺𑀜𑁆𑀳𑀺 𑀅𑀗𑁆𑀕𑁂 𑀯𑀺𑀯𑀭𑀺𑀬𑀫𑀸𑀦𑁂 𑀳𑀺𑀭𑀻 𑀓𑀼𑀧𑁆𑀧𑀢𑀺 𑀯𑀺𑀦𑀲𑁆𑀲𑀢𑀺, 𑀢𑀁 𑀢𑀁 𑀳𑀺𑀭𑀺𑀁 𑀓𑁄𑀧𑀦𑀢𑁄 𑀳𑀺𑀭𑀺𑀓𑁄𑀧𑀻𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀘 𑀳𑀺𑀭𑀺𑀓𑁄𑀧𑀻𑀦𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀦𑁆𑀢𑀺 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁. 𑀳𑀺𑀭𑀺𑀓𑁄𑀧𑀻𑀦𑀁 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀦𑁆𑀢𑀺𑀧𑀺 𑀧𑀸𑀞𑁄.

𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀆𑀳𑀸𑀭𑀁. 𑀬𑁄 𑀳𑀺 𑀓𑁄𑀘𑀺 𑀆𑀳𑀸𑀭𑁄 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑁄𑀮𑁆𑀬𑁂𑀦 𑀧𑀢𑁆𑀢𑁂 𑀧𑀢𑀺𑀢𑀢𑁆𑀢𑀸 𑀧𑀺𑀡𑁆𑀟𑀧𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀺𑀡𑁆𑀟𑀸𑀦𑀁 𑀯𑀸 𑀧𑀸𑀢𑁄 𑀧𑀺𑀡𑁆𑀟𑀧𑀸𑀢𑁄, 𑀢𑀢𑁆𑀣 𑀢𑀢𑁆𑀣 𑀮𑀤𑁆𑀥𑀸𑀦𑀁 𑀪𑀺𑀓𑁆𑀔𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀲𑀫𑀽𑀳𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑁂𑀯 𑀤𑀯𑀸𑀬𑀸𑀢𑀺 𑀦 𑀕𑀸𑀫𑀤𑀸𑀭𑀓𑀸𑀤𑀬𑁄 𑀯𑀺𑀬 𑀤𑀯𑀢𑁆𑀣𑀁, 𑀓𑀻𑀴𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀫𑀤𑀸𑀬𑀸𑀢𑀺 𑀦 𑀫𑀼𑀝𑁆𑀞𑀺𑀓𑀫𑀮𑁆𑀮𑀸𑀤𑀬𑁄 𑀯𑀺𑀬 𑀫𑀤𑀢𑁆𑀣𑀁, 𑀩𑀮𑀫𑀤𑀦𑀺𑀫𑀺𑀢𑁆𑀢𑀁 𑀧𑁄𑀭𑀺𑀲𑀫𑀤𑀦𑀺𑀫𑀺𑀢𑁆𑀢𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀫𑀡𑁆𑀟𑀦𑀸𑀬𑀸𑀢𑀺 𑀦 𑀅𑀦𑁆𑀢𑁂𑀧𑀼𑀭𑀺𑀓𑀯𑁂𑀲𑀺𑀬𑀸𑀤𑀬𑁄 𑀯𑀺𑀬 𑀫𑀡𑁆𑀟𑀦𑀢𑁆𑀣𑀁, 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀧𑀻𑀡𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀯𑀺𑀪𑀽𑀲𑀦𑀸𑀬𑀸𑀢𑀺 𑀦 𑀦𑀝𑀦𑀘𑁆𑀘𑀓𑀸𑀤𑀬𑁄 𑀯𑀺𑀬 𑀯𑀺𑀪𑀽𑀲𑀦𑀢𑁆𑀣𑀁, 𑀧𑀲𑀦𑁆𑀦𑀘𑁆𑀙𑀯𑀺𑀯𑀡𑁆𑀡𑀢𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀦𑁂𑀯 𑀤𑀯𑀸𑀬𑀸𑀢𑀺 𑀏𑀢𑀁 𑀫𑁄𑀳𑀽𑀧𑀦𑀺𑀲𑁆𑀲𑀬𑀧𑁆𑀧𑀳𑀸𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀦 𑀫𑀤𑀸𑀬𑀸𑀢𑀺 𑀏𑀢𑀁 𑀤𑁄𑀲𑀽𑀧𑀦𑀺𑀲𑁆𑀲𑀬𑀧𑁆𑀧𑀳𑀸𑀦𑀢𑁆𑀣𑀁. 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬𑀸𑀢𑀺 𑀏𑀢𑀁 𑀭𑀸𑀕𑀽𑀧𑀦𑀺𑀲𑁆𑀲𑀬𑀧𑁆𑀧𑀳𑀸𑀦𑀢𑁆𑀣𑀁. 𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬𑀸𑀢𑀺 𑀘𑁂𑀢𑀁 𑀅𑀢𑁆𑀢𑀦𑁄 𑀲𑀁𑀬𑁄𑀚𑀦𑀼𑀧𑁆𑀧𑀢𑁆𑀢𑀺𑀧𑀝𑀺𑀲𑁂𑀥𑀦𑀢𑁆𑀣𑀁. 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬𑀸𑀢𑀺 𑀏𑀢𑀁 𑀧𑀭𑀲𑁆𑀲𑀧𑀺 𑀲𑀁𑀬𑁄𑀚𑀦𑀼𑀧𑁆𑀧𑀢𑁆𑀢𑀺𑀧𑀝𑀺𑀲𑁂𑀥𑀦𑀢𑁆𑀣𑀁. 𑀘𑀢𑀽𑀳𑀺𑀧𑀺 𑀘𑁂𑀢𑁂𑀳𑀺 𑀅𑀬𑁄𑀦𑀺𑀲𑁄 𑀧𑀝𑀺𑀧𑀢𑁆𑀢𑀺𑀬𑀸 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀲𑁆𑀲 𑀘 𑀧𑀳𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀸𑀯𑀤𑁂𑀯𑀸𑀢𑀺 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀇𑀫𑀲𑁆𑀲 𑀓𑀸𑀬𑀲𑁆𑀲𑀸𑀢𑀺 𑀏𑀢𑀲𑁆𑀲 𑀘𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀭𑀽𑀧𑀓𑀸𑀬𑀲𑁆𑀲. 𑀞𑀺𑀢𑀺𑀬𑀸𑀢𑀺 𑀧𑀩𑀦𑁆𑀥𑀝𑁆𑀞𑀺𑀢𑀢𑁆𑀣𑀁. 𑀬𑀸𑀧𑀦𑀸𑀬𑀸𑀢𑀺 𑀧𑀯𑀢𑁆𑀢𑀺𑀬𑀸 𑀅𑀯𑀺𑀘𑁆𑀙𑁂𑀤𑀢𑁆𑀣𑀁, 𑀘𑀺𑀭𑀓𑀸𑀮𑀝𑁆𑀞𑀺𑀢𑀢𑁆𑀣𑀁 𑀯𑀸. 𑀖𑀭𑀽𑀧𑀢𑁆𑀣𑀫𑁆𑀪𑀫𑀺𑀯 𑀳𑀺 𑀚𑀺𑀡𑁆𑀡𑀖𑀭𑀲𑀸𑀫𑀺𑀓𑁄, 𑀅𑀓𑁆𑀔𑀩𑁆𑀪𑀜𑁆𑀚𑀦𑀫𑀺𑀯 𑀘 𑀲𑀸𑀓𑀝𑀺𑀓𑁄 𑀓𑀸𑀬𑀲𑁆𑀲 𑀞𑀺𑀢𑀢𑁆𑀣𑀁 𑀬𑀸𑀧𑀦𑀢𑁆𑀣𑀜𑁆𑀘𑁂𑀲 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀲𑁂𑀯𑀢𑀺, 𑀦 𑀤𑀯𑀫𑀤𑀫𑀡𑁆𑀟𑀦𑀯𑀺𑀪𑀽𑀲𑀦𑀢𑁆𑀣𑀁. 𑀅𑀧𑀺𑀘 𑀞𑀺𑀢𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬𑀸𑀢𑀺 𑀏𑀢𑁆𑀢𑀸𑀯𑀢𑀸 𑀏𑀢𑀲𑁆𑀲 𑀓𑀸𑀬𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀯𑀢𑁆𑀢𑀸𑀧𑀦𑀢𑁆𑀣𑀦𑁆𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸𑀢𑀺 𑀯𑀺𑀳𑀺𑀁𑀲𑀸 𑀦𑀸𑀫 𑀚𑀺𑀖𑀘𑁆𑀙𑀸 𑀆𑀩𑀸𑀥𑀝𑁆𑀞𑁂𑀦. 𑀢𑀲𑁆𑀲𑀸 𑀉𑀧𑀭𑀫𑀢𑁆𑀣𑀫𑁆𑀧𑁂𑀲 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀲𑁂𑀯𑀢𑀺, 𑀯𑀡𑀸𑀮𑁂𑀧𑀦𑀫𑀺𑀯 𑀉𑀡𑁆𑀳𑀲𑀻𑀢𑀸𑀤𑀻𑀲𑀼 𑀢𑀧𑁆𑀧𑀝𑀺𑀓𑀸𑀭𑀁 𑀯𑀺𑀬 𑀘. 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸𑀢𑀺 𑀲𑀓𑀮𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘 𑀅𑀦𑀼𑀕𑁆𑀕𑀳𑀢𑁆𑀣𑀁. 𑀅𑀬𑀜𑁆𑀳𑀺 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸 𑀓𑀸𑀬𑀩𑀮𑀁 𑀦𑀺𑀲𑁆𑀲𑀸𑀬 𑀲𑀺𑀓𑁆𑀔𑀢𑁆𑀢𑀬𑀸𑀦𑀼𑀬𑁄𑀕𑀯𑀲𑁂𑀦 𑀪𑀯𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬 𑀧𑀝𑀺𑀲𑁂𑀯𑀢𑀺, 𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑀸 𑀧𑀼𑀢𑁆𑀢𑀫𑀁𑀲𑀁 (𑀲𑀁. 𑀦𑀺. 𑁨.𑁬𑁩) 𑀯𑀺𑀬, 𑀦𑀤𑀻𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑀸 𑀓𑀼𑀮𑁆𑀮𑀁 (𑀫. 𑀦𑀺. 𑁧.𑁨𑁪𑁦) 𑀯𑀺𑀬, 𑀲𑀫𑀼𑀤𑁆𑀤𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑀸 𑀦𑀸𑀯𑀫𑀺𑀯 𑀘.

𑀇𑀢𑀺𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀏𑀢𑀁 𑀇𑀫𑀺𑀦𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑁂𑀯𑀦𑁂𑀦 𑀧𑀼𑀭𑀸𑀡𑀜𑁆𑀘 𑀚𑀺𑀖𑀘𑁆𑀙𑀸𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀅𑀧𑀭𑀺𑀫𑀺𑀢𑀪𑁄𑀚𑀦𑀧𑀘𑁆𑀘𑀬𑀁 𑀆𑀳𑀭𑀳𑀢𑁆𑀣𑀓𑀅𑀮𑀁𑀲𑀸𑀝𑀓𑀢𑀢𑁆𑀭𑀯𑀝𑁆𑀝𑀓𑀓𑀸𑀓𑀫𑀸𑀲𑀓𑀪𑀼𑀢𑁆𑀢𑀯𑀫𑀺𑀢𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀜𑁆𑀜𑀢𑀭𑁄 𑀯𑀺𑀬 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺𑀧𑀺 𑀧𑀝𑀺𑀲𑁂𑀯𑀢𑀺, 𑀪𑁂𑀲𑀚𑁆𑀚𑀫𑀺𑀯 𑀕𑀺𑀮𑀸𑀦𑁄. 𑀅𑀣 𑀯𑀸 𑀬𑀸 𑀅𑀥𑀼𑀦𑀸 𑀅𑀲𑀧𑁆𑀧𑀸𑀬𑀸𑀧𑀭𑀺𑀫𑀺𑀢𑀪𑁄𑀚𑀦𑀁 𑀦𑀺𑀲𑁆𑀲𑀸𑀬 𑀧𑀼𑀭𑀸𑀡𑀓𑀫𑁆𑀫𑀧𑀘𑁆𑀘𑀬𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀧𑀼𑀭𑀸𑀡𑀯𑁂𑀤𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀲𑀧𑁆𑀧𑀸𑀬𑀧𑀭𑀺𑀫𑀺𑀢𑀪𑁄𑀚𑀦𑁂𑀦 𑀢𑀲𑁆𑀲𑀸 𑀧𑀘𑁆𑀘𑀬𑀁 𑀯𑀺𑀦𑀸𑀲𑁂𑀦𑁆𑀢𑁄 𑀢𑀁 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺. 𑀬𑀸 𑀘𑀸𑀬𑀁 𑀅𑀥𑀼𑀦𑀸 𑀓𑀢𑀁 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑀓𑀫𑁆𑀫𑀽𑀧𑀘𑀬𑀁 𑀦𑀺𑀲𑁆𑀲𑀸𑀬 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀢𑁄 𑀦𑀯𑀯𑁂𑀤𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀬𑀼𑀢𑁆𑀢𑀧𑀭𑀺𑀪𑁄𑀕𑀯𑀲𑁂𑀦 𑀢𑀲𑁆𑀲𑀸 𑀫𑀽𑀮𑀁 𑀅𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀢𑀁 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀬𑀼𑀢𑁆𑀢𑀧𑀭𑀺𑀪𑁄𑀕𑀲𑀗𑁆𑀕𑀳𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀧𑁆𑀧𑀳𑀸𑀦𑀁 𑀥𑀫𑁆𑀫𑀺𑀓𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑁄 𑀘 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀧𑀭𑀺𑀫𑀺𑀢𑀧𑀭𑀺𑀪𑁄𑀕𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀲𑁆𑀲 𑀇𑀭𑀺𑀬𑀸𑀧𑀣𑀪𑀜𑁆𑀚𑀓𑀲𑁆𑀲 𑀯𑀸 𑀧𑀭𑀺𑀲𑁆𑀲𑀬𑀲𑁆𑀲 𑀅𑀪𑀸𑀯𑀢𑁄 𑀘𑀺𑀭𑀓𑀸𑀮𑀕𑀫𑀦𑀲𑀗𑁆𑀔𑀸𑀢𑀸 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀇𑀫𑀲𑁆𑀲 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀓𑀸𑀬𑀲𑁆𑀲𑀸𑀢𑀺𑀧𑀺 𑀧𑀝𑀺𑀲𑁂𑀯𑀢𑀺, 𑀬𑀸𑀧𑁆𑀬𑀭𑁄𑀕𑀻 𑀯𑀺𑀬 𑀢𑀧𑁆𑀧𑀘𑁆𑀘𑀬𑀁. 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺 𑀅𑀬𑀼𑀢𑁆𑀢𑀧𑀭𑀺𑀬𑁂𑀲𑀦𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀧𑀭𑀺𑀯𑀚𑁆𑀚𑀦𑁂𑀦 𑀅𑀦𑀯𑀚𑁆𑀚𑀢𑀸, 𑀧𑀭𑀺𑀫𑀺𑀢𑀧𑀭𑀺𑀪𑁄𑀕𑁂𑀦 𑀨𑀸𑀲𑀼𑀯𑀺𑀳𑀸𑀭𑁄. 𑀅𑀲𑀧𑁆𑀧𑀸𑀬𑀸𑀧𑀭𑀺𑀫𑀺𑀢𑀧𑀭𑀺𑀪𑁄𑀕𑀧𑀘𑁆𑀘𑀬𑀸 𑀅𑀭𑀢𑀺𑀢𑀦𑁆𑀤𑀻𑀯𑀺𑀚𑀫𑁆𑀪𑀺𑀢𑀸. 𑀯𑀺𑀜𑁆𑀜𑀽𑀕𑀭𑀳𑀸𑀤𑀺𑀤𑁄𑀲𑀸𑀪𑀸𑀯𑁂𑀦 𑀯𑀸 𑀅𑀦𑀯𑀚𑁆𑀚𑀢𑀸, 𑀲𑀧𑁆𑀧𑀸𑀬𑀧𑀭𑀺𑀫𑀺𑀢𑀪𑁄𑀚𑀦𑀧𑀘𑁆𑀘𑀬𑀸 𑀓𑀸𑀬𑀩𑀮𑀲𑀫𑁆𑀪𑀯𑁂𑀦 𑀨𑀸𑀲𑀼𑀯𑀺𑀳𑀸𑀭𑁄. 𑀬𑀸𑀯𑀤𑀢𑁆𑀣𑀉𑀤𑀭𑀸𑀯𑀤𑁂𑀳𑀓𑀪𑁄𑀚𑀦𑀧𑀭𑀺𑀯𑀚𑁆𑀚𑀦𑁂𑀦 𑀯𑀸 𑀲𑁂𑀬𑁆𑀬𑀲𑀼𑀔𑀧𑀲𑁆𑀲𑀲𑀼𑀔𑀫𑀺𑀤𑁆𑀥𑀲𑀼𑀔𑀸𑀦𑀁 𑀧𑀳𑀸𑀦𑀢𑁄 𑀅𑀦𑀯𑀚𑁆𑀚𑀢𑀸, 𑀘𑀢𑀼𑀧𑀜𑁆𑀘𑀸𑀮𑁄𑀧𑀫𑀢𑁆𑀢𑀊𑀦𑀪𑁄𑀚𑀦𑁂𑀦 𑀘𑀢𑀼𑀇𑀭𑀺𑀬𑀸𑀧𑀣𑀬𑁄𑀕𑁆𑀬𑀪𑀸𑀯𑀧𑀝𑀺𑀧𑀸𑀤𑀦𑀢𑁄 𑀨𑀸𑀲𑀼𑀯𑀺𑀳𑀸𑀭𑁄 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺𑀧𑀺 𑀧𑀝𑀺𑀲𑁂𑀯𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩);

𑀏𑀢𑁆𑀢𑀸𑀯𑀢𑀸 𑀘 𑀧𑀬𑁄𑀚𑀦𑀧𑀭𑀺𑀕𑁆𑀕𑀳𑁄 𑀫𑀚𑁆𑀛𑀺𑀫𑀸 𑀘 𑀧𑀝𑀺𑀧𑀤𑀸 𑀤𑀻𑀧𑀺𑀢𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑁂𑀦𑀸𑀲𑀦𑀦𑁆𑀢𑀺 𑀲𑁂𑀦𑀜𑁆𑀘 𑀆𑀲𑀦𑀜𑁆𑀘. 𑀬𑀢𑁆𑀣 𑀬𑀢𑁆𑀣 𑀳𑀺 𑀲𑁂𑀢𑀺 𑀯𑀺𑀳𑀸𑀭𑁂 𑀯𑀸 𑀅𑀟𑁆𑀠𑀬𑁄𑀕𑀸𑀤𑀺𑀫𑁆𑀳𑀺 𑀯𑀸, 𑀢𑀁 𑀲𑁂𑀦𑀁. 𑀬𑀢𑁆𑀣 𑀬𑀢𑁆𑀣 𑀆𑀲𑀢𑀺 𑀦𑀺𑀲𑀻𑀤𑀢𑀺, 𑀢𑀁 𑀆𑀲𑀦𑀁. 𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀲𑁂𑀦𑀸𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀦𑁆𑀢𑀺 𑀧𑀭𑀺𑀲𑀳𑀦𑀝𑁆𑀞𑁂𑀦 𑀉𑀢𑀼𑀬𑁂𑀯 𑀉𑀢𑀼𑀧𑀭𑀺𑀲𑁆𑀲𑀬𑁄. 𑀉𑀢𑀼𑀧𑀭𑀺𑀲𑁆𑀲𑀬𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀜𑁆𑀘 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀜𑁆𑀘. 𑀬𑁄 𑀲𑀭𑀻𑀭𑀸𑀩𑀸𑀥𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀓𑀭𑁄 𑀅𑀲𑀧𑁆𑀧𑀸𑀬𑁄 𑀉𑀢𑀼 𑀲𑁂𑀦𑀸𑀲𑀦𑀧𑀝𑀺𑀲𑁂𑀯𑀦𑁂𑀦 𑀯𑀺𑀦𑁄𑀤𑁂𑀢𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁 𑀏𑀓𑀻𑀪𑀸𑀯𑀲𑀼𑀔𑀢𑁆𑀣𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀫𑀜𑁆𑀘 𑀲𑀻𑀢𑀧𑀝𑀺𑀖𑀸𑀢𑀸𑀤𑀺𑀦𑀸𑀯 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀁 𑀯𑀼𑀢𑁆𑀢𑀫𑁂𑀯. 𑀬𑀣𑀸 𑀧𑀦 𑀘𑀻𑀯𑀭𑀧𑀝𑀺𑀲𑁂𑀯𑀦𑁂 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀁 𑀦𑀺𑀬𑀢𑀧𑀬𑁄𑀚𑀦𑀁, 𑀇𑀢𑀭𑀸𑀦𑀺 𑀓𑀤𑀸𑀘𑀺 𑀓𑀤𑀸𑀘𑀺 𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀦𑀺𑀬𑀢𑀁 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀅𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀉𑀢𑀼 𑀉𑀢𑀼𑀬𑁂𑀯. 𑀧𑀭𑀺𑀲𑁆𑀲𑀬𑁄 𑀧𑀦 𑀤𑀼𑀯𑀺𑀥𑁄 𑀧𑀸𑀓𑀝𑀧𑀭𑀺𑀲𑁆𑀲𑀬𑁄 𑀘, 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁄 𑀘 (𑀫𑀳𑀸𑀦𑀺. 𑁫). 𑀢𑀢𑁆𑀣 𑀧𑀸𑀓𑀝𑀧𑀭𑀺𑀲𑁆𑀲𑀬𑁄 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄. 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁄 𑀭𑀸𑀕𑀤𑁄𑀲𑀸𑀤𑀬𑁄. 𑀬𑁂 𑀬𑀢𑁆𑀣 𑀅𑀧𑀭𑀺𑀕𑀼𑀢𑁆𑀢𑀺𑀬𑀸 𑀘 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀘 𑀆𑀩𑀸𑀥𑀁 𑀦 𑀓𑀭𑁄𑀦𑁆𑀢𑀺, 𑀢𑀁 𑀲𑁂𑀦𑀸𑀲𑀦𑀁 𑀏𑀯𑀁 𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀲𑁂𑀯𑀦𑁆𑀢𑁄 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑁂𑀦𑀸𑀲𑀦𑀁 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀧𑀝𑀺𑀲𑁂𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀏𑀢𑁆𑀣 𑀭𑁄𑀕𑀲𑁆𑀲 𑀧𑀝𑀺𑀅𑀬𑀦𑀝𑁆𑀞𑁂𑀦 𑀧𑀘𑁆𑀘𑀬𑁄, 𑀧𑀘𑁆𑀘𑀦𑀻𑀓𑀕𑀫𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀧𑁆𑀧𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀪𑀺𑀲𑀓𑁆𑀓𑀲𑁆𑀲 𑀓𑀫𑁆𑀫𑀁 𑀢𑁂𑀦 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀪𑁂𑀲𑀚𑁆𑀚𑀁. 𑀕𑀺𑀮𑀸𑀦𑀧𑀘𑁆𑀘𑀬𑁄𑀯 𑀪𑁂𑀲𑀚𑁆𑀚𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀁, 𑀬𑀁𑀓𑀺𑀜𑁆𑀘𑀺 𑀕𑀺𑀮𑀸𑀦𑀲𑁆𑀲 𑀲𑀧𑁆𑀧𑀸𑀬𑀁 𑀪𑀺𑀲𑀓𑁆𑀓𑀓𑀫𑁆𑀫𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀓𑁆𑀔𑀸𑀭𑁄𑀢𑀺 𑀧𑀦 ‘‘𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁭.𑁬𑁭) 𑀆𑀤𑀻𑀲𑀼 𑀧𑀭𑀺𑀯𑀸𑀭𑁄 𑀯𑀼𑀘𑁆𑀘𑀢𑀺. ‘‘𑀭𑀣𑁄 𑀲𑀻𑀮𑀧𑀭𑀺𑀓𑁆𑀔𑀸𑀭𑁄, 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄’’𑀢𑀺 (𑀲𑀁. 𑀦𑀺. 𑁫.𑁪) 𑀆𑀤𑀻𑀲𑀼 𑀅𑀮𑀗𑁆𑀓𑀸𑀭𑁄. ‘‘𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁧.𑁧𑁯𑁧-𑁧𑁯𑁨) 𑀆𑀤𑀻𑀲𑀼 𑀲𑀫𑁆𑀪𑀸𑀭𑁄. 𑀇𑀥 𑀧𑀦 𑀲𑀫𑁆𑀪𑀸𑀭𑁄𑀧𑀺 𑀧𑀭𑀺𑀯𑀸𑀭𑁄𑀧𑀺 𑀯𑀝𑁆𑀝𑀢𑀺. 𑀢𑀜𑁆𑀳𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀁 𑀚𑀻𑀯𑀺𑀢𑀲𑁆𑀲 𑀧𑀭𑀺𑀯𑀸𑀭𑁄𑀧𑀺 𑀳𑁄𑀢𑀺, 𑀚𑀻𑀯𑀺𑀢𑀦𑀸𑀲𑀓𑀸𑀩𑀸𑀥𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀁 𑀅𑀤𑀢𑁆𑀯𑀸 𑀭𑀓𑁆𑀔𑀡𑀢𑁄 𑀲𑀫𑁆𑀪𑀸𑀭𑁄𑀧𑀺. 𑀬𑀣𑀸 𑀘𑀺𑀭𑀁 𑀧𑀯𑀢𑁆𑀢𑀢𑀺, 𑀏𑀯𑀫𑀲𑁆𑀲 𑀓𑀸𑀭𑀡𑀪𑀸𑀯𑀢𑁄, 𑀢𑀲𑁆𑀫𑀸 𑀧𑀭𑀺𑀓𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀜𑁆𑀘 𑀢𑀁 𑀧𑀭𑀺𑀓𑁆𑀔𑀸𑀭𑁄 𑀘𑀸𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄. 𑀢𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁. 𑀕𑀺𑀮𑀸𑀦𑀲𑁆𑀲 𑀬𑀁𑀓𑀺𑀜𑁆𑀘𑀺 𑀲𑀧𑁆𑀧𑀸𑀬𑀁 𑀪𑀺𑀲𑀓𑁆𑀓𑀸𑀦𑀼𑀜𑁆𑀜𑀸𑀢𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀚𑀸𑀢𑀸𑀦𑀁 𑀪𑀽𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀸𑀦𑀁. 𑀯𑁂𑀬𑁆𑀬𑀸𑀩𑀸𑀥𑀺𑀓𑀸𑀦𑀦𑁆𑀢𑀺 𑀏𑀢𑁆𑀣 𑀩𑁆𑀬𑀸𑀩𑀸𑀥𑁄𑀢𑀺 𑀥𑀸𑀢𑀼𑀓𑁆𑀔𑁄𑀪𑁄, 𑀢𑀁𑀲𑀫𑀼𑀝𑁆𑀞𑀸𑀦𑀸 𑀘 𑀓𑀼𑀝𑁆𑀞𑀕𑀡𑁆𑀟𑀧𑀻𑀴𑀓𑀸𑀤𑀬𑁄. 𑀩𑁆𑀬𑀸𑀩𑀸𑀥𑀢𑁄 𑀉𑀧𑁆𑀧𑀦𑁆𑀦𑀢𑁆𑀢𑀸 𑀯𑁂𑀬𑁆𑀬𑀸𑀩𑀸𑀥𑀺𑀓𑀸. 𑀯𑁂𑀤𑀦𑀸𑀦𑀦𑁆𑀢𑀺 𑀤𑀼𑀓𑁆𑀔𑀯𑁂𑀤𑀦𑀸 𑀅𑀓𑀼𑀲𑀮𑀯𑀺𑀧𑀸𑀓𑀯𑁂𑀤𑀦𑀸. 𑀢𑀸𑀲𑀁 𑀯𑁂𑀬𑁆𑀬𑀸𑀩𑀸𑀥𑀺𑀓𑀸𑀦𑀁 𑀯𑁂𑀤𑀦𑀸𑀦𑀁. 𑀅𑀩𑁆𑀬𑀸𑀩𑀚𑁆𑀛𑀧𑀭𑀫𑀢𑀸𑀬𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀧𑀭𑀫𑀢𑀸𑀬. 𑀬𑀸𑀯 𑀢𑀁 𑀤𑀼𑀓𑁆𑀔𑀁 𑀲𑀩𑁆𑀩𑀁 𑀧𑀳𑀻𑀦𑀁 𑀳𑁄𑀢𑀺 𑀢𑀸𑀯𑀸𑀢𑀺 𑀅𑀢𑁆𑀣𑁄.

𑀏𑀯𑀫𑀺𑀤𑀁 𑀲𑀗𑁆𑀔𑁂𑀧𑀢𑁄 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀧𑀘𑁆𑀘𑀬𑀧𑀭𑀺𑀪𑁄𑀕𑀮𑀓𑁆𑀔𑀡𑀁 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀘𑀻𑀯𑀭𑀸𑀤𑀬𑁄 𑀳𑀺 𑀬𑀲𑁆𑀫𑀸 𑀢𑁂 𑀧𑀝𑀺𑀘𑁆𑀘 𑀦𑀺𑀲𑁆𑀲𑀸𑀬 𑀧𑀭𑀺𑀪𑀼𑀜𑁆𑀚𑀫𑀸𑀦𑀸 𑀧𑀸𑀡𑀺𑀦𑁄 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀧𑀘𑁆𑀘𑀬𑁂 𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀁.

𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀤𑀦𑀯𑀺𑀥𑀺

𑁧𑁯. 𑀏𑀯𑀫𑁂𑀢𑀲𑁆𑀫𑀺𑀁 𑀘𑀢𑀼𑀩𑁆𑀩𑀺𑀥𑁂 𑀲𑀻𑀮𑁂 𑀲𑀤𑁆𑀥𑀸𑀬 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀲𑀤𑁆𑀥𑀸𑀲𑀸𑀥𑀦𑁄 𑀳𑀺 𑀲𑁄, 𑀲𑀸𑀯𑀓𑀯𑀺𑀲𑀬𑀸𑀢𑀻𑀢𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀧𑀝𑀺𑀓𑁆𑀔𑁂𑀧𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀢𑀲𑁆𑀫𑀸 𑀬𑀣𑀸 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀅𑀦𑀯𑀲𑁂𑀲𑀁 𑀲𑀤𑁆𑀥𑀸𑀬 𑀲𑀫𑀸𑀤𑀺𑀬𑀺𑀢𑁆𑀯𑀸 𑀚𑀻𑀯𑀺𑀢𑁂𑀧𑀺 𑀅𑀧𑁂𑀓𑁆𑀔𑀁 𑀅𑀓𑀭𑁄𑀦𑁆𑀢𑁂𑀦 𑀲𑀸𑀥𑀼𑀓𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀓𑀺𑀓𑀻𑀯 𑀅𑀡𑁆𑀟𑀁 𑀘𑀫𑀭𑀻𑀯 𑀯𑀸𑀮𑀥𑀺𑀁,

𑀧𑀺𑀬𑀁𑀯 𑀧𑀼𑀢𑁆𑀢𑀁 𑀦𑀬𑀦𑀁𑀯 𑀏𑀓𑀓𑀁;

𑀢𑀣𑁂𑀯 𑀲𑀻𑀮𑀁 𑀅𑀦𑀼𑀭𑀓𑁆𑀔𑀫𑀸𑀦𑀓𑀸,

𑀲𑀼𑀧𑁂𑀲𑀮𑀸 𑀳𑁄𑀣 𑀲𑀤𑀸 𑀲𑀕𑀸𑀭𑀯𑀸’’𑀢𑀺.

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋 ‘‘𑀏𑀯𑀫𑁂𑀯 𑀔𑁄 𑀧𑀳𑀸𑀭𑀸𑀤 𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻’’𑀢𑀺 (𑀅. 𑀦𑀺. 𑁮.𑁧𑁯). 𑀇𑀫𑀲𑁆𑀫𑀺𑀁 𑀘 𑀧𑀦𑀢𑁆𑀣𑁂 𑀅𑀝𑀯𑀺𑀬𑀁 𑀘𑁄𑀭𑁂𑀳𑀺 𑀩𑀤𑁆𑀥𑀣𑁂𑀭𑀸𑀦𑀁 𑀯𑀢𑁆𑀣𑀽𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀫𑀳𑀸𑀯𑀢𑁆𑀢𑀦𑀺𑀅𑀝𑀯𑀺𑀬𑀁 𑀓𑀺𑀭 𑀣𑁂𑀭𑀁 𑀘𑁄𑀭𑀸 𑀓𑀸𑀴𑀯𑀮𑁆𑀮𑀻𑀳𑀺 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀣𑁂𑀭𑁄 𑀬𑀣𑀸𑀦𑀺𑀧𑀦𑁆𑀦𑁄𑀯 𑀲𑀢𑁆𑀢𑀤𑀺𑀯𑀲𑀸𑀦𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀢𑁆𑀣𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.