𑀞𑀸𑀬𑀻𑀪𑀸𑀯𑀦𑀺𑀤𑁆𑀤𑁂𑀲

𑀭𑀢𑀺𑀞𑀸𑀬𑀻𑀪𑀸𑀯

𑁩𑁫𑁬. 𑀭𑀫𑁆𑀫𑀤𑁂𑀲𑀓𑀮𑀸𑀓𑀸𑀮-𑀯𑁂𑀲𑀸𑀤𑀺𑀧𑀝𑀺𑀲𑁂𑀯𑀦𑀸;

𑀬𑀼𑀯𑀸𑀦’𑀜𑁆𑀜𑁄𑀜𑁆𑀜𑀭𑀢𑁆𑀢𑀸𑀦𑀁, 𑀧𑀫𑁄𑀤𑁄𑀭𑀢𑀺 𑀭𑀼𑀘𑁆𑀘𑀢𑁂.

𑁩𑁫𑁬. 𑀲𑀺𑀗𑁆𑀕𑀸𑀭𑀸𑀤𑀬𑁄 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀭𑀫𑁆𑀫𑁂’’𑀘𑁆𑀘𑀸𑀤𑀺. 𑀢𑀢𑁆𑀣 ‘‘𑀭𑀫𑁆𑀫𑀤𑁂𑀲’’𑀇𑀘𑁆𑀘𑀸𑀤𑀺𑀦𑀸 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑀸 𑀤𑀲𑁆𑀲𑀺𑀢𑀸. ‘‘𑀬𑀼𑀯𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀆𑀮𑀫𑁆𑀩𑀡𑀯𑀺𑀪𑀸𑀯𑁄. 𑀇𑀢𑁆𑀣𑀻 𑀳𑀺 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑁄 𑀇𑀢𑁆𑀣𑀺𑀬𑀸 𑀆𑀮𑀫𑁆𑀩𑀡𑀯𑀺𑀪𑀸𑀯𑁄. 𑀧𑀫𑁄𑀤𑁄𑀢𑀺 𑀅𑀜𑁆𑀜𑀫𑀜𑁆𑀜𑀸𑀪𑀺𑀭𑀫𑀡𑀯𑀲𑁂𑀦 𑀆𑀫𑁄𑀤𑀭𑀽𑀧𑁄.

𑁩𑁫𑁬. 𑀇𑀤𑀸𑀦𑀺 𑀲𑀺𑀗𑁆𑀕𑀸𑀭𑀸𑀤𑀺𑀦𑀸𑀫𑀓𑁂 𑀢𑁂𑀭𑀢𑁆𑀬𑀸𑀤𑀺𑀓𑁂 𑀓𑀫𑁂𑀦 𑀦𑀺𑀤𑁆𑀤𑀺𑀲𑀢𑀺 ‘‘𑀭𑀫𑁆𑀫’’𑀇𑀘𑁆𑀘𑀸𑀤𑀺𑀦𑀸. 𑀭𑀫𑁆𑀫𑀤𑁂𑀲𑀓𑀮𑀸𑀓𑀸𑀮𑀯𑁂𑀲𑀸𑀤𑀺𑀧𑀝𑀺𑀲𑁂𑀯𑀦𑀸 𑀭𑀫𑀡𑀻𑀬𑀦𑀺𑀭𑀸𑀯𑀭𑀡𑀲𑀼𑀘𑀺𑀧𑀯𑀺𑀢𑁆𑀢𑀯𑀸𑀲𑀸𑀭𑀳𑀤𑁂𑀲𑁄 𑀭𑀫𑁆𑀫𑀕𑀻𑀢𑀺𑀓𑀸𑀤𑀺𑀓𑀮𑀸 𑀭𑀢𑀺𑀚𑀦𑀓𑀯𑀲𑀦𑁆𑀢𑀸𑀤𑀺𑀅𑀦𑀼𑀭𑀽𑀧𑀓𑀸𑀮𑁄 𑀫𑀸𑀮𑀸𑀕𑀦𑁆𑀥𑀸𑀤𑀺 𑀉𑀧𑀲𑁄𑀪𑀺𑀢𑀓𑀺𑀭𑀺𑀬𑀸𑀤𑀺 𑀫𑀦𑀼𑀜𑁆𑀜𑀯𑁂𑀲𑁄, 𑀆𑀤𑀺𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀪𑀸𑀲𑀺𑀢𑀫𑀺𑀳𑀺𑀢𑀸𑀤𑀺𑀘𑁂𑀢𑀺 𑀇𑀫𑁂𑀲𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑀸𑀤𑀻𑀲𑀼 𑀤𑀺𑀝𑁆𑀞𑀸𑀤𑀺𑀫𑀢𑁆𑀢𑀫𑀓𑀢𑁆𑀯𑀸 𑀧𑀜𑁆𑀜𑀸𑀬 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀧𑀼𑀦𑀧𑁆𑀧𑀼𑀦𑀸𑀦𑀼𑀪𑀯𑀦𑁂𑀦 𑀅𑀜𑁆𑀜𑁄𑀜𑁆𑀜𑀭𑀢𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀲𑀗𑁆𑀓𑀧𑁆𑀧𑀯𑀲𑁂𑀦𑀸𑀢𑀺𑀭𑀢𑁆𑀢𑀸𑀦𑀁 𑀬𑀼𑀯𑀸𑀦𑀁 𑀢𑀭𑀼𑀡𑀺𑀢𑁆𑀣𑀺 𑀧𑀼𑀭𑀺𑀲𑀸𑀦𑀁 𑀧𑀫𑁄𑀤𑁄 𑀅𑀪𑀺𑀭𑀫𑀡𑀯𑀲𑁂𑀦 𑀲𑀦𑁆𑀢𑁄𑀲𑁄 𑀧𑀻𑀢𑀺 𑀭𑀢𑀺 𑀭𑀼𑀘𑁆𑀘𑀢𑁂 𑀭𑀼𑀘𑁆𑀘𑀦𑀢𑁄 ‘‘𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀭𑀓𑀸𑀭𑁄 𑀲𑀦𑁆𑀥𑀺𑀚𑁄. 𑀤𑁂𑀲𑁄 𑀘 𑀓𑀮𑀸 𑀘 𑀓𑀸𑀮𑁄 𑀘 𑀯𑁂𑀲𑁄 𑀘𑁂𑀢𑀺 𑀘, 𑀢𑁂 𑀆𑀤𑀬𑁄 𑀬𑁂𑀲𑀫𑀺𑀢𑀺 𑀘, 𑀭𑀫𑁆𑀫𑀸 𑀘 𑀢𑁂 𑀤𑁂𑀲…𑀧𑁂… 𑀯𑁂𑀲𑀸𑀤𑀬𑁄 𑀘𑁂𑀢𑀺 𑀘, 𑀢𑁂𑀲𑀁 𑀧𑀝𑀺 𑀧𑀼𑀦𑀧𑁆𑀧𑀼𑀦𑀁 𑀲𑁂𑀯𑀦𑀫𑀺𑀢𑀺 𑀘, 𑀅𑀜𑁆𑀜𑁄 𑀘 𑀅𑀜𑁆𑀜𑁄 𑀘𑁂𑀢𑀺 𑀘, 𑀢𑁂𑀲𑀼 𑀭𑀢𑁆𑀢𑀸𑀢𑀺 𑀘 𑀯𑀸𑀓𑁆𑀬𑀁.

𑁩𑁫𑁭. 𑀬𑀼𑀢𑁆𑀬𑀸 𑀪𑀸𑀯𑀸𑀦𑀼𑀪𑀸𑀯𑀸 𑀢𑁂,

𑀦𑀺𑀩𑀦𑁆𑀥𑀸 𑀧𑁄𑀲𑀬𑀦𑁆𑀢𑀺 𑀦𑀁;

𑀲𑁄𑀧𑁆𑀬𑀸’𑀬𑁄𑀕𑀯𑀺𑀧𑁆𑀧𑀬𑁄𑀕-

𑀲𑀫𑁆𑀪𑁄𑀕𑀸𑀦𑀁 𑀯𑀲𑀸 𑀢𑀺𑀥𑀸.

𑁩𑁫𑁭. ‘‘𑀬𑀼𑀢𑁆𑀬𑀸’’𑀇𑀘𑁆𑀘𑀸𑀤𑀺. 𑀢𑁂 𑀬𑀣𑀸𑀯𑀼𑀢𑁆𑀢𑀸 𑀪𑀸𑀯𑀸𑀦𑀼𑀪𑀸𑀯𑀸 𑀬𑀼𑀢𑁆𑀬𑀸 𑀆𑀮𑀲𑀺𑀬𑀉𑀕𑁆𑀕𑀢𑀸𑀚𑀺𑀕𑀼𑀘𑁆𑀙𑀸𑀯𑀚𑁆𑀚𑀺𑀢𑀸 𑀬𑁂 𑀲𑀗𑁆𑀓𑀸𑀉𑀲𑁆𑀲𑀼𑀓𑁆𑀓𑀸𑀤𑀬𑁄 𑀪𑀸𑀯𑀸 𑀢𑀁𑀩𑁆𑀬𑀜𑁆𑀚𑀓𑀸 𑀢𑀤𑀦𑀼𑀭𑀽𑀧𑀸 𑀅𑀦𑀼𑀪𑀸𑀯𑀸 𑀘 𑀅𑀬𑁄𑀕𑀸𑀤𑀺𑀓𑁂 𑀲𑀺𑀗𑁆𑀕𑀸𑀭𑁂 𑀬𑀣𑀸 𑀬𑀣𑀸 𑀬𑀼𑀜𑁆𑀚𑀦𑁆𑀢𑀺, 𑀢𑀸𑀤𑀺𑀲𑀺𑀬𑀸𑀯 𑀬𑀼𑀢𑁆𑀢𑀺𑀬𑀸 𑀦𑀺𑀩𑀦𑁆𑀥𑀸 𑀦𑀁 𑀭𑀢𑀺𑀁 𑀲𑀫𑁆𑀧𑁄𑀲𑀬𑀦𑁆𑀢𑀺, 𑀲𑁄𑀬𑁂𑀯𑀫𑁂𑀯𑀁 𑀧𑁄𑀲𑀺𑀢𑁄 𑀲𑀺𑀗𑁆𑀕𑀸𑀭𑁄 𑀦𑀸𑀫 𑀭𑀲𑁄 𑀲𑀫𑁆𑀧𑀚𑁆𑀚𑀢𑁂. 𑀲𑁄𑀧𑀺 𑀢𑀺𑀥𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀬𑁄𑀕𑁄 𑀦𑀸𑀫 𑀧𑀼𑀩𑁆𑀩𑁂 𑀅𑀲𑀗𑁆𑀕𑀢𑀸𑀦𑀁 𑀅𑀦𑀼𑀭𑀸𑀕𑁂𑀦 𑀲𑀗𑁆𑀕𑀫𑀫𑀺𑀘𑁆𑀙𑀦𑁆𑀢𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀫𑀲𑀗𑁆𑀕𑀫𑁄. 𑀅𑀢𑀺𑀲𑀬𑀯𑀺𑀭𑀼𑀴𑁆𑀳𑀧𑁂𑀫𑀸𑀦𑀫𑀼𑀪𑀺𑀦𑁆𑀦𑀫𑁆𑀧𑀺 𑀲𑀺𑀮𑁂𑀲𑁄 𑀯𑀺𑀧𑁆𑀧𑀬𑁄𑀕𑁄. 𑀩𑀮𑀯𑀓𑀸𑀫𑀸𑀯𑁂𑀲𑀯𑀺𑀲𑁂𑀲𑀸𑀦𑀁 𑀓𑀸𑀫𑀻𑀦𑀁 𑀤𑀲𑁆𑀲𑀦𑀸𑀤𑀺𑀲𑀫𑀜𑁆𑀚𑀦𑀁 𑀲𑀫𑁆𑀪𑁄𑀕𑁄.

𑁩𑁫𑁭. 𑀇𑀤𑀸𑀦𑀺 𑀭𑀢𑀺𑀬𑀸 𑀧𑀼𑀝𑁆𑀞𑀓𑀸𑀭𑀡𑀁 𑀧𑀼𑀝𑁆𑀞𑀧𑀬𑁄𑀕𑀜𑁆𑀘 𑀤𑀲𑁆𑀲𑁂𑀢𑀺 ‘‘𑀬𑀼𑀢𑁆𑀬𑀸’’𑀇𑀘𑁆𑀘𑀸𑀤𑀺𑀦𑀸. 𑀢𑁂 𑀪𑀸𑀯𑀸𑀦𑀼𑀪𑀸𑀯𑀸 𑀦𑀺𑀤𑁆𑀤𑀺𑀝𑁆𑀞𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂𑀲𑀼 𑀭𑀢𑁆𑀬𑀸𑀦𑀼𑀭𑀽𑀧𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁄 𑀢𑀧𑁆𑀧𑀓𑀸𑀲𑀓𑁄 𑀅𑀦𑀼𑀪𑀸𑀯𑁄 𑀘𑁂𑀢𑀺 𑀇𑀫𑁂 𑀤𑁆𑀯𑁂 𑀬𑀼𑀢𑁆𑀬𑀸 𑀳𑁂𑀢𑀼𑀪𑀽𑀢𑀸𑀬 𑀅𑀬𑁄𑀕𑀯𑀺𑀧𑁆𑀧𑀬𑁄𑀕𑀲𑀫𑁆𑀪𑁄𑀕𑀲𑀗𑁆𑀔𑀢𑀸𑀦𑀁 𑀢𑀺𑀡𑁆𑀡𑀁 𑀲𑀺𑀗𑁆𑀕𑀸𑀭𑀸𑀦𑀁 𑀅𑀦𑀼𑀓𑀽𑀮𑀢𑁆𑀣𑁂𑀦 𑀭𑀢𑀺𑀬𑀸 𑀯𑀺𑀭𑀼𑀤𑁆𑀥𑀢𑁆𑀢𑀸 𑀆𑀮𑀲𑀺𑀬𑀉𑀕𑁆𑀕𑀚𑀺𑀕𑀼𑀘𑁆𑀙𑀸𑀤𑀺𑀓𑁂 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀲𑀗𑁆𑀓𑀸𑀉𑀲𑁆𑀲𑀼𑀓𑁆𑀓𑀸𑀤𑀻𑀦𑀁 𑀭𑀢𑁆𑀬𑀸𑀦𑀼𑀓𑀽𑀮𑀪𑀸𑀯𑀸𑀦𑀁 𑀯𑀲𑁂𑀦 𑀬𑀣𑀸𑀬𑁄𑀕𑀁 𑀦𑀺𑀩𑀦𑁆𑀥𑀸 𑀓𑀯𑀻𑀳𑀺 𑀩𑀦𑁆𑀥𑀸 𑀦𑀁 𑀭𑀢𑀺𑀁 𑀧𑁄𑀲𑀬𑀦𑁆𑀢𑀺 𑀬𑀣𑀸 𑀢𑀧𑁆𑀧𑀓𑀸𑀲𑀦𑁂𑀦 𑀧𑀽𑀭𑁂𑀦𑁆𑀢𑀺 𑀲𑀚𑁆𑀚𑁂𑀦𑁆𑀢𑀺, 𑀏𑀯𑀁 𑀲𑀚𑁆𑀚𑀺𑀢𑁄 𑀭𑀢𑀺𑀲𑀺𑀗𑁆𑀕𑀸𑀭𑁄 𑀦𑀸𑀫 𑀭𑀲𑁄 𑀳𑁄𑀢𑀺. 𑀲𑁄𑀧𑀺 𑀲𑀸𑀫𑀜𑁆𑀜𑁂𑀦 𑀦𑀺𑀤𑁆𑀤𑀺𑀝𑁆𑀞𑀲𑀺𑀗𑁆𑀕𑀸𑀭𑀭𑀲𑁄𑀧𑀺 𑀅𑀬𑁄𑀕𑀯𑀺𑀧𑁆𑀧𑀬𑁄𑀕𑀲𑀫𑁆𑀪𑁄𑀕𑀸𑀦𑀁 𑀲𑀺𑀗𑁆𑀕𑀸𑀭𑀸𑀦𑀁 𑀯𑀲𑀸 𑀪𑁂𑀤𑁂𑀦 𑀢𑀺𑀥𑀸 𑀪𑀯𑀢𑀻𑀢𑀺. 𑀢𑀢𑁆𑀣 𑀅𑀬𑁄𑀕𑁄 𑀦𑀸𑀫 𑀧𑀼𑀩𑁆𑀩𑁂 𑀅𑀜𑁆𑀜𑀫𑀜𑁆𑀜𑀲𑀗𑁆𑀕𑀫𑀭𑀳𑀺𑀢𑀸𑀦𑀁 𑀅𑀪𑀺𑀦𑀯𑀸𑀦𑀼𑀭𑀸𑀕𑀩𑀮𑁂𑀦 𑀲𑀗𑁆𑀕𑀫𑀁 𑀧𑀢𑁆𑀣𑁂𑀦𑁆𑀢𑀸𑀦𑀁 𑀣𑀻𑀧𑀼𑀫𑀸𑀦𑀁 𑀅𑀲𑀗𑁆𑀕𑀫𑁄. 𑀯𑀺𑀧𑁆𑀧𑀬𑁄𑀕𑁄 𑀦𑀸𑀫 𑀲𑀗𑁆𑀕𑀫𑀸𑀢𑀺𑀲𑀬𑁂𑀦 𑀯𑀺𑀭𑀼𑀴𑁆𑀳𑀧𑁂𑀫𑀸𑀦𑀁 𑀣𑀻𑀧𑀼𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀮𑁂𑀲𑁄. 𑀲𑀫𑁆𑀪𑁄𑀕𑁄 𑀦𑀸𑀫 𑀩𑀮𑀯𑀓𑀸𑀫𑀢𑀡𑁆𑀳𑀸𑀯𑀺𑀲𑁂𑀲𑀯𑀲𑁂𑀦 𑀬𑀼𑀢𑁆𑀢𑀸𑀦𑀁 𑀓𑀸𑀫𑀺𑀦𑀺𑀓𑀸𑀫𑀼𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀤𑀲𑁆𑀲𑀦𑀸𑀤𑀺𑀅𑀲𑁆𑀲𑀸𑀤𑁄. 𑀪𑀸𑀯𑁄 𑀘 𑀅𑀦𑀼𑀪𑀸𑀯𑁄 𑀘𑁂𑀢𑀺 𑀘, 𑀅𑀬𑁄𑀕𑁄 𑀘 𑀯𑀺𑀧𑁆𑀧𑀬𑁄𑀕𑁄 𑀘 𑀲𑀫𑁆𑀪𑁄𑀕𑁄 𑀘𑁂𑀢𑀺 𑀘 𑀯𑀸𑀓𑁆𑀬𑀁.

𑀇𑀫𑀫𑀮𑀗𑁆𑀓𑀸𑀭𑀁 𑀓𑀭𑁄𑀦𑁆𑀢𑁂𑀦 𑀆𑀘𑀭𑀺𑀬𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀧𑀸𑀤𑁂𑀦 𑀧𑀦 𑀧𑀭𑀫𑀫𑀥𑀼𑀭𑀲𑀤𑁆𑀥𑀫𑁆𑀫𑀸𑀫𑀢𑀮𑀼𑀤𑁆𑀥𑀲𑀼𑀤𑁆𑀥𑀲𑀦𑁆𑀢𑀸𑀦𑀸𑀦𑀁 𑀢𑀧𑁄𑀥𑀦𑀸𑀦𑀁 𑀅𑀜𑁆𑀜𑀭𑀲𑀸𑀯𑀩𑁄𑀥𑀦𑁂 𑀧𑀬𑁄𑀚𑀦𑀸𑀪𑀸𑀯𑁂𑀧𑀺 𑀮𑁄𑀓𑀺𑀬𑁂𑀲𑀼 𑀢𑁂𑀲𑀼 𑀢𑁂𑀲𑀼 𑀯𑁄𑀳𑀸𑀭𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀲𑀺𑀗𑁆𑀕𑀸𑀭𑀸𑀤𑀺𑀦𑀯𑀯𑀺𑀥𑀭𑀲𑀸𑀦𑀁 𑀮𑀓𑁆𑀔𑀡𑀫𑀢𑁆𑀢𑀲𑁆𑀲𑁂𑀯 𑀤𑀲𑁆𑀲𑀺𑀢𑀢𑁆𑀢𑀸 𑀢𑀤𑀦𑀼𑀭𑀽𑀧𑀮𑀓𑁆𑀔𑀺𑀬𑀧𑀭𑀺𑀕𑁆𑀕𑀳𑁂 𑀅𑀲𑀢𑀺 𑀮𑀓𑁆𑀔𑀡𑀸𑀯𑀩𑁄𑀥𑀲𑁆𑀲 𑀲𑀼𑀩𑁆𑀬𑀢𑁆𑀢𑀸𑀪𑀸𑀯𑀢𑁄 𑀯𑀼𑀢𑁆𑀢𑀮𑀓𑁆𑀔𑀡𑀸𑀯𑀩𑁄𑀥𑀢𑁆𑀣𑀁 𑀢𑀁𑀢𑀁𑀮𑀓𑁆𑀔𑀡𑀓𑀣𑀦𑀸𑀦𑀦𑁆𑀢𑀭𑀁 𑀢𑀲𑁆𑀲 𑀢𑀲𑁆𑀲 𑀮𑀓𑁆𑀔𑀺𑀬𑀲𑁆𑀲 𑀫𑀼𑀔𑀫𑀢𑁆𑀢𑀁 𑀤𑀲𑁆𑀲𑁂𑀢𑀩𑁆𑀩𑀁 𑀳𑁄𑀢𑀺. 𑀳𑁂𑀝𑁆𑀞𑀸 ‘‘𑀭𑀸𑀕𑀸𑀦𑀢𑀩𑁆𑀪𑀼𑀢𑀲𑀭𑁄𑀚𑀫𑀼𑀔𑀁 𑀥𑀭𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀲𑀫𑁆𑀪𑁄𑀕𑀲𑀺𑀗𑁆𑀕𑀸𑀭𑀭𑀲𑀸𑀪𑀸𑀲𑁂𑀦𑁂𑀯 𑀳𑀲𑀸𑀪𑀸𑀲𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀭𑀲𑀸𑀪𑀸𑀲𑀭𑀽𑀧𑀲𑁆𑀲 𑀪𑀸𑀯𑀸𑀪𑀸𑀲𑀲𑁆𑀲, 𑀯𑀺𑀪𑀸𑀯𑀸𑀪𑀸𑀲𑀲𑁆𑀲, 𑀅𑀦𑀼𑀪𑀸𑀯𑀸𑀪𑀸𑀲𑀲𑁆𑀲 𑀘 𑀜𑀸𑀢𑀩𑁆𑀩𑀢𑁆𑀢𑀸 𑀲𑀺𑀗𑁆𑀕𑀸𑀭𑀭𑀲𑀲𑁆𑀲 𑀮𑀓𑁆𑀔𑀺𑀬𑀫𑁂𑀯𑀁 𑀯𑁂𑀤𑀺𑀢𑀩𑁆𑀩𑀁.

𑀕𑀻𑀢𑀲𑁆𑀲𑀭𑁂𑀦 𑀉𑀧𑀓𑀟𑁆𑀠𑀺𑀬 𑀦𑁂𑀢𑁆𑀢𑀭𑀲𑁆𑀫𑀺-

𑀩𑀦𑁆𑀥𑀁 𑀓𑀭𑀁𑀯 𑀯𑀺𑀯𑀲𑀜𑁆𑀘 𑀓𑀭𑀕𑁆𑀕𑀳𑁂𑀦;

𑀬𑀸 𑀢𑀸𑀤𑀺𑀲𑁂𑀧𑀺 𑀯𑀺𑀦𑀺𑀬𑁄𑀚𑀬𑀺 𑀤𑀼𑀓𑁆𑀓𑀭𑁂 𑀫𑀁,

𑀲𑁂𑀭𑀦𑁆𑀤𑀢𑀻 𑀅𑀥𑀺𑀕𑀢𑀸 𑀯𑀺𑀥𑀺𑀦𑀸 𑀫𑀬𑀚𑁆𑀚𑀸𑀢𑀺.

𑀕𑀻𑀢𑀲𑁆𑀲𑀭𑁂𑀦 𑀳𑀢𑁆𑀣𑀻𑀦𑀁 𑀕𑀻𑀢𑀺𑀓𑀸𑀬 𑀧𑀺𑀬𑀢𑁆𑀢𑀸 𑀕𑀻𑀢𑀺𑀓𑀸𑀥𑀦𑀺𑀦𑀸 𑀉𑀧𑀓𑀟𑁆𑀠𑀺𑀬 𑀅𑀢𑁆𑀢𑀦𑁄 𑀲𑀫𑀻𑀧𑀁 𑀆𑀓𑀟𑁆𑀠𑀺𑀢𑁆𑀯𑀸 𑀦𑁂𑀢𑁆𑀢𑀭𑀲𑁆𑀫𑀺𑀩𑀦𑁆𑀥𑀁 𑀦𑁂𑀢𑁆𑀢𑀲𑀗𑁆𑀔𑀸𑀢𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀭𑀚𑁆𑀚𑀼𑀦𑀸 𑀩𑀦𑁆𑀥𑀁 𑀓𑀭𑀕𑁆𑀕𑀳𑁂𑀦 𑀳𑀢𑁆𑀣𑀕𑁆𑀕𑀸𑀳𑁂𑀦 𑀲𑁄𑀡𑁆𑀟𑀕𑁆𑀕𑀳𑀡𑁂𑀦 𑀯𑀺𑀯𑀲𑀜𑁆𑀘 𑀅𑀧𑀕𑀢𑀇𑀘𑁆𑀙𑀸𑀘𑀸𑀭𑀁 𑀧𑀭𑀯𑀲𑀁 𑀓𑀭𑀁 𑀇𑀯 𑀳𑀢𑁆𑀣𑀁 𑀇𑀯 𑀕𑀻𑀢𑀲𑁆𑀲𑀭𑁂𑀦 𑀅𑀢𑁆𑀢𑀦𑁄 𑀮𑀻𑀮𑁄𑀧𑁂𑀢𑀕𑀻𑀢𑀺𑀓𑀸𑀥𑀦𑀺𑀦𑀸 𑀉𑀧𑀓𑀟𑁆𑀠𑀺𑀬 𑀅𑀢𑁆𑀢𑀦𑁄 𑀲𑀫𑀻𑀧𑀁 𑀦𑁂𑀢𑁆𑀯𑀸 𑀦𑁂𑀢𑁆𑀢𑀭𑀲𑁆𑀫𑀺𑀩𑀦𑁆𑀥𑀁 𑀅𑀢𑁆𑀢𑀦𑁄 𑀦𑀬𑀦𑀓𑀦𑁆𑀢𑀺𑀬𑀸 𑀧𑀝𑀺𑀩𑀦𑁆𑀥𑀁 𑀓𑀭𑀕𑁆𑀕𑀳𑁂𑀦 𑀳𑀢𑁆𑀣𑀕𑁆𑀕𑀸𑀳𑁂𑀦 𑀯𑀺𑀯𑀲𑀜𑁆𑀘 𑀅𑀧𑀕𑀢𑀥𑀺𑀢𑀺𑀁 𑀫𑀽𑀴𑁆𑀳𑀁 𑀫𑀁 𑀬𑀸 𑀓𑀦𑁆𑀢𑀸 𑀢𑀸𑀤𑀺𑀲𑁂𑀧𑀺 𑀤𑀼𑀓𑁆𑀓𑀭𑁂 𑀯𑀺𑀦𑀺𑀬𑁄𑀚𑀬𑀺, 𑀲𑀸 𑀇𑀭𑀦𑁆𑀤𑀢𑀻 𑀇𑀭𑀦𑁆𑀤𑀢𑀻 𑀦𑀸𑀫 𑀦𑀸𑀕𑀫𑀸𑀦𑀯𑀺𑀓𑀸 𑀫𑀬𑀸 𑀅𑀚𑁆𑀚 𑀯𑀺𑀥𑀺𑀦𑀸 𑀪𑀸𑀕𑁆𑀬𑁂𑀦 𑀅𑀥𑀺𑀕𑀢𑀸 𑀮𑀤𑁆𑀥𑀸𑀢𑀺.

𑀏𑀢𑁆𑀣 𑀕𑀻𑀢𑀲𑁆𑀲𑀭𑀦𑁂𑀢𑁆𑀢𑀭𑀲𑁆𑀫𑀺𑀓𑀭𑀕𑁆𑀕𑀳𑀲𑀗𑁆𑀔𑀢𑀸𑀳𑀺 𑀇𑀫𑀸𑀳𑀺 𑀧𑀤𑀸𑀯𑀮𑀻𑀳𑀺 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀣𑀺𑀬𑀸 𑀧𑀼𑀭𑀺𑀲𑁄 𑀘, 𑀧𑀼𑀭𑀺𑀲𑀲𑁆𑀲 𑀣𑀻 𑀘 𑀆𑀮𑀫𑁆𑀩𑀡𑀁 𑀳𑁄𑀢𑀻𑀢𑀺 ‘‘𑀲𑀸 𑀇𑀭𑀦𑁆𑀤𑀢𑀻 𑀫𑀬𑀸’’𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀯𑀺𑀪𑀸𑀯𑁄 𑀤𑀲𑁆𑀲𑀺𑀢𑁄. ‘‘𑀉𑀧𑀓𑀟𑁆𑀠𑀺𑀬 𑀩𑀦𑁆𑀥𑀁 𑀯𑀺𑀯𑀲’’𑀦𑁆𑀢𑀺 𑀇𑀫𑁂𑀳𑀺 𑀓𑀸𑀫𑁂𑀦 𑀉𑀤𑁆𑀤𑀻𑀧𑀺𑀢𑀞𑀸𑀬𑀻𑀪𑀸𑀯𑀲𑀗𑁆𑀔𑀢𑀸 𑀭𑀢𑀺 𑀤𑀲𑁆𑀲𑀺𑀢𑀸. ‘‘𑀢𑀸𑀤𑀺𑀲𑁂𑀧𑀺 𑀤𑀼𑀓𑁆𑀓𑀭𑁂 𑀯𑀺𑀦𑀺𑀬𑁄𑀚𑀬𑀻’’𑀢𑀺 𑀇𑀫𑁂𑀳𑀺 𑀉𑀲𑁆𑀲𑀸𑀳𑀸𑀤𑀺𑀓𑀸 𑀘 ‘‘𑀯𑀺𑀥𑀺𑀦𑀸 𑀅𑀥𑀺𑀕𑀢𑀸 𑀫𑀬𑀚𑁆𑀚𑀸’’𑀢𑀺 𑀇𑀫𑁂𑀳𑀺 𑀳𑀭𑀺𑀲𑀸𑀤𑀺𑀓𑀸 𑀘 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸 𑀤𑀲𑁆𑀲𑀺𑀢𑀸. 𑀭𑀢𑀺𑀬𑀸 𑀯𑀺𑀭𑀼𑀤𑁆𑀥𑁂 𑀦𑀺𑀩𑁆𑀩𑁂𑀤𑀆𑀮𑀲𑀺𑀬𑀉𑀕𑁆𑀕𑀢𑀚𑀺𑀕𑀼𑀘𑁆𑀙𑀸𑀤𑀺𑀓𑁂 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂 𑀯𑀚𑁆𑀚𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀺𑀪𑀸𑀯𑀸𑀤𑀺𑀓𑁂 𑀧𑀓𑀸𑀲𑀦𑁆𑀢𑁄 ‘‘𑀕𑀻𑀢𑀲𑁆𑀲𑀭𑁂𑀦𑁂’’𑀘𑁆𑀘𑀸𑀤𑀺𑀓𑀸 𑀭𑀢𑀺𑀧𑁆𑀧𑀢𑀻𑀢𑀺𑀬𑀸 𑀅𑀦𑀼𑀭𑀽𑀧𑀁 𑀧𑀬𑀼𑀢𑁆𑀢𑀸 𑀓𑀯𑀺𑀧𑁆𑀧𑀬𑁄𑀕𑀸 𑀇𑀥 𑀅𑀦𑀼𑀪𑀸𑀯𑀸 𑀦𑀸𑀫 𑀳𑁄𑀦𑁆𑀢𑀺. 𑀦𑀸𑀝𑀓𑀸𑀤𑀺𑀤𑀲𑁆𑀲𑀦𑀻𑀬𑀲𑀢𑁆𑀣𑁂 𑀅𑀪𑀺𑀦𑀬𑁄 𑀅𑀦𑀼𑀪𑀸𑀯𑁄. 𑀭𑀫𑁆𑀫𑀤𑁂𑀲𑀭𑀫𑁆𑀫𑀓𑀸𑀮𑀭𑀫𑁆𑀫𑀯𑁂𑀲𑀸𑀤𑀬𑁄 𑀢𑀤𑀪𑀸𑀯𑁂 𑀭𑀢𑀺𑀬𑀸 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀲𑀸𑀫𑀢𑁆𑀣𑀺𑀬𑀸 𑀕𑀫𑁆𑀬𑀸 𑀪𑀯𑀦𑁆𑀢𑀻𑀢𑀺 𑀏𑀯𑀁 𑀮𑀓𑁆𑀔𑀡𑀸𑀦𑀼𑀕𑀢𑀮𑀓𑁆𑀔𑀺𑀬𑀧𑀭𑀺𑀕𑁆𑀕𑀸𑀳𑁄 𑀲𑀩𑁆𑀩𑀢𑁆𑀣 𑀓𑀸𑀢𑀩𑁆𑀩𑁄. 𑀏𑀯𑀁 𑀲𑀢𑀺𑀩𑀦𑁆𑀥𑀢𑁆𑀣𑀸𑀯𑀩𑁄𑀥𑀓𑀸𑀦𑀁 𑀲𑀩𑁆𑀪𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀬𑀧𑀻𑀢𑀺𑀬𑀸 𑀓𑀸𑀭𑀡𑀢𑁆𑀢𑀸 𑀓𑀸𑀭𑀺𑀬𑁄𑀧𑀘𑀸𑀭𑁂𑀦 𑀏𑀲𑁄 𑀩𑀦𑁆𑀥𑁄 𑀭𑀲𑁄 𑀦𑀸𑀫 𑀳𑁄𑀢𑀻𑀢𑀺. 𑀉𑀧𑀭𑀺𑀧𑀺 𑀏𑀯𑀫𑁂𑀯.

𑀳𑀲𑁆𑀲𑀞𑀸𑀬𑀻𑀪𑀸𑀯

𑁩𑁫𑁮. 𑀯𑀺𑀓𑀸𑀭𑀸𑀓𑀢𑀺𑀆𑀤𑀻𑀳𑀺,

𑀅𑀢𑁆𑀢𑀦𑁄’𑀣 𑀧𑀭𑀲𑁆𑀲 𑀯𑀸;

𑀳𑀸𑀲𑁄 𑀦𑀺𑀤𑁆𑀤𑀸 𑀲𑀫𑀸𑀮𑀲𑁆𑀬-

𑀫𑀼𑀘𑁆𑀙𑀸𑀤𑀺𑀩𑁆𑀬𑀪𑀺𑀘𑀸𑀭𑀺𑀪𑀺;

𑀧𑀭𑀺𑀧𑁄𑀲𑁂 𑀲𑀺𑀬𑀸 𑀳𑀲𑁆𑀲𑁄,

𑀪𑀺𑀬𑁆𑀬𑁄’𑀢𑁆𑀣𑀺𑀧𑀪𑀼𑀢𑀻𑀦 𑀲𑁄.

𑁩𑁫𑁮. ‘‘𑀯𑀺𑀓𑀸𑀭𑁂’’𑀘𑁆𑀘𑀸𑀤𑀺. 𑀯𑀺𑀓𑀸𑀭𑀸𑀓𑀢𑀺 𑀤𑁂𑀲𑀯𑀬𑀸𑀤𑀻𑀦𑀁 𑀯𑀺𑀧𑀭𑀻𑀢𑁄 𑀓𑁂𑀲𑀩𑀦𑁆𑀥𑀦𑀸𑀤𑀺, 𑀲𑁄 𑀆𑀤𑀺 𑀬𑁂𑀲𑀁 𑀅𑀜𑁆𑀜𑀸𑀓𑀢𑁆𑀬𑀸𑀤𑀺𑀦𑀘𑁆𑀘𑀦𑀸𑀤𑀻𑀦𑀁, 𑀢𑁂𑀳𑀺 𑀯𑀺𑀪𑀸𑀯𑁂𑀳𑀺 𑀳𑀸𑀲𑁄 𑀘𑁂𑀢𑁄𑀯𑀺𑀓𑀸𑀲𑁄, 𑀲𑁄𑀧𑀺 𑀅𑀢𑁆𑀢𑀦𑁄 𑀲𑀫𑁆𑀩𑀦𑁆𑀥𑀻 𑀯𑀸 𑀅𑀣 𑀧𑀭𑀲𑁆𑀲 𑀲𑀫𑁆𑀩𑀦𑁆𑀥𑀻 𑀯𑀸, 𑀢𑀢𑁆𑀣 𑀬𑁄 𑀯𑀺𑀪𑀸𑀯𑀲𑀸𑀫𑀢𑁆𑀣𑀺𑀬𑀸𑀬𑁂𑀯𑀸𑀪𑀺𑀩𑁆𑀬𑀢𑁆𑀢𑀺𑀁 𑀬𑀸𑀢𑀺, 𑀲𑁄 𑀅𑀢𑁆𑀢𑀝𑁆𑀞𑁄. 𑀬𑁄 𑀧𑀦 𑀯𑀺𑀪𑀸𑀯𑀤𑀲𑁆𑀲𑀦𑀸 𑀉𑀧𑁆𑀧𑀦𑁆𑀦𑀸𑀧𑀺 𑀧𑀼𑀭𑀺𑀲𑀲𑁆𑀲 𑀕𑀫𑁆𑀪𑀻𑀭𑀢𑁆𑀢𑀸𑀤𑀺𑀦𑀸 𑀙𑀸𑀤𑀺𑀢𑁄 𑀲𑀫𑀸𑀦𑁄 𑀧𑀼𑀭𑀺𑀲𑀦𑁆𑀢𑀭𑁂 𑀳𑀲𑀢𑁆𑀬𑀸𑀪𑀺𑀩𑁆𑀬𑀢𑁆𑀢𑁄, 𑀲𑁄 𑀧𑀭𑀝𑁆𑀞𑁄. 𑀲𑁄 𑀳𑀸𑀲𑁄 𑀦𑀺𑀤𑁆𑀤𑀸𑀤𑀻𑀳𑀺 𑀩𑁆𑀬𑀪𑀺𑀘𑀸𑀭𑀻𑀳𑀺𑀬𑁂𑀯, 𑀅𑀦𑀼𑀪𑀸𑀯𑀧𑀓𑁆𑀔𑁂 𑀆𑀤𑀺𑀲𑀤𑁆𑀤𑁂𑀦 𑀅𑀓𑁆𑀔𑀺𑀨𑀦𑁆𑀤𑀦𑀸𑀤𑀬𑁄 𑀕𑀳𑀺𑀢𑀸. 𑀧𑀭𑀺𑀧𑁄𑀲𑁂 𑀲𑀢𑀺 𑀳𑀲𑁆𑀲𑁄 𑀦𑀸𑀫 𑀭𑀲𑁄 𑀲𑀺𑀬𑀸. 𑀲𑁄 𑀳𑀲𑁆𑀲𑁄 𑀪𑀺𑀬𑁆𑀬𑁄 𑀇𑀢𑁆𑀣𑀺𑀧𑀪𑀼𑀢𑀻𑀦𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀧𑀪𑀼𑀢𑀺𑀲𑀤𑁆𑀤𑁂𑀦 𑀦𑀻𑀘𑀧𑀓𑀢𑀬𑁄 𑀲𑀗𑁆𑀕𑀡𑁆𑀳𑀦𑁆𑀢𑀺.

𑁩𑁫𑁮. 𑀇𑀤𑀸𑀦𑀺 𑀳𑀲𑁆𑀲𑀭𑀲𑀲𑁆𑀲 𑀧𑁄𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀺𑀓𑀸𑀭’’𑀇𑀘𑁆𑀘𑀸𑀤𑀺. 𑀯𑀺𑀓𑀸𑀭𑀸𑀓𑀢𑀺𑀆𑀤𑀻𑀳𑀺 𑀤𑁂𑀲𑀯𑀬𑁄𑀮𑀺𑀗𑁆𑀕𑀸𑀦𑀁 𑀯𑀺𑀧𑀭𑀻𑀢𑁂𑀳𑀺 𑀓𑁂𑀲𑀩𑀦𑁆𑀥𑀕𑀢𑀺𑀝𑁆𑀞𑀺𑀢𑀺𑀆𑀤𑀺𑀓𑁂𑀳𑀺, 𑀦𑀘𑁆𑀘𑀕𑀻𑀢𑀆𑀤𑀺𑀓𑁂𑀳𑀺 𑀘 𑀤𑀼𑀯𑀺𑀥𑁂𑀳𑀺 𑀆𑀓𑀢𑀺𑀲𑀗𑁆𑀔𑀢𑁂𑀳𑀺 𑀳𑁂𑀢𑀼𑀪𑀽𑀢𑁂𑀳𑀺 𑀅𑀢𑁆𑀢𑀦𑁄 𑀯𑀸 𑀅𑀣 𑀧𑀭𑀲𑁆𑀲 𑀯𑀸 𑀲𑀫𑁆𑀩𑀦𑁆𑀥𑀻 𑀲𑁄 𑀳𑀸𑀲𑁄 𑀘𑁂𑀢𑁄 𑀯𑀺𑀓𑀸𑀲𑀮𑀓𑁆𑀔𑀡𑁄 𑀦𑀺𑀤𑁆𑀤𑀸𑀲𑀫𑀸𑀮𑀲𑁆𑀬𑀫𑀼𑀘𑁆𑀙𑀸𑀤𑀺𑀩𑁆𑀬𑀪𑀺𑀘𑀸𑀭𑀺𑀪𑀺 𑀦𑀺𑀤𑁆𑀤𑀸𑀲𑀫𑀆𑀮𑀲𑁆𑀬𑀫𑀼𑀘𑁆𑀙𑀸𑀅𑀓𑁆𑀔𑀺𑀨𑀦𑁆𑀤𑀦𑀸𑀤𑀻𑀳𑀺 𑀅𑀦𑀼𑀪𑀸𑀯𑁂𑀳𑀺 𑀲𑀼𑀢𑀲𑀫𑁆𑀩𑀦𑁆𑀥𑁂𑀦 𑀢𑁂𑀳𑁂𑀯 𑀦𑀺𑀤𑁆𑀤𑀸𑀲𑀫𑀸𑀮𑀲𑁆𑀬𑀫𑀼𑀘𑁆𑀙𑀸𑀲𑀗𑁆𑀔𑀢𑀩𑁆𑀬𑀪𑀺𑀘𑀸𑀭𑀻𑀳𑀺 𑀓𑀭𑀡𑀪𑀽𑀢𑁂𑀳𑀺 𑀧𑀭𑀺𑀧𑁄𑀲𑁂 𑀲𑀢𑀺 𑀳𑀲𑁆𑀲𑁄 𑀳𑀲𑁆𑀲𑁄 𑀦𑀸𑀫 𑀭𑀲𑁄 𑀲𑀺𑀬𑀸, 𑀲𑁄 𑀳𑀲𑁆𑀲𑁄 𑀪𑀺𑀬𑁆𑀬𑁄 𑀇𑀢𑁆𑀣𑀺𑀧𑀪𑀼𑀢𑀻𑀦𑀁, 𑀦𑀻𑀘𑀧𑀓𑀢𑀻𑀦𑀜𑁆𑀘 𑀲𑀺𑀬𑀸𑀢𑀺. 𑀯𑀺𑀓𑀸𑀭𑀸 𑀘 𑀲𑀸 𑀆𑀓𑀢𑀺 𑀘𑁂𑀢𑀺 𑀘, 𑀲𑁄 𑀆𑀤𑀺 𑀬𑁂𑀲𑀦𑁆𑀢𑀺 𑀘, 𑀦𑀺𑀤𑁆𑀤𑀸 𑀘 𑀲𑀫𑁄 𑀘 𑀆𑀮𑀲𑁆𑀬𑀜𑁆𑀘 𑀫𑀼𑀘𑁆𑀙𑀸 𑀘𑁂𑀢𑀺 𑀘, 𑀢𑁂 𑀆𑀤𑀺 𑀬𑁂𑀲𑀁 𑀅𑀓𑁆𑀔𑀺𑀨𑀦𑁆𑀤𑀦𑀸𑀤𑀻𑀦𑀁 𑀅𑀦𑀼𑀪𑀸𑀯𑀸𑀦𑀦𑁆𑀢𑀺 𑀘, 𑀢𑁂 𑀘 𑀩𑁆𑀬𑀪𑀺𑀘𑀸𑀭𑀺𑀦𑁄 𑀘𑁂𑀢𑀺 𑀘, 𑀇𑀢𑁆𑀣𑀻 𑀧𑀪𑀼𑀢𑀺 𑀬𑁂𑀲𑀁 𑀦𑀻𑀘𑀧𑀓𑀢𑀻𑀦𑀦𑁆𑀢𑀺 𑀘 𑀯𑀸𑀓𑁆𑀬𑀁.

𑀳𑀲𑁆𑀲𑀧𑁆𑀧𑀪𑁂𑀤

𑁩𑁫𑁯. 𑀲𑀺𑀢𑀫𑀺𑀳 𑀯𑀺𑀓𑀸𑀲𑀺𑀦𑀬𑀦𑀁,

𑀓𑀺𑀜𑁆𑀘𑀸’𑀮𑀓𑁆𑀔𑀺𑀬𑀤𑀺𑀚𑀦𑁆𑀢𑀼 𑀢𑀁 𑀳𑀲𑀺𑀢𑀁;

𑀫𑀥𑀼𑀭𑀲𑁆𑀲𑀭𑀁 𑀯𑀺𑀳𑀲𑀺𑀢𑀁,

𑀲𑀁𑀲𑀲𑀺𑀭𑁄𑀓𑀫𑁆𑀧𑀫𑀼𑀧𑀳𑀲𑀺𑀢𑀁.

𑁩𑁬𑁦. 𑀅𑀧𑀳𑀲𑀺𑀢𑀁 𑀲𑀜𑁆𑀚𑀮’𑀓𑁆𑀔𑀺,

𑀯𑀺𑀓𑁆𑀔𑀺𑀢𑁆𑀢𑀗𑁆𑀕𑀁 𑀪𑀯𑀢𑁆𑀬’𑀢𑀺𑀳𑀲𑀺𑀢𑀁;

𑀤𑁆𑀯𑁂 𑀤𑁆𑀯𑁂 𑀳𑀲𑁆𑀲𑀸 𑀓𑀣𑀺𑀢𑀸 𑀘𑁂’𑀲𑀁,

𑀚𑁂𑀝𑁆𑀞𑁂 𑀫𑀚𑁆𑀛𑁂’𑀥𑀫𑁂𑀧𑀺 𑀘 𑀓𑀫𑀲𑁄.

𑁩𑁫𑁯-𑁩𑁬𑁦. 𑀳𑀲𑁆𑀲𑁂 𑀪𑁂𑀤𑀫𑀸𑀳 ‘‘𑀲𑀺𑀢’’𑀫𑀺𑀘𑁆𑀘𑀸𑀤𑀺𑀦𑀸. 𑀇𑀳 𑀳𑀲𑁆𑀲𑁂 𑀯𑀺𑀓𑀸𑀲𑀻𑀦𑀺 𑀦𑀬𑀦𑀸𑀦𑀺 𑀬𑀲𑁆𑀲 𑀢𑀁 𑀲𑀺𑀢𑀁, 𑀓𑀺𑀜𑁆𑀘𑀺 𑀆𑀮𑀓𑁆𑀔𑀺𑀬𑀸 𑀤𑀺𑀚𑀸 𑀤𑀦𑁆𑀢𑀸 𑀬𑀲𑁆𑀲 𑀢𑀁 𑀳𑀲𑀺𑀢𑀁. 𑀏𑀯𑀁 𑀫𑀥𑀼𑀭𑁄 𑀲𑀭𑁄 𑀲𑀤𑁆𑀤𑁄 𑀬𑀲𑁆𑀲 𑀢𑀁 𑀯𑀺𑀳𑀲𑀺𑀢𑀁. 𑀅𑀁𑀲𑀲𑀺𑀭𑁄𑀓𑀫𑁆𑀧𑁂𑀦 𑀲𑀳 𑀯𑀢𑁆𑀢𑀫𑀸𑀦𑀁 𑀉𑀧𑀳𑀲𑀺𑀢𑀁, 𑀲𑀳 𑀚𑀮𑁂𑀦 𑀅𑀲𑁆𑀲𑀼𑀦𑀸 𑀯𑀢𑁆𑀢𑀫𑀸𑀦𑀸𑀦𑀺 𑀅𑀓𑁆𑀔𑀻𑀦𑀺 𑀬𑀲𑁆𑀲 𑀢𑀁 𑀅𑀧𑀳𑀲𑀺𑀢𑀁. 𑀯𑀺𑀓𑁆𑀔𑀺𑀢𑁆𑀢𑀸𑀦𑀺 𑀇𑀢𑁄 𑀢𑀢𑁄 𑀧𑀲𑀸𑀭𑀺𑀢𑀸𑀦𑀺 𑀅𑀗𑁆𑀕𑀸𑀦𑀺 𑀬𑀲𑁆𑀲 𑀢𑀁 𑀅𑀢𑀺𑀳𑀲𑀺𑀢𑀁 𑀦𑀸𑀫. 𑀏𑀲𑀜𑁆𑀘 𑀲𑀺𑀢𑀸𑀤𑀻𑀦𑀁 𑀫𑀚𑁆𑀛𑁂 𑀤𑁆𑀯𑁂 𑀤𑁆𑀯𑁂 𑀳𑀲𑁆𑀲𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀓𑀫𑀲𑁄 𑀬𑀣𑀸𑀓𑁆𑀓𑀫𑁂𑀦 𑀚𑁂𑀝𑁆𑀞𑁂 𑀫𑀚𑁆𑀛𑁂 𑀅𑀥𑀫𑁂𑀧𑀺 𑀘 𑀓𑀣𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀸𑀢𑀦𑁂𑀳𑀻𑀢𑀺 𑀯𑀺𑀜𑁆𑀜𑀸𑀬𑀢𑀺.

𑁩𑁫𑁯-𑁩𑁬𑁦. 𑀇𑀤𑀸𑀦𑀺 𑀳𑀲𑁆𑀲𑀪𑁂𑀤𑀁 𑀤𑀲𑁆𑀲𑁂𑀢𑀺 ‘‘𑀲𑀺𑀢’’𑀫𑀺𑀘𑁆𑀘𑀸𑀤𑀺𑀦𑀸. 𑀇𑀳 𑀇𑀫𑀲𑁆𑀫𑀺𑀁 𑀳𑀲𑁆𑀲𑀯𑀺𑀲𑀬𑁂 𑀯𑀺𑀓𑀸𑀲𑀺𑀦𑀬𑀦𑀁 𑀯𑀺𑀯𑀝𑀦𑀬𑀦𑀁 𑀲𑀺𑀢𑀁 𑀦𑀸𑀫. 𑀓𑀺𑀜𑁆𑀘𑀺 𑀆𑀮𑀓𑁆𑀔𑀺𑀬𑀤𑀺𑀚𑀁 𑀢𑀼 𑀓𑀺𑀜𑁆𑀘𑀺 𑀤𑀺𑀲𑁆𑀲𑀫𑀸𑀦𑀤𑀦𑁆𑀢𑀁, 𑀢𑀁 𑀳𑀲𑀺𑀢𑀁 𑀦𑀸𑀫. 𑀫𑀥𑀼𑀭𑀲𑁆𑀲𑀭𑀁 𑀫𑀥𑀼𑀭𑀦𑀸𑀤𑀁 𑀯𑀺𑀳𑀲𑀺𑀢𑀁 𑀦𑀸𑀫. 𑀲𑀁𑀲𑀲𑀺𑀭𑁄𑀓𑀫𑁆𑀧𑀁 𑀅𑀁𑀲𑀲𑀺𑀭𑁄𑀓𑀫𑁆𑀧𑀲𑀳𑀺𑀢𑀁 𑀉𑀧𑀳𑀲𑀺𑀢𑀁 𑀦𑀸𑀫. 𑀲𑀚𑀮𑀓𑁆𑀔𑀺 𑀅𑀲𑁆𑀲𑀼𑀯𑀺𑀮𑁄𑀘𑀦𑀲𑀳𑀺𑀢𑀁 𑀅𑀧𑀳𑀲𑀺𑀢𑀁 𑀦𑀸𑀫. 𑀯𑀺𑀓𑁆𑀔𑀺𑀢𑁆𑀢𑀗𑁆𑀕𑀁 𑀅𑀝𑁆𑀞𑀸𑀦𑁂 𑀧𑀲𑀸𑀭𑀡𑀯𑀲𑁂𑀦 𑀯𑀺𑀓𑁆𑀔𑀺𑀢𑁆𑀢𑀳𑀢𑁆𑀣𑀧𑀸𑀤𑀸𑀤𑀺𑀅𑀯𑀬𑀯𑀯𑀦𑁆𑀢𑀁 𑀅𑀢𑀺𑀳𑀲𑀺𑀢𑀁 𑀦𑀸𑀫 𑀪𑀯𑀢𑀺. 𑀏𑀲𑀁 𑀙𑀦𑁆𑀦𑀁 𑀓𑀫𑀲𑁄 𑀓𑀫𑁂𑀦 𑀤𑁆𑀯𑁂 𑀤𑁆𑀯𑁂 𑀚𑁂𑀝𑁆𑀞𑁂 𑀫𑀚𑁆𑀛𑁂 𑀅𑀥𑀫𑁂𑀧𑀺 𑀯𑀺𑀲𑀬𑁂 𑀓𑀣𑀺𑀢𑀸 𑀧𑀼𑀭𑀸𑀢𑀦𑁂𑀳𑀺 𑀪𑀸𑀲𑀺𑀢𑀸𑀢𑀺. 𑀯𑀺𑀓𑀸𑀲𑀻𑀦𑀺 𑀦𑀬𑀦𑀸𑀦𑀺 𑀅𑀲𑁆𑀲𑁂𑀢𑀺 𑀘, 𑀓𑀺𑀜𑁆𑀘𑀺 𑀈𑀲𑀓𑀁 𑀆𑀮𑀓𑁆𑀔𑀺𑀬𑀸 𑀤𑀺𑀚𑀸 𑀬𑀲𑁆𑀲𑁂𑀢𑀺 𑀘, 𑀫𑀥𑀼𑀭𑁄 𑀲𑀭𑁄 𑀅𑀲𑁆𑀲𑁂𑀢𑀺 𑀘, 𑀅𑀁𑀲𑁄 𑀘 𑀲𑀺𑀭𑁄 𑀘𑁂𑀢𑀺 𑀘, 𑀅𑀁𑀲𑀲𑀺𑀭𑀲𑁄 𑀓𑀫𑁆𑀧𑁄𑀢𑀺 𑀘, 𑀢𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀘, 𑀲𑀳 𑀚𑀮𑁂𑀦 𑀯𑀢𑁆𑀢𑀫𑀸𑀦𑀸𑀦𑀺 𑀅𑀓𑁆𑀔𑀻𑀦𑀺 𑀬𑀲𑁆𑀲𑁂𑀢𑀺 𑀘, 𑀅𑀦𑀼𑀲𑁆𑀯𑀭𑀸𑀕𑀫𑁄. 𑀯𑀺𑀓𑁆𑀔𑀺𑀢𑁆𑀢𑀸𑀦𑀺 𑀅𑀗𑁆𑀕𑀸𑀦𑀺 𑀬𑀲𑁆𑀲𑁂𑀢𑀺 𑀘 𑀯𑀸𑀓𑁆𑀬𑀁. 𑀲𑀺𑀢𑀳𑀲𑀺𑀢𑀤𑁆𑀯𑀬𑀁 𑀉𑀢𑁆𑀢𑀫𑁂, 𑀯𑀺𑀳𑀲𑀺𑀢𑀉𑀧𑀳𑀲𑀺𑀢𑀤𑁆𑀯𑀬𑀁 𑀫𑀚𑁆𑀛𑀺𑀫𑁂, 𑀅𑀧𑀳𑀲𑀺𑀢𑀅𑀢𑀺𑀳𑀲𑀺𑀢𑀤𑁆𑀯𑀬𑀁 𑀅𑀥𑀫𑁂 𑀯𑀢𑁆𑀢𑀢𑁂. 𑀏𑀯𑀁 𑀲𑀺𑀢𑀸𑀤𑀬𑁄 𑀅𑀦𑀼𑀭𑀽𑀧𑀯𑀺𑀪𑀸𑀯𑀸𑀤𑀺𑀦𑀸 𑀧𑀬𑀼𑀢𑁆𑀢𑀸 𑀇𑀫𑁂 𑀭𑀲𑀸’𑀯𑀢𑁆𑀣𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀳𑀲𑁆𑀲𑀭𑀲𑀲𑁆𑀲 𑀏𑀯𑀫𑀼𑀤𑀸𑀳𑀭𑀡𑀁 𑀜𑀸𑀢𑀩𑁆𑀩𑀁 𑁋

𑀧𑀽𑀚𑁂𑀲𑀺 𑀓𑀡𑁆𑀞𑀫𑀡𑀺𑀦𑀸 𑀅𑀧𑀺 𑀬𑁄 𑀧𑀲𑀦𑁆𑀦𑁄,

𑀥𑀫𑁆𑀫𑁂 𑀧𑀼𑀭𑀸’𑀲𑀫𑀥𑀼𑀭𑀁 𑀯𑀺𑀥𑀼𑀭𑀁 𑀲 𑀳𑀦𑁆𑀢𑀼𑀁;

𑀕𑁄𑀧𑁂𑀦𑁆𑀢𑀺𑀬𑀸𑀧𑀺 𑀯𑀘𑀦𑁂𑀦 𑀣𑀺𑀬𑀸 𑀲𑀪𑀸𑀯𑀁;

𑀪𑀢𑁆𑀢𑀺𑀁 𑀅𑀓𑀸𑀲𑀺 𑀨𑀭𑀼𑀲𑁂 𑀫𑀬𑀺 𑀦𑀸𑀕𑀭𑀸𑀚𑀸𑀢𑀺.

𑀬𑁄 𑀧𑀼𑀭𑀸 𑀧𑀼𑀩𑁆𑀩𑁂 𑀥𑀫𑁆𑀫𑁂 𑀢𑀲𑁆𑀲 𑀥𑀫𑁆𑀫𑀓𑀣𑀦𑁂 𑀧𑀲𑀦𑁆𑀦𑁄 𑀓𑀡𑁆𑀞𑀫𑀡𑀺𑀦𑀸 𑀅𑀧𑀺 𑀅𑀢𑁆𑀢𑀦𑁄 𑀅𑀦𑀕𑁆𑀖𑀓𑀡𑁆𑀞𑀫𑀡𑀺𑀦𑀸𑀧𑀺 𑀢𑀁 𑀧𑀽𑀚𑁂𑀲𑀺, 𑀲𑁄 𑀦𑀸𑀕𑀭𑀸𑀚𑀸 𑀲𑀪𑀸𑀯𑀁 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀕𑁄𑀧𑁂𑀦𑁆𑀢𑀺𑀬𑀸 𑀅𑀧𑀺 𑀣𑀺𑀬𑀸 𑀯𑀘𑀦𑁂𑀦 𑀇𑀢𑁆𑀣𑀺𑀬𑀸 𑀯𑀘𑀦𑁂𑀦 𑀅𑀲𑀫𑀥𑀼𑀭𑀁 𑀢𑀼𑀮𑁆𑀬𑀭𑀳𑀺𑀢𑀁 𑀯𑀺𑀥𑀼𑀭𑀁 𑀯𑀺𑀥𑀼𑀭𑀧𑀡𑁆𑀟𑀺𑀢𑀁 𑀳𑀦𑁆𑀢𑀼𑀁 𑀯𑀺𑀦𑀸𑀲𑀦𑀢𑁆𑀣𑀁 𑀨𑀭𑀼𑀲𑁂 𑀘𑀡𑁆𑀟𑁂 𑀫𑀬𑀺 𑀪𑀢𑁆𑀢𑀺𑀁 𑀅𑀓𑀸𑀲𑀻𑀢𑀺. 𑀇𑀳 𑀏𑀓𑀲𑁆𑀫𑀺𑀁𑀬𑁂𑀯 𑀯𑀢𑁆𑀣𑀼𑀦𑀺 𑀦𑀸𑀕𑀭𑀸𑀚𑀲𑁆𑀲 𑀧𑀲𑀸𑀤𑀯𑀥𑀯𑀺𑀥𑀸𑀦𑀸𑀤𑀺𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺 𑀆𑀮𑀫𑁆𑀩𑀡𑀯𑀺𑀪𑀸𑀯𑁄, 𑀧𑀞𑀫𑀁 𑀅𑀦𑀕𑁆𑀖𑀧𑀺𑀬𑀯𑀢𑁆𑀣𑀽𑀳𑀺 𑀧𑀽𑀚𑀺𑀢𑀪𑀸𑀯𑁄 𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀢𑀼𑀮𑁆𑀬𑀪𑀸𑀯𑁄 𑀘 𑀇𑀢𑁆𑀣𑀺𑀯𑀘𑀦𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀦𑀪𑀸𑀯𑁄 𑀘 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀜𑁆𑀜𑀸𑀢𑀪𑀸𑀯𑁄 𑀘 𑀧𑀼𑀡𑁆𑀡𑀓𑀲𑁆𑀲 𑀘𑀡𑁆𑀟𑀪𑀸𑀯𑁄 𑀘𑁂𑀢𑀺 𑀇𑀫𑁂𑀳𑀺 𑀲𑀩𑁆𑀩𑀯𑀘𑀦𑁂𑀳𑀺 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀇𑀫𑁂𑀳𑀺 𑀉𑀤𑁆𑀤𑀻𑀧𑀺𑀢𑀞𑀸𑀬𑀻𑀪𑀸𑀯𑀲𑀗𑁆𑀔𑀢𑁄 𑀳𑀸𑀲𑁄 𑀯𑀸𑀓𑁆𑀬𑀲𑀸𑀫𑀢𑁆𑀣𑀺𑀬𑀸 𑀧𑀓𑀸𑀲𑀺𑀢𑁄 𑀳𑀸𑀲𑀯𑀺𑀭𑁄𑀥𑀺𑀦𑀺𑀩𑁆𑀩𑁂𑀤𑀸𑀤𑀺𑀯𑀚𑁆𑀚𑀺𑀢𑀸 𑀲𑀫𑀸𑀮𑀲𑀺𑀬𑀲𑀦𑁆𑀢𑁄𑀲𑀅𑀲𑁆𑀲𑀼𑀯𑁂𑀧𑀣𑀸𑀤𑀺𑀓𑀸 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸 𑀲𑀸𑀢𑁆𑀢𑀺𑀓𑀸𑀪𑀸𑀯𑀸 𑀘 𑀏𑀯𑀁 𑀲𑀸𑀫𑀢𑁆𑀣𑀺𑀬𑁂𑀦 𑀤𑀻𑀧𑀺𑀢𑀸. 𑀢𑀤𑀦𑀼𑀭𑀽𑀧𑀯𑀺𑀪𑀸𑀯𑀸𑀤𑀺𑀧𑀓𑀸𑀲𑀓𑀸 𑀬𑀣𑀸𑀯𑀼𑀢𑁆𑀢𑀓𑀯𑀺𑀧𑁆𑀧𑀬𑁄𑀕𑀸 𑀅𑀦𑀼𑀪𑀸𑀯𑀸 𑀦𑀸𑀫 𑀳𑁄𑀦𑁆𑀢𑀺. 𑀳𑀲𑁆𑀲𑀪𑁂𑀤𑁂𑀦 𑀫𑀚𑁆𑀛𑀺𑀫𑁂 𑀧𑀼𑀭𑀺𑀲𑁂 𑀯𑀢𑁆𑀢𑀩𑁆𑀩𑀸𑀧𑀺 𑀳𑀲𑀺𑀢𑀉𑀧𑀳𑀲𑀺𑀢𑀸 𑀤𑁆𑀯𑁂 𑀇𑀫𑀸 𑀤𑀝𑁆𑀞𑀩𑁆𑀩𑀸.

𑀓𑀭𑀼𑀡𑀸𑀞𑀸𑀬𑀻𑀪𑀸𑀯

𑁩𑁬𑁧. 𑀲𑁄𑀓𑀭𑀽𑀧𑁄 𑀢𑀼 𑀓𑀭𑀼𑀡𑁄-

𑀦𑀺𑀝𑁆𑀞𑀧𑀢𑁆𑀢𑀺𑀝𑁆𑀞𑀦𑀸𑀲𑀢𑁄;

𑀢𑀢𑁆𑀣𑀸’𑀦𑀼𑀪𑀸𑀯𑀸 𑀭𑀼𑀤𑀺𑀢-

𑀧𑀮𑀬𑀢𑁆𑀣𑀫𑁆𑀪𑀓𑀸𑀤𑀬𑁄;

𑀯𑀺𑀲𑀸𑀤𑀸𑀮𑀲𑁆𑀬𑀫𑀭𑀡-

𑀘𑀺𑀦𑁆𑀢𑀸𑀤𑀻 𑀩𑁆𑀬𑀪𑀺𑀘𑀸𑀭𑀺𑀦𑁄.

𑁩𑁬𑁧. ‘‘𑀲𑁄𑀓𑁂’’𑀘𑁆𑀘𑀸𑀤𑀺. 𑀅𑀦𑀺𑀝𑁆𑀞𑀲𑁆𑀲 𑀧𑀼𑀢𑁆𑀢𑀯𑀺𑀬𑁄𑀕𑀸𑀤𑀺𑀦𑁄 𑀤𑁂𑀲𑀦𑀺𑀓𑁆𑀓𑀟𑁆𑀠𑀦𑀸𑀤𑀺𑀦𑁄 𑀧𑀢𑁆𑀢𑀺 𑀘 𑀇𑀝𑁆𑀞𑀲𑁆𑀲 𑀥𑀫𑁆𑀫𑀲𑁆𑀲, 𑀥𑀦𑀸𑀤𑀺𑀦𑁄 𑀯𑀸 𑀦𑀸𑀲𑁄 𑀘 𑀢𑀢𑁄 𑀯𑀺𑀪𑀸𑀯𑀪𑀽𑀢𑁂𑀳𑀺 𑀲𑀫𑁆𑀧𑀦𑁆𑀦𑁄 𑀲𑁄𑀓𑀭𑀽𑀧𑁄 𑀲𑁄𑀓𑀲𑀪𑀸𑀯𑁄 𑀢𑀼 𑀓𑀭𑀼𑀡𑁄 𑀭𑀲𑁄 𑀦𑀸𑀫. 𑀢𑀢𑁆𑀣 𑀉𑀢𑁆𑀢𑀫𑀸𑀦𑀁 𑀲𑁄𑀓𑁄 𑀧𑀼𑀢𑁆𑀢𑀯𑀺𑀬𑁄𑀕𑀸𑀤𑀺𑀅𑀦𑀺𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄, 𑀥𑀫𑁆𑀫𑀸𑀤𑀺𑀇𑀝𑁆𑀞𑀦𑀸𑀲𑀢𑁄 𑀘 𑀚𑀸𑀬𑀢𑁂. 𑀦𑀻𑀘𑀸𑀦𑀁 𑀢𑀼 𑀤𑁂𑀲𑀦𑀺𑀓𑁆𑀓𑀟𑁆𑀠𑀦𑀸𑀤𑀺𑀅𑀦𑀺𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄, 𑀥𑀦𑀸𑀤𑀺𑀇𑀝𑁆𑀞𑀦𑀸𑀲𑀢𑁄 𑀘, 𑀧𑀭𑁂𑀲𑀁 𑀥𑀦𑀸𑀤𑀺𑀦𑀸𑀲𑀢𑁄 𑀢𑀼 𑀉𑀢𑁆𑀢𑀫𑀲𑁆𑀲𑁂𑀯 𑀫𑀳𑀸𑀓𑀸𑀭𑀼𑀡𑀺𑀓𑀢𑁆𑀢𑀸, 𑀲𑁂𑀲𑀁 𑀲𑀼𑀩𑁄𑀥𑀁. 𑀅𑀦𑀼𑀪𑀸𑀯𑁄 𑀧𑀦𑁂𑀢𑁆𑀣 𑀬𑀣𑁄𑀘𑀺𑀢𑁆𑀬𑀁 𑀦𑀺𑀭𑀽𑀧𑀬𑀺𑀢𑀩𑁆𑀩𑁄.

𑁩𑁬𑁧. 𑀇𑀤𑀸𑀦𑀺 𑀓𑀭𑀼𑀡𑀸𑀭𑀲𑀧𑁄𑀲𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀺 ‘‘𑀲𑁄𑀓’’𑀇𑀘𑁆𑀘𑀸𑀤𑀺𑀦𑀸. 𑀅𑀦𑀺𑀝𑁆𑀞𑀧𑁆𑀧𑀢𑁆𑀢𑀺𑀝𑁆𑀞𑀦𑀸𑀲𑀢𑁄 𑀧𑀼𑀢𑁆𑀢𑀯𑀺𑀬𑁄𑀕𑀸𑀤𑀺𑀦𑁄, 𑀤𑁂𑀲𑀘𑀸𑀕𑀸𑀤𑀺𑀦𑁄 𑀯𑀸 𑀅𑀦𑀺𑀝𑁆𑀞𑀲𑁆𑀲 𑀉𑀧𑁆𑀧𑀢𑁆𑀢𑀺 𑀘 𑀲𑀻𑀮𑀸𑀤𑀺𑀦𑁄, 𑀥𑀦𑀸𑀤𑀺𑀦𑁄 𑀯𑀸 𑀇𑀝𑁆𑀞𑀲𑁆𑀲 𑀓𑀦𑁆𑀢𑀺𑀯𑀢𑁆𑀣𑀼𑀦𑁄 𑀯𑀺𑀦𑀸𑀲𑁄 𑀘𑀸𑀢𑀺 𑀇𑀫𑁂𑀳𑀺 𑀆𑀮𑀫𑁆𑀩𑀡𑀯𑀺𑀪𑀸𑀯𑁂𑀳𑀺 𑀓𑀭𑀡𑀪𑀽𑀢𑁂𑀳𑀺 𑀉𑀧𑁆𑀧𑀦𑁆𑀦𑁄 𑀲𑁄𑀓𑀭𑀽𑀧𑁄 𑀢𑀼 𑀲𑁄𑀓𑀲𑀪𑀸𑀯𑁄 𑀧𑀦 𑀓𑀭𑀼𑀡𑁄 𑀓𑀭𑀼𑀡𑀸𑀭𑀲𑁄 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀓𑀭𑀼𑀡𑀸𑀭𑀲𑁂 𑀭𑀼𑀤𑀺𑀢𑀧𑀮𑀬𑀢𑁆𑀣𑀫𑁆𑀪𑀓𑀸𑀤𑀬𑁄 𑀭𑀼𑀤𑀺𑀢𑁄 𑀧𑀮𑀬𑁄 𑀣𑀫𑁆𑀪𑁄𑀢𑀺𑀆𑀤𑀬𑁄 𑀅𑀦𑀼𑀪𑀸𑀯𑀸 𑀦𑀸𑀫 𑀪𑀯𑀦𑁆𑀢𑀻𑀢𑀺. 𑀣𑀫𑁆𑀪𑀸𑀤𑀻𑀦𑀁 𑀲𑀭𑀽𑀧𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀯𑀺𑀲𑀸𑀤𑀆𑀮𑀲𑁆𑀬𑀫𑀭𑀡𑀘𑀺𑀦𑁆𑀢𑀸𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄 𑀢𑀲𑁆𑀫𑀺𑀁𑀬𑁂𑀯 𑀩𑁆𑀬𑀪𑀺𑀘𑀸𑀭𑀺𑀦𑁄 𑀪𑀯𑀦𑁆𑀢𑀺. 𑀇𑀳 𑀧𑀼𑀢𑁆𑀢𑀯𑀺𑀬𑁄𑀕𑀸𑀤𑀺𑀅𑀦𑀺𑀝𑁆𑀞𑀧𑁆𑀧𑀢𑁆𑀢𑀺𑀬𑀸 𑀘 𑀲𑀻𑀮𑀥𑀫𑁆𑀫𑀸𑀤𑀺𑀇𑀝𑁆𑀞𑀦𑀸𑀲𑀦𑁂𑀦 𑀘 𑀉𑀢𑁆𑀢𑀫𑀸𑀦𑀁 𑀲𑁄𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀤𑁂𑀲𑀘𑀸𑀕𑀸𑀤𑀺𑀅𑀦𑀺𑀝𑁆𑀞𑀧𑁆𑀧𑀢𑁆𑀢𑀺𑀬𑀸 𑀘 𑀥𑀦𑀸𑀤𑀺𑀇𑀝𑁆𑀞𑀦𑀸𑀲𑀦𑁂𑀦 𑀘 𑀦𑀻𑀘𑀸𑀦𑀁. 𑀅𑀜𑁆𑀜𑁂𑀲𑀁 𑀥𑀦𑀸𑀤𑀺𑀯𑀺𑀦𑀸𑀲𑀦𑁂𑀦 𑀧𑀦 𑀫𑀳𑀸𑀓𑀭𑀼𑀡𑀺𑀓𑀢𑁆𑀢𑀸 𑀉𑀢𑁆𑀢𑀫𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀲𑁄 𑀲𑁄𑀓𑁄 𑀲𑁂𑀲𑀸𑀦𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀬𑀣𑀸𑀭𑀳𑀁 𑀧𑀬𑁄𑀕𑁄 𑀓𑀸𑀢𑀩𑁆𑀩𑁄. 𑀲𑁄𑀓𑀲𑁆𑀲 𑀭𑀽𑀧𑁄 𑀲𑀪𑀸𑀯𑁄𑀢𑀺 𑀘, 𑀅𑀦𑀺𑀝𑁆𑀞𑀲𑁆𑀲 𑀧𑀢𑁆𑀢𑀻𑀢𑀺 𑀘, 𑀇𑀝𑁆𑀞𑀲𑁆𑀲 𑀦𑀸𑀲𑁄𑀢𑀺 𑀘, 𑀅𑀦𑀺𑀝𑁆𑀞𑀧𑁆𑀧𑀢𑁆𑀢𑀺 𑀘 𑀇𑀝𑁆𑀞𑀦𑀸𑀲𑁄 𑀘𑁂𑀢𑀺 𑀘, 𑀭𑀼𑀤𑀺𑀢𑀜𑁆𑀘 𑀧𑀮𑀬𑁄 𑀘 𑀣𑀫𑁆𑀪𑀓𑁄 𑀘𑁂𑀢𑀺 𑀘, 𑀢𑁂 𑀆𑀤𑀺 𑀬𑁂𑀲𑀫𑀺𑀢𑀺 𑀘, 𑀯𑀺𑀲𑀸𑀤𑁄 𑀘 𑀆𑀮𑀲𑁆𑀬𑀜𑁆𑀘 𑀫𑀭𑀡𑀜𑁆𑀘 𑀘𑀺𑀦𑁆𑀢𑀸 𑀘𑁂𑀢𑀺 𑀘, 𑀢𑀸 𑀆𑀤𑀺 𑀬𑁂𑀲𑀫𑀺𑀢𑀺 𑀘 𑀯𑀸𑀓𑁆𑀬𑀁. 𑀇𑀫𑀲𑁆𑀲 𑀓𑀭𑀼𑀡𑀸𑀭𑀲𑀲𑁆𑀲 𑀮𑀓𑁆𑀔𑀺𑀬𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 𑁋

𑀆𑀓𑀟𑁆𑀠𑀺𑀢𑁂’𑀓𑀲𑀢𑀭𑀸𑀚𑀧𑀼𑀭𑀓𑁆𑀔𑀢𑁄 𑀬𑁄,

𑀥𑀫𑁆𑀫𑁂𑀦 𑀆𑀲𑀦𑀫𑀮𑀁𑀓𑀼𑀭𑀼𑀢𑁂 𑀚𑀺𑀦𑁄𑀯;

𑀲𑁄 𑀅𑀲𑁆𑀲𑀯𑀸𑀮𑀫𑀯𑀮𑀫𑁆𑀩𑀺𑀬 𑀤𑀸𑀦𑀺 𑀦𑀻𑀢𑁄,

𑀬𑀓𑁆𑀔𑁂𑀦 𑀮𑁄𑀓𑀢𑀺𑀮𑀓𑁄 𑀓𑀼𑀭𑀼𑀢𑁂 𑀓𑀺𑀫𑁂𑀓𑁄𑀢𑀺.

𑀬𑁄 𑀏𑀓𑀲𑀢𑀭𑀸𑀚𑀧𑀼𑀭𑀓𑁆𑀔𑀢𑁄 𑀭𑀸𑀚𑀽𑀦𑀁 𑀏𑀓𑀲𑀢𑁂𑀦 𑀧𑀭𑀺𑀯𑀸𑀭𑀺𑀢𑁄 𑀚𑀺𑀦𑁄 𑀇𑀯 𑀩𑀼𑀤𑁆𑀥𑁄 𑀇𑀯 𑀥𑀫𑁆𑀫𑁂𑀦 𑀫𑀥𑀼𑀭𑀥𑀫𑁆𑀫𑀓𑀣𑀦𑁂𑀦 𑀆𑀲𑀦𑀁 𑀥𑀫𑁆𑀫𑀸𑀲𑀦𑀁 𑀅𑀮𑀁𑀓𑀼𑀭𑀼𑀢𑁂 𑀲𑀚𑁆𑀚𑁂𑀢𑀺, 𑀮𑁄𑀓𑀢𑀺𑀮𑀓𑁄 𑀮𑁄𑀓𑀲𑁆𑀲 𑀧𑀺𑀬𑀢𑀸𑀬 𑀢𑀺𑀮𑀓𑀸𑀮𑀗𑁆𑀓𑀸𑀭𑀪𑀽𑀢𑁄 𑀲𑁄 𑀯𑀺𑀥𑀼𑀭𑀧𑀡𑁆𑀟𑀺𑀢𑁄 𑀬𑀓𑁆𑀔𑁂𑀦 𑀧𑀼𑀡𑁆𑀡𑀓𑁂𑀦 𑀆𑀓𑀟𑁆𑀠𑀺𑀢𑁄 𑀳𑀼𑀢𑁆𑀯𑀸 𑀦𑀻𑀢𑁄 𑀅𑀲𑁆𑀲𑀯𑀸𑀮𑀁 𑀅𑀯𑀮𑀫𑁆𑀩𑀺𑀬 𑀇𑀤𑀸𑀦𑀺 𑀏𑀓𑁄 𑀓𑀺𑀁 𑀓𑀼𑀭𑀼𑀢𑁂𑀢𑀺. 𑀇𑀳𑀸𑀦𑀻𑀢𑁄𑀢𑀺 𑀤𑀲𑁆𑀲𑀺𑀢𑀧𑀺𑀬𑀯𑀢𑁆𑀣𑀼𑀯𑀺𑀬𑁄𑀕𑁄 𑀲𑁄𑀓𑀲𑁆𑀲 𑀆𑀮𑀫𑁆𑀩𑀡𑀯𑀺𑀪𑀸𑀯𑁄 𑀳𑁄𑀢𑀺. ‘‘𑀆𑀓𑀟𑁆𑀠𑀺𑀢𑁂𑀓𑀲𑀢𑀭𑀸𑀚𑁂’’𑀘𑁆𑀘𑀸𑀤𑀺𑀦𑀸 𑀲𑀓𑀮𑁂𑀦 𑀯𑀸𑀓𑁆𑀬𑁂𑀦 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀉𑀤𑁆𑀤𑀻𑀧𑀺𑀢𑀲𑁄𑀓𑀲𑀗𑁆𑀔𑀸𑀢𑀞𑀸𑀬𑀻𑀪𑀸𑀯𑁄 𑀘 𑀯𑀺𑀲𑀸𑀤𑀸𑀮𑀲𑁆𑀬𑀘𑀺𑀦𑁆𑀢𑀸𑀤𑀺𑀓𑁄 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁄 𑀘 𑀭𑀼𑀤𑀺𑀢𑀧𑀮𑀬𑀣𑀫𑁆𑀪𑀓𑀸𑀤𑀺𑀓𑀸 𑀯𑀺𑀪𑀸𑀯𑀸𑀤𑀺𑀩𑁄𑀥𑀓𑀅𑀦𑀼𑀪𑀸𑀯𑀸 𑀘 𑀯𑀸𑀓𑁆𑀬𑀲𑀸𑀫𑀢𑁆𑀣𑀺𑀬𑁂𑀦 𑀤𑀻𑀧𑀺𑀢𑀸 𑀳𑁄𑀦𑁆𑀢𑀺.

𑀭𑀼𑀤𑁆𑀤𑀞𑀸𑀬𑀻𑀪𑀸𑀯

𑁩𑁬𑁨. 𑀓𑁄𑀥𑁄 𑀫𑀘𑁆𑀙𑀭𑀺𑀬𑀸𑀤𑀻𑀳𑀺, 𑀧𑁄𑀲𑁂 𑀢𑀸𑀲𑀫𑀤𑀸𑀤𑀺𑀪𑀺;

𑀦𑀬𑀦𑀸𑀭𑀼𑀡𑀢𑀸𑀤𑀻𑀳𑀺, 𑀭𑀼𑀤𑁆𑀤𑁄 𑀦𑀸𑀫 𑀭𑀲𑁄 𑀪𑀯𑁂.

𑁩𑁬𑁨. ‘‘𑀓𑁄𑀥𑁄’’𑀇𑀘𑁆𑀘𑀸𑀤𑀺, 𑀲𑀼𑀩𑁄𑀥𑀁. 𑀏𑀢𑁆𑀣 𑀧𑀞𑀫𑁂𑀦 𑀆𑀤𑀺𑀲𑀤𑁆𑀤𑁂𑀦 𑀅𑀯𑀺𑀓𑁆𑀔𑁂𑀧𑀉𑀧𑀳𑀸𑀲𑀸𑀤𑀬𑁄 𑀯𑀺𑀪𑀸𑀯𑀸 𑀕𑀳𑀺𑀢𑀸, 𑀤𑀼𑀢𑀺𑀬𑁂𑀦 𑀉𑀕𑁆𑀕𑀲𑀫𑁆𑀪𑀫𑀸𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄, 𑀢𑀢𑀺𑀬𑁂𑀦 𑀪𑀽𑀓𑀼𑀝𑀺𑀧𑀼𑀭𑀡𑀑𑀝𑁆𑀞𑀦𑀺𑀧𑁆𑀧𑀻𑀴𑀦𑀸𑀤𑀬𑁄 𑀅𑀦𑀼𑀪𑀸𑀯𑀸.

𑁩𑁬𑁨. 𑀇𑀤𑀸𑀦𑀺 𑀭𑀼𑀤𑁆𑀤𑀭𑀲𑀲𑁆𑀲 𑀧𑁄𑀲𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀺 ‘‘𑀓𑁄𑀥𑁄’’𑀇𑀘𑁆𑀘𑀸𑀤𑀺𑀦𑀸. 𑀓𑁄𑀥𑁄 𑀫𑀘𑁆𑀙𑀭𑀺𑀬𑀸𑀤𑀻𑀳𑀺 𑀫𑀘𑁆𑀙𑀭𑀺𑀬𑀅𑀯𑀺𑀓𑁆𑀔𑁂𑀧𑀉𑀧𑀳𑀸𑀲𑀸𑀤𑀻𑀳𑀺 𑀆𑀮𑀫𑁆𑀩𑀡𑀸𑀤𑀻𑀳𑀺 𑀯𑀺𑀪𑀸𑀯𑁂𑀳𑀺 𑀘 𑀳𑁂𑀢𑀼𑀪𑀽𑀢𑁂𑀳𑀺 𑀢𑀸𑀲𑀫𑀤𑀸𑀤𑀻𑀳𑀺 𑀢𑀸𑀲𑀫𑀤𑀉𑀕𑁆𑀕𑀢𑀲𑀫𑁆𑀪𑀫𑀸𑀤𑀻𑀳𑀺 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂𑀳𑀺 𑀘 𑀦𑀬𑀦𑀸𑀭𑀼𑀡𑀢𑀸𑀤𑀻𑀳𑀺 𑀦𑁂𑀢𑁆𑀢𑀭𑀢𑁆𑀢𑀲𑀼𑀪𑀗𑁆𑀕𑀑𑀝𑁆𑀞𑀧𑀻𑀴𑀦𑀸𑀤𑀻𑀳𑀺 𑀅𑀦𑀼𑀪𑀸𑀯𑁂𑀳𑀺 𑀘 𑀓𑀭𑀡𑀪𑀽𑀢𑁂𑀳𑀺 𑀧𑁄𑀲𑁂 𑀲𑀢𑀺 𑀭𑀼𑀤𑁆𑀤𑁄 𑀦𑀸𑀫 𑀭𑀲𑁄 𑀪𑀯𑁂𑀢𑀺. 𑀫𑀘𑁆𑀙𑀭𑀺𑀬𑀁 𑀆𑀤𑀺 𑀬𑁂𑀲𑀦𑁆𑀢𑀺 𑀘, 𑀢𑀸𑀲𑁄 𑀘 𑀫𑀤𑁄 𑀘𑁂𑀢𑀺 𑀘, 𑀢𑁂 𑀆𑀤𑀺 𑀬𑁂𑀲𑀫𑀺𑀢𑀺 𑀘, 𑀦𑀬𑀦𑀸𑀦𑀺 𑀘 𑀢𑀸𑀦𑀺 𑀅𑀭𑀼𑀡𑀸𑀦𑀺 𑀘𑀸𑀢𑀺 𑀘, 𑀢𑁂𑀲𑀁 𑀪𑀸𑀯𑁄𑀢𑀺 𑀘, 𑀲𑀸 𑀆𑀤𑀺 𑀬𑁂𑀲𑀫𑀺𑀢𑀺 𑀘 𑀯𑀸𑀓𑁆𑀬𑀁.

𑀭𑀼𑀤𑁆𑀤𑀭𑀲𑀲𑁆𑀲 𑀉𑀤𑀸𑀳𑀭𑀡𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 𑁋

𑀬𑀓𑁆𑀔𑁂𑀦 𑀪𑁄 𑀅𑀥𑀺𑀕𑀢𑁄𑀲𑀺 𑀫𑀦𑀼𑀲𑁆𑀲𑀪𑀓𑁆𑀔𑁂,

𑀦𑀸’𑀲𑁆𑀲𑀲𑁆𑀲 𑀯𑀸𑀮’𑀫𑀯𑀮𑀫𑁆𑀩 𑀧𑀼𑀭𑀁 𑀅𑀯𑁂𑀓𑁆𑀔;

𑀯𑁂𑀭𑀫𑁆𑀪𑀯𑀸𑀢𑀫𑀼𑀔𑀘𑀼𑀡𑁆𑀡𑀺𑀢𑀲𑀩𑁆𑀩𑀕𑀢𑁆𑀢𑁄,

𑀫𑀘𑁆𑀘𑁄 𑀓𑀣𑀁 𑀧𑀼𑀦𑀧𑀺 𑀧𑀲𑁆𑀲𑀢𑀺 𑀚𑀻𑀯𑀮𑁄𑀓𑀦𑁆𑀢𑀺.

𑀪𑁄 𑀫𑀦𑀼𑀲𑁆𑀲𑀪𑀓𑁆𑀔𑁂𑀦 𑀬𑀓𑁆𑀔𑁂𑀦 𑀅𑀥𑀺𑀕𑀢𑁄𑀲𑀺 𑀕𑀳𑀺𑀢𑁄 𑀅𑀲𑀺, 𑀅𑀲𑁆𑀲𑀲𑁆𑀲 𑀯𑀸𑀮𑀫𑀯𑀮𑀫𑁆𑀩 𑀯𑀸𑀮𑀥𑀺𑀁 𑀕𑀳𑁂𑀢𑁆𑀯𑀸 𑀇𑀤𑀸𑀦𑁂𑀯 𑀧𑀼𑀭𑀁 𑀅𑀯𑁂𑀓𑁆𑀔 𑀢𑀼𑀬𑁆𑀳𑀁 𑀦𑀕𑀭𑀁 𑀑𑀮𑁄𑀓𑁂𑀳𑀺, 𑀢𑀣𑁂𑀯 𑀳𑀺 𑀯𑁂𑀭𑀫𑁆𑀪𑀯𑀸𑀢𑀫𑀼𑀔𑀘𑀼𑀡𑁆𑀡𑀺𑀢𑀲𑀩𑁆𑀩𑀕𑀢𑁆𑀢𑁄 𑀯𑁂𑀭𑀫𑁆𑀪𑀯𑀸𑀢𑀲𑁆𑀲 𑀅𑀪𑀺𑀫𑀼𑀔𑀺𑀘𑀼𑀡𑁆𑀡𑀺𑀢𑀲𑀓𑀮𑀲𑀭𑀻𑀭𑁄 𑀫𑀘𑁆𑀘𑁄 𑀫𑀦𑀼𑀲𑁆𑀲𑁄 𑀚𑀻𑀯𑀮𑁄𑀓𑀁 𑀲𑀢𑁆𑀢𑀮𑁄𑀓𑀁 𑀧𑀼𑀦𑀧𑀺 𑀓𑀣𑀁 𑀧𑀲𑁆𑀲𑀢𑀻𑀢𑀺. 𑀇𑀳 𑀫𑀘𑁆𑀙𑀭𑀺𑀬𑀸𑀤𑀺𑀯𑀺𑀪𑀸𑀯𑀸 𑀘 𑀓𑁄𑀥𑀸𑀤𑀺𑀲𑀗𑁆𑀔𑀸𑀢𑁄 𑀞𑀸𑀬𑀻𑀪𑀸𑀯𑁄 𑀘 𑀯𑀸𑀓𑁆𑀬𑀲𑀸𑀫𑀢𑁆𑀣𑀺𑀬𑀸 𑀤𑀻𑀧𑀺𑀢𑀸 𑀳𑁄𑀦𑁆𑀢𑀺, 𑀅𑀧𑀭𑀤𑁆𑀥𑁂𑀦 𑀢𑀸𑀲𑀫𑀤𑀉𑀕𑁆𑀕𑀢𑀸𑀤𑀺𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸 𑀯𑀺𑀪𑀸𑀯𑀺𑀢𑀸 𑀳𑁄𑀦𑁆𑀢𑀺. 𑀲𑀫𑀼𑀤𑀸𑀬𑁂𑀦 𑀦𑀬𑀦𑀸𑀭𑀼𑀡𑀢𑀸𑀤𑀬𑁄 𑀅𑀦𑀼𑀪𑀸𑀯𑀸 𑀲𑀽𑀘𑀺𑀢𑀸 𑀳𑁄𑀦𑁆𑀢𑀺.

𑀯𑀻𑀭𑀞𑀸𑀬𑀻𑀪𑀸𑀯

𑁩𑁬𑁩. 𑀧𑀢𑀸𑀧𑀯𑀺𑀓𑁆𑀓𑀫𑀸𑀤𑀻𑀳𑀼-𑀲𑁆𑀲𑀸𑀳𑁄 𑀯𑀺𑀭𑁄𑀢𑀺 𑀲𑀜𑁆𑀜𑀺𑀢𑁄;

𑀭𑀡𑀤𑀸𑀦𑀤𑀬𑀸𑀬𑁄𑀕𑀸, 𑀯𑀻𑀭𑁄’𑀬𑀁 𑀢𑀺𑀯𑀺𑀥𑁄 𑀪𑀯𑁂;

𑀢𑁂𑀯𑀸’𑀦𑀼𑀪𑀸𑀯𑀸 𑀥𑀺𑀢𑀺𑀫-𑀢𑁆𑀬𑀸𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄.

𑁩𑁬𑁩. ‘‘𑀧𑀢𑀸𑀧𑀺’’𑀘𑁆𑀘𑀸𑀤𑀺. 𑀧𑀢𑀸𑀧𑁄 𑀲𑀢𑁆𑀢𑀼𑀲𑀦𑁆𑀢𑀸𑀧𑀓𑀸𑀭𑀻 𑀢𑁂𑀚𑁄, 𑀯𑀺𑀓𑁆𑀓𑀫𑁄 𑀧𑀭𑀫𑀡𑁆𑀟𑀮𑀓𑁆𑀓𑀫𑀦𑁆𑀢𑀁, 𑀢𑁂 𑀆𑀤𑀬𑁄 𑀬𑁂𑀲𑀁 𑀩𑀮𑀸𑀯𑀺𑀓𑁆𑀔𑁂𑀧𑀸𑀤𑀻𑀦𑀁 𑀧𑀝𑀺𑀧𑀼𑀕𑁆𑀕𑀮𑀕𑀢𑀸𑀦𑀁 𑀯𑀺𑀪𑀸𑀯𑀸𑀦𑀁, 𑀢𑁂𑀳𑀺 𑀚𑀸𑀢𑁄 𑀉𑀲𑁆𑀲𑀸𑀳𑁄 𑀭𑀲𑀢𑁆𑀢𑀫𑀸𑀧𑀦𑁆𑀦𑁄 𑀯𑀻𑀭𑁄 𑀭𑀲𑁄𑀢𑀺 𑀲𑀜𑁆𑀜𑀺𑀢𑁄, 𑀅𑀬𑀁 𑀯𑀻𑀭𑁄 𑀭𑀡𑀤𑀸𑀦𑀤𑀬𑀸𑀬𑁄𑀕𑀸 𑀢𑀺𑀯𑀺𑀥𑁄 𑀪𑀯𑁂 𑀬𑀼𑀤𑁆𑀥𑀯𑀻𑀭𑁄 𑀤𑀸𑀦𑀯𑀻𑀭𑁄 𑀤𑀬𑀸𑀯𑀻𑀭𑁄𑀢𑀺, 𑀢𑁂 𑀬𑀼𑀤𑁆𑀥𑀓𑀭𑀡𑀸𑀤𑀬𑁄 𑀏𑀯 𑀢𑀢𑁆𑀣 𑀅𑀦𑀼𑀪𑀸𑀯𑀸 𑀪𑀯𑀦𑁆𑀢𑀺. 𑀥𑀺𑀢𑀺𑀫𑀢𑀺𑀉𑀕𑁆𑀕𑀢𑀸𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄 𑀪𑀯𑀦𑁆𑀢𑀻𑀢𑀺.

𑁩𑁬𑁩. 𑀇𑀤𑀸𑀦𑀺 𑀯𑀻𑀭𑀭𑀲𑀪𑁂𑀤𑀁, 𑀧𑁄𑀲𑀦𑀓𑁆𑀓𑀫𑀜𑁆𑀘 𑀤𑀲𑁆𑀲𑁂𑀢𑀺 ‘‘𑀧𑀢𑀸𑀧’’𑀇𑀘𑁆𑀘𑀸𑀤𑀺𑀦𑀸. 𑀧𑀢𑀸𑀧𑀯𑀺𑀓𑁆𑀓𑀫𑀸𑀤𑀻𑀳𑀺 𑀅𑀜𑁆𑀜𑀭𑀸𑀚𑀽𑀦𑀁 𑀤𑀡𑁆𑀟𑀚𑀢𑁂𑀚𑀲𑀗𑁆𑀔𑀢𑀧𑀢𑀸𑀧𑁄, 𑀢𑁂𑀲𑀫𑁂𑀯 𑀧𑀭𑀫𑀡𑁆𑀟𑀮𑀓𑁆𑀓𑀫𑀦𑀲𑀗𑁆𑀔𑀸𑀢𑀯𑀺𑀓𑁆𑀓𑀫𑁄 𑀨𑀮𑀪𑁂𑀤𑁄 𑀘𑁂𑀢𑀺𑀆𑀤𑀻𑀳𑀺 𑀉𑀧𑁆𑀧𑀦𑁆𑀦𑁄 𑀉𑀲𑁆𑀲𑀸𑀳𑁄 𑀯𑀻𑀭𑁄𑀢𑀺 𑀯𑀻𑀭𑀭𑀲𑁄𑀢𑀺 𑀲𑀜𑁆𑀜𑀺𑀢𑁄 𑀓𑀯𑀻𑀳𑀺 𑀜𑀸𑀢𑁄, 𑀅𑀬𑀁 𑀯𑀻𑀭𑀭𑀲𑁄 𑀭𑀡𑀤𑀸𑀦𑀤𑀬𑀸𑀬𑁄𑀕𑀸 𑀬𑀼𑀤𑁆𑀥𑀘𑀸𑀕𑀓𑀭𑀼𑀡𑀸𑀬𑁄𑀕𑁂𑀦 𑀳𑁂𑀢𑀼𑀪𑀽𑀢𑁂𑀦 𑀢𑀺𑀯𑀺𑀥𑁄 𑀪𑀯𑁂. 𑀢𑁂 𑀏𑀯 𑀭𑀡𑀤𑀸𑀦𑀤𑀬𑀸 𑀏𑀯 𑀇𑀫𑀸 𑀅𑀦𑀼𑀪𑀸𑀯𑀸 𑀦𑀸𑀫 𑀳𑁄𑀦𑁆𑀢𑀺. 𑀥𑀺𑀢𑀺𑀫𑀢𑁆𑀬𑀸𑀤𑀬𑁄 𑀥𑀺𑀢𑀺𑀫𑀢𑀺𑀉𑀕𑁆𑀕𑀢𑀕𑀩𑁆𑀩𑀸𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄 𑀪𑀸𑀯𑀸 𑀳𑁄𑀦𑁆𑀢𑀻𑀢𑀺. 𑀬𑀼𑀤𑁆𑀥𑀯𑀻𑀭𑀤𑀸𑀦𑀯𑀻𑀭𑀤𑀬𑀸𑀯𑀻𑀭𑀯𑀲𑁂𑀦 𑀯𑀻𑀭𑀭𑀲𑁄 𑀢𑀺𑀯𑀺𑀥𑁄 𑀳𑁄𑀢𑀺. 𑀧𑀢𑀸𑀧𑁄 𑀘 𑀯𑀺𑀓𑁆𑀓𑀫𑁄 𑀘𑁂𑀢𑀺 𑀘, 𑀢𑁂 𑀆𑀤𑀺 𑀬𑁂𑀲𑀫𑀺𑀢𑀺 𑀘, 𑀭𑀡𑁄 𑀘 𑀤𑀸𑀦𑀜𑁆𑀘 𑀤𑀬𑀸 𑀘𑁂𑀢𑀺 𑀘, 𑀢𑀸𑀳𑀺 𑀬𑁄𑀕𑁄𑀢𑀺 𑀘, 𑀢𑀬𑁄 𑀯𑀺𑀥𑀸 𑀧𑀓𑀸𑀭𑀸 𑀅𑀲𑁆𑀲𑀸𑀢𑀺 𑀘, 𑀥𑀺𑀢𑀺 𑀘 𑀫𑀢𑀺 𑀘𑁂𑀢𑀺 𑀘, 𑀢𑀸 𑀆𑀤𑀺 𑀬𑁂𑀲𑀫𑀺𑀢𑀺 𑀘 𑀯𑀸𑀓𑁆𑀬𑀁.

𑀯𑀻𑀭𑀭𑀲𑀲𑁆𑀲 𑀉𑀤𑀸𑀳𑀭𑀡𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 𑁋

𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀓𑀼𑀯𑁂𑀭𑀁 𑀲𑀼𑀫𑀳𑀢𑀺-

𑀫𑀧𑀺 𑀘𑁂’𑀓𑁄𑀯𑀓𑀼𑀫𑁆𑀪𑀡𑁆𑀟𑀲𑁂𑀦𑀁,

𑀉𑀢𑁆𑀢𑀸𑀲𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀫𑀡𑀺𑀭𑀢𑀦𑀯𑀭𑀁

𑀮𑀓𑁆𑀔𑀫𑀸𑀥𑀸𑀬 𑀚𑀽𑀢𑁂;

𑀚𑁂𑀢𑁆𑀯𑀸 𑀓𑁄𑀭𑀩𑁆𑀬𑀭𑀸𑀚𑀁 𑀲𑀘𑀺𑀯𑀭𑀢𑀦-

𑀫𑀼𑀤𑁆𑀥𑀘𑁆𑀘 𑀭𑀜𑁆𑀜𑀁 𑀲𑀢𑀫𑁆𑀳𑀸,

𑀏𑀢𑁆𑀣𑀸𑀦𑁂𑀢𑁆𑀯𑀸’𑀤𑀺𑀬𑀺𑀲𑁆𑀲𑀁 𑀲𑀼𑀬𑀼𑀯𑀢𑀺𑀭𑀢𑀦𑀁

𑀓𑁄 𑀫𑀫𑁂’𑀢𑁆𑀣’𑀢𑁆𑀣𑀺 𑀪𑀸𑀭𑁄𑀢𑀺.

𑀓𑀼𑀯𑁂𑀭𑀁 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀩𑁄𑀥𑁂𑀢𑁆𑀯𑀸 𑀲𑀼𑀫𑀳𑀢𑀺𑀫𑀧𑀺 𑀓𑀼𑀫𑁆𑀪𑀡𑁆𑀟𑀲𑁂𑀦𑀁 𑀅𑀢𑀺𑀫𑀳𑀦𑁆𑀢𑀺𑀁 𑀓𑀼𑀫𑁆𑀪𑀡𑁆𑀟𑀲𑁂𑀦𑀁 𑀏𑀓𑁄𑀯 𑀉𑀢𑁆𑀢𑀸𑀲𑁂𑀢𑁆𑀯𑀸 𑀪𑀬𑀁 𑀚𑀦𑁂𑀢𑁆𑀯𑀸 𑀫𑀡𑀺𑀭𑀢𑀦𑀯𑀭𑀁 𑀕𑀳𑁂𑀢𑁆𑀯𑀸 𑀚𑀽𑀢𑁂 𑀅𑀓𑁆𑀔𑀓𑀻𑀴𑀸𑀬𑀁 𑀮𑀓𑁆𑀔𑀁 𑀆𑀥𑀸𑀬 𑀞𑀧𑁂𑀢𑁆𑀯𑀸 𑀓𑁄𑀭𑀩𑁆𑀬𑀭𑀸𑀚𑀁 𑀚𑁂𑀢𑁆𑀯𑀸 𑀭𑀜𑁆𑀜𑀁 𑀲𑀢𑀫𑁆𑀳𑀸 𑀭𑀸𑀚𑀲𑀫𑁆𑀩𑀦𑁆𑀥𑀺𑀦𑀸 𑀲𑀢𑁂𑀦 𑀲𑀘𑀺𑀯𑀭𑀢𑀦𑀁 𑀅𑀫𑀘𑁆𑀘𑀭𑀢𑀦𑀁 𑀉𑀤𑁆𑀥𑀘𑁆𑀘 𑀉𑀤𑁆𑀥𑀭𑀺𑀢𑁆𑀯𑀸 𑀏𑀢𑁆𑀣𑀸𑀦𑁂𑀢𑁆𑀯𑀸 𑀲𑀼𑀬𑀼𑀯𑀢𑀺𑀭𑀢𑀦𑀁 𑀲𑁄𑀪𑀦𑀇𑀢𑁆𑀣𑀺𑀭𑀢𑀦𑀁 𑀆𑀤𑀺𑀬𑀺𑀲𑁆𑀲𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑁂𑀲𑀼 𑀫𑀫 𑀓𑁄 𑀪𑀸𑀭𑁄 𑀅𑀢𑁆𑀣𑀻𑀢𑀺. 𑀏𑀢𑁆𑀣 ‘‘𑀓𑁄 𑀫𑀫𑁂𑀢𑁆𑀣𑀢𑁆𑀣𑀺 𑀪𑀸𑀭𑁄’’𑀢𑀺 𑀇𑀫𑀺𑀦𑀸 𑀉𑀲𑁆𑀲𑀸𑀳𑀲𑀗𑁆𑀔𑀸𑀢𑁄 𑀞𑀸𑀬𑀻𑀪𑀸𑀯𑁄 𑀧𑀓𑀸𑀲𑀺𑀢𑁄. 𑀏𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀉𑀤𑁆𑀤𑀻𑀧𑀦𑁂𑀲𑀼 𑀓𑀸𑀭𑀡𑀪𑀽𑀢𑀲𑁆𑀲 𑀇𑀢𑁆𑀣𑀺𑀭𑀢𑀦𑀲𑁆𑀲 𑀆𑀤𑀸𑀦𑀔𑁆𑀬𑀸𑀢𑀦𑀸𑀕𑀭𑀸𑀚𑀕𑀢𑀧𑀢𑀸𑀧𑀯𑀺𑀓𑁆𑀓𑀫𑀸𑀤𑀺𑀯𑀺𑀪𑀸𑀯𑁄 𑀘, 𑀢𑀁𑀢𑀁𑀭𑀽𑀧𑀧𑁆𑀧𑀓𑀸𑀲𑀓𑀓𑀯𑀺𑀯𑀘𑀦𑀲𑀗𑁆𑀔𑀸𑀢𑀸𑀦𑀼𑀪𑀸𑀯𑁄 𑀘 ‘‘𑀯𑀺𑀜𑁆𑀜𑀸𑀧𑁂𑀢𑁆𑀯𑀸’’𑀇𑀘𑁆𑀘𑀸𑀤𑀺𑀦𑀸 𑀯𑀸𑀓𑁆𑀬𑀲𑀸𑀫𑀢𑁆𑀣𑀺𑀬𑁂𑀦 𑀧𑀝𑀺𑀧𑀸𑀤𑀦𑀻𑀬𑀸 𑀳𑁄𑀦𑁆𑀢𑀺. ‘‘𑀲𑀼𑀫𑀳𑀢𑀺𑀫𑀧𑀺 𑀓𑀼𑀫𑁆𑀪𑀡𑁆𑀟𑀲𑁂𑀦𑀁 𑀏𑀓𑁄’’𑀢𑀺 𑀘, ‘‘𑀭𑀜𑁆𑀜𑀁 𑀲𑀢𑀫𑁆𑀳𑀸 𑀲𑀘𑀺𑀯𑀭𑀢𑀦𑀫𑀼𑀤𑁆𑀥𑀘𑁆𑀘𑀸’’𑀢𑀺 𑀘 𑀇𑀫𑁂𑀳𑀺 𑀥𑀺𑀢𑀺𑀉𑀕𑁆𑀕𑀢𑀕𑀩𑁆𑀩𑀸𑀤𑀬𑁄 𑀘, ‘‘𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀓𑀼𑀯𑁂𑀭’’𑀦𑁆𑀢𑀺 𑀘, ‘‘𑀉𑀢𑁆𑀢𑀸𑀲𑁂𑀢𑁆𑀯𑀸 𑀓𑁄𑀭𑀩𑁆𑀬𑀭𑀸𑀚’’𑀦𑁆𑀢𑀺 𑀘, ‘‘𑀏𑀢𑁆𑀣𑀸𑀦𑁂𑀢𑁆𑀯𑀸 𑀇𑀘𑁆𑀘𑀸𑀤𑀬𑁄’’𑀢𑀺 𑀘 𑀇𑀫𑁂𑀳𑀺 𑀫𑀢𑁆𑀬𑀸𑀤𑀬𑁄 𑀘 𑀩𑁆𑀬𑀪𑀺𑀘𑀸𑀭𑀺𑀦𑁄 𑀪𑀸𑀯𑀸 𑀯𑀺𑀪𑀸𑀯𑀺𑀢𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀯𑀺𑀪𑀸𑀯𑀸𑀦𑀼𑀪𑀸𑀯𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂𑀳𑀺 𑀬𑀼𑀤𑁆𑀥𑀯𑀻𑀭𑀭𑀲𑁄 𑀧𑁄𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀫𑀺𑀦𑀸𑀬𑁂𑀯 𑀦𑀬𑁂𑀦 𑀤𑀸𑀦𑀯𑀻𑀭𑀸𑀤𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑀸.

𑀪𑀬𑀞𑀸𑀬𑀻𑀪𑀸𑀯

𑁩𑁬𑁪. 𑀯𑀺𑀓𑀸𑀭𑀺𑀲𑀦𑀲𑀢𑁆𑀢𑀸𑀤𑀺-

𑀪𑀬𑀼𑀓𑁆𑀓𑀁𑀲𑁄 𑀪𑀬𑀸𑀦𑀓𑁄;

𑀲𑁂𑀤𑀸𑀤𑀬𑁄’𑀦𑀼𑀪𑀸𑀯𑁂’𑀢𑁆𑀣,

𑀢𑀸𑀲𑀸𑀤𑀻 𑀩𑁆𑀬𑀪𑀺𑀘𑀸𑀭𑀺𑀦𑁄.

𑁩𑁬𑁪. ‘‘𑀯𑀺𑀓𑀸𑀭𑀺’’𑀘𑁆𑀘𑀸𑀤𑀺. 𑀯𑀺𑀓𑀸𑀭𑀺 𑀅𑀲𑀪𑀸𑀯𑀧𑁆𑀧𑀯𑀢𑁆𑀢𑁄 𑀯𑀺𑀭𑀼𑀤𑁆𑀥𑁄 𑀲𑀦𑁄 𑀲𑀤𑁆𑀤𑁄 𑀲𑀢𑁆𑀢𑁄 𑀘, 𑀢𑁂 𑀆𑀤𑀬𑁄 𑀬𑁂𑀲𑀁 𑀲𑀼𑀜𑁆𑀜𑀸𑀭𑀜𑁆𑀜𑀸𑀤𑀻𑀦𑀁 𑀇𑀢𑁆𑀣𑀺𑀦𑀻𑀘𑀧𑁆𑀧𑀓𑀢𑀺𑀲𑀫𑁆𑀪𑀯𑀦𑁆𑀢𑀸𑀦𑀁, 𑀯𑀺𑀪𑀸𑀯𑀸𑀦𑀁, 𑀕𑀼𑀭𑀼𑀆𑀤𑀻𑀦𑀁 𑀯𑀸 𑀉𑀢𑁆𑀢𑀫𑀸𑀦𑀁, 𑀢𑁂𑀳𑀺 𑀚𑀸𑀢𑀲𑁆𑀲 𑀪𑀬𑀲𑁆𑀲, 𑀓𑀺𑀢𑁆𑀢𑀺𑀫𑀲𑁆𑀲 𑀯𑀸 𑀉𑀓𑁆𑀓𑀁𑀲𑁄 𑀪𑀬𑀸𑀦𑀓𑁄 𑀦𑀸𑀫 𑀭𑀲𑁄. 𑀏𑀢𑁆𑀣 𑀲𑁂𑀤𑀓𑀫𑁆𑀧𑀦𑀧𑀸𑀤𑀘𑀮𑀦𑀸𑀤𑀬𑁄 𑀅𑀦𑀼𑀪𑀸𑀯𑀸, 𑀢𑀸𑀲𑀸𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄.

𑁩𑁬𑁪. 𑀇𑀤𑀸𑀦𑀺 𑀪𑀬𑀸𑀦𑀓𑀭𑀲𑀲𑁆𑀲 𑀧𑁄𑀲𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀺 ‘‘𑀯𑀺𑀓𑀸𑀭𑀺’’𑀘𑁆𑀘𑀸𑀤𑀺𑀦𑀸. 𑀯𑀺𑀓𑀸𑀭𑀺𑀲𑀦𑀲𑀢𑁆𑀢𑀸𑀤𑀺𑀪𑀬𑀼𑀓𑁆𑀓𑀁𑀲𑁄 𑀧𑀓𑀢𑀺𑀯𑀺𑀭𑀳𑁂𑀦 𑀯𑀺𑀓𑀸𑀭𑀯𑀦𑁆𑀢𑁂𑀳𑀺 𑀯𑀺𑀭𑀼𑀤𑁆𑀥𑁂𑀳𑀺 𑀅𑀲𑀦𑀺𑀲𑀤𑁆𑀤𑀸𑀤𑀺𑀲𑀤𑁆𑀤𑁂𑀳𑀺, 𑀭𑀓𑁆𑀔𑀲𑀸𑀤𑀺𑀲𑀢𑁆𑀢𑁂𑀳𑀺 𑀯𑀸 𑀯𑀺𑀪𑀸𑀯𑁂𑀳𑀺 𑀳𑁂𑀢𑀼𑀪𑀽𑀢𑁂𑀳𑀺 𑀲𑀜𑁆𑀚𑀸𑀢𑁄 𑀲𑀸𑀪𑀸𑀯𑀺𑀓𑁄, 𑀓𑀺𑀢𑁆𑀢𑀺𑀫𑁄 𑀯𑀸 𑀪𑀬𑀧𑀝𑀺𑀩𑀦𑁆𑀥𑁄 𑀉𑀓𑁆𑀓𑀁𑀲𑁄 𑀪𑀬𑀸𑀦𑀓𑀭𑀲𑁄 𑀦𑀸𑀫 𑀳𑁄𑀢𑀺. 𑀏𑀢𑁆𑀣 𑀪𑀬𑀸𑀦𑀓𑀭𑀲𑀯𑀺𑀲𑀬𑁂 𑀲𑁂𑀤𑀸𑀤𑀬𑁄 𑀤𑀸𑀳𑀲𑀭𑀻𑀭𑀓𑀫𑁆𑀧𑀦𑀸𑀤𑀬𑁄 𑀅𑀦𑀼𑀪𑀸𑀯𑀸 𑀓𑀸𑀬𑀺𑀓𑀯𑀸𑀘𑀲𑀺𑀓𑀧𑁆𑀧𑀬𑁄𑀕𑀲𑀗𑁆𑀔𑀢𑀸 𑀅𑀦𑀼𑀪𑀸𑀯𑀸 𑀳𑁄𑀦𑁆𑀢𑀺. 𑀢𑀸𑀲𑀸𑀤𑀻 𑀩𑁆𑀬𑀪𑀺𑀘𑀸𑀭𑀺𑀦𑁄 𑀢𑀸𑀲𑀲𑀗𑁆𑀓𑀸𑀤𑀬𑁄 𑀇𑀳 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸 𑀳𑁄𑀦𑁆𑀢𑀻𑀢𑀺. 𑀲𑀦𑁄 𑀘 𑀲𑀢𑁆𑀢𑁄 𑀘𑁂𑀢𑀺 𑀘, 𑀯𑀺𑀓𑀸𑀭𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀘, 𑀯𑀺𑀓𑀸𑀭𑀺𑀦𑁄 𑀘 𑀢𑁂 𑀲𑀦𑀲𑀢𑁆𑀢𑀸 𑀘𑁂𑀢𑀺 𑀘, 𑀢𑁂 𑀆𑀤𑀬𑁄 𑀬𑁂𑀲𑀁 𑀲𑀼𑀜𑁆𑀜𑀸𑀭𑀜𑁆𑀜𑀸𑀤𑀻𑀦𑀫𑀺𑀢𑀺 𑀘, 𑀢𑁂𑀳𑀺 𑀚𑀸𑀢𑀁 𑀪𑀬𑀫𑀺𑀢𑀺 𑀘, 𑀫𑀚𑁆𑀛𑁂 𑀧𑀤𑀮𑁄𑀧𑁄, 𑀢𑀲𑁆𑀲 𑀉𑀓𑁆𑀓𑀁𑀲𑁄𑀢𑀺 𑀘, 𑀲𑁂𑀤𑁄 𑀆𑀤𑀺 𑀬𑁂𑀲𑀁 𑀓𑀫𑁆𑀧𑀦𑀸𑀤𑀻𑀦𑀫𑀺𑀢𑀺 𑀘, 𑀢𑀸𑀲𑁄 𑀆𑀤𑀺 𑀬𑁂𑀲𑀁 𑀲𑀗𑁆𑀓𑀸𑀤𑀻𑀦𑀫𑀺𑀢𑀺 𑀘 𑀯𑀸𑀓𑁆𑀬𑀁. 𑀇𑀢𑁆𑀣𑀺𑀦𑀻𑀘𑀧𑁆𑀧𑀓𑀢𑀺𑀓𑀸𑀦𑀁 𑀪𑀬𑀳𑁂𑀢𑀼 𑀯𑀺𑀓𑀸𑀭𑀺𑀲𑀦𑀲𑀢𑁆𑀢𑀸𑀤𑀺, 𑀉𑀢𑁆𑀢𑀫𑀸𑀦𑀁 𑀕𑀼𑀭𑀼𑀆𑀤𑀺.

𑀏𑀢𑁆𑀣 𑀮𑀓𑁆𑀔𑀺𑀬𑀫𑁂𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋

𑀬𑀁 𑀤𑀺𑀝𑁆𑀞𑀺𑀲𑀢𑁆𑀣𑀧𑀢𑀦𑁂𑀦 𑀧𑀭𑀺𑀧𑁆𑀨𑀼𑀭𑀦𑁆𑀢𑀻,

𑀓𑀼𑀫𑁆𑀪𑀡𑁆𑀟𑀭𑀓𑁆𑀔𑀲𑀘𑀫𑀽 𑀕𑀫𑀺𑀢𑀸 𑀲𑀫𑀦𑁆𑀢𑀸;

𑀆𑀘𑀓𑁆𑀓𑀯𑀸𑀴𑀦𑀕’𑀫𑀲𑁆𑀲𑀕𑀢𑀁 𑀧𑀼𑀭𑀻𑀯,

𑀪𑁄𑀢𑁄 𑀫𑀼𑀳𑀼𑀁 𑀫𑀼𑀳𑀼’𑀫𑀧𑀲𑁆𑀲𑀺 𑀲 𑀧𑀼𑀡𑁆𑀡𑀓𑁄’𑀳𑀦𑁆𑀢𑀺.

𑀤𑀺𑀝𑁆𑀞𑀺𑀲𑀢𑁆𑀣𑀧𑀢𑀦𑁂𑀦 𑀤𑀺𑀝𑁆𑀞𑀺𑀲𑀮𑁆𑀮𑀲𑀫𑁆𑀧𑀸𑀢𑀦𑁂𑀦 𑀧𑀭𑀺𑀧𑁆𑀨𑀼𑀭𑀦𑁆𑀢𑀻 𑀓𑀫𑁆𑀧𑀫𑀸𑀦𑀸 𑀲𑀫𑀦𑁆𑀢𑀸 𑀧𑀭𑀺𑀲𑀫𑀦𑁆𑀢𑀢𑁄 𑀆𑀘𑀓𑁆𑀓𑀯𑀸𑀴𑀦𑀕𑀁 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸𑀯𑀥𑀺 𑀕𑀫𑀺𑀢𑀸 𑀧𑀮𑀸𑀧𑀺𑀢𑀸 𑀓𑀼𑀫𑁆𑀪𑀡𑁆𑀟𑀭𑀓𑁆𑀔𑀲𑀘𑀫𑀽 𑀓𑀼𑀫𑁆𑀪𑀡𑁆𑀟𑀭𑀓𑁆𑀔𑀲𑀸𑀦𑀁 𑀲𑁂𑀦𑀸 𑀬𑀁 𑀅𑀲𑁆𑀲𑀕𑀢𑀁 𑀅𑀲𑁆𑀲𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀓𑀁 𑀪𑁄𑀢𑁄 𑀪𑀯𑀢𑀁 𑀢𑀼𑀫𑁆𑀳𑀸𑀓𑀁 𑀧𑀼𑀭𑀻 𑀇𑀯 𑀧𑀼𑀭𑀺𑀬𑀸 𑀤𑀲𑁆𑀲𑀦𑀫𑀺𑀯 𑀫𑀼𑀳𑀼𑀁 𑀫𑀼𑀳𑀼𑀁 𑀅𑀧𑀲𑁆𑀲𑀺 𑀔𑀡𑁂 𑀔𑀡𑁂 𑀅𑀧𑀲𑁆𑀲𑀺𑀢𑁆𑀣, 𑀲𑁄 𑀅𑀳𑀁 𑀧𑀼𑀡𑁆𑀡𑀓𑁄 𑀦𑀸𑀫 𑀬𑀓𑁆𑀔𑁄𑀢𑀺. 𑀏𑀢𑁆𑀣 ‘‘𑀤𑀺𑀝𑁆𑀞𑀺𑀲𑀢𑁆𑀣𑀧𑀢𑀦𑁂𑀦𑀸’’𑀢𑀺 𑀤𑀺𑀝𑁆𑀞𑀺𑀲𑀢𑁆𑀣𑀸𑀭𑁄𑀧𑀦𑁂𑀦 𑀘 ‘‘𑀲 𑀧𑀼𑀡𑁆𑀡𑀓𑁄 𑀅𑀳’’𑀦𑁆𑀢𑀺 𑀇𑀫𑀺𑀦𑀸 𑀘 𑀪𑀬𑀚𑀦𑀦𑀲𑁆𑀲 𑀳𑁂𑀢𑀼𑀪𑀽𑀢𑀯𑀺𑀭𑀼𑀤𑁆𑀥𑀲𑀢𑁆𑀢𑀲𑀗𑁆𑀔𑀸𑀢𑀸 𑀯𑀺𑀪𑀸𑀯𑀸 𑀦𑀺𑀤𑁆𑀤𑀺𑀝𑁆𑀞𑀸, ‘‘𑀫𑀼𑀳𑀼𑀁 𑀫𑀼𑀳𑀼’𑀫𑀧𑀲𑁆𑀲𑀻’’𑀢𑀺 𑀭𑀲𑀸𑀯𑀢𑁆𑀣𑀲𑀫𑁆𑀧𑀢𑁆𑀢𑀪𑀬𑀼𑀓𑁆𑀓𑀁𑀲𑀲𑀗𑁆𑀔𑀢𑁄 𑀞𑀸𑀬𑀻𑀪𑀸𑀯𑁄 𑀯𑀺𑀪𑀸𑀯𑀺𑀢𑁄, ‘‘𑀓𑀼𑀫𑁆𑀪𑀡𑁆𑀟𑀭𑀓𑁆𑀔𑀲𑀘𑀫𑀽 𑀕𑀫𑀺𑀢𑀸 𑀲𑀫𑀦𑁆𑀢𑀸 𑀆𑀘𑀓𑁆𑀓𑀯𑀸𑀴𑀦𑀕’’𑀦𑁆𑀢𑀺 𑀢𑀸𑀲𑀲𑀗𑁆𑀓𑀸𑀤𑀺𑀓𑀸 𑀩𑁆𑀬𑀪𑀺𑀘𑀸𑀭𑀺𑀦𑁄 𑀪𑀸𑀯𑀸 𑀚𑁄𑀢𑀺𑀢𑀸. ‘‘𑀧𑀭𑀺𑀧𑁆𑀨𑀼𑀭𑀦𑁆𑀢𑀻’’𑀢𑀺 𑀲𑁂𑀤𑀓𑀫𑁆𑀧𑀸𑀤𑀬𑁄 𑀅𑀦𑀼𑀪𑀸𑀯𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺.

𑀚𑀺𑀕𑀼𑀘𑁆𑀙𑀸𑀞𑀸𑀬𑀻𑀪𑀸𑀯

𑁩𑁬𑁫. 𑀚𑀺𑀕𑀼𑀘𑁆𑀙𑀸 𑀭𑀼𑀥𑀺𑀭𑀸𑀤𑀻𑀳𑀺,

𑀧𑀽𑀢𑁆𑀬𑀸𑀤𑀻𑀳𑀺 𑀯𑀺𑀭𑀸𑀕𑀢𑁄;

𑀩𑀻𑀪𑀘𑁆𑀙𑁄 𑀔𑁄𑀪𑀦𑀼’𑀩𑁆𑀩𑁂𑀕𑀻,

𑀓𑀫𑁂𑀦 𑀓𑀭𑀼𑀡𑀸𑀬𑀼𑀢𑁄;

𑀦𑀸𑀲𑀸𑀯𑀺𑀓𑀼𑀦𑀦𑀸𑀤𑀻𑀳𑀺,

𑀲𑀗𑁆𑀓𑀸𑀤𑀻𑀳𑀺’𑀲𑁆𑀲 𑀧𑁄𑀲𑀦𑀁.

𑁩𑁬𑁫. ‘‘𑀚𑀺𑀕𑀼𑀘𑁆𑀙𑀸’’𑀇𑀘𑁆𑀘𑀸𑀤𑀺. 𑀭𑀼𑀥𑀺𑀭𑀦𑁆𑀢𑀸𑀤𑀻𑀳𑀺 𑀧𑀽𑀢𑀺𑀓𑀺𑀫𑀺𑀆𑀤𑀻𑀳𑀺 𑀯𑀺𑀭𑀸𑀕𑀢𑁄 𑀘 𑀚𑀸𑀢𑀸 𑀚𑀺𑀕𑀼𑀘𑁆𑀙𑀸 𑀕𑀭𑀳𑀸 𑀓𑀫𑁂𑀦 𑀔𑁄𑀪𑀦𑁄 𑀉𑀩𑁆𑀩𑁂𑀕𑀻 𑀓𑀭𑀼𑀡𑀸𑀬𑀼𑀢𑁄 𑀘 𑀩𑀻𑀪𑀘𑁆𑀙𑁄 𑀪𑀯𑀢𑀺, 𑀦𑀸𑀲𑀸𑀯𑀺𑀓𑀼𑀦𑀦𑀫𑀼𑀔𑀘𑁆𑀙𑀤𑀦𑀸𑀤𑀻𑀳𑀺 𑀅𑀦𑀼𑀪𑀸𑀯𑁂𑀳𑀺, 𑀲𑀗𑁆𑀓𑀸𑀯𑁂𑀕𑀸𑀤𑀻𑀳𑀺 𑀩𑁆𑀬𑀪𑀺𑀘𑀸𑀭𑀻𑀳𑀺 𑀘 𑀅𑀲𑁆𑀲 𑀧𑁄𑀲𑀦𑀁 𑀪𑀯𑀢𑀻𑀢𑀺.

𑁩𑁬𑁫. 𑀇𑀤𑀸𑀦𑀺 𑀩𑀻𑀪𑀘𑁆𑀙𑀭𑀲𑀲𑁆𑀲 𑀧𑁄𑀲𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀺 ‘‘𑀚𑀺𑀕𑀼𑀘𑁆𑀙𑀸’’𑀇𑀘𑁆𑀘𑀸𑀤𑀺𑀦𑀸. 𑀭𑀼𑀥𑀺𑀭𑀸𑀤𑀻𑀳𑀺 𑀭𑀢𑁆𑀢𑀦𑁆𑀢𑀕𑀼𑀡𑀸𑀤𑀻𑀳𑀺 𑀘, 𑀧𑀽𑀢𑁆𑀬𑀸𑀤𑀻𑀳𑀺 𑀧𑀽𑀢𑀺𑀓𑀺𑀫𑀺𑀆𑀤𑀻𑀳𑀺 𑀘, 𑀯𑀺𑀭𑀸𑀕𑀢𑁄 𑀯𑀺𑀭𑀢𑁆𑀢𑀪𑀸𑀯𑁂𑀦 𑀘𑀸𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀯𑀺𑀪𑀸𑀯𑁂𑀳𑀺 𑀳𑁂𑀢𑀼𑀪𑀽𑀢𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀚𑀺𑀕𑀼𑀘𑁆𑀙𑀸 𑀓𑀫𑁂𑀦 𑀭𑀼𑀥𑀺𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀯𑀺𑀪𑀸𑀯𑀸𑀦𑀁 𑀧𑀝𑀺𑀧𑀸𑀝𑀺𑀬𑀸 𑀔𑁄𑀪𑀦𑁄 𑀅𑀦𑀯𑀝𑁆𑀞𑀸𑀦𑁄 𑀅𑀲𑀫𑀸𑀳𑀺𑀢𑁄 𑀉𑀩𑁆𑀩𑁂𑀕𑀻 𑀉𑀩𑁆𑀩𑁂𑀕𑀯𑀸 𑀓𑀭𑀼𑀡𑀸𑀬𑀼𑀢𑁄 𑀲𑁄𑀓𑀭𑀽𑀧𑁂𑀦 𑀲𑀳𑀺𑀢𑁄 𑀘𑀸𑀢𑀺 𑀏𑀯𑀁 𑀩𑀻𑀪𑀘𑁆𑀙𑁄 𑀭𑀲𑁄 𑀦𑀸𑀫 𑀳𑁄𑀢𑀺. 𑀦𑀸𑀲𑀸𑀯𑀺𑀓𑀼𑀦𑀦𑀸𑀤𑀻𑀳𑀺 𑀦𑀸𑀲𑀲𑀗𑁆𑀓𑁄𑀘𑀦𑀫𑀼𑀔𑀧𑀺𑀤𑀳𑀦𑀸𑀤𑀻𑀳𑀺 𑀅𑀦𑀼𑀪𑀸𑀯𑁂𑀳𑀺 𑀘 𑀲𑀗𑁆𑀓𑀸𑀤𑀻𑀳𑀺 𑀘 𑀲𑀗𑁆𑀓𑀸𑀆𑀯𑁂𑀕𑀸𑀤𑀻𑀳𑀺 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂𑀳𑀺 𑀘 𑀓𑀭𑀡𑀪𑀽𑀢𑁂𑀳𑀺 𑀅𑀲𑁆𑀲 𑀩𑀻𑀪𑀘𑁆𑀙𑀭𑀲𑀲𑁆𑀲 𑀧𑁄𑀲𑀦𑀁 𑀳𑁄𑀢𑀻𑀢𑀺. 𑀭𑀼𑀥𑀺𑀭𑀸𑀤𑀻𑀲𑀼 𑀢𑀻𑀲𑀼 𑀧𑀤𑁂𑀲𑀼, 𑀔𑁄𑀪𑀦𑀸𑀤𑀻𑀲𑀼 𑀢𑀻𑀲𑀼 𑀘 𑀕𑀫𑁆𑀬𑀫𑀸𑀦𑀢𑁆𑀢𑀸 𑀅𑀯𑀼𑀢𑁆𑀢𑁄𑀧𑀺 𑀘𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄, 𑀢𑀲𑁆𑀫𑀸 𑀔𑁄𑀪𑀦𑀸𑀤𑀻𑀳𑀺 𑀢𑀻𑀳𑀺 𑀬𑀼𑀢𑁆𑀢𑁄𑀯 𑀩𑀻𑀪𑀘𑁆𑀙𑀭𑀲𑁄 𑀦𑀸𑀫𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀭𑀼𑀥𑀺𑀭𑀁 𑀆𑀤𑀺 𑀬𑁂𑀲𑀁 𑀅𑀦𑁆𑀢𑀸𑀤𑀻𑀦𑀫𑀺𑀢𑀺 𑀘, 𑀧𑀽𑀢𑀺𑀆𑀤𑀺 𑀬𑁂𑀲𑀁 𑀓𑀺𑀫𑀺𑀆𑀤𑀻𑀦𑀫𑀺𑀢𑀺 𑀘, 𑀉𑀩𑁆𑀩𑁂𑀕𑁄 𑀅𑀲𑁆𑀲 𑀩𑀻𑀪𑀘𑁆𑀙𑀲𑁆𑀲 𑀅𑀢𑁆𑀣𑀻𑀢𑀺 𑀘, 𑀓𑀭𑀼𑀡𑁂𑀦 𑀆𑀬𑀼𑀢𑁄𑀢𑀺 𑀘, 𑀦𑀸𑀲𑀸𑀬 𑀯𑀺𑀓𑀼𑀦𑀦𑀁 𑀲𑀗𑁆𑀓𑁄𑀘𑀦𑀫𑀺𑀢𑀺 𑀘, 𑀢𑀁 𑀆𑀤𑀺 𑀬𑁂𑀲𑀁 𑀫𑀼𑀔𑀘𑁆𑀙𑀸𑀤𑀦𑀸𑀤𑀻𑀦𑀫𑀺𑀢𑀺 𑀘, 𑀲𑀗𑁆𑀓𑀸 𑀆𑀤𑀺 𑀬𑁂𑀲𑀁 𑀆𑀯𑁂𑀕𑀸𑀤𑀻𑀦𑀫𑀺𑀢𑀺 𑀘 𑀯𑀸𑀓𑁆𑀬𑀁.

𑀇𑀫𑀲𑁆𑀲 𑀩𑀻𑀪𑀘𑁆𑀙𑀲𑁆𑀲𑁄𑀤𑀸𑀳𑀭𑀡𑀫𑁂𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋

𑀬𑀓𑁆𑀔𑀸 𑀫𑀘𑁆𑀘𑀓𑀭𑀗𑁆𑀓𑀓𑀗𑁆𑀓𑀦𑀥𑀭𑀸 𑀬𑁂 𑀦𑀺𑀫𑁆𑀫𑀺𑀢𑀸 𑀧𑀼𑀡𑁆𑀡𑀓𑁂-

𑀦𑀼’𑀢𑁆𑀢𑀁𑀲𑀻𑀓𑀢𑀧𑀸𑀡𑀺𑀧𑀮𑁆𑀮𑀯𑀥𑀭𑀸 𑀳𑀸𑀭𑀻𑀓𑀢𑀦𑁆𑀢𑁄𑀭𑀕𑀸;

𑀮𑀺𑀢𑁆𑀢𑀸 𑀮𑁄𑀳𑀺𑀢𑀓𑀼𑀗𑁆𑀓𑀼𑀫𑁂𑀳𑀺 𑀯𑀺𑀥𑀼𑀭𑁂𑀦𑁂’𑀢𑁂 𑀧𑀺𑀯𑀦𑁆𑀢𑀸 𑀯𑀲𑀸-

𑀫𑀚𑁆𑀚𑀁 𑀲𑀻𑀲𑀓𑀧𑀸𑀮𑀧𑀸𑀢𑀺𑀳𑀺 𑀧𑀼𑀭𑁂 𑀥𑀼𑀢𑁆𑀢𑀸 𑀯𑀺𑀬𑁄’𑀧𑁂𑀓𑁆𑀔𑀺𑀢𑀸𑀢𑀺.

𑀧𑀼𑀡𑁆𑀡𑀓𑁂𑀦 𑀬𑀓𑁆𑀔𑁂𑀦 𑀦𑀺𑀫𑁆𑀫𑀺𑀢𑀸 𑀫𑀘𑁆𑀘𑀓𑀭𑀗𑁆𑀓𑀓𑀗𑁆𑀓𑀦𑀥𑀭𑀸 𑀫𑀦𑀼𑀲𑁆𑀲𑀝𑁆𑀞𑀺𑀲𑀗𑁆𑀔𑀸𑀢𑀓𑀭𑀪𑀽𑀲𑀦𑀥𑀸𑀭𑀺𑀦𑁄 𑀉𑀢𑁆𑀢𑀁𑀲𑀻𑀓𑀢𑀧𑀸𑀡𑀺𑀧𑀮𑁆𑀮𑀯𑀥𑀭𑀸 𑀫𑀢𑁆𑀣𑀓𑀫𑀸𑀮𑀺𑀓𑀢𑀳𑀢𑁆𑀣𑀢𑀮𑀲𑀗𑁆𑀔𑀢𑀧𑀮𑁆𑀮𑀯𑀥𑀸𑀭𑀺𑀦𑁄 𑀳𑀸𑀭𑀻𑀓𑀢𑀦𑁆𑀢𑁄𑀭𑀕𑀸 𑀫𑀼𑀢𑁆𑀢𑀸𑀳𑀸𑀭𑀻𑀓𑀢𑀫𑀦𑀼𑀲𑁆𑀲𑀦𑁆𑀢𑀲𑀗𑁆𑀔𑀸𑀢𑀉𑀭𑀕𑀲𑀫𑁆𑀧𑀬𑀼𑀢𑁆𑀢𑀸 𑀮𑁄𑀳𑀺𑀢𑀓𑀼𑀗𑁆𑀓𑀼𑀫𑁂𑀳𑀺 𑀭𑀼𑀥𑀺𑀭𑀲𑀗𑁆𑀔𑀸𑀢𑀓𑀼𑀗𑁆𑀓𑀼𑀫𑀓𑀓𑁆𑀓𑁂𑀳𑀺 𑀮𑀺𑀢𑁆𑀢𑀸 𑀲𑀻𑀲𑀓𑀧𑀸𑀮𑀧𑀸𑀢𑀺𑀳𑀺 𑀲𑀻𑀲𑀓𑀧𑀸𑀮𑀲𑀗𑁆𑀔𑀸𑀢𑁂𑀳𑀺 𑀲𑀭𑀸𑀯𑁂𑀳𑀺 𑀯𑀲𑀸𑀫𑀚𑁆𑀚𑀁 𑀯𑀲𑀸𑀲𑀗𑁆𑀔𑀸𑀢𑀲𑀼𑀭𑀁 𑀧𑀼𑀭𑁂 𑀅𑀪𑀺𑀫𑀼𑀔𑁂 𑀧𑀺𑀯𑀦𑁆𑀢𑀸 𑀬𑁂 𑀬𑀓𑁆𑀔𑀸 𑀲𑀺𑀬𑀼𑀁, 𑀏𑀢𑁂 𑀬𑀓𑁆𑀔𑀸 𑀯𑀺𑀥𑀼𑀭𑁂𑀦 𑀧𑀡𑁆𑀟𑀺𑀢𑁂𑀦 𑀥𑀼𑀢𑁆𑀢𑀸 𑀯𑀺𑀬 𑀦𑀕𑀭𑁂 𑀲𑀼𑀭𑀸𑀥𑀼𑀢𑁆𑀢𑀸 𑀯𑀺𑀬 𑀉𑀧𑁂𑀓𑁆𑀔𑀺𑀢𑀸 𑀳𑁄𑀦𑁆𑀢𑀻𑀢𑀺. 𑀇𑀳 ‘‘𑀮𑀺𑀢𑁆𑀢𑀸 𑀮𑁄𑀳𑀺𑀢𑀓𑀼𑀗𑁆𑀓𑀼𑀫𑁂𑀳𑀻’’𑀢𑀺 𑀘 ‘‘𑀉𑀢𑁆𑀢𑀁𑀲𑀻𑀓𑀢𑀧𑀸𑀡𑀺𑀧𑀮𑁆𑀮𑀯𑀥𑀭𑀸’’𑀢𑀺 𑀘 ‘‘𑀳𑀸𑀭𑀻𑀓𑀢𑀦𑁆𑀢𑁄𑀭𑀕𑀸’’𑀢𑀺 𑀘 𑀇𑀫𑁂𑀳𑀺 𑀘𑀺𑀢𑁆𑀢𑀓𑁆𑀔𑁄𑀪𑀓𑀸𑀭𑀡𑀪𑀽𑀢𑁄 𑀭𑀼𑀥𑀺𑀭𑀸𑀤𑀺𑀯𑀺𑀪𑀸𑀯𑁄 𑀘, ‘‘𑀫𑀘𑁆𑀘𑀓𑀭𑀗𑁆𑀓𑀓𑀗𑁆𑀓𑀦𑀭𑁄’’𑀢𑀺 𑀘 ‘‘𑀲𑀻𑀲𑀓𑀧𑀸𑀮𑀧𑀸𑀢𑀺𑀳𑀺 𑀯𑀲𑀸𑀫𑀚𑁆𑀚𑀁 𑀧𑀺𑀯𑀦𑁆𑀢𑀸’’𑀢𑀺 𑀘 𑀇𑀫𑁂𑀳𑀺 𑀉𑀩𑁆𑀩𑁂𑀕𑀯𑀦𑁆𑀢𑀲𑀪𑀸𑀯𑀲𑁆𑀲 𑀳𑁂𑀢𑀼𑀪𑀽𑀢𑁄 𑀧𑀽𑀢𑁆𑀬𑀸𑀤𑀺𑀯𑀺𑀪𑀸𑀯𑁄 𑀘 𑀧𑀓𑀸𑀲𑀺𑀢𑁄. 𑀓𑀭𑀼𑀡𑀸𑀬𑀼𑀢𑀲𑀪𑀸𑀯𑀲𑁆𑀲 𑀓𑀸𑀭𑀡𑀪𑀽𑀢𑀯𑀺𑀭𑀚𑁆𑀚𑀦𑀯𑀺𑀪𑀸𑀯𑁄 𑀘 𑀦𑀸𑀲𑀸𑀯𑀺𑀓𑀼𑀦𑀦𑀸𑀤𑀺𑀅𑀦𑀼𑀪𑀸𑀯𑁄 𑀘 𑀲𑀗𑁆𑀓𑀸𑀯𑁂𑀕𑀸𑀤𑀺𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁄 𑀘 𑀩𑀻𑀪𑀘𑁆𑀙𑀲𑀗𑁆𑀔𑀸𑀢𑀞𑀸𑀬𑀻𑀪𑀸𑀯𑁄 𑀘𑀸𑀢𑀺 𑀇𑀫𑁂 𑀲𑀩𑁆𑀩𑁂 𑀯𑀸𑀓𑁆𑀬𑀲𑀸𑀫𑀢𑁆𑀣𑀺𑀬𑁂𑀦 𑀕𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀫𑁆𑀳𑀬𑀞𑀸𑀬𑀻𑀪𑀸𑀯

𑁩𑁬𑁬. 𑀅𑀢𑀺𑀮𑁄𑀓𑀧𑀤𑀢𑁆𑀣𑁂𑀳𑀺,

𑀯𑀺𑀫𑁆𑀳𑀬𑁄’𑀬𑀁 𑀭𑀲𑁄’𑀩𑁆𑀪𑀼𑀢𑁄;

𑀢𑀲𑁆𑀲𑀸’𑀦𑀼𑀪𑀸𑀯𑀸 𑀲𑁂𑀤𑀲𑁆𑀲𑀼-

𑀲𑀸𑀥𑀼𑀯𑀸𑀤𑀸𑀤𑀬𑁄 𑀲𑀺𑀬𑀼𑀁;

𑀢𑀸𑀲𑀸𑀯𑁂𑀕𑀥𑀺𑀢𑀺𑀧𑁆𑀧𑀜𑁆𑀜𑀸,

𑀳𑁄𑀦𑁆𑀢𑁂’𑀢𑁆𑀣 𑀩𑁆𑀬𑀪𑀺𑀘𑀸𑀭𑀺𑀦𑁄.

𑁩𑁬𑁬. ‘‘𑀅𑀢𑀺’’𑀘𑁆𑀘𑀸𑀤𑀺. 𑀅𑀢𑀺𑀮𑁄𑀓𑁂𑀳𑀺 𑀮𑁄𑀓𑀸𑀢𑀺𑀯𑀼𑀢𑁆𑀢𑀻𑀳𑀺 𑀫𑀸𑀬𑀸𑀤𑀺𑀩𑁆𑀩𑀕𑁂𑀳𑀸𑀭𑀸𑀫𑀸𑀤𑀻𑀳𑀺 𑀧𑀤𑀢𑁆𑀣𑁂𑀳𑀺 𑀚𑀸𑀢𑁄 𑀅𑀬𑀁 𑀯𑀺𑀫𑁆𑀳𑀬𑁄 𑀘𑀺𑀢𑁆𑀢𑀯𑀺𑀓𑀸𑀭𑀲𑀗𑁆𑀔𑀸𑀢𑁄 𑀞𑀸𑀬𑀻𑀪𑀸𑀯𑁄 𑀅𑀩𑁆𑀪𑀼𑀢𑁄 𑀭𑀲𑁄 𑀦𑀸𑀫. 𑀲𑁂𑀤𑀅𑀲𑁆𑀲𑀼𑀲𑀸𑀥𑀼𑀯𑀸𑀤𑀭𑁄𑀫𑀜𑁆𑀘𑀸𑀤𑀬𑁄 𑀢𑀲𑁆𑀲 𑀅𑀦𑀼𑀪𑀸𑀯𑀸 𑀲𑀺𑀬𑀼𑀁, 𑀢𑀸𑀲𑀸𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄 𑀳𑁄𑀦𑁆𑀢𑀻𑀢𑀺.

𑁩𑁬𑁬. 𑀇𑀤𑀸𑀦𑀺 𑀯𑀺𑀫𑁆𑀳𑀬𑀭𑀲𑀲𑁆𑀲 𑀧𑁄𑀲𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀺 ‘‘𑀅𑀢𑀺’’𑀇𑀘𑁆𑀘𑀸𑀤𑀺𑀦𑀸. 𑀅𑀢𑀺𑀮𑁄𑀓𑀧𑀤𑀢𑁆𑀣𑁂𑀳𑀺 𑀮𑁄𑀓𑀝𑁆𑀞𑀺𑀢𑀺𑀫𑀢𑀺𑀓𑁆𑀓𑀫𑁆𑀫 𑀧𑀯𑀢𑁆𑀢𑁂𑀳𑀺 𑀫𑀸𑀬𑀸𑀤𑀺𑀩𑁆𑀩𑀪𑀯𑀦𑀆𑀭𑀸𑀫𑀯𑀺𑀫𑀸𑀦𑀸𑀤𑀺𑀧𑀤𑀢𑁆𑀣𑁂𑀳𑀺 𑀳𑁂𑀢𑀼𑀪𑀽𑀢𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀬𑀁 𑀯𑀺𑀫𑁆𑀳𑀬𑁄 𑀘𑀺𑀢𑁆𑀢𑀩𑁆𑀬𑀸𑀧𑀦𑀲𑀗𑁆𑀔𑀸𑀢𑁄 𑀞𑀸𑀬𑀻𑀪𑀸𑀯𑁄 𑀅𑀩𑁆𑀪𑀼𑀢𑁄 𑀭𑀲𑁄 𑀅𑀩𑁆𑀪𑀼𑀢𑀭𑀲𑁄 𑀦𑀸𑀫 𑀪𑀯𑁂, 𑀲𑁂𑀤𑀲𑁆𑀲𑀼𑀲𑀸𑀥𑀼𑀯𑀸𑀤𑀸𑀤𑀬𑁄 𑀢𑀲𑁆𑀲 𑀅𑀩𑁆𑀪𑀼𑀢𑀭𑀲𑀲𑁆𑀲 𑀅𑀦𑀼𑀪𑀸𑀯𑀸 𑀲𑀺𑀬𑀼𑀁, 𑀢𑀸𑀲𑀸𑀯𑁂𑀕𑀥𑀺𑀢𑀺𑀧𑁆𑀧𑀜𑁆𑀜𑀸 𑀏𑀢𑁆𑀣 𑀅𑀩𑁆𑀪𑀼𑀢𑀭𑀲𑀯𑀺𑀲𑀬𑁂 𑀩𑁆𑀬𑀪𑀺𑀘𑀸𑀭𑀺𑀦𑁄 𑀪𑀸𑀯𑀸 𑀳𑁄𑀦𑁆𑀢𑀻𑀢𑀺. 𑀅𑀢𑀺𑀓𑁆𑀓𑀦𑁆𑀢𑀸 𑀮𑁄𑀓𑀫𑀺𑀢𑀺 𑀘, 𑀢𑁂 𑀘 𑀢𑁂 𑀧𑀤𑀢𑁆𑀣𑀸 𑀘𑁂𑀢𑀺 𑀘, 𑀲𑀸𑀥𑀼𑀇𑀢𑀺 𑀯𑀸𑀤𑁄𑀢𑀺 𑀘, 𑀲𑁂𑀤𑁄 𑀘 𑀅𑀲𑁆𑀲𑀼 𑀘 𑀲𑀸𑀥𑀼𑀯𑀸𑀤𑁄 𑀘𑁂𑀢𑀺 𑀘, 𑀢𑁂 𑀆𑀤𑀺 𑀬𑁂𑀲𑀁 𑀭𑁄𑀫𑀜𑁆𑀘𑀸𑀤𑀻𑀦𑀫𑀺𑀢𑀺 𑀘, 𑀢𑀸𑀲𑁄 𑀘 𑀆𑀯𑁂𑀕𑁄 𑀘 𑀥𑀺𑀢𑀺 𑀘 𑀧𑀜𑁆𑀜𑀸 𑀘𑁂𑀢𑀺 𑀘 𑀯𑀸𑀓𑁆𑀬𑀁.

𑀇𑀫𑀲𑁆𑀲 𑀅𑀩𑁆𑀪𑀼𑀢𑀭𑀲𑀲𑁆𑀲𑁄𑀤𑀸𑀳𑀭𑀡𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 𑁋

𑀲 𑀧𑀼𑀡𑁆𑀡𑀓𑁂𑀦𑀸’𑀳𑀝𑀦𑁂𑀓𑀪𑀺𑀁𑀲𑀦𑁂-

𑀲𑁆𑀯’𑀳𑁄 𑀦𑀝𑁂𑀦𑁂𑀯 𑀲𑀼𑀦𑀺𑀘𑁆𑀘𑀮𑁄’𑀘𑀮𑀸;

𑀦𑀺𑀧𑀸𑀢𑀺𑀢𑁄 𑀢𑁂𑀦 𑀅𑀯𑀁𑀲𑀺𑀭𑁄𑀧𑀢𑀁,

𑀅𑀲𑀦𑁆𑀢𑀲𑀁 𑀢𑀁 𑀫𑀺𑀦𑀺 𑀤𑀺𑀝𑁆𑀞𑀺𑀬𑀝𑁆𑀞𑀺𑀬𑀸𑀢𑀺.

𑀲𑁄 𑀯𑀺𑀥𑀼𑀭𑀧𑀡𑁆𑀟𑀺𑀢𑁄 𑀧𑀼𑀡𑁆𑀡𑀓𑁂𑀦 𑀬𑀓𑁆𑀔𑁂𑀦 𑀦𑀝𑁂𑀦 𑀇𑀯 𑀅𑀦𑁂𑀓𑀯𑀺𑀓𑀸𑀭𑀤𑀲𑁆𑀲𑀦𑀓𑁂𑀦 𑀦𑀸𑀝𑀓𑁂𑀦 𑀯𑀺𑀬 𑀆𑀳𑀝𑀦𑁂𑀓𑀪𑀺𑀁𑀲𑀦𑁂𑀲𑀼 𑀪𑀬𑀢𑁆𑀢𑀫𑀸𑀦𑀻𑀢𑀸𑀦𑁂𑀓𑀯𑀺𑀥𑀪𑀺𑀁𑀲𑀦𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀲𑀼𑀦𑀺𑀘𑁆𑀘𑀮𑁄 𑀢𑁂𑀦 𑀧𑀼𑀡𑁆𑀡𑀓𑁂𑀦 𑀅𑀘𑀮𑀸 𑀲𑀝𑁆𑀞𑀺𑀬𑁄𑀚𑀦𑀼𑀩𑁆𑀩𑁂𑀥𑀓𑀸𑀴𑀸𑀕𑀺𑀭𑀺𑀧𑀩𑁆𑀩𑀢𑀫𑀢𑁆𑀣𑀓𑀢𑁄 𑀦𑀺𑀧𑀸𑀢𑀺𑀢𑁄 𑀅𑀯𑀁𑀲𑀺𑀭𑁄𑀧𑀢𑀁 𑀅𑀥𑁄𑀲𑀻𑀲𑀁 𑀧𑀢𑀦𑁆𑀢𑁄 𑀅𑀲𑀦𑁆𑀢𑀲𑀁 𑀏𑀯𑀁 𑀅𑀧𑁆𑀧𑀢𑀺𑀝𑁆𑀞𑁂𑀧𑀺 𑀅𑀦𑀼𑀢𑁆𑀢𑀲𑀦𑁆𑀢𑁄 𑀢𑀁 𑀧𑀩𑁆𑀩𑀢𑀁 𑀤𑀺𑀝𑁆𑀞𑀺𑀬𑀝𑁆𑀞𑀺𑀬𑀸 𑀫𑀺𑀦𑀺 𑀧𑀫𑀸𑀡𑀫𑀓𑀸𑀲𑀺, 𑀅𑀳𑁄 𑀅𑀘𑁆𑀙𑀭𑀺𑀬𑀦𑁆𑀢𑀺. 𑀏𑀢𑁆𑀣 𑀪𑀬𑀳𑁂𑀢𑀼𑀫𑁆𑀳𑀺 𑀲𑀢𑀺 𑀪𑀻𑀢𑀺𑀬𑀸 𑀘 𑀢𑀢𑁆𑀣 𑀧𑀭𑀺𑀚𑀸𑀦𑀦𑀸𑀪𑀸𑀯𑀲𑁆𑀲 𑀘 𑀮𑁄𑀓𑀲𑀪𑀸𑀯𑀢𑁆𑀢𑀸 𑀢𑀫𑀢𑀺𑀓𑁆𑀓𑀫𑁆𑀫 𑀪𑀬𑀓𑀭𑀡𑁂 𑀅𑀲𑀦𑁆𑀢𑀸𑀲𑀲𑁆𑀲 𑀘 𑀤𑀺𑀝𑁆𑀞𑀺𑀬𑀸 𑀧𑀩𑁆𑀩𑀢𑀫𑀺𑀦𑀦𑀲𑁆𑀲 𑀘 𑀧𑀯𑀢𑁆𑀢𑀪𑀸𑀯𑀓𑀣𑀦𑁂𑀦 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀧𑀤𑀢𑁆𑀣𑀲𑀗𑁆𑀔𑀸𑀢𑁄 𑀯𑀺𑀪𑀸𑀯𑁄 ‘‘𑀅𑀲𑀦𑁆𑀢𑀲𑀁 𑀢𑀁 𑀫𑀺𑀦𑀺 𑀤𑀺𑀝𑁆𑀞𑀺𑀬𑀝𑁆𑀞𑀺𑀬𑀸’’𑀢𑀺 𑀇𑀫𑀺𑀦𑀸 𑀧𑀓𑀸𑀲𑀺𑀢𑁄. ‘‘𑀅𑀳𑁄’’𑀢𑀺 𑀯𑀘𑀦𑁂𑀦, 𑀢𑀲𑁆𑀲 𑀲𑀸𑀫𑀢𑁆𑀣𑀺𑀬𑁂𑀦 𑀘 𑀲𑀸𑀥𑀼𑀯𑀸𑀤𑀲𑁂𑀤𑀅𑀲𑁆𑀲𑀼𑀆𑀤𑀬𑁄 𑀅𑀦𑀼𑀪𑀸𑀯𑀸 𑀯𑀺𑀪𑀸𑀯𑀺𑀢𑀸. 𑀢𑀸𑀲𑀆𑀯𑁂𑀕𑀥𑀺𑀢𑀺𑀘𑁆𑀘𑀸𑀤𑀺𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸, 𑀯𑀺𑀫𑁆𑀳𑀬𑀲𑀗𑁆𑀔𑀸𑀢𑀞𑀸𑀬𑀻𑀪𑀸𑀯𑁄 𑀘 𑀲𑀫𑀼𑀤𑀺𑀢𑀯𑀸𑀓𑁆𑀬𑀲𑀸𑀫𑀢𑁆𑀣𑀺𑀬𑁂𑀦 𑀚𑁄𑀢𑀺𑀢𑁄.

𑀲𑀫𑀞𑀸𑀬𑀻𑀪𑀸𑀯

𑁩𑁬𑁭. 𑀞𑀸𑀬𑀻𑀪𑀸𑀯𑁄 𑀲𑀫𑁄 𑀫𑁂𑀢𑁆𑀢𑀸-

𑀤𑀬𑀸𑀫𑁄𑀤𑀸𑀤𑀺𑀲𑀫𑁆𑀪𑀯𑁄;

𑀪𑀸𑀯𑀸𑀤𑀻𑀳𑀺 𑀢𑀤𑀼’𑀓𑁆𑀓𑀁𑀲𑁄,

𑀲𑀦𑁆𑀢𑁄 𑀲𑀦𑁆𑀢𑀦𑀺𑀲𑁂𑀯𑀺𑀢𑁄.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀧𑀸𑀤𑀯𑀺𑀭𑀘𑀺𑀢𑁂

𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂

𑀭𑀲𑀪𑀸𑀯𑀸𑀯𑀩𑁄𑀥𑁄 𑀦𑀸𑀫 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁄 𑀲𑀫𑀢𑁆𑀢𑁄.

𑁩𑁬𑁭. ‘‘𑀞𑀸𑀬𑀺’’𑀘𑁆𑀘𑀸𑀤𑀺. 𑀫𑁂𑀢𑁆𑀢𑀸𑀤𑀺𑀲𑀫𑁆𑀪𑀯𑁄 𑀲𑀫𑁄 𑀉𑀧𑀲𑀫𑀲𑀗𑁆𑀔𑀸𑀢𑁄 𑀞𑀸𑀬𑀻𑀪𑀸𑀯𑁄 𑀪𑀯𑀢𑀺, 𑀢𑀤𑀦𑀼𑀭𑀽𑀧𑁂𑀳𑀺 𑀪𑀸𑀯𑀸𑀦𑀼𑀪𑀸𑀯𑁂𑀳𑀺 𑀢𑀲𑁆𑀲 𑀉𑀓𑁆𑀓𑀁𑀲𑁄 𑀬𑀲𑁆𑀲, 𑀲𑁄 𑀲𑀦𑁆𑀢𑁄 𑀦𑀸𑀫 𑀭𑀲𑁄 𑀪𑀯𑀢𑀺, 𑀲𑁄 𑀘 𑀲𑀦𑁆𑀢𑀦𑀺𑀲𑁂𑀯𑀺𑀢𑁄𑀢𑀺.

𑀇𑀢𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 𑀫𑀳𑀸𑀲𑀸𑀫𑀺𑀦𑀸𑀫𑀺𑀓𑀸𑀬𑀁 𑀝𑀻𑀓𑀸𑀬𑀁

𑀭𑀲𑀪𑀸𑀯𑀸𑀯𑀩𑁄𑀥𑁄 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁩𑁬𑁭. 𑀇𑀤𑀸𑀦𑀺 𑀲𑀦𑁆𑀢𑀭𑀲𑀲𑁆𑀲 𑀧𑁄𑀲𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀺 ‘‘𑀞𑀸𑀬𑀺’’𑀘𑁆𑀘𑀸𑀤𑀺𑀦𑀸. 𑀫𑁂𑀢𑁆𑀢𑀸𑀤𑀬𑀸𑀫𑁄𑀤𑀸𑀤𑀺𑀲𑀫𑁆𑀪𑀯𑁄 𑀫𑁂𑀢𑁆𑀢𑀸𑀓𑀭𑀼𑀡𑀸𑀧𑀻𑀢𑀺𑀆𑀤𑀺𑀯𑀺𑀪𑀸𑀯𑁂𑀳𑀺 𑀲𑀫𑁆𑀪𑀽𑀢𑁄 𑀲𑀫𑁄 𑀓𑀸𑀬𑀘𑀺𑀢𑁆𑀢𑁄𑀧𑀲𑀫𑁄 𑀞𑀸𑀬𑀻𑀪𑀸𑀯𑁄 𑀦𑀸𑀫 𑀳𑁄𑀢𑀺, 𑀪𑀸𑀯𑀸𑀤𑀻𑀳𑀺 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸𑀤𑀻𑀳𑀺 𑀓𑀭𑀡𑀪𑀽𑀢𑁂𑀳𑀺, 𑀅𑀧𑀺𑀘 𑀢𑀲𑁆𑀲 𑀲𑀫𑀲𑁆𑀲 𑀅𑀦𑀼𑀭𑀽𑀧𑁂𑀳𑀺 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸𑀦𑀼𑀪𑀸𑀯𑁂𑀳𑀺 𑀢𑀤𑀼𑀓𑁆𑀓𑀁𑀲𑁄 𑀢𑀲𑁆𑀲 𑀞𑀸𑀬𑀻𑀪𑀸𑀯𑀲𑁆𑀲 𑀉𑀓𑁆𑀓𑀁𑀲𑀬𑀼𑀢𑁆𑀢𑁄 𑀲𑀦𑁆𑀢𑀦𑀺𑀲𑁂𑀯𑀺𑀢𑁄 𑀲𑀸𑀥𑀽𑀳𑀺 𑀲𑁂𑀯𑀺𑀢𑁄 𑀲𑀦𑁆𑀢𑁄 𑀲𑀦𑁆𑀢𑀭𑀲𑁄 𑀦𑀸𑀫 𑀳𑁄𑀢𑀻𑀢𑀺. 𑀫𑁂𑀢𑁆𑀢𑀸 𑀘 𑀤𑀬𑀸 𑀘 𑀫𑁄𑀤𑁄 𑀘𑁂𑀢𑀺 𑀘, 𑀢𑁂 𑀆𑀤𑀬𑁄 𑀬𑁂𑀲𑀫𑀺𑀢𑀺 𑀘, 𑀢𑁂𑀳𑀺 𑀲𑀫𑁆𑀪𑀯𑁄 𑀬𑀲𑁆𑀲𑁂𑀢𑀺 𑀘, 𑀢𑀲𑁆𑀲 𑀉𑀓𑁆𑀓𑀁𑀲𑁄 𑀅𑀲𑁆𑀲 𑀲𑀦𑁆𑀢𑀲𑁆𑀲𑁂𑀢𑀺 𑀘, 𑀲𑀢𑀁 𑀦𑀺𑀲𑁂𑀯𑀺𑀢𑁄𑀢𑀺 𑀘 𑀯𑀸𑀓𑁆𑀬𑀁.

𑀅𑀲𑁆𑀲 𑀲𑀦𑁆𑀢𑀭𑀲𑀲𑁆𑀲𑁄𑀤𑀸𑀳𑀭𑀡𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 𑁋

𑀏𑀦𑁆𑀢𑁂𑀲𑀼 𑀓𑁂𑀲𑀭𑀺𑀓𑀭𑀻𑀲𑁆𑀯’𑀧𑀺 𑀯𑁂𑀞𑀬𑀦𑁆𑀢𑁂,

𑀦𑀸𑀕𑁂 𑀦𑀕𑀁 𑀫𑀤𑀕𑀚𑁂 𑀯𑀺𑀬 𑀯𑁂𑀴𑀼𑀕𑀼𑀫𑁆𑀩𑀁;

𑀬𑀓𑁆𑀔𑁂 𑀯𑀺𑀘𑀸𑀮𑀬𑀢𑀺 𑀦𑁄𑀘𑀮𑀺 𑀈𑀲𑀓𑀫𑁆𑀧𑀺,

𑀲𑀦𑁆𑀢𑀺𑀁 𑀕𑀢𑁄𑀯 𑀯𑀺𑀥𑀼𑀭𑁄 𑀫𑀥𑀼𑀭𑀸𑀧𑀺 𑀪𑀸𑀯𑁄𑀢𑀺.

𑀓𑁂𑀲𑀭𑀺𑀓𑀭𑀻𑀲𑀼 𑀲𑀻𑀳𑀳𑀢𑁆𑀣𑀻𑀲𑀼 𑀏𑀦𑁆𑀢𑁂𑀲𑀼 𑀅𑀧𑀺 𑀪𑀺𑀁𑀲𑀦𑀸𑀓𑀸𑀭𑁂𑀦 𑀲𑀫𑀻𑀧𑀫𑀸𑀕𑀘𑁆𑀙𑀦𑁆𑀢𑁂𑀲𑀼𑀧𑀺 𑀦𑀸𑀕𑁂 𑀯𑁂𑀞𑀬𑀦𑁆𑀢𑁂𑀧𑀺 𑀦𑀸𑀕𑁂𑀲𑀼 𑀲𑀭𑀻𑀭𑀁 𑀯𑁂𑀞𑀬𑀦𑁆𑀢𑁂𑀲𑀼𑀧𑀺. 𑀚𑀸𑀢𑁆𑀬𑀸𑀧𑁂𑀓𑁆𑀔𑀸𑀬𑁂𑀓𑀯𑀘𑀦𑀁, 𑀯𑁂𑀴𑀼𑀕𑀼𑀫𑁆𑀩𑀁 𑀫𑀤𑀕𑀚𑁂 𑀯𑀺𑀬 𑀯𑀺𑀘𑀸𑀮𑀬𑀢𑀺 𑀫𑀤𑀕𑀴𑀺𑀢𑀳𑀢𑁆𑀣𑀺𑀫𑁆𑀳𑀺 𑀘𑀸𑀮𑁂𑀦𑁆𑀢𑁂 𑀇𑀯 𑀬𑀓𑁆𑀔𑁂 𑀧𑀼𑀡𑁆𑀡𑀓𑁂 𑀦𑀕𑀁 𑀓𑀸𑀴𑀸𑀕𑀺𑀭𑀺𑀧𑀩𑁆𑀩𑀢𑀁 𑀯𑀺𑀘𑀸𑀮𑀬𑀢𑀺𑀧𑀺 𑀅𑀦𑁂𑀓𑀧𑁆𑀧𑀓𑀸𑀭𑁂 𑀘𑀸𑀮𑁂𑀦𑁆𑀢𑁂𑀧𑀺 𑀯𑀺𑀥𑀼𑀭𑁄 𑀧𑀡𑁆𑀟𑀺𑀢𑁄 𑀲𑀦𑁆𑀢𑀺𑀁 𑀕𑀢𑁄𑀯 𑀦𑀺𑀩𑁆𑀩𑀸𑀦𑀁 𑀆𑀮𑀫𑁆𑀩𑀡𑀓𑀭𑀡𑀯𑀲𑁂𑀦 𑀲𑀫𑁆𑀧𑀢𑁆𑀢𑁄 𑀯𑀺𑀬 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀦𑁆𑀦𑁄 𑀇𑀯 𑀅𑀣 𑀯𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀲𑀗𑁆𑀔𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀦𑁆𑀦𑁄 𑀯𑀺𑀬 𑀈𑀲𑀓𑀫𑁆𑀧𑀺 𑀅𑀧𑁆𑀧𑀓𑀫𑁆𑀧𑀺 𑀫𑀥𑀼𑀭𑀸 𑀪𑀸𑀯𑀸 𑀅𑀧𑀺 𑀫𑀥𑀼𑀭𑀲𑀪𑀸𑀯𑀢𑁄𑀧𑀺 𑀦𑁄 𑀘𑀮𑀺, 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀧𑀕𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀥𑀸𑀯𑀦𑀭𑁄𑀤𑀦𑀓𑀫𑁆𑀧𑀦𑀸𑀤𑀻𑀦𑀁 𑀓𑀭𑀡𑀪𑀽𑀢𑀁 𑀲𑀻𑀳𑀸𑀤𑀻𑀦𑀫𑀸𑀕𑀫𑀦𑀁 𑀦𑀸𑀕𑀯𑁂𑀞𑀦𑀁 𑀧𑀩𑁆𑀩𑀢𑀓𑀫𑁆𑀧𑀦𑀦𑁆𑀢𑀺𑀆𑀤𑀻𑀲𑀼 𑀯𑀢𑁆𑀢𑀫𑀸𑀦𑁂𑀲𑀼𑀧𑀺 𑀦𑀺𑀩𑁆𑀩𑀺𑀓𑀸𑀭𑀢𑁆𑀢𑁂𑀦 𑀲𑀦𑁆𑀢𑀺𑀁 𑀕𑀢𑁄𑀢𑀺 𑀇𑀫𑀺𑀦𑀸 𑀲𑀦𑁆𑀢𑀭𑀲𑀲𑁆𑀲 𑀧𑀓𑀢𑀺𑀪𑀽𑀢𑁂 𑀉𑀤𑁆𑀤𑁂𑀲𑁂 𑀤𑀲𑁆𑀲𑀺𑀢𑁄 𑀦𑀯𑀫𑁄 𑀞𑀸𑀬𑀻𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀏𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀉𑀤𑁆𑀤𑀻𑀧𑀦𑀸𑀦𑀁 𑀓𑀸𑀭𑀡𑀪𑀽𑀢𑀸 𑀫𑁂𑀢𑁆𑀢𑀸𑀤𑀬𑀸𑀫𑁄𑀤𑀸𑀤𑀺𑀯𑀺𑀪𑀸𑀯𑀸 𑀲𑀸𑀫𑀢𑁆𑀣𑀺𑀬𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺. 𑀥𑀺𑀢𑀺𑀫𑀢𑀺𑀲𑀢𑀺𑀆𑀤𑀬𑁄 𑀢𑀤𑀦𑀼𑀭𑀽𑀧𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸 𑀘 𑀢𑀸𑀤𑀺𑀲𑀸𑀦𑀼𑀪𑀸𑀯𑀸 𑀘 ‘‘𑀏𑀦𑁆𑀢𑁂𑀲𑀼 𑀯𑁂𑀞𑀬𑀦𑁆𑀢𑁂 𑀯𑀺𑀘𑀸𑀮𑀬𑀢𑀻’’𑀢𑀺 𑀇𑀫𑀺𑀦𑀸, 𑀲𑀓𑀮𑀯𑀸𑀓𑁆𑀬𑀲𑀸𑀫𑀢𑁆𑀣𑀺𑀬𑁂𑀦 𑀘 𑀧𑀓𑀸𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀇𑀢𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀦𑀺𑀲𑁆𑀲𑀬𑁂

𑀭𑀲𑀪𑀸𑀯𑀸𑀯𑀩𑁄𑀥𑁄 𑀦𑀸𑀫 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.