𑁫. 𑀪𑀸𑀯𑀸𑀯𑀩𑁄𑀥𑀧𑀭𑀺𑀘𑁆𑀙𑁂𑀤

𑁩𑁩𑁮. 𑀧𑀝𑀺𑀪𑀸𑀦𑀯𑀢𑀸 𑀮𑁄𑀓-𑀯𑁄𑀳𑀸𑀭’𑀫𑀦𑀼𑀲𑀸𑀭𑀺𑀦𑀸;

𑀢𑀢𑁄’𑀘𑀺𑀢𑁆𑀬𑀲𑀫𑀼𑀮𑁆𑀮𑀸𑀲-𑀯𑁂𑀤𑀺𑀦𑀸 𑀓𑀯𑀺𑀦𑀸 𑀧𑀭𑀁.

𑁩𑁩𑁮. 𑀢𑀤𑁂𑀯 𑀬𑀣𑀸𑀧𑀝𑀺𑀜𑁆𑀜𑀸𑀢𑀫𑀮𑀗𑁆𑀓𑀸𑀭𑀯𑀺𑀪𑀸𑀕𑀁 𑀩𑁄𑀥𑁂𑀢𑁆𑀯𑀸 𑀲𑀫𑁆𑀧𑀢𑀺 𑀭𑀲𑀯𑀦𑁆𑀢𑀸𑀮𑀗𑁆𑀓𑀸𑀭𑀧𑁆𑀧𑀲𑀗𑁆𑀕𑁂𑀦𑀸𑀥𑀺𑀕𑀢𑀁 𑀭𑀲𑀁 𑀲𑀓𑀮 𑀲𑀁𑀲𑀸𑀭𑀤𑀼𑀓𑁆𑀔𑀦𑀺𑀲𑁆𑀲 𑀭𑀡𑁂𑀓𑀦𑀺𑀫𑀺𑀢𑁆𑀢𑀯𑀺𑀫𑀼𑀢𑁆𑀢𑀺𑀭𑀲𑁂𑀓𑀭𑀲𑀯𑀺𑀲𑀼𑀤𑁆𑀥𑀲𑀤𑁆𑀥𑀫𑁆𑀫𑀸𑀕𑀫𑀯𑀺𑀕𑁆𑀕𑀸𑀳𑀲𑀧𑁆𑀧𑀻𑀡𑀦𑁄𑀡𑀢𑀫𑀢𑀻𑀦𑀁 𑀧𑀭𑀫𑀲𑀤𑁆𑀥𑀸𑀮𑀽𑀦𑀫𑀦𑀥𑀺𑀕𑀢𑀢𑁆𑀢𑁂𑀧𑀺 𑀮𑀓𑁆𑀔𑀡𑀫𑀢𑁆𑀢𑁂𑀦 𑀮𑁄𑀓𑀯𑁄𑀳𑀸𑀭𑀓𑁄𑀲𑀮𑁆𑀮𑀫𑀢𑁆𑀢𑀧𑀭𑀺𑀕𑁆𑀕𑀳𑀸𑀬 𑀓𑀺𑀜𑁆𑀘𑀺𑀫𑀢𑁆𑀢𑀫𑀼𑀧𑀤𑀺𑀲𑀺𑀢𑀼𑀁 𑀦 𑀲𑀸𑀓𑀮𑁆𑀮𑁂𑀦 ‘‘𑀧𑀝𑀺𑀪𑀸𑀦𑀯𑀢𑀸’’𑀢𑀺𑀆𑀤𑀺𑀫𑀸𑀳. 𑀧𑀝𑀺𑀪𑀸𑀦𑀁 𑀢𑀁𑀢𑀁𑀞𑀸𑀦𑀸𑀦𑀼𑀭𑀽𑀧𑀧𑁆𑀧𑀯𑀢𑁆𑀢𑀸 𑀧𑀜𑁆𑀜𑀸. 𑀲𑀸 𑀳𑀺 𑀲𑀭𑀲𑀭𑀘𑀦𑀸𑀬𑀘𑁆𑀘𑀦𑁆𑀢𑁄𑀧𑀓𑀸𑀭𑀺𑀓𑀸, 𑀢𑀢𑁄𑀯 𑀓𑀩𑁆𑀩𑀁 ‘‘𑀧𑀝𑀺𑀪𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀧𑀝𑀺𑀪𑀸𑀦𑀯𑀢𑀸’’𑀢𑀺. 𑀓𑀯𑀺𑀦𑀸 𑀮𑁄𑀓𑀯𑁄𑀳𑀸𑀭𑀸𑀦𑀼𑀕𑀦𑁆𑀢𑀩𑁆𑀩𑁄. 𑀬𑁄 𑀳𑀺 𑀲𑀓𑀮𑀁 𑀮𑁄𑀓𑀯𑁄𑀳𑀸𑀭𑀁 𑀦𑀸𑀦𑀼𑀲𑀭𑀢𑀺, 𑀲𑁄 𑀓𑀯𑀺𑀬𑁂𑀯 𑀦 𑀳𑁄𑀢𑀺. 𑀢𑁂𑀦𑀸𑀳 ‘‘𑀮𑁄𑀓𑀯𑁄𑀳𑀸𑀭𑀫𑀦𑀼𑀲𑀸𑀭𑀺𑀦𑀸’’𑀢𑀺. 𑀬𑀢𑁄 𑀑𑀘𑀺𑀢𑁆𑀬𑀁 𑀦𑀸𑀫 𑀓𑀯𑀻𑀦𑀁 𑀧𑀭𑀫𑀁 𑀭𑀳𑀲𑁆𑀲𑀁 𑀮𑁄𑀓𑀯𑁄𑀳𑀸𑀭𑁂𑀧𑀺 𑀉𑀘𑀺𑀢𑀜𑁆𑀜𑀽𑀬𑁂𑀯 𑀧𑀲𑀁𑀲𑀻𑀬𑀢𑁂, 𑀲𑀫𑀼𑀘𑀺𑀢𑀮𑁄𑀓𑀯𑁄𑀳𑀸𑀭𑀸𑀦𑀼𑀲𑀸𑀭𑁂𑀦𑁂𑀯 𑀘 𑀯𑀓𑁆𑀔𑀫𑀸𑀦𑀸𑀦𑀼𑀓𑁆𑀓𑀫𑁂𑀦 𑀯𑀺𑀭𑀘𑀺𑀢𑀸 𑀭𑀘𑀦𑀸 𑀲𑀘𑁂𑀢𑀦𑀸𑀦𑀁 𑀭𑀲𑀲𑁆𑀲𑀸𑀤𑀸𑀬 𑀲𑀫𑁆𑀧𑀚𑁆𑀚𑀢𑁂, 𑀢𑀲𑁆𑀫𑀸 𑀑𑀘𑀺𑀢𑁆𑀬𑁂 𑀲𑀫𑀼𑀮𑁆𑀮𑀲𑀢𑁆𑀢𑀁 𑀤𑀺𑀢𑁆𑀢𑀁 𑀨𑀼𑀝𑀫𑁂𑀯 𑀩𑀦𑁆𑀥𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁄𑀯𑀘𑁆𑀘𑀦𑁆𑀢𑀫𑁄𑀘𑀺𑀢𑁆𑀬𑀲𑀫𑀼𑀮𑁆𑀮𑀸𑀲𑀯𑁂𑀤𑀺𑀦𑀸 𑀓𑀯𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀧𑀭𑀁 𑀑𑀘𑀺𑀢𑁆𑀬𑀲𑀫𑀼𑀮𑁆𑀮𑀸𑀲𑀯𑁂𑀤𑀺𑀦𑀸’’𑀢𑀺. 𑀲𑀩𑁆𑀩𑀜𑁆𑀘𑁂𑀢𑀁 ‘‘𑀓𑀯𑀺𑀦𑀸’’𑀢𑀺 𑀏𑀢𑁆𑀣 𑀯𑀺𑀲𑁂𑀲𑀦𑀁, ‘‘𑀓𑀯𑀺𑀦𑀸’’𑀢𑀺 𑀘𑁂𑀢𑀁 ‘‘𑀦𑀺𑀩𑀦𑁆𑀥𑀸’’𑀢𑀺 𑀏𑀢𑁆𑀣 𑀅𑀯𑀼𑀢𑁆𑀢𑁄 𑀓𑀢𑁆𑀢𑀸.

𑁩𑁩𑁮. 𑀏𑀯𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀸𑀦𑀫𑀮𑀗𑁆𑀓𑀸𑀭𑀸𑀦𑀁 𑀤𑀲𑁆𑀲𑀦𑀸𑀯𑀲𑀭𑁂 𑀭𑀲𑀯𑀦𑁆𑀢𑀸𑀮𑀗𑁆𑀓𑀸𑀭𑀧𑁆𑀧𑀲𑀗𑁆𑀕𑁂𑀦𑀸𑀥𑀺𑀕𑀢𑀦𑀯𑀯𑀺𑀥𑀲𑀺𑀗𑁆𑀕𑀸𑀭𑀸𑀤𑀺𑀭𑀲𑁂 𑀲𑀓𑀮𑀲𑀁𑀲𑀸𑀭𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀅𑀲𑀳𑀸𑀬𑀓𑀭𑀡𑀪𑀽𑀢𑀯𑀺𑀫𑀼𑀢𑁆𑀢𑀺𑀭𑀲𑁂𑀦 𑀏𑀓𑀭𑀲𑀪𑀽𑀢𑁂 𑀅𑀢𑀺𑀧𑀡𑀻𑀢𑁂 𑀲𑀤𑁆𑀥𑀫𑁆𑀫𑀸𑀫𑀢𑀭𑀲𑁂𑀬𑁂𑀯 𑀮𑀼𑀤𑁆𑀥𑀸𑀦𑀁 𑀲𑀤𑁆𑀥𑀸𑀩𑀸𑀳𑀼𑀮𑁆𑀮𑀲𑀼𑀤𑁆𑀥𑀲𑀁𑀬𑀫𑀸𑀦𑀁 𑀯𑀺𑀫𑀼𑀔𑁂𑀧𑀺 𑀮𑀓𑁆𑀔𑀡𑀫𑀢𑁆𑀢𑀧𑀭𑀺𑀜𑁆𑀜𑀸𑀡𑁂𑀦 𑀮𑁄𑀓𑀯𑁄𑀳𑀸𑀭𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀢𑀼𑀓𑀸𑀫𑁄 𑀇𑀤𑀸𑀦𑀺 ‘‘𑀧𑀝𑀺𑀪𑀸𑀦𑀯𑀢𑀸’’𑀇𑀘𑁆𑀘𑀸𑀤𑀺𑀫𑀸𑀳. 𑀧𑀝𑀺𑀪𑀸𑀦𑀯𑀢𑀸 𑀲𑀭𑀲𑀭𑀘𑀦𑀸𑀬 𑀅𑀘𑁆𑀘𑀦𑁆𑀢𑁄𑀧𑀓𑀸𑀭𑀝𑁆𑀞𑀸𑀦𑁄𑀘𑀺𑀢𑀧𑀜𑁆𑀜𑀸𑀯𑀺𑀲𑁂𑀲𑀯𑀢𑀸 𑀮𑁄𑀓𑀯𑁄𑀳𑀸𑀭𑀫𑀦𑀼𑀲𑀸𑀭𑀺𑀦𑀸 𑀲𑀓𑀮𑀮𑁄𑀓𑁂 𑀯𑁄𑀳𑀸𑀭𑀸𑀦𑀼𑀭𑀽𑀧𑀫𑀦𑀼𑀕𑀢𑁂𑀦 𑀢𑀢𑁄 𑀬𑀲𑁆𑀫𑀸 𑀑𑀘𑀺𑀢𑁆𑀬𑀁 𑀦𑀸𑀫 𑀳𑀤𑀬𑀢𑁄 𑀅𑀩𑀳𑀺 𑀓𑀸𑀢𑀩𑁆𑀩𑀁, 𑀭𑀳𑀲𑁆𑀲𑀫𑀺𑀯 𑀩𑀦𑁆𑀥𑀢𑁄 𑀯𑀺𑀬𑁄𑀚𑀦𑀻𑀬𑀁 𑀦 𑀳𑁄𑀢𑀺. 𑀢𑀲𑁆𑀫𑀸 𑀧𑀭𑀫𑀢𑀺𑀲𑀬𑁂𑀦 𑀑𑀘𑀺𑀢𑁆𑀬𑀲𑀫𑀼𑀮𑁆𑀮𑀸𑀲𑀯𑁂𑀤𑀺𑀦𑀸 𑀉𑀘𑀺𑀢𑀪𑀸𑀯𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀣𑀲𑁆𑀲 𑀉𑀤𑁆𑀤𑀻𑀧𑀦𑀲𑁆𑀲𑁂𑀯 𑀅𑀦𑀼𑀭𑀽𑀧𑀧𑁆𑀧𑀓𑀸𑀭𑁂𑀦 𑀇𑀝𑁆𑀞𑀢𑁆𑀣𑀲𑁆𑀲 𑀲𑀫𑀼𑀮𑁆𑀮𑀸𑀲𑀦𑀁 𑀤𑀺𑀢𑁆𑀢𑀺𑀁 𑀚𑀸𑀦𑀦𑁆𑀢𑁂𑀦 𑀓𑀯𑀺𑀦𑀸 𑀩𑀦𑁆𑀥𑀓𑀸𑀭𑀓𑁂𑀦 𑀦𑀺𑀩𑀦𑁆𑀥𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀝𑀺𑀪𑀸 𑀧𑀝𑀺𑀪𑀸𑀦𑀦𑁆𑀢𑀺 𑀧𑀜𑁆𑀜𑀸𑀬𑁂𑀢𑀁 𑀦𑀸𑀫𑀁, 𑀢𑀢𑁄 𑀚𑀸𑀢𑀓𑀩𑁆𑀩𑀲𑁆𑀲𑀧𑀺 𑀧𑀝𑀺𑀪𑀸𑀢𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀅𑀬𑀁 𑀧𑀜𑁆𑀜𑀸𑀯𑀺𑀲𑁂𑀲𑁄 𑀭𑀘𑀦𑀸𑀬 𑀅𑀘𑁆𑀘𑀦𑁆𑀢𑁄𑀧𑀓𑀸𑀭𑁄𑀢𑀺 𑀜𑀸𑀢𑀩𑁆𑀩𑁄. 𑀧𑀝𑀺𑀪𑀸𑀦𑀫𑀲𑁆𑀲𑀢𑁆𑀣𑀻𑀢𑀺 𑀘, 𑀮𑁄𑀓𑀲𑁆𑀲 𑀯𑁄𑀳𑀸𑀭𑁄𑀢𑀺 𑀘, 𑀢𑀁 𑀅𑀦𑀼𑀕𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀘, 𑀑𑀘𑀺𑀢𑁆𑀬𑁂𑀦 𑀲𑀫𑀼𑀮𑁆𑀮𑀸𑀲𑁄𑀢𑀺 𑀘, 𑀢𑀁 𑀯𑀺𑀚𑀸𑀦𑀸𑀢𑀺 𑀲𑀻𑀮𑁂𑀦𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑁩𑁩𑁯. 𑀞𑀸𑀬𑀻𑀲𑀫𑁆𑀩𑀦𑁆𑀥𑀺𑀦𑁄 𑀪𑀸𑀯-𑀯𑀺𑀪𑀸𑀯𑀸 𑀲𑀸𑀦𑀼𑀪𑀸𑀯𑀓𑀸;

𑀲𑀫𑁆𑀧𑀚𑁆𑀚𑀦𑁆𑀢𑀺 𑀦𑀺𑀩𑀦𑁆𑀥𑀸 𑀢𑁂, 𑀭𑀲𑀲𑁆𑀲𑀸𑀤𑀸𑀬 𑀲𑀸𑀥𑀼𑀦𑀁.

𑁩𑁩𑁯. ‘‘𑀞𑀸𑀬𑀺’’𑀘𑁆𑀘𑀸𑀤𑀺. 𑀞𑀸𑀬𑀺𑀦𑁄 𑀯𑀓𑁆𑀔𑀫𑀸𑀦𑀭𑀢𑁆𑀬𑀸𑀤𑀬𑁄 𑀢𑁂𑀳𑀺 𑀲𑀳 𑀲𑀫𑁆𑀩𑀦𑁆𑀥𑁄 𑀯𑀺𑀪𑀸𑀯𑀸𑀤𑀻𑀳𑀺 𑀬𑁄𑀕𑁂 𑀭𑀢𑁆𑀬𑀸𑀤𑀻𑀦𑀫𑀲𑁆𑀲𑀸𑀤𑀺𑀬𑀢𑁆𑀢𑀫𑀸𑀦𑀻𑀬𑀫𑀸𑀦𑀢𑁆𑀢𑀸 𑀏𑀢𑁂𑀲𑀫𑀢𑁆𑀣𑀻𑀢𑀺 𑀞𑀸𑀬𑀻𑀲𑀫𑁆𑀩𑀦𑁆𑀥𑀺𑀦𑁄. 𑀲𑀳 𑀅𑀦𑀼𑀪𑀸𑀯𑁂𑀳𑀺 𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑁂𑀳𑀻𑀢𑀺 𑀲𑀸𑀦𑀼𑀪𑀸𑀯𑀓𑀸, 𑀪𑀸𑀯𑁄 𑀯𑀺𑀪𑀸𑀯𑁄 𑀘, 𑀯𑀓𑁆𑀔𑀫𑀸𑀦𑁄 𑀪𑀸𑀯𑁂𑀦 𑀪𑀸𑀯𑀸𑀪𑀸𑀲𑁄𑀧𑀺 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑁄, 𑀭𑀲𑀲𑁆𑀲𑀸𑀤𑀸𑀬 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁩𑁯. ‘‘𑀞𑀸𑀬𑀺’’𑀘𑁆𑀘𑀸𑀤𑀺. 𑀞𑀸𑀬𑀻𑀲𑀫𑁆𑀩𑀦𑁆𑀥𑀺𑀦𑁄 𑀞𑀸𑀬𑀻𑀧𑀤𑁂𑀦, 𑀢𑁂𑀦 𑀯𑀸𑀘𑁆𑀘𑀭𑀢𑀺𑀳𑀸𑀲𑀸𑀤𑀺𑀅𑀢𑁆𑀣𑁂𑀦 𑀯𑀸 𑀲𑀫𑁆𑀩𑀦𑁆𑀥𑀼𑀧𑀕𑀢𑀸 𑀲𑀸𑀦𑀼𑀪𑀸𑀯𑀓𑀸 𑀯𑀓𑁆𑀔𑀫𑀸𑀦𑀸𑀦𑀼𑀪𑀸𑀯𑁂𑀳𑀺 𑀲𑀳 𑀧𑀯𑀢𑁆𑀢𑀸 𑀪𑀸𑀯𑀯𑀺𑀪𑀸𑀯𑀸 𑀯𑀓𑁆𑀔𑀫𑀸𑀦𑀪𑀸𑀯𑀯𑀺𑀪𑀸𑀯𑀸 𑀦𑀺𑀩𑀦𑁆𑀥𑀸 𑀯𑀼𑀢𑁆𑀢𑀕𑀼𑀡𑁄𑀧𑁂𑀢𑀓𑀯𑀺𑀦𑀸 𑀩𑀦𑁆𑀥𑀺𑀢𑀸 𑀏𑀓𑀢𑁆𑀣 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑀸 𑀲𑀸𑀥𑀼𑀦𑀁 𑀇𑀲𑁆𑀲𑀸𑀤𑀺𑀤𑁄𑀲𑀭𑀳𑀺𑀢𑀸𑀦𑀁 𑀲𑀚𑁆𑀚𑀦𑀸𑀦𑀁 𑀭𑀲𑀲𑁆𑀲𑀸𑀤𑀸𑀬 𑀲𑀺𑀗𑁆𑀕𑀸𑀭𑀸𑀤𑀺𑀯𑀓𑁆𑀔𑀫𑀸𑀦𑀭𑀲𑀲𑁆𑀲 𑀅𑀲𑁆𑀲𑀸𑀤𑀦𑀢𑁆𑀣𑀁 𑀲𑀫𑁆𑀧𑀚𑁆𑀚𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀇𑀫𑀸𑀬 𑀕𑀸𑀣𑀸𑀬 𑀞𑀸𑀬𑀻𑀪𑀸𑀯𑁄 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁄 𑀓𑁂𑀯𑀮𑀪𑀸𑀯𑁄 𑀯𑀺𑀪𑀸𑀯𑁄 𑀅𑀦𑀼𑀪𑀸𑀯𑁄 𑀭𑀲𑁄 𑀘𑁂𑀢𑀺 𑀇𑀫𑁂 𑀉𑀤𑁆𑀤𑀺𑀝𑁆𑀞𑀸 𑀪𑀯𑀦𑁆𑀢𑀺, 𑀓𑀣𑀦𑁆𑀢𑀺 𑀘𑁂? 𑀪𑀸𑀯𑀯𑀺𑀪𑀸𑀯𑀸𑀦𑀁 ‘‘𑀞𑀸𑀬𑀻𑀲𑀫𑁆𑀩𑀦𑁆𑀥𑀺𑀦𑁄’’𑀢𑀺 𑀯𑀺𑀲𑁂𑀲𑀦𑀁 𑀪𑀯𑀢𑀺, 𑀢𑁂𑀦 𑀪𑀸𑀯𑀲𑁆𑀲 𑀞𑀸𑀬𑀻 𑀘 𑀲𑁄 𑀪𑀸𑀯𑁄 𑀘𑁂𑀢𑀺 𑀘 𑀞𑀸𑀬𑀻𑀧𑀤𑁂𑀦 𑀲𑀫𑁆𑀩𑀦𑁆𑀥𑀢𑁆𑀢𑀸 𑀞𑀸𑀬𑀻𑀪𑀸𑀯𑁄 𑀘, 𑀧𑀼𑀦 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂 𑀲𑀢𑀺 ‘‘𑀞𑀸𑀬𑀻𑀪𑀸𑀯𑁄’’𑀢𑀺 𑀇𑀫𑀲𑁆𑀲 𑀲𑀸𑀥𑀓𑀢𑁆𑀢𑀸 𑀇𑀫𑀲𑁆𑀲𑁂𑀯 𑀞𑀸𑀬𑀻𑀪𑀸𑀯𑀧𑀤𑀲𑁆𑀲 𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑁂𑀦 𑀕𑀫𑁆𑀫𑀫𑀸𑀦𑁄 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁄 𑀘, 𑀧𑀼𑀦 𑀞𑀸𑀬𑀻𑀧𑀤𑁂𑀦 𑀲𑀫𑀸𑀲𑀫𑀓𑀢𑁆𑀯𑀸 𑀯𑀺𑀲𑀼𑀁 𑀤𑀲𑁆𑀲𑀺𑀢𑀪𑀸𑀯𑀲𑀤𑁆𑀤𑀲𑀼𑀢𑀺𑀬𑀸 𑀞𑀸𑀬𑀻𑀪𑀸𑀯𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂𑀳𑀺 𑀅𑀜𑁆𑀜𑁄 𑀪𑀸𑀯𑁄 𑀘, 𑀢𑀣𑀸 𑀏𑀯 𑀞𑀸𑀬𑀻𑀧𑀤𑁂𑀦 𑀯𑀸𑀘𑁆𑀘𑀭𑀢𑀺𑀳𑀸𑀲𑀸𑀤𑀺𑀅𑀢𑁆𑀣𑀲𑁆𑀲 𑀉𑀧𑁆𑀧𑀢𑁆𑀢𑀺𑀉𑀤𑁆𑀤𑀻𑀧𑀦𑀤𑁆𑀯𑀬𑀁 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀲𑀚𑁆𑀚𑁂𑀢𑁆𑀯𑀸 𑀞𑀺𑀢𑀢𑁆𑀢𑀸 𑀢𑁂𑀳𑀺 𑀭𑀢𑀺𑀳𑀸𑀲𑀸𑀤𑀻𑀳𑀺 𑀅𑀢𑁆𑀣𑁂𑀳𑀺 𑀲𑀫𑁆𑀩𑀦𑁆𑀥𑀺𑀦𑁄 𑀆𑀮𑀫𑁆𑀩𑀡𑀉𑀤𑁆𑀤𑀻𑀧𑀦𑀲𑀗𑁆𑀔𑀢𑀯𑀺𑀯𑀺𑀥𑀯𑀺𑀪𑀸𑀯𑀸 𑀘, 𑀏𑀯𑀫𑁂𑀯 𑀲𑀸𑀦𑀼𑀪𑀸𑀯𑀓𑀧𑀤𑁂𑀦 𑀲𑀫𑀸𑀬𑁄𑀕𑁂𑀦 𑀤𑀲𑁆𑀲𑀺𑀢𑀸𑀦𑀼𑀪𑀸𑀯𑁄 𑀘, ‘‘𑀭𑀲𑀲𑁆𑀲𑀸𑀤𑀸𑀬𑀸’’𑀢𑀺 𑀇𑀫𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀭𑀲𑁄 𑀘𑀸𑀢𑀺 𑀏𑀯𑀫𑀺𑀫𑁂 𑀞𑀸𑀬𑀻𑀪𑀸𑀯𑀸𑀤𑀬𑁄 𑀉𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀞𑀸𑀬𑀺𑀦𑀸 𑀲𑀳 𑀲𑀫𑁆𑀩𑀦𑁆𑀥𑁄𑀢𑀺 𑀘, 𑀲𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀘, 𑀪𑀸𑀯𑁄 𑀘 𑀯𑀺𑀪𑀸𑀯𑁄 𑀘𑁂𑀢𑀺 𑀘, 𑀲𑀳 𑀅𑀦𑀼𑀪𑀸𑀯𑁂𑀳𑀺 𑀯𑀢𑁆𑀢𑀦𑁆𑀢𑀻𑀢𑀺 𑀘, 𑀭𑀲𑀲𑁆𑀲 𑀅𑀲𑁆𑀲𑀸𑀤𑁄𑀢𑀺 𑀘 𑀯𑀸𑀓𑁆𑀬𑀁.

𑀪𑀸𑀯𑀅𑀥𑀺𑀧𑁆𑀧𑀸𑀬

𑁩𑁪𑁦. 𑀘𑀺𑀢𑁆𑀢𑀯𑀼𑀢𑁆𑀢𑀺𑀯𑀺𑀲𑁂𑀲𑀸 𑀢𑀼, 𑀪𑀸𑀯𑀬𑀦𑁆𑀢𑀺 𑀭𑀲𑁂 𑀬𑀢𑁄;

𑀭𑀢𑁆𑀬𑀸𑀤𑀬𑁄 𑀢𑀢𑁄 𑀪𑀸𑀯-𑀲𑀤𑁆𑀤𑁂𑀦 𑀧𑀭𑀺𑀓𑀺𑀢𑁆𑀢𑀺𑀢𑀸.

𑁩𑁪𑁦. 𑀇𑀤𑀸𑀦𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑁂𑀲𑀼 𑀞𑀸𑀬𑀸𑀤𑀻𑀳𑀺 𑀪𑀸𑀯𑀯𑀺𑀪𑀸𑀯𑀸𑀦𑀼𑀪𑀸𑀯𑀭𑀲𑁂𑀲𑀼 𑀧𑀞𑀫𑀁 𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 𑀪𑀸𑀯𑀲𑀤𑁆𑀤𑀫𑀦𑁆𑀯𑀢𑁆𑀣𑀬𑀢𑀺 ‘‘𑀘𑀺𑀢𑁆𑀢’’𑀇𑀘𑁆𑀘𑀸𑀤𑀺𑀦𑀸. 𑀘𑀺𑀢𑁆𑀢𑀲𑁆𑀲 𑀯𑀼𑀢𑁆𑀢𑀺𑀬𑁄 𑀭𑀫𑀡𑀳𑀲𑀦𑀸𑀤𑀺𑀆𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑁄, 𑀢𑀸𑀯 𑀯𑀺𑀲𑁂𑀲𑀸 𑀯𑀺𑀲𑀺𑀝𑁆𑀞𑀲𑀪𑀸𑀯𑀢𑁆𑀣𑀸𑀢𑀺 𑀘𑀺𑀢𑁆𑀢𑀯𑀼𑀢𑁆𑀢𑀺𑀯𑀺𑀲𑁂𑀲𑀸. 𑀭𑀢𑁆𑀬𑀸𑀤𑀬𑁄 𑀞𑀸𑀬𑀻𑀩𑁆𑀬𑀪𑀺𑀘𑀸𑀭𑀻𑀲𑀸𑀢𑁆𑀢𑀺𑀓𑀸. 𑀢𑀼𑀲𑀤𑁆𑀤𑁄 𑀯𑀺𑀲𑁂𑀲𑁂. 𑀬𑀢𑁄 𑀭𑀲𑁂 𑀲𑀺𑀗𑁆𑀕𑀸𑀭𑀸𑀤𑀬𑁄 𑀪𑀸𑀯𑀬𑀦𑁆𑀢𑀺 𑀦𑀺𑀧𑁆𑀨𑀸𑀤𑁂𑀦𑁆𑀢𑀺. 𑀢𑀢𑁄 𑀪𑀸𑀯𑀲𑀤𑁆𑀤𑁂𑀦 𑀧𑀭𑀺𑀓𑀺𑀢𑁆𑀢𑀺𑀢𑀸 𑀪𑀭𑀢𑀸𑀤𑀻𑀳𑀺 𑀓𑀣𑀺𑀢𑀸. 𑀏𑀢𑁆𑀣 𑀳𑀺 𑀡𑁆𑀬𑀦𑁆𑀢𑁄 𑀪𑀽𑀥𑀸𑀢𑀼 𑀓𑀭𑀡𑁂 𑀯𑀢𑁆𑀢𑀢𑁂. 𑀬𑀢𑁄 𑀘𑀸𑀬𑀁 𑀦 𑀓𑁂𑀯𑀮𑀁 𑀓𑀭𑀡𑁂𑀬𑁂𑀯 𑀯𑀢𑁆𑀢𑀢𑁂, 𑀅𑀣 𑀔𑁄 𑀩𑁆𑀬𑀸𑀧𑀦𑁂, 𑀧𑀝𑀺𑀧𑀸𑀤𑀦𑁂 𑀘, 𑀢𑀲𑁆𑀫𑀸𑀲𑁆𑀲 𑀧𑀝𑀺𑀪𑀸𑀦𑀁 𑀘𑀺𑀢𑁆𑀢𑀁 𑀪𑀸𑀯𑀬𑀦𑁆𑀢𑀺 𑀩𑁆𑀬𑀸𑀧𑁂𑀦𑁆𑀢𑀺. 𑀅𑀣 𑀯𑀸 𑀓𑀯𑀺𑀦𑁄 𑀮𑁄𑀓𑀝𑁆𑀞𑀺𑀢𑀺𑀜𑀸𑀡𑀮𑀓𑁆𑀔𑀡𑀁 𑀅𑀥𑀺𑀧𑁆𑀧𑀸𑀬𑀁 𑀪𑀸𑀯𑀬𑀦𑁆𑀢𑀺 𑀧𑀝𑀺𑀧𑀸𑀤𑁂𑀦𑁆𑀢𑀻𑀢𑀺 𑀪𑀸𑀯𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁩𑁪𑁦. 𑀇𑀤𑀸𑀦𑀺 𑀉𑀤𑁆𑀤𑀺𑀝𑁆𑀞𑁂𑀲𑀼 𑀞𑀸𑀬𑀻𑀪𑀸𑀯𑀸𑀤𑀻𑀲𑀼 𑀞𑀸𑀬𑀻𑀆𑀤𑀻𑀦𑀁 [𑀞𑀸𑀬𑀻𑀪𑀸𑀯𑀸𑀤𑀻𑀦𑀁 (𑀓.)] 𑀢𑀺𑀡𑁆𑀡𑀁 𑀲𑀸𑀥𑀸𑀭𑀡𑁄 𑀪𑀸𑀯𑁄 𑀦𑀸𑀫 𑀏𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀅𑀦𑁆𑀯𑀢𑁆𑀣𑀯𑀲𑁂𑀦 𑀤𑀲𑁆𑀲𑁂𑀢𑀺 ‘‘𑀘𑀺𑀢𑁆𑀢’’𑀇𑀘𑁆𑀘𑀸𑀤𑀺. 𑀘𑀺𑀢𑁆𑀢𑀯𑀼𑀢𑁆𑀢𑀺𑀯𑀺𑀲𑁂𑀲𑀸 𑀢𑀼 𑀘𑀺𑀢𑁆𑀢𑀲𑁆𑀲 𑀉𑀢𑁆𑀢𑀭𑀺 𑀯𑀓𑁆𑀔𑀫𑀸𑀦𑀸𑀭𑀫𑁆𑀫𑀡𑀳𑀲𑀦𑀲𑁄𑀘𑀦𑀸𑀤𑀻𑀳𑀺, 𑀦𑀺𑀩𑁆𑀩𑁂𑀤𑀸𑀤𑀻𑀳𑀺, 𑀣𑀫𑁆𑀪𑀸𑀤𑀻𑀳𑀺 𑀘 𑀆𑀓𑀸𑀭𑁂𑀳𑀺 𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀸𑀓𑀸𑀭𑀲𑀗𑁆𑀔𑀸𑀢𑀸 𑀯𑀺𑀲𑁂𑀲𑀸 𑀧𑀦 𑀞𑀸𑀬𑀻𑀩𑁆𑀬𑀪𑀺𑀘𑀸𑀭𑀻𑀲𑀸𑀢𑁆𑀢𑀺𑀓𑀸 𑀬𑀢𑁄 𑀬𑀲𑁆𑀫𑀸 𑀭𑀲𑁂 𑀲𑀺𑀗𑁆𑀕𑀸𑀭𑀸𑀤𑀺𑀭𑀲𑁂 𑀪𑀸𑀯𑀬𑀦𑁆𑀢𑀺 𑀦𑀺𑀧𑁆𑀨𑀸𑀤𑁂𑀦𑁆𑀢𑀺 𑀓𑀭𑁄𑀦𑁆𑀢𑀺. 𑀦𑁄 𑀘𑁂, 𑀭𑀲𑁂 𑀲𑀺𑀗𑁆𑀕𑀸𑀭𑀸𑀤𑀺𑀭𑀲𑀯𑀺𑀲𑀬𑁂 𑀧𑀡𑁆𑀟𑀺𑀢𑀸𑀦𑀁 𑀘𑀺𑀢𑁆𑀢𑀁 𑀪𑀸𑀯𑀬𑀦𑁆𑀢𑀺 𑀩𑁆𑀬𑀸𑀧𑀦𑀁 𑀓𑀭𑁄𑀦𑁆𑀢𑀺. 𑀦𑁄 𑀘𑁂, 𑀢𑀲𑁆𑀫𑀺𑀁𑀬𑁂𑀯 𑀭𑀲𑀯𑀺𑀲𑀬𑁂 𑀓𑀯𑀺𑀦𑁄 𑀮𑁄𑀓𑀲𑀪𑀸𑀯𑀁 𑀯𑀺𑀲𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑀜𑀸𑀡𑀮𑀓𑁆𑀔𑀡𑀁 𑀅𑀥𑀺𑀧𑁆𑀧𑀸𑀬𑀁 𑀪𑀸𑀯𑀬𑀦𑁆𑀢𑀺 𑀧𑀝𑀺𑀧𑀸𑀤𑀦𑀁 𑀓𑀭𑁄𑀦𑁆𑀢𑀺. 𑀢𑀢𑁄 𑀪𑀸𑀯𑀲𑀤𑁆𑀤𑁂𑀦 𑀳𑁂𑀢𑀼𑀓𑀢𑁆𑀢𑀭𑀺 𑀦𑀺𑀧𑁆𑀨𑀦𑁆𑀦𑁂𑀦 𑀭𑀢𑁆𑀬𑀸𑀤𑀬𑁄 𑀭𑀢𑀺𑀳𑀸𑀲𑀸𑀤𑀬𑁄 𑀧𑀭𑀺𑀓𑀺𑀢𑁆𑀢𑀺𑀢𑀸 𑀪𑀭𑀢𑀸𑀤𑀻𑀳𑀺 𑀯𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺. ‘‘𑀭𑀢𑁆𑀬𑀸𑀤𑀬𑁄’’𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀳𑀸𑀲𑀸𑀤𑀬𑁄 𑀞𑀸𑀬𑀻𑀪𑀸𑀯𑀸 𑀘, 𑀦𑀺𑀩𑁆𑀩𑁂𑀤𑀸𑀤𑀬𑁄 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸 𑀘, 𑀣𑀫𑁆𑀪𑀧𑀮𑀬𑀸𑀤𑀬𑁄 𑀲𑀸𑀢𑁆𑀢𑀺𑀓𑀪𑀸𑀯𑀸 𑀘 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀘𑀺𑀢𑁆𑀢𑀲𑁆𑀲 𑀯𑀼𑀢𑁆𑀢𑀺𑀬𑁄𑀢𑀺 𑀘, 𑀢𑀸 𑀏𑀯 𑀯𑀺𑀲𑁂𑀲𑀸𑀢𑀺 𑀘, 𑀪𑀸𑀯𑁄 𑀇𑀢𑀺 𑀲𑀤𑁆𑀤𑁄𑀢𑀺 𑀘 𑀯𑀸𑀓𑁆𑀬𑀁.

𑀞𑀸𑀬𑀻𑀪𑀸𑀯𑀅𑀥𑀺𑀧𑁆𑀧𑀸𑀬

𑁩𑁪𑁧. 𑀯𑀺𑀭𑁄𑀥𑀺𑀦𑀸’𑀜𑁆𑀜𑀪𑀸𑀯𑁂𑀦,

𑀬𑁄 𑀪𑀸𑀯𑁄 𑀦 𑀢𑀺𑀭𑁄𑀳𑀺𑀢𑁄;

𑀲𑀻𑀮𑁂𑀦 𑀢𑀺𑀝𑁆𑀞𑀢𑀺’𑀘𑁆𑀘𑁂’𑀲𑁄,

𑀞𑀸𑀬𑀻𑀪𑀸𑀯𑁄𑀢𑀺 𑀲𑀤𑁆𑀤𑀺𑀢𑁄.

𑁩𑁪𑁧. 𑀞𑀸𑀬𑀸𑀤𑀺𑀓𑁂 𑀢𑀺𑀯𑀺𑀥𑁂 𑀪𑀸𑀯𑁂 𑀓𑀫𑁂𑀦𑀸𑀳 ‘‘𑀯𑀺𑀭𑁄𑀥𑀺𑀦𑀸’’𑀇𑀘𑁆𑀘𑀸𑀤𑀺𑀦𑀸. 𑀯𑀺𑀭𑁄𑀥𑀺𑀦𑀸 𑀅𑀜𑁆𑀜𑁂𑀦 𑀚𑀺𑀕𑀼𑀘𑁆𑀙𑀸𑀤𑀺𑀦𑀸 𑀪𑀸𑀯𑁂𑀦 𑀬𑁄 𑀪𑀸𑀯𑁄 𑀭𑀢𑁆𑀬𑀸𑀤𑀺𑀓𑁄 𑀦 𑀢𑀺𑀭𑁄𑀳𑀺𑀢𑁄 𑀦𑀘𑁆𑀙𑀸𑀤𑀺𑀢𑁄, 𑀏𑀲𑁄 𑀪𑀸𑀯𑁄 𑀅𑀦𑀼𑀘𑁆𑀙𑀺𑀚𑁆𑀚𑀫𑀸𑀦𑀢𑁆𑀢𑀸 𑀏𑀯 𑀢𑀺𑀝𑁆𑀞𑀢𑀺 𑀲𑀻𑀮𑁂𑀦𑀸𑀢𑀺, 𑀞𑀸𑀬𑀻 𑀏𑀯 𑀪𑀸𑀯𑁄𑀢𑀺 𑀞𑀸𑀬𑀻𑀪𑀸𑀯𑁄𑀢𑀺 𑀲𑀤𑁆𑀤𑀺𑀢𑁄 𑀓𑀣𑀺𑀢𑁄. 𑀬𑁄 𑀪𑀸𑀯𑀸𑀤𑀻𑀳𑀺 𑀆𑀮𑁄𑀓𑀺𑀢𑀲𑁆𑀲𑀸𑀤𑀁 𑀦𑀻𑀢𑁄 𑀲𑀫𑀸𑀦𑀻𑀢𑁄, 𑀲𑁄 𑀲𑀸𑀫𑀸𑀚𑀺𑀓𑁂𑀳𑀺 𑀅𑀲𑁆𑀲𑀸𑀤𑀺𑀬𑀫𑀸𑀦𑀢𑁆𑀢𑀸 𑀭𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀲𑀯𑀺𑀪𑀸𑀯’’𑀇𑀘𑁆𑀘𑀸𑀤𑀺.

𑁩𑁪𑁧. 𑀇𑀤𑀸𑀦𑀺 𑀞𑀸𑀬𑀻𑀆𑀤𑀺𑀓𑁂 𑀢𑀺𑀯𑀺𑀥𑀪𑀸𑀯𑁂 𑀓𑀫𑁂𑀦 𑀦𑀺𑀤𑁆𑀤𑀺𑀲𑀢𑀺 ‘‘𑀯𑀺𑀭𑁄𑀥𑀺’’𑀇𑀘𑁆𑀘𑀸𑀤𑀺𑀦𑀸. 𑀯𑀺𑀭𑁄𑀥𑀺𑀦𑀸 𑀅𑀜𑁆𑀜𑀪𑀸𑀯𑁂𑀦 𑀭𑀢𑀺𑀳𑀸𑀲𑀸𑀤𑀻𑀦𑀁 𑀯𑀺𑀭𑀼𑀤𑁆𑀥𑁂𑀦 𑀚𑀺𑀕𑀼𑀘𑁆𑀙𑀸𑀤𑀺𑀦𑀸 𑀅𑀜𑁆𑀜𑀪𑀸𑀯𑁂𑀦 𑀬𑁄 𑀪𑀸𑀯𑁄 𑀭𑀢𑀺𑀳𑀸𑀲𑀸𑀤𑀺𑀓𑁄 𑀢𑀺𑀭𑁄𑀳𑀺𑀢𑁄 𑀦 𑀩𑁆𑀬𑀯𑀳𑀺𑀢𑁄 𑀦 𑀳𑁄𑀢𑀺, 𑀏𑀲𑁄 𑀯𑀺𑀭𑀼𑀤𑁆𑀥𑀪𑀸𑀯𑁂𑀦 𑀅𑀩𑁆𑀬𑀯𑀳𑀺𑀢𑁄 𑀪𑀸𑀯𑁄 𑀢𑀺𑀝𑁆𑀞𑀢𑀺 𑀲𑀻𑀮𑁂𑀦𑀸𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀞𑀸𑀬𑀻 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀞𑀸𑀬𑀻𑀪𑀸𑀯𑁄𑀢𑀺 𑀲𑀤𑁆𑀤𑀺𑀢𑁄 𑀓𑀣𑀺𑀢𑁄𑀢𑀺. 𑀬𑁄 𑀯𑀺𑀪𑀸𑀯𑀸𑀦𑀼𑀪𑀸𑀯𑀸𑀤𑀻𑀳𑀺 𑀅𑀲𑁆𑀲𑀸𑀤𑀦𑀻𑀬𑀢𑁆𑀢𑀁 𑀧𑀸𑀧𑀺𑀢𑁄 𑀲𑀩𑁆𑀪𑁂𑀳𑀺 𑀅𑀲𑁆𑀲𑀸𑀤𑀦𑀻𑀬𑀢𑁆𑀢𑀸 𑀭𑀲𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀞𑀸𑀬𑀻 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑁄 𑀘 𑀲𑁄 𑀪𑀸𑀯𑁄 𑀘𑁂𑀢𑀺 𑀘, 𑀢𑀺𑀭𑁄 𑀓𑀬𑀺𑀭𑀺𑀢𑁆𑀣𑀸𑀢𑀺 𑀘, 𑀞𑀸𑀬𑀻 𑀘 𑀲𑁄 𑀪𑀸𑀯𑁄 𑀘𑁂𑀢𑀺 𑀘 𑀯𑀺𑀕𑁆𑀕𑀳𑁄.

𑀞𑀸𑀬𑀻𑀪𑀸𑀯𑀧𑁆𑀧𑀪𑁂𑀤𑀉𑀤𑁆𑀤𑁂𑀲

𑁩𑁪𑁨. 𑀭𑀢𑀺𑀳𑀸𑀲𑀸 𑀘 𑀲𑁄𑀓𑁄 𑀘,

𑀓𑁄𑀥𑀼𑀲𑁆𑀲𑀸𑀳𑀪𑀬’𑀫𑁆𑀧𑀺 𑀘;

𑀚𑀺𑀕𑀼𑀘𑁆𑀙𑀸𑀯𑀺𑀫𑁆𑀳𑀬𑀸 𑀘𑁂𑀯,

𑀲𑀫𑁄 𑀘 𑀦𑀯 𑀞𑀸𑀬𑀺𑀦𑁄.

𑁩𑁪𑁨. 𑀭𑀢𑁆𑀬𑀸𑀤𑀻𑀦𑀁 𑀦𑀯𑀦𑁆𑀦𑀫𑁂𑀯 𑀞𑀸𑀬𑀺𑀢𑁆𑀯𑀁 𑀲𑀫𑁆𑀪𑀯𑀢𑀻𑀢𑁆𑀬𑀸𑀳 ‘‘𑀭𑀢𑀺’’𑀘𑁆𑀘𑀸𑀤𑀺. 𑀲𑀫𑁄 𑀘𑁂𑀢𑀺 𑀏𑀯𑀁 𑀞𑀸𑀬𑀺𑀦𑁄 𑀦𑀯𑀸𑀢𑀺 𑀬𑁄𑀚𑀦𑀸. 𑀦𑀯𑁂𑀯𑁂𑀢𑁂 𑀲𑀓𑀲𑀓𑀯𑀺𑀪𑀸𑀯𑀸𑀦𑀼𑀪𑀸𑀯𑁂𑀳𑀺 𑀲𑀫𑀼𑀮𑁆𑀮𑀸𑀲𑀺𑀢𑀸 𑀯𑀺𑀲𑀼𑀫𑁆𑀧𑀺 𑀩𑀦𑁆𑀥𑀺𑀢𑀩𑁆𑀩𑀸 𑀓𑀯𑀺𑀦𑀸, 𑀅𑀪𑀺𑀦𑁂𑀢𑀩𑁆𑀩𑀸 𑀘 𑀦𑀝𑁂𑀦, 𑀢𑀣𑀸 𑀲𑁂𑀲𑀪𑀸𑀯𑀸𑀧𑀺. 𑀢𑀢𑁆𑀣 𑀬𑀤𑀺 𑀧𑀦𑀸𑀬𑀁 𑀭𑀢𑀺 𑀅𑀲𑁂𑀲𑀇𑀢𑁆𑀣𑀺𑀧𑀼𑀭𑀺𑀲𑀕𑀼𑀡𑀬𑀼𑀢𑁆𑀢𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀚𑀦𑀺𑀢𑀸, 𑀘𑀦𑁆𑀤𑀸𑀤𑀻𑀳𑀺 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁂𑀳𑀺 𑀉𑀤𑁆𑀤𑀻𑀧𑀺𑀢𑀸, 𑀉𑀲𑁆𑀲𑀼𑀓𑁆𑀓𑀢𑀸𑀤𑀺𑀩𑀸𑀥𑀓𑁂𑀳𑀺 𑀅𑀦𑀼𑀪𑀸𑀯𑁂𑀳𑀺 𑀧𑀭𑀺𑀧𑁄𑀲𑀺𑀢𑀸, 𑀲𑀓𑀲𑀓𑀸𑀦𑀼𑀪𑀸𑀯𑀲𑀸𑀫𑀢𑁆𑀣𑀺𑀬𑀸 𑀧𑀢𑀻𑀬𑀫𑀸𑀦𑁂𑀳𑀺 𑀅𑀦𑁂𑀓𑀭𑀽𑀧𑁂𑀳𑀺 𑀩𑁆𑀬𑀪𑀺𑀘𑀸𑀭𑀻𑀳𑀺 𑀘𑀺𑀢𑁆𑀢𑀢𑀸 𑀲𑀺𑀬𑀸, 𑀢𑀤𑀸 𑀢𑀼 𑀞𑀸𑀬𑀻 𑀭𑀢𑀺 𑀦𑀝𑀸𑀪𑀺𑀦𑀬𑁂𑀦, 𑀲𑀼𑀩𑀦𑁆𑀥𑀲𑀯𑀦𑁂𑀦 𑀯𑀸 𑀲𑀩𑁆𑀪𑁂𑀳𑀺 𑀅𑀲𑁆𑀲𑀸𑀤𑀺𑀬𑀫𑀸𑀦𑀸 𑀲𑀺𑀗𑁆𑀕𑀸𑀭𑀭𑀲𑀢𑁆𑀢𑀫𑀸𑀧𑀚𑁆𑀚𑀢𑁂. 𑀏𑀯𑀁 𑀬𑀣𑀸𑀬𑁄𑀕𑀁 𑀳𑀸𑀲𑀸𑀤𑀺𑀞𑀸𑀬𑀻𑀪𑀸𑀯𑀸𑀦𑀁 𑀳𑀲𑁆𑀲𑀭𑀲𑀸𑀤𑀺𑀪𑀸𑀯𑀸𑀧𑀚𑁆𑀚𑀦𑁂 𑀬𑀼𑀢𑁆𑀢𑀺𑀁 𑀲𑀫𑀦𑁆𑀦𑁂𑀬𑁆𑀬.

𑁩𑁪𑁨. 𑀞𑀸𑀬𑀻𑀪𑀸𑀯𑁄 𑀦𑀸𑀫 𑀭𑀢𑁆𑀬𑀸𑀤𑀬𑁄 𑀦𑀯𑁂𑀯𑁂𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀢𑀺𑀳𑀸𑀲𑀸’’𑀢𑀺𑀆𑀤𑀺𑀫𑀸𑀳. 𑀭𑀢𑀺𑀳𑀸𑀲𑀸 𑀘 𑀲𑁄𑀓𑁄 𑀘 𑀓𑁄𑀥𑀼𑀲𑁆𑀲𑀸𑀳𑀪𑀬𑀫𑁆𑀧𑀺 𑀘 𑀚𑀺𑀕𑀼𑀘𑁆𑀙𑀸𑀯𑀺𑀫𑁆𑀳𑀬𑀸 𑀘𑁂𑀯 𑀲𑀫𑁄 𑀲𑀦𑁆𑀢𑀕𑀼𑀡𑁄 𑀘𑀸𑀢𑀺 𑀏𑀯𑀁 𑀞𑀸𑀬𑀺𑀦𑁄 𑀦𑀯 𑀳𑁄𑀦𑁆𑀢𑀺. 𑀇𑀫𑁂𑀲𑀁 𑀭𑀢𑁆𑀬𑀸𑀤𑀻𑀦𑀁 𑀦𑀯𑀦𑁆𑀦𑀁 𑀲𑀭𑀽𑀧𑀓𑀣𑀦𑀁 ‘‘𑀲𑀺𑀗𑁆𑀕𑀸𑀭𑀳𑀲𑁆𑀲𑀓𑀭𑀼𑀡𑀸’’𑀢𑀺𑀆𑀤𑀺𑀓𑀸𑀬 𑀉𑀤𑁆𑀤𑁂𑀲𑀕𑀸𑀣𑀸𑀬 𑀅𑀦𑀦𑁆𑀢𑀭𑁂 𑀦𑀺𑀤𑁆𑀤𑁂𑀲𑁂 𑀧𑀸𑀓𑀝𑁄 𑀳𑁄𑀢𑀺. 𑀭𑀢𑀺 𑀘 𑀳𑀸𑀲𑁄 𑀘𑀸𑀢𑀺 𑀘, 𑀓𑁄𑀥𑁄 𑀘 𑀉𑀲𑁆𑀲𑀸𑀳𑁄 𑀘 𑀪𑀬𑀜𑁆𑀘𑁂𑀢𑀺 𑀘, 𑀚𑀺𑀕𑀼𑀘𑁆𑀙𑀸 𑀘 𑀯𑀺𑀫𑁆𑀳𑀬𑀸 𑀘𑁂𑀢𑀺 𑀘 𑀯𑀸𑀓𑁆𑀬𑀁. 𑀇𑀫𑁂 𑀦𑀯 𑀘 𑀏𑀯𑀁 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀲𑀸𑀢𑁆𑀢𑀺𑀓𑀸𑀪𑀸𑀯𑁄 𑀘𑁂𑀢𑀺 𑀇𑀫𑁂 𑀬𑀣𑀸𑀲𑀓𑀫𑀦𑀼𑀭𑀽𑀧𑀯𑀺𑀪𑀸𑀯𑀸𑀦𑀼𑀪𑀸𑀯𑁂𑀳𑀺 𑀤𑀺𑀢𑁆𑀢𑀁 𑀓𑀢𑁆𑀯𑀸 𑀧𑀘𑁆𑀘𑁂𑀓𑀁 𑀓𑀯𑀺𑀦𑀸 𑀩𑀦𑁆𑀥𑀺𑀢𑀩𑁆𑀩𑀸, 𑀦𑀝𑁂𑀦 𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀩𑁆𑀩𑀸 𑀘. 𑀇𑀫𑁂𑀲𑀼 𑀢𑀺𑀯𑀺𑀥𑀪𑀸𑀯𑁂𑀲𑀼 𑀅𑀬𑀁 𑀭𑀢𑀺 𑀅𑀲𑁂𑀲𑀧𑀼𑀫𑀺𑀢𑁆𑀣𑀺𑀕𑀼𑀡𑁂𑀳𑀺 𑀬𑀼𑀢𑁆𑀢𑁂𑀳𑀺 𑀦𑀭𑀦𑀸𑀭𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀉𑀧𑁆𑀧𑀸𑀤𑀺𑀢𑀸, 𑀘𑀦𑁆𑀤𑀸𑀤𑀻𑀳𑀺 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁂𑀳𑀺 𑀉𑀤𑁆𑀤𑀻𑀧𑀺𑀢𑀸, 𑀉𑀲𑁆𑀲𑀸𑀳𑀸𑀤𑀺𑀧𑀓𑀸𑀲𑀓𑀓𑀸𑀬𑀺𑀓𑀯𑀸𑀘𑀲𑀺𑀓𑀧𑀬𑁄𑀕𑀲𑀗𑁆𑀔𑀸𑀢𑀸𑀦𑀼𑀪𑀸𑀯𑁂𑀦 𑀧𑁄𑀲𑀺𑀢𑀸, 𑀲𑀓𑀲𑀓𑀸𑀦𑀼𑀪𑀸𑀯𑀲𑀸𑀫𑀢𑁆𑀣𑀺𑀬𑁂𑀳𑀺 𑀕𑀫𑁆𑀫𑀫𑀸𑀦𑀸𑀦𑁂𑀓𑀧𑁆𑀧𑀓𑀸𑀭𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂𑀳𑀺 𑀯𑀺𑀘𑀺𑀢𑁆𑀢𑀓𑀢𑀸 𑀳𑁄𑀢𑀺. 𑀈𑀤𑀺𑀲𑀸’𑀬𑀁 𑀭𑀢𑀺 𑀦𑀝𑀲𑁆𑀲 𑀅𑀪𑀺𑀦𑀬𑁂𑀦 𑀘 𑀧𑀲𑀢𑁆𑀣𑀩𑀦𑁆𑀥𑀲𑀯𑀦𑁂𑀦 𑀘 𑀲𑀩𑁆𑀪𑁂𑀳𑀺 𑀅𑀲𑁆𑀲𑀸𑀤𑀺𑀬𑀫𑀸𑀦𑀲𑀺𑀗𑁆𑀕𑀸𑀭𑀸𑀤𑀺𑀭𑀲𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀸. 𑀳𑀸𑀲𑀸𑀤𑀻𑀦𑀁 𑀲𑁂𑀲𑀞𑀸𑀬𑀻𑀪𑀸𑀯𑀸𑀦𑀁 𑀳𑀲𑁆𑀲𑀭𑀲𑀸𑀤𑀺𑀪𑀸𑀯𑀸𑀧𑀢𑁆𑀢𑀺𑀬𑀁 𑀬𑀼𑀢𑁆𑀢𑀺 𑀏𑀯𑀁 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀅𑀥𑀺𑀧𑁆𑀧𑀸𑀬

𑁩𑁪𑁩. 𑀢𑀺𑀭𑁄𑀪𑀸𑀯𑀸𑀯𑀺𑀪𑀸𑀯𑀸𑀤𑀺-

𑀯𑀺𑀲𑁂𑀲𑁂𑀦𑀸’𑀪𑀺𑀫𑀼𑀔𑁆𑀬𑀢𑁄;

𑀬𑁂𑀢𑁂 𑀘𑀭𑀦𑁆𑀢𑀺 𑀲𑀻𑀮𑁂𑀦,

𑀢𑁂 𑀳𑁄𑀦𑁆𑀢𑀺 𑀩𑁆𑀬𑀪𑀺𑀘𑀸𑀭𑀺𑀦𑁄.

𑁩𑁪𑁩. 𑀩𑁆𑀬𑀪𑀺𑀘𑀸𑀭𑀺𑀦𑁄 𑀆𑀳 ‘‘𑀢𑀺𑀭𑁄𑀪𑀸𑀯’’𑀇𑀘𑁆𑀘𑀸𑀤𑀺𑀦𑀸. 𑀢𑀺𑀭𑁄𑀪𑀸𑀯𑁄 𑀞𑀸𑀬𑀻𑀦𑀁 𑀏𑀓𑀲𑁆𑀲𑀸𑀧𑀺 𑀪𑀸𑀯𑀲𑁆𑀲 𑀦𑀺𑀩𑁆𑀩𑁂𑀤𑀸𑀤𑀺𑀦𑁄 𑀅𑀘𑀺𑀭𑀝𑁆𑀞𑀸𑀬𑀺𑀢𑀸 𑀘 𑀆𑀯𑀺𑀪𑀸𑀯𑁄 𑀧𑀸𑀓𑀝𑀢𑀸 𑀘 𑀦𑀸𑀦𑀸𑀭𑀲𑀦𑀺𑀲𑁆𑀲𑀬𑀢𑁆𑀢𑀸 𑀢𑁂 𑀆𑀤𑀬𑁄 𑀬𑀲𑁆𑀲. 𑀆𑀤𑀺𑀲𑀤𑁆𑀤𑁂𑀦 𑀞𑀸𑀬𑀻𑀥𑀫𑁆𑀫𑀲𑁆𑀲 𑀲𑀼𑀔𑀤𑀼𑀓𑁆𑀔𑀸𑀤𑀺𑀭𑀽𑀧𑀲𑁆𑀲 𑀕𑀳𑀡𑀁, 𑀲𑁄𑀯 𑀯𑀺𑀲𑁂𑀲𑁄, 𑀢𑁂𑀦. 𑀞𑀸𑀬𑀻𑀥𑀫𑁆𑀫𑀲𑁆𑀲 𑀲𑀼𑀔𑀤𑀼𑀓𑁆𑀔𑀭𑀽𑀧𑀲𑁆𑀲 𑀕𑀳𑀡𑀁, 𑀅𑀢𑁆𑀢𑀦𑁄 𑀥𑀫𑁆𑀫𑀲𑁆𑀲 𑀲𑀼𑀔𑀤𑀼𑀓𑁆𑀔𑀭𑀽𑀧𑀲𑁆𑀲 𑀞𑀸𑀬𑀺𑀦𑀺 𑀲𑀫𑀸𑀭𑁄𑀧𑀦𑀜𑁆𑀘𑀸𑀪𑀺𑀫𑀼𑀔𑁆𑀬𑀁. 𑀢𑀣𑀸 𑀳𑀺 𑀭𑀢𑀺𑀬𑀁 𑀧𑀭𑀺𑀲𑀫𑁄 𑀲𑀼𑀔𑀸𑀦𑀼𑀯𑀺𑀤𑁆𑀥𑁄 𑀪𑀯𑀢𑀺, 𑀲𑁄𑀓𑁂 𑀤𑀼𑀓𑁆𑀔𑀸𑀦𑀼𑀯𑀺𑀤𑁆𑀥𑁄. 𑀭𑀢𑀺𑀬𑀁 𑀲𑀼𑀔𑀲𑀪𑀸𑀯𑀸𑀧𑀺 𑀕𑀺𑀮𑀸𑀦𑀺𑀧𑁆𑀧𑀪𑀼𑀢𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄 𑀲𑀓𑀫𑁆𑀫𑀁 𑀤𑀼𑀓𑁆𑀔𑀫𑀺𑀫𑀁 𑀲𑀫𑀸𑀭𑁄𑀧𑀬𑀦𑁆𑀢𑁂𑀯. 𑀢𑀢𑁄 𑀢𑁂𑀦 𑀅𑀪𑀺𑀫𑀼𑀔𑀪𑀸𑀯𑁂𑀦 𑀬𑁂 𑀏𑀢𑁂 𑀪𑀸𑀯𑀸 𑀲𑀻𑀮𑁂𑀦 𑀘𑀭𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀢𑁂 𑀩𑁆𑀬𑀪𑀺𑀘𑀸𑀭𑀺𑀦𑁄 𑀳𑁄𑀦𑁆𑀢𑀻𑀢𑀺.

𑁩𑁪𑁩. 𑀇𑀤𑀸𑀦𑀺 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂 𑀮𑀓𑁆𑀔𑀡𑀢𑁄 𑀤𑀲𑁆𑀲𑁂𑀢𑀺 ‘‘𑀢𑀺𑀭𑁄𑀪𑀸𑀯𑀸’’𑀇𑀘𑁆𑀘𑀸𑀤𑀺𑀦𑀸. 𑀢𑀺𑀭𑁄𑀪𑀸𑀯𑀸𑀯𑀺𑀪𑀸𑀯𑀸𑀤𑀺𑀯𑀺𑀲𑁂𑀲𑁂𑀦 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸𑀦𑀁 𑀅𑀢𑁆𑀢𑀦𑁄 𑀅𑀦𑁂𑀓𑀭𑀲𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑁆𑀢𑀸, 𑀮𑁄𑀓𑀲𑁆𑀲 𑀪𑀺𑀦𑁆𑀦𑀭𑀼𑀘𑀺𑀓𑀢𑁆𑀢𑀸 𑀘 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀬𑀻𑀪𑀸𑀯𑁂 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸𑀦𑀫𑀢𑁆𑀢𑀦𑁄 𑀕𑀼𑀡𑀲𑁆𑀲 𑀮𑀻𑀦𑀢𑁆𑀢𑀜𑁆𑀘 𑀓𑀺𑀲𑁆𑀫𑀺𑀜𑁆𑀘𑀺 𑀢𑀲𑁆𑀲𑁂𑀯 𑀕𑀼𑀡𑀲𑁆𑀲 𑀧𑀸𑀓𑀝𑀢𑁆𑀢𑀜𑁆𑀘𑀸𑀢𑀺𑀆𑀤𑀺𑀓𑁂𑀦 𑀯𑀺𑀲𑁂𑀲𑁂𑀦 𑀅𑀪𑀺𑀫𑀼𑀔𑁆𑀬𑀢𑁄 𑀞𑀸𑀬𑀻𑀪𑀸𑀯𑀸𑀦𑀁 𑀲𑀼𑀔𑀤𑀼𑀓𑁆𑀔𑀭𑀽𑀧𑀁 𑀅𑀢𑁆𑀢𑀦𑀺 𑀘 𑀅𑀢𑁆𑀢𑀦𑁄 𑀲𑀼𑀔𑀤𑀼𑀓𑁆𑀔𑀭𑀽𑀧𑀁 𑀞𑀸𑀬𑀻𑀪𑀸𑀯𑁂𑀲𑀼 𑀘 𑀆𑀭𑁄𑀧𑀦𑀲𑀗𑁆𑀔𑀸𑀢𑁂𑀦 𑀅𑀪𑀺𑀫𑀼𑀔𑀪𑀸𑀯𑁂𑀦 𑀬𑁂𑀢𑁂 𑀪𑀸𑀯𑀸 𑀲𑀻𑀮𑁂𑀦 𑀘𑀭𑀦𑁆𑀢𑀺 𑀧𑀓𑀢𑀺𑀬𑀸 𑀧𑀯𑀢𑁆𑀢𑀦𑁆𑀢𑀺, 𑀢𑁂 𑀪𑀸𑀯𑀸 𑀩𑁆𑀬𑀪𑀺𑀘𑀸𑀭𑀺𑀦𑁄 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀏𑀯𑀫𑁂𑀯 [𑀏𑀯𑀭𑀽𑀧𑀸 (𑀓.)] 𑀧𑀻𑀴𑀸 𑀲𑀭𑀽𑀧𑁂𑀦 𑀏𑀓𑁄 𑀧𑀭𑀺𑀲𑀫𑀲𑀗𑁆𑀔𑀢𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁄 𑀭𑀢𑀺𑀬𑀁 𑀲𑀕𑀼𑀡𑁂𑀦 𑀮𑀻𑀦𑁄 𑀲𑀼𑀔𑀸𑀦𑀼𑀯𑀺𑀤𑁆𑀥𑁄 𑀳𑀼𑀢𑁆𑀯𑀸, 𑀲𑁄𑀓𑁂 𑀲𑀕𑀼𑀡𑁂𑀦 𑀧𑀸𑀓𑀝𑁄 𑀤𑀼𑀓𑁆𑀔𑀸𑀦𑀼𑀯𑀺𑀤𑁆𑀥𑁄 𑀘 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑁂. 𑀏𑀯𑀫𑁂𑀯 𑀲𑀼𑀔𑀲𑀪𑀸𑀯𑀭𑀢𑀺𑀬𑀁 𑀕𑀺𑀮𑀸𑀦𑀸𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄 𑀲𑀓𑀺𑀬𑀁 𑀤𑀼𑀓𑁆𑀔𑀲𑀭𑀽𑀧𑀁 𑀆𑀭𑁄𑀧𑁂𑀦𑁆𑀢𑀻𑀢𑀺 𑀓𑀢𑁆𑀯𑀸 𑀢𑀺𑀭𑁄𑀪𑀸𑀯𑀯𑀺𑀪𑀸𑀯𑀸𑀤𑀺𑀯𑀺𑀲𑁂𑀲𑁂𑀦 𑀅𑀪𑀺𑀫𑀼𑀔𑀁 𑀧𑀯𑀢𑁆𑀢𑀦𑁆𑀢𑀺. 𑀢𑀺𑀭𑁄𑀪𑀯𑀦𑀫𑀺𑀢𑀺 𑀘, 𑀆𑀯𑀺𑀪𑀯𑀦𑀫𑀺𑀢𑀺 𑀘, 𑀢𑀺𑀭𑁄𑀪𑀸𑀯𑁄 𑀘 𑀆𑀯𑀺𑀪𑀸𑀯𑁄 𑀘𑁂𑀢𑀺 𑀘, 𑀢𑁂 𑀆𑀤𑀬𑁄 𑀬𑀲𑁆𑀲 𑀞𑀸𑀬𑀻𑀪𑀸𑀯𑁂𑀲𑀼 𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀼𑀔𑀤𑀼𑀓𑁆𑀔𑀲𑀪𑀸𑀯𑀸𑀦𑀁 𑀅𑀢𑁆𑀢𑀦𑀺 𑀆𑀭𑁄𑀧𑀦𑀲𑁆𑀲𑁂𑀢𑀺 𑀘, 𑀲𑁄𑀬𑁂𑀯 𑀯𑀺𑀲𑁂𑀲𑁄𑀢𑀺 𑀘, 𑀅𑀪𑀺𑀫𑀼𑀔𑀸𑀦𑀁 𑀪𑀸𑀯𑁄𑀢𑀺 𑀘 𑀯𑀺𑀕𑁆𑀕𑀳𑁄. 𑀩𑁆𑀬𑀪𑀺𑀘𑀸𑀭𑀻𑀧𑀤𑁂 𑀯𑀺𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑁂 𑀅𑀪𑀺𑀲𑀤𑁆𑀤𑁄 𑀅𑀪𑀺𑀫𑀼𑀔𑀪𑀸𑀯𑁂 𑀯𑀢𑁆𑀢𑀢𑀺.

𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀧𑁆𑀧𑀪𑁂𑀤

𑁩𑁪𑁪. 𑀦𑀺𑀩𑁆𑀩𑁂𑀤𑁄 𑀢𑀓𑁆𑀓𑀲𑀗𑁆𑀓𑀸 𑀲𑀫-

𑀥𑀺𑀢𑀺𑀚𑀴𑀢𑀸 𑀤𑀻𑀦𑀢𑀼𑀕𑁆𑀕𑀸𑀮𑀲𑀢𑁆𑀢𑀁,

𑀲𑀼𑀢𑁆𑀢𑀁 𑀢𑀸𑀲𑁄 𑀕𑀺𑀮𑀸𑀦𑀼’𑀲𑁆𑀲𑀼𑀓𑀳𑀭𑀺𑀲-

𑀲𑀢𑀺𑀲𑁆𑀲𑀸𑀯𑀺𑀲𑀸𑀤𑀸𑀩𑀳𑀺𑀢𑁆𑀣𑀸.

𑀘𑀺𑀦𑁆𑀢𑀸 𑀕𑀩𑁆𑀩𑀸’𑀧𑀫𑀸𑀭𑁄’𑀫𑀭𑀺𑀲𑀫𑀤-

𑀫𑀢𑀼𑀫𑁆𑀫𑀸𑀤𑀫𑁄𑀳𑀸 𑀯𑀺𑀩𑁄𑀥𑁄,

𑀦𑀺𑀤𑁆𑀤𑀸𑀯𑁂𑀕𑀸 𑀲𑀩𑀺𑀴𑀁 𑀫𑀭𑀡-

𑀲𑀘𑀧𑀮𑀸𑀩𑁆𑀬𑀸𑀥𑀺 𑀢𑁂𑀢𑁆𑀢𑀺𑀁𑀲𑀫𑁂’𑀢𑁂.

𑁩𑁪𑁪. 𑀢𑁂 𑀤𑀲𑁆𑀲𑁂𑀢𑀺 ‘‘𑀦𑀺𑀩𑁆𑀩𑁂𑀤𑁄’’𑀇𑀘𑁆𑀘𑀸𑀤𑀺𑀦𑀸. 𑀤𑀻𑀦𑀢𑀼𑀕𑁆𑀕𑀸𑀮𑀲𑀢𑁆𑀢𑀦𑁆𑀢𑀺 𑀤𑀻𑀦𑀢𑀸 𑀘 𑀉𑀕𑁆𑀕𑀢𑀜𑁆𑀘 𑀆𑀮𑀲𑀢𑁆𑀢𑀜𑁆𑀘, 𑀕𑀺𑀮𑀸𑀦𑀺 𑀉𑀲𑁆𑀲𑀼𑀓𑀇𑀢𑀺 𑀉𑀲𑁆𑀲𑀼𑀓𑁆𑀓𑀁. 𑀘𑀧𑀮𑀇𑀢𑀺 𑀘𑀸𑀧𑀮𑁆𑀮𑀁, 𑀲𑀳 𑀘𑀧𑀮𑁂𑀦 𑀲𑀘𑀧𑀮𑁄, 𑀲𑁄 𑀘𑀸𑀬𑀁 𑀩𑁆𑀬𑀸𑀥𑀺 𑀘, 𑀫𑀭𑀡𑀜𑁆𑀘 𑀲𑀘𑀧𑀮𑀩𑁆𑀬𑀸𑀥𑀺 𑀘 𑀲𑀫𑀸𑀳𑀸𑀭𑁂. 𑀢𑀜𑁆𑀘 𑀲𑀳 𑀩𑀺𑀴𑀸𑀬 𑀯𑀢𑁆𑀢𑀢𑀻𑀢𑀺 𑀲𑀩𑀺𑀴𑀦𑁆𑀢𑀺 𑀏𑀢𑁂 𑀬𑀣𑀸𑀯𑀼𑀢𑁆𑀢𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸 𑀢𑁂𑀢𑁆𑀢𑀺𑀁𑀲 𑀳𑁄𑀦𑁆𑀢𑀻𑀢𑀺. 𑀉𑀲𑁆𑀲𑀸𑀳𑀯𑀢𑀸 𑀯𑀻𑀭𑀭𑀲𑁄 𑀢𑀁𑀯𑀲𑁂𑀦𑁂𑀯 𑀅𑀲𑁆𑀲𑀸𑀤𑀻𑀬𑀢𑀺. 𑀪𑀻𑀭𑀼𑀦𑀸 𑀢𑀼 𑀲𑁄𑀯 𑀪𑀬𑀸𑀦𑀓𑀭𑀲𑀯𑀲𑁂𑀦𑁂𑀢𑀺 𑀮𑁄𑀓𑀲𑀪𑀸𑀯𑀲𑁆𑀲 𑀅𑀦𑁂𑀓𑀢𑁆𑀢𑀸 𑀢𑀤𑀢𑁆𑀣𑀫𑁂𑀢𑁂 𑀩𑁆𑀬𑀪𑀺𑀘𑀸𑀭𑀺𑀦𑁄 𑀏𑀓𑁂𑀓𑀲𑁆𑀲𑀭𑀲𑀲𑁆𑀲 𑀩𑀳𑀯𑁄 𑀯𑀡𑁆𑀡𑀦𑀻𑀬𑀸, 𑀬𑀢𑁄 𑀢𑀁𑀯𑀡𑁆𑀡𑀦𑀸𑀤𑁆𑀯𑀸𑀭𑁂𑀦 𑀲𑀩𑁆𑀩𑁄𑀧𑀺 𑀢𑁂𑀲𑀼 𑀓𑀺𑀜𑁆𑀘𑀺 𑀅𑀲𑁆𑀲𑀸𑀤𑁂𑀢𑀻𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀧𑀦 𑀫𑀸𑀭𑀡𑁄𑀧𑀕𑀢𑀯𑁂𑀭𑀺𑀤𑀲𑁆𑀲𑀦𑀫𑁂𑀓𑀫𑁂𑀯 𑀢𑀗𑁆𑀔𑀡𑁂𑀬𑁂𑀯 𑀪𑀺𑀦𑁆𑀦𑀁 𑀧𑀓𑀢𑀺𑀯𑀲𑁂𑀦 𑀪𑀻𑀭𑀼𑀦𑁄 𑀪𑀬𑀲𑁆𑀲 𑀳𑁂𑀢𑀼, 𑀲𑀗𑁆𑀕𑀸𑀫𑀮𑁄𑀮𑀲𑁆𑀲 𑀢𑀼 𑀉𑀲𑁆𑀲𑀸𑀳𑀦𑀺𑀫𑀺𑀢𑁆𑀢𑀁 𑀲𑀺𑀬𑀸. 𑀢𑀣𑀸 𑀦𑀝𑁂𑀦 𑀓𑀢𑀁 𑀯𑀺𑀓𑀢𑀫𑀸𑀪𑀭𑀡𑀁 𑀓𑁆𑀭𑀺𑀬𑀸𑀯𑀸 𑀦𑀻𑀘𑀧𑀓𑀢𑀻𑀦𑀁 𑀞𑀸𑀬𑀺𑀦𑁄 𑀳𑀸𑀲𑀲𑁆𑀲 𑀳𑁂𑀢𑀼, 𑀕𑀫𑁆𑀪𑀻𑀭𑀧𑀓𑀢𑀻𑀦𑀁 𑀩𑁆𑀬𑀪𑀺𑀘𑀸𑀭𑀺𑀦𑁄 𑀳𑀸𑀲𑀲𑁆𑀲, 𑀢𑀲𑁆𑀫𑀸 𑀪𑀸𑀯𑁂 𑀯𑀡𑁆𑀡𑀬𑀢𑀸 𑀓𑀯𑀺𑀦𑀸 𑀪𑀸𑀯𑀸 𑀢𑀣𑀸 𑀯𑀡𑁆𑀡𑀦𑀻𑀬𑀸, 𑀬𑀣𑁄𑀘𑀺𑀢𑁆𑀬𑀧𑀭𑀺𑀧𑁄𑀲𑁄 𑀲𑀺𑀬𑀸. 𑀑𑀘𑀺𑀢𑁆𑀬𑀪𑀗𑁆𑀕𑁄 𑀢𑀼 𑀫𑀳𑀢𑀸 𑀯𑀸𑀬𑀸𑀫𑁂𑀦 𑀧𑀭𑀺𑀳𑀭𑀺𑀢𑀩𑁆𑀩𑁄.

𑀢𑁂𑀲𑀼 𑀦𑀺𑀩𑁆𑀩𑁂𑀤𑁄 𑀅𑀢𑁆𑀢𑀸𑀯𑀫𑀸𑀦𑀦𑀁. 𑀢𑀲𑁆𑀲 𑀘 𑀇𑀢𑁆𑀣𑀻𑀦𑀜𑁆𑀘 𑀦𑀻𑀘𑀸𑀦𑀜𑁆𑀘 𑀤𑀸𑀮𑀺𑀤𑁆𑀤𑀺𑀬𑀁 𑀯𑀺𑀪𑀸𑀯𑁄, 𑀬𑁄𑀕𑀻𑀦𑀁 𑀢𑀼 𑀢𑀢𑁆𑀯𑀲𑀁𑀯𑁂𑀤𑀦𑀁 𑀯𑀺𑀪𑀸𑀯𑁄, 𑀅𑀲𑁆𑀲𑀼𑀧𑀢𑀦𑀘𑀺𑀦𑁆𑀢𑀸𑀤𑀬𑁄 𑀏𑀢𑁆𑀣 𑀅𑀦𑀼𑀪𑀸𑀯𑀸.

𑀢𑀓𑁆𑀓𑁄 𑀯𑀺𑀢𑀓𑁆𑀓𑀦𑀁. 𑀢𑀲𑁆𑀲 𑀲𑀦𑁆𑀤𑁂𑀳𑁄 𑀯𑀺𑀪𑀸𑀯𑁄, 𑀲𑀺𑀭𑁄𑀓𑀫𑁆𑀧𑀸𑀤𑀺 𑀅𑀦𑀼𑀪𑀸𑀯𑁄.

𑀲𑀗𑁆𑀓𑀸𑀬 𑀯𑀺𑀭𑀼𑀤𑁆𑀥𑀘𑀭𑀡𑀁 𑀯𑀺𑀪𑀸𑀯𑁄, 𑀓𑀫𑁆𑀧𑀸𑀤𑀬𑁄 𑀅𑀦𑀼𑀪𑀸𑀯𑁄.

𑀲𑀫𑁄 𑀔𑁂𑀤𑁄. 𑀢𑀢𑁆𑀣 𑀕𑀢𑁆𑀬𑀸𑀤𑀺 𑀯𑀺𑀪𑀸𑀯𑁄, 𑀲𑁂𑀤𑀸𑀤𑀺 𑀅𑀦𑀼𑀪𑀸𑀯𑁄.

𑀥𑀺𑀢𑀺 𑀲𑀦𑁆𑀢𑁄𑀲𑁄. 𑀜𑀸𑀡𑀸𑀤𑀺 𑀯𑀺𑀪𑀸𑀯𑁄, 𑀅𑀦𑀼𑀪𑀸𑀯𑁄 𑀪𑁄𑀕𑀸𑀮𑁄𑀮𑀢𑀸𑀤𑀺.

𑀚𑀴𑀢𑀸 𑀅𑀧𑁆𑀧𑀝𑀺𑀧𑀢𑁆𑀢𑀺. 𑀢𑀲𑁆𑀲𑀸 𑀇𑀝𑁆𑀞𑀸𑀦𑀺𑀝𑁆𑀞𑀤𑀲𑁆𑀲𑀦𑀸𑀤𑀺 𑀯𑀺𑀪𑀸𑀯𑁄, 𑀅𑀦𑀺𑀫𑀺𑀲𑀦𑀬𑀦𑀸𑀮𑁄𑀘𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀤𑀻𑀦𑀢𑀸 𑀘𑁂𑀢𑀲𑁄 𑀅𑀦𑁄𑀚𑀢𑀸. 𑀢𑀲𑁆𑀲𑀸 𑀯𑀺𑀪𑀸𑀯𑁄 𑀤𑀼𑀕𑁆𑀕𑀢𑀢𑀸𑀤𑀺, 𑀅𑀦𑀼𑀪𑀸𑀯𑁄 𑀫𑀮𑀺𑀦𑀯𑀢𑁆𑀣𑀢𑀸𑀤𑀺.

𑀉𑀕𑁆𑀕𑀢𑀸 𑀤𑀸𑀭𑀼𑀡𑀢𑁆𑀢𑀁. 𑀢𑀲𑁆𑀲𑀸 𑀯𑀺𑀪𑀸𑀯𑁄 𑀩𑀮𑀯𑀸𑀧𑀭𑀸𑀥𑀸𑀤𑀺, 𑀢𑀲𑁆𑀲 𑀅𑀦𑀼𑀪𑀸𑀯𑁄 𑀢𑀚𑁆𑀚𑀦𑀸𑀤𑀺.

𑀆𑀮𑀲𑀢𑁆𑀢𑀲𑁆𑀲 𑀧𑀭𑀺𑀲𑀫𑀸𑀤𑀺 𑀯𑀺𑀪𑀸𑀯𑁄, 𑀚𑀺𑀫𑁆𑀳𑀢𑀸𑀤𑀺 𑀅𑀦𑀼𑀪𑀸𑀯𑁄.

𑀲𑀼𑀢𑁆𑀢𑀲𑁆𑀲 𑀦𑀺𑀤𑁆𑀤𑀸 𑀯𑀺𑀪𑀸𑀯𑁄, 𑀢𑀲𑁆𑀲𑀸𑀤𑀸𑀤𑀬𑁄 𑀅𑀦𑀼𑀪𑀸𑀯𑁄.

𑀢𑀸𑀲𑁄 𑀘𑀺𑀢𑁆𑀢𑀓𑁆𑀔𑁄𑀪𑁄. 𑀯𑀺𑀪𑀸𑀯𑁄 𑀅𑀲𑁆𑀲 𑀕𑀚𑁆𑀚𑀺𑀢𑀸𑀤𑀺, 𑀓𑀫𑁆𑀧𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀆𑀬𑀸𑀲𑀧𑀺𑀧𑀸𑀲𑀸𑀤𑀺 𑀯𑀺𑀪𑀸𑀯𑁄 𑀕𑀺𑀮𑀸𑀦𑀺𑀬𑀸, 𑀯𑀺𑀯𑀡𑁆𑀡𑀢𑀸𑀤𑀬𑁄 𑀅𑀦𑀼𑀪𑀸𑀯𑁄.

𑀓𑀸𑀮𑀓𑁆𑀔𑀫𑀢𑀸 𑀉𑀲𑁆𑀲𑀼𑀓𑀁. 𑀯𑀺𑀪𑀸𑀯𑁄 𑀢𑀲𑁆𑀲 𑀭𑀫𑀡𑀻𑀬𑀤𑀲𑁆𑀲𑀦𑀺𑀘𑁆𑀙𑀸𑀤𑀺, 𑀅𑀦𑀼𑀪𑀸𑀯𑁄 𑀢𑀼𑀭𑀺𑀢𑀢𑀸𑀤𑀺.

𑀘𑁂𑀢𑁄𑀧𑀲𑀸𑀤𑁄 𑀳𑀭𑀺𑀢𑁄. 𑀢𑀢𑁆𑀭 𑀉𑀲𑁆𑀲𑀯𑀸𑀤𑀺 𑀯𑀺𑀪𑀸𑀯𑁄, 𑀅𑀲𑁆𑀲𑀼𑀲𑁂𑀤𑀸𑀤𑀬𑁄 𑀅𑀦𑀼𑀪𑀸𑀯𑁄.

𑀲𑀤𑀺𑀲𑀤𑀲𑁆𑀲𑀦𑀸𑀤𑀺 𑀯𑀺𑀪𑀸𑀯𑁄 𑀲𑀢𑀺𑀬𑀸, 𑀅𑀦𑀼𑀪𑀸𑀯𑁄 𑀪𑀫𑀼𑀲𑀫𑀼𑀦𑁆𑀦𑀫𑀦𑀸𑀤𑀺.

𑀧𑀭𑁂𑀲𑀫𑀼𑀓𑁆𑀓𑀁𑀲𑀸𑀲𑀳𑀦𑀢𑀸 𑀇𑀲𑁆𑀲𑀸. 𑀢𑀲𑁆𑀲𑀸 𑀤𑀼𑀚𑁆𑀚𑀦𑀢𑁆𑀢𑀕𑀩𑁆𑀩𑀸𑀤𑀬𑁄 𑀯𑀺𑀪𑀸𑀯𑁄, 𑀤𑁄𑀲𑀓𑀣𑀦𑀸𑀯𑀚𑀸𑀦𑀦𑀸𑀤𑀬𑁄 𑀅𑀦𑀼𑀪𑀸𑀯𑁄.

𑀯𑀺𑀲𑀸𑀤𑁄 𑀔𑁂𑀤𑁄. 𑀯𑀺𑀪𑀸𑀯𑁄 𑀢𑀲𑁆𑀲 𑀆𑀭𑀤𑁆𑀥𑀓𑀸𑀭𑀺𑀬𑀸𑀲𑀺𑀤𑁆𑀥𑀸𑀤𑀺, 𑀩𑀸𑀥𑀬𑀢𑀸𑀧𑀸𑀤𑀺 𑀅𑀦𑀼𑀪𑀸𑀯𑁄.

𑀅𑀩𑀳𑀺𑀢𑁆𑀣𑀸 𑀓𑀸𑀬𑀲𑀁𑀯𑀭𑀡𑀁. 𑀢𑀲𑁆𑀲𑀸 𑀯𑀺𑀪𑀸𑀯𑁄 𑀮𑀚𑁆𑀚𑀸𑀤𑀺, 𑀅𑀦𑀼𑀪𑀸𑀯𑁄’𑀜𑁆𑀜𑀯𑀺𑀓𑁆𑀭𑀺𑀬𑀸.

𑀘𑀺𑀦𑁆𑀢𑀸 𑀇𑀝𑁆𑀞𑀸𑀮𑀸𑀪𑀸𑀤𑀻𑀳𑀺, 𑀅𑀦𑀼𑀪𑀸𑀯𑁄 𑀫𑀼𑀓𑀼𑀮𑀺𑀢𑀦𑀬𑀦𑀸𑀤𑀺.

𑀕𑀩𑁆𑀩𑁄 𑀅𑀪𑀺𑀫𑀸𑀦𑁄. 𑀯𑀺𑀪𑀸𑀯𑁄𑀲𑁆𑀲 𑀇𑀲𑁆𑀲𑀭𑀺𑀬𑀸𑀤𑀺, 𑀅𑀦𑀼𑀪𑀸𑀯𑁄 𑀅𑀯𑀚𑀸𑀦𑀦𑀸𑀤𑀺.

𑀅𑀧𑀫𑀸𑀭𑁄 𑀕𑀸𑀳𑀭𑀼𑀓𑁆𑀔𑀸𑀤𑀻𑀳𑀺 [𑀕𑀸𑀳𑀭𑀼𑀓𑁆𑀔𑀧𑀢𑀦𑀸𑀤𑀻𑀳𑀺 (?)], 𑀪𑀽𑀧𑀸𑀢𑀸𑀤𑀬𑁄 𑀏𑀢𑁆𑀣 𑀅𑀦𑀼𑀪𑀸𑀯𑁄.

𑀅𑀫𑀭𑀺𑀲𑁄 𑀅𑀓𑁆𑀔𑀫𑀢𑀸. 𑀯𑀺𑀪𑀸𑀯𑁄 𑀅𑀲𑁆𑀲𑀸𑀯𑀫𑀸𑀦𑀦𑀸𑀤𑀺, 𑀲𑀺𑀭𑁄𑀓𑀫𑁆𑀧𑀦𑀢𑀚𑁆𑀚𑀦𑀸𑀤𑀬𑁄 𑀅𑀦𑀼𑀪𑀸𑀯𑁄.

𑀫𑀤𑁄 𑀧𑀫𑀸𑀤𑀼𑀓𑁆𑀓𑀁𑀲𑁄. 𑀢𑀲𑁆𑀲 𑀯𑀺𑀪𑀸𑀯𑁄 𑀧𑀸𑀦𑀁, 𑀘𑀮𑀫𑀸𑀦𑀗𑁆𑀕𑀯𑀘𑁄𑀕𑀢𑀺𑀳𑀸𑀲𑀸𑀤𑀬𑁄 𑀅𑀦𑀼𑀪𑀸𑀯𑁄.

𑀫𑀢𑀺 𑀓𑀗𑁆𑀔𑀘𑁆𑀙𑁂𑀤𑁄. 𑀉𑀧𑀤𑁂𑀲𑀸𑀤𑀺 𑀯𑀺𑀪𑀸𑀯𑁄, 𑀫𑀼𑀔𑀯𑀺𑀓𑀸𑀲𑀸𑀤𑀺 𑀏𑀢𑁆𑀣 𑀅𑀦𑀼𑀪𑀸𑀯𑁄.

𑀅𑀲𑀫𑁂𑀓𑁆𑀔𑀺𑀢𑀓𑀸𑀭𑀺𑀢𑀸 𑀉𑀫𑁆𑀫𑀸𑀤𑁄. 𑀢𑀲𑁆𑀲 𑀯𑀺𑀪𑀸𑀯𑁄 𑀲𑀦𑁆𑀦𑀺𑀧𑀸𑀢𑀕𑀳𑀡𑀸𑀤𑀺, 𑀅𑀝𑁆𑀞𑀸𑀦𑀭𑀼𑀤𑀺𑀢𑀕𑀻𑀢𑀳𑀸𑀲𑀸𑀤𑀬𑁄 𑀅𑀦𑀼𑀪𑀸𑀯𑁄.

𑀫𑁄𑀳𑁄 𑀪𑀬𑀸𑀤𑀻𑀳𑀺, 𑀅𑀦𑀼𑀪𑀸𑀯𑁄 𑀣𑀫𑁆𑀪𑀓𑀫𑁆𑀧𑀸𑀤𑀺.

𑀤𑀼𑀭𑀸𑀘𑀸𑀭𑀸𑀤𑀻𑀳𑀺 𑀩𑀺𑀴𑀁, 𑀅𑀥𑁄𑀫𑀼𑀔𑀢𑀸𑀤𑀺 𑀅𑀦𑀼𑀪𑀸𑀯𑁄.

𑀫𑀭𑀡𑀁 𑀯𑀺𑀪𑀸𑀯𑀅𑀦𑀼𑀪𑀸𑀯𑁂𑀳𑀺 𑀲𑀼𑀧𑀲𑀺𑀤𑁆𑀥𑀁.

𑀘𑀧𑀮𑀢𑀸 𑀭𑀸𑀕𑀤𑁄𑀲𑀸𑀤𑀻𑀳𑀺, 𑀲𑀘𑁆𑀙𑀦𑁆𑀤𑀘𑀭𑀡𑀸𑀤𑀺 𑀅𑀦𑀼𑀪𑀸𑀯𑁄. 𑀩𑁆𑀬𑀸𑀥𑀺 𑀧𑀸𑀓𑀝𑁄.

𑀬𑁂 𑀯𑀸 𑀧𑀦𑀜𑁆𑀜𑁂 𑀇𑀥 𑀦𑀺𑀤𑁆𑀤𑀺𑀝𑁆𑀞𑀸 𑀘𑀺𑀢𑁆𑀢𑀯𑀼𑀢𑁆𑀢𑀺𑀯𑀺𑀲𑁂𑀲𑀸𑀧𑀺 𑀲𑀁𑀯𑀺𑀚𑁆𑀚𑀦𑁆𑀢𑀺 𑀲𑀼𑀔𑀼𑀫𑀪𑁂𑀤𑀸, 𑀢𑁂𑀲𑀼 𑀓𑁂𑀘𑀺 𑀯𑀼𑀢𑁆𑀢𑁂𑀲𑁆𑀯𑀦𑁆𑀢𑁄𑀕𑀥𑀸 𑀳𑁄𑀦𑁆𑀢𑀺. 𑀬𑀣𑀸 𑀳𑀺 𑀇𑀘𑁆𑀙𑀸𑀲𑀪𑀸𑀯𑀸 𑀲𑀩𑁆𑀩𑁂 𑀓𑀸𑀫𑀸 𑀭𑀢𑀺𑀬𑀁 𑀅𑀦𑁆𑀢𑁄𑀕𑀥𑀸, 𑀢𑀣𑀸 𑀤𑁄𑀲𑀧𑁆𑀧𑀓𑀸𑀭𑀸 𑀓𑁄𑀥𑀸 𑀫𑀭𑀺𑀲𑀇𑀲𑁆𑀲𑀸𑀤𑀻𑀲𑁆𑀯𑀦𑁆𑀢𑁄𑀕𑀥𑀸, 𑀤𑀼𑀓𑁆𑀔𑀲𑀪𑀸𑀯𑀸 𑀲𑁄𑀓𑀲𑀫𑀩𑁆𑀬𑀸𑀥𑀺𑀕𑀺𑀮𑀸𑀦𑀺 𑀯𑀺𑀲𑀸𑀤𑀸𑀤𑀻𑀲𑁆𑀯𑀦𑁆𑀢𑁄𑀕𑀥𑀸. 𑀧𑀻𑀢𑁆𑀬𑀸𑀤𑀬𑁄 𑀲𑀼𑀔𑀲𑀪𑀸𑀯𑀸 𑀳𑀭𑀺𑀲𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀲𑀼 𑀪𑀬𑀸 𑀢𑀸𑀲𑁄 𑀅𑀜𑁆𑀜𑁄, 𑀲𑀗𑁆𑀓𑀸 𑀢𑀣𑀸 𑀅𑀫𑀭𑀺𑀲𑁄. 𑀢𑀲𑁆𑀫𑀸 𑀇𑀲𑁆𑀲𑀸, 𑀢𑀣𑀸 𑀕𑀺𑀮𑀸𑀦𑀺𑀢𑁄 𑀲𑀫𑁄, 𑀦𑀺𑀤𑁆𑀤𑀸𑀬 𑀲𑀼𑀢𑁆𑀢𑀁, 𑀉𑀲𑁆𑀲𑀼𑀓𑀸 𑀘𑀧𑀮𑀢𑀸, 𑀢𑀣𑀸 𑀫𑁄𑀳𑀸 𑀧𑀮𑀬𑁄 𑀯𑀓𑁆𑀔𑀫𑀸𑀦𑁄 𑀅𑀜𑁆𑀜𑁄𑀢𑀺 𑀫𑀦𑁆𑀢𑀩𑁆𑀩𑀁.

𑁩𑁪𑁪. 𑀇𑀤𑀸𑀦𑀺 𑀢𑁂 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂 𑀲𑀭𑀽𑀧𑁂𑀦 𑀤𑀲𑁆𑀲𑁂𑀢𑀺 ‘‘𑀦𑀺𑀩𑁆𑀩𑁂𑀤𑁄’’𑀇𑀘𑁆𑀘𑀸𑀤𑀺𑀦𑀸. 𑀦𑀺𑀩𑁆𑀩𑁂𑀤𑁄 𑀅𑀢𑁆𑀢𑀦𑀺𑀦𑁆𑀤𑀸𑀲𑀗𑁆𑀔𑀢𑁄 𑀘, 𑀢𑀓𑁆𑀓𑀲𑀗𑁆𑀓𑀸 𑀘, 𑀲𑀫𑀥𑀺𑀢𑀺𑀚𑀴𑀢𑀸 𑀧𑀭𑀺𑀲𑀫𑁄 𑀲𑀦𑁆𑀢𑁄𑀲𑀮𑀓𑁆𑀔𑀡𑀸 𑀥𑀺𑀢𑀺 𑀚𑀴𑀢𑀸 𑀘, 𑀤𑀻𑀦𑀢𑀼𑀕𑁆𑀕𑀸𑀮𑀲𑀢𑁆𑀢𑀁 𑀤𑀻𑀦𑀪𑀸𑀯𑀤𑀸𑀭𑀼𑀡𑀪𑀸𑀯𑀅𑀮𑀲𑀪𑀸𑀯𑀸 𑀘, 𑀲𑀼𑀢𑁆𑀢𑀁 𑀲𑀬𑀦𑀜𑁆𑀘, 𑀢𑀸𑀲𑁄 𑀘𑀺𑀢𑁆𑀢𑀓𑁆𑀔𑁄𑀪𑁄 𑀘, 𑀕𑀺𑀮𑀸𑀦𑀧𑀭𑀺𑀫𑀤𑁆𑀤𑀺𑀢𑀪𑀸𑀯𑁄 𑀘, 𑀉𑀲𑁆𑀲𑀼𑀓𑀳𑀭𑀺𑀲𑀲𑀢𑀺𑀲𑁆𑀲𑀸𑀯𑀺𑀲𑀸𑀤𑀸𑀩𑀳𑀺𑀢𑁆𑀣𑀸 𑀉𑀲𑁆𑀲𑀸𑀳𑀧𑀺𑀢𑀺𑀲𑀢𑀺𑀇𑀲𑁆𑀲𑀸𑀔𑁂𑀤𑀆𑀓𑀸𑀭𑀲𑀁𑀯𑀭𑀸 𑀘, 𑀘𑀺𑀦𑁆𑀢𑀸 𑀘, 𑀕𑀩𑁆𑀩𑁄 𑀅𑀪𑀺𑀫𑀸𑀦𑁄 𑀘, 𑀅𑀧𑀫𑀸𑀭𑁄 𑀘, 𑀅𑀫𑀭𑀺𑀲𑀫𑀤𑀫𑀢𑀼𑀫𑁆𑀫𑀸𑀤𑀫𑁄𑀳𑀸 𑀅𑀓𑁆𑀔𑀦𑁆𑀢𑀺𑀧𑀫𑀸𑀤𑀸𑀥𑀺𑀓𑁆𑀓𑀸 𑀓𑀗𑁆𑀔𑀘𑁆𑀙𑁂𑀤𑀉𑀫𑁆𑀫𑀸𑀤𑀫𑁄𑀳𑀸 𑀘, 𑀯𑀺𑀩𑁄𑀥𑁄 𑀧𑀩𑁄𑀥𑁄 𑀘, 𑀦𑀺𑀤𑁆𑀤𑀸𑀯𑁂𑀕𑀸 𑀦𑀺𑀤𑁆𑀤𑀸 𑀘, 𑀆𑀯𑁂𑀕𑀲𑀗𑁆𑀔𑀸𑀢𑁄 𑀲𑀫𑁆𑀪𑀫𑁄 𑀘, 𑀲𑀩𑀺𑀴𑀁 𑀮𑀚𑁆𑀚𑀸𑀲𑀳𑀺𑀢𑀁 𑀫𑀭𑀡𑀲𑀘𑀧𑀮𑀸𑀩𑁆𑀬𑀸𑀥𑀺 𑀫𑀭𑀡𑀜𑁆𑀘 𑀘𑀸𑀧𑀮𑁆𑀬𑀲𑀳𑀺𑀢𑀸 𑀩𑁆𑀬𑀸𑀥𑀺 𑀘𑁂𑀢𑀺. 𑀏𑀢𑁂 𑀢𑁂𑀢𑁆𑀢𑀺𑀁𑀲 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀓𑁆𑀓𑁄 𑀘 𑀲𑀗𑁆𑀓𑀸 𑀘𑁂𑀢𑀺 𑀘, 𑀲𑀫𑁄 𑀘 𑀥𑀺𑀢𑀺 𑀘 𑀚𑀴𑀢𑀸 𑀘𑁂𑀢𑀺 𑀘, 𑀤𑀻𑀦𑀢𑀸 𑀘 𑀉𑀕𑁆𑀕𑁄 𑀘 𑀅𑀮𑀲𑀢𑁆𑀢𑀜𑁆𑀘𑀸𑀢𑀺 𑀘, 𑀉𑀲𑁆𑀲𑀼𑀓𑀜𑁆𑀘𑀳𑀭𑀺𑀲𑁄 𑀘 𑀲𑀢𑀺 𑀘 𑀇𑀲𑁆𑀲𑀸 𑀘 𑀯𑀺𑀲𑀸𑀤𑁄 𑀘 𑀅𑀩𑀳𑀺𑀢𑁆𑀣𑀸 𑀘𑁂𑀢𑀺 𑀘, 𑀅𑀫𑀭𑀺𑀲𑁄 𑀘 𑀫𑀤𑁄 𑀘 𑀫𑀢𑀺 𑀘 𑀉𑀫𑁆𑀫𑀸𑀤𑁄 𑀘 𑀫𑁄𑀳𑁄 𑀘𑁂𑀢𑀺 𑀘, 𑀦𑀺𑀤𑁆𑀤𑀸 𑀘 𑀆𑀯𑁂𑀕𑁄 𑀘𑁂𑀢𑀺 𑀘, 𑀲𑀳 𑀩𑀺𑀴𑀸𑀬 𑀯𑀢𑁆𑀢𑀢𑀻𑀢𑀺 𑀘, 𑀲𑀳 𑀘𑀧𑀮𑁂𑀦 𑀘𑀸𑀧𑀮𑁆𑀬𑁂𑀦 𑀯𑀢𑁆𑀢𑀢𑀻𑀢𑀺 𑀘, 𑀲𑀘𑀧𑀮𑁄 𑀘 𑀲𑁄 𑀩𑁆𑀬𑀸𑀥𑀺𑀘𑁂𑀢𑀺 𑀘, 𑀫𑀭𑀡𑀜𑁆𑀘 𑀲𑀘𑀧𑀮𑀩𑁆𑀬𑀸𑀥𑀺 𑀘𑁂𑀢𑀺 𑀘 𑀯𑀸𑀓𑁆𑀬𑀁. 𑀫𑀭𑀡𑀲𑀘𑀧𑀮𑀸𑀩𑁆𑀬𑀸𑀥𑀻𑀢𑀺 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄. 𑀢𑀲𑁆𑀫𑀸 ‘‘𑀲𑀩𑀺𑀴’’𑀦𑁆𑀢𑀺 𑀧𑀤𑀁 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁 𑀳𑁄𑀢𑀺.

𑀮𑁄𑀓𑀲𑀪𑀸𑀯𑀲𑁆𑀲 𑀅𑀦𑁂𑀓𑀯𑀺𑀥𑀢𑁆𑀢𑀸 𑀏𑀓𑁄𑀬𑁂𑀯 𑀯𑀻𑀭𑀭𑀲𑁄 𑀉𑀲𑁆𑀲𑀸𑀳𑀯𑀢𑀸 𑀯𑀻𑀭𑀭𑀲𑀸𑀓𑀸𑀭𑁂𑀦 𑀅𑀲𑁆𑀲𑀸𑀤𑀦𑀻𑀬𑁄 𑀳𑁄𑀢𑀺, 𑀲𑁄𑀬𑁂𑀯 𑀪𑀻𑀭𑀼𑀦𑀸 𑀪𑀬𑀸𑀓𑀸𑀭𑁂𑀦 𑀅𑀲𑁆𑀲𑀸𑀤𑀦𑀻𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀏𑀓𑁂𑀓𑀲𑁆𑀲 𑀭𑀲𑀲𑁆𑀲 𑀇𑀫𑁂 𑀩𑀳𑀽 𑀩𑁆𑀬𑀪𑀺𑀘𑀸𑀭𑀺𑀦𑁄 𑀯𑀡𑁆𑀡𑁂𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑀢𑀺 𑀅𑀦𑁂𑀓𑀸𑀥𑀺𑀧𑁆𑀧𑀸𑀬𑀓𑁄 𑀮𑁄𑀓𑁄 𑀢𑁂𑀲𑀼 𑀓𑀺𑀜𑁆𑀘𑀺 𑀅𑀲𑁆𑀲𑀸𑀤𑁂𑀢𑀺. 𑀏𑀯𑀁 𑀲𑀢𑀺 𑀩𑀦𑁆𑀥𑁄 𑀲𑀩𑁆𑀩𑀚𑀦𑀲𑁆𑀲 𑀓𑀦𑁆𑀢𑁄 𑀳𑁄𑀢𑀺. 𑀢𑀲𑁆𑀲𑀁 𑀪𑀸𑀯𑀯𑀡𑁆𑀡𑀦𑀸𑀬𑀁 𑀬𑀲𑁆𑀫𑀸 𑀫𑀸𑀭𑁂𑀢𑀼𑀫𑀸𑀕𑀘𑁆𑀙𑀦𑁆𑀢𑀸𑀦𑀁 𑀲𑀢𑁆𑀢𑀽𑀦𑀁 𑀤𑀲𑁆𑀲𑀦𑀫𑁂𑀓𑀫𑁂𑀯 𑀢𑀗𑁆𑀔𑀡𑁂 𑀚𑀦𑀸𑀥𑀺𑀧𑁆𑀧𑀸𑀬𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀧𑀓𑀢𑀺𑀪𑀻𑀭𑀽𑀦𑀁 𑀧𑀼𑀭𑀺𑀲𑀸𑀦𑀁 𑀪𑀬𑀲𑁆𑀲 𑀘 𑀬𑀼𑀤𑁆𑀥𑀮𑁄𑀮𑀲𑁆𑀲 𑀉𑀲𑁆𑀲𑀸𑀳𑀦𑀲𑁆𑀲 𑀘 𑀓𑀸𑀭𑀡𑀁 𑀳𑁄𑀢𑀺. 𑀏𑀯𑀁 𑀦𑀝𑁂𑀦 𑀳𑀲𑀦𑀢𑁆𑀣𑀁 𑀓𑀢𑀯𑀺𑀓𑀢𑀫𑀸𑀪𑀭𑀡𑀜𑁆𑀘 𑀢𑀸𑀤𑀺𑀲𑀓𑀺𑀭𑀺𑀬𑀸 𑀘 𑀉𑀢𑁆𑀢𑀸𑀦𑀧𑀓𑀢𑀺𑀓𑀸𑀦𑀁 𑀧𑀼𑀭𑀺𑀲𑀸𑀦𑀁 𑀞𑀸𑀬𑀻𑀳𑀸𑀲𑀲𑁆𑀲 𑀘 𑀕𑀫𑁆𑀪𑀻𑀭𑀧𑀓𑀢𑀺𑀓𑀸𑀦𑀁 𑀩𑁆𑀬𑀪𑀺𑀘𑀸𑀭𑀻𑀳𑀸𑀲𑀲𑁆𑀲 𑀘 𑀳𑁂𑀢𑀼 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀪𑀸𑀯𑁂 𑀯𑀡𑁆𑀡𑁂𑀦𑁆𑀢𑁂𑀦 𑀓𑀯𑀺𑀦𑀸 𑀑𑀘𑀺𑀢𑁆𑀬𑀪𑀗𑁆𑀕𑀫𑀓𑀢𑁆𑀯𑀸 𑀲𑀓𑁆𑀓𑀘𑁆𑀘𑀫𑁄𑀘𑀺𑀢𑁆𑀬𑀁 𑀲𑀚𑁆𑀚𑁂𑀢𑁆𑀯𑀸 𑀪𑀸𑀯𑀧𑁆𑀧𑀓𑀸𑀲𑀓𑀸𑀦𑀺 𑀲𑀯𑀺𑀪𑀸𑀯𑀸𑀦𑀼𑀪𑀸𑀯𑀓𑀯𑀺𑀯𑀘𑀦𑀸𑀦𑀺 𑀯𑀡𑁆𑀡𑁂𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀪𑀸𑀯𑀸𑀯𑀩𑁄𑀥𑀓𑀯𑀺𑀪𑀸𑀯𑀸𑀤𑀻𑀦𑀁 𑀚𑀸𑀦𑀺𑀢𑀩𑁆𑀩𑀢𑁆𑀢𑀸 𑀢𑁂𑀳𑀺 𑀢𑁂𑀳𑀺 𑀪𑀸𑀯𑁂𑀳𑀺 𑀲𑀤𑁆𑀥𑀺𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀲𑀼 𑀪𑀸𑀯𑁂𑀲𑀼 𑀅𑀢𑁆𑀢𑀸𑀯𑀫𑀸𑀦𑀦𑀮𑀓𑁆𑀔𑀡𑁄 𑀦𑀺𑀩𑁆𑀩𑁂𑀤𑁄. 𑀇𑀢𑁆𑀣𑀻𑀦𑀁, 𑀳𑀻𑀦𑀸𑀦𑀁 [𑀳𑀻𑀦𑀸𑀘𑀸𑀭𑀸𑀦𑀁 (𑀓.)] 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀘𑁂, 𑀤𑀸𑀮𑀺𑀤𑁆𑀤𑀺𑀬𑀁 𑀆𑀮𑀫𑁆𑀩𑀡𑀯𑀺𑀪𑀸𑀯𑁄 𑀦𑀸𑀫, 𑀬𑁄𑀕𑀻𑀦𑀁 𑀘𑁂, 𑀢𑀣𑀸𑀯𑀩𑁄𑀥𑁄 𑀆𑀮𑀫𑁆𑀩𑀡𑀯𑀺𑀪𑀸𑀯𑁄, 𑀏𑀢𑁆𑀣 𑀅𑀲𑁆𑀲𑀼𑀧𑀢𑀦𑀘𑀺𑀦𑁆𑀢𑀸𑀤𑀺𑀓𑀁 𑀅𑀦𑀼𑀪𑀸𑀯𑁄 𑀦𑀸𑀫.

𑀯𑀺𑀢𑀓𑁆𑀓𑀲𑁆𑀲 𑀲𑀦𑁆𑀤𑁂𑀳𑁄 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁄 𑀦𑀸𑀫, 𑀲𑀺𑀭𑁄𑀓𑀫𑁆𑀧𑀸𑀤𑀺𑀓𑀁 𑀅𑀦𑀼𑀪𑀸𑀯𑁄 𑀦𑀸𑀫.

𑀲𑀗𑁆𑀓𑀸𑀬 𑀯𑀺𑀭𑀼𑀤𑁆𑀥𑀧𑁆𑀧𑀯𑀢𑁆𑀢𑀺 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁄, 𑀓𑀫𑁆𑀧𑀸𑀤𑀺𑀓𑁄 𑀅𑀦𑀼𑀪𑀸𑀯𑁄. 𑀉𑀧𑀭𑀺 ‘‘𑀯𑀺𑀪𑀸𑀯𑁄’’𑀢𑀺 𑀯𑀼𑀢𑁆𑀢𑁂 𑀆𑀮𑀫𑁆𑀩𑀡𑀼𑀤𑁆𑀤𑀻𑀧𑀦𑁂𑀲𑀼 𑀤𑁆𑀯𑀻𑀲𑀼 𑀬𑀁 𑀬𑀼𑀚𑁆𑀚𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁.

𑀔𑁂𑀤𑀮𑀓𑁆𑀔𑀡𑀲𑁆𑀲 𑀲𑀫𑀲𑁆𑀲 𑀕𑀫𑀦𑀸𑀤𑀺𑀓𑀁 𑀯𑀺𑀪𑀸𑀯𑁄, 𑀲𑁂𑀤𑀸𑀤𑀺 𑀅𑀦𑀼𑀪𑀸𑀯𑁄.

𑀲𑀦𑁆𑀢𑁄𑀲𑀮𑀓𑁆𑀔𑀡𑀸𑀬 𑀥𑀺𑀢𑀺𑀬𑀸 𑀜𑀸𑀡𑀸𑀤𑀺 𑀯𑀺𑀪𑀸𑀯𑁄, 𑀪𑁄𑀕𑁂𑀲𑀼 𑀅𑀮𑁄𑀮𑀪𑀸𑀯𑀸𑀤𑀺 𑀅𑀦𑀼𑀪𑀸𑀯𑁄.

𑀅𑀬𑁄𑀕𑁆𑀕𑀢𑀸𑀮𑀓𑁆𑀔𑀡𑀸𑀬 𑀚𑀴𑀢𑀸𑀬 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀁 𑀅𑀚𑀸𑀦𑀦𑀸𑀤𑀺 𑀯𑀺𑀪𑀸𑀯𑁄, 𑀯𑀺𑀯𑀝𑀦𑀬𑀦𑁂𑀳𑀺 𑀅𑀪𑀺𑀫𑀼𑀔𑀯𑀺𑀮𑁄𑀓𑀦𑀢𑀸𑀤𑀺 𑀅𑀦𑀼𑀪𑀸𑀯𑁄.

𑀘𑀺𑀢𑁆𑀢𑀲𑁆𑀲𑀦𑀺𑀢𑁆𑀢𑁂𑀚𑀮𑀓𑁆𑀔𑀡𑀸𑀬 𑀤𑀻𑀦𑀢𑀸𑀬 𑀤𑀼𑀕𑁆𑀕𑀢𑀢𑀸𑀤𑀺 𑀯𑀺𑀪𑀸𑀯𑁄, 𑀫𑀮𑀺𑀦𑀯𑀢𑁆𑀣𑀢𑀸𑀤𑀺 𑀅𑀦𑀼𑀪𑀸𑀯𑁄.

𑀤𑀸𑀭𑀼𑀡𑀢𑀸𑀮𑀓𑁆𑀔𑀡𑀲𑁆𑀲 𑀉𑀕𑁆𑀕𑀪𑀸𑀯𑀲𑁆𑀲𑀸𑀢𑀺𑀲𑀬𑀸𑀧𑀭𑀸𑀥𑀸𑀤𑀺 𑀯𑀺𑀪𑀸𑀯𑁄, 𑀢𑀚𑁆𑀚𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀅𑀮𑀲𑀢𑁆𑀢𑀲𑁆𑀲 𑀅𑀝𑁆𑀞𑀸𑀦𑀧𑀭𑀺𑀲𑀫𑀸𑀤𑀺 𑀯𑀺𑀪𑀸𑀯𑁄, 𑀯𑀗𑁆𑀓𑀺𑀓𑀪𑀸𑀯𑁄 𑀅𑀦𑀼𑀪𑀸𑀯𑁄.

𑀲𑀬𑀦𑀲𑀗𑁆𑀔𑀸𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀤𑁆𑀤𑀸𑀤𑀺 𑀯𑀺𑀪𑀸𑀯𑁄, 𑀅𑀲𑁆𑀲𑀸𑀤𑀸𑀤𑀺 𑀅𑀦𑀼𑀪𑀸𑀯𑁄. 𑀏𑀢𑁆𑀣 𑀅𑀲𑁆𑀲𑀸𑀤𑀦𑀁 𑀦𑀸𑀫 𑀲𑁂𑀬𑁆𑀬𑀲𑀼𑀔𑀧𑀲𑁆𑀲𑀲𑀼𑀔𑀸𑀤𑀺𑀓𑀁.

𑀘𑀺𑀢𑁆𑀢𑀓𑁆𑀔𑁄𑀪𑀲𑀗𑁆𑀔𑀸𑀢𑀲𑁆𑀲 𑀢𑀸𑀲𑀲𑁆𑀲 𑀕𑀚𑁆𑀚𑀺𑀢𑀸𑀤𑀺 𑀯𑀺𑀪𑀸𑀯𑁄, 𑀕𑀚𑁆𑀚𑀺𑀢𑀁 𑀦𑀸𑀫 𑀪𑀬𑀚𑀦𑀓𑀯𑀘𑀦𑀁. 𑀓𑁄𑀧𑁂𑀦 𑀓𑀫𑁆𑀧𑀦𑀸 𑀅𑀦𑀼𑀪𑀸𑀯𑁄.

𑀧𑀻𑀴𑀸𑀲𑀗𑁆𑀔𑀸𑀢𑀲𑁆𑀲 𑀕𑀺𑀮𑀸𑀦𑀲𑁆𑀲 𑀆𑀬𑀸𑀲𑀧𑀺𑀧𑀸𑀲𑀸𑀤𑀺 𑀯𑀺𑀪𑀸𑀯𑁄, 𑀤𑀼𑀩𑁆𑀩𑀡𑁆𑀡𑀢𑀸𑀤𑀺 𑀅𑀦𑀼𑀪𑀸𑀯𑁄.

𑀅𑀦𑀼𑀭𑀽𑀧𑀓𑀸𑀮𑀲𑁆𑀲 𑀅𑀦𑁄𑀮𑁄𑀓𑀦𑀲𑁆𑀲 𑀉𑀲𑁆𑀲𑀼𑀓𑁆𑀓𑀲𑁆𑀲 𑀭𑀫𑁆𑀫𑀯𑀢𑁆𑀣𑀼𑀤𑀲𑁆𑀲𑀦𑀺𑀘𑁆𑀙𑀸𑀤𑀺 𑀯𑀺𑀪𑀸𑀯𑁄, 𑀢𑀼𑀭𑀺𑀢𑀢𑀸𑀤𑀺 𑀅𑀦𑀼𑀪𑀸𑀯𑁄.

𑀘𑁂𑀢𑁄𑀧𑀲𑀸𑀤𑀮𑀓𑁆𑀔𑀡𑀲𑁆𑀲 𑀳𑀭𑀺𑀲𑀲𑁆𑀲 𑀫𑀗𑁆𑀕𑀮𑀓𑀻𑀴𑀸𑀤𑀺 𑀯𑀺𑀪𑀸𑀯𑁄, 𑀲𑀦𑁆𑀢𑁄𑀲𑀯𑀘𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀲𑀭𑀡𑀮𑀓𑁆𑀔𑀡𑀸𑀬 𑀲𑀢𑀺𑀬𑀸 𑀲𑀜𑁆𑀜𑀸𑀡𑀤𑀲𑁆𑀲𑀦𑀸𑀤𑀺 𑀯𑀺𑀪𑀸𑀯𑁄, 𑀪𑀫𑀼𑀓𑁆𑀔𑁂𑀧𑀸𑀤𑀺 𑀅𑀦𑀼𑀪𑀸𑀯𑁄.

𑀧𑀭𑀲𑀫𑁆𑀧𑀢𑁆𑀢𑀺𑀅𑀲𑀳𑀦𑀮𑀓𑁆𑀔𑀡𑀸𑀬 𑀇𑀲𑁆𑀲𑀸𑀬 𑀤𑀼𑀚𑁆𑀚𑀦𑀪𑀸𑀯𑀕𑀩𑁆𑀩𑀸𑀤𑀺 𑀯𑀺𑀪𑀸𑀯𑁄, 𑀤𑁄𑀲𑀓𑀣𑀦𑀸𑀯𑀚𑀸𑀦𑀦𑀸𑀤𑀺 𑀅𑀦𑀼𑀪𑀯𑁄.

𑀔𑁂𑀤𑀮𑀓𑁆𑀔𑀡𑀲𑁆𑀲 𑀯𑀺𑀲𑀸𑀤𑀲𑁆𑀲 𑀆𑀭𑀤𑁆𑀥𑀓𑀸𑀭𑀺𑀬𑀸𑀲𑀺𑀤𑁆𑀥𑀺𑀓𑀸𑀭𑀺𑀬𑀩𑁆𑀬𑀸𑀧𑀢𑁆𑀢𑀺𑀆𑀤𑀺 𑀯𑀺𑀪𑀸𑀯𑁄, 𑀫𑀦𑁄𑀲𑀦𑁆𑀢𑀸𑀧𑀸𑀤𑀺 𑀅𑀦𑀼𑀪𑀸𑀯𑁄.

𑀆𑀓𑀸𑀭𑀲𑀁𑀯𑀭𑀡𑀮𑀓𑁆𑀔𑀡𑀸𑀬, 𑀭𑀲𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸𑀬 𑀯𑀸 𑀅𑀩𑀳𑀺𑀢𑁆𑀣𑀬𑀮𑀚𑁆𑀚𑀸𑀤𑀺 𑀯𑀺𑀪𑀸𑀯𑁄, 𑀢𑀤𑀜𑁆𑀜𑀓𑁆𑀭𑀺𑀬𑀸𑀓𑀭𑀡𑀁, 𑀅𑀥𑁄𑀫𑀼𑀔𑀓𑀭𑀡𑀁, 𑀧𑀸𑀤𑁂𑀳𑀺 𑀪𑀽𑀫𑀺𑀔𑀡𑀦𑀦𑁆𑀢𑀺𑀆𑀤𑀺 𑀅𑀦𑀼𑀪𑀸𑀯𑁄.

𑀘𑀺𑀦𑁆𑀢𑀸𑀬 𑀇𑀝𑁆𑀞𑀢𑁆𑀣𑀸𑀮𑀸𑀪𑀸𑀤𑀻 𑀯𑀺𑀪𑀸𑀯𑁄, 𑀫𑀓𑀼𑀮𑀺𑀢𑀦𑀬𑀦𑀸𑀤𑀺 𑀅𑀥𑁄𑀔𑀺𑀢𑁆𑀢𑀘𑀓𑁆𑀔𑀸𑀤𑀺 𑀯𑀸 𑀅𑀦𑀼𑀪𑀸𑀯𑁄.

𑀕𑀩𑁆𑀩𑀲𑁆𑀲 𑀇𑀲𑁆𑀲𑀭𑀺𑀬𑀸𑀤𑀺 𑀯𑀺𑀪𑀸𑀯𑁄, 𑀅𑀯𑀚𑀸𑀦𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀅𑀧𑀫𑀸𑀭𑀲𑁆𑀲 𑀬𑀓𑁆𑀔𑀧𑀻𑀴𑀸𑀤𑀺 𑀯𑀺𑀪𑀸𑀯𑁄, 𑀪𑀽𑀫𑀺𑀧𑀢𑀦𑀸𑀤𑀬𑁄 𑀅𑀦𑀼𑀪𑀸𑀯𑁄.

𑀅𑀓𑁆𑀔𑀫𑀮𑀓𑁆𑀔𑀡𑀲𑁆𑀲 𑀅𑀫𑀭𑀺𑀲𑀲𑁆𑀲 𑀅𑀯𑀫𑀸𑀦𑀦𑀸𑀤𑀺 𑀯𑀺𑀪𑀸𑀯𑁄, 𑀲𑀺𑀭𑁄𑀓𑀫𑁆𑀧𑀦𑀢𑀚𑁆𑀚𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀧𑀫𑀸𑀤𑀸𑀥𑀺𑀓𑁆𑀓𑀮𑀓𑁆𑀔𑀡𑀲𑁆𑀲 𑀫𑀤𑀲𑁆𑀲 𑀲𑀦𑁆𑀢𑁄𑀲𑀧𑀸𑀦𑀁 𑀯𑀺𑀪𑀸𑀯𑁄, 𑀓𑀫𑁆𑀧𑀫𑀸𑀦𑀳𑀢𑁆𑀣𑀧𑀸𑀤𑀯𑀘𑀦𑀕𑀫𑀦𑀳𑀸𑀲𑀸𑀤𑀻 𑀅𑀦𑀼𑀪𑀸𑀯𑁄.

𑀓𑀗𑁆𑀔𑀸𑀘𑁆𑀙𑁂𑀤𑀦𑀮𑀓𑁆𑀔𑀡𑀸𑀬 𑀫𑀢𑀺𑀬𑀸 𑀉𑀧𑀤𑁂𑀲𑀸𑀤𑀺 𑀯𑀺𑀪𑀸𑀯𑁄, 𑀫𑀼𑀔𑀲𑀦𑁆𑀢𑁄𑀲𑀸𑀤𑀺 𑀅𑀦𑀼𑀪𑀸𑀯𑁄.

𑀅𑀦𑀼𑀧𑀧𑀭𑀺𑀓𑁆𑀔𑀓𑀸𑀭𑀺𑀢𑀸𑀮𑀓𑁆𑀔𑀡𑀲𑁆𑀲 𑀉𑀫𑁆𑀫𑀸𑀤𑀲𑁆𑀲 𑀲𑀦𑁆𑀦𑀺𑀧𑀸𑀢𑀚𑁆𑀚𑀭𑀬𑀓𑁆𑀔𑀸𑀤𑀺 𑀯𑀺𑀪𑀸𑀯𑁄, 𑀅𑀓𑀸𑀭𑀡𑀭𑁄𑀤𑀦𑀳𑀲𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀫𑀼𑀬𑁆𑀳𑀦𑀮𑀓𑁆𑀔𑀡𑀲𑁆𑀲 𑀫𑁄𑀳𑀲𑁆𑀲 𑀅𑀥𑀺𑀓𑀪𑀬𑀸𑀤𑀺 𑀯𑀺𑀪𑀸𑀯𑁄, 𑀲𑀪𑀸𑀯𑀸𑀦𑀯𑀩𑁄𑀥𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀦𑀺𑀤𑁆𑀤𑀸𑀧𑀕𑀫𑀲𑀗𑁆𑀔𑀸𑀢𑀲𑁆𑀲 𑀯𑀺𑀩𑁄𑀥𑀲𑁆𑀲 𑀓𑀸𑀮𑀧𑀭𑀺𑀡𑀸𑀫𑀸𑀤𑀺 𑀆𑀮𑁄𑀓𑀲𑀭𑀡𑀸𑀤𑀺 𑀯𑀸 𑀯𑀺𑀪𑀸𑀯𑁄, 𑀅𑀓𑁆𑀔𑀺𑀫𑀤𑁆𑀤𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀫𑀦𑁄𑀲𑀫𑁆𑀧𑀻𑀴𑀦𑀮𑀓𑁆𑀔𑀡𑀸𑀬 𑀦𑀺𑀤𑁆𑀤𑀸𑀬 𑀓𑀲𑁆𑀲𑀘𑀺 𑀅𑀘𑀺𑀦𑁆𑀢𑀦𑀅𑀓𑀭𑀡𑀸𑀤𑀺 𑀯𑀺𑀪𑀸𑀯𑁄, 𑀅𑀓𑁆𑀔𑀺𑀧𑀺𑀤𑀳𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀪𑀬𑀸𑀕𑀫𑀦𑀮𑀓𑁆𑀔𑀡𑀲𑁆𑀲 𑀆𑀯𑁂𑀕𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀤𑀲𑁆𑀲𑀦𑀸𑀤𑀺 𑀯𑀺𑀪𑀸𑀯𑁄, 𑀉𑀢𑁆𑀭𑀸𑀲𑀓𑀫𑁆𑀧𑀸𑀤𑀺 𑀅𑀦𑀼𑀪𑀸𑀯𑁄.

𑀮𑀚𑁆𑀚𑀸𑀮𑀓𑁆𑀔𑀡𑀸𑀬 𑀩𑀺𑀴𑀸𑀬 𑀤𑀼𑀭𑀸𑀘𑀸𑀭𑀸𑀤𑀺 𑀯𑀺𑀪𑀸𑀯𑁄, 𑀅𑀥𑁄𑀫𑀼𑀔𑀢𑀸𑀤𑀺 𑀅𑀦𑀼𑀪𑀸𑀯𑁄.

𑀫𑀭𑀡𑀲𑁆𑀲 𑀲𑀢𑁆𑀣𑀧𑀳𑀸𑀭𑀭𑁄𑀕𑀸𑀤𑀺 𑀯𑀺𑀪𑀸𑀯𑁄, 𑀫𑀼𑀔𑀯𑀺𑀓𑀸𑀭𑀸𑀤𑀺 𑀅𑀦𑀼𑀪𑀸𑀯𑁄.

𑀘𑀸𑀧𑀮𑁆𑀮𑀲𑁆𑀲 𑀭𑀸𑀕𑀤𑁄𑀲𑀸𑀤𑀺 𑀯𑀺𑀪𑀸𑀯𑁄, 𑀅𑀢𑁆𑀢𑀦𑁄 𑀲𑀘𑁆𑀙𑀦𑁆𑀤𑀘𑀭𑀡𑀸𑀤𑀺 𑀅𑀦𑀼𑀪𑀸𑀯𑁄.

𑀩𑁆𑀬𑀸𑀥𑀺𑀬𑀸 𑀯𑀸𑀢𑀧𑀺𑀢𑁆𑀢𑀸𑀤𑀻𑀦𑀁 𑀉𑀲𑁆𑀲𑀤𑀪𑀸𑀯𑀸𑀤𑀺 𑀯𑀺𑀪𑀸𑀯𑁄, 𑀦𑀺𑀢𑁆𑀣𑀼𑀦𑀦𑀸𑀤𑀺 𑀅𑀦𑀼𑀪𑀸𑀯𑁄.

𑀇𑀫𑀲𑁆𑀫𑀺𑀁 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 𑀅𑀤𑀲𑁆𑀲𑀺𑀢𑀲𑀼𑀔𑀼𑀫𑀪𑁂𑀤𑀸 𑀅𑀜𑁆𑀜𑀸𑀧𑀺 𑀘𑀺𑀢𑁆𑀢𑀯𑀼𑀢𑁆𑀢𑀺𑀯𑀺𑀲𑁂𑀲𑀸 𑀲𑀦𑁆𑀢𑀺, 𑀢𑁂𑀲𑀼 𑀇𑀘𑁆𑀙𑀸𑀲𑀪𑀸𑀯𑀸 𑀲𑀩𑁆𑀩𑁂 𑀪𑁂𑀤𑀸 𑀓𑀸𑀫𑀭𑀢𑀺𑀬𑀜𑁆𑀘, 𑀤𑁄𑀲𑀧𑀓𑀸𑀭𑀸 𑀓𑁄𑀥𑀅𑀫𑀭𑀺𑀲𑀇𑀲𑁆𑀲𑀸𑀤𑀻𑀲𑀼 𑀘, 𑀤𑀼𑀓𑁆𑀔𑀲𑀪𑀸𑀯𑀸 𑀲𑁄𑀓𑀲𑀫𑀩𑁆𑀬𑀸𑀥𑀺𑀕𑀺𑀮𑀸𑀦𑀯𑀺𑀲𑀸𑀤𑀸𑀤𑀻𑀲𑀼 𑀘, 𑀧𑀺𑀢𑀺𑀆𑀤𑀬𑁄 𑀳𑀭𑀺𑀲𑁂 𑀘 𑀅𑀦𑁆𑀢𑁄𑀕𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑀫𑀸𑀦𑀸𑀦𑀁 𑀲𑀗𑁆𑀕𑀳𑁂 𑀲𑀢𑀺𑀧𑀺 𑀢𑀸𑀲𑀢𑁄 𑀪𑀬𑀲𑁆𑀲 𑀘, 𑀲𑀗𑁆𑀓𑀸𑀬 𑀅𑀫𑀭𑀺𑀲𑁆𑀲 𑀘, 𑀅𑀫𑀭𑀺𑀲𑀢𑁄 𑀇𑀲𑁆𑀲𑀸𑀬 𑀘, 𑀕𑀺𑀮𑀸𑀦𑀢𑁄 𑀲𑀫𑀲𑁆𑀲 𑀘, 𑀦𑀺𑀤𑁆𑀤𑀸𑀬 𑀲𑀼𑀢𑁆𑀢𑀲𑁆𑀲 𑀘, 𑀉𑀲𑁆𑀲𑀼𑀓𑁆𑀓𑀢𑁄 𑀘𑀧𑀮𑀢𑀸𑀬 𑀘, 𑀫𑁄𑀳𑀢𑁄 𑀯𑀓𑁆𑀔𑀫𑀸𑀦𑀧𑀮𑀬𑀲𑁆𑀲 𑀘 𑀧𑀸𑀓𑀝𑀯𑀺𑀲𑁂𑀲𑁂𑀦 𑀅𑀜𑁆𑀜𑀣𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀸𑀢𑁆𑀢𑀺𑀓𑀪𑀸𑀯𑀅𑀥𑀺𑀧𑁆𑀧𑀸𑀬

𑁩𑁪𑁫. 𑀲𑀫𑀸𑀳𑀺𑀢𑀢𑁆𑀢𑀧𑁆𑀧𑀪𑀯𑀁, 𑀲𑀢𑁆𑀢𑀁 𑀢𑁂𑀦𑁄’𑀧𑀧𑀸𑀤𑀺𑀢𑀸;

𑀲𑀸𑀢𑁆𑀢𑀺𑀓𑀸’𑀧𑁆𑀬’𑀦𑀼𑀪𑀸𑀯𑀢𑁆𑀢𑁂, 𑀯𑀺𑀲𑀼𑀁 𑀪𑀸𑀯𑀸𑀪𑀯𑀦𑁆𑀢𑀺 𑀢𑁂.

𑁩𑁪𑁫. 𑀲𑀸𑀢𑁆𑀢𑀺𑀓𑁂 𑀯𑀤𑀢𑀺 ‘‘𑀲𑀫𑀸𑀳𑀺𑀢𑁂’’𑀘𑁆𑀘𑀸𑀤𑀺𑀦𑀸. 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀢𑀸𑀪𑀸𑀯𑀸𑀧𑀸𑀤𑀦𑁂𑀦 𑀓𑀢𑀲𑀫𑀸𑀥𑀸𑀦𑁄 𑀅𑀢𑁆𑀢𑀸 𑀘𑀺𑀢𑁆𑀢𑀁 𑀢𑀢𑁄 𑀧𑀪𑀯𑀁 𑀉𑀧𑁆𑀧𑀦𑁆𑀦𑀁 𑀬𑀁, 𑀢𑀁 𑀲𑀢𑁆𑀢𑀁 𑀦𑀸𑀫. 𑀢𑁂𑀦 𑀲𑀢𑁆𑀢𑁂𑀦 𑀉𑀧𑀧𑀸𑀤𑀺𑀢𑀸 𑀦𑀺𑀩𑁆𑀩𑀢𑁆𑀢𑀺𑀢𑀸 𑀣𑀫𑁆𑀪𑀸𑀤𑀬𑁄 𑀲𑀸𑀢𑁆𑀢𑀺𑀓𑀸 𑀯𑀼𑀘𑁆𑀘𑀦𑁆𑀢𑁂. 𑀢𑁂 𑀘 𑀧𑀼𑀦 𑀅𑀦𑀼𑀪𑀸𑀯𑀸𑀧𑀺 𑀪𑀯𑀦𑁆𑀢𑀺 𑀣𑀫𑁆𑀪𑀸𑀤𑀺𑀪𑀸𑀯𑀲𑀁𑀲𑀽𑀘𑀦𑀲𑀪𑀸𑀯𑀯𑀺𑀓𑀸𑀭𑀭𑀽𑀧𑀢𑁆𑀢𑀸. 𑀢𑀜𑁆𑀘 ‘‘𑀘𑀺𑀢𑁆𑀢𑀯𑀼𑀢𑁆𑀢𑀺𑀯𑀺𑀲𑁂𑀲𑀢𑁆𑀢𑀸’’𑀇𑀘𑁆𑀘𑀸𑀤𑀺𑀦𑀸 𑀯𑀓𑁆𑀔𑀢𑀺. 𑀢𑁂𑀦𑀸𑀳 ‘‘𑀅𑀦𑀼𑀪𑀸𑀯𑀢𑁆𑀢𑁂𑀧𑀻’’𑀢𑀺. 𑀏𑀯𑀁 𑀲𑀢𑁆𑀬𑀧𑀺 𑀢𑁂 𑀲𑀸𑀢𑁆𑀢𑀺𑀓𑀸 𑀯𑀺𑀲𑀼𑀁 𑀧𑀼𑀣𑀕𑁂𑀯 𑀪𑀸𑀯𑀸 𑀪𑀯𑀦𑁆𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀘𑀺𑀢𑁆𑀢𑀪𑀯𑀢𑁆𑀢𑀯𑀺𑀭𑀽𑀧𑀢𑁆𑀢𑀸 𑀢𑁂𑀲𑀦𑁆𑀢𑀺.

𑁩𑁪𑁫. 𑀇𑀤𑀸𑀦𑀺 𑀉𑀤𑁆𑀤𑁂𑀲𑀓𑁆𑀓𑀫𑁂𑀦𑀸𑀥𑀺𑀕𑀢𑀓𑁂𑀯𑀮𑀪𑀸𑀯𑀲𑀗𑁆𑀔𑀸𑀢𑀁 𑀲𑀸𑀢𑁆𑀢𑀺𑀓𑀸𑀪𑀸𑀯𑀁 𑀤𑀲𑁆𑀲𑁂𑀢𑀺 ‘‘𑀲𑀫𑀸𑀳𑀺𑀢’’𑀇𑀘𑁆𑀘𑀸𑀤𑀺𑀦𑀸. 𑀲𑀫𑀸𑀳𑀺𑀢𑀢𑁆𑀢𑀧𑁆𑀧𑀪𑀯𑀁 𑀏𑀓𑀕𑁆𑀕𑀢𑀸𑀪𑀸𑀯𑀸𑀧𑀸𑀤𑀦𑁂𑀦 𑀓𑀢𑀲𑀫𑀸𑀥𑀸𑀦𑀘𑀺𑀢𑁆𑀢𑀢𑁄 𑀲𑀫𑁆𑀪𑀽𑀢𑀁 𑀲𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀮𑀸𑀪𑀸𑀮𑀸𑀪𑀸𑀤𑀻𑀲𑀼 𑀏𑀓𑀸𑀓𑀸𑀭𑀲𑁆𑀲 𑀳𑁂𑀢𑀼𑀦𑀸 𑀣𑀺𑀭𑀪𑀸𑀯𑁂𑀦 𑀉𑀧𑀧𑀸𑀤𑀺𑀢𑀸 𑀦𑀺𑀧𑁆𑀨𑀸𑀤𑀺𑀢𑀸 𑀣𑀫𑁆𑀪𑀸𑀤𑀬𑁄 𑀲𑀸𑀢𑁆𑀢𑀺𑀓𑀸 𑀦𑀸𑀫 𑀪𑀯𑀦𑁆𑀢𑀺. 𑀢𑁂 𑀲𑀸𑀢𑁆𑀢𑀺𑀓𑀸 𑀅𑀦𑀼𑀪𑀸𑀯𑀢𑁆𑀢𑁂𑀧𑀺 𑀘𑀺𑀢𑁆𑀢𑀸𑀓𑀸𑀭𑀲𑀗𑁆𑀔𑀸𑀢𑀣𑀫𑁆𑀪𑀸𑀤𑀺𑀧𑀓𑀸𑀲𑀦𑀲𑀪𑀸𑀯𑀯𑀺𑀓𑀸𑀭𑀲𑀭𑀽𑀧𑀢𑁆𑀢𑀸 𑀅𑀢𑁆𑀢𑀦𑁄 𑀅𑀦𑀼𑀪𑀸𑀯𑀢𑁆𑀢𑁂 𑀲𑀢𑀺𑀧𑀺 𑀯𑀺𑀲𑀼𑀁 𑀪𑀸𑀯𑀸 𑀪𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢 ‘‘𑀘𑀺𑀢𑁆𑀢𑀯𑀼𑀢𑁆𑀢𑀺𑀯𑀺𑀲𑁂𑀲𑀸 𑀢𑀼, 𑀪𑀸𑀯𑀬𑀦𑁆𑀢𑀺 𑀭𑀲𑁂 𑀬𑀢𑁄’’𑀢𑀺𑀆𑀤𑀺𑀦𑀸 𑀪𑀸𑀯𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀇𑀫𑁂 𑀲𑀸𑀢𑁆𑀢𑀺𑀓𑀸𑀪𑀸𑀯𑀸𑀦𑀼𑀪𑀸𑀯𑀯𑀲𑁂𑀦 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀲𑀫𑀸𑀳𑀺𑀢𑁄 𑀘 𑀲𑁄 𑀅𑀢𑁆𑀢𑀸 𑀘𑁂𑀢𑀺 𑀘, 𑀢𑀢𑁄 𑀧𑀪𑀯𑀫𑀺𑀢𑀺 𑀘, 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀘 𑀲𑁄 𑀅𑀢𑁆𑀢𑀸 𑀘𑁂𑀢𑀺 𑀘, 𑀲𑀢𑁆𑀢𑀢𑁄 𑀪𑀯𑀦𑁆𑀢𑀻𑀢𑀺 𑀘, 𑀲𑀢𑁆𑀢𑁂𑀦 𑀉𑀧𑁆𑀧𑀸𑀤𑀺𑀢𑀸𑀢𑀺 𑀘, 𑀅𑀦𑀼𑀪𑀸𑀯𑀸𑀦𑀁 𑀪𑀸𑀯𑁄𑀢𑀺 𑀘 𑀯𑀸𑀓𑁆𑀬𑀁. 𑀅𑀧𑀻𑀢𑀺 𑀅𑀦𑀼𑀕𑁆𑀕𑀳𑀢𑁆𑀣𑁂 𑀦𑀺𑀧𑀸𑀢𑁄.

𑀲𑀸𑀢𑁆𑀢𑀺𑀓𑀪𑀸𑀯𑀧𑁆𑀧𑀪𑁂𑀤

𑁩𑁪𑁬. 𑀣𑀫𑁆𑀪𑁄 𑀧𑀮𑀬𑀭𑁄𑀫𑀜𑁆𑀘𑀸,

𑀢𑀣𑀸 𑀲𑁂𑀤𑀲𑁆𑀲𑀼𑀯𑁂𑀧𑀣𑀼;

𑀯𑁂𑀯𑀡𑁆𑀡𑀺𑀬𑀁 𑀯𑀺𑀲𑁆𑀲𑀭𑀢𑀸,

𑀪𑀸𑀯𑀸’𑀝𑁆𑀞𑁂’𑀢𑁂 𑀢𑀼 𑀲𑀸𑀢𑁆𑀢𑀺𑀓𑀸.

𑁩𑁪𑁬. 𑀢𑁂 𑀤𑀲𑁆𑀲𑁂𑀢𑀺 ‘‘𑀣𑀫𑁆𑀪𑁄’’𑀇𑀘𑁆𑀘𑀸𑀤𑀺𑀦𑀸. 𑀏𑀢𑁆𑀣 𑀣𑀫𑁆𑀪𑁄 𑀅𑀯𑀺𑀲𑁆𑀲𑀭𑀓𑀸𑀬𑀘𑀺𑀢𑁆𑀢𑀢𑀸. 𑀧𑀮𑀬𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀫𑀢𑁆𑀢𑀸𑀯𑀲𑁂𑀲𑁄 𑀲𑀼𑀢𑁆𑀢𑀸𑀯𑀢𑁆𑀣𑀸𑀲𑀪𑀸𑀯𑁄 𑀦𑀺𑀤𑁆𑀤𑀸𑀧𑀪𑀯𑁄. 𑀲𑀼𑀩𑁆𑀬𑀢𑁆𑀢𑀮𑀓𑁆𑀔𑀡𑀸 𑀲𑁂𑀲𑀸.

𑁩𑁪𑁬. 𑀇𑀤𑀸𑀦𑀺 𑀲𑀸𑀢𑁆𑀢𑀺𑀓𑁂 𑀤𑀲𑁆𑀲𑁂𑀢𑀺 ‘‘𑀣𑀫𑁆𑀪𑁄’’𑀇𑀘𑁆𑀘𑀸𑀤𑀺𑀦𑀸. 𑀣𑀫𑁆𑀪𑁄 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀯𑀺𑀲𑀭𑀪𑀸𑀯𑀲𑀗𑁆𑀔𑀸𑀢𑁄 𑀘 𑀧𑀮𑀬𑀭𑁄𑀫𑀜𑁆𑀘𑀸 𑀦𑀺𑀤𑁆𑀤𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀫𑀢𑁆𑀢𑀸𑀢𑀺𑀭𑀺𑀢𑁆𑀢𑀲𑀼𑀢𑁆𑀢𑀸𑀯𑀢𑁆𑀣𑀸 𑀘 𑀧𑀲𑀸𑀤𑀸𑀤𑀺𑀲𑀫𑁆𑀪𑀯𑁄 𑀭𑁄𑀫𑀼𑀕𑁆𑀕𑀫𑁄 𑀘 𑀢𑀣𑀸 𑀏𑀯𑀁 𑀲𑁂𑀤𑀲𑁆𑀲𑀼𑀯𑁂𑀧𑀣𑀼 𑀘 𑀪𑀬𑀸𑀤𑀻𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀤𑀸𑀳𑁄 𑀘 𑀲𑀦𑁆𑀢𑁄𑀲𑀸𑀤𑀻𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀅𑀲𑁆𑀲𑀼 𑀘 𑀓𑀫𑁆𑀧𑀸 𑀘 𑀯𑁂𑀯𑀡𑁆𑀡𑀺𑀬𑀁 𑀯𑀺𑀭𑀽𑀧𑀢𑀸 𑀘 𑀯𑀺𑀲𑁆𑀲𑀭𑀢𑀸 𑀯𑀺𑀭𑀽𑀧𑀲𑀤𑁆𑀤𑀢𑀸 𑀘𑀸𑀢𑀺 𑀏𑀢𑁂 𑀅𑀝𑁆𑀞 𑀲𑀸𑀢𑁆𑀢𑀺𑀓𑀸 𑀪𑀸𑀯𑀸 𑀦𑀸𑀫 𑀳𑁄𑀦𑁆𑀢𑀺. 𑀭𑁄𑀫𑀸𑀦𑀁 𑀅𑀜𑁆𑀘𑁄 𑀉𑀕𑁆𑀕𑀫𑁄𑀢𑀺 𑀘, 𑀧𑀮𑀬𑁄 𑀘 𑀭𑁄𑀫𑀜𑁆𑀘𑁄 𑀘𑁂𑀢𑀺 𑀘, 𑀯𑁂𑀧𑀦𑀁 𑀓𑀫𑁆𑀧𑀦𑀫𑀺𑀢𑀺 𑀘, 𑀲𑁂𑀤𑁄 𑀘 𑀅𑀲𑁆𑀲𑀼 𑀘 𑀯𑁂𑀧𑀣𑀼 𑀘𑀸𑀢𑀺 𑀘, 𑀯𑀺𑀭𑀽𑀧𑁄 𑀯𑀡𑁆𑀡𑁄 𑀅𑀲𑁆𑀲𑁂𑀢𑀺 𑀘, 𑀢𑀲𑁆𑀲 𑀪𑀸𑀯𑁄𑀢𑀺 𑀘, 𑀯𑀺𑀭𑀽𑀧𑁄 𑀲𑀭𑁄 𑀅𑀲𑁆𑀲𑁂𑀢𑀺 𑀘, 𑀢𑀲𑁆𑀲 𑀪𑀸𑀯𑁄𑀢𑀺 𑀘 𑀯𑀸𑀓𑁆𑀬𑀁.

𑁩𑁪𑁭. 𑀬𑀤𑀸 𑀭𑀢𑁆𑀬𑀸𑀤𑀬𑁄 𑀪𑀸𑀯𑀸,

𑀞𑀺𑀢𑀺𑀲𑀻𑀮𑀸 𑀦 𑀳𑁄𑀦𑁆𑀢𑀺 𑀘𑁂;

𑀢𑀤𑀸 𑀲𑀩𑁆𑀩𑁂𑀧𑀺 𑀢𑁂 𑀪𑀸𑀯𑀸,

𑀪𑀯𑀦𑁆𑀢𑀺 𑀩𑁆𑀬𑀪𑀺𑀘𑀸𑀭𑀺𑀦𑁄.

𑁩𑁪𑁭. 𑀦 𑀓𑁂𑀯𑀮𑀁 𑀯𑀼𑀢𑁆𑀢𑀸𑀬𑁂𑀯 𑀩𑁆𑀬𑀪𑀺𑀘𑀸𑀭𑀺𑀦𑁄, 𑀭𑀢𑁆𑀬𑀸𑀤𑀬𑁄𑀧𑀻𑀢𑀺 𑀆𑀳 ‘‘𑀬𑀤𑀸’’𑀇𑀘𑁆𑀘𑀸𑀤𑀺. 𑀪𑀯𑀦𑁆𑀢𑀺 𑀩𑁆𑀬𑀪𑀺𑀘𑀸𑀭𑀺𑀦𑁄𑀢𑀺 𑀬𑀣𑀸𑀬𑁄𑀕𑀁 𑀬𑀣𑀸𑀲𑀫𑁆𑀩𑀦𑁆𑀥𑀁 𑀩𑁆𑀬𑀪𑀺𑀘𑀸𑀭𑀺𑀦𑁄 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀩𑁄𑀥𑀁.

𑁩𑁪𑁭. 𑀇𑀤𑀸𑀦𑀺 𑀦𑀺𑀩𑁆𑀩𑁂𑀤𑀸𑀤𑀬𑁄 𑀯𑀺𑀬 𑀭𑀢𑀺𑀳𑀸𑀲𑀸𑀤𑀬𑁄𑀧𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂 𑀩𑁆𑀬𑀪𑀺𑀘𑀸𑀭𑀺𑀦𑁄𑀧𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀬𑀤𑀸’’ 𑀇𑀘𑁆𑀘𑀸𑀤𑀺𑀦𑀸. 𑀭𑀢𑁆𑀬𑀸𑀤𑀬𑁄 𑀭𑀢𑀺𑀳𑀸𑀲𑀸𑀤𑀬𑁄 𑀪𑀸𑀯𑀸 𑀦𑀯 𑀞𑀸𑀬𑀻𑀪𑀸𑀯𑀸 𑀬𑀤𑀸 𑀞𑀺𑀢𑀺𑀲𑀻𑀮𑀸 𑀦 𑀳𑁄𑀦𑁆𑀢𑀺 𑀘𑁂 𑀯𑀺𑀭𑁄𑀥𑀻𑀳𑀺 𑀢𑁂𑀳𑀺 𑀢𑁂𑀳𑀺 𑀪𑀸𑀯𑀦𑁆𑀢𑀭𑁂𑀳𑀺 𑀩𑁆𑀬𑀯𑀳𑀺𑀢𑀢𑁆𑀢𑀸 𑀲𑀪𑀸𑀯𑀢𑁄 𑀞𑀺𑀢𑀺𑀲𑀪𑀸𑀯𑀸 𑀬𑀤𑀺 𑀦 𑀳𑁄𑀦𑁆𑀢𑀺, 𑀢𑀤𑀸 𑀢𑁂 𑀪𑀸𑀯𑀸 𑀭𑀢𑁆𑀬𑀸𑀤𑀬𑁄 𑀲𑀩𑁆𑀩𑁂𑀧𑀺 𑀩𑁆𑀬𑀪𑀺𑀘𑀸𑀭𑀺𑀦𑁄 𑀪𑀯𑀦𑁆𑀢𑀻𑀢𑀺. 𑀬𑀣𑀸𑀲𑀓𑀁 𑀩𑁆𑀬𑀪𑀺𑀘𑀸𑀭𑀺𑀢𑀸𑀦𑀼𑀭𑀽𑀧𑀯𑀺𑀪𑀸𑀯𑀸𑀦𑀼𑀪𑀸𑀯𑀸𑀦𑀁 𑀬𑁄𑀕𑀸𑀦𑀼𑀭𑀽𑀧𑁂𑀦 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀸 𑀳𑁄𑀦𑁆𑀢𑀺. 𑀭𑀢𑀺𑀆𑀤𑀺 𑀬𑁂𑀲𑀁 𑀳𑀸𑀲𑀸𑀤𑀻𑀦𑀫𑀺𑀢𑀺 𑀘, 𑀞𑀺𑀢𑀺 𑀲𑀻𑀮𑀁 𑀬𑁂𑀲𑀁 𑀭𑀢𑁆𑀬𑀸𑀤𑀻𑀦𑀫𑀺𑀢𑀺 𑀘 𑀯𑀺𑀕𑁆𑀕𑀳𑁄.

𑁩𑁪𑁮. 𑀯𑀺𑀪𑀸𑀯𑁄 𑀓𑀸𑀭𑀡𑀁 𑀢𑁂𑀲𑀼’-

𑀧𑁆𑀧𑀢𑁆𑀢𑀺𑀬𑀼’𑀤𑁆𑀤𑀻𑀧𑀦𑁂 𑀢𑀣𑀸;

𑀬𑁄 𑀲𑀺𑀬𑀸 𑀩𑁄𑀥𑀓𑁄 𑀢𑁂𑀲-

𑀫𑀦𑀼𑀪𑀸𑀯𑁄’𑀬’𑀫𑀻𑀭𑀺𑀢𑁄.

𑁩𑁪𑁮. 𑀇𑀤𑀸𑀦𑀺 𑀯𑀺𑀪𑀸𑀯𑀸𑀦𑀼𑀪𑀸𑀯𑁂 𑀤𑀲𑁆𑀲𑁂𑀢𑀺 ‘‘𑀯𑀺𑀪𑀸𑀯𑁄’’𑀇𑀘𑁆𑀘𑀸𑀤𑀺𑀦𑀸. 𑀢𑁂𑀲𑀁 𑀭𑀢𑁆𑀬𑀸𑀤𑀻𑀦𑀁 𑀪𑀸𑀯𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸, 𑀢𑀣𑀸 𑀉𑀤𑁆𑀤𑀻𑀧𑀦𑁂 𑀘 𑀓𑀸𑀭𑀡𑀁 𑀆𑀮𑀫𑁆𑀩𑀡𑀉𑀤𑁆𑀤𑀻𑀧𑀦𑀯𑀲𑁂𑀦 𑀤𑀼𑀯𑀺𑀥𑁄 𑀯𑀺𑀪𑀸𑀯𑁄 𑀦𑀸𑀫. 𑀢𑀢𑁆𑀣 𑀆𑀮𑀫𑁆𑀩𑀡𑀯𑀺𑀪𑀸𑀯𑁄 𑀓𑀦𑁆𑀢𑀸𑀤𑀺, 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁄 𑀘𑀦𑁆𑀤𑀸𑀤𑀺. 𑀢𑁂𑀲𑀁 𑀩𑁄𑀥𑀓𑁄 𑀜𑀸𑀧𑀓𑁄 𑀓𑀸𑀬𑀺𑀓𑁄 𑀘 𑀯𑀸𑀘𑀲𑀺𑀓𑁄 𑀘 𑀩𑁆𑀬𑀸𑀧𑀸𑀭𑁄 𑀲𑀺𑀬𑀸, 𑀅𑀬𑀁 𑀅𑀦𑀼𑀪𑀸𑀯𑁄 𑀈𑀭𑀺𑀢𑁄.

𑁩𑁪𑁮. 𑀇𑀤𑀸𑀦𑀺 𑀯𑀺𑀪𑀸𑀯𑀸𑀦𑀼𑀪𑀸𑀯𑁂 𑀤𑀲𑁆𑀲𑁂𑀢𑀺 ‘‘𑀯𑀺𑀪𑀸𑀯𑁄’’𑀇𑀘𑁆𑀘𑀸𑀤𑀺𑀦𑀸. 𑀢𑁂𑀲𑀁 𑀞𑀸𑀬𑀻𑀪𑀸𑀯𑀸𑀤𑀻𑀦𑀁 𑀢𑀺𑀡𑁆𑀡𑀁 𑀉𑀧𑁆𑀧𑀢𑁆𑀢𑀺𑀬𑀸 𑀘 𑀢𑀣𑀸 𑀉𑀤𑁆𑀤𑀻𑀧𑀦𑁂 𑀘 𑀉𑀧𑁆𑀧𑀦𑁆𑀦𑀸𑀦𑀁 𑀤𑀻𑀧𑀦𑁂 𑀘 𑀓𑀸𑀭𑀡𑀁 𑀆𑀮𑀫𑁆𑀩𑀡𑀉𑀤𑁆𑀤𑀻𑀧𑀦𑀯𑀲𑁂𑀦 𑀤𑀼𑀯𑀺𑀥𑁄 𑀳𑁂𑀢𑀼 𑀯𑀺𑀪𑀸𑀯𑁄 𑀦𑀸𑀫, 𑀢𑁂𑀲𑀁 𑀞𑀸𑀬𑀻𑀪𑀸𑀯𑀸𑀤𑀻𑀦𑀁 𑀩𑁄𑀥𑀓𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀬𑁄 𑀲𑀺𑀬𑀸 𑀦𑀝𑀓𑀯𑀻𑀦𑀁 𑀩𑁆𑀬𑀸𑀧𑀸𑀭𑁄 𑀅𑀢𑁆𑀣𑀺, 𑀅𑀬𑀁 𑀅𑀦𑀼𑀪𑀸𑀯𑁄𑀢𑀺 𑀈𑀭𑀺𑀢𑁄𑀢𑀺. 𑀯𑀺𑀲𑁂𑀲𑁂𑀦 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀯𑀺𑀪𑀸𑀯𑁄. 𑀅𑀦𑀼𑀪𑀸𑀯𑁂𑀢𑀺 𑀩𑁄𑀥𑁂𑀢𑀻𑀢𑀺 𑀅𑀦𑀼𑀪𑀸𑀯𑁄. 𑀏𑀢𑁆𑀣 𑀯𑀺𑀪𑀸𑀯𑁄 𑀦𑀸𑀫 𑀭𑀢𑀺𑀯𑀺𑀲𑀬𑁂 𑀦𑀭𑀦𑀸𑀭𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀆𑀮𑀫𑁆𑀩𑀡𑀯𑀺𑀪𑀸𑀯𑁄, 𑀘𑀦𑁆𑀤𑀭𑀫𑁆𑀫𑀤𑁂𑀲𑀸𑀤𑀺 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁄 𑀘𑁂𑀢𑀺 𑀤𑀼𑀯𑀺𑀥𑁄. 𑀳𑀸𑀲𑀸𑀤𑀻𑀦𑀫𑁆𑀧𑀺 𑀤𑀼𑀯𑀺𑀥𑀯𑀺𑀪𑀸𑀯𑀁 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀼𑀪𑀸𑀯𑁄 𑀦𑀸𑀫 𑀞𑀸𑀬𑀻𑀪𑀸𑀯𑀸𑀤𑀻𑀦𑀁 𑀢𑁂𑀲𑀁 𑀢𑁂𑀲𑀁 𑀪𑀸𑀯𑀸𑀦𑀁 𑀧𑀓𑀸𑀲𑀓𑀯𑀸𑀘𑀲𑀺𑀓𑀩𑁆𑀬𑀸𑀧𑀸𑀭𑀲𑀗𑁆𑀔𑀸𑀢𑀓𑀯𑀺𑀧𑀬𑁄𑀕𑁄 𑀘 𑀓𑀸𑀬𑀺𑀓𑀧𑀬𑁄𑀕𑀪𑀽𑀢𑁄 𑀦𑀝𑀸𑀦𑀁 𑀅𑀪𑀺𑀦𑀬𑀲𑀗𑁆𑀔𑀸𑀢𑁄 𑀢𑀁𑀢𑀁𑀪𑀸𑀯𑀲𑀭𑀽𑀧𑀦𑀺𑀭𑀽𑀧𑀓𑁄 𑀘𑁂𑀢𑀺 𑀤𑀼𑀯𑀺𑀥𑁄 𑀩𑁆𑀬𑀸𑀧𑀸𑀭𑁄.

𑁩𑁪𑁯. 𑀦𑁂𑀓𑀳𑁂𑀢𑀼𑀁 𑀫𑀦𑁄𑀯𑀼𑀢𑁆𑀢𑀺-𑀯𑀺𑀲𑁂𑀲𑀜𑁆𑀘 𑀯𑀺𑀪𑀸𑀯𑀺𑀢𑀼𑀁;

𑀪𑀸𑀯𑀁 𑀯𑀺𑀪𑀸𑀯𑀸𑀦𑀼𑀪𑀸𑀯𑀸, 𑀯𑀡𑁆𑀡𑀺𑀬𑀸 𑀩𑀦𑁆𑀥𑀦𑁂 𑀨𑀼𑀝𑀁.

𑁩𑁪𑁯. 𑀯𑀺𑀪𑀸𑀯𑀸𑀤𑀺𑀯𑀡𑁆𑀡𑀦𑀸𑀬𑀫𑁂𑀯 𑀪𑀸𑀯𑀯𑀺𑀲𑁂𑀲𑀸𑀯𑀩𑁄𑀥𑁄 𑀲𑀺𑀬𑀸, 𑀅𑀜𑁆𑀜𑀣𑀸 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀲𑀸𑀲𑁆𑀲𑀼𑀮𑁄𑀘𑀦𑀬𑀼𑀕𑀁 𑀲𑀜𑁆𑀚𑀸𑀢’’𑀫𑀺𑀢𑀺 𑀯𑀼𑀢𑁆𑀢𑁂 𑀲𑁄𑀓𑀸 𑀆𑀦𑀦𑁆𑀤𑀸 𑀭𑁄𑀕𑀸 𑀘𑁂𑀢𑀺 𑀓𑁄 𑀦𑀸𑀫 𑀲𑀓𑁆𑀓𑁄𑀢𑀺 𑀓𑀸𑀭𑀡𑀁 𑀦𑀺𑀘𑁆𑀙𑀺𑀢𑀼𑀁, 𑀘𑀺𑀢𑁆𑀢𑀯𑀼𑀢𑁆𑀢𑀺𑀯𑀺𑀲𑁂𑀲𑀜𑁆𑀘 𑀪𑀸𑀯𑀁 𑀯𑀺𑀦𑀸 𑀯𑀺𑀪𑀸𑀯𑀸𑀦𑀼𑀪𑀸𑀯𑀁 𑀓𑀯𑀺 𑀯𑀡𑁆𑀡𑁂𑀢𑀼𑀁 𑀦𑀝𑁄𑀪𑀺𑀦𑁂𑀢𑀼𑀁 𑀲𑀸𑀫𑀚𑁆𑀚𑀺𑀓𑁄 𑀯𑀸 𑀯𑀺𑀜𑁆𑀜𑀸𑀢𑀼𑀁 𑀓𑁄 𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑁂𑀓’’𑀇𑀘𑁆𑀘𑀸𑀤𑀺. 𑀦𑁂𑀓𑀳𑁂𑀢𑀼𑀁 𑀩𑀳𑀼𑀳𑁂𑀢𑀼𑀁 𑀫𑀦𑁄𑀯𑀼𑀢𑁆𑀢𑀺𑀯𑀺𑀲𑁂𑀲𑀜𑁆𑀘 𑀪𑀸𑀯𑀁 𑀯𑀺𑀪𑀸𑀯𑀺𑀢𑀼𑀁 𑀧𑀓𑀸𑀲𑁂𑀢𑀼𑀁 𑀯𑀺𑀪𑀸𑀯𑀸𑀦𑀼𑀪𑀸𑀯𑀸 𑀯𑀼𑀢𑁆𑀢𑀮𑀓𑁆𑀔𑀡𑀸 𑀩𑀦𑁆𑀥𑀦𑁂 𑀲𑀪𑀸𑀯𑀦𑀺𑀭𑀽𑀧𑀓𑀧𑀤𑁂 𑀨𑀼𑀝𑀁 𑀯𑀡𑁆𑀡𑀦𑀻𑀬𑀸, 𑀯𑀺𑀪𑀸𑀯𑀸𑀤𑀺𑀭𑀽𑀧𑀓𑁂𑀦𑁂𑀯 𑀅𑀯𑀼𑀢𑁆𑀢𑀫𑁆𑀧𑀺 𑀓𑀺𑀜𑁆𑀘𑀺 𑀧𑀢𑀻𑀬𑀢𑁂.

𑁩𑁪𑁯. ‘‘𑀤𑁂𑀯𑀤𑀢𑁆𑀢𑀲𑁆𑀲 𑀘𑀓𑁆𑀔𑀽𑀦𑀺 𑀅𑀲𑁆𑀲𑀼𑀧𑀼𑀡𑁆𑀡𑀸𑀦𑀻’’𑀢𑀺 𑀯𑀼𑀢𑁆𑀢𑁂 𑀲𑁄𑀓𑁂𑀦 𑀲𑀦𑁆𑀢𑁄𑀲𑁂𑀦 𑀭𑁄𑀕𑁂𑀦 𑀯𑀸𑀢𑀺 𑀬𑀣𑀸 𑀅𑀲𑁆𑀲𑀼𑀓𑀸𑀭𑀡𑀓𑀣𑀦𑀁 𑀯𑀺𑀦𑀸 𑀦 𑀚𑀸𑀦𑀸𑀢𑀺, 𑀏𑀯𑀁 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀸 𑀭𑀢𑀺𑀳𑀸𑀲𑀸𑀤𑀬𑁄 𑀢𑁂 𑀢𑁂 𑀪𑀸𑀯𑀸 𑀅𑀢𑁆𑀢𑀦𑁄 𑀧𑀢𑀻𑀢𑀺𑀬𑀸𑀦𑀼𑀭𑀽𑀧𑀁 𑀯𑀺𑀪𑀸𑀯𑀸𑀦𑀼𑀪𑀸𑀯𑀓𑀣𑀦𑀁 𑀯𑀺𑀦𑀸 𑀓𑀯𑀻𑀳𑀺 𑀯𑀡𑁆𑀡𑁂𑀢𑀩𑁆𑀩𑀸, 𑀦𑀝𑁂𑀳𑀺 𑀤𑀲𑁆𑀲𑁂𑀢𑀩𑁆𑀩𑀸, 𑀲𑀩𑁆𑀪𑁂𑀳𑀺 𑀅𑀲𑁆𑀲𑀸𑀤𑀦𑀻𑀬𑀸 𑀦𑀢𑁆𑀣𑀻𑀢𑀺 𑀞𑀸𑀬𑀻𑀆𑀤𑀻𑀦𑀁 𑀯𑀡𑁆𑀡𑀦𑀫𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀇𑀤𑀸𑀦𑀺 𑀅𑀦𑀼𑀲𑀸𑀲𑁂𑀦𑁆𑀢𑁄 𑀆𑀳 ‘‘𑀦𑁂𑀓’’𑀇𑀘𑁆𑀘𑀸𑀤𑀺. 𑀦𑁂𑀓𑀳𑁂𑀢𑀼𑀁 𑀢𑁂𑀲𑀁 𑀢𑁂𑀲𑀁 𑀪𑀸𑀯𑀸𑀦𑀁 𑀉𑀧𑁆𑀧𑀢𑁆𑀬𑀸𑀤𑁄 𑀆𑀮𑀫𑁆𑀩𑀡𑀯𑀺𑀪𑀸𑀯𑀸𑀤𑀺𑀩𑀳𑀼𑀓𑀸𑀭𑀡𑀯𑀦𑁆𑀢𑀁 𑀫𑀦𑁄𑀯𑀼𑀢𑁆𑀢𑀺𑀯𑀺𑀲𑁂𑀲𑀁 𑀪𑀸𑀯𑀜𑁆𑀘 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀯𑀺𑀲𑁂𑀲𑀲𑀗𑁆𑀔𑀸𑀢𑀪𑀸𑀯𑀜𑁆𑀘 𑀯𑀺𑀪𑀸𑀯𑀺𑀢𑀼𑀁 𑀧𑀓𑀸𑀲𑁂𑀢𑀼𑀁 𑀯𑀺𑀪𑀸𑀯𑀸𑀦𑀼𑀪𑀸𑀯𑀸 𑀅𑀦𑀦𑁆𑀢𑀭𑀦𑀺𑀤𑁆𑀤𑀺𑀝𑁆𑀞𑀸 𑀩𑀦𑁆𑀥𑀦𑁂 𑀭𑀲𑀪𑀸𑀯𑀧𑁆𑀧𑀓𑀸𑀲𑀦𑁂 𑀨𑀼𑀝𑀁 𑀧𑀓𑀸𑀲𑀁 𑀓𑀢𑁆𑀯𑀸 𑀯𑀡𑁆𑀡𑀺𑀬𑀸 𑀓𑀯𑀺𑀦𑀸 𑀯𑀡𑁆𑀡𑀦𑀻𑀬𑀸 𑀳𑁄𑀦𑁆𑀢𑀻𑀢𑀺. 𑀦 𑀏𑀓𑁄𑀢𑀺 𑀘, 𑀲𑁄 𑀳𑁂𑀢𑀼 𑀅𑀲𑁆𑀲𑁂𑀢𑀺 𑀘, 𑀫𑀦𑀲𑁄 𑀯𑀼𑀢𑁆𑀢𑀻𑀢𑀺 𑀘, 𑀢𑀸𑀬 𑀯𑀺𑀲𑁂𑀲𑁄𑀢𑀺 𑀘, 𑀯𑀺𑀪𑀸𑀯𑁄 𑀘 𑀅𑀦𑀼𑀪𑀸𑀯𑁄 𑀘𑁂𑀢𑀺 𑀘 𑀯𑀸𑀓𑁆𑀬𑀁.

𑁩𑁫𑁦. 𑀲𑀯𑀺𑀪𑀸𑀯𑀸𑀦𑀼𑀪𑀸𑀯𑁂𑀳𑀺, 𑀪𑀸𑀯𑀸 𑀢𑁂 𑀢𑁂 𑀬𑀣𑀸𑀭𑀳𑀁;

𑀯𑀡𑁆𑀡𑀦𑀻𑀬𑀸 𑀬𑀣𑁄𑀘𑀺𑀢𑁆𑀬𑀁, 𑀮𑁄𑀓𑀭𑀽𑀧𑀸𑀦𑀼𑀕𑀸𑀫𑀺𑀦𑀸.

𑁩𑁫𑁦. 𑀇𑀤𑀸𑀦𑀺 𑀢𑁂 𑀪𑀸𑀯𑀸 𑀮𑁄𑀓𑀲𑀪𑀸𑀯𑀸𑀦𑀢𑀺𑀓𑁆𑀓𑀫𑁂𑀦 𑀯𑀺𑀪𑀸𑀯𑀸𑀤𑀻𑀳𑀺 𑀯𑀡𑁆𑀡𑀦𑀻𑀬𑀸𑀢𑀺 𑀆𑀳 ‘‘𑀲𑀯𑀺𑀪𑀸𑀯𑁂’’𑀘𑁆𑀘𑀸𑀤𑀺. 𑀲𑀳 𑀯𑀺𑀪𑀸𑀯𑁂𑀳𑀺 𑀲𑀯𑀺𑀪𑀸𑀯𑀸, 𑀢𑁂 𑀘 𑀢𑁂 𑀅𑀦𑀼𑀪𑀸𑀯𑀸 𑀘, 𑀢𑁂𑀳𑀺. 𑀬𑀣𑀸𑀭𑀳𑀦𑁆𑀢𑀺 𑀅𑀢𑁆𑀢𑀦𑁄 𑀲𑀫𑁆𑀩𑀦𑁆𑀥𑀻𑀦𑀁 𑀯𑀲𑁂𑀦 𑀬𑀣𑀸𑀭𑀳𑀁 𑀯𑀡𑁆𑀡𑀦𑀻𑀬𑀸.

𑁩𑁫𑁦. 𑀇𑀤𑀸𑀦𑀺 𑀯𑀺𑀪𑀸𑀯𑀸𑀦𑀼𑀪𑀸𑀯𑁂 𑀦𑀺𑀲𑁆𑀲𑀸𑀬 𑀯𑀡𑁆𑀡𑀦𑀻𑀬𑀸 𑀢𑁂 𑀪𑀸𑀯𑀸 𑀮𑁄𑀓𑀲𑀪𑀸𑀯𑀫𑀦𑀢𑀺𑀓𑁆𑀓𑀫𑁆𑀫 𑀓𑀸𑀢𑀩𑁆𑀩𑀸𑀢𑀺 𑀅𑀦𑀼𑀲𑀸𑀲𑀦𑁆𑀢𑁄 𑀆𑀳 ‘‘𑀲𑀯𑀺𑀪𑀸𑀯𑀸’’𑀇𑀘𑁆𑀘𑀸𑀤𑀺. 𑀮𑁄𑀓𑀭𑀽𑀧𑀸𑀦𑀼𑀕𑀸𑀫𑀺𑀦𑀸 𑀮𑁄𑀓𑀯𑁄𑀳𑀸𑀭𑀫𑀦𑀼𑀯𑀢𑁆𑀢𑀫𑀸𑀦𑁂𑀦 𑀢𑁂 𑀢𑁂 𑀪𑀸𑀯𑀸 𑀞𑀸𑀬𑀻𑀪𑀸𑀯𑀸𑀤𑀬𑁄 𑀢𑀬𑁄 𑀬𑀣𑁄𑀘𑀺𑀢𑁆𑀬𑀁 𑀑𑀘𑀺𑀢𑁆𑀬𑀸𑀦𑀼𑀭𑀽𑀧𑀁 𑀲𑀯𑀺𑀪𑀸𑀯𑀸𑀦𑀼𑀪𑀸𑀯𑁂𑀳𑀺 𑀯𑀺𑀪𑀸𑀯𑀲𑀳𑀺𑀢𑁂𑀳𑀺 𑀅𑀦𑀼𑀪𑀸𑀯𑁂𑀳𑀺 𑀓𑀭𑀡𑀪𑀽𑀢𑁂𑀳𑀺 𑀬𑀣𑀸𑀭𑀳𑀁 𑀢𑁂𑀳𑀺 𑀢𑁂𑀳𑀺 𑀪𑀸𑀯𑁂𑀳𑀺 𑀲𑀫𑁆𑀩𑀦𑁆𑀥𑀻𑀦𑀁 𑀯𑀺𑀪𑀸𑀯𑀸𑀤𑀻𑀦𑀁 𑀯𑀲𑁂𑀦 𑀅𑀦𑀼𑀭𑀽𑀧𑀢𑁄 𑀯𑀡𑁆𑀡𑀦𑀻𑀬𑀸 𑀯𑀡𑁆𑀡𑁂𑀢𑀩𑁆𑀩𑀸 𑀳𑁄𑀦𑁆𑀢𑀻𑀢𑀺. 𑀯𑀺𑀪𑀸𑀯𑁂𑀳𑀺 𑀲𑀳 𑀬𑁂 𑀯𑀢𑁆𑀢𑀦𑁆𑀢𑀻𑀢𑀺 𑀘, 𑀢𑁂 𑀘 𑀢𑁂 𑀅𑀦𑀼𑀪𑀸𑀯𑀸 𑀘𑁂𑀢𑀺 𑀘, 𑀅𑀦𑀢𑀺𑀓𑁆𑀓𑀫𑁆𑀫 𑀅𑀭𑀳𑀦𑁆𑀢𑀺 𑀘, 𑀅𑀦𑀢𑀺𑀓𑁆𑀓𑀫𑁆𑀫 𑀑𑀘𑀺𑀢𑁆𑀬𑀫𑀺𑀢𑀺 𑀘, 𑀮𑁄𑀓𑀲𑁆𑀲 𑀭𑀽𑀧𑀁 𑀲𑀭𑀽𑀧𑀫𑀺𑀢𑀺 𑀘, 𑀢𑀁 𑀅𑀦𑀼𑀕𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑁩𑁫𑁧. 𑀘𑀺𑀢𑁆𑀢𑀯𑀼𑀢𑁆𑀢𑀺 𑀯𑀺𑀲𑁂𑀲𑀢𑁆𑀢𑀸, 𑀫𑀸𑀦𑀲𑀸 𑀲𑀸𑀢𑁆𑀢𑀺𑀓’𑀗𑁆𑀕𑀢𑁄;

𑀩𑀳𑀺𑀦𑀺𑀲𑁆𑀲𑀝𑀲𑁂𑀤𑀸𑀤𑀺-𑀅𑀦𑀼𑀪𑀸𑀯𑁂𑀳𑀺 𑀯𑀡𑁆𑀡𑀺𑀬𑀸.

𑁩𑁫𑁧. 𑀲𑀸𑀢𑁆𑀢𑀺𑀓𑀸 𑀓𑀣𑀁 𑀯𑀡𑁆𑀡𑀦𑀻𑀬𑀸𑀢𑀺 𑀆𑀳 ‘‘𑀘𑀺𑀢𑁆𑀢𑁂’’𑀘𑁆𑀘𑀸𑀤𑀺. 𑀘𑀺𑀢𑁆𑀢𑀲𑁆𑀲 𑀯𑀼𑀢𑁆𑀢𑀺𑀯𑀺𑀲𑁂𑀲𑁄 𑀬𑁂𑀲𑀁, 𑀢𑁂𑀲𑀁 𑀪𑀸𑀯𑁄, 𑀢𑀲𑁆𑀫𑀸 𑀫𑀸𑀦𑀲𑀸 𑀫𑀦𑀲𑀺 𑀪𑀯𑀸 𑀲𑀸𑀢𑁆𑀢𑀺𑀓𑀸 𑀅𑀗𑁆𑀕𑀢𑁄 𑀲𑀭𑀻𑀭𑀢𑁄 𑀩𑀳𑀺𑀦𑀺𑀲𑁆𑀲𑀝𑁂𑀳𑀺 𑀦𑀺𑀕𑁆𑀕𑀢𑁂𑀳𑀺 𑀲𑁂𑀤𑀸𑀤𑀻𑀳𑀺 𑀅𑀦𑀼𑀪𑀸𑀯𑁂𑀳𑀺 𑀯𑀡𑁆𑀡𑀦𑀻𑀬𑀸, 𑀦 𑀧𑀦 𑀲𑁂𑀤𑀲𑀮𑀺𑀮𑀫𑁂𑀯 𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁫𑁧. 𑀏𑀯𑀁 𑀲𑀸𑀫𑀜𑁆𑀜𑁂𑀦 𑀪𑀸𑀯𑀯𑀡𑁆𑀡𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑁂𑀲𑁂𑀦 𑀲𑀸𑀢𑁆𑀢𑀺𑀓𑀪𑀸𑀯𑀯𑀡𑁆𑀡𑀦𑀸 𑀈𑀤𑀺𑀲𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀘𑀺𑀢𑁆𑀢’’𑀇𑀘𑁆𑀘𑀸𑀤𑀺𑀦𑀸. 𑀘𑀺𑀢𑁆𑀢𑀯𑀼𑀢𑁆𑀢𑀺𑀯𑀺𑀲𑁂𑀲𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀯𑀺𑀲𑁂𑀲𑀢𑁆𑀢𑀸 𑀫𑀸𑀦𑀲𑀸 𑀘𑀺𑀢𑁆𑀢𑁂 𑀪𑀯𑀸 𑀲𑀸𑀢𑁆𑀢𑀺𑀓𑀸𑀪𑀸𑀯𑀸 𑀅𑀗𑁆𑀕𑀢𑁄 𑀲𑀭𑀻𑀭𑀢𑁄 𑀩𑀳𑀺𑀦𑀺𑀲𑁆𑀲𑀝𑀲𑁂𑀤𑀸𑀤𑀺𑀅𑀦𑀼𑀪𑀸𑀯𑁂𑀳𑀺 𑀩𑀳𑀺𑀦𑀺𑀓𑁆𑀔𑀦𑁆𑀢𑀲𑁂𑀤𑀸𑀤𑀻𑀳𑀺 𑀅𑀦𑀼𑀪𑀸𑀯𑁂𑀳𑀺 𑀓𑀭𑀡𑀪𑀽𑀢𑁂𑀳𑀺 𑀯𑀡𑁆𑀡𑀺𑀬𑀸 𑀯𑀡𑁆𑀡𑀦𑀻𑀬𑀸 𑀳𑁄𑀦𑁆𑀢𑀻𑀢𑀺, 𑀅𑀗𑁆𑀕𑀢𑁄 𑀩𑀳𑀺 𑀦𑀺𑀲𑁆𑀲𑀝𑀦𑁆𑀢𑀺 𑀯𑀺𑀲𑁂𑀲𑀦𑁂𑀦 𑀯𑀺𑀲𑀺𑀝𑁆𑀞𑀪𑀽𑀢𑀲𑁂𑀤𑀸𑀤𑀻𑀦𑀫𑁂𑀯 𑀪𑀸𑀯𑀸𑀦𑀼𑀪𑀸𑀯𑀢𑁆𑀢𑀁 𑀯𑀺𑀦𑀸 𑀓𑁂𑀯𑀮𑀁 𑀲𑁂𑀤𑀸𑀤𑀬𑁄 𑀯𑀼𑀢𑁆𑀢𑀸 𑀲𑀫𑀸𑀦𑀸 𑀪𑀸𑀯𑀸𑀤𑀬𑁄 𑀦𑀸𑀫 𑀦 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀢𑁆𑀢𑀲𑁆𑀲 𑀯𑀼𑀢𑁆𑀢𑀻𑀢𑀺 𑀘, 𑀲𑀸 𑀏𑀯 𑀯𑀺𑀲𑁂𑀲𑁄 𑀬𑁂𑀲𑀁 𑀲𑀸𑀢𑁆𑀢𑀺𑀓𑀸𑀦𑀫𑀺𑀢𑀺 𑀘, 𑀢𑁂𑀲𑀁 𑀪𑀸𑀯𑁄𑀢𑀺 𑀘, 𑀫𑀦𑀲𑀺 𑀪𑀯𑀸𑀢𑀺 𑀘, 𑀲𑁂𑀤𑁄 𑀆𑀤𑀺 𑀬𑁂𑀲𑀁 𑀔𑁂𑀴𑀸𑀤𑀻𑀦𑀫𑀺𑀢𑀺 𑀘, 𑀦𑀺𑀲𑁆𑀲𑀝𑀸 𑀦𑀺𑀕𑁆𑀕𑀢𑀸 𑀘 𑀢𑁂 𑀲𑁂𑀤𑀸𑀤𑀬𑁄 𑀘𑁂𑀢𑀺 𑀘, 𑀢𑁂 𑀏𑀯 𑀅𑀦𑀼𑀪𑀸𑀯𑀸𑀢𑀺 𑀘 𑀯𑀸𑀓𑁆𑀬𑀁.

𑀭𑀲𑀅𑀥𑀺𑀧𑁆𑀧𑀸𑀬

𑁩𑁫𑁨. 𑀲𑀸𑀫𑀚𑁆𑀚𑀺𑀓𑀸𑀦’𑀫𑀸𑀦𑀦𑁆𑀤𑁄, 𑀬𑁄 𑀩𑀦𑁆𑀥𑀢𑁆𑀣𑀸𑀦𑀼𑀲𑀸𑀭𑀺𑀦𑀁;

𑀭𑀲𑀻𑀬𑀢𑀻𑀢𑀺 𑀢𑀜𑁆𑀜𑀽𑀳𑀺, 𑀭𑀲𑁄 𑀦𑀸𑀫𑀸’𑀬’𑀫𑀻𑀭𑀺𑀢𑁄.