𑁪. 𑀅𑀢𑁆𑀣𑀸𑀮𑀗𑁆𑀓𑀸𑀭𑀸𑀯𑀩𑁄𑀥-𑀘𑀢𑀼𑀢𑁆𑀣𑀧𑀭𑀺𑀘𑁆𑀙𑁂𑀤

𑁧𑁬𑁪. 𑀅𑀢𑁆𑀣𑀸𑀮𑀗𑁆𑀓𑀸𑀭𑀲𑀳𑀺𑀢𑀸, 𑀲𑀕𑀼𑀡𑀸 𑀩𑀦𑁆𑀥𑀧𑀤𑁆𑀥𑀢𑀺;

𑀅𑀘𑁆𑀘𑀦𑁆𑀢𑀓𑀦𑁆𑀢𑀸 𑀓𑀦𑁆𑀢𑀸 [𑀬𑀢𑁄 𑀅𑀘𑁆𑀘𑀦𑁆𑀢𑀓𑀦𑁆𑀢𑀸 (𑀓.)] 𑀯 𑀯𑀼𑀘𑁆𑀘𑀦𑁆𑀢𑁂 𑀢𑁂 𑀢𑀢𑁄’𑀥𑀼𑀦𑀸.

𑁧𑁬𑁫. 𑀲𑀪𑀸𑀯, 𑀯𑀗𑁆𑀓𑀯𑀼𑀢𑁆𑀢𑀻𑀦𑀁, 𑀪𑁂𑀤𑀸 𑀤𑁆𑀯𑀺𑀥𑀸 𑀅𑀮𑀁𑀓𑁆𑀭𑀺𑀬𑀸;

𑀧𑀞𑀫𑀸 𑀢𑀢𑁆𑀣 𑀯𑀢𑁆𑀣𑀽𑀦𑀁, 𑀦𑀸𑀦𑀸𑀯𑀢𑁆𑀣𑀸’𑀯𑀺𑀪𑀸𑀯𑀺𑀦𑀻.

𑀬𑀣𑀸

𑁧𑁬𑁬. 𑀮𑀻𑀮𑀸 𑀯𑀺𑀓𑀦𑁆𑀢𑀺 𑀲𑀼𑀪𑀕𑁄, 𑀤𑀺𑀲𑀸 𑀣𑀺𑀭 𑀯𑀺𑀮𑁄𑀓𑀦𑁄;

𑀩𑁄𑀥𑀺𑀲𑀢𑁆𑀢𑀗𑁆𑀓𑀼𑀭𑁄 𑀪𑀸𑀲𑀁, 𑀯𑀺𑀭𑁄𑀘𑀺 𑀯𑀸𑀘 𑀫𑀸𑀲𑀪𑀺𑀁.

𑁧𑁬𑁭. 𑀯𑀼𑀢𑁆𑀢𑀺 𑀯𑀢𑁆𑀣𑀼𑀲𑀪𑀸𑀯𑀲𑁆𑀲, 𑀬𑀸’𑀜𑁆𑀜𑀣𑀸 𑀲𑀸’𑀧𑀭𑀸 𑀪𑀯𑁂;

𑀢𑀲𑁆𑀲𑀸’𑀦𑀦𑁆𑀢𑀯𑀺𑀓𑀧𑁆𑀧𑀢𑁆𑀢𑀸, 𑀳𑁄𑀢𑀺 𑀩𑀻𑀚𑁄’𑀧𑀤𑀲𑁆𑀲𑀦𑀁.

𑀯𑀗𑁆𑀓𑀯𑀼𑀢𑁆𑀢𑀺 𑀅𑀢𑁆𑀣𑀸𑀮𑀗𑁆𑀓𑀸𑀭

𑀉𑀤𑁆𑀤𑁂𑀲

𑁧𑁬𑁮. 𑀢𑀢𑁆𑀣𑀸’𑀢𑀺𑀲𑀬, 𑀉𑀧𑀫𑀸, 𑀭𑀽𑀧𑀓𑀸, 𑀯𑀼𑀢𑁆𑀢𑀺, 𑀤𑀻𑀧𑀓𑀁,;

𑀅𑀓𑁆𑀔𑁂𑀧𑁄, 𑀢𑁆𑀣𑀦𑁆𑀢𑀭𑀦𑁆𑀬𑀸𑀲𑁄, 𑀩𑁆𑀬𑀢𑀺𑀭𑁂𑀓𑁄, 𑀯𑀺𑀪𑀸𑀯𑀦𑀸.

𑁧𑁬𑁯. 𑀳𑁂𑀢𑀼, 𑀓𑁆𑀓𑀫𑁄, 𑀧𑀺𑀬𑀢𑀭𑀁, 𑀲𑀫𑀸𑀲, 𑀧𑀭𑀺𑀓𑀧𑁆𑀧𑀦𑀸;

𑀲𑀫𑀸𑀳𑀺𑀢𑀁, 𑀧𑀭𑀺𑀬𑀸𑀬, 𑀯𑀼𑀢𑁆𑀢𑀺, 𑀩𑁆𑀬𑀸𑀚𑁄𑀧𑀯𑀡𑁆𑀡𑀦𑀁.

𑁧𑁭𑁦. 𑀯𑀺𑀲𑁂𑀲, 𑀭𑀼𑀴𑁆𑀳𑀸𑀳𑀗𑁆𑀓𑀸𑀭𑀸, 𑀲𑀺𑀮𑁂𑀲𑁄, 𑀢𑀼𑀮𑁆𑀬𑀬𑁄𑀕𑀺𑀢𑀸;

𑀦𑀺𑀤𑀲𑁆𑀲𑀦𑀁, 𑀫𑀳𑀦𑁆𑀢𑀢𑁆𑀢𑀁, 𑀯𑀜𑁆𑀘𑀦𑀸, 𑀧𑁆𑀧𑀓𑀢𑀢𑁆𑀣𑀼𑀢𑀺,.

𑁧𑁭𑁧. 𑀏𑀓𑀸𑀯𑀮𑀺, 𑀅𑀜𑁆𑀜𑀫𑀜𑁆𑀜𑀁, 𑀲𑀳𑀯𑀼𑀢𑁆𑀢𑀺, 𑀯𑀺𑀭𑁄𑀥𑀺𑀢𑀸;

𑀧𑀭𑀺𑀯𑀼𑀢𑁆𑀢𑀺, 𑀩𑁆𑀪𑀫𑁄, 𑀪𑀸𑀯𑁄, 𑀫𑀺𑀲𑁆𑀲, 𑀫𑀸𑀲𑀻, 𑀭𑀲𑀻, 𑀇𑀢𑀺.

𑁧𑁭𑁨. 𑀏𑀢𑁂 𑀪𑁂𑀤𑀸 𑀲𑀫𑀼𑀤𑁆𑀤𑀺𑀝𑁆𑀞𑀸, 𑀪𑀸𑀯𑁄 𑀚𑀻𑀯𑀺𑀢 𑀫𑀼𑀘𑁆𑀘𑀢𑁂;

𑀯𑀗𑁆𑀓𑀯𑀼𑀢𑁆𑀢𑀻𑀲𑀼 𑀧𑁄𑀲𑁂𑀲𑀺, 𑀲𑀺𑀮𑁂𑀲𑁄 𑀢𑀼 𑀲𑀺𑀭𑀺𑀁 𑀧𑀭𑀁.

𑀦𑀺𑀤𑁆𑀤𑁂𑀲

𑁧𑁭𑁩. 𑀧𑀓𑀸𑀲𑀓𑀸 𑀯𑀺𑀲𑁂𑀲𑀲𑁆𑀲, 𑀲𑀺𑀬𑀸’𑀢𑀺𑀲𑀬𑀯𑀼𑀢𑁆𑀢𑀺 𑀬𑀸;

𑀮𑁄𑀓𑀸’𑀢𑀺𑀓𑁆𑀓𑀦𑁆𑀢𑀯𑀺𑀲𑀬𑀸, 𑀮𑁄𑀓𑀺𑀬𑀸,𑀢𑀺 𑀘 𑀲𑀸 𑀤𑁆𑀯𑀺𑀥𑀸.

𑁧𑁭𑁪. 𑀮𑁄𑀓𑀺𑀬𑀸𑀢𑀺𑀲𑀬𑀲𑁆𑀲𑁂’𑀢𑁂,

𑀪𑁂𑀤𑀸 𑀬𑁂 𑀚𑀸𑀢𑀺𑀆𑀤𑀬𑁄;

𑀧𑀝𑀺𑀧𑀸𑀤𑀻𑀬𑀢𑁂 𑀢𑁆𑀯’𑀚𑁆𑀚, 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀕𑁄𑀘𑀭𑀸.

𑁧𑁭𑁫. 𑀧𑀺𑀯𑀦𑁆𑀢𑀺 𑀤𑁂𑀳𑀓𑀦𑁆𑀢𑀻 𑀬𑁂, 𑀦𑁂𑀢𑁆𑀢𑀜𑁆𑀚𑀮𑀺𑀧𑀼𑀝𑁂𑀦 𑀢𑁂;

𑀦𑀸’𑀮𑀁 𑀳𑀦𑁆𑀢𑀼𑀁 𑀚𑀺𑀦𑁂’𑀲𑀁 𑀢𑁆𑀯𑀁, 𑀢𑀡𑁆𑀳𑀁 𑀢𑀡𑁆𑀳𑀸𑀳𑀭𑁄𑀧𑀺 𑀓𑀺𑀁?

𑁧𑁭𑁬. 𑀉𑀧𑀫𑀸𑀦𑁄’𑀧𑀫𑁂𑀬𑁆𑀬𑀸𑀦𑀁, 𑀲𑀥𑀫𑁆𑀫𑀢𑁆𑀢𑀁 𑀲𑀺𑀬𑁄’𑀧𑀫𑀸;

𑀲𑀤𑁆𑀤, 𑀢𑁆𑀣𑀕𑀫𑁆𑀫𑀸, 𑀯𑀸𑀓𑁆𑀬𑀢𑁆𑀣, 𑀯𑀺𑀲𑀬𑀸,𑀢𑀺 𑀘 𑀲𑀸 𑀪𑀺𑀥𑀸.

𑁧𑁭𑁭. 𑀲𑀫𑀸𑀲, 𑀧𑀘𑁆𑀘𑀬𑁂, 𑀯𑀸’𑀤𑀻, 𑀲𑀤𑁆𑀤𑀸 𑀢𑁂𑀲𑀁 𑀯𑀲𑀸 𑀢𑀺𑀥𑀸;

𑀲𑀤𑁆𑀤𑀕𑀫𑁆𑀫𑀸 𑀲𑀫𑀸𑀲𑁂𑀦, 𑀫𑀼𑀦𑀺𑀦𑁆𑀤𑁄 𑀘𑀦𑁆𑀤𑀺𑀫𑀸’𑀦𑀦𑁄.

𑁧𑁭𑁮. 𑀆𑀬𑀸𑀤𑀻 𑀧𑀘𑁆𑀘𑀬𑀸 𑀢𑁂𑀳𑀺, 𑀯𑀤𑀦𑀁 𑀧𑀗𑁆𑀓𑀚𑀸𑀬𑀢𑁂;

𑀫𑀼𑀦𑀺𑀦𑁆𑀤𑀦𑀬𑀦 𑀤𑁆𑀯𑀦𑁆𑀤𑀁, 𑀦𑀻𑀮𑀼𑀧𑁆𑀧𑀮𑀤𑀮𑀻𑀬𑀢𑀺.

𑁧𑁭𑁯. 𑀇𑀯𑀸𑀤𑀻 𑀇𑀯, 𑀯𑀸, 𑀢𑀼𑀮𑁆𑀬, 𑀲𑀫𑀸𑀦, 𑀦𑀺𑀪, 𑀲𑀦𑁆𑀦𑀺𑀪𑀸;

𑀬𑀣𑀸, 𑀲𑀗𑁆𑀓𑀸𑀲, 𑀢𑀼𑀮𑀺𑀢, 𑀧𑁆𑀧𑀓𑀸𑀲, 𑀧𑀢𑀺𑀭𑀽𑀧𑀓𑀸.

𑁧𑁮𑁦. 𑀲𑀭𑀻, 𑀲𑀭𑀺𑀓𑁆𑀔, 𑀲𑀁𑀯𑀸𑀤𑀻, 𑀯𑀺𑀭𑁄𑀥𑀺, 𑀲𑀤𑀺𑀲𑀸, 𑀯𑀺𑀬;

𑀧𑀝𑀺𑀧𑀓𑁆𑀔, 𑀧𑀘𑁆𑀘𑀦𑀻𑀓𑀸, 𑀲𑀧𑀓𑁆𑀔𑁄, 𑀧𑀫𑀺𑀢𑁄, 𑀧𑀫𑀸.

𑁧𑁮𑁧. 𑀧𑀝𑀺𑀩𑀺𑀫𑁆𑀩, 𑀧𑀝𑀺𑀘𑁆𑀙𑀦𑁆𑀦, 𑀲𑀭𑀽𑀧, 𑀲𑀫, 𑀲𑀫𑀺𑀢𑀸;

𑀲𑀯𑀡𑁆𑀡𑀸, 𑀪𑀸, 𑀧𑀝𑀺𑀦𑀺𑀥𑀺, 𑀲𑀥𑀫𑁆𑀫𑀸, 𑀤𑀺 𑀲𑀮𑀓𑁆𑀔𑀡𑀸.

𑁧𑁮𑁨. 𑀚𑀬𑀢𑁆𑀬, 𑀓𑁆𑀓𑁄𑀲𑀢𑀺, 𑀳𑀲𑀢𑀺, 𑀧𑀢𑀺𑀕𑀚𑁆𑀚𑀢𑀺, 𑀤𑀽𑀪𑀢𑀺;

𑀉𑀲𑀽𑀬𑀢𑁆𑀬, 𑀯𑀚𑀸𑀦𑀸𑀢𑀺, 𑀦𑀺𑀦𑁆𑀤𑀢𑀺, 𑀲𑁆𑀲𑀢𑀺, 𑀭𑀼𑀦𑁆𑀥𑀢𑀺.

𑁧𑁮𑁩. 𑀢𑀲𑁆𑀲 𑀘𑁄𑀭𑁂𑀢𑀺 𑀲𑁄𑀪𑀕𑁆𑀕𑀁, 𑀢𑀲𑁆𑀲 𑀓𑀦𑁆𑀢𑀺𑀁 𑀯𑀺𑀮𑀼𑀫𑁆𑀧𑀢𑀺;

𑀢𑁂𑀦 𑀲𑀤𑁆𑀥𑀺𑀁 𑀯𑀺𑀯𑀤𑀢𑀺, 𑀢𑀼𑀮𑁆𑀬𑀁 𑀢𑁂𑀦𑀸’𑀥𑀺𑀭𑁄𑀳𑀢𑀺.

𑁧𑁮𑁪. 𑀓𑀘𑁆𑀙𑀁 𑀯𑀺𑀕𑀸𑀳𑀢𑁂, 𑀢𑀲𑁆𑀲, 𑀢 𑀫𑀦𑁆𑀯𑁂𑀢𑁆𑀬, 𑀦𑀼𑀩𑀦𑁆𑀥𑀢𑀺;

𑀢𑀁𑀲𑀻𑀮𑀁, 𑀢𑀁𑀦𑀺𑀲𑁂𑀥𑁂𑀢𑀺, 𑀢𑀲𑁆𑀲 𑀘𑀸’𑀦𑀼𑀓𑀭𑁄𑀢𑀺, 𑀫𑁂.

𑁧𑁮𑁫. 𑀉𑀧𑀫𑀸𑀦𑁄’𑀧𑀫𑁂𑀬𑁆𑀬𑀸𑀦𑀁, 𑀲𑀥𑀫𑁆𑀫𑀢𑁆𑀢𑀁 𑀯𑀺𑀪𑀸𑀯𑀺𑀪𑀺;

𑀇𑀫𑁂𑀳𑀺 𑀉𑀧𑀫𑀸𑀪𑁂𑀤𑀸, 𑀓𑁂𑀘𑀺 𑀦𑀺𑀬𑁆𑀬𑀦𑁆𑀢𑀺 𑀲𑀫𑁆𑀧𑀢𑀺.

𑁧𑁮𑁬. 𑀯𑀺𑀓𑀸𑀲𑀺𑀧𑀤𑀼𑀫𑀁’𑀯𑀸’𑀢𑀺, 𑀲𑀼𑀦𑁆𑀤𑀭𑀁 𑀲𑀼𑀕𑀢𑀸’𑀦𑀦𑀁;

𑀇𑀢𑀺 𑀥𑀫𑁆𑀫𑁄𑀧𑀫𑀸 𑀦𑀸𑀫, 𑀢𑀼𑀮𑁆𑀬𑀥𑀫𑁆𑀫𑀦𑀺𑀤𑀲𑁆𑀲𑀦𑀸.

𑁧𑁮𑁭. 𑀥𑀫𑁆𑀫𑀳𑀻𑀦𑀸 ‘‘𑀫𑀼𑀔’𑀫𑁆𑀪𑁄𑀚, 𑀲𑀤𑀺𑀲𑀁 𑀫𑀼𑀦𑀺𑀦𑁄’’𑀇𑀢𑀺;

𑀯𑀺𑀧𑀭𑀻𑀢𑁄’𑀧𑀫𑀸 ‘‘𑀢𑀼𑀮𑁆𑀬, 𑀫𑀸𑀦𑀦𑁂𑀦’𑀫𑁆𑀩𑀼𑀚𑀁 𑀢𑀯’’.

𑁧𑁮𑁮. 𑀢𑀯𑀸’𑀦𑀦’𑀫𑀺𑀯’𑀫𑁆𑀪𑁄𑀚𑀁, 𑀅𑀫𑁆𑀪𑁄𑀚’𑀫𑀺𑀯 𑀢𑁂 𑀫𑀼𑀔𑀁;

𑀅𑀜𑁆𑀜𑀫𑀜𑁆𑀜𑁄𑀧𑀫𑀸 𑀲𑀸’𑀬𑀁, 𑀅𑀜𑁆𑀜𑀫𑀜𑁆𑀜𑁄𑀧𑀫𑀸𑀦𑀢𑁄.

𑁧𑁮𑁯. ‘‘𑀬𑀤𑀺 𑀓𑀺𑀜𑁆𑀘𑀺 𑀪𑀯𑁂’𑀫𑁆𑀪𑁄𑀚𑀁, 𑀮𑁄𑀘𑀦’𑀩𑁆𑀪𑀫𑀼𑀯𑀺𑀩𑁆𑀪𑀫𑀁;

𑀥𑀸𑀭𑁂𑀢𑀼𑀁 𑀫𑀼𑀔𑀲𑁄𑀪𑀁 𑀢𑀁, 𑀢𑀯𑁂’’𑀢𑀺 𑀅𑀩𑁆𑀪𑀼𑀢𑁄𑀧𑀫𑀸.

𑁧𑁯𑁦. ‘‘𑀲𑀼𑀕𑀦𑁆𑀥𑀺 𑀲𑁄𑀪𑀸 𑀲𑀫𑁆𑀩𑀦𑁆𑀥𑀻, 𑀲𑀺𑀲𑀺𑀭𑀁’𑀲𑀼 𑀯𑀺𑀭𑁄𑀥𑀺 𑀘;

𑀫𑀼𑀔𑀁 𑀢𑀯’𑀫𑁆𑀩𑀼𑀚𑀁𑀯𑁂’𑀢𑀺’’, 𑀲𑀸 𑀲𑀺𑀮𑁂𑀲𑁄𑀧𑀫𑀸 𑀫𑀢𑀸.

𑁧𑁯𑁧. 𑀲𑀭𑀽𑀧𑀲𑀤𑁆𑀤𑀯𑀸𑀘𑁆𑀘𑀢𑁆𑀢𑀸, 𑀲𑀸 𑀲𑀦𑁆𑀢𑀸𑀦𑁄𑀧𑀫𑀸 𑀬𑀣𑀸;

𑀩𑀸𑀮𑀸’𑀯𑀼’𑀬𑁆𑀬𑀸𑀦𑀫𑀸𑀮𑀸’𑀬𑀁, 𑀲𑀸’𑀮𑀓𑀸’𑀦𑀦𑀲𑁄𑀪𑀺𑀦𑀻.

𑁧𑁯𑁨. 𑀔𑀬𑀻 𑀘𑀦𑁆𑀤𑁄, 𑀩𑀳𑀼𑀭𑀚𑀁, 𑀧𑀤𑀼𑀫𑀁, 𑀢𑁂𑀳𑀺 𑀢𑁂 𑀫𑀼𑀔𑀁;

𑀲𑀫𑀸𑀦𑀫𑁆𑀧𑀺 𑀲𑀫𑀼𑀓𑁆𑀓𑀁𑀲𑀺, 𑀢𑁆𑀬’𑀬𑀁 𑀦𑀺𑀦𑁆𑀤𑁄𑀧𑀫𑀸 𑀫𑀢𑀸.

𑁧𑁯𑁩. 𑀅𑀲𑀫𑀢𑁆𑀣𑁄 𑀫𑀼𑀔𑁂𑀦𑀺’𑀦𑁆𑀤𑀼, 𑀚𑀺𑀦! 𑀢𑁂 𑀧𑀝𑀺𑀕𑀚𑁆𑀚𑀺𑀢𑀼𑀁;

𑀚𑀴𑁄 𑀓𑀮𑀗𑁆𑀓𑀻’𑀢𑀺 𑀅𑀬𑀁, 𑀧𑀝𑀺𑀲𑁂𑀥𑁄𑀧𑀫𑀸 𑀲𑀺𑀬𑀸.

𑁧𑁯𑁪. ‘‘𑀓𑀘𑁆𑀙𑀁 𑀘𑀦𑁆𑀤𑀸𑀭𑀯𑀺𑀦𑁆𑀤𑀸𑀦𑀁, 𑀅𑀢𑀺𑀓𑁆𑀓𑀫𑁆𑀫 𑀫𑀼𑀔𑀁 𑀢𑀯;

𑀅𑀢𑁆𑀢𑀦𑀸’𑀯 𑀲𑀫𑀁 𑀚𑀸𑀢’’, 𑀫𑀺𑀢𑁆𑀬’𑀲𑀸𑀥𑀸𑀭𑀡𑁄𑀧𑀫𑀸.

𑁧𑁯𑁫. ‘‘𑀲𑀩𑁆𑀩’𑀫𑁆𑀪𑁄𑀚’𑀧𑁆𑀧𑀪𑀸𑀲𑀸𑀭𑁄, 𑀭𑀸𑀲𑀺𑀪𑀽𑀢𑁄’𑀯 𑀓𑀢𑁆𑀣𑀘𑀺;

𑀢𑀯𑀸’𑀦𑀦𑀁 𑀯𑀺𑀪𑀸𑀢𑀻’’𑀢𑀺, 𑀳𑁄𑀢𑀸’𑀪𑀽𑀢𑁄𑀧𑀫𑀸 𑀅𑀬𑀁.

𑁧𑁯𑁬. 𑀧𑀢𑀻𑀬𑀢𑁂’𑀢𑁆𑀣𑀕𑀫𑁆𑀫𑀸 𑀢𑀼, 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀸 𑀓𑁆𑀯𑀘𑀺;

𑀲𑀫𑀸𑀲, 𑀧𑁆𑀧𑀘𑁆𑀘𑀬𑁂, 𑀯𑀸𑀤𑀺, 𑀲𑀤𑁆𑀤𑀬𑁄𑀕𑀁 𑀯𑀺𑀦𑀸 𑀅𑀧𑀺.

𑁧𑁯𑁭. 𑀪𑀺𑀗𑁆𑀕𑀸𑀦𑁂’𑀫𑀸𑀦𑀺 𑀘𑀓𑁆𑀔𑀽𑀦𑀺, 𑀦𑀸’𑀫𑁆𑀩𑀼𑀚𑀁 𑀫𑀼𑀔’𑀫𑁂𑀯𑀺’𑀤𑀁;

𑀲𑀼𑀩𑁆𑀬𑀢𑁆𑀢𑀲𑀤𑀺𑀲𑀢𑁆𑀢𑁂𑀦, 𑀲𑀸 𑀲𑀭𑀽𑀧𑁄𑀧𑀫𑀸 𑀫𑀢𑀸.

𑁧𑁯𑁮. ‘‘𑀫𑀬𑁂’𑀯 𑀫𑀼𑀔𑀲𑁄𑀪𑀸’𑀲𑁆𑀲𑁂, 𑀢𑁆𑀬𑀮’𑀫𑀺𑀦𑁆𑀤𑀼! 𑀯𑀺𑀓𑀢𑁆𑀣𑀦𑀸;

𑀬𑀢𑁄’𑀫𑁆𑀩𑀼𑀚𑁂𑀧𑀺 𑀲𑀸’𑀢𑁆𑀣𑀻𑀢𑀺’’, 𑀧𑀭𑀺𑀓𑀧𑁆𑀧𑁄𑀧𑀫𑀸 𑀅𑀬𑀁.

𑁧𑁯𑁯. ‘‘𑀓𑀺𑀁 𑀯𑀸’𑀫𑁆𑀩𑀼𑀚’𑀦𑁆𑀢𑁄𑀪𑀦𑁆𑀢𑀸𑀮𑀺, 𑀓𑀺𑀁 𑀮𑁄𑀮𑀦𑀬𑀦𑀁 𑀫𑀼𑀔𑀁;

𑀫𑀫 𑀤𑁄𑀮𑀸𑀬𑀢𑁂 𑀘𑀺𑀢𑁆𑀢’’, 𑀫𑀺𑀘𑁆𑀘’𑀬𑀁 𑀲𑀁𑀲𑀬𑁄𑀧𑀫𑀸.

𑁨𑁦𑁦. 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁 𑀧𑀤𑀲𑁆𑀲𑁂𑀢𑁆𑀯𑀸, 𑀲𑀥𑀫𑁆𑀫𑀲𑁆𑀲𑀸’𑀪𑀺𑀥𑀸𑀦𑀢𑁄;

𑀲𑀸𑀫𑁆𑀬𑀧𑁆𑀧𑀢𑀻𑀢𑀺𑀲𑀩𑁆𑀪𑀸𑀯𑀸, 𑀧𑀢𑀺𑀯𑀢𑁆𑀣𑀼𑀧𑀫𑀸 𑀬𑀣𑀸.

𑁨𑁦𑁧. 𑀚𑀦𑁂𑀲𑀼 𑀚𑀸𑀬𑀫𑀸𑀦𑁂𑀲𑀼, 𑀦𑁂’𑀓𑁄𑀧𑀺 𑀚𑀺𑀦𑀲𑀸𑀤𑀺𑀲𑁄;

𑀤𑀼𑀢𑀺𑀬𑁄 𑀦𑀦𑀼 𑀦𑀢𑁆𑀣𑁂’𑀯, 𑀧𑀸𑀭𑀺𑀚𑀸𑀢𑀲𑁆𑀲 𑀧𑀸𑀤𑀧𑁄.

𑁨𑁦𑁨. 𑀯𑀸𑀓𑁆𑀬𑀢𑁆𑀣𑁂𑀦𑁂’𑀯 𑀯𑀸𑀓𑁆𑀬𑀢𑁆𑀣𑁄, 𑀬𑀤𑀺 𑀓𑁄𑀘𑀽’𑀧𑀫𑀻𑀬𑀢𑁂;

𑀇𑀯𑀬𑀼𑀢𑁆𑀢𑀸, 𑀯𑀺𑀬𑀼𑀢𑁆𑀢𑀢𑁆𑀢𑀸, 𑀲𑀸 𑀯𑀸𑀓𑁆𑀬𑀢𑁆𑀣𑁄𑀧𑀫𑀸 𑀤𑁆𑀯𑀺𑀥𑀸.

𑀇𑀯𑀬𑀼𑀢𑁆𑀢𑀸

𑁨𑁦𑁩. 𑀚𑀺𑀦𑁄 𑀲𑀁𑀓𑁆𑀮𑁂𑀲𑀢𑀢𑁆𑀢𑀸𑀦𑀁, 𑀆𑀯𑀺𑀪𑀽𑀢𑁄 𑀚𑀦𑀸𑀦’𑀬𑀁;

𑀖𑀫𑁆𑀫𑀲𑀦𑁆𑀢𑀸𑀧𑀢𑀢𑁆𑀢𑀸𑀦𑀁, 𑀖𑀫𑁆𑀫𑀓𑀸𑀮𑁂’𑀫𑁆𑀩𑀼𑀤𑁄 𑀯𑀺𑀬.

𑀇𑀯𑀯𑀺𑀬𑀼𑀢𑁆𑀢𑀸

𑁨𑁦𑁪. 𑀫𑀼𑀦𑀺𑀦𑁆𑀤𑀸𑀦𑀦 𑀫𑀸𑀪𑀸𑀢𑀺, 𑀯𑀺𑀮𑀸𑀲𑁂𑀓𑀫𑀦𑁄𑀳𑀭𑀁;

𑀉𑀤𑁆𑀥𑀁 𑀲𑀫𑀼𑀕𑁆𑀕𑀢𑀲𑁆𑀲𑀸’𑀧𑀺, 𑀓𑀺𑀁 𑀢𑁂 𑀘𑀦𑁆𑀤 𑀯𑀺𑀚𑀫𑁆𑀪𑀦𑀸.

𑁨𑁦𑁫. 𑀲𑀫𑀼𑀩𑁆𑀩𑁂𑀚𑁂𑀢𑀺 𑀥𑀻𑀫𑀦𑁆𑀢𑀁, 𑀪𑀺𑀦𑁆𑀦𑀮𑀺𑀗𑁆𑀕𑀸𑀤𑀺𑀓𑀁 𑀢𑀼 𑀬𑀁;

𑀉𑀧𑀫𑀸𑀤𑀽𑀲𑀦𑀸𑀬𑀸’𑀮, 𑀫𑁂𑀢𑀁 𑀓𑀢𑁆𑀣𑀘𑀺 𑀢𑀁 𑀬𑀣𑀸.

𑁨𑁦𑁬. 𑀳𑀁𑀲𑀻’𑀯𑀸’𑀬𑀁 𑀲𑀲𑀻 𑀪𑀺𑀦𑁆𑀦, 𑀮𑀺𑀗𑁆𑀕𑀸, 𑀓𑀸𑀲𑀁 𑀲𑀭𑀸𑀦𑀺’𑀯;

𑀯𑀺𑀚𑀸𑀢𑀺 𑀯𑀘𑀦𑀸, 𑀳𑀻𑀦𑀸, 𑀲𑀸’𑀯 𑀪𑀢𑁆𑀢𑁄 𑀪𑀝𑁄’𑀥𑀺𑀧𑁂.

𑁨𑁦𑁭. ‘‘𑀔𑀚𑁆𑀚𑁄𑀢𑁄 𑀪𑀸𑀡𑀼𑀫𑀸𑀮𑀻’𑀯, 𑀯𑀺𑀪𑀸𑀢𑀺’’𑀢𑁆𑀬𑀥𑀺𑀓𑁄𑀧𑀫𑀸;

𑀅𑀨𑀼𑀝𑁆𑀞𑀢𑁆𑀣𑀸 ‘‘𑀩𑀮𑀫𑁆𑀩𑁄𑀥𑀺, 𑀲𑀸𑀕𑀭𑁄 𑀯𑀺𑀬 𑀲𑀁𑀔𑀼𑀪𑀺.’’

𑁨𑁦𑁮. ‘‘𑀘𑀦𑁆𑀤𑁂 𑀓𑀮𑀗𑁆𑀓𑁄 𑀪𑀺𑀗𑁆𑀕𑁄’𑀯𑁂’, 𑀢𑁆𑀬𑀼’𑀧𑀫𑀸𑀧𑁂𑀓𑁆𑀔𑀺𑀦𑀻 𑀅𑀬𑀁;

𑀔𑀡𑁆𑀟𑀺𑀢𑀸 𑀓𑁂𑀭𑀯𑀸’𑀓𑀸𑀭𑁄, 𑀲𑀓𑀮𑀗𑁆𑀓𑁄 𑀦𑀺𑀲𑀸𑀓𑀭𑁄.

𑁨𑁦𑁯. 𑀇𑀘𑁆𑀘𑁂𑀯𑀫𑀸𑀤𑀺𑀭𑀽𑀧𑁂𑀲𑀼, 𑀪𑀯𑀦𑁆𑀢𑀺 𑀯𑀺𑀕𑀢𑀸’𑀤𑀭𑀸;

𑀓𑀭𑁄𑀦𑁆𑀢𑀺 𑀘𑀸’𑀤𑀭𑀁 𑀥𑀻𑀭𑀸, 𑀧𑀬𑁄𑀕𑁂 𑀓𑁆𑀯𑀘𑀺 𑀤𑁂’𑀯 𑀢𑀼.

𑁨𑁧𑁦. 𑀇𑀢𑁆𑀣𑀻𑀬𑀁’𑀯𑀸’𑀚𑀦𑁄 𑀬𑀸𑀢𑀺, 𑀯𑀤𑀢𑁆𑀬𑁂’𑀲𑀸 𑀧𑀼𑀫𑀸 𑀯𑀺𑀬;

𑀧𑀺𑀬𑁄 𑀧𑀸𑀡𑀸 𑀇𑀯𑀸’𑀬𑀁 𑀫𑁂, 𑀯𑀺𑀚𑁆𑀚𑀸 𑀥𑀦’𑀫𑀺𑀯’𑀘𑁆𑀘𑀺𑀢𑀸.

𑁨𑁧𑁧. 𑀪𑀯𑀁 𑀯𑀺𑀬 𑀫𑀳𑀻𑀧𑀸𑀮, 𑀤𑁂𑀯𑀭𑀸𑀚𑀸 𑀯𑀺𑀭𑁄𑀘𑀢𑁂;

𑀅𑀮’𑀫𑀁𑀲𑀼𑀫𑀢𑁄 𑀓𑀘𑁆𑀙𑀁, 𑀢𑁂𑀚𑀲𑀸 𑀭𑁄𑀳𑀺𑀢𑀼𑀁 𑀅𑀬𑀁.

𑁨𑁧𑁨. 𑀉𑀧𑀫𑀸𑀦𑁄’𑀧𑀫𑁂𑀬𑁆𑀬𑀸𑀦𑀁, 𑀅𑀪𑁂𑀤𑀲𑁆𑀲 𑀦𑀺𑀭𑀽𑀧𑀦𑀸;

𑀉𑀧𑀫𑀸’𑀯 𑀢𑀺𑀭𑁄𑀪𑀽𑀢, 𑀪𑁂𑀤𑀸 𑀭𑀽𑀧𑀓 𑀫𑀼𑀘𑁆𑀘𑀢𑁂.

𑁨𑁧𑁩. 𑀅𑀲𑁂𑀲 𑀯𑀢𑁆𑀣𑀼 𑀯𑀺𑀲𑀬𑀁, 𑀏𑀓𑀤𑁂𑀲 𑀯𑀺𑀯𑀼𑀢𑁆𑀢𑀺 [𑀯𑀺𑀯𑀢𑁆𑀢𑀺 (𑀝𑀻𑀓𑀸)], 𑀘;

𑀢𑀁 𑀤𑁆𑀯𑀺𑀥𑀸 𑀧𑀼𑀦 𑀧𑀘𑁆𑀘𑁂𑀓𑀁, 𑀲𑀫𑀸𑀲𑀸𑀤𑀺𑀯𑀲𑀸 𑀢𑀺𑀥𑀸.

𑀅𑀲𑁂𑀲𑀯𑀢𑁆𑀣𑀼𑀯𑀺𑀲𑀬𑀲𑀫𑀸𑀲

𑁨𑁧𑁪. 𑀅𑀗𑁆𑀕𑀼𑀮𑀺𑀤𑀮 𑀲𑀁𑀲𑁄𑀪𑀺𑀁, 𑀦𑀔𑀤𑀻𑀥𑀺𑀢𑀺 𑀓𑁂𑀲𑀭𑀁;

𑀲𑀺𑀭𑀲𑀸 𑀦 𑀧𑀺𑀮𑀦𑁆𑀥𑀦𑁆𑀢𑀺, 𑀓𑁂 𑀫𑀼𑀦𑀺𑀦𑁆𑀤 𑀧𑀤’𑀫𑁆𑀩𑀼𑀚𑀁.

𑀅𑀲𑁂𑀲𑀯𑀢𑁆𑀣𑀼𑀯𑀺𑀲𑀬𑀅𑀲𑀫𑀸𑀲

𑁨𑁧𑁫. 𑀭𑀢𑀦𑀸𑀦𑀺 𑀕𑀼𑀡𑀸 𑀪𑀽𑀭𑀻, 𑀓𑀭𑀼𑀡𑀸 𑀲𑀻𑀢𑀮𑀁 𑀚𑀮𑀁;

𑀕𑀫𑁆𑀪𑀻𑀭𑀢𑁆𑀢 𑀫𑀕𑀸𑀥𑀢𑁆𑀢𑀁, 𑀧𑀘𑁆𑀘𑀓𑁆𑀔𑁄’𑀬𑀁 𑀚𑀺𑀦𑁄’𑀫𑁆𑀩𑀼𑀥𑀺.

𑀅𑀲𑁂𑀲𑀯𑀢𑁆𑀣𑀼𑀯𑀺𑀲𑀬𑀫𑀺𑀲𑁆𑀲𑀓

𑁨𑁧𑁬. 𑀘𑀦𑁆𑀤𑀺𑀓𑀸 𑀫𑀦𑁆𑀤𑀳𑀸𑀲𑀸 𑀢𑁂, 𑀫𑀼𑀦𑀺𑀦𑁆𑀤! 𑀯𑀤𑀦𑀺’𑀦𑁆𑀤𑀼𑀦𑁄;

𑀧𑀩𑁄𑀥𑀬𑀢𑁆𑀬’𑀬𑀁 𑀲𑀸𑀥𑀼, 𑀫𑀦𑁄 𑀓𑀼𑀫𑀼𑀤 𑀓𑀸𑀦𑀦𑀁.

𑁨𑁧𑁭. 𑀅𑀲𑁂𑀲𑀯𑀢𑁆𑀣𑀼𑀯𑀺𑀲𑀬𑁂, 𑀧𑀪𑁂𑀤𑁄 𑀭𑀽𑀧𑀓𑁂 𑀅𑀬𑀁;

𑀏𑀓𑀤𑁂𑀲𑀯𑀺𑀯𑀼𑀢𑁆𑀢𑀺𑀫𑁆𑀳𑀺, 𑀪𑁂𑀤𑁄 𑀤𑀸𑀦𑀺 𑀧𑀯𑀼𑀘𑁆𑀘𑀢𑀺.

𑀏𑀓𑀤𑁂𑀲𑀯𑀺𑀯𑀼𑀢𑁆𑀢𑀺𑀲𑀫𑀸𑀲

𑁨𑁧𑁮. 𑀯𑀺𑀮𑀸𑀲 𑀳𑀸𑀲 𑀓𑀼𑀲𑀼𑀫𑀁, 𑀭𑀼𑀘𑀺𑀭𑀸’𑀥𑀭 𑀧𑀮𑁆𑀮𑀯𑀁;

𑀲𑀼𑀔𑀁 𑀓𑁂 𑀯𑀸 𑀦 𑀯𑀺𑀦𑁆𑀤𑀦𑁆𑀢𑀺, 𑀧𑀲𑁆𑀲𑀦𑁆𑀢𑀸 𑀫𑀼𑀦𑀺𑀦𑁄 𑀫𑀼𑀔𑀁.

𑀏𑀓𑀤𑁂𑀲𑀯𑀺𑀯𑀼𑀢𑁆𑀢𑀺𑀅𑀲𑀫𑀸𑀲

𑁨𑁧𑁯. 𑀧𑀸𑀤𑀤𑁆𑀯𑀦𑁆𑀤𑀁 𑀫𑀼𑀦𑀺𑀦𑁆𑀤𑀲𑁆𑀲, 𑀤𑀤𑀸𑀢𑀼 𑀯𑀺𑀚𑀬𑀁 𑀢𑀯;

𑀦𑀔𑀭𑀁𑀲𑀻 𑀧𑀭𑀁 𑀓𑀦𑁆𑀢𑀸, 𑀬𑀲𑁆𑀲 𑀧𑀸𑀧𑀚𑀬𑀤𑁆𑀥𑀚𑀸.

𑀏𑀓𑀤𑁂𑀲𑀯𑀺𑀯𑀼𑀢𑁆𑀢𑀺𑀫𑀺𑀲𑁆𑀲𑀓

𑁨𑁨𑁦. 𑀲𑀼𑀦𑀺𑀫𑁆𑀫𑀮𑀓𑀧𑁄𑀮𑀲𑁆𑀲, 𑀫𑀼𑀦𑀺𑀦𑁆𑀤 𑀯𑀤𑀦𑀺’𑀦𑁆𑀤𑀼𑀦𑁄;

𑀲𑀸𑀥𑀼’𑀧𑁆𑀧𑀩𑀼𑀤𑁆𑀥 𑀳𑀤𑀬𑀁, 𑀚𑀸𑀢𑀁 𑀓𑁂𑀭𑀯 𑀓𑀸𑀦𑀦𑀁.

𑁨𑁨𑁧. 𑀭𑀽𑀧𑀓𑀸𑀦𑀺 𑀩𑀳𑀽𑀦𑁆𑀬𑁂’𑀯 [𑀝𑀻𑀓𑀸𑀬𑀁 𑀉𑀤𑁆𑀥𑀝𑀁 𑀬𑀼𑀢𑁆𑀢𑀭𑀽𑀧𑀓𑀁 𑀲𑀺𑀢𑀧𑀼𑀧𑁆𑀨𑀼𑀚𑀮𑀁 𑀮𑁄𑀮, 𑀦𑁂𑀢𑁆𑀢𑀪𑀺𑀗𑁆𑀕 𑀢𑀯𑀸’𑀦𑀦𑀁; 𑀓𑀲𑁆𑀲 𑀦𑀸𑀫 𑀫𑀦𑁄 𑀥𑀻𑀭, 𑀦𑀸𑀓𑀟𑁆𑀠𑀢𑀺 𑀫𑀦𑁄𑀳𑀭𑀁;], 𑀬𑀼𑀢𑁆𑀢𑀸, 𑀬𑀼𑀢𑁆𑀢𑀸𑀤𑀺𑀪𑁂𑀤𑀢𑁄;

𑀯𑀺𑀲𑀼𑀁 𑀦 𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀏𑀢𑁆𑀣𑁂’𑀯’𑀦𑁆𑀢𑁄𑀕𑀥𑀸𑀦𑀺’𑀢𑀺.

𑁨𑁨𑁨. ‘‘𑀘𑀦𑁆𑀤𑀺𑀫𑀸’𑀓𑀸𑀲𑀧𑀤𑀼𑀫’’, 𑀫𑀺𑀘𑁆𑀘𑁂𑀢𑀁 𑀔𑀡𑁆𑀟𑀭𑀽𑀧𑀓𑀁;

𑀤𑀼𑀝𑁆𑀞, ‘‘𑀫𑀫𑁆𑀩𑁄𑀭𑀼𑀳𑀯𑀦𑀁, 𑀦𑁂𑀢𑁆𑀢𑀸𑀦𑀺’𑀘𑁆𑀘𑀸’’𑀤𑀺 𑀲𑀼𑀦𑁆𑀤𑀭𑀁.

𑁨𑁨𑁩. 𑀧𑀭𑀺𑀬𑀦𑁆𑀢𑁄 𑀯𑀺𑀓𑀧𑁆𑀧𑀸𑀦𑀁, 𑀭𑀽𑀧𑀓𑀲𑁆𑀲𑁄’𑀧𑀫𑀸𑀬 𑀘;

𑀦𑀢𑁆𑀣𑀺 𑀬𑀁 𑀢𑁂𑀦 𑀯𑀺𑀜𑁆𑀜𑁂𑀬𑁆𑀬𑀁, 𑀅𑀯𑀼𑀢𑁆𑀢 𑀫𑀦𑀼𑀫𑀸𑀦𑀢𑁄.

𑁨𑁨𑁪. 𑀧𑀼𑀦𑀧𑁆𑀧𑀼𑀦 𑀫𑀼𑀘𑁆𑀘𑀸𑀭𑀡𑀁 [𑀧𑀼𑀦𑀧𑁆𑀧𑀼𑀦𑀼𑀘𑁆𑀘𑀸𑀭𑀡𑀁 𑀬𑀁 (𑀲𑀻. 𑀓.)], 𑀬𑀫𑀢𑁆𑀣𑀲𑁆𑀲, 𑀧𑀤𑀲𑁆𑀲 𑀘;

𑀉𑀪𑀬𑁂𑀲𑀜𑁆𑀘 𑀯𑀺𑀜𑁆𑀜𑁂𑀬𑁆𑀬𑀸, 𑀲𑀸’𑀬’𑀫𑀸𑀯𑀼𑀢𑁆𑀢𑀺 𑀦𑀸𑀫𑀢𑁄.

𑀅𑀢𑁆𑀣𑀸𑀯𑀼𑀢𑁆𑀢𑀺

𑁨𑁨𑁫. 𑀫𑀦𑁄 𑀳𑀭𑀢𑀺 𑀲𑀩𑁆𑀩𑁂𑀲𑀁, 𑀆𑀤𑀤𑀸𑀢𑀺 𑀤𑀺𑀲𑀸 𑀤𑀲;

𑀕𑀡𑁆𑀳𑀸𑀢𑀺 𑀦𑀺𑀫𑁆𑀫𑀮𑀢𑁆𑀢𑀜𑁆𑀘, 𑀬𑀲𑁄𑀭𑀸𑀲𑀺 𑀚𑀺𑀦𑀲𑁆𑀲’𑀬𑀁.

𑀧𑀤𑀸𑀯𑀼𑀢𑁆𑀢𑀺

𑁨𑁨𑁬. 𑀯𑀺𑀪𑀸𑀲𑁂𑀦𑁆𑀢𑀺 𑀤𑀺𑀲𑀸 𑀲𑀩𑁆𑀩𑀸, 𑀫𑀼𑀦𑀺𑀦𑁄 𑀤𑁂𑀳𑀓𑀦𑁆𑀢𑀺𑀬𑁄;

𑀯𑀺𑀪𑀸 𑀲𑁂𑀦𑁆𑀢𑀺 𑀘 𑀲𑀩𑁆𑀩𑀸𑀧𑀺, 𑀘𑀦𑁆𑀤𑀸𑀤𑀻𑀦𑀁 𑀳𑀢𑀸 𑀯𑀺𑀬.

𑀉𑀪𑀬𑀸𑀯𑀼𑀢𑁆𑀢𑀺

𑁨𑁨𑁭. 𑀚𑀺𑀢𑁆𑀯𑀸 𑀯𑀺𑀳𑀭𑀢𑀺 𑀓𑁆𑀮𑁂𑀲, 𑀭𑀺𑀧𑀼𑀁 𑀮𑁄𑀓𑁂 𑀚𑀺𑀦𑁄 𑀅𑀬𑀁;

𑀯𑀺𑀳𑀭𑀢𑁆𑀬’𑀭𑀺𑀯𑀕𑁆𑀕𑁄’𑀬𑀁, 𑀭𑀸𑀲𑀺𑀪𑀽𑀢𑁄’𑀯 𑀤𑀼𑀚𑁆𑀚𑀦𑁂.

𑁨𑁨𑁮. 𑀏𑀓𑀢𑁆𑀣 𑀯𑀢𑁆𑀢𑀫𑀸𑀦𑀫𑁆𑀧𑀺, 𑀲𑀩𑁆𑀩𑀯𑀸𑀓𑁆𑀬𑁄’𑀧𑀓𑀸𑀭𑀓𑀁;

𑀤𑀻𑀧𑀓𑀁 𑀦𑀸𑀫 𑀢𑀁 𑀘𑀸𑀤𑀺, 𑀫𑀚𑁆𑀛, 𑀦𑁆𑀢𑀯𑀺𑀲𑀬𑀁 𑀢𑀺𑀥𑀸.

𑀆𑀤𑀺 𑀤𑀻𑀧𑀓

𑁨𑁨𑁯. 𑀅𑀓𑀸𑀲𑀺 𑀩𑀼𑀤𑁆𑀥𑁄 𑀯𑁂𑀦𑁂𑀬𑁆𑀬, 𑀩𑀦𑁆𑀥𑀽𑀦 𑀫𑀫𑀺𑀢𑁄’𑀤𑀬𑀁;

𑀲𑀩𑁆𑀩𑀧𑀸𑀧𑁂𑀳𑀺 𑀘 𑀲𑀫𑀁, 𑀦𑁂𑀓𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀁.