𑁫. 𑀪𑀸𑀯𑀸𑀯𑀩𑁄𑀥-𑀧𑀜𑁆𑀘𑀫𑀧𑀭𑀺𑀘𑁆𑀙𑁂𑀤

𑁩𑁩𑁮. 𑀧𑀝𑀺𑀪𑀸𑀦𑀯𑀢𑀸 𑀮𑁄𑀓, 𑀯𑁄𑀳𑀸𑀭’𑀫𑀦𑀼𑀲𑀸𑀭𑀺𑀦𑀸;

𑀢𑀢𑁄’𑀘𑀺𑀢𑁆𑀬 𑀲𑀫𑀼𑀮𑁆𑀮𑀸𑀲, 𑀯𑁂𑀤𑀺𑀦𑀸 𑀓𑀯𑀺𑀦𑀸 𑀧𑀭𑀁.

𑁩𑁩𑁯. 𑀞𑀸𑀬𑀺𑀲𑀫𑁆𑀩𑀦𑁆𑀥𑀺𑀦𑁄 𑀪𑀸𑀯, 𑀯𑀺𑀪𑀸𑀯𑀸 𑀲𑀸’𑀦𑀼𑀪𑀸𑀯𑀓𑀸;

𑀲𑀫𑁆𑀩𑀚𑁆𑀛𑀦𑁆𑀢𑀺 𑀦𑀺𑀩𑀦𑁆𑀥𑀸 𑀢𑁂, 𑀭𑀲’𑀲𑁆𑀲𑀸𑀤𑀸𑀬 𑀲𑀸𑀥𑀼𑀦𑀁.

𑀪𑀸𑀯𑀅𑀥𑀺𑀧𑁆𑀧𑀸𑀬

𑁩𑁪𑁦. 𑀘𑀺𑀢𑁆𑀢 𑀯𑀼𑀢𑁆𑀢𑀺 𑀯𑀺𑀲𑁂𑀲𑀸 𑀢𑀼, 𑀪𑀸𑀯𑀬𑀦𑁆𑀢𑀺 𑀭𑀲𑁂 𑀬𑀢𑁄;

𑀭𑀢𑁆𑀬𑀸𑀤𑀬𑁄 𑀢𑀢𑁄 𑀪𑀸𑀯, 𑀲𑀤𑁆𑀤𑁂𑀦 𑀧𑀭𑀺𑀓𑀺𑀢𑁆𑀢𑀺𑀢𑀸.

𑀞𑀸𑀬𑀻𑀪𑀸𑀯𑀅𑀥𑀺𑀧𑁆𑀧𑀸𑀬

𑁩𑁪𑁧. 𑀯𑀺𑀭𑁄𑀥𑀺𑀦𑀸’𑀜𑁆𑀜𑀪𑀸𑀯𑁂𑀦, 𑀬𑁄 𑀪𑀸𑀯𑁄 𑀦 𑀢𑀺𑀭𑁄𑀳𑀺𑀢𑁄;

𑀲𑀻𑀮𑁂𑀦 𑀢𑀺𑀝𑁆𑀞𑀢𑀺’𑀘𑁆𑀘𑁂𑀲𑁄, ‘𑀞𑀸𑀬𑀻𑀪𑀸𑀯𑁄’𑀢𑀺 𑀲𑀤𑁆𑀤𑀺𑀢𑁄.

𑀞𑀸𑀬𑀻𑀪𑀸𑀯𑀧𑁆𑀧𑀪𑁂𑀤𑀉𑀤𑁆𑀤𑁂𑀲

𑁩𑁪𑁨. 𑀭𑀢𑀺, 𑀳𑀲𑁆𑀲𑁄, 𑀘 𑀲𑁄𑀓𑁄, 𑀘,

𑀓𑁄𑀥𑀼, 𑀲𑁆𑀲𑀸𑀳𑀸, 𑀪𑀬𑀁,𑀧𑀺 𑀘;

𑀚𑀺𑀕𑀼𑀘𑁆𑀙𑀸, 𑀯𑀺𑀫𑁆𑀳𑀬𑁄, 𑀘𑁂𑀯, 𑀲𑀫𑁄 𑀘 𑀦𑀯 𑀞𑀸𑀬𑀺𑀦𑁄.

𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀅𑀥𑀺𑀧𑁆𑀧𑀸𑀬

𑁩𑁪𑁩. 𑀢𑀺𑀭𑁄𑀪𑀸𑀯𑀸, 𑀯𑀺𑀪𑀸𑀯𑀸’𑀤𑀺, 𑀯𑀺𑀲𑁂𑀲𑀦𑀸’𑀪𑀺𑀫𑀼𑀔𑁆𑀬𑀢𑁄;

𑀬𑁂 𑀢𑁂 𑀘𑀭𑀦𑁆𑀢𑀺 𑀲𑀻𑀮𑁂𑀦, 𑀢𑁂 𑀳𑁄𑀦𑁆𑀢𑀺 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀩𑁆𑀬𑀪𑀺𑀘𑀸𑀭𑀺𑀪𑀸𑀯𑀧𑀪𑁂𑀤

𑁩𑁪𑁪. 𑀦𑀺𑀩𑁆𑀩𑁂𑀤𑁄, 𑀢𑀓𑁆𑀓, 𑀲𑀗𑁆𑀓𑀸, 𑀲𑀫,

𑀥𑀺𑀢𑀺, 𑀚𑀴𑀢𑀸, 𑀤𑀻𑀦𑀢𑀼, 𑀕𑁆𑀕𑀸, 𑀮𑀲𑀢𑁆𑀢𑀁,

𑀲𑀼𑀢𑁆𑀢𑀁, 𑀢𑀸𑀲𑁄, 𑀕𑀺𑀮𑀸𑀦𑀼, 𑀲𑁆𑀲𑀼𑀓, 𑀳𑀭𑀺𑀲,

𑀲𑀢𑀺, 𑀲𑁆𑀲𑀸, 𑀯𑀺𑀲𑀸𑀤𑀸, 𑀩𑀳𑀺𑀢𑁆𑀣𑀸 [𑀩𑀳𑀺𑀤𑁆𑀥𑀸 (𑀓.)];

𑀘𑀺𑀦𑁆𑀢𑀸, 𑀕𑀩𑁆𑀩𑀸, 𑀧𑀫𑀸𑀭𑁄, 𑀫𑀭𑀺𑀲, 𑀫𑀤,

𑀫𑀢𑀼, 𑀫𑁆𑀫𑀸𑀤, 𑀫𑁄𑀳𑀸, 𑀯𑀺𑀩𑁄𑀥𑁄,

𑀦𑀺𑀤𑁆𑀤𑀸, 𑀯𑁂𑀕𑀸, 𑀲𑀩𑀺𑀮𑀁, 𑀫𑀭𑀡,

𑀘𑀧𑀮𑀢𑀸 [𑀲𑀘𑀧𑀮𑀸 (𑀓.)], 𑀩𑁆𑀬𑀸𑀥𑀺, 𑀢𑁂𑀢𑁆𑀢𑀺𑀁𑀲 𑀫𑁂𑀢𑁂.

𑀲𑀢𑁆𑀢𑀺𑀓𑀪𑀸𑀯𑀅𑀥𑀺𑀧𑁆𑀧𑀸𑀬

𑁩𑁪𑁫. 𑀲𑀫𑀸𑀳𑀺𑀢’𑀢𑁆𑀢’𑀧𑁆𑀧𑀪𑀯𑀁, 𑀲𑀢𑁆𑀢𑀁 [𑀲𑀢𑁆𑀯𑀁 (𑀓.)] 𑀢𑁂𑀦𑁄’𑀧𑀧𑀸𑀤𑀺𑀢𑀸;

𑀲𑀢𑁆𑀢𑀺𑀓𑀸 [𑀲𑀸𑀢𑁆𑀯𑀺𑀓𑀸 (𑀓.)] 𑀧𑁆𑀬’𑀦𑀼𑀪𑀸𑀯𑀢𑁆𑀢𑁂, 𑀯𑀺𑀲𑀼𑀁 𑀪𑀸𑀯𑀸 𑀪𑀯𑀦𑁆𑀢𑀺 𑀢𑁂.

𑀲𑀢𑁆𑀢𑀺𑀓𑀪𑀸𑀯𑀧𑁆𑀧𑀪𑁂𑀤

𑁩𑁪𑁬. 𑀣𑀫𑁆𑀪𑁄, 𑀧𑀴𑀬, 𑀭𑁄𑀫𑀜𑁆𑀘𑀸, 𑀢𑀣𑀸 𑀲𑁂𑀤, 𑀲𑁆𑀲𑀼, 𑀯𑁂𑀧𑀣𑀼;

𑀯𑁂𑀯𑀡𑁆𑀡𑀺𑀬𑀁, 𑀯𑀺𑀲𑀭𑀢𑀸, 𑀪𑀸𑀯𑀸’𑀝𑁆𑀞𑁂’𑀢𑁂 𑀢𑀼 𑀲𑀢𑁆𑀢𑀺𑀓𑀸.

𑁩𑁪𑁭. 𑀬𑀤𑀸 𑀭𑀢𑁆𑀬𑀸𑀤𑀬𑁄 𑀪𑀸𑀯𑀸, 𑀞𑀺𑀢𑀺𑀲𑀻𑀮𑀸 𑀦 𑀳𑁄𑀦𑁆𑀢𑀺 𑀘𑁂;

𑀢𑀤𑀸 𑀲𑀩𑁆𑀩𑁂𑀧𑀺 𑀢𑁂 𑀪𑀸𑀯𑀸, 𑀪𑀯𑀦𑁆𑀢𑀺 𑀩𑁆𑀬𑀪𑀺𑀘𑀸𑀭𑀺𑀦𑁄.

𑁩𑁪𑁮. 𑀯𑀺𑀪𑀸𑀯𑁄 𑀓𑀸𑀭𑀡𑀁 𑀢𑁂𑀲𑀼, 𑀧𑁆𑀧𑀢𑁆𑀢𑀺𑀬𑀼’𑀤𑁆𑀤𑀻𑀧𑀦𑁂 𑀢𑀣𑀸;

𑀬𑁄 𑀲𑀺𑀬𑀸 𑀩𑁄𑀥𑀓𑁄 𑀢𑁂𑀲𑀁,

𑀅𑀦𑀼𑀪𑀸𑀯𑁄’𑀬 𑀫𑀻𑀭𑀺𑀢𑁄.

𑁩𑁪𑁯. 𑀦𑁂𑀓𑀳𑁂𑀢𑀼𑀁 𑀫𑀦𑁄𑀯𑀼𑀢𑁆𑀢𑀺, 𑀯𑀺𑀲𑁂𑀲𑀜𑁆𑀘 𑀯𑀺𑀪𑀸𑀯𑀺𑀢𑀼𑀁;

𑀪𑀸𑀯𑀁 𑀯𑀺𑀪𑀸𑀯𑀸’𑀦𑀼𑀪𑀸𑀯𑀸, 𑀯𑀡𑁆𑀡𑀺𑀬𑀸 𑀩𑀦𑁆𑀥𑀦𑁂 𑀨𑀼𑀝𑀁.

𑁩𑁫𑁦. 𑀲𑀯𑀺𑀪𑀸𑀯𑀸’𑀦𑀼𑀪𑀸𑀯𑁂𑀳𑀺, 𑀪𑀸𑀯𑀸 𑀢𑁂 𑀢𑁂 𑀬𑀣𑀸𑀭𑀳𑀁;

𑀯𑀡𑁆𑀡𑀦𑀻𑀬𑀸 𑀬𑀣𑁄’𑀘𑀺𑀢𑁆𑀬𑀁, 𑀮𑁄𑀓𑀭𑀽𑀧𑀸’𑀦𑀼𑀕𑀸𑀫𑀺𑀦𑀸.

𑁩𑁫𑁧. 𑀘𑀺𑀢𑁆𑀢 𑀯𑀼𑀢𑁆𑀢𑀺 𑀯𑀺𑀲𑁂𑀲𑀢𑁆𑀢𑀸, 𑀫𑀸𑀦𑀲𑀸 𑀲𑀢𑁆𑀢𑀺𑀓𑀸’𑀗𑁆𑀕𑀢𑁄;

𑀩𑀳𑀺 𑀦𑀺𑀲𑁆𑀲𑀝 𑀲𑁂𑀤𑀸𑀤𑀺, 𑀅𑀦𑀼𑀪𑀸𑀯𑁂𑀳𑀺 𑀯𑀡𑁆𑀡𑀺𑀬𑀸.

𑀭𑀲𑀅𑀥𑀺𑀧𑁆𑀧𑀸𑀬

𑁩𑁫𑁨. 𑀲𑀸𑀫𑀸𑀚𑀺𑀓𑀸𑀦 𑀫𑀸𑀦𑀦𑁆𑀤𑁄, 𑀬𑁄 𑀩𑀦𑁆𑀥𑀢𑁆𑀣𑀸’𑀦𑀼𑀲𑀸𑀭𑀺𑀦𑀁;

𑀭𑀲𑀻𑀬𑀢𑀻𑀢𑀺 𑀢𑀜𑁆𑀜𑀽𑀳𑀺, 𑀭𑀲𑁄 𑀦𑀸𑀫𑀸’𑀬’𑀫𑀻𑀭𑀺𑀢𑁄.

𑀭𑀲𑀧𑁆𑀧𑀪𑁂𑀤

𑁩𑁫𑁩. 𑀲𑀯𑀺𑀪𑀸𑀯𑀸, 𑀦𑀼𑀪𑀸𑀯𑁂𑀳𑀺, 𑀲𑀢𑁆𑀢𑀺𑀓,𑀩𑁆𑀬𑀪𑀺𑀘𑀸𑀭𑀺𑀪𑀺;

𑀅𑀲𑁆𑀲𑀸𑀤𑀺𑀬𑀢𑁆𑀢 𑀫𑀸𑀦𑀻𑀬, 𑀫𑀸𑀦𑁄 𑀞𑀸𑀬𑁂’𑀯 𑀲𑁄 𑀭𑀲𑁄.

𑁩𑁫𑁪. 𑀲𑀺𑀗𑁆𑀕𑀸𑀭,𑀳𑀲𑁆𑀲,𑀓𑀭𑀼𑀡𑀸, 𑀭𑀼𑀤𑁆𑀤,𑀯𑀻𑀭,𑀪𑀬𑀸𑀦𑀓𑀸;

𑀩𑀻𑀪𑀘𑁆𑀙,𑀩𑁆𑀪𑀼𑀢,𑀲𑀦𑁆𑀢𑀸, 𑀘, 𑀭𑀲𑀸 𑀞𑀸𑀬𑀻𑀦 𑀦𑀼𑀓𑁆𑀓𑀫𑀸.

𑁩𑁫𑁫. 𑀤𑀼𑀓𑁆𑀔𑀭𑀽𑀧𑁂’𑀬’ 𑀫𑀸𑀦𑀦𑁆𑀤𑁄, 𑀓𑀣𑀁 𑀦𑀼 𑀓𑀭𑀼𑀡𑀸𑀤𑀺𑀓𑁂?

𑀲𑀺𑀬𑀸 𑀲𑁄𑀢𑀽𑀦𑀫𑀸𑀦𑀦𑁆𑀤𑁄,

𑀲𑁄𑀓𑁄 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀳𑀺.

𑀞𑀸𑀬𑀻𑀪𑀸𑀯 𑀦𑀺𑀤𑁆𑀤𑁂𑀲 𑀭𑀢𑀺𑀝𑁆𑀞𑀸𑀬𑀻𑀪𑀸𑀯

𑁩𑁫𑁬. 𑀭𑀫𑁆𑀫,𑀤𑁂𑀲, 𑀓𑀮𑀸, 𑀓𑀸𑀮, 𑀯𑁂𑀲𑀸𑀤𑀺, 𑀧𑀝𑀺𑀲𑁂𑀯𑀦𑀸;

𑀬𑀼𑀯𑀸𑀦’𑀜𑁆𑀜𑁄𑀜𑁆𑀜𑀭𑀢𑁆𑀢𑀸𑀦𑀁, 𑀧𑀫𑁄𑀤𑁄 𑀭𑀢𑀺 𑀭𑀼𑀘𑁆𑀘𑀢𑁂.

𑁩𑁫𑁭. 𑀬𑀼𑀢𑁆𑀬𑀸 𑀪𑀸𑀯𑀸𑀦𑀼𑀪𑀸𑀯𑀸 𑀢𑁂, 𑀦𑀺𑀩𑀦𑁆𑀥𑀸 𑀧𑁄𑀲𑀬𑀦𑁆𑀢𑀺 𑀦𑀁;

𑀲𑁄𑀧𑁆𑀬’𑀬𑁄𑀕, 𑀯𑀺𑀧𑁆𑀧𑀬𑁄𑀕, 𑀲𑀫𑁆𑀪𑁄𑀕𑀸𑀦𑀁 𑀯𑀲𑀸 𑀢𑀺𑀥𑀸.

𑀳𑀲𑁆𑀲𑀝𑁆𑀞𑀸𑀬𑀻𑀪𑀸𑀯

𑁩𑁫𑁮. 𑀯𑀺𑀓𑀸𑀭𑀸’𑀓𑀢𑀺𑀆𑀤𑀻𑀳𑀺, 𑀅𑀢𑁆𑀢𑀦𑁄 𑀣 𑀧𑀭𑀲𑁆𑀲 𑀯𑀸;

𑀳𑀲𑁆𑀲𑁄 𑀦𑀺𑀤𑁆𑀤𑀸, 𑀲𑀫𑀸’𑀮𑀲𑁆𑀬, 𑀫𑀼𑀘𑁆𑀙𑀸𑀤𑀺,𑀩𑁆𑀬𑀪𑀺𑀘𑀸𑀭𑀺𑀪𑀺;

𑀧𑀭𑀺𑀧𑁄𑀲𑁂 𑀲𑀺𑀬𑀸 𑀳𑀲𑁆𑀲𑁄, 𑀪𑀺𑀬𑁆𑀬𑁄’𑀢𑁆𑀣𑀺𑀧𑀪𑀼𑀢𑀻𑀦𑀁 𑀲𑁄.

𑀳𑀲𑁆𑀲𑀧𑁆𑀧𑀪𑁂𑀤

𑁩𑁫𑁯. 𑀲𑀺𑀢 𑀫𑀺𑀳 𑀯𑀺𑀓𑀸𑀲𑀺 𑀦𑀬𑀦𑀁,

𑀓𑀺𑀜𑁆𑀘𑀸’𑀮𑀓𑁆𑀔𑀺𑀬 𑀤𑀺𑀚𑀁 𑀢𑀼 𑀢𑀁 𑀳𑀲𑀺𑀢𑀁;

𑀫𑀥𑀼𑀭𑀲𑁆𑀲𑀭𑀁 𑀯𑀺𑀳𑀲𑀺𑀢𑀁, 𑀅𑀁𑀲𑀲𑀺𑀭𑁄𑀓𑀫𑁆𑀧𑀫𑀼𑀧𑀳𑀲𑀺𑀢𑀁.

𑁩𑁬𑁦. 𑀅𑀧𑀳𑀲𑀺𑀢𑀁 𑀲𑀚𑀮’𑀓𑁆𑀔𑀺, 𑀯𑀺𑀓𑁆𑀔𑀺𑀢𑁆𑀢𑀗𑁆𑀕𑀁 𑀪𑀯𑀢𑁆𑀬’𑀢𑀺𑀳𑀲𑀺𑀢𑀁;

𑀤𑁆𑀯𑁂 𑀤𑁆𑀯𑁂 𑀓𑀣𑀺𑀢𑀸 𑀘𑁂’𑀲𑀁,

𑀚𑁂𑀝𑁆𑀞𑁂 [𑀫𑀚𑁆𑀛𑁂’𑀥𑀫𑁂𑀢𑀺 𑀏𑀢𑁆𑀣 𑀫𑀚𑁆𑀛𑁂 𑀅𑀥𑀫𑁂𑀢𑀺 𑀧𑀤𑀘𑁆𑀙𑁂𑀤𑁄] 𑀫𑀚𑁆𑀛𑁂’𑀥𑀫𑁂 𑀘 𑀓𑀫𑀲𑁄.

𑀓𑀭𑀼𑀡𑀝𑁆𑀞𑀸𑀬𑀻𑀪𑀸𑀯

𑁩𑁬𑁧. 𑀲𑁄𑀓𑀭𑀽𑀧𑁄 𑀢𑀼 𑀓𑀭𑀼𑀡𑁄, 𑀦𑀺𑀝𑁆𑀞𑀧𑁆𑀧𑀢𑁆𑀢𑀺’𑀝𑁆𑀞 𑀦𑀸𑀲𑀢𑁄;

𑀢𑀢𑁆𑀣𑀸’𑀦𑀼𑀪𑀸𑀯𑀸 𑀭𑀼𑀤𑀺𑀢, 𑀧𑀴𑀬,𑀢𑁆𑀣𑀫𑁆𑀪𑀓𑀸𑀤𑀬𑁄;

𑀯𑀺𑀲𑀸𑀤𑀸,𑀮𑀲𑁆𑀬,𑀫𑀭𑀡, 𑀘𑀺𑀦𑁆𑀢𑀸’𑀤𑀻 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀭𑀼𑀤𑁆𑀤𑀝𑁆𑀞𑀸𑀬𑀻𑀪𑀸𑀯

𑁩𑁬𑁨. 𑀓𑁄𑀥𑁄 𑀫𑀘𑁆𑀙𑀭𑀺𑀬𑀸’𑀤𑀻𑀳𑀺, 𑀧𑁄𑀲𑁂 𑀢𑀸𑀲, 𑀫𑀤𑀸𑀤𑀺𑀪𑀺;

𑀦𑀬𑀦𑀸’𑀭𑀼𑀡𑀢𑀸𑀤𑀻𑀳𑀺, 𑀭𑀼𑀤𑁆𑀤𑁄 𑀦𑀸𑀫 𑀭𑀲𑁄 𑀪𑀯𑁂.

𑀯𑀻𑀭𑀝𑁆𑀞𑀸𑀬𑀻𑀪𑀸𑀯

𑁩𑁬𑁩. 𑀧𑀢𑀸𑀧, 𑀯𑀺𑀓𑁆𑀓𑀫𑀸’𑀤𑀻𑀳𑀼, 𑀲𑁆𑀲𑀸𑀳𑁄 ‘𑀯𑀻𑀭𑁄’𑀢𑀺 𑀲𑀜𑁆𑀜𑀺𑀢𑁄;

𑀭𑀡,𑀤𑀸𑀦,𑀤𑀬𑀸𑀬𑁄𑀕𑀸, 𑀯𑀻𑀭𑁄’𑀬𑀁 𑀢𑀺𑀯𑀺𑀥𑁄 𑀪𑀯𑁂;

𑀢𑁂𑀯𑀸’𑀦𑀼𑀪𑀸𑀯𑀸 𑀥𑀺𑀢𑀺,𑀫, 𑀢𑁆𑀬𑀸’𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀪𑀬𑀝𑁆𑀞𑀸𑀬𑀻𑀪𑀸𑀯

𑁩𑁬𑁪. 𑀯𑀺𑀓𑀸𑀭𑀸,𑀲𑀦𑀺,𑀲𑀢𑁆𑀢𑀸’𑀤𑀺, 𑀪𑀬𑀼’𑀓𑁆𑀓𑀁𑀲𑁄 𑀪𑀬𑀸𑀦𑀓𑁄;

𑀲𑁂𑀤𑀸’𑀤𑀬𑁄 𑀦𑀼𑀪𑀸𑀯𑁂’𑀢𑁆𑀣, 𑀢𑀸𑀲𑀸’𑀤𑀻 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀚𑀺𑀕𑀼𑀘𑁆𑀙𑀸𑀝𑁆𑀞𑀸𑀬𑀻𑀪𑀸𑀯

𑁩𑁬𑁫. 𑀚𑀺𑀕𑀼𑀘𑁆𑀙𑀸 𑀭𑀼𑀥𑀺𑀭𑀸’𑀤𑀻𑀳𑀺, 𑀧𑀽𑀢𑁆𑀬𑀸’𑀤𑀻𑀳𑀺 𑀯𑀺𑀭𑀸𑀕𑀢𑁄;

𑀩𑀻𑀪𑀘𑁆𑀙𑁄 𑀔𑁄𑀪𑀦𑀼’𑀩𑁆𑀩𑁂𑀕𑀻, 𑀓𑀫𑁂𑀦 𑀓𑀭𑀼𑀡𑀸𑀬𑀼𑀢𑁄;

𑀦𑀸𑀲𑀸 𑀯𑀺𑀓𑀽𑀡𑀦𑀸𑀤𑀻𑀳𑀺, 𑀲𑀗𑁆𑀓𑀸𑀤𑀻𑀳𑀺’𑀲𑁆𑀲 𑀧𑁄𑀲𑀦𑀁.

𑀯𑀺𑀫𑁆𑀳𑀬𑀝𑁆𑀞𑀸𑀬𑀻𑀪𑀸𑀯

𑁩𑁬𑁬. 𑀅𑀢𑀺 𑀮𑁄𑀓 𑀧𑀤𑀢𑁆𑀣𑁂𑀳𑀺, 𑀯𑀺𑀫𑁆𑀳𑀬𑁄’𑀬𑀁 𑀭𑀲𑁄’𑀩𑁆𑀪𑀼𑀢𑁄;

𑀢𑀲𑁆𑀲𑀸’𑀦𑀼𑀪𑀸𑀯𑀸 𑀲𑁂𑀤,𑀲𑁆𑀲𑀼, 𑀲𑀸𑀥𑀼𑀯𑀸𑀤𑀸’𑀤𑀬𑁄 𑀲𑀺𑀬𑀼𑀁;

𑀢𑀸𑀲𑀸,𑀯𑁂𑀕,𑀥𑀺𑀢𑀺,𑀧𑁆𑀧𑀜𑁆𑀜𑀸, 𑀳𑁄𑀦𑁆𑀢𑁂’𑀢𑁆𑀣 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀲𑀫𑀝𑁆𑀞𑀸𑀬𑀻𑀪𑀸𑀯

𑁩𑁬𑁭. 𑀞𑀸𑀬𑀻𑀪𑀸𑀯𑁄 𑀲𑀫𑁄 𑀫𑁂𑀢𑁆𑀢𑀸, 𑀤𑀬𑀸,𑀫𑁄𑀤𑀸’𑀤𑀺 𑀲𑀫𑁆𑀪𑀯𑁄;

𑀪𑀸𑀯𑀸𑀤𑀻𑀳𑀺 𑀢’𑀤𑀼𑀓𑁆𑀓𑀁𑀲𑁄, 𑀲𑀦𑁆𑀢𑁄 𑀲𑀦𑁆𑀢 𑀦𑀺𑀲𑁂𑀯𑀺𑀢𑁄.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢 𑀫𑀳𑀸𑀲𑀸𑀫𑀺𑀯𑀺𑀭𑀘𑀺𑀢𑁂 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂

𑀭𑀲𑀪𑀸𑀯𑀸’𑀯𑀩𑁄𑀥𑁄 𑀦𑀸𑀫

𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁄 𑀲𑀫𑀢𑁆𑀢𑁄.