𑁩. 𑀕𑀼𑀡𑀸𑀯𑀩𑁄𑀥-𑀢𑀢𑀺𑀬𑀧𑀭𑀺𑀘𑁆𑀙𑁂𑀤

𑀅𑀦𑀼𑀲𑀦𑁆𑀥𑀺

𑁧𑁧𑁬. 𑀲𑀫𑁆𑀪𑀯𑀦𑁆𑀢𑀺 𑀕𑀼𑀡𑀸 𑀬𑀲𑁆𑀫𑀸, 𑀤𑁄𑀲𑀸𑀦𑁂’𑀯’𑀫𑀢𑀺𑀓𑁆𑀓𑀫𑁂;

𑀤𑀲𑁆𑀲𑁂𑀲𑁆𑀲𑀁 𑀢𑁂 𑀢𑀢𑁄 𑀤𑀸𑀦𑀺, 𑀲𑀤𑁆𑀤𑁂 𑀲𑀫𑁆𑀪𑀽𑀲𑀬𑀦𑁆𑀢𑀺 𑀬𑁂.

𑀲𑀤𑁆𑀤𑀸𑀮𑀗𑁆𑀓𑀸𑀭 𑀉𑀤𑁆𑀤𑁂𑀲

𑁧𑁧𑁭. 𑀧𑀲𑀸𑀤𑁄’𑀚𑁄, 𑀫𑀥𑀼𑀭𑀢𑀸, 𑀲𑀫𑀢𑀸, 𑀲𑀼𑀔𑀼𑀫𑀸𑀮𑀢𑀸;

𑀲𑀺𑀮𑁂𑀲𑁄’𑀤𑀭𑀢𑀸, 𑀓𑀦𑁆𑀢𑀺, 𑀅𑀢𑁆𑀣𑀩𑁆𑀬𑀢𑁆𑀢𑀺, 𑀲𑀫𑀸𑀥𑀬𑁄.

𑀲𑀤𑁆𑀤𑀸𑀮𑀗𑁆𑀓𑀸𑀭 𑀧𑀬𑁄𑀚𑀦

𑁧𑁧𑁮. 𑀕𑀼𑀡𑁂𑀳𑁂’𑀢𑁂𑀳𑀺 𑀲𑀫𑁆𑀧𑀦𑁆𑀦𑁄, 𑀩𑀦𑁆𑀥𑁄 𑀓𑀯𑀺𑀫𑀦𑁄𑀳𑀭𑁄;

𑀲𑀫𑁆𑀧𑀸𑀤𑀺𑀬𑀢𑀺 𑀓𑀢𑁆𑀢𑀽𑀦𑀁, 𑀓𑀺𑀢𑁆𑀢𑀺 𑀫𑀘𑁆𑀘𑀦𑁆𑀢𑀦𑀺𑀫𑁆𑀫𑀮𑀁.

𑀲𑀤𑁆𑀤𑀸𑀮𑀗𑁆𑀓𑀸𑀭 𑀦𑀺𑀤𑁆𑀤𑁂𑀲

𑁧𑁧𑁯. 𑀅𑀤𑀽𑀭𑀸𑀳𑀺𑀢𑀲𑀫𑁆𑀩𑀦𑁆𑀥, 𑀲𑀼𑀪𑀕𑀸 𑀬𑀸 𑀧𑀤𑀸’𑀯𑀮𑀺;

𑀲𑀼𑀧𑀲𑀺𑀤𑁆𑀥𑀸’𑀪𑀺𑀥𑁂𑀬𑁆𑀬𑀸’𑀬𑀁, 𑀧𑀲𑀸𑀤𑀁 𑀚𑀦𑀬𑁂 𑀬𑀣𑀸.

𑁧𑁨𑁦. 𑀅𑀮𑀗𑁆𑀓𑀭𑁄𑀦𑁆𑀢𑀸 𑀯𑀤𑀦𑀁, 𑀫𑀼𑀦𑀺𑀦𑁄’𑀥𑀭𑀭𑀁𑀲𑀺𑀬𑁄;

𑀲𑁄𑀪𑀦𑁆𑀢𑁂’𑀭𑀼𑀡𑀭𑀁𑀲𑀻’𑀯, 𑀲𑀫𑁆𑀧𑀢𑀦𑁆𑀢𑀸’𑀫𑁆𑀩𑀼𑀚𑁄’𑀤𑀭𑁂.

𑁧𑁨𑁧. 𑀑𑀚𑁄 𑀲𑀫𑀸𑀲𑀩𑀸𑀳𑀼𑀮𑁆𑀬, 𑀫𑁂𑀲𑁄 𑀕𑀚𑁆𑀚𑀲𑁆𑀲 𑀚𑀻𑀯𑀺𑀢𑀁;

𑀧𑀚𑁆𑀚𑁂𑀧𑁆𑀬’𑀦𑀸’𑀓𑀼𑀮𑁄 𑀲𑁄’𑀬𑀁,

𑀓𑀦𑁆𑀢𑁄 𑀓𑀸𑀫𑀻𑀬𑀢𑁂 𑀬𑀣𑀸.

𑁧𑁨𑁨. 𑀫𑀼𑀦𑀺𑀦𑁆𑀤 𑀫𑀦𑁆𑀤 𑀲𑀜𑁆𑀚𑀸𑀢, 𑀳𑀸𑀲 𑀘𑀦𑁆𑀤𑀦 𑀮𑀺𑀫𑁆𑀧𑀺𑀢𑀸;

𑀧𑀮𑁆𑀮𑀯𑀸 𑀥𑀯𑀮𑀸 𑀢𑀲𑁆𑀲𑁂, 𑀯𑁂𑀓𑁄 𑀦𑀸’𑀥𑀭𑀧𑀮𑁆𑀮𑀯𑁄.

𑁧𑁨𑁩. 𑀧𑀤𑀸’𑀪𑀺𑀥𑁂𑀬𑁆𑀬𑀯𑀺𑀲𑀬𑀁, 𑀲𑀫𑀸𑀲 𑀩𑁆𑀬𑀸𑀲 𑀲𑀫𑁆𑀪𑀯𑀁;

𑀬𑀁 𑀧𑀸𑀭𑀺𑀡𑀢𑁆𑀬𑀁 𑀳𑁄𑀢𑀻’𑀳, 𑀲𑁄𑀧𑀺 𑀑𑀚𑁄’𑀯 𑀢𑀁 𑀬𑀣𑀸.

𑁧𑁨𑁪. 𑀚𑁄𑀢𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀲𑀤𑁂𑀯𑀓𑁂;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀔𑀦𑁆𑀥𑁄’𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁧𑁨𑁫. 𑀫𑀢𑁆𑀣𑀓𑀝𑁆𑀞𑀻 𑀫𑀢𑀲𑁆𑀲𑀸’𑀧𑀺, 𑀭𑀚𑁄𑀪𑀸𑀯𑀁 𑀯𑀚𑀦𑁆𑀢𑀼 𑀫𑁂;

𑀬𑀢𑁄 𑀧𑀼𑀜𑁆𑀜𑁂𑀦 𑀢𑁂 𑀲𑁂𑀦𑁆𑀢𑀼, 𑀚𑀺𑀦 𑀧𑀸𑀤’𑀫𑁆𑀩𑀼𑀚𑀤𑁆𑀯𑀬𑁂.

𑁧𑁨𑁬. 𑀇𑀘𑁆𑀘𑀢𑁆𑀭 𑀦𑀺𑀘𑁆𑀘𑀧𑁆𑀧𑀡𑀢𑀺, 𑀕𑁂𑀥𑁄 𑀲𑀸𑀥𑀼 𑀧𑀤𑀺𑀲𑁆𑀲𑀢𑀺;

𑀚𑀸𑀬𑀢𑁂’𑀬𑀁 𑀕𑀼𑀡𑁄 𑀢𑀺𑀓𑁆𑀔, 𑀧𑀜𑁆𑀜𑀸𑀦𑀫𑀪𑀺𑀬𑁄𑀕𑀢𑁄.

𑁧𑁨𑁭. 𑀫𑀥𑀼𑀭𑀢𑁆𑀢𑀁 𑀧𑀤𑀸𑀲𑀢𑁆𑀢𑀺, 𑀭’𑀦𑀼𑀧𑁆𑀧𑀸𑀲𑀯𑀲𑀸 𑀤𑁆𑀯𑀺𑀥𑀸;

𑀲𑀺𑀬𑀸 𑀲𑀫𑀲𑀼𑀢𑀺 𑀧𑀼𑀩𑁆𑀩𑀸, 𑀯𑀡𑁆𑀡𑀸’𑀯𑀼𑀢𑁆𑀢𑀺 𑀧𑀭𑁄 𑀬𑀣𑀸.

𑁧𑁨𑁮. 𑀬𑀤𑀸 𑀏𑀲𑁄’𑀪𑀺𑀲𑀫𑁆𑀩𑁄𑀥𑀺𑀁, 𑀲𑀫𑁆𑀧𑀢𑁆𑀢𑁄 𑀫𑀼𑀦𑀺𑀧𑀼𑀗𑁆𑀕𑀯𑁄;

𑀢𑀤𑀸 𑀧𑀪𑀼𑀢𑀺 𑀥𑀫𑁆𑀫𑀲𑁆𑀲, 𑀮𑁄𑀓𑁂 𑀚𑀸𑀢𑁄 𑀫𑀳𑀼’𑀲𑁆𑀲𑀯𑁄.

𑁧𑁨𑁯. 𑀫𑀼𑀦𑀺𑀦𑁆𑀤𑀫𑀦𑁆𑀤𑀳𑀸𑀲𑀸 𑀢𑁂, 𑀓𑀼𑀦𑁆𑀤 𑀲𑀦𑁆𑀤𑁄𑀳𑀯𑀺𑀩𑁆𑀪𑀫𑀸;

𑀤𑀺𑀲𑀦𑁆𑀢 𑀫𑀦𑀼𑀥𑀸𑀯𑀦𑁆𑀢𑀺, 𑀳𑀲𑀦𑁆𑀢𑀸 𑀘𑀦𑁆𑀤𑀓𑀦𑁆𑀢𑀺𑀬𑁄.

𑁧𑁩𑁦. 𑀲𑀩𑁆𑀩𑀓𑁄𑀫𑀮𑀯𑀡𑁆𑀡𑁂𑀳𑀺, 𑀦𑀸’𑀦𑀼𑀧𑁆𑀧𑀸𑀲𑁄 𑀧𑀲𑀁𑀲𑀺𑀬𑁄;

𑀬𑀣𑀸’𑀬𑀁 𑀫𑀸𑀮𑀢𑀻𑀫𑀸𑀮𑀸, 𑀮𑀺𑀦 𑀮𑁄𑀮𑀸’𑀮𑀺𑀫𑀸𑀮𑀺𑀦𑀻.

𑁧𑁩𑁧. 𑀫𑀼𑀤𑀽𑀳𑀺 𑀯𑀸 𑀓𑁂𑀯𑀮𑁂𑀳𑀺, 𑀓𑁂𑀯𑀮𑁂𑀳𑀺 𑀨𑀼𑀝𑁂𑀳𑀺 𑀯𑀸,

𑀫𑀺𑀲𑁆𑀲𑁂𑀳𑀺 𑀯𑀸 𑀢𑀺𑀥𑀸 𑀳𑁄𑀢𑀺, 𑀯𑀡𑁆𑀡𑁂𑀳𑀺 𑀲𑀫𑀢𑀸 𑀬𑀣𑀸.

𑀓𑁂𑀯𑀮𑀫𑀼𑀤𑀼𑀲𑀫𑀢𑀸

𑁧𑁩𑁨. 𑀓𑁄𑀓𑀺𑀮𑀸’𑀮𑀸𑀧𑀲𑀁𑀯𑀸𑀤𑀻, 𑀫𑀼𑀦𑀺𑀦𑁆𑀤𑀸’𑀮𑀸𑀧𑀯𑀺𑀩𑁆𑀪𑀫𑁄;

𑀳𑀤𑀬𑀗𑁆𑀕𑀫𑀢𑀁 𑀬𑀸𑀢𑀺, 𑀲𑀢𑀁 𑀤𑁂𑀢𑀺 𑀘 𑀦𑀺𑀩𑁆𑀩𑀼𑀢𑀺𑀁.

𑀓𑁂𑀯𑀮𑀨𑀼𑀝𑀲𑀫𑀢𑀸

𑁧𑁩𑁩. 𑀲𑀫𑁆𑀪𑀸𑀯𑀦𑀻𑀬𑀲𑀫𑁆𑀪𑀸𑀯𑀁, 𑀪𑀕𑀯𑀦𑁆𑀢𑀁 𑀪𑀯𑀦𑁆𑀢𑀕𑀼𑀁;

𑀪𑀯𑀦𑁆𑀢𑀲𑀸𑀥𑀦𑀸’𑀓𑀗𑁆𑀔𑀻, 𑀓𑁄 𑀦 𑀲𑀫𑁆𑀪𑀸𑀯𑀬𑁂 𑀯𑀺𑀪𑀼𑀁.

𑀫𑀺𑀲𑁆𑀲𑀓𑀲𑀫𑀢𑀸

𑁧𑁩𑁪. 𑀮𑀤𑁆𑀥𑀘𑀦𑁆𑀤𑀦𑀲𑀁𑀲𑀕𑁆𑀕, 𑀲𑀼𑀕𑀦𑁆𑀥𑀺 𑀫𑀮𑀬𑀸’𑀦𑀺𑀮𑁄;

𑀫𑀦𑁆𑀤 𑀫𑀸𑀬𑀸𑀢𑀺 𑀪𑀻𑀢𑁄’𑀯, 𑀫𑀼𑀦𑀺𑀦𑁆𑀤𑀫𑀼𑀔𑀫𑀸𑀭𑀼𑀢𑀸.

𑁧𑁩𑁫. 𑀅𑀦𑀺𑀝𑁆𑀞𑀼𑀭’𑀓𑁆𑀔𑀭’𑀧𑁆𑀧𑀸𑀬𑀸, 𑀲𑀩𑁆𑀩𑀓𑁄𑀫𑀮 𑀦𑀺𑀲𑁆𑀲𑀝𑀸;

𑀓𑀺𑀘𑁆𑀙𑀫𑀼𑀘𑁆𑀘𑀸𑀭𑀡𑀸’𑀧𑁂𑀢, 𑀩𑁆𑀬𑀜𑁆𑀚𑀦𑀸 𑀲𑀼𑀔𑀼𑀫𑀸𑀮𑀢𑀸.

𑁧𑁩𑁬. 𑀧𑀲𑁆𑀲𑀦𑁆𑀢𑀸 𑀭𑀽𑀧𑀯𑀺𑀪𑀯𑀁, 𑀲𑀼𑀡𑀦𑁆𑀢𑀸 𑀫𑀥𑀼𑀭𑀁 𑀕𑀺𑀭𑀁;

𑀘𑀭𑀦𑁆𑀢𑀺 𑀲𑀸𑀥𑀽 [𑀲𑀸𑀥𑀼 (𑀲𑀻-𑀙𑀦𑁆𑀥𑀸𑀦𑀼𑀭𑀓𑁆𑀔𑀡𑀢𑁆𑀣𑀁)] 𑀲𑀫𑁆𑀩𑀼𑀤𑁆𑀥, 𑀓𑀸𑀮𑁂 𑀓𑁂𑀴𑀺𑀧𑀭𑀫𑁆𑀫𑀼𑀔𑀸.

𑁧𑁩𑁭. 𑀅𑀮𑀗𑁆𑀓𑀸𑀭𑀯𑀺𑀳𑀻𑀦𑀸’𑀧𑀺, 𑀲𑀢𑀁 𑀲𑀫𑁆𑀫𑀼𑀔𑀢𑁂’𑀤𑀺𑀲𑀻;

𑀆𑀭𑁄𑀳𑀢𑀺 𑀯𑀺𑀲𑁂𑀲𑁂𑀦, 𑀭𑀫𑀡𑀻𑀬𑀸 𑀢’𑀤𑀼𑀚𑁆𑀚𑀮𑀸.

𑁧𑁩𑁮. 𑀭𑁄𑀫𑀜𑁆𑀘 𑀧𑀺𑀜𑁆𑀙 𑀭𑀘𑀦𑀸, 𑀲𑀸𑀥𑀼 𑀯𑀸𑀤𑀸𑀳𑀺𑀢𑀤𑁆𑀥𑀦𑀻;

𑀮𑀴𑀦𑁆𑀢𑀺’𑀫𑁂 𑀫𑀼𑀦𑀺𑀫𑁂𑀖𑀼, 𑀫𑁆𑀫𑀤𑀸 𑀲𑀸𑀥𑀼 𑀲𑀺𑀔𑀸𑀯𑀮𑀸.

𑁧𑁩𑁯. 𑀲𑀼𑀔𑀼𑀫𑀸𑀮𑀢𑁆𑀢 𑀫𑀢𑁆𑀣𑁂’𑀯, 𑀧𑀤𑀢𑁆𑀣𑀯𑀺𑀲𑀬𑀫𑁆𑀧𑀺 𑀘;

𑀬𑀣𑀸 𑀫𑀢𑀸𑀤𑀺𑀲𑀤𑁆𑀤𑁂𑀲𑀼, 𑀓𑀺𑀢𑁆𑀢𑀺𑀲𑁂𑀲𑀸𑀤𑀺𑀓𑀺𑀢𑁆𑀢𑀦𑀁.

𑁧𑁪𑁦. 𑀲𑀺𑀮𑀺𑀝𑁆𑀞 𑀧𑀤 𑀲𑀁𑀲𑀕𑁆𑀕, 𑀭𑀫𑀡𑀻𑀬 𑀕𑀼𑀡𑀸’𑀮𑀬𑁄;

𑀲𑀩𑀦𑁆𑀥𑀕𑀸𑀭𑀯𑁄 𑀲𑁄’𑀬𑀁, 𑀲𑀺𑀮𑁂𑀲𑁄 𑀦𑀸𑀫 𑀢𑀁 𑀬𑀣𑀸.

𑁧𑁪𑁧. 𑀩𑀸𑀮𑀺’𑀦𑁆𑀤𑀼𑀯𑀺𑀩𑁆𑀪𑀫’𑀘𑁆𑀙𑁂𑀤𑀺, 𑀦𑀔𑀭𑀸’𑀯𑀮𑀺 𑀓𑀦𑁆𑀢𑀺𑀪𑀺;

𑀲𑀸 𑀫𑀼𑀦𑀺𑀦𑁆𑀤𑀧𑀤’𑀫𑁆𑀪𑁄𑀚, 𑀓𑀦𑁆𑀢𑀺 𑀯𑁄 𑀯𑀮𑀺𑀢𑀸’𑀯𑀢𑀁.

𑁧𑁪𑁨. 𑀉𑀓𑁆𑀓𑀁𑀲𑀯𑀦𑁆𑀢𑁄 𑀬𑁄𑀓𑁄𑀘𑀺, 𑀕𑀼𑀡𑁄 𑀬𑀤𑀺 𑀧𑀢𑀻𑀬𑀢𑁂;

𑀉𑀤𑀸𑀭𑁄’𑀬𑀁 𑀪𑀯𑁂 𑀢𑁂𑀦, 𑀲𑀦𑀸𑀣𑀸 𑀩𑀦𑁆𑀥𑀧𑀤𑁆𑀥𑀢𑀺.

𑁧𑁪𑁩. 𑀧𑀸𑀤𑀫𑁆𑀪𑁄𑀚 𑀭𑀚𑁄 𑀮𑀺𑀢𑁆𑀢, 𑀕𑀢𑁆𑀢𑀸 𑀬𑁂 𑀢𑀯 𑀕𑁄𑀢𑀫;

𑀅𑀳𑁄! 𑀢𑁂 𑀚𑀦𑁆𑀢𑀯𑁄 𑀬𑀦𑁆𑀢𑀺, 𑀲𑀩𑁆𑀩𑀣𑀸 𑀦𑀺𑀭𑀚𑀢𑁆𑀢𑀦𑀁.

𑁧𑁪𑁪. 𑀏𑀯𑀁 𑀚𑀺𑀦𑀸’𑀦𑀼𑀪𑀸𑀯𑀲𑁆𑀲, 𑀲𑀫𑀼𑀓𑁆𑀓𑀁𑀲𑁄’𑀢𑁆𑀭 𑀤𑀺𑀲𑁆𑀲𑀢𑀺;

𑀧𑀜𑁆𑀜𑀯𑀸 𑀯𑀺𑀥𑀺𑀦𑀸’𑀦𑁂𑀦, 𑀘𑀺𑀦𑁆𑀢𑀬𑁂 𑀧𑀭 𑀫𑀻𑀤𑀺𑀲𑀁.

𑁧𑁪𑁫. 𑀉𑀤𑀸𑀭𑁄 𑀲𑁄𑀧𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀬𑀁 𑀧𑀲𑀢𑁆𑀣 𑀯𑀺𑀲𑁂𑀲𑀦𑀁;

𑀬𑀣𑀸 𑀓𑀻𑀴𑀸𑀲𑀭𑁄 𑀮𑀻𑀮𑀸, 𑀳𑀸𑀲𑁄 𑀳𑁂𑀫𑀗𑁆𑀕𑀤𑀸’𑀤𑀬𑁄.

𑁧𑁪𑁬. 𑀮𑁄𑀓𑀺𑀬’𑀢𑁆𑀣𑀸’𑀦’𑀢𑀺𑀓𑁆𑀓𑀦𑁆𑀢𑀸, 𑀓𑀦𑁆𑀢𑀸 𑀲𑀩𑁆𑀩𑀚𑀦𑀸𑀦𑀧𑀺;

𑀓𑀦𑁆𑀢𑀺 𑀦𑀸𑀫𑀸’𑀢𑀺𑀯𑀼𑀢𑁆𑀢𑀲𑁆𑀲, 𑀯𑀼𑀢𑁆𑀢𑀸 𑀲𑀸 𑀧𑀭𑀺𑀳𑀸𑀭𑀢𑁄.

𑀬𑀣𑀸 𑀫𑀼𑀦𑀺𑀦𑁆𑀤 𑀇𑀘𑁆𑀘𑀸𑀤𑀺.

𑁧𑁪𑁭. 𑀅𑀢𑁆𑀣𑀩𑁆𑀬𑀢𑁆𑀢𑀸’𑀪𑀺𑀥𑁂𑀬𑁆𑀬𑀲𑁆𑀲𑀸,

𑀦𑁂𑀬𑁆𑀬𑀢𑀸 𑀲𑀤𑁆𑀤𑀢𑁄’𑀢𑁆𑀣𑀢𑁄;

𑀲𑀸’𑀬𑀁 𑀢𑀤𑀼𑀪𑀬𑀸 𑀦𑁂𑀬𑁆𑀬, 𑀧𑀭𑀺𑀳𑀸𑀭𑁂 𑀧𑀤𑀲𑁆𑀲𑀺𑀢𑀸;

𑀬𑀣𑀸 𑀫𑀭𑀻𑀘𑀺𑀘𑁆𑀘𑀸𑀤𑀺 𑀘, 𑀫𑀦𑁄𑀦𑀼𑀭𑀜𑁆𑀚𑀦𑁄𑀘𑁆𑀘𑀸𑀤𑀺.

𑀧𑀼𑀦 𑀅𑀢𑁆𑀣𑁂𑀦 𑀬𑀣𑀸

𑁧𑁪𑁮. 𑀲𑀪𑀸𑀯𑀸’𑀫𑀮𑀢𑀸 𑀥𑀻𑀭, 𑀫𑀼𑀥𑀸 𑀧𑀸𑀤𑀦𑀔𑁂𑀲𑀼 𑀢𑁂;

𑀬𑀢𑁄 𑀢𑁂’𑀯𑀦𑀢𑀸’𑀦𑀦𑁆𑀢, 𑀫𑁄𑀴𑀺𑀘𑁆𑀙𑀸𑀬𑀸 𑀚𑀳𑀦𑁆𑀢𑀺 𑀦𑁄.

𑁧𑁪𑁯. ‘𑀩𑀦𑁆𑀥𑀲𑀸𑀭𑁄’𑀢𑀺 𑀫𑀜𑁆𑀜𑀦𑁆𑀢𑀺, 𑀬𑀁 𑀲𑀫𑀕𑁆𑀕𑀸𑀧𑀺 𑀯𑀺𑀜𑁆𑀜𑀼𑀦𑁄;

𑀤𑀲𑁆𑀲𑀦𑀸’𑀯𑀲𑀭𑀁 𑀧𑀢𑁆𑀢𑁄, 𑀲𑀫𑀸𑀥𑀺 𑀦𑀸𑀫’𑀬𑀁 𑀕𑀼𑀡𑁄.

𑁧𑁫𑁦. 𑀅𑀜𑁆𑀜𑀥𑀫𑁆𑀫𑁄 𑀢𑀢𑁄’𑀜𑁆𑀜𑀢𑁆𑀣, 𑀮𑁄𑀓𑀲𑀻𑀫𑀸’𑀦𑀼𑀭𑁄𑀥𑀢𑁄;

𑀲𑀫𑁆𑀫𑀸 𑀆𑀥𑀻𑀬𑀢𑁂’𑀘𑁆𑀘𑁂’𑀲𑁄, ‘𑀲𑀫𑀸𑀥𑀻’𑀢𑀺 𑀦𑀺𑀭𑀼𑀘𑁆𑀘𑀢𑀺.

𑀲𑀫𑀸𑀥𑀺 𑀉𑀤𑁆𑀤𑁂𑀲

𑁧𑁫𑁧. 𑀅𑀧𑀸𑀡𑁂 𑀧𑀸𑀡𑀻𑀦𑀁 𑀥𑀫𑁆𑀫𑁄, 𑀲𑀫𑁆𑀫𑀸 𑀆𑀥𑀻𑀬𑀢𑁂 𑀓𑁆𑀯𑀘𑀺,;

𑀦𑀺𑀭𑀽𑀧𑁂 𑀭𑀽𑀧𑀬𑀼𑀢𑁆𑀢𑀲𑁆𑀲, 𑀦𑀺𑀭𑀲𑁂 𑀲𑀭𑀲𑀲𑁆𑀲, 𑀘.

𑁧𑁫𑁨. 𑀅𑀤𑁆𑀭𑀯𑁂 𑀤𑁆𑀭𑀯𑀬𑀼𑀢𑁆𑀢𑀲𑁆𑀲, 𑀅𑀓𑀢𑁆𑀢𑀭𑀺𑀧𑀺 𑀓𑀢𑁆𑀢𑀼𑀢𑀸,;

𑀓𑀞𑀺𑀦𑀲𑁆𑀲𑀸’𑀲𑀭𑀻𑀭𑁂,𑀧𑀺, 𑀭𑀽𑀧𑀁 𑀢𑁂𑀲𑀁 𑀓𑀫𑀸 𑀲𑀺𑀬𑀸.

𑀲𑀫𑀸𑀥𑀺𑀦𑀺𑀤𑁆𑀤𑁂𑀲

𑀅𑀧𑀸𑀡𑁂 𑀧𑀸𑀡𑀻𑀦𑀁 𑀥𑀫𑁆𑀫𑁄

𑁧𑁫𑁩. 𑀉𑀡𑁆𑀡𑀸 𑀧𑀼𑀡𑁆𑀡𑀺’𑀦𑁆𑀤𑀼𑀦𑀸 𑀦𑀸𑀣! 𑀤𑀺𑀯𑀸𑀧𑀺 𑀲𑀳 𑀲𑀗𑁆𑀕𑀫𑀸;

𑀯𑀺𑀦𑀺𑀤𑁆𑀤𑀸 𑀲𑀫𑁆𑀧𑀫𑁄𑀤𑀦𑁆𑀢𑀺, 𑀫𑀜𑁆𑀜𑁂 𑀓𑀼𑀫𑀼𑀤𑀺𑀦𑀻 𑀢𑀯.

𑀦𑀺𑀭𑀼𑀧𑁂 𑀭𑀽𑀧𑀬𑀼𑀢𑁆𑀢𑀲𑁆𑀲

𑁧𑁫𑁪. 𑀤𑀬𑀸𑀭𑀲𑁂𑀲𑀼 𑀫𑀼𑀚𑁆𑀚𑀦𑁆𑀢𑀸, 𑀚𑀦𑀸’𑀫𑀢𑀭𑀲𑁂𑀲𑁆𑀯𑀺’𑀯;

𑀲𑀼𑀔𑀺𑀢𑀸 𑀳𑀢𑀤𑁄𑀲𑀸 𑀢𑁂, 𑀦𑀸𑀣! 𑀧𑀸𑀤’𑀫𑁆𑀩𑀼𑀚𑀸’𑀦𑀢𑀸.

𑀦𑀺𑀭𑀲𑁂 𑀲𑀭𑀲𑀲𑁆𑀲

𑁧𑁫𑁫. 𑀫𑀥𑀼𑀭𑁂𑀧𑀺 𑀕𑀼𑀡𑁂 𑀥𑀻𑀭, 𑀦’𑀧𑁆𑀧𑀲𑀻𑀤𑀦𑁆𑀢𑀺 𑀬𑁂 𑀢𑀯;

𑀓𑀻𑀤𑀺𑀲𑀻 𑀫𑀦𑀲𑁄𑀯𑀼𑀢𑁆𑀢𑀺, 𑀢𑁂𑀲𑀁 𑀔𑀸𑀭𑀕𑀼𑀡𑀸𑀦 𑀪𑁄’.

𑀅𑀤𑁆𑀭𑀯𑁂 𑀤𑁆𑀭𑀯𑀬𑀼𑀢𑁆𑀢𑀲𑁆𑀲

𑁧𑁫𑁬. 𑀲𑀩𑁆𑀩𑀢𑁆𑀣𑀲𑀺𑀤𑁆𑀥! 𑀘𑀽𑀴𑀓, 𑀧𑀼𑀝𑀧𑁂𑀬𑁆𑀬𑀸 𑀫𑀳𑀸𑀕𑀼𑀡𑀸;

𑀤𑀺𑀲𑀸 𑀲𑀫𑀦𑁆𑀢𑀸 𑀥𑀸𑀯𑀦𑁆𑀢𑀺, 𑀓𑀼𑀦𑁆𑀤𑀲𑁄𑀪𑀸 𑀲 𑀮𑀓𑁆𑀔𑀡𑀸.

𑀅𑀓𑀢𑁆𑀢𑀭𑀺𑀧𑀺 𑀓𑀢𑁆𑀢𑀼𑀢𑀸

𑁧𑁫𑁭. 𑀫𑀸𑀭𑀸’𑀭𑀺𑀩𑀮𑀯𑀺𑀲𑁆𑀲𑀝𑁆𑀞𑀸, 𑀓𑀼𑀡𑁆𑀞𑀸 𑀦𑀸𑀦𑀸𑀯𑀺𑀥𑀸’𑀬𑀼𑀥𑀸;

𑀮𑀚𑁆𑀚𑀫𑀸𑀦𑀸’𑀜𑁆𑀜𑀯𑁂𑀲𑁂𑀦, 𑀚𑀺𑀦! 𑀧𑀸𑀤𑀸’𑀦𑀢𑀸 𑀢𑀯.

𑀓𑀞𑀺𑀦𑀲𑁆𑀲𑀸 𑀲𑀭𑀻𑀭𑁂

𑁧𑁫𑁮. 𑀫𑀼𑀦𑀺𑀦𑁆𑀤𑀪𑀸𑀡𑀼𑀫𑀸 𑀓𑀸𑀮𑁄,

𑀤𑀺𑀢𑁄 𑀩𑁄𑀥𑁄’𑀤𑀬𑀸’𑀘𑀮𑁂;

𑀲𑀤𑁆𑀥𑀫𑁆𑀫𑀭𑀁𑀲𑀺𑀦𑀸 𑀪𑀸𑀢𑀺, 𑀪𑀺𑀦𑁆𑀤 𑀫𑀦𑁆𑀤𑀢𑀫𑀁 𑀧𑀭𑀁.

𑁧𑁫𑁯. 𑀯𑀫𑀦𑀼’𑀕𑁆𑀕𑀺𑀭𑀦𑀸𑀤𑁆𑀬𑁂’𑀢𑀁, 𑀕𑀼𑀡𑀯𑀼𑀢𑁆𑀬’𑀧𑀭𑀺𑀘𑁆𑀘𑀼𑀢𑀁;

𑀅𑀢𑀺𑀲𑀼𑀦𑁆𑀤𑀭 𑀫𑀜𑁆𑀜𑀁 𑀢𑀼, 𑀓𑀸𑀫𑀁 𑀯𑀺𑀦𑁆𑀤𑀢𑀺 𑀕𑀸𑀫𑁆𑀫𑀢𑀁.

𑁧𑁬𑁦. 𑀓𑀦𑁆𑀢𑀻𑀦𑀁 𑀯𑀫𑀦𑀩𑁆𑀬𑀸𑀚𑀸, 𑀫𑀼𑀦𑀺𑀧𑀸𑀤𑀦𑀔𑀸’𑀯𑀮𑀻;

𑀘𑀦𑁆𑀤𑀓𑀦𑁆𑀢𑀻 𑀧𑀺𑀯𑀦𑁆𑀢𑀻’𑀯, 𑀦𑀺𑀧𑁆𑀧𑀪𑀁 𑀢𑀁 𑀓𑀭𑁄𑀦𑁆𑀢𑀺𑀬𑁄.

𑁧𑁬𑁧. 𑀅𑀘𑀺𑀢𑁆𑀢𑀓𑀢𑁆𑀢𑀼𑀓𑀁 𑀭𑀼𑀘𑁆𑀬 [𑀭𑀼𑀘𑁆𑀘 (𑀲𑀻.)], 𑀫𑀺𑀘𑁆𑀘𑁂𑀯𑀁 𑀕𑀼𑀡𑀓𑀫𑁆𑀫𑀢𑀁;

𑀲𑀘𑀺𑀢𑁆𑀢𑀓𑀢𑁆𑀢𑀼𑀓𑀁 𑀧𑁂’𑀢𑀁, 𑀕𑀼𑀡𑀓𑀫𑁆𑀫𑀁 𑀬𑀤𑀼’𑀢𑁆𑀢𑀫𑀁.

𑁧𑁬𑁨. 𑀉𑀕𑁆𑀕𑀺𑀭𑀦𑁆𑀢𑁄’𑀯 𑀲𑀲𑁆𑀦𑁂𑀳, 𑀭𑀲𑀁 𑀚𑀺𑀦𑀯𑀭𑁄 𑀚𑀦𑁂;

𑀪𑀸𑀲𑀦𑁆𑀢𑁄 𑀫𑀥𑀼𑀭𑀁 𑀥𑀫𑁆𑀫𑀁, 𑀓𑀁 𑀦 𑀲𑀧𑁆𑀧𑀻𑀡𑀬𑁂 𑀚𑀦𑀁.

𑁧𑁬𑁩. 𑀬𑁄 𑀲𑀤𑁆𑀤𑀲𑀢𑁆𑀣𑀓𑀼𑀲𑀮𑁄 𑀓𑀼𑀲𑀮𑁄 𑀦𑀺𑀖𑀡𑁆𑀟𑀼,

𑀙𑀦𑁆𑀤𑁄𑀅𑀮𑀗𑁆𑀓𑀢𑀺𑀲𑀼 𑀦𑀺𑀘𑁆𑀘𑀓𑀢𑀸’𑀪𑀺𑀬𑁄𑀕𑁄;

𑀲𑁄’𑀬𑀁 𑀓𑀯𑀺𑀢𑁆𑀢𑀯𑀺𑀓𑀮𑁄𑀧𑀺 𑀓𑀯𑀻𑀲𑀼 𑀲𑀗𑁆𑀔𑁆𑀬,

𑀫𑁄𑀕𑁆𑀕𑀬𑁆𑀳 𑀯𑀺𑀦𑁆𑀤𑀢𑀺 𑀳𑀺 𑀓𑀺𑀢𑁆𑀢𑀺’ 𑀫𑀫𑀦𑁆𑀤𑀭𑀽𑀧𑀁.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀯𑀺𑀭𑀘𑀺𑀢𑁂 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂

𑀕𑀼𑀡𑀸𑀯𑀩𑁄𑀥𑁄 𑀦𑀸𑀫

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.