𑁯. 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑀸𑀫𑀺𑀓𑀧𑀤𑀫𑀸𑀮𑀸

𑀅𑀣 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 ‘‘𑀪𑀽𑀢𑀁’’𑀇𑀘𑁆𑀘𑀸𑀤𑀺𑀓𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑁋

𑀘𑀺𑀢𑁆𑀢𑀁, 𑀘𑀺𑀢𑁆𑀢𑀸𑀦𑀺. 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀸𑀦𑀺. 𑀘𑀺𑀢𑁆𑀢𑁂𑀦, 𑀘𑀺𑀢𑁆𑀢𑁂𑀳𑀺, 𑀘𑀺𑀢𑁆𑀢𑁂𑀪𑀺. 𑀘𑀺𑀢𑁆𑀢𑀲𑁆𑀲, 𑀘𑀺𑀢𑁆𑀢𑀸𑀦𑀁. 𑀘𑀺𑀢𑁆𑀢𑀸, 𑀘𑀺𑀢𑁆𑀢𑀲𑁆𑀫𑀸, 𑀘𑀺𑀢𑁆𑀢𑀫𑁆𑀳𑀸, 𑀘𑀺𑀢𑁆𑀢𑁂𑀳𑀺, 𑀘𑀺𑀢𑁆𑀢𑁂𑀪𑀺. 𑀘𑀺𑀢𑁆𑀢𑀲𑁆𑀲, 𑀘𑀺𑀢𑁆𑀢𑀸𑀦𑀁. 𑀘𑀺𑀢𑁆𑀢𑁂, 𑀘𑀺𑀢𑁆𑀢𑀲𑁆𑀫𑀺𑀁, 𑀘𑀺𑀢𑁆𑀢𑀫𑁆𑀳𑀺, 𑀘𑀺𑀢𑁆𑀢𑁂𑀲𑀼. 𑀪𑁄 𑀘𑀺𑀢𑁆𑀢, 𑀪𑁄 𑀘𑀺𑀢𑁆𑀢𑀸, 𑀪𑀯𑀦𑁆𑀢𑁄 𑀘𑀺𑀢𑁆𑀢𑀸𑀦𑀺. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀘𑀺𑀢𑁆𑀢𑀸’’𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀁 ‘‘𑀘𑀺𑀢𑁆𑀢𑁂’’𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀜𑁆𑀘 𑀅𑀦𑀸𑀕𑀢𑀁, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀅𑀜𑁆𑀜𑁂𑀲𑀫𑁆𑀧𑀺 𑀢𑀸𑀤𑀺𑀲𑀸𑀦𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀭𑀽𑀧𑀸𑀦𑀁 𑀤𑀲𑁆𑀲𑀦𑀢𑁄 𑀯𑀺𑀪𑀗𑁆𑀕𑀧𑀸𑀴𑀺𑀬𑀜𑁆𑀘 ‘‘𑀙 𑀘𑀺𑀢𑁆𑀢𑀸 𑀅𑀩𑁆𑀬𑀸𑀓𑀢𑀸’’𑀢𑀺𑀆𑀤𑀺𑀤𑀲𑁆𑀲𑀦𑀢𑁄 𑀕𑀳𑁂𑀢𑀩𑁆𑀩𑀫𑁂𑀯, 𑀢𑀲𑁆𑀫𑀸 ‘‘𑀘𑀺𑀢𑁆𑀢𑀁, 𑀘𑀺𑀢𑁆𑀢𑀸𑀦𑀺, 𑀘𑀺𑀢𑁆𑀢𑀸. 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀸𑀦𑀺, 𑀘𑀺𑀢𑁆𑀢𑁂’’𑀢𑀺 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀕𑁆𑀕𑀳𑀻𑀢𑀦𑁆𑀢𑀸𑀦𑀜𑁆𑀳𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀓𑀢𑁆𑀣𑀘𑀺 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀯𑀺𑀬 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀩𑀳𑀼𑀯𑀘𑀦𑀸𑀦𑀺 𑀪𑀯𑀦𑁆𑀢𑀺. 𑀢𑀸𑀦𑀺 𑀘 𑀧𑀼𑀮𑁆𑀮𑀺𑀗𑁆𑀕𑁂𑀦 𑀯𑀸 𑀲𑀮𑀺𑀗𑁆𑀕𑁂𑀦 𑀯𑀸 𑀅𑀮𑀺𑀗𑁆𑀕𑁂𑀦 𑀯𑀸 𑀲𑀤𑁆𑀥𑀺𑀁 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺 𑀳𑀼𑀢𑁆𑀯𑀸 𑀓𑁂𑀯𑀮𑀸𑀦𑀺 𑀯𑀸 𑀧𑀸𑀯𑀘𑀦𑁂 𑀲𑀜𑁆𑀘𑀭𑀦𑁆𑀢𑀺. 𑀅𑀢𑁆𑀭 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸. 𑀲𑀩𑁆𑀩𑁂 𑀫𑀸𑀮𑀸 𑀉𑀧𑁂𑀦𑁆𑀢𑀺𑀫𑀁. 𑀬𑀲𑁆𑀲 𑀏𑀢𑁂 𑀥𑀦𑀸 𑀅𑀢𑁆𑀣𑀺. 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸. 𑀢𑀻𑀡𑀺𑀦𑁆𑀤𑁆𑀭𑀺𑀬𑀸. 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸. 𑀤𑀲𑀺𑀦𑁆𑀤𑁆𑀭𑀺𑀬𑀸. 𑀤𑁆𑀯𑁂 𑀫𑀳𑀸𑀪𑀽𑀢𑁂 𑀦𑀺𑀲𑁆𑀲𑀸𑀬 𑀤𑁆𑀯𑁂 𑀫𑀳𑀸𑀪𑀽𑀢𑀸, 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸, 𑀘𑀢𑀼𑀭𑁄 𑀅𑀗𑁆𑀕𑁂 𑀅𑀥𑀺𑀝𑁆𑀞𑀸𑀬, 𑀲𑁂𑀫𑀺 𑀯𑀫𑁆𑀫𑀺𑀓𑀫𑀢𑁆𑀣𑀓𑁂, 𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸. 𑀭𑀽𑀧𑁂 𑀘 𑀲𑀤𑁆𑀤𑁂 𑀘 𑀅𑀣𑁄 𑀭𑀲𑁂 𑀘. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀯𑀫𑀸𑀤𑀬𑁄 𑀅𑀦𑁂𑀓𑀲𑀢𑀸 𑀧𑀸𑀴𑀺𑀧𑁆𑀧𑀤𑁂𑀲𑀸 𑀤𑀝𑁆𑀞𑀩𑁆𑀩𑀸.

𑀏𑀢𑁆𑀣 𑀧𑀦 ‘‘𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀧𑀞𑀫𑁂𑀓𑀯𑀘𑀦𑀝𑁆𑀞𑀸𑀦𑁂 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂𑀦 𑀞𑀺𑀢𑀪𑀸𑀯𑀲𑁆𑀲 𑀅𑀤𑀲𑁆𑀲𑀦𑀢𑁄. ‘‘𑀘𑀢𑁆𑀢𑀸𑀭𑁄’’𑀢𑀺𑀆𑀤𑀻𑀦𑀺𑀬𑁂𑀯 𑀧𑀦 𑀧𑀤𑀸𑀦𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺 𑀦𑀺𑀬𑁄𑀕𑀸 𑀦𑀺𑀕𑁆𑀕𑀳𑀻𑀢𑀦𑁆𑀢𑁂𑀳𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀳𑀺 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁄𑀢𑀺.

𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 𑁋 𑀦𑀦𑀼 ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁄 𑀮𑀩𑁆𑀪𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 ‘‘𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀧𑀞𑀫𑁂𑀓𑀯𑀘𑀦𑀝𑁆𑀞𑀸𑀦𑁂 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂𑀦 𑀞𑀺𑀢𑀪𑀸𑀯𑀲𑁆𑀲 𑀅𑀤𑀲𑁆𑀲𑀦𑀢𑁄’’𑀢𑀺 𑀯𑀼𑀢𑁆𑀢𑀁, 𑀓𑀲𑁆𑀫𑀸 𑀘 𑀏𑀓𑀦𑁆𑀢𑀢𑁄 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑀸 𑀅𑀦𑀼𑀫𑀢𑀸, 𑀦𑀦𑀼 ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀤𑀲𑁆𑀲𑀦𑀢𑁄 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀻𑀲𑀼𑀧𑀺 ‘‘𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀬𑁄 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀸𑀢𑀺? 𑀦 𑀯𑀢𑁆𑀢𑀩𑁆𑀩𑀸, 𑀓𑀲𑁆𑀫𑀸𑀢𑀺 𑀘𑁂? ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼𑀧𑀺 𑀲𑀢𑀺𑀧𑀝𑁆𑀞𑀸𑀦𑀘𑀺𑀢𑁆𑀢𑀲𑀤𑁆𑀤𑀸𑀤𑀻𑀦𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀅𑀦𑀺𑀘𑁆𑀙𑀺𑀢𑀩𑁆𑀩𑀢𑁄. 𑀢𑀢𑁆𑀣 𑀳𑀺 𑀧𑀼𑀮𑁆𑀮𑀺𑀗𑁆𑀕𑁂𑀦 𑀥𑀫𑁆𑀫𑀲𑀤𑁆𑀤𑁂𑀦 𑀬𑁄𑀚𑁂𑀢𑀼𑀁 𑀥𑀫𑁆𑀫𑀺𑀲𑁆𑀲𑀭𑁄 𑀪𑀕𑀯𑀸 𑀥𑀫𑁆𑀫𑀸𑀧𑁂𑀓𑁆𑀔𑀁 𑀓𑀢𑁆𑀯𑀸 ‘‘𑀲𑀢𑀺𑀧𑀝𑁆𑀞𑀸𑀦𑁄, 𑀘𑀺𑀢𑁆𑀢𑁄, 𑀘𑀺𑀢𑁆𑀢𑀸’’𑀢𑀺 𑀘 𑀅𑀪𑀸𑀲𑀺. 𑀓𑁂𑀯𑀮𑀸 𑀳𑀺 𑀲𑀢𑀺𑀧𑀝𑁆𑀞𑀸𑀦 𑀘𑀺𑀢𑁆𑀢𑀲𑀤𑁆𑀤𑀸𑀤𑀬𑁄 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂𑀦 𑀓𑀢𑁆𑀣𑀘𑀺𑀧𑀺 𑀬𑁄𑀚𑀺𑀢𑀸 𑀦 𑀲𑀦𑁆𑀢𑀺, 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀪𑀸𑀯𑁂𑀦 𑀧𑀦 𑀬𑁄𑀚𑀺𑀢𑀸 𑀲𑀦𑁆𑀢𑀺.

𑀢𑀣𑀸 𑀳𑀺 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀧𑀼𑀮𑁆𑀮𑀺𑀗𑁆𑀕𑀕𑀳𑀧𑀢𑀺𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑁂 𑀧𑀯𑀢𑁆𑀢𑀁 𑀘𑀺𑀢𑁆𑀢𑀦𑀸𑀫𑀁 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀧𑀼𑀕𑁆𑀕𑀮𑁂 𑀆𑀭𑁄𑀧𑁂𑀢𑁆𑀯𑀸 𑀧𑀼𑀕𑁆𑀕𑀮𑀯𑀸𑀘𑀓𑀁 𑀓𑀢𑁆𑀯𑀸 ‘‘𑀘𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀫𑀥𑀺𑀧𑁆𑀧𑁂𑀢𑀁 𑀲𑀺𑀬𑀸, ‘‘𑀘𑀺𑀢𑁆𑀢’’𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑁂𑀬𑁆𑀬. 𑀢𑀲𑁆𑀫𑀸 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀘𑀺𑀢𑁆𑀢𑀸 𑀇𑀢𑁆𑀣𑀻’’𑀢𑀺𑀆𑀤𑀻𑀲𑀼 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀦 𑀇𑀘𑁆𑀙𑀺𑀢𑀩𑁆𑀩𑁄 𑀲𑀸𑀧𑁂𑀓𑁆𑀔𑀢𑁆𑀢𑀸 𑀘𑀺𑀢𑁆𑀢𑀲𑀤𑁆𑀤𑀸𑀤𑀻𑀦𑀁. 𑀬𑀣𑀸 𑀘 𑀏𑀢𑁆𑀣, 𑀏𑀯𑀁 ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼𑀧𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀦 𑀇𑀘𑁆𑀙𑀺𑀢𑀩𑁆𑀩𑁄. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀻𑀲𑀼 𑀧𑀦 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀅𑀧𑁂𑀓𑁆𑀔𑀺𑀢𑀩𑁆𑀩𑀸𑀦𑀺 𑀧𑀤𑀸𑀦𑀺 𑀦 𑀲𑀦𑁆𑀢𑀺, 𑀬𑁂𑀳𑀺 𑀢𑁂 𑀧𑀼𑀮𑁆𑀮𑀺𑀗𑁆𑀕𑀸𑀦𑀺 𑀲𑀺𑀬𑀼𑀁, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑁄’’𑀢𑀺𑀆𑀤𑀻𑀦𑀺𑀬𑁂𑀯 𑀧𑀤𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘‘𑀘𑀢𑁆𑀢𑀸𑀭𑀺, 𑀲𑀩𑁆𑀩𑀸𑀦𑀺, 𑀏𑀢𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀕𑀳𑁂𑀢𑁆𑀯𑀸 ‘‘𑀲𑀢𑀺𑀧𑀝𑁆𑀞𑀸𑀦𑀸, 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀓𑁂𑀘𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀦𑀺𑀓𑀸𑀭𑀮𑁄𑀧𑀁 𑀇𑀘𑁆𑀙𑀦𑁆𑀢𑀺 ‘‘𑀬𑀸 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀸𑀦𑀁, 𑀧𑀮𑁆𑀮𑀗𑁆𑀓𑀯𑀭𑀫𑀸𑀪𑀼𑀚𑁂, 𑀦𑀺𑀫𑀺𑀢𑁆𑀢𑀸𑀦𑀺 𑀧𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑁆𑀣 𑀯𑀺𑀬. 𑀅𑀤𑀲𑁆𑀲𑀦𑀜𑁆𑀳𑀺 𑀮𑁄𑀧𑁄, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺, 𑀘𑀢𑁆𑀢𑀸𑀭𑀺 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺, 𑀲𑀩𑁆𑀩𑀸𑀦𑀺 𑀫𑀸𑀮𑀸𑀦𑀻’𑀢𑀺𑀆𑀤𑀺𑀓𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀓𑁂𑀘𑀺 𑀧𑀦 ‘‘𑀲𑀩𑁆𑀩𑁂 𑀫𑀸𑀮𑀸 𑀉𑀧𑁂𑀦𑁆𑀢𑀺 𑀫’’𑀦𑁆𑀢𑀺 𑀏𑀢𑁆𑀣 𑀫𑀸𑀮𑀸𑀲𑀤𑁆𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀦𑁆𑀢𑀺 𑀫𑀜𑁆𑀜𑀺𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑀁 𑀲𑀩𑁆𑀩𑁂𑀲𑀤𑁆𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘‘𑀲𑀩𑁆𑀩𑀸 𑀫𑀸𑀮𑀸’’𑀢𑀺 𑀅𑀢𑁆𑀣𑀁 𑀓𑀣𑁂𑀦𑁆𑀢𑀺. 𑀢𑀁 𑀓𑀺𑀜𑁆𑀘𑀸𑀧𑀺 𑀬𑀼𑀢𑁆𑀢𑀢𑀭𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀲𑁄 𑀪𑀕𑀯𑀸 𑀮𑀺𑀗𑁆𑀕𑀁 𑀦𑀜𑁆𑀜𑀸𑀲𑀺, 𑀦 𑀘 ‘‘𑀲𑀩𑁆𑀩𑀸 𑀫𑀸𑀮𑀸 𑀉𑀧𑁂𑀦𑁆𑀢𑀺 𑀫’’𑀦𑁆𑀢𑀺 𑀤𑁆𑀯𑁂 𑀧𑀤𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀓𑀢𑁆𑀯𑀸 𑀯𑀢𑁆𑀢𑀼𑀁 𑀦 𑀲𑀓𑁆𑀔𑀺. 𑀬𑁄 𑀏𑀯𑀁 𑀯𑀺𑀲𑀤𑀺𑀲𑀮𑀺𑀗𑁆𑀕𑀸𑀦𑀺 𑀧𑀤𑀸𑀦𑀺 𑀉𑀘𑁆𑀘𑀸𑀭𑁂𑀲𑀺. 𑀚𑀸𑀦𑀦𑁆𑀢𑁄𑀬𑁂𑀯 𑀧𑀦 𑀪𑀕𑀯𑀸 𑀯𑀢𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑁄𑀬𑁂𑀯 𑀘 ‘‘𑀲𑀩𑁆𑀩𑁂 𑀫𑀸𑀮𑀸 𑀉𑀧𑁂𑀦𑁆𑀢𑀺 𑀫’’𑀦𑁆𑀢𑀺 𑀯𑀺𑀲𑀤𑀺𑀲𑀮𑀺𑀗𑁆𑀕𑀸𑀦𑀺 𑀧𑀤𑀸𑀦𑀺 𑀉𑀘𑁆𑀘𑀸𑀭𑁂𑀲𑀺, 𑀢𑀲𑁆𑀫𑀸 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑀁 𑀲𑀩𑁆𑀩𑁂𑀲𑀤𑁆𑀤𑀁 ‘‘𑀲𑀩𑁆𑀩𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 ‘‘𑀢𑀻𑀡𑀺𑀦𑁆𑀤𑁆𑀭𑀺𑀬𑀸’’𑀢𑀺 𑀧𑀤𑀁 𑀯𑀺𑀬 𑀮𑀼𑀢𑁆𑀢𑀦𑀺𑀓𑀸𑀭𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀫𑀸𑀮𑀸𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀲𑀩𑁆𑀩𑀸𑀦𑀺 𑀫𑀸𑀮𑀸𑀦𑀻’’𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀓𑀢𑁆𑀣𑀘𑀺 ‘‘𑀬𑀲𑁆𑀲 𑀏𑀢𑁂 𑀥𑀦𑀸 𑀅𑀢𑁆𑀣𑀻’’𑀢𑀺 𑀏𑀢𑁆𑀣 𑀯𑀺𑀬. 𑀏𑀢𑁆𑀣 𑀳𑀺 𑀬𑀲𑁆𑀲 𑀏𑀢𑀸𑀦𑀺 𑀥𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀇𑀤𑀫𑁆𑀧𑁂𑀢𑁆𑀣 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑀁. 𑀫𑀸𑀮𑀸𑀲𑀤𑁆𑀤𑁄 𑀤𑁆𑀯𑀺𑀮𑀺𑀗𑁆𑀕𑁄 𑀇𑀢𑁆𑀣𑀺𑀦𑀧𑀼𑀁𑀲𑀓𑀯𑀲𑁂𑀦. 𑀢𑀺𑀝𑁆𑀞𑀢𑀼 𑀢𑀲𑁆𑀲𑀺𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸, 𑀦𑀧𑀼𑀁𑀲𑀓𑀢𑁆𑀢𑁂 𑀧𑀦 𑀢𑀻𑀡𑀺 𑀫𑀸𑀮𑀸𑀦𑀺. ‘‘𑀫𑀸𑀮𑁂𑀳𑀺 𑀘 𑀕𑀦𑁆𑀥𑁂𑀳𑀺 𑀘 𑀪𑀕𑀯𑀢𑁄 𑀲𑀭𑀻𑀭𑀁 𑀧𑀽𑀚𑁂𑀦𑁆𑀢𑀻’’𑀢𑀺𑀆𑀤𑀬𑁄 𑀦𑀧𑀼𑀁𑀲𑀓𑀧𑁆𑀧𑀬𑁄𑀕𑀸𑀦𑀺𑀧𑀺 𑀩𑀳𑀽 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺.

𑀬𑀤𑀺 𑀧𑀦 𑀪𑁄 𑀫𑀸𑀮𑀲𑀤𑁆𑀤𑁄 𑀇𑀢𑁆𑀣𑀺𑀦𑀧𑀼𑀁𑀲𑀓𑀯𑀲𑁂𑀦 𑀤𑁆𑀯𑀺𑀮𑀺𑀗𑁆𑀕𑁄, ‘‘𑀲𑀩𑁆𑀩𑁂 𑀫𑀸𑀮𑀸 𑀉𑀧𑁂𑀦𑁆𑀢𑀺 𑀫’’𑀦𑁆𑀢𑀺 𑀏𑀢𑁆𑀣 𑀫𑀸𑀮𑀸𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑀧𑀭𑀺𑀓𑀧𑁆𑀧𑀦𑁂 𑀓𑁄 𑀤𑁄𑀲𑁄 𑀅𑀢𑁆𑀣𑀻𑀢𑀺? 𑀅𑀢𑁆𑀣𑁂𑀯 𑀇𑀢𑁆𑀣𑀺𑀮𑀺𑀗𑁆𑀕𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑁂𑀦 𑀲𑀩𑁆𑀩𑀦𑀸𑀫𑀺𑀓𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀲𑁆𑀲𑀸𑀪𑀸𑀯𑀢𑁄, 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀧𑀦 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑁂𑀦 𑀲𑀩𑁆𑀩𑀦𑀸𑀫𑀺𑀓𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀲𑁆𑀲 𑀉𑀧𑀮𑀩𑁆𑀪𑀦𑀢𑁄. 𑀢𑁂𑀦𑁂𑀯 𑀘 ‘‘𑀏𑀢𑁂 𑀥𑀦𑀸’’𑀢𑀺𑀆𑀤𑀬𑁄 𑀧𑀬𑁄𑀕𑀸 𑀧𑀸𑀯𑀘𑀦𑁂 𑀩𑀳𑀼𑀥𑀸 𑀤𑀺𑀝𑁆𑀞𑀸. 𑀏𑀢𑁆𑀣𑀸𑀧𑀺 𑀧𑀦 𑀯𑀤𑁂𑀬𑁆𑀬𑀼𑀁 ‘‘𑀥𑀦𑀸𑀢𑀺𑀆𑀤𑀻𑀦𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀧𑀼𑀮𑁆𑀮𑀺𑀗𑁆𑀕𑀸𑀦𑀺𑀬𑁂𑀯 ‘‘𑀏𑀢𑁂’’𑀢𑀺𑀆𑀤𑀻𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑁂𑀳𑀺 𑀬𑁄𑀚𑀺𑀢𑀢𑁆𑀢𑀸’’𑀢𑀺. 𑀦, 𑀦𑀧𑀼𑀁𑀲𑀓𑀸𑀦𑀺𑀬𑁂𑀯𑁂𑀢𑀸𑀦𑀺. 𑀬𑀤𑀺 𑀳𑀺 ‘‘𑀥𑀦𑀸’’𑀢𑀺𑀆𑀤𑀻𑀦𑀺 𑀧𑀼𑀮𑁆𑀮𑀺𑀗𑁆𑀕𑀸𑀦𑀺 𑀲𑀺𑀬𑀼𑀁, 𑀓𑀢𑁆𑀣𑀘𑀺 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀝𑁆𑀞𑀸𑀦𑁂 ‘‘𑀏𑀲𑁄’’𑀢𑀺𑀆𑀤𑀻𑀳𑀺 𑀑𑀓𑀸𑀭𑀦𑁆𑀢𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑁂𑀳𑀺 𑀬𑁄𑀚𑀺𑀢𑀸 𑀑𑀓𑀸𑀭𑀦𑁆𑀢𑀥𑀦𑀲𑀤𑁆𑀤𑀸𑀤𑀬𑁄 𑀲𑀺𑀬𑀼𑀁. 𑀢𑀣𑀸𑀭𑀽𑀧𑀸𑀦𑀁 𑀅𑀪𑀸𑀯𑀢𑁄 𑀧𑀦 ‘‘𑀥𑀦𑀸 𑀇𑀦𑁆𑀤𑁆𑀭𑀺𑀬𑀸 𑀯𑀺𑀜𑁆𑀜𑀸𑀡𑀸’’𑀢𑀺𑀆𑀤𑀬𑁄 𑀲𑀤𑁆𑀤𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. 𑀅𑀬𑀁 𑀦𑀬𑁄 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀝𑁆𑀞𑀸𑀦𑁂𑀬𑁂𑀯 𑀮𑀩𑁆𑀪𑀢𑀺. 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺 𑀳𑀺 𑀯𑀺𑀲𑀤𑀸𑀓𑀸𑀭𑀸𑀦𑀺 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀺 𑀯𑀺𑀬 𑀳𑀼𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑁂𑀳𑀺𑀧𑀺 𑀲𑀤𑁆𑀥𑀺𑀁 𑀘𑀭𑀦𑁆𑀢𑀺, 𑀦𑀧𑀼𑀁𑀲𑀓𑀸 𑀯𑀺𑀬 𑀧𑀼𑀭𑀺𑀲𑀯𑁂𑀲𑀥𑀸𑀭𑀺𑀦𑁄 𑀧𑀼𑀭𑀺𑀲𑁂𑀳𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯𑀕𑀦𑁆𑀢𑀩𑁆𑀩𑀁.

𑀅𑀣𑀸𑀧𑀺 𑀢𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀘𑀦𑀁 𑀧𑀼𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀘𑀺𑀢𑁆𑀢𑀸 𑀇𑀢𑁆𑀣𑀻’’𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀘𑀺𑀢𑁆𑀢𑁄, 𑀘𑀺𑀢𑁆𑀢𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀘𑀺𑀢𑁆𑀢𑀸 𑀬𑀣𑀸 ‘‘𑀲𑀤𑁆𑀥𑁄, 𑀲𑀤𑁆𑀥𑀸’’𑀢𑀺 𑀏𑀯𑀁 𑀅𑀲𑁆𑀲𑀢𑁆𑀣𑀻𑀢𑀺 𑀅𑀢𑁆𑀣𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁄 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀦𑀺𑀘𑁆𑀙𑀺𑀢𑀩𑁆𑀩𑁄, ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀦𑀺 𑀧𑀦 𑀏𑀯𑀭𑀽𑀧𑀲𑁆𑀲 𑀅𑀢𑁆𑀣𑀲𑁆𑀲 𑀅𑀕𑁆𑀕𑀳𑁂𑀢𑀩𑁆𑀩𑀢𑁄 ‘‘𑀲𑀢𑀺𑀧𑀝𑁆𑀞𑀸𑀦𑀁 𑀥𑀫𑁆𑀫𑁄, 𑀘𑀺𑀢𑁆𑀢𑀁 𑀥𑀫𑁆𑀫𑁄, 𑀘𑀺𑀢𑁆𑀢𑀸𑀦𑀺 𑀥𑀫𑁆𑀫𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺? 𑀢𑀦𑁆𑀦, ‘‘𑀘𑀺𑀢𑁆𑀢𑁄 𑀕𑀳𑀧𑀢𑀻’’𑀢𑀺𑀆𑀤𑀻𑀲𑀼 𑀧𑀦 ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 𑀘 𑀘𑀺𑀢𑁆𑀢𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀕𑀳𑀧𑀢𑀺 𑀥𑀫𑁆𑀫𑀸𑀤𑀻𑀦𑀁 𑀅𑀧𑁂𑀓𑁆𑀔𑀦𑀯𑀲𑁂𑀦 𑀦𑀺𑀘𑁆𑀘𑀁 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸.

𑀢𑀣𑀸 𑀳𑀺 𑀏𑀓𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀧𑀺 𑀧𑀼𑀜𑁆𑀜𑀲𑀤𑁆𑀤𑁄 𑀅𑀪𑀺𑀲𑀗𑁆𑀔𑀸𑀭𑀸𑀧𑁂𑀓𑁆𑀔𑀦𑀯𑀲𑁂𑀦 ‘‘𑀧𑀼𑀜𑁆𑀜𑁄 𑀅𑀪𑀺𑀲𑀗𑁆𑀔𑀸𑀭𑁄’’𑀢𑀺 𑀧𑀼𑀮𑁆𑀮𑀺𑀗𑁆𑀕𑁄 𑀚𑀸𑀢𑁄, 𑀢𑀣𑀸 𑀏𑀓𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀧𑀺 𑀧𑀤𑀼𑀫 𑀫𑀗𑁆𑀕𑀮𑀲𑀤𑁆𑀤𑀸𑀤𑀬𑁄 𑀅𑀜𑁆𑀜𑀲𑁆𑀲𑀢𑁆𑀣𑀲𑁆𑀲𑀸𑀧𑁂𑀓𑁆𑀔𑀦𑀯𑀲𑁂𑀦 ‘‘𑀧𑀤𑀼𑀫𑁄 𑀪𑀕𑀯𑀸, 𑀧𑀤𑀼𑀫𑀸 𑀤𑁂𑀯𑀻, 𑀫𑀗𑁆𑀕𑀮𑁄 𑀪𑀕𑀯𑀸, 𑀫𑀗𑁆𑀕𑀮𑀸 𑀇𑀢𑁆𑀣𑀻’’𑀢𑀺 𑀘 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀸 𑀚𑀸𑀢𑀸. 𑀏𑀓𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀧𑀺 𑀳𑀢𑁆𑀣𑀺𑀯𑀺𑀲𑁂𑀲𑀯𑀸𑀘𑀓𑀸 𑀓𑀸𑀮𑀸𑀯𑀓 𑀕𑀗𑁆𑀕𑁂𑀬𑁆𑀬𑀲𑀤𑁆𑀤𑀸𑀤𑀬𑁄 𑀓𑀼𑀮𑀸𑀧𑁂𑀓𑁆𑀔𑀦𑀯𑀲𑁂𑀦 ‘‘𑀓𑀸𑀮𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀸 𑀚𑀸𑀢𑀸. 𑀢𑀤𑀧𑁂𑀓𑁆𑀔𑀦𑀯𑀲𑁂𑀦 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀸𑀮𑀸𑀯𑀓𑁄 𑀘 𑀕𑀗𑁆𑀕𑁂𑀬𑁆𑀬𑁄’’𑀢𑀺𑀆𑀤𑀺 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺. 𑀏𑀯𑀁 𑀢𑀁𑀢𑀤𑀢𑁆𑀣𑀸𑀦𑀫𑀧𑁂𑀓𑁆𑀔𑀦𑀯𑀲𑁂𑀦 𑀢𑀁𑀢𑀁𑀧𑀓𑀢𑀺𑀮𑀺𑀗𑁆𑀕𑀁 𑀦𑀸𑀲𑁂𑀢𑁆𑀯𑀸 𑀅𑀧𑀭𑀁 𑀮𑀺𑀗𑁆𑀕𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺, 𑀦 𑀘 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀮𑀺𑀗𑁆𑀕𑀸𑀦𑀺 𑀢𑀤𑁆𑀥𑀺𑀢𑀯𑀲𑁂𑀦 𑀅𑀜𑁆𑀜𑀮𑀺𑀗𑁆𑀕𑀸𑀦𑀺 𑀚𑀸𑀢𑀸𑀦𑀺, 𑀅𑀣 𑀔𑁄 𑀕𑀳𑀧𑀢𑀺𑀥𑀫𑁆𑀫𑀸𑀤𑀻𑀦𑀁 𑀅𑀧𑁂𑀓𑁆𑀔𑀦𑀯𑀲𑁂𑀦𑁂𑀯 𑀅𑀜𑁆𑀜𑀮𑀺𑀗𑁆𑀕𑀸𑀦𑀺 𑀚𑀸𑀢𑀸𑀦𑀺, 𑀢𑀲𑁆𑀫𑀸 ‘‘𑀧𑁂𑀢𑀸𑀦𑀺 𑀪𑁄𑀢𑀺 𑀧𑀼𑀢𑁆𑀢𑀸𑀦𑀺, 𑀔𑀸𑀤𑀫𑀸𑀦𑀸 𑀢𑀼𑀯𑀁 𑀧𑀼𑀭𑁂. 𑀲𑀺𑀯𑀺𑀧𑀼𑀢𑁆𑀢𑀸𑀦𑀺 𑀘𑀯𑁆𑀳𑀬. 𑀏𑀯𑀁 𑀥𑀫𑁆𑀫𑀸𑀦𑀺 𑀲𑀼𑀢𑁆𑀯𑀸𑀦, 𑀯𑀺𑀧𑁆𑀧𑀲𑀻𑀤𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺𑀆𑀤𑀻𑀲𑀼𑀬𑁂𑀯 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀇𑀘𑁆𑀙𑀺𑀢𑀩𑁆𑀩𑁄 𑀅𑀦𑀜𑁆𑀜𑀸𑀧𑁂𑀓𑁆𑀔𑀓𑀢𑁆𑀢𑀸 𑀯𑀼𑀢𑁆𑀢𑀥𑀫𑁆𑀫𑀲𑀤𑁆𑀤𑀸𑀤𑀻𑀦𑀁, 𑀦 𑀧𑀦 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀘𑀺𑀢𑁆𑀢𑀸 𑀇𑀢𑁆𑀣𑀻, 𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀲𑀤𑁆𑀤𑀸𑀤𑀻𑀦𑀁 𑀯𑀺𑀧𑀮𑁆𑀮𑀸𑀲𑁄 𑀇𑀘𑁆𑀙𑀺𑀢𑀩𑁆𑀩𑁄 𑀕𑀳𑀧𑀢𑀺 𑀥𑀫𑁆𑀫𑀸𑀤𑀻𑀦𑀁 𑀅𑀧𑁂𑀓𑁆𑀔𑀓𑀢𑁆𑀢𑀸 𑀢𑁂𑀲𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯𑀕𑀦𑁆𑀢𑀩𑁆𑀩𑀁, 𑀇𑀤𑀜𑁆𑀘 𑀏𑀓𑀘𑁆𑀘𑀸𑀦𑀁 𑀲𑀫𑁆𑀫𑁄𑀳𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀅𑀬𑀁 𑀦𑀻𑀢𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸.

𑀩𑀤𑀭𑀢𑀺𑀢𑁆𑀣𑀯𑀺𑀳𑀸𑀭𑀯𑀸𑀲𑀻 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑁄 𑀧𑀦 ‘‘𑀅𑀧𑀭𑀺𑀫𑀸𑀡𑀸 𑀧𑀤𑀸 𑀅𑀧𑀭𑀺𑀫𑀸𑀡𑀸 𑀅𑀓𑁆𑀔𑀭𑀸 𑀅𑀧𑀭𑀺𑀫𑀸𑀡𑀸 𑀩𑁆𑀬𑀜𑁆𑀚𑀦𑀸𑀢𑀺 𑀧𑀸𑀴𑀺𑀧𑁆𑀧𑀤𑁂𑀲𑁂 ‘𑀧𑀤𑀸 𑀅𑀓𑁆𑀔𑀭𑀸 𑀩𑁆𑀬𑀜𑁆𑀚𑀦𑀸’𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. 𑀏𑀢𑁆𑀣𑀸𑀧𑀺 𑀫𑀬𑀁 ‘‘𑀧𑀤𑀸’’𑀢𑀺 𑀇𑀤𑀁 ‘‘𑀇𑀦𑁆𑀤𑁆𑀭𑀺𑀬𑀸 𑀭𑀽𑀧𑀸’’𑀢𑀺𑀆𑀤𑀻𑀦𑀺 𑀯𑀺𑀬 𑀦𑀧𑀼𑀁𑀲𑀓𑀮𑀺𑀗𑁆𑀕𑀫𑁂𑀯𑀸𑀢𑀺 𑀯𑀤𑀸𑀫 𑀑𑀓𑀸𑀭𑀦𑁆𑀢𑀯𑀲𑁂𑀦 𑀧𑀞𑀫𑁂𑀓𑀯𑀘𑀦𑀦𑁆𑀢𑀪𑀸𑀯𑀸𑀪𑀸𑀯𑀢𑁄, 𑀇𑀢𑀭𑀤𑁆𑀯𑀬𑀁 𑀧𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑁆𑀢𑀺𑀧𑀺 𑀧𑀼𑀮𑁆𑀮𑀺𑀗𑁆𑀕𑀦𑁆𑀢𑀺𑀧𑀺 𑀕𑀳𑁂𑀢𑀩𑁆𑀩𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑁄𑀓𑀸𑀭𑀦𑁆𑀢𑀯𑀲𑁂𑀦 𑀧𑀞𑀫𑁂𑀓𑀯𑀘𑀦𑀦𑁆𑀢𑀪𑀸𑀯𑀲𑁆𑀲𑀽𑀧𑀮𑀩𑁆𑀪𑀦𑀢𑁄. 𑀢𑀣𑀸 𑀳𑀺 ‘‘𑀧𑀼𑀢𑁆𑀢𑀸𑀦𑀺 𑀮𑀢𑀸𑀦𑀺 𑀧𑀩𑁆𑀩𑀢𑀸𑀦𑀺 𑀥𑀫𑁆𑀫𑀸𑀦𑀻’’𑀢𑀺𑀆𑀤𑀻𑀦𑀁𑀬𑁂𑀯 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺 𑀦𑀺𑀕𑁆𑀕𑀳𑀻𑀢𑀦𑁆𑀢𑀯𑀲𑁂𑀦 𑀧𑀞𑀫𑁂𑀓𑀯𑀘𑀦𑀦𑁆𑀢𑀢𑀸𑀬 𑀅𑀦𑀼𑀧𑀮𑀤𑁆𑀥𑀺𑀢𑁄, 𑀢𑁂𑀲𑀜𑁆𑀘𑁄𑀓𑀸𑀭𑀦𑁆𑀢𑀸𑀓𑀸𑀭𑀦𑁆𑀢𑀯𑀲𑁂𑀦 𑀧𑀞𑀫𑁂𑀓𑀯𑀘𑀦𑀦𑁆𑀢𑀢𑀸𑀤𑀲𑁆𑀲𑀦𑀢𑁄. ‘‘𑀚𑀭𑀸𑀥𑀫𑁆𑀫𑀁 𑀫𑀸 𑀚𑀻𑀭𑀻’’𑀢𑀺 𑀇𑀤𑀁 𑀧𑀦 𑀅𑀜𑁆𑀜𑀧𑀤𑀢𑁆𑀣𑀯𑀲𑁂𑀦 𑀦𑀧𑀼𑀁𑀲𑀓𑀁 𑀚𑀸𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀪𑀽𑀢𑀁, 𑀪𑀽𑀢𑀸𑀦𑀺, 𑀪𑀽𑀢𑀸. 𑀪𑀽𑀢𑀁, 𑀪𑀽𑀢𑀸𑀦𑀺, 𑀪𑀽𑀢𑁂. 𑀪𑀽𑀢𑁂𑀦, 𑀪𑀽𑀢𑁂𑀳𑀺, 𑀪𑀽𑀢𑁂𑀪𑀺. 𑀪𑀽𑀢𑀲𑁆𑀲, 𑀪𑀽𑀢𑀸𑀦𑀁. 𑀪𑀽𑀢𑀸, 𑀪𑀽𑀢𑀲𑁆𑀫𑀸, 𑀪𑀽𑀢𑀫𑁆𑀳𑀸, 𑀪𑀽𑀢𑁂𑀳𑀺, 𑀪𑀽𑀢𑁂𑀪𑀺. 𑀪𑀽𑀢𑀲𑁆𑀲, 𑀪𑀽𑀢𑀸𑀦𑀁. 𑀪𑀽𑀢𑁂, 𑀪𑀽𑀢𑀲𑁆𑀫𑀺𑀁, 𑀪𑀽𑀢𑀫𑁆𑀳𑀺, 𑀪𑀽𑀢𑁂𑀲𑀼. 𑀪𑁄 𑀪𑀽𑀢, 𑀪𑀯𑀦𑁆𑀢𑁄 𑀪𑀽𑀢𑀸𑀦𑀺, 𑀪𑀯𑀦𑁆𑀢𑁄 𑀪𑀽𑀢𑀸. 𑀏𑀯𑀁 𑀘𑀺𑀢𑁆𑀢𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺.

𑀇𑀫𑀺𑀦𑀸 𑀦𑀬𑁂𑀦 ‘‘𑀫𑀳𑀸𑀪𑀽𑀢𑀁 𑀪𑀯𑀺𑀢𑁆𑀢𑀁 𑀪𑀽𑀦𑀁 𑀪𑀯𑀦’’𑀫𑀺𑀘𑁆𑀘𑀸𑀤𑀻𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀤𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 ‘‘𑀯𑀢𑁆𑀢’’𑀫𑀺𑀘𑁆𑀘𑀸𑀤𑀻𑀦𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀢𑁆𑀢𑀁 𑀭𑀽𑀧𑀁 𑀲𑁄𑀢𑀁 𑀖𑀸𑀦𑀁, 𑀤𑀼𑀓𑁆𑀔𑀁 𑀧𑀼𑀧𑁆𑀨𑀁 𑀛𑀸𑀦𑀁 𑀜𑀸𑀡𑀁;

𑀤𑀸𑀦𑀁 𑀲𑀻𑀮𑀁 𑀧𑀼𑀜𑁆𑀜𑀁 𑀧𑀸𑀧𑀁, 𑀯𑀚𑁆𑀚𑀁 𑀲𑀘𑁆𑀘𑀁 𑀬𑀸𑀦𑀁 𑀙𑀢𑁆𑀢𑀁.

𑀲𑀓𑀝𑀁 𑀓𑀦𑀓𑀁 𑀢𑀕𑀭𑀁 𑀦𑀕𑀭𑀁, 𑀢𑀭𑀡𑀁 𑀘𑀭𑀡𑀁 𑀥𑀭𑀡𑀁 𑀫𑀭𑀡𑀁;

𑀦𑀬𑀦𑀁 𑀯𑀤𑀦𑀁 𑀓𑀭𑀡𑀁 𑀮𑀯𑀦𑀁, 𑀯𑀲𑀦𑀁 𑀧𑀯𑀦𑀁 𑀪𑀯𑀦𑀁 𑀕𑀕𑀦𑀁.

𑀅𑀫𑀢𑀁 𑀧𑀼𑀴𑀺𑀦𑀁 𑀫𑀸𑀮𑀁, 𑀆𑀲𑀦𑀁 𑀲𑀯𑀦𑀁 𑀫𑀼𑀔𑀁;

𑀧𑀤𑀼𑀫𑀁 𑀉𑀧𑁆𑀧𑀮𑀁 𑀯𑀲𑁆𑀲𑀁, 𑀮𑁄𑀘𑀦𑀁 𑀲𑀸𑀥𑀦𑀁 𑀲𑀼𑀔𑀁.

𑀢𑀸𑀡𑀁 𑀫𑀽𑀮𑀁 𑀥𑀦𑀁 𑀓𑀽𑀮𑀁, 𑀫𑀗𑁆𑀕𑀮𑀁 𑀦𑀴𑀺𑀦𑀁 𑀨𑀮𑀁;

𑀳𑀺𑀭𑀜𑁆𑀜𑀁 𑀅𑀫𑁆𑀩𑀼𑀚𑀁 𑀥𑀜𑁆𑀜𑀁, 𑀚𑀸𑀮𑀁 𑀮𑀺𑀗𑁆𑀕𑀁 𑀧𑀤𑀁 𑀚𑀮𑀁.

𑀅𑀗𑁆𑀕𑀁 𑀧𑀡𑁆𑀡𑀁 𑀲𑀼𑀲𑀸𑀦𑀁 𑀲𑀁, 𑀆𑀯𑀼𑀥𑀁 𑀳𑀤𑀬𑀁 𑀯𑀦𑀁;

𑀲𑁄𑀧𑀸𑀦𑀁 𑀘𑀻𑀯𑀭𑀁 𑀧𑀸𑀡𑀁, 𑀅𑀮𑀸𑀢𑀁 𑀇𑀦𑁆𑀤𑁆𑀭𑀺𑀬𑀁 𑀓𑀼𑀮𑀁.

𑀮𑁄𑀳𑀁 𑀓𑀡𑀁 𑀩𑀮𑀁 𑀧𑀻𑀞𑀁, 𑀅𑀡𑁆𑀟𑀁 𑀆𑀭𑀫𑁆𑀫𑀡𑀁 𑀧𑀼𑀭𑀁;

𑀅𑀭𑀜𑁆𑀜𑀁 𑀢𑀻𑀭𑀫𑀲𑁆𑀲𑀢𑁆𑀣-𑀫𑀺𑀘𑁆𑀘𑀸𑀤𑀻𑀦𑀺 𑀲𑀫𑀼𑀤𑁆𑀥𑀭𑁂.

𑀇𑀫𑀸𑀦𑀺 𑀘𑀺𑀢𑁆𑀢𑀲𑀤𑁆𑀤𑁂𑀦 𑀲𑀩𑁆𑀩𑀣𑀸𑀧𑀺 𑀲𑀤𑀺𑀲𑀸𑀦𑀺, 𑀇𑀫𑀸𑀦𑀺 𑀧𑀦 𑀯𑀺𑀲𑀤𑀺𑀲𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋

‘‘𑀘𑀫𑁆𑀫𑀁 𑀯𑁂𑀲𑁆𑀫’’𑀦𑁆𑀢𑀺𑀆𑀤𑀻𑀦𑀺, 𑀏𑀓𑀥𑀸𑀬𑁂𑀯 𑀪𑀺𑀚𑁆𑀚𑀭𑁂;

‘‘𑀓𑀫𑁆𑀫𑀁 𑀣𑀸𑀫𑀁 𑀕𑀼𑀡𑀯’’𑀦𑁆𑀢𑀺-𑀆𑀤𑀻𑀦𑀺 𑀢𑀼 𑀅𑀦𑁂𑀓𑀥𑀸.

𑀓𑀣𑀁?

𑀘𑀫𑁆𑀫𑁂, 𑀘𑀫𑁆𑀫𑀲𑁆𑀫𑀺𑀁, 𑀘𑀫𑁆𑀫𑀫𑁆𑀳𑀺, 𑀘𑀫𑁆𑀫𑀦𑀺, 𑀯𑁂𑀲𑁆𑀫𑁂, 𑀯𑁂𑀲𑁆𑀫𑀲𑁆𑀫𑀺𑀁, 𑀯𑁂𑀲𑁆𑀫𑀫𑁆𑀳𑀺, 𑀯𑁂𑀲𑁆𑀫𑀦𑀺, 𑀖𑀫𑁆𑀫𑁂, 𑀖𑀫𑁆𑀫𑀲𑁆𑀫𑀺𑀁, 𑀖𑀫𑁆𑀫𑀫𑁆𑀳𑀺, 𑀖𑀫𑁆𑀫𑀦𑀺. 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀓𑀫𑁆𑀫𑀁, 𑀓𑀫𑁆𑀫𑀸𑀦𑀺, 𑀓𑀫𑁆𑀫𑀸. 𑀓𑀫𑁆𑀫𑀁, 𑀓𑀫𑁆𑀫𑀸𑀦𑀺, 𑀓𑀫𑁆𑀫𑁂. 𑀓𑀫𑁆𑀫𑁂𑀦, 𑀓𑀫𑁆𑀫𑀼𑀦𑀸, 𑀓𑀫𑁆𑀫𑀦𑀸, 𑀓𑀫𑁆𑀫𑁂𑀳𑀺, 𑀓𑀫𑁆𑀫𑁂𑀪𑀺. 𑀓𑀫𑁆𑀫𑀲𑁆𑀲, 𑀓𑀫𑁆𑀫𑀼𑀦𑁄, 𑀓𑀫𑁆𑀫𑀸𑀦𑀁. 𑀓𑀫𑁆𑀫𑀲𑁆𑀫𑀸, 𑀓𑀫𑁆𑀫𑀫𑁆𑀳𑀸, 𑀓𑀫𑁆𑀫𑀼𑀦𑀸, 𑀓𑀫𑁆𑀫𑁂𑀳𑀺, 𑀓𑀫𑁆𑀫𑁂𑀪𑀺. 𑀓𑀫𑁆𑀫𑀲𑁆𑀲, 𑀓𑀫𑁆𑀫𑀼𑀦𑁄, 𑀓𑀫𑁆𑀫𑀸𑀦𑀁. 𑀓𑀫𑁆𑀫𑁂, 𑀓𑀫𑁆𑀫𑀲𑁆𑀫𑀺𑀁, 𑀓𑀫𑁆𑀫𑀫𑁆𑀳𑀺, 𑀓𑀫𑁆𑀫𑀦𑀺, 𑀓𑀫𑁆𑀫𑁂𑀲𑀼. 𑀪𑁄 𑀓𑀫𑁆𑀫, 𑀪𑀯𑀦𑁆𑀢𑁄 𑀓𑀫𑁆𑀫𑀸𑀦𑀺, 𑀪𑀯𑀦𑁆𑀢𑁄 𑀓𑀫𑁆𑀫𑀸.

𑀣𑀸𑀫𑀲𑀤𑁆𑀤𑀲𑁆𑀲 𑀧𑀦 𑀢𑀢𑀺𑀬𑁂𑀓𑀯𑀘𑀦𑀝𑁆𑀞𑀸𑀦𑀸𑀤𑀻𑀲𑀼 ‘‘𑀣𑀸𑀫𑁂𑀦, 𑀣𑀸𑀫𑀼𑀦𑀸, 𑀣𑀸𑀫𑀲𑁆𑀲, 𑀣𑀸𑀫𑀼𑀦𑁄’’𑀢𑀺 𑀘, ‘‘𑀣𑀸𑀫𑀸, 𑀣𑀸𑀫𑀲𑁆𑀫𑀸, 𑀣𑀸𑀫𑀫𑁆𑀳𑀸, 𑀣𑀸𑀫𑀼𑀦𑀸’’𑀢𑀺 𑀘 𑀬𑁄𑀚𑁂𑀢𑀩𑁆𑀩𑀁.

𑀯𑀦𑁆𑀢𑀼 𑀫𑀦𑁆𑀢𑀼 𑀇𑀫𑀦𑁆𑀢𑀼𑀧𑀘𑁆𑀘𑀬𑀯𑀢𑀁 𑀧𑀦 𑀦𑀺𑀕𑁆𑀕𑀳𑀻𑀢𑀦𑁆𑀢𑀲𑀤𑁆𑀤𑀸𑀦𑀁 ‘‘𑀕𑀼𑀡𑀯𑀁 𑀘𑀺𑀢𑁆𑀢𑀁, 𑀭𑀼𑀘𑀺𑀫𑀁 𑀧𑀼𑀧𑁆𑀨𑀁, 𑀧𑀸𑀧𑀺𑀫𑀁 𑀓𑀼𑀮𑀁’’ 𑀇𑀘𑁆𑀘𑀸𑀤𑀺𑀧𑀬𑁄𑀕𑀯𑀲𑁂𑀦 𑁋

𑀕𑀼𑀡𑀯𑀁, 𑀕𑀼𑀡𑀯𑀦𑁆𑀢𑀸𑀦𑀺, 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀺. 𑀕𑀼𑀡𑀯𑀦𑁆𑀢𑀁, 𑀕𑀼𑀡𑀯𑀦𑁆𑀢𑀸𑀦𑀺, 𑀕𑀼𑀡𑀯𑀦𑁆𑀢𑁂 𑀕𑀼𑀡𑀯𑀦𑁆𑀢𑀺. 𑀕𑀼𑀡𑀯𑀢𑀸, 𑀕𑀼𑀡𑀯𑀦𑁆𑀢𑁂𑀦, 𑀕𑀼𑀡𑀯𑀦𑁆𑀢𑁂𑀳𑀺, 𑀕𑀼𑀡𑀯𑀦𑁆𑀢𑁂𑀪𑀺. 𑀕𑀼𑀡𑀯𑀢𑁄, 𑀕𑀼𑀡𑀯𑀦𑁆𑀢𑀲𑁆𑀲, 𑀕𑀼𑀡𑀯𑀢𑀁, 𑀕𑀼𑀡𑀯𑀦𑁆𑀢𑀸𑀦𑀁. 𑀕𑀼𑀡𑀯𑀢𑀸, 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀲𑁆𑀫𑀸, 𑀕𑀼𑀡𑀯𑀦𑁆𑀢𑀫𑁆𑀳𑀸, 𑀕𑀼𑀡𑀯𑀦𑁆𑀢𑁂𑀳𑀺, 𑀕𑀼𑀡𑀯𑀦𑁆𑀢𑁂𑀪𑀺. 𑀕𑀼𑀡𑀯𑀢𑁄, 𑀕𑀼𑀡𑀯𑀦𑁆𑀢𑀲𑁆𑀲, 𑀕𑀼𑀡𑀯𑀢𑀁, 𑀕𑀼𑀡𑀯𑀦𑁆𑀢𑀸𑀦𑀁. 𑀕𑀼𑀡𑀯𑀢𑀺, 𑀕𑀼𑀡𑀯𑀦𑁆𑀢𑁂, 𑀕𑀼𑀡𑀯𑀦𑁆𑀢𑀲𑁆𑀫𑀺𑀁, 𑀕𑀼𑀡𑀯𑀦𑁆𑀢𑀫𑁆𑀳𑀺, 𑀕𑀼𑀡𑀯𑀦𑁆𑀢𑁂𑀲𑀼. 𑀪𑁄 𑀕𑀼𑀡𑀯, 𑀪𑀯𑀦𑁆𑀢𑁄 𑀕𑀼𑀡𑀯𑀦𑁆𑀢𑀸𑀦𑀺, 𑀕𑀼𑀡𑀯𑀦𑁆𑀢𑀺.

𑀏𑀯𑀁 ‘‘𑀭𑀼𑀘𑀺𑀫𑀁, 𑀭𑀼𑀘𑀺𑀫𑀦𑁆𑀢𑀸𑀦𑀺, 𑀭𑀼𑀘𑀺𑀫’’𑀦𑁆𑀢𑀺𑀇𑀘𑁆𑀘𑀸𑀤𑀺𑀦𑀸, ‘‘𑀧𑀸𑀧𑀺𑀫𑀁, 𑀧𑀸𑀧𑀺𑀫𑀦𑁆𑀢𑀸𑀦𑀺, 𑀧𑀸𑀧𑀺𑀫’’𑀦𑁆𑀢𑀺 𑀇𑀘𑁆𑀘𑀸𑀤𑀺𑀦𑀸 𑀘 𑀬𑁄𑀚𑁂𑀢𑀩𑁆𑀩𑀁. 𑀅𑀧𑀺𑀘𑁂𑀢𑁆𑀣 ‘‘𑀕𑀼𑀡𑀯𑀁 𑀩𑀮𑀯𑀁 𑀬𑀲𑀯𑀁 𑀲𑀢𑀺𑀫𑀁 𑀕𑀢𑀺𑀫𑀁’’𑀇𑀘𑁆𑀘𑀸𑀤𑀺𑀦𑀸 𑀧𑀬𑁄𑀕𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑀓𑀭𑁄𑀦𑁆𑀢𑀲𑀤𑁆𑀤𑀲𑁆𑀲 ‘‘𑀓𑀭𑁄𑀦𑁆𑀢𑀁 𑀘𑀺𑀢𑁆𑀢𑀁, 𑀓𑀭𑁄𑀦𑁆𑀢𑀁 𑀓𑀼𑀮’’𑀦𑁆𑀢𑀺 𑀧𑀬𑁄𑀕𑀯𑀲𑁂𑀦 𑁋

𑀓𑀭𑁄𑀦𑁆𑀢𑀁, 𑀓𑀭𑁄𑀦𑁆𑀢𑀸𑀦𑀺, 𑀓𑀭𑁄𑀦𑁆𑀢𑀸, 𑀓𑀭𑁄𑀦𑁆𑀢𑀺. 𑀓𑀭𑁄𑀦𑁆𑀢𑀁, 𑀓𑀭𑁄𑀦𑁆𑀢𑀸𑀦𑀺, 𑀓𑀭𑁄𑀦𑁆𑀢𑁂, 𑀓𑀭𑁄𑀦𑁆𑀢𑀺. 𑀓𑀭𑁄𑀢𑀸, 𑀓𑀭𑁄𑀦𑁆𑀢𑁂𑀦, 𑀓𑀭𑁄𑀦𑁆𑀢𑁂𑀳𑀺, 𑀓𑀭𑁄𑀦𑁆𑀢𑁂𑀪𑀺. 𑀓𑀭𑁄𑀢𑁄, 𑀓𑀭𑀢𑁄, 𑀓𑀭𑁄𑀦𑁆𑀢𑀲𑁆𑀲, 𑀓𑀭𑁄𑀦𑁆𑀢𑀸𑀦𑀁, 𑀓𑀭𑁄𑀢𑀁. 𑀓𑀭𑁄𑀢𑀸, 𑀓𑀭𑁄𑀦𑁆𑀢𑀸, 𑀓𑀭𑁄𑀦𑁆𑀢𑀲𑁆𑀫𑀸, 𑀓𑀭𑁄𑀦𑁆𑀢𑀫𑁆𑀳𑀸, 𑀓𑀭𑁄𑀦𑁆𑀢𑁂𑀳𑀺, 𑀓𑀭𑁄𑀦𑁆𑀢𑁂𑀪𑀺. 𑀓𑀭𑁄𑀢𑁄, 𑀓𑀭𑀢𑁄, 𑀓𑀭𑁄𑀦𑁆𑀢𑀲𑁆𑀲, 𑀓𑀭𑁄𑀦𑁆𑀢𑀸𑀦𑀁, 𑀓𑀭𑁄𑀢𑀁. 𑀓𑀭𑁄𑀢𑀺, 𑀓𑀭𑁄𑀦𑁆𑀢𑁂, 𑀓𑀭𑁄𑀦𑁆𑀢𑀲𑁆𑀫𑀺𑀁, 𑀓𑀭𑁄𑀦𑁆𑀢𑀫𑁆𑀳𑀺, 𑀓𑀭𑁄𑀦𑁆𑀢𑁂𑀲𑀼. 𑀪𑁄 𑀓𑀭𑁄𑀦𑁆𑀢, 𑀪𑀯𑀦𑁆𑀢𑁄, 𑀓𑀭𑁄𑀦𑁆𑀢𑀸𑀦𑀺, 𑀓𑀭𑁄𑀦𑁆𑀢𑀸, 𑀓𑀭𑁄𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀕𑀘𑁆𑀙𑀦𑁆𑀢𑀲𑀤𑁆𑀤𑀲𑁆𑀲 𑀢𑀼 ‘‘𑀕𑀘𑁆𑀙𑀦𑁆𑀢𑀁 𑀘𑀺𑀢𑁆𑀢𑀁, 𑀕𑀘𑁆𑀙𑀦𑁆𑀢𑀁 𑀓𑀼𑀮’’𑀦𑁆𑀢𑀺 𑀧𑀬𑁄𑀕𑀯𑀲𑁂𑀦 𑁋

𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑀸𑀦𑀺, 𑀕𑀘𑁆𑀙𑀦𑁆𑀢𑀸. 𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑀸𑀦𑀺, 𑀕𑀘𑁆𑀙𑀦𑁆𑀢𑁂. 𑀕𑀘𑁆𑀙𑀢𑀸, 𑀕𑀘𑁆𑀙𑀦𑁆𑀢𑁂𑀦, 𑀕𑀘𑁆𑀙𑀦𑁆𑀢𑁂𑀳𑀺, 𑀕𑀘𑁆𑀙𑀦𑁆𑀢𑁂𑀪𑀺. 𑀕𑀘𑁆𑀙𑀢𑁄, 𑀕𑀘𑁆𑀙𑀦𑁆𑀢𑀲𑁆𑀲, 𑀕𑀘𑁆𑀙𑀦𑁆𑀢𑀸𑀦𑀁, 𑀕𑀘𑁆𑀙𑀢𑀁. 𑀕𑀘𑁆𑀙𑀢𑀸, 𑀕𑀘𑁆𑀙𑀦𑁆𑀢𑀸, 𑀕𑀘𑁆𑀙𑀦𑁆𑀢𑀲𑁆𑀫𑀸, 𑀕𑀘𑁆𑀙𑀦𑁆𑀢𑀫𑁆𑀳𑀸, 𑀕𑀘𑁆𑀙𑀦𑁆𑀢𑁂𑀳𑀺, 𑀕𑀘𑁆𑀙𑀦𑁆𑀢𑁂𑀪𑀺. 𑀕𑀘𑁆𑀙𑀢𑁄, 𑀕𑀘𑁆𑀙𑀦𑁆𑀢𑀲𑁆𑀲, 𑀕𑀘𑁆𑀙𑀦𑁆𑀢𑀸𑀦𑀁, 𑀕𑀘𑁆𑀙𑀢𑀁. 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑁂, 𑀕𑀘𑁆𑀙𑀦𑁆𑀢𑀲𑁆𑀫𑀺𑀁, 𑀕𑀘𑁆𑀙𑀦𑁆𑀢𑀫𑁆𑀳𑀺, 𑀕𑀘𑁆𑀙𑀦𑁆𑀢𑁂𑀲𑀼. 𑀪𑁄 𑀕𑀘𑁆𑀙𑀁, 𑀪𑁄 𑀕𑀘𑁆𑀙𑀦𑁆𑀢𑀸, 𑀪𑀯𑀦𑁆𑀢𑁄 𑀕𑀘𑁆𑀙𑀦𑁆𑀢𑀸𑀦𑀺, 𑀕𑀘𑁆𑀙𑀦𑁆𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀯𑀁 ‘‘𑀘𑀭𑀦𑁆𑀢𑀁 𑀤𑀤𑀦𑁆𑀢𑀁 𑀢𑀺𑀝𑁆𑀞𑀦𑁆𑀢𑀁 𑀘𑀺𑀦𑁆𑀢𑀬𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀫𑀳𑀦𑁆𑀢𑀲𑀤𑁆𑀤𑀲𑁆𑀲 𑀧𑀦 𑀓𑁄𑀘𑀺 𑀪𑁂𑀤𑁄, 𑀢𑀣𑀸 𑀳𑀺 ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀦𑀸𑀫 𑀫𑀳𑀸’’𑀢𑀺 𑀏𑀯𑀁 ‘‘𑀫𑀳𑀸’’𑀇𑀢𑀺 𑀦𑀧𑀼𑀁𑀲𑀓𑀧𑀬𑁄𑀕𑀤𑀲𑁆𑀲𑀦𑀢𑁄 ‘‘𑀫𑀳𑀦𑁆𑀢𑀁, 𑀫𑀳𑀸, 𑀫𑀳𑀦𑁆𑀢𑀸𑀦𑀺, 𑀫𑀳𑀦𑁆𑀢𑀸. 𑀫𑀳𑀦𑁆𑀢𑀁, 𑀫𑀳𑀦𑁆𑀢𑀸𑀦𑀺, 𑀫𑀳𑀦𑁆𑀢𑁂. 𑀫𑀳𑀢𑀸’’𑀢𑀺 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀸𑀦𑁂𑀢𑀸𑀦𑀺 𑀘𑀺𑀢𑁆𑀢𑀲𑀤𑁆𑀤𑁂𑀦 𑀯𑀺𑀲𑀤𑀺𑀲𑀸𑀦𑀺.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀅𑀯𑀡𑁆𑀡𑀼𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀁

𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀢𑀲𑁆𑀲𑀻𑀮𑀢𑁆𑀣𑀲𑁆𑀲 𑀓𑀢𑀭𑀲𑁆𑀲𑀲𑁆𑀲 𑀅𑀢𑁆𑀣𑀯𑀺𑀪𑀸𑀯𑀺 𑀇𑀘𑁆𑀘𑁂𑀢𑀲𑁆𑀲 𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑁋

𑀅𑀝𑁆𑀞𑀺, 𑀅𑀝𑁆𑀞𑀻, 𑀅𑀝𑁆𑀞𑀻𑀦𑀺. 𑀅𑀝𑁆𑀞𑀺𑀁, 𑀅𑀝𑁆𑀞𑀻, 𑀅𑀝𑁆𑀞𑀻𑀦𑀺. 𑀅𑀝𑁆𑀞𑀺𑀦𑀸, 𑀅𑀝𑁆𑀞𑀻𑀳𑀺, 𑀅𑀝𑁆𑀞𑀻𑀪𑀺. 𑀅𑀝𑁆𑀞𑀺𑀲𑁆𑀲, 𑀅𑀝𑁆𑀞𑀺𑀦𑁄, 𑀅𑀝𑁆𑀞𑀻𑀦𑀁. 𑀅𑀝𑁆𑀞𑀺𑀦𑀸, 𑀅𑀝𑁆𑀞𑀻𑀳𑀺, 𑀅𑀝𑁆𑀞𑀻𑀪𑀺. 𑀅𑀝𑁆𑀞𑀺𑀲𑁆𑀲, 𑀅𑀝𑁆𑀞𑀺𑀦𑁄, 𑀅𑀝𑁆𑀞𑀻𑀦𑀁. 𑀅𑀝𑁆𑀞𑀺𑀲𑁆𑀫𑀺𑀁, 𑀅𑀝𑁆𑀞𑀺𑀫𑁆𑀳𑀺, 𑀅𑀝𑁆𑀞𑀻𑀲𑀼. 𑀪𑁄 𑀅𑀝𑁆𑀞𑀺, 𑀪𑀯𑀦𑁆𑀢𑁄 𑀅𑀝𑁆𑀞𑀻, 𑀪𑀯𑀦𑁆𑀢𑁄 𑀅𑀝𑁆𑀞𑀻𑀦𑀺. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

𑀓𑀺𑀜𑁆𑀘𑀸𑀧𑁂𑀢𑁆𑀣 𑀦𑀺𑀲𑁆𑀲𑀓𑁆𑀓𑀯𑀘𑀦𑀝𑁆𑀞𑀸𑀦𑁂 ‘‘𑀅𑀝𑁆𑀞𑀺𑀲𑁆𑀫𑀸, 𑀅𑀝𑁆𑀞𑀺𑀫𑁆𑀳𑀸’’𑀢𑀺 𑀧𑀤𑀸𑀦𑀺 𑀅𑀦𑀸𑀕𑀢𑀸𑀦𑀺, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀢𑀁𑀲𑀤𑀺𑀲𑀧𑁆𑀧𑀬𑁄𑀕𑀤𑀲𑁆𑀲𑀦𑀸 𑀕𑀳𑁂𑀢𑀩𑁆𑀩𑀸𑀦𑀺. 𑀬𑀣𑀸 𑀧𑀦 𑀅𑀝𑁆𑀞𑀺𑀲𑀤𑁆𑀤𑀲𑁆𑀲, 𑀏𑀯𑀁 ‘‘𑀲𑀢𑁆𑀣𑀺 𑀤𑀥𑀺 𑀯𑀸𑀭𑀺 𑀅𑀓𑁆𑀔𑀺 𑀅𑀘𑁆𑀙𑀺’’𑀇𑀘𑁆𑀘𑀸𑀤𑀻𑀦𑀫𑁆𑀧𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀅𑀢𑁆𑀣𑀯𑀺𑀪𑀸𑀯𑀺, 𑀅𑀢𑁆𑀣𑀯𑀺𑀪𑀸𑀯𑀻, 𑀅𑀢𑁆𑀣𑀯𑀺𑀪𑀸𑀯𑀻𑀦𑀺. 𑀅𑀢𑁆𑀣𑀯𑀺𑀪𑀸𑀯𑀺𑀁, 𑀅𑀢𑁆𑀣𑀯𑀺𑀪𑀸𑀯𑀻, 𑀅𑀢𑁆𑀣𑀯𑀺𑀪𑀸𑀯𑀻𑀦𑀺. 𑀅𑀢𑁆𑀣𑀯𑀺𑀪𑀸𑀯𑀺𑀦𑀸, 𑀅𑀢𑁆𑀣𑀯𑀺𑀪𑀸𑀯𑀻𑀳𑀺, 𑀅𑀢𑁆𑀣𑀯𑀺𑀪𑀸𑀯𑀻𑀪𑀺. 𑀅𑀢𑁆𑀣𑀯𑀺𑀪𑀸𑀯𑀺𑀲𑁆𑀲, 𑀅𑀢𑁆𑀣𑀯𑀺𑀪𑀸𑀯𑀺𑀦𑁄, 𑀅𑀢𑁆𑀣𑀯𑀺𑀪𑀸𑀯𑀻𑀦𑀁. 𑀅𑀢𑁆𑀣𑀯𑀺𑀪𑀸𑀯𑀺𑀦𑀸, 𑀅𑀢𑁆𑀣𑀯𑀺𑀪𑀸𑀯𑀺𑀲𑁆𑀫𑀸 𑀅𑀢𑁆𑀣𑀯𑀺𑀪𑀸𑀯𑀺𑀫𑁆𑀳𑀸, 𑀅𑀢𑁆𑀣𑀯𑀺𑀪𑀸𑀯𑀻𑀳𑀺, 𑀅𑀢𑁆𑀣𑀯𑀺𑀪𑀸𑀯𑀻𑀪𑀺. 𑀅𑀢𑁆𑀣𑀯𑀺𑀪𑀸𑀯𑀺𑀲𑁆𑀲, 𑀅𑀢𑁆𑀣𑀯𑀺𑀪𑀸𑀯𑀺𑀦𑁄, 𑀅𑀢𑁆𑀣𑀯𑀺𑀪𑀸𑀯𑀻𑀦𑀁. 𑀅𑀢𑁆𑀣𑀯𑀺𑀪𑀸𑀯𑀺𑀲𑁆𑀫𑀺𑀁, 𑀅𑀢𑁆𑀣𑀯𑀺𑀪𑀸𑀯𑀺𑀫𑁆𑀳𑀺, 𑀅𑀢𑁆𑀣𑀯𑀺𑀪𑀸𑀯𑀻𑀲𑀼. 𑀪𑁄 𑀅𑀢𑁆𑀣𑀯𑀺𑀪𑀸𑀯𑀺, 𑀪𑀯𑀦𑁆𑀢𑁄 𑀅𑀢𑁆𑀣𑀯𑀺𑀪𑀸𑀯𑀻, 𑀪𑀯𑀦𑁆𑀢𑁄 𑀅𑀢𑁆𑀣𑀯𑀺𑀪𑀸𑀯𑀻𑀦𑀺.

𑀏𑀯𑀁 ‘‘𑀥𑀫𑁆𑀫𑀯𑀺𑀪𑀸𑀯𑀺, 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀼𑀔𑀓𑀸𑀭𑀺’’𑀇𑀘𑁆𑀘𑀸𑀤𑀻𑀦𑀺𑀧𑀺. 𑀢𑀢𑁆𑀣 𑀅𑀝𑁆𑀞𑀺 𑀲𑀢𑁆𑀣𑀺𑀆𑀤𑀻𑀦𑀺 𑀧𑀥𑀸𑀦𑀮𑀺𑀗𑁆𑀕𑀸𑀦𑀺 𑀅𑀦𑀜𑁆𑀜𑀸𑀧𑁂𑀓𑁆𑀔𑀓𑀢𑁆𑀢𑀸, 𑀅𑀢𑁆𑀣𑀯𑀺𑀪𑀸𑀯𑀺 𑀥𑀫𑁆𑀫𑀯𑀺𑀪𑀸𑀯𑀺𑀆𑀤𑀻𑀦𑀺 𑀅𑀧𑁆𑀧𑀥𑀸𑀦𑀮𑀺𑀗𑁆𑀕𑀸𑀦𑀺 𑀅𑀜𑁆𑀜𑀸𑀧𑁂𑀓𑁆𑀔𑀓𑀢𑁆𑀢𑀸.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀇𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀇𑀯𑀡𑁆𑀡𑀦𑁆𑀢𑀢𑀸𑀧𑀓𑀢𑀺𑀓𑀁 𑀇𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀓𑀢𑀭𑀲𑁆𑀲𑀲𑁆𑀲 𑀕𑁄𑀢𑁆𑀭𑀪𑀼 𑀇𑀘𑁆𑀘𑁂𑀢𑀲𑁆𑀲 𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑁋

𑀆𑀬𑀼, 𑀆𑀬𑀽, 𑀆𑀬𑀽𑀦𑀺. 𑀆𑀬𑀼𑀁, 𑀆𑀬𑀽, 𑀆𑀬𑀽𑀦𑀺. 𑀆𑀬𑀼𑀦𑀸, 𑀆𑀬𑀽𑀳𑀺, 𑀆𑀬𑀽𑀪𑀺. 𑀆𑀬𑀼𑀲𑁆𑀲, 𑀆𑀬𑀼𑀦𑁄, 𑀆𑀬𑀽𑀦𑀁. 𑀆𑀬𑀼𑀦𑀸, 𑀆𑀬𑀽𑀳𑀺, 𑀆𑀬𑀽𑀪𑀺. 𑀆𑀬𑀼𑀲𑁆𑀲, 𑀆𑀬𑀼𑀦𑁄, 𑀆𑀬𑀽𑀦𑀁. 𑀆𑀬𑀼𑀲𑁆𑀫𑀺𑀁, 𑀆𑀬𑀼𑀫𑁆𑀳𑀺, 𑀆𑀬𑀽𑀲𑀼. 𑀪𑁄 𑀆𑀬𑀼, 𑀪𑀯𑀦𑁆𑀢𑁄 𑀆𑀬𑀽, 𑀪𑀯𑀦𑁆𑀢𑁄 𑀆𑀬𑀽𑀦𑀺. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

𑀓𑀺𑀜𑁆𑀘𑀸𑀧𑁂𑀢𑁆𑀣 𑀦𑀺𑀲𑁆𑀲𑀓𑁆𑀓𑀯𑀘𑀦𑀝𑁆𑀞𑀸𑀦𑁂 ‘‘𑀆𑀬𑀼𑀲𑁆𑀫𑀸, 𑀆𑀬𑀼𑀫𑁆𑀳𑀸’’𑀢𑀺 𑀧𑀤𑀸𑀦𑀺 𑀅𑀦𑀸𑀕𑀢𑀸𑀦𑀺, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀢𑀁𑀲𑀤𑀺𑀲𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀕𑀳𑁂𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 𑀆𑀬𑀼𑀲𑀤𑁆𑀤𑁄 𑀧𑀼𑀁𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀲𑀼 𑀘 𑀢𑀲𑁆𑀲 𑀤𑁆𑀯𑀺𑀮𑀺𑀗𑁆𑀕𑀢𑀸 𑀤𑀺𑀲𑁆𑀲𑀢𑀺. ‘‘𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲. 𑀆𑀬𑀼 𑀘𑀲𑁆𑀲𑀸 𑀧𑀭𑀺𑀓𑁆𑀔𑀻𑀡𑁄 𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 𑀳𑀺 𑀆𑀬𑀼𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀢𑀩𑁆𑀩𑀲𑁂𑀦 ‘‘𑀆𑀬𑀼, 𑀆𑀬𑀽, 𑀆𑀬𑀯𑁄’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀼𑀦𑀬𑁂𑀦 𑀬𑀣𑀸𑀲𑀫𑁆𑀪𑀯𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. ‘‘𑀅𑀕𑁆𑀕𑀁 𑀆𑀬𑀼 𑀘 𑀯𑀡𑁆𑀡𑁄 𑀘. 𑀓𑀺𑀢𑁆𑀢𑀓𑀁 𑀧𑀦𑀲𑁆𑀲 𑀆𑀬𑀽’’𑀢𑀺𑀆𑀤𑀻𑀲𑀼 𑀧𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁄, 𑀢𑀩𑁆𑀩𑀲𑁂𑀦 ‘‘𑀆𑀬𑀼, 𑀆𑀬𑀽, 𑀆𑀬𑀽𑀦𑀻’’𑀢𑀺 𑀬𑁄𑀚𑀺𑀢𑀸.

𑀕𑁄𑀢𑁆𑀭𑀪𑀼, 𑀕𑁄𑀢𑁆𑀭𑀪𑀽, 𑀕𑁄𑀢𑁆𑀭𑀪𑀽𑀦𑀺. 𑀕𑁄𑀢𑁆𑀭𑀪𑀼𑀁, 𑀕𑁄𑀢𑁆𑀭𑀪𑀽, 𑀕𑁄𑀢𑁆𑀭𑀪𑀽𑀦𑀺. 𑀕𑁄𑀢𑁆𑀭𑀪𑀼𑀦𑀸, 𑀕𑁄𑀢𑁆𑀭𑀪𑀽𑀳𑀺, 𑀕𑁄𑀢𑁆𑀭𑀪𑀽𑀪𑀺. 𑀕𑁄𑀢𑁆𑀭𑀪𑀼𑀲𑁆𑀲, 𑀕𑁄𑀢𑁆𑀭𑀪𑀼𑀦𑁄, 𑀕𑁄𑀢𑁆𑀭𑀪𑀽𑀦𑀁. 𑀕𑁄𑀢𑁆𑀭𑀪𑀼𑀦𑀸, 𑀕𑁄𑀢𑁆𑀭𑀪𑀼𑀲𑁆𑀫𑀸, 𑀕𑁄𑀢𑁆𑀭𑀪𑀼𑀫𑁆𑀳𑀸, 𑀕𑁄𑀢𑁆𑀭𑀪𑀽𑀳𑀺, 𑀕𑁄𑀢𑁆𑀭𑀪𑀽𑀪𑀺. 𑀕𑁄𑀢𑁆𑀭𑀪𑀼𑀲𑁆𑀲, 𑀕𑁄𑀢𑁆𑀭𑀪𑀼𑀦𑁄, 𑀕𑁄𑀢𑁆𑀭𑀪𑀽𑀦𑀁. 𑀕𑁄𑀢𑁆𑀭𑀪𑀼𑀲𑁆𑀫𑀺𑀁, 𑀕𑁄𑀢𑁆𑀭𑀪𑀼𑀫𑁆𑀳𑀺, 𑀕𑁄𑀢𑁆𑀭𑀪𑀽𑀲𑀼. 𑀪𑁄 𑀕𑁄𑀢𑁆𑀭𑀪𑀼, 𑀪𑀯𑀦𑁆𑀢𑁄 𑀕𑁄𑀢𑁆𑀭𑀪𑀽, 𑀪𑀯𑀦𑁆𑀢𑁄 𑀕𑁄𑀢𑁆𑀭𑀪𑀽𑀦𑀺. 𑀪𑁄 𑀕𑁄𑀢𑁆𑀭𑀪𑀽, 𑀪𑁄 𑀕𑁄𑀢𑁆𑀭𑀪𑀽𑀦𑀺, 𑀏𑀯𑀁 𑀩𑀳𑀼𑀯𑀘𑀦𑀁 𑀯𑀸. 𑀅𑀬𑀫𑀫𑁆𑀳𑀸𑀓𑀁 𑀫𑀢𑀁, 𑀏𑀯𑀁 ‘‘𑀘𑀺𑀢𑁆𑀢𑀲𑀳𑀪𑀼’’𑀇𑀘𑁆𑀘𑀸𑀤𑀻𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀉𑀓𑀸𑀭𑀦𑁆𑀢𑀲𑀤𑁆𑀤𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀢𑀁𑀲𑀤𑀺𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀼𑀕𑁆𑀕𑀮𑀯𑀸𑀘𑀓𑁄 𑀧𑀦 𑀊𑀓𑀸𑀭𑀦𑁆𑀢𑁄 𑀕𑁄𑀢𑁆𑀭𑀪𑀽𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀲𑀩𑁆𑀩𑀜𑁆𑀜𑀽𑀦𑀬𑁂 𑀧𑀯𑀺𑀝𑁆𑀞𑁄. 𑀢𑀢𑁆𑀭𑀜𑁆𑀜𑁂 𑀲𑀤𑁆𑀤𑀸 𑀦𑀸𑀫 ‘‘𑀘𑀓𑁆𑀔𑀼 𑀯𑀲𑀼 𑀥𑀦𑀼 𑀤𑀸𑀭𑀼 𑀢𑀺𑀧𑀼 𑀫𑀥𑀼 𑀲𑀺𑀗𑁆𑀕𑀼 𑀳𑀺𑀗𑁆𑀕𑀼 𑀘𑀺𑀢𑁆𑀢𑀕𑀼’’𑀇𑀘𑁆𑀘𑀸𑀤𑀬𑁄.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀉𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀉𑀯𑀡𑁆𑀡𑁄𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁

𑀉𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀏𑀯𑀁 𑀦𑀺𑀕𑁆𑀕𑀳𑀻𑀢𑀦𑁆𑀢 𑀇𑀓𑀸𑀭𑀦𑁆𑀢 𑀉𑀓𑀸𑀭𑀦𑁆𑀢𑀯𑀲𑁂𑀦 𑀢𑀺𑀯𑀺𑀥𑀸𑀦𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺 𑀦𑀺𑀭𑀯𑀲𑁂𑀲𑀢𑁄 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀢𑁂𑀲𑀼 𑀓𑁂𑀲𑀜𑁆𑀘𑀺 𑀦𑀺𑀕𑁆𑀕𑀳𑀻𑀢𑀦𑁆𑀢𑀸𑀦𑀁 𑀓𑁆𑀯𑀘𑀺 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀲𑁆𑀲 𑀩𑀳𑀼𑀯𑀘𑀦𑀲𑁆𑀲 𑀏𑀓𑀸𑀭𑀸𑀤𑁂𑀲𑀯𑀲𑁂𑀦 𑀪𑁂𑀤𑁄 𑀤𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀺𑀤𑀁? ‘‘𑀲𑀼𑀔𑁂 𑀤𑀼𑀓𑁆𑀔𑁂. 𑀏𑀓𑀽𑀦𑀧𑀜𑁆𑀜𑀸𑀲 𑀆𑀚𑀻𑀯𑀓𑀲𑀢𑁂 𑀏𑀓𑀽𑀦𑀧𑀜𑁆𑀜𑀸𑀲 𑀧𑀭𑀺𑀩𑁆𑀩𑀸𑀚𑀓𑀲𑀢𑁂’’𑀇𑀘𑁆𑀘𑁂𑀯𑀫𑀸𑀤𑀺. 𑀦𑀦𑀼 𑀪𑁄 𑀏𑀯𑀁𑀯𑀺𑀥𑀸𑀦𑀁 𑀭𑀽𑀧𑀸𑀦𑀁 𑀧𑀸𑀴𑀺𑀬𑀁 𑀤𑀲𑁆𑀲𑀦𑀢𑁄 ‘‘𑀏𑀓𑀸𑀭𑀦𑁆𑀢𑀫𑁆𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀅𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑁄𑀕𑀥𑀭𑀽𑀧𑀯𑀺𑀲𑁂𑀲𑀢𑁆𑀢𑀸 𑀢𑁂𑀲𑀁 𑀭𑀽𑀧𑀸𑀦𑀁. 𑀆𑀤𑁂𑀲𑀯𑀲𑁂𑀦 𑀳𑀺 𑀲𑀺𑀤𑁆𑀥𑀢𑁆𑀢𑀸 𑀯𑀺𑀲𑀼𑀁 𑀏𑀓𑀸𑀭𑀦𑁆𑀢𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀬𑀣𑀸𑀯𑀼𑀢𑁆𑀢𑀸 𑀢𑀺𑀯𑀺𑀥𑀢𑀸𑀬𑁂𑀯 𑀕𑀳𑁂𑀢𑀩𑁆𑀩𑀸𑀢𑀺.

𑀦𑀧𑀼𑀁𑀲𑀓𑀸𑀦𑀫𑀺𑀘𑁆𑀘𑁂𑀯𑀁, 𑀮𑀺𑀗𑁆𑀕𑀸𑀦𑀁 𑀦𑀬𑀲𑀸𑀮𑀺𑀦𑀻;

𑀧𑀤𑀫𑀸𑀮𑀸 𑀯𑀺𑀪𑀢𑁆𑀢𑀸 𑀫𑁂, 𑀲𑀸𑀲𑀦𑀢𑁆𑀣𑀁 𑀫𑀳𑁂𑀲𑀺𑀦𑁄.

𑀬𑀲𑁆𑀲𑁂𑀲𑀸 𑀧𑀕𑀼𑀡𑀸 𑀲𑀤𑁆𑀤-𑀦𑀻𑀢𑀺𑀭𑁂𑀲𑀸 𑀲𑀼𑀪𑀸𑀯𑀺𑀢𑀸;

𑀲𑀸𑀲𑀦𑁂 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀲𑀭𑀡𑀁 𑀲𑁄 𑀧𑀭𑀸𑀬𑀡𑀁.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄

𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄.