𑁧𑁦. 𑀮𑀺𑀗𑁆𑀕𑀢𑁆𑀢𑀬𑀫𑀺𑀲𑁆𑀲𑀓𑀦𑀸𑀫𑀺𑀓𑀧𑀤𑀫𑀸𑀮𑀸

𑀅𑀥𑀺𑀓𑀽𑀦𑀓𑀢𑁄 𑀘𑁂𑀓-𑀓𑁆𑀔𑀭𑀢𑁄 𑀘 𑀇𑀢𑁄 𑀧𑀭𑀁;

𑀢𑀻𑀡𑀺 𑀮𑀺𑀗𑁆𑀕𑀸𑀦𑀺 𑀫𑀺𑀲𑁆𑀲𑁂𑀢𑁆𑀯𑀸, 𑀧𑀤𑀫𑀸𑀮𑀫𑀦𑀸𑀓𑀼𑀮𑀁.

𑀦𑀸𑀦𑀸𑀲𑀼𑀔𑀼𑀫𑀲𑀗𑁆𑀓𑁂𑀢-𑀕𑀢𑁂𑀲𑁆𑀯𑀢𑁆𑀣𑁂𑀲𑀼 𑀯𑀺𑀜𑁆𑀜𑀼𑀦𑀁;

𑀕𑀫𑁆𑀪𑀻𑀭𑀩𑀼𑀤𑁆𑀥𑀺𑀘𑀸𑀭𑀢𑁆𑀣𑀁, 𑀧𑀯𑀓𑁆𑀔𑀸𑀫𑀺 𑀬𑀣𑀸𑀩𑀮𑀁.

𑀇𑀢𑁆𑀣𑀻 𑀣𑀻 𑀘 𑀧𑀪𑀸 𑀪𑀸 𑀘, 𑀕𑀺𑀭𑀸 𑀭𑀸 𑀧𑀯𑀦𑀁 𑀯𑀦𑀁;

𑀉𑀤𑀓𑀜𑁆𑀘 𑀤𑀓𑀁 𑀓𑀜𑁆𑀘, 𑀯𑀺𑀢𑀓𑁆𑀓𑁄 𑀇𑀢𑀺 𑀘𑀸𑀤𑀬𑁄.

𑀪𑀽 𑀪𑀽𑀫𑀺 𑀘𑁂𑀯 𑀅𑀭𑀜𑁆𑀜𑀁, 𑀅𑀭𑀜𑁆𑀜𑀸𑀦𑀻𑀢𑀺 𑀘𑀸𑀤𑀬𑁄;

𑀧𑀜𑁆𑀜𑀸 𑀧𑀜𑁆𑀜𑀸𑀡𑀁 𑀜𑀸𑀡𑀜𑁆𑀘, 𑀇𑀘𑁆𑀘𑀸𑀤𑀻 𑀘 𑀢𑀺𑀥𑀸 𑀲𑀺𑀬𑀼𑀁.

𑀓𑁄 𑀯𑀺 𑀲𑀸 𑀘𑁂𑀯 𑀪𑀸 𑀭𑀸 𑀘, 𑀣𑀻 𑀥𑀻 𑀓𑀼 𑀪𑀽 𑀢𑀣𑁂𑀯 𑀓𑀁;

𑀔𑀁 𑀕𑁄 𑀫𑁄 𑀫𑀸 𑀘 𑀲𑀁 𑀬𑀁 𑀢𑀁, 𑀓𑀺𑀫𑀺𑀘𑁆𑀘𑀸𑀤𑀻 𑀘 𑀏𑀓𑀺𑀓𑀸𑀢𑀺.

𑀅𑀬𑀁 𑀮𑀺𑀗𑁆𑀕𑀢𑁆𑀢𑀬𑀫𑀺𑀲𑁆𑀲𑀓𑁄 𑀦𑀸𑀫𑀺𑀓𑀧𑀤𑀫𑀸𑀮𑀸𑀉𑀤𑁆𑀤𑁂𑀲𑁄. 𑀢𑀢𑁆𑀭 𑀇𑀢𑁆𑀣𑀻, 𑀇𑀢𑁆𑀣𑀻, 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀺𑀁…𑀧𑁂… 𑀪𑁄𑀢𑀺𑀬𑁄 𑀇𑀢𑁆𑀣𑀺𑀬𑁄.

𑀣𑀻 𑀣𑀻, 𑀣𑀺𑀬𑁄. 𑀣𑀺𑀁, 𑀣𑀻, 𑀣𑀺𑀬𑁄. 𑀣𑀺𑀬𑀸, 𑀣𑀻𑀳𑀺, 𑀣𑀻𑀪𑀺. 𑀣𑀺𑀬𑀸, 𑀣𑀻𑀦𑀁. 𑀣𑀺𑀬𑀸, 𑀣𑀻𑀳𑀺, 𑀣𑀻𑀪𑀺. 𑀣𑀺𑀬𑀸, 𑀣𑀻𑀦𑀁. 𑀣𑀺𑀬𑀸, 𑀣𑀺𑀬𑀁, 𑀣𑀻𑀲𑀼. 𑀪𑁄𑀢𑀺 𑀣𑀺, 𑀪𑁄𑀢𑀺𑀬𑁄 𑀣𑀻, 𑀪𑁄𑀢𑀺𑀬𑁄 𑀣𑀺𑀬𑁄. 𑀏𑀢𑁆𑀣 𑁋

‘‘𑀓𑀼𑀓𑁆𑀓𑀼𑀝𑀸 𑀫𑀡𑀬𑁄 𑀤𑀡𑁆𑀟𑀸, 𑀣𑀺𑀬𑁄 𑀘 𑀧𑀼𑀜𑁆𑀜𑀮𑀓𑁆𑀔𑀡𑀸;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀧𑀸𑀧𑀲𑁆𑀲, 𑀓𑀢𑀧𑀼𑀜𑁆𑀜𑀲𑁆𑀲 𑀚𑀦𑁆𑀢𑀼𑀦𑁄;

𑀣𑀺𑀬𑀸 𑀕𑀼𑀬𑁆𑀳𑀁 𑀦 𑀲𑀁𑀲𑁂𑀬𑁆𑀬; 𑀣𑀻𑀦𑀁 𑀪𑀸𑀯𑁄 𑀤𑀼𑀭𑀸𑀚𑀸𑀦𑁄’’𑀢𑀺

𑀆𑀤𑀻𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀧𑀪𑀸, 𑀧𑀪𑀸, 𑀧𑀪𑀸𑀬𑁄. 𑀧𑀪𑀁…𑀧𑁂… 𑀪𑁄𑀢𑀺𑀬𑁄 𑀧𑀪𑀸𑀬𑁄.

𑀪𑀸, 𑀪𑀸, 𑀪𑀸𑀬𑁄. 𑀪𑀁, 𑀪𑀸, 𑀪𑀸𑀬𑁄. 𑀪𑀸𑀬, 𑀪𑀸𑀳𑀺, 𑀪𑀸𑀪𑀺. 𑀪𑀸𑀬, 𑀪𑀸𑀦𑀁. 𑀪𑀸𑀬, 𑀪𑀸𑀳𑀺, 𑀪𑀸𑀪𑀺. 𑀪𑀸𑀬, 𑀪𑀸𑀦𑀁. 𑀪𑀸𑀬, 𑀪𑀸𑀬𑀁, 𑀪𑀸𑀲𑀼. 𑀪𑁄𑀢𑀺 𑀪𑁂, 𑀪𑁄𑀢𑀺𑀬𑁄 𑀪𑀸, 𑀪𑁄𑀢𑀺𑀬𑁄 𑀪𑀸𑀬𑁄. 𑀏𑀢𑁆𑀣 𑀘 ‘‘𑀪𑀸𑀓𑀭𑁄 𑀪𑀸𑀦𑀼’’𑀇𑀘𑁆𑀘𑀸𑀤𑀻𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀕𑀺𑀭𑀸, 𑀕𑀺𑀭𑀸, 𑀕𑀺𑀭𑀸𑀬𑁄. 𑀕𑀺𑀭𑀁…𑀧𑁂… 𑀪𑁄𑀢𑀺𑀬𑁄 𑀕𑀺𑀭𑀸𑀬𑁄. ‘‘𑀯𑀸𑀘𑀸 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄. 𑀬𑁂 𑀯𑁄𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀕𑀺𑀭𑀸𑀳𑀺 𑀅𑀦𑀼𑀧𑀼𑀩𑁆𑀩𑀲𑁄’’𑀢𑀺 𑀇𑀫𑀸𑀦𑀺 𑀕𑀺𑀭𑀸𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀲𑀼𑀯𑀡𑁆𑀡𑀯𑀸𑀘𑀓𑁄 𑀭𑀸𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀇𑀥 𑀧𑀦 𑀲𑀤𑁆𑀤𑀯𑀸𑀘𑀓𑁄 𑀭𑀸𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄.

𑀭𑀸, 𑀭𑀸, 𑀭𑀸𑀬𑁄. 𑀭𑀁, 𑀭𑀸, 𑀭𑀸𑀬𑁄. 𑀭𑀸𑀬, 𑀭𑀸𑀳𑀺, 𑀭𑀸𑀪𑀺. 𑀭𑀸𑀬, 𑀭𑀸𑀦𑀁. 𑀭𑀸𑀬, 𑀭𑀸𑀳𑀺, 𑀭𑀸𑀪𑀺. 𑀭𑀸𑀬, 𑀭𑀸𑀦𑀁. 𑀭𑀸𑀬, 𑀭𑀸𑀬𑀁, 𑀭𑀸𑀲𑀼. 𑀪𑁄𑀢𑀺 𑀭𑁂, 𑀪𑁄𑀢𑀺𑀬𑁄 𑀭𑀸, 𑀪𑁄𑀢𑀺𑀬𑁄 𑀭𑀸𑀬𑁄.

𑀭𑀸 𑀯𑀼𑀘𑁆𑀘𑀢𑀺 𑀲𑀤𑁆𑀤𑁄. 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀝𑀻𑀓𑀸𑀬𑀜𑁆𑀳𑀺 ‘‘𑀭𑀸 𑀲𑀤𑁆𑀤𑁄 𑀢𑀺𑀬𑀢𑀺 𑀙𑀺𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀭𑀢𑁆𑀢𑀺, 𑀲𑀢𑁆𑀢𑀸𑀦𑀁 𑀲𑀤𑁆𑀤𑀲𑁆𑀲 𑀯𑀽𑀧𑀲𑀫𑀓𑀸𑀮𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀭𑀸𑀲𑀤𑁆𑀤𑀲𑁆𑀲 𑀲𑀤𑁆𑀤𑀯𑀸𑀘𑀓𑀢𑁆𑀢𑁂 ‘‘𑀭𑀢𑁆𑀢𑀻’’𑀢𑀺 𑀧𑀤𑀁 𑀦𑀺𑀤𑀲𑁆𑀲𑀦𑀁.

𑀧𑀯𑀦𑀁, 𑀧𑀯𑀦𑀸𑀦𑀺, 𑀧𑀯𑀦𑀸. 𑀧𑀯𑀦𑀁, 𑀧𑀯𑀦𑀸𑀦𑀺, 𑀧𑀯𑀦𑁂.

𑀯𑀦𑀁, 𑀯𑀦𑀸𑀦𑀺, 𑀯𑀦𑀸. 𑀯𑀦𑀁, 𑀯𑀦𑀸𑀦𑀺, 𑀯𑀦𑁂. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁.

𑀧𑀯𑀦 𑀯𑀦𑀲𑀤𑁆𑀤𑀸 𑀓𑀤𑀸𑀘𑀺 𑀲𑀫𑀸𑀦𑀢𑁆𑀣𑀸 𑀓𑀤𑀸𑀘𑀺 𑀪𑀺𑀦𑁆𑀦𑀢𑁆𑀣𑀸. 𑀢𑁂 𑀳𑀺 𑀅𑀭𑀜𑁆𑀜𑀯𑀸𑀘𑀓𑀢𑁆𑀢𑁂 𑀲𑀫𑀸𑀦𑀢𑁆𑀣𑀸 ‘‘𑀢𑁂 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀧𑀯𑀦𑀁 𑀧𑀸𑀯𑀺𑀲𑀺𑀁 𑀢𑀤𑀸. 𑀲𑀧𑀼𑀢𑁆𑀢𑁄 𑀧𑀸𑀯𑀺𑀲𑀺𑀁 𑀯𑀦’’𑀦𑁆𑀢𑀺𑀆𑀤𑀻𑀲𑀼. 𑀬𑀣𑀸𑀓𑁆𑀓𑀫𑀁 𑀧𑀦 𑀢𑁂 𑀯𑀸𑀬𑀼𑀢𑀡𑁆𑀳𑀸𑀯𑀦𑀯𑀸𑀘𑀓𑀢𑁆𑀢𑁂 𑀪𑀺𑀦𑁆𑀦𑀢𑁆𑀣𑀸 ‘‘𑀧𑀭𑀫𑀤𑀼𑀕𑁆𑀕𑀦𑁆𑀥𑀧𑀯𑀦𑀯𑀺𑀘𑀭𑀺𑀢𑁂. 𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀁, 𑀦𑀺𑀩𑁆𑀩𑀦𑀸 𑀳𑁄𑀣 𑀪𑀺𑀓𑁆𑀔𑀯𑁄’’𑀢𑀺𑀆𑀤𑀻𑀲𑀼.

𑀉𑀤𑀓𑀁, 𑀉𑀤𑀓𑀸𑀦𑀺, 𑀉𑀤𑀓𑀸. 𑀉𑀤𑀓𑀁, 𑀉𑀤𑀓𑀸𑀦𑀺, 𑀉𑀤𑀓𑁂.

𑀤𑀓𑀁, 𑀤𑀓𑀸𑀦𑀺, 𑀤𑀓𑀸. 𑀤𑀓𑀁, 𑀤𑀓𑀸𑀦𑀺, 𑀤𑀓𑁂. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁.

‘‘𑀅𑀫𑁆𑀩𑀧𑀓𑁆𑀓𑀁 𑀤𑀓𑀁 𑀲𑀻𑀢𑀁. 𑀣𑀮𑀚𑀸 𑀤𑀓𑀚𑀸 𑀧𑀼𑀧𑁆𑀨𑀸’’𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. ‘‘𑀦𑀻𑀮𑁄𑀤𑀁 𑀯𑀦𑀫𑀚𑁆𑀛𑀢𑁄. 𑀫𑀳𑁄𑀤𑀥𑀺. 𑀉𑀤𑀩𑀺𑀦𑁆𑀤𑀼𑀦𑀺𑀧𑀸𑀢𑁂𑀦, 𑀉𑀤𑀓𑀼𑀫𑁆𑀪𑁄𑀧𑀺 𑀧𑀽𑀭𑀢𑀻’’𑀢𑀺 𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼 𑀧𑀦 𑀲𑀫𑀸𑀲𑀦𑁆𑀢𑀕𑀢𑀦𑀸𑀫𑀢𑁆𑀢𑀸 𑀉𑀤𑀲𑀤𑁆𑀤𑁂𑀦𑁂𑀯 𑀉𑀤𑀓𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀭𑀺𑀢𑁆𑀢𑀲𑁆𑀲𑀸𑀤’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀝𑁆𑀞𑀸𑀦𑁂 ‘‘𑀭𑀺𑀢𑁆𑀢𑀲𑁆𑀲’’𑀦𑁆𑀢𑀺 𑀲𑀤𑁆𑀤𑁂𑀦 𑀭𑀺𑀢𑁆𑀢𑀲𑁆𑀲𑀸𑀤𑀢𑁆𑀣𑁄 𑀯𑀺𑀬. 𑀧𑀸𑀴𑀺𑀬𑀜𑁆𑀳𑀺 𑀓𑁂𑀯𑀮𑁄 𑀉𑀤𑀲𑀤𑁆𑀤𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄. 𑀅𑀢𑁆𑀣𑀺 𑀘𑁂, 𑀲𑀼𑀝𑁆𑀞𑀼 𑀫𑀦𑀲𑀺 𑀓𑀸𑀢𑀩𑁆𑀩𑁄.

𑀓𑀁, 𑀓𑀸𑀦𑀺, 𑀓𑀸. 𑀓𑀁, 𑀓𑀸𑀦𑀺, 𑀓𑁂. 𑀓𑁂𑀦, 𑀓𑁂𑀳𑀺, 𑀓𑁂𑀪𑀺. 𑀓𑀲𑁆𑀲, 𑀓𑀸𑀦𑀁. 𑀓𑀸, 𑀓𑀲𑁆𑀫𑀸, 𑀓𑀫𑁆𑀳𑀸, 𑀓𑁂𑀳𑀺, 𑀓𑁂𑀪𑀺. 𑀓𑀲𑁆𑀲, 𑀓𑀸𑀦𑀁. 𑀓𑁂, 𑀓𑀲𑁆𑀫𑀺𑀁, 𑀓𑀫𑁆𑀳𑀺, 𑀓𑁂𑀲𑀼. 𑀪𑁄 𑀓, 𑀪𑀯𑀦𑁆𑀢𑁄 𑀓𑀸, 𑀪𑀯𑀦𑁆𑀢𑁄 𑀓𑀸𑀦𑀺. 𑀪𑁄𑀲𑀤𑁆𑀤𑁂𑀦 𑀯𑀸 𑀩𑀳𑀼𑀯𑀘𑀦𑀁 𑀬𑁄𑀚𑁂𑀢𑀩𑁆𑀩𑀁 ‘‘𑀪𑁄 𑀓𑀸𑀦𑀺, 𑀪𑁄 𑀓𑀸’’𑀢𑀺.

𑀏𑀢𑁆𑀣 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁 𑀲𑀻𑀲𑀁 𑀲𑀼𑀔𑀜𑁆𑀘. 𑀅𑀢𑁆𑀭 ‘‘𑀓𑀦𑁆𑀢𑀸𑀭𑁄 𑀓𑀦𑁆𑀤𑀭𑁄 𑀓𑁂𑀯𑀝𑁆𑀝𑀸 𑀓𑁂𑀲𑀸 𑀓𑀭𑀼𑀡𑀸 𑀦𑀸𑀓𑁄’’𑀢𑀺𑀆𑀤𑀻𑀦𑀺 𑀧𑀬𑁄𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀭 𑀓𑀦𑁆𑀢𑀸𑀭𑁄𑀢𑀺 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀢𑀭𑀺𑀢𑀩𑁆𑀩𑁄 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑁄𑀢𑀺 𑀓𑀦𑁆𑀢𑀸𑀭𑁄, 𑀦𑀺𑀭𑀼𑀤𑀓𑀧𑁆𑀧𑀤𑁂𑀲𑁄. 𑀘𑁄𑀭𑀓𑀦𑁆𑀢𑀸𑀭𑀦𑁆𑀢𑀺𑀆𑀤𑀻𑀲𑀼 𑀧𑀦 𑀭𑀽𑀴𑁆𑀳𑀺𑀬𑀸 𑀤𑀼𑀕𑁆𑀕𑀫𑀦𑀝𑁆𑀞𑀸𑀦𑁂𑀧𑀺 𑀓𑀦𑁆𑀢𑀸𑀭𑀲𑀤𑁆𑀤𑁄 𑀧𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀦𑁆𑀤𑀭𑁄𑀢𑀺 𑀏𑀢𑁆𑀣𑀸𑀧𑀺 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀤𑀸𑀭𑀺𑀢𑁄 𑀪𑀺𑀦𑁆𑀦𑁄𑀢𑀺 𑀓𑀦𑁆𑀤𑀭𑁄. 𑀓𑁂𑀯𑀝𑁆𑀝𑀸𑀢𑀺𑀆𑀤𑀻𑀲𑀼 𑀧𑀦 𑀓𑁂 𑀉𑀤𑀓𑁂 𑀯𑀢𑁆𑀢𑀦𑀢𑁄 𑀕𑀳𑀡𑀢𑁆𑀣𑀁 𑀧𑀯𑀢𑁆𑀢𑀦𑀢𑁄 𑀓𑁂𑀯𑀝𑁆𑀝𑀸. 𑀓𑁂 𑀲𑀻𑀲𑁂 𑀲𑁂𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀓𑁂𑀲𑀸. 𑀓𑀁 𑀲𑀼𑀔𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀦𑀸𑀓𑁄𑀢𑀺 𑀲𑀕𑁆𑀕𑁄. 𑀓𑀦𑁆𑀢𑀺 𑀳𑀺 𑀲𑀼𑀔𑀁, 𑀦 𑀓𑀁 𑀅𑀓𑀁, 𑀤𑀼𑀓𑁆𑀔𑀁, 𑀢𑀁 𑀦𑀢𑁆𑀣𑀺 𑀏𑀢𑁆𑀣𑀸𑀢𑀺 𑀦𑀸𑀓𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀬𑀣𑁂𑀢𑁆𑀣 𑀇𑀢𑁆𑀣𑀻𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑀺𑀢𑀸, 𑀏𑀯𑀁 ‘‘𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀆𑀪𑀸 𑀧𑀤𑀻𑀧𑁄’’𑀢𑀺𑀆𑀤𑀻𑀦𑀫𑁆𑀧𑀺 𑀬𑁄𑀚𑁂𑀢𑀩𑁆𑀩𑀸.

𑀪𑀽, 𑀪𑀽, 𑀪𑀼𑀬𑁄. 𑀪𑀼𑀁, 𑀪𑀽, 𑀪𑀼𑀬𑁄. 𑀪𑀼𑀬𑀸, 𑀪𑀽𑀳𑀺, 𑀪𑀽𑀪𑀺. 𑀪𑀼𑀬𑀸, 𑀪𑀽𑀦𑀁. 𑀪𑀼𑀬𑀸, 𑀪𑀽𑀳𑀺, 𑀪𑀽𑀪𑀺. 𑀪𑀼𑀬𑀸, 𑀪𑀽𑀦𑀁. 𑀪𑀼𑀬𑀸, 𑀪𑀼𑀬𑀁, 𑀪𑀽𑀲𑀼. 𑀪𑁄𑀢𑀺 𑀪𑀼, 𑀪𑁄𑀢𑀺𑀬𑁄 𑀪𑀽, 𑀪𑁄𑀢𑀺𑀬𑁄 𑀪𑀼𑀬𑁄. 𑀏𑀢𑁆𑀣 𑀘 ‘‘𑀪𑀽𑀭𑀼𑀳𑁄 𑀪𑀽𑀧𑀸𑀮𑁄 𑀪𑀽𑀪𑀼𑀚𑁄 𑀪𑀽𑀢𑀮’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀪𑀽𑀫𑀺, 𑀪𑀽𑀫𑀻, 𑀪𑀽𑀫𑀺𑀬𑁄; 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁;

𑀅𑀭𑀜𑁆𑀜𑀁, 𑀅𑀭𑀜𑁆𑀜𑀸𑀦𑀺, 𑀅𑀭𑀜𑁆𑀜𑀸; 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀅𑀭𑀜𑁆𑀜𑀸𑀦𑀻 𑀯𑀼𑀘𑁆𑀘𑀢𑀺 𑀫𑀳𑀸𑀅𑀭𑀜𑁆𑀜𑀁, ‘‘𑀕𑀳𑀧𑀢𑀸𑀦𑀻’’𑀢𑀺 𑀧𑀤𑀫𑀺𑀯 𑀇𑀦𑀻𑀧𑀘𑁆𑀘𑀬𑀯𑀲𑁂𑀦 𑀲𑀸𑀥𑁂𑀢𑀩𑁆𑀩𑀁 𑀧𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀜𑁆𑀘. ‘‘𑀅𑀭𑀜𑁆𑀜𑀸𑀦𑀻’’𑀢𑀺 𑀳𑀺 𑀅𑀝𑁆𑀞𑀓𑀣𑀸𑀧𑀸𑀞𑁄𑀧𑀺 𑀤𑀺𑀲𑁆𑀲𑀢𑀺.

𑀅𑀭𑀜𑁆𑀜𑀸𑀦𑀻, 𑀅𑀭𑀜𑁆𑀜𑀸𑀦𑀻, 𑀅𑀭𑀜𑁆𑀜𑀸𑀦𑀺𑀬𑁄. 𑀅𑀭𑀜𑁆𑀜𑀸𑀦𑀺𑀁, 𑀅𑀭𑀜𑁆𑀜𑀸𑀦𑀻, 𑀅𑀭𑀜𑁆𑀜𑀸𑀦𑀺𑀬𑁄. 𑀅𑀭𑀜𑁆𑀜𑀸𑀦𑀺𑀬𑀸, 𑀅𑀭𑀜𑁆𑀜𑀸𑀦𑀻𑀳𑀺, 𑀅𑀭𑀜𑁆𑀜𑀸𑀦𑀻𑀪𑀺. 𑀅𑀭𑀜𑁆𑀜𑀸𑀦𑀺𑀬𑀸, 𑀅𑀭𑀜𑁆𑀜𑀸𑀦𑀻𑀦𑀁. 𑀅𑀭𑀜𑁆𑀜𑀸𑀦𑀺𑀬𑀸, 𑀅𑀭𑀜𑁆𑀜𑀸𑀦𑀻𑀳𑀺, 𑀅𑀭𑀜𑁆𑀜𑀸𑀦𑀻𑀪𑀺. 𑀅𑀭𑀜𑁆𑀜𑀸𑀦𑀺𑀬𑀸, 𑀅𑀭𑀜𑁆𑀜𑀸𑀦𑀻𑀦𑀁. 𑀅𑀭𑀜𑁆𑀜𑀸𑀦𑀺𑀬𑀸, 𑀅𑀭𑀜𑁆𑀜𑀸𑀦𑀺𑀬𑀁, 𑀅𑀭𑀜𑁆𑀜𑀸𑀦𑀻𑀲𑀼. 𑀪𑁄𑀢𑀺 𑀅𑀭𑀜𑁆𑀜𑀸𑀦𑀺, 𑀪𑁄𑀢𑀺𑀬𑁄 𑀅𑀭𑀜𑁆𑀜𑀸𑀦𑀻, 𑀪𑁄𑀢𑀺𑀬𑁄 𑀅𑀭𑀜𑁆𑀜𑀸𑀦𑀺𑀬𑁄.

𑀬𑀣𑁂𑀢𑁆𑀣 𑀉𑀢𑁆𑀢𑀭𑀸𑀥𑀺𑀓𑀯𑀲𑁂𑀦 𑀬𑁄𑀚𑀺𑀢𑀸, 𑀏𑀯𑀁 ‘‘𑀲𑀪𑀸, 𑀲𑀪𑀸𑀬’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀸. 𑀲𑀪𑀸𑀬𑀦𑁆𑀢𑀺 𑀲𑀪𑀸 𑀏𑀯, 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑀯𑀲𑁂𑀦 𑀧𑀦 𑀏𑀯𑀁 𑀯𑀼𑀢𑁆𑀢𑀁. ‘‘𑀲𑀪𑀸𑀬𑁂 𑀯𑀸 𑀤𑁆𑀯𑀸𑀭𑀫𑀽𑀮𑁂 𑀯𑀸 𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀧𑀸𑀴𑀺 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀧𑀜𑁆𑀜𑀸, 𑀧𑀜𑁆𑀜𑀸, 𑀧𑀜𑁆𑀜𑀸𑀬𑁄. 𑀧𑀜𑁆𑀜𑀁, 𑀧𑀜𑁆𑀜𑀸, 𑀧𑀜𑁆𑀜𑀸𑀬𑁄. 𑀧𑀜𑁆𑀜𑀸𑀬.

𑀧𑀜𑁆𑀜𑀸𑀡𑀁, 𑀧𑀜𑁆𑀜𑀸𑀡𑀸𑀦𑀺, 𑀧𑀜𑁆𑀜𑀸𑀡𑀸. 𑀧𑀜𑁆𑀜𑀸𑀡𑀁, 𑀧𑀜𑁆𑀜𑀸𑀡𑀸𑀦𑀺, 𑀧𑀜𑁆𑀜𑀸𑀡𑁂. 𑀧𑀜𑁆𑀜𑀸𑀡𑁂𑀦.

‘‘𑀢𑀣𑀸 𑀳𑀺 𑀪𑀦𑁆𑀢𑁂 𑀪𑀕𑀯𑀢𑁄 𑀲𑀻𑀮𑀧𑀜𑁆𑀜𑀸𑀡𑀁. 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄’’𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀜𑀸𑀡𑀁, 𑀜𑀸𑀡𑀸𑀦𑀺, 𑀜𑀸𑀡𑀸. 𑀜𑀸𑀡𑀁, 𑀜𑀸𑀡𑀸𑀦𑀺, 𑀜𑀸𑀡𑁂. 𑀜𑀸𑀡𑁂𑀦. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁. ‘‘𑀅𑀕𑁆𑀕𑀺 𑀅𑀕𑁆𑀕𑀺𑀦𑀺 𑀕𑀺𑀦𑀺’’𑀇𑀘𑁆𑀘𑀸𑀤𑀻𑀲𑀼𑀧𑀺 𑀉𑀢𑁆𑀢𑀭𑀸𑀥𑀺𑀓𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀓𑁄 𑀯𑀻 𑀲𑀸𑀤𑀻𑀲𑀼𑀧𑀺 𑀏𑀓𑀓𑁆𑀔𑀭𑁂𑀲𑀼 𑀓𑁄 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀸 𑀯𑀸𑀢𑁄 𑀘 𑀲𑀭𑀻𑀭𑀜𑁆𑀘, 𑀢𑀲𑁆𑀲 𑀢𑀩𑁆𑀩𑀸𑀘𑀓𑀢𑁆𑀢𑁂 𑀇𑀫𑁂 𑀧𑀬𑁄𑀕𑀸. 𑀲𑁂𑀬𑁆𑀬𑀣𑀺𑀤𑀁?

‘‘𑀚𑀺𑀦𑁂𑀦 𑀬𑁂𑀦 𑀆𑀦𑀻𑀢𑀁, 𑀮𑁄𑀓𑀲𑁆𑀲 𑀅𑀫𑀺𑀢𑀁 𑀳𑀺𑀢𑀁;

𑀢𑀲𑁆𑀲 𑀧𑀸𑀤𑀫𑁆𑀩𑀼𑀚𑀁 𑀯𑀦𑁆𑀤𑁂, 𑀓𑀫𑁄𑀴𑀺𑀅𑀮𑀺𑀲𑁂𑀯𑀺𑀢𑀁.

𑀓𑀓𑀼𑀥𑀭𑀼𑀓𑁆𑀔𑁄. 𑀓𑀭𑀚𑀓𑀸𑀬𑁄’’ 𑀇𑀘𑁆𑀘𑁂𑀯𑀫𑀸𑀤𑀬𑁄. 𑀢𑀢𑁆𑀣 𑀓𑀫𑁄𑀴𑀺𑀅𑀮𑀺𑀲𑁂𑀯𑀺𑀢𑀦𑁆𑀢𑀺 𑀯𑀦𑁆𑀤𑀦𑁆𑀢𑀸𑀦𑀁 𑀅𑀦𑁂𑀓𑀲𑀢𑀸𑀦𑀁 𑀩𑁆𑀭𑀳𑁆𑀫𑀸𑀦𑀁 𑀫𑁄𑀴𑀺𑀪𑀫𑀭𑀲𑁂𑀯𑀺𑀢𑀦𑁆𑀢𑀺 𑀓𑀯𑀬𑁄 𑀇𑀘𑁆𑀙𑀦𑁆𑀢𑀺. 𑀓𑀓𑀼𑀥𑀭𑀼𑀓𑁆𑀔𑁄𑀢𑀺 𑀏𑀢𑁆𑀣 𑀧𑀦 𑀓𑁄 𑀯𑀼𑀘𑁆𑀘𑀢𑀺 𑀯𑀸𑀢𑁄, 𑀢𑀲𑁆𑀲 𑀬𑁄 𑀓𑀼𑀚𑁆𑀛𑀢𑀺, 𑀯𑀸𑀢𑀭𑁄𑀕𑀸𑀧𑀦𑀬𑀦𑀯𑀲𑁂𑀦 𑀢𑀁 𑀦𑀺𑀯𑀸𑀭𑁂𑀢𑀺, 𑀢𑀲𑁆𑀫𑀸 𑀲𑁄 𑀭𑀼𑀓𑁆𑀔𑁄 𑀓𑀓𑀼𑀥𑁄𑀢𑀺 𑀯𑀼𑀘𑁆𑀘𑀢𑀻𑀪𑀺 𑀆𑀘𑀭𑀺𑀬𑀸. 𑀓𑀭𑀚𑀓𑀸𑀬𑁄𑀢𑀺 𑀏𑀢𑁆𑀣 𑀢𑀼 𑀓𑁄 𑀯𑀼𑀘𑁆𑀘𑀢𑀺 𑀲𑀭𑀻𑀭𑀁, 𑀢𑀢𑁆𑀣 𑀧𑀯𑀢𑁆𑀢𑁄 𑀭𑀚𑁄 𑀓𑀭𑀚𑁄. 𑀓𑀺𑀁 𑀢𑀁? 𑀲𑀼𑀓𑁆𑀓𑀲𑁄𑀡𑀺𑀢𑀁. 𑀢𑀜𑁆𑀳𑀺 ‘‘𑀭𑀸𑀕𑁄 𑀭𑀚𑁄, 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀭𑀸𑀕𑀭𑀚𑀨𑀮𑀢𑁆𑀢𑀸 𑀲𑀭𑀻𑀭𑀯𑀸𑀘𑀓𑁂𑀦 𑀓𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀨𑀮𑀯𑁄𑀳𑀸𑀭𑁂𑀦 ‘‘𑀓𑀭𑀚𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀲𑀼𑀓𑁆𑀓𑀲𑁄𑀡𑀺𑀢𑀲𑀗𑁆𑀔𑀸𑀢𑁂𑀦 𑀓𑀭𑀚𑁂𑀦 𑀲𑀫𑁆𑀪𑀽𑀢𑁄 𑀓𑀸𑀬𑁄 𑀓𑀭𑀚𑀓𑀸𑀬𑁄𑀢𑀺 𑀆𑀘𑀭𑀺𑀬𑀸. 𑀢𑀣𑀸 𑀳𑀺 ‘‘𑀓𑀸𑀬𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄’’𑀢𑀺 𑀯𑀼𑀢𑁆𑀢𑁄, 𑀫𑀳𑀸𑀅𑀲𑁆𑀲𑀧𑀽𑀭𑀲𑀼𑀢𑁆𑀢𑀝𑀻𑀓𑀸𑀬𑀁 𑀧𑀦 ‘‘𑀓𑀭𑀺𑀬𑀢𑀺 𑀕𑀩𑁆𑀪𑀸𑀲𑀬𑁂 𑀔𑀺𑀧𑀺𑀬𑀢𑀻𑀢𑀺 𑀓𑀭𑁄, 𑀲𑀫𑁆𑀪𑀯𑁄. 𑀓𑀭𑀢𑁄 𑀚𑀸𑀢𑁄𑀢𑀺 𑀓𑀭𑀚𑁄, 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄𑀢𑀺 𑀅𑀢𑁆𑀣𑁄. 𑀫𑀸𑀢𑀼𑀆𑀤𑀻𑀦𑀁 𑀲𑀡𑁆𑀞𑀸𑀧𑀦𑀯𑀲𑁂𑀦 𑀓𑀭𑀢𑁄 𑀚𑀸𑀢𑁄𑀢𑀺 𑀅𑀧𑀭𑁂, 𑀉𑀪𑀬𑀣𑀸𑀧𑀺 𑀓𑀭𑀚𑀓𑀸𑀬𑀦𑁆𑀢𑀺 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑀢𑁆𑀣𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄, 𑀧𑀼𑀭𑀺𑀫𑁄𑀬𑁂𑀯𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀓𑀲𑀤𑁆𑀤𑀸𑀥𑀺𑀓𑀸𑀭𑀢𑁆𑀢𑀸.

𑀓𑁄, 𑀓𑀸. 𑀓𑀁, 𑀓𑁂. 𑀓𑁂𑀦, 𑀓𑁂𑀳𑀺, 𑀓𑁂𑀪𑀺. 𑀓𑀲𑁆𑀲, 𑀓𑀸𑀦𑀁. 𑀓𑀸, 𑀓𑀲𑁆𑀫𑀸, 𑀓𑀫𑁆𑀳𑀸, 𑀓𑁂𑀳𑀺, 𑀓𑁂𑀪𑀺. 𑀓𑀲𑁆𑀲, 𑀓𑀸𑀦𑀁. 𑀓𑁂, 𑀓𑀲𑁆𑀫𑀺𑀁, 𑀓𑀫𑁆𑀳𑀺, 𑀓𑁂𑀲𑀼. 𑀪𑁄 𑀓, 𑀪𑀯𑀦𑁆𑀢𑁄 𑀓𑀸.

𑀢𑀢𑁆𑀭 𑀯𑀺 𑀯𑀼𑀘𑁆𑀘𑀢𑀺 𑀧𑀓𑁆𑀔𑀻. 𑀢𑀣𑀸 𑀳𑀺 𑀧𑀓𑁆𑀔𑀻𑀦𑀁 𑀇𑀲𑁆𑀲𑀭𑁄 𑀲𑀼𑀧𑀡𑁆𑀡𑀭𑀸𑀚𑀸 𑀯𑀺𑀦𑁆𑀤𑁄𑀢𑀺 𑀓𑀣𑀺𑀬𑀢𑀺. 𑀏𑀢𑀫𑀢𑁆𑀣𑀜𑁆𑀳𑀺 𑀲𑀦𑁆𑀥𑀸𑀬 𑀧𑀼𑀩𑁆𑀩𑀸𑀘𑀭𑀺𑀬𑁂𑀦𑀧𑀺 𑀅𑀬𑀁 𑀕𑀸𑀣𑀸 𑀪𑀸𑀲𑀺𑀢𑀸 𑁋

‘‘𑀲𑀤𑁆𑀥𑀸𑀦𑀢𑁂 𑀫𑀼𑀤𑁆𑀥𑀦𑀺 𑀲𑀡𑁆𑀞𑀧𑁂𑀫𑀺, 𑀫𑀼𑀦𑀺𑀦𑁆𑀤 𑀦𑀺𑀦𑁆𑀤𑀸𑀧𑀕𑀢𑀁 𑀢𑀯𑀕𑁆𑀕𑀁;

𑀤𑁂𑀯𑀺𑀦𑁆𑀤𑀦𑀸𑀕𑀺𑀦𑁆𑀤𑀦𑀭𑀺𑀦𑁆𑀤𑀯𑀺𑀦𑁆𑀤-𑀦 𑀢𑀁 𑀯𑀺𑀪𑀺𑀦𑁆𑀦𑀁 𑀘𑀭𑀡𑀸𑀭𑀯𑀺𑀦𑁆𑀤’’𑀦𑁆𑀢𑀺.

𑀢𑀢𑁆𑀣 𑀯𑀻𑀦𑀁 𑀇𑀦𑁆𑀤𑁄𑀢𑀺 𑀯𑀺𑀦𑁆𑀤𑁄, 𑀧𑀓𑁆𑀔𑀺𑀚𑀸𑀢𑀺𑀬𑀸 𑀚𑀸𑀢𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀭𑀸𑀚𑀸𑀢𑀺 𑀅𑀢𑁆𑀣𑁄.

𑀯𑀺𑀁, 𑀯𑀻, 𑀯𑀬𑁄. 𑀯𑀺𑀁, 𑀯𑀻, 𑀯𑀬𑁄. 𑀯𑀺𑀦𑀸, 𑀯𑀻𑀳𑀺, 𑀯𑀻𑀪𑀺. 𑀯𑀺𑀲𑁆𑀲, 𑀯𑀺𑀦𑁄, 𑀯𑀻𑀦𑀁. 𑀯𑀺𑀦𑀸, 𑀯𑀺𑀲𑁆𑀫𑀸, 𑀯𑀺𑀫𑁆𑀳𑀸, 𑀯𑀻𑀳𑀺, 𑀯𑀻𑀪𑀺. 𑀯𑀺𑀲𑁆𑀲, 𑀯𑀺𑀦𑁄, 𑀯𑀻𑀦𑀁. 𑀯𑀺𑀲𑁆𑀫𑀺𑀁, 𑀯𑀺𑀫𑁆𑀳𑀺, 𑀯𑀻𑀲𑀼. 𑀪𑁄 𑀯𑀺, 𑀪𑀯𑀦𑁆𑀢𑁄 𑀯𑀬𑁄.

𑀲𑀸 𑀯𑀼𑀘𑁆𑀘𑀢𑀺 𑀲𑀼𑀦𑀔𑁄, ‘‘𑀫𑀸𑀢𑀸 𑀫𑁂 𑀅𑀢𑁆𑀣𑀺, 𑀲𑀸 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 𑀧𑀦 𑀲𑀸𑀲𑀤𑁆𑀤𑁄 𑀲𑀩𑁆𑀩𑀦𑀸𑀫𑀺𑀓𑀧𑀭𑀺𑀬𑀸𑀧𑀦𑁆𑀦𑁄 𑀧𑀭𑀫𑁆𑀫𑀼𑀔𑀯𑀘𑀦𑁄 𑀢𑀲𑀤𑁆𑀤𑁂𑀦 𑀲𑀫𑁆𑀪𑀽𑀢𑁄 𑀤𑀝𑁆𑀞𑀩𑁆𑀩𑁄. 𑀲𑀸𑀲𑀤𑁆𑀤𑀲𑁆𑀲 𑀪𑀸 𑀭𑀸 𑀣𑀻 𑀪𑀽 𑀓𑀲𑀤𑁆𑀤𑀸𑀦𑀜𑁆𑀘 𑀦𑀸𑀫𑀺𑀓𑀧𑀤𑀫𑀸𑀮𑀸 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸.

𑀥𑀻 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀏𑀢𑁆𑀣 𑀘 ‘‘𑀅𑀫𑀘𑁆𑀘𑁂 𑀢𑀸𑀢 𑀚𑀸𑀦𑀸𑀳𑀺, 𑀥𑀻𑀭𑁂 𑀅𑀢𑁆𑀣𑀲𑁆𑀲 𑀓𑁄𑀯𑀺𑀤𑁂’’𑀢𑀺. ‘‘𑀥𑀻𑀫𑀸, 𑀥𑀻𑀫𑀢𑀺, 𑀲𑀼𑀥𑀻, 𑀲𑀼𑀥𑀺𑀦𑀻, 𑀥𑀻𑀬𑀼𑀢𑁆𑀢’’𑀦𑁆𑀢𑀺 𑀘 𑀆𑀤𑀻𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀥𑀻, 𑀥𑀻, 𑀥𑀺𑀬𑁄. 𑀥𑀺𑀁, 𑀥𑀻, 𑀥𑀺𑀬𑁄. 𑀥𑀺𑀬𑀸, 𑀥𑀻𑀳𑀺, 𑀥𑀻𑀪𑀺. 𑀥𑀺𑀬𑀸, 𑀥𑀻𑀦𑀁. 𑀥𑀺𑀬𑀸, 𑀥𑀻𑀳𑀺, 𑀥𑀻𑀪𑀺. 𑀥𑀺𑀬𑀸, 𑀥𑀻𑀦𑀁. 𑀥𑀺𑀬𑀸, 𑀥𑀺𑀬𑀁, 𑀥𑀻𑀲𑀼. 𑀪𑁄𑀢𑀺 𑀥𑀺, 𑀪𑁄𑀢𑀺𑀬𑁄 𑀥𑀻, 𑀪𑁄𑀢𑀺𑀬𑁄 𑀥𑀺𑀬𑁄.

𑀓𑀼 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀏𑀢𑁆𑀣 𑀘 ‘‘𑀓𑀼𑀤𑀸𑀮𑁄. 𑀓𑀼𑀫𑀼𑀤𑀁. 𑀓𑀼𑀜𑁆𑀚𑀭𑁄’’𑀢𑀺 𑀇𑀫𑀸𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀢𑀢𑁆𑀭 𑀓𑀼𑀁 𑀧𑀣𑀯𑀺𑀁 𑀤𑀸𑀮𑀬𑀢𑀺 𑀧𑀤𑀸𑀮𑁂𑀢𑀺 𑀪𑀺𑀦𑁆𑀤𑀢𑀺 𑀏𑀢𑁂𑀦𑀸𑀢𑀺 𑀓𑀼𑀤𑀸𑀮𑁄. 𑀓𑀼𑀬𑀁 𑀧𑀣𑀯𑀺𑀬𑀁 𑀫𑁄𑀤𑀢𑀻𑀢𑀺 𑀓𑀼𑀫𑀼𑀤𑀁. 𑀓𑀼𑀁 𑀚𑀭𑀢𑀻𑀢𑀺 𑀓𑀼𑀜𑁆𑀚𑀭𑁄. 𑀢𑀣𑀸 𑀳𑀺 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀓𑀼𑀁 𑀧𑀣𑀯𑀺𑀁 𑀢𑀤𑀪𑀺𑀖𑀸𑀢𑁂𑀦 𑀚𑀭𑀬𑀢𑀻𑀢𑀺 𑀓𑀼𑀜𑁆𑀚𑀭𑁄’’𑀢𑀺.

𑀓𑀼, 𑀓𑀽, 𑀓𑀼𑀬𑁄. 𑀓𑀼𑀁, 𑀓𑀽, 𑀓𑀼𑀬𑁄. 𑀓𑀼𑀬𑀸, 𑀓𑀽𑀳𑀺, 𑀓𑀽𑀪𑀺. 𑀓𑀼𑀬𑀸, 𑀓𑀽𑀦𑀁. 𑀓𑀼𑀬𑀸, 𑀓𑀽𑀳𑀺, 𑀓𑀽𑀪𑀺. 𑀓𑀼𑀬𑀸, 𑀓𑀽𑀦𑀁. 𑀓𑀼𑀬𑀸, 𑀓𑀼𑀬𑀁, 𑀓𑀽𑀲𑀼. 𑀪𑁄𑀢𑀺 𑀓𑀼, 𑀪𑁄𑀢𑀺𑀬𑁄 𑀓𑀽, 𑀪𑁄𑀢𑀺𑀬𑁄 𑀓𑀼𑀬𑁄.

𑀔’𑀫𑀺𑀦𑁆𑀤𑁆𑀭𑀺𑀬𑀁 𑀧𑀓𑀣𑀺𑀢𑀁, 𑀔’𑀫𑀸𑀓𑀸𑀲𑀫𑀼𑀤𑀻𑀭𑀺𑀢𑀁;

𑀲𑀕𑁆𑀕𑀝𑁆𑀞𑀸𑀦𑀫𑁆𑀧𑀺 𑀔𑀁 𑀯𑀼𑀢𑁆𑀢𑀁, 𑀲𑀼𑀜𑁆𑀜𑀢𑁆𑀢𑀫𑁆𑀧𑀺 𑀘 𑀔𑀁 𑀫𑀢𑀁.

𑀢𑀢𑁆𑀭𑀺𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀕𑀢𑀺𑀦𑀺𑀯𑀸𑀲𑀪𑀸𑀯𑀢𑁄 ‘‘𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀆𑀓𑀸𑀲𑀁 𑀯𑀺𑀯𑀺𑀢𑁆𑀢𑀝𑁆𑀞𑁂𑀦. 𑀲𑀕𑁆𑀕𑁄 𑀓𑀢𑀲𑀼𑀘𑀭𑀺𑀢𑁂𑀳𑀺 𑀏𑀓𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀢𑀸𑀬 ‘‘𑀔’’𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. ‘‘𑀔𑀕𑁄 𑀬𑀣𑀸 𑀳𑀺 𑀭𑀼𑀓𑁆𑀔𑀕𑁆𑀕𑁂, 𑀦𑀺𑀮𑀻𑀬𑀦𑁆𑀢𑁄𑀯 𑀲𑀸𑀔𑀺𑀦𑁄. 𑀲𑀸𑀔𑀁 𑀖𑀝𑁆𑀝𑁂𑀢𑀻’’𑀢𑀺 𑀘, ‘‘𑀔𑁂 𑀦𑀺𑀫𑁆𑀫𑀺𑀢𑁄 𑀅𑀘𑀭𑀺 𑀅𑀝𑁆𑀞𑀲𑀢𑀁 𑀲𑀬𑀫𑁆𑀪𑀽’’𑀢𑀺 𑀘 𑀆𑀤𑀺 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀔𑀁, 𑀔𑀸𑀦𑀺, 𑀔𑀸. 𑀔𑀁, 𑀔𑀸𑀦𑀺, 𑀔𑁂. 𑀔𑁂𑀦, 𑀔𑁂𑀳𑀺, 𑀔𑁂𑀪𑀺. 𑀔𑀲𑁆𑀲, 𑀔𑀸𑀦𑀁. 𑀔𑀸, 𑀔𑀲𑁆𑀫𑀸, 𑀔𑀫𑁆𑀳𑀸, 𑀔𑁂𑀳𑀺, 𑀔𑁂𑀪𑀺. 𑀔𑀲𑁆𑀲, 𑀔𑀸𑀦𑀁. 𑀔𑁂, 𑀔𑀲𑁆𑀫𑀺𑀁, 𑀔𑀫𑁆𑀳𑀺, 𑀔𑁂𑀲𑀼. 𑀪𑁄 𑀔, 𑀪𑀯𑀦𑁆𑀢𑁄 𑀔𑀸𑀦𑀺, 𑀪𑀯𑀦𑁆𑀢𑁄 𑀔𑀸.

𑀕𑁄𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂 𑁋

𑀕𑁄 𑀕𑁄𑀡𑁂 𑀘𑀺𑀦𑁆𑀤𑁆𑀭𑀺𑀬𑁂 𑀪𑀽𑀫𑁆𑀬𑀁, 𑀯𑀘𑀦𑁂 𑀘𑁂𑀯 𑀩𑀼𑀤𑁆𑀥𑀺𑀬𑀁;

𑀆𑀤𑀺𑀘𑁆𑀘𑁂 𑀭𑀲𑁆𑀫𑀺𑀬𑀜𑁆𑀘𑁂𑀯, 𑀧𑀸𑀦𑀻𑀬𑁂𑀧𑀺 𑀘 𑀯𑀢𑁆𑀢𑀢𑁂;

𑀢𑁂𑀲𑀼 𑀅𑀢𑁆𑀣𑁂𑀲𑀼 𑀕𑁄𑀡𑁂 𑀣𑀺-𑀧𑀼𑀫𑀸 𑀘 𑀇𑀢𑀭𑁂 𑀧𑀼𑀫𑀸.

𑀢𑀣𑀸 𑀳𑀺 ‘‘𑀕𑁄𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄. 𑀕𑁄𑀧𑀜𑁆𑀘𑀫𑁄’’𑀢𑀺𑀆𑀤𑀻𑀲𑀼 𑀕𑁄𑀲𑀤𑁆𑀤𑁄 𑀕𑁄𑀡𑁂 𑀯𑀢𑁆𑀢𑀢𑀺. 𑀕𑁄𑀘𑀭𑁄𑀢𑀺 𑀏𑀢𑁆𑀣𑀺𑀦𑁆𑀤𑁆𑀭𑀺𑀬𑁂𑀧𑀺 𑀯𑀢𑁆𑀢𑀢𑀺 𑀕𑀸𑀯𑁄 𑀘𑀓𑁆𑀔𑀸𑀤𑀻𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄. 𑀢𑀣𑀸 𑀳𑀺 𑀧𑁄𑀭𑀸𑀡𑀸 𑀓𑀣𑀬𑀺𑀁𑀲𑀼 ‘‘𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑁄𑀘𑀭𑁄 𑀯𑀺𑀬 𑀕𑁄𑀘𑀭𑁄, 𑀅𑀪𑀺𑀡𑁆𑀳𑀁 𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁. 𑀕𑀸𑀯𑁄𑀯𑀸𑀘𑀓𑁆𑀔𑀸𑀤𑀻𑀦𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑁂𑀳𑀺 𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁 𑀕𑁄𑀘𑀭𑁄’’𑀢𑀺. ‘‘𑀕𑁄𑀫𑀢𑀺𑀁 𑀕𑁄𑀢𑀫𑀁 𑀦𑀫𑁂’’𑀢𑀺 𑀧𑁄𑀭𑀸𑀡𑀓𑀯𑀺𑀭𑀘𑀦𑀸𑀬𑀁 𑀧𑀦 𑀧𑀣𑀯𑀺𑀬𑀁 𑀯𑀢𑁆𑀢𑀢𑀺. ‘‘𑀪𑀽𑀭𑀺𑀧𑀜𑁆𑀜𑀁 𑀕𑁄𑀢𑀫𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁𑀯𑀦𑁆𑀤𑀸𑀫𑀻’’𑀢𑀺 𑀳𑀺 𑀅𑀢𑁆𑀣𑁄. 𑀢𑀣𑀸 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀧𑁆𑀧𑀤𑁂𑀲𑁂 ‘‘𑀕𑁄𑀭𑀓𑁆𑀔𑀦𑁆𑀢𑀺 𑀔𑁂𑀢𑁆𑀢𑀭𑀓𑁆𑀔𑀁, 𑀓𑀲𑀺𑀭𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀣𑀯𑀻 𑀳𑀺 ‘‘𑀕𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀧𑁆𑀧𑀪𑁂𑀤𑁄 𑀘 𑀔𑁂𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀕𑁄𑀢𑁆𑀢𑀯𑀲𑁂𑀦 𑀕𑁄𑀢𑀫𑁄’’𑀢𑀺 𑀏𑀢𑁆𑀣 𑀢𑀼 𑀯𑀘𑀦𑁂 𑀩𑀼𑀤𑁆𑀥𑀺𑀬𑀜𑁆𑀘 𑀯𑀢𑁆𑀢𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 ‘‘𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. 𑀕𑁄𑀢𑀫𑁄𑀢𑀺 𑀳𑀺 𑀧𑀯𑀢𑁆𑀢𑀫𑀸𑀦𑀁 𑀕𑀁 𑀯𑀘𑀦𑀁 𑀩𑀼𑀤𑁆𑀥𑀺𑀜𑁆𑀘 𑀢𑀸𑀬𑀢𑀺 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀭𑀓𑁆𑀔𑀢𑀻𑀢𑀺 𑀕𑁄𑀢𑁆𑀢𑀁. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀏𑀯𑀁 𑀅𑀪𑀺𑀥𑀸𑀦𑀁 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦, 𑀢𑀲𑁆𑀫𑀸 𑀲𑁄 𑀕𑁄𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀢𑀸𑀦𑀺 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀓𑁄 𑀧𑀦 𑀲𑁄𑀢𑀺? 𑀅𑀜𑁆𑀜𑀓𑀼𑀮𑀧𑀭𑀫𑁆𑀧𑀭𑀸𑀲𑀸𑀥𑀸𑀭𑀡𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀆𑀤𑀺𑀧𑀼𑀭𑀺𑀲𑀲𑀫𑀼𑀤𑀸𑀕𑀢𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀢𑀣𑀸 𑀳𑀺 𑀢𑀁𑀕𑁄𑀢𑁆𑀢𑀚𑀸𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀤𑀬𑁄𑀧𑀺 𑀕𑁄𑀢𑀫𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀪𑁂𑀦 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀺𑀢𑀭𑀁 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀦𑀁 ‘‘𑀅𑀢𑀺𑀓𑁆𑀓𑀦𑁆𑀢𑀯𑀭𑀸 𑀔𑁄 𑀕𑁄𑀢𑀫 𑀢𑀣𑀸𑀕𑀢𑀸’’𑀢𑀺 𑀅𑀯𑁄𑀘. 𑀯𑁂𑀲𑁆𑀲𑀯𑀡𑁄𑀧𑀺 𑀫𑀳𑀸𑀭𑀸𑀚𑀸 𑀪𑀕𑀯𑀦𑁆𑀢𑀁 ‘‘𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀩𑀼𑀤𑁆𑀥𑀁 𑀯𑀦𑁆𑀤𑀸𑀫 𑀕𑁄𑀢𑀫’’𑀦𑁆𑀢𑀺 𑀅𑀯𑁄𑀘, 𑀆𑀬𑀲𑁆𑀫𑀸𑀧𑀺 𑀯𑀗𑁆𑀕𑀻𑀲𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 ‘‘𑀲𑀸𑀥𑀼 𑀦𑀺𑀩𑁆𑀩𑀸𑀧𑀦𑀁 𑀩𑁆𑀭𑀽𑀳𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑀸’’𑀢𑀺 𑀅𑀯𑁄𑀘. 𑀏𑀯𑀁 𑀇𑀤𑀁 𑀲𑀸𑀫𑀜𑁆𑀜𑀭𑀽𑀧𑀁 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀕𑁄𑀢𑀫𑀕𑁄𑀢𑁆𑀢𑀓𑀲𑁆𑀲𑀧𑀕𑁄𑀢𑁆𑀢𑀸𑀤𑀺𑀯𑀲𑁂𑀦 𑀩𑀳𑀼𑀯𑀺𑀥𑀁.

𑀢𑀣𑀸 𑀕𑁄𑀲𑀤𑁆𑀤𑁄 𑀆𑀤𑀺𑀘𑁆𑀘𑁂 𑀯𑀢𑁆𑀢𑀢𑀺. ‘‘𑀕𑁄𑀕𑁄𑀢𑁆𑀢𑀁 𑀕𑁄𑀢𑀫𑀁 𑀦𑀫𑁂’’𑀢𑀺 𑀧𑁄𑀭𑀸𑀡𑀓𑀯𑀺𑀭𑀘𑀦𑀸 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁, 𑀆𑀤𑀺𑀘𑁆𑀘𑀩𑀦𑁆𑀥𑀼𑀁 𑀕𑁄𑀢𑀫𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀯𑀦𑁆𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀆𑀤𑀺𑀘𑁆𑀘𑁄𑀧𑀺 𑀳𑀺 𑀕𑁄𑀢𑀫𑀕𑁄𑀢𑁆𑀢𑁂 𑀚𑀸𑀢𑁄 𑀪𑀕𑀯𑀸𑀧𑀺, 𑀏𑀯𑀁 𑀢𑁂𑀦 𑀲𑀫𑀸𑀦𑀕𑁄𑀢𑁆𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 ‘‘𑀆𑀤𑀺𑀘𑁆𑀘𑀩𑀦𑁆𑀥𑀽’’𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀣𑁄𑀫𑀦𑀸 𑀤𑀺𑀲𑁆𑀲𑀢𑀺 ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀯𑀺𑀯𑁂𑀓𑀁 𑀲𑀦𑁆𑀢𑀺𑀧𑀤𑀜𑁆𑀘 𑀫𑀳𑁂𑀲𑀻’’𑀢𑀺 𑀘, ‘‘𑀯𑀦𑁆𑀤𑁂 𑀚𑁂𑀢𑀯𑀦𑀁 𑀦𑀺𑀘𑁆𑀘𑀁, 𑀯𑀺𑀳𑀸𑀭𑀁 𑀭𑀯𑀺𑀩𑀦𑁆𑀥𑀼𑀦𑁄’’𑀢𑀺 𑀘, ‘‘𑀮𑁄𑀓𑁂𑀓𑀩𑀦𑁆𑀥𑀼’𑀫𑀭𑀯𑀺𑀦𑁆𑀤𑀲𑀳𑀸𑀬𑀩𑀦𑁆𑀥𑀼’’𑀦𑁆𑀢𑀺 𑀘. ‘‘𑀉𑀡𑁆𑀳𑀕𑀽’’𑀢𑀺 𑀏𑀢𑁆𑀣 𑀧𑀦 𑀕𑁄𑀲𑀤𑁆𑀤𑁄 𑀭𑀲𑁆𑀫𑀺𑀬𑀁 𑀯𑀢𑁆𑀢𑀢𑀺. 𑀉𑀡𑁆𑀳𑀸 𑀕𑀸𑀯𑁄 𑀭𑀲𑁆𑀫𑀺𑀬𑁄 𑀏𑀢𑀲𑁆𑀲𑀸𑀢𑀺 𑀉𑀡𑁆𑀳𑀕𑀽, 𑀲𑀽𑀭𑀺𑀬𑁄. 𑀧𑀼𑀩𑁆𑀩𑀸𑀘𑀭𑀺𑀬𑀸𑀧𑀺 𑀳𑀺 𑀙𑀦𑁆𑀤𑁄𑀯𑀺𑀘𑀺𑀢𑀺𑀲𑀢𑁆𑀣𑁂 𑀇𑀫𑀫𑁂𑀯𑀢𑁆𑀣𑀁 𑀩𑁆𑀬𑀸𑀓𑀭𑀺𑀁𑀲𑀼.

‘‘𑀕𑁄𑀲𑀻𑀢𑀘𑀦𑁆𑀤𑀦’’𑀦𑁆𑀢𑀺 𑀏𑀢𑁆𑀣 𑀧𑀸𑀦𑀻𑀬𑁂 𑀯𑀢𑁆𑀢𑀢𑀺. 𑀕𑁄𑀲𑀤𑁆𑀤𑁂𑀦 𑀳𑀺 𑀚𑀮𑀁 𑀯𑀼𑀘𑁆𑀘𑀢𑀺. 𑀕𑁄 𑀯𑀺𑀬 𑀲𑀻𑀢𑀁 𑀘𑀦𑁆𑀤𑀦𑀁, 𑀢𑀲𑁆𑀫𑀺𑀁 𑀧𑀦 𑀉𑀤𑁆𑀥𑀦𑀢𑁄 𑀉𑀤𑁆𑀥𑀭𑀺𑀢𑀧𑀓𑁆𑀓𑀼𑀣𑀺𑀢𑀢𑁂𑀮𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑁂 𑀢𑀗𑁆𑀔𑀡𑀜𑁆𑀜𑁂𑀯 𑀢𑀁 𑀢𑁂𑀮𑀁 𑀲𑀼𑀲𑀻𑀢𑀮𑀁 𑀳𑁄𑀢𑀺.

𑀏𑀢𑁆𑀣𑁂𑀓𑁂 𑀯𑀤𑀦𑁆𑀢𑀺 ‘‘𑀓𑀲𑁆𑀫𑀸 𑀪𑁄 ‘𑀕𑁄𑀧𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀕𑁄𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀘𑁂𑀯 𑀧𑀼𑀮𑁆𑀮𑀺𑀗𑁆𑀕𑁄 𑀘𑀸’𑀢𑀺 𑀯𑀤𑀣, 𑀓𑀲𑁆𑀫𑀸 𑀘 𑀧𑀦 ‘𑀇𑀦𑁆𑀤𑁆𑀭𑀺𑀬𑀧𑀣𑀯𑀻𑀯𑀘𑀦𑀩𑀼𑀤𑁆𑀥𑀺𑀲𑀽𑀭𑀺𑀬𑀭𑀲𑁆𑀫𑀺𑀧𑀸𑀦𑀻𑀬𑁂𑀲𑀼 𑀯𑀢𑁆𑀢𑀫𑀸𑀦𑁄 𑀧𑀼𑀮𑁆𑀮𑀺𑀗𑁆𑀕𑁄’𑀢𑀺 𑀯𑀤𑀣, 𑀏𑀢𑁂𑀲𑀼 𑀲𑀽𑀭𑀺𑀬𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀧𑀼𑀮𑁆𑀮𑀺𑀗𑁆𑀕𑁄 𑀳𑁄𑀢𑀼, 𑀦𑀦𑀼 𑀇𑀦𑁆𑀤𑁆𑀭𑀺𑀬𑀯𑀘𑀦𑀧𑀸𑀦𑀻𑀬𑁂𑀲𑀼 𑀯𑀢𑁆𑀢𑀫𑀸𑀦𑁂𑀦 𑀧𑀦 𑀕𑁄𑀲𑀤𑁆𑀤𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀣𑀯𑀻𑀩𑀼𑀤𑁆𑀥𑀺𑀭𑀲𑁆𑀫𑀻𑀲𑀼 𑀯𑀢𑁆𑀢𑀫𑀸𑀦𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑁂𑀦 𑀪𑀯𑀺𑀢𑀩𑁆𑀩𑀁 𑀇𑀦𑁆𑀤𑁆𑀭𑀺𑀬𑀸𑀤𑀺𑀧𑀣𑀯𑀸𑀤𑀺𑀧𑀤𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀸𑀦𑀁 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑀸𑀤𑀺𑀧𑀣𑀯𑀻𑀲𑀤𑁆𑀤𑀸𑀤𑀻𑀦𑀁 𑀦𑀧𑀼𑀁𑀲𑀓𑀺𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑁂𑀲𑀲𑁆𑀲 𑀤𑀲𑁆𑀲𑀦𑀢𑁄’’𑀢𑀺? 𑀢𑀦𑁆𑀦, 𑀦𑀺𑀬𑀫𑀸𑀪𑀸𑀯𑀢𑁄. 𑀇𑀢𑁆𑀣𑀺𑀧𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺 𑀳𑀺 𑀲𑀢𑁄 𑀓𑀲𑁆𑀲𑀘𑀺 𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺 𑀬𑀣𑀸 ‘‘𑀑𑀭𑁄𑀥𑁄’’𑀢𑀺. 𑀧𑀼𑀭𑀺𑀲𑀧𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺 𑀘 𑀲𑀢𑁄 𑀓𑀲𑁆𑀲𑀘𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺, 𑀬𑀣𑀸 ‘‘𑀅𑀢𑁆𑀣𑀓𑀸𑀫𑁄𑀲𑀺 𑀫𑁂 𑀬𑀓𑁆𑀔, 𑀳𑀺𑀢𑀓𑀸𑀫𑀸𑀲𑀺 𑀤𑁂𑀯𑀢𑁂’’𑀢𑀺. 𑀇𑀢𑁆𑀣𑀺𑀧𑀼𑀭𑀺𑀲𑀧𑀤𑀢𑁆𑀣𑁂𑀲𑀼 𑀧𑀦 𑀅𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀲𑀢𑀁 𑀓𑁂𑀲𑀜𑁆𑀘𑀺 𑀲𑀤𑁆𑀤𑀸𑀦𑀁 𑀏𑀓𑀲𑁆𑀫𑀺𑀁𑀬𑁂𑀯 𑀜𑀸𑀡𑀸𑀤𑀺𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑀸𑀦𑀁 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺 𑀬𑀣𑀸 ‘‘𑀧𑀜𑁆𑀜𑀸 𑀅𑀫𑁄𑀳𑁄 𑀜𑀸𑀡’’𑀦𑁆𑀢𑀺, ‘‘𑀢𑀝𑀁𑀢𑀝𑀻𑀢𑀝𑁄’’𑀢𑀺 𑀘. 𑀢𑀣𑀸 𑀳𑀺 𑀅𑀦𑀺𑀢𑁆𑀣𑀺𑀪𑀽𑀢𑁄𑀧𑀺 𑀲𑀫𑀸𑀦𑁄 ‘‘𑀫𑀸𑀢𑀼𑀮𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀭𑀼𑀓𑁆𑀔𑁄𑀧𑀺 𑀦𑀸𑀫𑀁 𑀮𑀪𑀢𑀺, 𑀢𑀩𑁆𑀩𑀲𑁂𑀦 𑀦𑀕𑀭𑀫𑁆𑀧𑀺. 𑀢𑁂𑀦𑀸𑀳 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀝𑀻𑀓𑀸𑀬𑀁 ‘‘𑀫𑀸𑀢𑀼𑀮𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀏𑀓𑁄 𑀭𑀼𑀓𑁆𑀔𑁄, 𑀢𑀸𑀬 𑀆𑀲𑀦𑁆𑀦𑀧𑁆𑀧𑀤𑁂𑀲𑁂 𑀫𑀸𑀧𑀺𑀢𑀢𑁆𑀢𑀸 𑀦𑀕𑀭𑀫𑁆𑀧𑀺 ‘𑀫𑀸𑀢𑀼𑀮𑀸’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑁂𑀦 𑀯𑀼𑀢𑁆𑀢𑀁 𑀫𑀸𑀢𑀼𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂’’𑀢𑀺.

𑀕𑁄𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸.

𑀫𑁄 𑀯𑀼𑀘𑁆𑀘𑀢𑀺 𑀘𑀦𑁆𑀤𑁄, 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀫𑀸 𑀯𑀼𑀘𑁆𑀘𑀢𑀺 𑀘𑀦𑁆𑀤𑁄’’𑀢𑀺 𑀆𑀓𑀸𑀭𑀦𑁆𑀢𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀑𑀓𑀸𑀭𑀦𑁆𑀢𑀧𑀸𑀞𑁂𑀦 𑀢𑁂𑀦 𑀪𑀯𑀺𑀢𑀩𑁆𑀩𑀁 𑀲𑀓𑁆𑀓𑀝𑀪𑀸𑀲𑀸𑀬 𑀏𑀓𑀓𑁆𑀔𑀭𑀓𑁄𑀲𑀢𑁄 𑀦𑀬𑀁 𑀕𑀳𑁂𑀢𑁆𑀯𑀸 ‘‘𑀫𑁄 𑀲𑀺𑀯𑁄 𑀘𑀦𑁆𑀤𑀺𑀫𑀸 𑀘𑁂𑀯𑀸’’𑀢𑀺 𑀑𑀓𑀸𑀭𑀦𑁆𑀢𑀯𑀲𑁂𑀦 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀏𑀢𑁆𑀣 𑀘 𑀑𑀓𑀸𑀭𑀦𑁆𑀢𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀫𑀲𑀤𑁆𑀤𑀲𑁆𑀲 𑀘𑀦𑁆𑀤𑀯𑀸𑀘𑀓𑀢𑁆𑀢𑁂 ‘‘𑀧𑀼𑀡𑁆𑀡𑀫𑀻, 𑀧𑀼𑀡𑁆𑀡𑀫𑀸’’𑀢𑀺 𑀘 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀢𑀢𑁆𑀣 𑀧𑀼𑀡𑁆𑀡𑁄 𑀫𑁄 𑀏𑀢𑁆𑀣𑀸𑀢𑀺 𑀧𑀼𑀡𑁆𑀡𑀫𑀻, 𑀏𑀯𑀁 𑀧𑀼𑀡𑁆𑀡𑀫𑀸, 𑀭𑀢𑁆𑀢𑀸𑀧𑁂𑀓𑁆𑀔𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀘𑀦𑀁. 𑀏𑀢𑁆𑀣 𑀧𑀦 ‘‘𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀧𑀞𑀫𑀬𑀸𑀫𑁂𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀻’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀁. 𑀏𑀢𑁆𑀣 𑀲𑀺𑀬𑀸 𑁋 𑀬𑀤𑀺 ‘‘𑀧𑀼𑀡𑁆𑀡𑀫𑀸’’𑀢𑀺 𑀅𑀬𑀁𑀲𑀤𑁆𑀤𑁄 𑀭𑀢𑁆𑀢𑀸𑀧𑁂𑀓𑁆𑀔𑁄 𑀇𑀢𑁆𑀣𑀺𑀮𑀺𑀗𑁆𑀕𑁄.

‘‘𑀧𑀼𑀡𑁆𑀡𑀫𑀸𑀬𑁂 𑀬𑀣𑀸 𑀘𑀦𑁆𑀤𑁄, 𑀧𑀭𑀺𑀲𑀼𑀤𑁆𑀥𑁄 𑀯𑀺𑀭𑁄𑀘𑀢𑀺;

𑀢𑀣𑁂𑀯 𑀢𑁆𑀯𑀁 𑀧𑀼𑀡𑁆𑀡𑀫𑀦𑁄, 𑀯𑀺𑀭𑁄𑀘 𑀤𑀲𑀲𑀳𑀲𑁆𑀲𑀺𑀬𑀁.

𑀅𑀦𑁆𑀯𑀤𑁆𑀥𑀫𑀸𑀲𑁂 𑀧𑀦𑁆𑀦𑀭𑀲𑁂, 𑀧𑀼𑀡𑁆𑀡𑀫𑀸𑀬𑁂 𑀉𑀧𑁄𑀲𑀣𑁂;

𑀧𑀘𑁆𑀘𑀬𑀁 𑀦𑀸𑀕𑀫𑀸𑀭𑀼𑀬𑁆𑀳, 𑀤𑀸𑀦𑀁 𑀤𑀸𑀢𑀼𑀫𑀼𑀧𑀸𑀕𑀫𑀺’’𑀦𑁆𑀢𑀺

𑀆𑀤𑀻𑀲𑀼 𑀓𑀣𑀁 ‘‘𑀧𑀼𑀡𑁆𑀡𑀫𑀸𑀬𑁂’’𑀢𑀺 𑀧𑀤𑀲𑀺𑀤𑁆𑀥𑀻𑀢𑀺? 𑀬𑀓𑀸𑀭𑀲𑁆𑀲 𑀬𑁂𑀓𑀸𑀭𑀸𑀤𑁂𑀲𑀯𑀲𑁂𑀦. 𑀥𑀫𑁆𑀫𑀺𑀲𑁆𑀲𑀭𑁂𑀦 𑀳𑀺 𑀪𑀕𑀯𑀢𑀸 ‘‘𑀧𑀼𑀡𑁆𑀡𑀫𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀡𑁆𑀡𑀫𑀸𑀬𑁂’’𑀢𑀺 𑀯𑀤𑀢𑀸 𑀬𑀓𑀸𑀭𑀲𑁆𑀲 𑀞𑀸𑀦𑁂 𑀬𑁂𑀓𑀸𑀭𑁄 𑀧𑀞𑀺𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑀯𑀺𑀲𑀬𑁂 𑀢𑁆𑀢𑀸𑀓𑀸𑀭𑀲𑁆𑀲 𑀞𑀸𑀦𑁂 𑀢𑁆𑀢𑁂𑀓𑀸𑀭𑁄 𑀯𑀺𑀬, 𑀦𑀻𑀓𑀸𑀭𑀲𑁆𑀲 𑀞𑀸𑀦𑁂 𑀦𑁂𑀓𑀸𑀭𑁄 𑀯𑀺𑀬 𑀘. 𑀢𑀣𑀸 𑀳𑀺 𑀬𑀣𑀸 ‘‘𑀅𑀩𑁆𑀬𑀬𑀢𑀁 𑀯𑀺𑀮𑀧𑀲𑀺 𑀯𑀺𑀭𑀢𑁆𑀢𑁂 𑀓𑁄𑀲𑀺𑀬𑀸𑀬𑀦𑁂’’𑀢𑀺 𑀇𑀫𑀲𑁆𑀫𑀺𑀁 𑀭𑀸𑀥𑀚𑀸𑀢𑀓𑁂 ‘‘𑀯𑀺𑀭𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀯𑀺𑀭𑀢𑁆𑀢𑁂’’𑀢𑀺 𑀯𑀤𑀦𑁆𑀢𑁂𑀦 𑀢𑁆𑀢𑀸𑀓𑀸𑀭𑀲𑁆𑀲 𑀞𑀸𑀦𑁂 𑀢𑁆𑀢𑁂𑀓𑀸𑀭𑁄 𑀧𑀞𑀺𑀢𑁄, ‘‘𑀓𑁄𑀲𑀺𑀬𑀸𑀬𑀦𑀻’’𑀢𑀺 𑀘 𑀯𑀢𑁆𑀢𑀩𑁆𑀩𑁂 ‘‘𑀓𑁄𑀲𑀺𑀬𑀸𑀬𑀦𑁂’’𑀢𑀺 𑀯𑀤𑀦𑁆𑀢𑁂𑀦 𑀦𑀻𑀓𑀸𑀭𑀲𑁆𑀲 𑀞𑀸𑀦𑁂 𑀦𑁂𑀓𑀸𑀭𑁄 𑀧𑀞𑀺𑀢𑁄. 𑀏𑀯𑀁 ‘‘𑀧𑀼𑀡𑁆𑀡𑀫𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀡𑁆𑀡𑀫𑀸𑀬𑁂’’𑀢𑀺 𑀯𑀤𑀢𑀸 𑀬𑀓𑀸𑀭𑀲𑁆𑀲 𑀞𑀸𑀦𑁂 𑀬𑁂𑀓𑀸𑀭𑁄 𑀧𑀞𑀺𑀢𑁄. 𑀬𑀣𑀸 𑀘 ‘‘𑀤𑀓𑁆𑀔𑀺𑀢𑀸𑀬𑁂 𑀅𑀧𑀭𑀸𑀚𑀺𑀢𑀲𑀗𑁆𑀖’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀫𑀳𑀸𑀲𑀫𑀬𑀲𑀼𑀢𑁆𑀢𑀧𑁆𑀧𑀤𑁂𑀲𑁂 ‘‘𑀤𑀓𑁆𑀔𑀺𑀢𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀤𑀓𑁆𑀔𑀺𑀢𑀸𑀬𑁂’’𑀢𑀺 𑀯𑀤𑀢𑀸 𑀬𑀓𑀸𑀭𑀲𑁆𑀲 𑀞𑀸𑀦𑁂 𑀬𑁂𑀓𑀸𑀭𑁄 𑀧𑀞𑀺𑀢𑁄, 𑀏𑀯𑀫𑀺𑀥𑀸𑀧𑀺. 𑀬𑀣𑀸 𑀧𑀦 ‘‘𑀲𑀪𑀸𑀬𑁂 𑀯𑀸 𑀤𑁆𑀯𑀸𑀭𑀫𑀽𑀮𑁂 𑀯𑀸’’𑀢𑀺 𑀏𑀢𑁆𑀣 ‘‘𑀲𑀪𑀸𑀬’’𑀦𑁆𑀢𑀺 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑀯𑀲𑁂𑀦 𑀲𑀪𑀸 𑀯𑀼𑀢𑁆𑀢𑀸, 𑀦 𑀢𑀣𑀸 𑀇𑀥 ‘‘𑀧𑀼𑀡𑁆𑀡𑀫𑀸𑀬’’𑀦𑁆𑀢𑀺 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁂𑀦 𑀧𑀼𑀡𑁆𑀡𑀫𑀸 𑀯𑀼𑀢𑁆𑀢𑀸, 𑀅𑀣 𑀔𑁄 ‘‘𑀧𑀼𑀡𑁆𑀡𑀫𑀸’’𑀢𑀺 𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀸. 𑀢𑀣𑀸 𑀳𑀺 ‘‘𑀧𑀼𑀡𑁆𑀡𑀫𑀸𑀬𑁄’’𑀢𑀺 𑀧𑀤𑀁 𑀬𑀓𑀸𑀭𑀝𑁆𑀞𑀸𑀦𑁂 𑀬𑁂𑀓𑀸𑀭𑀼𑀘𑁆𑀘𑀸𑀭𑀡𑀯𑀲𑁂𑀦 𑀲𑀫𑁆𑀪𑀽𑀢𑀁 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀸 𑀯𑀼𑀘𑁆𑀘𑀢𑀺 𑀲𑀺𑀭𑀻. 𑀢𑀣𑀸 𑀳𑀺 𑀯𑀺𑀤𑁆𑀯𑀫𑀼𑀔𑀫𑀡𑁆𑀟𑀦𑀝𑀻𑀓𑀸𑀬𑀁 ‘‘𑀫𑀸𑀮𑀺𑀦𑀻’’𑀢𑀺 𑀧𑀤𑀲𑁆𑀲𑀢𑁆𑀣𑀁 𑀯𑀤𑀢𑀸 ‘‘𑀫𑀸 𑀯𑀼𑀘𑁆𑀘𑀢𑀺 𑀮𑀓𑁆𑀔𑀻, 𑀅𑀮𑀺𑀦𑀻 𑀪𑀫𑀭𑀻’’𑀢𑀺 𑀯𑀼𑀢𑁆𑀢𑀁. 𑀮𑀓𑁆𑀔𑀻𑀲𑀤𑁆𑀤𑁄 𑀘 𑀲𑀺𑀭𑀻𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄, 𑀢𑁂𑀦 ‘‘𑀫𑀸 𑀯𑀼𑀘𑁆𑀘𑀢𑀺 𑀲𑀺𑀭𑀻’’𑀢𑀺 𑀅𑀢𑁆𑀣𑁄 𑀅𑀫𑁆𑀳𑁂𑀳𑀺 𑀅𑀦𑀼𑀫𑀢𑁄, 𑀢𑀣𑀸 𑀧𑁄𑀭𑀸𑀡𑁂𑀳𑀺𑀧𑀺 ‘‘𑀫𑀁 𑀲𑀺𑀭𑀺𑀁 𑀥𑀸𑀭𑁂𑀢𑀺 𑀯𑀺𑀤𑀥𑀸𑀢𑀺 𑀘𑀸𑀢𑀺 𑀫𑀦𑁆𑀥𑀸𑀢𑀸’’𑀢𑀺 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄, 𑀢𑀲𑁆𑀫𑀸 ‘‘𑀫𑀸𑀮𑀺𑀦𑀻 𑀫𑀦𑁆𑀥𑀸𑀢𑀸’’𑀢𑀺 𑀘 𑀇𑀫𑀸𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀢𑀢𑁆𑀭 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀢𑀸𑀯 𑀫𑀲𑀤𑁆𑀤𑀲𑁆𑀲 𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀫𑁄, 𑀫𑀸. 𑀫𑀁, 𑀫𑁂. 𑀫𑁂𑀦, 𑀫𑁂𑀳𑀺, 𑀫𑁂𑀪𑀺. 𑀫𑀲𑁆𑀲, 𑀫𑀸𑀦𑀁. 𑀫𑀸, 𑀫𑀲𑁆𑀫𑀸, 𑀫𑀫𑁆𑀳𑀸, 𑀫𑁂𑀳𑀺, 𑀫𑁂𑀪𑀺. 𑀫𑀲𑁆𑀲, 𑀫𑀸𑀦𑀁. 𑀫𑁂, 𑀫𑀲𑁆𑀫𑀺𑀁, 𑀫𑀫𑁆𑀳𑀺, 𑀫𑁂𑀲𑀼. 𑀪𑁄 𑀫, 𑀪𑀯𑀦𑁆𑀢𑁄 𑀫𑀸.

𑀅𑀬𑀁 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀫𑀸𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀫𑀸, 𑀫𑀸, 𑀫𑀸𑀬𑁄. 𑀫𑀁, 𑀫𑀸, 𑀫𑀸𑀬𑁄. 𑀫𑀸𑀬, 𑀫𑀸𑀳𑀺, 𑀫𑀸𑀪𑀺. 𑀫𑀸𑀬, 𑀫𑀸𑀦𑀁. 𑀫𑀸𑀬, 𑀫𑀸𑀳𑀺, 𑀫𑀸𑀪𑀺. 𑀫𑀸𑀬, 𑀫𑀸𑀦𑀁. 𑀫𑀸𑀬, 𑀫𑀸𑀬𑀁, 𑀫𑀸𑀲𑀼. 𑀪𑁄𑀢𑀺 𑀫𑁂, 𑀪𑁄𑀢𑀺𑀬𑁄 𑀫𑀸𑀬𑁄.

𑀏𑀢𑁆𑀣 𑀧𑀦 𑀲𑀺𑀭𑀻𑀯𑀸𑀘𑀓𑁄 𑀫𑀸𑀲𑀤𑁆𑀤𑁄 𑀘 𑀲𑀤𑁆𑀤𑀯𑀸𑀘𑀓𑁄 𑀭𑀸𑀲𑀤𑁆𑀤𑁄 𑀘𑀸𑀢𑀺 𑀇𑀫𑁂 𑀲𑀫𑀸𑀦𑀕𑀢𑀺𑀓𑀸 𑀏𑀓𑀓𑁆𑀔𑀭𑀢𑁆𑀢𑀸 𑀦𑀺𑀘𑁆𑀘𑀫𑀸𑀓𑀸𑀭𑀦𑁆𑀢𑀧𑀓𑀢𑀺𑀓𑀢𑁆𑀢𑀸 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀸 𑀘.

𑀢𑀢𑁆𑀭 𑀲𑀁 𑀯𑀼𑀘𑁆𑀘𑀢𑀺 𑀲𑀦𑁆𑀢𑀘𑀺𑀢𑁆𑀢𑁄 𑀧𑀼𑀭𑀺𑀲𑁄. 𑀬𑀁 𑀮𑁄𑀓𑁂 ‘‘𑀲𑀧𑁆𑀧𑀼𑀭𑀺𑀲𑁄’’𑀢𑀺 𑀘, ‘‘𑀅𑀭𑀺𑀬𑁄’’𑀢𑀺 𑀘, ‘‘𑀧𑀡𑁆𑀟𑀺𑀢𑁄’’𑀢𑀺 𑀘 𑀯𑀤𑀦𑁆𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀬𑀤𑀺𑀤𑀁 ‘‘𑀲’’𑀦𑁆𑀢𑀺. 𑀏𑀯𑀁 𑀲𑀧𑁆𑀧𑀼𑀭𑀺𑀲𑀸𑀭𑀺𑀬𑀧𑀡𑁆𑀟𑀺𑀢𑀯𑀸𑀘𑀓𑀲𑁆𑀲 𑀲𑀁𑀲𑀤𑁆𑀤𑀲𑁆𑀲 𑀧𑀘𑁆𑀘𑀢𑁆𑀢𑀯𑀘𑀦𑀯𑀲𑁂𑀦 𑀅𑀢𑁆𑀣𑀺𑀪𑀸𑀯𑁂 ‘‘𑀲𑀫𑁂𑀢𑀺 𑀅𑀲𑀢𑀸 𑀅𑀲’’𑀦𑁆𑀢𑀺 𑀇𑀤𑀁 𑀧𑀬𑁄𑀕𑀦𑀺𑀤𑀲𑁆𑀲𑀦𑀁. 𑀏𑀢𑁆𑀣 𑀳𑀺 ‘‘𑀦 𑀲𑀁 𑀅𑀲’’𑀦𑁆𑀢𑀺 𑀲𑀫𑀸𑀲𑀘𑀺𑀦𑁆𑀢𑀸𑀬 𑀲𑀧𑁆𑀧𑀼𑀭𑀺𑀲𑀸𑀲𑀧𑁆𑀧𑀼𑀭𑀺𑀲𑀧𑀤𑀢𑁆𑀣𑀸 𑀲𑀁 𑀅𑀲𑀁𑀲𑀤𑁆𑀤𑁂𑀳𑀺 𑀯𑀼𑀢𑁆𑀢𑀸𑀢𑀺 𑀜𑀸𑀬𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀧𑁆𑀧𑀼𑀭𑀺𑀲𑀧𑀤𑀢𑁆𑀣𑁄 𑀧𑀘𑁆𑀘𑀢𑁆𑀢𑀯𑀘𑀦𑁂𑀦 𑀲𑀁𑀲𑀤𑁆𑀤𑁂𑀦 𑀯𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺 𑀯𑀘𑀦𑀁 𑀦 𑀯𑀢𑁆𑀢𑀩𑁆𑀩𑀁. 𑀬𑁂 ‘‘𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀁. 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀦𑀲𑁆𑀲 ‘‘𑀲𑀁, 𑀲𑀦𑁆𑀢𑀁, 𑀲𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸. 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑁂 𑀲𑀁 𑀯𑀼𑀘𑁆𑀘𑀢𑀺 𑀥𑀦𑀁, ‘‘𑀫𑀦𑀼𑀲𑁆𑀲𑀲𑁆𑀲𑀁. 𑀧𑀭𑀲𑁆𑀲𑀁. 𑀲𑀩𑁆𑀩𑀲𑁆𑀲𑀁. 𑀲𑀩𑁆𑀩𑀲𑁆𑀲𑀳𑀭𑀡𑀁. 𑀧𑀭𑀲𑁆𑀲𑀳𑀭𑀡’’𑀦𑁆𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀲𑁆𑀲 𑀲𑀁 𑀫𑀦𑀼𑀲𑁆𑀲𑀲𑁆𑀲𑀁. 𑀏𑀯𑀁 𑀧𑀭𑀲𑁆𑀲 𑀲𑀁 𑀧𑀭𑀲𑁆𑀲𑀁. 𑀲𑀩𑁆𑀩𑀲𑁆𑀲 𑀲𑀁 𑀲𑀩𑁆𑀩𑀲𑁆𑀲𑀁. 𑀢𑀲𑁆𑀲 𑀳𑀭𑀡𑀁 𑀧𑀭𑀲𑁆𑀲𑀳𑀭𑀡𑀁 𑀲𑀩𑁆𑀩𑀲𑁆𑀲𑀳𑀭𑀡𑀦𑁆𑀢𑀺 𑀲𑀫𑀸𑀲𑁄. 𑀢𑀣𑀸 𑀲𑀁 𑀯𑀼𑀘𑁆𑀘𑀢𑀺 𑀲𑀼𑀔𑀁 𑀲𑀦𑁆𑀢𑀺 𑀘. 𑀯𑀼𑀢𑁆𑀢𑀜𑁆𑀳𑀺 𑀢𑀩𑁆𑀩𑀸𑀘𑀓𑀢𑁆𑀢𑀁 𑀧𑁄𑀭𑀸𑀡𑀓𑀯𑀺𑀭𑀘𑀦𑀸𑀬𑀁 𑁋

‘‘𑀤𑁂𑀯𑀤𑁂𑀯𑁄 𑀲𑀁𑀤𑁂𑀳𑀻 𑀦𑁄, 𑀳𑀻𑀦𑁄 𑀤𑁂𑀯𑀸𑀢𑀺𑀤𑁂𑀳𑀢𑁄;

𑀳𑀢𑁄𑀧𑀧𑀸𑀢𑀲𑀁𑀲𑀸𑀭𑁄, 𑀲𑀸𑀭𑁄 𑀲𑀁 𑀤𑁂𑀢𑀼 𑀤𑁂𑀳𑀺𑀦’’𑀦𑁆𑀢𑀺.

𑀢𑀲𑁆𑀫𑀸 𑀅𑀬𑀫𑁂𑀢𑁆𑀣 𑀕𑀸𑀣𑀸, ‘‘𑀲𑀓𑀮𑀮𑁄𑀓𑀲𑀗𑁆𑀓𑀭𑁄 𑀤𑀻𑀧𑀗𑁆𑀓𑀭𑁄’’𑀢𑀺 𑀏𑀢𑁆𑀣 ‘‘𑀲𑀗𑁆𑀓𑀭𑁄’’𑀢𑀺 𑀧𑀤𑀜𑁆𑀘𑀦𑀺𑀤𑀲𑁆𑀲𑀦𑀁. ‘‘𑀲𑀁, 𑀲𑀸𑀦𑀺, 𑀲𑀸. 𑀲𑀁, 𑀲𑀸𑀦𑀺, 𑀲𑁂. 𑀲𑁂𑀦’’𑀇𑀘𑁆𑀘𑀸𑀤𑀺 𑀧𑀼𑀩𑁆𑀩𑁂 𑀧𑀓𑀸𑀲𑀺𑀢𑀦𑀬𑁂𑀦 𑀜𑁂𑀬𑁆𑀬𑀁. 𑀏𑀢𑁆𑀣 𑀘 𑀲𑁄𑀢𑀽𑀦𑀁 𑀲𑀼𑀕𑀢𑀫𑀢𑀯𑀭𑁂 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀲𑀫𑀸𑀲𑀦𑁆𑀢𑀕𑀢𑀲𑁆𑀲 𑀲𑀁𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀓𑀣𑀬𑀸𑀫 𑁋

𑀫𑀦𑀼𑀲𑁆𑀲𑀲𑁆𑀲𑀁, 𑀫𑀦𑀼𑀲𑁆𑀲𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀲𑁆𑀲𑀸. 𑀫𑀦𑀼𑀲𑁆𑀲𑀲𑁆𑀲𑀁, 𑀫𑀦𑀼𑀲𑁆𑀲𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀲𑁆𑀲𑁂. 𑀫𑀦𑀼𑀲𑁆𑀲𑀲𑁆𑀲𑁂𑀦, 𑀫𑀦𑀼𑀲𑁆𑀲𑀲𑁆𑀲𑁂𑀳𑀺, 𑀫𑀦𑀼𑀲𑁆𑀲𑀲𑁆𑀲𑁂𑀪𑀺. 𑀫𑀦𑀼𑀲𑁆𑀲𑀲𑁆𑀲𑀲𑁆𑀲, 𑀫𑀦𑀼𑀲𑁆𑀲𑀲𑁆𑀲𑀸𑀦𑀁. 𑀫𑀦𑀼𑀲𑁆𑀲𑀲𑁆𑀲𑀸, 𑀫𑀦𑀼𑀲𑁆𑀲𑀲𑁆𑀲𑀲𑁆𑀫𑀸, 𑀫𑀦𑀼𑀲𑁆𑀲𑀲𑁆𑀲𑀫𑁆𑀳𑀸, 𑀫𑀦𑀼𑀲𑁆𑀲𑀲𑁆𑀲𑁂𑀳𑀺, 𑀫𑀦𑀼𑀲𑁆𑀲𑀲𑁆𑀲𑁂𑀪𑀺. 𑀫𑀦𑀼𑀲𑁆𑀲𑀲𑁆𑀲𑀲𑁆𑀲, 𑀫𑀦𑀼𑀲𑁆𑀲𑀲𑁆𑀲𑀸𑀦𑀁. 𑀫𑀦𑀼𑀲𑁆𑀲𑀲𑁆𑀲𑁂, 𑀫𑀦𑀼𑀲𑁆𑀲𑀲𑁆𑀲𑀲𑁆𑀫𑀺𑀁, 𑀫𑀦𑀼𑀲𑁆𑀲𑀲𑁆𑀲𑀫𑁆𑀳𑀺, 𑀫𑀦𑀼𑀲𑁆𑀲𑀲𑁆𑀲𑁂𑀲𑀼. 𑀪𑁄 𑀫𑀦𑀼𑀲𑁆𑀲𑀲𑁆𑀲, 𑀪𑁄𑀦𑁆𑀢𑁄 𑀫𑀦𑀼𑀲𑁆𑀲𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀲𑁆𑀲𑀸. 𑀏𑀲 𑀦𑀬𑁄 ‘‘𑀧𑀭𑀲𑁆𑀲𑀁 𑀲𑀩𑁆𑀩𑀲𑁆𑀲’’𑀦𑁆𑀢𑀺𑀆𑀤𑀻𑀲𑀼𑀧𑀺, 𑀲𑀩𑁆𑀩𑀸𑀦𑁂𑀢𑀸𑀦𑀺 𑀧𑀤𑀸𑀦𑀺 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺.

𑀬𑀁 𑀢𑀁 𑀓𑀺𑀫𑀺𑀢𑀺𑀲𑀤𑁆𑀤𑀸𑀦𑀁, 𑀦𑀸𑀫𑀫𑀸𑀮𑀁 𑀧𑀦𑀢𑁆𑀢𑀭𑀺;

𑀲𑀩𑁆𑀩𑀦𑀸𑀫𑀧𑀭𑀺𑀘𑁆𑀙𑁂𑀤𑁂, 𑀧𑀓𑀸𑀲𑀺𑀲𑁆𑀲𑀁 𑀢𑀺𑀮𑀺𑀗𑁆𑀕𑀢𑁄.

𑀇𑀘𑁆𑀘𑁂𑀯𑀁 𑀳𑁂𑀝𑁆𑀞𑀸 𑀉𑀤𑁆𑀤𑀺𑀝𑁆𑀞𑀸𑀦𑀁 𑀓𑁄 𑀯𑀺 𑀲𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀤𑁆𑀥𑀺𑀁 𑀅𑀢𑁆𑀣𑀦𑁆𑀢𑀭𑀦𑀺𑀤𑀲𑁆𑀲𑀦𑀧𑀤𑁂𑀳𑀺 𑀯𑀺𑀪𑀢𑁆𑀢𑀸. 𑀢𑀢𑁆𑀭𑀺𑀤𑀁 𑀮𑀺𑀗𑁆𑀕𑀯𑀯𑀢𑁆𑀣𑀸𑀦𑀁 𑁋

𑀓𑁄 𑀯𑀺 𑀲𑀸 𑀳𑁄𑀦𑁆𑀢𑀺 𑀧𑀼𑀮𑁆𑀮𑀺𑀗𑁆𑀕𑁂, 𑀪𑀸 𑀭𑀸 𑀣𑀻 𑀥𑀻 𑀓𑀼 𑀪𑀽 𑀣𑀺𑀬𑀁;

𑀓𑀁 𑀔𑀁 𑀦𑀧𑀼𑀁𑀲𑀓𑁂 𑀕𑁄 𑀢𑀼, 𑀧𑀼𑀫𑁂 𑀘𑁂𑀯𑀺𑀢𑁆𑀣𑀺𑀮𑀺𑀗𑁆𑀕𑀓𑁂.

𑀫𑁄 𑀧𑀼𑀫𑁂 𑀇𑀢𑁆𑀣𑀺𑀮𑀺𑀗𑁆𑀕𑁂 𑀫𑀸, 𑀲𑀁 𑀧𑀼𑀫𑁂 𑀘 𑀦𑀧𑀼𑀁𑀲𑀓𑁂;

𑀬𑀁 𑀢𑀁 𑀓𑀺𑀫𑀺𑀢𑀺 𑀲𑀩𑁆𑀩𑀢𑁆𑀭, 𑀮𑀺𑀗𑁆𑀕𑁂𑀲𑁆𑀯𑁂𑀯 𑀧𑀯𑀢𑁆𑀢𑀭𑁂.

𑀇𑀢𑁄 𑀅𑀜𑁆𑀜𑀸𑀦𑀺𑀧𑀺 𑀏𑀓𑀓𑁆𑀔𑀭𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀦𑀺.

𑀏𑀯𑀁 𑀯𑀺𑀜𑁆𑀜𑀽𑀦𑀁 𑀦𑀬𑀜𑁆𑀜𑀽𑀦𑀁 𑀲𑀤𑁆𑀤𑀭𑀘𑀦𑀸𑀯𑀺𑀲𑀬𑁂 𑀧𑀭𑀫𑀯𑀺𑀲𑀼𑀤𑁆𑀥𑀯𑀺𑀧𑀼𑀮𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀢𑁆𑀣𑀁 𑀧𑀭𑀫𑀲𑀡𑁆𑀳𑀲𑀼𑀔𑀼𑀫𑀢𑁆𑀣𑁂𑀲𑀼 𑀧𑀬𑁄𑀕𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀲𑀼𑀯𑀡𑁆𑀡𑀢𑀮𑁂 𑀲𑀻𑀳𑀯𑀺𑀚𑀫𑁆𑀪𑀦𑁂𑀦 𑀓𑁂𑀲𑀭𑀻𑀲𑀻𑀳𑀲𑁆𑀲 𑀯𑀺𑀚𑀫𑁆𑀪𑀦𑀫𑀺𑀯 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀜𑀸𑀡𑀯𑀺𑀚𑀫𑁆𑀪𑀦𑁂𑀦 𑀯𑀺𑀚𑀫𑁆𑀪𑀦𑀢𑁆𑀣𑀜𑁆𑀘 𑀅𑀥𑀺𑀓𑀽𑀦𑁂𑀓𑀓𑁆𑀔𑀭𑀯𑀲𑁂𑀦 𑀮𑀺𑀗𑁆𑀕𑀢𑁆𑀢𑀬𑀁 𑀫𑀺𑀲𑁆𑀲𑁂𑀢𑁆𑀯𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀺𑀪𑀢𑁆𑀢𑀸.

𑀲𑀤𑁆𑀤𑁂 𑀪𑀯𑀦𑁆𑀢𑀺 𑀓𑀼𑀲𑀮𑀸 𑀦 𑀢𑀼 𑀓𑁂𑀘𑀺 𑀅𑀢𑁆𑀣𑁂,

𑀅𑀢𑁆𑀣𑁂 𑀪𑀯𑀦𑁆𑀢𑀺 𑀓𑀼𑀲𑀮𑀸 𑀦 𑀢𑀼 𑀓𑁂𑀘𑀺 𑀲𑀤𑁆𑀤𑁂.

𑀓𑁄𑀲𑀮𑁆𑀮𑀫𑁂𑀯 𑀧𑀭𑀫𑀁 𑀤𑀼𑀪𑀬𑀢𑁆𑀣 𑀢𑀲𑁆𑀫𑀸,

𑀬𑁄𑀕𑀁 𑀓𑀭𑁂𑀬𑁆𑀬 𑀲𑀢𑀢𑀁 𑀫𑀢𑀺𑀫𑀸 𑀯𑀭𑀦𑁆𑀢𑀺.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼

𑀯𑀺𑀜𑁆𑀜𑀽𑀦𑀁 𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀮𑀺𑀗𑁆𑀕𑀢𑁆𑀢𑀬𑀫𑀺𑀲𑁆𑀲𑀓𑁄 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄

𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.