𑁬. 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀸𑀫𑀺𑀓𑀧𑀤𑀫𑀸𑀮𑀸

𑀅𑀣 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑁂𑀲𑀼 𑀅𑀪𑀺𑀪𑀯𑀺𑀢𑀼 𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑁋 𑀲𑀢𑁆𑀣𑀸, 𑀲𑀢𑁆𑀣𑀸, 𑀲𑀢𑁆𑀣𑀸𑀭𑁄. 𑀲𑀢𑁆𑀣𑀸𑀭𑀁, 𑀲𑀢𑁆𑀣𑀸𑀭𑁄. 𑀲𑀢𑁆𑀣𑀸𑀭𑀸, 𑀲𑀢𑁆𑀣𑀸𑀭𑁂𑀳𑀺, 𑀲𑀢𑁆𑀣𑀸𑀭𑁂𑀪𑀺. 𑀲𑀢𑁆𑀣𑀼, 𑀲𑀢𑁆𑀣𑀼𑀲𑁆𑀲, 𑀲𑀢𑁆𑀣𑀼𑀦𑁄, 𑀲𑀢𑁆𑀣𑀸𑀦𑀁, 𑀲𑀢𑁆𑀣𑀸𑀭𑀸𑀦𑀁. 𑀲𑀢𑁆𑀣𑀸𑀭𑀸, 𑀲𑀢𑁆𑀣𑀸𑀭𑁂𑀳𑀺, 𑀲𑀢𑁆𑀣𑀸𑀭𑁂𑀪𑀺. 𑀲𑀢𑁆𑀣𑀼, 𑀲𑀢𑁆𑀣𑀼𑀲𑁆𑀲, 𑀲𑀢𑁆𑀣𑀼𑀦𑁄, 𑀲𑀢𑁆𑀣𑀸𑀦𑀁, 𑀲𑀢𑁆𑀣𑀸𑀭𑀸𑀦𑀁. 𑀲𑀢𑁆𑀣𑀭𑀺, 𑀲𑀢𑁆𑀣𑀸𑀭𑁂𑀲𑀼. 𑀪𑁄 𑀲𑀢𑁆𑀣, 𑀪𑁄 𑀲𑀢𑁆𑀣𑀸, 𑀪𑀯𑀦𑁆𑀢𑁄 𑀲𑀢𑁆𑀣𑀸𑀭𑁄.

𑀅𑀬𑀁 𑀬𑀫𑀓𑀫𑀳𑀸𑀣𑁂𑀭𑁂𑀦 𑀓𑀢𑀸𑀬 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀸 𑀆𑀕𑀢𑁄 𑀦𑀬𑁄. 𑀏𑀢𑁆𑀣 𑀘 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 𑀓𑀘𑁆𑀘𑀸𑀬𑀦𑁂 𑀘 ‘‘𑀲𑀢𑁆𑀣𑀼𑀦𑀸’’𑀢𑀺 𑀧𑀤𑀁 𑀅𑀦𑀸𑀕𑀢𑀫𑁆𑀧𑀺 𑀕𑀳𑁂𑀢𑀩𑁆𑀩𑀫𑁂𑀯 ‘‘𑀥𑀫𑁆𑀫𑀭𑀸𑀚𑁂𑀦 𑀲𑀢𑁆𑀣𑀼𑀦𑀸’’𑀢𑀺 𑀤𑀲𑁆𑀲𑀦𑀢𑁄. ‘‘𑀲𑀢𑁆𑀣𑀸𑀭𑀸, 𑀲𑀢𑁆𑀣𑀼𑀦𑀸, 𑀲𑀢𑁆𑀣𑀸𑀭𑁂𑀳𑀺, 𑀲𑀢𑁆𑀣𑀸𑀭𑁂𑀪𑀻’’𑀢𑀺 𑀓𑀫𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀅𑀲𑀢𑀺𑀧𑀺 𑀅𑀢𑁆𑀣𑀯𑀺𑀲𑁂𑀲𑁂 𑀩𑁆𑀬𑀜𑁆𑀚𑀦𑀯𑀺𑀲𑁂𑀲𑀯𑀲𑁂𑀦, 𑀩𑁆𑀬𑀜𑁆𑀚𑀦𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀅𑀢𑁆𑀣𑀦𑀸𑀦𑀢𑁆𑀣𑀢𑀸𑀯𑀲𑁂𑀦 𑀲𑀤𑁆𑀤𑀦𑁆𑀢𑀭𑀲𑀦𑁆𑀤𑀲𑁆𑀲𑀦𑀁 𑀦𑀺𑀭𑀼𑀢𑁆𑀢𑀺𑀓𑁆𑀓𑀫𑁄𑀢𑀺 ‘‘𑀲𑀢𑁆𑀣𑀸’’𑀢𑀺 𑀧𑀤𑀁 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀸𑀤𑀻𑀲𑀼 𑀧𑀦 ‘‘𑀲𑀢𑁆𑀣𑀸’’𑀢𑀺 𑀧𑀞𑀫𑀸𑀩𑀳𑀼𑀯𑀘𑀦𑀁 𑀦 𑀆𑀕𑀢𑀁. 𑀓𑀺𑀜𑁆𑀘𑀸𑀧𑀺 𑀦 𑀆𑀕𑀢𑀁, 𑀢𑀣𑀸𑀧𑀺 ‘‘𑀅𑀯𑀺𑀢𑀓𑁆𑀓𑀺𑀢𑀸 𑀫𑀘𑁆𑀘𑀼𑀫𑀼𑀧𑀩𑁆𑀩𑀚𑀦𑁆𑀢𑀻’’𑀢𑀺 𑀧𑀸𑀴𑀺𑀬𑀁 ‘‘𑀅𑀯𑀺𑀢𑀓𑁆𑀓𑀺𑀢𑀸’’𑀢𑀺 𑀧𑀞𑀫𑀸𑀩𑀳𑀼𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀲𑀢𑁆𑀣𑀸’’𑀢𑀺 𑀧𑀤𑀲𑁆𑀲 𑀧𑀞𑀫𑀸𑀩𑀳𑀼𑀯𑀘𑀦𑀢𑁆𑀢𑀁 𑀅𑀯𑀲𑁆𑀲𑀫𑀺𑀘𑁆𑀙𑀺𑀢𑀩𑁆𑀩𑀁. 𑀢𑀣𑀸 𑀯𑀢𑁆𑀢𑀸, 𑀥𑀸𑀢𑀸, 𑀕𑀦𑁆𑀢𑀸𑀤𑀻𑀦𑀫𑁆𑀧𑀺 𑀢𑀕𑁆𑀕𑀢𑀺𑀓𑀢𑁆𑀢𑀸. 𑀢𑀣𑀸 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 ‘‘𑀲𑀢𑁆𑀣𑀸𑀭𑁂’’𑀢𑀺 𑀤𑀼𑀢𑀺𑀬𑀸𑀩𑀳𑀼𑀯𑀘𑀦𑀜𑁆𑀘 ‘‘𑀲𑀢𑁆𑀣𑀼𑀲𑁆𑀲, 𑀲𑀢𑁆𑀣𑀸𑀦’’𑀦𑁆𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀘 𑀆𑀕𑀢𑀸𑀦𑀺, 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 𑀦 𑀆𑀕𑀢𑀸𑀦𑀺. 𑀢𑀢𑁆𑀣 ‘‘𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀢𑀺. 𑀪𑀸𑀢𑀭𑁄 𑀅𑀢𑀺𑀓𑁆𑀓𑀫𑀢𑀻’’𑀢𑀺 𑀤𑀲𑁆𑀲𑀦𑀢𑁄 ‘‘𑀲𑀢𑁆𑀣𑀸𑀭𑁂’’𑀢𑀺 𑀤𑀼𑀢𑀺𑀬𑀸𑀩𑀳𑀼𑀯𑀘𑀦𑀭𑀽𑀧𑀁 𑀅𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀓𑀘𑁆𑀘𑀸𑀬𑀦𑀸𑀤𑀻𑀲𑀼 ‘‘𑀪𑁄 𑀲𑀢𑁆𑀣, 𑀪𑁄 𑀲𑀢𑁆𑀣𑀸’’ 𑀇𑀢𑀺 𑀭𑀲𑁆𑀲𑀤𑀻𑀖𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 ‘‘𑀪𑁄 𑀲𑀢𑁆𑀣’’ 𑀇𑀢𑀺𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀯𑀢𑁆𑀯𑀸 ‘‘𑀪𑀯𑀦𑁆𑀢𑁄 𑀲𑀢𑁆𑀣𑀸𑀭𑁄’’𑀢𑀺 𑀆𑀭𑀸𑀤𑁂𑀲𑀯𑀲𑁂𑀦 𑀆𑀮𑀧𑀦𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 ‘‘𑀪𑁄 𑀲𑀢𑁆𑀣’’ 𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀯𑀢𑁆𑀯𑀸 ‘‘𑀪𑁄 𑀲𑀢𑁆𑀣𑀸’’ 𑀇𑀢𑀺 𑀤𑀻𑀖𑀯𑀲𑁂𑀦 𑀆𑀮𑀧𑀦𑀩𑀳𑀼𑀯𑀘𑀦𑀁 𑀮𑀧𑀺𑀢𑀁. 𑀲𑀩𑁆𑀩𑀫𑁂𑀢𑀁 𑀆𑀕𑀫𑁂 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁.

𑀇𑀤𑀸𑀦𑀺 𑀲𑀢𑁆𑀣𑀼𑀲𑀤𑁆𑀤𑀲𑁆𑀲 𑀬𑀁 𑀭𑀽𑀧𑀦𑁆𑀢𑀭𑀁 𑀅𑀫𑁆𑀳𑁂𑀳𑀺 𑀤𑀺𑀝𑁆𑀞𑀁, 𑀢𑀁 𑀤𑀲𑁆𑀲𑁂𑀲𑁆𑀲𑀸𑀫 𑁋 𑀢𑀣𑀸 𑀳𑀺 ‘‘𑀇𑀫𑁂𑀲𑀁 𑀫𑀳𑀸𑀦𑀸𑀫 𑀢𑀺𑀡𑁆𑀡𑀁 𑀲𑀢𑁆𑀣𑀽𑀦𑀁 𑀏𑀓𑀸 𑀦𑀺𑀝𑁆𑀞𑀸 𑀉𑀤𑀸𑀳𑀼 𑀧𑀼𑀣𑀼 𑀦𑀺𑀝𑁆𑀞𑀸’’𑀢𑀺 𑀧𑀸𑀴𑀺𑀬𑀁 ‘‘𑀲𑀢𑁆𑀣𑀽𑀦’’𑀦𑁆𑀢𑀺 𑀧𑀤𑀁 𑀤𑀺𑀝𑁆𑀞𑀁, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀲𑀢𑁆𑀣𑀼, 𑀲𑀢𑁆𑀣𑀼𑀲𑁆𑀲, 𑀲𑀢𑁆𑀣𑀼𑀦𑁄, 𑀲𑀢𑁆𑀣𑀸𑀦𑀁, 𑀲𑀢𑁆𑀣𑀸𑀭𑀸𑀦𑀁, 𑀲𑀢𑁆𑀣𑀽𑀦’’𑀦𑁆𑀢𑀺. 𑀅𑀪𑀺𑀪𑀯𑀺𑀢𑀸, 𑀅𑀪𑀺𑀪𑀯𑀺𑀢𑀸, 𑀅𑀪𑀺𑀪𑀯𑀺𑀢𑀸𑀭𑁄. 𑀅𑀪𑀺𑀪𑀯𑀺𑀢𑀸𑀭𑀁, 𑀅𑀪𑀺𑀪𑀯𑀺𑀢𑀸𑀭𑁄. 𑀅𑀪𑀺𑀪𑀯𑀺𑀢𑀸𑀭𑀸, 𑀅𑀪𑀺𑀪𑀯𑀺𑀢𑀼𑀦𑀸, 𑀅𑀪𑀺𑀪𑀯𑀺𑀢𑀸𑀭𑁂𑀳𑀺, 𑀅𑀪𑀺𑀪𑀯𑀺𑀢𑀸𑀭𑁂𑀪𑀺. 𑀅𑀪𑀺𑀪𑀯𑀺𑀢𑀼, 𑀅𑀪𑀺𑀪𑀯𑀺𑀢𑀼𑀲𑁆𑀲, 𑀅𑀪𑀺𑀪𑀯𑀺𑀢𑀼𑀦𑁄, 𑀅𑀪𑀺𑀪𑀯𑀺𑀢𑀸𑀦𑀁, 𑀅𑀪𑀺𑀪𑀯𑀺𑀢𑀸𑀭𑀸𑀦𑀁, 𑀅𑀪𑀺𑀪𑀯𑀺𑀢𑀽𑀦𑀁. 𑀅𑀪𑀺𑀪𑀯𑀺𑀢𑀸𑀭𑀸, 𑀅𑀪𑀺𑀪𑀯𑀺𑀢𑀸𑀭𑁂𑀳𑀺, 𑀅𑀪𑀺𑀪𑀯𑀺𑀢𑀸𑀭𑁂𑀪𑀺. 𑀅𑀪𑀺𑀪𑀯𑀺𑀢𑀼, 𑀅𑀪𑀺𑀪𑀯𑀺𑀢𑀼𑀲𑁆𑀲, 𑀅𑀪𑀺𑀪𑀯𑀺𑀢𑀼𑀦𑁄, 𑀅𑀪𑀺𑀪𑀯𑀺𑀢𑀸𑀦𑀁, 𑀅𑀪𑀺𑀪𑀯𑀺𑀢𑀸𑀭𑀸𑀦𑀁. 𑀅𑀪𑀺𑀪𑀯𑀺𑀢𑀭𑀺, 𑀅𑀪𑀺𑀪𑀯𑀺𑀢𑀸𑀭𑁂𑀲𑀼. 𑀪𑁄 𑀅𑀪𑀺𑀪𑀯𑀺𑀢, 𑀪𑁄 𑀅𑀪𑀺𑀪𑀯𑀺𑀢𑀸, 𑀪𑀯𑀦𑁆𑀢𑁄 𑀅𑀪𑀺𑀪𑀯𑀺𑀢𑀸𑀭𑁄. 𑀬𑀣𑀸 𑀧𑀦𑁂𑀢𑁆𑀣 𑀅𑀪𑀺𑀪𑀯𑀺𑀢𑀼 𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀢𑁆𑀣𑀼𑀦𑀬𑁂𑀦 𑀬𑁄𑀚𑀺𑀢𑀸, 𑀏𑀯𑀁 𑀧𑀭𑀺𑀪𑀯𑀺𑀢𑀼𑀆𑀤𑀻𑀦𑀜𑁆𑀘 𑀅𑀜𑁆𑀜𑁂𑀲𑀜𑁆𑀘 𑀢𑀁𑀲𑀤𑀺𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀢𑁆𑀣𑀼𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀏𑀢𑁆𑀣𑀜𑁆𑀜𑀸𑀦𑀺 𑀢𑀁𑀲𑀤𑀺𑀲𑀸𑀦𑀺 𑀦𑀸𑀫 ‘‘𑀯𑀢𑁆𑀢𑀸, 𑀥𑀸𑀢𑀸’’𑀇𑀘𑁆𑀘𑀸𑀤𑀻𑀦𑀁 𑀧𑀤𑀸𑀦𑀁 𑀯𑀢𑁆𑀢𑀼𑀥𑀸𑀢𑀼 𑀇𑀘𑁆𑀘𑀸𑀤𑀻𑀦𑀺 𑀧𑀓𑀢𑀺𑀭𑀽𑀧𑀸𑀦𑀺.

𑀯𑀢𑁆𑀢𑀸 𑀥𑀸𑀢𑀸 𑀕𑀦𑁆𑀢𑀸 𑀦𑁂𑀢𑀸,

𑀤𑀸𑀢𑀸 𑀓𑀢𑁆𑀢𑀸 𑀘𑁂𑀢𑀸 𑀢𑀸𑀢𑀸;

𑀙𑁂𑀢𑁆𑀢𑀸 𑀪𑁂𑀢𑁆𑀢𑀸 𑀳𑀦𑁆𑀢𑀸 𑀫𑁂𑀢𑀸,

𑀚𑁂𑀢𑀸 𑀩𑁄𑀤𑁆𑀥𑀸 𑀜𑀸𑀢𑀸 𑀲𑁄𑀢𑀸.

𑀕𑀚𑁆𑀚𑀺𑀢𑀸 𑀯𑀲𑁆𑀲𑀺𑀢𑀸 𑀪𑀢𑁆𑀢𑀸, 𑀫𑀼𑀘𑁆𑀙𑀺𑀢𑀸 𑀧𑀝𑀺𑀲𑁂𑀥𑀺𑀢𑀸;

𑀪𑀸𑀲𑀺𑀢𑀸 𑀧𑀼𑀘𑁆𑀙𑀺𑀢𑀸 𑀔𑀦𑁆𑀢𑀸, 𑀉𑀝𑁆𑀞𑀸𑀢𑁄𑀓𑁆𑀓𑀫𑀺𑀢𑀸 𑀢𑀢𑀸.

𑀦𑀢𑁆𑀢𑀸 𑀧𑀦𑀢𑁆𑀢𑀸 𑀅𑀓𑁆𑀔𑀸𑀢𑀸, 𑀲𑀳𑀺𑀢𑀸 𑀧𑀝𑀺𑀲𑁂𑀯𑀺𑀢𑀸;

𑀦𑁂𑀢𑀸 𑀯𑀺𑀦𑁂𑀢𑀸 𑀇𑀘𑁆𑀘𑀸𑀤𑀻, 𑀯𑀢𑁆𑀢𑀭𑁂 𑀲𑀼𑀤𑁆𑀥𑀓𑀢𑁆𑀢𑀭𑀺.

𑀉𑀧𑁆𑀧𑀸𑀤𑁂𑀢𑀸 𑀯𑀺𑀜𑁆𑀜𑀸𑀧𑁂𑀢𑀸, 𑀲𑀦𑁆𑀤𑀲𑁆𑀲𑁂𑀢𑀸 𑀧𑀩𑁆𑀭𑀽𑀳𑁂𑀢𑀸;

𑀩𑁄𑀥𑁂𑀢𑀸𑀤𑀻 𑀘𑀜𑁆𑀜𑁂 𑀲𑀤𑁆𑀤𑀸, 𑀜𑁂𑀬𑁆𑀬𑀸 𑀳𑁂𑀢𑀼𑀲𑁆𑀫𑀺𑀁 𑀅𑀢𑁆𑀣𑀲𑁆𑀫𑀺𑀁.

𑀓𑀢𑁆𑀢𑀸 𑀔𑀢𑁆𑀢𑀸 𑀦𑁂𑀢𑁆𑀢𑀸 𑀪𑀢𑁆𑀢𑀸, 𑀧𑀺𑀢𑀸 𑀪𑀸𑀢𑀸𑀢𑀺𑀫𑁂 𑀧𑀦;

𑀓𑀺𑀜𑁆𑀘𑀺 𑀪𑀺𑀚𑁆𑀚𑀦𑁆𑀢𑀺 𑀲𑀼𑀢𑁆𑀢𑀲𑁆𑀫𑀺𑀁, 𑀢𑀁 𑀧𑀪𑁂𑀤𑀁 𑀓𑀣𑁂𑀲𑁆𑀲𑀳𑀁.

𑀲𑀢𑁆𑀣𑀸𑀢𑀺𑀆𑀤𑀻𑀲𑀼 𑀓𑁂𑀘𑀺, 𑀉𑀧𑀬𑁄𑀕𑁂𑀦 𑀲𑀸𑀫𑀺𑀦𑀸;

𑀲𑀳𑁂𑀯 𑀦𑀺𑀘𑁆𑀘𑀁 𑀯𑀢𑁆𑀢𑀦𑁆𑀢𑀺, 𑀦𑁂𑀯 𑀯𑀢𑁆𑀢𑀦𑁆𑀢𑀺 𑀓𑁂𑀘𑀺 𑀢𑀼.

𑀢𑀢𑁆𑀭 𑀓𑀢𑁆𑀢𑀼𑀲𑀤𑁆𑀤𑀸𑀤𑀬𑁄 𑀭𑀽𑀧𑀦𑁆𑀢𑀭𑀯𑀲𑁂𑀦 𑀲𑀢𑁆𑀣𑀼𑀲𑀤𑁆𑀤𑀢𑁄 𑀓𑀺𑀜𑁆𑀘𑀺 𑀪𑀺𑀚𑁆𑀚𑀦𑁆𑀢𑀺. 𑀢𑀣𑀸 𑀳𑀺 ‘‘𑀉𑀝𑁆𑀞𑁂𑀳𑀺 𑀓𑀢𑁆𑀢𑁂 𑀢𑀭𑀫𑀸𑀦𑁄, 𑀕𑀦𑁆𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀁𑀯𑀤𑀸’’𑀢𑀺 𑀏𑀢𑁆𑀣 ‘‘𑀓𑀢𑁆𑀢𑁂’’𑀢𑀺 𑀇𑀤𑀁 𑀆𑀮𑀧𑀦𑁂𑀓𑀯𑀘𑀦𑀭𑀽𑀧𑀁, 𑀏𑀯𑀜𑁆𑀳𑀺 ‘‘𑀪𑁄 𑀓𑀢𑁆𑀢𑀸’’𑀢𑀺 𑀭𑀽𑀧𑀢𑁄 𑀭𑀽𑀧𑀦𑁆𑀢𑀭𑀁 𑀦𑀸𑀫. ‘‘𑀢𑁂𑀦 𑀳𑀺 𑀪𑁄 𑀔𑀢𑁆𑀢𑁂 𑀬𑁂𑀦 𑀘𑀫𑁆𑀧𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀸’’𑀢𑀺 𑀏𑀢𑁆𑀣 ‘‘𑀔𑀢𑁆𑀢𑁂’’𑀢𑀺 𑀇𑀤𑀜𑁆𑀘𑀸𑀮𑀧𑀦𑁂𑀓𑀯𑀘𑀦𑀭𑀽𑀧𑀁. 𑀏𑀯𑀫𑁆𑀧𑀺 ‘‘𑀪𑁄 𑀔𑀢𑁆𑀢𑀸’’𑀢𑀺 𑀭𑀽𑀧𑀢𑁄 𑀭𑀽𑀧𑀦𑁆𑀢𑀭𑀁 𑀦𑀸𑀫. ‘‘𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀻’’𑀢𑀺 𑀏𑀢𑁆𑀣 ‘‘𑀦𑁂𑀢𑁆𑀢𑁂’’𑀢𑀺 𑀇𑀤𑀁 𑀲𑀢𑁆𑀢𑀫𑀺𑀬𑀸 𑀏𑀓𑀯𑀘𑀦𑀭𑀽𑀧𑀁, 𑀏𑀢𑀫𑁆𑀧𑀺 ‘‘𑀦𑁂𑀢𑁆𑀢𑀭𑀻’’𑀢𑀺 𑀭𑀽𑀧𑀢𑁄 𑀭𑀽𑀧𑀦𑁆𑀢𑀭𑀁. ‘‘𑀆𑀭𑀸𑀥𑀬𑀢𑀺 𑀭𑀸𑀚𑀸𑀦𑀁, 𑀧𑀽𑀚𑀁 𑀮𑀪𑀢𑀺 𑀪𑀢𑁆𑀢𑀼𑀲𑀽’’𑀢𑀺 𑀏𑀢𑁆𑀣 ‘‘𑀪𑀢𑁆𑀢𑀽𑀲𑀽’’𑀢𑀺 𑀇𑀤𑀁 𑀲𑀢𑁆𑀢𑀫𑀺𑀬𑀸 𑀩𑀳𑀼𑀯𑀘𑀦𑀭𑀽𑀧𑀁. ‘‘𑀪𑀢𑁆𑀢𑀸𑀭𑁂𑀲𑀽’’𑀢𑀺 𑀭𑀽𑀧𑀢𑁄 𑀭𑀽𑀧𑀦𑁆𑀢𑀭𑀁, 𑀅𑀢𑁆𑀭 ‘‘𑀪𑀢𑁆𑀢𑀽𑀲𑀽’’𑀢𑀺 𑀤𑀲𑁆𑀲𑀦𑀢𑁄, ‘‘𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸’’𑀢𑀺 𑀏𑀢𑁆𑀣 ‘‘𑀧𑀺𑀢𑀽𑀲𑀽’’𑀢𑀺 𑀤𑀲𑁆𑀲𑀦𑀢𑁄 𑀘 ‘‘𑀯𑀢𑁆𑀢𑀽𑀲𑀼 𑀥𑀸𑀢𑀽𑀲𑀼 𑀕𑀦𑁆𑀢𑀽𑀲𑀼 𑀦𑁂𑀢𑀽𑀲𑀼 𑀤𑀸𑀢𑀽𑀲𑀼 𑀓𑀢𑁆𑀢𑀽𑀲𑀽’’𑀢𑀺 𑀏𑀯𑀫𑀸𑀤𑀺𑀦𑀬𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀅𑀬𑀁 𑀦𑀬𑁄 𑀲𑀢𑁆𑀣𑀼𑀲𑀤𑁆𑀤𑁂𑀧𑀺 𑀇𑀘𑁆𑀙𑀺𑀢𑀩𑁆𑀩𑁄 𑀯𑀺𑀬 𑀅𑀫𑁆𑀳𑁂 𑀧𑀝𑀺𑀪𑀸𑀢𑀺.

𑀧𑀺𑀢𑀸, 𑀧𑀺𑀢𑀸, 𑀧𑀺𑀢𑀭𑁄. 𑀧𑀺𑀢𑀭𑀁, 𑀧𑀺𑀢𑀭𑁄. 𑀧𑀺𑀢𑀭𑀸, 𑀧𑀺𑀢𑀼𑀦𑀸, 𑀧𑁂𑀢𑁆𑀬𑀸, 𑀧𑀺𑀢𑀭𑁂𑀳𑀺, 𑀧𑀺𑀢𑀭𑁂𑀪𑀺, 𑀧𑀺𑀢𑀽𑀳𑀺, 𑀧𑀺𑀢𑀽𑀪𑀺. 𑀧𑀺𑀢𑀼, 𑀧𑀺𑀢𑀼𑀲𑁆𑀲, 𑀧𑀺𑀢𑀼𑀦𑁄, 𑀧𑀺𑀢𑀸𑀦𑀁, 𑀧𑀺𑀢𑀭𑀸𑀦𑀁, 𑀧𑀺𑀢𑀽𑀦𑀁. 𑀧𑀺𑀢𑀭𑀸, 𑀧𑁂𑀢𑁆𑀬𑀸, 𑀧𑀺𑀢𑀭𑁂𑀳𑀺, 𑀧𑀺𑀢𑀭𑁂𑀪𑀺, 𑀧𑀺𑀢𑀽𑀳𑀺, 𑀧𑀺𑀢𑀽𑀪𑀺. 𑀧𑀺𑀢𑀼, 𑀧𑀺𑀢𑀼𑀲𑁆𑀲, 𑀧𑀺𑀢𑀼𑀦𑁄, 𑀧𑀺𑀢𑀸𑀦𑀁, 𑀧𑀺𑀢𑀭𑀸𑀦𑀁, 𑀧𑀺𑀢𑀽𑀦𑀁. 𑀧𑀺𑀢𑀭𑀺, 𑀧𑀺𑀢𑀭𑁂𑀲𑀼, 𑀧𑀺𑀢𑀽𑀲𑀼. 𑀪𑁄 𑀧𑀺𑀢, 𑀪𑁄 𑀧𑀺𑀢𑀸, 𑀪𑀯𑀦𑁆𑀢𑁄 𑀧𑀺𑀢𑀭𑁄. 𑀏𑀢𑁆𑀣 𑀧𑀦 ‘‘𑀧𑁂𑀢𑁆𑀬𑀸, 𑀧𑀺𑀢𑀽𑀦’’𑀦𑁆𑀢𑀺 𑀇𑀫𑀁 𑀦𑀬𑀤𑁆𑀯𑀬𑀁 𑀯𑀚𑁆𑀚𑁂𑀢𑁆𑀯𑀸 𑀪𑀸𑀢𑀼𑀲𑀤𑁆𑀤𑀲𑁆𑀲 𑀘 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀢𑀢𑁆𑀣 ‘‘𑀫𑀢𑁆𑀬𑀸 𑀘 𑀧𑁂𑀢𑁆𑀬𑀸 𑀘 𑀓𑀢𑀁 𑀲𑀼𑀲𑀸𑀥𑀼, 𑀅𑀦𑀼𑀜𑁆𑀜𑀸𑀢𑁄𑀲𑀺 𑀫𑀸𑀢𑀸𑀧𑀺𑀢𑀽𑀳𑀺, 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦𑀸’’𑀢𑀺 𑀘 𑀤𑀲𑁆𑀲𑀦𑀢𑁄 𑀧𑀺𑀢𑀼𑀲𑀤𑁆𑀤𑀲𑁆𑀲 ‘‘𑀧𑁂𑀢𑁆𑀬𑀸, 𑀧𑀺𑀢𑀽𑀳𑀺, 𑀧𑀺𑀢𑀽𑀪𑀺. 𑀧𑀺𑀢𑀽𑀦’’𑀦𑁆𑀢𑀺 𑀭𑀽𑀧𑀪𑁂𑀤𑁄 𑀘, ‘‘𑀧𑀺𑀢𑀭𑁄’’ 𑀇𑀘𑁆𑀘𑀸𑀤𑀻𑀲𑀼 𑀭𑀲𑁆𑀲𑀢𑁆𑀢𑀜𑁆𑀘 𑀲𑀢𑁆𑀣𑀼𑀲𑀤𑁆𑀤𑀢𑁄 𑀯𑀺𑀲𑁂𑀲𑁄. 𑀢𑀢𑁆𑀣 𑀘 ‘‘𑀧𑁂𑀢𑁆𑀬𑀸’’𑀢𑀺 𑀇𑀤𑀁 ‘‘𑀚𑀦𑁆𑀢𑀼𑀬𑁄, 𑀳𑁂𑀢𑀼𑀬𑁄, 𑀳𑁂𑀢𑀼𑀬𑀸, 𑀅𑀥𑀺𑀧𑀢𑀺𑀬𑀸’’𑀢𑀺 𑀧𑀤𑀸𑀦𑀺 𑀯𑀺𑀬 𑀅𑀘𑀺𑀦𑁆𑀢𑁂𑀬𑁆𑀬𑀁 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀘𑁄𑀤𑀦𑀸 𑀲𑁄𑀥𑀦𑀸 𑀘𑀸𑀢𑁆𑀭 𑀪𑀯𑀢𑀺 𑁋 𑀲𑀢𑁆𑀣𑀸 𑀧𑀺𑀢𑀸 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀦𑀺𑀧𑁆𑀨𑀦𑁆𑀦𑀢𑁆𑀢𑀫𑀼𑀧𑀸𑀤𑀸𑀬 𑀆𑀓𑀸𑀭𑀦𑁆𑀢𑀸𑀦𑀻𑀢𑀺 𑀘, 𑀧𑀞𑀫𑀁 𑀞𑀧𑁂𑀢𑀩𑁆𑀩𑀁 𑀧𑀓𑀢𑀺𑀭𑀽𑀧𑀫𑀼𑀧𑀸𑀤𑀸𑀬 𑀉𑀓𑀸𑀭𑀦𑁆𑀢𑀸𑀦𑀻𑀢𑀺 𑀘 𑀢𑀼𑀫𑁆𑀳𑁂 𑀪𑀡𑀣, ‘‘𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁. 𑀅𑀫𑀸𑀢𑀸𑀧𑀺𑀢𑀭𑀲𑀁𑀯𑀟𑁆𑀠𑁄. 𑀓𑀢𑁆𑀢𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺𑀆𑀤𑀻𑀲𑀼 𑀧𑀦 𑀲𑀢𑁆𑀣𑀸𑀭 𑀇𑀘𑁆𑀘𑀸𑀤𑀻𑀦𑀺 𑀓𑀣𑀁 𑀢𑀼𑀫𑁆𑀳𑁂 𑀪𑀡𑀣𑀸𑀢𑀺? 𑀏𑀢𑀸𑀦𑀺𑀧𑀺 𑀫𑀬𑀁 𑀧𑀓𑀢𑀺𑀭𑀽𑀧𑀫𑀼𑀧𑀸𑀤𑀸𑀬 𑀉𑀓𑀸𑀭𑀦𑁆𑀢𑀸𑀦𑀻𑀢𑀺 𑀪𑀡𑀸𑀫𑀸𑀢𑀺. 𑀦𑀦𑀼 𑀘 𑀪𑁄 𑀏𑀢𑀸𑀦𑀺 𑀅𑀓𑀸𑀭𑀦𑁆𑀢𑀸𑀦𑀻𑀢𑀺? 𑀦, 𑀉𑀓𑀸𑀭𑀦𑁆𑀢𑀸𑀦𑀺𑀬𑁂𑀯 𑀢𑀸𑀦𑀺. 𑀦𑀦𑀼 𑀘 𑀪𑁄 𑀬𑁄 𑀅𑀁 𑀦𑀸𑀤𑀻𑀦𑀺 𑀧𑀭𑀪𑀽𑀢𑀸𑀦𑀺 𑀯𑀘𑀦𑀸𑀦𑀺 𑀦 𑀤𑀺𑀲𑁆𑀲𑀦𑁆𑀢𑀺 𑀬𑁂𑀳𑀺 𑀉𑀓𑀸𑀭𑀦𑁆𑀢𑀲𑀤𑁆𑀤𑀸𑀦𑀫𑀦𑁆𑀢𑀲𑁆𑀲 𑀆𑀭𑀸𑀤𑁂𑀲𑁄 𑀲𑀺𑀬𑀸, 𑀢𑀲𑁆𑀫𑀸 𑀅𑀓𑀸𑀭𑀦𑁆𑀢𑀸𑀦𑀻𑀢𑀺? 𑀦, 𑀈𑀤𑀺𑀲𑁂 𑀞𑀸𑀦𑁂 𑀧𑀭𑀪𑀽𑀢𑀸𑀦𑀁 𑀬𑁄 𑀅𑀁 𑀦𑀸𑀤𑀻𑀦𑀁 𑀯𑀘𑀦𑀸𑀦𑀫𑀦𑁄𑀓𑀸𑀲𑀢𑁆𑀢𑀸. 𑀢𑀣𑀸 𑀳𑀺 𑀲𑀫𑀸𑀲𑀯𑀺𑀲𑀬𑁄 𑀏𑀲𑁄. 𑀲𑀫𑀸𑀲𑀯𑀺𑀲𑀬𑀲𑁆𑀫𑀺𑀜𑁆𑀳𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺𑀧𑀺 𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀪𑁄 ‘‘𑀕𑀸𑀫𑀢𑁄 𑀦𑀺𑀓𑁆𑀔𑀫𑀢𑀻’’𑀢𑀺 𑀧𑀬𑁄𑀕𑀲𑁆𑀲 𑀯𑀺𑀬 𑀅𑀲𑀫𑀸𑀲𑀯𑀺𑀲𑀬𑁂 ‘‘𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀁 𑀕𑀘𑁆𑀙𑀢𑀻’’𑀢𑀺 𑀦𑀺𑀤𑁆𑀤𑁂𑀲𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀢𑁆𑀣𑀸𑀭 𑀇𑀘𑁆𑀘𑀸𑀤𑀻𑀦𑀺 𑀅𑀓𑀸𑀭𑀦𑁆𑀢𑀸𑀦𑀻𑀢𑀺 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀻𑀢𑀺? 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺 ‘‘𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀁 𑀕𑀘𑁆𑀙𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀉𑀓𑀸𑀭𑀦𑁆𑀢𑀢𑁆𑀢𑀸. 𑀏𑀢𑁆𑀣 𑀳𑀺 𑀅𑀲𑀫𑀸𑀲𑀢𑁆𑀢𑁂𑀧𑀺 𑀢𑁄𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀲𑀢𑁆𑀣𑀼𑀲𑀤𑁆𑀤𑀲𑁆𑀲 𑀉𑀓𑀸𑀭𑁄 𑀆𑀭𑀸𑀤𑁂𑀲𑀁 𑀮𑀪𑀢𑀺. 𑀬𑀸𑀦𑀺 𑀧𑀦 𑀢𑀼𑀫𑁆𑀳𑁂 𑀉𑀓𑀸𑀭𑀲𑁆𑀲 𑀆𑀭𑀸𑀤𑁂𑀲𑀦𑀺𑀫𑀺𑀢𑁆𑀢𑀸𑀦𑀺 𑀬𑁄 𑀅𑀁𑀦𑀸𑀤𑀻𑀦𑀺 𑀯𑀘𑀦𑀸𑀦𑀺 𑀇𑀘𑁆𑀙𑀣, 𑀢𑀸𑀦𑀺 𑀈𑀤𑀺𑀲𑁂 𑀞𑀸𑀦𑁂 𑀯𑀺𑀜𑁆𑀜𑀽𑀦𑀁 𑀧𑀫𑀸𑀡𑀁 𑀦 𑀳𑁄𑀦𑁆𑀢𑀺. 𑀓𑀸𑀦𑀺 𑀧𑀦 𑀳𑁄𑀦𑁆𑀢𑀻𑀢𑀺 𑀘𑁂? 𑀅𑀲𑀫𑀸𑀲𑀯𑀺𑀲𑀬𑁂 𑀢𑁄𑀧𑀘𑁆𑀘𑀬𑁄 𑀘 𑀲𑀫𑀸𑀲𑀯𑀺𑀲𑀬𑁂 𑀧𑀭𑀧𑀤𑀸𑀦𑀺 𑀘 𑀧𑀭𑀧𑀤𑀸𑀪𑀸𑀯𑁂 𑀲𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀬𑁄 𑀘𑀸𑀢𑀺 𑀇𑀫𑀸𑀦𑁂𑀯 𑀈𑀤𑀺𑀲𑁂 𑀞𑀸𑀦𑁂 𑀏𑀓𑀦𑁆𑀢𑁂𑀦 𑀧𑀫𑀸𑀡𑀁 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 ‘‘𑀬𑀸𑀯𑀤𑁂𑀯 𑀅𑀦𑀢𑁆𑀣𑀸𑀬, 𑀜𑀢𑁆𑀢𑀁 𑀩𑀸𑀮𑀲𑁆𑀲 𑀚𑀸𑀬𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬𑀁 ‘‘𑀅𑀬𑀁 𑀦𑀺𑀫𑁆𑀫𑀸𑀢𑀸𑀧𑀺𑀢𑀭𑁄𑀢𑀺 𑀇𑀫𑀲𑁆𑀫𑀺𑀁 𑀧𑀳𑀝𑁂 𑀤𑀡𑁆𑀟𑁄 𑀦𑀢𑁆𑀣𑀻’’𑀢𑀺 𑀏𑀢𑁆𑀣 𑀦𑀺𑀫𑁆𑀫𑀸𑀢𑀸𑀧𑀺𑀢𑀭𑁄𑀢𑀺 𑀇𑀫𑀲𑁆𑀲 𑀲𑀫𑀸𑀲𑀯𑀺𑀲𑀬𑀢𑁆𑀢𑀸 𑀲𑀺𑀫𑁆𑀳𑀺 𑀧𑀭𑁂 𑀉𑀓𑀸𑀭𑁄 𑀆𑀭𑀸𑀤𑁂𑀲𑀁 𑀮𑀪𑀢𑀺, 𑀢𑀢𑁄 𑀲𑀺𑀲𑁆𑀲 𑀑𑀓𑀸𑀭𑀸𑀤𑁂𑀲𑁄, 𑀇𑀘𑁆𑀘𑁂𑀢𑀁 𑀧𑀤𑀁 𑀧𑀓𑀢𑀺𑀭𑀽𑀧𑀯𑀲𑁂𑀦 𑀉𑀓𑀸𑀭𑀦𑁆𑀢𑀁 𑀪𑀯𑀢𑀺. 𑀦𑀺𑀧𑁆𑀨𑀦𑁆𑀦𑀢𑁆𑀢𑀫𑀼𑀧𑀸𑀤𑀸𑀬 ‘‘𑀧𑀼𑀭𑀺𑀲𑁄, 𑀉𑀭𑀕𑁄’’𑀢𑀺 𑀧𑀤𑀸𑀦𑀺 𑀯𑀺𑀬 𑀑𑀓𑀸𑀭𑀦𑁆𑀢𑀜𑁆𑀘 𑀪𑀯𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀫𑀸𑀲𑀯𑀺𑀕𑁆𑀕𑀳𑁄 ‘‘𑀫𑀸𑀢𑀸 𑀘 𑀧𑀺𑀢𑀸 𑀘 𑀫𑀸𑀢𑀸𑀧𑀺𑀢𑀭𑁄, 𑀦𑀢𑁆𑀣𑀺 𑀫𑀸𑀢𑀸𑀧𑀺𑀢𑀭𑁄 𑀏𑀢𑀲𑁆𑀲𑀸𑀢𑀺 𑀦𑀺𑀫𑁆𑀫𑀸𑀢𑀸𑀧𑀺𑀢𑀭𑁄’’𑀢𑀺. 𑀧𑀓𑀢𑀺𑀭𑀽𑀧𑀯𑀲𑁂𑀦 𑀳𑀺 ‘‘𑀦𑀺𑀫𑁆𑀫𑀸𑀢𑀸𑀧𑀺𑀢𑀼’’ 𑀇𑀢𑀺 𑀞𑀺𑀢𑁂 𑀲𑀺𑀯𑀘𑀦𑀲𑁆𑀫𑀺𑀁 𑀧𑀭𑁂 𑀉𑀓𑀸𑀭𑀲𑁆𑀲 𑀆𑀭𑀸𑀤𑁂𑀲𑁄 𑀳𑁄𑀢𑀺. 𑀓𑀢𑁆𑀣𑀘𑀺 𑀧𑀦 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂 ‘‘𑀅𑀬𑀁 𑀦𑀺𑀫𑁆𑀫𑀸𑀢𑀸𑀧𑀺𑀢𑀺𑀓𑁄’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀏𑀲𑁄 𑀧𑀦 ‘‘𑀅𑀬𑀁 𑀦𑀺𑀫𑁆𑀫𑀸𑀢𑀸𑀧𑀺𑀢𑀭𑁄’’𑀢𑀺 𑀧𑀤𑀲𑁆𑀲 𑀅𑀬𑀼𑀢𑁆𑀢𑀢𑀁 𑀫𑀜𑁆𑀜𑀫𑀸𑀦𑁂𑀳𑀺 𑀞𑀧𑀺𑀢𑁄𑀢𑀺 𑀫𑀜𑁆𑀜𑀸𑀫, 𑀦 𑀲𑁄 𑀅𑀬𑀼𑀢𑁆𑀢𑁄 𑀅𑀝𑁆𑀞𑀓𑀣𑀸𑀧𑀸𑀞𑁄. 𑀲𑁄 𑀳𑀺 𑀉𑀫𑀗𑁆𑀕𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀏𑀓𑀧𑀺𑀢𑀭𑁄𑀢𑀺 𑀲𑀺𑀫𑁆𑀳𑀺 𑀆𑀭𑀸𑀤𑁂𑀲𑀧𑀬𑁄𑀕𑁂𑀦 𑀲𑀫𑁂𑀢𑀺. 𑀢𑀣𑀸 𑀳𑀺 𑁋

‘‘𑀬𑀣𑀸𑀧𑀺 𑀦𑀺𑀬𑀓𑁄 𑀪𑀸𑀢𑀸,

𑀲𑀉𑀤𑀭𑀺𑀬𑁄 𑀏𑀓𑀫𑀸𑀢𑀼𑀓𑁄;

𑀏𑀯𑀁 𑀧𑀜𑁆𑀘𑀸𑀮𑀘𑀦𑁆𑀤𑁄 𑀢𑁂,

𑀤𑀬𑀺𑀢𑀩𑁆𑀩𑁄 𑀭𑀣𑁂𑀲𑀪𑀸’’𑀢𑀺

𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀦𑁆𑀢𑁂𑀳𑀺 𑀧𑀸𑀴𑀺𑀦𑀬𑀜𑁆𑀜𑀽𑀳𑀺 𑀕𑀭𑀽𑀳𑀺 ‘‘𑀦𑀺𑀬𑀓𑁄𑀢𑀺 𑀅𑀚𑁆𑀛𑀢𑁆𑀢𑀺𑀓𑁄 𑀏𑀓𑀧𑀺𑀢𑀭𑁄 𑀏𑀓𑀫𑀸𑀢𑀼𑀬𑀸 𑀚𑀸𑀢𑁄’’𑀢𑀺 𑀲𑀺𑀫𑁆𑀳𑀺 𑀆𑀭𑀸𑀤𑁂𑀲𑀧𑀬𑁄𑀕𑀭𑀘𑀦𑀸 𑀓𑀢𑀸. 𑀦 𑀓𑁂𑀯𑀮𑀜𑁆𑀘 𑀲𑀺𑀫𑁆𑀳𑀺 𑀆𑀭𑀸𑀤𑁂𑀲𑁂 𑀧𑀼𑀮𑁆𑀮𑀺𑀗𑁆𑀕𑀧𑁆𑀧𑀬𑁄𑀕𑁄𑀬𑁂𑀯𑀫𑁆𑀳𑁂𑀳𑀺 𑀤𑀺𑀝𑁆𑀞𑁄, 𑀅𑀣 𑀔𑁄 𑀇𑀢𑁆𑀣𑀺𑀮𑀺𑀗𑁆𑀕𑀧𑁆𑀧𑀬𑁄𑀕𑁄𑀧𑀺 𑀲𑀸𑀲𑀦𑁂 𑀤𑀺𑀝𑁆𑀞𑁄. 𑀢𑀣𑀸 𑀳𑀺 𑀯𑀺𑀦𑀬𑀧𑀺𑀝𑀓𑁂 𑀘𑀽𑀴𑀯𑀕𑁆𑀕𑁂 ‘‘𑀅𑀲𑁆𑀲𑀫𑀡𑀻 𑀳𑁄𑀢𑀺 𑀅𑀲𑀓𑁆𑀬𑀥𑀻𑀢𑀭𑀸’’𑀢𑀺 𑀧𑀤𑀁 𑀤𑀺𑀲𑁆𑀲𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀫𑀸𑀲𑀯𑀺𑀕𑁆𑀕𑀳𑁄 ‘‘𑀲𑀓𑁆𑀬𑀓𑀼𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀓𑁆𑀬𑀲𑁆𑀲 𑀪𑀕𑀯𑀢𑁄 𑀥𑀻𑀢𑀸 𑀲𑀓𑁆𑀬𑀥𑀻𑀢𑀭𑀸, 𑀦 𑀲𑀓𑁆𑀬𑀥𑀻𑀢𑀭𑀸 𑀅𑀲𑀓𑁆𑀬𑀥𑀻𑀢𑀭𑀸’’𑀢𑀺. 𑀇𑀥𑀸𑀧𑀺 𑀲𑀺𑀫𑁆𑀳𑀺 𑀧𑀭𑁂 𑀉𑀓𑀸𑀭𑀲𑁆𑀲 𑀆𑀭𑀸𑀤𑁂𑀲𑁄 𑀓𑀢𑁄, 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀆𑀧𑀘𑁆𑀘𑀬𑁄, 𑀢𑀢𑁄 𑀲𑀺𑀮𑁄𑀧𑁄 𑀘 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀲𑀫𑀸𑀲𑀧𑀤𑀢𑁆𑀢𑁂 𑀲𑀢𑁆𑀣𑀼 𑀧𑀺𑀢𑀼 𑀓𑀢𑁆𑀢𑀼𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 𑀯𑀼𑀢𑁆𑀢𑀭𑀽𑀧𑀢𑁄 𑀓𑁄𑀘𑀺 𑀓𑁄𑀘𑀺 𑀭𑀽𑀧𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀅𑀜𑁆𑀜𑁂𑀲𑀫𑁆𑀧𑀺 𑀭𑀽𑀧𑀯𑀺𑀲𑁂𑀲𑁄 𑀦𑀬𑀜𑁆𑀜𑀼𑀦𑀸 𑀫𑀕𑁆𑀕𑀺𑀢𑀩𑁆𑀩𑁄 𑀲𑀼𑀢𑁆𑀢𑀦𑁆𑀢𑁂𑀲𑀼. 𑀓𑁄 𑀳𑀺 𑀦𑀸𑀫 𑀲𑀫𑀢𑁆𑀣𑁄 𑀦𑀺𑀲𑁆𑀲𑁂𑀲𑀢𑁄 𑀩𑀼𑀤𑁆𑀥𑀯𑀘𑀦𑀲𑀸𑀕𑀭𑁂 𑀲𑀁𑀓𑀺𑀡𑁆𑀡𑀸𑀦𑀺 𑀯𑀺𑀘𑀺𑀢𑁆𑀭𑀸𑀦𑀺 𑀧𑀡𑁆𑀟𑀺𑀢𑀚𑀦𑀸𑀦𑀁 𑀳𑀤𑀬𑀯𑀺𑀫𑁆𑀳𑀸𑀧𑀦𑀓𑀭𑀸𑀦𑀺 𑀧𑀤𑀭𑀽𑀧𑀭𑀢𑀦𑀸𑀦𑀺 𑀲𑀫𑀼𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀅𑀧𑁆𑀧𑀫𑀢𑁆𑀢𑀓𑀸𑀦𑀺𑀬𑁂𑀯 𑀤𑀲𑁆𑀲𑀺𑀢𑀸𑀦𑀺.

𑀅𑀤𑀦𑁆𑀥𑀚𑀸𑀢𑀺𑀓𑁄 𑀯𑀺𑀜𑁆𑀜𑀼-𑀚𑀸𑀢𑀺𑀓𑁄 𑀲𑀢𑀢𑀁 𑀇𑀥;

𑀬𑁄𑀕𑀁 𑀓𑀭𑁄𑀢𑀺 𑀘𑁂 𑀲𑀢𑁆𑀣𑀼, 𑀧𑀸𑀴𑀺𑀬𑀁 𑀲𑁄 𑀦 𑀓𑀗𑁆𑀔𑀢𑀺.

𑀬𑁂 𑀧𑀦𑀺𑀥 𑀅𑀫𑁆𑀳𑁂𑀳𑀺 ‘‘𑀲𑀢𑁆𑀣𑀸, 𑀅𑀪𑀺𑀪𑀯𑀺𑀢𑀸, 𑀯𑀢𑁆𑀢𑀸, 𑀓𑀢𑁆𑀢𑀸’’𑀤𑀬𑁄 𑀲𑀤𑁆𑀤𑀸 𑀧𑀓𑀸𑀲𑀺𑀢𑀸, 𑀢𑁂𑀲𑀼 𑀓𑁂𑀘𑀺 𑀉𑀧𑀬𑁄𑀕𑀯𑀘𑀦𑁂𑀦 𑀲𑀤𑁆𑀥𑀺𑀁 𑀦𑀺𑀘𑁆𑀘𑀁 𑀯𑀢𑁆𑀢𑀦𑁆𑀢𑀺 ‘‘𑀧𑀼𑀘𑁆𑀙𑀺𑀢𑀸, 𑀑𑀓𑁆𑀓𑀫𑀺𑀢𑀸’’𑀇𑀘𑁆𑀘𑀸𑀤𑀬𑁄. 𑀢𑀣𑀸 𑀳𑀺 ‘‘𑀅𑀪𑀺𑀚𑀸𑀦𑀸𑀲𑀺 𑀦𑁄 𑀢𑁆𑀯𑀁 𑀫𑀳𑀸𑀭𑀸𑀚 𑀇𑀫𑀁 𑀧𑀜𑁆𑀳𑀁 𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀢𑀸. 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑀸’’𑀢𑀺𑀆𑀤𑀺𑀧𑀬𑁄𑀕𑀸 𑀩𑀳𑀽 𑀤𑀺𑀲𑁆𑀲𑀦𑁆𑀢𑀺. 𑀓𑁂𑀘𑀺 𑀲𑀸𑀫𑀺𑀯𑀘𑀦𑁂𑀦 𑀲𑀤𑁆𑀥𑀺𑀁 𑀦𑀺𑀘𑁆𑀘𑀁 𑀯𑀢𑁆𑀢𑀦𑁆𑀢𑀺 ‘‘𑀅𑀪𑀺𑀪𑀯𑀺𑀢𑀸, 𑀯𑀢𑁆𑀢𑀸’’𑀇𑀘𑁆𑀘𑀸𑀤𑀬𑁄. 𑀢𑀣𑀸 𑀳𑀺 ‘‘𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀅𑀪𑀺𑀪𑀯𑀺𑀢𑀸, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄. 𑀅𑀫𑀢𑀲𑁆𑀲 𑀤𑀸𑀢𑀸. 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸. 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲, 𑀉𑀧𑁆𑀧𑀸𑀤𑁂𑀢𑀸 𑀦𑀭𑀼𑀢𑁆𑀢𑀫𑁄’’𑀢𑀺𑀆𑀤𑀺𑀧𑀬𑁄𑀕𑀸 𑀩𑀳𑀽 𑀤𑀺𑀲𑁆𑀲𑀦𑁆𑀢𑀺. 𑀓𑁂𑀘𑀺 𑀧𑀦 𑀉𑀧𑀬𑁄𑀕𑀯𑀘𑀦𑁂𑀦𑀧𑀺 𑀲𑀤𑁆𑀥𑀺𑀁 𑀦𑁂𑀯 𑀯𑀢𑁆𑀢𑀦𑁆𑀢𑀺 𑀦𑀺𑀬𑁄𑀕𑀸 𑀧𑀜𑁆𑀜𑀢𑁆𑀢𑀺𑀬𑀁 𑀧𑀯𑀢𑁆𑀢𑀦𑀢𑁄. 𑀢𑀁 𑀬𑀣𑀸? ‘‘𑀲𑀢𑁆𑀣𑀸, 𑀧𑀺𑀢𑀸, 𑀪𑀸𑀢𑀸, 𑀦𑀢𑁆𑀢𑀸’’𑀇𑀘𑁆𑀘𑀸𑀤𑀬𑁄. 𑀏𑀢𑁆𑀣 𑀧𑀦 ‘‘𑀉𑀧𑀬𑁄𑀕𑀯𑀘𑀦𑁂𑀦 𑀲𑀤𑁆𑀥𑀺𑀁 𑀦𑀺𑀘𑁆𑀘𑀁 𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀁 𑀓𑀫𑁆𑀫𑀪𑀽𑀢𑀁 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀸𑀦𑀁 𑀆𑀓𑀸𑀭𑀦𑁆𑀢𑀧𑀤𑀸𑀦𑀁 𑀧𑀯𑀢𑁆𑀢𑀺𑀁 𑀯𑀺𑀤𑀺𑀢𑁆𑀯𑀸 𑀲𑀤𑁆𑀤𑁂𑀲𑀼 𑀅𑀢𑁆𑀣𑁂𑀲𑀼 𑀘 𑀓𑁄𑀲𑀮𑁆𑀮𑀫𑀺𑀘𑁆𑀙𑀦𑁆𑀢𑁂𑀳𑀺 𑀧𑀼𑀦 𑀮𑀺𑀗𑁆𑀕𑀅𑀦𑁆𑀢𑀯𑀲𑁂𑀦 ‘‘𑀲𑀢𑁆𑀣𑀸, 𑀲𑀢𑁆𑀣𑁄, 𑀲𑀢𑁆𑀣’’𑀦𑁆𑀢𑀺 𑀢𑀺𑀓𑀁 𑀓𑀢𑁆𑀯𑀸 𑀧𑀤𑀸𑀦𑀫𑀢𑁆𑀣𑁄 𑀘 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀘 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀘 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀢𑀢𑁆𑀭 𑀳𑀺 ‘‘𑀲𑀢𑁆𑀣𑀸’’𑀢𑀺 𑀇𑀤𑀁 𑀧𑀞𑀫𑀁 𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀆𑀓𑀸𑀭𑀦𑁆𑀢𑀪𑀽𑀢𑀁 𑀧𑀼𑀮𑁆𑀮𑀺𑀗𑁆𑀕𑀁, ‘‘𑀲𑀢𑁆𑀣𑁄’’𑀢𑀺 𑀇𑀤𑀁 𑀧𑀞𑀫𑀁 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀑𑀓𑀸𑀭𑀦𑁆𑀢𑀪𑀽𑀢𑀁 𑀧𑀼𑀮𑁆𑀮𑀺𑀗𑁆𑀕𑀁, ‘‘𑀲𑀢𑁆𑀣’’𑀦𑁆𑀢𑀺𑀤𑀁 𑀧𑀦 𑀧𑀞𑀫𑀁 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀦𑀺𑀕𑁆𑀕𑀳𑀻𑀢𑀦𑁆𑀢𑀪𑀽𑀢𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁. 𑀢𑀢𑁆𑀭 𑀲𑀢𑁆𑀣𑀸𑀢𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀸𑀲𑀢𑀺 𑀅𑀦𑀼𑀲𑀸𑀲𑀢𑀻𑀢𑀺 𑀲𑀢𑁆𑀣𑀸, 𑀓𑁄 𑀲𑁄? 𑀪𑀕𑀯𑀸. 𑀲𑀢𑁆𑀣𑁄𑀢𑀺 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀢𑁆𑀣𑁄, 𑀪𑀡𑁆𑀟𑀫𑀽𑀮𑀁 𑀕𑀳𑁂𑀢𑁆𑀯𑀸 𑀯𑀸𑀡𑀺𑀚𑁆𑀚𑀸𑀬 𑀤𑁂𑀲𑀦𑁆𑀢𑀭𑀁 𑀕𑀢𑁄 𑀚𑀦𑀲𑀫𑀽𑀳𑁄. 𑀲𑀢𑁆𑀣𑀦𑁆𑀢𑀺 𑀲𑀸𑀲𑀢𑀺 𑀆𑀘𑀺𑀓𑁆𑀔𑀢𑀺 𑀅𑀢𑁆𑀣𑁂 𑀏𑀢𑁂𑀦𑀸𑀢𑀺 𑀲𑀢𑁆𑀣𑀁, 𑀩𑁆𑀬𑀸𑀓𑀭𑀡𑀸𑀤𑀺𑀕𑀦𑁆𑀣𑁄, 𑀅𑀣 𑀯𑀸 𑀲𑀲𑀢𑀺 𑀳𑀺𑀁𑀲𑀢𑀺 𑀲𑀢𑁆𑀢𑁂 𑀏𑀢𑁂𑀦𑀸𑀢𑀺 𑀲𑀢𑁆𑀣𑀁, 𑀅𑀲𑀺𑀆𑀤𑀺. ‘‘𑀲𑀢𑁆𑀣𑀸, 𑀲𑀢𑁆𑀣𑀸, 𑀲𑀢𑁆𑀣𑀸𑀭𑁄. 𑀲𑀢𑁆𑀣𑀸𑀭𑀁, 𑀲𑀢𑁆𑀣𑀸𑀭𑁄’’𑀢𑀺 𑀧𑀼𑀭𑁂 𑀯𑀺𑀬 𑀧𑀤𑀫𑀸𑀮𑀸. ‘‘𑀲𑀢𑁆𑀣𑁄, 𑀲𑀢𑁆𑀣𑀸. 𑀲𑀢𑁆𑀣𑀁, 𑀲𑀢𑁆𑀣𑁂’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀧𑀤𑀫𑀸𑀮𑀸. ‘‘𑀲𑀢𑁆𑀣𑀁, 𑀲𑀢𑁆𑀣𑀸𑀦𑀺, 𑀲𑀢𑁆𑀣𑀸. 𑀲𑀢𑁆𑀣𑀁, 𑀲𑀢𑁆𑀣𑀸𑀦𑀺, 𑀲𑀢𑁆𑀣𑁂’’𑀢𑀺 𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦 𑀘𑀺𑀢𑁆𑀢𑀦𑀬𑁂𑀦 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀏𑀯𑀁 𑀢𑀺𑀥𑀸 𑀪𑀺𑀦𑁆𑀦𑀸𑀲𑀼 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀲𑀢𑁆𑀣𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀜𑁆𑀜𑀽, 𑀲𑀢𑁆𑀣𑀸 𑀬𑀦𑁆𑀢𑀺 𑀥𑀦𑀢𑁆𑀣𑀺𑀓𑀸;

𑀲𑀢𑁆𑀣𑀸 𑀅𑀧𑁂𑀢𑀺 𑀧𑀼𑀭𑀺𑀲𑁄, 𑀪𑁄𑀦𑁆𑀢𑁄 𑀲𑀢𑁆𑀣𑀸 𑀤𑀤𑀸𑀣 𑀲𑀁.

𑀏𑀯𑀁 𑀲𑀼𑀢𑀺𑀲𑀸𑀫𑀜𑁆𑀜𑀯𑀲𑁂𑀦 𑀲𑀤𑀺𑀲𑀢𑀸 𑀪𑀯𑀢𑀺.

𑀲𑀢𑁆𑀣𑀁 𑀬𑀁 𑀢𑀺𑀔𑀺𑀡𑀁 𑀢𑁂𑀦, 𑀲𑀢𑁆𑀣𑁄 𑀓𑀢𑁆𑀯𑀸𑀦 𑀓𑀧𑁆𑀧𑀺𑀬𑀁;

𑀨𑀮𑀁 𑀲𑀢𑁆𑀣𑀼𑀲𑁆𑀲 𑀧𑀸𑀤𑀸𑀲𑀺, 𑀲𑀢𑁆𑀣𑀸 𑀢𑀁 𑀧𑀭𑀺𑀪𑀼𑀜𑁆𑀚𑀢𑀺.

𑀏𑀯𑀁 𑀅𑀲𑀼𑀢𑀺𑀲𑀸𑀫𑀜𑁆𑀜𑀯𑀲𑁂𑀦 𑀅𑀲𑀤𑀺𑀲𑀢𑀸 𑀪𑀯𑀢𑀺, 𑀢𑀣𑀸 𑀮𑀺𑀗𑁆𑀕𑀅𑀦𑁆𑀢𑀯𑀲𑁂𑀦. ‘‘𑀘𑁂𑀢𑀸 𑀘𑁂𑀢𑁄’’𑀢𑀺 𑀘 ‘‘𑀢𑀸𑀢𑀸 𑀢𑀸𑀢𑁄’’𑀢𑀺 𑀘 𑀤𑀼𑀓𑀁 𑀓𑀢𑁆𑀯𑀸 𑀧𑀤𑀸𑀦𑀫𑀢𑁆𑀣𑁄 𑀘 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀘 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀘 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀢𑀢𑁆𑀭 𑀳𑀺 ‘‘𑀘𑁂𑀢𑀸’’𑀢𑀺 𑀧𑀞𑀫𑀁 𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀆𑀓𑀸𑀭𑀦𑁆𑀢𑀪𑀽𑀢𑀁 𑀧𑀼𑀮𑁆𑀮𑀺𑀗𑁆𑀕𑀁, 𑀢𑀣𑀸 ‘‘𑀢𑀸𑀢𑀸’’𑀢𑀺 𑀧𑀤𑀫𑁆𑀧𑀺. ‘‘𑀘𑁂𑀢𑁄’’𑀢𑀺 𑀇𑀤𑀁 𑀧𑀦 𑀧𑀞𑀫𑀁 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀑𑀓𑀸𑀭𑀦𑁆𑀢𑀪𑀽𑀢𑀁 𑀧𑀼𑀮𑁆𑀮𑀺𑀗𑁆𑀕𑀁, 𑀢𑀣𑀸 ‘‘𑀢𑀸𑀢𑁄’’𑀢𑀺 𑀧𑀤𑀫𑁆𑀧𑀺. 𑀢𑀢𑁆𑀭 𑀘𑁂𑀢𑀸𑀢𑀺 𑀘𑀺𑀦𑁄𑀢𑀺 𑀭𑀸𑀲𑀺𑀁 𑀓𑀭𑁄𑀢𑀻𑀢𑀺 𑀘𑁂𑀢𑀸, 𑀧𑀸𑀓𑀸𑀭𑀘𑀺𑀦𑀦𑀓𑁄 𑀧𑀼𑀕𑁆𑀕𑀮𑁄, 𑀇𑀝𑁆𑀞𑀓𑀯𑀟𑁆𑀠𑀓𑀻𑀢𑀺 𑀅𑀢𑁆𑀣𑁄. 𑀘𑁂𑀢𑁄𑀢𑀺 𑀘𑀺𑀢𑁆𑀢𑀁, 𑀏𑀯𑀁𑀦𑀸𑀫𑀓𑁄 𑀯𑀸 𑀮𑀼𑀤𑁆𑀤𑁄. 𑀏𑀢𑁆𑀣 𑀘 𑀘𑀺𑀢𑁆𑀢𑀁 ‘‘𑀘𑁂𑀢𑀬𑀢𑀺 𑀘𑀺𑀦𑁆𑀢𑁂𑀢𑀻’’𑀢𑀺 𑀅𑀢𑁆𑀣𑀯𑀲𑁂𑀦 𑀘𑁂𑀢𑁄, 𑀮𑀼𑀤𑁆𑀤𑁄 𑀧𑀦 𑀧𑀡𑁆𑀡𑀢𑁆𑀢𑀺𑀯𑀲𑁂𑀦. 𑀢𑀸𑀢𑀸𑀢𑀺 𑀢𑀸𑀬𑀢𑀻𑀢𑀺 𑀢𑀸𑀢𑀸. ‘‘𑀅𑀖𑀲𑁆𑀲 𑀢𑀸𑀢𑀸 𑀳𑀺𑀢𑀲𑁆𑀲 𑀯𑀺𑀥𑀸𑀢𑀸’’𑀢𑀺𑀲𑁆𑀲 𑀧𑀬𑁄𑀕𑁄. ‘‘𑀢𑀸𑀢𑁄’’𑀢𑀺 𑀏𑀢𑁆𑀣𑀸𑀧𑀺 𑀢𑀸𑀬𑀢𑀻𑀢𑀺 𑀢𑀸𑀢𑁄, 𑀧𑀼𑀢𑁆𑀢𑀸𑀦𑀁 𑀧𑀺𑀢𑀽𑀲𑀼, 𑀧𑀺𑀢𑀭𑀸𑀦𑀁 𑀧𑀼𑀢𑁆𑀢𑁂𑀲𑀼, 𑀅𑀜𑁆𑀜𑁂𑀲𑀜𑁆𑀘 𑀅𑀜𑁆𑀜𑁂𑀲𑀼 𑀧𑀺𑀬𑀧𑀼𑀕𑁆𑀕𑀮𑁂𑀲𑀼 𑀯𑀢𑁆𑀢𑀩𑁆𑀩𑀯𑁄𑀳𑀸𑀭𑁄 𑀏𑀲𑁄. ‘‘𑀲𑁄 𑀦𑀽𑀦 𑀓𑀧𑀡𑁄 𑀢𑀸𑀢𑁄, 𑀘𑀺𑀭𑀁 𑀭𑀼𑀘𑁆𑀘𑀢𑀺 𑀅𑀲𑁆𑀲𑀫𑁂. 𑀓𑀺𑀘𑁆𑀙𑁂𑀦𑀸𑀥𑀺𑀕𑀢𑀸 𑀪𑁄𑀕𑀸, 𑀢𑁂 𑀢𑀸𑀢𑁄 𑀯𑀺𑀥𑀫𑀁 𑀥𑀫𑀁. 𑀏𑀳𑀺 𑀢𑀸𑀢𑀸’’𑀢𑀺𑀆𑀤𑀻𑀲𑀼 𑀘𑀲𑁆𑀲 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀘𑁂𑀢𑀸, 𑀘𑁂𑀢𑀸, 𑀘𑁂𑀢𑀸𑀭𑁄. 𑀘𑁂𑀢𑀸𑀭𑀁, 𑀘𑁂𑀢𑀸𑀭𑁄’’𑀢𑀺 𑀲𑀢𑁆𑀣𑀼𑀦𑀬𑁂𑀦 𑀧𑀤𑀫𑀸𑀮𑀸. ‘‘𑀘𑁂𑀢𑁄, 𑀘𑁂𑀢𑀸. 𑀘𑁂𑀢𑀁, 𑀘𑁂𑀢𑁂. 𑀘𑁂𑀢𑀲𑀸, 𑀘𑁂𑀢𑁂𑀦𑀸’’𑀢𑀺 𑀫𑀦𑁄𑀕𑀡𑀦𑀬𑁂𑀦 𑀜𑁂𑀬𑁆𑀬𑀸. 𑀅𑀬𑀁 𑀘𑀺𑀢𑁆𑀢𑀯𑀸𑀘𑀓𑀲𑁆𑀲 𑀘𑁂𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸. ‘‘𑀘𑁂𑀢𑁄, 𑀘𑁂𑀢𑀸. 𑀘𑁂𑀢𑀁, 𑀘𑁂𑀢𑁂. 𑀘𑁂𑀢𑁂𑀦𑀸’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀜𑁂𑀬𑁆𑀬𑀸. 𑀅𑀬𑀁 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀲𑁆𑀲 𑀘𑁂𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸. ‘‘𑀢𑀸𑀢𑀸, 𑀢𑀸𑀢𑀸, 𑀢𑀸𑀢𑀸𑀭𑁄. 𑀢𑀸𑀢𑀸𑀭’’𑀦𑁆𑀢𑀺 𑀲𑀢𑁆𑀣𑀼𑀦𑀬𑁂𑀦 𑀜𑁂𑀬𑁆𑀬𑀸. ‘‘𑀢𑀸𑀢𑁄, 𑀢𑀸𑀢𑀸, 𑀢𑀸𑀢’’𑀦𑁆𑀢𑀺 𑀧𑀼𑀭𑀺𑀲𑀦𑀬𑁂𑀦 𑀜𑁂𑀬𑁆𑀬𑀸. 𑀏𑀯𑀫𑀺𑀫𑀸𑀲𑀼𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸, 𑀢𑀣𑀸 𑀮𑀺𑀗𑁆𑀕𑀅𑀦𑁆𑀢𑀯𑀲𑁂𑀦 ‘‘𑀜𑀸𑀢𑀸, 𑀜𑀸𑀢𑁄, 𑀜𑀸𑀢𑀁, 𑀜𑀸𑀢𑀸’’𑀢𑀺 𑀘𑀢𑀼𑀓𑁆𑀓𑀁 𑀓𑀢𑁆𑀯𑀸 𑀧𑀤𑀸𑀦𑀫𑀢𑁆𑀣𑁄 𑀘 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀘 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀘 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀢𑀢𑁆𑀭 𑀳𑀺 ‘‘𑀜𑀸𑀢𑀸’’𑀢𑀺 𑀇𑀤𑀁 𑀧𑀞𑀫𑀁 𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀆𑀓𑀸𑀭𑀦𑁆𑀢𑀪𑀽𑀢𑀁 𑀧𑀼𑀮𑁆𑀮𑀺𑀗𑁆𑀕𑀁. ‘‘𑀜𑀸𑀢𑁄 𑀜𑀸𑀢’’𑀦𑁆𑀢𑀺 𑀇𑀫𑀸𑀦𑀺 𑀬𑀣𑀸𑀓𑁆𑀓𑀫𑀁 𑀧𑀞𑀫𑀁 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑁄𑀓𑀸𑀭𑀦𑁆𑀢𑀦𑀺𑀕𑁆𑀕𑀳𑀻𑀢𑀦𑁆𑀢𑀪𑀽𑀢𑀸𑀦𑀺 𑀯𑀸𑀘𑁆𑀘𑀮𑀺𑀗𑁆𑀕𑁂𑀲𑀼 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺. 𑀢𑀣𑀸 𑀳𑀺 ‘‘𑀜𑀸𑀢𑁄 𑀅𑀢𑁆𑀣𑁄 𑀲𑀼𑀔𑀸𑀯𑀳𑁄. 𑀜𑀸𑀢𑀫𑁂𑀢𑀁 𑀓𑀼𑀭𑀗𑁆𑀕𑀲𑁆𑀲𑀸’’𑀢𑀺 𑀦𑁂𑀲𑀁 𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺. ‘‘𑀜𑀸𑀢𑀸’’𑀢𑀺 𑀇𑀤𑀁 𑀧𑀦 𑀧𑀞𑀫𑀁 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸𑀧𑀺 𑀆𑀓𑀸𑀭𑀦𑁆𑀢𑀪𑀽𑀢𑀁 𑀯𑀸𑀘𑁆𑀘𑀮𑀺𑀗𑁆𑀕𑁂𑀲𑀼 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀢𑀣𑀸 𑀳𑀺 ‘‘𑀏𑀲𑀸 𑀇𑀢𑁆𑀣𑀺𑀫𑀬𑀸 𑀜𑀸𑀢𑀸’’𑀢𑀺 𑀧𑀬𑁄𑀕𑁄. 𑀢𑀢𑁆𑀭 𑀧𑀼𑀮𑁆𑀮𑀺𑀗𑁆𑀕𑀧𑀓𑁆𑀔𑁂 ‘‘𑀚𑀸𑀦𑀸𑀢𑀻𑀢𑀺 𑀜𑀸𑀢𑀸’’𑀢𑀺 𑀓𑀢𑁆𑀢𑀼𑀓𑀸𑀭𑀓𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀧𑀓𑁆𑀔𑁂 ‘‘𑀜𑀸𑀬𑀺𑀢𑁆𑀣𑀸𑀢𑀺 𑀜𑀸𑀢𑀸 𑀜𑀸𑀢𑁄 𑀜𑀸𑀢’’𑀦𑁆𑀢𑀺 𑀓𑀫𑁆𑀫𑀓𑀸𑀭𑀓𑀸𑀢𑀻𑀢𑀓𑀸𑀮𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀤𑀝𑁆𑀞𑀩𑁆𑀩𑁄. ‘‘𑀜𑀸𑀢𑀸, 𑀜𑀸𑀢𑀸, 𑀜𑀸𑀢𑀸𑀭𑁄. 𑀜𑀸𑀢𑀸𑀭’’𑀦𑁆𑀢𑀺 𑀲𑀢𑁆𑀣𑀼𑀦𑀬𑁂𑀦 𑀜𑁂𑀬𑁆𑀬𑀸. ‘‘𑀜𑀸𑀢𑁄, 𑀜𑀸𑀢𑀸. 𑀜𑀸𑀢’’𑀦𑁆𑀢𑀺 𑀧𑀼𑀭𑀺𑀲𑀦𑀬𑁂𑀦 𑀜𑁂𑀬𑁆𑀬𑀸. ‘‘𑀜𑀸𑀢𑀁, 𑀜𑀸𑀢𑀸𑀦𑀺, 𑀜𑀸𑀢𑀸. 𑀜𑀸𑀢𑀁, 𑀜𑀸𑀢𑀸𑀦𑀺, 𑀜𑀸𑀢𑁂’’𑀢𑀺 𑀯𑀓𑁆𑀔𑀫𑀸𑀦𑀘𑀺𑀢𑁆𑀢𑀦𑀬𑁂𑀦 𑀜𑁂𑀬𑁆𑀬𑀸. ‘‘𑀜𑀸𑀢𑀸, 𑀜𑀸𑀢𑀸, 𑀜𑀸𑀢𑀸𑀬𑁄. 𑀜𑀸𑀢𑀁, 𑀜𑀸𑀢𑀸, 𑀜𑀸𑀢𑀸𑀬𑁄’’𑀢𑀺 𑀯𑀓𑁆𑀔𑀫𑀸𑀦𑀓𑀜𑁆𑀜𑀸𑀦𑀬𑁂𑀦 𑀜𑁂𑀬𑁆𑀬𑀸. 𑀏𑀯𑀫𑀺𑀫𑀸𑀲𑀼𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀅𑀜𑁆𑀜𑁂𑀲𑀼𑀧𑀺 𑀞𑀸𑀦𑁂𑀲𑀼 𑀬𑀣𑀸𑀭𑀳𑀁 𑀇𑀫𑀺𑀦𑀸 𑀦𑀬𑁂𑀦 𑀲𑀤𑀺𑀲𑀸𑀲𑀤𑀺𑀲𑀢𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸. 𑀯𑀢𑁆𑀢𑀸 𑀥𑀸𑀢𑀸 𑀕𑀦𑁆𑀢𑀸𑀤𑀻𑀦𑀫𑁆𑀧𑀺 ‘‘𑀯𑀤𑀢𑀻𑀢𑀺 𑀯𑀢𑁆𑀢𑀸, 𑀥𑀸𑀭𑁂𑀢𑀻𑀢𑀺 𑀥𑀸𑀢𑀸, 𑀕𑀘𑁆𑀙𑀢𑀻𑀢𑀺 𑀕𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀲𑀫𑁆𑀪𑀯𑀁 𑀦𑀺𑀩𑁆𑀩𑀘𑀦𑀸𑀦𑀺 𑀜𑁂𑀬𑁆𑀬𑀸𑀦𑀺.

𑀬𑀁 𑀧𑀦𑁂𑀢𑁆𑀣 𑀅𑀫𑁆𑀳𑁂𑀳𑀺 𑀧𑀓𑀺𑀡𑁆𑀡𑀓𑀯𑀘𑀦𑀁 𑀓𑀣𑀺𑀢𑀁, 𑀢𑀁 ‘‘𑀅𑀝𑁆𑀞𑀸𑀦𑁂 𑀇𑀤𑀁 𑀓𑀣𑀺𑀢’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀬𑀲𑁆𑀫𑀸 𑀅𑀬𑀁 𑀲𑀤𑁆𑀤𑀦𑀻𑀢𑀺 𑀦𑀸𑀫 𑀲𑀤𑁆𑀤𑀸𑀦𑀫𑀢𑁆𑀣𑀸𑀦𑀜𑁆𑀘 𑀬𑀼𑀢𑁆𑀢𑀸𑀬𑀼𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀓𑀢𑀸𑀭𑀫𑁆𑀪𑀢𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀲𑀩𑁆𑀩𑀁 𑀫𑀸𑀕𑀥𑀯𑁄𑀳𑀸𑀭𑀁 𑀲𑀗𑁆𑀔𑁄𑀪𑁂𑀢𑁆𑀯𑀸 𑀓𑀣𑀺𑀢𑀸𑀬𑁂𑀯 𑀲𑁄𑀪𑀢𑀺, 𑀦 𑀇𑀢𑀭𑀣𑀸, 𑀢𑀲𑁆𑀫𑀸 𑀦𑀸𑀦𑀧𑁆𑀧𑀪𑁂𑀤𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀸𑀬 𑀲𑀫𑁆𑀪𑀯𑀢𑁄 ‘‘𑀅𑀝𑁆𑀞𑀸𑀦𑁂 𑀇𑀤𑀁 𑀓𑀣𑀺𑀢’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀦𑀸𑀦𑀸𑀉𑀧𑀸𑀬𑁂𑀳𑀺 𑀯𑀺𑀜𑁆𑀜𑀽𑀦𑀁 𑀜𑀸𑀧𑀦𑀢𑁆𑀣𑀁 𑀓𑀢𑀸𑀭𑀫𑁆𑀪𑀢𑁆𑀢𑀸 𑀘 𑀧𑀦 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄𑀧𑁂𑀢𑁆𑀣 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄, 𑀅𑀜𑁆𑀜𑀤𑀢𑁆𑀣𑀼 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀅𑀬𑀁 𑀲𑀤𑁆𑀤𑀦𑀻𑀢𑀺 𑀧𑀺𑀝𑀓𑀢𑁆𑀢𑀬𑁄𑀧𑀓𑀸𑀭𑀸𑀬 𑀲𑀓𑁆𑀓𑀘𑁆𑀘𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸.

𑀇𑀢𑀺 𑀅𑀪𑀺𑀪𑀯𑀺𑀢𑀸𑀧𑀤𑀲𑀤𑀺𑀲𑀸𑀦𑀺 𑀯𑀢𑁆𑀢𑀸, 𑀥𑀸𑀢𑀸, 𑀕𑀦𑁆𑀢𑀸𑀤𑀻𑀦𑀺 𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀇𑀤𑀸𑀦𑀺 𑀅𑀢𑀁𑀲𑀤𑀺𑀲𑀸𑀦𑀺 𑀤𑀲𑁆𑀲𑁂𑀲𑁆𑀲𑀸𑀫. 𑀲𑁂𑀬𑁆𑀬𑀣𑀺𑀤𑀁 𑁋

𑀕𑀼𑀡𑀯𑀸 𑀕𑀡𑀯𑀸 𑀘𑁂𑀯, 𑀩𑀮𑀯𑀸 𑀬𑀲𑀯𑀸 𑀢𑀣𑀸;

𑀥𑀦𑀯𑀸 𑀲𑀼𑀢𑀯𑀸 𑀯𑀺𑀤𑁆𑀯𑀸, 𑀥𑀼𑀢𑀯𑀸 𑀓𑀢𑀯𑀸𑀧𑀺 𑀘.

𑀳𑀺𑀢𑀯𑀸 𑀪𑀕𑀯𑀸 𑀘𑁂𑀯, 𑀥𑀺𑀢𑀯𑀸 𑀣𑀸𑀫𑀯𑀸 𑀢𑀣𑀸;

𑀬𑀢𑀯𑀸 𑀘𑀸𑀕𑀯𑀸 𑀘𑀸𑀣, 𑀳𑀺𑀫𑀯𑀺𑀘𑁆𑀘𑀸𑀤𑀬𑁄 𑀭𑀯𑀸.

𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀳𑀺, 𑀅𑀓𑀸𑀭𑀦𑁆𑀢𑁂𑀳𑀺 𑀧𑀸𑀬𑀢𑁄;

𑀯𑀦𑁆𑀢𑀼𑀲𑀤𑁆𑀤𑁄 𑀧𑀭𑁄 𑀳𑁄𑀢𑀺, 𑀢𑀤𑀦𑁆𑀢𑀸 𑀕𑀼𑀡𑀯𑀸𑀤𑀬𑁄.

𑀲𑀜𑁆𑀜𑀸𑀯𑀸 𑀭𑀲𑁆𑀫𑀺𑀯𑀸 𑀘𑁂𑀯, 𑀫𑀲𑁆𑀲𑀼𑀯𑀸 𑀘 𑀬𑀲𑀲𑁆𑀲𑀺𑀯𑀸;

𑀇𑀘𑁆𑀘𑀸𑀤𑀺𑀤𑀲𑁆𑀲𑀦𑀸𑀧𑁂𑀲𑁄, 𑀆𑀓𑀸𑀭𑀺𑀯𑀡𑁆𑀡𑀼𑀓𑀸𑀭𑀢𑁄;

𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀲𑀼 𑀳𑁄𑀢𑀺, 𑀓𑀢𑁆𑀣𑀘𑀻𑀢𑀺 𑀧𑀓𑀸𑀲𑀬𑁂.

𑀲𑀢𑀺𑀫𑀸 𑀕𑀢𑀺𑀫𑀸 𑀅𑀢𑁆𑀣-𑀤𑀲𑁆𑀲𑀺𑀫𑀸 𑀥𑀺𑀢𑀺𑀫𑀸 𑀢𑀣𑀸;

𑀫𑀼𑀢𑀺𑀫𑀸 𑀫𑀢𑀺𑀫𑀸 𑀘𑁂𑀯, 𑀚𑀼𑀢𑀺𑀫𑀸 𑀳𑀺𑀭𑀺𑀫𑀸𑀧𑀺 𑀘.

𑀣𑀼𑀢𑀺𑀫𑀸 𑀭𑀢𑀺𑀫𑀸 𑀘𑁂𑀯, 𑀬𑀢𑀺𑀫𑀸 𑀩𑀮𑀺𑀫𑀸 𑀢𑀣𑀸;

𑀓𑀲𑀺𑀫𑀸 𑀲𑀼𑀘𑀺𑀫𑀸 𑀥𑀻𑀫𑀸, 𑀭𑀼𑀘𑀺𑀫𑀸 𑀘𑀓𑁆𑀔𑀼𑀫𑀸𑀧𑀺 𑀘.

𑀩𑀦𑁆𑀥𑀼𑀫𑀸 𑀳𑁂𑀢𑀼𑀫𑀸’𑀬𑀲𑁆𑀫𑀸, 𑀓𑁂𑀢𑀼𑀫𑀸 𑀭𑀸𑀳𑀼𑀫𑀸 𑀢𑀣𑀸;

𑀔𑀸𑀡𑀼𑀫𑀸 𑀪𑀸𑀡𑀼𑀫𑀸 𑀕𑁄𑀫𑀸, 𑀯𑀺𑀚𑁆𑀚𑀼𑀫𑀸 𑀯𑀲𑀼𑀫𑀸𑀤𑀬𑁄.

𑀧𑀸𑀧𑀺𑀫𑀸 𑀧𑀼𑀢𑁆𑀢𑀺𑀫𑀸 𑀘𑁂𑀯, 𑀘𑀦𑁆𑀤𑀺𑀫𑀺𑀘𑁆𑀘𑀸𑀤𑀬𑁄𑀧𑀺 𑀘;

𑀅𑀢𑀁𑀲𑀤𑀺𑀲𑀲𑀤𑁆𑀤𑀸𑀢𑀺, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑀇𑀯𑀡𑁆𑀡𑀼𑀓𑀸𑀭𑁄𑀓𑀸𑀭𑁂𑀳𑀺, 𑀫𑀦𑁆𑀢𑀼𑀲𑀤𑁆𑀤𑁄 𑀧𑀭𑁄 𑀪𑀯𑁂;

𑀆𑀓𑀸𑀭𑀦𑁆𑀢𑀸 𑀘𑀺𑀓𑀸𑀭𑀦𑁆𑀢𑀸, 𑀇𑀫𑀦𑁆𑀢𑀽𑀢𑀺 𑀯𑀺𑀪𑀸𑀯𑀬𑁂.

𑀕𑀼𑀡𑀯𑀸, 𑀕𑀼𑀡𑀯𑀸, 𑀕𑀼𑀡𑀯𑀦𑁆𑀢𑁄. 𑀕𑀼𑀡𑀯𑀦𑁆𑀢𑀁, 𑀕𑀼𑀡𑀯𑀦𑁆𑀢𑁂. 𑀕𑀼𑀡𑀯𑀢𑀸, 𑀕𑀼𑀡𑀯𑀦𑁆𑀢𑁂𑀦, 𑀕𑀼𑀡𑀯𑀦𑁆𑀢𑁂𑀳𑀺, 𑀕𑀼𑀡𑀯𑀦𑁆𑀢𑁂𑀪𑀺. 𑀕𑀼𑀡𑀯𑀢𑁄, 𑀕𑀼𑀡𑀯𑀦𑁆𑀢𑀲𑁆𑀲, 𑀕𑀼𑀡𑀯𑀢𑀁, 𑀕𑀼𑀡𑀯𑀦𑁆𑀢𑀸𑀦𑀁. 𑀕𑀼𑀡𑀯𑀢𑀸, 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀲𑁆𑀫𑀸, 𑀕𑀼𑀡𑀯𑀦𑁆𑀢𑀫𑁆𑀳𑀸, 𑀕𑀼𑀡𑀯𑀦𑁆𑀢𑁂𑀳𑀺, 𑀕𑀼𑀡𑀯𑀦𑁆𑀢𑁂𑀪𑀺. 𑀕𑀼𑀡𑀯𑀢𑁄, 𑀕𑀼𑀡𑀯𑀦𑁆𑀢𑀲𑁆𑀲, 𑀕𑀼𑀡𑀯𑀢𑀁, 𑀕𑀼𑀡𑀯𑀦𑁆𑀢𑀸𑀦𑀁. 𑀕𑀼𑀡𑀯𑀢𑀺, 𑀕𑀼𑀡𑀯𑀦𑁆𑀢𑁂, 𑀕𑀼𑀡𑀯𑀦𑁆𑀢𑀲𑁆𑀫𑀺𑀁, 𑀕𑀼𑀡𑀯𑀦𑁆𑀢𑀫𑁆𑀳𑀺, 𑀕𑀼𑀡𑀯𑀦𑁆𑀢𑁂𑀲𑀼. 𑀪𑁄 𑀕𑀼𑀡𑀯𑀸, 𑀪𑀯𑀦𑁆𑀢𑁄 𑀕𑀼𑀡𑀯𑀸, 𑀪𑁄𑀦𑁆𑀢𑁄 𑀕𑀼𑀡𑀯𑀦𑁆𑀢𑁄.

𑀏𑀢𑁆𑀣 𑀧𑀦 ‘‘𑀏𑀣 𑀢𑀼𑀫𑁆𑀳𑁂 𑀆𑀯𑀼𑀲𑁄 𑀲𑀻𑀮𑀯𑀸𑀳𑁄𑀣𑀸’’𑀢𑀺 𑀘,

‘‘𑀩𑀮𑀯𑀦𑁆𑀢𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀣𑀸𑀫𑀯𑀦𑁆𑀢𑁄𑀧𑀺 𑀳𑀸𑀬𑀭𑁂;

𑀘𑀓𑁆𑀔𑀼𑀫𑀸 𑀅𑀦𑁆𑀥𑀺𑀓𑀸 𑀳𑁄𑀦𑁆𑀢𑀺, 𑀫𑀸𑀢𑀼𑀕𑀸𑀫𑀯𑀲𑀁 𑀕𑀢𑀸’’𑀢𑀺 𑀘

𑀧𑀸𑀴𑀺𑀬𑀁 ‘‘𑀲𑀻𑀮𑀯𑀸, 𑀘𑀓𑁆𑀔𑀼𑀫𑀸’’𑀢𑀺 𑀧𑀞𑀫𑀸𑀩𑀳𑀼𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀕𑀼𑀡𑀯𑀸’’𑀢𑀺 𑀧𑀘𑁆𑀘𑀢𑁆𑀢𑀸𑀮𑀧𑀦𑀝𑁆𑀞𑀸𑀦𑁂 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. ‘‘𑀕𑀼𑀡𑀯𑀸 𑀲𑀢𑀺𑀫𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀫𑁆𑀧𑀺 𑀳𑀺 ‘‘𑀕𑀼𑀡𑀯𑀸’’𑀢𑀺 𑀧𑀘𑁆𑀘𑀢𑁆𑀢𑀸𑀮𑀧𑀦𑀩𑀳𑀼𑀯𑀘𑀦𑀸𑀦𑀺 𑀆𑀕𑀢𑀸𑀦𑀺, 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀪𑀸𑀯𑁂𑀦𑁂𑀯 𑀆𑀕𑀢𑀁, 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 ‘‘𑀪𑁄 𑀕𑀼𑀡𑀯’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀆𑀕𑀢𑀁. 𑀫𑀬𑀁 𑀧𑀦 ‘‘𑀢𑀕𑁆𑀖 𑀪𑀕𑀯𑀸 𑀩𑁄𑀚𑁆𑀛𑀗𑁆𑀕𑀸. 𑀓𑀣𑀁 𑀦𑀼 𑀪𑀕𑀯𑀸 𑀢𑀼𑀬𑁆𑀳𑀁 𑀲𑀸𑀯𑀓𑁄 𑀲𑀸𑀲𑀦𑁂 𑀭𑀢𑁄’’𑀢𑀺𑀏𑀯𑀫𑀸𑀤𑀻𑀲𑀼 𑀅𑀦𑁂𑀓𑀲𑀢𑁂𑀲𑀼 𑀧𑀸𑀞𑁂𑀲𑀼 ‘‘𑀪𑀕𑀯𑀸’’𑀇𑀢𑀺 𑀆𑀮𑀧𑀦𑁂𑀓𑀯𑀘𑀦𑀲𑁆𑀲 𑀤𑀻𑀖𑀪𑀸𑀯𑀤𑀲𑁆𑀲𑀦𑀢𑁄 𑀯𑀦𑁆𑀢𑀼𑀧𑀘𑁆𑀘𑀬𑀝𑁆𑀞𑀸𑀦𑁂 ‘‘𑀪𑁄 𑀕𑀼𑀡𑀯𑀸’’𑀇𑀘𑁆𑀘𑀸𑀤𑀺 𑀤𑀻𑀖𑀯𑀲𑁂𑀦 𑀯𑀘𑀦𑀁 𑀬𑀼𑀢𑁆𑀢𑀢𑀭𑀁 𑀯𑀺𑀬 𑀫𑀜𑁆𑀜𑀸𑀫, 𑀫𑀦𑁆𑀢𑀼𑀧𑀘𑁆𑀘𑀬𑀝𑁆𑀞𑀸𑀦𑁂 𑀧𑀦 𑀇𑀫𑀦𑁆𑀢𑀼𑀧𑀘𑁆𑀘𑀬𑀝𑁆𑀞𑀸𑀦𑁂 𑀘 ‘‘𑀲𑀩𑁆𑀩𑀯𑁂𑀭𑀪𑀬𑀸𑀢𑀻𑀢, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫. 𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫’’𑀇𑀘𑁆𑀘𑀸𑀤𑀻𑀲𑀼 𑀧𑀸𑀴𑀺𑀧𑀤𑁂𑀲𑁂𑀲𑀼 ‘‘𑀘𑀓𑁆𑀔𑀼𑀫’’𑀇𑀘𑁆𑀘𑀸𑀤𑀺𑀆𑀮𑀧𑀦𑁂𑀓𑀯𑀘𑀦𑀲𑁆𑀲 𑀭𑀲𑁆𑀲𑀪𑀸𑀯𑀤𑀲𑁆𑀲𑀦𑀢𑁄 ‘‘𑀪𑁄 𑀲𑀢𑀺𑀫, 𑀪𑁄 𑀕𑀢𑀺𑀫’’𑀇𑀘𑁆𑀘𑀸𑀤𑀺 𑀭𑀲𑁆𑀲𑀯𑀲𑁂𑀦 𑀯𑀘𑀦𑀁 𑀬𑀼𑀢𑁆𑀢𑀢𑀭𑀁 𑀯𑀺𑀬 𑀫𑀜𑁆𑀜𑀸𑀫, 𑀅𑀣 𑀯𑀸 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀆𑀬𑀲𑁆𑀫𑀸 𑀢𑀺𑀲𑁆𑀲’’ 𑀇𑀢𑀺𑀤𑀻𑀖𑀯𑀲𑁂𑀦 𑀯𑀼𑀢𑁆𑀢𑀸𑀮𑀧𑀦𑁂𑀓𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀪𑀕𑀯𑀸, 𑀆𑀬𑀲𑁆𑀫𑀸’’ 𑀇𑀢𑀺𑀤𑀻𑀖𑀯𑀲𑁂𑀦 𑀯𑀼𑀢𑁆𑀢𑀧𑀤𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀯𑀦𑁆𑀢𑀼𑀧𑀘𑁆𑀘𑀬𑀝𑁆𑀞𑀸𑀦𑁂𑀧𑀺 𑀫𑀦𑁆𑀢𑀼𑀧𑀘𑁆𑀘𑀬𑀦𑀬𑁄 𑀦𑁂𑀢𑀩𑁆𑀩𑁄, 𑀫𑀦𑁆𑀢𑀼𑀧𑀘𑁆𑀘𑀬𑀝𑁆𑀞𑀸𑀦𑁂𑀧𑀺 𑀯𑀦𑁆𑀢𑀼𑀧𑀘𑁆𑀘𑀬𑀦𑀬𑁄 𑀦𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀓𑀘𑁆𑀘𑀸𑀬𑀦𑀸𑀤𑀻𑀲𑀼 ‘‘𑀪𑁄 𑀕𑀼𑀡𑀯𑀁, 𑀪𑁄 𑀕𑀼𑀡𑀯, 𑀪𑁄 𑀕𑀼𑀡𑀯𑀸’’𑀇𑀢𑀺 𑀦𑀺𑀕𑁆𑀕𑀳𑀻𑀢𑀭𑀲𑁆𑀲𑀤𑀻𑀖𑀯𑀲𑁂𑀦 𑀢𑀻𑀡𑀺 𑀆𑀮𑀧𑀦𑁂𑀓𑀯𑀘𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀇𑀫𑀺𑀦𑀸 ‘‘𑀪𑁄 𑀲𑀢𑀺𑀫𑀁, 𑀪𑁄 𑀲𑀢𑀺𑀫, 𑀪𑁄 𑀲𑀢𑀺𑀫𑀸’’𑀢𑀺 𑀏𑀯𑀫𑀸𑀤𑀺𑀦𑀬𑁄𑀧𑀺 𑀤𑀲𑁆𑀲𑀺𑀢𑁄. 𑀧𑀞𑀫𑀸𑀩𑀳𑀼𑀯𑀘𑀦𑀝𑁆𑀞𑀸𑀦𑁂 𑀧𑀦 ‘‘𑀕𑀼𑀡𑀯𑀦𑁆𑀢𑁄, 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀻’’𑀢𑀺 𑀢𑀻𑀡𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀇𑀫𑀺𑀦𑀸𑀧𑀺 ‘‘𑀲𑀢𑀺𑀫𑀦𑁆𑀢𑁄, 𑀲𑀢𑀺𑀫𑀦𑁆𑀢𑀸, 𑀲𑀢𑀺𑀫𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀬𑁄𑀧𑀺 𑀤𑀲𑁆𑀲𑀺𑀢𑁄. 𑀢𑁂𑀲𑀼 ‘‘𑀪𑁄 𑀕𑀼𑀡𑀯𑀁 𑀪𑁄 𑀲𑀢𑀺𑀫𑀁, 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀻’’𑀢𑀺 𑀇𑀫𑀸𑀦𑀺 𑀧𑀤𑀸𑀦𑀺 𑀏𑀯𑀁𑀕𑀢𑀺𑀓𑀸𑀦𑀺 𑀘 𑀅𑀜𑁆𑀜𑀸𑀦𑀺 𑀧𑀤𑀸𑀦𑀺 𑀧𑀸𑀴𑀺𑀬𑀁 𑀅𑀧𑁆𑀧𑀲𑀺𑀤𑁆𑀥𑀸𑀦𑀺 𑀬𑀣𑀸 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀧𑀤𑀁 𑀧𑀲𑀺𑀤𑁆𑀥𑀁, 𑀢𑀲𑁆𑀫𑀸 𑀬𑀁 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀬𑀜𑁆𑀘 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂, 𑀬𑀜𑁆𑀘 𑀓𑀘𑁆𑀘𑀸𑀬𑀦𑀸𑀤𑀻𑀲𑀼, 𑀢𑀁 𑀲𑀩𑁆𑀩𑀁 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀳𑀺 𑀘 𑀲𑀤𑁆𑀥𑀺𑀁 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀕𑀗𑁆𑀕𑁄𑀤𑀓𑁂𑀦 𑀬𑀫𑀼𑀦𑁄𑀤𑀓𑀁 𑀯𑀺𑀬 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁.

𑀅𑀧𑀺𑀘𑁂𑀢𑁆𑀣 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀕𑀳𑁂𑀢𑀩𑁆𑀩𑁄. 𑀢𑀁 𑀬𑀣𑀸? ‘‘𑀢𑀼𑀬𑁆𑀳𑀁 𑀥𑀻𑀢𑀸 𑀫𑀳𑀸𑀯𑀻𑀭, 𑀧𑀜𑁆𑀜𑀯𑀦𑁆𑀢 𑀚𑀼𑀢𑀺𑀦𑁆𑀥𑀭𑀸’’𑀢𑀺 𑀧𑀸𑀴𑀺𑀬𑀁 ‘‘𑀧𑀜𑁆𑀜𑀯𑀦𑁆𑀢’’𑀇𑀢𑀺 𑀆𑀮𑀧𑀦𑁂𑀓𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄.

‘‘𑀲𑀩𑁆𑀩𑀸 𑀓𑀺𑀭𑁂𑀯𑀁 𑀧𑀭𑀺𑀦𑀺𑀝𑁆𑀞𑀺𑀢𑀸𑀦𑀺,

𑀬𑀲𑀲𑁆𑀲𑀺 𑀦𑀁 𑀧𑀜𑁆𑀜𑀯𑀦𑁆𑀢𑀁 𑀯𑀺𑀲𑀬𑁆𑀳;

𑀬𑀲𑁄 𑀘 𑀮𑀤𑁆𑀥𑀸 𑀧𑀼𑀭𑀺𑀫𑀁 𑀉𑀴𑀸𑀭𑀁,

𑀦𑀧𑁆𑀧𑀚𑁆𑀚𑀳𑁂 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡’’𑀦𑁆𑀢𑀺.

𑀇𑀫𑀺𑀲𑁆𑀲𑀸 𑀚𑀸𑀢𑀓𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀜𑁆𑀜𑀯𑀦𑁆𑀢’’𑀇𑀢𑀺 𑀆𑀮𑀧𑀦𑁂𑀓𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 𑀘 ‘‘𑀪𑁄 𑀕𑀼𑀡𑀯𑀦𑁆𑀢, 𑀪𑁄 𑀕𑀼𑀡𑀯𑀦𑁆𑀢𑀸, 𑀪𑁄 𑀲𑀢𑀺𑀫𑀦𑁆𑀢, 𑀪𑁄 𑀲𑀢𑀺𑀫𑀦𑁆𑀢𑀸’’𑀢𑀺𑀆𑀤𑀻𑀦𑀺𑀧𑀺 𑀆𑀮𑀧𑀦𑁂𑀓𑀯𑀘𑀦𑀸𑀦𑀺 𑀅𑀯𑀲𑁆𑀲𑀫𑀺𑀘𑁆𑀙𑀺𑀢𑀩𑁆𑀩𑀸𑀦𑀺. 𑀢𑀣𑀸 𑀳𑀺 𑀢𑀺𑀲𑁆𑀲𑀁 𑀧𑀸𑀴𑀺𑀬𑀁 ‘‘𑀬𑀲𑀲𑁆𑀲𑀺 𑀧𑀜𑁆𑀜𑀯𑀦𑁆𑀢’’ 𑀇𑀘𑁆𑀘𑀸𑀮𑀧𑀦𑀯𑀘𑀦𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀇𑀘𑁆𑀙𑀦𑁆𑀢𑀺. 𑀦𑀦𑁆𑀢𑀺 𑀳𑀺 𑀧𑀤𑀧𑀽𑀭𑀡𑁂 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀜𑁆𑀜𑀯𑀦𑁆𑀢𑀦𑁆𑀢𑀺 𑀧𑀦 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀅𑀦𑀼𑀲𑀸𑀭𑀸𑀕𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀯𑀁 𑀧𑀸𑀯𑀘𑀦𑁂 𑀯𑀦𑁆𑀢𑀼𑀧𑀘𑁆𑀘𑀬𑀸𑀤𑀺𑀲𑀳𑀺𑀢𑀸𑀦𑀁 𑀲𑀤𑁆𑀤𑀸𑀦𑀁 ‘‘𑀪𑀕𑀯𑀸, 𑀆𑀬𑀲𑁆𑀫𑀸, 𑀧𑀜𑁆𑀜𑀯𑀦𑁆𑀢, 𑀘𑀓𑁆𑀔𑀼𑀫, 𑀧𑀸𑀧𑀺𑀫’’𑀇𑀢𑀺𑀤𑀲𑁆𑀲𑀺𑀢𑀦𑀬𑁂𑀦 𑀆𑀮𑀧𑀦𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀘 ‘‘𑀕𑀗𑁆𑀕𑀸𑀪𑀸𑀕𑀻𑀭𑀣𑀻 𑀦𑀸𑀫, 𑀳𑀺𑀫𑀯𑀦𑁆𑀢𑀸 𑀧𑀪𑀸𑀯𑀺𑀢𑀸’’𑀢𑀺 𑀘 ‘‘𑀓𑀼𑀢𑁄 𑀆𑀕𑀢𑀢𑁆𑀣 𑀪𑀦𑁆𑀢𑁂𑀢𑀺, 𑀳𑀺𑀫𑀯𑀦𑁆𑀢𑀸 𑀫𑀳𑀸𑀭𑀸𑀚𑀸’’𑀢𑀺 𑀘 𑀤𑀲𑁆𑀲𑀦𑀢𑁄 ‘‘𑀕𑀼𑀡𑀯𑀦𑁆𑀢𑀸’’𑀢𑀺 𑀧𑀜𑁆𑀘𑀫𑀺𑀬𑀸 𑀏𑀓𑀯𑀘𑀦𑀁 𑀓𑀣𑀺𑀢𑀁. 𑀬𑀣𑀸 𑀕𑀼𑀡𑀯𑀦𑁆𑀢𑀼 𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑀺𑀢𑀸, 𑀏𑀯𑀁 𑀥𑀦𑀯𑀦𑁆𑀢𑀼𑀩𑀮𑀯𑀦𑁆𑀢𑀸𑀤𑀻𑀦𑀁 𑀲𑀢𑀺𑀫𑀦𑁆𑀢𑀼 𑀕𑀢𑀺𑀫𑀦𑁆𑀢𑀸𑀤𑀻𑀦𑀜𑁆𑀘 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀯𑀺𑀤𑁆𑀯𑀸𑀤𑀺𑀧𑀤𑀸𑀦𑀁 𑀕𑀼𑀡𑀯𑀸𑀧𑀤𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀫𑁆𑀧𑀺 𑀲𑁄𑀢𑀽𑀦𑀁 𑀧𑀬𑁄𑀕𑁂𑀲𑀼 𑀲𑀫𑁆𑀫𑁄𑀳𑀸𑀧𑀕𑀫𑀢𑁆𑀣𑀁 𑀏𑀓𑀤𑁂𑀲𑀢𑁄 𑀦𑀺𑀩𑁆𑀩𑀘𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀯𑀺𑀤𑁆𑀯𑀦𑁆𑀢𑀼𑀇𑀘𑁆𑀘𑀸𑀤𑀺𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋 𑀜𑀸𑀡𑀲𑀗𑁆𑀔𑀸𑀢𑁄 𑀯𑁂𑀤𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀤𑁆𑀯𑀸, 𑀧𑀡𑁆𑀟𑀺𑀢𑁄. 𑀏𑀢𑁆𑀣 𑀘 𑀯𑀺𑀤𑁆𑀯𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑀺𑀪𑀸𑀯𑁂 ‘‘𑀇𑀢𑀺 𑀯𑀺𑀤𑁆𑀯𑀸 𑀲𑀫𑀁 𑀘𑀭𑁂’’𑀢𑀺𑀆𑀤𑀺 𑀆𑀳𑀘𑁆𑀘𑀧𑀸𑀞𑁄 𑀦𑀺𑀤𑀲𑁆𑀲𑀦𑀁. 𑀅𑀢𑁆𑀭𑀸𑀬𑀁 𑀧𑀤𑀫𑀸𑀮𑀸 𑁋 𑀯𑀺𑀤𑁆𑀯𑀸, 𑀯𑀺𑀤𑁆𑀯𑀸, 𑀯𑀺𑀤𑁆𑀯𑀦𑁆𑀢𑁄. 𑀯𑀺𑀤𑁆𑀯𑀦𑁆𑀢𑀁, 𑀯𑀺𑀤𑁆𑀯𑀦𑁆𑀢𑁂. 𑀯𑀺𑀤𑁆𑀯𑀢𑀸, 𑀯𑀺𑀤𑁆𑀯𑀦𑁆𑀢𑁂𑀦. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁. 𑀯𑁂𑀤𑀦𑀸𑀯𑀸, 𑀯𑁂𑀤𑀦𑀸𑀯𑀸, 𑀯𑁂𑀤𑀦𑀸𑀯𑀦𑁆𑀢𑁄. 𑀯𑁂𑀤𑀦𑀸𑀯𑀦𑁆𑀢𑀁, 𑀯𑁂𑀤𑀦𑀸𑀯𑀦𑁆𑀢𑁂. 𑀯𑁂𑀤𑀦𑀸𑀯𑀢𑀸, 𑀯𑁂𑀤𑀦𑀸𑀯𑀦𑁆𑀢𑁂𑀦. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁. 𑀏𑀯𑀁 ‘‘𑀲𑀜𑁆𑀜𑀸𑀯𑀸𑀘𑁂𑀢𑀦𑀸𑀯𑀸 𑀲𑀤𑁆𑀥𑀸𑀯𑀸 𑀧𑀜𑁆𑀜𑀯𑀸 𑀲𑀩𑁆𑀩𑀸𑀯𑀸’’𑀇𑀘𑁆𑀘𑀸𑀤𑀻𑀲𑀼𑀧𑀺. 𑀏𑀢𑁆𑀣 𑀘 ‘‘𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺𑀆𑀤𑀻𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀢𑀢𑁆𑀣 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀯𑀦𑁆𑀢𑀁, 𑀲𑀩𑁆𑀩𑀲𑀢𑁆𑀢𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀚𑁆𑀛𑁂𑀤𑀻𑀖𑀜𑁆𑀳𑀺 𑀇𑀤𑀁 𑀧𑀤𑀁. 𑀬𑁂𑀪𑀼𑀬𑁆𑀬𑁂𑀦 𑀧𑀦 ‘‘𑀧𑀜𑁆𑀜𑀯𑀸𑀧𑀜𑁆𑀜𑀯𑀦𑁆𑀢𑁄’’𑀢𑀺𑀆𑀤𑀻𑀦𑀺 𑀫𑀚𑁆𑀛𑁂𑀭𑀲𑁆𑀲𑀸𑀦𑀺𑀧𑀺 𑀪𑀯𑀦𑁆𑀢𑀺. 𑀬𑀲𑀲𑁆𑀲𑀺𑀦𑁄 𑀧𑀭𑀺𑀯𑀸𑀭𑀪𑀽𑀢𑀸 𑀚𑀦𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀬𑀲𑀲𑁆𑀲𑀺𑀯𑀸, 𑀅𑀣 𑀯𑀸 𑀬𑀲𑀲𑁆𑀲𑀻 𑀘 𑀬𑀲𑀲𑁆𑀲𑀺𑀯𑀸 𑀘𑀸𑀢𑀺 𑀬𑀲𑀲𑁆𑀲𑀺𑀯𑀸. 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄𑀬𑀁. ‘‘𑀬𑀲𑀲𑁆𑀲𑀺𑀯𑀸’’𑀢𑀺 𑀧𑀤𑀲𑁆𑀲 𑀧𑀦 𑀅𑀢𑁆𑀣𑀺𑀪𑀸𑀯𑁂 𑁋

‘‘𑀔𑀢𑁆𑀢𑀺𑀬𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄, 𑀅𑀪𑀺𑀚𑀸𑀢𑁄 𑀬𑀲𑀲𑁆𑀲𑀺𑀯𑀸;

𑀥𑀫𑁆𑀫𑀭𑀸𑀚𑀸 𑀯𑀺𑀤𑁂𑀳𑀸𑀦𑀁, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑁂 𑀢𑀯𑀸’’𑀢𑀺

𑀇𑀤𑀁 𑀦𑀺𑀤𑀲𑁆𑀲𑀦𑀁. ‘‘𑀬𑀲𑀲𑁆𑀲𑀺𑀯𑀸, 𑀬𑀲𑀲𑁆𑀲𑀺𑀯𑀸, 𑀬𑀲𑀲𑁆𑀲𑀺𑀯𑀦𑁆𑀢𑁄. 𑀬𑀲𑀲𑁆𑀲𑀺𑀯𑀦𑁆𑀢𑀁’’ 𑀇𑀘𑁆𑀘𑀸𑀤𑀺 𑀦𑁂𑀢𑀩𑁆𑀩𑀁. 𑀅𑀢𑁆𑀣𑁂 𑀤𑀲𑁆𑀲𑀦𑀲𑀻𑀮𑀁 𑀅𑀢𑁆𑀣𑀤𑀲𑁆𑀲𑀺, 𑀓𑀺𑀁 𑀢𑀁? 𑀜𑀸𑀡𑀁. 𑀅𑀢𑁆𑀣𑀤𑀲𑁆𑀲𑀺 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑀤𑀲𑁆𑀲𑀺𑀫𑀸, 𑀏𑀢𑁆𑀣 𑀘 𑁋

‘‘𑀢𑀁 𑀢𑀢𑁆𑀣 𑀕𑀢𑀺𑀫𑀸 𑀥𑀺𑀢𑀺𑀫𑀸, 𑀫𑀼𑀢𑀺𑀫𑀸 𑀅𑀢𑁆𑀣𑀤𑀲𑁆𑀲𑀺𑀫𑀸;

𑀲𑀗𑁆𑀔𑀸𑀢𑀸 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀯𑀺𑀥𑀼𑀭𑁄 𑀏𑀢𑀤𑀩𑁆𑀭𑀯𑀻’’𑀢𑀺

𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. ‘‘𑀅𑀢𑁆𑀣𑀤𑀲𑁆𑀲𑀺𑀫𑀸, 𑀅𑀢𑁆𑀣𑀤𑀲𑁆𑀲𑀺𑀫𑀸, 𑀅𑀢𑁆𑀣𑀤𑀲𑁆𑀲𑀺𑀫𑀦𑁆𑀢𑁄. 𑀅𑀢𑁆𑀣𑀤𑀲𑁆𑀲𑀺𑀫𑀦𑁆𑀢𑀁’’ 𑀇𑀘𑁆𑀘𑀸𑀤𑀺 𑀦𑁂𑀢𑀩𑁆𑀩𑀁. 𑀧𑀸𑀧𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀧𑀺𑀫𑀸, 𑀅𑀓𑀼𑀲𑀮𑀭𑀸𑀲𑀺𑀲𑀫𑀦𑁆𑀦𑀸𑀕𑀢𑁄 𑀫𑀸𑀭𑁄. 𑀧𑀼𑀢𑁆𑀢𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀼𑀢𑁆𑀢𑀺𑀫𑀸, 𑀩𑀳𑀼𑀧𑀼𑀢𑁆𑀢𑁄. ‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸’’𑀢𑀺 𑀏𑀢𑁆𑀣 𑀳𑀺 𑀩𑀳𑀼𑀧𑀼𑀢𑁆𑀢𑁄 ‘‘𑀧𑀼𑀢𑁆𑀢𑀺𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀘𑀦𑁆𑀤𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀘𑀦𑁆𑀤𑀺𑀫𑀸. 𑀘𑀦𑁆𑀤𑁄𑀢𑀺 𑀘𑁂𑀢𑁆𑀣 𑀘𑀦𑁆𑀤𑀯𑀺𑀫𑀸𑀦𑀫𑀥𑀺𑀧𑁆𑀧𑁂𑀢𑀁, 𑀘𑀦𑁆𑀤𑀯𑀺𑀫𑀸𑀦𑀯𑀸𑀲𑀻 𑀧𑀦 𑀤𑁂𑀯𑀧𑀼𑀢𑁆𑀢𑁄 ‘‘𑀘𑀦𑁆𑀤𑀺𑀫𑀸’’𑀢𑀺. 𑀢𑀣𑀸 𑀳𑀺 ‘‘𑀘𑀦𑁆𑀤𑁄 𑀉𑀕𑁆𑀕𑀢𑁄, 𑀧𑀫𑀸𑀡𑀢𑁄 𑀘𑀦𑁆𑀤𑁄 𑀆𑀬𑀸𑀫𑀯𑀺𑀢𑁆𑀣𑀸𑀭𑀢𑁄 𑀉𑀩𑁆𑀩𑁂𑀥𑀢𑁄 𑀘 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑁄, 𑀧𑀭𑀺𑀓𑁆𑀔𑁂𑀧𑀢𑁄 𑀢𑀻𑀳𑀺 𑀬𑁄𑀚𑀦𑁂𑀳𑀺 𑀊𑀦𑀤𑀺𑀬𑀟𑁆𑀠𑀲𑀢𑀬𑁄𑀚𑀦𑁄’’𑀢𑀺𑀆𑀤𑀻𑀲𑀼 𑀘𑀦𑁆𑀤𑀯𑀺𑀫𑀸𑀦𑀁 ‘‘𑀘𑀦𑁆𑀤𑁄’’𑀢𑀺 𑀯𑀼𑀢𑁆𑀢𑀁. ‘‘𑀢𑀣𑀸𑀕𑀢𑀁 𑀅𑀭𑀳𑀦𑁆𑀢𑀁, 𑀘𑀦𑁆𑀤𑀺𑀫𑀸 𑀲𑀭𑀡𑀁 𑀕𑀢𑁄’’𑀢𑀺𑀆𑀤𑀻𑀲𑀼 𑀧𑀦 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑁄 ‘‘𑀘𑀦𑁆𑀤𑀺𑀫𑀸’’𑀢𑀺. 𑀅𑀧𑀭𑁄 𑀦𑀬𑁄 𑁋 𑀘𑀦𑁆𑀤𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀘𑀦𑁆𑀤𑀺𑀫𑀸. 𑀘𑀦𑁆𑀤𑁄𑀢𑀺 𑀘𑁂𑀢𑁆𑀣 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀦𑁆𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀁 𑀧𑀦 𑀘𑀦𑁆𑀤𑀯𑀺𑀫𑀸𑀦𑀁 ‘‘𑀘𑀦𑁆𑀤𑀺𑀫𑀸’’𑀢𑀺. 𑀢𑀣𑀸 𑀳𑀺 ‘‘𑀭𑀸𑀳𑀼 𑀘𑀦𑁆𑀤𑀁 𑀧𑀫𑀼𑀜𑁆𑀘𑀲𑁆𑀲𑀼, 𑀘𑀦𑁆𑀤𑁄 𑀫𑀡𑀺𑀫𑀬𑀯𑀺𑀫𑀸𑀦𑁂 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑁄 ‘‘𑀘𑀦𑁆𑀤𑁄’’𑀢𑀺 𑀯𑀼𑀢𑁆𑀢𑁄.

‘‘𑀬𑁄 𑀳𑀯𑁂 𑀤𑀳𑀭𑁄 𑀪𑀺𑀓𑁆𑀔𑀼, 𑀬𑀼𑀜𑁆𑀚𑀢𑀺 𑀩𑀼𑀤𑁆𑀥𑀲𑀸𑀲𑀦𑁂;

𑀲𑁄𑀫𑀁𑀮𑁄𑀓𑀁𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺

𑀆𑀤𑀻𑀲𑀼 𑀧𑀦 𑀢𑀦𑁆𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀁 𑀘𑀦𑁆𑀤𑀯𑀺𑀫𑀸𑀦𑀁 ‘‘𑀘𑀦𑁆𑀤𑀺𑀫𑀸’’𑀢𑀺 𑀯𑀼𑀢𑁆𑀢𑀁. 𑀇𑀢𑀺 ‘‘𑀘𑀦𑁆𑀤𑁄’’𑀢𑀺 𑀘 ‘‘𑀘𑀦𑁆𑀤𑀺𑀫𑀸’’𑀢𑀺 𑀘 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑀲𑁆𑀲𑀧𑀺 𑀘𑀦𑁆𑀤𑀯𑀺𑀫𑀸𑀦𑀲𑁆𑀲𑀧𑀺 𑀦𑀸𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭 ‘‘𑀧𑀸𑀧𑀺𑀫𑀸 𑀧𑀼𑀢𑁆𑀢𑀺𑀫𑀸 𑀘𑀦𑁆𑀤𑀺𑀫𑀸’’𑀢𑀺 𑀇𑀫𑀸𑀦𑀺 𑀧𑀸𑀧𑀲𑀤𑁆𑀤𑀸𑀤𑀺𑀢𑁄 ‘‘𑀢𑀤𑀲𑁆𑀲𑀢𑁆𑀣𑀺’’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀯𑀢𑁆𑀢𑀲𑁆𑀲 𑀇𑀫𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀲𑀺𑀤𑁆𑀥𑀺𑀫𑀼𑀧𑀸𑀕𑀢𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺.

𑀦𑀦𑀼 𑀘 𑀪𑁄 𑀫𑀦𑁆𑀢𑀼𑀧𑀘𑁆𑀘𑀬𑀯𑀲𑁂𑀦𑁂𑀯 𑀲𑀸𑀥𑁂𑀢𑀩𑁆𑀩𑀸𑀦𑀻𑀢𑀺? 𑀦, 𑀓𑀢𑁆𑀣𑀘𑀺𑀧𑀺 𑀅𑀓𑀸𑀭𑀦𑁆𑀢𑀢𑁄 𑀫𑀦𑁆𑀢𑀼𑀦𑁄 𑀅𑀪𑀸𑀯𑀸. 𑀦𑀦𑀼 𑀘 𑀪𑁄 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀸𑀧 𑀧𑀼𑀢𑁆𑀢 𑀘𑀦𑁆𑀤𑀢𑁄 𑀧𑀞𑀫𑀁 𑀇𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀢𑀢𑁄 𑀫𑀦𑁆𑀢𑀼𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀓𑁆𑀓𑀸 𑀲𑀸𑀥𑁂𑀢𑀼𑀦𑁆𑀢𑀺? 𑀲𑀓𑁆𑀓𑀸 𑀭𑀽𑀧𑀫𑀢𑁆𑀢𑀲𑀺𑀚𑁆𑀛𑀦𑀢𑁄, 𑀦𑀬𑁄 𑀧𑀦 𑀲𑁄𑀪𑀦𑁄 𑀦 𑀳𑁄𑀢𑀺. 𑀢𑀣𑀸 𑀳𑀺 𑀧𑀸𑀧 𑀧𑀼𑀢𑁆𑀢𑀸𑀤𑀺𑀢𑁄 𑀅𑀓𑀸𑀭𑀦𑁆𑀢𑀢𑁄 𑀇𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀫𑀦𑁆𑀢𑀼𑀧𑀘𑁆𑀘𑀬𑁂 𑀯𑀺𑀥𑀺𑀬𑀫𑀸𑀦𑁂 𑀅𑀜𑁆𑀜𑁂𑀳𑀺 𑀕𑀼𑀡𑀬𑀲𑀸𑀤𑀻𑀳𑀺 𑀅𑀓𑀸𑀭𑀦𑁆𑀢𑁂𑀳𑀺 𑀇𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀫𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀓𑀸𑀢𑀩𑁆𑀩𑀢𑀸𑀧𑀲𑀗𑁆𑀕𑁄 𑀲𑀺𑀬𑀸. 𑀦 𑀳𑀺 𑀅𑀦𑁂𑀓𑁂𑀲𑀼 𑀧𑀸𑀴𑀺𑀲𑀢𑀲𑀳𑀲𑁆𑀲𑁂𑀲𑀼 𑀓𑀢𑁆𑀣𑀘𑀺𑀧𑀺 𑀅𑀓𑀸𑀭𑀦𑁆𑀢𑀢𑁄 𑀕𑀼𑀡 𑀬𑀲𑀸𑀤𑀺𑀢𑁄 𑀇𑀓𑀸𑀭𑀸𑀕𑀫𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀼𑀧𑀘𑁆𑀘𑀬𑁄 𑀤𑀺𑀲𑁆𑀲𑀢𑀺, 𑀅𑀝𑁆𑀞𑀸𑀦𑀢𑁆𑀢𑀸 𑀧𑀦 𑀧𑀸𑀧 𑀧𑀼𑀢𑁆𑀢𑀸𑀤𑀺𑀢𑁄 𑀅𑀓𑀸𑀭𑀦𑁆𑀢𑀢𑁄 𑀇𑀓𑀸𑀭𑀸𑀕𑀫𑀁 𑀅𑀓𑀢𑁆𑀯𑀸 𑀇𑀫𑀦𑁆𑀢𑀼𑀧𑀘𑁆𑀘𑀬𑁂 𑀓𑀢𑁂𑀬𑁂𑀯 ‘‘𑀧𑀸𑀧𑀺𑀫𑀸 𑀧𑀼𑀢𑁆𑀢𑀺𑀫𑀸’’𑀢𑀺𑀆𑀤𑀻𑀦𑀺 𑀲𑀺𑀚𑁆𑀛𑀦𑁆𑀢𑀻𑀢𑀺.

𑀏𑀯𑀁 𑀲𑀦𑁆𑀢𑁂𑀧𑀺 𑀪𑁄 𑀓𑀲𑁆𑀫𑀸 𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑁂 𑀫𑀦𑁆𑀢𑀼𑀧𑀘𑁆𑀘𑀬𑁄𑀯 𑀯𑀼𑀢𑁆𑀢𑁄, 𑀦 𑀇𑀫𑀦𑁆𑀢𑀼𑀧𑀘𑁆𑀘𑀬𑁄𑀢𑀺? 𑀤𑁆𑀯𑀬𑀫𑁆𑀧𑀺 𑀯𑀼𑀢𑁆𑀢𑀫𑁂𑀯. 𑀓𑀣𑀁 𑀜𑀸𑀬𑀢𑀻𑀢𑀺 𑀘𑁂? 𑀬𑀲𑁆𑀫𑀸 𑀢𑀢𑁆𑀣 ‘‘𑀢𑀧𑀸𑀤𑀺𑀢𑁄 𑀲𑀻, 𑀤𑀡𑁆𑀟𑀸𑀤𑀺𑀢𑁄 𑀇𑀓 𑀈, 𑀫𑀥𑁆𑀯𑀸𑀤𑀺𑀢𑁄 𑀭𑁄, 𑀕𑀼𑀡𑀸𑀤𑀺𑀢𑁄 𑀯𑀦𑁆𑀢𑀽’’𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺 𑀲𑀦𑁆𑀦𑀺𑀳𑀺𑀢𑀢𑁄𑀤𑀦𑁆𑀢𑀲𑀤𑁆𑀤𑀪𑀸𑀯𑁂𑀦 𑀯𑀢𑁆𑀯𑀸 𑀫𑀚𑁆𑀛𑁂 ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀽’’𑀢𑀺 𑀅𑀜𑁆𑀜𑀣𑀸 𑀲𑀼𑀢𑁆𑀢𑀁 𑀯𑀢𑁆𑀯𑀸 𑀢𑀢𑁄 𑀲𑀦𑁆𑀦𑀺𑀳𑀺𑀢𑀢𑁄𑀤𑀦𑁆𑀢𑀯𑀲𑁂𑀦 ‘‘𑀲𑀤𑁆𑀥𑀸𑀤𑀺𑀢𑁄 𑀡𑀸’’𑀢𑀺 𑀲𑀼𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 ‘‘𑀲𑀢𑁆𑀬𑀸𑀤𑀻𑀳𑀺𑀫𑀦𑁆𑀢𑀽’’𑀢𑀺 𑀯𑀺𑀲𑀤𑀺𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀇𑀫𑀦𑁆𑀢𑀼 𑀧𑀘𑁆𑀘𑀬𑁄 𑀘 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀧𑀓𑀢𑀺 𑀳𑁂𑀲𑀸𑀘𑀭𑀺𑀬𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀁. 𑀏𑀢𑁆𑀣 𑀘 𑀤𑀼𑀢𑀺𑀬𑁄 𑀅𑀢𑁆𑀣𑁄 𑀲𑀭𑀲𑀦𑁆𑀥𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. 𑀢𑀣𑀸 𑀳𑀺𑀲𑁆𑀲 ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀽’’𑀢𑀺 𑀧𑀞𑀫𑁄 𑀅𑀢𑁆𑀣𑁄, ‘‘𑀲𑀢𑁆𑀬𑀸𑀤𑀻𑀳𑀺 𑀇𑀫𑀦𑁆𑀢𑀽’’𑀢𑀺 𑀤𑀼𑀢𑀺𑀬𑁄 𑀅𑀢𑁆𑀣𑁄. 𑀇𑀢𑀺 ‘‘𑀲𑁂𑀢𑁄 𑀥𑀸𑀯𑀢𑀻’’𑀢𑀺 𑀧𑀬𑁄𑀕𑁂 𑀯𑀺𑀬 ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀽’’𑀢𑀺 𑀲𑀼𑀢𑁆𑀢𑁂 𑀪𑀺𑀦𑁆𑀦𑀲𑀢𑁆𑀢𑀺𑀲𑀫𑀯𑁂𑀢𑀯𑀲𑁂𑀦 𑀅𑀢𑁆𑀣𑀤𑁆𑀯𑀬𑀧𑀝𑀺𑀧𑀢𑁆𑀢𑀺 𑀪𑀯𑀢𑀺, 𑀢𑀲𑁆𑀫𑀸 𑀧𑀭𑀫𑀲𑀼𑀔𑀼𑀫𑀲𑀼𑀕𑀫𑁆𑀪𑀻𑀭𑀢𑁆𑀣𑀯𑀢𑀸 𑀅𑀦𑁂𑀦 𑀲𑀼𑀢𑁆𑀢𑁂𑀦 𑀓𑀢𑁆𑀣𑀘𑀺 𑀲𑀢𑀺 𑀕𑀢𑀺 𑀲𑁂𑀢𑀼 𑀕𑁄𑀇𑀘𑁆𑀘𑀸𑀤𑀺𑀢𑁄 𑀫𑀦𑁆𑀢𑀼𑀧𑀘𑁆𑀘𑀬𑁄 𑀇𑀘𑁆𑀙𑀺𑀢𑁄. 𑀓𑀢𑁆𑀣𑀘𑀺 𑀲𑀢𑀺 𑀧𑀸𑀧 𑀧𑀼𑀢𑁆𑀢𑀇𑀘𑁆𑀘𑀸𑀤𑀺𑀢𑁄 𑀇𑀫𑀦𑁆𑀢𑀼𑀧𑀘𑁆𑀘𑀬𑁄 𑀇𑀘𑁆𑀙𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀲𑁆𑀫𑀸 𑀧𑀦 𑀲𑀢𑀺𑀲𑀤𑁆𑀤𑁄 𑀫𑀦𑁆𑀢𑀼𑀯𑀲𑁂𑀦 𑀕𑀢𑀺𑀥𑀻𑀲𑁂𑀣𑀼𑀕𑁄 𑀇𑀘𑁆𑀘𑀸𑀤𑀻𑀳𑀺, 𑀇𑀫𑀦𑁆𑀢𑀼𑀯𑀲𑁂𑀦 𑀧𑀸𑀧𑀧𑀼𑀢𑁆𑀢𑀸𑀤𑀻𑀳𑀺 𑀘 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀢𑁂𑀲𑀁 𑀧𑀓𑀸𑀭𑀪𑀸𑀯𑁂𑀦 𑀕𑀳𑀺𑀢𑁄, 𑀢𑀲𑁆𑀫𑀸 𑀏𑀯𑀁 𑀲𑀼𑀢𑁆𑀢𑀢𑁆𑀣𑁄 𑀪𑀯𑀢𑀺 ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀼 𑀲𑀢𑀺𑀧𑁆𑀧𑀓𑀸𑀭𑁂𑀳𑀺 𑀲𑀤𑁆𑀤𑁂𑀳𑀺 𑀫𑀦𑁆𑀢𑀼𑀧𑀘𑁆𑀘𑀬𑁄 𑀳𑁄𑀢𑀺 𑀇𑀫𑀦𑁆𑀢𑀼𑀧𑀘𑁆𑀘𑀬𑁄 𑀘 𑀬𑀣𑀸𑀭𑀳𑀁 ‘𑀢𑀤𑀲𑁆𑀲𑀢𑁆𑀣𑀺’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 ‘‘𑀲𑀢𑀺𑀫𑀸’’𑀢𑀺 𑀏𑀢𑁆𑀣 𑀲𑀢𑀻𑀢𑀺 𑀇𑀓𑀸𑀭𑀦𑁆𑀢𑀢𑁄 𑀫𑀦𑁆𑀢𑀼𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 ‘‘𑀕𑀢𑀺𑀫𑀸, 𑀥𑀻𑀫𑀸, 𑀲𑁂𑀢𑀼𑀫𑀸, 𑀕𑁄𑀫𑀸’’𑀢𑀺𑀆𑀤𑀻𑀲𑀼 𑀇𑀓𑀸𑀭𑀦𑁆𑀢 𑀈𑀓𑀸𑀭𑀦𑁆𑀢 𑀉𑀓𑀸𑀭𑀦𑁆𑀢𑀦𑀺𑀘𑁆𑀘𑁄𑀓𑀸𑀭𑀦𑁆𑀢𑀢𑁄 𑀫𑀦𑁆𑀢𑀼𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸 𑀘 ‘‘𑀲𑀢𑀺𑀫𑀸’’𑀢𑀺 𑀏𑀢𑁆𑀣 ‘‘𑀲𑀢𑀻’’𑀢𑀺 𑀇𑀓𑀸𑀭𑀦𑁆𑀢𑀢𑁄 𑀇𑀫𑀦𑁆𑀢𑀼𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 ‘‘𑀕𑀢𑀺𑀫𑀸, 𑀧𑀸𑀧𑀺𑀫𑀸, 𑀧𑀼𑀢𑁆𑀢𑀺𑀫𑀸’’𑀢𑀺𑀆𑀤𑀻𑀲𑀼 𑀇𑀓𑀸𑀭𑀦𑁆𑀢 𑀅𑀓𑀸𑀭𑀦𑁆𑀢𑀢𑁄 𑀇𑀫𑀦𑁆𑀢𑀼𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀲𑀢𑀺𑀧𑁆𑀧𑀓𑀸𑀭𑁂𑀳𑀺 𑀲𑀤𑁆𑀤𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 𑀫𑀦𑁆𑀢𑀼 𑀇𑀫𑀦𑁆𑀢𑀼𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺.

𑀬𑀚𑁆𑀚𑁂𑀯𑀁 𑀧𑀘𑁆𑀘𑀬𑀤𑁆𑀯𑀬𑀯𑀺𑀥𑀸𑀬𑀓𑀁 ‘‘𑀤𑀡𑁆𑀟𑀸𑀤𑀺𑀢𑁄 𑀇𑀓 𑀈’’𑀢𑀺 𑀲𑀼𑀢𑁆𑀢𑀁 𑀯𑀺𑀬 ‘‘𑀲𑀢𑁆𑀬𑀸𑀤𑀺𑀢𑁄 𑀇𑀫𑀦𑁆𑀢𑀼 𑀫𑀦𑁆𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸 𑀦𑀸𑀯𑁄𑀘𑀸𑀢𑀺? 𑀢𑀣𑀸 𑀅𑀯𑀘𑀦𑁂 𑀓𑀸𑀭𑀡𑀫𑀢𑁆𑀣𑀺. 𑀬𑀤𑀺 𑀳𑀺 ‘‘𑀤𑀡𑁆𑀟𑀸𑀤𑀺𑀢𑁄 𑀇𑀓 𑀈’’𑀢𑀺 𑀲𑀼𑀢𑁆𑀢𑀁 𑀯𑀺𑀬 ‘‘𑀲𑀢𑁆𑀬𑀸𑀤𑀺𑀢𑁄 𑀇𑀫𑀦𑁆𑀢𑀼 𑀫𑀦𑁆𑀢𑀽’’𑀢𑀺 𑀲𑀼𑀢𑁆𑀢𑀁 𑀯𑀼𑀢𑁆𑀢𑀁 𑀲𑀺𑀬𑀸, 𑀏𑀓𑀓𑁆𑀔𑀡𑁂𑀬𑁂𑀯 𑀇𑀫𑀦𑁆𑀢𑀼 𑀫𑀦𑁆𑀢𑀽𑀦𑀁 𑀯𑀘𑀦𑁂𑀦 𑀤𑀡𑁆𑀟𑀲𑀤𑁆𑀤𑀢𑁄 𑀲𑀫𑁆𑀪𑀽𑀢𑀁 ‘‘𑀤𑀡𑁆𑀟𑀺𑀓𑁄 𑀤𑀡𑁆𑀟𑀻’’𑀢𑀺 𑀭𑀽𑀧𑀤𑁆𑀯𑀬𑀫𑀺𑀯 𑀲𑀢𑀺𑀕𑀢𑀺𑀆𑀤𑀺𑀢𑁄𑀧𑀺 𑀯𑀺𑀲𑀤𑀺𑀲𑀭𑀽𑀧𑀤𑁆𑀯𑀬𑀫𑀺𑀘𑁆𑀙𑀺𑀢𑀩𑁆𑀩𑀁 𑀲𑀺𑀬𑀸, 𑀢𑀜𑁆𑀘 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀲𑀢𑁆𑀬𑀸𑀤𑀺𑀢𑁄 𑀇𑀫𑀦𑁆𑀢𑀼 𑀫𑀦𑁆𑀢𑀽’’𑀢𑀺 𑀦 𑀯𑀼𑀢𑁆𑀢𑀁. 𑀅𑀧𑀺𑀘 𑀢𑀣𑀸 𑀯𑀼𑀢𑁆𑀢𑁂 𑀩𑀯𑁆𑀳𑀓𑁆𑀔𑀭𑀢𑀸𑀬 𑀕𑀦𑁆𑀣𑀕𑀭𑀼𑀢𑀸 𑀲𑀺𑀬𑀸. 𑀬𑀲𑁆𑀫𑀸 𑀘 𑀲𑀼𑀢𑁆𑀢𑁂𑀦 𑀦𑀸𑀫 𑀅𑀧𑁆𑀧𑀓𑁆𑀔𑀭𑁂𑀦 𑀅𑀲𑀦𑁆𑀤𑀺𑀤𑁆𑀥𑁂𑀦 𑀲𑀸𑀭𑀯𑀦𑁆𑀢𑁂𑀦 𑀕𑀽𑀴𑁆𑀳𑀦𑀺𑀦𑁆𑀦𑀬𑁂𑀦 𑀲𑀩𑁆𑀩𑀢𑁄𑀫𑀼𑀔𑁂𑀦 𑀅𑀦𑀯𑀚𑁆𑀚𑁂𑀦 𑀪𑀯𑀺𑀢𑀩𑁆𑀩𑀁. 𑀓𑀘𑁆𑀘𑀸𑀬𑀦𑁂 𑀘 𑀬𑁂𑀪𑀼𑀬𑁆𑀬𑁂𑀦 𑀢𑀸𑀤𑀺𑀲𑀸𑀦𑀺 𑀕𑀫𑁆𑀪𑀻𑀭𑀢𑁆𑀣𑀸𑀦𑀺 𑀲𑀼𑀯𑀺𑀲𑀤𑀜𑀸𑀡𑀯𑀺𑀲𑀬𑀪𑀽𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 ‘‘𑀉𑀧𑀸𑀛𑀥𑀺𑀓𑀺𑀲𑁆𑀲𑀭𑀯𑀘𑀦𑁂, 𑀲𑀭𑀸 𑀲𑀭𑁂 𑀮𑁄𑀧’’𑀦𑁆𑀢𑀺𑀆𑀤𑀻𑀦𑀺, 𑀇𑀤𑀫𑁆𑀧𑀺 𑀢𑁂𑀲𑀫𑀜𑁆𑀜𑀢𑀭𑀁, 𑀢𑀲𑁆𑀫𑀸 ‘‘𑀲𑀢𑁆𑀬𑀸𑀤𑀺𑀢𑁄 𑀇𑀫𑀦𑁆𑀢𑀼 𑀫𑀦𑁆𑀢𑀽’’𑀢𑀺 𑀦 𑀯𑀼𑀢𑁆𑀢𑀁. 𑀏𑀯𑀁 𑀲𑀼𑀢𑁆𑀢𑁄𑀧𑀤𑁂𑀲𑁂 𑀅𑀓𑀢𑁂𑀧𑀺 𑀇𑀫𑀦𑁆𑀢𑀼𑀦𑁄𑀧𑀺 𑀕𑀳𑀡𑀢𑁆𑀣𑀁 𑀪𑀺𑀦𑁆𑀦𑀲𑀢𑁆𑀢𑀺𑀲𑀫𑀯𑁂𑀢𑀯𑀲𑁂𑀦 ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀧𑀭𑁄 𑀦𑀬𑁄 𑁋 ‘‘𑀢𑀧𑀸𑀤𑀺𑀢𑁄 𑀲𑀻’’𑀢𑀺𑀆𑀤𑀻𑀲𑀼 𑀢𑁄𑀤𑀦𑁆𑀢𑀲𑀤𑁆𑀤𑀲𑁆𑀲 𑀩𑀳𑀼𑀯𑀘𑀦𑀦𑁆𑀢𑀢𑀸 𑀦 𑀲𑀼𑀝𑁆𑀞𑀼 𑀧𑀸𑀓𑀝𑀸 𑀢𑁄𑀧𑀘𑁆𑀘𑀬𑀲𑁆𑀲 𑀏𑀓𑀢𑁆𑀣𑀩𑀯𑁆𑀳𑀢𑁆𑀣𑁂𑀲𑀼 𑀯𑀢𑁆𑀢𑀦𑀢𑁄, ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀽’’𑀢𑀺 𑀏𑀢𑁆𑀣 𑀧𑀦 𑀳𑀺𑀲𑀤𑁆𑀤𑀲𑁆𑀲 𑀩𑀳𑀼𑀯𑀘𑀦𑀢𑁆𑀣𑀢𑀸 𑀅𑀢𑀻𑀯 𑀧𑀸𑀓𑀝𑀸, 𑀢𑀲𑁆𑀫𑀸 𑀩𑀳𑀼𑀯𑀘𑀦𑀕𑁆𑀕𑀳𑀡𑁂𑀦 𑀇𑀫𑀦𑁆𑀢𑀼 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺𑀧𑀺 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀘 𑀪𑁄 𑀯𑀺𑀦𑀸𑀧𑀺 𑀇𑀫𑀦𑁆𑀢𑀼𑀧𑀘𑁆𑀘𑀬𑁂𑀦 𑀧𑀸𑀧𑀫𑀲𑁆𑀲𑀢𑁆𑀣𑀻𑀢𑀺 𑀧𑀸𑀧𑀻, 𑀧𑀸𑀧𑀻 𑀏𑀯 𑀧𑀸𑀧𑀺𑀫𑀸𑀢𑀺 𑀲𑀓𑀢𑁆𑀣𑁂 𑀫𑀸𑀧𑀘𑁆𑀘𑀬𑁂 𑀓𑀢𑁂𑀬𑁂𑀯 ‘‘𑀧𑀸𑀧𑀺𑀫𑀸 𑀧𑀼𑀢𑁆𑀢𑀺𑀫𑀸’’𑀢𑀺𑀆𑀤𑀻𑀦𑀺 𑀲𑀺𑀚𑁆𑀛𑀦𑁆𑀢𑀺 ‘‘𑀙𑀝𑁆𑀞𑀫𑁄 𑀲𑁄 𑀧𑀭𑀸𑀪𑀯𑁄’’𑀢𑀺 𑀏𑀢𑁆𑀣 𑀫𑀧𑀘𑁆𑀘𑀬𑁂𑀦 ‘‘𑀙𑀝𑁆𑀞𑀫𑁄’’𑀢𑀺 𑀧𑀤𑀁 𑀯𑀺𑀬𑀸𑀢𑀺? 𑀅𑀢𑀺𑀦𑀬𑀜𑁆𑀜𑀽 𑀪𑀯𑀁, 𑀅𑀢𑀺𑀦𑀬𑀜𑁆𑀜𑀽 𑀦𑀸𑀫𑀸𑀢𑀺 𑀪𑀯𑀁 𑀯𑀢𑁆𑀢𑀩𑁆𑀩𑁄, 𑀦 𑀧𑀦 𑀪𑀯𑀁 𑀲𑀤𑁆𑀤𑀕𑀢𑀺𑀁 𑀚𑀸𑀦𑀸𑀢𑀺, 𑀲𑀤𑁆𑀤𑀕𑀢𑀺𑀬𑁄 𑀘 𑀦𑀸𑀫 𑀩𑀳𑀼𑀯𑀺𑀥𑀸. 𑀢𑀣𑀸 𑀳𑀺 𑀙𑀝𑁆𑀞𑁄𑀬𑁂𑀯 𑀙𑀝𑁆𑀞𑀫𑁄, ‘‘𑀲𑀼𑀢𑁆𑀢𑀫𑁂𑀯 𑀲𑀼𑀢𑁆𑀢𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸 𑀲𑀤𑁆𑀤𑀕𑀢𑀺, ‘‘𑀤𑁂𑀯𑁄𑀬𑁂𑀯 𑀤𑁂𑀯𑀢𑀸’’𑀢𑀺𑀆𑀤𑀻𑀲𑀼 𑀓𑀜𑁆𑀜𑀸𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸 𑀲𑀤𑁆𑀤𑀕𑀢𑀺, ‘‘𑀤𑀺𑀝𑁆𑀞𑀺 𑀏𑀯 𑀤𑀺𑀝𑁆𑀞𑀺𑀕𑀢’’𑀦𑁆𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸 𑀲𑀤𑁆𑀤𑀕𑀢𑀺. 𑀏𑀯𑀁𑀯𑀺𑀥𑀸𑀲𑀼 𑀲𑀤𑁆𑀤𑀕𑀢𑀻𑀲𑀼 ‘‘𑀧𑀸𑀧𑀻 𑀏𑀯 𑀧𑀸𑀧𑀺𑀫𑀸’’𑀢𑀺𑀆𑀤𑀺𑀓𑀁 𑀓𑀢𑀭𑀁 𑀲𑀤𑁆𑀤𑀕𑀢𑀺𑀁 𑀯𑀤𑁂𑀲𑀺? ‘‘𑀲𑀢𑁆𑀣𑀸 𑀭𑀸𑀚𑀸 𑀩𑁆𑀭𑀳𑁆𑀫𑀸 𑀲𑀔𑀸 𑀅𑀢𑁆𑀢𑀸 𑀲𑀸 𑀧𑀼𑀫𑀸’’𑀢𑀺𑀆𑀤𑀻𑀲𑀼 𑀘 𑀓𑀢𑀭𑀁 𑀲𑀤𑁆𑀤𑀕𑀢𑀺𑀁 𑀯𑀤𑁂𑀲𑀺? 𑀓𑀢𑀭𑀲𑀤𑁆𑀤𑀦𑁆𑀢𑁄𑀕𑀥𑀁 𑀓𑀢𑀭𑀸𑀬 𑀘 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 𑀬𑁄𑀚𑁂𑀢𑀩𑁆𑀩𑀁 𑀫𑀜𑁆𑀜𑀲𑀻𑀢𑀺? 𑀲𑁄 𑀏𑀯𑀁 𑀧𑀼𑀝𑁆𑀞𑁄 𑀅𑀤𑁆𑀥𑀸 𑀉𑀢𑁆𑀢𑀭𑀺 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑁄 𑀦𑀬𑁄 𑀦 𑀕𑀳𑁂𑀢𑀩𑁆𑀩𑁄. 𑀢𑀸𑀤𑀺𑀲𑀲𑁆𑀫𑀺𑀜𑁆𑀳𑀺 𑀦𑀬𑁂 ‘‘𑀧𑀸𑀧𑀺𑀫𑀢𑀸 𑀧𑀸𑀧𑀺𑀫𑀢𑁄’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀦 𑀲𑀺𑀚𑁆𑀛𑀦𑁆𑀢𑀺, 𑀇𑀫𑀦𑁆𑀢𑀼𑀧𑀘𑁆𑀘𑀬𑀦𑀬𑁂𑀦 𑀧𑀦 𑀲𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀬𑀫𑁂𑀯 𑀦𑀬𑁄 𑀧𑀲𑀢𑁆𑀣𑀢𑀭𑁄 𑀆𑀬𑀲𑁆𑀫𑀦𑁆𑀢𑁂𑀳𑀺 𑀲𑀫𑁆𑀫𑀸 𑀘𑀺𑀢𑁆𑀢𑁂 𑀞𑀧𑁂𑀢𑀩𑁆𑀩𑁄. 𑀅𑀢𑁆𑀭𑀺𑀤𑀁 𑀦𑀺𑀤𑀲𑁆𑀲𑀦𑀁 𑁋

‘‘𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁,

𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸,

𑀚𑀬𑀁 𑀢𑀤𑀸 𑀤𑁂𑀯𑀕𑀡𑀸 𑀫𑀳𑁂𑀲𑀺𑀦𑁄’’𑀢𑀺 𑀘,

‘‘𑀲𑀸𑀔𑀸𑀧𑀢𑁆𑀢𑀨𑀮𑀽𑀧𑁂𑀢𑁄, 𑀔𑀦𑁆𑀥𑀺𑀫𑀸𑀯𑀫𑀳𑀸𑀤𑀼𑀫𑁄’’𑀢𑀺 𑀘.

𑀧𑀸𑀧𑀺𑀫𑀸, 𑀧𑀸𑀧𑀺𑀫𑀸, 𑀧𑀸𑀧𑀺𑀫𑀦𑁆𑀢𑁄. 𑀧𑀸𑀧𑀺𑀫𑀦𑁆𑀢𑀁. 𑀲𑁂𑀲𑀁 𑀦𑁂𑀬𑁆𑀬𑀁, 𑀏𑀲 𑀦𑀬𑁄 ‘‘𑀔𑀦𑁆𑀥𑀺𑀫𑀸, 𑀧𑀼𑀢𑁆𑀢𑀺𑀫𑀸’’𑀢𑀺𑀆𑀤𑀻𑀲𑀼𑀧𑀺.

𑀇𑀤𑀸𑀦𑀺 𑀬𑀣𑀸𑀧𑀸𑀯𑀘𑀦𑀁 𑀓𑀺𑀜𑁆𑀘𑀺𑀤𑁂𑀯 𑀳𑀺𑀫𑀯𑀦𑁆𑀢𑀼 𑀲𑀢𑀺𑀫𑀦𑁆𑀢𑀸𑀤𑀻𑀦𑀁 𑀯𑀺𑀲𑁂𑀲𑀁 𑀩𑁆𑀭𑀽𑀫. 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄. 𑀲𑀢𑀺𑀫𑀁 𑀪𑀺𑀓𑁆𑀔𑀼𑀁. 𑀩𑀦𑁆𑀥𑀼𑀫𑀁 𑀭𑀸𑀚𑀸𑀦𑀁. 𑀘𑀦𑁆𑀤𑀺𑀫𑀁 𑀤𑁂𑀯𑀧𑀼𑀢𑁆𑀢𑀁. 𑀲𑀢𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄. 𑀇𑀤𑁆𑀥𑀺𑀫𑀲𑁆𑀲 𑀘 𑀧𑀭𑀲𑁆𑀲 𑀘 𑀏𑀓𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀘𑁆𑀘𑀸𑀤𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀤𑁆𑀯𑀺𑀦𑁆𑀦𑀁 𑀯𑀢𑁆𑀢𑀩𑁆𑀩𑀯𑀘𑀦𑀁, ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺 𑀩𑀳𑀽𑀦𑀁 𑀯𑀢𑁆𑀢𑀩𑁆𑀩𑀯𑀘𑀦𑀦𑁆𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 ‘‘𑀤𑁆𑀯𑀺𑀦𑁆𑀦𑀁 𑀆𑀭𑁄𑀘𑁂𑀦𑁆𑀢𑁂𑀦 ‘𑀆𑀬𑀲𑁆𑀫𑀦𑁆𑀢𑀸 𑀥𑀸𑀭𑁂𑀦𑁆𑀢𑀽’𑀢𑀺, 𑀢𑀺𑀡𑁆𑀡𑀁 𑀆𑀭𑁄𑀘𑁂𑀦𑁆𑀢𑁂𑀦 ‘𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀢𑀺𑀡𑁆𑀡’’𑀦𑁆𑀢𑀺 𑀘𑁂𑀢𑁆𑀣 𑀓𑀣𑀸𑀲𑀻𑀲𑀫𑀢𑁆𑀢𑀁, 𑀢𑁂𑀦 𑀘𑀢𑀼𑀦𑁆𑀦𑀫𑁆𑀧𑀺 𑀧𑀜𑁆𑀘𑀦𑁆𑀦𑀫𑁆𑀧𑀺 𑀅𑀢𑀺𑀭𑁂𑀓𑀲𑀢𑀸𑀦𑀫𑁆𑀧𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀩𑀳𑀯𑁄𑀳𑀺 𑀉𑀧𑀸𑀤𑀸𑀬 ‘‘𑀉𑀤𑁆𑀤𑀺𑀝𑁆𑀞𑀸 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀓𑀸 𑀧𑀸𑀴𑀺𑀬𑁄 𑀞𑀧𑀺𑀢𑀸. 𑀢𑀢𑁆𑀣 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺𑀤𑀁 𑀯𑀺𑀦𑀬𑀯𑁄𑀳𑀸𑀭𑀯𑀲𑁂𑀦 𑀤𑁆𑀯𑁂𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀩𑁆𑀩𑀲𑀸𑀥𑀸𑀭𑀡𑀁. 𑀯𑀺𑀦𑀬𑀯𑁄𑀳𑀸𑀭𑀜𑁆𑀳𑀺 𑀯𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑁄𑀳𑀸𑀭𑁂 𑀦 𑀧𑀯𑀢𑁆𑀢𑀢𑀺. ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺𑀤𑀁 𑀧𑀦 𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀢𑀻𑀢𑀺 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭 ‘‘𑀳𑀺𑀫𑀯𑀦𑁆𑀢𑁄’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑁂𑀦𑁂𑀓𑀯𑀘𑀦𑀁 𑀪𑀯𑀢𑀺, 𑀓𑀢𑁆𑀣𑀘𑀺 𑀩𑀳𑀼𑀯𑀘𑀦𑀫𑁆𑀧𑀺, 𑀢𑁂𑀦𑀸𑀳 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀣𑁂𑀭𑁄 ‘‘𑀳𑀺𑀫𑀯𑀸 𑀢𑀺𑀝𑁆𑀞𑀢𑀺, 𑀳𑀺𑀫𑀯𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀻’’𑀢𑀺. ‘‘𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄’’𑀢𑀺 𑀅𑀬𑀁 𑀏𑀓𑀯𑀘𑀦𑀦𑀬𑁄 𑀬𑀣𑀸𑀭𑀼𑀢𑀧𑀸𑀴𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. 𑀬𑀣𑀸𑀭𑀼𑀢𑀧𑀸𑀴𑀺 𑀘 𑀦𑀸𑀫 𑁋

‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀬𑀣𑀸 𑀲𑀭𑀸.

𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀦𑀸𑀕𑀭𑀸𑀚𑀸 𑀫𑀳𑀺𑀤𑁆𑀥𑀺𑀓𑁄;

𑀅𑀢𑀼𑀮𑁄 𑀦𑀸𑀫 𑀦𑀸𑀫𑁂𑀦, 𑀧𑀼𑀜𑁆𑀜𑀯𑀦𑁆𑀢𑁄 𑀚𑀼𑀢𑀺𑀦𑁆𑀥𑀭𑁄.

𑀕𑀢𑀺𑀫𑀦𑁆𑀢𑁄 𑀲𑀢𑀺𑀫𑀦𑁆𑀢𑁄, 𑀥𑀺𑀢𑀺𑀫𑀦𑁆𑀢𑁄 𑀘 𑀲𑁄 𑀇𑀲𑀺;

𑀲𑀤𑁆𑀥𑀫𑁆𑀫𑀥𑀸𑀭𑀓𑁄 𑀣𑁂𑀭𑁄, 𑀆𑀦𑀦𑁆𑀤𑁄 𑀭𑀢𑀦𑀸𑀓𑀭𑁄’’

𑀇𑀘𑁆𑀘𑀸𑀤𑀺. 𑀏𑀢𑁆𑀣 ‘‘𑀧𑀼𑀜𑁆𑀜𑀯𑀦𑁆𑀢𑁄’’𑀢𑀺𑀆𑀤𑀻𑀦𑀺 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀩𑀳𑀼𑀯𑀘𑀦𑀪𑀸𑀯𑁂𑀦 𑀧𑀼𑀦𑀧𑁆𑀧𑀼𑀦𑀁 𑀯𑀤𑀦𑁆𑀢𑀸𑀦𑀺𑀧𑀺 𑀓𑀢𑁆𑀣𑀘𑀺 𑀏𑀓𑀯𑀘𑀦𑀸𑀦𑀺 𑀳𑁄𑀦𑁆𑀢𑀺, 𑀏𑀓𑀯𑀘𑀦𑀪𑀸𑀯𑁄 𑀘 𑀦𑁂𑀲𑀁 𑀕𑀸𑀣𑀸𑀯𑀺𑀲𑀬𑁂 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀬𑀣𑀸𑀧𑀸𑀯𑀘𑀦𑀁 𑀕𑀳𑁂𑀢𑀩𑁆𑀩𑀸𑀦𑀺.

𑀏𑀯𑀁 𑀳𑀺𑀫𑀯𑀦𑁆𑀢𑀼𑀲𑀢𑀺𑀫𑀦𑁆𑀢𑀼𑀲𑀤𑁆𑀤𑀸𑀤𑀻𑀦𑀁 𑀯𑀺𑀲𑁂𑀲𑀁 𑀜𑀢𑁆𑀯𑀸 𑀧𑀼𑀦 𑀮𑀺𑀗𑁆𑀕𑀦𑁆𑀢𑀯𑀲𑁂𑀦 𑀤𑁆𑀯𑀺𑀮𑀺𑀗𑁆𑀕𑀓𑀧𑀤𑀸𑀦𑀫𑀢𑁆𑀣𑁄 𑀘 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀘 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀘 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀢𑀢𑁆𑀭 𑀳𑀺 ‘‘𑀲𑀺𑀭𑀺𑀫𑀸’’𑀢𑀺 𑀧𑀤𑀁 𑀲𑀼𑀢𑀺𑀲𑀸𑀫𑀜𑁆𑀜𑀯𑀲𑁂𑀦 𑀮𑀺𑀗𑁆𑀕𑀤𑁆𑀯𑀬𑁂 𑀯𑀢𑁆𑀢𑀦𑀢𑁄 𑀤𑁆𑀯𑀺𑀥𑀸 𑀪𑀺𑀚𑁆𑀚𑀢𑀺. ‘‘𑀲𑀺𑀭𑀺𑀫𑀸 𑀧𑀼𑀭𑀺𑀲𑁄’’𑀢𑀺 𑀳𑀺 𑀅𑀢𑁆𑀣𑁂 𑀆𑀓𑀸𑀭𑀦𑁆𑀢𑀁 𑀧𑀼𑀮𑁆𑀮𑀺𑀗𑁆𑀕𑀁, ‘‘𑀲𑀺𑀭𑀺𑀫𑀸 𑀦𑀸𑀫 𑀤𑁂𑀯𑀻’’𑀢𑀺 𑀅𑀢𑁆𑀣𑁂 𑀆𑀓𑀸𑀭𑀦𑁆𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀉𑀪𑀬𑀫𑁆𑀧𑁂𑀢𑀁 𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀸. 𑀅𑀣 𑀯𑀸 𑀧𑀦 𑀧𑀘𑁆𑀙𑀺𑀫𑀁 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁, 𑀲𑀺𑀭𑀻 𑀬𑀲𑁆𑀲 𑀅𑀢𑁆𑀣𑀺 𑀲𑁄 𑀲𑀺𑀭𑀺𑀫𑀸𑀢𑀺 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀦𑀺𑀩𑁆𑀩𑀘𑀦𑀁, 𑀲𑀺𑀭𑀻 𑀬𑀲𑁆𑀲𑀸 𑀅𑀢𑁆𑀣𑀺 𑀲𑀸 𑀲𑀺𑀭𑀺𑀫𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀦𑀺𑀩𑁆𑀩𑀘𑀦𑀁. 𑀅𑀢𑁆𑀭𑀺𑀫𑀸𑀦𑀺 𑀓𑀺𑀜𑁆𑀘𑀸𑀧𑀺 𑀲𑀼𑀢𑀺𑀯𑀲𑁂𑀦 𑀦𑀺𑀩𑁆𑀩𑀘𑀦𑀢𑁆𑀣𑀯𑀲𑁂𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀢𑁆𑀣𑀸𑀦𑀺, 𑀢𑀣𑀸𑀧𑀺 𑀧𑀼𑀭𑀺𑀲𑀧𑀤𑀢𑁆𑀣𑀇𑀢𑁆𑀣𑀺𑀧𑀤𑀢𑁆𑀣𑀯𑀸𑀘𑀓𑀢𑁆𑀢𑀸 𑀪𑀺𑀦𑁆𑀦𑀢𑁆𑀣𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄. 𑀲𑀺𑀭𑀺𑀫𑀸, 𑀲𑀺𑀭𑀺𑀫𑀸, 𑀲𑀺𑀭𑀺𑀫𑀦𑁆𑀢𑁄. 𑀲𑀺𑀭𑀺𑀫𑀦𑁆𑀢𑀁, 𑀲𑀺𑀭𑀺𑀫𑀦𑁆𑀢𑁂. 𑀲𑀺𑀭𑀺𑀫𑀢𑀸, 𑀲𑀺𑀭𑀺𑀫𑀦𑁆𑀢𑁂𑀦. 𑀕𑀼𑀡𑀯𑀦𑁆𑀢𑀼𑀲𑀤𑁆𑀤𑀲𑁆𑀲𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸. 𑀲𑀺𑀭𑀺𑀫𑀸, 𑀲𑀺𑀭𑀺𑀫𑀸, 𑀲𑀺𑀭𑀺𑀫𑀸𑀬𑁄. 𑀲𑀺𑀭𑀺𑀫𑀁, 𑀲𑀺𑀭𑀺𑀫𑀸, 𑀲𑀺𑀭𑀺𑀫𑀸𑀬𑁄. 𑀲𑀺𑀭𑀺𑀫𑀸𑀬. 𑀯𑀓𑁆𑀔𑀫𑀸𑀦𑀓𑀜𑁆𑀜𑀸𑀦𑀬𑁂𑀦 𑀜𑁂𑀬𑁆𑀬𑀸. 𑀏𑀯𑀁 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸𑀦𑀁 𑀲𑀫𑀸𑀦𑀲𑀼𑀢𑀺𑀓𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀲𑀫𑀸𑀦𑀦𑀺𑀩𑁆𑀩𑀘𑀦𑀢𑁆𑀣𑀲𑁆𑀲𑀧𑀺 𑀳𑀺 𑀅𑀲𑀫𑀸𑀦𑀲𑀼𑀢𑀺𑀓𑀲𑁆𑀲 ‘‘𑀲𑀺𑀭𑀺𑀫𑀸’’𑀢𑀺 𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 𑀧𑀤𑀸𑀦𑀁 𑀇𑀫𑁂𑀳𑀺 𑀧𑀤𑁂𑀳𑀺 𑀓𑀸𑀘𑀺𑀧𑀺 𑀲𑀫𑀸𑀦𑀢𑀸 𑀦 𑀮𑀩𑁆𑀪𑀢𑀺. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀺𑀭𑀺𑀫𑀸’’𑀢𑀺 𑀧𑀤𑀁 𑀤𑁆𑀯𑁂𑀥𑀸, 𑀧𑀼𑀫𑀺𑀢𑁆𑀣𑀻𑀲𑀼 𑀧𑀯𑀢𑁆𑀢𑀺𑀢𑁄;

𑀪𑀺𑀚𑁆𑀚𑀢𑀻𑀢𑀺 𑀯𑀺𑀪𑀸𑀯𑁂𑀬𑁆𑀬, 𑀏𑀢𑁆𑀣 𑀧𑀼𑀮𑁆𑀮𑀺𑀗𑁆𑀕𑀫𑀺𑀘𑁆𑀙𑀺𑀢𑀁.

𑀇𑀢𑀺 𑀅𑀪𑀺𑀪𑀯𑀺𑀢𑀸 𑀧𑀤𑁂𑀦 𑀯𑀺𑀲𑀤𑀺𑀲𑀸𑀦𑀺 𑀕𑀼𑀡𑀯𑀸𑀲𑀢𑀺𑀫𑀸𑀤𑀻𑀦𑀺 𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀲𑀤𑁆𑀥𑀺𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀳𑀺. 𑀇𑀤𑀸𑀦𑀺 𑀅𑀧𑀭𑀸𑀦𑀺𑀧𑀺 𑀢𑀩𑁆𑀩𑀺𑀲𑀤𑀺𑀲𑀸𑀦𑀺 𑀧𑀤𑀸𑀦𑀺 𑀤𑀲𑁆𑀲𑁂𑀲𑁆𑀲𑀸𑀫 𑀲𑀤𑁆𑀥𑀺𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀳𑀺. 𑀲𑁂𑀬𑁆𑀬𑀣𑀺𑀤𑀁?

𑀭𑀸𑀚𑀸 𑀩𑁆𑀭𑀳𑁆𑀫𑀸 𑀲𑀔𑀸 𑀅𑀢𑁆𑀢𑀸, 𑀆𑀢𑀼𑀫𑀸 𑀲𑀸 𑀧𑀼𑀫𑀸 𑀭𑀳𑀸;

𑀤𑀴𑁆𑀳𑀥𑀫𑁆𑀫𑀸 𑀘 𑀧𑀘𑁆𑀘𑀓𑁆𑀔-𑀥𑀫𑁆𑀫𑀸 𑀘 𑀯𑀺𑀯𑀝𑀘𑁆𑀙𑀤𑀸.

𑀯𑀢𑁆𑀢𑀳𑀸 𑀘 𑀢𑀣𑀸 𑀯𑀼𑀢𑁆𑀢-𑀲𑀺𑀭𑀸 𑀘𑁂𑀯 𑀬𑀼𑀯𑀸𑀧𑀺 𑀘;

𑀫𑀖𑀯 𑀅𑀤𑁆𑀥 𑀫𑀼𑀤𑁆𑀥𑀸𑀤𑀺, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑀏𑀢𑁆𑀣 ‘‘𑀲𑀸’’𑀢𑀺 𑀧𑀤𑀫𑁂𑀯 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀫𑀸𑀓𑀸𑀭𑀦𑁆𑀢𑀁, 𑀲𑁂𑀲𑀸𑀦𑀺 𑀧𑀦 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀸𑀦𑀺 𑀆𑀓𑀸𑀭𑀦𑁆𑀢𑀸𑀦𑀺.

𑀭𑀸𑀚𑀸, 𑀭𑀸𑀚𑀸, 𑀭𑀸𑀚𑀸𑀦𑁄. 𑀭𑀸𑀚𑀸𑀦𑀁, 𑀭𑀸𑀚𑀁, 𑀭𑀸𑀚𑀸𑀦𑁄. 𑀭𑀜𑁆𑀜𑀸, 𑀭𑀸𑀚𑀺𑀦𑀸, 𑀭𑀸𑀚𑀽𑀳𑀺, 𑀭𑀸𑀚𑀽𑀪𑀺. 𑀭𑀜𑁆𑀜𑁄, 𑀭𑀸𑀚𑀺𑀦𑁄, 𑀭𑀜𑁆𑀜𑀁, 𑀭𑀸𑀚𑀽𑀦𑀁, 𑀭𑀸𑀚𑀸𑀦𑀁. 𑀭𑀜𑁆𑀜𑀸, 𑀭𑀸𑀚𑀽𑀳𑀺, 𑀭𑀸𑀚𑀽𑀪𑀺. 𑀭𑀜𑁆𑀜𑁄, 𑀭𑀸𑀚𑀺𑀦𑁄, 𑀭𑀜𑁆𑀜𑀁, 𑀭𑀸𑀚𑀽𑀦𑀁, 𑀭𑀸𑀚𑀸𑀦𑀁. 𑀭𑀜𑁆𑀜𑁂, 𑀭𑀸𑀚𑀺𑀦𑀺, 𑀭𑀸𑀚𑀽𑀲𑀼. 𑀪𑁄 𑀭𑀸𑀚, 𑀪𑀯𑀦𑁆𑀢𑁄 𑀭𑀸𑀚𑀸𑀦𑁄, 𑀪𑀯𑀦𑁆𑀢𑁄 𑀭𑀸𑀚𑀸 𑀇𑀢𑀺 𑀯𑀸, 𑀅𑀬𑀫𑀫𑁆𑀳𑀸𑀓𑀁 𑀭𑀼𑀘𑀺.

𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀸𑀤𑀻𑀲𑀼 ‘‘𑀭𑀸𑀚𑀸’’𑀢𑀺 𑀩𑀳𑀼𑀯𑀘𑀦𑀁 𑀦 𑀆𑀕𑀢𑀁, 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 𑀆𑀕𑀢𑀁. 𑀓𑀺𑀜𑁆𑀘𑀸𑀧𑀺 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀸𑀤𑀻𑀲𑀼 𑀦 𑀆𑀕𑀢𑀁, 𑀢𑀣𑀸𑀧𑀺 ‘‘𑀦𑁂𑀢𑀸𑀤𑀺𑀲𑀸 𑀲𑀔𑀸 𑀳𑁄𑀦𑁆𑀢𑀺, 𑀮𑀩𑁆𑀪𑀸 𑀫𑁂 𑀚𑀻𑀯𑀢𑁄 𑀲𑀔𑀸’’𑀢𑀺 𑀧𑀸𑀴𑀺𑀬𑀁 𑀩𑀳𑀼𑀯𑀘𑀦𑁂𑀓𑀯𑀘𑀦𑀯𑀲𑁂𑀦 ‘‘𑀲𑀔𑀸’’𑀢𑀺 𑀧𑀤𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀭𑀸𑀚𑀸’’𑀢𑀺 𑀩𑀳𑀼𑀯𑀘𑀦𑀁 𑀇𑀘𑁆𑀙𑀺𑀢𑀩𑁆𑀩𑀫𑁂𑀯. 𑀢𑀣𑀸 ‘‘𑀩𑁆𑀭𑀳𑁆𑀫𑀸, 𑀅𑀢𑁆𑀢𑀸’’𑀇𑀘𑁆𑀘𑀸𑀤𑀻𑀦𑀺𑀧𑀺 𑀩𑀳𑀼𑀯𑀘𑀦𑀸𑀦𑀺 𑀢𑀕𑁆𑀕𑀢𑀺𑀓𑀢𑁆𑀢𑀸 𑀯𑀺𑀦𑀸 𑀓𑁂𑀦𑀘𑀺 𑀭𑀽𑀧𑀯𑀺𑀲𑁂𑀲𑁂𑀦.

𑀏𑀢𑁆𑀣 𑀘 ‘‘𑀕𑀳𑀧𑀢𑀺𑀓𑁄 𑀦𑀸𑀫 𑀞𑀧𑁂𑀢𑁆𑀯𑀸 𑀭𑀸𑀚𑀁 𑀭𑀸𑀚𑀪𑁄𑀕𑀁 𑀩𑁆𑀭𑀸𑀳𑁆𑀫𑀡𑀁 𑀅𑀯𑀲𑁂𑀲𑁄 𑀕𑀳𑀧𑀢𑀺𑀓𑁄 𑀦𑀸𑀫𑀸’’𑀢𑀺 𑀤𑀲𑁆𑀲𑀦𑀢𑁄 𑀭𑀸𑀚𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀤𑀁 𑀧𑀦 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀦 𑀆𑀕𑀢𑀁. ‘‘𑀲𑀩𑁆𑀩𑀤𑀢𑁆𑀢𑁂𑀦 𑀭𑀸𑀚𑀺𑀦𑀸’’𑀢𑀺 𑀤𑀲𑁆𑀲𑀦𑀢𑁄 ‘‘𑀭𑀸𑀚𑀺𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀆𑀭𑀸𑀥𑀬𑀢𑀺 𑀭𑀸𑀚𑀸𑀦𑀁, 𑀧𑀽𑀚𑀁 𑀮𑀪𑀢𑀺 𑀪𑀢𑁆𑀢𑀼𑀲𑀽’’𑀢𑀺 𑀤𑀲𑁆𑀲𑀦𑀢𑁄 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀯𑀲𑁂𑀦 ‘‘𑀭𑀸𑀚𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀘𑁆𑀘𑀸𑀬𑀦𑀭𑀽𑀧𑀲𑀺𑀤𑁆𑀥𑀺𑀕𑀦𑁆𑀣𑁂𑀲𑀼 𑀧𑀦 ‘‘𑀭𑀸𑀚𑁂𑀦, 𑀭𑀸𑀚𑁂𑀳𑀺, 𑀭𑀸𑀚𑁂𑀪𑀺. 𑀭𑀸𑀚𑁂𑀲𑀽’’𑀢𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀘𑀽𑀴𑀦𑀺𑀭𑀼𑀢𑁆𑀢𑀺𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂𑀲𑀼 𑀢𑀸𑀦𑀺 𑀦𑀸𑀕𑀢𑀸𑀦𑀺, 𑀅𑀦𑀸𑀕𑀢𑀪𑀸𑀯𑁄𑀬𑁂𑀯 𑀢𑁂𑀲𑀁 𑀬𑀼𑀢𑁆𑀢𑀢𑀭𑁄 𑀧𑀸𑀴𑀺𑀬𑀁 𑀅𑀤𑀲𑁆𑀲𑀦𑀢𑁄, 𑀢𑀲𑁆𑀫𑀸 𑀏𑀢𑁆𑀣𑁂𑀢𑀸𑀦𑀺 𑀅𑀫𑁆𑀳𑁂𑀳𑀺 𑀦 𑀯𑀼𑀢𑁆𑀢𑀸𑀦𑀺. 𑀧𑀸𑀴𑀺𑀦𑀬𑁂 𑀳𑀺 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 𑀈𑀤𑀺𑀲𑀸𑀦𑀺 𑀧𑀤𑀸𑀦𑀺 𑀲𑀫𑀸𑀲𑁂𑀬𑁂𑀯 𑀧𑀲𑁆𑀲𑀸𑀫, 𑀦 𑀧𑀦𑀸𑀜𑁆𑀜𑀢𑁆𑀭, 𑀅𑀢𑁆𑀭𑀺𑀫𑁂 𑀧𑀬𑁄𑀕𑀸 𑁋 ‘‘𑀆𑀯𑀼𑀢𑁆𑀣𑀁 𑀥𑀫𑁆𑀫𑀭𑀸𑀚𑁂𑀦𑀸’’𑀢𑀺 𑀘, ‘‘𑀲𑀺𑀯𑀺𑀭𑀸𑀚𑁂𑀦 𑀧𑁂𑀲𑀺𑀢𑁄’’𑀢𑀺 𑀘, ‘‘𑀧𑀚𑀸𑀧𑀢𑀺𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕’’𑀦𑁆𑀢𑀺 𑀘, ‘‘𑀦𑀺𑀓𑁆𑀔𑀫𑀦𑁆𑀢𑁂 𑀫𑀳𑀸𑀭𑀸𑀚𑁂, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁂’’𑀢𑀺 𑀘, 𑀏𑀯𑀁 𑀧𑀸𑀴𑀺𑀦𑀬𑁂 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 ‘‘𑀭𑀸𑀚𑁂𑀦𑀸’’𑀢𑀺𑀆𑀤𑀻𑀦𑀺 𑀲𑀫𑀸𑀲𑁂𑀬𑁂𑀯 𑀧𑀲𑁆𑀲𑀸𑀫, 𑀦 𑀓𑁂𑀯𑀮𑀁 𑀧𑀸𑀴𑀺𑀦𑀬𑁂 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑁂𑀧𑀺 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 𑀲𑀫𑀸𑀲𑁂𑀬𑁂𑀯 𑀧𑀲𑁆𑀲𑀸𑀫, 𑀦 𑀧𑀦𑀸𑀜𑁆𑀜𑀢𑁆𑀭, 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀫𑀺𑀤𑀁 𑀞𑀸𑀦𑀁. 𑀓𑁄 𑀳𑀺 𑀦𑀸𑀫 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀲𑀩𑁆𑀩𑀲𑁄 𑀦𑀬𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀲𑀫𑀢𑁆𑀣𑁄 𑀅𑀜𑁆𑀜𑀢𑁆𑀭 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀳𑀺 𑀔𑀻𑀡𑀸𑀲𑀯𑁂𑀳𑀺.

𑀏𑀢𑁆𑀣 𑀘 𑀲𑀫𑀸𑀲𑀦𑁆𑀢𑀕𑀢𑀭𑀸𑀚-𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑁄 𑀤𑁆𑀯𑀺𑀥𑀸 𑀯𑀼𑀘𑁆𑀘𑀦𑁆𑀢𑁂 𑀑𑀓𑀸𑀭𑀦𑁆𑀢𑀸𑀓𑀸𑀭𑀦𑁆𑀢𑀯𑀲𑁂𑀦. 𑀢𑀢𑁆𑀭𑁄𑀓𑀸𑀭𑀦𑁆𑀢𑀸 ‘‘𑀫𑀳𑀸𑀭𑀸𑀚𑁄 𑀬𑀼𑀯𑀭𑀸𑀚𑁄 𑀲𑀺𑀯𑀺𑀭𑀸𑀚𑁄 𑀥𑀫𑁆𑀫𑀭𑀸𑀚𑁄’’𑀇𑀘𑁆𑀘𑁂𑀯𑀫𑀸𑀤𑀬𑁄 𑀪𑀯𑀦𑁆𑀢𑀺. 𑀆𑀓𑀸𑀭𑀦𑁆𑀢𑀸 𑀧𑀦 ‘‘𑀫𑀳𑀸𑀭𑀸𑀚𑀸 𑀬𑀼𑀯𑀭𑀸𑀚𑀸 𑀲𑀺𑀯𑀺𑀭𑀸𑀚𑀸 𑀥𑀫𑁆𑀫𑀭𑀸𑀚𑀸’’𑀇𑀘𑁆𑀘𑁂𑀯𑀫𑀸𑀤𑀬𑁄. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀘 ‘‘𑀫𑀳𑀸𑀭𑀸𑀚𑁄’’𑀢𑀺𑀆𑀤𑀻𑀦𑀺 𑀦 𑀲𑀦𑁆𑀢𑀺, 𑀢𑀣𑀸𑀧𑀺 ‘‘𑀲𑀩𑁆𑀩𑀫𑀺𑀢𑁆𑀢𑁄 𑀲𑀩𑁆𑀩𑀲𑀔𑁄, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀓𑁄’’𑀢𑀺 𑀧𑀸𑀴𑀺𑀬𑀁 ‘‘𑀲𑀩𑁆𑀩𑀲𑀔𑁄’’𑀢𑀺 𑀤𑀲𑁆𑀲𑀦𑀢𑁄 ‘‘𑀫𑀳𑀸𑀭𑀸𑀚𑁄’’𑀢𑀺𑀆𑀤𑀻𑀦𑀺𑀧𑀺 𑀅𑀯𑀲𑁆𑀲𑀫𑀺𑀘𑁆𑀙𑀺𑀢𑀩𑁆𑀩𑀸𑀦𑀺. 𑀢𑀣𑀸 𑀳𑀺 𑀲𑀫𑀸𑀲𑁂𑀲𑀼 ‘‘𑀥𑀫𑁆𑀫𑀭𑀸𑀚𑁂𑀦, 𑀥𑀫𑁆𑀫𑀭𑀸𑀚𑀲𑁆𑀲𑀸’’𑀢𑀺𑀆𑀤𑀻𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀏𑀢𑀸𑀦𑀺 𑀑𑀓𑀸𑀭𑀦𑁆𑀢𑀭𑀽𑀧𑀸𑀦𑀺 𑀏𑀯, 𑀦𑀸𑀓𑀸𑀭𑀦𑁆𑀢𑀭𑀽𑀧𑀸𑀦𑀺. 𑀫𑀳𑀸𑀭𑀸𑀚𑁄, 𑀫𑀳𑀸𑀭𑀸𑀚𑀸. 𑀫𑀳𑀸𑀭𑀸𑀚𑀁, 𑀫𑀳𑀸𑀭𑀸𑀚𑁂. 𑀫𑀳𑀸𑀭𑀸𑀚𑁂𑀦, 𑀫𑀳𑀸𑀭𑀸𑀚𑁂𑀳𑀺, 𑀫𑀳𑀸𑀭𑀸𑀚𑁂𑀪𑀺. 𑀫𑀳𑀸𑀭𑀸𑀚𑀲𑁆𑀲, 𑀫𑀳𑀸𑀭𑀸𑀚𑀸𑀦𑀁. 𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸, 𑀫𑀳𑀸𑀭𑀸𑀚𑀫𑁆𑀳𑀸, 𑀫𑀳𑀸𑀭𑀸𑀚𑁂𑀳𑀺, 𑀫𑀳𑀸𑀭𑀸𑀚𑁂𑀪𑀺. 𑀫𑀳𑀸𑀭𑀸𑀚𑀲𑁆𑀲, 𑀫𑀳𑀸𑀭𑀸𑀚𑀸𑀦𑀁. 𑀫𑀳𑀸𑀭𑀸𑀚𑁂, 𑀫𑀳𑀸𑀭𑀸𑀚𑀲𑁆𑀫𑀺𑀁, 𑀫𑀳𑀸𑀭𑀸𑀚𑀫𑁆𑀳𑀺, 𑀫𑀳𑀸𑀭𑀸𑀚𑁂𑀲𑀼. 𑀪𑁄 𑀫𑀳𑀸𑀭𑀸𑀚, 𑀪𑀯𑀦𑁆𑀢𑁄 𑀫𑀳𑀸𑀭𑀸𑀚𑀸. 𑀓𑀘𑁆𑀘𑀸𑀬𑀦𑀘𑀽𑀴𑀦𑀺𑀭𑀼𑀢𑁆𑀢𑀺𑀦𑀬𑁂𑀳𑀺 𑀧𑀦 ‘‘𑀪𑁄 𑀫𑀳𑀸𑀭𑀸𑀚𑀸’’𑀇𑀢𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀬𑀣𑀸 ‘‘𑀫𑀳𑀸𑀭𑀸𑀚𑁄’’𑀢𑀺 𑀑𑀓𑀸𑀭𑀦𑁆𑀢𑀧𑀤𑀲𑁆𑀲 𑀯𑀲𑁂𑀦, 𑀏𑀯𑀁 ‘‘𑀲𑀺𑀯𑀺𑀭𑀸𑀚𑁄 𑀥𑀫𑁆𑀫𑀭𑀸𑀚𑁄 𑀤𑁂𑀯𑀭𑀸𑀚𑁄’’𑀢𑀺𑀆𑀤𑀻𑀦𑀫𑁆𑀧𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀁 𑀯𑀲𑁂𑀦 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀅𑀬𑀁 𑀧𑀦𑀸𑀓𑀸𑀭𑀦𑁆𑀢𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀸𑀦𑁄. 𑀫𑀳𑀸𑀭𑀸𑀚𑀸𑀦𑀁, 𑀫𑀳𑀸𑀭𑀸𑀚𑀁, 𑀫𑀳𑀸𑀭𑀸𑀚𑀸𑀦𑁄. 𑀫𑀳𑀸𑀭𑀜𑁆𑀜𑀸, 𑀫𑀳𑀸𑀭𑀸𑀚𑀺𑀦𑀸, 𑀫𑀳𑀸𑀭𑀸𑀚𑀽𑀳𑀺, 𑀫𑀳𑀸𑀭𑀸𑀚𑀽𑀪𑀺. 𑀫𑀳𑀸𑀭𑀜𑁆𑀜𑁄, 𑀫𑀳𑀸𑀭𑀸𑀚𑀺𑀦𑁄, 𑀫𑀳𑀸𑀭𑀜𑁆𑀜𑀁, 𑀫𑀳𑀸𑀭𑀸𑀚𑀽𑀦𑀁. 𑀫𑀳𑀸𑀭𑀜𑁆𑀜𑀸, 𑀫𑀳𑀸𑀭𑀸𑀚𑀽𑀳𑀺, 𑀫𑀳𑀸𑀭𑀸𑀚𑀽𑀪𑀺. 𑀫𑀳𑀸𑀭𑀜𑁆𑀜𑁄, 𑀫𑀳𑀸𑀭𑀸𑀚𑀺𑀦𑁄, 𑀫𑀳𑀸𑀭𑀜𑁆𑀜𑀁, 𑀫𑀳𑀸𑀭𑀸𑀚𑀽𑀦𑀁. 𑀫𑀳𑀸𑀭𑀜𑁆𑀜𑁂, 𑀫𑀳𑀸𑀭𑀸𑀚𑀺𑀦𑀺, 𑀫𑀳𑀸𑀭𑀸𑀚𑀽𑀲𑀼. 𑀪𑁄 𑀫𑀳𑀸𑀭𑀸𑀚, 𑀪𑀯𑀦𑁆𑀢𑁄 𑀫𑀳𑀸𑀭𑀸𑀚𑀸𑀦𑁄.

𑀇𑀥𑀸𑀧𑀺 𑀧𑀓𑀭𑀡𑀤𑁆𑀯𑀬𑀦𑀬𑁂𑀦 ‘‘𑀪𑁄 𑀫𑀳𑀸𑀭𑀸𑀚𑀸’’ 𑀇𑀢𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀬𑀣𑀸 𑀘 ‘‘𑀫𑀳𑀸𑀭𑀸𑀚𑀸’’𑀢𑀺 𑀆𑀓𑀸𑀭𑀦𑁆𑀢𑀧𑀤𑀲𑁆𑀲 𑀯𑀲𑁂𑀦, 𑀏𑀯𑀁 ‘‘𑀲𑀺𑀯𑀺𑀭𑀸𑀚𑀸, 𑀥𑀫𑁆𑀫𑀭𑀸𑀚𑀸, 𑀤𑁂𑀯𑀭𑀸𑀚𑀸’’𑀢𑀺𑀆𑀤𑀻𑀦𑀫𑁆𑀧𑀺 𑀆𑀓𑀸𑀭𑀦𑁆𑀢𑀧𑀤𑀸𑀦𑀁 𑀯𑀲𑁂𑀦 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀇𑀥 𑀅𑀧𑀭𑀸𑀧𑀺 𑀅𑀢𑁆𑀣𑀲𑁆𑀲 𑀧𑀸𑀓𑀝𑀻𑀓𑀭𑀡𑀢𑁆𑀣𑀁 𑀓𑁆𑀭𑀺𑀬𑀸𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀆𑀓𑀸𑀭𑀦𑁆𑀢𑁄𑀓𑀸𑀭𑀦𑁆𑀢𑀸𑀦𑀁 𑀫𑀺𑀲𑁆𑀲𑀓𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑁄 𑀢𑀺𑀝𑁆𑀞𑀢𑀺, 𑀫𑀳𑀸𑀭𑀸𑀚𑀸𑀦𑁄, 𑀫𑀳𑀸𑀭𑀸𑀚𑀸 𑀢𑀺𑀝𑁆𑀞𑀦𑁆𑀢𑀺. 𑀫𑀳𑀸𑀭𑀸𑀚𑀸𑀦𑀁, 𑀫𑀳𑀸𑀭𑀸𑀚𑀁 𑀧𑀲𑁆𑀲𑀢𑀺, 𑀫𑀳𑀸𑀭𑀸𑀚𑀸𑀦𑁄, 𑀫𑀳𑀸𑀭𑀸𑀚𑁂 𑀧𑀲𑁆𑀲𑀢𑀺. 𑀫𑀳𑀸𑀭𑀜𑁆𑀜𑀸, 𑀫𑀳𑀸𑀭𑀸𑀚𑀺𑀦𑀸, 𑀫𑀳𑀸𑀭𑀸𑀚𑁂𑀦 𑀓𑀢𑀁, 𑀫𑀳𑀸𑀭𑀸𑀚𑀽𑀳𑀺, 𑀫𑀳𑀸𑀭𑀸𑀚𑀽𑀪𑀺, 𑀫𑀳𑀸𑀭𑀸𑀚𑁂𑀳𑀺, 𑀫𑀳𑀸𑀭𑀸𑀚𑁂𑀪𑀺 𑀓𑀢𑀁. 𑀫𑀳𑀸𑀭𑀜𑁆𑀜𑁄, 𑀫𑀳𑀸𑀭𑀸𑀚𑀺𑀦𑁄, 𑀫𑀳𑀸𑀭𑀸𑀚𑀲𑁆𑀲 𑀤𑀻𑀬𑀢𑁂, 𑀫𑀳𑀸𑀭𑀜𑁆𑀜𑀸, 𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸, 𑀫𑀳𑀸𑀭𑀸𑀚𑀫𑁆𑀳𑀸 𑀦𑀺𑀲𑁆𑀲𑀝𑀁, 𑀫𑀳𑀸𑀭𑀸𑀚𑀽𑀳𑀺, 𑀫𑀳𑀸𑀭𑀸𑀚𑀽𑀪𑀺, 𑀫𑀳𑀸𑀭𑀸𑀚𑁂𑀳𑀺, 𑀫𑀳𑀸𑀭𑀸𑀚𑁂𑀪𑀺 𑀦𑀺𑀲𑁆𑀲𑀝𑀁. 𑀫𑀳𑀸𑀭𑀜𑁆𑀜𑁄, 𑀫𑀳𑀸𑀭𑀸𑀚𑀺𑀦𑁄, 𑀫𑀳𑀸𑀭𑀸𑀚𑀲𑁆𑀲 𑀧𑀭𑀺𑀕𑁆𑀕𑀳𑁄, 𑀫𑀳𑀸𑀭𑀜𑁆𑀜𑀁, 𑀫𑀳𑀸𑀭𑀸𑀚𑀽𑀦𑀁, 𑀫𑀳𑀸𑀭𑀸𑀚𑀸𑀦𑀁 𑀧𑀭𑀺𑀕𑁆𑀕𑀳𑁄. 𑀫𑀳𑀸𑀭𑀜𑁆𑀜𑁂, 𑀫𑀳𑀸𑀭𑀸𑀚𑀺𑀦𑀺, 𑀫𑀳𑀸𑀭𑀸𑀚𑁂, 𑀫𑀳𑀸𑀭𑀸𑀚𑀲𑁆𑀫𑀺𑀁, 𑀫𑀳𑀸𑀭𑀸𑀚𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀁, 𑀫𑀳𑀸𑀭𑀸𑀚𑀽𑀲𑀼, 𑀫𑀳𑀸𑀭𑀸𑀚𑁂𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀪𑁄 𑀫𑀳𑀸𑀭𑀸𑀚 𑀢𑁆𑀯𑀁 𑀢𑀺𑀝𑁆𑀞, 𑀪𑁄𑀦𑁆𑀢𑁄 𑀫𑀳𑀸𑀭𑀸𑀚𑀸𑀦𑁄, 𑀫𑀳𑀸𑀭𑀸𑀚𑀸 𑀢𑀼𑀫𑁆𑀳𑁂 𑀢𑀺𑀝𑁆𑀞𑀣𑀸𑀢𑀺. 𑀏𑀯𑀁 ‘‘𑀬𑀼𑀯𑀭𑀸𑀚𑀸, 𑀬𑀼𑀯𑀭𑀸𑀚𑁄’’𑀢𑀺𑀆𑀤𑀻𑀲𑀼𑀧𑀺.

𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀓𑀲𑁆𑀫𑀸 𑀧𑀓𑀭𑀡𑀓𑀢𑁆𑀢𑀼𑀦𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀳𑀦𑁆𑀢𑁄 𑀯𑀸𑀬𑀸𑀫𑁄 𑀘 𑀫𑀳𑀦𑁆𑀢𑁄 𑀘 𑀧𑀭𑀓𑁆𑀓𑀫𑁄 𑀓𑀢𑁄, 𑀦𑀦𑁆𑀯𑁂𑀢𑁂𑀲𑀼𑀧𑀺 𑀧𑀤𑁂𑀲𑀼 𑀓𑀸𑀦𑀺𑀘𑀺 𑀩𑀼𑀤𑁆𑀥𑀯𑀘𑀦𑁂 𑀯𑀺𑀚𑁆𑀚𑀦𑁆𑀢𑀺, 𑀓𑀸𑀦𑀺𑀘𑀺 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺? 𑀯𑀺𑀜𑁆𑀜𑀽𑀳𑀺 𑀢𑁂 𑀏𑀯𑀁 𑀯𑀢𑁆𑀢𑀩𑁆𑀩𑀸 ‘‘𑀧𑀓𑀭𑀡𑀓𑀢𑁆𑀢𑀸𑀭𑁂𑀦𑁂𑀢𑁆𑀣 𑀲𑁄 𑀘 𑀫𑀳𑀦𑁆𑀢𑁄 𑀯𑀸𑀬𑀸𑀫𑁄 𑀲𑁄 𑀘 𑀫𑀳𑀦𑁆𑀢𑁄 𑀧𑀭𑀓𑁆𑀓𑀫𑁄 𑀲𑀸𑀝𑁆𑀞𑀓𑀣𑁂 𑀦𑀯𑀗𑁆𑀕𑁂 𑀲𑀢𑁆𑀣𑀼𑀲𑀸𑀲𑀦𑁂 𑀲𑀤𑁆𑀤𑁂𑀲𑀼 𑀘 𑀅𑀢𑁆𑀣𑁂𑀲𑀼 𑀘 𑀲𑁄𑀢𑀸𑀭𑀸𑀦𑀁 𑀲𑀼𑀝𑁆𑀞𑀼 𑀓𑁄𑀲𑀮𑁆𑀮𑀼𑀧𑁆𑀧𑀸𑀤𑀦𑁂𑀦 𑀲𑀸𑀲𑀦𑀲𑁆𑀲𑁄𑀧𑀓𑀸𑀭𑀢𑁆𑀣𑀁 𑀓𑀢𑁄, 𑀬𑀸𑀦𑀺 𑀘𑁂𑀢𑀸𑀦𑀺 𑀢𑁂𑀦 𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀏𑀢𑁂𑀲𑀼 𑀓𑀸𑀦𑀺𑀘𑀺 𑀩𑀼𑀤𑁆𑀥𑀯𑀘𑀦𑁂 𑀯𑀺𑀚𑁆𑀚𑀦𑁆𑀢𑀺, 𑀓𑀸𑀦𑀺𑀘𑀺 𑀦 𑀯𑀺𑀚𑁆𑀚𑀦𑁆𑀢𑀺. 𑀏𑀢𑁆𑀣 𑀬𑀸𑀦𑀺 𑀩𑀼𑀤𑁆𑀥𑀯𑀘𑀦𑁂 𑀯𑀺𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀯𑀺𑀚𑁆𑀚𑀫𑀸𑀦𑀯𑀲𑁂𑀦 𑀕𑀳𑀺𑀢𑀸𑀦𑀺. 𑀬𑀸𑀦𑀺 𑀦 𑀯𑀺𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑀯𑀲𑁂𑀦 𑀧𑀸𑀴𑀺𑀦𑀬𑀯𑀲𑁂𑀦 𑀘 𑀕𑀳𑀺𑀢𑀸𑀦𑀻’’𑀢𑀺. 𑀅𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁄 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀸 𑁋

‘‘𑀇𑀤𑀁 𑀯𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀓𑀁𑀲𑁄 𑀩𑀸𑀭𑀸𑀡𑀲𑀺𑀕𑁆𑀕𑀳𑁄;

𑀥𑀦𑀼𑀁 𑀢𑀽𑀡𑀺𑀜𑁆𑀘 𑀦𑀺𑀓𑁆𑀔𑀺𑀧𑁆𑀧, 𑀲𑀁𑀬𑀫𑀁 𑀅𑀚𑁆𑀛𑀼𑀧𑀸𑀕𑀫𑀻’’𑀢𑀺

𑀇𑀤𑀁 𑀆𑀓𑀸𑀭𑀦𑁆𑀢𑀲𑁆𑀲 𑀫𑀳𑀸𑀭𑀸𑀚𑀲𑀤𑁆𑀤𑀲𑁆𑀲 𑀦𑀺𑀤𑀲𑁆𑀲𑀦𑀁. 𑀬𑀲𑁆𑀫𑀸 ‘‘𑀲𑀩𑁆𑀩𑀲𑀔𑁄’’𑀢𑀺 𑀧𑀸𑀴𑀺 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀢𑁂𑀦 𑀦𑀬𑁂𑀦 ‘‘𑀫𑀳𑀸𑀭𑀸𑀚𑁄’’𑀢𑀺𑀧𑀺 𑀑𑀓𑀸𑀭𑀦𑁆𑀢𑁄 𑀤𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑁄 𑀘. 𑀢𑁂𑀦𑁂𑀯 𑀘 ‘‘𑀢𑀫𑀩𑁆𑀭𑀯𑀺 𑀫𑀳𑀸𑀭𑀸𑀚𑀸. 𑀦𑀺𑀓𑁆𑀔𑀫𑀦𑁆𑀢𑁂 𑀫𑀳𑀸𑀭𑀸𑀚𑁂’’𑀢𑀺𑀆𑀤𑀻𑀦𑀺 𑀤𑀺𑀲𑁆𑀲𑀦𑁆𑀢𑀺.

𑀏𑀯𑀁 𑀫𑀳𑀸𑀭𑀸𑀚𑀲𑀤𑁆𑀤𑀲𑁆𑀲 𑀑𑀓𑀸𑀭𑀦𑁆𑀢𑀢𑁆𑀢𑁂 𑀲𑀺𑀤𑁆𑀥𑁂 ‘‘𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸, 𑀫𑀳𑀸𑀭𑀸𑀚𑀫𑁆𑀳𑀸’’𑀢𑀺 𑀧𑀜𑁆𑀘𑀫𑀺𑀬𑀸 𑀏𑀓𑀯𑀘𑀦𑀜𑁆𑀘 ‘‘𑀫𑀳𑀸𑀭𑀸𑀚𑁂, 𑀫𑀳𑀸𑀭𑀸𑀚𑀲𑁆𑀫𑀺𑀁, 𑀫𑀳𑀸𑀭𑀸𑀚𑀫𑁆𑀳𑀻’’𑀢𑀺 𑀲𑀢𑁆𑀢𑀫𑀺𑀬𑀸 𑀏𑀓𑀯𑀘𑀦𑀜𑁆𑀘 𑀲𑀺𑀤𑁆𑀥𑀸𑀦𑀺 𑀏𑀯 𑀳𑁄𑀦𑁆𑀢𑀺 𑀧𑀸𑀴𑀺𑀬𑀁 𑀅𑀯𑀺𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀦𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸. ‘‘𑀭𑀸𑀚𑁂𑀦, 𑀭𑀸𑀚𑀲𑁆𑀲𑀸’’𑀢𑀺𑀆𑀤𑀻𑀦𑀺 𑀧𑀦 𑀦𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀸𑀦𑀺 𑀦 𑀳𑁄𑀦𑁆𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 ‘‘𑀭𑀸𑀚𑀸 𑀩𑁆𑀭𑀳𑁆𑀫𑀸 𑀲𑀔𑀸 𑀅𑀢𑁆𑀢𑀸’’𑀇𑀘𑁆𑀘𑁂𑀯𑀫𑀸𑀤𑀻𑀦𑀺 ‘‘𑀧𑀼𑀭𑀺𑀲𑁄 𑀉𑀭𑀕𑁄’’𑀢𑀺𑀆𑀤𑀻𑀦𑀺 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀲𑀩𑁆𑀩𑀣𑀸 𑀲𑀤𑀺𑀲𑀸𑀦𑀺 𑀦 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀦𑁂𑀲𑀁 ‘‘𑀭𑀜𑁆𑀜𑀸 𑀩𑁆𑀭𑀳𑁆𑀫𑀼𑀦𑀸 𑀲𑀔𑀺𑀦𑀸 𑀅𑀢𑁆𑀢𑀦𑀸 𑀅𑀢𑁆𑀢𑁂𑀦 𑀲𑀸𑀦𑀸 𑀧𑀼𑀫𑀼𑀦𑀸’’𑀢𑀺𑀆𑀤𑀻𑀦𑀺 𑀯𑀺𑀲𑀤𑀺𑀲𑀸𑀦𑀺𑀧𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀦 𑀲𑀓𑁆𑀓𑀸 𑀦𑀬𑀯𑀲𑁂𑀦 𑀚𑀸𑀦𑀺𑀢𑀼𑀁. 𑀏𑀯𑀁 𑀤𑀼𑀚𑁆𑀚𑀸𑀦𑀢𑁆𑀢𑀸 𑀧𑀦 𑀧𑀸𑀴𑀺𑀬𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀘 𑀬𑀣𑀸𑀭𑀼𑀢𑀧𑀤𑀸𑀦𑁂𑀯 𑀕𑀳𑁂𑀢𑀩𑁆𑀩𑀸𑀦𑀺. 𑀫𑀳𑀸𑀭𑀸𑀚𑀲𑀤𑁆𑀤𑀸𑀤𑀻𑀦𑀁 𑀧𑀦 𑀑𑀓𑀸𑀭𑀦𑁆𑀢𑀪𑀸𑀯𑁂 𑀲𑀺𑀤𑁆𑀥𑁂𑀬𑁂𑀯 ‘‘𑀧𑀼𑀭𑀺𑀲𑀦𑀬𑁄𑀕𑀥𑀸 𑀇𑀫𑁂 𑀲𑀤𑁆𑀤𑀸’’𑀢𑀺 𑀦𑀬𑀕𑁆𑀕𑀳𑀡𑀁 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀦𑀬𑀯𑀲𑁂𑀦 ‘‘𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸’’𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀸𑀦𑀺. 𑀬𑀣𑀸 𑀳𑀺 𑁋

‘‘𑀏𑀢𑀜𑁆𑀳𑀺 𑀢𑁂 𑀤𑀼𑀭𑀸𑀚𑀸𑀦𑀁, 𑀬𑀁 𑀲𑁂𑀲𑀺 𑀫𑀢𑀲𑀸𑀬𑀺𑀓𑀁;

𑀬𑀲𑁆𑀲 𑀢𑁂 𑀓𑀟𑁆𑀠𑀫𑀸𑀦𑀲𑁆𑀲, 𑀳𑀢𑁆𑀣𑀸 𑀤𑀡𑁆𑀟𑁄𑀦 𑀫𑀼𑀘𑁆𑀘𑀢𑀻’’𑀢𑀺

𑀏𑀢𑁆𑀣 ‘‘𑀳𑀢𑁆𑀣𑀸’’𑀢𑀺, ‘‘𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢’’𑀦𑁆𑀢𑀺 𑀏𑀢𑁆𑀣 𑀧𑀦 ‘‘𑀤𑀡𑁆𑀟𑀸’’𑀢𑀺 𑀘 𑀑𑀓𑀸𑀭𑀦𑁆𑀢𑀲𑁆𑀲 𑀧𑀜𑁆𑀘𑀫𑀺𑀬𑁂𑀓𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀉𑀭𑀕𑀸, 𑀧𑀝𑀗𑁆𑀕𑀸, 𑀯𑀺𑀳𑀕𑀸’’𑀢𑀺𑀆𑀤𑀻𑀦𑀺𑀧𑀺 𑀑𑀓𑀸𑀭𑀦𑁆𑀢𑀸𑀦𑀺 𑀧𑀜𑁆𑀘𑀫𑀺𑀬𑁂𑀓𑀯𑀘𑀦𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘 ‘‘𑀤𑀸𑀞𑀺𑀦𑀺 𑀫𑀸𑀢𑀺𑀫𑀜𑁆𑀜𑀯𑁆𑀳𑁄, 𑀲𑀺𑀗𑁆𑀕𑀸𑀮𑁄 𑀫𑀫 𑀧𑀸𑀡𑀤𑁄’’𑀢𑀺 𑀏𑀢𑁆𑀣 ‘‘𑀫𑀜𑁆𑀜𑀯𑁆𑀳𑁄’’𑀢𑀺, ‘‘𑀲𑀼𑀤𑁆𑀥𑀸 𑀲𑀼𑀤𑁆𑀥𑁂𑀳𑀺 𑀲𑀁𑀯𑀸𑀲𑀁, 𑀓𑀧𑁆𑀧𑀬𑀯𑁆𑀳𑁄 𑀧𑀢𑀺𑀲𑁆𑀲𑀢𑀸’’𑀢𑀺 𑀏𑀢𑁆𑀣 𑀧𑀦 ‘‘𑀓𑀧𑁆𑀧𑀬𑀯𑁆𑀳𑁄’’𑀢𑀺 𑀘 𑀓𑁆𑀭𑀺𑀬𑀸𑀧𑀤𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀕𑀘𑁆𑀙𑀯𑁆𑀳𑁄, 𑀪𑀼𑀜𑁆𑀚𑀯𑁆𑀳𑁄, 𑀲𑀬𑀯𑁆𑀳𑁄’’𑀢𑀺𑀆𑀤𑀻𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀕𑀡𑁆𑀳𑀦𑁆𑀢𑀺 𑀘 𑀢𑀸𑀤𑀺𑀲𑀸𑀦𑀺 𑀧𑀤𑀭𑀽𑀧𑀸𑀦𑀺 𑀲𑀸𑀲𑀦𑁂 𑀲𑀼𑀓𑀼𑀲𑀮𑀸 𑀓𑀼𑀲𑀮𑀸, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺𑀧𑀺 𑀦𑀬𑀕𑁆𑀕𑀸𑀳𑀯𑀲𑁂𑀦 ‘‘𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸’’𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀸𑀦𑀺. 𑀦𑀬𑀕𑁆𑀕𑀸𑀳𑀯𑀲𑁂𑀦 𑀧𑀦 𑀕𑀳𑀡𑁂 𑀅𑀲𑀢𑀺 𑀓𑀣𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀭𑀺𑀧𑀼𑀡𑁆𑀡𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀢𑀺𑀬𑁂𑀯 𑀢𑀲𑁆𑀫𑀺𑀁 𑀧𑀭𑀺𑀧𑀼𑀡𑁆𑀡𑀸 𑀪𑀯𑀦𑁆𑀢𑀺.

𑀢𑀣𑀸 𑀳𑀺 𑀩𑀼𑀤𑁆𑀥𑀯𑀘𑀦𑁂 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀺 𑀦𑀸𑀫𑀺𑀓𑀧𑀤𑀸𑀦𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀘 𑀧𑀸𑀝𑀺𑀏𑀓𑁆𑀓𑀁 𑀧𑀸𑀝𑀺𑀏𑀓𑁆𑀓𑀁 𑀏𑀓𑀯𑀘𑀦𑀩𑀳𑀼𑀯𑀘𑀦𑀓𑀸𑀳𑀺 𑀲𑀢𑁆𑀢𑀳𑀺 𑀅𑀝𑁆𑀞𑀳𑀺 𑀯𑀸 𑀦𑀸𑀫𑀯𑀺𑀪𑀢𑁆𑀢𑀻𑀳𑀺 𑀙𑀦𑁆𑀦𑀯𑀼𑀢𑀺𑀬𑀸 𑀘 𑀆𑀔𑁆𑀬𑀸𑀢𑀺𑀓𑀯𑀘𑀦𑁂𑀳𑀺 𑀬𑁄𑀚𑀺𑀢𑀸𑀦𑀺 𑀦 𑀲𑀦𑁆𑀢𑀺, 𑀦𑀬𑀯𑀲𑁂𑀦 𑀧𑀦 𑀲𑀦𑁆𑀢𑀺𑀬𑁂𑀯, 𑀇𑀢𑀺 𑀦𑀬𑀯𑀲𑁂𑀦 ‘‘𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸’’𑀢𑀺𑀆𑀤𑀻𑀦𑀺 𑀅𑀫𑁆𑀳𑁂𑀳𑀺 𑀞𑀧𑀺𑀢𑀸𑀦𑀺. ‘‘𑀫𑀳𑀸𑀭𑀸𑀚𑀸 𑀢𑀺𑀝𑁆𑀞𑀦𑁆𑀢𑀺, 𑀫𑀳𑀸𑀭𑀸𑀚𑀸 𑀢𑀼𑀫𑁆𑀳𑁂 𑀢𑀺𑀝𑁆𑀞𑀣𑀸’’𑀢𑀺 𑀇𑀫𑀸𑀦𑀺 𑀧𑀦 ‘‘𑀅𑀣 𑀔𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸 𑀫𑀳𑀢𑀺𑀬𑀸 𑀘 𑀬𑀓𑁆𑀔𑀲𑁂𑀦𑀸𑀬 𑀫𑀳𑀢𑀺𑀬𑀸 𑀘 𑀓𑀼𑀫𑁆𑀪𑀡𑁆𑀟𑀲𑁂𑀦𑀸𑀬𑀸’’𑀢𑀺 𑀤𑀲𑁆𑀲𑀦𑀢𑁄,

‘‘𑀘𑀢𑁆𑀢𑀸𑀭𑁄 𑀢𑁂 𑀫𑀳𑀸𑀭𑀸𑀚𑀸, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸;

𑀤𑀤𑁆𑀤𑀴𑁆𑀳𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀯𑀦𑁂 𑀓𑀸𑀧𑀺𑀮𑀯𑀢𑁆𑀣𑀯𑁂’’𑀢𑀺

𑀤𑀲𑁆𑀲𑀦𑀢𑁄 𑀘 𑀯𑀼𑀢𑁆𑀢𑀸𑀦𑀺. ‘‘𑀫𑀳𑀸𑀭𑀸𑀚’’𑀦𑁆𑀢𑀺𑀆𑀤𑀻𑀦𑀺𑀧𑀺 𑀧𑀸𑀴𑀺𑀜𑁆𑀘 𑀧𑀸𑀴𑀺𑀦𑀬𑀜𑁆𑀘 𑀤𑀺𑀲𑁆𑀯𑀸 𑀏𑀯 𑀯𑀼𑀢𑁆𑀢𑀸𑀦𑀺. 𑀅𑀲𑀫𑀸𑀲𑁂 ‘‘𑀭𑀸𑀚𑀁, 𑀭𑀸𑀚𑁂𑀦𑀸’’𑀢𑀺𑀆𑀤𑀻𑀦𑀺 𑀦 𑀧𑀲𑁆𑀲𑀸𑀫, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑀩𑁆𑀩𑀫𑀺𑀤𑀁 𑀞𑀸𑀦𑀁. 𑀇𑀤𑀜𑁆𑀳𑀺 𑀤𑀼𑀤𑁆𑀤𑀲𑀁 𑀯𑀻𑀭𑀚𑀸𑀢𑀺𑀦𑀸 𑀚𑀸𑀦𑀺𑀢𑀩𑁆𑀩𑀝𑁆𑀞𑀸𑀦𑀁. 𑀲𑀘𑁂 𑀧𑀦𑀸𑀬𑀲𑁆𑀫𑀦𑁆𑀢𑁄 𑀩𑀼𑀤𑁆𑀥𑀯𑀘𑀦𑁂 𑀯𑀸 𑀧𑁄𑀭𑀸𑀡𑀺𑀓𑀸𑀲𑀼 𑀯𑀸 𑀅𑀝𑁆𑀞𑀓𑀣𑀸𑀲𑀼 𑀅𑀲𑀫𑀸𑀲𑁂 ‘‘𑀭𑀸𑀚𑀁, 𑀭𑀸𑀚𑁂𑀦𑀸’’𑀢𑀺𑀆𑀤𑀻𑀦𑀺 𑀧𑀲𑁆𑀲𑁂𑀬𑁆𑀬𑀸𑀣, 𑀢𑀤𑀸 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣. 𑀓𑁄 𑀳𑀺 𑀦𑀸𑀫 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀩𑀼𑀤𑁆𑀥𑀯𑀘𑀦𑁂 𑀯𑁄𑀳𑀸𑀭𑀧𑁆𑀧𑀪𑁂𑀤𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄 𑀅𑀜𑁆𑀜𑀢𑁆𑀭 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀳𑀺 𑀫𑀳𑀸𑀔𑀻𑀡𑀸𑀲𑀯𑁂𑀳𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀦𑀺𑀭𑀼𑀢𑁆𑀢𑀺𑀧𑀤𑀓𑁄𑀯𑀺𑀤𑁄;

𑀅𑀓𑁆𑀔𑀭𑀸𑀦𑀁 𑀲𑀦𑁆𑀦𑀺𑀧𑀸𑀢𑀁, 𑀚𑀜𑁆𑀜𑀸 𑀧𑀼𑀩𑁆𑀩𑀸𑀧𑀭𑀸𑀦𑀺 𑀘𑀸’’𑀢𑀺.

𑀩𑁆𑀭𑀳𑁆𑀫𑀸, 𑀩𑁆𑀭𑀳𑁆𑀫𑀸, 𑀩𑁆𑀭𑀳𑁆𑀫𑀸𑀦𑁄. 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀳𑁆𑀫𑀁, 𑀩𑁆𑀭𑀳𑁆𑀫𑀸𑀦𑁄. 𑀩𑁆𑀭𑀳𑁆𑀫𑀼𑀦𑀸, 𑀩𑁆𑀭𑀳𑁆𑀫𑁂𑀳𑀺, 𑀩𑁆𑀭𑀳𑁆𑀫𑁂𑀪𑀺, 𑀩𑁆𑀭𑀳𑁆𑀫𑀽𑀳𑀺, 𑀩𑁆𑀭𑀳𑁆𑀫𑀽𑀪𑀺. 𑀩𑁆𑀭𑀳𑁆𑀫𑀲𑁆𑀲, 𑀩𑁆𑀭𑀳𑁆𑀫𑀼𑀦𑁄, 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀳𑁆𑀫𑀽𑀦𑀁. 𑀩𑁆𑀭𑀳𑁆𑀫𑀼𑀦𑀸, 𑀩𑁆𑀭𑀳𑁆𑀫𑁂𑀳𑀺, 𑀩𑁆𑀭𑀳𑁆𑀫𑁂𑀪𑀺, 𑀩𑁆𑀭𑀳𑁆𑀫𑀽𑀳𑀺, 𑀩𑁆𑀭𑀳𑁆𑀫𑀽𑀪𑀺. 𑀩𑁆𑀭𑀳𑁆𑀫𑀲𑁆𑀲, 𑀩𑁆𑀭𑀳𑁆𑀫𑀼𑀦𑁄, 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀳𑁆𑀫𑀽𑀦𑀁. 𑀩𑁆𑀭𑀳𑁆𑀫𑀦𑀺, 𑀩𑁆𑀭𑀳𑁆𑀫𑁂𑀲𑀼, 𑀪𑁄 𑀩𑁆𑀭𑀳𑁆𑀫, 𑀪𑁄 𑀩𑁆𑀭𑀳𑁆𑀫𑁂, 𑀪𑀯𑀦𑁆𑀢𑁄 𑀩𑁆𑀭𑀳𑁆𑀫𑀸𑀦𑁄.

𑀬𑀫𑀓𑀫𑀳𑀸𑀣𑁂𑀭𑀭𑀼𑀘𑀺𑀬𑀸 ‘‘𑀪𑁄 𑀩𑁆𑀭𑀳𑁆𑀫𑀸’’𑀇𑀢𑀺 𑀩𑀳𑀼𑀯𑀘𑀦𑀁 𑀯𑀸. 𑀏𑀢𑁆𑀣 𑀧𑀦 ‘‘𑀧𑀡𑁆𑀟𑀺𑀢𑀧𑀼𑀭𑀺𑀲𑁂𑀳𑀺 𑀤𑁂𑀯𑁂𑀳𑀺 𑀩𑁆𑀭𑀳𑁆𑀫𑀽𑀳𑀻’’𑀢𑀺 𑀝𑀻𑀓𑀸𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄, ‘‘𑀩𑁆𑀭𑀳𑁆𑀫𑀽𑀦𑀁 𑀯𑀘𑀻𑀖𑁄𑀲𑁄 𑀳𑁄𑀢𑀻’’𑀢𑀺 𑀘 ‘‘𑀩𑁆𑀭𑀳𑁆𑀫𑀽𑀦𑀁 𑀯𑀺𑀫𑀸𑀦𑀸𑀤𑀻𑀲𑀼 𑀙𑀦𑁆𑀤𑀭𑀸𑀕𑁄 𑀓𑀸𑀫𑀸𑀲𑀯𑁄 𑀦 𑀳𑁄𑀢𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄, ‘‘𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁, 𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’’𑀢𑀺 𑀆𑀳𑀘𑁆𑀘𑀪𑀸𑀲𑀺𑀢𑀲𑁆𑀲 𑀘 𑀤𑀲𑁆𑀲𑀦𑀢𑁄 ‘‘𑀩𑁆𑀭𑀳𑁆𑀫𑀽𑀳𑀺, 𑀩𑁆𑀭𑀳𑁆𑀫𑀽𑀪𑀺, 𑀩𑁆𑀭𑀳𑁆𑀫𑀽𑀦𑀁, 𑀩𑁆𑀭𑀳𑁆𑀫𑁂’’𑀢𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀏𑀢𑀸𑀦𑀺 𑀘𑀽𑀴𑀦𑀺𑀭𑀼𑀢𑁆𑀢𑀺𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀓𑀘𑁆𑀘𑀸𑀬𑀦𑁂𑀲𑀼 𑀦 𑀆𑀕𑀢𑀸𑀦𑀺.

𑀲𑀔𑀸, 𑀲𑀔𑀸, 𑀲𑀔𑀺𑀦𑁄, 𑀲𑀔𑀸𑀦𑁄, 𑀲𑀔𑀸𑀬𑁄. 𑀲𑀔𑀁, 𑀲𑀔𑀸𑀭𑀁, 𑀲𑀔𑀸𑀦𑀁, 𑀲𑀔𑀺𑀦𑁄, 𑀲𑀔𑀸𑀦𑁄, 𑀲𑀔𑀸𑀬𑁄. 𑀲𑀔𑀺𑀦𑀸, 𑀲𑀔𑀸𑀭𑁂𑀳𑀺, 𑀲𑀔𑀸𑀭𑁂𑀪𑀺, 𑀲𑀔𑁂𑀳𑀺, 𑀲𑀔𑁂𑀪𑀺. 𑀲𑀔𑀺𑀲𑁆𑀲, 𑀲𑀔𑀺𑀦𑁄, 𑀲𑀔𑀻𑀦𑀁, 𑀲𑀔𑀸𑀭𑀸𑀦𑀁, 𑀲𑀔𑀸𑀦𑀁. 𑀲𑀔𑀸𑀭𑀲𑁆𑀫𑀸, 𑀲𑀔𑀺𑀦𑀸, 𑀲𑀔𑀸𑀭𑁂𑀳𑀺, 𑀲𑀔𑀸𑀭𑁂𑀪𑀺, 𑀲𑀔𑁂𑀳𑀺, 𑀲𑀔𑁂𑀪𑀺. 𑀲𑀔𑀺𑀲𑁆𑀲, 𑀲𑀔𑀺𑀦𑁄, 𑀲𑀔𑀻𑀦𑀁, 𑀲𑀔𑀸𑀭𑀸𑀦𑀁, 𑀲𑀔𑀸𑀦𑀁. 𑀲𑀔𑁂, 𑀲𑀔𑁂𑀲𑀼, 𑀲𑀔𑀸𑀭𑁂𑀲𑀼. 𑀪𑁄 𑀲𑀔, 𑀪𑁄 𑀲𑀔𑀸, 𑀪𑁄 𑀲𑀔𑀺, 𑀪𑁄 𑀲𑀔𑀻, 𑀪𑁄 𑀲𑀔𑁂, 𑀪𑀯𑀦𑁆𑀢𑁄 𑀲𑀔𑀺𑀦𑁄, 𑀲𑀔𑀸𑀦𑁄, 𑀲𑀔𑀸𑀬𑁄.

𑀬𑀫𑀓𑀫𑀳𑀸𑀣𑁂𑀭𑀫𑀢𑁂𑀦 ‘‘𑀪𑁄 𑀲𑀔𑀸’’𑀇𑀢𑀺 𑀩𑀳𑀼𑀯𑀘𑀦𑀁 𑀯𑀸. 𑀧𑀸𑀴𑀺𑀬𑀁 𑀧𑀦 𑀲𑀼𑀯𑀡𑁆𑀡𑀓𑀓𑁆𑀓𑀝𑀚𑀸𑀢𑀓𑁂 ‘‘𑀳𑀭𑁂 𑀲𑀔𑀸 𑀓𑀺𑀲𑁆𑀲 𑀦𑀼 𑀫𑀁 𑀚𑀳𑀸𑀲𑀻’’𑀢𑀺 𑀤𑀻𑀖𑀯𑀲𑁂𑀦 𑀯𑀼𑀢𑁆𑀢𑁄 𑀲𑀔𑀸𑀲𑀤𑁆𑀤𑁄 𑀆𑀮𑀧𑀦𑁂𑀓𑀯𑀘𑀦𑀁, 𑀢𑀲𑁆𑀫𑀸 𑀬𑀫𑀓𑀫𑀳𑀸𑀣𑁂𑀭𑀦𑀬𑁄 𑀦 𑀬𑀼𑀚𑁆𑀚𑀢𑀻𑀢𑀺 𑀘𑁂? 𑀦𑁄 𑀦 𑀬𑀼𑀚𑁆𑀚𑀢𑀺. 𑀬𑀲𑁆𑀫𑀸 ‘‘𑀦𑁂𑀢𑀸𑀤𑀺𑀲𑀸 𑀲𑀔𑀸 𑀳𑁄𑀦𑁆𑀢𑀺, 𑀮𑀩𑁆𑀪𑀸 𑀫𑁂 𑀚𑀻𑀯𑀢𑁄 𑀲𑀔𑀸’’𑀢𑀺 𑀫𑀦𑁄𑀚𑀚𑀸𑀢𑀓𑁂 𑀲𑀔𑀸𑀲𑀤𑁆𑀤𑁄 𑀏𑀓𑀯𑀘𑀦𑀫𑁆𑀧𑀺 𑀳𑁄𑀢𑀺 𑀩𑀳𑀼𑀯𑀘𑀦𑀫𑁆𑀧𑀺. 𑀢𑀣𑀸 𑀳𑀺 𑀢𑀢𑁆𑀣 𑀧𑀞𑀫𑀧𑀸𑀤𑁂 𑀩𑀳𑀼𑀯𑀘𑀦𑀁, 𑀤𑀼𑀢𑀺𑀬𑀧𑀸𑀤𑁂 𑀧𑀦𑁂𑀓𑀯𑀘𑀦𑀁, 𑀢𑀲𑁆𑀫𑀸 𑀬𑀫𑀓𑀫𑀳𑀸𑀣𑁂𑀭𑁂𑀦 𑀧𑀘𑁆𑀘𑀢𑁆𑀢𑀸𑀮𑀧𑀦𑀩𑀳𑀼𑀯𑀘𑀦𑀝𑁆𑀞𑀸𑀦𑁂 𑀲𑀔𑀸𑀲𑀤𑁆𑀤𑁄 𑀯𑀼𑀢𑁆𑀢𑁄. 𑀏𑀢𑁆𑀣 𑀘 ‘‘𑀲𑀩𑁆𑀩𑀫𑀺𑀢𑁆𑀢𑁄 𑀲𑀩𑁆𑀩𑀲𑀔𑁄, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀓𑁄’’𑀢𑀺 𑀧𑀸𑀞𑀸𑀦𑀼𑀮𑁄𑀫𑁂𑀦 𑀲𑀫𑀸𑀲𑁂 𑀮𑀩𑁆𑀪𑀫𑀸𑀦𑀲𑁆𑀲 𑀲𑀔𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺 ‘‘𑀲𑀩𑁆𑀩𑀲𑀔𑁄, 𑀲𑀩𑁆𑀩𑀲𑀔𑀸, 𑀲𑀩𑁆𑀩𑀲𑀔𑀁, 𑀲𑀩𑁆𑀩𑀲𑀔𑁂’’𑀢𑀺𑀆𑀤𑀺𑀦𑀸 𑀧𑀼𑀭𑀺𑀲𑀦𑀬𑁂𑀦. 𑀢𑀢𑁆𑀭𑀸𑀬𑀁 𑀲𑀫𑀸𑀲𑀯𑀺𑀕𑁆𑀕𑀳𑁄 𑁋 𑀲𑀩𑁆𑀩𑁂𑀲𑀁 𑀚𑀦𑀸𑀦𑀁 𑀲𑀔𑀸, 𑀲𑀩𑁆𑀩𑁂 𑀯𑀸 𑀚𑀦𑀸 𑀲𑀔𑀺𑀦𑁄 𑀏𑀢𑀲𑁆𑀲𑀸𑀢𑀺 𑀲𑀩𑁆𑀩𑀲𑀔𑁄, 𑀬𑀣𑀸 𑀲𑀩𑁆𑀩𑀯𑁂𑀭𑀻𑀢𑀺.

𑀅𑀢𑁆𑀢𑀸, 𑀅𑀢𑁆𑀢𑀸, 𑀅𑀢𑁆𑀢𑀸𑀦𑁄. 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀁, 𑀅𑀢𑁆𑀢𑀸𑀦𑁄. 𑀅𑀢𑁆𑀢𑀦𑀸, 𑀅𑀢𑁆𑀢𑁂𑀦, 𑀅𑀢𑁆𑀢𑀦𑁂𑀳𑀺, 𑀅𑀢𑁆𑀢𑀦𑁂𑀪𑀺. 𑀅𑀢𑁆𑀢𑀦𑁄, 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑀸, 𑀅𑀢𑁆𑀢𑀦𑁂𑀳𑀺, 𑀅𑀢𑁆𑀢𑀦𑁂𑀪𑀺. 𑀅𑀢𑁆𑀢𑀦𑁄, 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑀺, 𑀅𑀢𑁆𑀢𑀦𑁂𑀲𑀼. 𑀪𑁄 𑀅𑀢𑁆𑀢, 𑀪𑀯𑀦𑁆𑀢𑁄 𑀅𑀢𑁆𑀢𑀸, 𑀪𑁄𑀦𑁆𑀢𑁄 𑀅𑀢𑁆𑀢𑀸𑀦𑁄.

𑀏𑀢𑁆𑀣 𑀧𑀦 𑀅𑀢𑁆𑀢𑀁 𑀦𑀺𑀭𑀗𑁆𑀓𑀢𑁆𑀯𑀸𑀦 𑀧𑀺𑀬𑀸𑀦𑀺 𑀲𑁂𑀯𑀢𑀺.

‘‘𑀲𑀘𑁂 𑀕𑀘𑁆𑀙𑀲𑀺 𑀧𑀜𑁆𑀘𑀸𑀮𑀁, 𑀔𑀺𑀧𑁆𑀧’𑀫𑀢𑁆𑀢𑀁 𑀚𑀳𑀺𑀲𑁆𑀲𑀲𑀺;

𑀫𑀺𑀕𑀁 𑀧𑀦𑁆𑀣𑀸𑀦𑀼𑀧𑀦𑁆𑀦𑀁𑀯, 𑀫𑀳𑀦𑁆𑀢𑀁 𑀪𑀬𑀫𑁂𑀲𑁆𑀲𑀢𑀻’’𑀢𑀺

𑀧𑀸𑀴𑀻𑀲𑀼 ‘‘𑀅𑀢𑁆𑀢’’𑀦𑁆𑀢𑀺 𑀤𑀲𑁆𑀲𑀦𑀢𑁄 ‘‘𑀅𑀢𑁆𑀢’’𑀦𑁆𑀢𑀺 𑀇𑀥 𑀯𑀼𑀢𑁆𑀢𑀁, ‘‘𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺 𑀧𑀸𑀴𑀺𑀤𑀲𑁆𑀲𑀦𑀢𑁄 𑀧𑀦 ‘‘𑀅𑀢𑁆𑀢𑁂𑀦𑀸’’𑀢𑀺. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 ‘‘𑀅𑀢𑁆𑀢𑀲𑁆𑀲𑀸’’𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀫𑁂𑀓𑀯𑀘𑀦𑀁 𑀆𑀕𑀢𑀁, 𑀏𑀢𑀁 𑀓𑀘𑁆𑀘𑀸𑀬𑀦𑁂 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 𑀦 𑀤𑀺𑀲𑁆𑀲𑀢𑀺. 𑀓𑀢𑁆𑀣𑀘𑀺 𑀧𑀦 ‘‘𑀅𑀢𑁆𑀢𑁂𑀲𑀽’’𑀢𑀺 𑀆𑀕𑀢𑀁. 𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀸𑀝𑁆𑀞𑀓𑀣𑀁 𑀚𑀺𑀦𑀢𑀦𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀦𑀺.

‘‘𑀆𑀢𑀼𑀫𑀸, 𑀆𑀢𑀼𑀫𑀸, 𑀆𑀢𑀼𑀫𑀸𑀦𑁄. 𑀆𑀢𑀼𑀫𑀸𑀦𑀁, 𑀆𑀢𑀼𑀫𑀁, 𑀆𑀢𑀼𑀫𑀸𑀦𑁄. 𑀆𑀢𑀼𑀫𑁂𑀦, 𑀆𑀢𑀼𑀫𑁂𑀳𑀺, 𑀆𑀢𑀼𑀫𑁂𑀪𑀻’’𑀢𑀺𑀆𑀤𑀺𑀦𑀸 𑀧𑀼𑀭𑀺𑀲𑀦𑀬𑁂𑀦 𑀯𑀢𑁆𑀯𑀸 ‘‘𑀪𑁄 𑀆𑀢𑀼𑀫, 𑀪𑀯𑀦𑁆𑀢𑁄 𑀆𑀢𑀼𑀫𑀸, 𑀆𑀢𑀼𑀫𑀸𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀢𑁆𑀭 𑀅𑀢𑁆𑀢𑀲𑀤𑁆𑀤𑀲𑁆𑀲 𑀲𑀫𑀸𑀲𑁂 ‘‘𑀪𑀸𑀯𑀺𑀢𑀢𑁆𑀢𑁄, 𑀪𑀸𑀯𑀺𑀢𑀢𑁆𑀢𑀸. 𑀪𑀸𑀯𑀺𑀢𑀢𑁆𑀢𑀁, 𑀪𑀸𑀯𑀺𑀢𑀢𑁆𑀢𑁂. 𑀪𑀸𑀯𑀺𑀢𑀢𑁆𑀢𑁂𑀦, 𑀪𑀸𑀯𑀺𑀢𑀢𑁆𑀢𑁂𑀳𑀺, 𑀪𑀸𑀯𑀺𑀢𑀢𑁆𑀢𑁂𑀪𑀻’’𑀢𑀺 𑀧𑀼𑀭𑀺𑀲𑀦𑀬𑁂𑀦𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀲𑀸, 𑀲𑀸, 𑀲𑀸𑀦𑁄. 𑀲𑀸𑀦𑀁, 𑀲𑀸𑀦𑁂. 𑀲𑀸𑀦𑀸, 𑀲𑀸𑀦𑁂𑀳𑀺, 𑀲𑀸𑀦𑁂𑀪𑀺. 𑀲𑀸𑀲𑁆𑀲, 𑀲𑀸𑀦𑀁. 𑀲𑀸𑀦𑀸, 𑀲𑀸𑀦𑁂𑀳𑀺, 𑀲𑀸𑀦𑁂𑀪𑀺. 𑀲𑀸𑀲𑁆𑀲, 𑀲𑀸𑀦𑀁. 𑀲𑀸𑀦𑁂, 𑀲𑀸𑀦𑁂𑀲𑀼. 𑀪𑁄 𑀲𑀸, 𑀪𑀯𑀦𑁆𑀢𑁄 𑀲𑀸𑀦𑁄. 𑀲𑀸 𑀯𑀼𑀘𑁆𑀘𑀢𑀺 𑀲𑀼𑀦𑀔𑁄.

𑀏𑀢𑁆𑀣 𑀘 ‘‘𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺. 𑀲𑀸𑀯 𑀯𑀸𑀭𑁂𑀦𑁆𑀢𑀺 𑀲𑀽𑀓𑀭’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀓𑁂𑀘𑀺 𑀧𑀦 𑀲𑀸𑀲𑀤𑁆𑀤𑀲𑁆𑀲 𑀤𑀼𑀢𑀺𑀬𑀸𑀢𑀢𑀺𑀬𑀸𑀤𑀻𑀲𑀼 ‘‘𑀲𑀁, 𑀲𑁂. 𑀲𑁂𑀦𑀸’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀦 𑀳𑀺 𑀢𑀸𑀦𑀺 ‘‘𑀲𑀁, 𑀲𑁂. 𑀲𑁂𑀦𑀸’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀩𑀼𑀤𑁆𑀥𑀯𑀘𑀦𑁂 𑀘𑁂𑀯 𑀅𑀝𑁆𑀞𑀓𑀣𑀸𑀤𑀻𑀲𑀼 𑀘 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 𑀤𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀧𑀦 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀯𑀼𑀢𑁆𑀢𑀁 ‘‘𑀲𑀸 𑀢𑀺𑀝𑁆𑀞𑀢𑀺, 𑀲𑀸𑀦𑁄 𑀢𑀺𑀝𑁆𑀞𑀦𑁆𑀢𑀺. 𑀲𑀸𑀦𑀁 𑀧𑀲𑁆𑀲𑀢𑀺, 𑀲𑀸𑀦𑁂 𑀧𑀲𑁆𑀲𑀢𑀺. 𑀲𑀸𑀦𑀸 𑀓𑀢𑀁, 𑀲𑀸𑀦𑁂𑀳𑀺 𑀓𑀢𑀁, 𑀲𑀸𑀦𑁂𑀪𑀺 𑀓𑀢𑀁. 𑀲𑀸𑀲𑁆𑀲 𑀤𑀻𑀬𑀢𑁂, 𑀲𑀸𑀦𑀁 𑀤𑀻𑀬𑀢𑁂. 𑀲𑀸𑀦𑀸 𑀦𑀺𑀲𑁆𑀲𑀝𑀁, 𑀲𑀸𑀦𑁂𑀳𑀺 𑀦𑀺𑀲𑁆𑀲𑀝𑀁, 𑀲𑀸𑀦𑁂𑀪𑀺 𑀦𑀺𑀲𑁆𑀲𑀝𑀁. 𑀲𑀸𑀲𑁆𑀲 𑀧𑀭𑀺𑀕𑁆𑀕𑀳𑁄, 𑀲𑀸𑀦𑀁 𑀧𑀭𑀺𑀕𑁆𑀕𑀳𑁄. 𑀲𑀸𑀦𑁂 𑀧𑀢𑀺𑀝𑁆𑀞𑀺𑀢𑀁, 𑀲𑀸𑀦𑁂𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀪𑁄 𑀲𑀸, 𑀪𑀯𑀦𑁆𑀢𑁄 𑀲𑀸𑀦𑁄’’𑀢𑀺, 𑀢𑀲𑁆𑀫𑀸 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸 𑀕𑀳𑁂𑀢𑀩𑁆𑀩𑀸.

𑀅𑀢𑁆𑀭𑀺𑀤𑀁 𑀯𑀢𑁆𑀢𑀩𑁆𑀩𑀁 𑁋 𑀬𑀣𑀸 ‘‘𑀲𑁂𑀳𑀺 𑀤𑀸𑀭𑁂𑀳𑀺 𑀅𑀲𑀦𑁆𑀢𑀼𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀫𑀸𑀦𑀲𑁆𑀲 ‘‘𑀲𑀓𑁄’’𑀇𑀢𑀺 𑀅𑀢𑁆𑀣𑀯𑀸𑀘𑀓𑀲𑁆𑀲 𑀲𑀲𑀤𑁆𑀤𑀲𑁆𑀲 ‘‘𑀅𑀢𑁆𑀢𑀦𑁄 𑀅𑀬𑀦𑁆𑀢𑀺 𑀲𑁄’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀲𑁄, 𑀲𑀸. 𑀲𑀁, 𑀲𑁂. 𑀲𑁂𑀦, 𑀲𑁂𑀳𑀺, 𑀲𑁂𑀪𑀺. 𑀲𑀲𑁆𑀲, 𑀲𑀸𑀦𑀁. 𑀲𑀸, 𑀲𑀲𑁆𑀫𑀸, 𑀲𑀫𑁆𑀳𑀸, 𑀲𑁂𑀳𑀺, 𑀲𑁂𑀪𑀺. 𑀲𑀲𑁆𑀲, 𑀲𑀸𑀦𑀁. 𑀲𑁂, 𑀲𑀲𑁆𑀫𑀺𑀁, 𑀲𑀫𑁆𑀳𑀺, 𑀲𑁂𑀲𑀽’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀦 𑀢𑀣𑀸 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀬𑀣𑀸 𑀯𑀸 ‘‘𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀁 𑀨𑀮𑀁. 𑀲𑀸𑀦𑀺 𑀓𑀫𑁆𑀫𑀸𑀦𑀺 𑀢𑀧𑁆𑀧𑁂𑀦𑁆𑀢𑀺, 𑀓𑁄𑀲𑀮𑀁 𑀲𑁂𑀦’𑀲𑀦𑁆𑀢𑀼𑀝𑁆𑀞𑀁, 𑀚𑀻𑀯𑀕𑁆𑀕𑀸𑀳𑀁 𑀅𑀕𑀸𑀳𑀬𑀻’’𑀢𑀺𑀆𑀤𑀻𑀲𑀼 𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑀓𑀫𑀺𑀘𑁆𑀘𑀢𑁆𑀣𑀯𑀸𑀘𑀓𑀲𑁆𑀲 𑀲𑀲𑀤𑁆𑀤𑀲𑁆𑀲 ‘‘𑀲𑀁, 𑀲𑀸𑀦𑀺, 𑀲𑀸. 𑀲𑀁, 𑀲𑀸𑀦𑀺, 𑀲𑁂. 𑀲𑁂𑀦, 𑀲𑁂𑀳𑀺, 𑀲𑁂𑀪𑀺. 𑀲𑀲𑁆𑀲, 𑀲𑀸𑀦𑀁. 𑀲𑀸, 𑀲𑀲𑁆𑀫𑀸, 𑀲𑀫𑁆𑀳𑀸, 𑀲𑁂𑀳𑀺, 𑀲𑁂𑀪𑀺. 𑀲𑀲𑁆𑀲, 𑀲𑀸𑀦𑀁. 𑀲𑁂, 𑀲𑀲𑁆𑀫𑀺𑀁, 𑀲𑀫𑁆𑀳𑀺, 𑀲𑁂𑀲𑀽’’𑀢𑀺 𑀘𑀺𑀢𑁆𑀢𑀦𑀬𑁂𑀦 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀦 𑀢𑀣𑀸 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀢𑁂𑀳𑀺 𑀆𑀘𑀭𑀺𑀬𑁂𑀳𑀺 𑀤𑀼𑀢𑀺𑀬𑀸𑀢𑀢𑀺𑀬𑀸𑀞𑀸𑀦𑁂 ‘‘𑀲𑀁, 𑀲𑁂. 𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀓𑀲𑁆𑀫𑀸 𑀘 𑀧𑀜𑁆𑀘𑀫𑀻𑀞𑀸𑀦𑁂 ‘‘𑀲𑀸, 𑀲𑀲𑁆𑀫𑀸, 𑀲𑀫𑁆𑀳𑀸’’𑀢𑀺 𑀯𑀼𑀢𑁆𑀢𑀁, 𑀲𑀢𑁆𑀢𑀫𑀻𑀞𑀸𑀦𑁂 𑀘 ‘‘𑀲𑁂, 𑀲𑀲𑁆𑀫𑀺𑀁, 𑀲𑀫𑁆𑀳𑀻’’𑀢𑀺 𑀘 𑀯𑀼𑀢𑁆𑀢𑀁? 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁, 𑀢𑀓𑁆𑀓𑀕𑀸𑀳𑀫𑀢𑁆𑀢𑁂𑀦 𑀕𑀳𑀺𑀢𑀁 𑀅𑀓𑀸𑀭𑀡𑀁. 𑀲𑀼𑀦𑀔𑀯𑀸𑀘𑀓𑁄 𑀳𑀺 𑀲𑀸𑀲𑀤𑁆𑀤𑁄 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑁄, 𑀦 𑀧𑀼𑀭𑀺𑀲 𑀘𑀺𑀢𑁆𑀢𑀲𑀤𑁆𑀤𑀸𑀤𑀬𑁄 𑀯𑀺𑀬 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑁄. 𑀬𑀸𑀬 𑀇𑀫𑀲𑁆𑀲 𑀈𑀤𑀺𑀲𑀸𑀦𑀺 𑀭𑀽𑀧𑀸𑀦𑀺 𑀲𑀺𑀬𑀼𑀁, 𑀲𑀸 𑀘 𑀧𑀓𑀢𑀺 𑀦𑀢𑁆𑀣𑀺. 𑀦 𑀘𑁂𑀲𑁄 ‘‘𑀭𑀸𑀚𑀸, 𑀩𑁆𑀭𑀳𑁆𑀫𑀸, 𑀲𑀔𑀸, 𑀅𑀢𑁆𑀢𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀯𑀺𑀬 𑀧𑀞𑀫𑀁 𑀅𑀓𑀸𑀭𑀦𑁆𑀢𑀪𑀸𑀯𑁂 𑀞𑀢𑁆𑀯𑀸 𑀧𑀘𑁆𑀙𑀸 𑀧𑀝𑀺𑀮𑀤𑁆𑀥𑀆𑀓𑀸𑀭𑀦𑁆𑀢𑀢𑀸, 𑀅𑀣 𑀔𑁄 𑀦𑀺𑀘𑁆𑀘𑀫𑁄𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑁄 𑀕𑁄𑀲𑀤𑁆𑀤𑁄 𑀯𑀺𑀬 𑀦𑀺𑀘𑁆𑀘𑀫𑀸𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑁄. 𑀦𑀺𑀘𑁆𑀘𑀫𑀸𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀲𑁆𑀲 𑀘 𑀏𑀯𑀭𑀽𑀧𑀸𑀦𑀺 𑀭𑀽𑀧𑀸𑀦𑀺 𑀦 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀦 𑀯𑀼𑀢𑁆𑀢𑀸𑀦𑀺. 𑀲𑀘𑁂𑀧𑀺 𑀫𑀜𑁆𑀜𑁂𑀬𑁆𑀬𑀼𑀁 ‘‘𑀅𑀢𑁆𑀢𑀁, 𑀅𑀢𑁆𑀢𑁂𑀦𑀸’𑀢𑀺 𑀘 𑀤𑀲𑁆𑀲𑀦𑀢𑁄 ‘𑀲𑀁, 𑀲𑁂𑀦𑀸’𑀢𑀺 𑀇𑀫𑀸𑀦𑀺 𑀧𑀦 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺. 𑀦 𑀕𑀳𑁂𑀢𑀩𑁆𑀩𑀸𑀦𑀺 ‘‘𑀭𑀸𑀚𑀸, 𑀩𑁆𑀭𑀳𑁆𑀫𑀸, 𑀲𑀔𑀸, 𑀅𑀢𑁆𑀢𑀸, 𑀲𑀸, 𑀧𑀼𑀫𑀸’’𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀤𑀫𑀸𑀮𑀸𑀯𑀲𑁂𑀦 𑀯𑀺𑀲𑀤𑀺𑀲𑀢𑁆𑀢𑀸 𑀦𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀸𑀓𑀸𑀭𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀈𑀤𑀺𑀲𑁂 𑀳𑀺 𑀞𑀸𑀦𑁂 𑀦𑀬𑀕𑁆𑀕𑀸𑀳𑀯𑀲𑁂𑀦 𑀕𑀳𑀡𑀁 𑀦𑀸𑀫 𑀲𑀤𑁄𑀲𑀁𑀬𑁂𑀯 𑀲𑀺𑀬𑀸, 𑀢𑀲𑁆𑀫𑀸 𑀦𑀬𑀕𑁆𑀕𑀸𑀳𑀯𑀲𑁂𑀦𑀧𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺.

𑀅𑀧𑀭𑀫𑁆𑀧𑀺 𑀅𑀢𑁆𑀭 𑀯𑀢𑁆𑀢𑀩𑁆𑀩𑀁 𑁋 𑀬𑀣𑀸 𑀳𑀺 ‘‘𑀲𑀸𑀳𑀺 𑀦𑀸𑀭𑀻𑀳𑀺 𑀢𑁂 𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀢𑁆𑀢𑀦𑁄 𑀦𑀸𑀭𑀻’’𑀢𑀺, ‘‘𑀲𑀸 𑀦𑀸𑀭𑀻’’𑀢𑀺 𑀏𑀯𑀁 𑀅𑀢𑁆𑀣𑀯𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀓𑀜𑁆𑀜𑀸𑀲𑀤𑁆𑀤𑁂𑀦 𑀲𑀤𑀺𑀲𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 ‘‘𑀲𑀸, 𑀲𑀸, 𑀲𑀸𑀬𑁄. 𑀲𑀁, 𑀲𑀸, 𑀲𑀸𑀬𑁄. 𑀲𑀸𑀬, 𑀲𑀸𑀳𑀺, 𑀲𑀸𑀪𑀺. 𑀲𑀸𑀬, 𑀲𑀸𑀦𑀁. 𑀲𑀸𑀬, 𑀲𑀸𑀳𑀺, 𑀲𑀸𑀪𑀺. 𑀲𑀸𑀬, 𑀲𑀸𑀦𑀁. 𑀲𑀸𑀬, 𑀲𑀸𑀬𑀁, 𑀲𑀸𑀲𑀽’’𑀢𑀺 𑀓𑀜𑁆𑀜𑀸𑀦𑀬𑁂𑀦 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀦 𑀢𑀣𑀸 𑀇𑀫𑀲𑁆𑀲 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀢𑁂 𑀆𑀘𑀭𑀺𑀬𑀸 𑀢𑀢𑀺𑀬𑀸𑀩𑀳𑀼𑀯𑀘𑀦𑀝𑁆𑀞𑀸𑀦𑁂 𑀘 ‘‘𑀲𑀸𑀳𑀺, 𑀲𑀸𑀪𑀻’’𑀢𑀺 𑀭𑀽𑀧𑀸𑀦𑀺 𑀇𑀘𑁆𑀙𑀦𑁆𑀢𑀺, 𑀓𑀲𑁆𑀫𑀸 𑀘 𑀲𑀢𑁆𑀢𑀫𑀻𑀩𑀳𑀼𑀯𑀘𑀦𑀝𑁆𑀞𑀸𑀦𑁂 ‘‘𑀲𑀸𑀲𑀽’’𑀢𑀺? 𑀇𑀤𑀫𑁆𑀧𑀺 𑀅𑀓𑀸𑀭𑀡𑀁 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀸. 𑀓𑀲𑁆𑀫𑀸 𑀘 𑀧𑀦 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑀝𑁆𑀞𑀸𑀦𑁂 𑀧𑀼𑀩𑁆𑀩𑀓𑁆𑀔𑀭𑀲𑁆𑀲 𑀭𑀲𑁆𑀲𑀯𑀲𑁂𑀦 ‘‘𑀲𑀲𑁆𑀲’’𑀇𑀢𑀺 𑀭𑀽𑀧𑀁 𑀇𑀘𑁆𑀙𑀦𑁆𑀢𑀺? 𑀇𑀤𑀫𑁆𑀧𑀺 𑀅𑀓𑀸𑀭𑀡𑀁 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀢𑁆𑀢𑀸. 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀲𑁆𑀲 𑀘 𑀲𑀸𑀲𑀤𑁆𑀤𑀲𑁆𑀲 𑀬𑀣𑀸 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀲𑁆𑀲 𑀧𑀼𑀭𑀺𑀲𑀲𑀤𑁆𑀤𑀲𑁆𑀲 ‘‘𑀧𑀼𑀭𑀺𑀲𑀲𑁆𑀲𑀸’’𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑀭𑀽𑀧𑀁 𑀪𑀯𑀢𑀺 𑀏𑀯𑀭𑀽𑀧𑀲𑁆𑀲 𑀭𑀽𑀧𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑁂𑀯 𑀆𑀬𑀲𑁆𑀫𑀸 𑀓𑀘𑁆𑀘𑀸𑀦𑁄 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑀝𑁆𑀞𑀸𑀦𑁂 𑀧𑀼𑀩𑁆𑀩𑀓𑁆𑀔𑀭𑀲𑁆𑀲 𑀤𑀻𑀖𑀯𑀲𑁂𑀦 ‘‘𑀲𑀸𑀲𑁆𑀲’’𑀇𑀢𑀺 𑀭𑀽𑀧𑀫𑀸𑀳. 𑀓𑀲𑁆𑀫𑀸 𑀘 𑀧𑀦 𑀢𑁂 𑀆𑀘𑀭𑀺𑀬𑀸 𑀘𑀢𑀼𑀢𑁆𑀣𑁂𑀓𑀯𑀘𑀦𑀝𑁆𑀞𑀸𑀦𑁂 ‘‘𑀲𑀸𑀬’’𑀇𑀢𑀺 𑀭𑀽𑀧𑀁 𑀇𑀘𑁆𑀙𑀦𑁆𑀢𑀺? 𑀇𑀤𑀫𑁆𑀧𑀺 𑀅𑀓𑀸𑀭𑀡𑀁, 𑀞𑀧𑁂𑀢𑁆𑀯𑀸 𑀳𑀺 𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑁂 𑀖𑀲𑀜𑁆𑀜𑀢𑁄 𑀆𑀓𑀸𑀭𑀢𑁄 𑀧𑀭𑁂𑀲𑀁 𑀦𑀸𑀤𑀻𑀦𑀁 𑀆𑀬𑀸𑀤𑁂𑀲𑀜𑁆𑀘 𑀅𑀓𑀸𑀭𑀦𑁆𑀢𑀢𑁄 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁄 𑀧𑀭𑀲𑁆𑀲 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀜𑁆𑀘 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑁂 𑀅𑀖𑀢𑁄 𑀆𑀓𑀸𑀭𑀦𑁆𑀢𑀢𑁄 𑀧𑀭𑀲𑁆𑀲 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀓𑀢𑁆𑀣𑀘𑀺𑀧𑀺 𑀆𑀬𑀸𑀤𑁂𑀲𑁄 𑀦 𑀤𑀺𑀲𑁆𑀲𑀢𑀺. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 𑀢𑀸𑀤𑀺𑀲𑀁 𑀭𑀽𑀧𑀁 𑀦 𑀯𑀼𑀢𑁆𑀢𑀁, 𑀅𑀯𑀘𑀦𑀁𑀬𑁂𑀯 𑀬𑀼𑀢𑁆𑀢𑀢𑀭𑀁 𑀩𑀼𑀤𑁆𑀥𑀯𑀘𑀦𑁂 𑀅𑀝𑁆𑀞𑀓𑀣𑀸𑀤𑀻𑀲𑀼 𑀘 𑀅𑀦𑀸𑀕𑀫𑀦𑀢𑁄. 𑀬𑀸 𑀧𑀦𑀫𑁆𑀳𑁂𑀳𑀺 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀯𑀘𑀦𑀜𑁆𑀘 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀢𑁆𑀢𑀸, 𑀲𑀸𑀬𑁂𑀯 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀦𑀸𑀦𑀸𑀅𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀸𑀦𑀁 𑀮𑀺𑀗𑁆𑀕𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀸 𑀲𑁄 𑀲𑀁𑀇𑀘𑁆𑀘𑁂𑀢𑁂𑀲𑀁 𑀢𑀺𑀡𑁆𑀡𑀁 𑀧𑀤𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸.

𑀏𑀢𑁆𑀣 𑀲𑀺𑀬𑀸 𑁋 𑀬𑁄 𑀢𑀼𑀫𑁆𑀳𑁂𑀳𑀺 𑀲𑀸𑀲𑀤𑁆𑀤𑁄 ‘‘𑀢𑀁𑀲𑀤𑁆𑀤𑀢𑁆𑀣𑁂 𑀘 𑀲𑀼𑀦𑀔𑁂 𑀘 𑀲𑀓𑀫𑀺𑀘𑁆𑀘𑀢𑁆𑀣𑁂 𑀘 𑀯𑀢𑁆𑀢𑀢𑀻’’𑀢𑀺 𑀇𑀘𑁆𑀙𑀺𑀢𑁄, 𑀓𑀣𑀁 𑀢𑀁 ‘‘𑀲𑀸’’𑀢𑀺 𑀯𑀼𑀢𑁆𑀢𑁂𑀬𑁂𑀯 ‘‘𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄’’𑀢𑀺 𑀚𑀸𑀦𑀦𑁆𑀢𑀻𑀢𑀺? 𑀦 𑀚𑀸𑀦𑀦𑁆𑀢𑀺, 𑀧𑀬𑁄𑀕𑀯𑀲𑁂𑀦 𑀧𑀦 𑀚𑀸𑀦𑀦𑁆𑀢𑀺 𑀮𑁄𑀓𑀺𑀬𑀚𑀦𑀸 𑀘𑁂𑀯 𑀧𑀡𑁆𑀟𑀺𑀢𑀸 𑀘. 𑀧𑀬𑁄𑀕𑀯𑀲𑁂𑀦 𑀳𑀺 ‘‘𑀲𑀸 𑀫𑀤𑁆𑀤𑀻 𑀦𑀸𑀕𑀫𑀸𑀭𑀼𑀳𑀺, 𑀦𑀸𑀢𑀺𑀩𑀤𑁆𑀥𑀁𑀯 𑀓𑀼𑀜𑁆𑀚𑀭’’𑀦𑁆𑀢𑀺𑀆𑀤𑀻𑀲𑀼 𑀲𑀸𑀲𑀤𑁆𑀤𑀲𑁆𑀲 𑀢𑀁𑀲𑀤𑁆𑀤𑀢𑁆𑀣𑀢𑀸 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀲𑀸𑀲𑀤𑁆𑀤𑁄 𑀢𑀁𑀲𑀤𑁆𑀤𑀢𑁆𑀣𑁂 𑀘 𑀯𑀢𑁆𑀢𑀢𑀺. ‘‘𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺. 𑀪𑀕𑀯𑀢𑁄 𑀲𑀸𑀚𑀸𑀢𑀺𑀫𑁆𑀧𑀺 𑀲𑀼𑀢𑁆𑀯𑀸 𑀲𑀢𑁆𑀢𑀸 𑀅𑀫𑀢𑀭𑀲𑀪𑀸𑀕𑀺𑀦𑁄 𑀪𑀯𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀲𑀸𑀲𑀤𑁆𑀤𑀲𑁆𑀲 𑀲𑀼𑀦𑀔𑀯𑀸𑀘𑀓𑀢𑀸 𑀯𑀺𑀜𑁆𑀜𑀸𑀬𑀢𑀺.