𑁭. 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀸𑀫𑀺𑀓𑀧𑀤𑀫𑀸𑀮𑀸

𑀅𑀣 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀪𑀯𑀦𑁆𑀢 𑀓𑀭𑁄𑀦𑁆𑀢𑀇𑀘𑁆𑀘𑀸𑀤𑀺𑀓𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑁋

𑀕𑀘𑁆𑀙𑀁 𑀫𑀳𑀁 𑀘𑀭𑀁 𑀢𑀺𑀝𑁆𑀞𑀁, 𑀤𑀤𑀁 𑀪𑀼𑀜𑁆𑀚𑀁 𑀲𑀼𑀡𑀁 𑀧𑀘𑀁;

𑀚𑀬𑀁 𑀚𑀭𑀁 𑀘𑀯𑀁 𑀫𑀻𑀬𑀁, 𑀲𑀭𑀁 𑀓𑀼𑀩𑁆𑀩𑀁 𑀚𑀧𑀁 𑀯𑀚𑀁.

𑀕𑀘𑁆𑀙𑀁, 𑀕𑀘𑁆𑀙𑀦𑁆𑀢𑁄, 𑀕𑀘𑁆𑀙𑀦𑁆𑀢𑀸. 𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑁂. 𑀕𑀘𑁆𑀙𑀢𑀸, 𑀕𑀘𑁆𑀙𑀦𑁆𑀢𑁂𑀳𑀺, 𑀕𑀘𑁆𑀙𑀦𑁆𑀢𑁂𑀢𑀺. 𑀕𑀘𑁆𑀙𑀢𑁄, 𑀕𑀘𑁆𑀙𑀦𑁆𑀢𑀲𑁆𑀲, 𑀕𑀘𑁆𑀙𑀦𑁆𑀢𑀸𑀦𑀁, 𑀕𑀘𑁆𑀙𑀢𑀁. 𑀕𑀘𑁆𑀙𑀢𑀸, 𑀕𑀘𑁆𑀙𑀦𑁆𑀢𑁂𑀳𑀺, 𑀕𑀘𑁆𑀙𑀦𑁆𑀢𑁂𑀪𑀺. 𑀕𑀘𑁆𑀙𑀢𑁄, 𑀕𑀘𑁆𑀙𑀦𑁆𑀢𑀲𑁆𑀲, 𑀕𑀘𑁆𑀙𑀦𑁆𑀢𑀸𑀦𑀁, 𑀕𑀘𑁆𑀙𑀢𑀁. 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑁂𑀲𑀼. 𑀪𑁄 𑀕𑀘𑁆𑀙𑀁, 𑀪𑁄 𑀕𑀘𑁆𑀙𑀸, 𑀪𑀯𑀦𑁆𑀢𑁄 𑀕𑀘𑁆𑀙𑀦𑁆𑀢𑁄.

𑀕𑀘𑁆𑀙𑀸𑀤𑀻𑀦𑀺 𑀅𑀜𑁆𑀜𑀸𑀦𑀺 𑀘 𑀢𑀁𑀲𑀤𑀺𑀲𑀸𑀦𑀁 𑀏𑀯𑀁 𑀜𑁂𑀬𑁆𑀬𑀸𑀦𑀻𑀢𑀺 𑀬𑀫𑀓𑀫𑀳𑀸𑀣𑁂𑀭𑀫𑀢𑀁. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀢𑀢𑀺𑀬𑁂𑀓𑀯𑀘𑀦𑀝𑁆𑀞𑀸𑀦𑀸𑀤𑀻𑀲𑀼 ‘‘𑀕𑀘𑁆𑀙𑀦𑁆𑀢𑁂𑀦, 𑀕𑀘𑁆𑀙𑀦𑁆𑀢𑀸, 𑀕𑀘𑁆𑀙𑀦𑁆𑀢𑀲𑁆𑀫𑀸, 𑀕𑀘𑁆𑀙𑀦𑁆𑀢𑀫𑁆𑀳𑀸, 𑀕𑀘𑁆𑀙𑀦𑁆𑀢𑀲𑁆𑀫𑀺𑀁, 𑀕𑀘𑁆𑀙𑀦𑁆𑀢𑀫𑁆𑀳𑀻’’𑀢𑀺 𑀇𑀫𑀸𑀦𑀺 𑀧𑀤𑀸𑀦𑀺 𑀦𑀸𑀕𑀢𑀸𑀦𑀺, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀧𑀬𑁄𑀕𑀤𑀲𑁆𑀲𑀦𑀢𑁄 𑀕𑀳𑁂𑀢𑀩𑁆𑀩𑀸𑀦𑀺.

𑀢𑀢𑁆𑀭 𑀬𑀫𑀓𑀫𑀳𑀸𑀣𑁂𑀭𑁂𑀦 𑀆𑀮𑀧𑀦𑀯𑀘𑀦𑀝𑁆𑀞𑀸𑀦𑁂𑀬𑁂𑀯 ‘‘𑀕𑀘𑁆𑀙𑀦𑁆𑀢𑁄, 𑀫𑀳𑀦𑁆𑀢𑁄, 𑀘𑀭𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀩𑀳𑀼𑀯𑀘𑀦𑀢𑁆𑀢𑀁 𑀓𑀣𑀺𑀢𑀁, 𑀧𑀘𑁆𑀘𑀢𑁆𑀢𑀯𑀘𑀦𑀝𑁆𑀞𑀸𑀦𑁂 𑀏𑀓𑀯𑀘𑀦𑀢𑁆𑀢𑀁. 𑀓𑁂𑀳𑀺𑀘𑀺 𑀧𑀦 𑀧𑀘𑁆𑀘𑀢𑁆𑀢𑀯𑀘𑀦𑀝𑁆𑀞𑀸𑀦𑁂 𑀏𑀓𑀯𑀘𑀦𑀩𑀳𑀼𑀯𑀘𑀦𑀢𑁆𑀢𑀁, 𑀆𑀮𑀧𑀦𑀯𑀘𑀦𑀝𑁆𑀞𑀸𑀦𑁂 𑀩𑀳𑀼𑀯𑀘𑀦𑀢𑁆𑀢𑀁𑀬𑁂𑀯 𑀓𑀣𑀺𑀢𑀁. ‘‘𑀕𑀘𑁆𑀙𑀁, 𑀫𑀳𑀁, 𑀘𑀭’’𑀦𑁆𑀢𑀺𑀆𑀤𑀻𑀦𑀁 𑀧𑀦 𑀆𑀮𑀧𑀦𑀝𑁆𑀞𑀸𑀦𑁂 𑀏𑀓𑀯𑀘𑀦𑀢𑁆𑀢𑀁. 𑀫𑀬𑀁 𑀧𑀦 𑀩𑀼𑀤𑁆𑀥𑀯𑀘𑀦𑁂 𑀅𑀦𑁂𑀓𑀸𑀲𑀼 𑀘𑀸𑀝𑁆𑀞𑀓𑀣𑀸𑀲𑀼 ‘‘𑀕𑀘𑁆𑀙𑀦𑁆𑀢𑁄, 𑀫𑀳𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀸𑀦𑀁 ‘‘𑀕𑀘𑁆𑀙𑀁, 𑀫𑀳𑀁’’𑀇𑀘𑁆𑀘𑀸𑀤𑀻𑀦𑀜𑁆𑀘 𑀲𑀸𑀦𑀼𑀲𑀸𑀭𑀸𑀮𑀧𑀦𑁂𑀓𑀯𑀘𑀦𑀧𑁆𑀧𑀬𑁄𑀕𑀸𑀦𑀁 𑀅𑀤𑀲𑁆𑀲𑀦𑀢𑁄 ‘‘𑀕𑀘𑁆𑀙𑀦𑁆𑀢𑁄 𑀪𑀸𑀭𑀤𑁆𑀯𑀸𑀚𑁄. 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀺. 𑀫𑀳𑀦𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄’’𑀢𑀺𑀆𑀤𑀻𑀦𑀁 𑀧𑀦 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀧𑁆𑀧𑀬𑁄𑀕𑀸𑀦𑀜𑁆𑀜𑁂𑀯 𑀤𑀲𑁆𑀲𑀦𑀢𑁄 𑀢𑀸𑀤𑀺𑀲𑀸𑀦𑀺 𑀭𑀽𑀧𑀸𑀦𑀺 𑀅𑀦𑀺𑀚𑁆𑀛𑀸𑀦𑀓𑁆𑀔𑀫𑀸𑀦𑀺 𑀯𑀺𑀬 𑀫𑀜𑁆𑀜𑀸𑀫. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀘𑁆𑀘𑀢𑁆𑀢𑀸𑀮𑀧𑀦𑀝𑁆𑀞𑀸𑀦𑁂 ‘‘𑀫𑀳𑀦𑁆𑀢𑁄, 𑀪𑀯𑀦𑁆𑀢𑁄, 𑀘𑀭𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀩𑀳𑀼𑀯𑀘𑀦𑀢𑁆𑀢𑀫𑁂𑀯 𑀓𑀣𑀺𑀢𑀁, 𑀦 𑀏𑀓𑀯𑀘𑀦𑀢𑁆𑀢𑀁. 𑀢𑀣𑀸 𑀳𑀺 𑀢𑀢𑁆𑀣 ‘‘𑀫𑀳𑀁 𑀪𑀯𑀁 𑀘𑀭𑀁 𑀢𑀺𑀝𑁆𑀞’’𑀦𑁆𑀢𑀺 𑀕𑀸𑀣𑀁 𑀯𑀢𑁆𑀯𑀸 ‘‘𑀫𑀳𑀁 𑀢𑀺𑀝𑁆𑀞𑀢𑀺, 𑀫𑀳𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀘, ‘‘𑀪𑁄 𑀫𑀳𑀸, 𑀪𑀯𑀦𑁆𑀢𑁄 𑀫𑀳𑀦𑁆𑀢𑁄’’𑀢𑀺 𑀘, ‘‘𑀪𑀯𑀁 𑀢𑀺𑀝𑁆𑀞𑀢𑀺, 𑀪𑀯𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀘 𑀆𑀤𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀧𑀦 ‘‘𑀪𑀯𑀁, 𑀪𑀯𑀦𑁆𑀢𑁄’’𑀢𑀺 𑀧𑀤𑀸𑀦𑀺 𑀬𑀢𑁆𑀣 ‘‘𑀳𑁄𑀦𑁆𑀢𑁄 𑀳𑁄𑀦𑁆𑀢𑀸’’𑀢𑀺 𑀓𑁆𑀭𑀺𑀬𑀢𑁆𑀣𑀁 𑀦 𑀯𑀤𑀦𑁆𑀢𑀺, 𑀢𑀢𑁆𑀣 ‘‘𑀪𑀯𑀁 𑀓𑀘𑁆𑀘𑀸𑀦𑁄. 𑀫𑀸 𑀪𑀯𑀦𑁆𑀢𑁄 𑀏𑀯𑀁 𑀅𑀯𑀘𑀼𑀢𑁆𑀣𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀣𑁂 𑀧𑀢𑀦𑀢𑁄 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀪𑀯𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂’’𑀢𑀺 𑀏𑀢𑁆𑀣 ‘‘𑀲𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀯𑀺𑀬 ‘‘𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀏𑀢𑁆𑀣 ‘‘𑀅𑀭𑀳𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀯𑀺𑀬 𑀘 ‘‘𑀪𑀯𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀩𑀳𑀼𑀯𑀘𑀦𑀢𑁆𑀢𑀁 𑀦𑀺𑀚𑁆𑀛𑀸𑀦𑀓𑁆𑀔𑀫𑀁. ‘‘𑀫𑀳𑀦𑁆𑀢𑁄, 𑀘𑀭𑀦𑁆𑀢𑁄, 𑀢𑀺𑀝𑁆𑀞𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀧𑀦 𑀩𑀳𑀼𑀯𑀘𑀦𑀢𑁆𑀢𑀁 𑀦 𑀦𑀺𑀚𑁆𑀛𑀸𑀦𑀓𑁆𑀔𑀫𑀁 𑀯𑀺𑀬 𑀅𑀫𑁆𑀳𑁂 𑀧𑀝𑀺𑀪𑀸𑀢𑀺. 𑀦 𑀳𑀺 𑀓𑀢𑁆𑀣𑀘𑀺𑀧𑀺 ‘‘𑀲𑀦𑁆𑀢𑁄, 𑀅𑀭𑀳𑀦𑁆𑀢𑁄, 𑀪𑀯𑀦𑁆𑀢𑁄’’𑀢𑀺 𑀧𑀤𑀯𑀚𑁆𑀚𑀺𑀢𑀸𑀦𑀁 ‘‘𑀕𑀘𑁆𑀙𑀦𑁆𑀢𑁄, 𑀫𑀳𑀦𑁆𑀢𑁄, 𑀘𑀭𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀅𑀦𑁂𑀓𑀧𑀤𑀲𑀢𑀸𑀦𑀁 𑀩𑀳𑀼𑀯𑀘𑀦𑀦𑁆𑀢𑀢𑀸𑀧𑀬𑁄𑀕𑁂 𑀧𑀲𑁆𑀲𑀸𑀫. 𑀢𑀣𑀸 𑀳𑀺 𑁋

𑀩𑀯𑁆𑀳𑀢𑁆𑀢𑁂 𑀓𑀢𑁆𑀣𑀘𑀺 𑀞𑀸𑀦𑁂, ‘‘𑀚𑀸𑀦’’𑀫𑀺𑀘𑁆𑀘𑀸𑀤𑀬𑁄 𑀬𑀣𑀸;

𑀤𑀺𑀲𑁆𑀲𑀦𑁆𑀢𑀺 𑀦𑁂𑀯𑀁 𑀩𑀯𑁆𑀳𑀢𑁆𑀢𑁂, ‘‘𑀕𑀘𑁆𑀙𑀦𑁆𑀢𑁄’’ 𑀇𑀢𑀺𑀆𑀤𑀬𑁄.

𑀩𑀯𑁆𑀳𑀢𑁆𑀢𑁂 𑀓𑀢𑁆𑀣𑀘𑀺 𑀞𑀸𑀦𑁂, ‘‘𑀲𑀦𑁆𑀢𑁄’’ 𑀇𑀘𑁆𑀘𑀸𑀤𑀬𑁄𑀧𑀺 𑀘;

𑀤𑀺𑀲𑁆𑀲𑀦𑁆𑀢𑀺 𑀦𑁂𑀯𑀁 𑀩𑀯𑁆𑀳𑀢𑁆𑀢𑁂, ‘‘𑀕𑀘𑁆𑀙𑀦𑁆𑀢𑁄’’ 𑀇𑀢𑀺𑀆𑀤𑀬𑁄.

‘‘𑀅𑀭𑀳𑀦𑁆𑀢𑁄’’𑀢𑀺 𑀩𑀯𑁆𑀳𑀢𑁆𑀢𑁂, 𑀏𑀓𑀦𑁆𑀢𑁂𑀦𑁂𑀯 𑀤𑀺𑀲𑁆𑀲𑀢𑀺;

𑀦𑁂𑀯𑀁 𑀤𑀺𑀲𑁆𑀲𑀦𑁆𑀢𑀺 𑀩𑀯𑁆𑀳𑀢𑁆𑀢𑁂, ‘‘𑀕𑀘𑁆𑀙𑀦𑁆𑀢𑁄’’ 𑀇𑀢𑀺𑀆𑀤𑀬𑁄.

𑀅𑀦𑁂𑀓𑀲𑀢𑀧𑀸𑀞𑁂𑀲𑀼, ‘‘𑀯𑀺𑀳𑀭𑀦𑁆𑀢𑁄’’𑀢𑀺𑀆𑀤𑀻𑀲𑀼;

𑀏𑀓𑀲𑁆𑀲𑀧𑀺 𑀩𑀳𑀼𑀓𑀢𑁆𑀢𑁂, 𑀧𑀯𑀢𑁆𑀢𑀺 𑀦 𑀢𑀼 𑀤𑀺𑀲𑁆𑀲𑀢𑀺.

𑀩𑀳𑀼𑀯𑀘𑀦𑀦𑀬𑁂𑀦, ‘‘𑀕𑀘𑁆𑀙𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀳𑀺;

𑀕𑀳𑀡𑁂 𑀲𑀢𑀺 𑀩𑀳𑀯𑁄, 𑀤𑁄𑀲𑀸 𑀤𑀺𑀲𑁆𑀲𑀦𑁆𑀢𑀺 𑀲𑀘𑁆𑀘𑀢𑁄.

𑀬𑀣𑁂𑀓𑀫𑁆𑀳𑀺 𑀖𑀭𑁂 𑀤𑀟𑁆𑀠𑁂, 𑀤𑀟𑁆𑀠𑀸 𑀲𑀸𑀫𑀻𑀧𑀺𑀓𑀸 𑀖𑀭𑀸;

𑀢𑀣𑀸 𑀩𑀯𑁆𑀳𑀢𑁆𑀢𑀯𑀸𑀘𑀺𑀢𑁆𑀢𑁂, ‘‘𑀕𑀘𑁆𑀙𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀢𑀼.

‘‘𑀯𑀺𑀳𑀭𑀦𑁆𑀢𑁄’’𑀢𑀺𑀆𑀤𑀻𑀦𑀁, 𑀩𑀯𑁆𑀳𑀢𑁆𑀢𑀯𑀸𑀘𑀺𑀢𑀸 𑀲𑀺𑀬𑀸;

𑀭𑀽𑀧𑀦𑀬𑁄 𑀅𑀦𑀺𑀝𑁆𑀞𑁄 𑀘, 𑀕𑀳𑁂𑀢𑀩𑁆𑀩𑁄 𑀅𑀦𑁂𑀓𑀥𑀸.

𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 ‘‘𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀁 𑀦𑀸𑀫 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦 𑀫𑀳𑀸𑀔𑀻𑀡𑀸𑀲𑀯𑁂𑀦 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀓𑀢’’𑀦𑁆𑀢𑀺 𑀮𑁄𑀓𑁂 𑀧𑀲𑀺𑀤𑁆𑀥𑀁, 𑀢𑀲𑁆𑀫𑀸 𑀇𑀤𑀁 𑀞𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀣𑁂𑀭𑁂 𑀕𑀸𑀭𑀯𑁂𑀦 𑀏𑀯𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀧𑀸𑀴𑀺𑀦𑀬𑀁 𑀕𑀭𑀼𑀁 𑀓𑀢𑁆𑀯𑀸 𑀤𑀺𑀝𑁆𑀞𑁂𑀦𑁂𑀓𑀯𑀘𑀦𑀦𑀬𑁂𑀦 𑀅𑀤𑀺𑀝𑁆𑀞𑁄 𑀩𑀳𑀼𑀯𑀘𑀦𑀦𑀬𑁄 𑀙𑀟𑁆𑀟𑁂𑀢𑀩𑁆𑀩𑁄. 𑀏𑀯𑀁 𑀲𑀢𑀺 𑀦𑀺𑀕𑁆𑀕𑀳𑀻𑀢𑀦𑁆𑀢𑁂𑀲𑀼 𑀦𑀬𑁄 𑀲𑁄𑀪𑀦𑁄 𑀪𑀯𑀢𑀺. 𑀅𑀬𑀁 𑀧𑀦 𑀅𑀫𑁆𑀳𑀸𑀓𑀁 𑀭𑀼𑀘𑀺 𑁋

‘‘𑀪𑀯𑀁 𑀓𑀭𑀁 𑀅𑀭𑀳𑀁 𑀲𑀁, 𑀫𑀳𑀁’’ 𑀇𑀢𑀺 𑀧𑀤𑀸𑀦𑀺 𑀢𑀼;

𑀯𑀺𑀲𑀤𑀺𑀲𑀸𑀦𑀺 𑀲𑀫𑁆𑀪𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀮𑀓𑁆𑀔𑀬𑁂.

‘‘𑀕𑀘𑁆𑀙𑀁 𑀘𑀭𑀁 𑀤𑀤𑀁 𑀢𑀺𑀝𑁆𑀞𑀁, 𑀘𑀺𑀦𑁆𑀢𑀬𑀁 𑀪𑀸𑀯𑀬𑀁 𑀯𑀤𑀁;

𑀚𑀸𑀦𑀁 𑀧𑀲𑁆𑀲’’𑀦𑁆𑀢𑀺𑀆𑀤𑀻𑀦𑀺, 𑀲𑀤𑀺𑀲𑀸𑀦𑀺 𑀪𑀯𑀦𑁆𑀢𑀺 𑀳𑀺.

𑀢𑀢𑁆𑀭 ‘‘𑀚𑀸𑀦’’𑀦𑁆𑀢𑀺𑀆𑀤𑀻𑀦𑀺, 𑀓𑀢𑁆𑀣𑀘𑀺 𑀧𑀭𑀺𑀯𑀢𑁆𑀢𑀭𑁂;

𑀯𑀺𑀪𑀢𑁆𑀢𑀺𑀮𑀺𑀗𑁆𑀕𑀯𑀘𑀦-𑀯𑀲𑁂𑀦𑀸𑀢𑀺 𑀯𑀺𑀪𑀸𑀯𑀬𑁂.

𑀢𑀢𑁆𑀭 𑀢𑀸𑀯 𑀪𑀯𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑀺 𑁋 𑀪𑀯𑀁𑀲𑀤𑁆𑀤𑁄 𑀳𑀺 ‘‘𑀯𑀟𑁆𑀠𑀦𑁆𑀢𑁄, 𑀳𑁄𑀦𑁆𑀢𑁄’’𑀢𑀺 𑀅𑀢𑁆𑀣𑁂𑀧𑀺 𑀯𑀤𑀢𑀺. 𑀢𑁂𑀲𑀁 𑀯𑀲𑁂𑀦 𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀪𑀯𑀁, 𑀪𑀯𑀦𑁆𑀢𑁄, 𑀪𑀯𑀦𑁆𑀢𑀸. 𑀪𑀯𑀦𑁆𑀢𑀁, 𑀪𑀯𑀦𑁆𑀢𑁂. 𑀪𑀯𑀦𑁆𑀢𑁂𑀦, 𑀪𑀯𑀦𑁆𑀢𑁂𑀳𑀺, 𑀪𑀯𑀦𑁆𑀢𑁂𑀪𑀺. 𑀪𑀯𑀦𑁆𑀢𑀲𑁆𑀲, 𑀪𑀯𑀦𑁆𑀢𑀸𑀦𑀁. 𑀪𑀯𑀦𑁆𑀢𑀸, 𑀪𑀯𑀦𑁆𑀢𑀲𑁆𑀫𑀸, 𑀪𑀯𑀦𑁆𑀢𑀫𑁆𑀳𑀸, 𑀪𑀯𑀦𑁆𑀢𑁂𑀳𑀺, 𑀪𑀯𑀦𑁆𑀢𑁂𑀪𑀺. 𑀪𑀯𑀦𑁆𑀢𑀲𑁆𑀲, 𑀪𑀯𑀦𑁆𑀢𑀸𑀦𑀁. 𑀪𑀯𑀦𑁆𑀢𑁂, 𑀪𑀯𑀦𑁆𑀢𑀲𑁆𑀫𑀺𑀁, 𑀪𑀯𑀦𑁆𑀢𑀫𑁆𑀳𑀺, 𑀪𑀯𑀦𑁆𑀢𑁂𑀲𑀼. 𑀳𑁂 𑀪𑀯𑀦𑁆𑀢, 𑀳𑁂 𑀪𑀯𑀦𑁆𑀢𑀸.

𑀢𑀢𑁆𑀣 ‘‘𑀪𑀯𑀁, 𑀪𑀯𑀦𑁆𑀢𑁄’’𑀢𑀺𑀆𑀤𑀻𑀦𑀁 ‘‘𑀯𑀟𑁆𑀠𑀦𑁆𑀢𑁄𑀳𑁄𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀲𑀼𑀯𑀺𑀚𑀸𑀦𑁄 𑀪𑀯𑀁 𑀳𑁄𑀢𑀺. 𑀥𑀫𑁆𑀫𑀓𑀸𑀫𑁄 𑀪𑀯𑀁 𑀳𑁄𑀢𑀺. 𑀭𑀸𑀚𑀸 𑀪𑀯𑀦𑁆𑀢𑁄 𑀦𑀸𑀦𑀸𑀲𑀫𑁆𑀧𑀢𑁆𑀢𑀻𑀳𑀺 𑀫𑁄𑀤𑀢𑀺. 𑀓𑀼𑀴𑀻𑀭𑀤𑀳𑁄 𑀕𑀗𑁆𑀕𑀸𑀬 𑀏𑀓𑀸𑀩𑀤𑁆𑀥𑁄, 𑀕𑀗𑁆𑀕𑀸𑀬 𑀧𑀽𑀭𑀡𑀓𑀸𑀮𑁂 𑀕𑀗𑁆𑀕𑁄𑀤𑀓𑁂𑀦 𑀧𑀽𑀭𑀢𑀺, 𑀉𑀤𑀓𑁂 𑀫𑀦𑁆𑀤𑀻 𑀪𑀯𑀦𑁆𑀢𑁂 𑀤𑀳𑀢𑁄 𑀉𑀤𑀓𑀁 𑀕𑀗𑁆𑀕𑀸𑀬 𑀑𑀢𑀭𑀢𑀻’’𑀢𑀺 𑀧𑀬𑁄𑀕𑀸 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀸. 𑀏𑀢𑁆𑀣 𑀪𑀯𑀁𑀲𑀤𑁆𑀤𑀫𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀕𑀘𑁆𑀙𑀫𑀸𑀦𑀘𑀭𑀫𑀸𑀦𑀲𑀤𑁆𑀤𑀸𑀤𑀻𑀲𑀼 𑀯𑀺𑀬 𑀪𑀯𑀦𑁆𑀢𑀲𑀤𑁆𑀤𑁂 ‘‘𑀪𑀯𑀦𑁆𑀢𑁄, 𑀪𑀯𑀦𑁆𑀢𑀸’’𑀢𑀺 𑀧𑀼𑀭𑀺𑀲𑀦𑀬𑁄𑀧𑀺 𑀮𑀩𑁆𑀪𑀢𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀪𑀯𑀦𑁆𑀢𑀁, 𑀪𑀯𑀦𑁆𑀢𑀸𑀦𑀻’’𑀢𑀺 𑀘𑀺𑀢𑁆𑀢𑀦𑀬𑁄𑀧𑀺 𑀮𑀩𑁆𑀪𑀢𑀺. 𑀏𑀯𑀁 𑀯𑀟𑁆𑀠𑀦𑀪𑀯𑀦𑀢𑁆𑀣𑀯𑀸𑀘𑀓𑀲𑁆𑀲 𑀪𑀯𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀬𑀜𑁆𑀘 𑀯𑀺𑀲𑁂𑀲𑁄 ‘‘𑀪𑀯𑀦𑁆𑀢𑁄’’𑀢𑀺 𑀧𑀤𑀁 𑀯𑀟𑁆𑀠𑀦𑀪𑀯𑀦𑀢𑁆𑀣𑀢𑁄 𑀅𑀜𑁆𑀜𑀢𑁆𑀣𑁂 𑀯𑀢𑁆𑀢𑀫𑀸𑀦𑀁 𑀩𑀳𑀼𑀯𑀘𑀦𑀫𑁂𑀯 𑀳𑁄𑀢𑀺, 𑀬𑀣𑀸 ‘‘𑀪𑀯𑀦𑁆𑀢𑁄 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀯𑀟𑁆𑀠𑀦𑀪𑀯𑀦𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀁 𑀏𑀓𑀯𑀘𑀦𑀫𑁂𑀯. 𑀅𑀢𑁆𑀭𑀺𑀫𑁂 𑀧𑀬𑁄𑀕𑀸 ‘‘𑀅𑀦𑀼𑀧𑀼𑀩𑁆𑀩𑁂𑀦 𑀪𑀯𑀦𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀺. 𑀲𑀫𑀡𑁂𑀦 𑀦𑀸𑀫 𑀈𑀤𑀺𑀲𑁂𑀲𑀼 𑀓𑀫𑁆𑀫𑁂𑀲𑀼 𑀅𑀩𑁆𑀬𑀸𑀯𑀝𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀯𑀦𑁆𑀢𑁄 𑀳𑀺 𑀲𑀫𑀡𑁄 𑀲𑀼𑀲𑀫𑀡𑁄 𑀅𑀲𑁆𑀲𑀸’’𑀢𑀺. ‘‘𑀪𑀯𑀁’’ 𑀇𑀢𑀺 𑀧𑀤𑀁 𑀧𑀦 𑀉𑀪𑀬𑀢𑁆𑀣𑀸𑀧𑀺 𑀏𑀓𑀯𑀘𑀦𑀫𑁂𑀯, 𑀢𑀲𑁆𑀫𑀸 𑀇𑀤𑀸𑀦𑀺 ‘‘𑀪𑀯𑀁 𑀆𑀦𑀦𑁆𑀤𑁄. 𑀪𑀯𑀦𑁆𑀢𑁄 𑀆𑀕𑀘𑁆𑀙𑀦𑁆𑀢𑀺, 𑀅𑀧𑁆𑀧𑀲𑀤𑁆𑀤𑀸 𑀪𑀯𑀦𑁆𑀢𑁄 𑀳𑁄𑀦𑁆𑀢𑀼, 𑀫𑀸 𑀪𑁄𑀦𑁆𑀢𑁄 𑀲𑀤𑁆𑀤𑀫𑀓𑀢𑁆𑀣𑀸’’𑀢𑀺 𑀏𑀯𑀫𑀸𑀤𑀺𑀧𑀬𑁄𑀕𑀤𑀲𑁆𑀲𑀦𑀯𑀲𑁂𑀦 𑀯𑁄𑀳𑀸𑀭𑀯𑀺𑀲𑁂𑀲𑁂 𑀧𑀯𑀢𑁆𑀢𑀁 𑀅𑀜𑁆𑀜𑀁 𑀅𑀢𑁆𑀣𑀁 𑀧𑀝𑀺𑀘𑁆𑀘 𑀅𑀧𑀭𑀸𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀪𑀯𑀁, 𑀪𑀯𑀦𑁆𑀢𑁄, 𑀪𑁄𑀦𑁆𑀢𑁄. 𑀪𑀯𑀦𑁆𑀢𑀁, 𑀪𑀯𑀦𑁆𑀢𑁂. 𑀪𑀯𑀢𑀸, 𑀪𑁄𑀢𑀸, 𑀪𑀯𑀦𑁆𑀢𑁂𑀦, 𑀪𑀯𑀦𑁆𑀢𑁂𑀳𑀺, 𑀪𑀯𑀦𑁆𑀢𑁂𑀪𑀺. 𑀪𑀯𑀢𑁄, 𑀪𑁄𑀢𑁄, 𑀪𑀯𑀦𑁆𑀢𑀲𑁆𑀲, 𑀪𑀯𑀦𑁆𑀢𑀸𑀦𑀁, 𑀪𑀯𑀢𑀁. 𑀪𑀯𑀢𑀸, 𑀪𑁄𑀢𑀸, 𑀪𑀯𑀦𑁆𑀢𑁂𑀳𑀺, 𑀪𑀯𑀦𑁆𑀢𑁂𑀪𑀺. 𑀪𑀯𑀢𑁄, 𑀪𑁄𑀢𑁄, 𑀪𑀯𑀦𑁆𑀢𑀲𑁆𑀲, 𑀪𑀯𑀦𑁆𑀢𑀸𑀦𑀁, 𑀪𑀯𑀢𑀁. 𑀪𑀯𑀢𑀺, 𑀪𑀯𑀦𑁆𑀢𑁂, 𑀪𑀯𑀦𑁆𑀢𑀲𑁆𑀫𑀺𑀁, 𑀪𑀯𑀦𑁆𑀢𑀫𑁆𑀳𑀺, 𑀪𑀯𑀦𑁆𑀢𑁂𑀲𑀼. 𑀪𑁄, 𑀪𑀯𑀦𑁆𑀢𑁄, 𑀪𑁄𑀦𑁆𑀢𑁄 𑀇𑀢𑀺.

𑀏𑀢𑁆𑀣 𑀧𑀦 ‘‘𑀪𑁄’’𑀇𑀘𑁆𑀘𑀸𑀤𑀻𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀬𑀲𑁆𑀫𑀸 𑀯𑁄𑀳𑀸𑀭𑀯𑀺𑀲𑁂𑀲𑀧𑀯𑀢𑁆𑀢𑀸𑀦𑀺 𑀆𑀮𑀧𑀦𑀧𑀤𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀯𑀼𑀲𑁄, 𑀪𑀦𑁆𑀢𑁂’’𑀢𑀺 𑀧𑀤𑀸𑀦𑀺 𑀯𑀺𑀬 𑀪𑁄𑀲𑀤𑁆𑀤𑀸𑀤𑀺𑀉𑀧𑀧𑀤𑀯𑀦𑁆𑀢𑀸𑀦𑀺 𑀦 𑀪𑀯𑀦𑁆𑀢𑀺, ‘‘𑀪𑁄 𑀧𑀼𑀭𑀺𑀲, 𑀪𑀯𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀸, 𑀪𑁄𑀦𑁆𑀢𑁄 𑀲𑀫𑀡𑀸, 𑀪𑁄 𑀭𑀸𑀚’’𑀇𑀘𑁆𑀘𑀸𑀤𑀻𑀲𑀼 𑀳𑀺 𑀧𑀼𑀭𑀺𑀲𑀲𑀤𑁆𑀤𑀸𑀤𑀬𑁄𑀬𑁂𑀯 𑀪𑁄𑀲𑀤𑁆𑀤𑀸𑀤𑀺 𑀉𑀧𑀧𑀤𑀯𑀦𑁆𑀢𑁄 𑀪𑀯𑀦𑁆𑀢𑀺. 𑀇𑀥 𑀘 ‘‘𑀪𑀯𑀁 𑀆𑀦𑀦𑁆𑀤𑁄’’𑀢𑀺 𑀏𑀢𑁆𑀣 𑀪𑀯𑀁𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀸𑀦𑀺 ‘‘𑀪𑁄, 𑀪𑀯𑀦𑁆𑀢𑁄, 𑀪𑁄𑀦𑁆𑀢𑁄’’𑀢𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀦 𑀧𑀦 ‘‘𑀥𑀫𑁆𑀫𑀓𑀸𑀫𑁄 𑀪𑀯𑀁 𑀳𑁄𑀢𑀻’’𑀢𑀺 𑀏𑀢𑁆𑀣 𑀪𑀯𑀁𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀸𑀦𑀺. 𑀧𑀞𑀫𑀲𑁆𑀫𑀺𑀜𑁆𑀳𑀺 𑀦𑀬𑁂 𑀯𑀟𑁆𑀠𑀦𑀢𑁆𑀣𑀯𑀲𑁂𑀦 ‘‘𑀪𑁄 𑀪𑀯𑀦𑁆𑀢, 𑀪𑀯𑀦𑁆𑀢𑁄 𑀪𑀯𑀦𑁆𑀢𑀸, 𑀪𑁄𑀦𑁆𑀢𑁄 𑀪𑀯𑀦𑁆𑀢𑀸’’𑀢𑀺 𑀪𑁄𑀲𑀤𑁆𑀤𑀸𑀤𑀬𑁄 𑀆𑀮𑀧𑀦𑀧𑀤𑀸𑀦𑀁 𑀉𑀧𑀧𑀤𑀸𑀦𑀺 𑀪𑀯𑀦𑁆𑀢𑀺, 𑀦 𑀤𑀼𑀢𑀺𑀬𑀲𑁆𑀫𑀺𑀁 𑀦𑀬𑁂. 𑀆𑀫𑁂𑀟𑀺𑀢𑀯𑀲𑁂𑀦 𑀧𑀦 ‘‘𑀪𑁄 𑀪𑁄, 𑀪𑀯𑀦𑁆𑀢𑁄 𑀪𑀯𑀦𑁆𑀢𑁄, 𑀪𑁄𑀦𑁆𑀢𑁄 𑀪𑁄𑀦𑁆𑀢𑁄’’𑀢𑀺 𑀧𑀤𑀸𑀦𑀺 𑀪𑀯𑀦𑁆𑀢𑀺 𑀬𑀣𑀸 ‘‘𑀪𑀦𑁆𑀢𑁂 𑀪𑀦𑁆𑀢𑁂’’𑀢𑀺.

𑀅𑀢𑁆𑀭𑀺𑀤𑀁 𑀪𑀽𑀥𑀸𑀢𑀼𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀧𑀸𑀴𑀺𑀦𑀺𑀤𑀲𑁆𑀲𑀦𑀁 𑁋 𑀓𑀲𑁆𑀫𑀸 𑀪𑀯𑀁 𑀯𑀺𑀚𑁆𑀚𑀦𑀫𑀭𑀜𑁆𑀜𑀦𑀺𑀲𑁆𑀲𑀺𑀢𑁄. 𑀓𑀣𑀁 𑀧𑀦𑀸𑀳𑀁 𑀪𑁄 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀚𑀸𑀦𑀺𑀲𑁆𑀲𑀸𑀫𑀺. 𑀏𑀯𑀁 𑀪𑁄𑀢𑀺 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸. 𑀫𑀸 𑀪𑀯𑀦𑁆𑀢𑁄 𑀏𑀯𑀁 𑀅𑀯𑀘𑀼𑀢𑁆𑀣. 𑀇𑀫𑀁 𑀪𑁄𑀦𑁆𑀢𑁄 𑀦𑀺𑀲𑀸𑀫𑁂𑀣. 𑀏𑀯𑀁 𑀪𑁄 𑀧𑀼𑀭𑀺𑀲 𑀚𑀸𑀦𑀸𑀳𑀺, 𑀧𑀸𑀧𑀥𑀫𑁆𑀫𑀸 𑀅𑀲𑀜𑁆𑀜𑀢𑀸 𑀇𑀘𑁆𑀘𑁂𑀯𑀫𑀸𑀤𑀺. 𑀏𑀢𑁆𑀣 ‘‘𑀪𑀯𑀁’’𑀇𑀘𑁆𑀘𑀸𑀤𑀻𑀦𑀺 𑀪𑀽𑀥𑀸𑀢𑀼𑀫𑀬𑀸𑀦𑀺 𑀦𑀸𑀫𑀧𑀤𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀧𑀺𑀘 𑀢𑁂𑀲𑀼 ‘‘𑀪𑁄, 𑀪𑀯𑀦𑁆𑀢𑁄, 𑀪𑁄𑀦𑁆𑀢𑁄’’𑀢𑀺 𑀇𑀫𑀸𑀦𑀺 𑀦𑀺𑀧𑀸𑀢𑀧𑀤𑀸𑀦𑀺𑀧𑀺 𑀳𑁄𑀦𑁆𑀢𑀻𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. ‘‘𑀪𑁄 𑀧𑀼𑀭𑀺𑀲𑀸’’𑀢𑀺𑀆𑀤𑀻𑀲𑀼 𑀢𑁂𑀲𑀁 𑀦𑀺𑀧𑀸𑀢𑀸𑀦𑀺𑀧𑀸𑀢𑀪𑀸𑀯𑁂 𑀯𑀺𑀯𑀸𑀤𑁄 𑀦 𑀓𑀭𑀡𑀻𑀬𑁄. 𑀓𑀘𑁆𑀘𑀸𑀬𑀦𑀲𑁆𑀫𑀺𑀜𑁆𑀳𑀺 ‘‘𑀪𑁄 𑀕𑁂 𑀢𑀽’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀣 𑀧𑀦 ‘‘𑀆𑀫𑀦𑁆𑀢𑀦𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀦𑀺𑀭𑀼𑀢𑁆𑀢𑀺𑀫𑀜𑁆𑀚𑀽𑀲𑀸𑀬𑀁 𑀯𑀼𑀢𑁆𑀢𑀁 ‘‘𑀪𑁄𑀢𑀺𑀤𑀁 𑀆𑀫𑀦𑁆𑀢𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑁄 𑀦 𑀓𑁂𑀯𑀮𑀁 𑀏𑀓𑀯𑀘𑀦𑀫𑁂𑀯 𑀳𑁄𑀢𑀺, 𑀅𑀣 𑀔𑁄 𑀩𑀳𑀼𑀯𑀘𑀦𑀫𑁆𑀧𑀺 𑀳𑁄𑀢𑀻𑀢𑀺 ‘𑀪𑁄 𑀧𑀼𑀭𑀺𑀲𑀸’𑀢𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄𑀧𑀺 𑀕𑀳𑀺𑀢𑁄. ‘𑀪𑀯𑀦𑁆𑀢𑁄’𑀢𑀺 𑀧𑀤𑀁 𑀧𑀦 𑀩𑀳𑀼𑀯𑀘𑀦𑀫𑁂𑀯 𑀳𑁄𑀢𑀻𑀢𑀺 ‘𑀧𑀼𑀭𑀺𑀲𑀸’𑀢𑀺 𑀧𑀼𑀦 𑀯𑀼𑀢𑁆𑀢’’𑀦𑁆𑀢𑀺. 𑀧𑀸𑀴𑀺𑀬𑀜𑁆𑀳𑀺 𑀅𑀝𑁆𑀞𑀓𑀣𑀸𑀲𑀼 𑀘 𑀦𑀺𑀧𑀸𑀢𑀪𑀽𑀢𑁄 𑀪𑁄𑀲𑀤𑁆𑀤𑁄 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀤𑁆𑀯𑀺𑀥𑀸 𑀤𑀺𑀲𑁆𑀲𑀢𑀺, 𑀇𑀢𑀭𑁂 𑀧𑀦 𑀩𑀳𑀼𑀯𑀘𑀦𑀯𑀲𑁂𑀦𑁂𑀯 𑀤𑀺𑀲𑁆𑀲𑀦𑁆𑀢𑀺. 𑀢𑁂𑀲𑀁 𑀢𑀼 𑀦𑀺𑀧𑀸𑀢𑀧𑀤𑀢𑁆𑀢𑁂 𑀭𑀽𑀧𑀦𑀺𑀧𑁆𑀨𑀸𑀤𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑁂𑀲𑀼 𑀪𑁄𑀲𑀤𑁆𑀤𑀲𑁆𑀲 𑀦𑀺𑀧𑀸𑀢𑀧𑀤𑀢𑁆𑀢𑀸 𑀆𑀳𑀘𑁆𑀘𑀪𑀸𑀲𑀺𑀢𑁂 𑀦𑀺𑀚𑁆𑀚𑀻𑀯𑀸𑀮𑀧𑀦𑁂 𑀇𑀢𑁆𑀣𑀺𑀮𑀺𑀗𑁆𑀕𑀯𑀺𑀲𑀬𑁄 ‘‘𑀉𑀫𑁆𑀫𑀼𑀚𑁆𑀚 𑀪𑁄 𑀧𑀼𑀣𑀼𑀲𑀺𑀮𑁂, 𑀧𑀭𑀺𑀧𑁆𑀮𑀯 𑀪𑁄 𑀧𑀼𑀣𑀼𑀲𑀺𑀮𑁂’’𑀢𑀺 𑀧𑀬𑁄𑀕𑁄𑀧𑀺 𑀤𑀺𑀲𑁆𑀲𑀢𑀺. 𑀅𑀢𑁆𑀭𑀺𑀫𑀸 𑀪𑁄𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑀦𑀻 𑀕𑀸𑀣𑀸𑀬𑁄 𑁋

‘‘𑀇𑀢𑁄 𑀪𑁄 𑀲𑀼𑀕𑀢𑀺𑀁 𑀕𑀘𑁆𑀙, 𑀫𑀦𑀼𑀲𑁆𑀲𑀸𑀦𑀁 𑀲𑀳𑀩𑁆𑀬𑀢𑀁’’;

𑀏𑀯𑀫𑀸𑀤𑀻𑀲𑀼 𑀪𑁄𑀲𑀤𑁆𑀤𑁄, 𑀏𑀓𑀯𑀘𑀦𑀓𑁄 𑀫𑀢𑁄.

‘‘𑀧𑀲𑁆𑀲𑀣 𑀪𑁄 𑀇𑀫𑀁 𑀓𑀼𑀮-𑀧𑀼𑀢𑁆𑀢’’𑀫𑀺𑀘𑁆𑀘𑁂𑀯𑀫𑀸𑀤𑀺𑀲𑀼;

𑀩𑀳𑀼𑀯𑀘𑀦𑀓𑁄 𑀏𑀲𑁄, 𑀪𑁄𑀲𑀤𑁆𑀤𑁄𑀢𑀺 𑀯𑀺𑀪𑀸𑀯𑀬𑁂.

𑀧𑀼𑀕𑁆𑀕𑀮𑀸𑀮𑀧𑀦𑁂 𑀘𑁂𑀯, 𑀥𑀫𑁆𑀫𑀲𑁆𑀲𑀸𑀮𑀧𑀦𑁂𑀧𑀺 𑀘;

𑀦𑀺𑀚𑁆𑀚𑀻𑀯𑀸𑀮𑀧𑀦𑁂 𑀘𑀸𑀢𑀺, 𑀪𑁄𑀲𑀤𑁆𑀤𑁄 𑀢𑀻𑀲𑀼 𑀤𑀺𑀲𑁆𑀲𑀢𑀺.

𑀢𑀢𑁆𑀭 𑀥𑀫𑁆𑀫𑀸𑀮𑀧𑀦𑀫𑁆𑀳𑀺, 𑀏𑀓𑀯𑀘𑁄𑀯 𑀮𑀩𑁆𑀪𑀢𑀺;

𑀇𑀢𑀭𑁂𑀲𑀼 𑀲𑀺𑀬𑀸 𑀤𑁂𑀓-𑀯𑀘𑁄 𑀩𑀳𑀼𑀯𑀘𑁄𑀧𑀺 𑀘.

𑀦𑀺𑀘𑁆𑀙𑀺𑀢𑀩𑁆𑀩𑀁 𑀕𑀼𑀡𑀻𑀧𑀤𑀁, 𑀥𑀫𑁆𑀫𑀲𑁆𑀲𑀸𑀮𑀧𑀦𑁂 𑀥𑀼𑀯𑀁;

‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄’’𑀢𑀺, 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀇𑀘𑁆𑀙𑀺𑀢𑀩𑁆𑀩𑀁 𑀕𑀼𑀡𑀻𑀧𑀤𑀁, 𑀧𑀼𑀕𑁆𑀕𑀮𑀸𑀮𑀧𑀦𑁂 𑀧𑀦;

‘‘𑀏𑀯𑀁 𑀪𑁄 𑀧𑀼𑀭𑀺𑀲 𑀚𑀸𑀦𑀸𑀳𑀺’’, 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀕𑀼𑀡𑀻𑀧𑀤𑀁 𑀅𑀲𑀦𑁆𑀢𑀫𑁆𑀧𑀺, 𑀧𑀼𑀕𑁆𑀕𑀮𑀸𑀮𑀧𑀦𑀫𑁆𑀳𑀺 𑀢𑀼;

𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀧𑀸𑀯𑀤𑁂, 𑀅𑀢𑁆𑀣𑀁 ‘‘𑀪𑁄 𑀏𑀳𑀺’’𑀆𑀤𑀺𑀲𑀼.

𑀖𑀝𑀸𑀤𑀻𑀦𑀁 𑀆𑀮𑀧𑀦𑀁, 𑀦𑀺𑀚𑁆𑀚𑀻𑀯𑀸𑀮𑀧𑀦𑀁 𑀪𑀯𑁂;

𑀚𑀻𑀯𑀁𑀯 𑀮𑁄𑀓𑀺𑀬𑀸 𑀮𑁄𑀓𑁂, 𑀆𑀮𑀧𑀦𑁆𑀢𑀺 𑀓𑀤𑀸𑀘𑀺 𑀢𑀼.

𑀦𑀺𑀚𑁆𑀚𑀻𑀯𑀸𑀮𑀧𑀦𑀁 𑀅𑀧𑁆𑀧𑀁, 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑁂 𑀲𑀺𑀬𑀸;

‘‘𑀉𑀫𑁆𑀫𑀼𑀚𑁆𑀚 𑀪𑁄 𑀧𑀼𑀣𑀼𑀲𑀺𑀮𑁂’’, 𑀇𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁.

𑀏𑀢𑁆𑀣 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀁, 𑀓𑁂𑀘𑀺 𑀇𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀢𑁂𑀲𑀁 𑀫𑀢𑁂𑀦 𑀪𑁄𑀢𑀻𑀢𑀺, 𑀮𑀺𑀗𑁆𑀕𑀁 𑀯𑀺𑀧𑀭𑀺𑀡𑀸𑀫𑀬𑁂.

𑀅𑀣 𑀯𑀸 𑀧𑀦 𑀪𑁄𑀲𑀤𑁆𑀤𑁄, 𑀦𑀺𑀧𑀸𑀢𑁄 𑀲𑁄𑀧𑀤𑀁 𑀯𑀺𑀬;

𑀢𑀲𑁆𑀫𑀸 𑀯𑀺𑀭𑁄𑀥𑀢𑀸 𑀦𑀸𑀲𑁆𑀲, 𑀢𑀺𑀮𑀺𑀗𑁆𑀕𑁂 𑀯𑀘𑀦𑀤𑁆𑀯𑀬𑁂.

𑀏𑀯𑀁 𑀲𑀦𑁆𑀢𑁂𑀧𑀺 𑀪𑁄𑀲𑀤𑁆𑀤𑁄, 𑀤𑁆𑀯𑀺𑀮𑀺𑀗𑁆𑀕𑁂𑀬𑁂𑀯 𑀧𑀸𑀬𑀢𑁄;

𑀬𑀲𑁆𑀫𑀸 𑀤𑀺𑀝𑁆𑀞𑁄 𑀢𑀢𑁄 𑀯𑀺𑀜𑁆𑀜𑀽, 𑀤𑁆𑀯𑀺𑀮𑀺𑀗𑁆𑀕𑁂𑀬𑁂𑀯 𑀢𑀁 𑀯𑀤𑁂.

𑀇𑀢𑁆𑀣𑀺𑀮𑀺𑀗𑁆𑀕𑀫𑁆𑀳𑀺 𑀲𑀫𑁆𑀧𑀢𑁆𑀢𑁂, ‘‘𑀪𑁄’’𑀢𑀺 𑀇𑀢𑀺 𑀧𑀬𑁄𑀚𑀬𑁂;

𑀏𑀯𑀁𑀯𑀺𑀥𑀁 𑀧𑀬𑁄𑀕𑀜𑁆𑀳𑀺, 𑀲𑀼𑀧𑁆𑀧𑀬𑁄𑀕𑀁 𑀩𑀼𑀥𑀸𑀩𑁆𑀭𑀯𑀼𑀁.

𑀬𑀚𑁆𑀚𑁂𑀯𑀁 𑀤𑀼𑀧𑁆𑀧𑀬𑁄𑀕𑀁𑀯, 𑀲𑀺𑀬𑀸 𑀢𑀼𑀫𑁆𑀳𑁂𑀳𑀺 𑀤𑀲𑁆𑀲𑀺𑀢𑀁;

‘‘𑀉𑀫𑁆𑀫𑀼𑀚𑁆𑀚 𑀪𑁄 𑀧𑀼𑀣𑀼𑀲𑀺𑀮𑁂’’, 𑀇𑀘𑁆𑀘𑀸𑀳𑀘𑁆𑀘𑀧𑀤𑀦𑁆𑀢𑀺 𑀘𑁂.

𑀤𑀼𑀧𑁆𑀧𑀬𑁄𑀕𑀁 𑀦 𑀢𑀁 𑀬𑀲𑁆𑀫𑀸, 𑀯𑁄𑀳𑀸𑀭𑀓𑀼𑀲𑀮𑁂𑀦 𑀯𑁂;

𑀚𑀺𑀦𑁂𑀦 𑀪𑀸𑀲𑀺𑀢𑁂 𑀥𑀫𑁆𑀫𑁂, 𑀤𑀼𑀧𑁆𑀧𑀬𑁄𑀕𑀸 𑀦 𑀯𑀺𑀚𑁆𑀚𑀭𑁂.

𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀯𑀺𑀲𑀬𑁂, 𑀪𑁄𑀢𑀺𑀲𑀤𑁆𑀤𑀧𑁆𑀧𑀬𑁄𑀚𑀦𑀁;

𑀓𑀯𑀻𑀦𑀁 𑀧𑁂𑀫𑀦𑀻𑀬𑀦𑁆𑀢𑀺, 𑀫𑀬𑀸 𑀏𑀯𑀫𑀼𑀤𑀻𑀭𑀺𑀢𑀁.

𑀏𑀯𑀁 𑀪𑀯𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑀁 𑀤𑁆𑀯𑀺𑀥𑀸 𑀯𑀺𑀪𑀢𑁆𑀢𑀸 𑀯𑀟𑁆𑀠𑀦𑀪𑀯𑀦𑀢𑁆𑀣𑀢𑀤𑀜𑁆𑀜𑀢𑁆𑀣𑀯𑀲𑁂𑀦.

𑀓𑀭𑁄𑀦𑁆𑀢𑀲𑀤𑁆𑀤𑀲𑁆𑀲 𑀧𑀦 𑁋

𑀓𑀭𑀁, 𑀓𑀭𑁄𑀦𑁆𑀢𑁄, 𑀓𑀭𑁄𑀦𑁆𑀢𑀸. 𑀓𑀭𑁄𑀦𑁆𑀢𑀁, 𑀓𑀭𑁄𑀦𑁆𑀢𑁂. 𑀓𑀭𑁄𑀢𑀸, 𑀓𑀭𑁄𑀦𑁆𑀢𑁂𑀦, 𑀓𑀭𑁄𑀦𑁆𑀢𑁂𑀳𑀺, 𑀓𑀭𑁄𑀦𑁆𑀢𑁂𑀪𑀺. 𑀓𑀭𑁄𑀢𑁄, 𑀓𑀭𑁄𑀦𑁆𑀢𑀲𑁆𑀲, 𑀓𑀭𑁄𑀦𑁆𑀢𑀸𑀦𑀁, 𑀓𑀭𑁄𑀢𑀁. 𑀓𑀭𑁄𑀢𑀸, 𑀓𑀭𑁄𑀦𑁆𑀢𑀸, 𑀓𑀭𑁄𑀦𑁆𑀢𑀲𑁆𑀫𑀸, 𑀓𑀭𑁄𑀦𑁆𑀢𑀫𑁆𑀳𑀸, 𑀓𑀭𑁄𑀦𑁆𑀢𑁂𑀳𑀺, 𑀓𑀭𑁄𑀦𑁆𑀢𑁂𑀪𑀺. 𑀓𑀭𑁄𑀢𑁄, 𑀓𑀭𑁄𑀦𑁆𑀢𑀲𑁆𑀲, 𑀓𑀭𑁄𑀦𑁆𑀢𑀸𑀦𑀁, 𑀓𑀭𑁄𑀢𑀁. 𑀓𑀭𑁄𑀦𑁆𑀢𑁂, 𑀓𑀭𑁄𑀦𑁆𑀢𑀲𑁆𑀫𑀺𑀁, 𑀓𑀭𑁄𑀦𑁆𑀢𑀫𑁆𑀳𑀺, 𑀓𑀭𑁄𑀦𑁆𑀢𑁂𑀲𑀼. 𑀪𑁄 𑀓𑀭𑁄𑀦𑁆𑀢, 𑀪𑀯𑀦𑁆𑀢𑁄 𑀓𑀭𑁄𑀦𑁆𑀢𑀸𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

‘‘𑀓𑀭𑁄𑀢𑁄 𑀦 𑀓𑀭𑀺𑀬𑀢𑀺 𑀧𑀸𑀧’’𑀦𑁆𑀢𑀺 𑀇𑀤𑀫𑁂𑀢𑁆𑀣 𑀓𑀭𑁄𑀢𑁄𑀲𑀤𑁆𑀤𑀲𑁆𑀲 𑀅𑀢𑁆𑀣𑀺𑀢𑀸𑀦𑀺𑀤𑀲𑁆𑀲𑀦𑀁. 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀓𑀭𑁄𑀦𑁆𑀢𑀻, 𑀓𑀭𑁄𑀦𑁆𑀢𑀺𑀬𑁄’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀓𑀭𑁄𑀦𑁆𑀢𑀁, 𑀓𑀭𑁄𑀦𑁆𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀅𑀭𑀳𑀦𑁆𑀢𑀲𑀤𑁆𑀤𑀲𑁆𑀲 𑁋

𑀅𑀭𑀳𑀁, 𑀅𑀭𑀳𑀦𑁆𑀢𑁄. 𑀅𑀭𑀳𑀦𑁆𑀢𑀁, 𑀅𑀭𑀳𑀦𑁆𑀢𑁂. 𑀅𑀭𑀳𑀢𑀸, 𑀅𑀭𑀳𑀦𑁆𑀢𑁂𑀦, 𑀅𑀭𑀳𑀦𑁆𑀢𑁂𑀳𑀺, 𑀅𑀭𑀳𑀦𑁆𑀢𑁂𑀪𑀺. 𑀅𑀭𑀳𑀢𑁄, 𑀅𑀭𑀳𑀦𑁆𑀢𑀲𑁆𑀲, 𑀅𑀭𑀳𑀦𑁆𑀢𑀸𑀦𑀁, 𑀅𑀭𑀳𑀢𑀁. 𑀅𑀭𑀳𑀢𑀸, 𑀅𑀭𑀳𑀦𑁆𑀢𑀸, 𑀅𑀭𑀳𑀦𑁆𑀢𑀲𑁆𑀫𑀸, 𑀅𑀭𑀳𑀦𑁆𑀢𑀫𑁆𑀳𑀸, 𑀅𑀭𑀳𑀦𑁆𑀢𑁂𑀳𑀺, 𑀅𑀭𑀳𑀦𑁆𑀢𑁂𑀪𑀺. 𑀅𑀭𑀳𑀢𑁄, 𑀅𑀭𑀳𑀦𑁆𑀢𑀲𑁆𑀲, 𑀅𑀭𑀳𑀦𑁆𑀢𑀸𑀦𑀁, 𑀅𑀭𑀳𑀢𑀁. 𑀅𑀭𑀳𑀦𑁆𑀢𑁂, 𑀅𑀭𑀳𑀦𑁆𑀢𑀲𑁆𑀫𑀺𑀁, 𑀅𑀭𑀳𑀦𑁆𑀢𑀫𑁆𑀳𑀺, 𑀅𑀭𑀳𑀦𑁆𑀢𑁂𑀲𑀼. 𑀪𑁄 𑀅𑀭𑀳𑀦𑁆𑀢, 𑀪𑀯𑀦𑁆𑀢𑁄 𑀅𑀭𑀳𑀦𑁆𑀢𑁄 𑀇𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀅𑀬𑀁 𑀕𑀼𑀡𑀯𑀸𑀘𑀓𑀲𑁆𑀲 𑀅𑀭𑀳𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸. ‘‘𑀅𑀭𑀳𑀸, 𑀅𑀭𑀳𑀦𑁆𑀢𑁄, 𑀅𑀭𑀳𑀦𑁆𑀢𑀸’’𑀇𑀢𑀺 𑀘. 𑀏𑀢𑀜𑁆𑀳𑀺 𑀭𑀽𑀧𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀝𑁆𑀞𑀸𑀦𑁂 𑀤𑀺𑀲𑁆𑀲𑀢𑀺. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀴𑀺𑀬𑀁 𑀧𑀦 ‘‘𑀫𑀬𑀜𑁆𑀘𑀫𑁆𑀳𑀸 𑀅𑀦𑀭𑀳𑀦𑁆𑀢𑁄’’𑀢𑀺 𑀧𑀤𑀁 𑀤𑀺𑀲𑁆𑀲𑀢𑀺. 𑀅𑀭𑀳𑀦𑁆𑀢𑀁, 𑀅𑀭𑀳𑀦𑁆𑀢𑁂. 𑀅𑀭𑀳𑀢𑀸, 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀲𑁆𑀲 𑀅𑀭𑀳𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀢𑀣𑀸 𑀳𑀺 ‘‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂. 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺𑀆𑀤𑀻𑀲𑀼 𑀅𑀭𑀳𑀁𑀲𑀤𑁆𑀤𑀸𑀤𑀬𑁄 𑀕𑀼𑀡𑀯𑀸𑀘𑀓𑀸. ‘‘𑀅𑀭𑀳𑀸 𑀅𑀳𑁄𑀲𑀺. 𑀅𑀳𑀜𑁆𑀳𑀺 𑀅𑀭𑀳𑀸 𑀮𑁄𑀓𑁂. 𑀏𑀓𑁄 𑀅𑀭𑀳𑀸, 𑀏𑀓𑀲𑀝𑁆𑀞𑀺 𑀅𑀭𑀳𑀦𑁆𑀢𑁄 𑀮𑁄𑀓𑁂 𑀅𑀳𑁂𑀲𑀼𑀁.

𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁.

𑀫𑀬𑀜𑁆𑀘𑀫𑁆𑀳𑀸 𑀅𑀦𑀭𑀳𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀅𑀭𑀳𑀸𑀲𑀤𑁆𑀤𑀸𑀤𑀬𑁄 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀇𑀥 𑀇𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀦𑀬𑁄 𑀅𑀧𑁆𑀧𑀲𑀺𑀤𑁆𑀥𑁄. 𑀬𑀤𑀺 𑀏𑀯𑀁 𑀆𑀲𑀯𑀓𑁆𑀔𑀬𑀁 𑀧𑀢𑁆𑀢𑀸 𑀇𑀢𑁆𑀣𑀻 𑀓𑀣𑀁 𑀯𑀢𑁆𑀢𑀩𑁆𑀩𑀸, 𑀆𑀲𑀯𑀓𑁆𑀔𑀬𑀁 𑀧𑀢𑁆𑀢𑀁 𑀘𑀺𑀢𑁆𑀢𑀁 𑀓𑀣𑀁 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀇𑀢𑁆𑀣𑀻 𑀢𑀸𑀯 ‘‘𑀬𑀁 𑀇𑀢𑁆𑀣𑀻 𑀅𑀭𑀳𑀁 𑀅𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀢𑁄 ‘‘𑀅𑀭𑀳’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀸 𑀕𑀼𑀡𑀯𑀲𑁂𑀦, 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀧𑀦 ‘‘𑀇𑀢𑁆𑀣𑀻 𑀅𑀭𑀳𑀸 𑀅𑀳𑁄𑀲𑀻’’𑀢𑀺 𑀯𑀢𑁆𑀢𑀩𑁆𑀩𑀸. 𑀘𑀺𑀢𑁆𑀢𑀁 𑀧𑀦 𑀕𑀼𑀡𑀯𑀲𑁂𑀦𑁂𑀯 ‘‘𑀅𑀭𑀳𑀁 𑀘𑀺𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺.

𑀲𑀦𑁆𑀢𑀲𑀤𑁆𑀤𑀲𑁆𑀲 𑁋

𑀲𑀁, 𑀲𑀦𑁆𑀢𑁄, 𑀲𑀦𑁆𑀢𑁄, 𑀲𑀦𑁆𑀢𑀸. 𑀲𑀁, 𑀲𑀦𑁆𑀢𑀁, 𑀲𑀦𑁆𑀢𑁂. 𑀲𑀢𑀸, 𑀲𑀦𑁆𑀢𑁂𑀦, 𑀲𑀦𑁆𑀢𑁂𑀳𑀺, 𑀲𑀦𑁆𑀢𑁂𑀪𑀺, 𑀲𑀩𑁆𑀪𑀺. 𑀲𑀢𑁄, 𑀲𑀦𑁆𑀢𑀲𑁆𑀲, 𑀲𑀦𑁆𑀢𑀸𑀦𑀁, 𑀲𑀢𑀁, 𑀲𑀢𑀸𑀦𑀁. 𑀲𑀢𑀸, 𑀲𑀦𑁆𑀢𑀸, 𑀲𑀦𑁆𑀢𑀲𑁆𑀫𑀸, 𑀲𑀦𑁆𑀢𑀫𑁆𑀳𑀸, 𑀲𑀦𑁆𑀢𑁂𑀳𑀺, 𑀲𑀦𑁆𑀢𑁂𑀪𑀺, 𑀲𑀩𑁆𑀪𑀺. 𑀲𑀢𑁄, 𑀲𑀦𑁆𑀢𑀲𑁆𑀲, 𑀲𑀦𑁆𑀢𑀸𑀦𑀁, 𑀲𑀢𑀁, 𑀲𑀢𑀸𑀦𑀁. 𑀲𑀢𑀺, 𑀲𑀦𑁆𑀢𑁂, 𑀲𑀦𑁆𑀢𑀲𑁆𑀫𑀺𑀁, 𑀲𑀦𑁆𑀢𑀫𑁆𑀳𑀺, 𑀲𑀦𑁆𑀢𑁂𑀲𑀼. 𑀪𑁄 𑀲𑀦𑁆𑀢, 𑀪𑀯𑀦𑁆𑀢𑁄 𑀲𑀦𑁆𑀢𑁄𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀏𑀢𑁆𑀣 𑀧𑀦 ‘‘𑀅𑀤𑁆𑀥𑀸 𑀳𑀺 𑀢𑀸𑀢 𑀲𑀢𑀦𑁂𑀲 𑀥𑀫𑁆𑀫𑁄’’𑀢𑀺 𑀚𑀬𑀤𑁆𑀤𑀺𑀲𑀚𑀸𑀢𑀓𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀲𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀲𑀢𑀦𑁂𑀲𑀸𑀢𑀺 𑀲𑀢𑀸𑀦𑀁 𑀏𑀲𑀸𑀢𑀺 𑀙𑁂𑀤𑁄, 𑀭𑀲𑁆𑀲𑀢𑁆𑀢𑀦𑀺𑀕𑁆𑀕𑀳𑀻𑀢𑀲𑀭𑀮𑁄𑀧𑀯𑀲𑁂𑀦 𑀘 𑀭𑀽𑀧𑀦𑀺𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀢𑀤𑀝𑁆𑀞𑀓𑀣𑀸𑀬𑀁 ‘‘𑀅𑀤𑁆𑀥𑀸 𑀏𑀓𑀁𑀲𑁂𑀦 𑀏𑀲 𑀢𑀸𑀢 𑀲𑀢𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀥𑀫𑁆𑀫𑁄 𑀲𑀪𑀸𑀯𑁄’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀬𑀁 𑀬𑁂 𑀮𑁄𑀓𑁂 ‘‘𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀘 ‘‘𑀅𑀭𑀺𑀬𑀸’’𑀢𑀺 𑀘 ‘‘𑀧𑀡𑁆𑀟𑀺𑀢𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀯𑀸𑀘𑀓𑀲𑁆𑀲 𑀲𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸. 𑀢𑀧𑁆𑀧𑀝𑀺𑀲𑁂𑀥𑀲𑁆𑀲 𑀧𑀦 𑀅𑀲𑀁, 𑀅𑀲𑀦𑁆𑀢𑁄, 𑀓𑀢𑁆𑀣𑀘𑀺 𑀅𑀲𑀦𑁆𑀢𑀸 𑀇𑀘𑁆𑀘𑀧𑀺. 𑀢𑀣𑀸 𑀳𑀺 ‘‘𑀅𑀲𑀦𑁆𑀢𑀸 𑀓𑀺𑀭 𑀫𑀁 𑀚𑀫𑁆𑀫𑀸, 𑀢𑀸𑀢 𑀢𑀸𑀢𑀸𑀢𑀺 𑀪𑀸𑀲𑀭𑁂’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. ‘‘𑀅𑀲𑀁, 𑀅𑀲𑀦𑁆𑀢𑀁, 𑀅𑀲𑀦𑁆𑀢𑁂. 𑀅𑀲𑀢𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀲𑀦𑁆𑀢𑁄, 𑀅𑀲𑀦𑁆𑀢𑁄’’𑀢𑀺𑀫𑀸𑀦𑀺 𑀩𑀳𑀼𑀯𑀘𑀦𑀓𑀸𑀦𑀺𑀬𑁂𑀯 𑀪𑀯𑀦𑁆𑀢𑀺, 𑀦 𑀓𑀢𑁆𑀣𑀘𑀺𑀧𑀺 𑀏𑀓𑀯𑀘𑀦𑀓𑀸𑀦𑀺. 𑀓𑀲𑁆𑀫𑀸? 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀢𑁆𑀢𑀸. 𑀅𑀜𑁆𑀜𑀢𑁆𑀭 𑀧𑀦 ‘‘𑀲𑀦𑁆𑀢𑁄, 𑀤𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀏𑀓𑀯𑀘𑀦𑀸𑀦𑀺𑀬𑁂𑀯 𑀞𑀧𑁂𑀢𑁆𑀯𑀸 𑀯𑀺𑀚𑁆𑀚𑀫𑀸𑀦𑀢𑁆𑀣𑀯𑀸𑀘𑀓𑀲𑀦𑁆𑀢𑁄𑀲𑀤𑁆𑀤𑀁, 𑀓𑀲𑁆𑀫𑀸? 𑀅𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀸𑀦𑀁 𑀢𑁂𑀲𑀁 𑀓𑀸𑀦𑀺𑀘𑀺 𑀧𑀬𑁄𑀕𑀸𑀦𑀺 𑀓𑀣𑀬𑀸𑀫 𑁋

𑀲𑀫𑁂𑀢𑀺 𑀅𑀲𑀢𑀸 𑀅𑀲𑀁. 𑀬𑀁 𑀬𑀜𑁆𑀳𑀺 𑀭𑀸𑀚 𑀪𑀚𑀢𑀺, 𑀲𑀦𑁆𑀢𑀁 𑀯𑀸 𑀬𑀤𑀺 𑀯𑀸 𑀅𑀲𑀁. 𑀦 𑀲𑀸 𑀲𑀪𑀸 𑀬𑀢𑁆𑀣 𑀦 𑀲𑀦𑁆𑀢𑀺 𑀲𑀦𑁆𑀢𑁄. 𑀅𑀲𑀦𑁆𑀢𑁄 𑀦𑀺𑀭𑀬𑀁 𑀬𑀦𑁆𑀢𑀺, 𑀲𑀦𑁆𑀢𑁄 𑀲𑀕𑁆𑀕𑀧𑀭𑀸𑀬𑀡𑀸. 𑀅𑀲𑀦𑁆𑀢𑁂 𑀦𑁄𑀧𑀲𑁂𑀯𑁂𑀬𑁆𑀬, 𑀲𑀦𑁆𑀢𑁂 𑀲𑁂𑀯𑁂𑀬𑁆𑀬 𑀧𑀡𑁆𑀟𑀺𑀢𑁄. 𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣. 𑀲𑀢𑀁 𑀥𑀫𑁆𑀫𑁄 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀪𑀯𑀦𑁆𑀢𑀺.

𑀬𑁄 𑀧𑀦𑀫𑁆𑀳𑁂𑀳𑀺 𑀧𑀤𑀫𑀸𑀮𑀸𑀬𑀁 ‘‘𑀲𑀩𑁆𑀪𑀻’’𑀢𑀺 𑀅𑀬𑀁 𑀲𑀤𑁆𑀤𑁄 𑀢𑀢𑀺𑀬𑀸𑀧𑀜𑁆𑀘𑀫𑀻𑀩𑀳𑀼𑀯𑀘𑀦𑀯𑀲𑁂𑀦 𑀬𑁄𑀚𑀺𑀢𑁄, 𑀲𑁄 𑀘 𑀔𑁄 𑀲𑀦𑁆𑀢𑀇𑀢𑀺 𑀅𑀓𑀸𑀭𑀦𑁆𑀢𑀧𑀓𑀢𑀺𑀯𑀲𑁂𑀦, 𑀅𑀜𑁆𑀜𑀢𑁆𑀣 𑀧𑀦 ‘‘𑀲𑀩𑁆𑀪𑀻’’𑀢𑀺 𑀇𑀓𑀸𑀭𑀦𑁆𑀢𑀧𑀓𑀢𑀺𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀲𑀩𑁆𑀪𑀻𑀢𑀺 𑀲𑀧𑁆𑀧𑀼𑀭𑀺𑀲𑁄 𑀦𑀺𑀩𑁆𑀩𑀸𑀦𑀜𑁆𑀘, 𑀲𑀼𑀦𑁆𑀤𑀭𑀸𑀥𑀺𑀯𑀘𑀦𑀁 𑀯𑀸 𑀏𑀢𑀁 𑀲𑀩𑁆𑀪𑀻𑀢𑀺. 𑀲𑀩𑁆𑀩𑁄 𑀘𑀸𑀬𑀫𑀢𑁆𑀣𑁄 𑀲𑀸𑀝𑁆𑀞𑀓𑀣𑀸𑀬 ‘‘𑀩𑀳𑀼𑀫𑁆𑀧𑁂𑀢𑀁 𑀅𑀲𑀩𑁆𑀪𑀺 𑀚𑀸𑀢𑀯𑁂𑀤𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 ‘‘𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺 𑀇𑀫𑀸𑀬 𑀘 𑀤𑀻𑀧𑁂𑀢𑀩𑁆𑀩𑁄.

𑀆𑀮𑀧𑀦𑁂 𑀘 𑀧𑀘𑁆𑀘𑀢𑁆𑀢𑁂, 𑀢𑀢𑀺𑀬𑀸𑀧𑀜𑁆𑀘𑀫𑀻𑀲𑀼 𑀘;

𑀲𑀫𑀸𑀲𑀫𑁆𑀳𑀺 𑀘 𑀬𑁄𑀚𑁂𑀬𑁆𑀬, 𑀲𑀩𑁆𑀪𑀺𑀲𑀤𑁆𑀤𑀁 𑀲𑀼𑀫𑁂𑀥𑀲𑁄.

𑀅𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀪𑁄 𑀲𑀩𑁆𑀪𑀺 𑀢𑀺𑀝𑁆𑀞, 𑀲𑀩𑁆𑀪𑀺 𑀢𑀺𑀝𑁆𑀞𑀢𑀺, 𑀲𑀩𑁆𑀪𑀺 𑀲𑀳 𑀕𑀘𑁆𑀙𑀢𑀺, 𑀲𑀩𑁆𑀪𑀺 𑀅𑀧𑁂𑀳𑀺, 𑀅𑀲𑀩𑁆𑀪𑀺𑀭𑀽𑀧𑁄 𑀧𑀼𑀭𑀺𑀲𑁄. 𑀬𑀲𑁆𑀫𑀸 𑀧𑀦𑀸𑀬𑀁 𑀲𑀸𑀲𑀦𑀸𑀦𑀼𑀓𑀽𑀮𑀸, 𑀢𑀲𑁆𑀫𑀸 𑀇𑀫𑀺𑀲𑁆𑀲𑀸 𑀢𑀤𑀦𑀼𑀓𑀽𑀮𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥 𑀲𑀸𑀲𑀦𑀢𑁄 𑀧𑀬𑁄𑀕𑁂 𑀤𑀲𑁆𑀲𑁂𑀲𑁆𑀲𑀸𑀫 𑀅𑀢𑀓𑁆𑀓𑀸𑀯𑀘𑀭𑁂 𑀯𑀺𑀘𑀺𑀢𑁆𑀢𑁂 𑀲𑀼𑀕𑀢𑀧𑀸𑀴𑀺𑀦𑀬𑁂 𑀲𑁄𑀢𑀽𑀦𑀁 𑀯𑀺𑀲𑀸𑀭𑀤𑀫𑀢𑀺𑀧𑀝𑀺𑀮𑀸𑀪𑀢𑁆𑀣𑀁. 𑀢𑀁 𑀬𑀣𑀸? 𑀩𑀳𑀼𑀫𑁆𑀧𑁂𑀢𑀁 𑀅𑀲𑀩𑁆𑀪𑀺 𑀚𑀸𑀢𑀯𑁂𑀤, 𑀬𑀁 𑀢𑀁 𑀯𑀸𑀮𑀥𑀺𑀦𑀸’𑀪𑀺𑀧𑀽𑀚𑀬𑀸𑀫. 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁. 𑀬𑀁 𑀲𑀸𑀮𑀯𑀦𑀲𑁆𑀫𑀺𑀁 𑀲𑁂𑀦𑀓𑁄, 𑀧𑀸𑀧𑀓𑀫𑁆𑀫𑀫𑀓𑀭𑀺 𑀅𑀲𑀩𑁆𑀪𑀺𑀭𑀽𑀧𑀁. 𑀆𑀩𑀸𑀥𑁄𑀬𑀁 𑀅𑀲𑀩𑁆𑀪𑀺𑀭𑀽𑀧𑁄. 𑀅𑀲𑀫𑁆𑀫𑁄𑀤𑀓𑁄 𑀣𑀤𑁆𑀥𑁄 𑀅𑀲𑀩𑁆𑀪𑀺𑀭𑀽𑀧𑁄’’𑀢𑀺. 𑀢𑀢𑁆𑀣 𑀆𑀮𑀧𑀦𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀧𑀘𑁆𑀘𑀢𑁆𑀢𑀯𑀘𑀦𑀁 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀅𑀦𑀸𑀕𑀢𑀫𑁆𑀧𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀢𑀣𑀸 𑀓𑀭𑀡𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀦𑀺𑀲𑁆𑀲𑀓𑁆𑀓𑀯𑀘𑀦𑀫𑁆𑀧𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀲𑀫𑀸𑀲𑁂 𑀲𑀤𑁆𑀤𑀭𑀽𑀧𑁂 𑀤𑀺𑀝𑁆𑀞𑁂𑀬𑁂𑀯 𑀩𑁆𑀬𑀸𑀲𑁂 𑀲𑀤𑁆𑀤𑀭𑀽𑀧𑀁 𑀬𑀣𑀸𑀲𑀫𑁆𑀪𑀯𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺 𑀞𑀧𑁂𑀢𑁆𑀯𑀸 ‘‘𑀳𑁂𑀢𑀼𑀲𑀢𑁆𑀣𑀸𑀭𑀤𑀲𑁆𑀲𑀦’’𑀦𑁆𑀢𑀺𑀆𑀤𑀻𑀦𑀺. 𑀢𑀢𑁆𑀣 𑀘 𑀦𑀺𑀩𑁆𑀩𑀸𑀦𑀯𑀸𑀘𑀓𑁄 𑀘𑁂, 𑀲𑀩𑁆𑀪𑀺𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀲𑀦𑁆𑀢𑀺𑀯𑀺𑀲𑀼𑀤𑁆𑀥𑀺 𑀦𑀺𑀩𑁆𑀩𑀼𑀢𑀺𑀲𑀤𑁆𑀤𑀸 𑀯𑀺𑀬, 𑀲𑁄 𑀘 𑀬𑀫𑀓𑀫𑀳𑀸𑀣𑁂𑀭𑀫𑀢𑁂 𑀭𑀢𑁆𑀢𑀺𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀲𑀩𑁆𑀩𑁂𑀲𑀫𑀺𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀲𑀸𑀥𑀸𑀭𑀡𑁄 𑀳𑀺 𑀲𑁄 𑀦𑀬𑁄. 𑀲𑀼𑀦𑁆𑀤𑀭𑀢𑁆𑀣𑀯𑀸𑀘𑀓𑁄 𑀘𑁂, 𑀅𑀕𑁆𑀕𑀺 𑀭𑀢𑁆𑀢𑀺 𑀅𑀝𑁆𑀞𑀺𑀦𑀬𑁂𑀳𑀺 𑀬𑁄𑀚𑁂𑀢𑀩𑁆𑀩𑁄 𑀯𑀸𑀘𑁆𑀘𑀮𑀺𑀗𑁆𑀕𑀢𑁆𑀢𑀸. ‘‘𑀲𑀩𑁆𑀪𑀺𑀥𑀫𑁆𑀫𑀪𑀽𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀏𑀢𑁆𑀣 𑀳𑀺 𑀲𑀼𑀦𑁆𑀤𑀭𑀥𑀫𑁆𑀫𑀪𑀽𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀸𑀴𑀺𑀦𑀬𑀯𑀲𑁂𑀦 𑀆𑀮𑀧𑀦𑀸𑀤𑀻𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀲𑀩𑁆𑀪𑀺𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀧𑀼𑀦 𑀅𑀝𑁆𑀞𑀓𑀣𑀸𑀦𑀬𑀯𑀲𑁂𑀦𑀧𑀺 𑀢𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀬𑀲𑁆𑀫𑀸 𑀲𑀕𑀸𑀣𑀸𑀯𑀕𑁆𑀕𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀦𑁆𑀢𑁄 ‘𑀲𑀩𑁆𑀪𑀻𑀳𑀺 𑀲𑀤𑁆𑀥𑀺𑀁 𑀲𑀢𑀁 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀻’𑀢𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 ‘‘𑀲𑀩𑁆𑀪𑀻𑀳𑀻’’𑀢𑀺 𑀳𑀺𑀯𑀘𑀦𑀯𑀲𑁂𑀦 𑀲𑀤𑁆𑀤𑀭𑀘𑀦𑀸𑀯𑀺𑀲𑁂𑀲𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀲𑀩𑁆𑀪𑀺𑀲𑀤𑁆𑀤𑁄 𑀲𑀩𑁆𑀩𑁂𑀲𑀼𑀧𑀺 𑀯𑀺𑀪𑀢𑁆𑀢𑀺𑀯𑀘𑀦𑁂𑀲𑀼 𑀬𑁄𑀚𑁂𑀢𑀩𑁆𑀩𑁄. 𑀅𑀢𑁆𑀭𑀺𑀤𑀁 𑀯𑀤𑀸𑀫 𑁋

𑀕𑀭𑀽 ‘‘𑀲𑀩𑁆𑀪𑀻𑀳𑀺 𑀲𑀤𑁆𑀥𑀺’’𑀦𑁆𑀢𑀺, 𑀅𑀢𑁆𑀣𑀁 𑀪𑀸𑀲𑀺𑀁𑀲𑀼 𑀧𑀸𑀴𑀺𑀬𑀸;

𑀬𑀢𑁄 𑀢𑀢𑁄 𑀲𑀩𑁆𑀪𑀺𑀲𑀤𑁆𑀤𑀁, 𑀥𑀻𑀭𑁄 𑀲𑀩𑁆𑀩𑀢𑁆𑀣 𑀬𑁄𑀚𑀬𑁂.

‘‘𑀅𑀲𑀩𑁆𑀪𑀺𑀭𑀽𑀧𑁄’’𑀇𑀢𑀺𑀧𑀺, 𑀲𑀫𑀸𑀲𑀯𑀺𑀲𑀬𑁂 𑀲𑀼𑀢𑀁;

𑀬𑀲𑁆𑀫𑀸 𑀢𑀲𑁆𑀫𑀸 𑀲𑀩𑁆𑀪𑀺𑀲𑀤𑁆𑀤𑀁, 𑀯𑀺𑀜𑁆𑀜𑀽 𑀲𑀩𑁆𑀩𑀥𑀺 𑀬𑁄𑀚𑀬𑁂.

‘‘𑀑𑀯𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬, 𑀅𑀲𑀩𑁆𑀪𑀸 𑀘 𑀦𑀺𑀯𑀸𑀭𑀬𑁂’’𑀢𑀺 𑀏𑀢𑁆𑀣 𑀧𑀦 ‘‘𑀅𑀲𑀩𑁆𑀪𑀸’’𑀢𑀺𑀧𑀤𑀁 𑀯𑀺𑀘𑀺𑀢𑁆𑀭𑀯𑀼𑀢𑁆𑀢𑀻𑀲𑀼 𑀢𑀤𑁆𑀥𑀺𑀢𑀧𑀘𑁆𑀘𑀬𑁂𑀲𑀼 𑀡𑁆𑀬𑀧𑀘𑁆𑀘𑀬𑀯𑀲𑁂𑀦 𑀦𑀺𑀧𑁆𑀨𑀢𑁆𑀢𑀺𑀫𑀼𑀧𑀸𑀕𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀬𑁂𑀪𑀼𑀬𑁆𑀬𑁂𑀦 𑀅𑀲𑀩𑁆𑀪𑀻𑀲𑀼 𑀪𑀯𑀁 𑀅𑀲𑀩𑁆𑀪𑀁. 𑀓𑀺𑀁 𑀢𑀁? 𑀅𑀓𑀼𑀲𑀮𑀁, 𑀢𑀢𑁄 𑀅𑀲𑀩𑁆𑀪𑀸 𑀅𑀓𑀼𑀲𑀮𑀥𑀫𑁆𑀫𑀸 𑀦𑀺𑀯𑀸𑀭𑀬𑁂 𑀘, 𑀓𑀼𑀲𑀮𑀥𑀫𑁆𑀫𑁂 𑀧𑀢𑀺𑀝𑁆𑀞𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀅𑀫𑁆𑀳𑁂 𑀅𑀲𑀩𑁆𑀪𑀸𑀳𑀺 𑀯𑀸𑀘𑀸𑀳𑀺 𑀯𑀺𑀓𑁆𑀓𑁄𑀲𑀫𑀸𑀦𑀸 𑀢𑀺𑀩𑁆𑀩𑀸𑀳𑀺 𑀲𑀢𑁆𑀢𑀻𑀳𑀺 𑀳𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑁆𑀣 𑀢𑀼 𑀅𑀲𑀩𑁆𑀪𑀻𑀦𑀁 𑀏𑀢𑀸𑀢𑀺 𑀅𑀲𑀩𑁆𑀪𑀸, 𑀦 𑀯𑀸 𑀲𑀩𑁆𑀪𑀻𑀦𑀁 𑀏𑀢𑀸𑀢𑀺𑀧𑀺 𑀅𑀲𑀩𑁆𑀪𑀸𑀢𑀺 𑀦𑀺𑀩𑁆𑀩𑀘𑀦𑀁, 𑀡𑁆𑀬𑀧𑀘𑁆𑀘𑀬𑀯𑀲𑁂𑀦 𑀘 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀘 𑀧𑀦𑁂𑀢𑁆𑀣 𑀅𑀫𑁆𑀳𑁂𑀳𑀺 𑀲𑀦𑁆𑀢𑀲𑀤𑁆𑀤𑀲𑁆𑀲 ‘‘𑀲𑀁, 𑀲𑀦𑁆𑀢𑁄. 𑀲𑀁, 𑀲𑀦𑁆𑀢𑀁, 𑀲𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀧𑀤𑀫𑀸𑀮𑀸 𑀤𑀲𑁆𑀲𑀺𑀢𑀸, 𑀢𑀢𑁆𑀣 ‘‘𑀲𑀫𑁂𑀢𑀺 𑀅𑀲𑀢𑀸 𑀅𑀲’’𑀦𑁆𑀢𑀺 𑀧𑀸𑀴𑀺𑀬𑀁 ‘‘𑀅𑀲’’𑀦𑁆𑀢𑀺 𑀧𑀤𑁂 𑀤𑀺𑀝𑁆𑀞𑁂𑀬𑁂𑀯 ‘‘𑀲’’𑀦𑁆𑀢𑀺 𑀧𑀤𑀁 𑀧𑀸𑀴𑀺𑀬𑀁 𑀅𑀦𑀸𑀕𑀢𑀫𑁆𑀧𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺 𑀬𑀼𑀕𑀴𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑀸𑀭𑀳𑀢𑁆𑀢𑀸. 𑀏𑀯𑀁 𑀤𑀺𑀝𑁆𑀞𑁂𑀦 𑀅𑀤𑀺𑀝𑁆𑀞𑀲𑁆𑀲 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 ‘‘𑀅𑀲’’𑀦𑁆𑀢𑀺 𑀏𑀢𑁆𑀣 𑀦 𑀲𑀁 𑀅𑀲𑀦𑁆𑀢𑀺 𑀲𑀫𑀸𑀲𑀯𑀺𑀕𑁆𑀕𑀳𑀯𑀲𑁂𑀦𑀸𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸 ‘‘𑀲’’𑀫𑀺𑀢𑀺 𑀧𑀤𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀏𑀯𑀫𑀜𑁆𑀜𑀢𑁆𑀭𑀸𑀧𑀺 𑀦𑀬𑁄. 𑀢𑀢𑁆𑀭 𑀲𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑁄. 𑀅𑀲𑀦𑁆𑀢𑀺 𑀅𑀲𑀧𑁆𑀧𑀼𑀭𑀺𑀲𑁄. 𑀇𑀢𑁆𑀣𑀺𑀮𑀺𑀗𑁆𑀕𑁂𑀯𑀢𑁆𑀢𑀩𑁆𑀩𑁂 ‘‘𑀅𑀲𑀢𑀻, 𑀅𑀲𑀸’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. ‘‘𑀅𑀲𑀢𑀻, 𑀅𑀲𑀢𑀻, 𑀅𑀲𑀢𑀺𑀬𑁄, 𑀅𑀲𑀸. 𑀅𑀲𑀢𑀺𑀁, 𑀅𑀲𑀢𑀻, 𑀅𑀲𑀢𑀺𑀬𑁄. 𑀅𑀲𑀸𑀬, 𑀅𑀲𑀢𑀺𑀬𑀸, 𑀅𑀲𑀢𑀻𑀳𑀺, 𑀅𑀲𑀢𑀻𑀪𑀺. 𑀅𑀲𑀢𑀺𑀬𑀸, 𑀅𑀲𑀢𑀻𑀦’’𑀦𑁆𑀢𑀺 𑀯𑀓𑁆𑀔𑀫𑀸𑀦 𑀇𑀢𑁆𑀣𑀺𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀏𑀢𑁆𑀣 𑀧𑀦 ‘‘𑀅𑀲𑀸 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺. 𑀫𑀸 𑀘 𑀯𑀲𑀁 𑀅𑀲𑀢𑀻𑀦𑀁 𑀦𑀺𑀕𑀘𑁆𑀙𑁂’’𑀢𑀺𑀆𑀤𑀻𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀅𑀲𑀸𑀢𑀺 𑀘𑁂𑀢𑁆𑀣 𑀅𑀲𑀢𑀻𑀢𑀺 𑀘 𑀲𑀫𑀸𑀦𑀢𑁆𑀣𑀸, 𑀅𑀲𑀦𑁆𑀢𑀚𑀸𑀢𑀺𑀓𑀸𑀢𑀺 𑀳𑀺 𑀢𑁂𑀲𑀁 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 ‘‘𑀅𑀲𑀸𑀢𑀺 𑀅𑀲𑀢𑀺𑀬𑁄 𑀮𑀸𑀫𑀺𑀓𑀸, 𑀅𑀣 𑀯𑀸 𑀲𑀸𑀢𑀁 𑀯𑀼𑀘𑁆𑀘𑀢𑀺 𑀲𑀼𑀔𑀁, 𑀢𑀁 𑀢𑀸𑀲𑀼 𑀦𑀢𑁆𑀣𑀺, 𑀅𑀢𑁆𑀢𑀦𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸𑀦𑀁 𑀅𑀲𑀸𑀢𑀫𑁂𑀯 𑀤𑁂𑀦𑁆𑀢𑀻𑀢𑀺𑀧𑀺 𑀅𑀲𑀸, 𑀤𑀼𑀓𑁆𑀔𑀸, 𑀤𑀼𑀓𑁆𑀔𑀯𑀢𑁆𑀣𑀼𑀪𑀽𑀢𑀸𑀢𑀺 𑀅𑀢𑁆𑀣𑁄’’𑀢𑀺 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀲𑀼𑀁, 𑀢𑀲𑁆𑀫𑀸 𑀲𑀸𑀢𑀁 𑀦𑀢𑁆𑀣𑀺 𑀏𑀢𑀺𑀲𑁆𑀲𑀦𑁆𑀢𑀺 𑀅𑀲𑀸𑀢𑀺 𑀅𑀢𑁆𑀣𑁂 ‘‘𑀅𑀲𑀸’’𑀢𑀺 𑀧𑀤𑀲𑁆𑀲 𑀬𑀣𑀸 𑀭𑀺𑀢𑁆𑀢𑁄 𑀅𑀲𑁆𑀲𑀸𑀤𑁄 𑀏𑀢𑁆𑀣𑀸𑀢𑀺 𑀭𑀺𑀢𑁆𑀢𑀲𑁆𑀲𑀦𑁆𑀢𑀺𑀧𑀤𑀲𑁆𑀲 𑀮𑀼𑀢𑁆𑀢𑀼𑀢𑁆𑀢𑀭𑀓𑁆𑀔𑀭𑀲𑁆𑀲 ‘‘𑀭𑀺𑀢𑁆𑀢𑀲𑁆𑀲𑀁, 𑀭𑀺𑀢𑁆𑀢𑀲𑁆𑀲𑀸𑀦𑀺. 𑀭𑀺𑀢𑁆𑀢𑀲𑁆𑀲’’𑀦𑁆𑀢𑀺 𑀘𑀺𑀢𑁆𑀢𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸, 𑀢𑀣𑀸 ‘‘𑀅𑀲𑀸, 𑀅𑀲𑀸, 𑀅𑀲𑀸𑀬𑁄. 𑀅𑀲𑀁, 𑀅𑀲𑀸, 𑀅𑀲𑀸𑀬𑁄. 𑀅𑀲𑀸𑀬𑀸’’𑀢𑀺 𑀓𑀜𑁆𑀜𑀸𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸.

𑀏𑀢𑁆𑀣 𑀘 𑀬𑁄 𑀅𑀫𑁆𑀳𑁂𑀳𑀺 ‘‘𑀲𑀦𑁆𑀢𑁄’’𑀇𑀢𑀺 𑀲𑀤𑁆𑀤𑁄 𑀤𑀲𑁆𑀲𑀺𑀢𑁄. 𑀲𑁄 𑀓𑀢𑁆𑀣𑀘𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀪𑀸𑀯𑁂𑀦 𑀲𑀁𑀯𑀺𑀚𑁆𑀚𑀫𑀸𑀦𑀲𑀤𑁆𑀤𑀲𑁆𑀲𑀢𑁆𑀣𑀫𑁆𑀧𑀺 𑀯𑀤𑀢𑀺, 𑀢𑀲𑁆𑀲 𑀯𑀲𑁂𑀦 𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀲𑀦𑁆𑀢𑁄, 𑀲𑀦𑁆𑀢𑁄, 𑀲𑀦𑁆𑀢𑀸. 𑀲𑀦𑁆𑀢𑀁, 𑀲𑀦𑁆𑀢𑁂. 𑀲𑀢𑀸, 𑀲𑀦𑁆𑀢𑁂𑀦, 𑀲𑀦𑁆𑀢𑁂𑀳𑀺, 𑀲𑀦𑁆𑀢𑁂𑀪𑀺. 𑀲𑀢𑁄, 𑀲𑀦𑁆𑀢𑀲𑁆𑀲, 𑀲𑀢𑀁, 𑀲𑀦𑁆𑀢𑀸𑀦𑀁. 𑀲𑀢𑀸, 𑀲𑀦𑁆𑀢𑀸, 𑀲𑀦𑁆𑀢𑀲𑁆𑀫𑀸, 𑀲𑀦𑁆𑀢𑀫𑁆𑀳𑀸, 𑀲𑀦𑁆𑀢𑁂𑀳𑀺, 𑀲𑀦𑁆𑀢𑁂𑀪𑀺. 𑀲𑀢𑁄, 𑀲𑀦𑁆𑀢𑀲𑁆𑀲, 𑀲𑀢𑀁, 𑀲𑀦𑁆𑀢𑀸𑀦𑀁. 𑀲𑀢𑀺, 𑀲𑀦𑁆𑀢𑁂, 𑀲𑀦𑁆𑀢𑀲𑁆𑀫𑀺𑀁, 𑀲𑀦𑁆𑀢𑀫𑁆𑀳𑀺, 𑀲𑀦𑁆𑀢𑁂𑀲𑀼. 𑀪𑁄 𑀲𑀦𑁆𑀢, 𑀪𑀯𑀦𑁆𑀢𑁄 𑀲𑀦𑁆𑀢𑁄, 𑀪𑀯𑀦𑁆𑀢𑁄 𑀲𑀦𑁆𑀢𑀸.

𑀏𑀢𑁆𑀣 𑀧𑀦 ‘‘𑀅𑀬𑀁 𑀔𑁄 𑀪𑀺𑀓𑁆𑀔𑀯𑁂 𑀅𑀝𑁆𑀞𑀫𑁄 𑀪𑀤𑁆𑀤𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁. 𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺. 𑀪𑀯𑁂 𑀔𑁄 𑀲𑀢𑀺 𑀚𑀸𑀢𑀺 𑀳𑁄𑀢𑀺’’𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀧𑀬𑁄𑀕𑀸𑀦𑀺 𑀪𑀯𑀦𑁆𑀢𑀺. ‘‘𑀲𑀗𑁆𑀔𑀸𑀭𑁂𑀲𑀼 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀧𑀦 𑀲𑀢𑀺𑀲𑀤𑁆𑀤𑁄 𑀯𑀘𑀦𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀞𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑁄.

𑀢𑀢𑁆𑀭 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀤𑁆𑀯𑀺𑀥𑀸 𑀞𑀺𑀢𑁂𑀲𑀼 𑀲𑀦𑁆𑀢𑁄𑀲𑀤𑁆𑀤𑁂𑀲𑀼 𑀩𑀳𑀼𑀯𑀘𑀦𑀲𑀦𑁆𑀢𑁄𑀲𑀤𑁆𑀤𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀲𑀫𑀸𑀦𑀲𑀤𑁆𑀤𑀲𑁆𑀲𑀢𑁆𑀣𑀫𑁆𑀧𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀦𑁆𑀢𑁄𑀢𑀺 𑀲𑀫𑀸𑀦𑁄, 𑀲𑀦𑁆𑀢𑀸𑀢𑀺 𑀲𑀫𑀸𑀦𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀓𑀣𑁂𑀢𑀩𑁆𑀩𑁄. 𑀲𑀫𑀸𑀦𑁄𑀢𑀺 𑀇𑀫𑀲𑁆𑀲 𑀘 ‘‘𑀳𑁄𑀦𑁆𑀢𑁄’’𑀢𑀺 𑀅𑀢𑁆𑀣𑁄 ‘‘𑀧𑀳𑀼 𑀲𑀫𑀸𑀦𑁄 𑀯𑀺𑀧𑀼𑀮𑀢𑁆𑀣𑀘𑀺𑀦𑁆𑀢𑀻, 𑀓𑀺𑀁 𑀓𑀸𑀭𑀡𑀸 𑀫𑁂 𑀦 𑀓𑀭𑁄𑀲𑀺 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀬𑁄𑀕𑀸𑀦𑀺 𑀧𑀦 𑁋

‘‘𑀬𑁄 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁;

𑀧𑀳𑀼 𑀲𑀦𑁆𑀢𑁄 𑀦 𑀪𑀭𑀢𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁.

𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲𑀸’’𑀢𑀺

𑀏𑀯𑀫𑀸𑀤𑀻𑀦𑀺 𑀪𑀯𑀦𑁆𑀢𑀺.

𑀅𑀧𑀺𑀘 𑀲𑀦𑁆𑀢𑁄𑀲𑀤𑁆𑀤𑁄 𑀬𑀲𑁆𑀫𑀸 ‘‘𑀓𑀺𑀮𑀦𑁆𑀢𑁄’’𑀢𑀺 𑀘 ‘‘𑀉𑀧𑀲𑀦𑁆𑀢𑁄’’𑀢𑀺 𑀘 ‘‘𑀦𑀺𑀭𑀼𑀤𑁆𑀥𑁄’’𑀢𑀺 𑀘 𑀅𑀢𑁆𑀣𑀁 𑀯𑀤𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀲𑀦𑁆𑀢𑀲𑀤𑁆𑀤𑀲𑁆𑀲 ‘‘𑀲𑀦𑁆𑀢𑁄, 𑀲𑀦𑁆𑀢𑀸. 𑀲𑀦𑁆𑀢𑀁, 𑀲𑀦𑁆𑀢𑁂. 𑀲𑀦𑁆𑀢𑁂𑀦𑀸’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀘 ‘‘𑀲𑀦𑁆𑀢𑁄 𑀢𑀲𑀺𑀢𑁄. 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁. 𑀲𑀦𑁆𑀢𑁄 𑀤𑀦𑁆𑀢𑁄 𑀦𑀺𑀬𑀢𑁄 𑀩𑁆𑀭𑀳𑁆𑀫𑀘𑀸𑀭𑀻. 𑀲𑀦𑁆𑀢𑁄 𑀦𑀺𑀭𑀼𑀤𑁆𑀥𑁄 𑀅𑀢𑁆𑀣𑀗𑁆𑀕𑀢𑁄 𑀅𑀩𑁆𑀪𑀢𑁆𑀣𑀗𑁆𑀕𑀢𑁄’’𑀢𑀺𑀆𑀤𑀻𑀦𑀺 𑀧𑀬𑁄𑀕𑀸𑀦𑀺. 𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀦𑁆𑀢𑀁, 𑀲𑀦𑁆𑀢𑀸𑀦𑀻’’𑀢𑀺 𑀘𑀺𑀢𑁆𑀢𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸. 𑀲𑀸 𑀘 ‘‘𑀲𑀁𑀯𑀺𑀚𑁆𑀚𑀫𑀸𑀦𑀁 𑀲𑀫𑀸𑀦𑀁 𑀓𑀺𑀮𑀦𑁆𑀢𑀁 𑀉𑀧𑀲𑀦𑁆𑀢𑀁 𑀦𑀺𑀭𑀼𑀤𑁆𑀥’’𑀫𑀺𑀢𑀺 𑀅𑀢𑁆𑀣𑀤𑀻𑀧𑀓𑀸𑀧𑀤𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 ‘‘𑀉𑀧𑀸𑀤𑀸𑀦𑁂 𑀔𑁄 𑀲𑀢𑀺 𑀪𑀯𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀦𑀧𑀼𑀁𑀲𑀓𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑀁𑀯𑀺𑀚𑁆𑀚𑀫𑀸𑀦𑀲𑀤𑁆𑀤𑀢𑁆𑀣𑀯𑀸𑀘𑀓𑀢𑁆𑀢𑁂 𑀢𑀢𑀺𑀬𑀸𑀧𑀜𑁆𑀘𑀫𑀻𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀲𑀢𑁆𑀢𑀫𑀻𑀞𑀸𑀦𑁂 ‘‘𑀲𑀢𑀸, 𑀲𑀢𑁄, 𑀲𑀢𑀁, 𑀲𑀢𑀻’’𑀢𑀺 𑀧𑀤𑀸𑀦𑀺 𑀅𑀥𑀺𑀓𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺, 𑀲𑁂𑀲𑀸𑀦𑀺 𑀘𑀺𑀢𑁆𑀢𑀦𑀬𑁂𑀦 𑀜𑁂𑀬𑁆𑀬𑀸𑀦𑀺. 𑀇𑀢𑁆𑀣𑀺𑀮𑀺𑀗𑁆𑀕𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀲𑀦𑁆𑀢𑀸, 𑀲𑀦𑁆𑀢𑀸, 𑀲𑀦𑁆𑀢𑀸𑀬𑁄. 𑀲𑀦𑁆𑀢𑀁, 𑀲𑀦𑁆𑀢𑀸, 𑀲𑀦𑁆𑀢𑀸𑀬𑁄. 𑀲𑀦𑁆𑀢𑀸𑀬𑀸’’𑀢𑀺 𑀓𑀜𑁆𑀜𑀸𑀦𑀬𑁂𑀦 𑀘, 𑀲𑀦𑁆𑀢𑀻, 𑀲𑀦𑁆𑀢𑀻, 𑀲𑀦𑁆𑀢𑀺𑀬𑁄. 𑀲𑀦𑁆𑀢𑀺𑀁, 𑀲𑀦𑁆𑀢𑀻, 𑀲𑀦𑁆𑀢𑀺𑀬𑁄. 𑀲𑀦𑁆𑀢𑀺𑀬𑀸’’𑀢𑀺 𑀇𑀢𑁆𑀣𑀺𑀦𑀬𑁂𑀦 𑀘 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀏𑀢𑀸𑀲𑀼 𑀧𑀞𑀫𑀸 ‘‘𑀲𑀁𑀯𑀺𑀚𑁆𑀚𑀫𑀸𑀦𑀸 𑀓𑀺𑀮𑀦𑁆𑀢𑀸 𑀉𑀧𑀲𑀦𑁆𑀢𑀸 𑀦𑀺𑀭𑀼𑀤𑁆𑀥𑀸’’𑀢𑀺 𑀅𑀢𑁆𑀣𑀤𑀻𑀧𑀓𑀸𑀧𑀤𑀯𑀢𑀻, 𑀏𑀢𑁆𑀣 𑀧𑀬𑁄𑀕𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯. 𑀤𑀼𑀢𑀺𑀬𑀸 𑀧𑀦 ‘‘𑀲𑀁𑀯𑀺𑀚𑁆𑀚𑀫𑀸𑀦𑀸 𑀲𑀫𑀸𑀦𑀸’’𑀢𑀺 𑀅𑀢𑁆𑀣𑀤𑀻𑀧𑀓𑀸𑀧𑀤𑀯𑀢𑀻. 𑀢𑀣𑀸 𑀳𑀺 ‘‘𑀲𑀦𑁆𑀢𑀻 𑀆𑀧𑀢𑁆𑀢𑀺 𑀆𑀯𑀺𑀓𑀸𑀢𑀩𑁆𑀩𑀸’’𑀢𑀺 𑀏𑀢𑁆𑀣 𑀲𑀁𑀯𑀺𑀚𑁆𑀚𑀫𑀸𑀦𑀸 ‘‘𑀲𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺.

‘‘𑀬𑀸𑀬 𑀫𑀸𑀢𑀼 𑀪𑀢𑁄 𑀧𑁄𑀲𑁄,

𑀇𑀫𑀁 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺;

𑀢𑀫𑁆𑀧𑀺 𑀧𑀸𑀡𑀤𑀤𑀺𑀁 𑀲𑀦𑁆𑀢𑀺𑀁,

𑀳𑀦𑁆𑀢𑀺 𑀓𑀼𑀤𑁆𑀥𑁄 𑀧𑀼𑀣𑀼𑀚𑁆𑀚𑀦𑁄’’𑀢𑀺

𑀏𑀢𑁆𑀣 𑀧𑀦 𑀲𑀫𑀸𑀦𑀸 ‘‘𑀲𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀭𑀸𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀦𑁆𑀢𑀻𑀲𑀤𑁆𑀤𑀲𑁆𑀲 𑀳𑀺 𑀲𑀁𑀯𑀺𑀚𑁆𑀚𑀫𑀸𑀦𑀲𑀤𑁆𑀤𑀢𑁆𑀣𑀯𑀸𑀘𑀓𑀢𑁆𑀢𑁂 ‘‘𑀚𑀸𑀢𑀺𑀬𑀸 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀇𑀢𑁆𑀣𑀺𑀮𑀺𑀗𑁆𑀕𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀲𑀢𑁆𑀢𑀫𑀻𑀞𑀸𑀦𑁂 ‘‘𑀲𑀢𑀺, 𑀲𑀢𑀺𑀬𑀸, 𑀲𑀢𑀺𑀬𑀁, 𑀲𑀦𑁆𑀢𑀺𑀬𑀸, 𑀲𑀦𑁆𑀢𑀺𑀬𑀁, 𑀲𑀦𑁆𑀢𑀻𑀲𑀽’’𑀢𑀺 𑀭𑀽𑀧𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺. 𑀲𑁂𑀲𑀸𑀦𑀺 𑀇𑀢𑁆𑀣𑀺𑀦𑀬𑁂𑀦 𑀜𑁂𑀬𑁆𑀬𑀸𑀦𑀺. 𑀅𑀬𑀁 𑀢𑀢𑀺𑀬𑀸, 𑀏𑀢𑁆𑀣 𑀘 ‘‘𑀅𑀲𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑀸 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀸𑀴𑀺 ‘‘𑀲𑀦𑁆𑀢𑀺𑀬𑀸’’𑀇𑀘𑁆𑀘𑀸𑀤𑀻𑀦𑀁 𑀅𑀢𑁆𑀣𑀺𑀪𑀸𑀯𑁂 𑀦𑀺𑀤𑀲𑁆𑀲𑀦𑀁. 𑀅𑀧𑀭𑁄 𑀦𑀬𑁄 𑁋 𑀲𑀢𑀻𑀲𑀤𑁆𑀤𑀲𑁆𑀲 ‘‘𑀲𑀫𑀸𑀦𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀬𑀸 𑀢𑁆𑀯𑀁 𑀯𑀲𑀲𑀺 𑀚𑀺𑀡𑁆𑀡𑀲𑁆𑀲, 𑀏𑀯𑀁 𑀤𑀳𑀭𑀺𑀬𑀸 𑀲𑀢𑀻’’𑀢𑀺 𑀘 ‘‘𑀬𑁂 𑀢𑀁 𑀚𑀺𑀡𑁆𑀡𑀲𑁆𑀲 𑀧𑀸𑀤𑀁𑀲𑀼, 𑀏𑀯𑀁 𑀤𑀳𑀭𑀺𑀬𑀁 𑀲𑀢𑀺’’𑀦𑁆𑀢𑀺 𑀘 𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀲𑀢𑀻, 𑀲𑀢𑀻, 𑀲𑀢𑀺𑀬𑁄. 𑀲𑀢𑀺𑀁, 𑀲𑀢𑀻, 𑀲𑀢𑀺𑀬𑁄. 𑀲𑀢𑀺𑀬𑀸’’𑀢𑀺𑀆𑀤𑀻𑀦𑀺𑀧𑀺 𑀭𑀽𑀧𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺, 𑀲𑀁𑀬𑁄𑀕𑁂 𑀦𑀓𑀸𑀭𑀮𑁄𑀧𑀯𑀲𑁂𑀦 𑀯𑀸.

𑀇𑀤𑀸𑀦𑀺 ‘‘𑀲𑀦𑁆𑀢𑁄, 𑀲𑀦𑁆𑀢𑀸’’𑀢𑀺 𑀧𑀤𑀤𑁆𑀯𑀬𑀲𑁆𑀲 𑀧𑀬𑁄𑀕𑀦𑀺𑀘𑁆𑀙𑀬𑀁 𑀓𑀣𑀬𑀸𑀫 𑀧𑀬𑁄𑀕𑁂𑀲𑀼 𑀲𑁄𑀢𑀽𑀦𑀁 𑀅𑀲𑀫𑁆𑀫𑀽𑀴𑁆𑀳𑀪𑀸𑀯𑀸𑀬. 𑀢𑀣𑀸 𑀳𑀺 ‘‘𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀯𑀸 ‘‘𑀧𑀡𑁆𑀟𑀺𑀢𑀸’’𑀢𑀺 𑀯𑀸 𑀩𑀳𑀼𑀯𑀘𑀦𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀢𑀼𑀓𑀸𑀫𑁂𑀦 ‘‘𑀲𑀦𑁆𑀢𑁄 𑀤𑀦𑁆𑀢𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀏𑀓𑀯𑀘𑀦𑀲𑀤𑀺𑀲𑀁 ‘‘𑀲𑀦𑁆𑀢𑁄’’𑀢𑀺 𑀩𑀳𑀼𑀯𑀘𑀦𑀁 𑀯𑀢𑁆𑀢𑀩𑁆𑀩𑀁. ‘‘𑀲𑀁𑀯𑀺𑀚𑁆𑀚𑀫𑀸𑀦𑁄’’𑀢𑀺 𑀏𑀓𑀯𑀘𑀦𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀢𑀼𑀓𑀸𑀫𑁂𑀦 ‘‘𑀲𑀦𑁆𑀢𑁄’’𑀢𑀺 𑀏𑀓𑀯𑀘𑀦𑀁 𑀯𑀢𑁆𑀢𑀩𑁆𑀩𑀁. ‘‘𑀲𑀁𑀯𑀺𑀚𑁆𑀚𑀫𑀸𑀦𑀸’’𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀢𑀼𑀓𑀸𑀫𑁂𑀦 ‘‘𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸’’𑀢𑀺, ‘‘𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸’’𑀢𑀺 𑀘 𑀏𑀯𑀁 𑀯𑀼𑀢𑁆𑀢𑀩𑀳𑀼𑀯𑀘𑀦𑀲𑀤𑀺𑀲𑀁 ‘‘𑀲𑀦𑁆𑀢𑁄’’𑀢𑀺 𑀯𑀸 ‘‘𑀲𑀦𑁆𑀢𑀸’’𑀢𑀺 𑀯𑀸 𑀩𑀳𑀼𑀯𑀘𑀦𑀁 𑀯𑀢𑁆𑀢𑀩𑁆𑀩𑀁, ‘‘𑀓𑀺𑀮𑀦𑁆𑀢𑁄’’𑀢𑀺 𑀯𑀸 ‘‘𑀲𑀫𑀸𑀦𑁄’’𑀢𑀺 𑀯𑀸 ‘‘𑀉𑀧𑀲𑀦𑁆𑀢𑁄’’𑀢𑀺 𑀯𑀸 ‘‘𑀦𑀺𑀭𑀼𑀤𑁆𑀥𑁄’’𑀢𑀺 𑀯𑀸 𑀏𑀓𑀯𑀘𑀦𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀢𑀼𑀓𑀸𑀫𑁂𑀦 ‘‘𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀩𑀳𑀼𑀯𑀘𑀦𑀲𑀤𑀺𑀲𑀁 ‘‘𑀲𑀦𑁆𑀢𑁄’’𑀢𑀺 𑀏𑀓𑀯𑀘𑀦𑀁 𑀯𑀢𑁆𑀢𑀩𑁆𑀩𑀁. 𑀢𑁂𑀬𑁂𑀯𑀢𑁆𑀣𑁂 𑀩𑀳𑀼𑀯𑀘𑀦𑀯𑀲𑁂𑀦 𑀯𑀢𑁆𑀢𑀼𑀓𑀸𑀫𑁂𑀦 𑀧𑀦 ‘‘𑀲𑀦𑁆𑀢𑀸 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺, 𑀓𑁄 𑀦𑁂 𑀳𑀢𑁆𑀣𑁂 𑀕𑀳𑁂𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀯𑀺𑀬 ‘‘𑀲𑀦𑁆𑀢𑀸’’𑀢𑀺 𑀩𑀳𑀼𑀯𑀘𑀦𑀁 𑀯𑀢𑁆𑀢𑀩𑁆𑀩𑀁. 𑀅𑀬𑀁 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸. 𑀇𑀤𑀜𑁆𑀳𑀺 𑀫𑀦𑁆𑀤𑀩𑀼𑀤𑁆𑀥𑀻𑀦𑀁 𑀲𑀫𑁆𑀫𑁄𑀳𑀝𑁆𑀞𑀸𑀦𑀁. 𑀅𑀬𑀫𑁆𑀧𑀺 𑀧𑀦𑁂𑀢𑁆𑀣 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄 𑁋

‘‘𑀢𑀺𑀮𑀺𑀗𑁆𑀕𑀢𑁆𑀣𑁂 𑀘 𑀏𑀓𑀢𑁆𑀣𑁂, 𑀩𑀯𑁆𑀳𑀢𑁆𑀣𑁂𑀧𑀺 𑀘 𑀤𑀺𑀲𑁆𑀲𑀢𑀺;

𑀲𑀢𑁆𑀢𑀫𑁆𑀬𑀦𑁆𑀢𑁄 𑀲𑀢𑀺𑀲𑀤𑁆𑀤𑁄, 𑀯𑀺𑀧𑀮𑁆𑀮𑀸𑀲𑁂 𑀩𑀳𑀼𑀫𑁆𑀳𑀺 𑀲𑁄’’𑀢𑀺.

𑀇𑀤𑀸𑀦𑀺 𑀫𑀳𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀫𑀳𑀁, 𑀫𑀳𑀸, 𑀫𑀳𑀦𑁆𑀢𑁄, 𑀫𑀳𑀦𑁆𑀢𑀸. 𑀫𑀳𑀦𑁆𑀢𑀁, 𑀫𑀳𑀦𑁆𑀢𑁂. 𑀫𑀳𑀢𑀸, 𑀫𑀳𑀦𑁆𑀢𑁂𑀦, 𑀫𑀳𑀦𑁆𑀢𑁂𑀳𑀺, 𑀫𑀳𑀦𑁆𑀢𑁂𑀪𑀺. 𑀫𑀳𑀢𑁄, 𑀫𑀳𑀦𑁆𑀢𑀲𑁆𑀲, 𑀫𑀳𑀦𑁆𑀢𑀸𑀦𑀁, 𑀫𑀳𑀢𑀁. 𑀫𑀳𑀢𑀸, 𑀫𑀳𑀦𑁆𑀢𑀸, 𑀫𑀳𑀦𑁆𑀢𑀲𑁆𑀫𑀸, 𑀫𑀳𑀦𑁆𑀢𑀫𑁆𑀳𑀸, 𑀫𑀳𑀦𑁆𑀢𑁂𑀳𑀺, 𑀫𑀳𑀦𑁆𑀢𑁂𑀪𑀺. 𑀫𑀳𑀢𑁄, 𑀫𑀳𑀦𑁆𑀢𑀲𑁆𑀲, 𑀫𑀳𑀦𑁆𑀢𑀸𑀦𑀁, 𑀫𑀳𑀢𑀁. 𑀫𑀳𑀢𑀺, 𑀫𑀳𑀦𑁆𑀢𑁂, 𑀫𑀳𑀦𑁆𑀢𑀲𑁆𑀫𑀺𑀁, 𑀫𑀳𑀦𑁆𑀢𑀫𑁆𑀳𑀺, 𑀫𑀳𑀦𑁆𑀢𑁂𑀲𑀼. 𑀪𑁄 𑀫𑀳, 𑀪𑁄 𑀫𑀳𑀸, 𑀪𑀯𑀦𑁆𑀢𑁄 𑀫𑀳𑀦𑁆𑀢𑁄𑀢𑀺 𑀅𑀬𑀫𑀫𑁆𑀳𑀸𑀓𑀁 𑀭𑀼𑀘𑀺.

𑀏𑀢𑁆𑀣 ‘‘𑀫𑀳𑀦𑁆𑀢𑁄, 𑀫𑀳𑀦𑁆𑀢𑀸. 𑀫𑀳𑀦𑁆𑀢𑀁, 𑀫𑀳𑀦𑁆𑀢𑁂. 𑀫𑀳𑀦𑁆𑀢𑁂𑀦𑀸’’𑀢𑀺 𑀧𑀼𑀭𑀺𑀲𑀦𑀬𑁄𑀧𑀺 𑀮𑀩𑁆𑀪𑀢𑀺, 𑀢𑀲𑁆𑀫𑀸 ‘‘𑀪𑁄 𑀫𑀳𑀦𑁆𑀢, 𑀪𑀯𑀦𑁆𑀢𑁄 𑀫𑀳𑀦𑁆𑀢𑀸’’𑀢𑀺 𑀆𑀮𑀧𑀦𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀫𑀳𑀦𑁆𑀢𑀁, 𑀫𑀳𑀦𑁆𑀢𑀸𑀦𑀻’’𑀢𑀺 𑀘𑀺𑀢𑁆𑀢𑀦𑀬𑁄𑀧𑀺 𑀮𑀩𑁆𑀪𑀢𑀺. 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀫𑀳𑀢𑀻, 𑀫𑀳𑀢𑀻, 𑀫𑀳𑀢𑀺𑀬𑁄. 𑀫𑀳𑀢𑀺𑀁, 𑀫𑀳𑀢𑀻, 𑀫𑀳𑀢𑀺𑀬𑁄. 𑀫𑀳𑀢𑀺𑀬𑀸, 𑀫𑀳𑀢𑀻𑀳𑀺 𑀫𑀳𑀢𑀻𑀪𑀻’’𑀢𑀺 𑀇𑀢𑁆𑀣𑀺𑀦𑀬𑁄𑀧𑀺 𑀮𑀩𑁆𑀪𑀢𑀺. ‘‘𑀫𑀳𑀢𑀺𑀬𑀸 𑀘 𑀬𑀓𑁆𑀔𑀲𑁂𑀦𑀸𑀬𑀸’’𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀅𑀧𑀭𑁄𑀧𑀺 ‘‘𑀫𑀳𑀦𑁆𑀢𑀸, 𑀫𑀳𑀦𑁆𑀢𑀸, 𑀫𑀳𑀦𑁆𑀢𑀸𑀬𑁄. 𑀫𑀳𑀦𑁆𑀢’’𑀦𑁆𑀢𑀺 𑀓𑀜𑁆𑀜𑀸𑀦𑀬𑁄𑀧𑀺 𑀮𑀩𑁆𑀪𑀢𑀺, ‘‘𑀫𑀳𑀦𑁆𑀢𑀸 𑀦𑀺𑀥𑀺𑀓𑀼𑀫𑁆𑀪𑀺𑀬𑁄’’𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀓𑀘𑁆𑀘𑀸𑀬𑀦𑁂 𑀧𑀦 ‘‘𑀫𑀳𑀦𑁆𑀢𑀻’’𑀇𑀢𑀺 𑀧𑀤𑀁 𑀤𑀺𑀝𑁆𑀞𑀁. 𑀢𑀁 ‘‘𑀕𑀼𑀡𑀯𑀦𑁆𑀢𑀻, 𑀓𑀼𑀮𑀯𑀦𑁆𑀢𑀻’’𑀇𑀘𑁆𑀘𑀸𑀤𑀻𑀦𑀺 𑀯𑀺𑀬 𑀧𑀸𑀴𑀺𑀬𑀁 𑀅𑀧𑁆𑀧𑀲𑀺𑀤𑁆𑀥𑀢𑁆𑀢𑀸 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀦𑀦𑀼 𑀪𑁄 𑀬𑀲𑁆𑀫𑀸 𑀲𑀸𑀲𑀦𑁂𑀧𑀺 ‘‘𑀕𑀘𑁆𑀙𑀦𑁆𑀢𑀻, 𑀘𑀭𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀘 ‘‘𑀇𑀤𑁆𑀥𑀺𑀫𑀦𑁆𑀢𑀻’’𑀢𑀺 𑀘 𑀧𑀤𑀁 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀫𑀳𑀦𑁆𑀢𑀻, 𑀕𑀼𑀡𑀯𑀦𑁆𑀢𑀻’’𑀢𑀺𑀆𑀤𑀻𑀦𑀺𑀧𑀺 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦 𑀪𑀯𑀺𑀢𑀩𑁆𑀩𑀁 𑀢𑀣𑀸𑀭𑀽𑀧𑀲𑁆𑀲 𑀦𑀬𑀲𑁆𑀲 𑀯𑀲𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑀢𑁆𑀢𑀸, ‘‘𑀫𑀳𑀢𑀻, 𑀕𑀼𑀡𑀯𑀢𑀻’’𑀇𑀘𑁆𑀘𑀸𑀤𑀺𑀦𑀬𑀲𑁆𑀲𑁂𑀯 𑀤𑀲𑁆𑀲𑀦𑀢𑁄 𑀘. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀲𑀼 𑀘 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀢𑀻 𑀦𑀗𑁆𑀕𑀮𑀲𑀻𑀲𑀸, 𑀇𑀢𑁆𑀣𑀻 𑀲𑀺𑀬𑀸 𑀭𑀽𑀧𑀯𑀢𑀻, 𑀲𑀸 𑀘 𑀲𑀻𑀮𑀯𑀢𑀻 𑀲𑀺𑀬𑀸. 𑀲𑀢𑀺𑀫𑀢𑀻 𑀘𑀓𑁆𑀔𑀼𑀫𑀢𑀻. 𑀇𑀤𑁆𑀥𑀺𑀫𑀢𑀻 𑀧𑀢𑁆𑀢𑀺𑀫𑀢𑀻’’𑀢𑀺 𑀘 ‘‘𑀫𑀳𑀢𑀺𑀁 𑀲𑁂𑀦𑀁 𑀤𑀺𑀲𑁆𑀯𑀸 𑀫𑀳𑁄𑀲𑀥𑀲𑁂𑀦𑀸 𑀫𑀦𑁆𑀤𑀸, 𑀅𑀬𑀁 𑀅𑀢𑀺𑀯𑀺𑀬 𑀫𑀳𑀢𑀻 𑀲𑁂𑀦𑀸 𑀤𑀺𑀲𑁆𑀲𑀢𑀻’’𑀢𑀺 𑀘 𑀆𑀤𑀻𑀦𑀺 𑀧𑀬𑁄𑀕𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀦 ‘‘𑀫𑀳𑀦𑁆𑀢𑀻, 𑀭𑀽𑀧𑀯𑀦𑁆𑀢𑀻’’𑀇𑀘𑁆𑀘𑀸𑀤𑀻𑀦𑀺.

𑀓𑁂𑀘𑀺 𑀧𑀦 ‘‘𑀫𑀳𑀸𑀇𑀢𑀺 𑀲𑀤𑁆𑀤𑁄 𑀩𑁆𑀬𑀸𑀲𑁂 𑀦 𑀮𑀩𑁆𑀪𑀢𑀺, 𑀲𑀫𑀸𑀲𑁂𑀬𑁂𑀯 𑀮𑀩𑁆𑀪𑀢𑀺 ‘𑀫𑀳𑀸𑀧𑀼𑀭𑀺𑀲𑁄’𑀢𑀺 𑀏𑀢𑁆𑀣 𑀯𑀺𑀬𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. ‘‘𑀫𑀳𑀸 𑀢𑁂 𑀉𑀧𑀸𑀲𑀓 𑀧𑀭𑀺𑀘𑁆𑀘𑀸𑀕𑁄. 𑀫𑀳𑀸 𑀯𑀢𑀸𑀬𑀁 𑀪𑀦𑁆𑀢𑁂 𑀪𑀽𑀫𑀺𑀘𑀸𑀮𑁄. 𑀖𑁄𑀲𑁄 𑀘 𑀯𑀺𑀧𑀼𑀮𑁄 𑀫𑀳𑀸. 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀦𑀸𑀫 𑀫𑀳𑀸. 𑀲𑁂𑀦𑀸 𑀲𑀸𑀤𑀺𑀲𑁆𑀲𑀢𑁂 𑀫𑀳𑀸’’𑀢𑀺 𑀧𑀬𑁄𑀕𑀤𑀲𑁆𑀲𑀦𑀢𑁄. 𑀏𑀯𑀁 𑀩𑁆𑀬𑀸𑀲𑁂𑀧𑀺 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀫𑀳𑀁, 𑀫𑀳𑀸, 𑀫𑀳𑀦𑁆𑀢𑁄, 𑀫𑀳𑀦𑁆𑀢𑀸. 𑀪𑁄 𑀫𑀳𑀦𑁆𑀢, 𑀪𑀯𑀦𑁆𑀢𑁄 𑀫𑀳𑀦𑁆𑀢𑀸’’𑀢𑀺 𑀧𑀼𑀮𑁆𑀮𑀺𑀗𑁆𑀕𑁂, ‘‘𑀫𑀳𑀦𑁆𑀢𑀁, 𑀫𑀳𑀸, 𑀫𑀳𑀦𑁆𑀢𑀸𑀦𑀺. 𑀪𑁄 𑀫𑀳𑀦𑁆𑀢, 𑀪𑀯𑀦𑁆𑀢𑁄 𑀫𑀳𑀦𑁆𑀢𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂, ‘‘𑀫𑀳𑀦𑁆𑀢𑀸, 𑀫𑀳𑀸, 𑀫𑀳𑀦𑁆𑀢𑀸, 𑀫𑀳𑀦𑁆𑀢𑀸𑀬𑁄. 𑀪𑁄𑀢𑀺 𑀫𑀳𑀦𑁆𑀢𑁂, 𑀪𑁄𑀢𑀺𑀬𑁄 𑀫𑀳𑀦𑁆𑀢𑀸, 𑀫𑀳𑀦𑁆𑀢𑀸𑀬𑁄’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑁂 𑀲𑀩𑁆𑀩𑀁 𑀲𑀫𑁆𑀧𑀼𑀡𑁆𑀡𑀁 𑀬𑁄𑀚𑁂𑀢𑀩𑁆𑀩𑀁. 𑀲𑀫𑀸𑀲𑁂 𑀧𑀦 ‘‘𑀫𑀳𑀸𑀲𑀢𑁆𑀢𑁄 𑀫𑀳𑀸𑀉𑀧𑀸𑀲𑀓𑁄 𑀫𑀳𑀸𑀉𑀧𑀸𑀲𑀺𑀓𑀸 𑀫𑀳𑀩𑁆𑀩𑀮𑁄 𑀫𑀳𑀸𑀯𑀦𑀁 𑀫𑀳𑀕𑁆𑀕𑀢𑀁 𑀫𑀳𑀧𑁆𑀨𑀮𑀁 𑀫𑀳𑀩𑁆𑀪𑀬’’𑀦𑁆𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀢𑀤𑁆𑀥𑀺𑀢𑁂 ‘‘𑀫𑀳𑀢𑁆𑀢𑀦𑁄 𑀫𑀳𑀢𑁆𑀢𑀁 𑀫𑀳𑀦𑁆𑀢𑀢𑁆𑀢𑀁 𑀫𑀳𑀦𑁆𑀢𑀢𑀸’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀕𑀘𑁆𑀙𑀦𑁆𑀢𑀲𑀤𑁆𑀤𑀲𑁆𑀲 𑀧𑀦 ‘‘𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑀸’’𑀢𑀺 𑀭𑀽𑀧𑀸𑀦𑀺 𑀯𑀢𑁆𑀯𑀸 𑀲𑁂𑀲𑀸𑀦𑀺 𑀫𑀳𑀦𑁆𑀢𑀲𑀤𑁆𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 ‘‘𑀕𑀘𑁆𑀙𑀦𑁆𑀢𑁄, 𑀕𑀘𑁆𑀙𑀦𑁆𑀢𑀸’’𑀢𑀺 𑀧𑀼𑀭𑀺𑀲𑀦𑀬𑁄 𑀘 ‘‘𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑀸𑀦𑀻’’𑀢𑀺 𑀘𑀺𑀢𑁆𑀢𑀦𑀬𑁄 𑀘 ‘‘𑀕𑀘𑁆𑀙𑀦𑁆𑀢𑀻, 𑀕𑀘𑁆𑀙𑀦𑁆𑀢𑀻, 𑀕𑀘𑁆𑀙𑀦𑁆𑀢𑀺𑀬𑁄’’𑀢𑀺 𑀇𑀢𑁆𑀣𑀺𑀦𑀬𑁄 𑀘 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦 ‘‘𑀘𑀭𑀁 𑀘𑀭𑀦𑁆𑀢𑁄 𑀘𑀭𑀦𑁆𑀢𑀁 𑀘𑀭𑀦𑁆𑀢𑀻, 𑀤𑀤𑀁 𑀤𑀤𑀦𑁆𑀢𑁄 𑀤𑀤𑀦𑁆𑀢𑀁 𑀤𑀤𑀦𑁆𑀢𑀻’’𑀢𑀺𑀆𑀤𑀻𑀦𑀁 𑀅𑀦𑁂𑀓𑀧𑀤𑀲𑀳𑀲𑁆𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑀬𑁂 𑀧𑀦𑀸𑀘𑀭𑀺𑀬𑀸 ‘‘𑀕𑀘𑁆𑀙𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀧𑀘𑁆𑀘𑀢𑁆𑀢𑀸𑀮𑀧𑀦𑀩𑀳𑀼𑀯𑀘𑀦𑀢𑁆𑀢𑀜𑁆𑀘 ‘‘𑀕𑀘𑁆𑀙𑀁’’𑀇𑀘𑁆𑀘𑀸𑀤𑀻𑀦𑀁 𑀆𑀮𑀧𑀦𑁂𑀓𑀯𑀘𑀦𑀢𑁆𑀢𑀜𑁆𑀘 𑀇𑀘𑁆𑀙𑀦𑁆𑀢𑀺, 𑀢𑁂 𑀲𑀫𑀫𑁆𑀳𑁂𑀳𑀺 𑀧𑀬𑁄𑀕𑁄 𑀲𑀸𑀲𑀦𑁂 𑀦 𑀤𑀺𑀝𑁆𑀞𑁄 𑀦𑀬𑀯𑀲𑁂𑀦𑀸𑀕𑀳𑁂𑀢𑀩𑁆𑀩𑀢𑁆𑀢𑀸. 𑀢𑀲𑁆𑀫𑀸 𑀢𑀸𑀦𑀺 𑀏𑀢𑁆𑀣 𑀦 𑀯𑀤𑀸𑀫. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀤𑀺𑀝𑁆𑀞𑁄. 𑀲𑁂𑀬𑁆𑀬𑀣𑀺𑀤𑀁?

‘‘𑀕𑀘𑁆𑀙𑀁 𑀯𑀺𑀥𑀫’’𑀫𑀺𑀘𑁆𑀘𑀸𑀤𑀺-𑀧𑀤𑀸𑀦𑀺 𑀫𑀼𑀦𑀺𑀲𑀸𑀲𑀦𑁂;

𑀓𑀢𑁆𑀣𑀘𑀸𑀔𑁆𑀬𑀸𑀢𑀺𑀓𑀸 𑀳𑁄𑀦𑁆𑀢𑀺, 𑀓𑀢𑁆𑀣𑀘𑀺 𑀧𑀦 𑀦𑀸𑀫𑀺𑀓𑀸.

‘‘𑀢𑀲𑁆𑀲𑀸𑀳𑀁 𑀲𑀦𑁆𑀢𑀺𑀓𑁂 𑀕𑀘𑁆𑀙𑀁,

𑀲𑁄 𑀫𑁂 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺;

𑀯𑀺𑀥𑀫𑀁 𑀤𑁂𑀯 𑀢𑁂 𑀭𑀝𑁆𑀞𑀁,

𑀧𑀼𑀢𑁆𑀢𑁄 𑀯𑁂𑀲𑁆𑀲𑀦𑁆𑀢𑀭𑁄 𑀢𑀯.

𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸, 𑀫𑀜𑁆𑀘𑁂 𑀢𑁆𑀯𑀁 𑀦𑀺𑀓𑁆𑀔𑀦𑀁 𑀯𑀦𑁂’’;

𑀇𑀘𑁆𑀘𑁂𑀯𑀫𑀸𑀤𑀬𑁄 𑀜𑁂𑀬𑁆𑀬𑀸, 𑀧𑀬𑁄𑀕𑀸 𑀏𑀢𑁆𑀣 𑀥𑀻𑀫𑀢𑀸.

‘‘𑀕𑀘𑁆𑀙𑀺𑀲𑁆𑀲𑀸𑀫𑀺 𑀯𑀺𑀥𑀫𑀻’’𑀢𑀺-𑀆𑀤𑀺𑀦𑀸 𑀚𑀺𑀦𑀲𑀸𑀲𑀦𑁂;

𑀦𑀸𑀦𑀸𑀓𑀸𑀮𑀧𑀼𑀭𑀺𑀲𑀸𑀦𑀁, 𑀯𑀲𑁂𑀦𑀢𑁆𑀣𑀁 𑀯𑀤𑁂 𑀯𑀺𑀤𑀽.

𑀦𑀸𑀫𑀢𑁆𑀢𑁂 𑀧𑀦 ‘‘𑀕𑀘𑁆𑀙𑀦𑁆𑀢𑁄, 𑀯𑀺𑀥𑀫𑀦𑁆𑀢𑁄’’𑀢𑀺𑀆𑀤𑀺𑀦𑀸;

‘‘𑀕𑀘𑁆𑀙’’𑀫𑀺𑀘𑁆𑀘𑁂𑀯𑀫𑀸𑀤𑀻𑀦-𑀫𑀢𑁆𑀣𑀫𑀢𑁆𑀣𑀯𑀺𑀤𑀽 𑀯𑀤𑁂.

𑀇𑀤𑀸𑀦𑀺 𑀲𑀫𑀕𑀢𑀺𑀓𑀢𑁆𑀢𑁂𑀧𑀺 ‘‘𑀚𑀸𑀦𑀁, 𑀧𑀲𑁆𑀲’’𑀦𑁆𑀢𑀺𑀆𑀤𑀻𑀦𑀁 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀦𑁆𑀢𑀭𑀯𑀲𑁂𑀦 𑀬𑁄 𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺, 𑀢𑀁 𑀯𑀤𑀸𑀫. 𑀢𑀣𑀸 𑀳𑀺 ‘‘𑀲𑀸 𑀚𑀸𑀦𑀁𑀬𑁂𑀯 𑀆𑀳 𑀦 𑀚𑀸𑀦𑀸𑀫𑀻𑀢𑀺, 𑀧𑀲𑁆𑀲𑀁𑀬𑁂𑀯 𑀆𑀳 𑀦 𑀧𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀚𑀸𑀦𑀁 𑀧𑀲𑁆𑀲𑀁 𑀲𑀤𑁆𑀤𑀸𑀦𑀁 ‘‘𑀚𑀸𑀦𑀦𑁆𑀢𑀻 𑀧𑀲𑁆𑀲𑀦𑁆𑀢𑀻’’𑀢𑀺 𑀮𑀺𑀗𑁆𑀕𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 ‘‘𑀕𑀘𑁆𑀙𑀁’’𑀇𑀢𑀺 𑀲𑀤𑁆𑀤𑀲𑁆𑀲𑀧𑀺 𑀬𑀣𑀸𑀧𑀬𑁄𑀕𑀁 ‘‘𑀕𑀘𑁆𑀙𑀦𑁆𑀢𑀻’’𑀢𑀺 𑀇𑀢𑁆𑀣𑀺𑀬𑀸 𑀓𑀣𑀦𑀢𑁆𑀣𑁄 𑀮𑀩𑁆𑀪𑀢𑀺 𑀢𑁂𑀳𑀺 𑀲𑀫𑀸𑀦𑀕𑀢𑀺𑀓𑀢𑁆𑀢𑀸, 𑀦 ‘‘𑀕𑀘𑁆𑀙𑀦𑁆𑀢𑁄’’𑀢𑀺 𑀲𑀤𑁆𑀤𑀲𑁆𑀲 ‘‘𑀕𑀘𑁆𑀙𑀦𑁆𑀢𑀻’’𑀢𑀺 𑀇𑀢𑁆𑀣𑀺𑀬𑀸 𑀓𑀣𑀦𑀢𑁆𑀣𑁄 𑀮𑀩𑁆𑀪𑀢𑀺 𑀢𑁂𑀳𑀺 𑀅𑀲𑀫𑀸𑀦𑀕𑀢𑀺𑀓𑀢𑁆𑀢𑀸𑀢𑀺 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. ‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀭𑀣𑀸’’𑀢𑀺 𑀏𑀢𑁆𑀣 ‘‘𑀚𑀸𑀦𑀦𑁆𑀢𑀸 𑀧𑀲𑁆𑀲𑀦𑁆𑀢𑀸’’𑀢𑀺 𑀯𑀘𑀦𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀧𑀦 ‘‘𑀕𑀘𑁆𑀙𑀁’’𑀇𑀢𑀺 𑀲𑀤𑁆𑀤𑀲𑁆𑀲𑀧𑀺 𑀬𑀣𑀸𑀧𑀬𑁄𑀕𑀁 ‘‘𑀕𑀘𑁆𑀙𑀦𑁆𑀢𑀸’’𑀢𑀺 𑀩𑀳𑀼𑀯𑀘𑀦𑀢𑁆𑀣𑁄 𑀮𑀩𑁆𑀪𑀢𑀺 𑀢𑁂𑀳𑀺 𑀲𑀫𑀸𑀦𑀕𑀢𑀺𑀓𑀢𑁆𑀢𑀸, 𑀦 ‘‘𑀕𑀘𑁆𑀙𑀦𑁆𑀢𑁂’’𑀢𑀺 𑀲𑀤𑁆𑀤𑀲𑁆𑀲 ‘‘𑀕𑀘𑁆𑀙𑀦𑁆𑀢𑀸’’𑀢𑀺 𑀩𑀳𑀼𑀯𑀘𑀦𑀢𑁆𑀣𑁄 𑀮𑀩𑁆𑀪𑀢𑀺 𑀢𑁂𑀳𑀺 𑀅𑀲𑀫𑀸𑀦𑀕𑀢𑀺𑀓𑀢𑁆𑀢𑀸𑀢𑀺 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀉𑀢𑁆𑀢𑀭𑀢𑁆𑀭𑀸𑀧𑀺. ‘‘𑀪𑀭𑀦𑁆𑀢𑀺 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭’’𑀦𑁆𑀢𑀺 𑀏𑀢𑁆𑀣 𑀅𑀦𑀼𑀲𑁆𑀲𑀭𑀁𑀲𑀤𑁆𑀤𑀲𑁆𑀲 ‘‘𑀅𑀦𑀼𑀲𑁆𑀲𑀭𑀦𑁆𑀢𑀸’’𑀢𑀺 𑀯𑀘𑀦𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀺. ‘‘𑀲𑀤𑁆𑀥𑀫𑁆𑀫𑁄 𑀕𑀭𑀼𑀓𑀸𑀢𑀩𑁆𑀩𑁄, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺 𑀏𑀢𑁆𑀣 𑀲𑀭𑀁𑀲𑀤𑁆𑀤𑀲𑁆𑀲 𑀲𑀭𑀦𑁆𑀢𑁂𑀦𑀸𑀢𑀺 𑀯𑀺𑀪𑀢𑁆𑀢𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀺. ‘‘𑀨𑀼𑀲𑀁 𑀪𑀽𑀢𑀸𑀦𑀺 𑀲𑀡𑁆𑀞𑀸𑀦𑀁, 𑀫𑀦𑀲𑀸 𑀕𑀡𑁆𑀳𑀢𑁄 𑀬𑀣𑀸’’𑀢𑀺 𑀏𑀢𑁆𑀣 𑀨𑀼𑀲𑀁𑀲𑀤𑁆𑀤𑀲𑁆𑀲𑀧𑀺 ‘‘𑀨𑀼𑀲𑀦𑁆𑀢𑀲𑁆𑀲𑀸’’𑀢𑀺 𑀯𑀺𑀪𑀢𑁆𑀢𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀺. 𑀢𑀣𑀸 ‘‘𑀬𑀸𑀘𑀁 𑀅𑀤𑀤𑀫𑀧𑁆𑀧𑀺𑀬𑁄’’𑀢𑀺 𑀏𑀢𑁆𑀣𑀸𑀧𑀺 𑀬𑀸𑀘𑀁𑀲𑀤𑁆𑀤𑀲𑁆𑀲 ‘‘𑀬𑀸𑀘𑀦𑁆𑀢𑀲𑁆𑀲𑀸’’𑀢𑀺 𑀯𑀺𑀪𑀢𑁆𑀢𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀺. 𑀬𑀸𑀘𑀦𑁆𑀢𑀺 𑀯𑀸 𑀬𑀸𑀘𑀺𑀢𑀩𑁆𑀩𑀁 𑀥𑀦𑀁, 𑀇𑀫𑀺𑀦𑀸 𑀦𑀬𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀭𑀺𑀯𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 ‘‘𑀪𑀯𑀁𑀓𑀭’’𑀦𑁆𑀢𑀺𑀆𑀤𑀻𑀦𑀁 𑀯𑀺𑀲𑀤𑀺𑀲𑀧𑀤𑀫𑀸𑀮𑀸 𑀘 ‘‘𑀕𑀘𑁆𑀙𑀁, 𑀘𑀭’’𑀦𑁆𑀢𑀺𑀆𑀤𑀻𑀦𑀁 𑀲𑀤𑀺𑀲𑀧𑀤𑀫𑀸𑀮𑀸 𑀘 ‘‘𑀚𑀸𑀦𑀁, 𑀧𑀲𑁆𑀲’’𑀦𑁆𑀢𑀺𑀆𑀤𑀻𑀦𑀁 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀦𑁆𑀢𑀭𑀯𑀲𑁂𑀦 𑀓𑀢𑁆𑀣𑀘𑀺 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀅𑀬𑀁 𑀢𑀺𑀯𑀺𑀥𑁄𑀧𑀺 𑀆𑀓𑀸𑀭𑁄 𑀆𑀔𑁆𑀬𑀸𑀢𑀺𑀓𑀧𑀤𑀢𑁆𑀣𑀯𑀺𑀪𑀸𑀯𑀦𑀸𑀬 𑀲𑀤𑁆𑀥𑀺𑀁 𑀓𑀣𑀺𑀢𑁄 𑀧𑀸𑀯𑀘𑀦𑀯𑀭𑁂 𑀲𑁄𑀢𑀽𑀦𑀁 𑀲𑀤𑁆𑀤𑁂𑀲𑁆𑀯𑀢𑁆𑀣𑁂𑀲𑀼 𑀘 𑀯𑀺𑀲𑀸𑀭𑀤𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀢𑁆𑀣𑀁. 𑀲𑀩𑁆𑀩𑀫𑁂𑀢𑀜𑁆𑀳𑀺 𑀲𑀦𑁆𑀥𑀸𑀬 𑀇𑀫𑀸 𑀕𑀸𑀣𑀸 𑀯𑀼𑀢𑁆𑀢𑀸 𑁋

‘‘𑀪𑀯𑀁 𑀓𑀭𑀁 𑀅𑀭𑀳𑀁 𑀲𑀁, 𑀫𑀳𑀁’’𑀇𑀢𑀺 𑀧𑀤𑀸𑀦𑀺 𑀢𑀼;

𑀯𑀺𑀲𑀤𑀺𑀲𑀸𑀦𑀺 𑀲𑀫𑁆𑀪𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀮𑀓𑁆𑀔𑀬𑁂.

‘‘𑀕𑀘𑁆𑀙𑀁 𑀘𑀭𑀁 𑀤𑀤𑀁 𑀢𑀺𑀝𑁆𑀞𑀁, 𑀘𑀺𑀦𑁆𑀢𑀬𑀁 𑀪𑀸𑀯𑀬𑀁 𑀯𑀤𑀁;

𑀚𑀸𑀦𑀁 𑀧𑀲𑁆𑀲’’𑀦𑁆𑀢𑀺𑀆𑀤𑀻𑀦𑀺, 𑀲𑀫𑀸𑀦𑀸𑀦𑀺 𑀪𑀯𑀦𑁆𑀢𑀺 𑀳𑀺.

𑀢𑀢𑁆𑀭 ‘‘𑀚𑀸𑀦’’𑀦𑁆𑀢𑀺𑀆𑀤𑀻𑀦𑀁, 𑀓𑀢𑁆𑀣𑀘𑀺 𑀧𑀭𑀺𑀯𑀢𑁆𑀢𑀦𑀁;

𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦-𑀦𑁆𑀢𑀭𑀢𑁄 𑀧𑀦 𑀤𑀺𑀲𑁆𑀲𑀢𑀻𑀢𑀺.

𑀅𑀧𑀺𑀘 𑀅𑀬𑀁 𑀲𑀩𑁆𑀩𑁂𑀲𑀫𑁆𑀧𑀺 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀤𑁆𑀯𑀻𑀲𑀼 𑀮𑀺𑀗𑁆𑀕𑁂𑀲𑀼 𑀙𑀲𑀼 𑀯𑀺𑀪𑀢𑁆𑀢𑀻𑀲𑀼 𑀢𑁂𑀭𑀲𑀲𑀼 𑀯𑀘𑀦𑁂𑀲𑀼 𑀅𑀜𑁆𑀜𑀢𑀭𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁. 𑀅𑀬𑀫𑁆𑀧𑀺 𑀧𑀦𑁂𑀢𑁆𑀣 𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀕𑀘𑁆𑀙𑀁 𑀘𑀭’’𑀦𑁆𑀢𑀺𑀆𑀤𑀻𑀦𑀺, 𑀯𑀺𑀧𑁆𑀧𑀓𑀢𑀯𑀘𑁄 𑀲𑀺𑀬𑀼𑀁;

‘‘𑀕𑀘𑁆𑀙𑀫𑀸𑀦𑁄 𑀘𑀭𑀫𑀸𑀦𑁄’’, 𑀇𑀘𑁆𑀘𑀸𑀤𑀻𑀦𑀺 𑀧𑀤𑀸𑀦𑀺 𑀘.

‘‘𑀫𑀳𑀁 𑀪𑀯’’𑀦𑁆𑀢𑀺 𑀏𑀢𑀸𑀦𑀺, 𑀯𑀺𑀧𑁆𑀧𑀓𑀢𑀯𑀘𑁄𑀧𑀺 𑀘;

𑀅𑀯𑀺𑀧𑁆𑀧𑀓𑀢𑀯𑀘𑁄 𑀘, 𑀲𑀺𑀬𑀼𑀁 𑀅𑀢𑁆𑀣𑀸𑀦𑀼𑀭𑀽𑀧𑀢𑁄.

‘‘𑀅𑀭𑀳𑀁 𑀲’’𑀦𑁆𑀢𑀺 𑀏𑀢𑀸𑀦𑀺, 𑀯𑀺𑀦𑀺𑀫𑀼𑀢𑁆𑀢𑀸𑀦𑀺 𑀲𑀩𑁆𑀩𑀣𑀸;

𑀆𑀓𑀸𑀭𑀁 𑀢𑀺𑀯𑀺𑀥𑀫𑁆𑀧𑁂𑀢𑀁, 𑀓𑀭𑁂 𑀘𑀺𑀢𑁆𑀢𑁂 𑀲𑀼𑀫𑁂𑀥𑀲𑁄𑀢𑀺.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀥𑀦𑀪𑀽𑀢𑀺𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀅𑀜𑁆𑀜𑁂𑀲𑀜𑁆𑀘 𑀢𑀁𑀲𑀤𑀺𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑀁 𑀯𑀓𑁆𑀔𑀸𑀫𑀺 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸.

𑀅𑀕𑁆𑀕𑀺, 𑀅𑀕𑁆𑀕𑀻, 𑀅𑀕𑁆𑀕𑀬𑁄. 𑀅𑀕𑁆𑀕𑀺𑀁, 𑀅𑀕𑁆𑀕𑀻, 𑀅𑀕𑁆𑀕𑀬𑁄. 𑀅𑀕𑁆𑀕𑀺𑀦𑀸, 𑀅𑀕𑁆𑀕𑀻𑀳𑀺, 𑀅𑀕𑁆𑀕𑀻𑀪𑀺. 𑀅𑀕𑁆𑀕𑀺𑀲𑁆𑀲, 𑀅𑀕𑁆𑀕𑀺𑀦𑁄, 𑀅𑀕𑁆𑀕𑀻𑀦𑀁. 𑀅𑀕𑁆𑀕𑀺𑀦𑀸, 𑀅𑀕𑁆𑀕𑀻𑀳𑀺, 𑀅𑀕𑁆𑀕𑀻𑀪𑀺. 𑀅𑀕𑁆𑀕𑀺𑀲𑁆𑀲, 𑀅𑀕𑁆𑀕𑀺𑀦𑁄, 𑀅𑀕𑁆𑀕𑀻𑀦𑀁. 𑀅𑀕𑁆𑀕𑀺𑀲𑁆𑀫𑀺𑀁, 𑀅𑀕𑁆𑀕𑀺𑀫𑁆𑀳𑀺, 𑀅𑀕𑁆𑀕𑀻𑀲𑀼. 𑀪𑁄 𑀅𑀕𑁆𑀕𑀺, 𑀪𑁄 𑀅𑀕𑁆𑀕𑀻, 𑀪𑀯𑀦𑁆𑀢𑁄 𑀅𑀕𑁆𑀕𑀬𑁄. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀝𑁆𑀞𑀸𑀦𑁂 ‘‘𑀅𑀕𑁆𑀕𑀺𑀲𑁆𑀫𑀸, 𑀅𑀕𑁆𑀕𑀺𑀫𑁆𑀳𑀸’’𑀢𑀺 𑀇𑀫𑀸𑀦𑀺 𑀦𑀸𑀕𑀢𑀸𑀦𑀺, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀢𑀁𑀲𑀤𑀺𑀲𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀕𑀳𑁂𑀢𑀩𑁆𑀩𑀸𑀦𑀺. ‘‘𑀅𑀕𑁆𑀕𑀺𑀦𑀸, 𑀅𑀕𑁆𑀕𑀺𑀲𑁆𑀫𑀸, 𑀅𑀕𑁆𑀕𑀺𑀫𑁆𑀳𑀸’’𑀢𑀺 𑀓𑀫𑁄 𑀘 𑀯𑁂𑀤𑀺𑀢𑀩𑁆𑀩𑁄.