𑁫. 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀸𑀫𑀺𑀓𑀧𑀤𑀫𑀸𑀮𑀸

𑀪𑀽 𑀥𑀸𑀢𑀼𑀢𑁄 𑀧𑀯𑀢𑁆𑀢𑀸𑀦𑀁, 𑀦𑀸𑀫𑀺𑀓𑀸𑀦𑀫𑀺𑀢𑁄 𑀧𑀭𑀁;

𑀦𑀸𑀫𑀫𑀸𑀮𑀁 𑀧𑀓𑀸𑀲𑀺𑀲𑁆𑀲𑀁, 𑀦𑀸𑀫𑀫𑀸𑀮𑀦𑁆𑀢𑀭𑀫𑁆𑀧𑀺 𑀘.

𑀯𑀺𑀧𑁆𑀧𑀓𑀺𑀡𑁆𑀡𑀓𑀣𑀸 𑀏𑀢𑁆𑀣, 𑀏𑀯𑀁 𑀯𑀼𑀢𑁆𑀢𑁂 𑀦 𑀳𑁂𑀲𑁆𑀲𑀢𑀺;

𑀧𑀪𑁂𑀤𑁄 𑀦𑀸𑀫𑀫𑀸𑀮𑀸𑀦𑀁, 𑀧𑀭𑀺𑀧𑀼𑀡𑁆𑀡𑁄𑀯 𑀳𑁂𑀳𑀺𑀢𑀺.

𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸𑀦𑀁, 𑀢𑀲𑁆𑀫𑀸 𑀇𑀥 𑀫𑀢𑀁 𑀲𑀼𑀢𑀁;

𑀧𑀼𑀭𑁂𑀘𑀭𑀁 𑀓𑀭𑀺𑀢𑁆𑀯𑀸𑀦, 𑀯𑀓𑁆𑀔𑀸𑀫𑀺 𑀲𑀯𑀺𑀦𑀺𑀘𑁆𑀙𑀬𑀁.

𑀧𑀼𑀭𑀺𑀲𑁄, 𑀧𑀼𑀭𑀺𑀲𑀸. 𑀧𑀼𑀭𑀺𑀲𑀁, 𑀧𑀼𑀭𑀺𑀲𑁂. 𑀧𑀼𑀭𑀺𑀲𑁂𑀦, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀺. 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑀸𑀦𑀁. 𑀧𑀼𑀭𑀺𑀲𑀸, 𑀧𑀼𑀭𑀺𑀲𑀲𑁆𑀫𑀸, 𑀧𑀼𑀭𑀺𑀲𑀫𑁆𑀳𑀸, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀺. 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑀸𑀦𑀁. 𑀧𑀼𑀭𑀺𑀲𑁂, 𑀧𑀼𑀭𑀺𑀲𑀲𑁆𑀫𑀺𑀁, 𑀧𑀼𑀭𑀺𑀲𑀫𑁆𑀳𑀺, 𑀧𑀼𑀭𑀺𑀲𑁂𑀲𑀼. 𑀪𑁄 𑀧𑀼𑀭𑀺𑀲, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸.

𑀅𑀬𑀫𑀸𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦 𑀓𑀢𑀲𑁆𑀫𑀸 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀢𑁄 𑀉𑀤𑁆𑀥𑀭𑀺𑀢𑁄 𑀧𑀼𑀭𑀺𑀲𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀦𑀬𑁄. 𑀢𑀢𑁆𑀭 𑀧𑀼𑀭𑀺𑀲𑀯𑀘𑀦𑀏𑀓𑀯𑀘𑀦𑀧𑀼𑀣𑀼𑀯𑀘𑀦𑁂𑀲𑀼 𑀧𑀘𑁆𑀘𑀢𑁆𑀢𑀯𑀘𑀦𑀸𑀤𑀻𑀦𑀺 𑀪𑀯𑀦𑁆𑀢𑀺. 𑀢𑀁 𑀬𑀣𑀸? 𑀧𑀼𑀭𑀺𑀲𑁄 𑀢𑀺𑀝𑁆𑀞𑀢𑀺, 𑀧𑀼𑀭𑀺𑀲𑀸 𑀢𑀺𑀝𑁆𑀞𑀦𑁆𑀢𑀺. 𑀢𑀢𑁆𑀭 𑀧𑀼𑀭𑀺𑀲𑁄𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑀁 𑀧𑀲𑁆𑀲𑀢𑀺, 𑀧𑀼𑀭𑀺𑀲𑁂 𑀧𑀲𑁆𑀲𑀢𑀺. 𑀢𑀢𑁆𑀭 𑀧𑀼𑀭𑀺𑀲𑀦𑁆𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀉𑀧𑀬𑁄𑀕𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑁂𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀉𑀧𑀬𑁄𑀕𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑁂𑀦 𑀓𑀢𑀁, 𑀧𑀼𑀭𑀺𑀲𑁂𑀳𑀺 𑀓𑀢𑀁, 𑀧𑀼𑀭𑀺𑀲𑁂𑀪𑀺 𑀓𑀢𑀁. 𑀢𑀢𑁆𑀭 𑀧𑀼𑀭𑀺𑀲𑁂𑀦𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀓𑀭𑀡𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀻𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀓𑀭𑀡𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑀲𑁆𑀲 𑀤𑀻𑀬𑀢𑁂, 𑀧𑀼𑀭𑀺𑀲𑀸𑀦𑀁 𑀤𑀻𑀬𑀢𑁂. 𑀢𑀢𑁆𑀭 𑀧𑀼𑀭𑀺𑀲𑀲𑁆𑀲𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀲𑀫𑁆𑀧𑀤𑀸𑀦𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑀸𑀦𑀦𑁆𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀲𑀫𑁆𑀧𑀤𑀸𑀦𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑀸 𑀦𑀺𑀲𑁆𑀲𑀝𑀁, 𑀧𑀼𑀭𑀺𑀲𑀲𑁆𑀫𑀸 𑀦𑀺𑀲𑁆𑀲𑀝𑀁, 𑀧𑀼𑀭𑀺𑀲𑀫𑁆𑀳𑀸 𑀦𑀺𑀲𑁆𑀲𑀝𑀁, 𑀧𑀼𑀭𑀺𑀲𑁂𑀳𑀺 𑀦𑀺𑀲𑁆𑀲𑀝𑀁, 𑀧𑀼𑀭𑀺𑀲𑁂𑀪𑀺 𑀦𑀺𑀲𑁆𑀲𑀝𑀁. 𑀢𑀢𑁆𑀭 𑀧𑀼𑀭𑀺𑀲𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀪𑀯𑀢𑀺. 𑀧𑀼𑀭𑀺𑀲𑀲𑁆𑀫𑀸𑀢𑀺…𑀧𑁂… 𑀧𑀼𑀭𑀺𑀲𑀫𑁆𑀳𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀻𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑀲𑁆𑀲 𑀧𑀭𑀺𑀕𑁆𑀕𑀳𑁄, 𑀧𑀼𑀭𑀺𑀲𑀸𑀦𑀁 𑀧𑀭𑀺𑀕𑁆𑀕𑀳𑁄. 𑀢𑀢𑁆𑀭 𑀧𑀼𑀭𑀺𑀲𑀲𑁆𑀲𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀲𑀸𑀫𑀺𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑀸𑀦𑀦𑁆𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀲𑀸𑀫𑀺𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑁂 𑀧𑀢𑀺𑀝𑁆𑀞𑀺𑀢𑀁, 𑀧𑀼𑀭𑀺𑀲𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀁, 𑀧𑀼𑀭𑀺𑀲𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀁, 𑀧𑀼𑀭𑀺𑀲𑁂𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀢𑀢𑁆𑀭 𑀧𑀼𑀭𑀺𑀲𑁂𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀪𑀼𑀫𑁆𑀫𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑀲𑁆𑀫𑀺𑀦𑁆𑀢𑀺…𑀧𑁂… 𑀧𑀼𑀭𑀺𑀲𑀫𑁆𑀳𑀻𑀢𑀺…𑀧𑁂… 𑀧𑀼𑀭𑀺𑀲𑁂𑀲𑀽𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀪𑀼𑀫𑁆𑀫𑀯𑀘𑀦𑀁 𑀪𑀯𑀢𑀺.

𑀪𑁄 𑀧𑀼𑀭𑀺𑀲 𑀢𑀺𑀝𑁆𑀞, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸 𑀢𑀺𑀝𑁆𑀞𑀣. 𑀢𑀢𑁆𑀭 𑀪𑁄 𑀧𑀼𑀭𑀺𑀲𑀇𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀆𑀮𑀧𑀦𑀁 𑀪𑀯𑀢𑀺, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸𑀇𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀆𑀮𑀧𑀦𑀁 𑀪𑀯𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀦𑀬𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄.

𑀬𑀫𑀓𑀫𑀳𑀸𑀣𑁂𑀭𑁂𑀦 𑀓𑀢𑀸𑀬 𑀧𑀦 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀯𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲𑀸’’𑀇𑀢𑀺 𑀤𑀻𑀖𑀯𑀲𑁂𑀦 𑀆𑀮𑀧𑀦𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀢𑀸𑀤𑀺𑀲𑁄 𑀦𑀬𑁄 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀦𑀢𑁆𑀣𑀺, 𑀢𑀣𑀸𑀧𑀺 𑀩𑀳𑀽𑀦𑀫𑀸𑀮𑀧𑀦𑀯𑀺𑀲𑀬𑁂 ‘‘𑀪𑁄 𑀬𑀓𑁆𑀔𑀸’’𑀇𑀢𑀺𑀆𑀤𑀻𑀦𑀁 𑀆𑀮𑀧𑀦𑀩𑀳𑀼𑀯𑀘𑀦𑀸𑀦𑀁 𑀚𑀸𑀢𑀓𑀝𑁆𑀞𑀓𑀣𑀸𑀤𑀻𑀲𑀼 𑀤𑀺𑀲𑁆𑀲𑀦𑀢𑁄 𑀧𑀲𑀢𑁆𑀣𑀢𑀭𑁄𑀯 𑀳𑁄𑀢𑀺 𑀯𑀺𑀜𑁆𑀜𑀽𑀦𑀁 𑀧𑀫𑀸𑀡𑀜𑁆𑀘, 𑀢𑀲𑁆𑀫𑀸 𑀇𑀫𑀺𑀦𑀸 𑀬𑀫𑀓𑀫𑀳𑀸𑀣𑁂𑀭𑀫𑀢𑁂𑀦𑀧𑀺 ‘‘𑀧𑀼𑀭𑀺𑀲𑁄 𑀧𑀼𑀭𑀺𑀲𑀸 𑀧𑀼𑀭𑀺𑀲’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀆𑀫𑀦𑁆𑀢𑀦𑁂 ‘‘𑀪𑁄 𑀧𑀼𑀭𑀺𑀲, 𑀪𑁄 𑀧𑀼𑀭𑀺𑀲𑀸, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸’’𑀢𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀢𑀢𑁆𑀣 𑀧𑀼𑀭𑀺𑀲𑁄𑀢𑀺 𑀧𑀞𑀫𑀸𑀬 𑀏𑀓𑀯𑀘𑀦𑀁. 𑀧𑀼𑀭𑀺𑀲𑀸𑀢𑀺 𑀩𑀳𑀼𑀯𑀘𑀦𑀁. 𑀧𑀼𑀭𑀺𑀲𑀦𑁆𑀢𑀺 𑀤𑀼𑀢𑀺𑀬𑀸𑀬 𑀏𑀓𑀯𑀘𑀦𑀁. 𑀧𑀼𑀭𑀺𑀲𑁂𑀢𑀺 𑀩𑀳𑀼𑀯𑀘𑀦𑀁. 𑀧𑀼𑀭𑀺𑀲𑁂𑀦𑀸𑀢𑀺 𑀢𑀢𑀺𑀬𑀸𑀬 𑀏𑀓𑀯𑀘𑀦𑀁. 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀻𑀢𑀺 𑀤𑁆𑀯𑁂 𑀩𑀳𑀼𑀯𑀘𑀦𑀸𑀦𑀺. 𑀧𑀼𑀭𑀺𑀲𑀲𑁆𑀲𑀸𑀢𑀺 𑀘𑀢𑀼𑀢𑁆𑀣𑀺𑀬𑀸 𑀏𑀓𑀯𑀘𑀦𑀁. 𑀧𑀼𑀭𑀺𑀲𑀸𑀦𑀦𑁆𑀢𑀺 𑀩𑀳𑀼𑀯𑀘𑀦𑀁. 𑀧𑀼𑀭𑀺𑀲𑀸, 𑀧𑀼𑀭𑀺𑀲𑀲𑁆𑀫𑀸, 𑀧𑀼𑀭𑀺𑀲𑀫𑁆𑀳𑀸𑀢𑀺 𑀢𑀻𑀡𑀺 𑀧𑀜𑁆𑀘𑀫𑀺𑀬𑀸 𑀏𑀓𑀯𑀘𑀦𑀸𑀦𑀺. 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀻𑀢𑀺 𑀤𑁆𑀯𑁂 𑀩𑀳𑀼𑀯𑀘𑀦𑀸𑀦𑀺. 𑀧𑀼𑀭𑀺𑀲𑀲𑁆𑀲𑀸𑀢𑀺 𑀙𑀝𑁆𑀞𑀺𑀬𑀸 𑀏𑀓𑀯𑀘𑀦𑀁. 𑀧𑀼𑀭𑀺𑀲𑀸𑀦𑀦𑁆𑀢𑀺 𑀩𑀳𑀼𑀯𑀘𑀦𑀁. 𑀧𑀼𑀭𑀺𑀲𑁂, 𑀧𑀼𑀭𑀺𑀲𑀲𑁆𑀫𑀺𑀁, 𑀧𑀼𑀭𑀺𑀲𑀫𑁆𑀳𑀻𑀢𑀺 𑀢𑀻𑀡𑀺 𑀲𑀢𑁆𑀢𑀫𑀺𑀬𑀸 𑀏𑀓𑀯𑀘𑀦𑀸𑀦𑀺. 𑀧𑀼𑀭𑀺𑀲𑁂𑀲𑀽𑀢𑀺 𑀩𑀳𑀼𑀯𑀘𑀦𑀁. 𑀪𑁄 𑀧𑀼𑀭𑀺𑀲𑀸𑀢𑀺 𑀅𑀝𑁆𑀞𑀫𑀺𑀬𑀸 𑀏𑀓𑀯𑀘𑀦𑀁. 𑀪𑁄 𑀧𑀼𑀭𑀺𑀲𑀸, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸𑀢𑀺 𑀤𑁆𑀯𑁂 𑀩𑀳𑀼𑀯𑀘𑀦𑀸𑀦𑀺.

𑀓𑀺𑀜𑁆𑀘𑀸𑀧𑁂𑀢𑁂𑀲𑀼 ‘‘𑀧𑀼𑀭𑀺𑀲𑀸’’𑀢𑀺 𑀇𑀤𑀁 𑀧𑀞𑀫𑀸𑀧𑀜𑁆𑀘𑀫𑀻𑀅𑀝𑁆𑀞𑀫𑀻𑀦𑀁, ‘‘𑀧𑀼𑀭𑀺𑀲𑁂’’𑀢𑀺 𑀇𑀤𑀁 𑀤𑀼𑀢𑀺𑀬𑀸𑀲𑀢𑁆𑀢𑀫𑀻𑀦𑀁, ‘‘𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀻’’𑀢𑀺 𑀢𑀢𑀺𑀬𑀸𑀧𑀜𑁆𑀘𑀫𑀻𑀦𑀁, ‘‘𑀧𑀼𑀭𑀺𑀲𑀸𑀦’’𑀦𑁆𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀏𑀓𑀲𑀤𑀺𑀲𑀁, 𑀢𑀣𑀸𑀧𑀺 𑀅𑀢𑁆𑀣𑀯𑀲𑁂𑀦 𑀅𑀲𑀗𑁆𑀓𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? ‘‘𑀧𑀼𑀭𑀺𑀲𑁄 𑀢𑀺𑀝𑁆𑀞𑀢𑀺, 𑀧𑀼𑀭𑀺𑀲𑀸 𑀢𑀺𑀝𑁆𑀞𑀦𑁆𑀢𑀺. 𑀧𑀼𑀭𑀺𑀲𑀁 𑀧𑀲𑁆𑀲𑀢𑀺, 𑀧𑀼𑀭𑀺𑀲𑁂 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸.

𑀢𑀢𑁆𑀣 𑀘 𑀪𑁄𑀢𑀺 𑀆𑀫𑀦𑁆𑀢𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑁄 𑀦 𑀓𑁂𑀯𑀮𑀁 𑀏𑀓𑀯𑀘𑀦𑀁𑀬𑁂𑀯 𑀳𑁄𑀢𑀺, 𑀅𑀣 𑀔𑁄 𑀩𑀳𑀼𑀯𑀘𑀦𑀫𑁆𑀧𑀺 𑀳𑁄𑀢𑀻𑀢𑀺 ‘‘𑀪𑁄 𑀧𑀼𑀭𑀺𑀲𑀸’’𑀇𑀢𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄𑀧𑀺 𑀕𑀳𑀺𑀢𑁄. ‘‘𑀪𑀯𑀦𑁆𑀢𑁄’’𑀢𑀺𑀤𑀁 𑀧𑀦 𑀩𑀳𑀼𑀯𑀘𑀦𑀫𑁂𑀯 𑀳𑁄𑀢𑀻𑀢𑀺 ‘‘𑀧𑀼𑀭𑀺𑀲𑀸’’𑀢𑀺 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀺 𑀬𑀫𑀓𑀫𑀳𑀸𑀣𑁂𑀭𑁂𑀦 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀯𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲𑀸’’𑀇𑀢𑀺 𑀤𑀻𑀖𑀯𑀲𑁂𑀦 𑀆𑀮𑀧𑀦𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀲𑀼 𑀘 𑀦𑀺𑀧𑀸𑀢𑀪𑀽𑀢𑁄 𑀪𑁄𑀲𑀤𑁆𑀤𑁄 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀚𑁆𑀚𑀢𑀺. 𑀅𑀢𑁆𑀭𑀺𑀫𑀸𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺 𑁋 ‘‘𑀅𑀧𑀺 𑀦𑀼 𑀔𑁄 𑀲𑀧𑀭𑀺𑀕𑁆𑀕𑀳𑀸𑀦𑀁 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑀭𑀺𑀕𑁆𑀕𑀳𑁂𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺, 𑀦𑁄 𑀳𑀺𑀤𑀁 𑀪𑁄 𑀕𑁄𑀢𑀫. 𑀅𑀘𑁆𑀙𑀭𑀺𑀬𑀁 𑀪𑁄 𑀆𑀦𑀦𑁆𑀤, 𑀅𑀩𑁆𑀪𑀼𑀢𑀁 𑀪𑁄 𑀆𑀦𑀦𑁆𑀤, 𑀏𑀳𑀺 𑀪𑁄 𑀲𑀫𑀡, 𑀪𑁄 𑀧𑀩𑁆𑀩𑀚𑀺𑀢’’𑀇𑀘𑁆𑀘𑀸𑀤𑀺𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀢𑁄 𑀘 𑀪𑁄𑀲𑀤𑁆𑀤𑀲𑁆𑀲 𑀏𑀓𑀯𑀘𑀦𑀧𑁆𑀧𑀬𑁄𑀕𑁂 𑀧𑀯𑀢𑁆𑀢𑀺𑀦𑀺𑀤𑀲𑁆𑀲𑀦𑀁, ‘‘𑀢𑁂𑀦 𑀳𑀺 𑀪𑁄 𑀫𑀫𑀧𑀺 𑀲𑀼𑀡𑀸𑀣. 𑀬𑀣𑀸 𑀫𑀬𑀫𑁂𑀯 𑀅𑀭𑀳𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀦𑀸𑀳𑀁 𑀪𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀢𑁄 𑀦𑀸𑀩𑁆𑀪𑀦𑀼𑀫𑁄𑀤𑀸𑀫𑀺, 𑀧𑀲𑁆𑀲𑀣 𑀪𑁄 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁. 𑀪𑁄 𑀬𑀓𑁆𑀔𑀸 𑀅𑀳𑀁 𑀇𑀫𑀁 𑀢𑀼𑀫𑁆𑀳𑀸𑀓𑀁 𑀪𑀸𑀚𑁂𑀢𑁆𑀯𑀸 𑀤𑀤𑁂𑀬𑁆𑀬𑀁. 𑀅𑀧𑀭𑀺𑀲𑀼𑀤𑁆𑀥𑁄 𑀧𑀦𑀫𑁆𑀳𑀺, 𑀪𑁄 𑀥𑀼𑀢𑁆𑀢𑀸 𑀢𑀼𑀫𑁆𑀳𑀸𑀓𑀁 𑀓𑁆𑀭𑀺𑀬𑀸 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀺. 𑀲𑁄 𑀢𑁂 𑀧𑀼𑀭𑀺𑀲𑁂 𑀆𑀳 𑀪𑁄 𑀢𑀼𑀫𑁆𑀳𑁂 𑀫𑀁 𑀫𑀸𑀭𑁂𑀦𑁆𑀢𑀸 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸𑀯 𑀫𑀸𑀭𑁂𑀣𑀸’’𑀢𑀺 𑀇𑀘𑁆𑀘𑀸𑀤𑀺 𑀧𑀦 𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀢𑁄 𑀘 𑀪𑁄𑀲𑀤𑁆𑀤𑀲𑁆𑀲 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁂 𑀧𑀯𑀢𑁆𑀢𑀺𑀦𑀺𑀤𑀲𑁆𑀲𑀦𑀁. 𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑁂 𑀧𑀦 ‘‘𑀪𑁄 𑀧𑀼𑀭𑀺𑀲, 𑀪𑁄 𑀧𑀼𑀭𑀺𑀲𑀸’’𑀢𑀺 𑀧𑀤𑀤𑁆𑀯𑀬𑀁 𑀆𑀮𑀧𑀦𑁂𑀓𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀁 𑀬𑀣𑀸 𑀆𑀕𑀫𑁂𑀳𑀺 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁.

𑀓𑁂𑀘𑀺 𑀧𑀦 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑁂 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀇𑀘𑁆𑀙𑀦𑁆𑀢𑀺, 𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑁂 𑀧𑀦 ‘‘𑀪𑁄 𑀧𑀼𑀭𑀺𑀲𑀸’’𑀇𑀢𑀺 𑀤𑀻𑀖𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀇𑀘𑁆𑀙𑀦𑁆𑀢𑀺. 𑀅𑀤𑀽𑀭𑀝𑁆𑀞𑀸𑀦𑀁 𑀤𑀽𑀭𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀁 𑀇𑀢𑁆𑀣𑀻𑀦𑀜𑁆𑀘 𑀆𑀮𑀧𑀦𑁂 𑀦 𑀓𑀺𑀜𑁆𑀘𑀺 𑀯𑀤𑀦𑁆𑀢𑀺. 𑀢𑀣𑀸 𑀅𑀤𑀽𑀭𑀝𑁆𑀞𑀸𑀬 𑀤𑀽𑀭𑀝𑁆𑀞𑀸𑀬 𑀘 𑀇𑀢𑁆𑀣𑀺𑀬𑀸 𑀆𑀮𑀧𑀦𑁂 𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑀸 ‘‘𑀅𑀤𑀽𑀭𑀝𑁆𑀞𑀸𑀦𑀁 𑀤𑀽𑀭𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀫𑀸𑀮𑀧𑀦𑁂 𑀓𑀣𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀅𑀤𑁆𑀥𑀸 𑀢𑁂 𑀏𑀯𑀁 𑀧𑀼𑀝𑁆𑀞𑀸 𑀉𑀢𑁆𑀢𑀭𑀺 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀏𑀯𑀫𑁆𑀧𑀺 𑀢𑁂 𑀘𑁂 𑀯𑀤𑁂𑀬𑁆𑀬𑀼𑀁 ‘‘𑀪𑀯𑀦𑁆𑀢𑁄 𑀧𑀼𑀭𑀺𑀲𑀸𑀢𑀺 𑀇𑀫𑀺𑀦𑀸𑀯 𑀅𑀤𑀽𑀭𑀝𑁆𑀞𑀸𑀦𑀁 𑀤𑀽𑀭𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀫𑀸𑀮𑀧𑀦𑀁 𑀪𑀯𑀢𑀻’’𑀢𑀺. 𑀢𑀤𑀸 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀬𑀤𑀺 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸’’𑀢𑀺 𑀇𑀫𑀺𑀦𑀸 𑀅𑀤𑁆𑀯𑁂𑀚𑁆𑀛𑁂𑀦 𑀯𑀘𑀦𑁂𑀦 𑀅𑀤𑀽𑀭𑀝𑁆𑀞𑀸𑀦𑀁 𑀤𑀽𑀭𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀫𑀸𑀮𑀧𑀦𑀁 𑀪𑀯𑀢𑀺, 𑀏𑀯𑀁 𑀲𑀦𑁆𑀢𑁂 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀧𑀤𑁂𑀦𑀧𑀺 𑀤𑀽𑀭𑀝𑁆𑀞𑀲𑁆𑀲 𑀘 𑀧𑀼𑀭𑀺𑀲𑀲𑁆𑀲𑀸𑀮𑀧𑀦𑀁 𑀯𑀢𑁆𑀢𑀩𑁆𑀩𑀁, 𑀏𑀯𑀁 𑀅𑀯𑀢𑁆𑀯𑀸 𑀓𑀺𑀫𑀢𑁆𑀣𑀁 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑁂 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀇𑀘𑁆𑀙𑀣, 𑀓𑀺𑀫𑀢𑁆𑀣𑀜𑁆𑀘 𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑁂 ‘‘𑀪𑁄 𑀧𑀼𑀭𑀺𑀲𑀸’’𑀇𑀢𑀺 𑀤𑀻𑀖𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀇𑀘𑁆𑀙𑀣.

𑀦𑀦𑀼 ‘‘𑀢𑀕𑁆𑀖 𑀪𑀕𑀯𑀸 𑀩𑁄𑀚𑁆𑀛𑀗𑁆𑀕𑀸, 𑀢𑀕𑁆𑀖 𑀲𑀼𑀕𑀢 𑀩𑁄𑀚𑁆𑀛𑀗𑁆𑀕𑀸’’𑀢𑀺𑀆𑀤𑀻𑀲𑀼 𑀆𑀮𑀧𑀦𑀧𑀤𑀪𑀽𑀢𑀁 ‘‘𑀪𑀕𑀯𑀸’’𑀇𑀢𑀺 𑀤𑀻𑀖𑀧𑀤𑀁 𑀲𑀫𑀻𑀧𑁂 𑀞𑀺𑀢𑀓𑀸𑀮𑁂𑀧𑀺 𑀤𑀽𑀭𑁂 𑀞𑀺𑀢𑀓𑀸𑀮𑁂𑀧𑀺 𑀩𑀼𑀤𑁆𑀥𑀲𑁆𑀲𑀸𑀮𑀧𑀦𑀧𑀤𑀁 𑀪𑀯𑀺𑀢𑀼𑀫𑀭𑀳𑀢𑁂𑀯, 𑀢𑀣𑀸 𑀆𑀮𑀧𑀦𑀧𑀤𑀪𑀽𑀢𑀁 ‘‘𑀲𑀼𑀕𑀢’’𑀇𑀢𑀺 𑀭𑀲𑁆𑀲𑀧𑀤𑀫𑁆𑀧𑀺. 𑀬𑀲𑁆𑀫𑀸 𑀧𑀦𑁂𑀢𑁂𑀲𑀼 ‘‘𑀪𑀕𑀯𑀸’’𑀢𑀺 𑀆𑀮𑀧𑀦𑀧𑀤𑀲𑁆𑀲 𑀦 𑀓𑀢𑁆𑀣𑀘𑀺𑀧𑀺 𑀭𑀲𑁆𑀲𑀢𑁆𑀢𑀁 𑀤𑀺𑀲𑁆𑀲𑀢𑀺, ‘‘𑀲𑀼𑀕𑀢𑀸’’𑀢𑀺 𑀆𑀮𑀧𑀦𑀧𑀤𑀲𑁆𑀲 𑀘 𑀦 𑀓𑀢𑁆𑀣𑀘𑀺𑀧𑀺 𑀤𑀻𑀖𑀢𑁆𑀢𑀁 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀤𑀻𑀖𑀭𑀲𑁆𑀲𑀫𑀢𑁆𑀢𑀸𑀪𑁂𑀤𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀯𑀼𑀢𑁆𑀢𑀧𑀤𑀁 𑀧𑀓𑀢𑀺𑀲𑁆𑀲𑀭𑀯𑀲𑁂𑀦 𑀲𑀫𑀻𑀧𑁂 𑀞𑀺𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀆𑀫𑀦𑁆𑀢𑀦𑀓𑀸𑀮𑁂 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀧𑀤𑀁 𑀪𑀯𑀢𑀺, 𑀆𑀬𑀢𑀲𑁆𑀲𑀭𑀯𑀲𑁂𑀦 𑀤𑀽𑀭𑁂 𑀞𑀺𑀢𑀧𑀼𑀭𑀺𑀲𑀲𑁆𑀲 𑀆𑀫𑀦𑁆𑀢𑀦𑀓𑀸𑀮𑁂 𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀧𑀤𑀁 𑀪𑀯𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀣𑀸 ‘‘𑀪𑀯𑀦𑁆𑀢𑁄 𑀧𑀼𑀭𑀺𑀲𑀸, 𑀪𑁄 𑀬𑀓𑁆𑀔𑀸, 𑀪𑁄 𑀥𑀼𑀢𑁆𑀢𑀸’’𑀢𑀺𑀆𑀤𑀻𑀦𑀺 𑀤𑀻𑀖𑀯𑀲𑁂𑀦 𑀯𑀼𑀢𑁆𑀢𑀸𑀦𑀺 𑀆𑀮𑀧𑀦𑀩𑀳𑀼𑀯𑀘𑀦𑀧𑀤𑀸𑀦𑀺𑀧𑀺 𑀧𑀓𑀢𑀺𑀲𑁆𑀲𑀭𑀯𑀲𑁂𑀦 𑀲𑀫𑀻𑀧𑁂 𑀞𑀺𑀢𑀧𑀼𑀭𑀺𑀲𑀸𑀦𑀁 𑀆𑀫𑀦𑁆𑀢𑀦𑀓𑀸𑀮𑁂 𑀅𑀤𑀽𑀭𑀝𑁆𑀞𑀸𑀦𑀫𑀸𑀮𑀧𑀦𑀧𑀤𑀸𑀦𑀺 𑀪𑀯𑀦𑁆𑀢𑀺, 𑀆𑀬𑀢𑀲𑁆𑀲𑀭𑀯𑀲𑁂𑀦 𑀤𑀽𑀭𑁂 𑀞𑀺𑀢𑀧𑀼𑀭𑀺𑀲𑀸𑀤𑀻𑀦𑀁 𑀆𑀫𑀦𑁆𑀢𑀦𑀓𑀸𑀮𑁂 𑀤𑀽𑀭𑀝𑁆𑀞𑀸𑀦𑀫𑀸𑀮𑀧𑀦𑀧𑀤𑀸𑀦𑀺 𑀪𑀯𑀦𑁆𑀢𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀢𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀸 𑀓𑀢𑁆𑀣𑀘𑀺 𑀓𑀢𑁆𑀣𑀘𑀺 𑀭𑀲𑁆𑀲𑀝𑁆𑀞𑀸𑀦𑁂𑀧𑀺 𑀤𑀻𑀖𑀝𑁆𑀞𑀸𑀦𑁂𑀧𑀺 𑀆𑀬𑀢𑁂𑀦 𑀲𑀭𑁂𑀦 𑀫𑀚𑁆𑀛𑀺𑀫𑀸𑀬𑀢𑁂𑀦 𑀲𑀭𑁂𑀦 𑀅𑀘𑁆𑀘𑀸𑀬𑀢𑁂𑀦 𑀘 𑀲𑀭𑁂𑀦 𑀯𑁂𑀤𑀁 𑀧𑀞𑀦𑁆𑀢𑀺 𑀮𑀺𑀔𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑁂𑀦 𑀕𑀻𑀢𑀲𑁆𑀲𑀭𑁂𑀦 𑀯𑀺𑀬. 𑀇𑀢𑀺 𑀲𑀩𑁆𑀩𑀓𑁆𑀔𑀭𑁂𑀲𑀼𑀧𑀺 𑀆𑀬𑀢𑁂𑀦 𑀲𑀭𑁂𑀦𑀼𑀘𑁆𑀘𑀸𑀭𑀡𑀁 𑀮𑀩𑁆𑀪𑀢𑁂𑀯 𑀮𑀺𑀔𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀁, 𑀢𑀲𑁆𑀫𑀸 𑀅𑀲𑀫𑁆𑀧𑀣𑀫𑀦𑁄𑀢𑀭𑀺𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀯𑀘𑀦𑁂𑀦 𑀤𑀽𑀭𑀝𑁆𑀞𑀲𑁆𑀲 𑀘 𑀅𑀤𑀽𑀭𑀝𑁆𑀞𑀲𑁆𑀲 𑀘 𑀧𑀼𑀭𑀺𑀲𑀲𑁆𑀲𑀸𑀮𑀧𑀦𑀁 𑀪𑀯𑀢𑀺, ‘‘𑀪𑁄 𑀧𑀼𑀭𑀺𑀲𑀸, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸’’𑀢𑀺 𑀇𑀫𑁂𑀳𑀺 𑀯𑀘𑀦𑁂𑀳𑀺𑀧𑀺 𑀤𑀽𑀭𑀝𑁆𑀞𑀸𑀦𑀜𑁆𑀘 𑀅𑀤𑀽𑀭𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀫𑀸𑀮𑀧𑀦𑀁 𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀺 𑀤𑀽𑀭𑀝𑁆𑀞𑀲𑁆𑀲 𑀅𑀤𑀽𑀭𑀝𑁆𑀞𑀸𑀦𑀜𑁆𑀘 𑀆𑀬𑀢𑁂𑀦 𑀲𑀭𑁂𑀦 𑀆𑀫𑀦𑁆𑀢𑀦𑀫𑁂𑀯 𑀧𑀫𑀸𑀡𑀁, 𑀦 𑀤𑀻𑀖𑀭𑀲𑁆𑀲𑀫𑀢𑁆𑀢𑀸𑀯𑀺𑀲𑁂𑀲𑁄, 𑀢𑀲𑁆𑀫𑀸 ‘‘𑀪𑁄 𑀲𑀢𑁆𑀣, 𑀪𑁄 𑀭𑀸𑀚, 𑀪𑁄 𑀕𑀘𑁆𑀙, 𑀪𑁄 𑀫𑀼𑀦𑀺, 𑀪𑁄 𑀤𑀡𑁆𑀟𑀺, 𑀪𑁄 𑀪𑀺𑀓𑁆𑀔𑀼, 𑀪𑁄 𑀲𑀬𑀫𑁆𑀪𑀼, 𑀪𑁄𑀢𑀺 𑀓𑀜𑁆𑀜𑁂, 𑀪𑁄𑀢𑀺 𑀧𑀢𑁆𑀢𑀺, 𑀪𑁄𑀢𑀺 𑀇𑀢𑁆𑀣𑀺, 𑀪𑁄𑀢𑀺 𑀬𑀸𑀕𑀼, 𑀪𑁄𑀢𑀺 𑀯𑀥𑀼, 𑀪𑁄 𑀓𑀼𑀮, 𑀪𑁄 𑀅𑀝𑁆𑀞𑀺, 𑀪𑁄 𑀘𑀓𑁆𑀔𑀼’’𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀧𑀤𑁂𑀳𑀺 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀜𑁆𑀘 𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀜𑁆𑀘 𑀪𑀯𑀢𑀺. ‘‘𑀪𑀯𑀦𑁆𑀢𑁄 𑀲𑀢𑁆𑀣𑀸, 𑀲𑀢𑁆𑀣𑀸𑀭𑁄, 𑀪𑁄𑀢𑀺𑀬𑁄 𑀓𑀜𑁆𑀜𑀸, 𑀓𑀜𑁆𑀜𑀸𑀬𑁄’’𑀢𑀺 𑀏𑀯𑀫𑀸𑀤𑀻𑀳𑀺𑀧𑀺 𑀧𑀤𑁂𑀳𑀺 𑀅𑀤𑀽𑀭𑀝𑁆𑀞𑀸𑀦𑀜𑁆𑀘𑀸𑀮𑀧𑀦𑀁 𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋

𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀭𑀜𑁆𑀜𑁄 𑀧𑀼𑀢𑁆𑀢𑀁 𑀅𑀤𑀲𑁆𑀲𑀬𑀼𑀁;

𑀧𑀼𑀢𑁆𑀢𑁄 𑀘 𑀧𑀺𑀢𑀭𑀁 𑀤𑀺𑀲𑁆𑀯𑀸, 𑀤𑀽𑀭𑀢𑁄𑀯𑀚𑁆𑀛𑀪𑀸𑀲𑀣.

𑀆𑀕𑀘𑁆𑀙𑀼 𑀤𑁄𑀯𑀸𑀭𑀺𑀓𑀸 𑀔𑀕𑁆𑀕𑀩𑀦𑁆𑀥𑀸,

𑀓𑀸𑀲𑀸𑀯𑀺𑀬𑀸 𑀳𑀦𑁆𑀢𑀼 𑀫𑀫𑀁 𑀚𑀦𑀺𑀦𑁆𑀤;

𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁,

𑀅𑀧𑀭𑀸𑀥𑁄 𑀓𑁄 𑀦𑁆𑀯𑀺𑀥 𑀫𑀫𑀚𑁆𑀚 𑀅𑀢𑁆𑀣𑀺.

𑀏𑀯𑀁 𑀲𑀤𑁆𑀥𑀫𑁆𑀫𑀭𑀸𑀚𑁂𑀦, 𑀯𑁄𑀳𑀸𑀭𑀓𑀼𑀲𑀮𑁂𑀦 𑀯𑁂;

𑀲𑀼𑀤𑁂𑀲𑀺𑀢𑁂 𑀲𑁄𑀫𑀦𑀲𑁆𑀲-𑀚𑀸𑀢𑀓𑁂 𑀲𑀩𑁆𑀩𑀤𑀲𑁆𑀲𑀺𑀦𑀸.

𑀤𑀽𑀭𑀝𑁆𑀞𑀸𑀦𑁂𑀧𑀺 𑀭𑀲𑁆𑀲𑀢𑁆𑀢𑀁, ‘‘𑀚𑀦𑀺𑀦𑁆𑀤’’𑀇𑀢𑀺 𑀤𑀺𑀲𑁆𑀲𑀢𑀺;

𑀦 𑀓𑀢𑁆𑀣𑀘𑀺𑀧𑀺 𑀤𑀻𑀖𑀢𑁆𑀢𑀁, 𑀇𑀢𑀺 𑀦𑀻𑀢𑀺 𑀫𑀬𑀸 𑀫𑀢𑀸.

𑀇𑀤𑀫𑁆𑀧𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 ‘‘𑀓𑀼𑀢𑁄 𑀦𑀼 𑀪𑁄 𑀇𑀤𑀫𑀸𑀬𑀸𑀢𑀁 ‘𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀁 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀫𑀺’𑀢𑀺’’? 𑀲𑀤𑁆𑀤𑀲𑀢𑁆𑀣𑀢𑁄. 𑀲𑀤𑁆𑀤𑀲𑀢𑁆𑀣𑀁 𑀦𑀸𑀫 𑀦 𑀲𑀩𑁆𑀩𑀲𑁄 𑀩𑀼𑀤𑁆𑀥𑀯𑀘𑀦𑀲𑁆𑀲𑁄𑀧𑀓𑀸𑀭𑀓𑀁, 𑀏𑀓𑀤𑁂𑀲𑁂𑀦 𑀧𑀦 𑀳𑁄𑀢𑀺.

𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 ‘‘𑀩𑀳𑀼𑀯𑀘𑀦’’𑀦𑁆𑀢𑀺 𑀯𑀸 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀯𑀸 ‘‘𑀅𑀦𑁂𑀓𑀯𑀘𑀦’’𑀦𑁆𑀢𑀺 𑀯𑀸 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 ‘‘𑀩𑀳𑀼𑀯𑀘𑀦’’𑀦𑁆𑀢𑀺 𑀯𑀸 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀯𑀸 ‘‘𑀅𑀦𑁂𑀓𑀯𑀘𑀦’’𑀦𑁆𑀢𑀺 𑀯𑀸 𑀯𑁄𑀳𑀸𑀭𑁄 𑀓𑀸𑀢𑀩𑁆𑀩𑁄, 𑀧𑀼𑀣𑀼𑀯𑀘𑀦𑀁 𑀅𑀦𑁂𑀓𑀯𑀘𑀦𑀦𑁆𑀢𑀺 𑀘 𑀇𑀤𑀁 𑀲𑀸𑀲𑀦𑁂 𑀦𑀺𑀭𑀼𑀢𑁆𑀢𑀜𑁆𑀜𑀽𑀦𑀁 𑀯𑁄𑀳𑀸𑀭𑁄, 𑀇𑀢𑀭𑀁 𑀲𑀤𑁆𑀤𑀲𑀢𑁆𑀣𑀯𑀺𑀤𑀽𑀦𑀁.

𑀓𑀲𑁆𑀫𑀸 𑀧𑀦 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀤𑁆𑀯𑀺𑀯𑀘𑀦𑀁 𑀦 𑀯𑀼𑀢𑁆𑀢𑀦𑁆𑀢𑀺? 𑀬𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑁂 𑀤𑁆𑀯𑀺𑀯𑀘𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺. 𑀦𑀦𑀼 𑀩𑀼𑀤𑁆𑀥𑀯𑀘𑀦𑁂 𑀯𑀘𑀦𑀢𑁆𑀢𑀬𑀁 𑀅𑀢𑁆𑀣𑀺, 𑀢𑀣𑀸 𑀳𑀺 ‘‘𑀆𑀬𑀲𑁆𑀫𑀸’’𑀢𑀺 𑀇𑀤𑀁 𑀏𑀓𑀯𑀘𑀦𑀁, ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀇𑀤𑀁 𑀤𑁆𑀯𑀺𑀯𑀘𑀦𑀁, ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺 𑀇𑀤𑀁 𑀩𑀳𑀼𑀯𑀘𑀦𑀦𑁆𑀢𑀺? 𑀢𑀦𑁆𑀦, 𑀬𑀤𑀺 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀁 𑀤𑁆𑀯𑀺𑀯𑀘𑀦𑀁 𑀪𑀯𑁂𑀬𑁆𑀬, ‘‘𑀧𑀼𑀭𑀺𑀲𑁄 𑀧𑀼𑀭𑀺𑀲𑀸’’𑀢𑀺𑀆𑀤𑀻𑀲𑀼 𑀓𑀢𑀭𑀁 𑀤𑁆𑀯𑀺𑀯𑀘𑀦𑀦𑁆𑀢𑀺 𑀯𑀤𑁂𑀬𑁆𑀬𑀸𑀣, 𑀢𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑁂 𑀤𑁆𑀯𑀺𑀯𑀘𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑁂𑀯 𑀳𑀺 𑀲𑀺 𑀬𑁄 𑀅𑀁 𑀬𑁄 𑀦𑀸 𑀳𑀻𑀢𑀺𑀆𑀤𑀺𑀦𑀸 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑁂𑀯 𑀤𑀲𑁆𑀲𑀺𑀢𑀸𑀦𑀻𑀢𑀺.

𑀦𑀦𑀼 𑀘 𑀪𑁄 ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀅𑀚𑁆𑀚 𑀉𑀧𑁄𑀲𑀣𑁄 𑀧𑀦𑁆𑀦𑀭𑀲𑁄. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫𑀸’’𑀢𑀺 𑀧𑀸𑀴𑀺𑀬𑀁 𑀤𑁆𑀯𑁂 𑀲𑀦𑁆𑀥𑀸𑀬 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁, ‘‘𑀉𑀤𑁆𑀤𑀺𑀝𑁆𑀞𑀸 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀧𑀦 𑀧𑀸𑀴𑀻𑀲𑀼 𑀩𑀳𑀯𑁄 𑀲𑀦𑁆𑀥𑀸𑀬 ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁, 𑀦 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀬𑀣𑀸 𑀢𑀣𑀸 𑀯𑀼𑀢𑁆𑀢’’𑀦𑁆𑀢𑀺, 𑀧𑀭𑀺𑀯𑀸𑀲𑀸𑀤𑀺𑀆𑀭𑁄𑀘𑀦𑁂𑀧𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀺𑀜𑁆𑀜𑀸𑀢𑀲𑀼𑀕𑀢𑀸𑀥𑀺𑀧𑁆𑀧𑀸𑀬𑁂𑀳𑀺 ‘‘𑀤𑁆𑀯𑀺𑀦𑁆𑀦𑀁 𑀆𑀭𑁄𑀘𑁂𑀦𑁆𑀢𑁂𑀦 ‘𑀆𑀬𑀲𑁆𑀫𑀦𑁆𑀢𑀸 𑀥𑀸𑀭𑁂𑀦𑁆𑀢𑀽’𑀢𑀺, 𑀢𑀺𑀡𑁆𑀡𑀁 𑀆𑀭𑁄𑀘𑁂𑀦𑁆𑀢𑁂𑀦 ‘𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺? 𑀲𑀘𑁆𑀘𑀁 𑀯𑀼𑀢𑁆𑀢𑀁, 𑀢𑀁 𑀧𑀦 𑀯𑀺𑀦𑀬𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀦𑀦𑀼 𑀯𑀺𑀦𑀬𑁄 𑀩𑀼𑀤𑁆𑀥𑀯𑀘𑀦𑀁, 𑀓𑀲𑁆𑀫𑀸 ‘‘𑀩𑀼𑀤𑁆𑀥𑀯𑀘𑀦𑁂 𑀤𑁆𑀯𑀺𑀯𑀘𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀤𑀣𑀸𑀢𑀺? 𑀲𑀘𑁆𑀘𑀁 𑀯𑀺𑀦𑀬𑁄 𑀩𑀼𑀤𑁆𑀥𑀯𑀘𑀦𑀁, 𑀢𑀣𑀸𑀧𑀺 𑀯𑀺𑀦𑀬𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀦 𑀲𑀩𑁆𑀩𑀲𑀸𑀥𑀸𑀭𑀡𑀩𑀳𑀼𑀯𑀘𑀦𑀧𑀭𑀺𑀬𑀸𑀧𑀦𑁆𑀦𑀁. 𑀬𑀤𑀺 𑀳𑀺 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀇𑀤𑀁 𑀤𑁆𑀯𑀺𑀯𑀘𑀦𑀁 𑀲𑀺𑀬𑀸, 𑀢𑀧𑁆𑀧𑀬𑁄𑀕𑀸𑀦𑀺𑀧𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀤𑁆𑀯𑀺𑀯𑀘𑀦𑀸𑀦𑁂𑀯 𑀲𑀺𑀬𑀼𑀁, 𑀢𑀣𑀸𑀭𑀽𑀧𑀸𑀦𑀺𑀧𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀦 𑀲𑀦𑁆𑀢𑀺. 𑀦 𑀳𑀺 𑀅𑀓𑁆𑀔𑀭𑀲𑀫𑀬𑀓𑁄𑀯𑀺𑀤𑁄 𑀛𑀸𑀦𑀮𑀸𑀪𑀻𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀲𑀫𑀯𑁂𑀓𑁆𑀔𑀦𑁆𑀢𑁄 𑀩𑀼𑀤𑁆𑀥𑀯𑀘𑀦𑁂 𑀏𑀓𑀫𑁆𑀧𑀺 𑀓𑁆𑀭𑀺𑀬𑀸𑀧𑀤𑀁 𑀤𑁆𑀯𑀺𑀯𑀘𑀦𑀦𑁆𑀢𑀺 𑀧𑀲𑁆𑀲𑁂𑀬𑁆𑀬, 𑀏𑀯𑀁 𑀓𑁆𑀭𑀺𑀬𑀸𑀧𑀤𑁂𑀲𑀼 𑀤𑁆𑀯𑀺𑀯𑀘𑀦𑀲𑁆𑀲𑀸𑀪𑀸𑀯𑀸 𑀦𑀸𑀫𑀺𑀓𑀧𑀤𑁂𑀲𑀼 𑀤𑁆𑀯𑀺𑀯𑀘𑀦𑀁 𑀦𑀢𑁆𑀣𑀺. 𑀦𑀸𑀫𑀺𑀓𑀧𑀤𑁂𑀲𑀼 𑀢𑀤𑀪𑀸𑀯𑀸𑀧𑀺 𑀓𑁆𑀭𑀺𑀬𑀸𑀧𑀤𑁂𑀲𑀼 𑀢𑀤𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀓𑁆𑀓𑀝𑀪𑀸𑀲𑀸𑀬𑀁 𑀤𑁆𑀯𑀻𑀲𑀼𑀧𑀺 𑀤𑁆𑀯𑀺𑀯𑀘𑀦𑀸𑀦𑀺 𑀲𑀦𑁆𑀢𑀺, 𑀫𑀸𑀕𑀥𑀪𑀸𑀲𑀸𑀬𑀁 𑀧𑀦 𑀦𑀢𑁆𑀣𑀺.

𑀅𑀧𑀺𑀘 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀯𑁄𑀳𑀸𑀭𑁄𑀧𑀺 ‘‘𑀩𑀼𑀤𑁆𑀥𑀯𑀘𑀦𑁂 𑀤𑁆𑀯𑀺𑀯𑀘𑀦𑀁 𑀦𑀢𑁆𑀣𑀻’’𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀢𑀜𑁆𑀳𑀺 𑀲𑀓𑁆𑀓𑀝𑀪𑀸𑀲𑀸𑀬𑀁 𑀯𑀼𑀢𑁆𑀢𑀸 𑀤𑁆𑀯𑀺𑀯𑀘𑀦𑀢𑁄 𑀩𑀳𑀼𑀯𑀘𑀦𑀢𑁄 𑀘 𑀯𑀺𑀲𑀼𑀁𑀪𑀽𑀢𑀁 𑀯𑀘𑀦𑀁, 𑀢𑀢𑁆𑀣 𑀯𑀸 𑀯𑀼𑀢𑁆𑀢𑁂𑀳𑀺 𑀅𑀢𑁆𑀣𑁂𑀳𑀺 𑀯𑀺𑀲𑀼𑀁𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀘𑀦𑀁 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀫𑀺𑀤𑀁 𑀲𑀓𑁆𑀓𑀝𑀪𑀸𑀲𑀸𑀬𑀁 𑀯𑀼𑀢𑁆𑀢𑀸 𑀤𑁆𑀯𑀺𑀯𑀘𑀦𑀢𑁄 𑀩𑀳𑀼𑀯𑀘𑀦𑀢𑁄 𑀘 𑀯𑀺𑀲𑀼𑀁𑀪𑀽𑀢𑀁 𑀯𑀘𑀦𑀦𑁆𑀢𑀺 𑀘𑁂? 𑀬𑀲𑁆𑀫𑀸 𑀲𑀓𑁆𑀓𑀝𑀪𑀸𑀲𑀸𑀬𑀁 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀯𑁄𑀳𑀸𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀤𑀁 𑀢𑁂𑀳𑀺 𑀲𑀓𑁆𑀓𑀝𑀪𑀸𑀲𑀸𑀬𑀁 𑀯𑀼𑀢𑁆𑀢𑁂𑀳𑀺 𑀤𑁆𑀯𑀺𑀯𑀘𑀦𑀩𑀳𑀼𑀯𑀘𑀦𑁂𑀳𑀺 𑀯𑀺𑀲𑀼𑀁𑀪𑀽𑀢𑀅𑀢𑁆𑀣𑀲𑁆𑀲 𑀯𑀘𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀜𑁆𑀘 𑀧𑀦 𑀲𑀓𑁆𑀓𑀝𑀪𑀸𑀲𑀸𑀬𑀁 𑀯𑀼𑀢𑁆𑀢𑁂𑀳𑀺 𑀯𑀺𑀲𑀼𑀁𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀘𑀦𑀦𑁆𑀢𑀺 𑀧𑀼𑀣𑀼𑀯𑀘𑀦𑀦𑁆𑀢𑀺 𑀘𑁂? 𑀬𑀲𑁆𑀫𑀸 𑀲𑀓𑁆𑀓𑀝𑀪𑀸𑀲𑀸𑀬𑀁 𑀤𑁆𑀯𑁂 𑀉𑀧𑀸𑀤𑀸𑀬 𑀤𑁆𑀯𑀺𑀯𑀘𑀦𑀁 𑀯𑀼𑀢𑁆𑀢𑀁, 𑀦 𑀢𑀺𑀘𑀢𑀼𑀧𑀜𑁆𑀘𑀸𑀤𑀺𑀓𑁂 𑀩𑀳𑀯𑁄 𑀉𑀧𑀸𑀤𑀸𑀬, 𑀩𑀳𑀯𑁄 𑀧𑀦 𑀉𑀧𑀸𑀤𑀸𑀬 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁, 𑀦 𑀤𑁆𑀯𑁂 𑀉𑀧𑀸𑀤𑀸𑀬, 𑀅𑀬𑀁 𑀲𑀓𑁆𑀓𑀝𑀪𑀸𑀲𑀸𑀬 𑀯𑀺𑀲𑁂𑀲𑁄. 𑀫𑀸𑀕𑀥𑀪𑀸𑀲𑀸𑀬𑀁 𑀧𑀦 𑀤𑁆𑀯𑀺𑀢𑀺𑀘𑀢𑀼𑀧𑀜𑁆𑀘𑀸𑀤𑀺𑀓𑁂 𑀩𑀳𑀯𑁄 𑀉𑀧𑀸𑀤𑀸𑀬 𑀧𑀼𑀣𑀼𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀓𑁆𑀓𑀝𑀪𑀸𑀲𑀸𑀬𑀁 𑀯𑀼𑀢𑁆𑀢𑁂𑀳𑀺 𑀅𑀢𑁆𑀣𑁂𑀳𑀺 𑀯𑀺𑀲𑀼𑀁𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀘𑀦𑀦𑁆𑀢𑀺 𑀧𑀼𑀣𑀼𑀯𑀘𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀫𑀸𑀕𑀥𑀪𑀸𑀲𑀸𑀬 𑀯𑀺𑀲𑁂𑀲𑁄. 𑀢𑀲𑁆𑀫𑀸𑀢𑁆𑀭 𑀧𑀼𑀣𑀼𑀪𑀽𑀢𑀲𑁆𑀲, 𑀧𑀼𑀣𑀼𑀦𑁄 𑀯𑀸 𑀅𑀢𑁆𑀣𑀲𑁆𑀲 𑀯𑀘𑀦𑀁 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀅𑀢𑁆𑀣𑁄 𑀲𑀫𑀥𑀺𑀕𑀦𑁆𑀢𑀩𑁆𑀩𑁄.

𑀇𑀤𑀸𑀦𑀺 ‘‘𑀧𑀼𑀭𑀺𑀲𑁄, 𑀧𑀼𑀭𑀺𑀲𑀸, 𑀧𑀼𑀭𑀺𑀲’’𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀢𑁄 𑀉𑀤𑁆𑀥𑀭𑀺𑀢𑀦𑀬𑀁 𑀦𑀺𑀲𑁆𑀲𑀸𑀬 𑀧𑀓𑀢𑀺𑀭𑀽𑀧𑀪𑀽𑀢𑀲𑁆𑀲 𑀪𑀽𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀪𑀽𑀢𑁄, 𑀪𑀽𑀢𑀸. 𑀪𑀽𑀢𑀁, 𑀪𑀽𑀢𑁂. 𑀪𑀽𑀢𑁂𑀦, 𑀪𑀽𑀢𑁂𑀳𑀺, 𑀪𑀽𑀢𑁂𑀪𑀺. 𑀪𑀽𑀢𑀲𑁆𑀲, 𑀪𑀽𑀢𑀸𑀦𑀁. 𑀪𑀽𑀢𑀸, 𑀪𑀽𑀢𑀲𑁆𑀫𑀸, 𑀪𑀽𑀢𑀫𑁆𑀳𑀸, 𑀪𑀽𑀢𑁂𑀳𑀺, 𑀪𑀽𑀢𑁂𑀪𑀺. 𑀪𑀽𑀢𑀲𑁆𑀲, 𑀪𑀽𑀢𑀸𑀦𑀁. 𑀪𑀽𑀢𑁂, 𑀪𑀽𑀢𑀲𑁆𑀫𑀺𑀁, 𑀪𑀽𑀢𑀫𑁆𑀳𑀺, 𑀪𑀽𑀢𑁂𑀲𑀼. 𑀪𑁄 𑀪𑀽𑀢, 𑀪𑀯𑀦𑁆𑀢𑁄 𑀪𑀽𑀢𑀸.

𑀅𑀣 𑀯𑀸 ‘‘𑀪𑁄 𑀪𑀽𑀢𑀸’’𑀇𑀢𑀺 𑀩𑀳𑀼𑀯𑀘𑀦𑀁 𑀯𑀺𑀜𑁆𑀜𑁂𑀬𑁆𑀬𑀁. 𑀬𑀣𑀸 𑀧𑀦𑁂𑀢𑁆𑀣 𑀪𑀽𑀢𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑀺𑀢𑀸, 𑀏𑀯𑀁 𑀪𑀸𑀯𑀓𑀸𑀤𑀻𑀦𑀜𑁆𑀘 𑀅𑀜𑁆𑀜𑁂𑀲𑀜𑁆𑀘 𑀢𑀁𑀲𑀤𑀺𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀏𑀢𑁆𑀣𑀜𑁆𑀜𑀸𑀦𑀺 𑀢𑀁𑀲𑀤𑀺𑀲𑀸𑀦𑀺 𑀦𑀸𑀫 ‘‘𑀩𑀼𑀤𑁆𑀥𑁄’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀩𑀼𑀤𑁆𑀥𑀇𑀘𑁆𑀘𑀸𑀤𑀻𑀦𑀺 𑀧𑀓𑀢𑀺𑀭𑀽𑀧𑀸𑀦𑀺.

𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄 𑀫𑀕𑁆𑀕𑁄,

𑀔𑀦𑁆𑀥𑁄 𑀓𑀸𑀬𑁄 𑀓𑀸𑀫𑁄 𑀓𑀧𑁆𑀧𑁄;

𑀫𑀸𑀲𑁄 𑀧𑀓𑁆𑀔𑁄 𑀬𑀓𑁆𑀔𑁄 𑀪𑀓𑁆𑀔𑁄,

𑀦𑀸𑀕𑁄 𑀫𑁂𑀖𑁄 𑀪𑁄𑀕𑁄 𑀬𑀸𑀕𑁄.

𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄,

𑀫𑀓𑁆𑀔𑁄 𑀣𑀫𑁆𑀪𑁄 𑀓𑁄𑀥𑁄 𑀮𑁄𑀪𑁄;

𑀳𑀸𑀲𑁄 𑀯𑁂𑀭𑁄 𑀤𑀸𑀳𑁄 𑀢𑁂𑀚𑁄,

𑀙𑀦𑁆𑀤𑁄 𑀓𑀸𑀲𑁄 𑀲𑀸𑀲𑁄 𑀭𑁄𑀕𑁄.

𑀅𑀲𑁆𑀲𑁄 𑀲𑀲𑁆𑀲𑁄 𑀇𑀲𑁆𑀲𑁄 𑀲𑀺𑀲𑁆𑀲𑁄,

𑀲𑀻𑀳𑁄 𑀩𑁆𑀬𑀕𑁆𑀖𑁄 𑀭𑀼𑀓𑁆𑀔𑁄 𑀲𑁂𑀮𑁄;

𑀇𑀦𑁆𑀤𑁄 𑀲𑀓𑁆𑀓𑁄 𑀤𑁂𑀯𑁄 𑀕𑀸𑀫𑁄,

𑀘𑀦𑁆𑀤𑁄 𑀲𑀽𑀭𑁄 𑀑𑀖𑁄 𑀤𑀻𑀧𑁄.

𑀧𑀲𑁆𑀲𑁄 𑀬𑀜𑁆𑀜𑁄 𑀘𑀸𑀕𑁄 𑀯𑀸𑀤𑁄,

𑀳𑀢𑁆𑀣𑁄 𑀧𑀢𑁆𑀢𑁄 𑀲𑁄𑀲𑁄 𑀕𑁂𑀥𑁄;

𑀲𑁄𑀫𑁄 𑀬𑁄𑀥𑁄 𑀕𑀘𑁆𑀙𑁄 𑀅𑀘𑁆𑀙𑁄,

𑀕𑁂𑀳𑁄 𑀫𑀸𑀴𑁄 𑀅𑀝𑁆𑀝𑁄 𑀲𑀸𑀮𑁄.

𑀦𑀭𑁄 𑀦𑀕𑁄 𑀫𑀺𑀕𑁄 𑀲𑀲𑁄,

𑀲𑀼𑀡𑁄 𑀩𑀓𑁄 𑀅𑀚𑁄 𑀤𑀺𑀚𑁄;

𑀳𑀬𑁄 𑀕𑀚𑁄 𑀔𑀭𑁄 𑀲𑀭𑁄,

𑀤𑀼𑀫𑁄 𑀢𑀮𑁄 𑀧𑀝𑁄 𑀥𑀚𑁄.

𑀉𑀭𑀕𑁄 𑀧𑀝𑀕𑁄 𑀯𑀺𑀳𑀕𑁄 𑀪𑀼𑀚𑀕𑁄,

𑀔𑀭𑀪𑁄 𑀲𑀭𑀪𑁄 𑀧𑀲𑀤𑁄 𑀕𑀯𑀚𑁄;

𑀫𑀳𑀺𑀲𑁄 𑀯𑀲𑀪𑁄 𑀅𑀲𑀼𑀭𑁄 𑀕𑀭𑀼𑀴𑁄,

𑀢𑀭𑀼𑀡𑁄 𑀯𑀭𑀼𑀡𑁄 𑀩𑀮𑀺𑀲𑁄 𑀧𑀮𑀺𑀖𑁄.

𑀲𑀸𑀮𑁄 𑀥𑀯𑁄 𑀘 𑀔𑀤𑀺𑀭𑁄,

𑀕𑁄𑀥𑀼𑀫𑁄 𑀲𑀝𑁆𑀞𑀺𑀓𑁄 𑀬𑀯𑁄;

𑀓𑀴𑀸𑀬𑁄 𑀘 𑀓𑀼𑀮𑀢𑁆𑀣𑁄 𑀘,

𑀢𑀺𑀮𑁄 𑀫𑀼𑀕𑁆𑀕𑁄 𑀘 𑀢𑀡𑁆𑀟𑀼𑀮𑁄.

𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀯𑁂𑀲𑁆𑀲𑁄,

𑀲𑀼𑀤𑁆𑀤𑁄 𑀥𑀼𑀢𑁆𑀢𑁄 𑀘 𑀧𑀼𑀓𑁆𑀓𑀼𑀲𑁄;

𑀘𑀡𑁆𑀟𑀸𑀮𑁄 𑀧𑀢𑀺𑀓𑁄 𑀧𑀝𑁆𑀞𑁄,

𑀫𑀦𑀼𑀲𑁆𑀲𑁄 𑀭𑀣𑀺𑀓𑁄 𑀭𑀣𑁄.

𑀧𑀩𑁆𑀩𑀚𑀺𑀢𑁄 𑀕𑀳𑀝𑁆𑀞𑁄 𑀘,

𑀕𑁄𑀡𑁄 𑀑𑀝𑁆𑀞𑁄 𑀘 𑀕𑀤𑁆𑀭𑀪𑁄;

𑀫𑀸𑀢𑀼𑀕𑀸𑀫𑁄 𑀘 𑀑𑀭𑁄𑀥𑁄,

𑀇𑀘𑁆𑀘𑀸𑀤𑀻𑀦𑀺 𑀯𑀺𑀪𑀸𑀯𑀬𑁂.

𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀦𑀦𑀼 𑀪𑁄 ‘𑀑𑀭𑁄𑀥𑀸 𑀘 𑀓𑀼𑀫𑀸𑀭𑀸 𑀘𑀸’𑀢𑀺 𑀧𑀸𑀞𑀲𑁆𑀲 𑀤𑀲𑁆𑀲𑀦𑀢𑁄 𑀑𑀭𑁄𑀥𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄’’𑀢𑀺? 𑀢𑀦𑁆𑀦, 𑀢𑀢𑁆𑀣 𑀳𑀺 ‘‘𑀑𑀭𑁄𑀥𑀸’’𑀢𑀺 𑀇𑀤𑀁 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀫𑁂𑀯, 𑀦𑀸’𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁, 𑀢𑀼𑀫𑁆𑀳𑁂 𑀧𑀦 ‘‘𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀁 𑀯𑀤𑀣, 𑀦 𑀧𑀦𑀺𑀤𑀁 𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁, 𑀅𑀣 𑀔𑁄 ‘‘𑀫𑀸𑀢𑀼𑀕𑀸𑀫𑀸’’𑀢𑀺𑀧𑀤𑀁 𑀯𑀺𑀬 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀫𑀸𑀓𑀸𑀭𑀦𑁆𑀢𑀧𑀤𑀦𑁆𑀢𑀺. 𑀦𑀦𑀼 𑀘 𑀪𑁄 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸𑀤𑀻𑀲𑀼 𑀑𑀭𑁄𑀥𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑀸 𑀧𑀸𑀓𑀝𑀸, 𑀓𑀣𑀦𑁆𑀢𑀺 𑀘𑁂? ‘‘𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀣𑁂𑀭𑀲𑁆𑀲 𑀓𑀼𑀤𑁆𑀥𑀸 𑀧𑀞𑀫𑀫𑁂𑀯 𑀫𑀦𑀁 𑀧𑀮𑁄𑀪𑁂𑀢𑁆𑀯𑀸 ‘𑀇𑀢𑁄 𑀢𑁂 𑀲𑀢𑁆𑀢𑀤𑀺𑀯𑀲𑀫𑀢𑁆𑀣𑀓𑁂 𑀉𑀧𑀝𑁆𑀞𑀸𑀓𑁄 𑀭𑀸𑀚𑀸 𑀫𑀭𑀺𑀲𑁆𑀲𑀢𑀻’𑀢𑀺 𑀲𑀼𑀧𑀺𑀦𑁂 𑀆𑀭𑁄𑀘𑁂𑀲𑀺. 𑀣𑁂𑀭𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀭𑀸𑀚𑁄𑀭𑁄𑀥𑀸𑀦𑀁 𑀆𑀘𑀺𑀓𑁆𑀔𑀺. 𑀢𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀁𑀲𑀽’’𑀢𑀺. 𑀏𑀢𑁆𑀣 𑀳𑀺 ‘‘𑀭𑀸𑀚𑁄𑀭𑁄𑀥𑀸𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀯 𑀑𑀭𑁄𑀥𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑀸 𑀧𑀸𑀓𑀝𑀸𑀢𑀺? 𑀢𑀦𑁆𑀦, 𑀅𑀢𑁆𑀣𑀲𑁆𑀲 𑀤𑀼𑀕𑁆𑀕𑀳𑀡𑀢𑁄. 𑀤𑀼𑀕𑁆𑀕𑀳𑀺𑀢𑁄 𑀳𑀺 𑀏𑀢𑁆𑀣 𑀢𑀼𑀫𑁆𑀳𑁂𑀳𑀺 𑀅𑀢𑁆𑀣𑁄, 𑀏𑀢𑁆𑀣 𑀧𑀦 𑀑𑀭𑁄𑀥𑀲𑀤𑁆𑀤𑁂𑀦 𑀇𑀢𑁆𑀣𑀺𑀧𑀤𑀢𑁆𑀣𑀲𑁆𑀲 𑀓𑀣𑀦𑀢𑁄 𑀇𑀢𑁆𑀣𑀺𑀧𑀤𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀸 𑀇𑀢𑁆𑀣𑀺𑀬𑁄’’𑀢𑀺 𑀅𑀬𑀫𑁂𑀯𑀢𑁆𑀣𑁄. 𑀢𑀼𑀫𑁆𑀳𑁂 𑀧𑀦 𑀅𑀫𑀸𑀢𑀸𑀧𑀺𑀢𑀭𑀲𑀁𑀯𑀤𑁆𑀥𑀢𑁆𑀢𑀸 𑀆𑀘𑀭𑀺𑀬𑀓𑀼𑀮𑁂 𑀘 𑀅𑀦𑀺𑀯𑀼𑀝𑁆𑀞𑀢𑁆𑀢𑀸 𑀏𑀢𑀁 𑀲𑀼𑀔𑀼𑀫𑀢𑁆𑀣𑀫𑀚𑀸𑀦𑀦𑁆𑀢𑀸 𑀬𑀁 𑀯𑀸 𑀢𑀁 𑀯𑀸 𑀫𑀼𑀔𑀸𑀭𑀽𑀴𑁆𑀳𑀁 𑀯𑀤𑀣.

𑀪𑀼𑀜𑁆𑀚𑀦𑀢𑁆𑀣𑀁 𑀓𑀣𑀦𑀢𑁆𑀣𑀁, 𑀫𑀼𑀔𑀁 𑀳𑁄𑀢𑀻𑀢𑀺 𑀦𑁄 𑀯𑀤𑁂;

𑀬𑀁 𑀯𑀸 𑀢𑀁 𑀯𑀸 𑀫𑀼𑀔𑀸𑀭𑀽𑀴𑁆𑀳𑀁, 𑀯𑀘𑀦𑀁 𑀧𑀡𑁆𑀟𑀺𑀢𑁄 𑀦𑀭𑁄𑀢𑀺.

𑀦 𑀫𑀬𑀁𑀪𑁄 𑀬𑀁 𑀯𑀸 𑀢𑀁 𑀯𑀸 𑀫𑀼𑀔𑀸𑀭𑀽𑀴𑁆𑀳𑀁 𑀯𑀤𑀸𑀫, 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀜𑁆𑀜𑁂𑀯 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀯𑀤𑀸𑀫, 𑀅𑀝𑁆𑀞𑀓𑀣𑀸𑀬𑁂𑀯 𑀅𑀫𑁆𑀳𑀸𑀓𑀁 𑀧𑀝𑀺𑀲𑀭𑀡𑀁, 𑀦 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀲𑀤𑁆𑀤𑀳𑀸𑀫𑀸𑀢𑀺. 𑀅𑀫𑁆𑀳𑀸𑀓𑀁 𑀲𑀤𑁆𑀤𑀳𑀣 𑀯𑀸 𑀫𑀸 𑀯𑀸, 𑀫𑀸 𑀢𑀼𑀫𑁆𑀳𑁂 ‘‘𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀜𑁆𑀜𑁂𑀯 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀯𑀤𑀸𑀫𑀸’’𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂 𑀅𑀩𑁆𑀪𑀸𑀘𑀺𑀓𑁆𑀔𑀣. 𑀦 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 ‘‘𑀑𑀭𑁄𑀥𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀫𑀢𑁆𑀣𑀺, 𑀢𑀲𑁆𑀫𑀸𑀧𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂 𑀅𑀩𑁆𑀪𑀸𑀘𑀺𑀓𑁆𑀔𑀣, 𑀦 𑀬𑀼𑀢𑁆𑀢𑀁 𑀩𑀼𑀤𑁆𑀥𑀸𑀤𑀻𑀦𑀁 𑀕𑀭𑀽𑀦𑀫𑀩𑁆𑀪𑀸𑀘𑀺𑀓𑁆𑀔𑀦𑀁 𑀫𑀳𑀢𑁄 𑀅𑀦𑀢𑁆𑀣𑀲𑁆𑀲 𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀢𑀢𑁄 𑀅𑀢𑁆𑀢𑀸𑀦𑀜𑁆𑀘 𑀔𑀡𑀢𑀻’’𑀢𑀺.

𑀏𑀯𑀁 𑀅𑀩𑁆𑀪𑀸𑀘𑀺𑀓𑁆𑀔𑀦𑀲𑁆𑀲 𑀅𑀬𑀼𑀢𑁆𑀢𑀢𑀁 𑀲𑀸𑀯𑀚𑁆𑀚𑀢𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦𑀧𑀺 𑀢𑁂 𑀇𑀤𑀁 𑀯𑀢𑁆𑀢𑀩𑁆𑀩𑀸 𑁋 𑀚𑀸𑀢𑀓𑀝𑁆𑀞𑀓𑀣𑀸𑀬𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀆𑀳𑀝𑀉𑀤𑀸𑀳𑀭𑀡𑀲𑀤𑀺𑀲𑀁 𑀉𑀤𑀸𑀳𑀭𑀡𑀫𑀢𑁆𑀣𑀺, 𑀢𑀁 𑀲𑀼𑀡𑀸𑀣. 𑀓𑁄𑀲𑀺𑀬𑀚𑀸𑀢𑀓𑀝𑁆𑀞𑀓𑀣𑀸𑀬𑀜𑁆𑀳𑀺 ‘‘𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀸𑀯𑀢𑁆𑀣𑀺𑀬𑀁 𑀫𑀸𑀢𑀼𑀕𑀸𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀓𑀺𑀭𑁂𑀓𑀲𑁆𑀲 𑀲𑀤𑁆𑀥𑀲𑁆𑀲 𑀧𑀲𑀦𑁆𑀦𑀲𑁆𑀲 𑀉𑀧𑀸𑀲𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀏𑀢𑁆𑀣 𑀳𑀺 ‘‘𑀫𑀸𑀢𑀼𑀕𑀸𑀫𑀁 𑀆𑀭𑀩𑁆𑀪 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀼𑀫𑁆𑀳𑀸𑀓𑀁 𑀫𑀢𑁂𑀦 𑀫𑀸𑀢𑀼𑀕𑀸𑀫𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄𑀬𑁂𑀯 𑀲𑀺𑀬𑀸, 𑀦 𑀧𑀼𑀮𑁆𑀮𑀺𑀗𑁆𑀕𑁄, 𑀓𑀺𑀫𑀺𑀤𑀁 𑀅𑀝𑁆𑀞𑀓𑀣𑀸𑀯𑀘𑀦𑀫𑁆𑀧𑀺 𑀦 𑀧𑀲𑁆𑀲𑀣, 𑀢𑀤𑁂𑀯 𑀧𑀦 𑀅𑀝𑁆𑀞𑀓𑀣𑀸𑀯𑀘𑀦𑀁 𑀧𑀲𑁆𑀲𑀣, 𑀓𑀺𑀁 𑀲𑀸 𑀏𑀯 𑀅𑀝𑁆𑀞𑀓𑀣𑀸 𑀢𑀼𑀫𑁆𑀳𑀸𑀓𑀁 𑀧𑀝𑀺𑀲𑀭𑀡𑀁, 𑀦 𑀢𑀤𑀜𑁆𑀜𑀸𑀢𑀺.

𑀬𑀤𑀺 𑀢𑀸𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀑𑀭𑁄𑀥𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀫𑀺𑀘𑁆𑀙𑀣, 𑀏𑀢𑁆𑀣𑀸𑀧𑀺 𑀲𑀸𑀲𑀤𑁆𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀫𑀸𑀢𑀼𑀕𑀸𑀫𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀫𑀺𑀘𑁆𑀙𑀣𑀸𑀢𑀺. 𑀏𑀯𑀁 𑀯𑀼𑀢𑁆𑀢𑀸 𑀢𑁂 𑀦𑀺𑀭𑀼𑀢𑁆𑀢𑀭𑀸 𑀅𑀧𑁆𑀧𑀝𑀺𑀪𑀸𑀦𑀸 𑀫𑀗𑁆𑀓𑀼𑀪𑀽𑀢𑀸 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀧𑀚𑁆𑀛𑀸𑀬𑁂𑀬𑁆𑀬𑀼𑀁. 𑀏𑀢𑁆𑀣𑀸𑀧𑀺 𑀫𑀸𑀢𑀼𑀕𑀸𑀫𑀲𑀤𑁆𑀤𑁂𑀦 𑀇𑀢𑁆𑀣𑀺𑀧𑀤𑀢𑁆𑀣𑀲𑁆𑀲 𑀓𑀣𑀦𑀢𑁄 𑀇𑀢𑁆𑀣𑀺𑀧𑀤𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀸 𑀇𑀢𑁆𑀣𑀻’’𑀢𑀺 𑀅𑀬𑀫𑁂𑀯𑀢𑁆𑀣𑁄. 𑀓𑀢𑁆𑀣𑀘𑀺 𑀳𑀺 𑀧𑀥𑀸𑀦𑀯𑀸𑀘𑀓𑁂𑀦 𑀧𑀼𑀮𑁆𑀮𑀺𑀗𑁆𑀕𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀯𑀸 𑀲𑀫𑀸𑀦𑀸𑀥𑀺𑀓𑀭𑀡𑀲𑁆𑀲 𑀕𑀼𑀡𑀲𑀤𑁆𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀯𑀢𑁆𑀢𑀺𑀢𑁆𑀢𑀸𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑁂𑀧𑀺 𑀮𑀺𑀗𑁆𑀕𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀇𑀢𑁆𑀣𑀺𑀧𑀤𑀢𑁆𑀣𑀫𑁂𑀯𑀸𑀧𑁂𑀓𑁆𑀔𑀺𑀢𑁆𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺. 𑀢𑀁 𑀬𑀣𑀸? ‘‘𑀇𑀥 𑀯𑀺𑀲𑀸𑀔𑁂 𑀫𑀸𑀢𑀼𑀕𑀸𑀫𑁄 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸 𑀳𑁄𑀢𑀺 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀸 𑀪𑀢𑁆𑀢𑀼𑀫𑀦𑀸𑀧𑀁 𑀘𑀭𑀢𑀺, 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀻’’𑀢𑀺 𑀘, ‘‘𑀓𑁄 𑀦𑀼 𑀔𑁄 𑀪𑀦𑁆𑀢𑁂 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀤𑀼𑀩𑁆𑀩𑀡𑁆𑀡𑀸 𑀘 𑀳𑁄𑀢𑀺 𑀤𑀼𑀭𑀽𑀧𑀸 𑀲𑀼𑀧𑀸𑀧𑀺𑀓𑀸 𑀤𑀲𑁆𑀲𑀦𑀸𑀬, 𑀤𑀮𑀺𑀤𑁆𑀤𑀸 𑀘 𑀳𑁄𑀢𑀺 𑀅𑀧𑁆𑀧𑀲𑁆𑀲𑀓𑀸 𑀅𑀧𑁆𑀧𑀪𑁄𑀕𑀸 𑀅𑀧𑁆𑀧𑁂𑀲𑀓𑁆𑀔𑀸 𑀘. 𑀇𑀥 𑀫𑀮𑁆𑀮𑀺𑀓𑁂 𑀏𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀓𑁄𑀥𑀦𑀸 𑀳𑁄𑀢𑀺 𑀉𑀧𑀸𑀬𑀸𑀲𑀩𑀳𑀼𑀮𑀸, 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑀸 𑀲𑀫𑀸𑀦𑀸 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀢𑁆𑀣𑀺𑀬𑀢𑀺 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀻’’𑀢𑀺 𑀘, ‘‘𑀢𑀁 𑀔𑁄 𑀧𑀦 𑀪𑀺𑀓𑁆𑀔𑀯𑁂 𑀇𑀢𑁆𑀣𑀺𑀭𑀢𑀦𑀁 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀻 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀻 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻’’𑀢𑀺 𑀘 𑀇𑀫𑁂 𑀧𑀬𑁄𑀕𑀸.

𑀓𑀢𑁆𑀣𑀘𑀺 𑀧𑀦 𑀧𑀥𑀸𑀦𑀯𑀸𑀘𑀓𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀲𑁆𑀲 𑀕𑀼𑀡𑀲𑀤𑁆𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀯𑀢𑁆𑀢𑀺𑀢𑁆𑀢𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑁂𑀧𑀺 𑀮𑀺𑀗𑁆𑀕𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀼𑀭𑀺𑀲𑀧𑀤𑀢𑁆𑀣𑀫𑁂𑀯𑀸𑀧𑁂𑀓𑁆𑀔𑀺𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺. 𑀢𑀁 𑀬𑀣𑀸? ‘‘𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀢𑀸𑀦𑀺 𑀇𑀫𑀲𑁆𑀫𑀺𑀁 𑀇𑀲𑀺𑀕𑀺𑀮𑀺𑀲𑁆𑀫𑀺𑀁 𑀧𑀩𑁆𑀩𑀢𑁂 𑀘𑀺𑀭𑀦𑀺𑀯𑀸𑀲𑀺𑀦𑁄 𑀅𑀳𑁂𑀲𑀼𑀁. 𑀢𑀁 𑀔𑁄 𑀧𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀭𑀺𑀡𑀸𑀬𑀓𑀭𑀢𑀦𑀁 𑀜𑀸𑀢𑀸𑀦𑀁 𑀧𑀯𑁂𑀲𑁂𑀢𑀸 𑀅𑀜𑁆𑀜𑀸𑀢𑀸𑀦𑀁 𑀦𑀺𑀯𑀸𑀭𑁂𑀢𑀸’’𑀢𑀺. 𑀓𑀢𑁆𑀣𑀘𑀺 𑀧𑀥𑀸𑀦𑀯𑀸𑀘𑀓𑁂𑀦 𑀮𑀺𑀗𑁆𑀕𑀢𑁆𑀢𑀬𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀲𑁆𑀲 𑀕𑀼𑀡𑀲𑀤𑁆𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀭𑀽𑀧𑀁 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺. 𑀢𑀁 𑀬𑀣𑀸? 𑀲𑀸 𑀇𑀢𑁆𑀣𑀻 ‘‘𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸. 𑀅𑀝𑁆𑀞𑀳𑀺 𑀔𑁄 𑀦𑀓𑀼𑀮𑀫𑀸𑀢𑁂 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀫𑁆𑀫𑀭𑀡𑀸 𑀫𑀦𑀸𑀧𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄, 𑀲𑀤𑁆𑀥𑀁 𑀓𑀼𑀮𑀁, 𑀘𑀺𑀢𑁆𑀢𑀁 𑀤𑀦𑁆𑀢𑀁 𑀲𑀼𑀔𑀸𑀯𑀳’’𑀦𑁆𑀢𑀺.

𑀲𑁂𑀬𑁆𑀬𑀇𑀢𑀺 𑀲𑀤𑁆𑀤𑁄 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀑𑀓𑀸𑀭𑀦𑁆𑀢𑀪𑀸𑀯𑁂 𑀞𑀢𑁆𑀯𑀸 𑀮𑀺𑀗𑁆𑀕𑀢𑁆𑀢𑀬𑀸𑀦𑀼𑀓𑀽𑀮𑁄 𑀪𑀯𑀢𑀺 𑀏𑀓𑀸𑀓𑀸𑀭𑁂𑀦𑁂𑀯 𑀢𑀺𑀝𑁆𑀞𑀦𑀢𑁄. 𑀓𑀣𑀁? 𑀲𑁂𑀬𑁆𑀬𑁄 𑀅𑀫𑀺𑀢𑁆𑀢𑁄 𑀫𑀢𑀺𑀬𑀸 𑀉𑀧𑁂𑀢𑁄. 𑀏𑀲𑀸𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄, 𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄.

‘‘𑀥𑀫𑁆𑀫𑁂𑀦 𑀘 𑀅𑀮𑀸𑀪𑁄 𑀬𑁄,

𑀬𑁄 𑀘 𑀮𑀸𑀪𑁄 𑀅𑀥𑀫𑁆𑀫𑀺𑀓𑁄;

𑀅𑀮𑀸𑀪𑁄 𑀥𑀫𑁆𑀫𑀺𑀓𑁄 𑀲𑁂𑀬𑁆𑀬𑁄,

𑀬𑀜𑁆𑀘𑁂 𑀮𑀸𑀪𑁄 𑀅𑀥𑀫𑁆𑀫𑀺𑀓𑁄.

𑀬𑀲𑁄 𑀘 𑀅𑀧𑁆𑀧𑀩𑀼𑀤𑁆𑀥𑀻𑀦𑀁, 𑀯𑀺𑀜𑁆𑀜𑀽𑀦𑀁 𑀅𑀬𑀲𑁄 𑀘 𑀬𑁄;

𑀅𑀬𑀲𑁄𑀯 𑀲𑁂𑀬𑁆𑀬𑁄 𑀯𑀺𑀜𑁆𑀜𑀽𑀦𑀁, 𑀦 𑀬𑀲𑁄 𑀅𑀧𑁆𑀧𑀩𑀼𑀤𑁆𑀥𑀺𑀦𑀁.

𑀤𑀼𑀫𑁆𑀫𑁂𑀥𑁂𑀳𑀺 𑀧𑀲𑀁𑀲𑀸 𑀘, 𑀯𑀺𑀜𑁆𑀜𑀽𑀳𑀺 𑀕𑀭𑀳𑀸 𑀘 𑀬𑀸;

𑀕𑀭𑀳𑀸𑀯 𑀲𑁂𑀬𑁆𑀬𑁄 𑀯𑀺𑀜𑁆𑀜𑀽𑀳𑀺, 𑀬𑀜𑁆𑀘𑁂 𑀩𑀸𑀮𑀧𑁆𑀧𑀲𑀁𑀲𑀦𑀸.

𑀲𑀼𑀔𑀜𑁆𑀘 𑀓𑀸𑀫𑀫𑀬𑀺𑀓𑀁, 𑀤𑀼𑀓𑁆𑀔𑀜𑁆𑀘 𑀧𑀯𑀺𑀯𑁂𑀓𑀺𑀓𑀁;

𑀧𑀯𑀺𑀯𑁂𑀓𑀁 𑀤𑀼𑀓𑁆𑀔𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀓𑀸𑀫𑀫𑀬𑀁 𑀲𑀼𑀔𑀁.

𑀚𑀻𑀯𑀺𑀢𑀜𑁆𑀘 𑀅𑀥𑀫𑁆𑀫𑁂𑀦, 𑀥𑀫𑁆𑀫𑁂𑀦 𑀫𑀭𑀡𑀜𑁆𑀘 𑀬𑀁;

𑀫𑀭𑀡𑀁 𑀥𑀫𑁆𑀫𑀺𑀓𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀚𑀻𑀯𑁂 𑀅𑀥𑀫𑁆𑀫𑀺𑀓’’𑀦𑁆𑀢𑀺.

𑀏𑀯𑀫𑀬𑀁 𑀲𑁂𑀬𑁆𑀬 𑀇𑀢𑀺 𑀲𑀤𑁆𑀤𑁄 𑀑𑀓𑀸𑀭𑀦𑁆𑀢𑀪𑀸𑀯𑁂 𑀞𑀢𑁆𑀯𑀸 𑀮𑀺𑀗𑁆𑀕𑀢𑁆𑀢𑀬𑀸𑀦𑀼𑀓𑀽𑀮𑁄 𑀪𑀯𑀢𑀺. 𑀓𑀢𑁆𑀣𑀘𑀺 𑀧𑀦 𑀆𑀓𑀸𑀭𑀦𑁆𑀢𑀪𑀸𑀯𑁂 𑀞𑀢𑁆𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀼𑀓𑀽𑀮𑁄 𑀤𑀺𑀲𑁆𑀲𑀢𑀺 ‘‘𑀇𑀢𑁆𑀣𑀻𑀧𑀺 𑀳𑀺 𑀏𑀓𑀘𑁆𑀘𑀺𑀬𑀸, 𑀲𑁂𑀬𑁆𑀬𑀸 𑀧𑁄𑀲 𑀚𑀦𑀸𑀥𑀺𑀧𑀸’’𑀢𑀺. 𑀦𑀺𑀕𑁆𑀕𑀳𑀻𑀢𑀦𑁆𑀢𑁄 𑀧𑀦 𑀳𑀼𑀢𑁆𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀼𑀓𑀽𑀮𑁄 𑀅𑀧𑀲𑀺𑀤𑁆𑀥𑁄. 𑀏𑀯𑀁𑀧𑀓𑀸𑀭𑁂 𑀧𑀬𑁄𑀕𑁂 𑀓𑀺𑀁 𑀢𑀼𑀫𑁆𑀳𑁂 𑀦 𑀧𑀲𑁆𑀲𑀣𑀸𑀢𑀺. 𑀏𑀯𑀁 𑀯𑀼𑀢𑁆𑀢𑀸 𑀘 𑀢𑁂 𑀦𑀺𑀭𑀼𑀢𑁆𑀢𑀭𑀸𑀯 𑀪𑀯𑀺𑀲𑁆𑀲𑀦𑁆𑀢𑀺.

𑀲𑀘𑁂𑀧𑀺 𑀢𑁂 𑀏𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑀧𑁆𑀧𑀤𑁂𑀲𑁂 𑀅𑀝𑁆𑀞𑀓𑀣𑀸𑀤𑀻𑀲𑀼 𑀘 ‘𑀫𑀸𑀢𑀼𑀕𑀸𑀫𑁄’𑀢𑀺 𑀯𑀸 ‘𑀫𑀸𑀢𑀼𑀕𑀸𑀫𑁂𑀦𑀸’𑀢𑀺 𑀯𑀸 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂𑀦 𑀫𑀸𑀢𑀼𑀕𑀸𑀫𑀲𑀤𑁆𑀤𑀲𑁆𑀲 𑀤𑀲𑁆𑀲𑀦𑀢𑁄 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑀁 𑀫𑀸𑀢𑀼𑀕𑀸𑀫𑀲𑀤𑁆𑀤𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀇𑀢𑁆𑀣𑀺𑀧𑀤𑀢𑁆𑀣𑀫𑁂𑀯 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀲𑀸 𑀇𑀢𑁆𑀣𑀻’’𑀢𑀺 𑀇𑀢𑁆𑀣𑀻𑀲𑀤𑁆𑀤𑁂𑀦 𑀲𑀸𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑀕𑁆𑀕𑀳𑀡𑀁 𑀫𑀬𑀁 𑀲𑀫𑁆𑀧𑀝𑀺𑀘𑁆𑀙𑀸𑀫, ‘𑀑𑀭𑁄𑀥𑁄’𑀢𑀺 𑀯𑀸 ‘𑀑𑀭𑁄𑀥𑁂𑀦𑀸’𑀢𑀺 𑀯𑀸 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂𑀦 𑀞𑀺𑀢𑀲𑁆𑀲 𑀑𑀭𑁄𑀥𑀲𑀤𑁆𑀤𑀲𑁆𑀲 𑀅𑀤𑀲𑁆𑀲𑀦𑀢𑁄 𑀧𑀦 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁 𑀧𑀼𑀭𑀺𑀫𑀢𑁆𑀣𑀁 𑀦 𑀲𑀫𑁆𑀧𑀝𑀺𑀘𑁆𑀙𑀸𑀫𑀸’’𑀢𑀺. 𑀢𑀤𑀸 𑀢𑁂𑀲𑀁 𑀇𑀫𑀸𑀦𑀺 𑀯𑀺𑀦𑀬𑀧𑀸𑀴𑀺𑀬𑀁 𑀆𑀕𑀢𑀧𑀤𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀉𑀤𑁂𑀦𑁄 𑀉𑀬𑁆𑀬𑀸𑀦𑁂 𑀧𑀭𑀺𑀘𑀸𑀭𑁂𑀲𑀺 𑀲𑀤𑁆𑀥𑀺𑀁 𑀑𑀭𑁄𑀥𑁂𑀦, 𑀅𑀣 𑀔𑁄 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀑𑀭𑁄𑀥𑁄 𑀭𑀸𑀚𑀸𑀦𑀁 𑀉𑀤𑁂𑀦𑀁 𑀏𑀢𑀤𑀯𑁄𑀘𑀸’’𑀢𑀺. 𑀏𑀯𑀁 𑀇𑀫𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 ‘‘𑀭𑀸𑀫𑁄 𑀦𑀸𑀫 𑀭𑀸𑀚𑀸 𑀓𑀼𑀝𑁆𑀞𑀭𑁄𑀕𑀻 𑀑𑀭𑁄𑀥𑁂𑀳𑀺 𑀘 𑀦𑀸𑀝𑀓𑁂𑀳𑀺 𑀘 𑀚𑀺𑀕𑀼𑀘𑁆𑀙𑀫𑀸𑀦𑁄’’𑀢𑀺 𑀯𑀘𑀦𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂 𑀕𑀭𑀼𑀓𑀼𑀮𑀫𑀼𑀧𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀲𑀸𑀥𑀼𑀓𑀁 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀉𑀕𑁆𑀕𑀡𑁆𑀳𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀫𑀸𑀢𑀼𑀕𑀸𑀫𑀲𑀤𑁆𑀤𑀸𑀤𑀻𑀲𑀼 𑀓𑀺𑀜𑁆𑀘𑀺 𑀯𑀺𑀦𑀺𑀘𑁆𑀙𑀬𑀁 𑀯𑀤𑀸𑀫 𑁋 𑀫𑀸𑀢𑀼𑀕𑀸𑀫𑀲𑀤𑁆𑀤𑁄 𑀘 𑀑𑀭𑁄𑀥𑀲𑀤𑁆𑀤𑁄 𑀘 𑀤𑀸𑀭𑀲𑀤𑁆𑀤𑁄 𑀘𑀸𑀢𑀺 𑀇𑀫𑁂 𑀇𑀢𑁆𑀣𑀺𑀧𑀤𑀢𑁆𑀣𑀯𑀸𑀘𑀓𑀸𑀧𑀺 𑀲𑀫𑀸𑀦𑀸 𑀏𑀓𑀦𑁆𑀢𑁂𑀦 𑀧𑀼𑀮𑁆𑀮𑀺𑀗𑁆𑀕𑀸 𑀪𑀯𑀦𑁆𑀢𑀺. 𑀢𑁂𑀲𑀼 𑀤𑀸𑀭𑀲𑀤𑁆𑀤𑀲𑁆𑀲 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺 𑀩𑀳𑀼𑀯𑀘𑀦𑀓𑀢𑁆𑀢𑀫𑁂𑀯 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀇𑀘𑁆𑀙𑀦𑁆𑀢𑀺, 𑀦 𑀏𑀓𑀯𑀘𑀦𑀓𑀢𑁆𑀢𑀁. 𑀫𑀬𑀁 𑀧𑀦 𑀤𑀸𑀭𑀲𑀤𑁆𑀤𑀲𑁆𑀲 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀏𑀓𑀯𑀘𑀦𑀓𑀢𑁆𑀢𑀁, 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀩𑀳𑀼𑀯𑀘𑀦𑀓𑀢𑁆𑀢𑀁 𑀅𑀦𑀼𑀚𑀸𑀦𑀸𑀫, 𑀩𑀯𑁆𑀳𑀢𑁆𑀣𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀧𑀸𑀴𑀺𑀬𑀜𑁆𑀳𑀺 𑀤𑀸𑀭𑀲𑀤𑁆𑀤𑁄 𑀬𑁂𑀪𑀼𑀬𑁆𑀬𑁂𑀦 𑀩𑀳𑀼𑀯𑀘𑀦𑀓𑁄 𑀪𑀯𑀢𑀺, 𑀏𑀓𑀯𑀘𑀦𑀓𑁄 𑀅𑀧𑁆𑀧𑁄. 𑀢𑀢𑁆𑀭𑀺𑀫𑁂 𑀧𑀬𑁄𑀕𑀸 𑁋

‘‘𑀤𑀸𑀲𑀸 𑀘 𑀤𑀸𑀲𑁆𑀬𑁄 𑀅𑀦𑀼𑀚𑀻𑀯𑀺𑀦𑁄 𑀘,

𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘 𑀫𑀬𑀜𑁆𑀘 𑀲𑀩𑁆𑀩𑁂;

𑀥𑀫𑁆𑀫𑀜𑁆𑀘𑀭𑀸𑀫𑀧𑁆𑀧𑀭𑀮𑁄𑀓𑀳𑁂𑀢𑀼,

𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀺𑀬𑁆𑀬𑀭𑁂’’𑀢𑀺 𑀘,

‘‘𑀬𑁄 𑀜𑀸𑀢𑀻𑀦𑀁 𑀲𑀔𑀻𑀦𑀁 𑀯𑀸, 𑀤𑀸𑀭𑁂𑀲𑀼 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀳𑀲𑀸 𑀲𑀫𑁆𑀧𑀺𑀬𑀸𑀬𑁂𑀦, 𑀢𑀁 𑀚𑀜𑁆𑀜𑀸𑀯𑀲𑀮𑁄 𑀇𑀢𑀻’’𑀢𑀺 𑀘,

‘‘𑀲𑁂𑀳𑀺 𑀤𑀸𑀭𑁂𑀳𑀺’𑀲𑀦𑁆𑀢𑀼𑀝𑁆𑀞𑁄, 𑀯𑁂𑀲𑀺𑀬𑀸𑀲𑀼 𑀧𑀤𑀺𑀲𑁆𑀲𑀢𑀺;

𑀤𑀺𑀲𑁆𑀲𑀢𑀺 𑀧𑀭𑀤𑀸𑀭𑁂𑀲𑀼, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔’’𑀦𑁆𑀢𑀺 𑀘,

‘‘𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸’’𑀢𑀺 𑀘 𑀩𑁆𑀬𑀸𑀲𑁂, 𑀲𑀫𑀸𑀲𑁂 𑀧𑀦 ‘‘𑀧𑀼𑀢𑁆𑀢𑀤𑀸𑀭𑀸 𑀤𑀺𑀲𑀸 𑀧𑀘𑁆𑀙𑀸, 𑀧𑀼𑀢𑁆𑀢𑀤𑀸𑀭𑁂𑀳𑀺 𑀫𑀢𑁆𑀢𑀦𑁄’’𑀢𑀺 𑀘 𑀏𑀯𑀫𑀸𑀤𑀬𑁄 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀸 𑀩𑀳𑀯𑁄 𑀪𑀯𑀦𑁆𑀢𑀺.

𑀏𑀓𑀯𑀘𑀦𑀧𑁆𑀧𑀬𑁄𑀕𑀸 𑀧𑀦 𑀅𑀧𑁆𑀧𑀸. 𑀲𑁂𑀬𑁆𑀬𑀣𑀺𑀤𑀁? ‘‘𑀕𑀭𑀽𑀦𑀁 𑀤𑀸𑀭𑁂, 𑀥𑀫𑁆𑀫𑀁 𑀘𑀭𑁂 𑀬𑁄𑀧𑀺 𑀲𑀫𑀼𑀜𑁆𑀚𑀓𑀁 𑀘𑀭𑁂, 𑀤𑀸𑀭𑀜𑁆𑀘 𑀧𑁄𑀲𑀁 𑀤𑀤𑀫𑀧𑁆𑀧𑀓𑀲𑁆𑀫𑀺’’𑀦𑁆𑀢𑀺 𑀘,

‘‘𑀬𑁂 𑀕𑀳𑀝𑁆𑀞𑀸 𑀧𑀼𑀜𑁆𑀜𑀓𑀭𑀸, 𑀲𑀻𑀮𑀯𑀦𑁆𑀢𑁄 𑀉𑀧𑀸𑀲𑀓𑀸;

𑀥𑀫𑁆𑀫𑁂𑀦 𑀤𑀸𑀭𑀁 𑀧𑁄𑀲𑁂𑀦𑁆𑀢𑀺, 𑀢𑁂 𑀦𑀫𑀲𑁆𑀲𑀸𑀫𑀺 𑀫𑀸𑀢𑀮𑀻’’𑀢𑀺 𑀘,

‘‘𑀧𑀭𑀤𑀸𑀭𑀁 𑀦 𑀕𑀘𑁆𑀙𑁂𑀬𑁆𑀬𑀁, 𑀲𑀤𑀸𑀭𑀧𑀲𑀼𑀢𑁄 𑀲𑀺𑀬’’𑀦𑁆𑀢𑀺 𑀘,

‘‘𑀬𑁄 𑀇𑀘𑁆𑀙𑁂 𑀧𑀼𑀭𑀺𑀲𑁄 𑀳𑁄𑀢𑀼𑀁, 𑀚𑀸𑀢𑀺𑀁 𑀚𑀸𑀢𑀺𑀁 𑀧𑀼𑀦𑀧𑁆𑀧𑀼𑀦𑀁;

𑀧𑀭𑀤𑀸𑀭𑀁 𑀯𑀺𑀯𑀚𑁆𑀚𑁂𑀬𑁆𑀬, 𑀥𑁄𑀢𑀧𑀸𑀤𑁄𑀯 𑀓𑀤𑁆𑀤𑀫’’𑀦𑁆𑀢𑀺 𑀘

𑀏𑀯𑀫𑀸𑀤𑀬𑁄 𑀏𑀓𑀯𑀘𑀦𑀧𑁆𑀧𑀬𑁄𑀕𑀸 𑀅𑀧𑁆𑀧𑀸.

𑀲𑀫𑀸𑀳𑀸𑀭𑀮𑀓𑁆𑀔𑀡𑀯𑀲𑁂𑀦 𑀧𑀦𑁂𑀲 𑀤𑀸𑀭𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀓𑀯𑀘𑀦𑁄𑀧𑀺 𑀓𑀢𑁆𑀣𑀘𑀺 𑀪𑀯𑀢𑀺. ‘‘𑀆𑀤𑀸𑀬 𑀧𑀼𑀢𑁆𑀢𑀤𑀸𑀭𑀁. 𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀗𑁆𑀕𑀳𑁄’’𑀇𑀢𑀺 𑀏𑀯𑀁 𑀇𑀥 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀮𑀺𑀗𑁆𑀕𑀜𑁆𑀘 𑀅𑀢𑁆𑀣𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀧𑀼𑀭𑀺𑀲𑁄 𑀧𑀼𑀭𑀺𑀲𑀸’’𑀢𑀺 𑀧𑀯𑀢𑁆𑀢𑀁 𑀧𑀼𑀭𑀺𑀲𑀲𑀤𑁆𑀤𑀦𑀬𑀁 𑀦𑀺𑀲𑁆𑀲𑀸𑀬 𑀲𑀩𑁆𑀩𑁂𑀲𑀁 ‘‘𑀪𑀽𑀢𑁄 𑀪𑀸𑀯𑀓𑁄 𑀪𑀯𑁄’’𑀢𑀺𑀆𑀤𑀻𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀅𑀜𑁆𑀜𑁂𑀲𑀜𑁆𑀘𑁄𑀓𑀸𑀭𑀦𑁆𑀢𑀧𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀓𑁄𑀲𑀮𑁆𑀮𑀫𑀼𑀧𑁆𑀧𑀸𑀤𑁂𑀢𑀩𑁆𑀩𑀁.

𑀓𑀺𑀁 𑀧𑀦 𑀲𑀩𑁆𑀩𑀸𑀦𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀏𑀓𑀲𑀤𑀺𑀲𑀸𑀦𑁂𑀯 𑀳𑀼𑀢𑁆𑀯𑀸 𑀧𑀯𑀺𑀝𑁆𑀞𑀸𑀦𑀻𑀢𑀺? 𑀦 𑀧𑀯𑀺𑀝𑁆𑀞𑀸𑀦𑀺. 𑀓𑀸𑀦𑀺𑀘𑀺 𑀳𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀸𑀦𑀺 𑀘 𑀳𑁄𑀦𑁆𑀢𑀺, 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘, 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘 𑀳𑁄𑀦𑁆𑀢𑀺, 𑀏𑀓𑀤𑁂𑀲𑁂𑀦 𑀦 𑀧𑀯𑀺𑀝𑁆𑀞𑀸𑀦𑀺 𑀘, 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀅𑀧𑁆𑀧𑀯𑀺𑀝𑁆𑀞𑀸𑀦𑁂𑀯. 𑀢𑀢𑁆𑀭 𑀓𑀢𑀫𑀸𑀦𑀺 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀸𑀦𑀺 𑀘 𑀳𑁄𑀦𑁆𑀢𑀺, 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘? ‘‘𑀲𑀭𑁄 𑀯𑀬𑁄 𑀘𑁂𑀢𑁄’’𑀢𑀺𑀆𑀤𑀻𑀦𑀺. 𑀲𑀭𑁄𑀇𑀢𑀺 𑀳𑀺 𑀅𑀬𑀁𑀲𑀤𑁆𑀤𑁄 𑀉𑀲𑀼𑀲𑀤𑁆𑀤𑀲𑀭𑀯𑀦𑀅𑀓𑀸𑀭𑀸𑀤𑀺𑀲𑀭𑀯𑀸𑀘𑀓𑁄 𑀘𑁂, 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑁄. 𑀭𑀳𑀤𑀯𑀸𑀘𑀓𑁄 𑀘𑁂, 𑀫𑀦𑁄𑀕𑀡𑀧𑀓𑁆𑀔𑀺𑀓𑀢𑁆𑀢𑀸 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑁄. 𑀯𑀬𑁄𑀇𑀢𑀺 𑀲𑀤𑁆𑀤𑁄 𑀧𑀭𑀺𑀳𑀸𑀦𑀺𑀯𑀸𑀘𑀓𑁄 𑀘𑁂, 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑁄. 𑀆𑀬𑀼𑀓𑁄𑀝𑁆𑀞𑀸𑀲𑀯𑀸𑀘𑀓𑁄 𑀘𑁂, 𑀫𑀦𑁄𑀕𑀡𑀧𑀓𑁆𑀔𑀺𑀓𑀢𑁆𑀢𑀸 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑁄. 𑀘𑁂𑀢𑁄 𑀇𑀢𑀺 𑀲𑀤𑁆𑀤𑁄 𑀬𑀤𑀺 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑁄, 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑁄. 𑀬𑀤𑀺 𑀧𑀦 𑀘𑀺𑀢𑁆𑀢𑀯𑀸𑀘𑀓𑁄, 𑀫𑀦𑁄𑀕𑀡𑀧𑀓𑁆𑀔𑀺𑀓𑀢𑁆𑀢𑀸 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑁄. 𑀫𑀦𑁄𑀕𑀡𑁄 𑀘 𑀦𑀸𑀫 𑁋

𑀫𑀦𑁄 𑀯𑀘𑁄 𑀯𑀬𑁄 𑀢𑁂𑀚𑁄,

𑀢𑀧𑁄 𑀘𑁂𑀢𑁄 𑀢𑀫𑁄 𑀬𑀲𑁄;

𑀅𑀬𑁄 𑀧𑀬𑁄 𑀲𑀺𑀭𑁄 𑀙𑀦𑁆𑀤𑁄,

𑀲𑀭𑁄 𑀉𑀭𑁄 𑀭𑀳𑁄 𑀅𑀳𑁄 𑁋

𑀇𑀫𑁂 𑀲𑁄𑀴𑀲.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀸𑀓𑀝𑀻𑀓𑀭𑀡𑀢𑁆𑀣𑀁 𑀫𑀦𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀁 𑀓𑀣𑀬𑀸𑀫 𑁋

𑀫𑀦𑁄, 𑀫𑀦𑀸. 𑀫𑀦𑀁, 𑀫𑀦𑁄, 𑀫𑀦𑁂. 𑀫𑀦𑀲𑀸, 𑀫𑀦𑁂𑀦, 𑀫𑀦𑁂𑀳𑀺, 𑀫𑀦𑁂𑀪𑀺. 𑀫𑀦𑀲𑁄, 𑀫𑀦𑀲𑁆𑀲, 𑀫𑀦𑀸𑀦𑀁. 𑀫𑀦𑀸, 𑀫𑀦𑀲𑁆𑀫𑀸, 𑀫𑀦𑀫𑁆𑀳𑀸, 𑀫𑀦𑁂𑀳𑀺, 𑀫𑀦𑁂𑀪𑀺. 𑀫𑀦𑀲𑁄, 𑀫𑀦𑀲𑁆𑀲, 𑀫𑀦𑀸𑀦𑀁. 𑀫𑀦𑀲𑀺, 𑀫𑀦𑁂, 𑀫𑀦𑀲𑁆𑀫𑀺𑀁, 𑀫𑀦𑀫𑁆𑀳𑀺, 𑀫𑀦𑁂𑀲𑀼. 𑀪𑁄 𑀫𑀦, 𑀪𑀯𑀦𑁆𑀢𑁄 𑀫𑀦𑀸.

𑀅𑀣 𑀯𑀸 ‘‘𑀪𑁄 𑀫𑀦𑀸’’𑀇𑀢𑀺 𑀩𑀳𑀼𑀯𑀘𑀦𑀫𑁆𑀧𑀺 𑀜𑁂𑀬𑁆𑀬𑀁. 𑀏𑀯𑀁 𑀯𑀘𑁄, 𑀯𑀘𑀸. 𑀯𑀘𑀁, 𑀯𑀘𑁄, 𑀯𑀘𑁂. 𑀯𑀘𑀲𑀸𑀢𑀺𑀆𑀤𑀺𑀦𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀳𑀲𑀤𑁆𑀤𑀲𑁆𑀲 𑀧𑀦 𑀪𑀼𑀫𑁆𑀫𑁂𑀓𑀯𑀘𑀦𑀝𑁆𑀞𑀸𑀦𑁂 𑀅𑀳𑀲𑀺, 𑀅𑀳𑁂, 𑀅𑀳𑀲𑁆𑀫𑀺𑀁, 𑀅𑀳𑀫𑁆𑀳𑀺, 𑀅𑀳𑀼, 𑀅𑀳𑀦𑀻𑀢𑀺 𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀭𑀽𑀧𑀦𑁆𑀢𑀭𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀫𑀦𑀲𑀤𑁆𑀤𑀲𑁆𑀲𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀤𑀸𑀫, 𑀅𑀝𑁆𑀞𑀸𑀦𑁂 𑀅𑀬𑀁 𑀓𑀣𑀺𑀢𑀸𑀢𑀺 𑀦 𑀘𑁄𑀤𑁂𑀢𑀩𑁆𑀩𑀁.

𑀫𑀦𑀁, 𑀫𑀦𑀸𑀦𑀺, 𑀫𑀦𑀸. 𑀫𑀦𑀁, 𑀫𑀦𑀸𑀦𑀺, 𑀫𑀦𑁂. 𑀫𑀦𑁂𑀦, 𑀫𑀦𑁂𑀳𑀺, 𑀫𑀦𑁂𑀪𑀺. 𑀫𑀦𑀲𑁆𑀲, 𑀫𑀦𑀲𑁄, 𑀫𑀦𑀸𑀦𑀁. 𑀫𑀦𑀸, 𑀫𑀦𑀲𑁆𑀫𑀸, 𑀫𑀦𑀫𑁆𑀳𑀸, 𑀫𑀦𑁂𑀳𑀺, 𑀫𑀦𑁂𑀪𑀺. 𑀫𑀦𑀲𑁆𑀲, 𑀫𑀦𑀲𑁄, 𑀫𑀦𑀸𑀦𑀁. 𑀫𑀦𑁂, 𑀫𑀦𑀲𑁆𑀫𑀺𑀁, 𑀫𑀦𑀫𑁆𑀳𑀺, 𑀫𑀦𑁂𑀲𑀼. 𑀪𑁄 𑀫𑀦, 𑀪𑀯𑀦𑁆𑀢𑁄 𑀫𑀦𑀸. 𑀅𑀣 𑀯𑀸 ‘‘𑀪𑁄 𑀫𑀦𑀸𑀦𑀺, 𑀪𑁄 𑀫𑀦𑀸’’𑀏𑀯𑀫𑁆𑀧𑀺 𑀩𑀳𑀼𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑀼𑀢𑁆𑀢𑀭𑀢𑁆𑀭𑀸𑀧𑀺 𑀦𑀬𑁄.

𑀏𑀢𑁆𑀣 𑀘 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀫𑀦𑀲𑀤𑁆𑀤𑀲𑁆𑀲 𑀧𑀘𑁆𑀘𑀢𑁆𑀢𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀪𑀼𑀫𑁆𑀫𑀯𑀘𑀦𑀸𑀦𑀺 𑀫𑀦𑁄 𑀫𑀦𑀲𑀸 𑀫𑀦𑀲𑁄 𑀫𑀦𑀲𑀻𑀢𑀺 𑀭𑀽𑀧𑀸𑀦𑀺 𑀞𑀧𑁂𑀢𑁆𑀯𑀸 𑀬𑀸𑀦𑀺 𑀲𑁂𑀲𑀸𑀦𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀘 𑀫𑀦𑀲𑀤𑁆𑀤𑀲𑁆𑀲 𑀧𑀘𑁆𑀘𑀢𑁆𑀢𑀯𑀘𑀦𑀸𑀦𑀺 ‘‘𑀫𑀦𑀁 𑀫𑀦𑀸𑀦𑀻’’𑀢𑀺 𑀭𑀽𑀧𑀸𑀦𑀺 𑀘, 𑀅𑀝𑁆𑀞𑀫𑁆𑀬𑁄𑀧𑀬𑁄𑀕𑀯𑀘𑀦𑀸𑀦𑀁 ‘‘𑀫𑀦𑀁 𑀫𑀦𑀸𑀦𑀻’’𑀢𑀺 𑀭𑀽𑀧𑀤𑁆𑀯𑀬𑀜𑁆𑀘 𑀞𑀧𑁂𑀢𑁆𑀯𑀸 𑀬𑀸𑀦𑀺 𑀲𑁂𑀲𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀓𑀫𑀢𑁄 𑀲𑀫𑀲𑀫𑀸𑀦𑀺.

𑀓𑁂𑀘𑀺 𑀑𑀓𑀸𑀭𑀦𑁆𑀢𑁄 𑀫𑀦𑁄𑀇𑀢𑀺 𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀢𑀺 𑀯𑀤𑀦𑁆𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 𑁋 𑀬𑀤𑀺 𑀲𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀲𑀺𑀬𑀸, 𑀢𑀲𑁆𑀲𑀤𑀺𑀲𑁂𑀳𑀺 𑀯𑀘𑁄 𑀯𑀬𑁄𑀢𑀺𑀆𑀤𑀺𑀲𑀤𑁆𑀤𑁂𑀳𑀺𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀳𑁂𑀯 𑀪𑀯𑀺𑀢𑀩𑁆𑀩𑀁, 𑀦 ‘‘𑀢𑁂 𑀦𑀧𑀼𑀁𑀲𑀓𑀮𑀺𑀗𑁆𑀕𑀸’’𑀢𑀺 𑀕𑀭𑀽 𑀯𑀤𑀦𑁆𑀢𑀺, ‘‘𑀧𑀼𑀮𑁆𑀮𑀺𑀗𑁆𑀕𑀸’’𑀇𑀘𑁆𑀘𑁂𑀯 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀘 𑀧𑀸𑀴𑀺𑀬𑀁 ‘‘𑀓𑀸𑀬𑁄 𑀅𑀦𑀺𑀘𑁆𑀘𑁄; 𑀫𑀦𑁄 𑀅𑀦𑀺𑀘𑁆𑀘𑁄’’𑀢𑀺 𑀘 ‘‘𑀓𑀸𑀬𑁄 𑀤𑀼𑀓𑁆𑀔𑁄, 𑀫𑀦𑁄 𑀤𑀼𑀓𑁆𑀔𑁄’’𑀢𑀺 𑀘 ‘‘𑀦𑀺𑀘𑁆𑀘𑁄 𑀯𑀸 𑀅𑀦𑀺𑀘𑁆𑀘𑁄 𑀯𑀸𑀢𑀺 𑀅𑀦𑀺𑀘𑁆𑀘𑁄 𑀪𑀦𑁆𑀢𑁂’’𑀢𑀺 𑀘 𑀏𑀯𑀫𑀸𑀤𑀬𑁄 𑀧𑀼𑀮𑁆𑀮𑀺𑀗𑁆𑀕𑀧𑁆𑀧𑀬𑁄𑀕𑀸 𑀩𑀳𑀯𑁄 𑀤𑀺𑀝𑁆𑀞𑀸. 𑀢𑁂𑀦 𑀜𑀸𑀬𑀢𑀺 𑀫𑀦𑁄𑀲𑀤𑁆𑀤𑁄 𑀏𑀓𑀦𑁆𑀢𑁂𑀦 𑀧𑀼𑀮𑁆𑀮𑀺𑀗𑁆𑀕𑁄𑀢𑀺. 𑀬𑀤𑀺 𑀧𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀲𑀺𑀬𑀸, ‘‘𑀅𑀦𑀺𑀘𑁆𑀘𑁄 𑀤𑀼𑀓𑁆𑀔𑁄’’𑀢𑀺 𑀏𑀯𑀫𑀸𑀤𑀻𑀦𑀺 𑀢𑀁𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺 𑀅𑀦𑁂𑀓𑀧𑀤𑀲𑀢𑀸𑀦𑀺𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑁂𑀯 𑀲𑀺𑀬𑀼𑀁. 𑀦 𑀳𑀺 𑀢𑀸𑀦𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺, 𑀅𑀣 𑀔𑁄 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀯𑀢𑁆𑀢𑀓𑀸𑀦𑀺 𑀯𑀸𑀘𑁆𑀘𑀮𑀺𑀗𑁆𑀕𑀸𑀦𑀺. 𑀏𑀯𑀁 𑀫𑀦𑁄𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑀸 𑀧𑀘𑁆𑀘𑁂𑀢𑀩𑁆𑀩𑀸𑀢𑀺, 𑀲𑀘𑁂 𑀫𑀦𑁄𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀦 𑀳𑁄𑀢𑀺, 𑀓𑀣𑀁 ‘‘𑀫𑀦𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀭𑀽𑀧𑀁 𑀤𑀺𑀲𑁆𑀲𑀢𑀻𑀢𑀺? 𑀲𑀘𑁆𑀘𑀁 ‘‘𑀫𑀦𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀫𑁂𑀯, 𑀢𑀣𑀸𑀧𑀺 𑀫𑀦𑁄𑀕𑀡𑁂 𑀧𑀫𑀼𑀔𑀪𑀸𑀯𑁂𑀦 𑀕𑀳𑀺𑀢𑀲𑁆𑀲𑁄𑀓𑀸𑀭𑀦𑁆𑀢𑀲𑁆𑀲 𑀫𑀦𑀲𑀤𑁆𑀤𑀲𑁆𑀲 𑀭𑀽𑀧𑀁 𑀦 𑀳𑁄𑀢𑀺. 𑀅𑀣 𑀓𑀺𑀜𑁆𑀘𑀭𑀳𑀻𑀢𑀺 𑀘𑁂? 𑀘𑀺𑀢𑁆𑀢𑀲𑀤𑁆𑀤𑁂𑀦 𑀲𑀫𑀸𑀦𑀮𑀺𑀗𑁆𑀕𑀲𑁆𑀲 𑀲𑀫𑀸𑀦𑀲𑀼𑀢𑀺𑀢𑁆𑀢𑁂𑀧𑀺 𑀫𑀦𑁄𑀕𑀡𑁂 𑀅𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀦𑀺𑀕𑁆𑀕𑀳𑀻𑀢𑀦𑁆𑀢𑀲𑁆𑀲𑁂𑀯 𑀫𑀦𑀲𑀤𑁆𑀤𑀲𑁆𑀲 𑀭𑀽𑀧𑀁. 𑀫𑀦𑀲𑀤𑁆𑀤𑁄 𑀳𑀺 𑀧𑀼𑀦𑁆𑀦𑀧𑀼𑀁𑀲𑀓𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀚𑁆𑀚𑀢𑀺 ‘‘𑀫𑀦𑁄 𑀫𑀦𑀁’’𑀇𑀢𑀺 𑀬𑀣𑀸 ‘‘𑀅𑀚𑁆𑀚𑀯𑁄𑀅𑀚𑁆𑀚𑀯’’𑀦𑁆𑀢𑀺. ‘‘𑀫𑀦𑁄 𑀘𑁂 𑀦𑀧𑁆𑀧𑀤𑀼𑀲𑁆𑀲𑀢𑀺. 𑀲𑀦𑁆𑀢𑀁 𑀢𑀲𑁆𑀲 𑀫𑀦𑀁 𑀳𑁄𑀢𑀻’’𑀢𑀺 𑀳𑀺 𑀧𑀸𑀴𑀺. 𑀬𑀤𑀺 𑀘 𑀲𑁄 𑀫𑀦𑁄𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀦 𑀳𑁄𑀢𑀺.

‘‘𑀕𑀭𑀼 𑀘𑁂𑀢𑀺𑀬𑀧𑀩𑁆𑀩𑀢𑀯𑀢𑁆𑀢𑀦𑀺𑀬𑀸,

𑀧𑀫𑀤𑀸 𑀧𑀫𑀤𑀸 𑀧𑀫𑀤𑀸 𑀯𑀺𑀫𑀤𑀁;

𑀲𑀫𑀡𑀁 𑀲𑀼𑀦𑀺𑀲𑀫𑁆𑀫 𑀅𑀓𑀸 𑀳𑀲𑀺𑀢𑀁,

𑀧𑀢𑀺𑀢𑀁 𑀅𑀲𑀼𑀪𑁂𑀲𑀼 𑀫𑀼𑀦𑀺𑀲𑁆𑀲 𑀫𑀦𑁄’’𑀢𑀺

𑀏𑀢𑁆𑀣 𑀫𑀦𑁄𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁄 ‘‘𑀧𑀢𑀺𑀢’’𑀦𑁆𑀢𑀺 𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀪𑀸𑀯𑁂𑀦 𑀓𑀲𑁆𑀫𑀸 𑀲𑀦𑁆𑀦𑀺𑀳𑀺𑀢𑁄. 𑀬𑀲𑁆𑀫𑀸 𑀘 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀪𑀸𑀯𑁂𑀦 𑀲𑀦𑁆𑀦𑀺𑀳𑀺𑀢𑀁, 𑀢𑀲𑁆𑀫𑀸 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀯𑀲𑁂𑀦 𑀫𑀦𑁄𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀢𑀺 𑀜𑀸𑀬𑀢𑀻𑀢𑀺? 𑀢𑀦𑁆𑀦, 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀲𑁆𑀲 𑀲𑀩𑁆𑀩𑀢𑁆𑀣 𑀮𑀺𑀗𑁆𑀕𑀯𑀺𑀲𑁂𑀲𑀸𑀚𑁄𑀢𑀦𑀢𑁄. 𑀬𑀤𑀺 𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 𑀲𑀩𑁆𑀩𑀢𑁆𑀣 𑀮𑀺𑀗𑁆𑀕𑀯𑀺𑀲𑁂𑀲𑀁 𑀚𑁄𑀢𑁂𑀬𑁆𑀬, ‘‘𑀘𑀢𑁆𑀢𑀸𑀭𑁄 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀏𑀢𑁆𑀣𑀸𑀧𑀺 ‘‘𑀘𑀢𑁆𑀢𑀸𑀭𑁄’’𑀢𑀺 𑀧𑀤𑀁 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀓𑀭𑁂𑀬𑁆𑀬, 𑀦 𑀘 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑁄 𑀳𑀺 𑀏𑀓𑀦𑁆𑀢𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁄. 𑀬𑀤𑀺 𑀢𑀼𑀫𑁆𑀳𑁂 ‘‘𑀧𑀢𑀺𑀢’’𑀦𑁆𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 𑀦𑀺𑀲𑁆𑀲𑀸𑀬 𑀫𑀦𑁄𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀫𑀺𑀘𑁆𑀙𑀣, ‘‘𑀘𑀢𑁆𑀢𑀸𑀭𑁄 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀏𑀢𑁆𑀣𑀧𑀺 ‘‘𑀘𑀢𑁆𑀢𑀸𑀭𑁄’’𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 𑀦𑀺𑀲𑁆𑀲𑀸𑀬 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀇𑀘𑁆𑀙𑀣𑀸𑀢𑀺. 𑀦 𑀫𑀬𑀁 𑀪𑁄 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀇𑀘𑁆𑀙𑀸𑀫, 𑀅𑀣 𑀔𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁𑀬𑁂𑀯 𑀇𑀘𑁆𑀙𑀸𑀫, ‘‘𑀘𑀢𑁆𑀢𑀸𑀭𑁄’’𑀢𑀺 𑀧𑀤𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀞𑀺𑀢𑀢𑁆𑀢𑀸 ‘‘𑀘𑀢𑁆𑀢𑀸𑀭𑀻’’𑀢𑀺 𑀕𑀡𑁆𑀳𑀸𑀫, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀅𑀢𑁆𑀣𑀁 𑀥𑀸𑀭𑁂𑀫𑀸𑀢𑀺. 𑀬𑀤𑀺 𑀏𑀯𑀁 ‘‘𑀧𑀢𑀺𑀢𑀁 𑀅𑀲𑀼𑀪𑁂𑀲𑀼 𑀫𑀼𑀦𑀺𑀲𑁆𑀲 𑀫𑀦𑁄’’𑀢𑀺 𑀏𑀢𑁆𑀣𑀸𑀧𑀺 ‘‘𑀧𑀢𑀺𑀢’’𑀦𑁆𑀢𑀺 𑀧𑀤𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀞𑀺𑀢𑀦𑁆𑀢𑀺 𑀫𑀦𑁆𑀢𑁆𑀯𑀸 ‘‘𑀧𑀢𑀺𑀢𑁄’’𑀢𑀺 𑀅𑀢𑁆𑀣𑀁 𑀥𑀸𑀭𑁂𑀣𑀸𑀢𑀺. 𑀦 𑀥𑀸𑀭𑁂𑀫 𑀏𑀢𑁆𑀣 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀲𑁆𑀲 𑀅𑀦𑀺𑀘𑁆𑀙𑀺𑀢𑀩𑁆𑀩𑀢𑁄. 𑀬𑀤𑀺 𑀳𑀺 𑀫𑀦𑁄𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄 𑀲𑀺𑀬𑀸, 𑀢𑀁𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 ‘‘𑀧𑀢𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀓𑀺𑀫𑀸𑀘𑀭𑀺𑀬𑁄 𑀏𑀯𑀁 𑀯𑀢𑁆𑀢𑀼𑀁 𑀦 𑀚𑀸𑀦𑀺, 𑀚𑀸𑀦𑀫𑀸𑀦𑁄 𑀏𑀯 𑀲𑁄 ‘‘𑀧𑀢𑀺𑀢𑁄’’𑀢𑀺 𑀦𑀸𑀯𑁄𑀘, ‘‘𑀧𑀢𑀺𑀢’’𑀦𑁆𑀢𑀺 𑀧𑀦𑀸𑀯𑁄𑀘, 𑀢𑁂𑀦 𑀜𑀸𑀬𑀢𑀺 ‘‘𑀫𑀦𑁄𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄’’𑀢𑀺. 𑀫𑀸 𑀢𑀼𑀫𑁆𑀳𑁂 𑀏𑀯𑀁 𑀯𑀤𑁂𑀣, 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 𑀦𑀸𑀫 𑀓𑀢𑁆𑀣𑀘𑀺 𑀧𑀥𑀸𑀦𑀮𑀺𑀗𑁆𑀕𑀫𑀦𑀼𑀯𑀢𑁆𑀢𑀢𑀺, 𑀓𑀢𑁆𑀣𑀘𑀺 𑀦𑀸𑀦𑀼𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀦 𑀢𑀁 𑀮𑀺𑀗𑁆𑀕𑀯𑀺𑀲𑁂𑀲𑀚𑁄𑀢𑀦𑁂 𑀏𑀓𑀦𑁆𑀢𑀢𑁄 𑀧𑀫𑀸𑀡𑀁. ‘‘𑀫𑀸𑀢𑀼𑀕𑀸𑀫𑁄, 𑀑𑀭𑁄𑀥𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀏𑀳𑀺 𑀯𑀺𑀲𑀸𑀔𑁂, 𑀘𑀺𑀢𑁆𑀢𑀸𑀦𑀺 𑀅𑀝𑁆𑀞𑀻𑀦𑀻’’𑀢𑀺 𑀏𑀯𑀫𑀸𑀤𑀺𑀭𑀽𑀧𑀯𑀺𑀲𑁂𑀲𑁄𑀬𑁂𑀯 𑀧𑀫𑀸𑀡𑀁. 𑀬𑀤𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑁂𑀬𑁂𑀯 𑀮𑀺𑀗𑁆𑀕𑀯𑀺𑀲𑁂𑀲𑁄 𑀅𑀥𑀺𑀕𑀦𑁆𑀢𑀩𑁆𑀩𑁄 𑀲𑀺𑀬𑀸, ‘‘𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸’’𑀢𑀺𑀆𑀤𑀻𑀲𑀼 𑀮𑀺𑀗𑁆𑀕𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸. 𑀬𑀲𑁆𑀫𑀸 𑀏𑀯𑀫𑀸𑀤𑀻𑀲𑀼𑀧𑀺 𑀞𑀸𑀦𑁂𑀲𑀼 𑀮𑀺𑀗𑁆𑀕𑀯𑀯𑀢𑁆𑀣𑀸𑀦𑀁 𑀳𑁄𑀢𑀺𑀬𑁂𑀯. 𑀓𑀣𑀁? ‘‘𑀘𑀢𑁆𑀢𑀸𑀭𑁄’’𑀢𑀺 𑀧𑀼𑀮𑁆𑀮𑀺𑀗𑁆𑀕𑀁 ‘‘𑀫𑀳𑀸𑀪𑀽𑀢𑀸’’𑀢𑀺 𑀦𑀧𑀼𑀁𑀲𑀓𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀢𑀺𑀢𑀁 𑀅𑀲𑀼𑀪𑁂𑀲𑀼 𑀫𑀼𑀦𑀺𑀲𑁆𑀲 𑀫𑀦𑁄’’𑀢𑀺 𑀏𑀢𑁆𑀣𑀸𑀧𑀺 ‘‘𑀧𑀢𑀺𑀢’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 ‘‘𑀫𑀦𑁄’’𑀢𑀺 𑀧𑀼𑀮𑁆𑀮𑀺𑀗𑁆𑀕𑀦𑁆𑀢𑀺 𑀯𑀯𑀢𑁆𑀣𑀸𑀦𑀁 𑀪𑀯𑀢𑀻𑀢𑀺. 𑀇𑀤𑀁 𑀲𑀼𑀢𑁆𑀯𑀸 𑀢𑁂 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀢𑁄 𑀢𑁂𑀲𑀁 𑀢𑀼𑀡𑁆𑀳𑀻𑀪𑀽𑀢𑀸𑀦𑀁 𑀇𑀤𑀁 𑀯𑀢𑁆𑀢𑀩𑁆𑀩𑀁 𑁋 𑀬𑀲𑁆𑀫𑀸 𑀫𑀦𑁄𑀕𑀡𑁂 𑀧𑀯𑀢𑁆𑀢𑀸𑀦𑀁 𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀺 𑀓𑀢𑁆𑀣𑀘𑀺 𑀦𑀧𑀼𑀁𑀲𑀓𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀫𑀦𑁄𑀕𑀡𑁂 𑀧𑀫𑀼𑀔𑀲𑁆𑀲 𑀫𑀦𑁄𑀲𑀤𑁆𑀤𑀲𑁆𑀲𑀧𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀺 𑀓𑀢𑁆𑀣𑀘𑀺 𑀦𑀧𑀼𑀁𑀲𑀓𑀯𑀲𑁂𑀦 𑀬𑁄𑀚𑀺𑀢𑀸𑀦𑀺. 𑀢𑀣𑀸 𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑀸 ‘‘𑀲𑀤𑁆𑀥𑀫𑁆𑀫𑀢𑁂𑀚𑀯𑀺𑀳𑀢𑀁 𑀯𑀺𑀮𑀬𑀁 𑀔𑀡𑁂𑀦, 𑀯𑁂𑀦𑁂𑀬𑁆𑀬𑀲𑀢𑁆𑀢𑀳𑀤𑀬𑁂𑀲𑀼 𑀢𑀫𑁄’𑀧𑀬𑀸𑀢𑀺. 𑀤𑀼𑀓𑁆𑀔𑀁 𑀯𑀘𑁄 𑀏𑀢𑀲𑁆𑀫𑀺𑀦𑁆𑀢𑀺 𑀤𑀼𑀩𑁆𑀩𑀘𑁄. 𑀅𑀯𑀦𑀢𑀁 𑀲𑀺𑀭𑁄 𑀬𑀲𑁆𑀲 𑀲𑁄𑀬𑀁 𑀅𑀯𑀁𑀲𑀺𑀭𑁄, 𑀅𑀧𑁆𑀧𑀓𑀁 𑀭𑀸𑀕𑀸𑀤𑀺 𑀭𑀚𑁄 𑀬𑁂𑀲𑀁 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀢𑁂 𑀅𑀧𑁆𑀧𑀭𑀚𑀓𑁆𑀔𑀸’’𑀢𑀺𑀆𑀤𑀺𑀦𑀸 𑀲𑀤𑁆𑀤𑀭𑀘𑀦𑀁 𑀓𑀼𑀩𑁆𑀩𑀺𑀁𑀲𑀼, 𑀦 𑀧𑀦 𑀢𑁂𑀳𑀺 𑀯𑀘𑁄 𑀲𑀺𑀭𑁄 𑀭𑀚𑁄𑀲𑀤𑁆𑀤𑀸𑀤𑀻𑀦𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 𑀈𑀤𑀺𑀲𑀻 𑀲𑀤𑁆𑀤𑀭𑀘𑀦𑀸 𑀓𑀢𑀸, 𑀅𑀣 𑀔𑁄 𑀲𑀺𑀭𑁄𑀫𑀦𑁄𑀲𑀤𑁆𑀤𑀸𑀦𑀁 𑀫𑀦𑁄𑀕𑀡𑁂 𑀧𑀯𑀢𑁆𑀢𑀸𑀦𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑁆𑀤𑀸𑀦𑀁 𑀓𑀢𑁆𑀣𑀘𑀺𑀧𑀺 𑀈𑀤𑀺𑀲𑀸𑀦𑀺𑀧𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀞𑀺𑀢𑀸𑀦𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀭𑁂𑀲𑀁 𑀚𑀸𑀦𑀸𑀧𑀦𑀸𑀥𑀺𑀧𑁆𑀧𑀸𑀬𑀯𑀢𑀺𑀬𑀸 𑀅𑀦𑀼𑀓𑀫𑁆𑀧𑀸𑀬 𑀯𑀺𑀭𑀘𑀺𑀢𑀸. 𑀏𑀢𑁆𑀣𑀸𑀧𑀺 𑀢𑀼𑀫𑁆𑀳𑀸𑀓𑀁 𑀫𑀢𑁂𑀦 𑀫𑀦𑁄𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑁂 𑀲𑀢𑀺 𑀯𑀘𑁄 𑀲𑀺𑀭𑁄 𑀇𑀘𑁆𑀘𑀸𑀤𑀬𑁄𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀫𑀸𑀧𑀚𑁆𑀚𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀓𑀺𑀁 𑀧𑀦𑁂𑀢𑁂𑀲𑀫𑁆𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁 𑀇𑀘𑁆𑀙𑀣𑀸𑀢𑀺. 𑀅𑀤𑁆𑀥𑀸 𑀢𑁂 𑀇𑀤𑀫𑁆𑀧𑀺 𑀲𑀼𑀢𑁆𑀯𑀸 𑀦𑀺𑀩𑁆𑀩𑁂𑀞𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑀸 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀢𑁂 𑀅𑀜𑁆𑀜𑀁 𑀕𑀳𑁂𑀢𑀩𑁆𑀩𑀓𑀸𑀭𑀡𑀁 𑀅𑀧𑀲𑁆𑀲𑀦𑁆𑀢𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀬𑀤𑀺 𑀪𑁄 𑀫𑀦𑁄 𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀦 𑀳𑁄𑀢𑀺, 𑀓𑀲𑁆𑀫𑀸 𑀯𑁂𑀬𑁆𑀬𑀸𑀓𑀭𑀡𑀸 ‘𑀫𑀦𑁄𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄’𑀢𑀺 𑀯𑀤𑀦𑁆𑀢𑀻’’𑀢𑀺? 𑀢𑁂 𑀯𑀢𑁆𑀢𑀩𑁆𑀩𑀸 𑁋 𑀬𑀤𑀺 𑀢𑀼𑀫𑁆𑀳𑁂 𑀯𑁂𑀬𑁆𑀬𑀸𑀓𑀭𑀡𑀫𑀢𑀁 𑀕𑀳𑁂𑀢𑁆𑀯𑀸 𑀫𑀦𑁄𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁 𑀭𑁄𑀘𑁂𑀣, 𑀦𑀦𑀼 𑀪𑀕𑀯𑀸𑀬𑁂𑀯 𑀮𑁄𑀓𑁂 𑀅𑀲𑀤𑀺𑀲𑁄 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁄 𑀫𑀳𑀸𑀧𑀼𑀭𑀺𑀲𑁄 𑀯𑀺𑀲𑀸𑀭𑀤𑁄 𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑁄. 𑀪𑀕𑀯𑀦𑁆𑀢𑀜𑁆𑀳𑀺 𑀧𑀤𑀓𑀸 𑀯𑁂𑀬𑁆𑀬𑀸𑀓𑀭𑀡𑀸 𑀅𑀫𑁆𑀩𑀝𑁆𑀞𑀫𑀸𑀡𑀯𑀧𑁄𑀓𑁆𑀔𑀭𑀲𑀸𑀢𑀺𑀲𑁄𑀡𑀤𑀡𑁆𑀟𑀸𑀤𑀬𑁄 𑀘 𑀩𑁆𑀭𑀸𑀳𑁆𑀫𑀡𑀸 𑀲𑀘𑁆𑀘𑀓𑀦𑀺𑀕𑀡𑁆𑀞𑀸𑀤𑀬𑁄 𑀘 𑀧𑀭𑀺𑀩𑁆𑀩𑀸𑀚𑀓𑀸 𑀯𑀸𑀤𑁂𑀦 𑀦 𑀲𑀫𑁆𑀧𑀸𑀧𑀼𑀡𑀺𑀁𑀲𑀼, 𑀅𑀜𑁆𑀜𑀤𑀢𑁆𑀣𑀼 𑀪𑀕𑀯𑀸𑀬𑁂𑀯 𑀫𑀢𑁆𑀢𑀯𑀸𑀭𑀡𑀕𑀡𑀫𑀚𑁆𑀛𑁂 𑀓𑁂𑀲𑀭𑀲𑀻𑀳𑁄 𑀯𑀺𑀬 𑀅𑀲𑀫𑁆𑀪𑀻𑀢𑁄 𑀦𑁂𑀲𑀁 𑀦𑁂𑀲𑀁 𑀯𑀸𑀤𑀁 𑀫𑀤𑁆𑀤𑁂𑀲𑀺, 𑀫𑀳𑀦𑁆𑀢𑁂 𑀘 𑀦𑁂 𑀅𑀢𑁆𑀣𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀏𑀯𑀁𑀯𑀺𑀥𑁂𑀦 𑀪𑀕𑀯𑀢𑀸 𑀯𑁄𑀳𑀸𑀭𑀓𑀼𑀲𑀮𑁂𑀦 𑀬𑀲𑁆𑀫𑀸 ‘‘𑀓𑀸𑀬𑁄 𑀅𑀦𑀺𑀘𑁆𑀘𑁄’’𑀢𑀺 𑀘 ‘‘𑀓𑀸𑀬𑁄 𑀤𑀼𑀓𑁆𑀔𑁄, 𑀫𑀦𑁄 𑀅𑀦𑀺𑀘𑁆𑀘𑁄, 𑀫𑀦𑁄 𑀤𑀼𑀓𑁆𑀔𑁄’’𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀯𑀼𑀢𑁆𑀢𑀸 𑀫𑀦𑁄𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑀲𑀽𑀘𑀦𑀺𑀓𑀸 𑀩𑀳𑀽 𑀧𑀸𑀴𑀺𑀬𑁄 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀫𑀦𑁄𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄𑀬𑁂𑀯𑀸𑀢𑀺 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑁄𑀢𑀺. 𑀏𑀯𑀁 𑀯𑀼𑀢𑁆𑀢𑀸 𑀢𑁂 𑀦𑀺𑀭𑀼𑀢𑁆𑀢𑀭𑀸 𑀅𑀧𑁆𑀧𑀝𑀺𑀪𑀸𑀦𑀸 𑀫𑀗𑁆𑀓𑀼𑀪𑀽𑀢𑀸 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀧𑀚𑁆𑀛𑀸𑀬𑀺𑀲𑁆𑀲𑀦𑁆𑀢𑀺.

𑀇𑀤𑀸𑀦𑀺 𑀲𑀭𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀺𑀲𑁂𑀲𑀢𑁄 𑀯𑀼𑀘𑁆𑀘𑀢𑁂 𑁋

𑀲𑀭𑁄, 𑀲𑀭𑀸. 𑀲𑀭𑀁, 𑀲𑀭𑁂. 𑀲𑀭𑁂𑀦, 𑀲𑀭𑁂𑀳𑀺, 𑀲𑀭𑁂𑀪𑀺. 𑀲𑀭𑀲𑁆𑀲, 𑀲𑀭𑀸𑀦𑀁. 𑀲𑀭𑀸, 𑀲𑀭𑀲𑁆𑀫𑀸, 𑀲𑀭𑀫𑁆𑀳𑀸, 𑀲𑀭𑁂𑀳𑀺, 𑀲𑀭𑁂𑀪𑀺. 𑀲𑀭𑀲𑁆𑀲, 𑀲𑀭𑀸𑀦𑀁. 𑀲𑀭𑁂, 𑀲𑀭𑀲𑁆𑀫𑀺𑀁, 𑀲𑀭𑀫𑁆𑀳𑀺, 𑀲𑀭𑁂𑀲𑀼. 𑀪𑁄 𑀲𑀭, 𑀪𑀯𑀦𑁆𑀢𑁄 𑀲𑀭𑀸.

𑀅𑀬𑀁 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀲𑁆𑀲 𑀉𑀲𑀼𑀲𑀤𑁆𑀤𑀲𑀭𑀯𑀦𑀅𑀓𑀸𑀭𑀸𑀤𑀺𑀲𑀭𑀯𑀸𑀘𑀓𑀲𑁆𑀲 𑀲𑀭𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀅𑀬𑀁 𑀧𑀦 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀲𑁆𑀲 𑀫𑀦𑁄𑀕𑀡𑀧𑀓𑁆𑀔𑀺𑀓𑀲𑁆𑀲 𑀭𑀳𑀤𑀯𑀸𑀘𑀓𑀲𑁆𑀲 𑀲𑀭𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀲𑀭𑁄, 𑀲𑀭𑀸. 𑀲𑀭𑀁, 𑀲𑀭𑁄, 𑀲𑀭𑁂. 𑀲𑀭𑀲𑀸, 𑀲𑀭𑁂𑀦, 𑀲𑀭𑁂𑀳𑀺, 𑀲𑀭𑁂𑀪𑀺. 𑀲𑀭𑀲𑁄, 𑀲𑀭𑀲𑁆𑀲, 𑀲𑀭𑀸𑀦𑀁. 𑀲𑀭𑀸, 𑀲𑀭𑀲𑁆𑀫𑀸, 𑀲𑀭𑀫𑁆𑀳𑀸, 𑀲𑀭𑁂𑀳𑀺, 𑀲𑀭𑁂𑀪𑀺. 𑀲𑀭𑀲𑁄, 𑀲𑀭𑀲𑁆𑀲, 𑀲𑀭𑀸𑀦𑀁. 𑀲𑀭𑀲𑀺, 𑀲𑀭𑁂, 𑀲𑀭𑀲𑁆𑀫𑀺𑀁, 𑀲𑀭𑀫𑁆𑀳𑀺, 𑀲𑀭𑁂𑀲𑀼. 𑀪𑁄 𑀲𑀭, 𑀪𑀯𑀦𑁆𑀢𑁄 𑀲𑀭𑀸, 𑀪𑁄 𑀲𑀭𑀸 𑀇𑀢𑀺 𑀯𑀸.

𑀯𑀬𑁄, 𑀯𑀬𑀸. 𑀯𑀬𑀁, 𑀯𑀬𑁂. 𑀯𑀬𑁂𑀦, 𑀯𑀬𑁂𑀳𑀺, 𑀯𑀬𑁂𑀪𑀻𑀢𑀺 𑀧𑀼𑀭𑀺𑀲𑀦𑀬𑁂𑀦 𑀜𑁂 𑀬𑁆𑀬𑁄. 𑀅𑀬𑀁 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀲𑁆𑀲 𑀧𑀭𑀺𑀳𑀸𑀦𑀺𑀯𑀸𑀘𑀓𑀲𑁆𑀲 𑀯𑀬𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀅𑀬𑀁 𑀧𑀦 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀲𑁆𑀲 𑀫𑀦𑁄𑀕𑀡𑀧𑀓𑁆𑀔𑀺𑀓𑀲𑁆𑀲 𑀆𑀬𑀼𑀓𑁄𑀝𑁆𑀞𑀸𑀲𑀯𑀸𑀘𑀓𑀲𑁆𑀲 𑀯𑀬𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋 𑀯𑀬𑁄, 𑀯𑀬𑀸. 𑀯𑀬𑀁, 𑀯𑀬𑁄, 𑀯𑀬𑁂. 𑀯𑀬𑀲𑀸, 𑀯𑀬𑁂𑀦, 𑀯𑀬𑁂𑀳𑀺, 𑀯𑀬𑁂𑀪𑀻𑀢𑀺 𑀫𑀦𑀦𑀬𑁂𑀦 𑀜𑁂𑀬𑁆𑀬𑁄. 𑀢𑀲𑁆𑀲 𑀘𑁂𑀢𑁄 𑀧𑀝𑀺𑀲𑁆𑀲𑁄𑀲𑀺, 𑀅𑀭𑀜𑁆𑀜𑁂 𑀮𑀼𑀤𑁆𑀤𑀕𑁄𑀘𑀭𑁄. 𑀘𑁂𑀢𑀸 𑀳𑀦𑀺𑀁𑀲𑀼 𑀯𑁂𑀤𑀩𑁆𑀩𑀁.

𑀘𑁂𑀢𑁄, 𑀘𑁂𑀢𑀸. 𑀘𑁂𑀢𑀁, 𑀘𑁂𑀢𑁂. 𑀘𑁂𑀢𑁂𑀦, 𑀘𑁂𑀢𑁂𑀳𑀺, 𑀘𑁂𑀢𑁂𑀪𑀻𑀢𑀺 𑀧𑀼𑀭𑀺𑀲𑀦𑀬𑁂𑀦 𑀜𑁂𑀬𑁆𑀬𑁄. 𑀅𑀬𑀁 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀲𑁆𑀲 𑀘𑁂𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀅𑀬𑀁 𑀧𑀦 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀯𑀸𑀘𑀓𑀲𑁆𑀲 𑀘𑁂𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋 𑀘𑁂𑀢𑁄, 𑀘𑁂𑀢𑀸. 𑀘𑁂𑀢𑀁, 𑀘𑁂𑀢𑁄, 𑀘𑁂𑀢𑁂. 𑀘𑁂𑀢𑀲𑀸, 𑀘𑁂𑀢𑁂𑀦, 𑀘𑁂𑀢𑁂𑀳𑀺, 𑀘𑁂𑀢𑁂𑀪𑀻𑀢𑀺 𑀫𑀦𑀦𑀬𑁂𑀦 𑀜𑁂𑀬𑁆𑀬𑁄. 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄, 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁, 𑀬𑀲𑁂𑀦 𑀓𑀼𑀮𑀧𑀼𑀢𑁆𑀢𑁂𑀦𑀸𑀢𑀺 𑀏𑀓𑀯𑀘𑀦𑀯𑀲𑁂𑀦 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸, 𑀏𑀓𑀯𑀘𑀦𑀧𑀼𑀣𑀼𑀯𑀘𑀦𑀯𑀲𑁂𑀦 𑀯𑀸. 𑀏𑀯𑀁 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀸𑀦𑀺 𑀘 𑀳𑁄𑀦𑁆𑀢𑀺, 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑀸𑀦𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀲𑁂𑀲𑀜𑁆𑀜𑀼𑀦𑁄 𑀳𑀺 𑀏𑀯𑀫𑀸𑀤𑀺𑀯𑀺𑀪𑀸𑀕𑀁 𑀅𑀚𑀸𑀦𑀦𑁆𑀢𑀸 𑀬𑀁 𑀯𑀸 𑀢𑀁 𑀯𑀸 𑀩𑁆𑀬𑀜𑁆𑀚𑀦𑀁 𑀭𑁄𑀧𑁂𑀦𑁆𑀢𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 𑀅𑀢𑁆𑀣𑀁 𑀯𑀺𑀭𑀸𑀥𑁂𑀦𑁆𑀢𑀺, 𑀢𑀲𑁆𑀫𑀸 𑀬𑁄 𑀏𑀢𑁆𑀣 𑀅𑀫𑁆𑀳𑁂𑀳𑀺 𑀧𑀓𑀸𑀲𑀺𑀢𑁄 𑀯𑀺𑀪𑀸𑀕𑁄, 𑀲𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀲𑀓𑁆𑀓𑀘𑁆𑀘𑀫𑀼𑀕𑁆𑀕𑀳𑁂𑀢𑀩𑁆𑀩𑁄. 𑀓𑀢𑀫𑀸𑀦𑀺 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘 𑀏𑀓𑀤𑁂𑀲𑁂𑀦 𑀦 𑀧𑀯𑀺𑀝𑁆𑀞𑀸𑀦𑀺 𑀘? 𑀫𑀦𑁄 𑀯𑀘𑁄 𑀢𑁂𑀚𑁄𑀲𑀤𑁆𑀤𑀸𑀤𑀬𑁄 𑀘𑁂𑀯 𑀅𑀬𑁆𑀬𑀲𑀤𑁆𑀤𑁄 𑀘, 𑀢𑀢𑁆𑀭 𑀫𑀦𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑀸.

𑀅𑀬𑁆𑀬𑀲𑀤𑁆𑀤𑀲𑁆𑀲 𑀧𑀦 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 ‘‘𑀅𑀬𑁆𑀬𑁄, 𑀅𑀬𑁆𑀬𑀸. 𑀅𑀬𑁆𑀬𑀁, 𑀅𑀬𑁆𑀬𑁂’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀯𑀢𑁆𑀯𑀸 𑀆𑀮𑀧𑀦𑀝𑁆𑀞𑀸𑀦𑁂 ‘‘𑀪𑁄 𑀅𑀬𑁆𑀬, 𑀪𑁄 𑀅𑀬𑁆𑀬𑁄’’𑀢𑀺 𑀤𑁆𑀯𑁂 𑀏𑀓𑀯𑀘𑀦𑀸𑀦𑀺, ‘‘𑀪𑀯𑀦𑁆𑀢𑁄 𑀅𑀬𑁆𑀬𑀸, 𑀪𑀯𑀦𑁆𑀢𑁄 𑀅𑀬𑁆𑀬𑁄’’𑀢𑀺 𑀤𑁆𑀯𑁂 𑀩𑀳𑀼𑀯𑀘𑀦𑀸𑀦𑀺 𑀘 𑀯𑀢𑁆𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀅𑀬𑁆𑀬𑁄 𑀇𑀢𑀺 𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑀯𑀘𑀦𑀪𑀸𑀯𑁂 𑀏𑀓𑀯𑀘𑀦𑀁, 𑀆𑀮𑀧𑀦𑀯𑀘𑀦𑀪𑀸𑀯𑁂 𑀏𑀓𑀯𑀘𑀦𑀜𑁆𑀘𑁂𑀯 𑀩𑀳𑀼𑀯𑀘𑀦𑀜𑁆𑀘. 𑀢𑀢𑁆𑀭𑀺𑀫𑁂 𑀧𑀬𑁄𑀕𑀸 ‘‘𑀅𑀬𑁆𑀬𑁄 𑀓𑀺𑀭 𑀲𑀸𑀕𑀢𑁄 𑀅𑀫𑁆𑀩𑀢𑀺𑀢𑁆𑀣𑀺𑀓𑁂𑀦 𑀦𑀸𑀕𑁂𑀦 𑀲𑀗𑁆𑀕𑀸𑀫𑁂𑀲𑀺, 𑀧𑀺𑀯𑀢𑀼 𑀪𑀦𑁆𑀢𑁂 𑀅𑀬𑁆𑀬𑁄 𑀲𑀸𑀕𑀢𑁄 𑀓𑀸𑀧𑁄𑀢𑀺𑀓𑀁 𑀧𑀲𑀦𑁆𑀦’’𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀅𑀬𑁆𑀬𑁄𑀲𑀤𑁆𑀤𑀲𑁆𑀲 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀧𑁆𑀧𑀬𑁄𑀕𑀸𑀦𑀺, ‘‘𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀢𑀁 𑀧𑀼𑀭𑀺𑀲𑀁 𑀏𑀢𑀤𑀯𑁄𑀘 ‘𑀦𑀸𑀬𑁆𑀬𑁄 𑀲𑁄 𑀪𑀺𑀓𑁆𑀔𑀼 𑀫𑀁 𑀦𑀺𑀧𑁆𑀧𑀸𑀝𑁂𑀲𑀺, 𑀅𑀧𑀺𑀘 𑀅𑀳𑀫𑁂𑀯 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀕𑀘𑁆𑀙𑀸𑀫𑀺, 𑀅𑀓𑀸𑀭𑀓𑁄 𑀲𑁄 𑀪𑀺𑀓𑁆𑀔𑀼, 𑀕𑀘𑁆𑀙 𑀔𑀫𑀸𑀧𑁂𑀳𑀻’𑀢𑀺’’ 𑀏𑀯𑀫𑀸𑀤𑀻𑀦𑀺 𑀅𑀬𑁆𑀬𑁄𑀲𑀤𑁆𑀤𑀲𑁆𑀲 𑀆𑀮𑀧𑀦𑁂𑀓𑀯𑀘𑀦𑀧𑁆𑀧𑀬𑁄𑀕𑀸𑀦𑀺, ‘‘𑀏𑀣’𑀬𑁆𑀬𑁄 𑀭𑀸𑀚𑀯𑀲𑀢𑀺𑀁, 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀡𑀸𑀣 𑀫𑁂. 𑀏𑀣 𑀫𑀬𑀁 𑀅𑀬𑁆𑀬𑁄 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀫𑀸𑀤𑀻𑀦𑀺 𑀅𑀬𑁆𑀬𑁄𑀲𑀤𑁆𑀤𑀲𑁆𑀲 𑀆𑀮𑀧𑀦𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀸𑀦𑀺. 𑀪𑀯𑀢𑀺 𑀘𑀢𑁆𑀭 𑁋

𑀅𑀬𑁆𑀬𑁄 𑀇𑀢𑀺 𑀅𑀬𑀁 𑀲𑀤𑁆𑀤𑁄, 𑀧𑀘𑁆𑀘𑀢𑁆𑀢𑁂𑀓𑀯𑀘𑁄 𑀪𑀯𑁂;

𑀆𑀮𑀧𑀦𑁂 𑀩𑀳𑀼𑀯𑀘𑁄, 𑀪𑀯𑁂 𑀏𑀓𑀯𑀘𑁄𑀧𑀺 𑀘 𑁋

𑀏𑀯𑀁 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘 𑀳𑁄𑀦𑁆𑀢𑀺 𑀏𑀓𑀤𑁂𑀲𑁂𑀦 𑀦 𑀧𑀯𑀺𑀝𑁆𑀞𑀸𑀦𑀺 𑀘.

𑀓𑀢𑀫𑀸𑀦𑀺 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀅𑀧𑁆𑀧𑀯𑀺𑀝𑁆𑀞𑀸𑀦𑀺? 𑀕𑁄𑀲𑀤𑁆𑀤𑁄𑀬𑁂𑀯. 𑀕𑁄𑀲𑀤𑁆𑀤𑀲𑁆𑀲 𑀳𑀺 𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀕𑁄, 𑀕𑀸𑀯𑁄, 𑀕𑀯𑁄. 𑀕𑀸𑀯𑀼𑀁, 𑀕𑀸𑀯𑀁, 𑀕𑀯𑀁, 𑀕𑀸𑀯𑁄, 𑀕𑀯𑁄. 𑀕𑀸𑀯𑁂𑀦, 𑀕𑀯𑁂𑀦, 𑀕𑁄𑀳𑀺, 𑀕𑁄𑀪𑀺. 𑀕𑀸𑀯𑀲𑁆𑀲, 𑀕𑀯𑀲𑁆𑀲, 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁. 𑀕𑀸𑀯𑀸, 𑀕𑀸𑀯𑀲𑁆𑀫𑀸, 𑀕𑀸𑀯𑀫𑁆𑀳𑀸, 𑀕𑀯𑀸, 𑀕𑀯𑀲𑁆𑀫𑀸, 𑀕𑀯𑀫𑁆𑀳𑀸, 𑀕𑁄𑀳𑀺, 𑀕𑁄𑀪𑀺. 𑀕𑀸𑀯𑀲𑁆𑀲, 𑀕𑀯𑀲𑁆𑀲, 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁. 𑀕𑀸𑀯𑁂, 𑀕𑀸𑀯𑀲𑁆𑀫𑀺𑀁, 𑀕𑀸𑀯𑀫𑁆𑀳𑀺, 𑀕𑀯𑁂, 𑀕𑀯𑀲𑁆𑀫𑀺𑀁, 𑀕𑀯𑀫𑁆𑀳𑀺, 𑀕𑀸𑀯𑁂𑀲𑀼, 𑀕𑀯𑁂𑀲𑀼, 𑀕𑁄𑀲𑀼. 𑀪𑁄 𑀕𑁄, 𑀪𑀯𑀦𑁆𑀢𑁄 𑀕𑀸𑀯𑁄, 𑀕𑀯𑁄. 𑀅𑀬𑀁 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀅𑀧𑁆𑀧𑀯𑀺𑀝𑁆𑀞𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.