𑁧𑁪. 𑀅𑀢𑁆𑀣𑀢𑁆𑀢𑀺𑀓𑀯𑀺𑀪𑀸𑀕

𑀪𑀽𑀥𑀸𑀢𑀼 𑀢𑀸𑀬 𑀦𑀺𑀧𑁆𑀨𑀦𑁆𑀦-𑀭𑀽𑀧𑀜𑁆𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁;

𑀓𑀢𑁆𑀯𑀸 𑀧𑀥𑀸𑀦𑀫𑀫𑁆𑀳𑁂𑀳𑀺, 𑀲𑀩𑁆𑀩𑀫𑁂𑀢𑀁 𑀧𑀧𑀜𑁆𑀘𑀺𑀢𑀁.

𑀪𑀯𑀢𑀺𑀲𑁆𑀲 𑀯𑀲𑀸 𑀤𑀸𑀦𑀺, 𑀯𑀓𑁆𑀔𑀸𑀫𑀢𑁆𑀣𑀢𑁆𑀢𑀺𑀓𑀁 𑀯𑀭𑀁;

𑀅𑀢𑁆𑀣𑀼𑀤𑁆𑀥𑀸𑀭𑁄 𑀢𑀼𑀫𑀦𑁆𑀢𑀜𑁆𑀘, 𑀢𑁆𑀯𑀸𑀤𑀺𑀬𑀦𑁆𑀢𑀁 𑀢𑀺𑀓𑀁 𑀇𑀥.

𑀢𑀲𑁆𑀫𑀸 𑀢𑀸𑀯 𑀪𑀽𑀥𑀸𑀢𑀼𑀢𑁄 𑀧𑀯𑀢𑁆𑀢𑀲𑁆𑀲 𑀪𑀽𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀦𑀻𑀬𑀢𑁂 𑁋

𑀔𑀦𑁆𑀥𑀲𑀢𑁆𑀢𑀸𑀫𑀦𑀼𑀲𑁆𑀲𑁂𑀲𑀼, 𑀯𑀺𑀚𑁆𑀚𑀫𑀸𑀦𑁂 𑀘 𑀥𑀸𑀢𑀼𑀬𑀁;

𑀔𑀻𑀡𑀸𑀲𑀯𑁂 𑀭𑀼𑀓𑁆𑀔𑀸𑀤𑀺𑀫𑁆𑀳𑀺, 𑀪𑀽𑀢𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀉𑀧𑁆𑀧𑀸𑀤𑁂 𑀘𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀪𑀽𑀢𑀲𑀤𑁆𑀤𑁄 𑀯𑀺𑀪𑀸𑀯𑀺𑀦𑀸;

𑀯𑀺𑀧𑀼𑀮𑁂 𑀲𑁄𑀧𑀲𑀕𑁆𑀕𑁄𑀬𑀁, 𑀳𑀻𑀴𑀦𑁂 𑀯𑀺𑀥𑀫𑁂𑀧𑀺 𑀘;

𑀧𑀭𑀸𑀚𑀬𑁂 𑀯𑁂𑀤𑀺𑀬𑀦𑁂, 𑀦𑀸𑀫𑁂 𑀧𑀸𑀓𑀝𑀢𑀸𑀬 𑀘.

𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 𑀪𑀽𑀢𑀲𑀤𑁆𑀤𑁄 𑀧𑀜𑁆𑀘𑀓𑁆𑀔𑀦𑁆𑀥𑀸𑀫𑀦𑀼𑀲𑁆𑀲𑀥𑀸𑀢𑀼𑀯𑀺𑀚𑁆𑀚𑀫𑀸𑀦𑀔𑀻𑀡𑀸𑀲𑀯𑀲𑀢𑁆𑀢𑀭𑀼𑀓𑁆𑀔𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀪𑀽𑀢𑀫𑀺𑀤𑀦𑁆𑀢𑀺 𑀪𑀺𑀓𑁆𑀔𑀯𑁂 𑀲𑀫𑀦𑀼𑀧𑀲𑁆𑀲𑀣𑀸’’𑀢𑀺𑀆𑀤𑀻𑀲𑀼 𑀳𑀺 𑀅𑀬𑀁 𑀧𑀜𑁆𑀘𑀓𑁆𑀔𑀦𑁆𑀥𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀬𑀸𑀦𑀻𑀥 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀻’’𑀢𑀺 𑀏𑀢𑁆𑀣 𑀅𑀫𑀦𑀼𑀲𑁆𑀲𑁂. ‘‘𑀘𑀢𑁆𑀢𑀸𑀭𑁄 𑀔𑁄 𑀪𑀺𑀓𑁆𑀔𑀼 𑀫𑀳𑀸𑀪𑀽𑀢𑀸 𑀳𑁂𑀢𑀽’’𑀢𑀺 𑀏𑀢𑁆𑀣 𑀥𑀸𑀢𑀽𑀲𑀼. ‘‘𑀪𑀽𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂. ‘‘𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄’’𑀢𑀺 𑀏𑀢𑁆𑀣 𑀔𑀻𑀡𑀸𑀲𑀯𑁂. ‘‘𑀲𑀩𑁆𑀩𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬’’𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑁂. ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸’’𑀢𑀺 𑀏𑀢𑁆𑀣 𑀭𑀼𑀓𑁆𑀔𑀸𑀤𑀻𑀲𑀽𑀢𑀺. 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀝𑁆𑀞𑀓𑀣𑀸𑀬 𑀯𑀘𑀦𑀁 𑀇𑀤𑀁. 𑀝𑀻𑀓𑀸𑀬𑀫𑀸𑀤𑀺𑀲𑀤𑁆𑀤𑁂𑀦 𑀉𑀧𑁆𑀧𑀸𑀤𑀸𑀤𑀻𑀦𑀺 𑀕𑀬𑁆𑀳𑀭𑁂. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢’’𑀦𑁆𑀢𑀺𑀆𑀤𑀻𑀲𑀼 𑀪𑀽𑀢𑀲𑀤𑁆𑀤𑁄 𑀉𑀧𑁆𑀧𑀸𑀤𑁂 𑀤𑀺𑀲𑁆𑀲𑀢𑀺. 𑀲𑀉𑀧𑀲𑀕𑁆𑀕𑁄 𑀧𑀦 ‘‘𑀧𑀪𑀽𑀢𑀫𑀭𑀺𑀬𑁄 𑀧𑀓𑀭𑁄𑀢𑀺 𑀧𑀼𑀜𑁆𑀜’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀧𑀼𑀮𑁂. ‘‘𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀪𑀽𑀢𑀭𑀽𑀧𑁄’’𑀢𑀺𑀆𑀤𑀻𑀲𑀼 𑀳𑀻𑀴𑀦𑁂. ‘‘𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀅𑀪𑀺𑀪𑀽𑀢𑁄 𑀫𑀸𑀭𑁄 𑀯𑀺𑀚𑀺𑀢𑁄 𑀲𑀗𑁆𑀕𑀸𑀫𑁄’’𑀢𑀺𑀆𑀤𑀻𑀲𑀼 𑀯𑀺𑀥𑀫𑀦𑁂. ‘‘𑀧𑀭𑀸𑀪𑀽𑀢𑀭𑀽𑀧𑁄𑀔𑁄 𑀅𑀬𑀁 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀧𑀭𑀸𑀚𑀬𑁂. ‘‘𑀅𑀦𑀼𑀪𑀽𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 𑀯𑁂𑀤𑀺𑀬𑀦𑁂. ‘‘𑀯𑀺𑀪𑀽𑀢𑀁 𑀧𑀜𑁆𑀜𑀸𑀬𑀸’’𑀢𑀺𑀆𑀤𑀻𑀲𑀼 𑀧𑀸𑀓𑀝𑀻𑀓𑀭𑀡𑁂 𑀤𑀺𑀲𑁆𑀲𑀢𑀺, 𑀢𑁂 𑀲𑀩𑁆𑀩𑁂 ‘‘𑀭𑀼𑀓𑁆𑀔𑀸𑀤𑀻𑀲𑀽’’𑀢𑀺𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸𑀢𑀺.

𑀇𑀤𑀸𑀦𑀺 𑀢𑀼𑀫𑀦𑁆𑀢𑀧𑀤𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋

𑀪𑀯𑀺𑀢𑀼𑀁, 𑀉𑀩𑁆𑀪𑀯𑀺𑀢𑀼𑀁, 𑀲𑀫𑀼𑀩𑁆𑀪𑀯𑀺𑀢𑀼𑀁, 𑀧𑀪𑀯𑀺𑀢𑀼𑀁, 𑀧𑀭𑀸𑀪𑀯𑀺𑀢𑀼𑀁, 𑀅𑀢𑀺𑀪𑀯𑀺𑀢𑀼𑀁, 𑀲𑀫𑁆𑀪𑀯𑀺𑀢𑀼𑀁, 𑀯𑀺𑀪𑀯𑀺𑀢𑀼𑀁, 𑀪𑁄𑀢𑀼𑀁, 𑀲𑀫𑁆𑀪𑁄𑀢𑀼𑀁, 𑀯𑀺𑀪𑁄𑀢𑀼𑀁, 𑀧𑀸𑀢𑀼𑀪𑀯𑀺𑀢𑀼𑀁, 𑀧𑀸𑀢𑀼𑀩𑁆𑀪𑀯𑀺𑀢𑀼𑀁 𑀯𑀸, 𑀧𑀸𑀢𑀼𑀪𑁄𑀢𑀼𑀁. 𑀇𑀫𑀸𑀦𑀺 𑀅𑀓𑀫𑁆𑀫𑀓𑀸𑀦𑀺 𑀢𑀼𑀫𑀦𑁆𑀢𑀧𑀤𑀸𑀦𑀺.

𑀧𑀭𑀺𑀪𑁄𑀢𑀼𑀁 𑀧𑀭𑀺𑀪𑀯𑀺𑀢𑀼𑀁, 𑀅𑀪𑀺𑀪𑁄𑀢𑀼𑀁 𑀅𑀪𑀺𑀪𑀯𑀺𑀢𑀼𑀁, 𑀅𑀥𑀺𑀪𑁄𑀢𑀼𑀁 𑀅𑀥𑀺𑀪𑀯𑀺𑀢𑀼𑀁, 𑀅𑀢𑀺𑀪𑁄𑀢𑀼𑀁 𑀅𑀢𑀺𑀪𑀯𑀺𑀢𑀼𑀁, 𑀅𑀦𑀼𑀪𑁄𑀢𑀼𑀁 𑀅𑀦𑀼𑀪𑀯𑀺𑀢𑀼𑀁, 𑀲𑀫𑀦𑀼𑀪𑁄𑀢𑀼𑀁 𑀲𑀫𑀦𑀼𑀪𑀯𑀺𑀢𑀼𑀁, 𑀅𑀪𑀺𑀲𑀫𑁆𑀪𑁄𑀢𑀼𑀁 𑀅𑀪𑀺𑀲𑀫𑁆𑀪𑀯𑀺𑀢𑀼𑀁. 𑀇𑀫𑀸𑀦𑀺 𑀲𑀓𑀫𑁆𑀫𑀓𑀸𑀦𑀺 𑀢𑀼𑀫𑀦𑁆𑀢𑀧𑀤𑀸𑀦𑀺, 𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀭𑀺 𑀪𑀯𑀦𑁆𑀢𑀺.

‘‘𑀪𑀸𑀯𑁂𑀢𑀼𑀁, 𑀧𑀪𑀸𑀯𑁂𑀢𑀼𑀁, 𑀲𑀫𑁆𑀪𑀸𑀯𑁂𑀢𑀼𑀁, 𑀯𑀺𑀪𑀸𑀯𑁂𑀢𑀼𑀁, 𑀧𑀭𑀺𑀪𑀸𑀯𑁂𑀢𑀼𑀁’’𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀳𑁂𑀢𑀼𑀓𑀢𑁆𑀢𑀭𑀺 𑀢𑀼𑀫𑀦𑁆𑀢𑀧𑀤𑀸𑀦𑀺, 𑀲𑀩𑁆𑀩𑀸𑀦𑀺𑀧𑀺 𑀳𑁂𑀢𑀼𑀓𑀢𑁆𑀢𑀭𑀺 𑀢𑀼𑀫𑀦𑁆𑀢𑀧𑀤𑀸𑀦𑀺 𑀲𑀓𑀫𑁆𑀫𑀓𑀸𑀦𑀺𑀬𑁂𑀯 𑀪𑀯𑀦𑁆𑀢𑀺. 𑀉𑀤𑁆𑀤𑁂𑀲𑁄𑀬𑀁.

𑀢𑀢𑁆𑀭 𑀲𑀫𑀸𑀦𑀢𑁆𑀣𑀧𑀤𑁂𑀲𑀼 𑀏𑀓𑀫𑁂𑀯𑀸𑀤𑀺𑀧𑀤𑀁 𑀕𑀳𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄 𑁋 𑀪𑀯𑀺𑀢𑀼𑀦𑁆𑀢𑀺 𑀳𑁄𑀢𑀼𑀁 𑀯𑀺𑀚𑁆𑀚𑀺𑀢𑀼𑀁 𑀧𑀜𑁆𑀜𑀸𑀬𑀺𑀢𑀼𑀁 𑀲𑀭𑀽𑀧𑀁 𑀮𑀪𑀺𑀢𑀼𑀁. 𑀏𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑁂𑀲𑀸𑀦𑀫𑁆𑀧𑀺 𑀢𑀼𑀫𑀦𑁆𑀢𑀸𑀦𑀁 𑀦𑀺𑀤𑁆𑀤𑁂𑀲𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄, 𑀲𑀩𑁆𑀩𑀸𑀦𑀺 𑀢𑀼𑀫𑀦𑁆𑀢𑀧𑀤𑀸𑀦𑀺 𑀘𑀢𑀼𑀢𑁆𑀣𑀺𑀬𑀢𑁆𑀣𑁂 𑀯𑀢𑁆𑀢𑀦𑁆𑀢𑀺 ‘‘𑀢𑁆𑀯𑀁 𑀫𑀫 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀦𑁂𑀢𑁆𑀢𑀁 𑀬𑀸𑀘𑀺𑀢𑀼𑀫𑀸𑀕𑀢𑁄’’𑀢𑀺 𑀏𑀢𑁆𑀣 𑀯𑀺𑀬. 𑀬𑀸𑀘𑀺𑀢𑀼𑀦𑁆𑀢𑀺 𑀳𑀺 𑀬𑀸𑀘𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀪𑀯𑀺𑀢𑀼𑀦𑁆𑀢𑀺𑀆𑀤𑀻𑀦𑀫𑁆𑀧𑀺 ‘‘𑀪𑀯𑀦𑀢𑁆𑀣𑀸𑀬𑀸’’𑀢𑀺 𑀯𑀸 ‘‘𑀪𑀯𑀦𑀢𑁆𑀣’’𑀦𑁆𑀢𑀺 𑀯𑀸 ‘‘𑀪𑀯𑀦𑀸𑀬𑀸’’𑀢𑀺 𑀯𑀸 𑀆𑀤𑀺𑀦𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀧𑀺𑀘 ‘‘𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄’’𑀢𑀺 𑀏𑀢𑁆𑀣 ‘‘𑀤𑀝𑁆𑀞𑀼’’𑀦𑁆𑀢𑀺 𑀧𑀤𑀲𑁆𑀲 ‘‘𑀤𑀺𑀲𑁆𑀯𑀸’’𑀢𑀺 𑀅𑀢𑁆𑀣𑀤𑀲𑁆𑀲𑀦𑀢𑁄 𑀬𑀣𑀸𑀭𑀳𑀁 𑀢𑀼𑀫𑀦𑁆𑀢𑀸𑀦𑀺 𑀢𑁆𑀯𑀸𑀲𑀤𑁆𑀤𑀦𑁆𑀢𑀧𑀤𑀢𑁆𑀣𑀯𑀲𑁂𑀦𑀧𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀏𑀢𑀸𑀦𑀺 𑀘 𑀦𑀺𑀧𑀸𑀢𑀧𑀤𑁂𑀲𑀼 𑀲𑀗𑁆𑀕𑀳𑀁𑀕𑀘𑁆𑀙𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀦𑀺𑀧𑀸𑀢𑀧𑀤𑀧𑀭𑀺𑀘𑁆𑀙𑁂𑀤𑁂 ‘‘𑀢𑀼𑀁 𑀇𑀢𑀺 𑀘𑀢𑀼𑀢𑁆𑀣𑀺𑀬𑀸’’𑀢𑀺. 𑀢𑀢𑁆𑀭𑀸𑀬𑀫𑀢𑁆𑀣𑁄 ‘‘𑀢𑀼𑀁 𑀇𑀢𑀺 𑀏𑀢𑀤𑀦𑁆𑀢𑁄 𑀦𑀺𑀧𑀸𑀢𑁄 𑀘𑀢𑀼𑀢𑁆𑀣𑀺𑀬𑀸 𑀅𑀢𑁆𑀣𑁂 𑀯𑀢𑁆𑀢𑀢𑀻’’𑀢𑀺.

𑀢𑀼𑀫𑀦𑁆𑀢𑀓𑀣𑀸 𑀲𑀫𑀢𑁆𑀢𑀸.

𑀇𑀤𑀸𑀦𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋

𑀪𑀯𑀺𑀢𑁆𑀯𑀸, 𑀪𑀯𑀺𑀢𑁆𑀯𑀸𑀦, 𑀪𑀯𑀺𑀢𑀼𑀦, 𑀪𑀯𑀺𑀬, 𑀪𑀯𑀺𑀬𑀸𑀦. 𑀉𑀩𑁆𑀪𑀯𑀺𑀢𑁆𑀯𑀸, 𑀉𑀩𑁆𑀪𑀯𑀺𑀢𑁆𑀯𑀸𑀦, 𑀉𑀩𑁆𑀪𑀯𑀺𑀢𑀼𑀦, 𑀉𑀩𑁆𑀪𑀯𑀺𑀬, 𑀉𑀩𑁆𑀪𑀯𑀺𑀬𑀸𑀦. 𑀏𑀲 𑀦𑀬𑁄 ‘‘𑀲𑀫𑀼𑀩𑁆𑀪𑀯𑀺𑀢𑁆𑀯𑀸, 𑀧𑀭𑀸𑀪𑀯𑀺𑀢𑁆𑀯𑀸, 𑀲𑀫𑁆𑀪𑀯𑀺𑀢𑁆𑀯𑀸, 𑀯𑀺𑀪𑀯𑀺𑀢𑁆𑀯𑀸, 𑀧𑀸𑀢𑀼𑀩𑁆𑀪𑀯𑀺𑀢𑁆𑀯𑀸’’𑀢𑀺 𑀏𑀢𑁆𑀣𑀸𑀧𑀺. 𑀇𑀫𑀸𑀦𑀺 𑀅𑀓𑀫𑁆𑀫𑀓𑀸𑀦𑀺 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑀸𑀦𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺.

𑀪𑀼𑀢𑁆𑀯𑀸, 𑀪𑀼𑀢𑁆𑀯𑀸𑀦, 𑀧𑀭𑀺𑀪𑀯𑀺𑀢𑁆𑀯𑀸, 𑀧𑀭𑀺𑀪𑀯𑀺𑀢𑁆𑀯𑀸𑀦, 𑀧𑀭𑀺𑀪𑀯𑀺𑀢𑀼𑀦, 𑀧𑀭𑀺𑀪𑀯𑀺𑀬, 𑀧𑀭𑀺𑀪𑀯𑀺𑀬𑀸𑀦, 𑀧𑀭𑀺𑀪𑀼𑀬𑁆𑀬. 𑀅𑀪𑀺𑀪𑀯𑀺𑀢𑁆𑀯𑀸, 𑀅𑀪𑀺𑀪𑀯𑀺𑀢𑁆𑀯𑀸𑀦, 𑀅𑀪𑀺𑀪𑀯𑀺𑀢𑀼𑀦, 𑀅𑀪𑀺𑀪𑀯𑀺𑀬, 𑀅𑀪𑀺𑀪𑀯𑀺𑀬𑀸𑀦, 𑀅𑀪𑀺𑀪𑀼𑀬𑁆𑀬. 𑀏𑀲 𑀦𑀬𑁄 ‘‘𑀅𑀥𑀺𑀪𑀯𑀺𑀢𑁆𑀯𑀸, 𑀅𑀢𑀺𑀪𑀯𑀺𑀢𑁆𑀯𑀸, 𑀅𑀦𑀼𑀪𑀯𑀺𑀢𑁆𑀯𑀸’’𑀢𑀺 𑀏𑀢𑁆𑀣𑀸𑀧𑀺. 𑀇𑀤𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. ‘‘𑀢𑀫𑀯𑁄𑀘 𑀭𑀸𑀚𑀸 𑀅𑀦𑀼𑀪𑀯𑀺𑀬𑀸𑀦 𑀢𑀫𑁆𑀧𑀺, 𑀏𑀬𑁆𑀬𑀸𑀲𑀺 𑀔𑀺𑀧𑁆𑀧𑀁 𑀅𑀳𑀫𑀧𑀺 𑀧𑀽𑀚𑀁 𑀓𑀲𑁆𑀲’’𑀦𑁆𑀢𑀺. 𑀅𑀦𑀼𑀪𑀼𑀢𑁆𑀯𑀸, 𑀅𑀦𑀼𑀪𑀼𑀢𑁆𑀯𑀸𑀦. 𑀅𑀥𑀺𑀪𑁄𑀢𑁆𑀯𑀸, 𑀅𑀥𑀺𑀪𑁄𑀢𑁆𑀯𑀸𑀦.

‘‘𑀲𑀝𑁆𑀞𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀅𑀜𑁆𑀜𑁂 𑀤𑁂𑀯𑁂 𑀅𑀥𑀺𑀪𑁄𑀢𑁆𑀯𑀸, 𑀇𑀲𑁆𑀲𑀭𑀁 𑀓𑀸𑀭𑀬𑀺𑀲𑁆𑀲𑀢𑀻’’𑀢𑀺

𑀇𑀤𑀫𑁂𑀢𑁆𑀣 𑀧𑀸𑀴𑀺𑀦𑀺𑀤𑀲𑁆𑀲𑀦𑀁, 𑀇𑀫𑀸𑀦𑀺 𑀲𑀓𑀫𑁆𑀫𑀓𑀸𑀦𑀺 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑀸𑀦𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀤𑁆𑀥𑀓𑀢𑁆𑀢𑀭𑀺𑀬𑁂𑀯 𑀪𑀯𑀦𑁆𑀢𑀺.

‘‘𑀪𑀸𑀯𑁂𑀢𑁆𑀯𑀸, 𑀪𑀸𑀯𑁂𑀢𑁆𑀯𑀸𑀦. 𑀧𑀪𑀸𑀯𑁂𑀢𑁆𑀯𑀸, 𑀧𑀪𑀸𑀯𑁂𑀢𑁆𑀯𑀸𑀦. 𑀲𑀫𑁆𑀪𑀸𑀯𑁂𑀢𑁆𑀯𑀸, 𑀲𑀫𑁆𑀪𑀸𑀯𑁂𑀢𑁆𑀯𑀸𑀦. 𑀯𑀺𑀪𑀸𑀯𑁂𑀢𑁆𑀯𑀸, 𑀯𑀺𑀪𑀸𑀯𑁂𑀢𑁆𑀯𑀸𑀦. 𑀧𑀭𑀺𑀪𑀸𑀯𑁂𑀢𑁆𑀯𑀸, 𑀧𑀭𑀺𑀪𑀸𑀯𑁂𑀢𑁆𑀯𑀸𑀦’’𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀲𑀓𑀫𑁆𑀫𑀓𑀸𑀦𑀺 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑀸𑀦𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺 𑀳𑁂𑀢𑀼𑀓𑀢𑁆𑀢𑀭𑀺𑀬𑁂𑀯 𑀪𑀯𑀦𑁆𑀢𑀺. 𑀉𑀤𑁆𑀤𑁂𑀲𑁄𑀬𑀁.

𑀢𑀢𑁆𑀭 𑀲𑀫𑀸𑀦𑀢𑁆𑀣𑀧𑀤𑁂𑀲𑀼 𑀏𑀓𑀫𑁂𑀯𑀸𑀤𑀺𑀧𑀤𑀁 𑀕𑀳𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄 𑁋 𑀪𑀯𑀺𑀢𑁆𑀯𑀸𑀢𑀺 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀺𑀢𑁆𑀯𑀸 𑀲𑀭𑀽𑀧𑀁 𑀮𑀪𑀺𑀢𑁆𑀯𑀸. 𑀏𑀯𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑁂𑀲𑀸𑀦𑀫𑁆𑀧𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀪𑀼𑀢𑁆𑀯𑀸𑀢𑀺 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀼𑀢𑁆𑀯𑀸𑀢𑀺 𑀲𑀓𑀫𑁆𑀫𑀓𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀪𑀼𑀢𑁆𑀯𑀸 𑀅𑀦𑀼𑀪𑀼𑀢𑁆𑀯𑀸𑀢𑀺 𑀇𑀫𑁂𑀲𑀜𑁆𑀳𑀺 𑀲𑀫𑀸𑀦𑀢𑁆𑀣𑀢𑀁 𑀲𑀤𑁆𑀥𑀫𑁆𑀫𑀯𑀺𑀤𑀽 𑀇𑀘𑁆𑀙𑀦𑁆𑀢𑀺. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀪𑀼𑀢𑁆𑀯𑀸 𑀪𑀼𑀢𑁆𑀯𑀸𑀦’’𑀇𑀘𑁆𑀘𑁂𑀢𑁂, ‘‘𑀅𑀦𑀼𑀪𑀼𑀢𑁆𑀯𑀸’’𑀢𑀺𑀫𑀲𑁆𑀲 𑀳𑀺;

𑀅𑀢𑁆𑀣𑀁 𑀲𑀽𑀘𑁂𑀦𑁆𑀢𑀺 ‘‘𑀳𑀼𑀢𑁆𑀯𑀸’’𑀢𑀺, 𑀧𑀤𑀲𑁆𑀲 𑀧𑀦 𑀦𑁂𑀯 𑀢𑁂.

𑀓𑁂𑀘𑀺 ‘‘𑀪𑀽𑀢𑁆𑀯𑀸’’𑀢𑀺 𑀤𑀻𑀖𑀢𑁆𑀢𑀁, 𑀢𑀲𑁆𑀲 𑀇𑀘𑁆𑀙𑀦𑁆𑀢𑀺 𑀲𑀸𑀲𑀦𑁂;

𑀤𑀻𑀖𑀢𑀸 𑀭𑀲𑁆𑀲𑀢𑀸 𑀘𑁂𑀯, 𑀤𑁆𑀯𑀬𑀫𑁆𑀧𑁂𑀢𑀁 𑀧𑀤𑀺𑀲𑁆𑀲𑀢𑀺.

𑀲𑀤𑁆𑀤𑀲𑀢𑁆𑀣𑁂 𑀘 ‘‘𑀪𑀽𑀢𑁆𑀯𑀸’’𑀢𑀺, 𑀤𑀻𑀖𑀢𑁆𑀢𑀲𑀜𑁆𑀳𑀺𑀢𑀁 𑀧𑀤𑀁;

‘‘𑀪𑀯𑀺𑀢𑁆𑀯𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀁, 𑀤𑀻𑀧𑁂𑀢𑀺 𑀦 𑀢𑀼 𑀲𑀸𑀲𑀦𑁂.

‘‘𑀳𑀼𑀢𑁆𑀯𑀸’’𑀇𑀢𑀺 𑀧𑀤𑀁𑀬𑁂𑀯, 𑀤𑀻𑀧𑁂𑀢𑀺 𑀚𑀺𑀦𑀲𑀸𑀲𑀦𑁂;

‘‘𑀪𑀯𑀺𑀢𑁆𑀯𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀁, 𑀦𑀢𑁆𑀣𑀺 𑀅𑀜𑁆𑀜𑀢𑁆𑀣 𑀢𑀁 𑀧𑀤𑀁.

𑀇𑀘𑁆𑀘𑁂𑀯𑀁 𑀲𑀯𑀺𑀲𑁂𑀲𑀦𑁆𑀢𑀼, 𑀯𑀘𑀦𑀁 𑀲𑀸𑀭𑀤𑀲𑁆𑀲𑀺𑀦𑀸;

𑀲𑀸𑀲𑀦𑁂 𑀲𑀤𑁆𑀤𑀲𑀢𑁆𑀣𑁂 𑀘, 𑀯𑀺𑀜𑁆𑀜𑀼𑀦𑀸 𑀧𑁂𑀓𑁆𑀔𑀺𑀢𑀩𑁆𑀩𑀓𑀁.

𑀏𑀯𑀁 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑁂 𑀧𑀯𑀢𑁆𑀢𑀸𑀦𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺𑀧𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀲𑀩𑁆𑀩𑀸𑀦𑁂𑀢𑀸𑀦𑀺 𑀅𑀯𑀺𑀪𑀢𑁆𑀢𑀺𑀓𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀳𑀺 𑀦𑀺𑀧𑀸𑀢𑀧𑀭𑀺𑀘𑁆𑀙𑁂𑀤𑁂 𑀅𑀯𑀺𑀪𑀢𑁆𑀢𑀺𑀓𑀸𑀦𑀺 𑀓𑀢𑁆𑀯𑀸 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀲𑀤𑁆𑀤𑀢𑁆𑀣𑀯𑀺𑀤𑀽𑀦𑀁 𑀧𑀦 𑀫𑀢𑁂 𑀧𑀞𑀫𑀸𑀤𑀺𑀯𑀺𑀪𑀢𑁆𑀢𑀺𑀯𑀲𑁂𑀦 𑀲𑀯𑀺𑀪𑀢𑁆𑀢𑀺𑀓𑀸𑀦𑀺 𑀪𑀯𑀦𑁆𑀢𑀺.

𑀇𑀫𑀲𑁆𑀫𑀺𑀜𑁆𑀘 𑀧𑀦 𑀢𑁆𑀯𑀸𑀤𑀺𑀬𑀦𑁆𑀢𑀸𑀥𑀺𑀓𑀸𑀭𑁂 𑀇𑀤𑀜𑁆𑀘𑀼𑀧𑀮𑀓𑁆𑀔𑀺𑀢𑀩𑁆𑀩𑀁 𑁋 𑀪𑀼𑀢𑁆𑀯𑀸 𑀕𑀘𑁆𑀙𑀢𑀺, 𑀪𑀼𑀢𑁆𑀯𑀸 𑀕𑀢𑁄, 𑀪𑀼𑀢𑁆𑀯𑀸 𑀕𑀫𑀺𑀲𑁆𑀲𑀲𑀺, 𑀓𑀲𑀺𑀢𑁆𑀯𑀸 𑀯𑀧𑀢𑀺. 𑀉𑀫𑀗𑁆𑀕𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀯𑁂𑀤𑁂𑀳𑁄 𑀦𑀸𑀯𑀫𑀸𑀭𑀼𑀳𑀺. 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀲𑁆𑀲𑀼 𑀇𑀘𑁆𑀘𑀸𑀤𑀻 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀥𑀸𑀢𑀽𑀦𑀁 𑀧𑀼𑀩𑁆𑀩𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑀸. ‘‘𑀪𑀼𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺 𑀏𑀢𑁆𑀣 𑀳𑀺 ‘‘𑀪𑀼𑀢𑁆𑀯𑀸’’𑀢𑀺 𑀇𑀤𑀁 𑀧𑀼𑀩𑁆𑀩𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀁. ‘‘𑀕𑀘𑁆𑀙𑀢𑀻’’𑀢𑀺 𑀇𑀤𑀁 𑀧𑀦 𑀉𑀢𑁆𑀢𑀭𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁, 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀺 𑀘𑁂𑀢𑀸𑀦𑀺 𑀧𑀤𑀸𑀦𑀺 𑀏𑀓𑀓𑀢𑁆𑀢𑀼𑀓𑀸𑀦𑀁 𑀓𑁆𑀭𑀺𑀬𑀸𑀦𑀁 𑀯𑀸𑀘𑀓𑀢𑁆𑀢𑀸. 𑀢𑀣𑀸 𑀳𑁂𑀢𑁆𑀣 𑀬𑁄 𑀕𑀫𑀦𑀓𑁆𑀭𑀺𑀬𑀸𑀬 𑀓𑀢𑁆𑀢𑀸, 𑀲𑁄 𑀏𑀯 𑀪𑀼𑀜𑁆𑀚𑀦𑀓𑁆𑀭𑀺𑀬𑀸𑀬 𑀓𑀢𑁆𑀢𑀼𑀪𑀽𑀢𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀅𑀦𑁆𑀥𑀓𑀸𑀭𑀁 𑀦𑀺𑀳𑀦𑁆𑀢𑁆𑀯𑀸𑀦, 𑀉𑀤𑀺𑀢𑁄𑀬𑀁 𑀤𑀺𑀯𑀸𑀓𑀭𑁄;

𑀯𑀡𑁆𑀡𑀁 𑀧𑀜𑁆𑀜𑀸𑀯𑀪𑀸𑀲𑁂𑀳𑀺, 𑀑𑀪𑀸𑀲𑁂𑀢𑁆𑀯𑀸 𑀲𑀫𑀼𑀕𑁆𑀕𑀢𑁄’’

𑀇𑀘𑁆𑀘𑀸𑀤𑀻𑀦𑀺𑀧𑀺 𑀧𑀦 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀲𑀫𑀸𑀦𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑀸. 𑀏𑀢𑁆𑀣 𑀳𑀺 ‘‘𑀦𑀺𑀳𑀦𑁆𑀢𑁆𑀯𑀸𑀦𑀸’’𑀢𑀺 𑀧𑀤𑀁 𑀲𑀫𑀸𑀦𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀁. ‘‘𑀉𑀤𑀺𑀢𑁄’’𑀢𑀺 𑀇𑀤𑀁 𑀧𑀦 𑀉𑀢𑁆𑀢𑀭𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀫𑀸𑀦𑀓𑀸𑀮𑀓𑁆𑀭𑀺𑀬𑀸𑀬 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀲𑁆𑀫𑀸𑀬𑁂𑀯 𑀲𑀫𑀸𑀦𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀬𑀁 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

𑀓𑁂𑀘𑀺 𑀧𑀦 ‘‘𑀫𑀼𑀔𑀁 𑀩𑁆𑀬𑀸𑀤𑀸𑀬 𑀲𑀬𑀢𑀺, 𑀅𑀓𑁆𑀔𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀲𑁆𑀲𑀢𑀻’’𑀢𑀺 𑀉𑀤𑀸𑀳𑀭𑀦𑁆𑀢𑀺. 𑀅𑀧𑀭𑁂 ‘‘𑀦𑀺𑀲𑀚𑁆𑀚 𑀅𑀥𑀻𑀢𑁂, 𑀞𑀢𑁆𑀯𑀸 𑀓𑀣𑁂𑀢𑀻’’𑀢𑀺. 𑀢𑀢𑁆𑀣 𑀩𑁆𑀬𑀸𑀤𑀸𑀦𑀧𑀭𑀺𑀯𑀢𑁆𑀢𑀦𑀼𑀢𑁆𑀢𑀭𑀓𑀸𑀮𑁄 𑀩𑁆𑀬𑀸𑀤𑀸𑀦𑀽𑀧𑀲𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑀓𑁆𑀭𑀺𑀬𑀸𑀬 𑀮𑀓𑁆𑀔𑀺𑀬𑀢𑀺. ‘‘𑀦𑀺𑀲𑀚𑁆𑀚 𑀅𑀥𑀻𑀢𑁂, 𑀞𑀢𑁆𑀯𑀸 𑀓𑀣𑁂𑀢𑀻’’𑀢𑀺 𑀘 𑀲𑀫𑀸𑀦𑀓𑀸𑀮𑀢𑀸𑀬𑀧𑀺 𑀅𑀚𑁆𑀛𑁂𑀦𑀓𑀣𑀦𑁂𑀳𑀺 𑀧𑀼𑀩𑁆𑀩𑁂𑀧𑀺 𑀦𑀺𑀲𑀚𑁆𑀚𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀓𑁆𑀓𑀸 𑀧𑀼𑀩𑁆𑀩𑀼𑀢𑁆𑀢𑀭𑀓𑀸𑀮𑀢𑀸 𑀲𑀫𑁆𑀪𑀸𑀯𑁂𑀢𑀼𑀁, 𑀢𑀲𑁆𑀫𑀸 𑀧𑀼𑀭𑀺𑀫𑀸𑀦𑀺𑀬𑁂𑀯 𑀉𑀤𑀸𑀳𑀭𑀡𑀸𑀦𑀺 𑀬𑀼𑀢𑁆𑀢𑀸𑀦𑀺. 𑀉𑀤𑀬𑀲𑀫𑀓𑀸𑀮𑀫𑁂𑀯 𑀳𑀺 𑀢𑀦𑁆𑀦𑀺𑀯𑀢𑁆𑀢𑀦𑀻𑀬𑀦𑀺𑀯𑀢𑁆𑀢𑀦𑀦𑁆𑀢𑀺.

‘‘𑀤𑁆𑀯𑀸𑀭𑀫𑀸𑀯𑀭𑀺𑀢𑁆𑀯𑀸 𑀧𑀯𑀺𑀲𑀢𑀺’’𑀇𑀘𑁆𑀘𑀸𑀤𑀺 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀅𑀧𑀭𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀯𑀺𑀲𑀦𑀓𑁆𑀭𑀺𑀬𑀸 𑀧𑀼𑀭𑀺𑀫𑀸, 𑀆𑀯𑀭𑀡𑀓𑁆𑀭𑀺𑀬𑀸 𑀧𑀦 𑀧𑀘𑁆𑀙𑀺𑀫𑀸, 𑀢𑀲𑁆𑀫𑀸 ‘‘𑀆𑀯𑀭𑀺𑀢𑁆𑀯𑀸’’𑀢𑀺 𑀇𑀤𑀁 𑀅𑀧𑀭𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀯𑀺𑀲𑀢𑀻’’𑀢𑀺 𑀇𑀤𑀁 𑀧𑀦 𑀧𑀼𑀩𑁆𑀩𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀦𑁆𑀢𑀺. 𑀅𑀬𑀁 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄. 𑀅𑀧𑀭𑁂 ‘‘𑀥’𑀦𑁆𑀢𑀺 𑀓𑀘𑁆𑀘 𑀧𑀢𑀺𑀢𑁄 𑀤𑀡𑁆𑀟𑁄’’𑀢𑀺 𑀉𑀤𑀸𑀳𑀭𑀡𑀦𑁆𑀢𑀺. 𑀅𑀪𑀺𑀖𑀸𑀢𑀪𑀽𑀢𑀲𑀫𑀸𑀬𑁄𑀕𑁂 𑀧𑀦 𑀅𑀪𑀺𑀖𑀸𑀢𑀚𑀲𑀤𑁆𑀤𑀲𑁆𑀲 𑀲𑀫𑀸𑀦𑀓𑀸𑀮𑀢𑀸 𑀏𑀢𑁆𑀣 𑀮𑀩𑁆𑀪𑀢𑀻𑀢𑀺 𑀇𑀥𑀸𑀧𑀺 𑀧𑀼𑀭𑀺𑀫𑀸𑀦𑀺𑀬𑁂𑀯 𑀉𑀤𑀸𑀳𑀭𑀡𑀸𑀦𑀺 𑀬𑀼𑀢𑁆𑀢𑀸𑀦𑀻𑀢𑀺.

‘‘𑀧𑀺𑀲𑀸𑀘𑀁 𑀤𑀺𑀲𑁆𑀯𑀸 𑀘𑀲𑁆𑀲 𑀪𑀬𑀁 𑀳𑁄𑀢𑀺. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸’’𑀇𑀘𑁆𑀘𑀸𑀤𑀺 𑀅𑀲𑀫𑀸𑀦𑁂 𑀓𑀢𑁆𑀢𑀭𑀺 𑀧𑀬𑁄𑀕𑁄. 𑀏𑀢𑁆𑀣 𑀳𑀺 𑀧𑀺𑀲𑀸𑀘𑀁 𑀤𑀺𑀲𑁆𑀯𑀸 𑀧𑀼𑀭𑀺𑀲𑀲𑁆𑀲 𑀪𑀬𑀁 𑀳𑁄𑀢𑀺, 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸. 𑀏𑀯𑀁 𑀲𑀫𑀸𑀦𑀓𑀢𑁆𑀢𑀼𑀓𑀢𑀸 𑀥𑀸𑀢𑀽𑀦𑀁 𑀦 𑀮𑀩𑁆𑀪𑀢𑀺 𑀤𑀲𑁆𑀲𑀦𑀓𑁆𑀭𑀺𑀬𑀸𑀬 𑀧𑀼𑀭𑀺𑀲𑁂𑀲𑀼 𑀧𑀯𑀢𑁆𑀢𑀦𑀢𑁄, 𑀪𑀯𑀦𑀸𑀤𑀺𑀓𑁆𑀭𑀺𑀬𑀸𑀬 𑀘 𑀪𑀬𑀸𑀤𑀻𑀲𑀼 𑀧𑀯𑀢𑁆𑀢𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

𑀇𑀤𑀫𑁆𑀧𑀺 𑀧𑀦𑁂𑀢𑁆𑀣 𑀉𑀧𑀮𑀓𑁆𑀔𑀺𑀢𑀩𑁆𑀩𑀁 ‘‘𑀅𑀧𑁆𑀧𑀢𑁆𑀯𑀸 𑀦𑀤𑀺𑀁 𑀧𑀩𑁆𑀩𑀢𑁄, 𑀅𑀢𑀺𑀓𑁆𑀓𑀫𑁆𑀫 𑀧𑀩𑁆𑀩𑀢𑀁 𑀦𑀤𑀻’’𑀇𑀘𑁆𑀘𑀸𑀤𑀺 𑀧𑀭𑀸𑀧𑀭𑀬𑁄𑀕𑁄. ‘‘𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀺, 𑀖𑀢𑀁 𑀧𑀺𑀯𑀺𑀢𑁆𑀯𑀸 𑀩𑀮𑀁 𑀚𑀸𑀬𑀢𑁂, ‘𑀥’𑀦𑁆𑀢𑀺 𑀓𑀢𑁆𑀯𑀸 𑀤𑀡𑁆𑀟𑁄 𑀧𑀢𑀺𑀢𑁄’’𑀇𑀘𑁆𑀘𑀸𑀤𑀺 𑀮𑀓𑁆𑀔𑀡𑀳𑁂𑀢𑀼𑀆𑀤𑀺𑀧𑁆𑀧𑀬𑁄𑀕𑁄. ‘‘𑀦𑁆𑀳𑀢𑁆𑀯𑀸 𑀕𑀫𑀦𑀁, 𑀪𑀼𑀢𑁆𑀯𑀸 𑀲𑀬𑀦𑀁. 𑀉𑀧𑀸𑀤𑀸𑀬 𑀭𑀽𑀧’’𑀫𑀺𑀘𑁆𑀘𑀸𑀧𑀺 𑀩𑁆𑀬𑀢𑁆𑀢𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺𑀧𑁆𑀧𑀬𑁄𑀕𑁄𑀢𑀺.

𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀥𑀸𑀢𑀽𑀦𑀁 𑀧𑀼𑀩𑁆𑀩𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄, 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀲𑀫𑀸𑀦𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄, 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀅𑀧𑀭𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄, 𑀅𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄, 𑀧𑀭𑀸𑀧𑀭𑀬𑁄𑀕𑁄, 𑀮𑀓𑁆𑀔𑀡𑀳𑁂𑀢𑀼𑀆𑀤𑀺𑀧𑁆𑀧𑀬𑁄𑀕𑁄, 𑀩𑁆𑀬𑀢𑁆𑀢𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺𑀧𑁆𑀧𑀬𑁄𑀕𑁄𑀢𑀺 𑀲𑀢𑁆𑀢𑀥𑀸 𑀢𑁆𑀯𑀸𑀤𑀺𑀬𑀦𑁆𑀢𑀸𑀦𑀁 𑀧𑀤𑀸𑀦𑀁 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀓𑀘𑁆𑀘𑀸𑀬𑀦𑁂 ‘‘𑀧𑀼𑀩𑁆𑀩𑀓𑀸𑀮𑁂𑀓𑀓𑀢𑁆𑀢𑀼𑀓𑀸𑀦𑀁 𑀢𑀼𑀦 𑀢𑁆𑀯𑀸𑀦 𑀢𑁆𑀯𑀸 𑀯𑀸’’𑀢𑀺 𑀧𑀼𑀩𑁆𑀩𑀓𑀸𑀮𑁂𑀬𑁂𑀯 𑀏𑀓𑀓𑀢𑁆𑀢𑀼𑀓𑀕𑁆𑀕𑀳𑀡𑀁 𑀓𑀢𑀦𑁆𑀢𑀺? 𑀬𑁂𑀢𑀼𑀬𑁆𑀬𑁂𑀦 𑀢𑁆𑀯𑀸𑀤𑀺𑀬𑀦𑁆𑀢𑀸𑀦𑀁 𑀧𑀤𑀸𑀦𑀁 𑀧𑀼𑀭𑀺𑀫𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀦𑀢𑁄. 𑀓𑀘𑁆𑀘𑀸𑀬𑀦𑁂 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀧𑀼𑀩𑁆𑀩𑀓𑀸𑀮𑁂𑀓𑀓𑀢𑁆𑀢𑀼𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 ‘‘𑀇𑀢𑀺 𑀓𑀢𑁆𑀯𑀸’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀳𑁂𑀢𑀼𑀅𑀢𑁆𑀣𑀯𑀲𑁂𑀦𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀢𑁄, 𑀢𑀲𑁆𑀫𑀸 ‘‘𑀪𑀯𑀺𑀢𑁆𑀯𑀸’’𑀢𑀺𑀆𑀤𑀻𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀢𑁆𑀯𑀸𑀤𑀺𑀲𑀤𑁆𑀤𑀦𑁆𑀢𑀸𑀦𑀁 𑀧𑀤𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 ‘‘𑀧𑀘𑀺𑀢𑁆𑀯𑀸’’𑀢𑀺𑀆𑀤𑀻𑀦𑀁 𑀬𑀣𑀸𑀧𑀬𑁄𑀕𑀁 ‘‘𑀪𑀯𑀦𑀳𑁂𑀢𑀼 𑀧𑀘𑀦𑀳𑁂𑀢𑀽’’𑀢𑀺𑀆𑀤𑀺𑀦𑀸 𑀳𑁂𑀢𑀼𑀅𑀢𑁆𑀣𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀳𑁂𑀢𑀼𑀢𑁆𑀣𑁂𑀧𑀺 𑀬𑀢𑁄 𑀳𑁄𑀦𑁆𑀢𑀺, 𑀲𑀤𑁆𑀤𑀸 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑀓𑀸;

𑀢𑀲𑁆𑀫𑀸 𑀳𑁂𑀢𑀼𑀯𑀲𑁂𑀦𑀸𑀧𑀺, 𑀯𑀤𑁂𑀬𑁆𑀬𑀢𑁆𑀣𑀁 𑀯𑀺𑀘𑀓𑁆𑀔𑀡𑁄.

‘‘𑀇𑀢𑀺 𑀓𑀢𑁆𑀯𑀸’’𑀢𑀺 𑀲𑀤𑁆𑀤𑀲𑁆𑀲, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀲𑀼 𑀳𑀺;

‘‘𑀇𑀢𑀺 𑀓𑀭𑀡𑀳𑁂𑀢𑀽’’𑀢𑀺, 𑀅𑀢𑁆𑀣𑁄 𑀥𑀻𑀭𑁂𑀳𑀺 𑀕𑀬𑁆𑀳𑀢𑀺.

‘‘𑀕𑀘𑁆𑀙𑀸𑀫𑀺 𑀤𑀸𑀦𑀺 𑀦𑀺𑀩𑁆𑀩𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀢𑀺’’;

𑀇𑀢𑀺 𑀧𑀸𑀞𑁂𑀧𑀺 𑀳𑁂𑀢𑀼𑀢𑁆𑀣𑁄, 𑀕𑀬𑁆𑀳𑀢𑁂 𑀧𑀼𑀩𑁆𑀩𑀯𑀺𑀜𑁆𑀜𑀼𑀪𑀺.

‘‘𑀬𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂 𑀕𑀫𑀦-𑀳𑁂𑀢𑀽’’𑀢𑀺 𑀳𑀺 𑀓𑀣𑀻𑀬𑀢𑁂;

𑀳𑁂𑀢𑀼𑀢𑁆𑀣𑁂𑀯𑀁 𑀬𑀣𑀸𑀬𑁄𑀕-𑀫𑀜𑁆𑀜𑀢𑁆𑀭𑀸𑀧𑀺 𑀅𑀬𑀁 𑀦𑀬𑁄.

𑀏𑀯𑀁 𑀪𑀽𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀘 𑀢𑀼𑀫𑀦𑁆𑀢𑀧𑀤𑀜𑁆𑀘 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀜𑁆𑀘𑀸𑀢𑀺 𑀅𑀢𑁆𑀣𑀢𑁆𑀢𑀺𑀓𑀁 𑀯𑀺𑀪𑀢𑁆𑀢𑀁.

𑀬𑁄 𑀇𑀫𑀫𑀢𑁆𑀣𑀢𑀺𑀓𑀁 𑀲𑀼𑀯𑀺𑀪𑀢𑁆𑀢𑀁,

𑀓𑀡𑁆𑀡𑀭𑀲𑀸𑀬𑀦𑀫𑀸𑀕𑀫𑀺𑀓𑀸𑀦𑀁;

𑀥𑀸𑀭𑀬𑀢𑁂 𑀲 𑀪𑀯𑁂 𑀕𑀢𑀓𑀗𑁆𑀔𑀸,

𑀧𑀸𑀯𑀘𑀦𑀫𑁆𑀳𑀺 𑀕𑀢𑁂 𑀲𑀼𑀔𑀼𑀫𑀢𑁆𑀣𑁂.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀅𑀢𑁆𑀣𑀢𑁆𑀢𑀺𑀓𑀯𑀺𑀪𑀸𑀕𑁄 𑀦𑀸𑀫

𑀘𑀼𑀤𑁆𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀪𑀽𑀥𑀸𑀢𑀼𑀭𑀽𑀧𑀸𑀦𑀺 𑀤𑀲𑁆𑀲𑀺𑀢𑀸𑀦𑀺.

𑀧𑀤𑀫𑀸𑀮𑀸 𑀦𑀺𑀝𑁆𑀞𑀺𑀢𑀸.