𑁧𑁩. 𑀲𑀯𑀺𑀦𑀺𑀘𑁆𑀙𑀬𑀲𑀗𑁆𑀔𑁆𑀬𑀸𑀦𑀸𑀫𑀦𑀸𑀫𑀺𑀓𑀧𑀤𑀫𑀸𑀮𑀸

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀲𑀗𑁆𑀔𑁆𑀬𑀸𑀦𑀸𑀫𑀺𑀓𑀧𑀦𑁆𑀢𑀺𑀬𑁄;

𑀪𑀽𑀥𑀸𑀢𑀼𑀚𑁂𑀳𑀺 𑀭𑀽𑀧𑁂𑀳𑀺, 𑀅𑀜𑁆𑀜𑁂𑀳𑀺 𑀘𑀼𑀧𑀬𑁄𑀚𑀺𑀢𑀼𑀁.

𑀬𑀸 𑀳𑀺 𑀲𑀸 𑀳𑁂𑀝𑁆𑀞𑀸 𑀅𑀫𑁆𑀳𑁂𑀳𑀺 𑀏𑀓 𑀤𑁆𑀯𑀺𑀢𑀺 𑀘𑀢𑀼𑀇𑀘𑁆𑀘𑁂𑀢𑁂𑀲𑀁 𑀲𑀗𑁆𑀔𑁆𑀬𑀸𑀲𑀩𑁆𑀩𑀦𑀸𑀫𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀓𑀣𑀺𑀢𑀸, 𑀢𑀁 𑀞𑀧𑁂𑀢𑁆𑀯𑀸 𑀇𑀥 𑀅𑀲𑀩𑁆𑀩𑀦𑀸𑀫𑀸𑀦𑀁 𑀧𑀜𑁆𑀘 𑀙 𑀲𑀢𑁆𑀢𑀸𑀤𑀻𑀦𑀁 𑀲𑀗𑁆𑀔𑁆𑀬𑀸𑀦𑀸𑀫𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀽𑀥𑀸𑀢𑀼𑀫𑀬𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀭𑀽𑀧𑁂𑀳𑀺 𑀬𑁄𑀚𑀦𑀢𑁆𑀣𑀁 𑀯𑀼𑀘𑁆𑀘𑀢𑁂 𑁋

𑀧𑀜𑁆𑀘, 𑀧𑀜𑁆𑀘𑀳𑀺, 𑀧𑀜𑁆𑀘𑀪𑀺, 𑀧𑀜𑁆𑀘𑀦𑁆𑀦𑀁, 𑀧𑀜𑁆𑀘𑀲𑀼. 𑀲𑀢𑁆𑀢𑀦𑁆𑀦𑀁 𑀯𑀺𑀪𑀢𑁆𑀢𑀻𑀦𑀁 𑀯𑀲𑁂𑀦 𑀜𑁂𑀬𑁆𑀬𑀁. ‘‘𑀧𑀜𑁆𑀘 𑀪𑀽𑀢𑀸, 𑀧𑀜𑁆𑀘 𑀅𑀪𑀺𑀪𑀯𑀺𑀢𑀸𑀭𑁄, 𑀧𑀜𑁆𑀘 𑀧𑀼𑀭𑀺𑀲𑀸, 𑀧𑀜𑁆𑀘 𑀪𑀽𑀫𑀺𑀬𑁄, 𑀧𑀜𑁆𑀘 𑀓𑀜𑁆𑀜𑀸𑀬𑁄, 𑀧𑀜𑁆𑀘 𑀪𑀽𑀢𑀸𑀦𑀺, 𑀧𑀜𑁆𑀘 𑀘𑀺𑀢𑁆𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀙, 𑀙𑀳𑀺, 𑀙𑀪𑀺, 𑀙𑀦𑁆𑀦𑀁, 𑀙𑀲𑀼, 𑀙𑀲𑁆𑀲𑀼 𑀇𑀢𑀺𑀧𑀺. ‘‘𑀙𑀲𑁆𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀙𑀲𑁆𑀲𑀼 𑀓𑁆𑀭𑀼𑀩𑁆𑀩𑀢𑀺 𑀲𑀦𑁆𑀣𑀯’’𑀦𑁆𑀢𑀺 𑀳𑀺 𑀧𑀸𑀴𑀺. 𑀲𑀢𑁆𑀢, 𑀲𑀢𑁆𑀢𑀳𑀺, 𑀲𑀢𑁆𑀢𑀪𑀺, 𑀲𑀢𑁆𑀢𑀦𑁆𑀦𑀁, 𑀲𑀢𑁆𑀢𑀲𑀼. 𑀅𑀝𑁆𑀞, 𑀅𑀝𑁆𑀞𑀳𑀺, 𑀅𑀝𑁆𑀞𑀪𑀺, 𑀅𑀝𑁆𑀞𑀦𑁆𑀦𑀁, 𑀅𑀝𑁆𑀞𑀲𑀼. 𑀦𑀯, 𑀦𑀯𑀳𑀺, 𑀦𑀯𑀪𑀺, 𑀦𑀯𑀦𑁆𑀦𑀁, 𑀦𑀯𑀲𑀼. 𑀤𑀲, 𑀤𑀲𑀳𑀺, 𑀤𑀲𑀪𑀺, 𑀤𑀲𑀦𑁆𑀦𑀁, 𑀤𑀲𑀲𑀼. 𑀏𑀯𑀁 𑀏𑀓𑀸𑀤𑀲. 𑀤𑁆𑀯𑀸𑀤𑀲, 𑀩𑀸𑀭𑀲. 𑀢𑁂𑀭𑀲, 𑀢𑁂𑀤𑀲, 𑀢𑁂𑀴𑀲. 𑀘𑀢𑀼𑀤𑁆𑀤𑀲, 𑀘𑀼𑀤𑁆𑀤𑀲. 𑀧𑀜𑁆𑀘𑀤𑀲, 𑀧𑀦𑁆𑀦𑀭𑀲. 𑀲𑁄𑀴𑀲. 𑀲𑀢𑁆𑀢𑀭𑀲. 𑀅𑀝𑁆𑀞𑀸𑀭𑀲, 𑀅𑀝𑁆𑀞𑀸𑀭𑀲𑀳𑀺, 𑀅𑀝𑁆𑀞𑀸𑀭𑀲𑀪𑀺, 𑀅𑀝𑁆𑀞𑀸𑀭𑀲𑀦𑁆𑀦𑀁, 𑀅𑀝𑁆𑀞𑀸𑀭𑀲𑀲𑀼. 𑀲𑀩𑁆𑀩𑀫𑁂𑀢𑀁 𑀩𑀳𑀼𑀯𑀘𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑀁.

𑀏𑀓𑀽𑀦𑀯𑀻𑀲𑀢𑀺, 𑀏𑀓𑀽𑀦𑀯𑀻𑀲𑀁 𑀇𑀘𑁆𑀘𑀸𑀤𑀺𑀧𑀺. 𑀏𑀓𑀽𑀦𑀯𑀻𑀲𑀸𑀬, 𑀏𑀓𑀽𑀦𑀯𑀻𑀲𑀸𑀬𑀁, 𑀏𑀓𑀽𑀦𑀯𑀻𑀲 𑀪𑀺𑀓𑁆𑀔𑀽 𑀢𑀺𑀝𑁆𑀞𑀦𑁆𑀢𑀺, 𑀏𑀓𑀽𑀦𑀯𑀻𑀲𑀁 𑀪𑀺𑀓𑁆𑀔𑀽 𑀧𑀲𑁆𑀲𑀢𑀺, 𑀏𑀯𑀁 ‘‘𑀓𑀜𑁆𑀜𑀸𑀬𑁄 𑀘𑀺𑀢𑁆𑀢𑀸𑀦𑀻’’𑀢𑀺 𑀘 𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀽𑀦𑀯𑀻𑀲𑀸𑀬 𑀪𑀺𑀓𑁆𑀔𑀽𑀳𑀺 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀏𑀓𑀽𑀦𑀯𑀻𑀲𑀸𑀬 𑀓𑀜𑁆𑀜𑀸𑀳𑀺 𑀓𑀢𑀁, 𑀏𑀓𑀽𑀦𑀯𑀻𑀲𑀸𑀬 𑀘𑀺𑀢𑁆𑀢𑁂𑀳𑀺 𑀓𑀢𑀁, 𑀏𑀓𑀽𑀦𑀯𑀻𑀲𑀸𑀬 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑁂𑀢𑀺, 𑀏𑀓𑀽𑀦𑀯𑀻𑀲𑀸𑀬 𑀓𑀜𑁆𑀜𑀸𑀦𑀁 𑀥𑀦𑀁 𑀤𑁂𑀢𑀺, 𑀏𑀓𑀽𑀦𑀯𑀻𑀲𑀸𑀬 𑀘𑀺𑀢𑁆𑀢𑀸𑀦𑀁 𑀭𑀼𑀘𑁆𑀘𑀢𑀺, 𑀏𑀓𑀽𑀦𑀯𑀻𑀲𑀸𑀬 𑀪𑀺𑀓𑁆𑀔𑀽𑀳𑀺 𑀅𑀧𑁂𑀢𑀺. 𑀏𑀯𑀁 𑀓𑀜𑁆𑀜𑀸𑀳𑀺 𑀘𑀺𑀢𑁆𑀢𑁂𑀳𑀺. 𑀏𑀓𑀽𑀦𑀯𑀻𑀲𑀸𑀬 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀓𑀁, 𑀏𑀯𑀁 𑀓𑀜𑁆𑀜𑀸𑀦𑀁 𑀘𑀺𑀢𑁆𑀢𑀸𑀦𑀁. 𑀏𑀓𑀽𑀦𑀯𑀻𑀲𑀸𑀬𑀁 𑀪𑀺𑀓𑁆𑀔𑀽𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀏𑀯𑀁 ‘‘𑀓𑀜𑁆𑀜𑀸𑀲𑀼 𑀘𑀺𑀢𑁆𑀢𑁂𑀲𑀽’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀽𑀦𑀯𑀻𑀲𑀢𑀺, 𑀏𑀓𑀽𑀦𑀯𑀻𑀲𑀢𑀺𑀁, 𑀏𑀓𑀽𑀦𑀯𑀻𑀲𑀢𑀺𑀬𑀸, 𑀏𑀓𑀽𑀦𑀯𑀻𑀲𑀢𑀺𑀬𑀁.

𑀯𑀻𑀲𑀢𑀺, 𑀯𑀻𑀲𑀢𑀺𑀁, 𑀯𑀻𑀲𑀢𑀺𑀬𑀸, 𑀯𑀻𑀲𑀢𑀺𑀬𑀁. 𑀯𑀻𑀲, 𑀯𑀻𑀲𑀁, 𑀯𑀻𑀲𑀸𑀬, 𑀯𑀻𑀲𑀸𑀬𑀁. 𑀢𑀣𑀸 𑀏𑀓𑀯𑀻𑀲 𑀤𑁆𑀯𑀸𑀯𑀻𑀲 𑀩𑀸𑀯𑀻𑀲 𑀢𑁂𑀯𑀻𑀲 𑀘𑀢𑀼𑀯𑀻𑀲 𑀇𑀘𑁆𑀘𑀸𑀤𑀻𑀲𑀼𑀧𑀺. 𑀢𑀺𑀁𑀲, 𑀢𑀺𑀁𑀲𑀁, 𑀢𑀺𑀁𑀲𑀸𑀬, 𑀢𑀺𑀁𑀲𑀸𑀬𑀁. 𑀘𑀢𑁆𑀢𑀸𑀮𑀻𑀲, 𑀘𑀢𑁆𑀢𑀸𑀮𑀻𑀲𑀁, 𑀘𑀢𑁆𑀢𑀸𑀮𑀻𑀲𑀸𑀬, 𑀘𑀢𑁆𑀢𑀸𑀮𑀻𑀲𑀸𑀬𑀁. 𑀘𑀢𑁆𑀢𑀸𑀭𑀻𑀲 𑀇𑀘𑁆𑀘𑀸𑀤𑀺𑀧𑀺. 𑀧𑀜𑁆𑀜𑀸𑀲, 𑀧𑀜𑁆𑀜𑀸𑀲𑀁, 𑀧𑀜𑁆𑀜𑀸𑀲𑀸𑀬, 𑀧𑀜𑁆𑀜𑀸𑀲𑀸𑀬𑀁. 𑀧𑀡𑁆𑀡𑀸𑀲, 𑀧𑀡𑁆𑀡𑀸𑀲𑀁, 𑀧𑀡𑁆𑀡𑀸𑀲𑀸𑀬, 𑀧𑀡𑁆𑀡𑀸𑀲𑀸𑀬𑀁. 𑀲𑀝𑁆𑀞𑀺, 𑀲𑀝𑁆𑀞𑀺𑀁, 𑀲𑀝𑁆𑀞𑀺𑀬𑀸, 𑀲𑀝𑁆𑀞𑀺𑀬𑀁. 𑀲𑀢𑁆𑀢𑀢𑀺, 𑀲𑀢𑁆𑀢𑀢𑀺𑀁, 𑀲𑀢𑁆𑀢𑀢𑀺𑀬𑀸, 𑀲𑀢𑁆𑀢𑀢𑀺𑀬𑀁. 𑀲𑀢𑁆𑀢𑀭𑀺 𑀇𑀘𑁆𑀘𑀸𑀤𑀺𑀧𑀺. 𑀅𑀲𑀻𑀢𑀺, 𑀅𑀲𑀻𑀢𑀺𑀁, 𑀅𑀲𑀻𑀢𑀺𑀬𑀸, 𑀅𑀲𑀻𑀢𑀺𑀬𑀁. 𑀦𑀯𑀼𑀢𑀺. 𑀦𑀯𑀼𑀢𑀺𑀁, 𑀦𑀯𑀼𑀢𑀺𑀬𑀸, 𑀦𑀯𑀼𑀢𑀺𑀬𑀁.

𑀇𑀢𑁆𑀣𑀜𑁆𑀘 𑀅𑀜𑁆𑀜𑀣𑀸𑀧𑀺 𑀲𑀗𑁆𑀔𑁆𑀬𑀸𑀭𑀽𑀧𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀏𑀓𑀽𑀦𑀯𑀻𑀲𑁂𑀳𑀺, 𑀏𑀓𑀽𑀦𑀯𑀻𑀲𑀸𑀦𑀁, 𑀏𑀓𑀽𑀦𑀯𑀻𑀲𑁂𑀲𑀼. ‘‘𑀙𑀦𑁆𑀦𑀯𑀼𑀢𑀻𑀦’’𑀦𑁆𑀢𑀺 𑀘 𑀆𑀤𑀺𑀦𑀸𑀧𑀺 𑀲𑀗𑁆𑀔𑁆𑀬𑀸𑀭𑀽𑀧𑀸𑀦𑀁 𑀓𑀢𑁆𑀣𑀘𑀺 𑀤𑀲𑁆𑀲𑀦𑀢𑁄 𑀓𑁂𑀘𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀊𑀦𑀯𑀻𑀲𑀢𑀺𑀲𑀤𑁆𑀤𑀁 𑀲𑀩𑁆𑀩𑀤𑀸𑀧𑀺 𑀏𑀓𑀯𑀘𑀦𑀦𑁆𑀢𑀫𑀺𑀢𑁆𑀣𑀺𑀮𑀺𑀗𑁆𑀕𑀫𑁂𑀯 𑀧𑀬𑀼𑀜𑁆𑀚𑀦𑁆𑀢𑀺. 𑀓𑁂𑀘𑀺 ‘‘𑀯𑀻𑀲𑀢𑀺𑀆𑀤𑀬𑁄 𑀆𑀦𑀯𑀼𑀢𑀺 𑀏𑀓𑀯𑀘𑀦𑀦𑁆𑀢𑀸 𑀇𑀢𑁆𑀣𑀺𑀮𑀺𑀗𑁆𑀕𑀸’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦𑀸𑀳𑀼 𑁋

‘‘𑀲𑀤𑁆𑀤𑀸 𑀲𑀗𑁆𑀔𑁆𑀬𑁂𑀬𑁆𑀬𑀲𑀗𑁆𑀔𑀸𑀲𑀼, 𑀏𑀓𑀢𑁆𑀢𑁂 𑀯𑀻𑀲𑀢𑀸𑀤𑀬𑁄;

𑀲𑀗𑁆𑀔𑀢𑁆𑀣𑁂 𑀤𑁆𑀯𑀺𑀩𑀳𑀼𑀢𑁆𑀢𑀫𑁆𑀳𑀺, 𑀢𑀸 𑀢𑀼 𑀘𑀸𑀦𑀯𑀼𑀢𑀺𑀢𑁆𑀣𑀺𑀬𑁄’’𑀢𑀺.

𑀏𑀢𑁆𑀣 𑀤𑁆𑀯𑀺𑀯𑀘𑀦𑀁 𑀙𑀟𑁆𑀟𑁂𑀢𑀩𑁆𑀩𑀁 𑀩𑀼𑀤𑁆𑀥𑀯𑀘𑀦𑁂 𑀢𑀤𑀪𑀸𑀯𑀢𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀘 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀯𑀘𑀦𑀁 𑀓𑀺𑀜𑁆𑀘𑀺 𑀧𑀸𑀴𑀺𑀧𑁆𑀧𑀤𑁂𑀲𑀁 𑀧𑀢𑁆𑀯𑀸 𑀬𑀼𑀚𑁆𑀚𑀢𑀺, 𑀓𑀺𑀜𑁆𑀘𑀺 𑀧𑀦 𑀧𑀢𑁆𑀯𑀸 𑀦 𑀬𑀼𑀚𑁆𑀚𑀢𑀺 𑀯𑀻𑀲𑀢𑀺𑀯𑀻𑀲𑀁𑀢𑀺𑀁𑀲𑀁𑀇𑀘𑁆𑀘𑀸𑀤𑀻𑀦𑀜𑁆𑀳𑀺 𑀲𑀗𑁆𑀔𑀢𑁆𑀣𑀸𑀦𑀁 𑀲𑀤𑁆𑀤𑀸𑀦𑀁 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀯𑀲𑁂𑀦𑀧𑀺 𑀧𑀸𑀴𑀺𑀬𑀁 𑀤𑀲𑁆𑀲𑀦𑀢𑁄, 𑀓𑀘𑁆𑀘𑀸𑀬𑀦𑁂 𑀘 𑀬𑁄𑀯𑀘𑀦𑀲𑀫𑁆𑀪𑀽𑀢𑀭𑀽𑀧𑀯𑀦𑁆𑀢𑀢𑀸𑀤𑀲𑁆𑀲𑀦𑀢𑁄. 𑀢𑀲𑁆𑀫𑀸 𑀬𑀣𑀸𑀲𑀫𑁆𑀪𑀯𑀁 𑀬𑀣𑀸𑀧𑀸𑀯𑀘𑀦𑀜𑁆𑀘 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂 𑀢𑁂𑀲𑀫𑁂𑀓𑀯𑀘𑀦𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸𑀦𑀁 𑀯𑀺𑀬.

𑀅𑀢𑁆𑀣𑀺𑀦𑀢𑁆𑀣𑀺𑀲𑀤𑁆𑀤𑀸 𑀳𑀺 𑀦𑀺𑀧𑀸𑀢𑀢𑁆𑀢𑀸 𑀏𑀓𑀢𑁆𑀢𑁂𑀧𑀺 𑀩𑀳𑀼𑀢𑁆𑀢𑁂𑀧𑀺 𑀧𑀯𑀢𑁆𑀢𑀦𑁆𑀢𑀺 ‘‘𑀧𑀼𑀢𑁆𑀢𑀸 𑀫𑀢𑁆𑀣𑀺 𑀥𑀦𑀫𑁆𑀫𑀢𑁆𑀣𑀺. 𑀦𑀢𑁆𑀣𑀺 𑀅𑀢𑁆𑀢𑀲𑀫𑀁 𑀧𑁂𑀫𑀁. 𑀦𑀢𑁆𑀣𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀻𑀲𑀼. 𑀅𑀮𑀺𑀗𑁆𑀕𑀢𑁆𑀢𑁂𑀧𑀺 𑀧𑀦𑁂𑀢𑁂𑀲𑀁 𑀓𑀢𑁆𑀣𑀘𑀺 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁄 𑀤𑀺𑀝𑁆𑀞𑁄. 𑀅𑀪𑀺𑀥𑀫𑁆𑀫𑁂 𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀅𑀦𑀼𑀥𑀫𑁆𑀫𑀘𑀓𑁆𑀓𑀯𑀢𑁆𑀢𑀺𑀦𑀸 𑀯𑁄𑀳𑀸𑀭𑀓𑀼𑀲𑀮𑁂𑀦 𑀯𑁄𑀳𑀸𑀭𑀓𑀼𑀲𑀮𑀲𑀸𑀥𑀓𑁂𑀦 ‘‘𑀅𑀢𑁆𑀣𑀺𑀬𑀸 𑀦𑀯. 𑀦𑀢𑁆𑀣𑀺𑀬𑀸 𑀦𑀯𑀸’’𑀢𑀺 𑀏𑀓𑀯𑀘𑀦𑀦𑁆𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀁 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀯𑀻𑀲𑀢𑀺𑀯𑀻𑀲𑀢𑀺𑀫𑀺𑀘𑁆𑀘𑀸𑀤𑀻𑀦𑀫𑁆𑀧𑀺 𑀬𑀣𑀸𑀲𑀫𑁆𑀪𑀯𑀁 𑀬𑀣𑀸𑀧𑀸𑀯𑀘𑀦𑀜𑁆𑀘 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂 𑀏𑀓𑀯𑀘𑀦𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣𑁂𑀓𑁂 ‘‘𑀳𑁂𑀢𑀼𑀬𑀸 𑀅𑀥𑀺𑀧𑀢𑀺𑀬𑀸’’𑀢𑀺 𑀘 𑀇𑀤𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀕𑀳𑁂𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀢𑀫𑁆𑀫𑀢𑀺𑀯𑀲𑁂𑀦 ‘‘𑀳𑁂𑀢𑀼𑀫𑁆𑀳𑀺 𑀅𑀥𑀺𑀧𑀢𑀺𑀫𑁆𑀳𑀻’’𑀢𑀺 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁄 𑀧𑀝𑀺𑀧𑀸𑀤𑁂𑀢𑀩𑁆𑀩𑁄, ‘‘𑀳𑁂𑀢𑀼𑀧𑀘𑁆𑀘𑀬𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑁂’’ 𑀇𑀘𑁆𑀘𑁂𑀯𑀢𑁆𑀣𑁄. 𑀅𑀣 𑀯𑀸 ‘‘𑀳𑁂𑀢𑀼𑀬𑀸 𑀅𑀥𑀺𑀧𑀢𑀺𑀬𑀸’’𑀢𑀺 𑀤𑁆𑀯𑀬𑀫𑀺𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀧𑀝𑀺𑀪𑀸𑀕𑀁 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀦𑁆𑀢𑀺 𑀕𑀳𑁂𑀢𑀩𑁆𑀩𑀁 ‘‘𑀳𑁂𑀢𑀼𑀬𑁄 𑀚𑀦𑁆𑀢𑀼𑀬𑁄’’𑀢𑀺𑀆𑀤𑀻𑀦𑀁 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀧𑀝𑀺𑀪𑀸𑀕𑀸𑀦𑀁 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀫𑁆𑀧𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑀸, ‘‘𑀅𑀢𑁆𑀣𑀺𑀬𑀸 𑀦𑀢𑁆𑀣𑀺𑀬𑀸’’𑀢𑀺 𑀇𑀤𑀁 𑀧𑀦 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀁 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸𑀦𑀁 𑀅𑀮𑀺𑀗𑁆𑀕𑀪𑁂𑀤𑀢𑁆𑀢𑀸. 𑀦 𑀳𑀺 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀅𑀦𑁆𑀢𑁄𑀕𑀥𑀸. 𑀏𑀢𑁂𑀲𑀼 𑀳𑀺 𑀅𑀢𑁆𑀣𑀺𑀲𑀤𑁆𑀤𑁄 𑀆𑀔𑁆𑀬𑀸𑀢𑀦𑀺𑀧𑀸𑀢𑀯𑀲𑁂𑀦 𑀪𑀺𑀚𑁆𑀚𑀢𑀺 ‘‘𑀅𑀢𑁆𑀣𑀺 𑀲𑀦𑁆𑀢𑀺 𑀲𑀁𑀯𑀺𑀚𑁆𑀚𑀢𑀺. 𑀅𑀢𑁆𑀣𑀺𑀔𑀻𑀭𑀸 𑀩𑁆𑀭𑀸𑀳𑁆𑀫𑀡𑀻’’𑀢𑀺𑀆𑀤𑀻𑀲𑀼, 𑀦𑀢𑁆𑀣𑀺𑀲𑀤𑁆𑀤𑁄 𑀧𑀦 𑀦𑀺𑀧𑀸𑀢𑁄𑀬𑁂𑀯. 𑀇𑀘𑁆𑀘𑁂𑀯𑀁 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸𑀦𑀁 𑀦𑀺𑀧𑀸𑀢𑀸𑀦𑀜𑁆𑀘 𑀮𑀺𑀗𑁆𑀕𑀯𑀘𑀦𑀯𑀲𑁂𑀦 𑀓𑀣𑀦𑀁 𑀬𑀼𑀚𑁆𑀚𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀯𑀲𑁂𑀦 𑀏𑀓𑀢𑁆𑀢𑀸𑀤𑀺𑀯𑀲𑁂𑀦 𑀘 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀲𑀤𑀺𑀲𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼, 𑀲𑀩𑁆𑀩𑀸𑀲𑀼 𑀘 𑀯𑀺𑀪𑀢𑁆𑀢𑀺𑀲𑀼;

𑀯𑀘𑀦𑁂𑀲𑀼 𑀘 𑀲𑀩𑁆𑀩𑁂𑀲𑀼, 𑀬𑀁 𑀦 𑀩𑁆𑀬𑁂𑀢𑀺 𑀢𑀤𑀩𑁆𑀬𑀬’’𑀦𑁆𑀢𑀺.

𑀏𑀢𑁆𑀣 𑀲𑀺𑀬𑀸 𑁋 𑀦𑀦𑀼 𑀘 𑀪𑁄 ‘‘𑀅𑀢𑁆𑀣𑀺 𑀲𑀓𑁆𑀓𑀸 𑀮𑀩𑁆𑀪𑀸 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬𑀸’’𑀢𑀺 𑀯𑀘𑀦𑀢𑁄 𑀅𑀢𑁆𑀣𑀺𑀲𑀤𑁆𑀤𑁄 𑀧𑀞𑀫𑀸𑀬 𑀯𑀺𑀪𑀢𑁆𑀢𑀺𑀬𑀸 𑀬𑀼𑀢𑁆𑀢𑁄, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀲𑀤𑀺𑀲𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁 𑀅𑀢𑁆𑀣𑀺𑀲𑀤𑁆𑀤𑁄 𑀧𑀞𑀫𑀸𑀬 𑀯𑀺𑀪𑀢𑁆𑀢𑀺𑀬𑀸 𑀬𑀼𑀢𑁆𑀢𑁄, 𑀢𑀣𑀸 𑀦𑀢𑁆𑀣𑀺𑀲𑀤𑁆𑀤𑁄 𑀅𑀢𑁆𑀣𑀺𑀲𑀤𑁆𑀤𑀲𑁆𑀲 𑀯𑀘𑀦𑀮𑁂𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸 𑀬𑀼𑀕𑀴𑀧𑀤𑀢𑁆𑀢𑀸 𑀘. 𑀇𑀤𑀁 𑀧𑀦 ‘‘𑀲𑀤𑀺𑀲𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀽’’𑀢𑀺𑀆𑀤𑀺𑀯𑀘𑀦𑀁 𑀉𑀧𑀲𑀕𑁆𑀕𑀦𑀺𑀧𑀸𑀢𑀲𑀗𑁆𑀔𑀸𑀢𑁂 𑀅𑀲𑀗𑁆𑀔𑁆𑀬𑀸𑀲𑀤𑁆𑀤𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀏𑀓𑁂𑀓𑀫𑀲𑀗𑁆𑀔𑁆𑀬𑀸𑀲𑀤𑁆𑀤𑀁 𑀲𑀦𑁆𑀥𑀸𑀬. 𑀢𑀣𑀸 𑀳𑀺 ‘‘𑀅𑀲𑀗𑁆𑀔𑁆𑀬𑀸’’𑀢𑀺 𑀘 ‘‘𑀅𑀩𑁆𑀬𑀬𑀸’’𑀢𑀺 𑀘 𑀮𑀤𑁆𑀥𑀯𑁄𑀳𑀸𑀭𑁂𑀲𑀼 𑀉𑀧𑀲𑀕𑁆𑀕𑀦𑀺𑀧𑀸𑀢𑁂𑀲𑀼 𑀉𑀧𑀲𑀕𑁆𑀕𑀸 𑀲𑀩𑁆𑀩𑁂𑀧𑀺 𑀲𑀩𑁆𑀩𑀯𑀺𑀪𑀢𑁆𑀢𑀺𑀯𑀘𑀦𑀓𑀸. 𑀦𑀺𑀧𑀸𑀢𑀸𑀦𑀁 𑀧𑀦 𑀏𑀓𑀘𑁆𑀘𑁂 𑀧𑀞𑀫𑀸𑀤𑀻𑀲𑀼 𑀬𑀣𑀸𑀭𑀳𑀁 𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸, 𑀏𑀓𑀘𑁆𑀘𑁂 𑀅𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸. 𑀢𑀢𑁆𑀣 𑀬𑁂 𑀬𑀤𑀕𑁆𑀕𑁂𑀦 𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸, 𑀢𑁂 𑀢𑀤𑀕𑁆𑀕𑁂𑀦 𑀢𑀩𑁆𑀩𑀘𑀦𑀓𑀸. 𑀉𑀧𑀲𑀕𑁆𑀕𑀦𑀺𑀧𑀸𑀢𑁂𑀲𑀼 𑀳𑀺 𑀧𑀘𑁆𑀘𑁂𑀓𑀁 ‘‘𑀇𑀤𑀁 𑀦𑀸𑀫 𑀯𑀘𑀦’’𑀦𑁆𑀢𑀺 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸, 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀧𑀦 ‘‘𑀲𑀤𑀺𑀲𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀽’’𑀢𑀺𑀆𑀤𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀁. 𑀓𑀘𑁆𑀘𑀸𑀬𑀦𑀸𑀘𑀭𑀺𑀬𑁂𑀦𑀧𑀺 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀸𑀲𑀫𑀸𑀯𑀼𑀲𑁄𑀧𑀲𑀕𑁆𑀕𑀦𑀺𑀧𑀸𑀢𑀸𑀤𑀻𑀳𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀆𑀯𑀼𑀲𑁄𑀲𑀤𑁆𑀤𑀢𑁄 𑀲𑀩𑁆𑀩𑀸𑀧𑀺 𑀯𑀺𑀪𑀢𑁆𑀢𑀺𑀬𑁄 𑀮𑀩𑁆𑀪𑀦𑁆𑀢𑀺, 𑀅𑀣 𑀔𑁄 𑀆𑀮𑀧𑀦𑀢𑁆𑀣𑀯𑀸𑀘𑀓𑀢𑁆𑀢𑀸 𑀏𑀓𑀯𑀘𑀦𑀺𑀓𑀅𑀦𑁂𑀓𑀯𑀘𑀦𑀺𑀓𑀸 𑀧𑀞𑀫𑀸𑀯𑀺𑀪𑀢𑁆𑀢𑀺𑀬𑁄𑀬𑁂𑀯 𑀮𑀩𑁆𑀪𑀦𑁆𑀢𑀺. 𑀅𑀬𑀫𑀲𑁆𑀫𑀸𑀓𑀁 𑀔𑀦𑁆𑀢𑀺.

𑀓𑁂𑀘𑀺 𑀧𑀦 𑀲𑀩𑁆𑀩𑁂𑀳𑀺𑀧𑀺 𑀦𑀺𑀧𑀸𑀢𑁂𑀳𑀺 𑀲𑀩𑁆𑀩𑀯𑀺𑀪𑀢𑁆𑀢𑀺𑀮𑁄𑀧𑀁 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. ‘‘𑀅𑀢𑁆𑀣𑀺 𑀲𑀓𑁆𑀓𑀸 𑀮𑀩𑁆𑀪𑀸 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬. 𑀤𑀺𑀯𑀸 𑀪𑀺𑀬𑁆𑀬𑁄 𑀦𑀫𑁄 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬 𑀘 𑀤𑀼𑀢𑀺𑀬𑀸𑀬 𑀘𑀸’’𑀢𑀺𑀆𑀤𑀺𑀯𑀘𑀦𑀢𑁄, 𑀧𑀤𑀧𑀽𑀭𑀡𑀫𑀢𑁆𑀢𑀸𑀦𑀜𑁆𑀘 𑀅𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀁 𑀅𑀣 𑀔𑀮𑀼 𑀯𑀢 𑀯𑀣 𑀇𑀘𑁆𑀘𑀸𑀤𑀻𑀦𑀁 𑀦𑀺𑀧𑀸𑀢𑀸𑀦𑀁 𑀯𑀘𑀦𑀢𑁄. 𑀏𑀢𑁆𑀣𑀸𑀧𑀺 𑀲𑀺𑀬𑀸 ‘‘𑀦𑀦𑀼 𑀘 𑀪𑁄 𑀅𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀫𑁆𑀧𑀺 𑀦𑀺𑀧𑀸𑀢𑀸𑀦𑀁 𑀲𑀫𑁆𑀪𑀯𑀢𑁄 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸𑀦𑀁 𑀅𑀯𑀺𑀪𑀢𑁆𑀢𑀺𑀓𑁄 𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄, 𑀅𑀣 𑀓𑀺𑀫𑀢𑁆𑀣𑀁 ‘𑀅𑀢𑁆𑀣𑀺𑀬𑀸 𑀦𑀯, 𑀦𑀢𑁆𑀣𑀺𑀬𑀸 𑀦𑀯𑀸’𑀢𑀺 𑀲𑀯𑀺𑀪𑀢𑁆𑀢𑀺𑀓𑁄 𑀦𑀺𑀤𑁆𑀤𑁂𑀲𑁄 𑀓𑀢𑁄’’𑀢𑀺? 𑀲𑀩𑁆𑀩𑀣𑀸 𑀯𑀺𑀪𑀢𑁆𑀢𑀻𑀳𑀺 𑀯𑀺𑀦𑀸 𑀅𑀢𑁆𑀣𑀲𑁆𑀲 𑀦𑀺𑀤𑁆𑀤𑀺𑀲𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸𑀢𑀺.

𑀬𑀤𑀺 𑀏𑀯𑀁 ‘‘𑀅𑀢𑁆𑀣𑀺 𑀲𑀓𑁆𑀓𑀸 𑀮𑀩𑁆𑀪𑀸 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬𑀸’’𑀢𑀺 𑀯𑀘𑀦𑀢𑁄 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸 𑀮𑀼𑀢𑁆𑀢𑀸𑀬 𑀧𑀞𑀫𑀸𑀬 𑀯𑀺𑀪𑀢𑁆𑀢𑀺𑀬𑀸 𑀯𑀲𑁂𑀦 𑀧𑀞𑀫𑀸𑀯𑀺𑀪𑀢𑁆𑀢𑀺𑀓𑀸𑀬𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀏𑀯𑀫𑀓𑀢𑁆𑀯𑀸 𑀓𑀲𑁆𑀫𑀸 𑀲𑀢𑁆𑀢𑀫𑁆𑀬𑀦𑁆𑀢𑀯𑀲𑁂𑀦 ‘‘𑀅𑀢𑁆𑀣𑀺𑀬𑀸 𑀦𑀢𑁆𑀣𑀺𑀬𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀸𑀢𑀺? 𑀲𑀘𑁆𑀘𑀁, 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸 𑀧𑀞𑀫𑀸𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀬𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀢𑀣𑀸𑀧𑀺 ‘‘𑀅𑀢𑁆𑀣𑀺𑀧𑀘𑁆𑀘𑀬𑁂 𑀦𑀯, 𑀦𑀢𑁆𑀣𑀺𑀧𑀘𑁆𑀘𑀬𑁂 𑀦𑀯𑀸’’𑀢𑀺 𑀏𑀢𑀲𑁆𑀲𑀢𑁆𑀣𑀲𑁆𑀲 𑀧𑀭𑀺𑀤𑀻𑀧𑀦𑁂 𑀧𑀞𑀫𑀸𑀬 𑀑𑀓𑀸𑀲𑁄 𑀦𑀢𑁆𑀣𑀺, 𑀲𑀢𑁆𑀢𑀫𑀺𑀬𑀸𑀬𑁂𑀯 𑀧𑀦 𑀅𑀢𑁆𑀣𑀺, 𑀢𑀲𑁆𑀫𑀸 ‘‘𑀅𑀢𑁆𑀣𑀺𑀬𑀸 𑀦𑀯, 𑀦𑀢𑁆𑀣𑀺𑀬𑀸 𑀦𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀢𑀺 𑀅𑀢𑁆𑀣𑀺𑀬𑀸𑀦𑀢𑁆𑀣𑀺𑀬𑀸𑀲𑀤𑁆𑀤𑀸𑀦𑀁 𑀲𑀢𑁆𑀢𑀫𑁆𑀬𑀦𑁆𑀢𑀪𑀸𑀯𑁂 𑀲𑀺𑀤𑁆𑀥𑁂𑀬𑁂𑀯 𑀢𑀢𑀺𑀬𑀸𑀘𑀢𑀼𑀢𑁆𑀣𑀻𑀧𑀜𑁆𑀘𑀫𑀻𑀙𑀝𑁆𑀞𑀺𑀬𑀦𑁆𑀢𑀪𑀸𑀯𑁄𑀧𑀺 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀺. 𑀢𑀲𑁆𑀫𑀸 ‘‘𑀅𑀢𑁆𑀣𑀺𑀪𑀸𑀯𑁄 𑀅𑀢𑁆𑀣𑀺𑀢𑀸’’𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑀺𑀬𑀸 𑀪𑀸𑀯𑁄 𑀅𑀢𑁆𑀣𑀺𑀪𑀸𑀯𑁄, 𑀦𑀢𑁆𑀣𑀺𑀬𑀸 𑀪𑀸𑀯𑁄 𑀦𑀢𑁆𑀣𑀺𑀪𑀸𑀯𑁄, 𑀅𑀢𑁆𑀣𑀺𑀬𑀸 𑀪𑀸𑀯𑁄 𑀅𑀢𑁆𑀣𑀺𑀢𑀸𑀪𑀺𑀆𑀤𑀺𑀦𑀸 𑀲𑀫𑀸𑀲𑀢𑀤𑁆𑀥𑀺𑀢𑀯𑀺𑀕𑁆𑀕𑀳𑁄 𑀅𑀯𑀲𑁆𑀲𑀫𑀺𑀘𑁆𑀙𑀺𑀢𑀩𑁆𑀩𑁄. 𑀬𑀤𑀺𑀤𑀫𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀢𑀁 ‘‘𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 𑀯𑀼𑀢𑁆𑀢𑀢𑁆𑀢𑀸𑀢𑀺.

𑀏𑀯𑀁 𑀳𑁄𑀢𑀼, 𑀓𑀲𑁆𑀫𑀸 𑀪𑁄 ‘‘𑀅𑀢𑁆𑀣𑀺𑀬𑀸, 𑀦𑀢𑁆𑀣𑀺𑀬𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀦𑀦𑀼 𑀦𑀺𑀧𑀸𑀢𑁄𑀧𑀲𑀕𑁆𑀕𑀸 𑀅𑀮𑀺𑀗𑁆𑀕𑀪𑁂𑀤𑀸𑀢𑀺? 𑀲𑀘𑁆𑀘𑀁, 𑀇𑀤𑀁 𑀧𑀦 𑀞𑀸𑀦𑀁 𑀅𑀢𑀻𑀯 𑀲𑀼𑀔𑀼𑀫𑀁, 𑀢𑀣𑀸𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀯𑀺𑀦𑀺𑀘𑁆𑀙𑀬𑀁 𑀩𑁆𑀭𑀽𑀫. 𑀬𑀣𑀸 𑀳𑀺 𑀯𑀻𑀲𑀢𑀺𑀇𑀘𑁆𑀘𑀸𑀤𑀻𑀦𑀁 𑀲𑀗𑁆𑀔𑁆𑀬𑀸𑀲𑀤𑁆𑀤𑀸𑀦𑀁 𑀲𑀭𑀽𑀧𑀢𑁄 𑀅𑀤𑀩𑁆𑀩𑀯𑀸𑀘𑀓𑀢𑁆𑀢𑁂𑀧𑀺 𑀤𑀩𑁆𑀩𑀯𑀸𑀘𑀓𑀸𑀦𑀁 𑀮𑀢𑀸𑀫𑀢𑀺𑀭𑀢𑁆𑀢𑀺𑀇𑀢𑁆𑀣𑀻 𑀬𑀸𑀕𑀼𑀯𑀥𑀽𑀲𑀤𑁆𑀤𑀸𑀦𑀁 𑀯𑀺𑀬 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁄 𑀲𑀤𑁆𑀤𑀲𑀢𑁆𑀣𑀯𑀺𑀤𑀽𑀳𑀺 𑀅𑀦𑀼𑀫𑀢𑁄, 𑀏𑀯𑀁 𑀅𑀤𑀩𑁆𑀩𑀯𑀸𑀘𑀓𑀢𑁆𑀢𑁂𑀧𑀺 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸𑀦𑀁 𑀓𑀢𑁆𑀣𑀘𑀺 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁄 𑀲𑀤𑁆𑀥𑀫𑁆𑀫𑀯𑀺𑀤𑀽𑀳𑀺 𑀅𑀦𑀼𑀫𑀢𑁄. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀅𑀢𑁆𑀣𑀺𑀬𑀸 𑀦𑀯, 𑀦𑀢𑁆𑀣𑀺𑀬𑀸 𑀦𑀯𑀸’’𑀢𑀺. 𑀅𑀣 𑀯𑀸 ‘‘𑀅𑀢𑁆𑀣𑀺𑀬𑀸, 𑀦𑀢𑁆𑀣𑀺𑀬𑀸’’𑀢𑀺 𑀇𑀫𑀸𑀦𑀺 𑀮𑀺𑀗𑁆𑀕𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀸𑀦𑀺 𑀲𑀢𑁆𑀢𑀫𑀺𑀬𑀦𑁆𑀢𑀸𑀦𑀺 𑀦𑀺𑀧𑀸𑀢𑀧𑀤𑀸𑀦𑀻𑀢𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺, 𑀦 𑀏𑀢𑁆𑀣 𑀘𑁄𑀤𑁂𑀢𑀩𑁆𑀩𑀁, 𑀏𑀯𑀭𑀽𑀧𑀸𑀦𑀺 𑀦𑀺𑀧𑀸𑀢𑀧𑀤𑀸𑀦𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸𑀦𑀺 𑀦 𑀲𑀦𑁆𑀢𑀺, 𑀢𑀲𑁆𑀫𑀸 𑀙𑀟𑁆𑀟𑁂𑀢𑀩𑁆𑀩𑀫𑀺𑀤𑀁 𑀯𑀘𑀦𑀦𑁆𑀢𑀺.

𑀧𑀸𑀯𑀘𑀦𑀲𑁆𑀫𑀺𑀜𑁆𑀳𑀺 𑀕𑀭𑀽𑀳𑀺 𑀅𑀦𑀺𑀤𑁆𑀤𑀺𑀝𑁆𑀞𑀸𑀦𑀺𑀧𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀦𑀺𑀧𑀸𑀢𑀧𑀤𑀸𑀦𑀺 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀸𑀧𑀺 ‘‘𑀳𑁂𑀢𑀼𑀬𑀸, 𑀅𑀥𑀺𑀧𑀢𑀺𑀬𑀸, 𑀅𑀢𑁆𑀣𑀺𑀬𑀸, 𑀦𑀢𑁆𑀣𑀺𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 ‘‘𑀅𑀧𑀲𑀤𑁆𑀤𑀸 𑀇𑀫𑁂’’𑀢𑀺 𑀯𑀺𑀭𑁄𑀥𑁄 𑀉𑀧𑁆𑀧𑀸𑀤𑁂𑀢𑀩𑁆𑀩𑁄. 𑀦 𑀳𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑁂𑀦 𑀧𑀸𑀭𑀫𑀺𑀢𑀸𑀧𑀼𑀜𑁆𑀜𑁂𑀦 𑀦𑀺𑀧𑁆𑀨𑀦𑁆𑀦𑁂𑀦 𑀅𑀦𑀸𑀯𑀭𑀡𑀜𑀸𑀡𑁂𑀦 𑀲𑀩𑁆𑀩𑀁 𑀜𑁂𑀬𑁆𑀬𑀫𑀡𑁆𑀟𑀮𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀧𑀲𑁆𑀲𑀢𑁄 𑀩𑀼𑀤𑁆𑀥𑀲𑁆𑀲 𑀯𑀘𑀦𑁂 𑀅𑀜𑁆𑀜𑁂𑀲𑀁 𑀯𑀸𑀘𑀸𑀯𑀺𑀧𑁆𑀧𑀮𑀸𑀧𑁄 𑀅𑀯𑀲𑁆𑀲𑀁 𑀮𑀩𑁆𑀪𑀢𑀻𑀢𑀺. 𑀦𑀦𑀼 𑀘 𑀪𑁄 ‘‘𑀳𑁂𑀢𑀼𑀬𑀸, 𑀅𑀥𑀺𑀧𑀢𑀺𑀬𑀸, 𑀅𑀢𑁆𑀣𑀺𑀬𑀸, 𑀦𑀢𑁆𑀣𑀺𑀬𑀸’’𑀢𑀺 𑀘 𑀇𑀤𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀘𑀦𑀁 𑀢𑁂𑀦 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀢𑀣𑀸𑀕𑀢𑁂𑀦 𑀳𑀺 𑀢𑀸𑀯𑀢𑀺𑀁𑀲𑀪𑀧𑀦𑁂 𑀤𑁂𑀲𑀺𑀢𑀓𑀸𑀮𑁂 𑀇𑀫𑀸𑀦𑀺 𑀧𑀤𑀸𑀦𑀺 𑀦 𑀲𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀯𑀤𑀣𑀸𑀢𑀺? 𑀩𑀼𑀤𑁆𑀥𑀯𑀘𑀦𑀁𑀬𑁂𑀯 𑀦𑀸𑀫. 𑀆𑀬𑀲𑁆𑀫𑀢𑁄 𑀳𑀺 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀢𑀣𑀸𑀕𑀢𑁂𑀦 𑀦𑀬𑁄 𑀤𑀺𑀦𑁆𑀦𑁄, 𑀢𑁂𑀦𑀧𑀺 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦 𑀲𑀢𑁆𑀣𑀼𑀓𑀧𑁆𑀧𑁂𑀦 𑀅𑀕𑁆𑀕𑀲𑀸𑀯𑀓𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀦𑀬𑀁 𑀮𑀪𑀺𑀢𑁆𑀯𑀸 𑀩𑁆𑀬𑀜𑁆𑀚𑀦𑀁 𑀲𑀼𑀭𑁄𑀧𑀺𑀢𑀁 𑀓𑀢𑀁. 𑀲𑀩𑁆𑀩𑁂𑀧𑀺 𑀳𑀺 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸 𑀅𑀭𑀺𑀬𑀸 𑀤𑀼𑀦𑁆𑀦𑀺𑀭𑀼𑀢𑁆𑀢𑀺𑀁 𑀦 𑀯𑀤𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀧𑀪𑁂𑀤𑀲𑁆𑀫𑀺𑀁 𑀲𑀼𑀓𑀼𑀲𑀮𑀢𑁆𑀢𑀸, 𑀢𑀲𑁆𑀫𑀸 𑀅𑀜𑁆𑀜𑁂𑀲𑀫𑀯𑀺𑀲𑀬𑁄 𑀏𑀲 𑀅𑀭𑀺𑀬𑀸𑀦𑀁 𑀯𑁄𑀳𑀸𑀭𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀲𑀢𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀲𑀢𑀁, 𑀲𑀢𑀸𑀦𑀺, 𑀲𑀢𑀸. 𑀲𑀢𑀁, 𑀲𑀢𑀸𑀦𑀺, 𑀲𑀢𑁂. 𑀲𑀢𑁂𑀦, 𑀲𑀢𑁂𑀳𑀺, 𑀲𑀢𑁂𑀪𑀺. 𑀲𑀢𑀲𑁆𑀲, 𑀲𑀢𑀸𑀦𑀁. 𑀲𑀢𑀸, 𑀲𑀢𑀲𑁆𑀫𑀸, 𑀲𑀢𑀫𑁆𑀳𑀸, 𑀲𑀢𑁂𑀳𑀺, 𑀲𑀢𑁂𑀪𑀺. 𑀲𑀢𑀲𑁆𑀲, 𑀲𑀢𑀸𑀦𑀁. 𑀲𑀢𑁂, 𑀲𑀢𑀲𑁆𑀫𑀺𑀁, 𑀲𑀢𑀫𑁆𑀳𑀺, 𑀲𑀢𑁂𑀲𑀼. 𑀏𑀯𑀁 𑀲𑀳𑀲𑁆𑀲𑀁, 𑀲𑀳𑀲𑁆𑀲𑀸𑀦𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀤𑀲𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀤𑀲𑀲𑀢𑀲𑀳𑀲𑁆𑀲𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀧𑀬𑁄𑀕𑁄 ‘‘𑀲𑀢𑀁 𑀪𑀺𑀓𑁆𑀔𑀽, 𑀲𑀢𑀁 𑀇𑀢𑁆𑀣𑀺𑀬𑁄, 𑀲𑀢𑀁 𑀘𑀺𑀢𑁆𑀢𑀸𑀦𑀺. 𑀪𑀺𑀓𑁆𑀔𑀽𑀦𑀁 𑀲𑀢𑀁, 𑀇𑀢𑁆𑀣𑀻𑀦𑀁 𑀲𑀢𑀁, 𑀘𑀺𑀢𑁆𑀢𑀸𑀦𑀁 𑀲𑀢𑀁. 𑀲𑀳𑀲𑁆𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑁆𑀣𑀜𑁆𑀘 𑀅𑀜𑁆𑀜𑀣𑀸𑀧𑀺 𑀲𑀤𑁆𑀤𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀓𑁄𑀝𑀺, 𑀓𑁄𑀝𑀻, 𑀓𑁄𑀝𑀺𑀬𑁄. 𑀭𑀢𑁆𑀢𑀺𑀦𑀬𑁂𑀦 𑀜𑁂𑀬𑁆𑀬𑀁.

𑀏𑀓𑀧𑁆𑀧𑀪𑀼𑀢𑀺𑀢𑁄 𑀬𑀸𑀯, 𑀤𑀲𑀓𑀸 𑀬𑀸 𑀧𑀯𑀢𑁆𑀢𑀢𑀺;

𑀲𑀗𑁆𑀔𑁆𑀬𑀸 𑀢𑀸𑀯 𑀲𑀸 𑀲𑀗𑁆𑀔𑁆𑀬𑁂𑀬𑁆𑀬-𑀧𑁆𑀧𑀥𑀸𑀦𑀸𑀢𑀺 𑀕𑀭𑀽 𑀯𑀤𑀼𑀁.

𑀯𑀻𑀲𑀢𑀺𑀢𑁄 𑀬𑀸𑀯 𑀲𑀢𑀸, 𑀬𑀸 𑀲𑀗𑁆𑀔𑁆𑀬𑀸 𑀢𑀸𑀯 𑀲𑀸 𑀧𑀦;

𑀲𑀗𑁆𑀔𑁆𑀬𑀸𑀧𑁆𑀧𑀥𑀸𑀦𑀸 𑀲𑀗𑁆𑀔𑁆𑀬𑁂𑀬𑁆𑀬-𑀧𑁆𑀧𑀥𑀸𑀦𑀸𑀢𑀺 𑀘 𑀯𑀡𑁆𑀡𑀬𑀼𑀁.

𑀅𑀧𑀺𑀘 𑁋

𑀯𑀻𑀲𑀢𑁄 𑀬𑀸𑀯 𑀓𑁄𑀝𑀺𑀬𑀸, 𑀲𑀗𑁆𑀔𑁆𑀬𑀸 𑀢𑀸𑀯 𑀳𑀺 𑀲𑀸 𑀔𑀮𑀼;

𑀲𑀗𑁆𑀔𑁆𑀬𑀸𑀧𑁆𑀧𑀥𑀸𑀦𑀸 𑀲𑀗𑁆𑀔𑁆𑀬𑁂𑀬𑁆𑀬-𑀧𑁆𑀧𑀥𑀸𑀦𑀸 𑀘𑀸𑀢𑀺 𑀦𑀺𑀤𑁆𑀤𑀺𑀲𑁂.

𑀢𑀣𑀸 𑀳𑀺 ‘‘𑀅𑀲𑀻𑀢𑀺 𑀓𑁄𑀝𑀺𑀬𑁄 𑀳𑀺𑀢𑁆𑀯𑀸, 𑀳𑀺𑀭𑀜𑁆𑀜𑀲𑁆𑀲𑀸𑀧𑀺 𑀧𑀩𑁆𑀩𑀚𑀺’’𑀦𑁆𑀢𑀺, ‘‘𑀔𑀻𑀡𑀸𑀲𑀯𑀸 𑀯𑀻𑀢𑀫𑀮𑀸, 𑀲𑀫𑀺𑀁𑀲𑀼 𑀲𑀢𑀓𑁄𑀝𑀺𑀬𑁄’’𑀢𑀺 𑀘 𑀧𑀸𑀴𑀺 𑀤𑀺𑀲𑁆𑀲𑀢𑀺.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑀩𑁆𑀩𑁂𑀲𑀁 𑀲𑀗𑁆𑀔𑁆𑀬𑀸𑀲𑀤𑁆𑀤𑀭𑀽𑀧𑀸𑀦𑀁 𑀧𑀸𑀓𑀝𑀻𑀓𑀭𑀡𑁂𑀦 𑀯𑀺𑀜𑁆𑀜𑀽𑀦𑀁 𑀲𑀼𑀔𑀼𑀫𑀜𑀸𑀡𑀧𑀝𑀺𑀮𑀸𑀪𑀢𑁆𑀣𑀁 𑀲𑀸𑀝𑁆𑀞𑀓𑀣𑀁 𑀉𑀤𑀸𑀦𑀧𑀸𑀴𑀺𑀧𑁆𑀧𑀤𑁂𑀲𑀁 𑀅𑀜𑁆𑀜𑀜𑁆𑀘 𑀧𑀸𑀴𑀺𑀧𑁆𑀧𑀤𑁂𑀲𑀫𑀝𑁆𑀞𑀓𑀣𑀸𑀯𑀘𑀦𑀜𑁆𑀘 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑀬𑀺𑀲𑁆𑀲𑀸𑀫𑀺 𑁋

‘‘𑀬𑁂𑀲𑀁 𑀔𑁄 𑀯𑀺𑀲𑀸𑀔𑁂 𑀲𑀢𑀁 𑀧𑀺𑀬𑀸𑀦𑀺, 𑀲𑀢𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺, 𑀬𑁂𑀲𑀁 𑀦𑀯𑀼𑀢𑀺 𑀧𑀺𑀬𑀸𑀦𑀺, 𑀦𑀯𑀼𑀢𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺. 𑀬𑁂𑀲𑀁 𑀅𑀲𑀻𑀢𑀺…𑀧𑁂… 𑀬𑁂𑀲𑀁 𑀲𑀢𑁆𑀢𑀢𑀺. 𑀬𑁂𑀲𑀁 𑀲𑀝𑁆𑀞𑀺. 𑀬𑁂𑀲𑀁 𑀧𑀜𑁆𑀜𑀸𑀲𑀁, 𑀬𑁂𑀲𑀁 𑀘𑀢𑁆𑀢𑀸𑀭𑀻𑀲𑀁, 𑀬𑁂𑀲𑀁 𑀢𑀺𑀁𑀲𑀁. 𑀬𑁂𑀲𑀁 𑀔𑁄 𑀯𑀺𑀲𑀸𑀔𑁂 𑀯𑀻𑀲𑀁 𑀧𑀺𑀬𑀸𑀦𑀺, 𑀯𑀻𑀲𑀢𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺. 𑀬𑁂𑀲𑀁 𑀤𑀲. 𑀬𑁂𑀲𑀁 𑀦𑀯. 𑀬𑁂𑀲𑀁 𑀅𑀝𑁆𑀞. 𑀬𑁂𑀲𑀁 𑀲𑀢𑁆𑀢. 𑀬𑁂𑀲𑀁 𑀙. 𑀬𑁂𑀲𑀁 𑀧𑀜𑁆𑀘. 𑀬𑁂𑀲𑀁 𑀘𑀢𑁆𑀢𑀸𑀭𑀺. 𑀬𑁂𑀲𑀁 𑀢𑀻𑀡𑀺. 𑀬𑁂𑀲𑀁 𑀤𑁆𑀯𑁂. 𑀬𑁂𑀲𑀁 𑀏𑀓𑀁 𑀧𑀺𑀬𑀁, 𑀢𑁂𑀲𑀁 𑀏𑀓𑀁 𑀤𑀼𑀓𑁆𑀔’’𑀦𑁆𑀢𑀺.

𑀢𑀢𑁆𑀣 𑀲𑀢𑀁 𑀧𑀺𑀬𑀸𑀦𑀻𑀢𑀺 𑀲𑀢𑀁 𑀧𑀺𑀬𑀸𑀬𑀺𑀢𑀩𑁆𑀩𑀯𑀢𑁆𑀣𑀽𑀦𑀺. ‘‘𑀲𑀢𑀁 𑀧𑀺𑀬’’𑀦𑁆𑀢𑀺𑀧𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀏𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲, 𑀢𑀸𑀯 𑀲𑀗𑁆𑀔𑁆𑀬𑀸𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀸, 𑀢𑀲𑁆𑀫𑀸 ‘‘𑀬𑁂𑀲𑀁 𑀤𑀲 𑀧𑀺𑀬𑀸𑀦𑀺, 𑀤𑀲 𑀢𑁂𑀲𑀁 𑀤𑀼𑀓𑁆𑀔𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀆𑀕𑀢𑀸. 𑀓𑁂𑀘𑀺 𑀧𑀦 ‘‘𑀬𑁂𑀲𑀁 𑀤𑀲 𑀧𑀺𑀬𑀸𑀦𑀁, 𑀤𑀲 𑀢𑁂𑀲𑀁 𑀤𑀼𑀓𑁆𑀔𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀬𑀲𑁆𑀫𑀸 𑀧𑀦 𑀯𑀻𑀲𑀢𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀢𑀁, 𑀢𑀸𑀯 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀸 𑀲𑀗𑁆𑀔𑁆𑀬𑀸𑀧𑁆𑀧𑀥𑀸𑀦𑀸 𑀘, 𑀢𑀲𑁆𑀫𑀸 𑀢𑀢𑁆𑀣𑀸𑀧𑀺 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀁𑀬𑁂𑀯 𑀕𑀳𑁂𑀢𑁆𑀯𑀸 ‘‘𑀬𑁂𑀲𑀁 𑀔𑁄 𑀯𑀺𑀲𑀸𑀔𑁂 𑀲𑀢𑀁 𑀧𑀺𑀬𑀸𑀦𑀺, 𑀲𑀢𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀆𑀕𑀢𑀸. 𑀲𑀩𑁆𑀩𑁂𑀲𑀫𑁆𑀧𑀺 𑀘 𑀬𑁂𑀲𑀁 𑀏𑀓𑀁 𑀧𑀺𑀬𑀁, 𑀏𑀓𑀁 𑀢𑁂𑀲𑀁 𑀤𑀼𑀓𑁆𑀔𑀦𑁆𑀢𑀺 𑀧𑀸𑀞𑁄, 𑀦 𑀧𑀦 𑀤𑀼𑀓𑁆𑀔𑀲𑁆𑀲𑀸𑀢𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀧𑀤𑀓𑁆𑀓𑀫𑁂 𑀏𑀓𑀭𑀲𑀸𑀯 𑀪𑀕𑀯𑀢𑁄 𑀤𑁂𑀲𑀦𑀸 𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑀸𑀯 𑀧𑀸𑀴𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀢𑀸𑀯 𑀲𑀸𑀝𑁆𑀞𑀓𑀣𑁄 𑀉𑀤𑀸𑀦𑀧𑀸𑀴𑀺𑀧𑁆𑀧𑀤𑁂𑀲𑁄.

𑀇𑀤𑀸𑀦𑀺 𑀅𑀜𑁆𑀜𑁄 𑀧𑀸𑀴𑀺𑀧𑁆𑀧𑀤𑁂𑀲𑁄 𑀅𑀝𑁆𑀞𑀓𑀣𑀸𑀧𑀸𑀞𑀧𑁆𑀧𑀤𑁂𑀲𑁄 𑀘 𑀦𑀻𑀬𑀢𑁂 𑁋

‘‘𑀲𑀢𑀁 𑀳𑀢𑁆𑀣𑀻 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀓𑀜𑁆𑀜𑀸 𑀲𑀳𑀲𑁆𑀲𑀸𑀦𑀺, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸;

𑀏𑀓𑀲𑁆𑀲 𑀧𑀤𑀯𑀻𑀢𑀺𑀳𑀸𑀭𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺’’𑀦𑁆𑀢𑀺

𑀧𑀸𑀴𑀺. 𑀏𑀢𑁆𑀣 ‘‘𑀲𑀢𑀁 𑀳𑀢𑁆𑀣𑀻’’𑀢𑀺𑀆𑀤𑀻𑀦𑀺 𑀯𑀺𑀲𑁂𑀲𑀺𑀢𑀸𑀦𑀺, ‘‘𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀺𑀲𑁂𑀲𑀦𑀁, 𑀢𑀲𑁆𑀫𑀸 𑀲𑀢𑀁𑀲𑀤𑁆𑀤𑀁 𑀲𑀳𑀲𑁆𑀲𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀳𑀢𑁆𑀣𑀻’’𑀢𑀺𑀆𑀤𑀻𑀦𑀺 𑀧𑀦 𑀉𑀧𑀧𑀤𑀁 𑀓𑀢𑁆𑀯𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀳𑀢𑁆𑀣𑀻 𑀲𑀢𑀁 𑀲𑀳𑀲𑁆𑀲𑀸𑀦𑀺. 𑀅𑀲𑁆𑀲𑀸 𑀲𑀢𑀁 𑀲𑀳𑀲𑁆𑀲𑀸𑀦𑀺. 𑀅𑀲𑁆𑀲𑀢𑀭𑀻𑀭𑀣𑀸 𑀲𑀢𑀁 𑀲𑀳𑀲𑁆𑀲𑀸𑀦𑀺. 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸 𑀓𑀜𑁆𑀜𑀸 𑀲𑀢𑀁 𑀲𑀳𑀲𑁆𑀲𑀸𑀦𑀺. 𑀇𑀤𑀁 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀯𑀲𑁂𑀦𑀢𑁆𑀣𑀕𑀳𑀡𑀁. 𑀲𑀗𑁆𑀔𑁆𑀬𑀸𑀧𑁆𑀧𑀥𑀸𑀦𑀯𑀲𑁂𑀦 𑀧𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 ‘‘𑀳𑀢𑁆𑀣𑀻𑀦𑀁 𑀲𑀢𑀲𑀳𑀲𑁆𑀲𑀁, 𑀅𑀲𑁆𑀲𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀅𑀲𑁆𑀲𑀢𑀭𑀻𑀭𑀣𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸𑀦𑀁 𑀓𑀜𑁆𑀜𑀸𑀦𑀁 𑀲𑀢𑀲𑀳𑀲𑁆𑀲’’𑀦𑁆𑀢𑀺. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄. ‘‘𑀬𑁄𑀚𑀦𑀸𑀦𑀁 𑀲𑀢𑀸𑀦𑀼𑀘𑁆𑀘𑁄, 𑀳𑀺𑀫𑀯𑀸 𑀧𑀜𑁆𑀘 𑀧𑀩𑁆𑀩𑀢𑁄’’𑀢𑀺 𑀅𑀬𑀫𑀝𑁆𑀞𑀓𑀣𑀸𑀧𑀸𑀞𑁄. 𑀏𑀢𑁆𑀣 ‘‘𑀧𑀜𑁆𑀘𑀸’’𑀢𑀺 𑀲𑀤𑁆𑀤𑀁 𑀲𑀢𑀲𑀤𑁆𑀤𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 ‘‘𑀲𑀺𑀧𑁆𑀧𑀺𑀓𑀸𑀦𑀁 𑀲𑀢𑀁 𑀦𑀢𑁆𑀣𑀻’’𑀢𑀺 𑀏𑀢𑁆𑀣 𑀯𑀺𑀬 𑀳𑀺𑀫𑀯𑀸 𑀧𑀩𑁆𑀩𑀢𑁄 𑀬𑁄𑀚𑀦𑀸𑀦𑀁 𑀧𑀜𑁆𑀘 𑀲𑀢𑀸𑀦𑀺 𑀉𑀘𑁆𑀘𑁄𑀢𑀺 𑀲𑀗𑁆𑀔𑁆𑀬𑀸𑀧𑁆𑀧𑀥𑀸𑀦𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. ‘‘𑀧𑀜𑁆𑀘 𑀲𑀢𑀸𑀦𑀻’’𑀢𑀺 𑀘 𑀅𑀤𑁆𑀥𑀼𑀦𑁄 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄. 𑀲𑀢𑀫𑀺𑀢𑀺 𑀲𑀤𑁆𑀤𑁄 ‘‘𑀲𑀢𑀁 𑀳𑁄𑀫𑀺, 𑀲𑀳𑀲𑁆𑀲𑀁 𑀳𑁄𑀫𑀻’’𑀢𑀺𑀆𑀤𑀻𑀲𑀼 𑀏𑀓𑀯𑀘𑀦𑁄. ‘‘𑀅𑀣𑁂𑀢𑁆𑀣𑁂𑀓𑀲𑀢𑀁 𑀔𑀢𑁆𑀬𑀸, 𑀅𑀦𑀼𑀬𑀦𑁆𑀢𑀸 𑀬𑀲𑀲𑁆𑀲𑀺𑀦𑁄’’𑀢𑀺𑀆𑀤𑀻𑀲𑀼 𑀩𑀳𑀼𑀯𑀘𑀦𑁄. 𑀏𑀯𑀁 𑀲𑀳𑀲𑁆𑀲𑀸𑀤𑀻𑀦𑀫𑁆𑀧𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀢𑀸 𑀮𑀩𑁆𑀪𑀢𑀺. 𑀢𑀣𑀸 𑀳𑀺 ‘‘𑀪𑀺𑀬𑁆𑀬𑁄 𑀦𑀁 𑀲𑀢𑀲𑀳𑀲𑁆𑀲𑀁, 𑀬𑀓𑁆𑀔𑀸𑀦𑀁 𑀧𑀬𑀺𑀭𑀼𑀧𑀸𑀲𑀢𑀻’’𑀢𑀺 𑀏𑀢𑁆𑀣 ‘‘𑀲𑀢𑀲𑀳𑀲𑁆𑀲’’𑀦𑁆𑀢𑀺 𑀏𑀓𑀯𑀘𑀦𑀁. ‘‘𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑁆𑀣 𑀲𑀳𑀲𑁆𑀲𑀦𑁆𑀢𑀺 𑀩𑀳𑀼𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀅𑀫𑀭𑀁 𑀦𑀸𑀫 𑀦𑀕𑀭𑀁, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫’’𑀦𑁆𑀢𑀺

𑀧𑀸𑀴𑀺. 𑀏𑀢𑁆𑀣 ‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂𑀢𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀩𑀳𑀼𑀯𑀘𑀦𑀁, 𑀢𑀲𑁆𑀫𑀸 ‘‘𑀫𑀳𑀸𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑀺𑀬𑀸𑀦𑀁 𑀫𑀢𑁆𑀣𑀓𑁂’’𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, ‘‘𑀫𑀢𑁆𑀣𑀓𑁂’’𑀢𑀺 𑀘𑁂𑀢𑁆𑀣 𑀯𑀘𑀦𑀲𑁂𑀲𑁄. ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑀺𑀬𑀸𑀦𑀁 𑀫𑀢𑁆𑀣𑀓𑁂’’𑀇𑀘𑁆𑀘𑁂𑀯𑀢𑁆𑀣𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀏𑀢𑁆𑀣𑀦𑁆𑀢𑀭𑁂 𑀬𑀁 𑀘𑀭𑀺𑀢𑀁, 𑀲𑀩𑁆𑀩𑀁 𑀢𑀁 𑀩𑁄𑀥𑀺𑀧𑀸𑀘𑀦’’𑀦𑁆𑀢𑀺

𑀧𑀸𑀴𑀺. 𑀏𑀢𑁆𑀣 ‘‘𑀓𑀧𑁆𑀧𑁂’’𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀩𑀳𑀼𑀯𑀘𑀦𑀁. ‘‘𑀲𑀢𑀲𑀳𑀲𑁆𑀲𑁂 𑀓𑀧𑁆𑀧𑁂’’𑀢𑀺 𑀓𑀧𑁆𑀧𑀲𑀤𑁆𑀤𑀲𑀫𑁆𑀩𑀦𑁆𑀥𑁂𑀦 𑀘𑀸𑀬𑀁 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀉𑀧𑀬𑁄𑀕𑀦𑀺𑀤𑁆𑀤𑁂𑀲𑁄 𑀘. 𑀲𑀫𑀸𑀦𑀸𑀥𑀺𑀓𑀭𑀡𑀜𑁆𑀳𑀺 𑀇𑀤𑀁 𑀓𑀧𑁆𑀧𑀲𑀤𑁆𑀤𑁂𑀦. ‘‘𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂’’𑀢𑀺 𑀅𑀘𑁆𑀙𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀩𑀳𑀼𑀯𑀘𑀦𑀸𑀦𑀺. 𑀓𑀲𑁆𑀲 𑀧𑀦 𑀅𑀲𑀗𑁆𑀔𑀺𑀬𑁂𑀢𑀺? 𑀅𑀜𑁆𑀜𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀓𑀧𑁆𑀧𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 𑀧𑀓𑀭𑀡𑀢𑁄 ‘‘𑀓𑀧𑁆𑀧𑀸𑀦’’𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑁂𑀯. 𑀦 𑀳𑀺 𑀯𑀼𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀼𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀕𑀳𑀡𑀁 𑀬𑀼𑀢𑁆𑀢𑀦𑁆𑀢𑀺. 𑀘𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 ‘‘𑀫𑀳𑀸𑀓𑀧𑁆𑀧𑀸𑀦𑀁 𑀘𑀢𑀼𑀭𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀲𑀢𑀲𑀳𑀲𑁆𑀲𑁂 𑀘 𑀫𑀳𑀸𑀓𑀧𑁆𑀧𑁂’’𑀢𑀺. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀖𑀝𑀸𑀦𑁂𑀓𑀲𑀳𑀲𑁆𑀲𑀸𑀦𑀺, 𑀓𑀼𑀫𑁆𑀪𑀻𑀦𑀜𑁆𑀘 𑀲𑀢𑀸 𑀩𑀳𑀽’’𑀢𑀺 𑀧𑀸𑀴𑀺. 𑀏𑀢𑁆𑀣 𑀖𑀝𑀸𑀢𑀺 𑀖𑀝𑀸𑀦𑀁. 𑀲𑀸𑀫𑀺𑀅𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. ‘‘𑀖𑀝𑀸𑀦𑀁 𑀅𑀦𑁂𑀓𑀲𑀳𑀲𑁆𑀲𑀸𑀦𑀺’’ 𑀇𑀘𑁆𑀘𑁂𑀯𑀢𑁆𑀣𑁄. 𑀓𑀼𑀫𑁆𑀪𑀻𑀦𑀜𑁆𑀘 𑀲𑀢𑀸 𑀩𑀳𑀽𑀢𑀺 𑀅𑀦𑁂𑀓𑀸𑀦𑀺 𑀘 𑀓𑀼𑀫𑁆𑀪𑀻𑀦𑀁 𑀲𑀢𑀸𑀦𑀺. 𑀏𑀢𑁆𑀣 𑀦𑀺𑀓𑀸𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀤𑀲𑀯𑀻𑀲𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀏𑀓𑀤𑁆𑀯𑀺𑀦𑁆𑀦𑀁 𑀅𑀪𑀺𑀲𑀫𑀬𑁄, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑁄’’𑀢𑀺

𑀧𑀸𑀴𑀺. 𑀏𑀢𑁆𑀣 𑀤𑀲𑀯𑀻𑀲𑀲𑀳𑀲𑁆𑀲𑀸𑀦𑀦𑁆𑀢𑀺 𑀤𑀲𑀲𑀳𑀲𑁆𑀲𑀸𑀦𑀁 𑀯𑀻𑀲𑀲𑀳𑀲𑁆𑀲𑀸𑀦𑀜𑁆𑀘. 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄. 𑀏𑀓𑀤𑁆𑀯𑀺𑀦𑁆𑀦𑀦𑁆𑀢𑀺 𑀲𑀻𑀲𑀫𑀢𑁆𑀢𑀓𑀣𑀦𑀁, 𑀢𑁂𑀦 ‘‘𑀏𑀓𑀲𑁆𑀲 𑀘𑁂𑀯 𑀤𑁆𑀯𑀺𑀦𑁆𑀦𑀜𑁆𑀘 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁…𑀧𑁂… 𑀤𑀲𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀤𑀻𑀧𑀗𑁆𑀓𑀭𑀁 𑀮𑁄𑀓𑀯𑀺𑀤𑀼𑀁, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀩𑁆𑀩𑀤𑀸’’𑀢𑀺

𑀧𑀸𑀴𑀺. 𑀏𑀢𑁆𑀣 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀇𑀤𑀁 𑀮𑀺𑀗𑁆𑀕𑀪𑁂𑀤𑀯𑀲𑁂𑀦 ‘‘𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸’’𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀁. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬 𑀯𑀸𑀘𑀓𑁄𑀧𑀺 𑀲𑀤𑁆𑀤𑁄 𑀦𑀧𑀼𑀁𑀲𑀓𑁄𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀘 ‘‘𑀙𑀴𑀪𑀺𑀜𑁆𑀜𑀸’’𑀢𑀺 𑀘 ‘‘𑀫𑀳𑀺𑀤𑁆𑀥𑀺𑀓𑀸’’𑀢𑀺 𑀘 𑀏𑀢𑀁 𑀧𑀤𑀢𑁆𑀢𑀬𑀁 𑀲𑀫𑀸𑀦𑀸𑀥𑀺𑀓𑀭𑀡𑀁. 𑀅𑀣 𑀯𑀸 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸𑀢𑀺 𑀙𑀴𑀪𑀺𑀜𑁆𑀜𑀸𑀦𑀁 𑀫𑀳𑀤𑁆𑀥𑀺𑀓𑀸𑀦𑀦𑁆𑀢𑀺 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘‘𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀅𑀬𑀁 𑀲𑀗𑁆𑀔𑁆𑀬𑀸𑀯𑀘𑀦𑁄 𑀪𑀯𑀢𑀺. ‘‘𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸’’𑀢𑀺𑀆𑀤𑀻𑀲𑀼𑀧𑀺 𑀅𑀬𑀁 𑀦𑀬𑁄 𑀦𑁂𑀢𑀩𑁆𑀩𑁄. ‘‘𑀢𑀸 𑀘 𑀲𑀢𑁆𑀢 𑀲𑀢𑀸 𑀪𑀭𑀺𑀬𑀸, 𑀤𑀸𑀲𑁆𑀬𑁄 𑀲𑀢𑁆𑀢 𑀲𑀢𑀸𑀦𑀺 𑀘𑀸’’𑀢𑀺 𑀧𑀸𑀴𑀺. 𑀏𑀢𑁆𑀣 𑀲𑀢𑀸𑀢𑀺 ‘‘𑀲𑀢𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀯𑀲𑁂𑀦 𑀕𑀳𑁂𑀢𑀩𑁆𑀩𑀁, 𑀦 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦. ‘‘𑀲𑀢𑀸’’𑀢𑀺 𑀳𑀺 ‘‘𑀧𑀜𑁆𑀘 𑀘𑀺𑀢𑁆𑀢𑀸 𑀯𑀺𑀧𑀸𑀓𑀸’’𑀢𑀺𑀆𑀤𑀻𑀦𑀺 𑀯𑀺𑀬 𑀦𑀧𑀼𑀁𑀲𑀓𑀭𑀽𑀧𑀁. 𑀇𑀢𑁆𑀣𑀺𑀮𑀺𑀗𑁆𑀕𑀪𑀽𑀢𑀸 𑀳𑀺 𑀲𑀢𑀲𑀤𑁆𑀤𑁄 𑀦𑀢𑁆𑀣𑀺, 𑀢𑀣𑀸 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑁄. 𑀬𑀤𑀺 𑀘 𑀤𑁆𑀯𑀺𑀮𑀺𑀗𑁆𑀕𑁄 𑀲𑀢𑀲𑀤𑁆𑀤𑁄 𑀲𑀺𑀬𑀸, 𑀏𑀯𑀜𑁆𑀘 𑀲𑀢𑀺 ‘‘𑀧𑀼𑀭𑀺𑀲𑁄, 𑀓𑀜𑁆𑀜𑀸’’𑀢𑀺 𑀘 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀭𑀽𑀧𑁂𑀳𑀺𑀧𑀺𑀪𑀯𑀺𑀢𑀩𑁆𑀩𑀁. 𑀭𑀽𑀧𑀤𑁆𑀯𑀬𑀫𑁆𑀧𑀺 𑀲𑀢𑀲𑀤𑁆𑀤𑀲𑁆𑀲 𑀦𑀢𑁆𑀣𑀺, 𑀢𑁂𑀦 𑀜𑀸𑀬𑀢𑀺 ‘‘𑀲𑀢𑀲𑀤𑁆𑀤𑁄 𑀏𑀓𑀦𑁆𑀢𑀦𑀧𑀼𑀁𑀲𑀓𑁄’’𑀢𑀺.

𑀦𑀦𑀼 𑀘 𑀪𑁄 ‘‘𑀢𑀸 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸’’𑀢𑀺 𑀏𑀢𑁆𑀣 𑀲𑀢𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀻𑀢𑀺? 𑀦, 𑀦𑀧𑀼𑀁𑀲𑀓𑁄𑀬𑁂𑀯𑀸𑀢𑀺. 𑀦𑀦𑀼 𑀘 𑀪𑁄 𑀤𑁂𑀯𑀢𑀸𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁄𑀢𑀺? 𑀲𑀘𑁆𑀘𑀁 𑀲𑀫𑀸𑀦𑀸𑀥𑀺𑀓𑀭𑀡𑁄, 𑀢𑀣𑀸𑀧𑀺 𑀦𑀧𑀼𑀁𑀲𑀓𑁄𑀬𑁂𑀯. 𑀈𑀤𑀺𑀲𑁂𑀲𑀼 𑀳𑀺 𑀲𑀗𑁆𑀔𑁆𑀬𑀸𑀯𑀺𑀲𑀬𑁂𑀲𑀼 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀅𑀧𑁆𑀧𑀫𑀸𑀡𑁄. 𑀢𑀣𑀸 𑀳𑀺 ‘‘𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀢𑀸𑀦𑀺 𑀇𑀫𑀲𑁆𑀫𑀺𑀁 𑀇𑀲𑀺𑀕𑀺𑀮𑀺𑀲𑁆𑀫𑀺𑀁 𑀧𑀩𑁆𑀩𑀢𑁂 𑀘𑀺𑀭𑀯𑀸𑀲𑀺𑀦𑁄 𑀅𑀳𑁂𑀲𑀼’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀢𑀸 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸’’𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀢𑁆𑀢𑀲𑀢𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀪𑀸𑀯𑁄𑀬𑁂𑀯𑀸𑀢𑀺 𑀅𑀯𑀕𑀦𑁆𑀢𑀩𑁆𑀩𑁄. ‘‘𑀲𑀢𑁆𑀢 𑀳𑀢𑁆𑀣𑀺𑀲𑀢𑁂 𑀤𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺 𑀲𑀢𑀲𑀤𑁆𑀤𑁄 𑀦𑀧𑀼𑀁𑀲𑀓𑁄𑀬𑁂𑀯. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑁂𑀳𑀺, 𑀧𑀭𑀺𑀯𑀸𑀭𑁂𑀲𑀺 𑀫𑀳𑀸𑀫𑀼𑀦𑀻’’𑀢𑀺 𑀧𑀸𑀴𑀺. 𑀏𑀢𑁆𑀣 ‘‘𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑁂𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺 𑀯𑀸 ‘‘𑀪𑀺𑀓𑁆𑀔𑀽𑀦𑀁 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑁂𑀳𑀻’’𑀢𑀺 𑀯𑀸 𑀲𑀗𑁆𑀔𑁆𑀬𑁂𑀬𑁆𑀬𑀲𑀗𑁆𑀔𑁆𑀬𑀸𑀧𑀥𑀸𑀦𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀲𑀢𑀲𑀳𑀲𑁆𑀲𑀯𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄’’𑀢𑀺 𑀧𑀸𑀴𑀺. 𑀏𑀢𑁆𑀣 ‘‘𑀲𑀢𑀲𑀳𑀲𑁆𑀲𑀯𑀲𑁆𑀲𑀸𑀦𑀻’’𑀢𑀺 𑀓𑀸𑀮𑀲𑁆𑀲 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁. 𑀢𑀣𑀸 ‘‘𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭’𑀫𑀚𑁆𑀛 𑀲𑁄 𑀯𑀲𑀻’’𑀢𑀺 𑀧𑀸𑀴𑀺𑀬𑀫𑁆𑀧𑀺. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄’’𑀢𑀺 𑀧𑀸𑀴𑀺, ‘‘𑀏𑀓𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂’’𑀢𑀺 𑀧𑀸𑀴𑀺 𑀘. 𑀏𑀢𑁆𑀣 𑀲𑀢𑀲𑀳𑀲𑁆𑀲𑀫𑁆𑀳𑀺 𑀓𑀧𑁆𑀧𑁂𑀢𑀺 𑀲𑀢𑀲𑀳𑀲𑁆𑀲𑀸𑀦𑀁 𑀓𑀧𑁆𑀧𑀸𑀦𑀁 𑀫𑀢𑁆𑀣𑀓𑁂. 𑀏𑀓𑀦𑀯𑀼𑀢𑁂 𑀓𑀧𑁆𑀧𑁂𑀢𑀺 𑀏𑀓𑀦𑀯𑀼𑀢𑀺𑀬𑀸 𑀓𑀧𑁆𑀧𑀸𑀦𑀁 𑀫𑀢𑁆𑀣𑀓𑁂𑀢𑀺 𑀪𑀼𑀫𑁆𑀫𑀯𑀘𑀦𑀲𑁆𑀲 𑀲𑀸𑀫𑀺𑀪𑀼𑀫𑁆𑀫𑀯𑀘𑀦𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀣𑀸 𑀳𑀺 ‘‘𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀪𑀼𑀫𑁆𑀫𑀯𑀘𑀦𑀲𑁆𑀲 ‘‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂’’𑀢𑀺 𑀲𑀸𑀫𑀺𑀪𑀼𑀫𑁆𑀫𑀯𑀘𑀦𑀯𑀲𑁂𑀦 𑀅𑀢𑁆𑀣𑁄 𑀕𑀳𑀺𑀢𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀬𑀤𑀺 𑀢𑀢𑁆𑀣 𑀲𑀳𑀲𑁆𑀲𑀸𑀦𑀺, 𑀲𑀢𑀸𑀦𑀺 𑀦𑀳𑀼𑀢𑀸𑀦𑀺 𑀘;

𑀦𑁂𑀯𑀫𑁆𑀳𑀸𑀓𑀁 𑀪𑀬𑀁 𑀓𑁄𑀘𑀺, 𑀯𑀦𑁂 𑀯𑀸𑀴𑁂𑀲𑀼 𑀯𑀺𑀚𑁆𑀚𑀢𑀻’’𑀢𑀺

𑀧𑀸𑀴𑀺. 𑀅𑀬𑀫𑁂𑀢𑀲𑁆𑀲𑀸 𑀅𑀢𑁆𑀣𑁄 𑁋 𑀢𑀢𑁆𑀣 𑀯𑀦𑁂 𑀯𑀸𑀴𑀸𑀦𑀁 𑀲𑀳𑀲𑁆𑀲𑀸𑀦𑀺 𑀘 𑀲𑀢𑀸𑀦𑀺 𑀘 𑀦𑀳𑀼𑀢𑀸𑀦𑀺 𑀘 𑀬𑀤𑀺 𑀯𑀺𑀚𑁆𑀚𑀦𑁆𑀢𑀺. 𑀅𑀣 𑀯𑀸 𑀲𑀳𑀲𑁆𑀲𑀸𑀦𑀺 𑀲𑀢𑀸𑀦𑀻𑀢𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀯𑀸𑀴𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀺 𑀘 𑀦𑀳𑀼𑀢𑀸𑀦𑀺 𑀘 𑀬𑀤𑀺 𑀯𑀺𑀚𑁆𑀚𑀦𑁆𑀢𑀺, 𑀏𑀯𑀁 𑀯𑀺𑀚𑁆𑀚𑀦𑁆𑀢𑁂𑀲𑀼𑀧𑀺 𑀯𑀸𑀴𑁂𑀲𑀼 𑀓𑁄𑀘𑀻𑀢𑀺 𑀓𑁆𑀯𑀘𑀺. 𑀓𑁄𑀘𑀺𑀲𑀤𑁆𑀤𑁄 𑀳𑀺 ‘‘𑀓𑁄 𑀢𑁂 𑀩𑀮𑀁 𑀫𑀳𑀸𑀭𑀸𑀚𑀸’’𑀢𑀺 𑀏𑀢𑁆𑀣 𑀓𑁄𑀲𑀤𑁆𑀤𑁄 𑀯𑀺𑀬 𑀓𑁆𑀯𑀲𑀤𑁆𑀤𑀢𑁆𑀣𑁂 𑀯𑀢𑁆𑀢𑀢𑀺, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑀸𑀬𑀁 𑀦𑀺𑀤𑁆𑀤𑁂𑀲𑁄. 𑀢𑁂𑀦 ‘‘𑀓𑁄𑀘𑀺 𑀓𑁆𑀯𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀯𑀸𑀴𑁂 𑀏𑀓𑀲𑁆𑀲𑀧𑀺 𑀯𑀸𑀴𑀫𑀺𑀕𑀲𑁆𑀲 𑀓𑀸𑀭𑀡𑀸 𑀦𑁂𑀯𑀫𑁆𑀳𑀸𑀓𑀁 𑀪𑀬𑀁 𑀯𑀺𑀚𑁆𑀚𑀢𑀻’’𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀓𑁄𑀘𑀻𑀢𑀺 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀏𑀢𑁆𑀣 𑀧𑀦 ‘‘𑀯𑀸𑀴𑁂𑀲𑀽’’𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀯𑀸𑀴𑀸𑀦𑀁 𑀓𑀸𑀭𑀡𑀸 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀫𑁆𑀳𑀸𑀓𑀁 𑀪𑀬𑀁 𑀦 𑀯𑀺𑀚𑁆𑀚𑀢𑀻𑀢𑀺. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀲𑀩𑁆𑀩𑀁 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀺𑀁𑀲𑀧𑀭𑀺𑀫𑀡𑁆𑀟𑀮𑀁;

𑀤𑀲𑀜𑁆𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀢𑀸𑀦𑀺 𑀘𑀸’’𑀢𑀺

𑀅𑀝𑁆𑀞𑀓𑀣𑀸𑀧𑀸𑀞𑁄. 𑀏𑀢𑁆𑀣 𑀬𑀲𑁆𑀫𑀸 𑀲𑀤𑁆𑀤𑀢𑁄 𑀲𑀫𑀸𑀦𑀯𑀺𑀪𑀢𑁆𑀢𑀺𑀮𑀺𑀗𑁆𑀕𑀯𑀘𑀦𑀸𑀦𑀁 𑀧𑀤𑀸𑀦𑀁 𑀅𑀲𑀫𑀸𑀦𑀯𑀺𑀪𑀢𑁆𑀢𑀺𑀮𑀺𑀗𑁆𑀕𑀯𑀘𑀦𑀸𑀦𑀁 𑀯𑀸 𑀅𑀢𑁆𑀣𑀢𑁄 𑀧𑀦 𑀲𑀫𑀸𑀦𑀸𑀦𑀁 𑀤𑀽𑀭𑁂 𑀞𑀺𑀢𑀸𑀦𑀫𑁆𑀧𑀺 𑀏𑀓𑀲𑀫𑁆𑀩𑀦𑁆𑀥𑁄 𑀳𑁄𑀢𑀺, 𑀇𑀢𑀭𑁂𑀲𑀁 𑀲𑀫𑀻𑀧𑁂 𑀞𑀺𑀢𑀸𑀦𑀫𑁆𑀧𑀺 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀩𑁆𑀩’’𑀦𑁆𑀢𑀺𑀤𑀁 ‘‘𑀧𑀭𑀺𑀫𑀡𑁆𑀟𑀮’’𑀦𑁆𑀢𑀺𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀙𑀢𑁆𑀢𑀺𑀁𑀲𑀸’’𑀢𑀺 𑀇𑀤𑀁 𑀧𑀦 ‘‘𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸’’𑀢𑀺

𑀅𑀝𑁆𑀞𑀓𑀣𑀸𑀧𑀸𑀞𑁄. 𑀏𑀢𑁆𑀣 ‘‘𑀤𑀼𑀯𑁂’’𑀢𑀺 𑀯𑀺𑀲𑁂𑀲𑀦𑀁, ‘‘𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀁. 𑀢𑀣𑀸 ‘‘𑀘𑀢𑁆𑀢𑀸𑀭𑀻’’𑀢𑀺 𑀯𑀺𑀲𑁂𑀲𑀦𑀁, ‘‘𑀦𑀳𑀼𑀢𑀸𑀦𑀻’’𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀁. 𑀢𑀣𑀸 𑀳𑀺 ‘‘𑀲𑀢𑀲𑀳𑀲𑁆𑀲𑀸𑀦𑀺 𑀦𑀳𑀼𑀢𑀸𑀦𑀺 𑀘𑀸’’𑀢𑀺 𑀇𑀫𑀸𑀦𑀺 ‘‘𑀤𑀼𑀯𑁂 𑀘𑀢𑁆𑀢𑀸𑀭𑀻’’𑀢𑀺 𑀇𑀫𑁂𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 ‘‘𑀤𑁆𑀯𑀺𑀲𑀢𑀲𑀳𑀲𑁆𑀲𑀁 𑀘𑀢𑀼𑀦𑀳𑀼𑀢’’𑀦𑁆𑀢𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀤𑀼𑀯𑁂’’𑀇𑀘𑁆𑀘𑀸𑀤𑀻𑀦𑀁 𑀲𑀗𑁆𑀔𑁆𑀬𑀸𑀲𑀤𑁆𑀤𑀸𑀦𑀁 ‘‘𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀻𑀳𑀺 𑀲𑀗𑁆𑀔𑁆𑀬𑀸𑀲𑀤𑁆𑀤𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀦 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀬𑀣𑀸 ‘‘𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸. 𑀲𑀢𑀲𑀳𑀲𑁆𑀲𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀻𑀲𑀼 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀮𑀩𑁆𑀪𑀢𑀺 𑀤𑀩𑁆𑀩𑀯𑀸𑀘𑀓𑀢𑁆𑀢𑀸 𑀯𑀺𑀲𑁂𑀲𑀺𑀢𑀩𑁆𑀩𑀧𑀤𑀸𑀦𑀁, 𑀦 𑀢𑀣𑀸 ‘‘𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀻𑀲𑀼 𑀅𑀤𑀩𑁆𑀩𑀯𑀸𑀘𑀓𑀢𑁆𑀢𑀸 𑀯𑀺𑀲𑁂𑀲𑀺𑀢𑀩𑁆𑀩𑀧𑀤𑀸𑀦𑀁, 𑀢𑀲𑁆𑀫𑀸 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀦 𑀇𑀘𑁆𑀙𑀺𑀢𑀩𑁆𑀩𑀸 𑀬𑀼𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀬𑀤𑀺 𑀏𑀯𑀁 ‘‘𑀓𑀼𑀲𑀮𑀸, 𑀭𑀽𑀧𑀁, 𑀘𑀓𑁆𑀔𑀼𑀫𑀸’’𑀢𑀺𑀆𑀤𑀻𑀦𑀁 𑀯𑀺𑀬 𑀇𑀫𑁂𑀲𑀫𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀭𑀳𑀺𑀢𑀸 𑀲𑀺𑀬𑀸𑀢𑀺? 𑀦, 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸. 𑀬𑀚𑁆𑀚𑁂𑀯𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀮𑀤𑁆𑀥𑀩𑁆𑀩𑁄𑀢𑀺? 𑀦, 𑀦𑀺𑀬𑀫𑀸𑀪𑀸𑀯𑀢𑁄. 𑀏𑀓𑀦𑁆𑀢𑁂𑀦 𑀳𑀺 𑀕𑀼𑀡𑀕𑀼𑀡𑀻𑀦𑀁𑀬𑁂𑀯 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄, 𑀦 𑀇𑀢𑀭𑁂𑀲𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑁂𑀧𑀺.

𑀢𑀢𑁆𑀣 ‘‘𑀏𑀢𑁆𑀢𑀓’’𑀦𑁆𑀢𑀺 𑀧𑀫𑀸𑀡𑀯𑀘𑀦𑀁. ‘‘𑀩𑀳𑀮𑀢𑁆𑀢𑁂𑀦𑀸’’𑀢𑀺 𑀯𑀺𑀲𑁂𑀲𑀦𑁂 𑀢𑀢𑀺𑀬𑀸. 𑀉𑀪𑀬𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀅𑀬𑀁 𑀯𑀲𑀼𑀦𑁆𑀥𑀭𑀸 𑀩𑀳𑀮𑀢𑁆𑀢𑁂𑀦 𑀬𑁄𑀚𑀦𑀸𑀦𑀁 𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘 𑀏𑀢𑁆𑀢𑀓𑀁 𑀲𑀗𑁆𑀔𑀸𑀢𑀸’’𑀢𑀺. ‘‘𑀏𑀢𑁆𑀢𑀓’’𑀦𑁆𑀢𑀺 𑀧𑀤𑀲𑁆𑀲 𑀘 ‘‘𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘𑀸’’𑀢𑀺 𑀇𑀫𑁂𑀳𑀺 𑀯𑀸 ‘‘𑀯𑀲𑀼𑀦𑁆𑀥𑀭𑀸’’𑀢𑀺 𑀇𑀫𑀺𑀦𑀸 𑀯𑀸 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀦 𑀇𑀘𑁆𑀙𑀺𑀢𑀩𑁆𑀩𑀸. 𑀏𑀢𑁆𑀢𑀓𑀦𑁆𑀢𑀺 𑀳𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀬𑀁 𑀲𑀤𑁆𑀤𑀲𑀢𑁆𑀣𑁂 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲 ‘‘𑀏𑀢𑁆𑀢𑀓𑁂𑀦 𑀧𑀫𑀸𑀡𑁂𑀦’’𑀇𑀘𑁆𑀘𑁂𑀯𑀢𑁆𑀣𑁄. 𑀅𑀧𑀺𑀘 ‘‘𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀦 𑀳𑀼𑀢𑀸𑀦𑀺 𑀘𑀸’’𑀢𑀺 𑀇𑀫𑁂𑀲𑀫𑁆𑀧𑀺 ‘‘𑀯𑀲𑀼𑀦𑁆𑀥𑀭𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀦 𑀇𑀘𑁆𑀙𑀺𑀢𑀩𑁆𑀩𑀸 ‘‘𑀪𑀺𑀓𑁆𑀔𑀽𑀦𑀁 𑀲𑀢’’𑀦𑁆𑀢𑀺 𑀏𑀢𑁆𑀣 𑀲𑀢𑀲𑀤𑁆𑀤𑀲𑁆𑀲 𑀯𑀺𑀬 𑀲𑀗𑁆𑀔𑁆𑀬𑀸𑀯𑀘𑀦𑀫𑀢𑁆𑀢𑀢𑁆𑀢𑀸. 𑀢𑀣𑀸 𑀳𑀺 ‘‘𑀏𑀢𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀗𑁆𑀔𑀸𑀢𑀸’’𑀢𑀺 𑀧𑀦 ‘‘𑀅𑀬’’𑀦𑁆𑀢𑀺 𑀘 𑀇𑀫𑁂𑀲𑀁 ‘‘𑀯𑀲𑀼𑀦𑁆𑀥𑀭𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀮𑀩𑁆𑀪𑀢𑀺. 𑀲𑀩𑁆𑀩𑁄𑀧𑀸𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀤𑀲𑁂𑀢𑁆𑀣 𑀭𑀸𑀚𑀺𑀬𑁄 𑀲𑁂𑀢𑀸, 𑀤𑀲𑁆𑀲𑀦𑀻𑀬𑀸 𑀫𑀦𑁄𑀭𑀫𑀸;

𑀙 𑀧𑀺𑀗𑁆𑀕𑀮𑀸 𑀧𑀦𑁆𑀦𑀭𑀲, 𑀳𑀮𑀺𑀤𑁆𑀤𑀸 𑀢𑀸 𑀘𑀢𑀼𑀤𑁆𑀤𑀲𑀸’’𑀢𑀺

𑀧𑀸𑀴𑀺. 𑀏𑀢𑁆𑀣 𑀙 𑀧𑀺𑀗𑁆𑀕𑀮𑀸 𑀧𑀦𑁆𑀦𑀭𑀲𑀸𑀢𑀺 𑀙 𑀘 𑀧𑀦𑁆𑀦𑀭𑀲 𑀘𑀸𑀢𑀺 𑀏𑀓𑀯𑀻𑀲𑀢𑀺 𑀧𑀺𑀗𑁆𑀕𑀮𑀸 𑀭𑀸𑀚𑀺𑀬𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀢𑀣𑀸 𑁋

‘‘𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, ‘𑀏𑀓𑀦𑀸𑀫𑀸’𑀢𑀺 𑀫𑁂 𑀲𑀼𑀢𑀁;

𑀅𑀲𑀻𑀢𑀺 𑀤𑀲 𑀏𑀓𑁄 𑀘, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸’’𑀢𑀺

𑀧𑀸𑀴𑀺. 𑀏𑀢𑁆𑀣 𑀧𑀦 ‘‘𑀏𑀓𑀦𑀯𑀼𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀲𑀻𑀢𑀺 𑀤𑀲 𑀏𑀓𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀘𑀺𑀢𑁆𑀭𑀲𑀤𑁆𑀤𑀭𑀘𑀦𑀜𑁆𑀳𑀺 𑀧𑀸𑀯𑀘𑀦𑀁. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀢𑀺𑀁𑀲𑀧𑀼𑀭𑀺𑀲𑀦𑀸𑀯𑀼𑀢𑁆𑀬𑁄, 𑀲𑀩𑁆𑀩𑁂𑀯𑁂𑀓𑁂𑀓𑀦𑀺𑀘𑁆𑀘𑀺𑀢𑀸;

𑀬𑁂𑀲𑀁 𑀲𑀫𑀁 𑀦 𑀧𑀲𑁆𑀲𑀸𑀫𑀺, 𑀓𑁂𑀯𑀮𑀁 𑀫𑀳𑀺’𑀫𑀁 𑀘𑀭’’𑀦𑁆𑀢𑀺

𑀧𑀸𑀴𑀺. 𑀏𑀢𑁆𑀣 ‘‘𑀧𑀼𑀭𑀺𑀲𑀸𑀦𑀁 𑀢𑀺𑀁𑀲𑀲𑀳𑀲𑁆𑀲𑀸𑀦𑀺 𑀦𑀯𑀼𑀢𑀺 𑀘 𑀲𑀢𑀸𑀦𑀺 𑀢𑀺𑀁𑀲 𑀦𑀸𑀯𑀼𑀢𑁆𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀢𑀺𑀁𑀲𑀲𑀤𑁆𑀤𑀢𑁄 𑀲𑀳𑀲𑁆𑀲𑀲𑀤𑁆𑀤𑀲𑁆𑀲 𑀦𑀯𑀼𑀢𑀺𑀲𑀤𑁆𑀤𑀢𑁄 𑀘 𑀲𑀢𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀢𑀺𑀁𑀲 𑀦𑀸𑀯𑀼𑀢𑁆𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀕𑀳𑀡𑁂 𑀲𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺𑀧𑀺 𑀏𑀤𑀺𑀲𑀻 𑀲𑀤𑁆𑀤𑀭𑀘𑀦𑀸 𑀓𑀸𑀢𑀩𑁆𑀩𑀸 𑀲𑀺𑀬𑀸, 𑀓𑀢𑀸𑀬 𑀘 𑀏𑀤𑀺𑀲𑀸𑀬 𑀲𑀤𑁆𑀤𑀭𑀘𑀦𑀸𑀬 𑀅𑀢𑁆𑀣𑀸𑀯𑀕𑀫𑁄 𑀯𑀺𑀦𑀸 𑀉𑀧𑀤𑁂𑀲𑁂𑀦 𑀲𑀼𑀡𑀦𑁆𑀢𑀸𑀦𑀁 𑀦 𑀲𑀺𑀬𑀸, 𑀢𑀲𑁆𑀫𑀸 𑀦𑁂𑀯𑀁 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀧𑀦 𑀕𑀳𑁂𑀢𑀩𑁆𑀩𑀁 𑁋 ‘‘𑀢𑀺𑀁𑀲 𑀦𑀸𑀯𑀼𑀢𑁆𑀬𑁄’’𑀢𑀺 𑀇𑀤𑀁 𑀮𑁄𑀓𑀲𑀗𑁆𑀓𑁂𑀢𑀭𑀽𑀴𑁆𑀳𑀁 𑀯𑀘𑀦𑀁, 𑀲𑀗𑁆𑀓𑁂𑀢𑀭𑀽𑀴𑁆𑀳𑀲𑁆𑀲 𑀧𑀦 𑀯𑀘𑀦𑀲𑁆𑀲𑀢𑁆𑀣𑁄 𑀬𑀲𑁆𑀫𑀸 𑀕𑀳𑀺𑀢𑀧𑀼𑀩𑁆𑀩𑀲𑀗𑁆𑀓𑁂𑀢𑁂𑀳𑀺 𑀲𑀼𑀢𑁆𑀯𑀸 𑀜𑀸𑀬𑀢𑁂, 𑀦 𑀉𑀧𑀤𑁂𑀲𑀢𑁄, 𑀢𑀲𑁆𑀫𑀸 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀭𑀜𑁆𑀜𑀸 𑀯𑀼𑀢𑁆𑀢𑀓𑀸𑀮𑁂𑀧𑀺 𑀲𑀢𑁆𑀣𑀸𑀭𑀸 𑀢𑀁 𑀓𑀣𑀁 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀓𑀸𑀮𑁂𑀧𑀺 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 𑀯𑀺𑀦𑀸𑀧𑀺 𑀉𑀧𑀤𑁂𑀲𑁂𑀦 𑀯𑀘𑀦𑀢𑁆𑀣𑀁 𑀚𑀸𑀦𑀦𑁆𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑀢𑀺𑀁𑀲𑀜𑁆𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀦𑀯𑀼𑀢𑀺 𑀘 𑀲𑀢𑀸𑀦𑀺 𑀢𑀼;

𑀢𑀺𑀁𑀲 𑀦𑀸𑀯𑀼𑀢𑀺𑀬𑁄 𑀦𑀸𑀫, 𑀯𑀼𑀢𑁆𑀢𑀸 𑀉𑀫𑀗𑁆𑀕𑀚𑀸𑀢𑀓𑁂.

𑀬𑀲𑁆𑀫𑀸 𑀧𑀸𑀯𑀘𑀦𑁂 𑀲𑀦𑁆𑀢𑀺, 𑀦𑀬𑀸 𑀘𑁂𑀯 𑀅𑀘𑀺𑀦𑁆𑀢𑀺𑀬𑀸;

𑀯𑁄𑀳𑀸𑀭𑀸 𑀘 𑀲𑀼𑀕𑀼𑀴𑁆𑀳𑀢𑁆𑀣𑀸, 𑀤𑀬𑀸𑀧𑀦𑁆𑀦𑁂𑀦 𑀤𑁂𑀲𑀺𑀢𑀸.

𑀢𑀲𑁆𑀫𑀸 𑀲𑀸𑀝𑁆𑀞𑀓𑀣𑁂 𑀥𑀻𑀭𑁄, 𑀕𑀫𑁆𑀪𑀻𑀭𑁂 𑀚𑀺𑀦𑀪𑀸𑀲𑀺𑀢𑁂;

𑀉𑀧𑀤𑁂𑀲𑀁 𑀲𑀤𑀸 𑀕𑀡𑁆𑀳𑁂, 𑀕𑀭𑀼𑀁 𑀲𑀫𑁆𑀫𑀸 𑀉𑀧𑀝𑁆𑀞𑀳𑀁.

𑀕𑀭𑀽𑀧𑀤𑁂𑀲𑀳𑀻𑀦𑁄 𑀳𑀺, 𑀅𑀢𑁆𑀣𑀲𑀸𑀭𑀁 𑀦 𑀯𑀺𑀦𑁆𑀤𑀢𑀺;

𑀅𑀢𑁆𑀣𑀲𑀸𑀭𑀯𑀺𑀳𑀻𑀦𑁄 𑀲𑁄, 𑀲𑀤𑁆𑀥𑀫𑁆𑀫𑀸 𑀧𑀭𑀺𑀳𑀸𑀬𑀢𑀺.

𑀕𑀭𑀽𑀧𑀤𑁂𑀲𑀮𑀸𑀪𑀻 𑀘, 𑀅𑀢𑁆𑀣𑀲𑀸𑀭𑀲𑀫𑀸𑀬𑀼𑀢𑁄;

𑀲𑀤𑁆𑀥𑀫𑁆𑀫𑀁 𑀧𑀭𑀺𑀧𑀸𑀮𑁂𑀦𑁆𑀢𑁄, 𑀲𑀤𑁆𑀥𑀫𑁆𑀫𑀲𑁆𑀫𑀸 𑀦 𑀳𑀸𑀬𑀢𑀺.

𑀲𑀤𑁆𑀥𑀫𑁆𑀫𑀢𑁆𑀣𑀸𑀬 𑀫𑁂 𑀢𑀲𑁆𑀫𑀸, 𑀲𑀗𑁆𑀔𑁆𑀬𑀸𑀫𑀸𑀮𑀸𑀧𑀺 𑀪𑀸𑀲𑀺𑀢𑀸;

𑀲𑀧𑁆𑀧𑀬𑁄𑀕𑀸 𑀬𑀣𑀸𑀬𑁄𑀕𑀁, 𑀲𑀳𑁂𑀯𑀢𑁆𑀣𑀯𑀺𑀦𑀺𑀘𑁆𑀙𑀬𑀸.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀲𑀯𑀺𑀦𑀺𑀘𑁆𑀙𑀬𑁄 𑀲𑀗𑁆𑀔𑁆𑀬𑀸𑀦𑀸𑀫𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄

𑀦𑀸𑀫

𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.