𑁩𑁯. 𑀩𑁄𑀥𑀺𑀭𑀸𑀚𑀥𑀻𑀢𑀼𑀬𑀸 [𑀩𑁄𑀥𑀺𑀭𑀸𑀚𑀥𑀻𑀢𑀸𑀬 𑀇𑀢𑀺𑀲𑀩𑁆𑀩𑀢𑁆𑀣] 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀮𑀗𑁆𑀓𑀸𑀬𑀁 𑀲𑀸𑀲𑀦𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁂 𑀢𑀢𑁆𑀣 𑀳𑀓𑀼𑀭𑁂𑀴𑀻𑀢𑀺 𑀏𑀓𑁄 𑀕𑀸𑀫𑁄 𑀅𑀳𑁄𑀲𑀺, 𑀢𑀢𑁆𑀣𑁂𑀓𑀸 𑀤𑀸𑀭𑀺𑀓𑀸 𑀕𑀸𑀫𑀸𑀤𑀸𑀭𑀺𑀓𑀸𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀓𑀻𑀴𑀦𑁆𑀢𑀻 𑀯𑀺𑀳𑀭𑀢𑀺, 𑀢𑀤𑀸 𑀕𑀸𑀫𑀲𑀫𑀻𑀧𑁂 𑀫𑀳𑀸𑀲𑁄𑀩𑁆𑀪𑀁 𑀳𑁄𑀢𑀺. 𑀢𑀢𑁆𑀣𑁂𑀓𑁄 𑀫𑀭𑀼𑀢𑁆𑀣𑀭𑀼𑀓𑁆𑀔𑁄 𑀲𑀩𑁆𑀩𑀤𑀸 𑀧𑀸𑀴𑀺𑀨𑀼𑀮𑁆𑀮𑁄𑀯 𑀢𑀺𑀝𑁆𑀞𑀢𑀺. 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀧𑀽𑀚𑀦𑀢𑁆𑀣𑀁 𑀧𑀼𑀧𑁆𑀨𑀸𑀦𑀺 𑀯𑀺𑀘𑀺𑀡𑀦𑁆𑀢𑀸 𑀉𑀤𑀓𑀁 𑀑𑀕𑀳𑁂𑀢𑁆𑀯𑀸 𑀭𑀼𑀓𑁆𑀔𑀫𑀪𑀺𑀭𑀼𑀬𑁆𑀳 𑀧𑀼𑀧𑁆𑀨𑀸𑀦𑀺 𑀑𑀘𑀺𑀡𑀦𑁆𑀢𑀺, 𑀓𑀼𑀫𑀸𑀭𑀺𑀓𑀸 𑀢𑁂 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀲𑀼𑀔𑁂𑀦 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀡𑀦𑁆𑀢𑀽𑀢𑀺 𑀏𑀓𑀁 𑀲𑀼𑀓𑁆𑀔𑀧𑀸𑀮𑀺𑀪𑀤𑁆𑀤𑀤𑀡𑁆𑀟𑀓𑀁 𑀆𑀳𑀭𑀺𑀢𑁆𑀯𑀸 𑀲𑁂𑀢𑀼𑀁 𑀓𑀢𑁆𑀯𑀸 𑀞𑀧𑁂𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀸 𑀢𑁂𑀦𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀡𑀦𑁆𑀢𑀺. 𑀅𑀣 𑀲𑀸 𑀢𑀢𑁄 𑀘𑀼𑀢𑀸 𑀢𑁂𑀦𑁂𑀯 𑀓𑀼𑀲𑀮𑀓𑀫𑁆𑀫𑁂𑀦 𑀚𑀫𑁆𑀩𑀼𑀤𑀻𑀧𑁂 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂 𑀲𑁄𑀫𑀤𑀢𑁆𑀢𑀭𑀜𑁆𑀜𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀉𑀢𑁆𑀢𑀫𑀭𑀽𑀧𑀥𑀭𑀸 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸 𑀅𑀳𑁄𑀲𑀺. 𑀫𑀸𑀢𑀸𑀧𑀺𑀢𑀭𑁄 𑀧𑀦𑀲𑁆𑀲𑀸 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀺𑀓𑀸𑀢𑀺 𑀯𑁄𑀳𑀭𑀺𑀁𑀲𑀼. 𑀧𑀼𑀩𑁆𑀩𑁂 𑀓𑀢𑀲𑁂𑀢𑀼𑀆𑀦𑀼𑀪𑀸𑀯𑁂𑀦 𑀢𑀲𑁆𑀲𑀸 𑀲𑀼𑀯𑀻𑀭𑀓𑁄 𑀦𑀸𑀫𑁂𑀓𑁄 𑀆𑀓𑀸𑀲𑀕𑀸𑀫𑀻 𑀲𑀺𑀦𑁆𑀥𑀯𑀧𑁄𑀢𑀓𑁄 𑀦𑀺𑀩𑁆𑀩𑀢𑁆𑀢𑀺. 𑀭𑀸𑀚𑀥𑀻𑀢𑀼𑀬𑀸 𑀧𑀦 𑀧𑀺𑀢𑀸 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀫𑀸𑀫𑀓𑁄 𑀲𑀗𑁆𑀖𑀫𑀸𑀫𑀓𑁄 𑀳𑀼𑀢𑁆𑀯𑀸 𑀫𑀳𑀦𑁆𑀢𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑁄 𑀲𑀺𑀦𑁆𑀥𑀯𑀧𑁄𑀢𑀓𑀁 𑀤𑀺𑀲𑁆𑀯𑀸 𑀧𑀼𑀜𑁆𑀜𑀓𑀭𑀡𑀲𑁆𑀲 𑀫𑁂 𑀲𑀳𑀸𑀬𑁄 𑀮𑀤𑁆𑀥𑁄𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀅𑀲𑁆𑀲𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀕𑀦𑁆𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀢𑀺. 𑀭𑀸𑀚𑀥𑀻𑀢𑀸 𑀦𑀁 𑀤𑀺𑀲𑁆𑀯𑀸 𑀧𑀺𑀢𑀼𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀪𑀺𑀡𑁆𑀳𑀁 𑀢𑀸𑀢 𑀓𑀼𑀳𑀺𑀁 𑀕𑀘𑁆𑀙𑀲𑀻𑀢𑀺 𑀧𑀼𑀘𑁆𑀙𑀺. 𑀭𑀸𑀚𑀸 𑀦 𑀓𑀺𑀜𑁆𑀘𑀺 𑀓𑀣𑁂𑀲𑀺, 𑀅𑀣 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀧𑀺𑀢𑀭𑀁 𑀦𑀺𑀩𑀦𑁆𑀥𑀦𑁆𑀢𑀻 𑀧𑀼𑀘𑁆𑀙𑀺. 𑀢𑀢𑁄 𑀭𑀸𑀚𑀸 𑀢𑀲𑁆𑀲𑀸𑀯𑀺 𑀓𑀭𑁄𑀦𑁆𑀢𑁄 𑀏𑀯𑀫𑀸𑀳.

𑁧. 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀧𑀼𑀩𑁆𑀩𑁂, 𑀧𑀽𑀭𑁂𑀦𑁆𑀢𑁄 𑀤𑀲𑀧𑀸𑀭𑀫𑀻;

𑀅𑀤𑀸𑀲𑀺 𑀲𑀻𑀲𑀭𑀢𑁆𑀢𑀓𑁆𑀔𑀺, 𑀫𑀁𑀲𑀁 𑀚𑀻𑀯𑀺𑀢𑀫𑁂𑀯 𑀘.

𑁨. 𑀧𑀼𑀢𑁆𑀢𑀤𑀸𑀭𑁂 𑀘 𑀭𑀚𑁆𑀚𑁂 𑀘, 𑀧𑀢𑁆𑀯𑀸 [𑀤𑀢𑁆𑀯𑀸 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀧𑀸𑀭𑀫𑀺𑀫𑀢𑁆𑀣𑀓𑀁;

𑀅𑀦𑀧𑁆𑀧𑀓𑀧𑁆𑀧𑀓𑁄𑀝𑀻𑀦𑀁, 𑀔𑁂𑀧𑁂𑀢𑁆𑀯𑀸 𑀓𑀧𑀺𑀮𑀯𑀼𑀬𑁂.

𑁩. 𑀲𑀓𑁆𑀓𑀭𑀸𑀚𑀓𑀼𑀮𑁂 𑀚𑀸𑀢𑁄, 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀲𑀫𑁆𑀧𑀢𑁆𑀢𑀘𑀓𑁆𑀓𑀯𑀢𑁆𑀢𑀺𑀢𑁆𑀢𑀁, 𑀧𑀳𑀦𑁆𑀢𑁆𑀯𑀸𑀦 𑀦𑀭𑀸𑀥𑀺𑀧𑁄.

𑁪. 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄, 𑀦𑀺𑀓𑁆𑀔𑀫𑁆𑀫 𑀅𑀪𑀺𑀦𑀺𑀓𑁆𑀔𑀫𑀁;

𑀩𑁄𑀥𑀺𑀫𑀽𑀮𑀫𑀼𑀧𑀸𑀕𑀫𑁆𑀫, 𑀦𑀺𑀲𑀺𑀦𑁆𑀦𑁄 𑀯𑀚𑀺𑀭𑀸𑀲𑀦𑁂.

𑁫. 𑀲𑀳𑀲𑁆𑀲𑀩𑀸𑀳𑀼𑀁 𑀫𑀸𑀧𑁂𑀢𑁆𑀯𑀸, 𑀦𑀸𑀦𑀸𑀬𑀼𑀥𑀲𑀫𑀸𑀓𑀼𑀮𑀁 [𑀦𑀸𑀦𑀸𑀯𑀼𑀥𑀲𑀫𑀸𑀓𑀼𑀮𑀁-𑀇𑀢𑀺𑀲𑀩𑁆𑀩𑀢𑁆𑀣];

𑀫𑀳𑀸𑀪𑀻𑀢𑀺𑀓𑀭𑀁 𑀯𑁂𑀲𑀁, 𑀓𑀸𑀴𑀧𑀩𑁆𑀩𑀢𑀲𑀸𑀤𑀺𑀲𑀁.

𑁬. 𑀫𑀸𑀧𑁂𑀢𑁆𑀯𑀸𑀦 𑀲𑀫𑀸𑀭𑀼𑀬𑁆𑀳, 𑀕𑀺𑀭𑀺𑀫𑁂𑀔𑀮𑀯𑀸𑀭𑀡𑀁;

𑀫𑀸𑀭𑀲𑁂𑀦𑀁 𑀲𑀫𑀸𑀦𑁂𑀢𑁆𑀯𑀸, 𑀆𑀕𑀢𑀁 𑀫𑀓𑀭𑀤𑁆𑀥𑀚𑀁.

𑁭. 𑀧𑀸𑀭𑀫𑀺𑀢𑀸𑀩𑀮𑁂𑀦 𑀢𑀁, 𑀫𑀸𑀭𑀲𑁂𑀦𑀁 𑀧𑀮𑀸𑀧𑀺𑀬;

𑀬𑀢𑁆𑀣𑀸𑀲𑀻𑀦𑁄 𑀓𑀺𑀮𑁂𑀲𑀸𑀭𑀺, 𑀲𑀳𑀲𑁆𑀲𑀁 𑀖𑀸𑀢𑀬𑀻 𑀚𑀺𑀦𑁄.

𑁮. 𑀦𑀬𑀦𑀁 𑀲𑀼𑀚𑀮𑀲𑁂𑀓𑁂𑀳𑀺, 𑀲𑀢𑁆𑀢𑀸𑀳𑀁 𑀚𑀺𑀦𑀲𑁂𑀯𑀺𑀢𑀁;

𑀧𑀽𑀚𑀺𑀢𑀁 𑀤𑁂𑀯𑀩𑁆𑀭𑀳𑁆𑀫𑁂𑀳𑀺, 𑀲𑀺𑀤𑁆𑀥𑁄𑀭𑀕𑀦𑀭𑀸𑀤𑀺𑀳𑀺;

𑀯𑀦𑁆𑀤𑀺𑀢𑀼𑀁 𑀚𑀬𑀩𑁄𑀥𑀺𑀁𑀢𑀁, 𑀕𑀘𑁆𑀙𑀸𑀫𑀺 𑀲𑀢𑀢𑀁 𑀅𑀳𑀁.

𑁯. 𑀉𑀧𑀸𑀲𑀢𑀺 𑀲𑀤𑀸 𑀕𑀦𑁆𑀢𑁆𑀯𑀸, 𑀬𑁄 𑀦𑀭𑁄 𑀩𑁄𑀥𑀺𑀧𑀸𑀤𑀧𑀁;

𑀕𑀦𑁆𑀥𑁄𑀤𑀤𑀻𑀧𑀥𑀽𑀧𑀸𑀤𑀺, 𑀦𑀸𑀦𑀸𑀧𑀽𑀚𑀸𑀳𑀺 𑀲𑀸𑀥𑀼𑀓𑀁.

𑁧𑁦. 𑀲 𑀦𑀭𑁄 𑀦𑀺𑀭𑀸𑀫𑀬𑁄 𑀳𑁄𑀢𑀺, 𑀧𑀘𑁆𑀘𑀢𑁆𑀢𑁂 𑀘 𑀧𑀭𑀢𑁆𑀣 𑀘;

𑀧𑀽𑀚𑀺𑀢𑁄 𑀫𑀸𑀦𑀺𑀢𑁄 𑀳𑁄𑀢𑀺, 𑀤𑀻𑀖𑀸𑀬𑀼 𑀩𑀮𑀯𑀸 𑀲𑀼𑀔𑀻.

𑁧𑁧. 𑀢𑀤𑀢𑁆𑀣𑀁 𑀧𑀢𑁆𑀣𑀬𑀦𑁆𑀢𑁂𑀦, 𑀅𑀢𑁆𑀣𑀓𑀸𑀫𑁂𑀦 𑀚𑀦𑁆𑀢𑀼𑀦𑀸;

𑀉𑀧𑀸𑀲𑀦𑀻𑀬𑀁 𑀲𑀤𑁆𑀥𑀸𑀬, 𑀦𑀺𑀘𑁆𑀘𑀁 𑀢𑀁 𑀩𑁄𑀥𑀺𑀧𑀸𑀤𑀧𑀁𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀼𑀫𑀸𑀭𑀺𑀓𑀸 𑀧𑀻𑀢𑀺𑀬𑀸 𑀨𑀼𑀝𑀲𑀭𑀻𑀭𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀳𑀫𑁆𑀧𑀺 𑀢𑀸𑀢 𑀕𑀘𑁆𑀙𑀸𑀫𑀻𑀢𑀺 𑀆𑀳. 𑀭𑀸𑀚𑀸 𑀧𑀦𑀲𑁆𑀲𑀸 𑀉𑀧𑀤𑁆𑀤𑀯𑀪𑀬𑁂𑀦 𑀕𑀫𑀦𑀁 𑀦 𑀇𑀘𑁆𑀙𑀺. 𑀢𑀢𑁄 𑀲𑀸 𑀬𑀸𑀯𑀢𑀢𑀺𑀬𑀁 𑀧𑀺𑀢𑀭𑀁 𑀬𑀸𑀘𑀺𑀢𑁆𑀯𑀸 𑀭𑀜𑁆𑀜𑀸 𑀅𑀦𑀼𑀜𑁆𑀜𑀸𑀢𑀸. 𑀢𑀢𑁄 𑀧𑀝𑁆𑀞𑀸𑀬 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀲𑀺𑀦𑁆𑀥𑀯𑀫𑀸𑀭𑀼𑀬𑁆𑀳 𑀩𑁄𑀥𑀺𑀁 𑀯𑀦𑁆𑀤𑀺𑀢𑀼𑀁 𑀲𑀢𑀢𑀁 𑀕𑀘𑁆𑀙𑀢𑀺. 𑀅𑀣𑀸𑀧𑀭𑀪𑀸𑀕𑁂 𑀭𑀸𑀚𑀸 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀘𑀺𑀦𑁆𑀢𑁂𑀲𑀺. 𑀥𑀻𑀢𑀸 𑀫𑁂 𑀦𑀺𑀭𑀦𑁆𑀢𑀭𑀁 𑀩𑁄𑀥𑀺𑀉𑀧𑀝𑁆𑀞𑀸𑀦𑀁𑀕𑀘𑁆𑀙𑀢𑀺, 𑀏𑀢𑀺𑀲𑁆𑀲𑀸 𑀅𑀦𑀸𑀕𑀢𑁂 𑀬𑀁𑀓𑀺𑀜𑁆𑀘𑀺 𑀪𑀬𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀢𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀫𑁂 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺. 𑀢𑀢𑁄 𑀲𑀺𑀦𑁆𑀥𑀯𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑀓𑀡𑁆𑀡𑀫𑀽𑀮𑁂 𑀫𑀦𑁆𑀢𑁂𑀦𑁆𑀢𑁄 𑀏𑀯𑀫𑀸𑀳, 𑀢𑀸𑀢 𑀫𑀫 𑀥𑀻𑀢𑀸 𑀅𑀪𑀺𑀡𑁆𑀳𑀁 𑀢𑀯 𑀲𑀳𑀸𑀬𑀁 𑀓𑀢𑁆𑀯𑀸 𑀩𑁄𑀥𑀺𑀁 𑀯𑀦𑁆𑀤𑀺𑀢𑀼𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀲𑁆𑀲𑀸 𑀬𑀁𑀓𑀺𑀜𑁆𑀘𑀺 𑀪𑀬𑀁 𑀪𑀯𑁂𑀬𑁆𑀬. 𑀢𑀁 𑀦𑀧𑁆𑀧𑀢𑀺𑀭𑀽𑀧𑀁. 𑀢𑀢𑁆𑀣 𑀕𑀫𑀦𑀸𑀕𑀫𑀦𑁂 𑀫𑀫 𑀥𑀻𑀢𑀭𑀁 𑀭𑀓𑁆𑀔𑁂𑀬𑁆𑀬𑀸𑀲𑀻𑀢𑀺 𑀢𑀲𑁆𑀲 𑀥𑀻𑀢𑀭𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀢𑁄 𑀭𑀸𑀚𑀥𑀻𑀢𑀸 𑀧𑀺𑀢𑀼𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀅𑀲𑁆𑀲𑀫𑀪𑀺𑀭𑀼𑀬𑁆𑀳 𑀩𑁄𑀥𑀺𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 𑀧𑀦𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑀸 𑀭𑀸𑀚𑀸𑀭𑀳𑀁 𑀯𑀢 𑀦𑁄 𑀇𑀤𑀁 𑀧𑀡𑁆𑀡𑀸𑀓𑀸𑀭𑀁 𑀤𑀺𑀝𑁆𑀞𑀁. 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀲𑁆𑀲𑀸𑀫. 𑀅𑀧𑁆𑀧𑁂𑀯 𑀦𑀸𑀫 𑀭𑀸𑀚𑀸 𑀲𑁄 𑀓𑀺𑀜𑁆𑀘𑀺 𑀦𑁄 𑀤𑀤𑁂𑀬𑁆𑀬𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀸 𑀏𑀯𑀫𑀸𑀳𑀁𑀲𑀼.

𑁧𑁨. 𑀩𑁄𑀥𑀺𑀫𑀡𑁆𑀟𑀁 𑀲𑀫𑀸𑀕𑀫𑁆𑀫, 𑀅𑀪𑀺𑀡𑁆𑀳𑀁 𑀢𑀼𑀝𑁆𑀞𑀫𑀸𑀦𑀲𑀸;

𑀯𑀦𑁆𑀤𑀦𑁆𑀢𑀻 𑀬𑀸𑀢𑀺 𑀓𑀜𑁆𑀜𑁂𑀓𑀸, 𑀯𑀺𑀚𑁆𑀚𑀽𑀯 𑀲𑀺𑀭𑀺𑀬𑀸 𑀚𑀮𑀁.

𑁧𑁩. 𑀦𑀻𑀮𑀥𑀫𑁆𑀧𑀺𑀮𑁆𑀮𑀪𑀸𑀭𑀸 𑀲𑀸, 𑀯𑀺𑀲𑀸𑀮𑀸𑀬𑀢𑀮𑁄𑀘𑀦𑀸;

𑀲𑁄𑀡𑁆𑀡𑀤𑁄𑀮𑀸𑀪𑀲𑀯𑀡𑀸, 𑀲𑀸𑀫𑀸 𑀲𑀼𑀪𑀧𑀬𑁄𑀥𑀭𑀸.

𑁧𑁪. 𑀲𑀢𑀭𑀁𑀲𑀻𑀳𑀺 𑀲𑀫𑁆𑀫𑀺𑀲𑁆𑀲, 𑀲𑀜𑁆𑀘𑁆𑀬𑀸𑀫𑁆𑀩𑀼𑀤𑀲𑀫𑀸𑀥𑀭𑀸;

𑀢𑀼𑀗𑁆𑀕𑀦𑀸𑀲𑀸 𑀦𑀻𑀮𑀪𑀫𑀼, 𑀳𑀸𑀲𑀪𑀸𑀲𑀸 𑀫𑀦𑁄𑀭𑀫𑀸.

𑁧𑁫. 𑀈𑀤𑀺𑀲𑀁 𑀦𑁄 𑀫𑀳𑀸𑀭𑀸𑀚𑀸 [𑀫𑀳𑀸𑀭𑀸𑀚𑀤𑀺𑀝𑁆𑀞𑀧𑀼𑀩𑁆𑀩 𑀇𑀢𑀺𑀧𑀺𑀓𑀢𑁆𑀣𑀘𑀺], 𑀤𑀺𑀝𑁆𑀞𑀧𑀼𑀩𑁆𑀩𑀁 𑀓𑀼𑀤𑀸𑀘𑀦𑀁;

𑀏𑀳𑀺 𑀢𑀲𑁆𑀲𑀸 𑀲𑀺𑀭𑀺𑀁𑀤𑁂𑀯, 𑀩𑁄𑀥𑀺𑀫𑀡𑁆𑀟𑀫𑁆𑀳𑀺 𑀤𑀓𑁆𑀔𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀯𑀡𑀲𑀁𑀲𑀕𑁆𑀕𑁂𑀦𑁂𑀯 𑀢𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀁𑀲𑁂𑀦𑀁 𑀕𑀳𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀩𑁄𑀥𑀺𑀯𑀦𑁆𑀤𑀦𑀢𑁆𑀣𑀸𑀬 𑀆𑀕𑀢𑀓𑀸𑀮𑁂 𑀩𑀳𑀺𑀧𑀸𑀓𑀸𑀭𑁂 𑀲𑁂𑀦𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀕𑀡𑁆𑀳𑀣𑁂𑀢𑀦𑁆𑀢𑀺 𑀫𑀦𑀼𑀲𑁆𑀲𑁂 𑀦𑀺𑀬𑁄𑀚𑁂𑀲𑀺. 𑀢𑀢𑁄 𑀲𑁂𑀦𑀸𑀧𑀺 𑀢𑀁 𑀕𑀳𑀡𑀲𑀚𑁆𑀚𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀥𑀻𑀢𑀸 𑀢𑁂 𑀤𑀺𑀲𑁆𑀯𑀸 𑀲𑀻𑀖𑀁 𑀲𑀺𑀦𑁆𑀥𑀯𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀦𑀺𑀲𑀺𑀦𑁆𑀦𑀸 𑀧𑀡𑁆𑀳𑀺𑀬𑀸 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀯𑁂𑀕𑁂𑀦 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀲𑀸 𑀧𑀦 𑀤𑀼𑀦𑁆𑀦𑀺𑀲𑀺𑀦𑁆𑀦𑀪𑀸𑀯𑁂𑀦 𑀅𑀲𑁆𑀲𑀲𑁆𑀲 𑀯𑁂𑀕𑀁 𑀲𑀦𑁆𑀥𑀸𑀭𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑀻 𑀅𑀲𑁆𑀲𑀧𑀺𑀝𑁆𑀞𑀺𑀢𑁄 𑀧𑀭𑀺𑀕𑀮𑀺. 𑀲𑀺𑀦𑁆𑀥𑀯𑁄 𑀭𑀸𑀚𑀥𑀻𑀢𑀭𑀁 𑀧𑀢𑀫𑀸𑀦𑀁 𑀤𑀺𑀲𑁆𑀯𑀸 𑀭𑀸𑀚𑁄𑀯𑀸𑀤𑀁 𑀲𑀭𑀫𑀸𑀦𑁄 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀓𑁂𑀲𑁂 𑀟𑀁𑀲𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑀫𑀸𑀦𑀸𑀬 𑀢𑀲𑁆𑀲𑀸 𑀧𑀺𑀝𑁆𑀞𑀺𑀁𑀤𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀓𑀸𑀲𑁂𑀦 𑀢𑀁 𑀦𑁂𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀲𑀺 [𑀧𑀸𑀢𑀮𑀺𑀧𑀼𑀢𑁆𑀢𑀦𑀕𑀭𑁂𑀬𑁂𑀯𑀢𑀁 𑀧𑀯𑀺𑀞𑀸𑀧𑁂𑀲𑀺𑀇𑀢𑀺𑀧𑀺𑀓𑀢𑁆𑀣𑀘𑀺].

𑁧𑁬. 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑁂𑀯𑀁, 𑀲𑀭𑀦𑁆𑀢𑀸 𑀉𑀧𑀓𑀸𑀭𑀓𑀁;

𑀦 𑀚𑀳𑀦𑁆𑀢𑀻𑀢𑀺 𑀫𑀦𑁆𑀢𑁆𑀯𑀸𑀦, 𑀓𑀢𑀜𑁆𑀜𑀽 𑀳𑁄𑀦𑁆𑀢𑀼 [𑀳𑁄𑀦𑁆𑀢𑀺𑀧𑀸𑀡𑀺𑀦𑁄-𑀇𑀢𑀺𑀧𑀺𑀓𑀢𑁆𑀣𑀘𑀺] 𑀧𑀸𑀡𑀺𑀦𑁄𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀦𑀸 𑀅𑀳𑁄𑀲𑀻𑀢𑀺.

𑁧𑁭. 𑀬𑁄 𑀬𑀁 𑀤𑀼𑀫𑀺𑀦𑁆𑀤𑀁𑀬𑀢𑀺𑀦𑀦𑁆𑀤𑀦𑁂𑀦;

𑀲𑀫𑁆𑀧𑀽𑀚𑀺𑀢𑀁 𑀧𑀽𑀚𑀬𑀢𑁂 𑀲 𑀧𑀜𑁆𑀜𑁄;

𑀲 𑀪𑁄𑀕𑀯𑀸 𑀳𑁄𑀢𑀺 𑀅𑀦𑀻𑀢𑀺𑀓𑁄 𑀘,

𑀲𑀩𑁆𑀩𑀢𑁆𑀣 𑀲𑁄 𑀳𑁄𑀢𑀺 𑀧𑀲𑀢𑁆𑀣𑀭𑀽𑀧𑁄.

𑀩𑁄𑀥𑀺𑀭𑀸𑀚𑀥𑀻𑀢𑀼𑀬𑀸 𑀯𑀢𑁆𑀣𑀼𑀁 𑀦𑀯𑀫𑀁.