𑁪𑁦. 𑀓𑀼𑀡𑁆𑀟𑀮𑀺𑀬𑀸 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀮𑀗𑁆𑀓𑀸𑀤𑀻𑀧𑁂 𑀭𑁄𑀳𑀡𑀚𑀧𑀤𑁂 𑀫𑀳𑀸𑀕𑀸𑀫𑁄 𑀦𑀸𑀫 𑀅𑀳𑁄𑀲𑀺, 𑀢𑀢𑁆𑀣 𑀢𑀺𑀲𑁆𑀲𑀯𑀺𑀳𑀸𑀭𑀁 𑀦𑀸𑀫 𑀅𑀦𑁂𑀓𑀲𑀢𑀪𑀺𑀓𑁆𑀔𑀽𑀳𑀺 𑀲𑀫𑀸𑀓𑀺𑀡𑁆𑀡𑀁 𑀅𑀦𑁂𑀓𑀧𑀭𑀺𑀯𑁂𑀡𑀧𑀢𑀺𑀫𑀡𑁆𑀟𑀺𑀢𑀁 𑀯𑀺𑀳𑀸𑀭𑀁 𑀅𑀳𑁄𑀲𑀺. 𑀢𑀢𑁆𑀣𑁂𑀓𑁄 𑀢𑀺𑀲𑁆𑀲𑁄 𑀦𑀸𑀫 𑀲𑀸𑀫𑀡𑁂𑀭𑁄 𑀧𑀝𑀺𑀯𑀲𑀢𑀺. 𑀲𑁄 𑀏𑀓𑀲𑁆𑀫𑀺𑀁𑀲𑀫𑀬𑁂 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀧𑀸𑀲𑀸𑀡𑀯𑀸𑀧𑀺𑀕𑀸𑀫𑁂 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀁 𑀪𑀢𑁆𑀢𑀁 𑀲𑀧𑁆𑀧𑀺𑀦𑀸 𑀲𑀤𑁆𑀥𑀺𑀁 𑀮𑀪𑀺𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀕𑀸𑀫𑀤𑁆𑀯𑀸𑀭𑀁 𑀧𑀢𑁆𑀯𑀸 𑀫𑀳𑀸𑀕𑀸𑀫𑀸𑀪𑀺𑀫𑀼𑀔𑁄 𑀕𑀘𑁆𑀙𑀦𑁆𑀢𑁄 𑀫𑀦𑀼𑀲𑁆𑀲𑁂 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑀁 𑀧𑀼𑀘𑁆𑀙𑀺. 𑀢𑁂𑀳𑀺 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀅𑀪𑀺𑀫𑀼𑀔𑁂 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀓𑀓𑀼𑀩𑀦𑁆𑀤𑀓𑀦𑁆𑀤𑀭𑀁 𑀦𑀸𑀫 𑀲𑀦𑁆𑀤𑀫𑀸𑀦𑀲𑀻𑀢𑀮𑁄𑀤𑀓𑀁 𑀥𑀯𑀮𑀯𑀸𑀮𑀼𑀓𑀸𑀢𑀮𑀁 𑀢𑀢𑁆𑀣 𑀢𑀼𑀫𑁆𑀳𑁂 𑀕𑀦𑁆𑀢𑁆𑀯𑀸 𑀦𑀳𑀸𑀢𑁆𑀯𑀸 𑀲𑀻𑀢𑀮𑀘𑁆𑀙𑀸𑀬𑀸𑀬 𑀯𑀸𑀮𑀼𑀓𑀸𑀢𑀮𑁂 𑀦𑀺𑀲𑀺𑀦𑁆𑀦𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀘𑁆𑀙𑀣𑀸𑀢𑀺 𑀯𑀼𑀢𑁆𑀢𑁂 𑀲𑀸𑀫𑀡𑁂𑀭𑁄 𑀲𑀸𑀥𑀽𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀫𑀸𑀭𑀪𑀺. 𑀢𑀤𑀸 𑀏𑀓𑁂𑀦 𑀯𑀦𑀓𑀫𑁆𑀫𑀺𑀓𑁂𑀦 𑀲𑀤𑁆𑀥𑀺𑀁𑀅𑀭𑀜𑁆𑀜𑀁 𑀕𑀢𑀸 𑀏𑀓𑀸 𑀲𑀼𑀦𑀔𑀻 𑀢𑀲𑁆𑀫𑀺𑀁 𑀓𑀦𑁆𑀤𑀭𑁂 𑀏𑀓𑀲𑁆𑀫𑀺𑀁 𑀧𑀩𑁆𑀪𑀸𑀭𑀝𑁆𑀞𑀸𑀦𑁂 𑀤𑀸𑀭𑀓𑁂 𑀯𑀺𑀚𑀸𑀬𑀺𑀢𑁆𑀯𑀸 𑀙𑀸𑀢𑀚𑁆𑀛𑀢𑁆𑀢𑀸 𑀧𑀯𑁂𑀥𑀫𑀸𑀦𑀕𑀢𑁆𑀢𑀸 𑀤𑀸𑀭𑀓𑀸𑀦𑀁 𑀲𑀫𑀻𑀧𑁂𑀦𑀺𑀧𑀦𑁆𑀦𑀸 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑁂 𑀆𑀳𑀸𑀭𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀦𑀺𑀧𑀦𑁆𑀦𑀝𑁆𑀞𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀯𑁂𑀥𑀫𑀸𑀦𑀸 𑀢𑀲𑁆𑀲 𑀲𑀫𑀻𑀧𑀁 𑀆𑀕𑀫𑁆𑀫 𑀦𑀗𑁆𑀕𑀼𑀝𑁆𑀞𑀁 𑀘𑀸𑀮𑁂𑀦𑁆𑀢𑀻 𑀅𑀝𑁆𑀞𑀸𑀲𑀺, 𑀲𑀸𑀫𑀡𑁂𑀭𑁄 𑀢𑀁 𑀤𑀺𑀲𑁆𑀯𑀸 𑀓𑀫𑁆𑀧𑀺𑀢𑀫𑀸𑀦𑀲𑁄 𑀅𑀢𑁆𑀢𑀦𑁄 𑀪𑁄𑀚𑀦𑀢𑁆𑀣𑀸𑀬 𑀯𑀝𑁆𑀝𑀺𑀢𑀁 𑀧𑀣𑀫𑀸𑀮𑁄𑀧𑀁 𑀢𑀲𑁆𑀲𑀸 𑀧𑀼𑀭𑀢𑁄 𑀞𑀧𑁂𑀲𑀺, 𑀢𑀢𑁄 𑀲𑀸 𑀲𑁄𑀫𑀦𑀲𑁆𑀲𑀸 𑀢𑀁 𑀪𑀼𑀜𑁆𑀚𑀺. 𑀢𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑀧𑀼𑀦𑀧𑁆𑀧𑀼𑀦𑀁 𑀆𑀮𑁄𑀧𑀁 𑀓𑀭𑁄𑀦𑁆𑀢𑁄 𑀢𑀲𑁆𑀲𑀸 𑀪𑀢𑁆𑀢𑀁 𑀤𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀢𑁄 𑀲𑀸 𑀲𑀼𑀦𑀔𑀻 𑀲𑀸𑀫𑀡𑁂𑀭𑀕𑀢𑁂𑀦 𑀧𑀲𑀸𑀤𑁂𑀦 𑀢𑀢𑁄 𑀘𑀼𑀢𑀸 𑀚𑀫𑁆𑀩𑀼𑀤𑀻𑀧𑁂 𑀤𑁂𑀯𑀧𑀼𑀢𑁆𑀢𑀦𑀕𑀭𑁂 𑀭𑀸𑀚𑀸𑀦𑀁 𑀧𑀝𑀺𑀘𑁆𑀘 𑀢𑀲𑁆𑀲 𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺, 𑀅𑀣𑀲𑁆𑀲𑀸 𑀲𑀺𑀔𑀸𑀫𑀗𑁆𑀕𑀮𑀤𑀺𑀯𑀲𑁂 𑀲𑀫𑁆𑀧𑀢𑁆𑀢𑁂 𑀫𑀸𑀢𑀸𑀧𑀺𑀢𑀭𑁄 𑀧𑀦𑀲𑁆𑀲𑀸 𑀓𑀼𑀡𑁆𑀟𑀮𑀸𑀯𑀝𑁆𑀝𑀓𑁂𑀲𑀢𑁆𑀢𑀸 𑀓𑀼𑀡𑁆𑀟𑀮𑀸𑀢𑀺 𑀦𑀸𑀫 𑀫𑀓𑀁𑀲𑀼. 𑀲𑀸 𑀅𑀦𑀼𑀓𑁆𑀓𑀫𑁂𑀦 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀅𑀳𑁄𑀲𑀺, 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀢𑀺𑀲𑁆𑀲𑁄 𑀲𑀸𑀫𑀡𑁂𑀭𑁄 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀦𑀸𑀯𑀁 𑀅𑀪𑀺𑀭𑀼𑀬𑁆𑀳 𑀚𑀫𑁆𑀩𑀼𑀤𑀻𑀧𑀁 𑀕𑀦𑁆𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀤𑁂𑀯𑀧𑀼𑀢𑁆𑀢𑀦𑀕𑀭𑀁 𑀧𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀬𑀼𑀕𑀫𑀢𑁆𑀢𑀤𑀲𑁄 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀫𑀳𑀸𑀯𑀻𑀣𑀺𑀁 𑀲𑀫𑁆𑀧𑀸𑀧𑀼𑀡𑀺. 𑀭𑀸𑀚𑀥𑀻𑀢𑀸 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑀻 𑀪𑀺𑀓𑁆𑀔𑀦𑁆𑀢𑀁 𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑀲𑀺𑀦𑁂𑀳𑀁 𑀧𑀝𑀺𑀮𑀪𑀺, 𑀢𑀲𑁆𑀫𑀺𑀁𑀔𑀡𑁂 𑀢𑀲𑁆𑀲𑀸 𑀚𑀸𑀢𑀺𑀲𑁆𑀲𑀭𑀜𑀸𑀡𑀁 𑀅𑀳𑁄𑀲𑀺. 𑀲𑀸 𑀓𑀺𑀭 𑀧𑀼𑀩𑁆𑀩𑁂 𑀪𑀺𑀓𑁆𑀔𑀼𑀡𑀻 𑀳𑀼𑀢𑁆𑀯𑀸 𑀧𑀡𑁆𑀡𑀲𑀽𑀘𑀺𑀬𑀸 𑀲𑀤𑁆𑀥𑀺𑀁 𑀧𑁄𑀢𑁆𑀣𑀓𑀜𑁆𑀘 𑀧𑀤𑀻𑀧𑀺𑀬𑀢𑁂𑀮𑀜𑁆𑀘 𑀤𑀢𑁆𑀯𑀸 𑀚𑀸𑀢𑀺𑀲𑁆𑀲𑀭𑀸 𑀪𑀯𑁂𑀬𑁆𑀬𑀁𑀢𑀺 𑀧𑀢𑁆𑀣𑀦𑀁 𑀞𑀧𑁂𑀲𑀺, 𑀢𑀢𑁄 𑀲𑀸𑀚𑀸𑀢𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑀻 𑀲𑀸𑀫𑀡𑁂𑀭𑁂𑀦 𑀅𑀢𑁆𑀢𑀦𑁄 𑀓𑀢𑀽𑀧𑀓𑀸𑀭𑀁 𑀤𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀸 𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀭𑀸𑀚𑀕𑁂𑀳𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀦𑀸𑀦𑀕𑁆𑀕𑀭𑀲 𑀪𑁄𑀚𑀦𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀲𑀸𑀫𑀡𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀻 𑀏𑀯𑀫𑀸𑀳.

𑁧. 𑀦 𑀲𑀜𑁆𑀚𑀸𑀦𑀸𑀲𑀺 𑀫𑀁 𑀥𑀻𑀭, 𑀧𑀼𑀩𑁆𑀩𑁂𑀳𑀁 𑀢𑀯 𑀤𑀸𑀲𑀺𑀓𑀸;

𑀢𑁂𑀦𑀸𑀳𑀁 𑀲𑀼𑀔𑀺𑀢𑀸 𑀆𑀲𑀺𑀁, 𑀢𑀲𑁆𑀫𑀸 𑀢𑁆𑀯𑀫𑀲𑀺 𑀇𑀲𑁆𑀲𑀭𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀸𑀫𑀡𑁂𑀭𑁄 𑀆𑀳.

𑁨. 𑀦𑀢𑁆𑀣𑀺 𑀫𑁂 𑀢𑀸𑀤𑀺𑀲𑀻 𑀤𑀸𑀲𑀻, 𑀦 𑀲𑀜𑁆𑀚𑀸𑀦𑀸𑀫𑀺 𑀢𑀁 𑀅𑀳𑀁;

𑀓𑀸𑀲𑀺 𑀢𑁆𑀯𑀁 𑀓𑀲𑁆𑀲 𑀯𑀸 𑀥𑀻𑀢𑀸, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸𑀢𑀺.

𑀢𑀢𑁄 𑀲𑀸 𑀢𑀁 𑀲𑀸𑀭𑀸𑀧𑁂𑀦𑁆𑀢𑀻 𑀆𑀳.

𑁩. 𑀲𑀸𑀭𑀸𑀧𑁂𑀫𑀺 𑀢𑀼𑀯𑀁 𑀅𑀚𑁆𑀚, 𑀬𑀣𑀸 𑀚𑀸𑀦𑀸𑀲𑀺𑀫𑀁 𑀇𑀲𑁂;

𑀩𑀼𑀚𑁆𑀛𑀲𑁆𑀲𑀼 𑀩𑁄𑀥𑀺𑀢𑁄 𑀤𑀸𑀦𑀺, 𑀫𑀬𑀸 𑀚𑀸𑀢𑀺𑀁𑀲𑀭𑀦𑁆𑀢𑀺𑀬𑀸.

𑁪. 𑀧𑀸𑀲𑀸𑀡𑀯𑀸𑀧𑀺𑀕𑀸𑀫𑀫𑁆𑀳𑀺, 𑀢𑀫𑁆𑀩𑀧𑀡𑁆𑀡𑀺𑀫𑁆𑀳𑀺 𑀭𑁄𑀳𑀡𑁂;

𑀪𑀺𑀓𑁆𑀔𑀺𑀢𑁆𑀯𑀸𑀦 𑀢𑀼𑀯𑀁 𑀪𑀦𑁆𑀢𑁂, 𑀬𑀤𑀸 𑀓𑀓𑀼𑀩𑀦𑁆𑀤𑀓𑀦𑁆𑀤𑀭𑁂.

𑁫. 𑀦𑀺𑀲𑀻𑀤𑀺𑀢𑁆𑀯𑀸𑀦 𑀢𑁆𑀯𑀁 𑀪𑀢𑁆𑀢𑀁, 𑀪𑀼𑀢𑁆𑀢𑀓𑀸𑀮𑀁 𑀲𑀭𑀺𑀲𑁆𑀲𑀲𑀺;

𑀢𑀤𑀸𑀳𑀁 𑀲𑀼𑀦𑀔𑀻 𑀆𑀲𑀺𑀁, 𑀯𑀺𑀚𑀸𑀢𑀸 𑀮𑀤𑁆𑀥𑀕𑁄𑀘𑀭𑀸.

𑁬. 𑀤𑀸𑀭𑀓𑁂 𑀔𑀸𑀤𑀺𑀢𑀼𑀁 𑀫𑀬𑁆𑀳, 𑀫𑀸𑀲𑀦𑁆𑀦𑀸 𑀔𑀼𑀤𑀧𑀻𑀴𑀺𑀢𑀸;

𑀧𑀯𑁂𑀥𑀫𑀸𑀦𑀲𑀩𑁆𑀩𑀗𑁆𑀕𑀸, 𑀅𑀝𑁆𑀞𑀸𑀲𑀺𑀁 𑀢𑀯 𑀲𑀦𑁆𑀢𑀺𑀓𑁂.

𑁭. 𑀤𑀺𑀲𑁆𑀯𑀸 𑀢𑀁 𑀫𑀁 𑀢𑀤𑀸 𑀪𑀦𑁆𑀢𑁂, 𑀯𑁂𑀥𑀫𑀸𑀦𑀁 𑀩𑀼𑀪𑀼𑀓𑁆𑀔𑀺𑀢𑀁;

𑀙𑀺𑀦𑁆𑀦𑀪𑀢𑁆𑀢𑁄 𑀢𑀼𑀯𑀁 𑀳𑀼𑀢𑁆𑀯𑀸, 𑀫𑀫𑀁 𑀪𑀢𑁆𑀢𑁂𑀦 𑀢𑁄𑀲𑀬𑀻.

𑁮. 𑀢𑀤𑀸𑀳𑀁 𑀫𑀼𑀤𑀼𑀘𑀺𑀢𑁆𑀢𑁂𑀦, 𑀘𑀺𑀢𑁆𑀢𑀁 𑀢𑀬𑀺 𑀧𑀲𑀸𑀤𑀬𑀺𑀁;

𑀢𑁂𑀦𑀸𑀳𑀁 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀤𑀼𑀢𑀺𑀬𑁂 𑀅𑀢𑁆𑀢𑀲𑀫𑁆𑀪𑀯𑁂.

𑁯. 𑀇𑀥 𑀭𑀸𑀚𑀓𑀼𑀮𑁂 𑀚𑀸𑀢𑀸, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻;

𑀘𑀺𑀢𑁆𑀢𑀧𑁆𑀧𑀲𑀸𑀤𑀫𑀢𑁆𑀢𑁂𑀦, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑁂.

𑁧𑁦. 𑀢𑀤𑀳𑀼𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺, 𑀈𑀤𑀺𑀲𑀸 𑀳𑁄𑀦𑁆𑀢𑀺 𑀲𑀫𑁆𑀧𑀤𑀸;

𑀓𑀻𑀤𑀺𑀲𑀁 𑀳𑁄𑀢𑀺 𑀲𑀫𑁆𑀩𑀼𑀤𑁆𑀥𑁂, 𑀧𑀲𑀸𑀤𑁂𑀦 𑀨𑀮𑀁 𑀅𑀳𑁄.

𑁧𑁧. 𑀅𑀜𑁆𑀜𑀸𑀦𑀺 𑀧𑀦 𑀓𑀺𑀘𑁆𑀘𑀸𑀦𑀺, 𑀧𑀳𑀸𑀬𑀸𑀢𑁆𑀢𑀳𑀺𑀢𑁂 𑀭𑀢𑁄;

𑀅𑀢𑀦𑁆𑀤𑀺𑀢𑁄 𑀤𑀺𑀯𑀸𑀭𑀢𑁆𑀢𑀺𑀁, 𑀲𑀭𑀸𑀢𑀼 𑀭𑀢𑀦𑀢𑁆𑀢𑀬𑀁𑀢𑀺.

𑀏𑀯𑀁 𑀲𑀸𑀫𑀡𑁂𑀭𑁂𑀦 𑀓𑀢𑀽𑀧𑀓𑀸𑀭𑀁 𑀲𑀸𑀭𑀸𑀧𑁂𑀢𑁆𑀯𑀸 𑀪𑀦𑁆𑀢𑁂 𑀢𑀯 𑀤𑀸𑀲𑀺𑀬𑀸 𑀅𑀦𑀼𑀕𑁆𑀕𑀳𑀁 𑀧𑀝𑀺𑀘𑁆𑀘 𑀇𑀥𑁂𑀯 𑀯𑀲𑀣𑀸𑀢𑀺 𑀦𑀺𑀫𑀦𑁆𑀢𑀺𑀢𑁆𑀯𑀸 𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀫𑀳𑀦𑁆𑀢𑀁 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀸𑀫𑀡𑁂𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁂𑀓𑀪𑀺𑀓𑁆𑀔𑀼𑀲𑀢𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀯𑀺𑀳𑀸𑀭𑁂 𑀯𑀲𑀸𑀧𑁂𑀢𑁆𑀯𑀸 𑀲𑀼𑀮𑀪𑀁 𑀓𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀲𑀺. 𑀲𑀸𑀫𑀡𑁂𑀭𑁄𑀧𑀺 𑀲𑀼𑀦𑀔𑀺𑀬𑀸 𑀤𑀺𑀦𑁆𑀦𑀤𑀸𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀼𑀝𑁆𑀞𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦 𑀘𑀺𑀭𑁂𑀦𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑁧𑁨. 𑀢𑀺𑀬𑀤𑁆𑀥𑁂𑀲𑀼 𑀢𑀺𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀯𑀢𑁆𑀣𑀼𑀢𑁆𑀢𑀬𑀁 𑀯𑀺𑀦𑀸;

𑀲𑀢𑁆𑀢𑀸𑀦 𑀫𑀜𑁆𑀜 𑀫𑀺𑀘𑁆𑀙𑀢𑁆𑀣, 𑀤𑀸𑀬𑀓𑀁 𑀲𑀼𑀭𑀧𑀸𑀤𑀧𑀁.

𑀓𑀼𑀡𑁆𑀟𑀮𑀺𑀬𑀸 𑀯𑀢𑁆𑀣𑀼𑀁 𑀤𑀲𑀫𑀁.

𑀫𑀳𑀸𑀲𑁂𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀏𑀢𑁆𑀢𑀸𑀯𑀢𑀸 𑀚𑀫𑁆𑀩𑀼𑀤𑀻𑀧𑀼𑀧𑁆𑀧𑀢𑁆𑀢𑀺𑀓𑀣𑀸 𑀲𑀫𑀢𑁆𑀢𑀸.