𑁩𑁩. 𑀓𑀧𑀡𑀸𑀬 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀚𑀫𑁆𑀩𑀼𑀤𑀻𑀧𑁂 𑀢𑀢𑁆𑀣 𑀢𑀢𑁆𑀣 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀡𑀺𑀬𑁄 𑀘 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀬𑁄 𑀘 𑀚𑀬𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀬𑁂𑀪𑀼𑀬𑁆𑀬𑁂𑀦 𑀕𑀦𑁆𑀢𑁆𑀯𑀸 𑀯𑀦𑁆𑀤𑀦𑁆𑀢𑀺. 𑀅𑀣𑀸 𑀧𑀭𑀪𑀸𑀕𑁂 𑀩𑀳𑀽 𑀪𑀺𑀓𑁆𑀔𑀽 𑀲𑀗𑁆𑀕𑀫𑁆𑀫 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀣𑁄𑀓𑀁 𑀯𑀺𑀲𑁆𑀲𑀫𑀺𑀁𑀲𑀼, 𑀢𑀤𑀸 𑀢𑀢𑁆𑀣 𑀏𑀓𑀸 𑀓𑀧𑀡𑀸 𑀤𑀼𑀕𑁆𑀕𑀢𑀺𑀢𑁆𑀣𑀻 𑀢𑀣𑀸 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀺𑀢𑀸 𑀅𑀬𑁆𑀬𑀸 𑀓𑀼𑀳𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀧𑀼𑀘𑁆𑀙𑀺. 𑀪𑀺𑀓𑁆𑀔𑀽 𑀢𑀁 𑀲𑀼𑀢𑁆𑀯𑀸 𑀚𑀬𑀫𑀳𑀸𑀩𑁄𑀥𑀺𑀲𑁆𑀲 𑀆𑀦𑀼𑀪𑀸𑀯𑀜𑁆𑀘 𑀢𑀁 𑀯𑀦𑁆𑀤𑀦𑀢𑁆𑀣𑀸𑀬 𑀅𑀢𑁆𑀢𑀸𑀦𑀁 𑀕𑀫𑀦𑀜𑁆𑀘 𑀓𑀣𑁂𑀦𑁆𑀢𑀸 𑀏𑀯𑀫𑀸𑀳𑀁𑀲𑀼.

𑁧. 𑀬𑀢𑁆𑀣𑀸𑀲𑀻𑀦𑁄 𑀚𑀺𑀦𑁄 𑀚𑁂𑀲𑀺, 𑀲𑀲𑁂𑀦𑀁 𑀫𑀓𑀭𑀤𑁆𑀥𑀚𑀁;

𑀳𑀦𑁆𑀢𑁆𑀯𑀸 𑀓𑀺𑀮𑁂𑀲𑀲𑁂𑀦𑀜𑁆𑀘, 𑀩𑀼𑀤𑁆𑀥𑁄 𑀆𑀲𑀺 𑀦𑀺𑀭𑀼𑀢𑁆𑀢𑀭𑁄.

𑁨. 𑀬𑀁 𑀧𑀽𑀚𑁂𑀲𑀺 𑀫𑀳𑀸𑀯𑀻𑀭𑁄, 𑀞𑀺𑀢𑁄 𑀧𑀤 𑀫𑀓𑁄𑀧𑀬𑀁;

𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀦𑁂𑀢𑁆𑀢, 𑀦𑀻𑀮𑀦𑀻𑀭𑀚𑀭𑀁𑀲𑀺𑀦𑀸.

𑁩. 𑀲𑀼𑀭𑀸𑀲𑀼𑀭𑀦𑀭𑀸𑀤𑀻𑀦𑀁, 𑀦𑁂𑀢𑁆𑀢𑀸𑀮𑀺 𑀧𑀸𑀴𑀺𑀧𑀸𑀢𑀦𑀸;

𑀫𑁂𑀘𑀓𑀸𑀓𑀸𑀭𑀧𑀢𑁆𑀢𑁂𑀳𑀺, 𑀲𑀺𑀔𑀡𑁆𑀟𑀻𑀯𑀺𑀬 𑀪𑀸𑀢𑀺 𑀬𑁄.

𑁪. 𑀲𑀼𑀭𑀧𑀸𑀤𑀧𑁄𑀯 𑀲𑀢𑁆𑀢𑀸𑀦𑀁, 𑀬𑀁 𑀢𑀺𑀝𑁆𑀞𑀢𑀺 𑀫𑀳𑀻𑀢𑀮𑁂;

𑀇𑀳 𑀮𑁄𑀓𑁂 𑀧𑀭𑀢𑁆𑀢𑁂 𑀘, 𑀤𑀤𑀦𑁆𑀢𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁.

𑁫. 𑀬𑀲𑁆𑀲 𑀧𑀼𑀭𑀸𑀡𑀧𑀡𑁆𑀡𑀫𑁆𑀧𑀺, 𑀧𑀢𑀺𑀢𑀁 𑀬𑁄 𑀦𑀭𑁄 𑀇𑀥;

𑀧𑀽𑀚𑁂𑀢𑀺 𑀢𑀲𑁆𑀲 𑀲𑁄 𑀤𑁂𑀢𑀺, 𑀪𑀯𑀪𑁄𑀕𑀁 𑀫𑀳𑀻𑀭𑀼𑀳𑁄.

𑁬. 𑀕𑀦𑁆𑀥𑀫𑀸𑀮𑁂𑀳𑀺 𑀲𑀮𑀺𑀮𑁂𑀳𑀺, 𑀬𑀫𑀼𑀧𑀸𑀲𑀢𑀺 𑀲𑀤𑀸 𑀦𑀭𑁄;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀤𑀼𑀭𑀺𑀢𑀁 𑀲𑁄 𑀦𑀺𑀳𑀜𑁆𑀜𑀢𑀺.

𑁭. 𑀬𑁄 𑀤𑁂𑀢𑀺 𑀇𑀳𑀮𑁄𑀓𑀢𑁆𑀣𑀁,

𑀬𑁄 𑀤𑁂𑀢𑀺 𑀧𑀸𑀭𑀮𑁄𑀓𑀺𑀓𑀁,

𑀲𑀫𑁆𑀧𑀤𑀁 𑀚𑀬𑀩𑁄𑀥𑀺𑀁𑀢𑀁,

𑀪𑁄𑀢𑀺 𑀕𑀘𑁆𑀙𑀸𑀫 𑀯𑀦𑁆𑀤𑀺𑀢𑀼𑀁.

𑀢𑀁 𑀲𑀼𑀢𑁆𑀯𑀸 𑀉𑀤𑀕𑁆𑀕𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀺𑀓𑁆𑀔𑀽𑀦𑀁 𑀏𑀯𑀫𑀸𑀳. 𑀅𑀳𑀁 𑀪𑀦𑁆𑀢𑁂 𑀧𑀭𑀓𑀼𑀮𑁂 𑀪𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀫𑀺. 𑀲𑁆𑀯𑀸𑀢𑀦𑀸𑀬 𑀫𑁂 𑀢𑀡𑁆𑀟𑀼𑀮𑀦𑀸𑀮𑀺𑀧𑀺 [𑀪𑀡𑁆𑀟𑀼𑀮𑀦𑀸𑀫𑁆𑀧 𑀇𑀢𑀺𑀲𑀩𑁆𑀩𑀢𑁆𑀣] 𑀦𑀢𑁆𑀣𑀺, 𑀧𑀕𑁂𑀯 𑀅𑀜𑁆𑀜𑀁 𑀥𑀦𑀁, 𑀇𑀫𑀁 𑀯𑀺𑀦𑀸 𑀅𑀜𑁆𑀜𑀁 𑀲𑀸𑀝𑀓𑀫𑁆𑀧𑀺 𑀦𑀢𑁆𑀣𑀺, 𑀓𑀲𑁆𑀫𑀸 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀢𑁆𑀢𑀸, 𑀢𑀲𑁆𑀫𑀸 𑀇𑀫𑀁 𑀪𑀦𑁆𑀢𑁂 𑀲𑀸𑀝𑀓𑀁 𑀫𑀫𑀸𑀦𑀼𑀕𑁆𑀕𑀳𑀸𑀬 𑀩𑁄𑀥𑀺𑀫𑁆𑀳𑀺 𑀥𑀚𑀁 𑀩𑀦𑁆𑀥𑀣𑀸𑀢𑀺 𑀬𑀸𑀘𑀺𑀢𑁆𑀯𑀸 𑀲𑀸𑀝𑀓𑀁 𑀥𑁄𑀯𑀺𑀢𑁆𑀯𑀸 𑀢𑁂𑀲𑀁 𑀅𑀤𑀸𑀲𑀺. 𑀪𑀺𑀓𑁆𑀔𑀽𑀧𑀺 𑀢𑀲𑁆𑀲𑀸𑀦𑀼𑀕𑁆𑀕𑀳𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀲𑀸 𑀲𑀸𑀝𑀓𑀁 𑀤𑀢𑁆𑀯𑀸 𑀧𑀻𑀢𑀺𑀧𑀸𑀫𑁄𑀚𑁆𑀚𑀫𑀸𑀦𑀲𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀤𑀳𑁂𑀯 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀬𑀸𑀫𑁂 𑀲𑀢𑁆𑀣𑀓𑀯𑀸𑀢𑁂𑀦 𑀉𑀧𑀳𑀢𑀸 𑀓𑀸𑀮𑀁 𑀓𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀕𑀫𑀦𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀪𑀼𑀫𑁆𑀫𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻, 𑀅𑀣𑀲𑁆𑀲𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀢𑀺𑀬𑁄𑀚𑀦𑀺𑀓𑁂 𑀞𑀸𑀦𑁂 𑀤𑀺𑀩𑁆𑀩𑀓𑀧𑁆𑀧𑀭𑀼𑀓𑁆𑀔𑀸 𑀧𑀸𑀢𑀼𑀭𑀳𑀁𑀲𑀼, 𑀢𑀢𑁆𑀢 𑀢𑀢𑁆𑀢 𑀦𑀸𑀦𑀸𑀯𑀺𑀭𑀸𑀕𑀥𑀚𑀧𑀢𑀸𑀓𑀸 𑀑𑀮𑀫𑁆𑀩𑀦𑁆𑀢𑀺. 𑀤𑁂𑀯𑀧𑀼𑀢𑁆𑀢𑀸 𑀘 𑀤𑁂𑀯𑀥𑀻𑀢𑀭𑁄 𑀘 𑀲𑀩𑁆𑀩𑀸𑀪𑀭𑀡𑀯𑀺𑀪𑀽𑀲𑀺𑀢𑀸 𑀢𑀣𑁂𑀯 𑀥𑀚𑀧𑀢𑀸𑀓𑀸𑀤𑀬𑁄 𑀕𑀳𑁂𑀢𑁆𑀯𑀸 𑀓𑀻𑀴𑀦𑁆𑀢𑀺. 𑀦𑀘𑁆𑀘𑀕𑀻𑀢𑀸𑀤𑀺𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀧𑀬𑁄𑀚𑁂𑀦𑁆𑀢𑀺. 𑀅𑀣 𑀤𑀼𑀢𑀺𑀬𑀤𑀺𑀯𑀲𑁂 𑀢𑁂𑀧𑀺 𑀪𑀺𑀓𑁆𑀔𑀽 𑀩𑁄𑀥𑀺𑀫𑀡𑁆𑀟𑀮𑀁 𑀕𑀘𑁆𑀙𑀦𑁆𑀢𑀸 𑀲𑀸𑀬𑀡𑁆𑀳𑁂 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀅𑀚𑁆𑀚 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀲𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸𑀢𑀺 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀫𑀺𑀁𑀲𑀼, 𑀢𑀢𑁄 𑀢𑁂 𑀭𑀢𑁆𑀢𑀺𑀪𑀸𑀕𑁂 𑀦𑀸𑀦𑀸𑀯𑀡𑁆𑀡𑀥𑀚𑁂 𑀘 𑀤𑁂𑀯𑀢𑀸𑀳𑀺 𑀧𑀬𑁄𑀚𑀺𑀬𑀫𑀸𑀦𑀸 𑀕𑀻𑀢𑀯𑀸𑀤𑀺𑀢𑀸𑀤𑀬𑁄 𑀘 𑀢𑀺𑀬𑁄𑀚𑀦𑀝𑁆𑀞𑀸𑀦𑁂 𑀓𑀧𑁆𑀧𑀭𑀼𑀓𑁆𑀔𑀸𑀦𑀺 𑀘 𑀇𑀤𑀁 𑀲𑀩𑁆𑀩𑀁 𑀤𑁂𑀯𑀺𑀲𑁆𑀲𑀭𑀺𑀬𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑀸 𑀤𑁂𑀯𑀥𑀻𑀢𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 𑀢𑁆𑀯𑀁 𑀓𑁂𑀦 𑀓𑀫𑁆𑀫𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀸𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀸 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑀸 𑀪𑀦𑁆𑀢𑁂 𑀫𑀁 𑀦 𑀲𑀜𑁆𑀚𑀸𑀦𑀺𑀢𑁆𑀣𑀸𑀢𑀺 𑀆𑀳. 𑀪𑀺𑀓𑁆𑀔𑀽𑀳𑀺 𑀦 𑀫𑀬𑀁 𑀲𑀜𑁆𑀚𑀸𑀦𑀸𑀫 𑀪𑀕𑀺𑀦𑀻𑀢𑀺 𑀯𑀼𑀢𑁆𑀢𑁂 𑀲𑀸 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀓𑀣𑁂𑀦𑁆𑀢𑀻 𑀏𑀯𑀫𑀸𑀳.

𑁮. 𑀳𑀻𑀬𑁆𑀬𑁄 𑀆𑀲𑀦𑀲𑀸𑀮𑀸𑀬, 𑀦𑀺𑀲𑀻𑀤𑀺𑀢𑁆𑀣 𑀲𑀫𑀸𑀕𑀢𑀸;

𑀢𑀼𑀫𑁆𑀳𑀓𑀁 𑀲𑀦𑁆𑀢𑀺𑀓𑀁 𑀕𑀫𑁆𑀫, 𑀬𑀸 𑀯𑀭𑀸𑀓𑀻𑀪𑀺𑀯𑀸𑀤𑀬𑀺.

𑁯. 𑀬𑀸 𑀩𑁄𑀥𑀺𑀁 𑀧𑀽𑀚𑀦𑀢𑁆𑀣𑀸𑀬, 𑀯𑀢𑁆𑀣𑀓𑀁 𑀧𑀝𑀺𑀧𑀸𑀤𑀬𑀺;

𑀲𑀸𑀳𑀁 𑀳𑀻𑀬𑁆𑀬𑁄 𑀘𑀼𑀢𑀸 𑀆𑀲𑀺𑀁, 𑀭𑀢𑁆𑀢𑀺𑀬𑀁 𑀩𑁆𑀬𑀸𑀥𑀺𑀧𑀻𑀴𑀺𑀢𑀸.

𑁧𑁦. 𑀦𑀸𑀦𑀸𑀲𑀫𑁆𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑀸, 𑀦𑀸𑀦𑀸𑀪𑀽𑀲𑀦𑀪𑀽𑀲𑀺𑀢𑀸;

𑀯𑀺𑀫𑀸𑀦𑁂 𑀭𑀢𑀦𑀸 𑀓𑀺𑀡𑁆𑀡𑁂, 𑀚𑀸𑀢𑀸𑀳𑀁 𑀏𑀢𑁆𑀣 𑀓𑀸𑀦𑀦𑁂.

𑁧𑁧. 𑀳𑀻𑀬𑁆𑀬𑁄 𑀧𑀲𑁆𑀲𑀺𑀢𑁆𑀣 𑀫𑁂 𑀕𑀢𑁆𑀢𑀁, 𑀭𑀚𑁄𑀚𑀮𑁆𑀮𑁂𑀳𑀺 𑀲𑀁𑀓𑀼𑀮𑀁;

𑀅𑀚𑁆𑀚 𑀧𑀲𑁆𑀲𑀣 𑀫𑁂 𑀕𑀢𑁆𑀢𑀁, 𑀯𑀡𑁆𑀡𑀯𑀦𑁆𑀢𑀁 𑀧𑀪𑀲𑁆𑀲𑀭𑀁.

𑁧𑁨. 𑀳𑀻𑀬𑁆𑀬𑁄 𑀧𑀲𑁆𑀲𑀺𑀢𑁆𑀣 𑀫𑁂 𑀪𑀦𑁆𑀢𑁂, 𑀦𑀺𑀯𑀢𑁆𑀣𑀁 𑀫𑀮𑀺𑀦𑀫𑁆𑀩𑀭𑀁;

𑀅𑀚𑁆𑀚 𑀧𑀲𑁆𑀲𑀣 𑀫𑁂 𑀪𑀦𑁆𑀢𑁂, 𑀤𑀺𑀩𑁆𑀩𑀫𑀫𑁆𑀩𑀭𑀫𑀼𑀢𑁆𑀢𑀫𑀁.

𑁧𑁩. 𑀯𑀺𑀓𑀺𑀡𑁆𑀡𑀨𑀮𑀺𑀢𑀕𑁆𑀕𑁂𑀳𑀺, 𑀓𑁂𑀲𑁂𑀳𑀺 𑀯𑀺𑀭𑀮𑀸 𑀓𑀼𑀮𑀁;

𑀊𑀓𑀸𑀕𑀽𑀣𑀧𑀝𑀺𑀓𑁆𑀓𑀽𑀮𑀁, 𑀳𑀻𑀬𑁆𑀬𑁄 𑀆𑀲𑀺𑀲𑀺𑀭𑀁 𑀫𑀫.

𑁧𑁪. 𑀅𑀚𑁆𑀚 𑀢𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸, 𑀫𑀫 𑀧𑀼𑀜𑁆𑀜𑀸𑀦𑀼𑀪𑀸𑀯𑀢𑁄;

𑀲𑀼𑀦𑀻𑀮𑀫𑀼𑀤𑀼𑀥𑀫𑁆𑀫𑀺𑀮𑁆𑀮𑀁, 𑀓𑀼𑀲𑀼𑀫𑀸 𑀪𑀭𑀡𑀪𑀽𑀲𑀺𑀢𑀁.

𑁧𑁫. 𑀧𑀼𑀭𑀸 𑀫𑁂 𑀲𑀓𑀲𑀻𑀲𑁂𑀦, 𑀯𑀳𑀺𑀢𑀁 𑀤𑀸𑀭𑀽 𑀤𑀓𑀸𑀤𑀺𑀓𑀁;

𑀧𑀼𑀜𑁆𑀜𑁂𑀦𑀸𑀳𑀁 𑀅𑀚𑁆𑀚 𑀫𑀸𑀮𑀸, 𑀪𑀸𑀭𑀁 𑀲𑀻𑀲𑁂 𑀲𑀫𑀼𑀩𑁆𑀩𑀳𑁂.

𑁧𑁬. 𑀥𑀚𑀢𑁆𑀣𑀸𑀬 𑀫𑀬𑀸 𑀳𑀻𑀬𑁆𑀬𑁄, 𑀧𑀤𑀺𑀦𑁆𑀦𑀁 𑀣𑀽𑀮𑀲𑀸𑀝𑀓𑀁;

𑀅𑀚𑁆𑀚 𑀦𑀺𑀩𑁆𑀩𑀢𑁆𑀢𑀺 𑀫𑁂 𑀪𑁄𑀦𑁆𑀢𑁄, 𑀫𑀳𑀦𑁆𑀢𑀁 𑀤𑀺𑀩𑁆𑀩𑀲𑀫𑁆𑀧𑀤𑀁.

𑁧𑁭. 𑀚𑀸𑀦𑀫𑀸𑀦𑁂𑀦 𑀓𑀢𑁆𑀢𑀩𑁆𑀩𑀁, 𑀤𑀸𑀦𑀸𑀤𑀻𑀲𑀼 𑀫𑀳𑀧𑁆𑀨𑀮𑀁;

𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂𑀲𑀼, 𑀲𑀼𑀔𑀤𑀁 𑀤𑀸𑀦 𑀫𑀼𑀢𑁆𑀢𑀫𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀲𑀸 𑀤𑁂𑀯𑀢𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀔𑀚𑁆𑀚𑀪𑁄𑀚𑁆𑀚𑁂𑀳𑀺 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀸𑀦𑀁 𑀤𑀤𑀫𑀸𑀦𑀸 𑀫𑀳𑀸𑀩𑁄𑀥𑀺𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀳𑀺 𑀥𑀚𑀧𑀢𑀸𑀓𑀸 𑀤𑀻𑀳𑀺 𑀘 𑀦𑀸𑀦𑀸𑀯𑀺𑀥𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀧𑀼𑀧𑁆𑀨𑁂𑀳𑀺 𑀘 𑀤𑀻𑀧𑀥𑀽𑀧𑁂𑀳𑀺 𑀘 𑀩𑁄𑀥𑀺𑀁 𑀧𑀽𑀚𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀢𑁆𑀣𑀸𑀬 𑀤𑀺𑀩𑁆𑀩𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀆𑀕𑀫𑁆𑀫 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀲𑀦𑁆𑀢𑀻 𑀦𑀸𑀦𑀸𑀯𑀺𑀥𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀪𑀺𑀓𑁆𑀔𑀽𑀧𑀺 𑀢𑀁 𑀅𑀘𑁆𑀙𑀭𑀺𑀬𑀁 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑁂𑀦𑁆𑀢𑀸 𑀩𑀳𑀽𑀚𑀦𑁂 𑀧𑀼𑀜𑁆𑀜𑀓𑀫𑁆𑀫𑁂 𑀦𑀺𑀬𑁄𑀚𑁂𑀲𑀼𑀁𑀢𑀺.

𑁧𑁮. 𑀏𑀯𑀁 𑀯𑀺𑀥𑀸𑀧𑀺 𑀓𑀧𑀡𑀸 𑀚𑀺𑀦𑀲𑀸𑀲𑀦𑀫𑁆𑀳𑀺,

𑀓𑀢𑁆𑀯𑀸 𑀧𑀲𑀸𑀤 𑀫𑀣 𑀣𑀽𑀮𑀓𑀼𑀘𑁂𑀮𑀓𑁂𑀦;

𑀧𑀽𑀚𑁂𑀢𑁆𑀯 𑀤𑀺𑀩𑁆𑀩𑀯𑀺𑀪𑀯𑀁 𑀅𑀮𑀪𑀻𑀢𑀺 𑀜𑀢𑁆𑀯𑀸,

𑀧𑀽𑀚𑀸𑀧𑀭𑀸 𑀪𑀯𑀣 𑀯𑀢𑁆𑀣𑀼𑀲𑀼 𑀢𑀻𑀲𑀼 𑀲𑀫𑁆𑀫𑀸𑀢𑀺.

𑀓𑀧𑀡𑀸𑀬 𑀯𑀢𑁆𑀣𑀼𑀁 𑀢𑀢𑀺𑀬𑀁.