𑁩𑁪. 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀡𑀢𑁄 𑀑𑀭𑀪𑀸𑀕𑁂 𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀧𑀸𑀝𑀮𑀺𑀧𑀼𑀢𑁆𑀢𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀢𑀢𑁆𑀣 𑀥𑀫𑁆𑀫𑀸𑀲𑁄𑀓𑁄 𑀦𑀸𑀫 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀆𑀡𑀸𑀘𑀓𑁆𑀓𑀯𑀢𑁆𑀢𑀺 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀉𑀤𑁆𑀥𑀁 𑀆𑀓𑀸𑀲𑀢𑁄 𑀳𑁂𑀝𑁆𑀞𑀸 𑀧𑀣𑀯𑀺𑀬𑀸 𑀬𑁄𑀚𑀦𑀧𑁆𑀧𑀫𑀸𑀡𑁂 𑀲𑀓𑀮𑀚𑀫𑁆𑀩𑀽𑀤𑀻𑀧𑁂 𑀢𑀲𑁆𑀲 𑀆𑀡𑀸 𑀧𑀯𑀢𑁆𑀢𑀢𑀺, 𑀢𑀤𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀘 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑁂 𑀭𑀸𑀚𑀸𑀦𑁄 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀮𑀯𑀸𑀳𑀦𑁂 𑀕𑀳𑁂𑀢𑁆𑀯𑀸 𑀆𑀕𑀫𑁆𑀫 𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀤𑁂𑀯𑀧𑀼𑀢𑁆𑀢𑀦𑀕𑀭𑁂 𑀤𑁂𑀯𑀧𑀼𑀢𑁆𑀢𑁄 𑀦𑀸𑀫 𑀫𑀳𑀸𑀭𑀸𑀚𑀸 𑀅𑀢𑁆𑀢𑀦𑁄 𑀩𑀮𑀯𑀸𑀳𑀦𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀥𑀫𑁆𑀫𑀸𑀲𑁄𑀓𑁄 𑀤𑁂𑀯𑀧𑀼𑀢𑁆𑀢𑀫𑀳𑀸𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀭𑀝𑁆𑀞𑁂 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀫𑀳𑀸𑀕𑀼𑀡𑀯𑀦𑁆𑀢𑀸 𑀅𑀬𑁆𑀬𑀸 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀺. 𑀢𑀁 𑀲𑀼𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑀭𑀸𑀚𑀸 𑀅𑀢𑁆𑀣𑀺 𑀤𑁂𑀯 𑀢𑀲𑁆𑀫𑀺𑀁 𑀦𑀕𑀭𑁂 𑀲𑀻𑀳𑀓𑀼𑀫𑁆𑀪𑀓𑀁 𑀦𑀸𑀫 𑀫𑀳𑀸𑀯𑀺𑀳𑀸𑀭𑀁. 𑀢𑀢𑁆𑀣 𑀅𑀦𑁂𑀓𑀲𑀳𑀲𑁆𑀲𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀲𑀻𑀮𑀯𑀦𑁆𑀢𑀸 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀯𑀺𑀯𑁂𑀓𑀓𑀸𑀫𑀺𑀦𑁄. 𑀢𑁂𑀲𑀼 𑀲𑀸𑀝𑁆𑀞𑀓𑀣𑀸𑀢𑀺𑀧𑀺𑀝𑀓𑀥𑀭𑁄 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀢𑁂𑀲𑀁 𑀧𑀸𑀫𑁄𑀓𑁆𑀔𑁄 𑀅𑀳𑁄𑀲𑀺. 𑀲𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀦𑀭𑀸𑀫𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁𑀯𑀡𑁆𑀡𑁂𑀢𑀺. 𑀕𑀼𑀡𑀯𑀸 𑀅𑀢𑁆𑀢𑀦𑁄 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀮𑁄𑀓𑁂 𑀧𑀸𑀓𑀝𑁄𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀼𑀝𑁆𑀞𑀫𑀸𑀦𑀲𑁄 𑀣𑁂𑀭𑀁 𑀧𑀲𑁆𑀲𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀲𑀫𑁆𑀫 𑀢𑁆𑀯𑀫𑁂𑀯 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀬𑀸𑀘𑀺𑀢𑁆𑀯𑀸 𑀇𑀥𑀸 𑀦𑁂𑀳𑀻𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑀭𑀸𑀚𑀸 𑀅𑀢𑁆𑀢𑀦𑁄 𑀳𑀢𑁆𑀣𑀲𑁆𑀲𑀩𑀮𑀯𑀸𑀳𑀦𑀸 𑀤𑀺𑀫𑀳𑀸 𑀲𑁂𑀦𑀗𑁆𑀕𑀧𑀭𑀺𑀯𑀼𑀢𑁄 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀬𑁆𑀬 𑀅𑀬𑁆𑀬𑀁 𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀸𑀚𑀸 𑀤𑀝𑁆𑀞𑀼𑀓𑀸𑀫𑁄𑀢𑀺 𑀆𑀳. 𑀣𑁂𑀭𑁂𑀦 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀭𑀸𑀚𑀸 𑀣𑁂𑀭𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑀁 𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀸𑀚𑀺𑀦𑁄 𑀧𑁂𑀲𑁂𑀲𑀺. 𑀢𑀢𑁄 𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀸𑀚𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑁄 𑀆𑀡𑀸𑀧𑀯𑀢𑁆𑀢𑀺𑀢𑀝𑁆𑀞𑀸𑀦𑁂 𑀭𑀸𑀚𑀽𑀦𑀁 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑀩𑁆𑀩𑁂𑀯 𑀣𑁂𑀭𑀸𑀕𑀫𑀦𑀫𑀕𑁆𑀕𑀁 𑀅𑀮𑀗𑁆𑀓𑀭𑁄𑀦𑁆𑀢𑀽𑀢𑀺. 𑀅𑀣 𑀢𑁂 𑀭𑀸𑀚𑀸𑀦𑁄 𑀢𑀼𑀝𑁆𑀞𑀧𑀳𑀝𑁆𑀞𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑀦𑀕𑀭𑀢𑁄 𑀬𑀸𑀯 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀁 𑀏𑀢𑁆𑀣𑀦𑁆𑀢𑀭𑁂 𑀧𑀜𑁆𑀘𑀧𑀡𑁆𑀡𑀸𑀲𑀬𑁄𑀚𑀦𑀺𑀓𑀁 𑀫𑀕𑁆𑀕𑀁 𑀯𑀺𑀲𑀫𑀁 𑀲𑀫𑀁 𑀓𑀭𑁄𑀦𑁆𑀢𑁄 𑀤𑁂𑀯𑀢𑀸𑀦𑀁 𑀤𑀺𑀩𑁆𑀩𑀯𑀻𑀣𑀺𑀫𑀺𑀯 𑀅𑀮𑀗𑁆𑀓𑀭𑀺𑀢𑁆𑀯𑀸 𑀥𑀫𑁆𑀫𑀸𑀲𑁄𑀓𑀫𑀳𑀸𑀦𑀭𑀺𑀦𑁆𑀤𑀲𑁆𑀲 𑀏𑀯𑀁 𑀲𑀸𑀲𑀦𑀁 𑀧𑁂𑀲𑁂𑀲𑀼𑀁. 𑀪𑀯𑀦𑁆𑀢𑁂𑀢𑁆𑀣.

𑁧. 𑀇𑀦𑁆𑀤𑀕𑀼𑀢𑁆𑀢𑀫𑀳𑀸𑀣𑁂𑀭, 𑀲𑀸𑀫𑀺𑀦𑁄 𑀕𑀫𑀦𑀸𑀬 𑀦𑁄;

𑀫𑀕𑁆𑀕𑀁 𑀅𑀮𑀗𑁆𑀓𑀭𑁄𑀦𑁆𑀢𑀽𑀢𑀺, 𑀫𑀳𑀸𑀭𑀸𑀚𑁂𑀦 𑀧𑁂𑀲𑀺𑀢𑀁.

𑁨. 𑀢𑀢𑁄 𑀢𑁂 𑀅𑀧𑀦𑁂𑀢𑁆𑀯𑀸𑀦, 𑀧𑀸𑀲𑀸𑀡𑀓𑀡𑁆𑀝𑀓𑀸𑀤𑀺𑀓𑀁;

𑀯𑀺𑀲𑀫𑀁 𑀲𑀫𑀁 𑀓𑀭𑀺𑀢𑁆𑀯𑀸𑀦, 𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦 𑀲𑀸𑀥𑀼𑀓𑀁.

𑁩. 𑀥𑁄𑀢𑀫𑀼𑀢𑁆𑀢𑀸 𑀲𑀫𑀸𑀪𑀸𑀲𑀸, 𑀑𑀓𑀺𑀭𑀺𑀢𑁆𑀯𑀸𑀦 𑀯𑀸𑀮𑀼𑀓𑀸;

𑀉𑀲𑁆𑀲𑀸𑀧𑀺𑀢𑀸 𑀢𑀢𑁆𑀣 𑀢𑀢𑁆𑀣, 𑀤𑀼𑀲𑁆𑀲𑀢𑁄𑀭𑀡𑀧𑀦𑁆𑀢𑀺𑀬𑁄.

𑁪. 𑀓𑀮𑀥𑁄𑀢𑀳𑁂𑀫𑀭𑀫𑁆𑀪𑀸𑀤𑀺, 𑀦𑀸𑀦𑀸𑀢𑁄𑀭𑀡𑀧𑀦𑁆𑀢𑀺𑀬𑁄;

𑀢𑀣𑀸 𑀧𑀼𑀧𑁆𑀨𑀫𑀬𑀸 𑀦𑁂𑀓, 𑀢𑁄𑀭𑀡𑀽𑀧𑀭𑀺𑀢𑁄𑀭𑀡𑀸.

𑁫. 𑀢𑁂𑀲𑀼 𑀢𑁂𑀲𑀼𑀘 𑀞𑀸𑀦𑁂𑀲𑀼, 𑀲𑀗𑁆𑀔𑀢𑀸 𑀓𑀼𑀲𑀼𑀫𑀕𑁆𑀖𑀺𑀓𑀸;

𑀢𑀣𑁂𑀯 𑀕𑀦𑁆𑀥𑀢𑁂𑀮𑁂𑀳𑀺, 𑀤𑀻𑀧𑀺𑀢𑀸 𑀤𑀻𑀧𑀧𑀦𑁆𑀢𑀺𑀬𑁄.

𑁬. 𑀧𑀤𑀼𑀫𑀼𑀧𑁆𑀧𑀮𑀲𑀦𑁆𑀦𑀻𑀭, 𑀧𑀼𑀧𑁆𑀨𑀧𑀮𑁆𑀮𑀯 𑀮𑀗𑁆𑀓𑀢𑀸;

𑀞𑀧𑀺𑀢𑀸 𑀖𑀝𑀫𑀸𑀮𑀸𑀬𑁄, 𑀧𑀼𑀡𑁆𑀡𑀸 𑀲𑁄𑀕𑀦𑁆𑀥𑀯𑀸𑀭𑀺𑀳𑀺.

𑁭. 𑀦𑀺𑀮𑀧𑀻𑀢𑀸 𑀤𑀺𑀲𑀫𑁆𑀪𑀺𑀦𑁆𑀦, 𑀧𑀢𑀸𑀓𑀸𑀳𑀺 𑀥𑀚𑁂𑀳𑀺 𑀘;

𑀫𑀕𑁆𑀕𑀲𑁆𑀲 𑀉𑀪𑀢𑁄 𑀧𑀲𑁆𑀲𑁂, 𑀯𑀦𑀫𑀸𑀲𑀺 𑀲𑀫𑀸𑀓𑀼𑀮𑀁.

𑁮. 𑀓𑁂𑀢𑀯𑁄 𑀉𑀕𑁆𑀕𑀢𑀸 𑀢𑀢𑁆𑀣, 𑀫𑀦𑁆𑀤𑀫𑀦𑁆𑀤𑀲𑀫𑀻𑀭𑀡𑀸;

𑀅𑀯𑁆𑀳𑀬𑀦𑁆𑀢𑀸𑀯 𑀲𑁄𑀪𑀦𑁆𑀢𑀺, 𑀩𑁆𑀭𑀳𑁆𑀫𑁄𑀭𑀕𑀲𑀼𑀭𑀸𑀤𑀬𑁄.

𑁯. 𑀦𑀸𑀕𑀘𑀫𑁆𑀧𑀧𑀼𑀦𑁆𑀦𑀸𑀕, 𑀓𑁂𑀢𑀓𑀻𑀯𑀓𑀼𑀮𑀸𑀤𑀺𑀳𑀺;

𑀧𑀤𑀼𑀫𑀼𑀧𑁆𑀧𑀮𑀸 𑀤𑀺𑀚𑀮𑀚𑁂𑀳𑀺, 𑀫𑀸𑀮𑀢𑀻 𑀓𑀼𑀲𑀼𑀫𑀸 𑀤𑀺𑀳𑀺.

𑁧𑁦. 𑀫𑀸𑀮𑀸𑀤𑀸𑀫𑁂𑀳𑀺 𑀦𑁂𑀓𑁂𑀳𑀺, 𑀫𑀕𑁆𑀕𑀫𑀸𑀲𑀺 𑀯𑀺𑀘𑀺𑀢𑁆𑀢𑀓𑀁;

𑀧𑀢𑁆𑀣𑀭𑀺𑀢𑁆𑀯𑀸 𑀧𑀸𑀤𑀧𑀝𑁂, 𑀲𑀺𑀢𑁆𑀢𑀲𑀫𑁆𑀫𑀢𑁆𑀢𑀪𑀽𑀫𑀺𑀬𑀁.

𑁧𑁧. 𑀮𑀸𑀚𑀸𑀤𑀺𑀧𑀜𑁆𑀘𑀧𑀼𑀧𑁆𑀨𑀸𑀦𑀺, 𑀯𑀺𑀓𑀺𑀭𑀺𑀁𑀲𑀼 𑀫𑀦𑁄𑀭𑀫𑀁;

𑀅𑀮𑀗𑁆𑀓𑀭𑀺𑀢𑁆𑀯𑀸 𑀳𑀢𑁆𑀢𑀲𑁆𑀲𑀸, 𑀓𑀼𑀲𑀼𑀫𑀸 𑀪𑀭𑀡𑀸𑀤𑀺𑀳𑀺.

𑁧𑁨. 𑀫𑀕𑁆𑀕𑀸𑀮𑀗𑁆𑀓𑀭𑀡𑀢𑁆𑀣𑀸𑀬, 𑀞𑀧𑀺𑀢𑀸𑀲𑀼𑀁 𑀢𑀢𑁄 𑀢𑀢𑁄;

𑀢𑁂𑀲𑀼 𑀢𑁂𑀲𑀼 𑀘 𑀞𑀸𑀦𑁂𑀲𑀼, 𑀪𑁂𑀭𑀺𑀫𑀡𑁆𑀟𑀮𑀫𑀚𑁆𑀛𑀕𑀸.

𑁧𑁩. 𑀦𑀘𑁆𑀘𑀦𑁆𑀢𑀺 𑀘𑀸𑀢𑀼𑀭𑀸 𑀦𑀸𑀭𑀻, 𑀭𑀲𑀪𑀸𑀯𑀦𑀺𑀭𑀦𑁆𑀢𑀭𑀸;

𑀓𑀁𑀲𑀯𑀁𑀲𑀸𑀤𑀺𑀧𑀕𑁆𑀕𑀬𑁆𑀳, 𑀯𑀚𑁆𑀚𑁂𑀦𑁆𑀢𑀸𑀦𑁂𑀓𑀢𑀦𑁆𑀢𑀺𑀬𑁄.

𑁧𑁪. 𑀕𑀸𑀬𑀦𑁆𑀢𑀺 𑀫𑀥𑀼𑀭𑀁 𑀕𑀻𑀢𑀁, 𑀕𑀸𑀬𑀦𑁆𑀢𑁂𑀢𑁆𑀣 𑀮𑀬𑀸𑀦𑁆𑀯𑀺𑀢𑀁;

𑀫𑀕𑁆𑀕𑁄𑀲𑁄 𑀲𑀸𑀥𑀼𑀯𑀸𑀤𑁂𑀳𑀺, 𑀪𑁂𑀭𑀺𑀢𑀦𑁆𑀢𑀺𑀦𑀤𑁂𑀳𑀺𑀘.

𑁧𑁫. 𑀓𑀭𑀻𑀦𑀁 𑀓𑁄𑀜𑁆𑀘𑀦𑀸𑀤𑁂𑀳𑀺, 𑀳𑀬𑀸𑀦𑀁 𑀳𑁂𑀲𑀺𑀢𑁂𑀳𑀺 𑀘;

𑀦𑁂𑀓𑀯𑀺𑀝𑀗𑁆𑀓𑀲𑀗𑁆𑀖𑁂𑀳𑀺, 𑀲𑁄 𑀓𑀭𑀻𑀳𑀺 𑀲𑀫𑀸𑀓𑀼𑀮𑁄.

𑁧𑁬. 𑀫𑀕𑁆𑀕𑀲𑁆𑀲 𑀉𑀪𑀢𑁄 𑀧𑀲𑁆𑀲𑁂, 𑀤𑁂𑀯𑀓𑀜𑁆𑀜𑀽𑀧𑀫𑀸 𑀲𑀼𑀪𑀸;

𑀫𑀸𑀮𑀸𑀓𑀮𑀸𑀧𑁂 𑀧𑀕𑁆𑀕𑀬𑁆𑀳, 𑀢𑀺𑀝𑁆𑀞𑀦𑁆𑀢𑀺 𑀢𑀼𑀝𑁆𑀞𑀫𑀸𑀦𑀲𑀸.

𑁧𑁭. 𑀢𑀣𑀸 𑀧𑀼𑀡𑁆𑀡𑀖𑀝𑁂 𑀕𑀬𑁆𑀳, 𑀧𑀤𑀼𑀫𑀼𑀧𑁆𑀧𑀮𑀲𑀁𑀓𑀼𑀮𑁂,

𑀅𑀝𑁆𑀞𑀫𑀗𑁆𑀕𑀮𑀫𑀼𑀕𑁆𑀕𑀬𑁆𑀳, 𑀢𑀺𑀝𑁆𑀞𑀦𑁆𑀢𑀺 𑀧𑀫𑀤𑀸 𑀢𑀳𑀺𑀁.

𑁧𑁮. 𑀲𑀻𑀢𑀮𑀽𑀤𑀓𑀲𑀫𑁆𑀧𑀦𑁆𑀦, 𑀧𑀧𑀸𑀳𑀺 𑀲𑀫𑀮𑀗𑁆𑀓𑀢𑀸;

𑀲𑀺𑀦𑀸𑀦𑀢𑁆𑀣𑀁 𑀔𑀢𑀸 𑀆𑀲𑀼𑀁, 𑀧𑁄𑀓𑁆𑀔𑀭𑀜𑁆𑀜𑁄 𑀢𑀳𑀺𑀁𑀢𑀳𑀺𑀁.

𑁧𑁯. 𑀢𑀳𑀺𑀁𑀢𑀳𑀺𑀁𑀓𑀢𑀸 𑀆𑀲𑀼𑀁, 𑀤𑀸𑀦𑀲𑀸𑀮𑀸 𑀫𑀦𑁄𑀭𑀫𑀸;

𑀦𑀺𑀘𑀺𑀢𑀸𑀲𑀼𑀫𑀦𑁂𑀓𑀸𑀦𑀺, 𑀤𑀸𑀦𑁄𑀧𑀓𑀭𑀡𑀸 𑀢𑀳𑀺𑀁.

𑁨𑁦. 𑀏𑀯𑀁 𑀦𑁂𑀓𑀯𑀺𑀥𑀸 𑀧𑀽𑀚𑀸, 𑀅𑀫𑁆𑀳𑁂𑀳𑀺 𑀧𑀝𑀺𑀧𑀸𑀤𑀺𑀢𑀸;

𑀞𑀧𑁂𑀢𑁆𑀯𑀸𑀦 𑀫𑀳𑀸𑀕𑀗𑁆𑀕𑀁, 𑀢𑀁 𑀚𑀸𑀦𑀸𑀢𑀼 𑀫𑀳𑀻𑀧𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀅𑀲𑁄𑀓𑀫𑀳𑀸𑀭𑀸𑀚𑀸 𑀕𑀗𑁆𑀕𑀁 𑀅𑀮𑀗𑁆𑀓𑀭𑁄𑀣𑀸𑀢𑀺 𑀲𑁄𑀴𑀲𑀬𑀓𑁆𑀔𑁂 𑀧𑁂𑀲𑁂𑀲𑀺, 𑀢𑁂 𑀲𑀧𑀭𑀺𑀯𑀸𑀭𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀕𑀗𑁆𑀕𑀸𑀬 𑀅𑀦𑁆𑀢𑁄 𑀢𑀺𑀕𑀸𑀯𑀼𑀢𑀝𑁆𑀞𑀸𑀦𑁂 𑀉𑀤𑀼𑀓𑁆𑀔𑀮𑀧𑀸𑀲𑀸𑀡𑁂 𑀞𑀧𑁂𑀲𑀼𑀁. 𑀞𑀧𑁂𑀢𑁆𑀯𑀸 𑀣𑀫𑁆𑀪𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀼𑀮𑀸𑀲𑀁𑀖𑀸𑀝𑁂 𑀤𑀢𑁆𑀯𑀸 𑀳𑀺𑀫𑀯𑀦𑁆𑀢𑀢𑁄 𑀭𑀢𑁆𑀢𑀘𑀦𑁆𑀤𑀦𑀲𑀸𑀭𑁂 𑀆𑀳𑀭𑀺𑀢𑁆𑀯𑀸 𑀧𑀤𑀭𑁂 𑀲𑀦𑁆𑀣𑀭𑀺𑀢𑁆𑀯𑀸 𑀅𑀦𑁂𑀓𑁂𑀳𑀺 𑀧𑀽𑀚𑀸𑀯𑀺𑀥𑀸𑀦𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀭𑀜𑁆𑀜𑁄 𑀏𑀯𑀁 𑀲𑀸𑀲𑀦𑀁 𑀧𑁂𑀲𑁂𑀲𑀼𑀁. 𑀪𑀯𑀦𑁆𑀢𑁂𑀢𑁆𑀣.

𑁨𑁧. 𑀬𑀫𑀢𑁆𑀣𑀸𑀬 𑀫𑀬𑀁 𑀲𑀩𑁆𑀩𑁂, 𑀫𑀳𑀸𑀭𑀸𑀚𑁂𑀦 𑀧𑁂𑀲𑀺𑀢𑀸;

𑀅𑀫𑁆𑀳𑁂𑀳𑀺 𑀤𑀸𑀦𑀺 𑀢𑀁 𑀲𑀩𑁆𑀩𑀁, 𑀓𑀢𑀫𑁂𑀯 𑀲𑀼𑀡𑁄𑀣 𑀢𑀁.

𑁨𑁨. 𑀕𑀸𑀯𑀼𑀢𑀢𑁆𑀢𑀬𑀕𑀫𑁆𑀪𑀻𑀭𑀁, 𑀕𑀗𑁆𑀕𑀁 𑀬𑁄𑀚𑀦𑀯𑀺𑀢𑁆𑀣𑀢𑀁;

𑀣𑀫𑁆𑀪𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸𑀦, 𑀅𑀦𑀕𑁆𑀖𑀁 𑀭𑀢𑁆𑀢𑀘𑀦𑁆𑀤𑀦𑀁.

𑁨𑁩. 𑀳𑀺𑀫𑀯𑀦𑁆𑀢𑀢𑁄 𑀳𑀭𑀺𑀢𑁆𑀯𑀸𑀦, 𑀲𑁂𑀢𑀼𑀁 𑀢𑀢𑁆𑀣 𑀲𑀼𑀫𑀸𑀧𑀺𑀢𑀁;

𑀢𑁄𑀭𑀡𑀸 𑀘 𑀉𑀪𑁄 𑀧𑀲𑁆𑀲𑁂, 𑀭𑀢𑀦𑁂𑀳𑀺 𑀲𑀼𑀦𑀺𑀫𑁆𑀫𑀺𑀢𑀸.

𑁨𑁪. 𑀧𑀼𑀡𑁆𑀡𑀓𑀼𑀫𑁆𑀪𑀤𑁆𑀥𑀚𑀸 𑀘𑁂𑀯, 𑀧𑀤𑀻𑀧𑀸𑀯𑀮𑀺𑀬𑁄 𑀢𑀣𑀸;

𑀉𑀪𑁄 𑀧𑀲𑁆𑀲𑁂𑀲𑀼 𑀭𑀢𑀦𑀸𑀦𑀺, 𑀫𑀸𑀧𑁂𑀢𑁆𑀯𑀸𑀮𑀫𑁆𑀩𑀦𑀸𑀦𑀺𑀘.

𑁨𑁫. 𑀲𑀼𑀯𑀡𑁆𑀡𑀫𑀡𑀺𑀫𑀼𑀢𑁆𑀢𑀸𑀤𑀺, 𑀤𑀸𑀫𑁂𑀳𑀺 𑀲𑀫𑀮𑀗𑁆𑀓𑀢𑀸;

𑀯𑀸𑀮𑀼𑀓𑀢𑁆𑀣𑀸𑀬 𑀑𑀓𑀺𑀡𑁆𑀡𑀸, 𑀥𑁄𑀢𑀫𑀼𑀢𑁆𑀢𑀸 𑀧𑀪𑀲𑁆𑀲𑀭𑀸.

𑁨𑁬. 𑀢𑁂𑀲𑀼 𑀢𑁂𑀲𑀼 𑀘 𑀞𑀸𑀦𑁂𑀲𑀼, 𑀞𑀧𑀺𑀢𑀸𑀲𑀼𑀁 𑀫𑀳𑀸𑀫𑀡𑀻;

𑀦𑀸𑀦𑀸𑀭𑀸𑀕𑀯𑀺𑀢𑀸𑀦𑁂𑀳𑀺, 𑀲𑁄𑀪𑀺𑀢𑀸 𑀲𑁂𑀢𑀼𑀦𑁄 𑀧𑀭𑀺.

𑁨𑁭. 𑀑𑀮𑀫𑁆𑀩𑀺𑀢𑀸𑀲𑀼𑀁 𑀢𑀢𑁆𑀣𑁂𑀯, 𑀤𑀺𑀩𑁆𑀩𑀸𑀤𑀺𑀓𑀼𑀲𑀼𑀫𑀸𑀤𑀬𑁄;

𑀦𑀺𑀝𑁆𑀞𑀺𑀢𑀁 𑀇𑀥 𑀓𑀸𑀢𑀩𑁆𑀩, 𑀬𑀼𑀢𑁆𑀢𑀁 𑀧𑀽𑀚𑀸𑀯𑀺𑀥𑀺𑀁𑀢𑀼 𑀦𑁄;

𑀤𑁂𑀯𑁄𑀢𑀁 𑀧𑀝𑀺𑀚𑀸𑀦𑀸𑀢𑀼, 𑀇𑀢𑀺 𑀯𑀢𑁆𑀯𑀸𑀦 𑀧𑁂𑀲𑀬𑀼𑀁𑀢𑀺.

𑀢𑀫𑁆𑀧𑀺 𑀲𑀼𑀢𑁆𑀯𑀸 𑀅𑀲𑁄𑀓𑁄 𑀫𑀳𑀸𑀭𑀸𑀚𑀸 𑀢𑀼𑀫𑁆𑀳𑁂𑀯 𑀣𑁂𑀭𑀁 𑀇𑀥𑀸𑀦𑁂𑀣𑀸𑀢𑀺 𑀢𑁂𑀲𑀁𑀬𑁂𑀯 𑀲𑀸𑀲𑀦𑀁 𑀧𑀝𑀺𑀧𑁂𑀲𑁂𑀲𑀺, 𑀢𑁂 𑀲𑀸𑀥𑀽𑀢𑀺 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀦𑁆𑀢𑁂 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀲𑁆𑀲 𑀕𑀫𑀦𑀸𑀬 𑀓𑀸𑀮𑁄𑀢𑀺 𑀆𑀳𑀁𑀲𑀼, 𑀢𑀢𑁄 𑀣𑁂𑀭𑁄 𑀲𑀝𑁆𑀞𑀺𑀲𑀳𑀲𑁆𑀲𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁂𑀳𑀺 𑀧𑀭𑀺𑀯𑀼𑀢𑁄 𑀧𑀜𑁆𑀘𑀧𑀡𑁆𑀡𑀸𑀲𑀬𑁄𑀚𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀅𑀣𑀸𑀧𑀭𑀁 𑀤𑁂𑀯𑀧𑀼𑀢𑁆𑀢𑀦𑀕𑀭𑀯𑀸𑀲𑀺𑀦𑁄 𑀅𑀦𑁂𑀓𑀯𑀺𑀥𑀫𑀸𑀮𑀸𑀕𑀦𑁆𑀥𑀯𑀸𑀲𑀘𑀼𑀡𑁆𑀡𑀤𑁆𑀥𑀚𑀧𑀢𑀸𑀓𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀢𑀸𑀮𑀸𑀯𑀘𑀭𑁂𑀳𑀺 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑁂𑀳𑀺 𑀧𑀽𑀚𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀅𑀣 𑀣𑁂𑀭𑁄 𑀫𑀳𑀦𑁆𑀢𑁂𑀦 𑀧𑀽𑀚𑀸𑀯𑀺𑀥𑀸𑀦𑁂𑀦 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀘𑀦𑁆𑀤𑀪𑀸𑀕𑀸𑀬 𑀕𑀗𑁆𑀕𑀸𑀬 𑀲𑁂𑀢𑀼𑀁 𑀧𑀢𑁆𑀯𑀸 𑀢𑀢𑁆𑀣 𑀫𑀳𑀦𑁆𑀢𑀁 𑀧𑀽𑀚𑀸𑀯𑀺𑀥𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀏𑀯𑀁 𑀉𑀴𑀸𑀭𑀁 𑀧𑀽𑀚𑀸𑀯𑀺𑀥𑀸𑀦𑀁 𑀇𑀤𑀸𑀦𑀺 𑀚𑀫𑁆𑀩𑀼𑀤𑀻𑀧𑁂 𑀦𑀸𑀜𑁆𑀜𑀲𑁆𑀲 𑀳𑁄𑀢𑀺, 𑀫𑀬𑁆𑀳𑀫𑁂𑀯𑁂𑀢𑀁 𑀓𑀢𑀁. 𑀅𑀳𑀫𑁂𑀯𑁂𑀢𑁆𑀢 𑀉𑀢𑁆𑀢𑀫𑁄 𑀅𑀧𑁆𑀧𑀝𑀺𑀫𑁄𑀢𑀺 𑀏𑀯𑀁 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀢𑀁 𑀫𑀸𑀦𑁂𑀦𑀼𑀧𑀢𑁆𑀣𑀤𑁆𑀥𑀘𑁂𑀢𑀲𑀸 𑀞𑀺𑀢𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑀲𑁆𑀲 𑀑𑀯𑀤𑀦𑁆𑀢𑁄 𑀏𑀯𑀫𑀸𑀳. 𑀢𑀲𑁆𑀫𑀸.

𑁨𑁮. 𑀫𑀸 𑀫𑀸𑀦𑀲𑁆𑀲 𑀯𑀲𑀻 𑀳𑁄𑀣, 𑀫𑀸𑀦𑁄 𑀪𑀦𑁆𑀢𑁂 𑀯𑀲𑀁𑀕𑀢𑀁 [𑀫𑀸𑀦𑀁𑀪𑀦𑁆𑀢𑁂𑀯𑀲𑀻𑀓𑀢𑀁 𑀇𑀢𑀺𑀲𑀩𑁆𑀩𑀢𑁆𑀣];

𑀅𑀦𑀢𑁆𑀣𑀤𑁄 𑀲𑀤𑀸 𑀳𑁄𑀢𑀺, 𑀧𑀸𑀢𑁂𑀢𑁆𑀯𑀸𑀦 𑀪𑀯𑀸 𑀯𑀝𑁂.

𑁨𑁯. 𑀫𑀸𑀦𑁄 𑀧𑀮𑀸𑀮𑀺𑀢𑁄 𑀲𑀢𑁆𑀢𑁄, 𑀢𑀡𑁆𑀳𑀸𑀧𑀝𑀺𑀖𑀲𑀗𑁆𑀕𑀢𑁄;

𑀫𑀓𑁆𑀓𑀝𑁄𑀭𑀕𑀲𑁄𑀡𑀸𑀤𑀺, 𑀳𑀼𑀢𑁆𑀯𑀸 𑀚𑀸𑀬𑀢𑀺 𑀚𑀸𑀢𑀺𑀲𑀼.

𑁩𑁦. 𑀫𑀸 𑀫𑀸𑀦𑀁 𑀲𑀸𑀫𑀺 𑀧𑀽𑀭𑁂𑀳𑀺, 𑀅𑀢𑁆𑀢𑀸𑀦𑀁 𑀧𑀭𑀺𑀲𑁄𑀥𑀬;

𑀅𑀧𑀭𑀺𑀲𑀼𑀤𑁆𑀥𑀸 𑀲𑀬𑁄 𑀪𑀺𑀓𑁆𑀔𑀼, 𑀤𑀸𑀬𑀓𑀁 𑀦 𑀧𑀭𑀺𑀢𑁄𑀲𑀢𑀺.

𑁩𑁧. 𑀤𑀤𑀦𑁆𑀢𑀸𑀦𑀁 𑀲𑀭𑀦𑁆𑀢𑀸𑀦𑀁, 𑀧𑀽𑀚𑁂𑀦𑁆𑀢𑀸𑀦𑀁 𑀲𑀘𑁂 𑀢𑀼𑀯𑀁;

𑀫𑀳𑀧𑁆𑀨𑀮𑀁 𑀫𑀳𑀸𑀪𑀽𑀢𑀺𑀁, 𑀓𑀸𑀫𑀢𑁆𑀣 𑀳𑁄𑀣 𑀦𑀺𑀩𑁆𑀩𑀡𑀸𑀢𑀺 [𑀦𑀺𑀫𑁆𑀫𑀦𑀸 𑀇𑀢𑀺𑀓𑀢𑁆𑀢𑀘𑀺].

𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀲𑀁𑀲𑀸𑀭𑁂 𑀦𑀺𑀩𑁆𑀩𑀺𑀦𑁆𑀤𑁄 𑀢𑀢𑁆𑀣𑁂𑀯 𑀞𑀺𑀢𑁄 𑀢𑀺𑀮𑀓𑁆𑀔𑀡𑀁 𑀧𑀝𑁆𑀞𑀧𑁂𑀢𑁆𑀯𑀸 𑀓𑀭𑀚𑀓𑀸𑀬𑀁 𑀲𑀫𑁆𑀫𑀲𑀦𑁆𑀢𑁄 𑀲𑀳𑀧𑀝𑀺 𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀯 𑀦𑀺𑀓𑁆𑀔𑀫𑀺. 𑀢𑀢𑁄 𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀸𑀚𑀸 𑀩𑀮𑀯𑀸𑀳𑀦𑀧𑀭𑀺𑀯𑀼𑀢𑁄 𑀫𑀳𑀦𑁆𑀢𑁂𑀦 𑀧𑀽𑀚𑀸𑀯𑀺𑀥𑀸𑀦𑁂𑀦 𑀧𑀝𑀺𑀫𑀕𑁆𑀕𑀁 𑀆𑀕𑀫𑁆𑀫 𑀯𑀦𑁆𑀤𑀺𑀢𑁆𑀯𑀸 𑀢𑀢𑁄 𑀤𑀺𑀕𑀼𑀡𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀼𑀭𑀼𑀫𑀸𑀦𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀣𑁂𑀭𑀁 𑀅𑀢𑁆𑀢𑀦𑁄 𑀦𑀕𑀭𑀁 𑀦𑁂𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀫𑀳𑀦𑁆𑀢𑀁 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀣𑁂𑀭𑁂𑀦 𑀲𑀳𑀸𑀕𑀢𑀸𑀦𑀁 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀢𑀼𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀦 𑀫𑀓𑀸𑀲𑀺, 𑀅𑀣 𑀣𑁂𑀭𑁄 𑀲𑀸𑀝𑁆𑀞𑀓𑀣𑀁 𑀧𑀺𑀝𑀓𑀢𑁆𑀢𑀬𑀁 𑀧𑀓𑀸𑀲𑁂𑀦𑁆𑀢𑁄 𑀢𑀲𑁆𑀫𑀺𑀁 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀢𑁄 𑀭𑀸𑀚𑀸 𑀲𑀧𑀭𑀺𑀲𑁄 𑀢𑀲𑁆𑀲 𑀲𑀭𑀻𑀭𑀦𑀺𑀓𑁆𑀔𑁂𑀧𑀁 𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑀁 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀻𑀢𑀺.

𑁩𑁨. 𑀧𑀼𑀭𑀸𑀢𑀦𑀸𑀦𑀁 𑀪𑀼𑀯𑀺 𑀧𑀼𑀜𑁆𑀜𑀓𑀫𑁆𑀫𑀺𑀦𑀁,

𑀕𑀼𑀡𑀸𑀦𑀼𑀪𑀸𑀯𑁂𑀦 𑀫𑀳𑁂𑀦𑁆𑀢𑀺 𑀏𑀯𑀁;

𑀲𑀤𑁂𑀯𑀓𑀸 𑀦𑀁 𑀫𑀦𑀲𑀻𑀓𑀭𑁄𑀦𑁆𑀢𑀸,

𑀧𑀼𑀜𑁆𑀜𑀁 𑀓𑀭𑁄𑀣𑀸 𑀬𑀢𑀦𑁂 𑀲𑀤𑀸 𑀤𑀭𑀸𑀢𑀺.

𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀁 𑀘𑀢𑀼𑀢𑁆𑀣𑀁.