𑁩𑁨. 𑀲𑀼𑀯𑀡𑁆𑀡𑀢𑀺𑀮𑀓𑀸𑀬 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀮𑀗𑁆𑀓𑀸𑀤𑀻𑀧𑁂 𑀓𑀺𑀭 𑀅𑀦𑀼𑀭𑀸𑀥𑀧𑀼𑀭𑀦𑀕𑀭𑁂 𑀏𑀓𑁄 𑀫𑀸𑀢𑀼𑀕𑀸𑀫𑁄 [𑀏𑀓𑀸𑀫𑀸𑀢𑀼𑀕𑀸𑀫𑀸𑀢𑀺𑀯𑀸 𑀏𑀓𑀸𑀫𑀸𑀢𑀼𑀕𑀸𑀫𑁄𑀢𑀺𑀯𑀸 𑀓𑀢𑁆𑀣𑀘𑀺] 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀦𑀺𑀘𑁆𑀘𑀁 𑀅𑀪𑀬𑀼𑀢𑁆𑀢𑀭𑀘𑁂𑀢𑀺𑀬𑁂 𑀧𑀼𑀧𑁆𑀨𑀧𑀽𑀚𑀁 𑀓𑀭𑁄𑀢𑀺, 𑀅𑀣𑁂𑀓𑀤𑀺𑀯𑀲𑀁 𑀲𑀸 𑀅𑀢𑁆𑀢𑀦𑁄 𑀥𑀻𑀢𑀼𑀬𑀸 𑀲𑀤𑁆𑀥𑀺𑀁 𑀢𑀲𑁆𑀫𑀺𑀁 𑀘𑁂𑀢𑀺𑀬𑁂 𑀧𑀼𑀧𑁆𑀨𑀧𑀽𑀚𑀦𑀢𑁆𑀣𑀸𑀬 [𑀧𑀼𑀧𑁆𑀨𑀧𑀽𑀚𑀢𑁆𑀣𑀸𑀬 𑀇𑀢𑀺𑀓𑀢𑁆𑀣𑀘𑀺] 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀸𑀲𑀦𑀲𑀸𑀮𑀸𑀬 𑀉𑀤𑀓𑀁 𑀅𑀧𑀲𑁆𑀲𑀦𑁆𑀢𑀻 𑀥𑀻𑀢𑀼 𑀳𑀢𑁆𑀣𑁂 𑀧𑀼𑀧𑁆𑀨𑀘𑀗𑁆𑀕𑁄𑀝𑀓𑀁 𑀞𑀧𑁂𑀢𑁆𑀯𑀸 𑀖𑀝 𑀫𑀸𑀤𑀸𑀬 𑀧𑁄𑀓𑁆𑀔𑀭𑀡𑀺𑀁 𑀅𑀕𑀫𑀸𑀲𑀺, 𑀢𑀢𑁄 𑀲𑀸 𑀤𑀸𑀭𑀺𑀓𑀸 𑀫𑀸𑀢𑀭𑀺 𑀅𑀦𑀸𑀕𑀢𑀸𑀬𑀬𑁂𑀯 [𑀅𑀦𑀸𑀕𑀢𑁂𑀬𑁂𑀯 𑀇𑀢𑀺𑀲𑀩𑁆𑀩𑀢𑁆𑀣] 𑀅𑀥𑁄𑀢𑀸𑀲𑀦𑁂 𑀧𑀼𑀧𑁆𑀨𑀫𑀼𑀝𑁆𑀞𑀺𑀁𑀕𑀳𑁂𑀢𑁆𑀯𑀸 𑀫𑀡𑁆𑀟𑀮𑀁 𑀓𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀏𑀯𑀁 𑀧𑀢𑁆𑀣𑀦𑀫𑀓𑀸𑀲𑀺. 𑀢𑀣𑀸 𑀳𑀺.

𑁧. 𑀫𑀳𑀸𑀯𑀻𑀭𑀲𑁆𑀲 𑀥𑀻𑀭𑀲𑁆𑀲, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀺𑀮𑁄𑀓𑀕𑁆𑀕𑀲𑁆𑀲 𑀦𑀸𑀣𑀲𑁆𑀲, 𑀪𑀕𑀯𑀦𑁆𑀢𑀲𑁆𑀲 𑀲𑀢𑁆𑀣𑀼𑀦𑁄.

𑁨. 𑀬 𑀫𑀳𑀁 𑀧𑀽𑀚𑀬𑀺𑀁 𑀧𑀼𑀧𑁆𑀨𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸;

𑀭𑀽𑀧𑀻𑀦𑀁 𑀧𑀯𑀭𑀸 𑀳𑁂𑀲𑁆𑀲𑀁, 𑀆𑀭𑁄𑀳𑀧𑀭𑀺𑀡𑀸𑀳𑀯𑀸.

𑁩. 𑀫𑀁 𑀤𑀺𑀲𑁆𑀯𑀸 𑀧𑀼𑀭𑀺𑀲𑀸 𑀲𑀩𑁆𑀩𑁂, 𑀫𑀼𑀘𑁆𑀙𑀦𑁆𑀢𑀼 𑀓𑀸𑀫𑀫𑀼𑀘𑁆𑀙𑀺𑀢𑀸;

𑀦𑀺𑀘𑁆𑀙𑀭𑀦𑁆𑀢𑀼 𑀲𑀭𑀻𑀭𑀸 𑀫𑁂, 𑀭𑀁𑀲𑀺𑀫𑀸𑀮𑀻𑀯 𑀭𑀁𑀲𑀺𑀬𑁄.

𑁪. 𑀳𑀤𑀬𑀗𑁆𑀕𑀫𑀸 𑀓𑀡𑁆𑀡𑀲𑀼𑀔𑀸, 𑀫𑀜𑁆𑀚𑀼𑀪𑀸𑀡𑀻 𑀲𑀼𑀪𑀸 𑀫𑀫;

𑀓𑀺𑀦𑁆𑀦𑀭𑀸𑀦𑀁 𑀬𑀣𑀸 𑀯𑀸𑀡𑀻, 𑀏𑀯𑀫𑁂𑀯 𑀧𑀯𑀢𑁆𑀢𑀢𑀽𑀢𑀺.

𑀅𑀣𑀲𑁆𑀲𑀸 𑀫𑀸𑀢𑀸 𑀆𑀕𑀫𑁆𑀫 𑀅𑀥𑁄𑀢𑀸𑀲𑀦𑁂 𑀧𑀽𑀚𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀤𑀺𑀲𑁆𑀯𑀸 𑀓𑀲𑁆𑀫𑀸 𑀘𑀡𑁆𑀟𑀸𑀮𑀻 𑀅𑀥𑁄𑀢𑀸𑀲𑀦𑁂 𑀪𑀕𑀯𑀢𑁄 𑀧𑀼𑀧𑁆𑀨𑀸𑀦𑀺 𑀧𑀽𑀚𑁂𑀲𑀺, 𑀅𑀬𑀼𑀢𑁆𑀢𑀁 𑀢𑀬𑀸 𑀓𑀢𑀦𑁆𑀢𑀺 𑀆𑀳, 𑀢𑀁 𑀲𑀼𑀢𑁆𑀯𑀸 𑀲𑀸 𑀫𑀸𑀢𑀼𑀬𑀸 𑀓𑀼𑀚𑁆𑀛𑀺𑀢𑁆𑀯𑀸 𑀢𑁆𑀯𑀁 𑀘𑀡𑁆𑀟𑀸𑀮𑀻𑀢𑀺 𑀅𑀓𑁆𑀓𑁄𑀲𑀺, 𑀲𑀸 𑀏𑀢𑁆𑀢𑀓𑀁 𑀧𑀼𑀜𑁆𑀜𑀸𑀧𑀼𑀜𑁆𑀜𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀢𑀢𑁄 𑀘𑀼𑀢𑀸 𑀚𑀫𑁆𑀩𑀼𑀤𑀻𑀧𑁂 𑀉𑀢𑁆𑀢𑀭𑀫𑀥𑀼𑀭𑀸𑀬𑀁 𑀏𑀓𑀲𑁆𑀲 𑀘𑀡𑁆𑀟𑀸𑀮𑀕𑀦𑁆𑀥𑀩𑁆𑀩𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀉𑀢𑁆𑀢𑀫𑀭𑀽𑀧𑀥𑀭𑀸 𑀅𑀳𑁄𑀲𑀺, 𑀢𑀲𑁆𑀲𑀸 𑀲𑀭𑀻𑀭𑀢𑁄 𑀫𑁂𑀖𑀫𑀼𑀔𑀢𑁄 𑀯𑀺𑀚𑁆𑀚𑀼𑀮𑁆𑀮𑀢𑀸𑀯𑀺𑀬 𑀭𑀁𑀲𑀺𑀬𑁄 𑀦𑀺𑀘𑁆𑀙𑀭𑀦𑁆𑀢𑀺. 𑀲𑀫𑀦𑁆𑀢𑀸 𑀘𑀢𑀼𑀳𑀢𑁆𑀣𑀝𑁆𑀞𑀸𑀦𑁂 𑀲𑀭𑀻𑀭𑀧𑁆𑀧𑀪𑀸𑀬 𑀅𑀦𑁆𑀥𑀓𑀸𑀭𑁂 𑀯𑀺𑀥𑀫𑀢𑀺. 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀺, 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄, 𑀢𑀲𑁆𑀲𑀸 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦 𑀫𑀦𑁆𑀢𑀭𑁂 𑀲𑀼𑀯𑀡𑁆𑀡𑀯𑀡𑁆𑀡𑀁 𑀏𑀓𑀁 𑀢𑀺𑀮𑀓𑀁 𑀅𑀳𑁄𑀲𑀺, 𑀢𑁂𑀦 𑀩𑀸𑀮𑀲𑀼𑀭𑀺𑀬𑀲𑁆𑀲 𑀯𑀺𑀬 𑀧𑀪𑀸 𑀦𑀺𑀘𑁆𑀙𑀭𑀢𑀺. 𑀤𑀺𑀝𑁆𑀞𑀤𑀺𑀝𑁆𑀞𑀸 𑀬𑁂𑀪𑀼𑀬𑁆𑀬𑁂𑀦 𑀉𑀫𑁆𑀫𑀢𑁆𑀢𑀸 𑀯𑀺𑀬 𑀓𑀸𑀫𑀫𑀤𑁂𑀦 𑀯𑀺𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺, 𑀅𑀳𑁄 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀆𑀦𑀼𑀪𑀸𑀯𑁄. 𑀢𑀣𑀸 𑀳𑀺.

𑁫. 𑀬𑁂𑀦 𑀲𑀸 𑀓𑁄𑀥𑀲𑀸𑀫𑀸𑀢𑀼, 𑀘𑀡𑁆𑀟𑀸𑀮𑀻 𑀇𑀢𑀺 𑀪𑀸𑀲𑀺𑀢𑀸;

𑀢𑁂𑀦 𑀲𑀸 𑀆𑀲𑀺 𑀘𑀡𑁆𑀟𑀸𑀮𑀻, 𑀚𑁂𑀕𑀼𑀘𑁆𑀙𑀸 𑀳𑀻𑀦𑀚𑀸𑀢𑀺𑀓𑀸.

𑁬. 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥, 𑀕𑀼𑀡𑀁 𑀧𑀽𑀚𑁂𑀲𑀺 𑀬𑀁 𑀢𑀤𑀸;

𑀢𑁂𑀦 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦, 𑀲𑀸 𑀪𑀺𑀭𑀽𑀧𑀻 𑀫𑀦𑁄𑀭𑀫𑀸.

𑁭. 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦, 𑀧𑀼𑀜𑁆𑀜𑀧𑀸𑀧𑀸𑀦𑀺 𑀬𑁄 𑀓𑀭𑁂;

𑀢𑀲𑁆𑀲 𑀢𑀲𑁆𑀲𑀸𑀦𑀼𑀭𑀽𑀧𑁂𑀦, 𑀫𑁄𑀭𑁄𑀯 𑀮𑀪𑀢𑁂 𑀨𑀮𑀁.

𑁮. 𑀧𑀸𑀧𑁂𑀦 𑀘 𑀢𑀺𑀭𑀘𑁆𑀙𑀸𑀦𑁂, 𑀚𑀸𑀬𑀦𑁆𑀢𑀺 𑀓𑀼𑀲𑀮𑁂𑀦 𑀢𑁂;

𑀯𑀡𑁆𑀡𑀧𑁄𑀓𑁆𑀔𑀭𑀢𑀸 𑀳𑁄𑀢𑀺, 𑀫𑁄𑀭𑀸𑀦𑀁 𑀓𑀫𑁆𑀫 𑀫𑀻𑀤𑀺𑀲𑀦𑁆𑀢𑀺.

𑀢𑀢𑁄 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀲𑀼𑀯𑀡𑁆𑀡𑀢𑀺𑀮𑀓𑀸𑀢𑀺 𑀦𑀸𑀫 𑀫𑀓𑀁𑀲𑀼. 𑀢𑀲𑁆𑀫𑀺𑀁𑀓𑀺𑀭 𑀦𑀕𑀭𑁂 𑀫𑀦𑀼𑀲𑁆𑀲𑀸 𑀢𑀲𑁆𑀲𑀸 𑀭𑀼𑀧𑀤𑀲𑁆𑀲𑀦𑁂𑀦𑀘 𑀲𑀯𑀡𑁂𑀦𑀘 𑀲𑀫𑁆𑀧𑀢𑁆𑀢𑀸𑀧𑀺 𑀘𑀡𑁆𑀟𑀸𑀮𑀥𑀻𑀢𑀸 𑀅𑀬𑀦𑁆𑀢𑀺 𑀧𑀭𑀺𑀪𑀯𑀪𑀬𑁂𑀦 𑀆𑀯𑀸𑀳𑀁 𑀦 𑀓𑀭𑁄𑀦𑁆𑀢𑀺. 𑀅𑀣 𑀢𑀲𑁆𑀫𑀺𑀁 𑀦𑀕𑀭𑁂 𑀚𑁂𑀝𑁆𑀞𑀘𑀡𑁆𑀟𑀸𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀸𑀬 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀲𑀦𑁆𑀢𑀺𑀓𑀁 𑀯𑀢𑁆𑀣𑀸𑀪𑀭𑀡𑀕𑀦𑁆𑀥𑀫𑀸𑀮𑀸𑀤𑀬𑁄 𑀧𑁂𑀲𑁂𑀲𑀺 𑀲𑀼𑀯𑀡𑁆𑀡𑀢𑀺𑀮𑀓𑀁 𑀅𑀫𑁆𑀳𑀸𑀓𑀁 𑀤𑀤𑀦𑁆𑀢𑀽𑀢𑀺, 𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀢𑀲𑁆𑀲𑀸 𑀆𑀭𑁄𑀘𑁂𑀲𑀼𑀁. 𑀲𑀸𑀲𑁆𑀲 𑀚𑀺𑀕𑀼𑀘𑁆𑀙𑀦𑁆𑀢𑀻 𑀧𑀭𑀺𑀳𑀸𑀲 𑀫𑀓𑀸𑀲𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀮𑀚𑁆𑀚𑀺𑀢𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀻𑀡𑀁 𑀫𑀼𑀜𑁆𑀘𑁂𑀢𑁆𑀯𑀸 𑀕𑀸𑀬𑀫𑀸𑀦𑁄 𑀏𑀯𑀫𑀸𑀳.

𑁯. 𑀮𑀮𑀦𑀸 𑀦𑀦𑀸𑀦𑀻 𑀘𑀮𑀮𑁄𑀘𑀦𑀸𑀦𑀻,

𑀢𑀭𑀼𑀡𑀸 𑀭𑀼𑀡𑀸𑀦𑀻 𑀘𑀮𑀺𑀢𑀸𑀥𑀭𑀸𑀡𑀻;

𑀫𑀦𑀼𑀚𑁄 𑀳𑀺 𑀬𑁄 𑀦𑁂𑀢𑁆𑀢𑀧𑀺𑀬𑀁 𑀓𑀭𑁄𑀢𑀺,

𑀲 𑀢𑀼 𑀦𑀻𑀘𑀚𑀸𑀢𑀺𑀁 𑀅𑀧𑀺 𑀦𑁄 𑀚𑀳𑀸𑀢𑀺.

𑀓𑀺𑀫𑀺𑀤𑀦𑁆𑀢𑀺 𑀭𑀜𑁆𑀜𑀸 𑀧𑀼𑀝𑁆𑀞𑁄 𑀆𑀳.

𑁧𑁦. 𑀲𑀫𑁂𑀢𑀺 𑀓𑀺𑀁 𑀤𑁂𑀯 𑀙𑀫𑀸𑀬 𑀫𑀢𑁆𑀢𑀺𑀓𑀸,

𑀓𑀤𑀸𑀘𑀺 𑀘𑀸𑀫𑀻𑀓𑀭𑀚𑀸𑀢𑀺𑀓𑀸𑀬;

𑀲𑀺𑀕𑀸𑀮𑀥𑁂𑀦𑀼 𑀅𑀧𑀺 𑀦𑀻𑀘𑀚𑀸𑀢𑀺𑀓𑀸,

𑀲𑀫𑁂𑀢𑀺 𑀓𑀺𑀁𑀲𑀻𑀳𑀯𑀭𑁂𑀦 𑀤𑁂𑀯𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀤𑁂𑀯 𑀇𑀫𑀲𑁆𑀫𑀺𑀁𑀦𑀕𑀭𑁂 𑀲𑀼𑀯𑀡𑁆𑀡𑀢𑀺𑀮𑀓𑀸 𑀦𑀸𑀫𑁂𑀓𑀸 𑀘𑀡𑁆𑀟𑀸𑀮𑀥𑀻𑀢𑀸 𑀅𑀢𑁆𑀣𑀺, 𑀲𑀸 𑀲𑀫𑀸𑀦𑀚𑀸𑀢𑀺𑀓𑁂𑀳𑀺 𑀧𑁂𑀲𑀺𑀢𑀧𑀡𑁆𑀡𑀸𑀓𑀸𑀭𑀁 𑀦 𑀕𑀡𑁆𑀳𑀸𑀢𑀺, 𑀓𑀼𑀮𑀯𑀦𑁆𑀢𑁂𑀬𑁂𑀯 𑀧𑀢𑁆𑀣𑁂𑀢𑀺, 𑀓𑀤𑀸 𑀦𑀸𑀫 𑀓𑀸𑀓𑀻 𑀲𑀼𑀯𑀡𑁆𑀡𑀳𑀁𑀲𑁂𑀦 𑀲𑀫𑀸𑀕𑀘𑁆𑀙𑀢𑀺 𑀤𑁂𑀯𑀸𑀢𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀧𑀺𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀫𑀢𑁆𑀣𑀁 𑀯𑀢𑁆𑀯𑀸 𑀲𑀘𑁆𑀘𑀁 𑀪𑀡𑁂𑀢𑀺 𑀧𑀼𑀘𑁆𑀙𑀺, 𑀲𑁄𑀧𑀺 𑀲𑀘𑁆𑀘𑀁 𑀤𑁂𑀯, 𑀲𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀫𑁂𑀯 𑀓𑀸𑀫𑁂𑀢𑀻𑀢𑀺 𑀆𑀳. 𑀭𑀸𑀚𑀸 𑀏𑀯𑀁 𑀲𑀢𑀺 𑀪𑀡𑁂 𑀧𑀜𑁆𑀘𑀫𑀥𑀼𑀭𑀦𑀕𑀭𑁂 𑀉𑀤𑁆𑀤𑀸𑀴𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀅𑀢𑁆𑀣𑀺, 𑀲𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀫𑀸𑀢𑀺𑀢𑁄𑀘 𑀧𑀺𑀢𑀺𑀢𑁄𑀘 𑀅𑀦𑀼𑀧𑀓𑁆𑀓𑀼𑀝𑁆𑀞𑁄, 𑀚𑁂𑀕𑀼𑀘𑁆𑀙𑀸 𑀧𑀝𑀺𑀓𑁆𑀓𑀽𑀮𑀸 𑀏𑀢𑀸𑀢𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦 𑀲𑀁𑀯𑀲𑀢𑀺. 𑀅𑀢𑁆𑀢𑀦𑁄 𑀕𑁂𑀳𑀢𑁄 𑀭𑀸𑀚𑀕𑁂𑀳𑀁 𑀕𑀘𑁆𑀙𑀦𑁆𑀢𑁄𑀘 𑀆𑀕𑀘𑁆𑀙𑀦𑁆𑀢𑁄 𑀘 𑀲𑁄𑀴𑀲𑀔𑀻𑀭𑁄𑀤𑀓𑀖𑀝𑁂𑀳𑀺 𑀫𑀕𑁆𑀕𑁂 𑀲𑀺𑀜𑁆𑀘𑀸𑀧𑁂𑀲𑀺. 𑀫𑀸𑀢𑀼𑀕𑀸𑀫𑁂 𑀤𑀺𑀲𑁆𑀯𑀸 𑀓𑀸𑀮𑀓𑀡𑁆𑀡𑀻 𑀫𑀬𑀸 𑀤𑀺𑀝𑁆𑀞𑀸𑀢𑀺 𑀔𑀻𑀭𑁄𑀤𑀓𑁂𑀦 𑀫𑀼𑀔𑀁 𑀥𑁄𑀯𑀢𑀺. 𑀢𑀯 𑀥𑀻𑀢𑀸 𑀲𑀓𑁆𑀓𑁄𑀦𑁆𑀢𑀻 𑀢𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀢𑀼, 𑀏𑀢𑀫𑀢𑁆𑀣𑀁 𑀢𑀯 𑀥𑀻𑀢𑀭𑀁 𑀓𑀣𑁂𑀳𑀻𑀢𑀺 𑀆𑀳, 𑀲𑁄𑀧𑀺 𑀢𑀁 𑀲𑀼𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀥𑀻𑀢𑀭𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀭𑀜𑁆𑀜𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀢𑀲𑁆𑀲𑀸 𑀓𑀣𑁂𑀲𑀺. 𑀢𑀸𑀬 𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄𑀦𑁆𑀢𑀻 𑀅𑀳𑀁 𑀉𑀤𑁆𑀤𑀸𑀴𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀯𑀲𑀺𑀲𑁆𑀲𑀸𑀫𑀺, 𑀫𑀸 𑀢𑀼𑀫𑁆𑀳𑁂 𑀘𑀺𑀦𑁆𑀢𑁂𑀣, 𑀧𑀧𑀜𑁆𑀘𑀫𑁆𑀧𑀺 𑀫𑀸 𑀓𑀭𑁄𑀣, 𑀧𑀸𑀢𑁄𑀯 𑀕𑀫𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑁂 𑀧𑀺𑀢𑀸 𑀧𑀦𑀲𑁆𑀲𑀸 𑀲𑀸𑀥𑀽𑀢𑀺 𑀲𑀳𑀲𑁆𑀲𑀕𑁆𑀖𑀦𑀓𑀘𑀺𑀢𑁆𑀢𑀓𑀫𑁆𑀩𑀮𑀓𑀜𑁆𑀘𑀼𑀓𑁂𑀦 𑀥𑀻𑀢𑀼 𑀲𑀭𑀻𑀭𑀁 𑀧𑀸𑀭𑀼𑀧𑀸𑀧𑁂𑀢𑁆𑀯𑀸 𑀯𑀻𑀡𑀸𑀤𑀺𑀢𑀼𑀭𑀺𑀬𑀪𑀡𑁆𑀟𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀥𑀻𑀢𑀼𑀬𑀸 𑀲𑀤𑁆𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀕𑀭𑁂 𑀭𑀜𑁆𑀜𑁄 𑀕𑀦𑁆𑀥𑀩𑁆𑀩𑀁 𑀓𑀭𑁄𑀦𑁆𑀢𑁄 𑀥𑀻𑀢𑀭𑀁 𑀧𑀺𑀝𑁆𑀞𑀺𑀧𑀲𑁆𑀲𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀦𑁆𑀥𑀩𑁆𑀩𑀫𑀓𑀸𑀲𑀺. 𑀅𑀣𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑀦𑀺𑀲𑀺𑀦𑁆𑀦𑀸 𑀲𑀼𑀯𑀡𑁆𑀡𑀢𑀺𑀮𑀓𑀸 𑀦𑀬𑀦𑀓𑁄𑀝𑀺𑀬𑀸 𑀤𑀺𑀝𑁆𑀞𑀺𑀁 𑀧𑀸𑀧𑁂𑀦𑁆𑀢𑀻 𑀲𑀭𑀲𑁂𑀦 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀧𑀸𑀭𑀼𑀢𑀓𑀜𑁆𑀘𑀼𑀓𑀁 𑀓𑀺𑀜𑁆𑀘𑀺 𑀅𑀧𑀦𑁂𑀢𑁆𑀯𑀸 𑀲𑀭𑀻𑀭𑀧𑁆𑀧𑀪𑀁 𑀧𑀜𑁆𑀜𑀸𑀧𑁂𑀲𑀺, 𑀭𑀸𑀚𑀸 𑀧𑀦𑀲𑁆𑀲𑀸 𑀲𑀭𑀻𑀭𑀧𑁆𑀧𑀪𑀁𑀘 𑀭𑀽𑀧𑀲𑀫𑁆𑀧𑀤𑀁𑀘 𑀤𑀺𑀲𑁆𑀯𑀸 𑀓𑀸𑀫𑀸𑀢𑀼𑀭𑁄 𑀯𑀺𑀕𑀢𑀲𑀜𑁆𑀜𑁄 𑀲𑀫𑁆𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦 𑀧𑀝𑀺𑀮𑀤𑁆𑀥𑀲𑁆𑀲𑀸𑀲𑁄 𑀢𑀲𑁆𑀲𑀸 𑀲𑀲𑁆𑀲𑀸𑀫𑀺𑀓𑀸𑀲𑁆𑀲𑀸𑀫𑀺𑀓𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 𑀘𑀡𑁆𑀟𑀸𑀮𑀥𑀻𑀢𑀸𑀢𑀺 𑀲𑀼𑀢𑁆𑀯𑀸 𑀧𑀭𑀺𑀪𑀯𑀪𑀬𑁂𑀦 𑀢𑀁 𑀆𑀦𑁂𑀢𑀼 𑀫𑀲𑀓𑁆𑀓𑁄𑀦𑁆𑀢𑁄 𑀏𑀯𑀭𑀽𑀧𑀁 𑀯𑀡𑁆𑀡𑀧𑁄𑀓𑁆𑀔𑀭𑀲𑀫𑁆𑀧𑀦𑁆𑀦𑀁 𑀇𑀢𑁆𑀣𑀺𑀭𑀢𑀦𑀁 𑀅𑀮𑀪𑀦𑁆𑀢𑀲𑁆𑀲 𑀫𑁂 𑀓𑁄 𑀅𑀢𑁆𑀣𑁄 𑀚𑀻𑀯𑀺𑀢𑁂𑀦𑀸𑀢𑀺 𑀲𑁄𑀘𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀓𑀸𑀫𑀫𑀼𑀘𑁆𑀙𑀺𑀢𑁄 𑀓𑀢𑁆𑀢𑀩𑁆𑀩𑀸 𑀓𑀢𑁆𑀢𑀩𑁆𑀩𑀁 𑀅𑀚𑀸𑀦𑀦𑁆𑀢𑁄 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀲𑀁 𑀲𑀬𑀫𑁂𑀯 𑀙𑀺𑀦𑁆𑀤𑀺𑀢𑁆𑀯𑀸 𑀓𑀸𑀮 𑀫𑀓𑀸𑀲𑀺. 𑀏𑀯𑀫𑁂𑀯 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀜𑁆𑀘𑀭𑀸𑀚𑀸𑀦𑁄 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀫𑀤𑀫𑀢𑁆𑀢𑀸 𑀅𑀲𑀺𑀦𑀸 𑀙𑀺𑀦𑁆𑀦𑀲𑀻𑀲𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀣𑀸 𑀳𑀺 𑀲𑀢𑁆𑀢𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀤𑀸𑀲𑀺𑀤𑀸𑀲 𑀧𑀼𑀢𑁆𑀢𑀤𑀸𑀭𑀸𑀤𑀻𑀲𑀼 [𑀧𑀼𑀢𑁆𑀢𑀤𑀸𑀭𑀸𑀤𑀻𑀳𑀺 𑀇𑀢𑀺𑀲𑀩𑁆𑀩𑀢𑁆𑀣] 𑀧𑀺𑀬𑀁 𑀦𑀺𑀲𑁆𑀲𑀸𑀬 𑀓𑀸𑀫𑁂𑀦 𑀫𑀼𑀘𑁆𑀙𑀺𑀢𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸.

𑁧𑁧. 𑀧𑀺𑀬𑀢𑁄 𑀚𑀸𑀬𑀢𑁂 𑀲𑁄𑀓𑁄,

𑀧𑀺𑀬𑀢𑁄 𑀚𑀸𑀬𑀢𑁂 𑀪𑀬𑀁;

𑀧𑀺𑀬𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁧𑁨. 𑀧𑁂𑀫𑀢𑁄 𑀚𑀸𑀬𑀢𑁂 𑀲𑁄𑀓𑁄,

𑀧𑁂𑀫𑀢𑁄 𑀚𑀸𑀬𑀢𑁂 𑀪𑀬𑀁;

𑀧𑁂𑀫𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁧𑁩. 𑀭𑀢𑀺𑀬𑀸 𑀚𑀸𑀬𑀢𑁂 𑀲𑁄𑀓𑁄,

𑀭𑀢𑀺𑀬𑀸 𑀚𑀸𑀬𑀢𑁂 𑀪𑀬𑀁;

𑀭𑀢𑀺𑀬𑀸 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁧𑁪. 𑀓𑀸𑀫𑀢𑁄 𑀚𑀸𑀬𑀢𑁂 𑀲𑁄𑀓𑁄,

𑀓𑀸𑀫𑀢𑁄 𑀚𑀸𑀬𑀢𑁂 𑀪𑀬𑀁;

𑀓𑀸𑀫𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁧𑁫. 𑀢𑀡𑁆𑀳𑀸𑀬 𑀚𑀸𑀬𑀢𑁂 𑀲𑁄𑀓𑁄,

𑀢𑀡𑁆𑀳𑀸𑀬 𑀚𑀸𑀬𑀢𑁂 𑀪𑀬𑀁;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑀢𑀢𑁄 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀧𑀜𑁆𑀘𑀫𑀥𑀼𑀭𑀦𑀕𑀭𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀭𑀜𑁆𑀜𑀸 𑀓𑀣𑀸𑀧𑁂𑀢𑁆𑀯𑀸 𑀢𑁂𑀦 𑀅𑀦𑀼𑀜𑁆𑀜𑀸𑀢𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀅𑀤𑁆𑀤𑀲. 𑀢𑀤𑀸 𑀉𑀤𑁆𑀤𑀸𑀴𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 𑀅𑀯𑀺𑀤𑀽𑀭𑁂 𑀓𑀫𑁆𑀩𑀮𑀪𑀤𑁆𑀤𑀧𑀻𑀞𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀕𑀦𑁆𑀥𑀩𑁆𑀩𑀩𑁆𑀭𑀸𑀳𑁆𑀫𑀡𑁄𑀧𑀺 𑀥𑀻𑀢𑀼𑀬𑀸 𑀲𑀤𑁆𑀥𑀺𑀁 𑀕𑀦𑁆𑀥𑀩𑁆𑀩𑀁 𑀓𑀼𑀭𑀼𑀫𑀸𑀦𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁𑀔𑀡𑁂 𑀧𑀺𑀢𑀼 𑀧𑀺𑀝𑁆𑀞𑀺𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑀸 𑀲𑀼𑀯𑀡𑁆𑀡𑀢𑀺𑀮𑀓𑀸 𑀉𑀤𑁆𑀤𑀸𑀴𑀩𑁆𑀭𑀸𑀳𑁆𑀫𑀡𑁄 𑀓𑀢𑀫𑁄𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀏𑀢𑀲𑁆𑀫𑀺𑀁 𑀪𑀤𑁆𑀤𑀧𑀻𑀞𑁂 𑀦𑀺𑀲𑀺𑀦𑁆𑀦𑁄𑀁 𑀏𑀲𑁄𑀢𑀺 𑀲𑀼𑀢𑁆𑀯𑀸 𑀦𑀺𑀮𑀸𑀫𑀮𑀮𑁄𑀘𑀦𑁂𑀳𑀺 𑀢𑀁 𑀑𑀮𑁄𑀓𑀦𑁆𑀢𑀺 𑀤𑀲𑀦𑀭𑀁𑀲𑀺𑀦𑀸 𑀲𑀫𑁆𑀪𑀺𑀦𑁆𑀦𑀲𑀼𑀭𑀢𑁆𑀢𑀸𑀥𑀭𑁂𑀦 𑀫𑀦𑁆𑀤𑀳𑀲𑀺𑀢𑀁 𑀓𑀭𑁄𑀦𑁆𑀢𑀻 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀧𑀸𑀭𑀼𑀢𑀓𑀜𑁆𑀘𑀼𑀓𑀁 𑀅𑀧𑀦𑁂𑀢𑁆𑀯𑀸 𑀲𑀭𑀻𑀭𑀧𑁆𑀧𑀪𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀉𑀫𑁆𑀫𑀢𑁆𑀢𑁄 𑀲𑁄𑀓𑁂𑀦 𑀧𑀭𑀺𑀤𑀟𑁆𑀠𑀕𑀢𑁆𑀢𑁄 𑀉𑀡𑁆𑀳𑀯𑀸𑀢𑁂𑀦 𑀧𑀽𑀭𑀺𑀢𑀫𑀼𑀔𑀦𑀸𑀲𑁄 𑀅𑀲𑁆𑀲𑀼𑀦𑀸 𑀓𑀺𑀮𑀺𑀦𑁆𑀦𑀦𑁂𑀢𑁆𑀢𑁄 𑀯𑀺𑀲𑀜𑁆𑀜𑀻 𑀅𑀳𑁄𑀲𑀺. 𑀢𑀢𑁄 𑀲𑁄 𑀫𑀼𑀳𑀼𑀢𑁆𑀢𑁂𑀦 𑀮𑀤𑁆𑀥𑀲𑁆𑀲𑀸𑀲𑁄 𑀭𑁄𑀕𑀻𑀯𑀺𑀬 𑀭𑀜𑁆𑀜𑁄 𑀲𑀓𑀸𑀲𑀸 𑀅𑀧𑀲𑀭𑀦𑁆𑀢𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀲𑀼𑀳𑀤𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑁂𑀲𑀁 𑀏𑀯𑀫𑀸𑀳. 𑀪𑀯𑀦𑁆𑀢𑁂𑀢𑁆𑀣.

𑁧𑁬. 𑀬𑁄 𑀆𑀧𑀤𑁂 𑀲𑀫𑀼𑀧𑁆𑀧𑀦𑁆𑀦𑁂,

𑀉𑀧𑀢𑀺𑀝𑁆𑀞𑀢𑀺 𑀲𑀦𑁆𑀢𑀺𑀓𑁂;

𑀲𑀼𑀔𑀤𑀼𑀓𑁆𑀔𑁂 𑀲𑀫𑁄 𑀳𑁄𑀢𑀺,

𑀲𑁄 𑀫𑀺𑀢𑁆𑀢𑁄 𑀲𑁄𑀘 𑀜𑀸𑀢𑀓𑁄.

𑁧𑁭. 𑀬𑁄 𑀕𑀼𑀡𑀁 𑀪𑀸𑀲𑀢𑁂 𑀬𑀲𑁆𑀲, 𑀅𑀕𑀼𑀡𑀜𑁆𑀘 𑀦𑀺𑀕𑀽𑀳𑀢𑀺;

𑀧𑀝𑀺𑀲𑁂𑀥𑁂𑀢𑁆𑀬 [𑀧𑀝𑀺𑀲𑁂𑀥𑁂𑀢𑀺𑀓𑀢𑁆𑀢𑀩𑁆𑀩𑀸 𑀇𑀢𑀺𑀲𑀩𑁆𑀩𑀢𑁆𑀣] 𑀓𑀢𑁆𑀢𑀩𑁆𑀩𑀸, 𑀲𑁄 𑀫𑀺𑀢𑁆𑀢𑁄 𑀲𑁄𑀘 𑀜𑀸𑀢𑀓𑁄.

𑁧𑁮. 𑀲𑀼𑀯𑀡𑁆𑀡𑀢𑀺𑀮𑀓𑀸𑀦𑀸𑀫, 𑀮𑀮𑀦𑀸 𑀓𑀸𑀫𑀮𑀸𑀮𑀬𑀸;

𑀦𑀻𑀮𑀓𑁆𑀔𑀺𑀘𑀡𑁆𑀟𑀓𑀡𑁆𑀟𑁂𑀳𑀺, 𑀯𑀺𑀔𑀡𑁆𑀟𑁂𑀲𑀺 𑀫𑀦𑁄 𑀫𑀫.

𑁧𑁯. 𑀢𑀲𑁆𑀲𑀸 𑀫𑀼𑀔𑀫𑁆𑀩𑀼𑀚𑁂 𑀲𑀢𑁆𑀢𑀸, 𑀫𑀫 𑀦𑁂𑀢𑁆𑀢𑀫𑀥𑀼𑀩𑁆𑀩𑀢𑀸,

𑀅𑀧𑁆𑀧𑀫𑁆𑀧𑀺𑀦 𑀲𑀭𑀦𑁆𑀢𑀸𑀫𑀁, 𑀢𑀢𑁆𑀣𑁂𑀯𑀸 𑀪𑀺𑀭𑀫𑀦𑁆𑀢𑀺 𑀢𑁂.

𑁨𑁦. 𑀲𑀳𑁂𑀯 𑀢𑁂𑀳𑀺 𑀫𑁂 𑀘𑀺𑀢𑁆𑀢𑀁, 𑀕𑀢𑀁 𑀉𑀮𑁆𑀮𑀁𑀖𑀺𑀬𑀼𑀤𑁆𑀥𑀢𑁄;

𑀮𑀚𑁆𑀚𑀸𑀕𑀫𑁆𑀪𑀻𑀭𑀧𑀭𑀺𑀔𑀁, 𑀥𑀺𑀢𑀺𑀧𑀸𑀓𑀸𑀭𑀫𑀼𑀕𑁆𑀕𑀢𑀁.

𑁨𑁧. 𑀲𑀫𑁆𑀫𑀼𑀬𑁆𑀳𑀸𑀫𑀺 𑀧𑀫𑀼𑀬𑁆𑀳𑀸𑀫𑀺, 𑀲𑀩𑁆𑀩𑀸 𑀫𑀼𑀬𑁆𑀳𑀦𑁆𑀢𑀺 𑀫𑁂 𑀤𑀺𑀲𑀸;

𑀢𑀲𑁆𑀲 𑀫𑁂 𑀲𑀭𑀡𑀁 𑀳𑁄𑀣, 𑀓𑀭𑁄𑀣 𑀫𑀫 𑀲𑀗𑁆𑀕𑀳𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀢𑁂 𑀏𑀯𑀫𑀸𑀳𑀁𑀲𑀼.

𑁨𑁨. 𑀬𑀁 𑀢𑁆𑀯𑀫𑀸𑀘𑀭𑀺𑀬 𑀧𑀢𑁆𑀣𑁂𑀲𑀺, 𑀘𑀡𑁆𑀟𑀸𑀮𑀻 𑀲𑀸 𑀅𑀲𑀗𑁆𑀕𑀫𑀸;

𑀓𑀺𑀦𑁆𑀦𑀼 𑀫𑀻𑀴𑁆𑀳𑁂𑀦 𑀲𑀁𑀬𑁄𑀕𑁄, 𑀘𑀦𑁆𑀤𑀦𑀲𑁆𑀲 𑀓𑀤𑀸 𑀲𑀺𑀬𑀸.

𑁨𑁩. 𑀅𑀕𑀫𑁆𑀫𑀕𑀫𑀦𑀸 𑀬𑀸𑀢𑀺, 𑀦𑀭𑀸𑀦𑀁 𑀤𑀽𑀭𑀢𑁄 𑀲𑀺𑀭𑀻;

𑀓𑀺𑀢𑁆𑀢𑀺𑀘𑀸𑀬𑀼 𑀩𑀮𑀁 𑀩𑀼𑀤𑁆𑀥𑀺, 𑀅𑀬𑀲𑀁𑀘 𑀲 𑀕𑀘𑁆𑀙𑀢𑀻𑀢𑀺.

𑀅𑀣 𑀢𑁂𑀲𑀁 𑀩𑁆𑀭𑀳𑁆𑀫𑀡𑁄 𑀆𑀳.

𑁨𑁪. 𑀦 𑀧𑀭𑀺𑀘𑁆𑀘𑀚𑀢𑀺 𑀮𑁄𑀓𑁄𑀬𑀁, 𑀅𑀫𑁂𑀚𑁆𑀛𑁂 𑀫𑀡𑀺𑀫𑀼𑀢𑁆𑀢𑀫𑀁;

𑀣𑀻𑀭𑀢𑀦𑀁 𑀬𑀼𑀯𑀸𑀡𑀻 𑀘, 𑀤𑀼𑀓𑁆𑀓𑀼𑀮𑀸 𑀅𑀧𑀺 𑀕𑀸𑀳𑀺𑀬𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀲𑁆𑀲𑀸 𑀲𑀲𑁆𑀲𑀸𑀫𑀺𑀓𑀸𑀲𑁆𑀲𑀸𑀫𑀺𑀓𑀪𑀸𑀯𑀁 𑀜𑀢𑁆𑀯𑀸 𑀆𑀦𑁂𑀣𑀸𑀢𑀺 𑀆𑀳, 𑀢𑁂 𑀢𑀣𑀸 𑀅𑀓𑀁𑀲𑀼. 𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑀸𑀬 𑀕𑁂𑀳𑀁 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀦𑁂𑀯 𑀅𑀕𑀫𑀸𑀲𑀺. 𑀢𑀲𑁆𑀲 𑀧𑀦 𑀩𑁆𑀭𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘𑀲𑀢𑀭𑀸𑀚𑀓𑀼𑀫𑀸𑀭𑀸 𑀦𑀸𑀦𑀸𑀯𑀺𑀥𑀸𑀦𑀺 𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀢𑁂 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀲𑀼𑀯𑀡𑁆𑀡𑀢𑀺𑀮𑀓𑀸𑀬 𑀯𑀺𑀚𑁆𑀚𑀫𑀸𑀦𑀸𑀬 𑀅𑀫𑁆𑀳𑀸𑀓𑀁 𑀲𑀺𑀧𑁆𑀧𑀼𑀕𑁆𑀕𑀳𑀡𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀏𑀢𑀁 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻𑀢𑀺, 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀳𑀢𑁆𑀣𑀸 𑀘𑀭𑀺𑀬𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀮𑀜𑁆𑀚𑀁 𑀤𑀢𑁆𑀯𑀸 𑀏𑀯𑀫𑀸𑀳𑀁𑀲𑀼, 𑀳𑀢𑁆𑀣𑀺𑀁 𑀲𑀼𑀭𑀸𑀬 𑀫𑀢𑁆𑀢𑀁 𑀓𑀢𑁆𑀯𑀸 𑀲𑀼𑀯𑀡𑁆𑀡𑀢𑀺𑀮𑀓𑀁 𑀫𑀸𑀭𑁂𑀳𑀻𑀢𑀺. 𑀢𑀢𑁄 𑀢𑁂 𑀲𑀩𑁆𑀩𑁂 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀤𑀽𑀢𑀁 𑀧𑀸𑀳𑁂𑀲𑀼𑀁, 𑀆𑀘𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑀫𑁆𑀳𑀸𑀢𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀆𑀘𑀭𑀺𑀬 𑀆𑀘𑀭𑀺𑀬𑀸𑀦𑀺𑀁 𑀧𑀲𑁆𑀲𑀺𑀢𑀼𑀓𑀸𑀫𑀫𑁆𑀳𑀸𑀢𑀺 𑀆𑀳𑀁𑀲𑀼. 𑀅𑀣 𑀲𑁄 𑀲𑀼𑀯𑀡𑁆𑀡𑀢𑀺𑀮𑀓𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣𑀸𑀢𑀺 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼, 𑀅𑀣 𑀢𑀲𑁆𑀲𑀸 𑀯𑀻𑀣𑀺𑀫𑀚𑁆𑀛𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀳𑀢𑁆𑀣𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀼𑀁. 𑀲𑁄 𑀲𑁄𑀡𑁆𑀟𑀸𑀬 𑀪𑀽𑀫𑀺𑀬𑀁 𑀧𑀳𑀭𑀦𑁆𑀢𑁄 [𑀧𑀳𑀭𑀦𑁆𑀢𑁄𑀉𑀧𑀥𑀸𑀯𑀺𑀢𑁆𑀯𑀸 𑀇𑀢𑀺𑀓𑀢𑁆𑀣𑀘𑀺] 𑀕𑀘𑁆𑀙𑀦𑁆𑀢𑁄 𑀉𑀧𑀥𑀸𑀯𑀺𑀢𑁆𑀯𑀸 𑀲𑁄𑀡𑁆𑀟𑁂𑀦 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀼𑀫𑁆𑀪𑁂 𑀦𑀺𑀲𑀻𑀤𑀸𑀧𑁂𑀲𑀺. 𑀢𑀢𑁄 𑀭𑀸𑀚𑀸𑀦𑁄 𑀢𑀣𑀸 𑀢𑀁 𑀫𑀸𑀭𑀸𑀧𑁂𑀢𑀼 𑀫𑀲𑀓𑁆𑀓𑁄𑀦𑁆𑀢𑀸 𑀧𑀼𑀦 𑀤𑀺𑀯𑀲𑁂 𑀫𑀦𑀼𑀲𑁆𑀲𑁂 𑀧𑀬𑁄𑀚𑁂𑀢𑁆𑀯𑀸 𑀭𑀢𑁆𑀢𑀺𑀬𑀁 𑀫𑀸𑀭𑀸𑀧𑁂𑀲𑀼𑀁. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀏𑀯𑀭𑀽𑀧𑀁 𑀇𑀢𑁆𑀣𑀺𑀁 𑀅𑀮𑀲𑀺𑀢𑁆𑀯𑀸 𑀚𑀻𑀯𑀦𑀢𑁄 𑀫𑀢𑀫𑁂𑀯 [𑀫𑀢𑀁𑀫𑁂𑀲𑁂𑀬𑁆𑀬𑁄 𑀇𑀢𑀺𑀓𑀢𑁆𑀣𑀘𑀺] 𑀲𑁂𑀬𑁆𑀬𑁄𑀢𑀺 𑀲𑁄𑀘𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀭𑀸𑀚𑀗𑁆𑀕𑀡𑁂 𑀤𑀸𑀭𑀼𑀘𑀺𑀢𑀓𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀺𑀁𑀧𑀯𑀺𑀲𑀺𑀢𑁆𑀯𑀸 𑀫𑀢𑁄𑀢𑀺. 𑀏𑀯𑀁 𑀫𑀸𑀢𑀼𑀕𑀸𑀫𑀯𑀲𑀗𑁆𑀕𑀢𑀸 𑀫𑀳𑀦𑁆𑀢𑀁 𑀅𑀦𑀬𑀩𑁆𑀬𑀲𑀦𑀜𑁆𑀘 𑀫𑀭𑀡𑀜𑁆𑀘 𑀧𑀸𑀧𑀼𑀡𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸.

𑁨𑁫. 𑀫𑀸𑀬𑀸𑀯𑁂𑀲𑀸 [𑀫𑀸𑀬𑀸𑀘𑁂𑀲𑀸 𑀇𑀢𑀺𑀓𑀢𑁆𑀣𑀘𑀺] 𑀫𑀭𑀻𑀘𑀻𑀯,

𑀲𑁄𑀓𑁄 𑀭𑁄𑀕𑁄 𑀘𑀼𑀧𑀤𑁆𑀤𑀯𑁄;

𑀔𑀭𑀸𑀯 𑀩𑀦𑁆𑀥𑀦𑀸 𑀘𑁂𑀲𑀸,

𑀫𑀘𑁆𑀘𑀼𑀧𑀸𑀲𑁄 𑀕𑀼𑀳𑀸𑀲𑀬𑁄;

𑀢𑀸𑀲𑀼 𑀬𑁄 𑀯𑀺𑀲𑁆𑀲𑀲𑁂 𑀧𑁄𑀲𑁄,

𑀲𑁄 𑀦𑀭𑁂𑀲𑀼 𑀦𑀭𑀸𑀥𑀫𑁄𑀢𑀺.

𑁨𑁬. 𑀅𑀬𑁄𑀦𑀺𑀲𑁄 𑀲𑀸 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸,

𑀧𑀼𑀜𑁆𑀜𑀁 𑀓𑀭𑀺𑀢𑁆𑀯𑀸 𑀅𑀮𑀪𑀻𑀤𑀺𑀲𑀁 𑀕𑀢𑀺𑀁;

𑀥𑀻𑀲𑀫𑁆𑀧𑀬𑀼𑀢𑁆𑀢𑀁 [𑀥𑀺𑀢𑀺𑀲𑀫𑁆𑀧𑀬𑀼𑀢𑁆𑀢𑀁 𑀇𑀢𑀺𑀓𑀢𑁆𑀣𑀘𑀺] 𑀓𑀼𑀲𑀮𑀁 𑀓𑀭𑁄𑀦𑁆𑀢𑀸,

𑀦𑀺𑀩𑁆𑀩𑀸𑀡𑀫𑁂𑀯𑀸𑀪𑀺𑀫𑀼𑀔𑀁 𑀓𑀭𑁄𑀣𑀸𑀢𑀺.

𑀲𑀼𑀯𑀡𑁆𑀡𑀢𑀺𑀮𑀓𑀸𑀬 𑀯𑀢𑁆𑀣𑀼𑀁 𑀤𑀼𑀢𑀺𑀬𑀁.