𑁩𑁧. 𑀫𑀳𑀸𑀲𑁂𑀦𑀭𑀜𑁆𑀜𑁄 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂 𑀫𑀳𑀸𑀲𑁂𑀦𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸. 𑀲𑁄 𑀧𑀦 𑀧𑀺𑀢𑀼𑀧𑀺𑀢𑀸𑀫𑀳𑀸𑀤𑀻𑀦𑀁 𑀥𑀦𑀭𑀸𑀲𑀺𑀁 𑀑𑀮𑁄𑀓𑁂𑀢𑁆𑀯𑀸 𑀇𑀫𑁂 𑀇𑀫𑀁 𑀲𑀸𑀧𑀢𑁂𑀬𑁆𑀬𑀁 𑀧𑀳𑀸𑀬 𑀫𑀘𑁆𑀘𑀼𑀦𑁄 𑀫𑀼𑀔𑀫𑀼𑀧𑀕𑀢𑀸. 𑀅𑀳𑁄 𑀲𑀁𑀲𑀸𑀭𑀺𑀓𑀸𑀦𑀁 𑀅𑀜𑁆𑀜𑀸𑀡𑀢𑀸. 𑀥𑀦𑀁 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀦𑀸𑀲𑀜𑁆𑀘 𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀥𑀦𑀯𑀺𑀦𑀸𑀲𑀜𑁆𑀘 𑀦 𑀚𑀸𑀦𑀦𑁆𑀢𑀻𑀢𑀺 𑀲𑀫𑁆𑀧𑀢𑁆𑀢𑀺𑀬𑀸 𑀅𑀥𑀺𑀕𑀫𑀜𑁆𑀘 𑀯𑀺𑀦𑀸𑀲𑀁 𑀘𑀸𑀢𑀺 𑀲𑀩𑁆𑀩𑀁 𑀘𑀺𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑀜𑁆𑀘 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀥𑀼𑀭𑁂𑀦 𑀅𑀦𑁆𑀦𑀧𑀸𑀦𑁂𑀦 𑀲𑀦𑁆𑀢𑀧𑁆𑀧𑁂𑀦𑁆𑀢𑁄 𑀅𑀦𑁂𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀏𑀓𑀤𑀺𑀯𑀲𑀁 𑀭𑀳𑁄 𑀧𑀝𑀺𑀲𑀮𑁆𑀮𑀺𑀦𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀏𑀯𑀁 𑀭𑀸𑀚𑀦𑀺𑀬𑁄𑀕𑁂𑀦 𑀚𑀦𑀲𑁆𑀲 𑀧𑀻𑀴𑀦𑀁 𑀓𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑀢𑁄 𑀲𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀮𑀤𑁆𑀥𑁂𑀦 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀁 𑀫𑀳𑀸𑀦𑀺𑀲𑀁𑀲𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀫𑀬𑀸 𑀓𑀸𑀢𑀩𑁆𑀩𑀦𑁆𑀢𑀺 𑀲𑁄 𑀲𑀼𑀳𑀤𑀸 𑀫𑀘𑁆𑀘𑀲𑁆𑀲 𑀭𑀚𑁆𑀚𑀁 𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀡𑀺𑀝𑁆𑀞𑀺𑀓𑀁 𑀆𑀤𑀸𑀬 𑀓𑀺𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀅𑀜𑁆𑀜𑀢𑀭𑀯𑁂𑀲𑁂𑀦 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀉𑀢𑁆𑀢𑀭𑀫𑀥𑀼𑀭𑀁 𑀦𑀸𑀫 𑀦𑀕𑀭𑀁 𑀅𑀕𑀫𑀸𑀲𑀺, 𑀢𑀢𑁆𑀣 𑀫𑀳𑀸𑀯𑀺𑀪𑀯𑁄 𑀏𑀓𑁄 𑀲𑁂𑀝𑁆𑀞𑀺 𑀧𑀝𑀺𑀯𑀲𑀢𑀺, 𑀢𑁂 𑀲𑁂𑀝𑁆𑀞𑀺𑀦𑁄 𑀲𑀫𑀻𑀧 𑀫𑀼𑀧𑀕𑀫𑁆𑀫 𑀞𑀺𑀢𑀸. 𑀢𑁂𑀦 𑀓𑀺𑀫𑀢𑁆𑀣𑀸𑀬𑀸𑀕𑀢𑀸𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 𑀢𑀯 𑀕𑁂𑀳𑁂 𑀪𑀢𑀺𑀬𑀸 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀢𑁂𑀦𑀸𑀦𑀼𑀜𑁆𑀜𑀸𑀢𑁄 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀓𑀫𑁆𑀫 𑀫𑀓𑀸𑀲𑀺, 𑀢𑀢𑁄 𑀏𑀓𑀤𑀺𑀯𑀲𑀁 𑀲𑁂𑀝𑁆𑀞𑀺 𑀢𑁂 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀺𑀢𑁆𑀯𑀸 𑀅𑀢𑀻𑀯 𑀢𑀼𑀫𑁆𑀳𑁂 𑀲𑀼𑀔𑀼𑀫𑀸𑀮𑀢𑀭𑀸. 𑀢𑀣𑀸𑀧𑀺 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀓𑀫𑁆𑀫𑀓𑀭𑀡𑁂𑀦 𑀘𑀺𑀭𑀁 𑀯𑀲𑀺𑀢𑁆𑀣, 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀺𑀲𑁆𑀫𑀺𑀜𑁆𑀘𑀺 𑀓𑀫𑁆𑀫𑁂𑀧𑀺 𑀓𑀼𑀲𑀻𑀢𑀢𑁆𑀢𑀁 𑀦 𑀧𑀜𑁆𑀜𑀸𑀬𑀢𑀺. 𑀧𑀕𑁂𑀯 𑀅𑀦𑀸𑀘𑀸𑀭𑀫𑁆𑀧𑀺, 𑀬𑀸𑀕𑀼𑀪𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀉𑀧𑀓𑀸𑀭𑀫𑁆𑀧𑀺 𑀫𑀫 𑀲𑀦𑁆𑀢𑀺𑀓𑀸 𑀦𑀢𑁆𑀣𑀺, 𑀓𑁂𑀦𑀢𑁆𑀣𑁂𑀦 𑀓𑀫𑁆𑀫𑀁 𑀓𑀭𑁄𑀣𑀸𑀢𑀺 𑀧𑀼𑀘𑁆𑀙𑀺. 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀚𑀦𑀧𑀤𑁂 𑀲𑀸𑀮𑀺𑀦𑁄 𑀫𑀦𑀸𑀧𑀪𑀸𑀯𑁄 𑀩𑀳𑀼𑀲𑁄 𑀲𑀽𑀬𑀢𑀺. 𑀢𑀲𑁆𑀫𑀸 𑀲𑀸𑀮𑀻𑀦𑀫𑀢𑁆𑀣𑀸𑀬 𑀇𑀥𑀸 𑀕𑀢𑀫𑁆𑀳𑀸𑀢𑀺 𑀆𑀳, 𑀢𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀢𑀼𑀝𑁆𑀞𑁄 𑀲𑁂𑀝𑁆𑀞𑀺 𑀲𑀸𑀮𑀻𑀦𑀁 𑀲𑀓𑀝𑀲𑀳𑀲𑁆𑀲𑀁 𑀅𑀤𑀸𑀲𑀺, 𑀭𑀸𑀚𑀸 𑀲𑀸𑀮𑀺𑀁𑀮𑀪𑀺𑀢𑁆𑀯𑀸 𑀲𑁂𑀝𑁆𑀞𑀺𑀦𑁄 𑀏𑀯𑀫𑀸𑀳, 𑀪𑁄 𑀇𑀫𑀁 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀧𑀸𑀧𑁂𑀣𑀸𑀢𑀺, 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀲𑀸𑀥𑀽𑀢𑀺 𑀯𑀢𑁆𑀯𑀸 𑀲𑀸𑀮𑀺𑀧𑀭𑀺𑀧𑀼𑀡𑁆𑀡𑀲𑀓𑀝𑀲𑀳𑀲𑁆𑀲𑀁 𑀭𑀜𑁆𑀜𑁄 𑀦𑀕𑀭𑀁 𑀧𑀸𑀧𑁂𑀲𑀺, 𑀭𑀸𑀚𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀦𑀸𑀦𑀸𑀯𑀡𑁆𑀡𑀯𑀢𑁆𑀣𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀳𑀺 𑀲𑀓𑀝𑁂 𑀧𑀽𑀭𑁂𑀢𑁆𑀯𑀸 𑀧𑀝𑀺𑀧𑁂𑀲𑁂𑀢𑁆𑀯𑀸 𑀫𑁂𑀢𑁆𑀢𑀺𑀁 𑀣𑀺𑀭𑀁 𑀓𑀢𑁆𑀯𑀸 𑀆𑀪𑀢𑀯𑀻𑀳𑀬𑁄 𑀭𑀸𑀚𑀕𑁂𑀳𑁂 𑀲𑀦𑁆𑀦𑀺𑀘𑀬𑀫𑀓𑀸𑀲𑀺, 𑀅𑀣 𑀭𑀸𑀚𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀫𑀼𑀲𑀮𑀁 𑀧𑀕𑁆𑀕𑀬𑁆𑀳 𑀲𑀳𑀢𑁆𑀣𑁂𑀦𑁂𑀯 𑀯𑀻𑀳𑀺𑀁 𑀓𑁄𑀝𑁆𑀝𑁂𑀢𑀺, 𑀓𑁄𑀝𑁆𑀝𑀺𑀢𑀓𑁄𑀝𑁆𑀝𑀺𑀢𑀁 𑀓𑀡𑀺𑀝𑁆𑀞𑀺𑀓𑀸 𑀧𑀧𑁆𑀨𑁄𑀝𑁂𑀢𑀺. 𑀏𑀯𑀁 𑀉𑀪𑁄𑀧𑀺 𑀢𑀡𑁆𑀟𑀼𑀮𑀸𑀦𑀁 𑀫𑀳𑀦𑁆𑀢𑀁 𑀭𑀸𑀲𑀺𑀁 𑀓𑀢𑁆𑀯𑀸 𑀤𑀸𑀭𑀽𑀤𑀓𑀸𑀤𑀬𑁄 𑀆𑀳𑀭𑀺𑀢𑁆𑀯𑀸 𑀅𑀫𑁆𑀩𑀺𑀮𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀭𑀸𑀚𑀕𑁂𑀳𑁂 𑀧𑀜𑁆𑀘𑀲𑀢𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀓𑀸𑀮𑀁 𑀉𑀕𑁆𑀖𑁄𑀲𑁂𑀲𑀼𑀁, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀫𑀫 𑀕𑁂𑀳𑁂 𑀪𑀼𑀜𑁆𑀚𑀦𑁆𑀢𑀽𑀢𑀺. 𑀢𑀁 𑀲𑀼𑀢𑁆𑀯𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀆𑀓𑀸𑀲𑁂𑀦 𑀆𑀕𑀫𑀺𑀁𑀲𑀼, 𑀭𑀸𑀚𑀸 𑀢𑁂 𑀬𑀸𑀯𑀤𑀢𑁆𑀣𑀁 𑀧𑀭𑀺𑀯𑀺𑀲𑀺, 𑀢𑀢𑁄 𑀢𑁂𑀲𑀁 𑀅𑀦𑁆𑀢𑀭𑁂 𑀧𑀺𑀬𑀁𑀕𑀼𑀤𑀻𑀧𑀯𑀸𑀲𑀻 𑀏𑀓𑁄 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀦𑀸𑀫 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀢𑁂 𑀫𑀁 𑀧𑀲𑁆𑀲𑀦𑁆𑀢𑀽𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑁂𑀦 𑀧𑀺𑀬𑀁𑀕𑀼𑀤𑀻𑀧𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀢𑁆𑀯𑀸 𑀧𑀭𑀺𑀪𑀼𑀜𑁆𑀘𑀺. 𑀢𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀩𑁆𑀩𑁂𑀲𑀁 𑀬𑀸𑀯𑀤𑀢𑁆𑀣𑀁 𑀅𑀳𑁄𑀲𑀺. 𑀏𑀯𑀁 𑀅𑀧𑁆𑀧𑀓𑁂𑀦𑀸𑀧𑀺 𑀤𑁂𑀬𑁆𑀬𑀥𑀫𑁆𑀫𑁂𑀦 𑀲𑀧𑁆𑀧𑀼𑀭𑀺𑀲𑀸 𑀤𑀸𑀬𑀓𑀸𑀦𑀁 𑀫𑀦𑀁 𑀧𑀲𑀸𑀤𑁂𑀢𑁆𑀯𑀸 𑀧𑀢𑀺𑀝𑁆𑀞𑀁 𑀓𑀭𑁄𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑀺.

𑁧. 𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀤𑀸𑀬𑀓𑀸𑀦𑀁 𑀫𑀦𑀁 𑀧𑀢𑀺;

𑀲𑀤𑁆𑀥𑀁 𑀯𑀟𑁆𑀠𑁂𑀦𑁆𑀢𑀺 𑀘𑀦𑁆𑀤𑁄𑀯, 𑀭𑀁𑀲𑀺𑀦𑀸 𑀔𑀻𑀭𑀲𑀸𑀕𑀭𑀁.

𑁨. 𑀅𑀝𑁆𑀞𑀸𑀦𑁂 𑀦 𑀦𑀺𑀬𑁄𑀚𑁂𑀦𑁆𑀢𑀸, 𑀓𑀭𑁄𑀦𑁆𑀢𑀸 𑀦𑁂𑀯 𑀲𑀦𑁆𑀦𑀺𑀥𑀺𑀁;

𑀧𑀭𑀺𑀪𑁄𑀕 𑀫𑀓𑀢𑁆𑀯𑀸𑀦, 𑀦𑁂𑀯 𑀦𑀸𑀲𑁂𑀦𑁆𑀢𑀺 𑀧𑀘𑁆𑀘𑀬𑀁.

𑁩. 𑀦 𑀧𑀸𑀧𑁂𑀦𑁆𑀢𑀸𑀘 𑀣𑁂𑀬𑁆𑀬𑀲𑁆𑀲, 𑀦 𑀓𑀭𑁄𑀦𑁆𑀢𑀸 𑀢𑀣𑁂𑀯𑀺𑀡𑀁;

𑀯𑀺𑀪𑀚𑀦𑁆𑀢𑀺 𑀲𑀼𑀲𑀻𑀮𑁂𑀲𑀼, 𑀲𑀬𑀁 𑀪𑀼𑀢𑁆𑀯𑀸𑀦 𑀲𑀻𑀮𑀯𑀸𑀢𑀺.

𑀅𑀣 𑀭𑀸𑀚𑀸 𑀓𑀡𑀺𑀝𑁆𑀞𑀺𑀓𑀸𑀬 𑀲𑀤𑁆𑀥𑀺𑀁 𑀣𑀢𑁆𑀣𑁂𑀯 𑀞𑀺𑀢𑁄 𑀧𑀺𑀬𑀁𑀕𑀼𑀤𑀻𑀧𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁂 𑀧𑀜𑁆𑀘𑀲𑀢𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀅𑀳𑁄𑀲𑀺. 𑀅𑀣 𑀢𑁂 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑀸 𑀓𑀢𑀁 𑀤𑀸𑀦𑀯𑀭𑀁 𑀅𑀦𑀼𑀲𑁆𑀲𑀭𑀦𑁆𑀢𑀸 𑀦 𑀘𑀺𑀭𑁂𑀦𑁂𑀯 𑀉𑀪𑁄𑀧𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁𑀢𑀺.

𑁪. 𑀦 𑀕𑀡𑁂𑀦𑁆𑀢𑀸𑀢𑁆𑀢𑀦𑁄 𑀤𑀼𑀓𑁆𑀔𑀁, 𑀯𑀺𑀳𑀸𑀬 𑀫𑀳𑀢𑀺𑀁 𑀲𑀺𑀭𑀺𑀁;

𑀆𑀬𑀢𑀺𑀁𑀪𑀯𑀫𑀺𑀘𑁆𑀙𑀦𑁆𑀢𑀸, 𑀲𑀼𑀚𑀦𑁂𑀯𑀁 𑀲𑀼𑀪𑁂 𑀭𑀢𑀸.

𑁫. 𑀆𑀬𑀸𑀲𑁂𑀦 𑀓𑀢𑀁 𑀧𑀼𑀜𑁆𑀜𑀁, 𑀫𑀳𑀦𑁆𑀢𑀨𑀮𑀤𑀸𑀬𑀓𑀁;

𑀇𑀢𑀺 𑀫𑀦𑁆𑀢𑁆𑀯𑀸𑀦 𑀫𑁂𑀥𑀸𑀯𑀻, 𑀲𑀳𑀢𑁆𑀣𑁂𑀦𑁂𑀯 𑀢𑀁 𑀓𑀭𑁂𑀢𑀺.

𑀫𑀳𑀸𑀲𑁂𑀦𑀭𑀜𑁆𑀜𑁄 𑀯𑀢𑁆𑀣𑀼𑀁 𑀧𑀣𑀫𑀁.