𑁨𑁬. 𑀘𑁄𑀭𑀖𑀸𑀢𑀓𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀉𑀧𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂 𑀯𑀺𑀳𑀭𑀢𑀺 𑀥𑀫𑁆𑀫𑀤𑁂𑀲𑀦𑀸𑀬 𑀫𑀳𑀸𑀚𑀦𑀲𑁆𑀲 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀤𑀁 𑀤𑀤𑀫𑀸𑀦𑁄. 𑀢𑀲𑁆𑀫𑀺𑀁𑀲𑀫𑀬𑁂 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀅𑀝𑀯𑀺𑀢𑁄 𑀦𑀕𑀭𑀁 𑀆𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀘𑁄𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑁂𑀦 𑀧𑀼𑀢𑁆𑀢𑀤𑀸𑀭𑁂 𑀧𑁄𑀲𑁂𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀘𑁄𑀭𑀸 𑀘𑁄𑀭𑀓𑀫𑁆𑀫𑀢𑁆𑀣𑀸𑀬 𑀦𑀕𑀭𑀁 𑀧𑀯𑀺𑀲𑀦𑁆𑀢𑀸 𑀦𑀕𑀭𑀤𑁆𑀯𑀸𑀭𑁂 𑀏𑀓𑀁 𑀤𑀼𑀓𑁆𑀔𑀺𑀢𑀁 𑀚𑀦𑀧𑀤𑀫𑀦𑀼𑀲𑁆𑀲𑀁 𑀧𑀲𑁆𑀲𑀺𑀢𑁆𑀯𑀸 𑀳𑀫𑁆𑀪𑁄 𑀓𑀢𑁆𑀣 𑀯𑀲𑀢𑀻𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀲𑁄 𑀅𑀢𑁆𑀢𑀚𑀦𑀸 𑀚𑀦𑀧𑀤𑀯𑀸𑀲𑀺𑀪𑀸𑀯𑀁 𑀧𑀓𑀸𑀲𑁂𑀲𑀺. 𑀅𑀣𑀲𑁆𑀲 𑀢𑁂 𑀓𑀲𑁆𑀫𑀸 𑀪𑁄 𑀇𑀫𑀺𑀦𑀸 𑀤𑀼𑀓𑁆𑀔𑀯𑀸𑀲𑁂𑀦 𑀯𑀲𑀺𑀲𑁆𑀲𑀲𑀺, 𑀏𑀳𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀘𑁄𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀢𑁆𑀣𑀸𑀮𑀗𑁆𑀓𑀸𑀭𑀲𑀫𑁆𑀧𑀦𑁆𑀦𑁄 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀳𑀺. 𑀇𑀫𑀺𑀦𑀸 𑀓𑀧𑀡𑀯𑀸𑀲𑁂𑀦 𑀦 𑀯𑀲𑀸𑀢𑀺 𑀆𑀳𑀁𑀲𑀼. 𑀲𑁄 𑀧𑀦𑀺𑀫𑁂 𑀬𑀼𑀢𑁆𑀢𑀁 𑀓𑀣𑁂𑀦𑁆𑀢𑀻𑀢𑀺 𑀢𑁂𑀲𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣 𑀢𑁂 𑀏𑀯𑀁 𑀲𑀢𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀸𑀳𑀻𑀢𑀺 𑀯𑀢𑁆𑀯𑀸 𑀦𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀮𑀼𑀫𑁆𑀧𑀦𑁆𑀢𑀸 𑀘𑁄𑀭𑀓𑀫𑁆𑀫𑀁 𑀅𑀓𑀁𑀲𑀼. 𑀢𑀤𑀸 𑀚𑀸𑀦𑀧𑀤𑀺𑀓𑁄 𑀮𑀤𑁆𑀥𑀯𑀺𑀪𑀯𑁄 𑀇𑀫𑀫𑁂𑀯 𑀯𑀭𑀢𑀭𑀦𑁆𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀘𑁄𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺, 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀧𑀼𑀭𑀺𑀲𑀸 𑀓𑀢𑀓𑀫𑁆𑀫𑁂 𑀢𑁂 𑀲𑀩𑁆𑀩𑁂𑀯 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁, 𑀭𑀸𑀚𑀸 𑀢𑁂 𑀤𑀺𑀲𑁆𑀯𑀸 𑀏𑀯𑀫𑀸𑀳, 𑀪𑀡𑁂 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀬𑁄 𑀏𑀢𑁂𑀲𑀁 𑀫𑀸𑀭𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀺, 𑀢𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀫𑁆𑀫𑀻𑀢𑀺, 𑀢𑀁 𑀲𑀼𑀢𑁆𑀯𑀸 𑀢𑁂 𑀘𑁄𑀭𑀸 𑀲𑀩𑁆𑀩𑁂 𑀅𑀜𑁆𑀜𑀫𑀜𑁆𑀜𑀜𑀸𑀢𑀺𑀲𑀼𑀳𑀤𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀢𑀁 𑀦 𑀇𑀘𑁆𑀙𑀺𑀁𑀲𑀼. 𑀲𑁄 𑀧𑀦 𑀚𑀦𑀧𑀤𑀯𑀸𑀲𑀻 𑀫𑀦𑀼𑀲𑁆𑀲𑁄 𑀅𑀳𑀫𑁂𑀢𑁂 𑀲𑀩𑁆𑀩𑁂 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀭𑀜𑁆𑀜𑁄 𑀯𑀢𑁆𑀯𑀸 𑀢𑁂𑀦𑀸𑀦𑀼𑀜𑁆𑀜𑀸𑀢𑁄 𑀢𑁂 𑀲𑀩𑁆𑀩𑁂 𑀫𑀸𑀭𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑀭𑀸𑀚𑀸 𑀢𑀲𑁆𑀲 𑀘𑁄𑀭𑀖𑀸𑀢𑀓𑀫𑁆𑀫𑀁 𑀅𑀤𑀸𑀲𑀺. 𑀲𑁄 𑀘𑁄𑀭𑁂 𑀘 𑀯𑀚𑁆𑀛𑀧𑁆𑀧𑀢𑁆𑀢𑁂 𑀘 𑀫𑀸𑀭𑁂𑀦𑁆𑀢𑁄 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀯𑀲𑀦𑁆𑀢𑁄 𑀅𑀧𑀭𑀪𑀸𑀕𑁂 𑀫𑀳𑀮𑁆𑀮𑀓𑁄 𑀅𑀳𑁄𑀲𑀺. 𑀅𑀣 𑀲𑁄 𑀫𑀦𑁆𑀤𑀩𑀮𑀢𑁆𑀢𑀸 𑀓𑀢𑀺𑀧𑀬𑀧𑀳𑀸𑀭𑁂𑀦𑀸𑀧𑀺 𑀘𑁄𑀭𑀁 𑀫𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀭𑀸𑀚𑀸 𑀢𑀁 𑀜𑀢𑁆𑀯𑀸 𑀅𑀜𑁆𑀜𑀲𑁆𑀲 𑀘𑁄𑀭𑀖𑀸𑀢𑀓𑀫𑁆𑀫𑀁 𑀅𑀤𑀸𑀲𑀺. 𑀅𑀣 𑀲𑁄 𑀘𑁄𑀭𑀖𑀸𑀢𑀓𑀫𑁆𑀫𑀸 [𑀘𑁄𑀭𑀖𑀸𑀢𑀓𑀫𑁆𑀫 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀧𑀭𑀺𑀳𑀻𑀦𑁄 𑀅𑀢𑁆𑀢𑀦𑁄 𑀕𑁂𑀳𑁂 𑀯𑀲𑀢𑀺. 𑀢𑀤𑀸 𑀅𑀜𑁆𑀜𑀢𑀭𑁄 𑀫𑀦𑀼𑀲𑁆𑀲𑁄 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀸𑀲𑀸𑀯𑀸𑀢𑁂𑀦 𑀫𑀦𑀼𑀲𑁆𑀲𑀫𑀸𑀭𑀡𑀓𑀫𑀦𑁆𑀢𑀁 𑀚𑀸𑀦𑀸𑀢𑀺. 𑀢𑀣𑀸𑀳𑀺 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀲𑀻𑀲𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀙𑁂𑀚𑁆𑀚𑀪𑁂𑀚𑁆𑀚𑀁 𑀓𑀢𑁆𑀢𑀼𑀓𑀸𑀫𑁄 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀸𑀲𑀸𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀁 𑀢𑀁 𑀞𑀸𑀦𑀁 𑀙𑀺𑀚𑁆𑀚𑀢𑀺 𑀪𑀺𑀚𑁆𑀚𑀢𑀺, 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀲𑁄 𑀫𑀦𑁆𑀢𑁄, 𑀅𑀣 𑀲𑁄 𑀢𑀁 𑀧𑀼𑀭𑀺𑀲𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀫𑀦𑁆𑀢𑀁 𑀮𑀪𑀺𑀢𑁆𑀯𑀸 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀅𑀳𑀁 𑀇𑀢𑁄 𑀧𑀼𑀩𑁆𑀩𑁂 𑀫𑀳𑀮𑁆𑀮𑀓𑀢𑁆𑀢𑀸 𑀘𑁄𑀭𑀸𑀦𑀁 𑀳𑀢𑁆𑀣𑀧𑀸𑀤𑀸𑀤𑀬𑁄 𑀤𑀼𑀓𑁆𑀔𑁂𑀦 𑀙𑁂𑀚𑁆𑀚 𑀪𑁂𑀚𑁆𑀚𑀁 𑀓𑀭𑁄𑀫𑀺, 𑀫𑀸𑀭𑁂𑀢𑀩𑁆𑀩𑁂𑀧𑀺 𑀤𑀼𑀓𑁆𑀔𑁂𑀦 𑀫𑀸𑀭𑁂𑀫𑀺. 𑀇𑀤𑀸𑀦𑀺 𑀧𑀦𑀸𑀳𑀁 𑀢𑀣𑀸 𑀦 𑀓𑀭𑁄𑀫𑀺, 𑀫𑀫 𑀫𑀦𑁆𑀢𑀸𑀦𑀼𑀪𑀸𑀯𑁂𑀦 𑀙𑁂𑀚𑁆𑀚𑀪𑁂𑀚𑁆𑀚𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀭𑀸𑀚𑀸 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀲𑀸𑀥𑀽𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀢𑀲𑁆𑀲𑁂𑀯 𑀧𑀸𑀓𑀢𑀺𑀓 𑀫𑀓𑀸𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀧𑀼𑀦 𑀧𑀜𑁆𑀘𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀸𑀫𑁂𑀲𑀺. 𑀲𑁄 𑀫𑀳𑀮𑁆𑀮𑀓𑁄 𑀔𑀻𑀡𑀸𑀬𑀼𑀓𑁄 𑀤𑀼𑀩𑁆𑀩𑀮𑁄 𑀫𑀭𑀡𑀫𑀜𑁆𑀘𑀧𑀭𑀸𑀬𑀡𑁄 𑀳𑀼𑀢𑁆𑀯𑀸 𑀫𑀭𑀡𑀯𑁂𑀤𑀦𑀸𑀤𑀼𑀓𑁆𑀔𑁂𑀦 𑀫𑀳𑀦𑁆𑀢𑁂𑀦 𑀪𑀬𑀸𑀦𑀓𑁂𑀦 𑀲𑀤𑁆𑀤𑁂𑀦 𑀯𑀺𑀲𑁆𑀲𑀭𑀁 𑀯𑀺𑀭𑀯𑀦𑁆𑀢𑁄 𑀦𑀺𑀫𑀻𑀮𑀺𑀢𑁂𑀦 𑀘𑀓𑁆𑀔𑀼𑀦𑀸 𑀪𑀬𑀸𑀦𑀓𑀁 𑀦𑀭𑀓𑀕𑁆𑀕𑀺𑀚𑀸𑀮𑀸𑀧𑀚𑁆𑀚𑀮𑀦𑁆𑀢𑀅𑀬𑀓𑀽𑀝𑀫𑀼𑀕𑁆𑀕𑀭𑀥𑀭𑁂 𑀦𑀺𑀭𑀬𑀧𑀸𑀮𑁂 𑀘 𑀧𑀲𑁆𑀲𑀦𑁆𑀢𑁄 𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀢𑀢𑁄 𑀢𑀲𑁆𑀲 𑀧𑀝𑀺𑀯𑀺𑀲𑁆𑀲𑀓𑀕𑁂𑀳𑁂 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀪𑀬𑀸𑀦𑀓𑀲𑀤𑁆𑀤𑀲𑀯𑀡𑁂𑀦 𑀕𑁂𑀳𑀁 𑀙𑀝𑁆𑀝𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀓𑀺𑀭 𑀤𑀺𑀯𑀲𑁂 𑀫𑀳𑀸𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑀸 𑀢𑀁 𑀘𑁄𑀭𑀖𑀸𑀢𑀓𑀁 𑀢𑀤𑀳𑁂𑀯 𑀓𑀸𑀮𑀁𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀤𑀺𑀲𑁆𑀯𑀸 𑀫𑀬𑀺 𑀢𑀢𑁆𑀣 𑀕𑀢𑁂 𑀧𑀦𑁂𑀲 𑀫𑀬𑀺 𑀧𑀲𑀸𑀤𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀜𑀢𑁆𑀯𑀸 𑀅𑀚𑁆𑀚 𑀫𑀬𑀸 𑀢𑀲𑁆𑀲𑀸𑀦𑀼𑀕𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲 𑀖𑀭𑀤𑁆𑀯𑀸𑀭 𑀫𑀕𑀫𑀸𑀲𑀺. 𑀅𑀣 𑀲𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀓𑀼𑀤𑁆𑀥𑁄 𑀓𑁄𑀧𑁂𑀦 𑀢𑀝𑀢𑀝𑀸𑀬𑀫𑀸𑀦𑀤𑁂𑀳𑁄 𑀅𑀚𑁆𑀚 𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀦𑀺𑀧𑀦𑁆𑀦𑁄𑀯 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀸𑀲𑀸𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀣𑁂𑀭𑁄 𑀢𑀲𑁆𑀫𑀺𑀁 𑀔𑀡𑁂 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀲𑀼𑀭𑀺𑀬𑁄 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀅𑀝𑁆𑀞𑀸𑀲𑀺, 𑀅𑀣 𑀲𑁄 𑀣𑁂𑀭𑀲𑁆𑀲 𑀢𑀬𑁄 𑀯𑀸𑀭𑁂 𑀢𑀣𑁂𑀯 𑀓𑀢𑁆𑀯𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑀺𑀯𑀺𑀬 𑀯𑀺𑀫𑁆𑀳𑀺𑀢𑀘𑀺𑀢𑁆𑀢𑁄 𑀣𑁂𑀭𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀬𑀢𑁆𑀢𑀁 𑀧𑀸𑀬𑀲𑀁 𑀣𑁂𑀭𑀲𑁆𑀲 𑀤𑀸𑀧𑁂𑀲𑀺, 𑀣𑁂𑀭𑁄 𑀫𑀗𑁆𑀕𑀮𑀁 𑀯𑀟𑁆𑀠𑁂𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀅𑀕𑀫𑀸𑀲𑀺, 𑀘𑁄𑀭𑀖𑀸𑀢𑀓𑁄 𑀣𑁂𑀭𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀢𑀲𑁆𑀫𑀺𑀁 𑀔𑀡𑁂 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀳𑁄 𑀯𑀻𑀢𑀭𑀸𑀕𑀸𑀦𑀁 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁄. 𑀏𑀯𑀁 𑀦𑀭𑀓𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑁄𑀧𑀺𑀲𑁆𑀲 𑀩𑀮𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄𑀢𑀺. 𑀢𑀣𑀸𑀳𑀺.

𑁧. 𑀤𑀸𑀦𑀁 𑀢𑀸𑀡𑀁 𑀫𑀦𑀼𑀲𑁆𑀲𑀸𑀦𑀁, 𑀤𑀸𑀦𑀁 𑀤𑀼𑀕𑁆𑀕𑀢𑀺𑀯𑀸𑀭𑀡𑀁;

𑀤𑀸𑀦𑀁 𑀲𑀕𑁆𑀕𑀲𑁆𑀲 𑀲𑁄𑀧𑀸𑀦𑀁, 𑀤𑀸𑀦𑀁 𑀲𑀦𑁆𑀢𑀺𑀓𑀭𑀁 𑀧𑀭𑀁.

𑁨. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀤𑀸𑀦𑁂𑀦, 𑀤𑀸𑀦𑀁 𑀘𑀺𑀦𑁆𑀢𑀸𑀫𑀡𑀻 𑀯𑀺𑀬;

𑀓𑀧𑁆𑀧𑀭𑀼𑀓𑁆𑀔𑁄𑀯 𑀲𑀢𑁆𑀢𑀸𑀦𑀁, 𑀤𑀸𑀦𑀁 𑀪𑀤𑁆𑀤𑀖𑀝𑁄𑀯𑀺𑀬.

𑁩. 𑀲𑀻𑀮𑀯𑀦𑁆𑀢𑀲𑁆𑀲 𑀤𑀸𑀦𑁂𑀦, 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀫𑁆𑀧𑀺 𑀘;

𑀮𑀪𑀦𑁆𑀢𑀺 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁, 𑀢𑀣𑀸 𑀮𑁄𑀓𑀼𑀢𑁆𑀢𑀭𑀁 𑀲𑀼𑀔𑀁.

𑁪. 𑀧𑀸𑀧𑀓𑀫𑁆𑀫𑁂𑀲𑀼 𑀦𑀺𑀭𑀢𑁄, 𑀞𑀺𑀢𑁄𑀬𑀁 𑀦𑀭𑀓𑀸𑀬𑀦𑁂 [𑀦𑀭𑀓𑀸𑀯𑀦𑁂 𑀇𑀢𑀺𑀧𑀺𑀓𑀢𑁆𑀣𑀘𑀺];

𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀣𑁂𑀭𑀲𑁆𑀲, 𑀧𑀺𑀡𑁆𑀟𑀧𑀸𑀢𑀲𑁆𑀲 𑀯𑀸𑀳𑀲𑀸.

𑁫. 𑀅𑀧𑀸𑀬𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸, 𑀦𑁂𑀓𑀤𑀼𑀓𑁆𑀔𑀲𑀫𑀸𑀓𑀼𑀮𑀁;

𑀤𑁂𑀯𑀲𑀗𑁆𑀖𑀧𑀭𑀺𑀩𑁆𑀩𑀽𑀴𑁆𑀳𑁄, 𑀕𑀢𑁄 𑀤𑁂𑀯𑀧𑀼𑀭𑀁 𑀯𑀭𑀁.

𑁬. 𑀢𑀲𑁆𑀫𑀸 𑀲𑀼𑀔𑁂𑀢𑁆𑀢𑁂 𑀲𑀤𑁆𑀥𑀸𑀬, 𑀤𑁂𑀣 𑀤𑀸𑀦𑀸𑀦𑀺 𑀓𑀸𑀫𑀤𑀁;

𑀤𑀸𑀦𑀁 𑀤𑁂𑀦𑁆𑀢𑁂𑀳𑀺 𑀲𑀻𑀮𑀫𑁆𑀧𑀺, 𑀧𑀸𑀮𑀦𑀻𑀬𑀁𑀢𑀺𑀲𑀼𑀦𑁆𑀤𑀭𑀦𑁆𑀢𑀺 [𑀧𑀸𑀮𑀦𑀁𑀘𑀸𑀢𑀺𑀲𑀼𑀦𑁆𑀤𑀭𑀁 𑀇𑀢𑀺𑀧𑀺𑀓𑀢𑁆𑀣𑀘𑀺].

𑀅𑀣 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼, 𑀓𑀺𑀁𑀪𑀦𑁆𑀢𑁂 𑀲𑁄 𑀧𑀸𑀧𑁄 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀓𑀢𑀭𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄𑀢𑀺. 𑀅𑀣 𑀲𑀢𑁆𑀣𑀸 𑀅𑀚𑁆𑀚𑁂𑀲 𑀪𑀺𑀓𑁆𑀔𑀯𑁂 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀺𑀦𑁆𑀦𑀤𑀸𑀦𑀸𑀦𑀼𑀪𑀸𑀯𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲𑁂𑀯 𑀦𑀺𑀲𑁆𑀲𑀦𑁆𑀤𑁂𑀦 𑀅𑀦𑀸𑀕𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻𑀢𑀺 𑀩𑁆𑀬𑀸𑀓𑀸𑀲𑀻𑀢𑀺.

𑁭. 𑀪𑁄 𑀲𑀸𑀭𑀺𑀧𑀼𑀢𑁆𑀢𑁂 𑀦𑀺𑀳𑀺𑀢𑀧𑁆𑀧𑀤𑀸𑀦𑀁,

𑀔𑀡𑁂𑀦 𑀧𑀸𑀧𑁂𑀢𑀺 𑀳𑀺 𑀲𑀕𑁆𑀕𑀫𑀕𑁆𑀕𑀁;

𑀢𑀲𑁆𑀫𑀸 𑀲𑀼𑀔𑁂𑀢𑁆𑀢𑁂𑀲𑀼 𑀤𑀤𑀸𑀣 𑀤𑀸𑀦𑀁,

𑀓𑀸𑀫𑀢𑁆𑀣 𑀘𑁂 𑀲𑀕𑁆𑀕𑀫𑁄𑀓𑁆𑀔𑀁 𑀧𑀭𑀢𑁆𑀣.

𑀘𑁄𑀭𑀖𑀸𑀢𑀓𑀯𑀢𑁆𑀣𑀼𑀁 𑀙𑀝𑁆𑀞𑀫𑀁.