𑀬𑀓𑁆𑀔𑀯𑀜𑁆𑀘𑀺𑀢𑀯𑀕𑁆𑀕𑁄

𑁨𑁧. 𑀬𑀓𑁆𑀔𑀯𑀜𑁆𑀘𑀺𑀢 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑀫𑁆𑀳𑀺 𑀓𑁄𑀲𑀮𑀭𑀜𑁆𑀜𑁄 𑀓𑀺𑀭 𑀚𑀦𑀧𑀤𑁂 𑀢𑀼𑀡𑁆𑀟𑀕𑀸𑀫𑁄𑀦𑀸𑀫 𑀅𑀳𑁄𑀲𑀺. 𑀢𑀢𑁆𑀣𑁂𑀓𑁄 𑀩𑀼𑀤𑁆𑀥𑀤𑀸𑀲𑁄 𑀦𑀸𑀫 𑀫𑀦𑀼𑀲𑁆𑀲𑁄 ‘‘𑀬𑀸𑀯𑀚𑀻𑀯𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺. 𑀩𑀼𑀤𑁆𑀥𑁄 𑀫𑁂 𑀲𑀭𑀡𑀁 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀦𑁆𑀢𑀺’’ 𑀏𑀯𑀁 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀧𑀝𑀺𑀯𑀲𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀏𑀓𑁄 𑀚𑀦𑀧𑀤𑀯𑀸𑀲𑀺𑀓𑁄 𑀢𑀢𑁆𑀣 𑀢𑀢𑁆𑀣 𑀆𑀳𑀺𑀡𑁆𑀟𑀦𑁆𑀢𑁄 𑀢𑀁 𑀢𑀼𑀡𑁆𑀟𑀕𑀸𑀫𑀁 𑀧𑀢𑁆𑀯𑀸 𑀢𑀲𑁆𑀲𑁂𑀯 𑀖𑀭𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀢𑀲𑁆𑀲 𑀧𑀦 𑀚𑀸𑀦𑀧𑀤𑀺𑀓𑀲𑁆𑀲 𑀲𑀭𑀻𑀭𑁂 𑀏𑀓𑁄 𑀬𑀓𑁆𑀔𑁄 𑀆𑀯𑀺𑀲𑀺𑀢𑁆𑀯𑀸 𑀧𑀻𑀴𑁂𑀢𑀺, 𑀢𑀤𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀧𑀯𑀺𑀲𑀦𑀓𑀸𑀮𑁂 𑀬𑀓𑁆𑀔𑁄 𑀩𑀼𑀤𑁆𑀥𑀤𑀸𑀲𑁄 𑀧𑀸𑀲𑀓𑀲𑁆𑀲 𑀕𑀼𑀡𑀢𑁂𑀚𑁂𑀦 𑀢𑀲𑁆𑀲 𑀕𑁂𑀳𑀁 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀩𑀳𑀺𑀕𑀸𑀫𑁂 𑀲𑀢𑁆𑀢𑀸𑀳𑀁 𑀅𑀝𑁆𑀞𑀸𑀲𑀺 𑀢𑀲𑁆𑀲𑀸𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄. 𑀢𑀢𑁄 𑀲𑁄 𑀚𑀸𑀦𑀧𑀤𑀺𑀓𑁄 𑀲𑀢𑁆𑀢𑀤𑀺𑀯𑀲𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀓𑀭𑀝𑁆𑀞𑀁 𑀕𑀦𑁆𑀢𑀼𑀓𑀸𑀫𑁄 𑀕𑀸𑀫𑀸 𑀦𑀺𑀓𑁆𑀔𑀫𑀺. 𑀅𑀣 𑀢𑀁 𑀢𑀣𑀸 𑀦𑀺𑀓𑁆𑀔𑀦𑁆𑀢𑀁 𑀤𑀺𑀲𑁆𑀯𑀸 𑀬𑀓𑁆𑀔𑁄 𑀅𑀕𑁆𑀕𑀳𑁂𑀲𑀺, 𑀅𑀣 𑀲𑁄 𑀢𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀼𑀳𑀺𑀁𑀕𑀢𑁄𑀲𑀻𑀢𑀺 𑀧𑀼𑀘𑁆𑀙𑀺. 𑀬𑀓𑁆𑀔𑁄 𑀪𑁄 𑀢𑀯𑀢𑁆𑀣𑀸𑀬 𑀏𑀢𑁆𑀣 𑀯𑀲𑀦𑁆𑀢𑀲𑁆𑀲 𑀫𑁂 𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀦𑁆𑀢𑀦𑁆𑀢𑀺. 𑀢𑀢𑁄 𑀲𑁄 𑀓𑁄 𑀢𑁂 𑀫𑀬𑀸 𑀅𑀢𑁆𑀣𑁄, 𑀓𑀺𑀁 𑀢𑁂 𑀤𑀫𑁆𑀫𑀻𑀢𑀺, 𑀅𑀣 𑀬𑀓𑁆𑀔𑁂𑀦 𑀪𑁄 𑀅𑀳𑀁 𑀔𑀼𑀤𑀸𑀬 𑀧𑀻𑀴𑀺𑀢𑁄 𑀪𑀢𑁆𑀢𑁂𑀦 𑀫𑁂 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑁄 𑀲𑁄 𑀏𑀯𑀁 𑀲𑀢𑀺 𑀓𑀲𑁆𑀫𑀸 𑀫𑀁 𑀅𑀦𑁆𑀢𑁄𑀕𑁂𑀳𑁂 𑀯𑀲𑀦𑁆𑀢𑀁 𑀦 𑀕𑀡𑁆𑀳𑀻𑀢𑀺 𑀆𑀳. 𑀬𑀓𑁆𑀔𑁂𑀦 𑀪𑁄 𑀢𑀲𑁆𑀫𑀺𑀁 𑀖𑀭𑁂 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀏𑀓𑁄 𑀉𑀧𑀲𑀓𑁄 𑀅𑀢𑁆𑀣𑀺, 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀕𑁂𑀳𑀁 𑀧𑀯𑀺𑀲𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀅𑀝𑁆𑀞𑀸𑀲𑀺𑀦𑁆𑀢𑀺 𑀯𑀼𑀢𑁆𑀢𑁄 𑀚𑀸𑀦𑀧𑀤𑀺𑀓𑁄 𑀲𑀭𑀡𑀁 𑀦𑀸𑀫 𑀓𑀺𑀦𑁆𑀢𑀺 𑀅𑀚𑀸𑀦𑀦𑁆𑀢𑁄 𑀓𑀺𑀦𑁆𑀢𑀺 𑀯𑀢𑁆𑀯𑀸 𑀲𑁄 𑀲𑀭𑀡𑀁 𑀅𑀕𑁆𑀕𑀳𑁂𑀲𑀻𑀢𑀺 𑀬𑀓𑁆𑀔𑀁 𑀧𑀼𑀘𑁆𑀙𑀺. 𑀬𑀓𑁆𑀔𑁄 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀭𑀡𑀁 𑀅𑀕𑁆𑀕𑀳𑁂𑀲𑀻𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀚𑀸𑀦𑀧𑀤𑀺𑀓𑁄 𑀇𑀤𑀸𑀦𑀺 𑀇𑀫𑀁 𑀯𑀜𑁆𑀘𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦𑀳𑀺 𑀬𑀓𑁆𑀔 𑀅𑀳𑀫𑁆𑀧𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀆𑀳. 𑀏𑀯𑀁 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀬𑀓𑁆𑀔𑁄 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀪 𑀬𑁂 𑀦 𑀪𑀫𑀦𑁆𑀢𑁄 𑀧𑀮𑀸𑀬𑀺, 𑀏𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀭𑀡𑀁 𑀇𑀥𑀮𑁄𑀓𑁂 𑀪𑀬𑁄 𑀧𑀤𑁆𑀤𑀯 𑀦𑀺𑀯𑀸𑀭𑀡𑀢𑁆𑀣𑀁 𑀳𑁄𑀢𑀺, 𑀧𑀭𑀮𑁄𑀓𑁂 𑀲𑀕𑁆𑀕𑀫𑁄𑀓𑁆𑀔𑀸𑀯𑀳𑀁. 𑀢𑀣𑀸𑀳𑀺.

𑁧. 𑀩𑀼𑀤𑁆𑀥𑁄𑀢𑀺 𑀯𑀘𑀦𑀁 𑀏𑀢𑀁, 𑀅𑀫𑀦𑀼𑀲𑁆𑀲𑀸𑀦𑀁 𑀪𑀬𑀸𑀯𑀳𑀁;

𑀩𑀼𑀤𑁆𑀥𑀪𑀢𑁆𑀢𑀺𑀓𑀚𑀦𑁆𑀢𑀽𑀦𑀁, 𑀲𑀩𑁆𑀩𑀤𑀸 𑀫𑀼𑀤𑀫𑀸𑀯𑀳𑀁.

𑁨. 𑀲𑀩𑁆𑀩𑁄𑀧𑀤𑁆𑀤𑀯𑀦𑀸𑀲𑀸𑀬, 𑀧𑀘𑁆𑀘𑀓𑁆𑀔𑀤𑀺𑀩𑁆𑀩𑀫𑁄𑀲𑀥𑀁;

𑀤𑀺𑀩𑁆𑀩𑀫𑀦𑁆𑀢𑀁 𑀫𑀳𑀸𑀢𑁂𑀚𑀁, 𑀫𑀳𑀸𑀬𑀦𑁆𑀢𑀁 𑀫𑀳𑀩𑁆𑀪𑀼𑀢𑀁.

𑁩. 𑀢𑀲𑁆𑀫𑀸 𑀲𑁄 𑀤𑀸𑀭𑀼𑀡𑁄 𑀬𑀓𑁆𑀔𑁄,

𑀤𑀺𑀲𑁆𑀯𑀸 𑀢𑀁 𑀲𑀭𑀡𑁂 𑀞𑀺𑀣𑀁;

𑀉𑀩𑁆𑀩𑀺𑀕𑁆𑀕𑁄 𑀘 𑀪𑀬𑀧𑁆𑀧𑀢𑁆𑀢𑁄,

𑀮𑁄𑀫𑀳𑀝𑁆𑀞𑁄 𑀘 𑀙𑀫𑁆𑀪𑀻𑀢𑁄.

𑁪. 𑀪𑀫𑀦𑁆𑀢𑁄 𑀥𑀸𑀯𑀺𑀢𑀁 𑀤𑀺𑀲𑁆𑀯𑀸, 𑀢𑀺𑀫𑀺𑀭𑁄𑀯 𑀲𑀼𑀭𑀺𑀬𑀼𑀕𑁆𑀕𑀢𑁂,

𑀲𑀺𑀫𑁆𑀩𑀮𑀺𑀢𑀽𑀮𑀪𑀝𑁆𑀞𑀁𑀯, 𑀘𑀡𑁆𑀟𑀯𑀸𑀢𑁂𑀦 𑀔𑀡𑁆𑀟𑀺𑀢𑀁.

𑁫. 𑀬𑀁 𑀤𑀼𑀓𑁆𑀔𑀁 𑀭𑀸𑀚𑀘𑁄𑀭𑀸𑀭𑀺, 𑀬𑀓𑁆𑀔𑀧𑁂𑀢𑀸 𑀤𑀺𑀲𑀫𑁆𑀪𑀯𑀁;

𑀦𑀺𑀘𑁆𑀙𑀦𑁆𑀢𑁂𑀦 𑀫𑀦𑀼𑀲𑁆𑀲𑁂𑀦, 𑀕𑀦𑁆𑀢𑀩𑁆𑀩𑀁 𑀲𑀭𑀡𑀢𑁆𑀢𑀬𑀁𑀢𑀺.

𑀢𑀢𑁄 𑀚𑀸𑀦𑀧𑀤𑀺𑀓𑁄 𑀲𑀭𑀡𑀸𑀕𑀫𑀦𑁂 𑀫𑀳𑀸𑀕𑀼𑀡𑀁 𑀫𑀳𑀸𑀦𑀺𑀲𑀁𑀲𑀁 𑀑𑀮𑁄𑀓𑁂𑀢𑁆𑀯𑀸 𑀩𑀼𑀤𑁆𑀥𑁂 𑀲𑀕𑀸𑀭𑀯𑁄 𑀲𑀧𑁆𑀧𑁂𑀫𑁄 ‘‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀢𑁂𑀦𑁂𑀯 𑀲𑀭𑀡𑀸𑀕𑀫𑀦𑀸𑀦𑀼𑀪𑀸𑀯𑁂𑀦 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯𑀺𑀬 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀻𑀢𑀺.

𑁬. 𑀤𑀺𑀲𑁆𑀯𑀸𑀦 𑀏𑀯𑀁 𑀲𑀭𑀡𑀁 𑀕𑀢𑀁 𑀢𑀁,

𑀅𑀧𑁂𑀦𑁆𑀢𑀺 𑀬𑀓𑁆𑀔𑀸𑀧𑀺 𑀫𑀳𑀩𑁆𑀪𑀬𑁂𑀦;

𑀧𑀸𑀮𑁂𑀣 𑀲𑀻𑀮𑀁 𑀲𑀭𑀡𑀜𑁆𑀘 𑀢𑀲𑁆𑀫𑀸,

𑀚𑀳𑀸𑀣 𑀤𑀼𑀭𑀺𑀢𑀁 𑀲𑀼𑀕𑀢𑀺𑀁 𑀪𑀚𑀯𑁆𑀳𑁄𑀢𑀺.

𑀬𑀓𑁆𑀔𑀯𑀜𑁆𑀘𑀺𑀢𑀯𑀢𑁆𑀣𑀼𑀁 𑀧𑀣𑀫𑀁.

𑁨𑁨. 𑀫𑀺𑀘𑁆𑀙𑀤𑀺𑀝𑁆𑀞𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 𑀥𑀭𑀫𑀸𑀦𑁂 𑀭𑀸𑀚𑀕𑀳𑀦𑀕𑀭𑁂 𑀓𑀺𑀭 𑀏𑀓𑁄 𑀩𑁆𑀭𑀳𑁆𑀫𑀪𑀢𑁆𑀢𑀺𑀓𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀧𑀝𑀺𑀯𑀲𑀢𑀺, 𑀢𑀢𑁆𑀣𑁂𑀯 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄𑀧𑀺. 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀏𑀓𑀢𑁄 𑀓𑀻𑀴𑀦𑁆𑀢𑀸 𑀯𑀟𑁆𑀠𑀦𑁆𑀢𑀺. 𑀅𑀣𑀸𑀧𑀭𑀪𑀸𑀕𑁂 𑀕𑀼𑀴𑀓𑀻𑀴𑀁𑀓𑀻𑀴𑀦𑁆𑀢𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀢𑁆𑀢𑁄 ‘‘𑀦𑀫𑁄 𑀩𑀼𑀤𑁆𑀥𑀬𑀸’’𑀢𑀺 𑀯𑀢𑁆𑀯𑀸 𑀕𑀼𑀴𑁆𑀳𑀁 𑀔𑀺𑀧𑀦𑁆𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀚𑀺𑀦𑀸𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀢𑁆𑀢𑁄 ‘‘𑀦𑀫𑁄 𑀩𑁆𑀭𑀳𑁆𑀫𑀼𑀦𑁄’’𑀢𑀺 𑀯𑀢𑁆𑀯𑀸 𑀔𑀺𑀧𑀦𑁆𑀢𑁄 𑀧𑀭𑀸𑀚𑁂𑀢𑀺, 𑀢𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀢𑁆𑀢𑁄 𑀦𑀺𑀘𑁆𑀘𑀁 𑀚𑀺𑀦𑀦𑁆𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀁 𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 𑀲𑀫𑁆𑀫 𑀢𑁆𑀯𑀁 𑀦𑀺𑀘𑁆𑀘𑀫𑁂𑀯 𑀚𑀺𑀦𑀸𑀲𑀺, 𑀓𑀺𑀁 𑀯𑀢𑁆𑀯𑀸 𑀕𑀼𑀴𑀁 𑀔𑀺𑀧𑀲𑀻𑀢𑀺 𑀧𑀼𑀘𑁆𑀙𑀺. 𑀲𑁄𑀳𑀁 𑀲𑀫𑁆𑀫 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀯𑀢𑁆𑀯𑀸 𑀔𑀺𑀧𑀸𑀫𑀻𑀢𑀺 𑀆𑀳. 𑀲𑁄𑀧𑀺 𑀢𑀢𑁄 𑀧𑀝𑁆𑀞𑀸𑀬 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀯𑀢𑁆𑀯𑀸 𑀔𑀺𑀧𑀢𑀺, 𑀅𑀣 𑀢𑁂 𑀬𑁂𑀪𑀼𑀬𑁆𑀬𑁂𑀦 𑀤𑀽𑀢𑁂 𑀲𑀫𑀲𑀫𑀸𑀯 𑀳𑁄𑀦𑁆𑀢𑀺. 𑀅𑀧𑀭𑀪𑀸𑀕𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀢𑁆𑀢𑁄 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀤𑀸𑀭𑀽𑀦𑀫𑀢𑁆𑀣𑀸𑀬 𑀯𑀦𑀁 𑀕𑀦𑁆𑀢𑁆𑀯𑀸 𑀲𑀓𑀝𑁂𑀦 𑀤𑀸𑀭𑀼𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀦𑀕𑀭𑀤𑁆𑀯𑀸𑀭𑀲𑀫𑀻𑀧𑁂 𑀲𑀓𑀝𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀺𑀡𑁂 𑀔𑀸𑀤𑀦𑀢𑁆𑀣𑀸𑀬 𑀕𑁄𑀡𑁂 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀕𑁄𑀡𑀸 𑀢𑀺𑀡𑀁 𑀔𑀸𑀤𑀦𑁆𑀢𑁄 𑀅𑀜𑁆𑀜𑁂𑀳𑀺 𑀕𑁄𑀭𑀽𑀧𑁂𑀳𑀺 𑀲𑀤𑁆𑀥𑀺𑀁 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀁𑀲𑀼. 𑀅𑀣𑀲𑁆𑀲 𑀧𑀺𑀢𑀸 𑀕𑁄𑀡𑁂 𑀧𑀭𑀺𑀬𑁂𑀲𑀦𑁆𑀢𑁄 𑀲𑀓𑀝𑀁 𑀑𑀮𑁄𑀓𑁂𑀳𑀻𑀢𑀺 𑀧𑀼𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀝𑁆𑀞𑁄 𑀅𑀳𑁄𑀲𑀺, 𑀅𑀣 𑀲𑀸𑀬𑀡𑁆𑀳𑁂 𑀚𑀸𑀢𑁂 𑀫𑀦𑀼𑀲𑁆𑀲𑀸 𑀦𑀕𑀭𑀤𑁆𑀯𑀸𑀭𑀁 𑀧𑀺𑀤𑀳𑀺𑀁𑀲𑀼, 𑀢𑀢𑁄 𑀓𑀼𑀫𑀸𑀭𑁄 𑀩𑀳𑀺𑀦𑀕𑀭𑁂 𑀤𑀸𑀭𑀼𑀲𑀓𑀝𑀲𑁆𑀲 𑀳𑁂𑀝𑁆𑀞𑀸 𑀲𑀬𑀦𑁆𑀢𑁄 𑀦𑀺𑀤𑁆𑀤𑀽𑀧𑀕𑀢𑁄 𑀅𑀳𑁄𑀲𑀺. 𑀅𑀣 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀘𑀸𑀢𑀺 𑀤𑁆𑀯𑁂 𑀬𑀓𑁆𑀔𑀸 𑀕𑁄𑀘𑀭𑀁 𑀧𑀭𑀺𑀬𑁂𑀲𑀫𑀸𑀦𑀸 𑀲𑀓𑀝𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀦𑁆𑀦𑀁 𑀓𑀼𑀫𑀸𑀭𑀁 𑀅𑀤𑁆𑀤𑀲𑀁𑀲𑀼, 𑀢𑁂𑀲𑀼 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀇𑀫𑀁 𑀔𑀸𑀤𑀸𑀫𑀻𑀢𑀺 𑀆𑀳. 𑀅𑀣𑀸𑀧𑀭𑁄 𑀫𑀸 𑀏𑀯 𑀫𑀓𑀸𑀲𑀺, ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀯𑀸𑀘𑀓𑁄 𑀏𑀲𑁄𑀢𑀺, 𑀔𑀸𑀤𑀸𑀫𑁂𑀯𑁂𑀢𑀦𑁆𑀢𑀺 𑀯𑀢𑁆𑀯𑀸 𑀇𑀢𑀭𑁂𑀦 𑀬𑀸𑀯𑀢𑀢𑀺𑀬𑀁 𑀯𑀸𑀭𑀺𑀬𑀫𑀸𑀦𑁄𑀧𑀺 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺. 𑀢𑀲𑁆𑀫𑀺𑀁 𑀔𑀡𑁂 𑀤𑀸𑀭𑀓𑁄 𑀧𑀼𑀩𑁆𑀩𑀧𑀭𑀺𑀘𑀬𑁂𑀦 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀆𑀳 𑀢𑀁 𑀲𑀼𑀢𑁆𑀯𑀸 𑀬𑀓𑁆𑀔𑁄 𑀪𑀬𑀧𑁆𑀧𑀢𑁆𑀢𑁄 𑀮𑁄𑀫𑀳𑀝𑁆𑀞𑁄 𑀳𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀝𑀺𑀓𑁆𑀓𑀫𑁆𑀫 𑀅𑀝𑁆𑀞𑀸𑀲𑀺. 𑀅𑀳𑁄 𑀅𑀘𑁆𑀙𑀭𑀺𑀬𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀅𑀩𑁆𑀪𑀼𑀢𑀁, 𑀏𑀯𑀁 𑀅𑀢𑁆𑀢𑀁 𑀅𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀧𑀭𑀺𑀘𑀬𑁂𑀦 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀯𑀼𑀢𑁆𑀢𑀲𑁆𑀲𑀧𑀺 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀉𑀧𑀤𑁆𑀤𑀯𑀁 𑀯𑀸 𑀦 𑀳𑁄𑀢𑀺. 𑀧𑀕𑁂𑀯 𑀅𑀢𑁆𑀢𑀁 𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀲𑁆𑀲𑀸𑀢𑀺. 𑀯𑀼𑀢𑁆𑀢𑀜𑁆𑀳𑀺.

𑁧. 𑀬𑀣𑀸𑀧𑀺 𑀲𑀺𑀔𑀺𑀦𑁄 𑀦𑀸𑀤𑀁, 𑀪𑀼𑀚𑀗𑁆𑀕𑀸𑀦𑀁 𑀪𑀬𑀸𑀯𑀳𑀁;

𑀏𑀯𑀁 𑀩𑀼𑀤𑁆𑀥𑁄𑀢𑀺 𑀯𑀘𑀦𑀁, 𑀅𑀫𑀦𑀼𑀲𑁆𑀲𑀸𑀦𑀁 𑀪𑀬𑀸𑀯𑀳𑀁.

𑁨. 𑀬𑀣𑀸 𑀫𑀦𑁆𑀢𑀲𑁆𑀲 𑀚𑀧𑁆𑀧𑁂𑀦, 𑀯𑀺𑀮𑀬𑀁 𑀬𑀸𑀢𑀺 𑀓𑀺𑀩𑁆𑀩𑀺𑀲𑀁;

𑀏𑀯𑀁 𑀩𑀼𑀤𑁆𑀥𑁄𑀢𑀺 𑀯𑀘𑀦𑁂𑀦, 𑀅𑀧𑀬𑀦𑁆𑀢𑀺 [𑀧𑀳𑀸𑀬𑀦𑁆𑀢𑀺 𑀇𑀢𑀺𑀲𑀩𑁆𑀩𑀢𑁆𑀣] 𑀧𑀺𑀲𑀸𑀘𑀓𑀸.

𑁩. 𑀅𑀕𑁆𑀕𑀺𑀁 𑀤𑀺𑀲𑁆𑀯𑀸 𑀬𑀣𑀸 𑀲𑀺𑀢𑁆𑀣𑀁, 𑀤𑀽𑀭𑀢𑁄𑀯 𑀯𑀺𑀮𑀻𑀬𑀢𑀺;

𑀤𑀺𑀲𑁆𑀯𑀸𑀦𑁂𑀯𑀁 𑀲𑀭𑀡𑀕𑀢𑀁, 𑀧𑁂𑀢𑀸 𑀧𑁂𑀦𑁆𑀢𑀺𑀯 [𑀧𑁂𑀢𑀸𑀧𑁂𑀦𑁆𑀢𑀸𑀯 𑀇𑀢𑀺𑀓𑀢𑁆𑀣𑀘𑀺] 𑀤𑀽𑀭𑀢𑁄.

𑁪. 𑀧𑀯𑀭𑀁 𑀩𑀼𑀤𑁆𑀥𑀇𑀘𑁆𑀘𑁂𑀢, 𑀫𑀓𑁆𑀔𑀭𑀤𑁆𑀯𑀬𑀫𑀩𑁆𑀪𑀼𑀢𑀁;

𑀲𑀩𑁆𑀩𑁄 𑀧𑀤𑁆𑀤𑀯𑀦𑀸𑀲𑀸𑀬, 𑀣𑀺𑀭𑀧𑀸𑀓𑀸𑀭 𑀫𑀼𑀕𑁆𑀕𑀢𑀁.

𑁫. 𑀲𑀢𑁆𑀢𑀭𑀢𑀦𑀧𑀸𑀲𑀸𑀤𑀁, 𑀢𑀫𑁂𑀯 𑀯𑀚𑀺𑀭𑀁 𑀕𑀼𑀳𑀁;

𑀢𑀫𑁂𑀯 𑀦𑀸𑀯𑀁 𑀤𑀻𑀧𑀁 𑀢𑀁, 𑀢𑀫𑁂𑀯 𑀓𑀯𑀘𑀁 𑀲𑀼𑀪𑀁.

𑁬. 𑀢𑀫𑁂𑀯 𑀲𑀺𑀭𑀲𑀺 𑀪𑀸𑀲𑀦𑁆𑀢𑀁, 𑀓𑀺𑀭𑀻𑀝𑀁 𑀭𑀢𑀦𑀸𑀫𑀬𑀁;

𑀮𑀮𑀸𑀝𑁂 𑀢𑀺𑀮𑀓𑀁 𑀭𑀫𑁆𑀫𑀁, 𑀓𑀧𑁆𑀧𑀽𑀭𑀁 𑀦𑀬𑀦𑀤𑁆𑀯𑀬𑁂.

𑁭. 𑀢𑀸𑀟𑀗𑁆𑀓𑀁 𑀓𑀡𑁆𑀡𑀬𑀼𑀕𑀮𑁂, 𑀲𑁄𑀡𑁆𑀡𑀫𑀸𑀮𑀸 𑀕𑀮𑁂 𑀲𑀼𑀪𑀸;

𑀏𑀓𑀸𑀯𑀴𑀺 𑀢𑀸𑀭𑀳𑀸𑀭, 𑀪𑀸𑀭𑀸 𑀚𑀢𑁆𑀢𑀼𑀲𑀼 𑀮𑀗𑁆𑀓𑀢𑀸.

𑁮. 𑀅𑀗𑁆𑀕𑀤𑀁 𑀩𑀸𑀳𑀼𑀫𑀽𑀮𑀲𑁆𑀲, 𑀓𑀭𑀕𑁆𑀕𑁂 𑀯𑀮𑀬𑀁 𑀢𑀣𑀸;

𑀅𑀗𑁆𑀕𑀼𑀮𑀺𑀲𑁆𑀯𑀗𑁆𑀕𑀼𑀮𑀺𑀬𑀜𑁆𑀘, 𑀔𑀕𑁆𑀕𑀁 𑀫𑀗𑁆𑀕𑀮𑀲𑀫𑁆𑀫𑀢𑀁.

𑁯. 𑀲𑁄𑀡𑁆𑀡𑀸 𑀢𑀧𑀢𑁆𑀢 𑀫𑀼𑀡𑁆𑀳𑀻𑀲𑀁, 𑀲𑀩𑀸𑀡𑀁𑀯 𑀲𑀭𑀸𑀲𑀦𑀁;

𑀢𑀫𑁂𑀯 𑀲𑀩𑁆𑀩𑀸𑀮𑀗𑁆𑀓𑀸𑀭𑀁, 𑀢𑀫𑁂𑀯 𑀤𑀼𑀭𑀺𑀢𑀸𑀧𑀳𑀁.

𑁧𑁦. 𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄,

𑀮𑁄𑀓𑀮𑁄𑀘𑀦𑀲𑀢𑁆𑀣𑀼𑀦𑁄;

𑀲𑀭𑀡𑀁 𑀢𑀲𑁆𑀲 𑀕𑀦𑁆𑀢𑁂𑀯,

𑀕𑀼𑀡𑀦𑀸𑀫𑀁 𑀏𑀳𑀺𑀧𑀲𑁆𑀲𑀺𑀓𑀁.

𑁧𑁧. 𑀦𑀫𑁄𑀢𑀺 𑀯𑀘𑀦𑀁 𑀧𑀼𑀩𑁆𑀩𑀁, 𑀩𑀼𑀤𑁆𑀥𑀸𑀬𑁂𑀢𑀺 𑀕𑀺𑀭𑀁 𑀢𑀤𑀸;

𑀲𑀼𑀧𑀦𑁆𑀢𑁂𑀦 𑀓𑀼𑀫𑀸𑀭𑁂𑀦, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑀽𑀦𑀼𑀦𑀸.

𑁧𑁨. 𑀲𑀼𑀢𑁆𑀯𑀸 𑀯𑀼𑀢𑁆𑀢𑀁 𑀧𑀺𑀲𑀸 𑀘𑀸𑀧𑀺, 𑀫𑀦𑀼𑀲𑁆𑀲𑀓𑀼𑀡𑀧𑁂 𑀭𑀢𑀸;

𑀦 𑀳𑀺𑀁𑀲𑀦𑁆𑀢𑀺 𑀅𑀳𑁄 𑀩𑀼𑀤𑁆𑀥, 𑀕𑀼𑀡𑀲𑀸𑀭𑀫𑀳𑀦𑁆𑀢𑀢𑀸𑀢𑀺.

𑀅𑀣 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀬𑀓𑁆𑀔𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀬𑀓𑁆𑀔𑀲𑁆𑀲 𑀏𑀯𑀫𑀸𑀳, 𑀅𑀬𑀼𑀢𑁆𑀢𑀁 𑀪𑁄 𑀢𑀬𑀸 𑀓𑀢𑀁. 𑀩𑀼𑀤𑁆𑀥𑀕𑀼𑀡𑁂 𑀧𑀳𑀸𑀭𑁄 𑀤𑀺𑀦𑁆𑀦𑁄, 𑀤𑀡𑁆𑀟𑀓𑀫𑁆𑀫𑀁 𑀢𑀬𑀸 𑀓𑀸𑀢𑀩𑁆𑀩𑀁𑀢𑀺, 𑀢𑁂𑀦 𑀓𑀺𑀁𑀫𑀬𑀸 𑀲𑀫𑁆𑀫 𑀓𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑁂 𑀩𑀼𑀪𑀼𑀓𑁆𑀔𑀺𑀢𑀲𑁆𑀲 𑀆𑀳𑀸𑀭𑀁 𑀤𑁂𑀳𑀻𑀢𑀺 𑀆𑀳. 𑀢𑀢𑁄 𑀲𑁄 𑀲𑀸𑀥𑀽𑀢𑀺 𑀯𑀢𑁆𑀯𑀸 𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀢𑀸𑀯𑁂𑀢𑁆𑀣 𑀯𑀘𑁆𑀙𑀸𑀳𑀻𑀢𑀺 𑀯𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀓𑀜𑁆𑀘𑀦𑀢𑀝𑁆𑀝𑀓𑁂 𑀯𑀟𑁆𑀠𑀺𑀢𑀁 𑀭𑀲𑀪𑁄𑀚𑀦𑀁 𑀆𑀳𑀭𑀺𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀧𑀺𑀢𑀼𑀯𑀡𑁆𑀡𑁂𑀦 𑀤𑀸𑀭𑀓𑀁 𑀪𑁄𑀚𑁂𑀢𑁆𑀯𑀸 𑀧𑀼𑀦 𑀓𑀼𑀫𑀸𑀭𑁂𑀦 𑀯𑀼𑀢𑁆𑀢𑀩𑀼𑀤𑁆𑀥𑀯𑀘𑀦𑀜𑁆𑀘 𑀅𑀢𑁆𑀢𑀦𑀸 𑀓𑀢𑀯𑀸𑀬𑀸𑀫𑀁 𑀘𑀸𑀢𑀺 𑀲𑀩𑁆𑀩𑀁 𑀢𑀝𑁆𑀝𑀓𑁂 𑀮𑀺𑀔𑀺𑀢𑁆𑀯𑀸 𑀇𑀤𑀁 𑀭𑀜𑁆𑀜𑁄𑀬𑁂𑀯 𑀧𑀜𑁆𑀜𑀸𑀬𑀢𑀽𑀢𑀺 𑀅𑀥𑀺𑀝𑁆𑀞𑀸𑀬 𑀅𑀕𑀫𑀁𑀲𑀼, 𑀅𑀣 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀭𑀜𑁆𑀜𑁄 𑀪𑁄𑀚𑀦𑀓𑀸𑀮𑁂 𑀭𑀸𑀚𑀧𑀼𑀭𑀺𑀲𑀸 𑀢𑀢𑁆𑀣 𑀢𑀝𑁆𑀝𑀓𑀁 𑀅𑀤𑀺𑀲𑁆𑀯𑀸 𑀦𑀕𑀭𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀸 𑀲𑀓𑀝𑁂 𑀤𑀸𑀭𑀓𑀜𑁆𑀘 𑀢𑀝𑁆𑀝𑀓𑀜𑁆𑀘 𑀤𑀺𑀲𑁆𑀯𑀸 𑀢𑀝𑁆𑀝𑀓𑁂𑀦 𑀲𑀤𑁆𑀥𑀺𑀁 𑀢𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀢𑀝𑁆𑀝𑀓𑁂 𑀅𑀓𑁆𑀔𑀭𑀸𑀤𑀻𑀦𑀺 𑀤𑀺𑀲𑁆𑀯𑀸 𑀯𑀸𑀘𑁂𑀢𑁆𑀯𑀸 𑀢𑀲𑁆𑀲 𑀕𑀼𑀡𑁂 𑀧𑀲𑀦𑁆𑀦𑁄 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀲𑀤𑁆𑀥𑀺𑀁 𑀲𑁂𑀝𑁆𑀞𑀺𑀝𑁆𑀞𑀸𑀦𑀫𑀤𑀸𑀲𑀺.

𑁧𑁩. 𑀚𑀺𑀦𑀲𑁆𑀲 𑀦𑀸𑀫𑀁 𑀲𑀼𑀧𑀺𑀦𑁂𑀦 𑀧𑁂𑀯𑀁,

𑀦 𑀳𑁄𑀢𑀺 𑀪𑀻𑀢𑀺𑀁 𑀮𑀧𑀦𑁂𑀦 𑀬𑀲𑁆𑀫𑀸;

𑀢𑀲𑁆𑀫𑀸 𑀫𑀼𑀦𑀺𑀦𑁆𑀤𑀁 𑀲𑀢𑀢𑀁 𑀲𑀭𑀸𑀣,

𑀕𑀼𑀡𑁂 𑀲𑀭𑀦𑁆𑀢𑀸 𑀲𑀭𑀡𑀜𑁆𑀘 𑀬𑀸𑀣𑀸𑀢𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀯𑀢𑁆𑀣𑀼𑀁 𑀤𑀼𑀢𑀺𑀬𑀁.

𑁨𑁩. 𑀧𑀸𑀤𑀧𑀻𑀞𑀺𑀓𑀸𑀬 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 𑀫𑀳𑀸𑀩𑁄𑀥𑀺𑀢𑁄 𑀓𑀺𑀭 𑀤𑀓𑁆𑀔𑀺𑀡𑀧𑀲𑁆𑀲𑁂 𑀏𑀢𑀁 𑀧𑀘𑁆𑀘𑀦𑁆𑀢𑀦𑀕𑀭𑀁 𑀅𑀳𑁄𑀲𑀺. 𑀢𑀢𑁆𑀣 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀭𑀢𑀦𑀢𑁆𑀢𑀬𑀫𑀸𑀫𑀓𑁄 𑀏𑀓𑁄 𑀉𑀧𑀸𑀲𑀓𑁄 𑀧𑀝𑀺𑀯𑀲𑀢𑀺. 𑀢𑀤𑀸 𑀏𑀓𑁄 𑀔𑀻𑀡𑀸𑀲𑀯𑁄 𑀪𑀕𑀯𑀢𑀸 𑀧𑀭𑀺𑀪𑀼𑀢𑁆𑀢𑀁 𑀧𑀸𑀤𑀧𑀻𑀞𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑀕𑀢𑀝𑁆𑀞𑀸𑀦𑁂 𑀧𑀽𑀚𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺 𑀬𑀼𑀕𑀫𑀢𑁆𑀢𑀤𑀲𑁄 𑀧𑀩𑁆𑀩𑀚𑁆𑀚𑀸𑀮𑀻𑀮𑀸𑀬 𑀚𑀦𑀁 𑀧𑀭𑀺𑀢𑁄𑀲𑁂𑀦𑁆𑀢𑁄. 𑀅𑀣 𑀲𑁄 𑀉𑀧𑀸𑀲𑀓𑁄 𑀢𑀣𑀸 𑀕𑀘𑁆𑀙𑀦𑁆𑀢𑀁 𑀣𑁂𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀉𑀧𑀕𑀦𑁆𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀦𑀺𑀩𑀤𑁆𑀥𑀁 𑀫𑀫 𑀕𑁂𑀳𑀁 𑀆𑀕𑀫𑀦𑀫𑀺𑀘𑁆𑀙𑀸𑀫𑀺, 𑀫𑀫𑀸𑀦𑀼𑀓𑀫𑁆𑀧𑀸𑀬 𑀏𑀢𑁆𑀣𑁂𑀯 𑀯𑀲𑀣 𑀲𑀸𑀫𑀻𑀢𑀺 𑀬𑀸𑀘𑀺𑀢𑁆𑀯𑀸 𑀦𑀕𑀭𑀸𑀲𑀦𑁆𑀦𑁂 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀦𑀤𑀻𑀓𑀽𑀮𑁂 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀢𑀁 𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑁂𑀳𑀺 𑀧𑀝𑀺𑀚𑀕𑁆𑀕𑀦𑁆𑀢𑁄 𑀫𑀸𑀦𑁂𑀦𑁆𑀢𑁄 𑀧𑀽𑀚𑁂𑀦𑁆𑀢𑁄 𑀯𑀲𑀢𑀺. 𑀣𑁂𑀭𑁄𑀧𑀺 𑀢𑀢𑁆𑀣 𑀨𑀸𑀲𑀼𑀓𑀝𑁆𑀞𑀸𑀦𑁂 𑀪𑀕𑀯𑀢𑀸 𑀧𑀭𑀺𑀪𑀼𑀢𑁆𑀢𑀧𑀸𑀤𑀧𑀻𑀞𑀥𑀸𑀢𑀼𑀁 𑀦𑀺𑀥𑀸𑀬 𑀯𑀸𑀮𑀼𑀓𑀸𑀳𑀺 𑀣𑀽𑀧𑀁 𑀓𑀢𑁆𑀯𑀸 𑀦𑀺𑀘𑁆𑀘𑀁 𑀕𑀦𑁆𑀥𑀥𑀽𑀧𑀤𑀻𑀧𑀧𑀼𑀧𑁆𑀨𑀧𑀽𑀚𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀯𑀸𑀲𑀁 𑀓𑀧𑁆𑀧𑁂𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀲𑁆𑀲𑁄 𑀧𑀸𑀲𑀓𑀲𑁆𑀲 𑀅𑀦𑀦𑁆𑀢𑀭𑀕𑁂𑀳𑀯𑀸𑀲𑀺𑀓𑁄 𑀏𑀓𑁄 𑀇𑀲𑁆𑀲𑀭𑀪𑀢𑁆𑀢𑀺𑀓𑁄 𑀅𑀢𑁆𑀢𑀦𑁄 𑀤𑁂𑀯𑀢𑀁 𑀦𑀺𑀩𑀤𑁆𑀥𑀁 𑀦𑀫𑀲𑁆𑀲𑀢𑀺. 𑀢𑀁 𑀤𑀺𑀲𑁆𑀯𑀸𑀲𑁆𑀲 𑀉𑀧𑀸𑀲𑀓𑁄 𑀩𑀼𑀤𑁆𑀥𑀕𑀼𑀡𑁂 𑀯𑀢𑁆𑀯𑀸 𑀅𑀔𑁂𑀢𑁆𑀢𑁂 𑀲𑀫𑁆𑀫 𑀫𑀸 𑀯𑀺𑀭𑀺𑀬𑀁 𑀓𑀭𑁄𑀳𑀺. 𑀧𑀚𑀳𑁂𑀢𑀁 𑀤𑀺𑀝𑁆𑀞𑀺𑀁𑀢𑀺 𑀆𑀳. 𑀢𑀢𑁄 𑀲𑁄 𑀓𑁂𑀭𑀸𑀝𑀺𑀓𑁄 𑀇𑀲𑁆𑀲𑀭𑀪𑀢𑁆𑀢𑀺𑀓𑁄 𑀓𑁄 𑀢𑁂 𑀲𑀢𑁆𑀣𑀼 𑀕𑀼𑀡𑀸𑀦𑀼𑀪𑀸𑀯𑁄, 𑀅𑀫𑁆𑀳𑀸𑀓𑀁 𑀇𑀲𑁆𑀲𑀭𑀲𑁆𑀲 𑀕𑀼𑀡𑁄𑀯 𑀫𑀳𑀦𑁆𑀢𑁄𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀕𑀼𑀡𑀁 𑀕𑀼𑀡𑀦𑁆𑀢𑀺 𑀓𑀣𑁂𑀦𑁆𑀢𑁄 𑀆𑀳.

𑁧. 𑀢𑀺𑀧𑀼𑀭𑀁 𑀲𑁄 𑀯𑀺𑀦𑀸𑀲𑁂𑀲𑀺, 𑀮𑀮𑀸𑀝𑀦𑀬𑀦𑀕𑁆𑀕𑀺𑀦𑀸;

𑀅𑀲𑀼𑀭𑁂𑀘 𑀯𑀺𑀦𑀸𑀲𑁂𑀲𑀺, 𑀢𑀺𑀲𑀽𑀮𑁂𑀦 𑀫𑀳𑀺𑀲𑁆𑀲𑀭𑁄.

𑁨. 𑀚𑀝𑀸𑀓𑀮𑀸𑀧𑀫𑀸𑀯𑀢𑁆𑀢𑀁, 𑀦𑀘𑁆𑀘𑀢𑀻 𑀤𑀺𑀦𑀲𑀦𑁆𑀥𑀺𑀬𑀁;

𑀯𑀸𑀤𑁂𑀢𑀺 𑀪𑁂𑀭𑀺𑀯𑀻𑀡𑀸𑀤𑀺𑀁, 𑀕𑀻𑀢𑀁𑀘𑀸𑀧𑀺 𑀲 𑀕𑀸𑀬𑀢𑀺.

𑁩. 𑀪𑀭𑀺𑀬𑀸𑀬𑁄 𑀢𑀲𑁆𑀲 𑀢𑀺𑀲𑁆𑀲𑁄, 𑀚𑀝𑀸𑀬𑁂𑀓𑀁 𑀲𑀫𑀼𑀩𑁆𑀩𑀳𑁂;

𑀏𑀓𑀫𑁂𑀓𑁂𑀦 𑀧𑀲𑁆𑀲𑁂𑀦, 𑀧𑀲𑁆𑀲𑀫𑀸𑀦𑁄 𑀘𑀭𑁂𑀓𑀓𑀁.

𑁪. 𑀳𑀢𑁆𑀣𑀺𑀘𑀫𑁆𑀫𑀫𑁆𑀩𑀭𑀥𑀭𑁄, 𑀢𑁂𑀦𑁂𑀯 𑀯𑀸𑀭𑀺𑀢𑀸 𑀢𑀧𑁄;

𑀅𑀲𑀸𑀤𑀺𑀲𑁂𑀳𑀺 𑀧𑀼𑀢𑁆𑀢𑁂𑀳𑀺, 𑀭𑀽𑀧𑁂𑀦 𑀘 𑀲𑀼𑀧𑀸𑀓𑀝𑁄.

𑁫. 𑀭𑀢𑀺𑀬𑀸 𑀘 𑀫𑀥𑀼𑀧𑀸𑀦𑁂 𑀘, 𑀩𑁆𑀬𑀸𑀯𑀝𑁄 𑀲𑀩𑁆𑀩𑀤𑀸 𑀘 𑀲𑁄;

𑀫𑀦𑀼𑀲𑁆𑀲𑀝𑁆𑀞𑀺𑀥𑀭𑁄 𑀲𑀻𑀲, 𑀓𑀧𑀸𑀮𑁂𑀦𑁂𑀲 𑀪𑀼𑀜𑁆𑀚𑀓𑀺.

𑁬. 𑀦 𑀚𑀸𑀢𑁄 𑀦 𑀪𑀬𑀁 𑀢𑀲𑁆𑀲, 𑀫𑀭𑀡𑀁 𑀦𑀢𑁆𑀣𑀺 𑀲𑀲𑁆𑀲𑀢𑁄;

𑀈𑀤𑀺𑀲𑁄 𑀫𑁂 𑀫𑀳𑀸𑀤𑁂𑀯𑁄, 𑀦𑀢𑁆𑀣𑀜𑁆𑀜𑀲𑁆𑀲𑀻𑀤𑀺𑀲𑁄 𑀕𑀼𑀡𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑁄 𑀲𑀫𑁆𑀫 𑀢𑀼𑀬𑁆𑀳𑀁 𑀇𑀲𑁆𑀲𑀭𑀲𑁆𑀲 𑀏𑀢𑁂 𑀕𑀼𑀡𑀸 𑀦𑀸𑀫 𑀢𑀸𑀯 𑀳𑁄𑀦𑁆𑀢𑀼. 𑀅𑀕𑀼𑀡𑀸 𑀦𑀸𑀫 𑀓𑀺𑀢𑁆𑀢𑀓𑀸 𑀳𑁄𑀦𑁆𑀢𑀻𑀢𑀺 𑀯𑀢𑁆𑀯𑀸 𑀪𑀕𑀯𑀢𑁄 𑀲𑀓𑀮𑀕𑀼𑀡𑁂 𑀲𑀁𑀳𑀭𑀺𑀢𑁆𑀯𑀸 𑀓𑀣𑁂𑀦𑁆𑀢𑁄 𑀆𑀳.

𑁭. 𑀮𑁄𑀓𑁂 𑀲𑀩𑁆𑀩𑀲𑀯𑀦𑁆𑀢𑀻𑀦𑀁, 𑀆𑀥𑀸𑀭𑁄 𑀲𑀸𑀕𑀭𑁄 𑀬𑀣𑀸;

𑀲𑀩𑁆𑀩𑁂𑀲𑀁 𑀕𑀼𑀡𑀭𑀸𑀲𑀻𑀦𑀁, 𑀆𑀥𑀸𑀭𑁄𑀯 𑀢𑀣𑀸𑀕𑀢𑁄.

𑁮. 𑀘𑀭𑀸𑀘𑀭𑀸𑀦𑀁 𑀲𑀩𑁆𑀩𑁂𑀲𑀁, 𑀆𑀥𑀸𑀭𑀸𑀯 𑀥𑀭𑀸 𑀅𑀬𑀁;

𑀢𑀣𑀸 𑀕𑀼𑀡𑀸𑀦𑀁 𑀲𑀩𑁆𑀩𑁂𑀲𑀁, 𑀆𑀥𑀸𑀭𑁄𑀯 𑀢𑀣𑀸𑀕𑀢𑁄.

𑁯. 𑀏𑀯𑀁 𑀲𑀦𑁆𑀢𑁄 𑀯𑀺𑀬𑀢𑁆𑀢𑁄𑀘 [𑀯𑀺𑀬𑀦𑁆𑀢𑁄 𑀇𑀢𑀺𑀓𑀢𑁆𑀣𑀘𑀺], 𑀏𑀯𑀁 𑀲𑁄 𑀓𑀭𑀼𑀡𑀸𑀧𑀭𑁄;

𑀏𑀯 𑀫𑀺𑀤𑁆𑀥𑀺𑀯𑀺𑀥𑀸 𑀢𑀲𑁆𑀲, 𑀏𑀯𑀫𑁂𑀯𑀁 𑀕𑀼𑀡𑀸 𑀇𑀢𑀺.

𑁧𑁦. 𑀩𑀼𑀤𑁆𑀥𑁄𑀧𑀺 𑀲𑀓𑁆𑀓𑁄𑀢𑀺 𑀦 𑀬𑀲𑁆𑀲 𑀯𑀡𑁆𑀡𑁂,

𑀓𑀧𑁆𑀧𑀫𑁆𑀧𑀺 𑀯𑀢𑁆𑀯𑀸 𑀔𑀬𑀢𑀁 𑀕𑀫𑁂𑀢𑀼𑀁;

𑀧𑀕𑁂𑀯 𑀘 𑀩𑁆𑀭𑀳𑁆𑀫𑀲𑀼𑀭𑀸 𑀲𑀼𑀭𑁂𑀳𑀺,

𑀯𑀢𑁆𑀢𑀼𑀁 𑀦 𑀳𑀸𑀦𑀦𑁆𑀢𑀕𑀼𑀡𑀲𑁆𑀲 𑀯𑀡𑁆𑀡𑀦𑁆𑀢𑀺.

𑀏𑀯𑀁 𑀯𑀤𑀦𑁆𑀢𑀸 𑀧𑀦 𑀢𑁂 𑀉𑀪𑁄𑀧𑀺 𑀅𑀫𑁆𑀳𑀸𑀓𑀁 𑀤𑁂𑀯𑁄 𑀉𑀢𑁆𑀢𑀫𑁄 𑀅𑀫𑁆𑀳𑀸𑀓𑀁 𑀤𑁂𑀯𑁄 𑀉𑀢𑁆𑀢𑀫𑁄𑀢𑀺 𑀓𑀮𑀳𑀁 𑀯𑀟𑁆𑀠𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀫𑀕𑀫𑀁𑀲𑀼, 𑀭𑀸𑀚𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀢𑁂𑀦𑀳𑀺 𑀢𑀼𑀫𑁆𑀳𑀸𑀓𑀁 𑀤𑁂𑀯𑀢𑀸𑀦𑀁 𑀫𑀳𑀦𑁆𑀢𑀪𑀸𑀯𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦 𑀚𑀸𑀦𑀺𑀲𑁆𑀲𑀸𑀫. 𑀤𑀲𑁆𑀲𑁂𑀣 𑀢𑁂𑀳𑀺 𑀦𑁄 𑀇𑀤𑁆𑀥𑀺𑀁𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀇𑀢𑁄 𑀓𑀺𑀭 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀢𑁆𑀣𑀸𑀭𑀸𑀦𑀁 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀦𑁆𑀢𑀽𑀢𑀺 𑀢𑀁 𑀲𑀼𑀢𑁆𑀯𑀸 𑀦𑀸𑀦𑀸𑀤𑀺𑀲𑀸𑀲𑀼 𑀩𑀳𑀽 𑀫𑀦𑀼𑀲𑁆𑀲𑀸 𑀲𑀫𑀸𑀕𑀫𑀺𑀁𑀲𑀼, 𑀅𑀣 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀤𑁂𑀯𑀲𑁆𑀲 𑀆𑀦𑀼𑀪𑀸𑀯𑀁 𑀧𑀲𑁆𑀲𑀸𑀫𑀸𑀢𑀺 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀢𑀢𑁆𑀣 𑀲𑀸𑀭𑀁 𑀦𑀸𑀤𑁆𑀤𑀲𑀁𑀲𑀼, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸𑀧𑀺 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀆𑀦𑀼𑀪𑀸𑀯𑀁 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀯𑀸𑀴𑀼𑀓𑀸𑀣𑀽𑀧𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀜𑁆𑀚𑀮𑀺𑀫𑁆𑀧𑀕𑁆𑀕𑀬𑁆𑀳 𑀅𑀝𑁆𑀞𑀁𑀲𑀼. 𑀅𑀣 𑀭𑀸𑀚𑀸𑀧𑀺 𑀩𑀮𑀯𑀸𑀳𑀦𑀧𑀭𑀺𑀯𑀼𑀢𑁄 𑀏𑀓𑀫𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀦𑀸𑀦𑀸𑀲𑀫𑀬𑀯𑀸𑀤𑀺𑀦𑁄𑀧𑀺 𑀅𑀚𑁆𑀚 𑀢𑁂𑀲𑀁 𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀫𑀜𑁆𑀘𑀸𑀢𑀺𑀫𑀜𑁆𑀘𑀁 𑀓𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑁂𑀲𑀁 𑀲𑀫𑀸𑀕𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀯𑀸𑀴𑀼𑀓𑀸𑀣𑀽𑀧 𑀫𑀪𑀺𑀫𑀼𑀔𑀁 𑀓𑀢𑁆𑀯𑀸 𑀅𑀜𑁆𑀚𑀮𑀺𑀫𑁆𑀧𑀕𑁆𑀕𑀬𑁆𑀳 𑀲𑀸𑀫𑀺 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀲𑀩𑁆𑀩𑀩𑀼𑀤𑁆𑀥𑀓𑀺𑀘𑁆𑀘𑀸𑀦𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀡𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀸𑀭𑀺𑀧𑀼𑀢𑁆𑀢𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀧𑀺 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼, 𑀦𑀢𑁆𑀣𑁂𑀢𑁆𑀣 𑀅𑀫𑁆𑀳𑀸𑀓𑀁 𑀅𑀜𑁆𑀜𑀁 𑀧𑀝𑀺𑀲𑀭𑀡𑀦𑁆𑀢𑀺 𑀯𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀸 𑀆𑀳𑀁𑀲𑀼.

𑁧𑁧. 𑀆𑀧𑀸𑀡𑀓𑁄𑀝𑀺𑀁 𑀩𑀼𑀤𑁆𑀥𑀲𑁆𑀲, 𑀲𑀭𑀡𑀁 𑀦𑁄 𑀕𑀢𑀸 𑀬𑀤𑀺;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁨. 𑀆𑀧𑀸𑀡𑀓𑁄𑀝𑀺𑀁 𑀥𑀫𑁆𑀫𑀲𑁆𑀲, 𑀲𑀭𑀡𑀁 𑀦𑁄 𑀕𑀢𑀸 𑀬𑀤𑀺;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁩. 𑀆𑀧𑀸𑀡𑀓𑁄𑀝𑀺𑀁 𑀲𑀗𑁆𑀖𑀲𑁆𑀲, 𑀲𑀭𑀡𑀁 𑀦𑁄 𑀕𑀢𑀸 𑀬𑀤𑀺;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁪. 𑀭𑀸𑀫𑀓𑀸𑀮𑁂 𑀫𑀼𑀦𑀺𑀦𑁆𑀤𑀲𑁆𑀲, 𑀧𑀸𑀤𑀼𑀓𑀸 𑀘𑀸𑀲𑀺 𑀅𑀩𑁆𑀪𑀼𑀢𑀸;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁫. 𑀙𑀤𑁆𑀤𑀦𑁆𑀢𑀓𑀸𑀮𑁂 𑀫𑀼𑀦𑀺𑀦𑁄, 𑀤𑀸𑀞𑀸 𑀙𑀭𑀁𑀲𑀺𑀭𑀜𑁆𑀚𑀺𑀢𑀸;

𑀢𑁂𑀦 𑀲𑀘𑁆𑀘𑁂𑀦𑀬𑀁 𑀥𑀸𑀢𑀼, 𑀦𑀺𑀘𑁆𑀙𑀸𑀭𑁂𑀢𑀼 𑀙 𑀭𑀁𑀲𑀺𑀬𑁄.

𑁧𑁬. 𑀚𑀸𑀢𑀫𑀢𑁆𑀢𑁄 𑀢𑀤𑀸 𑀩𑀼𑀤𑁆𑀥𑁄, 𑀞𑀺𑀢𑁄 𑀧𑀗𑁆𑀓𑀚𑀫𑀼𑀤𑁆𑀥𑀦𑀺;

𑀦𑀺𑀘𑁆𑀙𑀸𑀭𑁂𑀲𑀸𑀲𑀪𑀺𑀁𑀯𑀸𑀘𑀁, 𑀅𑀕𑁆𑀕𑁄 𑀲𑁂𑀝𑁆𑀞𑁄𑀢𑀺𑀆𑀤𑀺𑀦𑀸;

𑀢𑁂𑀦 𑀲𑀘𑁆𑀘𑁂𑀦𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁭. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀦𑀺𑀓𑁆𑀔𑀦𑁆𑀢𑁄 𑀅𑀪𑀺𑀦𑀺𑀓𑁆𑀔𑀫𑀁;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁮. 𑀫𑀸𑀭𑀲𑁂𑀦𑀁 𑀧𑀮𑀸𑀧𑁂𑀢𑁆𑀯𑀸, 𑀦𑀺𑀲𑀺𑀦𑁆𑀦𑁄 𑀩𑀼𑀚𑁆𑀛𑀺 𑀩𑁄𑀥𑀺𑀬𑀁;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁯. 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀚𑀺𑀦𑁄 𑀲𑀺𑀧𑀢𑀦𑁂 𑀢𑀤𑀸;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁨𑁦. 𑀦𑀦𑁆𑀤𑁄𑀧𑀦𑀦𑁆𑀤𑀪𑁄𑀕𑀺𑀦𑁆𑀤𑀁, 𑀦𑀸𑀕𑀁 𑀦𑀸𑀮𑀸𑀕𑀺𑀭𑀺𑀯𑁆𑀳𑀬𑀁;

𑀆𑀴𑀯𑀓𑀸 𑀤𑀬𑁄 𑀬𑀓𑁆𑀔𑁂, 𑀩𑁆𑀭𑀳𑁆𑀫𑀸𑀦𑁄 𑀘 𑀩𑀓𑀸 𑀤𑀬𑁄.

𑁨𑁧. 𑀲𑀘𑁆𑀘𑀓𑀸𑀤𑀺𑀦𑀺𑀕𑀡𑁆𑀞𑁂𑀘, 𑀓𑀽𑀝𑀤𑀦𑁆𑀢𑀸 𑀤𑀬𑁄 𑀤𑁆𑀯𑀺𑀚𑁂;

𑀤𑀫𑁂𑀲𑀺 𑀢𑁂𑀦 𑀲𑀘𑁆𑀘𑁂𑀦, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀉𑀧𑀸𑀲𑀓𑀸 𑀅𑀫𑁆𑀳𑀸𑀓𑀁 𑀅𑀦𑀼𑀓𑀫𑁆𑀫𑀁 𑀧𑀝𑀺𑀘𑁆𑀘 𑀫𑀳𑀸𑀚𑀦𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑁂𑀤𑀦𑀢𑁆𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀣 𑀲𑀸𑀫𑀻𑀢𑀺 𑀆𑀭𑀸𑀥𑁂𑀲𑀼𑀁. 𑀅𑀣 𑀩𑀼𑀤𑁆𑀥𑀸𑀦𑀼𑀪𑀸𑀯𑀜𑁆𑀘 𑀣𑁂𑀭𑀸𑀦𑀼𑀪𑀸𑀯𑀜𑁆𑀘 𑀉𑀧𑀸𑀲𑀓𑀸𑀦𑀁 𑀲𑀘𑁆𑀘𑀓𑀺𑀭𑀺𑀬𑀸𑀦𑀼𑀪𑀸𑀯𑀜𑁆𑀘 𑀧𑀝𑀺𑀘𑁆𑀘 𑀯𑀸𑀴𑀼𑀓𑀸𑀣𑀽𑀧𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀤𑀧𑀻𑀞𑀥𑀸𑀢𑀼 𑀆𑀓𑀸𑀲 𑀫𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀻 𑀯𑀺𑀮𑀸𑀲𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀅𑀣 𑀫𑀳𑀸𑀚𑀦𑀸 𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑁂𑀦𑁆𑀢𑀸 𑀲𑀸𑀥𑀼𑀓𑀻𑀴𑁆𑀳𑀁 𑀓𑀻𑀴𑀦𑁆𑀢𑀸 𑀫𑀳𑀸𑀦𑀸𑀤𑀁 𑀧𑀯𑀢𑁆𑀢𑁂𑀦𑁆𑀢𑀸 𑀫𑀳𑀦𑁆𑀢𑀁 𑀧𑀽𑀚𑀫𑀓𑀁𑀲𑀼. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀧𑀺 𑀇𑀫𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀢𑀬𑀧𑀭𑀸𑀬𑀡𑀸 𑀲𑀭𑀡 𑀫𑀕𑀫𑀁𑀲𑀽𑀢𑀺.

𑁨𑁨. 𑀨𑀼𑀝𑁆𑀞𑁄𑀧𑀺 𑀧𑀸𑀤𑁂𑀦 𑀚𑀺𑀦𑀲𑁆𑀲 𑀏𑀯𑀁,

𑀓𑀮𑀺𑀗𑁆𑀕𑀭𑁄 𑀧𑀸 𑀲𑀺 𑀫𑀳𑀸𑀦𑀼𑀪𑀸𑀯𑁄;

𑀮𑁄𑀓𑁂𑀓𑀦𑀸𑀣𑀲𑁆𑀲 𑀅𑀦𑀸𑀲𑀯𑀲𑁆𑀲,

𑀫𑀳𑀸𑀦𑀼𑀪𑀸𑀯𑁄 𑀳𑀺 𑀅𑀘𑀺𑀦𑁆𑀢𑀦𑀻𑀬𑁄𑀢𑀺.

𑀧𑀸𑀤𑀧𑀻𑀞𑀺𑀓𑀸𑀬 𑀯𑀢𑁆𑀣𑀼𑀁 𑀢𑀢𑀺𑀬𑀁.

𑁨𑁪. 𑀉𑀢𑁆𑀢𑀭𑀲𑀸𑀫𑀡𑁂𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀲𑁄 𑀓𑀺𑀭 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 [𑀧𑀼𑀭𑀺𑀫𑀩𑀼𑀤𑁆𑀥𑁂 𑀇𑀢𑀺𑀲𑀩𑁆𑀩𑀢𑁆𑀣] 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀚𑁆𑀚𑀸𑀥𑀭𑁄 𑀳𑀼𑀢𑁆𑀯𑀸 𑀳𑀺𑀫𑀯𑀢𑀺 𑀧𑀝𑀺𑀯𑀲𑀢𑀺. 𑀢𑀤𑀸 𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀯𑁂𑀓 𑀫𑀦𑀼𑀩𑁆𑀭𑀽𑀳𑀦𑁆𑀢𑁄 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀭𑀫𑀡𑀻𑀬𑁂 𑀧𑀤𑁂𑀲𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀤𑀸 𑀯𑀺𑀚𑁆𑀚𑀸𑀥𑀭𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀯𑀺𑀭𑀸𑀚𑀫𑀸𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀢𑀻𑀳𑀺 𑀓𑀡𑀺𑀓𑀸𑀭𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺, 𑀧𑀼𑀧𑁆𑀨𑀸𑀦𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀢𑁆𑀣𑀼 𑀉𑀧𑀭𑀺 𑀙𑀢𑁆𑀢𑀸𑀓𑀸𑀭𑁂𑀦 𑀅𑀝𑁆𑀞𑀁𑀲𑀼, 𑀲𑁄 𑀢𑁂𑀦 𑀪𑀻𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀴𑀸𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀢𑀢𑁆𑀣 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀉𑀢𑁆𑀢𑀭𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀉𑀢𑁆𑀢𑀫𑀭𑀽𑀧𑀥𑀭𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀯𑀺𑀚𑁆𑀚𑀸𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀚𑀸𑀢𑀺𑀬𑀸 𑀭𑀽𑀧𑁂𑀦 𑀯𑀺𑀚𑁆𑀚𑀸𑀬 𑀲𑀻𑀮𑀸𑀘𑀸𑀭𑁂𑀦 𑀘 𑀮𑁄𑀓𑀲𑁆𑀲 𑀫𑀳𑀦𑀻𑀬𑁄 𑀚𑀸𑀢𑁄, 𑀢𑀲𑁆𑀲 𑀢𑀁 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀁𑀤𑀺𑀲𑁆𑀯𑀸 𑀯𑀲𑁆𑀲𑀓𑀸𑀭𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀯𑁂𑀤𑁂𑀲𑀺. 𑀲𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀮𑁂𑀦𑀓𑀸𑀮𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀣𑁂𑀭𑀁 𑀉𑀧𑀝𑁆𑀞𑀳𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀣𑁂𑀭𑀲𑁆𑀲 𑀅𑀜𑁆𑀜𑀢𑀭𑁄 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬 𑀉𑀢𑁆𑀢𑀭𑀲𑀸𑀫𑀡𑁂𑀭𑁄 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭 𑀫𑀸𑀤𑀸𑀬 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑁆𑀫 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀴𑀸𑀓𑀲𑁆𑀲 𑀢𑀻𑀭𑁂 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀉𑀤𑀓𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀫𑀼𑀔𑀁 𑀥𑁄𑀯𑀢𑀺, 𑀢𑀤𑀸 𑀅𑀜𑁆𑀜𑀢𑀭𑁄 𑀉𑀫𑁆𑀫𑀕𑁆𑀕𑀘𑁄𑀭𑁄 𑀓𑀢𑀓𑀫𑁆𑀫𑁄 𑀆𑀭𑀓𑁆𑀔𑀧𑀼𑀭𑀺𑀲𑁂𑀳𑀺 𑀅𑀦𑀼𑀩𑀤𑁆𑀥𑁄 𑀅𑀕𑁆𑀕𑀤𑁆𑀯𑀸𑀭𑁂𑀦𑁂𑀯 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑁄 𑀅𑀢𑁆𑀢𑀦𑀸 𑀕𑀳𑀺𑀢𑀁 𑀭𑀢𑀦𑀪𑀡𑁆𑀟𑀺𑀓𑀁 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀮𑀸𑀬𑀺. 𑀲𑁄 𑀲𑀸𑀫𑀡𑁂𑀭𑁄𑀧𑀺 𑀧𑀢𑁆𑀢𑀲𑀫𑀻𑀧𑀁 [𑀲𑀢𑁆𑀢𑀼𑀲𑀫𑀻𑀧𑀁 𑀇𑀢𑀺𑀧𑀺 𑀓𑀢𑁆𑀣𑀘𑀺] 𑀉𑀧𑀕𑀢𑁄 𑀳𑁄𑀢𑀺, 𑀘𑁄𑀭𑀁 𑀅𑀦𑀼𑀩𑀦𑁆𑀥𑀦𑁆𑀢𑀸 𑀭𑀸𑀚𑀧𑀼𑀭𑀺𑀲𑀸 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑁂 𑀪𑀡𑁆𑀟𑀺𑀓𑀁 𑀤𑀺𑀲𑁆𑀯𑀸 𑀅𑀬𑀁 𑀘𑁄𑀭𑁄, 𑀇𑀫𑀺𑀦𑀸 𑀘𑁄𑀭𑀺𑀬𑀁 𑀓𑀢𑀦𑁆𑀢𑀺 𑀲𑀸𑀫𑀡𑁂𑀭𑀁 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀯𑀲𑁆𑀲𑀓𑀸𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀲𑀼𑀁. 𑀯𑀲𑁆𑀲𑀓𑀸𑀭𑁄 𑀘 𑀢𑀤𑀸 𑀭𑀜𑁆𑀜𑁄 𑀯𑀺𑀦𑀺𑀘𑁆𑀙𑀬𑁂 𑀦𑀺𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑀢𑀺. 𑀲𑁄 𑀏𑀲𑁄 𑀧𑀼𑀩𑁆𑀩𑁂 𑀫𑀫 𑀯𑀘𑀦𑀁 𑀦𑀸𑀤𑀺𑀬𑀺. 𑀲𑀼𑀤𑁆𑀥𑀧𑀸𑀲𑀡𑁆𑀟𑀺𑀬𑁂𑀲𑀼 𑀧𑀩𑁆𑀩𑀚𑀻𑀢𑀺 𑀘 𑀩𑀤𑁆𑀥𑀸𑀖𑀸𑀢𑀢𑁆𑀢𑀸 𑀢𑀁 𑀓𑀫𑁆𑀫𑀁 𑀅𑀲𑁄𑀥𑁂𑀢𑁆𑀯𑀸𑀯 𑀚𑀻𑀯𑀦𑁆𑀢𑀫𑁂𑀯𑁂𑀢𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀣𑀸𑀢𑀺 𑀆𑀡𑀸 𑀧𑁂𑀲𑀺, 𑀭𑀸𑀚𑀧𑀼𑀭𑀺𑀲𑀸 𑀢𑀁 𑀦𑀺𑀫𑁆𑀩𑀲𑀽𑀮𑁂 𑀉𑀢𑁆𑀢𑀸𑀲𑁂𑀲𑀼𑀁. 𑀲𑀸𑀫𑀡𑁂𑀭𑁄 𑀲𑀽𑀮𑀕𑁆𑀕𑁂 𑀦𑀺𑀲𑀺𑀦𑁆𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀫𑁂 𑀓𑁄 𑀪𑁂𑀲𑀚𑁆𑀚𑀁 𑀆𑀳𑀭𑀺𑀲𑁆𑀲𑀢𑀻𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀲𑀭𑀺. 𑀢𑀢𑁄 𑀣𑁂𑀭𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀣𑁂𑀲𑀺, 𑀪𑀕𑀯𑀸𑀧𑀺 𑀫𑀳𑀸𑀲𑀸𑀯𑀓𑀧𑀭𑀺𑀯𑀼𑀢𑁄 𑀢𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀞𑀸𑀦𑀫𑀕𑀫𑀸𑀲𑀺. 𑀢𑀢𑁄 𑀪𑀕𑀯𑀢𑁄 𑀦𑀺𑀓𑁆𑀔𑀦𑁆𑀢𑀪𑀸𑀯𑀸 𑀲𑀓𑀮𑀦𑀕𑀭𑁂 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺. 𑀅𑀣 𑀪𑀕𑀯𑀸 𑀯𑀺𑀧𑁆𑀨𑀼𑀭𑀦𑁆𑀢𑀳𑀢𑁆𑀣𑀢𑀮𑁂 𑀦𑀔𑀫𑀡𑀺𑀫𑀬𑀽𑀔𑀲𑀫𑁆𑀪𑀺𑀦𑁆𑀦𑀧𑀻𑀢𑀸𑀪𑀸𑀲𑀢𑀸𑀬 𑀧𑀕𑁆𑀖𑀭𑀦𑁆𑀢𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀯𑀺𑀬 𑀚𑀸𑀮𑀸𑀯𑀕𑀼𑀡𑁆𑀞𑀺𑀢𑀫𑀼𑀤𑀼𑀢𑀮𑀼𑀦𑀗𑁆𑀕𑀼𑀮𑀁 𑀳𑀢𑁆𑀣𑀁 𑀉𑀢𑁆𑀢𑀭𑀲𑁆𑀲 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀉𑀢𑁆𑀢𑀭 𑀇𑀤𑀁 𑀢𑁂 𑀧𑀼𑀩𑁆𑀩𑁂 𑀓𑀢𑀧𑀸𑀧𑀓𑀫𑁆𑀫𑀲𑁆𑀲 𑀨𑀮𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁆𑀣 𑀢𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑀩𑀮𑁂𑀦 𑀅𑀥𑀺𑀯𑀸𑀲𑀦𑀸 𑀓𑀸𑀢𑀩𑁆𑀩𑀸𑀢𑀺 𑀆𑀳. 𑀢𑁂𑀦𑁂𑀯 𑀆𑀳.

𑁧. 𑀅𑀢𑀻𑀢𑁂 𑀓𑀺𑀭 𑀏𑀓𑀲𑁆𑀫𑀺𑀁, 𑀕𑀸𑀫𑁂 𑀢𑁆𑀯 𑀫𑀲𑀺 𑀤𑀸𑀭𑀓𑁄;

𑀤𑀸𑀭𑁂𑀓𑁂𑀳𑀺 𑀲𑀫𑀸𑀕𑀫𑁆𑀫, 𑀓𑀻𑀴𑀦𑁆𑀢𑁄 𑀓𑁂𑀴𑀺𑀫𑀡𑁆𑀟𑀮𑁂.

𑁨. 𑀕𑀳𑁂𑀢𑁆𑀯𑀸 𑀲𑀼𑀔𑀼𑀫𑀁 𑀲𑀽𑀓𑀁, 𑀢𑀤𑀸 𑀢𑁆𑀯𑀁 𑀦𑀺𑀫𑁆𑀩𑀚𑀮𑁆𑀮𑀺𑀬𑀸;

𑀉𑀢𑁆𑀢𑀸𑀲𑁂𑀲𑀺 𑀢𑀢𑁆𑀣 𑀲𑀽𑀮𑁂, 𑀚𑀻𑀯𑀫𑀸𑀦𑀓𑀫𑀓𑁆𑀔𑀺𑀓𑀁.

𑁩. 𑀅𑀧𑀭𑀫𑁆𑀧𑀺 𑀢𑁂 𑀧𑀸𑀧𑀓𑀫𑁆𑀫𑀁, 𑀧𑀯𑀓𑁆𑀔𑀸𑀫𑀺 𑀲𑀼𑀡𑁄𑀳𑀺 𑀫𑁂;

𑀑𑀯𑀤𑀦𑁆𑀢𑀺𑀁 𑀳𑀺𑀢𑁂𑀦 𑀢𑁆𑀯𑀁, 𑀅𑀢𑀻𑀢𑁂 𑀲𑀓𑀫𑀸𑀢𑀭𑀁.

𑁪. 𑀚𑀻𑀯𑀲𑀽𑀮𑁂 𑀦𑀺𑀲𑀻𑀤𑀸𑀢𑀺, 𑀓𑁄𑀧𑁂𑀦𑀸𑀪𑀺𑀲𑀧𑀻 𑀢𑀼𑀯𑀁;

𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀸𑀧𑁂𑀳𑀺, 𑀲𑀭𑀁 𑀲𑀁𑀲𑀸𑀭𑀲𑀸𑀕𑀭𑁂.

𑁫. 𑀧𑀜𑁆𑀘𑀚𑀸𑀢𑀺𑀲𑀢𑁂 𑀅𑀘𑁆𑀙𑀺, 𑀚𑀻𑀯𑀲𑀽𑀮𑀫𑁆𑀳𑀺 𑀦𑀺𑀫𑁆𑀩𑀚𑁂;

𑀅𑀬𑀁 𑀢𑁂 𑀘𑀭𑀺𑀫𑀸 𑀚𑀸𑀢𑀺, 𑀏𑀢𑁆𑀣𑀸𑀧𑀺𑀘 𑀯𑀺𑀧𑀘𑁆𑀘𑀺 𑀲𑁄𑀢𑀺.

𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀢𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀉𑀢𑁆𑀢𑀭𑁄 𑀅𑀫𑀢𑀸𑀪𑀺𑀲𑁂𑀓𑀲𑀤𑀺𑀲𑁂𑀦 𑀲𑀢𑁆𑀣𑀼𑀦𑁄 𑀳𑀢𑁆𑀣𑀲𑀫𑁆𑀨𑀲𑁆𑀲𑀲𑀜𑁆𑀚𑀸𑀢𑀧𑀲𑀸𑀤𑀲𑁄𑀫𑀦𑀲𑁆𑀲𑀢𑀸𑀬 𑀉𑀴𑀸𑀭𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀧𑀝𑀺𑀮𑀪𑀺𑀢𑁆𑀯𑀸 𑀬𑀣𑀸𑀧𑀭𑀺𑀘𑀺𑀢𑀁 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀲𑀢𑁆𑀣𑀼 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀲𑀫𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺 𑀯𑀤𑀦𑁆𑀢𑀺. 𑀉𑀢𑁆𑀢𑀭𑁄 𑀧𑀦 𑀙𑀴𑀪𑀺𑀜𑁆𑀜𑁄 𑀳𑀼𑀢𑁆𑀯𑀸 𑀲𑀽𑀮𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺. 𑀫𑀳𑀸𑀚𑀦𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀸 𑀚𑀸𑀢𑀸 𑀅𑀳𑁂𑀲𑀼𑀁. 𑀢𑀸𑀯𑀤𑁂𑀯𑀲𑁆𑀲 𑀯𑀡𑁄𑀭𑀼𑀦𑁆𑀥𑀺, 𑀲𑁄 𑀪𑀺𑀓𑁆𑀔𑀽𑀳𑀺 𑀆𑀯𑀼𑀲𑁄 𑀢𑀸𑀤𑀺𑀲𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄 𑀓𑀣𑀁 𑀢𑁆𑀯𑀁 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀲𑀓𑁆𑀔𑀻𑀢𑀺 𑀧𑀼𑀝𑁆𑀞𑁄 𑀧𑀕𑁂𑀯 𑀫𑁂 𑀆𑀯𑀼𑀲𑁄 𑀲𑀁𑀲𑀸𑀭𑁂 𑀆𑀤𑀻𑀦𑀯𑁄 𑀲𑀗𑁆𑀔𑀸𑀭𑀸𑀦𑀜𑁆𑀘 𑀲𑀪𑀸𑀯𑁄 𑀲𑀼𑀤𑀺𑀝𑁆𑀞𑁄. 𑀢𑀲𑁆𑀫𑀸𑀳𑀁 𑀢𑀸𑀤𑀺𑀲𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄𑀧𑀺 𑀅𑀲𑀓𑁆𑀔𑀺𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀯𑀺𑀲𑁂𑀲𑀁 𑀅𑀥𑀺𑀕𑀦𑁆𑀢𑀼𑀁𑀢𑀺 𑀆𑀳. 𑀅𑀣𑀸𑀧𑀭𑀪𑀸𑀕𑁂 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸 𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑁬. 𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀳𑀺𑀫𑀯𑀦𑁆𑀢 𑀫𑀼𑀧𑀸𑀕𑀫𑀺.

𑁭. 𑀅𑀚𑁆𑀛𑁄𑀕𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀦, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁮. 𑀯𑀺𑀚𑁆𑀚𑀸𑀥𑀭𑁄 𑀢𑀤𑀸 𑀆𑀲𑀺𑀁, 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀅𑀳𑀁;

𑀢𑀺𑀲𑀽𑀮𑀁 𑀲𑀼𑀓𑀢𑀁 𑀕𑀬𑁆𑀳, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

𑁯. 𑀧𑀩𑁆𑀩𑀢𑀕𑁆𑀕𑁂 𑀬𑀣𑀸 𑀅𑀕𑁆𑀕𑀺, 𑀧𑀼𑀡𑁆𑀡𑀫𑀸𑀲𑁂𑀯 𑀘𑀦𑁆𑀤𑀺𑀫𑀸;

𑀯𑀦𑀁 𑀑𑀪𑀸𑀲𑀢𑁂 𑀩𑀼𑀤𑁆𑀥𑁄, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

𑁧𑁦. 𑀯𑀦𑀕𑁆𑀕𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀩𑀼𑀤𑁆𑀥𑀭𑀁𑀲𑀻 𑀯𑀺𑀥𑀸𑀯𑀭𑁂;

𑀦𑀮𑀕𑁆𑀕𑀺𑀯𑀡𑁆𑀡𑀲𑀗𑁆𑀓𑀸𑀲𑀸, 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁧𑁧. 𑀯𑀺𑀘𑀺𑀦𑀁 𑀅𑀤𑁆𑀤𑀲𑀁 𑀧𑀼𑀧𑁆𑀨𑀁, 𑀓𑀡𑀺𑀓𑀸𑀭𑀁 𑀤𑁂𑀯𑀕𑀦𑁆𑀥𑀺𑀓𑀁;

𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 𑀆𑀤𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀧𑀽𑀚𑀬𑀺𑀁.

𑁧𑁨. 𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 𑀫𑁂 𑀢𑀤𑀸;

𑀉𑀤𑁆𑀥𑀯𑀡𑁆𑀝𑀸 𑀅𑀥𑁄𑀧𑀢𑁆𑀢𑀸, 𑀙𑀸𑀬𑀁 𑀓𑀼𑀩𑁆𑀩𑀦𑁆𑀢𑀺 𑀲𑀢𑁆𑀣𑀼𑀦𑁄.

𑁧𑁩. 𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀜𑁆𑀙𑀳𑀁.

𑁧𑁪. 𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀓𑀡𑀺𑀓𑀸𑀭𑀻𑀢𑀺 𑀜𑀸𑀬𑀢𑀺;

𑀲𑀝𑁆𑀞𑀺𑀬𑁄𑀚𑀦 𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑁧𑁫. 𑀲𑀳𑀲𑁆𑀲𑀔𑀡𑁆𑀟𑀁 𑀲𑀢𑀪𑁂𑀡𑁆𑀟𑀼, 𑀥𑀚𑀸𑀮𑀼 𑀳𑀭𑀺𑀢𑀸𑀫𑀬𑀁;

𑀲𑀢𑀲𑀳𑀲𑁆𑀲𑀸𑀦𑀺 𑀩𑁆𑀬𑀽𑀳𑀸𑀦𑀺, 𑀩𑁆𑀬𑀫𑁆𑀳𑁂 𑀧𑀸𑀢𑀼𑀭𑀳𑀁𑀲𑀼 𑀫𑁂.

𑁧𑁬. 𑀲𑁄𑀡𑁆𑀡𑀫𑀬𑀸 𑀫𑀡𑀺𑀫𑀬𑀸, 𑀮𑁄𑀳𑀺𑀢𑀗𑁆𑀓𑀫𑀬𑀸 𑀧𑀺𑀘;

𑀨𑀮𑀺𑀓𑀸 𑀧𑀺𑀘 𑀧𑀮𑁆𑀮𑀗𑁆𑀓𑀸, 𑀬𑀤𑀺𑀘𑁆𑀙𑀓 𑀬𑀤𑀺𑀘𑁆𑀙𑀓𑀸.

𑁧𑁭. 𑀫𑀳𑀸𑀭𑀳𑀜𑁆𑀘 𑀲𑀬𑀦𑀁, 𑀢𑀽𑀮𑀺𑀓𑀁 𑀯𑀺𑀓𑀢𑀻𑀬𑀓𑀁;

𑀉𑀤𑁆𑀤𑀮𑁄𑀫𑀺𑀓𑀏𑀓𑀦𑁆𑀢𑀁, 𑀩𑀺𑀫𑁆𑀩𑁄𑀳𑀦𑀲𑀫𑀸𑀬𑀼𑀢𑀁.

𑁧𑁮. 𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀘𑀭𑀦𑁆𑀢𑁄 𑀤𑁂𑀯𑀘𑀸𑀭𑀺𑀓𑀁;

𑀬𑀤𑀸 𑀇𑀘𑁆𑀙𑀸𑀫𑀺 𑀕𑀫𑀦𑀁, 𑀤𑁂𑀯𑀲𑀁𑀖𑀧𑀼𑀭𑀓𑁆𑀔𑀢𑁄.

𑁧𑁯. 𑀧𑀼𑀧𑁆𑀨𑀲𑁆𑀲 𑀳𑁂𑀝𑁆𑀞𑀸 𑀢𑀺𑀝𑁆𑀞𑀸𑀫𑀺, 𑀉𑀧𑀭𑀺𑀘𑁆𑀙𑀤𑀦𑀁 𑀫𑀫;