𑁨. 𑀓𑁄𑀲𑀺𑀬𑀯𑀕𑁆𑀕 𑁪. 𑀙𑀩𑁆𑀩𑀲𑁆𑀲 𑀲𑀺𑀓𑁆𑀔𑀸𑀧𑀼𑀘𑁆𑀙𑀸

𑀧𑀼𑀘𑁆𑀙𑀸 𑁋 𑀬𑀁 𑀢𑁂𑀦 𑀆𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑀼𑀯𑀲𑁆𑀲𑀁 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀁 𑀆𑀯𑀼𑀲𑁄 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀫𑁆𑀩𑀳𑀼𑀮𑁂 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀲𑀫𑁆𑀩𑀳𑀼𑀮𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀅𑀦𑀼𑀯𑀲𑁆𑀲𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑁂𑀲𑀼𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀲𑁆𑀲 𑀆𑀯𑀼𑀲𑁄 𑀯𑀘𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀢𑁄 𑀪𑀦𑁆𑀢𑁂 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀧𑀼𑀘𑁆𑀙𑀸 𑁋 𑀓𑁂𑀦𑀸𑀯𑀼𑀲𑁄 𑀆𑀪𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀭𑀫𑁆𑀧𑀭𑀸𑀬 𑀪𑀦𑁆𑀢𑁂 𑀆𑀪𑀢𑀁.

𑀧𑀼𑀘𑁆𑀙𑀸 𑁋 𑀅𑀢𑁆𑀣𑀺 𑀦𑀼𑀔𑁄 𑀆𑀯𑀼𑀲𑁄 𑀏𑀢𑁆𑀣 𑀓𑁄𑀘𑀺 𑀯𑀺𑀭𑀤𑁆𑀥𑀤𑁄𑀲𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀢𑁆𑀣𑀺 𑀪𑀦𑁆𑀢𑁂.

𑀲𑀁𑀕𑀸𑀬𑀦𑀢𑁆𑀣𑀸𑀬 𑀲𑀗𑁆𑀖𑀲𑁆𑀲 𑀜𑀸𑀧𑀦𑀁

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑀁 𑀢𑀺𑀧𑀺𑀝𑀓𑀥𑀭 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀇𑀫𑁂𑀲𑀁 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀸𑀦𑀁 𑀬𑀸𑀯 𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀤𑀸𑀦𑀸𑀤𑀻𑀦𑀺 𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀺 𑀅𑀦𑁂𑀓𑀸𑀦𑀺 𑀞𑀸𑀦𑀸𑀦𑀺 𑀧𑀼𑀘𑁆𑀙𑀺𑀁, 𑀧𑀼𑀝𑁆𑀞𑁄𑀧𑀼𑀝𑁆𑀞𑁄 𑀘 𑀲𑁄 𑀆𑀬𑀲𑁆𑀫𑀸 𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑁄 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀇𑀢𑀺𑀳𑀺𑀤𑀁 𑀪𑀦𑁆𑀢𑁂 𑀇𑀫𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀦𑀺𑀫𑁆𑀫𑀮𑀸𑀦𑀺 𑀲𑀼𑀧𑀭𑀺𑀲𑀼𑀤𑁆𑀥𑀸𑀦𑀻 𑀢𑀲𑁆𑀲𑁂𑀯 𑀪𑀕𑀯𑀢𑁄 𑀯𑀘𑀦𑀸𑀦𑀺 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀲𑁆𑀫𑀸 𑀬𑀣𑀸𑀧𑀼𑀭𑁂 𑀫𑀳𑀸𑀓𑀲𑁆𑀲𑀧𑀸𑀤𑀬𑁄 𑀫𑀳𑀸𑀣𑁂𑀭𑀯𑀭𑀸 𑀧𑁄𑀭𑀸𑀡𑀲𑀁𑀕𑀻𑀢𑀺𑀓𑀸𑀭𑀸 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀯𑀺𑀦𑀬𑀁 𑀲𑀁𑀕𑀸𑀬𑀺𑀁𑀲𑀼 𑀘𑁂𑀯 𑀅𑀦𑀼𑀲𑀁𑀕𑀸𑀬𑀺𑀁𑀲𑀼 𑀘, 𑀏𑀯𑀫𑁂𑀯 𑀫𑀬𑀫𑁆𑀧𑀺 𑀤𑀸𑀦𑀺 𑀲𑀩𑁆𑀩𑁂𑀯 𑀙𑀝𑁆𑀞𑀲𑀁𑀕𑀻𑀢𑀺 𑀫𑀳𑀸𑀥𑀫𑁆𑀫𑀲𑀪𑀸 𑀧𑀭𑀺𑀬𑀸𑀧𑀦𑁆𑀦𑀸 𑀙𑀩𑁆𑀩𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬 𑀲𑀺𑀓𑁆𑀔𑀸𑀧𑀤𑀢𑁄 𑀧𑀝𑁆𑀞𑀸𑀬 𑀇𑀫𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀲𑀺𑀓𑁆𑀔𑀸𑀧𑀤𑀸𑀦𑀺 𑀏𑀓𑀢𑁄 𑀕𑀡𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀲𑀁𑀳𑀸𑀬𑁂𑀬𑁆𑀬𑀸𑀫.