𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓

𑀲𑀁𑀕𑀸𑀬𑀦𑀲𑁆𑀲 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀦𑀸

𑀑𑀓𑀸𑀲 𑀤𑀸𑀦𑀓𑀣𑀸

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀫𑀳𑀢𑀻 𑀅𑀬𑀁 𑀧𑀭𑀺𑀲𑀸, 𑀏𑀯𑀭𑀽𑀧𑀸𑀬 𑀧𑀭𑀺𑀲𑀸𑀬 𑀦 𑀲𑀼𑀓𑀭𑀸 𑀲𑀩𑁆𑀩𑀲𑁄 𑀓𑀣𑀁 𑀲𑀸𑀯𑁂𑀢𑀼𑀁, 𑀢𑀲𑁆𑀫𑀸 𑀆𑀬𑀲𑁆𑀫𑀢𑁄 𑀘 𑀚𑀯𑀦𑀢𑁆𑀣𑁂𑀭𑀲𑁆𑀲 𑀧𑀔𑀼𑀓𑁆𑀓𑀽𑀦𑀕𑀭𑀯𑀸𑀲𑀺𑀦𑁄 𑀆𑀬𑀲𑁆𑀫𑀢𑁄 𑀘 𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑀲𑁆𑀲 𑀢𑀺𑀧𑀺𑀝𑀓𑀥𑀭 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀺𑀦𑀬𑀧𑀼𑀘𑁆𑀙𑀦𑀪𑀸𑀭𑀜𑁆𑀘 𑀯𑀺𑀦𑀬𑀯𑀺𑀲𑁆𑀲𑀚𑁆𑀚𑀦 𑀪𑀸𑀭𑀜𑁆𑀘 𑀆𑀯𑀳𑀺𑀢𑀼𑀁 𑀑𑀓𑀸𑀲𑀁 𑀤𑀫𑁆𑀫𑀺, 𑀓𑀭𑁄𑀣 𑀢𑀼𑀫𑁆𑀳𑁂 𑀆𑀯𑀼𑀲𑁄 𑀙𑀝𑁆𑀞𑀲𑀁𑀕𑀻𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀦𑀺 𑀯𑀺𑀦𑀬𑀧𑀼𑀘𑁆𑀙𑀦 𑀯𑀺𑀦𑀬𑀯𑀺𑀲𑁆𑀲𑀚𑁆𑀚𑀦 𑀓𑀺𑀘𑁆𑀘𑀸𑀦𑀺 𑀬𑀣𑀸𑀥𑀫𑁆𑀫𑀁 𑀬𑀣𑀸𑀯𑀺𑀦𑀬𑀁.

𑀅𑀕𑁆𑀕𑀫𑀳𑀸𑀧𑀡𑁆𑀟𑀺𑀢 𑀪𑀤𑀦𑁆𑀢𑀚𑀯𑀦 𑀫𑀳𑀸𑀣𑁂𑀭𑁂𑀦

𑀞𑀧𑀺𑀢𑀸

𑀧𑀼𑀘𑁆𑀙𑀓 𑀲𑀫𑁆𑀫𑀼𑀢𑀺 𑀜𑀸𑀢𑁆𑀢𑀺

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑀁 𑀢𑀺𑀧𑀺𑀝𑀓𑀥𑀭 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬𑀁.

𑀢𑀺𑀧𑀺𑀝𑀓𑀥𑀭 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓

𑀪𑀤𑀦𑁆𑀢𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑁂𑀦

𑀞𑀧𑀺𑀢𑀸 𑀯𑀺𑀲𑁆𑀲𑀚𑁆𑀚𑀓 𑀲𑀫𑁆𑀫𑀼𑀢𑀺 𑀜𑀸𑀢𑁆𑀢𑀺

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀢𑀸 𑀚𑀯𑀦𑀢𑁆𑀣𑁂𑀭𑁂𑀦 𑀲𑀗𑁆𑀖𑀦𑀸𑀬𑀓 𑀫𑀳𑀸𑀣𑁂𑀭𑀲𑁆𑀲 𑀧𑀝𑀺𑀦𑀺𑀥𑀺𑀪𑀽𑀢𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀁.

𑀧𑀞𑀫 𑀧𑀸𑀭𑀸𑀚𑀺𑀓 𑀲𑀺𑀓𑁆𑀔𑀸𑀧𑀼𑀘𑁆𑀙𑀸

𑀧𑀼𑀘𑁆𑀙𑀸 𑁋 𑀬𑀁 𑀢𑁂𑀦 𑀆𑀯𑀼𑀲𑁄 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀁 𑀆𑀯𑀼𑀲𑁄 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀼𑀤𑀺𑀦𑁆𑀦𑀁 𑀪𑀦𑁆𑀢𑁂 𑀓𑀮𑀦𑁆𑀤𑀧𑀼𑀢𑁆𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀺𑀲𑁆𑀫𑀺𑀁 𑀆𑀯𑀼𑀲𑁄 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀼𑀤𑀺𑀦𑁆𑀤𑁄 𑀪𑀦𑁆𑀢𑁂 𑀓𑀮𑀦𑁆𑀤𑀧𑀼𑀢𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀅𑀢𑁆𑀣𑀺 𑀆𑀯𑀼𑀲𑁄 𑀢𑀢𑁆𑀣 𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀸 𑀪𑀦𑁆𑀢𑁂 𑀧𑀜𑁆𑀜𑀢𑁆𑀢𑀺 𑀤𑁆𑀯𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄, 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀢𑀲𑁆𑀫𑀺𑀁 𑀦𑀢𑁆𑀣𑀺.

𑀧𑀼𑀘𑁆𑀙𑀸 𑁋 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀦𑀼𑀔𑁄 𑀆𑀯𑀼𑀲𑁄 𑀧𑀤𑁂𑀲𑀧𑀜𑁆𑀜𑀢𑁆𑀢𑀺𑀦𑀼𑀔𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀦𑀼𑀔𑁄 𑀆𑀯𑀼𑀲𑁄 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀦𑀼𑀔𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀏𑀓𑀢𑁄𑀧𑀜𑁆𑀜𑀢𑁆𑀢𑀺𑀦𑀼𑀔𑁄 𑀆𑀯𑀼𑀲𑁄 𑀉𑀪𑀢𑁄𑀧𑀜𑁆𑀜𑀢𑁆𑀢𑀺𑀦𑀼𑀔𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀉𑀪𑀢𑁄𑀧𑀜𑁆𑀜𑀢𑁆𑀢𑀺 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀧𑀜𑁆𑀘𑀦𑁆𑀦𑀁 𑀆𑀯𑀼𑀲𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀦𑀁 𑀓𑀢𑁆𑀣𑁄𑀕𑀥𑀁 𑀓𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀺𑀤𑀸𑀦𑁄𑀕𑀥𑀁 𑀪𑀦𑁆𑀢𑁂 𑀦𑀺𑀤𑀸𑀦𑀧𑀭𑀺𑀬𑀸𑀧𑀦𑁆𑀦𑀁.

𑀧𑀼𑀘𑁆𑀙𑀸 𑁋 𑀓𑀢𑀫𑁂𑀦 𑀆𑀯𑀼𑀲𑁄 𑀉𑀤𑁆𑀤𑁂𑀲𑁂𑀦 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀼𑀢𑀺𑀬𑁂𑀦 𑀪𑀦𑁆𑀢𑁂 𑀉𑀤𑁆𑀤𑁂𑀲𑁂𑀦 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀢𑀺.

𑀧𑀼𑀘𑁆𑀙𑀸 𑁋 𑀘𑀢𑀼𑀦𑁆𑀦𑀁 𑀆𑀯𑀼𑀲𑁄 𑀯𑀺𑀧𑀢𑁆𑀢𑀻𑀦𑀁 𑀓𑀢𑀫𑀸 𑀯𑀺𑀧𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀻𑀮𑀯𑀺𑀧𑀢𑁆𑀢𑀺 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀯𑀺𑀧𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀲𑀁𑀯𑀭𑁄 𑀪𑀦𑁆𑀢𑁂 𑀯𑀺𑀧𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀲𑀫𑁆𑀧𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀁𑀯𑀭𑁄 𑀪𑀦𑁆𑀢𑁂 𑀲𑀫𑁆𑀫𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀧𑀝𑀺𑀧𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀬𑀸𑀯𑀚𑀻𑀯𑀁 𑀆𑀧𑀸𑀡𑀓𑁄𑀝𑀺𑀓𑀁 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀅𑀬𑀁 𑀪𑀦𑁆𑀢𑁂 𑀧𑀝𑀺𑀧𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀢𑀺 𑀆𑀯𑀼𑀲𑁄 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀪𑀕𑀯𑀢𑀸 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀲 𑀪𑀦𑁆𑀢𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀪𑀕𑀯𑀢𑀸 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁, 𑁧 - 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬, 𑁨 - 𑀲𑀗𑁆𑀖𑀨𑀸𑀲𑀼𑀢𑀸𑀬, 𑁩 - 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑁪 - 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑁫 - 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑁬 - 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬, 𑁭 - 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬, 𑁮 - 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬, 𑁯 - 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, 𑁧𑁦 - 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬.

𑀧𑀼𑀘𑁆𑀙𑀸 𑁋 𑀓𑁂 𑀆𑀯𑀼𑀲𑁄 𑀲𑀺𑀓𑁆𑀔𑀦𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁂𑀓𑁆𑀔𑀸𑀘 𑀪𑀦𑁆𑀢𑁂 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀘 𑀲𑀺𑀓𑁆𑀔𑀦𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑁂 𑀆𑀯𑀼𑀲𑁄 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀭𑀳𑀦𑁆𑀢𑁄 𑀪𑀦𑁆𑀢𑁂 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀧𑀼𑀘𑁆𑀙𑀸 𑁋 𑀓𑀢𑁆𑀣 𑀆𑀯𑀼𑀲𑁄 𑀞𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀺𑀓𑁆𑀔𑀸𑀓𑀸𑀫𑁂𑀲𑀼 𑀪𑀦𑁆𑀢𑁂 𑀞𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑁂 𑀆𑀯𑀼𑀲𑁄 𑀥𑀸𑀭𑁂𑀦𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀬𑁂𑀲𑀁 𑀪𑀦𑁆𑀢𑁂 𑀯𑀢𑁆𑀢𑀢𑀺 𑀢𑁂 𑀥𑀸𑀭𑁂𑀦𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀲𑁆𑀲 𑀆𑀯𑀼𑀲𑁄 𑀯𑀘𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀢𑁄 𑀪𑀦𑁆𑀢𑁂 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀧𑀼𑀘𑁆𑀙𑀸 𑁋 𑀓𑁂𑀦𑀸𑀯𑀼𑀲𑁄 𑀆𑀪𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀭𑀫𑁆𑀧𑀭𑀸𑀬 𑀪𑀦𑁆𑀢𑁂 𑀆𑀪𑀢𑀁.

𑀲𑀁𑀕𑀸𑀬𑀦𑀢𑁆𑀣𑀸𑀬 𑀲𑀗𑁆𑀖𑀲𑁆𑀲 𑀜𑀸𑀧𑀦𑀁

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄 𑀅𑀳𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀯𑀺𑀘𑀺𑀢𑁆𑀣𑀲𑀸𑀭𑀸𑀪𑀺𑀯𑀁𑀲𑀁 𑀢𑀺𑀧𑀺𑀝𑀓𑀥𑀭 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀧𑀞𑀫𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺𑀁, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺𑀁, 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺𑀁, 𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀆𑀤𑀻𑀦𑀺𑀧𑀺 𑀧𑀼𑀘𑁆𑀙𑀺𑀁, 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄𑀘 𑀲𑁄 𑀆𑀬𑀲𑁆𑀫𑀸𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑁄 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀇𑀢𑀺𑀳𑀺𑀤𑀁 𑀪𑀦𑁆𑀢𑁂 𑀧𑀞𑀫𑀁 𑀧𑀸𑀭𑀸𑀚𑀺𑀓 𑀲𑀺𑀓𑁆𑀔𑀸𑀧𑀤𑀁 𑀦𑀺𑀫𑁆𑀫𑀮𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀢𑀲𑁆𑀲𑁂𑀯 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀲𑁆𑀫𑀸 𑀬𑀣𑀸𑀧𑀼𑀭𑁂 𑀫𑀳𑀸𑀓𑀲𑁆𑀲𑀧𑀸𑀤𑀬𑁄 𑀫𑀳𑀸𑀣𑁂𑀭𑀯𑀭𑀸 𑀧𑁄𑀭𑀸𑀡𑀲𑀁𑀕𑀻𑀢𑀺𑀓𑀸𑀭𑀸 𑀩𑁆𑀭𑀳𑁆𑀫𑀘𑀭𑀺𑀬 𑀲𑀗𑁆𑀔𑀸𑀢𑀲𑁆𑀲 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀁𑀲𑀼𑀘𑁂𑀯 𑀅𑀦𑀼𑀲𑀗𑁆𑀕𑀸𑀬𑀺𑀁𑀲𑀼𑀘, 𑀏𑀯𑀫𑁂𑀯 𑀫𑀬𑀫𑁆𑀧𑀺 𑀤𑀸𑀦𑀺 𑀲𑀩𑁆𑀩𑁂𑀯 𑀙𑀝𑁆𑀞𑀲𑀁𑀕𑀻𑀢𑀺𑀫𑀳𑀸𑀥𑀫𑁆𑀫𑀲𑀪𑀸𑀧𑀭𑀺𑀬𑀸𑀧𑀦𑁆𑀦𑀸 𑀇𑀤𑀁 𑀧𑀞𑀫 𑀧𑀸𑀭𑀸𑀚𑀺𑀓 𑀲𑀺𑀓𑁆𑀔𑀸𑀧𑀤𑀁 𑀏𑀓𑀢𑁄𑀲𑀚𑁆𑀛𑀸𑀬𑀦𑀯𑀲𑁂𑀦 𑀲𑀁𑀕𑀸𑀬𑁂𑀬𑁆𑀬𑀸𑀫.

𑀭𑁂𑀯𑀢𑀸𑀪𑀺 𑀧𑀡𑁆𑀟𑀺𑀢𑀥𑀚 𑀲𑀸𑀲𑀦𑀯𑀁𑀲 𑀫𑀳𑀸𑀥𑀫𑁆𑀫𑀭𑀸𑀚𑀕𑀼𑀭𑀼𑀦𑁄

𑀅𑀪𑀺𑀥𑀚𑀫𑀳𑀸𑀭𑀝𑁆𑀞𑀕𑀼𑀭𑀼𑀦𑁄𑀘 𑀲𑀗𑁆𑀖𑀦𑀸𑀬𑀓 𑀫𑀳𑀸𑀣𑁂𑀭𑀲𑁆𑀲

𑀑𑀓𑀸𑀲 𑀤𑀸𑀦𑀓𑀣𑀸

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀫𑀳𑀢𑀻 𑀅𑀬𑀁 𑀧𑀭𑀺𑀲𑀸, 𑀏𑀯𑀭𑀽𑀧𑀸𑀬 𑀧𑀭𑀺𑀲𑀸𑀬 𑀦 𑀲𑀼𑀓𑀭𑀸 𑀲𑀩𑁆𑀩𑀲𑁄 𑀓𑀣𑀁 𑀲𑀸𑀯𑁂𑀢𑀼𑀁, 𑀢𑀲𑁆𑀫𑀸 𑀆𑀬𑀲𑁆𑀫𑀢𑁄𑀘 𑀲𑁄𑀪𑀦𑀲𑁆𑀲 𑀲𑀸𑀲𑀦𑀭𑀺 𑀲𑀸𑀭𑀸𑀫𑀸𑀥𑀺𑀯𑀸𑀲𑀺𑀦𑁄 𑀆𑀬𑀲𑁆𑀫𑀢𑁄𑀘 𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑀲𑁆𑀲 𑀢𑀺𑀧𑀺𑀝𑀓𑀥𑀭 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀺𑀦𑀬𑀧𑀼𑀘𑁆𑀙𑀦𑀪𑀸𑀭𑀜𑁆𑀘 𑀯𑀺𑀦𑀬𑀯𑀺𑀲𑁆𑀲𑀚𑁆𑀚𑀦𑀪𑀸𑀭𑀜𑁆𑀘 𑀆𑀯𑀳𑀺𑀢𑀼𑀁 𑀑𑀓𑀸𑀲𑀁 𑀤𑀫𑁆𑀫𑀺, 𑀓𑀭𑁄𑀣 𑀢𑀼𑀫𑁆𑀳𑁂 𑀆𑀯𑀼𑀲𑁄 𑀙𑀝𑁆𑀞𑀲𑀁𑀕𑀻𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀦𑀺 𑀯𑀺𑀦𑀬𑀧𑀼𑀘𑁆𑀙𑀦 𑀯𑀺𑀦𑀬𑀯𑀺𑀲𑁆𑀲𑀚𑁆𑀚𑀦 𑀓𑀺𑀘𑁆𑀘𑀸𑀦𑀺 𑀬𑀣𑀸𑀥𑀫𑁆𑀫𑀁 𑀬𑀣𑀸𑀯𑀺𑀦𑀬𑀁.

𑀅𑀕𑁆𑀕𑀫𑀳𑀸𑀧𑀡𑁆𑀟𑀺𑀢 𑀪𑀤𑀦𑁆𑀢 𑀲𑁄𑀪𑀦𑀢𑁆𑀣𑁂𑀭𑁂𑀦

𑀞𑀧𑀺𑀢𑀸 𑀧𑀼𑀘𑁆𑀙𑀓 𑀲𑀫𑁆𑀫𑀼𑀢𑀺 𑀜𑀸𑀢𑁆𑀢𑀺

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑀁 𑀢𑀺𑀧𑀺𑀝𑀓𑀥𑀭 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬𑀁.

𑀢𑀺𑀧𑀺𑀝𑀓𑀥𑀭 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓

𑀪𑀤𑀦𑁆𑀢𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑁂𑀦

𑀞𑀧𑀺𑀢𑀸 𑀯𑀺𑀲𑁆𑀲𑀚𑁆𑀚𑀓 𑀲𑀫𑁆𑀫𑀼𑀢𑀺 𑀜𑀸𑀢𑁆𑀢𑀺

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀤𑀺𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀢𑀸 𑀲𑁄𑀪𑀦𑀢𑁆𑀣𑁂𑀭𑁂𑀦 𑀲𑀗𑁆𑀖𑀦𑀸𑀬𑀓 𑀫𑀳𑀸𑀣𑁂𑀭𑀲𑁆𑀲 𑀧𑀝𑀺𑀦𑀺𑀥𑀺𑀪𑀽𑀢𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀁.

𑀤𑀼𑀢𑀺𑀬 𑀧𑀸𑀭𑀸𑀚𑀺𑀓 𑀲𑀺𑀓𑁆𑀔𑀸𑀧𑀼𑀘𑁆𑀙𑀸

𑀧𑀼𑀘𑁆𑀙𑀸 𑁋 𑀬𑀁 𑀢𑁂𑀦 𑀆𑀯𑀼𑀲𑁄 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑀼𑀢𑀺𑀬𑀁 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀁 𑀆𑀯𑀼𑀲𑁄 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀥𑀦𑀺𑀬𑀁 𑀪𑀦𑁆𑀢𑁂 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀺𑀲𑁆𑀫𑀺𑀁 𑀆𑀯𑀼𑀲𑁄 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀥𑀦𑀺𑀬𑁄 𑀪𑀦𑁆𑀢𑁂 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑁄 𑀭𑀜𑁆𑀜𑁄 𑀤𑀸𑀭𑀽𑀦𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀅𑀢𑁆𑀣𑀺 𑀆𑀯𑀼𑀲𑁄 𑀢𑀢𑁆𑀣 𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀸 𑀪𑀦𑁆𑀢𑁂 𑀧𑀜𑁆𑀜𑀢𑁆𑀢𑀺 𑀏𑀓𑀸 𑀅𑀦𑀼𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀢𑀲𑁆𑀫𑀺𑀁 𑀦𑀢𑁆𑀣𑀺.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀢𑀢𑁆𑀣 𑀫𑀽𑀮𑀧𑀜𑁆𑀜𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑁂𑀬𑁆𑀬, 𑀬𑀣𑀸𑀭𑀽𑀧𑁂 𑀅𑀤𑀺𑀦𑁆𑀦𑀸𑀤𑀸𑀦𑁂 𑀭𑀸𑀚𑀸𑀦𑁄 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀳𑀦𑁂𑀬𑁆𑀬𑀼𑀁𑀯𑀸 𑀩𑀦𑁆𑀥𑁂𑀬𑁆𑀬𑀼𑀁𑀯𑀸 𑀧𑀩𑁆𑀩𑀸𑀚𑁂𑀬𑁆𑀬𑀼𑀁𑀯𑀸 𑀘𑁄𑀭𑁄𑀲𑀺 𑀩𑀸𑀮𑁄𑀲𑀺 𑀫𑀼𑀴𑁆𑀳𑁄𑀲𑀺 𑀣𑁂𑀦𑁄𑀲𑀻𑀢𑀺 𑀢𑀣𑀸𑀭𑀽𑀧𑀁 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀆𑀤𑀺𑀬𑀫𑀸𑀦𑁄 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄𑀢𑀺 𑀅𑀬𑀁 𑀪𑀦𑁆𑀢𑁂 𑀢𑀢𑁆𑀣 𑀫𑀽𑀮𑀧𑀜𑁆𑀜𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀢𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀕𑀸𑀫𑀸𑀯𑀸 𑀅𑀭𑀜𑁆𑀜𑀸𑀯𑀸𑀢𑀺 𑀅𑀬𑀁 𑀪𑀦𑁆𑀢𑁂 𑀢𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀢𑀢𑁆𑀣 𑀧𑀭𑀺𑀧𑀼𑀡𑁆𑀡𑀧𑀜𑁆𑀜𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀬𑁄 𑀧𑀦 𑀪𑀺𑀓𑁆𑀔𑀼 𑀕𑀸𑀫𑀸𑀯𑀸 𑀅𑀭𑀜𑁆𑀜𑀸𑀯𑀸 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑁂𑀬𑁆𑀬, 𑀓𑀣𑀸𑀭𑀽𑀧𑁂 𑀅𑀤𑀺𑀦𑁆𑀦𑀸𑀤𑀸𑀦𑁂 𑀭𑀸𑀚𑀸𑀦𑁄 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀳𑀦𑁂𑀬𑁆𑀬𑀼𑀁𑀯𑀸 𑀩𑀦𑁆𑀥𑁂𑀬𑁆𑀬𑀼𑀁𑀯𑀸 𑀧𑀩𑁆𑀩𑀸𑀚𑁂𑀬𑁆𑀬𑀼𑀁𑀯𑀸 𑀘𑁄𑀭𑁄𑀲𑀺 𑀩𑀸𑀮𑁄𑀲𑀺 𑀫𑀽𑀴𑁆𑀳𑁄𑀲𑀺 𑀣𑁂𑀦𑁄𑀲𑀻𑀢𑀺 𑀢𑀣𑀸𑀭𑀽𑀧𑀁 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀆𑀤𑀺𑀬𑀫𑀸𑀦𑁄 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄𑀢𑀺 𑀅𑀬𑀁 𑀪𑀦𑁆𑀢𑁂 𑀢𑀢𑁆𑀣 𑀧𑀭𑀺𑀧𑀼𑀡𑁆𑀡𑀧𑀜𑁆𑀜𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺 𑀦𑀼𑀔𑁄 𑀆𑀯𑀼𑀲𑁄 𑀧𑀤𑁂𑀲𑀧𑀜𑁆𑀜𑀢𑁆𑀢𑀺𑀦𑀼𑀔𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀦𑀼𑀔𑁄 𑀆𑀯𑀼𑀲𑁄 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀦𑀼𑀔𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀏𑀓𑀢𑁄𑀧𑀜𑁆𑀜𑀢𑁆𑀢𑀺𑀦𑀼𑀔𑁄 𑀆𑀯𑀼𑀲𑁄 𑀉𑀪𑀢𑁄𑀧𑀜𑁆𑀜𑀢𑁆𑀢𑀺𑀦𑀼𑀔𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀉𑀪𑀢𑁄𑀧𑀜𑁆𑀜𑀢𑁆𑀢𑀺 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀢𑀲𑁆𑀫𑀺𑀁 𑀆𑀯𑀼𑀲𑁄 𑀤𑀼𑀢𑀺𑀬 𑀧𑀸𑀭𑀸𑀚𑀺𑀓𑁂 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑁄 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀯𑀺𑀪𑀚𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀤𑀺𑀦𑁆𑀦𑀁 𑀪𑀦𑁆𑀢𑁂 𑀆𑀤𑀺𑀬𑀦𑁆𑀢𑁄 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺, 𑀧𑀜𑁆𑀘 𑀫𑀸𑀲𑀓𑀁𑀯𑀸 𑀅𑀢𑀺𑀭𑁂𑀓 𑀧𑀜𑁆𑀘 𑀫𑀸𑀲𑀓𑀁𑀯𑀸 𑀅𑀕𑁆𑀖𑀦𑀓𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀢𑀺 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀊𑀦𑀧𑀜𑁆𑀘𑀫𑀸𑀲𑀓𑀁𑀯𑀸 𑀅𑀢𑀺𑀭𑁂𑀓𑀫𑀸𑀲𑀓𑀁𑀯𑀸 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀢𑀺 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀫𑀸𑀲𑀓𑀁𑀯𑀸 𑀊𑀦𑀫𑀸𑀲𑀓𑀯𑀸 𑀅𑀕𑁆𑀖𑀦𑀓𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲, 𑀅𑀤𑀺𑀦𑁆𑀦𑀁 𑀪𑀦𑁆𑀢𑁂 𑀆𑀤𑀺𑀬𑀦𑁆𑀢𑁄 𑀇𑀫𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀧𑀼𑀘𑁆𑀙𑀸 𑁋 𑀓𑁂𑀲𑀁 𑀆𑀯𑀼𑀲𑁄 𑀅𑀦𑀸𑀧𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀲𑀦𑁆𑀦𑀁 𑀪𑀦𑁆𑀢𑁂 𑀧𑀼𑀕𑁆𑀕𑀮𑀸𑀦𑀁 𑀅𑀦𑀸𑀧𑀢𑁆𑀢𑀺, 𑀲𑀓𑀲𑀜𑁆𑀜𑀺𑀲𑁆𑀲, 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀦 𑀕𑀡𑁆𑀳𑀦𑁆𑀢𑀲𑁆𑀲, 𑀢𑀸𑀯𑀓𑀸𑀮𑀺𑀓𑀁 𑀕𑀡𑁆𑀳𑀦𑁆𑀢𑀲𑁆𑀲, 𑀧𑁂𑀢𑀧𑀭𑀺𑀕𑁆𑀕𑀳𑀁 𑀕𑀡𑁆𑀳𑀦𑁆𑀢𑀲𑁆𑀲, 𑀢𑀺𑀭𑀘𑁆𑀙𑀸𑀦𑀕𑀢𑀧𑀭𑀺𑀕𑁆𑀕𑀳𑀁 𑀕𑀡𑁆𑀳𑀦𑁆𑀢𑀲𑁆𑀲, 𑀧𑀁𑀲𑀼𑀓𑀽𑀮𑀲𑀜𑁆𑀜𑀺𑀲𑁆𑀲, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲, 𑀯𑁂𑀤𑀦𑀸𑀝𑁆𑀝𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀼𑀘𑁆𑀙𑀸 𑁋 𑀧𑀜𑁆𑀘𑀦𑁆𑀦𑀁 𑀆𑀯𑀼𑀲𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀦𑀁 𑀓𑀢𑁆𑀣𑁄𑀕𑀥𑀁 𑀓𑀢𑁆𑀣𑀧𑀭𑀺𑀬𑀸𑀧𑀦𑁆𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀺𑀤𑀸𑀦𑁄𑀕𑀥𑀁 𑀪𑀦𑁆𑀢𑁂 𑀦𑀺𑀤𑀸𑀦𑀧𑀭𑀺𑀬𑀸𑀧𑀦𑁆𑀦𑀁.

𑀧𑀼𑀘𑁆𑀙𑀸 𑁋 𑀓𑀢𑀫𑁂𑀦 𑀆𑀯𑀼𑀲𑁄 𑀉𑀤𑁆𑀤𑁂𑀲𑁂𑀦 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀼𑀢𑀺𑀬𑁂𑀦 𑀪𑀦𑁆𑀢𑁂 𑀉𑀤𑁆𑀤𑁂𑀲𑁂𑀦 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀢𑀺.

𑀧𑀼𑀘𑁆𑀙𑀸 𑁋 𑀘𑀢𑀼𑀦𑁆𑀦𑀁 𑀆𑀯𑀼𑀲𑁄 𑀯𑀺𑀧𑀢𑁆𑀢𑀻𑀦𑀁 𑀓𑀢𑀫𑀸 𑀯𑀺𑀧𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀻𑀮𑀯𑀺𑀧𑀢𑁆𑀢𑀺 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀲𑀢𑁆𑀢𑀦𑁆𑀦𑀁 𑀆𑀯𑀼𑀲𑁄 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀓𑀢𑀫𑁄 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀙𑀦𑁆𑀦𑀁 𑀆𑀯𑀼𑀲𑁄 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀻𑀳𑀺 𑀪𑀦𑁆𑀢𑁂 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀲𑀺𑀬𑀸 𑀓𑀸𑀬𑀢𑁄𑀘 𑀘𑀺𑀢𑁆𑀢𑀢𑁄𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀯𑀸𑀘𑀸𑀢𑁄, 𑀲𑀺𑀬𑀸 𑀯𑀸𑀘𑀸𑀢𑁄𑀘

𑀘𑀺𑀢𑁆𑀢𑀢𑁄𑀘 𑀲𑀫𑀼𑀝𑁆𑀞𑀸𑀢𑀺, 𑀦 𑀓𑀸𑀬𑀢𑁄, 𑀲𑀺𑀬𑀸 𑀓𑀸𑀬𑀢𑁄𑀘 𑀯𑀸𑀘𑀸𑀢𑁄𑀘 𑀘𑀺𑀢𑁆𑀢𑀢𑁄𑀘 𑀲𑀫𑀼𑀝𑁆𑀞𑀸𑀢𑀺.

𑀧𑀼𑀘𑁆𑀙𑀸 𑁋 𑀘𑀢𑀼𑀦𑁆𑀦𑀁 𑀆𑀯𑀼𑀲𑁄 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀁 𑀅𑀥𑀺𑀓𑀭𑀡𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀲𑀢𑁆𑀢𑀦𑁆𑀦𑀁 𑀆𑀯𑀼𑀲𑁄 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑁆𑀯𑀺𑀳𑀺 𑀪𑀦𑁆𑀢𑁂 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑀘 𑀧𑀝𑀺𑀜𑁆𑀜𑀸𑀢 𑀓𑀭𑀡𑁂𑀦𑀘.

𑀧𑀼𑀘𑁆𑀙𑀸 𑁋 𑀓𑁄 𑀆𑀯𑀼𑀲𑁄 𑀢𑀢𑁆𑀣 𑀯𑀺𑀦𑀬𑁄, 𑀓𑁄 𑀢𑀢𑁆𑀣 𑀅𑀪𑀺𑀯𑀺𑀦𑀬𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀜𑁆𑀜𑀢𑁆𑀢𑀺 𑀪𑀦𑁆𑀢𑁂 𑀯𑀺𑀦𑀬𑁄 𑀯𑀺𑀪𑀢𑁆𑀢𑀺 𑀅𑀪𑀺𑀯𑀺𑀦𑀬𑁄.

𑀧𑀼𑀘𑁆𑀙𑀸 𑁋 𑀓𑀺𑀁𑀆𑀯𑀼𑀲𑁄 𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀁 𑀓𑀺𑀁 𑀢𑀢𑁆𑀣 𑀅𑀥𑀺𑀧𑀸𑀢𑀺𑀫𑁄𑀓𑁆𑀔𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀜𑁆𑀜𑀢𑁆𑀢𑀺 𑀪𑀦𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑀁, 𑀯𑀺𑀪𑀢𑁆𑀢𑀺 𑀅𑀥𑀺𑀧𑀸𑀢𑀺𑀫𑁄𑀓𑁆𑀔𑀁.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀯𑀺𑀧𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀲𑀁𑀯𑀭𑁄 𑀪𑀦𑁆𑀢𑁂 𑀯𑀺𑀧𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀲𑀫𑁆𑀧𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀁𑀯𑀭𑁄 𑀪𑀦𑁆𑀢𑁂 𑀲𑀫𑁆𑀧𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀧𑀝𑀺𑀧𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀬𑀸𑀯𑀚𑀻𑀯𑀁 𑀆𑀧𑀸𑀡𑀓𑁄𑀝𑀺𑀓𑀁 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀬𑀁 𑀪𑀦𑁆𑀢𑁂 𑀢𑀢𑁆𑀣 𑀧𑀝𑀺𑀧𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀢𑀺 𑀆𑀯𑀼𑀲𑁄 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀪𑀕𑀯𑀢𑀸 𑀤𑀼𑀢𑀺𑀬𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀲 𑀪𑀦𑁆𑀢𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀪𑀕𑀯𑀢𑀸 𑀤𑀼𑀢𑀺𑀬𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁. 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀲𑀗𑁆𑀖𑀨𑀸𑀲𑀼𑀢𑀸𑀬 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬.

𑀧𑀼𑀘𑁆𑀙𑀸 𑁋 𑀓𑁄 𑀆𑀯𑀼𑀲𑁄 𑀲𑀺𑀓𑁆𑀔𑀦𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁂𑀓𑁆𑀔𑀸𑀘 𑀪𑀦𑁆𑀢𑁂 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀘 𑀲𑀺𑀓𑁆𑀔𑀦𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑁂 𑀆𑀯𑀼𑀲𑁄 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀭𑀳𑀦𑁆𑀢𑁄 𑀪𑀦𑁆𑀢𑁂 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀧𑀼𑀘𑁆𑀙𑀸 𑁋 𑀓𑀢𑁆𑀣 𑀆𑀯𑀼𑀲𑁄 𑀞𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀺𑀓𑁆𑀔𑀸𑀓𑀸𑀫𑁂𑀲𑀼 𑀪𑀦𑁆𑀢𑁂 𑀞𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑁂 𑀆𑀯𑀼𑀲𑁄 𑀥𑀸𑀭𑁂𑀦𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀬𑁂𑀲𑀁 𑀪𑀦𑁆𑀢𑁂 𑀯𑀢𑁆𑀢𑀢𑀺 𑀢𑁂 𑀥𑀸𑀭𑁂𑀦𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀲𑁆𑀲 𑀆𑀯𑀼𑀲𑁄 𑀯𑀘𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀢𑀸 𑀪𑀦𑁆𑀢𑁂 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀫𑀼𑀤𑁆𑀥𑀲𑁆𑀲.

𑀧𑀼𑀘𑁆𑀙𑀸 𑁋 𑀓𑁂𑀦𑀸𑀯𑀼𑀲𑁄 𑀆𑀪𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀭𑀫𑁆𑀧𑀭𑀸𑀬 𑀪𑀦𑁆𑀢𑁂 𑀆𑀪𑀢𑀁.

𑀧𑀼𑀘𑁆𑀙𑀸 𑁋 𑀅𑀢𑁆𑀣𑀺 𑀦𑀼 𑀔𑁄 𑀆𑀯𑀼𑀲𑁄 𑀢𑀢𑁆𑀣 𑀉𑀧𑀦𑁂𑀢𑀩𑁆𑀩𑀁 𑀯𑀸 𑀅𑀧𑀦𑁂𑀢𑀩𑁆𑀩𑀁 𑀯𑀸 𑀅𑀓𑁆𑀔𑀭𑀧𑀤𑀧𑀘𑁆𑀘𑀸𑀪𑀝𑁆𑀞𑀁 𑀯𑀸 𑀯𑀺𑀭𑀤𑁆𑀥𑀧𑀤𑀩𑁆𑀬𑀜𑁆𑀚𑀦𑀁 𑀯𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀢𑁆𑀣𑀺 𑀪𑀦𑁆𑀢𑁂.

‘‘𑀲𑀁𑀕𑀸𑀬𑀦𑀢𑁆𑀣𑀸𑀬 𑀲𑀗𑁆𑀖𑀲𑁆𑀲 𑀜𑀸𑀧𑀦𑀁’’

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄 𑀅𑀳𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲 𑀢𑀺𑀧𑀺𑀝𑀓𑀥𑀭𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀤𑀼𑀢𑀺𑀬𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺𑀁, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺𑀁, 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺𑀁, 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺𑀁, 𑀅𑀦𑀼𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺𑀁, 𑀆𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺𑀁, 𑀅𑀦𑀸𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺𑀁, 𑀅𑀜𑁆𑀜𑀸𑀦𑀺𑀧𑀺 𑀈𑀤𑀺𑀲𑀸𑀦𑀺 𑀧𑀼𑀘𑁆𑀙𑀺𑀢𑀩𑁆𑀩𑀝𑁆𑀞𑀸𑀦𑀸𑀦𑀺 𑀅𑀦𑁂𑀓𑀸𑀦𑀺 𑀧𑀼𑀘𑁆𑀙𑀺𑀁, 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄𑀘 𑀲𑁄 𑀆𑀬𑀲𑁆𑀫𑀸 𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀇𑀢𑀺 𑀳𑀺𑀤𑀁 𑀪𑀦𑁆𑀢𑁂 𑀇𑀤𑀁 𑀤𑀼𑀢𑀺𑀬𑀁 𑀧𑀸𑀭𑀸𑀚𑀺𑀓 𑀲𑀺𑀓𑁆𑀔𑀸𑀧𑀤𑀁 𑀦𑀺𑀫𑁆𑀫𑀮𑀁, 𑀲𑀼𑀧𑀭𑀺𑀲𑀼𑀤𑁆𑀥𑀁, 𑀢𑀲𑁆𑀲𑁂𑀯 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀲𑁆𑀫𑀸 𑀬𑀣𑀸 𑀧𑀼𑀭𑁂 𑀫𑀳𑀸𑀓𑀲𑁆𑀲 𑀧𑀸𑀤𑀬𑁄 𑀫𑀳𑀸𑀣𑁂𑀭𑀯𑀭𑀸 𑀧𑁄𑀭𑀸𑀡𑀲𑀁𑀕𑀻𑀢𑀺𑀓𑀸𑀭𑀸 𑀩𑁆𑀭𑀳𑁆𑀫𑀘𑀭𑀺𑀬𑀲𑀗𑁆𑀔𑀸𑀢𑀲𑁆𑀲 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸, 𑀩𑀳𑀼𑀚𑀦𑀳𑀺𑀢𑀸𑀬, 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬, 𑀳𑀺𑀢𑀸𑀬, 𑀲𑀼𑀔𑀸𑀬, 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀁𑀲𑀼𑀘𑁂𑀯 𑀅𑀦𑀼𑀲𑀗𑁆𑀕𑀸𑀬𑀺𑀁𑀲𑀼𑀘, 𑀏𑀯𑀫𑁂𑀯 𑀫𑀬𑀫𑁆𑀧𑀺 𑀤𑀸𑀦𑀺 𑀲𑀩𑁆𑀩𑁂𑀯 𑀙𑀝𑁆𑀞𑀲𑀁𑀕𑀻𑀢𑀺𑀫𑀳𑀸𑀥𑀫𑁆𑀫𑀲𑀪𑀸𑀧𑀭𑀺𑀬𑀸𑀧𑀦𑁆𑀦𑀸 𑀇𑀤𑀁 𑀤𑀼𑀢𑀺𑀬 𑀧𑀸𑀭𑀸𑀚𑀺𑀓 𑀲𑀺𑀓𑁆𑀔𑀸𑀧𑀤𑀁 𑀏𑀓𑀢𑁄 𑀕𑀡𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀳𑀼𑀢𑁆𑀯𑀸 𑀲𑀗𑁆𑀕𑀸𑀬𑁂𑀬𑁆𑀬𑀸𑀫.

𑀢𑀢𑀺𑀬 𑀧𑀸𑀭𑀸𑀚𑀺𑀓 𑀲𑀺𑀓𑁆𑀔𑀸𑀧𑀼𑀘𑁆𑀙𑀸

𑀧𑀼𑀘𑁆𑀙𑀸 𑁋 𑀬𑀁 𑀢𑁂𑀦 𑀆𑀯𑀼𑀲𑁄 𑀪𑀕𑀯𑀢𑀸 (𑀧) 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀢𑀢𑀺𑀬𑀁 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀁 𑀆𑀯𑀼𑀲𑁄 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀫𑁆𑀩𑀳𑀼𑀮𑁂 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀺𑀲𑁆𑀫𑀺𑀁 𑀆𑀯𑀼𑀲𑁄 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀫𑁆𑀩𑀳𑀼𑀮𑀸 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀅𑀜𑁆𑀜𑀫𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀅𑀢𑁆𑀣𑀺 𑀦𑀼𑀔𑁄 𑀆𑀯𑀼𑀲𑁄 𑀢𑀢𑁆𑀣 𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀸 𑀪𑀦𑁆𑀢𑁂 𑀧𑀜𑁆𑀜𑀢𑁆𑀢𑀺, 𑀏𑀓𑀸 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀢𑀲𑁆𑀫𑀺𑀁 𑀦𑀢𑁆𑀣𑀺.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀢𑀢𑁆𑀣 𑀫𑀽𑀮𑀧𑀜𑁆𑀜𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀬𑁄𑀧𑀦 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀲𑀢𑁆𑀣𑀳𑀸𑀭𑀓𑀁𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄𑀢𑀺 𑀅𑀬𑀁 𑀪𑀦𑁆𑀢𑁂 𑀢𑀢𑁆𑀣 𑀫𑀽𑀮𑀧𑀜𑁆𑀜𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀢𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬 𑀫𑀭𑀡𑀸𑀬 𑀯𑀸 𑀲𑀫𑀸𑀤𑀧𑁂𑀬𑁆𑀬 𑀅𑀫𑁆𑀪𑁄𑀧𑀼𑀭𑀺𑀲 𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸 𑀧𑀸𑀧𑀓𑁂𑀦 𑀤𑀼𑀚𑁆𑀚𑀻𑀯𑀺𑀢𑁂𑀦 𑀫𑀢𑀦𑁆𑀢𑁂 𑀚𑀻𑀯𑀺𑀢𑀸

𑀲𑁂𑀬𑁆𑀬𑀸𑀢𑀺 𑀇𑀢𑀺 𑀘𑀺𑀢𑁆𑀢𑀫𑀦𑁄 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬 𑀫𑀭𑀡𑀸𑀬 𑀯𑀸 𑀲𑀫𑀸𑀤𑀧𑁂𑀬𑁆𑀬𑀸𑀢𑀺 𑀅𑀬𑀁 𑀪𑀦𑁆𑀢𑁂 𑀢𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀸 𑀆𑀯𑀼𑀲𑁄 𑀢𑀢𑁆𑀣 𑀧𑀭𑀺𑀧𑀼𑀡𑁆𑀡𑀧𑀜𑁆𑀜𑀢𑁆𑀢𑀺.