𑁨. 𑀪𑀽𑀢𑀕𑀸𑀫𑀯𑀕𑁆𑀕, 𑁫. 𑀤𑀼𑀢𑀺𑀬 𑀲𑁂𑀦𑀸𑀲𑀦 𑀲𑀺𑀓𑁆𑀔𑀸𑀧𑀼𑀘𑁆𑀙𑀸

𑀧𑀼𑀘𑁆𑀙𑀸 𑁋 𑀲𑀗𑁆𑀖𑀺𑀓𑁂 𑀆𑀯𑀼𑀲𑁄 𑀯𑀺𑀳𑀸𑀭𑁂 𑀲𑁂𑀬𑁆𑀬𑀁 𑀲𑀦𑁆𑀣𑀭𑀺𑀢𑁆𑀯𑀸 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑁂 𑀯𑀺𑀳𑀸𑀭𑁂 𑀲𑁂𑀬𑁆𑀬𑀁 𑀲𑀦𑁆𑀣𑀭𑀺𑀢𑁆𑀯𑀸 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀁𑀲𑀼, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀲𑁆𑀲 𑀆𑀯𑀼𑀲𑁄 𑀯𑀘𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀢𑀸 𑀪𑀦𑁆𑀢𑁂 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀧𑀼𑀘𑁆𑀙𑀸 𑁋 𑀓𑁂𑀦𑀸𑀯𑀼𑀲𑁄 𑀆𑀪𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀭𑀫𑁆𑀧𑀭𑀸𑀬 𑀪𑀦𑁆𑀢𑁂 𑀆𑀪𑀢𑀁.

𑀧𑀼𑀘𑁆𑀙𑀸 𑁋 𑀅𑀢𑁆𑀣𑀺 𑀦𑀼𑀔𑁄 𑀆𑀯𑀼𑀲𑁄 𑀏𑀢𑁆𑀣 𑀓𑁄𑀘𑀺𑀧𑀺 𑀯𑀺𑀭𑀤𑁆𑀥𑀤𑁄𑀲𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀢𑁆𑀣𑀺 𑀪𑀦𑁆𑀢𑁂.

𑀲𑀗𑁆𑀖𑀲𑁆𑀲 𑀜𑀸𑀧𑀦𑀁

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀳𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑀁 𑀇𑀫𑁂𑀲𑀁 𑀧𑀦𑁆𑀦𑀭𑀲𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀦𑀺𑀤𑀸𑀦𑀸𑀤𑀻𑀦𑀺 𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀺 𑀅𑀦𑁂𑀓𑀸𑀦𑀺 𑀞𑀸𑀦𑀸𑀦𑀺 𑀧𑀼𑀘𑁆𑀙𑀺𑀁, 𑀲𑁄 𑀘 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀇𑀢𑀺 𑀳𑀺𑀤𑀁 𑀪𑀦𑁆𑀢𑁂 𑀦𑀺𑀫𑁆𑀫𑀮𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀢𑀲𑁆𑀲𑁂𑀯 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀲𑁆𑀫𑀸 𑀬𑀣𑀸𑀧𑀼𑀭𑁂 𑀫𑀳𑀸𑀓𑀲𑁆𑀲𑀧𑀸𑀤𑀬𑁄 𑀫𑀳𑀸𑀣𑁂𑀭𑀯𑀭𑀸 𑀧𑁄𑀭𑀸𑀡𑀲𑀁𑀕𑀻𑀢𑀺𑀓𑀸𑀭𑀸 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀯𑀺𑀦𑀬𑀁 𑀲𑀁𑀕𑀸𑀬𑀺𑀁𑀲𑀼𑀘𑁂𑀯 𑀅𑀦𑀼𑀲𑀁𑀕𑀸𑀬𑀺𑀁𑀲𑀼𑀘, 𑀏𑀯𑀫𑁂𑀯 𑀫𑀬𑀫𑁆𑀧𑀺 𑀤𑀸𑀦𑀺 𑀙𑀝𑁆𑀞𑀲𑀁𑀕𑀻𑀢𑀺𑀫𑀳𑀸𑀥𑀫𑁆𑀫𑀲𑀪𑀸 𑀧𑀭𑀺𑀬𑀸𑀧𑀦𑁆𑀦𑀸 𑀬𑀣𑀸𑀦𑀼𑀧𑁆𑀧𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀇𑀫𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀏𑀓𑀢𑁄 𑀕𑀡𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀲𑀁𑀕𑀸𑀬𑁂𑀬𑁆𑀬𑀸𑀫.