𑁧𑁩. 𑀓𑀼𑀮𑀤𑀽𑀲𑀓 𑀲𑀗𑁆𑀖𑀸𑀤𑀺𑀲𑁂𑀲 𑀲𑀺𑀓𑁆𑀔𑀸𑀧𑀼𑀘𑁆𑀙𑀸

𑀧𑀼𑀘𑁆𑀙𑀸 𑁋 𑀬𑀁 𑀢𑁂𑀦 𑀆𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀼𑀮𑀤𑀽𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀓𑀢𑁆𑀣 𑀧𑀜𑁆𑀜𑀢𑁆𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀧𑀜𑁆𑀜𑀢𑁆𑀢𑁄.

𑀧𑀼𑀘𑁆𑀙𑀸 𑁋 𑀓𑀁 𑀆𑀭𑀩𑁆𑀪 𑀆𑀯𑀼𑀲𑁄 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀲𑁆𑀲𑀚𑀺 𑀧𑀼𑀦𑀩𑁆𑀩𑀲𑀼𑀓𑁂 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑁄, 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸 𑀙𑀦𑁆𑀤𑀕𑀸𑀫𑀺𑀢𑀸 𑀤𑁄𑀲𑀕𑀸𑀫𑀺𑀢𑀸 𑀫𑁄𑀳𑀕𑀸𑀫𑀺𑀢𑀸 𑀪𑀬𑀕𑀸𑀫𑀺𑀢𑀸 𑀧𑀸𑀧𑁂𑀲𑀼𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑁄.

𑀅𑀦𑀺𑀬𑀢 𑀲𑀺𑀓𑁆𑀔𑀸𑀧𑀼𑀘𑁆𑀙𑀸

𑀧𑀼𑀘𑁆𑀙𑀸 𑁋 𑀬𑀁 𑀢𑁂𑀦 𑀆𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀞𑀫𑁄 𑀘 𑀅𑀦𑀺𑀬𑀢𑁄 𑀤𑀼𑀢𑀺𑀬𑁄 𑀘 𑀅𑀦𑀺𑀬𑀢𑁄 𑀓𑀢𑁆𑀣 𑀧𑀜𑁆𑀜𑀢𑁆𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀧𑀜𑁆𑀜𑀢𑁆𑀢𑁄.

𑀧𑀼𑀘𑁆𑀙𑀸 𑁋 𑀓𑀁 𑀆𑀯𑀼𑀲𑁄 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀆𑀬𑀲𑁆𑀫𑀦𑁆𑀢𑀁 𑀪𑀦𑁆𑀢𑁂 𑀉𑀤𑀸𑀬𑀺𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑁄, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀉𑀤𑀸𑀬𑀻 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀺, 𑀢𑀲𑁆𑀫𑀺𑀜𑁆𑀘 𑀯𑀢𑁆𑀣𑀼𑀲𑁆𑀫𑀺𑀁, 𑀆𑀬𑀲𑁆𑀫𑀸𑀬𑁂𑀯 𑀪𑀦𑁆𑀢𑁂 𑀉𑀤𑀸𑀬𑀻 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀚𑁆𑀚𑀁 𑀅𑀓𑀸𑀲𑀺, 𑀢𑀲𑁆𑀫𑀺𑀜𑁆𑀘 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑁄.

𑀧𑀼𑀘𑁆𑀙𑀸 𑁋 𑀓𑀲𑁆𑀲 𑀆𑀯𑀼𑀲𑁄 𑀯𑀘𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀢𑁄 𑀪𑀦𑁆𑀢𑁂 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀧𑀼𑀘𑁆𑀙𑀸 𑁋 𑀓𑁂𑀦𑀸𑀯𑀼𑀲𑁄 𑀆𑀪𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀭𑀫𑁆𑀧𑀭𑀸𑀬 𑀪𑀦𑁆𑀢𑁂 𑀆𑀪𑀢𑀁.

𑀧𑀼𑀘𑁆𑀙𑀸 𑁋 𑀅𑀢𑁆𑀣𑀺 𑀦𑀼𑀔𑁄 𑀆𑀯𑀼𑀲𑁄 𑀏𑀢𑁆𑀣 𑀓𑁄𑀘𑀺𑀧𑀺 𑀯𑀺𑀭𑀤𑁆𑀥𑀤𑁄𑀲𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀢𑁆𑀣𑀺 𑀪𑀦𑁆𑀢𑁂.

𑀲𑀁𑀕𑀸𑀬𑀦𑀢𑁆𑀣𑀸𑀬 𑀲𑀗𑁆𑀖𑀲𑁆𑀲𑀜𑀸𑀧𑀦𑀁

𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀳𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀯𑀺𑀘𑀺𑀢𑁆𑀢𑀲𑀸𑀭𑀸𑀪𑀺𑀯𑀁𑀲𑀁 𑀢𑀺𑀧𑀺𑀝𑀓𑀥𑀭 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀧𑀞𑀫 𑀤𑀼𑀝𑁆𑀞𑀤𑁄𑀲 𑀲𑀺𑀓𑁆𑀔𑀸𑀧𑀤𑀢𑁄 𑀧𑀝𑁆𑀞𑀸𑀬 𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀺 𑀅𑀦𑁂𑀓𑀸𑀦𑀺 𑀞𑀸𑀦𑀸𑀦𑀺 𑀧𑀼𑀘𑁆𑀙𑀺𑀁, 𑀲𑁄 𑀘 𑀆𑀬𑀲𑁆𑀫𑀸 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀇𑀢𑀺𑀳𑀺𑀤𑀁 𑀪𑀦𑁆𑀢𑁂 𑀲𑀩𑁆𑀩𑀁 𑀲𑀺𑀓𑁆𑀔𑀸𑀧𑀤𑀁 𑀦𑀺𑀫𑁆𑀫𑀮𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀢𑀲𑁆𑀲𑁂𑀯 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀲𑁆𑀫𑀸 𑀬𑀣𑀸𑀧𑀼𑀭𑁂 𑀫𑀳𑀸𑀓𑀲𑁆𑀲𑀧𑀸𑀤𑀬𑁄 𑀫𑀳𑀸𑀣𑁂𑀭𑀯𑀭𑀸 𑀧𑁄𑀭𑀸𑀡𑀲𑀁𑀕𑀻𑀢𑀺𑀓𑀸𑀭𑀸 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀁𑀕𑀸𑀬𑀺𑀁𑀲𑀼𑀘𑁂𑀯 𑀅𑀦𑀼𑀲𑀁𑀕𑀸𑀬𑀺𑀁𑀲𑀼𑀘, 𑀏𑀯𑀫𑁂𑀯 𑀫𑀬𑀫𑁆𑀧𑀺 𑀤𑀸𑀦𑀺 𑀲𑀩𑁆𑀩𑁂𑀯 𑀙𑀝𑁆𑀞𑀲𑀁𑀕𑀻𑀢𑀺 𑀫𑀳𑀸𑀥𑀫𑁆𑀫𑀲𑀪𑀸𑀧𑀭𑀺𑀬𑀸𑀧𑀦𑁆𑀦𑀸 𑀇𑀫𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀏𑀓𑀢𑁄 𑀕𑀡𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀲𑀁𑀕𑀸𑀬𑁂𑀬𑁆𑀬𑀸𑀫.