𑁭. 𑀲𑀗𑁆𑀖𑀢𑁂𑀤𑀓𑀓𑁆𑀔𑀦𑁆𑀥𑀓

𑀧𑀼𑀘𑁆𑀙𑀸 𑁋 𑀓𑀣𑀁 𑀆𑀯𑀼𑀲𑁄 𑀙𑀦𑁆𑀦𑀁 𑀲𑀓𑁆𑀬𑀓𑀼𑀫𑀸𑀭𑀸𑀦𑀁 𑀲𑀳 𑀉𑀧𑀸𑀮𑀺𑀓𑀧𑁆𑀧𑀓𑁂𑀦 𑀧𑀩𑁆𑀩𑀚𑁆𑀚𑀸 𑀅𑀳𑁄𑀲𑀺, 𑀓𑀣𑀜𑁆𑀘 𑀦𑁂𑀲𑀁 𑀯𑀺𑀲𑁂𑀲𑁄 𑀉𑀤𑀧𑀸𑀤𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀸 𑀪𑀦𑁆𑀢𑁂 𑀉𑀧𑀸𑀮𑀺𑀁 𑀓𑀧𑁆𑀧𑀓𑀁 𑀧𑀞𑀫𑀁 𑀧𑀩𑁆𑀩𑀸𑀚𑁂𑀲𑀺, 𑀧𑀘𑁆𑀙𑀸 𑀢𑁂 𑀲𑀓𑁆𑀬𑀓𑀼𑀫𑀸𑀭𑁂, 𑀅𑀣 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀢𑁂𑀦𑁂𑀯 𑀅𑀦𑁆𑀢𑀭𑀯𑀲𑁆𑀲𑁂𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀸𑀓𑀸𑀲𑀺, 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑀺𑀩𑁆𑀩𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀲𑀺, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀸𑀓𑀸𑀲𑀺, 𑀤𑁂𑀯𑀤𑀢𑁆𑀢𑁄 𑀧𑁄𑀣𑀼𑀚𑁆𑀚𑀦𑀺𑀓𑀁 𑀇𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀙𑀦𑁆𑀦𑀁 𑀲𑀓𑁆𑀬𑀓𑀼𑀫𑀸𑀭𑀸𑀦𑀁 𑀉𑀧𑀸𑀮𑀺𑀓𑀧𑁆𑀧𑀓𑁂𑀦 𑀲𑀳 𑀧𑀩𑁆𑀩𑀚𑁆𑀚𑀸 𑀅𑀳𑁄𑀲𑀺, 𑀏𑀯𑀜𑁆𑀘 𑀧𑀦 𑀪𑀦𑁆𑀢𑁂 𑀢𑁂𑀲𑀁 𑀯𑀺𑀲𑁂𑀲𑀸𑀥𑀺𑀕𑀫𑁄 𑀅𑀳𑁄𑀲𑀺.

𑀧𑀓𑀸𑀲𑀦𑀻𑀬

𑀧𑀼𑀘𑁆𑀙𑀸 𑁋 𑀧𑀓𑀸𑀲𑀦𑀻𑀬𑀓𑀫𑁆𑀫𑀁 𑀆𑀯𑀼𑀲𑁄 𑀓𑀸𑀢𑀼𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀤𑁂𑀯𑀤𑀢𑁆𑀢𑁄 𑀪𑀦𑁆𑀢𑁂 ‘‘𑀲𑀭𑀸𑀚𑀺𑀓𑀸𑀬 𑀫𑀁 𑀪𑀕𑀯𑀸 𑀧𑀭𑀺𑀲𑀸𑀬 𑀔𑁂𑀴𑀸𑀲𑀓𑀯𑀸𑀤𑁂𑀦 𑀅𑀧𑀲𑀸𑀤𑁂𑀢𑀺, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀯 𑀉𑀓𑁆𑀓𑀁𑀲𑀢𑀻’’𑀢𑀺 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀓𑀸𑀲𑀦𑀻𑀬

𑀧𑀼𑀘𑁆𑀙𑀸 𑁋 𑀤𑁂𑀯𑀤𑀢𑁆𑀢𑀲𑁆𑀲 𑀆𑀯𑀼𑀲𑁄 𑀧𑀓𑀸𑀲𑀦𑀻𑀬𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀓𑀣𑀁 𑀪𑀕𑀯𑀸 𑀧𑀓𑀸𑀲𑁂𑀢𑀼𑀁 𑀆𑀡𑀸𑀧𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀸 𑀪𑀦𑁆𑀢𑁂 𑀤𑁂𑀯𑀤𑀢𑁆𑀢𑀲𑁆𑀲 𑀧𑀓𑀸𑀲𑀦𑀻𑀬𑀓𑀫𑁆𑀫𑀁 𑀓𑀸𑀢𑀼𑀁 𑀧𑀜𑁆𑀜𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 ‘‘𑀢𑁂𑀦 𑀳𑀺 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢 𑀤𑁂𑀯𑀤𑀢𑁆𑀢𑀁 𑀭𑀸𑀚𑀕𑀳𑁂 𑀧𑀓𑀸𑀲𑁂𑀳𑀻’’𑀢𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀤𑁂𑀯𑀤𑀢𑁆𑀢𑀲𑁆𑀲 𑀧𑀓𑀸𑀲𑀦𑀻𑀬𑀓𑀫𑁆𑀫𑀁 𑀓𑀢𑁆𑀯𑀸 𑀤𑁂𑀯𑀤𑀢𑁆𑀢𑀁 𑀭𑀸𑀚𑀕𑀳𑁂 𑀧𑀓𑀸𑀲𑁂𑀢𑀼𑀁 𑀪𑀕𑀯𑀸 𑀆𑀡𑀸𑀧𑁂𑀲𑀺.

𑀤𑁂𑀯𑀤𑀢𑁆𑀢

𑀧𑀼𑀘𑁆𑀙𑀸 𑁋 𑀓𑀣𑀁 𑀆𑀯𑀼𑀲𑁄 𑀤𑁂𑀯𑀤𑀢𑁆𑀢𑁂𑀦 𑀤𑀼𑀝𑁆𑀞𑀘𑀺𑀢𑁆𑀢𑁂𑀦 𑀯𑀥𑀓𑀘𑀺𑀢𑁆𑀢𑁂𑀦 𑀢𑀣𑀸 𑀕𑀢𑀲𑁆𑀲 𑀭𑀼𑀳𑀺𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀞𑀫𑀁 𑀆𑀦𑀦𑁆𑀢𑀭𑀺𑀬𑀁 𑀓𑀫𑁆𑀫𑀁 𑀉𑀧𑀘𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀸 𑀪𑀦𑁆𑀢𑁂 𑀕𑀺𑀚𑁆𑀛𑀓𑀽𑀝𑀲𑁆𑀲 𑀧𑀩𑁆𑀩𑀢𑀲𑁆𑀲 𑀙𑀸𑀬𑀸𑀬𑀁 𑀘𑀗𑁆𑀓𑀫𑀺, 𑀅𑀣 𑀪𑀦𑁆𑀢𑁂 𑀤𑁂𑀯𑀤𑀢𑁆𑀢𑁄 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀆𑀭𑀼𑀳𑀺𑀢𑁆𑀯𑀸 𑀫𑀳𑀢𑀺𑀁 𑀲𑀺𑀮𑀁 𑀧𑀯𑀺𑀚𑁆𑀛𑀺 ‘‘𑀇𑀫𑀸𑀬 𑀲𑀫𑀡𑀁 𑀕𑁄𑀢𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺, 𑀅𑀣 𑀔𑁄 𑀪𑀦𑁆𑀢𑁂 𑀤𑁆𑀯𑁂 𑀧𑀩𑁆𑀩𑀢𑀓𑀽𑀝𑀸𑀦𑀺 𑀲𑀫𑀸𑀕𑀦𑁆𑀢𑁆𑀯𑀸 𑀢𑀁 𑀲𑀺𑀮𑀁 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀢𑀢𑁄 𑀧𑀧𑀢𑀺𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂 𑀭𑀼𑀳𑀺𑀭𑀁 𑀉𑀧𑁆𑀧𑀸𑀤𑁂𑀲𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀤𑁂𑀯𑀤𑀢𑁆𑀢𑁂𑀦 𑀤𑀼𑀝𑁆𑀞𑁂𑀦 𑀯𑀥𑀓𑀘𑀺𑀢𑁆𑀢𑁂𑀦 𑀢𑀣𑀸𑀕𑀢𑀲𑁆𑀲 𑀭𑀼𑀳𑀺𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀞𑀫𑀁 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀉𑀧𑀘𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀼𑀮𑁂𑀲𑀼 𑀆𑀯𑀼𑀲𑁄 𑀢𑀺𑀓𑀪𑁄𑀚𑀦𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀤𑁂𑀯𑀤𑀢𑁆𑀢𑁄 𑀪𑀦𑁆𑀢𑁂 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑁄 𑀲𑀧𑀭𑀺𑀲𑁄 𑀓𑀼𑀮𑁂𑀲𑀼 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀅𑀮𑀁 𑀤𑁂𑀯𑀤𑀢𑁆𑀢, 𑀫𑀸 𑀢𑁂 𑀭𑀼𑀘𑁆𑀘𑀺 𑀲𑀗𑁆𑀖𑀪𑁂𑀤𑁄, 𑀕𑀭𑀼𑀓𑁄 𑀔𑁄 𑀤𑁂𑀯𑀤𑀢𑁆𑀢 𑀲𑀗𑁆𑀖𑀪𑁂𑀤𑁄𑀢𑀺𑀆𑀤𑀺𑀓𑁄 𑀆𑀯𑀼𑀲𑁄 𑀑𑀯𑀸𑀤𑁄 𑀪𑀕𑀯𑀢𑀸 𑀓𑀢𑁆𑀣 𑀤𑀺𑀦𑁆𑀦𑁄, 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀤𑀺𑀦𑁆𑀦𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀤𑀺𑀦𑁆𑀦𑁄, 𑀤𑁂𑀯𑀤𑀢𑁆𑀢𑁄 𑀪𑀦𑁆𑀢𑁂 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀺 𑀘𑀓𑁆𑀓𑀪𑁂𑀤𑀸𑀬, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀤𑀺𑀦𑁆𑀦𑁄.

𑀅𑀮𑀁 𑀤𑁂𑀯𑀤𑀢𑁆𑀢, 𑀫𑀸 𑀢𑁂 𑀭𑀼𑀘𑁆𑀘𑀺 𑀲𑀗𑁆𑀖𑀪𑁂𑀤𑁄, 𑀕𑀭𑀼𑀓𑁄 𑀔𑁄 𑀤𑁂𑀯𑀤𑀢𑁆𑀢 𑀲𑀗𑁆𑀖𑀪𑁂𑀤𑁄 𑁋

𑀧𑀼𑀘𑁆𑀙𑀸 𑁋 ‘‘𑀲𑀼𑀓𑀭𑀁 𑀲𑀸𑀥𑀼𑀦𑀸 𑀲𑀸𑀥𑀼𑀁, 𑀲𑀸𑀥𑀼𑀁 𑀧𑀸𑀧𑁂𑀦 𑀤𑀼𑀓𑁆𑀓𑀭𑀁. 𑀧𑀸𑀧𑀁 𑀧𑀸𑀧𑁂𑀦 𑀲𑀼𑀓𑀭𑀁, 𑀧𑀸𑀧𑀫𑀭𑀺𑀬𑁂𑀳𑀺 𑀤𑀼𑀓𑁆𑀓𑀭’’𑀦𑁆𑀢𑀺- 𑀆𑀯𑀼𑀲𑁄 𑀇𑀤𑀁 𑀉𑀤𑀸𑀦𑀁 𑀪𑀕𑀯𑀢𑀸 𑀓𑀢𑁆𑀣 𑀉𑀤𑀸𑀦𑀺𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀉𑀤𑀸𑀦𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀤𑁂𑀯𑀤𑀢𑁆𑀢𑀁𑀬𑁂𑀯 𑀆𑀭𑀩𑁆𑀪 𑀉𑀤𑀸𑀦𑀺𑀢𑀁, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺, 𑀅𑀣 𑀔𑁄 𑀪𑀦𑁆𑀢𑁂 𑀤𑁂𑀯𑀤𑀢𑁆𑀢𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 ‘‘𑀅𑀚𑁆𑀚𑀢𑀕𑁆𑀕𑁂 𑀤𑀸𑀦𑀸𑀳𑀁 𑀆𑀯𑀼𑀲𑁄 𑀆𑀦𑀦𑁆𑀤 𑀅𑀜𑁆𑀜𑀢𑁆𑀭𑁂𑀯 𑀪𑀕𑀯𑀢𑀸 𑀅𑀜𑁆𑀜𑀢𑁆𑀭𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀉𑀤𑀸𑀦𑀺𑀢𑀁.

𑀲𑀼𑀓𑀭𑀁 𑀲𑀸𑀥𑀼𑀦𑀸 𑀲𑀸𑀥𑀼𑀁, 𑀲𑀸𑀥𑀼𑀁 𑀧𑀸𑀧𑁂𑀦 𑀤𑀼𑀓𑁆𑀓𑀭𑀁;

𑀧𑀸𑀧𑀁 𑀧𑀸𑀧𑁂𑀦 𑀲𑀼𑀓𑀭𑀁, 𑀧𑀸𑀧𑀫𑀭𑀺𑀬𑁂𑀳𑀺 𑀤𑀼𑀓𑁆𑀓𑀭𑀁.

𑀧𑀼𑀘𑁆𑀙𑀸 𑁋 𑀪𑁂𑀤𑀸𑀦𑀼𑀯𑀢𑁆𑀢𑀓𑀸𑀦𑀁 𑀆𑀯𑀼𑀲𑁄 𑀪𑀺𑀓𑁆𑀔𑀽𑀦𑀁 𑀣𑀼𑀮𑁆𑀮𑀘𑁆𑀘𑀬𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀲𑀸𑀥𑀼 𑀪𑀦𑁆𑀢𑁂 𑀪𑁂𑀤𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

‘‘𑀲𑀸𑀥𑀼 𑀪𑀦𑁆𑀢𑁂 𑀪𑁂𑀤𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑁋

𑀧𑀼𑀘𑁆𑀙𑀸 𑁋 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀆𑀯𑀼𑀲𑁄 𑀲𑀗𑁆𑀖𑀭𑀸𑀚𑀺 𑀳𑁄𑀢𑀺 𑀦𑁄 𑀘 𑀲𑀗𑁆𑀖𑀪𑁂𑀤𑁄, 𑀓𑀺𑀢𑁆𑀢𑀸𑀯𑀢𑀸 𑀘 𑀧𑀦 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀢𑁄 𑀪𑀦𑁆𑀢𑁂 𑀏𑀓𑁄 𑀳𑁄𑀢𑀺, 𑀏𑀓𑀢𑁄 𑀤𑁆𑀯𑁂 𑀘𑀢𑀼𑀢𑁆𑀣𑁄 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 ‘‘𑀅𑀬𑀁 𑀥𑀫𑁆𑀫𑁄 𑀅𑀬𑀁 𑀯𑀺𑀦𑀬𑁄 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁 𑀇𑀫𑀁 𑀕𑀡𑁆𑀳𑀣 𑀇𑀫𑀁 𑀭𑁄𑀘𑁂𑀣𑀸𑀢𑀺’’, 𑀏𑀢𑁂𑀦𑁂𑀯 𑀪𑀦𑁆𑀢𑁂 𑀦𑀬𑁂𑀦 𑀘𑀢𑀼𑀦𑁆𑀦𑀁 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀸 𑀙𑀦𑁆𑀦𑀁 𑀯𑀸 𑀲𑀢𑁆𑀢𑀦𑁆𑀦𑀁 𑀯𑀸 𑀅𑀝𑁆𑀞𑀦𑁆𑀦𑀁 𑀯𑀸 𑀲𑀗𑁆𑀖𑀭𑀸𑀚𑀺 𑀳𑁄𑀢𑀺, 𑀦𑁄 𑀘 𑀲𑀗𑁆𑀖𑀪𑁂𑀤𑁄, 𑀏𑀓𑀢𑁄 𑀪𑀦𑁆𑀢𑁂 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺, 𑀏𑀓𑀢𑁄 𑀘𑀢𑁆𑀢𑀸𑀭𑁄, 𑀦𑀯𑀫𑁄 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 ‘‘𑀅𑀬𑀁 𑀥𑀫𑁆𑀫𑁄 𑀅𑀬𑀁 𑀯𑀺𑀦𑀬𑁄 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁 𑀇𑀫𑀁 𑀕𑀡𑁆𑀳𑀣 𑀇𑀫𑀁 𑀭𑁄𑀘𑁂𑀣𑀸’’𑀢𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘. 𑀏𑀯𑀁 𑀔𑁄 𑀪𑀦𑁆𑀢𑁂 𑀲𑀗𑁆𑀖𑀭𑀸𑀚𑀺 𑀳𑁄𑀢𑀺, 𑀦𑁄 𑀘 𑀲𑀗𑁆𑀖𑀪𑁂𑀤𑁄, 𑀏𑀯𑀜𑁆𑀘 𑀧𑀦 𑀪𑀦𑁆𑀢𑁂 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘.

𑀧𑀼𑀘𑁆𑀙𑀸 𑁋 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀆𑀯𑀼𑀲𑁄 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀥 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀅𑀥𑀫𑁆𑀫𑀸𑀤𑀺𑀁 𑀥𑀫𑁆𑀫𑀸𑀤𑀻𑀦𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀢𑁂 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀅𑀧𑀓𑀲𑁆𑀲𑀦𑁆𑀢𑀺, 𑀅𑀯𑀧𑀓𑀲𑁆𑀲𑀦𑁆𑀢𑀺, 𑀆𑀯𑁂𑀦𑀺𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀆𑀯𑁂𑀦𑀺𑀁 𑀧𑀯𑀸𑀭𑀡𑀁 𑀓𑀭𑁄𑀦𑁆𑀢𑀺, 𑀆𑀯𑁂𑀦𑀺𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀺.

𑀧𑀼𑀘𑁆𑀙𑀸 𑁋 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀆𑀯𑀼𑀲𑁄 𑀲𑀗𑁆𑀖𑁄 𑀲𑀫𑀕𑁆𑀕𑁄 𑀳𑁄𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀥 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀦𑁆𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀢𑁂 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀦 𑀅𑀧𑀓𑀲𑁆𑀲𑀦𑁆𑀢𑀺, 𑀦 𑀅𑀯𑀧𑀓𑀲𑁆𑀲𑀦𑁆𑀢𑀺, 𑀦 𑀆𑀯𑁂𑀦𑀺𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀦 𑀆𑀯𑁂𑀦𑀺𑀁 𑀧𑀯𑀸𑀭𑀡𑀁 𑀓𑀭𑁄𑀦𑁆𑀢𑀺, 𑀦 𑀆𑀯𑁂𑀦𑀺𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄 𑀪𑀦𑁆𑀢𑁂 𑀲𑀗𑁆𑀖𑁄 𑀲𑀫𑀕𑁆𑀕𑁄 𑀳𑁄𑀢𑀺.

𑀧𑀼𑀘𑁆𑀙𑀸 𑁋 𑀲𑀫𑀕𑁆𑀕𑀁 𑀆𑀯𑀼𑀲𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀺𑀁 𑀲𑁄 𑀧𑀲𑀯𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀫𑀕𑁆𑀕𑀁 𑀔𑁄 𑀪𑀦𑁆𑀢𑁂 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀧𑁆𑀧𑀝𑁆𑀞𑀺𑀢𑀺𑀓𑀁 𑀓𑀺𑀩𑁆𑀩𑀺𑀲𑀁 𑀧𑀲𑀯𑀢𑀺, 𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀺.

𑀧𑀼𑀘𑁆𑀙𑀸 𑁋 𑀪𑀺𑀦𑁆𑀦𑀁 𑀔𑁄 𑀆𑀯𑀼𑀲𑁄 𑀲𑀗𑁆𑀖𑀁 𑀲𑀫𑀕𑁆𑀕𑀁 𑀓𑀢𑁆𑀯𑀸 𑀓𑀺𑀁 𑀲𑁄 𑀧𑀲𑀯𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀺𑀦𑁆𑀦𑀁 𑀔𑁄 𑀪𑀦𑁆𑀢𑁂 𑀲𑀗𑁆𑀖𑀁 𑀲𑀫𑀕𑁆𑀕𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀢𑀺.

𑀧𑀼𑀘𑁆𑀙𑀸 𑁋 𑀲𑀗𑁆𑀖𑀪𑁂𑀤𑀁 𑀧𑀼𑀘𑁆𑀙𑀺𑀲𑁆𑀲𑀁, 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀁. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀆𑀯𑀼𑀲𑁄 𑀓𑀢𑀺 𑀆𑀧𑀢𑁆𑀢𑀺𑀬𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀗𑁆𑀖𑀪𑁂𑀤𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀁. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀪𑀦𑁆𑀢𑁂 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄.