𑁧𑁦. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓

𑀧𑀼𑀘𑁆𑀙𑀸 𑁋 𑀅𑀝𑁆𑀞𑀳𑀺 𑀆𑀯𑀼𑀲𑁄 𑀕𑀭𑀼𑀥𑀫𑁆𑀫𑁂𑀳𑀺 𑀉𑀧𑀲𑀫𑁆𑀧𑀤𑀸 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀸, 𑀓𑀲𑁆𑀲 𑀅𑀦𑀼𑀜𑁆𑀜𑀸𑀢𑀸, 𑀓𑀺𑀲𑁆𑀫𑀺𑀜𑁆𑀘 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀅𑀦𑀼𑀜𑁆𑀜𑀸𑀢𑀸, 𑀫𑀳𑀸𑀧𑀚𑀸𑀧𑀢𑀺 𑀪𑀦𑁆𑀢𑁂 𑀕𑁄𑀢𑀫𑀻 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺 𑀭𑀚𑁄𑀓𑀺𑀡𑁆𑀡𑁂𑀦 𑀕𑀢𑁆𑀢𑁂𑀦 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀸𑀲𑀺, 𑀅𑀣 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀢𑀁 𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀘𑀢𑀼𑀓𑁆𑀔𑀢𑁆𑀢𑀼𑀁 𑀬𑀸𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀆𑀕𑀸𑀭𑀲𑁆𑀫𑀸 𑀅𑀦𑀸𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀸.

𑀧𑀼𑀘𑁆𑀙𑀸 𑁋 𑀪𑀺𑀓𑁆𑀔𑀽𑀳𑀺 𑀆𑀯𑀼𑀲𑁄 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀆𑀭𑀩𑁆𑀪 𑀅𑀦𑀼𑀜𑁆𑀜𑀸𑀢𑀁, 𑀫𑀳𑀸𑀧𑀚𑀸𑀧𑀢𑀺 𑀪𑀦𑁆𑀢𑁂 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀓𑀣𑀸𑀳𑀁 𑀪𑀦𑁆𑀢𑁂 𑀇𑀫𑀸𑀲𑀼 𑀲𑀸𑀓𑀺𑀬𑀸𑀦𑀻𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀧𑀼𑀘𑁆𑀙𑀸 𑁋 𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸𑀬 𑀆𑀯𑀼𑀲𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀯𑀺𑀲𑀼𑀤𑁆𑀥𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀅𑀦𑀼𑀜𑁆𑀜𑀸𑀢𑀁, 𑀲𑀫𑁆𑀩𑀳𑀼𑀮𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑀺𑀁𑀲𑀼, 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀬𑁄 𑀯𑀺𑀢𑁆𑀣𑀸𑀬𑀺𑀁𑀲𑀼, 𑀫𑀗𑁆𑀓𑀽 𑀅𑀳𑁂𑀲𑀼𑀁, 𑀦 𑀲𑀓𑁆𑀔𑀺𑀁𑀲𑀼 𑀯𑀺𑀲𑁆𑀲𑀚𑁆𑀚𑁂𑀢𑀼𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀧𑀼𑀘𑁆𑀙𑀸 𑁋 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀁 𑀧𑀼𑀘𑁆𑀙𑀺𑀲𑁆𑀲𑀁, 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀁. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀆𑀯𑀼𑀲𑁄 𑀓𑀢𑀺 𑀆𑀧𑀢𑁆𑀢𑀺𑀬𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀁. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀪𑀦𑁆𑀢𑁂 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄.