𑁧𑁦. 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓

𑀧𑀼𑀘𑁆𑀙𑀸 𑁋 𑀪𑁂𑀤𑀕𑀭𑀼𑀓𑁂𑀳𑀺 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽𑀳𑀺 𑀦 𑀲𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀘, 𑀪𑁂𑀤𑀕𑀭𑀼𑀓𑁂𑀦 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀸 𑀧𑀭𑁂𑀲𑀫𑁆𑀧𑀺 𑀲𑀤𑁆𑀥𑀸𑀬 𑀆𑀧𑀢𑁆𑀢𑀺𑀤𑁂𑀲𑁂𑀢𑀩𑁆𑀩𑀸𑀢𑀺 𑀘 𑀆𑀯𑀼𑀲𑁄 𑀅𑀬𑀁 𑀲𑀸𑀫𑀕𑁆𑀕𑀺𑀭𑀲𑀑𑀯𑀸𑀤𑁄 𑀪𑀕𑀯𑀢𑀸 𑀓𑀢𑁆𑀣 𑀤𑀺𑀦𑁆𑀦𑁄, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀤𑀺𑀦𑁆𑀦𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀫𑁆𑀩𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀤𑀺𑀦𑁆𑀦𑁄, 𑀪𑀕𑀯𑀢𑀺 𑀪𑀦𑁆𑀢𑁂 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀅𑀳𑁄𑀲𑀺, 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺 𑀤𑀺𑀝𑁆𑀞𑀺 𑀅𑀳𑁄𑀲𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺 𑀤𑀺𑀝𑁆𑀞𑀺𑀦𑁄 𑀅𑀳𑁂𑀲𑀼𑀁. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀅𑀳𑁂𑀲𑀼𑀁. 𑀅𑀣 𑀔𑁄 𑀢𑁂 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀲𑀸𑀫𑀕𑁆𑀕𑀺𑀁 𑀮𑀪𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀁𑀲𑀼, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀤𑀺𑀦𑁆𑀦𑁄.

𑀧𑀼𑀘𑁆𑀙𑀸 𑁋 𑀲𑀗𑁆𑀖𑀪𑁂𑀤𑀲𑁆𑀲 𑀆𑀯𑀼𑀲𑁄 𑀫𑀽𑀮𑀪𑀽𑀢𑁂 𑀪𑀺𑀓𑁆𑀔𑀼𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑀓𑁂 𑀑𑀲𑀸𑀭𑀺𑀢𑁂 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀜𑁆𑀘 𑀓𑀸𑀢𑀼𑀁 𑀲𑀸𑀫𑀕𑁆𑀕𑀻 𑀉𑀧𑁄𑀲𑀣𑀜𑁆𑀘 𑀓𑀸𑀢𑀼𑀁 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀢𑁂𑀬𑁂𑀯 𑀉𑀓𑁆𑀔𑀺𑀢𑁆𑀢𑀓𑀸𑀦𑀼𑀯𑀢𑁆𑀢𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀅𑀦𑀼𑀜𑁆𑀜𑀸𑀢𑀁, 𑀢𑁂 𑀪𑀦𑁆𑀢𑁂 𑀉𑀓𑁆𑀔𑀺𑀢𑁆𑀢𑀓𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀑𑀲𑀸𑀭𑁂𑀢𑁆𑀯𑀸 𑀬𑁂𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀉𑀓𑁆𑀔𑁂𑀧𑀓𑁂 𑀪𑀺𑀓𑁆𑀔𑀽 𑀏𑀓𑀤𑀯𑁄𑀘𑀼𑀁 ‘‘𑀬𑀲𑁆𑀫𑀺𑀁 𑀆𑀯𑀼𑀲𑁄 𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑁄𑀲𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑁄 𑀏𑀲𑁄 𑀪𑀺𑀓𑁆𑀔𑀼𑀁 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 𑀘 𑀑𑀲𑀸𑀭𑀺𑀢𑁄 𑀘, 𑀳𑀦𑁆𑀤 𑀫𑀬𑀁 𑀆𑀯𑀼𑀲𑁄 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀫𑀸’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀧𑀼𑀘𑁆𑀙𑀸 𑁋 𑀓𑁄𑀲𑀫𑁆𑀩𑀓𑀁 𑀧𑀼𑀘𑁆𑀙𑀺𑀲𑁆𑀲𑀁, 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀁. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀆𑀯𑀼𑀲𑁄 𑀓𑀢𑀺 𑀆𑀧𑀢𑁆𑀢𑀺𑀬𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀫𑁆𑀩𑀓𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀁. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀪𑀦𑁆𑀢𑁂 𑀏𑀓𑀸 𑀆𑀧𑀢𑁆𑀢𑀺.