𑁮. 𑀘𑀻𑀯𑀭𑀓𑁆𑀔𑀦𑁆𑀥𑀓

𑀚𑀻𑀯𑀓𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀕𑀳𑀧𑀢𑀺𑀘𑀻𑀯𑀭𑀁 𑀆𑀯𑀼𑀲𑁄 𑀲𑀸𑀤𑀺𑀬𑀺𑀢𑀼𑀁 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀆𑀭𑀩𑁆𑀪 𑀅𑀦𑀼𑀜𑁆𑀜𑀸𑀢𑀁, 𑀚𑀻𑀯𑀓𑁄 𑀪𑀦𑁆𑀢𑁂 𑀓𑁄𑀫𑀸𑀭𑀪𑀘𑁆𑀘𑁄 𑀪𑀺𑀓𑁆𑀔𑀽𑀦𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀚𑀸𑀦𑀺𑀢𑀼𑀁 𑀪𑀕𑀯𑀦𑁆𑀢𑀁 𑀬𑀸𑀘𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀧𑀼𑀘𑁆𑀙𑀸 𑁋 𑀙 𑀆𑀯𑀼𑀲𑁄 𑀭𑀚𑀦𑀸𑀦𑀺 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀸𑀦𑀺, 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀅𑀦𑀼𑀜𑁆𑀜𑀸𑀢𑀸𑀦𑀺, 𑀲𑀫𑁆𑀩𑀳𑀼𑀮𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀙𑀓𑀡𑁂𑀦𑀧𑀺 𑀧𑀡𑁆𑀟𑀼𑀫𑀢𑁆𑀢𑀺𑀓𑀸𑀬𑀧𑀺 𑀘𑀻𑀯𑀭𑀁 𑀭𑀚𑀺𑀁𑀲𑀼, 𑀘𑀻𑀯𑀭𑀁 𑀤𑀼𑀩𑁆𑀩𑀡𑁆𑀡𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀸𑀦𑀺.

𑀧𑀼𑀘𑁆𑀙𑀸 𑁋 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀆𑀯𑀼𑀲𑁄 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀲𑀫𑁆𑀩𑀳𑀼𑀮𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀲𑀼𑀁 𑀤𑀦𑁆𑀢𑀓𑀲𑀸𑀯𑀸𑀦𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀤𑀸 𑀆𑀯𑀼𑀲𑁄 𑀪𑀕𑀯𑀸 𑀅𑀦𑀼𑀜𑁆𑀜𑀸𑀲𑀺 𑀙𑀺𑀦𑁆𑀦𑀓𑀁 𑀲𑀗𑁆𑀖𑀸𑀝𑀺𑀁 𑀙𑀺𑀦𑁆𑀦𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀙𑀺𑀦𑁆𑀦𑀓𑀁 𑀅𑀦𑁆𑀢𑀭𑀯𑀸𑀲𑀓𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀓𑁆𑀔𑀺𑀡𑀸𑀕𑀺𑀭𑀺𑀢𑁄 𑀪𑀦𑁆𑀢𑁂 𑀧𑀘𑁆𑀙𑀸𑀕𑀢𑀓𑀸𑀮𑁂 𑀪𑀕𑀯𑀸 𑀅𑀦𑀼𑀜𑁆𑀜𑀸𑀲𑀺 𑀙𑀺𑀦𑁆𑀦𑀓𑀁 𑀲𑀗𑁆𑀖𑀸𑀝𑀺𑀁 𑀙𑀺𑀦𑁆𑀦𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀙𑀺𑀦𑁆𑀦𑀓𑀁 𑀅𑀦𑁆𑀢𑀭𑀯𑀸𑀲𑀓𑀁.

𑀧𑀼𑀘𑁆𑀙𑀸 𑁋 𑀅𑀕𑁆𑀕𑀴𑀁 𑀘 𑀆𑀯𑀼𑀲𑁄 𑀢𑀼𑀦𑁆𑀦𑀜𑁆𑀘 𑀑𑀯𑀝𑁆𑀝𑀺𑀓𑀜𑁆𑀘 𑀓𑀡𑁆𑀟𑀼𑀲𑀓𑀜𑁆𑀘 𑀤𑀴𑁆𑀳𑀻𑀓𑀫𑁆𑀫𑀜𑁆𑀘 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀩𑀸𑀭𑀸𑀡𑀲𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀅𑀦𑀼𑀜𑁆𑀜𑀸𑀢𑀁, 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀅𑀕𑁆𑀕𑀴𑀁 𑀅𑀘𑁆𑀙𑀼𑀧𑁂𑀲𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀧𑀼𑀘𑁆𑀙𑀸 𑁋 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀘 𑀆𑀯𑀼𑀲𑁄 𑀆𑀕𑀦𑁆𑀢𑀼𑀓𑀪𑀢𑁆𑀢𑀜𑁆𑀘 𑀕𑀫𑀺𑀓𑀪𑀢𑁆𑀢𑀜𑁆𑀘 𑀕𑀺𑀮𑀸𑀦𑀪𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀜𑁆𑀘 𑀕𑀺𑀮𑀸𑀦𑀪𑁂𑀲𑀚𑁆𑀚𑀜𑁆𑀘 𑀥𑀼𑀯𑀬𑀸𑀕𑀼 𑀘 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀉𑀤𑀓𑀲𑀸𑀝𑀺𑀓𑀸𑀘𑀸𑀢𑀺 𑀇𑀫𑀸 𑀅𑀝𑁆𑀞 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀸, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀆𑀭𑀩𑁆𑀪 𑀅𑀦𑀼𑀜𑁆𑀜𑀸𑀢𑀸, 𑀯𑀺𑀲𑀸𑀔𑀸 𑀪𑀦𑁆𑀢𑁂 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀦𑁆𑀢𑀁 𑀅𑀝𑁆𑀞𑀯𑀭𑀸𑀦𑀺 𑀬𑀸𑀘𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀸.

𑀧𑀼𑀘𑁆𑀙𑀸 𑁋 𑀪𑀕𑀯𑀢𑀸 𑀆𑀯𑀼𑀲𑁄 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀦𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀅𑀜𑁆𑀜𑀢𑀭𑀲𑁆𑀲 𑀪𑀦𑁆𑀢𑁂 𑀪𑀺𑀓𑁆𑀔𑀼𑀦𑁄 𑀩𑀳𑀼𑀁 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁 𑀅𑀳𑁄𑀲𑀺, 𑀲𑁄 𑀘 𑀢𑀁𑀘𑀻𑀯𑀭𑀁 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀫𑀸𑀢𑀸𑀧𑀺𑀢𑀭𑁄𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀤𑀤𑀫𑀸𑀦𑁂 𑀓𑀺𑀁 𑀯𑀤𑁂𑀬𑁆𑀬𑀸𑀫, 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀢𑀼𑀁, 𑀦 𑀘 𑀪𑀺𑀓𑁆𑀔𑀯𑁂 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀩𑁆𑀩𑀁, 𑀬𑁄 𑀯𑀺𑀦𑀺𑀧𑀸𑀢𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋

𑀧𑀼𑀘𑁆𑀙𑀸 𑁋 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁 𑀯𑀼𑀝𑁆𑀞𑁂𑀦 𑀆𑀯𑀼𑀲𑁄 𑀅𑀜𑁆𑀜𑀢𑁆𑀭 𑀘𑀻𑀯𑀭𑀪𑀸𑀕𑀁 𑀲𑀸𑀤𑀺𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁 𑀯𑀼𑀝𑁆𑀞𑁄 𑀅𑀜𑁆𑀜𑀢𑁆𑀭 𑀘𑀻𑀯𑀭𑀪𑀸𑀕𑀁 𑀲𑀸𑀤𑀺𑀬𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀅𑀦𑀸𑀣𑀓𑀁 𑀆𑀯𑀼𑀲𑁄 𑀪𑀺𑀓𑁆𑀔𑀼𑀁 𑀕𑀺𑀮𑀸𑀦𑀁 𑀦 𑀉𑀧𑀝𑁆𑀞𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀪𑀕𑀯𑀢𑀺 𑀪𑀦𑁆𑀢𑁂 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀘𑁆𑀙𑀺𑀯𑀺𑀓𑀸𑀭𑀸𑀩𑀸𑀥𑁄 𑀅𑀳𑁄𑀲𑀺, 𑀲𑁄 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑁄 𑀲𑀬𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀦𑀕𑁆𑀕𑀺𑀬𑀁 𑀆𑀯𑀼𑀲𑁄 𑀢𑀺𑀢𑁆𑀣𑀺𑀬𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀦𑀕𑁆𑀕𑀺𑀬𑀁 𑀢𑀺𑀢𑁆𑀣𑀺𑀬𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀲𑀩𑁆𑀩𑀦𑀻𑀮𑀓𑀸𑀦𑀺 𑀯𑀸 𑀆𑀯𑀼𑀲𑁄 𑀘𑀻𑀯𑀭𑀸𑀦𑀺 𑀲𑀩𑁆𑀩𑀧𑀻𑀢𑀓𑀸𑀦𑀺 𑀯𑀸 𑀲𑀩𑁆𑀩𑀮𑁄𑀳𑀺𑀢𑀓𑀸𑀦𑀺 𑀯𑀸 𑀲𑀩𑁆𑀩𑀫𑀜𑁆𑀚𑀺𑀝𑁆𑀞𑀓𑀸𑀦𑀺 𑀯𑀸 𑀲𑀩𑁆𑀩𑀓𑀡𑁆𑀳𑀸𑀦𑀺𑀯𑀸𑀢𑀺 𑀏𑀯𑀭𑀽𑀧𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀲𑀩𑁆𑀩𑀦𑀻𑀮𑀓𑀸𑀤𑀻𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀲𑀼𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀜𑁆𑀘𑀼𑀓𑀁 𑀯𑀸 𑀆𑀯𑀼𑀲𑁄 𑀯𑁂𑀞𑀦𑀁 𑀯𑀸 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀙𑀩𑁆𑀩𑀕𑁆𑀕𑀺𑀬𑁂𑀯 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀓𑀜𑁆𑀘𑀼𑀓𑀫𑁆𑀧𑀺 𑀥𑀸𑀭𑁂𑀲𑀼𑀁 𑀯𑁂𑀞𑀦𑀫𑁆𑀧𑀺 𑀥𑀸𑀭𑁂𑀲𑀼𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀘𑀻𑀯𑀭𑀲𑀜𑁆𑀜𑀼𑀢𑁆𑀢𑀁 𑀧𑀼𑀘𑁆𑀙𑀺𑀲𑁆𑀲𑀁, 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀁. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀆𑀯𑀼𑀲𑁄 𑀓𑀢𑀺 𑀆𑀧𑀢𑁆𑀢𑀺𑀬𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀘𑀻𑀯𑀭𑀲𑀜𑁆𑀜𑀼𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀁. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀪𑀦𑁆𑀢𑁂 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄.