𑁫. 𑀘𑀫𑁆𑀫𑀓𑁆𑀔𑀦𑁆𑀥𑀓

𑀲𑁄𑀡𑀫𑀣𑁂𑀭 𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀉𑀧𑀸𑀳𑀦𑀁 𑀆𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀆𑀭𑀩𑁆𑀪 𑀅𑀦𑀼𑀜𑁆𑀜𑀸𑀢𑀁, 𑀆𑀬𑀲𑁆𑀫𑀢𑁄 𑀪𑀦𑁆𑀢𑁂 𑀲𑁄𑀡𑀲𑁆𑀲 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀘𑀗𑁆𑀓𑀫𑀢𑁄 𑀧𑀸𑀤𑀸 𑀪𑀺𑀚𑁆𑀚𑀺𑀁𑀲𑀼, 𑀘𑀗𑁆𑀓𑀫𑁄 𑀮𑁄𑀳𑀺𑀢𑁂𑀦 𑀨𑀼𑀝𑁄 𑀅𑀳𑁄𑀲𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀧𑀼𑀘𑁆𑀙𑀸 𑁋 𑀲𑀩𑁆𑀩𑀦𑀻𑀮𑀺𑀓𑀸 𑀯𑀸 𑀆𑀯𑀼𑀲𑁄 𑀲𑀩𑁆𑀩𑀧𑀻𑀢𑀺𑀓𑀸 𑀯𑀸 𑀲𑀩𑁆𑀩𑀮𑁄𑀳𑀺𑀢𑀺𑀓𑀸 𑀯𑀸 𑀲𑀩𑁆𑀩𑀫𑀜𑁆𑀚𑀺𑀝𑁆𑀞𑀺𑀓𑀸 𑀯𑀸 𑀲𑀩𑁆𑀩𑀓𑀡𑁆𑀳𑀸 𑀯𑀸 𑀲𑀩𑁆𑀩𑀫𑀳𑀸𑀭𑀗𑁆𑀕𑀭𑀢𑁆𑀢𑀸 𑀯𑀸 𑀲𑀩𑁆𑀩𑀫𑀳𑀸𑀦𑀸𑀫𑀭𑀢𑁆𑀢𑀸 𑀯𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀲𑀩𑁆𑀩𑀦𑀻𑀮𑀺𑀓𑀸𑀬𑁄 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀲𑀼𑀁, 𑀲𑀩𑁆𑀩𑀧𑀻𑀢𑀺𑀓𑀸𑀬𑁄 𑀲𑀩𑁆𑀩𑀮𑁄𑀳𑀺𑀢𑀺𑀓𑀸𑀬𑁄 𑀲𑀩𑁆𑀩𑀫𑀜𑁆𑀚𑀺𑀝𑁆𑀞𑀺𑀓𑀸𑀬𑁄 𑀲𑀩𑁆𑀩𑀓𑀡𑁆𑀳𑀸𑀬𑁄 𑀲𑀩𑁆𑀩𑀫𑀳𑀸𑀭𑀗𑁆𑀕𑀭𑀢𑁆𑀢𑀸 𑀲𑀩𑁆𑀩𑀫𑀳𑀸𑀦𑀸𑀫𑀭𑀢𑁆𑀢𑀸𑀬𑁄𑀧𑀺 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀲𑀼𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀔𑀮𑁆𑀮𑀓𑀩𑀦𑁆𑀥𑀸 𑀯𑀸 𑀆𑀯𑀼𑀲𑁄 𑀧𑀼𑀝𑀩𑀦𑁆𑀥𑀸 𑀯𑀸 𑀧𑀸𑀮𑀺𑀕𑀼𑀡𑁆𑀞𑀺𑀫𑀸 𑀯𑀸 𑀢𑀽𑀮𑀧𑀼𑀡𑁆𑀡𑀺𑀓𑀸 𑀯𑀸 𑀢𑀺𑀢𑁆𑀢𑀺𑀭𑀧𑀢𑁆𑀢𑀺𑀓𑀸 𑀯𑀸 𑀫𑁂𑀡𑁆𑀟𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀯𑀸 𑀅𑀚𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀯𑀸 𑀯𑀺𑀘𑁆𑀙𑀺𑀓𑀸𑀴𑀺𑀓𑀸 𑀯𑀸 𑀫𑁄𑀭𑀧𑀺𑀜𑁆𑀙 𑀧𑀭𑀺𑀲𑀺𑀩𑁆𑀩𑀺𑀓𑀸 𑀯𑀸 𑀘𑀺𑀢𑁆𑀭𑀸 𑀯𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀔𑀮𑁆𑀮𑀓𑀩𑀦𑁆𑀥𑀸 𑀉𑀧𑀸𑀳𑀦𑀸𑀬𑁄𑀧𑀺 𑀥𑀸𑀭𑁂𑀲𑀼𑀁, 𑀧𑀼𑀝𑀩𑀦𑁆𑀥𑀸 𑀉𑀧𑀸𑀳𑀦𑀸𑀬𑁄𑀧𑀺 𑀥𑀸𑀭𑁂𑀲𑀼𑀁, 𑀧𑀸𑀮𑀺𑀕𑀼𑀡𑁆𑀞𑀺𑀫𑀸 𑀉𑀧𑀸𑀳𑀦𑀸𑀬𑁄𑀧𑀺 𑀥𑀸𑀭𑁂𑀲𑀼𑀁, 𑀢𑀽𑀮𑀧𑀼𑀡𑁆𑀡𑀺𑀓𑀸 𑀉𑀧𑀸𑀳𑀦𑀸𑀬𑁄𑀧𑀺 𑀥𑀸𑀭𑁂𑀲𑀼𑀁, 𑀢𑀺𑀢𑁆𑀢𑀺𑀭𑀧𑀢𑁆𑀢𑀺𑀓𑀸 𑀉𑀧𑀸𑀳𑀦𑀸𑀬𑁄𑀧𑀺 𑀥𑀸𑀭𑁂𑀲𑀼𑀁, 𑀫𑁂𑀡𑁆𑀟𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄𑀧𑀺 𑀥𑀸𑀭𑁂𑀲𑀼𑀁, 𑀅𑀚𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄𑀧𑀺 𑀥𑀸𑀭𑁂𑀲𑀼𑀁, 𑀯𑀺𑀘𑁆𑀙𑀺𑀓𑀸𑀴𑀺𑀓𑀸 𑀉𑀧𑀸𑀳𑀦𑀸𑀬𑁄𑀧𑀺 𑀥𑀸𑀭𑁂𑀲𑀼𑀁, 𑀫𑁄𑀭𑀧𑀺𑀜𑁆𑀙 𑀧𑀭𑀺𑀲𑀺𑀩𑁆𑀩𑀺𑀢𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀲𑀼𑀁, 𑀘𑀺𑀢𑁆𑀭𑀸 𑀉𑀧𑀸𑀳𑀦𑀸𑀬𑁄𑀧𑀺 𑀥𑀸𑀭𑁂𑀲𑀼𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀝𑁆𑀞𑀧𑀸𑀤𑀼𑀓𑀸𑀬𑁄 𑀆𑀯𑀼𑀲𑁄 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀙𑀩𑁆𑀩𑀕𑁆𑀕𑀻𑀬𑁂𑀯 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀓𑀝𑁆𑀞𑀧𑀸𑀤𑀼𑀓𑀸𑀬𑁄 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀔𑀝𑀔𑀝𑀲𑀤𑁆𑀤𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀸, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀬𑀸𑀦𑁂𑀦 𑀆𑀯𑀼𑀲𑁄 𑀬𑀸𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀬𑀸𑀦𑁂𑀦 𑀬𑀸𑀬𑀺𑀁𑀲𑀼, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀕𑀺𑀮𑀸𑀦𑀲𑁆𑀲 𑀆𑀯𑀼𑀲𑁄 𑀬𑀸𑀦𑀁 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀕𑀺𑀮𑀸𑀦𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀅𑀦𑀼𑀜𑁆𑀜𑀸𑀢𑀁, 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀺𑀮𑀸𑀦𑁄 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀬𑀸𑀦𑀁 𑀦𑀸𑀪𑀺𑀭𑀼𑀳𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀁.

𑀧𑀼𑀘𑁆𑀙𑀸 𑁋 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀆𑀯𑀼𑀲𑁄 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀥𑀸𑀭𑁂𑀲𑀼𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀕𑁄𑀘𑀫𑁆𑀫𑀸𑀦𑀺 𑀆𑀯𑀼𑀲𑁄 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀧𑀸𑀧𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀲𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀆𑀯𑀼𑀲𑁄 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀸 𑀘 𑀕𑀼𑀡𑀗𑁆𑀕𑀼𑀡𑀽𑀧𑀳𑀦𑀜𑁆𑀘 𑀥𑀼𑀯𑀦𑀳𑀸𑀦𑀜𑁆𑀘 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺 𑀘 𑀦𑀺𑀲𑁆𑀲𑀻𑀫𑀕𑀢𑀸𑀦𑀁 𑀘𑀻𑀯𑀭𑀤𑀸𑀦𑀜𑁆𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀪𑀕𑀯𑀢𑀸 𑀓𑀢𑁆𑀣 𑀅𑀦𑀼𑀜𑁆𑀜𑀸𑀢𑀸𑀦𑀺, 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀓𑀼𑀝𑀺𑀓𑀡𑁆𑀡𑀁 𑀆𑀭𑀩𑁆𑀪 𑀅𑀦𑀼𑀜𑁆𑀜𑀸𑀢𑀸, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀲𑁄𑀡𑁄 𑀓𑀼𑀝𑀺𑀓𑀡𑁆𑀡𑁄 𑀏𑀢𑀸𑀦𑀺 𑀧𑀜𑁆𑀘𑀯𑀢𑁆𑀣𑀽𑀦𑀺 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀯𑀘𑀦𑁂𑀦 𑀪𑀕𑀯𑀦𑁆𑀢𑀁 𑀬𑀸𑀘𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀸.

𑀧𑀼𑀘𑁆𑀙𑀸 𑁋 𑀘𑀫𑁆𑀫𑀲𑀜𑁆𑀜𑀼𑀢𑁆𑀢𑀁 𑀧𑀼𑀘𑁆𑀙𑀺𑀲𑁆𑀲𑀁, 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀁. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀆𑀯𑀼𑀲𑁄 𑀓𑀢𑀺 𑀆𑀧𑀢𑁆𑀢𑀺𑀬𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀘𑀫𑁆𑀫𑀲𑀜𑁆𑀜𑀼𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀁, 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀁. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀪𑀦𑁆𑀢𑁂 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄.