𑁬. 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕

𑀧𑀼𑀘𑁆𑀙𑀸 𑁋 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕𑁂 𑀆𑀯𑀼𑀲𑁄 𑀧𑀞𑀫 𑀤𑀼𑀢𑀺𑀬𑀲𑀼𑀢𑁆𑀢𑀸𑀦𑀺 𑀪𑀕𑀯𑀢𑀸 𑀓𑀣𑀁 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕𑁂 𑀪𑀦𑁆𑀢𑁂 𑀪𑀕𑀯𑀢𑀸 ‘‘𑀧𑀪𑀲𑁆𑀲𑀭𑀫𑀺𑀤𑀁 𑀪𑀺𑀓𑁆𑀔𑀯𑁂 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁, 𑀢𑀁 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀢𑀲𑁆𑀫𑀸 ‘𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘𑀺𑀢𑁆𑀢𑀪𑀸𑀯𑀦𑀸 𑀦𑀢𑁆𑀣𑀻’𑀢𑀺 𑀯𑀤𑀸𑀫𑀺. 𑀧𑀪𑀲𑁆𑀲𑀭𑀫𑀺𑀤𑀁 𑀪𑀺𑀓𑁆𑀔𑀯𑁂 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀢𑀁 𑀲𑀼𑀪𑀯𑀸 𑀅𑀭𑀺𑀬𑀲𑀸𑀯𑀓𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀫𑀸 ‘𑀲𑀼𑀢𑀧𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘𑀺𑀢𑁆𑀢𑀪𑀸𑀯𑀦𑀸 𑀅𑀢𑁆𑀣𑀻’𑀢𑀺 𑀯𑀤𑀸𑀫𑀻’’𑀢𑀺. 𑀏𑀯𑀁 𑀔𑁄 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀢𑀢𑀺𑀬𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀢𑀢𑀺𑀬𑀲𑀼𑀢𑁆𑀢𑀸𑀤𑀻𑀦𑀺 𑀪𑀕𑀯𑀢𑀸 𑀓𑀣𑀁 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑁆𑀣𑁂𑀯 𑀪𑀦𑁆𑀢𑁂 𑀢𑀢𑀺𑀬𑀲𑀼𑀢𑁆𑀢𑀸𑀤𑀻𑀦𑀺 𑀧𑀜𑁆𑀘𑀲𑀼𑀢𑁆𑀢𑀸𑀦𑀺 ‘‘𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀘𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀘𑀺𑀢𑁆𑀢𑀁 𑀆𑀲𑁂𑀯𑀢𑀺, 𑀪𑀸𑀯𑁂𑀢𑀺, 𑀫𑀦𑀲𑀺𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀅𑀭𑀺𑀢𑁆𑀢𑀚𑁆𑀛𑀸𑀦𑁄 𑀯𑀺𑀳𑀭𑀢𑀺 𑀲𑀢𑁆𑀣𑀼𑀲𑀸𑀲𑀦𑀓𑀭𑁄 𑀑𑀯𑀸𑀤𑀧𑀢𑀺𑀓𑀭𑁄 𑀅𑀫𑁄𑀖𑀁 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑀢𑀺, 𑀓𑁄 𑀧𑀦 𑀯𑀸𑀤𑁄 𑀬𑁂 𑀦𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑀺. 𑀬𑁂𑀓𑁂𑀘𑀺 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀪𑀸𑀕𑀺𑀬𑀸 𑀅𑀓𑀼𑀲𑀮𑀧𑀓𑁆𑀔𑀺𑀓𑀸, 𑀲𑀩𑁆𑀩𑁂𑀢𑁂 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸, 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀦𑁆𑀯𑀤𑁂𑀯 𑀅𑀓𑀼𑀲𑀮𑀸𑀥𑀫𑁆𑀫𑀸, 𑀬𑁂𑀓𑁂𑀘𑀺 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀪𑀸𑀕𑀺𑀬𑀸 𑀓𑀼𑀲𑀮𑀧𑀓𑁆𑀔𑀺𑀓𑀸, 𑀲𑀩𑁆𑀩𑁂𑀢𑁂 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸, 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀦𑁆𑀯𑀤𑁂𑀯 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀅𑀝𑁆𑀞𑀫𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀅𑀝𑁆𑀞𑀫 𑀦𑀯𑀫 𑀤𑀲𑀫𑀲𑀼𑀢𑁆𑀢𑀸𑀦𑀺 𑀘 𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀯𑀕𑁆𑀕𑁂 𑀤𑀲𑀲𑀼𑀢𑁆𑀢𑀸𑀦𑀺 𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀯𑀕𑁆𑀕𑁂 𑀧𑀞𑀫𑀲𑀼𑀢𑁆𑀢𑀜𑁆𑀘 𑀪𑀕𑀯𑀢𑀸 𑀓𑀣𑀁 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑁆𑀣𑁂𑀯 𑀪𑀦𑁆𑀢𑁂 𑀅𑀝𑁆𑀞𑀫 𑀦𑀯𑀫 𑀤𑀲𑀫𑀲𑀼𑀢𑁆𑀢𑀸𑀦𑀺 𑀘 𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀯𑀕𑁆𑀕𑁂 𑀤𑀲𑀲𑀼𑀢𑁆𑀢𑀸𑀦𑀺 𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀯𑀕𑁆𑀕𑁂 𑀧𑀞𑀫𑀲𑀼𑀢𑁆𑀢𑀜𑁆𑀘 ‘‘𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀧𑀫𑀸𑀤𑁄, 𑀧𑀫𑀢𑁆𑀢𑀲𑁆𑀲 𑀪𑀺𑀓𑁆𑀔𑀯𑁂 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀤𑀼𑀢𑀺𑀬𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀯𑀕𑁆𑀕𑁂 𑀆𑀯𑀼𑀲𑁄 𑀤𑀼𑀢𑀺𑀬 𑀢𑀢𑀺𑀬𑀲𑀼𑀢𑁆𑀢𑀸𑀦𑀺 𑀪𑀕𑀯𑀢𑀸 𑀓𑀣𑀁 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀯𑀕𑁆𑀕𑁂 𑀪𑀦𑁆𑀢𑁂 𑀤𑀼𑀢𑀺𑀬 𑀢𑀢𑀺𑀬𑀲𑀼𑀢𑁆𑀢𑀸𑀦𑀺 ‘‘𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀅𑀦𑀼𑀬𑁄𑀕𑁄 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀦𑀼𑀬𑁄𑀕𑁄 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀙𑀝𑁆𑀞𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀙𑀝𑁆𑀞𑀲𑀼𑀢𑁆𑀢𑀸𑀤𑀻𑀦𑀺 𑀘 𑀧𑀫𑀸𑀤𑀸𑀤𑀺𑀯𑀕𑁆𑀕𑁂 𑀧𑀞𑀫𑀲𑀼𑀢𑁆𑀢𑀜𑁆𑀘 𑀪𑀕𑀯𑀢𑀸 𑀓𑀣𑀁 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑁆𑀣𑁂𑀯 𑀪𑀦𑁆𑀢𑁂 𑀙𑀝𑁆𑀞𑀲𑀼𑀢𑁆𑀢𑀸𑀤𑀻𑀦𑀺 𑀘 𑀧𑀫𑀸𑀤𑀸𑀤𑀺𑀯𑀕𑁆𑀕𑁂 𑀧𑀞𑀫𑀲𑀼𑀢𑁆𑀢𑀜𑁆𑀘 ‘‘𑀅𑀧𑁆𑀧𑀫𑀢𑁆𑀢𑀺𑀓𑀸 𑀏𑀲𑀸 𑀪𑀺𑀓𑁆𑀔𑀯𑁂 𑀧𑀭𑀺𑀳𑀸𑀦𑀺 𑀬𑀤𑀺𑀤𑀁 𑀜𑀸𑀢𑀺𑀧𑀭𑀺𑀳𑀸𑀦𑀺. 𑀏𑀢𑀁 𑀧𑀢𑀺𑀓𑀺𑀝𑁆𑀞𑀁 𑀪𑀺𑀓𑁆𑀔𑀯𑁂 𑀧𑀭𑀺𑀳𑀸𑀦𑀻𑀦𑀁 𑀬𑀤𑀺𑀤𑀁 𑀧𑀜𑁆𑀜𑀸𑀧𑀭𑀺𑀳𑀸𑀦𑀻𑀢𑀺. 𑀅𑀧𑁆𑀧𑀫𑀢𑁆𑀢𑀺𑀓𑀸 𑀏𑀲𑀸 𑀪𑀺𑀓𑁆𑀔𑀯𑁂 𑀯𑀼𑀤𑁆𑀥𑀺 𑀬𑀤𑀺𑀤𑀁 𑀜𑀸𑀢𑀺𑀯𑀼𑀤𑁆𑀥𑀺. 𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀯𑀼𑀤𑁆𑀥𑀻𑀦𑀁 𑀬𑀤𑀺𑀤𑀁 𑀧𑀜𑁆𑀜𑀸𑀯𑀼𑀤𑁆𑀥𑀺. 𑀢𑀲𑁆𑀫𑀸𑀢𑀺𑀳 𑀪𑀺𑀓𑁆𑀔𑀯𑁂 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀧𑀜𑁆𑀜𑀸𑀯𑀼𑀤𑁆𑀥𑀺𑀬𑀸 𑀯𑀤𑁆𑀥𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄 𑀪𑀺𑀓𑁆𑀔𑀯𑁂 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀧𑀫𑀸𑀤𑀸𑀤𑀺𑀯𑀕𑁆𑀕

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀫𑀸𑀤𑀸𑀤𑀺𑀯𑀕𑁆𑀕𑁂 𑀤𑀼𑀢𑀺𑀬𑀲𑀼𑀢𑁆𑀢𑀸𑀤𑀻𑀦𑀺 𑀓𑀣𑀁 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁄 𑀏𑀯𑀁 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀧𑀫𑀸𑀤𑁄. 𑀧𑀫𑀸𑀤𑁄 𑀪𑀺𑀓𑁆𑀔𑀯𑁂 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺, 𑀬𑁄 𑀏𑀯𑀁 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀅𑀧𑁆𑀧𑀫𑀸𑀤𑁄, 𑀅𑀧𑁆𑀧𑀫𑀸𑀤𑁄 𑀪𑀺𑀓𑁆𑀔𑀯𑁂 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀤𑀼𑀢𑀺𑀬 𑀧𑀫𑀸𑀤𑀸𑀤𑀺𑀯𑀕𑁆𑀕

𑀧𑀼𑀘𑁆𑀙𑀸 𑁋 𑀤𑀼𑀢𑀺𑀬𑁂 𑀧𑀦𑀸𑀯𑀼𑀲𑁄 𑀧𑀫𑀸𑀤𑀸𑀤𑀺𑀯𑀕𑁆𑀕𑁂 𑀧𑀞𑀫𑀲𑀼𑀢𑁆𑀢𑀸𑀤𑀻𑀦𑀺 𑀪𑀕𑀯𑀢𑀸 𑀓𑀣𑀁 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀼𑀢𑀺𑀬𑁂 𑀪𑀦𑁆𑀢𑁂 𑀧𑀫𑀸𑀤𑀸𑀤𑀺𑀯𑀕𑁆𑀕𑁂 𑀅𑀚𑁆𑀛𑀢𑁆𑀢𑀺𑀓𑀁 𑀪𑀺𑀓𑁆𑀔𑀯𑁂 𑀅𑀗𑁆𑀕𑀦𑁆𑀢𑀺 𑀓𑀭𑀺𑀢𑁆𑀯𑀸 𑀦𑀸𑀜𑁆𑀜𑀁 𑀏𑀓𑀗𑁆𑀕𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀧𑀫𑀸𑀤𑁄. 𑀧𑀫𑀸𑀤𑁄 𑀪𑀺𑀓𑁆𑀔𑀯𑁂 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀅𑀚𑁆𑀛𑀢𑁆𑀢𑀺𑀓𑀁 𑀪𑀺𑀓𑁆𑀔𑀯𑁂 𑀅𑀗𑁆𑀕𑀦𑁆𑀢𑀺 𑀓𑀭𑀺𑀢𑁆𑀯𑀸 𑀦𑀸𑀜𑁆𑀜𑀁 𑀏𑀓𑀗𑁆𑀕𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀅𑀧𑁆𑀧𑀫𑀸𑀤𑁄. 𑀅𑀧𑁆𑀧𑀫𑀸𑀤𑁄 𑀪𑀺𑀓𑁆𑀔𑀯𑁂 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀤𑀲𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀢𑁂𑀢𑁆𑀢𑀺𑀁𑀲𑀫𑀸𑀤𑀻𑀦𑀺𑀘 𑀤𑀲𑀲𑀼𑀢𑁆𑀢𑀸𑀦𑀺 𑀅𑀥𑀫𑁆𑀫𑀯𑀕𑁆𑀕𑁂 𑀘 𑀤𑀲𑀲𑀼𑀢𑁆𑀢𑀸𑀦𑀺 𑀪𑀕𑀯𑀢𑀸 𑀓𑀣𑀁 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑁆𑀣𑁂𑀯 𑀪𑀦𑁆𑀢𑁂 𑀢𑁂𑀢𑁆𑀢𑀺𑀁𑀲𑀫𑀸𑀤𑀻𑀦𑀺 𑀤𑀲𑀲𑀼𑀢𑁆𑀢𑀸𑀦𑀺 𑀘 𑀅𑀥𑀫𑁆𑀫𑀯𑀕𑁆𑀕𑁂 𑀤𑀲𑀲𑀼𑀢𑁆𑀢𑀸𑀦𑀺 𑀘 𑀬𑁂 𑀢𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽 𑀅𑀥𑀫𑁆𑀫𑀁 ‘‘𑀥𑀫𑁆𑀫𑁄’’𑀢𑀺 𑀤𑀻𑀧𑁂𑀦𑁆𑀢𑀺, 𑀢𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽 𑀩𑀳𑀼𑀚𑀦𑀅𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸 𑀩𑀳𑀼𑀚𑀦𑀅𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀩𑀳𑀼𑀜𑁆𑀘 𑀢𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽 𑀅𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺, 𑀢𑁂 𑀘𑀺𑀫𑀁 𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀦𑁆𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀘, 𑀬𑁂 𑀢𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽 𑀅𑀥𑀫𑁆𑀫𑀁 ‘‘𑀅𑀥𑀫𑁆𑀫𑁄’’𑀢𑀺 𑀤𑀻𑀧𑁂𑀦𑁆𑀢𑀺, 𑀢𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸 𑀩𑀳𑀼𑀚𑀦𑀲𑀼𑀔𑀸𑀬 𑀩𑀳𑀼𑀚𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀩𑀳𑀼𑀜𑁆𑀘 𑀢𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺, 𑀢𑁂 𑀘𑀺𑀫𑀁 𑀲𑀤𑁆𑀥𑀫𑁆𑀫𑀁 𑀞𑀧𑁂𑀦𑁆𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀘 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀏𑀓𑀧𑀼𑀕𑁆𑀕𑀮𑀯𑀕𑁆𑀕

𑀧𑀼𑀘𑁆𑀙𑀸 𑁋 𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑁂 𑀆𑀯𑀼𑀲𑁄 𑀪𑀕𑀯𑀢𑀸 𑀓𑀻𑀤𑀺𑀲𑀻 𑀥𑀫𑁆𑀫𑀤𑁂𑀲𑀦𑀸𑀬𑁄 𑀤𑁂𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑁂 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀓𑀧𑀼𑀕𑁆𑀕𑀮𑁄 𑀪𑀺𑀓𑁆𑀔𑀯𑁂 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀬𑀁 𑀔𑁄 𑀪𑀺𑀓𑁆𑀔𑀯𑁂 𑀏𑀓𑀧𑀼𑀕𑁆𑀕𑀮𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀸 𑀪𑀕𑀯𑀢𑀸 𑀥𑀫𑁆𑀫𑀤𑁂𑀲𑀦𑀸𑀬𑁄 𑀤𑁂𑀲𑀺𑀢𑀸.

𑀏𑀢𑀤𑀕𑁆𑀕𑀯𑀕𑁆𑀕

𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜 𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀏𑀢𑀤𑀯𑀕𑁆𑀕𑁂 𑀆𑀯𑀼𑀲𑁄 𑀆𑀕𑀢𑁂𑀲𑀼 𑀏𑀓𑀘𑀢𑁆𑀢𑀸𑀮𑀻𑀲𑀸𑀬 𑀣𑁂𑀭𑁂𑀲𑀼 𑀆𑀬𑀲𑁆𑀫𑀸 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀓𑀣𑀁 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀢𑀤𑀕𑁆𑀕𑀯𑀕𑁆𑀕𑁂 𑀪𑀦𑁆𑀢𑁂 𑀆𑀕𑀢𑁂𑀲𑀼 𑀏𑀓𑀘𑀢𑁆𑀢𑀸𑀮𑀻𑀲𑀸𑀬 𑀫𑀳𑀸𑀣𑁂𑀭𑁂𑀲𑀼 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀭𑀢𑁆𑀢𑀜𑁆𑀜𑀽𑀦𑀁 𑀬𑀤𑀺𑀤𑀁 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄’’𑀢𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀅𑀕𑁆𑀕𑀲𑀸𑀯𑀓𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀏𑀓𑀓𑀦𑀺𑀧𑀸𑀢𑁂 𑀏𑀢𑀤𑀕𑁆𑀕𑀯𑀕𑁆𑀕𑁂 𑀆𑀕𑀢𑁂𑀲𑀼 𑀏𑀓𑀘𑀢𑁆𑀢𑀸𑀮𑀻𑀲𑀸𑀬 𑀫𑀳𑀸𑀣𑁂𑀭𑁂𑀲𑀼 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀞𑀫𑁄 𑀅𑀕𑁆𑀕𑀲𑀸𑀯𑀓𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀤𑀼𑀢𑀺𑀬𑁄 𑀅𑀕𑁆𑀕𑀲𑀸𑀯𑀓𑁄 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺. 𑀆𑀬𑀲𑁆𑀫𑀸 𑀧𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀇𑀤𑀁 𑀢𑁂 𑀆𑀲𑀦𑀁 𑀯𑀻𑀭, 𑀧𑀜𑁆𑀜𑀢𑁆𑀢𑀁 𑀢𑀯𑀦𑀼𑀘𑁆𑀙𑀯𑀺𑀁;

𑀫𑀫 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄, 𑀦𑀺𑀲𑀻𑀤 𑀧𑀼𑀧𑁆𑀨𑀫𑀸𑀲𑀦𑁂.

𑀬𑁂 𑀯𑀢 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸, 𑀅𑀬𑀁 𑀢𑁂𑀲𑀁 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑁄.

𑀬𑀁𑀦𑀽𑀦𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀁.

𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸,

𑀢𑁂𑀲𑀁 𑀳𑁂𑀢𑀼𑀁 𑀢𑀣𑀸𑀕𑀢𑁄;

𑀆𑀳 𑀢𑁂𑀲𑀜𑁆𑀘 𑀬𑁄 𑀦𑀺𑀭𑁄𑀥𑁄,

𑀏𑀯𑀁𑀯𑀸𑀤𑀻 𑀫𑀳𑀸𑀲𑀫𑀡𑁄 𑁋

𑀮𑀪𑁂𑀬𑁆𑀬𑀸𑀫 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤𑀁.

𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑁄.

𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄.

𑀫𑀳𑀸𑀓𑀲𑁆𑀲𑀧𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀆𑀬𑀲𑁆𑀫𑀸 𑀧𑀦 𑀆𑀯𑀼𑀲𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀧𑀞𑀫𑀫𑀳𑀸𑀲𑀁𑀕𑀻𑀢𑀺𑀓𑀸𑀮𑁂 𑀧𑀸𑀫𑁄𑀓𑁆𑀔𑀲𑀗𑁆𑀖𑀦𑀸𑀬𑀓𑀪𑀽𑀢𑁄 𑀪𑀕𑀯𑀢𑀸 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀧𑀞𑀫𑀫𑀳𑀸𑀲𑀁𑀕𑀻𑀢𑀺𑀓𑀸𑀮𑁂 𑀲𑀗𑁆𑀖𑀧𑀸𑀫𑁄𑀓𑁆𑀔𑀪𑀽𑀢𑁄 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀲𑁆𑀲𑀧𑁄’’𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀏𑀓𑀓𑀦𑀺𑀧𑀸𑀢𑁂 𑀏𑀢𑀤𑀕𑁆𑀕𑀯𑀕𑁆𑀕𑁂 𑀆𑀕𑀢𑁂𑀲𑀼 𑀏𑀓𑀘𑀢𑁆𑀢𑀸𑀮𑀻𑀲𑀸𑀬 𑀫𑀳𑀸𑀣𑁂𑀭𑁂𑀲𑀼 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀬𑀤𑀺𑀤𑀁 𑀅𑀦𑀼𑀭𑀼𑀤𑁆𑀥𑁄’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀲𑀻𑀯𑀮𑀺𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀆𑀬𑀲𑁆𑀫𑀸 𑀧𑀦 𑀆𑀯𑀼𑀲𑁄 𑀲𑀻𑀯𑀮𑀺𑀢𑁆𑀣𑁂𑀭𑁄 𑀪𑀕𑀯𑀢𑀸 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀲𑀻𑀯𑀮𑀺𑀢𑁆𑀣𑁂𑀭𑁄 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀮𑀸𑀪𑀻𑀦𑀁 𑀬𑀤𑀺𑀤𑀁 𑀲𑀻𑀯𑀮𑀻’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸, 𑀬𑁄 𑀇𑀫𑀲𑁆𑀲 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀢 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑁄 𑀇𑀫𑀲𑁆𑀲 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑁄.

𑀲𑀼𑀲𑀼𑀔𑀁 𑀯𑀢 𑀦𑀺𑀩𑁆𑀩𑀸𑀦𑀁, 𑀬𑀢𑁆𑀣𑀺𑀤𑀁 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀦 𑀲𑀁𑀯𑀺𑀚𑁆𑀚𑀢𑀺 𑁋

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀮𑀸𑀪𑀻𑀦𑀁 𑀬𑀤𑀺𑀤𑀁 𑀲𑀻𑀯𑀮𑀺’’ 𑀳𑀼 𑁋

𑀆𑀦𑀦𑁆𑀤𑀸𑀣𑁂𑀭𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀆𑀬𑀲𑁆𑀫𑀸 𑀧𑀦 𑀆𑀯𑀼𑀲𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀧𑀞𑀫𑀫𑀳𑀸𑀲𑀁𑀕𑀻𑀢𑀺𑀓𑀸𑀮𑁂 𑀥𑀫𑁆𑀫𑀯𑀺𑀲𑁆𑀲𑀚𑁆𑀚𑀓𑀣𑁂𑀭𑀪𑀽𑀢𑁄 𑀓𑀣𑀁 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀧𑀞𑀫𑀫𑀳𑀸𑀲𑀁𑀕𑀻𑀢𑀺𑀓𑀸𑀮𑁂 𑀥𑀫𑁆𑀫𑀯𑀺𑀲𑁆𑀲𑀚𑁆𑀚𑀓𑀪𑀽𑀢𑁄 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄. 𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀢𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄. 𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑀢𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄. 𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀺𑀢𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄. 𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀧𑀜𑁆𑀘𑀲𑀼 𑀏𑀢𑀤𑀕𑁆𑀕𑀝𑁆𑀞𑀸𑀦𑁂𑀲𑀼 𑀞𑀧𑀺𑀢𑁄.

𑀲𑀢𑀲𑀳𑀲𑁆𑀲𑁂𑀦 𑀫𑁂 𑀓𑀻𑀢𑀁,

𑀲𑀢𑀲𑀳𑀲𑁆𑀲𑁂𑀦 𑀫𑀸𑀧𑀺𑀢𑀁;

𑀲𑁄𑀪𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁;

𑀧𑀝𑀺𑀕𑁆𑀕𑀡𑁆𑀳 𑀫𑀳𑀸𑀫𑀼𑀦𑀺 𑁋

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁. 𑀲𑀢𑀺𑀫𑀦𑁆𑀢𑀸𑀦𑀁. 𑀕𑀢𑀺𑀫𑀦𑁆𑀢𑀸𑀦𑀁. 𑀥𑀺𑀢𑀺𑀫𑀦𑁆𑀢𑀸𑀦𑀁. 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’ 𑁋

𑀉𑀧𑀸𑀮𑀺𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀏𑀓𑀓𑀦𑀺𑀧𑀸𑀢𑁂 𑀏𑀢𑀤𑀕𑁆𑀕𑀯𑀕𑁆𑀕𑁂 𑀆𑀕𑀢𑁂𑀲𑀼 𑀏𑀓𑀘𑀢𑁆𑀢𑀸𑀮𑀻𑀲𑀸𑀬 𑀫𑀳𑀸𑀣𑁂𑀭𑁂𑀲𑀼 𑀆𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀧𑀞𑀫𑀫𑀳𑀸𑀲𑀁𑀕𑀻𑀢𑀺𑀓𑀸𑀮𑁂 𑀯𑀺𑀦𑀬𑀯𑀺𑀲𑁆𑀲𑀚𑁆𑀚𑀓𑀪𑀽𑀢𑁄 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀉𑀧𑀸𑀮𑀺𑀢𑁆𑀣𑁂𑀭𑁄 𑀧𑀞𑀫𑀫𑀳𑀸𑀲𑀁𑀕𑀻𑀢𑀺𑀓𑀸𑀮𑁂 𑀯𑀺𑀦𑀬𑀯𑀺𑀲𑁆𑀲𑀚𑁆𑀚𑀓𑀪𑀽𑀢𑁄 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀉𑀧𑀸𑀮𑀻’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀯𑀺𑀦𑀬𑁄 𑀯𑀸𑀲𑀬𑁄 𑀫𑀬𑁆𑀳𑀁,

𑀯𑀺𑀦𑀬𑁄 𑀞𑀸𑀦𑀘𑀗𑁆𑀓𑀫𑀁;

𑀓𑀧𑁆𑀧𑁂𑀫𑀺 𑀯𑀺𑀦𑀬𑁂 𑀯𑀸𑀲𑀁,

𑀯𑀺𑀦𑀬𑁄 𑀫𑀫 𑀕𑁄𑀘𑀭𑁄.

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀣𑁂𑀭𑀻𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀏𑀢𑀤𑀕𑁆𑀕𑀯𑀕𑁆𑀕𑁂 𑀆𑀯𑀼𑀲𑁄 𑀆𑀕𑀢𑀸𑀲𑀼 𑀢𑁂𑀭𑀲𑀲𑀼 𑀣𑁂𑀭𑀻𑀲𑀼 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻𑀣𑁂𑀭𑀻 𑀓𑀣𑀁 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀢𑀤𑀕𑁆𑀕𑀯𑀕𑁆𑀕𑁂 𑀪𑀦𑁆𑀢𑁂 𑀆𑀕𑀢𑀸𑀲𑀼 𑀢𑁂𑀭𑀲𑀲𑀼 𑀣𑁂𑀭𑀻𑀲𑀼 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀣𑁂𑀭𑀻 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀭𑀢𑁆𑀢𑀜𑁆𑀜𑀽𑀦𑀁 𑀬𑀤𑀺𑀤𑀁 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀭𑀢𑁆𑀢𑀜𑁆𑀜𑀽𑀦𑀁 𑀬𑀤𑀺𑀤𑀁 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻’’ 𑁋

𑀧𑀼𑀘𑁆𑀙𑀸 𑁋 𑀔𑁂𑀫𑀸𑀣𑁂𑀭𑀻 𑀧𑀦 𑀆𑀯𑀼𑀲𑁄 𑀅𑀕𑁆𑀕𑀲𑀸𑀯𑀺𑀓𑀸 𑀪𑀕𑀯𑀢𑀸 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀔𑁂𑀫𑀸𑀣𑁂𑀭𑀻 𑀪𑀦𑁆𑀢𑁂 𑀧𑀞𑀫𑀸 𑀅𑀕𑁆𑀕𑀲𑀸𑀯𑀺𑀓𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀔𑁂𑀫𑀸’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

‘‘𑀬𑁂 𑀭𑀸𑀕𑀭𑀢𑁆𑀢𑀸𑀦𑀼𑀧𑀢𑀦𑁆𑀢𑀺 𑀲𑁄𑀢𑀁,

𑀲𑀬𑀁𑀓𑀢𑀁 𑀫𑀓𑁆𑀓𑀝𑁄𑀯 𑀚𑀸𑀮𑀁,

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸;

𑀅𑀦𑀧𑁂𑀓𑁆𑀔𑀺𑀦𑁄 𑀲𑀩𑁆𑀩𑀤𑀼𑀓𑁆𑀔𑀁 𑀧𑀳𑀸𑀬’’ 𑁋

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀔𑁂𑀫𑀸’’ 𑁋

𑀧𑀼𑀘𑁆𑀙𑀸 𑁋 𑀉𑀧𑁆𑀧𑀮𑀯𑀡𑁆𑀡𑀸 𑀧𑀦 𑀆𑀯𑀼𑀲𑁄 𑀣𑁂𑀭𑀻 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀺𑀓𑀸 𑀪𑀕𑀯𑀢𑀸 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀉𑀧𑁆𑀧𑀮𑀯𑀡𑁆𑀡𑀸 𑀪𑀦𑁆𑀢𑁂 𑀣𑁂𑀭𑀻 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀺𑀓𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀇𑀤𑁆𑀥𑀺𑀫𑀦𑁆𑀢𑀻𑀦𑀁 𑀬𑀤𑀺𑀤𑀁 𑀉𑀧𑁆𑀧𑀮𑀯𑀡𑁆𑀡𑀸’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀇𑀤𑁆𑀥𑀺𑀫𑀦𑁆𑀢𑀻𑀦𑀁 𑀬𑀤𑀺𑀤𑀁 𑀉𑀧𑁆𑀧𑀮𑀯𑀡𑁆𑀡𑀸’’ 𑁋

𑀧𑀝𑀸𑀘𑀸𑀭𑀸𑀣𑁂𑀭𑀻𑀪𑀺𑀓𑁆𑀔𑀼𑀦𑀻𑀫𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀏𑀓𑀓𑀦𑀺𑀧𑀸𑀢𑁂 𑀏𑀢𑀤𑀕𑁆𑀕𑀯𑀕𑁆𑀕𑁂 𑀆𑀕𑀢𑀸𑀲𑀼 𑀢𑁂𑀭𑀲𑀲𑀼 𑀣𑁂𑀭𑀻𑀲𑀼 𑀧𑀝𑀸𑀘𑀸𑀭𑀸𑀦𑀸𑀫 𑀣𑁂𑀭𑀻 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀢𑀤𑀕𑁆𑀕𑀯𑀕𑁆𑀕𑁂 𑀪𑀦𑁆𑀢𑁂 𑀆𑀕𑀢𑀸𑀲𑀼 𑀢𑁂𑀭𑀲𑀲𑀼 𑀣𑁂𑀭𑀺𑀓𑀸𑀲𑀼 𑀧𑀝𑀸𑀘𑀸𑀭𑀸 𑀣𑁂𑀭𑀻 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀧𑀝𑀸𑀘𑀸𑀭𑀸’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

‘‘𑀉𑀪𑁄 𑀧𑀼𑀢𑁆𑀢𑀸 𑀓𑀸𑀮𑀗𑁆𑀓𑀢𑀸,

𑀧𑀦𑁆𑀣𑁂 𑀫𑀬𑁆𑀳𑀁 𑀧𑀢𑀻 𑀫𑀢𑁄;

𑀫𑀸𑀢𑀸𑀧𑀺𑀢𑀸 𑀘 𑀪𑀸𑀢𑀸 𑀘,

𑀏𑀓𑀘𑀺𑀢𑀓𑀲𑁆𑀫𑀺𑀁 𑀟𑀬𑁆𑀳𑀭𑁂’’ 𑁋

‘‘𑀘𑀢𑀽𑀲𑀼 𑀲𑀫𑀼𑀤𑁆𑀤𑁂𑀲𑀼 𑀚𑀮𑀁 𑀧𑀭𑀺𑀢𑁆𑀢𑀓𑀁,

𑀢𑀢𑁄 𑀩𑀳𑀼𑀁 𑀅𑀲𑁆𑀲𑀼𑀚𑀮𑀁 𑀅𑀦𑀧𑁆𑀧𑀓𑀁;

𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀲𑁄𑀘𑀦𑀸,

𑀓𑀺𑀁 𑀓𑀸𑀭𑀡𑀸 𑀅𑀫𑁆𑀫 𑀢𑀼𑀯𑀁 𑀧𑀫𑀚𑁆𑀚𑀲𑀺’’ 𑁋

‘‘𑀦 𑀲𑀦𑁆𑀢𑀺 𑀧𑀼𑀢𑁆𑀢𑀸 𑀢𑀸𑀡𑀸𑀬,

𑀦 𑀧𑀺𑀢𑀸 𑀦𑀸𑀧𑀺 𑀩𑀦𑁆𑀥𑀯𑀸;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲,

𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸;

𑀏𑀢𑀫𑀢𑁆𑀣𑀯𑀲𑀁 𑀜𑀢𑁆𑀯𑀸, 𑀧𑀡𑁆𑀟𑀺𑀢𑁄 𑀲𑀻𑀮𑀲𑀁𑀯𑀼𑀢𑁄;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀔𑀺𑀧𑁆𑀧𑀫𑁂𑀯 𑀯𑀺𑀲𑁄𑀥𑀬𑁂’’ 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂,

𑀅𑀧𑀲𑁆𑀲𑀁 𑀉𑀤𑀬𑀩𑁆𑀩𑀬𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄,

𑀧𑀲𑁆𑀲𑀢𑁄 𑀉𑀤𑀬𑀩𑁆𑀩𑀬𑀁’’ 𑁋

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀧𑀝𑀸𑀘𑀸𑀭𑀸’’ 𑁋

𑀥𑀫𑁆𑀫𑀤𑀺𑀦𑁆𑀦𑀸𑀣𑁂𑀭𑀻𑀪𑀺𑀓𑁆𑀔𑀼𑀦𑀻𑀫𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀥𑀫𑁆𑀫𑀤𑀺𑀦𑁆𑀦𑀸 𑀧𑀦 𑀆𑀯𑀼𑀲𑁄 𑀣𑁂𑀭𑀻 𑀪𑀕𑀯𑀢𑀸 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀥𑀫𑁆𑀫𑀤𑀺𑀦𑁆𑀦𑀸 𑀪𑀦𑁆𑀢𑁂 𑀣𑁂𑀭𑀻 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀬𑀤𑀺𑀤𑀁 𑀥𑀫𑁆𑀫𑀤𑀺𑀦𑁆𑀦𑀸’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

‘‘𑀬𑀲𑁆𑀲 𑀧𑀼𑀭𑁂 𑀘 𑀧𑀘𑁆𑀙𑀸 𑀘,

𑀫𑀚𑁆𑀛𑁂𑀘 𑀦𑀢𑁆𑀣𑀺 𑀓𑀺𑀜𑁆𑀘𑀦𑀁;

𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁,

𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁’’ 𑁋

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀬𑀤𑀺𑀤𑀁 𑀥𑀫𑁆𑀫𑀤𑀺𑀦𑁆𑀦𑀸’’ 𑁋

𑀬𑀲𑁄𑀥𑀭𑀸𑀣𑁂𑀭𑀻𑀪𑀺𑀓𑁆𑀔𑀼𑀦𑀻𑀫𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀪𑀤𑁆𑀤𑀓𑀘𑁆𑀘𑀸𑀦𑀸𑀦𑀸𑀫 𑀆𑀯𑀼𑀲𑁄 𑀬𑀲𑁄𑀥𑀭𑀸𑀣𑁂𑀭𑀻 𑀪𑀕𑀯𑀢𑀸 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀤𑁆𑀤𑀓𑀘𑁆𑀘𑀸𑀦𑀸 𑀪𑀦𑁆𑀢𑁂 𑀬𑀲𑁄𑀥𑀭𑀸𑀣𑁂𑀭𑀻 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀫𑀳𑀸𑀪𑀺𑀜𑁆𑀜𑀧𑀢𑁆𑀢𑀸𑀦𑀁 𑀬𑀤𑀺𑀤𑀁 𑀪𑀤𑁆𑀤𑀓𑀘𑁆𑀘𑀸𑀦𑀸’’𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀫𑀳𑀸𑀪𑀺𑀜𑁆𑀜𑀧𑀢𑁆𑀢𑀸𑀦𑀁 𑀬𑀤𑀺𑀤𑀁 𑀪𑀤𑁆𑀤𑀓𑀘𑁆𑀘𑀸𑀦𑀸’’ 𑁋

𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀆𑀯𑀼𑀲𑁄 𑀏𑀢𑀤𑀕𑁆𑀕𑀯𑀕𑁆𑀕𑁂 𑀆𑀕𑀢𑁂𑀲𑀼 𑀏𑀓𑀸𑀤𑀲𑀲𑀼 𑀉𑀧𑀸𑀲𑀓𑁂𑀲𑀼 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸𑀦𑀸𑀫 𑀯𑀸𑀡𑀺𑀚𑀸 𑀪𑀕𑀯𑀢𑀸 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀪𑀦𑁆𑀢𑁂 𑀯𑀸𑀡𑀺𑀚𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀧𑀞𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑀸𑀦𑀁 𑀬𑀤𑀺𑀤𑀁 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀯𑀸𑀡𑀺𑀚𑀸’’𑀢𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

‘‘𑀏𑀢𑁂 𑀪𑀦𑁆𑀢𑁂 𑀫𑀬𑀁 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘, 𑀉𑀧𑀸𑀲𑀓𑁂 𑀦𑁄 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’ 𑀳𑀼 𑁋

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀧𑀞𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑀸𑀦𑀁 𑀬𑀤𑀺𑀤𑀁 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀯𑀸𑀡𑀺𑀚𑀸’’ 𑁋

𑀅𑀦𑀸𑀣𑀧𑀺𑀡𑁆𑀟𑀓𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸 𑀅𑀭𑀳𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀏𑀓𑀓𑀦𑀺𑀧𑀸𑀢𑁂 𑀏𑀢𑀤𑀕𑁆𑀕𑀯𑀕𑁆𑀕𑁂 𑀆𑀕𑀢𑁂𑀲𑀼 𑀏𑀓𑀸𑀤𑀲𑀲𑀼 𑀉𑀧𑀸𑀲𑀓𑁂𑀲𑀼 𑀲𑀼𑀤𑀢𑁆𑀢𑁄 𑀕𑀳𑀧𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀢𑀤𑀕𑁆𑀕𑀯𑀕𑁆𑀕𑁂 𑀪𑀦𑁆𑀢𑁂 𑀆𑀕𑀢𑁂𑀲𑀼 𑀏𑀓𑀸𑀤𑀲𑀲𑀼 𑀉𑀧𑀸𑀲𑀓𑁂𑀲𑀼 𑀲𑀼𑀤𑀢𑁆𑀢𑁄 𑀕𑀳𑀧𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀤𑀸𑀬𑀓𑀸𑀦𑀁 𑀬𑀤𑀺𑀤𑀁 𑀲𑀼𑀤𑀢𑁆𑀢𑁄 𑀕𑀳𑀧𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄’’𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀤𑀸𑀬𑀓𑀸𑀦𑀁 𑀬𑀤𑀺𑀤𑀁 𑀲𑀼𑀤𑀢𑁆𑀢𑁄 𑀕𑀳𑀧𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑁋

𑀲𑀽𑀭𑀫𑁆𑀩𑀝𑁆𑀞𑀉𑀧𑀸𑀲𑀓𑀸𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀲𑀽𑀭𑀫𑁆𑀩𑀝𑁆𑀞𑁄 𑀦𑀸𑀫 𑀆𑀯𑀼𑀲𑁄 𑀉𑀧𑀸𑀲𑀓𑁄 𑀪𑀕𑀯𑀢𑀸 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀽𑀭𑀫𑁆𑀩𑀝𑁆𑀞𑁄 𑀉𑀧𑀸𑀲𑀓𑁄 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸𑀦𑀁 𑀬𑀤𑀺𑀤𑀁 𑀲𑀽𑀭𑀫𑁆𑀩𑀝𑁆𑀞𑁄’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄.

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸𑀦𑀁 𑀬𑀤𑀺𑀤𑀁 𑀲𑀽𑀭𑀫𑁆𑀩𑀝𑁆𑀞𑁄’’ 𑀳𑀼 𑁋

𑀲𑀼𑀚𑀸𑀢𑀸 𑀉𑀧𑀸𑀲𑀺𑀓𑀸𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀏𑀢𑀤𑀕𑁆𑀕𑀯𑀕𑁆𑀕𑁂 𑀆𑀯𑀼𑀲𑁄 𑀆𑀕𑀢𑀸𑀲𑀼 𑀤𑀲𑀲𑀼 𑀉𑀧𑀸𑀲𑀺𑀓𑀸𑀲𑀼 𑀲𑀼𑀚𑀸𑀢𑀸𑀦𑀸𑀫 𑀉𑀧𑀸𑀲𑀺𑀓𑀸 𑀲𑁂𑀦𑀺𑀬𑀥𑀻𑀢𑀸 𑀓𑀣𑀁 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀼𑀚𑀸𑀢𑀸 𑀪𑀦𑁆𑀢𑁂 𑀲𑁂𑀦𑀺𑀬𑀥𑀻𑀢𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀧𑀞𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑀻𑀦𑀁 𑀬𑀤𑀺𑀤𑀁 𑀲𑀼𑀚𑀸𑀢𑀸 𑀲𑁂𑀦𑀺𑀬𑀥𑀻𑀢𑀸’’𑀢𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

‘‘𑀏𑀢𑀸 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘, 𑀉𑀧𑀸𑀲𑀺𑀓𑀸𑀬𑁄 𑀦𑁄 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀸 𑀲𑀭𑀡𑀁 𑀕𑀢𑀸’’ 𑀳𑀼 𑁋

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀧𑀞𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑀻𑀦𑀁 𑀬𑀤𑀺𑀤𑀁 𑀲𑀼𑀚𑀸𑀢𑀸 𑀲𑁂𑀦𑀺𑀬𑀥𑀻𑀢𑀸’’ 𑁋

𑀯𑀺𑀲𑀸𑀔𑀸 𑀉𑀧𑀸𑀲𑀺𑀓𑀸𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀯𑀺𑀲𑀸𑀔𑀸 𑀧𑀦 𑀆𑀯𑀼𑀲𑁄 𑀉𑀧𑀸𑀲𑀺𑀓𑀸 𑀓𑀣𑀁 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑀺𑀲𑀸𑀔𑀸 𑀪𑀦𑁆𑀢𑁂 𑀉𑀧𑀸𑀲𑀺𑀓𑀸 𑀫𑀺𑀕𑀸𑀭𑀫𑀸𑀢𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀤𑀸𑀬𑀺𑀓𑀸𑀦𑀁 𑀬𑀤𑀺𑀤𑀁 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀤𑀸𑀬𑀺𑀓𑀸𑀦𑀁 𑀬𑀤𑀺𑀤𑀁 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸’’ 𑀳𑀼 𑁋

𑀔𑀼𑀚𑁆𑀚𑀼𑀢𑁆𑀢𑀭𑀸 𑀉𑀧𑀸𑀲𑀺𑀓𑀸𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀏𑀓𑀓𑀦𑀺𑀧𑀸𑀢𑁂 𑀏𑀢𑀤𑀕𑁆𑀕𑀯𑀕𑁆𑀕𑁂 𑀆𑀕𑀢𑀸𑀲𑀼 𑀤𑀲𑀲𑀼 𑀉𑀧𑀸𑀲𑀺𑀓𑀸𑀲𑀼 𑀔𑀼𑀚𑁆𑀚𑀼𑀢𑁆𑀢𑀭𑀸𑀦𑀸𑀫 𑀉𑀧𑀸𑀲𑀺𑀓𑀸 𑀓𑀣𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀢𑀤𑀕𑁆𑀕𑀯𑀕𑁆𑀕𑁂 𑀪𑀦𑁆𑀢𑁂 𑀆𑀕𑀢𑀸𑀲𑀼 𑀤𑀲𑀲𑀼 𑀉𑀧𑀸𑀲𑀺𑀓𑀸𑀲𑀼 𑀔𑀼𑀚𑁆𑀚𑀼𑀢𑁆𑀢𑀭𑀸 𑀉𑀧𑀸𑀲𑀺𑀓𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀔𑀼𑀚𑁆𑀚𑀼𑀢𑁆𑀢𑀭𑀸’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀔𑀼𑀚𑁆𑀚𑀼𑀢𑁆𑀢𑀭𑀸’’ 𑀳𑀼 𑁋

𑀓𑀸𑀴𑀻𑀉𑀧𑀸𑀲𑀺𑀓𑀸𑀯𑀢𑁆𑀣𑀼

𑀧𑀼𑀘𑁆𑀙𑀸 𑁋 𑀓𑀸𑀴𑀻𑀦𑀸𑀫 𑀆𑀯𑀼𑀲𑁄 𑀉𑀧𑀸𑀲𑀺𑀓𑀸 𑀓𑀼𑀭𑀭𑀖𑀭𑀺𑀓𑀸 𑀓𑀣𑀁 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀸𑀴𑀻 𑀪𑀦𑁆𑀢𑁂 𑀉𑀧𑀸𑀲𑀺𑀓𑀸 𑀓𑀼𑀭𑀭𑀖𑀭𑀺𑀓𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀺𑀓𑀸𑀦𑀁 𑀅𑀦𑀼𑀲𑁆𑀲𑀯𑀧𑁆𑀧𑀲𑀦𑁆𑀦𑀸𑀦𑀁 𑀬𑀤𑀺𑀤𑀁 𑀓𑀸𑀴𑀻 𑀉𑀧𑀸𑀲𑀺𑀓𑀸 𑀓𑀼𑀭𑀭𑀖𑀭𑀺𑀓𑀸’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸.