𑁧. 𑀭𑀽𑀧𑀸𑀤𑀺𑀯𑀕𑁆𑀕

𑀧𑀼𑀘𑁆𑀙𑀸 𑁋 𑀏𑀓𑀓𑀦𑀺𑀧𑀸𑀢𑁂𑀧𑀺 𑀆𑀯𑀼𑀲𑁄 𑀭𑀽𑀧𑀸𑀤𑀺𑀯𑀕𑁆𑀕𑁄 𑀦𑀻𑀯𑀭𑀡𑀧𑁆𑀧𑀳𑀸𑀦𑀯𑀕𑁆𑀕𑁄 𑀅𑀓𑀫𑁆𑀫𑀦𑀺𑀬𑀯𑀕𑁆𑀕𑁄𑀢𑀺𑀆𑀤𑀺𑀦𑀸 𑀯𑀕𑁆𑀕𑀪𑁂𑀤𑀯𑀲𑁂𑀦 𑀩𑀳𑀼𑀯𑀺𑀥𑀸. 𑀢𑀢𑁆𑀣 𑀓𑀢𑀭𑀁 𑀯𑀕𑁆𑀕𑀁 𑀧𑀞𑀫𑀁 𑀲𑀁𑀕𑀸𑀬𑀺𑀁𑀲𑀼.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀓𑀦𑀺𑀧𑀸𑀢𑁂 𑀪𑀦𑁆𑀢𑁂 𑀭𑀽𑀧𑀸𑀤𑀺𑀯𑀕𑁆𑀕𑁄 𑀦𑀻𑀯𑀭𑀡𑀧𑁆𑀧𑀳𑀸𑀦𑀯𑀕𑁆𑀕𑁄𑀢𑀺𑀆𑀤𑀺𑀦𑀸 𑀯𑀻𑀲𑀢𑀺𑀬𑀸 𑀯𑀕𑁆𑀕𑁂𑀲𑀼 𑀭𑀽𑀧𑀸𑀤𑀺𑀯𑀕𑁆𑀕𑀁 𑀧𑀞𑀫𑀁 𑀲𑀁𑀕𑀸𑀬𑀺𑀁𑀲𑀼.

𑀧𑀼𑀘𑁆𑀙𑀸 𑁋 𑀲𑀸𑀥𑀼 𑀲𑀸𑀥𑀼 𑀆𑀯𑀼𑀲𑁄, 𑀫𑀬𑀫𑁆𑀧𑀺 𑀤𑀸𑀦𑀺 𑀆𑀯𑀼𑀲𑁄 𑀢𑀢𑁄𑀬𑁂𑀯 𑀧𑀝𑁆𑀞𑀸𑀬 𑀲𑀁𑀕𑀸𑀳𑀦𑀢𑁆𑀣𑀸𑀬 𑀲𑀁𑀕𑀻𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀦𑀺 𑀥𑀫𑁆𑀫𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀓𑀺𑀘𑁆𑀘𑀸𑀦𑀺 𑀆𑀯𑀳𑀺𑀢𑀼𑀁 𑀲𑀫𑀸𑀭𑀪𑀸𑀫. 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀏𑀓𑀓𑀦𑀺𑀧𑀸𑀢𑁂 𑀭𑀽𑀧𑀸𑀤𑀺𑀯𑀕𑁆𑀕𑁂 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘 𑀲𑀼𑀢𑁆𑀢𑀸𑀦𑀺 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀭𑀽𑀧𑀸𑀤𑀺𑀕𑀭𑀼𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 ‘‘𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀭𑀽𑀧𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀇𑀢𑁆𑀣𑀺𑀭𑀽𑀧𑀁, 𑀇𑀢𑁆𑀣𑀺𑀭𑀽𑀧𑀁 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀭𑀽𑀧𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀇𑀢𑁆𑀣𑀺𑀭𑀽𑀧𑀁, 𑀇𑀢𑁆𑀣𑀺𑀭𑀽𑀧𑀁 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀧𑀘𑁆𑀙𑀺𑀫𑀸𑀦𑀺 𑀧𑀜𑁆𑀘 𑀲𑀼𑀢𑁆𑀢𑀸𑀦𑀺 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀲𑁆𑀫𑀺𑀁𑀬𑁂𑀯 𑀪𑀦𑁆𑀢𑁂 𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀭𑀽𑀧𑀸𑀤𑀺𑀕𑀭𑀼𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀢𑁆𑀣𑀻𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 ‘‘𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀭𑀽𑀧𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀇𑀢𑁆𑀣𑀺𑀬𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑀭𑀽𑀧𑀁, 𑀧𑀼𑀭𑀺𑀲𑀭𑀽𑀧𑀁 𑀪𑀺𑀓𑁆𑀔𑀯𑁂 𑀇𑀢𑁆𑀣𑀺𑀬𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀭𑀽𑀧𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀇𑀢𑁆𑀣𑀺𑀬𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑀭𑀽𑀧𑀁, 𑀧𑀼𑀭𑀺𑀲𑀭𑀽𑀧𑀁 𑀪𑀺𑀓𑁆𑀔𑀯𑁂 𑀇𑀢𑁆𑀣𑀺𑀬𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

𑀦𑀻𑀢𑀢𑁆𑀣𑀯𑀲𑁂𑀦, 𑀦𑁂𑀬𑁆𑀬𑀢𑁆𑀣𑀯𑀲𑁂𑀦

𑀧𑀼𑀘𑁆𑀙𑀸 𑁋 𑀇𑀫𑀲𑁆𑀫𑀺𑀁 𑀆𑀯𑀼𑀲𑁄 𑀭𑀽𑀧𑀸𑀤𑀺𑀯𑀕𑁆𑀕𑁂 𑀪𑀕𑀯𑀢𑀸 𑀦𑀻𑀢𑀢𑁆𑀣𑀯𑀲𑁂𑀦 𑀓𑀺𑀁 𑀓𑀣𑀺𑀢𑀁, 𑀦𑁂𑀬𑁆𑀬𑀢𑁆𑀣𑀯𑀲𑁂𑀦 𑀧𑀦 𑀓𑀺𑀁 𑀜𑀸𑀧𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀲𑁆𑀫𑀺𑀁 𑀪𑀦𑁆𑀢𑁂 𑀭𑀽𑀧𑀸𑀤𑀺𑀯𑀕𑁆𑀕𑁂 𑀪𑀕𑀯𑀢𑀸 𑀦𑀻𑀢𑀢𑁆𑀣𑀯𑀲𑁂𑀦 𑀯𑀝𑁆𑀝𑀁 𑀓𑀣𑀺𑀢𑀁. 𑀦𑁂𑀬𑁆𑀬𑀢𑁆𑀣𑀯𑀲𑁂𑀦 𑀧𑀦 𑀯𑀺𑀯𑀝𑁆𑀝𑀫𑁆𑀧𑀺 𑀜𑀸𑀧𑀺𑀢𑀁.