𑁬𑁧. 𑀢𑀼𑀁 𑀢𑀸𑀬𑁂 𑀢𑀯𑁂 𑀪𑀸𑀯𑁂 𑀪𑀯𑀺𑀲𑁆𑀲𑀢𑀺 𑀓𑁆𑀭𑀺𑀬𑀸𑀬𑀁 𑀢𑀤𑀢𑁆𑀣𑀸𑀬𑀁

𑀪𑀯𑀺𑀲𑁆𑀲𑀢𑀺𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑀢𑁄 𑀓𑁆𑀭𑀺𑀬𑀢𑁆𑀣𑀸 𑀪𑀸𑀯𑁂 𑀢𑀼𑀫𑀸𑀤𑀬𑁄 𑀳𑁄𑀦𑁆𑀢𑀺 𑀓𑁆𑀭𑀺𑀬𑀸𑀬𑀁 𑀢𑀤𑀢𑁆𑀣𑀸𑀬𑀁 𑀧𑀢𑀻𑀬𑀫𑀸𑀦𑀸𑀬𑀁. 𑀓𑀭𑀡𑀸𑀬 𑀕𑀘𑁆𑀙𑀢𑀺 𑀓𑀸𑀢𑀼𑀁 𑀕𑀘𑁆𑀙𑀢𑀺. ‘‘𑀢𑀼𑀁𑀢𑀼𑀦𑀢𑀩𑁆𑀩𑁂𑀲𑀼 𑀯𑀸’’𑀢𑀺 𑀓𑀭𑀲𑁆𑀲 𑀯𑀸 𑀆 𑀳𑁄𑀢𑀺, 𑀧𑀼𑀩𑁆𑀩𑀭𑀽𑀧𑁂 𑀓𑀢𑁆𑀢𑀸𑀬𑁂. ‘‘𑀓𑀭𑀲𑁆𑀲𑀸 𑀢𑀯𑁂’’𑀢𑀺 𑀦𑀺𑀘𑁆𑀘𑀁 𑀆, 𑀓𑀸𑀢𑀯𑁂. 𑀦𑀺𑀧𑀸𑀢𑀢𑁆𑀢𑀸 ‘‘𑀅𑀲𑀗𑁆𑀔𑁆𑀬𑁂𑀳𑀺 𑀲𑀩𑁆𑀩𑀸𑀲𑀁’’𑀢𑀺 𑀘𑀢𑀼𑀢𑁆𑀣𑀻𑀲𑀲𑁆𑀲 𑀮𑁄𑀧𑁄. 𑀏𑀯+𑀫𑀼𑀧𑀭𑀺 𑀢𑀼𑀦𑀸𑀤𑀻𑀲𑀼. 𑀓𑀢𑁆𑀢𑀼𑀁 𑀓𑀸𑀫𑁂𑀢𑀻𑀢𑀺 𑀓𑀢𑁆𑀢𑀼𑀓𑀸𑀫𑁄, 𑀅𑀪𑀺𑀲𑀗𑁆𑀔𑀭𑀺𑀢𑀼+𑀫𑀸𑀓𑀗𑁆𑀔𑀢𑀺. 𑀲𑀤𑁆𑀥𑀫𑁆𑀫𑀁 𑀲𑀼𑀡𑀺𑀢𑀼𑀁, 𑀜𑀺𑀫𑁆𑀳𑀺 𑀦𑀸𑀕𑀫𑁂 𑀢𑀲𑁆𑀲 𑀡𑁄, 𑀦𑀸𑀕𑀫𑀢𑁆𑀢𑀸 𑀦 𑀯𑀼𑀤𑁆𑀥𑀺. 𑀲𑁄𑀢𑀯𑁂 𑀲𑁄𑀢𑀼𑀁 𑀲𑀼𑀡𑀺𑀢𑀼𑀁 𑀯𑀸 𑀧𑀢𑁆𑀣𑁂𑀳𑀺. 𑀏𑀯𑀁 𑀅𑀦𑀼𑀪𑀯𑀺𑀢𑀼𑀁, 𑀧𑀘𑀺𑀢𑀼𑀁. 𑀕𑀦𑁆𑀢𑀼𑀁, ‘‘𑀫𑀦𑀸𑀦𑀁 𑀦𑀺𑀕𑁆𑀕𑀳𑀻𑀢𑀁’’𑀢𑀺 𑀦𑀺𑀕𑁆𑀕𑀳𑀻𑀢𑀁. 𑀕𑀫𑀺𑀢𑀼𑀁, 𑀔𑀦𑁆𑀢𑀼𑀁, 𑀔𑀦𑀺𑀢𑀼𑀁, 𑀳𑀦𑁆𑀢𑀼𑀁, 𑀳𑀦𑀺𑀢𑀼𑀁, 𑀫𑀦𑁆𑀢𑀼𑀁, 𑀫𑀦𑀺𑀢𑀼𑀁, 𑀳𑀭𑀺𑀢𑀼𑀁, 𑀅𑀦𑀼𑀲𑁆𑀲𑀭𑀺𑀢𑀼𑀁 𑀇𑀘𑁆𑀙𑀢𑀺. 𑀢𑀣𑀸 𑀢𑀼𑀤𑀺𑀢𑀼𑀁, 𑀧𑀯𑀺𑀲𑀺𑀢𑀼𑀁, 𑀉𑀤𑁆𑀤𑀺𑀲𑀺𑀢𑀼𑀁, 𑀪𑁄𑀢𑁆𑀢𑀼𑀁, 𑀲𑀬𑀺𑀢𑀼𑀁, 𑀦𑁂𑀢𑀼𑀁, 𑀚𑀼𑀳𑁄𑀢𑀼𑀁, 𑀧𑀚𑀳𑀺𑀢𑀼𑀁, 𑀧𑀳𑀸𑀢𑀼𑀁, 𑀤𑀸𑀢𑀼𑀁, 𑀭𑁄𑀤𑁆𑀥𑀼𑀁, 𑀭𑀼𑀦𑁆𑀥𑀺𑀢𑀼𑀁, 𑀪𑁄𑀢𑁆𑀢𑀼𑀁, 𑀪𑀼𑀜𑁆𑀚𑀻𑀢𑀼𑀁, 𑀙𑁂𑀢𑁆𑀢𑀼𑀁, 𑀙𑀺𑀦𑁆𑀤𑀺𑀢𑀼𑀁, 𑀲𑀺𑀩𑁆𑀩𑀺𑀢𑀼𑀁, 𑀊𑀫𑁆𑀳𑀺 𑀯𑀲𑁆𑀲 𑀩𑁄, 𑀤𑁆𑀯𑀺𑀢𑁆𑀢𑀁, 𑀩𑀼𑀤𑁆𑀥𑀼𑀁, 𑀢𑀲𑁆𑀲 𑀥𑁄. 𑀩𑀼𑀚𑁆𑀛𑀺𑀢𑀼𑀁, 𑀬𑀼𑀓. 𑀚𑀸𑀦𑀺𑀢𑀼𑀁 𑀜𑀸=𑀅𑀯𑀩𑁄𑀥𑀦𑁂. 𑀚𑀦𑀺𑀢𑀼𑀁. 𑀚𑁂𑀢𑀼𑀁 𑀚𑀺𑀦𑀺𑀢𑀼𑀁. 𑀧𑀢𑁆𑀢𑀼𑀁 𑀧𑀸𑀧𑀼𑀡𑀺𑀢𑀼𑀁. 𑀓𑁂𑀢𑀼𑀁 𑀓𑀺𑀡𑀺𑀢𑀼𑀁. 𑀯𑀺𑀦𑀺𑀘𑁆𑀙𑁂𑀢𑀼𑀁, 𑀇𑀲𑁆𑀲 𑀏, 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁. 𑀕𑀳𑁂𑀢𑀼𑀁 𑀕𑀡𑁆𑀳𑀺𑀢𑀼𑀁. 𑀘𑁄𑀭𑀺𑀢𑀼𑀁 𑀘𑁄𑀭𑁂𑀢𑀼𑀁 𑀘𑁄𑀭𑀬𑀺𑀢𑀼𑀁, 𑀧𑀸𑀮𑁂𑀢𑀼𑀁 𑀧𑀸𑀮𑀬𑀺𑀢𑀼𑀁. 𑀧𑀬𑁄𑀚𑀓𑁂-𑀪𑀸𑀯𑁂𑀢𑀼𑀁 𑀪𑀸𑀯𑀬𑀺𑀢𑀼𑀁, 𑀓𑀸𑀭𑁂𑀢𑀼𑀁 𑀓𑀸𑀭𑀬𑀺𑀢𑀼𑀁 𑀓𑀸𑀭𑀸𑀧𑁂𑀢𑀼𑀁 𑀓𑀸𑀭𑀸𑀧𑀬𑀺𑀢𑀼𑀁 𑀇𑀘𑁆𑀙𑀢𑀺+𑀘𑁆𑀘𑀸𑀤𑀺.

𑀏𑀯𑀁 𑀓𑁆𑀭𑀺𑀬𑀢𑁆𑀣𑀓𑁆𑀭𑀺𑀬𑀸𑀬𑀁 𑀕𑀫𑁆𑀬𑀫𑀸𑀦𑀸𑀬𑀁, 𑀬𑀣𑀸 𑀲𑀼𑀩𑁄𑀤𑁆𑀥𑀼𑀁 𑀯𑀓𑁆𑀔𑀸𑀫𑀺, 𑀏𑀯𑀁 𑀤𑀝𑁆𑀞𑀼𑀁 𑀕𑀘𑁆𑀙𑀢𑀺, 𑀕𑀦𑁆𑀢𑀼+𑀫𑀸𑀭𑀪𑀢𑀺, 𑀕𑀦𑁆𑀢𑀼𑀁 𑀧𑀬𑁄𑀚𑁂𑀢𑀺, 𑀤𑀲𑁆𑀲𑁂𑀢𑀼+𑀫𑀸𑀳 𑀇𑀘𑁆𑀘𑀸𑀤𑀺.

𑀅𑀭𑀳𑀲𑀓𑁆𑀓𑀸𑀤𑀻𑀲𑀼𑀧𑀺 𑀲𑀺𑀤𑁆𑀥𑀁, 𑀢𑀣𑀸 𑀓𑀸𑀮 𑀲𑀫𑀬𑀯𑁂𑀮𑀸𑀲𑀼. 𑀓𑁄 𑀢𑀁 𑀦𑀺𑀦𑁆𑀤𑀺𑀢𑀼+𑀫𑀭𑀳𑀢𑀺, 𑀭𑀸𑀚𑀸 𑀪𑀯𑀺𑀢𑀼+𑀫𑀭𑀳𑀢𑀺, 𑀅𑀭𑀳𑁄 𑀪𑀯𑀁 𑀯𑀢𑁆𑀢𑀼𑀁, 𑀲𑀓𑁆𑀓𑀸 𑀚𑁂𑀢𑀼𑀁 𑀥𑀦𑁂𑀦 𑀯𑀸, 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀪𑀲𑁆𑀲 𑀥𑁄. 𑀓𑀢𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀪𑀩𑁆𑀩𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁, 𑀅𑀪𑀩𑁆𑀩𑁄 𑀓𑀸𑀢𑀼𑀁. 𑀅𑀦𑀼𑀘𑁆𑀙𑀯𑀺𑀓𑁄 𑀪𑀯𑀁 𑀤𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀼𑀁, 𑀇𑀤𑀁 𑀓𑀸𑀢𑀼𑀁 𑀅𑀦𑀼𑀭𑀽𑀧𑀁, 𑀤𑀸𑀦𑀁 𑀤𑀸𑀢𑀼𑀁 𑀬𑀼𑀢𑁆𑀢𑀁, 𑀤𑀸𑀢𑀼𑀁 𑀯𑀢𑁆𑀢𑀼𑀜𑁆𑀘 𑀮𑀪𑀢𑀺. 𑀏𑀯𑀁 𑀯𑀝𑁆𑀝𑀢𑀺 𑀪𑀸𑀲𑀺𑀢𑀼𑀁, 𑀙𑀺𑀦𑁆𑀤𑀺𑀢𑀼𑀁 𑀦 𑀘 𑀓𑀧𑁆𑀧𑀢𑀺 𑀇𑀘𑁆𑀘𑀸𑀤𑀺. 𑀢𑀣𑀸𑀓𑀸𑀮𑁄 𑀪𑀼𑀜𑁆𑀚𑀺𑀢𑀼𑀁, 𑀲𑀫𑀬𑁄 𑀪𑀼𑀜𑁆𑀚𑀺𑀢𑀼𑀁, 𑀯𑁂𑀮𑀸 𑀪𑀼𑀜𑁆𑀚𑀺𑀢𑀼𑀁.

𑀅𑀮𑀫𑀢𑁆𑀣𑁂𑀧𑀺 𑀲𑀺𑀤𑁆𑀥𑀁, 𑀅𑀮𑀫𑁂𑀯 𑀤𑀸𑀦𑀸𑀦𑀺 𑀤𑀸𑀢𑀼𑀁, 𑀅𑀮𑀫𑁂𑀯 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁.