𑁬𑁦. 𑀆𑀳𑀸𑀭𑀢𑁆𑀣𑀸

𑀅𑀚𑁆𑀛𑁄𑀳𑀸𑀭𑀢𑁆𑀣𑀸 𑀆𑀥𑀸𑀭𑁂 𑀓𑁆𑀢𑁄 𑀳𑁄𑀢𑀺 𑀬𑀣𑀸𑀧𑀢𑁆𑀢𑀜𑁆𑀘. 𑀪𑀼𑀢𑁆𑀢𑀯𑀦𑁆𑀢𑁄+𑀲𑁆𑀫𑀺𑀦𑁆𑀢𑀺 𑀪𑀼𑀢𑁆𑀢𑀁. 𑀏𑀯𑀁 𑀧𑀻𑀢𑀁, ‘‘𑀕𑀸𑀧𑀸𑀦+𑀫𑀻’’𑀢𑀺 𑀈. 𑀪𑀼𑀜𑁆𑀚𑀦𑀁 𑀪𑀼𑀢𑁆𑀢𑀁 𑀧𑀸𑀦𑀁 𑀧𑀻𑀢𑀁. 𑀪𑀼𑀜𑁆𑀚𑀻𑀬𑀺𑀢𑁆𑀣𑀸𑀢𑀺 𑀪𑀼𑀢𑁆𑀢𑁄 𑀑𑀤𑀦𑁄. 𑀏𑀯𑀁 𑀧𑀻𑀢𑀁 𑀉𑀤𑀓𑀁. 𑀅𑀓𑀢𑁆𑀢𑀢𑁆𑀣𑀁 𑀪𑀺𑀦𑁆𑀦𑀬𑁄𑀕𑀓𑀭𑀡𑀁. 𑀩𑀳𑀼𑀮𑀸𑀥𑀺𑀓𑀸𑀭𑀸 𑀓𑀢𑁆𑀢𑀭𑀺𑀧𑀺 ‘‘𑀅𑀧𑀺𑀯𑀺𑀁𑀲𑀽𑀢𑀺 𑀧𑀻𑀢𑀸 𑀕𑀸𑀯𑁄’’𑀢𑀺 𑀳𑁄𑀢𑁂𑀯. 𑀲𑀺𑀤=𑀧𑀸𑀓𑁂, 𑀧𑀲𑁆𑀲𑀺𑀚𑁆𑀚𑀻𑀢𑀺 𑀧𑀲𑁆𑀲𑀦𑁆𑀦𑁄, ‘‘𑀕𑀫𑀦𑀢𑁆𑀣’’ 𑀤𑀺𑀦𑀸 𑀓𑁆𑀢𑁄, ‘‘𑀪𑀺𑀤𑀸’’ 𑀤𑀺𑀦𑀸 𑀢𑀲𑁆𑀲 𑀦𑁄 𑀧𑀭𑀭𑀽𑀧𑀜𑁆𑀘. 𑀅𑀫𑀜𑁆𑀜𑀺𑀢𑁆𑀣𑀸𑀢𑀺 𑀫𑀢𑁄. 𑀇𑀘𑁆𑀙𑀻𑀬𑀺𑀢𑁆𑀣𑀸𑀢𑀺 𑀇𑀝𑁆𑀞𑁄. 𑀅𑀩𑀼𑀚𑁆𑀛𑀺𑀢𑀸𑀢𑀺 𑀩𑀼𑀤𑁆𑀥𑁄, ‘‘𑀥𑁄 𑀥𑀳𑀪𑁂𑀳𑀻’’𑀢𑀺 𑀢𑀲𑁆𑀲 𑀥𑁄. 𑀧𑀽𑀚𑀻𑀬𑀺𑀢𑁆𑀣𑀸𑀢𑀺 𑀧𑀽𑀚𑀺𑀢𑁄, 𑀘𑀼𑀭𑀸𑀤𑀺𑀢𑁆𑀢𑀸 𑀡𑀺. 𑀏𑀯𑀁 𑀲𑀻𑀮𑀻𑀬𑀺𑀢𑁆𑀣𑀸𑀢𑀺 𑀲𑀻𑀮𑀺𑀢𑁄. 𑀭𑀓𑁆𑀔𑀻𑀬𑀺𑀢𑁆𑀣𑀸𑀢𑀺 𑀭𑀓𑁆𑀔𑀺𑀢𑁄. 𑀔𑀫𑀻𑀬𑀺𑀢𑁆𑀣𑀸𑀢𑀺 𑀔𑀦𑁆𑀢𑁄, 𑀫𑀲𑁆𑀲 𑀦𑀺𑀕𑁆𑀕𑀳𑀻𑀢𑀁. 𑀅𑀓𑁆𑀓𑁄𑀘𑁆𑀙𑀻𑀬𑀺𑀢𑁆𑀣𑀸𑀢𑀺 𑀅𑀓𑁆𑀓𑀼𑀝𑁆𑀞𑁄, 𑀆𑀲𑁆𑀲 𑀭𑀲𑁆𑀲𑁄. 𑀭𑀼𑀲=𑀭𑁄𑀲𑁂, 𑀅𑀭𑁄𑀲𑀻𑀢𑀺 𑀭𑀼𑀝𑁆𑀞𑁄, ‘‘𑀕𑀫𑀦𑀢𑁆𑀣𑀸’’ 𑀤𑀺𑀦𑀸 𑀓𑀢𑁆𑀢𑀭𑀺 𑀓𑁆𑀢𑁄. 𑀜𑀺𑀫𑁆𑀳𑀺 𑀭𑀼𑀲𑀺𑀢𑁄. 𑀳𑀭=𑀳𑀭𑀡𑁂, 𑀅𑀪𑀺+ 𑀯𑀺+𑀆𑀧𑀼𑀩𑁆𑀩𑁄, 𑀅𑀪𑀺𑀩𑁆𑀬𑀸𑀳𑀭𑀻𑀬𑀺𑀢𑁆𑀣𑀸𑀢𑀺 𑀅𑀪𑀺𑀩𑁆𑀬𑀸𑀳𑀝𑁄. 𑀤𑀬=𑀤𑀸𑀦𑀕𑀢𑀺𑀳𑀺𑀁𑀲𑀸𑀤𑀸𑀦𑁂𑀲𑀼, 𑀅𑀤𑀬𑀻𑀬𑀺𑀢𑁆𑀣𑀸𑀢𑀺 𑀤𑀬𑀺𑀢𑁄. 𑀳𑀲=𑀆𑀮𑀺𑀓𑁆𑀬𑁂, 𑀅𑀳𑀲𑀻𑀢𑀺 𑀳𑀝𑁆𑀞𑁄. 𑀓𑀸𑀫𑀻𑀬𑀺𑀢𑁆𑀣𑀸𑀢𑀺 𑀓𑀦𑁆𑀢𑁄, ‘‘𑀡𑀺𑀡𑀸𑀧𑀻𑀦𑀁 𑀢𑁂𑀲𑀽’’𑀢𑀺 𑀏𑀢𑁆𑀣 ‘‘𑀡𑀺𑀡𑀸𑀧𑀻𑀦𑀁’’𑀢𑀺 𑀬𑁄𑀕𑀯𑀺𑀪𑀸𑀕𑀸 𑀘𑀼𑀭𑀸𑀤𑀺𑀡𑀺𑀮𑁄𑀧𑁄. 𑀲𑀁𑀬𑀫𑀻𑀢𑀺 𑀲𑀁𑀬𑀢𑁄. 𑀦𑀜𑀧𑀼𑀩𑁆𑀩𑁄, 𑀦 𑀫𑀭𑀻𑀢𑀺 𑀅𑀫𑀢𑁄, 𑀦𑀜𑀲𑀫𑀸𑀲𑁂 𑀦𑀲𑁆𑀲 𑀝𑁄.

𑀓𑀝𑁆𑀞𑀁 𑀤𑀼𑀓𑁆𑀔𑀁 𑀆𑀧𑀦𑁆𑀦𑁄𑀢𑀺 𑀨𑀮𑀪𑀽𑀢𑁂 𑀤𑀼𑀓𑁆𑀔𑁂 𑀓𑀝𑁆𑀞𑀲𑀤𑁆𑀤𑀲𑁆𑀲 𑀯𑀢𑁆𑀢𑀦𑀢𑁄 𑀨𑀮𑀲𑁆𑀲 𑀪𑀸𑀯𑀺𑀢𑁆𑀢𑀸 𑀪𑀽𑀢𑁂𑀬𑁂𑀯 𑀓𑁆𑀢𑁄. 𑀓𑀲=𑀕𑀢𑀺𑀳𑀺𑀁𑀲𑀸𑀯𑀺𑀮𑁂𑀔𑀦𑁂𑀲𑀼, 𑀅𑀓𑀲𑀺=𑀳𑀺𑀁𑀲𑀻𑀢𑀺 𑀓𑀝𑁆𑀞𑀁.