𑀧𑀬𑁄𑀕𑀲𑀺𑀤𑁆𑀥𑀺 𑀦𑀺𑀕𑀫𑀦𑀁

𑁧. 𑀬𑁂 𑀦𑀦𑁆𑀢𑀢𑀦𑁆𑀢𑀭𑀢𑀦𑀸𑀓𑀭𑀫𑀦𑁆𑀣𑀦𑁂𑀦,

𑀫𑀦𑁆𑀣𑀸𑀘𑀮𑁄𑀮𑁆𑀮𑀲𑀺𑀢𑀜𑀸𑀡𑀯𑀭𑁂𑀦 𑀮𑀤𑁆𑀥𑀸;

𑀲𑀸𑀭𑀸𑀫𑀢𑀸+𑀢𑀺𑀲𑀼𑀔𑀺𑀢𑀸 𑀲𑀼𑀔𑀬𑀦𑁆𑀢𑀺 𑀘+𑀜𑁆𑀜𑁂,

𑀢𑁂 𑀫𑁂 𑀚𑀬𑀦𑁆𑀢𑀺 𑀕𑀼𑀭𑀯𑁄 𑀕𑀼𑀭𑀯𑁄 𑀕𑀼𑀡𑁂𑀳𑀺.

𑁨. 𑀬𑀲𑁆𑀲 𑀲𑀸𑀥𑀼𑀕𑀼𑀡𑀼𑀩𑁆𑀪𑀽𑀢-𑀓𑀺𑀢𑁆𑀢𑀺 𑀲𑀩𑁆𑀩𑀢𑁆𑀢 𑀧𑀢𑁆𑀣𑀝𑀸;

𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀸𑀧𑀜𑁆𑀜𑁄, 𑀚𑀬𑀢𑀻 𑀲𑁄 𑀳 𑀲𑀩𑁆𑀩𑀤𑀸.

𑁩. 𑀧𑀭𑀫𑀧𑁆𑀧𑀺𑀘𑁆𑀙𑀢𑀸+𑀦𑁂𑀓-𑀲𑀦𑁆𑀢𑁄𑀲𑀽𑀧𑀲𑀫𑁂𑀲𑀺𑀦𑀁;

𑀲𑀼𑀘𑀺𑀲𑀮𑁂𑀔𑀯𑀼𑀢𑁆𑀢𑀻𑀦𑀁, 𑀲𑀤𑀸+𑀭𑀜𑁆𑀜𑀦𑀺𑀯𑀸𑀲𑀺𑀦𑀁.

𑁪. 𑀲𑀸𑀲𑀦𑀼𑀚𑁄𑀢𑀓𑀸𑀭𑀻𑀦+𑀫𑀸𑀘𑁂𑀭𑀢𑁆𑀢+𑀫𑀼𑀧𑀸𑀕𑀢𑀁;

𑀉𑀤𑀼𑀫𑁆𑀩𑀭𑀕𑀺𑀭𑀻𑀔𑁆𑀬𑀸𑀢𑀸+𑀬𑀢𑀦𑀁 𑀬𑀢𑀺𑀧𑀼𑀗𑁆𑀕𑀯𑀁.

𑁫. 𑀫𑁂𑀥𑀗𑁆𑀓𑀭𑁄𑀢𑀺 𑀆𑀔𑁆𑀬𑀸𑀢-𑀦𑀸𑀫𑀥𑁂𑀬𑁆𑀬𑀁 𑀢𑀧𑁄𑀥𑀦𑀁;

𑀣𑁂𑀭𑀁 𑀣𑀺𑀭𑀤𑀬𑀸 𑀫𑁂𑀥𑀸-𑀦𑀺𑀥𑀸𑀦𑀁 𑀲𑀸𑀥𑀼 𑀧𑀽𑀚𑀺𑀢𑀁.

𑁬. 𑀲𑀺𑀲𑁆𑀲𑀁 𑀲𑀳𑀸𑀬+𑀫𑀸𑀕𑀫𑁆𑀫, 𑀓𑀮𑁆𑀬𑀸𑀡𑀫𑀺𑀢𑁆𑀢+𑀫𑀢𑁆𑀢𑀦𑁄;

𑀲𑁄𑀥𑁂𑀢𑀼𑀁 𑀲𑀸𑀲𑀦𑀁 𑀲𑀢𑁆𑀣𑀼, 𑀧𑀭𑀓𑁆𑀓𑀫+𑀫𑀓𑀸𑀲𑀺 𑀬𑁄.

𑁭. 𑀲𑀗𑁆𑀖𑀭𑀓𑁆𑀔𑀺𑀢𑀦𑀸𑀫𑁂𑀦, 𑀫𑀳𑀸𑀣𑁂𑀭𑁂𑀦 𑀥𑀻𑀫𑀢𑀸;

𑀦𑀺𑀯𑀸𑀲𑀪𑀽𑀢𑁂𑀦𑀸+𑀦𑁂𑀓-𑀕𑀼𑀡𑀸𑀦+𑀧𑁆𑀧𑀺𑀘𑁆𑀙𑀢𑀸𑀤𑀺𑀦𑀁.

𑁮. 𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡-𑀧𑀬𑁄𑀕𑀓𑁆𑀓𑀫𑀲𑀸𑀥𑀓𑀸;

𑀏𑀢𑁆𑀢𑀸𑀯𑀢𑀸 𑀓𑀢𑀸 𑀏𑀲𑀸, 𑀧𑀬𑁄𑀕𑀲𑀺𑀤𑁆𑀥𑀺 𑀦𑀺𑀝𑁆𑀞𑀺𑀢𑀸.

𑁯. 𑀢𑁂𑀦𑁂𑀯 𑀭𑀘𑀺𑀢𑀸 𑀲𑀸𑀥𑀼, 𑀲𑀸𑀲𑀦𑁄𑀤𑀬𑀓𑀸𑀭𑀺𑀦𑀸;

𑀔𑀼𑀤𑁆𑀤𑀲𑀺𑀓𑁆𑀔𑀸𑀬 𑀝𑀻𑀓𑀸 𑀘, 𑀢𑀣𑀸 𑀲𑀫𑁆𑀩𑀦𑁆𑀥𑀘𑀺𑀦𑁆𑀢𑀦𑀸.

𑁧𑁦. 𑀲𑀼𑀲𑀤𑁆𑀤𑀲𑀺𑀤𑁆𑀥𑀺𑀁 𑀬𑁄 𑀬𑁄𑀕-𑀦𑀺𑀘𑁆𑀙𑀬𑀁 𑀲𑀩𑁆𑀪𑀺 𑀯𑀡𑁆𑀡𑀺𑀢𑀁;

𑀅𑀓𑀸 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀁, 𑀢𑀣𑀸 𑀲𑀫𑁆𑀩𑀦𑁆𑀥𑀘𑀺𑀦𑁆𑀢𑀦𑀁.

𑁧𑁧. 𑀲𑀢𑁆𑀣𑀲𑀜𑁆𑀘𑀺𑀢𑀧𑀼𑀜𑁆𑀜𑁂𑀦, 𑀦𑀺𑀩𑁆𑀩𑀸𑀦𑀲𑀸𑀥𑀓𑀁 𑀳𑀺𑀢𑀁;

𑀲𑀸𑀥𑁂𑀦𑁆𑀢𑁄 𑀮𑁄𑀓𑀦𑀸𑀣𑀲𑁆𑀲, 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑀢𑀁 𑀘𑀺𑀭𑀦𑁆𑀢𑀺.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀣𑁂𑀭𑀧𑀸𑀤𑀯𑀺𑀭𑀘𑀺𑀢𑀸

𑀧𑀬𑁄𑀕𑀲𑀺𑀤𑁆𑀥𑀺 𑀦𑀺𑀝𑁆𑀞𑀺𑀢𑀸.

(𑀯𑀺𑀲𑁂𑀲𑀮𑀓𑁆𑀔𑀡𑀁). 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀦 𑀧𑀬𑁄𑀕𑀲𑀺𑀤𑁆𑀥𑀺𑀦𑀺𑀕𑀫𑀦 𑀕𑀸𑀣𑀸𑀦𑀁 𑀏𑀓𑀸𑀤𑀲𑀦𑁆𑀦𑀁 𑀧𑀼𑀩𑁆𑀩𑁂𑀬𑁂𑀯 𑀯𑀓𑁆𑀔𑀫𑀸𑀦𑀸 𑀇𑀫𑀸 𑀕𑀸𑀣𑀸𑀬𑁄 𑀤𑀺𑀲𑁆𑀲𑀦𑁆𑀢𑀺 𑀧𑁄𑀭𑀸𑀡𑁂 𑀲𑀻𑀳𑀴𑀫𑀽𑀮𑀧𑀬𑁄𑀕𑀲𑀺𑀤𑁆𑀥𑀺𑀧𑀸𑀞𑁂. 𑀢𑀸 𑀘 𑀕𑀸𑀣𑀸𑀬𑁄 𑀧𑀘𑁆𑀙𑀸 𑀲𑀻𑀳𑀴𑀫𑀽𑀮𑀧𑀬𑁄𑀕𑀲𑀺𑀤𑁆𑀥𑀺𑀲𑀁𑀲𑁄𑀥𑀓𑁂𑀦 𑀫𑁂𑀥𑀗𑁆𑀓𑀭𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀧𑀓𑁆𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀫𑀬𑀁 𑀢𑀸 𑀕𑀸𑀣𑀸𑀬𑁄 𑀲𑀩𑁆𑀩𑀧𑀘𑁆𑀙𑀸𑀬𑁂𑀯 𑀇𑀫𑀲𑁆𑀫𑀺𑀁-𑀞𑀸𑀦𑁂 𑀞𑀧𑁂𑀫. 𑀢𑀸 𑀧𑀦 𑀕𑀸𑀣𑀸𑀬𑁄 𑀓𑀢𑀫𑀸𑀢𑀺 𑀘𑁂 𑁋

𑁧. 𑀘𑀸𑀕𑀯𑀺𑀓𑁆𑀓𑀫𑀲𑀤𑁆𑀥𑀸𑀦𑀼-𑀲𑀫𑁆𑀧𑀦𑁆𑀦𑀕𑀼𑀡𑀲𑀸𑀫𑀺𑀦𑁄;

𑀧𑀭𑀓𑁆𑀓𑀫𑀦𑀭𑀺𑀦𑁆𑀤𑀲𑁆𑀲, 𑀲𑀻𑀳𑀴𑀺𑀦𑁆𑀤𑀲𑁆𑀲 𑀥𑀻𑀫𑀢𑁄.

𑁨. 𑀅𑀢𑁆𑀭𑀚𑁂𑀦𑀸+𑀦𑀼𑀚𑀸𑀢𑁂𑀦, 𑀪𑀽𑀧𑀸𑀮𑀓𑀼𑀮𑀓𑁂𑀢𑀼𑀦𑀸;

𑀤𑀺𑀲𑀦𑁆𑀢𑀧𑀢𑁆𑀣𑀝𑁄𑀤𑀸𑀭-𑀯𑀺𑀓𑁆𑀓𑀫𑁂𑀦 𑀬𑀲𑀲𑁆𑀲𑀺𑀦𑀸.

𑁩. 𑀪𑀼𑀯𑀦𑁂𑀓𑀪𑀼𑀚𑀯𑁆𑀳𑁂𑀦, 𑀫𑀳𑀸𑀭𑀸𑀚𑁂𑀦 𑀥𑀻𑀫𑀢𑀸;

𑀘𑀢𑀼𑀧𑀘𑁆𑀘𑀬𑀤𑀸𑀦𑁂𑀦, 𑀲𑀢𑀢𑀁 𑀲𑀫𑀼𑀧𑀝𑁆𑀞𑀺𑀢𑁄.

𑁪. ‘‘𑀚𑀫𑁆𑀩𑀼𑀤𑁄𑀡𑀻’’𑀢𑀺 𑀯𑀺𑀔𑁆𑀬𑀸𑀢𑀸 𑁋

𑀯𑀸𑀲𑁂 𑀦𑀺𑀯𑀲𑀢𑁄 𑀲𑀢𑁄;

𑀲𑀼𑀫𑀗𑁆𑀕𑀮𑀫𑀳𑀢𑁆𑀣𑁂𑀭 𑁋

𑀲𑀸𑀫𑀺𑀦𑁄 𑀲𑀼𑀘𑀺𑀯𑀼𑀢𑁆𑀢𑀺𑀦𑁄.

𑁫. 𑀯𑀁𑀲𑁂 𑀯𑀺𑀲𑀼𑀤𑁆𑀥𑁂 𑀲𑀁𑀚𑀸𑀢𑁄,

𑀧𑀦𑁆𑀣𑀲𑁂𑀦𑀸𑀲𑀦𑁂 𑀭𑀢𑁄;

𑀧𑀭𑀺𑀬𑀢𑁆𑀢𑀺𑀫𑀳𑀸𑀲𑀺𑀦𑁆𑀥𑀼 𑁋

𑀦𑀺𑀬𑁆𑀬𑀸𑀫𑀓𑀥𑀼𑀭𑀦𑁆𑀥𑀭𑁄.

𑁫. 𑀅𑀧𑁆𑀧𑀺𑀘𑁆𑀙𑀸𑀤𑀺𑀕𑀼𑀡𑀽𑀧𑁂𑀢𑁄, 𑀚𑀺𑀦𑀲𑀸𑀲𑀦𑀫𑀸𑀫𑀓𑁄;

𑀯𑀦𑁂𑀭𑀢𑀫𑀳𑀢𑁆𑀣𑁂𑀭𑁄, 𑀫𑁂𑀥𑀗𑁆𑀓𑀭𑀲𑀫𑀯𑁆𑀳𑀬𑁄.

𑁬. 𑀧𑀸𑀝𑀯𑀢𑁆𑀣𑀸𑀬 𑀪𑀺𑀓𑁆𑀔𑀽𑀦𑀁, 𑀯𑀺𑀦𑀬𑁂 𑀲𑀼𑀯𑀺𑀲𑀸𑀭𑀤𑁄;

𑀧𑀬𑁄𑀕𑀲𑀺𑀤𑁆𑀥𑀺𑀁 𑀲𑁄𑀥𑀬𑀺, 𑀲𑀤𑀸 𑀲𑀧𑁆𑀧𑀜𑁆𑀜𑀕𑁄𑀘𑀭𑀁.

𑁭. 𑀇𑀫𑀁 𑀮𑀺𑀔𑀺𑀢𑀧𑀼𑀜𑁆𑀜𑁂𑀦, 𑀫𑁂𑀢𑁆𑀢𑁂𑀓𑁆𑀬𑀁 𑀉𑀧𑀲𑀁𑀓𑀫𑀺;

𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀲𑀭𑀡𑁂, 𑀲𑀼𑀧𑁆𑀧𑀢𑀺𑀝𑁆𑀞𑀸𑀫𑀺 𑀲𑀸𑀲𑀦𑁂𑀢𑀺.

𑀧𑀬𑁄𑀕𑀲𑀺𑀤𑁆𑀥𑀺𑀲𑀺𑀤𑁆𑀥𑀁.